(1)

Wara investigazzjoni anti-dumping, il-Kunsill bir-Regolament (KE) Nru 925/2009 (2), impona dazju anti-dumping fuq ċerti fojls tal-aluminju li joriġinaw mill-Armenja, mill-Brażil u miċ-Ċina (“l-investigazzjoni oriġinali”). Wara rieżami ta’ skadenza skont l-Artikolu 11(2) tar-Regolament bażiku, il-Kummissjoni Ewropea (“il-Kummissjoni”) bir-Regolament ta’ Implimentazzjoni (UE) 2015/2384 (3), estendiet il-miżuri fis-17 ta’ Diċembru 2015 għall-esportazzjonijiet miċ-Ċina u temmet il-miżuri għall-Brażil (“l-investigazzjoni preċedenti tar-rieżami ta’ skadenza”). Il-miżuri anti-dumping kontra l-importazzjonijiet li joriġinaw mill-Armenja skadew fis-7 ta’ Ottubru 2014.

(2)

B’riżultat ta’ investigazzjoni antiċirkomvenzjoni f’konformità mal-Artikolu 13 tar-Regolament bażiku, il-Kummissjoni, bir-Regolament ta’ Implimentazzjoni (UE) 2017/271 (4) estendiet id-dazju anti-dumping impost fuq l-importazzjonijiet ta’ ċerti fojls tal-aluminju li joriġinaw mir-Repubblika tal-Poplu taċ-Ċina għal importazzjonijiet ta’ ċertu fojl tal-aluminju ftit modifikat.

(3)

Bir-Regolament ta’ Implimentazzjoni (UE) 2021/1474 (5), il-Kummissjoni, wara investigazzjoni antiċirkomvenzjoni oħra f’konformità mal-Artikolu 13 tar-Regolament bażiku, estendiet id-dazju anti-dumping impost mir-Regolament ta’ Implimentazzjoni (UE) 2015/2384 u mir-Regolament ta’ Implimentazzjoni (UE) 2017/271 dwar l-importazzjonijiet ta’ ċerti fojls tal-aluminju li joriġinaw mir-Repubblika tal-Poplu taċ-Ċina għall-importazzjonijiet ta’ ċerti fojls tal-aluminju kkonsenjati mit-Tajlandja, kemm jekk iddikjarati li joriġinaw mit-Tajlandja kif ukoll jekk le.

(4)

Wara l-pubblikazzjoni ta’ Notifika dwar l-iskadenza imminenti (6), il-Kummissjoni rċeviet talba għal rieżami skont l-Artikolu 11(2) tar-Regolament bażiku.

(5)

It-talba għal rieżami ġiet ippreżentata fl-10 ta’ Settembru 2020 mill-produtturi tal-Unjoni, li jirrappreżentaw madwar 90 % tal-produzzjoni totali tal-Unjoni ta’ ċertu fojl tal-aluminju (“l-applikanti”). It-talba għal rieżami kienet ibbażata fuq ir-raġunijiet li l-iskadenza tal-miżuri probabbli tirriżulta f’kontinwazzjoni jew f’rikorrenza ta’ dumping u ħsara lill-industrija tal-Unjoni.

(6)

Hekk kif determinat, wara konsultazzjoni mal-Kumitat stabbilit bl-Artikolu 15(1) tar-Regolament bażiku, li kienet teżisti biżżejjed evidenza għall-bidu ta’ rieżami ta’ skadenza, fis-17 ta’ Diċembru 2020, permezz ta’ Notifika li ġiet ippubblikata f’Il-Ġurnal Uffiċjali tal-Unjoni Ewropea (7) (“in-Notifika ta’ Bidu”), il-Kummissjoni bdiet rieżami ta’ skadenza rigward l-importazzjonijiet ta’ ċertu fojl tal-aluminju li joriġina mir-Repubblika tal-Poplu taċ-Ċina (ir-“RPĊ” jew “il-pajjiż ikkonċernat”) fuq il-bażi tal-Artikolu 11(2) tar-Regolament bażiku.

(7)

L-investigazzjoni tal-probabbiltà ta’ kontinwazzjoni jew ta’ rikorrenza tad-dumping kopriet il-perjodu mill-1 ta’ Ottubru 2019 sat-30 ta’ Settembru 2020 (il-“perjodu ta’ investigazzjoni tar-rieżami” jew il-“PIR”). L-eżami tax-xejriet rilevanti għall-valutazzjoni tal-probabbiltà ta’ kontinwazzjoni jew ta’ rikorrenza ta’ ħsara kopra l-perjodu mill-1 ta’ Jannar 2017 sa tmiem il-perjodu ta’ investigazzjoni tar-rieżami (“il-perjodu kkunsidrat”).

(8)

Fin-Notifika ta’ Bidu, il-Kummissjoni stiednet lill-partijiet interessati jikkuntattjawha sabiex jipparteċipaw fl-investigazzjoni. Barra minn hekk, il-Kummissjoni speċifikament informat lill-applikanti, lil produtturi magħrufa oħrajn tal-Unjoni, lill-produtturi esportaturi magħrufa u lill-awtoritajiet Ċiniżi, lill-importaturi, fornituri u utenti magħrufa, lin-negozjanti, kif ukoll assoċjazzjonijiet li kienu magħrufa li kienu kkonċernati, dwar il-bidu tal-investigazzjoni, u stednithom jieħdu sehem.

(9)

Il-partijiet interessati kellhom opportunità jikkummentaw dwar il-bidu tal-investigazzjoni u jitolbu smigħ mal-Kummissjoni u/jew mal-Uffiċjal tas-Smigħ fil-proċedimenti kummerċjali.

(10)

Fin-Notifika ta’ Bidu, il-Kummissjoni ddikjarat li kien hemm il-possibbiltà li tagħżel kampjun minn fost il-partijiet interessati f’konformità mal-Artikolu 17 tar-Regolament bażiku.

(11)

Fin-Notifika ta’ Bidu tagħha, il-Kummissjoni ddikjarat li hija kienet għażlet b’mod proviżorju kampjun tal-produtturi tal-Unjoni. Il-Kummissjoni għażlet il-kampjun fuq il-bażi tal-volumi tal-produzzjoni u tal-bejgħ tal-prodott simili fl-Unjoni. Dan il-kampjun kien jikkonsisti minn tliet produtturi tal-Unjoni. Il-produtturi tal-Unjoni inklużi fil-kampjun kienu jirrappreżentaw madwar 77 % tal-produzzjoni totali stmata tal-Unjoni u 75 % tal-volum tal-bejgħ stmat tal-prodott simili fl-Unjoni. Il-Kummissjoni stiednet lill-partijiet interessati jikkummentaw dwar il-kampjun proviżorju. Il-Kummissjoni ma rċeviet l-ebda kumment. Il-kampjun b’hekk tqies li kien rappreżentattiv tal-industrija tal-Unjoni.

(12)

Sabiex tiddeċiedi jekk il-kampjunar huwiex meħtieġ u, jekk iva, sabiex tagħżel kampjun, il-Kummissjoni talbet lill-importaturi mhux relatati jipprovdu l-informazzjoni speċifikata fin-Notifika ta’ Bidu.

(13)

Importatur mhux relatat wieħed biss ipprovda l-informazzjoni mitluba u qabel li jiġi inkluż fil-kampjun. Għalhekk, ma kienx meħtieġ li jittieħdu kampjuni.

(14)

Sabiex tiddeċiedi jekk il-kampjunar huwiex meħtieġ u, jekk iva, sabiex tagħżel kampjun, il-Kummissjoni talbet lill-produtturi esportaturi kollha fir-RPĊ sabiex jipprovdu l-informazzjoni speċifikata fin-Notifika ta’ Bidu. Barra minn hekk, il-Kummissjoni talbet lill-Missjoni tar-Repubblika tal-Poplu taċ-Ċina għall-Unjoni Ewropea sabiex tidentifika u/jew tikkuntattja lil produtturi esportaturi oħrajn, jekk hemm, li jistgħu jkunu interessati li jipparteċipaw fl-investigazzjoni.

(15)

Żewġ produtturi esportaturi fil-pajjiż ikkonċernat preżentaw ruħhom u provdew l-informazzjoni mitluba. Madankollu, wieħed minnhom iddikjara li ma pproduċiex u lanqas ma esporta l-prodott taħt rieżami matul il-perjodu ta’ investigazzjoni tar-rieżami, u għalhekk ma xtaqx jikkoopera mal-investigazzjoni. Minħabba n-numru żgħir ta’ tweġibiet, il-Kummissjoni ddeċidiet li l-kampjunar ma kienx meħtieġ.

(16)

Il-Kummissjoni bagħtet kwestjonarju dwar l-eżistenza ta’ distorsjonijiet sinifikanti fir-RPĊ skont it-tifsira tal-Artikolu 2(6a)(b) tar-Regolament bażiku lill-Gvern tar-Repubblika tal-Poplu taċ-Ċina (“GTĊ”).

(17)

Fil-bidu, il-kwestjonarju kien disponibbli fil-fajl sabiex jiġi spezzjonat mill-partijiet interessati u fuq is-sit web tad-DĠ Kummerċ (8).

(18)

It-tweġibiet għall-kwestjonarju waslu għand it-tliet produtturi tal-Unjoni fil-kampjun. Il-produttur esportatur li ppreżenta ruħu matul il-kampjunar ma pprovdiex tweġiba għall-kwestjonarju. Ma waslet l-ebda tweġiba mingħand l-importaturi mhux relatati. L-ebda wieħed mill-utenti ma pprovda kwestjonarju jew ippreżenta ruħu matul l-investigazzjoni. Il-GTĊ lanqas ma pprovda tweġiba għall-kwestjonarju.

(19)

Minħabba li ma kien hemm l-ebda kooperazzjoni mill-produtturi esportaturi Ċiniżi jew mill-GTĊ, is-sejbiet fir-rigward tad-dumping u l-ħsara saru abbażi tal-fatti disponibbli skont l-Artikolu 18 tar-Regolament bażiku. Il-Missjoni tar-Repubblika tal-Poplu taċ-Ċina lill-Unjoni Ewropea ġiet informata dwar dan kif xieraq. Ma wasal l-ebda kumment.

(20)

Il-Kummissjoni fittxet l-informazzjoni kollha meqjusa neċessarja għall-investigazzjoni. F’konformità man-Notifika dwar il-konsegwenzi tat-tifqigħa tal-COVID-19 fuq l-investigazzjonijiet anti-dumping u anti-sussidji (9), saru proċessi ta’ kontroverifika mill-bogħod (“RCC”) permezz ta’ vidjokonferenza mal-kumpaniji li ġejjin:

—

Alcomet AD, Shumen, il-Bulgarija

—

Slim Aluminium SpA, Cisterna di Latina, l-Italja

—

Symetal, Ateni, il-Greċja

(21)

Il-prodott taħt rieżami huwa fojl tal-aluminju ta’ ħxuna mhux anqas minn 0,008 mm u mhux aktar minn 0,018 mm, mhux rinforzat, mhux maħdum ulterjorment apparti milli rrumblat, f’rombli ta’ wisa’ mhux aktar minn 650 mm u ta’ piż aktar minn 10 kg, li joriġina fir-Repubblika tal-Poplu taċ-Ċina, li bħalissa jaqa’ taħt il-kodiċi NM ex 7607 11 19 (il-kodiċi TARIC 7607111910) (“il-prodott taħt rieżami”, “fojl tal-aluminju għall-użu domestiku” jew “AHF”).

(22)

Il-prodott taħt rieżami jintuża għal kisi għal żmien qasir b’diversi użi fid-djar, fin-negozju tal-catering, fl-industrija tal-prodotti tal-ikel u fin-negozju tal-bejgħ bl-imnut tal-fjuri.

(23)

Kif ġie stabbilit fl-investigazzjoni oriġinali, kif ukoll fir-rieżami ta’ skadenza preċedenti, din l-investigazzjoni tar-rieżami ta’ skadenza kkonfermat li dawn il-prodotti li ġejjin għandhom l-istess karatteristiċi fiżiċi, kimiċi u tekniċi bażiċi kif ukoll l-istess użi bażiċi:

(24)

Il-Kummissjoni ddeċidiet li dawk il-prodotti huma, għalhekk, prodotti simili skont l-Artikolu 1(4) tar-Regolament bażiku.

(25)

F’konformità mal-Artikolu 11(2) tar-Regolament bażiku, il-Kummissjoni eżaminat jekk huwiex probabbli li l-iskadenza tal-miżura fis-seħħ twassal għal kontinwazzjoni jew għal rikorrenza ta’ dumping mir-RPĊ.

(26)

Matul il-perjodu ta’ investigazzjoni tar-rieżami, għalkemm l-importazzjonijiet tal-prodott taħt rieżami mir-RPĊ komplew, dawn laħqu biss 1 588 tunnellata, li jirrappreżentaw 2 % tas-sehem mis-suq tal-konsum tal-Unjoni. Ħafna minn dawn l-esportazzjonijiet saru taħt il-proċedura ta’ proċessar attiv (10) u għalhekk ma kienu soġġetti la għad-dazju anti-dumping u lanqas għad-dazju doganali. Il-Kummissjoni kkonkludiet li l-volum ta’ importazzjonijiet kien rappreżentattiv biżżejjed sabiex jiġi eżaminat jekk id-dumping kompliex matul il-perjodu ta’ investigazzjoni tar-rieżami.

(27)

Fid-dawl tal-evidenza suffiċjenti disponibbli fil-bidu tal-investigazzjoni li indikat l-eżistenza ta’ distorsjonijiet sinifikanti skont it-tifsira tal-punt (b) tal-Artikolu 2(6a) tar-Regolament bażiku fir-rigward tar-RPĊ, il-Kummissjoni bdiet l-investigazzjoni fir-rigward tal-produtturi esportaturi minn dan il-pajjiż fuq il-bażi tal-Artikolu 2(6a) tar-Regolament bażiku.

(28)

Konsegwentement, sabiex tiġbor id-data neċessarja għall-applikazzjoni eventwali tal-Artikolu 2(6a) tar-Regolament bażiku, fin-Notifika ta’ Bidu l-Kummissjoni stiednet lill-produtturi kollha fir-RPĊ sabiex jipprovdu informazzjoni dwar l-inputs użati għall-produzzjoni tal-prodott taħt rieżami. L-ebda produttur ma ppreżenta din l-informazzjoni.

(29)

Sabiex tikseb l-informazzjoni li qieset meħtieġa għall-investigazzjoni tagħha fir-rigward tal-allegati distorsjonijiet sinifikanti, il-Kummissjoni bagħtet kwestjonarju lill-GTĊ. Barra minn hekk, taħt il-punt 5.3.2 tan-Notifika ta’ Bidu, il-Kummissjoni stiednet lill-partijiet interessati kollha jesprimu l-fehmiet tagħhom, jissottomettu informazzjoni u jipprovdu evidenza ta’ sostenn fir-rigward tal-applikazzjoni tal-Artikolu 2(6a) tar-Regolament bażiku fi żmien 37 jum mid-data tal-pubblikazzjoni tan-Notifika ta’ Bidu f’Il-Ġurnal Uffiċjali tal-Unjoni Ewropea. Ma waslet l-ebda sottomissjoni.

(30)

Ma waslet l-ebda tweġiba għall-kwestjonarju mill-GTĊ. Sussegwentement, il-Kummissjoni informat lill-GTĊ li hija kienet se tuża l-fatti disponibbli skont it-tifsira tal-Artikolu 18 tar-Regolament bażiku sabiex tiddetermina l-eżistenza ta’ distorsjonijiet sinifikanti fir-RPĊ. Il-Kummissjoni informat li jekk is-sejbiet ikunu bbażati fuq il-fatti disponibbli f’konformità mal-Artikolu 18, ir-riżultat jista’ jkun anqas favorevoli għall-parti milli kieku din kienet ikkooperat. Ma wasal l-ebda kumment mingħand il-GTĊ.

(31)

Fil-punt 5.3.2 tan-Notifika ta’ Bidu, il-Kummissjoni speċifikat li, fid-dawl tal-evidenza disponibbli f’dak l-istadju tal-investigazzjoni, il-pajjiżi rappreżentattivi possibbli għall-fini tad-determinazzjoni tal-valur normali abbażi ta’ prezzijiet jew parametri referenzjarji mingħajr distorsjoni skont l-Artikolu 2(6a)(a) tar-Regolament bażiku għar-RPĊ, kienu l-Brażil u t-Turkija. Il-Kummissjoni stqarret ukoll li kienet se teżamina pajjiżi rappreżentattivi oħrajn li setgħu jkunu xierqa f’konformità mal-kriterji stabbiliti fl-ewwel inċiż tal-Artikolu 2(6a)(a) tar-Regolament bażiku.

(32)

Fid-29 ta’ Jannar 2021, il-Kummissjoni ppubblikat l-ewwel nota għall-fajl (“l-Ewwel Nota tal-FoP”) u informat lill-partijiet interessati dwar is-sorsi rilevanti li kien beħsiebha tuża sabiex tiddetermina l-valur normali. Fl-Ewwel Nota, il-Kummissjoni pprovdiet lista tal-fatturi kollha tal-produzzjoni bħall-materja prima, ix-xogħol u l-enerġija użati fil-produzzjoni tal-prodott taħt rieżami, abbażi tat-talba għal rieżami u sottomissjoni mill-applikanti. Barra minn hekk, abbażi tal-kriterji li jiggwidaw l-għażla ta’ prezzijiet jew parametri referenzjarji mingħajr distorsjoni, f’dak l-istadju tal-investigazzjoni, il-Kummissjoni identifikat tliet pajjiżi rappreżentattivi possibbli, jiġifieri l-Brażil, il-Federazzjoni Russa (“ir-Russja”) u t-Turkija. Il-Kummissjoni stiednet lill-partijiet interessati sabiex iressqu l-kummenti. Ma wasal l-ebda kumment dwar l-Ewwel Nota.

