(1)

Ir-Regolament (UE) Nru 1380/2013 tal-Parlament Ewropew u tal-Kunsill (1) jirrikjedi li jiġu adottati miżuri ta’ konservazzjoni li jqisu l-pariri xjentifiċi, tekniċi u ekonomiċi disponibbli, inkluż, meta jkun rilevanti, ir-rapporti mfassla mill-Kumitat Xjentifiku, Tekniku u Ekonomiku għas-Sajd u minn korpi konsultattivi oħrajn, kif ukoll pariri mogħtija minn kunsilli konsultattivi stabbiliti għaż-żoni ġeografiċi rilevanti ta’ kompetenza u r-rakkomandazzjonijiet konġunti magħmula mill-Istati Membri.

(2)

Il-Kunsill ser jadotta miżuri dwar l-iffissar u l-allokazzjoni tal-opportunitajiet tas-sajd, inkluż ċerti kondizzjonijiet li jkunu marbuta b’mod funzjonali ma’ dawk l-opportunitajiet tas-sajd, kif xieraq. Ir-Regolament (UE) Nru 1380/2013 jipprevedi li l-opportunitajiet tas-sajd jenħtieġ li jiġu allokati lill-Istati Membri b’tali mod li tiġi żgurata l-istabbiltà relattiva tal-attivitajiet tas-sajd ta’ kull Stat Membru għal kull stokk jew tip ta’ sajd.

(3)

Ir-Regolament (UE) Nru 1380/2013 jipprevedi li l-objettiv tal-Politika Komuni tas-Sajd huwa li sal-2015 tinkiseb ir-rata ta’ sfruttament tar-rendiment massimu sostenibbli (maximum sustainable yield — “MSY”) meta jkun possibbli u, fuq bażi progressiva u inkrementali, sa mhux aktar tard mill-2020 għall-istokkijiet kollha. L-objettiv tal-perijodu tranżitorju sal-2020 kien li tiġi bbilanċjata l-kisba tal-MSY għall-istokkijiet kollha bl-implikazzjonijiet soċjoekonomiċi possibbli tal-aġġustamenti possibbli tal-opportunitajiet tas-sajd relatati.

(4)

Għalhekk, il-qabdiet totali permissibbli (total allowable catches — TACs) jenħtieġ li jiġu stabbiliti, f’konformità mar-Regolament (UE) Nru 1380/2013, abbażi tal-pariri xjentifiċi disponibbli, filwaqt li jitqiesu l-implikazzjonijiet bijoloġiċi u soċjoekonomiċi u jiġi żgurat trattament ġust bejn is-setturi tas-sajd u filwaqt li jitqiesu l-opinjonijiet espressi matul il-konsultazzjoni mal-partijiet ikkonċernati.

(5)

Ir-Regolament (UE) 2016/1139 tal-Parlament Ewropew u tal-Kunsill (2) jistabbilixxi pjan pluriennali għall-istokkijiet tal-bakkaljaw, l-aringi u l-laċċ ikħal fil-Baħar Baltiku u għas-sajd li jisfrutta dawk l-istokkijiet (il-“pjan”). Il-pjan għandu l-għan li jiżgura li l-isfruttament tar-riżorsi bijoloġiċi ħajjin tal-baħar jirkupra u jżomm il-popolazzjonijiet tal-ispeċijiet maqbuda ’l fuq minn livelli li jistgħu jipproduċu l-MSY. Ir-Regolament (UE) Nru 1380/2013 jipprevedi li għall-istokkijiet soġġetti għal pjanijiet pluriennali speċifiċi, l-opportunitajiet tas-sajd ser jiġu stabbiliti f’konformità mar-regoli stabbiliti f’dawk il-pjanijiet pluriennali.

(6)

F’konformità mal-Artikolu 4(1) tal-pjan, l-opportunitajiet tas-sajd għall-istokkijiet elenkati fl-Artikolu 1 tal-pjan kellhom jiġu ffissati biex tinkiseb il-mortalità mis-sajd bl-MSY, espressa f’meded, mill-aktar fis possibbli u, fuq bażi progressiva u inkrementali, l-aktar tard sal-2020. Għalhekk, il-limiti tal-qbid applikabbli fl-2022 għall-istokkijiet rilevanti fil-Baħar Baltiku jenħtieġ li jiġu stabbiliti f’konformità mal-objettivi tal-pjan.

(7)

