(1)

L-Artikolu 1 tar-Regolament (UE) 2020/2170 tal-Parlament Ewropew u tal-Kunsill (2) jipprevedi li l-merkanzija importata minn barra l-Unjoni għandha tkun eliġibbli għal trattament skont il-kwoti tariffarji tal-importazzjoni tal-Unjoni jew kwoti oħra tal-importazzjoni biss jekk dik il-merkanzija tiġi rilaxxata għaċ-ċirkolazzjoni libera fit-territorji elenkati fih. Din id-dispożizzjoni tindirizza r-riskji għall-funzjonament kif suppost tas-suq intern tal-Unjoni u għall-integrità tal-Politika Kummerċjali Komuni li jirriżultaw miċ-ċirkomvenzjoni possibbli tal-kwoti tariffarji tal-Unjoni jew ta’ kwoti oħra tal-importazzjoni. It-territorji stabbiliti fl-Artikolu 1 ta' dak ir-Regolament ma jinkludux l-Irlanda ta’ Fuq.

(2)

Il-Ftehim dwar il-Kummerċ u l-Kooperazzjoni (3) bejn ir-Renju Unit u l-Unjoni Ewropea u l-Komunità Ewropea tal-Enerġija Atomika, minn naħa waħda, u r-Renju Unit tal-Gran Brittanja u l-Irlanda ta’ Fuq, min-naħa l-oħra (il-“Ftehim dwar il-Kummerċ u l-Kooperazzjoni”) jipprevedi l-ftuħ mill-Unjoni ta’ kwoti fir-rigward tal-importazzjonijiet fl-Unjoni ta’ ċerti prodotti li joriġinaw mir-Renju Unit. Barra minn hekk, il-Ftehim dwar il-Kummerċ u l-Kooperazzjon jagħti lill-Unjoni d-dritt li tintroduċi kwoti tariffarji jew kwoti oħra tal-importazzjonifir-rigward tal-importazzjonijiet ta’ merkanzija li toriġina mir-Renju Unit taħt ċerti ċirkostanzi, inkluż bħala parti mill-applikazzjoni tal-miżuri multilaterali ta’ salvagwardja f’konformità mal-Ftehim tad-WTO. Għalhekk, huwa neċessarju li jiġi ċċarat jekk il-merkanzija li toriġina mir-Renju Unit u rilaxxata għaċ-ċirkolazzjoni libera fl-Irlanda ta’ Fuq hijiex eliġibbli għal trattament skont dawk il-kwoti tariffarji jew kwoti oħra tal-importazzjoni.

(3)

Ir-Renju Unit huwa marbut bl-arranġamenti stipulati fil-Protokoll dwar l-Irlanda/l-Irlanda ta’ Fuq (il-“Protokoll”) tal-Ftehim dwar il-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika (4) (il-“Ftehim dwar il-Ħruġ”). Għalhekk, ir-relazzjoni legali bejn l-Unjoni u r-Renju Unit fir-rigward tal-merkanzija li toriġina mir-Renju Unit u rilaxxata għaċ-ċirkolazzjoni libera fl-Irlanda ta’ Fuq hija fundamentalment differenti minn dik bejn l-Unjoni u kwalunkwe pajjiż terz ieħor fir-rigward tal-merkanzija li toriġina f’tali pajjiż terz u rilaxxata għaċ-ċirkolazzjoni libera fl-Irlanda ta’ Fuq.

(4)

Ir-Renju Unit ipprovda evidenza li turi li ċerti prodotti tal-azzar li joriġinaw mir-Renju Unit li bħalissa huma soġġetti għall-miżuri ta’ salvagwardja skont ir-Regolament ta’ Implimentazzjoni tal-Kummissjoni (UE) 2019/159 (5) (il-“prodotti kkonċernati”) ġew ittrasferiti fi kwantitajiet sinifikanti lejn l-Irlanda ta’ Fuq minn partijiet oħra tar-Renju Unit. Sabiex tiġi żgurata l-vijabbiltà ekonomika ta’ dawk it-trasferimenti u fid-dawl taċ-ċirkostanzi speċifiċi fl-Irlanda ta’ Fuq, huwa xieraq li l-prodotti kkonċernati jitħallew jibbenefikaw mill-kwoti tariffarji tal-Unjoni rilevanti meta jiġu rilaxxati għaċ-ċirkolazzjoni libera fl-Irlanda ta’ Fuq.

(5)

Sabiex jiġi limitat ir-riskju ta’ ċirkomvenzjoni tal-kwoti tariffarji tal-Unjoni applikabbli għall-prodotti kkonċernati mill-importazzjonijiet tal-istess prodotti li joriġinaw minn pajjiżi oħra, meta tali prodotti jiġu rilaxxati għaċ-ċirkolazzjoni libera fl-Irlanda ta’ Fuq, jenħtieġ li l-prodotti kkonċernati jiġu kkonsenjati direttament minn partijiet oħra tar-Renju Unit.

(6)

Barra minn hekk, ir-Renju Unit ħa impenn li jieħu l-miżuri neċessarji, f’konformità mal-Protokoll, biex jiżgura li t-trasferimenti tal-prodotti kkonċernati bl-użu tal-kwoti tariffarji tal-Unjoni jiġu kkalkolati ma’ dawn il-kwoti, malli tali prodotti jiġu rilaxxati għaċ-ċirkolazzjoni libera fl-Irlanda ta’ Fuq, daqslikieku dik il-merkanzija ġiet importata fl-Unjoni.

(7)

Peress li l-ħtieġa għall-importazzjoni fl-Irlanda ta’ Fuq tal-prodotti kkonċernati tista’ tvarja maż-żmien, jenħtieġ li tiġi ddelegata lill-Kummissjoni s-setgħa li jiġu adottati atti skont l-Artikolu 290 tat-Trattat dwar il-Funzjonament tal-Unjoni Ewropea sabiex tiġi aġġustata l-lista tal-prodotti kkonċernati. Huwa partikolarment importanti li l-Kummissjoni twettaq konsultazzjonijiet xierqa matul ix-xogħol tagħha ta’ tħejjija, anki fil-livell ta’ esperti, u li dawk il-konsultazzjonijiet jiġu mwettqa f’konformità mal-prinċipji stipulati fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet (6) . B’mod partikolari, biex tiġi żgurata parteċipazzjoni ugwali fit-tħejjija ta’ atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċievuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta’ atti delegati.

(8)

Għaldaqstant, jenħtieġ li r-Regolament (UE) 2020/2170 jiġi emendat skont dan.

(9)

Bis-saħħa tal-Artikolu 5(3) u (4) tal-Protokoll, flimkien mal-Artikolu 13(3) tiegħu, dan ir-Regolament japplika wkoll għar-Renju Unit u fih fir-rigward tal-Irlanda ta’ Fuq.

(10)

Sabiex jiġi evitat kwalunkwe tfixkil potenzjali fit-trasferimenti tal-prodotti kkonċernati minn partijiet oħra tar-Renju Unit lejn l-Irlanda ta’ Fuq, jenħtieġ li dan ir-Regolament jidħol fis-seħħ malajr kemm jista’ jkun,

(1)

Iċ-Ċentru Ewropew għall-Monitoraġġ tad-Droga u d-Dipendenza fuq id-Droga (l-“EMCDDA”) ġie stabbilit bir-Regolament tal-Kunsill (KEE) Nru 302/93 (3). Dak ir-Regolament tfassal mill-ġdid fl-2006 bir-Regolament (KE) Nru 1920/2006 tal-Parlament Ewropew u tal-Kunsill (4).

(2)

L-EMCDDA ġie stabbilit biex jipprovdi lill-Unjoni, lill-Istati Membri u lill-pajjiżi terzi parteċipanti, informazzjoni fattwali, oġġettiva, affidabbli u komparabbli dwar id-droga u d-dipendenza fuq id-droga, u l-konsegwenzi tagħhom fil-livell Ewropew sabiex jgħinhom jagħtu ħarsa ġenerali lejn dik l-informazzjoni biex jitnebbaħ it-tfassil tal-politika u jiġu ggwidati inizjattivi maħsuba biex jindirizzaw id-drogi u, b’hekk, tali inizjattivi jingħataw valur miżjud meta, fl-oqsma ta’ kompetenza rispettivi tagħhom, huma jieħdu miżuri jew jiddeċiedu dwar azzjoni biex jindirizzaw il-fenomenu tad-drogi. Il-ħolqien u l-funzjonament tal-EMCDDA tejbu b’mod ċar id-disponibbiltà ta’ informazzjoni dwar id-drogi u d-dipendenza fuq id-droga, u l-konsegwenzi tagħhom, madwar l-Unjoni u internazzjonalment.

(3)

Filwaqt li l-objettiv ġenerali tiegħu għadu validu u jenħtieġ li jinżamm, ir-Regolament (KE) Nru 1920/2006 ma għadux jipprovdi qafas adegwat għall-indirizzar tal-isfidi attwali u futuri marbuta mad-droga. Għalhekk jenħtieġ li l-mandat tal-EMCDDA jiġi rivedut, sabiex, fost affarijiet oħra, jiġi sostitwit u msaħħaħ. L-EMCDDA jenħtieġ li jiġi msemmi l-Aġenzija tal-Unjoni Ewropea dwar id-Drogi (EUDA) (l-“Aġenzija”). Billi huma meħtieġa emendi sostanzjali għar-Regolament (KE) Nru 1920/2006 biex jiġi akkomodat l-approċċ komuni għall-aġenziji deċentralizzati tal-Unjoni adottat fid-19 ta’ Lulju 2012 mill-Parlament Ewropew, il-Kunsill u l-Kummissjoni u biex jitqiesu l-iżviluppi tal-fenomenu tad-droga, fl-interess taċ-ċarezza u l-effiċjenza, jenħtieġ li dak ir-Regolament jitħassar u jiġi sostitwit b’dan ir-Regolament.

(4)

L-enfasi ewlenija tar-Regolament (KE) Nru 1920/2006 kienet fuq kwistjonijiet relatati mas-saħħa. Filwaqt li huwa essenzjali li jinżamm dak il-fokus, peress li kwistjonijiet relatati mas-saħħa u l-provvista rigward il-fenomenu tad-droga huma intrinsikament marbuta, huwa wkoll meħtieġ li tiġi indirizzata l-provvista tad-drogi sabiex titnaqqas id-disponibbiltà tad-drogi fl-Unjoni u titrażżan id-domanda għad-drogi u, b’hekk, jingħata kontribut biex jiġi indirizzat it-tħassib relatat dwar is-sikurezza u s-sigurtà. Sabiex tipprovdi data u analiżi sinifikanti fattwali, oġġettivi, affidabbli, komparabbli u għall-Unjoni kollha, jenħtieġ li l-Aġenzija tindirizza l-fenomenu tad-droga filwaqt li tieħu approċċ ibbażat fuq l-evidenza, integrat, bilanċjat u multidixxiplinari għad-drogi, l-użu tad-drogi, id-disturbi u d-dipendenzi marbuta mal-użu tad-drogi, il-prevenzjoni, it-trattament, il-kura, it-tnaqqis tar-riskju u tal-ħsara, ir-riabilitazzjoni, ir-riintegrazzjoni fis-soċjetà u l-irkupru, is-swieq u l-provvista tad-droga, inkluż il-produzzjoni u t-traffikar illeċiti, u kwistjonijiet rilevanti oħra relatati mad-drogi u l-konsegwenzi tagħhom. L-approċċ tal-Aġenzija għandu jinkorpora perspettivi marbuta mad-drittijiet tal-bniedem, il-ġeneru u l-ugwaljanza bejn il-ġeneri, l-età, is-saħħa, u l-ekwità tas-saħħa, u perspettivi soċjali.

(5)

Jenħtieġ li l-ħidma tal-Aġenzija titwettaq b’kunsiderazzjoni xierqa tas-setgħat rispettivi tal-Unjoni u tal-Istati Membri tagħha fil-qasam tad-drogi. Jenħtieġ li din tkopri d-diversi aspetti tal-fenomenu tad-droga u s-soluzzjonijiet applikati. B’mod partikolari, jenħtieġ li l-Aġenzija tikkunsidra l-aspetti kollha relatati mal-protezzjoni u t-titjib tas-saħħa, fosthom l-aspetti fiżiċi u mentali, u l-impatt potenzjali fuq is-saħħa pubblika. Jenħtieġ li l-Aġenzija tħares ukoll lejn aspetti soċjali inkluż kunsiderazzjonijiet marbuta mal-istigmatizzazzjoni, il-marġinalizzazzjoni u r-riintegrazzjoni ta’ persuni li jużaw id-drogi. Meta tagħmel dan, jenħtieġ li l-Aġenzija tkun iggwidata minn dokumenti strateġiċi tal-Unjoni marbutin mad-droga.

(6)

Fit-twettiq tal-attivitajiet tagħha, jenħtieġ li l-Aġenzija tikkoopera ma’ korpi, uffiċċji u aġenziji rilevanti oħrajn tal-Unjoni fi ħdan il-mandati rispettivi tagħhom, u jenħtieġ li jitqiesu l-attivitajiet tagħhom sabiex tiġi evitata d-duplikazzjoni. B’mod partikolari, b’kunsiderazzjoni xierqa għall-mandati rispettivi tagħhom, jenħtieġ li l-Aġenzija tikkoopera mal-Aġenzija tal-Unjoni Ewropea għall-Kooperazzjoni fl-Infurzar tal-Liġi (Europol), stabbilita mir-Regolament (UE) 2016/794 tal-Parlament Ewropew u tal-Kunsill (5), sabiex tiżgura l-ġbir ta’ data u l-monitoraġġ tax-xejriet dwar il-provvista tad-drogi, inkluż il-produzzjoni u t-traffikar illeċiti u reati oħra relatati, dwar l-użu ta’ teknoloġiji ġodda u dwar sustanzi psikoattivi ġodda. Jenħtieġ li l-Aġenzija tikkoopera wkoll fuq livell internazzjonali mal-awtoritajiet u l-korpi rilevanti f’pajjiżi terzi, b’mod partikolari fil-pajjiżi kandidati, u b’appoġġ tal-azzjoni tal-Unjoni u tal-Istati Membri fil-livell tan-Nazzjonijiet Uniti. Jeħtieġ li tali kooperazzjoni tikkonforma man-normi dwar id-drittijiet tal-bniedem.

(7)

Sabiex tinkiseb effiċjenza massima fl-indirizzar tal-fenomenu tad-drogi, jenħtieġ li l-Aġenzija jkollha skambji mal-partijiet ikkonċernati rilevanti u b’mod partikolari mal-komunità xjentifika, billi tinkludi l-qasam akkademiku, u organizzazzjonijiet tas-soċjetà ċivili, fosthom organizzazzjonijiet ta’ persuni li jużaw id-drogi u ta’ komunitajiet milquta mill-konsum u l-bejgħ ta’ drogi jew kriminalità relatata mad-droga. Minħabba r-rilevanza partikolari tal-esperjenza tal-organizzazzjonijiet tas-soċjetà ċivili fil-qasam ta’ kompetenza tal-Aġenzija, jenħtieġ li l-Aġenzija żżomm kooperazzjoni dwar l-attivitajiet tagħha mal-organizzazzjonijiet tas-soċjetà ċivili, bħal dawk attivi fil-gruppi ta’ esperti rilevanti tal-Kummissjoni dwar id-drogi magħmula minn organizzazzjonijiet tas-soċjetà ċivili. L-Aġenzija għandha tiddedika l-mezzi meħtieġa biex tikkonsulta, taqsam informazzjoni u tiġbor l-għarfien ma’ dawn l-organizzazzjonijiet, inkluż fil-qasam ta’ sustanzi psikoattivi ġodda. Fejn xieraq, jenħtieġ li l-Aġenzija torganizza konsultazzjonijiet dedikati dwar is-suġġetti fi ħdan il-mandat tagħha.

(8)

Bil-ħsieb li xxerred informazzjoni affidabbli dwar id-drogi u s-sitwazzjoni tad-drogi, jenħtieġ li l-Aġenzija tinvolvi ruħha f’attivitajiet ta’ komunikazzjoni dwar suġġetti fi ħdan il-mandat tagħha. Madankollu, il-komunikazzjoni lill-pubbliku ġenerali fil-qasam tad-drogi xi drabi jista’ jkollha konsegwenzi negattivi mhux intenzjonati. Bħala parti mill-attivitajiet ta’ komunikazzjoni tagħha u fejn xieraq, għalhekk jenħtieġ li l-Aġenzija tqis li xxerred ir-rapporti tagħha, fosthom rapporti inizjali u rapporti ta’ valutazzjoni tar-riskju dwar sustanzi psikoattivi ġodda, mal-komunità xjentifika u organizzazzjonijiet tas-soċjetà ċivili bil-ħsieb li tiġi minimizzata l-ħsara possibbli relatata mad-droga. Fejn l-Aġenzija ma titħalliex ixxerred ir-rapport tagħha, b’mod partikolari minħabba l-preżenza ta’ informazzjoni klassifikata jew informazzjoni sensittiva mhux klassifikata, tista’ tikkunsidra li tippubblika sommarji ta’ dawk ir-rapporti bil-ħsieb li timminimizza l-ħsara possibbli relatata mad-droga.

(9)

Jenħtieġ li fil-ħidma tagħha, l-Aġenzija tagħti kunsiderazzjoni mistħoqqa lill-użu ta’ diversi sustanzi minħabba li tali użu isir dejjem aktar komuni.