(33)

Fit-28 ta’ Mejju 2021, il-Kummissjoni ppubblikat it-tieni nota għall-fajl (“it-Tieni Nota tal-FoP”). F’din in-Nota, il-Kummissjoni stabbiliet il-lista ta’ fatturi tal-produzzjoni u informat lill-partijiet interessati dwar is-sorsi rilevanti li kien beħsiebha tuża sabiex tiddetermina l-valur normali. Il-Kummissjoni għażlet lit-Turkija bħala pajjiż rappreżentattiv. Fin-nuqqas ta’ produttur rappreżentattiv xieraq tal-prodott taħt rieżami fi kwalunkwe wieħed mill-pajjiżi rappreżentattivi possibbli, il-Kummissjoni qieset li d-data tal-kumpaniji li jipproduċu prodott fl-istess kategorija ġenerali bħall-prodott taħt rieżami tista’ tkun xierqa sabiex tinkiseb id-data finanzjarja (il-kostijiet tal-bejgħ, il-kostijiet ġenerali u l-kostijiet amministrattivi (SG&A) u l-profitti). Għalhekk, il-Kummissjoni informat lill-partijiet interessati li kienet se tistabbilixxi (“SG&A”) u profitti bbażati fuq informazzjoni finanzjarja minn ħames kumpaniji Torok li jipproduċu prodotti tal-estrużjoni tal-aluminju. Il-Kummissjoni qieset li l-estrużjonijiet tal-aluminju huma prodotti li għandhom karatteristiċi tekniċi li jixbhu mill-qrib lil dawk tal-prodott taħt rieżami, u jaqsmu wkoll kompożizzjoni simili tal-materjal sors. Dawn il-prodotti spiss jiġu mmanifatturati mill-istess kumpaniji bħall-prodott taħt rieżami jew fl-istess grupp. Minħabba s-similaritajiet bejn il-prodott taħt rieżami u l-prodotti tal-estrużjoni tal-aluminju, kif ukoll il-fatt li ġew identifikati produtturi profittabbli ta’ estrużjonijiet tal-aluminju, tali data titqies rappreżentattiva tas-sitwazzjoni tal-kumpaniji li jipproduċu l-prodott taħt rieżami, u għalhekk adegwata sabiex jiġi stabbilit il-valur normali f’konformità mal-Artikolu 2(6a)(a) tar-Regolament bażiku.

(34)

Il-Kummissjoni stiednet lill-partijiet interessati sabiex jikkummentaw, iżda ma rċeviet l-ebda kumment dwar it-Tieni Nota.

(35)

F’investigazzjonijiet reċenti dwar is-settur tal-aluminju fir-RPĊ (11), il-Kummissjoni sabet li kien hemm distorsjonijiet sinifikanti fis-sens tal-Artikolu 2(6a)(b) tar-Regolament bażiku.

(36)

F’dawn l-investigazzjonijiet, il-Kummissjoni sabet li hemm intervent sostanzjali mill-gvern fir-RPĊ li jirriżulta f’distorsjoni tal-allokazzjoni effettiva tar-riżorsi f’konformità mal-prinċipji tas-suq (12). B’mod partikolari, il-Kummissjoni kkonkludiet li fis-settur tal-aluminju, mhux biss għadu jippersisti grad sostanzjali ta’ sjieda mill-GTĊ fis-sens tal-ewwel inċiż tal-Artikolu 2(6a)(b) tar-Regolament bażiku (13), iżda l-GTĊ huwa wkoll f’pożizzjoni li jinterferixxi fil-prezzijiet u fil-kostijiet permezz tal-preżenza tal-Istat fid-ditti fis-sens tat-tieni inċiż tal-Artikolu 2(6a)(b) tar-Regolament bażiku (14). Il-Kummissjoni sabet ukoll li l-preżenza u l-intervent tal-Istat fis-swieq finanzjarji, kif ukoll fil-provvista tal-materja prima u tal-inputs, iħallu effett ta’ distorsjoni addizzjonali fuq is-suq. Tabilħaqq, b’mod ġenerali, is-sistema tal-ippjanar fir-RPĊ tirriżulta fil-konċentrazzjoni tar-riżorsi f’setturi nominati bħala strateġiċi jew inkella bħala politikament importanti mill-GTĊ, aktar milli fl-allokazzjoni tagħhom f’konformità mal-forzi tas-suq (15). Barra minn hekk, il-Kummissjoni kkonkludiet li l-liġijiet Ċiniżi dwar il-falliment u l-proprjetà ma jaħdmux kif suppost fis-sens tar-raba’ inċiż tal-Artikolu 2(6a)(b) tar-Regolament bażiku, u b’hekk jiġu ġġenerati distorsjonijiet b’mod partikolari meta jiġu miżmuma ħajjin ditti insolventi u meta jiġu allokati d-drittijiet għall-użu tal-art fir-RPĊ (16). Bl-istess mod, il-Kummissjoni sabet distorsjonijiet tal-kostijiet tal-pagi fis-settur tal-aluminju fis-sens tal-ħames inċiż tal-Artikolu 2(6a)(b) tar-Regolament bażiku (17), kif ukoll distorsjonijiet fis-swieq finanzjarji fis-sens tas-sitt inċiż tal-Artikolu 2(6a)(b) tar-Regolament bażiku, b’mod partikolari fir-rigward tal-aċċess għall-kapital għall-atturi korporattivi fir-RPĊ (18).

(37)

Bħal fl-investigazzjonijiet preċedenti rigward is-settur tal-aluminju fir-RPĊ, f’din l-investigazzjoni l-Kummissjoni eżaminat jekk kienx xieraq jew le li jintużaw il-prezzijiet u l-kostijiet domestiċi fir-RPĊ, minħabba l-eżistenza ta’ distorsjonijiet sinifikanti skont it-tifsira tal-punt (b) tal-Artikolu 2(6a) tar-Regolament bażiku. Il-Kummissjoni għamlet dan abbażi tal-evidenza disponibbli fil-fajl, inkluża l-evidenza li tinsab fit-talba, kif ukoll fid-dokument ta’ Ħidma tal-Persunal tal-Kummissjoni dwar distorsjonijiet sinifikanti fl-ekonomija tar-Repubblika tal-Poplu taċ-Ċina għall-finijiet tal-investigazzjonijiet dwar id-difiża tal-kummerċ (19) (“ir-Rapport”), li jibbaża fuq sorsi disponibbli għall-pubbliku. Dik l-analiżi kopriet l-eżami tal-interventi sostanzjali tal-gvern fl-ekonomija tar-RPĊ b’mod ġenerali, iżda wkoll is-sitwazzjoni speċifika tas-suq fis-settur rilevanti inkluż il-prodott taħt rieżami. Il-Kummissjoni kompliet tissupplimenta dawn l-elementi evidenzjarji bir-riċerka tagħha stess dwar id-diversi kriterji rilevanti sabiex tikkonferma l-eżistenza ta’ distorsjonijiet sinifikanti fir-RPĊ, kif misjub ukoll mill-investigazzjonijiet preċedenti tagħha f’dan ir-rigward.

(38)

It-talba f’dan il-każ irreferiet għar-Rapport, b’mod partikolari għat-taqsimiet li jikkonċernaw is-settur tal-aluminju u l-intrapriżi tal-Istat, kif ukoll għall-investigazzjonijiet preċedenti tal-Kummissjoni dwar prodotti downstream (20). Barra minn hekk, it-talba rreferiet għal studji indipendenti li jikkonkludu li s-suq tal-aluminju Ċiniż huwa distort minħabba sussidjar sostanzjali, bħall-istudju tal-2019 tal-OECD “Measuring distortions in international markets: the aluminium value chain” (21) u r-rapport tal-2017 tal-assoċjazzjoni Ġermaniża tal-industrija tal-metalli mhux ferrużi WVMetalle. (22) Dawn l-istudji tqiegħdu fil-fajl tal-investigazzjoni fl-istadju tal-bidu. Ma ġie pprovdut l-ebda kumment dwar l-istudji minn l-ebda parti interessata. It-talba enfasizzat li dawk l-istudji jiddokumentaw il-preżenza sinifikanti tal-SOEs fis-settur tal-aluminju Ċiniż, il-forniment ta’ inputs ta’ materja prima rħas lill-produtturi tal-aluminju, kif ukoll l-eżistenza ta’ reġim tat-tassazzjoni li effettivament ifixkel is-suq. B’referenza mill-ġdid għar-Rapport u għall-investigazzjoni preċedenti tal-Kummissjoni, it-talba indikat ukoll li l-awtoritajiet Ċiniżi stabbilew prezzijiet għall-faħam, għall-elettriku, għall-gass naturali u għaż-żejt, li jfixklu l-prezzijiet tal-enerġija fis-settur tal-aluminju. Bl-istess mod, it-talba rreferiet għal distorsjonijiet tal-pagi fis-settur tal-aluminju. Barra minn hekk, it-talba allegat distorsjonijiet tal-kostijiet tal-makkinarju, b’mod partikolari minħabba li s-settur tal-aluminju jitqies bħala “settur imħeġġeġ” mill-awtoritajiet Ċiniżi u huwa elenkat bħala tali fil-Katalogu ta’ Gwida tal-Gvern Ċiniż għall-Aġġustament tal-Istruttura Industrijali, inkluża l-aktar iterazzjoni reċenti tagħha tal-2019 (23). It-talba indikat ukoll id-distorsjonijiet tal-kostijiet finanzjarji minħabba l-istruttura ġenerali tas-sistema bankarja Ċiniża, kif ukoll minħabba numru ta’ dokumenti ta’ politika – bħal pjanijiet jew politiki nazzjonali u settorjali ta’ ħames snin li jitolbu lill-istituzzjonijiet finanzjarji jappoġġaw lill-industrija tal-aluminju. Fl-aħħar nett, it-talba elenkat distorsjonijiet li joriġinaw minn miżuri addizzjonali tal-gvern, bħall-iskema ta’ kreditu tal-bejjiegħ esportatur, tnaqqis tat-taxxa fuq l-introjtu għall-ispejjeż tar-riċerka u l-iżvilupp, jew rifużjonijiet tal-VAT fuq tagħmir prodott domestikament. It-talba rreferiet f’dan ir-rigward għall-investigazzjoni tas-sussidju tal-2018 li saret mid-Dipartiment tal-Kummerċ tal-Istati Uniti fuq is-settur Ċiniż tal-fojl tal-aluminju. (24)

(39)

Fis-settur tal-aluminju, grad sostanzjali ta’ sjieda u kontroll mill-GTĊ jippersisti fis-sens tal-ewwel inċiż tal-Artikolu 2(6a)(b) tar-Regolament bażiku. Ħafna mill-akbar produtturi huma proprjetà tal-Istat. Peress li ma kien hemm l-ebda kooperazzjoni mill-esportaturi Ċiniżi tal-prodott taħt rieżami, il-proporzjon eżatt tal-produtturi privati u tal-Istat ma setax jiġi ddeterminat. Madankollu, l-investigazzjoni kkonfermat li fis-settur tal-aluminju numru ta’ produtturi kbar huma SOEs, inklużi Aluminium Corporation of China jew Shenhuo Group Aluminium, li t-tnejn li huma jimmanifatturaw ukoll il-prodott taħt rieżami.

(40)

Fir-rigward tal-fatt li l-GTĊ huwa f’pożizzjoni li jinterferixxi mal-prezzijiet u l-kostijiet permezz tal-preżenza tal-Istat f’ditti fis-sens tat-tieni inċiż tal-Artikolu 2(6a)(b) tar-Regolament bażiku, kemm l-intrapriżi pubbliċi kif ukoll dawk privati fis-settur tal-aluminju huma soġġetti għal superviżjoni u gwida tal-politika. Il-Kummissjoni ddokumentat b’mod estensiv l-attivitajiet ta’ bini tal-partit fl-investigazzjonijiet preċedenti tagħha tas-settur tal-aluminju, li fihom ipparteċipaw ukoll numru ta’ produtturi li jimmanifatturaw ukoll il-prodott taħt rieżami. (25) Barra minn hekk, ħafna produtturi tal-prodott taħt rieżami jenfasizzaw b’mod espliċitu l-attivitajiet ta’ bini tal-partit fuq is-siti web tagħhom, għandhom membri tal-partit fil-maniġment tal-kumpanija u jissottolinjaw l-affiljazzjoni tagħhom mas-CCP.

(41)

Pereżempju, in-Nanshan group reċentement irrapporta dan li ġej fir-rigward ta’ avveniment ta’ bini tal-partiti li seħħ f’Marzu tal-2021: “Fid-19 ta’ Marzu, il-fergħa tal-partit direttament taħt Nanshan Holdings organizzat l-avveniment ta’ jum tal-partit b’tema, studju fil-fond u implimentazzjoni tal-ispirtu tad-diskors tas-Segretarju Ġenerali Xi Jinping fil-Konferenza dwar l-Istudju u l-Edukazzjoni tal-Istorja tal-Partit, nitgħallmu l-qalba tal-istorja tal-partit, niġbru s-saħħa, u naħdmu ħafna. Il-mexxejja rilevanti tal-fergħa tal-partit direttament taħt Nanshan Holdings ippresjedew il-laqgħa. Fir-rapport tiegħu dwar il-lekċer tal-partit, is-segretarju tal-fergħa rrimarka li l-membri tal-partit u l-cadres jenħtieġ li jagħtu l-kontribut sħiħ għar-rwol eżemplari u ewlieni tagħhom, ma jinsewx l-aspirazzjonijiet oriġinali tagħhom, u jżommu f’moħħhom il-missjoni tagħhom. […] Il-membri u l-cadres kollha tal-partit esprimew li se jkomplu jistudjaw u jimplimentaw l-ispirtu tad-diskors tas-Segretarju Ġenerali Xi Jinping fil-Konferenza dwar l-Istudju u l-Edukazzjoni tal-Istorja tal-Partit, jgħaqqdu l-ideat u l-azzjonijiet mar-rekwiżiti u l-iskjerament tal-14-il Pjan ta’ Ħames Snin, ma jinsewx l-intenzjoni oriġinali, iżommu l-missjoni f’moħħhom, u jaħdmu ħafna. Javvanzaw ’il quddiem, ma jibżgħux jinnovaw, jagħtu l-kontribut sħiħ għar-rwol pijunier eżemplari tal-membri tal-partit fl-intrapriża […]”. (26).

(42)

Bl-istess mod, id-Dengfeng Electricity Group, li huwa proprjetà tal-Istat, fuq is-sit web tiegħu jindika li “waranofsinhar tal-10 ta’ Novembru 2020, it-taħriġ fil-klassi tal-ġestjoni korporattiva tal-kumpanija grupp sar fis-sitt kamra tal-laqgħat. Ipparteċipaw total ta’ 66 persuna, mid-diretturi tal-kumpanija grupp u persunal maniġerjali superjuri, diversi dipartimenti tan-negozju, intrapriżi affiljati direttament u mexxejja ta’ sub-intrapriżi. […] Wara dan, il-kumpanija grupp se tkompli tistudja b’mod kuxjenzjuż id-diskors importanti tas-Segretarju Ġenerali Xi Jinping fil-laqgħa plenarja, tifhem l-ispirtu tal-laqgħa plenarja, […] u tifhem bis-sħiħ it-teħid tad-deċiżjonijiet u l-adozzjoni tal-Kumitat Ċentrali tal-Partit, tuża l-għarfien u s-saħħa sabiex jintlaħqu l-għanijiet u jitwettqu l-kompiti stabbiliti fl-‘14-il Pjan ta’ Ħames Snin’”. (27)

(43)

Barra minn hekk, fis-settur tal-aluminju hemm stabbiliti politiki li jiddiskriminaw favur il-produtturi domestiċi jew li b’xi mod ieħor jinfluwenzaw is-suq fis-sens tat-tielet inċiż tal-Artikolu 2(6a)(b) tar-Regolament bażiku.

(44)

Is-settur tal-aluminju huwa soġġett għal bosta pjanijiet, linji gwida, direttivi u dokumenti ta’ politika oħrajn maħruġa fil-livell nazzjonali, reġjonali u muniċipali. Dawn il-politiki fis-seħħ matul il-perjodu ta’ investigazzjoni tar-rieżami, li jvarjaw mit-13-il Pjan ta’ Ħames Snin dwar l-Iżvilupp Ekonomiku u Soċjali (28), jew il-Pjan ta’ Żvilupp tal-Industrija tal-Metall Mhux Ferruż (mill-2016 sal-2020), u politiki oħra fil-livell nazzjonali, permezz ta’ pjanijiet reġjonali bħal, pereżempju, l-Avviż tal-Gvern tal-Provinċja ta’ Shandong dwar il-pjan ta’ implimentazzjoni għall-aċċellerazzjoni tal-iżvilupp ta’ kwalità għolja tas-seba’ industriji intensivi fl-enerġija, ġew iddokumentati b’mod estensiv mill-investigazzjoni preċedenti tal-Kummissjoni tas-settur (29). Bl-istess mod, il-Kummissjoni ddokumentat fid-dettall li l-industrija tal-aluminju tibbenefika minn gwida u intervent governattivi dwar il-materja prima u l-inputs prinċipali, b’mod partikolari l-enerġija (30). L-istess japplika għal miżuri oħrajn tal-gvern fis-settur li jinterferixxu mal-forzi tas-suq, bħal, fost l-oħrajn, politiki relatati mal-esportazzjoni, politiki ta’ kumulazzjoni ta’ riżerva, politiki ta’ espansjoni tal-kapaċità tal-produzzjoni (31) jew il-provvista ta’ inputs bi prezzijiet aktar baxxi mill-prezzijiet tas-suq (32).

