(1)

Id-divulgazzjonijiet relatati mas-sostenibbiltà fis-settur tas-servizzi finanzjarji jenħtieġ li jkunu ċari, konċiżi u prominenti biżżejjed biex jippermettu lill-investituri aħħarin jieħdu deċiżjonijiet infurmati. Għal dak il-għan, l-investituri aħħarin jenħtieġ li jkollhom aċċess għal data affidabbli li jistgħu jużaw u janalizzaw fil-ħin u b’mod effiċjenti. Għalhekk, jenħtieġ li l-informazzjoni pprovduta f’tali divulgazzjonijiet tiġi rieżaminata u riveduta f’konformità mad-Direttivi, mar-Regolamenti u mad-dispożizzjonijiet nazzjonali msemmija fl-Artikolu 6(3) u fl-Artikolu 11(2) tar-Regolament (UE) 2019/2088. Barra minn hekk, jenħtieġ li jiġu stabbiliti regoli dwar il-pubblikazzjoni ta’ dik l-informazzjoni fuq is-siti web, fejn tali pubblikazzjoni hija meħtieġa mir-Regolament (UE) 2019/2088.

(2)

Il-kontenut u l-preżentazzjoni tad-divulgazzjonijiet relatati mas-sostenibbiltà marbuta mal-prodotti finanzjarji li jirreferu għal basket ta’ indiċijiet jenħtieġ li jipprovdu lill-investituri aħħarin b’perspettiva komprensiva tal-karatteristiċi ta’ tali prodotti finanzjarji. Għalhekk jeħtieġ li d-divulgazzjonijiet relatati mas-sostenibbiltà dwar indiċi li huwa indikat bħala parametru referenzjarju u li huwa magħmul minn basket ta’ indiċijiet, ikopri kemm il-basket kif ukoll kull indiċi f’dak il-basket.

(3)

Għall-investituri aħħarin li għandhom interess fil-prestazzjoni tas-sostenibbiltà tal-parteċipanti fis-swieq finanzjarji u tal-konsulenti finanzjarji, huwa essenzjali li l-informazzjoni pprovduta mill-parteċipanti fis-swieq finanzjarji dwar l-impatti negattivi prinċipali tad-deċiżjonijiet ta’ investiment tagħhom fuq il-fatturi ta’ sostenibbiltà, u mill-konsulenti finanzjarji dwar l-impatti negattivi prinċipali tal-parir dwar l-investiment jew tal-parir dwar l-assigurazzjoni tagħhom fuq fatturi ta’ sostenibbiltà, tkun komprensiva. Għalhekk, jenħtieġ li tali informazzjoni tkopri kemm l-investimenti diretti kif ukoll dawk indiretti fl-assi.

(4)

Jeħtieġ li jiġi żgurat li l-informazzjoni ddivulgata tkun tista’ titqabbel faċilment u li l-indikaturi tal-impatti avversi prinċipali tad-deċiżjonijiet ta’ investiment fuq il-fatturi ta’ sostenibbiltà jkunu jistgħu jinftiehmu faċilment. Tali komparabbiltà u komprensibbiltà jittejbu billi ssir distinzjoni bejn, minn naħa, indikaturi tal-impatti avversi li dejjem iwasslu għal impatti avversi prinċipali, u, min-naħa l-oħra, indikaturi addizzjonali tal-impatti avversi fuq il-fatturi ta’ sostenibbiltà li jkunu prinċipali għall-parteċipanti fis-swieq finanzjarji. Madankollu, huwa importanti li jiġi żgurat li l-impatti avversi tad-deċiżjonijiet ta’ investiment fuq il-klima, jew fuq fatturi oħra ta’ sostenibbiltà relatati mal-ambjent, jitqiesu importanti daqs l-impatti avversi tad-deċiżjonijiet ta’ investiment fuq fatturi ta’ sostenibbiltà soċjali, tal-impjegati, tad-drittijiet tal-bniedem, kontra l-korruzzjoni jew kontra t-tixħim. Għalhekk, l-indikaturi addizzjonali tal-impatti negattivi prinċipali jenħtieġ li jkunu relatati ma’ tal-inqas wieħed minn dawk il-fatturi. Sabiex tiġi żgurata l-koerenza ma’ divulgazzjonijiet oħra relatati mas-sostenibbiltà, l-indikaturi tal-impatti avversi prinċipali jenħtieġ li jużaw metrika standardizzata, fejn rilevanti, u jkunu bbażati fuq l-indikaturi użati fir-Regolament Delegat tal-Kummissjoni (UE) 2020/1818 (2) u fir-Regolament Delegat tal-Kummissjoni (UE) 2021/2139 (3).

(5)

Sabiex tissaħħaħ aktar il-komparabbiltà tal-informazzjoni li għandha tiġi ddivulgata, l-informazzjoni dwar l-impatti avversi prinċipali jenħtieġ li tkun relatata ma’ perjodi ta’ referenza li jibdew mill-1 ta’ Jannar sal-31 ta’ Diċembru tas-sena preċedenti, u jenħtieġ li tiġi ppubblikata sat-30 ta’ Ġunju ta’ kull sena bħala data komuni. Madankollu, huwa possibbli li l-portafolli tal-investimenti tal-parteċipanti fis-swieq finanzjarji jinbidlu b’mod regolari f’perjodi ta’ referenza bħal dawn. Għalhekk, id-determinazzjoni tal-impatti avversi prinċipali jenħtieġ li ssir f’mill-inqas erba’ dati speċifiċi matul tali perjodu ta’ referenza u r-riżultat medju jenħtieġ li jiġi ddivulgat fuq bażi annwali. Sabiex jiġi żgurat li l-investituri aħħarin ikunu jistgħu jqabblu kif il-parteċipanti fis-swieq finanzjarji jkunu qiesu l-impatti avversi prinċipali maż-żmien, il-parteċipanti fis-swieq finanzjarji jenħtieġ li jipprovdu tqabbil storiku sena b’sena tar-rapporti tagħhom għal mill-inqas il-ħames perjodi ta’ referenza preċedenti, fejn ikunu disponibbli.

(6)

Il-parteċipanti fis-swieq finanzjarji li jqisu l-impatti avversi prinċipali għall-ewwel darba f’sena kalendarja partikolari jenħtieġ li jiġu ttrattati b’mod ġust, filwaqt li jenħtieġ li jiġi żgurat ukoll li l-investituri aħħarin jirċievu biżżejjed informazzjoni qabel ma jieħdu d-deċiżjonijiet ta’ investiment tagħhom. Għalhekk, jenħtieġ li tali parteċipanti fis-swieq finanzjarji jiddivulgaw informazzjoni dwar l-azzjonijiet li jippjanaw jew il-miri li jistabbilixxu għall-perjodu ta’ referenza sussegwenti biex jevitaw jew inaqqsu kwalunkwe impatt avvers prinċipali identifikat. Għall-istess raġuni, jenħtieġ li jiddivulgaw ukoll informazzjoni dwar il-politiki tagħhom biex jidentifikaw u jipprijoritizzaw l-impatti avversi prinċipali fuq il-fatturi ta’ sostenibbiltà u l-istandards internazzjonali li se japplikaw f’dak il-perjodu ta’ referenza sussegwenti.

(7)

L-investituri aħħarin jenħtieġ li, irrispettivament mill-Istat Membru li jkunu jirrisjedu fih, ikunu jistgħu jqabblu l-impatti negattivi prinċipali ddivulgati fuq il-fatturi ta’ sostenibbiltà. Għalhekk, il-parteċipanti fis-swieq finanzjarji jenħtieġ li jipprovdu sommarju tad-divulgazzjonijiet tagħhom kemm f’lingwa li abitwalment tintuża fl-isfera tal-finanzi internazzjonali kif ukoll f’waħda mil-lingwi uffiċjali tal-Istati Membri li fihom isiru disponibbli l-prodotti finanzjarji ta’ dawk il-parteċipanti fis-swieq finanzjarji.

(8)

Il-konsulenti finanzjarji jużaw informazzjoni dwar l-impatti avversi prinċipali fuq il-fatturi ta’ sostenibbiltà li tiġi pprovduta mill-parteċipanti fis-swieq finanzjarji. Għalhekk, l-informazzjoni pprovduta mill-konsulenti finanzjarji dwar jekk u kif iqisu l-impatti avversi prinċipali fuq il-fatturi ta’ sostenibbiltà fil-parir tagħhom dwar l-investiment jew l-assigurazzjoni jenħtieġ li tiddeskrivi b’mod ċar kif l-informazzjoni mill-parteċipanti fis-swieq finanzjarji tiġi pproċessata u integrata fil-parir tagħhom dwar l-investiment jew l-assigurazzjoni. B’mod partikolari, il-konsulenti finanzjarji li jiddependu minn kriterji jew limiti li jikkonċernaw l-impatti avversi prinċipali fuq il-fatturi ta’ sostenibbiltà li jintużaw biex jintgħażlu, jew jingħataw pariri dwar, prodotti finanzjarji, jenħtieġ li jippubblikaw dawk il-kriterji jew il-limiti.

