1.   B’dan hija stabbilita miżura ta’ assistenza li tibbenefika lill-Ukrajna (il-“benefiċjarju”), li għandha tiġi ffinanzjata fil-qafas tal-Faċilità Ewropea għall-Paċi (EPF) (il-“Miżura ta’ Assistenza”).

2.   L-objettiv tal-Miżura ta’ Assistenza huwa li tikkontribwixxi għat-tisħiħ tal-kapaċitajiet u r-reżiljenza tal-Forzi Armati Ukreni biex jiddefendu l-integrità territorjali u s-sovranità tal-Ukrajna u jipproteġu l-popolazzjoni ċivili kontra l-aggressjoni militari li għaddejja bħalissa.

3.   Sabiex jintlaħaq l-objettiv stabbilit fil-paragrafu 2, il-Miżura ta’ Assistenza għandha tiffinanzja l-forniment ta’ tagħmir u provvisti mhux imfassla biex iwasslu forza letali, bħal tagħmir ta’ protezzjoni personali, kaxxi għall-ewwel għajnuna u fjuwil lill-Forzi Armati Ukreni.

4.   Id-durata tal-Miżura ta’ Assistenza għandha tkun ta’ 24 xahar mill-adozzjoni ta’ din id-Deċiżjoni.

1.   L-ammont ta’ referenza finanzjarja maħsub biex ikopri n-nefqa relatata mal-Miżura ta’ Assistenza għandu jkun ta’ EUR 50 000 000.

2.   In-nefqa kollha għandha tiġi ġestita f’konformità mad-Deċiżjoni (PESK) 2021/509 u mar-regoli għall-implimentazzjoni tad-dħul u n-nefqa ffinanzjata taħt l-EPF.

3.   F’konformità mal-Artikolu 29(5) tad-Deċiżjoni (PESK) 2021/509, l-amministratur għall-miżuri ta’ assistenza jista’ jagħmel sejħa għal kontribuzzjonijiet wara l-adozzjoni ta’ din id-Deċiżjoni, sa EUR 50 000 000. Il-fondi li għalihom għamel sejħa l-amministratur għall-miżuri ta’ assistenza għandhom jintużaw biss biex titħallas in-nefqa fil-limiti approvati mill-Kumitat stabbilit bid-Deċiżjoni (PESK) 2021/509 fil-baġit emendatorju tal-2022 li tikkorrispondi għall-Miżura ta’ Assistenza.

4.   In-nefqa relatata mal-implimentazzjoni tal-Miżura ta’ Assistenza għandha tkun eliġibbli mill-1 ta’ Jannar 2022 u sa data li għandha tiġi ddeterminata mill-Kunsill.

1.   Ir-Rappreżentant Għoli għandu jagħmel l-arranġamenti meħtieġa mal-benefiċjarju biex jiżgura l-konformità tiegħu mad-dritt internazzjonali, b’mod partikolari d-dritt internazzjonali dwar id-drittijiet tal-bniedem u d-dritt umanitarju internazzjonali, u l-Artikolu 62(2) tad-Deċiżjoni (PESK) 2021/509, bħala kondizzjoni għall-għoti ta’ appoġġ taħt il-Miżura ta’ Assistenza.

2.   L-arranġamenti msemmija fil-paragrafu 1 għandhom jinkludu dispożizzjonijiet dwar is-sospensjoni u t-terminazzjoni tal-appoġġ taħt il-Miżura ta’ Assistenza f’każ li l-benefiċjarju jinstab li jkun kiser l-obbligi msemmija fil-paragrafu 1.

1.   Ir-Rappreżentant Għoli għandu jkun responsabbli li jiżgura l-implimentazzjoni ta’ din id-Deċiżjoni f’konformità mad-Deċiżjoni (PESK) 2021/509, u mar-regoli għall-implimentazzjoni tad-dħul u n-nefqa taħt l-EPF, b’mod konsistenti mal-Qafas Metodoloġiku Integrat għall-valutazzjoni u l-identifikazzjoni tal-miżuri u l-kontrolli meħtieġa għall-miżuri ta’ assistenza taħt l-EPF.

2.   Il-Kumitat stabbilit bid-Deċiżjoni (PESK) 2021/509 għandu jiddefinixxi aktar it-tip u l-kwantità ta’ appoġġ li għandhom jiġu ffinanzjati taħt l-Miżura ta’ Assistenza, filwaqt li jqis il-prijoritajiet rrakkomandati mill-Istat Maġġur tal-Unjoni Ewropea biex jintlaħqu l-ħtiġijiet tal-Forzi Armati Ukreni.

