REGOLAMENT TA’ IMPLIMENTAZZJONI TAL-KUMMISSJONI (UE) 2023/2117

tat-12 ta’ Ottubru 2023

li jistabbilixxi r-regoli u r-rekwiżiti dettaljati meħtieġa għall-funzjonament u l-ġestjoni ta’ repożitorju tal-informazzjoni skont ir-Regolament (UE) 2018/1139 tal-Parlament Ewropew u tal-Kunsill

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) 2018/1139 tal-Parlament Ewropew u tal-Kunsill tal-4 ta’ Lulju 2018 dwar regoli komuni fil-qasam tal-avjazzjoni ċivili u li jistabbilixxi Aġenzija tas-Sikurezza tal-Avjazzjoni tal-Unjoni Ewropea, u li jemenda r-Regolamenti (KE) Nru 2111/2005, (KE) Nru 1008/2008, (UE) Nru 996/2010, (UE) Nru 376/2014 u d-Direttivi 2014/30/UE u 2014/53/UE tal-Parlament Ewropew u tal-Kunsill, u li jħassar ir-Regolamenti (KE) Nru 216/2008 u (KE) Nru 552/2004 tal-Parlament Ewropew u tal-Kunsill u r-Regolament tal-Kunsill (KEE) Nru 3922/91 (1), u b’mod partikolari l-Artikolu 74(8) tiegħu,

Billi:

(1)

F’konformità mal-Artikolu 74 tar-Regolament (UE) 2018/1139, l-informazzjoni relatata mal-avjazzjoni ċivili trid tinħażen f’repożitorju elettroniku tal-informazzjoni stabbilit u ġestit mill-Aġenzija tas-Sikurezza tal-Avjazzjoni tal-Unjoni Ewropea (“l-Aġenzija”) li hu meħtieġ biex tkun żgurata l-kooperazzjoni effettiva bejn l-Aġenzija u l-awtoritajiet kompetenti nazzjonali fir-rigward tal-eżerċizzju tal-kompiti tagħhom relatati maċ-ċertifikazzjoni, is-sorveljanza u l-infurzar skont dak ir-Regolament.

(2)

Hu importanti li l-Kummissjoni u l-awtoritajiet kompetenti nazzjonali jkunu involuti fl-iżvilupp u l-ġestjoni tar-repożitorju mill-Aġenzija, u għalhekk dan ir-Regolament jenħtieġ li jistabbilixxi mekkaniżmu tal-konsultazzjoni xieraq biex ikun żgurat li l-Aġenzija tikkonsulta lill-Istati Membri u lill-Kummissjoni qabel ma tieħu deċiżjonijiet fir-rigward tar-repożitorju.

(3)

Biex ikun żgurat l-użu effettiv tar-repożitorju, l-istruttura tiegħu jenħtieġ li tipprevedi bażi tad-data ċentrali, infrastruttura tal-komunikazzjoni u interfaċċa meħtieġa għall-ħruġ, it-tfittxija u l-aċċess għall-informazzjoni maħżuna fir-repożitorju. Biex tiġi ffaċilitata l-kooperazzjoni bejn l-entitajiet li jużaw ir-repożitorju, jenħtieġ li jkun hemm interfaċċa unika għal tfittxijiet diretti mill-utenti fir-repożitorju u interfaċċa unika għall-awtoritajiet kompetenti nazzjonali.

(4)	Ir-repożitorju jenħtieġ li jiffaċilita l-integrazzjoni tal-awtoritajiet kompetenti fir-repożitorju u l-komunikazzjoni mar-repożitorju permezz tal-ispeċifikazzjonijiet funzjonali xierqa li jkopru l-interfaċċa, is-sigurtà, in-network, u l-informazzjoni dwar il-konfigurazzjoni tal-applikazzjoni.

(5)	L-Aġenzija jenħtieġ li tiżgura li r-repożitorju jinżamm f’kundizzjonijiet operatorji xierqa biex ikunu evitati l-fallimenti tekniċi u tkun żgurata l-kontinwità tal-operat tar-repożitorju u l-ġestjoni tad-data tiegħu.

(6)	L-informazzjoni jenħtieġ li tiġi trażmessa u skambjata permezz tar-repożitorju abbażi ta’ formati tal-informazzjoni maqbula b’mod komuni u proposti mill-Aġenzija biex l-informazzjoni skambjata tinftiehem bl-istess mod mill-entitajiet komunikanti.

(7)

Jenħtieġ li b’aġġornamenti regolari tal-informazzjoni maħżuna fir-repożitorju jkun jista’ jsir skambju aħjar tal-informazzjoni. F’dak ir-rigward, jenħtieġ li l-Aġenzija u l-awtoritajiet kompetenti nazzjonali jiżviluppaw metodoloġija biex jaġġornaw regolarment l-informazzjoni maħżuna fir-repożitorju.

(8)

Dan ir-Regolament jenħtieġ li jistabbilixxi wkoll ir-rekwiżiti għall-klassifikazzjoni tal-informazzjoni biex l-informazzjoni maħżuna fir-repożitorju tiġi ttrattata skont il-parametri tal-privatezza, tal-kunfidenzjalità, tal-integrità u tad-disponibbiltà. Jenħtieġ li ssir evalwazzjoni mill-ġdid ta’ din il-klassifikazzjoni tal-informazzjoni kull meta jkun hemm bidla fl-użu tad-data biex ikun żgurat li l-klassifikazzjoni tkun aġġornata.

(9)

Hu importanti li jiġu identifikati l-partijiet interessati li jistgħu jirċievu xi informazzjoni maħżuna fir-repożitorju u li jiġu stabbiliti regoli dettaljati dwar it-trattament tat-talbiet tagħhom għall-aċċess. Għal dan il-għan, dan ir-Regolament jenħtieġ li jistabbilixxi l-kundizzjonijiet meħtieġa għad-disseminazzjoni tal-informazzjoni lill-partijiet interessati. Jenħtieġ li jkun żgurat ukoll li l-informazzjoni riċevuta mill-partijiet interessati tiġi ġestita b’mod kunfidenzjali.

(10)

Sistema tat-traċċabbiltà tal-informazzjoni maħżuna fir-repożitorju jenħtieġ li tiggarantixxi l-protezzjoni minn aċċess mhux awtorizzat għar-repożitorju, u jenħtieġ li tippermetti l-monitoraġġ tal-operazzjonijiet meta tiġi pproċessata l-informazzjoni, inkluż id-data personali, biex tkun żgurata l-integrità tad-data u s-sigurtà tal-informazzjoni.

(11)	Il-persunal tal-utenti awtorizzati jeħtieġ jaċċessa r-repożitorju jenħtieġ li jkun awtorizzat mill-organizzazzjonijiet tagħhom skont proċeduri dokumentati. Il-persunal miċ-ċentri ajrumediċi jenħtieġ li jiġi awtorizzat mill-awtoritajiet kompetenti nazzjonali rispettivi tagħhom.

(12)

Ir-rekwiżiti għall-protezzjoni tal-infrastruttura u d-data rilevanti jenħtieġ li jinħolqu fil-qafas tal-politiki tal-ġestjoni tas-sigurtà. Jenħtieġ li b’mod partikolari jinħolqu miżuri għal pjan tal-ġestjoni tas-sigurtà, pjan tal-kontinwità tal-operat u pjan tal-irkupru mid-diżastri. L-utenti awtorizzati jenħtieġ li jiżguraw li jkun hemm fis-seħħ il-miżuri tas-sigurtà meħtieġa u li jikkooperaw f’dak ir-rigward.

(13)

Id-data personali jenħtieġ li tiġi pproċessata biss għall-fini biex tkun żgurata kooperazzjoni effettiva bejn l-Aġenzija u l-awtoritajiet kompetenti nazzjonali fir-rigward tal-eżerċizzju tal-kompiti tagħhom relatati maċ-ċertifikazzjoni, is-sorveljanza u l-infurzar. Dan ir-Regolament jenħtieġ li jistabbilixxi arranġamenti dettaljati għall-protezzjoni tad-data personali maħżuna fir-repożitorju u skambjata permezz tiegħu. Tali pproċessar irid jikkonforma mar-Regolamenti (UE) 2016/679 (2) u (UE) 2018/1725 (3) tal-Parlament Ewropew u tal-Kunsill u jiċċara r-responsabbiltajiet tal-entitajiet rilevanti maħtura biex jiżguraw li l-protezzjoni tad-data tkun garantita.

