(1)

Bir-Regolament ta’ Implimentazzjoni tal-Kummissjoni (UE) 2019/159 (3), il-Kummissjoni Ewropea imponiet miżura ta’ salvagwardja definittiva fuq ċerti prodotti tal-azzar (“is-salvagwardja”), li tikkonsisti minn kwoti tariffarji (“TRQs”) fir-rigward ta’ ċerti prodotti tal-azzar (“il-prodott ikkonċernat”) li jinkludu 26 kategorija ta’ prodotti tal-azzar, stabbiliti f’livelli li jippreservaw il-flussi kummerċjali tradizzjonali għal kull kategorija ta’ prodott. Tariffa doganali ta’ 25 % tapplika biss jekk jinqabżu l-limiti kwantitattivi ta’ dawn it-TRQs. Il-miżura ta’ salvagwardja ġiet imposta għal perjodu inizjali ta’ tliet snin, jiġifieri sat-30 ta’ Ġunju 2021.

(2)

Fil-15 ta’ Jannar 2021, il-Kummissjoni rċeviet talba sostanzjata minn tnax-il Stat Membru tal-UE biex teżamina, skont l-Artikolu 19 tar-Regolament (UE) 2015/478 tal-Parlament Ewropew u tal-Kunsill u l-Artikolu 16 tar-Regolament (UE) 2015/755, jekk il-miżura ta’ salvagwardja eżistenti jenħtiġx li tiġi estiża.

(3)

Il-Kummissjoni qieset li t-talba kien fiha biżżejjed evidenza biex tagħti bidu għal investigazzjoni tar-rieżami ta’ skadenza/estensjoni. Għalhekk, hija ppubblikat Notifika ta’ Bidu (4) (“in-Notifika ta’ Bidu”) f’Il-Ġurnal Uffiċjali tal-Unjoni Ewropea fis-26 ta’ Frar 2021.

(4)

Sabiex twettaq valutazzjoni xierqa dwar jekk il-miżura ta’ salvagwardja għadhiex meħtieġa biex jiġi evitat jew rimedjat dannu serju, dwar jekk l-industrija tal-azzar tal-Unjoni hijiex qed taġġusta lilha nfisha, u jekk din l-estensjoni tikkonformax mal-interess usa’ tal-UE, il-Kummissjoni ġabret data speċifika mill-industrija tal-Unjoni permezz ta’ kwestjonarji (5). Din id-data kienet tinkludi, fost oħrajn, l-evoluzzjoni ta’ indikaturi ekonomiċi u finanzjarji ewlenin għall-prodott ikkonċernat matul il-perjodu 2018-2020 (“il-perjodu taħt kunsiderazzjoni”), kif ukoll evidenza li l-industrija qed taġġusta.

(5)

Il-Kummissjoni fittxet ukoll il-pożizzjoni ta’ partijiet interessati oħrajn dwar estensjoni potenzjali. Għal dan il-għan, in-Notifika ta’ Bidu stiednet lill-partijiet interessati biex jipparteċipaw fl-investigazzjoni billi jissottomettu l-osservazzjonijiet tagħhom u evidenza ta’ sostenn.

(6)

F’termini ta’ proċess ġust, l-investigazzjoni tar-rieżami ta’ estensjoni kienet tinkludi proċedura bil-miktub f’żewġ stadji, li skontha, il-partijiet interessati l-ewwel issottomettew l-osservazzjonijiet tagħhom u, sussegwentement, ingħataw il-possibilità li jirribattu l-osservazzjonijiet tal-partijiet l-oħrajn u jissottomettu kummenti dwar it-tweġibiet għall-kwestjonarju. B’kollox, il-Kummissjoni rċeviet aktar minn 150 tweġiba individwali għall-kwestjonarju u aktar minn 160 sottomissjoni minn partijiet interessati qabel l-iskadenzi stabbiliti. Il-Kummissjoni offriet ukoll lill-partijiet interessati l-possibbiltà ta’ seduti ta’ smigħ, jekk iġġustifikati kif xieraq. Kien biss il-Gvern tal-Federazzjoni Russa li għamel użu minn din il-possibbiltà (6).

(7)

Fl-investigazzjoni tar-rieżami ta’ estensjoni tagħha, il-Kummissjoni vvalutat l-ewwel jekk ġewx issodisfati r-rekwiżiti tan-neċessità u l-aġġustament, obbligatorji skont ir-regoli kemm tal-Ftehim li jistabbilixxi l-Organizzazzjoni Dinjija tal-Kummerċ (il-Ftehim tad-WTO) kif ukoll tal-leġiżlazzjoni tal-Unjoni (ara t-Taqsima 3). It-tieni nett, hija vvalutat ukoll liema tul u termini ta’ liberalizzazzjoni għall-estensjoni jkunu ġġustifikati (ara t-Taqsimiet 3.3 u 3.4 rispettivament). Fl-aħħar nett, il-Kummissjoni vvalutat jekk din l-estensjoni tkunx f’konformità mal-interess tal-Unjoni (ara t-Taqsima 5). Fil-valutazzjoni tagħha, il-Kummissjoni qieset sewwa l-osservazzjonijiet u l-evidenza li rċeviet mill-partijiet interessati, kif ukoll kwalunkwe informazzjoni oħra disponibbli pubblikament, b’rabta mal-mistoqsijiet ta’ hawn fuq. Il-Kummissjoni indirizzat speċifikament id-dikjarazzjonijiet rilevanti li saru mill-partijiet interessati li jiddevjaw mill-valutazzjoni tal-Kummissjoni f’Taqsima ddedikata (ara t-Taqsima 7).

(8)

Skont l-Artikolu 7.1 tal-Ftehim dwar is-Salvagwardji tad-WTO u l-Artikolu 19(2) tar-Regolament tal-UE (UE) 2015/478 dwar ir-regoli komuni għall-importazzjonijiet (7), il-perjodu ta’ applikazzjoni ta’ miżura ta’ salvagwardja jista’ jiġi estiż sakemm il-miżura ta’ salvagwardja tkompli tkun neċessarja u jkun hemm evidenza li l-industrija qed taġġusta lilha nfisha.

(9)

Il-Kummissjoni l-ewwel eżaminat u ddeskriviet is-sitwazzjoni ekonomika tal-industrija tal-Unjoni abbażi tat-tweġibiet għall-kwestjonarju li rċeviet (it-Taqsima 3.1.1). Sussegwentement, il-Kummissjoni vvalutat jekk, u sa liema punt, il-pressjoni tal-importazzjoni kienet teżisti jew kompliet matul il-perjodu taħt kunsiderazzjoni (it-Taqsima 3.1.2.). Din il-valutazzjoni kienet tinkludi analiżi dettaljata tal-evoluzzjoni tal-importazzjonijiet u tal-użu tat-TRQs matul il-perjodu ta’ applikazzjoni tas-salvagwardja, kif ukoll valutazzjoni dettaljata ta’ bosta fatturi rilevanti oħra biex tiġi ddeterminata l-imġiba probabbli tal-importazzjonijiet fl-Unjoni, jekk il-miżura ta’ salvagwardja titħalla tiskadi (“analiżi kontrofattwali”).

(10)

Sabiex tivvaluta s-sitwazzjoni ekonomika tal-industrija tal-azzar tal-Unjoni, il-Kummissjoni ħarġet kwestjonarji lill-produtturi tal-azzar magħrufa tal-Unjoni biex tiġbor informazzjoni rigward l-indikaturi tad-dannu dwar il-prodott ikkonċernat matul il-perjodu 2018-2020 (“il-perjodu taħt kunsiderazzjoni”). Il-Kummissjoni talbet ukoll lill-assoċjazzjonijiet tal-industrija magħrufa tal-Unjoni (EUROFER, ESTA u CET) biex iqassmu l-kwestjonarji fost il-membri individwali tagħhom. Barra minn hekk il-Kummissjoni nnotifikat lill-produtturi magħrufa tal-Unjoni, permezz tas-sistema ta’ fajls miftuħin (TRON) (8), bit-talba biex jimlew il-kwestjonarji li kienu disponibbli wkoll fuq is-sit web tad-Direttorat Ġenerali għall-Kummerċ (9).

(11)

Il-Kummissjoni rċeviet aktar minn 150 tweġiba individwali għall-kwestjonarju. Il-Kummissjoni rċeviet ukoll sottomissjonijiet konsolidati ta’ data mill-assoċjazzjonijiet tal-industrija magħrufa mill-Kummissjoni. Barra minn hekk, il-Kummissjoni rċeviet tweġibiet individwali għall-kwestjonarju mingħand kull produttur li kien ipprovda d-data lill-assoċjazzjonijiet tal-industrija individwalment u mingħand produtturi li ma kinux jappartjenu għal xi assoċjazzjoni. Il-Kummissjoni mbagħad ipproċessat id-data li rċeviet. Hija l-ewwel ikkonsolidat id-data riċevuta direttament mingħand membri ta’ assoċjazzjonijiet, u aktar tard ikkontroverifikat il-preċiżjoni tagħhom u l-metodoloġija ta’ konsolidazzjoni mas-sett tad-data sottomess mill-assoċjazzjonijiet tal-industrija f’sessjonijiet mill-bogħod ta’ kontroverifika ddedikati li seħħew fl-14 ta’ Ġunju 2021. Il-Kummissjoni mbagħad amalgamat it-tweġibiet tal-membri tal-assoċjazzjoni flimkien mat-tweġibiet individwali riċevuti mill-produtturi li ma jappartjenux għal xi assoċjazzjoni, f’sett tad-data konsolidat. Dan is-sett tad-data jikkostitwixxi l-bażi għall-valutazzjoni tas-sitwazzjoni ekonomika tal-industrija tal-Unjoni. Il-valutazzjoni ta’ dan is-sett tad-data (fit-Tabelli 1 sa 4) wriet dan li ġej:

(12)

Matul il-perjodu taħt kunsiderazzjoni, il-volum tal-produzzjoni naqas b’mod stabbli sena wara sena, bi tnaqqis ta’ -5 % fl-2019 u bi tnaqqis aktar qawwi ta’ -16 % fl-2020, meta mqabbel maċ-ċifri tal-2018. Ir-ripartizzjoni trimestrali tal-2020 (10) turi li dan it-tnaqqis kien immotivat fil-biċċa l-kbira mill-prestazzjoni fit-tieni u fit-tielet trimestri, li kienu dawk l-aktar milquta mill-effetti tal-pandemija tal-COVID-19. Il-kapaċità tal-produzzjoni baqgħet stabbli matul il-perjodu u, għalhekk, l-użu tal-kapaċità segwa xejra ta’ tnaqqis f’konformità mat-tnaqqis fil-produzzjoni (Ara t-Tabella 1). Fl-aħħar nett, il-ħażniet naqsu b’7 % fl-2019 u bi 15 % fl-2020 meta mqabbla mas-sena 2018.

(13)

Il-konsum fis-suq tal-Unjoni beda jonqos fl-2019 (-6 %), u din ix-xejra kompliet fl-2020 (-16 %) meta mqabbla mas-sena 2018. L-evoluzzjoni tal-volum tal-bejgħ domestiku mill-produtturi tal-Unjoni segwiet xejra simili ħafna matul il-perjodu taħt kunsiderazzjoni (-4 % fl-2019 u -14 % fl-2020). Matul il-perjodu taħt kunsiderazzjoni, l-industrija tal-Unjoni żiedet is-sehem mis-suq tagħha b’aktar minn 2 punti perċentwali.

(14)

L-indikaturi tad-dannu relatati mal-volum ta’ bejgħ (ara t-Tabella 2) u l-valur raw tnaqqis kontinwu matul il-perjodu taħt kunsiderazzjoni. Il-prezzijiet tal-bejgħ ta’ unità naqsu b’mod konsistenti b’5 % fl-2019 u bi 12 % fl-2020 meta mqabbla mal-2018. Il-fluss tal-flus u r-redditu fuq il-kapital użat iddeterjoraw ukoll sena wara sena matul il-perjodu taħt kunsiderazzjoni, b’dan tal-aħħar jilħaq ċifri negattivi kemm fl-2019 (-2,6 %) kif ukoll fl-2020 (-19,4 %).

(15)

It-tnaqqis fil-prezzijiet flimkien mat-tnaqqis fil-volumi tal-produzzjoni u tal-bejgħ, deskritt fit-Tabelli 1 u 2, diġà kien bidel lill-industrija tal-Unjoni f’sitwazzjoni fejn kienet qed tagħmel telf fl-2019 (-0,4 %) u s-sitwazzjoni kompliet tiddeterjora fl-2020, fejn laħqet telf ta’ -3,7 %.

(16)

L-impjieg baqa’ stabbli fl-2019, iżda naqas b’6 % fl-2020 meta mqabbel mal-2018.

