REGOLAMENT DELEGAT TAL-KUMMISSJONI (UE) 2023/2104

tal-4 ta’ Lulju 2023

li jemenda r-Regolament Delegat (UE) 2015/2402 fir-rigward tar-rieżami tal-valuri ta’ referenza armonizzati tal-effiċjenza għall-produzzjoni separata tal-elettriku u s-sħana bl-applikazzjoni tad-Direttiva 2012/27/UE tal-Parlament Ewropew u tal-Kunsill

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Direttiva 2012/27/UE tal-Parlament Ewropew u tal-Kunsill tal-25 ta’ Ottubru 2012 dwar l-effiċjenza fl-enerġija, li temenda d-Direttivi 2009/125/KE u 2010/30/UE u li tħassar id-Direttivi 2004/8/KE u 2006/32/KE (1), u b’mod partikolari t-tieni subparagrafu tal-Artikolu 14(10) tagħha,

Billi:

(1)

Ir-Regolament Delegat tal-Kummissjoni (UE) 2015/2402 (2) stabbilixxa valuri ta’ referenza armonizzati rieżaminati tal-effiċjenza għall-produzzjoni separata tal-elettriku u tas-sħana, bħala matriċi ta’ valuri differenzjati b’fatturi rilevanti, inkluż is-sena ta’ kostruzzjoni u t-tipi ta’ fjuwil, ikkomplementati b’fatturi ta’ korrezzjoni marbuta mas-sitwazzjoni klimatika medja u t-telf evitat mill-grilja.

(2)

Il-Kummissjoni wettqet rieżami ta’ dawn il-valuri ta’ referenza armonizzati tal-effiċjenza (“ir-rieżami”) għall-produzzjoni separata tal-elettriku u tas-sħana, billi qieset id-data mill-użu operazzjonali taħt kundizzjonijiet realistiċi, mogħtija mill-Istati Membri u l-partijiet ikkonċernati. Bħala riżultat tal-iżviluppi fl-aħjar teknoloġija disponibbli u ekonomikament ġustifikabbli, osservati matul il-perjodu ta’ rieżami mill-2016 sal-2021, id-distinzjoni li saret fir-Regolament Delegat tal-Kummissjoni (UE) 2015/2402 fir-rigward tas-sena ta’ kostruzzjoni tal-unità ta’ koġenerazzjoni jenħtieġ li tinżamm b’rabta mal-valuri ta’ referenza armonizzati tal-effiċjenza għall-produzzjoni separata tal-elettriku.

(3)

Ir-rieżami wera l-ħtieġa li jiġu inklużi fjuwils ġodda u teknoloġiji emerġenti li jistgħu jintużaw b’mod aktar wiesa’ jew jiġu introdotti fil-koġenerazzjoni. Għalhekk, il-lista tas-sorsi tal-enerġija b’valuri ta’ referenza speċifiċi jenħtieġ li tiġi estiża biex tinkludi wkoll il-gassijiet elettroniċi u l-idroġenu nnegozjat. Fir-rigward tal-idroġenu nnegozjat, jenħtieġ li jiġu stabbiliti valuri ta’ referenza separati biex tiżdied l-effiċjenza tal-użu tal-idroġenu f’unitajiet kbar ta’ koġenerazzjoni.

(4)

Ir-rieżami jappoġġa l-użu tal-valur ta’ referenza uniku għall-produzzjoni separata tal-elettriku għall-fjuwils fossili kollha, abbażi tal-użu tal-gass naturali fl-impjanti tal-enerġija tat-turbini tal-gass b’ċiklu kkombinat. Il-bini ta’ unitajiet ġodda ta’ koġenerazzjoni li jużaw fjuwils fossili likwidi jew solidi ma huwiex f’konformità mal-objettivi fit-tul tal-politika dwar l-enerġija u l-klima tal-Unjoni. Għalhekk, sabiex jiġu evitati bidliet retroattivi għall-iskemi attwali, il-valuri ta’ referenza jenħtieġ li jiġu aġġornati u jkunu applikabbli għall-unitajiet ta’ koġenerazzjoni ġodda u sostanzjalment rinnovati li jikkunsmaw il-fjuwils fossili li jibdew joperaw mill-1 ta’ Jannar 2024.

(5)

Ir-rieżami wera li l-valuri ta’ referenza armonizzati tal-effiċjenza għall-produzzjoni separata tas-sħana jenħtieġ li jinbidlu biss fir-rigward tal-fjuwils fossili. Is-sett il-ġdid ta’ valuri ta’ referenza għall-fjuwils fossili huwa stabbilit abbażi ta’ bojlers tas-sħana biss li jużaw il-gass naturali u jenħtieġ li jkun applikabbli għal unitajiet ġodda jew sostanzjalment rinnovati għal produzzjoni separata ta’ sħana kompluta mill-1 ta’ Jannar 2024.

