(1)

L-investiment fil-mobbiltà għat-tagħlim għal kulħadd, irrispettivament mill-ambjent li ġejjin minnu u l-mezzi u fl-iżvilupp ta' politika ta' kooperazzjoni u innovazzjoni fl-oqsma tal-edukazzjoni u t-taħriġ, iż-żgħażagħ u l-isport huwa essenzjali għall-bini ta' soċjetajiet inklużivi, koeżivi u reżiljenti u s-sostenn tal-kompetittività tal-Unjoni, u hija aktar importanti f'kuntest ta' bidla rapida u profonda xprunata mir-rivoluzzjoni teknoloġika u l-globalizzazzjoni. Barra minn hekk, investiment bħal dan jikkontribwixxi wkoll għat-tisħiħ tal-identità u l-valuri Ewropej u għal Unjoni aktar demokratika.

(2)

Fil-komunikazzjoni tagħha tal-14 ta' Novembru 2017 intitolata "it-Tisħiħ tal-Identità Ewropea permezz tal-Edukazzjoni u l-Kultura", il-Kummissjoni ressqet il-viżjoni tagħha sabiex taħdem lejn l-istabbiliment, sal-2025, ta' Żona Ewropea tal-Edukazzjoni li fiha t-tagħlim ma jkunx imfixkel mill-fruntieri. Dik il-komunikazzjoni stabbiliet viżjoni għal Unjoni li fiha jkun sar standard li wieħed iqatta' żmien fi Stat Membru ieħor biex jistudja u jitgħallem fi kwalunkwe mod jew ambjent, fejn, tkun saret in-norma li wieħed jitkellem żewġ lingwi oħra minbarra l-lingwa materna tiegħu u fejn il-persuni jkollhom sens qawwi tal-identità tagħhom bħala Ewropej, tal-wirt kulturali tal-Ewropa u tad-diversità tagħha. F'dak il-kuntest, il-Kummissjoni enfasizzat il-ħtieġa li tingħata spinta lill-Programm ippruvat u ttestjat ta' Erasmus+ fil-kategoriji kollha ta' studenti li diġà jkopri bl-għan li jintlaħqu studenti b'inqas opportunitajiet.

(3)

L-importanza tal-edukazzjoni, it-taħriġ u ż-żgħażagħ għall-futur tal-Unjoni hija riflessa fil-komunikazzjoni tal-Kummissjoni tal-14 ta' Frar 2018 intitolata ''Qafas Finanzjarju Pluriennali ġdid u modern għal Unjoni Ewropea li tagħti riżultati fuq il-prijoritajiet tagħha b'mod effiċjenti wara l-2020''. Dik il-komunikazzjoni enfasizzat il-ħtieġa li jitwettqu l-impenji magħmula mill-Istati Membri fis-Summit Soċjali għall-Impjiegi Ġusti u t-Tkabbir li sar f'Gothenburg fis-17 ta' Novembru 2017, inkluż permezz tal-implimentazzjoni sħiħa tal-Pilastru Ewropew tad-Drittijiet Soċjali pproklamat solennement u ffirmat fis-17 ta' Novembru 2017 mill-Parlament Ewropew, il-Kunsill u l-Kummissjoni (4) u l-Prinċipju 1 tiegħu, li jirrigwarda l-edukazzjoni, it-taħriġ u t-tagħlim tul il-ħajja. Dik il-komunikazzjoni enfasizzat il-ħtieġa li jiżdiedu l-mobbiltà u l-iskambji, inkluż permezz ta' Programm Erasmus + sostanzjalment imsaħħaħ, inklużiv u estiż, kif kien mitlub mill-Kunsill Ewropew fil-konklużjonijiet tiegħu tal-14 ta' Diċembru 2017.

(4)

Il-Prinċipju 1 tal-Pilastru Ewropew tad-Drittijiet Soċjali jipprevedi li kulħadd għandu d-dritt għal edukazzjoni, taħriġ u tagħlim tul il-ħajja ta' kwalità u inklużivi sabiex jinżammu u jinkisbu ħiliet li jippermettulhom jipparteċipaw bis-sħiħ fis-soċjetà u jiġġestixxu b'suċċess it-tranżizzjonijiet fis-suq tax-xogħol. Il-Pilastru Ewropew tad-Drittijiet Soċjali jagħmel ċara wkoll l-importanza ta' edukazzjoni u kura bikrija tat-tfal ta' kwalità tajba u li jiġu żgurati opportunitajiet indaqs għal kulħadd.

(5)

Fid-Dikjarazzjoni ta' Bratislava, iffirmata fis-16 ta' Settembru 2016 , il-mexxejja ta' 27 Stat Membru enfasizzaw id-determinazzjoni tagħhom li jipprovdu opportunitajiet aħjar għaż-żgħażagħ. Fid-Dikjarazzjoni ta' Ruma, iffirmata fil-25 ta' Marzu 2017, il-mexxejja ta' 27 Stat Membru u tal-Kunsill Ewropew, il-Parlament Ewropew u l-Kummissjoni wegħdu li jaħdmu għal Unjoni fejn iż-żgħażagħ jirċievu l-aħjar edukazzjoni u taħriġ u jistgħu jistudjaw u jsibu impjiegi madwar il-kontinent u li tippreserva l-wirt kulturali tagħna u li tippromwovi d-diversità kulturali.

(6)

Ir-rapport tal-Kummissjoni tal-31 ta’ Jannar 2018 dwar l-evalwazzjoni ta' nofs it-terminu tal-programm Erasmus+ (2014-2020) stabbilit bir-Regolament (UE) Nru 1288/2013 tal-Parlament Ewropew u tal-Kunsill (5)(il-Programm 2014-2020") ikkonferma li l-ħolqien ta' programm uniku għall-edukazzjoni u t-taħriġ, iż-żgħażagħ u l-sport kien irriżulta f'simplifikazzjoni, razzjonalizzazzjoni u sinerġiji sinifikanti fil-ġestjoni ta' dak il-Programm iżda kkonkluda li huwa meħtieġ titjib ulterjuri sabiex issir konsolidazzjoni ulterjuri tal-kisbiet fl-effiċjenza tal-Programm 2014-2020. Fil-konsultazzjonijiet għal dik l-evalwazzjoni ta' nofs it-terminu u dwar il-programm futur, l-Istati Membri u l-partijiet ikkonċernati għamlu talba qawwija għall-kontinwità fil-kamp ta' applikazzjoni, l-arkitettura u l-mekkaniżmi eżekuttivi tal-Programm Erasmus+, filwaqt li talbu għadd ta' titjib, bħal li l-Programm Erasmus+ isir aktar inklużiv, sempliċi u maniġġabbli għall-benefiċċjarji. L-Istati Membri u l-partijiet ikkonċernati esprimew ukoll l-appoġġ sħiħ tagħhom biex il-Programm Erasmus+ jinżamm integrat u msejjes fuq il-paradigma tat-tagħlim tul il-ħajja.Fir-riżoluzzjoni tiegħu tat-2 ta' Frar 2017 dwar l-implimentazzjoni ta' Erasmus+ (6), il-Parlament Ewropew laqa' l-istruttura integrata tal-Programm 2014-2020 u stieden lill-Kummissjoni tisfrutta b'mod sħiħ id-dimensjoni tat-tagħlim tul il-ħajja ta' dak il-Programm billi trawwem u tinkoraġġixxi l-kooperazzjoni transsettorjali fil-Programm Erasmus+ . L-Istati Membri u l-partijiet ikkonċernati enfasizzaw ukoll il-ħtieġa li tissaħħaħ aktar id-dimensjoni internazzjonali tal-Programm Erasmus+.

(7)

Il-konsultazzjoni pubblika miftuħa tal-2018 dwar il-finanzjament tal-Unjoni fl-oqsma tal-valuri u l-mobbiltà kkonfermat is-sejbiet ewlenin tar-rapport dwar l-evalwazzjoni ta’ nofs it-terminu tal-Programm 2014-2020 u enfasizzat il-ħtieġa li l-Programm futur isir aktar inklużiv, li jkompli jiffoka l-prijoritajiet fuq l-immodernizzar tas-sistemi edukattivi u tat-taħriġ u li jsaħħaħ il-prijoritajiet dwar it-trawwim tal-identità Ewropea, iċ-ċittadinanza attiva u l-parteċipazzjoni fil-ħajja demokratika.

(8)

Fil-komunikazzjoni tagħha tat-2 ta' Mejju 2018 intitolata ''Baġit Modern għal Unjoni li Tipproteġi, Tagħti s-Setgħa u Tiddefendi - il-Qafas Finanzjarju Pluriennali għall-2021-2027'', il-Kummissjoni talbet għal investiment akbar fin-nies u enfasi aktar qawwija fuq "iż-żgħażagħ" fil-qafas finanzjarju li jmiss.F'dik il- komunikazzjoni, il-Kummissjoni rrikonoxxiet li l-Programm Erasmus+ kien waħda mill-aktar stejjer ta' suċċess viżibbli tal-Unjoni. Fil-komunikazzjoni tagħha tas-27 ta'Mejju 2020 intitolata ''Il-baġit tal-UE jmexxi l-pjan ta' rkupru għall-Ewropa'', il-Kummissjoni rrikonoxxiet ir-rwol tal-Programm Erasmus+ li jagħmel l-Unjoni aktar reżiljenti u li jindirizza l-isfidi soċjoekonomiċi. Ikkonfermat ukoll l-impenn tagħha biex issaħħaħ b'mod sinifikanti l-Programm Erasmus+. Dan ikun jippermetti li aktar persuni jmorru jgħixu f'pajjiż ieħor biex jitgħallmu jew jaħdmu u jkun jippermetti li l-Programm jiffoka fuq l-inklużività u fuq l-ilħuq ta' aktar persuni b'inqas opportunitajiet.

(9)

F'dan il-kuntest, huwa neċessarju li jiġi stabbilit Erasmus+ , il-Programm tal-Unjoni għall-edukazzjoni ut-taħriġ, iż-żgħażagħ u l-isport (il-‘Programm’), bħala s-suċċessur tal-Programm Erasmus+ 2014-2020. In-natura integrata tal-Programm 2014-2020 li tkopri t-tagħlim fil-kuntesti kollha, kemm dawk formali, mhux formali jew informali, u f'kull stadju tal-ħajja jenħtieġ li tiġi rinfurzata sabiex tagħti spinta lill-modi ta' tagħlim flessibbli, biex b'hekk il-persuni jkunu jistgħu jakkwistaw u jtejbu l-għarfien, il-ħiliet u l-kompetenzi li huma meħtieġa biex jiżviluppaw bħala individwi u biex jiffaċċjaw l-isfidi u jisfruttaw bl-aħjar mod l-opportunitajiet tas-seklu 21.

(10)

Il-Programm jenħtieġ li jiġi stabbilit għal perijodu ta' seba' snin biex id-durata tiegħu tiġi allinjata ma' dik tal-qafas finanzjarju pluriennali għas-snin 2021 sa 2027 stabbilit fir-Regolament tal-Kunsill (UE, Euratom) 2020/2093 (7) (‘il-QFP 2021-2027’)

(11)

Jenħtieġ li l-Programm ikun mgħammar sabiex isir kontributur saħansitra ikbar għall-implimentazzjoni tal-għanijiet u l-prijoritajiet ta' politika tal-Unjoni fl-oqsma tal-edukazzjoni, it-taħriġ, iż-żgħażagħ u l-isport. Approċċ koerenti għat-tagħlim tul il-ħajja huwa ċentrali għall-ġestjoni tat-tranżizzjonijiet differenti li l-persuni ser jiffaċċjaw tul il-ħajja tagħhom. Tali approċċ jenħtieġ li jkun inkuraġġit permezz ta' kooperazzjoni transsettorjali effettiva. Fit-teħid 'il quddiem ta' tali approċċ, il-Programm jenħtieġ li jżomm relazzjoni mill-qrib mal-qafas strateġiku ġenerali għall-politika ta' kooperazzjoni tal-Unjoni fl-oqsma tal-edukazzjoni u t-taħriġ u ż-żgħażagħ, inkluż l-aġendi ta' politika għall-iskejjel, l-edukazzjoni għolja, l-edukazzjoni u t-taħriġ vokazzjonali u t-tagħlim għall-adulti, filwaqt li jsaħħaħ u jiżviluppa sinerġiji ġodda ma' programmi u oqsma ta' politika relatati oħra tal-Unjoni.

(12)

Il-Programm huwa komponent ewlieni tal-bini ta' Żona Ewropea tal-Edukazzjoni. B'segwitu għall-komunikazzjoni tal-14 ta' Novembru 2017 intitolata ''It-tisħiħ tal-Identità Ewropea permezz tal-Edukazzjoni u l-Kultura'', il-Kummissjoni fakkret, fil-komunikazzjoni tagħha tat-30 ta' Settembru 2020 dwar il-kisba sal-2025 taż-Żona Ewropea tal-Edukazzjoni', li l-Programm Erasmus + jibqa' strumentali fil-kisba tal-għanijiet ta' edukazzjoni, taħriġ u tagħlim tul il-ħajja ta' kwalità u inklużivi, u fit-tħejjija tal-Unjoni biex tiffaċċa t-tranżizzjonijiet diġitali u ekoloġiċi. Jenħtieġ li l-Programm ikun mgħammar biex jikkontribwixxi għas-suċċessur tal-qafas strateġiku għall-kooperazzjoni Ewropea fl-edukazzjoni u t-taħriġ u l-Aġenda aġġornata għall-Ħiliet għall-Ewropa għall-kompetittività sostenibbli, il-ġustizzja soċjali u r-reżiljenza stabbiliti fil-komunikazzjoni tal-Kummissjoni tal-1 ta’ Lulju 2020 b'impenn kondiviż għall-importanza strateġika tal-ħiliet, il-kompetenzi ewlenin u l-għarfien għaż-żamma tal-impjiegi u l-appoġġ għat-tkabbir, il-kompetittività, l-innovazzjoni u l-koeżjoni soċjali, f’konformità mar-Rakkomandazzjoni tal-Kunsill tat-22 ta' Mejju 2018 (8). Il-Programm jenħtieġ li jikkontribwixxi għat-twettiq tal-Pjan ta' Azzjoni għall-Edukazzjoni Diġitalistabbilit fil-komunikazzjoni tal-Kummissjoni tat-30 ta' Settembru 2020 intitolata "Pjan ta' Azzjoni għall-Edukazzjoni Diġitali 2021-2027 - Tfassil mill-ġdid tal-edukazzjoni u t-taħriġ għall-era diġitali". Il-Programm jenħtieġ li jwieġeb għat-trasformazzjoni diġitali meħtieġa tal-edukazzjoni u t-taħriġ, iż-żgħażagħ u l-isport. Jenħtieġ li il-Programm jappoġġa wkoll lill-Istati Membri biex jilħqu l-għanijiet tad-Dikjarazzjoni ta' Pariġi tas-17 ta' Marzu 2015 dwar il-promozzjoni taċ-ċittadinanza u l-valuri komuni tal-libertà, it-tolleranza u n-nondiskriminazzjoni permezz tal-edukazzjoni.

(13)

F'konformità mal-Istrateġija tal-Unjoni Ewropea għaż-Żgħażagħ 2019-2027 (9), il-qafas għall-kooperazzjoni Ewropea fil-qasam taż-żgħażagħ għall-2019-2027, ibbażat fuq il-komunikazzjoni tal-Kummissjoni tat-22 ta' Mejju 2018 intitolata "L-Impenn, il-Konnessjoni u l-Għoti tas-Setgħa liż-żgħażagħ: Strateġija tal-UE dwar iż-Żgħażagħ", jenħtieġ li l-Programm jappoġġa ħidma ta' kwalità għolja fost iż-żgħażagħ, għodod u sistemi għat-taħriġ ta' persuni li jaħdmu maż-żgħażagħ, il-validazzjoni tat-tagħlim mhux formali u informali u approċċi orjentati lejn il-kwalità biex tingħata s-setgħa lil organizzazzjonijiet taż-żgħażagħ. Jenħtieġ li l-Programm jappoġġa Djalogu tal-UE maż-Żgħażagħ inklużiv u wiesa' li l-prijoritajiet tiegħu huma xprunati mill-ħtiġijiet taż-żgħażagħ.

(14)

Jenħtieġ li l-Programm jieħu kont tal-Pjan ta' Ħidma rilevanti tal-Unjoni Ewropea għall-Isport, li huwa l-qafas ta' kooperazzjoni fil-livell tal-Unjoni fil-qasam tal-isport. Jenħtieġ li jiġu żgurati l-konsistenza u l-komplementarjetà bejn il-Pjan ta' Ħidma rilevanti tal-Unjoni Ewropea għall-Isport u l-azzjonijiet appoġġati taħt il-Programm fil-qasam tal-isport. Hemm bżonn ta' attenzjoni, b'mod partikolari, fuq l-isport tal-massa, filwaqt li jittieħed kont tar-rwol importanti li għandu l-isports fil-promozzjoni tal-attività fiżika u stil ta' ħajja tajjeb għas-saħħa, ir-relazzjonijiet interpersonali, l-inklużjoni soċjali u l-ugwaljanza. Jenħtieġ li l-Programm jappoġġa l-mobbiltà għat-tagħlim tal-persunal tal-isport, primarjament fl-isport tal-massa. Il-persunal fl-isport mhux tal-massa, inkluż dak involut f'karrieri doppji fl-isport u mhux fl-isport, jista' jtejjeb ukoll l-impatt tat-tagħlim u t-trasferiment tal-għarfien għall-persunal u l-organizzazzjonijiet tal-isport tal-massa. Għaldaqstant, jenħtieġ li l-Programm ikun jista' jappoġġa opportunitajiet ta' mobbiltà għat-tagħlim għall-persunal fl-isport mhux tal-massa fejn il-parteċipazzjoni tat-tali persunal tista' tkun ta' benefiċċju għall-isport tal-massa. Jenħtieġ li l-Programm jikkontribwixxi għall-promozzjoni ta' valuri komuni Ewropej permezz tal-isport, il-governanza tajba u l-integrità fl-isport, l-iżvilupp sostenibbli, u l-edukazzjoni, it-taħriġ u l-ħiliet fl-isport u permezz tiegħu. Avvenimenti sportivi mingħajr skop ta' qligħ appoġġati mill-Programm jenħtieġ li jiksbu dimensjoni u impatt Ewropej.

(15)

Il-Programm jenħtieġ li jkun jista' jappoġġa kwalunkwe qasam ta' studju u jenħtieġ li, b'mod partikolari, jikkontribwixxi għat-tisħiħ tal-kapaċità tal-innovazzjoni tal-Unjoni billi jappoġġa attivitajiet li jgħinu lill-persuni jiżviluppaw l-għarfien, il-ħiliet, il-kompetenzi u l-attitudnijiet li jeħtieġu f'oqsma ta' studju jew dixxiplini li jħarsu 'l quddiem bħax-xjenza, it-teknoloġija, l-inġinerija, l-arti u l-matematika (STEAM), it-tibdil fil-klima, il-ħarsien ambjentali, l-iżvilupp sostenibbli, l-enerġija nadifa, l-intelliġenza artifiċjali, ir-robotika, l-analiżi tad-data, id-disinn u l-arkitettura, u l-litteriżmu diġitali u fil-media. L-innovazzjoni tista' titrawwem permezz ta' azzjonijiet kollha marbuta mal-mobbiltà għat-tagħlim u l-kooperazzjoni, kemm dawk ġestiti direttament kif ukoll indirettament.

(16)

Jenħtieġ li s-sinerġiji mal-Programm Orizzont Ewropa stabbilit bir-Regolament (UE) 2021/695 tal-Parlament Ewropew u tal-Kunsill (10) ("Orizzont Ewropa") jiżguraw li jintużaw riżorsi kkombinati mill-Programm u Orizzont Ewropa biex jappoġġaw attivitajiet dedikati għat-tisħiħ u l-immodernizzar tal-istituzzjonijiet tal-edukazzjoni għolja Ewropej. Orizzont Ewropa, fejn xieraq, ser jikkumplementa l-appoġġ tal-Programm għall-inizjattiva tal-Universitajiet Ewropej bħala parti mill-iżvilupp ta' strateġiji ġodda konġunti u integrati fit-tul u sostenibbli dwar l-edukazzjoni, ir-riċerka u l-innovazzjoni. Is-sinerġiji ma' Orizzont Ewropa ser jgħinu biex irawmu l-integrazzjoni tal-edukazzjoni u r-riċerka, b'mod partikolari fl-istituzzjonijiet tal-edukazzjoni għolja.

(17)

Teknoloġiji ġodda u emerġenti joffru opportunitajiet sinifikanti għat-tagħlim u l-iskambju u wrew li huma ta' importanza partikolari matul il-pandemija tal-COVID-19. Minbarra l-mobbiltà għat-tagħlim fiżiku, li tibqa' l-azzjoni ewlenija tal-Programm, il-formati virtwali, bħat-tagħlim virtwali, jenħtieġ li jiġu promossi sabiex jikkumplimentaw jew jappoġġaw il-mobbiltà għat-tagħlim fiżika, biex joffru opportunitajiet ta' tagħlim sinifikanti lil dawk li ma jistgħux jiċċaqalqu fiżikament lejn pajjiż li mhuwiex il-pajjiż ta' residenza tagħhom jew biex irawmu skambji permezz ta' formati ta' tagħlim innovattivi. Fejn rilevanti, jenħtieġ li tiġi promossa l-kooperazzjoni virtwali taħt il-Programm. Jenħtieġ li l-Kummissjoni, fejn xieraq u possibbli, tiżgura li l-għodod tat-tagħlim virtwali żviluppati taħt il-Programm isiru disponibbli għall-pubbliku ġenerali.

(18)

Biex jissodisfa l-għanijiet tiegħu, jenħtieġ li l-Programm ikun iktar inklużiv billi jtejjeb ir-rati ta' parteċipazzjoni fost persuni b'inqas opportunitajiet. Firxa ta' miżuri jistgħu jgħinu biex tiżdied il-parteċipazzjoni fil-Programm ta' persuni b'inqas opportunitajiet, inkluż involviment, komunikazzjoni, pariri u assistenza aħjar u aktar immirati, proċeduri simplifikati, formati tal-mobbiltà għat-tagħlim aktar flessibbli, u żieda fl-involviment ma' organizzazzjonijiet żgħar, b'mod partikolari organizzazzjonijiet ġodda u organizzazzjonijiet ta' bażi fil-livell tal-komunità li jaħdmu direttament ma' studenti żvantaġġati ta' kull età. Huwa importanti li jiġi rikonoxxut li livelli baxxi ta' parteċipazzjoni fost persuni b'inqas opportunitajiet jistgħu jirriżultaw minn kawżi differenti u jiddependu minn kuntesti differenti. Għalhekk, fi ħdan qafas għall-Unjoni kollha ta' tali miżuri mmirati biex iżidu l-parteċipazzjoni fost il-persuni b'inqas opportunitajiet, jenħtieġ li jiġu żviluppati pjanijiet ta' azzjoni għall-inklużjoni u jiġu mfassla apposta għall-gruppi fil-mira u għaċ-ċirkostanzi speċifiċi f'kull Stat Membru.