(45)

Fil-qosor, il-GTĊ għandu miżuri fis-seħħ sabiex iħeġġeġ lill-operaturi jikkonformaw mal-objettivi tal-ordni pubbliku li jappoġġaw lill-industriji mħeġġa, inkluża l-produzzjoni tal-inputs ewlenin li jintużaw fil-manifattura tal-prodott taħt rieżami. Tali miżuri jimpedixxu l-forzi tas-suq milli joperaw b’mod ħieles.

(46)

Din l-investigazzjoni ma żvelat l-ebda evidenza li l-applikazzjoni diskriminatorja jew l-infurzar inadegwat tal-liġijiet dwar il-falliment u l-proprjetà skont ir-raba’ inċiż tal-Artikolu 2(6a)(b) tar-Regolament bażiku fis-settur tal-PSC imsemmi hawn fuq fil-premessa (36) ma kinux se jaffettwaw lill-manifatturi tal-prodott taħt rieżami.

(47)

Is-settur tal-aluminju huwa affettwat ukoll mid-distorsjonijiet tal-kostijiet tal-pagi fis-sens tal-ħames inċiż tal-Artikolu 2(6a)(b) tar-Regolament bażiku, kif imsemmi wkoll hawn fuq fil-premessa (36). Dawk id-distorsjonijiet jaffettwaw lis-settur kemm direttament (waqt il-produzzjoni tal-prodott taħt rieżami jew tal-inputs ewlenin), kif ukoll indirettament (waqt li jkun hemm aċċess għall-kapital jew għall-inputs minn kumpaniji soġġetti għall-istess sistema lavorattiva fir-RPĊ).

(48)

Barra minn hekk, ma tressqet l-ebda evidenza f’din l-investigazzjoni li turi li s-settur tal-aluminju ma huwiex affettwat mill-intervent tal-gvern fis-sistema finanzjarja fis-sens tas-sitt inċiż tal-Artikolu 2(6a)(b) tar-Regolament bażiku, kif imsemmi wkoll hawn fuq fil-premessa (36). Għalhekk, l-intervent sostanzjali mill-gvern fis-sistema finanzjarja jwassal sabiex il-kundizzjonijiet tas-suq jiġu affettwati b’mod serju fil-livelli kollha.

(49)

Fl-aħħar nett, il-Kummissjoni tfakkar li sabiex jiġi mmanifatturat il-prodott taħt rieżami, huma meħtieġa numru ta’ inputs. Meta l-produtturi tal-prodott taħt rieżami jixtru jew jikkuntrattaw għal dawn l-inputs, il-prezzijiet li jitħallsu (u li jiġu rreġistrati bħala l-kostijiet tagħhom) huma esposti għall-istess distorsjonijiet sistemiċi msemmija qabel. Pereżempju, il-fornituri tal-inputs iħaddmu manodopera li hija soġġetta għal distorsjonijiet; huma jistgħu jissellfu flus li huma soġġetti għad-distorsjonijiet fis-settur finanzjarju/l-allokazzjoni tal-kapital; u huma soġġetti għas-sistema ta’ pjanar li tapplika fil-livelli kollha tal-gvern u tas-setturi.

(50)

B’konsegwenza ta’ dan, mhux biss il-prezzijiet tal-bejgħ domestiku tal-prodott taħt rieżami ma humiex xierqa għall-użu fis-sens tal-Artikolu 2(6a)(a) tar-Regolament bażiku, iżda l-kostijiet tal-inputs kollha (inklużi l-materja prima, l-enerġija, l-art, il-finanzjament, il-manodopera, eċċ.) huma wkoll affettwati minħabba li l-formazzjoni tal-prezzijiet tagħhom hija affettwata minn intervent sostanzjali min-naħa tal-gvern, kif deskritt fil-Partijiet I u II tar-Rapport. Tabilħaqq, l-interventi mill-gvern deskritti fir-rigward tal-allokazzjoni tal-kapital, tal-art, tal-manodopera, tal-enerġija u tal-materja prima huma preżenti fir-RPĊ kollha. Dan ifisser, pereżempju, li input li minnu nnifsu kien prodott fir-RPĊ permezz tal-kombinament ta’ firxa ta’ fatturi tal-produzzjoni huwa espost għal distorsjonijiet sinifikanti. L-istess japplika għall-input, lejn l-input u l-bqija.

(51)

Il-partijiet interessati ma ppreżentaw l-ebda evidenza jew argument kuntrarju.

(52)

Fil-qosor, l-evidenza disponibbli wriet li l-prezzijiet jew il-kostijiet tal-prodott taħt rieżami, inklużi l-kostijiet tal-materja prima, tal-enerġija u tal-manodopera, ma humiex ir-riżultat tal-forzi tas-suq ħieles minħabba li dawn huma affettwati minn intervent sostanzjali min-naħa tal-gvern fis-sens tal-Artikolu 2(6a)(b) tar-Regolament bażiku kif muri mill-impatt attwali jew potenzjali ta’ wieħed jew aktar mill-elementi rilevanti elenkati fih. Abbażi ta’ dan, u fin-nuqqas ta’ kwalunkwe kooperazzjoni mill-GTĊ, il-Kummissjoni kkonkludiet li ma huwiex xieraq li jintużaw prezzijiet u kostijiet domestiċi sabiex jiġi stabbilit il-valur normali f’dan il-każ. Konsegwentement, il-Kummissjoni pproċediet sabiex tibni l-valur normali esklużivament abbażi tal-ispejjeż tal-produzzjoni u l-bejgħ li jirriflettu prezzijiet jew valuri referenzjarji mingħajr distorsjoni, jiġifieri, f’dan il-każ, abbażi tal-ispejjeż korrispondenti tal-produzzjoni u l-bejgħ f’pajjiż rappreżentattiv xieraq, f’konformità mal-Artikolu 2(6a)(a) tar-Regolament bażiku, kif diskuss fit-taqsima li ġejja.

(53)

Skont l-Artikolu 2(6a) tar-Regolament bażiku, l-għażla tal-pajjiż rappreżentattiv kienet ibbażata fuq il-kriterji li ġejjin:

(54)

Kif spjegat fil-premessi (32) sa (33), il-Kummissjoni ppubblikat żewġ noti għall-fajl dwar is-sorsi għad-determinazzjoni tal-valur normali: l-Ewwel Nota tal-FoP u t-Tieni Nota tal-FoP. Fit-Tieni Nota tal-FoP, il-Kummissjoni informat lill-partijiet interessati dwar l-għażla tat-Turkija bħala pajjiż rappreżentattiv xieraq f’dan il-każ jekk l-eżistenza tad-distorsjonijiet sinifikanti skont l-Artikolu 2(6a) tar-Regolament bażiku tiġi kkonfermata.

(55)

Fl-Ewwel Nota tal-FoP, il-Kummissjoni identifikat lill-Armenja, lill-Brażil, lir-Russja u lit-Turkija bħala pajjiżi b’livell simili ta’ żvilupp ekonomiku bħar-RPĊ skont il-Bank Dinji, jiġifieri lkoll huma kklassifikati mill-Bank Dinji bħala pajjiżi “b’introjtu medju superjuri” abbażi tal-introjtu nazzjonali gross matul il-PIR, fejn kien magħruf li jiġi mmanifatturat l-prodott ikkonċernat.

(56)

Ma wasal l-ebda kumment dwar il-pajjiżi identifikati f’dik in-Nota.

(57)

Għall-erba’ pajjiżi msemmija fil-premessa (55) hawn fuq, il-Kummissjoni vverifikat ukoll id-disponibbiltà ta’ data finanzjarja pubblika dwar il-produtturi tal-prodott taħt rieżami f’dawk il-pajjiżi.

(58)

Fir-rigward tal-Armenja, ma kien hemm l-ebda data finanzjarja disponibbli għall-pubbliku għall-uniku produttur magħruf (34). Fin-nuqqas ta’ kummenti mill-partijiet interessati, il-Kummissjoni għalhekk ikkonkludiet li l-Armenja ma setgħetx titqies bħala pajjiż rappreżentattiv xieraq għal din l-investigazzjoni.

(59)

Fir-rigward tal-Brażil, il-Kummissjoni fl-Ewwel Nota tal-FoP identifikat żewġ produtturi tal-AHF, jiġifieri Companhia Brasileira de Aluminio (“CBA”) u Novelis do Brasil Ltda (“Novelis”). CBA kienet qiegħda tagħmel telf matul il-perjodu ta’ investigazzjoni tar-rieżami u għalhekk ġiet eskluża għad-determinazzjoni tal-SG&A u l-profitt. Fir-rigward ta’ Novelis, minkejja li d-data finanzjarja tagħha kienet disponibbli u l-kumpanija kienet profittabbli matul il-perjodu ta’ investigazzjoni tar-rieżami, fit-Tieni Nota tal-FoP, il-Kummissjoni kkonkludiet li l-kumpanija ma setgħetx titqies għar-raġunijiet li ġejjin: l-ewwel nett, il-Kummissjoni osservat li fil-Brażil kien għaddej proċediment anti-dumping dwar l-importazzjonijiet Ċiniżi ta’ prodotti tal-aluminju, inkluż l-AHF. L-importazzjonijiet Ċiniżi allegatament oġġett ta’ dumping jista’ jkollhom effett ta’ distorsjoni fuq is-suq Brażiljan, pereżempju billi joħolqu tnaqqis fil-prezzijiet jew jikkawżaw telf dannuż lill-industrija tal-aluminju tal-Brażil; it-tieni, il-profitt ġenerali rapportat fir-rapport finanzjarju ta’ Novelis kif instab fil-bażi ta’ data ta’ Dun and Bradstreet kien inkonsistenti mar-riżultati finanzjarji ta’ telf preżentati fil-qafas tal-investigazzjoni anti-dumping imwettqa mill-awtoritajiet Brażiljani, u fejn Novelis kienet waħda mill-ilmentaturi domestiċi. Dan poġġa dubji serji dwar il-kwalità u l-preċiżjoni tad-data finanzjarja ta’ Novelis disponibbli fuq Dun and Bradstreet. Barra minn hekk, fit-Tieni Nota tal-FoP, il-Kummissjoni enfasizzat l-eżistenza ta’ restrizzjonijiet tal-esportazzjoni fuq prodotti tal-aluminju fil-Brażil, b’mod partikolari kwota ta’ esportazzjoni fuq input ewlieni (il-Ligi tal-aluminju) u prodott sekondarju (ir-Ruttam tal-aluminju) fil-produzzjoni ta’ fojls domestiċi tal-aluminju. Għalhekk, fit-Tieni Nota tal-FoP, il-Kummissjoni kkonkludiet li l-Brażil ma setax jitqies bħala pajjiż rappreżentattiv xieraq.

(60)

Fir-rigward tar-Russja, għalkemm id-data finanzjarja tat-tliet produtturi ta’ fojls domestiċi tal-aluminju li ġew identifikati fl-Ewwel Nota tal-FoP kienet disponibbli għall-pubbliku, fit-Tieni Nota tal-FoP, il-Kummissjoni kkonkludiet li r-Russja ma setgħetx titqies bħala pajjiż rappreżentattiv xieraq. Ir-raġunijiet għal din il-konklużjoni kienu l-eżistenza ta’ restrizzjonijiet fuq l-esportazzjoni fuq l-aluminju, l-eżistenza ta’ distorsjonijiet tal-gass naturali fis-suq domestiku, u l-fatt li s-suq tal-aluminju fir-Russja deher li kien iddominat minn grupp ta’ kumpaniji wieħed (Rusal), li jipprevjeni kompetizzjoni effettiva fis-suq domestiku Russu.

(61)

Fir-rigward tat-Turkija, mit-tliet produtturi tal-fojl domestiku tal-aluminju li ġew identifikati fl-Ewwel Nota tal-FoP, id-data finanzjarja reċenti kienet disponibbli biss għal kumpanija waħda, jiġifieri Asaş Aluminyum. Madankollu, il-profitt miksub minn Asaş Aluminyum kien qrib il-punt ta’ ekwilibriju. Il-Kummissjoni ma qisitx tali marġni ta’ profitt baxx bħala raġonevoli skont it-tifsira tal-Artikolu 2(6a)(a) tar-Regolament bażiku, filwaqt li qieset li (i) kif stabbilit fir-Regolament ta’ Implimentazzjoni (UE) 2020/1428 li jimponi dazju anti-dumping proviżorju fuq l-importazzjonijiet ta’ estrużjonijiet tal-aluminju li joriġinaw mir-Repubblika tal-Poplu taċ-Ċina (35), il-livell ta’ profitt miksub fis-settur tal-estrużjoni tal-aluminju fit-Turkija fl-2018 kien sostanzjalment ogħla, jiġifieri 7,3 %, u (ii) il-profitt miksub mill-industrija tal-Unjoni fin-nuqqas ta’ dumping dannuż, kif użat fl-investigazzjoni oriġinali kien ta’ 5 %. Għalhekk, fit-Tieni Nota tal-FoP, il-Kummissjoni kkonkludiet li d-data finanzjarja ta’ Asaş Aluminyum ma setgħetx tintuża bħala bażi sabiex jiġu ddeterminati l-SG&A u l-profitt skont l-Artikolu 2(6a)(a) tar-Regolament bażiku, li jipprevedi li “l-valur normali maħdum għandu jinkludi ammont raġonevoli u mingħajr distorsjoni għal kostijiet amministrattivi, tal-bejgħ u ġenerali u għal profitti”.

(62)

Bħala konklużjoni, ma kien hemm l-ebda produttur ta’ fojl domestiku tal-aluminju fit-Turkija li d-data finanzjarja tiegħu setgħet tintuża sabiex jiġi ddeterminat ammont raġonevoli għall-SG&A u l-profitt.

(63)

Għalhekk, il-Kummissjoni qieset jekk tistax tintuża data minn kumpaniji li jipproduċu prodott fl-istess kategorija ġenerali bħall-prodott taħt rieżami. Fit-Tieni Nota tal-FoP, il-Kummissjoni kkonkludiet li l-prodotti tal-estrużjoni tal-aluminju kellhom karatteristiċi tekniċi li jixbhu mill-qrib lil dawk tal-prodott taħt rieżami, u li kellhom kompożizzjoni ta’ materjal ta’ sors simili. It-tnejn spiss jiġu prodotti mill-istess kumpaniji jew fl-istess grupp. Għalhekk, f’dan il-każ, il-Kummissjoni sabet li kien xieraq li tintuża data tal-kumpaniji Torok attivi fis-settur tal-prodotti tal-estrużjoni tal-aluminju. Id-data finanzjarja li tkopri nofs il-perjodu ta’ investigazzjoni tar-rieżami kienet disponibbli għal ħames produtturi tal-estrużjoni tal-aluminju fit-Turkija (36), u tali data tqieset rappreżentattiva tas-sitwazzjoni tal-kumpaniji li jipproduċu fojl domestiku tal-aluminju. Għalhekk, il-medja ponderata tal-SG&A u l-profitt ta’ dawk il-ħames kumpaniji ntużat sabiex jiġi ddeterminat ammont mingħajr distorsjoni u raġonevoli għall-SG&A u l-profitt għall-kumpaniji li jipproduċu l-fojl domestiku tal-aluminju.

(64)

Il-partijiet interessati ġew mistiedna jikkummentaw dwar l-adegwatezza tat-Turkija bħala pajjiż rappreżentattiv u tal-ħames produtturi tal-estrużjoni tal-aluminju bħala produtturi fil-pajjiż rappreżentattiv. Ma wasal l-ebda kumment.

(65)

Wara li ġie stabbilit li t-Turkija kienet l-uniku pajjiż rappreżentattiv xieraq disponibbli, abbażi tal-elementi kollha msemmija hawn fuq, ma kienx hemm bżonn li titwettaq valutazzjoni tal-livell ta’ protezzjoni soċjali u ambjentali f’konformità mal-aħħar sentenza tal-ewwel inċiż tal-Artikolu 2(6a)(a) tar-Regolament bażiku.

(66)

Fid-dawl tal-analiżi ta’ hawn fuq, it-Turkija ssodisfat il-kriterji kollha stabbiliti fl-ewwel inċiż tal-Artikolu 2(6a)(a) tar-Regolament bażiku, u b’hekk tqieset bħala l-pajjiż rappreżentattiv xieraq.

