(1)

Il-konklużjonijiet tal-Kunsill Ewropew tad-19 u l-20 ta Diċembru 2013 laqgħu t-tħejjijiet għall-ġenerazzjoni li jmiss ta’ komunikazzjoni governattiva bis-satellita permezz ta’ kooperazzjoni mill-qrib bejn l-Istati Membri, il-Kummissjoni u l-Aġenzija Spazjali Ewropea (ESA). Il-komunikazzjoni governattiva bis-satellita ġiet identifikata wkoll bħala waħda mill-elementi tal-Istrateġija Globali għall-Politika Estera u ta’ Sigurtà tal-Unjoni Ewropea ta’ Ġunju 2016. Il-komunikazzjoni governattiva bis-satellita għandha tikkontribwixxi għar-rispons tal-UE għat-Theddidiet Ibridi u tipprovdi appoġġ għall-Istrateġija tas-Sigurtà Marittima tal-UE u għall-politika tal-UE dwar l-Artiku.

(2)

Il-konklużjonijiet tal-Kunsill Ewropew tal-21 u t-22 ta’ Marzu 2019 enfasizzaw li l-Unjoni jeħtieġ li tkompli tiżviluppa ekonomija diġitali kompetittiva, sigura, inklużiva u etika b’konnettività ta’ klassi dinjija.

(3)

Il-Komunikazzjoni tal-Kummissjoni tat-22 ta’ Frar 2021, bit-titlu “Pjan ta’ Azzjoni dwar is-sinerġiji bejn l-industriji ċivili, tad-difiża u tal-ispazju” tgħid li l-għan hu jiġi ffaċilitat l-aċċess għal konnettività b’veloċità għolja għal kull persuna fl-Ewropa u li tiġi provduta sistema ta’ konnettività reżiljenti li permezz tagħha l-Ewropa tibqa’ konnessa jiġri x’jiġri.

(4)

“Boxxla Strateġika għal Sigurtà u Difiża” adottata mill-Kunsill fil-21 ta’ Marzu 2022 tirrikonoxxi li l-infrastruttura spazjali tal-Unjoni u tal-Istati Membri tagħha tikkontribwixxi għar-reżiljenza tagħna u toffri servizzi ewlenin li jissostitwixxu jew jikkomplementaw l-infrastrutturi tal-art għat-telekomunikazzjoni. Għalhekk tappella lill-Unjoni biex taħdem fuq il-proposta għal sistema ta’ komunikazzjoni sigura globali tal-Unjoni bbażata fl-ispazju.

(5)

Wieħed mill-komponenti importanti tal-Programm Spazjali tal-Unjoni, stabbilit mir-Regolament (UE) 2021/696 tal-Parlament Ewropew u tal-Kunsill (2) huwa GOVSATCOM, li għandu l-għan li jiżgura d-disponibbiltà fit-tul ta’ servizzi ta’ komunikazzjoni bis-satellita affidabbli, siguri, skalabbli u kosteffettivi għall-utenti ta’ GOVSATCOM. Ir-Regolament (UE) 2021/696 jipprevedi li fl-ewwel fażi tal-komponent ta’ GOVSATCOM, sa madwar l-2025, il-kapaċità eżistenti tiġi miġbura u kondiviża permezz taċ-Ċentru ta’ GOVSATCOM. F’dan il-kuntest, il-Kummissjoni għandha takkwista kapaċitajiet ta’ GOVSATCOM mill-Istati Membri b’sistemi nazzjonali u kapaċitajiet spazjali u minn fornituri tal-komunikazzjoni kummerċjali bis-satellita jew tas-servizzi, filwaqt li tqis l-interessi essenzjali tas-sigurtà tal-Unjoni.

F’dik l-ewwel fażi, is-servizzi ta’ GOVSATCOM għandhom jiġu introdotti abbażi ta’ approċċ gradwali, fid-dawl taż-żieda tal-kapaċitajiet tal-infrastruttura taċ-Ċentru ta’ GOVSATCOM. Dak l-approċċ huwa bbażat ukoll fuq il-premessa li jekk matul l-ewwel fażi, analiżi ddettaljata tal-provvista u tad-domanda fil-futur tiżvela li ma kienx biżżejjed biex ikopri d-domanda li tkun qed tevolvi, ser ikun neċessarju li tinbeda t-tieni fażi u li jiġu żviluppati infrastrutturi jew kapaċitajiet spazjali addizzjonali mfassla apposta permezz ta’ kooperazzjoni mas-settur privat, pereżempju mal-operaturi satellitari tal-Unjoni.

(6)

Fit-22 ta’ Marzu 2017, il-Kumitat Politiku u ta’ Sigurtà tal-Kunsill approva l-Ħtiġijiet tal-Utenti Militari Ċivili ta’ Livell Għoli għall-Komunikazzjoni Governattiva bis-Satellita (GOVSATCOM), li tħejjew mis-Servizz Ewropew għall-Azzjoni Esterna (SEAE) u li magħhom ġew integrati r-rekwiżiti tal-utenti militari identifikati mill-Aġenzija Ewropea għad-Difiża fl-Objettiv Komuni tal-Istat Maġġur tagħha adottata fl-2013 u l-ħtiġijiet tal-utenti ċivili miġbura mill-Kummissjoni. Analiżijiet sussegwenti mill-Kummissjoni wrew li l-offerta attwali tal-komunikazzjoni bis-satellita tal-Unjoni, abbażi tal-kapaċitajiet mill-Istati Membri b’sistemi nazzjonali kif ukoll tas-settur privat, ma tistax tissodisfa ċerti ħtiġijiet ġodda tad-domanda governattiva li qed jimxu lejn soluzzjonijiet ta’ sigurtà ogħla, latenza baxxa u kopertura globali. Jenħtieġ li dawk il-ħtiġijiet jiġu mmonitorjati u vvalutati mill-ġdid b’mod regolari.

(7)

Il-progress tekniku reċenti ppermetta li jitfaċċaw kostellazzjonijiet ta’ komunikazzjonijiet ta’ orbita mhux ġeostazzjonarja (NGSO) u gradwalment joffri servizzi ta’ konnettività b’veloċità għolja u b’latenza baxxa. Għalhekk hemm opportunità biex jiġu indirizzati l-ħtiġijiet li qed jevolvu tal-utenti awtorizzati mill gvernijiet billi tiġi żviluppata u implimentata infrastruttura addizzjonali peress li r-riżervi għall-frekwenzi mal-Unjoni Internazzjonali tat-Telekomunikazzjoni li huma neċessarji biex jiġu pprovduti s-servizzi meħtieġa bħalissa huma disponibbli fl-Unjoni Ewropea. Jekk ma jintużawx, dawk ir-riżervi għall-frekwenzi jsiru obsoleti u jiġu attribwiti lil atturi oħra. Peress li l-frekwenzi u s-slots orbitali huma riżorsa dejjem aktar skarsa, il-Kummissjoni, permezz ta’ proċess miftuħ u trasparenti mal-Istati Membri, jenħtieġ li taħtaf din l-opportunità biex tikkonkludi mal-Istati Membri li jipprovdu r-riżervi għall-frekwenzi, ftehimiet ta’ liċenzjar iddedikati għall-forniment ta’ servizzi governattivi bbażati fuq l-infrastruttura governattiva. Is-settur privat huwa responsabbli biex jikseb id-drittijiet fuq ir-riżervi għall-frekwenzi meħtieġa għall-forniment ta’ servizzi kummerċjali.

(8)

Hemm domanda dejjem akbar mill-atturi governattivi tal-Unjoni għal servizzi ta’ komunikazzjoni bis-satellita bbażati fl-ispazju li jkunu siguri u affidabbli, b’mod partikolari minħabba li jkunu l-aktar għażla vijabbli fin-nuqqas ta’ sistemi ta’ komunikazzjoni bbażati fuq l-art jew fejn jiġu mfixkla jew ma jkunux affidabbli. L-aċċess affordabbli u kosteffettiv għall-komunikazzjoni bis-satellita huwa indispensabbli wkoll f’żoni fejn ma hemm l-ebda infrastruttura terrestri, inkluż fuq l-oċeani, l-ispazju tal-ajru, f’żoni remoti u fejn l-infrastruttura terrestri tiffaċċa qtugħ serju jew ma tistax tiġi fdata f’sitwazzjonijiet ta’ kriżi. Il-komunikazzjoni bis-satellita tista’ żżid ir-reżiljenza ġenerali tan-networks ta’ komunikazzjoni, pereżempju billi toffri alternattiva fil-każ ta’ attakki fiżiċi jew attakki ċibernetiċi fuq infrastruttura terrestri lokali, inċidenti jew diżastri naturali jew ikkawżati mill-bniedem.

(9)

Jenħtieġ li l-Unjoni tiżgura l-forniment ta’ soluzzjonijiet ta’ komunikazzjoni bis-satellita li jkunu reżiljenti, globali, siguri, protetti, mingħajr interruzzjoni, garantiti u flessibbli għall-ħtiġijiet u r-rekwiżiti governattivi li qed jevolvu, mibnija fuq bażi teknoloġika u industrijali tal-Unjoni, sabiex tiżdied ir-reżiljenza tal-operazzjonijiet tal-Istati Membri u tal-istituzzjonijiet tal-Unjoni.

(10)

Għalhekk, huwa importanti li jiġi stabbilit programm ġdid, jiġifieri l-Programm tal-Unjoni għall-Konnettività Sigura (“il-Programm”) biex jipprevedi infrastruttura ta’ komunikazzjoni tal-Unjoni multiorbitali bbażata fuq is-satellita għall-użu governattiv, filwaqt li jiġu integrati u komplementati l-kapaċitajiet nazzjonali u Ewropej eżistenti u futuri fil-qafas tal-komponent ta’ GOVSATCOM, u tiġi żviluppata aktar u tiġi integrata gradwalment l-inizjattiva tal-Infrastruttura Ewropea ta’ Komunikazzjoni Kwantistika (EuroQCI) fis-sistema ta’ konnettività sigura.

(11)

Jenħtieġ li l-Programm jissodisfa l-ħtiġijiet governattivi ġodda għal soluzzjonijiet ta’ sigurtà ogħla, latenza baxxa u kopertura globali. Jenħtieġ li jiżgura l-forniment u d-disponibbiltà fit-tul ta’ aċċess globali mingħajr interruzzjoni għal servizzi ta’ komunikazzjoni governattivi bis-satellita siguri, awtonomi, affidabbli u kosteffettivi, li jappoġġaw ir-reżiljenza u l-protezzjoni tal-infrastruttura kritika, l-għarfien tas-sitwazzjoni, l-azzjonijiet esterni, il-ġestjoni tal-kriżijiet, kif ukoll applikazzjonijiet li huma kritiċi għall-ekonomija, is-sigurtà u d-difiża tal-Unjoni u tal-Istati Membri, li jintegra u jikkomplementa l-kapaċitajiet ta’ GOVSATCOM. Barra minn hekk, jenħtieġ li l-Programm jipprijoritizza t-twassil ta’ servizzi governattivi u jippermetti l-forniment ta’ servizzi kummerċjali mis-settur privat Ewropew, b’kunsiderazzjoni għal stħarriġ tas-suq li jkun jinkludi konsultazzjoni tal-utenti awtorizzati mill-gvernijiet, permezz ta’ infrastruttura kummerċjali.

(12)

Id-Deċiżjoni (UE) 2022/2481 tal-Parlament Ewropew u tal-Kunsill (3) tistabbilixxi serje ta’ objettivi u miri biex tippromwovi l-iżvilupp ta’ infrastrutturi diġitali reżiljenti, siguri, effiċjenti u sostenibbli fl-Unjoni filwaqt li tinkludi mira diġitali għall-Kummissjoni u għall-Istati Membri li tinkiseb konnettività tal-gigabits għal kulħadd sal-2030. Jenħtieġ li l-Programm jiffaċilita l-konnettività madwar l-Unjoni u madwar id-dinja, għaċ-ċittadini u n-negozji, inkluż, iżda mhux biss, l-għoti ta’ aċċess għal broadband b’veloċità għolja affordabbli li jista’ jgħin biex jitneħħew ż-żoni mejta għall-komunikazzjoni u tiżdied il-koeżjoni madwar l-Unjoni, inkluż fir-reġjuni ultraperiferiċi, iż-żoni rurali, periferiċi, remoti u iżolati tagħha u l-gżejjer. Is-servizzi satellitari attwalment ma jistgħux jissostitwixxu l-prestazzjoni tan-networks ibbażati fuq l-art iżda jistgħu jnaqqsu d-distakk diġitali u saħansitra jikkontribwixxu, fejn applikabbli, għall-objettivi ġenerali tad-Direttiva (UE) 2018/1972 tal-Parlament Ewropew u tal-Kunsill (4).

(13)

Għalhekk, jenħtieġ li l-Programm jikkonsisti fid-definizzjoni, it-tfassil, l-iżvilupp, il-validazzjoni u l-attivitajiet ta’ implimentazzjoni relatati għall-kostruzzjoni tal-infrastruttura spazjali u tal-art inizjali, meħtieġa għall-forniment tal-ewwel servizzi governattivi. Jenħtieġ li l-Programm imbagħad ikun jinvolvi attivitajiet ta’ implimentazzjoni gradwali mmirati lejn it-tlestija kemm tal-infrastruttura spazjali kif ukoll dik tal-art meħtieġa għall-forniment ta’ servizzi governattivi avvanzati, li bħalissa mhumiex disponibbli u li huma lil hinn mill-ogħla livell ta’ żvilupp tekniku tas-servizzi Ewropej eżistenti ta’ komunikazzjoni bis-satellita. Barra minn hekk, jenħtieġ li l-Programm jippromwovi l-iżvilupp ta’ terminals tal-utenti li jkunu kapaċi jisfruttaw is-servizzi ta’ komunikazzjoni avvanzati. Jenħtieġ li l-attivitajiet ta’ sfruttament jibdew mill-aktar fis possibbli bil-forniment tal-ewwel servizzi governattivi mmirati sal-2024, sabiex il-ħtiġijiet tal-utenti awtorizzati mill-gvernijiet jiġu ssodisfati kemm jista’ jkun malajr. Jenħtieġ li l-Programm imbagħad jinvolvi attivitajiet mmirati lejn it-tlestija kemm tal-infrastruttura spazjali kif ukoll dik tal-art meħtieġa għal kapaċità operazzjonali sħiħa sal-2027. Jenħtieġ li l-forniment ta’ servizzi governattivi, l-operat, il-manutenzjoni u t-titjib kontinwu tal-infrastruttura spazjali u tal-art, ladarba implimentata, kif ukoll l-iżvilupp tal-ġenerazzjonijiet futuri tas-servizzi governattivi, ikunu parti mill-attivitajiet ta’ sfruttament.

(14)

F’Ġunju 2019, l-Istati Membri ffirmaw id-Dikjarazzjoni dwar l-Infrastruttura Ewropea ta’ Komunikazzjoni Kwantistika (EuroQCI) (id-“Dikjarazzjoni”), fejn qablu li jaħdmu flimkien, mal-Kummissjoni u bl-appoġġ tal-ESA, lejn l-iżvilupp ta’ infrastruttura ta’ komunikazzjoni kwantistika li tkopri l-Unjoni kollha. F’konformità mad-Dikjarazzjoni, l-EuroQCI għandha l-għan li timplimenta infrastruttura ta’ komunikazzjoni kwantistika sigura ċċertifikata minn tarf sa tarf, li tippermetti li l-informazzjoni u d-data jiġu trażmessi u maħżuna u li tkun kapaċi tgħaqqad l-assi kritiċi ta’ komunikazzjoni pubblika madwar l-Unjoni. Il-Programm ser jikkontribwixxi biex jintlaħqu l-objettivi tad-Dikjarazzjoni billi jiżviluppa infrastruttura spazjali u tal-art tal-EuroQCI integrata fl-infrastruttura governattiva tal-Programm, kif ukoll billi jiżviluppa u jimplimenta l-infrastruttura terrestri tal-EuroQCI, li ser tkun proprjetà tal-Istati Membri. Jenħtieġ li l-infrastruttura spazjali, tal-art u dik terrestri tal-EuroQCI tiġi żviluppata fi ħdan il-Programm f’żewġ fażijiet prinċipali, fażi ta’ validazzjoni preliminari, li tista’ tinvolvi l-iżvilupp u l-validazzjoni ta’ diversi teknoloġiji u protokolli ta’ komunikazzjoni differenti, u fażi sħiħa ta’ implimentazzjoni, li tinkludi soluzzjonijiet xierqa għall-konnettività intersatellitari u t-trażmissjoni tad-data bejn is-satelliti, l-art u l-infrastruttura terrestri.

(15)

Waħda mill-funzjonijiet ewlenin tal-EuroQCI ser tkun li tippermetti d-distribuzzjoni kwantistika ta’ kjavi kriptografiċi (QKD). Sal-lum, it-teknoloġija u l-prodotti tal-QKD mhumiex maturi biżżejjed biex jintużaw għall-protezzjoni ta’ informazzjoni klassifikata tal-UE (IKUE). Il-kwistjonijiet ewlenin li jikkonċernaw is-sigurtà tal-QKD, bħall-istandardizzazzjoni tal-protokolli tal-QKD, l-analiżi tal-kanali laterali u l-metodoloġija tal-evalwazzjoni, għadhom iridu jiġu solvuti. Għalhekk, jenħtieġ li l-Programm jappoġġa l-EuroQCI u jippermetti l-inklużjoni ta’ prodotti kriptografiċi approvati fl-infrastruttura meta jkunu disponibbli.

(16)

Sabiex l-IKUE tiġi protetta b’mod sodisfaċenti u sigur, jenħtieġ li s-soluzzjonijiet primarji biex jiġi miġġieled it-theddid maħluq mill-computing kwantistiku jkunu l-kombinazzjoni ta’ soluzzjonijiet konvenzjonali, kriptografija postkwantistika u possibbilment QKD f’approċċi ibridi. Għalhekk, jenħtieġ li l-Programm juża tali approċċi, bl-għan li jiżgura kemm kriptografija tal-ogħla livell kif ukoll distribuzzjoni ta’ kjavi.

(17)

Sabiex jiġu estiżi l-kapaċitajiet ta’ komunikazzjoni bis-satellita tal-Unjoni, jenħtieġ li l-infrastruttura tal-Programm tkun ibbażata fuq, tintegra u tikkumplimenta l-infrastruttura żviluppata għall-finijiet tal-komponent ta’ GOVSATCOM. B’mod partikolari, jenħtieġ li l-infrastruttura tal-art tal-Programm tkun ibbażata fuq iċ-Ċentri ta’ GOVSATCOM, kif miżjuda progressivament abbażi tal-ħtiġijiet tal-utenti permezz ta’ assi oħra tas-segment tal-art, inkluż dawk tal-Istati Membri li lesti jikkontribwixxu addizzjonalment, abbażi ta’ rekwiżiti operazzjonali u ta’ sigurtà.

(18)

Jenħtieġ li l-Programm itejjeb il-konnettività sigura fuq żoni ġeografiċi ta’ interess strateġiku, bħall-Afrika u l-Artiku, kif ukoll il-Baltiku, il-Baħar l-Iswed, ir-reġjuni tal-Mediterran u l-Atlantiku. Jenħtieġ li s-servizzi pprovduti skont il-Programm jikkontribwixxu wkoll għar-reżiljenza ġeopolitika billi joffru konnettività addizzjonali f’konformità mal-miri ta’ politika f’dawk ir-reġjuni u mal-Komunikazzjoni Konġunta tal-Kummissjoni u tar-Rappreżentant Għoli tal-Unjoni għall-Affarijiet Barranin u l-Politika ta’ Sigurtà tal-1 ta’ Diċembru 2021 bit-titlu “Il-Global Gateway”.

(19)

Mingħajr preġudizzju għas-servizz ta’ komunikazzjoni, is-satelliti mibnija għall-finijiet tal-Programm jistgħu jiġu mgħammra b’subsistemi, inkluż tagħbijiet utli, li jistgħu jippermettu ż-żieda tal-kapaċità u s-servizzi tal-komponenti tal-Programm Spazjali tal-Unjoni, biex b’hekk jiġi ffaċilitat l-iżvilupp tas-servizzi mhux ta’ komunikazzjoni addizzjonali li għandhom jiġu deċiżi mill-kumitat tal-Programm li jiltaqa’ fil-konfigurazzjoni rilevanti, kif stabbilit fir-Regolament (UE) 2021/696, u implimentati taħt il-kondizzjonijiet stabbiliti f’dan ir-Regolament. Jekk il-benefiċċju għall-komponenti tal-Programm Spazjali tal-Unjoni jiġi stabbilit kif xieraq, filwaqt li jitqiesu l-ħtiġijiet tal-utenti u r-restrizzjonijiet baġitarji, dawk is-subsistemi jistgħu jiġu żviluppati biex joffru servizzi alternattivi ta’ pożizzjonament, navigazzjoni u kronometraġġ li jikkomplementaw lil Galileo, biex jiġi żgurat ix-xandir ta’ messaġġi bis-Sistema Ewropea ta’ Navigazzjoni b’Kopertura Ġeostazzjonarja (EGNOS) b’latenza aktar baxxa, jiġu pprovduti sensuri bbażati fuq l-ispazju għas-sorveljanza spazjali u jiġi appoġġat it-tisħiħ tal-kapaċitajiet attwali ta’ Copernicus, b’mod partikolari għas-servizzi ta’ emerġenza u ta’ sigurtà ċivili. Barra minn hekk, dawk is-subsistemi jistgħu jipprovdu servizzi mhux ta’ komunikazzjoni lis-sistemi tal-Istati Membri, bil-kondizzjoni li dan ma jkollux impatt fuq is-sigurtà u l-baġit tal-Programm.

(20)

Meta titqies l-importanza għall-Programm tal-infrastruttura governattiva tal-art tiegħu u l-impatt tagħha fuq is-sigurtà tiegħu, jenħtieġ li l-pożizzjoni ta’ tali infrastruttura tiġi ddeterminata mill-Kummissjoni, f’konformità mar-rekwiżiti ġenerali tas-sigurtà u wara proċess miftuħ u trasparenti, bil-ħsieb li tiġi żgurata distribuzzjoni bbilanċjata fost l-Istati Membri. L-implimentazzjoni tal-infrastruttura governattiva tal-art tal-Programm, li tintegra wkoll l-infrastruttura żviluppata taħt il-komponent ta’ GOVSATCOM, tista’ tinvolvi lill-Aġenzija tal-Unjoni Ewropea għall-Programm Spazjali (“l-Aġenzija”) jew, fejn xieraq u fi ħdan il-qasam ta’ kompetenza tagħha, lill-ESA.

(21)

Huwa vitali għas-sigurtà tal-Unjoni u tal-Istati Membri tagħha u għall-iżgurar tas-sigurtà u l-integrità tas-servizzi governattivi, li l-assi spazjali tal-Programm jiġu mnedija mit-territorju tal-Unjoni. F’ċirkostanzi eċċezzjonali u sostanzjati kif xieraq, jenħtieġ li jkun possibbli li tali llanċjar isir mit-territorju ta’ pajjiż terz. Minbarra lanċjaturi tqal u medji, lanċjaturi żgħar u mikrolanċjaturi jistgħu jipprovdu flessibbiltà addizzjonali biex jippermettu skjerament rapidu tal-assi spazjali.

