(1)

Id-Direttiva 2001/95/KE tal-Parlament Ewropew u tal-Kunsill (3) tistabbilixxi r-rekwiżit li l-prodotti għall-konsumatur iridu jkunu sikuri u li l-awtoritajiet tas-sorveljanza tas-suq tal-Istati Membri jridu jaġixxu kontra prodotti perikolużi kif ukoll jiskambjaw informazzjoni għal dak il-għan permezz tas-Sistema ta’ Informazzjoni Rapida tal-Unjoni (RAPEX).

(2)

Hemm bżonn li d-Direttiva 2001/95/KE tiġi riveduta u aġġornata fid-dawl tal-iżviluppi relatati ma’ teknoloġiji ġodda u mal-bejgħ online, biex tiġi żgurata l-konsistenza mal-iżviluppi fil-leġiżlazzjoni tal-Unjoni dwar l-armonizzazzjoni u fil-leġiżlazzjoni dwar l-istandardizzazzjoni, biex jiġi żgurat funzjonament aħjar ta’sejħiet lura tal-prodotti għal raġunijiet ta’ sikurezza kif ukoll biex jiġi żgurat qafas aktar ċar għall-prodotti li jixbhu l-ikel li sa issa huma regolati mid-Direttiva tal-Kunsill 87/357/KEE (4). Fl-interess taċ-ċarezza, id-Direttivi 2001/95/KE u 87/357/KEE jenħtieġ li jitħassru u jiġu sostitwiti b’dan ir-Regolament.

(3)

Regolament huwa l-istrument legali xieraq peress li dan jimponi regoli ċari u dettaljati li ma jħallu ebda lok għal traspożizzjoni diverġenti bejn l-Istati Membri. L-għażla ta’ regolament minflok direttiva tippermetti wkoll li jintlaħaq aħjar l-objettiv li tiġi żgurata l-koerenza mal-qafas leġiżlattiv tas-sorveljanza tas-suq għal prodotti li jaqgħu fil-kamp ta’ applikazzjoni tal-leġiżlazzjoni tal-Unjoni dwar l-armonizzazzjoni, fejn l-istrument legali applikabbli huwa wkoll regolament, jiġifieri r-Regolament (UE) 2019/1020 tal-Parlament Ewropew u tal-Kunsill (5). Fl-aħħar nett, tali għażla tkompli tnaqqas il-piż regolatorju permezz ta’ applikazzjoni konsistenti tar-regoli dwar is-sikurezza tal-prodotti madwar l-Unjoni.

(4)

L-għan ta’ dan ir-Regolament huwa li jikkontribwixxi għall-kisba tal-objettivi msemmija fl-Artikolu 169 tat-Trattat dwar il-Funzjonament tal-Unjoni Ewropea (TFUE). B’mod partikolari, jenħtieġ li jkollu l-għan li jiżgura s-saħħa u s-sikurezza tal-konsumaturi u l-funzjonament tas-suq intern fir-rigward tal-prodotti maħsuba għall-konsumaturi.

(5)

Dan ir-Regolament jenħtieġ li jkollu l-għan li jipproteġi lill-konsumaturi u s-sikurezza tagħhom bħala wieħed mill-prinċipji fundamentali tal-qafas legali tal-Unjoni u kif minqux fil-Karta tad-Drittijiet Fundamentali tal-Unjoni Ewropea (il-“Karta”). Prodotti perikolużi jista’ jkollhom konsegwenzi negattivi ħafna għall-konsumaturi u ċ-ċittadini. Il-konsumaturi kollha, inklużi dawk l-aktar vulnerabbli, bħat-tfal, il-persuni akbar fl-età jew il-persuni b’diżabilità, għandhom id-dritt għal prodotti sikuri. Il-konsumaturi jenħtieġ li jkollhom għad-dispożizzjoni tagħhom mezzi suffiċjenti biex jinfurzaw dak id-dritt u l-Istati Membri jenħtieġ li jkollhom strumenti u miżuri adegwati għad-dispożizzjoni tagħhom biex jinfurzaw dan ir-Regolament.

(6)

Minkejja l-iżvilupp ta’ leġiżlazzjoni tal-Unjoni dwar l-armonizzazzjoni speċifika għas-settur li tindirizza l-aspetti tas-sikurezza ta’ prodotti speċifiċi jew kategoriji speċifiċi ta’ prodotti, huwa prattikament impossibbli li tiġi adottata liġi tal-Unjoni għal kull prodott għall-konsumatur li jeżisti jew li jista’ jiġi żviluppat. Għaldaqstant hemm bżonn ta’ qafas leġiżlattiv b’bażi wiesgħa ta’ natura orizzontali li jimla l-lakuni u li jikkomplementa d-dispożizzjonijiet fil-leġiżlazzjoni fis-seħħ jew futura tal-Unjoni dwar l-armonizzazzjoni speċifika għas-settur u li jiżgura l-protezzjoni tal-konsumatur li ma hijiex żgurata mod ieħor minn dik il-leġiżlazzjoni, b’mod partikolari bil-ħsieb li jinkiseb livell għoli tal-protezzjoni tas-saħħa u s-sikurezza tal-konsumaturi, kif jirrikjedu l-Artikoli 114 u 169 tat-TFUE.

(7)

Fl-istess ħin, fir-rigward ta’ prodotti li huma soġġetti għal leġiżlazzjoni tal-Unjoni dwar l-armonizzazzjoni speċifika għas-settur, il-kamp ta’ applikazzjoni tal-partijiet differenti ta’ dan ir-Regolament jenħtieġ li jiġi stabbilit b’mod ċar biex jiġu evitati dispożizzjonijiet imrikkba u jiġi żgurat qafas legali ċar.

(8)

Filwaqt li xi wħud mid-dispożizzjonijiet ta’ dan ir-Regolament, bħall-biċċa l-kbira tal-obbligi tal-operaturi ekonomiċi, jenħtieġ li ma japplikawx għal prodotti koperti mil-leġiżlazzjoni tal-Unjoni dwar l-armonizzazzjoni, ċerti dispożizzjonijiet oħra ta’ dan ir-Regolament huma komplementari għal-leġiżlazzjoni tal-Unjoni dwar l-armonizzazzjoni u jenħtieġ li għalhekk japplikaw għal tali prodotti. B’mod partikolari, ir-rekwiżit ġenerali tas-sikurezza tal-prodotti u d-dispożizzjonijiet relatati jenħtieġ li japplikaw għall-prodotti għall-konsumatur koperti mil-leġiżlazzjoni tal-Unjoni dwar l-armonizzazzjoni meta ċerti tipi ta’ riskji ma jkunux koperti minn dik il-leġiżlazzjoni tal-Unjoni dwar l-armonizzazzjoni. Id-dispożizzjonijiet ta’ dan ir-Regolament li jikkonċernaw l-obbligi tal-fornituri tas-swieq online, l-obbligi tal-operaturi ekonomiċi f’każ ta’ inċidenti, id-dritt għall-informazzjoni u għal rimedju għall-konsumaturi kif ukoll is-sejħiet lura tal-prodotti għal raġunijiet ta’ sikurezza jenħtieġ li japplikaw għal prodotti koperti mil-leġiżlazzjoni tal-Unjoni dwar l-armonizzazzjoni sa fejn ma jkunx hemm dispożizzjonijiet speċifiċi bl-istess objettiv f’tali leġiżlazzjoni tal-Unjoni dwar l-armonizzazzjoni. Bl-istess mod, ir-RAPEX diġà tintuża għall-finijiet tal-leġiżlazzjoni tal-Unjoni dwar l-armonizzazzjoni, kif imsemmi fl-Artikolu 20 tar-Regolament (UE) 2019/1020: għalhekk, id-dispożizzjonijiet ta’ dan ir-Regolament li jirregolaw is-Safety Gate u l-funzjonament tiegħu jenħtieġ li japplikaw għall-prodotti koperti mil-leġiżlazzjoni tal-Unjoni dwar l-armonizzazzjoni.

(9)

Il-prodotti li huma ddisinjati b’mod esklużiv għall-użu professjonali iżda li wara ġew imdawra għas-suq tal-konsumatur jenħtieġ li jkunu soġġetti għal dan ir-Regolament għaliex jistgħu joħolqu riskji għas-saħħa u s-sikurezza tal-konsumaturi meta użati b’kondizzjonijiet raġonevolment prevedibbli.

(10)

Il-prodotti mediċinali huma soġġetti għal evalwazzjoni qabel it-tqegħid fis-suq li tinkludi analiżi speċifika tar-riskji u l-benefiċċji. Għalhekk jenħtieġ li dawk il-prodotti jiġu esklużi mill-kamp ta’ applikazzjoni ta’ dan ir-Regolament.

(11)

Il-liġi tal-Unjoni dwar l-ikel, l-għalf u oqsma relatati tistabbilixxi sistema speċifika li tiżgura s-sikurezza tal-prodotti koperti minnha. Fil-fatt, il-prodotti tal-ikel u tal-għalf għandhom qafas legali speċifiku stabbilit, b’mod partikolari, bir-Regolament (KE) Nru 178/2002 tal-Parlament Ewropew u tal-Kunsill (6). Barra minn hekk, il-prodotti tal-ikel u tal-għalf huma rregolati wkoll mir-Regolament (UE) 2017/625 tal-Parlament Ewropew u tal-Kunsill (7), li jiżgura approċċ armonizzat fir-rigward tal-kontrolli uffiċjali għall-verifika tal-konformità mal-liġi tal-għalf u l-ikel u mar-regoli dwar is-saħħa tal-annimali u t-trattament xieraq tal-annimali. Għalhekk, jenħtieġ li l-ikel u l-għalf jiġu esklużi mill-kamp ta’ applikazzjoni ta’ dan ir-Regolament bl-eċċezzjoni ta’ materjali u oġġetti maħsuba biex jiġu f’kuntatt mal-ikel sa fejn ikunu kkonċernati r-riskji li ma humiex koperti mir-Regolament (KE) Nru 1935/2004 tal-Parlament Ewropew u tal-Kunsill (8) jew minn leġiżlazzjoni oħra speċifika għall-ikel li tkopri biss ir-riskji kimiċi u bijoloġiċi relatati mal-ikel.

(12)

Il-pjanti ħajjin huma soġġetti għal qafas legali speċifiku, previst, b’mod partikolari, mir-Regolament (UE) 2016/2031 tal-Parlament Ewropew u tal-Kunsill (9) li jqis l-ispeċifiċitajiet ta’ dawk il-prodotti biex tiġi żgurata s-sikurezza tal-konsumatur.

(13)

Il-prodotti sekondarji tal-annimali huma materjali ta’ oriġini mill-annimali li l-bniedem ma jikkunsmax. Dawk il-prodotti, bħall-għalf, huma soġġetti għal qafas legali speċifiku, previst, b’mod partikolari, mir-Regolament (KE) Nru 1069/2009 tal-Parlament Ewropew u tal-Kunsill (10).

(14)

Il-prodotti għall-protezzjoni tal-pjanti, imsejħa wkoll pestiċidi, huma soġġetti għal dispożizzjonijiet speċifiċi għall-awtorizzazzjoni tagħhom fil-livell nazzjonali, abbażi tar-Regolament (KE) Nru 1107/2009 tal-Parlament Ewropew u tal-Kunsill (11), u għalhekk jenħtieġ li jiġu esklużi wkoll mill-kamp ta’ applikazzjoni ta’ dan ir-Regolament.

(15)

L-inġenji tal-ajru msemmija fl-Artikolu 2(3), il-punt (d), tar-Regolament (UE) 2018/1139 tal-Parlament Ewropew u tal-Kunsill (12) huma soġġetti għall-kontroll regolatorju tal-Istati Membri, fid-dawl tar-riskju limitat tagħhom għas-sikurezza fl-avjazzjoni ċivili. Għalhekk jenħtieġ li dawk l-inġenji tal-ajru jiġu esklużi mill-kamp ta’ applikazzjoni ta’ dan ir-Regolament.

(16)

Ir-rekwiżiti stabbiliti f’dan ir-Regolament jenħtieġ li japplikaw għal prodotti użati jew għal prodotti li jiġu msewwija, rikondizzjonati jew riċiklati, li jerġgħu jidħlu fil-katina tal-provvista matul attività kummerċjali, għajr għal dawk il-prodotti li għalihom il-konsumatur ma jistax jistenna b’mod raġonevoli li jissodisfaw standards tas-sikurezza tal-ogħla livell, bħal prodotti li jiġu ppreżentati b’mod espliċitu bħala li għandhom jiġu msewwija jew li jiġu rikondizzjonati, jew li jitqiegħdu fis-suq bħala oġġetti għall-kollezzjoni ta’ interess storiku.

(17)

Is-servizzi jenħtieġ li ma jkunux koperti minn dan ir-Regolament. Madankollu, sabiex jiġu protetti s-saħħa u s-sikurezza tal-konsumaturi, il-prodotti li jkunu fornuti jew imqiegħda għad-dispożizzjoni tal-konsumaturi fil-kuntest tal-provvista ta’ servizzi, inklużi prodotti li l-konsumaturi jkunu esposti direttament għalihom waqt il-provvista ta’ servizz, jenħtieġ li jaqgħu fil-kamp ta’ applikazzjoni ta’ dan ir-Regolament. Madankollu, it-tagħmir li jirkbu jew jivvjaġġaw fuqu l-konsumaturi, fejn tali tagħmir jitħaddem direttament minn fornitur tas-servizz fil-kuntest ta’ servizzi ta’ trasport, jenħtieġ li jkun eskluż mill-kamp ta’ applikazzjoni ta’ dan ir-Regolament billi dan irid ikun trattat flimkien mas-sikurezza tas-servizz mogħti.

