(1)

Il-Kummissjoni u r-Rappreżentant Għoli għarfu li b’tensjonijiet ġeopolitiċi li qed jiżdiedu, b’integrazzjoni ekonomika aktar profonda u bl-aċċellerazzjoni tal-iżvilupp teknoloġiku, ċerti flussi u attivitajiet ekonomiċi jistgħu jippreżentaw riskju għas-sigurtà ekonomika tagħna u adottaw Komunikazzjoni Konġunta dwar l-Istrateġija Ewropea għas-Sigurtà Ekonomika (1) biex jiġi stabbilit approċċ strateġiku komprensiv għas-sigurtà ekonomika.

(2)

L-Istrateġija Ewropea għas-Sigurtà Ekonomika hija bbażata fuq approċċ bi tliet pilastri: il-promozzjoni tal-bażi ekonomika u tal-kompetittività tal-UE; il-protezzjoni kontra r-riskji; u s-sħubija mal-usa’ firxa possibbli ta’ pajjiżi biex jiġu indirizzati t-tħassib u l-interessi komuni.

(3)

Bħala parti minn dan il-qafas u fid-dawl tar-riskji li ċerti dipendenzi ekonomiċi u evoluzzjonijiet tekniċi jistgħu jippreżentaw, l-UE teħtieġ stampa ċara tar-riskji għas-sigurtà ekonomika tagħha u l-evoluzzjoni tagħhom maż-żmien.

(4)

Dawn ir-riskji għandhom jiġu identifikati u vvalutati flimkien mal-Istati Membri tal-UE, b’kontributi minn partijiet ikkonċernati privati fi proċess dinamiku u kontinwu.

(5)

L-Istrateġija Ewropea għas-Sigurtà Ekonomika identifikat l-erba’ kategoriji ta’ riskju wiesgħa u mhux eżawrjenti li ġejjin għal valutazzjoni ulterjuri: ir-reżiljenza tal-ktajjen tal-provvista, inkluża s-sigurtà tal-enerġija; is-sigurtà fiżika u ċibernetika tal-infrastruttura kritika; is-sigurtà tat-teknoloġija u l-ħrib tat-teknoloġija; l-użu tad-dipendenzi ekonomiċi bħala arma u l-koerċizzjoni ekonomika.

(6)

Fil-Komunikazzjoni Konġunta, il-Kummissjoni impenjat ruħha li tivvaluta r-riskji tas-sigurtà u tal-ħrib tat-teknoloġija abbażi ta’ lista ta’ teknoloġiji strateġiċi kritiċi għas-sigurtà ekonomika u, fir-rigward tal-aktar riskji sensittivi, li tipproponi lista ta’ teknoloġiji kritiċi bil-ħsieb tal-valutazzjoni tar-riskju li għandha titwettaq b’mod kollettiv mal-Istati Membri sa tmiem l-2023.

(7)

Il-Komunikazzjoni Konġunta identifikat dawn it-tliet kriterji ddefiniti b’mod strett u li jħarsu ’l quddiem għall-għażla tat-teknoloġiji li jippreżentaw l-aktar riskji sensittivi, għal valutazzjoni ulterjuri: in-natura abilitanti u trasformattiva tat-teknoloġija; ir-riskju ta’ fużjoni ċivili u militari; u r-riskju ta’ użu ħażin tat-teknoloġija għal ksur tad-drittijiet tal-bniedem.

(8)

Il-kriterju tan-natura abilitanti u trasformattiva tat-teknoloġija jqis il-potenzjal u r-rilevanza tat-teknoloġija biex tixpruna żidiet sinifikanti fil-prestazzjoni u fl-effiċjenza u/jew bidliet radikali għas-setturi, il-kapaċitajiet eċċ.

(9)

Il-kriterju tar-riskju ta’ fużjoni ċivili u militari jqis ir-rilevanza tat-teknoloġija kemm għas-setturi ċivili kif ukoll għal dawk militari u l-potenzjal tagħha li tavvanza ż-żewġ oqsma, kif ukoll lejn ir-riskju ta’ użi ta’ ċerti teknoloġiji biex jimminaw il-paċi u s-sigurtà.

(10)

Il-kriterju tar-riskju ta’ użu ħażin tat-teknoloġija għal ksur tad-drittijiet tal-bniedem iqis l-użu ħażin potenzjali tat-teknoloġija bi ksur tad-drittijiet tal-bniedem, inkluż ir-restrizzjoni tal-libertajiet fundamentali.

(11)

Wara l-ewwel analiżi interna, il-Kummissjoni identifikat lista ta’ 10 oqsma teknoloġiċi kritiċi għas-sigurtà ekonomika tal-UE. Din il-lista ta’ oqsma teknoloġiċi tqis il-ħidma li saret skont il-Pjan ta’ Azzjoni dwar is-sinerġiji bejn l-industriji ċivili, tad-difiża u tal-ispazju (2). Dan dokument ħaj u jista’ jkun soġġett għal aktar emendi li jirriflettu l-iżviluppi teknoloġiċi bħala parti minn eżerċizzju li għadu għaddej.

(12)

Abbażi tat-tliet kriterji ddefiniti b’mod strett u li jħarsu ’l quddiem għall-għażla tat-teknoloġiji għal valutazzjoni ulterjuri, din ir-Rakkomandazzjoni presenti tidentifika erba’ oqsma teknoloġiċi, minn din il-lista, li hija tqis li x’aktarx jippreżentaw l-aktar riskji sensittivi u immedjati relatati mas-sigurtà tat-teknoloġija u mal-ħrib tat-teknoloġija, jiġifieri s-Semikondutturi Avvanzati, l-Intelliġenza Artifiċjali, it-Teknoloġiji Kwantistiċi u l-Bijoteknoloġiji. Dawn l-oqsma tat-teknoloġija għandhom, bħala kwistjoni tal-ogħla prijorità, ikunu soġġetti għal valutazzjoni tar-riskju kollettiva mal-Istati Membri sa tmiem is-sena. Soġġett għall-ħidma dwar l-ambitu mal-Istati Membri, din il-valutazzjoni kollettiva tista’ tiffoka fuq is-subsettijiet tat-teknoloġiji f’dawn l-erba’ oqsma teknoloġiċi.

