REGOLAMENT DELEGAT TAL-KUMMISSJONI (UE) 2023/2175

tas-7 ta’ Lulju 2023

li jissupplimenta r-Regolament (UE) 2017/2402 tal-Parlament Ewropew u tal-Kunsill fir-rigward ta’ standards tekniċi regolatorji li jispeċifikaw f’aktar dettall ir-rekwiżiti relatati mar-retenzjoni tar-riskju għall-oriġinaturi, l-isponsors, il-mutwanti oriġinali u l-ġesturi

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) 2017/2402 tal-Parlament Ewropew u tal-Kunsill tat-12 ta’ Diċembru 2017 li jistabbilixxi qafas ġenerali għat-titolizzazzjoni u li joħloq qafas speċifiku għal titolizzazzjoni sempliċi, trasparenti u standardizzata, u li jemenda d-Direttivi 2009/65/KE, 2009/138/KE u 2011/61/UE u r-Regolamenti (KE) Nru 1060/2009 u (UE) Nru 648/2012 (1), u b’mod partikolari l-Artikolu 6(7), it-tielet subparagrafu tiegħu,

Billi:

(1)

Sabiex jiġi żgurat li l-investituri u s-superviżuri jifhmu kif forma sintetika jew kontinġenti ta’ retenzjoni hija ekwivalenti għal waħda mill-opzjonijiet ta’ retenzjoni stabbiliti fl-Artikolu 6(3) tar-Regolament (UE) 2017/2402, l-użu ta’ tali forma ta’ retenzjoni u d-dettalji tagħha għandhom jiġu żvelati fid-dokument tal-offerta finali, fil-prospett, fis-sommarju tat-tranżazzjoni jew fil-ħarsa ġenerali lejn il-karatteristiċi ewlenin tat-titolizzazzjoni.

(2)

L-Artikolu 6(3), il-punti (a) sa (e), tar-Regolament (UE) 2017/2402 jistabbilixxi diversi modalitajiet biex jiġi ssodisfat ir-rekwiżit ta’ retenzjoni tar-riskju stabbilit fl-Artikolu 6(1) ta’ dak ir-Regolament. Sabiex tiġi armonizzata l-applikazzjoni tar-rekwiżit ta’ retenzjoni tar-riskju u tinkiseb retenzjoni ekwivalenti ta’ interess materjali ekonomiku nett f’titolizzazzjoni, huwa meħtieġ li jiġu speċifikati aktar dawk il-modalitajiet, inkluż it-twettiq permezz ta’ forma sintetika jew kontinġenti ta’ retenzjoni. Fil-qafas ta’ programm ABCP, faċilità ta’ likwidità li tkopri 100 % tar-riskju ta’ kreditu ta’ kull waħda mill-iskoperturi titolizzati, jew li tikkostitwixxi pożizzjoni tal-ewwel telf fir-rigward tat-titolizzazzjoni, hija ekwivalenti għaż-żamma ta’ interess ekonomiku nett fit-titolizzazzjoni. Għalhekk, tali programmi ABCP jenħtieġ li jitqiesu konformi mar-rekwiżit ta’ retenzjoni tar-riskju f’konformità mal-Artikolu 6(3), il-punti (a) u (d), tar-Regolament (UE) 2017/2402.

(3)

Il-marġni pożittiv sintetiku huwa ddefinit fl-Artikolu 2(29) tar-Regolament (UE) 2017/2402 bħala ammont kuntrattwalment allokat mill-oriġinatur biex jassorbi t-telf. Konsegwentement, il-marġni pożittiv sintetiku jwassal għal valur tal-iskopertura li jenħtieġ li jitqies fil-kejl tal-interess materjali ekonomiku nett fl-oriġinazzjoni. Għalhekk, il-marġni pożittiv sintetiku jenħtieġ li jiġi rikonoxxut bħala forma possibbli ta’ konformità mill-oriġinatur ta’ titolizzazzjoni sintetika mar-rekwiżit ta’ retenzjoni tar-riskju meta dak il-marġni pożittiv sintetiku jissodisfa l-kundizzjonijiet stabbiliti fl-Artikolu 6(1) tar-Regolament (UE) 2017/2402, u fejn dak il-marġni pożittiv sintetiku jkun soġġett għal rekwiżit ta’ kapital f’konformità mar-regolament prudenzjali applikabbli.

(4)

Marġnijiet pożittivi sintetiċi jistgħu jiġu deżinjati b’żewġ modi differenti. Mod wieħed huwa permezz tal-għoti ta’ titjib fil-kreditu lis-segment superjuri jew intermedju. It-tieni mod huwa billi jiġi pprovdut titjib fil-kreditu għas-segmenti kollha, inkluż is-segment tal-ewwel telf. Meta l-marġni pożittiv sintetiku jipprovdi titjib fil-kreditu lis-segmenti superjuri jew intermedji biss, ma jistax jiġi ttrattat bħala segment tal-ewwel telf. Għalhekk, jenħtieġ li r-ritenitur iżomm mill-inqas ammont minimu fis-segmenti kollha sabiex jikkonforma mal-Artikolu 6(3), il-punt (a), tar-Regolament (UE) 2017/2402. Meta l-marġni pożittiv sintetiku jipprovdi titjib fil-kreditu għas-segmenti kollha, il-marġni pożittiv sintetiku jenħtieġ li jkun ekwivalenti għas-segment tal-ewwel telf tat-titolizzazzjoni sintetika, u, għalhekk, jitqies li jikkonforma mal-Artikolu 6(3), il-punt (d), tar-Regolament (UE) 2017/2402.

(5)

Huwa meħtieġ li jiġi speċifikat l-interess ekonomiku li għandu jiġi ritenut meta l-iskoperturi sottostanti ta’ titolizzazzjoni jinkludu ammonti prelevati u mhux prelevati ta’ faċilitajiet ta’ kreditu. Minħabba li r-riskju ta’ kreditu jiġi ddeterminat fuq il-bażi tal-ammonti prelevati, l-interess ekonomiku nett jenħtieġ li jitkejjel b’kont meħud ta’ dawk l-ammonti biss.

(6)

Sabiex jiġi żgurat l-issodisfar kontinwu tar-rekwiżit ta’ retenzjoni fejn l-interess ekonomiku nett jiġi ritenut mill-grupp konsolidat u r-ritenitur li jappartjeni għall-grupp ma jibqax inkluż fl-ambitu tas-superviżjoni fuq bażi konsolidata, huwa meħtieġ li jiġi stabbilit li waħda jew aktar mill-entitajiet li jifdal inklużi fl-ambitu tas-superviżjoni fuq bażi konsolidata jenħtieġ li jassumu skopertura għat-titolizzazzjoni.

(7)

L-Artikolu 6(1), l-ewwel subparagrafu, tar-Regolament (UE) 2017/2402 jipprojbixxi l-bejgħ jew l-iħħeġġjar tal-interess ekonomiku ritenut minħabba li jekk dan iseħħ, dan ineħħi l-iskopertura tar-ritenitur għar-riskju ta’ kreditu tal-pożizzjonijiet jew l-iskoperturi ta’ titolizzazzjoni ritenuti. Għalhekk, jenħtieġ li l-iħħeġġjar ikun permess biss meta jiħħeġġja r-ritenitur kontra riskji għajr ir-riskju ta’ kreditu tal-pożizzjonijiet jew tal-iskoperturi ta’ titolizzazzjoni ritenuti. Madankollu, l-iħħeġġjar jenħtieġ li jkun permess ukoll meta jitwettaq qabel it-titolizzazzjoni bħala element leġittimu u prudenti tal-għoti ta’ kreditu jew tal-ġestjoni tar-riskju u ma joħloqx differenzjazzjoni għall-benefiċċju tar-ritenitur bejn ir-riskju ta’ kreditu tal-pożizzjonijiet jew l-iskoperturi ta’ titolizzazzjoni ritenuti u l-pożizzjonijiet jew l-iskoperturi ta’ titolizzazzjoni trasferiti lill-investituri. Barra minn hekk, f’titolizzazzjonijiet fejn ir-ritenitur jimpenja ruħu għal retenzjoni ta’ aktar mill-interess materjali ekonomiku nett minimu ta’ 5 %, jenħtieġ li l-iħħeġġjar ma jkunx ipprojbit għal kwalunkwe imgħax ritenut li jaqbeż dak il-perċentwal, dment li dawk iċ-ċirkostanzi jiġu ddivulgati fid-dokument tal-offerta finali, fil-prospett, fis-sommarju tat-tranżazzjoni jew fil-ħarsa ġenerali tal-karatteristiċi ewlenin tat-titolizzazzjoni.