(9)

Il-metrika attwali tal-impronta tal-karbonju għadha ma hijiex żviluppata bis-sħiħ. Għalhekk, il-parteċipanti fis-swieq finanzjarji li, f’konformità mal-Artikolu 4(2)(d) tar-Regolament (UE) 2019/2088, fid-divulgazzjonijiet tagħhom fil-livell tal-entità jirreferu għall-grad ta’ allinjament tal-prodotti finanzjarji tagħhom mal-objettivi tal-Ftehim ta’ Pariġi adottat fl-ambitu tal-Konvenzjoni Qafas tan-Nazzjonijiet Uniti dwar it-Tibdil fil-Klima, jenħtieġ li jibbażaw tali divulgazzjonijiet fuq xenarji klimatiċi li jħarsu ’l quddiem.

(10)

Wieħed mill-modi li bih il-prodotti finanzjarji jistgħu jippromwovu l-karatteristiċi ambjentali jew soċjali huwa li jitqiesu l-impatti negattivi prinċipali tad-deċiżjonijiet ta’ investiment. Il-prodotti finanzjarji li għandhom investiment sostenibbli bħala l-objettiv tagħhom iridu, bħala parti mid-divulgazzjonijiet magħmula fir-rigward tal-prinċipju “la tagħmilx ħsara sinifikanti”, jikkunsidraw ukoll l-indikaturi tas-sostenibbiltà b’rabta mal-impatti avversi msemmija fl-Artikolu 4(6) u (7) tar-Regolament (UE) 2019/2088. Għal dawk ir-raġunijiet, il-parteċipanti fis-swieq finanzjarji jenħtieġ li jindikaw, bħala parti mid-divulgazzjonijiet tas-sostenibbiltà tagħhom, kif huma jqisu, għal dawk il-prodotti finanzjarji, l-impatti negattivi prinċipali tad-deċiżjonijiet ta’ investiment tagħhom fuq il-fatturi ta’ sostenibbiltà.

(11)

It-tieni subparagrafu ta-Artikolu 10(1) tar-Regolament (UE) 2019/2088 jirrikjedi li l-parteċipanti fis-swieq finanzjarji li jagħmlu disponibbli prodotti finanzjarji li jippromwovu karatteristiċi ambjentali jew soċjali biex jiddivulgaw dawk il-karatteristiċi mingħajr ma jqarrqu bl-investituri aħħarin. Dan jimplika li l-parteċipanti fis-swieq finanzjarji jenħtieġ li ma jiddivulgawx dwar is-sostenibbiltà, inkluż permezz ta’ kategorizzazzjoni tal-prodott, b’mod li ma jirriflettix il-mod li bih il-prodott finanzjarju jippromwovi b’mod effettiv dawk il-karatteristiċi ambjentali jew soċjali. Għalhekk, il-parteċipanti fis-swieq finanzjarji jenħtieġ li jiddivulgaw biss dawk il-kriterji għall-għażla tal-assi sottostanti li huma vinkolanti fuq il-proċess tat-teħid tad-deċiżjonijiet dwar l-investiment, u mhux kriterji li jistgħu jinjoraw jew jegħlbu fid-diskrezzjoni tagħhom.

(12)

Il-prodotti finanzjarji li jippromwovu karatteristiċi ambjentali jew soċjali jistgħu jintużaw biex isir investiment f’firxa wiesgħa ta’ assi sottostanti, li wħud minnhom jistgħu ma jikkwalifikawx huma stess bħala investimenti sostenibbli jew jikkontribwixxu għall-karatteristiċi ambjentali jew soċjali speċifiċi promossi mill-prodott finanzjarju. Eżempji ta’ investimenti bħal dawn huma strumenti għall-iħħeġġjar, investimenti mhux skrinjati għal skopijiet ta’ diversifikazzjoni, investimenti li għalihom id-data hija nieqsa jew flus miżmuma bħala likwidità anċillari. Għalhekk, il-parteċipanti fis-swieq finanzjarji li jagħmlu disponibbli tali prodotti finanzjarji jenħtieġ li jkunu kompletament trasparenti dwar l-allokazzjoni tal-investimenti sottostanti għal dawk il-kategoriji ta’ investimenti.

(13)

Il-prodotti finanzjarji jistgħu jippromwovu karatteristiċi ambjentali jew soċjali b’ħafna modi, inkluż f’dokument prekuntrattwali jew perjodiku, f’isimhom jew fi kwalunkwe komunikazzjoni ta’ kummerċjalizzazzjoni dwar l-istrateġija ta’ investiment tagħhom, l-istandards tal-prodotti finanzjarji, it-tikketti li jaderixxu magħhom, jew il-kundizzjonijiet applikabbli għar-reġistrazzjoni awtomatika. Biex jiġu żgurati l-komparabbiltà u l-komprensibbiltà tal-karatteristiċi ambjentali jew soċjali promossi, il-parteċipanti fis-swieq finanzjarji li jagħmlu disponibbli prodotti finanzjarji li jippromwovu karatteristiċi ambjentali jew soċjali jenħtieġ li jikkonfermaw l-informazzjoni dwar il-promozzjoni ta’ karatteristiċi ambjentali jew soċjali fl-annessi tad-dokumenti jew tal-informazzjoni msemmija fl-Artikolu 6(3) u fl-Artikolu 11(2) tar-Regolament (UE) 2019/2088 dwar divulgazzjonijiet prekuntrattwali u perjodiċi.

(14)

Il-prodotti finanzjarji li jippromwovu karatteristiċi ambjentali jew soċjali għandhom diversi gradi ta’ ambizzjoni relatata mas-sostenibbiltà. Għalhekk, fejn dawk il-prodotti finanzjarji jsegwu parzjalment investiment sostenibbli, il-parteċipanti fis-swieq finanzjarji jenħtieġ li jikkonfermaw dak il-fatt fl-annessi tad-dokumenti jew tal-informazzjoni msemmija fl-Artikolu 6(3) u fl-Artikolu 11(2) tar-Regolament (UE) 2019/2088 dwar id-divulgazzjonijiet prekuntrattwali u perjodiċi biex jiġi żgurat li l-investituri aħħarin ikunu jistgħu jifhmu l-gradi differenti ta’ sostenibbiltà u jieħdu deċiżjonijiet infurmati dwar l-investiment f’termini ta’ sostenibbiltà.

(15)

Filwaqt li l-prodotti finanzjarji li għandhom l-investiment sostenibbli bħala l-objettiv tagħhom jenħtieġ li jagħmlu investimenti sostenibbli biss, tali prodotti jistgħu sa ċertu punt jagħmlu investimenti oħrajn fejn ikunu meħtieġa jagħmlu dan skont ir-regoli speċifiċi għas-settur. Għalhekk huwa xieraq li jiġu meħtieġa divulgazzjonijiet dwar l-ammont u l-iskop ta’ kwalunkwe investiment ieħor sabiex ikun jista’ jiġi vverifikat jekk dawk l-investimenti ma jipprevjenux lill-prodott finanzjarju milli jilħaq l-objettiv ta’ investiment sostenibbli tiegħu.

