(1)

Ir-Regolament (UE) 2015/847 tal-Parlament Ewropew u tal-Kunsill (4) ġie emendat b’mod sostanzjali (5). Billi għandhom isiru iżjed emendi, jenħtieġ li dak ir-Regolament jiġi riformulat fl-interess taċ-ċarezza.

(2)

Ir-Regolament (UE) 2015/847 ġie adottat biex jiżgura li r-rekwiżiti tat-Task Force ta’ Azzjoni Finanzjarja (FATF) fuq il-fornituri ta’ servizzi ta’ trasferiment telegrafiku, u b’mod partikolari l-obbligu li l-fornituri ta’ servizzi ta’ pagament jakkumpanjaw it-trasferimenti ta’ fondi b’informazzjoni dwar il-pagatur u l-benefiċjarju, ikunu ġew applikati b’mod uniformi madwar l-Unjoni. L-aħħar bidliet li ddaħħlu f’Ġunju 2019 fl-istandards tal-FATF dwar teknoloġiji ġodda, li għandhom l-għan li jirregolaw l-assi virtwali u l-fornituri ta’ servizzi tal-assi virtwali, ipprovdew obbligi ġodda u simili għall-fornituri ta’ servizzi tal-assi virtwali, bl-iskop li tiġi ffaċilitata t-traċċabilità tat-trasferimenti tal-assi virtwali. Minbarra dawk il-bidliet, il-fornituri ta’ servizzi tal-assi virtwali jridu jakkumpanjaw it-trasferimenti tal-assi virtwali b’informazzjoni dwar l-oriġinaturi u l-benefiċjarji ta’ dawk it-trasferimenti. Il-fornituri ta’ servizzi tal-assi virtwali huma wkoll obbligati jiksbu, iżommu u jikkondividu dik l-informazzjoni mal-kontroparti tagħhom fuq in-naħa l-oħra tat-trasferiment tal-assi virtwali u jagħmluha disponibbli, jekk jitolbuha, għall-awtoritajiet kompetenti.

(3)

Billi r-Regolament (UE) 2015/847 attwalment japplika biss għat-trasferimenti ta’ fondi, jiġifieri għal karti tal-flus u muniti, flus skritturali, u flus elettroniċi kif definit fl-Artikolu 2, il-punt 2, tad-Direttiva 2009/110/KE tal-Parlament Ewropew u tal-Kunsill (6), huwa xieraq li l-kamp ta’ applikazzjoni tar-Regolament (UE) 2015/847 jiġi estiż sabiex ikopri wkoll it-trasferimenti ta’ assi virtwali.

(4)

Il-flussi ta’ flus illeċiti permezz ta’ trasferimenti ta’ fondi u ta’ assi virtwali jistgħu jagħmlu ħsara lill-integrità, l-istabbiltà u r-reputazzjoni tas-settur finanzjarju, u jheddu s-suq intern tal-Unjoni, kif ukoll l-iżvilupp internazzjonali. Il-ħasil tal-flus, il-finanzjament tat-terroriżmu u l-kriminalità organizzata jibqgħu problemi sinifikanti li għandhom jiġu indirizzati fil-livell tal-Unjoni. Is-saħħa, l-integrità u l-istabbiltà tas-sistema ta’ trasferimenti ta’ fondi u ta’ assi virtwali, u l-fiduċja fis-sistema finanzjarja, mill-aspett globali tagħha, jistgħu jiġu pperikolati serjament bl-isforzi tal-kriminali u s-soċji tagħhom li jgħattu l-oriġini ta’ rikavati kriminali jew li jittrasferixxu fondi jew assi virtwali għal attivitajiet kriminali jew għal skopijiet terroristiċi.

(5)

Sabiex jiffaċilitaw l-attivitajiet kriminali tagħhom, dawk li jwettqu l-ħasil tal-flus u dawk li jiffinanzjaw it-terroriżmu x’aktarx jieħdu vantaġġ mil-libertà tal-movimenti tal-kapital fiż-żona finanzjarja integrata tal-Unjoni, sakemm ma jiġux adottati ċerti miżuri ta’ koordinament fil-livell tal-Unjoni. Il-kooperazzjoni internazzjonali fil-qafas tal-FATF u l-implimentazzjoni globali tar-rakkomandazzjonijiet tiegħu għandhom l-għan li jevitaw il-ħasil tal-flus u l-finanzjament tat-terroriżmu meta jsiru t-trasferimenti ta’ fondi jew ta’ assi virtwali.

(6)

Minħabba d-daqs tal-azzjoni li trid tittieħed, jenħtieġ li l-Unjoni tiżgura li l-Istandards Internazzjonali dwar il-Ġlieda kontra l-Ħasil tal-Flus u l-Finanzjament tat-Terroriżmu u l-Proliferazzjoni adottati mill-FATF fis-16 ta’ Frar 2012 u mbagħad riveduti fil-21 ta’ Ġunju 2019 (ir-“Rakkomandazzjonijiet riveduti tal-FATF”), u b’mod partikolari r-Rakkomandazzjoni 15 tal-FATF dwar teknoloġiji ġodda, ir-Rakkomandazzjoni 16 tal-FATF dwar it-trasferimenti telegrafiċi u n-noti interpretattivi riveduti dwar dawk ir-rakkomandazzjonijiet, ikunu applikati b’mod uniformi fl-Unjoni kollha u li, b’mod partikolari, ma jkunx hemm diskriminazzjoni jew diskrepanza bejn, minn naħa waħda, il-pagamenti jew it-trasferimenti nazzjonali ta’ assi virtwali fi Stat Membru u, min-naħa l-oħra, il-pagamenti jew it-trasferimenti transfruntiera ta’ assi virtwali bejn l-Istati Membri. Azzjoni mhux koordinata mill-Istati Membri li jaġixxu waħedhom fil-qasam tat-trasferimenti transfruntiera ta’ fondi u ta’ assi virtwali jista’ jkollha impatt sinifikanti fuq il-funzjonament tajjeb tas-sistemi ta’ pagament u s-servizzi ta’ assi virtwali fil-livell tal-Unjoni u b’hekk tista’ tagħmel ħsara lis-suq intern fil-qasam tas-servizzi finanzjarji.

(7)

Sabiex jitrawwem approċċ koerenti fil-kuntest internazzjonali u sabiex tiżdied l-effettività tal-ġlieda kontra l-ħasil tal-flus u l-finanzjament tat-terroriżmu, jenħtieġ li azzjoni ulterjuri mill-Unjoni tqis l-iżviluppi fil-livell internazzjonali, b’mod partikolari r-Rakkomandazzjonijiet riveduti tal-FATF.

(8)

Il-firxa globali tagħhom, il-ħeffa li biha jistgħu jitwettqu t-tranżazzjonijiet u l-anonimità possibbli offruta mit-trasferiment tagħhom irendu l-assi virtwali partikolarment suxxettibbli għall-użu ħażin kriminali, inkluż f’sitwazzjonijiet transfruntiera. Sabiex tindirizza b’mod effettiv ir-riskji minħabba l-użu ħażin tal-assi virtwali għall-ħasil tal-flus u għal finijiet ta’ finanzjament tat-terroriżmu, l-Unjoni jenħtieġ li tippromwovi l-applikazzjoni fil-livell globali tal-istandards implimentati minn dan ir-Regolament u l-iżvilupp tad-dimensjoni internazzjonali u transġuriżdizzjonali tal-qafas regolatorju u superviżorju għat-trasferimenti ta’ assi virtwali fir-rigward tal-ħasil tal-flus u l-finanzjament tat-terroriżmu.

(9)

Id-Direttiva (UE) 2015/849 tal-Parlament Ewropew u tal-Kunsill (7), bħala riżultat tal-emenda tagħha bid-Direttiva (UE) 2018/843 tal-Parlament Ewropew u tal-Kunsill (8) introduċiet definizzjoni tal-muniti virtwali u rrikonoxxiet lill-fornituri involuti f’servizzi ta’ skambju bejn muniti virtwali u muniti ta’ kors legali, kif ukoll fornituri tal-kartieri ta’ kustodja, fost l-entitajiet soġġetti għar-rekwiżiti tal-ġlieda kontra l-ħasil tal-flus u l-finanzjament tat-terroriżmu skont id-dritt tal-Unjoni. L-aħħar żviluppi internazzjonali, partikolarment fil-qafas tal-FATF, issa jimplikaw il-ħtieġa li jiġu rregolati kategoriji addizzjonali ta’ fornituri ta’ servizzi tal-assi virtwali li għadhom mhumiex koperti u li titwessa’ d-definizzjoni attwali ta’ munita virtwali.

(10)

Id-definizzjoni ta’ kriptoassi fir-Regolament (UE) 2023/1114 tal-Parlament Ewropew u tal-Kunsill (9) tikkorrispondi għad-definizzjoni ta’ assi virtwali mniżżla fir-Rakkomandazzjonijiet riveduti tal-FATF, u l-lista tas-servizzi tal-kriptoassi u tal-fornituri ta’ servizzi ta’ kriptoassi koperta f’dak ir-Regolament tinkludi wkoll il-fornituri ta’ servizzi ta’ assi virtwali identifikati bħala tali mill-FATF u meqjusa li x’aktarx iqajmu tħassib dwar il-ħasil tal-flus u l-finanzjament tat-terroriżmu. Sabiex tiġi żgurata l-koerenza tad-dritt tal-Unjoni f’dak il-qasam, jenħtieġ li dan ir-Regolament juża l-istess definizzjonijiet ta’ kriptoassi, ta’ servizzi tal-kriptoassi u ta’ fornituri ta’ servizzi ta’ kriptoassi bħal dawk użati fir-Regolament (UE) 2023/1114.

(11)

L-implimentazzjoni u l-infurzar ta’ dan ir-Regolament jirrappreżentaw mezzi rilevanti u effettivi għall-prevenzjoni u l-ġlieda kontra l-ħasil tal-flus u l-finanzjament tat-terroriżmu.

(12)

Dan ir-Regolament mhuwiex maħsub biex jimponi piżijiet jew spejjeż mhux neċessarji fuq il-fornituri ta’ servizzi ta’ pagament, il-fornituri ta’ servizzi ta’ kriptoassi jew persuni li jużaw is-servizzi tagħhom. F’dak ir-rigward, jenħtieġ li l-approċċ preventiv ikun immirat u proporzjonat u jenħtieġ li jikkonforma bis-sħiħ mal-moviment liberu tal-kapital, li huwa ggarantit fl-Unjoni kollha.

(13)

L-Istrateġija Riveduta tal-Unjoni dwar il-Finanzjament tat-Terroriżmu tas-17 ta’ Lulju 2008 (l-“Istrateġija Riveduta”) tiddikjara li jridu jinżammu l-isforzi għall-prevenzjoni tal-finanzjament tat-terroriżmu u għall-kontroll tal-użu minn persuni suspettati b’terroriżmu tar-riżorsi finanzjarji tagħhom stess. Hija tirrikonoxxi li l-FATF qed tfittex kontinwament li ttejjeb ir-rakkomandazzjonijiet tagħha u qed taħdem lejn fehim komuni ta’ kif jenħtieġ li dawk jiġu implimentati. L-Istrateġija Riveduta tinnota li l-implimentazzjoni tar-Rakkomandazzjonijiet riveduti tal-FATF mill-membri kollha tal-FATF u mill-membri tal-korpi reġjonali mmudellati fuq il-FATF hija evalwata fuq bażi regolari u li approċċ komuni għall-implimentazzjoni mill-Istati Membri huwa għalhekk importanti.

(14)

Barra minn hekk, fil-komunikazzjoni tagħha tas-7 ta’ Mejju 2020 dwar Pjan ta’ Azzjoni għal politika komprensiva tal-Unjoni dwar il-prevenzjoni tal-ħasil tal-flus u l-finanzjament tat-terroriżmu, il-Kummissjoni identifikat sitt oqsma ta’ prijorità għal azzjoni urġenti biex jittejjeb ir-reġim tal-Unjoni kontra l-ħasil tal-flus u l-finanzjament tat-terroriżmu, inkluż l-istabbiliment ta’ qafas regolatorju koerenti għal dak ir-reġim fl-Unjoni biex jinkisbu regoli aktar dettaljati u armonizzati, partikolarment biex jiġu indirizzati l-implikazzjonijiet tal-innovazzjoni teknoloġika u l-iżviluppi fl-istandards internazzjonali u biex tiġi evitata implimentazzjoni diverġenti tar-regoli eżistenti. Il-ħidma fil-livell internazzjonali tissuġġerixxi ħtieġa li jiġi estiż il-kamp ta’ applikazzjoni tas-setturi jew tal-entitajiet koperti minn dak ir-reġim u li jiġi vvalutat kif jenħtieġ li dan japplika għall-fornituri ta’ servizzi ta’ kriptoassi li sa issa ma kinux koperti.

(15)

Sabiex jiġi prevenut il-finanzjament tat-terroriżmu, ittieħdu miżuri bl-għan li jkunu ffriżati l-fondi u r-riżorsi ekonomiċi ta’ ċerti persuni, gruppi u entitajiet, inkluż ir-Regolamenti tal-Kunsill (KE) Nru 2580/2001 (10), (KE) Nru 881/2002 (11) u (UE) Nru 356/2010 (12). Għal dak l-istess għan, ittieħdu wkoll miżuri bl-għan li tiġi protetta s-sistema finanzjarja kontra l-inkanalar ta’ fondi u riżorsi ekonomiċi għall-finijiet tat-terroriżmu. Id-Direttiva (UE) 2015/849 fiha għadd ta’ miżuri bħal dawn. Madankollu dawk il-miżuri ma jimpedux kompletament lit-terroristi jew kriminali oħra milli jkollhom aċċess għal sistemi ta’ pagament għat-trasferiment tal-fondi tagħhom.

(16)

It-traċċabbiltà tat-trasferimenti tal-fondi u tal-kriptoassi tista’ tkun għodda partikolarment importanti u valida fil-prevenzjoni, fl-individwazzjoni u fl-investigazzjoni tal-ħasil tal-flus u tal-finanzjament tat-terroriżmu, kif ukoll fl-implimentazzjoni ta’ miżuri restrittivi, b’mod partikolari dawk imposti bir-Regolamenti (KE) Nru 2580/2001, (KE) Nru 881/2002 u (UE) Nru 356/2010. Għalhekk huwa xieraq, sabiex tkun żgurata t-trażmissjoni tal-informazzjoni tul il-katina kollha ta’ pagament jew il-katina tat-trasferiment tal-kriptoassi, li tiġi prevista sistema li timponi l-obbligu fuq il-fornituri ta’ servizzi ta’ pagament li jakkumpanjaw it-trasferimenti ta’ fondi b’informazzjoni dwar il-pagatur u l-prenditur u l-obbligu fuq il-fornituri ta’ servizzi ta’ kriptoassi li jakkumpanjaw it-trasferimenti ta’ kriptoassi, b’informazzjoni dwar l-oriġinatur u l-benefiċjarju.

(17)

Ċerti trasferimenti ta’ kriptoassi jinvolvu fatturi speċifiċi ta’ riskju għoli ta’ ħasil tal-flus, finanzjament tat-terroriżmu u attivitajiet kriminali oħra, b’mod partikolari trasferimenti relatati ma’ prodotti, tranżazzjonijiet jew teknoloġiji mfassla biex itejbu l-anonimità, inkluż kartieri ta’ privatezza, mixers jew tumblers. Sabiex tiġi żgurata t-traċċabbiltà ta’ tali trasferimenti, jenħtieġ li l-Awtorità Superviżorja Ewropea (l-Awtorità Bankarja Ewropea), stabbilita bir-Regolament (UE) Nru 1093/2010 tal-Parlament Ewropew u tal-Kunsill (13) (EBA), tiċċara, b’mod partikolari, kif il-fatturi ta’ riskju elenkati fl-Anness III għad-Direttiva (UE) 2015/849 għandhom jitqiesu mill-fornituri ta’ servizzi ta’ kriptoassi, inkluż meta jwettqu tranżazzjonijiet ma’ entitajiet mhux tal-Unjoni li mhumiex regolati, irreġistrati jew liċenzjati fi kwalunkwe pajjiż terz, jew ma’ indirizzi awtoospitati. Meta jiġu identifikati sitwazzjonijiet ta’ riskju ogħla, jenħtieġ li l-EBA toħroġ linji gwida li jispeċifikaw il-miżuri ta’ diliġenza dovuta msaħħa li l-entitajiet marbuta bl-obbligu jenħtieġ li jikkunsidraw li japplikaw biex jimmitigaw tali riskji, inkluż l-adozzjoni ta’ proċeduri xierqa bħall-użu ta’ għodod analitiċi tat-teknoloġija ta’ reġistru distribwit (DLT), biex jiġu identifikati l-oriġini jew id-destinazzjoni tal-kriptoassi.

(18)

Jenħtieġ li dan ir-Regolament japplika mingħajr preġudizzju għall-miżuri restrittivi nazzjonali u l-miżuri restrittivi tal-Unjoni imposti minn regolamenti bbażati fuq l-Artikolu 215 tat-Trattat dwar il-Funzjonament tal-Unjoni Ewropea, bħar-Regolamenti (KE) Nru 2580/2001, (KE) Nru 881/2002 u (UE) Nru 356/2010 u r-Regolamenti tal-Kunsill (UE) Nru 267/2012 (14), (UE) 2016/1686 (15) u (UE) 2017/1509 (16), li jistgħu jirrikjedu li l-fornituri ta’ servizzi ta’ pagament tal-pagaturi u tal-prendituri, il-fornituri ta’ servizzi ta’ kriptoassi tal-oriġinaturi u tal-benefiċjarji, il-fornituri intermedjarji ta’ servizzi ta’ pagament, kif ukoll il-fornituri intermedjarji ta’ servizzi tal-kriptoassi, jieħdu azzjoni adatta biex jiffriżaw ċerti fondi u kriptoassi jew li jikkonformaw ma’ restrizzjonijiet speċifiċi li jikkonċernaw ċerti trasferimenti ta’ fondi jew ta’ kriptoassi. Il-fornituri ta’ servizzi ta’ pagament u l-fornituri ta’ servizzi ta’ kriptoassi jenħtieġ li jkollhom fis-seħħ politiki, proċeduri u kontrolli interni biex jiżguraw l-implimentazzjoni ta’ dawk il-miżuri restrittivi, inkluż miżuri ta’ skrinjar mal-listi tal-Unjoni u dawk nazzjonali ta’ persuni deżinjati. Jenħtieġ li l-EBA toħroġ linji gwida li jispeċifikaw dawk il-politiki, il-proċeduri u l-kontrolli interni. Huwa maħsub li r-rekwiżiti ta’ dan ir-Regolament dwar politiki, proċeduri u kontrolli interni relatati ma’ miżuri restrittivi fil-futur qrib ser jiġu sostitwiti minn Regolament tal-Parlament Ewropew u tal-Kunsill dwar il-prevenzjoni tal-użu tas-sistema finanzjarja għall-finijiet tal-ħasil tal-flus jew il-finanzjament tat-terroriżmu.

(19)

L-ipproċessar ta’ data personali skont dan ir-Regolament jenħtieġ li jseħħ f’konformità sħiħa mar-Regolament (UE) 2016/679 tal-Parlament Ewropew u tal-Kunsill (17). L-ipproċessar ulterjuri ta’ data personali għal skopijiet kummerċjali jenħtieġ li jkun strettament ipprojbit. Il-ġlieda kontra l-ħasil tal-flus u l-finanzjament tat-terroriżmu hija rikonoxxuta bħala raġuni ta’ interess pubbliku importanti mill-Istati Membri kollha. Fl-applikazzjoni ta’ dan ir-Regolament, it-trasferiment ta’ data personali lil pajjiż terz huwa meħtieġ li jsir f’konformità mal-Kapitolu V tar-Regolament (UE) 2016/679. Huwa importanti li l-fornituri ta’ servizzi ta’ pagament u l-fornituri ta’ servizzi ta’ kriptoassi li joperaw f’ġuriżdizzjonijiet multipli b’fergħat jew sussidjarji li jinsabu barra l-Unjoni ma għandhomx jitwaqqfu milli jittrasferixxu data dwar tranżazzjonijiet suspettużi fi ħdan l-istess organizzazzjoni, bil-kondizzjoni li japplikaw salvagwardji adegwati. Barra minn hekk, jenħtieġ li l-fornituri ta’ servizzi ta’ kriptoassi tal-oriġinatur u tal-benefiċjarju, il-fornituri ta’ servizzi ta’ pagament tal-pagatur u tal-prenditur u l-fornituri intermedjarji ta’ servizzi ta’ pagament u l-fornituri intermedjarji ta’ servizzi tal-kriptoassi jkollhom fis-seħħ miżuri tekniċi u organizzattivi xierqa biex jipproteġu d-data personali kontra telf aċċidentali, tibdil jew divulgazzjoni jew aċċess mhux awtorizzati.

(20)

Persuni li sempliċiment jikkonvertu dokumenti stampati f’data elettronika u li jkunu qed jaġixxu taħt kuntratt ma’ fornitur ta’ servizzi ta’ pagament, u persuni li jipprovdu lil fornituri ta’ servizzi ta’ pagament biss b’sistemi ta’ messaġġi jew sistemi oħra ta’ appoġġ għat-trażmissjoni ta’ fondi jew b’sistemi ta’ kklerjar u ta’ saldu jenħtieġ li ma jaqgħux fil-kamp ta’ applikazzjoni ta’ dan ir-Regolament.

(21)

Persuni li jipprovdu biss infrastruttura anċillari, bħal fornituri ta’ servizzi ta’ network u infrastruttura tal-Internet, fornituri ta’ servizzi tal-cloud jew żviluppaturi ta’ software, li tippermetti lil entità oħra tipprovdi servizzi ta’ trasferiment tal-kriptoassi jenħtieġ li ma jaqgħux fil-kamp ta’ applikazzjoni ta’ dan ir-Regolament sakemm ma jwettqux trasferimenti ta’ kriptoassi.

(22)

Jenħtieġ li dan ir-Regolament ma japplikax għal trasferimenti ta’ kriptoassi minn persuna għal oħra mwettqa mingħajr l-involviment ta’ fornitur ta’ servizzi tal-kriptoassi, jew f’każijiet fejn kemm l-oriġinatur kif ukoll il-benefiċjarju jkunu fornituri ta’ servizzi ta’ trasferiment tal-kriptoassi li jaġixxu f’isimhom stess.

(23)

It-trasferimenti ta’ fondi li jikkorrispondu għas-servizzi msemmija fl-Artikolu 3, il-punti (a) sa (m) u l-punt (o), tad-Direttiva (UE) 2015/2366 tal-Parlament Ewropew u tal-Kunsill (18) ma jaqgħux fil-kamp ta’ applikazzjoni ta’ dan ir-Regolament. Huwa xieraq li jiġu esklużi wkoll mill-kamp ta’ applikazzjoni ta’ dan ir-Regolament trasferimenti ta’ fondi u ta’ tokens tal-flus elettroniċi kif definit fl-Artikolu 3(1), il-punt (7), tar-Regolament (UE) 2023/1114 li jirrappreżentaw riskju baxx ta’ ħasil ta’ flus jew ta’ finanzjament tat-terroriżmu. Jenħtieġ li tali esklużjonijiet ikopru kards tal-ħlas, strumenti ta’ ħlas elettroniku, telefons ċellulari jew apparat diġitali jew ta’ teknoloġija tal-informatika (IT) ieħor imħallas minn qabel jew li jitħallas wara b’karatteristiċi simili, fejn ikunu użati esklużivament għax-xiri ta’ prodotti jew servizzi u n-numru tal-kard, strument jew apparat jakkumpanja t-trasferimenti kollha. Madankollu, l-użu ta’ kard tal-ħlas, strument ta’ flus elettroniċi, telefon ċellulari jew kwalunkwe apparat diġitali jew apparat tal-IT ieħor b’karatteristiċi simili li jkun imħallas minn qabel jew li jitħallas wara sabiex isir trasferiment ta’ fondi jew ta’ tokens tal-flus elettroniċi bejn persuni fiżiċi li jaġixxu ta’ konsumaturi għal skopijiet oħra għajr l-attivitajiet ta’ kummerċ, negozju jew dawk professjonali, jaqa’ fil-kamp ta’ applikazzjoni ta’ dan ir-Regolament. Barra minn hekk, l-irtirar ta’ flus minn kaxxiera awtomatiċi, pagamenti ta’ taxxi, multi jew imposti oħra, trasferimenti ta’ fondi li jsiru permezz ta’ skambji elettroniċi ta’ immaġni diġitali ta’ ċekkijiet, inklużi ċekkijiet tronkati, jew kambjali, u trasferimenti ta’ fondi fejn kemm il-pagatur kif ukoll il-prenditur ikunu l-fornituri ta’ servizzi ta’ pagament li jaġixxu f’isimhom stess jenħtieġ li jkunu esklużi mill-kamp ta’ applikazzjoni ta’ dan ir-Regolament.

(24)

Kriptoassi li huma uniċi u mhux funġibbli mhumiex soġġetti għar-rekwiżiti ta’ dan ir-Regolament sakemm ma jkunux ikklassifikati bħala kriptoassi jew fondi skont ir-Regolament (UE) 2023/1114.

(25)

Il-kaxxiera awtomatiċi tal-kriptoassi (“l-ATMs tal-kripto”) jistgħu jippermettu li l-utenti jwettqu trasferimenti ta’ kriptoassi lejn indirizz tal-kriptoassi billi jiddepożitaw flus kontanti, ta’ spiss mingħajr ebda forma ta’ identifikazzjoni u verifika tal-klijenti. L-ATMs tal-kripto huma esposti b’mod partikolari għar-riskji ta’ ħasil tal-flus u ta’ finanzjament tat-terroriżmu minħabba l-anonimità li jipprovdu, u minħabba l-possibbiltà li joperaw bi flus kontanti ta’ oriġini mhux magħrufa, li jagħmluhom mezz ideali għal attivitajiet illeċiti. Minħabba r-rwol tal-ATMs tal-kripto fil-forniment jew fl-iffaċilitar b’mod attiv ta’ trasferimenti tal-kriptoassi, it-trasferimenti tal-kriptoassi marbuta ma’ ATMs tal-kripto jenħtieġ li jaqgħu taħt il-kamp ta’ applikazzjoni ta’ dan ir-Regolament.

(26)

Sabiex ikunu riflessi l-karatteristiċi speċjali tas-sistemi nazzjonali ta’ pagament, u bil-kondizzjoni li dejjem ikun possibbli li jiġi ttraċċat it-trasferiment ta’ fondi lura sal-pagatur, jenħtieġ li l-Istati Membri jkunu jistgħu jeżentaw mill-kamp ta’ applikazzjoni ta’ dan ir-Regolament ċerti trasferimenti domestiċi ta’ fondi ta’ valur baxx, inkluż pagamenti elettroniċi giro, użati għax-xiri ta’ prodotti jew servizzi.

(27)

Minħabba n-natura mingħajr fruntieri inerenti u l-firxa globali tat-trasferimenti tal-kriptoassi u l-forniment tas-servizzi ta’ kriptoassi, ma hemm l-ebda raġuni oġġettiva sabiex issir distinzjoni bejn it-trattament tar-riskji ta’ ħasil tal-flus u dak tal-finanzjament tat-terroriżmu ta’ trasferimenti nazzjonali minn dak ta’ trasferimenti transfruntieri. Sabiex jiġu riflessi dawk il-karatteristiċi speċifiċi, jenħtieġ li ma tingħata l-ebda eżenzjoni mill-kamp ta’ applikazzjoni ta’ dan ir-Regolament lit-trasferimenti domestiċi ta’ valur baxx tal-kriptoassi, f’konformità mar-rekwiżit tal-FATF li t-trasferimenti kollha tal-kriptoassi jiġu ttrattati bħala transfruntiera.

(28)

Jenħtieġ li l-fornituri ta’ servizzi ta’ pagament u l-fornituri ta’ servizzi ta’ kriptoassi jiżguraw li l-informazzjoni dwar il-pagatur u l-prenditur jew dwar l-oriġinatur u l-benefiċjarju ma tkunx nieqsa jew mhux kompleta.