(18)

L-antikitajiet, bħal opri tal-arti jew oġġetti għall-kollezzjoni huma kategoriji speċifiċi ta’ prodotti li ma jistgħux ikunu mistennija li jissodisfaw ir-rekwiżiti ta’ sikurezza stabbiliti minn dan ir-Regolament, u għalhekk jenħtieġ li jiġu esklużi mill-kamp ta’ applikazzjoni tiegħu. Madankollu, sabiex jiġi evitat li prodotti oħra jitqiesu bi żball bħala li jappartjenu għal dawk il-kategoriji, huwa neċessarju li jitqies li l-opri tal-arti huma prodotti maħluqa biss għal skopijiet artistiċi, li l-oġġetti tal-kollezzjoni huma ta’ rarità u interess storiku jew xjentifiku suffiċjenti biex jiġġustifikaw il-ġbir u l-preservazzjoni tagħhom, u li l-antikitajiet, jekk ma jkunux diġà opri tal-arti jew oġġetti għall-kollezzjoni jew it-tnejn, huma ta’ età straordinarja. Meta jiġi vvalutat jekk prodott huwiex antikità, bħal opra tal-arti jew oġġett għall-kollezzjoni, jista’ jitqies l-Anness IX tad-Direttiva tal-Kunsill 2006/112/KE (13).

(19)

L-Organizzazzjoni Dinjija tas-Saħħa tiddefinixxi s-“saħħa” bħala stat ta’ benesseri fiżiku, mentali u soċjali sħiħ u mhux biss bħala n-nuqqas ta’ mard jew infermità.

(20)

Il-bejgħ mill-bogħod, inkluż il-bejgħ online, jenħtieġ li jaqa’ wkoll fil-kamp ta’ applikazzjoni ta’ dan ir-Regolament. Il-bejgħ online kiber b’mod konsistenti u kostanti, u ħoloq mudelli ta’ negozju ġodda, sfidi ġodda rigward is-sikurezza tal-prodotti u atturi ġodda fis-suq, bħall-fornituri tas-swieq online.

(21)

Fil-każ ta’ prodott offrut għall-bejgħ online jew b’mezzi oħra ta’ bejgħ mill-bogħod, il-prodott jenħtieġ li jitqies bħala li ġie mqiegħed fis-suq jekk l-offerta għall-bejgħ tkun immirata lejn il-konsumaturi fl-Unjoni. F’konformità mar-regoli applikabbli tal-Unjoni dwar id-dritt internazzjonali privat, jenħtieġ li titwettaq analiżi każ b’każ, sabiex jiġi stabbilit jekk offerta tkunx immirata lejn il-konsumaturi fl-Unjoni. Jenħtieġ li offerta għall-bejgħ titqies bħala immirata lejn il-konsumaturi fl-Unjoni jekk l-operatur ekonomiku rilevanti jimmira, bi kwalunkwe mezz, l-attivitajiet tiegħu lejn Stat Membru. Għall-analiżijiet każ b’każ, jenħtieġ li jitqiesu l-fatturi rilevanti, bħaż-żoni ġeografiċi li lejhom ikun possibbli d-dispaċċ, il-lingwi disponibbli, użati għall-offerta jew għall-ordni, il-mezzi ta’ pagament, l-użu tal-munita tal-Istat Membru jew isem tad-dominju rreġistrat f’wieħed mill-Istati Membri. Fil-każ tal-bejgħ online, is-sempliċi fatt li l-interfaċċa tal-operaturi ekonomiċi jew tal-fornituri tas-swieq online tkun aċċessibbli fl-Istat Membru li fih ikun stabbilit jew domiċiljat il-konsumatur ma huwiex biżżejjed.

(22)

Skont ir-rekwiżit tas-sikurezza ġenerali stabbilit f’dan ir-Regolament, l-operaturi ekonomiċi jenħtieġ li jkunu obbligati jintroduċu fis-suq prodotti sikuri biss. Tali livell għoli ta’ sikurezza jenħtieġ li jinkiseb primarjament permezz tad-disinn u l-karatteristiċi tal-prodott, filwaqt li jitqies l-użu maħsub u prevedibbli u l-kondizzjonijiet tal-użu tal-prodott. Ir-riskji li jifdal, jekk ikun hemm, jenħtieġ li jittaffew permezz ta’ ċerti salvagwardji, bħal twissijiet u struzzjonijiet.

(23)

Is-sikurezza ta’ prodott jenħtieġ li tiġi vvalutata billi jitqiesu l-aspetti rilevanti kollha tal-prodott, b’mod partikolari l-karatteristiċi tiegħu, bħall-karatteristiċi fiżiċi, mekkaniċi u kimiċi, u l-preżentazzjoni tiegħu, kif ukoll il-ħtiġijiet u r-riskji speċifiċi li l-prodott jirrappreżenta għal ċerti kategoriji ta’ konsumaturi li x’aktarx jużaw il-prodotti, b’mod partikolari t-tfal, il-persuni akbar fl-età u l-persuni b’diżabilità. Dawk ir-riskji jistgħu jinkludu wkoll riskju ambjentali sa fejn dan joħloq riskju għas-saħħa u s-sikurezza tal-konsumaturi. Dik il-valutazzjoni jenħtieġ li tqis ir-riskju għas-saħħa li joħolqu l-prodotti konnessi diġitalment, inkluż ir-riskju għas-saħħa mentali, speċjalment tal-konsumaturi vulnerabbli, b’mod partikolari t-tfal. Għaldaqstant, huma u jivvalutaw is-sikurezza tal-prodotti konnessi diġitalment li x’aktarx iħallu impatt fuq it-tfal, jenħtieġ li, fl-aħjar interess tat-tfal, il-manifatturi jiżguraw li l-prodotti li jqiegħdu fis-suq jissodisfaw l-ogħla standards ta’ sikurezza, sigurtà u privatezza mid-disinn. Barra minn dan, jekk tkun meħtieġa informazzjoni speċifika biex il-prodotti jsiru sikuri għal ċerta kategorija ta’ persuni, il-valutazzjoni tas-sikurezza tal-prodotti jenħtieġ li tqis ukoll il-preżenza ta’ dik l-informazzjoni u l-aċċessibbiltà tagħha. Is-sikurezza tal-prodotti kollha jenħtieġ li tiġi vvalutata billi titqies il-ħtieġa li l-prodott ikun sikur tul il-ħajja kollha tiegħu.

(24)

L-oġġetti li jikkonnettjaw ma’ oġġetti oħrajn jew l-oġġetti mhux inkorporati li jinfluwenzaw il-mod kif jaħdem oġġett ieħor jistgħu joħolqu riskju għas-sikurezza tal-prodott. Dak l-aspett jenħtieġ li jingħata kunsiderazzjoni debita bħala riskju potenzjali. Il-konnessjonijiet u l-interrelazzjoni li oġġett jista’ jkollu ma’ oġġetti esterni jenħtieġ li ma jipperikolawx is-sikurezza tiegħu.

(25)

Teknoloġiji ġodda jistgħu jikkawżaw riskji ġodda għas-saħħa u s-sikurezza tal-konsumaturi jew ibiddlu l-mod kif jistgħu jimmaterjalizzaw ir-riskji eżistenti, bħal intervent estern li jwettaq hacking ta’ prodott jew li jbiddillu l-karatteristiċi tiegħu. Teknoloġiji ġodda jistgħu jimmodifikaw sostanzjalment il-prodott oriġinali, pereżempju permezz ta’ aġġornamenti tas-software, li mbagħad jenħtieġ li jkunu soġġetti għal valutazzjoni tar-riskju ġdida jekk dik il-modifika sostanzjali jkollha impatt fuq is-sikurezza tal-prodott.

(26)

Ir-riskji speċifiċi taċ-ċibersigurtà li jaffettwaw is-sikurezza tal-konsumaturi, kif ukoll il-protokolli u ċ-ċertifikazzjonijiet, jistgħu jiġu indirizzati mil-leġiżlazzjoni settorjali. Madankollu jenħtieġ li jiġi żgurat li, f’każijiet li fihom tali leġiżlazzjoni settorjali ma tapplikax, l-operaturi ekonomiċi rilevanti u l-awtoritajiet nazzjonali jqisu r-riskji marbuta ma’ teknoloġiji ġodda, meta jiddisinjaw il-prodotti u meta jevalwawhom rispettivament, sabiex jiżguraw li l-bidliet introdotti fil-prodott ma jipperikolawx is-sikurezza tiegħu.

(27)

Sabiex tiġi faċilitata l-applikazzjoni effettiva u konsistenti tar-rekwiżit tas-sikurezza ġenerali stipulat f’dan ir-Regolament, huwa importanti li jintużaw standards Ewropej li jkopru ċerti prodotti u riskji. L-istandards Ewropej, li r-referenzi għalihom ġew ippubblikati f’konformità mad-Direttiva 2001/95/KE, jenħtieġ li jibqgħu jipprovdu preżunzjoni tal-konformità mar-rekwiżit tas-sikurezza ġenerali stipulat f’dan ir-Regolament. It-talbiet tal-istandardizzazzjoni maħruġa mill-Kummissjoni f’konformità mad-Direttiva 2001/95/KE jenħtieġ li jitqiesu bħala talbiet tal-istandardizzazzjoni maħruġa f’konformità ma’ dan ir-Regolament. Fil-każ li riskji jew kategoriji ta’ riskju differenti jkunu koperti mill-istess standard, il-konformità ta’ prodott mal-parti tal-istandard li tkopri r-riskju jew il-kategorija ta’ riskju rilevanti tagħti wkoll lill-prodott innifsu preżunzjoni ta’ sigurtà sa fejn ikunu kkonċernati r-riskju jew il-kategorija ta’ riskju rilevanti.

(28)

Meta l-Kummissjoni tidentifika ħtieġa li jkun hemm standard Ewropew li jiżgura konformità ta’ ċerti prodotti mar-rekwiżit tas-sikurezza ġenerali stipulat f’dan ir-Regolament, din jenħtieġ li tapplika d-dispożizzjonijiet rilevanti tar-Regolament (UE) Nru 1025/2012 tal-Parlament Ewropew u tal-Kunsill (14) biex titlob organizzazzjoni Ewropea tal-istandardizzazzjoni, waħda jew aktar, jew tabbozza jew tidentifika standard li jkun xieraq biex jiżgura li l-prodotti konformi miegħu huma preżunti bħala sikuri.

(29)

Il-prodotti jistgħu joħolqu riskji differenti għal ġeneri differenti u jenħtieġ li l-attivitajiet ta’ standardizzazzjoni dan iqisuh biex jiġu evitati diskrepanzi f’termini ta’ sikurezza u għaldaqstant distakk fis-sikurezza bejn il-ġeneri. Id-Dikjarazzjoni dwar Standards Reattivi għall-Kwistjonijiet ta’ Ġeneru tal-Kummissjoni Ekonomika għall-Ewropa tan-Nazzjonijiet Uniti tiddeskrivi diversi azzjonijiet li l-korpi nazzjonali tal-istandards u l-organizzazzjonijiet li jiżviluppaw l-istandards jenħtieġ li jinkludu fil-pjan ta’ azzjoni tagħhom dwar il-ġeneru għal standards u żvilupp ta’ standards reattivi għall-kwistjonijiet ta’ ġeneru, sabiex jinkisbu standards inklużivi, rappreżentattivi u bilanċjati f’termini ta’ ġeneru.

(30)

Flimkien mal-adattament tar-Regolament (UE) Nru 1025/2012, jenħtieġ li tiġi introdotta proċedura speċifika għall-adozzjoni tar-rekwiżiti tas-sikurezza speċifiċi bl-assistenza tal-Kumitat speċjalizzat previst minn dan ir-Regolament.

(31)

Fin-nuqqas ta’ standards Ewropej, il-liġi nazzjonali tal-Istat Membru fejn il-prodott jitqiegħed fis-suq li tistabbilixxi r-rekwiżiti tas-saħħa u s-sikurezza jenħtieġ li tikkonforma mal-liġi tal-Unjoni, b’mod partikolari l-Artikoli 34 u 36 tat-TFUE.

(32)

L-operaturi ekonomiċi jenħtieġ li jkollhom obbligi proporzjonati li jikkonċernaw is-sikurezza tal-prodotti, fir-rigward tar-rwoli rispettivi tagħhom fil-katina tal-provvista, sabiex jiżguraw livell għoli ta’ protezzjoni tas-saħħa u s-sikurezza tal-konsumaturi, filwaqt li jiżguraw ukoll il-funzjonament effiċjenti tas-suq intern. L-operaturi ekonomiċi kollha li jintervjenu fil-katina tal-provvista u tad-distribuzzjoni jenħtieġ li jieħdu l-miżuri xierqa biex jiżguraw li jqiegħdu fis-suq biss prodotti li jkunu sikuri u li jkunu konformi ma’ dan ir-Regolament. Huwa meħtieġ li tkun prevista distribuzzjoni ċara u proporzjonata tal-obbligi li jikkorrispondu għar-rwol ta’ kull operatur fil-proċess tal-provvista u d-distribuzzjoni. Pereżempju, fir-rigward tal-verifika ta’ jekk il-manifattur u, meta jkun rilevanti, l-importatur ikunux ikkonformaw mal-obbligi tagħhom, id-distributur jenħtieġ li jkollu l-obbligu li jwettaq biss verifiki fattwali u mhux valutazzjoni tal-informazzjoni pprovduta minnhom. L-informazzjoni dwar l-identifikazzjoni tal-prodott u tal-operaturi ekonomiċi, kif ukoll l-istruzzjonijiet u l-informazzjoni dwar is-sikurezza, jistgħu barra minn hekk jiġu pprovduti mill-operaturi ekonomiċi f’forma diġitali permezz ta’ soluzzjonijiet elettroniċi, bħal kodiċi QR jew kodiċi tal-matriċi tad-data.

(33)

Jenħtieġ li l-manifatturi jfasslu dokumentazzjoni teknika fir-rigward tal-prodotti li jintroduċu fis-suq, li jenħtieġ li jkun fiha l-informazzjoni meħtieġa biex tagħti prova li dawk il-prodott huma sikuri. Id-dokumentazzjoni teknika jenħtieġ li tkun ibbażata fuq analiżi interna tar-riskju mwettqa mill-manifattur. L-ammont ta’ informazzjoni li trid tingħata fid-dokumentazzjoni teknika jenħtieġ li jkun proporzjonat mal-kumplessità tal-prodott u mar-riskji possibbli identifikati mill-manifattur. B’mod partikolari, il-manifatturi jenħtieġ li jipprovdu deskrizzjoni ġenerali tal-prodott u l-elementi meħtieġa biex tiġi vvalutata s-sikurezza tiegħu. Fil-każ ta’ prodotti kumplessi jew prodotti li jippreżentaw riskji possibbli, l-informazzjoni li jenħtieġ li tiġi pprovduta tista’ teħtieġ deskrizzjoni aktar estensiva tal-prodott. F’tali każijiet, jenħtieġ li tiġi inkluża wkoll analiżi ta’ dawk ir-riskji u tal-mezzi tekniċi adottati biex jittaffew jew jiġu eliminati r-riskji. Meta l-prodott jikkonforma mal-istandards Ewropej jew ma’ elementi oħra applikati biex jiġi ssodisfat ir-rekwiżit tas-sikurezza ġenerali stipulat f’dan ir-Regolament, il-lista ta’ standards Ewropej rilevanti jew l-elementi l-oħra jenħtieġ li jkunu indikati wkoll.