(10)

Jenħtieġ li l-Aġenzija tiżviluppa l-attivitajiet tagħha madwar tliet oqsma ta’ kompetenza ewlenin, jiġifieri l-monitoraġġ, li jwassal għal politiki informati aħjar; tħejjija, li twassal għal azzjonijiet informati aħjar; u l-iżvilupp tal-kompetenza, li jwassal għal reazzjonijiet aktar b’saħħithom mill-Unjoni u mill-Istati Membri għall-fenomenu tad-drogi.

(11)

Jenħtieġ li l-ġbir, l-analiżi u t-tixrid tad-data jkomplu jkunu l-kompitu ewlieni tal-Aġenzija. Meta tiġbor, tanalizza jew ixxerred id-data, jenħtieġ li l-Aġenzija tikkonforma mal-qafas legali dwar l-ipproċessar tad-data personali u jenħtieġ li ma xxerred jew tibgħat ebda data li tippermetti li jiġu identifikati individwi jew gruppi żgħar ta’ individwi. Id-data standard tinġabar permezz tal-punti fokali nazzjonali, li jenħtieġ li jibqgħu il-fornituri primarji tad-data għall-Aġenzija. L-Aġenzija tista’ tuża wkoll sorsi addizzjonali u torganizza laqgħat ta’ esperti, inkluż laqgħat virtwali. Barra minn hekk, sorsi tad-data, eqreb lejn il-ħin reali, qed isiru dejjem aktar disponibbli permezz ta’ metodi innovattivi għall-ġbir tad-data. Għalhekk, jenħtieġ li l-Aġenzija jkollha aċċess għad-data rilevanti disponibbli biex tikseb stampa olistika tal-fenomenu tad-droga fl-Unjoni u l-fatturi esterni li jinfluwenzaw dan. Bil-ħsieb li jiġi żgurat li kull punt fokali nazzjonali jibqa’ infurmat dwar is-sitwazzjoni fl-Istat Membru tiegħu, jenħtieġ li jiġi nfurmat fuq bażi regolari dwar id-data li tikkonċerna lill-Istat Membru tiegħu li hija miġbura minn sorsi addizzjonali ta’ informazzjoni u dwar l-attivitajiet tan-network ta’ laboratorji forensiċi u tossikoloġiċi stabbiliti minn dan ir-Regolament.

(12)

Il-punti fokali nazzjonali huma atturi ewlenin fis-sistema tal-Unjoni għall-monitoraġġ u r-rapportar dwar id-droga. Dawn jiġbru l-informazzjoni u jipproduċu data komparabbli u xjentifikament soda dwar is-sitwazzjoni nazzjonali tad-droga, li tikkontribwixxi għall-monitoraġġ tas-sitwazzjoni madwar l-Unjoni. Il-punti fokali nazzjonali huma wkoll kruċjali fil-proċess tat-titjib tal-metodoloġiji u l-għodod tal-ġbir tad-data u tal-iżvilupp ta’ linji gwida rilevanti għall-implimentazzjoni tagħhom. Barra minn hekk, il-punti fokali nazzjonali jipparteċipaw f’sistema ta’ twissija bikrija u jirrapportaw dwar xejriet ġodda fl-użu ta’ sustanzi psikoattivi eżistenti. Għalhekk huwa essenzjali li l-Aġenzija u l-punti fokali nazzjonali jkollhom relazzjoni ta’ tisħiħ reċiproku. Jenħtieġ li r-rekwiżiti tad-data tal-Aġenzija jkunu riflessi fil-punti fokali nazzjonali. Jenħtieġ li l-punti fokali nazzjonali jingħataw is-setgħa fi ħdan l-Istati Membri li jirċievu d-data rilevanti kollha mill-awtoritajiet nazzjonali differenti. Filwaqt li tiġi evitata kwalunkwe miżura ta’ armonizzazzjoni u d-deċiżjonijiet dwar il-governanza, l-istruttura jew il-kompiti bażiċi tal-punti fokali nazzjonali fir-rigward ta’ awtoritajiet kompetenti nazzjonali oħra jitħallew f’idejn l-Istati Membri, f’konformità mat-Trattati, jenħtieġ li l-mandat tal-Aġenzija jippermetti s-simplifikazzjoni tal-ġbir tad-data fl-Istati Membri kemm jista’ jkun sabiex jiġu evitati r-rapportar doppju u d-duplikazzjoni tal-isforzi.

(13)

Huwa neċessarju li jiġu stabbiliti l-pedamenti ta’ relazzjoni ta’ fiduċja reċiproka u djalogu kontinwu bejn l-Aġenzija u l-punti fokali nazzjonali, abbażi ta’ mekkaniżmu ċar u effettiv li jaħdem u sett ta’ regoli. Għalhekk jenħtieġ li l-Aġenzija tingħata s-setgħa li tappoġġa finanzjarjament lill-punti fokali nazzjonali u tikkontribwixxi għall-funzjonament effettiv tagħhom, inkluż billi tipprovdi valutazzjoni ta’ kull punt fokali nazzjonali relatata direttament mal-kontribut tiegħu għal azzjoni koordinata tal-Unjoni fil-qasam tad-drogi.

(14)

Bl-għan li jappoġġaw azzjoni effettiva tal-Unjoni fil-qasam tad-drogi u jikkontribwixxu għall-ħidma tal-Aġenzija, jenħtieġ li l-punti fokali nazzjonali, inter alia, jaqdu rwol ta’ koordinazzjoni f’attivitajiet relatati mal-iżgurar ta’ ġbir u monitoraġġ koerenti ta’ data relatata mad-drogi, il-komunikazzjoni mal-Aġenzija u l-promozzjoni ta’ teħid ta’ deċiżjonijiet ibbażat fuq l-evidenza, l-iżgurar ta’ perspettiva nazzjonali transsettorjali u komprensiva tas-sitwazzjoni tad-droga, inkluż kull informazzjoni rilevanti dwar xejriet u sfidi ġodda u l-kontribut għall-ħolqien ta’ indikaturi rilevanti. Barra minn hekk, u f’konformità mal-kompetenza nazzjonali, il-punti fokali nazzjonali għandhom rwol ewlieni fil-promozzjoni u l-appoġġ tat-teħid ta’ deċiżjonijiet ibbażat fuq l-evidenza, l-appoġġ tas-sistemi ta’ kollaborazzjoni, u l-valutazzjoni tal-ħtiġijiet ta’ informazzjoni tal-partijiet ikkonċernati rilevanti u l-ġbir ta’ inventarju aġġornat tas-sorsi nazzjonali ta’ informazzjoni dwar id-drogi.

(15)

Sabiex tiffaċilita u tistruttura l-ġbir tad-data u l-iskambju ta’ informazzjoni, kemm kwalitattivi kif ukoll kwantitattivi, u biex tappoġġa l-ħolqien ta’ sistema ta’ monitoraġġ integrata u interoperabbli li tippermetti monitoraġġ f’ħin reali, jenħtieġ li l-Aġenzija tiżviluppa u tapplika s-soluzzjonijiet diġitali xierqa meħtieġa għat-twettiq tal-kompiti tagħha.

(16)

Sabiex l-Aġenzija tkun tista’ tagħmel użu aħjar mill-informazzjoni disponibbli għaliha, pereżempju, biex tieħu miżuri aktar proattivi bħall-valutazzjonijiet tat-theddid, ir-rapporti strateġiċi tal-intelligence u t-twissijiet, u sabiex tittejjeb it-tħejjija tal-Unjoni għal żviluppi futuri, jenħtieġ li tissaħħaħ il-kapaċità ta’ monitoraġġ u analitika tal-Aġenzija meta mqabbla ma’ dik tal-EMCDDA.

(17)

Sabiex tittejjeb it-tħejjija tal-Unjoni, huwa meħtieġ li jkun hemm stampa olistika tal-iżviluppi futuri potenzjali tal-fenomenu tad-droga. Biex tħejji lilha nnifisha u tgħammar aħjar lil dawk li jfasslu l-politika għal tali żviluppi futuri, jenħtieġ li l-Aġenzija twettaq eżerċizzji ta’ tbassir regolari, filwaqt li tqis il-megatendenzi, jiġifieri l-ixprunaturi fit-tul li huma osservabbli bħalissa u li x’aktarx ikollhom influwenza sinifikanti fuq il-futur, bl-għan li jiġu identifikati sfidi u opportunitajiet ġodda biex jirrispondu għall-problemi tad-droga.

(18)

Il-fenomenu tad-drogi qed isir dejjem aktar iffaċilitat mit-teknoloġija, kif ntwera matul il-pandemija tal-COVID-19 fejn ġiet osservata adozzjoni akbar ta’ teknoloġiji ġodda biex tiġi ffaċilitata d-distribuzzjoni tad-droga. Huwa stmat li madwar żewġ terzi tal-offerti fis-swieq tad-darknet huma relatati mad-droga. In-negozjar tad-droga juża pjattaformi differenti, inkluż networks tal-media soċjali u applikazzjonijiet mobbli. Dak l-iżvilupp huwa rifless fir-reazzjonijiet għall-fenomenu tad-drogi, b’użu akbar ta’ komunikazzjonijiet bl-Internet u interventi online, inkluż applikazzjonijiet mobbli u interventi tas-saħħa elettronika. L-Aġenzija, flimkien ma’ korpi, uffiċċji u aġenziji rilevanti oħrajn tal-Unjoni u filwaqt li tevita d-duplikazzjoni tal-isforzi, jenħtieġ li timmonitorja tali żviluppi bħala parti mill-approċċ olistiku tagħha għall-fenomenu tad-droga.

(19)

Is-sustanzi psikoattivi ġodda li joħolqu riskji soċjali u għas-saħħa pubblika madwar l-Unjoni jenħtieġ li jiġu indirizzati b’mod adegwat. Għalhekk, huwa meħtieġ li jiġu mmonitorjati s-sustanzi psikoattivi ġodda u, sabiex ikun possibbli rispons rapidu, li tinżamm is-sistema ta’ twissija bikrija stabbilita taħt ir-Regolament (KE) Nru 1920/2006. Id-dispożizzjonijiet ta’ dak ir-Regolament relatati mal-iskambju ta’ informazzjoni dwar sustanzi psikoattivi ġodda u s-sistema ta’ twissija bikrija għalihom, inkluż ir-rapport inizjali u l-valutazzjonijiet tar-riskju ta’ sustanzi psikoattivi ġodda, ġew emendati reċentement u jenħtieġ li jibqgħu l-istess f’dan ir-Regolament.

(20)

Abbażi tal-monitoraġġ imsaħħaħ mill-Aġenzija u l-esperjenza miksuba fil-valutazzjoni tar-riskju ta’ sustanzi psikoattivi ġodda, jenħtieġ li l-Aġenzija tiżviluppa kapaċitajiet ġenerali ta’ valutazzjoni tat-theddid għas-saħħa u s-sigurtà. Kapaċità akbar biex tidentifika b’mod proattiv u malajr theddid ġdid u biex tinforma l-iżvilupp ta’ kontromiżuri hija meħtieġa b’mod urġenti, minħabba li n-natura dinamika attwali tal-fenomenu modern tad-droga tfisser li l-isfidi relatati jistgħu jinfirxu malajr bejn il-fruntieri.

(21)

Billi s-sustanzi perikolużi u ċerti xejriet ta’ konsum jistgħu jwasslu għal ħsara għas-saħħa, jenħtieġ li l-Aġenzija tkun tista’ toħroġ twissijiet li jikkomplementaw is-sistemi ta’ twissija nazzjonali rilevanti u li jkunu mingħajr preġudizzju għalihom. Sabiex tappoġġa dik il-funzjoni, jenħtieġ li l-Aġenzija tiżviluppa sistema Ewropea ta’ twissija dwar id-droga, li tkun aċċessibbli mill-awtoritajiet nazzjonali. Jenħtieġ li dik is-sistema tiffaċilita l-iskambju rapidu ta’ informazzjoni li tista’ tkun teħtieġ azzjonijiet rapidi biex jiġu ssalvagwardjati s-saħħa, aspetti soċjali, is-sikurezza u s-sigurtà. Jeħtieġ li l-Aġenzija, taħt il-kondizzjonijiet stipulati f’dan ir-Regolament, tkun tista’ tiżviluppa sistema ta’ twissija biex l-informazzjoni dwar riskji identifikati tkun disponibbli għal persuni li jużaw jew potenzjalment jużaw drogi speċifiċi.

(22)

Il-prekursuri tad-droga huma sustanzi meħtieġa għall-produzzjoni ta’ drogi bħall-amfetamini, il-kokaina u l-eroina. Hekk kif il-produzzjoni illegali tad-droga fl-Unjoni qed tiżdied, il-prevenzjoni tad-devjazzjoni u t-traffikar tal-prekursuri tad-droga minn mezzi legali għall-produzzjoni illegali tad-droga jenħtieġ li tissaħħaħ. Biex tappoġġa dak l-isforz, jenħtieġ li l-Aġenzija jkollha rwol li timmonitorja d-devjazzjoni u t-traffikar tal-prekursuri tad-droga u li tassisti lill-Kummissjoni fl-implimentazzjoni tal-liġi tal-Unjoni dwar il-prekursuri tad-droga.

(23)

Billi hemm ħtieġa dejjem akbar għal data forensika u tossikoloġika u għarfien espert speċjalizzat, flimkien ma’ ħtieġa għal koordinazzjoni aħjar bejn il-laboratorji fl-Istati Membri, huwa meħtieġ li jiġi stabbilit network ta’ laboratorji forensiċi u tossikoloġiċi b’għarfien fil-qasam tad-drogi u l-ħsarat relatati mad-droga. Jenħtieġ li dak in-network jippermetti li l-Aġenzija jkollha aċċess għal informazzjoni rilevanti, iżżid il-kapaċitajiet tal-Aġenzija f’dak il-qasam u tappoġġa l-iskambju ta’ għarfien bejn il-laboratorji rilevanti fl-Istati Membri, mingħajr ma l-Aġenzija ġġarrab l-ispejjeż għoljin biex toħloq u tmexxi l-laboratorju tagħha stess.

(24)

Jenħtieġ li n-network ta’ laboratorji forensiċi u tossikoloġiċi jkun rappreżentattiv tal-Istati Membri fis-sens li jenħtieġ li kull wieħed minnhom ikun permess jaħtar sa tliet laboratorji fin-network, li jkopru l-għarfien espert tossikoloġiku u forensiku. Sabiex tiġi żgurata l-usa’ kopertura possibbli, jenħtieġ li l-esperti minn laboratorji oħrajn rilevanti għall-ħidma tal-Aġenzija, inkluż min-Network Ewropew tal-Laboratorji Doganali, jingħataw ukoll il-possibbiltà li jipparteċipaw fin-network. Tali kooperazzjoni tippermetti lil-laboratorji kollha involuti jitgħallmu minn xulxin f’oqsma differenti, jappoġġaw l-iskambju ta’ informazzjoni bejn laboratorji rilevanti u jnaqqsu l-ispejjeż għal laboratorji individwali.

(25)

Biex tkabbar l-għarfien fil-qasam kopert mill-mandat tal-Aġenzija u tappoġġa lill-Istati Membri, jenħtieġ li l-Aġenzija tidentifika u tiffinanzja proġetti rilevanti, bħall-iżvilupp ta’ standards ta’ referenza dwar drogi ġodda, l-elaborazzjoni ta’ studji tossikoloġiċi jew farmakoloġiċi, l-implimentazzjoni ta’ approċċi innovattivi għar-riċerka, u t-tfassil ta’ profili tad-droga. Jenħtieġ li l-proġetti li l-Aġenzija tiffinanzja jiġu inklużi fil-programm konsolidat ta’ ħidma annwali tal-Aġenzija u jsiru pubbliċi.

(26)

L-Aġenzija ser tkun f’pożizzjoni li taċċessa d-data u tikseb l-esperjenza xjentifika meħtieġa biex tiżviluppa u tippromwovi interventi bbażati fuq l-evidenza u l-aħjar prattiki u sabiex tqajjem kuxjenza dwar l-effetti negattivi tad-drogi, il-prevenzjoni, il-miżuri għat-tnaqqis tar-riskju u l-ħsara, it-trattament, il-kura, ir-riabilitazzjoni u l-irkupru, u, fejn rilevanti, tieħu approċċ sensittiv għall-ġeneru u tqis id-dimensjoni tal-età. Jenħtieġ li -Aġenzija tippromwovi l-implimentazzjoni u l-aġġornament tal-istandards ta’ kwalità eżistenti għall-prevenzjoni tad-drogi (Standards Ewropej ta’ Kwalità għall-Prevenzjoni tad-Droga) jew ta’ kurrikulu li jipprovdi lil dawk li jieħdu d-deċiżjonijiet u lil dawk li jfasslu l-politika bl-għarfien dwar l-aktar interventi u approċċi effettivi ta’ prevenzjoni bbażati fuq l-evidenza (Kurrikulu ta’ Prevenzjoni tal-Unjoni Ewropea), inkluż kif jintlaħqu popolazzjonijiet ta’ riskju għoli.