(14)

Jeħtieġ li jiġu identifikati u allokati r-responsabbiltajiet rispettivi tal-entitajiet li jipproċessaw id-data personali fir-repożitorju, inkluż id-dħul u l-estrazzjoni tad-data personali mir-repożitorju. Ir-Regolament (UE) 2018/1139 jipprevedi li l-Aġenzija, b’kooperazzjoni mal-Kummissjoni u mal-awtoritajiet kompetenti nazzjonali, tistabbilixxi u timmaniġġja repożitorju tal-informazzjoni meħtieġ biex tkun żgurata kooperazzjoni effettiva bejn l-Aġenzija u l-awtoritajiet kompetenti nazzjonali. B’mod partikolari, biex jikkooperaw ħalli jiżguraw il-ġestjoni tas-sigurtà tar-repożitorju. Għaldaqstant, dawn jenħtieġ li jkunu kontrolluri konġunti għall-ipproċessar tad-data personali għall-ġestjoni tar-repożitorju. Għalhekk, jeħtieġ jiġu definiti r-responsabbiltajiet tal-kontrolluri konġunti u l-obbligi speċifiċi tagħhom lejn is-suġġetti tad-data.

(15)

Kull awtorità kompetenti nazzjonali, l-Aġenzija u l-Kummissjoni jenħtieġ li jkunu l-uniku kontrollur tal-operazzjonijiet tal-ipproċessar tad-data mwettqa fis-sistemi tagħhom stess bħala utenti awtorizzati. Jenħtieġ li l-operazzjonijiet tal-ipproċessar tad-data jsiru f’konformità mar-Regolamenti (UE) 2016/679 u (UE) 2018/1725. Peress li d-data skambjata fir-repożitorju toriġina minn kull kontrollur, jenħtieġ li dawn jinnotifikaw lill-Aġenzija f’każ ta’ xi ksur tad-data personali fis-sistema tagħhom li jista’ jikkomprometti s-sigurtà, il-kunfidenzjalità, id-disponibbiltà jew l-integrità tad-data personali pproċessata fir-repożitorju.

(16)

Jenħtieġ li jiġi speċifikat l-obbligu ta’ notifika reċiproka tal-ksur tas-sigurtà, inkluż tal-ksur tad-data personali, biex il-kontrolluri konġunti jkunu jistgħu jidentifikaw l-inċidenti tas-sigurtà u l-ksur tad-data malajr kemm jista’ jkun. Ir-rappurtar meħtieġ ta’ dan il-ksur jenħtieġ li jkun żgurat minn kull kontrollur kif xieraq.

(17)

Meta meħtieġ, l-eżerċizzju tad-drittijiet tas-suġġett tad-data jista’ jiġi ristrett skont ċerti kundizzjonijiet speċifikati. Dawn ir-restrizzjonijiet jenħtieġ li jkunu proporzjonati u limitati fl-ambitu u fiż-żmien. Is-suġġett tad-data jenħtieġ li jitħalla jeżerċita d-drittijiet tiegħu għal difiża effettiva u rimedju ġudizzjarju.

(18)

Biex tkun żgurata s-sikurezza tal-avjazzjoni, l-awtorità kompetenti jaf ikollha bżonn aċċess għal rekords preċedenti, inkluż dawk li jkun fihom id-data personali. B’mod partikolari, l-aċċess għal data medika li tiġġustifika perjodi preċedenti ta’ inkapaċità jew l-impożizzjoni ta’ limitazzjonijiet. Għalhekk, u mingħajr preġudizzju għal perjodi iqsar previsti fil-liġi nazzjonali, perjodu massimu tal-ħżin ta’ 10 snin li jibda mid-data tal-iskadenza tad-dokument (eż. ċertifikati tas-saħħa, rapporti mediċi, liċenzji) inkluż kull dokument meħtieġ għall-proċeduri msemmija fir-Regolament (UE) 2018/1139 jenħtieġ li jiżgura li din id-data xorta tista’ tkun disponibbli għall-utenti awtorizzati.

(19)

Id-data personali fir-repożitorju hi informazzjoni essenzjali li jenħtieġ li tinżamm għal finijiet ta’ arkivjar fl-interess tas-sikurezza tal-avjazzjoni u għall-finijiet ta’ riċerka storika. Meta jiskadi l-perjodu tal-ħżin jew xi perjodu iqsar possibbilment previst fil-liġi nazzjonali, jenħtieġ li d-data personali titħassar minnufih mir-repożitorju. Id-data personali tista’ tinżamm għal finijiet ta’ arkivjar fl-interess pubbliku tas-sikurezza tal-avjazzjoni u għall-finijiet ta’ riċerka storika barra mir-repożitorju.

(20)

Biex tkun żgurata l-applikazzjoni xierqa ta’ dan ir-Regolament, l-Istati Membri u l-entitajiet affettwati jenħtieġ li jingħataw żmien biżżejjed biex jadattaw il-proċeduri tagħhom għall-qafas regolatorju l-ġdid qabel ma jibda japplika dan ir-Regolament. Għalhekk, ċerti rekwiżiti tal-Anness I jenħtieġ li jkunu applikabbli f’dati aktar tard skont il-kategorija tal-oġġett tal-informazzjoni tagħhom u d-data tal-ħruġ.

(21)

L-Aġenzija ħejjiet abbozz ta’ att ta’ implimentazzjoni għall-funzjonament u l-ġestjoni ta’ repożitorju tal-informazzjoni skont ir-Regolament (UE) 2018/1139 u ppreżentatu lill-Kummissjoni bl-Opinjoni Nru 04/2022 (4), f’konformità mal-Artikolu 75(2), il-punt (b), u l-Artikolu 76(1) tar-Regolament (UE) 2018/1139.

(22)	Il-Kontrollur Ewropew għall-Protezzjoni tad-Data ġie kkonsultat skont l-Artikolu 42(1) tar-Regolament (UE) 2018/1725 u ta l-opinjoni tiegħu fid-29 ta’ Marzu 2023.

(23)	Il-miżuri previsti f’dan ir-Regolament ta’ Implimentazzjoni huma konformi mal-opinjoni tal-Kumitat għall-applikazzjoni tar-regoli komuni tas-sikurezza fil-qasam tal-avjazzjoni ċivili,

ADOTTAT DAN IR-REGOLAMENT:

KAPITOLU I

DISPOŻIZZJONIJIET ĠENERALI

Artikolu 1

Suġġett

Dan ir-Regolament jistabbilixxi r-regoli u l-proċeduri għall-funzjonament u l-ġestjoni ta’ repożitorju tal-informazzjoni meħtieġa biex tkun żgurata kooperazzjoni effettiva bejn l-Aġenzija u l-awtoritajiet kompetenti nazzjonali fir-rigward tal-eżerċizzju tal-kompiti tagħhom relatati maċ-ċertifikazzjoni, is-sorveljanza u l-infurzar skont ir-Regolament (UE) 2018/1139.

Artikolu 2

Definizzjonijiet

1. Għall-finijiet ta’ dan ir-Regolament, għandhom japplikaw id-definizzjonijiet tar-Regolamenti (UE) 2018/1139, (UE) 2016/679, (UE) 2018/1725 u r-Regolamenti ta’ Implimentazzjoni tal-Kummissjoni (UE) 2019/947 (5) u (UE) 2021/664 (6).