(19)

F'xi każijiet, il-persuni b'inqas opportunitajiet x'aktarx jipparteċipaw inqas fil-Programm għal raġunijiet finanzjarji, kemm minħabba s-sitwazzjoni ekonomika tagħhom jew minħabba l-ispejjeż ogħla ta' parteċipazzjoni li tiġġenera s-sitwazzjoni speċifika tagħhom, kif spiss ikun il-każ għall-persuni b'diżabilità. F'każijiet bħal dawn, il-parteċipazzjoni tagħhom tista' tiġi ffaċilitata b'appoġġ finanzjarju mmirat. Għalhekk, jenħtieġ li l-Kummissjoni tiżgura li tali miżuri ta' appoġġ finanzjarju jiddaħħlu fis-seħħ, inkluż permezz ta' aġġustamenti possibbli tal-għotjiet fil-livell nazzjonali. Jenħtieġ li spejjeż addizzjonali assoċjati ma' miżuri sabiex tiġi ffaċilitata l-inklużjoni ma jikkostitwixxux ġustifikazzjoni għar-rifjut ta' applikazzjoni.

(20)

Sabiex il-Programm isir aktar aċċessibbli għal organizzazzjonijiet ġodda u għal organizzazzjonijiet b'kapaċità amministrattiva iżgħar u biex il-Programm isir aktar maniġġabbli għall-benefiċjarji, jenħtieġ li jittieħdu firxa ta' miżuri biex jiġu ssimplifikati l-proċeduri tal-Programm fil-livell ta' implimentazzjoni. F'dak ir-rigward, sistemi tat-teknoloġija tal-informazzjoni tal-Programm jenħtieġ li jkunu faċli għall-utent u jipprovdu aċċess sempliċi għall-opportunitajiet offruti mill-Programm. Bl-istess mod, il-proċeduri stabbiliti għall-implimentazzjoni tal-Programm jenħtieġ li jkunu konsistenti u sempliċi u jenħtieġ li jkunu akkumpanjati minn miżuri ta' appoġġ u informazzjoni ta' kwalità għolja. Għal dak il-għan, jenħtieġ li jiġu organizzati laqgħat regolari tan-network ta' aġenziji nazzjonali.

(21)

Fil-komunikazzjoni tagħha tal-14 ta' Novembru 2017 intitolata "It-Tisħiħ tal-identità Ewropea permezz tal-edukazzjoni u l-kultura", il-Kummissjoni enfasizzat ir-rwol ċentrali li għandhom l-edukazzjoni, il-kultura u l-isport fil-promozzjoni ta' ċittadinanza attiva u valuri komuni fost l-iżgħar ġenerazzjonijiet. It-tisħiħ tal-identità Ewropea u t-trawwim tal-parteċipazzjoni attiva tal-individwi u tas-soċjetà ċivili f’proċessi demokratiċi huwa kruċjali għall-futur tal-Ewropa u s-soċjetajiet demokratiċi. Li wieħed imur jistudja, jitgħallem, jitħarreġ u jaħdem jew jipparteċipa f'attivitajiet taż-żgħażagħ u tal-isport jikkontribwixxi għat-tisħiħ ta' dik l-identità Ewropea fid-diversità kollha tagħha. Dan isaħħaħ is-sens li wieħed ikun parti minn komunità kulturali u jrawwem it-tagħlim interkulturali, il-ħsieb kritiku u ċ-ċittadinanza attiva fost persuni ta' kull età. Dawk li jipparteċipaw f'attivitajiet ta' mobbiltà għat-tagħlim jenħtieġ li jinvolvu ruħhom fil-komunitajiet lokali tagħhom u jinvolvu ruħhom fil-komunitajiet lokali tal-pajjiż ospitanti tagħhom sabiex jaqsmu l-esperjenzi tagħhom. Jenħtieġ li l-Programm jappoġġa l-attivitajiet marbutin mat-tisħiħ tal-aspetti kollha tal-kreattività fl-edukazzjoni, it-taħriġ u ż-żgħażagħ u t-tisħiħ tal-kompetenzi ewlenin individwali.

(22)

Jenħtieġ li l-Programm jappoġġa biss azzjonijiet u attivitajiet li jippreżentaw valur miżjud Ewropew potenzjali. Il-kunċett ta' valur miżjud Ewropew għandu jinftiehem b'mod ġenerali u jista' jintwera b'modi differenti, bħal meta l-azzjonijiet jew l-attivitajiet ikunu ta' natura tranżnazzjonali, b'mod partikolari fir-rigward tal-mobbiltà għat-tagħlim u l-kooperazzjoni mmirati lejn il-kisba ta' impatt sistemiku sostenibbli, jikkumplementaw jew irawmu sinerġiji ma' programmi u politiki oħra fil-livell nazzjonali, tal-Unjoni u internazzjonali, jew jikkontribwixxu għall-użu effettiv tal-għodod ta' trasparenza u rikonoxximent tal-Unjoni.

(23)

Jenħtieġ li d-dimensjoni internazzjonali tal-Programm tingħata spinta u timmira li toffri aktar opportunitajiet għall-mobbiltà għat-tagħlim, il-kooperazzjoni u d-djalogu ta' politika ma' pajjiżi terzi li mhumiex assoċjati mal-Programm. Billi nibnu fuq l-implimentazzjoni b'suċċess ta' attivitajiet internazzjonali ta' edukazzjoni għolja u taż-żgħażagħ skont il-programmi predeċessuri fl-oqsma tal-edukazzjoni u t-taħriġ u ż-żgħażagħ, l-attivitajiet internazzjonali ta' mobbiltà għat-tagħlim jenħtieġ li jiġu estiżi għal setturi oħra, bħall-edukazzjoni u t-taħriġ vokazzjonali u l-isport. Sabiex jiżdied l-impatt ta' dawk l-attivitajiet, huwa importanti li jissaħħu s-sinerġiji bejn il-Programm u l-istrumenti tal-Unjoni għall-azzjoni esterna, bħall-Istrument ta' Viċinat, ta' Kooperazzjoni għall-Iżvilupp u ta' Kooperazzjoni Internazzjonali, stabbilit permezz ta' Regolament tal-Parlament Ewropew u tal-Kunsill li jistabbilixxi l-Istrument ta' Viċinat, ta' Kooperazzjoni għall-Iżvilupp u ta' Kooperazzjoni Internazzjonali – Ewropa Globali, li jemenda u li jħassar id-Deċiżjoni Nru 466/2014/UE tal-Parlament Ewropew u tal-Kunsill u jħassar ir-Regolament (UE) 2017/1601 tal-Parlament Ewropew u tal-Kunsill u r-Regolament tal-Kunsill (KE, Euratom) Nru 480/2009, u l-Istrument għall-Assistenza ta' Qabel l-Adeżjoni (IPA III), stabbilit permezz ta' Regolament tal-Parlament Ewropew u tal-Kunsill li jistabbilixxi l-Istrument għall-Assistenza ta’ Qabel l-Adeżjoni (IPA III). L-istrumenti tal-Unjoni għall-azzjoni esterna jenħtieġ li jkollhom l-għan li jżidu l-opportunitajiet, b'mod partikolari għall-individwi u l-organizzazzjonijiet minn pajjiżi terzi mhux assoċjati mal-Programm, filwaqt li jappoġġaw, b'mod partikolari, it-tisħiħ tal-kapaċitajiet f'dawk il-pajjiżi, l-iżvilupp tal-ħiliet u l-iskambji bejn il-persuni, filwaqt li joffru aktar opportunitajiet għall-kooperazzjoni, il-mobbiltà għat-tagħlim u d-djalogu politiku.

(24)

Jenħtieġ li tinżamm l-arkitettura bażika tal-Programm 2014-2020, li ġiet diviża fi tliet kapitoli, jiġifieri l-edukazzjoni u t-taħriġ, iż-żgħażagħ u l-isport, u ġiet strutturata madwar tliet azzjonijiet ewlenin, kienet ta' suċċess u jenħtieġ li tinżamm. Jenħtieġ li jiġi introdott titjib sabiex jiġu simplifikati u razzjonalizzati l-azzjonijiet appoġġati mill-Programm. Jenħtieġ li l-istabbiltà u l-kontinwità jiġu żgurati wkoll f'termini ta' ġestjoni u modalitajiet ta' implimentazzjoni. B'mod ġenerali, mill-inqas 75 % tal-baġit tal-Programm jenħtieġ li jkun implimentat taħt ġestjoni indirettamill-aġenziji nazzjonali. Dan jinkludi azzjonijiet bħall-mobbiltà għat-tagħlim fl-oqsma kollha tal-edukazzjoni u t-taħriġ, iż-żgħażagħ u l-isport u sħubiji ta' kooperazzjoni, inkluż sħubiji fuq skala żgħira fl-oqsma tal-edukazzjoni u t-taħriġ u ż-żgħażagħ. Fejn xieraq, jenħtieġ li jiġu stabbiliti arranġamenti speċifiċi fir-rigward tal-ġestjoni diretta għal azzjonijiet li jinvolvu networks madwar l-Unjoni u organizzazzjonijiet Ewropej taħt l-azzjonijiet ewlenin 2 u 3, esklużi sħubiji fuq skala żgħira,.

(25)

Jenħtieġ li l-Programm jimplimenta sett ta' azzjonijiet sabiex jappoġġa l-mobbiltà għat-tagħlim, il-kooperazzjoni fost l-organizzazzjonijiet u l-istituzzjonijiet, l-iżvilupp tal-politika u l-kooperazzjoni, u l-azzjonijiet Jean Monnet. Dan ir-Regolament jenħtieġ li jistabbilixxi dawk l-azzjonijiet u d-deskrizzjonijiet tagħhom, inkluż l-attivitajiet li jistgħu jiġu implimentati skont dawk l-azzjonijiet matul il-perjodu ta' programmazzjoni.

(26)

Jenħtieġ li l-Programm jirrinforza l-opportunitajiet ta' mobbiltà għat-tagħlim eżistenti, b'mod partikolari f'dawk is-setturi fejn il-Programm jista' jkollu l-akbar kisbiet fl-effiċjenza, sabiex iwessa' l-ksib ta' tali opportunitajiet u jissodisfa d-domanda għolja mhux milħuqa. B'mod partikolari, dan jenħtieġ li jsir billi tiżdied u tiġi ffaċilitata l-mobbiltà għat-tagħlim għal studenti ta' edukazzjoni għolja, studenti tal-iskola, studenti fis-settur tal-edukazzjoni għall-adulti u studenti fis-settur tal-edukazzjoni u t-taħriġ vokazzjonali, bħall-apprendisti u t-trainees, inkluż għal finijiet ta' titjib tal-ħiliet u taħriġ mill-ġdid. Gradwati reċenti u persuni li reċentement kisbu kwalifika ta' edukazzjoni u taħriġ vokazzjonali jenħtieġ li jkunu jistgħu jipparteċipaw fil-mobbiltà għat-tagħlim. Jenħtieġ li l-parteċipazzjoni ta' gradwati reċenti fil-mobbiltà għat-tagħlim tkun ibbażata fuq kriterji oġġettivi, u jenħtieġ li jkun żgurat trattament ugwali. L-opportunitajiet ta' mobbiltà għat-tagħlim għaż-żgħażagħ li jipparteċipaw f'attivitajiet ta' tagħlim mhux formali jenħtieġ li jiġu estiżi wkoll sabiex jilħqu aktar żgħażagħ. Il-mobbiltà għat-tagħlim tal-persunal fil-qasam tal-edukazzjoni u t-taħriġ, iż-żgħażagħ u l-isport jenħtieġ li tiġi rinforzata wkoll, b'konsiderazzjoni tal-effett ta' ingranaġġ li għandha. Jenħtieġ li l-opportunitajiet ta' mobbiltà għat-tagħlim ikunu jistgħu jieħdu diversi forom inkluż traineeships, apprendistati, skambji taż-żgħażagħ, skambji ta' skejjel, tagħlim jew parteċipazzjoni f'attività ta' żvilupp professjonali, u jenħtieġ li jkunu bbażati fuq il-ħtiġijiet speċifiċi tas-setturi differenti. Jenħtieġ li l-Programm jappoġġa l-kwalità fil-mobbiltà għat-tagħlim, inkluża l-kwalità abbażi tal-prinċipji stabbiliti fir-Rakkomandazzjoni tal-Parlament Ewropew u tal-Kunsill, tat-18 ta' Diċembru 2006 (11), u r-Rakkomandazzjonijiet tal-Kunsill tat-28 ta' Ġunju 2011 (12),tal-20 ta' Diċembru 2012 (13), tal-15 ta' Marzu 2018 (14), tas- 26 ta' Novembru 2018 (15) u tal-24 ta' Novembru 2020 (16).

(27)

F'konformità mal-viżjoni ta' Żona Ewropea tal-Edukazzjoni reali, jenħtieġ li l-Programm jagħti spinta wkoll lill-mobbiltà għat-tagħlim u l-iskambji u jippromwovi l-parteċipazzjoni tal-istudenti tal-edukazzjoni għolja f'attivitajiet edukattivi, kulturali u sportivi billi jappoġġa d-diġitalizzazzjoni tal-proċessi permezz ta’, pereżempju, l-inizjattiva Kard Ewropea tal-Istudenti. F'dan il-kuntest, jenħtieġ li l-Kummissjoni tiżviluppa l-inizjattiva Kard Ewropea tal-Istudenti, b'mod partikolari għal studenti tal-edukazzjoni għolja parteċipanti fil-Programm. L-Inizjattiva Kard Ewropea tal-Istudenti tista' tkun pass importanti biex il-mobbiltà għat-tagħlim ssir realtà għal kulħadd, billi tippermetti lill-istituzzjonijiet tal-edukazzjoni għolja jibagħtu u jirċievu iktar studenti tal-edukazzjoni għolja għall-fini ta' skambji filwaqt li tkompli ttejjeb il-kwalità fil-mobbiltà għat-tagħlim tal-istudenti tal-edukazzjoni għolja, u wkoll tiffaċilita l-aċċess tagħhom għal diversi servizzi, bħal-libreriji, it-trasport u l-akkomodazzjoni, qabel ma jaslu fiżikament fl-istituzzjoni barra minn pajjiżhom.

(28)

Jenħtieġ li l-Programm iħeġġeġ il-parteċipazzjoni taż-żgħażagħ fil-ħajja demokratika Ewropea, inkluż billi jappoġġa attivitajiet li jikkontribwixxu għall-edukazzjoni ċivika u proġetti ta' parteċipazzjoni sabiex iż-żgħażagħ jinvolvu ruħhom u jitgħallmu jipparteċipaw fis-soċjetà ċivika, biex b’hekk joħloq sensibilizzazzjoni tal-valuri komuni Ewropej inkluż id-drittijiet fundamentali, kif ukoll l-istorja u l-kultura Ewropea, jiġbor flimkien żgħażagħ u dawk li jieħdu deċiżjonijiet fil-livelli lokali, nazzjonali u tal-Unjoni, u jikkontribwixxi għall-proċess ta' integrazzjoni Ewropea.

(29)

Filwaqt li jibni fuq l-evalwazzjoni u l-iżvilupp ulterjuri tal- inizjattiva DiscoverEU li tnediet bħala azzjoni preparatorja fl-2018, jenħtieġ li l-Programm joffri liż-żgħażagħ aktar opportunitajiet biex jiskopru d-destinazzjonijiet kollha fl-Ewropa permezz ta' esperjenzi ta' tagħlim barra minn pajjiżhom. Iż-żgħażagħ, b'mod partikolari dawk b'inqas opportunitajiet, jenħtieġ li jingħataw iċ-ċans li jkollhom esperjenza ta' vjaġġ fl-Ewropa għall-ewwel darba, għal terminu qasir fil-livell individwali jew fi grupp bħala parti minn attività edukattiva mhux formali jew informali li jkollha l-għan li trawwem is-sens ta' appartenenza tagħhom fl-Unjoni u li tippermettilhom jiskopru d-diversità kulturali u lingwistika tagħha. Il-parteċipanti jenħtieġ li jintgħażlu abbażi ta' kriterji ċari u trasparenti. Jenħtieġ li l-korpi ta' implimentazzjoni jippromwovu miżuri biex jiżguraw li l-inizjattiva DiscoverEU tkun inklużiva u ġeografikament ibbilanċjata kemm fir-rigward tal-passes tal-ivvjaġġar allokati kif ukoll tal-Istati Membri miżjura, u biex jappoġġaw attivitajiet b'dimensjoni ta' tagħlim b'saħħitha. F'dan ir-rigward, permezz ta' miżuri mmirati, bħal attivitajiet ta' sensibilizzazzjoni, sessjonijiet ta' informazzjoni ta' qabel it-tluq u avvenimenti għaż-żgħażagħ, il-Programm jenħtieġ ukoll li jippromwovi l-għażla ta' Stati Membri inqas miżjura u reġjuni periferiċi. Jenħtieġ li jiġu kkunsidrati mezzi oħra tat-trasport meta t-trasport bil-ferrovija ma jkunx disponibbli jew ma jkun prattiku xejn, b'kont meħud, b'mod partikolari, tas-sitwazzjoni speċifika tad-destinazzjoni. Jenħtieġ li l-inizjattiva DiscoverEU tfittex li tibni rabtiet ma' inizjattivi lokali, reġjonali, nazzjonali u Ewropej rilevanti, bħall-azzjoni tal-Unjoni intitolata "Kapitali Ewropej tal-Kultura", il-Kapitali Ewropej taż-Żgħażagħ, il-Kapitali Ewropej tal-Volontarjat u l-Kapitali Ekoloġiċi Ewropej.

(30)

It-tagħlim tal-lingwi jikkontribwixxi għal fehim reċiproku u mobbiltà fl-Unjoni u 'l barra minnha, u l-kompetenzi lingwistiċi huma ħiliet essenzjali għall-ħajja u x-xogħol. Għalhekk, il-Programm jenħtieġ li jtejjeb it-tagħlim tal-lingwi, inkluż, fejn rilevanti, il-lingwi tas-sinjali nazzjonali, inkluż permezz tal-użu iktar mifrux ta' għodod online billi t-tagħlim online jista' joffri vantaġġi addizzjonali għat-tagħlim tal-lingwi f'termini ta' aċċess u flessibbiltà. Fl-istess ħin, sabiex jiġi żgurat aċċess wiesa' u inklużiv għall-Programm, huwa importanti li l-multilingwiżmu jkun prinċipju ewlieni fl-implimentazzjoni tal-Programm.

(31)

Jenħtieġ li l-Programm jappoġġa miżuri li jtejbu l-kooperazzjoni bejn l-istituzzjonijiet u l-organizzazzjonijiet li huma attivi fl-oqsma tal-edukazzjoni u t-taħriġ, iż-żgħażagħ u l-isport, biex b'hekk jirrikonoxxi r-rwol fundamentali tal-istituzzjonijiet u l-organizzazzjonijiet li jgħammru lill-individwi bl-għarfien, il-ħiliet u l-kompetenzi meħtieġa f'dinja li qed tinbidel u li jgħinu lill-istituzzjonijiet u l-organizzazzjonijiet biex jissodisfaw b'mod adegwat il-potenzjal tagħhom għall-innovazzjoni, il-kreattività u l-intraprenditorija, b'mod partikolari fi ħdan l-ekonomija diġitali.

(32)

Fil-konklużjonijiet tiegħu tal-14 ta' Diċembru 2017, il-Kunsill Ewropew talab lill-Istati Membri, lill-Kunsill u lill-Kummissjoni biex jipproċedu b'għadd ta' inizjattivi sabiex iżidu l-kooperazzjoni Ewropea fil-qasam tal-edukazzjoni u t-taħriġ għal livell ġdid, inkluż billi jinkoraġġixxu l-emerġenza ta' ‘'Universitajiet Ewropej’' sal-2024, li jikkonsistu f'networks 'minn isfel għal fuq' ta' universitajiet madwar l-Unjoni. Fil-konklużjonijiet tiegħu tat-28 ta' Ġunju 2018, il-Kunsill Ewropew appella biex tiġi mħeġġa l-kooperazzjoni bejn ir-riċerka, l-innovazzjoni u l-edukazzjoni, inkluż permezz tal-inizjattiva tal-Universitajiet Ewropej. Il-Programm jenħtieġ li jappoġġa lil dawk l-Universitajiet Ewropej fl-iżvilupp ta' strateġiji konġunti fit-tul għal edukazzjoni, riċerka u innovazzjoni ta' kwalità għolja, u għas-servizz tas-soċjetà.

(33)

Il-Komunikazzjoni ta' Bruges tas-7 ta' Diċembru 2010 dwar Kooperazzjoni Ewropea msaħħa fil-qasam tal-Edukazzjoni u t-Taħriġ Vokazzjonali għall-perijodu 2011-2020 talbet għall-appoġġ tal-eċċellenza vokazzjonali għal tkabbir intelliġenti u sostenibbli. Fil-komunikazzjoni tagħha tat-18 ta' Lulju 2017 intitolata "It-Tisħiħ tal-Innovazzjoni fir-Reġjuni tal-Ewropa: Strateġiji għal tkabbir reżiljenti, inklużiv u sostenibbli", il-Kummissjoni appellat lil-Istati Membri biex jgħaqqdu l-edukazzjoni u t-taħriġ vokazzjonali mas-sistemi tal-innovazzjoni, bħala parti minn strateġiji ta' speċjalizzazzjoni intelliġenti fil-livell reġjonali. Jenħtieġ li l-Programm jipprovdi l-mezzi sabiex tingħata risposta lil dawk it-talbiet u jappoġġa l-iżvilupp ta' pjattaformi tranżnazzjonali ta' ċentri ta' eċċellenza vokazzjonali imdaħħla fi strateġiji lokali u reġjonali għat-tkabbir sostenibbli, l-innovazzjoni u l-kompetittività. Dawk iċ-ċentri ta' eċċellenza jenħtieġ li jaġixxu ta' xprunaturi ta' ħiliet vokazzjonali ta' kwalità f'kuntest ta' sfidi settorjali, filwaqt li jappoġġaw bidliet strutturali ġenerali u politiki soċjoekonomiċi fl-Unjoni.

(34)

Pjattaformi u għodod għal kooperazzjoni virtwali online faċli għall-utent jista' jkollhom rwol importanti fl-appoġġ tat-twettiq tal-edukazzjoni u t-taħriġ u tal-politika dwar iż-żgħażagħ fl-Unjoni. Sabiex iżid l-użu ta' attivitajiet virtwali ta' kooperazzjoni, il-Programm jenħtieġ li jappoġġa użu iktar sistematiku u koerenti ta' pjattaformi online bħal eTwinning, School Education Gateway, il-Pjattaforma Elettronika għat-Tagħlim tal-Adulti fl-Ewropa, il-Portal Ewropew taż-Żgħażagħ u l-pjattaformi online għall-edukazzjoni għolja u, fejn meħtieġ, kwalunkwe pjattaforma online oħra li tista' tiġi stabbilita fl-oqsma tal-edukazzjoni u t-taħriġ u ż-żgħażagħ.

(35)

F'konformità mal-oqfsa ta' ħidma u l-għodod tal-Unjoni rilevanti, jenħtieġ li l-Programm jikkontribwixxi biex jiffaċilita t-trasparenza u r-rikonoxximent ta' kompetenzi, ħiliet u kwalifiki, u t-trasferiment ta' krediti jew unitajiet ta' eżiti tat-tagħlim sabiex irawwem l-assigurazzjoni tal-kwalità u jappoġġa l-validazzjoni ta' tagħlim mhux formali u informali, il-ġestjoni tal-ħiliet u l-gwida. F'dak ir-rigward, il-Programm jenħtieġ li jipprovdi appoġġ ukoll għall-punti ta' kuntatt u n-networks fil-livell nazzjonali u tal-Unjoni li jiffaċilitaw skambji trans-Ewropej u l-iżvilupp ta' perkorsi ta' tagħlim flessibbli bejn oqsma differenti tal-edukazzjoni u t-taħriġ u ż-żgħażagħ u f'kuntesti formali u mhux formali. Il-Programm jenħtieġ li jipprovdi wkoll appoġġ lill-Proċess ta' Bologna.