(27)

Minħabba l-perspettiva tagħha fl-Unjoni kollha, jenħtieġ li l-Aġenzija tkun tista’ tivvaluta l-miżuri u t-taħriġ nazzjonali, pereżempju dwar il-prevenzjoni, inkluż il-prevenzjoni sensittiva għal kwistjonijiet ta’ ġeneru u adatta għall-età, it-trattament, it-tnaqqis tal-ħsara, l-irkupru u miżuri relatati oħrajn, sabiex jiġi determinat jekk dawn jirriflettux l-aħħar sitwazzjoni xjentifika attwali u urewx li huma effettivi. Valutazzjoni pożittiva tal-miżuri nazzjonali tista’ sservi bħala tikketta ta’ kwalità.

(28)

Meta jitqies li l-Aġenzija ser tkun f’pożizzjoni unika fil-livell tal-Unjoni li tippermettilha tqabbel id-data u l-aħjar prattiki, jenħtieġ li l-Aġenzija tkun tista’ toffri appoġġ, inkluż, fejn meħtieġa tagħmel dan mill-Istati Membri, biex tgħin fl-evalwazzjoni u l-abbozzar ta’ strateġiji nazzjonali dwar id-droga b’mod aktar strutturat madwar l-Istati Membri. Barra minn hekk, jenħtieġ li r-rwol tal-Aġenzija fl-għoti ta’ taħriġ u appoġġ lill-Istati Membri fl-implimentazzjoni ta’ standards ta’ kwalità u prattiki tajbin jissaħħaħ fid-dawl tal-għarfien espert li ser tiżviluppa f’dawk l-oqsma.

(29)

Jenħtieġ li l-kooperazzjoni internazzjonali tkun parti mill-kompiti ewlenin tal-Aġenzija b’responsabbiltajiet stabbiliti f’termini ċari sabiex tkun tista’ tinvolvi ruħha bis-sħiħ f’tali attivitajiet u twieġeb għal talbiet minn organizzazzjonijiet internazzjonali u korpi oħrajn u minn pajjiżi terzi. Jenħtieġ li l-Aġenzija tkun tista’ toffri għodod xjentifiċi u bbażati fuq l-evidenza adegwati għall-iżvilupp u l-implimentazzjoni tad-dimensjoni esterna tal-politika tal-Unjoni dwar id-drogi u r-rwol importanti tal-Unjoni fil-livell multilaterali f’konformità mat-Trattati bħala mezz biex tiġi żgurata l-implimentazzjoni effiċjenti u koerenti tal-politika tal-Unjoni dwar id-drogi internament u fil-livell internazzjonali. Jenħtieġ li l-ħidma f’dak il-qasam tkun ibbażata fuq qafas ta’ kooperazzjoni internazzjonali żviluppat mill-Aġenzija. Jenħtieġ li l-qafas ta’ kooperazzjoni internazzjonali jkun konformi mat-Trattati u l-prijoritajiet tal-Unjoni dwar il-kooperazzjoni internazzjonali u ggwidat mill-istrumenti rilevanti tan-Nazzjonijiet Uniti. Jenħtieġ li l-Aġenzija tirrevedi l-qafas ta’ kooperazzjoni internazzjonali fuq bażi regolari sabiex jiġi żgurat li jkun jirrifletti b’mod adegwat l-iżviluppi u l-prijoritajiet internazzjonali.

(30)

Sabiex il-finanzjament tal-Unjoni għar-riċerka dwar is-sigurtà u s-saħħa jiġi megħjun jiżviluppa l-potenzjal sħiħ tiegħu u jindirizza x’jenħtieġ minn politika dwar id-drogi, jenħtieġ li l-Aġenzija tassisti lill-Kummissjoni fl-identifikazzjoni ta’ temi ewlenin ta’ riċerka u fit-tfassil u l-implimentazzjoni tal-programmi qafas tal-Unjoni għar-riċerka u l-innovazzjoni li huma rilevanti għall-objettivi tal-Aġenzija. Meta l-Aġenzija tassisti lill-Kummissjoni fl-identifikazzjoni ta’ temi ewlenin ta’ riċerka jew fit-tfassil u l-implimentazzjoni ta’ programm qafas tal-Unjoni, jenħtieġ li hija ma tirċevix finanzjament minn dak il-programm u jenħtieġ li tieħu l-miżuri meħtieġa kollha sabiex jiġu evitati kunflitti ta’ interess. Jenħtieġ li l-Aġenzija tipparteċipa f’inizjattivi madwar l-Unjoni kollha li jindirizzaw ir-riċerka u l-innovazzjoni biex tiżgura li jiġu żviluppati t-teknoloġiji meħtieġa għall-attivitajiet tagħha u li dawn ikunu disponibbli għall-użu. Jenħtieġ li l-attivitajiet ippjanati ta’ riċerka u innovazzjoni jiġu stipulati fid-dokument uniku ta’ programmazzjoni li jkun fih il-programm ta’ ħidma pluriennali u annwali tal-Aġenzija.

(31)

Il-Kummissjoni u l-Istati Membri għandhom ikunu rrappreżentati fuq il-Bord tat-Tmexxija tal-Aġenzija biex jissorveljaw ħidmietu b’mod effettiv. Jenħtieġ li l-membri u l-membri supplenti tal-Bord tat-Tmexxija jinħatru filwaqt li jitqiesu l-ħiliet maniġerjali, amministrattivi u baġitarji rilevanti tagħhom. Jenħtieġ li l-membri supplenti jaġixxu bħala membri fin-nuqqas tal-membri rilevanti. Il-membri supplenti jistgħu jattendu wkoll laqgħat fil-preżenza tal-membri rilevanti mingħajr ma l-preżenza tagħhom tinvolvi spejjeż addizzjonali għall-Aġenzija u mingħajr ma jieħdu sehem fil-votazzjonijiet.

(32)

Jenħtieġ li l-Bord tat-Tmexxija jingħata s-setgħat meħtieġa, b’mod partikolari biex jiġi adottat il-baġit u r-regoli finanzjarji u d-dokumenti ta’ ppjanar, xierqa u r-rapport annwali konsolidat tal-attività. Sabiex jiżgura l-funzjonament indipendenti u l-integrità tal-Aġenzija, jenħtieġ li l-Bord tat-Tmexxija jadotta wkoll regoli għall-prevenzjoni u l-ġestjoni tal-kunflitti ta’ interess fir-rigward tal-membri tiegħu, il-membri tal-Bord Eżekuttiv, il-membri tal-Kumitat Xjentifiku, u l-membri tan-Network Ewropew ta’ Informazzjoni dwar id-Droga u d-Dipendenza fuq id-Droga (in-“network Reitox”), esperti nazzjonali sekondati u persunal ieħor mhux impjegat mill-Aġenzija. Meta tagħmel dan, huwa importanti li l-Aġenzija tqis kif xieraq ir-rakkomandazzjonijiet u l-linji gwida dwar dik il-kwistjoni, b’mod partikolari dawk tal-Ombudsman Ewropew u l-Linji Gwida tal-Kummissjoni dwar il-prevenzjoni u l-ġestjoni tal-kunflitti ta’ interess fl-aġenziji deċentralizzati tal-UE tal-10 ta’ Diċembru 2013. Jenħtieġ li l-Bord tat-Tmexxija jeżerċita s-setgħat ta’ awtorità tal-ħatra fir-rigward tal-persunal tal-aġenzija, inkluż id-Direttur Eżekuttiv.

(33)

Huwa importanti li l-partijiet kollha rappreżentati fuq il-Bord tat-Tmexxija jagħmlu ħilithom biex jimmultiplikaw il-perspettivi u l-esperjenzi rappreżentati fil-ħidma tiegħu, filwaqt li jikkontribwixxu għaliha, filwaqt li jiżguraw il-kontinwità tal-ħidma tiegħu. Il-partijiet kollha għandhom jimmiraw li jiksbu rappreżentanza bilanċjata bejn il-ġeneri fil-Bord tat-Tmexxija.

(34)

Jenħtieġ li l-Bord tat-Tmexxija jkun assistit minn Bord Eżekuttiv biex iħejji d-deċiżjonijiet tagħha. Jenħtieġ li l-Aġenzija tkun immexxija minn Direttur Eżekuttiv. Jenħtieġ li Kumitat Xjentifiku jkompli jassisti lill-Bord tat-Tmexxija u lid-Direttur Eżekuttiv fir-rigward ta’ kwistjonijiet xjentifiċi rilevanti.

(35)

Jenħtieġ li l-Bord ta’ Tmexxija jaħtar lid-Direttur Eżekuttiv wara proċedura tal-għażla miftuħa u trasparenti organizzata u ġestita mill-Kummissjoni. F’konformità mal-prattika segwita fil-ħatra ta’ direttur eżekuttiv għall-EMCDDA, jenħtieġ li l-Kummissjoni tikkunsidra l-inklużjoni ta’ rappreżentant tal-Bord tat-Tmexxija bħala osservatur fil-proċedura tal-ħatra. Jenħtieġ li l-valutazzjoni mill-Kummissjoni fi tmiem il-mandat inizjali ta’ ħames snin tad-Direttur Eżekuttiv tinkludi kontribut minn qabel mill-Bord tat-Tmexxija dwar il-prestazzjoni tad-Direttur Eżekuttiv.

(36)

Huwa importanti li l-Aġenzija tingħata r-riżorsi adegwati biex twettaq il-kompiti tagħha, l-objettivi u r-responsabbiltajiet skont dan ir-Regolament u tingħata baġit awtonomu li jirrifletti l-missjoni tagħha. Jenħtieġ li dan jiġi ffinanzjat prinċipalment minn kontribuzzjoni mill-baġit ġenerali tal-Unjoni. Jenħtieġ li l-proċedura baġitarja tal-Unjoni tkun applikabbli sa fejn huma kkonċernati l-kontribuzzjoni tal-Unjoni u kwalunkwe sussidju ieħor li għandu jitħallas mill-baġit ġenerali tal-Unjoni. Jenħtieġ li l-Qorti tal-Awdituri twettaq awditjar tal-kontijiet tal-Aġenzija.

(37)

Sabiex tkompli tappoġġa lill-Istati Membri u partijiet ikkonċernati oħrajn biex jifhmu u jindirizzaw il-fenomenu tad-drogi, il-possibbiltà li l-Aġenzija tipprovdi servizzi addizzjonali, lil hinn mill-kompiti ewlenin tagħha stipulati f’dan ir-Regolament, bil-ħlas ta’ tariffi jenħtieġ li tiġi introdotta. Jenħtieġ li l-metodu li bih jiġu kkalkulati t-tariffi imposti mill-Aġenzija jkun trasparenti. Jenħtieġ li t-tariffi imposti mill-Aġenzija jkopru l-ispejjeż sħaħ għall-forniment tal-attivitajiet relatati mas-servizzi mogħtija, inkluż l-ispejjeż tal-persunal u dawk operazzjonali. Fejn it-tariffi jkunu ġew imposti f’sena finanzjarja, jenħtieġ li l-kontijiet proviżorji tal-Aġenzija jkunu akkumpanjati minn rapport dwar dawk it-tariffi. Tali rapporti jkunu soġġetti wkoll għall-awditu mill-Qorti tal-Awdituri. It-tariffi għandhom jiġu stabbiliti f’livell li jevita defiċit jew akkumulazzjoni sinifikanti ta’ surplus u jenħtieġ li jiġu riveduti meta dan ma jkunx il-każ.

(38)

Jenħtieġ li d-Direttur Eżekuttiv jippreżenta r-rapport annwali tal-Aġenzija lill-Parlament Ewropew u l-Kunsill. Barra minn hekk, jenħtieġ li l-Parlament Ewropew u l-Kunsill ikunu jistgħu jistiednu lid-Direttur Eżekuttiv jirrapporta dwar it-twettiq tal-kompiti tiegħu.

(39)

Jenħtieġ li r-Regolament (KE) Nru 1049/2001 tal-Parlament Ewropew u tal-Kunsill (6) japplika għall-Aġenzija. Jenħtieġ li l-Aġenzija tkun kemm jista’ jkun trasparenti dwar l-attivitajiet tagħha, mingħajr ma tipperikola l-kisba tal-objettiv tal-operazzjonijiet tagħha.

(40)

Ir-Regolament (UE, Euratom) Nru 883/2013 tal-Parlament Ewropew u tal-Kunsill (7) u l-Ftehim Interistituzzjonali tal-25 ta’ Mejju 1999 bejn il-Parlament Ewropew, il-Kunsill tal-Unjoni Ewropea u l-Kummissjoni tal-Komunitajiet Ewropej dwar investigazzjonijiet interni mill-Uffiċċju Ewropew ta’ Kontra l-Frodi (OLAF) (8), li magħhom diġà aderixxa l-EMCDDA, jenħtieġ li japplikaw għall-Aġenzija.

(41)

L-Aġenzija tipproċessa data li teħtieġ protezzjoni partikolari, b’mod partikolari l-Informazzjoni Klassifikata tal-Unjoni Ewropea (IKUE) u informazzjoni sensittiva mhux klassifikata. Jenħtieġ li l-Aġenzija tagħmel regoli dwar il-kunfidenzjalità u l-ipproċessar ta’ tali informazzjoni. Jenħtieġ li r-regoli dwar il-protezzjoni ta’ IKUE jkunu konsistenti mad-Deċiżjonijiet tal-Kummissjoni (UE, Euratom) 2015/443 (9) u (UE, Euratom) 2015/444 (10). F’konformità ma’ dawk l-atti legali, jenħtieġ li l-Aġenzija żżomm lura milli tippubblika data sensittiva. Jenħtieġ ukoll li toqgħod lura milli tiżvela l-informazzjoni kummerċjali kunfidenzjali ta’ partijiet terzi.

(42)

Sabiex tiġi kkontrollata u żgurata l-prestazzjoni tal-Aġenzija u biex ikun żgurat li l-mandat tagħha jippermettilha twettaq l-attivitajiet neċessarji meħtieġa mill-iżviluppi fis-swieq tad-droga l-politika, jenħtieġ li titwettaq evalwazzjoni esterna tal-ħidma tal-Aġenzija fuq bażi regolari u li l-mandat tagħha jiġi adattat kif xieraq, jekk meħtieġ.

(43)

Jenħtieġ li l-Aġenzija, f’konformità sħiħa mad-drittijiet fundamentali, tikkoopera mill-qrib ma’ organizzazzjonijiet internazzjonali rilevanti u korpi governattivi u mhux governattivi oħrajn inkluż korpi tekniċi rilevanti minn ġewwa u barra l-Unjoni fl-implimentazzjoni tal-programm ta’ ħidma tagħha, f’konformità mad-dispożizzjonijiet rilevanti tat-Trattati u l-kompetenzi tal-Istati Membru, b’mod partikolari biex tevita d-duplikazzjoni tax-xogħol u tiżgura l-aċċess għad-data u l-għodod kollha meħtieġa biex twettaq il-mandat tagħha.

(44)

Jenħtieġ li l-Aġenzija tissostitwixxi u tissuċċedi l-EMCDDA. Għalhekk, jenħtieġ li hija tkun is-suċċessur legali tal-kuntratti kollha tal-EMCDDA, inkluż il-kuntratti tax-xogħol, l-obbligi u l-proprjetajiet miksuba. Jenħtieġ li l-ftehimiet internazzjonali konklużi mill-EMCDDA qabel it-2 ta’ Lulju 2024 jibqgħu fis-seħħ.

(45)

Minħabba li l-objettiv ta’ dan ir-Regolament, jiġifieri l-istabbiliment ta’ aġenzija biex tindirizza l-fenomenu tad-drogi, ma jistax jinkiseb b’mod suffiċjenti mill-Istati Membri iżda jista’ pjuttost, minħabba l-iskala u l-effetti tal-azzjoni, jinkiseb aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea (TUE). F’konformità mal-prinċipju ta’ proporzjonalità, kif stabbilit f’dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkiseb dak l-objettiv,

(1)

Fit-22 ta’ Mejju 2018, il-Kunsill awtorizza lill-Kummissjoni biex tinnegozja ftehim ta’ kummerċ ħieles ma’ New Zealand.

(2)

Fit-30 ta’ Ġunju 2022, in-negozjati għall-Ftehim ta’ Kummerċ Ħieles bejn l-Unjoni Ewropea u New Zealand (“il-Ftehim”) ġew konklużi b’suċċess.

(3)

Il-Ftehim jenħtieġ li jiġi ffirmat,

(1)

Ir-Regolament tal-Kunsill (UE) 2023/194 (1) jistabbilixxi għall-2023 l-opportunitajiet tas-sajd għal ċerti stokkijiet tal-ħut, applikabbli fl-ilmijiet tal-Unjoni u, għall-bastimenti tas-sajd tal-Unjoni, f’ċerti ilmijiet mhux tal-Unjoni. Il-qabdiet totali permissibbli (TACs) u l-miżuri marbuta mat-TACs b’mod funzjonali, stabbiliti bir-Regolament (UE) 2023/194 jenħtieġ li jiġu emendati biex titqies il-pubblikazzjoni tal-parir xjentifiku kif ukoll l-eżiti tal-konsultazzjonijiet ma’ pajjiżi terzi.