Il-Kunsill Internazzjonali għall-Esplorazzjoni tal-Baħar (International Council for the Exploration of the Sea — ICES) ippubblika l-parir annwali tiegħu dwar l-istokkijiet tal-Baltiku fit-28 ta’ Mejju 2021. Dan indika li l-bijomassa tal-aringa tal-Baltiku tal-Punent fis-suddiviżjonijiet 20 sa 24 tal-ICES kienet biss 54 % tal-valur ta’ referenza ta’ limitu tal-bijomassa tal-istokkijiet riproduttivi (Blim), li taħtu huwa possibbli li l-kapaċità riproduttiva titnaqqas. Barra minn hekk, ir-reklutaġġ għadu f’livelli storikament baxxi. Għalhekk, l-ICES ippubblika għar-raba’ sena konsekuttiva parir għal qabdiet żero għall-aringa tal-Baltiku tal-Punent. Skont l-Artikolu 5(2) tar-Regolament (UE) 2016/1139, għalhekk jenħtieġ li jiġu adottati l-miżuri ta’ rimedju xierqa kollha biex jiġi żgurat li l-istokk ikkonċernat jirritorna malajr għal livelli ’l fuq mil-livell li kapaċi jipproduċi l-MSY. Barra minn hekk, dik id-dispożizzjoni tirrikjedi li jiġu adottati aktar miżuri ta’ rimedju. Jekk l-opportunitajiet tas-sajd għall-aringa tal-Baltiku tal-Punent jiġu ffissati fil-livell indikat fil-parir tal-ICES, l-obbligu li jinħattu l-art il-qabdiet kollha f’sajd imħallat b’qabdiet inċidentali tal-aringa tal-Baltiku tal-Punent iwassal għall-fenomenu ta’ “speċijiet bi kwota limitanti”. Sabiex jinstab il-bilanċ it-tajjeb bejn, minn naħa, il-kontinwazzjoni tas-sajd għal stokkijiet oħra fid-dawl tal-implikazzjonijiet soċjoekonomiċi potenzjalment severi u, min-naħa l-oħra, il-ħtieġa li jinkiseb status bijoloġiku tajjeb għall-istokk, filwaqt li titqies id-diffikultà tas-sajd tal-istokkijiet kollha f’sajd imħallat b’MSY fl-istess ħin, huwa xieraq li tiġi stabbilita TAC speċifika għall-qabdiet inċidentali tal-aringa tal-Baltiku tal-Punent. Madankollu, l-operazzjonijiet tas-sajd imwettqa għall-fini esklużiv ta’ investigazzjonijiet xjentifiċi u f’konformità sħiħa mal-kondizzjonijiet stabbiliti fl-Artikolu 25 tar-Regolament (UE) 2019/1241 tal-Parlament Ewropew u tal-Kunsill (3), kif ukoll sajjieda kostali fuq skala żgħira li jistadu b’ċertu irkaptu passiv, jenħtieġ li jitħallew jistadu għall-aringa tal-Baltiku tal-Punent. Jenħtieġ li l-livell tat-TAC ikun tali li l-mortalità ma tiżdiedx u li dan jipprovdi inċentivi għal titjib fis-selettività u fl-evitar.

(8)

Fir-rigward tal-istokk tal-bakkaljaw tal-Baltiku tal-Lvant, l-ICES seta’ mill-2019 jibbaża l-parir ta’ prekawzjoni tiegħu fuq valutazzjoni aktar rikka fid-data. L-ICES iqis li l-bijomassa tal-istokk tal-bakkaljaw tal-Baltiku tal-Lvant għadha inqas mill-Blim u kompliet tonqos mill-2020. Għalhekk, l-ICES ippubblika għat-tielet sena konsekuttiva parir għal qabdiet żero għall-bakkaljaw tal-Baltiku tal-Lvant. Mill-2019, ġew adottati miżuri ta’ konservazzjoni stretti fl-Unjoni. Skont l-Artikolu 5(2) tar-Regolament (UE) 2016/1139, is-sajd immirat tal-bakkaljaw tal-Baltiku tal-Lvant ingħalaq u t-TAC għall-qabdiet inċidentali inevitabbli tal-bakkaljaw tal-Baltiku tal-Lvant ġiet stabbilita f’livell baxx ħafna biex jiġi evitat il-fenomenu ta’ “speċijiet bi kwota limitanti” f’sajd ieħor. Barra minn hekk, aktar miżuri ta’ rimedju relatati b’mod funzjonali mal-opportunitajiet tas-sajd ġew adottati fil-forma ta’ għeluq fiż-żmien riproduttiv u tal-projbizzjoni tas-sajd rikreattiv fiż-żona ewlenija ta’ distribuzzjoni. Minħabba l-parir tal-ICES u s-sitwazzjoni tal-istokk li baqgħet kif inhi, huwa xieraq li l-livell tal-opportunitajiet tas-sajd u l-miżuri ta’ rimedju marbuta b’mod funzjonali jinżammu kif inhuma.

(9)