(36)

Jenħtieġ li l-Programm jimmobilizza l-potenzjal tal-parteċipanti preċedenti fil- Programm Erasmus+ u jappoġġa l-attivitajiet relatati, b'mod partikolari tan-networks tal- Erasmus+ alumni, l-ambaxxaturi u l-EuroPeers, billi jħeġġiġhom jippromwovu l-Programm bil-għan li tiżdied il-parteċipazzjoni.

(37)

Bħala mod ta' kif tiġi żgurata l-kooperazzjoni ma' strumenti oħrajn tal-Unjoni u appoġġ għal politiki oħrajn tal-Unjoni, jenħtieġ li jiġu offruti opportunitajiet ta' mobbiltà għat-tagħlim lil persuni f'diversi setturi ta' attività, bħas-settur pubbliku u dak privat, tal-agrikoltura u tal-intrapriża, biex ikunu jistgħu jkollhom esperjenza ta' tagħlim barra minn pajjiżhom li tippermettilhom, fi kwalunkwe stadju tal-ħajja tagħhom, jikbru u jiżviluppaw kemm personalment, b'mod partikolari billi jiżviluppaw sensibilizzazzjoni rigward l-identità Ewropea tagħhom u fehim tad-diversità kulturali Ewropea, kif ukoll professjonalment, inkluż billi jakkwistaw ħiliet rilevanti għas-suq tax-xogħol. Il-Programm jenħtieġ li joffri punt tad-dħul għall-iskemi ta' mobbiltà tranżnazzjonali tal-Unjoni b'dimensjoni ta' tagħlim b'saħħitha, li jissimplifika l-offerta ta' tali skemi għall-benefiċjarji u dawk li jipparteċipaw f'dawk l-attivitajiet. Jenħtieġ li tiġi ffaċilitata l-espansjoni tal-proġetti tal-Programm . Jenħtieġ li jiġu stabbiliti miżuri speċifiċi biex jgħinu lill-promoturi tal-proġetti tal-Programm japplikaw għal għotjiet jew jiżviluppaw sinerġiji b'appoġġ mill-Fondi tal-Politika ta' Koeżjoni u mill-programmi relatati mal-migrazzjoni, is-sigurtà, il-ġustizzja u ċ-ċittadinanza, is-saħħa, il-media u l-kultura, u l-volontarjat. Jenħtieġ li jkun possibbli li proposti ta' proġetti ta' kwalità li ma jistgħux jiġu ffinanzjati taħt il-Programm minħabba restrizzjonijiet baġitarji jistgħu jingħataw tikketta ta' Siġill ta' Eċċellenza, abbażi ta' sett limitat ta' kriterji. It-tikketta ta’ Siġill ta' Eċċellenza tirrikonoxxi l-kwalità tal-proposta u tissimplifika t-tfittxija għal finanzjament alternattiv taħt il-Fond Ewropew għall-Iżvilupp Reġjonali stabbilit permezz tar-Regolament tal-Parlament Ewropew u tal-Kunsill dwar il-Fond Ewropew għall-Iżvilupp Reġjonali u dwar il-Fond ta’ Koeżjoni (il-‘Fond Ewropew għall-Iżvilupp Reġjonali’) jew il-Fond Soċjali Ewropew Plus stabbilit permezz tar-Regolament tal-Parlament Ewropew u tal-Kunsill dwar il-Fond Soċjali Ewropew Plus (ESF+) (il-‘Fond Soċjali Ewropew Plus’).

(38)

Huwa importanti li jiġu stimulati t-tagħlim, l-apprendiment u r-riċerka fi kwistjonijiet ta' integrazzjoni Ewropea, inkluż l-isfidi u l-opportunitajiet futuri tal-Unjoni, u li jiġu promossi d-dibattiti dwar dawk il-kwistjonijiet b'appoġġ minn azzjonijiet Jean Monnet fil-qasam tal-edukazzjoni għolja u f'oqsma oħrajn tal-edukazzjoni u t-taħriġ, b'mod partikolari permezz tat-taħriġ tal-għalliema u l-persunal. It-trawwim ta' sens Ewropew ta' appartenenza u ta' impenn huma partikolarment importanti minħabba l-isfidi għall-valuri komuni li l-Unjoni hija msejsa fuqhom u li jiffurmaw parti minn identità Ewropea komuni, u minħabba l-fatt li ċ-ċittadini juru livelli baxxi ta' involviment. Il-Programm jenħtieġ li jkompli jikkontribwixxi għall-iżvilupp tal-eċċellenza fl-istudji ta' integrazzjoni Ewropea. Huwa xieraq li l-progress tal-istituzzjonijiet iffinanzjat fil-qafas ta’ azzjonijiet Jean Monnet għat-twettiq tal-għanijiet tal-Programm jiġi mmonitorjat u evalwat regolarment. Jenħtieġ li jiġu mħeġġa skambji bejn dawk l-istituzzjonijiet u istituzzjonijiet oħrajn fil-livell nazzjonali jew tranżnazzjonali, b'rispett sħiħ għal-libertà akkademika tagħhom.

(39)

Billi jirrifletti l-importanza li jiġi indirizzat it-tibdil fil-klima skont il-impenji tal-Unjoni biex timplimenta l-Ftehim ta' Pariġi adottat taħt il-Konvenzjoni Qafas tan-Nazzjonijiet Uniti dwar il-Bidla fil-Klima (17) u biex jikseb l-Għanijiet ta' Żvilupp Sostenibbli tan-Nazzjonijiet Uniti, il-Programm huwa intiż li jikkontribwixxi għall-integrazzjoni tal-azzjonijiet klimatiċi u għall-kisba tal-mira kumplessiva ta' 30 % tan-nefqa tal-baġit tal-Unjoni li jappoġġa l-għanijiet klimatiċi. F'konformità mal-Patt Ekoloġiku Ewropew bħala pjan ta' azzjoni għal tkabbir sostenibbli, l-azzjonijiet taħt dan ir-Regolament jenħtieġ li jirrispettaw il-prinċipju ta' "tagħmilx ħsara" mingħajr ma jbiddlu n-natura fundamentali tal-Programm. Matul l-implimentazzjoni tal-Programm, jenħtieġ li jiġu identifikati u stabbiliti azzjonijiet rilevanti u li dawn jiġu rivalutati fil-kuntest tal-evalwazzjonijiet rilevanti u l-proċess ta' rieżami. Huwa xieraq ukoll li jitkejlu l-azzjonijiet rilevanti li jikkontribwixxu għall-għanijiet klimatiċi, inkluż dawk maħsuba biex inaqqsu l-impatt ambjentali tal-Programm.

(40)

Dan ir-Regolament jistabbilixxi pakkett finanzjarju għall-Programm li għandu jikkostitwixxi l-ammont ta' referenza primarja, fi ħdan it-tifsira tal-punt 18 tal-Ftehim Interistituzzjonali tas-16 ta’ Diċembru 2020 bejn il-Parlament Ewropew, il-Kunsill tal-Unjoni Ewropea u l-Kummissjoni Ewropea dwar dixxiplina baġitarja, dwar kooperazzjoni f'materji baġitarji u dwar ġestjoni finanzjarja tajba, kif ukoll dwar ir-riżorsi proprji ġodda, inkluż pjan direzzjonali lejn l-introduzzjoni ta' riżorsi proprji ġodda (18) għall-Parlament Ewropew u għall-Kunsill matul il-proċedura baġitarja annwali. Dak il-pakkett finanzjarju jinkludi ammont ta' EUR 0,5 biljuni fi prezzijiet kostanti tal-2018 skont id-dikjarazzjoni konġunta mill-Parlament Ewropew, mill-Kunsill u mill-Kummissjoni tas-16 ta’ Diċembru 2020 dwar it-tisħiħ ta' programmi speċifiċi u l-adattament ta' atti bażiċi (19).

(41)

Fi ħdan pakkett bażiku għal azzjonijiet li għandhom jiġu ġestiti mill-aġenziji nazzjonali fil-qasam tal-edukazzjoni u t-taħriġ, tqassim tal-allokazzjoni minima għal kull settur jenħtieġ li jiġi definit għas-setturi li ġejjin sabiex massa kritika ta' approprjazzjonijiet tkun garantita li tilħaq l-output u r-riżultati maħsuba f'kull wieħed minn dawk is-setturi: l-edukazzjoni għolja, l-edukazzjoni skolastika, l-edukazzjoni u taħriġ vokazzjonali, l-edukazzjoni skolastika u l-edukazzjoni għall-adulti.

(42)

Ir-Regolament (UE, Euratom) 2018/1046 tal-Parlament Ewropew u tal-Kunsill (20) (ir-"Regolament Finanzjarju") japplika għall-Programm. Ir-Regolament Finanzjarju jistabbilixxi regoli dwar l-implimentazzjoni tal-baġit tal-Unjoni, inkluż ir-regoli dwar għotjiet, premjijiet, akkwist, ġestjoni indiretta, strumenti finanzjarji, garanziji baġitarji, assistenza finanzjarja u r-rimborż ta' esperti esterni.

(43)

Jenħtieġ li t-tipi ta' finanzjament u l-metodi ta' implimentazzjoni skont dan ir-Regolament jintgħażlu abbażi tal-abbiltà tagħhom li jiksbu l-għanijiet speċifiċi tal-azzjonijiet u li jrendu r-riżultati, filwaqt li jqisu, b'mod partikolari, l-ispejjeż tal-kontrolli, il-piż amministrattiv, u r-riskju mistenni tan-nuqqas ta' konformità. Meta ssir din l-għażla, l-użu tas-somom f'daqqa, l-ispejjeż għal kull unità u r-rati fissi, kif ukoll il-finanzjament mhux marbut mal-ispejjeż kif imsemmija fl-Artikolu 125(1) tar-Regolament Finanzjarju, jenħtieġ li jiġu kkunsidrati. L-allokazzjonijiet baġitarji biex jimplimentaw l-azzjonijiet ġestiti mill-aġenziji nazzjonali jenħtieġ li jiġu akkumpanjati minn appoġġ adegwat għall-ispejjeż operattivi tal-aġenziji nazzjonali, fl-għamla ta' tariffa ta' ġestjoni, biex tiġi żgurata implimentazzjoni effettiva u sostenibbli tal-kompiti ta' ġestjoni ddelegati. Il-prinċipji ta' trasparenza, trattament ugwali u nondiskriminazzjoni stabbiliti fir-Regolament Finanzjarju jenħtieġ li jiġu rispettati fl-implimentazzjoni tal-Programm.

(44)

Il-pajjiżi terzi li huma membri taż-Żona Ekonomika Ewropea jistgħu jieħdu sehem fil-programmi tal-Unjoni fil-qafas tal-kooperazzjoni stabbilit skont il-Ftehim dwar iż-Żona Ekonomika Ewropea (21), li jipprevedi l-implimentazzjoni tal-programmi abbażi ta' deċiżjoni adottata skont dak il-Ftehim. Pajjiżi terzi jistgħu jipparteċipaw ukoll abbażi ta' strumenti ġuridiċi oħrajn. F'dan ir-Regolament jenħtieġ li tiġi introdotta dispożizzjoni speċifika li tirrikjedi li pajjiżi terzi jagħtu d-drittijiet u l-aċċess neċessarji meħtieġa biex l-uffiċjal awtorizzanti responsabbli, l-Uffiċċju Ewropew ta' Kontra l-Frodi (OLAF) u l-Qorti tal-Awdituri jeżerċitaw il-kompetenzi rispettivi tagħhom b'mod komprensiv. Il-parteċipazzjoni sħiħa tal-pajjiżi terzi fil-Programm jenħtieġ li tkun soġġetta għall-kondizzjonijiet stabbiliti fi ftehimiet speċifiċi li jkopru l-parteċipazzjoni tal-pajjiż terz konċernat fil-Programm. Barra minn hekk, il-parteċipazzjoni sħiħa tinvolvi l-obbligu li tiġi stabbilita aġenzija nazzjonali u li wħud mill-azzjonijiet tal-Programm jiġu ġestiti taħt ġestjoni indiretta. Entitajiet legali minn pajjiżi terzi li mhumiex assoċjati mal-Programm jenħtieġ li jkunu jistgħu jipparteċipaw f'xi wħud mill-azzjonijiet tal-Programm, kif definit fil-programmi ta' ħidma u s-sejħiet għall-proposti ppubblikati mill-Kummissjoni. Meta jiġi implimentat il-Programm, jistgħu jiġu kkunsidrati arranġamenti speċifiċi fir-rigward tal-parteċipazzjoni ta' entitajiet legali mill-mikrostati Ewropej.

(45)

Fid-dawl tal-Artikolu 349 tat-Trattat dwar il-Funzjonament tal-Unjoni Ewropea (TFUE) u f'konformità mal-komunikazzjoni tal-Kummissjoni tal-24 ta' Ottubru 2017 intitolata "Sħubija strateġika aktar b'saħħitha u mġedda mar-reġjuni ultraperiferiċi tal-UE", jenħtieġ li l-Programm iqis is-sitwazzjoni speċifika ta' dawk ir-reġjuni ultraperiferiċi msemmija f'dak l-Artikolu. Jenħtieġ li jittieħdu miżuri biex tiżdied il-parteċipazzjoni tar-reġjuni ultraperiferiċi fl-azzjonijiet kollha, inkluż permezz ta' appoġġ finanzjarju, fejn rilevanti, għall-mobbiltà għat-tagħlim. Jenħtieġ li jitrawmu l-iskambji tal-mobbiltà u l-kooperazzjoni bejn il-persuni u l-organizzazzjonijiet minn dawk ir-reġjuni u pajjiżi terzi, b'mod partikolari l-ġirien tagħhom. Tali miżuri jenħtieġ li jiġu ssorveljati u evalwati regolarment.

(46)

Skont id-Deċiżjoni tal-Kunsill 2013/755/UE (22), l-individwi u l-entitajiet stabbiliti f'pajjiżi jew territorji barranin huma eliġibbli għal finanzjament soġġett għar-regoli u l-għanijiet tal-Programm u l-arranġamenti possibbli applikabbli għall-Istat Membru li miegħu l-pajjiż jew it-territorju barrani huwa marbut. Ir-restrizzjonijiet imposti mill-pożizzjoni remota ta' dawk il-pajjiżi jew territorji jenħtieġ li titqies meta jiġi implimentat il-Programm. Il-parteċipazzjoni ta' dawk il-pajjiżi u t-territorji fil-Programm jenħtieġ li tiġi ssorveljata u evalwata regolarment.

(47)

F'konformità mar-Regolament Finanzjarju, jenħtieġ li l-Kummissjoni tadotta programmi ta' ħidma u tinforma lill-Parlament Ewropew u lill-Kunsill dwar dan. Jenħtieġ li l-programmi ta' Ħidma jistabbilixxu l-miżuri meħtieġa għall-implimentazzjoni tagħhom, b'mod konformi mal-għanijiet ġenerali u speċifiċi tal-Programm, il-kriterji tal-għażla u tal-għotja għall-għotjiet, u l-elementi l-oħrajn kollha meħtieġa. Il-programmi ta' ħidma u kwalunkwe emenda għalihom jenħtieġ li jiġu adottati permezz ta' atti ta' implimentazzjoni f'konformità mal-proċedura ta' eżami.

(48)

Sabiex jiġi vvalutat il-progress fl-implimentazzjoni u jsir titjib possibbli fl-implimentazzjoni tal-Programm, jenħtieġ li l-Kummissjoni twettaq evalwazzjoni interim tal-Programm. Jenħtieġ li dik l-evalwazzjoni interim tkun akkumpanjata minn evalwazzjoni finali tal-Programm 2014-2020 u jenħtieġ li t-tagħlimiet rilevanti minn dik l-evalwazzjoni jikkontribwixxu għall-evalwazzjoni interim. Minbarra li tivvaluta l-effettività u l-prestazzjoni tal-Programm, huwa ta' importanza partikolari li l-evalwazzjoni interim tivvaluta bir-reqqa l-implimentazzjoni ta' inizjattivi ġodda u tal-miżuri ta' inklużjoni u simplifikazzjoni stabbiliti. Fejn xieraq, u abbażi tal-evalwazzjoni interim, jenħtieġ li l-Kummissjoni tressaq proposta leġiżlattiva biex temenda dan ir-Regolament. Il-Kummissjoni jenħtieġ li tikkomunika kwalunkwe evalwazzjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni.

(49)

Skont il-paragrafi 22 u 23 tal-Ftehim Interistituzzjonali tat-13 ta' April 2016 dwar it-Tfassil Aħjar tal-Liġijiet (23), jenħtieġ li l-Programm jiġi evalwat abbażi tal-informazzjoni miġbura f'konformità ma' rekwiżiti ta' monitoraġġ speċifiċi, filwaqt li jiġi evitat piż amministrattiv, b'mod partikolari fuq l-Istati Membri, kif ukoll ir-regolamentazzjoni żejda. Għalhekk, id-dispożizzjonijiet adottati permezz ta' atti delegati relatati ma għandhomx iwasslu għal piż addizzjonali sinifikanti għall-Istati Membri. Jenħtieġ li r-rekwiżiti ta' monitoraġġ jinkludu indikaturi speċifiċi, li jistgħu jitkejlu u realistiċi li jistgħu jitkejlu matul iż-żmien bħala bażi għall-evalwazzjoni tal-effetti tal-Programm fir-realtà.

(50)

Jenħtieġ li jiġu żgurati sensibilizzazzjoni, pubbliċità u disseminazzjoni xierqa tal-opportunitajiet u tar-riżultati tal-azzjonijiet appoġġati mill-Programm fil-livell lokali, nazzjonali u Ewropew u jenħtieġ li jqisu l-gruppi fil-mira ewlenin fl-oqsma tal-edukazzjoni u t-taħriġ, iż-żgħażagħ u l-isport u, fejn rilevanti, varjetà kbira ta' gruppi fil-mira oħra, bħall-gwida għall-karriera u s-servizzi tal-impjiegi, l-organizzazzjonijiet kulturali, l-intrapriżi u l-fondazzjonijiet. Jenħtieġ li l-attivitajiet ta' sensibilizzazzjoni, pubbliċità u ta' disseminazzjoni jibbażaw fuq il-korpi ta' implimentazzjoni kollha tal-Programm u jenħtieġ li, fejn ikun rilevanti, ikollhom l-appoġġ ta' partijiet ikkonċernati rilevanti oħra. Barra minn hekk, jenħtieġ li l-Kummissjoni tinvolvi ruħha ma' firxa wiesgħa ta' partijiet ikkonċernati, inkluż organizzazzjonijiet li jipparteċipaw fil-Programm, fuq bażi regolari tul iċ-ċiklu tal-ħajja tal-Programm, sabiex tiffaċilita l-kondiviżjoni ta' prattiki tajbin u r-riżultati tal-proġetti u tiġbor feedback dwar il-Programm. Jenħtieġ li l-aġenziji nazzjonali jiġu mistiedna jipparteċipaw f'dak il-proċess.

(51)

Sabiex tiġi żgurata effiċjenza akbar fil-komunikazzjoni lill-pubbliku ġenerali u sinerġiji aktar b'saħħithom bejn l-attivitajiet ta' komunikazzjoni mwettqa b'inizjattiva tal-Kummissjoni, jenħtieġ li r-riżorsi finanzjarji allokati għall-komunikazzjoni taħt dan ir-Regolament jikkontribwixxu wkoll għall-komunikazzjoni korporattiva tal-prijoritajiet ta' politika tal-Unjoni, safejn dawk il-prijoritajiet ikunu relatati mal-għanijiet tal-Programm.

(52)

Sabiex ikun żgurat li dan ir-Regolament jiġi implimentat b'mod effiċjenti u effettiv, jenħtieġ li l-Programm jagħmel użu massimu mill-mekkaniżmi eżekuttivi diġà fis-seħħ. L-implimentazzjoni tal-Programm jenħtieġ għalhekk li tiġi fdata lill-Kummissjoni u lill-aġenziji nazzjonali. Fejn ikun fattibbli, u sabiex tiġi massimizzata l-effiċjenza, l-aġenziji nazzjonali jenħtieġ li jkunu l-istess bħal dawk deżinjati għall-ġestjoni tal-Programm 2014-2020 . Il-kamp ta' applikazzjoni tal-valutazzjoni tal-konformità ex-ante jenħtieġ li jkun limitat għar-rekwiżiti li huma ġodda u speċifiċi għall-Programm, sakemm ma jkunx ġustifikat xort'oħra, bħal f'każ ta' nuqqasijiet serji jew sottoprestazzjoni min-naħa tal-aġenzija nazzjonali konċernata.

(53)

Sabiex jiġu żgurati l-ġestjoni finanzjarja tajba u ċ-ċertezza legali f'kull Stat Membru jew pajjiż terz assoċjat mal-Programm , jenħtieġ li kull awtorità nazzjonali tiddeżinja korp indipendenti tal-awditjar. Fejn fattibbli, u sabiex tiġi massimizzata l-effiċjenza, il-korpi indipendenti tal-awditjar jenħtieġ li jkunu l-istess bħal dawk iddeżinjati taħt il-Programm 2014-2020.

(54)

Jenħtieġ li l-Istati Membri jagħmlu ħilithom biex jadottaw il-miżuri kollha xierqa biex ineħħu l-ostakli legali u amministrattivi li jistgħu jipprevjenu l-aċċess għall-Programm jew jimpedixxu l-funzjonament xieraq tiegħu. Dak jinkludi s-soluzzjoni, fejn possibbli, u mingħajr preġudizzju għal-liġi tal-Unjoni dwar id-dħul u r-residenza ta' ċittadini ta' pajjiżi terzi, ta' kwistjonijiet li joħolqu diffikultajiet fil-kisba ta' viżi u ta' permessi ta' residenza.

(55)

Jenħtieġ li s-sistema ta' rapportar dwar il-prestazzjoni tiżgura li d-data għall-monitoraġġ tal-implimentazzjoni tal-Programm u għall-evalwazzjoni tinġabar b'mod effiċjenti, effettiv, f'waqtu u fil-livell xieraq ta' dettall. Din id-data jenħtieġ li tiġi kkomunikata lill-Kummissjoni b'mod li tkun konformi mar-regoli rilevanti tal-protezzjoni tad-data.

(56)

Sabiex ikunu żgurati kondizzjonijiet uniformi għall-implimentazzjoni ta' dan ir-Regolament, jenħtieġ li l-Kummissjoni tingħata setgħat ta' implimentazzjoni. Jenħtieġ li dawk is-setgħat jiġu eżerċitati f'konformità mar-Regolament (UE) Nru 182/2011 tal-Parlament Ewropew u tal-Kunsill (24).