(22)

Huwa importanti li l-Unjoni jkollha fil-pussess tagħha l-assi tanġibbli u intanġibbli kollha relatati mal-infrastruttura governattiva żviluppata taħt il-Programm, ħlief l-infrastruttura terrestri tal-EuroQCI, filwaqt li tiżgura l-konformità tal-Karta tad-Drittijiet Fundamentali tal-Unjoni Ewropea, inkluż l-Artikolu 17 tagħha. Jenħtieġ li minkejja s-sjieda mill-Unjoni ta’ dawk l-assi, ikun possibbli għall-Unjoni, f’konformità ma’ dan ir-Regolament u, fejn jitqies xieraq fuq valutazzjoni ta’ każ b’każ, li dawk l-assi jsiru disponibbli għal partijiet terzi jew li jiġu mneħħija.

(23)

Inizjattivi fl-Unjoni kollha, bħall-inizjattiva ta’ konnettività sigura, huma msawra mill-parteċipazzjoni wiesgħa ta’ intrapriżi żgħar u ta’ daqs medju (SMEs), negozji ġodda u intrapriżi kbar mis-settur spazjali upstream u downstream madwar l-Unjoni. F’dawn l-aħħar snin, xi atturi spazjali sfidaw is-settur spazjali, b’mod partikolari n-negozji ġodda u l-SMEs li żviluppaw teknoloġiji u applikazzjonijiet spazjali innovattivi u mmexxija mis-suq, xi drabi b’mudelli ta’ negozju differenti. Sabiex tiġi żgurata l-kompetittività tal-ekosistema spazjali tal-Unjoni, jenħtieġ li l-Programm jimmassimizza l-użu ta’ teknoloġiji innovattivi u fixkiela, kif ukoll mudelli ta’ negozju ġodda żviluppati mill-ekosistema spazjali Ewropea, inkluż New Space, b’mod partikolari minn SMEs, minn kumpaniji b’kapitalizzazzjoni medja u minn negozji ġodda li jiżviluppaw teknoloġiji u applikazzjonijiet spazjali ġodda xprunati mis-suq, filwaqt li tkun koperta l-katina tal-valur spazjali kollha li tinkludi s-segment upstream u dak downstream.

(24)

Huwa essenzjali li jiġi mħeġġeġ l-investiment mis-settur privat permezz ta’ akkwist u aggregazzjoni xierqa ta’ kuntratti ta’ servizz, biex b’hekk titnaqqas l-inċertezza u jiġu pprovduti viżibilità u prevedibbiltà fit-tul tal-ħtiġijiet tas-servizzi tas-settur pubbliku. Sabiex tiġi żgurata l-kompetittività tal-industrija spazjali Ewropea fil-futur, jenħtieġ ukoll li l-Programm jikkontribwixxi għall-iżvilupp ta’ ħiliet avvanzati f’oqsma relatati mal-ispazju u jappoġġa lill-attivitajiet ta’ edukazzjoni u taħriġ, kif ukoll jippromwovi opportunitajiet indaqs, l-ugwaljanza bejn il-ġeneri u t-tisħiħ tal-pożizzjoni tan-nisa, sabiex jintlaħaq il-potenzjal sħiħ taċ-ċittadini tal-Unjoni f’dak il-qasam.

(25)

F’konformità mal-objettivi stipulati fil-Komunikazzjoni tal-Kummissjoni tal-11 ta’ Diċembru 2019 bit-titlu “Il-Patt Ekoloġiku Ewropew”, jenħtieġ li l-Programm jimminimizza, sa fejn ikun possibbli, l-impatt ambjentali tiegħu. Filwaqt li l-assi fl-ispazju huma nfushom ma jarmux gassijiet serra waqt li jkunu qed jintużaw, il-manifattura tagħhom u l-faċilitajiet tal-art assoċjati għandhom impatt ambjentali. Jenħtieġ li jiġu adottati miżuri biex jiġi mitigat dak l-impatt. Għal dak il-għan, jenħtieġ li l-akkwist imsemmi taħt il-Programm jinkludi prinċipji u miżuri dwar is-sostenibbiltà, bħal dispożizzjonijiet biex jiġu minimizzati u kkumpensati l-emissjonijiet ta’ gassijiet serra ġġenerati mill-iżvilupp, il-produzzjoni u l-implimentazzjoni tal-infrastruttura, u miżuri għall-prevenzjoni tat-tniġġis tad-dawl, bħall-impatt fuq osservazzjonijiet astronomiċi bbażati fuq l-art.

(26)

Minħabba l-għadd dejjem jikber ta’ inġenji spazjali u residwi spazjali fl-orbita, jenħtieġ li l-kostellazzjoni Ewropea l-ġdida tissodisfa wkoll il-kriterji tas-sostenibbiltà tal-ispazju u tkun eżempju ta’ prattiki tajba fil-ġestjoni tat-traffiku spazjali u fis-sorveljanza u insegwiment fl-ispazju (SST), sabiex jitnaqqas l-ammont ta’ residwi spazjali, jiġu evitati ħsarat fl-orbita u kolliżjoni fl-orbita, u jiġu pprovduti miżuri xierqa għat-tmiem tal-ħajja tal-inġenji spazjali. Peress li tħassib leġittimu dwar il-protezzjoni tal-ambjent spazjali li qed jiġi diskuss f’fora internazzjonali, bħal fil-Kumitat tan-Nazzjonijiet Uniti dwar l-Użu Paċifiku tal-Ispazju, huwa ta’ importanza assoluta li l-Unjoni turi tmexxija fis-sostenibbiltà spazjali. Jenħtieġ li l-kuntratti akkwistati taħt il-Programm jiżguraw li t-teknoloġija użata tippermetti l-ogħla standards possibbli f’dak li għandu x’jaqsam mas-sostenibbiltà, kif ukoll l-effiċjenza fl-enerġija u fir-riżorsi.

(27)

Jenħtieġ li r-rekwiżiti operazzjonali għas-servizzi governattivi jkunu bbażati fuq il-valutazzjoni tal-ħtiġijiet tal-utenti awtorizzati mill-gvernijiet, filwaqt li jitqiesu wkoll il-kapaċitajiet tal-offerti attwali tas-suq. Meta jiġu vvalutati dawk ir-rekwiżiti jenħtieġ li l-kapaċitajiet attwali tas-suq jintużaw kemm jista’ jkun possibbli. Minn dawk ir-rekwiżiti operazzjonali, flimkien mar-rekwiżiti ġenerali tas-sigurtà u d-domanda li qed tevolvi tas-servizzi governattivi, jenħtieġ li jiġi żviluppat il-portafoll għas-servizzi governattivi. Jenħtieġ li dak il-portafoll tas-servizzi jistabbilixxi l-linja bażi applikabbli għas-servizzi governattivi. Jenħtieġ li jidentifika wkoll il-kategoriji tas-servizzi li jikkomplementaw il-portafoll tas-servizzi ta-servizzi ta’ GOVSATCOM stabbilit fil-qafas tar-Regolament (UE) 2021/696. Jenħtieġ li l-Kummissjoni tiżgura l-konsistenza u l-koerenza tar-rekwiżiti operazzjonali u tas-sigurtà bejn il-komponent ta’ GOVSATCOM u l-Programm. Sabiex tinżamm l-aqwa konkordanza possibbli bejn id-domanda u s-servizzi pprovduti, jenħtieġ li l-portafoll tas-servizzi għas-servizzi governattivi jiġi identifikat fl-2023 u jenħtieġ li jkun jista’ jiġi aġġornat regolarment, wara konsultazzjoni tal-Istati Membri, abbażi ta’ dawk ir-rekwiżiti operazzjonali u ta’ sigurtà.

(28)

Il-komunikazzjonijiet bis-satellita mhumiex riżorsa infinita u huma limitati mill-kapaċità satellitari, mill-frekwenza u mill-kopertura ġeografika. Għaldaqstant, sabiex ikun kosteffettiv u jikkapitalizza fuq l-ekonomiji ta’ skala, jenħtieġ li l-Programm jottimizza l-konkordanza bejn il-provvista u d-domanda tas-servizzi governattivi u jevita kapaċità żejda. Peress li d-domanda u l-provvista potenzjali t-tnejn jinbidlu maż-żmien, jenħtieġ li l-Kummissjoni timmonitorja l-ħtiġijiet biex taġġusta l-portafoll għas-servizzi governattivi kull meta dan jidher li jkun meħtieġ.

(29)

Jenħtieġ li l-Istati Membri, il-Kunsill, il-Kummissjoni u s-SEAE, kif ukoll l-aġenziji u l-korpi tal-Unjoni jkunu jistgħu jsiru parteċipanti tal-Programm, skont ma jagħżlu li jawtorizzaw utenti ta’ servizzi governattivi jew jipprovdu kapaċitajiet, siti jew faċilitajiet. Meta wieħed iqis li hija f’idejn l-Istati Membri li jiddeċiedi jekk jawtorizzax utenti nazzjonali tas-servizzi governattivi, jenħtieġ li l-Istati Membri ma jkunux obbligati jikkontribwixxu għall-Programm jew jospitaw l-infrastruttura tal-Programm.

(30)

Jenħtieġ li kull parteċipant tal-Programm jiddeżinja awtorità kompetenti għal konnettività sigura biex timmonitorja jekk l-utenti, u entitajiet nazzjonali oħra li għandhom rwol fil-Programm, jikkonformawx mar-regoli u l-proċeduri ta’ sigurtà applikabbli, kif stabbilit fir-rekwiżiti ġenerali tas-sigurtà. Il-parteċipanti tal-Programm jistgħu jassenjaw il-funzjonijiet ta’ tali awtorità lil awtorità eżistenti.

(31)

Dan ir-Regolament jistabbilixxi pakkett finanzjarju għat-tul kollu tal-Programm, li għandu jikkostitwixxi l-ammont ta’ referenza primarja, skont it-tifsira tal-punt 18 tal-Ftehim Interistituzzjonali tas-16 ta’ Diċembru 2020 bejn il-Parlament Ewropew, il-Kunsill tal-Unjoni Ewropea u l-Kummissjoni Ewropea dwar dixxiplina baġitarja, dwar kooperazzjoni f’materji baġitarji u dwar ġestjoni finanzjarja tajba, kif ukoll dwar riżorsi proprji ġodda, inkluż pjan direzzjonali lejn l-introduzzjoni ta’ riżorsi proprji ġodda (5), għall-Parlament Ewropew u għall-Kunsill matul il-proċedura baġitarja annwali.

(32)

L-objettivi tal-Programm huma konsistenti u komplementari ma’ dawk ta’ programmi oħra tal-Unjoni, b’mod partikolari Orizzont Ewropa, stabbilit bir-Regolament (UE) 2021/695 tal-Parlament Ewropew u tal-Kunsill (6) u d-Deċiżjoni tal-Kunsill (UE) 2021/764 (7), il-Programm Ewropa Diġitali, stabbilit bir-Regolament (UE) 2021/694 tal-Parlament Ewropew u tal-Kunsill (8), l-Istrument ta’ Viċinat, ta’ Kooperazzjoni għall-Iżvilupp u ta’ Kooperazzjoni Internazzjonali — Ewropa Globali, stabbilit bir-Regolament (UE) 2021/947 tal-Parlament Ewropew u tal-Kunsill (9), il-Faċilità Nikkollegaw l-Ewropa, stabbilita bir-Regolament (UE) 2021/1153 tal-Parlament Ewropew u tal-Kunsill (10) u, b’mod partikolari, il-Programm Spazjali tal-Unjoni.

(33)

Orizzont Ewropa ser jalloka sehem dedikat mill-komponenti tiegħu tar-Raggruppament “Diġitali, Industrija u Spazju” għall-attivitajiet ta’ riċerka u innovazzjoni relatati mal-iżvilupp u l-validazzjoni tas-sistema ta’ konnettività sigura, inkluż għat-teknoloġiji potenzjali li jiġu żviluppati taħt l-ekosistema spazjali, inkluż Spazju Ġdid. L-Istrument ta’ Viċinat, ta’ Kooperazzjoni għall-Iżvilupp u ta’ Kooperazzjoni Internazzjonali — Ewropa Globali (NDICI) ser jalloka sehem dedikat tal-fondi ta’ Ewropa Globali tiegħu għal attivitajiet relatati mal-operat tas-sistema ta’ konnettività sigura. u mal-forniment ta’ servizzi mad-dinja kollha, u dan ser jagħmilha possibbli li jiġu offruti firxa ta’ servizzi lis-sħab internazzjonali. Il-Programm Spazjali tal-Unjoni ser jalloka sehem dedikat tal-komponent ta’ GOVSATCOM għall-attivitajiet relatati mal-iżvilupp taċ-Ċentru ta’ GOVSATCOM li ser jifforma parti mill-infrastruttura tal-art tas-sistema ta’ konnettività sigura. Jenħtieġ li l-finanzjament li joriġina minn dawn il-programmi jiġi implimentat f’konformità mar-regoli ta’ dawn il-programmi.

(34)

Minħabba l-implikazzjonijiet inerenti tiegħu fuq is-sigurtà tal-Unjoni u tal-Istati Membri tagħha, il-Programm jikkondividi wkoll objettivi u prinċipji mal-Fond Ewropew għad-Difiża, stabbilit bir-Regolament (UE) 2021/697 tal-Parlament Ewropew u tal-Kunsill (11). Jenħtieġ li għalhekk, parti mill-finanzjament mill-Fond Ewropew għad-Difiża tiġi pprovduta biex tiffinanzja l-attivitajiet taħt il-Programm, b’mod partikolari l-attivitajiet relatati mal-implimentazzjoni tal-infrastruttura tiegħu.

(35)

Sabiex jiġi żgurat li l-Programm jiġi implimentat b’suċċess, huwa importanti li jiġi żgurat li jkun hemm riżorsi biżżejjed disponibbli. Jenħtieġ li l-Istati Membri jkunu jistgħu jikkontribwixxu bil-kompetenza teknika, bl-għarfien espert u bl-assistenza tagħhom, b’mod partikolari fl-oqsma tas-sikurezza u s-sigurtà, jew, fejn xieraq u possibbli, billi jagħmlu disponibbli għall-Programm id-data, l-informazzjoni, is-servizzi u l-infrastruttura li jinsabu fit-territorju tagħhom. Jenħtieġ li l-Programm ikun kapaċi jirċievi kontribuzzjonijiet finanzjarji addizzjonali jew kontribuzzjonijiet in natura minn partijiet terzi, inkluż aġenziji u korpi tal-Unjoni, Stati Membri, pajjiżi terzi li jipparteċipaw fil-Programm jew organizzazzjonijiet internazzjonali, f’konformità mal-ftehimiet rilevanti.

(36)

Ir-Regolament (UE, Euratom) 2018/1046 tal-Parlament Ewropew u tal-Kunsill (12) (ir-“Regolament Finanzjarju”) japplika għall-Programm. Ir-Regolament Finanzjarju jistabbilixxi regoli dwar l-implimentazzjoni tal-baġit tal-Unjoni, inkluż ir-regoli dwar għotjiet, premjijiet, akkwist pubbliku, ġestjoni indiretta, strumenti finanzjarji, garanziji baġitarji, assistenza finanzjarja u r-rimborż ta’ esperti esterni.

(37)

F’konformità mal-Artikolu 191(3) tar-Regolament Finanzjarju, fl-ebda ċirkostanza ma għandhom jiġu ffinanzjati darbtejn l-istess kostijiet mill-baġit tal-Unjoni.

(38)

Jenħtieġ li l-Kummissjoni tkun tista’ tirrikorri, kif meħtieġ u sa fejn ikun neċessarju, għall-assistenza teknika ta’ ċerti partijiet esterni, dment li l-interessi tas-sigurtà tal-Unjoni jiġu ppreżervati. Jenħtieġ li entitajiet oħra involuti fil-governanza pubblika tal-Programm ikunu jistgħu ukoll jużaw l-istess assistenza teknika fit-twettiq tal-kompiti inkarigati lilhom skont dan ir-Regolament.

(39)

Jenħtieġ li l-kuntratti pubbliċi konklużi taħt il-Programm għall-attivitajiet iffinanzjati mill-Programm jikkonformaw mar-regoli tal-Unjoni. Jenħtieġ li f’dak il-kuntest, l-Unjoni tkun responsabbli wkoll għad-definizzjoni tal-objettivi li jridu jintlaħqu fir-rigward tal-akkwist pubbliku.

(40)

Il-Programm jiddependi fuq teknoloġiji kumplessi u li jinbidlu b’mod kostanti. Id-dipendenza fuq tali teknoloġiji tirriżulta f’inċertezza u f’riskji għall-kuntratti pubbliċi konklużi taħt il-Programm, peress li dawk il-kuntratti jinvolvu impenji fit-tul għat-tagħmir jew is-servizzi. Għalhekk, minbarra r-regoli stabbiliti fir-Regolament Finanzjarju, huma meħtieġa miżuri speċifiċi li jikkonċernaw il-kuntratti pubbliċi. Jenħtieġ, għalhekk, li jkun possibbli li jiġi impost livell minimu ta’ sottokuntrattar. Jenħtieġ li fir-rigward ta’ dan tal-aħħar, tingħata prijorità, fejn possibbli, lin-negozji ġodda u lill-SMEs, b’mod partikolari sabiex tkun faċilitata l-parteċipazzjoni transfruntiera tagħhom.

(41)

Sabiex jintlaħqu l-objettivi tal-Programm, huwa importanti li, fejn ikun xieraq, wieħed ikun jista’ jibbaża fuq il-kapaċitajiet offruti mill-entitajiet pubbliċi u privati tal-Unjoni li jkunu attivi fil-qasam spazjali, u li jkun jista’ jaħdem ukoll fil-livell internazzjonali ma’ pajjiżi terzi jew ma’ organizzazzjonijiet internazzjonali. Għal dik ir-raġuni, jeħtieġ li tiġi prevista l-possibbiltà li jintużaw l-għodod u l-metodi ta’ ġestjoni rilevanti kollha previsti mit-Trattat dwar il-Funzjonament tal-Unjoni Ewropea (TFUE) u mir-Regolament Finanzjarju u proċeduri konġunti tal-akkwist.

(42)

Il-kooperazzjoni pubblika-privata hija l-aktar skema xierqa biex biha jiġi żgurat li l-objettivi tal-Programm ikunu jistgħu jiġu segwiti. Jenħtieġ li tippermetti li wieħed jibni fuq il-bażi teknoloġika u industrijali eżistenti tal-komunikazzjoni bis-satellita tal-Unjoni, inkluż l-assi privati, u tipprovdi servizzi governattivi robusti u innovattivi, u tippermetti lis-sħab privati jikkomplementaw l-infrastruttura tal-Programm b’kapaċitajiet addizzjonali biex joffru servizzi kummerċjali bil-kundizzjonijiet tas-suq permezz ta’ investimenti proprji addizzjonali. Barra minn hekk, jenħtieġ li skema bħal din tottimizza l-ispejjeż tal-implimentazzjoni u tal-operat billi tikkondividi l-ispejjeż tal-iżvilupp u tal-implimentazzjoni fuq komponenti komuni kemm għall-infrastrutturi governattivi kif ukoll għal dawk kummerċjali, kif ukoll għall-ispejjeż operazzjonali billi tippermetti livell għoli ta’ mutwalizzazzjoni tal-kapaċità. Jenħtieġ li tistimula wkoll l-innovazzjoni fl-ekosistema spazjali Ewropea, inkluż Spazju Ġdid, billi tippermetti l-kondiviżjoni tar-riskji tar-riċerka u l-iżvilupp bejn is-sħab pubbliċi u dawk privati.

(43)

Għall-implimentazzjoni tal-Programm, jenħtieġ li l-kuntratti ta’ konċessjoni, il-provvista, is-servizzi, il-kuntratti ta’ xogħlijiet jew il-kuntratti mħallta jsegwu l-prinċipji ewlenin. Jenħtieġ li tali kuntratti jistabbilixxi distribuzzjoni ċara tal-kompiti u tar-responsabbiltajiet bejn is-sħab pubbliċi u privati, inkluż allokazzjoni ċara tar-riskji bejniethom, bil-ħsieb li jiġi żgurat li l-kuntratturi jassumu r-responsabbiltà għall-konsegwenzi ta’ kwalunkwe nuqqas li huma responsabbli għalih. Jenħtieġ li l-kuntratti jiżguraw li l-kuntratturi ma jirċevux kumpens żejjed għall-forniment ta’ servizzi governattivi, jippermettu li l-forniment ta’ servizzi kummerċjali jiġi stabbilit mis-settur privat u jiżguraw prijoritizzazzjoni xierqa tal-ħtiġijiet tal-utenti awtorizzati mill-gvernijiet. Jenħtieġ li l-kuntratti jiżguraw li l-forniment ta’ servizzi bbażati fuq infrastruttura kummerċjali jippreżerva l-interessi essenzjali tal-Unjoni u l-objettivi ġenerali u speċifiċi tal-Programm. Huwa għalhekk importanti li jkun hemm miżuri fis-seħħ biex jiżguraw li dawk l-interessi essenzjali u l-objettivi jiġu ppreżervati. B’mod partikolari, jenħtieġ li l-Kummissjoni tkun tista’ tieħu l-miżuri meħtieġa biex tiżgura l-kontinwità tas-servizz fil-każ li l-kuntrattur ma jkunx jista’ jaqdi l-obbligi tiegħu.

Jenħtieġ li l-kuntratti jinkludu salvagwardji adegwati biex jipprevjenu, fost l-oħrajn, kunflitti ta’ interess u distorsjonijiet potenzjali tal-kompetizzjoni li jirriżultaw mill-forniment ta’ servizzi kummerċjali, diskriminazzjoni bla bżonn jew kwalunkwe vantaġġ indirett moħbi ieħor. Tali salvagwardji jistgħu jinkludu s-separazzjoni tal-kontijiet bejn is-servizzi governattivi u kummerċjali, inkluż l-istabbiliment ta’ entità strutturalment u legalment separata mill-operatur integrat vertikalment għall-forniment ta’ servizzi governattivi, kif ukoll aċċess miftuħ, ġust, raġonevoli u mhux diskriminatorju għall-infrastruttura meħtieġ għall-forniment ta’ servizzi kummerċjali. Jenħtieġ li għalhekk, is-servizzi kummerċjali jkunu disponibbli għall-fornituri tas-servizzi terrestri eżistenti b’kondizzjonijiet trasparenti u mhux diskriminatorji. Jenħtieġ li l-kuntratti jrawmu l-parteċipazzjoni ta’ negozji ġodda u SMEs tul il-katina tal-valur kollha u fl-Istati Membri.

(44)

Objettiv importanti tal-Programm huwa li jiżgura s-sigurtà tal-Unjoni u tal-Istati Membri u li jsaħħaħ ir-reżiljenza fit-teknoloġiji ewlenin u fil-ktajjen tal-valur, filwaqt li jippreżerva ekonomija miftuħa. F’każijiet speċifiċi, dak l-objettiv jirrikjedi li jiġu stabbiliti kondizzjonijiet għall-eliġibbiltà u l-parteċipazzjoni, sabiex tiġi żgurata l-protezzjoni tal-integrità, is-sigurtà u r-reżiljenza tas-sistemi operazzjonali tal-Unjoni. Jenħtieġ li dan ma jdgħajjifx il-ħtieġa ta’ kompetittività u kosteffettività.