Fir-rigward tal-bakkaljaw tal-Baltiku tal-Punent, l-estimi xjentifiċi kienu indikaw għal diversi snin li l-bijomassa tal-istokk riproduttiv kienet taħt il-punt ta’ referenza, li taħtu għandha tittieħed azzjoni ta’ ġestjoni speċifika u xierqa (Btrigger). Għalhekk f’dawn l-aħħar snin ġew adottati miżuri ta’ ġestjoni dejjem aktar stretti. Fl-2021 l-ICES iddeċieda li jwettaq valutazzjoni aktar fil-fond tas-sitwazzjoni tal-istokk u b’hekk ippospona l-parir tiegħu għall-10 ta’ Settembru 2021. Dik il-valutazzjoni żvelat li l-bijomassa tal-istokk tal-bakkaljaw tal-Baltiku tal-Punent kienet inqas minn nofs l-istima preċedenti u li għal aktar minn 10 snin fil-biċċa l-kbira kienet inqas mill-Blim. Huwa stmat li l-bijomassa attwali hija madwar nofs il-Blim. Ir-reklutaġġ ilu storikament baxx mill-2018. L-ICES iqis li bi probabbiltà ta’ 53 % l-bijomassa tal-istokk tista’ tiżdied ftit aktar mill-Blim fl-2023 anki b’xi qabdiet. F’tali sitwazzjoni, skont l-Artikolu 5(2) tar-Regolament (UE) 2016/1139, jenħtieġ li jittieħdu miżuri ta’ rimedju u li l-opportunitajiet tas-sajd jiġu ffissati b’tali mod li jiġi żgurat li l-istokk jirritorna malajr għal livell ’il fuq mil-livell li kapaċi jipproduċi l-MSY. Il-livell ta’ qabdiet rakkomandati huwa tant baxx li ma jistax jiflaħ kemm sajd dirett kif ukoll il-qabdiet inċidentali inevitabbli f’sajd ieħor, b’mod partikolari fis-sajd demersali għall-ħut ċatt. Għalhekk, huwa xieraq li tiġi stabbilita TAC limitata għall-qabdiet inċidentali inevitabbli f’sajd ieħor biex jiġi evitat il-fenomenu ta’ “speċijiet bi kwota limitanti”, b’eżenzjoni għall-operazzjonijiet tas-sajd imwettqa għall-fini esklużiv ta’ investigazzjonijiet xjentifiċi u f’konformità sħiħa mal-kondizzjonijiet stabbiliti fl-Artikolu 25 tar-Regolament (UE) 2019/1241. Barra minn hekk, aktar miżuri ta’ rimedju marbuta b’mod funzjonali mal-opportunitajiet tas-sajd ġew adottati preċedentement fil-forma ta’ għeluq fiż-żmien riproduttiv u limitazzjonijiet fuq is-sajd rikreattiv. Minħabba d-deterjorament serju ulterjuri tal-istokk, huwa xieraq li l-għeluq fiż-żmien riproduttiv jiġi estiż mill-15 ta’ Jannar sal-31 ta’ Marzu sabiex jiġi kopert il-perijodu li matulu l-bakkaljaw jaggrega qabel ir-riproduzzjoni. Jenħtieġ li tiġi introdotta eżenzjoni addizzjonali mill-għeluq fiż-żmien riproduttiv għal bastimenti tas-sajd li jistadu bi xbieki tat-tħammil għal molluski bivalvi fis-suddiviżjoni 22 tal-ICES f’ilmijiet ta’ inqas minn 20 metru fond, peress li dak is-sajd iseħħ barra miż-żoni fejn ibid il-merluzz u għandu qabdiet aċċessorji baxxi ħafna ta’ merluzz. Fir-rigward tas-sajd rikreattiv, għall-kuntrarju tas-snin preċedenti, l-ICES ma kienx f’pożizzjoni li jipprovdi separazzjoni bejn il-qabdiet kummerċjali u dawk rikreattivi, minħabba l-livell baxx tal-qabdiet totali rakkomandati. Minħabba l-kundizzjoni tal-istokk, huwa meħtieġ li l-limitu tal-qabda jitnaqqas kemm jista’ jkun sabiex jibqa’ fil-livelli tal-qabdiet rakkomandati mill-ICES. Barra minn hekk, huwa xieraq li s-sajd rikreattiv ma jibqax ikun eżentat mill-perijodu tal-għeluq fiż-żmien riproduttiv.

(10)

Fl-2020, l-ICES qies li l-bijomassa tal-aringa tal-Baltiku Ċentrali niżlet taħt il-punt ta’ referenza tal-bijomassa tal-istokkijiet riproduttivi li taħtu għandha tittieħed azzjoni ta’ ġestjoni speċifika u xierqa (Btrigger). Fl-2021, l-ICES qies li l-bijomassa kompliet tonqos u issa tinsab qrib il-Blim. Għalhekk, huwa xieraq li jiġu ffissati l-opportunitajiet tas-sajd skont l-Artikolu 5(1) tar-Regolament (UE) 2016/1139.

(11)

Skont il-parir tal-ICES, il-bakkaljaw jinqabad inċidentalment fis-sajd tal-barbun tat-tbajja’. Il-laċċ ikħal jinqabad f’sajd imħallat mal-aringa u huwa speċi ta’ priża għall-bakkaljaw. Huwa xieraq li jitqiesu dawk l-interazzjonijiet bejn id-diversi speċijiet meta jiġu ffissati l-opportunitajiet tas-sajd għall-barbun tat-tbajja’ u l-laċċ ikħal.

(12)

Fir-rigward tas-salamun fis-suddiviżjonijiet 22 sa 31 tal-ICES, l-ICES kien preċedentement iddikjara għal diversi snin li l-istatus tal-istokkijiet tax-xmajjar kien eteroġenju ħafna. Sabiex l-esperti jingħataw aktar żmien biex iqisu aħjar dik id-diverġenza, l-ICES iddeċieda li jipposponi l-parir tiegħu għall-15 ta’ Settembru 2021. Skont il-parir tal-ICES, il-qabdiet kummerċjali u rikreattivi kollha fil-baċir ewlieni, li b’mod inerenti huma sajd imħallat li jaqbad is-salamun minn stokkijiet b’saħħithom u dgħajfa tax-xmajjar, jenħtieġ li jitwaqqfu sabiex jiġu protetti l-istokkijiet dgħajfa tax-xmajjar. Madankollu, l-ICES iqis li s-sajd dirett eżistenti fiż-żoni kostali tal-Golf ta’ Bothnia u l-Baħar Aland jista’ jkompli matul il-migrazzjoni fis-sajf tas-salamun. Sabiex jinstab il-bilanċ it-tajjeb bejn il-kontinwazzjoni tas-sajd fid-dawl tal-implikazzjonijiet soċjoekonomiċi potenzjalment severi, u, min-naħa l-oħra, il-ħtieġa li jinkiseb status bijoloġiku tajjeb għall-istokk, filwaqt li titqies id-diffikultà tas-sajd tal-istokkijiet kollha f’sajd imħallat b’MSY fl-istess ħin, huwa xieraq li tiġi stabbilita TAC speċifika għall-qabdiet inċidentali tas-salamun f’dawk iż-żoni, bl-eżenzjoni ta’ operazzjonijiet tas-sajd imwettqa għall-fini esklużiv ta’ investigazzjonijiet xjentifiċi u f’konformità sħiħa mal-kondizzjonijiet stabbiliti fl-Artikolu 25 tar-Regolament (UE) 2019/1241, u s-sajd kostali fit-Tramuntana tal-latitudni 59°30′N matul il-perijodu mill-1 ta’ Mejju sal-31 ta’ Awwissu. Minħabba l-parir tal-ICES, huwa xieraq li jiġu adottati aktar miżuri ta’ rimedju marbuta b’mod funzjonali mal-opportunitajiet tas-sajd. Jenħtieġ li l-użu ta’ konzijiet lil hinn minn erba’ mili nawtiċi jiġi pprojbit peress li tipikament dan huwa rkaptu użat biex jaqbad is-salamun. Barra minn hekk, f’dawk iż-żoni fejn is-sajd kummerċjali mhuwiex permess, jenħtieġ li jkun permess li jinżamm kuljum salamun bil-pinen maqtugħin wieħed biss għal kull petriċa kbira fis-sajd rikreattiv. Fl-aħħar nett, sabiex jiġi evitat rapportar ħażin, il-kampjuni kollha ta’ kwalunkwe speċi ta’ ħut miżmuma jenħtieġ li jinħattu l-art sħaħ sabiex ikunu jistgħu jiġu identifikati b’mod ċar.

