(1)

Iridu jsiru għadd ta' emendi fir-Regolament (KE) Nru 1371/2007 tal-Parlament Ewropew u tal-Kunsill (3) sabiex tissaħħaħ il-protezzjoni għall-passiġġieri u biex titħeġġeġ żieda fl-ivvjaġġar bil-ferrovija, filwaqt li jitqiesu debitament b'mod partikolari l-Artikoli 11, 12 u 14 tat-Trattat dwar il-Funzjonament tal-Unjoni Ewropea (TFUE). Fid-dawl ta' dawk l-emendi u fl-interess taċ-ċarezza, jenħtieġ għalhekk li r-Regolament (KE) Nru 1371/2007 jiġi riformulat.

(2)

Fil-qafas tal-politika komuni tat-trasport, huwa importanti li d-drittijiet tal-utent tal-passiġġieri ferrovjarji jkunu mħarsa u tittejjeb il-kwalità u l-effettività tas-servizzi ferrovjarji tal-passiġġieri sabiex jiġi megħjun it-tkabbir tas-sehem tat-trasport ferrovjarju meta mqabbel ma' mezzi oħra tat-trasport.

(3)

Minkejja li fl-Unjoni sar bosta progress fejn tidħol il-protezzjoni tal-konsumaturi, il-protezzjoni tad-drittijiet tal-passiġġieri tal-ferroviji għadu jeħtieġ li titjieb aktar.

(4)

B'mod partikolari, ġaladarba l-passiġġier tal-ferrovija huwa l-parti d-dgħajfa fil-kuntratt tat-trasport, jenħtieġ li jiġu mħarsa d-drittijiet tal-passiġġieri ferrovjarji.

(5)

Il-passiġġieri tal-ferroviji li jagħmlu vjaġġi internazzjonali u domestiċi jingħataw l-istess drittijiet sabiex dan iżid il-livell ta' protezzjoni tal-konsumaturi fl-Unjoni, sabiex jiżgura kundizzjonijiet ekwi għall-impriżi ferrovjarji, u sabiex lill-passiġġieri jiggarantilhom livell uniformi ta' drittijiet. Il-passiġġieri jenħtieġ li jirċievu informazzjoni kemm jista' jkun preċiża rigward id-drittijiet tagħhom. Billi ċerti formati moderni tal-biljetti ma jippermettux fiżikament li tiġi stampata informazzjoni fuqhom, jenħtieġ li jkun possibbli li tingħata l-informazzjoni meħtieġa f'dan ir-Regolament b'mezzi oħra.

(6)

Is-servizzi ferrovjarji offruti strettament għall-użu storiku jew turistiku normalment ma jaqdux ħtiġijiet normali tat-trasport. Dawn is-servizzi normalment ikunu iżolati mill-bqija tas-sistema ferrovjarja tal-Unjoni u jużaw it-teknoloġija li tista' tillimita l-aċċessibbiltà tagħhom. Bl-eċċezzjoni ta' ċerti dispożizzjonijiet li jenħtieġ li japplikaw għas-servizzi ferrovjarji kollha tal-passiġġieri fl-Unjoni kollha, jenħtieġ li l-Istati Membri jkunu jistgħu jagħtu eżenzjonijiet mill-applikazzjoni tad-dispożizzjonijiet ta' dan ir-Regolament għal servizzi ferrovjarji offruti strettament għal użu storiku jew turistiku.

(7)

Is-servizzi ferrovjarji urbani, suburbani u reġjonali tal-passiġġieri għandhom natura differenti mis-servizzi ferrovjarji tal-passiġġieri fuq distanzi twal. Għalhekk l-Istati Membri jenħtieġ li jitħallew dawn is-servizzi minn ċerti dispożizzjonijiet ta' dan ir-Regolament dwar id-drittijiet tal-passiġġieri. Tali eżenzjonijiet madankollu jenħtieġ li ma japplikawx għal regoli essenzjali, b'mod partikolari mhux għal dawk id-dispożizzjonijiet relatati ma' kondizzjonijiet nondiskriminatorji ta' kuntratti tat-trasport, għad-dritt ta' akkwist ta' biljetti ferrovjarji mingħajr diffikultà żejda, għar-responsabbiltà tal-impriżi ferrovjarji fir-rigward tal-passiġġieri u l-bagalji tagħhom, u għar-rekwiżit li impriżi ferrovjarji jkunu assigurati b'mod adegwat u r-rekwiżit li jittieħdu miżuri adegwati biex tiġi żgurata s-sigurtà personali fl-istazzjonijiet ferrovjarji u fuq il-ferroviji. Is-servizzi reġjonali huma aktar integrati bis-sħiħ fil-bqija tas-sistema ferrovjarja tal-Unjoni u l-vjaġġi kkonċernati huma itwal. Għas-servizzi ferrovjarji reġjonali tal-passiġġieri, jenħtieġ li eżenzjonijiet possibbli għalhekk jiġu ristretti aktar. Fir-rigward tas-servizzi ferrovjarji reġjonali tal-passiġġieri, jenħtieġ li eżenzjonijiet mid-dispożizzjonijiet ta' dan ir-Regolament li jiffaċilitaw l-użu ta' servizzi ferrovjarji minn persuni b'diżabbiltà jew persuni b'mobbiltà mnaqqsa jitneħħew għalkollox gradwalment, u jenħtieġ li l-eżenzjonijiet ma japplikawx fir-rigward tad-dispożizzjonijiet ta' dan ir-Regolament li jippromwovu l-użu tar-roti. Barra minn hekk, jenħtieġ li l-possibbiltà li s-servizzi reġjonali jiġu eżentati minn ċerti obbligi fir-rigward tal-forniment ta' biljetti globali u ridirezzjonar tar-rotta tkun limitata fiż-żmien.

(8)

Hija mira ta' dan ir-Regolament li jtejjeb is-servizzi ferrovjarji tal-passiġġieri fl-Unjoni. Għalhekk, jenħtieġ li l-Istati Membri jkollhom il-possibbiltà li jagħtu eżenzjonijiet għal servizzi f'reġjuni fejn parti konsiderevoli mis-servizz jinħadem barra mill-Unjoni.

(9)

Barra minn hekk, sabiex tkun tista' ssir tranżizzjoni bla xkiel mill-qafas stabbilit skont ir-Regolament (KE) Nru 1371/2007 għal dak skont dan ir-Regolament, jenħtieġ li l-eżenzjonijiet nazzjonali preċedenti jitneħħew gradwalment biex tkun żgurata ċ-ċertezza u l-kontinwità legali meħtieġa. L-Istati Membri, li bħalissa għandhom stabbiliti eżenzjonijiet skont l-Artikolu 2(4) tar-Regolament (KE) Nru 1371/2007 jenħtieġ li jitħallew jeżentaw servizzi ferrovjarji domestiċi tal-passiġġieri biss mid-dispożizzjonijiet ta' dan ir-Regolament li jeħtieġu adattament sinifikanti u, fi kwalunkwe każ, biss għal perjodu limitat ta' żmien. Jenħtieġ li l-Istati Membri jitħallew ukoll, għal perijodu tranżitorju, jagħtu eżenzjoni mill-obbligu li jiddistribwixxu informazzjoni dwar it-traffiku u l-ivvjaġġar fost l-operaturi, iżda biss fejn ma jkunx teknikament fattibbli għall-amministratur tal-infrastruttura li jipprovdi data f'ħin reali lil kwalunkwe impriża ferrovjarja, bejjiegħ tal-biljetti, operatur tal-vjaġġi jew amministratur tal-istazzjon. Valutazzjoni ta' dak li huwa teknikament fattibbli jenħtieġ li ssir mill-inqas kull sentejn.