(2)

Ir-Regolament (UE) 2023/194 jistabbilixxi għal żero t-TAC għall-inċova (Engraulis encrasicolus) fis-subżoni 9 u 10 tal-Kunsill Internazzjonali għall-Esplorazzjoni tal-Baħar (ICES) u fl-ilmijiet tal-Unjoni tad-diviżjoni 34.1.1 tal-Kumitat għas-Sajd fl-Atlantiku Ċentrali tal-Lvant (CECAF) għall-perjodu mill-1 ta’ Lulju 2023 sat-30 ta’ Ġunju 2024, sakemm l-ICES jippubblika l-parir xjentifiku tiegħu għal dak l-istokk għal dak il-perjodu. Sabiex is-sajd ikun jista’ jkompli sakemm tiġi stabbilita t-TAC definittiva għal dak l-istokk abbażi ta’ dak il-parir xjentifiku, jenħtieġ li t-TAC proviżorja tiġi stabbilita fil-livell ta’ 4 564 tunnellata għall-perjodu mill-1 ta’ Lulju 2023 sat-30 ta’ Settembru 2023. Dak il-livell jikkorrispondi għall-qabdiet ta’ dak l-istokk fit-tielet trimestru tal-2022.

(3)

Fit-12 ta’ Mejju 2023, l-Unjoni, ir-Renju Unit u n-Norveġja kellhom konsultazzjonijiet dwaril-livell tal-opportunitajiet tas-sajd għal-laċċa kaħla (Sprattus sprattus) fis-subżona 4 u d-diviżjoni 3a tal-ICES għall-perjodu mill-1 ta’ Lulju 2023 sat-30 ta’ Ġunju 2024, kif ukoll dwar il-livell tat-TACs għal-laċċa kaħla għal dak il-perjodu fl-ilmijiet tal-Unjoni u tar-Renju Unit tas-subżona 4 u tad-diviżjoni 2a tal-ICES u fl-ilmijiet tal-Unjoni u dawk Norveġiżi tad-diviżjoni 3a tal-ICES. Dawk il-konsultazzjonijiet saru abbażi tal-pożizzjoni tal-Unjoni approvata mill-Kunsill fl-4 ta’ Mejju 2023. Għaldaqstant, jenħtieġ li dawk it-TACs rilevanti jiġu stabbiliti fil-livelli miftiehma mar-Renju Unit u n-Norveġja.

(4)

Fl-4 ta’ Mejju 2023, l-Unjoni u r-Renju Unit kellhom konsultazzjonijiet dwar il-livell tat-TAC għal-laċċa kaħla fl-ilmijiet tal-Unjoni u tar-Renju Unit tad-diviżjonijiet 7d u 7e tal-ICES għall-perjodu mill-1 ta’ Lulju 2023 sat-30 ta’ Ġunju 2024. Dawk il-konsultazzjonijiet twettqu skont l-Artikolu 498(2), (4) u (6) tal-Ftehim dwar il-Kummerċ u l-Kooperazzjoni (2) u abbażi tal-pożizzjoni tal-Unjoni approvata mill-Kunsill fis-27 ta’ April 2023. L-eżitu ta’ dawk il-konsultazzjonijiet ġie ddokumentat f’Rekord bil-Miktub. Għaldaqstant, jenħtieġ li dik it-TAC tiġi stabbilita fil-livell miftiehem mar-Renju Unit.

(5)

Minħabba li, fir-rigward ta’ diversi stokkijiet, jew il-bijomassa tagħhom hija taħt il-limitu tal-punt ta’ referenza tal-bijomassa (“Blim”) inkella l-ICES ma jiddefinixxix punti ta’ referenza għall-konservazzjoni iżda jirrakkomanda qabdiet żero jew li jiġi sospiż is-sajd fil-mira, jenħtieġ li fl-2023 tiġi pprojbita l-flessibbiltà minn sena għal sena skont l-Artikoli 3 u 4 tar-Regolament tal-Kunsill (KE) Nru 847/96 (3).

(6)

Il-kodiċijiet għal diversi kondizzjonijiet rigward il-kwoti Norveġiżi taħt it-TACs inklużi fil-Parti B tal-Anness IA tar-Regolament (UE) 2023/194, li jistabbilixxu f’liema żoni n-Norveġja tista’ tistad il-kwantitajiet disponibbli għaliha, huma neqsin jew mhumiex korretti. L-Anness IA għal dak ir-Regolament għaldaqstant jenħtieġ li jiġu emendati.

(7)

L-Artikoli 15 u 17 tar-Regolament (UE) 2022/2056 tal-Parlament Ewropew u tal-Kunsill (4) jipprojbixxu li jinżamm abbord, jiġi ttrażbordat, jew jinħażen fuq bastiment tas-sajd jew li jinħatt l-art kwalunkwe kelb il-baħar tal-qarnuna bajda oċeaniku (Carcharhinus longimanus) jew kwalunkwe tawru seta (Carcharhinus falciformis) kemm bħala partijiet ta’ karkassa kif ukoll bħala karkassa sħiħa, fiż-żona koperta mill-Konvenzjoni dwar il-Konservazzjoni u l-Immaniġġar ta’ Stokkijiet ta’ Ħut Migratorju fil-Punent tal-Paċifiku u l-Paċifiku Ċentrali (WCPFC). Sabiex tiġi evitata d-duplikazzjoni tad-dispożizzjonijiet dwar l-istess suġġett, huwa xieraq li jitħassar l-Artikolu 45 tar-Regolament (UE) 2023/194.

(8)

Skont diversi rakkomandazzjonijiet tal-Kummissjoni Internazzjonali għall-Konservazzjoni tat-Tonn tal-Atlantiku (ICCAT), l-Unjoni tista’, fuq talba, tittrasferixxi perċentwal tal-kwota mhux użata tagħha tal-istokkijiet fiż-Żona tal-Konvenzjoni tal-ICCAT mis-sena ta’ qabel tal-aħħar jew mill-aħħar sena qabel sena partikolari, skont ir-regoli għal kull stokk tal-ICCAT kif stipulati mill-ICCAT. Ir-Regolament tal-Kunsill (UE) 2022/109 (5) u r-Regolament (UE) 2023/194 jistabbilixxu l-kwoti tal-Unjoni għall-istokkijiet tal-ICCAT għall-2022 u għall-2023 rispettivament skont l-eżitu tal-laqgħa annwali tal-ICCAT fis-sena preċedenti, u dawn iqisu t-trasferimenti tal-kwoti tal-Unjoni mhux użati, fejn applikabbli. Jenħtieġ li ma jkunx possibbli li dawk ir-riporti jiġu kkombinati mat-trasferimenti tal-kwoti skont l-Artikolu 4 tar-Regolament (KE) Nru 847/96 u għalhekk jenħtieġ li l-użu ta’ tali trasferimenti jkun ipprojbit għal dak il-perjodu.

(9)

Ħames Stati Membri bagħtu l-modifiki fil-pjan ta’ ġestjoni tat-trobbija tagħhom lill-Kummissjoni f’konformità mal-Artikolu 6(3) tar-Regolament (UE) 2016/1627 tal-Parlament Ewropew u tal-Kunsill (6). Abbażi ta’ dawk il-modifiki, il-Kummissjoni bagħtet il-pjan ta’ ġestjoni tat-trobbija tal-Unjoni modifikat għall-2023 lis-Segretarjat tal-ICCAT fid-9 ta’ Mejju 2023 u l-ICCAT ippubblikat dawk il-modifiki għall-pjan tal-Unjoni fil-11 ta’ Mejju 2023. L-input u l-kapaċità massimi tat-trobbija tal-Unjoni jenħtieġ li għaldaqstant jiġu emendati f’konformità ma’ dawk il-modifiki.

(10)

Għalhekk jenħtieġ li r-Regolamenti (UE) 2023/194 u (UE) 2022/109 jiġu emendati skont dan.

(11)

Sabiex is-sajd ikun jista’ jkompli fl-1 ta’ Lulju 2023 u lil hinn, jenħtieġ li dan ir-Regolament jidħol fis-seħħ mingħajr dewmien.

(12)

Jenħtieġ li d-dispożizzjonijiet ta’ dan ir-Regolament li jemendaw ċerti dispożizzjonijiet tar-Regolament (UE) 2023/194 japplikaw mill-1 ta’ Jannar 2023, bi qbil mal-perjodu ta’ applikazzjoni ta’ dawk id-dispożizzjonijiet emendati. Id-dispożizzjonijiet ta’ dan ir-Regolament dwar l-opportunitajiet tas-sajd għall-inċova, il-gamblu tat-Tramuntana u l-laċċa kaħla u t-tħassir tal-Artikolu 45 tar-Regolament (UE) 2023/194 jenħtieġ li japplikaw mill-1 ta’ Lulju 2023. Jenħtieġ li d-dispożizzjonijiet ta’ dan ir-Regolament li jikkonċernaw l-ICCAT u li jemendaw ċerti dispożizzjonijiet tar-Regolament (UE) 2022/109 japplikaw mill-1 ta’ Jannar 2022, bi qbil mal-perjodu ta’ applikazzjoni ta’ dawk id-dispożizzjonijiet emendati. Tali applikazzjoni retroattiva ma taffettwax il-prinċipji taċ-ċertezza legali u tal-protezzjoni tal-aspettattivi leġittimi, peress li jew l-opportunitajiet tas-sajd ikkonċernati jiżdiedu b’dawk l-emendi inkella l-kwantitajiet rilevanti għadhom ma ġewx ittrasferiti skont l-Artikolu 4(2) tar-Regolament (KE) Nru 847/96,

(1)

Il-Kummissjoni eżaminat l-applikazzjoni għall-approvazzjoni ta’ emenda għall-Ispeċifikazzjoni tal-Prodott tal-Indikazzjoni Ġeografika Protetta “Extremadura” li bagħtet Spanja f’konformità mal-Artikolu 105 tar-Regolament (UE) Nru 1308/2013.

(2)

Il-Kummissjoni ppubblikat l-applikazzjoni għall-approvazzjoni tal-emendi fl-Ispeċifikazzjoni tal-Prodott f’Il-Ġurnal Uffiċjali tal-Unjoni Ewropea (2), kif meħtieġ mill-Artikolu 97(3) tar-Regolament (UE) Nru 1308/2013.

(3)

Il-Kummissjoni ma rċeviet l-ebda dikjarazzjoni ta’ oġġezzjoni skont l-Artikolu 98 tar-Regolament (UE) Nru 1308/2013.

(4)

Għaldaqstant, jenħtieġ li l-emendi fl-Ispeċifikazzjoni tal-Prodott jiġu approvati skont l-Artikolu 99 tar-Regolament (UE) Nru 1308/2013.

(5)

Il-miżuri previsti f’dan ir-Regolament huma skont l-opinjoni tal-Kumitat għall-Organizzazzjoni Komuni tas-Swieq Agrikoli,

(1)

Il-Kummissjoni eżaminat l-applikazzjoni għall-approvazzjoni ta’ emendi fl-Ispeċifikazzjoni tal-Prodott tad-Denominazzjoni ta’ Oriġini Protetta “Balaton/Balatoni” li ntbagħtitilha mill-Ungerija f’konformità mal-Artikolu 105 tar-Regolament (UE) Nru 1308/2013.

(2)

Il-Kummissjoni ppubblikat l-applikazzjoni għall-approvazzjoni tal-emendi fl-Ispeċifikazzjoni tal-Prodott f’Il-Ġurnal Uffiċjali tal-Unjoni Ewropea (2), kif meħtieġ mill-Artikolu 97(3) tar-Regolament (UE) Nru 1308/2013.

(3)

Il-Kummissjoni ma rċeviet l-ebda dikjarazzjoni ta’ oġġezzjoni skont l-Artikolu 98 tar-Regolament (UE) Nru 1308/2013.

(4)

Għaldaqstant, jenħtieġ li l-emendi fl-Ispeċifikazzjoni tal-Prodott jiġu approvati skont l-Artikolu 99 tar-Regolament (UE) Nru 1308/2013.

(5)

Il-miżuri previsti f’dan ir-Regolament huma skont l-opinjoni tal-Kumitat għall-Organizzazzjoni Komuni tas-Swieq Agrikoli,

(1)

F’konformità mal-Artikolu 97(2) u (3) tar-Regolament (UE) Nru 1308/2013, il-Kummissjoni eżaminat l-applikazzjoni għar-reġistrazzjoni tal-isem “Canelli” li ntbagħtitilha mill-Italja u ppubblikatha f’Il-Ġurnal Uffiċjali tal-Unjoni Ewropea (2).

(2)

Il-Kummissjoni ma rċeviet l-ebda dikjarazzjoni ta’ oġġezzjoni skont l-Artikolu 98 tar-Regolament (UE) Nru 1308/2013.

(3)

F’konformità mal-Artikolu 99 tar-Regolament (UE) Nru 1308/2013, l-isem “Canelli” jenħtieġ li jkun protett u li jidħol fir-reġistru msemmi fl-Artikolu 104 ta’ dak ir-Regolament.

(4)

Il-miżuri previsti f’dan ir-Regolament huma f’konformità mal-opinjoni tal-Kumitat għall-Organizzazzjoni Komuni tas-Swieq Agrikoli,

(1)

Ir-Regolament tal-Kummissjoni (KE) Nru 1484/95 (3) stabbilixxa r-regoli għall-implimentazzjoni tas-sistema ta’ dazji addizzjonali tal-importazzjoni u ffissa l-prezzijiet rappreżentattivi fis-setturi tal-laħam tat-tjur u tal-bajd u għall-albumina tal-bajd.

(2)

Minn kontroll regolari tad-data, li abbażi tagħha jiġu stabbiliti l-prezzijiet rappreżentattivi għall-prodotti tas-setturi tal-laħam tat-tjur u tal-bajd u għall-albumina tal-bajd, jirriżulta li jenħtieġ li jiġu emendati l-prezzijiet rappreżentattivi għall-importazzjoni ta’ ċerti prodotti filwaqt li jitqiesu l-varjazzjonijiet fil-prezzijiet skont l-oriġini.

(3)

Għalhekk, jenħtieġ li r-Regolament (KE) Nru 1484/95 jiġi emendat skont dan.

(4)

Biex ikun żgurat li din il-miżura tapplika kemm jista’ jkun malajr wara li d-data aġġornata ssir disponibbli, jenħtieġ li dan ir-Regolament jidħol fis-seħħ fil-jum tal-pubblikazzjoni tiegħu,

(1)

L-Anness II tar-Regolament (KE) Nru 1333/2008 jistabbilixxi lista tal-Unjoni tal-addittivi tal-ikel approvati biex jintużaw fl-ikel u l-kondizzjonijiet tal-użu tagħhom.

(2)

Ir-Regolament tal-Kummissjoni (UE) Nru 231/2012 (3) jistabbilixxi l-ispeċifikazzjonijiet għall-addittivi tal-ikel elenkati fl-Annessi II u III tar-Regolament (KE) Nru 1333/2008.

(3)

Il-listi tal-Unjoni tal-addittivi tal-ikel u l-ispeċifikazzjonijiet tagħhom jistgħu jiġu aġġornati f’konformità mal-proċedura komuni msemmija fl-Artikolu 3(1) tar-Regolament (KE) Nru 1331/2008, b’inizjattiva tal-Kummissjoni jew wara li tkun saret applikazzjoni.

(4)

Il-gliċerol (E 422), l-esteri tal-poligliċerol tal-aċidi xaħmin (E 475) u l-poliriċinoleat tal-poligliċerol (E 476) huma sustanzi awtorizzati f’konformità mal-Annessi II u III tar-Regolament (KE) Nru 1333/2008.

(5)

Fil-15 ta’ Marzu 2017, l-Awtorità Ewropea dwar is-Sigurtà fl-Ikel (“l-Awtorità”) ħarġet opinjoni xjentifika dwar l-evalwazzjoni mill-ġdid tal-gliċerol (E 422) bħala addittiv tal-ikel (4), fejn ikkonkludiet li ma kienx hemm bżonn ta’ konsum aċċettabbli ta’ kuljum numeriku, u li ma kien hemm l-ebda tħassib dwar is-sikurezza tal-addittiv tal-ikel għall-użi rrapportati. L-Awtorità rrakkomandat xi modifiki fl-ispeċifikazzjonijiet għall-E 422 stabbiliti fir-Regolament (UE) Nru 231/2012 u li tingħatalha aktar informazzjoni dwar l-użi u l-livelli tal-użu.

(6)

Fit-23 ta’ Novembru 2018, il-Kummissjoni nediet sejħa pubblika għal data teknika dwar l-addittiv tal-ikel ġliċerol (E 422), u speċifikat id-data meħtieġa identifikata mill-Awtorità.

(7)

Wara l-preżentazzjoni tad-data mill-operaturi kummerċjali interessati, il-Kummissjoni talbet lill-Awtorità tipprovdi opinjoni xjentifika biex tikkonferma li d-data teknika pprovduta mill-operaturi kummerċjali interessati kienet suffiċjenti biex tappoġġa emenda fl-ispeċifikazzjonijiet għall-addittiv tal-ikel, il-gliċerol (E 422), biex jinġiebu f’konformità mal-istandards attwali, kif kienet irrakkomandat l-Awtorità.

(8)

Fl-opinjoni xjentifika tagħha adottata fit-18 ta’ Mejju 2022 (5), l-Awtorità kkonkludiet li l-ispeċifikazzjonijiet attwali għall-gliċerol (E 422) kellhom jiġu adattati b’mod partikolari billi jitbaxxew il-limiti massimi għall-elementi tossiċi (arseniku, ċomb, merkurju u kadmju), billi jitħassar il-metodu ta’ identifikazzjoni bbażat fuq il-formazzjoni tal-akroleina mat-tisħin, billi jitħassar it-test għall-preżenza tal-akroleina, billi jiġi inkluż limitu massimu għall-akroleina u billi tiġi mmodifikata d-definizzjoni tal-gliċerol (E 422).