(8)

Sabiex tiġi żgurata r-retenzjoni kontinwa tal-interess materjali ekonomiku nett, ir-ritenituri jenħtieġ li jiżguraw li ma jkun hemm l-ebda mekkaniżmu inkorporat fl-istruttura ta’ titolizzazzjoni li bih l-interess materjali ekonomiku nett ritenut imkejjel fl-oriġinazzjoni jonqos aktar malajr mill-interess ittrasferit. Għall-istess raġuni, jenħtieġ li l-interess materjali ekonomiku nett ritenut ma jingħatax prijorità f’termini ta’ flussi ta’ flus biex b’mod preferenzjali jibbenefika milli jitħallas lura jew jiġi amortizzat b’mod li jnaqqas dak l-interess materjali ekonomiku nett ritenut taħt il-5 % tal-valur nominali kontinwu tas-segmenti mibjugħin jew ittrasferiti lill-investituri jew tal-iskoperturi titolizzati, jew taħt il-valur nett ta’ 5 % fil-każ ta’ skoperturi improduttivi ta’ titolizzazzjonijiet tradizzjonali NPE. Barra minn hekk, jenħtieġ li t-titjib fil-kreditu pprovdut lill-investitur li jassumi skopertura għal xi pożizzjoni ta’ titolizzazzjoni ma jonqosx b’mod sproporzjonat għar-rata ta’ ħlas lura fuq l-iskoperturi sottostanti. Jenħtieġ li dak ir-rekwiżit ma jipprevjenix lir-ritenitur milli jiġi rremunerat fuq bażi ta’ prijorità għal servizzi mogħtija lill-entità bi skop speċjali tat-titolizzazzjoni, dment li l-ammont tar-remunerazzjoni jiġi stabbilit fuq bażi distakkata u li l-istruttura ta’ din ir-remunerazzjoni ma xxekkilx ir-rekwiżit ta’ retenzjoni.

(9)

Meta l-obbligant prinċipali jkollu allinjament sħiħ tal-interess mal-investitur, inkluż fis-sitwazzjoni fejn it-titolizzazzjoni tkun tinkludi esklussivament bonds koperti maħruġa minnu stess jew strumenti ta’ dejn oħra maħruġa minnu stess, jenħtieġ li l-entità li tittitolizza dawk l-istrumenti ma tkunx obbligata tieħu xi azzjoni ulterjuri biex tikkonforma mar-rekwiżit ta’ retenzjoni tar-riskju.

(10)

L-Artikolu 8 tar-Regolament (UE) 2017/2402 jipprevedi ċerti eċċezzjonijiet dwar il-projbizzjoni fuq ir-rititolizzazzjonijiet. Minħabba li r-rekwiżiti ta’ retenzjoni japplikaw għaż-żewġ livelli tat-tranżazzjonijiet involuti f’rititolizzazzjoni, huwa meħtieġ li jiġi speċifikat kif dawk it-tranżazzjonijiet għandhom jikkonformaw mar-rekwiżit ta’ retenzjoni. Bħala regola ġenerali, l-ewwel titolizzazzjonijiet ta’ skoperturi u t-tieni livell “ripakkettat” tat-tranżazzjoni jenħtieġ li jiġu ttrattati bħala separati għall-finijiet li jiġi ssodisfat ir-rekwiżit ta’ retenzjoni tar-riskju. Għalhekk jenħtieġ li jkun hemm obbligu li jiġi ritenut interess ekonomiku materjali nett f’kull wieħed minn dawk il-livelli. Jenħtieġ li l-istess japplika għal tranżazzjonijiet b’aktar minn titolizzazzjoni sottostanti waħda, bħal programmi ABCP għajr dawk imsemmija fl-Artikolu 8(4) tar-Regolament (UE) 2017/2402. Madankollu, huwa possibbli li l-oriġinatur tat-titolizzazzjoni li jaġixxi bħala ritenitur jittitolizza pożizzjonijiet li jkun żamm lil hinn mir-rekwiżit ta’ retenzjoni minimu fl-ewwel livell ta’ titolizzazzjoni. F’dak il-każ, jenħtieġ li dak l-oriġinatur ma jkunx meħtieġ li jżomm interess addizzjonali fil-livell tar-rititolizzazzjoni, dment li ma tiżdied l-ebda skopertura jew pożizzjoni oħra mal-aggregazzjoni sottostanti tar-rititolizzazzjoni. F’dawk il-każijiet, ir-rititolizzazzjoni jenħtieġ li titqies biss bħala t-tieni parti tal-istess tranżazzjoni li ma tbiddilx b’mod sinifikanti l-bażi ekonomika tat-titolizzazzjoni. Għalhekk, ir-retenzjoni oriġinali fil-livell tat-titolizzazzjoni jenħtieġ li tkun biżżejjed biex tissodisfa l-għan tar-rekwiżit ta’ retenzjoni tar-riskju. Fl-aħħar nett, jenħtieġ li s-sempliċi riaggregazzjoni mill-oriġinatur tat-titolizzazzjoni ta’ pożizzjoni ta’ titolizzazzjoni f’segmenti kontigwi ma titqiesx bħala rititolizzazzjoni għall-finijiet tar-rekwiżit ta’ retenzjoni.

(11)

Ir-rekwiżiti tal-għażla tal-assi stabbiliti fl-Artikolu 6(2) tar-Regolament (UE) 2017/2402 huma parti integrali mill-qafas ta’ retenzjoni tar-riskju. Li kieku l-oriġinaturi setgħu jagħżlu l-assi li jaqblilhom biex jittitolizzaw il-portafolli ta’ kwalità ta’ kreditu agħar, u b’mod partikolari mingħajr l-għarfien tal-investituri jew tal-investituri potenzjali, l-iskop u l-effettività ta’ retenzjoni tar-riskju biex jiġu allinjati l-interessi tal-oriġinaturi u tal-investituri jiġu mxekkla serjament. F’dak ix-xenarju, filwaqt li l-oriġinatur ikun qed juża t-titolizzazzjoni biex jeħles minn assi riskjużi, l-investituri jiġu mqarrqa jekk jibbażaw fuq ir-retenzjoni mill-oriġinatur ta’ porzjon tar-riskju bħala evidenza ta’ allinjament xieraq tal-interessi. Sabiex jiġi evitat xenarju bħal dan u biex jiġu previsti ċ-ċertezza u s-sigurtà legali, huwa meħtieġ li jiġu stabbiliti kriterji li l-oriġinaturi jistgħu jibbażaw fuqhom biex jiżguraw il-konformità mal-Artikolu 6(2) tar-Regolament (UE) 2017/2402. Barra minn hekk, jenħtieġ li jiġu pprovduti wkoll kriterji għad-determinazzjoni ta’ “assi komparabbli”. It-titolizzazzjonijiet fejn it-tqabbil imsemmi fl-Artikolu 6(2) tar-Regolament (UE) 2017/2402 ma jkunx possibbli minħabba li l-assi komparabbli kollha jkunu ġew ittrasferiti lill-SSPE jenħtieġ li jitqiesu li jissodisfaw ir-rekwiżiti ta’ dak il-paragrafu, dment li l-fatt li dan it-tqabbil ma jkunx possibbli jiġi ddivulgat fid-dokument tal-offerta finali, fil-prospett, fis-sommarju tat-tranżazzjoni jew fil-ħarsa ġenerali tal-karatteristiċi ewlenin tat-titolizzazzjoni.