(29)

Sabiex ma jkunx hemm xkiel għall-effiċjenza tas-sistemi ta’ pagament u sabiex ikunu bbilanċjati r-riskji li t-tranżazzjonijiet jibdew isiru bil-moħbi b’riżultat ta’ rekwiżiti eċċessivament stretti ta’ identifikazzjoni kontra t-theddida terroristika potenzjali ppreżentata minn trasferimenti żgħar ta’ fondi, jenħtieġ li l-obbligu ta’ kontroll jekk l-informazzjoni dwar il-pagatur jew il-prenditur hijiex eżatta fil-każ ta’ trasferimenti ta’ fondi fejn il-verifika tkun għadha ma saritx, jiġi impost biss fir-rigward ta’ trasferimenti ta’ fondi individwali li jaqbżu EUR 1 000, ħlief jekk it-trasferiment jidher li huwa marbut ma’ trasferimenti oħra ta’ fondi li flimkien ikunu jaqbżu l-EUR 1 000, fejn il-fondi jkunu riċevuti jew imħallsa fi flus kontanti jew fi flus elettroniċi anonimi, jew fejn ikun hemm bażi raġonevoli għal suspett ta’ ħasil tal-flus jew ta’ finanzjament tat-terroriżmu.

(30)

Meta mqabbla mat-trasferimenti ta’ fondi, it-trasferimenti ta’ kriptoassi jistgħu jitwettqu f’diversi ġuriżdizzjonijiet fuq skala akbar u b’veloċità akbar minħabba l-firxa globali u l-karatteristiċi teknoloġiċi tagħhom. Minbarra l-psewdoanonimità tal-kriptoassi, dawk il-karatteristiċi tat-trasferimenti tal-kriptoassi joffru lill-kriminali l-opportunità li jwettqu trasferimenti illeċiti kbar b’veloċità għolja filwaqt li jevitaw l-obbligi ta’ traċċabbiltà u jevitaw l-individwazzjoni, billi jistrutturaw tranżazzjoni kbira f’ammonti iżgħar, bl-użu ta’ diversi indirizzi ta’ DLT apparentement mhux relatati, inkluż indirizzi ta’ DLT ta’ darba, u bl-użu ta’ proċessi awtomatizzati. Il-biċċa l-kbira tal-kriptoassi huma wkoll volatili ħafna u l-valur tagħhom jista’ jvarja b’mod sinifikanti f’perjodu ta’ żmien qasir ħafna li jagħmel il-kalkolu tat-tranżazzjonijiet marbuta aktar inċert. Sabiex jiġu riflessi dawk il-karatteristiċi speċifiċi, jenħtieġ li t-trasferimenti tal-kriptoassi jiġu soġġetti għall-istess rekwiżiti irrispettivament mill-ammont tagħhom u minn jekk humiex trasferimenti domestiċi jew transfruntiera.

(31)

Għal trasferimenti ta’ fondi jew għal trasferimenti ta’ kriptoassi fejn il-verifika titqies li tkun saret, jenħtieġ li l-fornituri ta’ servizzi ta’ pagament u l-fornituri ta’ servizzi ta’ kriptoassi ma jkunux meħtieġa li jivverifikaw il-preċiżjoni tal-informazzjoni dwar il-pagatur jew il-prenditur li tkun takkumpanja kull trasferiment ta’ fondi, jew dwar l-oriġinatur u l-benefiċjarju li takkumpanja kull trasferiment ta’ kriptoassi, dment li l-obbligi stabbiliti fid-Direttiva (UE) 2015/849 ikunu ssodisfati.

(32)

Fid-dawl tal-atti leġiżlattivi tal-Unjoni fir-rigward tas-servizzi ta’ pagament, jiġifieri r-Regolament (UE) Nru 260/2012 tal-Parlament Ewropew u tal-Kunsill (19), id-Direttiva (UE) 2015/2366 u r-Regolament (UE) 2021/1230 tal-Parlament Ewropew u tal-Kunsill (20), jenħtieġ li jkun biżżejjed li jiġi previst li l-informazzjoni simplifikata biss takkumpanja t-trasferimenti ta’ fondi fl-Unjoni, bħan-numru tal-kont ta’ pagament jew identifikatur uniku tat-tranżazzjoni.

(33)

Sabiex l-awtoritajiet responsabbli mill-ġlieda kontra l-ħasil tal-flus jew il-finanzjament tat-terroriżmu f’pajjiżi terzi jkunu jistgħu jittraċċaw is-sors ta’ fondi jew ta’ kriptoassi użati għal dawk l-għanijiet, jenħtieġ li t-trasferimenti ta’ fondi jew it-trasferimenti ta’ kriptoassi mill-Unjoni ’l barra mill-Unjoni jkollhom informazzjoni kompleta dwar il-pagatur u l-prenditur, fir-rigward tat-trasferimenti tal-fondi, u dwar l-oriġinatur u l-benefiċjarju, fir-rigward tat-trasferimenti ta’ kriptoassi. Jenħtieġ li l-informazzjoni kompleta dwar il-pagatur u l-prenditur tinkludi l-identifikatur ta’ entità ġuridika (LEI), jew kwalunkwe identifikatur uffiċjali ekwivalenti, meta dak l-identifikatur jiġi pprovdut mill-pagatur lill-fornitur ta’ servizzi ta’ pagament tiegħu, billi dan jippermetti identifikazzjoni aħjar tal-partijiet involuti fi trasferiment ta’ fondi u jista’ jiġi inkluż faċilment f’formati eżistenti ta’ messaġġi tal-pagamenti, bħal dak żviluppat mill-Organizzazzjoni Internazzjonali għall-Istandardizzazzjoni għall-iskambju elettroniku ta’ data bejn l-istituzzjonijiet finanzjarji. Jenħtieġ li l-awtoritajiet responsabbli għall-ġlieda kontra l-ħasil tal-flus jew il-finanzjament tat-terroriżmu f’pajjiżi terzi jingħataw aċċess għal informazzjoni kompleta dwar il-pagatur u l-prenditur jew dwar l-oriġinatur u l-benefiċjarju, skont kif applikabbli, għall-finijiet biss tal-prevenzjoni, l-individwazzjoni u l-investigazzjoni ta’ ħasil tal-flus u finanzjament tat-terroriżmu.

(34)

Il-kriptoassi jeżistu f’realtà virtwali mingħajr fruntieri u jistgħu jiġu trasferiti lil kwalunkwe fornitur ta’ servizzi tal-kriptoassi, irrispettivament minn jekk dak il-fornitur huwiex irreġistrat jew le f’ġuriżdizzjoni. Bosta ġuriżdizzjonijiet mhux tal-Unjoni għandhom fis-seħħ regoli relatati mal-protezzjoni tad-data u l-infurzar li huma differenti minn dawk fl-Unjoni. Meta jiġu ttrasferiti kriptoassi f’isem klijent lil fornitur ta’ servizzi tal-kriptoassi li ma jkunx irreġistrat fl-Unjoni, jenħtieġ li l-fornitur ta’ servizzi tal-kriptoassi tal-oriġinatur jivvaluta l-kapaċità tal-fornitur ta’ servizzi tal-kriptoassi tal-benefiċjarju li jirċievi u jżomm l-informazzjoni meħtieġa skont dan ir-Regolament f’konformità mar-Regolament (UE) 2016/679, bl-użu, fejn xieraq, tal-opzjonijiet disponibbli fil-Kapitolu V tar-Regolament (UE) 2016/679. Jenħtieġ li l-Bord Ewropew għall-Protezzjoni tad-Data, wara li jikkonsulta lill-EBA, joħroġ linji gwida dwar l-implimentazzjoni prattika tar-rekwiżiti tal-protezzjoni tad-data għat-trasferimenti ta’ data personali lejn pajjiżi terzi fil-kuntest ta’ trasferimenti ta’ kriptoassi. Jistgħu jseħħu sitwazzjonijiet fejn id-data personali ma tkunx tista’ tintbagħat minħabba li r-rekwiżiti tar-Regolament (UE) 2016/679 ma jkunux jistgħu jiġu ssodisfati. Jenħtieġ li l-EBA toħroġ linji gwida dwar proċeduri xierqa biex jiġi ddeterminat jekk f’tali każijiet it-trasferiment tal-kriptoassi jenħtieġx li jiġi eżegwit, miċħud jew sospiż.

(35)

Jenħtieġ li l-awtoritajiet tal-Istat Membru responsabbli mill-ġlieda kontra l-ħasil tal-flus u l-finanzjament tat-terroriżmu, u l-awtoritajiet ġudizzjarji u tal-infurzar tal-liġi rilevanti fl-Istati Membri u fil-livell tal-Unjoni, jintensifikaw il-kooperazzjoni bejniethom u mal-awtoritajiet rilevanti tal-pajjiżi terzi, inkluż dawk fil-pajjiżi li qed jiżviluppaw, sabiex jissaħħu aktar it-trasparenza u l-kondiviżjoni tal-informazzjoni u tal-aħjar prattiki.

(36)

Jenħtieġ li l-fornitur ta’ servizzi tal-kriptoassi tal-oriġinatur jiżgura li t-trasferimenti tal-kriptoassi jkunu akkumpanjati mill-isem tal-oriġinatur, l-indirizz tar-reġistru distribwit tal-oriġinatur, f’każijiet meta trasferiment tal-kriptoassi jkun irreġistrat fuq network bl-użu ta’ teknoloġija tad-DLT jew teknoloġija simili, in-numru tal-kont tal-kriptoassi tal-oriġinatur, f’każijiet meta tali kont ikun jeżisti u jintuża biex tiġi pproċessata t-tranżazzjoni, l-indirizz tal-oriġinatur inkluż l-isem tal-pajjiż, in-numru tad-dokument personali uffiċjali u n-numru ta’ identifikazzjoni tal-klijent, jew, inkella, id-data u l-post tat-twelid tal-oriġinatur, u, soġġett għall-eżistenza tal-kamp tad-data meħtieġ fil-format tal-messaġġ rilevanti u meta pprovdut mill-oriġinatur lill-fornitur ta’ servizzi tal-kriptoassi tiegħu, il-LEI attwali jew, fin-nuqqas tiegħu, kwalunkwe identifikatur uffiċjali ekwivalenti ieħor disponibbli tal-oriġinatur. Jenħtieġ li l-informazzjoni tiġi ppreżentata b’mod sigur u qabel it-trasferiment tal-kriptoassi, jew simultanjament jew fl-istess ħin miegħu.

(37)

Jenħtieġ li l-fornitur ta’ servizzi tal-kriptoassi tal-oriġinatur jiżgura wkoll li t-trasferimenti tal-kriptoassi jkunu akkumpanjati mill-isem tal-benefiċjarju, l-indirizz tar-reġistru distribwit tal-benefiċjarju, f’każijiet meta trasferiment ta’ kriptoassi jkun irreġistrat fuq network bl-użu ta’ teknoloġija tad-DLT jew teknoloġija simili, in-numru tal-kont tal-benefiċjarju, f’każijiet meta tali kont ikun jeżisti u jintuża biex tiġi pproċessata t-tranżazzjoni, u, soġġett għall-eżistenza tal-kamp tad-data meħtieġ fil-format tal-messaġġ rilevanti u meta pprovdut mill-oriġinatur lill-fornitur ta’ servizzi tal-kriptoassi tiegħu, il-LEI attwali jew, fin-nuqqas ta’ dan, kwalunkwe identifikatur uffiċjali ekwivalenti ieħor disponibbli tal-benefiċjarju. Jenħtieġ li l-informazzjoni tiġi ppreżentata b’mod sigur u qabel it-trasferiment tal-kriptoassi, jew simultanjament jew fl-istess ħin miegħu.

(38)

Fir-rigward tat-trasferimenti ta’ kriptoassi, jenħtieġ li r-rekwiżiti ta’ dan ir-Regolament japplikaw għat-trasferimenti kollha inkluż trasferimenti ta’ kriptoassi lejn jew minn indirizz awtoospitat, dment li jkun hemm fornitur ta’ servizzi tal-kriptoassi involut.

(39)

Fil-każ ta’ trasferiment lejn jew minn indirizz awtoospitat, jenħtieġ li l-fornitur ta’ servizzi tal-kriptoassi jiġbor l-informazzjoni kemm dwar l-oriġinatur kif ukoll dwar il-benefiċjarju, normalment mingħand il-klijent tiegħu. Fil-prinċipju, jenħtieġ li fornitur ta’ servizzi tal-kriptoassi ma jkollux għalfejn jivverifika l-informazzjoni dwar l-utent tal-indirizz awtoospitat. Madankollu, fil-każ ta’ trasferiment ta’ ammont li jaqbeż l-EUR 1 000 li jintbagħat jew jiġi riċevut f’isem klijent ta’ fornitur ta’ servizzi tal-kriptoassi lil jew minn indirizz awtoospitat, jenħtieġ li dak il-fornitur ta’ servizzi tal-kriptoassi jivverifika jekk dak l-indirizz awtoospitat ikunx effettivament proprjetà ta’ dak il-klijent jew ikkontrollata minnu.

(40)

Fir-rigward ta’ trasferimenti ta’ fondi minn pagatur uniku lil diversi prendituri li għandhom jintbagħtu fi trasferiment f’lottijiet li jinkludu trasferimenti individwali mill-Unjoni ’l barra mill-Unjoni, jenħtieġ li jkun previst li tali trasferimenti individwali jkollhom biss in-numru tal-kont tal-pagament tal-pagatur jew l-identifikatur uniku tat-tranżazzjoni, kif ukoll l-informazzjoni kompleta dwar il-prenditur, dment li l-lott ikun fih informazzjoni kompleta dwar il-pagatur li tiġi vverifikata għall-eżattezza u informazzjoni kompleta dwar il-prenditur li tkun kompletament traċċabbli.

(41)

Fir-rigward ta’ trasferimenti f’lottijiet tal-kriptoassi, jenħtieġ li l-preżentazzjoni tal-informazzjoni dwar l-oriġinatur u l-benefiċjarju f’lottijiet tiġi aċċettata, sakemm dik il-preżentazzjoni sseħħ immedjatament u b’mod sigur. Jenħtieġ li ma jkunx permess li tiġi ppreżentata l-informazzjoni rikjesta wara t-trasferiment, billi l-preżentazzjoni trid issir qabel jew fil-mument li titlesta t-tranżazzjoni, u jenħtieġ li l-fornituri ta’ servizzi ta’ kriptoassi jew entitajiet oħrajn marbuta b’obbligu jippreżentaw l-informazzjoni rikjesta simultanjament mat-trasferiment f’lottijiet tal-kriptoassi.

(42)

Sabiex jiġi kkontrollat jekk l-informazzjoni rikjesta dwar il-pagatur u l-prenditur takkumpanjax it-trasferimenti tal-fondi, u sabiex tingħata għajnuna fl-identifikazzjoni ta’ tranżazzjonijiet suspettużi, jenħtieġ li l-fornitur ta’ servizzi ta’ pagament tal-prenditur u l-fornitur intermedjarju ta’ servizzi ta’ pagament ikollhom proċeduri effettivi stabbiliti biex jindividwaw jekk l-informazzjoni dwar il-pagatur u l-prenditur hijiex nieqsa jew mhux kompleta. Jenħtieġ li dawk il-proċeduri jinkludu monitoraġġ wara jew waqt it-trasferimenti fejn ikun fattibbli. Jenħtieġ li l-awtoritajiet kompetenti jiżguraw li l-fornituri ta’ servizzi ta’ pagament jinkludu l-informazzjoni meħtieġa dwar it-tranżazzjoni mat-trasferiment telegrafiku jew messaġġ relatat tul il-katina kollha ta’ pagament.

(43)

Fir-rigward ta’ trasferimenti tal-kriptoassi, jenħtieġ li l-fornitur ta’ servizzi tal-kriptoassi tal- benefiċjarju jimplimenta proċeduri effettivi biex jindividwa jekk l-informazzjoni dwar l-oriġinatur jew il-benefiċjarju hijiex nieqsa jew mhux kompleta. Jenħtieġ li dawk il-proċeduri jinkludu, fejn ikun xieraq, monitoraġġ wara jew waqt it-trasferimenti. Jenħtieġ li ma jkunx rekwiżit li l-informazzjoni tkun mehmuża direttament mat-trasferiment tal-kriptoassi nnifsu, sakemm din tiġi ppreżentata qabel it-trasferiment tal-kriptoassi, jew simultanjament jew fl-istess ħin miegħu, u tkun disponibbli fuq talba għall-awtoritajiet xierqa.

(44)

Fid-dawl tat-theddida potenzjali ta’ ħasil tal-flus u ta’ finanzjament tat-terroriżmu li t-trasferimenti anonimi jippreżentaw, huwa xieraq li l-fornituri ta’ servizzi ta’ pagament ikunu meħtieġa jitolbu informazzjoni dwar il-pagatur u l-prenditur u li l-fornituri ta’ servizzi tal-kriptoassi ikunu meħtieġa jitolbu informazzjoni dwar l-oriġinatur u l-benefiċjarju. Konformement mal-approċċ ibbażat fuq ir-riskju żviluppat mill-FATF, huwa xieraq li jiġu identifikati oqsma ta’ riskju ogħla u aktar baxx, bil-ħsieb li jiġu immirati aħjar ir-riskji tal-ħasil tal-flus u l-finanzjament tat-terroriżmu. Għaldaqstant, jenħtieġ li l-fornitur ta’ servizzi tal-kriptoassi tal-benefiċjarju, il-fornitur ta’ servizzi ta’ pagament tal-prenditur, il-fornitur intermedjarju ta’ servizzi ta’ pagament u l-fornitur intermedjarju ta’ servizzi tal-kriptoassi jkollhom proċeduri effettivi bbażati fuq ir-riskju li japplikaw fejn trasferiment ta’ fondi ma jkollux l-informazzjoni meħtieġa dwar il-pagatur jew il-prenditur, jew fejn trasferiment ta’ kriptoassi ma jkollux l-informazzjoni meħtieġa dwar l-oriġinatur jew il-benefiċjarju, li tippermetti lil dak il-fornitur ta’ servizzi jiddeċiedi jekk iwettaqx, jirrifjutax jew jissospendix dak it-trasferiment u li jiddetermina azzjoni ta’ segwitu adatta li għandu jieħu.

(45)

Jenħtieġ li l-fornituri ta’ servizzi ta’ kriptoassi, bħall-entitajiet kollha marbutin b’obbligu, jivvalutaw u jimmonitorjaw ir-riskju relatat mal-klijenti, il-prodotti u l-kanali ta’ konsenja tagħhom. Jenħtieġ li l-fornituri ta’ servizzi ta’ kriptoassi jivvalutaw ukoll ir-riskju relatat mat-tranżazzjonijiet tagħhom, inkluż meta jwettqu trasferimenti lejn indirizzi awtoospitati jew minnhom. Fil-każ li l-fornitur ta’ servizzi tal-kriptoassi jkun konxju jew isir konxju li l-informazzjoni dwar l-oriġinatur jew il-benefiċjarju li juża l-indirizz awtoospitat mhijiex preċiża, jew jekk il-fornitur ta’ servizz tal-kriptoassi jiltaqa’ ma’ xejriet mhux tas-soltu jew suspettużi ta’ tranżazzjonijiet jew sitwazzjonijiet ta’ riskji ogħla ta’ ħasil tal-flus u ta’ finanzjament tat-terroriżmu assoċjati ma’ trasferimenti li jinvolvu indirizzi awtoospitati, jenħtieġ li dak il-fornitur ta’ servizzi ta’ kriptoassi jimplimenta, fejn xieraq, miżuri ta’ diliġenza dovuta msaħħa biex jimmaniġġa u jimmitiga r-riskji b’mod xieraq. Il-fornitur ta’ servizzi ta’ kriptoassi jenħtieġ li jqis dawk iċ-ċirkostanzi meta jivvaluta jekk trasferiment ta’ kriptoassi, jew kwalunkwe tranżazzjoni relatata, huwiex anormali u jekk għandux jiġi rrappurtat lill-Unità tal-Intelligence Finanzjarja (UIF) f’konformità mad-Direttiva (UE) 2015/849.

(46)

Jenħtieġ li dan ir-Regolament jiġi rieżaminat fil-kuntest tal-adozzjoni ta’ Regolament tal-Parlament Ewropew u tal-Kunsill dwar il-prevenzjoni tal-użu tas-sistema finanzjarja għall-finijiet tal-ħasil tal-flus jew il-finanzjament tat-terroriżmu, Direttiva tal-Parlament Ewropew u tal-Kunsill dwar il-mekkaniżmi li għandhom jiġu stabbiliti mill-Istati Membri għall-prevenzjoni tal-użu tas-sistema finanzjarja għall-finijiet tal-ħasil tal-flus jew il-finanzjament tat-terroriżmu u li jħassar id-Direttiva (UE) 2015/849 u Regolament tal-Parlament Ewropew u tal-Kunsill li jistabbilixxi l-Awtorità għall-Ġlieda Kontra l-Ħasil tal-Flus u l-Finanzjament tat-Terroriżmu u li jemenda r-Regolamenti (UE) Nru 1093/2010, (UE) Nru 1094/2010, (UE) Nru 1095/2010, sabiex tiġi żgurata l-konsistenza mad-dispożizzjonijiet rilevanti.

(47)

Fil-valutazzjoni tar-riskji, jenħtieġ li l-fornitur ta’ servizzi ta’ pagament tal-prenditur, il-fornitur intermedjarju ta’ servizzi ta’ pagament, il-fornitur ta’ servizzi tal-kriptoassi tal-benefiċjarju jew il-fornitur intermedjarju ta’ servizzi tal-kriptoassi jeżerċitaw viġilanza speċjali meta jsir konxju li l-informazzjoni dwar il-pagatur jew il-prenditur jew dwar l-oriġinatur jew il-benefiċjarju, kif applikabbli, tkun nieqsa jew mhux kompleta, jew meta trasferiment tal-kriptoassi jkun jeħtieġ li jiġi kkunsidrat suspettuż abbażi tal-oriġini jew id-destinazzjoni tal-kriptoassi kkonċernati, u jenħtieġ li jirrapporta tranżazzjonijiet suspettużi lill-awtoritajiet kompetenti f’konformità mal-obbligi ta’ rappurtar stabbiliti fid-Direttiva (UE) 2015/849.

(48)

B’mod simili għat-trasferimenti ta’ fondi bejn il-fornituri ta’ servizzi ta’ pagament, it-trasferimenti ta’ kriptoassi li jinvolvu fornituri intermedjarji ta’ servizzi tal-kriptoassi jistgħu jiffaċilitaw it-trasferimenti bħala element intermedju f’katina ta’ trasferimenti tal-kriptoassi. F’konformità mal-istandards internazzjonali, jenħtieġ li tali fornituri intermedjarji jkunu soġġetti wkoll għar-rekwiżiti stabbiliti f’dan ir-Regolament, bl-istess mod bħall-obbligi eżistenti fuq il-fornituri intermedjarji ta’ servizzi ta’ pagament.

(49)

Id-dispożizzjonijiet dwar it-trasferimenti ta’ fondi u t-trasferimenti tal-kriptoassi li fir-rigward tagħhom informazzjoni dwar il-pagatur jew il-prenditur jew l-oriġinatur jew il-benefiċjarju tkun nieqsa jew ma tkunx kompleta u li fir-rigward tagħhom huwa meħtieġ li t-trasferimenti tal-kriptoassi jitqiesu bħala suspettużi abbażi tal-oriġini jew id-destinazzjoni tal-kriptoassi kkonċernati, japplikaw mingħajr preġudizzju għal kwalunkwe obbligu tal-fornituri ta’ servizzi ta’ pagament, tal-fornituri intermedjarji ta’ servizzi ta’ pagament, tal-fornituri ta’ servizzi ta’ kriptoassi u tal-fornituri intermedjarji ta’ servizzi tal-kriptoassi li jirrifjutaw jew jissospendu trasferimenti ta’ fondi u trasferimenti ta’ kriptoassi li jiksru dispożizzjoni ta’ dritt ċivili, amministrattiv jew kriminali.

(50)

Sabiex tiġi żgurata n-newtralità teknoloġika, jenħtieġ li dan ir-Regolament ma jobbligax l-użu ta’ teknoloġija partikolari għat-trasferiment ta’ informazzjoni dwar it-tranżazzjonijiet mill-fornituri ta’ servizzi ta’ kriptoassi. Sabiex tiġi żgurata l-implimentazzjoni effiċjenti tar-rekwiżiti applikabbli għall-fornituri ta’ servizzi ta’ kriptoassi skont dan ir-Regolament, l-inizjattivi li jistabbilixxu l-istandards li jinvolvu jew li jitmexxew mill-industrija tal-kriptoassi ser ikunu kritiċi. Jenħtieġ li s-soluzzjonijiet li jirriżultaw ikunu interoperabbli permezz tal-użu ta’ standards internazzjonali jew għall-Unjoni kollha sabiex ikun jista’ jsir skambju rapidu ta’ informazzjoni.

(51)

Bil-għan li jassistu lill-fornituri ta’ servizzi tal-pagament u lill-fornituri ta’ servizzi ta’ kriptoassi biex jistabbilixxu proċeduri effettivi għall-individwazzjoni ta’ każijiet fejn jirċievu trasferimenti ta’ fondi jew trasferimenti ta’ kriptoassi b’informazzjoni nieqsa jew mhux kompleta dwar il-pagatur, il-prenditur, l-oriġinatur jew il-benefiċjarju u biex tittieħed azzjoni ta’ segwitu effettiva, jenħtieġ li l-EBA toħroġ linji gwida.

(52)

Sabiex tkun tista’ tittieħed azzjoni immedjata fil-ġlieda kontra l-ħasil tal-flus u l-finanzjament tat-terroriżmu, jenħtieġ li l-fornituri ta’ servizzi ta’ pagament u l-fornituri ta’ servizzi ta’ kriptoassi jirrispondu immedjatament għal talbiet għal informazzjoni dwar il-pagatur u l-prenditur jew dwar l-oriġinatur u l-benefiċjarju mill-awtoritajiet responsabbli mill-ġlieda kontra l-ħasil tal-flus jew il-finanzjament tat-terroriżmu fl-Istat Membru fejn ikunu stabbiliti dawk il-fornituri ta’ servizzi ta’ pagament jew fejn ikollhom l-uffiċċju rreġistrat tagħhom dawk il-fornitur ta’ servizzi tal-kriptoassi.

(53)

L-għadd ta’ ġranet ta’ xogħol li jkunu għaddew fl-Istat Membru tal-fornitur ta’ servizzi ta’ pagament tal-pagatur jiddetermina l-għadd ta’ ġranet li fihom għandha tingħata tweġiba għal talbiet għal informazzjoni dwar il-pagatur.

(54)

Ladarba jista’ jagħti l-każ li f’investigazzjonijiet kriminali ma jkunx possibbli li tiġi identifikata d-data meħtieġa jew l-individwi involuti fi tranżazzjoni għal ħafna xhur, jew anke snin, wara t-trasferiment oriġinali tal-fondi jew it-trasferiment tal-kriptoassi, u sabiex ikun jista’ jkun hemm aċċess għal evidenza essenzjali fil-kuntest tal-investigazzjonijiet, huwa xieraq li l-fornituri ta’ servizzi ta’ pagament jew il-fornituri ta’ servizzi ta’ kriptoassi jkunu meħtieġa jżommu rekords ta’ informazzjoni dwar il-pagatur u l-prenditur jew l-oriġinatur u l-benefiċjarju għal perjodu ta’ żmien għall-finijiet ta’ prevenzjoni, individwazzjoni u investigazzjoni ta’ ħasil tal-flus u finanzjament tat-terroriżmu. Jenħtieġ li dak il-perjodu jkun limitat għal ħames snin u fi tmiemhom jenħtieġ li d-data personali kollha titħassar sakemm ma jkunx previst mod ieħor mil-liġi nazzjonali. Jekk ikun meħtieġ għall-finijiet tal-prevenzjoni, l-individwazzjoni u l-investigazzjoni tal-ħasil tal-flus jew tal-finanzjament tat-terroriżmu, u wara li jwettqu valutazzjoni tan-neċessità u l-proporzjonalità tal-miżura, jenħtieġ li l-Istati Membri jkunu jistgħu jippermettu jew jirrikjedu ż-żamma ta’ rekords għal perjodu ulterjuri ta’ mhux aktar minn ħames snin, mingħajr preġudizzju għal-liġi kriminali nazzjonali dwar l-evidenza applikabbli għal investigazzjonijiet kriminali u proċedimenti legali li jkunu għaddejjin u f’konformità sħiħa mad-Direttiva (UE) 2016/680 tal-Parlament Ewropew u tal-Kunsill (21). Dawk il-miżuri jistgħu jiġu rieżaminati fid-dawl tal-adozzjoni ta’ Regolament tal-Parlament Ewropew u tal-Kunsill dwar il-prevenzjoni tal-użu tas-sistema finanzjarja għall-għanijiet ta’ ħasil tal-flus jew ta’ finanzjament tat-terroriżmu.