(45)

F’konformità mar-Regolament Finanzjarju, ir-Regolament (UE, Euratom) Nru 883/2013 tal-Parlament Ewropew u tal-Kunsill (13) u r-Regolamenti tal-Kunsill (Euratom, KE) Nru 2988/95 (14), (Euratom, KE) Nru 2185/96 (15) u (UE) 2017/1939 (16), l-interessi finanzjarji tal-Unjoni jridu jiġu protetti permezz ta’ miżuri proporzjonati, inkluż miżuri relatati mal-prevenzjoni, is-sejbien, il-korrezzjoni u l-investigazzjoni ta’ irregolaritajiet inkluż frodi, l-irkupru ta’ fondi mitlufa, imħallsa bi żball jew użati b’mod mhux korrett, u, fejn xieraq, l-impożizzjoni ta’ penali amministrattivi. B’mod partikolari, skont ir-Regolamenti (Euratom, KE) Nru 2185/96 u (UE, Euratom) Nru 883/2013 l-Uffiċċju Ewropew Kontra l-Frodi (OLAF) għandu s-setgħa li jwettaq investigazzjonijiet amministrattivi, inkluż kontrolli u spezzjonijiet fuq il-post, bil-ħsieb li jistabbilixxi jekk kienx hemm frodi, korruzzjoni jew kwalunkwe attività illegali oħra li taffettwa l-interessi finanzjarji tal-Unjoni.

L-Uffiċċju tal-Prosekutur Pubbliku Ewropew (UPPE) għandu s-setgħa, skont ir-Regolament (UE) 2017/1939, li jinvestiga u jressaq għall-prosekuzzjoni reati kriminali li jaffettwaw l-interessi finanzjarji tal-Unjoni kif previst fid-Direttiva (UE) 2017/1371 tal-Parlament Ewropew u tal-Kunsill (17).

F’konformità mar-Regolament Finanzjarju, kwalunkwe persuna jew entità li tirċievi fondi mill-Unjoni trid tikkoopera bis-sħiħ fil-protezzjoni tal-interessi finanzjarji tal-Unjoni, tagħti d-drittijiet u l-aċċess neċessarji lill-Kummissjoni, lill-OLAF, lill-Qorti tal-Awdituri u, fir-rigward ta’ dawk l-Istati Membri li jipparteċipaw fil-kooperazzjoni msaħħa, lill-UPPE skont ir-Regolament (UE) 2017/1939, u tiżgura li kwalunkwe parti terza involuta fl-implimentazzjoni ta’ fondi tal-Unjoni tagħti drittijiet ekwivalenti.

(46)

Sabiex tiġi żgurata l-protezzjoni tal-interessi finanzjarji tal-Unjoni, jeħtieġ li pajjiżi terzi jintalbu jagħtu d-drittijiet u l-aċċess meħtieġa għall-uffiċjal awtorizzanti responsabbli, għall-OLAF u għall-Qorti tal-Awdituri biex jeżerċitaw b’mod komprensiv il-kompetenzi rispettivi tagħhom.

(47)

Jenħtieġ li sabiex jiġu ottimizzati l-effiċjenza u l-impatt tal-Programm, jittieħdu azzjonijiet li jippromwovu l-użu u l-iżvilupp ta’ standards miftuħa, teknoloġiji b’sors miftuħ u l-interoperabbiltà fl-arkitettura tas-sistema ta’ konnettività sigura. Kunċett aktar miftuħ ta’ dik is-sistema jista’ jippermetti sinerġiji aħjar ma’ komponenti oħra tal-Programm Spazjali tal-Unjoni jew servizzi u applikazzjonijiet nazzjonali, jottimizza l-ispejjeż billi jevita d-duplikazzjoni fl-iżvilupp tal-istess teknoloġija, itejjeb l-affidabbiltà, irawwem l-innovazzjoni u jaħsad il-benefiċċji ta’ kompetizzjoni wiesgħa.

(48)

Governanza pubblika tajba tal-Programm tirrikjedi d-distribuzzjoni ċara tar-responsabbiltajiet u tal-kompiti fost l-atturi differenti involuti biex tiġi evitata duplikazzjoni bla ħtieġa u biex jitnaqqsu l-kostijiet li jaqbżu l-baġit u d-dewmien. Jenħtieġ li l-atturi kollha tal-governanza jsostnu, fi ħdan il-qasam ta’ kompetenza tagħhom u skont ir-responsabbiltajiet tagħhom, il-kisba tal-objettivi tal-Programm.

(49)

L-Istati Membri ilhom attivi fil-qasam tal-ispazju. Għandhom sistemi, infrastruttura, aġenziji u korpi nazzjonali f’dak il-qasam. Għalhekk, jistgħu jagħtu kontribut kbir għall-Programm, speċjalment għall-implimentazzjoni tiegħu. Huma jistgħu jikkooperaw mal-Unjoni biex jippromwovu s-servizzi u l-applikazzjonijiet tal-Programm u jiżguraw koerenza bejn l-inizjattivi nazzjonali rilevanti u l-Programm. Il-Kummissjoni tista’ tkun f’pożizzjoni li timmobilizza l-mezzi għad-dispożizzjoni tal-Istati Membri, tibbenefika mill-assistenza tagħhom u, soġġett għal kondizzjonijiet maqbula reċiprokament, tinkariga lill-Istati Membri b’kompiti fl-implimentazzjoni tal-Programm. Fejn rilevanti, jenħtieġ li l-Istati Membri jkollhom l-għan li jiżguraw il-koerenza u l-komplementarjetà tal-pjanijiet għall-irkupru u r-reżiljenza tagħhom mal-Programm. Barra minn hekk, jenħtieġ li l-Istati Membri jieħdu l-miżuri kollha meħtieġa biex jiżguraw il-protezzjoni tal-infrastruttura tal-art li tinsab fit-territorji tagħhom. Minbarra dan, jenħtieġ li l-Istati Membri jkunu jistgħu jiżguraw li l-frekwenzi meħtieġa għall-Programm ikunu disponibbli u protetti fil-livell adegwat sabiex ikun hemm lok għall-iżvilupp u l-implimentazzjoni sħaħ tal-applikazzjonijiet abbażi tas-servizzi offruti, f’konformità mad-Deċiżjoni Nru 243/2012/UE tal-Parlament Ewropew u tal-Kunsill (18). Jenħtieġ li l-frekwenzi disponibbli għall-Programm ma jkollhom l-ebda impatt finanzjarju fuq il-Programm.

(50)

F’konformità mal-Artikolu 17 tat-Trattat dwar l-Unjoni Ewropea (TUE) u bħala promotur tal-interess ġenerali tal-Unjoni, hija r-responsabbiltà tal-Kummissjoni li timplimenta l-Programm, tassumi responsabbiltà ġenerali u tippromwovi l-użu tiegħu. Jenħtieġ li sabiex tottimizza r-riżorsi u l-kompetenzi tad-diversi partijiet ikkonċernati, il-Kummissjoni f’ċirkostanzi ġustifikabbli tkun tista’ tinkariga lil entitajiet oħra b’ċerti kompiti. Jenħtieġ li l-Kummissjoni tistabbilixxi r-rekwiżiti tekniċi u operazzjonali prinċipali meħtieġa biex tiġi implimentata l-evoluzzjoni tas-sistemi u tas-servizzi. Jenħtieġ li tagħmel dan wara li tikkonsulta lill-esperti tal-Istati Membri, lill-utenti u lil partijiet ikkonċernati pubbliċi jew privati rilevanti oħra. Fl-aħħar nett, f’konformità mal-Artikolu 4(3) TFUE, l-eżerċizzju tal-kompetenza mill-Unjoni ma jirriżultax f’impediment għall-Istati Membri milli jeżerċitaw il-kompetenzi rispettivi tagħhom. Madankollu, biex isir użu tajjeb mill-fondi tal-Unjoni, huwa xieraq li l-Kummissjoni tiżgura, kemm jista’ jkun, il-konsistenza tal-attivitajiet imwettqa fil-kuntest tal-Programm, ma’ dawk tal-Istati Membri, mingħajr ma toħloq kwalunkwe duplikazzjoni bla bżonn tal-isforzi.

(51)

L-Artikolu 154 tar-Regolament Finanzjarju jipprevedi li, abbażi tar-riżultati ta’ valutazzjoni ex ante, il-Kummissjoni trid tkun tista’ tiddependi fuq is-sistemi u l-proċeduri tal-persuni jew tal-entitajiet inkarigati bl-implimentazzjoni tal-fondi tal-Unjoni. Jekk ikun meħtieġ, jenħtieġ li fil-ftehim ta’ kontribuzzjoni korrispondenti jiġu definiti aġġustamenti speċifiċi għal dawk is-sistemi u l-proċeduri (miżuri ta’ superviżjoni), kif ukoll l-arranġamenti għall-kuntratti eżistenti.

(52)

Minħabba l-kopertura tiegħu mad-dinja kollha, il-Programm għandu dimensjoni internazzjonali b’saħħitha. Is-sħab internazzjonali, il-gvernijiet u ċ-ċittadini tagħhom ser ikunu riċevituri tal-firxa ta’ servizzi tal-Programm b’benefiċċji akkumulati għall-kooperazzjoni internazzjonali tal-Unjoni u tal-Istati Membri ma’ dawk is-sħab. Għal kwistjonijiet relatati mal-Programm, il-Kummissjoni tista’ tikkoordina, fi ħdan il-qasam ta’ kompetenza tagħha u f’isem l-Unjoni, l-attivitajiet fix-xena internazzjonali.

(53)

Filwaqt li tibni fuq l-għarfien espert żviluppat f’dawn l-aħħar snin fil-ġestjoni, fl-operat u fil-forniment ta’ servizzi relatati mal-komponenti Galileo u EGNOS tal-Programm Spazjali tal-Unjoni, l-Aġenzija hija l-aktar korp xieraq biex jimplimenta, taħt is-superviżjoni tal-Kummissjoni, il-kompiti relatati mal-operat tal-infrastruttura governattiva u l-forniment ta’ servizzi governattivi. Għalhekk jenħtieġ li tiżviluppa aktar kapaċitajiet rilevanti għal dak l-għan. Jenħtieġ li l-Aġenzija mbagħad tiġi inkarigata bil-forniment ta’ servizzi governattivi u jenħtieġ li tkun tista’ tiġi inkarigata bit-tmexxija operattiva kollha tal-infrastruttura governattiva jew ta’ parti minnha.

(54)

Fir-rigward tas-sigurtà, u minħabba l-esperjenza tagħha f’dan il-qasam, jenħtieġ li l-Aġenzija tkun responsabbli biex tiżgura, permezz tal-Bord għall-Akkreditazzjoni tas-Sigurtà tagħha, l-akkreditazzjoni tas-sigurtà tas-servizzi u l-infrastruttura governattivi. Barra minn hekk, soġġett għall-prontezza operattiva tal-Aġenzija, b’mod partikolari f’termini ta’ livelli adegwati ta’ riżorsi umani, jenħtieġ li l-Aġenzija twettaq il-kompiti inkarigati lilha mill-Kummissjoni. Fejn possibbli, jenħtieġ li l-Aġenzija tisfrutta l-għarfien espert tagħha, pereżempju, fl-attivitajiet tas-Sistema Ewropea ta’ Navigazzjoni Globali bis-Satellita (EGNSS). Meta l-Aġenzija tiġi inkarigata b’kompiti, jenħtieġ li jitqiegħdu għad-dispożizzjoni tagħha r-riżorsi umani, amministrattivi u finanzjarji adegwati biex l-Aġenzija tkun tista’ twettaq kompletament il-kompiti u l-missjonijiet tagħha.

(55)

Sabiex jiġi żgurat l-operat tal-infrastruttura governattiva u jiġi ffaċilitat il-forniment tas-servizzi governattivi, jenħtieġ li l-Aġenzija titħalla tinkariga, permezz ta’ ftehimiet ta’ kontribuzzjoni, attivitajiet speċifiċi lil entitajiet oħra, fi ħdan l-oqsma ta’ kompetenza rispettiva tagħhom, skont il-kondizzjonijiet tal-ġestjoni indiretta li japplikaw għall-Kummissjoni kif stabbilit fir-Regolament Finanzjarju.

(56)

L-ESA hija organizzazzjoni internazzjonali b’għarfien espert estensiv fil-qasam tal-ispazju, inkluż fil-komunikazzjoni bis-satellita, u għalhekk hija sieħeb importanti fl-implimentazzjoni tal-aspetti differenti tal-politika spazjali tal-Unjoni. F’dak ir-rigward, jenħtieġ li l-ESA tkun tista’ tipprovdi għarfien espert lill-Kummissjoni, inkluż għat-tħejjija tal-ispeċifikazzjonijiet u l-implimentazzjoni tal-aspetti tekniċi tal-Programm. Għal dak il-għan, jenħtieġ li l-ESA tiġi inkarigata bis-superviżjoni tal-attivitajiet ta’ żvilupp u validazzjoni tal-Programm, u tappoġġa l-evalwazzjoni tal-kuntratti konklużi fil-kuntest tal-implimentazzjoni tal-Programm.

(57)

Minħabba l-importanza tal-attivitajiet marbuta mal-ispazju għall-ekonomija tal-Unjoni u għall-ħajja taċ-ċittadini tal-Unjoni, jenħtieġ li l-kisba u ż-żamma ta’ livell għoli ta’ sigurtà jkunu prijorità ewlenija għall-Programm, b’mod partikolari sabiex jiġu ssalvagwardjati l-interessi tal-Unjoni u tal-Istati Membri, inkluż fir-rigward ta’ informazzjoni klassifikata u informazzjoni sensittiva mhux klassifikata.

(58)

Minħabba l-għarfien espert speċifiku tas-SEAE u l-kuntatt regolari tiegħu mal-awtoritajiet ta’ pajjiżi terzi u organizzazzjonijiet internazzjonali, jenħtieġ li s-SEAE jassisti lill-Kummissjoni fit-twettiq ta’ ċerti kompiti relatati mas-sigurtà tal-Programm fil-qasam tar-relazzjonijiet esterni, f’konformità mad-Deċiżjoni tal-Kunsill 2010/427/UE (19).

(59)

Jenħtieġ li mingħajr preġudizzju għar-responsabbiltà esklużiva tal-Istati Membri fil-qasam tas-sigurtà nazzjonali, kif previst fl-Artikolu 4(2) tat-TUE, u għad-dritt tal-Istati Membri li jipproteġu l-interessi essenzjali tas-sigurtà tagħhom f’konformità mal-Artikolu 346 TFUE, tiġi stabbilita governanza speċifika ta’ sigurtà li tiżgura implimentazzjoni bla xkiel tal-Programm. Jenħtieġ li dik il-governanza tkun ibbażata fuq tliet prinċipji ewlenin. L-ewwel nett, huwa importanti li l-esperjenza unika u estensiva tal-Istati Membri fi kwistjonijiet ta’ sigurtà titqies kemm jista’ jkun. It-tieni, sabiex ikun hemm prevenzjoni tal-kunflitti ta’ interess u ta’ kwalunkwe nuqqas fl-applikazzjoni tar-regoli dwar is-sigurtà, jenħtieġ li l-funzjonijiet operazzjonali jkunu segregati mill-funzjonijiet ta’ akkreditazzjoni tas-sigurtà. It-tielet, l-entità responsabbli għall-ġestjoni tal-infrastruttura kollha tal-Programm jew ta’ parti minnha hija wkoll l-aktar waħda adattata biex tiġġestixxi s-sigurtà tal-kompiti inkarigati lilha. Is-sigurtà tal-Programm tibni fuq l-esperjenza miksuba fl-implimentazzjoni tal-Programm Spazjali tal-UE matul is-snin li għaddew. Governanza tajba tas-sigurtà tirrikjedi wkoll li r-rwoli jiġu distribwiti b’mod xieraq fost id-diversi atturi. Minħabba li hija responsabbli għall-Programm, jenħtieġ li l-Kummissjoni, mingħajr preġudizzju għall-prerogattivi tal-Istati Membri fil-qasam tas-sigurtà nazzjonali, tiddetermina flimkien mal-Istati Membri r-rekwiżiti ġenerali tas-sigurtà applikabbli għall-Programm. B’mod partikolari fil-qasam tal-informazzjoni klassifikata, jenħtieġ li l-governanza tas-sigurtà tal-Programm tirrifletti r-rwoli u l-oqsma ta’ kompetenza rispettivi tal-Kunsill u tal-Istati Membri fl-evalwazzjoni u l-approvazzjoni ta’ prodotti kriptografiċi għall-protezzjoni ta’ IKUE.

(60)

Iċ-ċibersigurtà u s-sigurtà fiżika tal-infrastruttura tal-Programm, kemm tal-art kif ukoll spazjali, kif ukoll ir-ridondanza fiżika tiegħu, huma kruċjali biex tiġi żgurata l-kontinwità tas-servizz u tal-operazzjonijiet tas-sistema. Meta jiġu stabbiliti r-rekwiżiti ġenerali tas-sigurtà jenħtieġ għalhekk li titqies b’mod xieraq il-ħtieġa li jiġu protetti s-sistema u s-servizzi tagħha kontra attakki ċibernetiċi u theddid għas-satelliti, inkluż permezz tal-użu ta’ teknoloġiji ġodda u billi jiġu appoġġati ir-rispons għal tali attakki u l-irkupru minnhom.

(61)

Fejn xieraq, wara l-analiżi tar-riskju u tat-theddid, jenħtieġ li l-Kummissjoni tidentifika struttura ta’ monitoraġġ tas-sigurtà. Jenħtieġ li dik l-istruttura ta’ monitoraġġ tas-sigurtà tkun l-entità li twieġeb għall-istruzzjonijiet żviluppati fl-ambitu tad-Deċiżjoni tal-Kunsill (PESK) 2021/698 (20).

(62)

Mingħajr preġudizzju għall-prerogattivi tal-Istati Membri fil-qasam tas-sigurtà nazzjonali, il-Kummissjoni u r-Rappreżentant Għoli, it-tnejn li huma fil-qasam rispettiv ta’ kompetenza tagħhom, jenħtieġ li jiżguraw is-sigurtà tal-Programm f’konformità ma’ dan ir-Regolament u, fejn ikun rilevanti, mad-Deċiżjoni (PESK) 2021/698.

(63)

Is-servizzi governattivi pprovduti mill-Programm ser jintużaw mill-atturi governattivi tal-Unjoni f’missjonijiet u operazzjonijiet kritiċi għas-sigurtà, id-difiża u s-sikurezza, kif ukoll għall-protezzjoni ta’ infrastruttura kritika. Għalhekk, jenħtieġ li tali servizzi u infrastruttura jkunu soġġetti għal akkreditazzjoni tas-sigurtà.

(64)

Huwa indispensabbli li l-attivitajiet ta’ akkreditazzjoni tas-sigurtà jitwettqu abbażi ta’ responsabbiltà kollettiva għas-sigurtà tal-Unjoni u tal-Istati Membri tagħha, billi kull attur jagħmel l-almu tiegħu biex jibni kunsens u billi jiġu involuti dawk kollha kkonċernati bil-kwistjoni tas-sigurtà, u li titpoġġa fis-seħħ proċedura għall-monitoraġġ permanenti tar-riskju. Huwa wkoll neċessarju li l-attivitajiet tal-akkreditazzjoni teknika tas-sigurtà jiġu mwettqa minn professjonisti li huma kwalifikati kif xieraq fil-qasam tal-akkreditazzjoni tas-sistemi kumplessi u li għandhom livell adegwat ta’ approvazzjoni tas-sigurtà.

(65)

Skont l-Artikolu 17 TUE, il-Kummissjoni hija responsabbli għall-ġestjoni ta’ programmi li, f’konformità mar-regoli stipulati fir-Regolament Finanzjarju, jistgħu jiġu sottodelegati lil partijiet terzi, taħt ġestjoni indiretta. F’dak il-kuntest, huwa neċessarju li l-Kummissjoni tiżgura li l-kompiti mwettqa minn partijiet terzi għall-implimentazzjoni tal-Programm taħt ġestjoni indiretta ma jdgħajfux is-sigurtà tal-Programm, b’mod partikolari fir-rigward tal-kontroll ta’ informazzjoni klassifikata. Għalhekk jenħtieġ li jiġi ċċarat li fejn il-Kummissjoni tinkariga lill-ESA biex twettaq kompiti skont il-Programm, il-ftehimiet ta’ kontribuzzjoni korrispondenti jridu jiżguraw li l-informazzjoni klassifikata ġġenerata mill-ESA titqies bħala IKUE f’konformità mad-Deċiżjoni tal-Kunsill 2013/488/UE (21) u d-Deċiżjoni tal-Kummissjoni (UE, Euratom) 2015/444 (22) u maħluqa taħt l-awtorità tal-Kummissjoni.

(66)

Is-servizzi governattivi tal-Programm jistgħu jintużaw f’missjonijiet u f’operazzjonijiet kritiċi tas-sigurtà u s-sikurezza mill-atturi tal-Unjoni u tal-Istati Membri. Għalhekk, sabiex jiġu protetti l-interessi essenzjali tas-sigurtà tal-Unjoni u tal-Istati Membri tagħha, huma meħtieġa miżuri biex jiġi żgurat livell neċessarju ta’ nondipendenza fuq partijiet terzi (pajjiżi terzi u entitajiet minn pajjiżi terzi), li jkopru l-elementi kollha tal-Programm. Tali miżuri jistgħu jinkludu teknoloġiji spazjali u terrestri fil-livell tal-komponenti, tas-subsistemi jew tas-sistemi, l-industriji tal-manifattura, is-sidien u l-operaturi tas-sistemi spazjali, u l-post fiżiku tal-komponenti tas-sistema terrestri.

(67)

Abbażi biss ta’ ftehim li għandu jiġi konkluż’ f’konformità mal-Artikolu 218 TFUE, Membri tal-Assoċjazzjoni Ewropea tal-Kummerċ Ħieles (EFTA) li huma membri taż-Żona Ekonomika Ewropea (ŻEE), pajjiżi aderenti, pajjiżi kandidati u kandidati potenzjali kif ukoll il-pajjiżi tal-Politika Ewropea tal-Viċinat u pajjiżi terzi oħra jistgħu jitħallew jipparteċipaw fil-Programm.

(68)

Skont id-Deċiżjoni tal-Kunsill (UE) 2021/1764 (23), persuni u entitajiet stabbiliti f’pajjiżi jew f’territorji ekstra-Ewropej huma eliġibbli għal finanzjament soġġett għar-regoli u għall-objettivi tal-Programm u għal arranġamenti possibbli applikabbli għall-Istat Membru li miegħu huwa marbut il-pajjiż jew territorju ekstra-Ewropew rilevanti.

(69)

Skont il-paragrafi 22 u 23 tal-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet (24), jenħtieġ li l-Programm jiġi evalwat abbażi tal-informazzjoni miġbura f’konformità ma’ rekwiżiti speċifiċi ta’ monitoraġġ, filwaqt li jiġi evitat piż amministrattiv, b’mod partikolari fuq l-Istati Membri, u regolamentazzjoni żejda. Jenħtieġ li dawk ir-rekwiżiti, fejn xieraq, jinkludu indikaturi li jistgħu jitkejlu bħala bażi għall-evalwazzjoni tal-effetti tal-Programm. Jenħtieġ li l-evalwazzjoni ta’ dan il-Programm tqis is-sejbiet tal-evalwazzjoni tal-Programm Spazjali tal-Unjoni li jappartjenu għall-komponent ta’ GOVSATCOM imwettaq fil-qafas tar-Regolament (UE) 2021/696.