2. Għandhom japplikaw ukoll id-definizzjonijiet li ġejjin:

(a)	“utenti awtorizzati” tfisser il-Kummissjoni, l-Aġenzija, l-awtoritajiet kompetenti nazzjonali u kull awtorità kompetenti tal-Istat Membru fdat bl-investigazzjoni ta’ aċċidenti u inċidenti tal-avjazzjoni ċivili kif stabbilit fl-Artikolu 74(6), l-ewwel sentenza, tar-Regolament (UE) 2018/1139;

(b)	“interfaċċa” tfisser il-punt fejn sistemi indipendenti u spiss mhux relatati jikkonnettjaw u jaġixxu fuq xulxin jew jikkomunikaw ma’ xulxin;

(c)	“persunal awtorizzat” tfisser il-persunal tal-utenti awtorizzati li jkunu rċevew aċċess għar-repożitorju;

(d)	“kategorija ta’ oġġett tal-informazzjoni” tfisser it-tip ta’ informazzjoni li taqa’ fil-kamp ta’ applikazzjoni tal-Artikolu 74(1) tar-Regolament (UE) 2018/1139 li trid tiġi skambjata u aċċessata mill-utenti awtorizzati;

(e)	“oġġett tal-informazzjoni” tfisser biċċa informazzjoni skambjata individwalment li għandha dejjem tikkorrispondi għall-kategorija tal-oġġett tal-informazzjoni u tkun kompatibbli mal-format tal-informazzjoni tagħha;

(f)

“format tal-informazzjoni” tfisser struttura predefinita tal-kategorija tal-oġġett tal-informazzjoni li tikkonsisti fi skema ta’ oqsma li jikkorrispondu għal tipi dettaljati tal-kontenut f’kull kategorija tal-oġġetti tal-informazzjoni u vokabularji magħmula minn settijiet limitati tal-valuri permissibbli assoċjati ma’ kull qasam;

(g)

“parti interessata” tfisser awtoritajiet pubbliċi tal-istituzzjonijiet, tal-aġenziji u tal-korpi tal-Unjoni Ewropea u awtoritajiet pubbliċi tal-Istati Membri, persuni fiżiċi u ġuridiċi li huma soġġetti għal oġġett tal-informazzjoni kif definit fl-Anness I ta’ dan ir-Regolament u l-entitajiet kwalifikati akkreditati skont l-Artikolu 69 tar-Regolament (UE) 2018/1139.

KAPITOLU II

TWAQQIF, ĠESTJONI U MANUTENZJONI TAR-REPOŻITORJU

Artikolu 3

Twaqqif tar-repożitorju

1. Ir-repożitorju għandu jkun magħmul mill-interfaċċi tal-Ħżin, tal-Iskambju, u tal-Aċċess għall-Utenti.

2. L-interfaċċa tal-Ħżin imsemmija fil-paragrafu 1 għandha tikkonsisti minn:

(a)	bażi tad-data ċentrali li jkun fiha l-informazzjoni msemmija fl-Artikolu 74(1) tar-Regolament (UE) 2018/1139, u tkun tinkludi l-informazzjoni eżistenti u informazzjoni ġdida, u;

(b)	rendikont tal-bidliet fl-informazzjoni u l-istatus attwali/arkivjat tagħha.

3. L-interfaċċa tal-Iskambju msemmija fil-paragrafu 1 għandha tikkonsisti minn:

(a)	infrastruttura tal-komunikazzjoni li tipprovdi Interfaċċi Programmabbli tal-Applikazzjoni (APIs) siguri għall-ħruġ, il-bidla, it-tfittxija/il-qari, u l-arkivjar tal-informazzjoni bejn is-sistemi tal-utenti awtorizzati u r-repożitorju, u;

(b)	regoli dwar il-verifika tal-kwalità tal-informazzjoni li jiżguraw il-konsistenza, l-integrità u l-eżattezza tal-informazzjoni maħżuna.

4. L-interfaċċa tal-Aċċess għall-Utenti msemmija fil-paragrafu 1 għandha tipprevedi tfittxija online u sigura u aċċess għall-qari tal-informazzjoni maħżuna. L-interfaċċa tal-Aċċess għall-Utenti għandha tkun disponibbli biss għall-persunal awtorizzat.

5. L-Aġenzija għandha tiżviluppa d-dokumentazzjoni meħtieġa li tappoġġa l-integrazzjoni tal-utenti awtorizzati mar-repożitorju. Dik id-dokumentazzjoni għandha tikkonsisti minn:

(a)	standards tal-API u mekkaniżmi tal-iskambju;

(b)	informazzjoni dwar is-sigurtà, in-network u l-konfigurazzjoni tal-applikazzjoni meħtieġa għal komunikazzjoni mar-repożitorju;

(c)	regoli li jispeċifikaw l-istruttura u l-kontenut validi tal-informazzjoni skambjata mar-repożitorju.

6. L-Aġenzija għandha tipprevedi wkoll ambjent tal-ittestjar biex l-utenti awtorizzati jkunu jistgħu jittestjaw il-funzjonalità u l-prestazzjoni tal-interfaċċa tal-Iskambju bejn is-sistemi tagħhom u r-repożitorju.

Artikolu 4

Ġestjoni tar-repożitorju

1. L-Aġenzija għandha tkun responsabbli għall-ġestjoni operatorja tar-repożitorju u għandha taħżen l-informazzjoni fir-repożitorju b’mod sigur.

2. L-utenti awtorizzati għandhom jittrażmettu u jiskambjaw l-informazzjoni permezz tar-repożitorju mill-interfaċċi u għandhom jiżguraw konnessjoni online sigura bejn is-sistemi tagħhom u r-repożitorju.

3. Qabel ma tieħu xi deċiżjoni dwar il-ġestjoni operatorja tar-repożitorju, jew qabel ma tagħmlu disponibbli għall-pubbliku, l-Aġenzija għandha tikkonsulta lill-Kummissjoni u lill-awtoritajiet kompetenti nazzjonali.

4. Il-persunal awtorizzat tal-eżaminaturi ajrumediċi u ċ-ċentri ajrumediċi nazzjonali għandu jittrażmetti u jiskambja l-informazzjoni fir-repożitorju tramite l-awtoritajiet kompetenti nazzjonali ta’ pajjiżu f’konformità mal-Artikolu 10(4) ta’ dan ir-Regolament.

Artikolu 5

Manutenzjoni tar-repożitorju

1. L-Aġenzija għandha tieħu ħsieb il-manutenzjoni tar-repożitorju u tiżgura li dan ikun jiffunzjona kif suppost mil-lat ta’ privatezza, kunfidenzjalità, integrità u disponibbiltà.

2. L-Aġenzija għandha tagħmel backup sistematiku tar-repożitorju u tad-data tiegħu.

KAPITOLU III

REGOLI DWAR L-INFORMAZZJONI MAĦŻUNA FIR-REPOŻITORJU

Artikolu 6

Formati u standards tal-informazzjoni

1. L-utenti awtorizzati għandhom jittrażmettu, jaġġornaw regolarment u jiskambjaw informazzjoni permezz tar-repożitorju abbażi ta’ formati tal-informazzjoni maqbula b’mod komuni u proposti mill-Aġenzija

2. Il-formati tal-informazzjoni għandhom jiġu standardizzati għal kull kategorija tal-informazzjoni. L-utenti awtorizzati għandhom jittrażmettu biss l-oġġetti tal-informazzjoni lir-repożitorju bil-format tal-informazzjoni speċifiku għal dik il-kategorija tal-informazzjoni.

3. Il-lista tal-kategoriji tal-oġġetti tal-informazzjoni hija stabbilita fl-Anness I.

Artikolu 7

Klassifikazzjoni tal-informazzjoni

1. L-Aġenzija, b’kooperazzjoni mal-Kummissjoni u l-awtoritajiet kompetenti nazzjonali, għandha tikklassifika l-kategoriji tal-oġġetti tal-informazzjoni skont il-marki li ġejjin:

(a)	privatezza: data mhux personali, data personali mhux sensittiva, jew data personali sensittiva;

(b)	kunfidenzjalità: l-ebda impatt, impatt limitat, impatt sinifikanti, jew impatt katastrofiku;

(c)	integrità: l-ebda impatt, impatt limitat, impatt sinifikanti, jew impatt katastrofiku;

(d)	disponibilità: l-ebda impatt, impatt limitat, impatt sinifikanti, jew impatt katastrofiku.

2. Id-definizzjonijiet dettaljati tal-marki msemmija fil-paragrafu 1 huma stabbiliti fl-Anness II.

3. Kull meta tqis li jkun meħtieġ, l-Aġenzija, b’kooperazzjoni mal-Kummissjoni u l-awtoritajiet kompetenti nazzjonali, għandha tevalwa mill-ġdid il-klassifikazzjoni tal-informazzjoni biex tiżgura li din tkun għadha xierqa abbażi tal-bidliet fl-użu tal-informazzjoni.

Artikolu 8

Arranġamenti għad-disseminazzjoni tal-informazzjoni

1. Meta tintalab minn xi parti interessata, l-Aġenzija tista’ tipprovdi l-informazzjoni li jkun hemm fir-repożitorju lil dik il-parti interessata, u tissoġġettaha għall-kundizzjonijiet speċifiċi tal-użu stabbiliti f’dan l-Artikolu.