(34)

Kwalunkwe persuna fiżika jew ġuridika li jew tintroduċi prodott fis-suq f’isimha jew bit-trademark tagħha jew sostanzjalment tbiddel il-prodott b’tali mod li tista’ tiġi affettwata l-konformità mar-rekwiżiti ta’ dan ir-Regolament, jenħtieġ li titqies li hija l-manifattur u jenħtieġ li tassumi l-obbligi tal-manifattur.

(35)

Il-modifika ta’ prodott, b’mezzi fiżiċi jew diġitali, jista’ jkollha konsegwenzi fuq in-natura u l-karatteristiċi tal-prodott b’mod li ma kienx previst fil-valutazzjoni tar-riskju inizjali tal-prodott u li jista’ jipperikola s-sikurezza tal-prodott. Tali modifika jenħtieġ għalhekk li titqies bħala modifika sostanzjali u, meta ma ssirx mill-konsumatur jew f’ismu, jenħtieġ li twassal biex il-prodott jitqies bħala prodott ġdid minn manifattur differenti. Sabiex tiġi żgurata l-konformità mar-rekwiżit tas-sikurezza ġenerali stipulat f’dan ir-Regolament, il-persuna li twettaq dik il-modifika sostanzjali jenħtieġ li titqies bħala l-manifattur u soġġetta għall-istess obbligi. Jenħtieġ li dak ir-rekwiżit japplika biss fir-rigward tal-parti mmodifikata tal-prodott, dment li l-modifika ma taffettwax il-prodott kollu kemm hu. Sabiex jiġi evitat piż bla bżonn u sproporzjonat, il-persuna li twettaq il-modifika sostanzjali jenħtieġ li ma tintalabx tirrepeti t-testijiet u tipproduċi dokumentazzjoni ġdida b’rabta ma’ aspetti tal-prodott li ma jiġux affettwati mill-modifika. Jenħtieġ li l-persuna li twettaq il-modifika sostanzjali jkollha r-responsabbiltà li turi li l-modifika ma għandhiex impatt fuq il-prodott kollu kemm hu.

(36)

Il-proċeduri interni ta’ konformità, li permezz tagħhom l-operaturi ekonomiċi jiżguraw, internament, it-twettiq effettiv u rapidu tal-obbligi tagħhom kif ukoll il-kondizzjonijiet biex jirreaġixxu fil-waqt f’każ ta’ prodott perikoluż, jenħtieġ li jiġu stabbiliti mill-operaturi ekonomiċi nfushom.

(37)

Sabiex tiġi evitata l-introduzzjoni fis-suq ta’ prodotti perikolużi, jenħtieġ li jkun obbligatorju li l-operaturi ekonomiċi jinkludu fl-attivitajiet ta’ produzzjoni jew kummerċjalizzazzjoni tagħhom proċessi interni li jiżguraw konformità mar-rekwiżiti rilevanti ta’ dan ir-Regolament. Tali proċessi interni jenħtieġ li jiġu determinati mill-operaturi ekonomiċi nfushom fir-rigward tar-rwol tagħhom fil-katina tal-provvista u t-tip ta’ prodotti kkonċernati u jistgħu jkunu bbażati, pereżempju, fuq proċeduri organizzattivi, linji gwida, standards jew mal-ħatra ta’ maniġer ad hoc. L-istabbiliment u l-format ta’ tali proċessi interni jenħtieġ li jibqgħu r-responsabbiltà unika tal-operaturi ekonomiċi rilevanti.

(38)

Huwa essenzjali li l-operaturi ekonomiċi u l-fornituri kollha tas-swieq online jikkooperaw mal-awtoritajiet tas-sorveljanza tas-suq sabiex jiġu eliminati jew jittaffew ir-riskji għall-prodotti rilevanti li jitqiegħdu fis-suq. Madankollu, it-talbiet li jsirulhom mill-awtoritajiet tas-sorveljanza tas-suq jenħtieġ li jitfasslu skont ir-rwol li għandhom fil-katina tal-provvista u fir-rigward tal-obbligi legali rispettivi tagħhom.

(39)

Il-bejgħ dirett minn operaturi ekonomiċi stabbiliti barra mill-Unjoni permezz ta’ mezzi online jfixkel il-ħidma tal-awtoritajiet tas-sorveljanza tas-suq meta jindirizzaw prodotti perikolużi fl-Unjoni, peress li f’ħafna każijiet l-operaturi ekonomiċi la jistgħu jiġu stabbiliti u lanqas ma għandhom rappreżentant legali fl-Unjoni. Għalhekk huwa meħtieġ li jiġi żgurat li l-awtoritajiet tas-sorveljanza tas-suq ikollhom setgħat u mezzi adegwati biex jindirizzaw b’mod effettiv il-bejgħ ta’ prodotti perikolużi online. Sabiex jiġi żgurat l-infurzar effettiv ta’ dan ir-Regolament, l-obbligu stabbilit fl-Artikolu 4(1), (2) u (3) tar-Regolament (UE) 2019/1020 jenħtieġ li jiġi estiż għall-prodotti li jaqgħu barra mill-kamp ta’ applikazzjoni tal-leġiżlazzjoni tal-Unjoni dwar l-armonizzazzjoni biex jiġi żgurat li hemm operatur ekonomiku responsabbli fl-Unjoni, inkarigat b’kompiti relatati ma’ tali prodotti u li jipprovdi lill-awtoritajiet tas-sorveljanza tas-suq b’interlokutur u, meta jkun xieraq fir-rigward ta’ riskji possibbli relatati ma’ prodott, iwettaq il-kompiti speċifiċi fi żmien xieraq biex ikun żgurat li l-prodotti jkunu sikuri. Dawk il-kompiti speċifiċi jenħtieġ li jinkludu kontrolli regolari fir-rigward tal-konformità mad-dokumentazzjoni teknika, l-informazzjoni dwar il-prodott u l-manifattur, l-istruzzjonijiet u l-informazzjoni dwar is-sikurezza.

(40)

L-informazzjoni ta’ kuntatt tal-operatur ekonomiku stabbilit fl-Unjoni u responsabbli għall-prodotti li jaqgħu fil-kamp ta’ applikazzjoni ta’ dan ir-Regolament jenħtieġ li tiġi indikata mal-prodott sabiex jiġu ffaċilitati l-kontrolli tul il-katina tal-provvista kollha.

(41)

Sabiex l-operaturi ekonomiċi li huma intrapriżi żgħar u ta’ daqs medju (SMEs), inklużi l-mikrointrapriżi, ikunu jistgħu jlaħħqu mal-obbligi l-ġodda imposti minn dan ir-Regolament, il-Kummissjoni jenħtieġ li tipprovdi linji gwida prattiċi u gwida mfassla apposta, pereżempju, mezz dirett għall-konnessjoni ma’ esperti fil-każ ta’ mistoqsijiet, filwaqt li jitqies il-bżonn ta’ semplifikazzjoni u limitazzjoni tal-piżijiet amministrattivi tagħhom.

(42)

L-iżgurar tal-identifikazzjoni tal-prodott u l-forniment ta’ informazzjoni dwar il-manifattur u operaturi ekonomiċi rilevanti oħra matul il-katina tal-provvista kollha jgħinu biex ikunu identifikati l-operaturi ekonomiċi u, meta jkun applikabbli, biex jittieħdu miżuri korrettivi effettivi u proporzjonati kontra prodotti perikolużi, bħal sejħiet lura mmirati. Għalhekk l-identifikazzjoni tal-prodott u l-forniment tal-informazzjoni dwar il-manifattur u operaturi ekonomiċi rilevanti oħra jiżguraw li l-konsumaturi, inklużi l-persuni b’diżabilità, u l-awtoritajiet ta’ sorveljanza tas-suq ikollhom informazzjoni preċiża dwar prodotti perikolużi, li tkattar il-kunfidenza fis-suq u ma jkunx hemm xkiel bla bżonn tal-kummerċ. Għalhekk il-prodotti jenħtieġ li jkollhom informazzjoni li tippermetti l-identifikazzjoni tagħhom u l-identifikazzjoni tal-manifattur u, fejn applikabbli, tal-importatur u operaturi ekonomiċi rilevanti oħra. Tali rekwiżiti jistgħu jsiru aktar stretti għal ċerti tipi ta’ prodotti, li x’aktarx joħolqu riskju serju għas-saħħa u s-sikurezza tal-konsumaturi, permezz ta’ sistema ta’ ġbir u ħżin tad-data li tippermetti, minbarra l-identifikazzjoni tal-prodott, l-identifikazzjoni tal-komponenti tiegħu jew tal-operaturi ekonomiċi involuti fil-katina tal-provvista tiegħu. Dan jenħtieġ li jkun mingħajr preġudizzju għar-rekwiżiti ta’ informazzjoni stabbiliti mid-Direttiva 2011/83/UE tal-Parlament Ewropew u tal-Kunsill (15), relatata ma’ dawk il-karatteristiċi prinċipali tal-oġġetti, sa fejn ikun xieraq għall-mezz u għan-natura tal-oġġetti. Stampa jenħtieġ li titqies bħala ritratt, illustrazzjoni jew element pittografiku ieħor, li faċilment tippermetti l-identifikazzjoni ta’ prodott jew prodott potenzjali.

(43)

Billi jiġi żgurat li l-manifatturi jinnotifikaw l-inċidenti kkawżati minn prodott li jkunu qiegħdu fis-suq, se tittejjeb l-informazzjoni disponibbli għall-awtoritajiet tas-sorveljanza tas-suq u se tkun tista’ ssir identifikazzjoni aħjar tal-kategoriji ta’ prodotti potenzjalment perikolużi. Ir-regoli dwar ir-responsabbiltà tal-operaturi ekonomiċi għall-prodotti difettużi huma stabbiliti fil-liġi speċifika tal-Unjoni u tali notifika u ġbir ta’ data għalhekk jenħtieġ li ma jitqisux bħala ammissjoni tar-responsabbiltà għal prodott difettuż jew bħala konferma tar-responsabbiltà skont il-liġi rilevanti tal-Unjoni jew nazzjonali.

(44)

Sabiex ikunu jistgħu jindividwaw riskji ġodda emerġenti bikrija u xejriet oħra tas-suq relatati mas-sikurezza tal-prodotti, il-partijiet interessati kollha, inklużi l-organizzazzjonijiet tal-konsumaturi jew tan-negozju, jenħtieġ li jiġu mħeġġa jindikaw lill-awtoritajiet tas-sorveljanza tas-suq u lill-Kummissjoni informazzjoni disponibbli għalihom biex jidentifikaw u jinvestigaw ksur ta’ dan ir-Regolament.

(45)

Il-fornituri tas-swieq online għandhom rwol kruċjali fil-katina tal-provvista, billi jippermettu lill-operaturi ekonomiċi jilħqu għadd akbar ta’ konsumaturi, u għaldaqstant fis-sistema tas-sikurezza tal-prodotti wkoll.

(46)

Skont il-mudelli kummerċjali kumplessi ġodda marbuta mal-bejgħ online, l-istess entità tista’ tipprovdi varjetà ta’ servizzi. Jiddependi min-natura tas-servizzi pprovduti għal prodott partikolari, l-istess entità tista’ taqa’ taħt kategoriji differenti ta’ mudelli ta’ negozju skont dan ir-Regolament. Meta entità tipprovdi biss servizzi ta’ intermedjazzjoni online għal prodott partikolari, allura tkun tikkwalifika biss bħala fornitur ta’ suq online għal dak il-prodott. F’każ li l-istess entità tipprovdi kemm servizzi tas-suq online għall-bejgħ ta’ prodott partikolari kif ukoll taġixxi bħala operatur ekonomiku skont dan ir-Regolament, din tikkwalifika wkoll bħala l-operatur ekonomiku rilevanti. Fit-tali każ, l-entità inkwistjoni jkollha għalhekk tikkonforma ruħha mal-obbligi applikabbli għall-operatur ekonomiku rilevanti. Pereżempju, jekk il-fornitur tas-suq online jiddistribwixxi wkoll prodott, allura, fir-rigward tal-bejgħ tal-prodott distribwit, dan jitqies li huwa distributur. Bl-istess mod, jekk l-entità inkwistjoni tbigħ il-prodotti tad-ditta tagħha stess, hija taġixxi bħala manifattur u għalhekk ikollha tikkonforma mar-rekwiżiti applikabbli għall-manifatturi. Barra minn hekk, xi entitajiet jistgħu jikkwalifikaw bħala fornituri tas-servizzi ta’ ġestjoni jekk joffru servizzi ta’ ġestjoni. Tali każijiet ikollhom għalhekk jiġu vvalutati fuq bażi ta’ każ b’każ.

(47)

Minħabba r-rwol importanti li għandhom il-fornituri tas-swieq online meta jintermedjaw il-bejgħ ta’ prodotti bejn il-kummerċjanti u l-konsumaturi, dawn l-atturi jenħtieġ li jkollhom aktar responsabbiltajiet fl-indirizzar tal-bejgħ ta’ prodotti perikolużi online. Id-Direttiva 2000/31/KE tal-Parlament Ewropew u tal-Kunsill (16) tipprovdi l-qafas ġenerali għall-kummerċ elettroniku u tistabbilixxi ċerti obbligi għall-pjattaformi online. Ir-Regolament (UE) 2022/2065 tal-Parlament Ewropew u tal-Kunsill (17) jirregola r-responsabbiltà u l-akkontabbiltà tal-fornituri tas-servizzi intermedjarji online fir-rigward ta’ kontenut illegali, inklużi prodotti perikolużi. Dak ir-Regolament japplika mingħajr preġudizzju għar-regoli stabbiliti mil-liġi tal-Unjoni dwar il-protezzjoni tal-konsumatur u s-sikurezza tal-prodotti. Għaldaqstant, abbażi tal-qafas legali orizzontali previst minn dak ir-Regolament, jenħtieġ li jiġu introdotti rekwiżiti speċifiċi essenzjali biex jiġi indirizzat b’mod effettiv il-bejgħ ta’ prodotti perikolużi online, f’konformità mal-Artikolu 2(4), il-punt (f), ta’ dak ir-Regolament. Sa fejn dan ir-Regolament jispeċifika r-rekwiżiti, fir-rigward tas-sikurezza tal-prodotti, li magħhom il-fornituri tas-swieq online għandhom jikkonformaw sabiex tiġi żgurata l-konformità ma’ ċerti dispożizzjonijiet tar-Regolament (UE) 2022/2065, jenħtieġ li dawk ir-rekwiżiti ma jaffettwawx l-applikazzjoni tar-Regolament (UE) 2022/2065, li jkompli japplika għal dawk il-fornituri ta’ swieq online.