(17)

Id-data fit-Taqsima 3.1.1. uriet li s-sitwazzjoni ekonomika tal-industrija tal-Unjoni kienet diġà ddeterjorat b’mod sinifikanti fis-sena 2019, meta l-industrija tal-Unjoni kienet qed tagħmel telf, bi kważi l-indikaturi tad-dannu kollha juru xejra negattiva qawwija. Għandu jiġi osservat li mill-2018 sal-2019, il-profittabbiltà esperjenzat tnaqqis qawwi ta’ 6,1 punti perċentwali biex laħqet -0,4 % fi tmiem l-2019. Dan id-deterjorament serju għalhekk seħħ ferm qabel il-bidu mhux mistenni tal-pandemija tal-COVID-19 u l-effetti li rriżultaw minnha fuq is-suq. Il-pożizzjoni finanzjarja tal-industrija tal-Unjoni kompliet tiddeterjora matul l-2020, meta l-effetti ekonomiċi tal-pandemija tal-COVID-19 komplew jikkumplimentaw id-dgħufija tal-pożizzjoni finanzjarja tal-industrija tal-Unjoni prodotta mill-kontinwazzjoni, matul l-2020, tal-pressjoni tal-importazzjoni eżerċitata mill-esportaturi lejn l-Unjoni. L-effetti tal-pandemija tal-COVID-19 żiedu mal-periklu kontinwu għall-pożizzjoni finanzjarja tal-industrija tal-Unjoni kkawżat mill-pressjoni tal-importazzjoni. L-importazzjonijiet, flimkien ma’, sa ċertu punt il-pandemija tal-COVID-19, xeħtu lill-industrija tal-Unjoni f’sitwazzjoni finanzjarja serja b’telf ta’ -4 %. Għandu jiġi enfasizzat li l-impatt addizzjonali tal-kriżi kkawżata mill-pandemija fuq il-pożizzjoni finanzjarja tal-industrija tal-Unjoni, li aggrava d-deterjorament diġà eżistenti kkawżat mill-importazzjoni, kien bi tqabbil iżgħar. Mill-2019 sal-2020, il-profittabbiltà naqset bi 3.3 punti perċentwali biex tilħaq telf ta’ kważi -4 %. Għalhekk, il-pandemija tal-COVID-19 amplifikat sors ta’ dannu serju preeżistenti u kontinwu għall-industrija tal-Unjoni, li huwa prinċipalment immotivat mill-importazzjonijiet.

(18)

Bħala konklużjoni, il-Kummissjoni għalhekk sabet li, matul il-perjodu ta’ applikazzjoni tal-miżura ta’ salvagwardja, is-sitwazzjoni ekonomika tal-industrija tal-Unjoni kompliet tmur għall-agħar bħala riżultat tal-pressjoni tal-importazzjoni matul perjodu fejn l-aġġustamenti importanti li saru mill-industrija tal-Unjoni għadhom ma pproduċewx effetti pożittivi.

(19)

Il-Kummissjoni kkonkludiet, abbażi tas-sitwazzjoni ekonomika u tal-iżvilupp ta’ indikaturi tad-dannu għall-prodott ikkonċernat fit-Tabelli 1 sa 4, li l-industrija tal-Unjoni kompliet tmur għall-agħar bejn l-2018 u l-2020 u attwalment tinsab f’sitwazzjoni fraġli.

(20)

Minbarra din is-sejba, u f’konformità mal-approċċ segwit fl-investigazzjoni oriġinali, (13) il-Kummissjoni kkonfermat ukoll is-sejbiet tagħha abbażi ta’ tliet familji ta’ prodotti, jiġifieri prodotti ċatti, prodotti twal u tubi (14).

Tabella 5

Produzzjoni, kapaċità tal-produzzjoni, użu tal-kapaċità, ħażniet

Tabella 6

Il-konsum, il-bejgħ domestiku u s-sehem mis-suq tal-Unjoni

Tabella 7

Prezz tal-bejgħ ta’ unità, profittabbiltà, fluss tal-flus u redditu fuq il-kapital użat

Tabella 8

Impjieg

(21)

It-Tabelli 5 sa 8 urew l-evoluzzjoni tal-indikaturi tad-dannu għal kull familja ta’ prodotti matul il-perjodu taħt kunsiderazzjoni. B’mod partikolari, dawn ikkonfermaw li s-sitwazzjoni ekonomika u finanzjarja tal-industrija tal-Unjoni segwiet, għal kull waħda mill-familji ta’ prodotti individwalment, xejriet komparabbli ta’ deterjorament bħal dawk stabbiliti għall-prodott ikkonċernat fl-intier tiegħu. Pereżempju, l-indikaturi tad-dannu bħall-volum tal-produzzjoni, il-volum tal-bejgħ domestiku, il-prezz tal-bejgħ ta’ unità u l-profittabbiltà ddeterjoraw b’mod konsistenti fl-2019, u din ix-xejra kompliet fl-2020 fejn kienet evidenti sitwazzjoni ekonomika u finanzjarja negattiva. L-unika eċċezzjoni, f’termini ta’ xejra diverġenti meta mqabbla ma’ dawk tal-prodott ikkonċernat, għandha x’taqsam mal-iżvilupp tal-fluss tal-flus fil-familja tat-tubi matul il-perjodu taħt kunsiderazzjoni.

(22)

Fid-dawl ta’ dan, l-analiżi supplimentari mwettqa għal kull familja ta’ prodotti għalhekk tikkorrobora s-sejbiet għall-prodott ikkonċernat, jiġifieri li anke meta tiġi vvalutata fuq bażi ta’ familja ta’ prodotti, is-sitwazzjoni ekonomika tal-industrija tal-Unjoni marret għall-agħar b’mod sinifikanti matul il-perjodu taħt kunsiderazzjoni u bħalissa tinsab f’sitwazzjoni fraġli.

(23)

Biex tiddetermina jekk l-importazzjonijiet jagħmlux pressjoni fuq l-industrija tal-azzar tal-Unjoni matul il-perjodu taħt kunsiderazzjoni u sa liema punt, il-Kummissjoni l-ewwel ivvalutat l-evoluzzjoni tal-importazzjonijiet (15) tal-prodott ikkonċernat f’termini ġenerali u, it-tieni, fir-rigward tal-livell ta’ konsum. Barra minn hekk, il-Kummissjoni vvalutat l-evoluzzjoni tat-TRQs użati taħt is-salvagwardja (ara t-Taqsima 3.1.2(b)).

Tabella 9

Evoluzzjoni tal-importazzjonijiet f’tunnellati

(24)

F’termini ġenerali, il-volum tal-importazzjonijiet tal-prodott ikkonċernat naqas bi 13 % fl-2019 u b’27 % fl-2020 meta mqabbel mal-livell tal-2018 (16).

Tabella 10

Evoluzzjoni tas-sehem mill-importazzjonijiet

Tabella 11

Sehem mis-suq tal-importazzjonijiet għal kull familja ta’ prodotti

(25)

Meta t-tnaqqis fil-volum tal-importazzjonijiet li jidher fit-Tabella 9 jiġi vvalutat bi tqabbil mal-evoluzzjoni tal-konsum fis-suq tal-Unjoni, il-Kummissjoni osservat li għalkemm is-sehem mis-suq tal-importazzjonijiet naqas gradwalment matul il-perjodu kkonċernat. Minkejja dan, is-sehem mis-suq tal-importazzjonijiet baqa’ fl-istess livell fl-2020 meta mqabbel mal-2017, jiġifieri s-sena eżatt qabel l-impożizzjoni tal-miżura ta’ salvagwardja (17). Barra minn hekk, is-sehem medju mis-suq tal-importazzjonijiet matul il-perjodu taħt is-salvagwardja kien ogħla milli fis-snin ta’ qabel l-impożizzjoni tagħha (kemm jekk snin individwali, kif ukoll fuq medja). Dan juri li, minkejja s-salvagwardja, il-preżenza tal-importazzjonijiet fis-suq tal-azzar tal-Unjoni ma naqsitx. Minflok, din żdiedet f’termini relattivi meta mqabbel mal-perjodu ta’ qabel l-impożizzjoni tas-salvagwardja (18).

(26)

Il-Kummissjoni tat ukoll ħarsa aktar mill-qrib lejn il-pressjoni tal-importazzjoni billi vvalutat l-evoluzzjoni tal-użu tat-TRQ taħt is-salvagwardja (19).

(27)

Din l-analiżi turi li l-pajjiżi esportaturi prinċipali tal-azzar eżawrew għadd kbir mill-kwoti speċifiċi għall-pajjiż allokati lilhom u, pjuttost spiss, f’perjodu pjuttost qasir fi ħdan il-perjodi rilevanti ta’ applikazzjoni tal-miżura ta’ salvagwardja. F’xi każijiet estremi, volumi kbar ta’ kwoti annwali ġew eżawriti fl-ewwel jum tal-perjodu jew fi żmien ftit ġimgħat. Din ix-xejra kompliet taħt l-amministrazzjoni trimestrali tal-kwoti speċifiċi għall-pajjiż introdotti fl-1 ta’ Lulju 2020. L-analiżi wriet ukoll li xi wħud minn dawn il-pajjiżi eżawrew malajr ħafna wkoll xi kwoti residwi f’bosta kategoriji wara li kienu diġà eżawrew tagħhom stess, u b’hekk eskludew fornituri storiċi oħrajn. Din hija xejra konsistenti li tista’ tiġi osservata fil-kategoriji u fl-oriġini tal-prodotti kollha, u f’volumi kbar.

(28)

Il-pajjiżi esportaturi prinċipali mhux biss juru l-kapaċità li jfornu volumi kbar f’perjodu qasir, u b’hekk joħolqu tfixkil sinifikanti fis-suq, iżda jidhru wkoll lesti biex ikomplu jżidu l-preżenza tagħhom fis-suq tal-Unjoni, kull meta d-disinn tal-miżura jagħtihom opportunità biex jagħmlu dan (pereżempju, permezz tal-aċċess eċċezzjonali għall-kwota residwa). Għalhekk, kif instab matul it-tieni rieżami tal-funzjonament tal-miżura ta’ salvagwardja (20), l-esportaturi tal-pajjiżi esportaturi prinċipali juru b’mod ċar imġiba opportunistika li tfittex li timmassimizza l-preżenza tagħhom fis-suq taħt il-miżura ta’ salvagwardja, bil-mezzi kollha possibbli.

(29)

Qabel l-adozzjoni tal-miżuri tariffarji tal-Istati Uniti skont it-Taqsima 232 tal-Att dwar l-Espansjoni tal-Kummerċ tal-1962 (“il-miżuri tat-Taqsima 232”) dwar ċerti prodotti tal-azzar f’Marzu 2018, l-Istati Uniti kienu l-akbar suq importatur tal-azzar. Wara li imponew dazju bil-quddiem ta’ 25 % fuq l-importazzjonijiet, l-Istati Uniti tilfu din il-pożizzjoni għall-Unjoni, li attwalment hija l-akbar pajjiż importatur tal-azzar fid-dinja, segwita mill-Istati Uniti (21). Sabiex tipproteġi lis-suq tal-Unjoni mid-devjazzjoni tat-traffiku kummerċjali li tirriżulta, l-Unjoni imponiet is-salvagwardja tagħha b’mod proviżorju f’Lulju 2018 u fil-forma definittiva tagħha fi Frar 2019, u dan permezz ta’ TRQs fuq il-prodott ikkonċernat li, għall-kuntrarju tal-miżura tal-Istati Uniti, tippreserva l-flussi kummerċjali storiċi u tiskoraġġixxi importazzjonijiet addizzjonali, inkluż il-kummerċ iddevjat.

(30)

L-importazzjonijiet fl-Unjoni naqsu bi 13 % fl-2019 u b’27 % fl-2020 meta mqabbla mal-massimu tagħhom fl-2018 (ara t-Tabella 5). Fl-istess ħin, matul l-istess perjodu, l-importazzjonijiet fis-suq tal-Istati Uniti segwew xejra parallela ta’ tnaqqis aktar qawwi wara l-impożizzjoni tal-miżuri tat-Taqsima 232, kif jidher fit-Tabella 11 hawn taħt.

Tabella 11

Importazzjonijiet fl-Istati Uniti f’tunnellati  (22)

(31)

Għalhekk, din id-data tagħti prova ta’ korrelazzjoni mill-qrib u sinifikanti bejn it-tnaqqis qawwi fil-volumi tal-importazzjoni fl-Istati Uniti wara l-impożizzjoni tal-miżuri tat-Taqsima 232 tal-Istati Uniti u ż-żieda parallela tal-importazzjonijiet fl-Unjoni, parzjalment imtaffija mill-miżura ta’ salvagwardja. Din il-korrelazzjoni hija kkonfermata għall-perjodi ta’ salvagwardja kollha sal-impatt tal-pandemija tal-COVID-19.

(32)

Wara li identifikat dawn ix-xejriet tal-importazzjoni fl-akbar żewġ swieq importaturi tal-azzar (l-Unjoni u l-Istati Uniti), il-Kummissjoni bdiet tivvaluta l-prestazzjoni tal-esportazzjoni fi swieq terzi oħra tal-pajjiżi fornituri prinċipali tal-azzar lejn l-Unjoni (23).

Tabella 12

Evoluzzjoni tal-esportazzjonijiet tal-prodott ikkonċernat minn pajjiżi fornituri prinċipali tal-azzar għall-UE lejn swieq terzi (għajr l-UE u l-Istati Uniti)

(33)

Il-Kummissjoni wettqet analiżi statistika tax-xejriet tal-esportazzjoni tal-prodott ikkonċernat għall-pajjiżi esportaturi prinċipali tal-azzar abbażi tad-data mill-Global Trade Atlas (24). It-Tabella 8 turi li, b’mod ġenerali, il-pajjiżi esportaturi prinċipali tal-prodott ikkonċernat lejn l-Unjoni naqqsu sostanzjalment il-volumi tal-esportazzjoni tagħhom lejn swieq terzi oħra matul il-perjodu taħt kunsiderazzjoni. Valutazzjoni individwali tal-prestazzjoni tal-esportazzjoni ta’ dawn il-pajjiżi kkonfermat li l-biċċa l-kbira minn dawn il-pajjiżi esperjenzaw ukoll tnaqqis fil-volumi tal-esportazzjoni tagħhom għal kull pajjiż (għajra l-Unjoni u l-Istati Uniti). Għalhekk, dan ifisser li matul perjodu fejn l-akbar żewġ pajjiżi importaturi ewlenin tal-azzar fid-dinja (l-Unjoni u l-Istati Uniti) raw tnaqqis sinifikanti fl-importazzjonijiet meta l-miżuri rispettivi tagħhom kienu fis-seħħ, il-pajjiżi esportaturi ewlenin lejn l-Unjoni naqqsu wkoll il-volumi tal-esportazzjoni tagħhom lejn swieq terzi oħra.