(12)

Meta jkunu nbdew proċedimenti ta’ insolvenza fir-rigward tar-ritenitur, jew meta r-ritenitur ma jkunx jista’ jkompli jaġixxi f’dik il-kapaċità għal raġunijiet lil hinn mill-kontroll tiegħu jew mill-kontroll tal-azzjonisti tiegħu, jenħtieġ li jkun possibbli li l-interess materjali ekonomiku nett li jifdal jiġi ritenut minn entità ġuridika oħra li tikkonforma mal-Artikolu 6 tar-Regolament (UE) 2017/2402, sabiex l-allinjament tal-interessi jkompli jseħħ.

(13)

Skont l-Artikolu 6(1), ir-raba’ subparagrafu, tar-Regolament (UE) 2017/2402, il-ġesturi biss li jistgħu juru għarfien espert fis-servizzjar ta’ skoperturi ta’ natura simili għall-iskoperturi titolizzati jistgħu jaġixxu bħala ritenituri f’titolizzazzjoni ta’ skoperturi li ma jrendux tradizzjonali. Għalhekk huwa xieraq li jiġu stabbiliti l-kriterji li l-ġesturi jenħtieġ li jissodisfaw sabiex ikunu jistgħu juru li għandhom l-għarfien espert meħtieġ fis-servizzjar tal-iskoperturi li huma simili għal dawk titolizzati.

(14)

Ir-Regolament ta’ Delega tal-Kummissjoni (UE) Nru 625/2014 (2) jissupplimenta d-dispożizzjonijiet dwar ir-retenzjoni tar-riskju stabbiliti fl-Artikolu 405 tar-Regolament (UE) Nru 575/2013 tal-Parlament Ewropew u tal-Kunsill (3) għall-istituzzjonijiet ta’ kreditu u d-ditti tal-investiment. Ir-Regolament (UE) 2017/2401 tal-Parlament Ewropew u tal-Kunsill (4) emenda r-Regolament (UE) Nru 575/2013 billi ħassar il-Parti Ħamsa, u għalhekk l-Artikolu 405, ta’ dak ir-Regolament. Ir-rekwiżiti dwar ir-retenzjoni tar-riskju li ġew stabbiliti fl-Artikolu 405 tar-Regolament (UE) Nru 575/2013 issa huma stabbiliti fl-Artikolu 6 tar-Regolament (UE) 2017/2402. Għalhekk huwa xieraq li jitħassar ir-Regolament ta’ Delega (UE) Nru 625/2014, mingħajr preġudizzju għall-Artikolu 43(6) tar-Regolament (UE) 2017/2402.

(15)	Dan ir-Regolament huwa bbażat fuq l-abbozz ta’ standards tekniċi regolatorji żviluppat f’kooperazzjoni mill-qrib mal-Awtorità Ewropea tat-Titoli u s-Swieq u mal-Awtorità Ewropea tal-Assigurazzjoni u l-Pensjonijiet tax-Xogħol, u ppreżentat lill-Kummissjoni mill-Awtorità Bankarja Ewropea.

(16)

L-Awtorità Bankarja Ewropea wettqet konsultazzjonijiet pubbliċi miftuħa dwar l-abbozz ta’ standards tekniċi regolatorji li fuqu huwa bbażat dan ir-Regolament, analizzat il-kostijiet u l-benefiċċji relatati potenzjali u talbet il-parir tal-Grupp tal-Partijiet Bankarji Interessati stabbilit f’konformità mal-Artikolu 37 tar-Regolament (UE) Nru 1093/2010 tal-Parlament Ewropew u tal-Kunsill (5),

ADOTTAT DAN IR-REGOLAMENT:

Artikolu 1

Definizzjonijiet

Għall-finijiet ta’ dan ir-Regolament, għandhom japplikaw id-definizzjonijiet li ġejjin:

(a)	“forma sintetika ta’ retenzjoni” tfisser ir-retenzjoni ta’ interess materjali ekonomiku nett permezz tal-użu ta’ strumenti derivattivi;

(b)	“forma kontinġenti ta’ retenzjoni” tfisser ir-retenzjoni ta’ interess materjali ekonomiku nett permezz tal-użu ta’ appoġġ ta’ kreditu li jiżgura infurzar immedjat tar-retenzjoni, inkluż permezz ta’ garanziji, ittri ta’ kreditu, jew forom simili ta’ appoġġ ta’ kreditu.

Artikolu 2

Ritenituri ta’ interess materjali ekonomiku nett

1. Ir-rekwiżit stabbilit fl-Artikolu 6(1), l-ewwel subparagrafu, tar-Regolament (UE) 2017/2402, li jgħid li l-interess materjali ekonomiku nett ritenut ma għandux jinqasam bejn tipi differenti ta’ ritenituri għandu jiġi ssodisfat minn kwalunkwe wieħed minn dawn li ġejjin:

(a)	l-oriġinatur jew l-oriġinaturi;

(b)	l-isponsor jew l-isponsors;

(c)	il-mutwant oriġinali jew il-mutwanti oriġinali;

(d)	il-ġestur jew il-ġesturi f’titolizzazzjoni NPE tradizzjonali, dment li jissodisfaw ir-rekwiżit dwar l-għarfien espert stabbilit fl-Artikolu 19 ta’ dan ir-Regolament.

2. Meta aktar minn oriġinatur wieħed ikun eliġibbli biex jissodisfa r-rekwiżit ta’ retenzjoni, kull oriġinatur għandu jissodisfa dak ir-rekwiżit fuq bażi pro rata b’referenza għall-iskoperturi titolizzati li għalihom huwa l-oriġinatur.

3. Meta aktar minn mutwant oriġinali wieħed ikun eliġibbli biex jissodisfa r-rekwiżit ta’ retenzjoni, kull mutwant oriġinali għandu jissodisfa dak ir-rekwiżit fuq bażi pro rata b’referenza għall-iskoperturi titolizzati li għalihom huwa l-mutwant oriġinali.

4. B’deroga mill-paragrafi 2 u 3, ir-rekwiżit ta’ retenzjoni jista’ jiġi ssodisfat bis-sħiħ minn oriġinatur wieħed jew minn mutwant oriġinali dment li tiġi ssodisfata waħda mill-kundizzjonijiet li ġejjin:

(a)	l-oriġinatur jew il-mutwant oriġinali jkun stabbilixxa u jkun qed jimmaniġġa l-programm ta’ karti kummerċjali garantiti b’assi (ABCP) jew titolizzazzjoni oħra;

(b)	l-oriġinatur jew il-mutwant oriġinali jkun stabbilixxa l-programm ABCP jew titolizzazzjoni oħra u jkun ikkontribwixxa aktar minn 50 % tal-iskoperturi titolizzati totali mkejla bil-valur nominali fl-oriġinazzjoni.

5. Fejn aktar minn sponsor wieħed ikun eliġibbli biex jissodisfa r-rekwiżit ta’ retenzjoni, ir-rekwiżit ta’ retenzjoni għandu jiġi ssodisfat minn:

(a)

l-isponsor li l-interess ekonomiku tiegħu jkun l-aktar allinjat mill-qrib mal-interess tal-investitur kif miftiehem mill-isponsors involuti kollha abbażi ta’ kriterji oġġettivi, inklużi dawn kollha li ġejjin:

(i)	l-istruttura tat-tariffi tat-tranżazzjoni;

(ii)	l-involviment tal-sponsor fl-istabbiliment u l-immaniġġar tal-programm ABCP jew titolizzazzjoni oħra; u

(iii)

l-iskopertura għar-riskju ta’ kreditu tat-titolizzazzjonijiet; jew

(b)	kull sponsor bi proporzjon mal-għadd totali ta’ sponsors.

6. Meta aktar minn ġestur wieħed ikun eliġibbli biex jissodisfa r-rekwiżit ta’ retenzjoni, ir-rekwiżit ta’ retenzjoni għandu jiġi ssodisfat minn:

(a)

il-ġestur bl-interess ekonomiku predominanti fir-ristrutturar b’suċċess tal-iskoperturi tat-titolizzazzjoni NPE tradizzjonali, kif miftiehem mill-ġesturi kollha involuti abbażi ta’ kriterji oġġettivi, inklużi l-istruttura tat-tariffi tat-tranżazzjoni u r-riżorsi u l-għarfien espert disponibbli tal-ġestur biex jimmaniġġa l-proċess ta’ristrutturar tal-iskoperturi; jew

(b)	kull ġestur fuq bażi pro rata b’referenza għall-iskoperturi titolizzati li huwa jimmaniġġa, li għandha tiġi kkalkolata bħala s-somma tal-valur nett tal-iskoperturi titolizzati li jikkwalifikaw bħala skoperturi improduttivi u tal-valur nominali tal-iskoperturi titolizzati produttivi.