(9)

Għalhekk jixraq li jiġu emendati l-ispeċifikazzjonijiet għall-gliċerol (E 422). Jenħtieġ li d-definizzjoni tal-addittiv tal-ikel tiġi emendata biex tkun ristretta għall-proċessi tal-manifattura li dwarhom kienet ivvalutat id-data l-Awtorità. Jenħtieġ li jitbaxxew il-limiti massimi attwali għall-elementi tossiċi f’konformità mal-opinjoni xjentifika tal-Awtorità, filwaqt li jitqiesu l-livelli li jistgħu jinkisbu fil-preżent billi tintuża prattiki tajba ta’ manifattura. Jenħtieġ li jitħassar il-metodu ta’ identifikazzjoni għall-gliċerol ibbażat fuq il-formazzjoni tal-akroleina mat-tisħin, meta wieħed iqis li l-kontenut tal-gliċerol fl-E 422 għandu jiġi ddeterminat b’metodu analitiku xieraq. Jenħtieġ li jitħassar it-test għall-preżenza tal-akroleina u li jiġi inkluż limitu numeriku massimu għall-akroleina bi qbil mal-opinjoni xjentifika tal-Awtorità u filwaqt li jitqies il-livell li bħalissa jista’ jinkiseb bl-applikazzjoni ta’ prattiki tajba ta’ manifattura.

(10)

Meta jitqies li l-Awtorità ma identifikatx tħassib immedjat dwar is-saħħa marbut mal-preżenza ta’ elementi tossiċi u l-akroleina, huwa xieraq li matul perjodu tranżizzjonali jiġi permess l-użu tal-addittiv tal-ikel, il-gliċerol (E 422), imqiegħed fis-suq legalment qabel id-data tad-dħul fis-seħħ ta’ dan ir-Regolament.

(11)

Għall-istess raġunijiet, huwa xieraq li l-ikel li jkun fih l-addittiv tal-ikel, il-gliċerol (E 422), li jkun tqiegħed fis-suq legalment qabel id-data tad-dħul fis-seħħ ta’ dan ir-Regolament ikun jista’ jkompli jitqiegħed fis-suq għal perjodu tranżizzjonali u jibqa’ fis-suq sad-data ta’ durabbiltà minima tiegħu jew “id-data sa meta jista’ jintuża l-aħħar”.

(12)

Fl-20 ta’ Diċembru 2017, l-Awtorità ħarġet opinjoni xjentifika dwar l-evalwazzjoni mill-ġdid tal-esteri tal-poligliċerol tal-aċidi xaħmin (E 475) bħala addittiv tal-ikel (6), li kkonkludiet li ma kienx hemm bżonn ta’ konsum aċċettabbli ta’ kuljum numeriku u li l-addittiv tal-ikel ma kien ta’ ebda tħassib għas-sikurezza bl-użi u bil-livelli tal-użu rrapportati. L-Awtorità rrakkomandat xi modifiki fl-ispeċifikazzjonijiet għall-E 475 stabbiliti fir-Regolament (UE) Nru 231/2012.

(13)

Fit-23 ta’ Novembru 2018, il-Kummissjoni nediet sejħa pubblika għal data teknika dwar l-addittiv tal-ikel l-esteri tal-poligliċerol tal-aċidi xaħmin (E 475), li kellha fil-mira d-data meħtieġa identifikata mill-Awtorità.

(14)

Wara l-preżentazzjoni tad-data mill-operaturi kummerċjali interessati, il-Kummissjoni talbet lill-Awtorità tipprovdi opinjoni xjentifika biex tikkonferma li d-data teknika pprovduta mill-operaturi kummerċjali interessati kienet suffiċjenti biex tappoġġa emenda fl-ispeċifikazzjonijiet għall-addittiv tal-ikel esteri tal-poligliċerol tal-aċidi xaħmin (E 475) biex jinġiebu f’konformità mal-istandards attwali, kif irrakkomandat mill-Awtorità.

(15)

Fl-opinjoni xjentifika tagħha, adottata fl-1 ta’ April 2022 (7), l-Awtorità kkonkludiet li l-ispeċifikazzjonijiet attwali għall-esteri tal-poligliċerol tal-aċidi xaħmin (E 475) kellhom jiġu adattati b’mod partikolari billi jitnaqqsu l-limiti massimi għall-elementi tossiċi, billi jiġu inklużi l-limiti massimi għall-impuritajiet u l-kostitwenti li huma ta’ tħassib għas-sikurezza u billi tiġi mmodifikata d-definizzjoni tal-esteri tal-poligliċerol tal-aċidi xaħmin (E 475).

(16)

Għalhekk huwa xieraq li jiġu emendati l-ispeċifikazzjonijiet għall-esteri tal-poligliċerol tal-aċidi xaħmin (E 475). Id-definizzjoni tal-addittiv tal-ikel jenħtieġ li tiġi emendata sabiex l-użu tal-gliċerol għall-produzzjoni tal-addittiv tal-ikel jiġi ristrett għall-gliċerol li jikkonforma mal-ispeċifikazzjonijiet għall-addittiv tal-ikel (E 422). Il-limiti massimi attwali għall-elementi tossiċi jenħtieġ li jitnaqqsu u l-limiti massimi għat-total ta’ 3-monokloropropandiol (3-MCPD) u ta’ esteri tat-3-MCPD tal-aċidi xaħmin (espressi bħala 3-MCPD), għall-esteri gliċidiliċi tal-aċidi xaħmin (espressi bħala gliċidol) u għall-aċidu eruċiku jenħtieġ li jiġu stabbiliti f’konformità mal-opinjoni xjentifika tal-Awtorità u filwaqt li jitqies il-livell li bħalissa jista’ jinkiseb bl-applikazzjoni ta’ prattiki tajba ta’ manifattura.

(17)

Minħabba li qegħdin jiġu implimentati tekniki ġodda ta’ manifattura li jirriżultaw fil-produzzjoni tal-addittiv tal-ikel l-esteri tal-poligliċerol tal-aċidi xaħmin (E 475) b’livelli aktar baxxi ta’ esteri gliċidiliċi tal-aċidi xaħmin (espressi bħala gliċidol), huwa xieraq li l-manifatturi tal-addittivi tal-ikel jingħataw perjodu tranżizzjonali biex jilħqu livell massimu ta’ 5 mg/kg għall-esteri gliċidiliċi tal-aċidi xaħmin (espressi bħala gliċidol) fl-addittiv tal-ikel (E 475). Madankollu, minħabba li l-esteri gliċidiliċi tal-aċidi xaħmin huma ġenotossiċi u karċinoġeniċi, jenħtieġ li japplika livell massimu intermedju ta’ 10 mg/kg għall-esteri gliċidiliċi tal-aċidi xaħmin (espressi bħala gliċidol) mid-data tad-dħul fis-seħħ ta’ dan ir-Regolament.

(18)

Meta jitqies li l-Awtorità ma identifikatx tħassib immedjat dwar is-saħħa relatat mal-preżenza tal-elementi tossiċi, 3-monokloropropandiol (3-MCPD), l-esteri tat-3-MCPD tal-aċidi xaħmin, l-aċidu eruċiku u l-esteri gliċidiliċi tal-aċidi xaħmin, huwa xieraq li jiġi permess għal perjodu tranżizzjonali l-użu tal-addittiv tal-ikel l-esteri tal-poligliċerol tal-aċidi xaħmin (E 475) li tqiegħed fis-suq legalment qabel id-data tad-dħul fis-seħħ ta’ dan ir-Regolament u li jkun permess li l-ikel li jkun fih dan l-addittiv, ikompli jitqiegħed fis-suq għall-istess perjodu tranżizzjonali u jibqa’ fis-suq sad-data ta’ durabbiltà minima tiegħu jew “id-data sa meta jista’ jintuża l-aħħar”.

(19)

Għall-istess raġunijiet u meta jitqies il-kontenut imnaqqas fih ta’ esteri gliċidiliċi tal-aċidi xaħmin, l-addittiv tal-ikel l-esteri tal-poligliċerol tal-aċidi xaħmin (E 475) imqiegħed legalment fis-suq wara d-data tad-dħul fis-seħħ ta’ dan ir-Regolament u li jikkonforma mal-livell massimu intermedju mnaqqas għall-esteri gliċidiliċi tal-aċidi xaħmin (espressi bħala gliċidol) jenħtieġ li jitħalla jintuża sakemm jispiċċaw l-istokkijiet, u l-ikel li jkun fih dan l-addittiv tal-ikel jenħtieġ li jitħalla jitqiegħed fis-suq u jibqa’ fis-suq sad-data ta’ durabbiltà minima tiegħu jew “id-data sa meta jista’ jintuża l-aħħar”.

(20)

Fl-24 ta’ Marzu 2017, l-Awtorità ħarġet opinjoni xjentifika dwar l-evalwazzjoni mill-ġdid tal-poliriċinoleat tal-poligliċerol (E 476) bħala addittiv tal-ikel (8). L-Awtorità kkonkludiet li s-sett ta’ data ta raġuni biex jiżdied il-konsum aċċettabbli ta’ kuljum għal 25 mg/kg bw kuljum. L-Awtorità rrakkomandat xi modifiki għall-ispeċifikazzjonijiet tal E 476 stabbiliti fir-Regolament (UE) Nru 231/2012.

(21)

Fit-23 ta’ Novembru 2018, il-Kummissjoni nediet sejħa pubblika għal data teknika dwar l-addittiv tal-ikel poliriċinoleat tal-poligliċerol (E 476), li kellha fil-mira d-data identifikata bħala meħtieġa mill-Awtorità.

(22)

Fit-18 ta’ Marzu 2020, ġiet ippreżentata applikazzjoni għall-awtorizzazzjoni tal-użu tal-poliriċinoleat tal-poligliċerol (E 476) bħala emulsjonant fis-silġ li jittiekel għall-emulsjoni tax-xaħam u taż-żejt tat-tip ilma fiż-żejt u z-zlazi emulsifikati b’kontenut ta’ xaħam ta’ aktar minn 20 %. Sussegwentement, il-Kummissjoni qegħdet l-applikazzjoni għad-disponibbiltà tal-Istati Membri skont l-Artikolu 4 tar-Regolament (KE) Nru 1331/2008.

(23)

Il-poliriċinoleat tal-poligliċerol (E 476) huwa kapaċi jipproduċi emulsjonijiet stabbli ta’ ilma fiż-żejt bi qtar ta’ daqsijiet iżgħar li jistgħu jiġu ffriżati biex jipproduċu silġ artab, kremuż u li jittiekel li jeħtieġ inqas enerġija fil-proċess tal-manifattura u li jkollu aktar stabbiltà fil-katina tal-provvista tal-oġġetti ffriżati. Dan jippermetti l-użu ta’ xaħmijiet u żjut b’saturazzjoni baxxa u b’inqas zokkor fis-silġ li jittiekel. Il-livell tal-poliriċinoleat tal-poligliċerol (E 476) meħtieġ biex tinkiseb il-funzjoni teknoloġika maħsuba huwa 4 000 mg/kg.

(24)

Il-poliriċinoleat tal-poligliċerol (E 476) jippermetti wkoll li jitnaqqas iż-żejt fiz-zlazi emulsifikati (eż. fil-mayonnaise jew fit-taħlitiet għal fuq l-insalata) mingħajr effett negattiv fuq is-sensazzjoni fil-ħalq. Il-livell massimu awtorizzat attwalment ta’ 4 000 mg/kg mhuwiex biżżejjed għal prodotti b’kontenut ta’ xaħam ta’ aktar minn 20 %. Il-livell ta’ użu tal-poliriċinoleat tal-poligliċerol (E 476) meħtieġ biex tinkiseb il-funzjoni teknoloġika maħsuba fi prodotti b’kontenut ta’ xaħam ta’ aktar minn 20 % huwa ta’ 8 000 mg/kg.

(25)

Wara l-preżentazzjoni tad-data mill-operaturi kummerċjali interessati b’rispons għas-sejħa pubblika għad-data teknika u l-preżentazzjoni tal-applikazzjoni dwar l-estensjoni tal-użu tal-poliriċinoleat tal-poligliċerol (E 476), il-Kummissjoni talbet lill-Awtorità tipprovdi opinjoni xjentifika biex tikkonferma li d-data teknika pprovduta mill-operaturi kummerċjali interessati kienet tappoġġa b’mod adegwat emenda fl-ispeċifikazzjonijiet għall-addittiv tal-ikel, il-poliriċinoleat tal-poligliċerol (E 476), biex jinġiebu f’konformità mal-istandards attwali, kif irrakkomandat mill-Awtorità.

(26)

Fl-opinjoni xjentifika tagħha adottata fit-30 ta’ Marzu 2022 (9), l-Awtorità kkonkludiet li l-estensjoni tal-użu proposta ma twassalx għal tħassib dwar is-sikurezza. L-Awtorità kkonkludiet ukoll li l-ispeċifikazzjonijiet attwali għall-poliriċinoleat tal-poligliċerol (E 476) kellhom jiġu adattati b’mod partikolari billi jitbaxxew il-limiti massimi għall-elementi tossiċi, billi jiġu inklużi l-limiti massimi għall-impuritajiet li huma ta’ tħassib għas-sikurezza u billi tiġi mmodifikata d-definizzjoni tal-poliriċinoleat tal-poligliċerol (E 476).

(27)

Għalhekk jixraq li l-poliriċinoleat tal-poligliċerol (E 476) jiġi awtorizzat fil-kategorija tal-ikel 03 “Silġ li jittiekel” b’livell massimu ta’ 4 000 mg/kg, jiżdied il-livell massimu awtorizzat fil-kategorija tal-ikel 12.6 “Żlazi” għal 8 000 mg/kg għaz-zlazi emulsifikati b’kontenut ta’ xaħam ta’ 20 % jew aktar u jiġu emendati l-ispeċifikazzjonijiet tiegħu fid-dawl tal-opinjoni xjentifika tal-Awtorità. Id-definizzjoni tal-addittiv tal-ikel jenħtieġ li tiġi emendata sabiex l-użu tal-gliċerol għall-produzzjoni tal-addittiv tal-ikel jiġi ristrett għall-gliċerol li jikkonforma mal-ispeċifikazzjonijiet għall-addittiv tal-ikel (E 422). Jenħtieġ li jitbaxxew il-limiti massimi attwali għall-elementi tossiċi u jenħtieġ li l-limiti massimi għat-total ta’ 3-monokloropropandiol (3-MCPD) u ta’ esteri tat-3-MCPD tal-aċidi xaħmin (espressi bħala 3-MCPD) u ta’ esteri gliċidiliċi tal-aċidi xaħmin (espressi bħala gliċidol) jiġu stabbiliti f’konformità mal-opinjoni xjentifika tal-Awtorità u filwaqt li jitqies il-livell li bħalissa jista’ jinkiseb bl-applikazzjoni ta’ prattiki tajba ta’ manifattura.

(28)

Meta jitqies li l-Awtorità ma identifikatx tħassib immedjat dwar is-saħħa relatat mal-preżenza tal-elementi tossiċi, 3-monokloropropandiol (3-MCPD), l-esteri tat-3-MCPD tal-aċidi xaħmin u esteri gliċidiliċi tal-aċidi xaħmin, jixraq li jiġi permess għal perjodu tranżizzjonali l-użu tal-addittiv tal-ikel il-poliriċinoleat tal-poligliċerol (E 476) li tqiegħed fis-suq legalment qabel id-data tad-dħul fis-seħħ ta’ dan ir-Regolament.

(29)

Għall-istess raġunijiet, jixraq li l-ikel li jkun fih l-addittiv tal-ikel poliriċinoleat tal-poligliċerol (E 476) li jkun tqiegħed fis-suq legalment qabel id-data tad-dħul fis-seħħ ta’ dan ir-Regolament ikun jista’ jkompli jitqiegħed fis-suq għal perjodu tranżizzjonali u jibqa’ fis-suq sad-data ta’ durabbiltà minima tiegħu jew “id-data sa meta jista’ jintuża l-aħħar”.

(30)

Għalhekk, jenħtieġ li r-Regolamenti (KE) Nru 1333/2008 u (UE) Nru 231/2012 jiġu emendati skont dan.

(31)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

(1)

Permezz tar-Regolament ta’ Implimentazzjoni (UE) 2017/763 (2), il-Kummissjoni Ewropea (“il-Kummissjoni”) imponiet dazji anti-dumping fuq l-importazzjonijiet ta’ ċerta karta termali ħafifa li toriġina mir-Repubblika tal-Korea (“il-miżuri oriġinali”). L-investigazzjoni li wasslet għall-impożizzjoni tal-miżuri oriġinali minn hawn ’il quddiem se tissejjaħ “l-investigazzjoni oriġinali”. Il-miżuri ħadu l-forma ta’ rati fissi tad-dazju fil-livell ta’ EUR 104,46 għal kull tunnellata netta, kemm għall-uniku grupp esportatur li kkoopera kif ukoll għall-kumpaniji l-oħrajn kollha.