(70)

Sabiex tiġi żgurata l-adegwatezza kontinwa tal-indikaturi biex jirrapportaw dwar il-progress tal-Programm, kif ukoll tal-qafas ta’ monitoraġġ u ta’ evalwazzjoni tal-Programm, is-setgħa ta’ adozzjoni ta’ atti f’konformità mal-Artikolu 290 TFUE jenħtieġ li tiġi delegata lill-Kummissjoni fir-rigward tal-emendar tal-Anness għal dan ir-Regolament f’dak li għandu x’jaqsam mal-indikaturi, tas-supplementar ta’ dan ir-Regolament b’dispożizzjonijiet dwar l-istabbiliment ta’ qafas ta’ monitoraġġ u ta’ evalwazzjoni u tas-supplimentar ta’ dan ir-Regolament billi jiġu speċifikati l-karatteristiċi ta’ bażi ta’ data tal-assi spazjali tal-Programm, kif ukoll il-metodoloġija u l-proċessi biex jinżamm u jiġi aġġornat. Huwa partikularment importanti li l-Kummissjoni twettaq konsultazzjonijiet xierqa matul ix-xogħol ta’ tħejjija tagħha, inkluż fil-livell ta’ esperti, u li dawk il-konsultazzjonijiet jitwettqu f’konformità mal-prinċipji stabbilit fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet. B’mod partikolari, biex tiġi żgurata parteċipazzjoni ugwali fit-tħejjija ta’ atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċievuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta’ atti delegati.

(71)

Fl-interess ta’ governanza pubblika tajba u minħabba s-sinerġiji bejn il-Programm u l-komponent ta’ GOVSATCOM, jenħtieġ li l-kumitat tal-Programm stabbilit fil-qafas tar-Regolament (UE) 2021/696 fil-konfigurazzjoni ta’ GOVSATCOM iservi wkoll bħala l-kumitat għall-finijiet tal-Programm. Għal kwistjonijiet li għandhom x’jaqsmu mas-sigurtà tal-Programm, jenħtieġ li l-kumitat tal-Programm jiltaqa’ f’konfigurazzjoni speċifika ta’ sigurtà.

(72)

Peress li l-governanza pubblika tajba tirrikjedi ġestjoni uniformi tal-Programm, teħid aktar rapidu tad-deċiżjonijiet u aċċess ugwali għall-informazzjoni, ir-rappreżentanti tal-entitajiet inkarigati b’kompiti relatati mal-Programm jistgħu jieħdu sehem bħala osservaturi fil-ħidma tal-kumitat tal-Programm stabbilit bl-applikazzjoni tar-Regolament (UE) Nru 182/2011 tal-Parlament Ewropew u tal-Kunsill (25). Għall-istess raġunijiet, ir-rappreżentanti ta’ pajjiżi terzi u ta’ organizzazzjonijiet internazzjonali li kkonkludew ftehim internazzjonali mal-Unjoni, relatat mal-Programm, jistgħu jieħdu sehem fil-ħidma tal-kumitat tal-Programm, soġġett għall-obbligi ta’ sigurtà u kif previst fit-termini ta’ tali ftehim. Ir-rappreżentanti ta’ entitajiet inkarigati b’kompiti marbuta mal-Programm, ta’ pajjiżi terzi u ta’ organizzazzjonijiet internazzjonali jenħtieġ li ma jkunux intitolati jieħdu sehem fil-proċeduri tal-votazzjoni tal-kumitat tal-Programm. Il-kondizzjonijiet għall-parteċipazzjoni ta’ osservaturi u parteċipanti ad hoc jenħtieġ li jkunu stabbiliti fir-regoli ta’ proċedura tal-kumitati tal-Programm.

(73)

Sabiex jiġu żgurati kondizzjonijiet uniformi għall-implimentazzjoni ta’ dan ir-Regolament, jenħtieġ li l-Kummissjoni tingħata setgħat ta’ implimentazzjoni relatati mal-adozzjoni ta’: ir-regoli dettaljati dwar il-forniment ta’ servizzi governattivi, ir-rekwiżiti operazzjonali għas-servizzi governattivi, il-portafoll tas-servizzi għas-servizzi governattivi, id-deċiżjonijiet ta’ kontribuzzjoni rigward il-ftehimiet ta’ kontribuzzjoni u l-programmi ta’ ħidma, kif ukoll l-istabbiliment ta’ rekwiżiti addizzjonali għall-parteċipazzjoni ta’ pajjiżi terzi u organizzazzjonijiet internazzjonali fil-Programm. Jenħtieġ li dawk is-setgħat jiġu eżerċitati b’konformità mar-Regolament (UE) Nru 182/2011.

(74)

Jenħtieġ li s-servizzi governattivi li huma bbażati fuq l-infrastruttura governattiva, bħala regola ġenerali, jiġu pprovduti mingħajr ħlas lill-utenti awtorizzati mill-gvernijiet. Madankollu, il-kapaċità għal dawk is-servizzi hija limitata. Jekk, wara analiżi, il-Kummissjoni tikkonkludi li hemm nuqqas ta’ kapaċitajiet, jenħtieġ li jkun permess li tiġi adottata politika tal-ipprezzar f’każijiet debitament ġustifikati fejn id-domanda taqbeż il-kapaċità ta’ aċċess, bħala parti minn dawk ir-regoli dettaljati dwar il-forniment tas-servizz, sabiex jiġu mqabbla l-provvista u d-domanda tas-servizzi. Sabiex ikunu żgurati kondizzjonijiet uniformi għall-implimentazzjoni ta’ dan ir-Regolament, jenħtieġ li s-setgħat ta’ implimentazzjoni relatati mal-adozzjoni ta’ tali politika tal-ipprezzar jiġu kkonferiti lill-Kummissjoni. Jenħtieġ li dawk is-setgħat jiġu eżerċitati b’konformità mar-Regolament (UE) Nru 182/2011.

(75)

Sabiex ikunu żgurati kondizzjonijiet uniformi għall-implimentazzjoni ta’ dan ir-Regolament, jenħtieġ li s-setgħat ta’ implimentazzjoni relatati mal-istabbiliment ta’ miżuri meħtieġa biex jiġi ddeterminat il-post taċ-ċentri li jappartjenu għall-infrastruttura governattiva tal-art jiġu kkonferiti lill-Kummissjoni. Għall-għażla ta’ tali postijiet, jenħtieġ li l-Kummissjoni tkun tista’ tqis ir-rekwiżiti operazzjonali u tas-sigurtà, kif ukoll l-infrastruttura eżistenti. Jenħtieġ li dawk is-setgħat jiġu eżerċitati b’konformità mar-Regolament (UE) Nru 182/2011.

(76)

Sabiex jiġu żgurati kondizzjonijiet uniformi għall-implimentazzjoni ta’ dan ir-Regolament, jenħtieġ li jiġu kkonferiti setgħat ta’ implimentazzjoni relatati mal-istabbiliment ta’ miżuri meħtieġa biex jiġu ddeterminati rekwiżiti ġenerali tas-sigurtà lill-Kummissjoni. Jenħtieġ li dawk is-setgħat jiġu eżerċitati b’konformità mar-Regolament (UE) Nru 182/2011. L-Istati Membri jenħtieġ li jkunu jistgħu jeżerċitaw kontroll massimu fuq ir-rekwiżiti ġenerali tas-sigurtà tal-Programm. Meta tadotta atti ta’ implimentazzjoni fil-qasam tas-sigurtà tal-Programm, jenħtieġ li l-Kummissjoni tkun assistita minn kumitat tal-Programm, li jiltaqa’ f’konfigurazzjoni ta’ sigurtà ddedikata. Minħabba s-sensittività ta’ kwistjonijiet ta’ sigurtà, jenħtieġ li l-presidenza tal-kumitat tal-Programm tagħmel ħilitha biex issib soluzzjonijiet li jkunu jgawdu l-akbar appoġġ possibbli fi ħdan il-kumitat tal-Programm. Jenħtieġ li l-Kummissjoni ma tadottax atti ta’ implimentazzjoni li jiddeterminaw ir-rekwiżiti tas-sigurtà ġenerali tal-Programm f’każijiet fejn il-kumitat tal-Programm ma jagħti l-ebda opinjoni. Fejn l-involviment tal-konfigurazzjoni tas-sigurtà tal-kumitat tal-Programm ikun previst mod ieħor, tali involviment jenħtieġ li jsir f’konformità mar-regoli ta’ proċedura tal-kumitat tal-Programm.

(77)

Il-Programm jikkomplementa l-Programm Spazjali tal-Unjoni eżistenti billi jintegra u jestendi l-objettivi u l-azzjonijiet tiegħu biex tinħoloq sistema ta’ konnettività sigura u bbażata fl-ispazju għall-Unjoni. Jenħtieġ li l-evalwazzjoni tal-Programm tqis dan.

(78)

Ladarba l-objettivi ta’ dan ir-Regolament ma jistgħux jintlaħqu b’mod suffiċjenti mill-Istati Membri, iżda pjuttost, minħabba l-iskala u l-effetti tal-azzjoni li jmorru lil hinn mill-kapaċitajiet finanzjarji u tekniċi ta’ kwalunkwe Stat Membru uniku, jistgħu jintlaħqu aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju tas-sussidjarjetà kif stipulat fl-Artikolu 5 TUE. F’konformità mal-prinċipju tal-proporzjonalità, kif stipulat f’dak l-Artikolu, dan ir-Regolament ma jmurx lil hinn minn dak li huwa meħtieġ sabiex jintlaħqu dawk l-objettivi.

(79)

Jenħtieġ li l-Programm jiġi stabbilit għal perjodu ta’ ħames snin biex id-durata tiegħu tiġi allinjata ma’ dik tal-qafas finanzjarju pluriennali għas-snin 2021 sal-2027 stabbilit fir-Regolament tal-Kunsill (UE, Euratom) 2020/2093 (26) (“QFP 2021-2027”).

(80)

Sabiex l-implimentazzjoni ta’ dan ir-Regolament tkun tista’ tibda malajr kemm jista’ jkun, bil-ħsieb li jintlaħqu l-objettivi tiegħu, jenħtieġ li huwa jidħol fis-seħħ b’urġenza,

(1)

Ir-Regolament Delegat tal-Kummissjoni (UE) 2016/127 (2) jistabbilixxi, fost l-oħrajn, ir-rekwiżiti speċifiċi dwar il-kompożizzjoni għall-formula tat-trabi u ta’ prosegwiment immanifatturata mill-idroliżati tal-proteina. Dan jipprevedi li l-formula tat-trabi u ta’ prosegwiment immanifatturata mill-idroliżati tal-proteina għandha tikkonforma mar-rekwiżiti dwar il-kontenut ta’ proteina, is-sors tal-proteina, u l-ipproċessar tal-proteina kif ukoll mar-rekwiżiti dwar l-aċidi amminiċi indispensabbli u kundizzjonalment indispensabbli u dwar l-L-karnitina kif stabbilit fil-punt 2.3 tal-Anness I u l-punt 2.3 tal-Anness II ta’ dak ir-Regolament.

(2)

Kif inhu ddikjarat fir-Regolament Delegat (UE) 2016/127, fl-opinjoni tagħha tal-24 ta’ Lulju 2014 dwar il-kompożizzjoni essenzjali tal-formuli tat-trabi u ta’ prosegwiment (3), l-Awtorità Ewropea dwar is-Sigurtà fl-Ikel (“l-Awtorità”) innotat li s-sikurezza u x-xerq ta’ kull formula speċifika li fiha l-idroliżati tal-proteina għandhom jiġu stabbiliti permezz ta’ evalwazzjoni klinika tal-popolazzjoni fil-mira. Sa issa, l-Awtorità wettqet evalwazzjoni pożittiva ta’ żewġ idroliżati tal-proteina li jintużaw fil-formuli tat-trabi u ta’ prosegwiment. Il-kompożizzjoni ta’ dawk iż-żewġ idroliżati tal-proteina hija riflessa fir-rekwiżiti attwalment stabbiliti fir-Regolament Delegat (UE) 2016/127. Madankollu, dawk ir-rekwiżiti jistgħu jiġu aġġornati sabiex jiġi permess it-tqegħid fis-suq tal-formula mmanifatturata mill-idroliżati tal-proteina b’kompożizzjoni differenti minn dawk li diġà ġew evalwati b’mod pożittiv, wara evalwazzjoni każ b’każ mill-Awtorità tas-sikurezza tagħhom u ta’ kemm huma xierqa.

(3)

Fis-6 ta’ Frar 2019, il-Kummissjoni rċeviet talba mingħand meyer.science GmbH f’isem HIPP-Werk Georg Hipp OHG u Arla Foods Ingredients, biex l-Awtorità tevalwa s-sikurezza u kemm hi xierqa għall-għan tagħha l-formula tat-trabi u ta’ prosegwiment immanifatturata minn idroliżat tal-proteina li l-kompożizzjoni tiegħu ma tikkonformax mar-rekwiżiti stabbiliti fil-punt 2.3 tal-Anness I u fil-punt 2.3 tal-Anness II tar-Regolament Delegat (UE) 2016/127.

(4)

Wara talba mill-Kummissjoni, l-Awtorità ħarġet opinjoni xjentifika fid-9 ta’ Marzu 2022 dwar is-sikurezza nutrizzjonali ta’ dik il-formula tat-trabi u ta’ prosegwiment, u kemm hi xierqa għall-għan tagħha (4). F’dik l-opinjoni l-Awtorità kkonkludiet li l-idroliżat tal-proteina kkonċernat huwa sors ta’ proteina nutrizzjonalment sikur u xieraq biex jintuża fil-formula tat-trabi u ta’ prosegwiment dment li l-formula li jintuża fiha jkollha minimu ta’ 0,45 g/100 kJ (1,9 g/100 kcal) proteina u tikkonforma mal-kriterji kompożizzjonali l-oħrajn stipulati fir-Regolament Delegat (UE) 2016/127 u mal-mudell tal-aċidi amminiċi li jinsab fit-Taqsima A tal-Anness III ta’ dak ir-Regolament.

(5)

Filwaqt li jitqiesu l-konklużjonijiet tal-Awtorità jixraq li jiġi permess it-tqegħid fis-suq tal-formula tat-trabi u ta’ prosegwiment immanifatturata mill-idroliżat tal-proteina kkonċernat. Għalhekk, jenħtieġ li r-rekwiżiti għall-idroliżati tal-proteina stipulati fir-Regolament Delegat (UE) 2016/127 jiġu aġġornati u addattati biex jinkludu wkoll ir-rekwiżiti għal dak l-idroliżat tal-proteina.

(6)

Għalhekk jenħtieġ li l-Annessi I, II u III tar-Regolament Delegat (UE) 2016/127 jiġu emendati skont dan.

(7)

Ir-Regolament Delegat (UE) 2016/127 japplika għall-formula tat-trabi u ta’ prosewgiment immanifatturata mill-idroliżati tal-proteina mit-22 ta’ Frar 2022. Sabiex il-formula tat-trabi u ta’ prosegwiment immanifatturata mill-proteina idrolizzata f’konformità mar-rekwiżiti stipulati f’dan ir-Regolament tkun tista’ titqiegħed fis-suq mingħajr dewmien żejjed, jenħtieġ li dan ir-Regolament jidħol fis-seħħ b’urġenza.

(1)

Il-verżjoni bil-lingwa Latvjana tar-Regolament Delegat tal-Kummissjoni (UE) 2019/2035 (2) fiha żbalji fit-titolu tiegħu u fil-premessa (1) fir-rigward tar-regoli għall-istabbilimenti li jżommu l-annimali terrestri u l-imfaqas, fil-premessa (2) fir-rigward tal-approvazzjoni tal-imfaqas, fil-premessa (11) fir-rigward tal-imfaqas tal-għasafar miżmuma fil-magħluq u l-imfaqas tat-tjur. Dak ir-Regolament fih ukoll diversi żbalji, li jaffettwaw il-kamp ta’ applikazzjoni tad-dispożizzjonijiet li ġejjin: fl-Artikolu 1(3) fir-rigward tal-imfaqas tal-għasafar miżmuma fil-magħluq; fl-Artikolu 1(3), it-tieni subparagrafu, il-punt (b) fir-rigward tal-bajd għat-tifqis mill-imfaqas; fl-Artikolu 1(6)(b) fir-rigward tal-obbligi ta’ informazzjoni tal-awtorità kompetenti rigward ir-reġistri tagħha tal-imfaqas; fl-Artikolu 1(9) fir-rigward tal-imfaqas irreġistrati jew approvati; fil-Parti II, it-Titolu I, it-titolu tal-Kapitolu 2 fir-rigward tal-imfaqas; fl-Artikolu 7, it-titolu u l-frażi introduttorja fir-rigward tar-rekwiżiti għall-għoti ta’ approvazzjoni lill-imfaqas li minnhom il-bajd għat-tifqis tat-tjur jew il-flieles ta’ ġurnata jkunu se jinġarru lejn Stat Membru ieħor; fl-Artikolu 18, it-titolu u l-frażi introduttorja fir-rigward tar-reġistri ta’ stabbilimenti tal-annimali terrestri miżmuma u tal-imfaqas; fil-Parti II, it-Titolu III, it-titolu tal-Kapitolu 2 fir-rigward tal-imfaqas; fl-Artikolu 33, it-titolu, il-frażi introduttorja u l-punt (a) fir-rigward tal-obbligi taż-żamma tar-rekords mill-operaturi tal-imfaqas; fl-Anness I, il-Parti 3, it-titolu fir-rigward tar-rekwiżiti għall-għoti ta’ approvazzjoni lill-imfaqas; fl-Anness I, il-Parti 3, il-punt 1, il-frażi introduttorja u l-punti (a) u (b) fir-rigward tar-rekwiżiti b’rabta mal-miżuri ta’ bijosigurtà tal-imfaqas; fl-Anness I, il-Parti 3, il-punt 2, il-frażi introduttorja u l-punt (b) fir-rigward tar-rekwiżiti b’rabta mal-mi’uri ta’ sorveljanza tal-imfaqas; fl-Anness I, il-Parti 3, il-punt 3, il-frażi introduttorja u l-punti (a), (c) u (f) fir-rigward tar-rekwiżiti b’rabta mal-faċilitajiet u t-tagħmir tal-imfaqas; fl-Anness I, il-parti 3, il-punt 5, il-frażi introduttorja u l-punt (a)(i) fir-rigward tar-rekwiżiti b’rabta mas-superviżjoni mill-awtorità kompetenti tal-imfaqas; fl-Anness I, il-Parti 4, il-punt 1(a)(ii) fir-rigward tar-rekwiżiti b’rabta mal-miżuri ta’ bijosigurtà tal-istabbilimenti li jżommu t-tjur; fl-Anness I, fil-Parti 4, il-punt 2(b) fir-rigward tar-rekwiżiti b’rabta mas-sorveljanza tal-istabbilimenti li jżommu t-tjur; fl-Anness I, il-Parti 4, il-punt 3(b)(iii) u l-punt 3(e) fir-rigward tar-rekwiżiti b’rabta mal-faċilitajiet u t-tagħmir ta’ stabbilimenti li jżommu t-tjur; fl-Anness II, it-titolu fir-rigward tal-programm ta’ kontroll mikrobijoloġiku fl-imfaqas u l-programmi ta’ sorveljanza tal-mard fi stabbilimenti li jżommu t-tjur u fl-imfaqas; fl-Anness II, il-Parti 1, it-titolu fir-rigward tal-programm ta’ kontroll mikrobijoloġiku fl-imfaqas; fl-Anness II, il-Parti 2, it-titolu fir-rigward tal-programmi ta’ sorveljanza tal-mard fl-imfaqas u fi stabbilimenti li jżommu t-tjur; fl-Anness II, il-Parti 2, il-punt 2.4(b), il-frażi introduttorja u l-punt (iv) fir-rigward tar-rekwiżiti b’rabta mal-matriċi tal-kampjunar; fl-Anness II, il-Parti 2, il-punt 2.5(b), l-ewwel sentenza u l-punti i) u ii) fir-rigward tar-rekwiżiti fir-rigward tal-qafas tal-kampjunar u l-frekwenza tal-kampjunar.

(2)

Għalhekk, jenħtieġ li l-verżjoni bil-lingwa Latvjana tar-Regolament Delegat (UE) 2019/2035 tiġi kkoreġuta skont dan. Il-verżjonijiet bil-lingwi l-oħra mhumiex affettwati,

(1)

Fis-17 ta’ Jannar 2019 il-Kummissjoni imponiet dazju anti-dumping definittiv fuq l-importazzjonijiet fl-Unjoni ta’ roti elettriċi li joriġinaw mir-Repubblika tal-Poplu taċ-Ċina (“RPĊ”) (“il-prodott ikkonċernat”) permezz tar-Regolament ta’ Implimentazzjoni (UE) 2019/73 (“ir-Regolament oriġinali”).

(2)

Fl-investigazzjoni oriġinali, il-kampjunar ġie applikat għall-investigazzjoni tal-produtturi esportaturi fir-Repubblika tal-Poplu taċ-Ċina f’konformità mal-Artikolu 17 tar-Regolament (UE) 2016/1036.

(3)

Il-Kummissjoni imponiet rati individwali ta’ dazju anti-dumping li jvarjaw minn 10,3 % sa 62,1 % fuq l-importazzjonijiet ta’ roti elettriċi għall-produtturi esportaturi mir-Repubblika tal-Poplu taċ-Ċina inklużi fil-kampjun. Għall-produtturi esportaturi li kkooperaw li ma kinux inklużi fil-kampjun (bl-eċċezzjoni tal-kumpaniji soġġetti għar-rata tad-dazju kumpensatorju parallela għall-kumpaniji l-oħrajn kollha, skont ir-Regolament ta’ Implimentazzjoni tal-Kummissjoni (UE) 2019/72 (3)) ġie impost dazju medju ponderat ta’ 24,2 %. Dawn il-produtturi esportaturi li kkooperaw mhux inklużi fil-kampjun huma elenkati fl-Anness I tar-Regolament oriġinali. Ġie impost dazju medju ponderat ta’ 16,2 % fuq kumpaniji oħra li kkooperaw mhux inklużi fil-kampjun (soġġetti għar-rata tad-dazju kumpensatorju parallela għall-kumpaniji l-oħra kollha, skont ir-Regolament ta’ Implimentazzjoni (UE) 2019/72). Dawn huma elenkati fl-Anness II tar-Regolament oriġinali. Barra minn hekk, ġiet imposta rata ta’ dazju għall-pajjiż kollu ta’ 70,1 % fuq ir-roti elettriċi minn kumpaniji fir-Repubblika tal-Poplu taċ-Ċina li jew ma ppreżentawx ruħhom jew ma kkooperawx fl-investigazzjoni anti-dumping, iżda kkooperaw fl-investigazzjoni antisussidji parallela (elenkati fl-Anness III tar-Regolament oriġinali).

(4)

Skont l-Artikolu 1, il-paragrafu 6 tar-Regolament oriġinali, il-paragrafu 2 ta’ dak l-Artikolu jista’ jiġi emendat billi jiżdied il-produttur esportatur il-ġdid fl-anness xieraq mal-kumpaniji li kkooperaw mhux inklużi fil-kampjun u għalhekk soġġetti għar-rata tad-dazju anti-dumping medja ponderata xierqa, meta dak il-produttur esportatur ġdid fir-Repubblika tal-Poplu taċ-Ċina jipprovdi biżżejjed evidenza lill-Kummissjoni li:

(5)

Il-kumpanija Zhejiang Jollo Technology Co., Ltd (“l-applikant”) ressqet talba lill-Kummissjoni biex tingħata trattament ta’ produttur esportatur ġdid u għalhekk tkun soġġetta għar-rata ta’ dazju applikabbli għall-kumpaniji li kkooperaw fir-Repubblika tal-Poplu taċ-Ċina mhux inklużi fil-kampjun, soġġetti għar-rata ta’ dazju kumpensatorju parallela għall-kumpaniji l-oħra kollha, jiġifieri 16,2 % (“NEPT”), fejn sostniet li ssodisfat it-tliet kundizzjonijiet kollha stabbiliti fl-Artikolu 1, il-paragrafu 6, tar-Regolament oriġinali.

