ISSN 1977-074X |
||
Il-Ġurnal Uffiċjali tal-Unjoni Ewropea |
L 301 |
|
![]() |
||
Edizzjoni bil-Malti |
Leġiżlazzjoni |
Volum 64 |
Werrej |
|
II Atti mhux leġiżlattivi |
Paġna |
|
|
REGOLAMENTI |
|
|
* |
Regolament tal-Kummissjoni (UE) 2021/1399 tal-24 ta’ Awwissu 2021 li jemenda r-Regolament (KE) Nru 1881/2006 fir-rigward tal-livelli massimi tal-iskleroti tal-ergotina u l-alkalojdi tal-ergotina f’ċerti oġġetti tal-ikel ( 1 ) |
|
|
* |
|
|
|
(1) Test b'rilevanza għaż-ŻEE. |
MT |
L-Atti li t-titoli tagħhom huma stampati b'tipa ċara huma dawk li għandhom x'jaqsmu mal-maniġment ta' kuljum ta' materji agrikoli, u li ġeneralment huma validi għal perijodu limitat. It-titoli ta'l-atti l-oħra kollha huma stampati b'tipa skura u mmarkati b'asterisk quddiemhom. |
II Atti mhux leġiżlattivi
REGOLAMENTI
25.8.2021 |
MT |
Il-Ġurnal Uffiċjali tal-Unjoni Ewropea |
L 301/1 |
REGOLAMENT TAL-KUMMISSJONI (UE) 2021/1399
tal-24 ta’ Awwissu 2021
li jemenda r-Regolament (KE) Nru 1881/2006 fir-rigward tal-livelli massimi tal-iskleroti tal-ergotina u l-alkalojdi tal-ergotina f’ċerti oġġetti tal-ikel
(Test b’rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament tal-Kunsill (KEE) Nru 315/93 tat-8 ta’ Frar 1993 li jistabbilixxi proċeduri tal-Komunità għall-kontaminanti fl-ikel (1), u b’mod partikolari l-Artikolu 2(3) tiegħu,
Billi:
(1) |
Ir-Regolament tal-Kummissjoni (KE) Nru 1881/2006 (2) jistabbilixxi l-livelli massimi għal ċerti kontaminanti, inkluż l-iskleroti tal-ergotina u l-alkalojdi tal-ergotina, fl-oġġetti tal-ikel. |
(2) |
It-terminu ergotina jew skleroti tal-ergotina jirreferi għall-istrutturi fungali mill-ispeċi Claviceps li jissostitwixxu l-ġewwieni fuq is-sbul jew iż-żerriegħa fuq l-għata tal-ħaxix, u huma viżibbli bħala skleroti kbar li tilfu l-kulur. Dawn l-iskleroti fihom klassijiet differenti ta’ alkalojdi. |
(3) |
Fit-28 ta’ Ġunju 2012, l-Awtorità Ewropea dwar is-Sigurtà fl-Ikel (“l-Awtorità”) adottat opinjoni dwar l-alkalojdi tal-ergotina fl-ikel u fl-għalf (3). L-Awtorità bbażat il-valutazzjoni tar-riskju tagħha fuq l-alkalojdi tal-ergotina prinċipali Claviceps purpurea, jiġifieri l-ergometrina, l-ergotammina, l-ergokristina, l-ergokriptina, l-ergokornina, kif ukoll l-epimeri “-inina”. Stabbiliet doża akuta ta’ referenza ta’ grupp ta’ 1 μg/kg ta’ piż tal-ġisem u doża tollerabbli ta’ kuljum ta’ grupp ta’ 0,6 μg/kg ta’ piż tal-ġisem kuljum. Ikkonkludiet li għalkemm id-data disponibbli ma indikat l-ebda raġuni għal tħassib għal kwalunkwe sottogrupp tal-popolazzjoni, l-istimi tal-esponiment djetetiku relatat ma’ numru limitat ta’ gruppi tal-ikel, u l-kontribuzzjoni mhux magħrufa possibbli minn ikel ieħor ma setgħux jiġu esklużi. |
(4) |
Fis-6 ta’ Lulju 2017, l-Awtorità ppubblikat rapport xjentifiku dwar l-esponiment djetetiku tal-bniedem u tal-annimali għall-alkalojdi tal-ergotina (4). Għal ċerti gruppi tal-popolazzjoni, l-istimi tal-esponiment għall-alkalojdi tal-ergotina jindikaw esponiment li jqarreb lejn id-doża tollerabbli ta’ kuljum. Għall-ogħla stimi ta’ esponiment, il-kontributuri ewlenin għall-esponiment djetetiku kroniku kienu tipi differenti ta’ ħobż u bziezen, b’mod partikolari dawk li fihom is-segala jew magħmulin esklussivament minnha. L-ogħla stimi ta’ esponiment akut jindikaw esponiment akut li jqarreb lejn id-doża akuta ta’ referenza. |