(13)

Sabiex jiġi żgurat l-użu sħiħ tal-opportunitajiet tas-sajd kostali, fl-2019 ġiet introdotta flessibbiltà limitata bejn iż-żoni għas-salamun mis-suddiviżjonijiet 22 sa 31 tal-ICES sas-suddiviżjoni 32 tal-ICES. Minħabba l-bidliet fl-opportunitajiet tas-sajd għal dawn iż-żewġ stokkijiet, huwa xieraq li dik il-flessibbiltà titnaqqas.

(14)

L-introduzzjoni ta’ projbizzjoni tas-sajd għat-trota tal-baħar lil hinn minn erba’ mili nawtiċi u ta’ limitazzjoni tal-qabdiet inċidentali tat-trota tal-baħar għal 3 % tal-qabda mħallta tat-trota tal-baħar u tas-salamun ikkontribwiet sa ċertu punt għat-tnaqqis sostanzjali ta’ rapportar ħażin tal-qabdiet fis-sajd għas-salamun li qabel kien sinifikanti, b’mod partikolari bħala qabdiet ta’ trota tal-baħar. Għalhekk, huwa xieraq li tinżamm dik id-dispożizzjoni biex jinżamm livell baxx ta’ rapportar ħażin.

(15)

L-użu tal-opportunitajiet tas-sajd iffissati f’dan ir-Regolament huwa soġġett għar-Regolament tal-Kunsill (KE) Nru 1224/2009 (4), u b’mod partikolari l-Artikoli 33 u 34 tiegħu rigward ir-reġistrar ta’ qabdiet u l-isforz tas-sajd, u t-trażmissjoni ta’ data dwar l-eżawriment tal-opportunitajiet tas-sajd lill-Kummissjoni. Għalhekk, dan ir-Regolament jenħtieġ li jispeċifika l-kodiċijiet relatati mal-ħatt l-art tal-istokkijiet soġġetti għal dan ir-Regolament li jridu jintużaw mill-Istati Membri meta jibagħtu d-data lill-Kummissjoni.

(16)

Ir-Regolament tal-Kunsill (KE) Nru 847/96 (5) introduċa kondizzjonijiet addizzjonali għall-ġestjoni minn sena għal sena tat-TACs inkluż, skont l-Artikoli tiegħu 3 u 4, dispożizzjonijiet dwar il-flessibbiltà għat-TACs prekawzjonarji u analitiċi. Skont l-Artikolu 2 ta’ dak ir-Regolament, meta jiffissa t-TACs, il-Kunsill ser jiddeċiedi għal liema stokkijiet ma għandhomx japplikaw l-Artikolu 3 jew 4, b’mod partikolari abbażi tal-istatus bijoloġiku tal-istokkijiet. Aktar reċentement, l-Artikolu 15(9) tar-Regolament (UE) Nru 1380/2013 introduċa l-mekkaniżmu ta’ flessibbiltà minn sena għal sena għall-istokkijiet kollha li huma soġġetti għall-obbligu tal-ħatt l-art. Għalhekk, sabiex jiġi evitat li l-flessibbiltà eċċessiva, li ddgħajjef il-prinċipju ta’ sfruttament razzjonali u responsabbli tar-riżorsi bijoloġiċi ħajjin tal-baħar, tfixkel l-ilħuq tal-objettivi tal-Politika Komuni tas-Sajd u tikkawża d-deterjorament tal-istatus bijoloġiku tal-istokkijiet, jenħtieġ li jiġi stabbilit li l-Artikoli 3 u 4 tar-Regolament (KE) Nru 847/96 japplikaw biss għat-TACs analitiċi meta ma tintużax il-flessibbiltà minn sena għal sena prevista fl-Artikolu 15(9) tar-Regolament (UE) Nru 1380/2013.

(17)

Barra minn hekk, minħabba li l-bijomassa tal-istokk tal-bakkaljaw tal-Baltiku tal-Lvant, tal-aringa tal-Baltiku tal-Punent u tal-bakkaljaw tal-Baltiku tal-Punent hija inqas mill-Blim u li huwa permess biss sajd inċidentali, sajd xjentifiku u, fil-każ tal-aringa tal-Baltiku tal-Punent, ċertu sajd kostali fuq skala żgħira fl-2022, l-Istati Membri li għandhom sehem ta’ kwota tat-TAC rilevanti impenjaw ruħhom li ma japplikawx il-flessibbiltà minn sena għal sena prevista fl-Artikolu 15(9) tar-Regolament (UE) Nru 1380/2013 għal dawk l-istokkijiet fl-2022 sabiex il-qabdiet fl-2022 ma jaqbżux it-TAC stabbilita għall-bakkaljaw tal-Baltiku tal-Lvant, għall-aringa tal-Baltiku tal-Punent u għall-bakkaljaw tal-Baltiku tal-Punent. Barra minn hekk, minħabba li l-bijomassa tal-istokk tas-salamun tax-xmajjar ’l isfel mil-latitudni 59°30′N huma kważi kollha taħt il-limitu tal-punt ta’ referenza għall-produzzjoni tas-salamun żgħir (Rlim) u li f’dik iż-żona huwa permess biss sajd inċidentali u sajd xjentifiku fl-2022, l-Istati Membri rilevanti impenjaw ruħhom bl-istess mod rigward il-flessibbiltà minn sena għal oħra fir-rigward tal-qabdiet tas-salamun fil-baċir prinċipali fl-2022.