(16)

Ħafna prodotti finanzjarji jiddependu minn strateġiji ta’ esklużjoni bbażati fuq kriterji ambjentali jew soċjali. L-investituri aħħarin jenħtieġ li jiġu pprovduti bl-informazzjoni meħtieġa biex jivvalutaw l-effetti ta’ tali kriterji fuq id-deċiżjonijiet ta’ investiment, u l-effetti ta’ tali strateġiji ta’ esklużjoni fuq il-kompożizzjoni tal-portafoll li jirriżulta. Il-prattika tas-suq turi li xi strateġiji ta’ esklużjoni jintwerew bħala effettivi, filwaqt li fil-fatt dawk l-istrateġiji ta’ esklużjoni attwalment iwasslu għall-esklużjoni ta’ għadd limitat biss ta’ investimenti, jew huma bbażati fuq esklużjonijiet rikjesti bil-liġi. Għalhekk, jeħtieġ li jiġi indirizzat it-tħassib dwar il-“greenwashing”, jiġifieri b’mod partikolari l-prattika li jinkiseb vantaġġ kompetittiv inġust billi strument finanzjarju jiġi rrakkomandat bħala sostenibbli jew li ma jagħmilx ħsara lill-ambjent, meta fil-fatt l-istrument finanzjarju ma jkunx jissodisfa l-istandards ambjentali bażiċi jew standards oħrajn relatati mas-sostenibbiltà. Sabiex jiġu evitati l-bejgħ inadatt u l-greenwashing, u sabiex l-investituri aħħarin jiġu pprovduti b’fehim aħjar tal-effetti tal-istrateġiji ta’ esklużjoni applikati minn ċerti prodotti finanzjarji, il-parteċipanti fis-swieq finanzjarji jenħtieġ li jikkonfermaw kwalunkwe impenn f’termini ta’ investimenti esklużi, b’mod partikolari bħala elementi vinkolanti tal-istrateġija ta’ investiment, f’informazzjoni dwar l-allokazzjoni tal-assi u fl-informazzjoni dwar l-indikaturi tas-sostenibbiltà użati biex jitkejlu l-effetti ta’ tali strateġiji.

(17)

Ir-Regolament (UE) 2019/2088 għandu l-għan li jnaqqas l-asimetriji ta’ informazzjoni fir-relazzjonijiet bejn il-prinċipal u l-aġent li jikkonċernaw il-promozzjoni tal-karatteristiċi ambjentali jew soċjali u l-objettivi ta’ investiment sostenibbli. Għal dak il-għan, l-imsemmi Regolament jirrikjedi li l-parteċipanti fis-swieq finanzjarji jagħmlu divulgazzjonijiet prekuntrattwali u fuq is-siti web lill-investituri aħħarin meta jaġixxu bħala aġenti ta’ dawk l-investituri aħħarin. Sabiex dak ir-rekwiżit ikun kompletament effettiv, matul iċ-ċiklu tal-ħajja ta’ prodott finanzjarju, il-parteċipanti fis-swieq finanzjarji jenħtieġ li jimmonitorjaw kif dak il-prodott jikkonforma mal-karatteristiċi ambjentali jew soċjali ddivulgati, jew mal-objettiv ta’ investiment sostenibbli. Għalhekk, il-parteċipanti fis-swieq finanzjarji jenħtieġ li jispjegaw, bħala parti mid-divulgazzjonijiet fuq is-sit web tagħhom, il-mekkaniżmi ta’ kontroll interni jew esterni stabbiliti biex jissorveljaw tali konformità fuq bażi kontinwa.

(18)

Ir-Regolament (UE) 2019/2088 jispeċifika li l-valutazzjoni ta’ prattiki ta’ governanza tajba tifforma parti integrali mill-prodotti finanzjarji li jippromwovu karatteristiċi ambjentali jew soċjali, jew li għandhom investiment sostenibbli bħala l-objettiv tagħhom. Għalhekk, il-parteċipanti fis-swieq finanzjarji li jagħmlu disponibbli prodotti finanzjarji li jippromwovu karatteristiċi ambjentali jew soċjali jew li għandhom objettiv ta’ investiment sostenibbli jenħtieġ li jiddivulgaw informazzjoni dwar il-politiki tagħhom biex jivvalutaw il-prattiki ta’ governanza tajba tal-kumpaniji destinatarji ta’ investiment.

(19)

L-Artikolu 8(1)(b) tar-Regolament (UE) 2019/2088 jirrikjedi li l-parteċipanti fis-swieq finanzjarji li jagħmlu disponibbli prodotti finanzjarji li jippromwovu karatteristiċi ambjentali jew soċjali u li jużaw indiċi indikat bħala parametru referenzjarju, jiddivulgaw jekk dak l-indiċi jkunx konsistenti ma’ dawk il-karatteristiċi u b’liema mod. Min-naħa l-oħra, l-Artikolu 9(1) tar-Regolament (UE) 2019/2088 jirrikjedi li l-parteċipanti fis-swieq finanzjarji li jagħmlu disponibbli prodotti finanzjarji li għandhom investiment sostenibbli bħala l-objettiv tagħhom u li jużaw indiċi indikat bħala parametru referenzjarju jiddivulgaw kif dak l-indiċi huwa allinjat ma’ dak l-objettiv ta’ investiment u għaliex u kif dak l-indiċi indikat ivarja minn indiċi tas-suq wiesa’. Għal prodotti finanzjarji bħal dawn, il-parteċipanti fis-swieq finanzjarji jenħtieġ li għalhekk juru b’mod ċar li t-tfassil tal-indiċi deżinjat ikun xieraq biex jintlaħaq l-objettiv iddikjarat ta’ investiment sostenibbli u li l-istrateġija tal-prodott finanzjarju tiżgura li l-prodott finanzjarju jiġi allinjat kontinwament ma’ dak l-indiċi. Għalhekk, jenħtieġ li jsiru divulgazzjonijiet dwar il-metodoloġiji fil-livell tal-indiċi għal prodotti finanzjarji bħal dawn.

(20)

Il-parteċipanti fis-swieq finanzjarji jistgħu jużaw diversi metodi ta’ investiment biex jiżguraw li l-prodotti finanzjarji li jagħmlu disponibbli jissodisfaw il-karatteristiċi ambjentali jew soċjali, jew jilħqu l-objettiv ta’ investiment sostenibbli. Il-parteċipanti fis-swieq finanzjarji jistgħu jinvestu direttament f’titoli maħruġa minn kumpaniji destinatarji ta’ investiment jew jagħmlu investimenti indiretti. Il-parteċipanti fis-swieq finanzjarji jenħtieġ li jkunu trasparenti dwar liema sehem mill-investimenti tagħhom jinżamm direttament u liema sehem jinżamm indirettament. B’mod partikolari, il-parteċipanti fis-swieq finanzjarji jenħtieġ li jispjegaw kif l-użu tad-derivattivi huwa kompatibbli mal-karatteristiċi ambjentali jew soċjali li l-prodott finanzjarju jippromwovi jew mal-objettiv ta’ investiment sostenibbli.

(21)

Sabiex tiġi żgurata ċ-ċarezza għall-investituri aħħarin, l-informazzjoni prekuntrattwali dwar il-prodotti finanzjarji li jippromwovu karatteristiċi ambjentali jew soċjali jenħtieġ li tagħmilha ċara, permezz ta’ dikjarazzjoni, li tali prodotti ma jkollhomx investiment sostenibbli bħala objettiv. Għall-istess għan, u biex jiġu żgurati kundizzjonijiet ekwivalenti mal-prodotti finanzjarji li għandhom investiment sostenibbli bħala l-objettiv tagħhom, l-informazzjoni prekuntrattwali, tas-sit web u perjodika dwar il-prodotti li jippromwovu karatteristiċi ambjentali jew soċjali jenħtieġ li ssemmi wkoll il-proporzjon tal-investimenti sostenibbli.

(22)

L-Artikolu 2, il-punt 17, tar-Regolament (UE) 2019/2088 jiddefinixxi investiment sostenibbli bħala investiment f’attività ekonomika li tikkontribwixxi għal objettiv ambjentali jew soċjali, jew investiment fil-kapital uman jew f’komunitajiet ekonomikament jew soċjalment żvantaġġati, dment li tali investimenti ma jagħmlux ħsara sinifikanti lil kwalunkwe wieħed minn dawk l-objettivi u li l-kumpaniji destinatarji ta’ investiment isegwu prattiki ta’ governanza tajba. Il-prinċipju “la tagħmilx ħsara sinifikanti” huwa partikolarment importanti għall-prodotti finanzjarji li għandhom investiment sostenibbli bħala l-objettiv tagħhom peress li l-konformità ma’ dak il-prinċipju hija kriterju meħtieġ biex jiġi vvalutat jekk investiment jilħaqx l-objettiv ta’ investiment sostenibbli. Madankollu, dak il-prinċipju huwa rilevanti wkoll għall-prodotti finanzjarji li jippromwovu karatteristiċi ambjentali jew soċjali fejn dawk il-prodotti finanzjarji jagħmlu investimenti sostenibbli, peress li l-parteċipanti fis-swieq finanzjarji jenħtieġ li jiddivulgaw il-proporzjon ta’ investimenti sostenibbli li jsiru. Għalhekk, il-parteċipanti fis-swieq finanzjarji li jagħmlu disponibbli prodotti finanzjarji li jippromwovu karatteristiċi ambjentali jew soċjali, li parzjalment jagħmlu investimenti sostenibbli jew prodotti finanzjarji li jkollhom investiment sostenibbli bħala l-objettiv tagħhom jenħtieġ li jipprovdu informazzjoni relatata mal-prinċipju “la tagħmilx ħsara sinifikanti”. Il-prinċipju “la tagħmilx ħsara sinifikanti” huwa marbut mad-divulgazzjonijiet tal-impatti avversi prinċipali tad-deċiżjonijiet ta’ investiment fuq il-fatturi ta’ sostenibbiltà. Għal dik ir-raġuni, id-divulgazzjonijiet tal-prodotti finanzjarji dwar il-prinċipju “la tagħmilx ħsara sinifikanti” jenħtieġ li jispjegaw kif tqiesu l-indikaturi għall-impatti avversi. Barra minn hekk, peress li dawk id-divulgazzjonijiet huma marbuta mill-qrib mar-Regolament (UE) 2020/852 tal-Parlament Ewropew u tal-Kunsill (4), huwa xieraq li tkun meħtieġa informazzjoni addizzjonali dwar l-allinjament tal-investimenti mas-salvagwardji minimi stabbiliti f’dak ir-Regolament.