3.   L-amministratur għall-miżuri ta’ assistenza, abbażi tal-informazzjoni riċevuta mill-attur(i) responsabbli għall-implimentazzjoni, għandu jirrapporta lill-Kumitat stabbilit bid-Deċiżjoni (PESK) 2021/509 dwar il-kunsinna ta’ tagħmir, inkluż il-kwantitajiet, it-tipi u kwalunkwe informazzjoni rilevanti oħra, għal aktar segwitu u monitoraġġ.

4.   L-implimentazzjoni tal-attività msemmija fl-Artikolu 1(3) tista’ titwettaq minn:

(a)	il-Ministeru għad-Difiża tal-Awstrija;

(b)	il-Ministeru għad-Difiża tal-Belġju;

(c)	il-Ministeru għad-Difiża tal-Bulgarija;

(d)	il-Ministeru għad-Difiża tal-Kroazja;

(e)	il-Ministeru għad-Difiża ta’ Ċipru;

(f)	il-Ministeru għad-Difiża taċ-Ċekja;

(g)	il-Ministeru għad-Difiża tad-Danimarka;

(h)	iċ-Ċentru Estonjan għall-Investimenti fid-Difiża (ECDI) f’isem il-Ministeru tad-Difiża tal-Estonja;

(i)	il-Ministeru għad-Difiża tal-Finlandja;

(j)	il-Ministeru għad-Difiża ta’ Franza;

(k)	il-Ministeru għad-Difiża tal-Ġermanja;

(l)	il-Ministeru għad-Difiża tal-Greċja;

(m)	il-Ministeru għad-Difiża tal-Ungerija;

(n)	id-Dipartiment għad-Difiża tal-Irlanda;

(o)	il-Ministeru għad-Difiża tal-Italja;

(p)	iċ-Ċentru għal-Loġistika u l-Akkwist fil-qasam tad-Difiża tal-Istat tal-Latvja;

(q)	il-Ministeru għad-Difiża tal-Litwanja;

(r)	id-Direttorat tad-Difiża tal-Ministeru għall-Affarijiet Barranin u Ewropej tal-Lussemburgu;

(s)	il-Ministeru għall-Intern, is-Sigurtà Nazzjonali u l-Infurzar tal-Liġi ta’ Malta;

(t)	il-Ministru għad-Difiża tan-Netherlands;

(u)	il-Ministeru għad-Difiża tal-Polonja;

(v)	il-Ministeru għad-Difiża tal-Portugall;

(w)	il-Ministeru għad-Difiża Nazzjonali tar-Rumanija;

(x)	il-Ministeru għad-Difiża tar-Repubblika Slovakka;

(y)	il-Ministeru għad-Difiża tas-Slovenja;

(z)	il-Ministeru għad-Difiża ta’ Spanja;

(aa)	il-Ministeru għad-Difiża tal-Iżvezja / il-Forzi Armati Żvediżi.

1.   L-Istati Membri għandhom jikkunsidraw li jipprovdu appoġġ finanzjarju u loġistiku lill-Ukrajna, inkluż il-forniment ta’ tagħmir protettiv.

2.   L-Istati Membri għandhom jippermettu t-tranżitu ta’ tagħmir militari inkluż persunal ta’ akkumpanjament, mit-territorji tagħhom, inkluż l-ispazju tal-ajru tagħhom.

1.   Ir-Rappreżentant Għoli għandu jiżgura l-monitoraġġ tar-rispett tal-obbligi stabbiliti f’konformità mal-Artikolu 3 mill-benefiċjarju. Tali monitoraġġ għandu jipprovdi għarfien tal-kuntest u tar-riskji tal-ksur tal-obbligi stabbiliti f’konformità mal-Artikolu 3, inkluż ksur tad-dritt internazzjonali tal-bniedem u d-dritt umanitarju internazzjonali mill-unitajiet tal-Forzi Armati Ukreni appoġġati taħt il-Miżura ta’ Assistenza.

2.   Il-kontroll ta’ wara t-trasportazzjoni tal-provvisti għandu jiġi organizzat b’mod konsistenti mal-Qafas Metodoloġiku Integrat għall-valutazzjoni u l-identifikazzjoni tal-miżuri u l-kontrolli meħtieġa għall-miżuri ta’ assistenza fil-qafas tal-EPF.