(67)

Fl-Ewwel Nota tal-FoP, il-Kummissjoni elenkat il-fatturi tal-produzzjoni, bħall-materjali, l-enerġija u l-manodopera, użati fil-produzzjoni tal-prodott taħt rieżami u stiednet lill-partijiet interessati jikkummentaw u jipproponu informazzjoni disponibbli għall-pubbliku dwar il-valuri mingħajr distorsjoni għal kull wieħed mill-fatturi tal-produzzjoni msemmija f’dik in-Nota.

(68)

Billi ma kien hemm l-ebda kooperazzjoni mill-produtturi Ċiniżi u l-ebda kumment minn kwalunkwe waħda mill-partijiet interessati, il-Kummissjoni bbażat ruħha fuq l-informazzjoni sottomessa mill-applikant. Fit-Tieni Nota tal-FoP, il-Kummissjoni aġġornat il-lista ta’ fatturi tal-produzzjoni użati sabiex jiġi stabbilit il-valur normali abbażi tal-informazzjoni kontroverifikata provduta minn wieħed mill-applikanti li, skont l-applikanti u fin-nuqqas ta’ kwalunkwe informazzjoni oħra, kien hemm meqjus li għandu fatturi tal-produzzjoni u proċess ta’ produzzjoni rappreżentattivi tal-produtturi esportaturi Ċiniżi.

(69)

Fit-Tieni Nota tal-FoP, il-Kummissjoni ddikjarat ukoll li, sabiex taħdem il-valur normali f’konformità mal-Artikolu 2(6a)(a) tar-Regolament bażiku, hija tuża d-data mill-Global Trade Atlas (“GTA”) (37) sabiex tistabbilixxi l-kost mingħajr distorsjoni tal-fatturi prinċipali tal-produzzjoni, b’mod partikolari l-materja prima. Barra minn hekk, il-Kummissjoni ddikjarat li se tuża informazzjoni mill-Istitut Tork tal-Istatistika sabiex tistabbilixxi l-kostijiet mingħajr distorsjoni tax-xogħol (38) u tal-enerġija (39).

(70)

Fl-aħħar nett, il-Kummissjoni ddikjarat li sabiex tistabbilixxi l-kostijiet tal-SG&A u l-profitt, hija kienet se tuża d-data finanzjarja mill-ħames produtturi Torok ta’ prodotti tal-estrużjoni tal-aluminju, kif stabbilit fil-premessa (63) hawn fuq.

(71)

Il-Kummissjoni inkludiet valur għall-kostijiet ġenerali tal-manifattura sabiex tkopri l-kostijiet mhux inklużi fil-fatturi tal-produzzjoni msemmija aktar ’il fuq. Il-Kummissjoni stabbiliet il-proporzjon tal-ispejjeż ġenerali tal-manifattura mal-kostijiet diretti tal-manifattura, abbażi tad-data tal-produttur tal-Unjoni msemmi fil-premessa (68) hawn fuq, li pprovda informazzjoni speċifika għal dan il-għan. Il-metodoloġija hija spjegata kif xieraq fit-Taqsima 3.3.4 hawn taħt.

(72)

Meta titqies l-informazzjoni kollha ppreżentata mill-partijiet interessati u miġbura u kontroverifikata matul il-proċess tal-RCC, il-fatturi tal-produzzjoni li ġejjin u s-sorsi tagħhom ġew identifikati sabiex jiġi ddeterminat il-valur normali f’konformità mal-Artikolu 2(6a)(a) tar-Regolament bażiku:

Tabella 1Fatturi tal-produzzjoni tal-AHF

(73)

Sabiex jiġi stabbilit il-prezz mingħajr distorsjoni ta’ materja prima kif ikkonsenjata fl-istabbiliment tal-produttur rappreżentattiv tal-pajjiż, il-Kummissjoni użat bħala bażi l-prezz medju ponderat ta’ importazzjoni fil-livell tas-CIF fil-pajjiż rappreżentattiv kif rapportat fil-GTA li miegħu żdiedu d-dazji fuq l-importazzjoni u l-kostijiet tat-trasport, fejn applikabbli. Il-prezz tal-importazzjoni fil-pajjiż rappreżentattiv ġie ddeterminat bħala medja ponderata tal-prezzijiet unitarji tal-importazzjonijiet mill-pajjiżi terzi kollha bl-esklużjoni tar-RPĊ u l-pajjiżi li ma humiex membri tad-WTO elenkati fl-Anness I tar-Regolament (UE) 2015/755 tal-Parlament Ewropew u tal-Kunsill (40).

(74)

Il-Kummissjoni ddeċidiet li teskludi l-importazzjonijiet mir-RPĊ lejn il-pajjiż rappreżentattiv peress li fit-Taqsima 3.3.1 ta’ hawn fuq din ikkonkludiet li ma huwiex xieraq li jintużaw prezzijiet u kostijiet domestiċi fir-RPĊ minħabba l-eżistenza ta’ distorsjonijiet sinifikanti f’konformità mal-Artikolu 2(6a)(b) tar-Regolament bażiku. Minħabba li ma hemm l-ebda evidenza li turi li l-istess distorsjonijiet ma affettwawx bl-istess mod il-prodotti maħsuba għall-esportazzjoni, il-Kummissjoni qieset li l-istess distorsjonijiet affettwaw il-prezzijiet tal-esportazzjoni. Din l-esklużjoni ma kellhiex impatt sinifikanti, peress li l-importazzjonijiet li kien fadal kienu għadhom sinifikanti (jiġifieri 75 000 tunnellata ta’ stokk tal-fojl, 700 000 tunnellata ta’ żejt tal-irrumblar, u 161 000 tunnellata ta’ ruttam tal-aluminju).

(75)

Sabiex tistabbilixxi l-valur referenzjarju għall-kostijiet lavorattivi fil-pajjiż rappreżentattiv, il-Kummissjoni użat l-aktar statistika riċenti ppubblikata mill-Istitut Statistiku Tork (41). Dan l-istitut jippubblika informazzjoni dettaljata dwar il-kostijiet lavorattivi f’setturi ekonomiċi differenti fit-Turkija. Il-Kummissjoni stabbiliet il-parametru referenzjarju fuq il-bażi tal-kostijiet lavorattivi fis-siegħa għall-2016 (42) għall-attività ekonomika C.24, jiġifieri Manifattura ta’ metalli bażiċi (43) skont il-klassifikazzjoni NACE Rev.2. Il-valuri ġew aġġustati aktar għall-inflazzjoni permezz tal-indiċi tal-prezzijiet tal-produtturi domestiċi (44) sabiex jirriflettu l-kostijiet għall-PIR.

(76)

Il-prezz tal-elettriku għall-utenti industrijali fit-Turkija huwa ppubblikat mill-Istitut Statistiku tat-Turkija (45). Il-Kummissjoni użat data dwar il-prezzijiet tal-elettriku industrijali fil-livell ta’ konsum korrispondenti f’Kuruş/kWh li tkopri l-PIR.

(77)

Il-prezz tal-gass naturali għall-utenti industrijali fit-Turkija huwa ppubblikat mill-Istitut Statistiku tat-Turkija (46). Il-Kummissjoni użat data dwar il-prezzijiet tal-gass industrijali fil-livell ta’ konsum korrispondenti f’Kuruş/M3 li tkopri l-PIR.

(78)

Skont l-Artikolu 2(6a)(a) tar-Regolament bażiku, “il-valur normali maħdum għandu jinkludi ammont raġonevoli u mingħajr distorsjoni għal kostijiet amministrattivi, tal-bejgħ u ġenerali u għal profitti”. Barra minn hekk, kien jeħtieġ li jiġi stabbilit valur għall-ispejjeż ġenerali tal-manifattura sabiex ikopri l-kostijiet mhux inklużi fil-fatturi tal-produzzjoni msemmija hawn fuq.

(79)

Sabiex tistabbilixxi valur mhux distort tal-kostijiet ġenerali tal-manifattura u minħabba n-nuqqas ta’ kooperazzjoni mill-produtturi esportaturi Ċiniżi, il-Kummissjoni użat il-fatti disponibbli f’konformità mal-Artikolu 18 tar-Regolament bażiku. Għalhekk, fuq il-bażi ta’ data tal-produtturi tal-Unjoni provduta mill-applikanti, il-Kummissjoni stabbiliet il-proporzjon tal-ispejjeż ġenerali tal-manifattura mal-kostijiet diretti tal-manifattura. Imbagħad, dan il-perċentwal ġie applikat għall-valur mingħajr distorsjoni tal-kostijiet diretti tal-manifattura sabiex jinkiseb il-valur mingħajr distorsjoni tal-ispejjeż ġenerali tal-manifattura.

(80)

Għall-istabbiliment ta’ ammont mingħajr distorsjoni u raġonevoli għall-SG&A u l-profitt, il-Kummissjoni qagħdet fuq l-aktar data finanzjarja reċenti disponibbli tal-ħames kumpaniji fit-Turkija li kienu ġew identifikati fit-Tieni Nota tal-FoP bħala produtturi attivi u profittabbli ta’ prodott fl-istess kategorija ġenerali, jiġifieri l-prodotti ta’ estrużjoni tal-aluminju, kif spjegat fil-premessa (63) hawn fuq. Intużat data finanzjarja għall-ħames kumpaniji li ġejjin kif estratta minn Dun and Bradstreet (47):

(81)

Fuq il-bażi ta’ dak li ntqal hawn fuq, il-Kummissjoni ħadmet il-valur normali fuq bażi ta’ kif joħroġ mill-fabbrika f’konformità mal-Artikolu 2(6a)(a) tar-Regolament bażiku.

(82)

L-ewwel nett, il-Kummissjoni stabbiliet il-kostijiet mingħajr distorsjoni tal-manifattura. Fin-nuqqas ta’ kooperazzjoni minn kwalunkwe produttur Ċiniż, il-Kummissjoni bbażat fuq l-informazzjoni provduta minn wieħed mill-applikanti, kif imsemmi fil-premessa (68), dwar l-użu ta’ kull fattur (materjali u manodopera) għall-produzzjoni tal-prodott taħt rieżami. Dawn il-proporzjonijiet ta’ konsum ġew ivverifikati matul proċess tal-RCC. Il-Kummissjoni mbagħad immultiplikat il-fatturi tal-użu bil-kostijiet mingħajr distorsjoni għal kull unità li ġew osservati fil-pajjiż rappreżentattiv, kif deskritt fit-Taqsima 3.3.4 hawn fuq.

(83)

Ladarba ġie stabbilit il-kost tal-manifattura mingħajr distorsjoni, il-Kummissjoni mbagħad żiedet l-ispejjeż ġenerali tal-manifattura u d-deprezzament, kif spjegat fil-premessa (78) mal-kost mingħajr distorsjoni tal-manifattura sabiex tasal għall-ispejjeż tal-produzzjoni mingħajr distorsjoni.

(84)

Għall-ispejjeż tal-produzzjoni stabbiliti kif deskritt fil-premessa preċedenti, il-Kummissjoni applikat l-SG&A u l-profitt tal-ħames kumpaniji fil-pajjiż rappreżentattiv. L-SG&A, espressi bħala perċentwal tal-Kostijiet tal-Prodotti Mibjugħa (“COGS”) u applikati għall-ispejjeż tal-produzzjoni mingħajr distorsjoni, ammontaw għal 14,1 %. Il-profitt, espress bħala perċentwal tas-COGS u applikat għall-ispejjeż tal-produzzjoni mingħajr distorsjoni, ammonta għal 7,1 %.

(85)

Abbażi ta’ dan, il-Kummissjoni bniet il-valur normali fuq bażi ta’ kif joħroġ mill-fabbrika f’konformità mal-Artikolu 2(6a)(a) tar-Regolament bażiku.

(86)

Fin-nuqqas ta’ kooperazzjoni minn kwalunkwe produttur Ċiniż, il-prezz tal-esportazzjoni ġie ddeterminat fuq il-bażi tal-fatti disponibbli f’konformità mal-Artikolu 18 tar-Regolament bażiku. Għalhekk, il-prezzijiet tal-esportazzjoni kienu bbażati fuq il-prezzijiet CIF reġistrati fil-Eurostat ikkoreġuti għal livell ta’ kif joħroġ mill-fabbrika. Għalhekk, il-prezz CIF tal-esportazzjoni tnaqqas mill-kostijiet tat-trasport bil-baħar u tal-assigurazzjoni u l-kost tat-trasport domestiku fiċ-Ċina. Il-kostijiet tat-trasport domestiku Ċiniż u tat-trasport internazzjonali kienu bbażati fuq informazzjoni provduta mill-applikanti fit-talba għal rieżami, li nstabet li kienet konformi mal-kostijiet tat-trasport kalkolati bl-użu ta’ bażijiet ta’ data esterni (il-Bank Dinji u l-OECD).

(87)

Il-Kummissjoni qabblet il-valur normali stabbilit f’konformità mal-Artikolu 2(6a)(a) tar-Regolament bażiku u l-prezz tal-esportazzjoni kif stabbilit hawn fuq, fuq bażi ta’ kif joħroġ mill-fabbrika.

(88)

Abbażi ta’ dan, il-marġni tad-dumping medju ponderat, espress bħala perċentwal tal-prezz tas-CIF fil-fruntiera tal-Unjoni, bid-dazju mhux imħallas, instab fil-livell ta’ 72,2 % matul il-PIR.

(89)

Il-Kummissjoni kkonkludiet li l-esportazzjonijiet lejn l-Unjoni tal-prodott taħt rieżami mir-RPĊ komplew ikunu oġġett ta’ dumping matul il-perjodu ta’ investigazzjoni tar-rieżami.

(90)

Wara s-sejba tal-eżistenza ta’ dumping matul l-PIR, il-Kummissjoni investigat il-probabbiltà ta’ kontinwazzjoni ta’ dumping jekk il-miżuri jiskadu, f’konformità mal-Artikolu 11(2) tar-Regolament bażiku. Ġew analizzati l-elementi li ġejjin: il-kapaċità tal-produzzjoni u l-kapaċità ta’ riżerva fir-RPĊ, id-disponibbiltà ta’ swieq oħrajn u l-imġiba tal-prezzijiet tal-esportazzjonijiet Ċiniżi, kif ukoll l-attraenza tas-suq tal-Unjoni. Huwa mfakkar li minħabba n-nuqqas ta’ kooperazzjoni mill-produtturi esportaturi Ċiniżi kif ukoll mill-GTĊ, l-analiżi kienet ibbażata fuq il-fatti disponibbli f’konformità mal-Artikolu 18 tar-Regolament bażiku, b’mod partikolari t-talba għal rieżami, l-istatistika tal-GTA u l-informazzjoni disponibbli għall-pubbliku.

(91)

Sabiex tanalizza l-kapaċità tal-produzzjoni u l-kapaċità ta’ riżerva fir-RPĊ u minħabba n-nuqqas ta’ kooperazzjoni tal-GTĊ u tal-produtturi esportaturi Ċiniżi, il-Kummissjoni qagħdet fuq l-informazzjoni provduta mill-applikant fit-talba tiegħu għal rieżami u l-informazzjoni disponibbli għall-pubbliku, kif speċifikat fil-premessi ta’ hawn taħt.

(92)

L-investigazzjoni wriet li minħabba tkabbir rapidu bejn l-2005 u l-2015, hemm kapaċità żejda ġenerali fis-settur tal-aluminju Ċiniż (48). Dan jgħodd speċifikament ukoll għas-settur tal-AHF (49). Skont is-CRU, madwar 8 % tal-produzzjoni totali tal-fojl tal-aluminju tintuża għall-produzzjoni tal-AHF (50). Fuq din il-bażi, il-kapaċità tal-produzzjoni tal-AHF fiċ-Ċina taqbeż b’mod sostanzjali l-volum tal-produzzjoni attwali u għalhekk il-produtturi Ċiniżi jiddependu ħafna fuq l-esportazzjonijiet. Fl-2020, il-konsum tal-fojl domestiku Ċiniż kien ta’ madwar 250 000 tunnellata, filwaqt li l-produzzjoni kienet stmata li kienet madwar 308 000 tunnellata u l-kapaċità tal-produzzjoni kienet ta’ madwar 360 000 tunnellata. Dan ifisser li l-kapaċità ta’ riżerva Ċiniża kienet tammonta għal madwar 52 000 tunnellata fl-2020, jew 65 % tal-konsum tal-Unjoni tal-AHF matul il-perjodu ta’ investigazzjoni tar-rieżami, li kienet tammonta għal madwar 80 000 tunnellata.

(93)

Il-kapaċità żejda fiċ-Ċina hija konfermata minn informazzjoni disponibbli għall-pubbliku mill-Kummissjoni Muniċipali ta’ Shanghai għall-Ekonomija u l-Informazzjoni, li tirrapporta li hemm saħansitra kapaċità ġdida ta’ fojl tal-aluminju maħluqa fiċ-Ċina u li tali kapaċità ġdida ta’ produzzjoni laħqet rekord ta’ 1,65 miljun tunnellata fl-2020 (51). Jekk wieħed jassumi li madwar 8 % ta’ din il-kapaċità totali (jiġifieri 132 000 tunnellata) tintuża għall-AHF, iż-żieda fil-kapaċità totali tal-produzzjoni biss tirrappreżenta aktar minn 150 % tal-konsum tal-Unjoni.