7. Entità ma għandhiex titqies li tkun ġiet stabbilita jew li topera għall-iskop uniku tat-titolizzazzjoni ta’ skoperturi kif imsemmi fl-Artikolu 6(1), it-tieni subparagrafu, tar-Regolament (UE) 2017/2402 fejn japplika dan kollu li ġej:

(a)

l-entità jkollha strateġija u l-kapaċità li tissodisfa l-obbligi ta’ pagament konsistenti ma’ mudell ta’ negozju usa’ li jinvolvi sostenn mill-kapital, assi, miżati jew sorsi oħra ta’ introjtu, li bis-saħħa tagħhom l-entità ma tiddependix fuq l-iskoperturi li għandhom jiġu titolizzati, fuq imgħax ritenut jew propost li jiġi ritenut f’konformità mal-Artikolu 6 tar-Regolament (UE) 2017/2402, jew fuq kwalunkwe introjtu korrispondenti minn dawn l-iskoperturi u interessi, bħala s-sors uniku jew predominanti ta’ dħul tiegħu;

(b)	il-membri tal-korp maniġerjali jkollhom l-esperjenza meħtieġa biex jippermettu lill-entità ssegwi l-istrateġija tan-negozju stabbilita, kif ukoll arranġamenti ta’ governanza korporattiva adegwati.

Artikolu 3

Rispett tar-rekwiżit ta’ retenzjoni permezz ta’ forma sintetika jew kontinġenti ta’ retenzjoni

1. Ir-rispett tar-rekwiżit ta’ retenzjoni b’mod ekwivalenti għal waħda mill-opzjonijiet stabbiliti fl-Artikolu 6(3) tar-Regolament (UE) 2017/2402 permezz ta’ forma sintetika jew kontinġenti ta’ retenzjoni għandu jissodisfa l-kundizzjonijiet kollha li ġejjin:

(a)	l-ammont ritenut ikun mill-inqas ugwali għall-ammont meħtieġ taħt l-opzjoni li għalih tikkorrespondi l-forma sintetika jew kontinġenti tar-retenzjoni;

(b)

ir-ritenitur ikun iddivulga b’mod espliċitu fid-dokument tal-offerta finali, fil-prospett, fis-sommarju tat-tranżazzjoni jew fil-ħarsa ġenerali tal-karatteristiċi ewlenin tat-titolizzazzjoni li se jżomm interess materjali ekonomiku nett fit-titolizzazzjoni permezz ta’ forma sintetika jew kontinġenti fuq bażi kontinwa.

Għall-finijiet tal-punt (b), ir-ritenitur għandu jiddivulga fid-dokument tal-offerta finali, fil-prospett, fis-sommarju tat-tranżazzjoni jew fil-ħarsa ġenerali tal-karatteristiċi ewlenin tat-titolizzazzjoni d-dettalji kollha dwar il-forma sintetika jew kontinġenti ta’ retenzjoni applikabbli, inkluża l-metodoloġija użata fid-determinazzjoni tal-interess materjali nett ritenut u spjegazzjoni għal liema mill-opzjonijiet stabbiliti fl-Artikolu 6(3), il-punti (a) sa (e) tar-Regolament (UE) 2017/2402 hija ekwivalenti r-retenzjoni.

2. Meta entità minbarra istituzzjoni kif definita fl-Artikolu 4(1), il-punt (3), tar-Regolament (UE) Nru 575/2013, u għajr impriża tal-assigurazzjoni jew tar-riassigurazzjoni kif definita fl-Artikolu 13, il-punti (1) u (4), tad-Direttiva 2009/138/KE, iżżomm interess ekonomiku permezz ta’ forma sintetika jew kontinġenti ta’ retenzjoni, dak l-imgħax ritenut għandu jkun kollateralizzat bis-sħiħ fi flus u jinżamm skont arranġamenti kif imsemmi fl-Artikolu 16(9) tad-Direttiva 2014/65/UE tal-Parlament Ewropew u tal-Kunsill (6).

Artikolu 4

Retenzjoni ekwivalenti għal mhux inqas minn 5 % tal-valur nominali ta’ kull segment mibjugħ jew trasferit lill-investituri

Ir-retenzjoni msemmija fl-Artikolu 6(3)(a) tar-Regolament (UE) 2017/2402 (porzjon vertikali) għandha tiġi ssodisfata bi kwalunkwe wieħed mill-metodi li ġejjin:

(a)	retenzjoni diretta ta’ mhux inqas minn 5 % tal-valur nominali ta’ kull segment mibjugħ jew trasferit lill-investituri;

(b)	ir-retenzjoni ta’ skopertura li tesponi lid-detentur tagħha għar-riskju ta’ kreditu ta’ kull segment maħruġ ta’ tranżazzjoni ta’ titolizzazzjoni fuq bażi pro rata ta’ mhux inqas minn 5 % tal-valur nominali totali ta’ kull segment maħruġ;

(c)	ir-retenzjoni ta’ mhux inqas minn 5 % tal-valur nominali ta’ kull waħda mill-iskoperturi titolizzati, dment li r-riskju ta’ kreditu miżmum ikun ikklassifikat pari passu mar-riskju ta’ kreditu titolizzat fir-rigward tal-istess skoperturi jew ikun subordinat għalih;

(d)

il-provvediment, fil-kuntest ta’ programm ABCP, ta’ faċilità ta’ likwidità, dment li jiġu ssodisfati l-kundizzjonijiet kollha li ġejjin:

(i)	il-faċilità ta’ likwidità tkun tkopri 100 % tas-sehem tar-riskju ta’ kreditu tal-iskoperturi titolizzati tat-tranżazzjoni ta’ titolizzazzjoni li hija ffinanzjata mill-programm ABCP;

(ii)	il-faċilità ta’ likwidità tkopri r-riskju ta’ kreditu sakemm ir-ritenitur ikollu jżomm l-interess materjali ekonomiku nett;

(iii)

il-faċilità ta’ likwidità hija provduta mill-oriġinatur, l-isponsor jew il-mutwant oriġinali fit-tranżazzjoni ta’ titolizzazzjoni;

(iv)	l-investituri jkunu ngħataw aċċess għall-informazzjoni fi ħdan id-divulgazzjoni inizjali li tippermettilhom jivverifikaw li l-punti (i), (ii) u (iii) jiġu ssodisfati.

Artikolu 5

Retenzjoni tal-interess tal-oriġinatur f’titolizzazzjoni ċirkolanti jew f’titolizzazzjoni ta’ skoperturi ċirkolanti

Ir-retenzjoni tal-interess tal-oriġinatur ta’ mhux inqas minn 5 % tal-valur nominali ta’ kull waħda mill-iskoperturi titolizzati kif imsemmi fl-Artikolu 6(3), il-punt (b), tar-Regolament (UE) 2017/2402 għandha titqies biss bħala ssodisfata meta r-riskju ta’ kreditu ritenut ta’ dawn l-iskoperturi jikklassifika pari passu mar-riskju ta’ kreditu titolizzat fir-rigward tal-istess skoperturi, jew ikun subordinat għalih.

Artikolu 6

Retenzjoni ta’ skoperturi magħżula b’mod aleatorju ekwivalenti għal mhux inqas minn 5 % tal-valur nominali tal-iskoperturi titolizzati

1. L-aggregazzjoni ta’ mill-inqas 100 skopertura potenzjalment titolizzata li minnhom l-iskoperturi mhux titolizzati u titolizzati ritenuti għandhom jintgħażlu b’mod aleatorju, kif imsemmi fl-Artikolu 6(3), il-punt (c), tar-Regolament (UE) 2017/2402, għandha tkun varjata biżżejjed biex tiġi evitata konċentrazzjoni eċċessiva tal-interess ritenut.

