(1)

Il-komunikazzjoni tal-Kummissjoni tat-3 ta’ Marzu 2010 intitolata “Ewropa 2020: Strateġija għal tkabbir intelliġenti, sostenibbli u inklużiv” tistabbilixxi l-objettivi tal-Unjoni li ssir ekonomija bbażata fuq l-għarfien u l-innovazzjoni, tnaqqas il-piż amministrattiv minn fuq l-impriżi u tqabbel aħjar il-provvista tal-ħaddiema mat-talba għax-xogħol. Dik il-komunikazzjoni tidentifika l-ħtieġa għal politika komprensiva tal-migrazzjoni tal-ħaddiema u għal integrazzjoni aħjar tal-migranti. Il-miżuri li jiffaċilitaw l-ammissjoni ta’ ħaddiema li kwalifiki għoljin minn pajjiżi terzi iridu jitqiesu f’dak il-kuntest usa’.

(2)

Il-konklużjonijiet tal-Kunsill Ewropew tas-26 u tas-27 ta’ Ġunju 2014 jiddikjaraw li biex tibqa’ destinazzjoni attraenti għat-talenti u l-ħiliet, l-Ewropa trid tikkompeti fit-tellieqa globali għat-talent. Għaldaqstant, jenħtieġ li jiġu żviluppati strateġiji li jimmassimizzaw l-opportunitajiet għal migrazzjoni legali, inkluż is-simplifikazzjoni tar-regoli eżistenti.

(3)

Il-komunikazzjoni tal-Kummissjoni tat-13 ta’ Mejju 2015 intitolata “Aġenda Ewropea dwar il-Migrazzjoni” tappella għal skema attraenti mifruxa mal-Unjoni kollha għal ċittadini ta’ pajjiżi terzi bi kwalifiki għoljin u tispeċifika li jinħtieġ rieżami tad-Direttiva tal-Kunsill 2009/50/KE (4) biex l-Unjoni tkun tista’ tattira b’mod aktar effettiv it-talent u b’hekk tindirizza kemm l-isfidi demografiċi li qed tiffaċċa l-Unjoni kif ukoll in-nuqqas ta’ ħaddiema u ta’ ħiliet f’setturi ewlenin tal-ekonomija tal-Unjoni. Is-sejħa biex tiġi rieżaminata dik id-Direttiva hija mtennija fil-komunikazzjoni tal-Kummissjoni tat-23 ta’ Settembru 2020“Patt Ġdid dwar il-Migrazzjoni u l-Ażil”, li jiddikjara li r-riforma tal-Karta Blu tal-UE “trid iġġib valur miżjud reali tal-UE biex tattira l-ħiliet permezz ta’ strument effettiv u flessibbli għall-UE kollha”.

(4)

Il-Parlament Ewropew, fir-riżoluzzjoni tiegħu tat-12 ta’ April 2016 (5), appella għal rieżami ambizzjuż u mmirat tad-Direttiva 2009/50/KE, inkluż tal-kamp ta’ applikazzjoni tagħha.

(5)

Huwa neċessarju li jiġu indirizzati l-isfidi identifikati fil-komunikazzjoni tal-Kummissjoni tat-22 ta’ Mejju 2014 dwar l-implimentazzjoni tad-Direttiva 2009/50/KE. Jenħtieġ li l-Unjoni timmira li tistabbilixxi skema aktar attraenti u effettiva għall-Unjoni kollha għal ħaddiema bi kwalifiki għoljin minn pajjiżi terzi. Jenħtieġ li l-approċċ tal-Unjoni biex tiġbed tali ħaddiema bi kwalifiki għoljin jiġi armonizzat aktar u l-Karta Blu tal-UE jenħtieġ li ssir l-għodda primarja f’dak ir-rigward, bi proċeduri aktar mgħaġġla, kriterji ta’ ammissjoni aktar flessibbli u inklużivi, u drittijiet aktar estensivi, li jinkludu mobbiltà iffaċilitata ġewwa l-UE. Billi dan jinvolvi bidliet sostanzjali għad-Direttiva 2009/50/KE, dik id-Direttiva jenħtieġ li titħassar u tiġi sostitwita b’Direttiva ġdida.

(6)

Jenħtieġ li tiġi stabbilita sistema ta’ ammissjoni ċara u trasparenti għall-Unjoni kollha li tattira u żżomm ħaddiema bi kwalifiki għoljin minn pajjiżi terzi u li tippromwovi l-mobbiltà ta’ dawk il-ħaddiema. Jenħtieġ li din id-Direttiva tapplika irrispettivament minn jekk l-iskop inizjali ta’ residenza taċ-ċittadin ta’ pajjiż terz ikunx impjieg bi kwalifiki għoljin jew ikunx skop ieħor li mbagħad jinbidel għall-iskop ta’ impjieg bi kwalifiki għoljin. Huwa neċessarju li jittieħed kont tal-prijoritajiet tal-Istati Membri, tal-ħtiġijiet tas-swieq tax-xogħol tagħhom u tal-kapaċitajiet ta’ akkoljenza tagħhom. Din id-Direttiva jenħtieġ li tkun mingħajr preġudizzju għall-kompetenza tal-Istati Membri li joħorġu permessi ta’ residenza nazzjonali oħrajn minbarra l-Karti Blu tal-UE għall-fini ta’ impjieg bi kwalifiki għoljin. Barra minn hekk, jenħtieġ li din id-Direttiva ma taffettwax il-possibbiltà li detentur ta’ Karta Blu tal-UE jgawdi minn drittijiet u benefiċċji addizzjonali skont il-liġi nazzjonali li jkunu kompatibbli ma’ din id-Direttiva.

(7)

L-Istati Membri jenħtieġ li jiżguraw kondizzjonijiet ekwivalenti bejn il-Karti Blu tal-UE u l-permessi ta’ residenza nazzjonali għall-fini ta’ impjieg bi kwalifiki għoljin, f’termini ta’ drittijiet proċedurali u ta’ trattament ugwali, proċeduri u aċċess għall-informazzjoni. B’mod partikolari, jenħtieġ li l-Istati Membri jiżguraw li l-livell ta’ salvagwardji u drittijiet proċedurali mogħtija lid-detenturi tal-Karta Blu tal-UE u l-membri tal-familja tagħhom ma jkunx inferjuri mil-livell ta’ salvagwardji u drittijiet proċedurali li jgawdu mid-detenturi ta’ permessi ta’ residenza nazzjonali. Jenħtieġ li l-Istati Membri jiżguraw ukoll li l-applikanti għal Karta Blu tal-UE ma jkunux f’pożizzjoni inqas favorevoli mill-applikanti għal permessi ta’ residenza nazzjonali fir-rigward tal-proċeduri ta’ rikonoxximent għall-impjegaturi, u li ma jkunux meħtieġa jħallsu tariffi ogħla għat-trattament tal-applikazzjoni tagħhom. Fl-aħħar nett, jenħtieġ li l-Istati Membri jimpenjaw ruħhom fl-istess livell ta’attività ta’ informazzjoni, promozzjoni u reklamar fir-rigward tal-Karta Blu tal-UE bħalma jagħmlu fil-każ tal-permessi ta’ residenza nazzjonali pereżempju fir-rigward tal-informazzjoni fuq is-siti web nazzjonali dwar il-migrazzjoni legali, kampanji ta’ informazzjoni u programmi ta’ taħriġ mogħtija lill-awtoritajiet kompetenti tal-migrazzjoni.

(8)

Sabiex tissaħħaħ u tiġi promossa l-iskema tal-Karta Blu tal-UE u biex jiġu attirati ħaddiema bi kwalifiki għoljin minn pajjiżi terzi, l-Istati Membri huma mħeġġa jsaħħu l-attivitajiet ta’ reklamar u l-kampanji ta’ informazzjoni dwar il-Karta Blu tal-UE, inkluż, fejn xieraq, attivitajiet u kampanji diretti lejn pajjiżi terzi.

(9)

Fl-implimentazzjoni ta’ din id-Direttiva, l-Istati Membri ma għandhomx jiddiskriminaw abbażi ta’ sess, razza, kulur, oriġini etnika jew soċjali, karatteristiċi ġenetiċi, lingwa, reliġjon jew twemmin, opinjoni politika jew kwalunkwe opinjoni oħra, sħubija f’minoranza nazzjonali, proprjetà, twelid, diżabbiltà, età jew orjentazzjoni sesswali, kif inhu meħtieġ bid-Direttivi tal-Kunsill 2000/43/KE (6) u 2000/78/KE (7), b’mod partikolari. Sabiex il-prinċipju ta’ nondiskriminazzjoni jkun effettiv, jenħtieġ li d-detenturi tal-Karta Blu tal-UE jkunu jistgħu jfittxu rimedju legali u jressqu lmenti kif previst mil-liġi nazzjonali jekk jiffaċċaw kwalunkwe tip ta’ diskriminazzjoni, inkluż fis-suq tax-xogħol.