(94)

Abbażi ta’ dan ta’ hawn fuq, il-Kummissjoni kkonkludiet li l-produtturi esportaturi Ċiniżi għandhom kapaċitajiet ta’ riżerva sinifikanti u l-kapaċitajiet tagħhom għadhom qegħdin jikbru. Dawn il-kapaċitajiet ta’ riżerva jistgħu jintużaw għall-esportazzjonijiet lejn l-Unjoni jekk il-miżuri jitħallew jiskadu.

(95)

Minħabba n-nuqqas ta’ kooperazzjoni tal-produtturi Ċiniżi, ma hemm l-ebda informazzjoni disponibbli dwar is-suq domestiku Ċiniż tal-AHF u l-konsum domestiku ġie stabbilit kif stmat mill-applikanti, abbażi tad-data tas-CRU. Dan wera li l-konsum totali fiċ-Ċina huwa sostanzjalment anqas mill-kapaċità installata, u għalhekk il-produtturi fiċ-Ċina huma dipendenti fuq is-swieq tal-esportazzjoni. Kien hemm żieda stabbli fid-domanda osservata fiċ-Ċina fl-aħħar snin (mill-2017 sal-2020) ta’ madwar 3 % fis-sena (jiġifieri madwar 8 000 tunnellata fis-sena), filwaqt li l-kapaċità ta’ riżerva kienet tirrappreżenta 52 000 tunnellata fl-2020. Għalhekk, il-livell tad-domanda ma huwiex biżżejjed sabiex tkun tista’ tassorbi l-kapaċità ta’ riżerva totali fiċ-Ċina.

(96)

Il-Kummissjoni analizzat ukoll is-sitwazzjoni fi swieq oħrajn ta’ pajjiżi terzi u l-kapaċità tagħhom li jassorbu ż-żieda fl-esportazzjonijiet tal-AHF miċ-Ċina. Matul il-PIR, il-produtturi Ċiniżi kienu qegħdin jesportaw lejn numru ta’ pajjiżi terzi oħrajn, it-Tajlandja, l-Indja, il-Korea t’Isfel, l-Indoneżja u l-Ġappun bħala d-destinazzjonijiet prinċipali tal-esportazzjoni, li jirrappreżentaw qrib l-40 % tal-esportazzjonijiet kollha miċ-Ċina matul il-PIR.

(97)

Hemm firxa wiesgħa ta’ miżuri għad-difiża tal-kummerċ u restrizzjonijiet oħrajn fuq l-importazzjonijiet fis-seħħ kontra l-esportazzjonijiet ta’ AHF li joriġinaw mill-PRC. Skont il-Global Trade Alert (52), id-WTO (53) u l-informazzjoni provduta fit-talba għal rieżami (54), jeżistu miżuri għad-difiża tal-kummerċ fl-Arġentina (anti-dumping), fl-Indja (anti-dumping), fil-Messiku (anti-dumping), fit-Turkija (anti-dumping), fl-Istati Uniti (anti-dumping u anti-sussidji) u fl-Indoneżja (salvagwardja). Dawk il-miżuri juru li l-aċċess tal-produtturi Ċiniżi għal dawk is-swieq huwa limitat, u għalhekk l-esportazzjonijiet lejn dawn is-swieq x’aktarx li ma jiżdidux sostanzjalment fil-futur qarib.

(98)

Importatur partikolari argumenta li ż-żieda fid-domanda fir-reġjun Asjatiku Paċifiku, u l-kostijiet tat-trasport aktar baxxi meta mqabbla ma’ dawk imġarrba meta ssir l-esportazzjoni lejn is-suq tal-Unjoni, ikunu jfissru li huwa aktar vijabbli ekonomikament għall-produtturi esportaturi Ċiniżi li jesportaw l-AHF lejn ir-reġjun Asjatiku Paċifiku minflok lejn is-suq tal-Unjoni, anke minkejja l-miżuri ta’ difiża tal-kummerċ u ostakli kummerċjali oħrajn f’xi wħud minn dawn il-pajjiżi.

(99)

L-esportazzjonijiet tal-fojl tal-aluminju lejn l-akbar ħames swieq tal-esportazzjoni taċ-Ċina żdiedu b’34 % mill-2017 sal-PIR. Madankollu, il-Kummissjoni qieset li għalkemm id-domanda fiċ-Ċina u fil-pajjiżi ġirien tagħha wriet żieda fl-aħħar snin, kien għad hemm kapaċità ta’ riżerva sostanzjali disponibbli, li wera li din iż-żieda fid-domanda, minkejja l-kostijiet aktar baxxi tat-trasport relatati ma’ dawn l-esportazzjonijiet, x’aktarx li ma tassorbix il-kapaċità ta’ riżerva disponibbli.

(100)

Għalhekk, parti kbira mill-kapaċitajiet ta’ riżerva x’aktarx li tintuża sabiex jiżdiedu l-esportazzjonijiet miċ-Ċina lejn l-Unjoni, jekk il-miżuri jitħallew jiskadu u l-aċċess għas-suq tal-Unjoni jsir mingħajr restrizzjonijiet sinifikanti.

(101)

Il-Kummissjoni qieset li l-livelli tal-prezzijiet għal swieq oħrajn ta’ pajjiżi terzi jkunu indikatur raġonevoli għall-imġiba probabbli futura tal-prezzijiet lejn is-suq tal-Unjoni. Għalhekk, il-Kummissjoni analizzat il-livelli tal-prezzijiet tal-esportazzjoni miċ-Ċina lejn l-aktar swieq tal-esportazzjoni importanti tagħha matul il-PIR; jiġifieri t-Tajlandja, l-Indja, il-Korea t’Isfel, l-Indoneżja u l-Ġappun. Din l-analiżi żvelat li l-prezzijiet tal-esportazzjoni lejn dawn il-pajjiżi kienu aktar baxxi mill-esportazzjonijiet lejn l-Unjoni, kif spjegat fil-premessa (102). Barra minn hekk, meta jitqiesu l-marġnijiet sinifikanti tad-dumping stabbiliti għall-esportazzjonijiet lejn l-Unjoni matul il-PIR, ma kien hemm l-ebda raġuni sabiex jiġi konkluż li l-prezzijiet tal-esportazzjoni lejn l-Unjoni ma jibqgħux f’livelli li huma l-oġġett ta’ dumping, jekk il-miżuri jitħallew jiskadu.

(102)

Kif stabbilit fil-premessi (119) u (120), l-esportazzjonijiet Ċiniżi lejn l-Unjoni saru kemm taħt l-iskema ta’ proċessar attiv (prinċipalment), mingħajr ma kienu soġġetti għal miżuri anti-dumping jew dazji doganali, kif ukoll taħt ir-reġim doganali normali. Il-Kummissjoni qieset li jekk il-miżuri jiskadu, l-importazzjonijiet taħt ir-reġim doganali normali x’aktarx li jiżdiedu u eventwalment jaqbżu l-importazzjonijiet fil-biċċa l-kbira tal-każijiet skont l-iskema ta’ proċessar attiv. Dan huwa bbażat fuq il-fatt li qabel l-impożizzjoni ta’ dazji anti-dumping saru importazzjonijiet sostanzjali taħt ir-reġim doganali normali u li s-suq tal-Unjoni kif stabbilit fil-premessa (103) huwa wieħed mill-akbar swieq madwar id-dinja u kapaċi jassorbi tal-anqas parzjalment il-kapaċitajiet ta’ riżerva sinifikanti disponibbli fiċ-Ċina. Għalhekk, il-prezzijiet tal-importazzjoni taħt ir-reġim normali tal-importazzjoni tqiesu bħala punt ta’ riferiment xieraq sabiex jiġi stabbilit jekk is-suq tal-Unjoni huwiex attraenti għall-importazzjonijiet Ċiniżi f’termini ta’ livelli tal-prezzijiet. Fuq din il-bażi, matul il-perjodu ta’ investigazzjoni tar-rieżami, il-livelli tal-prezzijiet tal-esportazzjoni Ċiniżi lejn l-Unjoni nstabu li kienu bħala medja 7 % ogħla mill-prezz medju lejn is-swieq prinċipali l-oħrajn tal-esportazzjoni taċ-Ċina (eskluż id-dazju anti-dumping). Dan indika li s-suq tal-Unjoni huwa attraenti f’termini ta’ prezzijiet peress li jħalli aktar qligħ.

(103)

Is-suq tal-Unjoni għall-fojl tal-aluminju huwa, wara ċ-Ċina, it-tieni l-akbar fid-dinja li jammonta għal 15 % tad-domanda dinjija (55). Għalhekk, l-Unjoni hija attraenti wkoll għall-produtturi Ċiniżi tal-AHF fid-dawl tad-daqs tagħha.

(104)

Barra minn hekk, kif huwa spjegat fil-premessi (2) u (3), fil-passat il-produtturi esportaturi Ċiniżi aċċessaw ripetutament is-suq tal-Unjoni permezz ta’ prattiki ta’ ċirkomvenzjoni billi esportaw prodott ftit modifikat u billi stabbilew operazzjonijiet ta’ assemblaġġ fit-Tajlandja, bl-uniku għan li jevitaw id-dazji anti-dumping fis-seħħ. Dawn il-prattiki ta’ ċirkomvenzjoni juru l-interess qawwi tal-produtturi Ċiniżi fl-aċċess għas-suq tal-Unjoni mingħajr restrizzjonijiet u, b’hekk, l-attraenza tas-suq tal-Unjoni għal dawk il-produtturi.

(105)

Għalhekk, il-Kummissjoni kkonkludiet li, f’każ li l-miżuri attwali jitħassru, huwa probabbli li l-produtturi esportaturi Ċiniżi jerġgħu jidderieġu l-esportazzjonijiet lejn l-Unjoni bi prezzijiet oġġett ta’ dumping.

(106)

L-investigazzjoni wriet li l-esportazzjonijiet Ċiniżi komplew jidħlu fis-suq tal-Unjoni bi prezzijiet li huma l-oġġett ta’ dumping u l-prassi ta’ prezzijiet ta’ bejgħ mhux ekwi tal-produtturi esportaturi Ċiniżi tal-AHF x’aktarx li jkomplu fuq skala akbar jekk il-miżuri jiskadu.

(107)

L-esportazzjonijiet Ċiniżi lejn is-swieq prinċipali l-oħrajn tagħhom tal-esportazzjoni huma saħansitra aktar baxxi mill-prezzijiet lejn l-Unjoni, u hemm bosta miżuri ta’ difiża tal-kummerċ fis-seħħ kontra l-esportazzjonijiet Ċiniżi tal-AHF f’bosta ġuriżdizzjonijiet oħrajn li jikkonfermaw l-imġiba inġusta fl-ipprezzar tal-produtturi esportaturi Ċiniżi.

(108)

Barra minn hekk, il-Kummissjoni sabet indikaturi oħrajn li d-dumping x’aktarx ikompli jekk il-miżuri jiskadu, bħall-kapaċità ta’ riżerva għolja ta’ AHF fiċ-Ċina u l-attraenza tas-suq tal-Unjoni f’termini tal-livelli tal-prezzijiet u tad-daqs. Fl-istess ħin, is-suq domestiku Ċiniż u swieq oħrajn ta’ pajjiżi terzi ma jidhrux li jistgħu jassorbu kwalunkwe kapaċità ta’ riżerva sinifikanti li teżisti fiċ-Ċina li għalhekk tkun disponibbli għall-esportazzjoni lejn l-Unjoni jekk il-miżuri jitħallew jiskadu.

(109)

B’konsegwenza, il-Kummissjoni kkonkludiet li hemm probabbiltà kbira ta’ kontinwazzjoni tad-dumping jekk jiskadu l-miżuri.

(110)

Il-prodott simili kien manifatturat minn sitt produtturi fl-Unjoni matul il-perjodu ta’ investigazzjoni tar-rieżami. Huma jikkostitwixxu l-“industrija tal-Unjoni” skont it-tifsira tal-Artikolu 4(1) tar-Regolament bażiku.

(111)

Il-produzzjoni totali tal-Unjoni matul il-perjodu ta’ investigazzjoni tar-rieżami kienet stabbilita għal 39 460 tunnellata. Il-Kummissjoni stabbiliet iċ-ċifra abbażi tat-tweġibiet verifikati għall-kwestjonarju tal-produtturi tal-Unjoni inklużi fil-kampjun u d-data stmata provduta mill-produtturi mhux inklużi fil-kampjun u mill-applikanti (56). Kif indikat fil-premessa (11), it-tliet produtturi tal-Unjoni inklużi fil-kampjun kienu jirrappreżentaw aktar minn 80 % tal-produzzjoni totali tal-Unjoni tal-prodott simili.

(112)

Il-Kummissjoni stabbiliet il-konsum tal-Unjoni abbażi tal-volumi tal-bejgħ tal-produzzjoni proprja tal-industrija tal-Unjoni destinata għas-suq tal-Unjoni, il-volumi tal-importazzjoni miksuba mill-istatistika tal-Eurostat u l-importazzjonijiet evitati ta’ prodott ftit modifikat taħt rieżami mir-RPĊ kif reġistrati mill-Istati Membri skont l-Artikolu 14(6) tar-Regolament bażiku (il-“bażi ta’ data 14.6”) (57).

(113)

Abbażi ta’ dan, il-konsum mill-Unjoni żviluppa kif ġej:

Tabella 1

Konsum tal-Unjoni (tunnellati)  (58)

(114)

B’mod ġenerali, matul il-perjodu kkunsidrat, il-konsum tal-Unjoni żdied. Filwaqt li baqa’ relattivament stabbli mill-2017 sal-2019, huwa żdied bi 8 % fil-perjodu ta’ investigazzjoni tar-rieżami meta mqabbel kemm mas-sena ta’ qabel kif ukoll mal-2017.

(115)

Kif imsemmi fil-premessa (112), il-Kummissjoni stabbiliet il-volum tal-importazzjonijiet mir-RPĊ abbażi tal-istatistika u l-informazzjoni tal-Eurostat mill-bażi ta’ data 14.6. Is-sehem mis-suq kien stabbilit fuq il-bażi tal-konsum tal-Unjoni kif stabbilit fil-premessa (113).

(116)

L-importazzjonijiet mir-RPĊ żviluppaw kif ġej:

Tabella 2

Il-volum tal-importazzjonijiet (tunnellati) u s-sehem mis-suq

(117)

L-importazzjonijiet tal-prodott taħt rieżami mill-pajjiż ikkonċernat żdiedu bejn l-2017 u l-2019 u naqsu matul il-perjodu ta’ investigazzjoni tar-rieżami. B’mod ġenerali, l-importazzjonijiet mill-pajjiż ikkonċernat naqsu b’24 % bejn l-2017 u l-perjodu ta’ investigazzjoni tar-rieżami. Is-sehem mis-suq tal-importazzjonijiet mir-RPĊ baqa’ stabbli bejn l-2017 u l-2019 u naqas fil-perjodu ta’ investigazzjoni tar-rieżami b’madwar punt 1 perċentwali, minkejja t-tnaqqis aktar sinifikanti fl-importazzjonijiet f’termini assoluti.

(118)

Madankollu, dan l-iżvilupp jenħtieġ li jitqies fl-isfond taż-żieda enormi fl-importazzjonijiet tal-prodott evitat mit-Tajlandja matul l-istess perjodu kif deskritt fil-premessi (131) u (133).

(119)

Il-prodott taħt rieżami jiġi importat mir-RPĊ kemm taħt ir-reġim normali kif ukoll taħt is-sistema ta’ proċessar attiv.

(120)

L-importazzjonijiet mir-RPĊ taħt ir-reġim normali u taħt is-sistema ta’ proċessar attiv żviluppaw kif ġej:

Tabella 3

Il-volum tal-importazzjonijiet (f’tunnellati) mir-RPĊ taħt ir-reġim normali u taħt is-sistema ta’ proċessar attiv

(121)

Il-volumi tal-importazzjonijiet taħt ir-reġim normali żdiedu b’31 % bejn l-2017 u l-2019 u naqsu b’mod sinifikanti matul il-perjodu ta’ investigazzjoni tar-rieżami, li ġie kkonkretizzat f’sehem mis-suq dejjem akbar bejn l-2017 u l-2019 minn 1,2 % għal 1,5 % u tnaqqis fil-perjodu ta’ investigazzjoni tar-rieżami għal 0,3 %. L-importazzjonijiet taħt is-sistema ta’ proċessar attiv segwew xejra opposta, u naqsu bejn l-2017 u l-2019 b’10 % u żdiedu fil-perjodu ta’ investigazzjoni tar-rieżami b’20 %. Għalhekk, b’mod ġenerali matul il-perjodu kkunsidrat, il-volumi tal-importazzjoni taħt l-iskema ta’ proċessar attiv żdiedu bi 8 %, anki jekk, minħabba ż-żieda parallela fil-konsum, ma żdietx is-sehem mis-suq, li b’mod ġenerali baqa’ 1,7 %.

(122)

Il-prezz medju tal-importazzjonijiet mir-RPĊ żviluppa kif ġej:

Tabella 4

Prezzijiet tal-importazzjonijiet (EUR/tunnellata)

(123)

B’mod ġenerali, kemm għar-reġim doganali normali kif ukoll għall-proċedura ta’ proċessar attiv, il-prezzijiet medji tal-importazzjoni mir-RPĊ żdiedu bi 8 % matul il-perjodu kkunsidrat. Il-prezzijiet tal-importazzjoni (ir-reġimi doganali kollha) baqgħu taħt il-prezzijiet tal-produtturi tal-Unjoni matul il-PI (it-Tabella 9).