2. Meta jagħżlu l-iskoperturi msemmija fil-paragrafu 1, ir-ritenituri għandhom iqisu l-fatturi kwantitattivi u kwalitattivi li huma xierqa għat-tip ta’ skoperturi titolizzati sabiex jiżguraw li d-distinzjoni bejn skoperturi mhux titolizzati u dawk titolizzati ritenuti tkun aleatorja. Għal dak il-għan, u fejn rilevanti, ir-ritenituri għandhom iqisu l-fatturi li ġejjin meta jagħżlu l-iskoperturi:

(a)	iż-żmien tal-oriġinazzjoni tas-self (anzjanità);

(b)	it-tip ta’ skoperturi titolizzati;

(c)	il-pożizzjoni ġeografika;

(d)	id-data tal-oriġinazzjoni;

(e)	id-data tal-maturità;

(f)	il-proporzjon tas-self mal-valur;

(g)	it-tip ta’ kollateral;

(h)	is-settur tal-industrija;

(i)	il-bilanċ tas-self pendenti;

(j)	kwalunkwe fattur ieħor meqjus rilevanti mir-ritenitur.

3. Ir-ritenituri ma għandhomx jagħżlu skoperturi individwali differenti f’punti differenti fiż-żmien, ħlief meta dan jista’ jkun meħtieġ biex jiġi ssodisfat ir-rekwiżit ta’ retenzjoni fir-rigward ta’ titolizzazzjoni fejn l-iskoperturi titolizzati jvarjaw matul iż-żmien, jew minħabba skoperturi ġodda miżjuda mat-titolizzazzjoni jew minħabba tibdil fil-livell ta’ skoperturi titolizzati individwali.

4. Meta r-ritenitur ikun il-ġestur tat-titolizzazzjoni, l-għażla mwettqa f’konformità ma’ dan l-Artikolu ma għandhiex twassal għal deterjorament fl-istandards ta’ ġestjoni applikati mir-ritenitur fuq l-iskoperturi ttrasferiti meta mqabbel mal-iskoperturi ritenuti.

Artikolu 7

Retenzjoni tas-segment tal-ewwel telf

1. Ir-retenzjoni tas-segment tal-ewwel telf skont l-Artikolu 6(3)(d), tar-Regolament (UE) 2017/2402 għandha tiġi ssodisfata bi kwalunkwe wieħed mill-metodi li ġejjin:

(a)	iż-żamma jew ta’ pożizzjonijiet fil-karta bilanċjali jew barra l-karta bilanċjali;

(b)

iż-żamma ta’ skopertura permezz ta’ provvediment ta’ forma kontinġenti ta’ retenzjoni jew ta’ faċilità ta’ likwidità fil-kuntest ta’ programm ABCP, li jissodisfa l-kriterji kollha li ġejjin:

(i)	l-iskopertura tkopri mill-inqas 5 % tal-valur nominali tal-iskoperturi titolizzati;

(ii)	l-iskopertura tikkostitwixxi pożizzjoni tal-ewwel telf fir-rigward tat-titolizzazzjoni;

(iii)

l-iskopertura tkopri r-riskju ta’ kreditu għat-tul kollu tal-impenn ta’ retenzjoni;

(iv)	l-iskopertura tiġi pprovduta mir-ritenitur;

(v)	l-investituri jkunu ngħataw aċċess fid-divulgazzjoni inizjali għall-informazzjoni kollha meħtieġa biex jivverifikaw li l-punti (i) sa (iv) jiġu ssodisfati;

(c)	sovrakollateralizzazzjoni, kif iddefinita fl-Artikolu 242, il-punt (9), tar-Regolament (UE) Nru 575/2013, jekk dik is-sovrakollateralizzazzjoni topera f’pożizzjoni ta’ “l-ewwel telf” ta’ mhux inqas minn 5 % tal-valur nominali tal-iskoperturi titolizzati.

2. Fejn is-segment tal-ewwel telf jaqbeż il-5 % tal-valur nominali tal-iskoperturi titolizzati, ir-ritenitur jista’ jagħżel li jżomm porzjon pro rata minn dan is-segment tal-ewwel telf biss, dment li dan il-porzjon ikun ekwivalenti għal mill-inqas 5 % tal-valur nominali tal-iskoperturi titolizzati.

Artikolu 8

Retenzjoni ta’ skopertura tal-ewwel telf ta’ mhux inqas minn 5 % ta’ kull skopertura titolizzata

1. Ir-retenzjoni ta’ skopertura tal-ewwel telf fil-livell ta’ kull skopertura titolizzata kif imsemmi fl-Artikolu 6(3), il-punt (e), tar-Regolament (UE) 2017/2402 għandha titqies li tkun ġiet issodisfata biss meta r-riskju ta’ kreditu ritenut ikun subordinat għar-riskju ta’ kreditu titolizzat fir-rigward tal-istess skoperturi.

2. B’deroga mill-paragrafu 1, ir-retenzjoni ta’ skopertura tal-ewwel telf fil-livell ta’ kull skopertura titolizzata kif imsemmi fl-Artikolu 6(3)(e) tar-Regolament (UE) 2017/2402 tista’ tiġi ssodisfata wkoll permezz tal-bejgħ mill-oriġinatur jew mill-mutwant oriġinali tal-iskoperturi sottostanti b’valur skontat meta tiġi ssodisfata kull waħda mill-kundizzjonijiet li ġejjin:

(a)	l-ammont tal-iskont ma jkunx inqas minn 5 % tal-valur nominali ta’ kull skopertura;

(b)	l-ammont ta’ bejgħ skontat ikun rimborsabbli lill-oriġinatur jew lill-mutwant oriġinali biss jekk dak l-ammont ta’ bejgħ skontat ma jiġix assorbit minn telf relatat mar-riskju ta’ kreditu assoċjat mal-iskoperturi titolizzati.

Artikolu 9

Applikazzjoni tal-għażliet ta’ retenzjoni fuq it-titolizzazzjonijiet NPE tradizzjonali

1. Fil-każ ta’ titolizzazzjonijiet NPE kif imsemmi fl-Artikolu 6(3a) tar-Regolament (UE) 2017/2402, għall-fini tal-applikazzjoni tal-Artikolu 4(a), u l-Artikoli 5 sa 8 ta’ dan ir-Regolament għas-sehem ta’ skoperturi improduttivi fl-aggregazzjoni ta’ skoperturi sottostanti ta’ titolizzazzjoni, kwalunkwe referenza għall-valur nominali tal-iskoperturi titolizzati għandha tinftiehem bħala referenza għall-valur nett tal-iskoperturi improduttivi.

2. Għall-finijiet tal-Artikolu 6 ta’ dan ir-Regolament, il-valur nett tal-iskoperturi improduttivi ritenuti għandu jiġi kkalkolat bl-użu tal-istess ammont tal-iskont li ma jitħallasx lura fil-prezz tax-xiri li kien jiġi applikat li kieku l-iskoperturi improduttivi ritenuti ġew titolizzati.

3. Għall-finijiet tal-Artikolu 4, il-punt (a), l-Artikolu 5 u l-Artikolu 8 ta’ dan ir-Regolament, il-valur nett tal-parti ritenuta tal-iskoperturi improduttivi għandu jiġi kkalkolat bl-użu tal-istess perċentwal tal-iskont li ma jitħallasx lura fil-prezz tax-xiri li japplika għall-parti mhux ritenuta.

4. Meta l-iskont li ma jitħallasx lura fil-prezz tax-xiri kif imsemmi fl-Artikolu 6(3a), it-tieni subparagrafu, tar-Regolament (UE) 2017/2402 ikun ġie miftiehem fil-livell tal-aggregazzjoni ta’ skoperturi sottostanti improduttivi jew fil-livell ta’ subaggregazzjoni, il-valur nett ta’ skoperturi improduttivi titolizzati individwali inklużi fl-aggregazzjoni jew fis-subaggregazzjoni, kif applikabbli, għandu jiġi kkalkolat bl-applikazzjoni ta’ sehem korrispondenti tal-iskont li ma jitħallasx lura fil-prezz tax-xiri għal kull waħda mill-iskoperturi titolizzati improduttivi bi proporzjon għall-valur nominali tagħhom jew, fejn applikabbli, il-valur pendenti tagħhom fiż-żmien tal-oriġinazzjoni.