(10)

Wara li kkunsidra r-rapport tal-Eurostat tal-21 ta’ Frar 2020 intitolat “Hard-to-fill ICT vacancies: an increasing challenge” (Postijiet tax-xogħol battala tal-ICT li diffiċli jimtlew: l-isfida dejjem tikber) u l-konklużjonijiet tiegħu dwar nuqqas mifrux ta’ ħaddiema b’ħiliet għolja fis-settur tat-teknoloġiji tal-informazzjoni u l-komunikazzjoni (ICT) fis-swieq tax-xogħol tal-Istati Membri, il-ħiliet professjonali ogħla jenħtieġ li jitqiesu bħala ekwivalenti għal kwalifiki ta’ edukazzjoni għolja għall-fini tal-applikazzjoni għal Karta Blu tal-UE fir-rigward ta’ żewġ pożizzjonijiet ogħla: Maniġers tas-Servizzi tat-Teknoloġija tal-Informazzjoni u l-Komunikazzjoni (numru 133 tal-Klassifika Internazzjonali Standard tal-Impjiegi (ISCO)-08) u Professjonisti tat-Teknoloġija tal-Informazzjoni u l-Komunikazzjoni (numru 25 tal-klassifika ISCO-08). Meta jitqies li grad ta’ baċellerat jieħu mill-inqas tliet snin biex jitlesta, il-perijodu rilevanti ta’ esperjenza professjonali meħtieġa jenħtieġ li jkun ta’ tliet snin. It-tul ta’ dak il-perijodu huwa ġġustifikat ukoll minħabba fil-pass mgħaġġel tal-evoluzzjoni teknoloġika fis-settur tal-ICT u l-ħtiġijiet li qed jinbidlu tal-impjegaturi.

(11)

L-Istati Membri huma mħeġġa jiffaċilitaw il-valutazzjoni u l-validazzjoni ta’ ħiliet professjonali ogħla għall-finijiet tal-Karta Blu tal-UE.

(12)

Huwa previst li l-lista ta’ professjonijiet stabbilita f’anness għal din id-Direttiva tista’ tiġi emendata, b’mod partikolari wara valutazzjonijiet mill-Kummissjoni biex jiġi stabbilit jekk isirx dan, abbażi ta’, fost sorsi oħra, l-informazzjoni pprovduta mill-Istati Membri rigward il-ħtiġijiet tas-swieq tax-xogħol tagħhom, għall-fini tar-rikonoxximent tal-esperjenza professjonali skont din id-Direttiva f’oqsma oħra ta’ attività. Jenħtieġ li l-Kummissjoni twettaq tali valutazzjonijiet kull sentejn.

(13)

Għal professjonijiet mhux elenkati fl-anness, jenħtieġ li jkun possibbli għall-Istati Membri li jaċċettaw applikazzjonijiet għal Karta Blu tal-UE abbażi ta’ evidenza ta’ ħiliet professjonali ogħla, attestati b’mill-inqas ħames snin ta’ esperjenza professjonali f’livell komparabbli ma’ kwalifiki ta’ edukazzjoni għolja u li hija rilevanti għall-professjoni jew settur speċifikat fil-kuntratt tax-xogħol jew fl-offerta vinkolanti ta’ impjieg.

(14)

Il-kunċett ta’ impjieg bi kwalifiki għoljin jirrikjedi li l-persuna impjegata mhux biss ikollha livell għoli ta’ kompetenza, kif evidenzjat minn kwalifiki professjonali għolja, iżda wkoll li x-xogħol li ser jitwettaq ikun b’mod inerenti meqjus li jirrikjedi tali kompetenza. Filwaqt li fis-suq tax-xogħol modern mhijiex dejjem u neċessarjament meħtieġa rabta diretta bejn il-kwalifiki u l-impjieg, il-kompiti u d-dmirijiet relatati mal-kuntratt tax-xogħol għal impjieg bi kwalifiki għoljin jenħtieġ li jkunu tant speċjalizzati u kumplessi li l-livell meħtieġ ta’ kompetenza għat-twettiq ta’ dawk id-dmirijiet ikun normalment assoċjat mat-tlestija ta’ programmi edukattivi u l-kwalifiki li jirriżultaw fil-livelli 6, 7 u 8 tal- Klassifikazzjoni Standard Internazzjonali tal-Edukazzjoni (ISCED) tal-2011, jew, fejn xieraq, mal-livelli 6, 7 u 8 tal-Qafas Ewropew tal-Kwalifiki (QEK) li huma ġeneralment ekwivalenti, f’konformità mal-liġi tal-Istat Membru kkonċernat, jew, għal professjonijiet speċifiċi, ma’ ħiliet professjonali ogħla komparabbli.

(15)

Jenħtieġ li din id-Direttiva ma taffettwax id-dritt tal-Istati Membri li jiddeterminaw il-volumi ta’ ammissjoni taċ-ċittadini ta’ pajjiżi terzi li jaslu fit-territorju tagħhom minn pajjiżi terzi sabiex ifittxu xogħol f’konformità mal-Artikolu 79(5) tat-Trattat dwar il-Funzjonament tal-Unjoni Ewropea (TFUE). Abbażi ta’ dan, jenħtieġ li l-Istati Membri jkunu jistgħu jew iqisu applikazzjoni għal Karta Blu tal-UE bħala inammissibbli jew inkella jiċħduha.

(16)

Il-benefiċjarji ta’ protezzjoni internazzjonali kif definit fl-Artikolu 2, punt (a), tad-Direttiva 2011/95/UE tal-Parlament Ewropew u tal-Kunsill (8) għandhom sett wiesa’ ta’ drittijiet, inkluż aċċess għas-suq tax-xogħol fl-Istat Membru li jkun tahom il-protezzjoni internazzjonali. Sabiex itejbu l-opportunitajiet tagħhom fis-suq tax-xogħol madwar l-Unjoni, jenħtieġ li l-benefiċjarji ta’ protezzjoni internazzjonali bi kwalifiki għoljin ikunu intitolati japplikaw għal Karta Blu tal-UE fi Stati Membri għajr dak li jkun tahom il-protezzjoni internazzjonali. F’dawk l-Istati Membri l-oħra, jenħtieġ li dawn ikunu soġġetti għall-istess regoli bħal kwalunkwe ċittadin ieħor ta’ pajjiż terz li jaqa’ fil-kamp ta’ applikazzjoni ta’ din id-Direttiva, u jenħtieġ li din id-Direttiva ma jkollha ebda impatt fuq l-istatus tagħhom fl-Istat Membru li jkun tahom il-protezzjoni internazzjonali. Il-benefiċjarji ta’ protezzjoni internazzjonali huma intitolati wkoll li japplikaw għal Karta Blu tal-UE fl-Istat Membru li tahom protezzjoni internazzjonali. F’każijiet bħal dawn, għal raġunijiet ta’ ċarezza legali u koerenza, jenħtieġ li d-dispożizzjonijiet ta’ din id-Direttiva dwar it-trattament indaqs u r-riunifikazzjoni tal-familja ma japplikawx. Jenħtieġ li dawk id-drittijiet jibqgħu regolati skont l-acquis dwar l-ażil u, fejn applikabbli, skont id-Direttiva tal-Kunsill 2003/86/KE (9).

(17)

It-trasferiment tar-responsabbiltà għall-benefiċjarji ta’ protezzjoni internazzjonali huwa barra l-kamp ta’ applikazzjoni ta’ din id-Direttiva. Jenħtieġ li l-istatus ta’ protezzjoni u d-drittijiet assoċjati mal-protezzjoni internazzjonali ma jiġux ittrasferiti lil Stat Membru ieħor abbażi tal-ħruġ ta’ Karta Blu tal-UE.

(18)

Sabiex jiġu ffaċilitati l-attivitajiet indipendenti kummerċjali u ta’ mobbiltà ġewwa l-UE ta’ ċittadini ta’ pajjiżi terzi bi kwalifiki għoljin li huma benefiċjarji tad-dritt għal moviment liberu, jenħtieġ li dawn iċ-ċittadini ta’ pajjiżi terzi jingħataw aċċess għall-Karta Blu tal-UE f’konformità mal-istess regoli bħal kwalunkwe ċittadin ieħor ta’ pajjiż terz li jaqa’ fil-kamp ta’ applikazzjoni ta’ din id-Direttiva. Dan l-intitolament jikkonċerna persuni li jgawdu minn drittijiet għal moviment liberu abbażi ta’ rbit familjari ma’ ċittadin tal-Unjoni f’konformità mal-leġiżlazzjoni rilevanti u jenħtieġ li japplika irrispettivament minn jekk iċ-ċittadin ta’ referenza tal-Unjoni jkunx eżerċita d-dritt fundamentali li jiċċaqlaq u jirrisjedi liberament skont l-Artikolu 21 TFUE u irrispettivament minn jekk iċ-ċittadin ta’ pajjiż terz ikkonċernat kienx l-ewwel detentur ta’ Karta Blu tal-UE jew inkella benefiċjarju tad-dritt għal moviment liberu. Għaldaqstant, jenħtieġ li tali detenturi tal-Karta Blu tal-UE jkunu intitolati jidħlu għal impjieg bi kwalifiki għoljin, jagħmlu vjaġġi fuq xogħol u jistabbilixxu r-residenza tagħhom fi Stati Membri differenti irrispettivament minn jekk iċ-ċittadin ta’ pajjiż terz jakkumpanjax liċ-ċittadin ta’ referenza tal-Unjoni jew le. Jenħtieġ li d-drittijiet li dawn iċ-ċittadini ta’ pajjiżi terzi jiksbu bħala detenturi ta’ Karta Blu tal-UE jkunu mingħajr preġudizzju għad-drittijiet li jistgħu jgawdu skont id-Direttiva 2004/38/KE tal-Parlament Ewropew u tal-Kunsill (10). Għal raġunijiet ta’ ċarezza u koerenza legali, f’termini ta’ riunifikazzjoni tal-familja u trattament indaqs, jenħtieġ li jipprevalu r-regoli tad-Direttiva 2004/38/KE. Id-dispożizzjonijiet kollha f’din id-Direttiva li jirrigwardaw lill-benefiċjarji tad-dritt għal moviment liberu jenħtieġ li japplikaw ukoll għaċ-ċittadini ta’ pajjiżi terzi li jgawdu drittijiet ta’ moviment liberu ekwivalenti għal dawk taċ-ċittadini tal-Unjoni skont ftehimiet jew bejn l-Unjoni u l-Istati Membri tagħha min-naħa waħda, u pajjiżi terzi min-naħa l-oħra, jew bejn l-Unjoni u pajjiżi terzi.