(6)	Jeħtieġ li jkun hemm kundizzjonijiet stabbli għall-investiment fil-koġenerazzjoni, u l-fiduċja kontinwa tal-investitur, u għaldaqstant huwa xieraq li jiġu ffissati l-valuri armonizzati ta’ referenza għall-elettriku u s-sħana.

(7)

Wieħed mill-objettivi tad-Direttiva 2012/27/UE huwa li tippromwovi l-koġenerazzjoni sabiex tiġi ffrankata l-enerġija, u għalhekk jenħtieġ li jingħata inċentiv għall-modifika retroattiva ta’ unitajiet ta’ koġenerazzjoni aktar antiki sabiex tittejjeb l-effiċjenza enerġetika tagħhom. Sabiex jiġi pprovdut tali inċentiv, u f’konformità mar-rekwiżit li l-valuri ta’ referenza armonizzati tal-effiċjenza jkunu bbażati fuq il-prinċipji stabbiliti fil-punt (f) tal-Anness II tad-Direttiva 2012/27/UE, il-valuri ta’ referenza tal-effiċjenza għall-elettriku applikabbli għal unità ta’ koġenerazzjoni jenħtieġ li jiżdiedu mill-11-il sena wara s-sena ta’ kostruzzjoni tagħha skont ir-regoli fl-Artikolu 3(2) tar-Regolament Delegat (UE) 2015/2402.

(8)

Il-ġenerazzjoni termali qiegħda ssir dejjem aktar importanti għas-sigurtà, għar-reżiljenza u għall-flessibbiltà tas-sistema tal-enerġija. It-tħaddim ta’ xi sistemi ta’ koġenerazzjoni jista’ jinbidel biex jipprovdi sigurtà tal-provvista, flessibbiltà jew servizzi anċillari għas-sistema tal-elettriku, skont l-applikazzjoni. Ir-reviżjonijiet futuri tar-Regolament Delegat (UE) 2015/2402 għandhom jesploraw l-evoluzzjoni tal-livelli ta’ effiċjenza, peress li l-impjanti tal-enerġija termali jridu jadattaw l-operat tagħhom biex isiru aktar flessibbli b’reazzjoni għall-intermittenza tal-enerġija rinnovabbli u għall-elettrifikazzjoni min-naħa tad-domanda.

(9)	Għaldaqstant, ir-Regolament Delegat (UE) 2015/2402 jenħtieġ li jiġi emendat skont dan,

ADOTTAT DAN IR-REGOLAMENT:

Artikolu 1

Ir-Regolament Delegat (UE) 2015/2402 huwa emendat kif ġej:

L-Annessi I u II huma sostitwiti bit-test fl-Anness I ta’ dan ir-Regolament;

L-Anness IV huwa sostitwit bit-test fl-Anness II ta’ dan ir-Regolament.

Artikolu 2

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Għandu japplika mill-1 ta’ Jannar 2024.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, l-4 ta’ Lulju 2023.

Għall-Kummissjoni

Il-President

Ursula VON DER LEYEN

(1) ĠU L 315, 14.11.2012, p. 1.

(2) Ir-Regolament Delegat tal-Kummissjoni (UE) 2015/2402 tat-12 ta’ Ottubru 2015 li jirrevedi l-valuri ta’ referenza armonizzati tal-effiċjenza għall-produzzjoni separata tal-elettriku u s-sħana bl-applikazzjoni tad-Direttiva 2012/27/UE tal-Parlament Ewropew u tal-Kunsill u li tħassar id-Deċiżjoni ta’ Implimentazzjoni tal-Kummissjoni 2011/877/UE (ĠU L 333, 19.12.2015, p. 54).