2. Talba għal disseminazzjoni tal-informazzjoni mir-repożitorju għandha tiġi ppreżentata bil-mod u l-manjiera stabbiliti mill-Aġenzija.

3. Meta tirċievi talba, l-Aġenzija għandha tivverifika li:

(a)	it-talba tkun ġejja minn parti interessata; u

(b)	il-parti interessata turi li l-informazzjoni mitluba hija meħtieġa strettament għall-operazzjonijiet tal-parti interessata stess.

4. L-Aġenzija għandha tevalwa jekk it-talba hix ġustifikata u, jekk il-kundizzjonijiet stabbiliti fil-paragrafu 5 jiġu ssodisfati, din għandha tipprovdi l-informazzjoni mitluba lill-parti interessata.

5. L-Aġenzija għandha tipprovdi l-informazzjoni mitluba lill-parti interessata biss skont il-kundizzjonijiet li ġejjin:

(a)	il-parti interessata ma tirċevix aċċess għall-kontenut kollu tar-repożitorju;

(b)	l-informazzjoni tkun meħtieġa strettament għall-operazzjonijiet tal-parti interessata stess;

(c)	l-ebda data personali ma tiġi disseminata, sakemm dik id-data ma tkunx tikkonċerna lill-parti interessata nnifisha jew diment li dik id-disseminazzjoni tkun meħtieġa strettament biex jitwettqu l-operazzjonijiet tal-parti interessata.

6. L-Aġenzija għandha tagħmel disponibbli għall-utenti awtorizzati lista aġġornata tat-talbiet riċevuti u l-azzjoni meħuda mill-Aġenzija.

7. Il-parti interessata għandha:

(a)	tuża l-informazzjoni biss għall-iskop speċifikat fil-formola tat-talba;

(b)	ma tiżvelax l-informazzjoni riċevuta mingħajr l-awtorizzazzjoni tal-utenti awtorizzati;

(c)	tieħu l-miżuri meħtieġa biex tiżgura l-kunfidenzjalità tal-informazzjoni riċevuta.

Artikolu 9

Reġistrazzjoni tal-operazzjonijiet tal-ipproċessar tad-data

1. L-Aġenzija għandha tiżgura li l-operazzjonijiet kollha tal-ipproċessar tad-data jiġu rreġistrati. Ir-rendikont għandu jipprovdi l-informazzjoni li ġejja:

(a)	il-fini tat-talba għall-aċċess għad-data tar-repożitorju;

(b)	l-identifikazzjoni tal-utent awtorizzat li jiġbor id-data;

(c)	id-data u l-ħin eżatti tal-operazzjonijiet tal-ipproċessar tad-data;

(d)	l-identifikazzjoni tal-persunal awtorizzat li jwettaq it-tiftixa.

2. L-Aġenzija għandha tuża r-rendikonti tal-operazzjonijiet tal-ipproċessar tad-data biss biex timmonitorja l-legalità tal-aċċess għall-informazzjoni u tiżgura l-integrità u s-sigurtà tad-data. Ir-rendikonti għandu jkun fihom id-data meħtieġa strettament għal dak il-għan li tikkonforma mal-prinċipju tal-minimizzazzjoni tad-data kif stabbilit fl-Artikolu 89 tar-Regolament (UE) 2016/679 u fl-Artikolu 13 tar-Regolament (UE) 2018/1725. Ir-rendikonti għandhom jitħassru meta tintemm il-proċedura tal-monitoraġġ jew mhux aktar tard minn sena wara.

3. Meta jitolbu dan, il-Kummissjoni u l-awtoritajiet kompetenti nazzjonali għandhom jingħataw aċċess għar-rendikonti biex jivvalutaw il-legalità tal-aċċess għall-informazzjoni, jimmonitorjaw il-legalità tal-operazzjonijiet tal-ipproċessar tad-data u jiżguraw l-integrità u s-sigurtà tad-data.

Artikolu 10

Aċċess għar-repożitorju

1. L-utenti awtorizzati għandhom jiżguraw li l-persunal awtorizzat biss ikollu aċċess għar-repożitorju.

2. L-utenti awtorizzati għandhom jiżguraw li l-persunal tagħhom jirċievi aċċess għall-informazzjoni abbażi tal-marki tal-privatezza u tal-kunfidenzjalità tal-kategorija tal-oġġett tal-informazzjoni f’konformità mal-Artikolu 7.

3. L-utenti awtorizzati għandhom jistabbilixxu u jżommu:

(a)	lista tal-persunal awtorizzat;

(b)

proċeduri dwar l-aċċess għar-repożitorju; tali proċeduri għandhom ikunu konformi mar-rekwiżiti legali applikati għall-aċċess u l-ipproċessar tal-informazzjoni stabbiliti fil-liġi tal-Unjoni u dik nazzjonali. Għandhom jiddokumentaw it-termini u l-kundizzjonijiet biex il-persunal awtorizzat ikollu aċċess għar-repożitorju.

4. L-eżaminaturi ajrumediċi u ċ-ċentri ajrumediċi nazzjonali għandhom jiżguraw li l-persunal awtorizzat mill-awtorità kompetenti nazzjonali tagħhom biss ikollu aċċess għar-repożitorju.

Artikolu 11

Ġestjoni tas-sigurtà tar-repożitorju

1. L-Aġenzija għandha tipproteġi l-infrastruttura tar-repożitorju u l-informazzjoni fih, u għandha tiżviluppa:

(a)	pjan tal-ġestjoni tas-sigurtà;

(b)	pjan tal-kontinwità tal-operat;

(c)	pjan tal-irkupru mid-diżastri.

2. L-Aġenzija għandha tevita l-ipproċessar mhux awtorizzat tal-informazzjoni u kull qari, ikkopjar, modifika, tneħħija jew tħassir mhux awtorizzati tal-informazzjoni fir-repożitorju, jew waqt id-disseminazzjoni minn jew lejn ir-repożitorju, jew waqt it-trażmissjoni, b’mod partikolari b’tekniki xierqa tal-kriptaġġ.

3. L-Aġenzija għandha tiżgura li l-persuni awtorizzati biex jaċċessaw ir-repożitorju jkollhom aċċess biss għall-informazzjoni koperta mill-awtorizzazzjoni tal-aċċess tagħhom, b’identitajiet individwali tal-utenti u modalitajiet tal-aċċess kunfidenzjali biss.

4. L-utenti awtorizzati għandhom jimmaniġġjaw is-sigurtà tal-informazzjoni tagħhom qabel u waqt it-trażmissjoni lir-repożitorju u għandhom jipproteġu l-infrastruttura tagħhom billi jiżguraw:

(a)	it-twaqqif ta’ interfaċċi bejn is-sistemi tagħhom u r-repożitorju;

(b)	it-tħaddim u l-manutenzjoni tal-interfaċċi;

(c)	li l-persunal awtorizzat ikun imħarreġ kif xieraq fis-sigurtà tal-informazzjoni, fil-leġiżlazzjoni applikabbli dwar il-protezzjoni tad-data u fid-drittijiet fundamentali qabel ma jitħalla jipproċessa l-informazzjoni maħżuna fir-repożitorju.

5. L-utenti awtorizzati għandhom jikkooperaw ħalli jiżguraw il-ġestjoni tas-sigurtà tar-repożitorju.

KAPITOLU IV

PROTEZZJONI TAD-DATA PERSONALI

Artikolu 12

Ipproċessar tad-data personali maħżuna fir-repożitorju

1. Id-data personali maħżuna fir-repożitorju għandha tiġi pproċessata biss biex tkun żgurata l-kooperazzjoni bejn l-utenti awtorizzati meħtieġa għat-twettiq tal-kompiti tagħhom relatati maċ-ċertifikazzjoni, is-sorveljanza u l-infurzar. L-ipproċessar għandu jkun limitat sal-punt meħtieġ għat-twettiq tal-kompiti tagħhom u għal dak li hu meħtieġ strettament u proporzjonat għall-objettivi segwiti.