(34)

Il-Kummissjoni ssupplimentat ulterjorment il-valutazzjoni tagħha stess bl-analiżi mwettqa mill-OECD. Id-data tal-OECD ikkonfermat il-valutazzjoni tal-Kummissjoni stess li, ġeneralment, il-prestazzjoni tal-esportazzjoni tal-pajjiżi esportaturi prinċipali tal-azzar kienet naqset b’mod konsistenti matul il-perjodu taħt kunsiderazzjoni (25).

(35)

Il-Kummissjoni mbagħad ivvalutat l-evoluzzjoni fil-konsum domestiku fil-pajjiżi esportaturi prinċipali tal-azzar (26) matul il-perjodu taħt kunsiderazzjoni.

Tabella 13

L-evoluzzjoni tal-konsum fis-swieq prinċipali tal-produzzjoni tal-azzar (inklużi l-pajjiżi esportaturi prinċipali lejn l-UE)  (27)

(36)

It-Tabella 13 turi li, kumplessivament matul il-perjodu taħt kunsiderazzjoni, il-konsum (28) fis-suq domestiku tal-pajjiżi ewlenin li jipproduċu l-azzar (li jinkludi l-pajjiżi fornituri prinċipali tal-azzar għall-Unjoni) żdied. Madankollu, din ix-xejra kumplessiva hija mmotivata miż-żieda eċċezzjonali fil-konsum esperjenzata fiċ-Ċina, li hija bil-kbir, l-akbar suq tal-produzzjoni tal-azzar fid-dinja. B’din l-eċċezzjoni, il-pajjiżi l-oħra kollha raw tnaqqis kontinwu fil-konsum domestiku.

(37)

Għalhekk, it-tnaqqis simultanju tal-esportazzjonijiet u tal-konsum domestiku matul il-perjodu taħt kunsiderazzjoni fil-maġġoranza tal-pajjiżi ewlenin li jipproduċu l-azzar juri b’mod inekwivoku d-diffikultajiet dejjem akbar li qed jesperjenzaw biex isibu opportunitajiet għall-operazzjonijiet tradizzjonali ta’ esportazzjoni tagħhom. Dawn id-diffikultajiet isaħħu bil-kbir it-tensjoni kompetittiva u jwasslu għal imġiba aggressiva mill-esportaturi fi swieq terzi.

(38)

Il-Kummissjoni vvalutat ukoll l-iżviluppi l-aktar reċenti relatati mal-kapaċità żejda globali fis-settur tal-azzar li kienet diġà qieset fir-Regolamenti dwar is-Salvagwardja Proviżorja u Definittiva.

(39)

Analiżi ta’ diversi sorsi awtorevoli msemmija f’dan ir-Regolament turi li s-sitwazzjoni ta’ kapaċità żejda fis-suq globali tal-azzar marret għall-agħar matul il-perjodu taħt kunsiderazzjoni. L-OECD osservat li l-aħħar informazzjoni disponibbli (minn Diċembru 2020) tissuġġerixxi li l-kapaċità globali tal-produzzjoni tal-azzar żdiedet fl-2020 għat-tieni sena konsekuttiva (Illustrazzjoni 10). Il-bidla fil-kapaċità netta fl-2020, bit-teħid inkunsiderazzjoni ta’ addizzjonijiet u għeluq ġodda fil-kapaċità, ittella’ l-kapaċità globali attwali tal-produzzjoni tal-azzar sa 2 453,2 mmt, li tirrappreżenta żieda ta’ 1,6 % mil-livell fi tmiem l-2019 (29).

(40)

Barra minn hekk, l-OECD żiedet tgħid li l-kapaċità globali tal-produzzjoni tal-azzar żdiedet għal 2 453,2 mmt fl-2020, filwaqt li l-produzzjoni tal-azzar mhux maħdum naqset għal 1 827,8 mmt, bid-distakk bejn it-tnejn jiżdied minn 568,7 mmt għal 625,4 mmt fl-2019. Il-produzzjoni globali tal-azzar bħala sehem mill-kapaċità, bħala indikatur impreċiż tar-rata ta’ użu globali, naqset minn 76,5 % fl-2019 għal 74,5 % fl-2020 (30).

(41)

Il-konklużjonijiet tar-Rapport Ministerjali tal-Forum Globali tal-2020 dwar il-Kapaċità Żejda tal-Azzar (“GFSEC”), abbażi tad-data sal-2019, kienu diġà indikaw li l-iżviluppi fis-settur setgħu jsegwu din id-direzzjoni. Ir-rapport osserva li żewġ punti ta’ tħassib partikolari fi tmiem l-2019 kienu x-xejra fid-direzzjoni opposta osservata fil-kapaċità Ċiniża ta’ produzzjoni tal-azzar, b’diversi proġetti kbar mibdija f’żoni ġodda, b’mod partikolari f’żoni kostali tan-Nofsinhar u tal-Lvant u appoġġati mill-iskema ta’ swaps tal-kapaċità mmexxija mill-gvern, u l-appoġġ Ċiniż għal jew il-parteċipazzjoni fl-espansjoni tal-kapaċità f’pajjiżi terzi. It-tkabbir rapidu tal-kapaċità kien qed iseħħ ukoll fix-Xlokk tal-Asja u fil-Lvant Nofsani (31).

(42)

Ir-Rapport żied jgħid li l-implikazzjoni immedjata tal-perspettiva tad-domanda hija li d-distakk globali bejn il-kapaċità u d-domanda, indikatur tar-riskji ta’ provvista żejda għas-suq tal-azzar, se jiżdied b’mod sinifikanti għal mill-inqas 606 mmt fl-2020 (32). Huwa osserva wkoll li dan it-treġġigħ lura fil-kapaċità żejda jista’ jwassal għal disturbi fil-kummerċ, iwassal għal prezzijiet tal-azzar ferm aktar baxxi u jagħmel ħsara lis-sostenibbiltà ekonomika tal-industrija tal-azzar. (33)

(43)

Għalhekk, il-Kummissjoni qieset li huwa evidenti li l-problema tal-kapaċità żejda globali fis-settur tal-azzar marret għall-agħar fil-perjodu taħt kunsiderazzjoni, u dan irriżulta f’distakk saħansitra akbar bejn il-produzzjoni, il-konsum u l-kapaċità installata. Il-Kummissjoni kkonfermat din l-informazzjoni wkoll bil-valutazzjoni tagħha stess tad-data mill-bażi tad-data tas-CRU għall-pajjiżi prinċipali li jipproduċu l-azzar madwar id-dinja, li jinkludu l-pajjiżi esportaturi prinċipali tal-azzar lejn is-suq tal-Unjoni (34).

(44)

Fir-regolamenti tagħha li jimponu miżura ta’ salvagwardja proviżorja u definittiva, il-Kummissjoni sabet li l-miżuri tat-Taqsima 232 tal-Istati Uniti dwar ċerti prodotti tal-azzar kienu probabbli li jikkawżaw diverżjoni konsiderevoli tat-traffiku kummerċjali lejn is-suq tal-Unjoni tal-esportazzjonijiet oriġinarjament destinati għas-suq tal-Istati Uniti, jekk ma tittieħed l-ebda azzjoni ta’ rimedju mill-Unjoni. Fir-regolament definittiv tagħha, il-Kummissjoni kkonkludiet li kien hemm evidenza li l-ewwel sinjali ta’ diverżjoni tat-traffiku kummerċjali kienu diġà qed iseħħu fl-2018 (35).

(45)

Il-Kummissjoni diġà wriet fit-Tabella 11 li, mill-adozzjoni tal-miżuri tat-Taqsima 232 tal-Istati Uniti fuq l-azzar, il-livell tal-importazzjonijiet fis-suq tal-Istati Uniti kien naqas b’mod sinifikanti. Fil-fatt, matul il-perjodu taħt kunsiderazzjoni, ma jidhirx li l-importazzjonijiet li qabel kienu mmirati lejn l-Istati Uniti sabu opportunitajiet oħra madwar id-dinja, billi l-esportazzjonijiet ġenerali lejn pajjiżi oħra, inkluż is-suq tal-Unjoni, naqsu f’sitwazzjoni ta’ konsum domestiku li qed jonqos għall-pajjiżi esportaturi prinċipali tal-azzar lejn l-Unjoni.

(46)

Sal-lum, il-miżuri tat-Taqsima 232 tal-Istati Uniti għadhom fis-seħħ u ma hemmx indikazzjoni mill-awtoritajiet tal-Istati Uniti li tipprevedi r-revoka tagħhom. Għaldaqstant, ir-riskju ta’ devjazzjoni tat-traffiku kummerċjali, kemm tal-prodotti attwalment trasportati lejn l-Istati Uniti kif ukoll ta’ dawk li kienu jiġu importati fis-suq tal-Istati Uniti iżda li, b’riżultat tal-miżuri tat-Taqsima 232 tal-Istati Uniti ma għadhomx qed jiġu importati, jibqa’ kompletament li kieku l-miżura ta’ salvagwardja tal-Unjoni kellha tiskadi.

(47)

Matul il-perjodu taħt kunsiderazzjoni, minbarra l-miżuri tat-Taqsima 232 tal-Istati Uniti, li għadhom fis-seħħ, il-Kummissjoni osservat l-impożizzjoni kontinwa ta’ miżuri ġodda f’ġurisdizzjonijiet differenti li fil-biċċa l-kbira jaffettwaw lill-pajjiżi esportaturi prinċipali tal-azzar lejn l-Unjoni f’varjetà wiesgħa ta’ prodotti tal-azzar, inklużi bosta minn dawk li jaqgħu taħt il-miżura ta’ salvagwardja (36). Dan jinkludi n-notifika mħabbra reċentement dwar l-estensjoni tal-miżura ta’ salvagwardja fuq ċerti prodotti tal-azzar mir-Renju Unit (37).

(48)

Din ix-xejra osservata ta’ żieda kontinwa fil-kamp ta’ applikazzjoni tal-kategoriji tal-azzar soġġetti għal dazji anti-dumping u kumpensatorji, mingħajr sinjali ta’ treġġigħ lura fil-futur prevedibbli, issaħħaħ id-diffikultajiet imsemmija hawn fuq għall-pajjiżi esportaturi biex isibu opportunitajiet għall-esportazzjonijiet tagħhom, u dan isaħħaħ it-tensjoni kompetittiva u jagħmel l-imġiba tal-esportaturi aktar b’saħħitha

(49)

L-Unjoni attwalment hija l-akbar suq importatur tal-azzar fid-dinja f’termini ta’ volumi. (38) F’termini ta’ livelli tal-prezzijiet, il-prezzijiet tal-importazzjoni fl-Unjoni mill-pajjiżi fornituri prinċipali tagħha huma konsistentement ogħla mill-prezzijiet tal-esportazzjoni tagħhom lejn swieq terzi oħra għal maġġoranza kbira tal-esportazzjonijiet tal-azzar tagħhom (minn 53 % sa 73 % tal-kodiċijiet totali affettwati, il-valuri tal-esportazzjoni lejn l-Unjoni huma ogħla minn dawk lejn swieq terzi oħra) (39).

(50)

Dan ifisser li l-esportaturi għandhom interess li jippenetraw is-suq tal-Unjoni b’kull mezz possibbli li kultant jirriżulta f’imġiba inġusta fl-ipprezzar. Fil-fatt, f’dawn l-aħħar snin, il-Kummissjoni imponiet sensiela ta’ miżuri anti-dumping u kumpensatorji fuq l-importazzjonijiet tal-azzar, anki fuq il-kategoriji ta’ prodotti koperti mis-salvagwardja.

(51)

Ix-xejriet statistiċi tal-importazzjonijiet fl-UE (ara t-Tabella 9) jikkonfermaw l-attraenza tas-suq tal-Unjoni għall-esportaturi. Bħala medja, l-importazzjonijiet lejn l-Unjoni saħansitra żiedu s-sehem mis-suq tagħhom matul il-perjodu taħt kunsiderazzjoni meta mqabbel mal-perjodu ta’ qabel l-impożizzjoni tas-salvagwardja, f’kuntest ta’ tnaqqis fil-konsum u minkejja salvagwardja fis-seħħ.

(52)

Fid-dawl ta’ dawn l-elementi, il-Kummissjoni kkonkludiet li s-suq tal-azzar tal-Unjoni għadu attraenti għall-pajjiżi esportaturi.

(53)

Abbażi tal-evidenza u l-kunsiderazzjonijiet imsemmija hawn fuq, il-Kummissjoni sabet li l-industrija tal-azzar tal-Unjoni, wara l-ewwel tliet snin tal-miżura ta’ salvagwardja, għadha tinsab f’sitwazzjoni ekonomika fraġli.

(54)

Il-Kummissjoni sabet ukoll li l-importazzjonijiet mill-pajjiżi esportaturi prinċipali tal-azzar eżerċitaw u għadhom qed jeżerċitaw pressjoni fuq l-importazzjoni għolja ħafna fis-suq tal-azzar tal-Unjoni, b’xejra aggressiva u opportunistika ta’ mġiba kummerċjali, jiġifieri, bl-użu ta’ kwalunkwe marġni biex tiżdied il-preżenza fis-suq.