(6)

Biex jiġi ddeterminat jekk l-applikant jissodisfax il-kundizzjonijiet biex jingħata trattament ta’ produttur esportatur ġdid (NEPT) kif stipulat fl-Artikolu 1, il-paragrafu 6 tar-Regolament oriġinali (“il-kundizzjonijiet NEPT”), il-Kummissjoni l-ewwel bagħtet kwestjonarju lill-applikant fejn talbet għal evidenza li turi li hu kien qed jissodisfa l-kundizzjonijiet NEPT. L-applikant ipprovda tweġiba għall-kwestjonarju.

(7)

Il-Kummissjoni fittxet li tivverifika l-informazzjoni kollha li qieset meħtieġa biex tiddetermina jekk l-applikant kienx jissodisfa l-kriterji NEPT.

(8)

Fir-rigward tal-kundizzjoni stabbilita fl-Artikolu 1, il-paragrafu 6 tar-Regolament oriġinali li l-applikant ma esportax il-prodott ikkonċernat lejn l-Unjoni matul il-perjodu ta’ investigazzjoni li fuqu huma bbażati l-miżuri, jiġifieri mill-1 ta’ Ottubru 2016 sat-30 ta’ Settembru 2017 (“il-perjodu ta’ investigazzjoni oriġinali”), matul l-investigazzjoni, il-Kummissjoni stabbiliet li l-applikant ma setax jesporta roti elettriċi lejn l-Unjoni matul il-perjodu ta’ investigazzjoni peress li l-applikant ipprovda evidenza li ġie stabbilit fl-2021.

(9)

Fir-rigward tal-kundizzjoni stabbilita fl-Artikolu 1, il-paragrafu 6, tar-Regolament oriġinali, li l-applikant mhu relatat mal-ebda esportatur jew produttur li huwa soġġett għall-miżuri anti-dumping imposti mir-Regolament oriġinali, matul l-investigazzjoni l-Kummissjoni stabbiliet li l-applikant mhu relatat mal-ebda wieħed mill-esportaturi jew produtturi fir-Repubblika tal-Poplu taċ-Ċina li huma soġġetti għall-miżuri anti-dumping imposti mir-Regolament oriġinali u li setgħu kkooperaw fl-investigazzjoni oriġinali.

(10)

Fir-rigward tal-kundizzjoni stipulata fl-Artikolu 1, il-paragrafu 6 tar-Regolament oriġinali, li l-applikant effettivament esporta l-prodott ikkonċernat lejn l-Unjoni wara l-perjodu ta’ investigazzjoni oriġinali jew daħal f’obbligu kuntrattwali irrevokabbli biex jesporta kwantità sinifikanti lejn l-Unjoni, matul l-investigazzjoni, il-Kummissjoni stabbiliet li abbażi tal-evidenza dokumentarja pprovduta, l-applikant kien fil-fatt esporta roti elettriċi lejn l-Unjoni wara l-perjodu ta’ investigazzjoni. L-applikant ipprovda dokumentazzjoni tal-bejgħ għal tranżazzjonijiet lejn Spanja (Ġunju 2021) u lejn l-Italja (Awwissu 2022).

(11)

B’konsegwenza, il-Kummissjoni kkonkludiet li l-applikant huwa konformi mal-kundizzjoni stipulata fl-Artikolu 1, il-paragrafu 6, tar-Regolament oriġinali.

(12)

Għaldaqstant, l-applikant jissodisfa t-tliet kundizzjonijiet biex jingħata trattament ta’ produttur esportatur ġdid (NEPT), kif stipulat fl-Artikolu 1, il-paragrafu 6 tar-Regolament oriġinali u jenħtieġ għalhekk li t-talba tiġi milqugħa. Konsegwentement, jenħtieġ li l-applikant ikun soġġett għal dazju anti-dumping ta’ 16,2 % għall-kumpaniji li kkooperaw mhux inklużi fil-kampjun tal-investigazzjoni oriġinali u soġġetti għar-rata tad-dazju kumpensatorju parallela għall-kumpaniji l-oħra kollha, skont ir-Regolament ta’ Implimentazzjoni (UE) 2019/72.

(13)

L-applikant u l-industrija tal-Unjoni kienu infurmati bil-fatti essenzjali u l-kunsiderazzjonijiet skont liema tqies xieraq li tingħata r-rata tad-dazju anti-dumping applikabbli lill-kumpaniji li kkooperaw mhux inklużi fil-kampjun tal-investigazzjoni oriġinali lil Zhejiang Jollo Technology Co., Ltd.

(14)

Il-partijiet ingħataw il-possibbiltà li jibagħtu xi kummenti. Ma wasal l-ebda kumment.

(15)

Ir-Regolament huwa f’konformità mal-opinjoni tal-Kumitat stabbilit bl-Artikolu 15(1) tar-Regolament (UE) 2016/1036,

(1)

L-importazzjonijiet tal-bijodiżil li joriġinaw mill-Arġentina huma soġġetti għal dazji kumpensatorji definittivi imposti mir-Regolament ta’ Implimentazzjoni tal-Kummissjoni (UE) 2019/244 (2) (l-investigazzjoni oriġinali).

(2)

Oleaginosa Moreno Hermanos S.A.C.I.F.I. y A (l-applikant), produttur esportatur Arġentin, bil-kodiċi addizzjonali TARIC C497 (3), soġġett għal rata ta’ dazju kumpensatorju individwali ta’ 25,0 %, informa lill-Kummissjoni fit-23 ta’ Mejju 2022 li kien bidel ismu għal Viterra Argentina S.A.

(3)

Il-kumpanija qieset li l-bidla fl-isem ma taffettwax id-drittijiet tagħha li tibbenefika mir-rata tad-dazju kumpensatorju individwali applikata għaliha taħt l-isem preċedenti tagħha u talbet lill-Kummissjoni tikkonferma dan.

(4)

L-assoċjazzjoni Ewropea tal-produtturi tal-bijodiżil (EBB) ma qablitx mal-applikant billi argumentat li din il-kumpanija kienet għaddiet minn bidla strutturali aktar kumplessa li taffettwa d-dritt tagħha li tkompli tibbenefika mil-livell ta’ miżura stabbilit fl-investigazzjoni oriġinali.

(5)

Il-Kummissjoni ġabret informazzjoni u eżaminat l-evidenza pprovduta mill-applikant u qieset li l-bidla fl-isem kienet irreġistrata kif suppost mal-awtoritajiet rilevanti, u ma rriżultatx f’relazzjoni ġdida ma’ gruppi oħra ta’ kumpaniji li ma kinux investigati mill-Kummissjoni fl-investigazzjoni oriġinali.

(6)

L-evidenza fil-proċess ikkonfermaw id-dikjarazzjoni tar-rikorrent li l-bidla fl-isem ġiet approvata mir-Reġistru Pubbliku tal-Kummerċ tal-Arġentina fit-3 ta’ Mejju 2022 u mill-Amministrazzjoni Federali tad-Dħul Pubbliku fl-1 ta’ Lulju 2022. Għaldaqstant, il-Kummissjoni kkonkludiet li l-bidla fl-isem ma taffettwax is-sejbiet tar-Regolament ta’ Implimentazzjoni (UE) 2019/244 u b’mod partikolari r-rata tad-dazju kumpensatorju applikabbli għall-kumpanija.

(7)

Abbażi ta’ dan ta’ hawn fuq, il-bidla fl-isem jenħtieġ li tidħol fis-seħħ mid-data li fiha l-kumpanija bdiet topera uffiċjalment bl-isem il-ġdid, jiġifieri l-1 ta’ Lulju 2022.

(8)

L-industrija tal-Unjoni (EBB) fil-kummenti tagħha għad-divulgazzjoni tenniet l-argumenti ppreżentati inizjalment dwar it-talba għal bidla fl-isem. Allegat li l-bidla fl-isem kienet qed taħbi bidla strutturali aktar kumplessa, li l-applikant żied l-attivitajiet tiegħu tal-bijodiżil permezz ta’ akkwisti differenti, biddel is-CEO, sar mexxej fis-settur agrikolu fl-Arġentina, u li, b’xi mod, kien relatat ma’ produttur esportatur ieħor, li kien falla.

(9)

Fakkret li l-produtturi esportaturi kollha fl-Arġentina huma soġġetti għal impenn fuq il-prezz li bih iridu jirrispettaw prezz minimu ta’ importazzjoni u jesportaw volum limitat ta’ bijodiżil tagħhom lejn l-Unjoni, liema limitu jiġi rivedut kull sena għall-pajjiż kollu.

(10)

The Commission examined the above allegations and noted that the industry did not provide sufficient evidence corroborating their claims. Il-Kummissjoni ma sabitx evidenza li tindika impatt tal-attivitajiet tal-applikant fis-settur agrikolu, jew l-allegata żieda fil-kapaċità tal-produzzjoni tiegħu fuq il-miżuri attwalment fis-seħħ. Is-sempliċi bidla fl-isem ma tippermettix lill-applikant jesporta volum ogħla lejn l-Unjoni jew ibigħ taħt il-prezz minimu ffissat perjodikament mill-Kummissjoni u għalhekk ma jistax jaffettwa jew jimmina l-miżuri attwalment fis-seħħ. L-affermazzjonijiet tal-industrija tal-Unjoni ma setgħux jittieħdu inkonsiderazzjoni u għalhekk ġew miċħuda.

(11)

Minħabba l-kunsiderazzjonijiet fil-premessi ta’ hawn fuq, il-Kummissjoni qieset li kien xieraq li r-Regolament ta’ Implimentazzjoni (UE) 2019/244 jiġi emendat biex jirrifletti l-bidla fl-isem tal-kumpanija li qabel kellha l-kodiċi TARIC addizzjonali C497.

(12)

Il-miżuri previsti f’dan ir-Regolament huma skont l-opinjoni tal-Kumitat stabbilit bl-Artikolu 15(1) tar-Regolament (UE) 2016/1036 tal-Parlament Ewropew u tal-Kunsill (4).

(1)

Wara investigazzjoni anti-dumping f’konformità mal-Artikolu 5 tar-Regolament bażiku, fit-2 ta’ Mejju 2017, il-Kummissjoni adottat ir-Regolament ta’ Implimentazzjoni (UE) 2017/763 (2) li jimponi dazju anti-dumping definittiv fuq l-importazzjonijiet fl-Unjoni ta’ ċerta karta termali ħafifa (lightweight thermal paper, “LWTP”) li toriġina mir-Repubblika tal-Korea (“il-pajjiż ikkonċernat”) (“ir-Regolament inkwistjoni”). Il-miżuri ħadu l-forma ta’ rati ta’ dazju fissi: EUR 104,46 għal kull tunnellata netta kemm għall-grupp Hansol kif ukoll għall-kumpaniji l-oħrajn kollha.

(2)

Il-grupp Hansol (Hansol Paper Co. Ltd. u Hansol Artone Paper Co. Ltd.) (“Hansol”) ikkontesta r-Regolament inkwistjoni quddiem il-Qorti Ġenerali. Fit-2 ta’ April 2020, il-Qorti Ġenerali ħarġet is-sentenza tagħha fil-Kawża T-383/17 li tannulla r-Regolament ta’ Implimentazzjoni (UE) 2017/763 sa fejn kien jikkonċerna lil Hansol. Fil-11 ta’ Ġunju 2020, il-Kummissjoni għamlet appell għas-sentenza tal-Qorti Ġenerali (Kawża C-260/20 P). Fit-12 ta’ Mejju 2022, il-Qorti tal-Ġustizzja ċaħdet l-appell.

(3)

Il-Qorti Ġenerali sabet li l-Kummissjoni kienet wettqet żball meta stabbiliet il-valur normali għal mill-anqas tip wieħed ta’ prodott mibjugħ minn Hansol Artone Paper Co. Ltd. (“Artone”). Fin-nuqqas ta’ bejgħ domestiku ta’ dak it-tip ta’ prodott, il-Kummissjoni, skont l-Artikolu 2(3) tar-Regolament bażiku, ħadmet valur normali għal Artone fuq il-bażi tal-kost tal-produzzjoni ta’ Artone. Peress li Hansol Paper Co. Ltd. (“Hansol Paper”) kellha bejgħ domestiku rappreżentattiv fl-andament normali tal-kummerċ ta’ dak it-tip ta’ prodott, il-Qorti Ġenerali sabet li l-Kummissjoni kien jenħtiġilha li tuża l-prezz tal-bejgħ domestiku ta’ dik il-parti bħala valur normali, skont l-Artikolu 2(1) tar-Regolament bażiku.

(4)

Il-Qorti Ġenerali sabet ukoll li l-Kummissjoni kienet għamlet żball evidenti ta’ valutazzjoni fil-ponderazzjoni tal-bejgħ fl-Unjoni Ewropea ta’ rombli jumbo lil klijenti indipendenti meta mqabbel mal-bejgħ lil konvertituri relatati għall-konverżjoni f’rombli żgħar. Il-Kummissjoni kienet applikat din il-ponderazzjoni biex tirrifletti kif xieraq l-imġiba ġenerali ta’ dumping ta’ Hansol filwaqt li Hansol, fuq talba tagħha, kienet ingħatat eżenzjoni għal tlieta mill-konvertituri relatati tagħha biex tlesti kwestjonarju. Il-Qorti Ġenerali sabet li, billi ma kkunsidratx ċertu volum ta’ bejgħ mill-ġdid ta’ Schades Nordic, wieħed minn dawn it-tliet konvertituri relatati fl-Unjoni, il-Kummissjoni kienet issottovalutat il-ponderazzjoni tal-bejgħ ta’ Hansol ta’ rombli jumbo lil klijenti indipendenti li kellhom marġni ta’ dumping ferm aktar baxx mill-bejgħ tagħha lil konvertituri relatati għall-bejgħ mill-ġdid fil-forma ta’ rombli żgħar lil negozjanti indipendenti. Għalhekk, il-Kummissjoni kienet kisret l-Artikolu 2(11) tar-Regolament bażiku peress li l-kalkoli li saru mill-Kummissjoni ma kinux jirriflettu l-firxa sħiħa tad-dumping prattikat minn Hansol.

(5)

Fl-aħħar, il-Qorti Ġenerali sabet li l-iżball ta’ ponderazzjoni deskritt fil-premessa (4) affettwa wkoll il-kalkolu tal-marġni tat-twaqqigħ tal-prezz u tad-dannu, peress li l-Kummissjoni kienet użat l-istess ponderazzjoni għal dawn il-kalkoli. Għalhekk, din sabet li l-Kummissjoni kienet kisret l-Artikolu 3(2) u 3(3) tar-Regolament bażiku.

(6)

Dawn is-sejbiet ġew ikkonfermati mill-Qorti tal-Ġustizzja (5).

(7)

Skont l-Artikolu 266 tat-Trattat dwar il-Funzjonament tal-Unjoni Ewropea (“TFUE”), l-istituzzjonijiet tal-Unjoni huma obbligati jieħdu l-passi meħtieġa biex jikkonformaw mas-sentenzi tal-Qorti tal-Unjoni. F’każ ta’ annullament ta’ att adottat mill-istituzzjonijiet tal-Unjoni fil-kuntest ta’ proċedura amministrattiva, bħall-investigazzjoni anti-dumping f’dan il-każ, il-konformità mas-sentenza tal-Qorti Ġenerali tikkonsisti mis-sostituzzjoni tal-att annullat b’att ġdid, fejn l-illegalità identifikata mill-Qorti Ġenerali hija eliminata (6).

(8)

Skont il-ġurisprudenza tal-Qorti Ġenerali u tal-Qorti tal-Ġustizzja, il-proċedura għas-sostituzzjoni ta’ att annullat tista’ titkompla fil-punt eżatt li fih seħħet l-illegalità (7). Dan jimplika, b’mod partikolari, li f’sitwazzjoni fejn att li jikkonkludi proċedura amministrattiva jiġi annullat, dak l-annullament mhux neċessarjament jaffettwa l-atti preparatorji, bħall-bidu tal-proċedura anti-dumping. Pereżempju, fejn jiġi annullat regolament li jimponi miżuri anti-dumping definittivi, il-proċediment jibqa’ miftuħ minħabba li huwa biss l-att li jikkonkludi l-proċediment li jisparixxi mill-ordinament ġuridiku tal-Unjoni (8), ħlief f’każijiet fejn l-illegalità tkun seħħet fl-istadju tal-bidu. It-tkomplija tal-proċedura amministrattiva bl-impożizzjoni mill-ġdid tad-dazji anti-dumping fuq l-importazzjonijiet li kienu saru matul il-perjodu ta’ applikazzjoni tar-regolament annullat ma tistax titqies li tmur kontra r-regola ta’ nonretroattività (9).

(9)

Fil-kawża attwali, il-Qorti Ġenerali annullat ir-Regolament inkwistjoni fir-rigward ta’ Hansol għar-raġunijiet imsemmija fil-premessi (3) sa (5).

(10)

Is-sejbiet fir-Regolament inkwistjoni, li ma ġewx ikkontestati, jew li ġew ikkontestati iżda miċħuda mill-Qorti Ġenerali jew ma ġewx eżaminati mill-Qorti Ġenerali, u għalhekk ma wasslux għall-annullament tar-Regolament inkwistjoni, jibqgħu kompletament validi (10).

(11)

Wara s-sentenza tal-Qorti tal-Ġustizzja fil-Kawża C-260/20 P, il-Kummissjoni ddeċidiet li terġa’ tiftaħ parzjalment l-investigazzjoni anti-dumping dwar l-importazzjonijiet ta’ ċerta karta termali ħafifa li twassal għall-adozzjoni tar-Regolament inkwistjoni u li tkompli l-investigazzjoni mill-punt li fih seħħew l-irregolaritajiet. Ġie ppubblikat Avviż (“l-Avviż ta’ ftuħ mill-ġdid”) f’Il-Ġurnal Uffiċjali tal-Unjoni Ewropea fit-30 ta’ Ġunju 2022 (11). Il-ftuħ mill-ġdid kien limitat għall-eżekuzzjoni tas-sentenza tal-Qorti tal-Ġustizzja fir-rigward ta’ Hansol.

(12)

Fl-istess ħin, il-Kummissjoni ddeċidiet li tagħmel l-importazzjonijiet ta’ ċerta karta termali ħafifa li toriġina mir-Repubblika tal-Korea u prodotta minn Hansol soġġetta għal reġistrazzjoni u talbet lill-awtoritajiet doganali nazzjonali biex jistennew il-pubblikazzjoni tar-Regolament ta’ Implimentazzjoni rilevanti tal-Kummissjoni li jimponi mill-ġdid id-dazji qabel ma jiddeċiedu dwar kwalunkwe talba għal ħlas lura u remissjoni ta’ dazji anti-dumping sa fejn kienu kkonċernati l-importazzjonijiet li jikkonċernaw il-prodotti ta’ Hansol (12) (“ir-Regolament dwar ir-reġistrazzjoni”).

(13)

Il-Kummissjoni informat lill-partijiet interessati dwar il-ftuħ mill-ġdid u stednithom jikkummentaw.

(14)

Il-Kummissjoni rċeviet kummenti minn Hansol u mill-Assoċjazzjoni Ewropea tal-Karta Termali (“ETPA”) u mill-membri tagħha.

(15)

Hansol innotat li fir-Regolament dwar ir-reġistrazzjoni, il-Kummissjoni kienet ibbażat fuq is-sentenzi tal-Qorti Ġenerali fil-Kawżi T-440/20 u T-441/20 (“Jindal Saw”) (13) biex tikkonkludi li r-reġistrazzjoni kienet għodda sabiex ikunu jistgħu sussegwentement jiġu applikati miżuri kontra l-importazzjonijiet mid-data tar-reġistrazzjoni. Hansol sostniet li dawn is-sentenzi kienu għadhom mhux finali u li ma kinux japplikaw għas-sitwazzjoni preżenti, għaliex fil-Kawża T-383/17 il-Qorti Ġenerali kienet iddikjarat li r-regolament kien illegali filwaqt li ma kinitx iddikjarat hekk fil-Kawżi T-440/20 u T-441/20. Din argumentat ukoll li f’Jindal Saw il-kumpanija kkonċernata, Jindal Saw, kienet waħda minn diversi produtturi esportaturi u kien hemm diversi pajjiżi kkonċernati, filwaqt li Hansol hija l-uniku produttur esportatur fil-kawża inkwistjoni li tikkonċerna biss il-Korea. Fuq dik il-bażi, Hansol sostniet li l-Kummissjoni għalhekk ma tistax tibbaża fuq is-sentenzi ta’ Jindal Saw biex tiġbor b’mod retroattiv ir-responsabbiltà finali għall-ħlas tad-dazji anti-dumping fuq l-importazzjonijiet tal-prodott ikkonċernat manifatturat minn Hansol.

(16)

Fir-rigward tal-fatt li s-sentenza ta’ Jindal Saw kienet għadha tista’ tiġi appellata, l-ETPA sostniet li dawn is-sentenzi jirreplikaw ġurisprudenza stabbilita fit-tul. L-ETPA kkontestat ukoll id-differenzi allegati minn Hansol bejn is-sentenzi f’Jindal Saw u li f’T-383/17, bħal fil-parti operattiva tas-sentenzi f’T-300/16 u T-301/16 (il-kawżi ta’ qabel T-440/20 u T-441/20 li permezz tagħhom ir-regolamenti oriġinali f’Jindal Saw ġew annullati), bħal f’T-383/17, il-Qorti Ġenerali annullat ir-regolament ikkontestat fl-intier tiegħu, sa fejn jikkonċerna lir-rikorrent. Skont l-ETPA, il-fatt li s-sentenza annullat ir-Regolament inkwistjoni għal Hansol biss kien ifisser ukoll li, għall-kuntrarju tal-pretensjoni ta’ Hansol, ir-regolament inkwistjoni xorta waħda jifforma parti mill-ordni ġuridiku tal-Unjoni.

(17)

F’dan ir-rigward, il-Kummissjoni nnotat li l-fatt li s-sentenza fil-Kawża T-440/20 kienet għadha mhux finali meta ġie ppubblikat ir-regolament dwar ir-reġistrazzjoni ma jimplikax li r-reġistrazzjoni ma kinitx possibbli f’din il-kawża. F’dik il-kawża, il-Qorti Ġenerali approvat il-prattika tal-Kummissjoni li tirreġistra l-importazzjonijiet meta timplimenta s-sentenzi, u appoġġat il-fatt li l-Kummissjoni tista’ tabilħaqq tirreġistra l-importazzjonijiet f’sitwazzjonijiet bħal dawn. Il-Qorti Ġenerali ddikjarat li l-Artikolu 14 tar-Regolament bażiku, li jagħti s-setgħa lill-Kummissjoni li titlob lill-awtoritajiet nazzjonali jieħdu miżuri xierqa biex jirreġistraw l-importazzjonijiet, huwa ta’ applikazzjoni ġenerali. B’mod partikolari, il-Qorti Ġenerali nnotat li “l-Artikolu 14(5) ta’ dak ir-regolament ma huwiex soġġett għal xi restrizzjoni fir-rigward taċ-ċirkostanzi li fihom il-Kummissjoni għandha s-setgħa li titlob lill-awtoritajiet doganali nazzjonali jirreġistraw il-merkanzija”. Il-Qorti Ġenerali ddikjarat ukoll li “t-tneħħija tad-dritt lill-Kummissjoni li tirrikorri għar-reġistrazzjoni bħala parti mill-proċedimenti għall-impożizzjoni mill-ġdid ta’ dazju anti-dumping definittiv jista’ jimmina l-effettività tar-regolamenti li jista’ jwassal għal tali impożizzjoni mill-ġdid”. Fi kwalunkwe każ, is-sentenza, sadanittant, saret finali. Għalhekk, it-talba ġiet miċħuda.