(19)

Jenħtieġ li din id-Direttiva ma tapplikax għal ċittadini ta’ pajjiżi terzi li japplikaw għal residenza fi Stat Membru bħala riċerkaturi sabiex iwettqu proġetti ta’ riċerka, billi dawn jaqgħu fil-kamp ta’ applikazzjoni tad-Direttiva (UE) 2016/801 tal-Parlament Ewropew u tal-Kunsill (11), li introduċiet proċedura speċifika għall-ammissjoni ta’ ċittadini ta’ pajjiżi terzi għall-fini ta’ riċerka. Madankollu, ċittadini ta’ pajjiżi terzi residenti legalment ammessi skont id-Direttiva (UE) 2016/801 jenħtieġ li jkunu intitolati japplikaw għal Karta Blu tal-UE skont din id-Direttiva. Id-detenturi ta’ Karta Blu tal-UE li jirrisjedu legalment jenħtieġ ukoll li jkunu intitolati japplikaw biex jirrisjedu bħala riċerkaturi skont id-Direttiva (UE) 2016/801. Sabiex tiġi żgurata tali possibbiltà, id-Direttiva (UE) 2016/801 jenħtieġ li tiġi emendata kif xieraq.

(20)

Minkejja li din id-Direttiva ma tapplikax għal ċittadini ta’ pajjiżi terzi li japplikaw biex ikunu ammessi fl-Unjoni bħala ħaddiema bi trasferiment intraazjendali skont id-Direttiva 2014/66/UE tal-Parlament Ewropew u tal-Kunsill (12), jenħtieġ li ħaddiema bi trasferiment intraazjendali li jirrisjedu legalment fl-Unjoni jkunu intitolati li japplikaw għal Karta Blu tal-UE skont din id-Direttiva għal finijiet oħrajn għajr dawk koperti mid-Direttiva 2014/66/UE.

(21)

Huwa neċessarju li tiġi prevista sistema ta’ ammissjoni flessibbli, li tkun immexxija mid-domanda, li tkun ċara u bbilanċjata li tkun ibbażata fuq kriterji oġġettivi, bħal li l-applikant ikollu kuntratt ta’ xogħol jew offerta vinkolanti ta’ impjieg b’tul ta’ mill-inqas sitt xhur, konformità mal-liġi, ftehimiet kollettivi jew prattiki nazzjonali applikabbli fil-fergħat rilevanti relatati max-xogħol, limitu ta’ salarju adattabbli mill-Istati Membri għas-sitwazzjoni fis-suq tax-xogħol tiegħu u li l-applikant ikollu kwalifiki professjonali ogħla jew, fejn xieraq, ħiliet professjonali ogħla.

(22)

Din id-Direttiva jenħtieġ li tkun mingħajr preġudizzju għall-proċeduri nazzjonali dwar ir-rikonoxximent ta’ diplomi. Sabiex jiġi evalwat jekk iċ-ċittadin ta’ pajjiż terz ikkonċernat għandux kwalifiki ta’ edukazzjoni ogħla jew kwalifiki ekwivalenti, jenħtieġ li ssir referenza għal-livelli 6, 7 u 8 tal-ISCED tal-2011 jew, fejn xieraq, għal-livelli 6, 7 u 8 ġeneralment ekwivalenti tal-QEK, f’konformità mal-liġi tal-Istat Membru kkonċernat.

(23)

L-Istati Membri huma mħeġġa jiffaċilitaw ir-rikonoxximent ta’ dokumenti li jiċċertifikaw il-kwalifiki professjonali ogħla rilevanti taċ-ċittadin ta’ pajjiż terz ikkonċernat u, fir-rigward tal-benefiċjarji tal-protezzjoni internazzjonali li jista’ ma jkollhomx id-dokumenti neċessarji, biex jistabbilixxu arranġamenti għall-valutazzjoni u validazzjoni xierqa tal-kwalifiki preċedenti tagħhom ta’ edukazzjoni għolja jew, fejn rilevanti, tal-ħiliet professjonali ogħla tagħhom.

(24)

Sabiex jiġi żgurat livell suffiċjenti ta’ armonizzazzjoni tal-kondizzjonijiet ta’ ammissjoni fl-Unjoni kollha, jenħtieġ li jiġi ddeterminat fattur inferjuri u superjuri għal-limitu tas-salarju. Il-limiti, kemm dak inferjuri kif ukoll dak superjuri, għall-istabbiliment tal-limitu tas-salarju nazzjonali jenħtieġ li jiġu ddeterminati billi jiġu mmultiplikati dawk il-fatturi inferjuri u superjuri bis-salarju gross annwali medju fl-Istat Membru kkonċernat. Jenħtieġ li jintgħażel limitu tas-salarju fil-firxa tal-limiti, kemm dak inferjuri kif ukoll dak superjuri, wara konsultazzjoni mas-sħab soċjali f’konformità mal-prattiki nazzjonali. Jenħtieġ li dak il-limitu tas-salarju jistabbilixxi s-salarju minimu li għandu jaqla’ detentur ta’ Karta Blu tal-UE. Għalhekk, sabiex tinkiseb Karta Blu tal-UE, jenħtieġ li l-applikanti jaqilgħu salarju li jkun daqs il-limitu tas-salarju magħżul mill-Istat Membru kkonċernat, jew aktar minnu.

(25)

Jenħtieġ li l-Istati Membri jkunu jistgħu jipprovdu limitu inferjuri tas-salarju għal professjonijiet speċifiċi fejn l-Istat Membru kkonċernat iqis li hemm nuqqas partikolari ta’ ħaddiema disponibbli u fejn tali professjonijiet ikunu jappartjenu għall-grupp ewlieni 1 jew 2 tal-klassifika ISCO. Fi kwalunkwe każ, tali limitu tas-salarju jenħtieġ li ma jkunx inqas minn 1,0 darbiet tas-salarju annwali gross medju fl-Istat Membru kkonċernat.

(26)

F’konformità mal-prijoritajiet tal-Aġenda Ġdida għall-Ħiliet għall-Ewropa, stabbilita fil-komunikazzjoni tal-Kummissjoni tal-10 ta’ Ġunju 2016, b’mod partikolari biex jitjieb it-tlaqqigħ tal-ħiliet u biex jiġi indirizzat in-nuqqas ta’ ħiliet, l-Istati Membri huma mħeġġa, fejn xieraq, wara li jikkonsultaw lis-sħab soċjali, li jikkompilaw listi ta’ setturi tal-impjiegi li jiffaċċaw nuqqas ta’ ħaddiema bi kwalifiki għoljin.

(27)

Jenħtieġ li l-Istati Membri jkunu jistgħu jipprevedu limitu inferjuri tas-salarju sabiex minnu jibbenifikaw iċ-ċittadini ta’ pajjiżi terzi matul ċertu perijodu wara li jiggradwaw. Dak il-perijodu jenħtieġ li japplika kull darba li ċ-ċittadin ta’ pajjiż terz jilħaq livell ta’ edukazzjoni rilevanti għall-finijiet ta’ din id-Direttiva, jiġifieri l-livell 6, 7 jew 8 tal-ISCED 2011, jew fejn xieraq, il-livell 6, 7 jew 8 tal-QEK, f’konformità mal-liġi tal-Istat Membru kkonċernat. Dak il-perijodu enħtieġ li japplika kull fejn iċ-ċittadin ta’ pajjiż terz japplika għal Karta Blu tal-UE inizjali jew tiġdid fi żmien tliet snin mid-data tal-kisba tal-kwalifiki rilevanti u, barra minn hekk, fejn dak iċ-ċittadin ta’ pajjiż terz japplika għat-tiġdid ta’ Karta Blu tal-UE fi żmien 24 xahar mill-ħruġ tal-Karta Blu tal-UE inizjali. Wara li jgħaddu dawk il-perijodi ta’ konċessjoni, li jistgħu jiddekorru b’mod parallel, il-professjonisti żgħażagħ jistgħu jkunu mistennija b’mod raġonevoli li jkunu kisbu biżżejjed esperjenza professjonali sabiex jissodisfaw il-limitu tas-salarju regolari. Fi kwalunkwe każ, tali limitu tas-salarju infejuri jenħtieġ li ma jkunx inqas minn 1,0 darbiet tas-salarju annwali gross medju fl-Istat Membru kkonċernat.