(55)

Sabiex titjieb il-konformità ma’ dan ir-Regolament, u f’konformità mal-Komunikazzjoni tal-Kummissjoni tad-9 ta’ Diċembru 2010 intitolata “Rinfurzar tar-reġimi tas-sanzjonar fis-settur tas-servizzi finanzjarji”, jenħtieġ li jissaħħu s-setgħat tal-awtoritajiet kompetenti li jadottaw miżuri superviżorji u s-setgħat tagħhom ta’ sanzjonar. Jenħtieġ li sanzjonijiet u miżuri amministrattivi jkunu previsti u, minħabba l-importanza tal-ġlieda kontra l-ħasil tal-flus u l-finanzjament tat-terroriżmu, jenħtieġ li l-Istati Membri jistabbilixxu sanzjonijiet u miżuri li jkunu effettivi, proporzjonati u dissważivi. Jenħtieġ li l-Istati Membri jinnotifikaw lill-Kummissjoni, u lill-kumitat intern permanenti dwar il-ġlieda kontra l-ħasil tal-flus u l-finanzjament tat-terroriżmu msemmi fl-Artikolu 9a(7) tar-Regolament (UE) Nru 1093/2010 b’dan.

(56)

Sabiex ikunu żgurati kondizzjonijiet uniformi għall-implimentazzjoni ta’ dan ir-Regolament, jenħtieġ li jingħataw setgħat ta’ implimentazzjoni lill-Kummissjoni. Jenħtieġ li dawk is-setgħat ikunu eżerċitati f’konformità mar-Regolament (UE) Nru 182/2011 tal-Parlament Ewropew u tal-Kunsill (22).

(57)

Għadd ta’ pajjiżi u territorji li ma jiffurmawx parti mit-territorju tal-Unjoni jikkondividu unjoni monetarja ma’ Stat Membru, jiffurmaw parti miż-żona monetarja ta’ Stat Membru jew iffirmaw konvenzjoni monetarja mal-Unjoni rappreżentati minn Stat Membru, u għandhom fornituri ta’ servizzi ta’ pagament li jipparteċipaw direttament jew indirettament fis-sistemi ta’ pagament u ta’ saldu ta’ dak l-Istat Membru. Sabiex tkun evitata l-applikazzjoni ta’ dan ir-Regolament għal trasferimenti ta’ fondi bejn l-Istati Membri kkonċernati u dawk il-pajjiżi jew territorji li jkollhom effett negattiv sinifikanti fuq l-ekonomiji ta’ dawk il-pajjiżi jew territorji, hu xieraq li jsir provvediment għall-possibbiltà li tali trasferimenti ta’ fondi jkunu trattati bħala trasferimenti ta’ fondi fl-Istati Membri kkonċernati.

(58)

Minħabba r-riskji għoljin potenzjali assoċjati ma’, u l-kumplessità teknoloġika u regolatorja maħluqa minn, indirizzi awtoospitati, inkluż fir-rigward tal-verifika tal-informazzjoni dwar is-sjieda, sal-1 ta’ Lulju 2026, jenħtieġ li l-Kummissjoni tivvaluta l-ħtieġa għal miżuri speċifiċi addizzjonali biex timmitiga r-riskji ppreżentati minn trasferimenti minn jew lejn indirizzi awtoospitati jew entitajiet mhux stabbiliti fl-Unjoni, inkluż l-introduzzjoni ta’ restrizzjonijiet possibbli, u jenħtieġ li tivvaluta l-effettività u l-proporzjonalità tal-mekkaniżmi użati biex tiġi vverifikata l-preċiżjoni tal-informazzjoni dwar is-sjieda ta’ indirizzi awtoospitati.

(59)

Fil-preżent, id-Direttiva (UE) 2015/849 tapplika biss għal żewġ kategoriji ta’ fornituri ta’ servizzi ta’ kriptoassi, jiġifieri, fornituri tal-kartieri ta’ kustodja u fornituri involuti f’servizzi ta’ skambju bejn muniti virtwali u muniti ta’ kors legali. Sabiex jingħalqu l-lakuni eżistenti fil-qafas kontra l-ħasil tal-flus u kontra l-finanzjament tat-terroriżmu u sabiex id-dritt tal-Unjoni jkun allinjat mar-rakkomandazzjonijiet internazzjonali, jenħtieġ li d-Direttiva (UE) 2015/849 tiġi emendata biex tinkludi l-kategoriji kollha tal-fornituri ta’ servizzi ta’ kriptoassi kif definiti fir-Regolament (UE) 2023/1114, li jkopri firxa usa’ ta’ fornituri ta’ servizzi ta’ kriptoassi. B’mod partikolari, bil-ħsieb li jiġi żgurat li l-fornituri ta’ servizzi ta’ kriptoassi jkunu soġġetti għall-istess rekwiżiti u livell ta’ superviżjoni bħal istituzzjonijiet ta’ kreditu u finanzjament, huwa xieraq li tiġi aġġornata l-lista tal-entitajiet obbligati billi l-fornituri ta’ servizzi ta’ kriptoassi jiġu inklużi fil-kategorija ta’ istituzzjonijiet finanzjarji għall-finijiet tad-Direttiva (UE) 2015/849. Barra minn hekk, filwaqt li jitqies li l-istituzzjonijiet finanzjarji tradizzjonali jaqgħu wkoll fid-definizzjoni ta’ fornituri ta’ servizzi ta’ kriptoassi meta joffru tali servizzi, l-identifikazzjoni tal-fornituri ta’ servizzi ta’ kriptoassi bħala istituzzjonijiet finanzjarji tippermetti sett konsistenti wieħed ta’ regoli li japplikaw għall-entitajiet li jipprovdu kemm servizzi finanzjarji tradizzjonali kif ukoll servizzi tal-kriptoassi. Jenħtieġ li d-Direttiva (UE) 2015/849 tiġi emendata wkoll sabiex jiġi żgurat li l-fornituri ta’ servizzi ta’ kriptoassi jkunu jistgħu jimmitigaw b’mod xieraq ir-riskji tal-ħasil tal-flus u tal-finanzjament tat-terroriżmu li għalihom ikunu esposti.

(60)

Ir-relazzjonijiet stabbiliti bejn il-fornituri ta’ servizzi ta’ kriptoassi u l-entitajiet stabbiliti f’pajjiżi terzi għall-fini tal-eżekuzzjoni ta’ trasferimenti tal-kriptoassi jew il-forniment ta’ servizzi simili tal-kriptoassi jippreżentaw similaritajiet għal relazzjonijiet bankarji korrispondenti stabbiliti ma’ istituzzjoni rispondenti ta’ pajjiż terz. Peress li dawk ir-relazzjonijiet huma kkaratterizzati minn natura kontinwa u ripetittiva, jenħtieġ li dawn jitqiesu bħala tip ta’ relazzjoni korrispondenti u jkunu soġġetti għal miżuri speċifiċi ta’ diliġenza dovuta msaħħa simili fil-prinċipju għal dawk applikati fil-kuntest tas-servizzi bankarji u finanzjarji. B’mod partikolari, l-fornituri ta’ servizzi ta’ kriptoassi, meta jistabbilixxu relazzjoni korrispondenti ġdida ma’ entità rispondenti, jeħtieġ li japplikaw miżuri speċifiċi ta’ diliġenza dovuta msaħħa sabiex jidentifikaw u jivvalutaw l-iskopertura għar-riskju ta’ dak ir-rispondent, abbażi tar-reputazzjoni tiegħu, il-kwalità tas-superviżjoni u l-kontrolli li għandu għall-ġlieda kontra l-ħasil tal-flus u l-finanzjament tat-terroriżmu (AML/CFT). Abbażi tal-informazzjoni miġbura, jenħtieġ li l-fornituri korrispondenti ta’ servizzi tal-kriptoassi jimplimentaw miżuri xierqa ta’ mitigazzjoni tar-riskju, li jenħtieġ li jqisu b’mod partikolari r-riskju ogħla potenzjali ta’ ħasil tal-flus u finanzjament tat-terroriżmu ppreżentat minn entitajiet mhux irreġistrati u mhux liċenzjati. Dak huwa partikolarment rilevanti sakemm l-implimentazzjoni tal-istandards tal-FATF relatati mal-kriptoassi fil-livell globali jibqa’ rregolari, u dan joħloq riskji u sfidi addizzjonali. Jenħtieġ li l-EBA tipprovdi gwida dwar kif il-fornituri ta’ servizzi ta’ kriptoassi għandhom iwettqu d-diliġenza dovuta msaħħa u jenħtieġ li tispeċifika l-miżuri xierqa ta’ mitigazzjoni tar-riskju, inkluż l-azzjoni minima li għandha tittieħed, meta jinteraġixxu ma’ entitajiet li jipprovdu servizzi tal-kriptoassi.

(61)

Ir-Regolament (UE) 2023/1114 stabbilixxa qafas regolatorju komprensiv għall-fornituri ta’ servizzi ta’ kriptoassi, li jarmonizza r-regoli li jikkonċernaw l-awtorizzazzjoni u l-operat tal-fornituri ta’ servizzi ta’ kriptoassi madwar l-Unjoni. Sabiex tiġi evitata d-duplikazzjoni tar-rekwiżiti, jenħtieġ li d-Direttiva (UE) 2015/849 tiġi emendata biex tneħħi r-rekwiżiti tar-reġistrazzjoni fir-rigward ta’ dawk il-kategoriji ta’ fornituri ta’ servizzi ta’ kriptoassi li ser isiru soġġetti għal reġim uniku ta’ liċenzjar skont ir-Regolament (UE) 2023/1114.

(62)

Minħabba li l-objettivi ta’ dan ir-Regolament, jiġifieri l-ġlieda kontra l-ħasil tal-flus u l-finanzjament tat-terroriżmu, inkluż bl-implimentazzjoni ta’ standards internazzjonali u billi tiġi żgurata d-disponibbiltà ta’ informazzjoni bażika dwar il-pagaturi u l-prendituri tat-trasferiment ta’ fondi, u dwar l-oriġinaturi u l-benefiċjarji ta’ trasferimenti tal-kriptoassi, ma jistgħux jinkisbu b’mod suffiċjenti mill-Istati Membri iżda jistgħu pjuttost, minħabba l-iskala u l-effetti tal-azzjoni, jinkisbu aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju ta’ proporzjonalità kif stabbilit f’dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkisbu dawk l-objettivi.

(63)

Dan ir-Regolament huwa soġġett għar-Regolament (UE) 2016/679 u r-Regolament (UE) 2018/1725 tal-Parlament Ewropew u tal-Kunsill (23). Huwa jirrispetta d-drittijiet fundamentali u josserva l-prinċipji rikonoxxuti fil-Karta tad-Drittijiet Fundamentali tal-Unjoni Ewropea, b’mod partikolari d-dritt għar-rispett għall-ħajja privata u tal-familja (l-Artikolu 7), id-dritt għall-protezzjoni tad-data personali (l-Artikolu 8), id-dritt għal rimedju effettiv u għal proċess imparzjali (l-Artikolu 47) u l-prinċipju ta’ ne bis in idem.

(64)

Sabiex tiġi żgurata l-konsistenza mar-Regolament (UE) 2023/1114, jenħtieġ li dan ir-Regolament japplika mid-data tal-applikazzjoni ta’ dak ir-Regolament. Sa dik id-data, l-Istati Membri jenħtieġ li jittrasponu wkoll l-emendi għad-Direttiva (UE) 2015/849.

(65)

Il-Kontrollur Ewropew għall-Protezzjoni tad-Data ġie kkonsultat f’konformità mal-Artikolu 42(1) tar-Regolament (UE) 2018/1725 u ta l-opinjoni tiegħu fit-22 ta’ Settembru 2021 (24),

(1)

Huwa importanti li jiġi żgurat li l-atti leġiżlattivi tal-Unjoni dwar is-servizzi finanzjarji jkunu adatti għall-era diġitali u jikkontribwixxu għal ekonomija għas-servizz tan-nies li tibqa’ valida fil-futur, inkluż billi tippermetti l-użu ta’ teknoloġiji innovattivi. L-Unjoni għandha interess ta’ politika li tiżviluppa u tippromwovi l-adozzjoni ta’ teknoloġiji trasformattivi fis-settur finanzjarju, inkluża l-adozzjoni tat-teknoloġija ta’ reġistru distribwit (“DLT”). Huwa mistenni li ħafna mill-applikazzjonijiet tat-teknoloġija ta’ reġistru distribwit, inkluża t-teknoloġija blockchain, li għadhom ma ġewx studjati bis-sħiħ se jkomplu jirriżultaw f’tipi ġodda ta’ attività kummerċjali u mudelli ta’ negozju li, flimkien mas-settur tal-kriptoassi nnifsu, se jwasslu għal tkabbir ekonomiku u opportunitajiet ġodda ta’ impjieg għaċ-ċittadini tal-Unjoni.

(2)

Il-kriptoassi huma waħda mill-applikazzjonijiet ewlenin tat-teknoloġija ta’ reġistru distribwit. Il-kriptoassi huma rappreżentazzjonijiet diġitali ta’ valur jew ta’ drittijiet li għandhom il-potenzjal li jġibu benefiċċji sinifikanti għall-parteċipanti fis-suq, inklużi d-detenturi fil-livell tal-konsumatur ta’ kriptoassi. Ir-rappreżentazzjonijiet tal-valur jinkludu l-valur estern u nonintrinsiku attribwit lil kriptoassi mill-partijiet ikkonċernati jew mill-parteċipanti fis-suq, u dan ifisser li l-valur huwa soġġettiv u bbażat biss fuq l-interess tax-xerrej tal-kriptoassi. Permezz tas-simplifikazzjoni tal-proċessi ta’ ġenerazzjoni ta’ kapital u t-titjib tal-kompetizzjoni, l-offerti ta’ kriptoassi jistgħu jagħtu lok għal mod ta’ finanzjament innovattiv u inklużiv, inkluż għall-intrapriżi żgħar u ta’ daqs medju (SMEs). Meta jintużaw bħala mezz ta’ pagament, il-kriptoassi jistgħu jippreżentaw opportunitajiet f’termini ta’ pagamenti orħos, aktar rapidi u aktar effiċjenti, b’mod partikolari fuq bażi transfruntiera, billi jillimitaw in-numru ta’ intermedjarji.

(3)

Xi kriptoassi, b’mod partikolari dawk li jikkwalifikaw bħala strumenti finanzjarji kif definiti fid-Direttiva 2014/65/UE tal-Parlament Ewropew u tal-Kunsill (4), jaqgħu fil-kamp ta’ applikazzjoni tal-atti leġiżlattivi eżistenti tal-Unjoni dwar is-servizzi finanzjarji. Għalhekk, sett sħiħ ta’ regoli tal-Unjoni diġà japplika għall-emittenti ta’ tali kriptoassi u għad-ditti li jwettqu attivitajiet relatati ma’ tali kriptoassi.

(4)

Madankollu, kriptoassi oħra jaqgħu barra mill-kamp ta’ applikazzjoni tal-atti leġiżlattivi tal-Unjoni dwar is-servizzi finanzjarji. Fil-preżent, ma hemm l-ebda regola, għajr dawk fir-rigward tal-ġlieda kontra l-ħasil tal-flus, għall-forniment ta’ servizzi relatati ma’ tali kriptoassi mhux regolati, inkluż għall-operat ta’ pjattaformi ta’ negozjar għall-kriptoassi, l-iskambju ta’ kriptoassi ma’ fondi jew ma’ kriptoassi oħrajn, u l-forniment tal-kustodja u l-amministrazzjoni ta’ kriptoassi f’isem il-klijenti. L-assenza ta’ tali regoli tħalli lid-detenturi ta’ dawk il-kriptoassi esposti għar-riskji, b’mod partikolari f’oqsma mhux koperti mir-regoli dwar il-protezzjoni tal-konsumatur. L-assenza ta’ tali regoli tista’ tirriżulta wkoll f’riskji sostanzjali għall-integrità tas-suq, inkluż f’termini ta’ abbuż tas-suq kif ukoll f’termini ta’ kriminalità finanzjarja. Biex jindirizzaw dawk ir-riskji, xi Stati Membri stabbilew regoli speċifiċi għat-totalità, jew għal subsett, tal-kriptoassi li jaqgħu barra mill-kamp ta’ applikazzjoni tal-atti leġiżlattivi tal-Unjoni dwar is-servizzi finanzjarji, u Stati Membri oħra qed jikkunsidraw jekk jilleġiżlawx fil-qasam tal-kriptoassi.

(5)

L-assenza ta’ qafas ġenerali tal-Unjoni għas-swieq fil-kriptoassi jista’ jwassal għal nuqqas ta’ fiduċja tal-utent f’dawk l-assi, li jista’ jxekkel b’mod sinifikanti l-iżvilupp ta’ suq f’dawk l-assi u jwassal għal opportunitajiet mitlufa f’termini ta’ servizzi diġitali innovattivi, strumenti ta’ pagament alternattivi jew sorsi ta’ finanzjament ġodda għall-kumpaniji tal-Unjoni. Barra minn hekk, il-kumpaniji li jużaw il-kriptoassi ma jkollhom l-ebda ċertezza legali dwar kif il-kriptoassi tagħhom jiġu ttrattati fl-Istati Membri differenti, u dan idgħajjef l-isforzi tagħhom biex jużaw il-kriptoassi għall-innovazzjoni diġitali. In-nuqqas ta’ qafas ġenerali tal-Unjoni għas-swieq fil-kriptoassi jista’ jwassal ukoll għal frammentazzjoni regolatorja, li tfixkel il-kompetizzjoni fis-suq intern, tagħmilha aktar diffiċli għall-fornituri ta’ servizzi tal-kriptoassi biex ikabbru l-attivitajiet tagħhom fuq bażi transfruntiera u twassal għal arbitraġġ regolatorju. Is-swieq fil-kriptoassi għadhom modesti fid-daqs u fil-preżent ma humiex ta’ theddida għall-istabbiltà finanzjarja. Madankollu, huwa possibbli li tipi ta’ kriptoassi li għandhom l-għan li jistabbilizzaw il-prezz tagħhom fir-rigward ta’ assi speċifiku jew basket ta’ assi jistgħu fil-futur jiġu adottati b’mod wiesa’ mid-detenturi fil-livell tal-konsumatur, u tali żvilupp jista’ joħloq sfidi addizzjonali f’termini tal-istabbiltà finanzjarja, il-ħidma bla ostakoli ta’ sistemi ta’ ħlas, it-trażmissjoni tal-politika monetarja jew is-sovranità monetarja.

(6)

Għalhekk, huwa meħtieġ qafas iddedikat u armonizzat fil-livell tal-Unjoni għas-swieq fil-kriptoassi sabiex jipprovdi regoli speċifiċi għall-kriptoassi u għas-servizzi u għall-attivitajiet relatati li għadhom ma humiex koperti mill-atti leġiżlattivi tal-Unjoni dwar is-servizzi finanzjarji. Jenħtieġ li tali qafas jappoġġja l-innovazzjoni u l-kompetizzjoni ġusta, filwaqt li jiżgura livell għoli ta’ protezzjoni tad-detenturi fil-livell tal-konsumatur u l-integrità tas-swieq fil-kriptoassi. Qafas ċar jenħtieġ li jippermetti lill-fornituri ta’ servizzi tal-kriptoassi jkabbru n-negozji tagħhom fuq bażi transfruntiera u jiffaċilitalhom l-aċċess għas-servizzi bankarji biex jippermettilhom iwettqu l-attivitajiet tagħhom bla xkiel. Jenħtieġ li qafas tal-Unjoni għas-swieq fil-kriptoassi jipprevedi t-trattament proporzjonat tal-emittenti tal-kriptoassi u tal-fornituri ta’ servizzi tal-kriptoassi, u b’hekk jagħti lok għal opportunitajiet indaqs fir-rigward tad-dħul fis-suq u l-iżvilupp attwali u futur tas-swieq fil-kriptoassi. Jenħtieġ li jippromwovi wkoll l-istabbiltà finanzjarja u l-ħidma bla ostakoli ta’ sistemi ta’ ħlas, u jindirizza r-riskji għall-politika monetarja li jistgħu jirriżultaw minn kriptoassi li jkollhom l-għan li jistabbilizzaw il-prezz tagħhom fir-rigward ta’ assi speċifiku jew ta’ basket ta’ assi. Regolamentazzjoni xierqa żżomm il-kompetittività tal-Istati Membri fis-swieq finanzjarji u teknoloġiċi internazzjonali u tipprovdi lill-klijenti benefiċċji sinifikanti f’termini ta’ aċċess għal servizzi finanzjarji u mmaniġġjar tal-assi orħos, aktar rapidi u aktar sikuri. Jenħtieġ li qafas tal-Unjoni għas-swieq fil-kriptoassi ma jirregolax it-teknoloġija sottostanti. Jenħtieġ li l-atti leġiżlattivi tal-Unjoni jevitaw li jimponu piż regolatorju mhux meħtieġ u sproporzjonat fuq l-użu tat-teknoloġija, peress li l-Unjoni u l-Istati Membri jfittxu li jżommu l-kompetittività f’suq globali.

(7)

Il-mekkaniżmi ta’ kunsens użati għall-validazzjoni tat-tranżazzjonijiet fil-kriptoassi jista’ jkollhom impatti negattivi prinċipali fuq il-klima u impatti negattivi oħra relatati mal-ambjent. Għalhekk, jenħtieġ li tali mekkaniżmi ta’ kunsens jużaw soluzzjonijiet aktar ekoloġiċi u jiżguraw li kwalunkwe impatt negattiv prinċipali li jista’ jkollhom fuq il-klima, u kwalunkwe impatt negattiv ieħor relatat mal-ambjent, jiġi identifikat u żvelat b’mod adegwat mill-emittenti tal-kriptoassi u mill-fornituri ta’ servizzi tal-kriptoassi. Meta jiġi ddeterminat jekk l-impatti negattivi humiex prinċipali, jenħtieġ li jitqies il-prinċipju tal-proporzjonalità u d-daqs u l-volum tal-kriptoassi maħruġ. L-awtorità Superviżorja Ewropea (l-Awtorità Ewropea tat-Titoli u s-Swieq) (ESMA) stabbilita bir-Regolament (UE) Nru 1095/2010 tal-Parlament Ewropew u tal-Kunsill (5), f’kooperazzjoni mal-Awtorità Superviżorja Ewropea (l-Awtorità Bankarja Ewropea) (EBA) stabbilita bir-Regolament (UE) Nru 1093/2010 tal-Parlament Ewropew u tal-Kunsill (6), għalhekk jenħtieġ li tingħata l-mandat li tiżviluppa abbozz ta’ standards tekniċi regolatorji biex tispeċifika aktar il-kontenut, il-metodoloġiji u l-preżentazzjoni tal-informazzjoni fir-rigward tal-indikaturi tas-sostenibbiltà fir-rigward tal-impatti negattivi relatati mal-klima u impatti negattivi oħra relatati mal-ambjent, u biex tiddeskrivi l-indikaturi ewlenin tal-enerġija. Jenħtieġ li l-abbozz ta’ standards tekniċi regolatorji jiżgura wkoll il-koerenza tal-iżvelar mill-emittenti tal-kriptoassi u minn fornituri ta’ servizzi tal-kriptoassi. Meta tiżviluppa l-abbozz ta’ standards tekniċi regolatorji, jenħtieġ li l-ESMA tqis id-diversi tipi ta’ mekkaniżmi ta’ kunsens użati għall-validazzjoni tat-tranżazzjonijiet fil-kriptoassi, il-karatteristiċi tagħhom u d-differenzi bejniethom. L-ESMA jenħtieġ li tqis ukoll ir-rekwiżiti eżistenti ta’ żvelar, tiżgura l-komplementarjetà u l-konsistenza, u tevita li żżid il-piż fuq il-kumpaniji.

(8)

Is-swieq fil-kriptoassi huma globali u għalhekk intrinsikament transfruntiera. Għalhekk, jenħtieġ li l-Unjoni tkompli tappoġġja l-isforzi internazzjonali biex tippromwovi l-konverġenza fit-trattament tal-kriptoassi u tas-servizzi tal-kriptoassi permezz ta’ organizzazzjonijiet jew korpi internazzjonali bħall-Bord għall-Istabbiltà Finanzjarja, il-Kumitat ta’ Basel dwar is-Superviżjoni Bankarja u t-Task Force ta’ Azzjoni Finanzjarja.

(9)

Jenħtieġ li l-atti leġiżlattivi tal-Unjoni dwar is-servizzi finanzjarji jkunu ggwidati mill-prinċipji ta’ “l-istess attivitajiet, l-istess riskji, l-istess regoli” u tan-newtralità teknoloġika. Għalhekk, il-kriptoassi li jaqgħu taħt l-atti leġiżlattivi eżistenti tal-Unjoni dwar is-servizzi finanzjarji jenħtieġ li jibqgħu regolati skont il-qafas regolatorju eżistenti, irrispettivament mit-teknoloġija użata għall-ħruġ jew it-trasferiment tagħhom, pjuttost milli minn dan ir-Regolament. Għaldaqstant, dan ir-Regolament jeskludi espressament mill-kamp ta’ applikazzjoni tiegħu l-kriptoassi li jikkwalifikaw bħala strumenti finanzjarji kif definiti fid-Direttiva 2014/65/UE, dawk li jikkwalifikaw bħala depożiti kif definiti fid-Direttiva 2014/49/UE tal-Parlament Ewropew u tal-Kunsill (7), inklużi depożiti strutturati kif definiti fid-Direttiva 2014/65/UE, dawk li jikkwalifikaw bħala fondi kif definiti fid-Direttiva (UE) 2015/2366 tal-Parlament Ewropew u tal-Kunsill (8), ħlief jekk jikkwalifikaw bħala tokens tal-flus elettroniċi (“tokens tal-flus elettroniċi”), dawk li jikkwalifikaw bħala pożizzjonijiet ta’ titolizzazzjoni kif definiti fir-Regolament (UE) 2017/2402 tal-Parlament Ewropew u tal-Kunsill (9), u dawk li jikkwalifikaw bħala kuntratti tal-assigurazzjoni mhux tal-ħajja jew tal-ħajja, prodotti jew skemi tal-pensjoni u skemi tas-sigurtà soċjali. Wara li jiġi kkunsidrat il-fatt li l-flus elettroniċi u l-fondi riċevuti bi skambju għal flus elettroniċi jenħtieġ li ma jiġux trattati bħala depożiti f’konformità mad-Direttiva 2009/110/KE tal-Parlament Ewropew u tal-Kunsill (10), it-tokens tal-flus elettroniċi ma jistgħux jiġu trattati bħala depożiti li huma esklużi mill-kamp ta’ applikazzjoni ta’ dan ir-Regolament.

(10)

Jenħtieġ li dan ir-Regolament ma japplikax għal kriptoassi li huma uniċi u mhux funġibbli ma’ kriptoassi oħrajn, inkluż l-arti diġitali u l-oġġetti ta’ kollezzjoni. Il-valur ta’ tali kriptoassi uniċi u mhux funġibbli huwa attribwibbli għall-karatteristiċi uniċi ta’ kull kriptoassi u l-utilità li jagħti lid-detentur tat-token. Lanqas ma jenħtieġ li dan ir-Regolament japplika għal kriptoassi li jirrappreżentaw servizzi jew assi fiżiċi li huma uniċi u mhux funġibbli, bħal garanziji tal-prodotti jew proprjetà immobbli. Filwaqt li kriptoassi uniċi u mhux funġibbli jistgħu jiġu nnegozjati fuq is-suq u jiġu akkumulati b’mod spekulattiv, ma humiex faċilment interkambjabbli u l-valur relattiv ta’ tali kriptoassi meta mqabbel ma’ ieħor, kull wieħed minnhom uniku, ma jistax jiġi aċċertat permezz ta’ tqabbil ma’ suq eżistenti jew assi ekwivalenti. Tali karatteristiċi jillimitaw il-punt sa fejn dawk il-kriptoassi jista’ jkollhom użu finanzjarju, u b’hekk jillimitaw ir-riskji għad-detenturi u għas-sistema finanzjarja u jiġġustifikaw l-esklużjoni tagħhom mill-kamp ta’ applikazzjoni ta’ dan ir-Regolament.