(2)

Is-sentenzi fil-Kawżi T-383/17 (3) u C-260/20 P (4) kienu jinvolvu l-annullament tal-miżuri għall-uniku grupp esportatur li kkoopera. Bir-Regolament ta’ Implimentazzjoni (UE) 2023/593 (5), il-Kummissjoni Ewropea imponiet mill-ġdid id-dazji anti-dumping fuq l-importazzjonijiet ta’ ċerta karta termali ħafifa li toriġina mir-Repubblika tal-Korea fil-livell rivedut ta’ EUR 103,16 għal kull tunnellata netta, kemm għall-uniku grupp esportatur li kkoopera kif ukoll għall-kumpaniji l-oħrajn kollha.

(3)

Wara l-pubblikazzjoni ta’ notifika ta’ skadenza imminenti (6), il-Kummissjoni rċeviet talba għal rieżami skont l-Artikolu 11(2) tar-Regolament bażiku.

(4)

It-talba għal rieżami tressqet fl-1 ta’ Frar 2022 mill-Assoċjazzjoni Ewropea tal-Karta Termali (“l-applikant”) f’isem l-industrija tal-Unjoni ta’ ċerta karta termali ħafifa skont l-Artikolu 5(4) tar-Regolament bażiku. It-talba għal rieżami kienet ibbażata fuq ir-raġunijiet li l-iskadenza tal-miżuri x’aktarx li twassal għal kontinwazzjoni jew rikorrenza ta’ dumping u għal kontinwazzjoni jew rikorrenza ta’ ħsara għall-industrija tal-Unjoni.

(5)

Wara li ddeterminat, wara konsultazzjoni mal-Kumitat stabbilit bl-Artikolu 15(1) tar-Regolament bażiku, li kienet teżisti biżżejjed evidenza għall-bidu ta’ rieżami ta’ skadenza, il-Kummissjoni, fit-3 ta’ Mejju 2022, bdiet rieżami ta’ skadenza dwar l-importazzjonijiet lejn l-Unjoni ta’ ċerta karta termali ħafifa li toriġina mir-Repubblika tal-Korea (“il-pajjiż ikkonċernat”) abbażi tal-Artikolu 11(2) tar-Regolament bażiku. Din ippubblikat Notifika ta’ Bidu f’Il-Ġurnal Uffiċjali tal-Unjoni Ewropea (7) (“in-Notifika ta’ Bidu”).

(6)

L-investigazzjoni ta’ kontinwazzjoni jew ta’ rikorrenza tad-dumping kopriet il-perjodu mill-1 ta’ Jannar 2021 sal-31 ta’ Diċembru 2021 (“il-perjodu ta’ investigazzjoni tar-rieżami”). L-eżaminazzjoni tax-xejriet rilevanti għall-valutazzjoni tal-probabbiltà ta’ kontinwazzjoni jew ta’ rikorrenza tad-dannu kopriet il-perjodu mill-1 ta’ Jannar 2018 sa tmiem il-perjodu ta’ investigazzjoni tar-rieżami (“il-perjodu kkunsidrat”).

(7)

Fin-Notifika ta’ Bidu, il-partijiet interessati ġew mistiedna jikkuntattjaw lill-Kummissjoni sabiex jieħdu sehem fl-investigazzjoni. Barra minn hekk, il-Kummissjoni infurmat speċifikament lill-applikant, lill-produttur magħruf fir-Repubblika tal-Korea u lill-awtoritajiet tar-Repubblika tal-Korea, lill-importaturi, lill-utenti u lill-kummerċjanti magħrufa dwar il-bidu tal-iskadenza u stednithom jipparteċipaw.

(8)

Il-partijiet interessati kellhom l-opportunità li jikkummentaw dwar il-bidu tar-rieżami ta’ skadenza u li jitolbu seduta mal-Kummissjoni u/jew mal-Uffiċjal tas-Seduta fil-proċedimenti kummerċjali.

(9)

Il-Kummissjoni rċeviet kummenti dwar il-bidu minn Hansol Paper Co. Ltd. (“Hansol Paper”). Din il-parti ddikjarat li d-data fit-talba ma turix li l-industrija tal-Unjoni qiegħda ġġarrab dannu materjali.

(10)

Il-Kummissjoni fakkret li Hansol Paper kienet wettqet eżami tat-talba f’konformità mal-Artikolu 11(2) u ma’ paragrafi rilevanti oħrajn tal-Artikolu 11 tar-Regolament bażiku, u waslet għall-konklużjoni li r-rekwiżiti għall-bidu ta’ investigazzjoni ġew issodisfati, jiġifieri, li l-adegwatezza u l-akkuratezza tal-evidenza ppreżentata mill-applikanti kienu evidenza suffiċjenti li għandha t-tendenza li turi l-probabbiltà ta’ kontinwazzjoni jew rikorrenza ta’ dumping dannuż.

(11)

F’dan ir-rigward, din fakkret ukoll li fl-istadju tat-talba ma huwiex meħtieġ li l-Kummissjoni jkollha quddiemha l-istess evidenza ta’ probabbiltà ta’ kontinwazzjoni jew ta’ rikorrenza ta’ dumping u dannu ta’ kwantità u kwalità li jkunu meħtieġa għall-estensjoni tal-miżuri. Investigazzjoni tal-anti-dumping hija proċess fejn iċ-ċertezza dwar l-eżistenza tal-elementi meħtieġa biex tiġi adottata jew imtawla miżura jew biex jintemm proċediment tintlaħaq gradwalment hekk kif l-investigazzjoni tavvanza. Barra minn hekk, ma huwiex eskluż li ċerti żbalji jew ineżattezzi jistgħu jeżistu fl-applikazzjoni. Madankollu, l-eżistenza tagħhom mhux neċessarjament ikollha impatt fuq il-konklużjoni ġenerali li t-talba fiha biżżejjed evidenza ta’ probabbiltà ta’ kontinwazzjoni jew rikorrenza ta’ dumping dannuż, u li l-fajl jistħoqqlu investigazzjoni.

(12)

Barra minn hekk, l-istandard legali ta’ evidenza meħtieġ għal talba (biżżejjed evidenza) jagħmilha ċara li l-kwantità u l-kwalità tal-informazzjoni fit-talba ma humiex l-istess bħal ta’ dik disponibbli fi tmiem investigazzjoni. Ma huwiex eskluż li jsiru bidliet bejn l-istadju tat-talba u l-konklużjoni tal-investigazzjoni. Madankollu, tali bidliet mhux neċessarjament għandhom impatt fuq il-konklużjoni ġenerali li l-fajl jistħoqqlu investigazzjoni peress li hemm biżżejjed evidenza tal-probabbiltà ta’ kontinwazzjoni jew rikorrenza ta’ dumping dannuż.

(13)

Fir-rigward tal-pretensjoni li d-data fit-talba ma turix li l-industrija tal-Unjoni qiegħda ġġarrab dannu materjali, Hansol Paper issottomettiet li l-indikaturi ekonomiċi pprovduti fit-talba juru li l-importazzjonijiet mill-Korea huma f’livelli mhux dannużi, is-sehem mis-suq tal-Korea huwa negliġibbli u l-industrija tal-Unjoni qiegħda taħdem tajjeb f’termini ta’ volum ta’ bejgħ, sehem mis-suq, investimenti u effiċjenza operattiva. Skont Hansol Paper, it-talba rrikonoxxiet li l-prezzijiet tal-bejgħ tal-produtturi tal-Unjoni naqsu matul il-perjodu kkunsidrat iżda ssottomettiet li dan huwa dovut għal fatturi oħrajn fis-suq kollu li ma għandhom xejn x’jaqsmu mal-importazzjonijiet mill-Korea.

(14)

Il-Kummissjoni ċċarat li fit-talba, l-applikant allega l-probabbiltà ta’ kontinwazzjoni jew ta’ rikorrenza ta’ dannu mill-pajjiż ikkonċernat. Il-Kummissjoni tabilħaqq ikkunsidrat li, fit-talba, l-applikant ipprovda biżżejjed evidenza li turi li, wara perjodu inizjali ta’ rkupru, l-industrija tal-Unjoni ġarrbet dannu meta l-importazzjonijiet mill-pajjiż ikkonċernat żdiedu bejn l-1 ta’ Ottubru 2020 u t-30 ta’ Settembru 2021. F’dan ir-rigward, hija fakkret li sejba ta’ dannu materjali tirrikjedi eżami, fost l-oħrajn, tal-fatturi rilevanti kif deskritti fl-Artikolu 5(2)(d) tar-Regolament bażiku. Fil-fatt, il-formulazzjoni tal-Artikolu 5(2) tar-Regolament bażiku tiddikjara li l-ilment għandu jkun fih informazzjoni dwar il-bidliet fil-volum ta’ importazzjonijiet li allegatament kienu oġġett ta’ dumping, l-effett ta’ dawk l-importazzjonijiet fuq il-prezzijiet tal-prodott simili fis-suq tal-Unjoni u l-impatt konsegwenti tal-importazzjonijiet fuq l-industrija tal-Unjoni, kif muri minn fatturi u indiċijiet rilevanti (mhux neċessarjament kollha) li jaffettwaw l-istat tal-industrija tal-Unjoni, bħal dawk elenkati fl-Artikoli 3(3) u 3(5). Dan huwa applikabbli mutatis mutandis għall-analiżi tal-probabbiltà f’rieżami ta’ skadenza. Bl-istess mod, mhux il-fatturi kollha jridu juru deterjorament sabiex jiġi stabbilit dannu materjali (u għalhekk, il-probabbiltà ta’ kontinwazzjoni jew rikorrenza tiegħu). Barra minn hekk, l-eżistenza ta’ fatturi oħrajn li jista’ jkollhom impatt fuq is-sitwazzjoni tal-industrija tal-Unjoni, ma timplikax neċessarjament li l-effett tal-importazzjonijiet oġġett ta’ dumping fuq din l-industrija ma huwiex materjali (għal darb’oħra, dan huwa applikabbli b’mod simili għall-analiżi tal-probabbiltà). Dan huwa aktar minnu fil-każ ta’ rieżami ta’ skadenza fejn l-enfasi tkun fuq x’jiġri jekk il-miżuri jiġu revokati. Barra minn hekk, fil-każ ta’ rieżamijiet ta’ skadenza, il-miżuri anti-dumping jista’ jkollhom ċertu effett pożittiv anke jekk id-dannu jkompli b’mod ġenerali. Fi kwalunkwe każ, il-Kummissjoni nnotat ukoll li t-talba kien fiha biżżejjed evidenza dwar il-probabbiltà ta’ rikorrenza ta’ dannu. B’mod partikolari, din uriet li s-suq tal-Korea huwa kkaratterizzat minn kapaċità żejda sinifikanti fil-produzzjoni. Is-suq domestiku tal-Korea ma huwiex kapaċi jassorbi din il-produzzjoni żejda. Għalhekk, is-suq tal-Unjoni, li huwa globalment l-akbar suq tal-karta termali huwa attraenti għall-esportaturi Koreani f’termini tad-daqs. Barra minn hekk, swieq oħrajn tal-esportazzjoni huma diffiċli biex jiġu aċċessati għal diversi raġunijiet (8). Fuq din il-bażi, il-Kummissjoni kienet intitolata tibda l-investigazzjoni.

(15)

Fir-rigward tal-allegazzjonijiet ta’ Hansol Paper dwar l-iżvilupp pożittiv ta’ xi indikaturi tad-dannu fit-talba, eż., is-sehem mis-suq u l-volum ta’ bejgħ, il-Kummissjoni nnotat li l-miżuri anti-dumping spiss ikollhom effett pożittiv fuq l-istat tal-industrija tal-Unjoni — fattur li naturalment tqies fl-analiżi tal-Kummissjoni.

(16)

Fir-rigward tal-kumment dwar l-interess tal-Unjoni, il-Kummissjoni ma għandha l-ebda obbligu legali li teżamina l-interess tal-Unjoni fl-istadju tal-bidu.

(17)

Fin-Notifika ta’ Bidu, il-Kummissjoni ddikjarat li tista’ tieħu kampjun tal-partijiet interessati f’konformità mal-Artikolu 17 tar-Regolament bażiku.

(18)

Fin-Notifika ta’ Bidu, il-Kummissjoni ddikjarat li kienet għażlet kampjun tal-produtturi tal-Unjoni b’mod provviżorju. Il-Kummissjoni għażlet kampjun ta’ tliet produtturi tal-Unjoni. Il-kriterji użati għall-għażla tal-kampjun kienu l-akbar volum rappreżentattiv ta’ bejgħ u produzzjoni tal-prodott simili fl-UE bejn l-1 ta’ Jannar 2021 u l-31 ta’ Diċembru 2021. Il-produtturi tal-Unjoni inklużi fil-kampjun kienu jirrappreżentaw 86 % tal-volum totali stmat ta’ produzzjoni u bejgħ fl-Unjoni. F’konformità mal-Artikolu 17(2) tar-Regolament bażiku, il-Kummissjoni stiednet lill-partijiet interessati jikkummentaw dwar il-kampjun provviżorju. Wasal kumment wieħed mill-assoċjazzjoni tal-Unjoni li appoġġat il-kampjun provviżorju. Il-kampjun ġie kkonfermat fit-12 ta’ Mejju 2022. Il-kampjun huwa rappreżentattiv tal-industrija tal-Unjoni.

(19)

Sabiex tiddeċiedi jekk il-kampjunar kienx meħtieġ u, jekk iva, biex tagħżel kampjun, il-Kummissjoni talbet lil importaturi mhux relatati jipprovdu l-informazzjoni speċifikata fin-Notifika ta’ Bidu. Ma kien hemm l-ebda importatur mhux relatat li ssottometta l-informazzjoni mitluba. Konsegwentement, il-Kummissjoni ddeċidiet li l-kampjunar ma kienx meħtieġ.

(20)

Il-Kummissjoni stiednet lit-tliet produtturi tal-Unjoni inklużi fil-kampjun u lill-produttur esportatur ewlieni magħruf fil-Korea biex jimlew il-kwestjonarji rilevanti li saru disponibbli online (9) fil-jum tal-bidu.

(21)

Waslu tweġibiet għall-kwestjonarju mingħand it-tliet produtturi tal-Unjoni inklużi fil-kampjun, il-produttur esportatur ewlieni magħruf, Hansol Paper, u l-importaturi relatati tiegħu Hansol Europe B.V. u Hansol America Inc. Barra minn hekk, l-applikant ipprovda tweġiba għall-kwestjonarju bil-makrodata.

(22)

Il-Kummissjoni fittxet u vverifikat l-informazzjoni kollha meqjusa meħtieġa għad-determinazzjoni tal-probabbiltà ta’ kontinwazzjoni jew ta’ rikorrenza ta’ dumping u dannu u tal-interess tal-Unjoni. Iż-żjarat ta’ verifika skont l-Artikolu 16 tar-Regolament bażiku twettqu fil-bini tal-kumpaniji li ġejjin:

Produtturi tal-Unjoni

Produttur esportatur fir-Repubblika tal-Korea

Importaturi relatati

(23)

Fis-27 ta’ April 2023, il-Kummissjoni ddivulgat il-fatti u l-kunsiderazzjonijiet essenzjali li fuq il-bażi tagħhom kien biħsiebha żżomm fis-seħħ id-dazji anti-dumping. Fl-10 ta’ Mejju 2023, il-Kummissjoni bagħtet aġġornament tal-kalkolu tat-twaqqigħ tal-prezz lil Hansol Paper biss. Il-partijiet kollha ngħataw perjodu li fih setgħu jikkummentaw dwar id-divulgazzjoni. Waslu kummenti mingħand l-applikanti u mingħand Hansol Paper.

(24)

Il-kummenti li għamlu l-partijiet interessati ġew ikkunsidrati mill-Kummissjoni u ttieħdu inkunsiderazzjoni, fejn xieraq. L-ebda parti ma talbet seduta ta’ smigħ.

(25)

Minħabba l-għadd limitat ta’ partijiet li ssottomettew id-data, uħud miċ-ċifri ppreżentati hawn taħt kellhom ikunu fil-forma ta’ meded sabiex jiġi evitat ksur tal-kunfidenzjalità. Id-data mill-uniku produttur esportatur li kkoopera qiegħda tingħata f’meded peress li huwa l-unika kumpanija li kkooperat.

(26)

Il-prodott taħt rieżami huwa l-istess bħal dak fl-investigazzjoni oriġinali, jiġifieri ċerta karta termali ħafifa li tiżen 65 g/m2 jew inqas; f’rombli ta’ wisa’ 20 cm jew aktar, piż tar-romblu (inkluża l-karta) ta’ 50 kg jew aktar u dijametru tar-romblu (inkluża l-karta) ta’ 40 cm jew aktar (“rombli jumbo”); b’kisja ta’ taħt fuq naħa waħda jew fuq iż-żewġ naħat jew mingħajrha; miksija b’sustanza termosensittiva fuq naħa waħda jew fuq iż-żewġ naħat; u b’kisja ta’ fuq jew mingħajrha (“il-prodott taħt rieżami”), li attwalment taqa’ taħt il-kodiċijiet NM ex 4809 90 00, ex 4811 90 00, ex 4816 90 00 u ex 4823 90 85 (il-kodiċijiet TARIC: 4809900010, 4811900010, 4816900010, 4823908520).

(27)

Il-karta termali ħafifa hija karta ta’ speċjalità. Għandha kisja attiva termali li tirreaġixxi biex tifforma immaġni meta s-sħana tiġi applikata minn stampaturi b’printheads termali. Il-karta termali ħafifa tintuża għal applikazzjonijiet fil-punt ta’ bejgħ bħall-irċevuti maħruġa mill-bejgħ bl-imnut, iżda wkoll għal tikketti awtoadeżivi għall-imballaġġ, il-biljetti u t-tikketti tal-kummerċ elettroniku.