(28)

Jenħtieġ li jiġu definiti l-kondizzjonijiet tad-dħul u tar-residenza taċ-ċittadini ta’ pajjiżi terzi għall-fini ta’ impjieg bi kwalifiki għoljin, inkluż il-kriterji tal-eliġibbiltà marbuta ma’ limitu tas-salarju. Jenħtieġ li l-limitu tas-salarju stabbilit mill-Istat Membru ma jkollux l-għan li jiddetermina s-salarji u għaldaqstant jenħtieġ li ma jidderogax mir-regoli jew mill-prattiki fil-livell tal-Istati Membri jew minn ftehimiet kollettivi, u jenħtieġ li ma jintużax sabiex jikkostitwixxi xi tip ta’ armonizzazzjoni f’dak il-qasam. Jenħtieġ li s-salarju mħallas lid-detentur tal-Karta Blu tal-UE ma jkunx inqas mil-limitu tas-salarju applikabbli iżda jista’ jkun ogħla, kif miftiehem bejn l-impjegatur u ċ-ċittadin ta’ pajjiż terz, f’konformità mal-kondizzjonijiet tas-suq, il-liġi tax-xogħol, ftehimiet kollettivi u l-prattiki fl-Istat Membru kkonċernat. Jenħtieġ li din id-Direttiva tirrispetta b’mod sħiħ il-kompetenzi tal-Istati Membri, b’mod partikolari fir-rigward tal-impjiegi, ix-xogħol u kwistjonijiet soċjali.

(29)

Jenħtieġ li l-Istati Membri jkunu jistgħu jirrikjedu li ċ-ċittadin ta’ pajjiż terz jipprovdi l-indirizz tiegħu fil-mument tal-applikazzjoni. F’każ li ċ-ċittadin ta’ pajjiż terz ikun għadu ma jafx l-indirizz futur tiegħu, jenħtieġ li l-Istati Membri jaċċettaw indirizz temporanju, li jista’ jkun l-indirizz tal-impjegatur.

(30)

Jenħtieġ li l-perijodu ta’ validità tal-Karta Blu tal-UE jkun ta’ mill-inqas 24 xahar. Madankollu, fejn it-tul tal-kuntratt tax-xogħol ikun iqsar, il-Karta Blu tal-UE jenħtieġ li tinħareġ għal mill-inqas it-tul tal-kuntratt tax-xogħol u tliet xhur fuqu, soġġett għal massimu ta’ 24 xahar. Jekk iċ-ċittadin ta’ pajjiż terz ikollu dokument tal-ivvjaġġar li l-perijodu ta’ validità tiegħu jkun iqsar minn 24 xahar jew iqsar mid-durata tal-kuntratt tax-xogħol, il-Karta Blu tal-UE jenħtieġ li tinħareġ tal-inqas għall-perijodu ta’ validità tad-dokument tal-ivvjaġġar. Iċ-ċittadini ta’ pajjiżi terzi jenħtieġ li jitħallew iġeddu d-dokument tal-ivvjaġġar tagħhom waqt li jkollhom Karta Blu tal-UE.

(31)

Jenħtieġ li l-Istati Membri jiċħdu l-applikazzjonijiet għal Karti Blu tal-UE u jenħtieġ li jkunu jistgħu jirtiraw jew jirrifjutaw li jġeddu Karti Blu tal-UE fejn ikun hemm theddida għall-ordni pubbliku, is-sigurtà pubblika jew is-saħħa pubblika. Theddida għas-saħħa pubblika trid tinftiehem bil-mod li bih dak it-terminu huwa definit fl-Artikolu 2, punt 21, tar-Regolament (UE) 2016/399 tal-Parlament Ewropew u tal-Kunsill (13). Jenħtieġ li kwalunkwe ċaħda ta’ applikazzjoni għal raġunijiet ta’ ordni pubbliku jew sigurtà pubblika jkun ibbażat fuq l-imġiba individwali tal-persuna kkonċernata, f’konformità mal-prinċipju ta’ proporzjonalità. Jenħtieġ li mard jew diżabbiltà mġarrba wara li ċ-ċittadin ta’ pajjiż terz ikun ġie ammess fit-territorju tal-ewwel Stat Membru ma jikkostitwixxux ir-raġuni waħdanija għall-irtirar jew għar-rifjut tat-tiġdid ta’ Karta Blu tal-UE jew sabiex ma tinħariġx Karta Blu tal-UE fit-tieni Stat Membru. Barra minn hekk, jenħtieġ li l-Istati Membri jkollhom il-possibbiltà li ma jirtirawx jew ma jirrifjutawx li jġeddu Karta Blu tal-UE fejn l-obbligu li jiġi ppreżentat kuntratt tax-xogħol validu jew li jintlaħaq il-limitu applikabbli tas-salarju ma jiġux issodisfati temporanjament minħabba mard, diżabbiltà jew liv tal-ġenituri.

(32)

Jenħtieġ li l-Istati Membri jkunu jistgħu jirtiraw jew jirrifjutaw li jġeddu Karta Blu tal-UE meta d-detentur ta’ Karta Blu tal-UE jkun naqas milli jikkonforma mal-kondizzjonijiet għall-mobbiltà skont din id-Direttiva, inkluż f’każijiet ta’ użu abbużiv tad-drittijiet ta’ mobbiltà, pereżempju meta d-detentur ma jkunx irrispetta l-perijodu permess għat-twettiq ta’ attività ta’ negozju, ma jkunx ippreżenta applikazzjoni għal mobbiltà fit-tul fil-perijodu ta’ żmien mitlub fit-tieni Stat Membru, jew ikun applika għal Karta Blu tal-UE fit-tieni Stat Membru u beda l-impjieg qabel ma jkun permess meta kien ċar li l-kondizzjonijiet għall-mobbiltà ma kinux ser jiġu ssodisfati u l-applikazzjoni tkun ġiet miċħuda.

(33)

Kwalunkwe deċiżjoni li tiċħad applikazzjoni għal Karta Blu tal-UE jew li tirtira jew tirrifjuta li tiġi mġedda Karta Blu tal-UE jenħtieġ li tqis iċ-ċirkostanzi speċifiċi tal-każ u jenħtieġ li tkun proporzjonata. B’mod partikolari, fejn ir-raġuni għaċ-ċaħda, irtirar jew rifjut ta’ tiġdid tkun relatata mal-imġiba tal-impjegatur, l-imġiba ħażina minuri tal-impjegatur jenħtieġ li f’ebda każ ma tikkostitwixxi l-unika raġuni għaċ-ċaħda ta’ applikazzjoni għal Karta Blu tal-UE jew għall-irtirar jew ir-rifjut tat-tiġdid tal-Karta Blu tal-UE.

(34)

Deċiżjoni li tiċħad applikazzjoni għal Karta Blu tal-UE ma taffettwax id-dritt taċ-ċittadin ta’ pajjiż terz ikkonċernat milli jippreżenta applikazzjoni oħra. Il-preżentazzjoni ta’ tali applikazzjoni ġdida ma tawtorizzax liċ-ċittadin ta’ pajjiż terz ikkonċernat li jibqa’ fit-territorju tal-Istat Membru kkonċernat, ħlief meta jkun previst mil-liġi nazzjonali.

(35)

Ladarba jiġu ssodisfati l-kondizzjonijiet kollha għall-ammissjoni, jenħtieġ li l-Istati Membri joħorġu Karta Blu tal-UE f’limitu ta’ żmien speċifikat. Jekk Stat Membru joħroġ il-permessi ta’ residenza fit-territorju tiegħu biss u l-kondizzjonijiet kollha ta’ din id-Direttiva b’rabta mal-ammissjoni jiġu ssodisfati, jenħtieġ li l-Istat Membru jagħti l-viża meħtieġa liċ-ċittadin ta’ pajjiż terz ikkonċernat. Jenħtieġ li jiġi żgurat li l-awtoritajiet kompetenti jikkooperaw b’mod effettiv għal dak l-għan. F’każ li l-Istat Membru ma joħroġx viżi, jenħtieġ li jagħti liċ-ċittadin ta’ pajjiż terz ikkonċernat permess ekwivalenti li jippermetti d-dħul.

(36)

Jenħtieġ li r-regoli dwar il-ħinijiet tal-ipproċessar għall-applikazzjonijiet għal Karta Blu tal-UE jiggarantixxu l-ħruġ malajr tal-permessi fil-każijiet kollha. Jenħtieġ li l-ħin tal-ipproċessar għall-eżaminazzjoni ta’ applikazzjoni għal Karta Blu tal-UE ma jinkludix il-ħin meħtieġ għar-rikonoxximent tal-kwalifiki professjonali, fejn applikabbli, jew il-ħin meħtieġ għall-ħruġ ta’ viża, jekk ikun meħtieġ. F’każ li Karta Blu tal-UE tiskadi matul il-proċedura ta’ tiġdid, jenħtieġ li ċ-ċittadin ta’ pajjiż terz ikun intitolat li jibqa’, jaħdem u jgawdi d-drittijiet previsti taħt din id-Direttiva fit-territorju tal-Istat Membru li jkun ħareġ il-Karta Blu tal-UE, sakemm tittieħed id-deċiżjoni dwar l-applikazzjoni mill-awtoritajiet kompetenti, iżda jenħtieġ li dak iċ-ċittadin ta’ pajjiż terz ma jkollux id-dritt li jiċċaqlaq lejn it-tieni Stat Membru.

(37)

Meta Stat Membru jkun iddetermina li applikazzjoni għal Karta Blu tal-UE jew għal mobbiltà intra-UE trid issir mill-impjegatur, jenħtieġ li dak l-Istat Membru ma jirrestrinġix is-salvagwardji proċedurali li jgawdi ċ-ċittadin ta’ pajjiż terz ikkonċernat matul il-proċedura ta’ applikazzjoni jew id-drittijiet li jgawdi d-detentur tal-Karta Blu tal-UE matul il-perijodu ta’ impjieg jew il-proċedura ta’ tiġdid tal-Karta Blu tal-UE.