(11)

Il-partijiet frazzjonali ta’ kriptoassi uniku u mhux funġibbli jenħtieġ li ma jitqisux uniċi u mhux funġibbli. Il-ħruġ ta’ kriptoassi bħala tokens mhux funġibbli f’serje kbira jew ġabra jenħtieġ li jitqies bħala indikatur tal-funġibbiltà tagħhom. Is-sempliċi attribuzzjoni ta’ identifikatur uniku għal kriptoassi ma hijiex fiha nnifisha biżżejjed biex tikklassifikah bħala uniku u mhux funġibbli. L-assi jew id-drittijiet rappreżentati jenħtieġ li jkunu wkoll uniċi u mhux funġibbli sabiex il-kriptoassi jitqies uniku u mhux funġibbli. L-esklużjoni ta’ kriptoassi li huma uniċi u mhux funġibbli mill-kamp ta’ applikazzjoni ta’ dan ir-Regolament hija mingħajr preġudizzju għall-kwalifika ta’ tali kriptoassi bħala strumenti finanzjarji. Jenħtieġ li dan ir-Regolament japplika wkoll għall-kriptoassi li jidhru li huma uniċi u mhux funġibbli, iżda li l-karatteristiċi de facto tagħhom jew li l-karatteristiċi tagħhom li huma marbuta mal-użi de facto tagħhom, jagħmluhom funġibbli jew mhux uniċi. F’dak ir-rigward, meta jivvalutaw u jikklassifikaw il-kriptoassi, jenħtieġ li l-awtoritajiet kompetenti jadottaw approċċ ta’ sustanza fuq il-forma meta l-karatteristiċi tal-kriptoassi in kwistjoni jiddeterminaw il-klassifikazzjoni u mhux id-deżinjazzjoni tiegħu mill-emittent.

(12)

Huwa xieraq li ċerti tranżazzjonijiet intragrupp u xi entitajiet pubbliċi jiġu esklużi mill-kamp ta’ applikazzjoni ta’ dan ir-Regolament peress li dawn ma joħolqux riskji għall-protezzjoni tal-investituri, l-integrità tas-suq, l-istabbiltà finanzjarja, il-ħidma bla ostakoli ta’ sistemi ta’ ħlas, it-trażmissjoni tal-politika monetarja jew is-sovranità monetarja. L-organizzazzjonijiet internazzjonali pubbliċi li huma eżentati jinkludu l-Fond Monetarju Internazzjonali u l-Bank għall-Ħlasijiet Internazzjonali.

(13)

L-assi diġitali maħruġa minn banek ċentrali li jaġixxu fil-kapaċità tagħhom ta’ awtorità monetarja, inklużi flus tal-bank ċentrali f’forma diġitali, jew kriptoassi maħruġa minn awtoritajiet pubbliċi oħra, inklużi amministrazzjonijiet ċentrali, reġjonali u lokali, jenħtieġ li ma jkunux soġġetti għall-qafas tal-Unjoni għas-swieq fil-kriptoassi. Lanqas ma jenħtieġ li servizzi relatati pprovduti minn tali banek ċentrali meta jaġixxu fil-kapaċità tagħhom ta’ awtorità monetarja jew awtoritajiet pubbliċi oħra jkunu soġġetti għal dak il-qafas tal-Unjoni.

(14)

Għall-finijiet li tiġi żgurata delineazzjoni ċara bejn, min-naħa waħda, il-kriptoassi koperti minn dan ir-Regolament u, min-naħa l-oħra, l-istrumenti finanzjarji, jenħtieġ li l-ESMA tingħata l-mandat li toħroġ linji gwida dwar il-kriterji u l-kundizzjonijiet għall-kwalifika tal-kriptoassi bħala strumenti finanzjarji. Jenħtieġ li dawk il-linji gwida jippermettu wkoll fehim aħjar tal-każijiet meta kriptoassi li altrimenti jitqiesu uniċi u mhux funġibbli ma’ kriptoassi oħra jistgħu jikkwalifikaw bħala strumenti finanzjarji. Sabiex jippromwovu approċċ komuni għall-klassifikazzjoni tal-kriptoassi, EBA, ESMA u l-Awtorità Superviżorja Ewropea (l-Awtorità Ewropea tal-Assigurazzjoni u l-Pensjonijiet tax-Xogħol) (EIOPA), stabbilita bir-Regolament (UE) Nru 1094/2010 tal-Parlament Ewropew u tal-Kunsill (11) (l-“Awtoritajiet Superviżjorji Ewropej” jew l-“ASE”) jenħtieġ li jippromwovu diskussjonijiet dwar tali klassifikazzjoni. Jenħtieġ li l-awtoritajiet kompetenti jkunu jistgħu jitolbu opinjonijiet mill-ASE dwar il-klassifikazzjoni tal-kriptoassi, inklużi klassifikazzjonijiet proposti minn offerenti jew persuni li jkunu qed ifittxu l-ammissjoni għan-negozjar. L-offerenti jew il-persuni li jkunu qed ifittxu l-ammissjoni għan-negozjar huma primarjament responsabbli għall-klassifikazzjoni korretta ta’ kriptoassi, li tista’ tiġi kkontestata mill-awtoritajiet kompetenti, kemm qabel id-data tal-pubblikazzjoni tal-offerta kif ukoll fi kwalunkwe ħin wara. Meta l-klassifikazzjoni ta’ kriptoassi tidher li hija inkonsistenti ma’ dan ir-Regolament jew mal-atti leġiżlattivi rilevanti oħra tal-Unjoni dwar is-servizzi finanzjarji, l-ASE jenħtieġ li jagħmlu użu mis-setgħat tagħhom skont ir-Regolamenti (UE) Nru 1093/2010, (UE) Nru 1094/2010 u (UE) Nru 1095/2010 sabiex ikun żgurat approċċ konsistenti u koerenti għal tali klassifikazzjoni.

(15)

Skont l-Artikolu 127(2), ir-raba’ inċiż, tat-Trattat dwar il-Funzjonament tal-Unjoni Ewropea (TFUE), wieħed mill-kompiti bażiċi li għandu jitwettaq permezz tas-Sistema Ewropea ta’ Banek Ċentrali (SEBĊ) huwa l-promozzjoni tal-ħidma bla ostakoli ta’ sistemi ta’ ħlas. Il-Bank Ċentrali Ewropew (BĊE) jista’, skont l-Artikolu 22 tal-Protokoll Nru 4 dwar l-Istatut tas-Sistema Ewropea ta’ Banek Ċentrali u tal-Bank Ċentrali Ewropew mehmuż mat-Trattati, jagħmel regolamenti biex jiżgura li s-sistemi ta’ kklirjar u ta’ pagament fi ħdan l-Unjoni u ma’ pajjiżi oħra jkunu sodi u effiċjenti. Għal dak l-għan, il-BĊE adotta regolamenti dwar rekwiżiti għal sistemi ta’ pagament sistemikament importanti. Dan ir-Regolament huwa mingħajr preġudizzju għar-responsabbiltajiet tal-BĊE u tal-banek ċentrali nazzjonali fis-SEBĊ biex jiżgura li s-sistemi ta’ kklirjar u ta’ pagament fi ħdan l-Unjoni u ma’ pajjiżi oħra jkunu sodi u effiċjenti. Konsegwentement, u sabiex jiġi evitat il-ħolqien possibbli ta’ settijiet ta’ regoli paralleli, l-EBA, l-ESMA u l-BĊE jenħtieġ li jikkooperaw mill-qrib meta jħejju l-abbozz tal-istandards tekniċi rilevanti skont dan ir-Regolament. Barra minn hekk, huwa kruċjali li l-BĊE u l-banek ċentrali nazzjonali jkollhom aċċess għall-informazzjoni meta jwettqu l-kompiti tagħhom relatati mas-sorveljanza tas-sistemi ta’ pagament, inkluż l-ikklerjar tal-pagamenti. Barra minn hekk, dan ir-Regolament jenħtieġ li jkun mingħajr preġudizzju għar-Regolament tal-Kunsill (UE) Nru 1024/2013 (12) u jenħtieġ li jiġi interpretat b’tali mod li ma jkunx f’kunflitt ma’ dak ir-Regolament.

(16)

Kwalunkwe att leġiżlattiv adottat fil-qasam tal-kriptoassi jenħtieġ li jkun speċifiku, jibqa’ validu fil-futur u jkun kapaċi jżomm il-pass mal-iżviluppi fl-innovazzjoni u fit-teknoloġija u jkun imsejjes fuq approċċ ibbażat fuq l-inċentivi. Għalhekk, jenħtieġ li t-termini “kriptoassi” u “teknoloġija ta’ reġistru distribwit” jiġu ddefiniti bl-usa’ mod possibbli sabiex ikopru t-tipi kollha ta’ kriptoassi li bħalissa jaqgħu barra mill-kamp ta’ applikazzjoni tal-atti leġiżlattivi tal-Unjoni dwar is-servizzi finanzjarji. Jenħtieġ li kwalunkwe att leġiżlattiv adottat fil-qasam tal-kriptoassi ta’ dan it-tip jikkontribwixxi wkoll għall-objettiv tal-ġlieda kontra l-ħasil tal-flus u l-finanzjament tat-terroriżmu. Għal dik ir-raġuni, l-entitajiet li joffru servizzi li jaqgħu fil-kamp ta’ applikazzjoni ta’ dan ir-Regolament jenħtieġ li jikkonformaw ukoll mar-regoli applikabbli tal-Unjoni kontra l-ħasil tal-flus u l-finanzjament tat-terroriżmu, li jintegraw l-istandards internazzjonali.

(17)

Assi diġitali li ma jistgħux jiġu ttrasferiti lil detenturi oħra ma jaqgħux taħt id-definizzjoni ta’ kriptoassi. Għalhekk, assi diġitali li huma aċċettati biss mill-emittent jew mill-offerent u li huma teknikament impossibbli li jiġu ttrasferiti direttament lil detenturi oħra jenħtieġ li jiġu esklużi mill-kamp ta’ applikazzjoni ta’ dan ir-Regolament. Eżempju ta’ tali assi diġitali jinkludi skemi ta’ lealtà meta l-punti ta’ lealtà jistgħu jiġu skambjati biss għal benefiċċji mal-emittent jew l-offerent ta’ dawk il-punti.

(18)

Dan ir-Regolament jikkwalifika il-kriptoassi fi tliet tipi li jenħtieġ li jiġu distinti minn xulxin u jkunu soġġetti għal rekwiżiti differenti skont ir-riskji li jinvolvu. Il-klassifikazzjoni hija bbażata fuq jekk il-kriptoassi jfittxux li jistabbilizzaw il-valur tagħhom b’referenza għal assi oħra. L-ewwel tip jikkonsisti minn kriptoassi li għandhom l-għan li jistabbilizzaw il-valur tagħhom billi jirreferenzjaw munita uffiċjali waħda biss. Il-funzjoni ta’ dawn il-kriptoassi hija simili ħafna għall-funzjoni tal-flus elettroniċi kif definita fid-Direttiva 2009/110/KE. Bħall-flus elettroniċi, tali kriptoassi huma sostituti elettroniċi għall-muniti u għall-karti tal-flus u x’aktarx li jintużaw sabiex isiru l-pagamenti. Jenħtieġ li dawk il-kriptoassi jiġu definiti f’dan ir-Regolament bħala “tokens tal-flus elettroniċi”. It-tieni tip ta’ kriptoassi jikkonċerna “tokens irreferenzjati ma’ assi”, li għandhom l-għan li jistabbilizzaw il-valur tagħhom billi jirreferenzjaw valur jew dritt ieħor, jew taħlita tagħhom, inkluż munita uffiċjali waħda jew aktar. Dak it-tieni tip jkopri l-kriptoassi l-oħra kollha, għajr it-tokens tal-flus elettroniċi, li l-valur tagħhom huwa appoġġjat minn assi, sabiex tiġi evitata ċ-ċirkomvenzjoni u sabiex dan ir-Regolament jibqa’ validu fil-futur. Fl-aħħar nett, it-tielet tip jikkonsisti minn kriptoassi għajr it-tokens irreferenzjati ma’ assi jew tokens tal-flus elettroniċi, u tkopri varjetà wiesgħa ta’ kriptoassi, inkluż tokens ta’ utilità.

(19)

Fil-preżent, minkejja s-similaritajiet tagħhom, il-flus elettroniċi u l-kriptoassi li jirreferenzjaw munita uffiċjali jvarjaw f’xi aspetti importanti. Id-detenturi ta’ flus elettroniċi kif definiti fid-Direttiva 2009/110/KE huma dejjem ipprovduti bi pretensjoni kontra l-emittenti tal-flus elettroniċi u għandhom dritt kuntrattwali li jifdu l-flus elettroniċi tagħhom, f’kull ħin u bil-parità kontabbli, il-valur monetarju tal-flus elettroniċi miżmuma.. B’kuntrast ma’ dan, xi wħud mill-kriptoassi li jirreferenzjaw munita uffiċjali ma jipprovdux lid-detenturi tagħhom b’tali pretensjoni kontra l-emittenti ta’ tali kriptoassi u jistgħu jaqgħu barra mill-kamp ta’ applikazzjoni tad-Direttiva 2009/110/KE. Kriptoassi oħra li jirreferenzjaw munita uffiċjali ma jipprovdux pretensjoni b’parità mal-munita li jkunu qed jirreferenzjaw jew jillimitaw il-perjodu ta’ fidi. Il-fatt li d-detenturi ta’ tali kriptoassi ma jkollhomx pretensjoni kontra l-emittenti ta’ tali kriptoassi, jew li tali pretensjoni ma tkunx f’parità mal-munita li magħha jkunu qed jirreferenzjaw dawk il-kriptoassi, jista’ jdgħajjef il-fiduċja tad-detenturi ta’ dawk il-kriptoassi. Għaldaqstant, sabiex tiġi evitata ċ-ċirkomvenzjoni tar-regoli stabbiliti fid-Direttiva 2009/110/KE, jenħtieġ li kwalunkwe definizzjoni ta’ tokens tal-flus elettroniċi tkun wiesgħa kemm jista’ jkun possibbli biex tkopri t-tipi kollha ta’ kriptoassi li jirreferenzjaw munita uffiċjali unika. Barra minn hekk, jenħtieġ li jiġu stabbiliti kundizzjonijiet stretti dwar il-ħruġ ta’ tokens tal-flus elettroniċi, inkluż obbligu li tokens tal-flus elettroniċi jinħarġu jew minn istituzzjoni ta’ kreditu awtorizzata skont id-Direttiva 2013/36/UE tal-Parlament Ewropew u tal-Kunsill (13), jew minn istituzzjoni tal-flus elettroniċi awtorizzata skont id-Direttiva 2009/110/KE. Għall-istess raġuni, jenħtieġ li l-emittenti ta’ tokens tal-flus elettroniċi jiżguraw li d-detenturi ta’ dawn it-tokens jistgħu jeżerċitaw id-dritt tagħhom li jifdu t-tokens tagħhom fi kwalunkwe ħin u b’parità mal-munita li tirreferenzja dawk it-tokens. Peress li t-tokens tal-flus elettroniċi huma kriptoassi u jistgħu joħolqu sfidi ġodda f’termini ta’ protezzjoni tad-detenturi fil-livell tal-konsumatur u ta’ integrità tas-suq li huma speċifiċi għall-kriptoassi, jenħtieġ li dawn ikunu soġġetti wkoll għar-regoli stabbiliti f’dan ir-Regolament biex jindirizzaw dawk l-isfidi.

(20)

Minħabba r-riskji u l-opportunitajiet differenti li jirriżultaw mill-kriptoassi, huwa meħtieġ li jiġu stabbiliti regoli għall-offerenti u l-persuni li jkunu qed ifittxu l-ammissjoni għan-negozjar ta’ kriptoassi għajr it-tokens irreferenzjati ma’ assi u t-tokens tal-flus elettroniċi, kif ukoll għall-emittenti ta’ tokens irreferenzjati ma’ assi u t-tokens tal-flus elettroniċi. Emittenti tal-kriptoassi huma entitajiet li għandhom kontroll fuq il-ħolqien ta’ kriptoassi.

(21)

Huwa meħtieġ li jiġu stabbiliti regoli speċifiċi għall-entitajiet li jipprovdu servizzi relatati mal-kriptoassi. L-ewwel kategorija ta’ tali servizzi tikkonsisti mill-iżgurar tal-operat ta’ pjattaforma ta’ negozjar għall-kriptoassi, fl-iskambju ta’ kriptoassi ma’ fondi jew kriptoassi oħra, fil-forniment tal-kustodja u l-amministrazzjoni ta’ kriptoassi f’isem il-klijenti, u fil-forniment ta’ servizzi ta’ trasferiment għal kriptoassi f’isem il-klijenti. It-tieni kategorija ta’ tali servizzi tikkonsisti mit-tqegħid tal-kriptoassi, fir-riċeviment jew it-trażmissjoni ta’ ordnijiet għall-kriptoassi f’isem il-klijenti, fl-eżekuzzjoni ta’ ordnijiet għal kriptoassi f’isem il-klijenti, fil-forniment ta’ pariri dwar il-kriptoassi u fil-forniment ta’ mmaniġġjar ta’ portafolli tal-kriptoassi. Kwalunkwe persuna li tfornii servizzi tal-kriptoassi fuq bażi professjonali f’konformità ma’ dan ir-Regolament jenħtieġ li titqies bħala “fornitur ta’ servizzi tal-kriptoassi”.

(22)

Dan ir-Regolament jenħtieġ li japplika għal persuni fiżiċi u ġuridiċi u ċerti impriżi oħra u s-servizzi u l-attivitajiet tal-kriptoassi mwettqa, fornuti jew ikkontrollati direttament jew indirettament minnhom, inkluż meta parti minn tali attivitajiet jew servizzi titwettaq b’mod deċentralizzat. Meta s-servizzi tal-kriptoassi jiġu pprovduti b’mod kompletament deċentralizzat mingħajr kwalunkwe intermedjarju, jenħtieġ li dawn ma jaqgħux fil-kamp ta’ applikazzjoni ta’ dan ir-Regolament. Dan ir-Regolament ikopri d-drittijiet u l-obbligi tal-emittenti tal-kriptoassi, l-offerenti, persuni li jkunu qed ifittxu l-ammissjoni għan-negozjar ta’ kriptoassi u fornituri ta’ servizzi tal-kriptoassi. Meta l-kriptoassi ma jkollhom l-ebda emittent identifikabbli, jenħtieġ li ma jaqgħux fil-kamp ta’ applikazzjoni tat-Titolu II, III jew IV ta’ dan ir-Regolament. Madankollu, jenħtieġ li l-fornituri ta’ servizzi tal-kriptoassi li jfornu servizzi fir-rigward ta’ tali kriptoassi jkunu koperti minn dan ir-Regolament.

(23)

Sabiex jiġi żgurat li l-offerti kollha lill-pubbliku ta’ kriptoassi għajr it-tokens irreferenzjati ma’ assi jew tokens tal-flus elettroniċi, li jista’ potenzjalment ikollhom użu finanzjarju, jew l-ammissjonijiet kollha ta’ kriptoassi għan-negozjar fuq pjattaforma ta’ negozjar għall-kriptoassi (“l-ammissjoni għan-negozjar”), fl-Unjoni, huma mmonitorjati u ssorveljati sew mill-awtoritajiet kompetenti, jenħtieġ li l-offerenti jew il-persuni kollha li jkunu qed ifittxu l-ammissjoni għan-negozjar jkunu persuni ġuridiċi.

(24)

Sabiex tiġi żgurata l-protezzjoni tagħhom, id-detenturi fil-livell tal-konsumatur prospettivi tal-kriptoassi jenħtieġ li jiġu informati dwar il-karatteristiċi, il-funzjonijiet u r-riskji tal-kriptoassi li huma jkunu biħsiebhom jixtru. Meta jagħmlu offerta lill-pubbliku ta’ kriptoassi għajr tokens irreferenzjati ma’ assi jew tokens tal-flus elettroniċi jew meta jfittxu l-ammissjoni għan-negozjar ta’ tali kriptoassi fl-Unjoni, jenħtieġ li l-offerenti jew il-persuni li jkunu qed ifittxu l-ammissjoni għan-negozjar jabbozzaw, jinnotifikaw lill-awtorità kompetenti tagħhom u jippubblikaw dokument ta’ informazzjoni li jkun fih żvelar obbligatorju (“white paper dwar il-kriptoassi”). Jenħtieġ li l-white paper dwar il-kriptoassi jkun fiha informazzjoni ġenerali, dwar l-emittent, l-offerent jew il-persuna li tkun qed tfittex l-ammissjoni għan-negozjar, dwar il-proġett li jrid jitwettaq bil-kapital iġġenerat, dwar l-offerta lill-pubbliku ta’ kriptoassi jew dwar l-ammissjoni tagħhom għan-negozjar, dwar id-drittijiet u l-obbligi marbuta mal-kriptoassi, dwar it-teknoloġija sottostanti użata għal tali kriptoassi u dwar ir-riskji relatati. Madankollu, jenħtieġ li l-white paper dwar il-kriptoassi ma jkunx fiha deskrizzjoni tar-riskji li ma jkunux prevedibbli u li x’aktarx ma jimmaterjalizzawx. L-informazzjoni li hemm fil-white paper dwar il-kriptoassi kif ukoll fil-komunikazzjonijiet ta’ kummerċjalizzazzjoni rilevanti, bħalma huma messaġġi ta’ reklamar u materjal ta’ kummerċjalizzazzjoni, u inkluż permezz ta’ kanali ġodda bħal pjattaformi tal-media soċjali, jenħtieġ li tkun ġusta, ċara u mhux qarrieqa. Il-messaġġi ta’ reklamar u l-materjal ta’ kummerċjalizzazzjoni jenħtieġ li jkunu konsistenti mal-informazzjoni pprovduta fil-white paper dwar il-kriptoassi.

(25)

White papers dwar il-kriptoassi, inkluż is-sommarji tagħhom, u r-regoli tal-operat tal-pjattaformi ta’ negozjar għall-kriptoassi jenħtieġ li jitfasslu f’mill-anqas waħda mill-lingwi uffiċjali tal-Istat Membru domiċiljari u ta’ kwalunkwe Stat Membru ospitanti jew alternattivament, b’lingwa abitwali fil-qasam tal-finanzi internazzjonali. Fiż-żmien tal-adozzjoni ta’ dan ir-Regolament, il-lingwa Ingliża hija l-lingwa abitwali fl-isfera tal-finanzi internazzjonali iżda jista’ jkun li dan jevolvi fil-futur.

(26)

Sabiex jiġi żgurat approċċ proporzjonat, jenħtieġ li l-ebda rekwiżit ta’ dan ir-Regolament ma japplika għall-offerti ta’ kriptoassi lill-pubbliku, għajr tokens irreferenzjati ma’ assi jew tokens tal-flus elettroniċi, li huma offruti b’xejn jew li jinħolqu awtomatikament bħala premju għaż-żamma ta’ reġistru distribwit jew il-validazzjoni tat-tranżazzjonijiet fil-kuntest ta’ mekkaniżmu ta’ kunsens. Barra minn hekk, jenħtieġ li l-ebda rekwiżit ma japplika għal offerti ta’ tokens ta’ utilità li jipprovdu aċċess għal prodott jew servizz eżistenti, li jippermetti lid-detentur jiġbor il-prodott jew juża s-servizz, jew meta d-detentur tal-kriptoassi jkollu d-dritt li jużahom biss bi skambju għal prodotti u servizzi f’network limitat ta’ negozjanti b’arranġamenti kuntrattwali mal-offerent. Jenħtieġ li tali eċċezzjonijiet ma jinkludux kriptoassi li jirrappreżentaw prodotti maħżuna li ma humiex maħsuba li jinġabru mix-xerrej wara x-xiri. Lanqas ma jenħtieġ li l-eżenzjoni limitata tan-network tapplika għall-kriptoassi li tipikament ikunu mfassla għal network ta’ fornituri ta’ servizzi li qed jikber kontinwament. L-eżenzjoni limitata tan-network jenħtieġ li tiġi evalwata mill-awtorità kompetenti kull darba li offerta, jew il-valur aggregat ta’ aktar minn offerta waħda, taqbeż ċertu livell limitu, li jfisser li offerta ġdida ma jenħtieġx li awtomatikament tibbenefika minn eżenzjoni ta’ offerta preċedenti. Jenħtieġ li dawk l-eżenzjonijiet jieqfu japplikaw meta l-offerent, jew persuna oħra li taġixxi f’isem l-offerent, tikkomunika l-intenzjoni tal-offerent li jkun qed ifittex l-ammissjoni għan-negozjar jew il-kriptoassi eżentati jiġu ammessi għan-negozjar.

(27)

Sabiex jiġi żgurat approċċ proporzjonat, jenħtieġ li r-rekwiżiti ta’ dan ir-Regolament għat-tfassil u għall-pubblikazzjoni ta’ white paper dwar il-kriptoassi ma japplikawx għall-offerti ta’ kriptoassi għajr għat-tokens irreferenzjati ma’ assi jew għat-tokens tal-flus elettroniċi li huma offruti lil anqas minn 150 persuna għal kull Stat Membru, jew li jiġu indirizzati biss lil investituri kwalifikati fejn il-kriptoassi jistgħu jinżammu biss minn tali investituri kwalifikati. Jenħtieġ li l-SMEs u n-negozji ġodda ma jkunux soġġetti għal piżijiet amministrattivi eċċessivi u sproporzjonati. Għaldaqstant, jenħtieġ li offerti lill-pubbliku ta’ kriptoassi għajr tokens irreferenzjati ma’ assi jew tokens tal-flus elettroniċi fl-Unjoni li l-korrispettiv totali tagħhom ma jaqbiżx EUR 1 000 000 fuq perjodu ta’ 12-il xahar jiġu eżentati mill-obbligu li jfasslu white paper dwar il-kriptoassi.

(28)

Jenħtieġ li s-sempliċi ammissjoni għan-negozjar jew il-pubblikazzjoni tal-prezzijiet tat-talba u tal-offerta ma jitqisux, fihom infushom, bħala offerta lill-pubbliku ta’ kriptoassi. Jenħtieġ li tali ammissjoni jew pubblikazzjoni tikkostitwixxi offerta lill-pubbliku ta’ kriptoassi biss meta tkun tinkludi komunikazzjoni li tikkostitwixxi offerta lill-pubbliku skont dan ir-Regolament.

(29)

Anke jekk xi offerti ta’ kriptoassi għajr tokens irreferenzjati ma’ assi jew tokens tal-flus elettroniċi huma eżentati minn diversi obbligi ta’ dan ir-Regolament, l-atti leġiżlattivi tal-Unjoni li jiżguraw il-protezzjoni tal-konsumatur, bħad-Direttiva 2005/29/KE tal-Parlament Ewropew u tal-Kunsill (14) jew id-Direttiva tal-Kunsill 93/13/KEE (15), inkluż kwalunkwe obbligu ta’ informazzjoni li jkun fihom, jibqgħu applikabbli għal offerti lill-pubbliku ta’ kriptoassi li jkunu jikkonċernaw relazzjonijiet min-negozju għall-konsumatur.

(30)

Meta offerta lill-pubbliku tkun tikkonċerna tokens ta’ utilità għal prodotti li għadhom ma jeżistux jew servizzi li għadhom mhux qed joperaw, jenħtieġ li d-durata tal-offerta lill-pubbliku kif deskritta fil-white paper dwar il-kriptoassi ma taqbiżx 12-il xahar. Dik il-limitazzjoni fuq id-durata tal-offerta lill-pubbliku ma hijiex relatata mal-mument meta l-prodotti jew is-servizzi jibdew jeżistu jew isiru operazzjonali u jkunu jistgħu jintużaw mid-detentur ta’ token ta’ utilità wara l-iskadenza tal-offerta lill-pubbliku.