(5) |
L-Awtorità eżaminat ukoll ir-relazzjoni bejn il-preżenza tal-iskleroti tal-ergotina u l-alkalojdi tal-ergotina. F’livelli ogħla, ġiet osservata relazzjoni lineari ta’ sinifikanza statistika bejn il-kontenut tal-iskleroti u l-livelli tal-alkalojdi tal-ergotina. Madankollu, din ir-relazzjoni mhux dejjem setgħet tintwera f’livelli aktar baxxi, li jindika li n-nuqqas ta’ skleroti ma jeskludix il-preżenza tal-alkalojdi tal-ergotina. Raġuni waħda hija li l-immaniġġar taċ-ċereali jkisser l-iskleroti, li jirriżulta fi trab tal-ergotina, li mbagħad jiġi assorbit mill-ħbub taċ-ċereali. |
(6) |
Għalhekk, jixraq li jitbaxxa l-livell massimu għall-iskleroti tal-ergotina u jiġu stabbiliti livelli massimi għall-alkalojdi tal-ergotina f’dawk l-oġġetti tal-ikel b’livelli sinifikanti tat-tali alkalojdi, li jikkontribwixxu b’mod sinifikanti għall-esponiment tal-bniedem, u fl-oġġetti tal-ikel li huma rilevanti għall-esponiment tal-grupp vulnerabbli tal-popolazzjoni. |
(7) |
Livelli aktar baxxi ta’ skleroti tal-ergotina diġà jistgħu jinkisbu f’ħafna miċ-ċereali permezz tal-applikazzjoni ta’ prattiki agrikoli tajbin u permezz tal-applikazzjoni ta’ tekniki ta’ separazzjoni u tindif. Għalhekk, jenħtieġ li l-livell massimu eżistenti għaċ-ċereali jitnaqqas bħala konsegwenza. F’dan ir-rigward, jixraq ukoll li jiġi ċċarat l-istadju li fih japplikaw il-livelli massimi għall-iskleroti tal-ergotina f’ċereali mhux ipproċessati sabiex jiġu eliminati l-problemi fir-rigward tal-applikazzjoni tagħhom. |
(8) |
Fir-rigward tal-prodotti tat-tħin, jixraq li jiġu stabbiliti livelli massimi differenti għall-alkalojdi tal-ergotina skont l-ispeċi taċ-ċereali. Peress li s-segala hija l-ispeċi taċ-ċereali bl-ogħla riskju ta’ kontaminazzjoni mill-iskleroti tal-ergotina, livelli aktar baxxi ta’ alkalojdi tal-ergotina huma aktar diffiċli li jinkisbu u għalhekk, jenħtieġ li jiġi stabbilit livell massimu speċifiku għall-prodotti tat-tħin tas-segala, filwaqt li jenħtieġ li jiġi stabbilit livell aktar baxx għall-prodotti tat-tħin ta’ ċereali oħrajn. Madankollu, fir-rigward tal-prodotti tat-tħin ta’ ċereali oħrajn, jenħtieġ li jiġu stabbiliti livelli massimi differenti skont il-kontenut tal-irmied tal-prodotti sabiex jitqies il-fatt li l-prodotti li fihom aktar nuħħala (kontenut ogħla ta’ rmied) għandhom livelli naturalment ogħla ta’ alkalojdi tal-ergotina peress li t-trab tal-iskleroti tal-ergotina jiġi adsorbit f’nuħħala. |
(9) |
Barra minn hekk, peress li mistenni li l-livelli ta’ kontaminazzjoni miksuba se jkomplu jonqsu għal xi prodotti tat-tħin, jixraq li jiġi previst li livelli massimi aktar stretti jenħtieġ li japplikaw fi żmien medju għal dawk il-prodotti. Sabiex il-Kummissjoni tkun tista’ timmonitorja l-progress lejn dawk il-livelli massimi aktar stretti u tivvaluta l-bidliet possibbli fil-livelli minħabba t-tibdil fil-prattiki agrikoli, kif ukoll fil-fatturi klimatiċi u ambjentali, l-Istati Membri u l-partijiet interessati jenħtieġ li jiġu mitluba jipprovdu d-data u l-informazzjoni meħtieġa. |