(18)

Fir-rigward tat-talba ta’ Hansol li r-Regolament inkwistjoni ma kienx għadu jgħodd billi Hansol, li għaliha kien ġie annullat ir-regolament, kienet l-uniku produttur esportatur ikkonċernat minn dak ir-Regolament, il-Kummissjoni, mingħajr ma daħlet fir-rilevanza ġuridika tat-talba, ġibdet l-attenzjoni li t-talba kienet fattwalment skorretta. Tabilħaqq, il-fatt li fil-perjodu ta’ investigazzjoni ma ġie identifikat l-ebda produttur ieħor mir-Repubblika tal-Korea li jesporta lejn l-Unjoni ma jfissirx li r-Regolament ta’ Implimentazzjoni (UE) 2017/763 japplika biss għal Hansol. Tabilħaqq, fir-Regolament inkwistjoni, il-Kummissjoni imponiet ukoll dazji fuq produtturi esportaturi oħrajn permezz tad-dazju residwu (14). Barra minn hekk, il-Qorti Ġenerali annullat ir-Regolament ikkontestat biss “sa fejn jikkonċerna lil Hansol Paper Co. Ltd.”. Għalhekk, it-talba ġiet miċħuda.

(19)

Hansol indikat ukoll tħassib li l-Kummissjoni possibbilment ma tifhimx b’mod korrett kif tikkoreġi l-kwistjoni tal-ponderazzjoni. Hansol sostniet li, skont is-sentenza tal-Qorti Ġenerali, il-perċentwal li jirrappreżenta l-bejgħ mill-ġdid tar-rombli jumbo minn Schades Ltd. fil-bejgħ totali tar-rombli jumbo minn Hansol Paper, Artone, u n-negozjant relatat tagħha Hansol Europe man-negozjant relatat tagħha Schades Ltd., jenħtieġ li jiġi applikat għall-kwantità ta’ bejgħ ta’ rombli jumbo lill-konvertituri relatati tagħha (Schades Nordic, Heipa u R+S) għall-bejgħ mill-ġdid. Il-kwantità li tirriżulta jenħtieġ li tiżdied mal-kwantità ta’ bejgħ ta’ rombli jumbo (diretti u indiretti) użati għall-kalkolu tal-marġni tad-dumping u mnaqqsa mill-kwantità ta’ bejgħ ta’ rombli jumbo għal Schades Nordic, Heipa u R+S għall-konverżjoni. Fuq dik il-bażi, Hansol ipprovdiet kalkolu mill-ġdid tal-ponderazzjoni bejn il-bejgħ dirett u indirett ta’ rombli jumbo lil klijenti indipendenti meta mqabbel mal-bejgħ lil konvertituri relatati għal bejgħ mill-ġdid fil-forma ta’ rombli żgħar lil klijenti indipendenti. L-ETPA ssottolinjat li matul l-investigazzjoni, flimkien ma’ Schades Ltd., l-uniku konvertitur relatat ma’ Hansol li biegħ mill-ġdid ukoll ir-rombli jumbo kien Schades Nordic u li għalhekk għal dik ir-raġuni biss, approċċ bħal dan ma jkunx konformi mal-evidenza disponibbli għall-Kummissjoni. Enfasizzat ukoll li, filwaqt li l-Qorti Ġenerali identifikat ċerti żbalji fl-approċċ adottat mill-Kummissjoni fl-investigazzjoni oriġinali, din ma imponietx approċċ għal kalkolu tal-ponderazzjoni rivedut, u ċċarat li huwa f’idejn il-Kummissjoni li tiddeċiedi liema miżuri huma xierqa biex tiġi żgurata l-konformità mas-sentenza.

(20)

Fir-rigward ta’ din il-kwistjoni, il-Kummissjoni nnotat li l-metodu propost minn Hansol huwa fundamentalment differenti mill-metodu użat mill-Kummissjoni fil-kalkolu tad-dumping tagħha għar-Regolament inkwistjoni. F’dak il-kalkolu li jistabbilixxi l-marġnijiet ta’ Hansol, il-Kummissjoni kkwantifikat il-bejgħ dirett u indirett totali ta’ rombli jumbo lil klijenti mhux relatati li sar mill-grupp Hansol kollu kemm hu kif huwa rrapportat fit-tweġibiet għall-kwestjonarju tal-entitajiet differenti tal-grupp fit-tabelli tal-bejgħ tagħhom. Fuq dik il-bażi, il-Kummissjoni stabbiliet il-piż ta’ dan il-bejgħ meta mqabbel mal-piż tar-rombli jumbo għall-konverżjoni għal rombli żgħar. Il-proposta ta’ Hansol li jiġi applikat is-sehem ikkalkolat ta’ bejgħ mill-ġdid ta’ rombli jumbo minn Schades Ltd. meta mqabbel mal-volumi totali ta’ xiri ta’ Schades Ltd lit-tliet konvertituri relatati l-oħrajn hija metodu fundamentalment differenti u mhux daqstant bir-reqqa, fid-dawl tal-volumi tal-bejgħ mill-ġdid ta’ rombli jumbo tat-tliet konvertituri relatati li ma weġbux għall-kwestjonarju, kif ġie rrapportat minn Hansol matul il-proċediment.

(21)

Il-Kummissjoni ċċarat ukoll li, filwaqt li l-Qorti Ġenerali sabet li l-Kummissjoni wettqet żball billi fil-kalkolu ma inkludietx il-volumi tal-bejgħ mill-ġdid ta’ rombli jumbo rrapportati fil-proċediment minn Schades Nordic (15), hija ma kinitx skwalifikat il-metodoloġija tal-Kummissjoni bħala tali. Għalhekk, il-Kummissjoni żammet strettament mad-deċiżjoni tal-Qorti Ġenerali billi żammet il-metodoloġija għall-istabbiliment tal-ponderazzjoni rispettiva mhux mibdula, ħlief għall-fatt li issa żiedet il-volumi ta’ rombli jumbo mibjugħa minn Schades Nordic, Heipa u R+S, kif meħtieġ mill-Qorti Ġenerali. Dak il-kalkolu ġie spjegat aktar fid-divulgazzjoni limitata speċifika għall-kumpanija.

(22)

Għal żewġ tipi ta’ prodotti esportati lejn l-Unjoni minn Artone, il-Kummissjoni, fil-kalkolu tagħha tad-dumping, kienet ħadmet il-valur normali fin-nuqqas ta’ bejgħ domestiku rappreżentattiv ta’ dik il-parti. Fil-punt 148 u fil-punti 152-158 tas-sentenza fil-Kawża T-383/17 u fil-punti 79 u 85 tas-sentenza fil-Kawża C-260/20 P, il-Qrati tal-Unjoni sabu li, kemm skont il-formulazzjoni kif ukoll l-istruttura tal-ewwel subparagrafu tal-Artikolu 2(1) tar-Regolament bażiku, kien il-prezz effettivament imħallas jew pagabbli fl-andament normali tal-kummerċ li jrid, bħala kwistjoni ta’ prijorità, jitqies biex jiġi stabbilit il-valur normali. Meta l-esportatur ma jbigħx il-prodott simili domestikament, il-valur normali għandu jiġi stabbilit abbażi tal-prezzijiet ta’ bejjiegħa jew produtturi oħrajn bħala kwistjoni ta’ prijorità, u mhux abbażi tal-kostijiet tal-produzzjoni tal-kumpanija kkonċernata.

(23)

Wieħed miż-żewġ tipi ta’ prodotti msemmija fil-premessa (22) fil-fatt inbigħ fis-suq domestiku fi kwantitajiet rappreżentattivi u fl-andament normali tal-kummerċ mill-kumpanija relatata Hansol Paper u, għalhekk, il-Qorti Ġenerali sabet li l-Kummissjoni kienet kisret l-Artikolu 2(1) tar-Regolament bażiku fil-kuntest tal-kalkolu tal-valur normali ta’ Artone.

(24)

Għalhekk, il-Kummissjoni rrevediet il-kalkolu tal-valur normali għal dak it-tip ta’ prodott billi ssostitwiet il-valur normali maħdum ta’ Artone bil-valur normali ta’ Hansol Paper fir-rigward ta’ dak it-tip ta’ prodott.

(25)

It-tip ta’ prodott l-ieħor esportat minn Artone li għalih inħadem il-valur normali ma kellux bejgħ domestiku rappreżentattiv minn Hansol Paper lanqas. Tabilħaqq, il-volumi tal-bejgħ domestiku ta’ Hansol Paper naqsu ferm taħt il-limitu ta’ 5 % tal-Artikolu 2(2) tar-Regolament bażiku. Konsegwentement, u skont l-Artikolu 2(3) tar-Regolament bażiku, il-valur normali ta’ dak it-tip ta’ prodott kien maħdum ukoll għal Hansol Paper. Fin-nuqqas ta’ prezzijiet tal-bejgħ rappreżentattivi fl-andament normali tal-kummerċ ta’ bejjiegħa jew produtturi oħrajn fil-pajjiż esportatur, il-ħidma tal-valur normali ta’ Artone għal dan it-tip ta’ prodott għalhekk inżammet.

(26)

Fl-investigazzjoni li wasslet għar-Regolament inkwistjoni, il-Kummissjoni kienet irċeviet tweġibiet għall-kwestjonarju minn Hansol, Artone, Hansol Europe (negozjant relatat fl-Unjoni) u Schades UK Ltd., negozjant/konvertitur relatat li jinsab fl-Unjoni. Tliet konvertituri li jinsabu fl-Unjoni u relatati mal-Grupp Hansol, jiġifieri Schades Nordic, Heipa u R+S, kienu talbu eżenzjoni biex jimlew il-kwestjonarju għall-kumpaniji relatati mal-produttur esportatur (l-Anness I tal-kwestjonarju). Dawn il-partijiet ikkonvertew il-prodott ikkonċernat għall-bejgħ mill-ġdid, f’rombli żgħar, lil klijenti indipendenti. Il-Kummissjoni aċċettat it-talba għal eżenzjoni tagħhom, li kienet ibbażata fuq in-nuqqas jew il-volum limitat ta’ bejgħ tal-prodott ikkonċernat minn dawn il-partijiet.

(27)

Skont l-Artikolu 2(11) tar-Regolament bażiku, il-Kummissjoni hija obbligata li tqis it-tranżazzjonijiet kollha tal-esportazzjoni lejn l-Unjoni meta tikkalkula l-marġni tad-dumping. Sabiex fil-kalkolu tad-dumping tagħha jiġi inkluż il-volum sinifikanti ta’ bejgħ mill-Grupp Hansol lill-konvertituri relatati li kienu ġew eżentati milli jimlew kwestjonarju, il-Kummissjoni kienet estendiet ir-riżultati tal-kalkolu tad-dumping billi applikat ponderazzjoni tal-marġnijiet tad-dumping ikkalkolati abbażi tat-tweġibiet ivverifikati għall-kwestjonarju ta’ Hansol Paper, Artone, Hansol Europe u Schades UK Ltd. Għal dak il-għan, il-Kummissjoni attribwiet ponderazzjoni ta’ bejn 15 % u 25 % għall-marġni tad-dumping stabbilit għall-bejgħ dirett u l-bejgħ tal-prodott ikkonċernat permezz ta’ kumpaniji relatati u ponderazzjoni ta’ bejn 75 % u 85 % għall-marġni tad-dumping stabbilit għall-bejgħ lil konvertituri relatati għall-bejgħ mill-ġdid bħala rombli żgħar lil partijiet mhux relatati (16).

(28)

Il-Qorti Ġenerali u l-Qorti tal-Ġustizzja sabu li l-Kummissjoni kienet kisret l-Artikoli 2(11) u 9(4) tar-Regolament bażiku. Huma sabu li l-ponderazzjoni użata kienet ivvizzjata minn żball evidenti peress li ċertu volum ta’ prodott ikkonċernat mibjugħ mill-ġdid minn Schades Nordic kien ġie injorat. Għalhekk, il-volum tal-bejgħ dirett u indirett tal-prodott ikkonċernat ma kienx iddikjarat biżżejjed fil-kalkolu tal-ponderazzjoni u l-firxa sħiħa tad-dumping konsegwentement ma kinitx ġiet riflessa fil-kalkoli. (17)

(29)

Fid-dawl tas-sejbiet tal-Qrati tal-Unjoni kif miġbura fil-qosor fil-premessa (28), il-Kummissjoni rrieżaminat il-kalkolu tal-ponderazzjoni. Hija għamlet dan billi żiedet mal-volum tal-bejgħ dirett u indirett tal-prodott ikkonċernat użat għal dik il-komputazzjoni, il-volum ta’ bejgħ mill-ġdid ta’ rombli jumbo ta’ Hansol permezz ta’ Schades Nordic kif ġie rrapportat minn Hansol matul l-investigazzjoni. Il-ponderazzjoni tal-bejgħ dirett u indirett tal-prodott ikkonċernat ta’ Hansol meta mqabbel mal-bejgħ totali tiegħu lejn l-Unjoni konsegwentement żdied b’0,7 punti perċentwali, filwaqt li l-ponderazzjoni tal-bejgħ tiegħu lil konvertituri relatati għall-bejgħ mill-ġdid bħala rombli żgħar lil partijiet mhux relatati naqas bl-istess perċentwal.

(30)

Il-Kummissjoni kkalkolat mill-ġdid il-marġni tad-dumping għal Hansol, billi ssostitwiet il-valur normali maħdum ta’ tip ta’ prodott wieħed mibjugħ minn Artone b’valur normali bbażat fuq il-prezz tal-bejgħ domestiku ta’ dak it-tip ta’ prodott miksub minn Hansol Paper, kif inhu spjegat fil-premessa (24), u billi rrevediet il-ponderazzjoni tal-marġnijiet tad-dumping stabbiliti għaż-żewġ tipi ta’ bejgħ, kif spjegat fil-premessa (29).

(31)

Abbażi ta’ dan, il-marġni tad-dumping definittiv medju ponderat rivedut tal-Grupp Hansol, espress bħala perċentwal tal-prezz CIF fil-fruntiera tal-Unjoni, bid-dazju mhux imħallas, tnaqqas minn 10,3 % għal 10,2 %.

(32)

Fir-Regolament inkwistjoni, l-istess ponderazzjoni li kienet ġiet applikata għall-marġnijiet tad-dumping għall-bejgħ dirett u indirett tal-prodott ikkonċernat, minn naħa waħda, u għall-bejgħ lil konvertituri relatati għall-bejgħ mill-ġdid bħala rombli żgħar lil partijiet mhux relatati, min-naħa l-oħra, ġiet applikata wkoll biex jiġi kkalkolat il-marġni tat-twaqqigħ tal-prezz ta’ Hansol.

(33)

Il-Qrati tal-Unjoni sabu li l-iżball li jaffettwa l-kalkolu tal-ponderazzjoni tal-bejgħ affettwa wkoll il-kalkolu tat-twaqqigħ tal-prezz u l-valutazzjoni tal-impatt tal-importazzjonijiet li huma l-oġġett ta’ dumping fuq prodotti simili tal-industrija tal-Unjoni (18).

(34)

Fir-rigward tal-kalkolu tat-twaqqigħ tal-prezz, il-Kummissjoni implimentat is-sentenza tal-Qorti tal-Ġustizzja billi applikat ir-rati ta’ ponderazzjoni riveduti, kif spjegat fil-premessa (29), anki għall-marġnijiet ta’ twaqqigħ tal-prezz għall-bejgħ dirett u indirett tal-prodott ikkonċernat, minn naħa waħda, u għall-bejgħ lil konvertituri relatati għall-bejgħ mill-ġdid bħala rombli żgħar lil partijiet mhux relatati, min-naħa l-oħra.

(35)

Ir-riżultat tat-tqabbil, espress bħala perċentwal tal-fatturat tal-produtturi tal-Unjoni inklużi fil-kampjun matul il-perjodu ta’ investigazzjoni, kien marġni tat-twaqqigħ tal-prezz medju ponderat ta’ 9,3 %.

(36)

Il-marġni tat-twaqqigħ tal-prezz li nstab matul l-investigazzjoni li wasslet għar-regolament inkwistjoni kien ta’ 9,4 %. Fid-dawl tad-differenza immaterjali bejn dak il-marġni u l-marġni ta’ twaqqigħ rivedut, il-Kummissjoni kkonkludiet li dik il-bidla ma kinitx teħtieġ ir-rivalutazzjoni tal-analiżi tad-dannu jew tal-kawżalità. Għalhekk, hija kkonfermat is-sejbiet f’dak ir-rigward kif miġbura fil-qosor fit-taqsimiet 4 u 5 tar-Regolament li jimponi miżuri provviżorji (19) u l-premessa (102) tar-Regolament inkwistjoni.

(37)

Fl-14 ta’ Novembru 2022, il-Kummissjoni informat lill-partijiet interessati kollha bis-sejbiet ta’ hawn fuq li abbażi tagħhom kellha l-ħsieb li tipproponi li timponi mill-ġdid id-dazju anti-dumping fuq l-importazzjonijiet ta’ ċerta karta termali ħafifa li toriġina mir-Repubblika tal-Korea u manifatturata minn Hansol u li taġġusta d-dazju residwu, abbażi tal-fatti miġbura u ppreżentati relatati mal-investigazzjoni oriġinali. Wara d-divulgazzjoni finali, waslu kummenti mingħand Hansol, l-ETPA u l-Gvern tar-Repubblika tal-Korea (“GOK”).

(38)

Il-GOK esprima t-tħassib tiegħu fir-rigward tal-mod kif il-Kummissjoni kienet implimentat is-sentenzi tal-Qrati tal-Unjoni peress li fehem li l-kalkoli tad-dumping riveduti ma rrettifikawx għal kollox l-iżbalji identifikati f’dawn is-sentenzi. Madankollu, il-GOK ma speċifikax ulterjorment f’liema sens il-Kummissjoni kellha żball.

(39)

L-ETPA appoġġat bis-sħiħ il-kors ta’ azzjoni maħsub tal-Kummissjoni.

(40)

Fil-kummenti tagħha dwar id-divulgazzjoni, Hansol sostniet li l-Kummissjoni ma kinitx ikkoreġiet l-iżball fir-rigward tal-kalkolu tal-valur normali. Hansol sostniet ukoll li l-Kummissjoni ma rrettifikatx l-iżball ta’ ponderazzjoni identifikat mill-Qorti Ġenerali u kkonfermat mill-Qorti tal-Ġustizzja.

(41)

Hansol sostniet li hija qablet mal-fatt li l-Kummissjoni kienet implimentat is-sentenzi tal-Qrati tal-Unjoni billi użat, għat-tqabbil mal-prezz tal-esportazzjoni ta’ Artone, il-prezz tal-bejgħ domestiku ta’ Hansol Paper għal tip ta’ prodott li dik il-parti kienet biegħet fis-suq domestiku fi kwantitajiet rappreżentattivi u fl-andament normali tal-kummerċ (ara l-premessi (23) u (24)). Madankollu, Hansol ma qablitx mal-fatt li l-Kummissjoni, kif huwa spjegat fil-premessa (25), ma kinitx għamlet dan għal tip ieħor ta’ prodott li ma nbiegħx fis-suq domestiku minn Artone.

(42)

Hansol sostniet li l-Kummissjoni xorta waħda kien jenħtiġilha li tuża l-prezzijiet tal-bejgħ ta’ dak it-tip ta’ prodott minn hawn ’il quddiem imsejjaħ “tip ta’ prodott X” (in-numru attwali tat-tip ta’ prodott huwa kunfidenzjali). Hija argumentat li l-Qorti Ġenerali kienet iddeċidiet li l-Kummissjoni jenħtieġ li tuża l-prezzijiet tal-bejgħ ta’ partijiet oħrajn, jekk disponibbli, “bħala kwistjoni ta’ prijorità”. F’dan ir-rigward, hija sostniet li l-bejgħ domestiku ta’ Hansol tat-tip ta’ prodott X kien kollu profittabbli u, b’riżultat ta’ dan, il-valur normali maħdum ta’ Hansol Paper għal dak it-tip ta’ prodott kien ugwali għal valur normali bbażat fuq il-prezzijiet tal-bejgħ. Billi l-valur normali maħdum kien ugwali għall-prezz tal-bejgħ, Hansol sostniet li l-Kummissjoni kienet taħt l-obbligu li tuża l-prezz tal-bejgħ ta’ Hansol Paper.

(43)

Il-Kummissjoni ma qablitx. L-ewwel nett, hija ċċarat li l-Qorti Ġenerali kienet ikkonfermat li, skont l-Artikolu 2(3), l-ewwel subparagrafu, tar-Regolament bażiku, jekk ma jkun hemm l-ebda bejgħ jew jekk ikun hemm bejgħ insuffiċjenti tal-prodott simili fl-andament normali tal-kummerċ, il-Kummissjoni għandha tidderoga mill-prinċipju tal-użu tal-prezzijiet tal-bejgħ biex tistabbilixxi l-valur normali, u għandha tibbaża l-valur normali fuq il-bażi tal-prezzijiet ta’ bejjiegħa jew produtturi oħrajn jew, jekk dawn ma jkunux disponibbli, tikkalkola l-valur normali abbażi tal-kost tal-produzzjoni. Hija speċifikat, fil-punt 150 tas-sentenza fil-Kawża T-383/17, li insuffiċjenza tal-bejgħ tkopri s-sitwazzjoni li fiha l-bejgħ tal-prodott simili fil-pajjiż esportatur jikkostitwixxi anqas minn 5 % tal-volum tal-bejgħ tal-prodott ikkonċernat lill-Unjoni. Għalhekk, il-Qorti Ġenerali kkonfermat li, f’dan ix-xenarju, il-Kummissjoni ma għandhiex tuża l-prezzijiet tal-bejgħ domestiku (20). F’dan il-każ, il-volumi tal-bejgħ domestiku ta’ Hansol Paper tat-tip ta’ prodott X kienu jikkostitwixxu anqas minn 1 % tal-bejgħ ta’ dak it-tip ta’ prodott lill-Unjoni, li huwa ferm anqas mil-limitu ta’ 5 % imsemmi fl-Artikolu 2(2) tar-Regolament bażiku, u għalhekk, il-valur normali tiegħu ta’ dak it-tip ta’ prodott inħadem mill-Kummissjoni. Hija fakkret ukoll li matul l-investigazzjoni, Hansol qatt ma sostniet li l-Kummissjoni ma kienx messha ħadmet il-valur normali ta’ dak it-tip ta’ prodott għal Hansol Paper. Fin-nuqqas ta’ kwalunkwe produttur ieħor li kkoopera, peress li l-Kummissjoni kienet ħadmet il-valur normali tat-tip ta’ prodott X għal Hansol Paper, kif huwa spjegat hawn fuq, u għalhekk ma kien hemm disponibbli l-ebda prezz tal-bejgħ domestiku alternattiv ta’ dak it-tip ta’ prodott, il-Kummissjoni ħadmet il-valur normali tat-tip ta’ prodott X għal Artone.

(44)

It-tieni, is-sempliċi fatt li l-valur normali maħdum ta’ tip ta’ prodott partikolari huwa identiku għall-prezz tal-bejgħ tiegħu ma jbiddlux f’valur normali bbażat fuq il-prezzijiet tal-bejgħ. Valur normali stabbilit skont l-Artikolu 2(3) tar-Regolament bażiku huwa valur normali maħdum. Għalhekk, għall-fini tal-kalkolu tad-dumping, dan il-valur normali maħdum ma jistax jintuża għal tqabbil ma’ prezzijiet tal-esportazzjoni ta’ partijiet oħrajn peress li ma hemm l-ebda dispożizzjoni biex isir dan fir-Regolament bażiku. Għalhekk, it-talba ta’ Hansol li s-sentenzi tal-Qrati tal-Unjoni kienu jobbligaw lill-Kummissjoni tuża l-prezz tal-bejgħ domestiku ta’ Hansol Paper fil-kalkolu tad-dumping ta’ Artone għal dak it-tip ta’ prodott partikolari, ġiet miċħuda.