(31)

Sabiex tkun tista’ ssir is-superviżjoni, jenħtieġ li l-offerenti u l-persuni li jkunu qed ifittxu l-ammissjoni għan-negozjar tal-kriptoassi għajr tokens irreferenzjati ma’ assi jew tokens tal-flus elettroniċi qabel jagħmlu kwalunkwe offerta lill-pubbliku ta’ kriptoassi fl-Unjoni jew qabel ma dawk il-kriptoassi jiġu ammessi għan-negozjar, jinnotifikaw il-white paper dwar il-kriptoassi tagħhom u, fuq talba tal-awtorita’ kompetenti, il-komunikazzjonijiet ta’ kummerċjalizzazzjoni tagħhom, lill-awtorità kompetenti tal-Istat Membru fejn ikollhom l-uffiċċju reġistrat jew jekk ma jkollhom ebda uffiċċju rreġistrat fl-Unjoni, tal-Istat Membru fejn ikollhom fergħa. Jenħtieġ li l-offerenti li jkunu stabbiliti f’pajjiż terz jinnotifikaw il-white paper dwar il-kriptoassi tagħhom u, fuq talba tal-awtorita’ kompetenti, il-komunikazzjonijiet ta’ kummerċjalizzazzjoni tagħhom, lill-awtorità kompetenti tal-Istat Membru fejn ikun beħsiebhom joffru l-kriptoassi.

(32)

L-operatur ta’ pjattaforma ta’ negozjar jenħtieġ li jkun responsabbli għall-konformità mar-rekwiżiti tat-Titolu II ta’ dan ir-Regolament meta l-kriptoassi jiġu ammessi għan-negozjar fuq inizjattiva tiegħu stess u l-white paper dwar il-kriptoassi ma tkunx diġà ġiet ippubblikata fil-każijiet previsti minn dan ir-Regolament. L-operatur ta’ pjattaforma ta’ negozjar jenħtieġ li jkun responsabbli wkoll għall-konformità ma’ dawk ir-rekwiżiti fejn ikun ġie konkluż ftehim bil-miktub għal dak l-għan mal-persuna li tkun qed tfittex l-ammissjoni għan-negozjar. Il-persuna li tkun qed tfittex l-ammissjoni għan-negozjar jenħtieġ li tibqa’ responsabbli meta tipprovdi informazzjoni qarrieqa lill-operatur tal-pjattaforma ta’ negozjar. Il-persuna li tkun qed tfittex l-ammissjoni għan-negozjar jenħtieġ li tibqa’ responsabbli wkoll għal kwistjonijiet mhux iddelegati lill-operatur tal-pjattaforma ta’ negozjar.

(33)

Sabiex jiġi evitat piż amministrattiv żejjed, jenħtieġ li l-awtoritajiet kompetenti ma jintalbux japprovaw white paper dwar il-kriptoassi qabel il-pubblikazzjoni tagħha. Madankollu, jenħtieġ li l-awtoritajiet kompetenti jkollhom is-setgħa li jitolbu emendi fil-white paper dwar il-kriptoassi u għall-komunikazzjonijiet ta’ kummerċjalizzazzjoni u, meta meħtieġ, li jitolbu l-inklużjoni ta’ informazzjoni addizzjonali fil-white paper dwar il-kriptoassi.

(34)

Jenħtieġ li l-awtoritajiet kompetenti jkunu jistgħu jissospendu jew jipprojbixxu offerta lill-pubbliku ta’ kriptoassi għajr tokens irreferenzjati ma’ assi jew tokens tal-flus elettroniċi, jew l-ammissjoni ta’ tali kriptoassi għan-negozjar, meta tali offerta lill-pubbliku jew l-ammissjoni għan-negozjar ma tkunx konformi mar-rekwiżiti applikabbli ta’ dan ir-Regolament, inkluż meta l-white paper dwar il-kriptoassi jew il-komunikazzjonijiet ta’ kummerċjalizzazzjoni ma jkunux ġusti, ċari jew ikunu qarrieqa. Jenħtieġ li l-awtoritajiet kompetenti jkollhom ukoll is-setgħa li jippubblikaw twissija li l-offerent jew il-persuna li tkun qed tfittex l-ammissjoni għan-negozjar tkun naqset milli tissodisfa dawk ir-rekwiżiti, jew fuq is-sit web tagħha jew permezz ta’ stqarrija għall-istampa.

(35)

Jenħtieġ li l-white papers dwar il-kriptoassi li jkunu ġew debitament innotifikati lil awtorità kompetenti u l-komunikazzjonijiet ta’ kummerċjalizzazzjoni jiġu ppubblikati. Wara tali pubblikazzjoni, jenħtieġ li l-offerenti u l-persuni li jkunu qed ifittxu l-ammissjoni għan-negozjar ta’ kriptoassi għajr tokens irreferenzjati ma’ assi jew tokens tal-flus elettroniċi jitħallew joffru dawk il-kriptoassi fl-Unjoni kollha u jfittxu l-ammissjoni għan-negozjar ta’ tali kriptoassi fl-Unjoni.

(36)

L-offerenti ta’ kriptoassi għajr tokens irreferenzjati ma’ assi jew tokens tal-flus elettroniċi, jenħtieġ li jkollhom arranġamenti effettivi fis-seħħ sabiex jimmonitorjaw u jissalvagwardjaw il-fondi, jew kriptoassi oħra ġġenerati matul l-offerta lill-pubbliku tagħhom. Jenħtieġ li dawk l-arranġamenti jiżguraw ukoll li kwalunkwe fond jew kriptoassi ieħor miġbur mid-detenturi jew mid-detenturi prospettivi jiġi rritornat kif xieraq mill-aktar fis possibbli meta offerta lill-pubbliku tiġi kkanċellata għal kwalunkwe raġuni. Jenħtieġ li l-offerent jiżgura li l-fondi jew kriptoassi oħrajn miġbura matul l-offerta lill-pubbliku jinżammu f’kustodja minn parti terza.

(37)

Sabiex tiġi żgurata aktar il-protezzjoni tad-detenturi fil-livell tal-konsumatur ta’ kriptoassi, jenħtieġ li d-detenturi fil-livell tal-konsumatur li jkunu qed jakkwistaw kriptoassi għajr tokens irreferenzjati ma’ assi jew tokens tal-flus elettroniċi, direttament mingħand l-offerent, jew fornitur ta’ servizzi tal-kriptoassi li jqiegħed l-kriptoassi f’isem l-offerent, jiġu pprovduti dritt ta’ rtirar matul perjodu ta’ 14-il jum wara l-akkwiżizzjoni tagħhom. Sabiex tiġi żgurata t-tlestija bla xkiel ta’ offerta lill-pubbliku ta’ kriptoassi limitata fiż-żmien, jenħtieġ li dan id-dritt ta’ rtirar ma jiġix eżerċitat mid-detenturi fil-livell tal-konsumatur wara t-tmiem tal-perjodu ta’ abbonament. Barra minn hekk, jenħtieġ li d-dritt ta’ rtirar ma japplikax meta kriptoassi għajr tokens irreferenzjati ma’ assi jew tokens tal-flus elettroniċi, ikunu ammessi għan-negozjar qabel ma jsir ix-xiri mid-detentur fil-livell tal-konsumatur, billi, f’tali każ, il-prezz ta’ tali kriptoassi jiddependi fuq il-fluttwazzjonijiet tas-swieq fil-kriptoassi. Meta d-detentur fil-livell tal-konsumatur ikollu dritt ta’ rtirar skont dan ir-Regolament, jenħtieġ li d-dritt ta’ rtirar skont id-Direttiva 2002/65/KE tal-Parlament Ewropew u tal-Kunsill (16) ma japplikax.

(38)

Jenħtieġ li l-offerenti u l-persuni li jkunu qed ifittxu l-ammissjoni għan-negozjar ta’ kriptoassi għajr tokens irreferenzjati ma’ assi jew tokens tal-flus elettroniċi, jaġixxu b’mod onest, ġust u professjonali, jenħtieġ li jikkomunikaw mad-detenturi u d-detenturi prospettivi ta’ kriptoassi b’mod ġust, ċar u mhux qarrieqi, jenħtieġ li jidentifikaw, jipprevjenu, jimmaniġġjaw u jiżvelaw il-kunflitti ta’ interess u jenħtieġ li jkollhom arranġamenti amministrattivi effettivi biex jiżguraw li s-sistemi u l-protokolli tas-sigurtà tagħhom jissodisfaw l-istandards tal-Unjoni. Sabiex tgħin lill-awtoritajiet kompetenti fil-kompiti superviżorji tagħhom, l-ESMA, f’kooperazzjoni mill-qrib mal-EBA, jenħtieġ li tingħata l-mandat li toħroġ linji gwida dwar dawk is-sistemi u l-protokolli ta’ sigurtà sabiex tispeċifika aktar dawn l-istandards tal-Unjoni.

(39)

Sabiex jiġu protetti aktar id-detenturi tal-kriptoassi, jenħtieġ li r-regoli dwar ir-responsabbiltà ċivili japplikaw għall-offerenti u l-persuni li jkunu qed ifittxu l-ammissjoni għan-negozjar u għall-membri tal-korp maniġerjali tagħhom għall-informazzjoni pprovduta lill-pubbliku fil-white paper dwar il-kriptoassi.

(40)

It-tokens irreferenzjati ma’ assi jistgħu jiġu adottati b’mod wiesa’ mid-detenturi sabiex jittrasferixxu l-valur jew bħala mezz ta’ skambju u, b’hekk, joħolqu riskji akbar f’termini ta’ protezzjoni tad-detenturi ta’ kriptoassi, b’mod partikolari tad-detenturi fil-livell tal-konsumatur, u f’termini ta’ integrità tas-suq meta mqabbla ma’ kriptoassi oħrajn. Għalhekk, jenħtieġ li l-emittenti ta’ tokens irreferenzjati ma’ assi jkunu soġġetti għal rekwiżiti aktar stretti minn emittenti ta’ kriptoassi oħrajn.

(41)

Fejn kriptoassi jaqa’ fid-definizzjoni ta’ token irreferenzjat ma’ assi jew token tal-flus elettroniċi, jenħtieġ li japplika t-Titolu III jew IV ta’ dan ir-Regolament, irrispettivament minn kif l-emittent ikun biħsiebu jfassal il-kriptoassi, inkluż il-mekkaniżmu għaż-żamma ta’ valur stabbli tal-kriptoassi. L-istess japplika għall-hekk imsejħa “stablecoins” algoritmiċi li għandhom l-għan li jżommu valur stabbli fir-rigward ta’ munita uffiċjali jew fir-rigward ta’ assi wieħed jew aktar, permezz ta’ protokolli, li jipprevedu ż-żieda jew it-tnaqqis fil-provvista ta’ tali kriptoassi b’rispons għal bidliet fid-domanda. L-offerenti jew il-persuni li jkunu qed ifittxu l-ammissjoni għan-negozjar ta’ kriptoassi algoritmiċi li ma jkollhomx l-għan li jistabbilizzaw il-valur tal-kriptoassi billi jirreferenzjaw assi wieħed jew aktar jenħtieġ li fi kwalunkwe każ jikkonformaw mat-Titolu II ta’ dan ir-Regolament.

(42)

Sabiex jiġu żgurati s-superviżjoni u l-monitoraġġ xierqa tal-offerti lill-pubbliku ta’ tokens irreferenzjati ma’ assi, jenħtieġ li l-emittenti ta’ tokens irreferenzjati ma’ assi jkollhom uffiċċju reġistrat fl-Unjoni.

(43)

L-offerti lill-pubbliku ta’ tokens irreferenzjati ma’ assi fl-Unjoni jew li jfittxu l-ammissjoni ta’ tali kriptoassi għan-negozjar jenħtieġ li jkunu permessi biss meta l-awtorità kompetenti tkun awtorizzat lill-emittent ta’ tali kriptoassi jagħmel dan u tkun approvat il-white paper dwar il-kriptoassi rilevanti. Madankollu, jenħtieġ li r-rekwiżit tal-awtorizzazzjoni ma japplikax meta t-tokens irreferenzjati ma’ assi jiġu indirizzati unikament lil investituri kwalifikati, jew meta l-offerta lill-pubbliku tat-tokens irreferenzjati ma’ assi tkun anqas minn EUR 5 000 000. F’dawk il-każijiet, jenħtieġ li l-emittent ta’ tokens irreferenzjati ma’ assi xorta jkun mitlub jabbozza white paper dwar il-kriptoassi biex jinforma lix-xerrejja dwar il-karatteristiċi u r-riskji tat-tokens irreferenzjati ma’ assi u jenħtieġ ukoll li jkun mitlub jinnotifika l-white paper dwar il-kriptoassi lill-awtorità kompetenti qabel il-pubblikazzjoni tagħha.

(44)

Jenħtieġ li l-istituzzjonijiet ta’ kreditu awtorizzati skont id-Direttiva 2013/36/UE ma jkollhomx bżonn ta’ awtorizzazzjoni oħra skont dan ir-Regolament sabiex joffru jew ifittxu l-ammissjoni għan-negozjar ta’ tokens irreferenzjati ma’ assi. Jenħtieġ li japplikaw il-proċeduri nazzjonali stabbiliti skont dik id-Direttiva iżda jenħtieġ li jiġu kkomplementati minn rekwiżit li l-awtorità kompetenti tal-Istat Membru domiċiljari iddeżinjata skont dan ir-Regolament tiġi nnotifikata bl-elementi li jippermettu lil dik l-awtorità tivverifika l-kapaċità tal-emittent li joffri jew ifittex l-ammissjoni għan-negozjar ta’ tokens irreferenzjati ma’ assi. Jenħtieġ li l-istituzzjonijiet ta’ kreditu li joffru jew li jfittxu l-ammissjoni għan-negozjar ta’ tokens irreferenzjati ma’ assi jkunu soġġetti għar-rekwiżiti kollha li japplikaw għall-emittenti ta’ tokens irreferenzjati ma’ assi bl-eċċezzjoni tar-rekwiżiti ta’ awtorizzazzjoni, ir-rekwiżiti ta’ fondi proprji u l-proċedura ta’ approvazzjoni fir-rigward tal-azzjonisti kwalifikanti, peress li dawk il-kwistjonijiet huma koperti mid-Direttiva 2013/36/UE u mir-Regolament (UE) Nru 575/2013 tal-Parlament Ewropew u tal-Kunsill (17). Jenħtieġ li white paper dwar il-kriptoassi abbozzata minn tali istituzzjoni ta’ kreditu tiġi approvata mill-awtorità kompetenti tal-Istat Membru domiċiljari qabel il-pubblikazzjoni. L-istituzzjonijiet ta’ kreditu awtorizzati skont id-dispożizzjonijiet tal-liġi nazzjonali li jittrasponu d-Direttiva 2013/36/UE u li joffru jew ifittxu l-ammissjoni għan-negozjar ta’ tokens irreferenzjati ma’ assi jenħtieġ li jkunu soġġetti għas-setgħat amministrattivi stabbiliti skont dik id-Direttiva kif ukoll dawk skont dan ir-Regolament, inklużi restrizzjoni jew limitazzjoni tan-negozju ta’ istituzzjoni ta’ kreditu u sospensjoni jew projbizzjoni ta’ offerta lill-pubbliku ta’ tokens irreferenzjati ma’ assi. Meta l-obbligi li japplikaw għal tali istituzzjonijiet ta’ kreditu skont dan ir-Regolament jikkoinċidu ma’ dawk tad-Direttiva 2013/36/UE, l-istituzzjonijiet ta’ kreditu jenħtieġ li jikkonformaw mar-rekwiżiti aktar speċifiċi jew aktar stretti, u b’hekk jiżguraw il-konformità maż-żewġ settijiet ta’ regoli. Il-proċedura ta’ notifika għall-istituzzjonijiet ta’ kreditu li biħsiebhom joffru jew ifittxu l-ammissjoni għan-negozjar ta’ tokens irreferenzjati ma’ assi skont dan ir-Regolament jenħtieġ li tkun mingħajr preġudizzju għad-dispożizzjonijiet tal-liġi nazzjonali li jittrasponu d-Direttiva 2013/36/UE u jistabbilixxu proċeduri għall-awtorizzazzjoni tal-istituzzjonijiet ta’ kreditu sabiex jipprovdu s-servizzi elenkati fl-Anness I ta’ dik id-Direttiva.

(45)

Jenħtieġ li awtorità kompetenti tiċħad l-awtorizzazzjoni għal raġunijiet oġġettivi u dimostrabbli, inkluż meta l-mudell kummerċjali tal-emittent li japplika ta’ tokens irreferenzjati ma’ assi jista’ jkun ta’ theddida serja għall-integrità tas-suq, għall-istabbiltà finanzjarja jew għall-ħidma bla ostakoli ta’ sistemi ta’ ħlas. Jenħtieġ li l-awtorità kompetenti tikkonsulta lill-EBA, lill-ESMA u lill-BĊE u, meta l-emittent ikun stabbilit fi Stat Membru li l-munita uffiċjali tiegħu ma hijiex l-euro jew meta munita uffiċjali ta’ Stat Membru li ma hijiex l-euro tkun referenzjata mit-token irreferenzjat ma’ assi, il-bank ċentrali ta’ dak l-Istat Membru, qabel ma tagħti awtorizzazzjoni jew tirrifjuta awtorizzazzjoni. Jenħtieġ li l-opinjonijiet mhux vinkolanti tal-EBA u tal-ESMA jindirizzaw il-klassifikazzjoni tal-kriptoassi, filwaqt li l-BĊE u, meta applikabbli, il-bank ċentrali tal-Istat Membru kkonċentrat jenħtieġ li jipprovdu lill-awtorità kompetenti b’opinjoni dwar ir-riskji għall-istabbiltà finanzjarja, il-ħidma bla ostakoli ta’ sistemi ta’ ħlas, it-trażmissjoni tal-politika monetarja jew is-sovranità monetarja. L-awtoritajiet kompetenti jenħtieġ li jiċħdu l-awtorizzazzjoni f’każijiet meta l-BĊE jew il-bank ċentrali ta’ Stat Membru jagħti opinjoni negattiva abbażi ta’ raġunijiet ta’ riskju għall-ħidma bla ostakoli ta’ sistemi ta’ ħlas, trażmissjoni tal-politika monetarja, jew sovranità monetarja. Meta tingħata awtorizzazzjoni lil emittent li japplika ta’ tokens irreferenzjati ma’ assi, jenħtieġ li l-white paper dwar il-kriptoassi abbozzata minn dak l-emittent titqies ukoll bħala approvata. Jenħtieġ li l-awtorizzazzjoni mill-awtorità kompetenti tkun valida fl-Unjoni kollha u jenħtieġ li tippermetti lill-emittent ta’ tokens irreferenzjati ma’ assi joffri dawk il-kriptoassi fuq is-suq intern u jfittex l-ammissjoni għan-negozjar. Bl-istess mod, jenħtieġ li l-white paper dwar il-kriptoassi tkun valida wkoll għall-Unjoni kollha, mingħajr ebda possibbiltà li l-Istati Membri jimponu rekwiżiti addizzjonali.

(46)

F’diversi każijiet meta l-BĊE jiġi kkonsultat skont dan ir-Regolament, jenħtieġ li l-opinjoni tiegħu tkun vinkolanti sa fejn tobbliga lil awtorità kompetenti tirrifjuta, tirtira jew tillimita awtorizzazzjoni ta’ emittent ta’ tokens irreferenzjati ma’ assi jew li timponi miżuri speċifiċi fuq l-emittent ta’ tokens irreferenzjati ma’ assi. L-Artikolu 263, l-ewwel paragrafu, tat-TFUE jipprevedi li l-Qorti tal-Ġustizzja tal-Unjoni Ewropea (il-“Qorti tal-Ġustizzja”) jenħtieġ li teżamina l-legalità tal-atti tal-BĊE għajr rakkomandazzjonijiet jew opinjonijiet. Madankollu, jenħtieġ li jitfakkar li hija l-Qorti tal-Ġustizzja li għandha tinterpreta din id-dispożizzjoni fid-dawl tas-sustanza u tal-effetti ta’ opinjoni tal-BĊE.

(47)

Sabiex tiġi żgurata l-protezzjoni tad-detenturi fil-livell tal-konsumatur, jenħtieġ li l-emittenti ta’ tokens irreferenzjati ma’ assi dejjem jipprovdu lid-detenturi tat-tali tokens b’informazzjoni kompluta, ġusta, ċara u mhux qarrieqa. White papers dwar il-kriptoassi għat-tokens irreferenzjati ma’ assi jenħtieġ li jinkludu informazzjoni dwar il-mekkaniżmu ta’ stabbilizzazzjoni, dwar il-politika ta’ investiment tal-assi ta’ riżerva, dwar l-arranġamenti ta’ kustodja għall-assi ta’ riżerva u dwar id-drittijiet ipprovduti lid-detenturi.

(48)

Minbarra l-informazzjoni mogħtija fil-white paper dwar il-kriptoassi, jenħtieġ li l-emittenti ta’ tokens irreferenzjati ma’ assi jipprovdu wkoll lid-detenturi ta’ tali tokens b’informazzjoni fuq bażi li għadha għaddejja. B’mod partikolari, jenħtieġ li jiżvelaw fuq is-sit web tagħhom l-ammont ta’ tokens irreferenzjati ma’ assi fiċ-ċirkolazzjoni u l-valur u l-kompożizzjoni tal-assi ta’ riżerva. Jenħtieġ li l-emittenti ta’ tokens irreferenzjati ma’ assi jiżvelaw ukoll kwalunkwe avveniment li jkollu jew x’aktarx li jkollu impatt sinifikanti fuq il-valur tat-tokens irreferenzjati ma’ assi jew fuq l-assi ta’ riżerva, irrispettivament minn jekk dawn il-kriptoassi humiex ammessi għan-negozjar.

(49)

Sabiex tiġi żgurata l-protezzjoni tad-detenturi fil-livell tal-konsumatur, jenħtieġ li l-emittenti ta’ tokens irreferenzjati ma’ assi dejjem jaġixxu b’mod onest, ġust u professjonali u fl-aħjar interessi tad-detenturi ta’ tokens irreferenzjati ma’ assi. L-emittenti ta’ tokens irreferenzjati ma’ assi jenħtieġ li jistabbilixxu wkoll proċedura ċara ta’ trattament tal-ilmenti li jaslu mingħand detenturi ta’ tokens irreferenzjati ma’ assi.

(50)

L-emittenti ta’ tokens irreferenzjati ma’ assi jenħtieġ li jistabbilixxu politika għall-identifikazzjoni, għall-prevenzjoni, għall-immaniġġjar u għall-iżvelar ta’ kunflitti ta’ interess li jistgħu jirriżultaw mir-relazzjonijiet tagħhom mal-azzjonisti jew membri tagħhom, jew ma’ kwalunkwe azzjonist jew membru, kemm jekk dirett jew indirett, li jkollu parteċipazzjoni kwalifikanti fl-emittenti, jew mal-membri tal-korp maniġerjali tagħhom, mal-impjegati tagħhom, mad-detenturi tat-tokens irreferenzjati ma’ assi jew ma’ fornituri ta’ servizzi terzi tagħhom..

(51)

L-emittenti ta’ tokens irreferenzjati ma’ assi jenħtieġ li jkollhom arranġamenti ta’ governanza robusti, inkluża struttura organizzazzjonali ċara b’linji ta’ responsabbiltà ddefiniti sew, trasparenti u konsistenti u proċessi effettivi biex jidentifikaw, jimmaniġġjaw, jimmonitorjaw u jirrapportaw ir-riskji li għalihom ikunu jew jistgħu jkunu skoperti. Il-membri tal-korp maniġerjali ta’ tali emittenti jenħtieġ li jkunu kompetenti u idonei u b’mod partikolari, jenħtieġ li ma jkunux instabu ħatja ta’ reati relatati mal-ħasil tal-flus jew mal-finanzjament tat-terroriżmu jew ta’ kwalunkwe reat ieħor li jaffettwa r-reputazzjoni tajba tagħhom. L-azzjonisti jew il-membri, kemm jekk diretti jew indiretti, persuni fiżiċi jew ġuridiċi, li jkollhom parteċipazzjonijiet kwalifikanti f’tali emittenti, jenħtieġ li jkollhom reputazzjoni tajba biżżejjed u, b’mod partikolari, jenħtieġ li ma jkunux instabu ħatja ta’ reati relatati mal-ħasil tal-flus jew mal-finanzjament tat-terroriżmu jew ta’ kwalunkwe reat ieħor li jaffettwa r-reputazzjoni tajba tagħhom. L-emittenti ta’ tokens irreferenzjati ma’ assi jenħtieġ li jużaw ukoll riżorsi proporzjonati għall-iskala tal-attivitajiet tagħhom u jenħtieġ li dejjem jiżguraw il-kontinwità u r-regolarità fit-twettiq tal-attivitajiet tagħhom. Għal dak l-għan, jenħtieġ li l-emittenti ta’ tokens irreferenzjati ma’ assi jistabbilixxu politika tal-kontinwità tal-operat li għandha l-għan li tiżgura, fil-każ ta’ interruzzjoni tas-sistemi u tal-proċeduri tagħhom, it-twettiq tal-attivitajiet prinċipali tagħhom relatati ma’ tokens irreferenzjati ma’ assi. Jenħtieġ li l-emittenti ta’ tokens irreferenzjati ma’ assi jkollhom ukoll mekkaniżmi ta’ kontroll intern b’saħħithom u proċeduri effettivi għall-immaniġġjar tar-riskju, kif ukoll sistema li tiggarantixxi l-integrità u l-kunfidenzjalità tal-informazzjoni riċevuta. Dawk l-obbligi jimmiraw li jiżguraw il-protezzjoni tad-detenturi ta’ tokens irreferenzjati ma’ assi, b’mod partikolari d-detenturi fil-livell tal-konsumatur, filwaqt li ma joħolqux ostakli bla bżonn.

(52)

L-emittenti ta’ tokens irreferenzjati ma’ assi normalment ikunu fiċ-ċentru ta’ network ta’ entitajiet li jiżguraw il-ħruġ ta’ tali kriptoassi, it-trasferiment tagħhom u d-distribuzzjoni tagħhom lid-detenturi. Għalhekk, jenħtieġ li l-emittenti ta’ tokens irreferenzjati ma’ assi jkollhom l-obbligu li jistabbilixxu u jżommu arranġamenti kuntrattwali xierqa ma’ entitajiet terzi għal-iżgurar tal-mekkaniżmu ta’ stabbilizzazzjoni u tal-investiment tal-assi ta’ riżerva li jiggarantixxu l-valur tat-tokens, tal-kustodja ta’ dawn l-assi ta’ riżerva u, meta applikabbli, tad-distribuzzjoni tat-tokens irreferenzjati ma’ assi għall-pubbliku.

(53)

Sabiex jiġu indirizzati r-riskji għall-istabbiltà finanzjarja tas-sistema finanzjarja usa’, l-emittenti ta’ tokens irreferenzjati ma’ assi jenħtieġ li jkunu soġġetti għal rekwiżiti ta’ fondi proprji. Jenħtieġ li dawk ir-rekwiżiti jkunu proporzjonati għad-daqs tal-ħruġ tat-tokens irreferenzjati ma’ assi u, għalhekk, jiġu kkalkolati bħala perċentwali tar-riżerva ta’ assi li jiggarantixxu l-valur tat-tokens irreferenzjati ma’ assi. Madankollu, jenħtieġ li l-awtoritajiet kompetenti jkunu jistgħu jżidu l-ammont ta’ fondi proprji meħtieġa abbażi, fost l-oħrajn, tal-evalwazzjoni tal-proċess ta’ mmaniġġjar tar-riskju u tal-mekkaniżmi ta’ kontroll intern tal-emittent, tal-kwalità u tal-volatilità tal-assi ta’ riżerva li jiggarantixxu t-tokens irreferenzjati ma’ assi jew il-valur aggregat u tan-numru ta’ tranżazzjonijiet saldati f’tokens irreferenzjati ma’ assi.