(55)

Barra minn hekk, minħabba x-xejriet prevalenti ta’ tnaqqis fl-esportazzjonijiet dinjija u fil-konsum domestiku mill-pajjiżi esportaturi prinċipali tal-azzar matul il-perjodu taħt kunsiderazzjoni, li diġà kienu evidenti qabel il-pandemija tal-COVID-19, u f’kuntest ġenerali ta’ kapaċità żejda sinifikanti, il-Kummissjoni mbagħad osservat li l-esportaturi jeħtieġu li jżidu l-bejgħ tagħhom fi kwalunkwe suq possibbli biex ikomplu joperaw.

(56)

L-investigazzjoni kkonfermat ukoll li swieq sinifikanti oħra tal-azzar, inkluż it-tieni l-akbar pajjiż importatur, l-Istati Uniti, għad għandhom fis-seħħ restrizzjonijiet kummerċjali li jaffettwaw il-kapaċità tal-pajjiżi esportaturi li jbigħu lilhom, f’kuntest ġenerali ta’ tnaqqis kontinwu fil-konsum tal-azzar.

(57)

L-investigazzjoni kkonfermat ukoll li s-suq tal-Unjoni huwa, meta mqabbel, aktar attraenti għall-importazzjonijiet f’termini ta’ daqs u ta’ livelli tal-prezzijiet, u b’hekk sar suq fejn jistgħu jiġu diretti volumi kbar ta’ azzar.

(58)

L-analiżi kontrofattwali mwettqa fid-dawl tas-sett ta’ fatturi deskritt fit-Taqsima 3.1.2. biex tiddetermina x’jiġri li kieku tiġi eliminata s-salvagwardja turi, b’mod ċar, li f’dan il-mument teżisti probabbiltà għolja li volumi sostanzjali ħafna ta’ azzar mhux mibjugħ f’partijiet oħra tad-dinja jistgħu jispiċċaw jiġu diretti lejn is-suq tal-Unjoni.

(59)

Dawn l-importazzjonijiet addizzjonali, flimkien ma’ dawk li jeżistu bħalissa, kieku ġeneralment iwasslu għal deterjorament ulterjuri serju ħafna tas-sitwazzjoni ekonomika tal-industrija tal-Unjoni, u jistgħu jipperikolaw serjament il-vijabbiltà tagħha. Għalhekk, ġie stabbilit li l-iskadenza tal-miżura ta’ salvagwardja kieku tirriżulta f’dannu serju għall-industrija tal-Unjoni kkawżata minn żieda fl-importazzjonijiet. Din il-konklużjoni ma hijiex affettwata mill-effetti attwali tal-pandemija tal-COVID-19 fuq l-industrija tal-Unjoni. Filwaqt li s-sitwazzjoni ekonomika tal-industrija tal-Unjoni ġiet aggravata ulterjorment fl-2020 minħabba l-pandemija tal-COVID-19, il-Kummissjoni stabbiliet li ż-żieda probabbli fl-importazzjonijiet, jekk il-miżura ta’ salvagwardja tiskadi, tirriżulta f’dannu serju lill-industrija tal-Unjoni.

(60)

Il-Kummissjoni kkonkludiet li dawn il-volumi akbar jistgħu jimminaw b’mod sinifikanti kwalunkwe rkupru ekonomiku sinifikattiv kif ukoll l-isforzi li qed isiru mill-industrija tal-azzar tal-Unjoni fil-proċess ta’ aġġustament tagħha għal livell ogħla ta’ importazzjonijiet, li huma deskritti fit-taqsima li ġejja. Għalhekk, il-Kummissjoni qieset li l-miżura ta’ salvagwardja għadha meħtieġa biex jiġi evitat dannu serju.

(61)

Din il-ħtieġa teżisti wkoll minħabba li, skont ir-regoli tad-WTO, l-Unjoni ma għandhiex il-possibbiltà li żżid id-dazji fuq l-importazzjoni fuq il-prodott ikkonċernat mingħajr ma tieħu miżura ta’ salvagwardja. Tabilħaqq, fid-WTO, l-Unjoni ffissat id-dazji fuq l-importazzjoni tagħha fil-livell ta’ żero għal-linji tariffarji inklużi fil-prodott ikkonċernat. Għal din ir-raġuni, hekk kif bħal fl-2018 kien evidenti li ż-żieda fl-importazzjonijiet kienet ir-riżultat tal-effett ta’ dawn l-obbligi (jiġifieri konċessjonijiet tariffarji mingħajr dazju) imġarrba mill-Unjoni skont il-GATT, dawn l-obbligi issa kieku jippermettu li l-importazzjonijiet jerġgħu jiżdiedu, u dan jirriżulta f’dannu serju għall-industrija tal-Unjoni li kieku s-salvagwardja titħalla tiskadi.

(62)

Meta l-Kummissjoni introduċiet is-salvagwardja proviżorja tal-azzar f’Lulju 2018, l-industrija tal-azzar tal-UE kienet diġà bdiet proċess ta’ aġġustament għall-kriżi serja esperjenzata mis-settur tal-azzar minn nofs l-2010, meta d-domanda dinjija tal-azzar naqset minkejja li l-kapaċità xorta waħda kompliet tespandi. Dan l-iżbilanċ, aggravat mill-intervent tal-Istat li jappoġġa ż-żidiet fil-kapaċità u li jipprevjeni l-għeluq ta’ faċilitajiet mhux ekonomiċi f’xi pajjiżi terzi, ħoloq distorsjoni fid-dinamika tas-suq u rrestrinġa lill-produtturi biex jirrikorru dejjem aktar għas-swieq tal-esportazzjoni, li wassal għal każijiet ta’ difiża tal-kummerċ, b’ħafna minnhom jinvolvu liċ-Ċina fejn tinsab l-akbar kapaċità żejda.

(63)

L-Unjoni rreaġixxiet malajr għal din l-isfida. Fl-2013, bil-“Pjan ta’ Azzjoni għal industrija tal-azzar kompetittiva u sostenibbli fl-Ewropa” (40) tagħha, il-Kummissjoni stipulat pjan ambizzjuż ta’ azzjonijiet immirati, kemm fil-livell tal-Unjoni kif ukoll f’dak tal-Istati Membri, biex issaħħaħ il-kompetittività tal-industrija tal-azzar tal-UE u biex din issir sostenibbli u kapaċi tikkompeti fil-livell globali, kif ukoll biex tiġi żviluppata l-ġenerazzjoni li jmiss ta’ prodotti tal-azzar li huma vitali għal industriji Ewropej ewlenin oħra.

(64)

Id-ditta ta’ konsultazzjoni McKinsey, fir-Rapport tagħha “The current capacity shake-up in steel and how the industry is adapting”  (41) ippubblikat f’Jannar 2018, rat id-deċennju tal-2016-2025 bħala volatili u matur għal aktar ristrutturar, fid-dawl tal-fatt li l-isforzi ta’ konsolidazzjoni u ta’ aġġustament f’xi partijiet mid-dinja, b’mod partikolari fl-Ewropa, kienu “fil-biċċa l-kbira paċuti minn espansjoni kontinwa x’imkien ieħor” . Ir-Rapport spjega wkoll kif il-kumpaniji, speċjalment fl-Ewropa, fil-Korea t’Isfel u fil-Ġappun, qed jaġġustaw għall-kapaċità żejda globali billi jsegwu prodotti ġodda u estensjonijiet tal-mudelli tan-negozju li jippermettulhom javvanzaw fil-katina tal-valur. Ir-Rapport spjega wkoll li barra minn hekk, l-innovazzjoni fl-azzar tinvolvi wkoll il-proċessi ta’ produzzjoni ewlenin, bl-għan li jinstabu soluzzjonijiet biex jitnaqqsu l-ispejjeż tal-produzzjoni, jittejbu l-prodotti ta’ funzjonalità, jew jitnaqqas il-piż ambjentali. Fl-aħħar nett, ir-Rapport kien jistenna li aktar atturi ewlenin jesperimentaw b’innovazzjoni radikali fil-proċessi ta’ produzzjoni, u b’hekk imorru kontra twemmin li ilu żmien twil li t-teknoloġija tal-produzzjoni tal-azzar immaturat u b’hekk hemm biss spazju limitat għal aktar żidiet fil-produttività.

(65)

F’dan il-kuntest, f’Marzu 2016 il-Kummissjoni ħadet rendikont tal-azzjonijiet implimentati skont il-Pjan ta’ Azzjoni tal-2013 għall-Azzar u, permezz tal-Komunikazzjoni tagħha “L-Azzar: iż-żamma tal-impjiegi sostenibbli u t-tkabbir fl-Ewropa”  (42), saħħet l-azzjonijiet sabiex tippromwovi l-investiment u toħloq negozju aktar favorevoli li għandu jgħin lill-industrija tal-azzar tal-Unjoni fl-isforzi ta’ adattament tagħha. B’mod partikolari, il-Kummissjoni ffukat mill-ġdid kemm jista’ jkun l-inizjattivi strateġiċi tal-Unjoni kollha tagħha, u b’mod aċċellerat sabiex iżżid l-isforzi li l-industrija tal-azzar tal-UE kienet qed tagħmel biex timmodernizza u timplimenta innovazzjonijiet li jiggarantixxu l-kompetittività u s-sostenibbiltà tagħha fit-tul.

(66)

Kif spjegat fit-Taqsima 3.1.e), l-adozzjoni mill-Istati Uniti tal-miżuri tat-Taqsima 232 tagħha fuq l-azzar, li daħlet fis-seħħ f’Ġunju 2018, approfondiet l-iżbilanċ kroniku bejn il-kapaċità u d-domanda tal-azzar. L-għeluq ta’ dak li, f’dak iż-żmien, kien l-akbar suq importatur tal-azzar aggrava l-imġiba aggressiva mill-pajjiżi esportaturi tal-azzar fit-tfittxija ddisprata tagħhom għal opportunitajiet biex jeħilsu mill-eċċess fl-output tagħhom.

(67)

F’dawn iċ-ċirkostanzi, ir-reazzjoni proporzjonali mill-Kummissjoni bl-introduzzjoni tal-miżura ta’ salvagwardja tagħha f’TRQ imfassla biex tiskoraġġixxi d-devjazzjoni tat-traffiku kummerċjali, b’mod proviżorju f’Lulju 2018 u fil-forma definittiva tagħha fi Frar 2019, evitat li tissaħħaħ iż-żieda f’daqqa u qawwija fl-importazzjonijiet tal-azzar li s-suq tal-azzar tal-UE kien diġà qed jesperjenza. Fin-nuqqas ta’ din l-azzjoni, l-isforzi ta’ aġġustament li l-industrija tal-azzar tal-UE kienet qed twettaq biex tadatta għall-kapaċità żejda globali dejjem tiżdied u għas-swieq tal-azzar progressivament integrati, kienu jisfaxxaw fix-xejn.

(68)

Taħt is-salvagwardja tal-Unjoni, l-isforzi ta’ aġġustament tal-industrija tal-azzar tal-Unjoni tkomplew. Fis-sottomissjonijiet tagħha u fit-tweġibiet tagħha għall-kwestjonarju, l-industrija tal-azzar tal-Unjoni ddokumentat li kienet qed taġġusta ruħha matul l-ewwel tliet snin tal-applikazzjoni tas-salvagwardja. L-informazzjoni kunfidenzjali sottomessa, ikkumplementata bi stqarrijiet għall-istampa, rapporti tal-kumpaniji u informazzjoni oħra disponibbli pubblikament, uriet li l-industrija tal-azzar tal-UE kienet qed tadotta azzjonijiet ta’ aġġustament biex tnaqqas il-kostijiet, ittejjeb il-prestazzjoni, tkun innovattiva, u twettaq it-trasformazzjoni ambjentali tagħha f’konformità mal-impenji tal-UE biex jiġi miġġieled it-tibdil fil-klima. L-aġġustamenti ddokumentati jikkonċernaw il-kategoriji ta’ prodotti koperti mis-salvagwardja tal-azzar tal-UE. Dawn l-aġġustamenti qed iħejju lill-industrija tal-azzar tal-UE biex tibqa’ finanzjarjament u ambjentalment sostenibbli fit-tul.

(69)

Minn naħa waħda, l-industrija tal-azzar tal-Unjoni rrappurtat miżuri li jsaħħu l-prestazzjoni biex jiġu ffrankati l-ispejjeż u tiġi ottimizzata l-katina tal-valur, bħal tnaqqis fl-impjiegi, għeluq ta’ faċilitajiet inqas effiċjenti jew mhux użati biżżejjed, flimkien ma’ investimenti f’makkinarju u proċessi ta’ produzzjoni ġodda (43). Min-naħa l-oħra, l-industrija tal-azzar tal-Unjoni ddokumentat ukoll aġġustamenti li jħarsu aktar ’il quddiem biex tissaħħaħ il-kompetittività fit-tul, bħal investimenti f’teknoloġiji sostenibbli ġodda (inkluża t-teknoloġija ambjentali), proċessi tal-produzzjoni, u innovazzjoni tal-prodotti. Fost oħrajn, xi wħud mill-produtturi tal-azzar, bħal Aperam (44), Thyssenkrupp (45) jew ArcelorMittal (46) adottaw l-innovazzjonijiet teknoloġiċi l-aktar reċenti u żiedu l-awtomatizzazzjoni u d-diġitalizzazzjoni fil-proċessi tagħhom. Oħrajn, bħal Voestalpine (47) jew Salzgitter (48) iddifferenzjaw il-prodotti tagħhom billi investew f’setturi b’użu finali primjum (bħal dak awtomobilistiku, tal-enerġija) u kkollaboraw mill-qrib mal-klijenti fuq gradi u soluzzjonijiet ġodda tal-azzar. Dawn l-aġġustamenti kollha jgħinu lill-industrija tal-azzar tal-Unjoni biex tadatta għal suq aktar kompetittiv bi pressjoni tal-importazzjoni ogħla.