(28)

Il-karta termali ħafifa tista’ tiġi prodotta b’diversi tipi ta’ żviluppaturi kimiċi. Din l-investigazzjoni tikkonċerna t-tipi kollha.

(29)

Il-prodott ikkonċernat minn din l-investigazzjoni huwa l-prodott taħt rieżami li joriġina mir-Repubblika tal-Poplu taċ-Ċina.

(30)

Kif stabbilit fl-investigazzjoni oriġinali, din l-investigazzjoni tar-rieżami ta’ skadenza kkonfermat li l-prodotti li ġejjin għandhom l-istess karatteristiċi fiżiċi u tekniċi bażiċi kif ukoll l-istess użi bażiċi:

(31)

Għalhekk, dawn il-prodotti huma kkunsidrati bħala prodotti simili skont it-tifsira tal-Artikolu 1(4) tar-Regolament bażiku.

(32)

F’sottomissjoni tal-1 ta’ Lulju 2022, il-produttur esportatur talab kjarifika dwar jekk tipi ta’ prodotti ġodda prodotti mill-industrija tal-Unjoni jiġux inklużi jew esklużi mill-ambitu tar-rieżami ta’ skadenza. Dawn it-tipi ġodda ta’ prodotti ma jużaw l-ebda żviluppatur kimiku u l-immaġni tiġi rilaxxata abbażi tal-fiżika minflok proċess kimiku. Nota għall-fajl datata d-19 ta’ Settembru 2022 iċċarat l-ambitu tal-investigazzjoni fis-sens li l-karta termali ħafifa bi żviluppatur kimiku biss hija koperta mill-proċediment.

(33)

Matul il-perjodu ta’ investigazzjoni tar-rieżami, l-importazzjonijiet tal-karta termali ħafifa mir-Repubblika tal-Korea komplew, għalkemm f’livelli aktar baxxi milli fil-perjodu ta’ investigazzjoni tal-investigazzjoni oriġinali (jiġifieri mill-1 ta’ Jannar 2015 sal-31 ta’ Diċembru 2015). Skont it-tabella 2 ta’ hawn taħt, l-importazzjonijiet ta’ karta termali ħafifa mir-Repubblika tal-Korea ammontaw għal 2,7 % tas-suq tal-Unjoni fil-perjodu ta’ investigazzjoni tar-rieżami meta mqabbla ma’ 13,6 % tas-sehem mis-suq matul l-investigazzjoni oriġinali.

(34)

Hansol Paper ikkooperat fl-investigazzjoni. Dan kien jirrappreżenta (qrib) l-importazzjonijiet kollha tal-prodott taħt rieżami mir-Repubblika tal-Korea. L-ebda produttur esportatur ieħor ma ppreżenta ruħu. Is-sejbiet fir-rigward tal-kontinwazzjoni tad-dumping huma bbażati fuq id-data vverifikata ta’ Hansol Paper.

(35)

Il-Kummissjoni l-ewwel eżaminat jekk il-volum totali ta’ bejgħ domestiku tal-produttur esportatur li kkoopera kienx rappreżentattiv, f’konformità mal-Artikolu 2(2) tar-Regolament bażiku. Il-bejgħ domestiku jkun rappreżentattiv jekk it-total tal-volum ta’ bejgħ domestiku tal-prodott simili lill-klijenti indipendenti fis-suq domestiku għal kull produttur esportatur ikun jirrappreżenta mill-anqas 5 % tal-volum totali ta’ bejgħ għall-esportazzjoni tiegħu tal-prodott taħt rieżami lejn l-Unjoni matul il-perjodu ta’ investigazzjoni tar-rieżami. Abbażi ta’ dan, il-bejgħ totali mill-produttur esportatur tal-prodott simili fis-suq domestiku, kien rappreżentattiv.

(36)

Il-Kummissjoni sussegwentement identifikat it-tipi ta’ prodotti mibjugħin fuq livell domestiku li kienu identiċi jew paragunabbli għat-tipi ta’ prodotti mibjugħin għall-esportazzjoni lejn l-Unjoni għall-produttur esportatur b’bejgħ domestiku rappreżentattiv.

(37)

Il-Kummissjoni mbagħad eżaminat jekk il-bejgħ domestiku mill-produttur esportatur fis-suq domestiku tiegħu għal kull tip ta’ prodott li huwa identiku jew komparabbli ma’ tip ta’ prodott mibjugħ għall-esportazzjoni lejn l-Unjoni kienx rappreżentattiv, f’konformità mal-Artikolu 2(2) tar-Regolament bażiku. Il-bejgħ domestiku ta’ tip ta’ prodott huwa rappreżentattiv jekk il-volum totali ta’ bejgħ domestiku ta’ dak it-tip ta’ prodott lil klijenti indipendenti matul il-perjodu ta’ investigazzjoni tar-rieżami jirrappreżenta mill-anqas 5 % tal-volum totali ta’ bejgħ b’esportazzjoni tat-tip tal-prodott identiku jew komparabbli lejn l-Unjoni. Il-Kummissjoni stabbiliet li, għal xi tipi ta’ prodotti li ġew esportati lejn l-Unjoni matul il-perjodu ta’ investigazzjoni tar-rieżami, ma kien hemm l-ebda bejgħ domestiku u għalhekk ma kienx rappreżentattiv.

(38)

Imbagħad, il-Kummissjoni ddefiniet il-proporzjon ta’ bejgħ profittabbli lil klijenti indipendenti fis-suq domestiku għal kull tip ta’ prodott matul il-perjodu ta’ investigazzjoni tar-rieżami sabiex tiddeċiedi jekk tużax il-bejgħ domestiku effettiv għall-kalkolu tal-valur normali, f’konformità mal-Artikolu 2(4) tar-Regolament bażiku.

(39)

Il-valur normali huwa bbażat fuq il-prezz domestiku effettiv għal kull tip ta’ prodott, irrispettivament minn jekk dak il-bejgħ huwiex profittabbli jew le, jekk:

(40)

F’dan il-każ, il-valur normali huwa l-medja ponderata tal-prezzijiet ta’ bejgħ domestiku kollu ta’ dak it-tip ta’ prodott matul il-perjodu ta’ investigazzjoni tar-rieżami.

(41)

Il-valur normali huwa l-prezz domestiku effettiv għal kull tip ta’ prodott ta’ bejgħ domestiku bi profitt tat-tipi ta’ prodotti biss matul il-perjodu ta’ investigazzjoni tar-rieżami, jekk:

(42)

L-analiżi ta’ bejgħ domestiku wriet li, skont it-tip ta’ prodott, bejn 32 % u 100 % tal-bejgħ domestiku kollu ħalla profitt u li l-prezz ta’ bejgħ medju ponderat ta’ kull tip ta’ prodott kien ogħla mill-kost tal-produzzjoni. Għaldaqstant, skont it-tip ta’ prodott, il-valur normali ġie kkalkolat bħala medja ponderata tal-prezz tal-bejgħ domestiku kollu matul il-perjodu ta’ investigazzjoni tar-rieżami jew medja ponderata ta’ bejgħ bi profitt biss.

(43)

Meta tip ta’ prodott ma nbiegħx fis-suq domestiku, u fin-nuqqas ta’ prezz ta’ bejgħ domestiku ta’ tali tip ta’ prodott minn kwalunkwe produttur esportatur ieħor, il-Kummissjoni bniet il-valur normali f’konformità mal-Artikolu 2(3) u (6) tar-Regolament bażiku.

(44)

Il-valur normali nħadem billi ngħadd dan li ġej mal-kost medju tal-produzzjoni tal-prodott simili tal-produttur esportatur li kkoopera matul il-perjodu ta’ investigazzjoni tar-rieżami:

(45)

Hansol Paper esportat il-prodott taħt rieżami lejn l-Unjoni jew direttament lil klijenti indipendenti jew permezz tal-kumpanija relatata tagħha Hansol Europe.

(46)

Għall-bejgħ tal-produttur esportatur direttament lil klijenti indipendenti fl-Unjoni, il-prezz tal-esportazzjoni kien il-prezz li attwalment tħallas jew dak pagabbli għall-prodott taħt rieżami meta nbiegħ għall-esportazzjoni lejn l-Unjoni, f’konformità mal-Artikolu 2(8) tar-Regolament bażiku.

(47)

Għall-bejgħ tal-prodottur esportatur lejn l-Unjoni permezz ta’ Hansol Europe li taġixxi bħala importatur, il-prezz tal-esportazzjoni ġie stabbilit fuq il-bażi tal-prezz li bih il-prodott importat reġa’ nbiegħ għall-ewwel darba lill-klijenti indipendenti fl-Unjoni, f’konformità mal-Artikolu 2(9) tar-Regolament bażiku. F’dan il-każ, saru aġġustamenti fil-prezz għall-kostijiet kollha mġarrba bejn l-importazzjoni u l-bejgħ mill-ġdid, inklużi l-ispejjeż SG&A, u għall-profitti akkumulati.

(48)

Fir-rigward tal-marġini tal-profitt użat, f’konformità mal-każistika stabbilita tal-qrati tal-Unjoni, (10) il-Kummissjoni ma użatx il-marġini tal-profitt tal-kumpanija relatata minħabba li dan ma huwiex ikkunsidrat affidabbli. Fin-nuqqas ta’ kwalunkwe informazzjoni oħra, din irrikorriet għall-marġni ta’ profitt ta’ 4,5 % li kien intuża wkoll fl-investigazzjoni oriġinali (11).

(49)

Għal kull tip ta’ prodott, il-Kummissjoni qabblet il-valur normali u l-prezz tal-esportazzjoni tal-produttur esportatur fuq bażi ta’ kif joħroġ mill-fabbrika.

(50)

Fejn iġġustifikat mill-ħtieġa li jiġi żgurat tqabbil ġust, il-Kummissjoni aġġustat il-valur normali u/jew il-prezz tal-esportazzjoni għad-differenzi li jaffettwaw il-prezzijiet u l-komparabbiltà tal-prezzijiet, f’konformità mal-Artikolu 2(10) tar-Regolament bażiku. L-aġġustamenti għall-kostijiet tat-trasport, għall-kostijiet tal-immaniġġar u tat-tagħbija, għall-imposti bankarji, għad-dazji doganali tal-UE, għar-ribassi fi tmiem is-sena, għall-kummissjonijiet u għar-rifużjoni tad-dazju tnaqqsu mill-prezzijiet ta’ bejgħ domestiku u/jew tal-esportazzjoni, fejn dawn ġew irrapportati u nstabu li huma ġġustifikati. Il-Kummissjoni sabet li l-pretensjonijiet għal aġġustamenti relatati mal-kostijiet tal-ippakkjar u mal-kostijiet tal-kreditu ma humiex iġġustifikati.

(51)

L-ippakkjar għall-esportazzjoni u għall-bejgħ domestiku kien bażikament identiku, għalhekk ma kien hemm l-ebda raġuni biex tingħata l-pretensjoni ta’ aġġustament.

(52)

L-Artikolu 2(10)(g) tar-Regolament bażiku jipprevedi li meta l-kreditu jkun fattur meqjus fid-determinazzjoni tal-prezzijiet mitluba, aġġustament jista’ jkun iġġustifikat. Il-Kummissjoni ċaħdet l-aġġustament tal-kost ta’ kreditu abbażi tar-raġunament li, minħabba n-natura sensittiva tiegħu, ġie żvelat biss lill-produttur esportatur. Il-Kummissjoni kkonkludiet li l-kost tal-kreditu mogħti ma kienx fattur meqjus mill-parti fid-determinazzjoni tal-prezzijiet mitluba.

(53)

Il-Kummissjoni qabblet il-valur normali medju ponderat ta’ kull tip ta’ prodott simili mal-prezz tal-esportazzjoni medju ponderat tat-tip korrispondenti tal-prodott taħt rieżami, f’konformità mal-Artikolu 2(11) u (12) tar-Regolament bażiku.

(54)

Abbażi ta’ dan, il-marġni tad-dumping medju ponderat espress bħala perċentwal tal-prezz CIF fil-fruntiera tal-Unjoni, bid-dazju mhux imħallas, kien ta’ 29 % għal Hansol Paper. Għalhekk ġie konkluż li d-dumping tkompla matul il-perjodu ta’ investigazzjoni tar-rieżami.

(55)

Wara d-divulgazzjoni finali, Hansol Paper innotat li l-biċċa l-kbira tad-dumping idderivat minn karta termali għat-tikketti u indikat id-differenza f’termini ta’ taħlita tal-prodott bejn il-bejgħ tagħha fl-Unjoni fl-investigazzjoni oriġinali u l-investigazzjoni ta’ rieżami. Il-Kummissjoni tfakkar li l-valur normali u l-prezz tal-esportazzjoni tqabblu għal kull tip ta’ prodott, kif deskritt fit-taqsimiet ta’ hawn fuq, u li, fl-aħħar mill-aħħar, kellu jiġi stabbilit marġni tad-dumping wieħed biss għall-bejgħ tal-prodotti kollha koperti mill-miżuri fis-seħħ. Għalhekk, id-differenza fit-taħlita tal-prodott bejn l-investigazzjoni oriġinali u r-rieżami tqieset meta ġie stabbilit il-marġni tad-dumping.

(56)

Wara s-sejba tal-eżistenza ta’ dumping matul il-perjodu ta’ investigazzjoni tar-rieżami, f’konformità mal-Artikolu 11(2) tar-Regolament bażiku, il-Kummissjoni investigat il-probabbiltà ta’ kontinwazzjoni tad-dumping jekk il-miżuri jiġu revokati. Ġew analizzati l-elementi li ġejjin: il-kapaċità tal-produzzjoni u l-kapaċità ta’ riżerva fir-Repubblika tal-Korea u l-attraenza tas-suq tal-Unjoni kontra swieq oħrajn.

(57)

Skont l-intelliġenza tas-suq, Hansol Paper kienet bil-bosta l-akbar produttur tal-prodott taħt rieżami fir-Repubblika tal-Korea. Il-kapaċità tal-produzzjoni tiegħu varjat skont is-sors. Ir-Rapport ta’ Hansol tal-2019 dwar is-Sostenibbiltà tal-Karta stabbilixxa li dan kien ta’ 355 000 tunnellata fis-sena għad-diviżjoni inkluża l-karta termali ħafifa (12). Matul l-investigazzjoni, filwaqt li ammettiet li dik iċ-ċifra kienet il-kapaċità maħsuba ta’ kisi termali, Hansol Paper issottomettiet ċifri tal-kapaċità tal-produzzjoni fil-medda ta’ 250 000 – 300 000 tunnellata fis-sena. Matul il-verifika fuq il-post, il-kumpanija sostniet li ċ-ċifra kkwotata fir-Rapport tal-2019 ma kinitx akkurata. Il-kumpanija qieset li ċ-ċifri tal-kapaċità fl-Istudju tal-2019-2024 dwar is-Suq Dinji tal-Karta ta’ Laves Chemie Consulting kienu aktar akkurati. Dak l-istudju pprovda stima tal-kapaċità tal-produzzjoni tal-karta termali ta’ Hansol Paper għal 260 000 tunnellata fis-sena (13).

(58)

Skont l-istudju msemmi hawn fuq minn Laves Chemie Consulting, sa dan l-aħħar kien ikun hemm tliet produtturi oħrajn tal-karta termali fir-Repubblika tal-Korea b’kapaċità ta’ produzzjoni totali ta’ 45 000 tunnellata (14). Madankollu, għadu ma huwiex ċar sa liema punt din il-kapaċità tista’ tiġi attivata għal karta termali ħafifa jekk iċ-ċirkostanzi tas-suq jagħtu raġuni għal dan. Skont il-produtturi tal-Unjoni, l-uniku produttur addizzjonali tal-Korea li għadu qiegħed jimmanifattura l-karta termali huwa Donghwa Ind co. Ltd, b’kapaċità ta’ produzzjoni ta’ 15 000 tunnellata fis-sena (15).

(59)

Fid-dawl ta’ dan ta’ hawn fuq, filwaqt li l-Kummissjoni ma setgħetx tikkwantifika l-kapaċità ta’ riżerva fil-Korea b’mod ġenerali, setgħet tistabbilixxi li l-kapaċità ta’ produzzjoni hija sinifikanti, li hija madwar 10 darbiet akbar mill-konsum domestiku fil-Korea u li tirrappreżenta kważi d-doppju tal-konsum tal-Unjoni. Barra minn hekk, Hansol Paper ħabbret ripetutament l-intenzjoni tagħha li tespandi n-negozju tagħha tal-karta termali, kif muri fir-rapport finanzjarju tagħha għall-ewwel nofs tal-2021 (16) u fir-rapporti finanzjarji sussegwenti (ukoll fl-2022 (17)). Tali espansjoni tkun tirrappreżenta żieda mal-kapaċità tal-produzzjoni tal-karta termali tal-Korea fil-perjodu ta’ investigazzjoni tar-rieżami, li diġà kienet ogħla b’mod sinifikanti mill-konsum tal-karta termali ħafifa fl-Unjoni (ara t-Tabella 1).