(54)

Sabiex ikopru r-responsabbiltà kontra d-detenturi ta’ tokens irreferenzjati ma’ assi tagħhom, l-emittenti ta’ tokens irreferenzjati ma’ assi jenħtieġ li jikkostitwixxu u jżommu riżerva ta’ assi li tirrikonċilja r-riskji riflessi f’tali responsabbiltà. Jenħtieġ li r-riżerva ta’ assi tintuża għall-benefiċċju tad-detenturi ta’ tokens irreferenzjati ma’ assi meta l-emittent ma jkunx jista’ jissodisfa l-obbligi tiegħu lejn id-detenturi, bħal fil-każ ta’ insolvenza. Ir-riżerva ta’ assi jenħtieġ li tkun komposta u mmaniġġjata b’tali mod li r-riskji tas-suq u tal-munita jkunu koperti. Jenħtieġ li l-emittenti ta’ tokens irreferenzjati ma’ assi jiżguraw l-immaniġġjar prudenti tar- riżerva ta’ assi u jenħtieġ li, b’mod partikolari jiżguraw li l-valur tar-riżerva jammonta tal-anqas għall-valur korrispondenti tat-tokens fiċ-ċirkolazzjoni u li l-bidliet fir-riżerva jkunu mmaniġġati b’mod adegwat sabiex jiġu evitati impatti negattivi fuq is-swieq tal-assi ta’ riżerva. Għalhekk, jenħtieġ li l-emittenti ta’ tokens irreferenzjati ma’ assi ikollhom politiki ċari u dettaljati li jiddeskrivu, fost l-oħrajn, il-kompożizzjoni tar-riżerva ta’ assi, l-allokazzjoni ta’ assi inklużi fiha, il-valutazzjoni komprensiva tar-riskji li jirriżultaw mill-assi ta’ riżerva, il-proċedura għall-ħruġ u l-fidi tat-tokens irreferenzjati ma’ assi, il-proċedura biex jiżdiedu u jitnaqqsu l-assi ta’ riżerva u, meta l-assi ta’ riżerva jkunu investiti, il-politika ta’ investiment li hija segwita mill-emittenti. Jenħtieġ li l-emittenti ta’ tokens irreferenzjati ma’ assi li jiġu kkummerċjalizzati kemm fl-Unjoni kif ukoll f’pajjiżi terzi jiżguraw li r-riżerva ta’ assi tagħhom tkun disponibbli biex tkopri r-responsabbiltà tal-emittenti lejn id-detenturi tal-Unjoni. Għalhekk, jenħtieġ li r-rekwiżit li tinżamm ir-riżerva ta’ assi ma’ ditti soġġetti għal-liġi tal-Unjoni japplika b’mod proporzjonat għas-sehem tat-tokens irreferenzjati ma’ assi li huwa mistenni li jiġi kkummerċjalizzat fl-Unjoni.

(55)

Sabiex jiġi evitat ir-riskju ta’ telf għal tokens irreferenzjati ma’ assi u sabiex jiġi ppreservat il-valur ta’ dawk l-assi, jenħtieġ li l-emittenti ta’ tokens irreferenzjati ma’ assi jkollhom politika ta’ kustodja adegwata għall-assi ta’ riżerva tagħhom. Jenħtieġ li dik il-politika tiżgura li l-assi ta’ riżerva jkunu segregati kompletament mill-assi proprji tal-emittent f’kull ħin, li l-assi ta’ riżerva ma jkunux gravati jew mirhuna bħala kollateral, u li l-emittent ta’ tokens irreferenzjati ma’ assi jkollu aċċess fil-pront għal dawk l-assi ta’ riżerva. Jenħtieġ li l-assi ta’ riżerva, skont in-natura tagħhom, jinżammu f’kustodja minn fornitur ta’ servizzi tal-kriptoassi, minn istituzzjoni ta’ kreditu awtorizzata skont id-Direttiva 2013/36/UE jew minn ditta ta’ investiment awtorizzata skont id-Direttiva 2014/65/UE. Jenħtieġ li dan ma jeskludix il-possibbiltà li tiġi ddelegata ż-żamma tal-assi fiżiċi lil entità oħra. Jenħtieġ li fornituri ta’ servizzi tal-kriptoassi, istituzzjonijiet ta’ kreditu jew ditti ta’ investiment li jaġixxu bħala kustodji tal-assi ta’ riżerva jkunu responsabbli għat-telf ta’ tali assi ta’ riżerva fir-rigward tal-emittent jew tad-detenturi ta’ tokens irreferenzjati ma’ assi, sakemm ma jkunux taw prova li tali telf ikun inħoloq b’riżultat ta’ avveniment estern lil hinn mill-kontroll raġonevoli tagħhom. Jenħtieġ li jiġu evitati l-konċentrazzjonijiet tal-kustodji tal-assi ta’ riżerva. Madankollu, f’ċerti sitwazzjonijiet, dak jista’ ma jkunx possibbli minħabba nuqqas ta’ alternattivi xierqa. F’tali każijiet, jenħtieġ li konċentrazzjoni temporanja titqies aċċettabbli.

(56)

Sabiex jiġu protetti d-detenturi ta’ tokens irreferenzjati ma’ assi kontra tnaqqis fil-valur tal-assi li jiggarantixxu l-valur tat-tokens, jenħtieġ li l-emittenti ta’ tokens irreferenzjati ma’ assi jinvestu biss l-assi ta’ riżerva f’assi siguri, b’riskju baxx u b’riskji ta’ suq, ta’ konċentrazzjoni u ta’ kreditu minimi. Peress li t-tokens irreferenzjati ma’ assi jistgħu jintużaw bħala mezz ta’ skambju, il-profitti jew it-telf kollu li jirriżulta mill-investiment tal-assi ta’ riżerva jenħtieġ li jitħallas mill-emittent ta’ tokens irreferenzjati ma’ assi.

(57)

Jenħtieġ li detenturi ta’ tokens irreferenzjati ma’ assi jkollhom dritt permanenti ta’ fidi b’tali mod li l-emittent ikollu l-obbligu li jifdi t-tokens irreferenzjati ma’ assi fi kwalunkwe ħin, fuq talba mid-detenturi ta’ tokens irreferenzjati ma’ assi. L-emittent ta’ tokens irreferenzjati ma’ assi jenħtieġ li jifdi jew billi jħallas ammont f’fondi, għajr flus elettroniċi, ekwivalenti għall-valur tas-suq tal-assi rreferenzjati mit-tokens irreferenzjati ma’ assi, jew billi jikkonsenja l-assi referenzjati mit-tokens. Jenħtieġ li l-emittent ta’ tokens irreferenzjati ma’ assi dejjem jipprovdi lid-detentur bl-għażla li jifdi t-tokens irreferenzjati ma’ assi f’fondi għajr flus elettroniċi denominati fl-istess munita uffiċjali li l-emittent ikun aċċetta meta jbigħ it-tokens. Jenħtieġ li l-emittent jipprovdi informazzjoni dettaljata biżżejjed u li tinftiehem faċilment dwar il-forom differenti ta’ fidi disponibbli.

(58)

Sabiex jitnaqqsu r-riskji li t-tokens irreferenzjati ma’ assi jintużaw bħala ħażna ta’ valur, jenħtieġ li l-emittenti ta’ tokens irreferenzjati ma’ assi u tal-fornituri ta’ servizzi tal-kriptoassi ma jagħtux interess, meta jipprovdu servizzi tal-kriptoassi relatati ma’ tokens irreferenzjati ma’ assi, lid-detenturi ta’ tokens irreferenzjati ma’ assi relatat mat-tul ta’ żmien li matulu tali detenturi jkunu qed iżommu dawk it-tokens irreferenzjati ma’ assi.

(59)

Jenħtieġ li t-tokens irreferenzjati ma’ assi u t-tokens tal-flus elettroniċi jitqiesu sinifikanti meta jissodisfaw, jew x’aktarx li jissodisfaw, ċerti kriterji, inkluż bażi kbira ta’ klijenti, kapitalizzazzjoni għolja tas-suq, jew għadd kbir ta’ tranżazzjonijiet. Bħala tali, dawn jistgħu jintużaw minn għadd kbir ta’ detenturi u l-użu tagħhom jista’ joħloq sfidi speċifiċi f’termini ta’ stabbiltà finanzjarja, trażmissjoni tal-politika monetarja jew sovranità monetarja. Għalhekk, jenħtieġ li dawk it-tokens irreferenzjati ma’ assi u t-tokens tal-flus elettroniċi sinifikanti jkunu soġġetti għal rekwiżiti aktar stretti minn tokens irreferenzjati ma’ assi jew tokens tal-flus elettroniċi li ma jitqiesx li huma sinifikanti. B’mod partikolari, jenħtieġ li l-emittenti ta’ tokens irreferenzjati ma’ assi sinifikanti jkunu soġġetti għal rekwiżiti ta’ kapital ogħla, minn rekwiżiti ta’ interoperabbiltà u jenħtieġ li jistabbilixxu politika ta’ mmaniġġjar tal-likwidità. L-adegwatezza tal-livelli limitu biex token irreferenzjat ma’ assi jew token tal-flus elettroniċi jiġu kklassifikati bħala sinifikanti jenħtieġ li tiġi rieżaminata mill-Kummissjoni bħala parti mir-rieżami tagħha tal-applikazzjoni ta’ dan ir-Regolament. Meta jkun xieraq, jenħtieġ li r-rieżami jiġi akkumpanjat minn proposta leġiżlattiva.

(60)

Monitoraġġ komprensiv fuq l-ekosistema kollha tal-emittenti ta’ tokens irreferenzjati ma’ assi huwa importanti sabiex jiġu ddeterminati d-daqs veru u l-impatt ta’ tali tokens. Sabiex jiġu koperti t-tranżazzjonijiet kollha li jitwettqu fir-rigward ta’ kwalunkwe token irreferenzjat ma’ assi partikolari, il-monitoraġġ ta’ tali tokens għalhekk jinkludi l-monitoraġġ tat-tranżazzjonijiet kollha li jiġu saldati, kemm jekk jiġu saldati fir-reġistru distribwit (“on-chain”) kif ukoll jekk barra mir-reġistru distribwit (“off-chain”), u inklużi tranżazzjonijiet bejn klijenti tal-istess fornitur ta’ servizzi tal-kriptoassi.

(61)

Huwa partikolarment importanti li jiġu stmati tranżazzjonijiet saldati ma’ tokens irreferenzjati ma’ assi assoċjati mal-użi bħala mezz ta’ skambju fi ħdan żona ta’ munita unika, jiġifieri dawk assoċjati ma’ pagamenti ta’ djun inkluż dawk fil-kuntest ta’ tranżazzjonijiet man-negozjanti. Jenħtieġ li dawk it-tranżazzjonijiet ma jinkludux tranżazzjonijiet assoċjati ma’ funzjonijiet u servizzi ta’ investiment, bħal mezz ta’ skambju ma’ fondi jew kriptoassi oħra, sakemm ma jkunx hemm evidenza li t-token irreferenzjat ma’ assi jintuża għas-saldu ta’ tranżazzjonijiet fi kriptoassi oħra. Użu għas-saldu ta’ tranżazzjonijiet fi kriptoassi oħra jkun preżenti f’każijiet meta tranżazzjoni li tinvolvi żewġ komponenti ta’ kriptoassi, li jkunu differenti mit-tokens irreferenzjati ma’ assi, tiġi saldata fit-tokens irreferenzjati ma’ assi. Barra minn hekk, meta t-tokens irreferenzjati ma’ assi jintużaw b’mod wiesa’ bħala mezz ta’ skambju f’żona ta’ munita unika, jenħtieġ li l-emittenti jkollhom l-obbligu li jnaqqsu l-livell ta’ attività. Jenħtieġ li token irreferenzjat ma’ assi jitqies sabiex jintuża b’mod wiesa’ bħala mezz ta’ skambju meta n-numru medju u l-valur aggregat medju tat-tranżazzjonijiet kuljum assoċjati mal-użi bħala mezz ta’ skambju f’żona ta’ munita unika jkunu ogħla minn miljun tranżazzjoni u EUR 200 000 000 rispettivament.

(62)

Meta t-tokens irreferenzjati ma’ assi jkunu ta’ theddida serja għall-ħidma bla ostakoli ta’ sistemi ta’ ħlas, it-trażmissjoni tal-politika monetarja jew is-sovranità monetarja, jenħtieġ li l-banek ċentrali jkunu jistgħu jitolbu lill-awtorità kompetenti tirtira l-awtorizzazzjoni tal-emittent ta’ dawk it-tokens irreferenzjati ma’ assi. Meta t-tokens irreferenzjati ma’ assi jkunu ta’ theddida għall-ħidma bla ostakoli ta’ sistemi ta’ ħlas, għat-trażmissjoni tal-politika monetarja jew għas-sovranità monetarja, jenħtieġ li l-banek ċentrali jkunu jistgħu jitolbu lill-awtorità kompetenti biex tillimita l-ammont ta’ dawk it-tokens irreferenzjati ma’ assi li għandhom jinħarġu, jew li jimponui ammont b’denominazzjoni minima.

(63)

Dan ir-Regolament huwa mingħajr preġudizzju għal-liġi nazzjonali li tirregola l-użu ta’ muniti domestiċi u barranin f’operazzjonijiet bejn residenti, adottati minn Stati Membri li ma humiex fiż-żona tal-euro fl-eżerċizzju tal-prerogattiva tagħhom ta’ sovranità monetarja.

(64)

Jenħtieġ li l-emittenti ta’ tokens irreferenzjati ma’ assi jħejju pjan ta’ rkupru li jipprevedi miżuri li għandhom jittieħdu mill-emittent biex jerġa’ jiġi konformi mar-rekwiżiti applikabbli għar-riżerva ta’ assi, inkluż fir-rigward ta’ każijiet meta l-issodisfar ta’ talbiet ta’ fidi joħloq żbilanċi temporanji fir-riżerva ta’ assi. Jenħtieġ li l-awtorità kompetenti jkollha s-setgħa li tissospendi temporanjament il-fidi ta’ tokens irreferenzjati ma’ assi sabiex tipproteġi l-interessi tad-detenturi ta’ tokens irreferenzjati ma’ assi u l-istabbiltà finanzjarja.

(65)

Jenħtieġ li l-emittenti ta’ tokens irreferenzjati ma’ assi jkollhom pjan għall-fidi ordnat tat-tokens sabiex jiżguraw li d-drittijiet tad-detenturi ta’ tokens irreferenzjati ma’ assi jkunu protetti meta l-emittenti ma jkunux jistgħu jikkonformaw mal-obbligi tagħhom, inkluż fil-każ ta’ waqfien tal-ħruġ tat-tokens irreferenzjati ma’ assi. Meta l-emittent ta’ tokens irreferenzjati ma’ assi jkun istituzzjoni ta’ kreditu jew entità li taqa’ fil-kamp ta’ applikazzjoni tad-Direttiva 2014/59/UE tal-Parlament Ewropew u tal-Kunsill (18), jenħtieġ li l-awtorità kompetenti tikkonsulta lill-awtorità ta’ riżoluzzjoni responsabbli. Dik l-awtorità ta’ riżoluzzjoni jenħtieġ li titħalla teżamina l-pjan ta’ fidi bl-għan li tidentifika kwalunkwe element fih li jista’ jaffettwa b’mod negattiv ir-riżolvibbiltà tal-emittent, l-istrateġija ta’ riżoluzzjoni tal-emittent, jew kwalunkwe azzjoni prevista fil-pjan ta’ riżoluzzjoni tal-emittent, u tagħmel rakkomandazzjonijiet lill-awtorità kompetenti fir-rigward ta’ dawk il-kwistjonijiet. Meta tagħmel dan, l-awtorità ta’ riżoluzzjoni jenħtieġ ukoll li titħalla tikkunsidra jekk humiex meħtieġa xi bidliet fil-pjan ta’ riżoluzzjoni jew fl-istrateġija ta’ riżoluzzjoni, f’konformità mad-dispożizzjonijiet tad-Direttiva 2014/59/UE u r-Regolament (UE) Nru 806/2014 tal-Parlament Ewropew u tal-Kunsill (19), kif applikabbli. Jenħtieġ li tali eżami mill-awtorità ta’ riżoluzzjoni ma jaffettwax is-setgħat tal-awtorità superviżorja prudenzjali jew tal-awtorità ta’ riżoluzzjoni, kif applikabbli, biex jittieħdu miżuri ta’ prevenzjoni ta’ kriżijiet jew miżuri ta’ mmaniġġjar ta’ kriżijiet.

(66)

Jenħtieġ li l-emittenti ta’ tokens tal-flus elettroniċi jkunu awtorizzati jew bħala istituzzjoni ta’ kreditu skont id-Direttiva 2013/36/UE jew bħala istituzzjoni tal-flus elettroniċi skont id-Direttiva 2009/110/KE. Jenħtieġ li t-tokens tal-flus elettroniċi jitqiesu bħala “flus elettroniċi” peress li dak it-terminu huwa definit fid-Direttiva 2009/110/KE u jenħtieġ li l-emittenti tagħhom, sakemm ma jkunx speċifikat mod ieħor f’dan ir-Regolament, jikkonformaw mar-rekwiżiti rilevanti stabbiliti fid-Direttiva 2009/110/KE għall-bidu, l-eżerċizzju u s-superviżjoni prudenzjali tan-negozju tal-istituzzjonijiet tal-flus elettroniċi u r-rekwiżiti dwar il-ħruġ u t-tifdija tat-tokens tal-flus elettroniċi. L-emittenti ta’ tokens tal-flus elettroniċi jenħtieġ li jabbozzawwhite paper dwar il-kriptoassi u jinnotifikawha lill-awtorità kompetenti tagħhom. Eżenzjonijiet fir-rigward ta’ networks limitati, fir-rigward ta’ ċerti tranżazzjonijiet minn fornituri ta’ networks ta’ komunikazzjonijiet elettroniċi u fir-rigward ta’ istituzzjonijiet tal-flus elettroniċi li joħorġu biss ammont massimu limitat ta’ flus elettroniċi, abbażi tal-eżenzjonijiet fakultattivi speċifikati fid-Direttiva 2009/110/KE, jenħtieġ li japplikaw ukoll għat-tokens tal-flus elettroniċi. Madankollu, l-emittenti ta’ tokens tal-flus elettroniċi jenħtieġ li xorta jkollhom l-obbligu li jabbozzaw white paper dwar il-kriptoassi sabiex tinforma lix-xerrejja dwar il-karatteristiċi u r-riskji tat-tokens tal-flus elettroniċi u jenħtieġ li jkollhom ukoll l-obbligu li jinnotifikaw il-white paper dwar il-kriptoassi lill-awtorità kompetenti qabel il-pubblikazzjoni tagħha.

(67)

Jenħtieġ li d-detenturi ta’ tokens tal-flus elettroniċi jingħataw pretensjoni kontra l-emittent ta’ tokens tal-flus elettroniċi. Jenħtieġ li d-detenturi ta’ tokens tal-flus elettroniċi dejjem jingħataw dritt ta’ fidi b’parità għall-fondi ddenominati fil-munita uffiċjali li t-token tal-flus elettroniċi jkun qed jirreferenzja. Id-dispożizzjonijiet tad-Direttiva 2009/110/KE dwar il-possibbiltà li tiġi imposta tariffa fir-rigward tal-fidi ma humiex rilevanti fil-kuntest ta’ tokens tal-flus elettroniċi.

(68)

Sabiex jitnaqqas ir-riskju li t-tokens tal-flus elettroniċi jintużaw bħala ħażna tal-valur, l-emittenti ta’ tokens tal-flus elettroniċi u l-fornituri ta’ servizzi tal-kriptoassi meta jipprovdu servizzi tal-kriptoassi relatati mat-tokens tal-flus elettroniċi, jenħtieġ li ma jagħtux imgħax lid-detenturi tat-tokens tal-flus elettroniċi, inkluż imgħax li ma huwiex relatat mat-tul ta’ żmien li t-tali detenturi jżommu dawk it-tokens tal-flus elettroniċi.

(69)

Il-white paper dwar il-kriptoassi abbozzata minn emittent ta’ tokens tal-flus elettroniċi jenħtieġ li jkun fiha l-informazzjoni kollha dwar dak l-emittent u l-offerta ta’ tokens tal-flus elettroniċi jew l-ammissjoni tagħhom għan-negozjar li tkun meħtieġa sabiex ix-xerrejja prospettivi jkunu jistgħu jieħdu deċiżjoni informata dwar ix-xiri u jifhmu r-riskji relatati mal-offerta tat-tokens tal-flus elettroniċi. Jenħtieġ li l-white paper dwar il-kriptoassi tirreferi wkoll espressament għad-dritt tad-detenturi tat-tokens tal-flus elettroniċi li jifdu t-tokens tal-flus elettroniċi tagħhom għal fondi denominati fil-munita uffiċjali li t-tokens tal-flus elettroniċi jirreferu b’parità u fi kwalunkwe ħin.

(70)

Meta emittent ta’ tokens tal-flus elettroniċi jinvesti l-fondi rċevuti bi skambju għal tokens tal-flus elettroniċi, jenħtieġ li dawn il-fondi jiġu investiti f’assi denominati fl-istess munita uffiċjali bħal dik li t-token tal-flus elettroniċi tkun qed tirreferenzja sabiex jiġu evitati riskji bejn il-muniti.

(71)

Tokens tal-flus elettroniċi sinifikanti jistgħu joħolqu riskji akbar għall-istabbiltà finanzjarja minn tokens tal-flus elettroniċi li ma humiex sinifikanti u minn flus elettroniċi tradizzjonali. Għalhekk, jenħtieġ li l-emittenti ta’ tokens tal-flus elettroniċi sinifikanti li huma istituzzjonijiet tal-flus elettroniċi jkunu soġġetti għal rekwiżiti addizzjonali. B’mod partikolari, jenħtieġ li tali emittenti ta’ tokens tal-flus elettroniċi sinifikanti jkunu soġġetti għal rekwiżiti ta’ kapital ogħla minn emittenti ta’ tokens tal-flus elettroniċi oħra, jkunu soġġetti għal rekwiżiti ta’ interoperabbiltà u jistabbilixxu politika ta’ immaniġġjar tal-likwidità. Jenħtieġ li jikkonformaw ukoll ma’ wħud mill-istess rekwiżiti li japplikaw għall-emittenti ta’ tokens irreferenzjati ma’ assi fir-rigward tar-riżerva ta’ assi, bħal pereżempju dawk fuq il-kustodja u l-investiment tar-riżerva ta’ assi. Jenħtieġ li dawk ir-rekwiżiti għall-emittenti ta’ tokens tal-flus elettroniċi sinifikanti japplikaw minflok l-Artikoli 5 u 7 tad-Direttiva 2009/110/KE. Peress li dawk id-dispożizzjonijiet tad-Direttiva 2009/110/KE ma japplikawx għall-istituzzjonijiet ta’ kreditu meta joħorġu flus elettroniċi, jenħtieġ li lanqas ir-rekwiżiti addizzjonali għal tokens tal-flus elettroniċi sinifikanti skont dan ir-Regolament ma japplikaw.

(72)

Jenħtieġ li l-emittenti ta’ tokens tal-flus elettroniċi jkollhom fis-seħħ pjanijiet għall-irkupru u l-fidi biex jiżguraw li d-drittijiet tad-detenturi tat-tokens tal-flus elettroniċi jkunu protetti meta l-emittenti ma jkunux jistgħu jikkonformaw mal-obbligi tagħhom.

(73)

Fil-biċċa l-kbira tal-Istati Membri, il-forniment ta’ servizzi tal-kriptoassi għadu ma huwiex irregolat minkejja r-riskji potenzjali li dawn joħolqu għall-protezzjoni tal-investituri, l-integrità tas-suq u l-istabbiltà finanzjarja. Sabiex jiġu indirizzati tali riskji, dan ir-Regolament jipprovdi rekwiżiti operazzjonali, organizzazzjonali u prudenzjali fil-livell tal-Unjoni applikabbli għall-fornituri ta’ servizzi tal-kriptoassi.

(74)

Sabiex tkun tista’ ssir superviżjoni effettiva u tiġi eliminata l-possibbiltà li tiġi evitata jew ċirkumventata s-superviżjoni, jenħtieġ li s-servizzi tal-kriptoassi jiġu pprovduti biss minn persuni ġuridiċi li jkollhom uffiċċju rreġistrat fi Stat Membru li fih iwettqu attivitajiet ta’ negozju sostantivi, inkluż il-forniment ta’ servizzi tal-kriptoassi. Impriżi li ma humiex persuni ġuridiċi, bħal sħubijiet kummerċjali, jenħtieġ li taħt ċerti kundizzjonijiet jingħataw il-permess ukoll li jipprovdu servizzi tal-kriptoassi. Huwa essenzjali li l-fornituri ta’ servizzi tal-kriptoassi jżommu mmaniġġjar effettiv tal-attivitajiet tagħhom fl-Unjoni sabiex jevitaw li jdgħajfu s-superviżjoni prudenzjali effettiva u biex jiżguraw l-infurzar tar-rekwiżiti taħt dan ir-Regolament intiżi li jiżguraw protezzjoni tal-investitur, integrita’ tas-suq u stabbilta’ finanzjarja. Jenħtieġ li l-kuntatt dirett mill-qrib regolari bejn is-superviżuri u l-immaniġġjar responsabbli tal-fornituri ta’ servizzi tal-kriptoassi jkun element essenzjali ta’ tali superviżjoni. Għalhekk jenħtieġ li l-fornituri ta’ servizzi tal-kriptoassi jkollhom il-post ta’ mmaniġġjar effettiv tagħhom fl-Unjoni, u mill-anqas wieħed mid-diretturi jenħtieġ li jkun residenti fl-Unjoni. Il-post ta’ mmaniġġjar effettiv ifisser il-post fejn d-deċiżjonijiet maniġerjali u kummerċjali ewlenin, li huma neċessarji biex jitwettaq in-negozju jittieħdu.

(75)

Jenħtieġ li dan ir-Regolament ma jaffettwax il-possibbiltà li persuni stabbiliti fl-Unjoni jirċievu servizzi tal-kriptoassi minn ditta ta’ pajjiż terz fuq inizjattiva proprja. Meta ditta ta’ pajjiż terz tipprovdi servizzi tal-kriptoassi fuq inizjattiva proprja ta’ persuna stabbilita fl-Unjoni, jenħtieġ li s-servizzi tal-kriptoassi ma jkunux meqjusa bħala li huma pprovduti fl-Unjoni. Meta ditta ta’ pajjiż terz tissolleċita klijenti jew klijenti prospettivi fl-Unjoni jew tippromwovi jew tirreklama servizzi jew attivitajiet tal-kriptoassi fl-Unjoni, jenħtieġ li s-servizzi ma jitqisux bħala li huma servizzi tal-kriptoassi pprovduti fuq inizjattiva proprja tal-klijent. F’tali każ, jenħtieġ li d-ditta ta’ pajjiż terz tkun awtorizzata bħala fornitur ta’ servizzi tal-kriptoassi.

(76)

Minħabba l-iskala relattivament żgħira sal-lum tal-fornituri ta’ servizzi tal-kriptoassi, is-setgħa li jawtorizzaw u jissorveljaw tali fornituri ta’ servizzi jenħtieġ li tingħata lill-awtoritajiet nazzjonali kompetenti. Awtorizzazzjoni bħala fornitur ta’ servizzi tal-kriptoassi jenħtieġ li tingħata, tiġi miċħuda jew irtirata mill-awtorità kompetenti tal-Istat Membru fejn l-entità jkollha l-uffiċċju reġistrat tagħha. Meta tingħata awtorizzazzjoni, din jenħtieġ li tindika s-servizzi tal-kriptoassi li għalihom ikun awtorizzat il-fornitur ta’ servizzi tal-kriptoassi u jenħtieġ li tkun valida għall-Unjoni kollha.

(77)

Sabiex tiġi żgurata l-protezzjoni kontinwa tas-sistema finanzjarja tal-Unjoni kontra r-riskji tal-ħasil tal-flus u tal-finanzjament tat-terroriżmu, huwa meħtieġ li jiġi żgurat li l-fornituri ta’ servizzi tal-kriptoassi jwettqu aktar kontrolli fuq l-operazzjonijiet finanzjarji li jinvolvu klijenti u istituzzjonijiet finanzjarji minn pajjiżi terzi elenkati bħala pajjiżi terzi b’riskju għoli għaliex huma ġurisdizzjonijiet li għandhom nuqqasijiet strateġiċi fir-reġim nazzjonali tagħhom tal-ġlieda kontra l-ħasil tal-flus u kontra l-finanzjament tat-terroriżmu li jikkostitwixxu theddid sinifikanti għas-sistema finanzjarja tal-Unjoni kif imsemmi fid-Direttiva (UE) 2015/849 tal-Parlament Ewropew u tal-Kunsill (20).