(45)

Hansol sostniet ukoll li l-Kummissjoni ma kinitx fehmet b’mod korrett il-metodu li jenħtieġ li tadotta biex tikkoreġi l-iżball ta’ ponderazzjoni. Hija invokat il-punt 86 tas-sentenza fil-Kawża T-383/17 u l-punt 64 tas-sentenza fil-Kawża C-260/20 P biex issostni li l-Kummissjoni kien jenħtieġ li tirrifletti l-proporzjon ta’ bejgħ ta’ Schades UK Ltd. mingħajr konverżjoni fil-bejgħ ta’ Hansol lin-negozjanti relatati l-oħrajn tagħha u mhux sempliċiment iżżid il-volum tal-bejgħ ta’ Schades Nordic mingħajr konverżjoni għall-bejgħ dirett u indirett ta’ Hansol lil klijenti indipendenti. Hansol ippreżentat l-argument ukoll li kieku l-Qorti Ġenerali kienet qieset li l-Kummissjoni kienet se tirrettifika l-iżball ta’ ponderazzjoni kif spjegat fil-premessa (29), il-Kummissjoni, fid-dawl tal-impatt limitat, ma kinitx tilħaq il-konklużjoni li l-iżball ta’ ponderazzjoni seta’ affettwa l-kalkolu tat-twaqqigħ tal-prezz u l-valutazzjoni tal-impatt tal-importazzjonijiet li huma l-oġġett ta’ dumping fuq prodotti simili tal-industrija tal-Unjoni.

(46)

Bħala kumment preliminari, it-talba ta’ Hansol tissuġġerixxi li l-Kummissjoni kienet użat il-kampjunar, jiġifieri kienet applikat l-Artikolu 17(1) tar-Regolament bażiku meta ddeċidiet li tuża d-data ta’ Schades UK Ltd. sabiex tikkalkola l-marġni tad-dumping għall-bejgħ tal-prodott ikkonċernat lil konvertituri relatati. Il-Kummissjoni nnotat li fil-punti 63 sa 69 tas-sentenza fil-Kawża T-383/17, il-Qorti Ġenerali ċaħdet l-istess talba. Tabilħaqq, il-Kummissjoni ddeċidiet li tikkalkola l-marġni tad-dumping fuq il-bejgħ ta’ Hansol lit-tliet konvertituri relatati l-oħrajn fuq id-data dwar il-prezz tal-esportazzjoni minn Schades UK Ltd, minħabba li kienet meqjusa fl-aħjar pożizzjoni biex tipprovdi l-aktar ċifri bir-reqqa fir-rigward tal-maġġoranza tal-bejgħ tal-Grupp Hansol lil konvertituri relatati fl-Unjoni għal bejgħ mill-ġdid sussegwenti bħala rombli żgħar lil klijenti mhux relatati (21). Għall-finijiet tal-kalkolu tad-dumping tal-Grupp Hansol, il-Kummissjoni kienet tal-fehma li Schades UK Ltd. kienet l-uniku konvertitur relatat mal-grupp Hansol li biegħet mill-ġdid il-prodott ikkonċernat lil klijenti indipendenti. Din il-konklużjoni tqieset skorretta mill-Qrati tal-Unjoni fid-dawl tal-evidenza disponibbli fil-fajl fir-rigward ta’ Schades Nordic.

(47)

Tabilħaqq, il-Kummissjoni nnotat li Hansol, fl-investigazzjoni oriġinali, kienet irrapportat lill-Kummissjoni li Schades Nordic kienet biegħet mill-ġdid [170–190] tunnellata mingħajr konverżjoni lil klijenti indipendenti. Hija rrapportat ukoll li ż-żewġ konvertituri relatati l-oħrajn li kienu ġew eżentati, Heipa u R+S, ma kellhom l-ebda bejgħ mill-ġdid mingħajr konverżjoni (22). Hansol ma pprovdiet l-ebda evidenza ta’ bejgħ ta’ rombli jumbo minn Heipa jew minn R+S. Għalhekk, it-talba ta’ Hansol kienet f’kontradizzjoni diretta mal-informazzjoni li kienet ipprovdiet matul l-investigazzjoni.

(48)

Fis-sentenza fil-Kawża C-260/20 P, il-Qorti tal-Ġustizzja ddikjarat b’mod ċar li l-Kummissjoni ma tistax teskludi informazzjoni pprovduta mill-partijiet interessati purament minħabba l-fatt li din l-informazzjoni ġiet ipprovduta b’mod ieħor minflok permezz ta’ tweġiba għall-kwestjonarju dwar l-anti-dumping (23). Il-Kummissjoni, wara li reġgħet fetħet l-investigazzjoni, ikkonformat ma’ dik is-sejba għaliex qieset l-informazzjoni pprovduta minn Hansol, fl-investigazzjoni, dwar il-bejgħ mill-ġdid ta’ rombli jumbo minn Schades Nordic, Heipa u R+S. Billi Hansol kienet irrapportat li Heipa u R+S ma kellhom l-ebda bejgħ mill-ġdid tal-prodott ikkonċernat, ma kienet meħtieġa l-ebda korrezzjoni fir-rigward tal-volumi stabbiliti għal dawn il-partijiet

(49)

Barra minn hekk, Hansol ibbażat it-talba tagħha li skontha l-Kummissjoni kien jenħtiġilha li tapplika l-proporzjon tal-bejgħ ta’ Schades UK Ltd. mingħajr konverżjoni għat-tliet negozjanti relatati l-oħra ta’ Hansol b’mod partikolari fuq it-test fil-punt 86 tas-sentenza fil-Kawża T-383/17 li jaqra li: ta’ min wieħed jinnota li l-Kummissjoni ddeċidiet li tuża d-data ta’ Schades (UK Ltd) sabiex tikkalkola l-marġni tad-dumping fuq il-bejgħ li sar mill-applikant lit-tliet konvertituri relatati l-oħra. F’dan ir-rigward hija rreferiet ukoll għad-dikjarazzjoni tal-Qorti tal-Ġustizzja fil-punt 64 tas-sentenza fil-Kawża C-260/20 P, kif ġej: “kif jirriżulta mill-punti 85 u 86 tas-sentenza appellata, il-Kummissjoni kienet iddeċidiet li tuża d-data ta’ Schades sabiex tikkalkola l-marġni ta’ dumping fuq il-bejgħ ta’ Hansol lit-tliet proċessuri relatati l-oħra. (…) Fid-dawl tal-fatt li l-Kummissjoni kienet taf li Schades kienet biegħet mill-ġdid ċerti kwantitajiet tal-prodott inkwistjoni lil klijenti indipendenti mingħajr ipproċessar, il-Qorti Ġenerali qieset li hija kellha tirrifletti din is-sitwazzjoni fil-livell tal-bejgħ tal-prodotti kkunsidrati lill-proċessuri relatati l-oħrajn. (…)”.

(50)

Il-Kummissjoni qieset li Hansol qrat ħażin id-dikjarazzjonijiet magħmula mill-Qrati tal-Unjoni. Tabilħaqq, id-data ta’ Schades UK Ltd intużat biex jiġi kkalkolat il-marġni tad-dumping fuq il-bejgħ ta’ Hansol lit-tliet konvertituri relatati l-oħrajn bħala l-marġni tad-dumping stabbilit għall-bejgħ ta’ Schades UK Ltd. ta’ rombli jumbo ikkonvertiti f’rombli żgħar ġie applikat għall-volumi applikabbli għall-konverżjoni ta’ oriġini Koreana mibjugħa lil dawn it-tliet konvertituri relatati l-oħrajn. Fil-punt 64, il-Qorti tal-Ġustizzja nnotat, madankollu, li n-natura rappreżentattiva tad-data ta’ Schades UK Ltd. “bl-ebda mod ma teskludi li l-kalkolu bbażat fuq din id-data jkun ivvizzjat bi żbalji, fid-dawl tal-assenza ta’ teħid inkunsiderazzjoni tad-data kollha rilevanti f’dan ir-rigward”. Fi kliem ieħor, il-Qorti tal-Ġustizzja sabet li l-użu ta’ Schades UK Ltd. bħala rappreżentant għall-bejgħ ta’ Hansol lill-konvertituri relatati l-oħrajn ma kienx jimplika li l-Kummissjoni setgħet tinjora l-evidenza fil-fajl fir-rigward tal-bejgħ ta’ rombli jumbo lil klijenti indipendenti rrapportati minn Schades Nordic. Dan ma kienx jirrikjedi li l-Kummissjoni tirrifletti jew testendi l-istess proporzjon tal-bejgħ ta’ Schades Ltd mingħajr konverżjoni fil-bejgħ ta’ Hansol lin-negozjanti relatati l-oħrajn tagħha. Dan imur kontra l-evidenza proprja fil-fajl, li ma ġietx ikkontestata minn Hansol. Permezz tal-ftuħ mill-ġdid tal-investigazzjoni, u għall-kuntrarju ta’ dak li kien sar qabel, il-Kummissjoni qieset bis-sħiħ l-ammonti ta’ rombli jumbo mibjugħin lill-konvertituri relatati ta’ Hansol fl-Unjoni li biegħu mill-ġdid rombli jumbo mingħajr konverżjoni.

(51)

Huwa fir-rigward ta’ [170–190] tunnellata ta’ bejgħ mill-ġdid tal-prodott ikkonċernat lil klijenti indipendenti minn Schades Nordic li l-Qorti Ġenerali u l-Qorti tal-Ġustizzja kienu stabbilew żball hekk kif dan il-bejgħ mill-ġdid, li kien ġie rrapportat minn Hansol fil-proċedura b’mezzi oħrajn għajr permezz ta’ tweġiba għall-kwestjonarju, ma kienx tqies mill-Kummissjoni. Dan ġie kkoreġut, kif inhu spjegat fil-premessa (29), billi ġie miżjud mal-volum tal-bejgħ dirett u indirett tal-prodott ikkonċernat dak il-volum ta’ bejgħ mill-ġdid ta’ rombli jumbo ta’ Hansol permezz ta’ Schades Nordic kif irrapportat minn Hansol matul l-investigazzjoni. Ma kien meħtieġ li jsir l-ebda aġġustament ieħor, peress li Hansol kienet irrapportat li l-konvertituri Heipa u R+S ma kienu għamlu l-ebda bejgħ mill-ġdid tal-prodott ikkonċernat lil klijenti indipendenti.

(52)

Fl-aħħar, il-Kummissjoni ċaħdet l-argument li skontu, il-fatt li l-korrezzjoni magħmula mill-Kummissjoni kellha impatt żgħir biss fuq il-marġni tat-twaqqigħ tal-prezz u l-ebda impatt fuq l-analiżi tad-dannu u l-kawżalità juri li l-Kummissjoni kienet fehmet ħażin is-sentenza tal-Qrati tal-Unjoni. Is-sentenza tal-Qorti Ġenerali tgħid li “ma setax jiġi eskluż” li l-iżball tal-Kummissjoni seta’ kellu impatt u mhux li kellu impatt fuq l-analiżi tad-dannu u l-kawżalità (24). Bl-istess mod, il-Qorti tal-Ġustizzja fil-punt 62 innotat: “Il-fatt li, fid-dawl tal-imsemmija data, kien, tal-inqas, possibbli li l-Kummissjoni attribwiet ponderazzjoni kbira wisq għall-bejgħ lill-konvertituri relatati għall-konverżjoni f’rombli żgħar li b’konsegwenza ta’ dan iżid id-dumping reali applikat minn Hansol, kien biżżejjed sabiex tiġi kkontestata l-affidabbiltà u n-natura oġġettiva tal-valutazzjoni mill-Kummissjoni tad-dumping imwettaq minn Hansol”. Għalhekk, il-fatt li l-korrezzjoni tal-ponderazzjoni kellha impatt żgħir fuq it-twaqqigħ tal-prezz rivedut ma juri xejn ħlief li l-iżball identifikat mill-Qorti Ġenerali kien irrilevanti. Għaldaqstant, din it-talba ġiet miċħuda.

(53)

L-iżball identifikat mill-Qorti Ġenerali u kkonfermat mill-Qorti tal-Ġustizzja dwar il-ponderazzjoni tal-bejgħ affettwa wkoll il-kalkolu tal-marġni tad-dannu. Il-Kummissjoni implimentat is-sentenza tal-Qrati tal-Unjoni billi applikat ir-rati ta’ ponderazzjoni riveduti, kif spjegat fil-premessa (29), anki għall-marġnijiet tad-dannu għall-bejgħ dirett u indirett tal-prodott ikkonċernat, minn naħa, u għall-bejgħ lil konvertituri relatati għall-bejgħ mill-ġdid bħala rombli żgħar lil partijiet mhux relatati, min-naħa l-oħra.

(54)

Ir-riżultat tat-tqabbil irriżulta f’marġni ta’ dannu għal Hansol ta’ 36,9 %, filwaqt li l-marġni ta’ dannu stabbilit matul l-investigazzjoni li wasslet għar-regolament inkwistjoni kien ta’ 37 % (25). Minħabba li l-marġni ta’ dumping stabbilit mill-ġdid huwa anqas mill-marġni ta’ dannu, f’konformità mar-regoli applikabbli, jenħtieġ li r-rata ta’ dazju anti-dumping tiġi stabbilita fil-livell tar-rata ta’ dumping. Għaldaqstant, ir-rata tad-dazju anti-dumping imposta mill-ġdid għal Hansol hija ta’ 10,2 %.

(55)

Il-Kummissjoni fakkret li d-dazju anti-dumping ġie impost bħala ammont fiss f’euro għal kull tunnellata netta. Ir-rata tad-dazju definittiv riveduta ta’ 10,2 % tirrappreżenta rata tad-dazju fissa ta’ EUR 103,16 għal kull tunnellata netta.

(56)

Il-Kummissjoni fakkret ukoll li l-livell ta’ kooperazzjoni f’dan il-każ kien għoli, peress li l-importazzjonijiet ta’ Hansol kienu jikkostitwixxu l-esportazzjonijiet totali lejn l-Unjoni matul il-perjodu ta’ investigazzjoni. Għalhekk, id-dazju anti-dumping residwu kien stabbilit fil-livell tal-kumpanija li kkooperat. Konsegwentement, ir-rata tad-dazju definittiva residwa, applikabbli għall-kumpaniji l-oħrajn kollha, ġiet riveduta għal rata tad-dazju fissa ta’ EUR 103,16 għal kull tunnellata netta.

(57)

Il-livell rivedut ta’ dazju anti-dumping japplika mingħajr ebda interruzzjoni temporali mid-dħul fis-seħħ tar-Regolament inkwistjoni (jiġifieri, mill-4 ta’ Mejju 2017 ’il quddiem). L-awtoritajiet doganali huma ordnati jiġbru l-ammont xieraq fuq l-importazzjonijiet li jikkonċernaw lil prodotti ta’ Hansol u jirrimborżaw kwalunkwe ammont żejjed miġbur sa issa f’konformità mal-leġiżlazzjoni doganali applikabbli.

(58)

Fid-dawl tal-Artikolu 109 tar-Regolament (UE, Euratom) 2018/1046 tal-Parlament Ewropew u tal-Kunsill (26), meta jkollu jiġi rimborżat ammont wara sentenza tal-Qorti tal-Ġustizzja tal-Unjoni Ewropea, l-imgħax li għandu jitħallas jenħtieġ li jkun ir-rata applikata mill-Bank Ċentrali Ewropew għall-operazzjonijiet ta’ rifinanzjament prinċipali tiegħu, kif ippubblikata fis-serje C ta’ Il-Ġurnal Uffiċjali tal-Unjoni Ewropea fl-ewwel jum kalendarju ta’ kull xahar.

(59)

Abbażi ta’ dan ta’ hawn fuq, il-Kummissjoni qieset li huwa xieraq li timponi mill-ġdid id-dazju anti-dumping definittiv fuq l-importazzjonijiet ta’ ċerta karta termali ħafifa li tiżen 65 g/m2 jew anqas; f’rombli wiesgħa 20 cm jew aktar, piż tar-romblu (inkluża l-karta) ta’ 50 kg jew aktar u dijametru tar-romblu (inkluża l-karta) ta’ 40 cm jew aktar (“rombli jumbo”); b’kisja ta’ taħt fuq naħa waħda jew fuq iż-żewġ naħat jew mingħajrha; miksija b’sustanza termosensittiva fuq naħa waħda jew fuq iż-żewġ naħat; u b’kisja ta’ fuq jew mingħajrha, li attwalment taqa’ taħt il-kodiċijiet NM ex 4809 90 00, ex 4811 90 00, ex 4816 90 00 u ex 4823 90 85 (Kodiċijiet TARIC: 4809900010, 4811900010, 4816900010, 4823908520), li joriġinaw mir-Repubblika tal-Korea b’rata fissa ta’ dazju ta’ EUR 103,16 għal kull tunnellata.

(60)

Il-miżuri previsti f’dan ir-Regolament huma skont l-opinjoni tal-Kumitat stabbilit bl-Artikolu 15(1) tar-Regolament (UE) 2016/1036,

(1)

Id-deni tal-ħnieżer Afrikan huwa marda virali infettiva li taffettwa lill-annimali porċini miżmuma u dawk selvaġġi u jista’ jkollu impatt serju fuq il-popolazzjoni tal-annimali kkonċernata u fuq il-profittabbiltà tal-biedja, filwaqt li jikkawża tfixkil fil-movimenti tal-kunsinni ta’ dawn l-annimali u tal-prodotti tagħhom fl-Unjoni u fl-esportazzjonijiet lejn pajjiżi terzi.

(2)

Ir-Regolament (UE) 2016/429 jistabbilixxi qafas leġiżlattiv ġdid għall-prevenzjoni u għall-kontroll tal-mard li jiġi trażmess lill-annimali jew lill-bnedmin. Id-deni tal-ħnieżer Afrikan jaqa’ taħt id-definizzjoni ta’ marda elenkata f’dak ir-Regolament, u huwa soġġett għar-regoli dwar il-prevenzjoni u l-kontroll tal-mard stabbiliti fih. Barra minn hekk, l-Anness tar-Regolament ta’ Implimentazzjoni tal-Kummissjoni (UE) 2018/1882 (2) jelenka d-deni tal-ħnieżer Afrikan bħala marda tal-kategoriji A, D u E li taffettwa lis-Suidae, filwaqt li r-Regolament Delegat tal-Kummissjoni (UE) 2020/687 (3) jissupplimenta r-regoli għall-kontroll tal-mard tal-kategoriji A, B u C stabbiliti fir-Regolament (UE) 2016/429, inkluż b’miżuri ta’ kontroll tal-mard għad-deni tal-ħnieżer Afrikan.

(3)

Ir-Regolament (KE) Nru 1069/2009 tal-Parlament Ewropew u tal-Kunsill (4) jistabbilixxi r-regoli dwar is-saħħa tal-annimali għall-prodotti sekondarji mill-annimali sabiex jiġu evitati u minimizzati r-riskji għas-saħħa tal-annimali li jirriżultaw minn dawk il-prodotti sekondarji. Barra minn hekk, ir-Regolament tal-Kummissjoni (UE) Nru 142/2011 (5) jistabbilixxi ċerti regoli tas-saħħa tal-annimali għall-prodotti sekondarji mill-annimali li jaqgħu fil-kamp ta’ applikazzjoni tar-Regolament (KE) Nru 1069/2009, inkluż ir-regoli fir-rigward tar-rekwiżiti ta’ ċertifikazzjoni għall-movimenti tal-kunsinni ta’ dawk il-prodotti sekondarji fl-Unjoni. Dawk ir-Regolamenti ma jkoprux id-dettalji u l-aspetti speċifiċi kollha fir-rigward tar-riskju tat-tixrid tad-deni tal-ħnieżer Afrikan permezz tal-prodotti sekondarji mill-annimali miksuba minn annimali porċini miżmuma fiż-żoni ristretti II u III u l-prodotti sekondarji mill-annimali miksuba minn annimali porċini selvaġġi miż-żoni ristretti I, II u III. Għalhekk huwa xieraq li f’dan ir-Regolament jiġu stabbiliti miżuri speċjali ta’ kontroll tal-mard relatati ma’ dawk il-prodotti sekondarji mill-annimali u l-movimenti tal-kunsinni ta’ dawn il-prodotti sekondarji mill-annimali miż-żoni ristretti I, II u III.

(4)

Ir-Regolament ta’ Implimentazzjoni tal-Kummissjoni (UE) 2021/605 (6) ġie adottat fil-qafas tar-Regolament (UE) 2016/429, u jistabbilixxi miżuri speċjali ta’ kontroll tal-mard fir-rigward tad-deni tal-ħnieżer Afrikan li jridu jiġu applikati għal perjodu ta’ żmien limitat mill-Istati Membri elenkati fl-Anness I tiegħu, fiż-żoni ristretti I, II u III, kif elenkati f’dak l-Anness. Ir-regoli stabbiliti f’dak ir-Regolament ta’ Implimentazzjoni ġew allinjati kemm jista’ jkun mal-istandards internazzjonali, bħal dawk stabbiliti fil-Kapitolu 15.1 “Infezzjoni bil-virus tad-deni tal-ħnieżer Afrikan” tal-Kodiċi tas-Saħħa tal-Annimali Terrestri tal-Organizzazzjoni Dinjija għas-Saħħa tal-Annimali (7) (il-Kodiċi tad-WOAH).

(5)

Dan ir-Regolament jenħtieġ li jipprevedi wkoll approċċ ta’ reġjonalizzazzjoni, li jenħtieġ li japplika flimkien mal-miżuri ta’ kontroll tal-mard stabbiliti fir-Regolament Delegat (UE) 2020/687 u jenħtieġ li jelenka ż-żoni ristretti tal-Istati Membri affettwati minn tifqigħat tad-deni tal-ħnieżer Afrikan jew li jinsabu f’riskju minħabba l-prossimità tagħhom għal tifqigħat bħal dawn (l-Istati Membri kkonċernati). Dawk iż-żoni ristretti jenħtieġ li jkunu differenzjati skont is-sitwazzjoni epidemjoloġika tad-deni tal-ħnieżer Afrikan u l-livell ta’ riskju u kklassifikati bħala żoni ristretti I, II u III, b’żona ristretta III li telenka ż-żoni bl-ogħla livell ta’ riskju għat-tixrid ta’ dik il-marda u s-sitwazzjoni tal-marda l-aktar dinamika fl-annimali porċini miżmuma. Barra minn hekk, dawk iż-żoni ristretti jenħtieġ li jiġu elenkati fl-Anness I ta’ dan ir-Regolament filwaqt li titqies l-informazzjoni pprovduta mill-awtoritajiet kompetenti tal-Istati Membri kkonċernati fir-rigward tas-sitwazzjoni tal-marda, il-prinċipji u l-kriterji bbażati fuq ix-xjenza għad-definizzjoni ġeografika tar-reġjonalizzazzjoni minħabba d-deni tal-ħnieżer Afrikan u l-linji gwida tal-Unjoni miftiehma mal-Istati Membri fil-Kumitat Permanenti dwar il-Pjanti, l-Annimali, l-Ikel u l-Għalf u disponibbli għall-pubbliku fuq is-sit web tal-Kummissjoni (8), kif ukoll il-livell ta’ riskju għat-tixrid tad-deni tal-ħnieżer Afrikan u s-sitwazzjoni epidemjoloġika ġenerali tad-deni tal-ħnieżer Afrikan fl-Istat Membru kkonċernat u fl-Istati Membri jew pajjiżi terzi tal-viċinat, fejn rilevanti. Barra minn hekk, kwalunkwe emenda sussegwenti tal-konfini taż-żoni ristretti I, II u III fl-Anness I ta’ dan ir-Regolament jenħtieġ li tkun ibbażata fuq kunsiderazzjonijiet simili kif intużaw għall-elenkar, u jenħtieġ li tqis l-istandards internazzjonali, bħall-Kodiċi tad-WOAH, billi tindika n-nuqqas tal-marda għal perjodu ta’ mill-inqas 12-il xahar fiż-żona jew f’pajjiż. F’ċerti sitwazzjonijiet, filwaqt li titqies il-ġustifikazzjoni pprovduta mill-awtorità kompetenti tal-Istat Membru kkonċernat u l-prinċipji u l-kriterji bbażati fuq ix-xjenza għad-definizzjoni ġeografika tar-reġjonalizzazzjoni minħabba d-deni tal-ħnieżer Afrikan u l-linji gwida disponibbli fil-livell tal-Unjoni, dak il-perjodu jenħtieġ li jitnaqqas għal 3 xhur.