5. Meta l-iskont li ma jitħallasx lura fil-prezz tax-xiri jinkludi d-differenza bejn l-ammont nominali ta’ segment wieħed jew diversi segmenti ta’ titolizzazzjoni NPE sottoskritti mill-oriġinatur għall-bejgħ sussegwenti u l-prezz li bih dak is-segment jew dawk is-segmenti l-ewwel jinbiegħu lil partijiet terzi mhux relatati kif imsemmi fl-Artikolu 6(3a), it-tieni subparagrafu, tar-Regolament (UE) 2017/2402, dik id-differenza għandha titqies fil-kalkolu tal-valur nett tal-iskoperturi titolizzati individwali improduttivi billi jiġi applikat sehem korrispondenti tad-differenza għal kull waħda mill-iskoperturi titolizzati improduttivi bi proporzjon mal-valur nominali tagħhom.

Artikolu 10

Kejl tal-livell ta’ retenzjoni

1. Fejn ikun qed jitkejjel il-livell ta’ retenzjoni ta’ interess ekonomiku nett, jiġu applikati l-kriterji li ġejjin:

(a)

l-oriġinazzjoni għandha tkun iż-żmien li fih l-iskoperturi ġew titolizzati għall-ewwel darba, li għandu jkun wieħed minn dawn li ġejjin:

(i)	id-data tal-ħruġ tat-titoli;

(ii)	id-data tal-iffirmar tal-ftehim ta’ protezzjoni tal-kreditu;

(iii)

id-data tal-ftehim dwar skont fil-prezz tax-xiri li jitħallas lura;

(b)	meta l-kalkolu tal-livell ta’ retenzjoni jkun ibbażat fuq valuri nominali, il-prezz tal-akkwiżizzjoni tal-assi ma għandux jitqies għall-fini ta’ dak il-kalkolu;

(c)	il-ġbir tal-imposti finanzjarji u introjtu ieħor mill-imposti riċevuti fir-rigward tal-iskoperturi titolizzati f’titolizzazzjoni tradizzjonali netta tal-kostijiet u l-ispejjeż (marġni pożittiv tradizzjonali) ma għandhomx jitqiesu meta jitkejjel l-interess ekonomiku nett tar-ritenitur;

(d)

meta l-oriġinatur jaġixxi bħala r-ritenitur tat-titolizzazzjoni u japplika l-għażla ta’ retenzjoni msemmija fl-Artikolu 6(3)(d) tar-Regolament (UE) 2017/2402, u meta l-valur tal-iskopertura tal-marġni pożittiv sintetiku li jipprovdi titjib fil-kreditu għas-segmenti kollha tat-titolizzazzjoni sintetika u jservi bħala protezzjoni tal-ewwel telf ikun soġġett għal rekwiżiti kapitali f’konformità mar-regolament prudenzjali applikabbli għall-oriġinatur, l-oriġinatur jista’ jqis il-valur tal-iskopertura tal-marġni pożittiv sintetiku meta jikkalkula l-interess materjali ekonomiku nett f’konformità mal-Artikolu 7 ta’ dan ir-Regolament billi jittratta l-valur tal-iskopertura tal-marġni pożittiv sintetiku bħala retenzjoni tas-segment tal-ewwel telf, minbarra kwalunkwe retenzjoni reali tas-segment tal-ewwel telf;

(e)	l-opzjoni ta’ retenzjoni u l-metodoloġija użata għall-kalkolu tal-interess ekonomiku nett ma għandhomx jinbidlu matul il-ħajja ta’ titolizzazzjoni, sakemm ċirkostanzi eċċezzjonali ma jeħtiġux bidla u dik il-bidla ma tintużax bħala mezz sabiex jitnaqqas l-ammont tal-imgħax ritenut.

2. Ir-ritenitur ma għandux jintalab biex kontinwament iforni jew jaġġusta mill-ġdid l-imgħax ritenut tiegħu għal mill-inqas 5 % fil-każ ta’ telf realizzat fuq l-iskoperturi ritenuti jew allokat għall-pożizzjonijiet ritenuti.

Artikolu 11

Kejl tal-interess materjali ekonomiku nett li għandu jinżamm għal skoperturi fil-forma ta’ ammonti prelevati u mhux prelevati ta’ faċilitajiet ta’ kreditu

Il-kalkolu tal-interess ekonomiku nett li għandu jinżamm għall-faċilitajiet ta’ kreditu, inklużi karti ta’ kreditu, għandu jkun ibbażat biss fuq l-ammonti li diġà ġew prelevati, realizzati jew riċevuti u għandu jiġi aġġustat f’konformità ma’ tibdiliet f’dawk l-ammonti.

Artikolu 12

Projbizzjoni tal-iħħeġġjar jew tal-bejgħ tal-interess ritenut

1. L-obbligu stabbilit fl-Artikolu 6(1), l-ewwel subparagrafu, tar-Regolament (UE) 2017/2402 li interess materjali ekonomiku nett jiġi ritenut fuq bażi kontinwa fit-titolizzazzjoni għandu jitqies li ġie ssodisfat biss meta, filwaqt li titqies is-sustanza ekonomika tat-tranżazzjoni, jiġu ssodisfati ż-żewġ kundizzjonijiet li ġejjin:

(a)	l-interess materjali ekonomiku nett ritenut ma jkun soġġett għall-ebda mitigazzjoni tar-riskju ta’ kreditu jew iħħeġġjar tal-pożizzjonijiet ta’ titolizzazzjoni ritenuti jew tal-iskoperturi ritenuti,

(b)	ir-ritenitur ma jbigħx, jittrasferixxi jew b’xi mod ieħor iċedi d-drittijiet, il-benefiċċji jew l-obbligi kollha jew parti minnhom li jirriżultaw mill-interess ekonomiku nett ritenut.

B’deroga mill-punt (a), ir-ritenitur jista’ jiħħeġġja l-interess ekonomiku nett meta l-iħħeġġjar ma jkunx kontra r-riskju ta’ kreditu tal-pożizzjonijiet ta’ titolizzazzjoni ritenuti jew tal-iskoperturi ritenuti.

2. Ir-ritenitur jista’ juża skoperturi jew pożizzjonijiet ta’ titolizzazzjoni ritenuti bħala kollateral għal finijiet ta’ finanzjament garantit inklużi, fejn rilevanti, arranġamenti ta’ finanzjament li jinvolvu bejgħ, trasferiment jew ċediment ieħor tad-drittijiet, tal-benefiċċji jew tal-obbligi kollha jew parti minnhom li jirriżultaw mill-interess ekonomiku nett ritenut, dment li dan l-użu bħala kollateral ma jittrasferix l-iskopertura għar-riskju ta’ kreditu ta’ dawk l-iskoperturi jew il-pożizzjonijiet ta’ titolizzazzjoni ritenuti lil parti terza.

3. Il-paragrafu 1, il-punt (b), ma għandu japplika fl-ebda wieħed mill-każijiet li ġejjin:

(a)	fil-każ tal-insolvenza tar-ritenitur;

(b)	meta r-ritenitur, għal raġunijiet legali lil hinn mill-kontroll tiegħu u lil hinn mill-kontroll tal-azzjonisti tiegħu, ma jkunx jista’ jkompli jaġixxi bħala ritenitur;

(c)	fil-każ ta’ retenzjoni fuq bażi konsolidata kif imsemmi fl-Artikolu 14.

Artikolu 13

Tranżazzjonijiet li għalihom ir-rekwiżit ta’ retenzjoni ma japplikax, kif imsemmi fl-Artikolu 6(6) tar-Regolament (UE) 2017/2402

It-tranżazzjonijiet li għalihom ir-rekwiżit ta’ retenzjoni ma japplikax, kif imsemmi fl-Artikolu 6(6) tar-Regolament (UE) 2017/2402, għandhom jinkludu pożizzjonijiet ta’ titolizzazzjoni fil-portafoll ta’ negozjar ta’ korrelazzjoni li jew huma strumenti ta’ referenza kif imsemmi fl-Artikolu 338(1), il-punt (b), tar-Regolament (UE) Nru 575/2013 jew huma eliġibbli għall-inklużjoni fil-portafoll ta’ negozjar ta’ korrelazzjoni.