(23)

Sabiex l-investituri aħħarin ikunu jistgħu jifhmu aħjar l-istrateġiji ta’ investiment offruti, il-parteċipanti fis-swieq finanzjarji jenħtieġ li jużaw divulgazzjonijiet relatati mas-sostenibbiltà tas-sit web biex jespandu dwar suġġetti ddivulgati b’mod konċiż f’dokumenti prekuntrattwali u jipprovdu aktar informazzjoni rilevanti għal dawk l-investituri aħħarin. Qabel ma jiġi konkluż kuntratt, il-parteċipanti fis-swieq finanzjarji jenħtieġ li jinfurmaw lill-investituri aħħarin dwar il-fatt li aktar informazzjoni dettaljata u speċifika għall-prodott tista’ tinstab fuq is-sit web u jipprovduhom b’iperlink għal dik l-informazzjoni.

(24)

Id-divulgazzjoni tal-prodott fuq is-sit web jenħtieġ li tipprovdi dettalji addizzjonali dwar l-istrateġija ta’ investiment użata għall-prodott finanzjarju kkonċernat, inkluża l-politika biex tiġi vvalutata l-governanza tajba tal-kumpaniji destinatarji ta’ investiment, u l-metodoloġiji użati biex jitkejjel jekk il-prodott finanzjarju jissodisfax il-karatteristiċi ambjentali jew soċjali jew jekk jilħaqx objettivi ta’ investiment sostenibbli. Barra minn hekk, il-parteċipanti fis-swieq finanzjarji jenħtieġ li jippubblikaw fuq is-sit web tagħhom sommarju ċar, konċiż u li jinftiehem tal-informazzjoni pprovduta bħala parti mir-rapportar perjodiku.

(25)

Fir-rigward tal-kontenut tad-divulgazzjonijiet perjodiċi meħtieġa mill-Artikolu 11 tar-Regolament (UE) 2019/2088, il-parteċipanti fis-swieq finanzjarji jenħtieġ li jiddivulgaw sett minimu ta’ indikaturi kwantitattivi u kwalitattivi standardizzati u komparabbli li juru kif kull prodott finanzjarju jissodisfa l-karatteristiċi ambjentali jew soċjali li jippromwovi jew l-objettiv ta’ investiment sostenibbli li għandu l-għan li jilħaq. Dawk l-indikaturi jenħtieġ li jkunu rilevanti għall-istrateġija tad-disinn u tal-investiment tal-prodott finanzjarju kif deskritt fl-informazzjoni prekuntrattwali tal-prodott finanzjarju. B’mod partikolari, biex tiġi żgurata l-konsistenza bejn id-divulgazzjonijiet prekuntrattwali u d-divulgazzjonijiet perjodiċi, fid-divulgazzjonijiet perjodiċi tagħhom, il-parteċipanti fis-swieq finanzjarji jenħtieġ li jirrapportaw dwar l-indikaturi speċifiċi tas-sostenibbiltà msemmija fl-informazzjoni prekuntrattwali u li jintużaw biex jitkejjel kif jintlaħqu l-karatteristiċi ambjentali jew soċjali jew jintlaħaq l-objettiv ta’ investiment sostenibbli.

(26)

Jeħtieġ li jiġi żgurat li l-investituri aħħarin ikollhom ħarsa ġenerali ċara lejn l-investimenti tal-prodott finanzjarju. Għalhekk, fir-rapporti perjodiċi meħtieġa mill-Artikolu 11 tar-Regolament (UE) 2019/2088, il-parteċipanti fis-swieq finanzjarji jenħtieġ li jipprovdu informazzjoni dwar l-impatti tal-aqwa ħmistax-il investiment tal-prodott finanzjarju. Dawn l-investimenti ewlenin jenħtieġ li jintgħażlu abbażi tal-investimenti li jammontaw għall-akbar proporzjon ta’ investimenti matul il-perjodu kopert mir-rapport perjodiku, ikkalkolati f’intervalli xierqa biex ikunu rappreżentattivi ta’ dak il-perjodu. Madankollu, fejn inqas minn ħmistax-il investiment jammontaw għal nofs l-investimenti tal-prodott finanzjarju, il-parteċipanti fis-swieq finanzjarji jenħtieġ li jipprovdu informazzjoni dwar dawk l-investimenti biss. Barra minn hekk, sabiex tiġi żgurata komparabbiltà adegwata maż-żmien, il-parteċipanti fis-swieq finanzjarji jenħtieġ li jipprovdu tqabbil storiku sena b’sena tar-rapporti perjodiċi tagħhom għal mill-inqas il-ħames perjodi preċedenti, diment li r-rapporti perjodiċi għal dawk il-perjodi jkunu disponibbli.

(27)

Il-parteċipanti fis-swieq finanzjarji li jagħmlu disponibbli prodotti finanzjarji li jużaw parametru referenzjarju biex jissodisfaw il-karatteristiċi ambjentali jew soċjali, jew biex jilħqu l-objettiv ta’ investiment sostenibbli, jenħtieġ li jkunu trasparenti dwar kemm il-prodott finanzjarju jkun jista’ jibqa’ konformi mal-parametru referenzjarju indikat meta jkollu l-għan li jissodisfa dik il-karatteristika jew li jilħaq dak l-objettiv. Għal dik ir-raġuni, u biex titrawwem il-konsistenza mad-divulgazzjonijiet ambjentali, soċjali u ta’ governanza (ESG) meħtieġa fil-livell tal-parametru referenzjarju skont ir-Regolament (UE) 2016/1011 tal-Parlament Ewropew u tal-Kunsill (5), fir-rapporti perjodiċi tagħhom, il-parteċipanti fis-swieq finanzjarji jenħtieġ li jqabblu l-prestazzjoni tal-prodott finanzjarju kkonċernat ma’ dik tal-parametru referenzjarju indikat għal dawk l-indikaturi ta’ sostenibbiltà kollha li huma rilevanti biex jissostanzjaw li l-parametru referenzjarju indikat huwa allinjat mal-karatteristiċi ambjentali jew soċjali tal-prodott finanzjarju jew l-objettiv ta’ investiment sostenibbli tagħha. Dan it-tqabbil jenħtieġ li jippermetti wkoll lill-investituri aħħarin jiddeterminaw b’mod ċar sa liema punt il-prodott finanzjarju jaħdem b’mod sostenibbli meta mqabbel mal-prestazzjoni ta’ prodott konvenzjonali.

(28)

Jeħtieġ li jiġi żgurat li l-investituri aħħarin ikunu jistgħu jibbenefikaw mid-divulgazzjonijiet relatati mas-sostenibbiltà fir-rigward ta’ offerta għal prodott finanzjarju minn parteċipant fis-suq finanzjarju minn Stat Membru ieħor. Għalhekk, il-parteċipanti fis-swieq finanzjarji jenħtieġ li jipprovdu sommarju tal-informazzjoni pprovduta f’dawk id-divulgazzjonijiet relatati mas-sostenibbiltà f’lingwa li hija komuni fl-isfera tal-finanzi internazzjonali. Meta prodott finanzjarju jsir disponibbli barra mill-Istat Membru fejn ikun stabbilit il-parteċipant fis-suq finanzjarju, jenħtieġ li jiġi pprovdut ukoll sommarju ta’ dik l-informazzjoni f’waħda mil-lingwi uffiċjali tal-Istat Membru fejn il-prodott finanzjarju jsir disponibbli.

