(1)

It-tariffi mħallsa lill-ESMA mir-repożitorji tat-tranżazzjonijiet jiġu kkalkulati bl-użu ta’ metodoloġija stabbilita fir-Regolamenti Delegati tal-Kummissjoni (UE) Nru 1003/2013 (3) u (UE) 2019/360 (4). Il-perjodu ta’ referenza għall-fatturat applikabbli f’dawk ir-Regolamenti Delegati huwa s-sena ta’ qabel is-sena li fiha jitħallas id-dħul.

(2)

Fl-1 ta’ Frar 2020, ir-Renju Unit irtira mill-Unjoni Ewropea u mill-Komunità Ewropea tal-Enerġija Atomika. F’konformità mal-perjodu ta’ tranżizzjoni stabbilit fl-Artikolu 126 tal-Ftehim dwar il-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika, id-dritt tal-Unjoni ma baqax japplika għar-Renju Unit u fih mill-31 ta’ Diċembru 2020.

(3)

Żewġ repożitorji tat-tranżazzjonijiet stabbiliti fir-Renju Unit ittrasferew parti mis-servizzi u l-attivitajiet tagħhom lill-Unjoni sabiex ikunu jistgħu jkomplu jipprovdu s-servizzi u l-attivitajiet tagħhom lil kontropartijiet stabbiliti fl-Unjoni. Dan biddel b’mod sinifikanti l-għadd ta’ repożitorji tat-tranżazzjonijiet attivi fl-Unjoni.

(4)

Ir-repożitorji tat-tranżazzjonijiet il-ġodda tal-Unjoni effettivament bdew l-attività tagħhom fl-Unjoni f’Jannar 2021, u l-livell ta’ attività tagħhom fl-2020 kien kważi ineżistenti. It-tariffa għas-superviżjoni annwali tagħhom għall-2021 għalhekk tkun negliġibbli, għalkemm l-attivitajiet tagħhom x’aktarx li jkunu sinifikanti. Sabiex jiġi żgurat li jħallsu tariffa li tkun proporzjonata mal-fatturat reali tagħhom fl-Unjoni, it-tariffa għas-superviżjoni annwali tagħhom għall-2021 għandha tiġi kkalkulata abbażi tal-fatturat applikabbli tagħhom matul l-ewwel nofs tal-2021.

(5)

Sabiex l-ESMA tkun tista’ timponi tariffi fuq ir-repożitorji tat-tranżazzjonijiet fl-2021 b’mod proporzjonat filwaqt li tkopri l-ispejjeż kollha tagħha relatati mas-superviżjoni tagħhom, jeħtieġ li jinbidel il-perjodu ta’ referenza għall-kalkolu tat-tariffi annwali mħallsa mir-repożitorji tat-tranżazzjonijiet lill-ESMA fl-2021. Peress li r-repożitorji tat-tranżazzjonijiet rilevanti huma rreġistrati mal-ESMA skont ir-Regolamenti (UE) Nru 648/2012 u (UE) 2015/2365, l-emendi għal dak il-perjodu ta’ referenza jenħtieġ li jsiru fl-istess ħin.

(6)

Ir-Regolamenti Delegati (UE) Nru 1003/2013 u (UE) 2019/360 għandhom għalhekk jiġu emendati skont il-ħtieġa.

(7)

Sabiex tiġi ffaċilitata minnufih attività ta’ superviżjoni u infurzar effettiva u effiċjenti, dan ir-Regolament għandu jidħol fis-seħħ b’urġenza,

(1)

Permezz tar-Regolament ta’ Implimentazzjoni tal-Kummissjoni (UE) 2015/309 (2), il-Kummissjoni imponiet dazji kompensatorji definittivi fuq l-importazzjonijiet ta’ ċerti troti qawsalla li joriġinaw mit-Turkija (“l-investigazzjoni oriġinali”).

(2)

Fl-4 ta’ Ġunju 2018, wara rieżami interim parzjali dwar is-sussidjar tal-produtturi esportaturi kollha, il-Kummissjoni ddeċidiet li żżomm il-miżuri kif stabbilit oriġinarjament (ir-Regolament ta’ Implimentazzjoni tal-Kummissjoni (UE) 2018/823) (3). Din sabet li l-bidla leġiżlattiva fil-leġiżlazzjoni Torka dwar is-sussidji għall-produtturi tat-trota, li kienet soġġetta għar-rieżami, ma kinitx tiġġustifika r-reviżjoni tad-dazji kompensatorji għall-produtturi kollha tat-trota fit-Turkija. Madankollu, ġie osservat li l-impatt tal-bidla leġiżlattiva kien differenti fil-livell ta’ kumpaniji individwali u kien jiddependi fuq is-sitwazzjoni speċifika ta’ kull waħda mill-kumpaniji (4).

(3)

Fil-15 ta’ Mejju 2020, wara rieżami interim parzjali, il-Kummissjoni emendat il-livell tad-dazju kompensatorju fir-rigward ta’ produttur esportatur wieħed (ir-Regolament ta’ Implimentazzjoni tal-Kummissjoni (UE) 2020/658) (5).

(4)

Id-dazji kompensatorji definittivi li huma fis-seħħ bħalissa jvarjaw minn 1,5 % sa 9,5 %.

(5)

Wara l-pubblikazzjoni ta’ avviż dwar l-iskadenza (6), il-Kummissjoni rċeviet talba għal rieżami skont l-Artikolu 18 tar-Regolament bażiku.

(6)

It-talba tressqet fil-25 ta’ Novembru 2019 mill-Organizzazzjoni Daniża tal-Akkwakultura (“TDAO” jew “l-applikant”) f’isem il-produtturi li jirrappreżentaw aktar minn 40 % tal-produzzjoni totali tal-Unjoni ta’ ċerti troti qawsalla. It-talba kienet imsejsa fuq ir-raġuni li l-iskadenza tal-miżuri aktarx twassal għall-kontinwazzjoni ta’ sussidjar u għall-kontinwazzjoni jew għar-rikorrenza ta’ dannu għall-industrija tal-Unjoni.

(7)

Qabel il-bidu tar-rieżami ta’ skadenza, u f’konformità mal-Artikoli 22(1) u 10(7) tar-Regolament bażiku, il-Kummissjoni għarrfet lill-Gvern tat-Turkija (“GOT”) li hija kienet irċeviet talba ddokumentata kif xieraq għal rieżami u stiednet lill-GOT għal konsultazzjonijiet bil-għan li tkun iċċarata s-sitwazzjoni dwar il-kontenut tat-talba ta’ rieżami u li tinstab soluzzjoni bi ftehim reċiproku. Il-konsultazzjonijiet saru fl-20 ta’ Frar 2020.

(8)

Matul il-konsultazzjonijiet ta’ qabel, il-GOT indika li kien hemm bidla sostanzjali fis-sistemi ta’ appoġġ tat-Turkija li dehret għax l-ammont totali tal-pagament ta’ appoġġ u tal-produzzjoni li għandu jiġi appoġġat naqas b’mod sinifikanti mill-2013. Għalhekk, il-GOT kien tal-fehma li ma kienx hemm bżonn li jinbeda rieżami ta’ skadenza.

(9)

Il-Kummissjoni qieset li l-evidenza ppreżentata fit-talba għal rieżami kienet tikkostitwixxi l-informazzjoni raġonevolment disponibbli għall-applikant f’dak l-istadju. Kif muri fil-memorandum dwar is-suffiċjenza tal-evidenza, li fih il-valutazzjoni tal-Kummissjoni dwar l-evidenza kollha għad-dispożizzjoni tal-Kummissjoni dwar l-allegati sussidji u li abbażi tagħha l-Kummissjoni bdiet l-investigazzjoni, fl-istadju tal-bidu kien hemm biżżejjed evidenza li l-allegati sussidji kienu kompensabbli f’termini tal-eżistenza, l-ammont u n-natura tagħhom.

(10)

Billi ddeterminat, wara li kkonsultat il-Kumitat stabbilit mill-Artikolu 15(1) tar-Regolament (UE) 2016/1036 tal-Parlament Ewropew u tal-Kunsill (7) fl-applikazzjoni tal-Artikolu 25(1) tar-Regolament bażiku, li kien hemm raġuni suffiċjenti biex jingħata bidu għal rieżami ta' skadenza, il-Kummissjoni ħabbret il-bidu ta’ rieżami ta’ skadenza skont l-Artikolu 18 tar-Regolament bażiku skont l-avviż ippubblikat f'Il-Ġurnal Uffiċjali tal-Unjoni Ewropea (8) fis-27 ta' Frar 2020 ("in-Notifika ta' bidu"). Fid-dawl tal-Artikolu 18(2) tar-Regolament bażiku, il-Kummissjoni ħejjiet memorandum dwar is-suffiċjenza tal-evidenza li fih il-valutazzjoni tal-Kummissjoni dwar l-evidenza kollha għad-dispożizzjoni tagħha u li abbażi tagħha l-Kummissjoni bdiet din l-investigazzjoni.

(11)

L-investigazzjoni ta’ kontinwazzjoni jew rikorrenza ta’ sussidjar kopriet il-perjodu mill-1 ta’ Jannar 2019 sal-31 ta’ Diċembru 2019 (“perjodu ta’ investigazzjoni tar-rieżami” jew “PIR”). L-eżaminazzjoni tax-xejriet rilevanti għall-valutazzjoni tal-probabbiltà ta’ kontinwazzjoni jew ta’ rikorrenza ta’ dannu kopriet il-perjodu mill-1 ta’ Jannar 2016 sal-aħħar tal-perjodu ta’ investigazzjoni tar-rieżami (“il-perjodu kkunsidrat”) (9).

(12)

Fin-Notifika ta’ Bidu, il-partijiet interessati ġew mistiedna biex jikkuntattjaw lill-Kummissjoni sabiex jipparteċipaw fl-investigazzjoni. Barra minn hekk, il-Kummissjoni informat speċifikament lill-applikant, lil produtturi tal-Unjoni oħrajn magħrufa, lill-produtturi esportaturi magħrufa u lill-GOT, lill-importaturi u lill-utenti magħrufa dwar il-bidu tal-investigazzjoni u stednithom jipparteċipaw.

(13)

Il-partijiet kollha ġew mistiedna jressqu l-fehmiet tagħhom, jissottomettu l-informazzjoni u jipprovdu evidenza ta’ sostenn fi żmien l-iskadenzi stabbiliti fin-Notifika ta’ Bidu. Il-partijiet interessati kellhom ukoll l-opportunità li jikkummentaw dwar il-bidu tal-investigazzjoni u jitolbu seduta ta’ smigħ mal-Kummissjoni u/jew mal-Uffiċjal tas-Seduta fil-proċedimenti kummerċjali.

(14)

Fin-Notifika ta’ Bidu, il-Kummissjoni ħabbret li kien hemm il-possibbiltà li tagħżel kampjun minn fost il-partijiet interessati f’konformità mal-Artikolu 27 tar-Regolament bażiku.

(15)

Fin-Notifika ta’ Bidu, il-Kummissjoni ħabbret li hija kienet għażlet provviżorjament kampjun tal-produtturi tal-Unjoni. F’konformità mal-Artikolu 27(1) tar-Regolament bażiku, il-Kummissjoni għażlet kampjun provviżorju abbażi tal-akbar volum rappreżentattiv tal-produzzjoni u tal-bejgħ li raġonevolment seta’ jiġi investigat fiż-żmien disponibbli, waqt li qieset ukoll il-firxa ġeografika. Dan il-kampjun kien jikkonsisti minn tmien produtturi tal-Unjoni li kollha kemm huma kienu Intrapriżi Żgħar u Medji (“SMEs”). Il-produtturi tal-Unjoni inklużi fil-kampjun b’mod provviżorju kienu jirrappreżentaw 14 % tal-produzzjoni tal-Unjoni. Il-Kummissjoni stiednet lill-partijiet interessati biex jikkummentaw dwar il-kampjun provviżorju.

(16)

Il-Kummissjoni rċeviet kummenti mingħand it-TDAO. Fuq din il-bażi u bil-ħsieb li tkopri l-akbar volum rappreżentattiv tal-produzzjoni, il-Kummissjoni ddeċidiet li żżid produttur ta’ trota ffriżata mal-kampjun finali u li tissostitwixxi wieħed mill-produtturi magħżula b’mod provviżorju b’ieħor. Ma waslux aktar kummenti.

(17)

Barra minn hekk, kif imsemmi fil-premessa (24), wieħed mill-produtturi tal-Unjoni inkluż fil-kampjun ma pprovdiex tweġiba għall-kwestjonarju u għalhekk ġie eskluż mill-kampjun. Il-kampjun li jifdal tal-produtturi tal-Unjoni xorta kien jirrappreżenta 13 % tal-produzzjoni tal-Unjoni u kien rappreżentattiv għall-industrija tal-Unjoni, minħabba l-għadd kbir ta’ produtturi tal-Unjoni.

(18)

Sabiex tiddeċiedi jekk il-kampjunar kienx meħtieġ u, jekk iva, sabiex tagħżel kampjun, il-Kummissjoni stiednet lill-importaturi mhux relatati biex jipprovdu l-informazzjoni speċifikata fin-Notifika ta’ Bidu.

(19)

Peress li l-ebda importatur mhux relatat ma ppreżenta ruħu, ma kien hemm l-ebda bżonn ta’ kampjunar.

(20)

Sabiex tiddeċiedi jekk il-kampjunar huwiex meħtieġ u, jekk iva, sabiex tagħżel kampjun, il-Kummissjoni talbet lill-produtturi esportaturi kollha fit-Turkija biex jipprovdu l-informazzjoni speċifikata fin-Notifika ta’ Bidu. Barra minn hekk, il-Kummissjoni talbet lill-Missjoni tar-Repubblika tat-Turkija għall-Unjoni Ewropea biex tidentifika u/jew tikkuntattja lil produtturi esportaturi oħrajn, jekk hemm, li jistgħu jkunu interessati li jipparteċipaw fl-investigazzjoni.

(21)

Ħmistax-il produttur esportatur / grupp ta’ produtturi esportaturi fit-Turkija pprovdew l-informazzjoni mitluba u qablu li jiġu inklużi fil-kampjun. Il-volum totali tal-esportazzjonijiet iddikjarat lejn l-Unjoni minn dawn il-kumpaniji ta’ ċerti trota qawsalla matul il-perjodu ta’ investigazzjoni tar-rieżami kien jammonta għal 100 % tal-esportazzjonijiet mit-Turkija lejn l-Unjoni.