(124)

Il-prezz medju tal-importazzjoni taħt ir-reġim normali baqa’ relattivament stabbli bejn l-2017 u l-2019 u żdied b’5 punti perċentwali fil-perjodu ta’ investigazzjoni tar-rieżami, filwaqt li l-prezz medju tal-importazzjoni taħt il-proċedura ta’ proċessar attiv żdied b’mod kostanti sal-2019 u mbagħad naqas b’2 punti perċentwali fil-perjodu ta’ investigazzjoni tar-rieżami.

(125)

Fid-dawl tan-nuqqas ta’ kooperazzjoni tal-produtturi esportaturi Ċiniżi, il-Kummissjoni ddeterminat it-twaqqigħ tal-prezz matul il-perjodu ta’ investigazzjoni tar-rieżami billi qabblet:

(126)

Ir-riżultat tat-tqabbil ma wera l-ebda twaqqigħ tal-prezz.

(127)

Analiżi aktar dettaljata għal kull reġim ta’ importazzjoni żvelat, madankollu, li l-importazzjonijiet li saru taħt l-iskema ta’ proċessar attiv kienu qegħdin iwaqqgħu l-prezzijiet tal-bejgħ tal-industrija tal-Unjoni b’medja ta’ 7,2 %. Kif spjegat fil-premessa (173), il-livelli tal-prezzijiet ta’ dawn l-importazzjonijiet tqiesu bħala indikatur b’saħħtu tal-livelli futuri tal-prezzijiet għall-Unjoni mingħajr dazji anti-dumping.

(128)

Barra minn hekk, meta jitqies il-prezz medju tal-importazzjoni tal-importazzjonijiet Ċiniżi kollha, irrispettivament mir-reġim tal-importazzjoni mingħajr ma jiġu applikati d-dazji anti-dumping, instab li dawn waqqgħu l-prezzijiet tal-bejgħ tal-industrija tal-Unjoni b’medja ta’ 4,2 % matul il-perjodu ta’ investigazzjoni tar-rieżami. Bħal hawn fuq, dawn il-prezzijiet tqiesu wkoll bħala indikatur raġonevoli tal-livelli possibbli futuri tal-prezzijiet jekk il-miżuri jitħassru.

(129)

Barra minn hekk, il-Kummissjoni qieset ukoll il-livelli tal-prezzijiet tal-importazzjonijiet li ġew evitati mit-Tajlandja peress li dawk l-importazzjonijiet fir-realtà kienu minn produtturi esportaturi Ċiniżi li kienu qegħdin jevitaw biss id-dazji anti-dumping fis-seħħ fuq l-importazzjonijiet li joriġinaw miċ-Ċina. L-investigazzjoni stabbiliet li dawn l-importazzjonijiet (b’aġġustamenti xierqa għad-dazji doganali u l-kostijiet ta’ wara l-importazzjoni), waqqgħu l-prezzijiet tal-industrija tal-Unjoni b’medja ta’ 3,5 % matul il-perjodu ta’ investigazzjoni tar-rieżami.

(130)

L-importazzjonijiet tal-prodott taħt rieżami minn pajjiżi terzi oħrajn primarjament kienu mill-Armenja, mit-Tajlandja u mit-Turkija.

(131)

Il-volum tal-importazzjonijiet minn pajjiżi terzi oħrajn, kif ukoll is-sehem mis-suq u x-xejriet tal-prezzijiet żviluppaw kif ġej matul il-perjodu kkunsidrat:

Tabella 5

Importazzjonijiet minn pajjiżi terzi minbarra r-RPĊ

(132)

Matul il-perjodu kkunsidrat, l-importazzjonijiet minn pajjiżi terzi oħrajn żdiedu b’madwar 9 000 tunnellata, jiġifieri b’26 %, li huwa aktar mgħaġġel mill-progressjoni tal-konsum tal-Unjoni li rriżulta f’żieda fis-sehem mis-suq minn 46 % għal 53 %.

(133)

Madankollu, 76 % ta’ din iż-żieda (6 792 tunnellata) kienu importazzjonijiet mit-Tajlandja li qegħdin jevitaw il-miżuri anti-dumping definittivi fis-seħħ fuq l-importazzjonijiet miċ-Ċina kif stabbilit fil-premessa (3), u għalhekk għandhom jitqiesu bħala importazzjonijiet Ċiniżi.

(134)

Kif jidher fit-Tabella 5, filwaqt li l-importazzjonijiet minn pajjiżi terzi oħrajn għajr mit-Tajlandja żdiedu b’6 % matul il-perjodu kkunsidrat (2 126 tunnellata), b’pass aktar bil-mod mill-konsum tal-Unjoni, l-importazzjonijiet mit-Tajlandja żdiedu b’diversi eluf ta’ drabi u dan irriżulta f’żieda fis-sehem mis-suq minn 0 % għal 9 %. Importazzjonijiet oħrajn ta’ pajjiżi terzi mingħajr it-Tajlandja tilfu s-sehem mis-suq, b’mod partikolari bejn l-2019 u l-perjodu ta’ investigazzjoni tar-rieżami, fejn iż-żieda fis-sehem mis-suq mit-Tajlandja kienet l-aktar evidenti (+ 5 punti perċentwali).

(135)

Matul il-perjodu ta’ investigazzjoni tar-rieżami, il-livelli tal-prezzijiet tal-importazzjonijiet mit-Tajlandja nstabu li waqqgħu l-prezzijiet tal-bejgħ tal-industrija tal-Unjoni b’medja ta’ 3,5 %, kif spjegat fil-premessa (129) hawn fuq, filwaqt li fl-istess ħin il-prezzijiet tal-importazzjoni minn pajjiżi terzi oħrajn minbarra t-Tajlandja kienu konformi mal-prezzijiet tal-bejgħ tal-industrija tal-Unjoni.

(136)

Il-valutazzjoni tas-sitwazzjoni ekonomika tal-industrija tal-Unjoni kienet tinkludi evalwazzjoni tal-indikaturi ekonomiċi kollha li influwenzaw l-istat tal-industrija tal-Unjoni matul il-perjodu kkunsidrat.

(137)

Kif imsemmi fil-premessa (11), il-kampjunar intuża għall-valutazzjoni tas-sitwazzjoni ekonomika tal-industrija tal-Unjoni.

(138)

Sabiex tiddetermina l-ħsara, il-Kummissjoni għamlet distinzjoni bejn l-indikaturi tal-ħsara makroekonomiċi u dawk mikroekonomiċi. Il-Kummissjoni evalwat l-indikaturi makroekonomiċi abbażi tad-data li tinsab fit-tweġibiet għall-kwestjonarju dwar l-anti-dumping mill-produtturi inklużi fil-kampjun, kif ukoll tad-data makroekonomika provduta mill-produtturi mhux inklużi fil-kampjun u mill-assoċjazzjoni tal-produtturi tal-Unjoni, kontroverifikata mad-data fit-talba għal rieżami. Id-data kienet relatata mal-produtturi kollha tal-Unjoni. Il-Kummissjoni evalwat l-indikaturi mikroekonomiċi abbażi tad-data li tinsab fit-tweġibiet għall-kwestjonarju mill-produtturi tal-Unjoni inklużi fil-kampjun. Id-data kienet relatata mal-produtturi tal-Unjoni inklużi fil-kampjun. Iż-żewġ settijiet ta’ data nstabu li kienu rappreżentattivi tas-sitwazzjoni ekonomika tal-industrija tal-Unjoni.

(139)

L-indikaturi makroekonomiċi huma: il-produzzjoni, il-kapaċità tal-produzzjoni, l-użu tal-kapaċità, il-volum ta’ bejgħ, is-sehem mis-suq, it-tkabbir, l-impjiegi, il-produttività, id-daqs tal-marġni tad-dumping u l-irkupru minn dumping tal-passat.

(140)

L-indikaturi mikroekonomiċi huma: il-prezzijiet unitarji medji, il-kost unitarju, il-kostijiet lavorattivi, l-inventarji, il-profittabbiltà, il-fluss tal-flus, l-investimenti, ir-redditu fuq l-investimenti u l-kapaċità li jiġi ġġenerat il-kapital.

(141)

Il-produzzjoni totali tal-Unjoni, il-kapaċità tal-produzzjoni u l-użu tal-kapaċità żviluppaw kif ġej matul il-perjodu kkunsidrat:

Tabella 6

Il-produzzjoni, il-kapaċità tal-produzzjoni u l-użu tal-kapaċità

(142)

Għalkemm il-konsum tal-Unjoni żdied bi 8 % matul il-perjodu kkunsidrat kif imsemmi fil-premessa (113), il-volum tal-produzzjoni tal-prodott simili naqas bi 15 % mill-2017 sal-2018, u wara dan irkupra ftit matul il-bqija tal-perjodu kkunsidrat, li rriżulta fi tnaqqis ta’ 5 % matul il-perjodu sħiħ ikkunsidrat. Għalhekk, iż-żieda fil-konsum tal-Unjoni ma kinitx ta’ benefiċċju għall-industrija tal-Unjoni.

(143)

It-tnaqqis fil-volum tal-produzzjoni huwa parzjalment dovut għall-proċessi ta’ ristrutturar tal-industrija tal-Unjoni mwettqa sabiex tirkupra mill-ħsara mġarrba matul il-perjodu ta’ investigazzjoni tar-rieżami tal-investigazzjoni għar-rieżami tal-iskadenza preċedenti (mill-1 ta’ Ottubru 2013 sat-30 ta’ Settembru 2014), u parzjalment minħabba ż-żieda fil-kompetizzjoni inġusta li l-industrija tal-Unjoni ffaċċjat minn importazzjonijiet evitati tal-prodott taħt rieżami li ġejjin mit-Tajlandja. Kif spjegat fil-premessa (132), iż-żieda fil-volumi tal-importazzjoni minn pajjiżi terzi kienet dovuta prinċipalment għal żieda fl-AHF evitat mit-Tajlandja.

(144)

Il-volum ta’ bejgħ u s-sehem mis-suq tal-industrija tal-Unjoni żviluppaw kif ġej matul il-perjodu kkunsidrat:

Tabella 7

Il-volum ta’ bejgħ u s-sehem mis-suq

(145)

Il-volum ta’ bejgħ tal-industrija tal-Unjoni naqas b’6 % matul il-perjodu kkunsidrat. Huwa naqas b’mod stabbli sal-2019 (bi 17 %) u rkupra parzjalment matul il-perjodu ta’ investigazzjoni tar-rieżami, billi żdied bi 11-il punt perċentwali. Madankollu, din iż-żieda ma kinitx konformi maż-żieda fil-konsum tal-Unjoni li b’mod ġenerali rriżulta f’telf tas-sehem mis-suq tal-industrija tal-Unjoni minn 51 % fl-2017 għal 45 % fil-perjodu ta’ investigazzjoni tar-rieżami (bi tnaqqis ta’ 6 punti perċentwali), filwaqt li s-sehem mis-suq tal-importazzjonijiet evitati mit-Tajlandja kiseb 9 punti perċentwali matul l-istess perjodu.

(146)

Għalkemm il-konsum tal-Unjoni żdied bi 8 % matul il-perjodu kkunsidrat, il-volum ta’ bejgħ tal-industrija tal-Unjoni naqas b’6 %, li rriżulta f’telf ta’ 13 % mis-sehem mis-suq għall-industrija tal-Unjoni matul il-perjodu kkunsidrat. Konsegwentement, ma kienx hemm tkabbir għall-industrija tal-Unjoni matul il-perjodu kkunsidrat.

(147)

L-impjiegi u l-produttività żviluppaw kif ġej matul il-perjodu kkunsidrat:

Tabella 8

Impjiegi u produttività

(148)

In-numru ta’ impjegati tal-industrija tal-Unjoni naqas b’4 % bejn l-2017 u l-perjodu ta’ investigazzjoni tar-rieżami. Il-produttività tal-forza tax-xogħol tal-industrija tal-Unjoni, imkejla bħala output (tunnellati) għal kull impjegat, segwiet l-istess xejra sal-2019 u rkuprat fil-perjodu ta’ investigazzjoni tar-rieżami wara ż-żieda fil-produzzjoni u fil-bejgħ, kif spjegat fil-premessi (142) u (145) hawn fuq.

(149)

It-tnaqqis fin-numru ta’ impjegati huwa dovut għat-tnaqqis fil-volum tal-produzzjoni, li huwa marbut ukoll mat-tnaqqis tal-volum ta’ bejgħ tal-industrija tal-Unjoni.

(150)

Il-Kummissjoni kkonkludiet fil-premessa (89) li d-dumping mir-RPĊ kompla matul il-perjodu ta’ investigazzjoni tar-rieżami. Il-Kummissjoni kkonkludiet ukoll li kien hemm probabbiltà kbira ta’ kontinwazzjoni ta’ dumping mir-RPĊ, jekk il-miżuri jiskadu.

(151)

Minkejja l-miżuri anti-dumping fis-seħħ mill-2009, l-industrija tal-Unjoni tilfet volum ta’ bejgħ sostanzjali li huwa rifless f’telf tas-sehem mis-suq ta’ 13 % matul il-perjodu kkunsidrat. Għaldaqstant, ma seta’ jiġi stabbilit l-ebda rkupru sħiħ mid-dumping tal-passat u l-industrija tal-Unjoni tibqa’ vulnerabbli ħafna għall-effetti dannużi minn kwalunkwe importazzjoni oġġett ta’ dumping fis-suq tal-Unjoni.

(152)

Il-prezzijiet medji ponderati tal-bejgħ ta’ unità tal-produtturi tal-Unjoni inklużi fil-kampjun lil klijenti mhux relatati fl-Unjoni żviluppaw kif ġej matul il-perjodu kkunsidrat:

Tabella 9

Il-prezzijiet tal-bejgħ fl-Unjoni

(153)

Il-prezz medju tal-bejgħ ta’ unità żdied bejn l-2017 u l-2018 u naqas fl-2019 fl-istess livell tal-2017, imbagħad naqas b’6 % matul il-perjodu ta’ investigazzjoni tar-rieżami. Filwaqt li l-industrija tal-Unjoni rnexxielha żżomm il-prezzijiet tal-bejgħ tagħha ogħla mill-ispiża unitarja tal-produzzjoni matul il-perjodu kollu kkunsidrat, il-pressjoni fuq il-prezzijiet taż-żieda fl-importazzjonijiet li ġew evitati mit-Tajlandja kienet qiegħda turi effett fuq il-prezzijiet tal-bejgħ tal-industrija tal-Unjoni matul il-perjodu ta’ investigazzjoni tar-rieżami, li kieku dawn naqsu għal grad ogħla mill-kost unitarju.

(154)

Il-kostijiet lavorattivi medji tal-produtturi tal-Unjoni inklużi fil-kampjun żviluppaw kif ġej matul il-perjodu kkunsidrat:

Tabella 10

Kostijiet lavorattivi medji għal kull impjegat

(155)

Il-kost medju lavorattiv żdied progressivament matul il-perjodu kkunsidrat. B’mod ġenerali, il-kost medju lavorattiv għal kull impjegat żdied b’14 %. Din ix-xejra kienet influwenzata l-aktar mill-proċess ta’ ristrutturar fuq l-industrija tal-Unjoni, peress li xi produtturi investew fil-ħolqien ta’ strutturi ta’ bejgħ fi Stati Membri differenti.

(156)

Il-livelli tal-istokks tal-produtturi tal-Unjoni inklużi fil-kampjun żviluppaw kif ġej matul il-perjodu kkunsidrat:

Tabella 11

Inventarji

(157)

L-inventarji ma jistgħux jiġu kkunsidrati bħala indikatur rilevanti ta’ ħsara f’dan is-settur peress li l-produzzjoni u l-bejgħ huma bbażati prinċipalment fuq ordnijiet u, għalhekk, il-produtturi għandhom it-tendenza li jżommu stokks limitati. Għalhekk, ix-xejriet fl-inventarji qegħdin jingħataw biss għall-fini ta’ informazzjoni.

(158)

B’mod ġenerali, l-inventarji żdiedu b’46 % matul il-perjodu kkunsidrat. Inizjalment dawn naqsu b’4 % mill-2017 sal-2018 qabel ma żdiedu b’mod progressiv fl-2019 u fil-perjodu ta’ investigazzjoni tar-rieżami.

(159)

Il-profittabbiltà, il-fluss tal-flus, l-investimenti u r-redditu fuq l-investimenti tal-produtturi tal-Unjoni inklużi fil-kampjun żviluppaw kif ġej matul il-perjodu kkunsidrat:

Tabella 12

Il-profittabilità, il-fluss tal-flus, l-investimenti u r-redditu fuq l-investimenti

(160)

Il-Kummissjoni stabbiliet il-profittabbiltà tal-produtturi tal-Unjoni inklużi fil-kampjun billi esprimiet il-profitt nett qabel it-taxxa tal-bejgħ tal-prodott simili lil klijenti mhux relatati fl-Unjoni bħala perċentwal tal-fatturat ta’ dak il-bejgħ.

(161)

Wara l-investigazzjoni għar-rieżami ta’ skadenza preċedenti msemmija fil-premessa (1), fejn ġew imposti l-miżuri anti-dumping, is-sitwazzjoni tal-industrija tal-Unjoni tjiebet u l-marġni ta’ profitt tagħha laħaq it-8,2 % fl-2017. Madankollu, is-sitwazzjoni marret għall-agħar sussegwentement u l-marġnijiet ta’ profitt naqsu mill-2018 u laħqu biss it-3,4 % fil-perjodu ta’ investigazzjoni tar-rieżami, li jikkorrispondi għal tnaqqis ta’ 59 % matul il-perjodu kkunsidrat.