(29)

Jeħtieġ li tiġi żgurata l-komparabbiltà tad-dikjarazzjoni dwar l-impatti negattivi prinċipali, id-divulgazzjonijiet prekuntrattwali u d-divulgazzjonijiet perjodiċi meħtieġa mir-Regolament (UE) 2019/2088, u li jiġi żgurat li tali informazzjoni tinftiehem faċilment mill-investituri aħħarin. Għalhekk huwa xieraq li jiġu stabbiliti mudelli standard għall-preżentazzjoni ta’ dik l-informazzjoni. Għall-istess raġuni, il-mudelli jenħtieġ li jkun fihom spjegazzjonijiet sommarji tat-termini ewlenin użati f’dawk il-mudelli.

(30)

Ċerti prodotti finanzjarji jistgħu joffru firxa ta’ opzjonijiet ta’ investiment sottostanti lill-investituri aħħarin. Jeħtieġ li jiġi żgurat li l-investituri aħħarin jiġu infurmati dwar il-prestazzjoni potenzjali tas-sostenibbiltà ta’ tali prodotti, u li l-parteċipanti fis-swieq finanzjarji jkunu meħtieġa jipprovdu informazzjoni dwar dawk l-opzjonijiet li jippromwovu karatteristiċi ambjentali jew soċjali jew li jkollhom investiment sostenibbli bħala l-objettiv tagħhom. Din l-informazzjoni jenħtieġ li tagħmilha ċara li għall-prodotti finanzjarji li jippromwovu karatteristiċi ambjentali jew soċjali, il-punt sa fejn dawk il-prodotti jissodisfaw dawk il-karatteristiċi huwa soġġett għall-proporzjon ta’ opzjonijiet magħżula mill-investitur aħħari li jippromwovu dawk il-karatteristiċi u l-perjodu ta’ żmien li fih l-investitur aħħari jinvesti f’dawk l-opzjonijiet. L-informazzjoni pprovduta jenħtieġ li tagħmilha ċara wkoll li għall-prodotti finanzjarji li għandhom investiment sostenibbli bħala l-objettiv tagħhom, l-opzjonijiet ta’ investiment sottostanti kollha jrid ikollhom investiment sostenibbli bħala l-objettiv tagħhom. Hemm prodotti finanzjarji li joffru firxa ta’ opzjonijiet ta’ investiment sottostanti lill-investituri aħħarin, filwaqt li waħda jew aktar mill-opzjonijiet ta’ investiment sottostanti jikkwalifikaw bħala prodotti finanzjarji li jippromwovu karatteristiċi ambjentali jew soċjali. Sabiex tiġi pprovduta trasparenza sħiħa, huwa importanti li jiġi żgurat li l-informazzjoni dwar dawk il-prodotti finanzjarji tkopri wkoll dawk l-opzjonijiet. Hemm ukoll prodotti finanzjarji fejn waħda jew aktar mill-opzjonijiet ta’ investiment sottostanti huma prodotti finanzjarji li għandhom investiment sostenibbli bħala l-objettiv tagħhom. F’dak il-każ ukoll, l-informazzjoni dwar dawk il-prodotti jenħtieġ li tkopri dawk l-opzjonijiet. Hemm ukoll prodotti finanzjarji b’waħda jew aktar mill-opzjonijiet ta’ investiment sottostanti li għandhom investiment sostenibbli bħala l-objettiv tagħhom, iżda fejn dawk l-opzjonijiet ma humiex prodotti finanzjarji kif iddefiniti fl-Artikolu 2(12) tar-Regolament (UE) 2019/2088. Billi dawk l-opzjonijiet jinsabu fi ħdan prodott finanzjarju ġenerali fil-kamp ta’ applikazzjoni tar-Regolament (UE) 2019/2088 u għandhom investiment sostenibbli bħala l-objettiv tagħhom, huwa xieraq li tintalab informazzjoni minima dwar l-objettiv ta’ investiment sostenibbli tagħhom.

(31)

Id-divulgazzjonijiet prekuntrattwali għall-prodotti finanzjarji li joffru firxa ta’ opzjonijiet ta’ investiment sottostanti jenħtieġ li jipprovdu livell xieraq ta’ informazzjoni relatata mas-sostenibbiltà dwar il-prodott finanzjarju b’mod ġenerali. L-investituri aħħarin jenħtieġ li jiġu pprovduti b’lista fil-qosor tal-opzjonijiet ta’ investiment sottostanti relatati mas-sostenibbiltà u indikazzjoni ċara ta’ fejn tista’ tinstab informazzjoni relatata mas-sostenibbiltà dwar dawk l-opzjonijiet. Dik il-lista jenħtieġ li tiżgura li l-opzjonijiet ta’ investiment sottostanti jiġu kkategorizzati kif xieraq f’termini tal-objettiv ta’ investiment sostenibbli u l-promozzjoni ta’ karatteristiċi ambjentali jew soċjali.

(32)

L-inklużjoni tal-informazzjoni relatata mas-sostenibbiltà direttament fil-forma ta’ annessi għad-divulgazzjonijiet prekuntrattwali msemmija fir-Regolament (UE) 2019/2088 tista’ tipprevjeni lil investitur aħħari milli jirċievi divulgazzjoni ċara u konċiża minħabba li l-prodott finanzjarju jista’ joffri firxa kbira ta’ opzjonijiet ta’ investiment sottostanti u għadd korrispondenti ta’ annessi ta’ informazzjoni. F’każijiet bħal dawn, jenħtieġ li jkun permess li tali informazzjoni tiġi pprovduta permezz ta’ referenza għal divulgazzjonijiet oħra magħmula skont id-Direttivi, ir-Regolamenti jew id-dritt nazzjonali. Bl-istess mod, għal divulgazzjonijiet perjodiċi relatati ma’ prodotti finanzjarji li joffru firxa ta’ opzjonijiet ta’ investiment sottostanti, l-informazzjoni perjodika jenħtieġ li tkun relatata biss mal-opzjonijiet ta’ investiment li jkun sar investiment fihom, minħabba li l-opzjonijiet ta’ investiment li fil-fatt ikun sar investiment fihom jirregolaw sa liema punt il-prodott finanzjarju jissodisfa l-karatteristiċi ambjentali jew soċjali li dan jippromwovi jew jilħaq l-objettiv ta’ investiment sostenibbli tiegħu.

(33)

Ir-Regolament (UE) 2020/852 emenda r-Regolament (UE) 2019/2088 billi rrikjeda li l-parteċipanti fis-swieq finanzjarji jinkludu fi ħdan id-divulgazzjonijiet prekuntrattwali u perjodiċi tal-prodotti finanzjarji li għandhom investiment sostenibbli bħala l-objettiv tagħhom u jinvestu f’attività ekonomika li tikkontribwixxi għal objettiv ambjentali skont it-tifsira tal-Artikolu 2(17) ta’ dak ir-Regolament, informazzjoni dwar l-objettiv ambjentali kif stabbilit fir-Regolament (UE) 2020/852, u deskrizzjoni ta’ kif u sa liema punt l-investimenti sottostanti għall-prodott finanzjarju huma f’attivitajiet ekonomiċi ambjentalment sostenibbli kif imsemmi fl-Artikolu 3 ta’ dak ir-Regolament. Barra minn hekk, ir-Regolament (UE) 2019/2088 issa jirrikjedi wkoll li l-parteċipanti fis-swieq finanzjarji jinkludu fi ħdan id-divulgazzjonijiet prekuntrattwali u perjodiċi tal-prodotti finanzjarji li jippromwovu karatteristiċi ambjentali, l-informazzjoni meħtieġa għall-prodotti finanzjarji li għandhom investiment sostenibbli bħala l-objettiv tagħhom u jinvestu f’attività ekonomika li tikkontribwixxi għal objettiv ambjentali fis-sens ta’ dak ir-Regolament. Huwa meħtieġ li l-investituri aħħarin ikunu jistgħu jqabblu faċilment il-gradi tal-investimenti tal-prodotti finanzjarji f’attivitajiet ekonomiċi ambjentalment sostenibbli. Għalhekk, jenħtieġ li l-parteċipanti fis-swieq finanzjarji, għall-finijiet tal-Artikolu 6(1) u (2), u l-Artikolu 11(2) tar-Regolament (UE) 2019/2088, jinkludu fl-annessi tad-dokumenti jew tal-informazzjoni msemmija fl-Artikolu 6(3) u fl-Artikolu 11(2) ta’ dak ir-Regolament (UE) rappreżentazzjonijiet grafiċi ta’ tali investimenti abbażi ta’ metrika standardizzata, bin-numeratur li jikkonsisti fil-valur tas-suq tal-investimenti f’attivitajiet ekonomiċi ambjentalment sostenibbli u d-denominatur li jikkonsisti fil-valur tas-suq tal-investimenti kollha. Sabiex tiġi pprovduta informazzjoni affidabbli lill-investituri aħħarin, in-numeratur jenħtieġ li jinkludi l-valur tas-suq tal-investimenti f’kumpaniji destinatarji ta’ investiment li jirrappreżenta l-proporzjon ta’ attivitajiet ekonomiċi ambjentalment sostenibbli tal-kumpaniji destinatarji ta’ investiment, u r-rikavat mit-titoli ta’ dejn fejn it-termini tat-titoli ta’ dejn jirrikjedu li dak ir-rikavat jintuża għal attivitajiet ekonomiċi ambjentalment sostenibbli. Sabiex jiġu koperti l-investimenti kollha li jistgħu jiffinanzjaw attivitajiet ekonomiċi ambjentalment sostenibbli, jenħtieġ li jkun possibbli li fin-numeratur jiġu inklużi l-assi tal-infrastruttura, l-assi tal-proprjetà immobbli, l-assi tat-titolizzazzjoni u l-investimenti fi prodotti finanzjarji oħrajn kif imsemmi fl-ewwel paragrafu tal-Artikolu 5 u fl-ewwel paragrafu tal-Artikolu 6 tar-Regolament (UE) 2020/852. Minħabba n-nuqqas ta’ metodoloġiji affidabbli biex jiġi ddeterminat sa liema punt l-iskoperturi miksuba permezz tad-derivattivi huma skoperturi għal attivitajiet ekonomiċi ambjentalment sostenibbli, tali skoperturi jenħtieġ li ma jiġux inklużi fin-numeratur. Id-denominatur jenħtieġ li jikkonsisti fil-valur tas-suq tal-investimenti kollha.