(22)

F’konformità mal-Artikolu 27(1) tar-Regolament bażiku, il-Kummissjoni għażlet kampjun ta’ tliet produtturi esportaturi / gruppi ta’ produtturi esportaturi abbażi tal-akbar volum rappreżentattiv tal-esportazzjonijiet lejn l-Unjoni li raġonevolment seta’ jiġi investigat fiż-żmien disponibbli. Il-kampjun kien jammonta għal aktar minn 70 % tal-bejgħ tal-esportazzjoni ddikjarat lejn l-Unjoni matul il-perjodu ta’ investigazzjoni tar-rieżami.

(23)

F’konformità mal-Artikolu 27(2) tar-Regolament bażiku, il-produtturi esportaturi kkonċernati magħrufa kollha u l-awtoritajiet Torok ġew ikkonsultati dwar l-għażla tal-kampjun. Ma wasal l-ebda kumment.

(24)

Sabiex tikseb l-informazzjoni meqjusa neċessarja għall-investigazzjoni tagħha, il-Kummissjoni bagħtet kwestjonarji lid-disa’ produtturi tal-Unjoni inklużi fil-kampjun, lit-tliet produtturi esportaturi inklużi fil-kampjun u lill-GOT. Wieħed mill-produtturi tal-Unjoni inkluż fil-kampjun informa lill-Kummissjoni li ma kienx f’pożizzjoni li jimla tweġiba għall-kwestjonarju. Barra minn hekk, produttur esportatur wieħed inkluż fil-kampjun ma pprovdiex tweġiba għall-kwestjonarju. B’riżultat ta’ dan, waslu tweġibiet għall-kwestjonarju mingħand tmien produtturi tal-Unjoni, żewġ produtturi esportaturi inklużi fil-kampjun u l-GOT.

(25)

Fir-rigward tal-produttur esportatur inkluż fil-kampjun li ma kkooperax, il-Kummissjoni ddeċidiet li tibbaża s-sejbiet tagħha fuq il-fatti disponibbli f’konformità mal-Artikolu 28(1) tar-Regolament bażiku. Il-produttur esportatur ikkonċernat ġie infurmat kif xieraq. Ma wasal l-ebda kumment. Iż-żewġ produtturi esportaturi inklużi fil-kampjun li pprovdew tweġibiet sħaħ għall-kwestjonarju xorta koprew aktar minn 60 % tal-bejgħ tal-esportazzjoni ddikjarat lejn l-Unjoni matul il-perjodu ta’ investigazzjoni tar-rieżami.

(26)

Il-Kummissjoni fittxet u vverifikat l-informazzjoni kollha meqjusa bħala meħtieġa għad-determinazzjoni tal-probabbiltà ta’ kontinwazzjoni jew ta’ rikorrenza ta’ sussidjar u dannu u tal-interess tal-Unjoni. Minħabba t-tifqigħa tal-pandemija tal-COVID-19 u l-miżuri konsegwenti li ttieħdu biex tiġi indirizzata t-tifqigħa (10), il-Kummissjoni madankollu ma setgħetx twettaq żjarat ta’ verifika fil-bini tal-kumpaniji kollha skont l-Artikolu 26 tar-Regolament bażiku. Minflok, il-Kummissjoni wettqet kontroverifiki mill-bogħod (“RCCs”) tal-informazzjoni pprovduta mill-kumpaniji li ġejjin:

Il-produtturi tal-Unjoni:

Il-produtturi esportaturi:

GOT:

(27)

Fis-26 ta’ Marzu 2021, il-Kummissjoni żvelat il-fatti u l-kunsiderazzjonijiet essenzjali li fuq il-bażi tagħhom kien beħsiebha żżomm id-dazji kompensatorji fis-seħħ. Il-partijiet kollha ngħataw perjodu li fih setgħu jikkummentaw dwar id-divulgazzjoni.

(28)

Fl-14 ta’ April 2021, il-Kummissjoni, waqt li qieset ċerti pretensjonijiet li waslu wara l-iżvelar finali li kellu impatt fuq l-eżitu tal-investigazzjoni, żvelat dawk il-fatti u l-kunsiderazzjonijiet addizzjonali li wasslu biex il-Kummissjoni timmodifika s-sejbiet finali bħala preċedentament żvelati. Il-partijiet interessati ngħataw ukoll perjodu li fih setgħu jagħmlu rappreżentazzjonijiet wara din ir-rivelazzjoni addizzjonali.

(29)

Il-kummenti li għamlu l-partijiet interessati ġew ikkunsidrati mill-Kummissjoni u kienu kkunsidrati fejn xieraq. Il-partijiet li talbu dan ingħataw seduta ta’ smigħ.

(30)

Il-prodott ikkonċernat huwa l-istess bħal fl-investigazzjoni oriġinali, jiġifieri t-trota qawsalla (Oncorhynchus mykiss) (“trota”):

(31)

Bħal fl-investigazzjoni oriġinali, il-Kummissjoni sabet li l-prodott manifatturat fit-Turkija u li jiġi esportat lejn l-Unjoni u l-prodott manifatturat u li jinbiegħ fl-Unjoni mill-industrija tal-Unjoni għandhom l-istess karatteristiċi fiżiċi, tekniċi u kimiċi bażiċi, u l-istess użi finali bażiċi. Għalhekk dawn tqiesu bħala prodotti simili skont it-tifsira tal-Artikolu 2(c) tar-Regolament bażiku.

(32)

Fuq il-bażi tas-sussidji investigati fl-investigazzjoni oriġinali u fir-rieżamijiet interim parzjali msemmija fil-premessi (2) u (3) fir-rigward tal-prodott ikkonċernat, l-informazzjoni inkluża fit-talba għal rieżami u l-informazzjoni sottomessa mill-GOT u l-produtturi esportaturi li kkooperaw inklużi fil-kampjun, ġew investigati l-miżuri li ġejjin, li allegatament jinvolvu l-għoti ta’ programmi ta’ sussidju:

It-trasferiment dirett tal-fondi — għotjiet:

Id-dħul mitluf:

It-trasferiment dirett tal-fondi — finanzjament preferenzjali:

(33)

Matul l-PIR, ingħata appoġġ dirett lill-produtturi tat-trota li tiżen inqas minn 1 kg abbażi tad-Digriet Presidenzjali 2019/1691 (“id-Digriet 1691”) (11). Il-proċeduri u l-prinċipji dwar l-implimentazzjoni tad-Digriet ġew ipprovduti mill-Communiqué 2019/56 (“Communiqué 56”) maħruġa mill-Ministeru tal-Ikel, l-Agrikoltura u l-Bhejjem (12). L-ammont ta’ appoġġ ġie stabbilit għal 0,75 TL/kg għall-produzzjoni sa limitu ta’ 350 000 kg fis-sena.

(34)

Dan l-appoġġ jiġi rivedut kull sena bħala parti mir-rieżami annwali tal-appoġġ agrikolu. Il-Kummissjoni nnotat li l-appoġġ kompla mingħajr ebda bidla notevoli wara l-PIR abbażi tad-Digriet Nru 2020/3190 (13), bil-Communiqué korrispondenti li jistabbilixxi l-kundizzjonijiet għal tali appoġġ (14).

(35)

Kif ikkonfermat fl-investigazzjoni oriġinali (15), dawk il-miżuri jammontaw għal sussidji kompensabbli skont it-tifsira tal-Artikolu 3(1)(a)(i) u l-Artikolu 3(2) tar-Regolament bażiku, jiġifieri trasferiment ta’ fondi mill-GOT fil-forma ta’ sussidju dirett lill-produtturi tat-trota.

(36)

Is-sussidji diretti huma speċifiċi u kompensabbli skont it-tifsira tal-Artikolu 4(2)(a) tar-Regolament bażiku bħala l-awtorità awtorizzanti, u l-leġiżlazzjoni li skontha topera l-awtorità awtorizzanti, tillimita b’mod espliċitu l-aċċess għal dawn l-għotjiet lil intrapriżi li joperaw fis-settur tal-akkwakultura. L-intrapriżi involuti fl-akkwakultura huma msemmija b’mod espliċitu u t-trota hija indikata b’mod ċar bħala waħda mill-ispeċijiet, li jibbenefikaw minn din l-iskema ta’ sussidju.

(37)

Il-Kummissjoni stabbiliet li ż-żewġ produtturi esportaturi inklużi fil-kampjun ibbenefikaw minn din l-iskema matul il-perjodu ta’ investigazzjoni tar-rieżami.

(38)

Il-benefiċċju għal kull kumpanija kien l-ammont ta’ appoġġ medju dirett riċevut matul il-perjodu ta’ investigazzjoni tar-rieżami għall-ħut ħaj imrobbi proprju. Fiż-żewġ każijiet, il-kumpaniji pprovdew informazzjoni dwar l-ammont tal-appoġġ, u mingħand min ġie riċevut. Il-kumpaniji rreġistraw ukoll fil-biċċa l-kbira dan l-introjtu taħt l-intestatura “introjtu mis-sussidju” fil-kontijiet tagħhom u sar awditu ta’ dawn il-kontijiet b’mod indipendenti. Din ittieħdet bħala evidenza pożittiva ta’ sussidju li ta benefiċċju.

(39)

Kif ikkonfermat fl-investigazzjoni oriġinali (16), il-benefiċċju ta’ dawn is-sussidji kien japplika wkoll għal kumpaniji li mhux biss kienu jrabbu iżda xtraw ukoll xi trota minn kumpaniji mhux relatati għall-ipproċessar, peress li l-prodott ikkonċernat ikopri kemm il-materja prima ssussidjata direttament, jiġifieri t-trota ħajja, kif ukoll il-prodotti downstream, bħal ħut sħiħ frisk jew iffriżat, flettijiet, ħut affumikat. F’konformità mal-metodoloġija tal-investigazzjoni oriġinali, għall-ħut mixtri, il-benefiċċju ġie kkalkolat fuq il-bażi tas-sussidji totali mogħtija mill-awtoritajiet Torok diviżi bl-ammont totali tal-produzzjoni tat-trota ssussidjata fit-Turkija.

(40)

Matul l-PIR, l-appoġġ għall-produzzjoni tat-trota li tiżen aktar minn 1 kg lill-produtturi tat-trota ngħata abbażi tad-Digriet 1691 u l-Communiqué 56. L-ammont ta’ sussidju ġie stabbilit għal 1,50 TL/kg għall-produzzjoni sa limitu ta’ 350 000 kg fis-sena.

(41)

Kif ikkonfermat fl-aħħar investigazzjoni tar-rieżami interim (17), is-sussidju għat-trota ta’ aktar minn 1 kg kien fil-fatt maħsub biex jibbenefika lit-troti ta’ aktar minn 1,2 kg, jiġifieri t-trota li ma taqax taħt id-definizzjoni tal-prodott ikkonċernat. Għalhekk, il-Kummissjoni kkonkludiet li tali appoġġ ma setax jitqies bħala sussidju kompensabbli għall-produtturi tal-prodott ikkonċernat.

(42)

Matul l-PIR, l-appoġġ għat-tnissil tat-trota fl-imfaqas protetti mill-mard lill-produtturi tat-trota ngħata abbażi tad-Digriet 1691 u l-Communiqué 56. L-ammont ta’ sussidju ġie stabbilit għal 1,50 TL/kg għall-produzzjoni ta’ 350 000 kg fis-sena.

(43)

Kif ikkonfermat fl-aħħar investigazzjoni tar-rieżami interim (18), il-Kummissjoni qieset li tali appoġġ (fil-forma ta’ għotja diretta) kien jikkostitwixxi sussidji għall-produzzjoni tat-trota simili għal sussidji diretti, jiġifieri kontribuzzjoni finanzjarja li tagħti benefiċċju skont l-Artikoli 3 (1)(a)(i) u 3(2) tar-Regolament bażiku. Peress li l-appoġġ ingħata esklussivament lill-produtturi tat-trota, il-Kummissjoni kkonkludiet li l-iskema kienet speċifika skont it-tifsira tal-Artikolu 4(2)(a) tar-Regolament bażiku. Il-benefiċċju kien jikkonsisti f’għotjiet diretti lill-produtturi tat-trota li jissodisfaw il-kriterji ta’ eliġibbiltà. Għalhekk, il-Kummissjoni kkonkludiet li l-appoġġ seta’ jitqies bħala sussidju kompensabbli.

(44)

Madankollu, il-Kummissjoni stabbiliet li ż-żewġ produtturi esportaturi li kkooperaw inklużi fil-kampjun ma bbenefikawx mill-appoġġ għat-trobbija tat-troti fl-imfaqas protetti mill-mard matul l-PIR.

(45)

Matul l-PIR, ingħata appoġġ għat-trobbija tal-ħut fi produzzjoni tas-sistema magħluqa (19) abbażi tad-Digriet 1691 u l-Communiqué 56, fejn it-trota kienet waħda mill-ispeċi koperti. L-ammont ta’ sussidju ġie stabbilit għal 1,50 TL/kg għall-produzzjoni sa limitu ta’ 350 000 kg fis-sena.

(46)

Il-Kummissjoni qieset li tali appoġġ (fil-forma ta’ għotja diretta) kien jikkostitwixxi sussidji għall-produzzjoni tat-trota simili għal sussidji diretti, jiġifieri kontribuzzjoni finanzjarja li tagħti benefiċċju skont l-Artikoli 3 (1)(a)(i) u 3(2) tar-Regolament bażiku. Peress li l-appoġġ ingħata lill-produtturi tat-trota (waħda mill-ispeċi koperti), il-Kummissjoni kkonkludiet li l-iskema kienet speċifika skont it-tifsira tal-Artikolu 4(2)(a) tar-Regolament bażiku. Il-benefiċċju kien jikkonsisti f’għotjiet diretti lill-produtturi tat-trota li jissodisfaw il-kriterji ta’ eliġibbiltà. Għalhekk, il-Kummissjoni kkonkludiet li l-appoġġ seta’ jitqies bħala sussidju kompensabbli.

(47)

Il-Kummissjoni stabbiliet li ż-żewġ produtturi esportaturi inklużi fil-kampjun ukoll ma bbenefikawx mill-appoġġ meta użaw produzzjoni tas-sistema magħluqa matul l-PIR.