(10)

Jenħtieġ li l-Istati Membri jinfurmaw lill-Kummissjoni meta jeżentaw is-servizzi ferrovjarji tal-passiġġieri mill-applikazzjoni ta' ċerti dispożizzjonijiet ta' dan ir-Regolament. Meta jipprovdu din l-informazzjoni, jenħtieġ li l-Istati Membri jispjegaw ir-raġunijiet għall-għoti ta' tali eżenzjonijiet u l-miżuri meħuda jew previsti għall-konformità mal-obbligi skont dan ir-Regolament meta jiskadu l-eżenzjoni kkonċernati.

(11)

Fejn ikun hemm diversi amministraturi tal-istazzjoni responsabbli għal stazzjon wieħed, jenħtieġ li l-Istati Membri jkollhom il-possibbiltà li jaħtru l-korp inkarigat mir-responsabbiltajiet imsemmija f'dan ir-Regolament.

(12)

Aċċess għal informazzjoni dwar l-ivvjaġġar f'ħin reali, inkluż dik dwar it-tariffi li tagħmel l-ivvjaġġar aktar aċċessibbli għal konsumaturi ġodda u tipprovdilhom firxa aktar wiesgħa ta' possibbiltajiet ta' vvjaġġar u tariffi minn fejn jistgħu jagħżlu. Jenħtieġ li l-impriżi ferrovjarji jipprovdu lil impriżi ferrovjarji oħra, bejjiegħa tal-biljetti u operaturi tal-vjaġġi li jbiegħu s-servizzi tagħhom b'aċċess għal tali informazzjoni dwar l-ivvjaġġar u jagħtuhom il-possibbiltà li jagħmlu u jikkanċellaw riservazzjonijiet biex jiffaċilitaw l-ivvjaġġar bil-ferrovija. L-amministraturi tal-infrastruttura jenħtieġ li jqassmu data f'ħin reali dwar il-wasla u t-tluq tal-ferroviji lill-impriżi ferrovjarji u lill-amministraturi tal-istazzjonijiet, kif ukoll lill-bejjiegħa tal-biljetti u lill-operaturi tal-vjaġġi sabiex jiġi ffaċilitat l-ivvjaġġar bil-ferrovija.

(13)

Rekwiżiti aktar dettaljati rigward l-għoti ta’ informazzjoni dwar l-ivvjaġġar huma stabbiliti fl-ispeċifikazzjoni teknika għall-interoperabbiltà msemmija fir-Regolament tal-Kummissjoni (UE) Nru 454/2011 (4).

(14)

It-tisħiħ tad-drittijiet tal-passiġġieri ferrovjarji jenħtieġ li jinbena fuq il-liġi internazzjonali eżistenti li tinsab fl-Appendiċi A — Regoli uniformi dwar il-Kuntratt għat-Trasport Internazzjonali ta' Passiġġieri u Bagalji bil-Ferrovija (CIV) — mal-Konvenzjoni dwar it-Trasport Internazzjonali bil-Ferrovija (COTIF) tad-9 ta' Mejju 1980, kif modifikata mill-Protokoll għall-modifikazzjoni tal-Konvenzjoni dwar it-Trasport Internazzjonali bil-Ferrovija tat-3 ta' Ġunju 1999 (il-Protokoll tal-1999). Madankollu huwa mixtieq li l-kamp ta' applikazzjoni ta' dan ir-Regolament jiġi estiż sabiex jipproteġi mhux biss lill-passiġġieri internazzjonali imma wkoll lill-passiġġieri domestiċi. Fit-23 ta' Frar 2013, l-Unjoni aderiet mal-COTIF.

(15)

Jenħtieġ li l-Istati Membri jipprojbixxu d-diskriminazzjoni abbażi tan-nazzjonalità tal-passiġġier jew il-post tal-istabbiliment fi ħdan l-Unjoni tal-impriża ferrovjarja, il-bejjiegħ tal-biljetti jew l-operatur tal-vjaġġi. Madankollu, jenħtieġ li t-tariffi soċjali u l-inkoraġġiment ta' użu usa' tat-trasport pubbliku ma jiġux ipprojbiti, dment li tali miżuri jkunu proporzjonati u jitħaddmu indipendentement min-nazzjonalità tal-passiġġier kkonċernat. L-impriżi ferrovjarji, il-bejjiegħa tal-biljetti u l-operaturi tal-vjaġġi huma liberi li jiddeterminaw il-prattiki kummerċjali tagħhom, inkluż l-użu ta' offerti speċjali u l-promozzjoni ta' ċerti mezzi ta' bejgħ. Minħabba l-iżvilupp ta' pjattaformi fuq l-internet li jbigħu l-biljetti tat-trasport tal-passiġġieri, l-Istati Membri jenħtieġ jagħtu attenzjoni speċjali biex jiżguraw li ma ssir l-ebda diskriminazzjoni waqt il-proċess biex jiġu aċċessati l-pjattaformi fuq l-internet jew biex jinxtraw il-biljetti. Barra minn hekk, irrispettivament minn kif jinxtara ċertu tip ta' biljett, jenħtieġ li l-livell ta' protezzjoni tal-passiġġier ikun l-istess.

(16)

Iż-żieda fil-popolarità taċ-ċikliżmu madwar l-Unjoni qed tħalli implikazzjonijiet fuq il-mobbiltà ġenerali u t-turiżmu. Jekk fil-qasma modali jiżdied l-użu tal-ferroviji u taċ-ċikliżmu, jonqos l-impatt tat-trasport fuq l-ambjent. Għalhekk jenħtieġ li l-l-impriżi ferrovjarji jiffaċilitaw kemm jista' jkun it-taħlita taċ-ċikliżmu u l-vjaġġi bil-ferrovija. B'mod partikolari, meta jakkwistaw vetturi ferrovjarji ġodda jew jagħmlu titjib kbir fil-vetturi ferrovjarji eżistenti, jenħtieġ li jipprovdu għadd adegwat ta' postijiet għar-roti għajr jekk l-akkwist jew it-titjib jikkonċerna vaguni tar-ristoranti, vaguni tal-irqad jew vaguni kuċċetti. Sabiex jiġi evitat impatt negattiv fuq il-prestazzjoni tas-sikurezza tal-vetturi ferrovjarji eżistenti, dak l-obbligu jenħtieġ li japplika biss f'każijiet ta' titjib kbir li jeħtieġ awtorizzazzjoni ġdida ta' vettura għat-tqegħid fis-suq.