(18)

Is-sena tas-sajd għall-merluzz tan-Norveġja fid-diviżjoni 3a tal-ICES, fl-ilmijiet tar-Renju Unit tad-diviżjoni 2a tal-ICES u fl-ilmijiet tar-Renju Unit u tal-Unjoni tas-subżona 4 tal-ICES hija mill-1 ta' Novembru sal-31 ta' Ottubru. Sabiex ikun jista' jibda s-sajd fl-1 ta' Novembru 2021, u abbażi ta' parir xjentifiku ġdid u wara konsultazzjonijiet mar-Renju Unit, jeħtieġ li tiġi stabbilita TAC preliminari għall-merluzz tan-Norveġja fid-diviżjoni 3a tal-ICES, fl-ilmijiet tar-Renju Unit tad-diviżjoni 2a tal-ICES u fl-ilmijiet tar-Renju Unit u tal-Unjoni tas-subżona 4 tal-ICES għall-perijodu mill-1 ta' Novembru 2021 sal-31 ta' Diċembru 2021. Jenħtieġ li dak it-TAC preliminari tiġi stabbilita f'konformità mal-parir tal-ICES ippubblikat fit-8 ta' Ottubru 2021.

(19)

Fir-Regolament tal-Kunsill (UE) 2021/92 (6), it-tabella dwar l-opportunitajiet tas-sajd għall-kavall fil-Baħar tat-Tramuntana tirreferi għall-ilmijiet taż-żoni 3a u 4, l-ilmijiet tar-Renju Unit taż-żona 2a, l-ilmijiet tal-Unjoni taż-żoni 3b, 3c u s-suddiviżjonijiet 22 sa 32 f’konformità mal-Ftehim ta’ Kummerċ u Kooperazzjoni bejn l-Unjoni Ewropea u l-Komunità Ewropea tal-Enerġija Atomika, minn naħa waħda, u r-Renju Unit tal-Gran Brittanja u l-Irlanda ta’ Fuq, min-naħa l-oħra (7). Madankollu, fl-2021, il-konsultazzjonijiet dwar il-kavall bejn l-Istati kostali ma wasslux għal ftehim dwar l-arranġamenti ta’ aċċess bejn l-Unjoni, ir-Renju Unit u n-Norveġja. Għalhekk, l-Unjoni m’għandhiex aċċess biex tistad għall-kwota tagħha tal-kavall fl-ilmijiet Norveġiżi tal-Baħar tat-Tramuntana.

(20)

Fl-2021, l-Unjoni kkonkludiet negozjati mar-Renju Unit dwar l-opportunitajiet tas-sajd u l-miżuri ta’ ġestjoni għal ċerti TACs għall-2021, inkluż għall-kavall, li jippermettu lill-Unjoni tistad għall-kwota tagħha tal-kavall fl-ilmijiet tar-Renju Unit. B’riżultat ta’ dan, jenħtieġ li t-tabelli rilevanti dwar l-opportunitajiet tas-sajd jiġu emendati skont dan biex jirriflettu d-delimitazzjonijiet taż-żona tas-sajd fl-ilmijiet tal-Baħar tat-Tramuntana għall-ilmijiet tar-Renju Unit u tal-Unjoni.

(21)

Fl-2021, l-Unjoni m’għandhiex aċċess biex tistad għall-kwota tagħha tal-kavall fl-ilmijiet Norveġiżi tal-Baħar tat-Tramuntana. Ir-Regolament (UE) 2021/92 jinkludi t-tabella dwar l-opportunitajiet tas-sajd għall-kavall fl-ilmijiet Norveġiżi taż-żoni 2a u 4a u jenħtieġ li jkun possibbli li l-kwota ta’ 13 359 tunnellata allokata lid-Danimarka tinqabad fl-ilmijiet tal-Unjoni u tar-Renju Unit tal-Baħar tat-Tramuntana. Jenħtieġ li tiddaħħal nota f’qiegħ il-paġna fit-tabella rilevanti dwar l-opportunitajiet tas-sajd biex id-Danimarka tkun tista’ tistad għal dik il-kwota fl-ilmijiet tal-Unjoni u tar-Renju Unit tal-Baħar tat-Tramuntana. Ir-Renju Unit ġie ikkonsultat dwar dik il-possibbiltà u ma qajjem l-ebda oġġezzjoni dwar l-approċċ li jippermetti li dik il-kwota tiġi mistada f’dawk l-ilmijiet tar-Renju Unit mit-12 ta’ Ottubru 2021.