(78)

Ċerti ditti soġġetti għall-atti leġiżlattivi tal-Unjoni dwar is-servizzi finanzjarji jenħtieġ li jitħallew jipprovdu s-servizzi kollha tal-kriptoassi jew xi wħud minnhom mingħajr ma jkollhom l-obbligu li jiksbu awtorizzazzjoni bħala fornitur ta’ servizzi tal-kriptoassi skont dan ir-Regolament jekk jinnotifikaw lill-awtoritajiet kompetenti tagħhom b’ċerta informazzjoni qabel ma jipprovdu dawk is-servizzi għall-ewwel darba. F’tali każijiet, jenħtieġ li dawk id-ditti jitqiesu bħala fornituri ta’ servizzi tal-kriptoassi u jenħtieġ li s-setgħat amministrattivi rilevanti previsti f’dan ir-Regolament, inkluża s-setgħa li jissospendu jew jipprojbixxu ċerti servizzi tal-kriptoassi, japplikaw fir-rigward tagħhom. Jenħtieġ li dawk id-ditti jkunu soġġetti għar-rekwiżiti kollha applikabbli għall-fornituri ta’ servizzi tal-kriptoassi skont dan ir-Regolament bl-eċċezzjoni tar-rekwiżiti ta’ awtorizzazzjoni, ir-rekwiżiti ta’ fondi proprji u l-proċedura ta’ approvazzjoni rigward l-azzjonisti u membri li għandhom partiċipazzjonijiet kwalifikanti, peress li dawk il-kwistjonijiet huma koperti mill-atti leġiżlattivi rispettivi tal-Unjoni li taħthom kienu awtorizzati. Il-proċedura ta’ notifika għall-istituzzjonijiet ta’ kreditu li biħsiebhom jipprovdu servizzi tal-kriptoassi skont dan ir-Regolament jenħtieġ li tkun mingħajr preġudizzju għad-dispożizzjonijiet tal-liġi nazzjonali li jittrasponu d-Direttiva 2013/36/UE li jistabbilixxu proċeduri għall-awtorizzazzjoni tal-istituzzjonijiet ta’ kreditu sabiex jipprovdu s-servizzi elenkati fl-Anness I ta’ dik id-Direttiva.

(79)

Sabiex jiġu żgurati l-protezzjoni tal-konsumatur, l-integrità tas-suq u l-istabbiltà finanzjarja, jenħtieġ li l-fornituri ta’ servizzi tal-kriptoassi dejjem jaġixxu b’mod onest, ġust u professjonali u fl-aħjar interessi tal-klijenti tagħhom. Jenħtieġ li s-servizzi tal-kriptoassi jitqiesu bħala “servizzi finanzjarji” kif definiti fid-Direttiva 2002/65/KE, f’każijiet meta jikkonformaw mal-kriterji ta’ dik id-Direttiva. Meta jiġu kkummerċjalizzati mill-bogħod, jenħtieġ li l-kuntratti bejn il-fornituri ta’ servizzi tal-kriptoassi u l-konsumaturi jkunu soġġetti għad-Direttiva 2002/65/KE ukoll, sakemm ma jkunx espressament stipulat mod ieħor f’dan ir-Regolament. Jenħtieġ li l-fornituri ta’ servizzi tal-kriptoassi jipprovdu lill-klijenti tagħhom b’informazzjoni li hija kompluta, ġusta, ċara u mhux qarrieqa u jwissuhom dwar ir-riskji assoċjati mal-kriptoassi. Jenħtieġ li l-fornituri ta’ servizzi tal-kriptoassi jagħmlu l-politiki tal-ipprezzar tagħhom pubbliċi, jenħtieġ li jistabbilixxu proċedura ta’ trattament tal-ilmenti u jenħtieġ li jkollhom politika robusta sabiex jidentifikaw, jipprevjenu, jimmaniġġjaw u jiżvelaw il-kunflitti ta’ interess.

(80)

Biex tiġi żgurata l-protezzjoni tal-konsumatur, jenħtieġ li l-fornituri ta’ servizzi tal-kriptoassi skont dan ir-Regolament jikkonformaw ma’ ċertu rekwiżiti prudenzjali. Jenħtieġ li dawk ir-rekwiżiti prudenzjali jiġu stabbiliti bħala ammont fiss jew fi proporzjon mal-ispejjeż ġenerali fissi tal-fornituri ta’ servizzi tal-kriptoassi tas-sena ta’ qabel, skont it-tipi ta’ servizzi li jipprovdu.

(81)

Jenħtieġ li l-fornituri ta’ servizzi tal-kriptoassi jkunu soġġetti għal rekwiżiti organizzazzjonali b’saħħithom. Jenħtieġ li l-membri tal-korp maniġerjali ta’ fornituri ta’ servizzi tal-kriptoassi jkunu kompetenti u idonei u b’mod partikolari, jenħtieġ li, ma jkunux instabu ħatja ta’ kwalunkwe reat fil-qasam tal-ħasil tal-flus jew tal-finanzjament tat-terroriżmu jew ta’ kwalunkwe reat ieħor li jaffettwa r-reputazzjoni tajba tagħhom. L-azzjonisti jew il-membri, kemm jekk diretti jew indiretti, persuni fiżiċi jew ġuridiċi, li jkollhom parteċipazzjonijiet kwalifikanti f’fornituri ta’ servizzi tal-kriptoassi jenħtieġ li jkunu ta’ reputazzjoni tajba biżżejjed u, b’mod partikolari, jenħtieġ li ma jkunux instabu ħatja ta’ reati relatati mal-ħasil tal-flus jew mal-finanzjament tat-terroriżmu jew ta’ kwalunkwe reat ieħor li jaffettwa r-reputazzjoni tajba tagħhom. Barra minn hekk, meta l-influwenza eżerċitata minn azzjonisti u membri li għandhom partiċipazzjonijiet kwalifikanti f’fornituri ta’ servizzi tal-kriptoassi x’aktarx li tkun ta’ preġudizzju għall-immaniġġjar sod u prudenti tal-fornitur ta’ servizzi tal-kriptoassi filwaqt li jitqiesu, fost l-oħrajn, l-attivitajiet preċedenti tagħhom, ir-riskju li jinvolvu ruħhom f’attivitajiet illeċiti, jew l-influwenza jew il-kontroll minn gvern ta’ pajjiż terz, jenħtieġ li l-awtoritajiet kompetenti jkollhom is-setgħa li jindirizzaw dawk ir-riskji. Jenħtieġ li l-fornituri ta’ servizzi tal-kriptoassi jimpjegaw maniġment u persunal b’għarfien, b’ħiliet u b’għarfien espert adegwati u jenħtieġ li dawn jieħdu l-passi raġonevoli kollha sabiex iwettqu dmirijiethom, inkluż permezz tat-tħejjija ta’ pjan għall-kontinwità tal-operat. Jenħtieġ li jkollhom mekkaniżmi sodi ta’ kontroll intern u ta’ valutazzjoni tar-riskju kif ukoll sistemi u proċeduri adegwati sabiex jiżguraw l-integrità u l-kunfidenzjalità tal-informazzjoni riċevuta. Il-fornituri ta’ servizzi tal-kriptoassi jenħtieġ li jkollhom arranġamenti xierqa sabiex iżommu rekords tat-tranżazzjonijiet, tal-ordnijiet u tas-servizzi kollha relatati mas-servizzi tal-kriptoassi li huma jipprovdu. Jenħtieġ li jkollhom ukoll sistemi fis-seħħ sabiex jindividwaw abbuż potenzjali tas-suq imwettaq mill-klijenti.

(82)

Sabiex jiggarantixxu l-protezzjoni tal-klijenti tagħhom, jenħtieġ li l-fornituri ta’ servizzi tal-kriptoassi jkollhom arranġamenti adegwati sabiex jissalvagwardjaw id-drittijiet tas-sjieda tal-klijenti fir-rigward tal-kriptoassi li huma għandhom fil-pussess tagħhom. Meta l-mudell tan-negozju tagħhom jirrikjedilhom li jkollhom fondi kif definiti fid-Direttiva (UE) 2015/2366 fil-forma ta’ karti tal-flus, muniti, flus skritturali jew flus elettroniċi li jappartjenu għall-klijenti tagħhom, jenħtieġ li fornituri ta’ servizzi tal-kriptoassi jqiegħdu tali fondi ma’ istituzzjoni ta’ kreditu jew ma’ bank ċentrali, meta jkun hemm kont disponibbli mal-bank ċentrali. Jenħtieġ li l-fornituri ta’ servizzi tal-kriptoassi jkunu awtorizzati jagħmlu tranżazzjonijiet ta’ pagament b’rabta mas-servizzi tal-kriptoassi li joffru, iżda biss meta jkunu awtorizzati bħala istituzzjonijiet ta’ pagament f’konformità ma’ dik id-Direttiva.

(83)

Skont is-servizzi li jipprovdu u minħabba r-riskji speċifiċi li jirriżultaw minn kull tip ta’ servizz, jenħtieġ li l-fornituri ta’ servizzi tal-kriptoassi jkunu soġġetti għal rekwiżiti speċifiċi għal dawk is-servizzi. Jenħtieġ li l-fornituri ta’ servizzi tal-kriptoassi li jfornu kustodja u amministrazzjoni ta’ kriptoassi f’isem il-klijenti jilħqu ftehim mal-klijenti tagħhom b’ċerti dispożizzjonijiet obbligatorji u jenħtieġ li jistabbilixxu u jimplimentaw politika ta’ kustodja, li jenħtieġ li tkun disponibbli għall-klijenti fuq it-talba tagħhom f’format elettroniku. Jenħtieġ li tali ftehim jispeċifika, fost l-oħrajn, in-natura tas-servizz ipprovdut, li jista’ jinkludi ż-żamma ta’ kriptoassi li jappartjenu għall-klijenti jew il-mezzi ta’ aċċess għal tali kriptoassi, f’liema każ il-klijent jista’ jżomm il-kontroll tal-kriptoassi f’kustodja. Alternattivament, il-kriptoassi jew il-mezzi ta’ aċċess għalihom jistgħu jiġu ttrasferiti għall-kontroll sħiħ tal-fornitur ta’ servizzi tal-kriptoassi. Il-fornituri ta’ servizzi tal-kriptoassi li jżommu kriptoassi li jappartjenu għall-klijenti, jew il-mezzi ta’ aċċess għal tali kriptoassi, jenħtieġ li jiżguraw li dawk il-kriptoassi ma jintużawx għan-nom proprju. Jenħtieġ li l-fornituri ta’ servizzi tal-kriptoassi jiżguraw li l-kriptoassi kollha miżmuma dejjem ma jkunux gravati. Dawk il-fornituri ta’ servizzi tal-kriptoassi jenħtieġ li jinżammu responsabbli wkoll għal kwalunkwe telf li jirriżulta minn inċident relatat mat-teknoloġiji tal-informazzjoni u tal-komunikazzjoni (“ICT”), inkluż inċident li jirriżulta minn attakk ċibernetiku, serq jew kwalunkwe ħsara. Il-fornituri ta’ hardware jew software ta’ kartieri mhux ta’ kustodja jenħtieġ li ma jaqgħux fil-kamp ta’ applikazzjoni ta’ dan ir-Regolament.

(84)

Sabiex jiġi żgurat il-funzjonament ordnat tas-swieq fil-kriptoassi, jenħtieġ li l-fornituri ta’ servizzi tal-kriptoassi li joperaw pjattaforma ta’ negozjar għall-kriptoassi jkollhom regoli operazzjonali dettaljati, jenħtieġ li jiżguraw li s-sistemi u l-proċeduri tagħhom ikunu reżiljenti biżżejjed, jenħtieġ li jkunu soġġetti għal rekwiżiti ta’ trasparenza ta’ qabel in-negozjar u ta’ wara n-negozjar adattati għas-swieq fil-kriptoassi, u jenħtieġ li jistabbilixxu regoli trasparenti u mhux diskriminatorji, ibbażati fuq kriterji oġġettivi, li jirregolaw l-aċċess għall-pjattaforma tagħhom. Il-fornituri ta’ servizzi tal-kriptoassi li joperaw pjattaforma ta’ negozjar għall-kriptoassi jenħtieġ li jkollhom ukoll struttura ta’ tariffi trasparenti għas-servizzi pprovduti sabiex jiġi evitat it-tqegħid ta’ ordnijiet li jistgħu jikkontribwixxu għal abbuż tas-suq jew għal kundizzjonijiet ta’ negozjar diżordinati. Jenħtieġ li l-fornituri ta’ servizzi tal-kriptoassi li joperaw pjattaforma ta’ negozjar għall-kriptoassi jkunu jistgħu jsaldaw it-tranżazzjonijiet eżegwiti fuq pjattaformi ta’ negozjar on-chain u off-chain u jenħtieġ li jiżguraw saldu f’waqtu. Is-saldu tat-tranżazzjonijiet jenħtieġ li jinbeda fi żmien 24 siegħa minn meta tranżazzjoni tiġi eżegwita fuq il-pjattaforma ta’ negozjar. Fil-każ ta’ saldu off-chain, is-saldu jenħtieġ li jinbeda fl-istess jum ta’ negozju filwaqt li fil-każ ta’ saldu on-chain, is-saldu jista’ jieħu aktar fit-tul peress li ma huwiex ikkontrollat mill-fornitur ta’ servizzi tal-kriptoassi li jopera l-pjattaforma ta’ negozjar.

(85)

Biex tiġi żgurata l-protezzjoni tal-konsumatur, jenħtieġ li l-fornituri ta’ servizzi tal-kriptoassi li jiskambjaw l-kriptoassi għal fondi jew kriptoassi oħra bl-użu tal-kapital tagħhom stess jfasslu politika kummerċjali mhux diskriminatorja. Jenħtieġ li jippubblikaw il-kwotazzjonijiet vinkolanti jew il-metodoloġija li jkunu qed jużaw biex jiddeterminaw il-prezz tal-kriptoassi li jixtiequ jpartu, u jenħtieġ li jippubblikaw kwalunkwe limitu li jixtiequ jistabbilixxu fuq l-ammont li għandu jiġi skambjat. Jenħtieġ li jkunu soġġetti wkoll għal rekwiżiti ta’ trasparenza ta’ wara n-negozjar.

(86)

Jenħtieġ li l-fornituri ta’ servizzi tal-kriptoassi li jeżegwixxu ordnijiet għal kriptoassi f’isem il-klijenti jfasslu politika ta’ eżekuzzjoni u jenħtieġ li dejjem jimmiraw li jiksbu l-aħjar riżultat possibbli għall-klijenti tagħhom, inkluż meta jaġixxu bħala l-kontroparti tal-klijenti. Jenħtieġ li jieħdu l-passi kollha meħtieġa biex jevitaw li l-impjegati tagħhom jagħmlu użu ħażin mill-informazzjoni relatata mal-ordnijiet tal-klijenti. Il-fornituri ta’ servizzi tal-kriptoassi li jirċievu ordnijiet u jittrażmettu dawk l-ordnijiet lil fornituri oħra ta’ servizzi tal-kriptoassi jenħtieġ li jimplimentaw proċeduri biex dawk l-ordnijiet jintbagħtu minnufih u kif suppost. Jenħtieġ li l-fornituri ta’ servizzi tal-kriptoassi ma jirċivux benefiċċji monetarji jew mhux monetarji għat-trażmissjoni ta’ dawk l-ordnijiet lil kwalunkwe pjattaforma ta’ negozjar partikolari għall-kriptoassi jew lil kwalunkwe fornituri ieħor ta’ servizzi tal-kriptoassi. Jenħtieġ li jimmonitorjaw l-effettività tal-arranġamenti ta’ eżekuzzjoni tal-ordnijiet tagħhom u tal-politika ta’ eżekuzzjoni tagħhom, filwaqt li jivvalutaw jekk iċ-ċentri tal-eżekuzzjoni inklużi fil-politika ta’ eżekuzzjoni tal-ordnijiet jipprevedux l-aħjar riżultat possibbli għall-klijent jew jekk għandhomx bżonn jagħmlu bidliet fl-arranġamenti ta’ eżekuzzjoni tagħhom, u jenħtieġ li jinnotifikaw lill-klijenti li magħhom għandhom relazzjoni li għadha għaddejja dwar kwalunkwe bidla materjali fl-arranġamenti ta’ eżekuzzjoni tal-ordnijiet jew fil-politika ta’ eżekuzzjoni tagħhom.

(87)

Meta fornitur ta’ servizzi tal-kriptoassi li jeżegwixxi ordnijiet għal kriptoassi f’isem il-klijenti jkun il-kontroparti tal-klijent, jista’ jkun hemm similaritajiet mas-servizzi ta’ skambji ta’ kriptoassi għal fondi jew kriptoassi oħra. Madankollu, fi skambji ta’ kriptoassi għal fondi jew kriptoassi oħra, il-prezz għal tali skambji jiġi ddeterminat liberament mill-fornitur ta’ servizzi tal-kriptoassi bħala skambju tal-munita. Madankollu fl-eżekuzzjoni tal-ordnijiet għall-kriptoassi f’isem il-klijenti, il-fornitur ta’ servizzi tal-kriptoassi jenħtieġ li dejjem jiżgura li jikseb l-aħjar riżultat possibbli għall-klijent tiegħu, inkluż meta jaġixxi bħala kontroparti tal-klijent, f’konformità mal-politika tiegħu dwar l-aħjar eżekuzzjoni. Jenħtieġ li l-iskambju ta’ kriptoassi għal fondi jew kriptoassi oħra meta jsir mill-emittent jew mill-offerent ma jkunx servizz tal-kriptoassi.

(88)

Il-fornituri ta’ servizzi tal-kriptoassi li jqegħdu l-kriptoassi għal detenturi potenzjali jenħtieġ li, qabel il-konklużjoni ta’ kuntratt, jikkomunikaw lil dawk il-persuni informazzjoni dwar kif biħsiebhom iwettqu s-servizz tagħhom. Sabiex jiżguraw il-protezzjoni tal-klijenti tagħhom, il-fornituri ta’ servizzi tal-kriptoassi li huma awtorizzati li jqiegħdu l-kriptoassi jenħtieġ li jkollhom fis-seħħ proċeduri speċifiċi u adegwati biex jipprevjenu, jimmonitorjaw, jimmaniġġjaw u jiżvelaw kwalunkwe kunflitt ta’ interess li jinħoloq mit-tqegħid ta’ kriptoassi mal-klijenti tagħhom stess u meta l-prezz propost għat-tqegħid tal-kriptoassi jkun ġie sopravalutat jew sottovalutat. Jenħtieġ li t-tqegħid ta’ kriptoassi f’isem offerent ma jiġix meqjus bħala offerta separata.

(89)

Sabiex tiġi żgurata l-protezzjoni tal-konsumatur, il-fornituri ta’ servizzi tal-kriptoassi li jfornu pariri dwar il-kriptoassi, jew fuq talba ta’ klijent jew fuq inizjattiva tagħhom stess, jew li jfornu l-immaniġġjar tal-portafolli tal-kriptoassi, jenħtieġ li jagħmlu valutazzjoni dwar jekk dawk is-servizzi tal-kriptoassi jew il-kriptoassi humiex xierqa għall-klijenti, filwaqt li jqisu l-esperjenza, l-għarfien u l-objettivi tal-klijenti tagħhom, u l-kapaċità tal-klijenti tagħhom li jġarrbu t-telf. Meta l-klijenti ma jipprovdux informazzjoni lill-fornituri ta’ servizzi tal-kriptoassi dwar l-esperjenza, l-għarfien u l-objettivi tagħhom u l-kapaċità tagħhom li jġarrbu telf, jew ikun ċar li l-kriptoassi ma jkunux adattati għall-klijenti, jenħtieġ li l-fornituri ta’ servizzi tal-kriptoassi ma jirrakkomandawx tali servizzi tal-kriptoassi jew kriptoassi lil dawk il-klijenti, u lanqas ma jibdew il-forniment ta’ mmaniġġjar tal-portafolli tal-kriptoassi. Meta jfornu pariri dwar il-kriptoassi, jenħtieġ li l-fornituri ta’ servizzi tal-kriptoassi jipprovdu lill-klijenti b’rapport, li jenħtieġ li jinkludi l-valutazzjoni tal-adegwatezza li tispeċifika l-parir mogħti u kif din tissodisfa l-preferenzi u l-objettivi tal-klijenti. Meta jfornu mmaniġġjar ta’ portafolli tal-kriptoassi, jenħtieġ li l-fornituri ta’ servizzi tal-kriptoassi jipprovdu dikjarazzjonijiet perjodiċi lill-klijenti tagħhom, li jenħtieġ li jinkludu rieżami tal-attivitajiet tagħhom u tal-prestazzjoni tal-portafoll kif ukoll dikjarazzjoni aġġornata dwar il-valutazzjoni tal-adegwatezza.

(90)

Xi servizzi tal-kriptoassi, b’mod partikolari l-forniment tal-kustodja u l-amministrazzjoni ta’ kriptoassi f’isem il-klijenti, it-tqegħid tal-kriptoassi, u s-servizzi ta’ trasferiment ta’ kriptoassi f’isem il-klijenti, jistgħu jikkoinċidu mas-servizzi ta’ pagament kif definit fid-Direttiva (UE) 2015/2366.

(91)

L-għodod ipprovduti mill-emittenti tal-flus elettroniċi lill-klijenti tagħhom biex jimmaniġġjaw token tal-flus elettroniċi jistgħu ma jkunux distinti mill-attivita ta’ forniment tas-servizzi ta’ kustodja u amministrazzjoni kif irregolati minn dan ir-Regolament. Għalhekk jenħtieġ li l-istituzzjonijiet tal-flus elettroniċi jkunu jistgħu jipprovdu servizzi ta’ kustodja mingħajr awtorizzazzjoni minn qabel skont dan ir-Regolament biex jipprovdu servizzi tal-kriptoassi, biss fir-rigward tat-tokens tal-flus elettroniċi maħruġa minnhom.

(92)

L-attività tad-distributuri tradizzjonali tal-flus elettroniċi, jiġifieri, dik tad-distribuzzjoni tal-flus elettroniċi f’isem l-emittenti, tammonta għall-attività tat-tqegħid ta’ kriptoassi għall-finijiet ta’ dan ir-Regolament. Madankollu, jenħtieġ li l-persuni fiżiċi jew ġuridiċi li għandhom il-permess jiddistribwixxu flus elettroniċi skont id-Direttiva 2009/110/KE jkunu jistgħu wkoll jiddistribwixxu tokens tal-flus elettroniċi f’isem l-emittenti ta’ tokens tal-flus elettroniċi mingħajr ma jkollhom l-obbligu li jiksbu awtorizzazzjoni minn qabel skont dan ir-Regolament sabiex jipprovdu servizzi tal-kriptoassi. Għalhekk, jenħtieġ li tali distributuri jkunu eżentati mir-rekwiżit li jfittxu awtorizzazzjoni bħala fornitur ta’ servizzi tal-kriptoassi għall-attività tat-tqegħid tal-kriptoassi.

(93)

Fornitur ta’ servizzi ta’ trasferiment għal kriptoassi jenħtieġ li tkun entità li tipprovdi għat-trasferiment f’isem klijent, ta’ kriptoassi minn indirizz jew kont ta’ reġistru distribwit għall-ieħor. Tali servizz ta’ trasferiment jenħtieġ li ma jinkludix il-validaturi, in-nodi jew il-minaturi li jistgħu jkunu parti mill-konferma ta’ tranżazzjoni u l-aġġornament tal-istat tar-reġistru distribwit sottostanti. Ħafna fornituri ta’ servizzi tal-kriptoassi joffru wkoll xi tip ta’ servizz ta’ trasferiment għal kriptoassi, bħala parti minn, pereżempju, s-servizz ta’ forniment tal-kustodja u l-amministrazzjoni ta’ kriptoassi f’isem il-klijenti, l-iskambju ta’ kriptoassi għal fondi jew kriptoassi oħra, jew l-eżekuzzjoni ta’ ordnijiet għal kriptoassi f’isem il-klijenti. Skont il-karatteristiċi preċiżi tas-servizzi assoċjati mat-trasferiment ta’ tokens tal-flus elettroniċi, tali servizzi jistgħu jaqgħu taħt id-definizzjoni ta’ servizzi ta’ pagament tad-Direttiva (UE) 2015/2366. F’tali każ, jenħtieġ li dawk it-trasferimenti jiġu pprovduti minn entità awtorizzata li tforni tali servizzi ta’ pagament f’konformità ma’ dik id-Direttiva.

(94)

Dan ir-Regolament jenħtieġ li ma jindirizzax l-għoti u t-teħid b’self fil-kriptoassi, inkluż tokens tal-flus elettroniċi, u għalhekk jenħtieġ li ma jippreġudikax il-liġi nazzjonali applikabbli. Jenħtieġ li jiġu vvalutati aktar il-fattibbiltà u n-neċessità li jiġu rregolati tali attivitajiet.

(95)

Huwa importanti li tiġi żgurata fiduċja fis-swieq fil-kriptoassi u l-integrità ta’ dawk is-swieq. Għalhekk, huwa meħtieġ li jiġu stabbiliti regoli li jiskoraġġixxu l-abbuż tas-suq għall-kriptoassi li jkunu ammessi għan-negozjar. Madankollu, peress li l-emittenti tal-kriptoassi u l-fornituri ta’ servizzi tal-kriptoassi spiss ikunu SMEs, ikun sproporzjonat li jiġu applikati għalihom id-dispożizzjonijiet kollha tar-Regolament (UE) Nru 596/2014 tal-Parlament Ewropew u tal-Kunsill (21). Għalhekk, huwa meħtieġ li jiġu stabbiliti regoli speċifiċi li jipprojbixxu ċerta mġiba li x’aktarx iddgħajjef il-fiduċja tal-utenti fis-swieq fil-kriptoassi u l-integrità ta’ dawk is-swieq, inklużi l-abbużi minn informazzjoni privileġġjata, l-iżvelar illegali ta’ informazzjoni privileġġjata u l-manipulazzjoni tas-suq relatati mal-kriptoassi. Dawk ir-regoli personalizzati dwar l-abbuż tas-suq imwettaq fir-rigward tal-kriptoassi jenħtieġ li jiġu applikati wkoll f’każijiet meta l-kriptoassi jiġu ammessi għan-negozjar.

(96)

Jenħtieġ li ċ-ċertezza legali għall-parteċipanti għas-swieq fil-kriptoassi tissaħħaħ permezz ta’ karatterizzazzjoni ta’ żewġ elementi essenzjali għall-ispeċifikazzjoni ta’ informazzjoni privileġġjata, jiġifieri n-natura preċiża ta’ dik l-informazzjoni u s-sinifikat tal-effett potenzjali tagħha fuq il-prezzijiet tal-kriptoassi. Jenħtieġ li dawk l-elementi jiġu kkunsidrati wkoll għall-prevenzjoni tal-abbuż tas-suq fil-kuntest tas-swieq fil-kriptoassi u l-funzjonament tagħhom, filwaqt li jitqies, pereżempju, l-użu tal-media soċjali, l-użu ta’ kuntratti intelliġenti għall-eżekuzzjonijiet tal-ordnijiet u l-konċentrazzjoni ta’ aggregazzjoniiet tal-estrazzjoni.

(97)

Derivattivi li jikkwalifikaw bħala strumenti finanzjarji kif definiti fid-Direttiva 2014/65/UE, u li l-assi sottostanti tagħhom ikun kriptoassi, huma soġġetti għar-Regolament (UE) Nru 596/2014 meta jiġu nnegozjati fuq suq irregolat, f’faċilità multilaterali tan-negozjar jew f’faċilità organizzata tan-negozjar. Il-kriptoassi li jaqgħu fi ħdan il-kamp ta’ applikazzjoni ta’ dan ir-Regolament, li huma l-assi sottostanti ta’ dawk id-derivattivi, jenħtieġ li jkunu soġġetti għad-dispożizzjonijiet dwar l-abbuż tas-suq ta’ dan ir-Regolament.