(17)

L-għadd adegwat ta' postijiet għar-roti għall-kompożizzjoni ta' ferrovija jenħtieġ li jiġi ddeterminat billi jitqies id-daqs tal-kompożizzjoni tal-ferrovija, it-tip ta' servizz u d-domanda għat-trasport tar-roti. Jenħtieġ li l-impriżi ferrovjarji jkollhom il-possibbiltà li jistabbilixxu pjanijiet b'għadd konkret ta' postijiet għar-roti għas-servizzi tagħhom, wara li jikkonsultaw lill-pubbliku. Meta l-impriżi ferrovjarji jagħżlu li ma jistabbilixxux pjanijiet, jenħtieġ li japplika għadd statutorju. Dak l-għadd statutorju jenħtieġ li jservi wkoll bħala gwida mill-impriżi ferrovjarji meta jkunu qed jistabbilixxu l-pjanijiet tagħhom. Għadd li huwa inqas mill-għadd statutorju jenħtieġ li jitqies adegwat biss meta jkun iġġustifikat minn ċirkostanzi speċjali bħall-operat ta' servizzi ferrovjarji fil-ħin tax-xitwa fejn huwa ċar li m'hemmx domanda jew domanda baxxa għat-trasport tar-roti. Barra minn hekk, f'xi Stati Membri d-domanda għat-trasport tar-roti hija partikolarment għolja fir-rigward ta' ċerti tipi ta' servizzi. Għalhekk, jenħtieġ li l-Istati Membri jkollhom il-possibbiltà li jiddeterminaw l-għadd minimu adegwat ta' postijiet għar-roti għal ċerti tipi ta' servizzi. Dan l-għadd jenħtieġ li jipprevali fuq kwalunkwe pjan tal-impriżi ferrovjarji. Jenħtieġ li dan ma jimpedixxix il-moviment liberu tal-vetturi ferrovjarji fl-Unjoni. Il-passiġġieri jenħtieġ li jiġu infurmati bl-ispazju disponibbli għar-roti.

(18)

Jenħtieġ li d-drittijiet u l-obbligi rigward il-ġarr ta' roti fuq ferroviji japplikaw għal roti li jistgħu jintrikbu faċilment qabel u wara l-vjaġġ bil-ferrovija. Il-ġarr ta' roti f'pakketti u basktijiet, kif applikabbli, huwa kopert bid-dispożizzjonijiet ta' dan ir-Regolament li għandhom x'jaqsmu mal-bagalji.

(19)

Id-drittijiet tal-passiġġieri tal-ferroviji għal servizzi ferrovjarji jinkludu li jirċievu informazzjoni rigward is-servizz kemm qabel kif ukoll matul il-vjaġġ. Jenħtieġ li l-impriżi ferrovjarji, il-bejjiegħa tal-biljetti u l-operaturi tal-vjaġġi jipprovdu informazzjoni ġenerali dwar is-servizz ferrovjarju qabel l-ivvjaġġar. Dik l-informazzjoni jenħtieġ li tingħata b'formati aċċessibbli għall-persuni b'diżabbiltà u l-persuni b'mobbiltà mnaqqsa. Jenħtieġ li l-impriżi ferrovjarji u, fejn possibbli, il-bejjiegħa tal-biljetti u l-operaturi tal-vjaġġi jipprovdu lill-passiġġier, matul il-vjaġġ, aktar informazzjoni meħtieġa minn dan ir-Regolament. Fejn amministratur ta' stazzjon jkollu tali informazzjoni, jenħtieġ wkoll li huwa jipprovdi l-informazzjoni lill-passiġġieri.

(20)

Id-daqs tal-bejjiegħa tal-biljetti jvarja b'mod sostanzjali minn intrapriżi mikro sa kbar u xi bejjiegħa tal-biljetti joffru s-servizzi tagħhom offline biss jew online biss. Għalhekk jenħtieġ li l-obbligu li l-passiġġieri jingħataw informazzjoni dwar l-ivvjaġġar ikun proporzjonali għad-daqsijiet differenti, u għalhekk il-kapaċitajiet differenti tal-bejjiegħa tal-biljetti.

(21)

Jenħtieġ li dan ir-Regolament ma jżommx lill-impriżi ferrovjarji, l-operaturi tal-vjaġġi jew lill-bejjiegħa tal-biljetti milli joffru lil passiġġieri kondizzjonijiet aktar favorevoli minn dawk stabbiliti f'dan ir-Regolament. Madankollu, jenħtieġ li dan ir-Regolament ma jwassalx biex impriża ferrovjarja tkun marbuta b'kondizzjonijiet kuntrattwali aktar favorevoli offruti minn operatur tal-vjaġġi jew bejjiegħ tal-biljetti, għajr jekk previst xort'oħra f'arranġament bejn l-impriża ferrovjarja u l-operatur tal-vjaġġi jew il-bejjiegħ tal-biljetti.

(22)

Il-biljetti globali jippermettu vjaġġi bla xkiel għall-passiġġieri u għalhekk jenħtieġ li jsir kull sforz raġonevoli biex jiġu offruti dawn il-biljetti għal servizzi ferrovjarji tal-passiġġieri fuq distanzi fit-tul, dawk urbani, suburbani u reġjonali, kemm jekk internazzjonali u kemm jekk lokali, inkluż servizzi ferrovjarji tal-passiġġieri eżentati skont dan ir-Regolament. Jenħtieġ li jkun possibbli, għall-fini li jiġi determinat id-dewmien totali li għalih ikun disponibbli kumpens, li jiġu esklużi perijodi ta' dewmien li jkunu seħħew waqt il-partijiet tal-vjaġġ relatati ma' servizzi ferrovjarji eżentati skont dan ir-Regolament.

(23)

Fir-rigward tas-servizzi mħaddma mill-istess impriża ferrovjarja, jenħtieġ li t-trasferiment ta' passiġġieri ferrovjarji minn servizz għal ieħor jiġi ffaċilitat bl-introduzzjoni ta' obbligu li jingħataw biljetti globali, peress li l-ebda ftehim kummerċjali mhu meħtieġa bejn l-impriżi ferrovjarji. Ir-rekwiżit li jiġu pprovduti biljetti globali jenħtieġ li japplika għal servizzi mħaddma minn impriżi ferrovjarji li jappartjenu għall-istess sid jew li huma sussidjarji li huma kompletament proprjetà ta' waħda mill-impriżi ferrovjarji li jipprovdu servizzi ferrovjarji inklużi fil-vjaġġ. Jenħtieġ li l-impriża ferrovjarja jkollha l-possibbiltà li tispeċifika fuq il-biljett globali l-ħin tat-tluq ta' kull servizz ferrovjarju, inklużi servizzi reġjonali, li għalih huwa validu l-biljett globali.

(24)

Jenħtieġ li l-passiġġieri jkunu infurmati b'mod ċar jekk il-biljetti mibjugħa minn impriża ferrovjarja fi tranżazzjoni kummerċjali waħda jikkostitwux biljett globali. Fejn il-passiġġieri ma jkunux infurmati b'mod korrett, jenħtieġ li l-impriża ferrovjarja tkun responsabbli daqslikieku dawk il-biljetti kienu globali.

(25)

Jenħtieġ li l-offerta ta' biljetti globali tkun promossa. Madankollu, l-informazzjoni korretta dwar is-servizz ferrovjarju hija essenzjali wkoll meta l-passiġġieri jixtru l-biljetti minn bejjiegħ tal-biljetti jew operatur tal-vjaġġi. Fejn il-bejjiegħa tal-biljetti jew l-operaturi tal-vjaġġi jbiegħu biljetti separati bħala pakkett, jenħtieġ li jinfurmaw b'mod ċar lill-passiġġieri li dawk il-biljetti ma joffrux l-istess livell ta' protezzjoni bħal biljetti globali u li dawk il-biljetti ma nħarġux bħala biljetti globali mill-impriża ferrovjarja jew mill-impriżi ferrovjarji li jipprovdu s-servizz. Meta l-bejjiegħa tal-biljetti jew l-operaturi tal-vjaġġi jonqsu milli jikkonformaw ma' dan ir-rekwiżit, jenħtieġ li r-responsabbiltà tagħhom tmur lil hinn mir-rimborż tal-biljetti.