(162)

Dan kien prinċipalment dovut għall-pressjoni fuq il-prezzijiet eżerċitata mill-importazzjonijiet evitati mit-Tajlandja li daħlu fl-Unjoni u waqqgħu dawk tal-industrija tal-Unjoni u li jeżerċitaw pressjoni sinifikanti fuq il-prezzijiet li ġiegħlet lill-industrija tal-Unjoni tnaqqas il-livelli tal-prezzijiet tagħha, kif spjegat hawn fuq fil-premessa (153).

(163)

Il-fluss tal-flus nett huwa l-kapaċità tal-industrija tal-Unjoni li tiffinanzja hija stess l-attivitajiet tagħha. Minħabba li l-industrija tal-Unjoni għadha profittabbli, minkejja x-xejra ta’ tnaqqis, il-fluss tal-flus baqa’ b’mod ġenerali relattivament stabbli matul il-perjodu kkunsidrat.

(164)

L-investimenti żdiedu b’46 % fil-perjodu kkunsidrat, li huwa prinċipalment dovut għall-isforzi li saru mill-industrija tal-Unjoni sabiex tissimplifika l-produzzjoni tagħha u żżid l-effiċjenza u l-produttività sabiex tiffaċċja ż-żieda fl-importazzjonijiet bi prezz baxx. Madankollu, matul l-istess perjodu, ir-redditu fuq l-investimenti, li huwa espress bħala l-profitt f’perċentwal tal-valur kontabilistiku nett tal-investimenti naqas minn 10 % għal 1 % u għalhekk segwa l-istess xejra bħall-profittabbiltà.

(165)

It-tnaqqis fil-profittabbiltà u r-redditu fuq l-investiment għamluha dejjem aktar diffiċli għall-produtturi tal-Unjoni inklużi fil-kampjun sabiex iżidu l-kapital għall-investiment. Hekk kif ir-redditi fuq l-investimenti naqsu daqshekk malajr, il-kapaċità tal-produtturi fil-kampjun li jiġġeneraw il-kapital fil-futur hija saħansitra aktar fil-periklu.

(166)

L-evoluzzjoni tal-indikaturi mikro u makro matul il-perjodu kkunsidrat uriet sitwazzjoni finanzjarja deterjorata tal-industrija tal-Unjoni. B’mod ġenerali, ix-xejriet tal-indikaturi ekonomiċi prinċipali kollha marru għall-agħar matul il-perjodu kkunsidrat.

(167)

B’mod partikolari, il-produzzjoni, il-volumi tal-bejgħ u l-ishma mis-suq naqsu, kif ukoll il-prezzijiet tal-bejgħ li kellhom effett negattiv fuq l-impjiegi u l-produttività kif ukoll fuq il-profittabbiltà. Iż-żieda fil-pressjoni fuq il-prezzijiet mill-importazzjonijiet evitati mit-Tajlandja b’mod partikolari ma ppermettietx lill-industrija tal-Unjoni tallinja l-prezzijiet tal-bejgħ tagħha mal-iżvilupp tal-ispejjeż tal-produzzjoni tagħha b’effetti negattivi fuq il-profittabbiltà tagħha li raw tnaqqis ta’ kważi 60 % matul il-perjodu kkunsidrat. Fl-aħħar nett, ir-redditi li qegħdin jonqsu malajr fuq l-investimenti għandhom impatt negattiv fuq il-kapaċità tal-industrija tal-Unjoni li żżid il-kapital u l-investimenti.

(168)

Min-naħa l-oħra, minkejja x-xejriet ta’ tnaqqis, l-industrija tal-Unjoni xorta rnexxielha żżomm volum kbir ta’ bejgħ u sehem konsiderevoli mis-suq. Bl-istess mod, minkejja x-xejra negattiva, il-profittabbiltà baqgħet pożittiva matul il-perjodu kkunsidrat. Għalhekk, il-Kummissjoni kkonkludiet li l-industrija tal-Unjoni ma ġarrbitx ħsara materjali fis-sens tal-Artikolu 3(5) tar-Regolament bażiku matul il-perjodu ta’ investigazzjoni tar-rieżami, iżda kienet f’sitwazzjoni fraġli.

(169)

Għalhekk, il-Kummissjoni eżaminat aktar il-probabbiltà ta’ rikorrenza ta’ ħsara jekk il-miżuri jiskadu.

(170)

Fil-premessa (168) il-Kummissjoni kkonkludiet li l-industrija tal-Unjoni ma ġarrbitx dannu materjali matul il-perjodu ta’ investigazzjoni tar-rieżami, iżda kienet f’sitwazzjoni fraġli. Għalhekk, il-Kummissjoni vvalutat, f’konformità mal-Artikolu 11(2) tar-Regolament bażiku, jekk ikunx hemm probabbiltà ta’ rikorrenza ta’ dannu kkawżat mill-importazzjonijiet oġġett ta’ dumping mir-RPĊ jekk il-miżuri jitħallew jiskadu.

(171)

Sabiex jiġi stabbilit jekk hemmx probabbiltà ta’ rikorrenza ta’ dannu kkawżat oriġinarjament mill-importazzjonijiet oġġett ta’ dumping mill-pajjiżi kkonċernati, il-Kummissjoni qieset l-elementi li ġejjin: (i) il-volum tal-produzzjoni u l-kapaċità ta’ riżerva fir-RPĊ u l-attraenza tas-suq tal-Unjoni; (ii) il-livelli probabbli tal-prezzijiet tal-importazzjonijiet mir-RPĊ u l-impatt tagħhom fuq is-sitwazzjoni tal-industrija tal-Unjoni, jekk il-miżuri jitħallew jiskadu; u (iii) l-eżistenza ta’ prattiki ta’ ċirkomvenzjoni.

(172)

Kif stabbilit fil-premessa (91), il-kapaċità tal-produzzjoni fir-RPĊ taqbeż b’mod sostanzjali l-volumi tal-produzzjoni u d-domanda interna fis-suq domestiku Ċiniż. Barra minn hekk, minħabba l-konklużjonijiet dwar l-attraenza tas-suq tal-Unjoni kif deskritta fil-premessi (102) sa (105), tali kapaċità ta’ riżerva x’aktarx li fil-biċċa l-kbira tintuża għall-esportazzjonijiet lejn is-suq tal-Unjoni, jekk il-miżuri jitħallew jiskadu.

(173)

Sabiex tivvaluta l-impatt tal-importazzjonijiet futuri fuq is-sitwazzjoni tal-industrija tal-Unjoni, il-Kummissjoni qieset li l-livelli tal-prezzijiet tal-esportazzjonijiet Ċiniżi mingħajr dazji anti-dumping ikunu indikatur raġonevoli tal-livelli futuri tal-prezzijiet għas-suq tal-Unjoni. Fuq din il-bażi, kif stabbilit fil-premessi (127) u (128) rispettivament, il-marġni medju tat-twaqqigħ tal-prezz għall-prodott taħt rieżami nstab li kien 4,2 % għar-reġimi kollha tal-importazzjoni, u 7,2 %, taħt il-proċedura ta’ proċessar attiv, tal-aħħar, li ma huwa soġġett għall-ebda dazju, jitqies bħala l-aħjar indikatur tal-livelli probabbli tal-prezzijiet fin-nuqqas ta’ miżuri anti-dumping.

(174)

Barra minn hekk, kif spjegat fil-premessa (120), kważi l-importazzjonijiet kollha mir-RPĊ lejn l-Unjoni saru taħt il-proċedura ta’ proċessar attiv. Għalhekk, jista’ jiġi konkluż li l-miżuri anti-dumping kienu effettivi fil-prevenzjoni tal-importazzjonijiet oġġett ta’ dumping mir-RPĊ milli jidħlu fis-suq tal-Unjoni, u li x’aktarx jerġgħu jibdew jekk il-miżuri jiskadu.

(175)

Il-prodott taħt rieżami huwa prodott bażiku, u għalhekk is-suq huwa sensittiv għall-prezz. Żieda fl-importazzjonijiet bi prezzijiet baxxi ġġiegħel lill-industrija tal-Unjoni tkompli tnaqqas il-prezzijiet tagħha hekk kif diġà sar sabiex tikkompeti mal-importazzjonijiet evitati mit-Tajlandja, kif spjegat hawn fuq fil-premessi (133) u (135).

(176)

Meta jitqies dan ta’ hawn fuq, u jekk jiffaċċjaw żieda fl-importazzjonijiet bi prezz baxx mir-RPĊ, il-produtturi tal-Unjoni, f’tentattiv biex iżommu l-volumi tal-bejgħ u l-ishma mis-suq, inaqqsu l-prezzijiet tagħhom b’4,2 % (fil-livell tat-twaqqigħ tal-prezz); dan ikollu impatt fuq il-profittabbiltà ġenerali tal-industrija, li tonqos minn 3,4 % fil-perjodu ta’ investigazzjoni tar-rieżami għal -1 %, u għalhekk issir negattiva fit-terminu l-qasir.

(177)

Min-naħa l-oħra, jekk l-industrija tal-Unjoni żżomm il-livelli attwali tal-prezzijiet tagħha, u meta jitqies li l-AHF huwa prodott bażiku, dan ikollu impatt negattiv kważi immedjat fuq il-volum tal-bejgħ u tal-produzzjoni tiegħu, kif ukoll fuq is-sehem mis-suq. Barra minn hekk, tnaqqis fil-volum tal-produzzjoni jirriżulta f’żieda fl-ispejjeż unitarji tal-produzzjoni minħabba t-tnaqqis fl-ekonomija ta’ skala. Dan ikompli jiddeterjora l-profittabbiltà tal-industrija tal-Unjoni u jinbidel f’telf fuq perjodu ta’ żmien qasir.

(178)

B’telf ta’ profittabbiltà, l-industrija tal-Unjoni ma tkunx tista’ twettaq l-investimenti meħtieġa. Fl-aħħar mill-aħħar, dan iwassal ukoll għal telf ta’ impjiegi u riskju ta’ għeluq tal-linji tal-produzzjoni.

(179)

Kif stabbilit fil-premessa (104), l-esportaturi Ċiniżi għandhom storja ta’ prattiki ta’ dumping lejn is-suq tal-Unjoni. Bħalissa, kif imsemmi fil-premessi (2) u (3), hemm fis-seħħ żewġ miżuri kontra ċ-ċirkomvenzjoni, waħda kontra l-importazzjonijiet ta’ prodott ftit modifikat miċ-Ċina, u t-tieni, aktar reċenti, għall-importazzjonijiet li ġejjin mit-Tajlandja fejn il-produtturi esportaturi Ċiniżi stabbilew operazzjonijiet ta’ assemblaġġ.

(180)

Kif indikat fil-premessi (153) u (162), il-prattiki ta’ ċirkomvenzjoni mit-Tajlandja kienu l-kawża prinċipali għat-telf tal-industrija tal-Unjoni fil-volum ta’ bejgħ u s-sehem sinifikanti matul il-perjodu kkunsidrat. L-eżistenza ta’ dawn il-prattiki ta’ ċirkomvenzjoni turi li l-importazzjonijiet evitati li jidħlu fis-suq tal-Unjoni mingħajr dazji anti-dumping għandhom effett negattiv sinifikanti fuq is-sitwazzjoni tal-industrija tal-Unjoni, li jimmaterjalizza malajr minħabba s-sensittività tal-prezz tas-suq.

(181)

Fid-dawl ta’ dan ta’ hawn fuq, il-Kummissjoni kkonkludiet li l-iskadenza tal-miżuri, bil-probabbiltà kollha jirriżulta f’żieda sinifikanti ta’ importazzjonijiet oġġett ta’ dumping mir-RPĊ bi prezzijiet li jwaqqgħu l-prezzijiet tal-industrija tal-Unjoni, u b’hekk ikompli jaggrava s-sitwazzjoni diġà fraġli tal-industrija tal-Unjoni. Huwa probabbli ħafna li dan iwassal għal rikorrenza ta’ ħsara materjali u b’konsegwenza ta’ dan, il-vijabbiltà tal-industrija tal-Unjoni tkun f’riskju serju.

(182)

F’konformità mal-Artikolu 21 tar-Regolament bażiku, il-Kummissjoni eżaminat jekk iż-żamma tal-miżuri anti-dumping eżistenti tmurx kontra l-interess tal-Unjoni b’mod ġenerali. Id-determinazzjoni tal-interess tal-Unjoni kienet ibbażata fuq apprezzament tad-diversi interessi involuti, inklużi dawk tal-industrija tal-Unjoni, tal-importaturi, tad-distributuri u tal-utenti.

(183)

Il-partijiet interessati kollha ngħataw l-opportunità li jesprimu l-fehmiet tagħhom skont l-Artikolu 21(2) tar-Regolament bażiku.

(184)

L-industrija tal-Unjoni hija magħmula minn madwar tmien kumpaniji u kienet timpjega madwar 1 000 ħaddiem direttament b’ħafna aktar li jiddependu minnha indirettament. Kif imsemmi fil-premessa (11), il-Kummissjoni għażlet kampjun ta’ produtturi tal-Unjoni. Il-kampjun kien jikkonsisti minn tliet (3) produtturi tal-Unjoni li provdew tweġiba għall-kwestjonarju. Il-kampjun tqies li kien rappreżentattiv għall-industrija tal-Unjoni.

(185)

Kif huwa stabbilit hawn fuq, l-industrija tal-Unjoni ma ġarrbitx ħsara materjali matul il-perjodu kkunsidrat iżda tinsab f’sitwazzjoni fraġli, kif huwa konfermat mix-xejriet negattivi tal-indikaturi tal-ħsara. It-tneħħija tad-dazji anti-dumping twassal għal rikorrenza probabbli ta’ ħsara materjali li tiġi kkonkretizzata f’telf fil-volum tal-bejgħ u tal-produzzjoni, kif ukoll f’sehem mis-suq li jwassal għal telf fil-profittabbiltà u fl-impjiegi.

(186)

Min-naħa l-oħra, l-industrija tal-Unjoni wriet li hija industrija vijabbli. Wara l-aħħar rieżami ta’ skadenza, hija rnexxielha ttejjeb is-sitwazzjoni tagħha f’kundizzjonijiet ġusti fis-suq tal-Unjoni, tagħmel l-investimenti u tilħaq profittabbiltà ġusta. Il-kontinwazzjoni tal-miżuri tipprevjeni l-importazzjonijiet bi prezz baxx mir-RPĊ milli jimlew is-suq tal-Unjoni, u għalhekk tippermetti lill-industrija tal-Unjoni żżomm livelli ta’ prezzijiet sostenibbli u żżid il-profittabbiltà tagħha sabiex tilħaq il-livelli meħtieġa għal investimenti futuri.

(187)

Abbażi ta’ dan il-Kummissjoni b’hekk ikkonkludiet li ż-żamma tal-miżuri anti-dumping hija fl-interess tal-industrija tal-Unjoni.

(188)

Il-Kummissjoni kkuntattjat lill-importaturi, lin-negozjanti u lill-utenti mhux relatati magħrufa kollha. Importatur wieħed biss, Cellofix, ipprovda kummenti iżda ma ssottomettiex tweġiba għall-kwestjonarju.

(189)

Cellofix oppona t-tiġdid tal-miżuri fis-seħħ filwaqt li ddikjara li: (i) ma jirriżultax f’rikorrenza ta’ ħsara għall-industrija tal-Unjoni u, (ii) ma jkunx fl-interess tal-Unjoni.

(190)

Fir-rigward tal-ewwel punt, Cellofix argumenta li l-miżuri attwali kienu fis-seħħ għal perjodu ta’ aktar minn ħdax-il sena li matulhom huwa ddikjara li l-industrija tal-Unjoni kienet irkuprat minn kwalunkwe ħsara mġarrba. Dan jidher ukoll fit-tkabbir tal-industrija.

(191)

Il-Kummissjoni ma taqbilx ma’ din l-asserzjoni. Kif stabbilit fit-Taqsima 5.4, l-investigazzjoni stabbiliet xejra ġenerali ’l isfel tal-indikaturi ekonomiċi u finanzjarji tal-industrija tal-Unjoni, u wriet li l-industrija tal-Unjoni kienet f’sitwazzjoni fraġli matul il-perjodu ta’ investigazzjoni tar-rieżami. Kif stabbilit fil-premessa (146), il-Kummissjoni lanqas ma sabet li kien hemm tkabbir fl-industrija tal-Unjoni. Huwa mfakkar li abbażi ta’ dawn l-iżviluppi, il-Kummissjoni kkonkludiet li l-iskadenza tal-miżuri x’aktarx li twassal għal rikorrenza ta’ ħsara materjali. Għaldaqstant, l-argumenti tal-importatur f’dan ir-rigward ġew irrifjutati.

(192)

Fir-rigward tat-tieni punt li t-tiġdid tal-miżuri mhux se jkun fl-interess tal-Unjoni, l-importatur sostna li, wara l-adozzjoni tal-miżuri anti-dumping definittivi fl-2009, huwa bata sabiex jixtri l-AHF mill-industrija tal-Unjoni minħabba n-nuqqas ta’ kapaċità ta’ produzzjoni tagħhom iżda wkoll minħabba l-pressjoni eżerċitata mill-kompetituri kbar tagħha fuq il-produtturi tal-Unjoni, sabiex tillimita l-provvista għal Cellofix.