(70)

Għandu jiġi osservat li dawn l-isforzi ta’ aġġustament ma waqfux mal-bidu tal-kriżi ekonomika kkawżata mill-pandemija tal-COVID-19, għalkemm l-iskossi li rriżultaw u l-effetti ekonomiċi negattivi tal-kriżi żiedu l-kumplessità u l-piż għall-industrija tal-Unjoni biex tkompli bil-proċess ta’ adattament tagħha.

(71)

Il-prinċipji li attwalment qed jiggwidaw l-isforzi ta’ aġġustament tal-industrija tal-azzar tal-Unjoni ġew stabbiliti mill-Kummissjoni fil-Komunikazzjoni tagħha “Strateġija Industrijali Ġdida għall-Ewropa” , ippubblikata f’Marzu 2020 (49), fejn stabbiliet il-pedamenti għal politika industrijali li tappoġġa t-tranżizzjoni doppja lejn ekonomija ekoloġika u diġitali, tagħmel lill-industrija tal-UE aktar kompetittiva fil-livell globali, u ssaħħaħ l-awtonomija strateġika miftuħa tal-Ewropa.

(72)

Billi din l-istrateġija ġiet adottata eżatt meta bdiet il-pandemija tal-COVID-19, il-Kummissjoni reċentement aġġornatha f’Mejju 2021 permezz tal-Komunikazzjoni tagħha “Nibnu Suq Uniku aktar b’saħħtu għall-irkupru tal-Ewropa”  (50), li tieħu rendikont tal-miżuri ta’ emerġenza u rkupru li l-UE sadanittant implimentat fil-kuntest usa’ tal-politika industrijali tal-UE. F’dan l-aġġornament tal-politika industrijali tal-UE, il-Kummissjoni tenfasizza l- “ħtieġa li jitħaffef aktar il-pass tat-tranżizzjoni lejn mudell ekonomiku u industrijali aktar nadif, aktar diġitali u aktar reżiljenti, biex tibqa’ u tissaħħaħ l-ispinta tal-Ewropa lejn kompetittività sostenibbli”.

(73)

Minħabba l-importanza ewlenija tagħha, wieħed mit-tliet Dokumenti ta’ Ħidma tal-Persunal tal-Kummissjoni (“SWD”) li jakkumpanjaw l-aġġornament tal-Istrateġija Industrijali tal-2020 jikkonċerna l-industrija tal-azzar: “Towards competitive and clean European steel”  (51). Dan l-SWD jiddeskrivi l-isfidi u l-opportunitajiet għall-industrija tal-azzar tal-Unjoni, kif ukoll is-sett ta’ għodod ta’ politika tal-UE disponibbli biex jiġu appoġġati l-isforzi futuri tal-industrija tal-azzar tal-Unjoni fit-tmexxija tat-tranżizzjoni doppja.

(74)

Għalhekk, il-Kummissjoni kkonkludiet li l-industrija tal-azzar tal-UE qed taġġusta u se tkompli taġġusta għal sitwazzjoni ta’ importazzjonijiet ogħla matul l-applikazzjoni tas-salvagwardja.

(75)

Il-Kummissjoni sabet li s-salvagwardja tal-azzar tal-UE għadha meħtieġa biex jiġi evitat dannu serju u li hemm evidenza li l-industrija tal-UE għadha qed timplimenta miżuri biex taġġusta għal sitwazzjoni tas-suq ikkaratterizzata minn pressjoni tal-importazzjoni ogħla. Madankollu, skont l-Artikolu 19 tar-Regolament (UE) 2015/478, li jittrasponi l-Artikolu 7.2 tal-Ftehim dwar is-Salvagwardji tad-WTO, it-tul ta’ miżura ta’ salvagwardja “irid ikun limitat għal perjodu ta’ żmien meħtieġ sabiex jipprevjeni jew jirrimedja dannu serju u sabiex jiffaċilita l-aġġustament min-naħa tal-produtturi tal-Unjoni” .

(76)

Il-miżura ta’ salvagwardja tal-Unjoni inizjalment kienet maħsuba biex iddum tliet snin sat-30 ta’ Ġunju 2021. Madankollu, il-Kummissjoni osservat li matul it-tieni sena tal-applikazzjoni tas-salvagwardja, il-kriżi ekonomika li rriżultat mill-pandemija tal-COVID-19 tawlet il-proċess ta’ adattament tal-industrija tal-azzar tal-Unjoni, b’parti mir-riżorsi disponibbli ddedikati biex il-kumpaniji tal-azzar jinżammu vijabbli matul l-aktar fażijiet kritiċi tal-pandemija tal-COVID-19.

(77)

Il-Kummissjoni sabet ukoll li estensjoni għal sena waħda biss tkun qasira b’mod sproporzjonat. F’dan ir-rigward, il-Kummissjoni osservat li bħalma juru l-indikaturi industrjali u finanzjarji tal-industrija tal-azzar tal-Unjoni għall-2020, din bħalissa tinsab f’sitwazzjoni fraġli u għadha vulnerabbli għall-iskossi tal-importazzjoni jekk il-miżura ta’ salvagwardja tiskadi f’dan l-istadju, u dan jista’ jipperikola l-isforzi ta’ aġġustament li saru sa issa. Barra minn hekk, il-Kummissjoni osservat ukoll li għad hemm sitwazzjoni kummerċjali ġenerali u ekonomika dgħajfa, li għadha ma rkupratx bis-sħiħ mir-reċessjoni kkawżata mill-pandemija.

(78)

Fir-rigward ta’ dan tal-aħħar, il-Kummissjoni osservat li għalkemm il-prospetti tat-tkabbir tal-PDG għall-2021 qed jiġu ammeljorati gradwalment mill-maġġoranza tal-previżjonijiet, u dan minħabba r-riżultati pożittivi tal-għoti tal-vaċċin fil-maġġoranza tal-pajjiżi tal-Punent, f’dan iż-żmien il-fiduċja għadha fraġli minħabba f’inċertezzi fil-proċess tal-vaċċinazzjoni u d-diffikultajiet biex tiġi kkontrollata l-pandemija f’pajjiżi kummerċjali importanti bħall-Brażil u l-Indja. Oxford Economics, fl-aħħar Prospettiva tagħha ta’ Mejju/Ġunju 2021, żiedet it-tbassir tagħha tal-PDG dinji u issa tistenna li din is-sena jikber b’6,3 % u b’4,6 % fl-2022, rispettivament b’0,4 u 0,2 punti perċentwali ogħla mit-tbassir preċedenti tagħha, hekk kif l-ekonomiji jirkupraw it-telf matul l-agħar fażijiet tal-pandemija. Rigward iż-Żona tal-euro, Oxford Economics tistenna li l-PDG jikber b’4,2 % fl-2021 u b’4,7 % fl-2022, b’ritorn għal-livell li kellha qabel il-kriżi sal-bidu tal-2022. Min-naħa tagħha, fit-Tbassir ekonomiku tagħha tar-Rebbiegħa 2021 il-Kummissjoni aġġornat ukoll it-tbassir tagħha għall-ekonomija tal-UE u tistenna li din tespandi b’4,2 % fl-2021 u b’4,4 % fl-2022. F’termini ta’ rkupru, ir-rati ta’ tkabbir ivarjaw b’mod importanti bejn l-Istati Membri u l-Kummissjoni tistenna li l-Istati Membri kollha jenħtieġ li jaraw lill-ekonomiji tagħhom jerġgħu lura għal-livelli li kellhom qabel il-kriżi sa tmiem l-2022.

(79)

F’dawn iċ-ċirkostanzi attwali, sabiex jiġi evitat li l-industrija tal-Unjoni ġġarrab dannu serju mhux dovut jekk il-miżura ta’ salvagwardja tiskadi f’dan l-istadju, il-Kummissjoni tqis li huwa meħtieġ li l-miżura tiġi estiża għal tliet snin addizzjonali sat-30 ta’ Ġunju 2024.

(80)

Madankollu, sabiex jiġi garantit li l-estensjoni tibqa’ limitata għall-minimu strett meħtieġ, l-estensjoni se tkun soġġetta għas-sistema ta’ rieżami prevista fit-Taqsima 4 li, fost oħrajn, tipprevedi rieżami biex jiġi ddeterminat jekk is-salvagwardja għandhiex ma tiġix mitmuma sat-30 ta’ Ġunju 2023 wara sentejn ta’ estensjoni.

(81)

Ir-rata attwali ta’ liberalizzazzjoni tas-salvagwardja ġiet stabbilita f’rata annwali ta’ 3 %. Il-Kummissjoni vvalutat, abbażi tal-evidenza disponibbli, jekk dan il-livell ta’ liberalizzazzjoni għadux xieraq u proporzjonali għall-iżviluppi u għall-prospetti tas-suq. Minbarra t-tbassir ekonomiku ġenerali u l-indikaturi ta’ rkupru speċifiċi għall-industrija deskritti fit-taqsima preċedenti għall-valutazzjoni tat-tul tal-estensjoni, il-Kummissjoni qieset ukoll indikaturi ta’ rkupru kummerċjali.

(82)

F’dan ir-rigward, IHS Markit, fit-Tbassir GTA tagħha tal-flussi kummerċjali ta’ April, bassret żidiet importanti minn sena għal oħra fil-valur reali tal-kummerċ globali, b’żidiet ta’ 6,5 % u 4,3 % rispettivament fl-2021 u fl-2022 li se jippermettu sa tmiem l-2021 diġà jinlaħaq il-livell ta’ qabel il-pandemija tal-COVID-19. Madankollu, il-kummerċ globali se jkompli jesperjenza tnaqqis fir-rigward tax-xejra tiegħu fit-tul ta’ qabel il-COVID, jiġifieri mill-2011-2019, u din mhux se tintlaħaq qabel l-2025/2026. Barra minn hekk, IHS Markit tipprevedi li fl-aħħar mill-aħħar il-kummerċ globali se jikber b’Rata Komposta medja ta’ Tkabbir Annwali aktar baxxa ta’ 2,9 % biss matul il-perjodu 2021-2030.

(83)

F’dawn iċ-ċirkostanzi, kif inhu mbassar mit-tbassir attwali, mhuwiex mistenni li l-kundizzjonijiet ekonomiċi u kummerċjali ta’ qabel il-pandemija se jiġu stabbiliti mill-ġdid b’mod sod fl-Unjoni qabel tmiem l-ewwel nofs tal-2022, u f’konformità mar-rata ta’ tkabbir imbassra fuq ix-xejra attwali tal-flussi kummerċjali, il-Kummissjoni ma tara l-ebda raġuni biex f’dan l-istadju tinbidel ir-rata ta’ liberalizzazzjoni ta’ 3 % għall-ewwel sena ta’ estensjoni.

(84)

Barra minn hekk, iż-żamma ta’ mill-inqas 3 % sat-30 ta’ Ġunju 2022 se żżomm l-importazzjonijiet sa massimu ta’ 32,5 miljun tunnellata, li għadhom ftit inqas mir-rekord storiku tal-2018. Ir-rekord storiku jista’ jinkiseb sena wara, ladarba l-kundizzjonijiet ekonomiċi u kummerċjali jkunu rkupraw sa dak iż-żmien.

(85)

Bl-għan li jiġi ggarantit li l-miżura ta’ salvagwardja tibqa’ fis-seħħ biss sa fejn ikun meħtieġ, il-Kummissjoni se twettaq rieżami biex tiddetermina jekk, abbażi taċ-ċirkostanzi f’dak iż-żmien, il-miżura ta’ salvagwardja jenħtiġx li tintemm sat-30 ta’ Ġunju 2023, jiġifieri wara sentejn ta’ estensjoni. Barra minn hekk, sabiex sadanittant iżżomm it-tħaddim tas-salvagwardja adattata għall-evoluzzjoni tas-suq u f’konformità mal-interess tal-partijiet ikkonċernati kollha, il-Kummissjoni se twettaq rieżami tal-funzjonament, bħal dawk imwettqa fl-2019 u fl-2020. Dan ir-rieżami tal-funzjonament se jinbeda biżżejjed minn qabel biex tiġi introdotta kwalunkwe bidla meħtieġa mill-1 ta’ Lulju 2022, wara l-ewwel sena ta’ estensjoni. Se jinbeda wkoll rieżami immedjat tal-miżura ta’ salvagwardja jekk l-Istati Uniti tintroduċi bidla fil-miżura tat-Taqsima 232 tagħha dwar l-azzar li jista’ jkollha impatt sinifikanti fuq il-flussi kummerċjali ddevjati mhux kif suppost li qed tiġġenera bħalissa.

(86)

Il-Kummissjoni ddeċidiet ukoll li l-pass ta’ liberalizzazzjoni ta’ 3 % xorta waħda jista’ jiġi rieżaminat u, jekk meħtieġ, mibdul matul ir-rieżami tal-funzjonament li għandu jitlesta sat-30 ta’ Ġunju 2022, jekk iċ-ċirkostanzi jiġġustifikaw dan.

(87)

Il-Kummissjoni eżaminat ukoll jekk jeżistux raġunijiet ekonomiċi konvinċenti li jistgħu jwasslu għall-konklużjoni li mhuwiex fl-interess tal-Unjoni li tiġi estiża s-salvagwardja eżistenti.