(22)

Il-Ftehim ta’ Sħubija dwar is-Sajd Sostenibbli bejn l-Unjoni Ewropea minn naħa waħda, u l-Gvern ta’ Greenland u l-Gvern tad-Danimarka, min-naħa l-oħra, u l-Protokoll ta’ Implimentazzjoni tiegħu (8), jipprevedu li l-Unjoni għandha tirċievi 7,7 % tat-TAC għall-kapelin li jinqabad fl-ilmijiet ta’ Greenland fis-subżoni 5 u 14 tal-ICES. Fil-5 ta’ Ottubru 2021, l-Unjoni rċeviet informazzjoni mingħand l-awtoritajiet ta’ Greenland li l-ICES ħareġ parir għall-kapelin għall-istaġun 2021/2022 fil-livell ta’ 904 200 tunnellata bħala TAC. Wara parir xjentifiku u abbażi tal-ftehim milħuq bejn Greenland, l-Iżlanda u n-Norveġja dwar il-kapelin, il-Gvern ta’ Greenland stabbilixxa kwota ta’ 135 630 tunnellata. F’konformità mal-Protokoll ta’ Implimentazzjoni, Greenland tixtieq toffri lill-Unjoni 69 623 tunnellata ta’ kapelin, li jammontaw għal 7,7 % tat-TAC totali. Dik it-TAC issa għandha tiġi stabbilita abbażi ta’ dak. Barra minn hekk, Greenland, l-Iżlanda u n-Norveġja qablu, bħala parti mill-arranġament qafas tagħhom dwar il-konservazzjoni u l-ġestjoni tal-kapelin, dwar arranġamenti ġodda għall-istaġun tas-sajd. Għalhekk, jeħtieġ ukoll li l-bidla tiġi riflessa fl-istaġun tas-sajd, li issa għandu jirreferi għal perijodu mill-15 ta’ Ottubru 2021 sal-15 ta’ April 2022.

(23)

Il-Kummissjoni tagħti awtorizzazzjonijiet tas-sajd lill-bastimenti li jtajru l-bandiera tal-Venezwela biex dawn ikunu jistgħu jistadu għall-isnapper fl-ilmijiet tal-Unjoni ’l barra mill-kosta tal-Guyana Franċiża. L-emenda proposta għandha l-għan li tiżgura l-kontinwità tal-operazzjonijiet tas-sajd matul il-proċess ta’ awtorizzazzjoni bejn sentejn taħt ċerti kondizzjonijiet.

(24)

Għalhekk, ir-Regolament (UE) 2021/92 jenħtieġ li jiġi emendat skont dan.

(25)

Sabiex tiġi evitata l-interruzzjoni tal-attivitajiet tas-sajd u sabiex jiġi żgurat l-għajxien tas-sajjieda tal-Unjoni, id-dispożizzjonijiet ta’ dan ir-Regolament rigward il-Baħar Baltiku jenħtieġ li jibdew japplikaw mill-1 ta’ Jannar 2022. Il-limiti ta’ qbid previsti fir-Regolament (UE) 2021/92 japplikaw mill-1 ta’ Jannar 2021. Id-dispożizzjonijiet introdotti minn dan ir-Regolament li jirrigwardaw dawk il-limiti ta’ qbid jenħtieġ li għalhekk japplikaw ukoll mill-1 ta’ Jannar 2021. Madankollu, dan ir-Regolament jenħtieġ li japplika għall-merluzz tan-Norveġja fid-diviżjoni 3a tal-ICES, fl-ilmijiet tar-Renju Unit u tal-Unjoni tas-subżona 4 tal-ICES u fl-ilmijiet tar-Renju Unit fid-diviżjoni 2a tal-ICES mill-1 ta’ Novembru 2021 sal-31 ta’ Ottubru 2022. Fid-dawl tal-ħtieġa li jitkomplew l-attivitajiet tas-sajd sostenibbli u li jibda s-sajd rilevanti fil-ħin għall-ftuħ tal-istaġun tas-sajd, id-dispożizzjonijiet ta’ dan ir-Regolament dwar il-limiti ta’ qbid għall-kavall fl-ilmijiet tan-Norveġja tal-Baħar tat-Tramuntana u l-kapelin fl-ilmijiet ta’ Greenland tas-subżoni 5 u 14 tal-ICES jenħtieġ li japplikaw mit-12 ta’ Ottubru 2021 u mill-15 ta’ Ottubru 2021 rispettivament. Minħabba li l-opportunitajiet ta’ sajd ikkonċernati jew għadhom ma ġewx eżawriti jew ser jinżdiedu permezz ta’ dan ir-Regolament, il-prinċipji ta’ ċertezza legali u l-protezzjoni ta’ aspettattivi leġittimi ma humiex affettwati mill-applikazzjoni retroattiva ta’ dan ir-Regolament. Għal raġunijiet urġenti, dan ir-Regolament jenħtieġ li jidħol fis-seħħ minnufih wara l-pubblikazzjoni tiegħu,

(1)

Il-pandemija tal-COVID-19 għadha qed tikkawża tnaqqis fit-traffiku tal-ajru bħala riżultat ta’ tnaqqis sinifikanti fid-domanda għall-ivvjaġġar bl-ajru u minħabba miżuri diretti li ttieħdu mill-Istati Membri kif ukoll minn pajjiżi terzi biex jikkontrollaw it-tifrix tal-COVID-19. Il-Eurocontrol irrapportat li fl-ewwel nofs tal-2021, it-traffiku tal-ajru fl-ispazju tal-ajru taż-ŻEE kien pjuttost stabbli u kien jammonta għal madwar 38 % tat-traffiku tal-ajru tal-2019 fil-perjodu korrispondenti b’xejra ’l fuq. Skont it-tbassir tal-Eurocontrol, it-traffiku medju annwali tal-ajru huwa mistenni li jilħaq 50 % u 72 % fl-2021 u fl-2022 rispettivament, abbażi tal-aktar xenarju realistiku ta’ tbassir.

(2)

Ċirkostanzi bħal dawn huma barra mill-kontroll tat-trasportaturi tal-ajru u l-kanċellazzjonijiet volontarji jew obbligatorji konsegwenti tas-servizzi tal-ajru mit-trasportaturi tal-ajru f’konformità mad-domanda li qed tevolvi huma rispons meħtieġ jew leġittimu għal dawk iċ-ċirkostanzi.