(60)

Wara d-divulgazzjoni finali, Hansol Paper iddikjarat li s-sejbiet tal-Kummissjoni dwar il-kapaċità fil-Korea kienu skorretti u ma kinux sostanzjati, jiġifieri minħabba li: (i) Hansol Paper kienet l-uniku produttur tal-prodott taħt rieżami fil-Korea, (ii) il-Kummissjoni kienet interpretat ħażin l-avviżi ta’ espansjoni ta’ Hansol Paper u (iii) il-Kummissjoni kienet eżaġerat meta stabbiliet li l-kapaċità tal-produzzjoni ta’ Hansol Paper kienet flessibbli b’mod sinifikanti.

(61)

Il-Kummissjoni ma qablitx. Fir-rigward ta’ Hansol Paper li allegatament hija l-uniku produttur tal-prodott taħt rieżami fil-Korea, il-Kummissjoni ġibdet l-attenzjoni li dan kien ikkontestat minn informazzjoni oħra fil-fajl inklużi dikjarazzjonijiet magħmula minn Hansol Paper innifisha matul l-investigazzjoni tar-rieżami ta’ skadenza (18). Filwaqt li l-Kummissjoni sostniet b’mod konsistenti li Hansol Paper kienet l-uniku produttur esportatur li kkoopera f’din l-investigazzjoni ta’ rieżami, il-Kummissjoni ma kinitx ikkonkludiet li Hansol Paper kienet l-uniku produttur ta’ karta termali ħafifa fir-Repubblika tal-Korea. Għall-kuntrarju, kif spjegat fil-premessa (58) hawn fuq, l-evidenza fil-fajl issuġġeriet li mill-inqas produttur wieħed ieħor tal-karta termali ħafifa fir-Repubblika tal-Korea, jiġifieri Donghwa Ind co. Ltd, jista’ jkun li qed jipproduċi l-prodott taħt rieżami. Il-Kummissjoni nnotat li s-sit web ta’ Donghwa Ind (19) kien jinkludi referenzi għall-produzzjoni tal-karta termali b’mod ġenerali u stampi ta’ prodotti bħal irċevuti fil-punt tal-bejgħ tipikament magħmula minn karta termali ħafifa. Il-Kummissjoni nnotat ukoll li, fid-dawl tal-evidenza kuntrarja, Hansol Paper naqset milli tippreżenta evidenza biex tissostanzja l-pretensjoni tagħha li hija l-uniku produttur ta’ karta termali ħafifa fir-Repubblika tal-Korea. Għalhekk, il-pretensjoni ma ntlaqgħetx.

(62)

Il-Kummissjoni ma qablitx li, kif iddikjarat minn Hansol, il-kapaċità żejda fil-Korea kienet żero. Pereżempju, Hansol Paper ipprovdiet ċifri tal-kapaċità tant baxxi li l-użu tal-kapaċità rrappurtat tagħha kien jaqbeż il-100 % f’xi snin tal-perjodu kkunsidrat.

(63)

F’dak kollu li jirrigwarda l-allegata interpretazzjoni żbaljata tal-avviżi ta’ espansjoni ta’ Hansol Paper u l-kwistjoni tal-kapaċità ta’ produzzjoni flessibbli, il-Kummissjoni ma qablitx. Hansol Paper innifisha kienet ripetutament ħabbret pubblikament fir-rapporti finanzjarji tagħha l-intenzjoni tagħha li tespandi n-negozju tal-karta termali tagħha (20). Il-fatt li l-pjanijiet ta’ investiment disponibbli fiż-żmien taż-żjara ta’ verifika ma kinux jinkludu investimenti mmirati lejn iż-żieda fil-kapaċità ma jipprekludix lil Hansol Paper milli ssegwi l-avviżi tagħha fi stadju aktar tard. Fi kwalunkwe każ, il-mezzi għal Hansol Paper biex tespandi n-negozju tal-karta termali tagħha huma diversi, inklużi l-kapaċitajiet ta’ bdil. Kif innotat mill-parti nnifisha fir-Rapport tal-2022 ta’ Sostenibbiltà ta’ Hansol Paper (21), mingħajr dubju, Hansol Paper għandha faċilitajiet ta’ produzzjoni flessibbli. Anki jekk il-kwantifikazzjoni tal-flessibbiltà ma kinitx disponibbli b’mod ċar, il-fatt li dehret fir-rapport jissuġġerixxi li l-flessibbiltà ma kinitx minuri u, għalhekk, ta’ min iħabbarha pubblikament. It-taħlita tal-prodott fil-pjan ta’ produzzjoni ta’ Hansol Paper għall-2023 ma waqqfitx lill-parti milli taqleb ammont mhux negliġibbli ta’ kapaċitajiet għall-prodott taħt rieżami meta meħtieġ.

(64)

Is-suq domestiku tar-Repubblika tal-Korea huwa żgħir, b’konsum annwali li jvarja minn 20 000 sa 37 200 tunnellata (22). Il-produzzjoni annwali ta’ Hansol Paper waħedha hija bejn erba’ u disa’ darbiet akbar mill-konsum tal-prodott taħt rieżami fis-suq domestiku tiegħu. L-investigazzjoni stabbiliet li, f’termini ta’ volum, il-konsum domestiku qiegħed jonqos billi l-bejgħ domestiku tal-karta termali ħafifa ta’ Hansol Paper, il-produttur dominanti tal-pajjiż, naqas b’29 % matul il-perjodu kkunsidrat (23). Għalhekk, l-industrija tal-karta termali ħafifa tal-Korea hija orjentata lejn l-esportazzjoni. Fir-rigward tal-profittabbiltà ta’ bejgħ domestiku ta’ Hansol Paper, ara t-taqsima 3.2.1 hawn fuq.

(65)

Abbażi tad-data vverifikata ta’ Hansol Paper, il-Kummissjoni stabbiliet li l-volum tal-esportazzjonijiet Koreani lejn destinazzjonijiet għajr l-Unjoni żdied matul il-perjodu taħt rieżami (24). Din stabbiliet ukoll li l-esportazzjonijiet Koreani, b’mod partikolari lejn l-Istati Uniti, kienu sinifikanti (25). Madankollu, il-prezzijiet ta’ bejgħ tal-esportazzjonijiet Koreani lejn destinazzjonijiet għajr l-Unjoni naqsu matul il-perjodu taħt rieżami. Dan jidher b’mod ċar fis-suq tal-Istati Uniti (26). Barra minn hekk, l-awtoritajiet tal-Istati Uniti imponew miżuri anti-dumping fuq l-importazzjonijiet ta’ karta termali li toriġina, fost l-oħrajn, mir-Repubblika tal-Korea fis-27 ta’ Settembru 2021 (27). Għal dawk ir-raġunijiet, f’termini ta’ prezzijiet, is-suq tal-Istati Uniti sar inqas attraenti għall-esportazzjonijiet Koreani.

(66)

Is-suq tal-Unjoni huwa l-akbar suq għall-karta termali ħafifa fid-dinja, li jammonta għal madwar 25 % tal-konsum globali, u għandu potenzjal għoli ta’ tkabbir f’termini assoluti (28). L-investigazzjoni stabbiliet li s-suq tal-Unjoni huwa attraenti f’termini ta’ prezzijiet meta mqabbel ma’ swieq oħrajn. Wara l-impożizzjoni tal-miżuri anti-dumping fl-2017, l-importazzjonijiet mir-Repubblika tal-Korea naqsu b’mod sinifikanti u kienu jammontaw għal 1 000–2 500 tunnellata biss fl-2020. Madankollu, minn dak iż-żmien, u minkejja d-dazji anti-dumping fis-seħħ, il-bejgħ mill-Korea lejn l-Unjoni reġa’ żdied (29) u kien jammonta għal 4 500–6 000 tunnellata fil-perjodu ta’ investigazzjoni tar-rieżami, li jirrappreżenta sehem mis-suq ta’ 2,7 %.

(67)

Wara d-divulgazzjoni finali, Hansol Paper talbet lill-Kummissjoni tikkalkula marġni ta’ dumping għall-bejgħ ta’ Hansol Paper lil swieq ta’ pajjiżi terzi fuq il-bażi li tali kalkolu kien prattika konsistenti fir-rieżamijiet ta’ skadenza mwettqa mill-Kummissjoni u li l-Kummissjoni ma kinitx ivvalutat jekk il-prezzijiet tal-esportazzjoni ta’ Hansol Paper lejn swieq mhux tal-UE kinux jindikaw dumping. Il-Kummissjoni ċċarat li, l-għan ta’ rieżami ta’ skadenza kien li jiġi stabbilit jekk l-iskadenza tal-miżuri kinitx x’aktarx twassal għal kontinwazzjoni jew rikorrenza ta’ dumping u dannu. Minħabba s-sejba ta’ dumping sinifikanti matul il-perjodu ta’ investigazzjoni tar-rieżami għall-bejgħ lejn l-Unjoni u l-konklużjoni sussegwenti dwar il-probabbiltà ta’ kontinwazzjoni ta’ dumping, il-Kummissjoni ma kinitx meħtieġa twettaq xi determinazzjoni ulterjuri ta’ dumping fl-investigazzjoni preżenti. Fir-rigward tal-prezzijiet tal-esportazzjoni ta’ Hansol Paper lejn swieq mhux tal-UE, dawn ġew analizzati fil-premessa (65) hawn fuq. Dawn huma analizzati aktar fil-premessi ta’ hawn taħt.

(68)

Wara d-divulgazzjoni finali, Hansol Paper allegat li l-Kummissjoni kien messha sabet li s-suq tal-karta termali ħafifa tal-Unjoni ma kienx għadu attraenti fid-dawl tal-informazzjoni diġà sottomessa minn Hansol paper (u, li allegatament, ma kienx indirizzat biżżejjed mill-Kummissjoni) u, b’mod partikolari, il-pretensjonijiet li Hansol Paper ma tibqax tikkonċentra fuq is-suq tal-Unjoni, l-importanza tas-suq tal-Istati Uniti għal Hansol Paper, il-livell tal-miżuri anti-dumping tal-Istati Uniti fuq il-karta termali u li l-Kummissjoni ma ddeskrivietx f’dan ir-Regolament l-attivitajiet ta’ Hansol Paper fi swieq terzi oħra.

(69)

Il-Kummissjoni ma qablitx mal-allegat nuqqas ta’ attraenza tas-suq tal-Unjoni għall-esportazzjonijiet Koreani. Il-fatti li matul il-perjodu ta’ investigazzjoni tar-rieżami ma kienx is-suq ewlieni ta’ Hansol Paper f’termini ta’ volum u li Hansol Paper kellha bejgħ sinifikanti lejn l-Istati Uniti ma jdgħajfux l-attraenza tas-suq tal-Unjoni. Barra minn hekk, il-Kummissjoni sostniet li s-sempliċi eżistenza ta’ miżuri anti-dumping fl-Istati Uniti tagħmel is-suq tal-Istati Uniti inqas attraenti minn qabel ma ġiet imposta kwalunkwe miżura, anki jekk il-livell tal-miżuri ma jkunx projbittiv. Fir-rigward tal-bejgħ ta’ Hansol Paper fi swieq oħra, il-Kummissjoni ma setgħetx tiżvela l-volumi tal-bejgħ u l-prezzijiet tagħha fi swieq oħra għal kull pajjiż f’dan ir-Regolament sal-punt li tali informazzjoni kienet tqieset bħala sensittiva mill-parti (jiġifieri l-uniku sors tad-data inkwistjoni). Madankollu, il-Kummissjoni qieset l-istrateġija tal-bejgħ u tal-prezzijiet ta’ Hansol Paper fi swieq oħra, kif kondiviż mal-parti permezz tar-rapporti ta’ verifika. F’dan ir-rigward, il-Kummissjoni sabet li, madwar id-dinja, hemm produzzjoni termali tal-karta f’għadd żgħir ta’ pajjiżi, kif muri fid-Dokument Termali 2019-2024 fl-Istudju tas-Suq Dinji ta’ Laves Chemie. Għalhekk, il-produtturi tal-prodott taħt rieżami jiffaċċjaw kompetizzjoni mill-produtturi lokali fi ftit żoni tad-dinja biss. L-Amerka t’Isfel u l-Amerka Ċentrali, l-Afrika, l-Awstralja u l-biċċa l-kbira tal-pajjiżi Asjatiċi kienu għalhekk importaturi netti ta’ karta termali (30), prinċipalment mill-Korea. Anki jekk, fil-prinċipju, is-swieq mingħajr produzzjoni domestika (sinifikanti) jidhru aktar attraenti mal-ewwel daqqa t’għajn, il-Kummissjoni sabet li, f’termini wiesgħa, il-prezzijiet tal-bejgħ ta’ Hansol Paper tal-prodott taħt rieżami lil swieq tal-esportazzjoni mhux tal-UE, inklużi l-Istati Uniti, naqsu matul il-perjodu kkunsidrat b’livell simili bħall-prezzijiet lejn l-Unjoni. Tqabbil tal-prezzijiet tal-bejgħ ta’ Hansol Paper għas-swieq kollha tal-esportazzjoni mhux tal-UE u l-prezzijiet tal-bejgħ ta’ Hansol Paper lejn l-Unjoni żvela li, matul il-perjodu kkunsidrat, il-prezzijiet tal-UE kienu ġeneralment ogħla b’mod konsistenti mill-prezzijiet tal-bejgħ ta’ Hansol Paper lill-bqija tad-dinja. Għalhekk, il-Kummissjoni kkonfermat li s-suq tal-Unjoni, l-akbar suq tal-karta termali ħafifa fid-dinja u suq b’potenzjal għoli ta’ tkabbir f’termini assoluti, kien suq attraenti għall-esportazzjonijiet Koreani f’termini ta’ volum u prezz, irrispettivament mill-bidliet fin-netwerk tal-bejgħ ta’ Hansol Paper mill-investigazzjoni oriġinali.

(70)

Fid-dawl tas-sejbiet tagħha dwar il-kontinwazzjoni tad-dumping matul il-perjodu ta’ investigazzjoni tar-rieżami kif stabbilit fil-premessa (54), l-eżistenza ta’ kapaċità ta’ produzzjoni flessibbli sinifikanti fir-Repubblika tal-Korea, l-interess tal-Korea li reġa’ beda jikber fis-suq kbir tal-Unjoni bi prezzijiet attraenti u l-miżuri anti-dumping imposti dan l-aħħar fis-suq tal-esportazzjoni ewlieni attwali tiegħu (31), tista’ tkun mistennija żieda ulterjuri fl-importazzjonijiet oġġett ta’ dumping tal-prodott ikkonċernat jekk il-miżuri jitneħħew. Għalhekk, il-Kummissjoni kkonkludiet li hemm probabbiltà kbira li l-iskadenza tal-miżuri anti-dumping fuq l-importazzjonijiet tal-prodott ikkonċernat tirriżulta fil-kontinwazzjoni tad-dumping.

(71)

Il-prodott simili kien immanifatturat minn ħames produtturi fl-Unjoni matul il-perjodu kkunsidrat. Dawn jikkostitwixxu l-“industrija tal-Unjoni” skont it-tifsira tal-Artikolu 4(1) tar-Regolament bażiku.

(72)

Il-produzzjoni totali tal-Unjoni matul il-perjodu ta’ investigazzjoni tar-rieżami kienet stabbilita għal madwar 360 727 tunnellata. Il-Kummissjoni stabbiliet iċ-ċifra abbażi tal-informazzjoni kollha disponibbli dwar l-industrija tal-Unjoni, bħat-tweġiba għall-kwestjonarju sottomessa mill-applikant, kontroverifikata mat-tweġibiet għall-kwestjonarju individwali tal-produtturi tal-Unjoni inklużi fil-kampjun. Kif indikat fil-premessa (18), fil-kampjun intgħażlu tliet produtturi tal-Unjoni li jirrappreżentaw 86 % tal-produzzjoni totali tal-Unjoni tal-prodott simili.

(73)

Il-Kummissjoni stabbiliet il-konsum tal-Unjoni abbażi: (a) id-data tal-applikant dwar il-bejgħ mill-industrija tal-Unjoni tal-prodott simili, kontroverifikata parzjalment mal-volumi ta’ bejgħ irrapportati mill-produtturi tal-Unjoni inklużi fil-kampjun (32); u (b) l-importazzjonijiet tal-prodott taħt rieżami mill-pajjiżi terzi kollha kif irrapportati fil-Eurostat u l-analiżi tad-data dwar l-esportazzjoni tal-produttur esportatur li kkoopera.

(74)

Il-konsum tal-Unjoni żviluppa kif ġej:

Tabella 1

Konsum tal-Unjoni (tunnellati)

(75)

Il-konsum tal-Unjoni naqas bi 8 % mill-2018 sal-2020. Il-konsum tal-Unjoni ġie affettwat fl-2020 minħabba l-pandemija globali tal-COVID, madankollu, il-konsum tal-Unjoni reġa’ lura matul il-perjodu ta’ investigazzjoni tar-rieżami u hemm tnaqqis ġenerali ta’ 2 % matul il-perjodu kkunsidrat.

(76)

Il-Kummissjoni stabbiliet il-volum tal-importazzjonijiet abbażi tat-tweġiba għall-kwestjonarju ppreżentata mill-produttur esportatur li kkoopera u mill-istatistika tal-Eurostat. Is-sehem mis-suq tal-importazzjonijiet kien stabbilit fuq il-bażi tal-konsum tal-Unjoni.

(77)

L-importazzjonijiet mill-pajjiż ikkonċernat żviluppaw kif ġej:

Tabella 2

Volum tal-importazzjonijiet (tunnellati) u sehem mis-suq