2. Id-data personali għandha tiġi aċċessata u pproċessata f’konformità mal-ispeċifikazzjonijiet tekniċi tar-repożitorju.

3. L-obbligi tal-protezzjoni tad-data mid-disinn u b’mod awtomatiku għandhom jitqiesu kemm waqt id-determinazzjoni tal-mezzi għall-ipproċessar u anki waqt l-ipproċessar innifsu.

4. L-Aġenzija għandha twettaq rieżamijiet regolari biex tiżgura l-effettività tas-salvagwardji kollha tal-protezzjoni tad-data implimentati.

Artikolu 13

Kontroll konġunt tad-data personali maħżuna fir-repożitorju

1. Il-kontrolluri konġunti tad-data personali maħżuna fir-repożitorju għandhom ikunu l-utenti awtorizzati.

2. Kull kontrollur konġunt għandu jkun responsabbli għall-issodisfar tal-kriterji tal-klassifikazzjoni tal-informazzjoni għal kull oġġett tal-informazzjoni pproċessat fir-Repożitorju.

Artikolu 14

Allokazzjoni tar-responsabbiltajiet bejn il-kontrolluri konġunti

1. L-Aġenzija għandha tkun responsabbli:

(a)	għat-twaqqif, it-tħaddim u l-amminiazzjoni tar-repożitorju;

(b)	għall-ġestjoni kontinwa tar-repożitorju, b’mod partikolari d-drittijiet tal-aċċess u s-sigurtà u l-kunfidenzjalità tad-data personali pproċessata fir-repożitorju f’konformità mal-Artikoli 4, 5, 9 u 12;

(c)	biex tikkomunika kull ksur tad-data personali fir-repożitorju lill-utenti awtorizzati, lill-Kontrollur Ewropew għall-Protezzjoni tad-Data u, meta meħtieġ, lis-suġġetti tad-data f’konformità mal-Artikolu 34 tar-Regolament (UE) 2018/1725;

(d)	biex tiddefinixxi u timplimenta l-mezzi tekniċi biex il-pazjenti jkunu jistgħu jeżerċitaw id-drittijiet tagħhom f’konformità mar-Regolament (UE) 2018/1725.

2. L-awtoritajiet kompetenti nazzjonali u l-Kummissjoni għandhom ikunu responsabbli:

(a)	għall-ipproċessar tad-data personali fir-repożitorju f’konformità mal-Interfaċċi tal-Ħżin, tal-Iskambju u tal-Aċċess għall-Utenti msemmija fl-Artikolu 3 u r-rekwiżiti tas-sigurtà definiti fil-paragrafu 4 tal-Artikolu 12;

(b)	biex jiżguraw is-sigurtà ta’ kull ipproċessar tad-data personali barra r-repożitorju meta dik id-data tiġi pproċessata għall-finijiet tal-ipproċessar permezz tar-repożitorju jew b’rabta miegħu;

(c)	biex jaħtru l-persunal awtorizzat li għandu jingħata aċċess għar-repożitorju f’konformità mal-Artikolu 11, u jikkomunikaw dan lill-Aġenzija;

(d)

biex jaġixxu bħala punt ta’ kuntatt għas-suġġetti tad-data li jkunu fir-responsabbiltà tagħhom bħala kontrolluri uniċi, inkluż meta jeżerċitaw id-drittijiet tagħhom, permezz meta meħtieġ tal-mezzi tekniċi pprovduti mill-Aġenzija f’konformità mal-punt 1(d), jew permezz tal-mezzi tal-komunikazzjoni indikati fil-punt 3;

(e)	biex jinnotifikaw lill-Aġenzija dwar kull inċident tas-sigurtà, inkluż kull ksur tad-data personali li jista’ jikkomprometti s-sigurtà, il-kunfidenzjalità, id-disponibbiltà jew l-integrità tad-data personali trażmessa u/jew maħżuna fir-repożitorju;

(f)

biex jinnotifikaw kull ksur tad-data relatat mad-data personali pproċessata fir-repożitorju lill-awtoritajiet superviżorji kompetenti rispettivi u, meta meħtieġ, lis-suġġetti tad-data, f’konformità mal-Artikoli 33 u 34 tar-Regolament (UE) 2016/679 u mal-Artikolu 34 tar-Regolament (UE) 2018/1725 kif applikabbli.

3. Kull kontrollur konġunt għandu jaħtar:

(a)	punt ta’ kuntatt b’indirizz tal-email funzjonali għall-komunikazzjoni bejniethom;

(b)	punt ta’ kuntatt biex jappoġġa lis-suġġetti tad-data fl-eżerċizzju tad-drittijiet tagħhom skont il-leġiżlazzjoni applikabbli dwar il-protezzjoni tad-data.

4. Meta kontrollur konġunt jirċievi talba mingħand suġġett tad-data li ma tkunx fir-responsabbiltà tiegħu, dan għandu jibgħatha minnufih lill-kontrollur konġunt responsabbli. Jekk jintalbu dan, il-kontrolluri konġunti għandhom jgħinu lil xulxin fil-ġestjoni tat-talbiet tas-suġġetti tad-data u għandhom iwieġbu lil xulxin mingħajr dewmien u mill-aktar tard fi żmien 15-il ġurnata minn meta jirċievu t-talba għall-għajnuna.

5. Jekk kontrollur, biex jikkonforma mal-obbligi tiegħu speċifikati fl-Artikoli 33 u 34 tar-Regolament (UE) 2016/679 jew fl-Artikolu 34 tar-Regolament (UE) 2018/1725, ikun jeħtieġ informazzjoni mingħand kontrollur ieħor, dan għandu jibgħat talba speċifika fl-indirizz tal-email funzjonali msemmi fil-punt 3(a). Dan tal-aħħar għandu jagħmel l-aħjar li jista’ biex jipprovdi dik l-informazzjoni.

Artikolu 15

Restrizzjonijiet

1. Il-kontrolluri jistgħu jirrestrinġu l-eżerċizzju tad-drittijiet tas-suġġetti tad-data biss sa fejn u sakemm ikun meħtieġ strettament għas-salvagwardja tas-sikurezza tal-avjazzjoni ċivili. L-eżerċizzju tad-drittijiet tas-suġġetti tad-data jista’ jiġi ristrett biss fis-sitwazzjonijiet li ġejjin:

(a)

waqt li jkunu għaddejjin xi investigazzjonijiet, spezzjonijiet jew attivitajiet tal-monitoraġġ li jissemmew fl-Artikolu 75(2), il-punt (e), tar-Regolament (UE) 2018/1139 u li jkunu qed jitwettqu mill-Aġenzija fl-ambitu tar-responsabbiltajiet tagħha, jew mill-awtoritajiet kompetenti kif previst fil-liġi nazzjonali jew tal-Unjoni;

(b)	waqt li jkunu għaddejjin xi proċedimenti quddiem il-Qorti tal-Ġustizzja tal-Unjoni Ewropea jew quddiem xi qorti kompetenti oħra skont il-liġi nazzjonali jew internazzjonali.

2. Meta l-Kummissjoni u l-Aġenzija jkunu l-kontrolluri, dawn jistgħu wkoll jirrestrinġu l-eżerċizzju tad-drittijiet tas-suġġetti tad-data biss sa fejn u sakemm ikun meħtieġ strettament għas-salvagwardja tas-sikurezza tal-avjazzjoni ċivili, jekk ikunu għaddejjin investigazzjonijiet tas-sigurtà tal-IT b’impatt dirett jew indirett fuq il-funzjonament tar-repożitorju.

3. Ir-restrizzjonijiet kollha għandhom ikunu soġġetti għal valutazzjoni tal-ħtieġa u tal-proporzjonalità, u għandhom ikunu limitati fl-ambitu u fiż-żmien.

4. Is-suġġett tad-data li l-eżerċitar tad-drittijiet tiegħu jkun ristrett għandu jiġi infurmat dwar ir-raġunijiet u l-firxa tar-restrizzjoni.

Artikolu 16

Perjodu tal-ħżin tad-data personali

1. L-utenti awtorizzati għandhom:

(a)

jaħżnu d-data personali fir-repożitorju għal perjodu massimu ta’ 10 snin li jibda mid-data tal-iskadenza tad-dokument, jew mid-data meta ma jibqax validu, inkluż kull dokument meħtieġ għall-proċeduri msemmija fir-Regolament (UE) 2018/1139 sakemm il-liġi nazzjonali ma tkunx teżiġi xi perjodu differenti;

(b)	iħassru d-data personali mir-repożitorju malli jiskadi l-perjodu tal-ħżin.