(48)

Il-Wegħda dwar is-Sikurezza tal-Prodotti, iffirmata għall-ewwel darba fl-2018 u li magħha ngħaqdu għadd ta’ fornituri ta’ swieq online minn dak iż-żmien, tipprevedi għadd ta’ impenji volontarji dwar is-sikurezza tal-prodotti. Il-loġika tal-Wegħda dwar is-Sikurezza tal-Prodotti intweriet permezz tat-tisħiħ tal-protezzjoni tal-konsumaturi kontra prodotti perikolużi mibjugħa online. Sabiex tissaħħaħ il-protezzjoni tal-konsumaturi billi tiġi evitata ħsara għall-ħajja, is-saħħa u s-sikurezza tagħhom u biex tiġi żgurata kompetizzjoni ġusta fis-suq intern, il-fornituri tas-swieq online huma mħeġġa jieħdu dawk l-impenji volontarji biex jipprevjenu li l-elenkar ta’ prodotti perikolużi li diġà ġew irtirati jerġa’ jitfaċċa. L-użu ta’ teknoloġiji u proċessi diġitali u t-titjib fis-sistemi ta’ twissija, b’mod partikolari l-Portal Safety Gate, jistgħu jippermettu l-identifikazzjoni u l-komunikazzjoni awtomatiċi ta’ prodotti perikolużi notifikati u jwettqu kontrolli aleatorji awtomatizzati mal-Portal Safety Gate.

(49)

Il-fornituri tas-swieq online jenħtieġ li jaġixxu b’attenzjoni xierqa fir-rigward tal-kontenut ospitat fl-interfaċċi online tagħhom li jikkonċerna s-sikurezza tal-prodotti, f’konformità mal-obbligi speċifiċi stabbiliti f’dan ir-Regolament. Għaldaqstant, dan ir-Regolament jenħtieġ li jistabbilixxi obbligi ta’ diliġenza dovuta għall-fornituri tas-swieq online kollha fir-rigward tal-kontenut ospitat fl-interfaċċi online tagħhom li jikkonċerna s-sikurezza tal-prodotti.

(50)

Barra minn hekk, għall-finijiet ta’ sorveljanza effettiva tas-suq, il-fornituri tas-swieq online jenħtieġ li jirreġistraw fil-Portal Safety Gate u jindikaw, fil-Portal Safety Gate, l-informazzjoni dwar il-punt uniku ta’ kuntatt tagħhom għall-faċilitazzjoni tal-komunikazzjoni ta’ informazzjoni dwar kwistjonijiet ta’ sikurezza tal-prodotti. Il-Kummissjoni jenħtieġ li tiżgura li r-reġistrazzjoni tkun faċli u mingħajr kumplikazzjonijiet għall-utent. Il-punt uniku ta’ kuntatt skont dan ir-Regolament jista’ jkun l-istess bħall-punt ta’ kuntatt skont l-Artikolu 11 tar-Regolament (UE) 2022/2065, mingħajr ma jipperikola l-objettiv li jiġu trattati kwistjonijiet marbuta mas-sikurezza tal-prodotti b’mod rapidu u speċifiku.

(51)

Il-fornituri tas-swieq online jenħtieġ li jiddeżinjaw punt uniku ta’ kuntatt għall-konsumaturi. Dak il-punt uniku ta’ kuntatt jenħtieġ li jservi bħala tieqa unika għall-komunikazzjonijiet tal-konsumatur dwar kwistjonijiet ta’ sikurezza tal-prodotti, li mbagħad ikunu jistgħu jiġu diretti mill-ġdid lejn l-unità tas-servizz xierqa ta’ suq online. Jenħtieġ li dan ma jostakolax lill-punti ta’ kuntatt addizzjonali għal servizzi speċifiċi milli jkunu disponibbli għall-konsumaturi. Il-punt uniku ta’ kuntatt skont dan ir-Regolament jista’ jkun l-istess bħall-punt ta’ kuntatt skont l-Artikolu 12 tar-Regolament (UE) 2022/2065.

(52)

Sabiex ikunu jistgħu jikkonformaw mal-obbligi tagħhom skont dan ir-Regolament, b’mod partikolari fir-rigward tal-konformità f’waqtha u effettiva mal-ordnijiet tal-awtoritajiet pubbliċi, l-ipproċessar tal-avviżi ta’ partijiet terzi oħra u l-kooperazzjoni mal-awtoritajiet tas-sorveljanza tas-suq fil-kuntest ta’ miżuri korrettivi fuq talba, il-fornituri tas-swieq online jenħtieġ li jkollhom fis-seħħ mekkaniżmu intern għall-immaniġġjar ta’ kwistjonijiet relatati mas-sikurezza tal-prodotti.

(53)

L-Artikolu 14(4) tar-Regolament (UE) 2019/1020 jipprovdi lill-awtoritajiet tas-sorveljanza tas-suq bis-setgħa, meta ma jkun hemm l-ebda mezz effettiv ieħor disponibbli biex jiġi eliminat riskju serju, li jirrikjedu t-tneħħija tal-kontenut li jirreferi għall-prodotti relatati minn interfaċċa online jew li jirrikjedu l-wiri espliċitu ta’ twissija lill-utenti finali meta dawn jaċċessaw interfaċċa online. Is-setgħat fdati lill-awtoritajiet tas-sorveljanza tas-suq mill-Artikolu 14(4) tar-Regolament (UE) 2019/1020 jenħtieġ li japplikaw ukoll għal dan ir-Regolament. Għas-sorveljanza effettiva tas-suq skont dan ir-Regolament u biex jiġi evitat li prodotti perikolużi jkunu preżenti fis-suq tal-Unjoni, jenħtieġ li dawk is-setgħat japplikaw fil-każijiet kollha meħtieġa u proporzjonati u wkoll għal prodotti li joħolqu riskju anqas minn serju. Huwa essenzjali li l-fornituri tas-swieq online jikkonformaw ma’ tali ordnijiet b’urġenza. Għalhekk, dan ir-Regolament jenħtieġ li jintroduċi limiti ta’ żmien vinkolanti f’dak ir-rigward. Jenħtieġ li dawk is-setgħat jiġu eżerċitati f’konformità mal-Artikolu 9 tar-Regolament (UE) 2022/2065.

(54)

L-ordnijiet li jirrikjedu wkoll li l-fornitur ta’ suq online ineħħi mill-interfaċċa online tiegħu l-kontenut identiku kollu li jirreferi għall-offerta ta’ prodott perikoluż speċifikat fl-ordni, jenħtieġ li jidentifikaw l-elementi li se jiddeterminaw u jippermettu lill-fornitur ta’ suq online ineħħi offerti identiċi, abbażi tal-informazzjoni murija mill-kummerċjanti, sal-punt li l-fornitur ta’ suq online ma huwiex meħtieġ iwettaq valutazzjoni indipendenti ta’ dak il-kontenut.

(55)

Meta l-informazzjoni mis-Sistema ta’ Twissija Rapida “Safety Gate” ma jkunx fiha lokatur uniformi tar-riżorsi (URL) preċiż u, meta jkun hemm bżonn, informazzjoni addizzjonali li tippermetti l-identifikazzjoni tal-kontenut li jirreferi għal offerta ta’ prodott perikoluż, il-fornituri tas-swieq online jenħtieġ li madankollu jqisu l-informazzjoni trażmessa, bħall-identifikaturi tal-prodott, meta disponibbli, u informazzjoni oħra dwar it-traċċabbiltà, fil-kuntest ta’ kwalunkwe miżura adottata mill-fornituri tas-swieq online fuq l-inizjattiva tagħhom stess bl-għan li jidentifikaw, ineħħu jew jiddiżattivaw l-aċċess għal tali offerti ta’ prodotti perikolużi fuq l-interfaċċa online tagħhom, meta jkun applikabbli. Madankollu, jenħtieġ li Portal Safety Gate ikun modernizzat u aġġornat sabiex lill-fornituri tas-swieq online jkunilhom aktar faċli jidentifikaw prodotti mhux sikuri u, b’dak il-għan, jenħtieġ li tkun possibbli l-implimentazzjoni tad-dispożizzjonijiet ta’ dan ir-Regolament dwar it-tneħħija tal-kontenut li jirreferi għall-prodott perikoluż mill-interfaċċi online permezz ta’ sistema ta’ notifika ddisinjata u żviluppata fi ħdan il-Portal Safety Gate.

(56)

L-obbligi imposti minn dan ir-Regolament fuq il-fornituri tas-swieq online jenħtieġ li la jammontaw għal obbligu ġenerali li tiġi mmonitorjata l-informazzjoni li huma jittrażmettu jew jaħżnu, u lanqas li jirrikjedu lill-fornituri tas-swieq online li jfittxu b’mod attiv fatti jew ċirkostanzi li jindikaw attività illegali, bħall-bejgħ ta’ prodotti perikolużi online. Madankollu, sabiex jibbenefikaw mill-eżenzjoni mir-responsabbiltà tas-servizzi tal-ospitar skont id-Direttiva 2000/31/KE u r-Regolament (UE) 2022/2065, il-fornituri tas-swieq online jenħtieġ li jneħħu l-kontenut li jirreferi għal offerta ta’ prodott perikoluż mill-interfaċċi online tagħhom minnufih u malli jiksbu għarfien dwaru jew fil-każ ta’ talbiet għad-danni, malli jindunaw bil-kontenut li jirreferi għal offerta ta’ prodott perikoluż, b’mod partikolari fil-każijiet li fihom il-fornitur tas-suq online ikun ġie mgħarraf dwar il-fatti jew iċ-ċirkostanzi li abbażi tagħhom operatur ekonomiku diliġenti jenħtieġ li jkun identifika l-illegalità inkwistjoni. Il-fornituri tas-swieq online jenħtieġ li jipproċessaw avviżi li jikkonċernaw il-kontenut li jirreferi għal offerta ta’ prodott perikoluż, riċevuta f’konformità mal-Artikolu 16 tar-Regolament (UE) 2022/2065, fi ħdan oqfsa ta’ żmien addizzjonali stabbiliti b’dan ir-Regolament. Barra minn hekk, il-fornituri tas-swieq online huma mħeġġa jiċċekkjaw il-prodotti mal-Portal Safety Gate qabel ma jintroduċuhom fuq l-interfaċċa tagħhom.

(57)

Għall-finijiet tal-Artikolu 22 tar-Regolament (UE) 2022/2065, u fir-rigward tas-sikurezza tal-prodotti mibjugħa online, il-Koordinatur tas-Servizzi Diġitali jenħtieġ li jqis b’mod partikolari l-organizzazzjonijiet tal-konsumaturi u l-assoċjazzjonijiet li jirrappreżentaw l-interessi tal-konsumaturi u l-partijiet ikkonċernati rilevanti l-oħra, fuq talba tagħhom, bħala sinjalaturi fdati, dment li jkunu ġew issodisfati l-kondizzjonijiet stabbiliti f’dak l-Artikolu.

(58)

It-traċċabbiltà tal-prodotti hija fundamentali għal sorveljanza effettiva tas-suq ta’ prodotti perikolużi u miżuri korrettivi. Il-konsumaturi jenħtieġ ukoll li jiġu protetti kontra prodotti perikolużi bl-istess mod fil-mezzi tal-bejgħ offline u online, inkluż meta jixtru prodotti minn swieq online. Filwaqt li jibnu fuq id-dispożizzjonijiet tar-Regolament (UE) 2022/2065 fir-rigward tat-traċċabbiltà tal-kummerċjanti, il-fornituri tas-swieq online jenħtieġ li ma jippermettux offerta ta’ prodott speċifiku tiġi elenkata fuq il-pjattaformi tagħhom sakemm il-kummerċjant ikun ipprovda l-informazzjoni kollha relatata mas-sikurezza u t-traċċabbiltà tal-prodotti kif speċifikat f’dan ir-Regolament. Tali informazzjoni jenħtieġ li tintwera flimkien mal-elenkar tal-prodott sabiex il-konsumaturi jkunu jistgħu jibbenefikaw mill-istess informazzjoni disponibbli online u offline. Madankollu, il-fornituri tas-swieq online jenħtieġ li ma jkunux responsabbli għall-verifika tal-kompletezza, il-korrettezza u l-preċiżjoni tal-informazzjoni nnifisha, peress li l-obbligu li tiġi żgurata t-traċċabbiltà tal-prodotti huwa r-responsabbiltà tal-kummerċjant rilevanti.

(59)

Huwa importanti wkoll li l-fornituri tas-swieq online jikkooperaw mill-qrib mal-awtoritajiet tas-sorveljanza tas-suq, mal-kummerċjanti u mal-operaturi ekonomiċi rilevanti dwar is-sikurezza tal-prodotti. L-Artikolu 7(2) tar-Regolament (UE) 2019/1020 jimponi obbligu fuq il-fornituri tas-servizzi tas-soċjetà tal-informazzjoni biex jikkooperaw mal-awtoritajiet tas-sorveljanza tas-suq fir-rigward tal-prodotti koperti minn dak ir-Regolament. Dak l-obbligu jenħtieġ għalhekk li jiġi estiż għall-prodotti kollha għall-konsumatur. Pereżempju, l-awtoritajiet tas-sorveljanza tas-suq qed itejbu b’mod kostanti l-għodod teknoloġiċi li jużaw għas-sorveljanza tas-suq online biex jidentifikaw prodotti perikolużi mibjugħa online. Sabiex dawk l-għodod ikunu operazzjonali, il-fornituri tas-swieq online jenħtieġ li jagħtu aċċess għall-interfaċċi tagħhom. Barra minn hekk, għall-fini tas-sikurezza tal-prodotti, l-awtoritajiet tas-sorveljanza tas-suq jenħtieġ ukoll li jkollhom il-possibbiltà li jħassru d-data minn interfaċċa online fuq talba motivata fil-każ ta’ ostakli tekniċi stabbiliti mill-fornituri tas-swieq online jew mill-bejjiegħa online. Il-fornituri tas-swieq online jenħtieġ li jikkooperaw ukoll dwar is-sejħiet lura tal-prodotti u dwar ir-rappurtar tal-inċidenti.