(38)

Jenħtieġ li l-format tal-Karta Blu tal-UE jkun konformi mar-Regolament tal-Kunsill (KE) Nru 1030/2002 (14), biex b’hekk l-Istati Membri jkunu jistgħu jirreferu għall-informazzjoni dwar il-kondizzjonijiet li taħthom il-persuna kkonċernata jkollha permess li taħdem. Jenħtieġ li l-Istati Membri jkunu jistgħu jipprovdu informazzjoni addizzjonali f’forma stampata jew jaħżnu tali informazzjoni f’forma elettronika f’konformità mal-Artikolu 4 ta’ dak ir-Regolament u l-punt (a)16 tal-Anness għal dak ir-Regolament, sabiex ikunu jistgħu jagħtu aktar informazzjoni preċiża dwar l-attività tal-impjieg ikkonċernata. Jenħtieġ li l-għoti ta’ tali informazzjoni addizzjonali tkun fakultattiva għall-Istati Membri u jenħtieġ li ma jkunx rekwiżit addizzjonali li jikkomprometti l-permess uniku u l-proċedura ta’ applikazzjoni unika.

(39)

Jenħtieġ li l-Istat Membru kkonċernat jiżgura li l-applikanti jkollhom id-dritt li jikkontestaw, quddiem qorti jew tribunal, kwalunkwe deċiżjoni li tiċħad applikazzjoni għal Karta Blu tal-UE jew kwalunkwe deċiżjoni ta’ rifjut ta’ tiġdid jew irtirar ta’ Karta Blu tal-UE. Jenħtieġ li dan ikun mingħajr preġudizzju għall-possibbiltà li tinħatar awtorità amministrattiva biex twettaq stħarriġ amministrattiv preliminari ta’ tali deċiżjonijiet.

(40)

Peress li din id-Direttiva għandha l-għan li tindirizza n-nuqqasijiet ta’ ħaddiema u ta’ ħiliet fis-swieq tax-xogħol, jenħtieġ li Stat Membru jkun jista’ jivverifika jekk pożizzjoni vakanti li applikant għal Karta Blu jkollu l-intenzjoni li jimla, tistax minflok timtela minn membru tal-forza tax-xogħol nazzjonali jew tal-Unjoni, jew minn ċittadini ta’ pajjiżi terzi li diġà jinsabu residenti legalment f’dak l-Istat Membru u li diġà jifformaw parti mis-suq tax-xogħol tiegħu bis-saħħa tal-liġi tal-Unjoni jew dik nazzjonali, jew minn residenti għal żmien twil fl-UE li jixtiequ jiċċaqalqu lejn dak l-Istat Membru għal impjieg bi kwalifiki għoljin f’konformità mal-Kapitolu III tad-Direttiva tal-Kunsill 2003/109/KE (15). F’każ li l-Istati Membri jiddeċiedu li jagħmlu użu minn dik il-possibbiltà, jenħtieġ li jikkomunikaw dan b’mod ċar, aċċessibbli u trasparenti lill-applikanti u lill-impjegaturi, inkluż permezz ta’ media online. Jenħtieġ li tali kontrolli ma jkunux parti mill-proċedura ta’ tiġdid tal-Karta Blu tal-UE. F’każijiet ta’ mobbiltà fit-tul, jenħtieġ li Stat Membru jkun jista’ biss iqis is-sitwazzjoni tas-suq tax-xogħol jekk dak l-Istat Membru jkun introduċa wkoll kontrolli għall-applikanti li jkunu ġejjin minn pajjiżi terzi.

(41)

Fl-implimentazzjoni ta’ din id-Direttiva, jenħtieġ li l-Istati Membri joqogħdu lura milli jwettqu reklutaġġ attiv f’setturi li qed ibatu minn nuqqas ta’ persunal fil-pajjiżi li qed jiżviluppaw. Jenħtieġ li jiġu żviluppati linji politiċi u prinċipji etiċi ta’ reklutaġġ li japplikaw għall-impjegaturi fis-settur pubbliku u f’dak privat f’setturi ewlenin, pereżempju fis-settur tas-saħħa. Dan huwa konsistenti mal-impenn tal-Unjoni għall-Kodiċi Globali dwar ir-Reklutaġġ Internazzjonali tal-Persunal tas-Saħħa tal-2010 tal-Organizzazzjoni Dinjija tas-Saħħa, kif ukoll mal-konklużjonijiet tal-Kunsill u tal-Istati Membri tal-14 ta’ Mejju 2007 dwar il-Programm Ewropew għal Azzjoni biex jiġi indirizzat in-nuqqas kritiku ta’ ħaddiema tas-saħħa fil-pajjiżi li qed jiżviluppaw (2007–2013) u għas-settur tal-edukazzjoni. Huwa xieraq li dawk il-prinċipji u linji politiċi jiġu msaħħa permezz tal-iżvilupp u l-applikazzjoni ta’ mekkaniżmi, linji gwida u għodod oħrajn maħsuba biex jiffaċilitaw, kif xieraq, il-migrazzjoni ċirkolari u temporanja, kif ukoll miżuri oħrajn li jkunu jnaqqsu l-impatt negattiv, u jżidu l-impatt pożittiv, tal-immigrazzjoni bi kwalifiki għoljin fuq il-pajjiżi li qed jiżviluppaw sabiex l-eżodu ta’ mħuħ jinbidel f’kisba ta’ mħuħ.

(42)

Jenħtieġ li l-Istati Membri jkollhom l-għażla li japplikaw proċedura ssimplifikata għall-impjegaturi. Jenħtieġ li dik il-proċedura tippermetti lil impjegaturi rikonoxxuti li jieħdu vantaġġ minn proċeduri u kondizzjonijiet ta’ dħul aktar sempliċi taħt din id-Direttiva. Madankollu, l-Istati Membri jenħtieġ li jinkludu biżżejjed salvagwardji kontra l-abbuż. F’konformità mal-prinċipju ta’ proporzjonalità, dawk is-salvagwardji jridu jieħdu kont tal-gravità u n-natura tal-imġiba ħażina. Jekk, fil-mument tat-tiġdid ta’ Karta Blu tal-UE, l-impjegatur ma jkunx għadu rikonoxxut, jenħtieġ li japplikaw il-kondizzjonijiet ta’ ammissjoni regolari għat-tiġdid ta’ dik il-Karta Blu tal-UE, sakemm iċ-ċittadin ta’ pajjiż terz ikkonċernat ma jkunx impjegat minn impjegatur rikonoxxut ieħor.

(43)

Sabiex jiġi żgurat li l-kriterji għall-ammissjoni jkomplu jiġu ssodisfati, jenħtieġ li l-Istati Membri jitħallew jirrikjedu li, matul l-ewwel 12-il xahar ta’ impjieg legali bħala detentur ta’ Karta Blu tal-UE, kwalunkwe bidla fl-impjegatur jew bidliet sinifikanti oħra jiġu kkomunikati lill-awtoritajiet kompetenti u li l-awtoritajiet kompetenti jwettqu verifika tas-sitwazzjoni tas-suq tax-xogħol. Wara dak il-perijodu ta’ 12-il xahar, jenħtieġ li l-Istati Membri jkunu jistgħu jirrikjedu biss lid-detentur tal-Karta Blu tal-UE li jgħarraf lill-awtoritajiet kompetenti ta’ bidla tal-impjegatur jew bidla li taffettwa l-issodisfar tal-kriterji għall-ammissjoni stabbiliti f’ din id-Direttiva, inkluż, fejn neċessarju, il-kuntratt tax-xogħol il-ġdid. Jenħtieġ li ma jitwettaq ebda kontroll tas-sitwazzjoni tas-suq tax-xogħol. Il-valutazzjoni mwettqa mill-Istati Membri jenħtieġ li tkun limitata għall-elementi li nbidlu.

(44)

Sabiex tiġi promossa l-intraprenditorija innovattiva, jenħtieġ li l-Istati Membri jkunu jistgħu jagħtu liċ-ċittadini ta’ pajjiżi terzi ammessi taħt din id-Direttiva l-possibbiltà li jeżerċitaw impjieg indipendenti b’mod parallel mal-attività tagħhom taħt din id-Direttiva mingħajr ma dan jaffettwa d-drittijiet ta’ residenza tagħhom bħala detenturi ta’ Karta Blu tal-UE. Dan jenħtieġ li jkun mingħajr preġudizzju għall-obbligu kontinwu li jiġu ssodisfati l-kondizzjonijiet għal ammissjoni taħt din id-Direttiva, u għaldaqstant jenħtieġ li d-detentur ta’ Karta Blu tal-UE jibqa’ f’impjieg bi kwalifiki għoljin. Jenħtieġ li l-Istati Membri jkunu jistgħu jistabbilixxu l-kondizzjonijiet ta’ aċċess għall-impjieg indipendenti fil-liġi nazzjonali tagħhom. Jenħtieġ li l-Istati Membri jkunu intitolati wkoll li jillimitaw l-estensjoni tal-impjieg indipendenti permess. L-Istati Membri jenħtieġ li jagħtu aċċess lid-detenturi tal-Karta Blu tal-UE għal attivitajiet ta’ persuni b’impjieg indipendenti taħt kondizzjonijiet li ma jkunux inqas favorevoli minn dawk previsti taħt skemi nazzjonali eżistenti. Kwalunkwe dħul li ġej minn impjieg indipendenti jenħtieġ li ma jikkontribwixxix lejn l-ilħuq tal-limitu tas-salarju meħtieġ biex wieħed jikkwalifika bħala detentur ta’ Karta Blu tal-UE.