(88)

Għal dan il-għan, il-Kummissjoni vvalutat l-impatt tal-miżuri possibbli fuq il-produtturi, l-importaturi u l-utenti tal-Unjoni. Il-valutazzjoni tal-evidenza disponibbli hija strutturata kif ġej: i) is-sitwazzjoni ekonomika tal-produtturi tal-azzar tal-Unjoni u l-effett possibbli tal-eliminazzjoni tal-miżura (ara t-Taqsima 5.1); u ii) l-interess tal-utenti u tal-importaturi, fid-dawl tal-allegat nuqqas fil-provvista, il-livell għoli tal-prezzijiet tal-azzar, u d-dewmien fil-provvista ddikjarat minn xi partijiet interessati, kif ukoll ir-rabta kawżali potenzjali bejn dawn l-effetti allegati u s-salvagwardja tal-azzar tal-Unjoni (ara t-Taqsima 5.2). Fil-valutazzjoni tagħha, il-Kummissjoni qieset b’mod partikolari l-evoluzzjoni tal-użu tat-TRQ taħt is-salvagwardja u d-disponibbiltà ġenerali tal-importazzjonijiet fil-provvista lejn is-suq tal-Unjoni.

(89)

L-industrija tal-azzar tal-Unjoni għandha aktar minn 500 sit ta’ produzzjoni li joperaw fi 23 Stat Membru tal-UE. L-industrija timpjega 330 000 persuna direttament, u meta jiġu inklużi impjiegi indiretti u indotti f’setturi oħra, toħloq 2,6 miljun impjieg madwar l-Unjoni (52).

(90)

Fit-Taqsima 3.1.1, il-Kummissjoni ddeskriviet is-sitwazzjoni ekonomika tal-produtturi tal-azzar tal-Unjoni u kkonkludiet li kien meħtieġ li l-miżura tiġi estiża biex jiġi evitat jew irrimedjat dannu serju. Jekk il-miżura ma tiġix estiża, l-investigazzjoni stabbiliet li l-industrija tal-Unjoni aktarx tiffaċċja mewġa sinifikanti ta’ importazzjonijiet li jimminaw b’mod serju kwalunkwe sforz biex isir aġġustament għall-pressjoni tal-importazzjoni f’sitwazzjoni ekonomika ġenerali li għadha inċerta fl-Unjoni.

(91)

Għalhekk, ikun fl-interess tal-produtturi tal-azzar tal-Unjoni li l-miżura tiġi estiża.

(92)

Il-Kummissjoni osservat li l-miżura ta’ salvagwardja ppermettiet li l-volumi tan-negozju storiċi jkomplu jidħlu fis-suq tal-Unjoni mingħajr dazju, u li ġiet liberalizzata b’mod regolari (billi żdiedu l-volumi tat-TRQ bi 3 % f’Lulju 2019 u f’Lulju 2020 rispettivament) (53). Għalhekk, il-volumi tan-negozju tradizzjonali żdiedu gradwalment taħt il-miżura ta’ salvagwardja. Barra minn hekk, matul l-estensjoni tagħha, il-miżura ta’ salvagwardja se tkompli tiġi liberalizzata.

(93)

Meta vvalutat l-użu tat-TRQ, il-Kummissjoni osservat li, matul l-ewwel tliet snin tal-applikazzjoni tas-salvagwardja, kien hemm volumi konsistenti (u dejjem akbar) ta’ TRQ mingħajr dazju disponibbli fi tmiem kull perjodu rilevanti, virtwalment fil-kategoriji kollha ta’ prodotti, spiss b’aktar minn kwota waħda speċifika għall-pajjiż disponibbli, u f’ħafna każijiet anke parti mill-kwota residwa. Il-Kummissjoni osservat ukoll li, mit-tieni sena ta’ applikazzjoni tal-miżuri, jiġifieri mill-1 ta’ Lulju 2019, ix-xejra fl-użu tat-TRQ esperjenzat tnaqqis qawwi. Għalhekk dan kien il-każ anke qabel il-pandemija tal-COVID-19.

(94)

Din l-evoluzzjoni tidher b’mod ċar fit-Tabella 14 hawn taħt (54):

Sors: il-bażi tad-data dwar il-kwoti ta’ TAXUD

(95)

Għalhekk, il-Kummissjoni kkonkludiet li filwaqt li s-salvagwardja ssodisfat l-objettiv tagħha li tiskoraġġixxi devjazzjoni tat-traffiku kummerċjali lejn is-suq tal-Unjoni, kien hemm biżżejjed volumi ta’ TRQ mingħajr dazju disponibbli għall-importaturi u għall-utenti fl-Unjoni, b’mod proporzjonali għad-domanda u li jaqbżu l-volumi ġenerużi tan-negozju storiċi.

5.2.2.   Prezzijiet tal-azzar għoljin

(96)

Il-Kummissjoni vvalutat ukoll l-evidenza disponibbli fir-rigward taż-żidiet fil-prezzijiet osservati fis-settur tal-azzar fl-ewwel xhur tal-2021 u f’parti mit-tieni nofs tal-2020. B’mod partikolari, il-Kummissjoni ħarset lejn jekk dawn iż-żidiet fis-suq tal-Unjoni u fis-suq dinji kinux marbuta mal-miżura ta’ salvagwardja tal-azzar tal-UE, u lejn l-impatt li din iż-żieda qed ikollha u/jew kieku jkollha fuq is-suq tal-Unjoni jekk il-miżura tas-salvagwardja tiġi estiża.

(97)

F’dan ir-rigward, il-Kummissjoni l-ewwel osservat li huwa fatt mhux ikkontestat (55) li l-prezzijiet tal-azzar, inklużi dawk ta’ xi kategoriji ta’ prodotti fi ħdan il-prodott ikkonċernat, esperjenzaw żieda qawwija madwar id-dinja matul l-aħħar xhur (bdiet matul it-tieni nofs tal-2020) (56). Din ix-xejra u l-ambitu jidhru wkoll b’mod ċar fiċ-ċarts li jinsabu fil-Graffs 1-3 (57), li juru l-evoluzzjoni tal-prezz ta’ tliet kategoriji ta’ prodotti (il-Kategoriji 1, 4 u 13) (58):

(98)

Barra minn hekk, il-Kummissjoni osservat li l-prezzijiet tal-materja prima għall-produzzjoni tal-azzar, b’mod partikolari l-mineral tal-ħadid u r-ruttam, ukoll kienu qed jesperjenzaw żieda drastika matul l-istess perjodu meta l-prezzijiet tal-azzar bdew jiżdiedu, kif spjegat fil-premessa (91) (ara l-Graff 4) (59).

(99)

Ir-Rapport tal-OECD spjega li l-prezzijiet tal-materja prima ewlenija għall-produzzjoni tal-azzar żdiedu b’mod drammatiku matul it-tieni nofs tal-2020, u minn Frar 2021, il-prezzijiet referenzjarji għall-mineral tal-ħadid, għall-faħam tal-kokk u għar-ruttam kienu ogħla b’97 %, 53 % u 56 % sena wara sena, rispettivament. (61)

(100)

Din l-informazzjoni tikkonferma l-istampa deskritta mill-evoluzzjoni tal-indikaturi tad-dannu fit-Tabelli 1 sa 4. B’mod partikolari, li ż-żieda fil-prezzijiet fit-tieni nofs tal-2020, flimkien ma’ sinjali ta’ rkupru fid-domanda, ikkontribwiet għat-titjib fis-sitwazzjoni tal-industrija tal-Unjoni minn sitwazzjoni preċedenti li kienet negattiva ħafna. Madankollu, din iż-żieda fil-prezz ma ppermettietx lill-industrija tal-Unjoni terġa’ lura għal marġnijiet profittabbli sa tmiem l-2020. Dan il-fatt huwa attribwibbli, mill-anqas parzjalment, għaż-żieda parallela fil-prezzijiet esperjenzata fil-materja prima ewlenija għall-produzzjoni tal-azzar.

(101)

F’dan ir-rigward, l-OECD osservat dan u li minkejja ż-żieda qawwija fil-prezzijiet tal-azzar, il-marġni tal-prezzijiet tal-materja prima tal-azzar, imkejjel mid-differenza bejn il-prezz tal-azzar u basket ta’ inputs tal-azzar, ma żdiedx minħabba ż-żieda fil-prezzijiet tal-materja prima (Illustrazzjoni 9). Fil-fatt, il-basket tal-prezzijiet tal-materja prima użat biex jiġu kkalkulati l-marġnijiet kien 97 % ogħla fi Frar 2021, sena wara sena (62).

(102)

Kif jidher fil-Graffs 1-3, il-Kummissjoni osservat ukoll li ż-żieda fil-prezzijiet tal-azzar ma hijiex fenomenu marbut mas-suq tal-Unjoni, iżda xejra mifruxa fis-swieq prinċipali tal-azzar madwar id-dinja.

(103)

Madankollu, minkejja dan, kif jidher fit-Tabella 14, il-Kummissjoni osservat li kien hemm disponibbiltà kbira ta’ kwoti mingħajr dazju minn diversi sorsi prattikament fil-kategoriji kollha ta’ prodotti fl-aħħar perjodu tal-miżura, jiġifieri mill-1 ta’ Lulju 2020 (63). Konsegwentement, is-salvagwardja ma llimitatx lill-utenti tal-Unjoni biex jixtru l-azzar esklużivament mill-produtturi tal-Unjoni bil-prezzijiet li dawn ikunu stabbilew, u b’hekk jitħallew mingħajr alternattiva oħra ta’ provvista realistika (u mingħajr dazju). Għall-kuntrarju, l-utenti tal-Unjoni kellhom il-possibbiltà li jimportaw minn oriġini oħra taħt il-volumi rilevanti ta’ TRQ mingħajr dazju disponibbli għal kull kategorija ta’ prodotti.

(104)

Il-Kummissjoni osservat ukoll li s-sottomissjonijiet ta’ ċerti utenti allegaw li dawn ma setgħux jimportaw volumi akbar mingħajr dazju minn ċerti oriġini speċifiċi (dawn l-oriġini jvarjaw skont il-kategorija ta’ prodotti inkwistjoni). Madankollu, il-Kummissjoni osservat li waħda mill-kundizzjonijiet ta’ infurzar ta’ salvagwardja hija li jiġi ppreservat li l-flussi kummerċjali tradizzjonali f’termini kemm ta’ volumi kif ukoll ta’ oriġini jkomplu jkunu disponibbli fis-suq tal-Unjoni. Il-fatt li pajjiż partikolari seta’ eżawrixxa t-TRQ speċifiku għall-pajjiż tiegħu f’kategorija ta’ prodotti speċifika, filwaqt li jkun hemm volumi u oriġini multipli b’TRQ mingħajr dazju disponibbli f’dik l-istess kategorija, ma jfissirx li l-miżura ta’ salvagwardja qed toħloq nuqqas mhux dovut fis-suq.

(105)

Għalhekk, dawn il-fatti jissuġġerixxu bil-qawwa li l-miżura ta’ salvagwardja ma hijiex il-kawża taż-żieda osservata fil-prezz tal-azzar, u li din ma toħloqx nuqqas ġenerali ta’ azzar fis-suq tal-Unjoni. Għalhekk, il-Kummissjoni kkonkludiet li ma hemmx rabta diretta bejn il-miżura ta’ salvagwardja u l-evoluzzjoni reċenti fil-livelli tal-prezzijiet tal-azzar. Barra minn hekk, mhuwiex evidenti li l-prezzijiet attwalment għoljin se jiġu sostnuti fit-tul, ladarba s-suq jaġġusta għal sitwazzjoni ta’ wara l-pandemija tal-COVID-19. (64)

(106)

Il-Kummissjoni mbagħad ivvalutat id-dewmien allegat imġarrab mill-industrija tal-azzar tal-Unjoni fil-forniment tas-suq tal-Unjoni (65). Mill-investigazzjoni sar evidenti li fl-aħħar parti tal-perjodu taħt kunsiderazzjoni kien hemm spariġġ tranżitorju bejn id-domanda u l-provvista fl-Unjoni (kif ukoll fi swieq terzi oħra) meta l-ekonomija bdiet tirkupra mill-qiegħ tar-reċessjoni dovuta għall-pandemija tal-COVID-19. (66) F’dan ir-rigward, il-Kummissjoni osservat li l-produtturi tal-azzar kellhom jirreaġixxu għat-tnaqqis f’daqqa u drastiku fid-domanda li seħħ fl-2020 minħabba l-pandemija tal-COVID-19 (67). L-industrija tal-Unjoni waqqfet parti mill-kapaċità tagħha biex tnaqqas kemm jista’ jkun l-ispejjeż fissi tagħha u biex tallinja l-kapaċità eżistenti mad-domanda eżistenti. Sussegwentement, aktar tard fl-2020 u fil-bidu tal-2021, id-domanda f’xi setturi li jużaw l-azzar esperjenzat irkupru rapidu u f’daqqa, eż. fis-settur awtomobilistiku (68).

(107)

Din is-sitwazzjoni seħħet ukoll f’diversi swieq madwar id-dinja. F’dan ir-rigward, skont ir-Rapport l-aktar reċenti tal-OECD, il-kapaċità vasta għall-produzzjoni tal-azzar li tnaqqset temporanjament matul l-eqqel tal-pandemija ma setgħetx terġa’ titħaddem malajr biżżejjed biex tissodisfa l-irkupru fid-domanda u l-istokkjar mill-ġdid tal-azzar, u dan wassal għal żieda rapida fil-prezzijiet globali tal-azzar (69).