(57)

Sabiex jiġu simplifikati r-rekwiżiti għall-benefiċjarji, jenħtieġ li jintużaw kemm jista' jkun possibbli għotjiet simplifikati fil-forma ta' somom f'daqqa, spejjeż għal kull unità u rati fissi . L-għotjiet simplifikati biex jappoġġaw l-azzjonijiet ta' mobbiltà tal-Programm, kif definit mill-Kummissjoni, jenħtieġ li jqisu l-ispejjeż tal-għajxien u tas-sussistenza fil-pajjiż ospitanti. Il-Kummissjoni u l-aġenziji nazzjonali tal-pajjiżi emittenti jenħtieġ li jkollhom il-possibbiltà li jaġġustaw dawk l-għotjiet fuq il-bażi ta' kriterji oġġettivi, b'mod partikolari biex jiżguraw aċċess għal persuni b'inqas opportunitajiet. F'konformità mal-liġi nazzjonali, jenħtieġ li l-Istati Membri jitħeġġu wkoll jeżentaw dawk l-għotjiet minn kwalunkwe taxxa u imposta soċjali; l-għotjiet li jingħataw lil individwi minn entitajiet legali pubbliċi jew privati jenħtieġ li jiġu ttrattati bl-istess mod.

(58)

F'konformità mar-Regolament Finanzjarju, ir-Regolament (UE, Euratom) Nru 883/2013 tal-Parlament Ewropew u tal-Kunsill (25) u r-Regolamenti tal-Kunsill (KE, Euratom) Nru 2988/95 (26), (Euratom, KE) Nru 2185/96 (27) u (UE) 2017/1939 (28), l-interessi finanzjarji tal-Unjoni jridu jiġu protetti permezz ta' miżuri proporzjonati, inkluż miżuri relatati mal-prevenzjoni, is-sejbien, il-korrezzjoni u l-investigazzjoni ta' irregolaritajiet, inkluż frodi, mal-irkupru ta' fondi mitlufa, imħallsa bi żball jew użati b'mod mhux korrett, u, fejn xieraq, mal-impożizzjoni ta' penali amministrattivi. B'mod partikolari, f'konformità mar-Regolamenti (Euratom, KE) Nru 2185/96 u (UE, Euratom) Nru 883/2013, l-OLAF għandu s-setgħa li jwettaq investigazzjonijiet amministrattivi, inkluż kontrolli u spezzjonijiet fuq il-post, bil-għan li jiġi stabbilit jekk kienx hemm frodi, korruzzjoni jew kwalunkwe attività illegali oħra li taffettwa l-interessi finanzjarji tal-Unjoni. L-Uffiċċju tal-Prosekutur Pubbliku Ewropew (UPPE) għandu s-setgħa, skont ir-Regolament (UE) 2017/1939, li jinvestiga u jressaq għall-prosekuzzjoni reati kriminali li jaffettwaw l-interessi finanzjarji tal-Unjoni kif previst fid-Direttiva (UE) 2017/1371 tal-Parlament Ewropew u tal-Kunsill (29). F'konformità mar-Regolament Finanzjarju, kwalunkwe persuna jew entità li tirċievi fondi mill-Unjoni trid tikkoopera bis-sħiħ fil-protezzjoni tal-interessi finanzjarji tal-Unjoni, tagħti d-drittijiet u l-aċċess neċessarji lill-Kummissjoni, lill-OLAF, lill-Qorti tal-Awdituri u, fir-rigward ta' dawk l-Istati Membri li jipparteċipaw fil-kooperazzjoni msaħħa skont ir-Regolament (UE) 2017/1939, lill-UPPE, u tiżgura li kwalunkwe parti terza involuta fl-implimentazzjoni ta' fondi tal-Unjoni tagħti drittijiet ekwivalenti.

(59)

Huwa meħtieġ li tiġi żgurata l-komplementarjetà u l-konsistenza tal-azzjonijiet tal-Programm, inkluż dawk li ma għandhomx natura tranżnazzjonali jew internazzjonali, ma' attivitajiet imwettqa mill-Istati Membri u ma' attivitajiet oħra tal-Unjoni, b'mod partikolari dawk relatati mal-edukazzjoni u t-taħriġ, il-kultura u l-media, iż-żgħażagħ u s-solidarjetà, l-impjiegi u l-inklużjoni soċjali, ir-riċerka u l-innovazzjoni, l-industrija u l-intrapriżi, il-politika diġitali, l-agrikoltura u l-iżvilupp rurali li jkollhom attenzjoni fuq il-bdiewa żgħażagħ, l-ambjent u l-klima, il-koeżjoni, il-politika reġjonali, il-migrazzjoni, is-sigurtà u l-kooperazzjoni u l-iżvilupp internazzjonali.

(60)

Filwaqt li l-qafas regolatorju taħt il-Programm 2014-2020 ppermetta lill-Istati Membri u lir-reġjuni jistabbilixxu sinerġiji fil-perijodu ta' programmazzjoni 2014-2020 bejn dak il-Programm u strumenti oħra tal-Unjoni, bħall-Fondi Strutturali u ta' Investiment Ewropej, li jappoġġaw ukoll l-iżvilupp kwalitattiv ta' sistemi edukattivi, tat-taħriġ u taż-żgħażagħ fl-Unjoni, dak il-potenzjal s'issa għadu ma ġiex sfruttat biżżejjed, u għalhekk ġew limitati l-effetti sistemiċi tal-proġetti u l-impatt fuq il-politika. Jenħtieġ li ssir komunikazzjoni u kooperazzjoni effettiva fil-livell nazzjonali bejn il-korpi nazzjonali inkarigati mill-ġestjoni ta' dawk l-istrumenti varji sabiex jiġi massimizzat l-impatt rispettiv tagħhom. Jenħtieġ li l-Programm jippermetti l-kooperazzjoni attiva ma' dawk l-istrumenti, b'mod partikolari biex jiġi żgurat li, fejn rilevanti, jiġu stabbiliti miżuri ta' appoġġ finanzjarju adegwati biex jappoġġaw lill-persuni b'inqas opportunitajiet.

(61)

Sabiex jiġi ottimizzat il-valur miżjud mill-investimenti ffinanzjati kompletament jew parzjalment permezz tal-baġit tal-Unjoni, jenħtieġ li jitfittxew sinerġiji, b'mod partikolari, bejn il-Programm u programmi oħra tal-Unjoni, inkluż Fondi implimentati taħt ġestjoni kondiviża. Sabiex jiġu massimizzati dawk is-sinerġiji, jenħtieġ li jiġu żgurati mekkaniżmi abilitanti ewlenin, inkluż finanzjament kumulattiv f'azzjoni mill-Programm u programm ieħor tal-Unjoni, sakemm tali finanzjament kumulattiv ma jaqbiżx l-ispejjeż eliġibbli totali tal-azzjoni. Għal dak il-għan, dan ir-Regolament jenħtieġ li jistabbilixxi regoli xierqa, b'mod partikolari dwar il-possibbiltà li tiġi ddikjarata l-istess spiża jew nefqa fuq bażi prorata lill-Programm u lil programm ieħor tal-Unjoni.

(62)

Sabiex tadatta, fejn meħtieġ, għall-iżviluppi fl-oqsma rilevanti, u sabiex tiżgura l-valutazzjoni effettiva tal-progress tal-Programm lejn il-kisba tal-għanijiet tiegħu, jenħtieġ li tiġi ddelegata lill-Kummissjoni s-setgħa li tadotta atti skont l-Artikolu 290 TFUE biex temenda Anness I għal dan ir-Regolament billi żżid mad-deskrizzjoni tal-azzjonijiet tal-Programm u biex temenda Anness II għal dan ir-Regolament fir-rigward-tal-indikaturi tal-prestazzjoni tal-Programm, u biex tissupplimenta dan ir-Regolament b'dispożizzjonijiet dwar l-istabbiliment ta' qafas ta' monitoraġġ u evalwazzjoni. Huwa partikolarment importanti li l-Kummissjoni twettaq konsultazzjonijiet xierqa matul ix-xogħol tagħha ta' tħejjija, ukoll fil-livell ta' esperti, u li dawk il-konsultazzjonijiet jiġu mwettqa f'konformità mal-prinċipji stipulati fil-Ftehim Interistituzzjonali tat-13 ta' April 2016 dwar it-Tfassil Aħjar tal-Liġijiet. B'mod partikolari, biex tkun żgurata parteċipazzjoni ugwali fit-tħejjija tal-atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi ta' esperti tal-Kummissjoni li jittrattaw it-tħejjija tal-atti delegati.

(63)

Huwa xieraq li jiġi żgurat li l-Programm 2014-2020 jingħalaq korrettement, b'mod partikolari fir-rigward tal-kontinwazzjoni tal-arranġamenti pluriennali għall-ġestjoni tiegħu, bħall-finanzjament ta' assistenza teknika u amministrattiva. Mill-1 ta' Jannar 2021, l-assistenza teknika u amministrattiva jenħtieġ li tiżgura, fejn meħtieġ, il-ġestjoni tal-azzjonijiet li ma ġewx finalizzati taħt il-Programm 2014-2020 sal-31 ta' Diċembru 2020.

(64)

Dan ir-Regolament jirrispetta d-drittijiet fundamentali u josserva l-prinċipji rikonoxxuti b'mod partikolari mill-Karta tad-Drittijiet Fundamentali tal-Unjoni Ewropea ("il-Karta"). B'mod partikolari, dan ir-Regolament ifittex li jiżgura rispett sħiħ lejn id-dritt għall-ugwaljanza bejn in-nisa u l-irġiel u d-dritt għal nondiskriminazzjoni bbażata fuq sess, razza jew oriġini etnika, reliġjon jew twemmin, diżabbiltà, età jew orjentazzjoni sesswali, u li jippromwovi l-applikazzjoni tal-Artikoli 21 u 23 tal-Karta. F'konformità mal-Artikolu 13 tal-Karta, jenħtieġ ukoll li jiġi żgurat li l-libertà akkademika tiġi rrispettata mill-pajjiżi li jkunu qed jirċievu fondi taħt il-Programm.

(65)

Ir-regoli finanzjarji orizzontali adottati mill-Parlament Ewropew u mill-Kunsill abbażi tal-Artikolu 322 TFUE japplikaw għal dan ir-Regolament. Dawk ir-regoli huma stabbiliti fir-Regolament Finanzjarju u jiddeterminaw b'mod partikolari l-proċedura għall-istabbiliment u l-implimentazzjoni tal-baġit permezz ta' għotjiet, akkwist, premjijiet u implimentazzjoni indiretta, u jipprovdu għal kontrolli dwar ir-responsabbiltà tal-atturi finanzjarji. Fejn il-kontribuzzjoni tal-Unjoni tieħu l-forma ta' somom f'daqqa, spejjeż għal kull unità jew rati fissi, il-livelli ta' appoġġ finanzjarju jenħtieġ li jiġu rieżaminati regolarment u, fejn ikun meħtieġ, aġġustati f'konformità mar-Regolament Finanzjarju, filwaqt li jitqiesu, fejn xieraq, l-ispejjeż tal-għajxien u tas-sussistenza fil-pajjiż ospitanti u l-ispejjeż tal-ivvjaġġar. Ir-regoli adottati abbażi tal-Artikolu 322 TFUE jinkludu wkoll reġim ġenerali ta' kundizzjonalità għall-protezzjoni tal-baġit tal-Unjoni.

(66)

F'konformità mal-Artikolu 193(2) tar-Regolament Finanzjarju , huwa possibbli li tingħata għotja għal azzjoni li tkun diġà bdiet, dment li l-applikant ikun jista' juri l-ħtieġa li jibda l-azzjoni qabel il-firma tal-ftehim ta' għotja. Madankollu, l-ispejjeż imġarrba qabel id-data tas-sottomissjoni tal-applikazzjoni għal għotja mhumiex eliġibbli għal finanzjament tal-Unjoni ħlief f'każijiet eċċezzjonali debitament ġustifikati. F'konformità mal-Artikolu 193(4) ta' dak ir-Regolament, l-ispejjeż imġarrba qabel id-data tas-sottomissjoni tal-applikazzjoni għal għotja wkoll mhumiex eliġibbli għal finanzjament tal-Unjoni fil-każ ta' għotjiet operattivi u, f’tali każ, il-ftehim ta' għotja jrid jiġi ffirmat fi żmien erba' xhur mill-bidu tas-sena finanzjarja tal-benefiċjarju. Sabiex jiġi evitat kwalunkwe tfixkil fl-appoġġ tal-Unjoni li jista' jkun ta' preġudizzju għall-interessi tal-Unjoni, jenħtieġ li jkun possibbli li fid-deċiżjoni ta' finanzjament, għal perijodu limitat ta' żmien fil-bidu tal- QFP 2021-2027, u f'każijiet debitament ġustifikati biss, tkun prevista l-eliġibbiltà tal-attivitajiet u l-ispejjeż mill-1 ta' Jannar 2021 , anki jekk dawk l-attivitajiet ġew implimentati u l-ispejjeż imġarrba qabel ma ġiet ippreżentata l-applikazzjoni għal għotja.

(67)

Minħabba li l-għanijiet ta' dan ir-Regolament ma jistgħux jinkisbu b'mod suffiċjenti mill-Istati Membri iżda jistgħu pjuttost, minħabba l-karattru tranżnazzjonali tal-Programm, il-volum kbir u l-kamp ta' applikazzjoni ġeografiku wiesa' tal-attivitajiet ta' mobbiltà għat-tagħlim u ta' kooperazzjoni ffinanzjati, l-effetti tiegħu fuq l-aċċess għall-mobbiltà għat-tagħlim u b'mod aktar ġenerali dwar l-integrazzjoni tal-Unjoni, u d-dimensjoni internazzjonali rinforzata tal-Programm , jinkisbu aħjar fil-livell tal-Unjoni, l-Unjoni tista' tadotta miżuri, f'konformità mal-prinċipju ta' sussidjarjetà, kif stabbilit fl-Artikolu 5 tat-Trattat dwar l-Unjoni Ewropea. F'konformità mal-prinċipju ta' proporzjonalità, kif stabbilit f'dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkisbu dawk l-għanijiet.

(68)

Għalhekk, jenħtieġ li jitħassar ir-Regolament (UE) Nru 1288/2013 b’effett mill-1 ta’ Jannar 2021.

(69)

Sabiex tiġi żgurata l-kontinwità fl-għoti ta' appoġġ fil-qasam ta' politika rilevanti u biex tkun tista' ssir l-implimentazzjoni tal-Programm mill-bidu tal- QFP 2021-2027, jenħtieġ li dan ir-Regolament jidħol fis-seħħ b’urġenza u jenħtieġ li japplika, b'effett retroattiv, mill-1 ta' Jannar 2021,

(1)

Il-kultura, l-arti, il-patrimonju kulturali u d-diversità kulturali huma ta' valur kbir għas-soċjetà Ewropea mil-lat kulturali, edukattiv, demokratiku, ambjentali, soċjali, ekonomiku u f'dak li għandu x'jaqsam mad-drittijiet tal-bniedem, u jenħtieġ li dawn jiġu promossi u appoġġati. Id-Dikjarazzjoni ta' Ruma tal-25 ta' Marzu 2017 u l-Kunsill Ewropew tal-14 u 15 ta' Diċembru 2017 iddikjaraw li l-edukazzjoni u l-kultura huma elementari biex jinbnew soċjetajiet inklużivi u koeżivi għal kulħadd u biex tiġi appoġġata l-kompetittività Ewropea.

(2)

Skont l-Artikolu 2 tat-Trattat dwar l-Unjoni Ewropea (TUE), l-Unjoni hija bbażata fuq il-valuri tar-rispett għad-dinjità tal-bniedem, il-libertà, id-demokrazija, l-ugwaljanza, l-istat tad-dritt u r-rispett għad-drittijiet tal-bniedem, inkluż id-drittijiet tal-persuni li jagħmlu parti minn minoranza. Dawk il-valuri huma komuni għall-Istati Membri f'soċjetà li fiha jipprevalu l-pluraliżmu, in-nondiskriminazzjoni, it-tolleranza, il-ġustizzja, is-solidarjetà u l-ugwaljanza bejn in-nisa u l-irġiel. Dawk il-valuri huma riaffermati u artikolati ulterjorment fid-drittijiet, il-libertajiet u l-prinċipji mnaqqxa fil-Karta tad-Drittijiet Fundamentali tal-Unjoni Ewropea (il-"Karta"), li għandha l-istess valur legali bħat-Trattati skont l l-Artikolu 6 TUE. B'mod partikolari, il-libertà ta' espressjoni u tal-informazzjoni u l-libertà tal-arti u xjenza huma minquxa, rispettivament, fl-Artikoli 11 u 13 tal-Karta.

(3)

L-Artikolu 3 TUE jispeċifika wkoll li l-mira tal-Unjoni hija li tippromwovi l-paċi, il-valuri tagħha u l-benesseri tal-popli tagħha u li, fost affarijiet oħra, hija trid tirrispetta r-rikkezza tad-diversità kulturali u lingwistika tagħha u tiżgura l-ħarsien u l-iżvilupp tal-patrimonju kulturali tal-Ewropa.

(4)

Il-komunikazzjoni tal-Kummissjoni tat-22 ta' Mejju 2018 intitolata "Aġenda Ġdida Ewropea għall-Kultura" tistabbilixxi l-objettivi għas-setturi kulturali u kreattivi. Hija għandha l-għan li tisfrutta l-potenzjal tal-kultura u tad-diversità kulturali favur il-koeżjoni soċjali u l-benesseri tas-soċjetà billi trawwem id-dimensjoni transfruntiera tas-setturi kulturali u kreattivi u trawwem il-kapaċità tagħhom ta' tkabbir, biex tħeġġeġ il-kreattività bbażata fuq il-kultura fl-edukazzjoni u l-innovazzjoni, u favur l-impjiegi u t-tkabbir u biex issaħħaħ ir-relazzjonijiet kulturali internazzjonali. Il-Programm Ewropa Kreattiva (il-"Programm"), flimkien ma' programmi u finanzjamenti oħra tal-Unjoni, ser jappoġġja l-Aġenda Ewropea l-Ġdida għall-Kultura. Il-valur intrinsiku tal-kultura u tal-espressjoni artistika jenħtieġ li jiġi ppreservat u promoss, u l-kreazzjoni artistika jenħtieġ li tkun fil-qalba tal-Programm. Dan huwa wkoll konformi mal-Konvenzjoni tal-Unesco tal-2005 dwar il-Protezzjoni u l-Promozzjoni tad-Diversità tal-Espressjonijiet Kulturali, li daħlet fis-seħħ fit-18 ta' Marzu 2007, u li l-Unjoni u l-Istati Membri tagħha huma parti għaliha.

(5)

Sabiex titrawwem iż-żona komuni ta' diversità kulturali għall-popli tal-Ewropa, huwa importanti li tiġi promossa ċ-ċirkolazzjoni tranżnazzjonali ta' xogħlijiet, kollezzjonijiet u prodotti artistiċi u kulturali, biex b'hekk jiġu mħeġġa d-djalogu u l-iskambji kulturali, u l-mobbilità tranżnazzjonali tal-artisti u tal-professjonisti kulturali u kreattivi.

(6)

Is-salvagwardja u t-tisħiħ tal-patrimonju kulturali jiffaċilitaw il-parteċipazzjoni libera fil-ħajja kulturali, f'konformità mad-Dikjarazzjoni Universali tan-Nazzjonijiet Uniti (NU) dwar id-Drittijiet tal-Bniedem u l-Patt Internazzjonali dwar id-Drittijiet Ekonomiċi, Soċjali u Kulturali. Għaldaqstant, il-patrimonju kulturali għandu rwol importanti fil-bini ta' soċjetà paċifika u demokratika, fil-proċessi ta' żvilupp sostenibbli u fil-promozzjoni tad-diversità kulturali.

(7)

Il-promozzjoni tad-diversità kulturali Ewropea hija bbażata fuq il-libertà tal-espressjoni artistika, il-kapaċitajiet u l-kompetenzi tal-artisti u tal-operaturi kulturali, l-eżistenza ta' setturi kulturali u kreattivi ta' suċċess u reżiljenti u l-kapaċità tal-artisti u l-operaturi kulturali li joħolqu, jinnovaw u jipproduċu x-xogħlijiet tagħhom u li jqassmuhom lil udjenza Ewropea usa' u aktar diversifikata. Din b'hekk tkabbar il-potenzjal kummerċjali tas-setturi kulturali u kreattivi , iżżid l-aċċess għal l-kontenut kreattiv, ir-riċerka artistika u l-kreattività u l-promozzjoni tagħhom, u tikkontribwixxi għat-tkabbir sostenibbli u l-ħolqien ta' impjiegi. Barra minn hekk, il-promozzjoni tal-kreattività u ta' għarfien ġdid tikkontribwixxi biex tingħata spinta lill-kompetittività u lill-innovazzjoni fil-ktajjen tal-valur industrijali. Id-diversità kulturali u lingwistika rikka tal-Unjoni hija assi ewlieni għall-proġett Ewropew. Fl-istess ħin, is-suq kulturali u kreattiv Ewropew huwa kkaratterizzat minn speċifiċitajiet ġeografiċi, speċifiċitajiet lingwistiċi, jew mit-tnejn, li jistgħu jikkawżaw frammentazzjoni tas-suq. Għalhekk jenħtieġ li jkun hemm sforzi kontinwi biex jiġi żgurat li s-setturi kulturali u kreattivi jibbenefikaw b'mod sħiħ mis-suq uniku tal-Unjoni u, b'mod partikolari, mis-Suq Uniku Diġitali.

(8)

It-tranżizzjoni diġitali tirrappreżenta bidla fundamentali għas-setturi kulturali u kreattivi. Din it-tranżizzjoni sawret mill-ġdid id-drawwiet, ir-relazzjonijiet, u l-mudelli ta' produzzjoni u konsum. Dan joħloq għadd ta' sfidi. Fl-istess ħin, it-tranżizzjoni diġitali toffri opportunitajiet ġodda għas-setturi kulturali u kreattivi f'termini tal-ħolqien u d-distribuzzjoni ta' xogħlijiet Ewropej u l-aċċess għalihom, li huwa ta' benefiċċju għas-soċjetà Ewropea inġenerali. Il-Programm jenħtieġ li jħeġġeġ lis-setturi kulturali u kreattivi biex jieħdu vantaġġ minn dawk l-opportunitajiet.

(9)

Il-Programm jenħtieġ li jqis in-natura doppja tas-setturi kulturali u kreattivi, filwaqt li jirrikonoxxi, minn naħa waħda, il-valur intrinsiku u artistiku tal-kultura u, min-naħa l-oħra, il-valur ekonomiku ta' dawk is-setturi, inkluż il-kontribut usa' ta' dawk is-setturi għat-tkabbir, il-kompetittività, il-kreattività u l-innovazzjoni. Il-Programm jenħtieġ li jqis ukoll l-impatt pożittiv tal-kultura fuq id-djalogu interkulturali, il-koeżjoni soċjali u d-disseminazzjoni tal-għarfien. Dan jirrikjedi setturi kulturali u kreattivi Ewropej b'saħħithom, b'mod partikolari industrija awdjoviżiva Ewropea vibranti, minħabba l-kapaċità tagħha li tilħaq udjenzi differenti u l-importanza ekonomika tagħha, inkluż l-importanza ekonomika tagħha għal setturi kreattivi oħra. Madankollu, il-kompetizzjoni fi ħdan is-swieq awdjoviżivi globali ġiet intensifikata ulterjorment b'riżultat tat-tranżizzjoni diġitali li qed tkompli tikber, pereżempju bidliet fil-produzzjoni u l-konsum tal-media, u l-pożizzjoni dejjem akbar tal-pjattaformi globali fid-distribuzzjoni tal-kontenut. Għaldaqstant, jenħtieġ li jingħata appoġġ akbar lill-industrija Ewropea.