ANNESS I

“ANNESS I

Valuri ta’ referenza armonizzati tal-effiċjenza għall-produzzjoni separata tal-elettriku

(imsemmija fl-Artikolu 1)

Fit-tabella li jmiss il-valuri ta’ referenza armonizzati tal-effiċjenza (%) għal produzzjoni separata tal-elettriku huma bbażati fuq valur kalorifiku nett u l-kundizzjonijiet standard atmosferiċi tal-ISO (temperatura ambjentali ta’ 15 °C, 1,013 bar, umdità relattiva ta’ 60 %):

	Kategorija	Sors ta’ enerġija	Sena ta’ kostruzzjoni
	Kategorija	Sors ta’ enerġija	Qabel l-2016	2016-2023	Wara l-2024
Solidi	S1	Faħam iebes inkluż antraċite, faħam bituminuż, faħam subbituminuż, kokk, semikokk, kokk petroliferu	44,2	44,2	53,0
	S2	Linjite, mattunelli tal-linjite, shale bituminuż	41,8	41,8	53,0
	S3	Pit, mattunelli tal-pit	39,0	39,0	53,0
	S4	Bijomassa niexfa inkluż injam u bijomassa solida oħra inkluż gerbub u mattunelli tal-injam, laqx tal-injam imnixxef, skart tal-injam nadif u xott, qxur tal-ġewż u għadam taż-żebbuġ u għadam ieħor.	33,0	37,0	37,0
	S5	Bijomassa solida oħra inkluż l-injam kollu mhux inkluż taħt S4 u likur iswed u kannella.	25,0	30,0	30,0
	S6	Skart muniċipali u industrijali (mhux rinnovabbli, ta’ oriġini mhux bijoloġika bħal plastik, lastiku u materjali sintetiċi oħra) u skart rinnovabbli/bijodegradabbli	25,0	25,0	25,0
Likwidi	L7	Żejt fjuwil tqil, żejt tal-gass/tad-diżil, prodotti oħrajn taż-żejt	44,2	44,2	53,0
	L8	Bijolikwidi inkluż bijometanol, bijoetanol, bijobutanol, bijodiżil, bijofjuwils oħra u l-likwidi elettroniċi kollha	44,2	44,2	44,2
	L9	Likwidi ta’ skart inkluż skart bijodegradabbli u mhux rinnovabbli (inkluż xaħam tad-dam, xaħam u residwi tal-ħbub tal-birrerija).	25,0	29,0	29,0
Gassużi	G10	Gass naturali, LPG, LNG u bijometan	52,5	53,0	53,0
	G11 A	Idroġenu negozjat (1)	44,2	44,2	53,0
	G11B	Gassijiet tar-raffinerija, gass sintetiku, idroġenu (prodott sekondarju), gassijiet elettroniċi (2)	44,2	44,2	44,2
	G12	Bijogass prodott minn diġestjoni anerobika, landfill u trattament tad-dranaġġ	42,0	42,0	42,0
	G13	Gass tal-forn tal-kokk, gass tal-forn tal-blast, gass tal-minjieri, u gassijiet irkuprati oħrajn (minbarra gass tar-raffinerija)	35,0	35,0	35,0
Oħrajn	O14 A	Sħana mormija, inkluż gassijiet tal-egżost mill-proċess, prodott li jirriżulta minn reazzjonijiet kimiċi eżotermiċi (temperatura tal-input > 200 °C)		30,0	30,0
	O14B	Sħana mormija, inkluż gassijiet tal-egżost mill-proċess, prodott li jirriżulta minn reazzjonijiet kimiċi eżotermiċi (temperatura tal-input < 200 °C)		30,0	20,0
	O15	Nukleari		33,0	33,0
	O16	Termali solari		30,0	30,0
	O17	Ġeotermali		19,5	19,5
	O18	Fjuwils oħra mhux imsemmija hawn fuq		30,0	30,0

ANNESS II

Valuri ta’ referenza armonizzati tal-effiċjenza għall-produzzjoni separata tas-sħana

(imsemmija fl-Artikolu 1)

Fit-tabella li jmiss il-valuri ta’ referenza armonizzati tal-effiċjenza (%) għal produzzjoni separata tas-sħana huma bbażati fuq valur kalorifiku nett u l-kundizzjonijiet standard atmosferiċi tal-ISO (temperatura ambjentali ta’ 15 °C, 1,013 bar, umdità relattiva ta’ 60 %):