(3)

Skont l-Artikolu 8(2) tar-Regolament (KEE) Nru 95/93, interpretat flimkien mal-Artikolu 10(2), it-trasportaturi tal-ajru għandhom jużaw mill-anqas 80 % ta’ serje ta’ slots allokati lilhom, jew jitilfu l-preċedenza storika għal dawk is-slots, magħrufa bħala r-regola “tużah jew titilfu”. Fid-dawl tal-kriżi tal-COVID-19, u biex tiġi protetta s-saħħa finanzjarja tat-trasportaturi tal-ajru u jiġi evitat l-impatt ambjentali negattiv ta’ titjiriet vojta jew fil-biċċa l-kbira vojta operati biss għall-finijiet taż-żamma ta’ slots tal-ajruporti sottostanti, ir-regola “tużah jew titilfu” ġiet sospiża mill-1 ta’ Marzu 2020 sat-28 ta’ Marzu 2021.

(4)

Fis-16 ta’ Frar 2021, u minħabba l-impatt kontinwu tal-kriżi tal-COVID-19 fuq it-traffiku tal-ajru, l-Unjoni emendat ir-Regolament (KEE) Nru 95/93 biex tagħti aktar eżenzjonijiet lil-linji tal-ajru mir-regola “tużah jew titilfu” matul il-perjodu ta’ skedar tas-sajf tal-2021 billi ssospendiet ir-regola għal perjodu ulterjuri mit-28 ta’ Marzu 2021 sat-30 ta’ Ottubru 2021.

(5)

Skont l-Artikolu 10a(5) tar-Regolament (KEE) Nru 95/93, il-Kummissjoni għandha s-setgħa li tadotta atti delegati biex temenda l-perjodu ta’ sospensjoni tar-regola “tużahjew titilfu” stabbilita fl-Artikolu 10a(3).

(6)

Barra minn hekk, skont l-Artikolu 10a(5) tar-Regolament (KEE) Nru 95/93, il-Kummissjoni għandha s-setgħa li tadotta, fejn strettament meħtieġ sabiex tindirizza l-impatt li qed jevolvi tal-kriżi tal-COVID-19 fuq il-livelli tat-traffiku tal-ajru, atti delegati biex temenda r-rata tal-użu tas-slots f’medda ta’ bejn 30 % u 70 %.

(7)

Minkejja żieda gradwali, il-livelli tat-traffiku tal-ajru fl-ewwel nofs tal-2021 għadhom baxxi meta mqabbla mal-istess perjodu fl-2019, b’medja ta’ madwar 38 % tat-traffiku tal-ajru tal-2019 fil-perjodu korrispondenti. Filwaqt li jiġu rikonoxxuti d-diffikultajiet fit-tbassir preċiż tal-perkors ta’ rkupru tal-livelli tat-traffiku tal-ajru, huwa raġonevoli li wieħed jistenna li s-sitwazzjoni tippersisti fil-futur qarib bi tnaqqis kostanti tad-distakk bejn it-traffiku tal-ajru fl-2021 meta mqabbel mal-2019. Abbażi tat-tbassir ta’ erba’ snin tal-Eurocontrol tal-21 ta’ Mejju 2021, fl-aktar xenarju probabbli, li jassumi li t-tilqim jenħtieġ li jikseb l-effikaċja fl-2022, il-livelli annwali tat-traffiku jilħqu medja annwali ta’ 50 % sa 72 % tal-livelli korrispondenti tal-2019, fl-2021 u fl-2022 rispettivament. Abbażi tat-tbassir disponibbli ta’ kull xahar tal-Eurocontrol għall-2021 u l-medja annwali disponibbli tal-Eurocontrol għall-2022, it-traffiku tal-ajru matul il-perjodu ta’ skedar tax-xitwa 2021/2022 huwa mistenni li jkun ta’ 70 % tal-livelli tal-2019.

(8)

Id-data miġbura mill-Organizzazzjoni Dinjija tas-Saħħa u miċ-Ċentru Ewropew għall-Kontroll tal-Mard turi li t-tnaqqis persistenti tat-traffiku tal-ajru huwa r-riżultat tal-impatt tal-kriżi tal-COVID-19. Id-data disponibbli turi korrelazzjoni bejn in-numri ta’ każijiet li qed jevolvu u r-risponsi tal-Istati Membri u ta’ pajjiżi terzi għal dawk in-numri li qed jevolvu, billi jadottaw miżuri li għandhom impatt fuq l-ivvjaġġar bl-ajru, u jirriżultaw fi tnaqqis fit-traffiku tal-ajru. Miżuri bħal dawn, li jistgħu jiġu implimentati jew jitneħħew fi żmien qasir ħafna, jikkontribwixxu għal atmosfera ta’ inċertezza u jħallu impatt negattiv fuq il-fiduċja tal-konsumatur u l-imġiba tal-prenotazzjonijiet.

(9)

Minħabba n-numri ta’ każijiet li qed jevolvu tal-COVID-19 u t-tixrid possibbli ta’ varjanti ġodda, huwa raġonevoli li wieħed jistenna għadd sinifikanti ta’ kanċellazzjonijiet bħala konsegwenza tal-kriżi tal-COVID-19 matul il-perjodu ta’ skedar tax-xitwa li ġej, mill-31 ta’ Ottubru 2021 sas-26 ta’ Marzu 2022, jekk il-linji tal-ajru jkunu meħtieġa joperaw il-portafolli tas-slots kollha tagħhom tal-2019 f’konformità mal-Artikolu 8 tar-Regolament (KEE) Nru 95/93.