(45)

Bl-għan li jissaħħaħ il-kontribut tad-detentur ta’ Karta Blu tal-UE permezz tal-kwalifiki professjonali għoljin tiegħu, jenħtieġ li l-Istati Membri jkunu jistgħu wkoll jistabbilixxu dispożizzjonijiet fil-liġi nazzjonali tagħhom li jippermettu lid-detenturi ta’ Karta Blu tal-UE jinvolvu ruħhom f’attivitajiet professjonali oħrajn li huma komplementari għall-attività prinċipali tagħhom bħala detenturi ta’ Karta Blu tal-UE. Kwalunkwe dħul li ġej minn dawk l-attivitajiet professjonali jenħtieġ li ma jikkontribwixxix lejn l-ilħuq tal-limitu tas-salarju meħtieġ biex wieħed jikkwalifika bħala detentur ta’ Karta Blu tal-UE.

(46)

Jenħtieġ li jingħata trattament ugwali lid-detenturi ta’ Karta Blu tal-UE fir-rigward tal-fergħat tas-sigurtà soċjali elenkati fl-Artikolu 3 tar-Regolament (KE) Nru 883/2004 tal-Parlament Ewropew u tal-Kunsill (16). Din id-Direttiva ma tarmonizzax il-leġiżlazzjoni dwar is-sigurtà soċjali tal-Istati Membri. Hija limitata għall-applikazzjoni tal-prinċipju ta’ trattament ugwali fil-qasam tas-sigurtà soċjali għaċ-ċittadini ta’ pajjiżi terzi li jaqgħu fil-kamp ta’ applikazzjoni tagħha.

(47)

Fil-każ ta’ mobbiltà bejn l-Istati Membri, japplika r-Regolament (UE) Nru 1231/2010 tal-Parlament Ewropew u tal-Kunsill (17). Jenħtieġ li din id-Direttiva ma tagħtix aktar drittijiet lid-detentur mobbli ta’ Karta Blu tal-UE minn dawk diġà previsti fil-liġi tal-Unjoni eżistenti fil-qasam tas-sigurtà soċjali għaċ-ċittadini ta’ pajjiżi terzi li għandhom interessi transkonfinali bejn l-Istati Membri.

(48)

Jenħtieġ li l-kwalifiki professjonali miksubin minn ċittadin ta’ pajjiż terz fi Stat Membru ieħor jiġu rikonoxxuti bl-istess mod kif isir għaċ-ċittadini tal-Unjoni. Il-kwalifiki miksubin f’pajjiż terz jenħtieġ li jiġu kkunsidrati b’konformità mad-Direttiva 2005/36/KE tal-Parlament Ewropew u tal-Kunsill (18). Din id-Direttiva jenħtieġ li tkun mingħajr preġudizzju għall-kondizzjonijiet stabbiliti skont il-liġi nazzjonali għall-eżerċizzju ta’ professjonijiet regolati. Jenħtieġ ukoll li dan ma jżommx Stat Membru milli jżomm restrizzjonijiet nazzjonali fuq l-aċċess għall-impjiegi li jinvolvi tal-inqas l-involviment okkażjonali fl-eżerċizzju tal-awtorità pubblika u r-responsabbiltà għas-salvagwardja tal-interess ġenerali tal-Istat, jew milli jżomm regoli nazzjonali dwar l-attivitajiet li huma riżervati għaċ-ċittadini ta’ dak l-Istat Membru, iċ-ċittadini tal-Unjoni jew iċ-ċittadini ta’ pajjiż ieħor fiż-Żona Ekonomika Ewropea (ŻEE), inkluż f’każijiet ta’ mobbiltà lejn Stati Membri oħra, fejn tali restrizzjonijiet jew regoli kienu jeżistu fiż-żmien tad-dħul fis-seħħ ta’ din id-Direttiva.

(49)

Jenħtieġ li d-drittijiet miksubin minn benefiċjarju ta’ protezzjoni internazzjonali bħala detentur ta’ Karta Blu tal-UE jkunu mingħajr preġudizzju għad-drittijiet li tgawdi dik il-persuna taħt id-Direttiva 2011/95/UE u taħt il-Konvenzjoni dwar l-Istatus tar-Refuġjati tat-28 ta’ Lulju 1951 kif emendata mill-Protokoll ta’ New York tal-31 ta’ Jannar 1967 (il-“Konvenzjoni ta’ Ġinevra”) fl-Istat Membru li ta l-protezzjoni internazzjonali. F’dak l-Istat Membru, sabiex jiġu evitati regoli konfliġġenti, jenħtieġ li d-dispożizzjonijiet ta’ din id-Direttiva dwar it-trattament indaqs u r-riunifikazzjoni tal-familja ma japplikawx. Jenħtieġ li l-persuni li huma benefiċjarji ta’ protezzjoni internazzjonali fi Stat Membru partikolari u d-detenturi ta’ Karta Blu tal-UE fi Stat Membru ieħor igawdu l-istess drittijiet bħal kwalunkwe detentur ieħor ta’ Karta Blu tal-UE fl-Istat Membru msemmi l-aħħar, inkluż l-ugwaljanza fit-trattament bħaċ-ċittadini tal-Istat Membru tar-residenza u d-drittijiet għar-riunifikazzjoni tal-familja. L-istatus ta’ benefiċjarju tal-protezzjoni internazzjonali huwa indipendenti minn jekk il-benefiċjarju huwiex ukoll detentur ta’ Karta Blu tal-UE u l-validità ta’ dik il-Karta Blu tal-UE.

(50)

Jenħtieġ li kondizzjonijiet favorevoli għar-riunifikazzjoni tal-familja u l-aċċess tal-konjuġi għax-xogħol ikunu element fundamentali ta’ din id-Direttiva sabiex jiġu attirati aktar ħaddiema bi kwalifiki għoljin minn pajjiżi terzi. Sabiex jinkiseb dak l-għan, jenħtieġ li jiġu previsti derogi speċifiċi mid-Direttiva 2003/86/KE, li hija applikabbli fl-ewwel Stat Membru ta’ residenza u fit-tieni. L-Istati Membri jenħtieġ li jkunu jistgħu jirrestrinġu l-kamp ta’ applikazzjoni tal-attivitajiet ta’ persuni b’impjieg indipendenti li l-konjuġi jistgħu jinvolvu ruħhom fihom taħt l-istess kondizzjonijiet li japplikaw għad-detenturi ta’ Karta Blu tal-UE. Jenħtieġ li l-kondizzjonijiet marbuta mal-integrazzjoni jew mal-perijodi ta’ stennija ma jiġux applikati qabel ma tkun permessa r-riunifikazzjoni tal-familja, minħabba li l-ħaddiema bi kwalifiki għoljin u l-familji tagħhom x’aktarx li jkollhom punt tat-tluq favorevoli fir-rigward tal-integrazzjoni fil-komunità ospitanti. Bl-għan li jiġi ffaċilitat id-dħul malajr tal-ħaddiema bi kwalifiki għoljin, jenħtieġ li l-permessi ta’ residenza għall-membri tal-familja tagħhom jinħarġu fl-istess żmien li tinħareġ il-Karta Blu tal-UE fejn il-kondizzjonijiet rilevanti jkunu ssodisfati u l-applikazzjonijiet ikunu saru simultanjament.

(51)

Sabiex jiġu attirati ħaddiema bi kwalifiki għoljin minn pajjiżi terzi u sabiex jiġi inkoraġġut is-soġġorn kontinwu tagħhom fl-Unjoni, filwaqt li jiġu ffaċilitati l-mobbiltà fi ħdan l-Unjoni u l-migrazzjoni ċirkolari, jenħtieġ li jiġu previsti derogi mid-Direttiva tal-Kunsill 2003/109/KE. Id-detenturi ta’ Karta Blu tal-UE li għamlu użu mill-possibbiltà li jiċċaqalqu minn Stat Membru għal Stat Membru ieħor jenħtieġ li jingħataw aċċess aktar faċli għall-istatus tal-UE ta’ resident għal żmien twil fi Stat Membru, b’mod partikolari billi jitħallew jakkumulaw perijodi ta’ residenza fi Stati Membri differenti, dment li jkunu jistgħu juru n-numru ta’ snin ta’ residenza legali u kontinwa meħtieġa skont l-Artikolu 4(1) tad-Direttiva 2003/109/KE bħala detenturi ta’ Karta Blu tal-UE, ta’ permess nazzjonali għal impjieg bi kwalifiki għoljin jew ta’ awtorizzazzjoni bħala student jew riċerkatur f’konformità mad-Direttiva (UE) 2016/801, jew bħala benefiċjarji tal-protezzjoni internazzjonali. Jenħtieġ ukoll li jagħtu prova ta’ sentejn ta’ residenza legali u kontinwa bħala detentur ta’ Karta Blu tal-UE immedjatament qabel il-preżentazzjoni tal-applikazzjoni rilevanti fit-territorju tal-Istat Membru fejn tiġi ppreżentata l-applikazzjoni għall-istatus tal-UE ta’ resident għal żmien twil fi Stat Membru. Kif previst fid-Direttiva 2003/109/KE, nofs biss tal-perijodi ta’ residenza għal skopijiet ta’ studju jistgħu jitqiesu fil-kalkolu tal-ħames snin ta’ residenza legali u kontinwa fl-Istati Membri fejn il-perijodi ta’ residenza għal skopijiet ta’ studju jitqiesu għall-kalkolu tar-residenza kontinwa.