(60)

Il-qafas legali għas-sorveljanza tas-suq tal-prodotti koperti mil-leġiżlazzjoni tal-Unjoni dwar l-armonizzazzjoni u stabbilit fir-Regolament (UE) 2019/1020 u l-qafas legali għas-sorveljanza tas-suq tal-prodotti koperti minn dan ir-Regolament jenħtieġ li jkunu koerenti kemm jista’ jkun. Għalhekk huwa meħtieġ, sa fejn huma kkonċernati l-attivitajiet ta’ sorveljanza tas-suq, l-obbligi, is-setgħat, il-miżuri, u l-kooperazzjoni fost l-awtoritajiet tas-sorveljanza tas-suq, li jiġu allinjati ż-żewġ settijiet ta’ dispożizzjonijiet. Għal dak il-għan, jenħtieġ li l-Artikolu 10, l-Artikolu 11(1) sa (7), l-Artikoli 12 sa 15, l-Artikolu 16(1) sa (5), l-Artikoli 18 u 19 u l-Artikoli 21 sa 24 tar-Regolament (UE) 2019/1020 japplikaw ukoll għall-prodotti koperti minn dan ir-Regolament.

(61)

Skont ir-Regolament (UE) Nru 952/2013 tal-Parlament Ewropew u tal-Kunsill (18) (il-Kodiċi Doganali tal-Unjoni), il-prodotti minn pajjiżi terzi maħsuba biex jitqiegħdu fis-suq tal-Unjoni jew maħsuba għall-użu privat jew għall-konsum fit-territorju doganali tal-Unjoni jitqiegħdu taħt il-proċedura doganali “rilaxx għaċ-ċirkolazzjoni libera”. Dik il-proċedura għandha l-għan li tlesti l-formalitajiet stabbiliti fir-rigward tal-importazzjoni tal-oġġetti, inkluż l-infurzar tad-dispożizzjonijiet applikabbli tal-liġi tal-Unjoni, sabiex dawk l-oġġetti jkunu jistgħu jitqiegħdu fis-suq tal-Unjoni bħal kwalunkwe prodott magħmul fl-Unjoni. F’dak li għandu x’jaqsam mas-sikurezza tal-konsumatur, dawk il-prodotti huma meħtieġa jikkonformaw ma’ dan ir-Regolament u, b’mod partikolari, mar-rekwiżit tas-sikurezza ġenerali stabbilit f’dan ir-Regolament.

(62)

Il-Kapitolu VII tar-Regolament (UE) 2019/1020, li jistabbilixxi r-regoli għall-kontrolli fuq prodotti li jidħlu fis-suq tal-Unjoni, diġà huwa direttament applikabbli għall-prodotti koperti minn dan ir-Regolament. L-awtoritajiet responsabbli minn dawk il-kontrolli jenħtieġ li jwettquhom abbażi tal-analiżi tar-riskju kif imsemmi fl-Artikoli 46 u 47 tar-Regolament (UE) Nru 952/2013, il-leġiżlazzjoni ta’ implimentazzjoni u l-gwida korrispondenti. Għalhekk, dan ir-Regolament ma jimmodifika bl-ebda mod il-Kapitolu VII tar-Regolament (UE) 2019/1020 u l-mod kif l-awtoritajiet responsabbli mill-kontrolli fuq prodotti li jidħlu fis-suq tal-Unjoni jorganizzaw lilhom infushom u jwettqu l-attivitajiet tagħhom.

(63)

Jenħtieġ li l-Istati Membri jiżguraw li kwalunkwe miżura meħuda mill-awtoritajiet kompetenti tagħhom skont dan ir-Regolament tkun soġġetta għal rimedji ġudizzjarji effettivi f’konformità mal-Artikolu 47 tal-Karta.

(64)

L-awtoritajiet nazzjonali jenħtieġ li jkunu jistgħu jikkomplementaw l-attivitajiet tradizzjonali tas-sorveljanza tas-suq iffukati fuq is-sikurezza tal-prodotti b’attivitajiet tas-sorveljanza tas-suq li jiffukaw fuq il-proċeduri ta’ konformità interna stabbiliti mill-operaturi ekonomiċi biex jiżguraw is-sikurezza tal-prodotti. L-awtoritajiet tas-sorveljanza tas-suq jenħtieġ li jkunu jistgħu jirrikjedu lill-manifattur jindika liema prodotti oħra - manifatturati bl-istess proċedura, jew li jkun fihom l-istess komponenti meqjusa li joħolqu riskju jew li jkunu parti mill-istess lott ta’ produzzjoni - huma affettwati mill-istess riskju.

(65)

L-Istati Membri jenħtieġ li jiżguraw ukoll li l-awtoritajiet tas-sorveljanza tas-suq ikollhom biżżejjed għarfien espert u riżorsi għall-attivitajiet kollha tagħhom relatati mal-infurzar.

(66)

Jenħtieġ li jiġi stabbilit skambju ta’ informazzjoni bejn l-Istati Membri u l-Kummissjoni dwar l-applikazzjoni ta’ dan ir-Regolament abbażi ta’ indikaturi tal-output li jippermettu l-kejl tal-effettività tal-leġiżlazzjoni tal-Unjoni dwar is-sikurezza tal-prodotti.

(67)

Jenħtieġ li jkun hemm skambju effettiv, rapidu u preċiż ta’ informazzjoni dwar prodotti perikolużi biex jiġi żgurat li jittieħdu miżuri xierqa fir-rigward ta’ dawk il-prodotti u għaldaqstant jiġu protetti s-saħħa u s-sikurezza tal-konsumaturi.

(68)

RAPEX jenħtieġ li tiġi modernizzata biex tippermetti miżuri korrettivi aktar effiċjenti li jridu jittieħdu fl-Unjoni kollha fir-rigward ta’ prodotti li joħolqu riskju lil hinn mit-territorju ta’ Stat Membru uniku. Huwa xieraq li l-isem imqassar jinbidel minn RAPEX għal Safety Gate għal aktar ċarezza u sensibilizzazzjoni aħjar għall-konsumaturi. Safety Gate tinkludi tliet elementi: l-ewwel nett, sistema ta’ twissija rapida dwar prodotti perikolużi mhux tal-ikel li permezz tagħha l-awtoritajiet nazzjonali u l-Kummissjoni jistgħu jiskambjaw informazzjoni dwar tali prodotti (Sistema ta’ Twissija Rapida “Safety Gate”); it-tieni, portal web biex jinforma lill-pubbliku u jippermettilu jressaq ilmenti (Portal Safety Gate); u t-tielet, web portal li tippermetti lin-negozji jikkonformaw mal-obbligu tagħhom li jinfurmaw lill-awtoritajiet u lill-konsumaturi dwar prodotti u inċidenti perikolużi (Safety Business Gateway). Jenħtieġ li jkun hemm interfaċċi bejn l-elementi differenti tas-Safety Gate. Is-Sistema ta’ Twissija Rapida “Safety Gate” hija s-sistema interna li permezz tagħha l-awtoritajiet u l-Kummissjoni jiskambjaw informazzjoni dwar miżuri li jikkonċernaw prodotti perikolużi, u li jista’ jkun fiha informazzjoni kunfidenzjali. Jenħtieġ li jiġi ppubblikat estratt ta’ twissijiet fuq il-Portal Safety Gate sabiex il-pubbliku jiġi infurmat dwar prodotti perikolużi. Is-Safety Business Gateway huwa l-portal web li permezz tiegħu n-negozji jinfurmaw lill-awtoritajiet tas-sorveljanza tas-suq tal-Istati Membri dwar prodotti perikolużi u dwar inċidenti. Il-Kummissjoni jenħtieġ li tiżviluppa soluzzjoni teknika biex tiżgura li l-informazzjoni mdaħħla min-negozji fis-Safety Business Gateway li hija maħsuba biex twissi lill-konsumaturi tkun tista’ ssir disponibbli għall-konsumaturi fuq il-Portal Safety Gate mingħajr dewmien żejjed. Barra minn hekk, jenħtieġ li l-Kummissjoni tiżviluppa interfaċċa interoperabbli biex tippermetti lill-fornituri tas-swieq online jgħaqqdu l-interfaċċi tagħhom mal-Portal Safety Gate b’mod faċli, rapidu u affidabbli.

(69)

L-Istati Membri jenħtieġ li fis-Sistema ta’ Twissija Rapida “Safety Gate” jinnotifikaw kemm miżuri korrettivi obbligatorji kif ukoll volontarji li jipprevjenu, jirrestrinġu jew jimponu kondizzjonijiet speċifiċi fuq il-kummerċjalizzazzjoni possibbli ta’ prodott minħabba riskju serju għas-saħħa u s-sikurezza tal-konsumaturi jew, fil-każ ta’ prodotti koperti mir-Regolament (UE) 2019/1020, ukoll għal interessi pubbliċi rilevanti oħra tal-utenti finali.

(70)

Skont l-Artikolu 34 tar-Regolament (UE) 2019/1020, l-awtoritajiet tal-Istati Membri għandhom jinnotifikaw il-miżuri meħuda kontra prodotti koperti minn dak ir-Regolament, li joħolqu riskju anqas minn serju, permezz tas-sistema ta’ informazzjoni u komunikazzjoni msemmija f’dak l-Artikolu, filwaqt li l-miżuri korrettivi meħuda kontra l-prodotti koperti minn dan ir-Regolament li joħolqu riskju anqas minn serju jistgħu wkoll jiġu nnotifikati fis-Sistema ta’ Twissija Rapida “Safety Gate”. L-Istati Membri u l-Kummissjoni jenħtieġ li jqiegħdu għad-disponibbiltà tal-pubbliku informazzjoni relatata mar-riskji għas-saħħa u s-sikurezza tal-konsumaturi ppreżentati mill-prodotti. Huwa xieraq għall-konsumaturi u għan-negozji li l-informazzjoni kollha dwar il-miżuri korrettivi meħuda kontra prodotti li joħolqu riskju serju tinsab fis-Sistema ta’ Twissija Rapida “Safety Gate”, li tippermetti li l-informazzjoni rilevanti dwar prodotti perikolużi, titqiegħed għad-dispożizzjoni tal-pubbliku permezz tal-Portal Safety Gate. Huwa importanti li jiġi żgurat li dik l-informazzjoni kollha tkun disponibbli bil-lingwa/i uffiċjali tal-Istat Membru ta’ residenza tal-konsumatur u li tkun miktuba b’lingwaġġ ċar u li jinftiehem. Għalhekk, l-Istati Membri huma mħeġġa jinnotifikaw fis-Sistema ta’ Twissija Rapida “Safety Gate” il-miżuri korrettivi kollha dwar prodotti li joħolqu riskju għas-saħħa u s-sikurezza tal-konsumaturi.

(71)

F’każ li l-informazzjoni jkollha tiġi nnotifikata fis-sistema ta’ informazzjoni u komunikazzjoni skont ir-Regolament (UE) 2019/1020, hemm il-possibbiltà għal tali notifiki li jiġu sottomessi direttament fis-Sistema ta’ Twissija Rapida “Safety Gate” jew li jiġu ġġenerati mis-sistema ta’ informazzjoni u komunikazzjoni għas-sorveljanza tas-suq prevista fl-Artikolu 34 tar-Regolament (UE) 2019/1020. Għal dak il-għan, jenħtieġ li l-Kummissjoni żżomm u tkompli tiżviluppa l-interfaċċa li ġiet stabbilita għat-trasferiment tal-informazzjoni bejn dik is-sistema ta’ informazzjoni u komunikazzjoni u s-Sistema ta’ Twissija Rapida “Safety Gate”, sabiex jiġi evitat id-dħul doppju tad-data u biex jiġi ffaċilitat tali trasferiment.

(72)

Il-Kummissjoni jenħtieġ li żżomm u tiżviluppa aktar il-portal web Safety Business Gateway, li jippermetti lill-operaturi ekonomiċi jikkonformaw mal-obbligi tagħhom li jinformaw lill-awtoritajiet tas-sorveljanza tas-suq u lill-konsumaturi dwar prodotti perikolużi li jkunu qiegħdu fis-suq. Dan jenħtieġ li jippermetti skambju ta’ informazzjoni rapidu u effiċjenti bejn l-operaturi ekonomiċi u l-awtoritajiet nazzjonali, u jiffaċilita l-informazzjoni lill-konsumaturi mill-operaturi ekonomiċi.

(73)

Jista’ jkun hemm każijiet meta jkun meħtieġ li jiġi indirizzat riskju serju fil-livell tal-Unjoni meta r-riskju ma jkunx jista’ jiġi kkontrollat b’mod sodisfaċenti permezz ta’ miżuri meħuda mill-Istat Membru kkonċernat jew permezz ta’ kwalunkwe proċedura oħra skont il-liġi tal-Unjoni. Dan jista’ jkun partikolarment il-każ fir-rigward ta’ riskji emerġenti ġodda jew dawk li jħallu impatt fuq il-konsumaturi vulnerabbli. Għal dik ir-raġuni, il-Kummissjoni jenħtieġ li tkun tista’ tadotta miżuri fuq inizjattiva tagħha stess jew fuq talba tal-Istati Membri. Tali miżuri jenħtieġ li jkunu adattati għall-gravità u l-urġenza tas-sitwazzjoni. Barra minn hekk, huwa meħtieġ li jiġi previst mekkaniżmu adegwat li bih il-Kummissjoni tkun tista’ tadotta miżuri interim applikabbli immedjatament.