(13)

L-istrutturar tal-lista jirrifletti l-valutazzjoni tal-Kummissjoni dwar liema oqsma teknoloġiċi minn fosthom huma aktar probabbli li jippreżentaw l-aktar riskji sensittivi u immedjati relatati mas-sigurtà tat-teknoloġija u l-ħrib tat-teknoloġija. Dan jista’ jservi bħala għajnuna għat-teħid ta’ deċiżjonijiet dwar il-passi ulterjuri. Il-Kummissjoni se tidħol fi djalogu miftuħ mal-Istati Membri dwar il-kalendarju xieraq u l-ambitu ta’ valutazzjonijiet tar-riskju ulterjuri, filwaqt li tqis, fost l-oħrajn, il-kontribut tal-fattur taż-żmien għall-evoluzzjoni tar-riskji. Il-Kummissjoni tilqa’ skambju f’waqtu dwar dan l-aspett tal-Istrateġija tas-Sigurtà Ekonomika fil-Kunsill, fil-kuntest tad-deliberazzjonijiet u tal-orjentazzjonijiet politiċi ġenerali tiegħu b’reazzjoni għall-Komunikazzjoni Konġunta. Il-Kummissjoni tista’ tippreżenta aktar inizjattivi f’dan ir-rigward sar-Rebbiegħa tal-2024, fid-dawl ta’ tali djalogu u tal-ewwel esperjenza bil-valutazzjonijiet kollettivi inizjali, kif ukoll ta’ inputs ulterjuri li jistgħu jiġu riċevuti fl-oqsma teknoloġiċi elenkati. Fid-deċiżjoni dwar proposti għal valutazzjonijiet tar-riskju kollettivi ulterjuri mal-Istati Membri dwar wieħed jew aktar mill-oqsma teknoloġiċi addizzjonali elenkati, jew is-subsettijiet tagħhom, il-Kummissjoni se tqis l-azzjonijiet li għadhom għaddejjin jew ippjanati għall-promozzjoni jew għas-sħubija fil-qasam tat-teknoloġija li jkun qed jiġi kkunsidrat. B’mod aktar ġenerali, il-Kummissjoni se żżomm f’moħħha li l-miżuri meħuda biex tissaħħaħ il-kompetittività tal-UE fl-oqsma rilevanti jistgħu jikkontribwixxu għat-tnaqqis ta’ ċerti riskji teknoloġiċi.

(14)

L-objettiv tal-valutazzjoni tar-riskju għandu jkun li jiġu identifikati u analizzati l-vulnerabbiltajiet ta’ natura sistemika skont l-impatt potenzjali tagħhom fuq is-sigurtà ekonomika tal-UE u l-grad ta’ probabbiltà li jimmaterjalizza l-impatt negattiv. Biex jiġi strutturat l-eżerċizzju tal-valutazzjoni tar-riskju li jmiss mal-Istati Membri, il-Kummissjoni identifikat xi prinċipji gwida.

(15)

Din ir-Rakkomandazzjoni ma tippreġudikax l-eżitu tal-valutazzjoni tar-riskju. L-eżitu tal-valutazzjoni kollettiva dettaljata tal-livell u tan-natura tar-riskji ppreżentati biss jista’ jservi bħala bażi għal diskussjoni ulterjuri dwar il-ħtieġa ta’ kwalunkwe miżura preċiża u proporzjonata għal promozzjoni, sħubija jew protezzjoni fi kwalunkwe wieħed minn dawn l-oqsma teknoloġiċi, jew kwalunkwe subsett tagħhom. L-Istati Membri u l-Kummissjoni jistgħu jużaw din l-informazzjoni fit-tfassil ta’ azzjonijiet ta’ politika futuri, inklużi miżuri ta’ promozzjoni, sħubija jew protezzjoni fil-livell nazzjonali, tal-UE jew f’dak internazzjonali, li għandhom ikunu proporzjonali għal-livell ta’ riskju indirizzat u preċiżi fir-rigward tal-ambitu. Għalhekk, f’dan l-istadju ta’ prevalutazzjoni, ma tista’ tinsilet l-ebda konklużjoni dwar ir-rikors għal kwalunkwe strument partikolari fis-settijiet ta’ miżuri tal-UE jew tal-Istati Membri għal promozzjoni, protezzjoni jew sħubija ma’ oħrajn fid-dawl ta’ sigurtà ekonomika msaħħa.

(16)

Kwalunkwe miżura li tista’ tittieħed se tkun proporzjonata u mmirata b’mod preċiż għar-riskji vvalutati ta’ kull qasam tat-teknoloġija kritika jew ta’ teknoloġija rilevanti. Kwalunkwe miżura implimentata se jkollha l-għan li ssaħħaħ il-qawwa tal-Unjoni f’dawn l-oqsma u tkun imfassla biex timminimizza kwalunkwe effett konsegwenzjali negattiv fuq is-suq u l-ekonomija. B’mod partikolari, dawn il-valutazzjonijiet se jikkontribwixxu għall-iżvilupp tal-politiki tal-Unjoni b’appoġġ għall-innovazzjoni u l-iżvilupp industrijali għat-teknoloġiji identifikati, inkluż permezz ta’ inizjattivi internazzjonali.