(108)

Bl-istess mod, S&P Platts Global osservat li minbarra ċ-Ċina, il-produzzjoni tal-azzar mhux maħdum damet biex tirkupra wara l-lockdowns f’pajjiżi u reġjuni ewlenin. L-output tal-Ewropa naqas b’7,1 % fis-sena f’Marzu, dak tal-Amerika ta’ Fuq bi 8,9 % u dak tal-Indja bi 8,6 %, skont l-Assoċjazzjoni Dinjija tal-Azzar. Fl-Istati Uniti, ir-rati ta’ użu tal-kapaċità tal-imtieħen għadhom biss madwar 77 % meta mqabbla ma’ 80 % f’Marzu tas-sena l-oħra qabel ma seħħet il-pandemija. Il-METI tal-Ġappun ibassar li l-produzzjoni tal-azzar mhux maħdum tal-pajjiż hija ta’ 23,24 miljun mt fi Q2, inqas mit-23,67 miljun fi Q1 (70). IHS Markit osserva wkoll li t-tħaddim mill-ġdid tal-fran u l-importazzjonijiet li qed jiżdiedu bil-qawwa qed jibdew itaffu l-kriżi fil-provvista (71).

(109)

Biex tasal għal konklużjoni, il-Kummissjoni analizzat l-evidenza disponibbli fil-fajl dwar it-tkomplija tal-operazzjonijiet fil-linji ta’ produzzjoni li kienu ġew imserrħa temporanjament mill-industrija tal-Unjoni matul il-pandemija.

(110)

L-evidenza fil-fajl tindika żieda kostanti fil-kapaċità disponibbli fis-suq minn fran li twaqqfu fl-2020 (72). Il-Kummissjoni qieset li din l-evidenza turi li l-industrija tal-Unjoni qed twieġeb għall-irkupru ekonomiku f’ċerti setturi downstream fl-2021, u dan jenħtieġ li jirriżulta f’li hija tkun kapaċi tforni volumi akbar ta’ azzar f’perjodu iqsar, u b’hekk jiġi restawrat bilanċ fis-suq (73).

(111)

Ir-Rapport tal-OECD osserva wkoll, f’dan ir-rigward, li huwa mistenni b’mod wiesa’ li l-provvista tal-azzar tlaħħaq mal-ordnijiet sa tmiem l-ewwel trimestru tal-2021 (74). Tbassir simili huwa rifless minn bosta pubblikazzjonijiet speċjalizzati (75).

(112)

Għalhekk, il-Kummissjoni sabet li l-problemi tal-provvista esperjenzati wara l-irkupru fid-domanda kienu tranżitorji u li għalhekk, ir-ritorn għat-tħaddim ta’ faċilitajiet wieqfa mill-industrija tal-Unjoni, li qed iseħħ, jenħtieġ li jgħin biex jiġi żgurat li l-kundizzjonijiet normali tal-provvista tal-azzar ta’ qabel il-pandemija jerġgħu jiġu stabbiliti f’perjodu raġonevolment qasir.

(113)

Dokument ta’ Ħidma tal-Persunal tal-Kummissjoni reċenti kkonferma l-importanza li jkun hemm settur tal-azzar qawwi u kompetittiv fl-Unjoni. F’dan ir-rigward, huwa osserva li l-Istrateġija Industrijali tal-UE rrikonoxxiet ukoll li l-industriji intensivi fl-enerġija huma indispensabbli għall-ekonomija tal-Ewropa u li setturi oħrajn jiddependu fuqhom, u li s-settur tal-azzar u industriji oħrajn intensivi fl-enerġija għandhom rwol vitali fil-provvista ta’ prodotti u servizzi lil firxa wiesgħa ta’ ekosistemi industrijali tal-Ewropa (76).

(114)

L-istess Dokument ta’ Ħidma tal-Persunal osserva wkoll li l-azzar huwa input kruċjali għal bosta ekosistemi downstream, bħall-kostruzzjoni, il-mobbiltà u s-settur awtomobilistiku, jew għall-kumpaniji tal-inġinerija mekkanika. Id-data dwar il-konsum tal-azzar għal kull settur turi li l-kostruzzjoni tirrappreżenta 35 % tal-użu tal-azzar fl-UE, is-settur awtomobilistiku jirrappreżenta 19 %, l-inġinerija mekkanika u s-settur tal-prodotti tal-metall jirrappreżentaw 15 % kull wieħed, u t-tubi jirrappreżentaw 10 %. Kumpaniji attivi f’dawn is-setturi, li ħafna minnhom huma intrapriżi żgħar u ta’ daqs medju (SMEs), jimpjegaw miljuni ta’ ħaddiema fl-Ewropa u jiddependu mill-produzzjoni tal-azzar tal-UE (77). Bl-istess mod, fl-2016, Komunikazzjoni tal-Kummissjoni kienet diġà enfasizzat li “bażi industrijali b’saħħitha hija essenzjali għat-tkabbir ekonomiku tal-Ewropa, għaż-żamma ta’ impjiegi sostenibbli u għall-kompetittività tagħha fis-swieq globali”, u li “settur tal-azzar b’saħħtu jifforma l-bażi ta’ ħafna ktajjen ta’ valur industrijali”  (78).

(115)

Il-Kummissjoni stabbiliet li huma ssodisfati r-rekwiżiti legali tan-neċessità u tal-aġġustament meħtieġa biex tiġi estiża miżura ta’ salvagwardja.

(116)

Barra minn hekk, il-Kummissjoni sabet ukoll li tneħħija f’dan l-istadju tal-miżura ta’ salvagwardja aktarx tikkawża żieda f’daqqa fl-importazzjoni u din il-ħaġa taggrava b’mod serju s-sitwazzjoni finanzjarja attwali tal-industrija tal-azzar tal-Unjoni, li għadha fraġli. Din l-eliminazzjoni kieku tipperikola l-irkupru tal-industrija tal-Unjoni hekk kif l-ekonomija u l-kummerċ tal-Unjoni u dawk dinjija qed jirkupraw wara r-reċessjoni dovuta għall-pandemija tal-COVID-19, u għadhom ma rritornawx għall-kundizzjonijiet ta’ qabel il-pandemija. Min-naħa tiegħu, dan l-iskoss fl-importazzjonijiet jirriskja li jelimina l-isforzi ta’ aġġustament li l-industrija tal-azzar tal-Unjoni qed tagħmel biex tadatta għal pressjoni tal-importazzjoni aktar qawwija li ġejja minn dinamika tas-suq b’distorsjoni serja kkawżata minn kapaċità żejda globali dejjem tikber, kif ukoll minn interventi mill-Istati.

(117)

Barra minn hekk, il-Kummissjoni sabet ukoll li ż-żidiet fil-prezzijiet tal-azzar osservati reċentement fis-suq tal-azzar tal-Unjoni ma jistgħux ikunu imputabbli għal, jew ikunu r-riżultat tas-salvagwardja tal-azzar tal-Unjoni, minħabba li prezzijiet għoljin simili jipprevalu wkoll fis-swieq dinjija u volumi kbar ta’ TRQs mingħajr dazju xorta waħda għadhom mhux użati u disponibbli taħt is-salvagwardja.

(118)

F’dan ir-rigward, il-Kummissjoni osservat ukoll li, b’inqas minn xahar u nofs għal tmiem it-tielet sena tal-miżura, madwar 11-il miljun tunnellata ta’ TRQ mingħajr dazju baqgħu ma ntużawx, jiġifieri 36 % tat-TRQ totali disponibbli (79). B’hekk intwera li fil-kategoriji ta’ prodotti kollha, l-utenti kellhom il-possibbiltà li jiksbu biżżejjed azzar mingħajr dazju minn diversi sorsi, u li l-miżura ta’ salvagwardja ma llimitatx il-provvista effettiva b’mod eċċessiv, la f’termini ta’ volum u lanqas f’termini ta’ oriġini.

(119)

Fil-qosor, il-Kummissjoni sabet li huwa ċar li l-iżvantaġġi jekk is-salvagwardja titħalla tiskadi fit-30 ta’ Ġunju 2021 ikunu ferm akbar minn kwalunkwe benefiċċju potenzjali li tista’ ġġib magħha t-terminazzjoni tagħha.

(120)

Għalhekk, il-Kummissjoni kkonkludiet li huwa fl-interess ġenerali tal-Unjoni li l-miżura ta’ salvagwardja tiġi estiża.

(121)

Il-lista ta’ pajjiżi li qed jiżviluppaw li se jkomplu jkunu soġġetti għall-miżura ta’ salvagwardja tibqa’ l-istess bħal dik inkluża fl-Anness II tar-Regolament ta’ Implimentazzjoni tal-Kummissjoni (UE) 2020/2037. (80)

(122)

Il-Kummissjoni rċeviet aktar minn 160 sottomissjoni ta’ osservazzjonijiet u ta’ konfutazzjonijiet mill-partijiet interessati, inklużi produtturi tal-azzar tal-Unjoni, utenti u importaturi tal-azzar tal-Unjoni, produtturi esportaturi u gvernijiet ta’ pajjiżi terzi. F’din it-taqsima, il-Kummissjoni se tindirizza d-dikjarazzjonijiet li saru minn dawn il-partijiet interessati. Għall-finijiet tal-ekonomija amministrattiva, il-Kummissjoni ġabret id-dikjarazzjonijiet skont in-natura u l-kontenut. Fejn xieraq, il-Kummissjoni rreferiet għal sejbiet preċedenti f’dan ir-Regolament li diġà indirizzaw fid-dettall il-biċċa l-kbira mid-dikjarazzjonijiet li saru mill-partijiet interessati.

(123)

Bosta partijiet interessati argumentaw li r-rekwiżit legali taż-żieda f’daqqa fl-importazzjonijiet ma kienx issodisfat billi matul il-perjodu taħt kunsiderazzjoni, il-livell ġenerali tal-importazzjonijiet kien naqas; f’dawn iċ-ċirkostanzi, huma sostnew li l-Kummissjoni ma hijiex intitolata testendi s-salvagwardja. Barra minn hekk, xi partijiet argumentaw li kwalunkwe sitwazzjoni dannuża tal-industrija tal-Unjoni ma kinitx tkun ir-riżultat ta’ żieda fl-importazzjonijiet. Partijiet oħrajn iddikjaraw li l-effetti dderivati mill-pandemija tal-COVID-19, inkluż tnaqqis fid-domanda, ma jiġġustifikawx estensjoni tal-miżura. Fl-aħħar nett, partijiet oħra ddikjaraw li r-rekwiżiti legali biex tiġi estiża miżura huma l-istess bħal dawk għall-impożizzjoni ta’ miżura oriġinali, inklużi żieda fl-importazzjonijiet, rabta kawżali u żviluppi imprevisti.

(124)

F’dan ir-rigward, il-Kummissjoni tosserva li r-rekwiżiti għall-estensjoni ta’ miżura ta’ salvagwardja skont l-Artikolu 7.1 tal-Ftehim dwar is-Salvagwardji tad-WTO u l-Artikolu 19(2) tar-Regolament (UE) 2015/478, jiġifieri l-ħtieġa li jiġu evitati jew rimedjati dannu serju u aġġustament kontinwu, ma jeħtiġux li sseħħ żieda fl-importazzjonijiet matul il-perjodu taħt kunsiderazzjoni. Il-Kummissjoni stabbiliet li hemm probabbiltà li, jekk tiskadi s-salvagwardja, l-importazzjonijiet jiżdiedu u dan jirriżulta f’dannu serju għall-interess tal-Unjoni. Għalhekk, il-Kummissjoni rrifjutat dawn id-dikjarazzjonijiet.

(125)

Bosta partijiet interessati sfidaw il-fatt li l-industrija tal-azzar tal-Unjoni qed taġġusta u għalhekk iddikjaraw li dan ir-rekwiżit legali ma huwiex issodisfat.

(126)

Il-Kummissjoni tirreferi għall-aġġustamenti deskritti fit-Taqsima 3.2. Il-miżuri u l-eżempji elenkati f’din it-taqsima juru li l-industrija tal-azzar tal-Unjoni qed taġġusta permezz ta’ bosta azzjonijiet immirati lejn l-effiċjenza u l-innovazzjoni. Konsegwentement, il-Kummissjoni rrifjutat dawn id-dikjarazzjonijiet.

(127)

Bosta partijiet interessati argumentaw li l-miżuri ta’ aġġustament tal-industrija tal-Unjoni kienu azzjonijiet ta’ ristrutturar imwettqa matul il-pandemija tal-COVID-19 jew sempliċiment investiment regolari, parzjalment immotivat mill-politiki tal-UE bħall-Patt Ekoloġiku Ewropew, aktar milli miżuri adottati fil-kuntest tat-titjib tal-kompetittività tal-industrija tal-azzar tal-Unjoni vis-à-vis il-kompetizzjoni barranija. F’dan ir-rigward, il-Kummissjoni sabet li l-miżuri ta’ aġġustament adottati mill-kumpaniji fi kwalunkwe kuntest, normalment jirreaġixxu għal ħafna raġunijiet differenti u fl-istess ħin għandhom ħafna objettivi. Fil-każ tas-salvagwardja, tabilħaqq kif iddikjarat fit-taqsima ta’ aġġustament, xi wħud mill-aġġustamenti li saru mill-industrija tal-azzar tal-Unjoni kellhom ukoll l-għan, fost objettivi oħra, li jimmitigaw l-iskossi u l-effetti ekonomiċi negattivi tal-pandemija jew li jissodisfaw l-impenji ambjentali tal-UE. Madankollu, fi kwalunkwe każ, dawn it-tipi ta’ aġġustamenti huma wkoll miżuri li jadattaw l-attivitajiet tal-industrija tal-azzar tal-Unjoni għal sitwazzjoni b’livell ogħla ta’ importazzjonijiet u pressjoni tal-importazzjoni, f’konformità mal-linji gwida u l-objettivi tal-politika industrijali tal-UE deskritti fl-istess taqsima. Pereżempju, l-installazzjoni ta’ Arvedi (81) ta’ forn elettriku ġdid effiċjenti ħafna fil-linja ta’ produzzjoni tagħha kellha l-għan li ssir aktar kosteffiċjenti filwaqt li jitnaqqsu l-emissjonijiet tal-karbonju tagħha. Għalhekk, il-Kummissjoni tqis li ma kienx hemm biżżejjed evidenza biex jiġu ġġustifikati dawn id-dikjarazzjonijiet, u rrifjutathom.