(48)

Matul l-PIR, ingħata appoġġ għat-trobbija tal-ħut f’għadajjar tal-ħamrija abbażi tad-Digriet 1691 u l-Communiqué 56. L-ammont ta’ sussidju ġie stabbilit għal 1,50 TL/kg għall-produzzjoni sa limitu ta’ 300 000 kg fis-sena. Tali appoġġ jingħata lill-produtturi li jużaw l-ilma ta’ taħt l-art miksub mill-elettriku jew ilma tan-nixxiegħa miksub mingħajr ma jużaw l-enerġija biex jagħmlu attivitajiet ta’ tnissil f’għadajjar tal-ħamrija l-aktar għall-konsum domestiku. Dawn il-produtturi jistgħu ma jibbenefikawx mill-iskemi msemmija fil-punti 3.1.1 u 3.1.4 hawn fuq.

(49)

Il-Kummissjoni kkonkludiet li tali appoġġ seta’ eventwalment jitqies bħala sussidju kompensabbli għall-produtturi tal-prodott ikkonċernat, iżda fi kwalunkwe każ ma kienx disponibbli għall-produtturi esportaturi inklużi fil-kampjun, peress li diġà rċevew appoġġ għall-produzzjoni tat-trota skont il-punt 3.1.1 hawn fuq.

(50)

Matul l-PIR, il-pagamenti ta’ appoġġ għal servizzi ta’ pubblikazzjoni u ta’ konsultazzjoni agrikoli ngħataw abbażi tad-Digriet 1691 u l-Communiqué 56. Skont l-Artikolu 6(7) tad-Digriet 1691, l-appoġġ ingħata direttament lill-intrapriżi li jipprovdu servizzi ta’ konsultazzjoni u mhux lill-produtturi tal-akkwakultura.

(51)

Matul l-investigazzjoni oriġinali, l-appoġġ għal pagamenti għal servizzi ta’ pubblikazzjoni u ta’ konsultazzjoni agrikoli (20) ngħata direttament lill-produtturi tat-trota. Madankollu, l-investigazzjoni attwali sabet li tali appoġġ issa huwa pprovdut direttament lill-intrapriżi li jipprovdu servizzi ta’ konsultazzjoni. Għalhekk, il-Kummissjoni kkonkludiet li l-iskema ma tat l-ebda benefiċċju lill-produtturi esportaturi inklużi fil-kampjun u għalhekk ma kinitx kompensatorja.

(52)

L-investigazzjoni stabbiliet li l-pagamenti ta’ appoġġ għar-rimi tal-bastimenti tas-sajd intemmu fl-2018.

(53)

Wara d-divulgazzjoni, il-GOT u ż-żewġ produtturi esportaturi fil-kampjun ikkummentaw li, fir-rigward tal-kalkolu tas-sussidju indirett, il-metodoloġija applikata mill-Kummissjoni fir-rieżami attwali ma kinitx konformi mal-metodoloġija applikata fl-investigazzjoni oriġinali. Jiġifieri, fl-investigazzjoni oriġinali l-benefiċċju għat-troti mixtrija ġie kkalkulat billi s-sussidji totali mogħtija mill-awtoritajiet Torok ġew diviżi bl-ammont tal-produzzjoni totali tat-troti fit-Turkija u mhux bl-ammont ta’ produzzjoni ta’ troti sussidjata fit-Turkija.

(54)

Għalhekk, il-Kummissjoni rrieżaminat il-kalkolu tal-ammont ta’ sussidju indirett ikkalkulat fir-rigward tat-trota mixtrija miż-żewġ produtturi esportaturi fil-kampjun minn fornituri mhux relatati biex tallinjah mal-metodoloġija użata fl-investigazzjoni oriġinali. Barra minn hekk, wara d-divulgazzjoni addizzjonali, il-produtturi esportaturi fil-kampjun enfasizzaw żball fir-rata għat-tnaqqis tat-tariffi mħallsa lill-assoċjazzjonijiet tal-impriżi. Madankollu, filwaqt li l-Kummissjoni qablet mal-pretensjoni, il-korrezzjoni ma kellha l-ebda impatt materjali fuq l-ammonti totali ta’ sussidju.

(55)

Iż-żewġ produtturi esportaturi fil-kampjun ikkummentaw ukoll dwar il-metodoloġija tal-kalkolu tas-sussidju dirett. Huma sostnew li mhux it-troti kollha li għalihom ġew riċevuti sussidji diretti fil-fatt inbiegħu matul il-PIR. Fil-fehma tagħha, il-Kummissjoni jenħtieġ li tqis il-livelli tal-istokk tal-kumpaniji, u tillimita l-benefiċċju għall-kwantità tal-bejgħ esportata lejn l-Unjoni minn dawn il-produtturi esportaturi fil-PIR.

(56)

Ta’ min jinnota li l-ammonti ta’ sussidju ġew riċevuti abbażi tal-volumi tal-produzzjoni tat-troti, irrispettivament minn jekk din il-produzzjoni hijiex sussegwentement mibjugħa jew le matul il-PIR. It-talbiet tal-produtturi esportaturi ġew għalhekk rifjutati.

(57)

Meta jitqiesu l-kummenti li saru mill-partijiet interessati, l-ammonti ta’ sussidju dirett u indirett stabbiliti matul il-PIR għaż-żewġ produtturi esportaturi fil-kampjun kienu 2,38 % għal Özpekler u 2,84 % għal GMS.

(58)

L-ammonti totali ta’ sussidju stabbiliti fir-rigward tal-għotjiet kollha riċevuti matul l-PIR għaż-żewġ produtturi esportaturi inklużi fil-kampjun kienu kif ġej:

Tabella 1

Għotjiet

(59)

Il-Communiqué Ġenerali dwar il-Lista tat-Taxxa fuq il-Konsum Speċjali Nru 1 (21) jidentifika l-prinċipji u l-kundizzjonijiet ewlenin għar-ribass tat-taxxa fuq il-konsum tal-fjuwil tal-bastimenti. Il-bastimenti tas-sajd li huma rreġistrati mar-Reġistru Internazzjonali tal-Bastimenti tat-Turkija jew mar-Reġistru Nazzjonali tal-Bastimenti jistgħu jibbenefikaw miż-żejt diżil għal użu marittimu speċjali bla taxxa fuq il-konsum.

(60)

L-investigazzjoni kkonfermat li l-appoġġ għall-bastimenti tas-sajd għax-xiri tal-fjuwil x’aktarx ma jkunx ta’ benefiċċju għall-produtturi tal-prodott ikkonċernat u, tabilħaqq, ma kienx ta’ benefiċċju għaż-żewġ produtturi esportaturi li kkooperaw inklużi fil-kampjun fir-rigward tal-produzzjoni tagħhom tat-trota. Għalhekk, il-Kummissjoni kkonkludiet li tali appoġġ ma setax jitqies bħala sussidju kompensabbli għall-produtturi tal-prodott ikkonċernat.

(61)

Id-Digriet Nru 2012/3305 (22) u l-Communiqué ta’ implimentazzjoni Nru 2012/1 (23) jipprovdu l-bażi għall-appoġġ mill-Istat għall-investimenti fis-settur tal-akkwakultura (24) u jikkostitwixxu l-bażi tal-Programm ta’ Inċentivi għall-Investiment tat-Turkija. Dan jinkludi żewġ skemi ta’ inċentivi:

(62)

Il-kumpaniji li ma jistgħux jissodisfaw il-kriterji tal-ammont minimu ta’ investiment skont l-iskema ta’ inċentivi għall-investiment reġjonali jistgħu jibbenefikaw mill-iskema ta’ inċentivi għall-investimenti ġenerali, li hija disponibbli għas-sitt reġjuni kollha definiti fid-digriet 2012/3305. Abbażi tal-livell ta’ żvilupp ekonomiku tas-sitt reġjuni l-intensità tal-għajnuna tista’ tvarja. Kemm id-Digriet kif ukoll il-Communiqué għadhom validi, u s-sitt reġjuni ma nbidlux mill-investigazzjoni oriġinali.

(63)

Matul l-PIR, GMS ibbenefikat minn tnaqqis fit-taxxa fuq l-introjtu u Özpekler minn eżenzjonijiet mill-VAT u mid-dazju doganali skont l-inċentivi ta’ investiment reġjonali. Kif ikkonfermat fl-investigazzjoni oriġinali (25), l-appoġġ għall-investimenti jitqies bħala sussidju skont it-tifsira tal-Artikolu 3(1)(a)(ii) u l-Artikolu 3(2) tar-Regolament bażiku, meta l-appoġġ jieħu l-forma ta’ inċentiv fiskali, jiġifieri meta d-dħul tal-gvern ikun dovut mod ieħor iżda fil-fatt ikun mitluf jew ma jinġabarx.

(64)

Is-sussidju huwa speċifiku u kompensabbli peress li l-benefiċċju tas-sussidju huwa speċifikament limitat għal lista ta’ reġjuni. L-aċċess għas-sussidju huwa limitat aktar għal ċerti intrapriżi li joperaw f’ċerti setturi. Barra minn hekk, is-sussidju ma jissodisfax ir-rekwiżiti ta’ nuqqas ta’ speċifiċità tal-Artikolu 4(2)(b) tar-Regolament bażiku, minħabba n-numru u l-kwalità tar-restrizzjonijiet applikabbli għal ċerti setturi, b’mod partikolari dawk li jirrestrinġu l-aċċess għas-sussidju għal ċerti tipi ta’ intrapriżi jew jeskludu kompletament ċerti setturi.

(65)

L-akkwakultura hija espressament indikata fl-Anness 2A tad-Digriet 2012/3305 bħala waħda mill-attivitajiet li jistgħu jibbenefikaw minn dan it-tip ta’ eżenzjonijiet mit-taxxa. L-Anness 4 tad-Digriet jelenka s-setturi li jistgħu ma jibbenefikawx minn xi wieħed mill-inċentiv taħt din l-iskema.

(66)

Sabiex jiġi stabbilit l-ammont tas-sussidju kompensabbli, il-benefiċċju mogħti lir-riċevituri matul il-perjodu ta’ investigazzjoni tar-rieżami ġie kkalkolat bħala d-differenza bejn it-taxxa totali pagabbli skont ir-rata normali tat-taxxa u t-taxxa totali pagabbli skont ir-rata mnaqqsa tat-taxxa. Madankollu, instab li l-benefiċċju għal Özpekler kien negliġibbli. L-ammont ta’ sussidju stabbilit matul il-perjodu ta’ investigazzjoni tar-rieżami għal GMS kien ta’ 0,7 %.

(67)

Iż-żewġ produtturi esportaturi fil-kampjun ikkummentaw ukoll dwar l-appoġġ għall-investimenti li saru. Huma sostnew li l-Kummissjoni ma kellhiex tikkalkula l-benefiċċju għall-eżenzjoni mill-VAT, peress li l-kumpaniji kollha jpaċu l-VAT tagħhom fl-istess xahar jew fix-xhur li ġejjin skont il-VAT pagabbli u l-bilanċ riċevibbli tal-kumpanija. L-uniku benefiċċju għall-kumpanija kien l-abbiltà li tevita l-ħlas bil-quddiem tal-VAT.

(68)

Il-fatt li minn perspettiva kontabilistika, l-ammonti pagabbli tal-VAT jiġu paċuti ma’ ammonti riċevuti, ma jneħħix il-benefiċċju f’termini ta’ fluss ta’ flus, li jirriżulta mill-fatt li l-produtturi esportaturi ma jkollhomx għalfejn iħallsu flus bil-quddiem, u mbagħad jistennew li jirċievu rifużjoni mill-awtoritajiet tat-taxxa abbażi tal-ipproċessar tad-dikjarazzjonijiet tal-VAT tagħhom ta’ kull xahar, kif inhu l-każ għall-kumpaniji li ma jibbenefikawx mill-iskema. Tabilħaqq, kif ikkonfermat mill-produtturi esportaturi nfushom, “l-uniku benefiċċju li l-parteċipanti għandhom mill-iskema huwa l-kapaċità li jiġi evitat (il-) pagament tal-VAT... li kumpaniji oħra li ma għandhomx Ċertifikat ta’ Inċentiv tal-Investiment għandhom inizjalment jagħmlu u aktar tard jiġu kkreditati” (26). It-talbiet tal-produtturi esportaturi ġew għalhekk rifjutati.

(69)

Skont il-Liġi dwar l-Assigurazzjoni Agrikola Nru 5363 (27) u d-Digriet Nru 2018/380 (28) dwar ir-riskji, l-għelejjel u r-reġjuni li għandhom jiġu koperti mill-Grupp tal-Assigurazzjoni Agrikola u r-Rati ta’ Appoġġ tal-Primjum għas-sena 2019, il-produtturi tal-prodotti tal-akkwakultura jistgħu jibbenefikaw minn primjum tal-assigurazzjoni mnaqqas li jkopri t-telf tal-istokk ta’ ħut u l-ħsad tat-trota minħabba mard numeruż possibbli, diżastri naturali, inċidenti, eċċ. L-appoġġ tal-ammonti GOT jammonta għal 50 % tal-primjum tal-assigurazzjoni.

(70)

Kif ikkonfermat fl-investigazzjoni oriġinali (29), il-benefiċċju mogħti minn din l-iskema jieħu l-forma ta’ tnaqqis fil-kostijiet finanzjarji mġarrba fil-kopertura tal-assigurazzjoni tal-ħajja tal-produzzjoni tal-akkwakultura. Din l-iskema tikkostitwixxi sussidju skont it-tifsira tal-Artikolu 3(1)(a)(i) tar-Regolament bażiku fil-forma ta’ għotja diretta mill-GOT lill-produtturi tat-trota u kontribuzzjoni finanzjarja minħabba li r-riċevituri tas-sussidju jibbenefikaw minn primjum tal-assigurazzjoni favorevoli, li huwa ferm inqas mil-livell ta’ primjums tal-assigurazzjoni disponibbli fis-suq għall-kopertura ta’ riskji komparabbli. Din l-iskema tikkostitwixxi benefiċċju skont it-tifsira tal-Artikolu 3(2) tar-Regolament bażiku. Il-benefiċċju huwa ugwali għad-differenza bejn il-primjums offruti fil-kuntest ta’ polza tal-assigurazzjoni kummerċjali u l-primjum issussidjat.