(10) |
Minkejja l-applikazzjoni ta’ prattiki tajbin, intwera li l-glutina tal-qamħ, bħala prodott sekondarju tal-proċess tat-tħin imxarrab, fiha livelli ogħla ta’ alkalojdi tal-ergotina peress li l-konċentrat tal-alkalojdi tal-ergotina huwa konsegwenza tal-proċess tal-produzzjoni tagħha. Għalhekk, jenħtieġ li jiġi stabbilit livell massimu ogħla għall-alkaljodi tal-ergotina fil-glutina tal-qamħ. |
(11) |
Minħabba t-tibdil fl-Anness I tar-Regolament (KE) Nru 396/2005 tal-Parlament Ewropew u tal-Kunsill (5), jenħtieġ li tiġi modifikata nota f’qiegħ il-paġna korrispondenti fl-Anness tar-Regolament tal-Kummissjoni (KE) Nru 1881/2006. |
(12) |
Sabiex l-operaturi ekonomiċi jkunu jistgħu jippreparaw għall-applikazzjoni tar-regoli l-ġodda introdotti b’dan ir-Regolament, jixraq li jiġi previst żmien raġonevoli sakemm japplikaw il-livelli massimi u jiġi previst perjodu tranżitorju għall-oġġetti tal-ikel li tqiegħdu legalment fis-suq qabel id-data tal-applikazzjoni ta’ dan ir-Regolament. Madankollu fir-rigward tas-segala, għalissa ma jistgħux jinkisbu livelli aktar baxxi ta’ kontaminazzjoni mill-iskleroti tal-ergotina b’mod raġonevoli, u għalhekk jixraq li jingħata perjodu itwal biex tiġi permessa applikazzjoni aktar stretta ta’ prattiki agrikoli tajbin u applikazzjoni ta’ tekniki mtejba ta’ separazzjoni u tindif. |
(13) |
Għalhekk, jenħtieġ li r-Regolament (KE) Nru 1881/2006 jiġi emendat skont dan. |
(14) |
Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf, |
ADOTTAT DAN IR-REGOLAMENT:
Artikolu 1
Ir-Regolament (KE) Nru 1881/2006 huwa emendat kif ġej:
(1) |
Fl-Artikolu 9, il-paragrafu 4 huwa sostitwit b’dan li ġej: “4. Sal-1 ta’ Jannar 2023, l-Istati Membri u l-partijiet interessati għandhom jikkomunikaw lill-Kummissjoni r-riżultati tal-investigazzjonijiet imwettqa u l-progress fir-rigward tal-applikazzjoni tal-miżuri ta’ prevenzjoni biex tiġi evitata l-kontaminazzjoni mill-iskleroti tal-ergotina u l-alkalojdi tal-ergotina fis-segala u l-prodotti tat-tħin tas-segala u l-alkalojdi tal-ergotina fil-prodotti tat-tħin tal-ħbub tax-xgħir, tal-qamħ, tal-farru u tal-ħafur. L-Istati Membri u l-partijiet interessati għandhom jirrapportaw regolarment fil-bażi tad-data tal-EFSA, id-data tal-okkorrenza dwar l-iskleroti tal-ergotina u l-alkalojdi tal-ergotina fis-segala u l-prodotti tat-tħin tas-segala u dwar l-alkalojdi tal-ergotina fil-prodotti tat-tħin tal-ħbub tax-xgħir, tal-qamħ, tal-farru u tal-ħafur.” |
(2) |
L-Anness huwa emendat f’konformità mal-Anness ta’ dan ir-Regolament. |
Artikolu 2
L-oġġetti tal-ikel elenkati fl-Anness imqiegħda legalment fis-suq qabel l-1 ta’ Jannar 2022, jistgħu jibqgħu fis-suq sad-data tad-durabbiltà minima jew sad-data tal-iskadenza tagħhom.
Artikolu 3
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Għandu japplika mill-1 ta’ Jannar 2022.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, l-24 ta’ Awwissu 2021.
Għall-Kummissjoni
Il-President
Ursula VON DER LEYEN
(2) Ir-Regolament tal-Kummissjoni (KE) Nru 1881/2006 tad-19 ta’ Diċembru 2006 li jiffissa l-livelli massimi ta’ ċerti kontaminanti fl-oġġetti tal-ikel (ĠU L 364, 20.12.2006, p. 5).