(128)

Xi partijiet interessati ddikjaraw li l-miżuri tat-Taqsima 232 tal-Istati Uniti rigward l-azzar ma għadhomx jippreżentaw riskju ta’ devjazzjoni tat-traffiku kummerċjali, billi s-suq ikun aġġusta lilu nnifsu f’dawn l-aħħar tliet snin. Barra minn hekk, xi partijiet jiddikjaraw li l-eżenzjonijiet fis-seħħ skont dik il-miżura, fi kwalunkwe każ kieku fil-biċċa l-kbira jnaqqsu r-riskju ta’ kwalunkwe devjazzjoni tat-traffiku kummerċjali lejn is-suq tal-Unjoni. Barra minn hekk, xi partijiet iddikjaraw ukoll li l-livell tal-prezzijiet fl-Istati Uniti huwa sostanzjalment ogħla minn ta’ swieq oħra u għalhekk jagħmel id-devjazzjoni tat-traffiku kummerċjali inqas probabbli.

(129)

Fir-rigward tal-miżuri tat-Taqsima 232 tal-Istati Uniti, il-Kummissjoni tirreferi għat-Tabella 7 li turi li l-importazzjonijiet lejn l-Istati Uniti naqsu drastikament wara l-impożizzjoni tagħhom u li swieq oħrajn ma assorbewx dak il-volum żejjed. Rigward l-eżenzjonijiet fis-seħħ, il-Kummissjoni osservat li f’ċerti każijiet, pereżempju l-Kanada u l-Messiku (li huma fost l-akbar pajjiżi esportaturi lejn l-Istati Uniti), dawn l-eżenzjonijiet ma għandhom l-ebda effett fuq ir-riskju ta’ devjazzjoni tat-traffiku kummerċjali billi dawn il-pajjiżi għandhom volumi tal-esportazzjoni tal-azzar negliġibbli fis-suq tal-Unjoni. Il-pajjiżi esportaturi prinċipali tal-azzar lejn l-UE għadhom soġġetti għall-miżuri tat-Taqsima 232 tal-Istati Uniti u għandhom biżżejjed kapaċità biex iżidu l-esportazzjonijiet tagħhom lejn l-UE. L-analiżi individwali tal-prestazzjoni tal-esportazzjoni tagħhom mill-impożizzjoni tal-miżuri tat-Taqsima 232 tal-Istati Uniti turi tnaqqis kostanti (82). Għalhekk, kwalunkwe eżenzjoni li tista’ tkun fis-seħħ ma tnaqqasx ir-riskju ta’ devjazzjoni tat-traffiku kummerċjali. Fl-aħħar nett, il-fatt li l-prezzijiet fl-Istati Uniti huma ogħla ma jinvalidax is-sejba li għad hemm riskju ta’ devjazzjoni tat-traffiku kummerċjali. Fil-fatt, il-Kummissjoni tindika x-xejriet tal-importazzjoni fl-Istati Uniti mill-2018 ’l hawn. Dan it-tnaqqis enormi fl-importazzjonijiet huwa marbut biż-żmien bl-impożizzjoni tal-miżuri tat-Taqsima 232 tal-Istati Uniti. Għalhekk, il-fatt li l-Istati Uniti jista’ jkollhom prezzijiet domestiċi ogħla minn swieq oħra ma waqqafx lill-importazzjonijiet milli jonqsu b’mod sostanzjali matul il-perjodu taħt kunsiderazzjoni.

(130)

Bosta partijiet interessati ddikjaraw li l-kapaċità żejda kienet qed tonqos u li anke li kieku l-kapaċità żejda kellha tkompli fis-settur tal-azzar, dan ma jfissirx awtomatikament li din se twassal għal devjazzjoni tat-traffiku kummerċjali lejn is-suq tal-Unjoni.

(131)

Il-Kummissjoni qieset li l-evoluzzjoni tal-kapaċità żejda f’dawn l-aħħar snin hija ċara, u tirreferi għat-Taqsima 3.1.2.d. Għalhekk, l-affermazzjonijiet li din qed titnaqqas huma kontradetti b’mod ċar mill-evidenza. It-tieni nett, fil-kuntest deskritt, jiġifieri, tnaqqis fl-esportazzjonijiet lejn pajjiżi terzi, tnaqqis fil-konsum domestiku, prezzijiet ogħla miksuba fl-esportazzjonijiet lejn l-Unjoni meta mqabbla ma’ swieq oħra, bl-UE tkun l-akbar suq importatur u għalhekk kapaċi tassorbi volumi kbar, l-imġiba tal-esportazzjoni taħt is-sistema tat-TRQ, ikun kontra kull loġika ekonomika li jiġi miċħud li l-pajjiżi esportaturi jkollhom inċentiv ċar biex iżidu l-produzzjoni u l-kapaċità tal-produzzjoni tagħhom sabiex ibigħu volumi akbar fis-suq tal-Unjoni. Għalhekk, il-Kummissjoni osservat li s-sejbiet ta’ din l-investigazzjoni, f’kuntest ta’ kapaċità żejda globali sinifikanti stabbilita (inkluż fost il-pajjiżi esportaturi prinċipali tal-azzar lejn l-Unjoni), joħolqu probabbiltà qawwija li l-importazzjonijiet fl-Unjoni kieku jiżdiedu sostanzjalment jekk tiskadi l-miżura ta’ salvagwardja.

(132)

Bosta partijiet interessati talbu li kategorija ta’ prodotti partikolari tiġi eskluża mill-miżura, jew li tingħata trattament speċjali fi ħdan il-miżura jekk din kienet se tiġi estiża. L-argumenti li jappoġġaw dawn id-dikjarazzjonijiet kienu diversifikati.

(133)

Madankollu, il-Kummissjoni osservat li l-ambitu ta’ din l-investigazzjoni kien limitat għall-valutazzjoni ta’ jekk il-miżura, fil-forma attwali tagħha, jenħtiġx li tiġi estiża fiż-żmien jew le. Għalhekk, l-investigazzjoni ma kopriet l-ebda modifika potenzjali għall-funzjonament tal-miżura li taffettwa l-kategoriji ta’ prodotti individwali. Għalhekk, dawn id-dikjarazzjonijiet ġew rifjutati billi ma humiex pertinenti skont il-qafas ta’ din l-investigazzjoni.

(134)

Xi partijiet interessati jiddikjaraw li ċerti kategoriji ta’ prodotti, fost oħrajn 1, 2, 3B, 4B, 6, 16, 18, 20, 21, 22, 24 u 25A, jenħtieġ li jiġu esklużi mill-kamp ta’ applikazzjoni tal-miżura f’każ ta’ estensjoni, minħabba li jew it-TRQs huma allegatament restrittivi wisq, jew li t-TRQs baqgħu ma ntużawx, jew li l-volumi tal-importazzjoni tal-kategorija kkonċernata reċentement naqsu.

(135)

Il-Kummissjoni tfakkar li l-miżura ta’ salvagwardja ma tiġix adottata kontra pajjiż ta’ oriġini partikolari jew kontra kategorija ta’ prodotti waħda. Minflok, il-miżura hija fis-seħħ fuq l-importazzjonijiet tal-prodott ikkonċernat (ċerti prodotti tal-azzar) minn diversi oriġini. Għalhekk, kwalunkwe dikjarazzjoni bbażata fuq pajjiż jew kategorija ta’ prodotti individwali tmur kontra l-prinċipju tal-miżura. Bħal fil-kuntest tas-salvagwardja oriġinali, u kif spjegat fit-Taqsima 3.1.1., il-Kummissjoni eżaminat is-sitwazzjoni abbażi tal-prodott ikkonċernat fl-intier tiegħu (jiġifieri s-26 kategorija ta’ prodotti tal-azzar) u kkonfermat l-analiżi tagħha abbażi ta’ tliet familji ta’ prodotti.

(136)

Xi pajjiżi terzi, inklużi xi wħud li magħhom l-Unjoni għandha ftehimiet kummerċjali bilaterali fis-seħħ, talbu li l-Kummissjoni teskludihom mill-miżura jekk din tiġi estiża. Xi wħud minn dawn il-pajjiżi rreferew għal dispożizzjonijiet speċifiċi fil-ftehimiet bilaterali rispettivi tagħhom bħala argument għall-esklużjoni.

(137)

Il-Kummissjoni osservat li l-ebda wieħed minn dawn il-ftehimiet ma jipprevedi l-esklużjoni ta’ miżura ta’ salvagwardja multilaterali bħal dik inkwistjoni. Għalhekk, il-Kummissjoni kkonfermat li skont dawn il-ftehimiet bilaterali, hija ma tinsab taħt l-ebda obbligu legali li teskludi lil kwalunkwe wieħed minn dawn il-pajjiżi mill-miżura, u rrifjutat dawn id-dikjarazzjonijiet kif xieraq.

(138)

Xi partijiet interessati ddikjaraw li minħabba li l-pajjiżi esportaturi jkunu intitolati jfittxu kumpens u fin-nuqqas ta’ ftehim, bilanċjar mill-ġdid kontra l-Unjoni u li għal din ir-raġuni, jenħtieġ li l-Kummissjoni ma testendix il-miżura ta’ salvagwardja.

(139)

F’dan ir-rigward, il-Kummissjoni hija konxja mill-qafas legali applikabbli f’dawk il-każijiet fejn miżura ddum aktar minn tliet snin. Madankollu, il-Kummissjoni tfakkar li l-Ftehim dwar is-Salvagwardji tad-WTO u r-Regolament (UE) 2015/478 jippermettu li miżura ddum aktar minn tliet snin jekk jiġu ssodisfati l-kundizzjonijiet legali. Għalhekk, il-Kummissjoni, billi testendi l-miżura lil hinn minn tliet snin meta jiġu ssodisfati l-kundizzjonijiet rilevanti, qed teżerċita d-dritt ġuridiku tagħha skont ir-regoli tad-WTO u tal-UE.

(140)

Xi partijiet interessati ddikjaraw li minħabba li l-miżura oriġinali kienet ibbażata fuq id-data tal-EU28, l-estensjoni tagħha abbażi tal-EU27 tkun illegali.

(141)

Il-Kummissjoni qieset li l-investigazzjoni attwali tar-rieżami hija bbażata fuq l-EU27. L-ebda parti interessata ma kkontestat li l-miżura ta’ salvagwardja oriġinali, adottata abbażi ta’ dik li kienet f’dak iż-żmien l-EU28, kienet illegali. Il-kamp ta’ applikazzjoni tal-miżura ta’ salvagwardja fid-dawl tal-irtirar tar-Renju Unit mill-Unjoni diġà seħħ permezz tar-Regolament (UE) 2020/2037 (83). Għalhekk, il-Kummissjoni rrifjutat din id-dikjarazzjoni.

(142)

Xi partijiet interessati argumentaw li l-miżuri anti-dumping u antisussidji diġà jipproteġu b’mod suffiċjenti lill-industrija tal-Unjoni kontra importazzjonijiet inġusti, u li s-salvagwardji allegatament jipprevedu protezzjoni eċċessiva li tagħti lill-industrija tal-Unjoni vantaġġ addizzjonali fil-pożizzjoni dominanti tagħhom fis-suq tal-Unjoni.

(143)

Il-Kummissjoni tfakkar li d-dazji anti-dumping u kumpensatorji jindirizzaw prattiki kummerċjali inġusti, filwaqt li s-salvagwardji pjuttost jindirizzaw kwistjoni ta’ volumi akbar. Il-Kummissjoni għandha stabbilit l-hekk imsejjaħ “regolament dwar ir-rimedju doppju” għal dawk l-importazzjonijiet soġġetti kemm għal salvagwardji kif ukoll għal dazji anti-dumping u/jew kumpensatorji (84). Dan ir-regolament jiżgura li meta l-importazzjonijiet taħt is-salvagwardja jaqbżu l-volum ta’ TRQ mingħajr dazju, il-25 % ma jiġix akkumulat mad-dazju anti-dumping u/jew kumpensatorju applikabbli sabiex ma jwassalx għal effett fuq il-kummerċ akbar milli jkun mixtieq. Abbażi ta’ dan, il-Kummissjoni rrifjutat id-dikjarazzjonijiet ta’ rimedju doppju.

(144)

Barra minn hekk, l-allegata protezzjoni mogħtija permezz tal-miżuri ta’ difiża tal-kummerċ tal-UE (dazji anti-dumping u kumpensatorji) hija insuffiċjenti għall-finijiet tal-investigazzjoni attwali dwar is-salvagwardja, kif jidher fit-Taqsima 3.1. Il-maġġoranza tal-fatturi tad-dannu marru għall-agħar b’mod sinifikanti matul il-perjodu taħt kunsiderazzjoni.

(145)

Il-miżuri previsti f’dan ir-Regolament huma f’konformità mal-opinjoni tal-Kumitat dwar is-Salvagwardji stabbilit skont l-Artikolu 3(3) tar-Regolament (UE) 2015/478 u l-Artikolu 22(3) tar-Regolament (UE) 2015/755 rispettivament,