(10)

Kif muri mill-azzjoni tal-Unjoni għall-Kapitali Ewropej tal-Kultura, stabbilita bid-Deċiżjoni Nru 445/2014/UE tal-Parlament Ewropew u tal-Kunsill (4) (il-"Kapitali Ewropea tal-Kultura") is-setturi kulturali u kreattivi għandhom rwol importanti fit-tisħiħ u r-rivitalizzazzjoni tat-territorji tal-Unjoni. B'dan il-mod, is-setturi kulturali u kreattivi huma muturi ewlenin biex jiġi promoss it-turiżmu ta' kwalità u l-iżvilupp reġjonali, lokali u urban madwar l-Unjoni.

(11)

Sabiex ikun effettiv, jenħtieġ li l-Programm iqis in-natura speċifika u l-isfidi speċifiċi tas-setturi kulturali u kreattivi differenti, il-gruppi fil-mira differenti tagħhom u l-ħtiġijiet partikolari tagħhom permezz ta' approċċi mfassla apposta fi ħdan fergħa ddedikata għas-settur awdjoviżiv (il-"Fergħa MEDIA"), fergħa ddedikata għas-setturi kulturali u kreattivi l-oħra (il-"Fergħa Kulturali") u fergħa transettorjali (il-"Fergħa Transettorjali").

(12)

Il-Programm jenħtieġ li jappoġġja azzjonijiet u attivitajiet b'valur miżjud Ewropew, li jikkomplementaw programmi u politiki reġjonali, nazzjonali, internazzjonali u programmi u politiki oħra tal-Unjoni u jagħmel impatt pożittiv fuq iċ-ċittadini Ewropej, u jenħtieġ li jappoġġja l-iżvilupp u l-promozzjoni ta' kooperazzjoni u skambji tranżnazzjonali fi ħdan is-setturi kulturali u kreattivi. Permezz tali azzjonijiet u attivitajiet, il-Programm jikkontribwixxi għat-tisħiħ tal-identità u l-valuri Ewropej filwaqt li jippromwovi d-diversità kulturali u lingwistika.

(13)

Il-mużika, f'kull forma u espressjoni tagħha, u b'mod partikolari l-mużika kontemporanja u live, hija komponent importanti tax-xena kulturali, artistika u ekonomika tal-Unjoni u l-patrimonju tagħha. Hija element ta' koeżjoni soċjali u sservi bħala strument ewlieni biex jissaħħaħ l-iżvilupp ekonomiku u kulturali. Il-fergħa Kultura jenħtieġ għalhekk li tagħti attenzjoni lis-settur tal-mużika.

(14)

Il-fergħa Kultura jenħtieġ li tippromwovi n-networking ta' komunitajiet kreattivi u trawwem kollaborazzjoni transfruntiera u multidixxiplinari bl-użu ta' settijiet ta' ħiliet differenti, bħal settijiet ta' ħiliet artistiċi, kreattivi, diġitali u teknoloġiċi.

(15)

Il-fergħa transettorjali għandha l-għan kemm li tisfrutta l-potenzjal ta' kollaborazzjoni bejn setturi kulturali u kreattivi differenti u li tindirizza l-isfidi komuni li jiffaċċjaw. Approċċ trażversali konġunt iwassal għal benefiċċji f'termini ta' trasferiment tal-għarfien u ta' effiċjenza amministrattiva. F'dak il-kuntest, id-desks tal-Programm jikkontribwixxu għall-kisba tal-objettivi tal-Programm u għall-implimentazzjoni tiegħu.

(16)

Hemm bżonn ta' intervent mill-Unjoni fis-settur awdjoviżiv biex jakkumpanja l-politiki tal-Unjoni dwar is-Suq Uniku Diġitali. Dan jikkonċerna, b'mod partikolari, il-modernizzazzjoni tal-qafas tad-dritt tal-awtur permezz tad-Direttivi (UE) 2019/789 (5) u (UE) 2019/790 (6) tal-Parlament Ewropew u tal-Kunsill, u d-Direttiva 2010/13/UE tal-Parlament Ewropew u tal-Kunsill (7), kif emendata bid-Direttiva (UE) 2018/1808 tal-Parlament Ewropew u tal-Kunsill (8). Id-Direttivi (UE) 2019/789 u (UE) 2019/790 għandhom l-għan li jsaħħu l-kapaċità tal- tal-operaturi awdjoviżivi Ewropej biex joħolqu, jiffinanzjaw, jipproduċu u jxerrdu xogħlijiet li jintwerew b'mod prominenti fuq media differenti, pereżempju it-TV, iċ-ċinema jew il-Video On Demand li tkun disponibbli u attraenti għat-telespettaturi f'suq aktar miftuħ u kompetittiv kemm fl-Ewropa kif ukoll lil hinn minnha. Dawk id-Direttivi għandhom ukoll l-għan li jiksbu suq li jiffunzjona tajjeb għall-kreaturi u d-detenturi tad-drittijiet, speċjalment għall-pubblikazzjonijiet tal-istampa u l-pjattaformi online, u li jiżguraw remunerazzjoni ġusta għall-awturi u l-artisti, li huma dimensjonijiet li jenħtieġ li jitqiesu fil-Programm kollu kemm hu. Barra minn hekk, jenħtieġ li jiżdied l-appoġġ sabiex jiġu indirizzati l-iżviluppi reċenti li seħħew fis-suq, b'mod partikolari l-pożizzjoni aktar b'saħħitha tal-pjattaformi globali ta' distribuzzjoni meta mqabbla ma' xandara nazzjonali li tradizzjonalment jinvestu fil-produzzjoni ta' xogħlijiet Ewropej. Hekk kif il-kundizzjonijiet tas-suq u l-operaturi awdjoviżwali jkomplu jevolvu, jenħtieġ li jiġu pprovduti kriterji speċifiċi biex jiġi definit x'jikkostitwixxi kumpannija tal-produzzjoni indipendenti fil-kuntest tal-implimentazzjoni tal-Programm.

(17)

Jenħtieġ li l-Programm jippermetti l-aktar parteċipazzjoni wiesgħa possibbli fih min-naħa tal-organizzazzjonijiet fis-setturi kulturali u kreattivi u li dawk l-organizzazzjonijiet ikollhom aċċess għall-Programm bl-aktar mod wiesa' possibbli, irrispettivament mill-oriġini ġeografika tagħhom. Il-Programm jenħtieġ li jappoġġja dawk l-organizzazzjonijiet u lill-aqwa talent, irrispettivament minn fejn ikunu jinsabu, biex joperaw bejn il-fruntieri u internazzjonalment. Il-fergħa MEDIA jenħtieġ li tqis id-differenzi bejn il-pajjiżi fir-rigward tal-produzzjoni u d-distribuzzjoni tal-kontenut awdjoviżiv u l-aċċess għall-kontenut awdjoviżiv u x-xejriet relatati mal-konsum tal-kontenut awdjoviżiv, u, b'mod partikolari, l-ispeċifiċitajiet lingwistiċi u ġeografiċi tagħhom, biex b'hekk tipprovdi kundizzjonijiet ekwivalenti ta' kompetizzjoni u twessa' l-parteċipazzjoni minn Stati Membri b'kapaċitajiet awdjoviżivi differenti u żżid il-kollaborazzjoni bejniethom filwaqt li tappoġġa t-talent Ewropew, irrispettivament minn fejn ikun jinsab, biex jopera bejn il-fruntieri u internazzjonalment. Jenħtieġ li jitqiesu wkoll l-ispeċifiċitajiet tar-reġjuni ultraperiferiċi msemmija fl-Artikolu 349 tat-Trattat dwar il-Funzjonament tal-Unjoni Ewropea (TFUE).

(18)

L-azzjonijiet speċjali taħt il-Programm bħall-azzjoni tal-Unjoni għaċ-Ċertifikat tal-Patrimonju Ewropew stabbilita bid-Deċiżjoni Nru 1194/2011/UE tal-Parlament Ewropew u tal-Kunsill (9) (iċ-"Ċertifikat tal-Patrimonju Ewropew"), il-Jiem tal-Patrimonju Ewropew, il-premjijiet Ewropej fl-oqsma tal-mużika kontemporanja, il-pop u r-rock, il-letteratura, il-patrimonju u l-arkitettura u l-Kapitali Ewropej tal-Kultura ġibdu l-attenzjoni ta' miljuni ta' ċittadini Ewropej, urew il-benefiċċji soċjali u ekonomiċi tal-politiki kulturali Ewropea u, għaldaqstant, jenħtieġ li jibqgħu jsiru u, kull meta jkun possibbli, għandhom jitwessgħu. Jenħtieġ li l-fergħa Kultura tappoġġa l-attivitajiet ta' networking tas-siti taċ-Ċertifikat tal-Patrimonju Ewropew. Jenħtieġ li tiġi kkunsidrata wkoll il-possibbiltà li l-premjijiet Ewropej jiġu estiżi għal oqsma u setturi ġodda, b'mod partikolari t-teatru.

(19)

Il-kultura hija essenzjali għat-tisħiħ ta' komunitajiet inklużivi u koeżivi. Fil-kuntest tal-kwistjonijiet dwar il-migrazzjoni u l-isfidi b'rabta mal-integrazzjoni, il-kultura għandha rwol fundamentali biex tipprovdi opportunitajiet għal djalogu interkulturali u biex jiġu integrati l-migranti u r-refuġjati billi tgħinhom iħossuhom parti mis-soċjetajiet ospitanti, u biex jiġu żviluppati relazzjonijiet tajba bejn il-migranti u komunitajiet ġodda.

(20)

Sabiex jikkontribwixxi għal soċjetà inklużiva, jenħtieġ li l-Programm jippromwovi u jżid il-parteċipazzjoni kulturali fl-Unjoni kollha, b'mod partikolari fir-rigward ta' persuni b'diżabilità u persuni minn sfondi żvantaġġati.

(21)

F'konformità mad-Dikjarazzjoni ta' Davos tat-22 ta' Jannar 2018 bit-titlu "Towards a high-quality Baukultur for Europe" ("Lejn Baukultur ta' kwalità għolja għall-Ewropa"), jenħtieġ li jittieħdu passi biex jiġi promoss approċċ integrat ġdid għat-tiswir ta' ambjent mibni ta' kwalità għolja li jkun ankrat fil-kultura, li jsaħħaħ il-koeżjoni soċjali, li jiggarantixxi ambjent sostenibbli u li jikkontribwixxi għas-saħħa u l-benesseri tal-popolazzjoni kollha. Jenħtieġ li dak l-approċċ ipoġġi enfasi mhux biss fuq iż-żoni urbani, iżda anki fuq l-interkonnettività ta' żoni periferiċi u rurali. Il-kunċett ta' Baukultur jinkorpora l-fatturi kollha li jħallu impatt dirett fuq il-kwalità tal-ħajja taċ-ċittadini u tal-komunitajiet, u għalhekk irawwem l-inklużività, il-koeżjoni u s-sostenibbiltà b'mod konkret ħafna.

(22)

Il-libertà tal-espressjoni u l-libertà artistika huma fil-qalba ta' setturi kulturali u kreattivi vibranti. B'mod partikolari, is-settur tal-media tal-aħbarijiet jeħtieġ ambjent tal-media liberu, varjat u pluralistiku. Flimkien mad-Direttiva 2010/13/UE il-Programm jenħtieġ għalhekk li jippromwovi ambjent tal-media liberu, diversifikat u pluralistiku, li jħeġġeġ l-iskambji u l-attivitajiet trażversali li jappoġġjaw is-settur tal-media tal-aħbarijiet. Jenħtieġ li l-Programm jipprovdi appoġġ għall-professjonisti ġodda tal-media u jtejjeb l-iżvilupp tal-ħsieb kritiku fost iċ-ċittadini permezz tal-promozzjoni tal-litteriżmu medjatiku.

(23)

Jenħtieġ ukoll li l-Programm jistimula l-interess u jtejjeb l-aċċess għax-xogħlijiet awdjoviżivi Ewropej, b'mod partikolari permezz ta' miżuri għall-ilħuq ta' udjenzi ġodda, inkluż il-litteriżmu ċinematografiku.

(24)

Il-mobbilità tal-artisti u tal-ħaddiema kulturali lil hinn mill-fruntieri taħt il-fergħa Kultura tista' tikkontribwixxi għal setturi kulturali u kreattivi ġewwa l-Unjoni li jkunu konnessi aħjar, aktar b'saħħithom u aktar sostenibbli għax dan huwa mod biex jiġu aċċellerati l-iżvilupp tal-ħiliet u l-kurva tat-tagħlim fi ħdan is-setturi, biex titjieb is-sensibilizzazzjoni interkulturali u biex jitrawwmu l-kokreazzjoni , il-koproduzzjoni, iċ-ċirkolazzjoni u d-disseminazzjoni tranżnazzjonali tax-xogħlijiet.

(25)

Minħabba l-ispeċifiċitajiet tas-setturi kulturali u kreattivi, jenħtieġ li l-proġetti ta' kooperazzjoni, b'mod partikolari proġetti fuq skala żgħira, ikunu fil-qalba tal-fergħa Kultura. Għalhekk, jenħtieġ li l-Kummissjoni tiffaċilita l-parteċipazzjoni fil-Programm billi tikseb simplifikazzjoni sostanzjali tal-proċeduri burokratiċi, l-aktar fl-istadju tal-applikazzjoni, u, għal proġetti fuq skala żgħira, billi tippermetti rati ogħla ta' kofinanzjament.

(26)

F'konformità mal-Artikoli 8 u 10 tat-TFUE, il-Programm, fl-attivitajiet kollha tiegħu, jenħtieġ li jappoġġjaw l-integrazzjoni tal-perspettiva tal-ġeneri u l-integrazzjoni ta' objettivi ta' nondiskriminazzjoni u jenħtieġ li, fejn applikabbli, jiddefinixxi kriterji xierqa ta' bilanċ bejn is-sessi. In-nisa huma involuti b'mod attiv fis-setturi kulturali u kreattivi bħala awturi, professjonisti, għalliema, artisti u membri tal-udjenza. Madankollu, huwa inqas probabbli li n-nisa jokkupaw pożizzjonijiet ta' teħid ta' deċiżjonijiet f'istituzzjonijiet kulturali, artistiċi u kreattivi. Għalhekk jenħtieġ li l-Programm jippromwovi t-talent femminili sabiex jappoġġja l-karrieri artistiċi u professjonali tan-nisa.

(27)

B'kont meħud tal-komunikazzjoni konġunta tat-8 ta' Ġunju 2016 intitolata "Lejn strateġija tal-UE għal relazzjonijiet kulturali internazzjonali", approvata bir-riżoluzzjoni tal-Parlament Ewropew tal-5 ta' Lulju 2017 dwar il-mandat għat-trilogu dwar l-abbozz ta' baġit 2018 (10), u l-konklużjonijiet tal-Kunsill tal-24 ta' Mejju 2017 dwar approċċ strateġiku tal-UE għal relazzjonijiet kulturali internazzjonali , l-istrumenti ta' finanzjament Ewropej u, b'mod partikolari, il-Programm, jenħtieġ li jagħrfu r-rilevanza tal-kultura fir-relazzjonijiet internazzjonali u r-rwol tagħha fil-promozzjoni tal-valuri Ewropej permezz ta' azzjonijiet immirati mfasslin b'tali mod li jkollhom impatt ċar mill-Unjoni fuq ix-xena globali.

(28)

F'konformità mal-komunikazzjoni tal-Kummissjoni tat-22 ta' Lulju 2014 intitolata "Lejn approċċ integrat għall-Ewropa lejn il-wirt kulturali" , il-politiki u l-istrumenti rilevanti jenħtieġ li jiżguraw il-legat tas-Sena Ewropea tal-Wirt Kulturali 2018, li integrat b'suċċess u b'mod effiċjenti l-kultura f'oqsma ta' politika oħra, b'mod partikolari permezz ta' approċċ ta' governanza parteċipattiva, li jislet il-valur fit-tul tal-wirt kulturali tal-Ewropa u tas-sostenibbiltà tiegħu, filwaqt li jiżviluppa approċċ aktar integrat għall-preżervazzjoni u l-valorizzazzjoni tiegħu u jappoġġja s-salvagwardja, ir-riġenerazzjoni, l-użu mill-ġdid adattiv u l-promozzjoni sostenibbli tal-valuri tiegħu permezz ta' attivitajiet ta' sensibilizzazzjoni u networking. Fis-settur tal-kultura, għandu jiġi kkunsidrat li jingħata appoġġ lill-artisti, il-kreaturi u l-artiġjani artistiċi b'ħila fis-snajja tradizzjonali relatati mar-restawr tal-patrimonju kulturali. Fis-settur awdjoviżiv, b'mod partikolari, ix-xogħlijiet relatati mal-patrimonju huma sors kruċjali ta' memorja u diversità kulturali u jirrappreżentaw opportunitajiet potenzjali tas-suq. F'dan il-kuntest, l-arkivji u l-libreriji awdjoviżivi jikkontribwixxu għall-preżervazzjoni u l-użu mill-ġdid ta' xogħlijiet relatati mal-patrimonju u l-iżvilupp ta' suq ġdid għal dawn ix-xogħlijiet.

(29)

F'konformità mal-komunikazzjoni tal-Kummissjoni tal-10 ta' ta' Marzu 2020 intitolata " Strateġija Industrijali Ġdida għall-Ewropa", jenħtieġ li l-Unjoni sserraħ fuq il-lati pożittivi tagħha, b'mod partikolari d-diversità, it-talenti, il-valuri u l-mod ta' għajxien tagħha u l-innovaturi u l-kreaturi tagħha.

(30)

Is-suċċess tal-Programm iserraħ fuq l-iżvilupp ta' proġetti innovattivi u effettivi li jiġġeneraw prattiki tajbin f'termini ta' kooperazzjoni Ewropea tranżnazzjonali fis-setturi kulturali u kreattivi. Fejn ikun possibbli, stejjer ta' suċċess bħal dawn jenħtieġ li jiġu promossi biex jiġi mħeġġeġ l-appoġġ ta' mudelli ta' negozju u ħiliet ġodda, filwaqt li jitrawwem l-għarfien espert tradizzjonali u s-soluzzjonijiet kreattivi u interdixxiplinari jiġu tradotti f'valur ekonomiku u soċjali.

(31)

Soġġett għal ċerti kundizzjonijiet, fil-Programm jenħtieġ li jkunu jistgħu jipparteċipaw il-Membri tal-Assoċjazzjoni Ewropea tal-Kummerċ Ħieles, il-pajjiżi fil-proċess ta’ adeżjoni mal-Unjoni, pajjiżi kandidati u kandidati potenzjali li jkunu qed jibbenefikaw minn strateġija ta' qabel l-adeżjoni, il-pajjiżi tal-Politika Ewropea tal-Viċinat u s-sħab strateġiċi tal-Unjoni.

(32)

Il-pajjiżi terzi li huma membri taż-Żona Ekonomika Ewropea jistgħu jieħdu sehem fil-programmi tal-Unjoni fil-qafas tal-kooperazzjoni stabbilit skont il-Ftehim dwar iż-Żona Ekonomika Ewropea (11), li jipprevedi l-implimentazzjoni tal-programmi abbażi ta' deċiżjoni adottata skont dak il-Ftehim. Pajjiżi terzi jistgħu wkoll jieħdu sehem abbażi ta' strumenti ġuridiċi oħrajn. F'dan ir-Regolament jenħtieġ li tiġi introdotta dispożizzjoni speċifika li tirrikjedi li pajjiżi terzi jagħtu d-drittijiet u l-aċċess neċessarji meħtieġa biex l-uffiċjal awtorizzanti responsabbli, l-Uffiċċju Ewropew ta' Kontra l-Frodi (OLAF) u l-Qorti tal-Awdituri jeżerċitaw il-kompetenzi rispettivi tagħhom b'mod komprensiv.

(33)

Jenħtieġ li l-pajjiżi terzi jimmiraw li jipparteċipaw bis-sħiħ fil-Programm . Madankollu, pajjiżi terzi li ma jissodisfawx il-kundizzjonijiet biex jipparteċipaw fil-fergħat MEDIA u Transettorjali, iżda li jipparteċipaw fil-fergħa Kultura jenħtieġ li jkunu jistgħu jistabbilixxu u jappoġġjaw desks tal-Programm biex jippromwovu l-Programm f'pajjiżhom u biex jistimulaw il-kooperazzjoni transfruntiera fis-setturi kulturali u kreattivi.

(34)

Jenħtieġ li d-derogi mill-obbligu li jissodisfaw il-kundizzjonijiet stabbiliti fid-Direttiva 2010/13/UE jkunu soġġetti għal skrutinju u jingħataw lil pajjiżi tal-Politika Ewropea tal-Viċinat f'każijiet debitament ġustifikati, b'kont meħud tas-sitwazzjoni speċifika tas-suq awdjoviżiv fil-pajjiż ikkonċernat u l-livell ta' integrazzjoni fil-qafas politiku awdjoviżiv Ewropew. Jenħtieġ li l-progress lejn il-kisba tal-objettivi stabbiliti fid-Direttiva 2010/13/UE jiġi mmonitorjat fuq bażi regolari. Barra minn hekk, il-parteċipazzjoni fl-azzjonijiet iffinanzjati mill-fergħa MEDIA jenħtieġ li tiġi stabbilita skont il-każ fil-programmi ta' ħidma rilevanti.

(35)

Jenħtieġ li l-Programm irawwem il-kooperazzjoni bejn l-Unjoni u organizzazzjonijiet internazzjonali bħall-Unesco, il-Kunsill tal-Ewropa, inkluż Eurimages u l-Osservatorju Awdjoviżiv Ewropew (l-"Osservatorju"), l-Organizzazzjoni għall-Kooperazzjoni u l-Iżvilupp Ekonomiċi (OECD) u l-Organizzazzjoni Dinjija tal-Proprjetà. Il-Programm jenħtieġ li jappoġġja wkoll l-impenn tal-Unjoni b'rabta mal-Għanijiet ta' Żvilupp Sostenibbli tan-NU, b'mod partikolari d-dimensjoni kulturali tagħhom. Fir-rigward tas-settur awdjoviżiv, il-Programm jenħtieġ li jiżgura l-kontribut tal-Unjoni għall-ħidma tal-Osservatorju.

(36)

Filwaqt li jirrifletti l-importanza tal-indirizzar tat-tibdil fil-klima f'konformità mal-impenji tal-Unjoni li timplimenta l-Ftehim ta' Pariġi adottat fl-ambitu tal-Konvenzjoni Qafas tan-Nazzjonijiet Uniti dwar it-Tibdil fil-Klima u li tissodisfa l-Għanijiet ta' Żvilupp Sostenibbli tan-NU, il-Programm huwa maħsub li jikkontribwixxi għall-integrazzjoni tal-azzjonijiet klimatiċi u għall-kisba ta' mira ġenerali ta’ 30 % tal-infiq tal-baġit tal-Unjoni li jappoġġa l-għanijiet klimatiċi. F'konformità mal-Patt Ekoloġiku Ewropew bħala pjan ta' azzjoni għal tkabbir sostenibbli, l-azzjonijiet taħt dan ir-Regolament jenħtieġ li jirrispettaw il-prinċipju "la tagħmilx ħsara sinifikanti". Matul l-implimentazzjoni tal-Programm, jenħtieġ li jiġu identifikati -azzjonijiet rilevanti u li jiġu stabbiliti mingħajr ma jitbiddel il-karattru fundamentali tal-Programm u jenħtieġ li jiġu vvalutati mill-ġdid fil-kuntest tal-evalwazzjonijiet u tal-proċessi ta' rieżami rilevanti.