(193)

Fir-rigward tal-allegat nuqqas ta’ kapaċità tal-produzzjoni, l-investigazzjoni wriet li l-industrija tal-Unjoni kellha madwar 10 000 tunnellata ta’ kapaċità ta’ riżerva disponibbli li ma jissuġġerixxi l-ebda problema fl-industrija tal-Unjoni sabiex tforni lis-suq tal-Unjoni. Fir-rigward tal-pressjoni allegata fuq l-industrija tal-Unjoni sabiex tillimita l-provvista tal-AHF, il-kumpanija ma provdiet l-ebda evidenza sabiex tappoġġa din l-affermazzjoni. Dawn il-pretensjonijiet għalhekk ġew miċħuda.

(194)

Minħabba n-nuqqas ta’ kooperazzjoni ta’ kwalunkwe importatur, negozjant jew utent ieħor, ma kienet disponibbli l-ebda informazzjoni dwar l-impatt tad-dazji fuq dawn il-partijiet. Madankollu, l-investigazzjoni oriġinali żvelat li kwalunkwe impatt fuq partijiet interessati oħrajn ma kienx tali li l-miżuri kellhom jitqiesu li huma kontra l-interess tal-Unjoni u bl-istess mod, l-investigazzjoni tar-rieżami ta’ skadenza preċedenti stabbiliet li ż-żamma tal-miżuri ma jkollhiex impatt negattiv sinifikanti fuq is-sitwazzjoni ta’ dawn il-partijiet.

(195)

Fuq il-bażi ta’ dan, il-Kummissjoni kkonkludiet li ż-żamma tal-miżuri anti-dumping fis-seħħ ma jkollhiex impatt negattiv sinifikanti fuq l-importaturi, in-negozjanti jew l-utenti.

(196)

Abbażi ta’ dan ta’ hawn fuq, il-Kummissjoni kkonkludiet li ma kienx hemm raġunijiet konvinċenti tal-interess tal-Unjoni kontra ż-żamma tal-miżuri eżistenti fuq l-importazzjonijiet tal-prodott taħt rieżami li joriġina mir-RPĊ.

(197)

Ibbażat fuq il-konklużjonijiet milħuqa mill-Kummissjoni dwar il-kontinwazzjoni tad-dumping mir-RPĊ, ir-rikorrenza tal-ħsara kawżata mill-importazzjonijiet oġġett ta’ dumping mir-RPĊ, u l-interess tal-Unjoni, il-Kummissjoni ssib li jenħtieġ li jinżammu l-miżuri anti-dumping fuq ċertu fojl tal-aluminju li joriġina mir-RPĊ.

(198)

Sabiex jiġu mminimizzati r-riskji ta’ ċirkomvenzjoni minħabba d-differenza kbira fir-rati tad-dazju, huma meħtieġa miżuri speċjali sabiex tiġi żgurata l-applikazzjoni tad-dazji anti-dumping individwali. Il-kumpaniji b’dazji anti-dumping individwali jridu jippreżentaw fattura kummerċjali valida lill-awtoritajiet doganali tal-Istati Membri. Il-fattura trid tkun konformi mar-rekwiżiti stabbiliti fl-Artikolu 1(3) ta’ dan ir-Regolament. L-importazzjonijiet li ma jkunux akkumpanjati minn dik il-fattura jenħtieġ li jkunu soġġetti għad-dazju anti-dumping applikabbli għall-“kumpaniji l-oħrajn kollha”.

(199)

Filwaqt li l-preżentazzjoni ta’ din il-fattura hija meħtieġa sabiex l-awtoritajiet doganali tal-Istati Membri jkunu jistgħu japplikaw ir-rati tad-dazju anti-dumping individwali fuq l-importazzjonijiet, ma hijiex l-uniku element li għandu jitqies mill-awtoritajiet doganali. Tabilħaqq, anke jekk jiġu ppreżentati b’fattura li tissodisfa r-rekwiżiti kollha stabbiliti fl-Artikolu 1(3) ta’ dan ir-Regolament, l-awtoritajiet doganali tal-Istati Membri jridu jwettqu l-verifiki tas-soltu tagħhom u jistgħu, bħal fil-każijiet l-oħrajn kollha, jirrikjedu dokumenti addizzjonali (dokumenti tat-trasport, eċċ.) sabiex ikunu jistgħu jivverifikaw l-akkuratezza tad-dettalji li jkun hemm fid-dikjarazzjoni u jiżguraw li l-applikazzjoni sussegwenti tar-rata tad-dazju aktar baxxa tkun ġustifikata, f’konformità mal-liġi doganali.

(200)

Jekk l-esportazzjonijiet minn waħda mill-kumpaniji li jibbenefikaw minn rati tad-dazju individwali aktar baxxi jiżdiedu b’mod sinifikanti fil-volum wara l-impożizzjoni tal-miżuri kkonċernati, tali żieda fil-volum tista’ titqies bħala waħda li fiha nnifisha tikkostitwixxi bidla fix-xejra tal-kummerċ minħabba l-impożizzjoni ta’ miżuri skont it-tifsira tal-Artikolu 13(1) tar-Regolament bażiku. F’tali ċirkostanzi, tista’ tinbeda investigazzjoni kontra ċ-ċirkomvenzjoni, sakemm jiġu ssodisfati l-kundizzjonijiet sabiex din issir. Din l-investigazzjoni, fost l-oħrajn, tista’ teżamina l-bżonn tat-tneħħija ta’ rati individwali tad-dazju u l-impożizzjoni konsegwenti ta’ dazju applikabbli għall-pajjiż kollu.

(201)

Ir-rati tad-dazju anti-dumping tal-kumpaniji individwali speċifikati f’dan ir-Regolament japplikaw biss għall-importazzjonijiet tal-prodott taħt rieżami li joriġinaw mir-RPĊ u manifatturat mill-entitajiet legali msemmijin. L-importazzjonijiet tal-prodott taħt rieżami manifatturat minn kwalunkwe kumpanija oħra mhux imsemmija b’mod speċifiku fil-parti operattiva ta’ dan ir-Regolament, inklużi l-entitajiet relatati ma’ dawk speċifikament imsemmija, jenħtieġ li jkunu soġġetti għar-rata ta’ dazju applikabbli għall-“kumpaniji l-oħrajn kollha”. Dawn jenħtieġ li ma jkunux soġġetti għal xi rata individwali ta’ dazju anti-dumping.

(202)

Kumpanija tista’ titlob l-applikazzjoni ta’ dawn ir-rati tad-dazju anti-dumping individwali jekk sussegwentement tibdel l-isem tal-entità tagħha. It-talba trid tiġi indirizzata lill-Kummissjoni (60). It-talba jrid ikun fiha l-informazzjoni rilevanti kollha li turi li l-bidla ma taffettwax id-dritt tal-kumpanija li tibbenefika mir-rata tad-dazju li tapplika għaliha. Jekk il-bidla fl-isem tal-kumpanija ma taffettwax id-dritt tagħha li tibbenefika mir-rata tad-dazju li tapplika għaliha, se jiġi ppubblikat Regolament dwar il-bidla tal-isem f’Il-Ġurnal Uffiċjali tal-Unjoni Ewropea.

(203)

Il-partijiet interessati kollha ġew informati bil-fatti u bil-kunsiderazzjonijiet essenzjali li abbażi tagħhom kien maħsub li jiġi rrakkomandat li jinżammu l-miżuri eżistenti. Ingħataw ukoll perjodu sabiex jagħmlu r-rappreżentazzjonijiet wara din id-divulgazzjoni. Ma wasal l-ebda kumment.

(204)

Fid-dawl tal-Artikolu 109 tar-Regolament (UE, Euratom) 2018/1046 tal-Parlament Ewropew u tal-Kunsill (61), meta ammont ikollu jiġi rimborżat wara sentenza tal-Qorti tal-Ġustizzja tal-Unjoni Ewropea, l-imgħax li jrid jitħallas jenħtieġ li jkun ir-rata applikata mill-Bank Ċentrali Ewropew għall-operazzjonijiet ta’ rifinanzjament ewlenin tiegħu, kif ippubblikat fis-serje C ta’ Il-Ġurnal Uffiċjali tal-Unjoni Ewropea fl-ewwel jum kalendarju ta’ kull xahar.

(205)

Il-miżuri previsti f’dan ir-Regolament huma f’konformità mal-opinjoni tal-Kumitat stabbilit bl-Artikolu 15(1) tar-Regolament (UE) 2016/1036.

(1)

Permezz tar-Regolament ta’ Implimentazzjoni tal-Kummissjoni (UE) 2015/309 (2), il-Kummissjoni imponiet dazji kompensatorji definittivi fuq l-importazzjonijiet ta’ ċerti troti qawsalla li joriġinaw mir-Repubblika tat-Turkija (“l-investigazzjoni oriġinali”).

(2)

Fl-4 ta’ Ġunju 2018, wara rieżami interim parzjali dwar is-sussidjar tal-produtturi esportaturi kollha, skont ir-Regolament ta’ Implimentazzjoni tal-Kummissjoni (UE) 2018/823 (3), il-Kummissjoni ddeċidiet li żżomm il-miżuri kif stabbilit fl-investigazzjoni oriġinali.

(3)

Din sabet li l-bidla leġiżlattiva fil-leġiżlazzjoni Torka dwar is-sussidji għall-produtturi tat-trota, li kienet soġġetta għar-rieżami, ma kinitx tiġġustifika r-reviżjoni tad-dazji kompensatorji għall-produtturi kollha tat-trota fit-Turkija. Madankollu, ġie osservat li l-impatt tal-bidla leġiżlattiva kien differenti fil-livell ta’ kumpanija individwali (4).

(4)

Fil-15 ta’ Mejju 2020, wara rieżami interim parzjali, skont ir-Regolament ta’ Implimentazzjoni tal-Kummissjoni (UE) 2020/658 (5), il-Kummissjoni emendat il-livell tad-dazju kompensatorju fir-rigward ta’ produttur esportatur wieħed.

(5)

Fl-20 ta’ Mejju 2021, wara rieżami ta’ skadenza, skont ir-Regolament ta’ Implimentazzjoni tal-Kummissjoni (UE) 2021/823 (6), il-Kummissjoni ddeċidiet li żżomm il-livell tad-dazji kompensatorji kif stabbilit fl-investigazzjoni oriġinali u kif emendat bir-Regolament ta’ Implimentazzjoni (UE) 2020/658.

(6)

Hija sabet li l-iskadenza tal-miżuri fis-seħħ kienet tirriżulta fil-kontinwazzjoni tas-sussidjar, billi l-esportazzjonijiet sussidjati tal-prodott ikkonċernat lejn l-Unjoni kienu jkomplu f’volumi sostanzjali. Barra minn hekk, minħabba l-kapaċità żejda massiva fit-Turkija, l-attraenza tas-suq tal-Unjoni, il-livelli tal-prezzijiet tal-importazzjonijiet mit-Turkija u l-impatt probabbli tagħhom fuq l-industrija tal-Unjoni, kien hemm probabbiltà ta’ kontinwazzjoni ta’ dannu f’każ li l-miżuri jitħallew jiskadu.

(7)

Bħala konklużjoni, ġie stabbilit li ma kienx hemm raġunijiet konvinċenti ta’ interess tal-Unjoni kontra ż-żamma tal-miżuri eżistenti.

(8)

Id-dazji kompensatorji definittivi li huma fis-seħħ bħalissa jvarjaw minn 1,5 % sa 9,5 %.

(9)

Fid-29 ta’ Mejju 2020, il-Kummissjoni rċeviet talba għal rieżami interim parzjali tad-dazju kompensatorju fis-seħħ skont l-Artikolu 19 tar-Regolament (UE) 2016/1037 (“ir-Regolament bażiku”) ippreżentata mill-produttur esportatur Selina Balik Isleme Tesis Ithalat Ihracat ve Ticaret Anonim Sirketi (“ir-rikorrent”). It-talba għal rieżami interim parzjali kienet limitata fl-ambitu għall-eżami tas-sussidjar sa fejn kien ikkonċernat ir-rikorrent.

(10)

Fil-5 ta’ Frar 2021, il-Kummissjoni Ewropea bdiet rieżami interim tal-miżuri kompensatorji applikabbli għall-importazzjonijiet fl-Unjoni ta’ ċerti troti qawsalla li joriġinaw mir-Repubblika tat-Turkija (il-“pajjiż ikkonċernat”) skont l-Artikolu 19 tar-Regolament bażiku. Hija ppubblikat Notifika ta’ Bidu f’Il-Ġurnal Uffiċjali tal-Unjoni Ewropea (in-“Notifika ta’ Bidu”) (7).

(11)

Ir-rikorrent argumenta li ċ-ċirkostanzi li jiġġustifikaw il-miżuri kompensatorji eżistenti jidhru li nbidlu u li huma ta’ natura dejjiema sa fejn kien ikkonċernat ir-rikorrent.

(12)

Ir-rieżami dwar is-sussidjar tar-rikorrent kopra l-perjodu mill-1 ta’ Jannar 2020 sal-31 ta’ Diċembru 2020.

(13)

Fin-Notifika ta’ Bidu, il-partijiet interessati ġew mistiedna biex jikkuntattjaw lill-Kummissjoni biex jieħdu sehem fir-rieżami. Barra minn hekk, il-Kummissjoni infurmat speċifikament lir-rikorrent, lill-produtturi u lill-assoċjazzjonijiet magħrufa tal-Unjoni, kif ukoll lill-Gvern tal-pajjiż ikkonċernat dwar il-bidu tar-rieżami u stednithom jipparteċipaw.

(14)

Il-partijiet interessati kellhom l-opportunità li jikkummentaw dwar il-ftuħ tar-rieżami u li jitolbu seduta ta’ smigħ mal-Kummissjoni u/jew mal-Uffiċjal tas-Seduta fil-proċedimenti kummerċjali.

(15)

Il-Kummissjoni bagħtet kwestjonarji lir-rikorrent u lill-awtoritajiet tal-pajjiż ikkonċernat.

(16)

Il-Kummissjoni rċeviet tweġibiet għall-kwestjonarju kemm mir-rikorrent kif ukoll mill-awtoritajiet tal-pajjiż ikkonċernat.

(17)

Il-prodott suġġett għal rieżami huwa t-trota qawsalla (Oncorhynchus mykiss)

li joriġina mir-Repubblika tat-Turkija u li fil-preżent jaqa’ taħt il-kodiċijiet NM ex 0301 91 90, ex 0302 11 80, ex 0303 14 90, ex 0304 42 90, ex 0304 82 90 u ex 0305 43 00 (il-kodiċi TARIC 0301919011, 0302118011, 0303149011, 0304429010, 0304829010 u 0305430011) (“il-prodott rieżaminat).

(18)

Bħal fl-investigazzjoni oriġinali, il-Kummissjoni sabet li l-prodott manifatturat fit-Turkija u li jiġi esportat fl-Unjoni u l-prodott manifatturat u li jinbiegħ fl-Unjoni mill-industrija tal-Unjoni għandhom l-istess karatteristiċi fiżiċi, tekniċi u kimiċi bażiċi, u l-istess użi finali bażiċi. Għalhekk dawn tqiesu bħala prodotti simili fis-sens tal-Artikolu 2(c) tar-Regolament bażiku.

(19)

Fl-ittra tiegħu lill-Kummissjoni tat-30 ta’ Novembru 2021, ir-rikorrent irtira t-talba tiegħu għal rieżami interim.

(20)

F’konformità mal-Artikolu 14(1) tar-Regolament bażiku, il-proċediment jista’ jintemm, sakemm tali tmiem ma jkunx fl-interess tal-Unjoni.

(21)

L-investigazzjoni ma kienet żvelat ebda kunsiderazzjoni li turi li din it-terminazzjoni tkun tmur kontra l-interess tal-Unjoni.

(22)

Barra minn hekk, fl-20 ta’ Settembru 2021, il-Kummissjoni Ewropea bdiet rieżami interim mal-pajjiż kollu tal-miżuri kompensatorji applikabbli għall-importazzjonijiet fl-Unjoni ta’ ċerti troti qawsalla li joriġinaw mir-Repubblika tat-Turkija (8). Għalhekk, il-miżuri kontra s-sussidji attwalment fis-seħħ se jiġu rieżaminati għall-produtturi esportaturi kollha f’dan il-qafas.

(23)

Għaldaqstant, il-Kummissjoni kkunsidrat li l-proċediment ta’ rieżami interim parzjali għandu jintemm mingħajr determinazzjoni formali dwar xi bidliet sinifikanti dejjiema u l-prattiki ta’ sussidju tar-rikorrent.

(24)

Il-partijiet interessati ġew infurmati b’dan u ġew mogħtija l-opportunità li jikkummentaw.

(25)

Il-Kummissjoni ma rċeviet ebda kummenti li jwasslu għall-konklużjoni li tali tmiem ma jkunx fl-interess tal-Unjoni.

(26)

Din id-Deċiżjoni hija f’konformità mal-opinjoni tal-Kumitat stabbilita permezz tal-Artikolu 25(1) tar-Regolament bażiku,