Kategorija		Sors ta’ enerġija	Sena ta’ kostruzzjoni
			Qabel l-2016			2016-2023			Wara l-2024
			Ilma sħun	Fwar (3)	Użu dirett ta’ gassijiet tal-egżost (4)	Ilma sħun	Fwar (3)	Użu dirett ta’ gassijiet tal-egżost (4)	Ilma sħun	Fwar (3)	Użu dirett ta’ gassijiet tal-egżost (4)
Solidi	S1	Faħam iebes inkluż antraċite, faħam bituminuż, faħam subbituminuż, kokk, semikokk, kokk petroliferu	88	83	80	88	83	80	92	87	84
	S2	Linjite, mattunelli tal-linjite, shale bituminuż	86	81	78	86	81	78	92	87	84
	S3	Pit, mattunelli tal-pit	86	81	78	86	81	78	92	87	84
	S4	Bijomassa niexfa inkluż injam u bijomassa solida oħra inkluż gerbub u mattunelli tal-injam, laqx tal-injam imnixxef, skart tal-injam nadif u xott, qxur tal-ġewż u għadam taż-żebbuġ u għadam ieħor.	86	81	78	86	81	78	86	81	78
	S5	Bijomassa solida oħra inkluż l-injam kollu mhux inkluż taħt S4 u likur iswed u kannella.	80	75	72	80	75	72	80	75	72
	S6	Skart muniċipali u industrijali (mhux rinnovabbli, ta’ oriġini mhux bijoloġika bħal plastik, lastiku u materjali sintetiċi oħra) u skart rinnovabbli/bijodegradabbli	80	75	72	80	75	72	80	75	72
Likwidi	L7	Żejt fjuwil tqil, żejt tal-gass/tad-diżil, prodotti oħrajn taż-żejt	89	84	81	85	80	77	92	87	84
	L8	Bijolikwidi inkluż bijometanol, bijoetanol, bijobutanol, bijodiżil, bijofjuwils oħra u l-likwidi elettroniċi kollha	89	84	81	85	80	77	85	80	77
	L9	Likwidi ta’ skart inkluż skart bijodegradabbli u mhux rinnovabbli (inkluż xaħam tad-dam, xaħam u residwi tal-ħbub tal-birrerija).	80	75	72	75	70	67	75	70	67
Gassużi	G10	Gass naturali, LPG, LNG u bijometan	90	85	82	92	87	84	92	87	84
	G11 A	Idroġenu negozjat	89	84	81	90	85	82	92	87	84
	G11B	Gassijiet tar-raffinerija, gass sintetiku, idroġenu (prodott sekondarju), gassijiet elettroniċi	89	84	81	90	85	82	90	85	82
	G12	Bijogass prodott minn diġestjoni anerobika, landfill u trattament tad-dranaġġ	70	65	62	80	75	72	80	75	72
	G13	Gass tal-forn tal-kokk, gass tal-forn tal-blast, gass tal-minjieri, u gassijiet irkuprati oħrajn (minbarra gass tar-raffinerija)	80	75	72	80	75	72	80	75	72
Oħrajn	O14 A	Sħana mormija, inkluż gassijiet tal-egżost mill-proċess, prodott li jirriżulta minn reazzjonijiet kimiċi eżotermiċi (temperatura tal-input > 200 °C)	—	—	—	92	87	—	92	87	—
	O14B	Sħana mormija, inkluż gassijiet tal-egżost mill-proċess, prodott li jirriżulta minn reazzjonijiet kimiċi eżotermiċi (temperatura tal-input < 200 °C)	—	—	—	92	87	—	92	87	—
	O15	Nukleari	—	—	—	92	87	—	92	87	—
	O16	Termali solari	—	—	—	92	87	—	92	87	—
	O17	Ġeotermali	—	—	—	92	87	—	92	87	—
	O18	Fjuwils oħra mhux imsemmija hawn fuq	—	—	—	92	87	—	92	87	—

”

(1) Idroġenu mibjugħ mill-fornitur tiegħu lil operatur ta’ unità ta’ koġenerazzjoni.

(2) Il-gassijiet elettroniċi huma mifhuma bħala fjuwil sintetiku gassuż li joriġina mill-idroġenu rinnovabbli u mid-diossidu tal-karbonju maqbud jew minn sors ikkonċentrat, bħal gassijiet mit-tromba ta’ ċumnija f’sit industrijali, inkella mill-arja.

(3) Meta l-impjanti ma jikkunsidrawx ir-ritorn tal-kondensat fil-kalkoli tagħhom tal-effiċjenzi tas-sħana tas-CHP, il-valuri ta’ referenza tal-effiċjenza stabbiliti fit-tabella ta’ hawn fuq jenħtieġ li jiżdiedu b’ħames punti perċentwali.

(4) Meta t-temperatura tilħaq 250 °C jew aktar jenħtieġ li jintużaw il-valuri għal sħana diretta.

Livell ta’ vultaġġ ta’ konnessjoni	Fattur ta’ korrezzjoni (mhux fuq il-post)	Fattur ta’ korrezzjoni (fuq il-post)
≥ 345 kV	1	0,976
≥ 200 – < 345 kV	0,972	0,963
≥ 100 – < 200 kV	0,963	0,951
≥ 50 – < 100 kV	0,952	0,936
≥ 12 – < 50 kV	0,935	0,914
≥ 0,45 – < 12 kV	0,918	0,891
< 0,45 kV	0,888	0,851