(37)

Għall-finijiet ta' simplifikazzjoni u effiċjenza, jenħtieġ li l-Kummissjoni tkun tista' taqsam l-impenji baġitarji f'pagamenti annwali. F'dak il-każ, jenħtieġ li l-Kummissjoni timpenja l-pagamenti annwali matul l-implimentazzjoni tal-Programm, b'kont meħud tal-progress tal-azzjonijiet li jirċievu assistenza finanzjarja, l-istima tal-ħtiġijiet tagħhom u l-baġit disponibbli. Il-Kummissjoni jenħtieġ li tikkomunika lill-benefiċjarji tal-għotjiet skeda ta' żmien indikattiva li tkopri l-impenn tal-pagamenti annwali individwali.

(38)

Ir-regoli finanzjarji orizzontali adottati mill-Parlament Ewropew u mill-Kunsill abbażi tal-Artikolu 322 TFUE japplikaw għal dan ir-Regolament. Dawk ir-regoli huma stabbiliti fir-Regolament (UE, Euratom) 2018/1046 tal-Parlament Ewropew u tal-Kunsill (12) (ir-“ Regolament Finanzjarju”) u jiddeterminaw, b'mod partikolari, il-proċedura għall-istabbiliment u l-implimentazzjoni tal-baġit permezz ta' għotjiet, akkwist, premjijiet u implimentazzjoni indiretta, u jipprevedu kontrolli fuq ir-responsabbiltà tal-atturi finanzjarji. Ir-regoli adottati abbażi tal-Artikolu 322 TFUE jinkludu wkoll reġim ġenerali ta' kundizzjonalità għall-protezzjoni tal-baġit tal-Unjoni.

(39)

Il-“LUX - il-Premju Ċinematografiku Ewropew tal-Pubbliku mogħti mill-Parlament Ewropew u l-Akkademja Ewropea taċ-Ċinema” stabbilixxa lilu nnifsu bħala premju Ewropew distint, li jippromwovi u jxerred films Ewropej li jirriflettu l-identità u l-valuri Ewropej lil hinn mill-fruntieri nazzjonali, u jibni fuq kollaborazzjonijiet ma' komunità ta' kreaturi ċinematografiċi rinomati u organizzazzjonijiet u networks ċinematografiċi Ewropej.

(40)

Sa mill-ħolqien tagħha, l-Orkestra taż-Żgħażagħ tal-Unjoni Ewropea żviluppat għarfien espert uniku fil-promozzjoni tal-aċċess għall-mużika, kif ukoll fid-djalogu interkulturali, ir-rispett reċiproku u l-intendiment permezz tal-kultura, filwaqt li ffavorixxiet ukoll l-iżvilupp tal-karriera internazzjonali u t-taħriġ tal-mużiċisti żgħażagħ. L-Orkestra taż-Żgħażagħ tal-Unjoni Ewropea hija partikolari minħabba li hija orkestra Ewropea maħluqa b'riżoluzzjoni tal-Parlament Ewropew li tmur lil hinn mill-konfini kulturali u hija magħmula minn mużiċisti żgħażagħ magħżula mill-Ewropa kollha f'konformità ma' kriterji artistiċi eżiġenti permezz ta' proċess ta' awdizzjoni annwali trasparenti li jsir fl-Istati Membri kollha. Dan il-kontribut speċjali għad-diversità u l-identità kulturali tal-Ewropa jenħtieġ li jiġi rikonoxxut, pereżempju, billi jiġu previsti azzjonijiet li l-Orkestra taż-Żgħażagħ tal-Unjoni Ewropea u entitajiet kulturali Ewropej simili jistgħu japplikaw biex jipparteċipaw fihom. Jenħtieġ li tiġi prevista l-possibbiltà ta' finanzjament pluriennali għal tali entitajiet sabiex tiġi żgurata l-istabbiltà tal-funzjonament tagħhom.

(41)

Organizzazzjonijiet fis-setturi kulturali u kreattivi b'kopertura ġeografika Ewropea wiesgħa li l-attivitajiet tagħhom jinvolvu l-forniment ta' servizzi kulturali direttament liċ-ċittadini tal-Unjoni u li għalhekk għandhom il-potenzjal li jkollhom impatt dirett fuq l-identità Ewropea jenħtieġ li jkunu eliġibbli għall-appoġġ mill-Unjoni.

(42)

Sabiex tiġi żgurata l-allokazzjoni effiċjenti tal-fondi mill-baġit ġenerali tal-Unjoni, jeħtieġ li l-azzjonijiet u l-attivitajiet kollha mwettqa taħt il-Programm jipprovdu valur aġġunt Ewropew. Jeħtieġ ukoll li jiġi żgurat li huma jikkomplementaw l-attivitajiet tal-Istati Membri. Jenħtieġ li jiġu mfittxija l-konsistenza, il-komplementarjetà u s-sinerġiji mal-programmi ta' finanzjament li jappoġġjaw oqsma ta' politika b'rabtiet mill-qrib ma' xulxin, filwaqt li jiġi żgurat li l-benefiċjarji potenzjali jkunu konxji tal-opportunitajiet ta' finanzjament differenti, u mal-politiki orizzontali bħall-politika tal-kompetizzjoni tal-Unjoni.

(43)

L-appoġġ finanzjarju jenħtieġ li jintuża biex in-nuqqasijiet tas-suq jew sitwazzjonijiet ta' investiment mhux ottimali jiġu indirizzati b'mod proporzjonat, u l-azzjonijiet jenħtieġ li ma jiddupplikawx jew jeskludu l-finanzjament privat jew ifixklu l-kompetizzjoni fis-suq intern.

(44)

Huwa importanti li l-Programm jindirizza l-isfidi strutturali tas-setturi kulturali u kreattivi tal-Ewropa li ġew aggravati mill-pandemija tal-COVID-19. Il-Programm jinkludi r-rwol fundamentali tal-kultura u l-media Ewropej għall-benesseri taċ-ċittadini u biex dawn ikunu jistgħu jieħdu deċiżjonijiet infurmati. Il-Programm, flimkien ma' programmi ta' finanzjament rilevanti oħra tal-Unjoni u Next Generation EU, jenħtieġ li jappoġġjaw l-irkupru fuq terminu qasir tas-setturi kulturali u kreattivi, isaħħu r-reżiljenza u l-kompetittività fit-tul tagħhom biex kriżijiet potenzjali ewlenin fil-futur jiġu indirizzati bl-aħjar mod u biex jakkumpanjaw it-tranżizzjoni diġitali u ekoloġika tagħhom.

(45)

L-objettivi ta' politika tal-Programm huma indirizzati wkoll permezz ta' strumenti finanzjarji u garanziji baġitarji taħt it-twieqi ta' politika tal-Programm InvestEU 2021-2027 stabbiliti permezz tar-Regolament (UE) 2021/523 tal-Parlament Ewropew u tal-Kunsill (13), li, fost l-oħrajn, ikomplu jiffaċilitaw l-aċċess għall-finanzjament għall-intrapriżi żgħar u medji u għall-organizzazzjonijiet fis-setturi kulturali u kreattivi.

(46)

L-impatt, il-kwalità u l-effiċjenza fl-implimentazzjoni tal-proġetti skont il-Programm jenħtieġ li jikkostitwixxu l-kriterji ewlenin ta' evalwazzjoni għall-għażla tal-proġetti kkonċernati. B'kont meħud tal-għarfien espert tekniku meħtieġ għall-valutazzjoni tal-proposti taħt azzjonijiet speċifiċi tal-Programm, membri tal-kumitati li jridu jevalwaw tali proposti ("kumitati ta' evalwazzjoni") jistgħu jkunu esperti esterni. Meta jintgħażlu l-esperti esterni, jenħtieġ li jiġu meqjusa sew l-esperjenzi professjonali tagħhom u l-bilanċ bejn il-ġeneri tal-kumitat inkwistjoni.

(47)

Il-Programm jenħtieġ li jkun jinkludi sistema realistika u maniġġabbli ta' indikaturi kwalitattivi u kwantitattivi tal-prestazzjoni li takkumpanja l-azzjonijiet tiegħu u li timmonitorja l-prestazzjoni tiegħu fuq bażi kontinwa. Tali monitoraġġ u l-azzjonijiet ta' informazzjoni u ta' komunikazzjoni relatati mal-Programm u mal-azzjonijiet tiegħu, jenħtieġ li jibnu fuq it-tliet fergħat tal-Programm.

(48)

Meta wieħed iqis l-importanza u l-kumplessità tal-ġbir u l-analiżi tad-data u tal-kejl tal-impatt tal-politiki kulturali, jenħtieġ li l-Kummissjoni tgħin fil-ġbir ta' evidenza u data statistika dwar ix-xejriet u l-iżviluppi tas-setturi kulturali u kreattivi billi tagħmel użu mill-għarfien espert tagħha u minn dak ta' istituzzjonijiet tar-riċerka rilevanti oħra u jenħtieġ li tirrapporta regolarment lill-Parlament Ewropew u lill-Kunsill u dwar id-data miġbura.

(49)

Jenħtieġ li l-Programm jiġi stabbilit għal perijodu ta' seba' snin biex it-tul tiegħu jiġi allinjat ma' dak tal-qafas finanzjarju pluriennali għas-snin 2021-2027 stabbilit fir-Regolament tal-Kunsill (UE, Euratom) 2020/2093 (14) (il- QFP“2021-2027)”.

(50)

Dan ir-Regolament jistabbilixxi pakkett finanzjarju għall-Programm li għandu jikkostitwixxi l-ammont ta' referenza primarja fis-sens tal-punt 18 tal-Ftehim Interistituzzjonali tas-16 ta' Diċembru 2020 bejn il-Parlament Ewropew, il-Kunsill tal-Unjoni Ewropea u l-Kummissjoni Ewropea dwar dixxiplina baġitarja, dwar kooperazzjoni f'materji ta' baġit u dwar ġestjoni finanzjarja tajba, kif ukoll dwar riżorsi proprji ġodda, inkluż pjan direzzjonali lejn l-introduzzjoni ta' riżorsi proprji ġodda (15), għall-Parlament Ewropew u l-Kunsill matul il-proċedura baġitarja annwali.

(51)

Ir-Regolament Finanzjarju japplika għal dan il-Programm. Ir-Regolament Finanzjarju jistabbilixxi regoli dwar l-implimentazzjoni tal-baġit tal-Unjoni, inkluż ir-regoli dwar l-għotjiet, fosthom dawk mogħtija lil partijiet terzi, premjijiet, akkwist pubbliku, ġestjoni indiretta, strumenti finanzjarji, garanziji baġitarji, .assistenza finanzjarja u r-rimborż ta' esperti esterni.

(52)

Il-forom ta' finanzjament u l-metodi ta' implimentazzjoni skont dan ir-Regolament jenħtieġ li jintgħażlu abbażi tal-kapaċità tagħhom li jiksbu l-objettivi speċifiċi tal-azzjonijiet u li jħallu riżultati, filwaqt li jitqiesu, b'mod partikolari, il-kostijiet tal-kontrolli, il-piż amministrattiv u l-ħtieġa ta' simplifikazzjoni amministrattiva, b'mod partikolari fil-proċess tal-applikazzjoni, għall-benefiċċju tal-partijiet kollha involuti, u r-riskju mistenni ta' nuqqas ta' konformità. Meta ssir dik l-għażla, jenħtieġ li jitqies l-użu ta' somom f'daqqa, kostijiet unitarji u rati fissi, kif ukoll finanzjament mhux marbut ma' kostijiet kif imsemmi fl-Artikolu 125(1) tar-Regolament Finanzjarju.

(53)

F'konformità mar-Regolament Finanzjarju, ir-Regolament (UE, Euratom) Nru 883/2013 tal-Parlament Ewropew u tal-Kunsill (16) u r-Regolamenti tal-Kunsill (KE, Euratom) Nru 2988/95 (17), (Euratom, KE) Nru 2185/96 (18) u (UE) 2017/1939 (19), l-interessi finanzjarji tal-Unjoni jridu jiġu protetti permezz ta' miżuri proporzjonati, inkluż miżuri relatati mal-prevenzjoni, is-sejbien, il-korrezzjoni u l-investigazzjoni ta' irregolaritajiet, inkluż frodi, mal-irkupru ta' fondi mitlufa, imħallsa bi żball jew użati b'mod mhux korrett, u, fejn xieraq, mal-impożizzjoni ta' penali amministrattivi. B'mod partikolari, f'konformità mar-Regolamenti (Euratom, KE) Nru 2185/96 u (UE, Euratom) Nru 883/2013, l- OLAF għandu s-setgħa li jwettaq investigazzjonijiet amministrattivi, inkluż kontrolli u spezzjonijiet fuq il-post, bil-għan li jiġi stabbilit jekk kienx hemm frodi, korruzzjoni jew kwalunkwe attività illegali oħra li taffettwa l-interessi finanzjarji tal-Unjoni. L-Uffiċċju tal-Prosekutur Pubbliku Ewropew (UPPE) għandu s-setgħa, skont ir-Regolament (UE) 2017/1939, li jinvestiga u jressaq għall-prosekuzzjoni reati kriminali li jaffettwaw l-interessi finanzjarji tal-Unjoni kif previst fid-Direttiva (UE) 2017/1371 tal-Parlament Ewropew u tal-Kunsill (20). F'konformità mar-Regolament Finanzjarju, kwalunkwe persuna jew entità li tirċievi fondi tal-Unjoni għandha tikkoopera b'mod sħiħ fil-protezzjoni tal-interessi finanzjarji tal-Unjoni, tagħti d-drittijiet u l-aċċess neċessarji lill-Kummissjoni, lill-OLAF, lill-Qorti tal-Awdituri, u fir-rigward ta' dawk l-Istati Membri li jipparteċipaw f'kooperazzjoni msaħħa skont ir-Regolament (UE) 2017/1939, lill-UPPE, u tiżgura li kwalunkwe parti terza involuta fl-implimentazzjoni tal-fondi tal-Unjoni tagħti drittijiet ekwivalenti.

(54)

Jenħtieġ li jkun possibbli li jingħataw proposti ta' kwalità għal azzjonijiet li huma eliġibbli taħt il-Programm iżda li ma jistgħux jiġu ffinanzjati minnu minħabba restrizzjonijiet baġitarji b'tikketta ta' Siġill ta' Eċċellenza, abbażi ta' sett speċifiku ta' kriterji. It-tikketta ta' Siġill ta' Eċċellenza tirrikonoxxi l-kwalità tal-proposta u tissimplifika t-tfittxija għal finanzjament alternattiv taħt il-Fond Ewropew għall-Iżvilupp Reġjonali jew il-Fond Soċjali Ewropew Plus. Għal azzjonijiet, li fir-rigward tagħhom jista' jingħata ċertifikat ta' Siġill ta' Eċċellenza, jenħtieġ li tiġi pprovduta informazzjoni addizzjonali fis-sejħiet għal proposti rilevanti.

(55)

Fid-dawl tal-Artikolu 349 TFUE, u filwaqt li titqies il-komunikazzjoni tal-Kummissjoni tal-24 ta' Ottubru 2017 intitolata "Sħubija strateġika aktar b'saħħitha u mġedda mar-reġjuni ultraperiferiċi tal-UE", il-kontribut speċifiku tar-reġjuni msemmija f'dak l-Artikolu għad-diversità kulturali tal-Unjoni, kif ukoll ir-rwol tagħhom fil-promozzjoni tal-iskambji, inkluż permezz tal-mobbilità, u l-kooperazzjoni ma' persuni u organizzazzjonijiet minn pajjiżi terzi, b'mod partikolari mill-pajjiżi ġirien tagħhom, jenħtieġ li jiġu vvalutati. Skont id-Deċiżjoni tal-Kunsill 2013/755/UE (21) u b'kont meħud tal-kontribut ta' pajjiżi u territorji extra-Ewropej għall-influwenza kulturali internazzjonali tal-Unjoni, persuni u entitajiet stabbiliti f'pajjiżi u territorji extra-Ewropej huma eliġibbli għal finanzjament soġġett għar-regoli u l-objettivi tal-Programm u għall-arranġamenti possibbli applikabbli għall-Istat Membru li miegħu jkun marbut il-pajjiż jew it-territorju extra-Ewropew rilevanti. Għalhekk, jenħtieġ li jkun possibbli li l-persuni jibbenefikaw bl-istess mod mill-vantaġġi kompetittivi li l-industriji kulturali u kreattivi jistgħu joffru, b'mod partikolari t-tkabbir ekonomiku u l-impjiegi.

(56)

Sabiex tiġi żgurata l-valutazzjoni effettiva tal-progress tal-Programm lejn il-kisba tal-objettivi tiegħu, jenħtieġ li tiġi delegata lill-Kummissjoni s-setgħa li tadotta atti skont l-Artikolu 290 TFUE fir-rigward tal-iżvilupp ta' qafas ta' monitoraġġ u evalwazzjoni u fir-rigward tar-rieżami tal-indikaturi tal-Programm. Huwa partikolarment importanti li l-Kummissjoni twettaq konsultazzjonijiet xierqa matul ix-xogħol tagħha ta' tħejjija, ukoll fil-livell ta' esperti, u li dawk il-konsultazzjonijiet jiġu mwettqa f'konformità mal-prinċipji stipulati fil-Ftehim Interistituzzjonali tat-13 ta' April 2016 dwar it-Tfassil Aħjar tal-Liġijiet (22). B'mod partikolari, biex tkun żgurata l-parteċipazzjoni ugwali waqt it-tħejjija ta' atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta' atti delegati.

(57)

F'konformità mal-Artikolu 193(2) tar-Regolament Finanzjarju, huwa possibbli li tingħata għotja għal azzjoni li tkun diġà bdiet, dment li l-applikant ikun jista' juri l-ħtieġa li l-azzjoni tinbeda qabel il-firma tal-ftehim ta' għotja. Madankollu, l-ispejjeż imġarrba qabel id-data tal-preżentazzjoni tal-applikazzjoni għal għotja mhumiex eliġibbli għall-finanzjament tal-Unjoni, ħlief f'każijiet eċċezzjonali debitament ġustifikati. F'konformità mal-Artikolu 193(4) tar-Regolament Finanzjarju, lanqas l-ispejjeż mġarrba qabel id-data tal-preżentazzjoni tal-applikazzjoni għal għotja s ma huma eliġibbli għall-finanzjament tal-Unjoni fil-każ ta' għotjiet operattivi u l-ftehim ta' għotja jrid jiġi ffirmat fi żmien erba' xhur mill-bidu tas-sena finanzjarja tal-benefiċjarju. Sabiex jiġi evitat kwalunkwe tfixkil fl-appoġġ tal-Unjoni li jista' jkun ta' preġudizzju għall-interessi tal-Unjoni, jenħtieġ li jkun possibbli li fid-deċiżjoni ta' finanzjament, għal perijodu limitat ta' żmien fil-bidu tal-QFP 2021-2027, u f'każijiet debitament ġustifikati biss, tkun prevista l-eliġibbiltà tal-attivitajiet u l-ispejjeż mill-1 ta' Jannar 2021, anki jekk dawk l-attivitajiet ikunu ġew implimentati u dawk il-kostijiet ikunu ġew imġarrba qabel ma tkun ġiet ippreżentata l-applikazzjoni għal għotja.

(58)

Skont il-paragrafi 22 u 23 tal-Ftehim Interistituzzjonali tat-13 ta' April 2016 dwar -Tfassil Aħjar tal-Liġijiet, jenħtieġ li l-Programm jiġi evalwat fuq il-bażi ta' informazzjoni miġbura f'konformità mar-rekwiżiti speċifiċi ta' monitoraġġ, filwaqt li jiġi evitat piż amministrattiv, b'mod partikolari għall-Istati Membri, u r-regolamentazzjoni żejda.-, Dawk ir-rekwiżiti, fejn xieraq, jenħtieġ li jinkludu indikaturi li jistgħu jitkejlu, bħala bażi għall-evalwazzjoni tal-effetti tal-Programm fil-prattika.

(59)

Sabiex jiġu żgurati kondizzjonijiet uniformi għall-implimentazzjoni ta' dan ir-Regolament, jenħtieġ li jingħataw setgħat ta' implimentazzjoni lill-Kummissjoni biex tadotta l-programmi ta' ħidma. Dawk is-setgħat ta' implimentazzjoni jenħtieġ li jiġu eżerċitati f'konformità mar-Regolament (UE) Nru 182/2011 tal-Parlament Ewropew u tal-Kunsill (23). B'mod partikolari, kif previst f'dan ir-Regolament, il-limiti ta' żmien jenħtieġ li jkunu proporzjonati u jenħtieġ li joffru lill-membri tal-kumitat opportunitajiet bikrija u effettivi biex jeżaminaw l-abbozz ta' att ta' implimentazzjoni u jesprimu l-fehmiet tagħhom.

(60)

Jeħtieġ ukoll li jiġi żgurat li l-Programm Ewropa Kreattiva 2014-2020 stabbilit bir-Regolament (UE) Nru 1293/2013 tal-Parlament Ewropew u tal-Kunsill (24) (il-"Programm 2014-2020") jingħalaq b'mod korrett, b'mod partikolari fir-rigward tal-kontinwazzjoni ta' arranġamenti pluriennali għall-ġestjoni tiegħu, bħall-finanzjament ta' assistenza teknika u amministrattiva. Mill-1 ta' Jannar 2021, assistenza teknika u amministrattiva jenħtieġ li tiżgura, fejn meħtieġ, il-ġestjoni tal-azzjonijiet li jkunu għadhom ma ġewx iffinalizzati bħala parti mill-Programm 2014-2020 sal-31 ta' Diċembru 2020.

(61)

Dan ir-Regolament jirrispetta d-drittijiet fundamentali u josserva l-prinċipji rikonoxxuti, b'mod partikolari fil-Karta. B'mod partikolari, dan ir-Regolament għandu l-għan li jiżgura r-rispett sħiħ tad-dritt għal ugwaljanza bejn in-nisa u l-irġiel u tad-dritt ta' nondiskriminazzjoni fuq il-bażi ta' sess, ta' oriġini razzjali jew etnika, ta' reliġjon jew twemmin, ta' diżabilità, ta' età jew ta' orjentazzjoni sesswali, kif minqux fl-Artikoli 21 u 23 tal-Karta. Dan ir-Regolament huwa konformi wkoll mal-Konvenzjoni tan-NU dwar id-Drittijiet ta' Persuni b'Diżabilità.

(62)

Minħabba li l-għanijiet ta' dan ir-Regolament ma jistgħux jinkisbu b'mod suffiċjenti mill-Istati Membri iżda jistgħu pjuttost, minħabba l-karattru tranżnazzjonali tagħhom, il-volum għoli u l-ambitu ġeografiku wiesa' tal-attivitajiet ta' mobbilità u ta' kooperazzjoni ffinanzjati, l-effetti tagħhom fuq l-aċċess għall-mobbilità għat-tagħlim u, b'mod aktar ġenerali, fuq l-integrazzjoni tal-Unjoni, u d-dimensjoni internazzjonali msaħħa tagħhom, jinkisbu aħjar fil-livell tal-Unjoni, l-Unjoni tista' tadotta miżuri, f'konformità mal-prinċipju ta’ sussidjarjetà, kif stabbilit fl-Artikolu 5 TUE. Skont il-prinċipju ta’ proporzjonalità, kif stabbilit fl-istess Artikolu, dan ir-Regolament ma jmurx lil hinn minn dak li huwa meħtieġ sabiex jinkisbu dawk l-għanijiet.