(74)

Id-determinazzjoni tar-riskju li jikkonċerna prodott u l-livell tiegħu hija bbażata fuq valutazzjoni tar-riskju mwettqa mill-atturi rilevanti. L-Istati Membri, fit-twettiq ta’ tali valutazzjoni tar-riskju, jistgħu jilħqu riżultati differenti f’dak li jikkonċerna l-preżenza ta’ riskju jew il-livell tiegħu. Dan jista’ jipperikola l-funzjonament korrett tas-suq intern u l-kondizzjonijiet ekwi kemm għall-konsumaturi kif ukoll għall-operaturi ekonomiċi. Għalhekk, jenħtieġ li jiġi stabbilit mekkaniżmu biex jippermetti lill-Kummissjoni tipprovdi opinjoni dwar il-kwistjoni fit-tilwima.

(75)

Il-Kummissjoni jenħtieġ li tfassal rapport perjodiku dwar l-applikazzjoni tal-mekkaniżmu skont l-Artikolu 29, li jenħtieġ li jiġi ppreżentat lin-network Ewropew tal-awtoritajiet tal-Istati Membri kompetenti għas-sikurezza tal-prodott skont dan ir-Regolament (“Network tas-Sikurezza tal-Konsumatur”). Dak ir-rapport jenħtieġ li jidentifika l-kriterji ewlenin applikati mill-Istati Membri għall-valutazzjoni tar-riskju u l-impatt tagħhom fuq is-suq intern u fuq livell ugwali ta’ protezzjoni tal-konsumatur, bil-għan li jippermetti lill-Istati Membri u lill-Kummissjoni jarmonizzaw l-approċċi u l-kriterji għall-valutazzjoni tar-riskju.

(76)

In-Network tas-Sikurezza tal-Konsumatur previst minn dan ir-Regolament isaħħaħ il-kooperazzjoni dwar l-infurzar tas-sikurezza tal-prodotti bejn l-Istati Membri. B’mod partikolari, dan jiffaċilita l-attivitajiet ta’ skambju ta’ informazzjoni, l-organizzazzjoni ta’ attivitajiet konġunti ta’ sorveljanza tas-suq u l-iskambju ta’ għarfien espert u l-aħjar prattiki. Jenħtieġ li jikkontribwixxi wkoll għall-armonizzazzjoni tal-metodoloġiji għall-ġbir tad-data dwar is-sikurezza tal-prodotti, kif ukoll għal żieda fl-interoperabbiltà bejn is-sistemi ta’ informazzjoni reġjonali, settorjali, nazzjonali u Ewropej għas-sikurezza tal-prodotti. In-Network tas-Sikurezza tal-Konsumatur jenħtieġ li jkun irrappreżentat u jipparteċipa kif xieraq fl-attivitajiet ta’ koordinazzjoni u kooperazzjoni tan-Network tal-Unjoni għall-Konformità tal-Prodotti previst fir-Regolament (UE) 2019/1020 kull meta tkun meħtieġa koordinazzjoni tal-attivitajiet li jaqgħu fi ħdan il-kamp ta’ applikazzjoni taż-żewġ Regolamenti biex tiġi żgurata l-effettività tagħhom.

(77)

Biex tiġi ppreżervata l-koerenza tal-qafas legali tas-sorveljanza tas-suq u, fl-istess ħin, tiġi żgurata kooperazzjoni effettiva bejn in-Network tas-Sikurezza tal-Konsumatur u n-Network tal-Unjoni għall-Konformità tal-Prodotti, immirati lejn il-koordinazzjoni u l-kooperazzjoni strutturata bejn l-awtoritajiet tal-infurzar tal-Istati Membri u l-Kummissjoni previsti mir-Regolament (UE) 2019/1020, huwa meħtieġ li n-Network tas-Sikurezza tal-Konsumatur jiġi assoċjat man-Network tal-Unjoni għall-Konformità tal-Prodotti fl-attivitajiet imsemmija fl-Artikoli 11, 12, 13 u 21 tar-Regolament (UE) 2019/1020.

(78)

L-awtoritajiet tas-sorveljanza tas-suq jenħtieġ li jwettqu attivitajiet konġunti ma’ awtoritajiet jew organizzazzjonijiet oħra li jirrappreżentaw lill-operaturi ekonomiċi jew lill-konsumaturi, bil-għan li jippromwovu s-sikurezza tal-prodotti u jidentifikaw prodotti perikolużi, inklużi dawk li jiġu offruti għall-bejgħ online. Meta jagħmlu dan, l-awtoritajiet tas-sorveljanza tas-suq u l-Kummissjoni, kif xieraq, jenħtieġ li jiżguraw li l-għażla tal-prodotti u tal-produtturi kif ukoll l-attivitajiet imwettqa ma joħolqux sitwazzjonijiet li jistgħu ifixklu l-kompetizzjoni jew jaffettwaw l-oġġettività, l-indipendenza u l-imparzjalità tal-partijiet. L-awtoritajiet tas-sorveljanza tas-suq jenħtieġ li jqiegħdu għad-disponibbiltà tal-pubbliku l-ftehimiet dwar attivitajiet konġunti malajr kemm jista’ jkun, sakemm tali pubblikazzjoni ma tipperikolax l-effettività tal-attivitajiet li jridu jitwettqu.

(79)

Jenħtieġ li l-Kummissjoni torganizza, fuq bażi regolari, attività konġunta li permezz tagħha l-awtoritajiet tas-sorveljanza tas-suq jenħtieġ li jwettqu spezzjonijiet fuq prodotti miksuba b’identità koperta online jew offline, b’mod partikolari fuq dawk il-prodotti li jiġu nnotifikati l-aktar ta’ spiss fis-Safety Gate.

(80)

Azzjonijiet simultanji kkoordinati ta’ kontroll (“sweeps”) huma azzjonijiet speċifiċi ta’ infurzar li jistgħu jkomplu jtejbu s-sikurezza tal-prodotti u jenħtieġ għalhekk li jitwettqu biex jinstab il-ksur online u offline ta’ dan ir-Regolament. B’mod partikolari, jenħtieġ li jitwettqu sweeps meta x-xejriet tas-suq, l-ilmenti tal-konsumaturi jew indikazzjonijiet oħra jissuġġerixxu li ċerti prodotti jew kategoriji ta’ prodotti ta’ spiss jinstabu li joħolqu riskju serju.

(81)

Jenħtieġ li jiġi żgurat, bħala regola ġenerali, l-aċċess pubbliku għall-informazzjoni disponibbli għall-awtoritajiet dwar is-sikurezza tal-prodotti. Madankollu, meta l-informazzjoni dwar is-sikurezza tal-prodotti għall-pubbliku ssir disponibbli, is-segretezza professjonali, kif imsemmija fl-Artikolu 339 tat-TFUE, jenħtieġ li tiġi protetta b’mod li jkun kompatibbli mal-ħtieġa sabiex tiġi żgurata l-effettività tal-attivitajiet tas-sorveljanza tas-suq u tal-miżuri ta’ protezzjoni.

(82)

L-ilmenti huma importanti f’termini ta’ sensibilizzazzjoni tal-awtoritajiet nazzjonali dwar is-sikurezza u l-effettività tal-attivitajiet ta’ sorveljanza u kontroll relatati ma’ prodotti perikolużi. Għalhekk, jenħtieġ li l-Istati Membri jagħtu lill-konsumaturi u lil partijiet interessati oħra bħall-assoċjazzjonijiet tal-konsumaturi u l-operaturi ekonomiċi l-possibbiltà li jressqu tali lmenti.

(83)

L-interfaċċa pubblika tas-Sistema ta’ Twissija Rapida “Safety Gate”, il-Portal Safety Gate, tippermetti lill-pubbliku ġenerali, inklużi l-konsumaturi, l-operaturi ekonomiċi u l-fornituri tas-swieq online, li jiġi infurmat dwar il-miżuri korrettivi meħuda kontra prodotti perikolużi preżenti fis-suq tal-Unjoni. Taqsima separata tal-Portal Safety Gate tippermetti lill-konsumaturi jinfurmaw lill-Kummissjoni dwar prodotti li jinsabu fis-suq li joħolqu riskju għas-saħħa u s-sikurezza tal-konsumatur. Meta rilevanti, il-Kummissjoni jenħtieġ li tipprovdi segwitu adegwat, b’mod partikolari billi tittrażmetti tali informazzjoni lill-awtoritajiet nazzjonali kkonċernati. Il-bażi tad-data u s-sit web tas-Safety Gate jenħtieġ li jkunu aċċessibbli faċilment għall-persuni b’diżabilità.

(84)

Wara verifika tal-preċiżjoni tal-informazzjoni riċevuta mill-konsumaturi u partijiet interessati oħra, il-Kummissjoni jenħtieġ li tiżgura segwitu xieraq. B’mod partikolari, il-Kummissjoni jenħtieġ li tibgħat l-informazzjoni lill-Istati Membri rilevanti sabiex l-awtorità kompetenti tas-sorveljanza tas-suq tkun tista’ tipproċedi kif xieraq u kif meħtieġ. Huwa importanti li l-konsumaturi u partijiet interessati oħra jiġu infurmati kif xieraq dwar l-azzjoni tal-Kummissjoni.

(85)

Meta prodott li jkun diġà nbiegħ lill-konsumaturi jirriżulta li jkun perikoluż, jista’ jkun meħtieġ li jissejjaħ lura biex jiġu protetti l-konsumaturi fl-Unjoni. Il-konsumaturi jistgħu ma jkunux jafu li għandhom fil-pussess tagħhom prodott imsejjaħ lura. Sabiex tiżdied l-effettività tas-sejħa lura, huwa għalhekk importanti li jintlaħqu aħjar il-konsumaturi kkonċernati. Il-kuntatt dirett huwa l-aktar metodu effettiv biex tiżdied is-sensibilizzazzjoni tal-konsumaturi dwar is-sejħiet lura u tiġi mħeġġa l-azzjoni. Huwa wkoll il-mezz ta’ komunikazzjoni preferut fost il-gruppi kollha tal-konsumaturi. Sabiex tiġi żgurata s-sikurezza tal-konsumaturi, huwa importanti li dawn jiġu infurmati b’mod rapidu u affidabbli. Għalhekk, l-operaturi ekonomiċi u, meta jkun applikabbli, il-fornituri tas-swieq online jenħtieġ li jużaw id-data tal-klijent għad-dispożizzjoni tagħhom biex jinfurmaw lill-konsumaturi dwar sejħiet lura u twissijiet ta’ sikurezza marbuta mal-prodotti li jkunu xtraw. Għalhekk, huwa meħtieġ obbligu legali biex l-operaturi ekonomiċi u l-fornituri tas-swieq online jkunu obbligati jużaw kwalunkwe data tal-klijenti li tkun diġà għad-dispożizzjoni tagħhom biex jinfurmaw lill-konsumaturi dwar sejħiet lura u twissijiet ta’ sikurezza. F’dak ir-rigward, l-operaturi ekonomiċi u l-fornituri tas-swieq online jenħtieġ li jiżguraw li jinkludu l-possibbiltà li jikkuntattjaw direttament lill-klijenti fil-każ ta’ sejħa lura jew twissija ta’ sikurezza li taffettwahom fi programmi eżistenti ta’ lealtà tal-klijent u f’sistemi ta’ reġistrazzjoni tal-prodotti, li permezz tagħhom il-klijenti jintalbu, wara li jkunu xtraw prodott, biex jikkomunikaw lill-manifattur fuq bażi volontarja xi informazzjoni bħall-isem, l-informazzjoni ta’ kuntatt tagħhom, il-mudell tal-prodott jew in-numru tas-serje. Is-sempliċi fatt li s-sejħiet lura huma mmirati lejn il-konsumaturi jenħtieġ li ma jipprevjenix lill-operaturi ekonomiċi u lill-fornituri tas-swieq online milli jgħarrfu lill-klijenti kollha b’avviż ta’ sejħa lura ta’ prodott u lanqas milli joffru rimedji lil utenti finali oħra. L-operaturi ekonomiċi u l-fornituri tas-swieq online jenħtieġ li jiġu mħeġġa jieħdu tali azzjonijiet, speċjalment fil-każ ta’ intrapriżi mikro u żgħar li jaġixxu bħala konsumaturi.

(86)

Il-konsumaturi jenħtieġ li jiġu mħeġġa jirreġistraw prodotti sabiex jirċievu informazzjoni dwar sejħiet lura u twissijiet ta’ sikurezza. Il-Kummissjoni jenħtieġ li tingħata s-setgħa li tadotta atti ta’ implimentazzjoni sabiex tispeċifika li għal xi prodotti speċifiċi jew kategoriji speċifiċi ta’ prodotti, il-konsumaturi jenħtieġ li dejjem ikollhom il-possibbiltà li jirreġistraw prodott li jkunu xtraw sabiex jiġu nnotifikati direttament dwar sejħa lura jew twissija ta’ sikurezza relatata ma’ dak il-prodott. Fl-iddeterminar tal-prodotti speċifiċi jew tal-kategoriji speċifiċi ta’ prodotti soġġetti għal dak ir-rekwiżit, jenħtieġ li tingħata kunsiderazzjoni xierqa liċ-ċiklu tal-ħajja tal-prodotti jew il-kategoriji tal-prodotti inkwistjoni, kif ukoll lir-riskji li joħolqu l-prodotti, il-frekwenza tas-sejħiet lura u l-kategorija tal-utenti tal-prodotti, b’mod partikolari l-konsumaturi vulnerabbli.

(87)

Terz tal-konsumaturi jkomplu jużaw prodotti perikolużi minkejja li jaraw avviż ta’ sejħa lura, b’mod partikolari minħabba li l-avviżi ta’ sejħa lura jiġu abbozzati b’mod kumpless jew ixejnu r-riskju involut. Għalhekk, l-avviż ta’ sejħa lura jenħtieġ li jkun ċar, trasparenti u jiddeskrivi b’mod ċar ir-riskju involut, filwaqt li jevita kwalunkwe terminu, espressjoni jew element ieħor li jista’ jnaqqas l-perċezzjoni tar-riskju tal-konsumaturi. Il-konsumaturi jenħtieġ li jkunu jistgħu jiksbu wkoll aktar informazzjoni, jekk meħtieġ, permezz ta’ numru tat-telefon mingħajr ħlas jew strument interattiv ieħor.