(71)

L-appoġġ huwa speċifiku peress li l-awtorità awtorizzanti u l-leġiżlazzjoni li skontha topera l-awtorità awtorizzanti jillimitaw b’mod espliċitu l-aċċess għal dan il-primjum imnaqqas għall-intrapriżi li joperaw fis-settur agrikolu u saħansitra jimmiraw b’mod espliċitu r-riskji mġarrba mill-produtturi tal-akkwakultura.

(72)

Il-Kummissjoni stabbiliet li wieħed mill-produtturi inklużi fil-kampjun, Özpekler, ibbenefika minn din l-iskema. L-ammont ta’ sussidju matul il-perjodu ta’ investigazzjoni tar-rieżami kien ta’ 0,1 %.

(73)

Matul l-investigazzjoni oriġinali, il-Kummissjoni sabet li l-produtturi tat-trota Torok kienu qed jibbenefikaw minn self preferenzjali, bħal:

(74)

L-ewwel, id-Digriet Nru 2018/1188 jipprovdi li Ziraat Bankasi A.S. u l-Kooperattivi tal-Kreditu Agrikolu (“ACCs”) jistgħu jagħtu self b’imgħax baxx u self kummerċjali lill-produtturi tas-settur tal-akkwakultura. Il-produtturi tat-trota jistgħu jirċievu skontijiet fuq ir-rati tal-imgħax applikabbli li jvarjaw bejn 50 % u 100 %. Il-limitu massimu tal-kreditu huwa ta’ 5 000 000 TL. Id-Digriet ikopri perjodu ta’ applikazzjoni mill-1 ta’ Jannar 2018 sal-31 ta’ Diċembru 2019 (inklużi dawn il-jiem).

(75)

L-ACCs elenkati fid-Digriet huma entitajiet tal-liġi privata stabbiliti minn produtturi agrikoli (jiġifieri persuni fiżiċi jew entitajiet ġuridiċi li huma involuti fil-produzzjoni agrikola) fit-Turkija sabiex jappoġġaw il-ħtiġijiet finanzjarji tan-negozju tagħhom.

(76)

Ziraat Bankasi A.S. huwa l-Bank Agrikolu tar-Repubblika tat-Turkija, bank kompletament tal-Istat. Matul l-investigazzjoni oriġinali, l-ishma tiegħu kienu proprjetà tas-Sottosegretarjat tat-Teżor. Madankollu, mill-2018, il-kapital tiegħu ġie ttrasferit lill-Fond ta’ Ġid Tork. F’konformità mal-Artikolu 2 tal-liġi nru 6741 dwar l-Istabbiliment ta’ Kumpanija għall-Ġestjoni tal-Fond ta’ Ġid tat-Turkija u Emendi f’Ċerti Liġijiet, il-Fond ta’ Ġid tat-Turkija huwa istituzzjoni affiljata mal-Presidenza. Il-President tal-Bord tad-Diretturi tal-Fond huwa l-President tar-Repubblika. Wieħed mill-Membri tal-Bord jista’ jiġi assenjat bħala d-Deputat President mill-President tar-Repubblika. Għalhekk Ziraat Bankasi A.S. għadu vestit b’awtorità governattiva u għalhekk jitqies bħala korp pubbliku, minkejja l-bidla formali fis-sjieda tal-kapital tiegħu.

(77)

It-tieni, id-Digriet Nru 2010/27612 (30) jipprovdi li jista’ jingħata self b’rati tal-imgħax żero fil-mija lill-SMEs.

(78)

Matul l-PIR, il-produtturi esportaturi inklużi fil-kampjun li kkooperaw kellhom biss self b’imgħax baxx pendenti minn Ziraat Bankasi A.S., iżda ma użawx self b’imgħax baxx mill-ACCs jew self b’imgħax żero għall-SMEs.

(79)

Kif stabbilit fl-investigazzjoni oriġinali, Türkiye İhracat Kredi Bankası A.Ş (“Eximbank”) inkera mill-GOT fil-21 ta’ Awwissu 1987 bid-Digriet Nru 87/11914, b’segwitu tad-digriet tal-Liġi Nru 3332 (31) dwar il-krediti għall-esportazzjoni, u huwa bank kompletament tal-Istat li jaġixxi bħala l-istrument ta’ inċentiv għall-esportazzjoni tal-GOT fl-istrateġija għall-esportazzjoni tat-Turkija. Eximbank ingħata l-mandat mill-gvern biex jappoġġa l-kummerċ barrani u l-kuntratturi/l-investituri Torok li joperaw barra mill-pajjiż (32), sabiex jiżdiedu l-esportazzjonijiet tan-negozji Torok u tissaħħaħ il-kompetittività internazzjonali tagħhom. Għalhekk, huwa kkunsidrat li Eximbank jingħata awtorità governattiva u għalhekk jitqies bħala korp pubbliku.

(80)

Il-Liġi Nru 3332, kif ukoll ir-Riżoluzzjoni Nru 2013/4286 (33) dwar l-istabbiliment ta’ Eximbank jikkostitwixxu l-bażi ġuridika għall-krediti għall-esportazzjoni pprovduti permezz ta’ Eximbank. Eximbank jipprovdi appoġġ finanzjarju (jew direttament jew permezz ta’ banek tal-aġenti li jaħdmu fuq bażi ta’ kummissjoni), bħal krediti għall-esportazzjoni kontinġenti qabel jew wara l-konsenja u krediti tal-investiment orjentati lejn l-esportazzjoni lill-esportaturi, bl-intenzjoni li tiżdied il-kompetittività tal-esportaturi Torok fi swieq barranin.

(81)

Barra minn hekk, l-hekk imsejħa “krediti ta’ riskontar” jintużaw biex jipprovdu avvanzi ta’ flus lill-esportaturi abbażi tal-iskontar tal-kontijiet u tad-dokumenti relatati mal-bejgħ tal-esportazzjoni. Il-bażi ġuridika għal dawn il-krediti hija l-“Implementation Instructions for Rediscount Credit for Exports and Foreign Exchange Earning Services” (34) . Il-krediti ta’ riskontar huma ffinanzjati mill-Bank Ċentrali tat-Turkija (“CBRT”), iżda jgħaddu mill-istituzzjonijiet finanzjarji Torok (banek pubbliċi kif ukoll privati) li jaġixxu bħala aġenti tas-CBRT. Ir-rati tal-imgħax huma stabbiliti mis-CBRT, u l-banek tal-aġenti jiġu remunerati permezz ta’ kummissjoni imposta fuq ir-riċevituri.

(82)

Matul l-PIR, il-produtturi esportaturi inklużi fil-kampjun li kkooperaw kellhom krediti għall-esportazzjoni b’imgħax baxx pendenti pprovduti jew direttament minn Eximbank jew permezz ta’ banek pubbliċi jew privati oħrajn li jaġixxu bħala aġenti ta' Eximbank. Il-kumpaniji bbenefikaw ukoll minn krediti ta’ riskontar ipprovduti permezz ta’ Eximbank jew permezz ta’ banek pubbliċi jew privati oħrajn.

(83)

Kif ikkonfermat fl-investigazzjoni oriġinali (35), il-finanzjament preferenzjali msemmi hawn fuq (selfiet agrikoli u krediti għall-esportazzjoni) jitqies bħala sussidju skont it-tifsira tal-Artikolu 3(1)(a)(i) u l-Artikolu 3(2) tar-Regolament bażiku.

(84)

Abbażi tas-sejbiet tal-investigazzjoni attwali, il-Kummissjoni kkonkludiet li l-iskemi ta’ finanzjament preferenzjali msemmija hawn fuq jagħtu benefiċċji lir-riċevituri, peress li tali finanzjament jingħata taħt ir-rati tas-suq, jiġifieri b'kundizzjonijiet li ma jirriflettux il-kundizzjonijiet tas-suq għall-finanzjament b’maturità komparabbli.

(85)

Dawn l-iskemi ta’ finanzjament preferenzjali huma speċifiċi skont it-tifsira tal-Artikolu 4(2)(a) tar-Regolament bażiku f’dak li għandu x’jaqsam mas-self agrikolu, peress li l-awtoritajiet awtorizzanti jew il-leġiżlazzjoni li skontha joperaw l-awtoritajiet awtorizzanti tillimita b’mod espliċitu l-aċċess għal ċerti intrapriżi. Il-krediti relatati mal-esportazzjonijiet huma speċifiċi skont l-Artikolu 4(4)(a) tar-Regolament bażiku peress li huma kontinġenti fuq il-prestazzjoni tal-esportazzjoni.

(86)

Għalhekk, l-iskemi ta’ finanzjament preferenzjali kollha msemmija hawn fuq jitqiesu bħala sussidji kompensabbli.

(87)

Wara l-iżvelar, iż-żewġ produtturi esportaturi fil-kampjun ikkummentaw dwar il-metodoloġija tal-kalkolu tas-sussidji kumpensabbli għas-self preferenzjali, filwaqt li sostnew li s-self riċevut minn Eximbank biss kien preferenzjali, filwaqt li s-self riċevut minn banek kummerċjali oħra kien fiil-kundizzjonijiet tas-suq, anki jekk ir-rata tal-imgħax reali kienet aktar baxxa mill-punt ta’ riferiment użat mill-Kummissjoni. B’konsegwenza ta’ dan, skont il-produtturi esportaturi, ir-rata tal-imgħax aktar baxxa riċevuta ma għamlitx dan is-self kompensabbli.

(88)

Kif spjegat fil-premessa (80), din l-investigazzjoni kkonfermat li l-krediti għall-esportazzjoni ġew ipprovduti mhux biss direttament minn Eximbank, iżda wkoll permezz ta’ banek pubbliċi jew privati oħra li jaġixxu bħala aġenti ta’ Eximbank. Barra minn hekk, is-sett ta’ kundizzjonijiet stabbiliti fil-premessi minn (83) sa (85) ikkonferma li dan is-self huwa kompensabbli. Addizzjonalment, kif spjegat fil-premessa (81), il-krediti ta’ riskontar kienu ffinanzjati mis-CBRT, iżda għaddew mill-istituzzjonijiet finanzjarji Torok (banek pubbliċi kif ukoll privati) li jaġixxu bħala aġenti tas-CBRT.

(89)

Il-Kummissjoni rrieżaminat fid-dettall is-self iddikjarat bħala mhux preferenzjali mill-kumpaniji fil-kampjun. Madankollu, l-informazzjoni pprovduta ma kinitx biżżejjed biex jiġi konkluż li dan is-self ma kienx relatat mal-iskemi preferenzjali. Fil-fatt, id-dokumentazzjoni ta’ sostenn ipprovduta għal dan is-self matul l-investigazzjoni indikat b’mod ċar il-fatt li l-finanzjament ipprovdut kien marbut ma’ impenji ta’ esportazzjoni. Barra minn hekk, f’ħafna każijiet, ġiet ipprovduta biss ittra bit-Tork mill-kumpanija li talbet fondi mill-banek. Barra minn hekk, il-ftehimiet qafas ġenerali tal-banek dejjem kienu jinkludu artikoli li jorbtu l-krediti għall-esportazzjoni pprovduti mal-prattiki ta’ inċentiv tal-Eximbank u tas-CBRT. It-talbiet tal-produtturi esportaturi ġew għalhekk rifjutati.

(90)

Il-produtturi esportaturi fil-kampjun sostnew ukoll li xi self ma kienx kontinġenti fuq l-esportazzjoni u għalhekk ma kienx kompensabbli. Wara r-rieżami, abbażi tad-dokumentazzjoni ta’ sostenn il-Kummissjoni qablet li xi selfiet la kienu relatati mal-bejgħ tal-esportazzjoni, u lanqas ma kienu jaqgħu taħt is-self agrikolu sussidjat, u għalhekk ma kienux koperti minn ebda skema ta’ sussidju. Il-Kummissjoni għalhekk neħħiet dan is-self mill-kalkolu tal-benefiċċju.

(91)

Wieħed mill-produtturi esportaturi fil-kampjun ipprovda informazzjoni li waħda mis-selfiet riċevuti tiegħu ma kinitx relatata mal-prodott ikkonċernat u li għalhekk ma seta’ jiġi kkalkulat l-ebda benefiċċju għaliha. Il-Kummissjoni rrevediet l-informazzjoni li rċeviet iżda ma setgħetx tikkonferma li l-ambitu tas-selfa kien limitat għal prodotti oħra għajr il-prodott ikkonċernat. It-talbiet tal-produtturi esportaturi ġew għalhekk rifjutati.

(92)

Wara l-iżvelar, kif ukoll wara l-iżvelar addizzjonali, l-istess produttur esportatur fil-kampjun iddikjara li xi selfiet kontinġenti fuq l-esportazzjoni ma kienux relatati biss mal-prodott ikkonċernat, iżda wkoll ma’ ħut ieħor esportat. Il-Kummissjoni rrieżaminat dawn is-selfiet u, abbażi tal-informazzjoni pprovduta mill-kumpanija, setgħet tikkonferma li għal xi wħud mis-selfiet il-kontinġenti fuq l-esportazzjoni ddikjarat kien relatat ma’ tipi differenti ta’ ħut esportat. Għalhekk, il-kalkoli ġew adattati skont dan.

(93)

Barra minn hekk, il-produtturi esportaturi fil-kampjun argumentaw li l-Kummissjoni jenħtieġ li tqis ir-rata normattiva tal-imgħax fl-eqreb data qabel jew wara d-data tal-bidu tas-selfa. F’dan ir-rigward, il-Kummissjoni nnotat li d-data tal-parametri referenzjarji pprovduta minn ċerta data titqies bħala valida minn dik id-data sal-pubblikazzjoni ta’ data ġdida. Għalhekk, il-Kummissjoni qieset b’mod sistematiku l-parametri referenzjjari dwar l-eqreb data qabel id-data tal-bidu tas-self. Għaldaqstant din it-talba ġiet irrifjutata.

(94)

Iż-żewġ produtturi esportaturi fil-kampjun enfasizzaw ukoll għadd ta’ żbalji klerikali fil-kalkolu tas-sussidji kompensabbli għas-self preferenzjali fir-rigward tar-ripagamenti kapitali fil-PIR, l-għadd ta’ jiem li għandhom jitqiesu għall-kalkolu tal-imgħax fil-PIR u r-rati tnormatitivi tal-imgħax magħżula f’dati żbaljati. Dawn l-iżbalji klerikali ġew ikkoreġuti. Wara d-iżvelar addizzjonali, produttur esportatur wieħed fil-kampjun talab li jagħmel bidliet minuri addizzjonali fi tliet selfiet. Selfa waħda ġiet ikkoreġuta. Madankollu, peress li l-benefiċċju fuq iż-żewġ selfiet l-oħra kien diġà tneħħa abbażi ta’ korrezzjonijiet preċedenti, l-ebda bidla ulterjuri ma tqieset neċessarja.