(52)

Sabiex titrawwem il-mobbiltà tal-ħaddiema bi kwalifiki għoljin minn pajjiżi terzi bejn l-Unjoni u l-pajjiżi tal-oriġini tagħhom, jenħtieġ li jiġu previsti derogi mid-Direttiva 2003/109/KE sabiex ikunu permessi perijodi itwal ta’ assenza minn dawk previsti f’dik id-Direttiva wara li l-ħaddiema bi kwalifiki għoljin minn pajjiżi terzi jkunu kisbu l-istatus tal-UE ta’ residenti għal żmien twil fi Stat Membru.

(53)

Il-mobbiltà okkupazzjonali u ġeografika tal-ħaddiema bi kwalifiki għoljin minn pajjiżi terzi jenħtieġ li tiġi rikonoxxuta bħala fattur importanti li jikkontribwixxi għat-titjib tal-effikaċja tas-suq tax-xogħol madwar l-Unjoni, għall-indirizzar tan-nuqqas ta’ ħiliet u għat-tpaċija tal-iżbilanċi reġjonali. Jenħtieġ li l-mobbiltà fi ħdan l-Unjoni tiġi ffaċilitata.

(54)

Din id-Direttiva hija mingħajr preġudizzju għad-dispożizzjonijiet tad-Direttivi 96/71/KE (19) u 2014/67/UE (20) tal-Parlament Ewropew u tal-Kunsill.

(55)

Jenħtieġ li l-inċertezza legali eżistenti rigward vjaġġi professjonali li jsiru minn ħaddiema bi kwalifiki għoljin minn pajjiżi terzi tiġi indirizzata billi jiġi definit il-kunċett ta’ vjaġġi professjonali u tiġi stabbilita lista ta’ attivitajiet li fi kwalunkwe każ jenħtieġ li jitqiesu bħala attivitajiet kummerċjali fl-Istati Membri kollha. Dawk l-attivitajiet iridu jkunu marbuta b’mod dirett mal-interessi tal-impjegatur fl-ewwel Stat Membru u jenħtieġ li jkunu relatati mar-responsabbiltajiet tad-detentur ta’ Karta Blu tal-UE fuq ix-xogħol li għalih kienet ingħatat il-Karta Blu tal-UE. Jenħtieġ li t-tieni Stati Membri ma jkunux permessi jitolbu li d-detenturi ta’ Karta Blu tal-UE li jinvolvu ruħhom f’attivitajiet kummerċjali jkollhom viża, permess tax-xogħol jew xi awtorizzazzjoni oħra għajr il-Karta Blu tal-UE. Meta l-Karta Blu tal-UE tinħareġ minn Stat Membru li ma japplikax l-acquis ta’ Schengen b’mod sħiħ, jenħtieġ li d-detentur tagħha jkun intitolat għad-dħul u s-soġġorn fit-tieni Stat Membru, wieħed jew aktar, għall-fini ta’ attivitajiet kummerċjali sa massimu ta’ 90 jum fi kwalunkwe perijodu ta’ 180 jum.

(56)

Jenħtieġ li d-detenturi ta’ Karta Blu tal-UE jitħallew jiċċaqalqu għat-tieni Stat Membru taħt kondizzjonijiet simplifikati meta jkollhom l-intenzjoni li japplikaw għal Karta Blu tal-UE ġdida abbażi ta’ kuntratt tax-xogħol eżistenti jew offerta vinkolanti ta’ impjieg. Jenħtieġ li t-tieni Stat Membru ma jkunx permess li jitlob mingħand id-detenturi ta’ Karta Blu tal-UE xi awtorizzazzjoni oħra għajr il-Karta Blu tal-UE maħruġa mill-ewwel Stat Membru. Hekk kif detentur ta’ Karta Blu tal-UE jippreżenta applikazzjoni kompluta għal Karta Blu ġdida tal-UE fit-tieni Stat Membru fil-limitu tal-iskadenza prevista f’din id-Direttiva, jenħtieġ li jkun possibbli għal dak l-Istat Membru li jippermetti lid-detentur ta’ Karta Blu tal-UE biex jibda l-impjieg. Id-detenturi ta’ Karta Blu tal-UE jenħtieġ li jkunu intitolati li jibdew l-impjieg tagħhom mhux aktar tard minn 30 jum wara li jippreżentaw l-applikazzjoni għal Karta Blu tal-UE. Il-mobbiltà jenħtieġ li tkun immexxija mid-domanda u għalhekk jenħtieġ li dejjem ikun meħtieġ kuntratt ta’ xogħol fit-tieni Stat Membru, jenħtieġ li jiġu ssodisfati l-kondizzjonijiet kollha taħt il-liġi applikabbli, li jinsabu fi ftehimiet kollettivi jew stabbiliti bi prattiki fil-fergħat tal-oqsma okkupazzjonali rilevanti u s-salarju jenħtieġ li jilħaq il-limitu stabbilit mit-tieni Stat Membru f’konformità ma’ din id-Direttiva.

(57)

Meta d-detenturi ta’ Karta Blu tal-UE jkollhom l-intenzjoni li japplikaw għal Karta Blu tal-UE fit-tieni Stat Membru sabiex jeżerċitaw professjoni regolata, jenħtieġ li l-kwalifiki professjonali tagħhom jiġu rikonoxxuti bl-istess mod bħal dawk taċ-ċittadini tal-Unjoni li jeżerċitaw id-dritt tal-moviment liberu, f’konformità mad-Direttiva 2005/36/KE u l-liġi tal-Unjoni u dik nazzjonali oħra applikabbli.

(58)

Filwaqt li huma stabbiliti xi regoli speċjali f’din id-Direttiva rigward id-dħul u s-soġġorn fit-tieni Stat Membru għall-finijiet ta’ attivitajiet kummerċjali u ċ-ċaqliq lejn it-tieni Stat Membru għall-finijiet ta’ residenza u impjieg hemmhekk skont il-Karta Blu tal-UE fit-territorju tiegħu, japplikaw ir-regoli l-oħrajn kollha li jirregolaw il-moviment tal-persuni tul il-fruntieri kif stabbiliti fid-dispożizzjonijiet rilevanti tal-acquis ta’ Schengen.

(59)

Meta l-Karta Blu tal-UE tinħareġ minn Stat Membru li ma japplikax l-acquis ta’ Schengen b’ mod sħiħ, u d-detentur ta’ Karta Blu tal-UE, f’każijiet ta’ mobbiltà kif previst f’din id-Direttiva, jaqsam fruntiera esterna fis-sens tar-Regolament (UE) 2016/399 fit-territorju tat-tieni Stat Membru, jenħtieġ li dak l-Istat Membru jkun intitolat li jitlob evidenza li d-detentur ta’ Karta Blu tal-UE jkun qed jidħol fit-territorju tiegħu għall-fini ta’ attivitajiet kummerċjali jew ta’ residenza u impjieg hemmhekk skont il-Karta Blu tal-UE abbażi ta’ kuntratt tax-xogħol jew offerta vinkolanti ta’ impjieg. Fil-każ ta’ mobbiltà għat-twettiq ta’ attivitajiet kummerċjali, jenħtieġ li t-tieni Stat Membru jkun jista’ jitlob evidenza tal-finijiet kummerċjali tas-soġġorn, bħal stediniet, biljetti tad-dħul, jew dokumenti li jiddeskrivu l-attivitajiet kummerċjali tal-kumpannija rilevanti u l-pożizzjoni tad-detentur ta’ Karta Blu tal-UE f’dik il-kumpannija.

(60)

Meta d-detentur ta’ Karta Blu tal-UE jiċċaqlaq lejn it-tieni Stat Membru sabiex japplika għal Karta Blu tal-UE u huwa jkun akkumpanjat minn membri tal-familja, jenħtieġ li dak l-Istat Membru jkun jista’ jitlob lil dawk il-membri tal-familja biex jippreżentaw il-permessi ta’ residenza tagħhom li nħarġu fl-ewwel Stat Membru. Barra minn hekk, f’każijiet tal-qsim ta’ fruntiera esterna fis-sens tar-Regolament (UE) 2016/399, jenħtieġ li l-Istati Membri li japplikaw l-acquis ta’ Schengen b’mod sħiħ jikkonsultaw is-Sistema ta’ Informazzjoni ta’ Schengen u jenħtieġ li jirrifjutaw id-dħul lil, jew joġġezzjonaw għall-mobbiltà ta’, persuni li għalihom tkun inħarġet twissija f’dik is-sistema għall-finijiet ta’ rifjut ta’ dħul jew soġġorn, kif imsemmi fir-Regolament (KE) Nru 1987/2006 tal-Parlament Ewropew u tal-Kunsill (21)

(61)

Fejn detentur ta’ Karta Blu tal-UE jiċċaqlaq lejn it-tieni Stat Membru abbażi ta’ Karta Blu tal-UE maħruġa mill-ewwel Stat Membru u li t-tieni Stat Membru jiċħad l-applikazzjoni ta’ dak id-detentur tal-Karta Blu tal-UE għal Karta Blu tal-UE ġdida, jenħtieġ li din id-Direttiva tippermetti lit-tieni Stat Membru jitlob li d-detentur tal-Karta Blu tal-UE jitlaq mit-territorju tiegħu. Fejn id-detentur ta’ Karta Blu tal-UE għad għandu Karta Blu tal-UE valida maħruġa mill-ewwel Stat Membru, jenħtieġ li t-tieni Stat Membru jkun jista’ jitlob li d-detentur ta’ Karta Blu tal-UE jmur lura lejn l-ewwel Stat Membru f’konformità mad-Direttiva 2008/115/KE tal-Parlament Ewropew u tal-Kunsill (22). Fejn il-Karta Blu tal-UE maħruġa mill-ewwel Stat Membru tkun ġiet irtirata jew skadiet matul l-eżami tal-applikazzjoni, jenħtieġ li jkun possibbli li t-tieni Stat Membru jiddeċiedi li jew jirritorna d-detentur ta’ Karta Blu tal-UE lil pajjiż terz f’konformità mad-Direttiva 2008/115/KE, jew li jitlob lill-ewwel Stat Membru biex jippermetti d-dħul mill-ġdid tad-detentur ta’ Karta Blu tal-UE fit-territorju tiegħu, mingħajr formalitajiet jew dewmien bla bżonn. Fil-każ tal-aħħar, jenħtieġ li l-ewwel Stat Membru joħroġ dokument lid-detentur ta’ Karta Blu tal-UE li jippermetti d-dħul mill-ġdid fit-territorju tiegħu.