2. Ir-repożitorju għandu jkollu l-mezzi tekniċi biex jippermetti:

(a)	it-tħassir awtomatizzat tad-data personali malli jiskadi l-perjodu tal-ħżin;

(b)	il-psewdonimizzazzjoni awtomatizzata, jew soluzzjonijiet tekniċi oħra b’effett ekwivalenti, tad-data personali maħżuna għall-finijiet ta’ arkivjar.

Artikolu 17

Ipproċessar għall-finijiet ta’ arkivjar u ta’ riċerka storika fl-interess tas-sikurezza tal-avjazzjoni

1. Malli jiskadi l-perjodu tal-ħżin, l-Aġenzija tista’ żżomm id-data personali mir-repożitorju f’reġistru separat għall-finijiet ta’ arkivjar u ta’ riċerka storika.

2. Dik id-data personali għandha tkun limitata għal dik meħtieġa strettament għall-finijiet ta’ arkivjar u ta’ riċerka storika fl-interess tas-sikurezza tal-avjazzjoni, u għal konformità mal-prinċipju tal-minimizzazzjoni tad-data kif stabbilit fl-Artikolu 89 tar-Regolament (UE) 2016/679 u fl-Artikolu 13 tar-Regolament (UE) 2018/1725.

3. L-Aġenzija għandha tiżviluppa protokoll dwar l-aċċess għar-reġistru. L-Artikoli 4, 5 u 9 sa 12 għandhom japplikaw għal dan ir-reġistru.

KAPITOLU V

DISPOŻIZZJONIJIET FINALI

Artikolu 18

Dħul fis-seħħ u applikazzjoni

1. Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

2. Il-Kapitoli I u II għandhom japplikaw mill-1 ta’ April 2025.

3. Ir-rekwiżiti rigward l-oġġetti tal-informazzjoni maħruġa wara d-dħul fis-seħħ ta’ dan ir-Regolament għandhom ikunu applikabbli:

(a)	mill-1 ta’ Jannar 2027 għall-kategorija tal-Anness I, il-grupp A;

(b)	mill-1 ta’ Jannar 2028 għall-kategorija tal-Anness I, il-grupp B;

(c)	mill-1 ta’ Jannar 2029 għall-kategorija tal-Anness I, il-grupp C;

4. Ir-rekwiżiti rigward l-oġġetti tal-informazzjoni validi u maħruġa qabel id-dħul fis-seħħ ta’ dan ir-Regolament elenkati fl-Anness I, għandhom ikunu applikabbli mill-1 ta’ Jannar 2029.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, it-12 ta’ Ottubru 2023.

Għall-Kummissjoni

Il-President

Ursula VON DER LEYEN

(1) ĠU L 212, 22.8.2018, p. 1.

(2) Ir-Regolament (UE) 2016/679 tal-Parlament Ewropew u tal-Kunsill tas-27 ta’ April 2016 dwar il-protezzjoni tal-persuni fiżiċi fir-rigward tal-ipproċessar tad-data personali u dwar il-moviment liberu ta’ tali data, u li jħassar id-Direttiva 95/46/KE (Regolament Ġenerali dwar il-Protezzjoni tad-Data) (ĠU L 119, 4.5.2016, p. 1).

(3) Ir-Regolament (UE) 2018/1725 tal-Parlament Ewropew u tal-Kunsill tat-23 ta’ Ottubru 2018 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta’ tali data, u li jħassar ir-Regolament (KE) Nru 45/2001 u d-Deċiżjoni Nru 1247/2002/KE (ĠU L 295, 21.11.2018, p. 39).

(4) https://www.easa.europa.eu/document-library/opinions

(5) Ir-Regolament ta’ Implimentazzjoni tal-Kummissjoni (UE) 2019/947 tal-24 ta’ Mejju 2019 dwar ir-regoli u l-proċeduri għall-operazzjoni ta’ inġenji tal-ajru mingħajr bdot abbord (ĠU L 152, 11.6.2019, p. 45).

(6) Ir-Regolament ta’ Implimentazzjoni tal-Kummissjoni (UE) 2021/664 tat-22 ta’ April 2021 dwar qafas regolatorju għall-U-space (ĠU L 139, 23.4.2021, p. 161).