(95)

Meta jitqiesu l-kummenti li saru mill-partijiet interessati, l-ammonti ta’ sussidju fir-rigward tal-iskemi ta’ finanzjament preferenzjali stabbiliti matul il-PIR għaż-żewġ produtturi esportaturi fil-kampjun kienu 0,75 % għal Özpekler u 0,72 % għal GMS.

(96)

F’konformità mal-Artikolu 6(b) tar-Regolament bażiku, il-benefiċċju fuq il-finanzjament preferenzjali ġie kkalkolat bħala d-differenza bejn l-ammont tal-imgħax imħallas u l-ammont li jkollu jitħallas għal self kummerċjali komparabbli. Bħala parametru referenzjarju, il-Kummissjoni applikat ir-rata medja ponderata tal-imgħax tas-self kummerċjali fis-suq domestiku Tork, abbażi ta’ data miksuba mis-CBRT (36). Il-Kummissjoni allokat il-benefiċċju relatat mal-krediti għall-esportazzjoni fuq il-bejgħ tal-esportazzjoni filwaqt li s-self agrikolu ġie allokat fuq il-bejgħ totali.

(97)

L-ammonti tas-sussidju kkalkolati għall-produtturi esportaturi inklużi fil-kampjun ibbażati fuq din il-metodoloġija huma kif ġej:

Tabella 2

Finanzjament preferenzjali

(98)

Abbażi tal-kunsiderazzjonijiet ta’ hawn fuq, il-Kummissjoni sabet li l-ammont aggregat ta’ sussidji kompensabbli f’konformità mad-dispożizzjonijiet tar-Regolament bażiku, espress ad valorem, għall-produtturi esportaturi inklużi fil-kampjun kien ta’ 4,2 % u 3,2 % rispettivament, u b’hekk juri kontinwazzjoni ta’ sussidjar matul il-perjodu ta’ investigazzjoni tar-rieżami.

Tabella 3

Rati għas-sussidji kompensabbli individwali

(99)

F’konformità mal-Artikolu 18(2) tar-Regolament bażiku, ġie eżaminat jekk l-iskadenza tal-miżuri fis-seħħ hijiex probabbli li twassal għal kontinwazzjoni ta’ sussidjar.

(100)

Kif stabbilit fil-premessi minn (33) sa (97), ġie stabbilit li matul il-perjodu tal-investigazzjoni tar-rieżami, il-prodotturi esportaturi Torok tal-prodott ikkonċernat komplew jiksbu benefiċċju mis-sussidjar kompensabbli mill-awtoritajiet Torok.

(101)

Il-programmi ta’ sussidju jagħtu benefiċċji rikorrenti u ma hemm l-ebda indikazzjoni li dawn il-benefiċċji se jiġu eliminati b’mod gradwali fil-futur prevedibbli. Barra minn hekk, l-esportaturi tipikament huma eliġibbli għal diversi sussidji.

(102)

Ġie eżaminat ukoll jekk l-esportazzjonijiet lejn l-Unjoni jsirux f’volumi sinifikanti jekk jitneħħew il-miżuri.

(103)

It-Turkija hija produttur kbir tal-prodott ikkonċernat. Abbażi tad-data miġbura matul l-investigazzjoni, u kif deskritt fil-premessa (165), it-Turkija pproduċiet 95 000 tunnellata ta’ trota matul il-perjodu ta’ investigazzjoni tar-rieżami (37). Kif imsemmi fil-premessa (112), il-volumi tal-importazzjonijiet tat-trota mit-Turkija lejn l-Unjoni kienu sostanzjali, b’madwar 20 500 tunnellata ekwivalenti ta’ ħut sħiħ fl-istess perjodu, li jirrappreżentaw madwar 14 % tas-suq tal-Unjoni. Ma kien hemm l-ebda indikazzjoni li dawn il-volumi se jonqsu jekk jitneħħew il-miżuri.

(104)

F’dawn iċ-ċirkostanzi, hemm probabbiltà kbira li l-volumi tal-esportazzjonijiet issussidjati tal-prodott ikkonċernat lejn l-Unjoni, li kienu diġà sinifikanti matul il-perjodu tal-investigazzjoni tar-rieżami, ikomplu f’volumi sostanzjali jekk il-miżuri jitħassru. Għalhekk, il-Kummissjoni kkonkludiet li kien hemm probabbiltà ta’ kontinwazzjoni ta’ sussidjar.

(105)

Il-prodott simili kien manifatturat minn aktar minn 700 produttur fl-Unjoni matul il-perjodu ta’ investigazzjoni tar-rieżami. Dawn jikkostitwixxu l-“industrija tal-Unjoni” skont it-tifsira tal-Artikolu 8(1) tar-Regolament bażiku.

(106)

Il-produzzjoni totali tal-Unjoni matul il-perjodu ta’ investigazzjoni ġiet stmata għal madwar 129 miljun kg “ekwivalenti ta’ ħut sħiħ”, abbażi tad-data pprovduta mill-applikant u mill-kumpaniji individwali inklużi fil-kampjun. It-tmien produtturi tal-Unjoni li kkoopperaw magħżula fil-kampjun kienu jirrappreżentaw 13 % tal-produzzjoni totali tal-Unjoni tal-prodott simili.

(107)

Il-konsum tal-Unjoni ġie stabbilit billi żdied il-volum totali stmat tal-bejgħ tal-industrija tal-Unjoni fis-suq tal-Unjoni (ara l-premessa (118)) u l-volum totali tal-importazzjonijiet kif identifikat mill-Eurostat (ara l-premessa (91) u t-Tabelli 6 u 8).

(108)

Il-volum tal-importazzjonijiet fil-Eurostat huwa rrapportat f’piżijiet netti għal sitt kodiċijiet NM differenti, jiġifieri ħaj, frisk, imkessaħ, iffriżat u/jew affumikat fil-forma ta’ ħut sħiħ u/jew imsewwi jew flettijiet. Il-piż nett irreġistrat fil-Eurostat ġie kkonvertit f’“ekwivalenti ta’ ħut sħiħ” għal finijiet ta’ tqabbil, peress li d-data dwar il-produzzjoni u l-bejgħ tal-industrija tal-Unjoni ġiet irrapportata f’WFE. Dan sar billi l-volum tal-importazzjonijiet irreġistrat fl-Eurostat ġie diviż bil-fatturi ta’ konverżjoni ta’ hawn taħt. Il-fatturi ta’ konverżjoni użati kienu dawk ipprovduti mill-applikant u użati fl-investigazzjoni oriġinali:

Tabella 4

Fatturi ta’ konverżjoni (f’tunnellati ta’ WFE)

(109)

Il-konsum tal-Unjoni żviluppa kif ġej:

Tabella 5

Konsum tal-Unjoni (tunnellati metriċi)

(110)

Il-konsum tal-Unjoni varja ftit matul il-perjodu kkunsidrat. B’mod ġenerali, il-konsum tal-Unjoni naqas bi 2 % matul il-perjodu kkunsidrat, u b’hekk għadda minn 150 175 tunnellata ta’ WFE fl-2016 għal 147 603 tunnellata ta’ WFE fil-PIR.

(111)

Il-Kummissjoni stabbiliet il-volum u s-sehem mis-suq tal-importazzjonijiet abbażi tal-Eurostat espressi f’tunnellati ta’ WFE kif indikat fil-premessa (92). Is-sehem mis-suq tal-importazzjonijiet ġie stabbilit abbażi tal-volum tal-importazzjonijiet u l-konsum totali tal-Unjoni.

(112)

Abbażi ta’ dan, l-importazzjonijiet fl-Unjoni mit-Turkija u s-sehem mis-suq tagħhom żviluppaw kif ġej:

Tabella 6

Volum ta' importazzjoni (f'tunnellati metriċi) u s-sehem mis-suq

(113)

Il-volum tal-importazzjonijiet mit-Turkija naqas b’mod stabbli bejn l-2016 u l-2018 u reġa’ żdied fil-PIR. Kumplessivament, il-volum tal-importazzjonijiet naqas b’6 % matul il-perjodu kkunsidrat, b’rata ferm aktar baxxa mill-importazzjonijiet minn pajjiżi oħrajn li naqsu bi 13 % matul l-istess perjodu (ara l-premessa (106)). Il-volumi tal-importazzjonijiet tat-trota mit-Turkija kienu għadhom sostanzjali għal 20 446 tunnellata ta’ WFE fil-PIR.

(114)

Is-sehem mis-suq segwa l-istess xejra bħall-volum tal-importazzjonijiet, jiġifieri naqas bejn l-2016 u l-2018 minn 14,4 % għal 11,4 %, jiġifieri bi 3 punti perċentwali, u mbagħad reġa’ żdied fil-PIR għal 13,9 %. L-importazzjonijiet Torok żammew sehem mis-suq pjuttost stabbli b’mod ġenerali matul il-perjodu kkunsidrat, bl-eċċezzjoni tal-2018 fejn naqsu b’1,9 punt perċentwali meta mqabbel mal-2017.

(115)

Il-Kummissjoni stabbiliet il-prezzijiet medji tal-importazzjonijiet abbażi tal-Eurostat billi ddividiet il-volum totali tal-importazzjonijiet Torok espressi f’tunnellata ta’ WFE bil-valur totali ta’ dawk l-importazzjonijiet.

(116)

Abbażi ta’ dan, il-prezz medju ponderat tal-importazzjonijiet lejn l-Unjoni mit-Turkija żviluppa kif ġej:

Tabella 7

Prezzijiet tal-importazzjoni (EUR/tunnellata ta' WFE)

(117)

Il-prezz tal-importazzjonijiet mit-Turkija naqas bejn l-2016 u l-2018 b’5 % u mbagħad żdied bi 3,5 % fil-perjodu ta’ investigazzjoni tar-rieżami. Kumplessivament, il-prezz tal-importazzjonijiet mit-Turkija naqas bi 2 % matul il-perjodu kkunsidrat. Meta mqabbel mal-prezzijiet tal-bejgħ tal-Unjoni, kif imsemmija fit-Tabella 12, il-prezz tal-importazzjonijiet mit-Turkija kien ferm inqas mill-prezzijiet tal-Unjoni matul il-perjodu kollu kkonċernat.

(118)

Il-Kummissjoni ddeterminat it-twaqqigħ tal-prezz matul il-perjodu ta’ investigazzjoni tar-rieżami billi qabblet:

(119)

It-tqabbil tal-prezzijiet sar abbażi tat-tip għat-tranżazzjonijiet fl-istess livell ta’ kummerċ, b’aġġustament dovut fejn meħtieġ, u wara tnaqqis tar-rifużjonijiet u tal-iskontijiet. Ir-riżultat tat-tqabbil ġie espress bħala perċentwal tal-fatturat tal-produtturi tal-Unjoni matul il-perjodu ta’ investigazzjoni tar-rieżami. Dan wera marġni medju ponderat tat-twaqqigħ tal-prezz ta’ bejn 13,7 % u 32,2 % mill-importazzjonijiet mit-Turkija fis-suq tal-Unjoni.

(120)

Matul il-PIR, il-marġni medju ponderat tat-twaqqigħ tal-prezz kien ta’ 14,5 % (bid-dazji kompensatorji inklużi).

(121)

L-importazzjonijiet tat-trota minn pajjiżi terzi għajr it-Turkija kienu prinċipalment min-Norveġja u mill-Bożnija-Ħerzegovina.

(122)

Kif deskritt fil-premessa (108), il-volum tal-importazzjonijiet fl-Unjoni minn pajjiżi terzi oħrajn kif irrapportat fil-Eurostat ġie espress f’tunnellati ta’ WFE. Abbażi ta’ dan, il-volum tal-importazzjonijiet kif ukoll is-sehem mis-suq u x-xejriet tal-prezzijiet għall-importazzjonijiet tat-trota minn pajjiżi terzi oħrajn żviluppaw kif ġej:

Tabella 8

Importazzjonijiet minn pajjiżi terzi

(123)

Il-volumi tal-importazzjonijiet minn pajjiżi terzi oħrajn kienu baxxi matul il-perjodu kkunsidrat u b’mod ġenerali naqsu bi ftit minn 2 432 tunnellata fl-2016 għal 2 118-il tunnellata fil-perjodu ta’ investigazzjoni tar-rieżami, jiġifieri tnaqqis ta’ 13 % matul il-perjodu kkunsidrat. Is-sehem mis-suq korrispondenti baqa’ taħt it-2 % matul il-perjodu kollu kkunsidrat u b’mod ġenerali naqas minn 1,6 % għal 1,4 %. B’mod ġenerali, il-prezzijiet tal-importazzjonijiet tal-pajjiżi terzi żdiedu bi 2 % matul il-perjodu kkunsidrat u bħala medja kienu ogħla b’mod konsiderevoli mill-prezzijiet tal-importazzjonijiet mill-pajjiż ikkonċernat (15 % ogħla fil-PIR).

(124)

Il-valutazzjoni tas-sitwazzjoni ekonomika tal-industrija tal-Unjoni kienet tinkludi evalwazzjoni tal-indikaturi ekonomiċi kollha li influwenzaw l-istat tal-industrija tal-Unjoni matul il-perjodu kkunsidrat.

(125)

Kif imsemmi fil-premessa (15), il-kampjunar intuża għall-valutazzjoni tas-sitwazzjoni ekonomika tal-industrija tal-Unjoni.

(126)

Biex tiddetermina d-dannu, il-Kummissjoni għamlet distinzjoni bejn l-indikaturi tad-dannu makroekonomiċi u dawk mikroekonomiċi. Il-Kummissjoni evalwat l-indikaturi makroekonomiċi abbażi tad-data pprovduta mill-applikant u l-kumpaniji individwali inklużi fil-kampjun, li kienu relatati mal-produtturi tal-Unjoni kollha relatati. Il-Kummissjoni evalwat l-indikaturi mikroekonomiċi fuq il-bażi tad-data li tinsab fit-tweġibiet mill-produtturi tal-Unjoni inklużi fil-kampjun, li kienet elatata mal-produtturi tal-Unjoni fil-kampjun. Iż-żewġ settijiet ta’ data nstabu li kienu rappreżentattivi tas-sitwazzjoni ekonomika tal-industrija tal-Unjoni.