Artikolu 14

Retenzjoni fuq bażi konsolidata

Kumpaniji azzjonarji finanzjarji mħallta kif definiti fl-Artikolu 2, il-punt (15), tad-Direttiva 2002/87/KE tal-Parlament Ewropew u tal-Kunsill (7), istituzzjonijiet prinċipali, jew kumpaniji azzjonarji finanzjarji, li huma stabbiliti fl-Unjoni u li jissodisfaw ir-rekwiżiti msemmija fl-Artikolu 6(1) tar-Regolament (UE) 2017/2402 abbażi tas-sitwazzjoni konsolidata tagħhom f’konformità mal-paragrafu 4 ta’ dak l-Artikolu għandhom, meta r-ritenitur ma jibqax inkluż fl-ambitu tas-superviżjoni fuq bażi konsolidata, jiżguraw li waħda jew aktar mill-entitajiet li jifdal inklużi fl-ambitu tas-superviżjoni fuq bażi konsolidata tissodisfa r-rekwiżit ta’ retenzjoni.

Artikolu 15

Rekwiżiti dwar l-allokazzjoni tal-flussi tal-flus u t-telf għall-interess ritenut u dwar it-tariffi pagabbli lir-ritenitur

1. Ir-ritenituri ma għandhomx jużaw arranġamenti jew mekkaniżmi inkorporati fit-titolizzazzjoni li bis-saħħa tagħhom l-imgħax ritenut fl-oriġinazzjoni jonqos aktar malajr mill-interess ittrasferit. Fl-allokazzjoni tal-flussi tal-flus, l-imgħax ritenut ma għandux jingħata prijorità sabiex jibbenefika b’mod preferenzjali milli jitħallas lura jew jiġi amortizzat qabel l-interess ittrasferit.

L-amortizzament tal-interess ritenut permezz tal-allokazzjoni tal-fluss tal-flus f’konformità mal-ewwel subparagrafu jew permezz tal-allokazzjoni ta’ telf li, fil-fatt, inaqqas il-livell ta’ retenzjoni maż-żmien, għandu jkun permess.

2. Għall-finijiet tal-paragrafu 1, l-arranġamenti dwar kwalunkwe tariffa, jew fissa jew kontinġenti fuq il-volum jew il-prestazzjoni tal-iskoperturi titolizzati jew l-evoluzzjoni tal-parametri referenzjarji tas-suq rilevanti, pagabbli lir-ritenitur fuq bażi ta’ prijorità għar-remunerazzjoni tar-ritenitur għal kwalunkwe servizz ipprovdut lit-titolizzazzjoni għandhom jitqiesu konsistenti biss mar-rekwiżiti dwar l-interess ritenut stabbiliti f’dak il-paragrafu meta jiġu ssodisfati l-kundizzjonijiet kollha li ġejjin:

(a)	l-ammont tat-tariffi huwa stabbilit fuq bażi distakkata wara li jitqiesu tranżazzjonijiet komparabbli fis-suq;

(b)

it-tariffi huma strutturati bħala kunsiderazzjoni għall-forniment tas-servizz u ma joħolqux pretensjoni preferenzjali fil-flussi tal-flus tat-titolizzazzjoni li effettivament inaqqsu l-interess ritenut aktar malajr mill-interess ittrasferit.

Għall-finijiet tal-punt (a), fin-nuqqas ta’ tranżazzjonijiet komparabbli fis-suq rilevanti, l-ammont tat-tariffi għandu jikkonforma mar-rekwiżit li dawk it-tariffi jiġu stabbiliti fuq bażi distakkata meta dawk it-tariffi jiġu stabbiliti b’referenza għat-tariffi pagabbli fi tranżazzjonijiet simili fi swieq oħra, jew jiġu stabbiliti bl-użu ta’ metriċi ta’ valwazzjoni li jqisu kif xieraq it-tip ta’ titolizzazzjoni u s-servizz li jkun qiegħed jiġi pprovdut.

Il-kundizzjonijiet fl-ewwel subparagrafu, il-punti (a) u (b), ma għandhomx jitqiesu li ġew issodisfati meta t-tariffi jkunu ggarantiti jew pagabbli bil-quddiem fi kwalunkwe forma, kompletament jew parzjalment qabel is-servizz li jkun qiegħed jiġi pprovdut wara l-għeluq, u l-interess materjali ekonomiku nett effettiv wara li jitnaqqsu t-tariffi jkun anqas mill-interess ekonomiku nett minimu meħtieġ skont l-għażla tar-retenzjoni magħżula mill-għażliet stipulati fl-Artikolu 6(3), il-punti (a) sa (e), tar-Regolament (UE) 2017/2402.

Artikolu 16

Rispett tar-rekwiżit ta’ retenzjoni f’titolizzazzjonijiet ta’ strumenti ta’ dejn proprji maħruġa

Meta entità tititolizza l-istrumenti ta’ dejn maħruġa minnha stess, inklużi bonds koperti kif iddefiniti fl-Artikolu 3, il-punt (1), tad-Direttiva (UE) 2019/2162 tal-Parlament Ewropew u tal-Kunsill (8), u l-iskoperturi sottostanti tat-titolizzazzjoni jinkludu esklussivament dawk l-istrumenti ta’ dejn proprji maħruġin, għandu jitqies li jkun hemm konformità mar-rekwiżit ta’ retenzjoni fl-Artikolu 6(1) tar-Regolament (UE) 2017/2402.

Artikolu 17

Rekwiżit ta’ retenzjoni fir-rititolizzazzjonijiet

1. Għar-rititolizzazzjonijiet permessi mill-Artikolu 8 tar-Regolament (UE) 2017/2402, ritenitur għandu jżomm l-interess materjali ekonomiku nett fir-rigward ta’ kull wieħed mil-livelli ta’ tranżazzjoni rispettivi.

2. B’deroga mill-paragrafu 1, l-oriġinatur ta’ rititolizzazzjoni ma għandux ikun obbligat li jżomm interess materjali ekonomiku nett fil-livell tat-tranżazzjoni tar-rititolizzazzjoni meta jiġu ssodisfati l-kundizzjonijiet kollha li ġejjin:

(a)	l-oriġinatur tar-rititolizzazzjoni jkun ukoll l-oriġinatur u r-ritenitur tat-titolizzazzjoni sottostanti;

(b)	ir-rititolizzazzjoni tkun appoġġata minn aggregazzjoni ta’ skoperturi li jinkludu biss skoperturi jew pożizzjonijiet li ġew ritenuti mill-oriġinatur fit-titolizzazzjoni sottostanti li jaqbżu l-interess ekonomiku nett minimu meħtieġ qabel id-data tal-oriġinazzjoni tar-rititolizzazzjoni;

(c)	ma hemm l-ebda diskrepanza fil-maturità bejn il-pożizzjonijiet jew l-iskoperturi ta’ titolizzazzjoni sottostanti u r-rititolizzazzjoni.

3. Għall-finijiet tal-paragrafi 1 u 2, is-segmentazzjoni mill-ġdid mill-oriġinatur tat-titolizzazzjoni ta’ segment maħruġ f’segmenti kontigwi ma għandhiex tikkostitwixxi rititolizzazzjoni.

Artikolu 18

Assi ttrasferiti lill-SSPE

1. Għall-finijiet tal-Artikolu 6(2) tar-Regolament (UE) 2017/2402, l-assi miżmuma fil-karta tal-bilanċ tal-oriġinatur li, skont id-dokumentazzjoni tat-titolizzazzjoni, jissodisfaw il-kriterji ta’ eliġibbiltà, għandhom jitqiesu li huma komparabbli mal-assi li għandhom jiġu ttrasferiti lill-SSPE meta, fiż-żmien tal-għażla tal-assi, jiġu ssodisfati ż-żewġ kundizzjonijiet li ġejjin:

(a)	il-prestazzjoni mistennija kemm tal-assi li għandhom jinżammu ulterjorment fil-karta tal-bilanċ kif ukoll tal-assi li għandhom jiġu ttrasferiti hija ddeterminata minn fatturi simili;

(b)

abbażi ta’ indikazzjonijiet, inklużi l-prestazzjoni fl-imgħoddi u l-mudelli applikabbli, jista’ jkun raġonevolment mistenni li l-prestazzjoni tal-assi li għandhom jinżammu ulterjorment fil-karta tal-bilanċ mhix se tkun aħjar b’mod sinifikanti matul il-perjodu ta’ żmien imsemmi fl-Artikolu 6(2) tar-Regolament (UE) 2017/2402 mill-prestazzjoni tal-assi li għandhom jiġu ttrasferiti.