(26)

Meta joffru biljetti globali, huwa importanti li l-impriżi ferrovjarji jqisu ħinijiet ta' konnessjoni minimi realistiċi u applikabbli meta jkunu prenotati oriġinarjament, kif ukoll kwalunkwe fattur rilevanti bħad-daqs u l-post tal-istazzjonijiet u l-pjattaformi rispettivi.

(27)

Fid-dawl tal-Konvenzjoni tan-Nazzjonijiet Uniti dwar id-Drittijiet tal-Persuni b'Diżabbiltà u sabiex il-persuni b'diżabbiltà u l-persuni b'mobbiltà mnaqqsa jingħataw opportunitajiet għall-ivvjaġġar bil-ferroviji li jkunu komparabbli ma' dawk ta' ċittadini oħra, jenħtieġ li jiġu stabbiliti r-regoli għal nondiskriminazzjoni u assistenza waqt il-vjaġġ tagħhom. Persuni b'diżabbiltà u persuni b'mobbiltà mnaqqsa għandhom l-istess drittijiet bħaċ-ċittadini l-oħra kollha għall-moviment liberu u għan-nondiskriminazzjoni. Fost l-oħrajn, jenħtieġ li tingħata attenzjoni speċjali għall-għoti ta' informazzjoni lill-persuni b'diżabbiltà u lill-persuni b'mobbiltà mnaqqsa rigward l-aċċessibbiltà tas-servizzi ferrovjarji, il-kundizzjonijiet tal-aċċess tal-vaguni u l-faċilitajiet abbord. Sabiex il-passiġġieri b'indeboliment sensorju jkunu mogħtija l-aħjar informazzjoni dwar xi dewmien, jenħtieġ li jintużaw sistemi viżivi u awditivi, kif xieraq. Jenħtieġ li l-persuni b'diżabbiltà jkunu jistgħu jixtru l-biljetti minn fuq il-ferrovija mingħajr ħlas żejjed fejn ma jkunx hemm mezzi aċċessibbli biex il-biljetti jinxtraw qabel jirkbu l-ferrovija. Madankollu, jenħtieġ li jkun hemm il-possibbiltà li dan id-dritt jiġi limitat f'ċirkostanzi marbuta mas-sigurtà jew mar-riservazzjoni obbligatorja tal-ferrovija. Il-persunal jenħtieġ li jingħata t-taħriġ kif xieraq biex ikun jista' jissodisfa l-ħtiġijiet tal-persuni b'diżabbiltà u tal-persuni b'mobbiltà mnaqqsa, b'mod partikolari meta jkun qed jagħtihom assistenza. Sabiex ikunu żgurati l-istess kundizzjonijiet tal-ivvjaġġar, jenħtieġ li tingħata assistenza lil dawn il-persuni fl-istazzjonijiet u abbord jew, f'każ ta' nuqqas ta' persunal imħarreġ li jakkumpanjahom abbord il-ferrovija jew fl-istazzjoni, jenħtieġ li jsiru l-isforzi raġonevoli kollha biex jippermettu l-ivvjaġġar bil-ferrovija.

(28)

Jenħtieġ li l-impriżi ferrovjarji u l-amministraturi tal-istazzjonijiet jikkooperaw b'mod attiv mal-organizzazzjonijiet li jirrappreżentaw lill-persuni b'diżabbiltà sabiex itejbu l-kwalità tal-aċċessibbiltà tas-servizzi tat-trasport.

(29)

Sabiex jiffaċilitaw l-aċċess għas-servizzi ferrovjarji tal-passiġġieri għall-persuni b'diżabbiltà jew għal persuni b'mobbiltà mnaqqsa, jenħtieġ li l-Istati Membri jkollhom il-possibbiltà li jirrikjedu lill-impriżi ferrovjarji u l-amministraturi tal-istazzjonijiet biex jistabbilixxu Punti ta' Kuntatt Uniċi nazzjonali biex jikkoordinaw l-informazzjoni u l-assistenza.

(30)

Sabiex jiġi żgurat li tingħata l-assistenza lill-persuni b'diżabbiltà u l-persuni b'mobbiltà mnaqqsa, għal raġunijiet prattiċi jeħtieġ li l-impriża ferrovjarja, l-amministratur tal-istazzjon, il-bejjiegħ tal-biljetti jew l-operatur tal-vjaġġi jiġi nnotifikat bil-quddiem dwar il-ħtieġa għall-assistenza. Filwaqt li dan ir-Regolament jistabbilixxi perjodu ta' żmien massimu komuni għal tali prenotifiki, arranġamenti volontarji li jipprovdu perjodi iqsar huma siewja meta dawn itejjbu l-mobbiltà tal-persuni b'diżabbiltà u tal-persuni b'mobbiltà mnaqqsa. Biex tiġi garantita l-aktar distribuzzjoni wiesgħa possibbli ta' informazzjoni dwar tali perjodi ta' żmien imnaqqsa, huwa importanti li l-Kummissjoni tinkludi fir-rapport tagħha dwar l-implimentazzjoni u r-riżultati ta' dan ir-Regolament informazzjoni dwar l-iżvilupp ta' arranġamenti ta' prenotifika mnaqqsa u t-tixrid relatat ta' informazzjoni.

(31)

L-impriżi ferrovjarji u l-amministraturi tal-istazzjonijiet jenħtieġ jikkunsidraw il-bżonnijiet tal-persuni b'diżabbiltà u tal-persuni b'mobbiltà mnaqqsa, permezz ta' konformità mad-Direttiva (UE) 2019/882 tal-Parlament Ewropew u tal-Kunsill (5) u r-Regolament tal-Kummissjoni (UE) Nru 1300/2014 (6). Fejn dan ir-Regolament jirreferi għad-dispożizzjonijiet tad-Direttiva (UE) 2019/882, dawk id-dispożizzjonijiet jenħtieġ li jiġu applikati mill-Istati Membri mit-28 ta' Ġunju 2025 u f'konformità mal-miżuri tranżitorji stabbiliti fl-Artikolu 32 ta' dik id-Direttiva. Fir-rigward tas-servizzi ferrovjarji tal-passiġġieri, il-kamp ta' applikazzjoni ta' dawk id-dispożizzjonijiet huwa stabbilit fil-punt (c) tal-Artikolu 2(2) ta' dik id-Direttiva.

(32)

Ċerti annimali huma mħarrġa biex jassistu lill-persuni b'diżabbiltà biex huma jkunu jistgħu jkunu mobbli b'mod indipendenti. Għal tali mobbiltà huwa essenzjali li dawk l-annimali jkunu jistgħu jittieħdu abbord il-ferroviji. Dan ir-Regolament jistabbilixxi drittijiet u obbligi komuni fir-rigward tal-klieb ta' assistenza. Madankollu, jenħtieġ li l-Istati Membri jkollhom il-possibbiltà li jwettqu provi bl-użu ta' annimali oħra ta' assistenza għall-mobbiltà u li jħalluhom jitilgħu abbord is-servizzi ferrovjarji domestiċi tagħhom. Huwa importanti li l-Kummissjoni timmonitorja l-iżvilupp fir-rigward ta' din il-kwistjoni fid-dawl tal-ħidma futura fuq l-annimali ta' assistenza għall-mobbiltà.