(88)

Sabiex jiġi mħeġġeġ ir-rispons tal-konsumatur għas-sejħiet lura, huwa importanti wkoll li l-azzjoni meħtieġa mill-konsumaturi tkun sempliċi kemm jista’ jkun u li r-rimedji offruti jkunu effettivi, mingħajr spejjeż u f’waqthom. Id-Direttiva (UE) 2019/771 tal-Parlament Ewropew u tal-Kunsill (19) tipprovdi lill-konsumaturi bir-rimedji kuntrattwali għal nuqqas ta’ konformità ta’ oġġetti fiżiċi li kienu jeżistu fil-mument tal-konsenja u li sar evidenti fil-perjodu ta’ responsabbiltà previst mill-Istati Membri f’konformità mal-Artikolu 10(3) ta’ dik id-Direttiva. L-Artikolu 14 tad-Direttiva (UE) 2019/770 tal-Parlament Ewropew u tal-Kunsill (20) japplika wkoll f’termini tal-mezz tanġibbli, bħal DVDs, CDs, USB sticks u kards tal-memorja, użati biex iġorru kontenut diġitali. Madankollu, sitwazzjonijiet meta prodotti perikolużi jissejħu lura mis-suq jiġġustifikaw li jkun hemm sett speċifiku ta’ regoli li jenħtieġ li jiġu applikati mingħajr preġudizzju għal rimedji kuntrattwali minħabba li l-objettivi tagħhom huma differenti. Filwaqt li r-rimedji kuntrattwali jservu l-iskop li jirrimedjaw in-nuqqas ta’ konformità tal-oġġetti mal-kuntratt, ir-rimedji fil-każ ta’ sejħa lura jservu kemm biex jiżguraw l-eliminazzjoni ta’ prodotti perikolużi mis-suq kif ukoll rimedju adegwat għall-konsumatur. B’konsegwenza, hemm differenzi kbar bejn iż-żewġ settijiet ta’ rimedji potenzjali: l-ewwel nett, fil-każ ta’ sejħa lura ta’ prodott skont dan ir-Regolament, jenħtieġ li ma jkun hemm l-ebda limitu ta’ żmien biex jiġu attivati r-rimedji; it-tieni, il-konsumatur jenħtieġ li jkun intitolat li jitlob rimedji mingħand l-operatur ekonomiku rilevanti, mhux neċessarjament mingħand il-kummerċjant. Barra minn hekk, fil-każ ta’ sejħa lura, jenħtieġ li l-konsumatur ma jkollux għalfejn juri li l-prodott huwa perikoluż.

(89)

Minħabba l-objettivi differenti tar-rimedji pprovduti fil-każ ta’ sejħa lura ta’ prodott perikoluż u r-rimedji għan-nuqqas ta’ konformità tal-oġġetti mal-kuntratt, il-konsumaturi jenħtieġ li jużaw is-sistema li tikkorrispondi għas-sitwazzjoni rilevanti. Pereżempju, jekk il-konsumatur jirċievi avviż ta’ sejħa lura b’deskrizzjoni tar-rimedji disponibbli għall-konsumatur, il-konsumatur jenħtieġ li jaġixxi skont l-istruzzjonijiet fl-avviż tas-sejħa lura. Madankollu, jenħtieġ li ma jiċċaħħadx mill-possibbiltà li jitlob rimedji mingħand il-bejjiegħ abbażi tan-nuqqas ta’ konformità tal-oġġetti perikolużi mal-kuntratt.

(90)

Ladarba l-konsumatur ikun ġie pprovdut b’rimedju bħala segwitu għal sejħa lura, il-konsumatur ma setax ikun intitolat għal rimedju għan-nuqqas ta’ konformità tal-oġġett mal-kuntratt għal raġunijiet marbuta mal-fatt li l-prodott kien perikoluż minħabba li n-nuqqas ta’ konformità ma għadux jeżisti. Bl-istess mod, fil-każ li l-konsumatur jinvoka d-drittijiet tal-konsumatur għal rimedju skont id-Direttiva (UE) 2019/770 jew id-Direttiva (UE) 2019/771, il-konsumatur ma huwiex intitolat għal rimedju skont dan ir-Regolament għall-istess kwistjoni ta’ sikurezza. Madankollu, jekk ma jiġux issodisfati rekwiżiti oħra għall-konformità fir-rigward tal-istess oġġett, il-bejjiegħ jibqa’ responsabbli għal tali nuqqas ta’ konformità tal-oġġett mal-kuntratt anki jekk ikun ġie pprovdut rimedju lill-konsumatur wara sejħa lura ta’ prodott perikoluż.

(91)

L-operaturi ekonomiċi li jibdew sejħa lura ta’ prodott jenħtieġ li joffru lill-konsumaturi mill-anqas żewġ għażliet bejn tiswija, sostituzzjoni, jew rifużjoni adegwata tal-valur tal-prodott imsejjaħ lura, għajr meta jkun impossibbli jew sproporzjonat. Li l-konsumaturi jingħataw għażla bejn rimedji jista’ jtejjeb l-effettività ta’ sejħa lura. Barra minn hekk, jenħtieġ li jiġu mħeġġa inċentivi biex il-konsumaturi jiġu motivati jipparteċipaw f’sejħa lura, bħal skontijiet jew vawċers, sabiex tiżdied l-effettività tas-sejħiet lura. It-tiswija tal-prodott jenħtieġ li titqies biss bħala rimedju possibbli jekk is-sikurezza tal-prodott imsewwi tkun tista’ tiġi żgurata. L-ammont tar-rifużjoni jenħtieġ li jkun mill-anqas daqs il-prezz imħallas mill-konsumatur, mingħajr preġudizzju għal kumpens ulterjuri kif previst fil-liġijiet nazzjonali. Meta ma tkun disponibbli l-ebda prova tal-prezz imħallas, xorta jenħtieġ li tingħata rifużjoni adegwata tal-valur tal-prodott imsejjaħ lura. Fil-każ ta’ sejħiet lura tal-mezz tanġibbli għal kontenut diġitali fis-sens tal-Artikolu 2, il-punt (1), tad-Direttiva (UE) 2019/770, ir-rifużjoni jenħtieġ li tkopri s-somom kollha mħallsa mill-konsumatur skont il-kuntratt, kif previst fl-Artikolu 16(1) ta’ dik id-Direttiva. Kwalunkwe rimedju jenħtieġ li jkun mingħajr preġudizzju għad-dritt tal-konsumaturi għad-danni skont il-liġi nazzjonali.

(92)

Ir-rimedji offruti fil-każ ta’ sejħa lura tal-prodott għal raġunijiet ta’ sikurezza jenħtieġ li ma jpoġġux piż eċċessiv fuq il-konsumaturi u lanqas ma għandhom ipoġġuhom f’riskju. Jekk ir-rimedju jinvolvi wkoll ir-rimi tal-prodott imsejjaħ lura, dan ir-rimi jenħtieġ li jitwettaq b’kunsiderazzjoni xierqa tal-objettivi ambjentali u sostenibbli stabbiliti fil-livelli tal-Unjoni u nazzjonali. Barra minn hekk, it-tiswija mill-konsumaturi jenħtieġ li titqies biss bħala rimedju possibbli jekk tkun tista’ titwettaq faċilment u b’mod sikur mill-konsumatur, pereżempju permezz tas-sostituzzjoni ta’ batterija jew permezz tal-qtugħ ta’ qfieli twal wisq fuq ħwejjeġ tat-tfal meta jkun previst fl-avviż ta’ sejħa lura. Barra minn hekk, it-tiswija mill-konsumatur jenħtieġ li tkun mingħajr preġudizzju għad-drittijiet tal-konsumaturi skont id-Direttivi (UE) 2019/770 u (UE) 2019/771. Għalhekk, fit-tali sitwazzjonijiet, l-operaturi ekonomiċi jenħtieġ li ma jobbligawx lill-konsumaturi jsewwu prodott perikoluż.

(93)

Jenħtieġ li dan ir-Regolament iħeġġeġ ukoll lill-operaturi ekonomiċi u lill-fornituri tas-swieq online biex jipparteċipaw f’memoranda ta’ qbil volontarji mal-awtoritajiet kompetenti, mal-Kummissjoni jew mal-organizzazzjonijiet li jirrappreżentaw lill-konsumaturi jew lill-operaturi ekonomiċi biex jieħdu impenji volontarji relatati mas-sikurezza tal-prodotti li jmorru lil hinn mill-obbligi legali stabbiliti fil-liġi tal-Unjoni.

(94)

Jenħtieġ li l-konsumaturi jkunu intitolati jinfurzaw id-drittijiet tagħhom fir-rigward tal-obbligi imposti fuq l-operaturi ekonomiċi jew il-fornituri tas-swieq online skont dan ir-Regolament permezz ta’ azzjonijiet rappreżentattivi f’konformità mad-Direttiva (UE) 2020/1828 tal-Parlament Ewropew u tal-Kunsill (21). Għal dak il-għan, jenħtieġ li dan ir-Regolament jipprevedi li d-Direttiva (UE) 2020/1828 tkun applikabbli għall-azzjonijiet rappreżentattivi li jikkonċernaw ksur ta’ dan ir-Regolament li jagħmlu ħsara jew li jistgħu jagħmlu ħsara lill-interessi kollettivi tal-konsumaturi. L-Anness I ta’ dik id-Direttiva jenħtieġ għalhekk li jiġi emendat skont dan. Huwa f’idejn l-Istati Membri li jiżguraw li dik l-emenda tkun riflessa fil-miżuri ta’ traspożizzjoni tagħhom adottati f’konformità ma’ dik id-Direttiva, għalkemm l-adozzjoni ta’ miżuri ta’ traspożizzjoni nazzjonali f’dak ir-rigward ma hijiex kondizzjoni għall-applikabbiltà ta’ dik id-Direttiva għal dawk l-azzjonijiet rappreżentattivi. L-applikabbiltà ta’ dik id-Direttiva għall-azzjonijiet rappreżentattivi mressqa kontra l-ksur minn operaturi ekonomiċi jew mill-fornituri tas-swieq online ta’ dispożizzjonijiet ta’ dan ir-Regolament li jagħmlu ħsara jew jistgħu jagħmlu ħsara lill-interessi kollettivi tal-konsumaturi jenħtieġ li tibda mid-data tal-applikazzjoni ta’ dan ir-Regolament. Sa dik id-data, il-konsumaturi jenħtieġ li jkunu jistgħu jiddependu fuq l-applikabbiltà tad-Direttiva (UE) 2020/1828 f’konformità mal-punt 8 tal-Anness I ta’ dik id-Direttiva.

(95)

Jenħtieġ li l-Unjoni tkun tista’ tikkoopera u tiskambja informazzjoni relatata mas-sikurezza tal-prodotti mal-awtoritajiet regolatorji ta’ pajjiżi terzi jew ma’ organizzazzjonijiet internazzjonali fi ħdan il-qafas ta’ ftehimiet konklużi bejn l-Unjoni u pajjiżi terzi jew organizzazzjonijiet internazzjonali jew ta’ arranġamenti konklużi bejn il-Kummissjoni u l-awtoritajiet ta’ pajjiżi terzi jew organizzazzjonijiet internazzjonali, anke bil-ħsieb tal-prevenzjoni taċ-ċirkolazzjoni ta’ prodotti perikolużi fis-suq. Tali kooperazzjoni u skambju ta’ informazzjoni jenħtieġ li jirrispettaw il-kunfidenzjalità u r-regoli dwar il-protezzjoni tad-data personali tal-Unjoni. Id-data personali jenħtieġ li tiġi ttrasferita biss sal-punt li tali skambju jkun meħtieġ għall-iskop uniku tal-protezzjoni tas-saħħa jew tas-sikurezza tal-konsumaturi.

(96)

L-iskambju sistematiku ta’ informazzjoni bejn il-Kummissjoni u pajjiżi terzi jew organizzazzjonijiet internazzjonali dwar is-sikurezza ta’ prodotti għall-konsumatur u dwar miżuri preventivi, restrittivi u korrettivi jenħtieġ li jkun ibbażat fuq ir-reċiproċità, li tinvolvi skambju ta’ informazzjoni ekwivalenti iżda mhux neċessarjament identiku għal benefiċċju reċiproku. Skambju ta’ informazzjoni ma’ pajjiż terz li jipproduċi oġġetti destinati għas-suq tal-Unjoni jista’ jinvolvi l-bgħit mill-Kummissjoni ta’ informazzjoni magħżula mis-Sistema ta’ Twissija Rapida “Safety Gate” relatata ma’ prodotti li joriġinaw minn dak il-pajjiż terz. Bi skambju, dak il-pajjiż terz jista’ jibgħat informazzjoni dwar il-miżuri ta’ segwitu meħuda abbażi tan-notifiki riċevuti. Tali kooperazzjoni tista’ tikkontribwixxi għall-objettiv li jitwaqqfu prodotti perikolużi fis-sors u li dawn ma jitħallewx jilħqu s-suq tal-Unjoni.

(97)

Sabiex ikollhom effett ta’ deterrent sinifikanti għall-operaturi ekonomiċi u, meta jkun applikabbli, il-fornituri tas-swieq online biex jipprevjenu l-introduzzjoni ta’ prodotti perikolużi fis-suq, jenħtieġ li l-penali jkunu adegwati għat-tip ta’ ksur, għall-vantaġġ possibbli għall-operatur ekonomiku jew għall-fornitur ta’ suq online u għat-tip u għall-gravità tad-dannu mġarrab mill-konsumatur. Il-penali jenħtieġ li jkunu effettivi, proporzjonati u dissważivi.

(98)

Meta jiġu imposti penali, jenħtieġ li tingħata kunsiderazzjoni dovuta lin-natura, il-gravità u d-durata tal-ksur inkwistjoni. L-impożizzjoni ta’ penali jenħtieġ li tkun proporzjonata u jenħtieġ li tikkonforma mal-liġi tal-Unjoni u nazzjonali, inkluż ma’ salvagwardji proċedurali applikabbli u mal-prinċipji tal-Karta.