(6)

Mid-data tal-adozzjoni tar-Regolament ta’ Implimentazzjoni (UE) 2021/605, is-sitwazzjoni epidemjoloġika fl-Unjoni evolviet u fl-Istati Membri nġabru esperjenza u għarfien ġodda dwar l-epidemjoloġija tad-deni tal-ħnieżer Afrikan. Għalhekk, huwa xieraq li jiġu rieżaminati u adattati l-miżuri speċjali attwali ta’ kontroll tal-mard għad-deni tal-ħnieżer Afrikan stabbiliti f’dak ir-Regolament ta’ Implimentazzjoni filwaqt li jitqiesu dawk l-iżviluppi u sabiex jiġi evitat it-tixrid ta’ dik il-marda fl-Unjoni. Għaldaqstant, il-miżuri speċjali ta’ kontroll tal-mard stabbiliti f’dan ir-Regolament jenħtieġ li jqisu l-esperjenza miksuba fl-applikazzjoni tar-Regolament ta’ Implimentazzjoni (UE) 2021/605.

(7)

Ir-Regolament ta’ Implimentazzjoni (UE) 2021/605 jistabbilixxi miżuri speċjali ta’ kontroll tal-mard għad-deni tal-ħnieżer Afrikan li, b’mod ġenerali, japplikaw għall-movimenti miż-żoni ristretti I, II u III tal-kunsinni tal-annimali porċini miżmuma f’dawk iż-żoni ristretti u l-prodotti tagħhom. Madankollu, il-movimenti tal-kunsinni tal-annimali porċini miżmuma fiż-żoni ristretti I, II u III u l-prodotti tagħhom fiż-żoni ristretti jippreżentaw ukoll riskji fir-rigward tat-tixrid ta’ dik il-marda u jikkontribwixxu għall-persistenza twila tal-marda f’dawk iż-żoni ristretti. Għalhekk, filwaqt li titqies is-sitwazzjoni epidemjoloġika tad-deni tal-ħnieżer Afrikan fl-Istati Membri kkonċernati, huwa xieraq li jiġu stabbiliti projbizzjonijiet speċifiċi u miżuri ta’ mitigazzjoni tar-riskju għall-movimenti tal-kunsinni tal-annimali porċini miżmuma f’dawk iż-żoni ristretti u li jiġi estiż il-kamp ta’ applikazzjoni tal-miżuri speċjali attwali ta’ kontroll tal-mard stabbiliti fir-regoli tal-Unjoni kif xieraq.

(8)

Fil-passat, sabiex tiġi żgurata reazzjoni effettiva u rapida għar-riskji emerġenti, bħall-konferma ta’ tifqigħa tad-deni tal-ħnieżer Afrikan fi Stat Membru jew f’żona preċedentement ħielsa mill-mard, ġew adottati Deċiżjonijiet ta’ Implimentazzjoni individwali tal-Kummissjoni, fejn rilevanti, biex jidentifikaw malajr fil-livell tal-Unjoni ż-żona ristretta għat-tifqigħat tad-deni tal-ħnieżer Afrikan fl-annimali porċini miżmuma, li kienu jinkludu żoni ta’ protezzjoni u ta’ sorveljanza, jew iż-żona infettata f’każ ta’ tifqigħa ta’ dik il-marda fl-annimali porċini selvaġġi, kif previst fir-Regolament Delegat (UE) 2020/687. Sabiex jiġu żgurati ċ-ċarezza u t-trasparenza tar-regoli tal-Unjoni, huwa xieraq li wara l-konferma ta’ tifqigħa tad-deni tal-ħnieżer Afrikan fl-annimali porċini miżmuma jew selvaġġi fi Stat Membru jew f’żona preċedentement ħielsa mill-mard, iż-żoni kkonċernati jiġu identifikati fil-livell tal-Unjoni bħala żoni ta’ protezzjoni u ta’ sorveljanza jew, f’każ tal-annimali porċini selvaġġi, bħala żona infettati u elenkati fl-Anness II ta’ dan ir-Regolament bid-durata ta’ dik ir-reġjonalizzazzjoni. Sabiex tiġi żgurata kontinwità territorjali taż-żoni ristretti għall-annimali porċini miżmuma jew selvaġġi, f’sitwazzjonijiet speċifiċi u filwaqt li titqies il-valutazzjoni tar-riskju, fejn rilevanti, jenħtieġ li jkun possibbli wkoll li jiġu elenkati żoni preċedentement ħielsa mill-mard wara l-konferma tat-tifqigħa tad-deni tal-ħnieżer Afrikan bħala żoni ristretti II jew III fl-Anness I ta’ dan ir-Regolament minflok ma jiġu elenkati dawn iż-żoni fl-Anness II tiegħu.

(9)

Filwaqt li titqies is-sitwazzjoni epidemjoloġika li qiegħda tevolvi tad-deni tal-ħnieżer Afrikan fl-annimali porċini selvaġġi fl-Unjoni, jenħtieġ li l-miżuri speċjali ta’ kontroll tal-mard, inklużi d-derogi rilevanti, applikabbli għaż-żoni ristretti II stabbiliti f’dan ir-Regolament japplikaw ukoll fiż-żoni infettati elenkati fl-Anness II tiegħu, minbarra l-miżuri stabbiliti fl-Artikoli 63 sa 66 tar-Regolament Delegat (UE) 2020/687. Madankollu, minħabba r-riskju immedjat tat-tixrid ulterjuri ta’ dik il-marda li tiġi skoperta fl-annimali porċini selvaġġi, il-movimenti tal-kunsinni tal-annimali porċini miżmuma u l-prodotti tagħhom lejn Stati Membri oħrajn u lejn pajjiżi terzi jenħtieġ li ma jiġux awtorizzati miż-żoni infettati elenkati fl-Anness II tiegħu.

(10)

L-Artikolu 16(2) tar-Regolament ta’ Implimentazzjoni (UE) 2021/605 jipprevedi deroga mir-rekwiżit għal reċint għal ċerti stabbilimenti tal-annimali porċini miżmuma għal perjodu ta’ tliet xhur wara l-konferma tal-ewwel tifqigħa tad-deni tal-ħnieżer Afrikan fl-Istat Membru soġġett għal ċerti kundizzjonijiet. Filwaqt li titqies is-sitwazzjoni speċifika fl-Istati Membri meta ċnut bħal dawn reżistenti għall-bhejjem ma jkunux jistgħu jinbnew f’perjodu qasir ta’ żmien għal raġunijiet tekniċi u amministrattivi, huwa xieraq li jiġi previst perjodu estiż ta’ 6 xhur f’dan ir-Regolament, sabiex tiġi żgurata l-implimentazzjoni xierqa tar-regoli speċjali ta’ kontroll tal-mard għad-deni tal-ħnieżer Afrikan fi Stat Membru jew żona preċedentement ħielsa mill-mard.

(11)

L-Artikoli 166 u 167 tar-Regolament (UE) 2016/429 jirrikjedu li l-kunsinni ta’ prodotti li joriġinaw mill-annimali minn annimali terrestri prodotti jew ipproċessati fi stabbilimenti, f’negozji tal-ikel jew f’żoni soġġetti għal miżuri ta’ emerġenza jew għal restrizzjonijiet fuq il-moviment, iridu jkunu akkumpanjati miċ-ċertifikati rilevanti tas-saħħa tal-annimali. L-Artikolu 19 tar-Regolament ta’ Implimentazzjoni (UE) 2021/605 jistabbilixxi l-obbligi tal-operaturi fir-rigward taċ-ċertifikati tas-saħħa tal-annimali għall-movimenti tal-kunsinni tal-laħam frisk u tal-prodotti tal-laħam, inkluż il-budellati, miksuba mill-annimali porċini miż-żoni ristretti I, II u III u jelenka l-kunsinni li għalihom il-marka tas-saħħa jew tal-identifikazzjoni tista’ tissostitwixxi ċ-ċertifikat tas-saħħa tal-annimali għall-movimenti ta’ ċerti kunsinni minn dawk iż-żoni ristretti. Sabiex tiġi żgurata l-implimentazzjoni tar-regoli speċjali tal-kontroll tal-mard għad-deni tal-ħnieżer Afrikan, huwa meħtieġ li jiġu stabbiliti dispożizzjonijiet adattati f’dan ir-Regolament relatati mal-lista tal-istabbilimenti li għalihom l-awtorità kompetenti tal-Istat Membru kkonċernat tista’ tissostitwixxi ċ-ċertifikat tas-saħħa tal-annimali bil-marka tas-saħħa jew tal-identifikazzjoni għall-movimenti ta’ ċerti kunsinni.

(12)

L-Artikolu 10 tar-Regolament ta’ Implimentazzjoni (UE) 2021/605 jistabbilixxi projbizzjonijiet speċifiċi fir-rigward tal-movimenti tal-kunsinni tal-prodotti ġerminali miksuba mill-annimali porċini miżmuma fiż-żoni ristretti II u III barra minn dawk iż-żoni ristretti. Barra minn hekk, l-Artikolu 31 ta’ dak ir-Regolament ta’ Implimentazzjoni jistabbilixxi kundizzjonijiet speċifiċi għal derogi li jawtorizzaw il-movimenti, tal-kunsinni tal-prodotti ġerminali miksuba mill-annimali porċini miżmuma fiż-żona ristretta II, minn dik iż-żona ristretta fit-territorju tal-istess Stat Membru. Filwaqt li jitqies il-livell għoli tal-miżuri ta’ bijosigurtà fis-seħħ fl-istabbilimenti tal-prodotti ġerminali approvati, jenħtieġ li f’dan ir-Regolament jiġu stabbiliti kundizzjonijiet speċifiċi għal derogi li jawtorizzaw il-movimenti, tal-kunsinni ta’ prodotti ġerminali miksuba minn annimali porċini miżmuma fiż-żona ristretta III, minn dik iż-żona ristretta fit-territorju tal-istess Stat Membru. Fost kundizzjonijiet oħrajn, dawn il-movimenti jenħtieġ li jiġu awtorizzati biss mill-awtorità kompetenti tal-Istat Membru kkonċernat jekk id-donaturi rġiel u d-donaturi nisa jkunu nżammu fl-istabbilimenti tal-prodotti ġerminali approvati mit-twelid jew għal perjodu ta’ mill-inqas 3 xhur qabel il-ġbir tal-prodotti ġerminali kif previst fil-Kodiċi tad-WOAH. Abbażi tal-Kodiċi tad-WOAH, huwa xieraq li jiġi stabbilit ukoll l-obbligu li, mill-inqas kull sena, jiġu ttestjati għad-deni tal-ħnieżer Afrikan l-annimali porċini miżmuma kollha fl-istabbilimenti tal-prodotti ġerminali approvati li huma awtorizzati għall-movimenti tal-kunsinni ta’ prodotti ġerminali miż-żona ristretta III.

(13)

L-Artikolu 14 tar-Regolament ta’ Implimentazzjoni (UE) 2021/605 jistabbilixxi l-kundizzjonijiet ġenerali għal derogi mill-projbizzjonijiet speċifiċi fir-rigward tal-movimenti tal-kunsinni tal-annimali porċini miżmuma fiż-żoni ristretti I, II u III barra minn dawk iż-żoni. L-Artikolu 14(1)(a), ta’ dak ir-Regolament jirreferi għall-kundizzjoni ġenerali stabbilita fl-Artikolu 28(2)(a), tar-Regolament Delegat (UE) 2020/687, li tirrikjedi li l-movimenti awtorizzati kollha fiż-żona ta’ protezzjoni jitwettqu esklużivament permezz ta’ rotot iddeżinjati. Filwaqt li jitqiesu miżuri oħrajn ta’ mitigazzjoni tar-riskju fis-seħħ għall-movimenti tal-kunsinni tal-annimali porċini miżmuma fiż-żoni ristretti I, II u III previsti f’dan ir-Regolament u sabiex jiġu evitati restrizzjonijiet bla bżonn, ir-referenza għall-kundizzjonijiet ġenerali għall-għoti ta’ derogi mill-projbizzjonijiet fiż-żona ta’ protezzjoni tal-Artikolu 28 tar-Regolament Delegat (UE) 2020/687 jenħtieġ li tiġi sostitwita bir-referenza għall-kundizzjonijiet ġenerali għall-għoti ta’ derogi mill-projbizzjonijiet rilevanti għaż-żona ta’ sorveljanza tal-Artikolu 43 ta’ dak ir-Regolament Delegat, dan jirrikjedi, fost l-oħrajn, li l-movimenti awtorizzati kollha jitwettqu billi jiġu prijoritizzati l-awtostradi ewlenin jew il-linji ferrovjarji ewlenin.

(14)

L-Artikolu 35 tar-Regolament ta’ Implimentazzjoni (UE) 2021/605 jistabbilixxi kundizzjonijiet speċifiċi għall-awtorizzazzjoni tal-movimenti tal-kunsinni tal-materjali tal-kategorija 3 miksuba mill-annimali porċini miżmuma fiż-żoni ristretti II barra minn dawk iż-żoni ristretti fl-istess Stat Membru għall-iskop tal-ipproċessar ta’ prodotti sekondarji mill-annimali permezz ta’ sterilizzazzjoni bil-pressjoni jew ċerti metodi alternattivi, il-manifattura tal-ikel għall-annimali domestiċi u għat-trasformazzjoni tal-prodotti sekondarji mill-annimali u prodotti derivati f’bijogass jew kompost kif previst fir-Regolament (KE) Nru 1069/2009. Filwaqt li titqies l-effettività tal-metodi ta’ pproċessar rilevanti biex jittaffew ir-riskji tad-deni tal-ħnieżer Afrikan, huwa xieraq ukoll li f’dan ir-Regolament jiġu stabbiliti kundizzjonijiet speċifiċi għall-awtorizzazzjoni tal-movimenti tal-kunsinni tal-materjali tal-Kategorija 3 miksuba minn annimali porċini miżmuma f’żona ristretta III barra minn dik iż-żona ristretta fl-istess Stat Membru għall-iskop tal-ipproċessar ta’ prodotti sekondarji mill-annimali minn sterilizzazzjoni bil-pressjoni jew ċerti metodi alternattivi, il-manifattura tal-ikel għall-annimali domestiċi u għat-trasformazzjoni ta’ prodotti sekondarji mill-annimali u prodotti derivati f’bijogass jew kompost.

(15)

L-Artikolu 44 tar-Regolament ta’ Implimentazzjoni (UE) 2021/605 jipprevedi l-marki tas-saħħa jew, fejn rilevanti, tal-identifikazzjoni speċjali għal ċerti prodotti li joriġinaw mill-annimali. Dawn il-prodotti jenħtieġ li jiġu mmarkati b’marka tas-saħħa speċjali jew, fejn rilevanti, marka tal-identifikazzjoni li ma hijiex ovali u li ma tistax tiġi konfuża mal-marka tas-saħħa jew mal-marka tal-identifikazzjoni previst fl-Artikolu 5(1) tar-Regolament (KE) Nru 853/2004 tal-Parlament Ewropew u tal-Kunsill (9). Filwaqt li jitqiesu r-regoli stabbiliti f’dak ir-Regolament u għall-applikazzjoni effettiva tar-regoli speċjali ta’ kontroll tal-mard għad-deni tal-ħnieżer Afrikan li jikkonċernaw movimenti fi ħdan jew minn żoni ristretti ta’ ċerti kunsinni tal-laħam frisk u tal-prodotti tal-laħam miksuba minn annimali porċini miżmuma jew selvaġġi u f’interessi taċ-ċarezza, jenħtieġ li tiġi stabbilita forma konkreta tal-marki speċjali f’dan ir-Regolament li jipprovdi sett komprensiv tal-miżuri tekniċi għall-kontroll ta’ dik il-marda. Barra minn hekk, jenħtieġ li jiġi introdott perjodu tranżitorju għal forma armonizzata ta’ dawn il-marki speċjali biex titqies is-sitwazzjoni speċifika tal-awtoritajiet kompetenti u tal-operaturi tan-negozju tal-ikel fl-Istati Membri affettwati mid-deni tal-ħnieżer Afrikan li jeħtieġ li jagħmlu l-arranġamenti meħtieġa biex tiġi żgurata l-konformità ma’ dan ir-Regolament.

(16)

L-esperjenza miksuba fil-ġlieda kontra d-deni tal-ħnieżer Afrikan fl-Unjoni turi li huma meħtieġa ċerti miżuri ta’ mitigazzjoni tar-riskju u miżuri ta’ bijosigurtà msaħħa sabiex jipprevjenu t-tixrid ta’ dik il-marda fl-istabbilimenti tal-annimali porċini miżmuma. Dawn il-miżuri jenħtieġ li jiġu stabbiliti fl-Anness III ta’ dan ir-Regolament u jenħtieġ li jkopru l-istabbilimenti soġġetti għad-derogi stabbiliti għall-movimenti tal-kunsinni tal-annimali porċini miżmuma fiż-żoni ristretti I, II u III.

(17)

Mid-data tal-adozzjoni tar-Regolament ta’ Implimentazzjoni (UE) 2021/605, is-sitwazzjoni epidemjoloġika fl-Unjoni evolviet ulterjorment fir-rigward tad-deni tal-ħnieżer Afrikan f’diversi Stati Membri, b’mod partikolari fil-popolazzjonijiet tal-annimali porċini selvaġġi, li kellhom rwol ewlieni fit-trażmissjoni u fil-persistenza tal-virus fl-Unjoni. Minkejja l-miżuri ta’ kontroll tal-mard meħuda mill-Istati Membri f’konformità mar-regoli tal-Unjoni, l-annimali porċini selvaġġi għadhom sors ewlieni ta’ trażmissjoni u ta’ persistenza tal-preżenza ta’ dik il-marda fl-Unjoni. It-tifqigħat ta’ dik il-marda fl-annimali porċini jippreżentaw riskju wkoll għall-Istati Membri ħielsa mill-mard minħabba l-movimenti tal-annimali porċini selvaġġi jew bħala parti mit-tixrid medjat mill-bniedem permezz tal-materjali infettati. Filwaqt li titqies is-sitwazzjoni epidemjoloġika attwali fl-Unjoni fir-rigward tad-deni tal-ħnieżer Afrikan, jenħtieġ li l-Istati Membri jieħdu miżuri ta’ kontroll ikkoordinati sew u konsistenti. L-applikazzjoni tal-miżuri speċjali ta’ kontroll tal-mard qabel l-introduzzjoni tad-deni tal-ħnieżer Afrikan ġiet rakkomandata wkoll permezz tal-parir xjentifiku pprovdut mill-Awtorità Ewropea dwar is-Sigurtà fl-Ikel (EFSA) fl-Opinjoni Xjentifika tagħha tat-12 ta’ Ġunju 2018 dwar id-deni Afrikan fiċ-ċingjal u (10) fir-Rapport Xjentifiku tat-18 ta’ Diċembru 2019 dwar l-Analiżijiet epidemjoloġiċi tad-deni tal-ħnieżer Afrikan fl-Unjoni Ewropea (11).

(18)

Għaldaqstant, sabiex jiġi evitat it-tixrid tad-deni tal-ħnieżer Afrikan mill-annimali porċini selvaġġi, miżuri kkoordinati sew mill-Istati Membri huma kruċjali biex tiġi evitata d-duplikazzjoni tal-isforzi. Għalhekk, jenħtieġ li dan ir-Regolament jipprevedi obbligu fuq l-Istati Membri biex jistabbilixxu Pjanijiet ta’ azzjoni nazzjonali għall-annimali porċini selvaġġi sabiex jiġi evitat it-tixrid tad-deni tal-ħnieżer Afrikan fl-Unjoni, billi jiġi żgurat approċċ koordinat u konsistenti madwar l-Istati Membri (pjanijiet ta’ azzjoni nazzjonali). Ir-rekwiżiti minimi għall-pjanijiet ta’ azzjoni nazzjonali jenħtieġ li jqisu l-parir xjentifiku pprovdut mill-EFSA, b’mod partikolari dwar il-miżuri preventivi biex titnaqqas u tiġi stabbilizzata d-densità taċ-ċingjal qabel l-introduzzjoni ta’ dik il-marda, is-sorveljanza passiva, il-miżuri ta’ bijosigurtà matul il-kaċċa tal-annimali porċini selvaġġi, sabiex jiġi pprovdut approċċ armonizzat fl-Istati Membri. Dawn il-pjanijiet ta’ azzjoni nazzjonali u r-riżultati annwali tal-implimentazzjoni tagħhom jenħtieġ li jiġu ppreżentati lill-Kummissjoni u lill-Istati Membri l-oħrajn.

(19)

Il-miżuri ta’ ġestjoni tal-annimali porċini selvaġġi meħuda fil-kuntest tal-pjanijiet ta’ azzjoni nazzjonali jenħtieġ li jkunu kompatibbli, fejn rilevanti, mar-regoli ambjentali tal-Unjoni, inklużi r-rekwiżiti għall-protezzjoni tan-natura, stabbiliti fid-Direttiva 2009/147/KE tal-Parlament Ewropew u tal-Kunsill (12) u fid-Direttiva tal-Kunsill 92/43/KEE (13).

(20)

Sabiex jitqiesu l-iżviluppi reċenti fis-sitwazzjoni epidemjoloġika tad-deni tal-ħnieżer Afrikan fl-Unjoni, l-esperjenza u l-għarfien ġodda miġbura fl-Unjoni, u sabiex jiġu miġġielda r-riskji assoċjati mat-tixrid ta’ dik il-marda b’mod proattiv, f’dan ir-Regolament jenħtieġ li jiġu stabbiliti regoli speċjali ta’ kontroll tal-mard riveduti u estiżi. Għaldaqstant, jenħtieġ li r-Regolament ta’ Implimentazzjoni (UE) 2021/605 jitħassar u li jiġi sostitwit b’dan ir-Regolament.

(21)

Ir-Regolament ta’ Implimentazzjoni (UE) 2021/605 japplika sal-20 ta’ April 2028. Filwaqt li titqies is-sitwazzjoni epidemjoloġika attwali tad-deni tal-ħnieżer Afrikan fl-Unjoni, huwa meħtieġ li jinżammu l-miżuri speċjali ta’ kontroll tal-mard stabbiliti f’dan ir-Regolament sa dik id-data.

(22)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,