(33)

Hu mixtieq li dan ir-Regolament joħloq sistema ta' kumpens għall-passiġġieri fil-każ ta' dewmien, inkluż f'każijiet fejn id-dewmien ikun ikkawżat minn kanċellazzjoni ta' servizz jew konnessjoni mitlufa. F'każ ta' dewmien fit-tul ta' servizz ferrovjarju tal-passiġġieri, l-impriżi ferrovjarji jenħtieġ jagħtu kumpens lill-passiġġieri skont persentaġġ tal-prezz tal-biljett.

(34)

L-impriżi ferrovjarji jenħtieġ li jkunu obbligati li jkunu assigurati, jew li jkollhom garanziji adegwati, għar-responsabbiltà tagħhom lejn il-passiġġieri tal-ferroviji fil-każ ta' inċident.

(35)

Id-drittijiet imsaħħa ta' kumpens u ta' assistenza fil-każ ta' dewmien, konnessjoni mitlufa jew kanċellazzjoni jenħtieġ li jwasslu għal inċentivi akbar għas-suq tal-passiġġieri tal-ferroviji, għall-benefiċċju tal-passiġġieri.

(36)

F'każ ta' dewmien, il-passiġġieri jenħtieġ li jingħataw alternattivi għal kontinwazzjoni tat-trasport jew għal ridirezzjonar tar-rotta b'kundizzjonijiet tat-trasport komparabbli. F'dan il-każ jenħtieġ jitqiesu l-ħtiġijiet tal-persuni b'diżabbiltà u tal-persuni b'mobbiltà mnaqqsa.

(37)

Madankollu, jenħtieġ li l-impriża ferrovjarja ma tkunx obbligata tħallas kumpens jekk tkun tista' turi li d-dewmien seħħ minħabba ċirkostanzi straordinarji bħal kundizzjonijiet estremi tat-temp jew diżastri naturali kbar li pperikolaw l-operazzjoni sikura tas-servizz. Kwalunkwe każ bħal dan jenħtieġ ikollu l-karattru ta' katastrofi naturali eċċezzjonali, kif distint mill-kundizzjonijiet normali u staġunali tat-temp bħal maltempati tal-ħarifa jew għargħar urbani regolari li jseħħ mill-mareat jew meta jinħall is-silġ. Barra minn hekk, Jenħtieġ li impriża ferrovjarja ma tkunx obbligata tħallas kumpens jekk tkun tista' turi li d-dewmien seħħ minħabba kriżi kbira tas-saħħa pubblika, bħal pandemija. Barra minn hekk, fejn id-dewmien ikun ikkawżat minn passiġġier jew minn ċerti atti ta' partijiet terzi, l-impriża ferrovjarja jenħtieġ li ma tkunx obbligata tipprvodi kumpens għad-dewmien. L-impriżi ferrovjarji jenħtieġ li juru li la setgħu jbassru u lanqas jevitaw tali avvenimenti, u lanqas ma setgħu jipprevjenu d-dewmien, anki jekk ikunu ħadu l-miżuri raġonevoli kollha, inkluż il-manutenzjoni preventiva xierqa tal-vetturi ferrovjarji tagħhom. Jenħtieġ li l-istrajks mill-persunal tal-impriża ferrovjarja, u l-azzjoniijiet, jew l-ommissjonijiet minn operaturi ferrovjarji oħra li jużaw l-istess infrastruttura, l-amministratur tal-infrastruttura jew l-amministraturi tal-istazzjonijiet, ma jaffettwawx ir-responsabbiltà għal dewmien. Iċ-ċirkostanzi li fihom l-impriżi ferrovjarji mhumiex obbligati jħallsu kumpens jenħtieġ li jkunu ġustifikati b'mod oġġettiv. Fejn komunikazzjoni jew dokument tal-amministratur tal-infrastruttura ferrovjarja, awtorità pubblika jew korp ieħor indipendenti mill-impriżi ferrovjarji, li jindikaw iċ-ċirkostanzi li fuqhom tibbaża ruħha l-impriża sabiex tkun eżentata mill-obbligu li jħallsu kumpens, ikunu disponibbli għall-impriżi ferrovjarji, jenħtieġ li jġibu tali komunikazzjonijiet jew dokumenti għall-attenzjoni tal-passiġġieri u, fejn rilevanti, għal dik tal-awtoritajiet ikkonċernati.

(38)

Jenħtieġ li l-impriżi ferrovjarji jkunu mħeġġa jissimplifikaw il-proċedura għall-passiġġieri biex japplikaw għall-kumpens jew rimborż. B'mod partikolari, l-Istati Membri jenħtieġ li jkollhom il-possibbiltà li jirrikjedu li l-impriżi ferrovjarji jaċċettaw applikazzjonijiet minn ċerti mezzi ta' komunikazzjoni, bħal fuq siti web jew bl-użu ta' applikazzjonijiet mobbli, sakemm dawn ir-rekwiżiti ma jkunux diskriminatorji.

(39)

Sabiex ikun aktar faċli għall-passiġġieri li jagħmlu talba għal rimborż jew kumpens f'konformità ma' dan ir-Regolament, jenħtieġ li jiġu stabbiliti formoli li huma validi mal-Unjoni kollha għal tali talbiet. Jenħtieġ li l-passiġġieri jkollhom il-possibbiltà li jippreżentaw it-talbiet tagħhom billi jużaw tali formola.

(40)

F'kooperazzjoni mal-amministraturi tal-infrastruttura u l-amministraturi tal-istazzjonijiet, jenħtieġ li l-impriżi ferrovjarji jħejju pjanijiet ta' kontinġenza biex jimminimizzaw l-impatt tal-interruzzjonijiet il-kbar billi lill-passiġġieri maqbuda jagħtuhom l-informazzjoni u l-attenzjoni xierqa.

(41)

Hu mixtieq ukoll li l-vittmi tal-inċidenti u dawk li jiddependu fuqhom ikunu meħlusa minn preokkupazzjonijiet finanzjarji għaż-żmien qasir fil-perjodu eżatt wara l-inċident.

(42)

Hu fl-interess tal-passiġġieri tal-ferroviji li jittieħdu l-miżuri xierqa, bi ftehim mal-awtoritajiet pubbliċi, biex jiżguraw is-sigurtà personali tagħhom fl-istazzjonijiet kif ukoll fuq il-ferroviji.

(43)

Jenħtieġ li l-passiġġieri ferrovjarji jkunu jistgħu jressqu lment lil kwalunkwe impriża ferrovjarja involuta, lill-amministraturi tal-istazzjonijiet ta' ċerti stazzjonijiet jew, fejn xieraq, lill-bejjiegħa tal-biljetti jew l-operaturi tal-vjaġġi rigward l-oqsma ta' responsabbiltà rispettivi tagħhom dwar id-drittijiet u l-obbligi mogħtija minn dan ir-Regolament. Il-passiġġieri ferrovjarji jenħtieġ li jkunu intitolati li jirċievu risposta fi żmien raġonevoli.

(44)

Fl-interess ta' trattament effiċjenti tal-ilmenti, jenħtieġ li l-impriżi ferrovjarji u l-amministraturi tal-istazzjonijiet ikollhom id-dritt li jistabbilixxu servizzi tal-klijenti u mekkaniżmi ta' trattament ta' ilmenti konġunti. L-informazzjoni dwar il-proċeduri ta' trattament tal-ilmenti jenħtieġ li tkun disponibbli għall-pubbliku u aċċessibbli faċilment għall-passiġġieri kollha.

(45)

Jenħtieġ li dan ir-Regolament ma jaffettwawx id-drittijiet tal-passiġġieri biex iressqu lment ma' korp nazzjonali jew biex ifittxu rimedju legali permezz ta' proċeduri nazzjonali.