(63)

Għaldaqstant, ir-Regolament (UE) Nru 1295/2013 jenħtieġ li jitħassar b'effett mill-1 ta' Jannar 2021.

(64)

Sabiex tiġi żgurata l-kontinwità fl-għoti ta' appoġġ fil-qasam ta' politika rilevanti u biex tkun tista' ssir l-implimentazzjoni tal-Programm mill-bidu tal-QFP 2021-2027, jenħtieġ li dan ir-Regolament jidħol fis-seħħ b’urġenza u jenħtieġ li japplika, b'effett retroattiv, mill-1 ta' Jannar 2021,

(1)

Ir-Regolament (KE) Nru 294/2008 tal-Parlament Ewropew u tal-Kunsill (3) ġie emendat b'mod sostanzjali (4). Peress li għandhom isiru iżjed emendi, jenħtieġ li dak ir-Regolament jiġi riformulat fl-interess taċ-ċarezza.

(2)

L-evalwazzjonijiet perjodiċi indipendenti tal-Istitut Ewropew tal-Innovazzjoni u t-Teknoloġija (EIT) u l-esperjenza fl-applikazzjoni tar-Regolament (KE) Nru 294/2008 juru li huma meħtieġa bidliet sostanzjali biex ikomplu jtejbu l-mudell tal-EIT u l-proċessi sottostanti tiegħu. Barra minn hekk, l-evalwazzjoni interim u l-valutazzjoni tal-impatt ex ante tal-EIT identifikaw għadd ta' oqsma għal titjib, fost l-oħrajn il-mudell ta' finanzjament tal-Komunitajiet ta' Konoxxenza u Innovazzjoni (KKI), l-integrazzjoni tal-KKI fl-ekosistemi tal-innovazzjoni lokali, il-ftuħ u t-trasparenza tal-KKI u l-monitoraġġ mill-EIT. Dan ir-Regolament joffri wkoll l-opportunità li dawk l-aspetti jiġu indirizzati.

(3)

L-Istati Membri huma responsabbli primarjament għas-sostenn ta' bażi Ewropea soda, industrijali, kompetittiva u innovattiva. Madankollu, in-natura u d-daqs tal-isfida tal-innovazzjoni jeħtieġu wkoll li tittieħed azzjoni b'mod kollaborattiv fil-livell tal-Unjoni.

(4)

L-EIT huwa stabbilit biex jikkomplementa l-politiki u l-inizjattivi tal-Unjoni u nazzjonali eżistenti permezz tat-trawwim tal-integrazzjoni tat-triangolu tal-għarfien – l-edukazzjoni għolja, ir-riċerka u l-innovazzjoni – mal-Unjoni kollha.

(5)

L-EIT jenħtieġ li jikkontribwixxi għat-tisħiħ tal-kapaċità tal-innovazzjoni tal-Unjoni u tal-Istati Membri sabiex jiġu indirizzati l-isfidi l-kbar li tiffaċċja s-soċjetà, u b'hekk jikkontribwixxi għall-iżvilupp ekonomiku u l-kompetittività sostenibbli tal-Unjoni.

(6)

L-EIT, permezz tal-KKI, jenħtieġ li jkollu l-għan li jsaħħaħ l-ekosistemi tal-innovazzjoni madwar l-Unjoni b'mod miftuħ u trasparenti. Biex jilħaq dak l-objettiv, l-EIT jenħtieġ li jiffaċilita u jsaħħaħ in-networking, l-integrazzjoni u l-kooperazzjoni u jippromwovi sinerġiji bejn il-komunitajiet differenti tal-innovazzjoni fl-Ewropa kollha. L-EIT għandu wkoll l-għan li jwettaq il-prijoritajiet strateġiċi tal-Unjoni u jikkontribwixxi għat-twettiq tal-objettivi u l-politiki tal-Unjoni, inklużi dawk imsemmija fil-komunikazzjonijiet tal-Kummissjoni tal-11 ta' Diċembru 2019 dwar il-Patt Ekoloġiku Ewropew, tas-27 ta' Mejju 2020 dwar il-baġit tal-UE li jmexxi l-pjan ta' rkupru għall-Ewropa (Pjan ta' Rkupru għall-Ewropa), tad-19 ta' Frar 2020 dwar strateġija Ewropea għad-data, tal-10 ta' Marzu 2020 dwar Strateġija għall-SMEs għal Ewropa sostenibbli u diġitali u tal-10 ta' Marzu 2020 dwar Strateġija Industrijali Ġdida għall-Ewropa, u dawk relatati mal-kisba tal-awtonomija strateġika tal-Unjoni, filwaqt li tinżamm ekonomija miftuħa. Barra minn hekk, l-EIT jenħtieġ li jikkontribwixxi għall-indirizzar tal-isfidi globali, inklużi l-Għanijiet ta' Żvilupp Sostenibbli (SDGs) tan-Nazzjonijiet Uniti billi jsegwi l-prinċipji tal-Aġenda 2030 għall-Iżvilupp Sostenibbli (l-"Aġenda 2030") u l-Ftehim ta' Pariġi adottat skont il-Konvenzjoni Qafas tan-Nazzjonijiet Uniti dwar it-Tibdil fil-Klima (5) (Il-‘Ftehim ta' Pariġi’), u għall-kisba ta' tranżizzjoni lejn ekonomija b'emissjonijiet żero netti ta' gassijiet serra (GHG) sa mhux aktar tard mill-2050. It-tranżizzjoni tkun possibbli biss permezz ta' spinta fir-riċerka u l-innovazzjoni, li tissottolinja l-ħtieġa li jiġu rinfurzati kundizzjonijiet favorevoli u investimenti fit-tisħiħ tal-bażi tal-għarfien tal-Ewropa u l-kapaċità tar-riċerka u l-innovazzjoni tal-Ewropa, b'mod partikolari f'teknoloġiji u innovazzjonijiet ekoloġiċi li ma jagħmlux ħsara lill-klima.

(7)

L-EIT jenħtieġ li jtejjeb il-ftuħ tal-KKI sabiex isaħħaħ ir-rabtiet kollaborattivi u joħloq sinerġiji bejn il-komunitajiet tal-innovazzjoni differenti fl-Ewropa, u b'hekk jiffaċilita d-diversità ġeografika u ċ-ċirkolazzjoni tat-talenti.

(8)

L-oqsma prijoritarji u l-ħtiġijiet finanzjarji tal-EIT għal perjodu ta' seba' snin, li jkopru l-qafas finanzjarju pluriennali (il-QFP) rilevanti, jenħtieġ li jiġu stabbiliti f'Aġenda Strateġika tal-Innovazzjoni (l-ASI). L-ASI jenħtieġ li tkun allinjata ma' Orizzont Ewropa – il-Programm Qafas għar-Riċerka u l-Innovazzjoni (Orizzont Ewropa), stabbilit bir-Regolament (UE) 2021/695 tal-Parlament Ewropew u tal-Kunsill (6), inkluż fir-rigward tar-rappurtar, monitoraġġ, evalwazzjoni u rekwiżiti oħra stabbiliti f’dak ir-Regolament, u jenħtieġ li tqis l-ippjanar strateġiku ta' Orizzont Ewropa. L-ASI jenħtieġ li tistabbilixxi u trawwem sinerġiji ma' partijiet oħra ta' Orizzont Ewropa, ma' programmi rilevanti oħra tal-Unjoni tal-QFP u inizjattivi, politiki u strumenti rilevanti oħra tal-Unjoni, nazzjonali u reġjonali, b'mod partikolari ma' dawk li jappoġġjaw ir-riċerka u l-innovazzjoni, l-edukazzjoni u l-iżvilupp tal-ħiliet, l-industrija sostenibbli u kompetittiva, l-intraprenditorija u l-iżvilupp reġjonali. Minħabba l-importanza tal-ASI għall-politika tal-innovazzjoni tal-Unjoni u l-impatt soċjoekonomiku mistenni fuq l-Unjoni, l-ASI jenħtieġ li tiġi adottata mill-Parlament Ewropew u mill-Kunsill abbażi ta' proposta tal-Kummissjoni. Dik il-proposta tal-Kummissjoni jenħtieġ li tkun ibbażata fuq kontribuzzjoni pprovduta mill-EIT. Dik il-kontribuzzjoni jenħtieġ li tkun disponibbli għall-Parlament Ewropew u l-Kunsill.

(9)

Il-kriżi li rriżultat mit-tifqigħa tal-COVID-19 ikkawżat tfixkil enormi fis-sistemi ekonomiċi u tal-kura tas-saħħa tal-Istati Membri. Il-kollaborazzjoni tal-istituzzjonijiet, il-korpi, l-uffiċċji u l-aġenziji tal-Unjoni se jkunu meħtieġa biex jingħelbu l-impatti soċjali, ekonomiċi, ambjentali u teknoloġiċi mill-kriżi. L-EIT u l-KKI jenħtieġ li jirrispondu bi flessibbiltà għall-isfidi u l-prijoritajiet eżistenti kif ukoll għal dawk ġodda u mhux mistennija, u jenħtieġ li jkunu jistgħu jadottaw miżuri u inizjattivi biex jipprovdu appoġġ xieraq lill-ekosistemi tagħhom. B'mod partikolari, l-EIT u l-KKI jenħtieġ li jikkontribwixxu għall-isforzi ta' innovazzjoni li huma meħtieġa biex jiġi indirizzat l-impatt tal-kriżi tal-COVID-19, skont il-prijoritajiet tal-Patt Ekoloġiku Ewropew, il-Pjan ta' Rkupru għall-Ewropa, l-Istrateġija Industrijali Ġdida għall-Ewropa u l-SDGs, filwaqt li tiġi żgurata sinerġija ma' inizjattivi u sħubijiet oħra tal-Unjoni.

(10)

Skont ir-Regolament (UE) 2021/695, l-attivitajiet tal-EIT jenħtieġ li jindirizzaw sfidi strateġiċi fit-tul, b'mod partikolari f'oqsma transdixxiplinari u/jew interdixxiplinari, inkluż l-iżvilupp ta' soluzzjonijiet innovattivi mhux teknoloġiċi bħala komplement meħtieġ għal attivitajiet tal-innovazzjoni ffukati fuq it-teknoloġija. F'dan ir-rigward, l-EIT jenħtieġ li jippromwovi djalogu regolari mas-soċjetà ċivili, l-organizzazzjonijiet ta' riċerka, iċ-ċentri ta' innovazzjoni, l-intrapriżi żgħar u ta' daqs medju (l-SMEs), l-istituzzjonijiet tal-edukazzjoni għolja u r-rappreżentanti tal-industrija.

(11)

L-EIT jenħtieġ li, permezz tal-KKI, jagħti prijorità lit-trasferiment tal-attivitajiet tiegħu tal-edukazzjoni għolja, ir-riċerka u l-innovazzjoni u tal-intraprenditorija lill-kuntest tan-negozju u lill-applikazzjoni kummerċjali tagħhom u jappoġġja l-kapaċità tal-innovazzjoni u tal-intraprenditorija tal-istituzzjonijiet tal-edukazzjoni għolja u l-ħolqien u l-iżvilupp ta' negozji innovattivi, b'mod komplimentari mal-Kunsill Ewropew tal-Innovazzjoni (EIC), kif ukoll il-partijiet rilevanti l-oħra ta' Orizzont Ewropa u l-Programm InvestEU stabbilit bir-Regolament (EU) 2021/523 tal-Parlament Ewropew u tal-Kunsill (7).

(12)

L-EIT jenħtieġ li jopera permezz ta' Sħubijiet Ewropej Istituzzjonalizzati mmexxija mill-eċċellenza tal-istituzzjonijiet tal-edukazzjoni għolja, organizzazzjonijiet tar-riċerka, kumpaniji u partijiet ikkonċernati oħra, inklużi SMEs u kumpaniji pubbliċi, kif ukoll awtoritajiet lokali, intrapriżi soċjali, organizzazzjonijiet rilevanti mingħajr skop ta' qligħ u partijiet ikkonċernati oħra. Minħabba n-natura innovattiva ta' ċerti intrapriżi fir-rigward tal-prodotti jew is-servizzi li joffru, l-organizzazzjoni tagħhom jew il-metodi ta' produzzjoni li jużaw, il-promozzjoni tal-intraprenditorija soċjali u involviment aktar mill-qrib tal-SMEs u l-intrapriżi soċjali li jiżgura l-parteċipazzjoni attiva tagħhom jenħtieġ li jiġu segwiti. Dawk is-sħubijiet jenħtieġ li jimmiraw li jsiru finanzjarjament sostenibbli billi jużaw fondi minn sorsi pubbliċi u privati oħra u li jattiraw u jinvolvu l-aktar firxa possibbli ta' sħab ġodda. Huma jenħtieġ li jintgħażlu u jinħatru bħala KKI mill-Bord tat-Tmexxija, skont l-oqsma ta' prijorità u l-iskeda ta' żmien stabbiliti fl-ASI, filwaqt li jitqiesu l-prijoritajiet kif stabbiliti fl-ippjanar strateġiku ta' Orizzont Ewropa, bl-għan li jiġu indirizzati l-isfidi globali u soċjali emerġenti. Dawn jenħtieġ li jintgħażlu abbażi ta' proċess kompetittiv, miftuħ, trasparenti u bbażat fuq l-eċċellenza, skont dan ir-Regolament u l-kriterji għall-għażla tas-Sħubijiet Ewropej stabbiliti fir-Regolament (UE) 2021/695. L-ewwel KKI ta' dan it-tip, li għandha titnieda mill-aktar fis possibbli fl-2022 jew fl-2023, jenħtieġ li tkun relatata mas-Setturi u l-Industriji Kulturali u Kreattivi, u t-tieni KKI ta' dan it-tip, li għandha titnieda fl-2026, jenħtieġ li tkun relatata mas-Setturi u l-Ekosistemi tal-Ilma, tal-Baħar u Marittimi.

(13)

Filwaqt li titqies l-ispeċifiċità tal-KKI, hu meħtieġ li jiġu previsti kundizzjonijiet minimi speċjali biex tiġi ffurmata KKI, b'deroga mir-regoli għall-parteċipazzjoni u d-disseminazzjoni ta' Orizzont Ewropa. Bl-istess mod, jaf ikun hemm bżonn regoli speċifiċi dwar is-sjieda, id-drittijiet tal-aċċess, l-isfruttament u d-disseminazzjoni għall-attivitajiet ta' valur miżjud tal-KKI, fejn ikun xieraq.

(14)

Il-Bord tat-Tmexxija jenħtieġ li jmexxi u jimmonitorja l-attivitajiet tal-EIT u jkun responsabbli għall-għażla, id-deżinjazzjoni, il-finanzjament, il-monitoraġġ u l-evalwazzjoni tal-attivitajiet tal-KKI skont ir-Regolament (UE) 2021/695 u l-ASI. Meta taħtar il-membri tal-Bord tat-Tmexxija, jenħtieġ li l-Kummissjoni tiżgura rappreżentanza bbilanċjata ta' dawk b'esperjenza fl-oqsma tal-edukazzjoni għolja, ir-riċerka, l-innovazzjoni jew in-negozju, kif ukoll il-bilanċ bejn il-ġeneri u l-kopertura ġeografika, bl-eċċellenza bħala prinċipju gwida.

(15)

L-EIT jenħtieġ li jorganizza monitoraġġ kontinwu u evalwazzjonijiet perjodiċi indipendenti esterni tal-output, tar-riżultati u tal-impatt ta' kull KKI, inkluż il-progress tagħhom lejn is-sostenibbiltà finanzjarja, il-kosteffiċjenza u l-ftuħ għal membri ġodda. Dawk l-evalwazzjonijiet jenħtieġ li, jinkludu rieżamijiet interim li jkopru l-ewwel tliet snin tal-ftehim ta' sħubija u t-tliet snin wara kwalunkwe estensjoni, valutazzjonijiet komprensivi mwettqa qabel tmiem is-seba' sena tal-ftehim ta' sħubija, u rieżamijiet finali mwettqa qabel tmiem il-ftehim ta' sħubija. Il-Bord tat-Tmexxija jenħtieġ li jieħu miżuri korrettivi fir-rigward tal-KKI meta jkun xieraq.

(16)

L-EIT jenħtieġ li jinforma regolarment lill-Grupp tar-Rappreżentanti tal-Istati Membri (MSRG) dwar il-prestazzjoni, il-kisbiet u l-attivitajiet tal-EIT u tal-KKI, ir-riżultati tal-monitoraġġ u l-evalwazzjoni tagħhom, u l-indikaturi tal-prestazzjoni u l-miżuri korrettivi tagħhom. Jenħtieġ li l-MSRG jagħti pariri lill-Bord tat-Tmexxija u lid-Direttur dwar kwistjonijiet strateġikament importanti u jenħtieġ li jagħti pariri u jikkondividi l-esperjenza mal-EIT u mal-KKI. L-EIT jenħtieġ li jorganizza l-laqgħat tal-MSRG.

(17)

Biex jikkontribwixxu għall-kompetittività u jirrinforzaw l-attraenza internazzjonali tal-ekonomija Ewropea u l-kapaċità tal-innovazzjoni u tal-intraprenditorija tagħha, l-EIT u l-KKI jenħtieġ li jkunu kapaċi jattiraw organizzazzjonijiet sħab, riċerkaturi u studenti minn madwar l-Unjoni kollha, inkluż mir-reġjuni ultraperiferiċi tal-Unjoni, u lil hinn, bħal pereżempju billi jħeġġu l-mobbiltà tagħhom.

(18)

Ir-relazzjonijiet bejn l-EIT u l-KKI jenħtieġ li jkunu bbażati fuq ftehimiet ta' sħubija u ftehimiet ta' għotja, li jistabbilixxu d-drittijiet u l-obbligi tal-KKI u kontribuzzjoni finanzjarja bbażata fuq il-prestazzjoni tal-EIT lill-KKI. Sabiex jiġi limitat il-piż amministrattiv fuq il-KKI u jiġu żgurati aktar riżorsi u attivitajiet ta' ppjanar fit-tul, l-EIT jenħtieġ li jikkonkludi ftehimiet ta' għotja pluriennali sa tliet snin mal-KKI, jew, fejn jitqies li jkun aktar xieraq, ftehimiet ta' għotja annwali. B'deroga mir-Regolament (UE, Euratom) 2018/1046 tal-Parlament Ewropew u tal-Kunsill (8) (ir-"Regolament Finanzjarju"), l-EIT jenħtieġ li jkun jista' jistabbilixxi tali ftehim ta' sħubija għal perjodu inizjali ta' seba' snin u, soġġett għal prestazzjoni pożittiva u riżultati pożittivi tar-rieżami interim u tal-valutazzjoni komprensiva tal-KKI, jestendih għal perjodu ieħor ta' mhux aktar minn seba' snin. Wara l-iskadenza tal-ftehim ta' sħubija, l-EIT u l-KKI jistgħu jikkonkludu memorandum ta' kooperazzjoni bil-għan li tinżamm kooperazzjoni attiva.

(19)

L-edukazzjoni għolja teħtieġ is-sostenn bħala komponent integrali, iżda ħafna drabi nieqes, tat-triangolu tal-għarfien. L-istituzzjonijiet tal-edukazzjoni għolja parteċipanti u l-fornituri tal-edukazzjoni u t-taħriġ vokazzjonali jenħtieġ li jagħtu lawrji u diplomi permezz tal-KKI skont ir-regoli nazzjonali u l-proċeduri ta' akkreditazzjoni. Il-ftehimiet ta' sħubija, il-ftehimiet ta' għotja u l-memoranda ta' kooperazzjoni bejn l-EIT u l-KKI jenħtieġ li jipprevedu li dawk il-lawrji u d-diplomi jiġu indikati wkoll bħala lawrji u diplomi tal-EIT. Barra minn hekk, l-EIT jenħtieġ li jsaħħaħ il-promozzjoni tal-lawrji u d-diplomi bit-tikketta tal-EIT sabiex iżid ir-rikonoxximent tagħhom barra mill-Komunità tal-EIT u jestendi l-użu tagħhom għal programmi ta' tagħlim tul il-ħajja, taħriġ vokazzjonali, taħriġ tal-ħiliet, taħriġ mill-ġdid u programmi ta' titjib tal-ħiliet. Permezz tal-attivitajiet u l-ħidma tiegħu, l-EIT jenħtieġ li, skont id-Direttiva 2005/36/KE tal-Parlament Ewropew u tal-Kunsill (9), jgħin jippromwovi l-mobbiltà għall-istudenti, ir-riċerkaturi u l-persunal, kif ukoll jipprovdi opportunitajiet għal tagħlim tul il-ħajja, mentoring u coaching.

(20)

Jenħtieġ li jiġu adottati dispożizzjonijiet adattati li jiggarantixxu r-responsabbiltà, il-ftuħ u t-trasparenza tal-EIT. Jenħtieġ li fl-Istatuti tal-EIT jiġu stabbiliti regoli adattati li jirregolaw il-governanza u l-funzjonament tiegħu.

(21)

L-EIT jenħtieġ li jkollu personalità ġuridika u, biex tkun żgurata l-awtonomija u l-indipendenza funzjonali tiegħu mill-awtoritajiet nazzjonali u minn pressjonijiet esterni, dan jenħtieġ li jamministra l-baġit tiegħu stess li d-dħul tiegħu jenħtieġ li jinkludi kontribuzzjoni tal-Unjoni.

(22)

Huwa mistenni li l-industrija, kif ukoll is-setturi finanzjarji u tas-servizzi jikkontribwixxu b'mod sinifikanti għall-baġit tal-KKI. Il-KKI jenħtieġ li, b'mod partikolari, jimmiraw li jimmassimizzaw is-sehem tal-kontribuzzjonijiet minn sorsi privati u mid-dħul iġġenerat mill-attivitajiet tagħhom u li jsegwu u jiksbu s-sostenibbiltà finanzjarja, sa mhux aktar tard mill-iskadenza ta' 15-il sena ta' appoġġ finanzjarju mill-EIT. Il-KKI u l-organizzazzjonijiet sħab tagħhom jenħtieġ li jippubbliċizzaw il-fatt li l-attivitajiet tagħhom iseħħu fil-kuntest tal-EIT u li dawn jirċievu kontribuzzjoni finanzjarja mill-baġit ġenerali tal-Unjoni. Barra minn hekk, it-trasparenza tal-finanzjament jenħtieġ li tiżdied billi tiġi pprovduta informazzjoni pubblikament disponibbli dwar liema proġetti huma ffinanzjati u dwar l-allokazzjoni tal-finanzjament.

(23)

Il-proċedura baġitarja tal-Unjoni jenħtieġ li tkun applikabbli għall-kontribuzzjoni finanzjarja tal-Unjoni li tkun imħallsa mill-baġit ġenerali tal-Unjoni. L-awditjar tal-kontijiet jenħtieġ li tagħmlu l-Qorti tal-Awdituri skont ir-Regolament Finanzjarju.

(24)

L-EIT jenħtieġ li jagħmel l-aħjar sforzi biex jiffaċilita tranżizzjoni bla xkiel bejn il-perjodi tal-QFP, b'mod partikolari għall-attivitajiet li jkunu għaddejjin.