(34)

Bħalissa ma hemm l-ebda metodoloġija xierqa biex jiġi kkalkolat sa liema punt l-iskoperturi għall-gvernijiet ċentrali, għall-banek ċentrali u għall-emittenti supranazzjonali (“skoperturi sovrani”) huma skoperturi għal attivitajiet ekonomiċi ambjentalment sostenibbli. Sabiex tiżdied is-sensibilizzazzjoni tal-investituri aħħarin, huwa xieraq li l-livell ta’ investimenti f’attivitajiet ekonomiċi ambjentalment sostenibbli jiġi kkalkolat u rrappreżentat grafikament b’żewġ modi. L-ewwel mod huwa li tiġi permessa l-inklużjoni fin-numeratur tal-investimenti f’titoli ta’ dejn maħruġa minn gvernijiet ċentrali, banek ċentrali u emittenti supranazzjonali fejn it-termini tat-titoli ta’ dejn jirrikjedu li r-rikavat jintuża għal attivitajiet ekonomiċi ambjentalment sostenibbli u l-inklużjoni fid-denominatur tal-investimenti f’titoli ta’ dejn maħruġa minn gvernijiet ċentrali, banek ċentrali u emittenti supranazzjonali, irrispettivament mill-użu tar-rikavat. Sabiex ikomplu jinformaw id-deċiżjonijiet ta’ investiment tal-investituri aħħarin, il-parteċipanti fis-swieq finanzjarji jenħtieġ li jispjegaw għaliex ċerti skoperturi sovrani ma humiex f’attivitajiet ekonomiċi ambjentalment sostenibbli, inkluż fejn dan ikun il-każ minħabba n-nuqqas ta’ metodoloġiji xierqa biex jiġi kkalkolat sa liema punt dawk l-iskoperturi huma skoperturi għal attivitajiet ekonomiċi ambjentalment sostenibbli. It-tieni mod huwa li jiġu esklużi l-iskoperturi sovrani min-numeratur u mid-denominatur, u b’hekk tissaħħaħ aktar il-komparabbiltà fost il-prodotti finanzjarji u li l-investituri aħħarin jkunu jistgħu jivvalutaw sa liema punt il-prodotti finanzjarji jinvestu f’attivitajiet ekonomiċi ambjentalment sostenibbli mingħajr l-inklużjoni ta’ skoperturi sovrani.

(35)

Il-parteċipanti fis-swieq finanzjarji jenħtieġ li jkunu jistgħu jiddependu fuq fornituri tad-data terzi meta l-impriżi jkunu għadhom ma kkonformawx mal-obbligu, stabbilit fl-Artikolu 8 tar-Regolament (UE) 2020/852, li jiddivulgaw informazzjoni dwar kif u sa liema punt l-attivitajiet tagħhom huma assoċjati ma’ attivitajiet ekonomiċi li jikkwalifikaw bħala ambjentalment sostenibbli skont l-Artikoli 3 u 9 ta’ dak ir-Regolament. Għall-valutazzjoni tal-investimenti f’kumpaniji destinatarji ta’ investiment li ma jkunux suġġetti għad-divulgazzjonijiet meħtieġa mill-Artikolu 8 tar-Regolament (UE) 2020/852, il-parteċipanti fis-swieq finanzjarji jenħtieġ li jivvalutaw u jużaw id-data rrapportata pubblikament. Huwa biss meta tali data ma tkunx disponibbli, li l-parteċipanti fis-swieq finanzjarji jenħtieġ li jitħallew jużaw data li tkun inkisbet jew direttament minn kumpaniji destinatarji ta’ investiment, jew minn partijiet terzi, f’kull każ dment li d-data magħmula disponibbli taħt tali divulgazzjonijiet tkun ekwivalenti għad-data magħmula disponibbli skont id-divulgazzjonijiet magħmula f’konformità ma’ dak l-Artikolu 8.

(36)

Huwa meħtieġ li jiġi żgurat li l-prodotti finanzjarji jiddivulgaw b’mod konsistenti informazzjoni dwar il-grad sa fejn l-investimenti f’kumpaniji destinatarji ta’ investiment li jkunu impriżi mhux finanzjarji, huma investimenti f’attivitajiet ekonomiċi ambjentalment sostenibbli skont l-Artikoli 3 u 9 tar-Regolament (UE) 2020/852. Għal dak il-għan, il-parteċipanti fis-swieq finanzjarji jenħtieġ li jagħżlu jew il-proporzjon tal-fatturat, tan-nefqa kapitali jew tan-nefqa operatorja, biex jikkalkulaw l-indikatur ewlieni tal-prestazzjoni għal kull prodott finanzjarju biex ikejlu dak il-grad, u jenħtieġ li jiddivulgaw dik l-għażla fl-annessi tad-dokumenti jew tal-informazzjoni msemmija fl-Artikolu 6(3) tar-Regolament (UE) 2019/2088. Sabiex tiġi żgurata l-komparabbiltà fost il-prodotti finanzjarji u biex l-investituri aħħarin jifhmu aktar faċilment, l-indikatur ewlieni tal-prestazzjoni jenħtieġ li awtomatikament ikun il-fatturat. In-nefqa kapitali jew in-nefqa operattiva jenħtieġ li tintuża biss meta l-karatteristiċi tal-prodott finanzjarju jiġġustifikaw dan l-użu, b’mod partikolari meta n-nefqa kapitali jew in-nefqa operatorja tkun aktar rappreżentattiva għall-grad sa fejn dawk il-prodotti finanzjarji jinvestu f’attivitajiet ekonomiċi ambjentalment sostenibbli, u sakemm jiġi spjegat dan l-użu. Għall-kumpaniji destinatarji ta’ investiment li huma impriżi finanzjarji, kif definiti fl-Artikolu 1, il-punt (8), tar-Regolament Delegat tal-Kummissjoni (UE) 2021/2178 (6), jenħtieġ li l-kumparabbiltà tinkiseb billi jintalab l-użu tal-istess indikatur ewlieni tal-prestazzjoni għall-istess tip ta’ impriża finanzjarja. Għall-impriżi tal-assigurazzjoni u l-impriżi tar-riassigurazzjoni li jwettqu attivitajiet ta’ sottoskrizzjoni mhux tal-ħajja, jenħtieġ li jkun possibbli li jiġu kkombinati kemm l-indikaturi ewlenin tal-prestazzjoni tal-investiment kif ukoll dawk tas-sottoskrizzjoni f’indikatur ewlieni wieħed tal-prestazzjoni. Biex tiġi promossa t-trasparenza għall-investituri aħħarin, huwa neċessarju li jkun meħtieġ li d-divulgazzjonijiet perjodiċi ta’ kif u sa liema punt l-investimenti sottostanti għall-prodott finanzjarju jsiru f’attivitajiet ekonomiċi ambjentalment sostenibbli jipprovdu tqabbil mal-proporzjonijiet immirati ta’ investimenti f’dawk l-attivitajiet ekonomiċi li jidhru fid-divulgazzjonijiet prekuntrattwali. Sabiex jiġu żgurati l-komparabbiltà u t-trasparenza, id-divulgazzjonijiet perjodiċi jenħtieġ li jindikaw sa liema punt saru l-investimenti f’dawk l-attivitajiet ekonomiċi skont il-fatturat, in-nefqa kapitali u n-nefqa operazzjonali.