(46)

L-impriżi ferrovjarji u l-amministraturi tal-istazzjonijiet jenħtieġ li jiddefinixxu l-istandards tal-kwalità tas-servizz għas-servizzi ferrovjarji tal-passiġġieri, jamministrawhom u jimmonitorjawhom. L-impriżi ferrovjarji jenħtieġ li jagħmlu wkoll pubblikament disponibbli informazzjoni dwar il-prestazzjoni tal-kwalità tas-servizz tagħhom.

(47)

Sabiex jinżamm livell għoli ta' protezzjoni tal-konsumatur fit-trasport ferrovjarju, jenħtieġ li jkun meħtieġ li l-Istati Membri jinnominaw korpi nazzjonali tal-infurzar biex isegwu mill-qrib l-applikazzjoni ta' dan ir-Regolament u biex jinfurzawh fil-livell nazzjonali. Dawk il-korpi jenħtieġ li jkunu jistgħu jieħdu bosta miżuri ta' infurzar. Il-passiġġieri jenħtieġ li jkunu jistgħu jressqu l-ilmenti tagħhom quddiem dawn il-korpi dwar l-allegat ksur tar-Regolament. Biex ikun żgurat li dawn l-ilmenti jiġu trattati b'mod sodisfaċenti, il-korpi jenħtieġ ukoll li jikkooperaw mal-korpi nazzjonali tal-infurzar ta' Stati Membri oħajn.

(48)

L-Istati Membri li ma għandhomx sistema ferrovjarja, u l-ebda prospett immedjat li jkollhom waħda, ser iġorru piż sproporzjonat u inutli jekk ikunu soġġetti għall-obbligi tal-infurzar fir-rigward tal-amministraturi tal-istazzjonijiet u l-amministraturi tal-infrastruttura previsti b'dan ir-Regolament. L-istess japplika għall-obbligi ta' infurzar fir-rigward tal-impriżi ferrovjarji sakemm Stat Membru ma jkunx ta liċenzja lil xi impriża ferrovjarja. Għalhekk, jenħtieġ li dawn l-Istati Membri jkunu eżenti minn dawk l-obbligi.

(49)

L-ipproċessar tad-data personali jenħtieġ isir skont il-liġi tal-Unjoni dwar il-protezzjoni tad-data personali, b'mod partikolari r-Regolament (UE) 2016/679 tal-Parlament Ewropew u tal-Kunsill (7).

(50)

Jenħtieġ li l-Istati Membri jistabbilixxu penali applikabbli għall-ksur ta' dan ir-Regolament u jiżguraw li dawn il-penali jiġu applikati. Il-penali, li jistgħu jinkludu l-ħlas ta' kumpens lill-persuna inkwistjoni, jenħtieġ ikunu effettivi, proporzjonati u dissważivi.

(51)

Minħabba li l-għanijiet ta' dan ir-Regolament, jiġifieri l-iżvilupp tal-ferroviji tal-Unjoni u t-tisħiħ tad-drittijiet tal-passiġġieri tal-ferroviji, ma jistgħux jinkisbu b’mod suffiċjenti mill-Istati Membri u għalhekk jistgħu jinkisbu aħjar fil-livell tal-Unjoni, l-Unjoni tista' tadotta miżuri, f’konformità mal-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju ta' proporzjonalità, kif stabbilit f'dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkisbu dawk l-għanijiet.

(52)

Sabiex ikun żgurat livell għoli ta' protezzjoni tal-passiġġieri, jenħtieġ li tiġi delegata lill-Kummissjoni s-setgħa li tadotta atti skont l-Artikolu 290 tat-TFUE biex temenda l-Anness I fir-rigward tar-Regoli Uniformi CIV u biex taġġusta l-ammonti minimi tal-ħlas bil-quddiem fil-każ ta' mewt ta' passiġġier fid-dawl tal-bidliet fl-Indiċi Armonizzat tal-Prezzijiet għall-Konsumatur li japplika għall-UE kollha. Huwa partikolarment importanti li l-Kummissjoni twettaq konsultazzjonijiet xierqa matul ix-xogħol tagħha ta' tħejjija, ukoll fil-livell ta' esperti, u li dawk il-konsultazzjonijiet jiġu mwettqa f'konformità mal-prinċipji stipulati fil-Ftehim Interistituzzjonali tat-13 ta' April 2016 dwar it-Tfassil Aħjar tal-Liġijiet (8). B'mod partikolari, biex tiġi żgurata parteċipazzjoni ugwali fit-tħejjija ta' atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta' atti delegati.

(53)

Sabiex ikunu żgurati kondizzjonijiet uniformi għall-implimentazzjoni ta' dan ir-Regolament, jenħtieġ li jingħataw setgħat ta' implimentazzjoni lill-Kummissjoni. Jenħtieġ li dawk is-setgħat ikunu eżerċitati f'konformità mar-Regolament (UE) Nru 182/2011 tal-Parlament Ewropew u tal-Kunsill (9).

(54)

Dan ir-Regolament jirrispetta d-drittijiet fundamentali u josserva l-prinċipji rikonoxxuti fil-Karta tad-Drittijiet Fundamentali tal-Unjoni Ewropea, b'mod partikolari l-Artikoli 21, 26, 38 u 47 li jikkonċernaw, rispettivament, il-projbizzjoni ta' kwalunkwe forma ta' diskriminazzjoni, l-integrazzjoni ta' persuni b'diżabbiltà, l-iżgurar ta' livell għoli ta' protezzjoni tal-konsumaturi, u d-dritt għal rimedju effettiv u għal proċess ġust. Dan ir-Regolament irid jiġi applikat mill-qrati tal-Istati Membri b'rispett sħiħ ta' dawn id-drittijiet u l-prinċipji,

(1)

Il-leġiżlazzjoni u l-politika tal-Unjoni fil-qasam tal-ambjent u l-klima u dawk rilevanti fil-qasam tal-enerġija wasslu għal titjib sostanzjali fl-istat tal-ambjent. Madankollu, għad baqa' sfidi ambjentali u klimatiċi kbar li jekk ma jiġux indirizzati ser ikollhom konsegwenzi negattivi sinifikanti għall-Unjoni u għall-benesseri taċ-ċittadini tagħha.

(2)

Il-Programm għall-Ambjent u l-Azzjoni Klimatika (LIFE), stabbilit bir-Regolament (UE) Nru 1293/2013 tal-Parlament Ewropew u tal-Kunsill (4), għall-perijodu bejn l-2014 u l-2020, huwa l-aktar wieħed reċenti f'sensiela ta' programmi tal-Unjoni mill-1992 li jappoġġaw l-implimentazzjoni ta' leġiżlazzjoni u ta' prijoritajiet politiċi ambjentali u klimatiċi. Il-Programm LIFE ġie vvalutat b'mod pożittiv f'evalwazzjoni ta' nofs it-terminu reċenti bħala li jinsab fit-triq it-tajba biex ikun effettiv, effiċjenti u rilevanti. Il-Programm LIFE 2014-2020 jenħtieġ, għalhekk, li jitkompla b'ċerti modifiki identifikati fl-evalwazzjoni ta' nofs it-terminu u f'valutazzjonijiet sussegwenti. Għaldaqstant, jenħtieġ li l-Programm għall-Ambjent u l-Azzjoni dwar il-Klima (LIFE) (il-"Programm LIFE") jiġi stabbilit għal perijodu ta' seba' snin biex it-tul tiegħu jiġi allinjat ma' dak tal-qafas finanzjarju pluriennali stabbilit fir-Regolament tal-Kunsill (UE, Euratom) 2020/2093 (5).