(3) Scientific Opinion on Ergot alkaloids in food and feed. EFSA Journal 2012;10(7):2798. [158 pp.] doi:10.2903/j.efsa.2012.2798.
(4) Arcella, D., Gomez Ruiz, J-A., Innocenti, ML and Roldán, R., 2017. Scientific report on human and animal dietary exposure to ergot alkaloids. EFSA Journal 2017;15(7):4902, 53 pp. https://doi.org/10.2903/j.efsa.2017.4902.
(5) Ir-Regolament (KE) Nru 396/2005 tal-Parlament Ewropew u tal-Kunsill tat-23 ta’ Frar 2005 dwar il-livelli massimi ta’ residwu ta’ pestiċidi fi jew fuq ikel u għalf li joriġina minn pjanti u annimali u jemenda d-Direttiva tal-Kunsill 91/414/KEE (ĠU L 70, 16.3.2005, p. 1).
ANNESS
L-Anness tar-Regolament (KE) Nru 1881/2006 huwa emendat kif ġej:
(1) |
Fit-taqsima 2, l-entrati “2.9 Skleroti tal-ergotina u alkalojdi tal-ergotina” huma sostitwiti b’dan li ġej:
|
(2) |
In-nota f’qiegħ il-paġna 1 hija sostitwita b’dan li ġej:
|
(3) |
In-nota f’qiegħ il-paġna 18 hija sostitwita b’dan li ġej:
|
(*1) Il-livell massimu għall-alkalojdi tal-ergotina jirreferi għas-somma inferjuri tat-12-il alkalojde tal-ergotina li ġejjin: ergokornina/ergokorninina; ergokristina/ergokristinina; ergokriptina/ergokriptinina (forma α- u β-); ergometrina/ergometrinina; ergosina/ergosinina; ergotammina/ergotaminina. Fis-somma inferjuri, il-kontribut ta’ kull epimer mhux kwantifikat huwa stabbilit għal żero.”
25.8.2021 |
MT |
Il-Ġurnal Uffiċjali tal-Unjoni Ewropea |
L 301/6 |
REGOLAMENT TA’ IMPLIMENTAZZJONI TAL-KUMMISSJONI (UE) 2021/1400
tal-24 ta’ Awwissu 2021
li jiffissa r-rati tal-imgħax li jridu jintużaw biex jiġu kkalkulati l-kostijiet għall-finanzjament tal-miżuri ta’ intervent, li jikkonsistu fix-xiri, il-ħżin u r-rimi tal-ħażniet għas-sena fiskali 2022 tal-FAEG
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) Nru 1306/2013 tal-Parlament Ewropew u tal-Kunsill tas-17 ta’ Diċembru 2013 dwar il-finanzjament, il-ġestjoni u l-monitoraġġ tal-politika agrikola komuni u li jħassar ir-Regolamenti tal-Kunsill (KEE) Nru 352/78, (KE) Nru 165/94, (KE) Nru 2799/98, (KE) Nru 814/2000, (KE) Nru 1290/2005 u (KE) Nru 485/2008 (1), u b’mod partikolari l-Artikolu 20(1) u (4) tiegħu,
Wara li kkonsultat lill-Kumitat dwar il-Fondi Agrikoli,
Billi:
(1) |
L-Artikolu 3(1)(a) tar-Regolament ta’ Delega tal-Kummissjoni (UE) Nru 906/2014 (2) jistipula li n-nefqa relatata mal-kostijiet ta’ finanzjament imġarrba mill-Istati Membri sabiex jimmobilizzaw fondi biex jixtru l-prodotti trid tiġi ddeterminata f’konformità mal-metodi stabbiliti fl-Anness I ta’ dak ir-Regolament. |
(2) |
Il-punt I.1 tal-Anness I tar-Regolament ta’ Delega (UE) Nru 906/2014 jipprevedi li l-kostijiet ta’ finanzjament ikkonċernati jridu jiġu kkalkulati abbażi ta’ rata tal-imgħax uniformi għall-Unjoni ffissata mill-Kummissjoni fil-bidu ta’ kull sena fiskali. Din ir-rata tal-imgħax tikkorrispondi għall-medja tar-rati bil-quddiem tal-Euribor għal terminu ta’ tliet xhur u ta’ 12-il xahar, irreġistrati matul il-perjodu ta’ referenza ta’ sitt xhur li jrid jiġi ddeterminat mill-Kummissjoni, qabel in-notifika mingħand l-Istati Membri prevista fl-ewwel paragrafu tal-punt I.2 ta’ dak l-Anness, b’koeffiċjent ta’ korrezzjoni ta’ terz u ta’ żewġ terzi rispettivament. |