ANNESS I

LISTA TAL-OĠĠETT TAL-INFORMAZZJONI

Oġġett tal-informazzjoni	Gruppi ta’ prijorità
Liċenzji
Liċenzji tal-bdoti	A
Validazzjoni tal-liċenzja tal-bdoti	A
Liċenzja tal-kontrolluri tat-traffiku tal-ajru	A
Liċenzja tal-manutenzjoni tal-inġenji tal-ajru	B
Ċertifikati — Organizzazzjonijiet
Ċertifikat tal-fornituri tal-ATM/ANS	B
Ċertifikat tal-operaturi tal-ajru	B
Ċertifikat tal-operaturi tal-ajru (AOC)	B
Ċertifikat tat-tagħmir tal-ajrudrom	B
Ċertifikat tal-ajrunavigabbiltà (CofA)	B
Ċertifikat ta’ kwalifika tal-apparat tat-taħriġ tas-simulazzjoni tat-titjir (FSTD)	C
Ċertifikat tal-operaturi tal-UAS ħfief (LUC)	A
Ċertifikat tal-operaturi tal-UAS	C
Ċertifikat tal-fornituri tas-servizzi tal-U-spazju (USSP)	B
Ċertifikat tal-Fornituri tas-Servizzi tal-Informazzjoni Komuni	B
Ċertifikati — Persunal
Ċertifikat tat-taħriġ teoretiku tal-bdoti remoti	C
Ċertifikat tal-eżaminaturi	A
Ċertifikat tal-għalliema	A
Ċertifikat taċ-ċentru tal-valutazzjoni tal-kompetenza lingwistika	C
Ċertifikati — Prodotti/Tagħmir
Ċertifikat tat-tip (TC)	B
Ċertifikat supplimentari tat-tip (STC)	B
Ċertifikat ristrett tat-tip (RTC)	B
Folju tad-data taċ-ċertifikat tat-tip	C
Ċertifikat tal-istorbju	C
Ċertifikat ristrett tal-istorbju	C
Ċertifikat tar-rieżami tal-ajrunavigabbiltà (ARC)	C
Ċertifikat ristrett tal-ajrunavigabbiltà (RCofA)	C
Approvazzjoni ta’ bidliet maġġuri/minuri	C
Approvazzjoni ta’ disinn tat-tiswija maġġuri/minuri	C
Ċertifikat tas-sistemi tal-ATM/ANS u tal-kostitwenti tal-ATM/ANS	B
Ċertifikati — Mediċi
Ċertifikat tal-eżaminaturi ajrumediċi	A
Ċertifikat taċ-ċentri ajrumediċi (AeMC)	A
Ċertifikat tal-eżaminaturi ajrumediċi tal-kontrolluri tat-traffiku tal-ajru (ATCO)	A
Ċertifikat mediku tal-kontrolluri tat-traffiku tal-ajru (ATCO)	A
Formola tal-applikazzjoni għaċ-Ċertifikat mediku tal-bdoti	A
Formoli tal-eżamijiet mediċi tal-bdoti u Ċertifikati mediċi ta’ appoġġ	A
Ċertifikat mediku tal-bdoti	A
Dikjarazzjonijiet
Dikjarazzjoni tal-fornituri tas-servizzi tal-informazzjoni dwar it-titjir (FIS)	B
Dikjarazzjoni tal-fornituri tas-servizzi tal-ġestjoni tar-rampa	B
Dikjarazzjoni tal-fornituri tas-servizzi fuq il-mitjar	B
Sistemi tal-ATM/ANS u kostitwenti tal-ATM/ANS — Dikjarazzjoni	B
Sistemi tal-ATM/ANS u kostitwenti tal-ATM/ANS — Dikjarazzjoni tal-Konformità	B
Dikjarazzjoni tal-operaturi bħala fornituri tat-taħriġ tekniku STS	C
Dikjarazzjonijiet NCC u SPO tal-operaturi tal-inġenji tal-ajru	C
Dikjarazzjoni STS operazzjonali tal-UAS	A
Attestazzjonijiet u rapporti
Attestazzjoni tal-ekwipaġġ tal-kabina	C
Rapport mediku tal-ekwipaġġ tal-kabina	C
Eżenzjonijiet
Eżenzjoni (kumulattiva) ta’ aktar minn 8 xhur — Deċiżjoni	B
Eżenzjoni (kumulattiva) ta’ aktar minn 8 xhur — Notifika	B
Eżenzjoni (kumulattiva) ta’ aktar minn 8 xhur — Rakkomandazzjoni	B
Eżenzjoni (kumulattiva) sa 8 xhur — Notifika	A
Eżenzjoni mill-pussess ta’ Ċertifikat ATM/ANS bħala fornitur — Deċiżjoni	C
Eżenzjoni mill-pussess ta’ Ċertifikat ATM/ANS bħala fornitur — Notifika	C
Eżenzjoni mill-pussess ta’ Ċertifikat ATM/ANS bħala fornitur	C
Approvazzjonijiet
Permess għat-titjir — approvazzjoni tal-kundizzjonijiet tat-titjira	A
Permess għat-titjir	A
Approvazzjoni tar-Rapport tal-Bord tar-Reviżjoni tal-Manutenzjoni (MRB)	C
Eżamijiet tal-għarfien teoriku (ECQB)	C
Approvazzjonijiet tal-Organizzazzjonijiet tal-Ajrunavigabbiltà Kombinata (CAOA) — Parti-CAO	B
Approvazzjonijiet tal-Organizzazzjonijiet tal-Meniġment tal-Ajrunavigabbiltà Kontinwa (CAMOA)	B
Approvazzjonijiet tal-Organizzazzjonijiet tal-Manutenzjoni (MOA) — Parti M, Sottoparti F, Formola 3-MF tal-EASA	B
Approvazzjonijiet tal-Organizzazzjonijiet tal-Manutenzjoni (MOA) — Parti-145	B
Approvazzjonijiet tal-Organizzazzjonijiet tat-Taħriġ fil-Manutenzjoni (MTOA) — Parti-147	B
Ittra ta’ Ftehim għal produzzjoni mingħajr l-approvazzjoni ta’ organizzazzjoni tal-produzzjoni	C
Approvazzjonijiet tal-organizzazzjonijiet tal-produzzjoni (POA)	B
Proċedura alternattiva għall-approvazzjonijiet tal-organizzazzjonijiet tad-disinn (APDOA)	C
Approvazzjonijiet tal-organizzazzjonijiet tad-disinn (DOA)	B
Approvazzjoni tad-disinn jew tal-produzzjoni tat-tagħmir tal-ATM/ANS	B
Organizzazzjonijiet tat-taħriġ tal-kontrolluri tat-traffiku tal-ajru (ATCO)	B
Approvazzjoni tal-organizzazzjoni tat-taħriġ tal-ekwipaġġ tal-kabina (CCTO)	C
Approvazzjoni tal-organizzazzjoni tat-taħriġ (ATO) (bdoti)	C
Organizzazzjoni tat-taħriġ dikjarata (DTO) għall-bdoti	C
Approvazzjoni tal-organizzazzjonijiet tat-taħriġ tal-ekwipaġġ tal-kabina (RITO)	B
Deċiżjonijiet
Parteċipazzjoni fl-applikabbiltà ta’ dispożizzjonijiet speċifiċi tar-Regolament Bażiku għall-attivitajiet elenkati — Deċiżjoni	C
Invaliditar u rikonoxximent ta’ ċertifikati jew dikjarazzjonijiet	C
Deċiżjoni għal-eżenzjoni mid-dispożizzjoni tar-Regolament Bażiku għal Ajrudromi	C
Responsabbiltà konġunta għal kompiti relatati mal-operaturi tal-inġenji tal-ajru involuti fit-trasport kummerċjali bl-ajru	C
Proposta għal emenda fl-Att ta’ Implimentazzjoni/Att Delegat	C
Akkreditazzjoni bħala Entità Kwalifikata	C
Proposta għal Skema Individwali għall-Ispeċifikazzjoni tal-Ħin tat-Titjir (IFTSs)	C
Notifiki tal-iskemi FTL	C
Konferma tal-operaturi dwar l-aċċettabbiltà tal-miżuri ta’ mitigazzjoni aġġornati u tal-konformità mal-kundizzjonijiet lokali f’każ ta’ operazzjonijiet transfruntieri	C
Reġistrazzjoni tal-operaturi tal-UAS	A
Deċiżjoni ta’ Stat Membru dwar l-għażla ta’ fornitur uniku tas-servizzi tal-informazzjoni komuni	B
Miżuri
Miżura immedjata b’reazzjoni għal problema serja tas-sikurezza — Deċiżjoni	B
Miżura immedjata b’reazzjoni għal problema serja tas-sikurezza — Rakkomandazzjoni	B
Miżura immedjata b’reazzjoni għal problema serja tas-sikurezza — Notifika	B
Bullettini tal-Informazzjoni dwar iż-Żoni tal-Kunflitt (CZIB) — Miżuri	B
Parteċipazzjoni (Art. 2(6)) fl-applikabbiltà ta’ dispożizzjonijiet speċifiċi tar-Regolament Bażiku għall-attivitajiet elenkati — Notifika	C
Parteċipazzjoni fl-applikabbiltà ta’ dispożizzjonijiet speċifiċi tar-Regolament Bażiku għall-attivitajiet elenkati — Rakkomandazzjoni	C
Nonparteċipazzjoni fl-eżenzjoni ta’ kategoriji tal-inġenji tal-ajru minn dispożizzjonijiet speċifiċi tar-Regolament Bażiku	C
Oħrajn
Operatur tal-ajru — speċifikazzjonijiet tal-operazzjonijiet	C
Awtorizzazzjoni ta’ operatur tal-pajjiż terz (TCO)	B
Operazzjonijiet Speċjalizzati Kummerċjali ta’ Riskju Għoli — Awtorizzazzjoni	B
Reġistrazzjoni ta’ apparat ċertifikat tal-UAS	A
Awtorizzazzjoni ta’ Ordni Standard Teknika Ewropea (ETSOA):	C
Devjazzjoni għall-ETSO	C
Proposta għal emenda fl-Att ta’ Implimentazzjoni/Att Delegat — Notifika	B
Proposta għal emenda fl-Att ta’ Implimentazzjoni/Att Delegat — Rakkomandazzjoni	B
Lista tal-Istati Membri u l-Organizzazzjonijiet li jkunu trasferew ir-responsabbiltajiet, il-kompitu riallokat (f’konformità mal-Artikoli 64 u 65) u l-awtorità kompetenti responsabbli wara r-riallokazzjoni	C
Id-Direttivi dwar l-ajrunavigabbiltà (AD), dwar is-sikurezza, il-Bullettini tal-Informazzjoni dwar is-Sikurezza (SIB)	C
Abbozz ta’ rakkomandazzjonijiet għal tweġiba għall-Ittri lill-Istati tal-ICAO	C
Lista tal-kontroll tal-Konformità tal-Istandards u l-prattiki rakkomandati (SARPs) tal-ICAO	C
Rakkomandazzjonijiet għal tweġiba għall-Ittri lill-Istati tal-ICAO	C
Talbiet għal Mezzi Alternattivi tal-Konformità	C

ANNESS II

KLASSIFIKAZZJONI TAL-INFORMAZZJONI

Definizzjonijiet dettaljati tal-immarkar skont l-Artikolu 7(2)

(a)

il-PRIVATEZZA hi kklassifikata skont il-kategoriji ta’ hawn taħt:

ID	Isem il-Klassifikazzjoni tal-Privatezza	Deskrizzjoni tal-Klassifikazzjoni tal-Privatezza
PRIV-2	Informazzjoni Personali Sensittiva	Data personali li tiżvela l-oriġini razzjali jew etnika, opinjonijiet politiċi, twemmin reliġjuż jew filosofiku, jew sħubija fi tradeunion; l-ipproċessar ta’ data ġenetika u data bijometrika bl-iskop ta’ identifikazzjoni unika ta’ individwu; data dwar is-saħħa jew data dwar il-ħajja sesswali jew l-orjentazzjoni sesswali ta’ persuna fiżika; data dwar kundanni u reati kriminali.
PRIV-1	Informazzjoni Personali Nonsensittiva	Kull informazzjoni relatata ma’ persuna fiżika identifikata jew identifikabbli (“suġġett tad-data”); persuna identifikabbli hi persuna li tista’ tiġi identifikata, direttament jew indirettament, b’mod partikolari b’referenza għal numru ta’ identifikazzjoni jew għal fattur wieħed jew aktar speċifiku għall-identità fiżika, fiżjoloġika, mentali, ekonomika, kulturali jew soċjali tagħha u sakemm dawn ma jkunux jiżvelaw aspetti tas-suġġett tad-data li jikkwalifikaw bħala informazzjoni personali sensittiva.
PRIV-0	Informazzjoni Nonpersonali	Informazzjoni li mhix relatata ma’ persuna fiżika jew li ma twassalx għall-identifikazzjoni ta’ persuna fiżika bħal data personali anonimizzata.