(62)

Għall-finijiet tar-residenza tal-benefiċjarji ta’ protezzjoni internazzjonali, huwa neċessarju li jiġi żgurat li meta dawn il-benefiċjarji jiċċaqilqu lejn Stat Membru għajr l-Istat Membru li tahom il-protezzjoni internazzjonali, l-Istat Membru l-ieħor jiġi infurmat dwar l-isfond tal-protezzjoni internazzjonali tal-persuni kkonċernati sabiex ikun jista’ jikkonforma mal-obbligi tiegħu fir-rigward tal-prinċipju ta’ non-refoulement.

(63)

Meta Stat Membru jkollu l-ħsieb li jkeċċi persuna li kisbet Karta Blu tal-UE f’dak l-Istat Membru u li hija benefiċjarja ta’ protezzjoni internazzjonali fi Stat Membru ieħor, dik il-persuna jenħtieġ li tgawdi mill-protezzjoni kontra r-refoulement f’konformità mad-Direttiva 2011/95/UE u l-Artikolu 33 tal-Konvenzjoni ta’ Ġinevra.

(64)

Meta t-tkeċċija ta’ benefiċjarju ta’ protezzjoni internazzjonali mit-territorju ta’ Stat Membru hi permessa skont id-Direttiva 2011/95/UE, jenħtieġ li l-Istat Membru jiżgura li l-informazzjoni kollha tinkiseb minn sorsi rilevanti, inkluż, fejn ikun xieraq, mill-Istat Membru li jkun ta l-protezzjoni internazzjonali, u li l-informazzjoni tiġi vvalutata bir-reqqa bil-ħsieb li jiġi garantit li d-deċiżjoni li jitkeċċa l-benefiċjarju tkun konformi mal-Artikolu 4 tal-Karta tad-Drittijiet Fundamentali tal-Unjoni Ewropea (il-“Karta”).

(65)

Jenħtieġ li jiġu previsti dispożizzjonijiet speċifiċi ta’ rappurtar għall-monitoraġġ tal-implimentazzjoni ta’ din id-Direttiva, bil-għan li jiġi identifikat u possibbilment megħlub l-impatt possibbli tagħha f’termini ta’ eżodu ta’ mħuħ fil-pajjiżi li qed jiżviluppaw u sabiex tiġi evitata l-ħela ta’ mħuħ.

(66)

Minħabba li l-għanijiet ta’ din id-Direttiva, jiġifieri l-istabbiliment ta’ proċedura ta’ ammissjoni speċjali u l-adozzjoni ta’ kondizzjonijiet tad-dħul u tar-residenza applikabbli għal ċittadini ta’ pajjiżi terzi għall-fini ta’ impjieg bi kwalifiki għoljin u għall-membri tal-familja tagħhom, u l-istabbiliment ta’ drittijiet fir-rigward tagħhom, ma jistgħux jinkisbu b’mod suffiċjenti mill-Istati Membri, speċjalment fir-rigward tal-iżgurar tal-mobbiltà tagħhom bejn l-Istati Membri u l-offerta ta’ sett wieħed u ċar ta’ kriterji ta’ ammissjoni fl-Istati Membri kollha sabiex jiġu sfruttati aħjar l-attraenza ġenerali, iżda jistgħu pjuttost, minħabba l-iskala jew l-effetti tagħha, jinkisbu aħjar fil-livell tal-Unjoni, l-Unjoni tista’ tadotta miżuri f’konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea (TUE). F’konformità mal-prinċipju ta’ proporzjonalità, kif stabbilit f’dak l-Artikolu, din id-Direttiva ma tmurx lil hinn minn dak li huwa meħtieġ sabiex jinkisbu dawk l-għanijiet.

(67)

Din id-Direttiva tirrispetta d-drittijiet fundamentali u tosserva l-prinċipji rikonoxxuti mill-Karta, f’konformità mal-Artikolu 6 TUE.

(68)

F’konformità mad-Dikjarazzjoni Politika Konġunta tat-28 ta’ Settembru 2011 tal-Istati Membri u tal-Kummissjoni dwar id-dokumenti ta’ spjegazzjoni, l-Istati Membri impenjaw ruħhom li jżidu man-notifika tal-miżuri ta’ traspożizzjoni tagħhom, f’każijiet ġustifikati, dokument wieħed jew aktar li jispjegaw ir-relazzjoni bejn il-komponenti ta’ direttiva u l-partijiet korrispondenti tal-istrumenti nazzjonali ta’ traspożizzjoni. Fir-rigward ta’ din id-Direttiva, il-leġiżlatur iqis it-trażmissjoni ta’ dawn id-dokumenti bħala ġustifikata.

(69)

F’konformità mal-Artikoli 1 u 2 tal-Protokoll Nru 22 dwar il-pożizzjoni tad-Danimarka, anness mat-TUE u mat-TFUE, id-Danimarka mhijiex qed tieħu sehem fl-adozzjoni ta’ din id-Direttiva u mhijiex marbuta biha jew soġġetta għall-applikazzjoni tagħha.

(70)

F’konformità mal-Artikoli 1 u 2 u l-Artikolu 4a(1) tal-Protokoll Nru 21 dwar il-pożizzjoni tar-Renju Unit u tal-Irlanda fir-rigward tal-Ispazju ta’ Libertà, Sigurtà u Ġustizzja, anness mat-TUE u mat-TFUE, u mingħajr preġudizzju għall-Artikolu 4 ta’ dak il-Protokoll, l-Irlanda mhix qed tieħu sehem fl-adozzjoni ta’ din id-Direttiva u mhix marbuta biha jew soġġetta għall-applikazzjoni tagħha.

(71)

Għalhekk, jenħtieġ li d-Direttiva 2009/50/KE titħassar,

(1)

Il-livelli massimi ta’ residwi (“MRLs”) għall-klorantraniliprol ġew stabbiliti fil-Parti A tal-Anness III tar-Regolament (KE) Nru 396/2005.

(2)

Skont l-Artikolu 6(2) u (4) tar-Regolament (KE) Nru 396/2005 tressqet applikazzjoni għat-tolleranza għall-klorantraniliprol użat fuq il-bus u l-ħemes fl-Istati Uniti. L-applikant isostni li l-użu awtorizzat ta’ dik is-sustanza fuq il-bus u l-ħemes fl-Istati Uniti wassal għal residwi li jeċċedu l-MRL li hemm fir-Regolament (KE) Nru 396/2005 u li hemm bżonn ta’ MRL ogħla biex ma jkunx hemm ostakli għall-kummerċ fl-importazzjoni ta’ dawk l-għelejjel.

(3)

Skont l-Artikolu 8 tar-Regolament (KE) Nru 396/2005, din l-applikazzjoni ġiet evalwata mill-Istat Membru kkonċernat u r-rapport ta’ evalwazzjoni tressaq lill-Kummissjoni.

(4)

L-Awtorità Ewropea dwar is-Sigurtà fl-Ikel (“l-Awtorità”), ivvalutat l-applikazzjoni u r-rapport tal-evalwazzjoni, u b’mod partikolari eżaminat ir-riskji għall-konsumatur u, fejn kien rilevanti, għall-annimali, u tat opinjoni motivata dwar l-MRL (2) propost. Għaddiet dik l-opinjoni lill-applikant, lill-Kummissjoni u lill-Istati Membri u ppubblikatha.

(5)

L-Awtorità kkonkludiet li kienu ġew issodisfati r-rekwiżiti kollha rigward id-data u li l-modifiki tal-MRL mitluba mill-applikant kienu aċċettabbli fir-rigward tas-sikurezza tal-konsumatur abbażi ta’ valutazzjoni tal-esponiment tal-konsumaturi għas-27 grupp Ewropew speċifiku tal-konsumatur. Hi qieset l-aktar informazzjoni riċenti dwar il-karatteristiċi tossikoloġiċi tas-sustanza. L-esponiment tul il-ħajja għas-sustanza mill-konsum tal-prodotti tal-ikel kollha li jista’ jkun fihom din is-sustanza wera li ma hemm l-ebda riskju li tinqabeż id-doża aċċettabbli ta’ kuljum. Barra minn hekk, l-Awtorità kkonkludiet li l-istabbiliment ta’ doża akuta ta’ referenza mhuwiex meħtieġ minħabba l-profil tat-tossiċità akuta baxxa tas-sustanza.

(6)

Abbażi tal-opinjoni motivata tal-Awtorità u filwaqt li jitqiesu l-fatturi rilevanti tas-suġġett ikkunsidrat, il-modifiki proposti lill-MRL jissodisfaw ir-rekwiżiti tal-Artikolu 14(2) tar-Regolament (KE) Nru 396/2005.

(7)

Ir-Regolament (KE) Nru 396/2005 jenħtieġ li jiġi emendat skont dan.

(8)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,