(3) |
Biex jiġu ddeterminati r-rati tal-imgħax applikabbli għal sena fiskali partikolari, l-ewwel paragrafu tal-punt I.2 tal-Anness I tar-Regolament ta’ Delega (UE) Nru 906/2014 jipprevedi li l-Istati Membri jridu jinnotifikaw lill-Kummissjoni, meta titlob dan, bir-rata tal-imgħax medja mġarrba minnhom realment matul il-perjodu ta’ referenza msemmi fil-punt I.1 ta’ dak l-Anness, sa mhux iktar tard mid-data ta’ skadenza msemmija f’dik it-talba. |
(4) |
Barra minn hekk, f’konformità mat-tieni paragrafu tal-punt I.2 tal-Anness I tar-Regolament ta’ Delega (UE) Nru 906/2014, jekk Stat Membru ma jibgħat l-ebda notifika, fil-forma u sad-data ta’ skadenza msemmijin fl-ewwel paragrafu ta’ dak il-punt, ir-rata tal-imgħax imġarrba minn dak l-Istat Membru għandha titqies bħala 0 %. Jekk Stat Membru jiddikjara li ma ġarrab l-ebda kost tal-imgħax għax ma kellux prodotti agrikoli fil-ħżin pubbliku matul il-perjodu ta’ referenza, il-Kummissjoni trid tistabbilixxi dik ir-rata tal-imgħax f’konformità mat-tielet paragrafu ta’ dak il-punt. |
(5) |
Minħabba l-fatt li ma kien hemm l-ebda prodott agrikolu fil-ħżin pubbliku matul il-perjodu ta’ referenza ta’ sitt xhur li huwa stabbilit għax-xhur ta’ Novembru 2020 sa April 2021, l-Istati Membri ma ntalbux jagħmlu notifiki skont l-ewwel paragrafu tal-punt I.2 tal-Anness I tar-Regolament ta’ Delega (UE) Nru 906/2014. Għalhekk, il-Kummissjoni ffissat rata ta’ imgħax ta’ referenza skont it-tielet paragrafu ta’ dak il-punt. |
(6) |
F’konformità mal-punt I.3 tal-Anness I tar-Regolament ta’ Delega (UE) Nru 906/2014, ir-rata tal-imgħax stabbilita abbażi tal-punt I.2 ta’ dak l-Anness trid titqabbel mar-rata tal-imgħax uniformi ffissata abbażi tal-punt I.1 ta’ dak l-Anness. Ir-rata tal-imgħax applikabbli għal kull Stat Membru trid tkun l-aktar waħda baxxa minn dawn iż-żewġ rati tal-imgħax. Madankollu, għall-fini tar-rimborż tan-nefqa tal-Istati Membri, ir-rati tal-imgħax negattivi ma jistgħux jiġu kkunsidrati. |
(7) |
Ir-rati tal-imgħax applikabbli għas-sena fiskali tal-2022 tal-FAEG għandhom jiġu stabbiliti billi jitqiesu dawk il-fatturi differenti, |
ADOTTAT DAN IR-REGOLAMENT:
Artikolu 1
Għan-nefqa marbuta mal-kostijiet ta’ finanzjament imġarrba mill-Istati Membri biex jimmobilizzaw il-fondi għax-xiri sfurzat ta’ prodotti li għandhom jitħallsu mis-sena fiskali 2022 tal-Fond Agrikolu Ewropew ta’ Garanzija (FAEG), ir-rati tal-imgħax previsti fl-Anness I tar-Regolament ta’ Delega (UE) Nru 906/2014 f’konformità mal-Artikolu 3(1)(a) ta’ dak ir-Regolament għandhom jiġu ffissati għal 0 %.
Artikolu 2
Dan ir-Regolament għandu jidħol fis-seħħ fit-tielet jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Għandu japplika mill-1 ta’ Ottubru 2021.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, l-24 ta’ Awwissu 2021.
Għall-Kummissjoni
Il-President
Ursula VON DER LEYEN
(1) ĠU L 347, 20.12.2013, p. 549.
(2) Ir-Regolament ta’ Delega tal-Kummissjoni (UE) Nru 906/2014 tal-11 ta’ Marzu 2014 li jissupplimenta r-Regolament (UE) Nru 1306/2013 tal-Parlament Ewropew u tal-Kunsill fir-rigward tal-infiq b’intervent pubbliku (ĠU L 255, 28.8.2014, p. 1).