(37)

Id-dispożizzjonijiet ta’ dan ir-Regolament huma marbuta mill-qrib ma’ xulxin, peress li kollha jittrattaw l-informazzjoni li trid tiġi pprovduta mill-parteċipanti fis-swieq finanzjarji u mill-konsulenti finanzjarji fir-rigward tad-divulgazzjonijiet relatati mas-sostenibbiltà fis-settur tas-servizzi finanzjarji meħtieġa skont ir-Regolament (UE) 2019/2088. Biex tiġi żgurata l-koerenza bejn dawk id-dispożizzjonijiet, li jenħtieġ li jidħlu fis-seħħ fl-istess ħin, u biex tiġi ffaċilitata perspettiva komprensiva mill-parteċipanti fis-swieq finanzjarji u mill-konsulenti finanzjarji tal-obbligi tagħhom skont dak ir-Regolament, huwa xieraq li jiġu inklużi l-istandards tekniċi regolatorji kollha meħtieġa mill-Artikolu 2a(3), mit-tielet subparagrafu tal-Artikolu 4(6), mit-tieni subparagrafu tal-Artikolu 4(7), mir-raba’ subparagrafu tal-Artikolu 8(3), mir-raba’ subparagrafu tal-Artikolu 8(4), mir-raba’ subparagrafu tal-Artikolu 9(5), mir-raba’ subparagrafu tal-Artikolu 9(6), mir-raba’ subparagrafu tal-Artikolu 10(2), mir-raba’ subparagrafu tal-Artikolu 11(4), u mir-raba’ subparagrafu tal-Artikolu 11(5) f’Regolament wieħed.

(38)

Dan ir-Regolament huwa bbażat fuq l-abbozz tal-istandards tekniċi regolatorji sottomessi lill-Kummissjoni mill-Awtorità Bankarja Ewropea, l-Awtorità Ewropea tal-Assigurazzjoni u l-Pensjonijiet tax-Xogħol u l-Awtorità Ewropea tat-Titoli u s-Swieq (“l-Awtoritajiet Superviżorji Ewropej”).

(39)

Il-Kumitat Konġunt tal-Awtoritajiet Superviżorji Ewropej imsemmi fl-Artikolu 54 tar-Regolament (UE) Nru 1093/2010 tal-Parlament Ewropew u tal-Kunsill (7), fl-Artikolu 54 tar-Regolament (UE) Nru 1094/2010 tal-Parlament Ewropew u tal-Kunsill (8) u fl-Artikolu 54 tar-Regolament (UE) Nru 1095/2010 tal-Parlament Ewropew u tal-Kunsill (9) wettaq konsultazzjonijiet pubbliċi miftuħa dwar l-abbozz ta’ standards tekniċi regolatorji li fuqhom huwa bbażat dan ir-Regolament, analizza l-kostijiet u l-benefiċċji potenzjali relatati u talab il-parir tal-Grupp tal-Partijiet Bankarji Interessati stabbilit f’konformità mal-Artikolu 37 tar-Regolament (UE) Nru 1093/2010, tal-Grupp tal-Partijiet Interessati tal-Oqsma tal-Assigurazzjoni u tar-Riassigurazzjoni stabbilit f’konformità mal-Artikolu 37 tar-Regolament (UE) Nru 1094/2010, u tal-Grupp tal-Partijiet Interessati tat-Titoli u s-Swieq stabbilit f’konformità mal-Artikolu 37 tar-Regolament (UE) Nru 1095/2010.

(40)

Huwa meħtieġ li l-parteċipanti fis-swieq finanzjarji u l-konsulenti finanzjarji jkunu jistgħu jadattaw għar-rekwiżiti stabbiliti f’dan ir-Regolament Delegat. Għalhekk, id-data tal-applikazzjoni tiegħu jenħtieġ li tiġi differita għall-1 ta’ Jannar 2023. Madankollu, huwa meħtieġ li l-parteċipanti fis-swieq finanzjarji li jkunu qiesu l-impatti avversi prinċipali tad-deċiżjonijiet ta’ investiment fuq il-fatturi ta’ sostenibbiltà kif imsemmija fl-Artikolu 4(1)(a), tar-Regolament (UE) 2019/2088, jew kif meħtieġ mill-Artikolu 4(3) jew (4) ta’ dak ir-Regolament, sal-31 ta’ Diċembru 2022, jippubblikaw l-ewwel darba l-informazzjoni dwar dawk l-impatti fuq is-siti web tagħhom f’taqsimiet separati bit-titolu “Dikjarazzjoni dwar l-impatti avversi prinċipali tad-deċiżjonijiet ta’ investiment fuq il-fatturi ta’ sostenibbiltà” sat-30 ta’ Ġunju 2023 għall-perjodu mill-1 ta’ Jannar 2022 sal-31 ta’ Diċembru 2022,

(1)

F’konformità mal-Artikolu 50(2)(a) tar-Regolament (UE) Nru 1151/2012, l-applikazzjoni tas-Slovakkja għar-reġistrazzjoni tal-isem “Hrušovský lepník”, ġiet ippubblikata f’Il-Ġurnal Uffiċjali tal-Unjoni Ewropea (2).

(2)

Il-Kummissjoni ma rċeviet l-ebda dikjarazzjoni ta’ oppożizzjoni f’konformità mal-Artikolu 51 tar-Regolament (UE) Nru 1151/2012, u jenħtieġ li l-isem “Hrušovský lepník” jiġi rreġistrat,

(1)

Il-livelli massimi tar-residwi (MRLs) għall-ametodaktrin u d-dodina ġew stabbiliti fl-Anness II tar-Regolament (KE) Nru 396/2005. L-MRLs għall-klormekwat u għan-nikotina ġew stabbiliti fil-Parti A tal-Anness III ta’ dak ir-Regolament. Għall-profenofos, ġew stabbiliti MRLs fl-Anness II u l-Parti B tal-Anness III ta’ dak ir-Regolament. Ma kinux stabbiliti MRLs speċifiċi għall-ispodoptera exigua multicapsid nucleopolyhedrovirus (SeMNPV) iżolat BV-0004 fir-Regolament (KE) Nru 396/2005, u dik is-sustanza lanqas ma ddaħħlet fl-Anness IV ta’ dak ir-Regolament, u għaldaqstant japplika l-valur prestabbilit ta’ 0,01 mg/kg stipulat fl-Artikolu 18(1)(b) tiegħu.

(2)

Fil-kuntest ta’ proċedura għall-awtorizzazzjoni tal-użu ta’ prodott għall-protezzjoni tal-pjanti li fih is-sustanza attiva ametoktradin fuq għelejjel li jistgħu jkunu attraenti għan-naħal u li jistgħu jirriżultaw f’residwi ta’ għasel, tressqet applikazzjonijiet skont l-Artikolu 6(1) tar-Regolament (KE) Nru 396/2005 li jitolbu modifika għall-MRLs eżistenti għall-għasel.

(3)

Għad-dodina, tressqet applikazzjoni skont l-Artikolu 6(1) tar-Regolament (KE) Nru 396/2005 li titlob modifika tal-MRLs eżistenti għall-frott taċ-ċitru.

(4)

F’konformità mal-Artikolu 8 tar-Regolament (KE) Nru 396/2005, dawk iż-żewġ applikazzjonijiet ġew evalwati mill-Istati Membri kkonċernati u r-rapporti ta’ evalwazzjoni ntbagħtu lill-Kummissjoni.