(127)

L-indikaturi makroekonomiċi huma: il-produzzjoni, il-kapaċità tal-produzzjoni, l-użu tal-kapaċità, il-volum tal-bejgħ, is-sehem mis-suq, it-tkabbir, l-impjiegi, il-produttività, id-daqs tal-marġni ta’ sussidju u l-irkupru minn sussidju preċedenti.

(128)

L-indikaturi mikroekonomiċi huma: il-prezzijiet unitarji medji, il-kost unitarju, il-kostijiet lavorattivi, l-inventarji, il-profittabbiltà, il-fluss tal-flus, l-investimenti, ir-redditu fuq l-investimenti u l-kapaċità li jiġi ġġenerat il-kapital.

(129)

Il-volum tal-produzzjoni tal-industrija tal-Unjoni nkiseb mill-applikant abbażi tad-data tar-Rapport tal-Federazzjoni tal-Produtturi Ewropej tal-Akkwakultura (Federation of European Aquaculture Producers, “FEAP”). (38) Id-data tal-FEAP tinġabar fuq bażi ex-farm u tirreferi għal ħut ħaj imrobbi f’kull Stat Membru. Id-data għall-perjodu ta’ investigazzjoni tar-rieżami kienet koperta wkoll mir-rapport tal-FEAP.

(130)

Abbażi ta’ dan, il-produzzjoni totali tal-Unjoni, il-kapaċità tal-produzzjoni u l-użu tal-kapaċità żviluppaw kif ġej matul il-perjodu kkunsidrat:

Tabella 9

Produzzjoni, kapaċità tal-produzzjoni u użu tal-kapaċità

(131)

Il-volum tal-produzzjoni varja matul il-perjodu kkunsidrat. Filwaqt li naqas bejn l-2016 u l-2017 b’1 %, dan żdied bejn l-2017 u l-2018 bi 8 %, u mbagħad reġa’ naqas fil-perjodu ta’ investigazzjoni tar-rieżami b’10 %. B’mod ġenerali, il-volum tal-produzzjoni naqas bi 3 % matul il-perjodu kkunsidrat.

(132)

Il-kapaċità tal-produzzjoni (39) segwiet xejra simili għall-volum tal-produzzjoni; din naqset b’4 % mill-2016 sal-2017, żdiedet fl-2018 bi 8 % u reġgħet naqset fil-perjodu ta’ investigazzjoni tar-rieżami b’7 %. B’mod ġenerali, din żdiedet bi 2 % matul il-perjodu kkunsidrat.

(133)

L-użu tal-kapaċità baqa’ relattivament stabbli u b’mod ġenerali naqas bi 2 % fil-perjodu kkunsidrat.

(134)

Il-volum ta’ bejgħ tal-industrija tal-Unjoni ġie stabbilit abbażi tal-informazzjoni pprovduta mill-applikant billi tnaqqas il-volum ta’ bejgħ għall-esportazzjoni tal-industrija tal-Unjoni mill-volum totali tal-produzzjoni tal-industrija tal-Unjoni, kif deskritt fil-premessi minn (129) sa (130).

(135)

Abbażi ta’ dan, il-volum ta’ bejgħ u s-sehem mis-suq tal-industrija tal-Unjoni żviluppaw kif ġej matul il-perjodu kkunsidrat:

Tabella 10

Volum ta’ bejgħ u s-sehem mis-suq

(136)

Il-volum ta’ bejgħ naqas ftit b’1 % matul il-perjodu kkunsidrat. L-ewwel baqa’ stabbli bejn l-2016 u l-2017 u mbagħad żdied b’9 % bejn l-2017 u l-2018, filwaqt li naqas b’10 % fil-perjodu ta’ investigazzjoni tar-rieżami, u laħaq livelli aktar baxxi mill-2016. It-tnaqqis parallel fil-konsum deskritt fil-premessa (110), wassal għal żieda żgħira fis-sehem mis-suq tal-industrija tal-Unjoni minn 84 % fl-2016 għal 85 % fil-perjodu ta’ investigazzjoni tar-rieżami, jiġifieri żieda ta’ 1 % matul il-perjodu kkunsidrat.

(137)

Filwaqt li l-konsum tal-Unjoni żdied bi 2 % matul il-perjodu kkunsidrat, il-volum ta’ bejgħ tal-industrija tal-Unjoni naqas b’1 % li sarraf f’żieda fis-sehem mis-suq ta’ 1 %.

(138)

L-impjiegi u l-produttività żviluppaw kif ġej matul il-perjodu kkunsidrat:

Tabella 11

Impjiegi u produttività

(139)

L-impjiegi tal-industrija tal-Unjoni varjaw matul il-perjodu kkunsidrat, u naqsu bejn l-2016 u l-2017 bi 8 %, u mbagħad reġgħu żdiedu bi 8 % fl-2018 u finalment naqsu bi 2 % bejn l-2018 u l-perjodu ta’ investigazzjoni tar-rieżami. B’mod ġenerali naqsu bi 2 %.

(140)

Il-produttività naqset bi ftit minħabba l-kombinazzjoni ta’ tnaqqis fl-impjiegi u tnaqqis saħansitra aktar mgħaġġel fil-volum tal-produzzjoni kif spjegat fil-premessa (115).

(141)

Il-marġnijiet tas-sussidju stabbiliti matul il-perjodu ta’ investigazzjoni tar-rieżami kienu ferm ogħla mil-livell de minimis kif iddikjarat fil-premessa (98). L-impatt tad-daqs tal-marġnijiet rewali tas-sussidju fuq l-industrija tal-Unjoni kien sostanzjali, fid-dawl tal-volum u l-prezzijiet tal-importazzjonijiet mit-Turkija.

(142)

L-ipprezzar inġust kontinwu mill-produtturi esportaturi mit-Turkija ma ppermettiex lill-industrija tal-Unjoni tirkupra bis-sħiħ mill-prattiki ta’ sussidjar tal-passat.

(143)

Il-prezzijiet medji ponderati tal-bejgħ ta’ unità tal-produtturi tal-Unjoni inklużi fil-kampjun lil klijenti mhux relatati fl-Unjoni żviluppaw kif ġej matul il-perjodu kkunsidrat:

Tabella 12

Prezzijiet u kostijiet tal-bejgħ fl-Unjoni

(144)

Il-prezz medju tal-bejgħ ta' unita tal-industrija tal-Unjoni lil klijenti mhux relatati fl-Unjoni żdied ftit bi 2 % matul il-perjodu kkunsidrat, u laħaq EUR 3 621/ tunnellata ta’ WFE fil-PIR. Dan żdied bi 8 % bejn l-2016 u l-2017 u mbagħad naqas gradwalment sal-perjodu ta’ investigazzjoni tar-rieżami.

(145)

Il-kost unitarju tal-produzzjoni kien ogħla mill-prezz medju tal-bejgħ matul il-perjodu kkunsidrat, bl-eċċezzjoni tal-2018. Kumplessivament, il-kost unitarju tal-produzzjoni żdied b’1 % matul il-perjodu kkunsidrat, u laħaq EUR 3 650/ tunnellata ta’ WFE fil-PIR, ogħla mill-prezz medju tal-bejgħ ta' unità.

(146)

Il-kostijiet lavorattivi medji tal-produtturi tal-Unjoni inklużi fil-kampjun żviluppaw kif ġej matul il-perjodu kkunsidrat:

Tabella 13

Kostijiet lavorattivi medji għal kull impjegat

(147)

Il-kostijiet lavorattivi medji għal kull impjegat urew żieda gradwali matul il-perjodu kkunsidrat. B’mod ġenerali, dawn żdiedu b’7 % matul il-perjodu kkunsidrat.

(148)

Il-livelli tal-istokkijiet tal-produtturi tal-Unjoni inklużi fil-kampjun żviluppaw kif ġej matul il-perjodu kkunsidrat:

Tabella 14

Inventarji

(149)

Kumplessivament, l-istokkijiet tal-għeluq żdiedu b’47 % matul il-perjodu kkunsidrat.

(150)

It-trota hija prodott li jitħassar malajr, li sakemm ma jiġix iffriżat ikollu ħajja fuq l-ixkaffa ta’ inqas minn ġimagħtejn. Bl-eċċezzjoni ta’ kumpanija waħda, il-produtturi tal-Unjoni inklużi fil-kampjun ma jżommux stokkijiet tat-trota wara t-trobbija u ma jiffriżawx il-produzzjoni tagħhom, sa ċertu punt sinifikanti . Bħala konklużjoni, il-livelli tal-istokkijiet mhumiex meqjusa bħala indikatur sinifikanti ta’ dannu f’din l-investigazzjoni.

(151)

Il-profittabbiltà, il-fluss tal-flus, l-investimenti u r-redditu fuq l-investimenti tal-produtturi tal-Unjoni inklużi fil-kampjun żviluppaw kif ġej matul il-perjodu kkunsidrat:

Tabella 15

Profittabbiltà, fluss tal-flus, investimenti u redditu fuq l-investimenti

(152)

Il-Kummissjoni stabbiliet il-profittabbiltà tal-produtturi tal-Unjoni inklużi fil-kampjun billi esprimiet il-profitt nett qabel it-taxxa tal-bejgħ tal-prodott simili lil klijenti mhux relatati fl-Unjoni bħala perċentwal tal-fatturat ta’ dak il-bejgħ. Il-profittabbiltà kienet negattiva matul il-perjodu kkunsidrat, bl-eċċezzjoni tal-2018 meta kienet kemxejn pożittiva (0,5 %). Kumplesivament, fil-perjodu kkunsidrat, il-profittabbiltà bdiet madwar – 2,1 % fl-2016 u gradwalment tjiebet sas-sena 2018, meta reġgħet naqset bi ftit għal – 0,8 % fil-PIR.

(153)

Il-fluss tal-flus nett huwa l-kapaċità tal-industrija tal-Unjoni li tiffinanzja hija stess l-attivitajiet tagħha. Il-fluss tal-flus kien qed isegwi xejra simili bħall-profittabbiltà, jiġifieri żdied mll-2016 għall-2018 u naqas fil-PIR.

(154)

L-investimenti naqsu mill-2016 għall-2017, iżda reġgħu żdiedu fl-2018 u komplew jiżdiedu fil-PIR. Kumplessivament urew żieda ta’ 27 % matul il-perjodu kkunsidrat. Minkejja din iż-żieda, id-daqs tal-investimenti baqa’ baxx matul il-perjodu kkunsidrat (medja ta’ EUR 1,7 miljun fis-sena, għat-tmien kumpaniji kollha inklużi fil-kampjun) u kienu fil-biċċa l-kbira relatati mal-konformità.

(155)

Ir-redditu fuq l-investimenti huwa l-profitt f’perċentwal tal-valur kontabilistiku nett tal-investimenti. Bħal fil-każ tal-indikaturi finanzjarji l-oħrajn, ir-redditu fuq l-investiment żdied mill-2016 għall-2018 u naqas fil-PIR.

(156)

Minkejja l-miżuri kompensatorji fis-seħħ, l-importazzjonijiet Torok tat-trota baqgħu sostanzjali b’ishma mis-suq stabbli bejn madwar 11 % u aktar minn 14 % matul il-perjodu kkunsidrat. Matul l-PIR, is-sehem mis-suq kien ta’ 13,9 %. Fl-istess ħin, il-prezzijiet tal-importazzjonijiet urew xejra ta’ tnaqqis u waqqgħu l-prezzijiet tal-Unjoni b’medja ta’ 14,5 % matul l-PIR, minkejja l-eżistenza tal-miżuri kompensatorji.

(157)

L-iżvilupp tal-indikaturi makroekonomiċi, b’mod partikolari l-volum tal-produzzjoni u tal-bejgħ, l-impjiegi u l-produttività wrew xejriet stabbli jew kemxejn li qed jonqsu. Is-sehem mis-suq tal-industrija tal-Unjoni żdied bi ftit matul il-perjodu kkunsidrat, filwaqt li naqas fil-PIR u laħaq livell simili għal dak fl-2016. Iż-żieda fis-sehem mis-suq fl-2017 u fl-2018 minkejja l-volum ta’ bejgħ relattivament stabbli hija dovuta għat-tnaqqis fil-konsum matul l-istess perjodu. Għalkemm l-industrija tal-Unjoni rnexxielha żżomm fil-biċċa l-kbira l-volum ta’ bejgħ u s-sehem mis-suq tagħha, dan kien għad-detriment tal-profittabbiltà tagħha u ta’ indikaturi finanzjarji oħrajn kif spjegat fil-premessa li ġejja.

(158)

Minkejja li l-prezz medju tal-bejgħ ta’ unità tal-produtturi tal-Unjoni żdied bi ftit matul il-perjodu kkunsidrat, l-industrija tal-Unjoni ma rnexxilhiex tikseb marġni ta’ profitt sostenibbli. Minħabba l-pressjoni fuq il-prezzijiet tal-importazzjonijiet Torok, l-industrija tal-Unjoni ma setgħetx iżżid il-prezzijiet tal-bejgħ tagħha lanqas biex tilħaq il-kost medju tal-produzzjoni u għalhekk, kienet qed tagħmel telf matul il-perjodu kkunsidrat (bl-eċċezzjoni tal-2018 fejn kienet kważi f'ekwilibriju). Għalhekk, l-importazzjonijiet Torok eżerċitaw ukoll trażżin sinifikanti tal-prezzijiet fuq il-bejgħ tal-produtturi tal-Unjoni matul il-PIR. Indikaturi finanzjarji oħrajn (fluss tal-flus, redditu fuq l-investiment) segwew xejra simili għall-profittabbiltà, u wrew valuri negattivi jew baxxi matul il-perjodu kollu kkunsidrat. L-investimenti, għalkemm żdiedu fl-2017 u fl-2018, kienu ta’ daqs ġeneralment baxx u kienu relatati mal-konformità. L-industrija tal-Unjoni ma setgħetx tirkupra mis-sitwazzjoni dannuża tagħha u ġarrbet telf kważi matul il-perjodu kollu kkunsidrat.

(159)

Fid-dawl ta’ dan ta’ hawn fuq, il-Kummissjoni kkonkludiet li l-industrija tal-Unjoni ġarrbet dannu materjali, li b’mod partikolari jidher mis-sitwazzjoni finanzjarja tal-industrija tal-Unjoni.