(b)

il-KUNFIDENZJALITÀ hi kklassifikata skont il-kategoriji ta’ hawn taħt:

Isem il-Livell tal-Klassifikazzjoni

Deskrizzjoni tal-Livell tal-Klassifikazzjoni

CONF-3

Katastrofika

Informazzjoni li l-iżvelar mhux awtorizzat tagħha jkollu waħda jew aktar mill-konsegwenzi li ġejjin:

—	Impatt finanzjarju > EUR 10 miljun

—	Talbiet sinifikanti għal kumpens ta’ responsabbiltà/danni mill-utenti awtorizzati u/jew il-partijiet interessati tar-Repożitorju tal-Avjazzjoni

—	Żvantaġġ kompetittiv sinifikanti għall-utenti awtorizzati u/jew il-partijiet interessati tar-Repożitorju tal-Avjazzjoni

—	Impossibbiltà li l-utenti awtorizzati tar-Repożitorju tal-Avjazzjoni jilħqu l-objettivi tagħhom

—	Telfien totali tal-fiduċja mill-partijiet interessati u mill-pubbliku

—	Telfien totali tar-reputazzjoni

—	Dubji fuq l-Aġenzija bħala organizzazzjoni

CONF-2

Sinifikanti

Informazzjoni li l-iżvelar mhux awtorizzat tagħha jkollu waħda jew aktar mill-konsegwenzi li ġejjin:

—	Impatt finanzjarju ta’ EUR 1-10 miljun

—	Talbiet medji għal kumpens ta’ responsabbiltà/danni mill-utenti awtorizzati u/jew il-partijiet interessati tar-Repożitorju tal-Avjazzjoni

—	Ħsara sinifikanti lir-reputazzjoni fil-qasam tan-negozju speċifiku, esponiment negattiv mal-midja speċjalizzata u ġenerali

—	Telfien tal-fiduċja mill-partijiet interessati relatat mal-proċess kummerċjali speċifiku

—	Ksur ta’ obbligi regolatorji

—	Ksur ta’ obbligi legali

—	Ksur ta’ rekwiżiti kuntrattwali

CONF-1

Limitata

Informazzjoni li l-iżvelar mhux awtorizzat tagħha jkollu waħda jew aktar mill-konsegwenzi li ġejjin:

—	Impatt finanzjarju < EUR 1 miljun

—	Talbiet minuri għal kumpens ta’ responsabbiltà/danni mill-utenti awtorizzati u/jew il-partijiet interessati tar-Repożitorju tal-Avjazzjoni

—	Reputazzjoni, esponiment negattiv limitat fil-midja speċjalizzata

—	Telfien tal-fiduċja mill-partijiet ikkonċernati interni relatat mal-proċess kummerċjali speċifiku

CONF-0

L-ebda impatt

Informazzjoni li l-iżvelar mhux awtorizzat tagħha jwassal biex ir-reputazzjoni tal-utenti awtorizzati tar-Repożitorju tal-Avjazzjoni ssir inkonsistenti mal-immaġni mixtieqa iżda:

—	L-ebda kopertura mill-midja, l-informazzjoni diġà pubblika

—	L-ebda impatt fuq il-partijiet interessati

—	L-ebda impatt finanzjarju

(c)

l-INTEGRITÀ hi kklassifikata skont il-kategoriji ta’ hawn taħt:

Isem il-Livell tal-Integrità

Deskrizzjoni tal-Livell tal-Klassifikazzjoni

INTGR-3

Katastrofika

L-informazzjoni li taqa’ f’din il-kategorija tkun korrotta u/jew kompromessa u jkollha waħda jew aktar mill-konsegwenzi li ġejjin:

—	Telf finanzjarju > EUR 10 miljun

—	Talbiet sinifikanti għal kumpens ta’ responsabbiltà/danni mill-utenti awtorizzati u/jew il-partijiet interessati tar-Repożitorju tal-Avjazzjoni

—	Żvantaġġ kompetittiv sinifikanti għall-utenti awtorizzati u/jew il-partijiet interessati tar-Repożitorju tal-Avjazzjoni, Impossibbiltà li l-utenti awtorizzati tar-Repożitorju tal-Avjazzjoni jilħqu l-objettivi tagħhom

—	Telfien totali tal-fiduċja mill-partijiet interessati u mill-pubbliku

—	Telfien totali tar-reputazzjoni

—	Dubji fuq l-Aġenzija bħala organizzazzjoni

INTGR-2

Sinifikanti

L-informazzjoni li taqa’ f’din il-kategorija tkun korrotta u/jew kompromessa u jkollha waħda jew aktar mill-konsegwenzi li ġejjin:

—	Impatt finanzjarju ta’ EUR 1-10 miljun

—	Talbiet medji għal kumpens ta’ responsabbiltà/danni mill-utenti awtorizzati u/jew il-partijiet interessati tar-Repożitorju tal-Avjazzjoni

—	Ħsara sinifikanti lir-reputazzjoni fil-qasam tan-negozju speċifiku, esponiment negattiv mal-midja speċjalizzata u ġenerali

—	Telfien tal-fiduċja mill-partijiet interessati relatat mal-proċess kummerċjali speċifiku

—	Ksur ta’ obbligi regolatorji

—	Ksur ta’ obbligi legali

—	Ksur ta’ rekwiżiti kuntrattwali

INTGR-1

Limitata

Informazzjoni li l-iżvelar mhux awtorizzat tagħha jkollu waħda jew aktar mill-konsegwenzi li ġejjin:

—	Impatt finanzjarju < EUR 1 miljun

—	Talbiet minuri għal kumpens ta’ responsabbiltà/danni mill-utenti awtorizzati u/jew il-partijiet interessati tar-Repożitorju tal-Avjazzjoni

—	Reputazzjoni, esponiment negattiv limitat fil-midja speċjalizzata

—	Telfien tal-fiduċja mill-partijiet ikkonċernati interni relatat mal-proċess kummerċjali speċifiku

INTGR-0

L-ebda impatt

Informazzjoni li l-iżvelar mhux awtorizzat tagħha jwassal biex ir-reputazzjoni tal-utenti awtorizzati tar-Repożitorju tal-Avjazzjoni ssir inkonsistenti mal-immaġni mixtieqa iżda:

—	L-ebda kopertura mill-midja

—	L-informazzjoni diġà pubblika

—	L-ebda impatt fuq il-partijiet interessati

—	L-ebda impatt finanzjarju

(d)

id-DISPONIBBILTÀ hi kklassifikata skont il-kategoriji ta’ hawn taħt:

ID	Isem il-Livell tad-Disponibbiltà	Deskrizzjoni tal-Livell tal-Klassifikazzjoni
AVAIL-3	Katastrofika	F’każ ta’ interruzzjoni, l-aċċess għall-informazzjoni jeħtieġ jerġa’ jiġi stabbilit fi żmien 24 siegħa (inkluż billejl u fi tmiem il-ġimgħa)
AVAIL-2	Sinifikanti	F’każ ta’ interruzzjoni, l-aċċess għall-informazzjoni jeħtieġ jerġa’ jiġi stabbilit fi żmien ġimgħa kalendarja
AVAIL-1	Limitata	F’każ ta’ interruzzjoni, l-aċċess għall-informazzjoni jeħtieġ jerġa’ jiġi stabbilit fi żmien ġimagħtejn kalendarji
AVAIL-0	L-ebda impatt	F’każ ta’ interruzzjoni, l-aċċess għall-informazzjoni jeħtieġ jerġa’ jiġi stabbilit fi żmien xahar