(98)

Jenħtieġ li l-awtoritajiet kompetenti jingħataw biżżejjed setgħat biex jissorveljaw il-ħruġ, l-offerta lill-pubbliku u l-ammissjoni għan-negozjar ta’ kriptoassi, inklużi tokens irreferenzjati ma’ assi jew tokens tal-flus elettroniċi, kif ukoll biex jissorveljaw il-fornituri ta’ servizzi tal-kriptoassi. Dawk is-setgħat jenħtieġ li jinkludu s-setgħa li jissospendu jew jipprojbixxu offerta lill-pubbliku jew ammissjoni għan-negozjar ta’ kriptoassi jew il-forniment ta’ servizz tal-kriptoassi, u biex jinvestigaw il-ksur tar-regoli dwar l-abbuż tas-suq. L-emittenti ta’ kriptoassi għajr it-tokens irreferenzjati ma’ assi jew it-tokens tal-flus elettroniċi jenħtieġ li ma jkunux soġġetti għal superviżjoni skont dan ir-Regolament meta l-emmittent ma jkunx offerent jew persuna li tkun qed tfittex l-ammissjoni għan-negozjar.

(99)

Jenħtieġ li l-awtoritajiet kompetenti jkollhom ukoll is-setgħa li jimponu penali fuq l-emittenti, l-offerenti jew il-persuni li jkunu qed ifittxu l-ammissjoni għan-negozjar ta’ kriptoassi, inklużi tokens irreferenzjati ma’ assi jew tokens tal-flus elettroniċi u fornituri ta’ servizzi tal-kriptoassi. Meta jiddeterminaw it-tip u l-livell ta’ penali amministrattiva jew miżura amministrattiva oħra, l-awtoritajiet kompetenti jenħtieġ li jqisu ċ-ċirkostanzi rilevanti kollha, inklużi l-gravità u t-tul ta’ żmien tal-ksur u jekk dan twettaqx intenzjonalment.

(100)

Minħabba n-natura transfruntiera tas-swieq fil-kriptoassi, jenħtieġ li l-awtoritajiet kompetenti jikkooperaw ma’ xulxin biex jindividwaw u jiskoraġġixxu kwalunkwe ksur ta’ dan ir-Regolament.

(101)

Biex tiġi ffaċilitata t-trasparenza rigward il-kriptoassi u l-fornituri ta’ servizzi tal-kriptoassi, jenħtieġ li l-ESMA tistabbilixxi reġistru ta’ white papers dwar il-kriptoassi, l-emittenti ta’ tokens irreferenzjati ma’ assi, l-emittenti ta’ tokens tal-flus elettroniċi u l-fornituri ta’ servizzi tal-kriptoassi.

(102)

Tokens irreferenzjati ma’ assi sinifikanti jistgħu jintużaw bħala mezz ta’ skambju u sabiex isiru volumi kbar ta’ tranżazzjonijiet ta’ pagament. Minħabba li volumi daqstant kbar jistgħu jippreżentaw riskji speċifiċi għall-kanali ta’ trażmissjoni monetarja u għas-sovranità monetarja, huwa xieraq li l-EBA tiġi assenjata l-kompitu li tissorvelja lill-emittenti ta’ tokens irreferenzjati ma’ assi, ladarba tali tokens ikunu ġew ikklassifikati bħala sinifikanti. Jenħtieġ li tali inkarigu jindirizza n-natura speċifika ħafna tar-riskji ppreżentati mit-tokens irreferenzjati ma’ assi, u jenħtieġ li ma jistabbilixxi l-ebda preċedent għal kwalunkwe att leġiżlattiv ieħor tal-Unjoni dwar is-servizzi finanzjarji.

(103)

L-awtoritajiet kompetenti inkarigati mis-superviżjoni skont id-Direttiva 2009/110/KE jenħtieġ li jissorveljaw l-emittenti ta’ tokens tal-flus elettroniċi. Madankollu, minħabba l-użu potenzjali mifrux ta’ tokens tal-flus elettroniċi sinifikanti bħala mezzi ta’ pagament u r-riskji li jistgħu joħolqu għall-istabbiltà finanzjarja, hija meħtieġa superviżjoni doppja kemm mill-awtoritajiet kompetenti kif ukoll mill-EBA tal-emittenti ta’ tokens tal-flus elettroniċi sinifikanti. Jenħtieġ li EBA tissorvelja l-konformità mill-emittenti ta’ tokens tal-flus elettroniċi sinifikanti mar-rekwiżiti addizzjonali speċifiċi stabbiliti f’dan ir-Regolament għal tali tokens. Peress li r-rekwiżiti addizzjonali speċifiċi jenħtieġ li japplikaw biss għall-istituzzjonijiet tal-flus elettroniċi li joħorġu tokens tal-flus elettroniċi sinifikanti, jenħtieġ li l-istituzzjonijiet ta’ kreditu li joħorġu tokens tal-flus elettroniċi sinifikanti, li għalihom ma japplikawx tali rekwiżiti, jibqgħu taħt is-superviżjoni tal-awtoritajiet kompetenti rispettivi tagħhom. Is-superviżjoni doppja jenħtieġ li tindirizza n-natura speċifika ħafna tar-riskji maħluqa mit-tokens tal-flus elettroniċi, u jenħtieġ li ma tistabbilixxix preċedent għal kwalunkwe att leġiżlattiv ieħor tal-Unjoni dwar is-servizzi finanzjarji.

(104)

Tokens tal-flus elettroniċi sinifikanti denominati f’munita uffiċjali ta’ Stat Membru għajr l-euro, li jintużaw bħala mezz ta’ skambju u sabiex jiġu saldati volumi kbar ta’ tranżazzjonijiet ta’ pagament jistgħu, għalkemm x’aktarx ma jseħħux, joħolqu riskji speċifiċi għas-sovranità monetarja tal-Istat Membru li fil-munita uffiċjali tiegħu huma denominati. Meta mill-anqas 80 % tal-għadd ta’ detenturi u tal-volum tat-tranżazzjonijiet ta’ dawk it-tokens tal-flus elettroniċi sinifikanti jkunu kkonċentrati fl-Istat Membru domiċiljari, jenħtieġ li r-responsabbiltajiet superviżorji ma jiġux ittrasferiti lill-EBA.

(105)

Jenħtieġ li l-EBA tistabbilixxi kulleġġ ta’ superviżuri għal kull emittent ta’ tokens irreferenzjati ma’ assi sinifikanti u ta’ tokens tal-flus elettroniċi sinifikanti. Peress li l-emittenti ta’ tokens irreferenzjati ma’ assi sinifikanti u tat-tokens tal-flus elettroniċi sinifikanti normalment ikunu fiċ-ċentru ta’ network ta’ entitajiet li jiżguraw il-ħruġ, it-trasferiment u d-distribuzzjoni ta’ tali kriptoassi, jenħtieġ li l-membri tal-kulleġġ tas-superviżuri għal kull emittent jinkludu, fost l-oħrajn, l-awtoritajiet kompetenti tal-pjattaformi ta’ negozjar l-aktar rilevanti għall-kriptoassi, f’każijiet meta t-tokens irreferenzjati ma’ assi sinifikanti jew it-tokens tal-flus elettroniċi sinifikanti jiġu ammessi għan-negozjar, u l-awtoritajiet kompetenti tal-entitajiet u l-fornituri ta’ servizzi tal-kriptoassi l-aktar rilevanti li jiżguraw il-kustodja u l-amministrazzjoni ta’ tokens irreferenzjati ma’ assi sinifikanti u tat-tokens tal-flus elettroniċi sinifikanti f’isem id-detenturi. Jenħtieġ li l-kulleġġ tas-superviżuri għall-emittenti ta’ tokens irreferenzjati ma’ assi sinifikanti u tat-tokens tal-flus elettroniċi sinifikanti jiffaċilita l-kooperazzjoni u l-iskambju ta’ informazzjoni fost il-membri tiegħu u jenħtieġ li joħroġ opinjonijiet mhux vinkolanti dwar, fost l-oħrajn, tibdiliet fl-awtorizzazzjoni jew fil-miżuri superviżorji rigward tali emittenti.

(106)

Sabiex tissorvelja emittenti ta’ tokens irreferenzjati ma’ assi sinifikanti u ta’ tokens tal-flus elettroniċi sinifikanti, jenħtieġ li l-EBA jkollha s-setgħat, fost l-oħrajn, li twettaq spezzjonijiet fuq il-post, tieħu miżuri superviżorji u timponi multi.

(107)

Jenħtieġ li l-EBA timponi tariffi fuq l-emittenti ta’ tokens irreferenzjati ma’ assi sinifikanti u ta’ tokens tal-flus elettroniċi sinifikanti biex tkopri l-ispejjeż tagħha, inkluż għall-ispejjeż ġenerali. Għall-emittenti ta’ tokens irreferenzjati ma’ assi sinifikanti, jenħtieġ li t-tariffa tkun proporzjonata għad-daqs tar-riżerva ta’ assi tagħhom. Għall-emittenti ta’ tokens tal-flus elettroniċi sinifikanti, jenħtieġ li t-tariffa tkun proporzjonata għall-ammont ta’ fondi riċevuti bi skambju għal tokens tal-flus elettroniċi sinifikanti.

(108)

Sabiex tiġi żgurata l-effettività ta’ dan ir-Regolament, jenħtieġ li tiġi delegata lill-Kummissjoni s-setgħa li tadotta atti skont l-Artikolu 290 tat-Trattat dwar il-Funzjonament tal-Unjoni Ewropea fir-rigward tal-ispeċifikazzjoni ulterjuri tal-elementi tekniċi tad-definizzjonijiet stabbiliti f’dan ir-Regolament sabiex jiġu aġġustati għall-iżviluppi teknoloġiċi u tas-suq, filwaqt li jiġu speċifikati aktar ċerti kriterji biex jiġi ddeterminat jekk token irreferenzjat ma’ assi jew token tal-flus elettroniċi jenħtieġx li jiġi kklassifikat bħala sinifikanti, li jiddetermina meta jkun hemm tħassib sinifikanti dwar il-protezzjoni tal-investituri jew theddida għall-funzjonament xieraq u l-integrità tas-swieq fil-kriptoassi jew għall-istabbiltà tas-sistema finanzjarja tal-Unjoni kollha jew parti minnha, tispeċifika aktar ir-regoli ta’ proċedura għall-eżerċizzju tas-setgħa tal-EBA li timponi multi jew pagamenti perjodiċi ta’ penali, inklużi dispożizzjonijiet dwar id-drittijiet tad-difiża, dispożizzjonijiet temporali, u l-ġbir ta’ multi jew pagamenti perjodiċi ta’ penali, u l-perjodi ta’ limitazzjoni għall-impożizzjoni u l-infurzar ta’ multi u pagamenti perjodiċi ta’ penali, u tispeċifika aktar it-tip u l-ammont ta’ tariffi superviżorji li l-EBA tista’ timponi fuq l-emittenti ta’ tokens irreferenzjati ma’ assi sinifikanti jew ta’ tokens tal-flus elettroniċi sinifikanti. Huwa partikolarment importanti li l-Kummissjoni twettaq konsultazzjonijiet xierqa matul ix-xogħol tagħha ta’ tħejjija, ukoll fil-livell ta’ esperti, u li dawk il-konsultazzjonijiet jiġu mwettqa f’konformità mal-prinċipji stipulati fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet (22). B’mod partikolari, biex tiġi żgurata parteċipazzjoni ugwali fit-tħejjija ta’ atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta’ atti delegati.

(109)

Sabiex tiġi promossa l-applikazzjoni konsistenti ta’ dan ir-Regolament, madwar l-Unjoni, inkluża l-protezzjoni adegwata ta’ detenturi ta’ kriptoassi u tal-klijenti ta’ fornituri ta’ servizzi tal-kriptoassi, b’mod partikolari meta jkunu konsumaturi, jenħtieġ li jiġu żviluppati standards tekniċi. Huwa effiċjenti u xieraq li EBA u ESMA jiġu fdati, bħala korpi b’għarfien espert speċjalizzat ħafna, bl-iżvilupp ta’ abbozzi ta’ standards tekniċi regolatorji li ma jinvolvux għażliet ta’ politika, biex jiġu ppreżentati lill-Kummissjoni.

(110)

Jenħtieġ li l-Kummissjoni tingħata s-setgħa li tadotta standards tekniċi regolatorji żviluppati mill-EBA u mill-ESMA fir-rigward ta’: il-kontenut, il-metodoloġiji u l-preżentazzjoni tal-informazzjoni f’white paper dwar il-kriptoassi dwar l-impatti negattivi prinċipali fuq il-klima u impatti negattivi oħra relatati mal-ambjent tal-mekkaniżmu ta’ kunsens użat biex jinħareġ il-kriptoassi; il-proċedura għall-approvazzjoni ta’ white papers dwar il-kriptoassi sottomessi mill-istituzzjonijiet ta’ kreditu meta joħorġu tokens irreferenzjati ma’ assi; l-informazzjoni li jenħtieġ li jkun fiha applikazzjoni għal awtorizzazzjoni bħala emittent ta’ tokens irreferenzjati ma’ assi; il-metodoloġija biex jiġu stmati l-għadd medju trimestrali u l-valur aggregat medju tat-tranżazzjonijiet għal kull jum assoċjati mal-użi tat-tokens irreferenzjati ma’ assi u tokens tal-flus elettroniċi denominati f’munita li ma tkunx munita uffiċjali ta’ Stat Membru bħala mezz ta’ skambju f’kull żona tal-munita unika; ir-rekwiżiti, il-mudelli u l-proċeduri ta’ trattament tal-ilmenti tad-detenturi ta’ tokens irreferenzjati ma’ assi u tal-klijenti tal-fornituri ta’ servizzi tal-kriptoassi; ir-rekwiżiti għall-politiki u l-proċeduri għall-identifikazzjoni, il-prevenzjoni, l-immaniġġjar u l-iżvelar tal-kunflitti ta’ interess tal-emittenti ta’ tokens irreferenzjati ma’ assi u d-dettalji u l-metodoloġija għall-kontenut ta’ dak l-iżvelar; il-proċedura u l-iskeda ta’ żmien għal emittent ta’ tokens irreferenzjati ma’ assi u tokens tal-flus elettroniċi sinifikanti sabiex jaġġusta għal rekwiżiti ogħla ta’ fondi proprji, il-kriterji għall-ħtieġa ta’ fondi proprji ogħla, ir-rekwiżiti minimi għat-tfassil ta’ programmi ta’ ttestjar tal-istress; ir-rekwiżit ta’ likwidità għar-riżerva ta’ assi; l-istrumenti finanzjarji li fihom tista’ tiġi investita r-riżerva ta’ assi; il-kontenut dettaljat ta’ informazzjoni meħtieġa biex titwettaq il-valutazzjoni tal-akkwiżizzjoni proposta tal-parteċipazzjoni kwalifikanti f’emittent ta’ tokens irreferenzjati ma’ assi; ir-rekwiżiti għall-obbligi addizzjonali għall-emittenti ta’ tokens irreferenzjati ma’ assi sinifikanti; l-informazzjoni li l-istituzzjonijiet ta’ kreditu, id-depożitorji ċentrali tat-titoli, id-ditti ta’ investiment, l-operaturi tas-suq, l-istituzzjonijiet tal-flus elettroniċi, il-kumpaniji maniġerjali tal-UCITS u l-maniġers ta’ fondi ta’ investiment alternattivi li beħsiebhom jipprovdu servizzi tal-kriptoassi jinnotifikaw lill-awtoritajiet kompetenti; l-informazzjoni li jkun fiha applikazzjoni għal awtorizzazzjoni ta’ fornitur ta’ servizzi tal-kriptoassi; il-kontenut, il-metodoloġiji u l-preżentazzjoni ta’ informazzjoni li l-fornitur ta’ servizzi tal-kriptoassi jagħmel disponibbli għall-pubbliku u li hija relatata mal-impatti negattivi prinċipali fuq il-klima u impatti negattivi oħra relatati mal-ambjent tal-mekkaniżmu ta’ kunsens użat biex jinħareġ kull kriptoassi li fir-rigward tiegħu jipprovdu servizzi; miżuri li jiżguraw il-kontinwità u r-regolarità fit-twettiq tas-servizzi tal-kriptoassi u r-rekords li jridu jinżammu tas-servizzi, l-ordnijiet u t-tranżazzjonijiet kollha tal-kriptoassi li jwettqu; ir-rekwiżiti għall-politiki għall-identifikazzjoni, il-prevenzjoni, l-immaniġġjar u l-iżvelar ta’ kunflitti ta’ interess tal-fornituri ta’ servizzi tal-kriptoassi u d-dettalji u l-metodoloġija għall-kontenut ta’ dak l-iżvelar; il-mod li bih għandha tiġi offruta d-data ta’ trasparenza tal-operatur ta’ pjattaforma ta’ negozjar u l-kontenut u l-format tar-rekords tal-ktieb tal-ordnijiet rigward il-pjattaforma ta’ negozjar; il-kontenut dettaljat tal-informazzjoni meħtieġa biex titwettaq il-valutazzjoni tal-akkwiżizzjoni proposta tal-parteċipazzjoni kwalifikanti f’fornitur ta’ servizzi tal-kriptoassi; l-arranġamenti, is-sistemi u proċeduri xierqa għall-monitoraġġ u l-individwazzjoni tal-abbuż tas-suq; il-mudell ta’ notifika għar-rappurtar ta’ suspetti ta’ abbuż tas-suq u proċeduri ta’ koordinazzjoni bejn l-awtoritajiet kompetenti rilevanti għall-individwazzjoni ta’ abbuż tas-suq; l-informazzjoni li trid tiġi skambjata bejn l-awtoritajiet kompetenti; mudell ta’ dokument għall-arranġamenti ta’ kooperazzjoni bejn l-awtoritajiet kompetenti tal-Istati Membri u l-awtoritajiet superviżorji ta’ pajjiżi terzi; id-data meħtieġa għall-klassifikazzjoni tal-white papers dwar il-kriptoassi fir-reġistru tal-ESMA u l-arranġamenti prattiċi biex jiġi żgurat li tali data tkun tista’ tinqara minn magna; il-kundizzjonijiet li skonthom ċerti membri tal-kulleġġ tas-superviżuri għall-emittenti ta’ tokens irreferenzjati ma’ assi sinifikanti u għall-emittenti ta’ tokens tal-flus elettroniċi sinifikanti għandhom jitqiesu l-aktar rilevanti fil-kategorija tagħhom; u l-kundizzjonijiet li skonthom jitqies li tokens irreferenzjati ma’ assi jew tokens tal-flus elettroniċi jintużaw fuq skala kbira għall-finijiet tal-kwalifikazzjoni ta’ ċerti membri ta’ dak il-kulleġġ u d-dettalji tal-arranġamenti prattiċi għall-funzjonament ta’ dak il-kulleġġ. Jenħtieġ li l-Kummissjoni tadotta dawk l-istandards tekniċi regolatorji permezz ta’ atti delegati f’konformità mal-Artikolu 290 TFUE u skont l-Artikoli 10 sa 14 tar-Regolamenti (UE) Nru 1093/2010 u ta’ (UE) Nru 1095/2010, rispettivament.

(111)

Jenħtieġ li l-Kummissjoni tingħata s-setgħa li tadotta standards tekniċi ta’ implimentazzjoni żviluppati mill-EBA u mill-ESMA, fir-rigward ta’: l-istabbiliment ta’ formoli, formati u mudelli standard għall-white papers dwar il-kriptoassi; l-istabbiliment ta’ formoli, mudelli u proċeduri standard għat-trażmissjoni ta’ informazzjoni għall-finijiet tal-applikazzjoni għal awtorizzazzjoni bħala emittent ta’ tokens irreferenzjati ma’ assi; l-istabbiliment ta’ formoli, formati u mudelli standard għall-finijiet tar-rapportar dwar tokens irreferenzjati ma’ assi u tokens tal-flus elettroniċi denominati f’munita li ma tkunx munita uffiċjali ta’ Stat Membru li jinħarġu b’valur għola minn EUR 100 000 000; l-istabbiliment ta’ formoli, mudelli u proċeduri standard għan-notifika ta’ informazzjoni lill-awtoritajiet kompetenti minn istituzzjonijiet ta’ kreditu, depożitorji ċentrali tat-titoli, ditti ta’ investiment, operaturi tas-suq, istituzzjonijiet tal-flus elettroniċi, kumpaniji maniġerjali tal-UCITS u maniġers ta’ fondi ta’ investiment alternattivi li beħsiebhom jipprovdu servizzi tal-kriptoassi; l-istabbiliment ta’ formoli, mudelli u proċeduri standard għall-applikazzjoni għal awtorizzazzjoni bħala fornituri ta’ servizzi tal-kriptoassi; id-determinazzjoni tal-mezzi tekniċi għall-iżvelar pubbliku ta’ informazzjoni privileġġjata u għall-ittardjar tal-iżvelar pubbliku ta’ informazzjoni privileġġjata; u l-istabbiliment tal-formoli, il-mudelli u l-proċeduri standard għall-kooperazzjoni u l-iskambju ta’ informazzjoni bejn l-awtoritajiet kompetenti u bejn l-awtoritajiet kompetenti, EBA u ESMA. Jenħtieġ li l-Kummissjoni tadotta dawk l-istandards tekniċi ta’ implimentazzjoni permezz ta’ atti ta’ implimentazzjoni f’konformità mal-Artikolu 291 TFUE u f’konformità mal-Artikolu 15 tar-Regolament (UE) Nru 1093/2010 u mal-Artikolu 15 tar-Regolament (UE) Nru 1095/2010.

(112)

Minħabba li l-objettivi ta’ dan ir-Regolament, jiġifieri li jindirizza l-frammentazzjoni tal-qafas ġuridiku li japplika għall-offerenti jew għall-persuni li jkunu qed ifittxu l-ammissjoni għan-negozjar tal-kriptoassi, għajr tokens irreferenzjati ma’ assi u tokens tal-flus elettroniċi, għall-emittenti ta’ tokens irreferenzjati ma’ assi u tokens tal-flus elettroniċi u għall-fornituri ta’ servizzi tal-kriptoassi, u li jiżgura l-funzjonament xieraq tas-swieq fil-kriptoassi filwaqt li jiżgura l-protezzjoni tad-detenturi tal-kriptoassi u l-fornituri ta’ servizzi tal-kriptoassi, b’mod partikolari d-detenturi fil-livell tal-konsumatur, kif ukoll il-protezzjoni tal-integrità tas-suq u l-istabbiltà finanzjarja, ma jistgħux jinkisbu b’mod suffiċjenti mill-Istati Membri iżda jistgħu, pjuttost, jinkisbu aħjar fil-livell tal-Unjoni billi jinħoloq qafas li fih jista’ jiżviluppa suq transfruntier akbar għall-kriptoassi u għall-fornituri ta’ servizzi tal-kriptoassi, l-Unjoni tista’ tadotta miżuri, f’konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju ta’ proporzjonalità kif stabbilit f’dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkisbu dawk l-objettivi.

(113)

Sabiex jiġi evitat tfixkil tal-parteċipanti fis-suq li jipprovdu servizzi u attivitajiet fir-rigward ta’ kriptoassi għajr tokens irreferenzjati ma’ assi u tokens tal-flus elettroniċi li nħarġu qabel id-data ta’ applikazzjoni ta’ dan ir-Regolament, l-emittenti ta’ tali kriptoassi jenħtieġ li jiġu eżentati mill-obbligu li jippubblikaw white paper dwar il-kriptoassi u minn rekwiżiti oħra ta’ dan ir-Regolament. Madankollu, jenħtieġ li ċerti obbligi japplikaw meta tali kriptoassi jkunu ġew ammessi għan-negozjar qabel id-data tal-applikazzjoni ta’ dan ir-Regolament. Sabiex jiġi evitat tfixkil għall-parteċipanti eżistenti fis-suq, huma meħtieġa dispożizzjonijiet tranżizzjonali għall-emittenti ta’ tokens irreferenzjati mal-assi li kienu joperaw fiż-żmien tad-dħul fis-seħħ ta’ dan ir-Regolament.

(114)

Peress li l-oqfsa regolatorji nazzjonali applikabbli għall-fornituri ta’ servizzi tal-kriptoassi qabel id-dħul fis-seħħ ta’ dan ir-Regolament ivarjaw fost l-Istati Membri, huwa essenzjali li dawk l-Istati Membri li, fil-preżent, ma jkollhomx fis-seħħ rekwiżiti prudenzjali b’saħħithom għall-fornituri ta’ servizzi tal-kriptoassi li attwalment joperaw taħt l-oqfsa regolatorji tagħhom ikollhom il-possibbiltà li jirrikjedu li tali fornituri ta’ servizzi tal-kriptoassi jkunu soġġetti għal rekwiżiti aktar stretti minn dawk taħt l-oqfsa regolatorji nazzjonali. F’tali każijiet, jenħtieġ li l-Istati Membri jitħallew ma japplikawx, jew inaqqsu, il-perjodu tranżitorju ta’ 18-il xahar li f’każijiet oħra jippermetti lill-fornituri ta’ servizzi tal-kriptoassi jipprovdu servizzi abbażi tal-qafas regolatorju nazzjonali eżistenti tagħhom. Tali għażla għall-Istati Membri jenħtieġ li ma tistabbilixxix preċedent għal kwalunkwe att leġiżlattiv ieħor tal-Unjoni dwar is-servizzi finanzjarji.

(115)

L-informaturi jenħtieġ li jkunu jistgħu jiġbdu l-attenzjoni tal-awtoritajiet kompetenti dwar informazzjoni ġdida li tassistihom fl-identifikazzjoni ta’ ksur ta’ dan ir-Regolament u fl-impożizzjoni ta’ penali. Għalhekk, jenħtieġ li dan ir-Regolament jiżgura li jkun hemm fis-seħħ arranġamenti adegwati li jippermettu li l-informaturi jkunu jistgħu jwissu lill-awtoritajiet kompetenti dwar ksur attwali jew potenzjali ta’ dan ir-Regolament u li jipproteġuhom minn ritaljazzjoni. Jenħtieġ li dak isir billi tiġi emendata d-Direttiva (UE) 2019/1937 tal-Parlament Ewropew u tal-Kunsill (23) sabiex issir applikabbli għall-ksur ta’ dan ir-Regolament.

(116)

Minħabba li jenħtieġ li EBA tingħata mandat bis-superviżjoni diretta tal-emittenti ta’ tokens irreferenzjati ma’ assi sinifikanti u ta’ tokens tal-flus elettroniċi sinifikanti, u jenħtieġ li ESMA tingħata l-mandat li tagħmel użu mis-setgħat tagħha fir-rigward tal-fornituri ta’ servizzi tal-kriptoassi sinifikanti, huwa meħtieġ li jiġi żgurat li EBA u ESMA jkunu jistgħu jeżerċitaw is-setgħat u l-kompiti kollha tagħhom sabiex jissodisfaw l-objettivi tagħhom li jipproteġu l-interess pubbliku billi jikkontribwixxu għall-istabbiltà u l-effettività fuq terminu qasir, medju u twil tas-sistema finanzjarja għall-ekonomija tal-Unjoni, iċ-ċittadini u n-negozji tagħha u biex jiġi żgurat li l-emittenti tal-kriptoassi u l-fornituri ta’ servizzi tal-kriptoassi jkunu koperti mir-Regolamenti (UE) Nru 1093/2010 u (UE) Nru 1095/2010. Għalhekk dawk ir-Regolamenti jenħtieġ li jiġu emendati skont dan.

(117)

Il-ħruġ, l-offerta jew it-tfittxija tal-ammissjoni għan-negozjar ta’ kriptoassi u l-forniment ta’ servizzi tal-kriptoassi jistgħu jinvolvu l-ipproċessar ta’ data personali. Kwalunkwe pproċessar ta’ data personali skont dan ir-Regolament jenħtieġ li jitwettaq f’konformità mal-liġi applikabbli tal-Unjoni dwar il-protezzjoni ta’ data personali. Dan ir-Regolament huwa mingħajr preġudizzju għad-drittijiet u l-obbligi skont ir-Regolament (UE) 2016/679 tal-Parlament Ewropew u tal-Kunsill (24) u r-Regolament (UE) 2018/1725 tal-Parlament Ewropew u tal-Kunsill (25).

(118)

Il-Kontrollur Ewropew għall-Protezzjoni tad-Data ġie kkonsultat skont mal-Artikolu 42(1) tar-Regolament (UE) 2018/1725 u ta l-opinjoni tiegħu fl-24 ta’ Ġunju 2021 (26).

(119)

Jenħtieġ li d-data tal-applikazzjoni ta’ dan ir-Regolament tiġi differita sabiex jilħqu jiġu adottati l-istandards tekniċi regolatorji, l-istandards tekniċi ta’ implimentazzjoni u l-atti delegati li huma meħtieġa biex jiġu speċifikati aktar ċerti elementi ta’ dan ir-Regolament,