(3)

Il-Programm LIFE, li jimmira li jikseb l-objettivi u l-miri stabbiliti bil-leġiżlazzjoni, il-politika u l-pjanijiet, b'mod partikolari l-objettivi stabbiliti fil-komunikazzjoni tal-Kummissjoni tal-11 ta' Diċembru 2019 dwar il-Patt Ekoloġiku Ewropew (“Patt Ekoloġiku Ewropew”) u l-impenji internazzjonali tal-Unjoni fil-qasam tal-ambjent u l-klima u dawk rilevanti fil-qasam tal-enerġija, jenħtieġ li jikkontribwixxi lejn tranżizzjoni ġusta lejn ekonomija sostenibbli, ċirkolari, effiċjenti fl-użu tal-enerġija, ibbażata fuq l-enerġija rinnovabbli, newtrali għall-klima u reżiljenti għat-tibdil fil-klima, lejn il-protezzjoni, ir-restawr u t-titjib tal-kwalità tal-ambjent, inkluż l-arja, l-ilma u l-ħamrija, u tas-saħħa, u lejn it-twaqqif u t-treġġigħ lura tat-telf tal-bijodiversità, inkluż permezz tal-appoġġ tal-implimentazzjoni u l-ġestjoni tan-netwerk Natura 2000 u l-indirizzar tad-degradazzjoni tal-ekosistemi, permezz ta' interventi diretti jew inkella permezz tal-appoġġ tal-integrazzjoni ta' dawk l-objettivi f'politiki oħra. Il-Programm LIFE jenħtieġ li jappoġġa wkoll l-implimentazzjoni tal-programmi ġenerali ta' azzjoni adottati skont l-Artikolu 192(3) tat-Trattat dwar il-Funzjonament tal-Unjoni Ewropea (TFUE), bħas-7 Programm ta' Azzjoni Ambjentali (6) u kwalunkwe programm ta' azzjoni ambjentali tal-Unjoni sussegwenti.

(4)

L-Unjoni hija impenjata li tiżviluppa rispons komprensiv għall-Għanijiet ta' Żvilupp Sostenibbli tal-Aġenda tan-Nazzjonijiet Uniti għall-2030 għall-Iżvilupp Sostenibbli, li jenfasizzaw il-konnessjoni intrinsika bejn il-ġestjoni tar-riżorsi naturali biex tiġi żgurata d-disponibbiltà tagħhom fit-tul u s-servizzi tal-ekosistema, u r-rabta tagħhom mas-saħħa tal-bniedem u t-tkabbir ekonomiku sostenibbli u soċjalment inklużiv. F'dan l-ispirtu, il-Programm LIFE jenħtieġ li jirrifletti l-prinċipji tas-solidarjetà, filwaqt li jagħti kontribut materjali kemm għall-iżvilupp ekonomiku kif ukoll għall-koeżjoni soċjali.

(5)

Bil-għan li jiġi promoss żvilupp sostenibbli, jenħtieġ li r-rekwiżiti tal-protezzjoni ambjentali u klimatika jiġu integrati fid-definizzjoni u fl-implimentazzjoni tal-politiki u l-attivitajiet kollha tal-Unjoni. Jenħtieġ li għaldaqstant jiġu promossi sinerġiji u komplementarjetà ma' programmi ta' finanzjament oħra tal-Unjoni, inkluż billi jiġi ffaċilitat il-finanzjament tal-attivitajiet li jikkomplementaw proġetti integrati strateġiċi u proġetti strateġiċi dwar in-natura u li jappoġġaw l-użu u r-replikazzjoni ta' soluzzjonijiet żviluppati fl-ambitu tal-Programm LIFE. Il-koordinazzjoni hija meħtieġa sabiex jiġi evitat finanzjament doppju. Il-Kummissjoni u l-Istati Membri jenħtieġ li jieħdu passi biex jipprevjenu duplikazzjoni amministrattiva u piż amministrattiv fuq il-benefiċjarji ta' proġett li jkunu jirriżultaw minn obbligi ta' rappurtar minn strumenti finanzjarji differenti.

(6)

Il-Programm LIFE jenħtieġ li jikkontribwixxi għall-iżvilupp sostenibbli u għall-ilħuq tal-objettivi u l-miri tal-leġiżlazzjoni, tal-istrateġiji, tal-pjanijiet u tal-impenji internazzjonali tal-Unjoni fil-qasam tal-ambjent u l-klima u dawk rilevanti fil-qasam tal-enerġija, b'mod partikolari fir-rigward tal-Aġenda 2030 għall-Iżvilupp Sostenibbli tan-Nazzjonijiet Uniti, il-Konvenzjoni dwar id-Diversità Bijoloġika (7) u l-Ftehim ta' Pariġi adottat fl-ambitu tal-Konvenzjoni Qafas tan-Nazzjonijiet Uniti dwar it-Tibdil fil-Klima (8) (il-“Ftehim ta' Pariġi dwar it-Tibdil fil-Klima”), u, fost l-oħrajn, il-Konvenzjoni tal-Kummissjoni Ekonomika għall-Ewropa tan-Nazzjonijiet Uniti (NU/KEE) dwar l-Aċċess għall-Informazzjoni, il-parteċipazzjoni tal-pubbliku fit-Teħid tad-deċiżjonijiet u l-aċċess għall-ġustizzja fi kwistjonijiet ambjentali (9) (il-“Konvenzjoni ta' Aarhus”), il-Konvenzjoni NU/KEE dwar it-Tniġġis Transkonfinali tal-Arja Fuq Distanza Twila, il-Konvenzjoni tan-NU ta' Basilea dwar il-Kontroll tal-Movimenti li Jaqsmu l-Fruntieri tal-Iskart ta' Riskju u d-Disponiment Minnhom, il-Konvenzjoni tan-NU ta' Rotterdam dwar il-Proċedura ta' Kunsens Infurmat minn Qabel għal Ċerti Kimiċi u Pestiċidi Perikolużi fil-Kummerċ Internazzjonali, u l-Konvenzjoni tan-NU ta' Stokkolma dwar Materjal Organiku Persistenti li Jniġġes.

(7)

L-Unjoni tagħti importanza kbira lis-sostenibbiltà fit-tul tar-riżultati tal-proġetti ffinanzjati mill-Programm LIFE, u lill-kapaċità li jiġu żgurati u miżmuma dawk ir-riżultati wara l-implimentazzjoni tal-proġett, fost l-oħrajn bit-tkomplija tal-proġett, jew bir-replikazzjoni jew bit-trasferiment tar-riżultati.