(160)

F’konformità mal-Artikolu 8(5) tar-Regolament bażiku, il-Kummissjoni eżaminat jekk l-importazzjonijiet isssussidjati mit-Turkija kkawżawx dannu materjali lill-industrija tal-Unjoni. F’konformità mal-Artikolu 8(6) tar-Regolament bażiku, il-Kummissjoni eżaminat ukoll jekk fatturi oħrajn magħrufa setgħux fl-istess ħin ikkawżaw dannu lill-industrija tal-Unjoni. Il-Kummissjoni żgurat li kwalunkwe dannu possibbli kkawżat minn fatturi oħrajn għajr l-importazzjonijiet issussidjati mill-pajjiż ikkonċernat ma kienx attribwit għall-importazzjonijiet issussidjati.

(161)

L-importazzjonijiet Torok tat-trota baqgħu sostanzjali b’ishma mis-suq ta’ aktar minn 10 % matul il-perjodu kollu kkunsidrat u f’livelli tal-prezzijiet baxxi matul l-PIR, minkejja l-miżuri kontra s-sussidji fis-seħħ. Minħabba l-pressjoni sostanzjali fuq il-prezzijiet mill-importazzjonijiet Torok, l-industrija tal-Unjoni ma setgħetx iżżid il-prezzijiet tagħha f’konformità maż-żieda fil-kost li wasslet għal telf matul kważi l-perjodu kollu kkunsidrat.

(162)

Ma seta’ jiġi identifikat l-ebda fattur ieħor li seta’ kkawża d-dannu materjali mġarrab mill-industrija tal-Unjoni. Tabilħaqq, il-volum importat minn pajjiżi terzi oħrajn minbarra t-Turkija (2 188 tunnellata ta’ WFE fil-PIR) kien jirrappreżenta biss 1,4 % tas-sehem mis-suq fil-PIR (meta mqabbel mal-20 446 tunnellata ta’ WFE mit-Turkija, li jirrappreżentaw 13,9 % tas-sehem mis-suq). Barra minn hekk, matul l-PIR, il-prezz medju tal-importazzjonijiet minn pajjiżi terzi oħrajn minbarra t-Turkija (EUR 3 336/Tunnellata ta’ WFE) kien 16 % ogħla mill-prezz medju tal-importazzjonijiet mit-Turkija (EUR 2 884/Tunnellata ta’ WFE).

(163)

Fid-dawl tal-konklużjonijiet ta’ hawn fuq, li l-industrija tal-Unjoni ġarrbet dannu materjali kkawżat mill-importazzjonijiet mit-Turkija, f’konformità mal-Artikolu 18(2) tar-Regolament bażiku, il-Kummissjoni vvalutat jekk ikunx hemm probabbiltà ta’ kontinwazzjoni ta’ dannu kkawżat mill-importazzjonijiet issussidjati mit-Turkija jekk il-miżuri jkunu tħallew jiskadu.

(164)

F’dan ir-rigward, il-Kummissjoni analizzat l-elementi segwenti: il-volum tal-produzzjoni u l-kapaċità ta’ riżerva fit-Turkija, l-attraenza tas-suq tal-Unjoni għall-produtturi esportaturi Torok, il-livelli tal-prezzijiet probabbli tal-importazzjonijiet mit-Turkija fin-nuqqas ta’ miżuri kontra s-sussidji, u l-impatt tagħhom fuq l-industrija tal-Unjoni.

(165)

Il-produzzjoni totali tat-trota fit-Turkija matul l-PIR kienet ta’ 95 000 tunnellata (40). Minn dan, parti kbira ġiet esportata peress li l-konsum tal-ħut per capita fit-Turkija (madwar 6 kg) huwa baxx ħafna meta mqabbel mal-Unjoni (madwar 24 kg) (41).

(166)

Barra minn hekk, il-volum kurrenti tal-produzzjoni fit-Turkija ma jirriflettix il-kapaċità reali tal-produzzjoni li tista’ tiġi attivata jekk il-miżuri jittħassru. Tabilħaqq, il-produtturi esportaturi inklużi fil-kampjun u l-produtturi esportaturi li pprovdew tweġiba sħiħa għall-formoli tal-kampjunar mal-bidu, irrapportaw użu medju tal-kapaċità ta’ 48 % u 47 % rispettivament. Meta wieħed ikun jaf li l-produzzjoni totali Torka tat-trota hija ta’ 95 000 tunnellata fil-PIR, il-kapaċità kumplessiva tista’ tkun bejn 197 000 u 202 000 tunnellata bl-estrapolazzjoni.

(167)

Abbażi tal-kapaċità medja tal-użu ddikjarata rrappurtata mill-produtturi esportaturi li kkooperaw, il-kapaċità medja ta’ riżerva tvarja bejn 101 000 u 102 000 tunnellata. Dan jammonta għal 70 % tal-konsum totali fl-Unjoni. Jekk anki parzjalment jiġu diretti lejn is-suq tal-Unjoni, dan ikun ifisser li jistgħu jiġu esportati volumi sinifikanti, u, kif spjegat fil-premessi minn (115) sa (120), bi prezzijiet li jwaqqgħu b’mod sostanzjali dawk tal-industrija tal-Unjoni li jkollhom effett negattiv sinifikanti fuq l-industrija tal-Unjoni.

(168)

Is-suq tal-Unjoni huwa attraenti fir-rigward tad-daqs u l-prezzijiet tiegħu. Huwa bil-bosta l-aktar suq importanti tal-esportazzjoni għall-produtturi tat-trota fit-Turkija, li jammonta għal 55 % tal-esportazzjonijiet totali tagħhom tat-trota. L-esportazzjonijiet lejn l-Unjoni huma 59 % ogħla mill-esportazzjonijiet lejn it-tieni l-akbar suq tal-esportazzjoni tagħha, li hija r-Russja, li tammonta għal 33 % tal-esportazzjonijiet Torok tat-trota (42). Is-suq tal-Unjoni u r-Russja kienu jirrappreżentaw madwar 85 % tal-esportazzjonijiet Torok kollha tat-trota. Il-prezzijiet tal-importazzjonijiet Torok lejn is-suq tal-Unjoni kienu ftit ogħla minn dawk lejn ir-Russja matul l-PIR, li għamlu s-suq tal-Unjoni ftit aktar profittabbli mis-suq Russu. Fl-ewwel 10 destinazzjonijiet tal-esportazzjoni tat-trota Torka, żewġ swieq biss — il-Vjetnam u l-Ġappun — joffru prezzijiet li huma ogħla minn dawk tal-Unjoni. Madankollu, dawn iż-żewġ swieq kienu relattivament insinifikanti u jirrappreżentaw, 5 % u 2 % tal-esportazzjonijiet tat-Turkija, rispettivament.

(169)

L-attraenza tas-suq tal-Unjoni hija ġġustifikata wkoll mill-prossimità ġeografika. B’mod partikolari, it-trota mhijiex adattata għal vjaġġi ’l bogħod u twal. Tabilħaqq, l-esportaturi Torok diġà għandhom kanali ta’ distribuzzjoni stabbiliti sew fl-Unjoni, li jiffaċilitaw loġistikament l-esportazzjonijiet lejn l-Unjoni.

(170)

Minkejja l-miżuri eżistenti, it-Turkija biegħet lill-Unjoni volum sostanzjali ta’ trota matul il-perjodu kkunsidrat u xorta kellha sehem mis-suq konsiderevoli matul l-PIR (qrib l-14 %). Dawn inbiegħu bi prezz li, anki bid-dazji kompensatorji, waqqa’ b’mod sinifikanti l-prezzijiet tal-bejgħ tal-industrija tal-Unjoni fis-suq tal-Unjoni.

(171)

Għalhekk, is-suq tal-Unjoni huwa meqjus attraenti għall-produtturi Torok u jista’ jiġi konkluż li l-kapaċitajiet ta’ riżerva disponibbli fit-Turkija se jkunu tal-inqas parzjalment diretti lejn is-suq tal-Unjoni. F’dan ir-rigward, ta’ min ifakkar li s-sehem mis-suq tal-importazzjonijiet Torok kien jammonta għal 17 % fil-perjodu ta’ investigazzjoni tal-investigazzjoni oriġinali, jiġifieri qabel l-impożizzjoni tad-dazji kompensatorji.

(172)

Fir-rigward tal-effett probabbli ta’ tali importazzjonijiet, il-Kummissjoni eżaminat il-livelli tal-prezzijiet probabbli tagħhom jekk il-miżuri jitħallew jiskadu. F’dan ir-rigward, il-Kummissjoni qieset il-livelli tal-prezzijiet tal-importazzjoni matul il-perjodu ta’ investigazzjoni tar-rieżami mingħajr dazju kompensatorju bħala approċċ raġonevoli u konservattiv. Il-marġni medju tat-twaqqigħ tal-prezz instab li kien sostanzjali u ammonta għal 19,8 %.

(173)

Filwaqt li l-industrija tal-Unjoni rnexxielha żżid il-prezzijiet medji tal-unità matul il-perjodu kkunsidrat mingħajr ma tilfet is-sehem mis-suq, dan sar għad-detriment tal-profittabbiltà tagħha. Għalhekk, tali strateġija ma tistax titqies bħala għażla jekk il-miżuri jittħassru, b’mod partikolari minħabba li f’dan il-każ il-pressjoni fuq il-prezzijiet fis-suq tal-Unjoni tiżdied b’mod konsiderevoli. Għalhekk, mingħajr restrizzjonijiet biex jaċċessaw is-suq tal-Unjoni, l-esportazzjonijiet Torok, x’aktarx li jiżdiedu fil-volum bi prezzijiet saħansitra aktar baxxi minn dawk matul l-PIR. Meta tiġi ffaċċjata b’tali pressjoni fuq il-prezzijiet f’volumi kbar, l-industrija tal-Unjoni se tkun imġiegħla tnaqqas il-prezzijiet tal-bejgħ tagħha f’tentattiv biex iżżomm il-volum ta’ bejgħ. B’konsegwenza ta’ dan, il-profittabbiltà tagħha, li diġà qed tagħmel it-telf, x’aktarx li tiddeterjora saħansitra aktar. Tabilħaqq, huwa possibbli li wieħed jara korrelazzjoni bejn il-profittabbiltà tal-industrija tal-Unjoni u l-iżvilupp tal-volum tal-importazzjonijiet mit-Turkija. Meta l-volumi tal-importazzjonijiet naqsu mill-2016 sal-2018, l-industrija tal-Unjoni setgħet ittejjeb il-profittabbiltà tagħha, filwaqt li matul il-PIR, meta l-volumi tal-importazzjonijiet reġgħu żdiedu, il-profittabbiltà tal-industrija tal-Unjoni naqset.

(174)

Fl-alternattiva, jekk l-industrija tal-Unjoni tipprova iżżomm il-prezzijiet tal-bejgħ tagħha fil-livelli kurrenti, huwa ferm probabbli li l-produtturi esportaturi Torok se jiksbu volumi tal-bejgħ u sehem mis-suq mill-industrija tal-Unjoni, għal-livelli ta’ qabel l-impożizzjoni tal-miżuri. Tali sitwazzjoni, ikollha wkoll impatt negattiv fuq il-profittabbiltà tal-industrija tal-Unjoni peress li ma tkunx tista’ tkopri aktar il-kostijiet fissi tagħha.

(175)

B’konsegwenza ta’ dan, il-profittabbiltà tal-industrija tal-Unjoni u s-sitwazzjoni ekonomika ġenerali tagħha jiġu affettwati b’mod negattiv u jmorru għall-agħar. B’mod parallel, l-industrija tal-Unjoni tiġi prekluża milli tagħmel l-investimenti meħtieġa biex tissodisfa l-istandards tal-ambjent u tas-saħħa.

(176)

Meta titqies is-sitwazzjoni dannuża li l-industrija tal-Unjoni bħalissa tinsab fiha, l-impatt li l-miżuri jitħallew jiskadu jkun devastanti.

(177)

Fid-dawl tas-sejbiet ta’ hawn fuq, jiġifieri l-kapaċità ta’ riżerva enormi fit-Turkija, l-attraenza tas-suq tal-Unjoni, il-livelli tal-prezzijiet tal-importazzjonijiet mit-Turkija u l-impatt probabbli tagħhom fuq l-industrija tal-Unjoni, il-Kummissjoni kkonkludiet li hemm probabbiltà ta’ kontinwazzjoni ta’ dannu jekk il-miżuri jitħallew jiskadu.

(178)

F’konformità mal-Artikolu 31 tar-Regolament bażiku, il-Kummissjoni eżaminat jekk iż-żamma tal-miżuri kompensatorji eżistenti tmurx kontra l-interess tal-Unjoni b’mod ġenerali. Id-determinazzjoni tal-interess tal-Unjoni kienet ibbażata fuq apprezzament tad-diversi interessi kollha involuti, inklużi dawk tal-industrija, tal-importaturi u tal-utenti tal-Unjoni.

(179)

L-investigazzjoni wriet li l-industrija tal-Unjoni kienet f’sitwazzjoni dannuża u li t-tneħħija tal-miżuri x’aktarx twassal għal kompetizzjoni inġusta akbar minn importazzjonijiet sussidjati mit-Turkija.

(180)

Abbażi ta’ dan, il-Kummissjoni kkonkludiet li ż-żamma tal-miżuri kompensatorji kienet tkun fl-interess tal-industrija tal-Unjoni.

(181)

L-ebda wieħed mill-importaturi jew l-utenti mhux relatati ma ppreżenta ruħu jew wieġeb għall-kwestjonarju fir-rieżami preżenti.

(182)

Fin-nuqqas ta’ kwalunkwe evidenza li tissuġġerixxi li l-miżuri fis-seħħ affettwaw lill-importaturi jew lill-utenti b’mod konsiderevoli, ġie konkluż li t-tkomplija tal-miżuri mhijiex se taffettwahom sa punt sinifikanti.

(183)

Abbażi ta’ dan ta’ hawn fuq, il-Kummissjoni kkonkludiet li ma kienx hemm raġunijiet konvinċenti tal-interess tal-Unjoni kontra ż-żamma tal-miżuri eżistenti fuq l-importazzjonijiet tat-trota li toriġina fil-pajjiż ikkonċernat.