(5)

L-Awtorità Ewropea dwar is-Sigurtà fl-Ikel (“l-Awtorità”) ivvalutat l-applikazzjonijiet u r-rapporti tal-evalwazzjonijiet u b’mod partikolari eżaminat ir-riskji għall-konsumaturi, u fejn rilevanti, ir-riskji għall-annimali, u ħarġet l-opinjonijiet motivati tagħha dwar l-MRLs proposti (2). L-Awtorità bagħtet dawk l-opinjonijiet lill-applikanti, lill-Kummissjoni u lill-Istati Membri, u qegħdithom għad-dispożizzjoni tal-pubbliku.

(6)

L-Awtorità kkonkludiet li r-rekwiżiti kollha fir-rigward tal-kompletezza għat-tressiq tad-data ġew issodisfati, u li abbażi tal-valutazzjoni tal-esponiment tal-konsumaturi għal 27 grupp speċifiku Ewropew tal-konsumaturi, il-modifiki lill-MRLs mitluba mill-applikanti kienu aċċettabbli mil-lat tas-sikurezza tal-konsumaturi. B’din il-konklużjoni, l-Awtorità qieset l-aktar informazzjoni reċenti dwar il-proprjetajiet tossikoloġiċi tas-sustanzi. La l-esponiment tul il-ħajja għal dawk is-sustanzi permezz tal-konsum tal-prodotti kollha tal-ikel li jista’ jkun fihom dawn is-sustanzi, u lanqas l-esponiment għal perjodu qasir minħabba konsum kbir tal-prodotti rilevanti ma wrew li hemm riskju li tinqabeż id-doża aċċettabbli ta’ kuljum jew id-doża akuta ta’ referenza.

(7)

Għall-klormekwat, ġew stabbiliti MRLs temporanji bir-Regolament tal-Kummissjoni (UE) 2019/1561 (3) għall-faqqiegħ tal-gajdra u bir-Regolament tal-Kummissjoni (UE) 2017/693 (4) għall-faqqiegħ ikkultivat f’ 6 mg/kg u 0,9 mg/kg rispettivament. Dawk l-MRLs temporanji ġew stabbiliti abbażi tad-data ta’ monitoraġġ li turi li kien hemm residwi fuq faqqiegħ ikkultivat mhux ittrattat f’livell ogħla mil-limitu ta’ determinazzjoni minħabba l-kontaminazzjoni kroċjata tal-faqqiegħ kultivat bit-tiben legalment ittrattat bil-klormekwat. Dawn l-MRLs temporanji ġew stabbiliti sat-13 ta’ April 2021, sakemm tiġi sottomessa d-data ta’ monitoraġġ dwar l-okkorrenza ta’ dik is-sustanza fil-prodotti kkonċernati.

(8)

L-Awtorità u l-operaturi ta’ negozju tal-ikel ssottomettew data ta’ monitoraġġ reċenti li turi li r-residwi tal-klormekwat għadhom iseħħu fil-faqqiegħ tal-gajdri u fil-faqqiegħ ikkultivat f’livelli ogħla mil-limitu ta’ determinazzjoni. Il-kultivaturi tal-faqqiegħ innotifikaw lill-Kummissjoni dwar studju wieħed li għaddej sabiex jiġu vvalutati l-livelli ta’ kontaminazzjoni fil-faqqiegħ tal-gajdra u f’faqqiegħ ikkultivat ieħor. Ladarba l-istudju se jiġi konkluż fl-2022 u d-data miġbura mbagħad se tintbagħat lill-Kummissjoni, huwa xieraq li tkompli tiġi estiża l-validità ta’ dawk l-MRLs temporanji għal sena mill-pubblikazzjoni ta’ dan ir-Regolament.

(9)

L-MRLs temporanji għall-klormekwat ġew stabbiliti wkoll permezz tar-Regolament (UE) 2017/693 għal-lanġas għal 0,07 mg/kg, minħabba li d-data ta’ monitoraġġ uriet persistenza fis-siġar bħala konsegwenza tal-użi preċedenti. Dawn l-MRLs temporanji ġew stabbiliti sat-13 ta’ April 2021, sakemm tiġi sottomessa d-data ta’ monitoraġġ dwar l-okkorrenza ta’ dik is-sustanza fil-prodotti kkonċernati. L-Awtorità, l-Istati Membri u l-operaturi tan-negozji tal-ikel ssottomettew data ta’ monitoraġġ reċenti li turi li r-residwi ta’ din is-sustanza f’livelli ogħla mil-limitu ta’ determinazzjoni għadha tokkorri fil-lanġas. Huwa għalhekk xieraq li jitkompla l-monitoraġġ fuq il-livelli ta’ klormekwat fil-lanġas u li tiġi estiża l-validità ta’ dak l-MRL temporanju sa seba’ snin mill-pubblikazzjoni ta’ dan ir-Regolament.

(10)

Għan-nikotina, l-MRLs temporanji ġew stabbiliti bir-Regolament tal-Kummissjoni (UE) 2017/978 (5) għall-faqqiegħ selvaġġ (faqqiegħ porċini mnixxfin u faqqiegħ selvaġġ imnixxfin li mhumiex porċini) sad-19 ta’ Ottubru 2021, fl-istennija tas-sottomissjoni u l-evalwazzjoni ta’ data ġdida u informazzjoni dwar l-okkorrenza jew il-formazzjoni naturali tan-nikotina fil-prodotti kkonċernati. L-evidenza xjentifika mhijiex konklużiva biex turi li n-nikotina tinstab b’mod naturali fil-prodotti kkonċernati u biex jiġi spjegat il-mekkaniżmu tal-formazzjoni. L-Awtorità u l-operaturi ta’ negozju tal-ikel ssottomettew data ta’ monitoraġġ reċenti li turi li r-residwi ta’ din is-sustanza għadhom jokkorru f’livelli ogħla mil-limitu ta’ determinazzjoni. Huwa għalhekk xieraq li jitkompla l-monitoraġġ fuq il-livelli ta’ nikotina f’dawk il-prodotti u li tiġi estiża l-validità ta’ dawk l-MRLs temporanji sa seba’ snin mill-pubblikazzjoni ta’ dan ir-Regolament.

(11)

Għall-profenofos, ġie stabbilit MRL temporanju bir-Regolament (UE) 2017/978 għall-petali tal-ward sat-18 ta’ Ottubru 2021, sakemm tiġi sottomessa d-data ta’ monitoraġġ dwar l-okkorrenza ta’ dik is-sustanza fil-prodott ikkonċernat. L-Awtorità u l-operaturi tan-negozji tal-ikel issottomettew data ta’ monitoraġġ reċenti li turi li r-residwi ta’ din is-sustanza f’livelli ogħla mil-limitu ta’ determinazzjoni għadha tokkorri fil-petali tal-ward. Huwa għalhekk xieraq li jitkompla l-monitoraġġ fuq il-livelli ta’ profenofos fil-petali tal-ward u li tiġi estiża l-validità ta’ dak l-MRL temporanju sa seba’ snin mill-pubblikazzjoni ta’ dan ir-Regolament.

(12)

Applikazzjoni għall-approvazzjoni tas-sustanza attiva Spodoptera exigua multicapsid nucleopolyhedrovirus (SeMNPV) iżolat BV-0004 ġiet sottomessa lil Stat Membru f’konformità mal-Artikolu 7 tar-Regolament (KE) Nru 1107/2009 tal-Parlament Ewropew u tal-Kunsill (6). L-applikazzjoni ġiet evalwata mill-Istat Membru kkonċernat f’konformità mal-Artikolu 11(2) ta’ dak ir-Regolament. L-awtorità vvalutat l-applikazzjoni u wasslet konklużjoni dwar l-evalwazzjoni bejn il-pari tal-valutazzjoni tar-riskju tal-pestiċidi tas-sustanza attiva (7), fejn hija rrakkomandat l-inklużjoni tal-Spodoptera exigua multicapsid nucleopolyhedrovirus (SeMNPV) iżolat BV-0004 fl-Anness IV tar-Regolament (KE) Nru 396/2005. Għalhekk huwa xieraq li dik is-sustanza tiġi inkluża fl-Anness IV tar-Regolament (KE) Nru 396/2005.

(13)

Abbażi tal-opinjonijiet motivati u tal-konklużjoni tal-Awtorità, u filwaqt li jitqiesu l-fatturi rilevanti elenkati fl-Artikolu 14(2) tar-Regolament (KE) Nru 396/2005, il-modifiki rispettivi proposti għall-MRLs jissodisfaw ir-rekwiżiti tal-Artikolu 14(2) tar-Regolament (KE) Nru 396/2005.

(14)

Għalhekk, ir-Regolament (KE) Nru 396/2005 jenħtieġ li jiġi emendat skont dan.

(15)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,