2. Il-valutazzjoni dwar jekk l-oriġinatur ikunx ikkonforma mal-Artikolu 6(2) tar-Regolament (UE) 2017/2402 għandha tqis jekk l-oriġinatur ikunx ħa kwalunkwe azzjoni biex jikkonforma ma’ dak l-Artikolu, u b’mod partikolari jekk l-oriġinatur ikunx stabbilixxa kwalunkwe politika, proċedura u kontroll intern biex jipprevjeni l-għażla sistematika jew intenzjonata għall-finijiet ta’ titolizzazzjoni ta’ assi ta’ kwalità ta’ kreditu medja agħar minn assi komparabbli ritenuti fil-karta tal-bilanċ tiegħu.

3. Oriġinatur għandu jitqies li jkun ikkonforma mal-Artikolu 6(2) tar-Regolament (UE) 2017/2402 meta, wara t-titolizzazzjoni, ma jkun hemm l-ebda skopertura li titħalla fil-karta tal-bilanċ tal-oriġinatur li tkun komparabbli mal-iskoperturi titolizzati, għajr l-iskoperturi li l-oriġinatur ikun diġà impenja kuntrattwalment li jittitolizza, u dment li dak il-fatt ikun ġie kkomunikat b’mod ċar lill-investituri.

Artikolu 19

Rekwiżit ta’ għarfien espert dwar is-servizzjant tat-titolizzazzjonijiet NPE tradizzjonali

1. Fil-każ ta’ titolizzazzjonijiet NPE tradizzjonali, is-servizzjanti għandhom jitqiesu li għandhom għarfien espert fis-servizzjar ta’ skoperturi ta’ natura simili għal dawk titolizzati, kif imsemmi fl-Artikolu 6(1), ir-raba’ subparagrafu, tar-Regolament (UE) 2017/2402 fejn tiġi ssodisfata waħda mill-kundizzjonijiet li ġejjin:

(a)	il-membri tal-korp maniġerjali tas-servizzjant u l-persunal superjuri, minbarra l-membri tal-korp maniġerjali, li huma responsabbli għas-servizzjar ta’ skoperturi ta’ natura simili għal dawk titolizzati jkollhom għarfien u ħiliet adegwati fis-servizzjar ta’ dawn l-iskoperturi;

(b)	in-negozju tal-ġestur, jew tal-grupp konsolidat tiegħu għal finijiet kontabilistiċi jew prudenzjali, ikun inkluda l-ġestjoni ta’ skoperturi ta’ natura simili għal dawk titolizzati għal mill-inqas 5 snin qabel id-data tat-titolizzazzjoni;

(c)

jiġu ssodisfati l-punti kollha li ġejjin:

(i)	mill-inqas tnejn mill-membri tal-korp maniġerjali tal-ġestur ikollhom esperjenza professjonali rilevanti fil-ġestjoni ta’ skoperturi ta’ natura simili għal dawk titolizzati, fuq livell personali, ta’ mill-inqas 5 snin;

(ii)	persunal superjuri, minbarra l-membri tal-korp maniġerjali, li huma responsabbli għall-ġestjoni mill-ġestur ta’ skoperturi improduttivi jkollhom esperjenza professjonali rilevanti fil-ġestjoni ta’ dawn l-iskoperturi, fuq livell personali, ta’ mill-inqas 5 snin;

(iii)

il-funzjoni ta’ ġestjoni mill-ġestur tkun sostnuta minn ġestur ta’ riżerva li jikkonforma mal-punt (b).

2. Il-ġesturi għandhom jissostanzjaw u jiddivulgaw l-esperjenza professjonali tagħhom f’dettall suffiċjenti biex l-investituri istituzzjonali jkunu jistgħu jikkonformaw mal-obbligi ta’ diliġenza dovuta tagħhom stabbiliti fl-Artikolu 5 tar-Regolament (UE) 2017/2402, filwaqt li jiġu rispettati r-rekwiżiti ta’ kunfidenzjalità applikabbli.

Artikolu 20

Tħassir

Ir-Regolament ta’ Delega (UE) Nru 625/2014 huwa mħassar, mingħajr preġudizzju għall-Artikolu 43(6) tar-Regolament (UE) 2017/2402.

Artikolu 21

Dħul fis-seħħ

Dan ir-Regolament għandu jidħol fis-seħħ fl-20 jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, is-7 ta’ Lulju 2023.

Għall-Kummissjoni

Il-President

Ursula VON DER LEYEN

(1) ĠU L 347, 28.12.2017, p. 35.

(2) Ir-Regolament ta’ Delega tal-Kummissjoni (UE) Nru 625/2014 tat-13 ta’ Marzu 2014 li jissupplimenta r-Regolament (UE) Nru 575/2013 tal-Parlament Ewropew u tal-Kunsill permezz ta’ standards tekniċi regolatorji li jispeċifikaw ir-rekwiżiti tal-istituzzjonijiet investituri, sponsors, mutwanti oriġinali u oriġinaturi marbuta ma’ skoperturi għar-riskju tal-kreditu trasferit (ĠU L 174, 13.6.2014, p. 16).

(3) Ir-Regolament (UE) Nru 575/2013 tal-Parlament Ewropew u tal-Kunsill tas-26 ta’ Ġunju 2013 dwar ir-rekwiżiti prudenzjali għall-istituzzjonijiet ta’ kreditu u d-ditti tal-investiment u li jemenda r-Regolament (UE) Nru 648/2012 (ĠU L 176, 27.6.2013, p. 1).

(4) Ir-Regolament (UE) 2017/2401 tal-Parlament Ewropew u tal-Kunsill tat-12 ta’ Diċembru 2017 li jemenda r-Regolament (UE) Nru 575/2013 dwar ir-rekwiżiti prudenzjali għall-istituzzjonijiet ta’ kreditu u għad-ditti ta’ investiment (ĠU L 347, 28.12.2017, p. 1).

(5) Ir-Regolament (UE) Nru 1093/2010 tal-Parlament Ewropew u tal-Kunsill tal-24 ta’ Novembru 2010 li jistabbilixxi Awtorità Superviżorja Ewropea (Awtorità Bankarja Ewropea) u li jemenda d-Deċiżjoni Nru 716/2009/KE u jħassar id-Deċiżjoni tal-Kummissjoni 2009/78/KE (ĠU L 331, 15.12.2010, p. 12).

(6) Id-Direttiva 2014/65/UE tal-Parlament Ewropew u tal-Kunsill tal-15 ta’ Mejju 2014 dwar is-swieq fl-istrumenti finanzjarji u li temenda d-Direttiva 2002/92/KE u d-Direttiva 2011/61/UE (ĠU L 173, 12.6.2014, p. 349).

(7) Id-Direttiva 2002/87/KE tal-Parlament Ewropew u tal-Kunsill tas-16 ta’ Diċembru 2002 dwar is-superviżjoni supplementari ta’ istituzzjonijiet ta’ kreditu dwar impriżi ta’ assigurazzjoni u ditti tal-investiment f’konglomerat finanzjarju u li temenda d-Direttivi tal-Kunsill 73/239/KEE, 79/267/KEE, 92/49/KEE, 92/96/KEE, 93/6/KEE u 93/22/KEE, u d-Direttivi 98/78/KE u 2000/12/KE tal-Parlament Ewropew u tal-Kunsill (ĠU L 35, 11.2.2003, p. 1).

(8) Id-Direttiva (UE) 2019/2162 tal-Parlament Ewropew u tal-Kunsill tas-27 ta’ Novembru 2019 dwar il-ħruġ ta’ bonds koperti u s-superviżjoni pubblika ta’ bonds koperti u li temenda d-Direttivi 2009/65/KE u 2014/59/UE (ĠU L 328, 18.12.2019, p. 29).