(184)

Abbażi tal-konklużjonijiet li waslet għalihom il-Kummissjoni dwar il-probabbiltà ta’ kontinwazzjoni ta’ sussidju, il-probabbiltà ta’ kontinwazzjoni ta’ dannu kif ukoll l-interess tal-Unjoni, jenħtieġ li jinżammu l-miżuri antisussidji fuq l-importazzjonijiet tat-trota li toriġina mit-Turkija.

(185)

Ir-rati tad-dazju kompensatorju tal-kumpanija individwali speċifikati f’dan ir-Regolament huma applikabbli esklussivament għall-importazzjonijiet tal-prodott ikkonċernat li joriġina mit-Turkija u li jiġi manifatturat mill-entitajiet ġuridiċi msemmija. L-importazzjonijiet tal-prodott ikkonċernat manifatturat minn kwalunkwe kumpanija oħra mhux imsemmija b’mod speċifiku fid-dispożittiv ta’ dan ir-Regolament, inklużi l-entitajiet relatati ma’ dawk speċifikament imsemmija, jenħtieġ li jiġu soġġetti għar-rata ta’ dazju applikabbli għall-“kumpaniji l-oħrajn kollha”. Dawn jenħtieġ li ma jiġux soġġetti għal xi rati individwali ta’ dazju kompensatorju.

(186)

Kumpanija tista’ titlob li jiġu applikati dawn ir-rati ta’ dazju kompensatorju individwali jekk sussegwentement tibdel l-isem tal-entità tagħha. It-talba trid tkun indirizzata lill-Kummissjoni. It-talba jrid ikun fiha l-informazzjoni rilevanti kollha li tippermetti li jintwera li l-bidla ma taffettwax id-dritt tal-kumpanija li tibbenefika mir-rata tad-dazju li tapplika għaliha. Jekk il-bidla fl-isem tal-kumpanija ma taffettwax id-dritt tagħha li tibbenefika mir-rata tad-dazju li tapplika għaliha, sl-bidla tal-isem tkun ippubblikata f’Il-Ġurnal Uffiċjali tal-Unjoni Ewropea.

(187)

Fid-dawl tal-Artikolu 109 tar-Regolament (UE, Euratom) 2018/1046 tal-Parlament Ewropew u tal-Kunsill (43), meta ammont għandu jiġi rimborżat wara sentenza tal-Qorti tal-Ġustizzja tal-Unjoni Ewropea, l-imgħax li għandu jitħallas jenħtieġ li jkun ir-rata applikata mill-Bank Ċentrali Ewropew għall-operazzjonijiet ta’ rifinanzjament ewlenin tiegħu, kif ippubblikat fis-serje C ta’ Il-Ġurnal Uffiċjali tal-Unjoni Ewropea fl-ewwel jum kalendarju ta’ kull xahar.

(188)

Il-miżuri previsti f'dan ir-Regolament huma skont l-opinjoni tal-Kumitat stabbilit bl-Artikolu 15(1) tar-Regolament (UE) 2016/1036.

(1)

Ir-Regolament ta’ Implimentazzjoni tal-Kummissjoni (UE) Nru 820/2011 (2) jipprevedi l-approvazzjoni tas-sustanza attiva terbutilażin u għalhekk l-introduzzjoni tat-terbutilażin fl-Anness tar-Regolament ta’ Implimentazzjoni tal-Kummissjoni (UE) Nru 540/2011 (3).

(2)

Ir-Regolament ta’ Implimentazzjoni (UE) Nru 820/2011 jipprevedi wkoll il-preżentazzjoni ta’ aktar informazzjoni konfermatorja dwar l-ispeċifikazzjoni tal-materjal tekniku, kif immanifatturat kummerċjalment inkluż l-informazzjoni dwar ir-rilevanza tal-impuritajiet, l-ekwivalenza bejn l-ispeċifikazzjonijiet tal-materjal tekniku, kif immanifatturat kummerċjalment, u l-ispeċifikazzjonijiet tal-materjal tat-test użat fl-istudji tat-tossiċità u l-valutazzjoni tal-esponiment tal-ilma ta’ taħt l-art għall-metaboliti mhux identifikati LM1, LM2, LM3, LM4, LM5 u LM6.

(3)

Barra minn hekk, ir-Regolament ta’ Implimentazzjoni (UE) Nru 820/2011 talab lill-applikant iressaq informazzjoni konfermatorja fir-rigward tar-rilevanza tal-metaboliti MT1 MT13, MT14 u tal-metaboliti mhux identifikati LM1, LM2, LM3, LM4, LM5 u LM6 fir-rigward tal-kanċer, jekk it-terbutilażin ikun ġie klassifikat skont ir-Regolament (KE) Nru 1272/2008 tal-Parlament Ewropew u tal-Kunsill (4) bħala “suspettat li jikkawża l-kanċer”.

(4)

L-applikant ippreżenta informazzjoni addizzjonali fil-perjodi previsti fir-Regolament ta’ Implimentazzjoni (UE) Nru 820/2011. Fir-rigward tar-rilevanza tal-metaboliti speċifikati tat-terbutilażin jekk it-terbutilażin ikun ġie klassifikat skont ir-Regolament (KE) Nru 1272/2008 bħala “suspettat li jikkawża l-kanċer”, il-Kumitat tal-Valutazzjoni tar-Riskju tal-Aġenzija Ewropea għas-Sustanzi Kimiċi adotta opinjoni fil-5 ta’ Ġunju 2015 (5) li tikkonferma li t-terbutilażin ma għandux jiġi kklassifikat bħala “suspettat li jikkawża l-kanċer”, b’hekk irendi l-informazzjoni konfermatorja mhux meħtieġa.

(5)

L-Istat Membru relatur, ir-Renju Unit, ivvaluta l-informazzjoni addizzjonali ppreżentata mill-applikant. Huwa ppreżenta l-valutazzjoni tiegħu, fil-forma ta’ addendum tal-abbozz ta’ rapport ta’ valutazzjoni, lill-Istati Membri l-oħra, lill-Kummissjoni u lill-Awtorità Ewropea dwar is-Sigurtà fl-Ikel (“l-Awtorità”) fis-6 ta’ Awwissu 2015.

(6)

L-Istat Membru relatur ikkonsulta lill-Istati Membri l-oħra, lill-applikant u lill-Awtorità u talabhom jipprovdu kummenti dwar l-addendum tal-abbozz ta’ rapport ta’ valutazzjoni. L-Awtorità ppubblikat rapport tekniku (6) li kien fih l-eżitu fil-qosor ta’ din il-konsultazzjoni dwar it-terbutilażin fl-20 ta’ Jannar 2016.

(7)

Filwaqt li tqis il-valutazzjoni tal-Istat Membru relatur u r-rapport tekniku, il-Kummissjoni tqis li r-rekwiżit li tiġi ppreżentata informazzjoni konfermatorja dwar l-ispeċifikazzjoni tal-materjal tekniku, kif immanifatturat kummerċjalment, inkluż l-informazzjoni dwar ir-rilevanza tal-impuritajiet, u dwar l-ekwivalenza bejn l-ispeċifikazzjonijiet tal-materjal tekniku, kif immanifatturat kummerċjalment, u l-ispeċifikazzjonijiet tal-materjal tat-test użat fl-istudji tat-tossiċità jista’ jitqies indirizzat, diment li jitnaqqsu l-livelli massimi stabbiliti bħalissa għall-impuritajiet rilevanti propażin u simażin fil-materjal tekniku kif immanifatturat.

(8)

Il-Kummissjoni kompliet tikkonsulta lill-Awtorità b’rabta mal-esponiment tal-ilma ta’ taħt l-art għall-metaboliti tat-terbutilażin. L-Awtorità ppubblikat il-konklużjonijiet aġġornati tagħha dwar il-valutazzjoni tal-informazzjoni addizzjonali fid-29 ta’ Ġunju 2017 (7) u fid-19 ta’ Settembru 2019 (8). L-Awtorità identifikat riskju għat-trabi u għat-trabi li telqu jimxu f’xi kundizzjonijiet tal-użu mill-esponiment għall-metaboliti tat-terbutilażin fl-ikel u fl-ilma tax-xorb, skont l-informazzjoni addizzjonali pprovduta mill-applikant u abbażi tal-użu tat-terbutilażin b’rata ta’ 850 g/ha kull sena fl-istess għalqa. Barra minn hekk, meta t-terbutilażin jiġi applikat kull sena b’rata massima ta’ 850 g/ha, huwa mbassar li jkun hemm żewġ metaboliti ta’ terbutilażin, LM3 u LM6 fl-ilma ta’ taħt l-art ta’ aktar minn 0,75 μg/L fix-xenarji kollha, li jwassal għall-ħtieġa ta’ valutazzjoni tar-riskju għall-konsumatur li, madankollu, ma setgħetx titwettaq peress li l-valuri ta’ referenza bbażati fuq is-saħħa ma setgħux jiġu derivati abbażi tad-data disponibbli.

(9)

L-abbozz tar-rapport tal-valutazzjoni, l-abbozz ta’ rapport ta’ valutazzjoni u l-konklużjonijiet tal-Awtorità ġew rieżaminati mill-Istati Membri u mill-Kummissjoni fil-Kumitat Permanenti dwar il-Pjanti, l-Annimali, l-Ikel u l-Għalf u ġew iffinalizzati fl-24 ta’ Marzu 2021 fil-format tar-rapport ta’ rieżami aġġornat għat-terbutilażin.

(10)

L-applikant ingħata l-possibbiltà li jippreżenta kummenti dwar ir-rapport ta’ rieżami aġġornat.

(11)

Il-Kummissjoni kkonkludiet li l-informazzjoni addizzjonali pprovduta mill-applikant mhijiex biżżejjed biex jiġi eskluż ir-riskju għall-konsumaturi mill-esponiment għall-metaboliti tat-terbutilażin meta tiġi applikata kull sena fl-istess għalqa b’rata massima ta’ 850 g/ha.

(12)

Għalhekk, huwa meħtieġ u xieraq li l-approvazzjoni tat-terbutilażin tiġi ristretta biex tintuża biss kull tliet snin fl-istess għalqa b’rata massima ta’ 850 g/ha. Jeħtieġ ukoll li jiġu emendati l-livelli massimi tal-impuritajiet rilevanti propażin u simażin li huma permessi fil-materjal tekniku kif immanifatturat kummerċjalment.

(13)

Għalhekk, jenħtieġ li r-Regolamenti ta’ Implimentazzjoni (UE) Nru 820/2011 u (UE) Nru 540/2011 jenħtieġ li jiġu emendati skont dan.

(14)

Jenħtieġ li l-Istati Membri jingħataw iż-żmien biex jirtiraw jew jemendaw l-awtorizzazzjonijiet għall-prodotti għall-protezzjoni tal-pjanti li fihom it-terbutilażin u li mhumiex konformi mal-kundizzjonijiet ristretti tal-approvazzjoni.

(15)

Għall-prodotti għall-protezzjoni tal-pjanti li fihom it-terbutilażin, meta jingħata xi perjodu ta’ grazzja mill-Istati Membri f’konformità mal-Artikolu 46 tar-Regolament (KE) Nru 1107/2009, jenħtieġ li dak il-perjodu jiskadi sa mhux aktar tard minn 12-il xahar wara d-dħul fis-seħħ ta’ dan ir-Regolament.

(16)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

(1)

Id-Deċiżjoni tal-Kunsill (UE) 2020/430 (1) introduċiet deroga ta’ xahar mill-ewwel subparagrafu tal-Artikolu 12(1) tar-Regoli ta’ Proċedura tal-Kunsill (2) fir-rigward ta’ deċiżjonijiet li tintuża l-proċedura ordinarja bil-miktub, fejn dawk id-deċiżjonijiet jittieħdu mill-Kumitat tar-Rappreżentanti Permanenti tal-Gvernijiet tal-Istati Membri (Coreper). Dik id-deroga kienet prevista li ddum sat-23 ta’ April 2020.

(2)

Id-Deċiżjoni (UE) 2020/430 tipprevedi li, jekk ikun ġustifikat minn kontinwazzjoni ta’ ċirkostanzi eċċezzjonali, il-Kunsill jista’ jġedded dik id-Deċiżjoni. Fil-21 ta’ April 2020, il-Kunsill, permezz tad-Deċiżjoni (UE) 2020/556 (3), estenda d-deroga prevista fl-Artikolu 1 tad-Deċiżjoni (UE) 2020/430 b’perijodu ieħor ta’ xahar, jiġifieri, sat-23 ta’ Mejju 2020. Fl-20 ta’ Mejju 2020, il-Kunsill, permezz tad-Deċiżjoni (UE) 2020/702 (4), estenda d-deroga prevista fl-Artikolu 1 tad-Deċiżjoni (UE) 2020/430 sal-10 ta’ Lulju 2020. Fit-3 ta’ Lulju 2020, il-Kunsill, permezz tad-Deċiżjoni (UE) 2020/970 (5), estenda dik id-deroga sal-10 ta’ Settembru 2020. Fl-4 ta’ Settembru 2020, il-Kunsill, permezz tad-Deċiżjoni (UE) 2020/1253 (6), estenda dik id-deroga sal-10 ta’ Novembru 2020. Fis-6 ta’ Novembru 2020, il-Kunsill, permezz tad-Deċiżjoni (UE) 2020/1659 (7), estenda dik id-deroga sal-15 ta’ Jannar 2021. Fit-12 ta’ Jannar 2021, il-Kunsill, permezz tad-Deċiżjoni (UE) 2021/26 (8), estenda dik id-deroga sad-19 ta’ Marzu 2021. Fit-12 ta’ Marzu 2021, il-Kunsill, permezz tad-Deċiżjoni (UE) (UE) 2021/454 (9), estenda dik id-deroga sal-21 ta’ Mejju 2021.

(3)

Minħabba li għad jeżistu ċ-ċirkostanzi eċċezzjonali kkawżati mill-pandemija tal-COVID-19, b’għadd ta’ miżuri straordinarji preventivi u ta’ konteniment meħuda mill-Istati Membri li għadhom fis-seħħ, teżisti l-ħtieġa li tiġi estiża d-deroga prevista fl-Artikolu 1 tad-Deċiżjoni (UE) 2020/430, kif estiża bid-Deċiżjonijiet (UE) 2020/556, (UE) 2020/702, (UE) 2020/970, (UE) 2020/1253, (UE) 2020/1659, (UE) 2021/26, u (UE) 2021/454, b’perijodu limitat ieħor sas-16 ta’ Lulju 2021,