(99)

Sabiex jinżamm livell għoli ta’ saħħa u sikurezza tal-konsumaturi, jenħtieġ li tiġi delegata lill-Kummissjoni s-setgħa tadotta atti skont l-Artikolu 290 tat-TFUE fir-rigward tal-identifikazzjoni u t-traċċabbiltà ta’ prodotti li jġorru riskju serju potenzjali għas-saħħa u s-sikurezza tal-konsumaturi u għall-funzjonament tas-Sistema ta’ Twissija Rapida “Safety Gate”, b’mod partikolari biex jiġu adottati l-modalitajiet u l-proċeduri għall-iskambju ta’ informazzjoni dwar il-miżuri kkomunikati permezz tas-Sistema ta’ Twissija Rapida “Safety Gate” u l-kriterji għall-valutazzjoni tal-livell ta’ riskju. Huwa partikolarment importanti li l-Kummissjoni twettaq konsultazzjonijiet xierqa matul ix-xogħol tagħha ta’ tħejjija, ukoll fil-livell ta’ esperti, u li dawk il-konsultazzjonijiet jiġu mwettqa f’konformità mal-prinċipji stipulati fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet (22). B’mod partikolari, biex tiġi żgurata parteċipazzjoni ugwali fit-tħejjija ta’ atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta’ atti delegati.

(100)

Sabiex ikunu żgurati kondizzjonijiet uniformi għall-implimentazzjoni ta’ dan ir-Regolament, jenħtieġ li jingħataw setgħat ta’ implimentazzjoni lill-Kummissjoni biex tadotta rekwiżiti speċifiċi ta’ sikurezza, tiddetermina l-indikaturi tal-output abbażi ta’ liema l-Istati Membri għandhom jikkomunikaw data li tikkonċerna l-implimentazzjoni ta’ dan ir-Regolament; biex tispeċifika l-kompiti u r-rwoli tal-punti ta’ kuntatt nazzjonali uniċi; biex tieħu miżuri fir-rigward ta’ azzjoni tal-Unjoni kontra prodotti li joħolqu riskju serju; biex tadotta l-modalitajiet biex il-konsumaturi jibagħtu l-informazzjoni fil-Portal Safety Gate; biex tispeċifika l-implimentazzjoni tal-interfaċċa interoperabbli fuq il-Portal Safety Gate; biex tistabbilixxi r-rekwiżiti għar-reġistrazzjoni ta’ prodotti għall-finijiet ta’ sejħiet lura tal-prodotti għal raġunijiet ta’ sikurezza; u biex tadotta l-mudell għal avviż ta’ sejħa lura. Jenħtieġ li dawk is-setgħat ikunu eżerċitati f’konformità mar-Regolament (UE) Nru 182/2011 tal-Parlament Ewropew u tal-Kunsill (23).

(101)

Jenħtieġ li l-Kummissjoni tadotta atti ta’ implimentazzjoni applikabbli minnufih fejn, f’każijiet debitament ġustifikati marbuta mas-saħħa u s-sikurezza tal-konsumaturi, dan ikun meħtieġ għal raġunijiet imperattivi ta’ urġenza.

(102)

Jenħtieġ li l-Kummissjoni twettaq evalwazzjoni tal-implimentazzjoni tal-penali stabbiliti skont dan ir-Regolament fir-rigward tal-effettività u l-effetti deterrenti tagħhom, u, meta jkun xieraq, tadotta proposta leġiżlattiva fir-rigward tal-infurzar tagħhom.

(103)

Ċerti dispożizzjonijiet tar-Regolament (UE) Nru 1025/2012 jenħtieġ li jiġu emendati biex jitqiesu l-ispeċifiċitajiet ta’ dan ir-Regolament, u b’mod partikolari l-ħtieġa li jiġu determinati r-rekwiżiti tas-sikurezza speċifiċi skont dan ir-Regolament qabel ma titnieda t-talba lill-organizzazzjoni Ewropea tal-istandardizzazzjoni.

(104)

Id-Direttiva 87/357/KEE, li tkopri prodotti għall-konsumatur li, għalkemm ma humiex oġġetti tal-ikel, jixbhu oġġetti tal-ikel u x’aktarx li jiġu konfużi ma’ oġġetti tal-ikel b’tali mod li l-konsumaturi, speċjalment it-tfal, jistgħu jpoġġuhom f’ħalqhom, isoffuhom jew jibilgħuhom u li jistgħu jikkawżaw, pereżempju, soffokazzjoni, avvelenament, il-perforazzjoni jew l-ostruzzjoni tas-sistema diġestiva, wasslet għal interpretazzjoni kontroversjali. Barra minn hekk, dik id-Direttiva ġiet adottata fi żmien meta l-qafas legali għas-sikurezza tal-prodotti għall-konsumatur kien limitat ħafna fil-kamp ta’ applikazzjoni tiegħu. Għal dawk ir-raġunijiet, id-Direttiva 87/357/KEE jenħtieġ li titħassar u tiġi sostitwita b’dan ir-Regolament, b’mod partikolari, id-dispożizzjonijiet ta’ dan ir-Regolament li jiżguraw li, wara valutazzjoni tar-riskju, prodotti li jistgħu jkunu ta’ ħsara meta jitqiegħdu fil-ħalq, jissoffew jew jinbelgħu u li x’aktarx jiġu konfużi ma’ oġġetti tal-ikel minħabba l-forma, ir-riħa, il-kulur, id-dehra, l-imballaġġ, it-tikkettar, il-volum, id-daqs jew karatteristiċi oħra tagħhom, jenħtieġ li jitqiesu perikolużi. Fit-twettiq tal-evalwazzjoni tagħhom, l-awtoritajiet tas-sorveljanza tas-suq jenħtieġ li jqisu, fost l-oħrajn, li, kif sostniet il-Qorti tal-Ġustizzja tal-Unjoni Ewropea, ma huwiex meħtieġ li jintwera permezz ta’ data oġġettiva u sostanzjata li t-tqegħid fil-ħalq, l-issoffjar jew l-inġestjoni ta’ prodotti li jixbhu l-ikel jistgħu jinvolvu riskji bħal soffokazzjoni, avvelenament, jew il-perforazzjoni jew l-ostruzzjoni tas-sistema diġestiva. Madankollu, l-awtoritajiet nazzjonali kompetenti jenħtieġ li jivvalutaw fuq bażi ta’ każ b’każ jekk tali prodotti humiex perikolużi u jiġġustifikawx dik il-valutazzjoni.

(105)

Sabiex l-operaturi ekonomiċi u l-fornituri tas-swieq online jingħataw biżżejjed żmien biex jadattaw għar-rekwiżiti ta’ dan ir-Regolament, inklużi r-rekwiżiti ta’ informazzjoni, huwa meħtieġ li jiġi previst perjodu tranżitorju suffiċjenti wara d-data tad-dħul fis-seħħ ta’ dan ir-Regolament li matulu l-prodotti koperti mid-Direttiva 2001/95/KE li huma konformi ma’ dik id-Direttiva xorta jistgħu jiġu introdotti fis-suq. Għalhekk, jenħtieġ li l-Istati Membri ma jimpedux it-tqegħid fis-suq ta’ tali prodotti, inklużi offerti għall-bejgħ.

(106)

Minħabba li l-objettiv ta’ dan ir-Regolament, jiġifieri li jtejjeb il-funzjonament tas-suq intern filwaqt li jipprovdi livell għoli ta’ protezzjoni tal-konsumatur, ma jistax jinkiseb b’mod suffiċjenti mill-Istati Membri minħabba l-ħtieġa ta’ livell għoli ta’ kollaborazzjoni u azzjoni koerenti bejn l-awtoritajiet kompetenti tal-Istati Membri u għal mekkaniżmu għall-iskambju rapidu u effiċjenti ta’ informazzjoni dwar prodotti perikolużi fl-Unjoni iżda jista’ pjuttost, minħabba l-karattru tal-problema madwar l-Unjoni kollha, jinkiseb aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju ta’ proporzjonalità kif stabbilit f’dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkiseb dak l-objettiv.

(107)

Meta, għall-finijiet ta’ dan ir-Regolament, ikun meħtieġ li tiġi pproċessata data personali, tali pproċessar jenħtieġ li jitwettaq f’konformità mal-liġi tal-Unjoni dwar il-protezzjoni ta’ data personali. Kwalunkwe ipproċessar ta’ data personali skont dan ir-Regolament huwa soġġett għar-Regolamenti (UE) 2016/679 (24) u (UE) 2018/1725 (25) u d-Direttiva 2002/58/KE (26) tal-Parlament u tal-Kunsill, kif applikabbli. Meta l-konsumaturi jirrapportaw prodott fil-Portal Safety Gate, jenħtieġ li tinħażen biss dik id-data personali li tkun meħtieġa biex jiġi rrapportat il-prodott perikoluż u għal perjodu li ma jaqbiżx il-ħames snin wara li tali data tkun iddaħħlet. Il-manifatturi u l-importaturi jenħtieġ li jkollhom ir-reġistru tal-ilmenti tal-konsumaturi biss sakemm dan ikun meħtieġ għall-fini ta’ dan ir-Regolament. Il-manifatturi u l-importaturi, meta jkunu persuni fiżiċi, jenħtieġ li jiżvelaw isimhom biex jiżguraw li l-konsumatur ikun jista’ jidentifika l-prodott għall-fini tat-traċċabbiltà.

(108)

Il-Kontrollur Ewropew għall-Protezzjoni tad-Data ġie kkonsultat skont l-Artikolu 42 tar-Regolament (UE) 2018/1725,

(1)

Ir-Regolament tal-Kummissjoni (UE) Nru 1321/2014 (2) jistabbilixxi r-rekwiżiti għall-kontinwità tal-ajrunavigabbiltà tal-inġenji tal-ajru, inklużi l-kwalifiki u l-liċenzji tal-persunal responsabbli għar-rilaxx għas-servizz ta’ prodotti wara l-manutenzjoni.

(2)

It-terminu “inġenju tal-ajru motorizzat kumpless” kien ġie definit fl-Artikolu 3, il-punt (j), tar-Regolament (KE) Nru 216/2008 tal-Parlament Ewropew u tal-Kunsill (3), u tħassar bir-Regolament (UE) 2018/1139. F’konformità mal-Artikolu 140(2), il-punt (b), tar-Regolament (UE) 2018/1139, ir-Regolament (UE) Nru 1321/2014 għandu jiġi adattat għar-Regolament (UE) 2018/1139 fir-rigward tad-definizzjoni ta’ dak it-terminu.

(3)

Sabiex tittejjeb l-effiċjenza tas-sistema ta’ liċenzjar u taħriġ tal-manutenzjoni, huwa meħtieġ li jiġu introdotti bidliet fir-rekwiżiti rigward l-organizzazzjonijiet tal-liċenzji u tat-taħriġ tal-manutenzjoni stabbiliti fl-Anness III (il-Parti-66) u fl-Anness IV (il-Parti-147) tar-Regolament (UE) Nru 1321/2014.

(4)

B’mod partikolari, huwa meħtieġ li tiġi ffaċilitata l-approvazzjoni tal-klassifikazzjoni tat-tip ta’ inġenji tal-ajru fuq il-liċenzji tal-manutenzjoni meta ma jkun hemm l-ebda organizzazzjoni approvata f’konformità mal-Anness IV tar-Regolament (UE) Nru 1321/2014 li toffri taħriġ tat-tip fuq dak l-inġenju tal-ajru, filwaqt li jinżamm l-istess livell ta’ sikurezza u jinżammu wkoll kundizzjonijiet ekwi. Jeħtieġ ukoll li s-sillabu tat-taħriġ bażiku tal-persunal li jiċċertifika involut fil-manutenzjoni tal-inġenji tal-ajru jiġi aġġornat, li tittejjeb l-effiċjenza tat-“taħriġ fuq ix-xogħol” meħtieġ għall-ewwel approvazzjoni tal-klassifikazzjoni tat-tip fil-kategorija tal-liċenzja tal-manutenzjoni u li jiġu introdotti metodi ta’ taħriġ u teknoloġiji tat-tagħlim ġodda, flimkien ma’ titjib ieħor, bħala parti mill-aġġornament regolari tar-regoli f’dak l-Anness.

(5)

Għaldaqstant, ir-Regolament (UE) Nru 1321/2014 jenħtieġ li jiġi emendat skont dan.

(6)

L-emendi huma bbażati fuq l-Opinjoni Nru 07/2022 (4) tal-Aġenzija tas-Sikurezza tal-Avjazzjoni tal-Unjoni Ewropea f’konformità mal-Artikolu 75(2), il-punt (b), u l-Artikolu 76(1) tar-Regolament (UE) 2018/1139.

(7)

Jenħtieġ li jiġi pprovdut perjodu ta’ tranżizzjoni suffiċjenti għall-organizzazzjonijiet tat-taħriġ fil-manutenzjoni u għall-awtoritajiet tal-liċenzjar biex tiġi żgurata l-konformità tagħhom mar-regoli u mal-proċeduri l-ġodda introdotti b’dan ir-Regolament.

(8)

Ir-Regolament ta’ Implimentazzjoni tal-Kummissjoni (UE) 2022/1360 (5) emenda r-Regolament (UE) Nru 1321/2014 biex jinkludi referenzi għad-data u għall-informazzjoni użati għall-kontinwità tal-ajrunavigabbiltà stabbiliti f’konformità mal-Anness Ib il-ġdid tar-Regolament tal-Kummissjoni (UE) Nru 748/2012 (6).

(9)

Ir-Regolament ta’ Implimentazzjoni (UE) 2022/1360 ħassar b’mod involontarju l-punt (3) tal-punt M.A.302(d) tal-Anness I (il-Parti-M) tar-Regolament (UE) Nru 1321/2014 u l-punti (3) sa (9) tal-punt ML.A.302(c) tal-Anness Vb (il-Parti-ML) ta’ dak ir-Regolament, li kellhom jinżammu. Ir-Regolament ta’ Implimentazzjoni (UE) 2022/1360 żied ukoll b’mod involontarju punt ieħor (e) mal-punt M.A.502 tal-Anness I (il-Parti-M) tar-Regolament (UE) Nru 1321/2014, minflok issostitwieh.

(10)

Għalhekk, ir-Regolament (UE) Nru 1321/2014 jenħtieġ li jiġi kkoreġut skont dan.

(11)

Il-miżuri previsti f’dan ir-Regolament huma f’konformità mal-opinjoni tal-kumitat stabbilit bl-Artikolu 127 tar-Regolament (UE) 2018/1139,