(10)

Għalhekk huwa meħtieġ li l-perjodu stabbilit fl-Artikolu 10a(3) tar-Regolament (KEE) Nru 95/93 jiġi estiż mill-31 ta’ Ottubru 2021 sas-26 ta’ Marzu 2022.

(11)

Id-domanda għall-ivvjaġġar matul il-perjodu ta’ skedar tax-xitwa mill-31 ta’ Ottubru 2021 sas-26 ta’ Marzu 2022 xorta tista’ tibqa’ baxxa minkejja l-progress tal-kampanji ta’ tilqim, aktar sikurezza għall-ivvjaġġar, u t-tnaqqis gradwali fil-pajjiżi ta’ miżuri li għandhom impatt fuq l-ivvjaġġar. Domanda baxxa persistenti matul il-perjodu ta’ skedar tax-xitwa x’aktarx tista’ tkun indikazzjoni ta’ bidliet strutturali fit-tul fis-suq u fl-imġiba tal-konsumatur. Għalhekk, ir-rata tal-użu tas-slots jenħtieġ li, minn naħa, tevita konsegwenzi negattivi mhux intenzjonati fuq is-sitwazzjoni finanzjarja tal-linji tal-ajru u impatti ambjentali negattivi minħabba titjiriet vojta jew fil-biċċa l-kbira vojta operati biss biex jinżammu d-drittijiet storiċi fuq is-slots, u min-naħa l-oħra, jew jinċentivaw lil-linji tal-ajru biex jagħmlu użu effiċjenti mill-kapaċità tal-ajruport, jew jirrilaxxaw is-slots fil-ġabra għal utenti oħra sabiex jiżguraw l-użu effiċjenti tal-kapaċità tal-ajruport.

(12)

Barra minn hekk, jenħtieġ li r-rata tal-użu tas-slots tiġi stabbilita b’rata li tiggarantixxi ammont minimu ta’ servizzi sabiex tiżdied il-fiduċja tal-passiġġieri, l-użu effiċjenti tal-kapaċità tal-ajruport matul il-perjodu ta’ skedar tax-xitwa 2021/2022 u konnettività affidabbli.

(13)

Jenħtieġ li r-rata tal-użu tas-slots tqis ukoll bidliet strutturali aktar fit-tul fl-imġiba tas-suq u tal-konsumatur, sabiex is-suq ikun jista’ jadatta gradwalment għad-domanda li qed tinbidel u jiftaħ l-aċċess għall-kapaċità għall-perjodu ta’ skedar tax-xitwa 2022/2023. B’mod partikolari, peress li xi linji tal-ajru għamlu użu minn slots ad hoc matul l-2020 u l-bidu tal-2021 mingħajr ma kisbu slots storiċi.

(14)

Għalhekk, ir-rata tal-użu tas-slots għall-perjodu ta’ skedar tax-xitwa 2021/2022 jenħtieġ li tiġi stabbilita għal 50 %.

(15)

Filwaqt li huwa ġeneralment preżunt li t-trasportaturi tal-ajru joperaw malli terġa’ tiżdied id-domanda, limitu ta’ użu aktar baxx joħloq ir-riskju li xi trasportaturi jistgħu jillimitaw l-operazzjonijiet f’xi ajruporti għall-minimu meħtieġ biss għall-fini li jżommu d-drittijiet storiċi f’dawk is-slots għad-detriment tal-kompetituri, tal-operaturi tal-ajruporti u tal-konsumaturi. Ir-rilaxx possibbli ta’ xi kapaċità tal-ajruport minħabba din ir-rata ta’ użu ġdida x’aktarx li ma jikkawżax tfixkil serju fl-operazzjonijiet u n-networks tal-linji tal-ajru, mentri kieku rata ta’ użu ogħla tfixkilhom.

(16)

Għall-finijiet taċ-ċertezza legali, b’mod partikolari għall-koordinaturi tas-slots u l-operaturi tal-ajru, jenħtieġ li dan ir-Regolament jidħol fis-seħħ b’urġenza fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea,

(1)

L-Anness I tar-Regolament ta’ Implimentazzjoni tal-Kummissjoni (UE) Nru 543/2011 (2) jipprevedi regoli dettaljati dwar standards ta' kummerċjalizzazzjoni għall-frott u l-ħaxix.

(2)

Mill-2018 sal-2020, il-Grupp ta’ Ħidma dwar l-Istandards tal-Kwalità Agrikola tal-Kummissjoni Ekonomika għall-Ewropa tan-Nazzjonijiet Uniti (UNECE) irreveda l-istandards tal-UNECE għall-bżar ħelu (2018 & 2020), l-għeneb tal-mejda (2019 & 2020), it-tuffieħ u l-lanġas (2020). Sabiex jiġu evitati ostakli għall-kummerċ li mhumiex neċessarji, l-istandards speċifiċi u ġenerali għal dawk il-frott u l-ħaxix ipprovduti fir-Regolament ta’ Implimentazzjoni (UE) Nru 543/2011 jeħtieġ li jinġiebu konformi mal-istandards ġodda tal-UNECE.

(3)

Meta jitqies li dawk l-istandards riveduti tal-UNECE ġew ippreżentati b’suċċess għall-approvazzjoni tal-Istati Membri skont il-proċedura stabbilita fid-Deċiżjoni tal-Kunsill (UE) 2017/2104 tas-6 ta’ Novembru 2017 dwar il-pożizzjoni li għandha tittieħed f’isem l-Unjoni Ewropea fi ħdan il-Grupp ta’ Ħidma tal-UNECE dwar l-Istandards tal-Kwalità Agrikola (UNECE-WP.7) (3).

(4)

Għaldaqstant, jenħtieġ li r-Regolament (UE) Nru 543/2011 jiġi emendat skont dan,