(25)

Id-dħul tal-EIT jenħtieġ li jinkludi l-kontribuzzjoni mill-Unjoni pprovduta mill-kontribuzzjoni finanzjarja minn Orizzont Ewropa. Dak id-dħul jenħtieġ li jkun jista' jinkludi kontribuzzjonijiet minn sorsi privati u pubbliċi oħra.

(26)

L-EIT huwa korp stabbilit mill-Unjoni skont it-tifsira tal-Artikolu 70 tar-Regolament Finanzjarju u jenħtieġ li jadotta r-regoli finanzjarji tiegħu skont dan. Konsegwentement, ir-Regolament Delegat tal-Kummissjoni (UE) 2019/715 (10) jenħtieġ li japplika għall-EIT.

(27)

L-EIT jenħtieġ li jadotta rapport annwali konsolidat tal-attività, li jiddeskrivi l-attivitajiet imwettqa u r-riżultati tal-operazzjonijiet fis-sena kalendarja preċedenti. L-EIT jenħtieġ li jadotta wkoll dokument uniku ta' programmazzjoni, ibbażat fuq l-ASI, skont ir-regoli finanzjarji tiegħu, li jiddeskrivi l-inizjattiva ppjanata tiegħu mil-lat ta' programmazzjoni annwali u pluriennali u li jippermetti lill-EIT jirreaġixxi għal żviluppi interni u esterni fl-oqsma tar-riċerka, tas-soċjetà, tat-teknoloġija, tal-edukazzjoni għolja, tal-innovazzjoni u ta' oqsma rilevanti oħrajn. Jenħtieġ li dak id-dokument uniku ta' programmazzjoni jiġi trażmess lill-Parlament Ewropew u lill-Kunsill għal skopijiet ta' informazzjoni.

(28)

Sa mill-ħolqien tiegħu, l-EIT ibbenefika mill-għarfien espert tal-persunal tiegħu. Madankollu, minħabba l-qafas ġuridiku applikabbli skont ir-Regolament (KE) Nru 294/2008, xi wħud minn dawk il-kuntratti tal-persunal skadew mingħajr il-possibbiltà ta' tiġdid. Sabiex tiġi evitata sitwazzjoni bħal din fil-futur, u minħabba l-importanza tal-għarfien espert uman għas-suċċess tal-attivitajiet tal-EIT, ikun fl-aħjar interessi tal-EIT li jagħmel kull sforz, fi ħdan il-qafas ġuridiku applikabbli, biex jattira u jżomm persunal ikkwalifikat.

(29)

Huwa xieraq li l-Kummissjoni tibda evalwazzjonijiet indipendenti u esterni tal-operat tal-EIT, inklużi l-attivitajiet immaniġġjati permezz tal-KKI, b'mod partikolari bil-ħsieb li tħejji l-ASI. Dawk l-evalwazzjonijiet jenħtieġ li jeżaminaw kif l-EIT jissodisfa l-missjoni u l-objettivi tiegħu u jkopru l-attivitajiet tal-EIT u tal-KKI. Jenħtieġ li jivvalutaw il-valur miżjud tal-Unjoni tal-EIT, l-impatt madwar l-Unjoni u l-impatt tal-attivitajiet tal- Iskema ta’ Innovazzjoni Reġjonali (RIS), il-ftuħ, l-effikaċja, l-effiċjenza, l-attivitajiet ta' sensibilizzazzjoni, il-komunikazzjoni, il-viżibbiltà, id-disseminazzjoni tar-riżultati, ir-rilevanza tal-attivitajiet segwiti u jekk humiex konsistenti ma' politiki nazzjonali u tal-Unjoni rilevanti, inkluż kwalunkwe sinerġija ma' partijiet oħra ta' Orizzont Ewropa. Dawk l-evalwazzjonijiet jenħtieġ li jikkontribwixxu għall-evalwazzjonijiet ta' Orizzont Ewropa mwettqa mill-Kummissjoni skont ir-Regolament (UE) 2021/695.

(30)

L-EIT jenħtieġ li jagħmel l-aħjar sforzi biex jissimplifika t-terminoloġija relatata mal-istruttura ta' kull KKI, bil-għan li jkompli jissimplifika u jsaħħaħ ir-rikonoxxibbiltà tal-EIT.

(31)

Sabiex jikkontribwixxi għall-indirizzar tad-disparitajiet fl-innovazzjoni fl-Ewropa, l-EIT jenħtieġ li, b'mod partikolari permezz tal-Iskema ta' Innovazzjoni Reġjonali (RIS), kif stabbilit ulterjorment fl-ASI, jappoġġja l-kapaċità ta' innovazzjoni tal-pajjiżi u r-reġjuni, jimmira li jsaħħaħ l-ekosistemi tal-innovazzjoni biex jiġu indirizzati l-isfidi globali u jintegra organizzazzjonijiet sħab ġodda fil-KKI.

(32)

Il-KKI, filwaqt li jaġixxu bħala faċilitatur tal-innovazzjoni, jenħtieġ li jikkunsidraw il-prijoritajiet tal-istrateġija tal-ispeċjalizzazzjoni intelliġenti tal-Istati Membri u jsaħħu l-kapaċità tal-innovazzjoni tagħhom billi jirriflettu b'mod sħiħ il-kapaċitajiet reġjonali u l-punti b'saħħithom, l-opportunitajiet, id-dgħufijiet, kif ukoll l-atturi lokali u l-attivitajiet u s-swieq tagħhom.

(33)

Huwa essenzjali li jiġu promossi sinerġiji b'saħħithom bejn l-EIT u l-EIC. Jenħtieġ li l-KKI jistimulaw il-ħolqien ta' negozji innovattivi f'sinerġija mill-qrib mal-EIC, filwaqt li jevitaw id-duplikazzjoni, u l-benefiċjarji tal-EIT jenħtieġ li jkunu jistgħu japplikaw l-istrumenti tal-EIC għal appoġġ addizzjonali għas-servizzi pprovduti mill-KKI. B'mod partikolari, in-negozji ġodda b'potenzjal ta' tkabbir għoli appoġġjati mill-KKI jenħtieġ li jkollhom aċċess simplifikat u b'hekk aktar mgħaġġel għall-azzjonijiet tal-EIC skont id-dispożizzjonijiet rilevanti tar-Regolament (UE) 2021/695 sabiex jingħataw għajnuna biex jespandu malajr, filwaqt li l-benefiċjarji tal-EIC jenħtieġ li jibbenefikaw mill-iskemi ta' appoġġ ipprovduti mill-EIT. Sabiex tiġi evitata l-kompartimentalizzazzjoni u jiġu promossi s-sinerġiji u l-kollaborazzjoni, l-EIT u l-EIC jenħtieġ li jipprevedu skambji ta' informazzjoni reċiproċi u sistematiċi. Fejn rilevanti, il-Bord tat-Tmexxija jenħtieġ li jkun jista' jistieden lill-membri tal-Bord tal-EIC għal-laqgħat tiegħu bħala osservaturi.

(34)

Sabiex tiġi żgurata l-kontinwità tal-attivitajiet tal-EIT u tal-KKI skont id-dispożizzjonijiet rilevanti tar-Regolament (UE) 2021/695, dan ir-Regolament jenħtieġ li jidħol fis-seħħ b'urġenza u jenħtieġ li japplikaw ċerti dispożizzjonijiet tiegħu, b'effett retroattiv, mill-1 ta' Jannar 2021.

(35)

Ladarba l-objettivi ta' dan ir-Regolament ma jistgħux jintlaħqu biżżejjed mill-Istati Membri iżda jistgħu minflok, għal raġunijiet ta' skala u ta' transnazzjonalità, jintlaħqu aħjar fil-livell tal-Unjoni, l-Unjoni tista' tadotta miżuri, skont il-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea (TUE). Skont il-prinċipju tal-proporzjonalità, kif stabbilit f'dak l-Artikolu, dan ir-Regolament ma jmurx lil hinn minn dak li hu meħtieġ sabiex dawk l-objettivi jintlaħqu,

(1)

"innovazzjoni" tfisser il-proċess, inkluż l-eżitu tiegħu, li permezz tiegħu jiddaħħlu ideat ġodda b'suċċess f'suq eżistenti li jkunu jirrispondu għad-domanda u l-ħtiġijiet tas-soċjetà, ekonomiċi jew ambjentali u li jkunu jiġġeneraw prodotti, proċessi, servizzi jew mudelli tan-negozju, organizzattivi u soċjali jew li jkunu kapaċi joħolqu swieq ġodda u li jipprovdu ċertu valur lis-soċjetà;

(2)

"Komunità ta' Konoxxenza u Innovazzjoni" jew "KKI" tfisser Sħubija Ewropea Istituzzjonalizzata fuq skala kbira, kif imsemmi fir-Regolament (UE) 2021/695, ta' istituzzjonijiet tal-edukazzjoni għolja, organizzazzjonijiet tar-riċerka, kumpaniji u partijiet ikkonċernati oħra fil-proċess tal-innovazzjoni fil-forma ta' network strateġiku, irrispettivament mill-forma ġuridika tagħha, ibbażata fuq ippjanar konġunt tal-innovazzjoni għal perjodu medju u fit-tul biex jingħelbu l-isfidi tal-EIT u jingħata kontribut ħalli jintlaħqu l-objettivi stabbiliti skont ir-Regolament (UE) 2021/695;

(3)

"ċentru ta' kolokazzjoni" tfisser ċentru fiżiku, stabbilit b'mod miftuħ u trasparenti, li jippromwovi rabtiet bejn l-atturi tat-triangolu tal-għarfien u kollaborazzjoni attiva bejniethom u jaġixxi bħala punt fokali għall-iskambju tal-għarfien u li permezz tiegħu s-sħab tal-KKI jkunu jistgħu jaċċessaw il-faċilitajiet u l-għarfien espert meħtieġ biex isegwu l-objettivi komuni tagħhom;

(4)

"ċentru tal-RIS" tfisser ċentru fiżiku, stabbilit b’KKI u li jifforma parti mill-istruttura tagħha, fi Stat Membru jew f'pajjiż assoċjat fil-mira tal-RIS li jservi bħala punt fokali għall-attivitajiet tal-KKI u għall-mobilizzazzjoni u l-involviment ta' atturi tat-triangolu tal-għarfien lokali fl-attivitajiet tal-KKI;

(5)

"organizzazzjoni sieħba" tfisser entità ġuridika li hija membru ta' KKI u li tista' tinkludi, b'mod partikolari, istituzzjonijiet tal-edukazzjoni għolja, fornituri tal-edukazzjoni u t-taħriġ vokazzjonali, organizzazzjonijiet tar-riċerka, istituzzjonijiet pubbliċi, kumpaniji pubbliċi jew privati, istituzzjonijiet finanzjarji, awtoritajiet reġjonali u lokali, fondazzjonijiet u organizzazzjonijiet mingħajr skop ta' qligħ;

(6)

"organizzazzjoni tar-riċerka" tfisser entità ġuridika pubblika jew privata li fost l-objettivi ewlenin tagħha twettaq żvilupp tar-riċerka jew teknoloġiku;

(7)

"istituzzjoni tal-edukazzjoni għolja" jew "HEI" tfisser università jew xi tip ta' istituzzjoni tal-edukazzjoni għolja li, skont id-dritt jew il-prassi nazzjonali, joffru lawrji u diplomi b'mod partikolari fil-livell ta' masters jew dottorat, irrispettivament mid-denominazzjoni tagħha fil-kuntest nazzjonali;

(8)

"Komunità tal-EIT" tfisser l-EIT u l-komunità attiva tal-individwi u l-entitajiet ġuridiċi li bbenefikaw jew jibbenefikaw mill-appoġġ jew mill-kontribuzzjoni finanzjarja tal-EIT;

(9)

"L-Aġenda Strateġika ta' Innovazzjoni" jew l-"ASI" tfisser att li jistabbilixxi l-oqsma ta' prijorità u l-istrateġija tal-EIT għall-inizjattivi futuri, il-kapaċità tal-EIT li tiġġenera l-aqwa valur miżjud tal-innovazzjoni, objettivi, azzjonijiet ewlenin, il-mod ta' kif taħdem, ir-riżultati mistennija u l-impatt tal-EIT, kif ukoll stima tar-riżorsi meħtieġa għall-perjodu tal-Orizzont Ewropa u tal-QFP;

(10)

"L-Iskema tal-Innovazzjoni Reġjonali" jew l-"RIS" tfisser skema li trawwem l-integrazzjoni tat-triangolu tal-għarfien u l-kapaċità tal-innovazzjoni tal-pajjiżi, (u r-reġjuni f'dawk il-pajjiżi) li huma kklassifikati bħala innovaturi "moderati" jew "modesti" fit-Tabella ta' Valutazzjoni tal-Innovazzjoni Ewropea kif imsemmi fl-ASI u tar-reġjuni ultraperiferiċi skont it-tifsira tal-Artikolu 349 tat-Trattat dwar il-Funzjonament tal-Unjoni Ewropea (TFUE), b'mod partikolari billi tattira u tintegra sħab ġodda fil-KKI u tnaqqas id-disparitajiet reġjonali, u b'hekk tnaqqas id-distakk fl-innovazzjoni;

(11)

"forum tal-partijiet ikkonċernati" tfisser pjattaforma miftuħa għar-rappreżentanti tal-istituzzjonijiet tal-Unjoni, awtoritajiet nazzjonali, reġjonali u lokali, entitajiet individwali jew ta' interess organizzat mid-dinja tan-negozju, tal-edukazzjoni għolja, tar-riċerka, assoċjazzjonijiet, is-soċjetà ċivili u organizzazzjonijiet raggruppati, kif ukoll partijiet ikkonċernati oħra min-naħa tat-triangolu tal-għarfien;

(12)

"pjan ta' direzzjoni tan-negozju tal-KKI" tfisser dokument anness mal-ftehim ta' għotja li jkopri perjodu ta' mhux aktar minn tliet snin, li jiddeskrivi l-objettivi tal-KKI, il-mod li bih għandhom jinkisbu, ir-riżultati mistennija, l-attivitajiet ta' valur miżjud tal-KKI ppjanati u l-ħtiġijiet u r-riżorsi finanzjarji relatati, inklużi l-azzjonijiet li għandhom l-għan li jiksbu s-sostenibbiltà finanzjarja u jżidu l-ftuħ tal-KKI għal sħab ġodda minn madwar l-Unjoni;

(13)

"attivitajiet ta' valur miżjud tal-KKI" tfisser attivitajiet imwettqa minn organizzazzjonijiet sħab skont il-pjan ta' direzzjoni tan-negozju tal-KKI, li jkunu jikkontribwixxu għall-integrazzjoni tat-triangolu tal-għarfien tal-edukazzjoni għolja, ir-riċerka u l-innovazzjoni, inklużi l-attivitajiet tal-istabbiliment, tal-amministrazzjoni u tal-koordinazzjoni tal-KKI, u li jikkontribwixxu għall-objettivi ġenerali tal-EIT;

(14)

"attivitajiet trasversali tal-KKI" tfisser attivitajiet li għandhom l-għan li jsaħħu l-kooperazzjoni u s-sinerġiji bejn il-KKI, li jrawmu approċċ aktar interdixxiplinari u li joħolqu massa kritika fost il-KKI biex jindirizzaw suġġetti ta' interess komuni;

(15)

"memorandum ta' kooperazzjoni" tfisser ftehim bejn l-EIT u KKI, bil-ħsieb li KKI tibqa' membru attiv tal-Komunità tal-EIT wara l-iskadenza tal-ftehim ta' sħubija, u li jinkludi l-kundizzjonijiet għall-aċċess għas-sejħiet kompetittivi tal-EIT għal xi attivitajiet speċifiċi u attivitajiet transnazzjonali b'valur miżjud għoli tal-Unjoni;

(16)

"sostenibbiltà finanzjarja" tfisser il-kapaċità ta' KKI li tiffinanzja l-attivitajiet tat-triangolu tal-għarfien tagħha indipendentement mill-kontribuzzjonijiet mill-EIT.

(a)

jidentifika, skont l-ASI, il-prijoritajiet u l-attivitajiet ewlenin tiegħu, u jimplimentahom skont id-dispożizzjonijiet applikabbli tar-Regolament (UE) 2021/695;

(b)

jiżgura ftuħ lejn organizzazzjonijiet sħab ġodda potenzjali u jqajjem kuxjenza fosthom u jħeġġeġ il-parteċipazzjoni tagħhom fl-attivitajiet tiegħu, b'mod partikolari l-SMEs u ċ-ċentri ta' eċċellenza emerġenti, madwar l-Unjoni, inkluż permezz tal-RIS, billi jibni fuq networks ta' informazzjoni u strutturi eżistenti;

(c)

jagħżel u jaħtar KKI skont l-Artikolu 9 u jistabbilixxi d-drittijiet u l-obbligi tal-KKI permezz ta' ftehimiet ta' sħubija u ftehimiet ta' għotja, jissorvelja u jipprovdi lill-KKI l-appoġġ meħtieġ u gwida strateġika, b'miżuri xierqa tal-kontroll tal-kwalità, monitoraġġ kontinwu u evalwazzjoni perjodika esterna tal-attivitajiet tagħhom skont l-Artikolu 11, u jieħu miżuri korrettivi meta jkun xieraq;

(d)

imexxi l-implimentazzjoni tal-RIS, inkluż permezz tal-implimentazzjoni taċ-ċentri tal-RIS mill-KKI;

(e)

jiżgura livell xieraq ta' koordinazzjoni u jiffaċilita l-komunikazzjoni u l-kooperazzjoni tematika bejn il-KKI u joħroġ sejħiet għal attivitajiet u servizzi konġunti fost il-KKI;

(f)

jiżgura l-implimentazzjoni mifruxa ta' lawrji u diplomi bit-tikketta tal-EIT mill-KKI, isaħħaħ il-promozzjoni tagħhom barra mill-Komunità tal-EIT u jestendihom għall-programmi ta' tagħlim tul il-ħajja;

(g)

jippromwovi d-disseminazzjoni tal-aqwa prassi għall-integrazzjoni tat-triangolu tal-għarfien, inkluż fost il-KKI u madwar l-Unjoni, inter alia permezz tal-RIS, biex joħloq kultura komuni ta' innovazzjoni u trasferiment tal-għarfien, u jħeġġeġ l-ftuħ tal-KKI lejn membri ġodda permezz ta' attivitajiet ta' sensibilizzazzjoni;

(h)

jippromwovi d-disseminazzjoni, il-komunikazzjoni u l-isfruttament wiesgħa tar-riżultati u tal-opportunitajiet li joħorġu mill-Komunità tal-EIT, sabiex jiżdiedu s-sensibilizzazzjoni, il-viżibbiltà u l-għarfien tal-EIT madwar l-Unjoni, kif ukoll biex titħeġġeġ il-parteċipazzjoni fl-attivitajiet tal-Komunità tal-EIT;

(i)

jappoġġja l-KKI fl-iżvilupp ta' strateġija effettiva għas-sostenibbiltà finanzjarja għall-mobilizzazzjoni ta' fondi minn sorsi pubbliċi u privati oħra;

(j)

irawwem l-eċċellenza fl-edukazzjoni għolja, fir-riċerka u fl-innovazzjoni, b'mod partikolari billi jippromwovi l-KKI bħala sħab eċċellenti tal-innovazzjoni;

(k)

jippromwovi approċċi multidixxiplinari għall-innovazzjoni, fis-setturi kollha, inkluż permezz tal-integrazzjoni ta' soluzzjonijiet teknoloġiċi, soċjali u mhux teknoloġiċi, is-sostenibbiltà u n-newtralità klimatika sa mid-disinn, approċċi organizzattivi, enfasi fuq l-intraprenditorija u mudelli ġodda tan-negozju;

(l)

jiżgura sinerġiji u komplementarjetajiet bejn l-attivitajiet tal-EIT u programmi oħra tal-Unjoni, fejn xieraq, skont ir-Regolament (UE) 2021/695;

(m)

irawwem id-diskussjoni u l-iskambju u d-disseminazzjoni ta' għarfien espert u know-how bejn il-KKI fir-rigward tal-mudelli innovattivi tad-drittijiet ta' proprjetà intellettwali, bl-għan li jippromwovi t-trasferiment u d-disseminazzjoni tal-għarfien, kemm fil-kuntest tal-KKI kif ukoll b'mod aktar wiesa' madwar l-Unjoni;

(n)

jipprovdi l-appoġġ meħtieġ u jrawwem is-sinerġiji mal-KKI għall-iżvilupp ta' soluzzjonijiet innovattivi;

(o)

jorganizza laqgħat regolari, mill-inqas kull sentejn, ta' forum tal-partijiet ikkonċernati biex jikkondividi u jiddiskuti l-attivitajiet tal-EIT, l-esperjenzi tiegħu, l-aqwa prassi u l-kontribut għall-politiki u l-objettivi tal-innovazzjoni, tar-riċerka u tal-edukazzjoni tal-Unjoni, kif ukoll politiki u objettivi oħrajn tal-Unjoni meta jkun rilevanti, u biex il-partijiet ikkonċernati jkunu jistgħu jesprimu l-fehmiet tagħhom;

(p)

tal-inqas darbtejn fis-sena, jorganizza laqgħat tal-MSRG, indipendentement mil-laqgħat tal-forum tal-partijiet ikkonċernati.

(q)

jiffaċilita l-istabbiliment tal-faċilitajiet tas-servizzi kondiviżi tal-Komunità tal-EIT;

(r)

iħeġġeġ in-networking, maż-żmien, taċ-ċentri tal-RIS u taċ-ċentri ta' kolokazzjoni fl-Istati Membri sabiex tiġi ffaċilitata l-kooperazzjoni tagħhom fil-Komunità tal-EIT u mal-ekosistemi tal-innovazzjoni lokali;

(s)

jimmonitorja l-implimentazzjoni tal-attivitajiet li għandhom jitwettqu mill-KKI għall-iżvilupp tal-kapaċità intraprenditorjali u tal-innovazzjoni tal-organizzazzjonijiet membri tagħhom, b'mod partikolari l-istituzzjonijiet tal-edukazzjoni għolja, fornituri tal-edukazzjoni u t-taħriġ vokazzjonali, l-SMEs u n-negozji ġodda u l-integrazzjoni tagħhom fl-ekosistemi tal-innovazzjoni, fl-Unjoni kollha u f'konformità mal-approċċ tat-triangolu tal-għarfien;

(t)

ifassal, b'kooperazzjoni mal-Kummissjoni, u wara konsultazzjoni mal-KKI, iniedi u jikkoordina inizjattiva pilota li tappoġġja l-kapaċitajiet tal-innovazzjoni u intraprenditorjali tal-istituzzjonijiet tal-edukazzjoni għolja u l-integrazzjoni tagħhom fl-ekosistemi tal-innovazzjoni (inizjattiva pilota għall-edukazzjoni għolja), li għandha tiġi implimentata permezz tal-KKI.

(a)

il-kundizzjonijiet minimi biex tiġi ffurmata KKI huma stabbiliti fl-Artikolu 9(3) u (4) ta' dan ir-Regolament;

(b)

regoli speċifiċi dwar is-sjieda, id-drittijiet tal-aċċess, l-isfruttament u d-disseminazzjoni jistgħu japplikaw għall-attivitajiet ta' valur miżjud tal-KKI, fejn xieraq.