(8)

Il-konformità mal-impenji tal-Unjoni skont il-Ftehim ta' Pariġi dwar it-Tibdil fil-Klima teħtieġ it-trasformazzjoni tal-Unjoni f'soċjetà sostenibbli, ċirkolari, effiċjenti fl-użu tal-enerġija, ibbażata fuq l-enerġija rinnovabbli, newtrali għall-klima u reżiljenti għat-tibdil fil-klima. Tali trasformazzjoni, min-naħa tagħha, tirrikjedi azzjoni b’enfasi speċjali fuq is-setturi li jikkontribwixxu l-aktar għal-livelli attwali ta' emissjonijiet ta’ gassijiet serra u ta' tniġġis, li tippromovi l-effiċjenza fl-użu tal-enerġija u l-enerġija rinnovabbli, kif ukoll li tikkontribwixxi għall-implimentazzjoni tal-qafas ta' politika għall-klima u l-enerġija għall-2030 u tal-Pjanijiet Nazzjonali Integrati dwar l-Enerġija u l-Klima tal-Istati Membri u għall-implimentazzjoni tal-istrateġija tal-Unjoni dwar il-klima u l-enerġija fit-tul, f'konformità mal-objettivi tal-Ftehim ta' Pariġi dwar it-Tibdil fil-Klima. Il-Programm LIFE jenħtieġ li jinkludi wkoll miżuri li jikkontribwixxu għall-implimentazzjoni tal-politika tal-Unjoni dwar l-adattament għall-klima biex titnaqqas il-vulnerabbiltà għall-effetti negattivi tat-tibdil fil-klima.

(9)

Il-proġetti fil-qafas tas-sottoprogramm il-ġdid “Tranżizzjoni Lejn Enerġija Nadifa” tal-Programm LIFE jenħtieġ li jiffokaw fuq il-ħolqien tat-tisħiħ tal-kapaċitajiet u d-diffużjoni ta' għarfien, ħiliet, tekniki, metodi u soluzzjonijiet innovattivi biex jinkisbu l-objettivi tal-leġiżlazzjoni u l-politika tal-Unjoni dwar it-tranżizzjoni lejn l-enerġija rinnovabbli u effiċjenza akbar fl-użu tal-enerġija. Tali tisħiħ tal-kapaċitajiet u diffużjoni huma tipikament azzjonijiet ta’ koordinazzjoni u appoġġ ta’ valur miżjud għoli fil-livell tal-Unjoni, li għandhom l-għan li jkissru l-ostakli tas-suq li jfixklu t-tranżizzjoni soċjoekonomika għal enerġija sostenibbli, u li prinċipalment jinvolvu entitajiet żgħar u ta’ daqs medju kif ukoll atturi multipli, inkluż awtoritajiet pubbliċi lokali u reġjonali u organizzazzjonijiet mingħajr skop ta’ qligħ. Tali azzjonijiet iġibu magħhom kobenefiċċji multipli, bħall-indirizzar tal-faqar enerġetiku, it-titjib tal-kwalità tal-arja interna, it-tnaqqis tas-sustanzi niġġiesa lokali bis-saħħa tat-titjib fl-effiċjenza fl-użu tal-enerġija u ż-żieda fl-enerġiji rinnovabbli distribwiti, u l-kontribut għal effetti ekonomiċi lokali pożittivi u għal aktar tkabbir soċjalment inklużiv.

(10)

Sabiex jingħata kontribut għall-mitigazzjoni tat-tibdil fil-klima u għall-impenji internazzjonali tal-Unjoni fir-rigward tad-dekarbonizzazzjoni, teħtieġ li titħaffef it-trasformazzjoni tas-settur tal-enerġija. L-azzjonijiet għat-tisħiħ tal-kapaċitajiet li jappoġġaw l-effiċjenza fl-użu tal-enerġija u l-enerġija rinnovabbli, iffinanzjati sal-2020 fl-ambitu ta' Orizzont 2020 (10), jenħtieġ li jiġu integrati fis-sottoprogramm il-ġdid “Tranżizzjoni lejn Enerġija Nadifa tal-Programm LIFE”, peress li l-objettiv tagħhom mhuwiex li jiffinanzjaw l-eċċellenza u jiġġeneraw l-innovazzjoni, iżda li jiffaċilitaw l-użu ta' teknoloġija diġà disponibbli għall-enerġija rinnovabbli u l-effiċjenza fl-użu tal-enerġija, li ser tikkontribwixxi għall-mitigazzjoni tat-tibdil fil-klima. Il-Programm LIFE jenħtieġ li jinvolvi lill-partijiet ikkonċernati u lis-setturi kollha involuti fi tranżizzjoni lejn enerġija nadifa. L-inklużjoni ta' tali azzjonijiet ta' tisħiħ tal-kapaċitajiet fil-Programm LIFE toffri potenzjal għal sinerġiji bejn is-sottoprogrammi u żżid il-koerenza ġenerali tal-finanzjament tal-Unjoni. Għaldaqstant, jenħtieġ li tinġabar u titqassam data dwar l-użu ta' soluzzjonijiet eżistenti ta' riċerka u innovazzjoni fil-proġetti tal-Programm LIFE, inkluż mill-programm Orizzont Ewropa stabbilit skont ir-Regolament (UE) 2021/695 tal-Parlament Ewropew u tal-Kunsill (11) (“Orizzont Ewropa”) u l-predeċessuri tiegħu.

(11)

Il-valutazzjoni tal-impatt li akkumpanjat il-proposta tal-Kummissjoni għad-Direttiva (UE) 2018/2002 tal-Parlament Ewropew u tal-Kunsill (12), li emendat id-Direttiva 2012/27/UE tal-Parlament Ewropew u tal-Kunsill (13), tikkalkula li l-ilħuq tal-miri tal-enerġija tal-Unjoni għall-2030 ser teħtieġ investimenti addizzjonali ta' EUR 177 biljun kull sena fil-perijodu 2021-2030. L-akbar lakuni huma relatati mal-investimenti fid-dekarbonizzazzjoni tal-bini biex jinżdiedu l-effiċjenza fl-użu tal-enerġija u l-użu ta' sorsi ta' enerġija rinnovabbli fuq skala żgħira, fejn il-kapital jeħtieġ jgħaddi lejn proġetti ta' natura distribwita ħafna. Wieħed mill-objettivi tas-sottoprogramm “Tranżizzjoni lejn Enerġija Nadifa”, li jkopri l-effiċjenza fl-użu tal-enerġija u l-użu rapidu ta' enerġija rinnovabbli, huwa li jibni l-kapaċità għall-iżvilupp u l-aggregazzjoni ta' tali proġetti, biex b'hekk jgħin ukoll biex jiġu assorbiti l-fondi mill-Fondi Strutturali u ta' Investiment Ewropej u jaġixxi ta' katalizzatur għall-investimenti f'enerġija rinnovabbli u l-effiċjenza fl-użu tal-enerġija, anki billi juża l-istrumenti finanzjarji pprovduti taħt ir-Regolament (UE) 2021/523 tal-Parlament Ewropew u tal-Kunsill (14).

(12)

Il-programm LIFE huwa l-uniku programm iddedikat speċifikament għall-ambjent u l-azzjoni dwar il-klima, u għalhekk għandu rwol kruċjali fl-appoġġ għall-implimentazzjoni tal-leġiżlazzjoni u l-politiki tal-Unjoni f’dawk l-oqsma.

(13)

Is-sinerġiji ma' Orizzont Ewropa jenħtieġ li jgħinu l-identifikazzjoni u l-istabbiliment tal–ħtiġijiet relatati mar-riċerka u l-innovazzjoni biex jiġu indirizzati l-isfidi ambjentali, klimatiċi u tal-enerġija fi ħdan l-Unjoni matul il-proċess tal-ippjanar strateġiku tar-riċerka u l-innovazzjoni ta' Orizzont Ewropa. Il-Programm LIFE jenħtieġ li jkompli jaġixxi bħala katalizzatur għall-implimentazzjoni tal-leġiżlazzjoni u l-politika tal-Unjoni fil-qasam tal-ambjent u l-klima u dawk rilevanti fil-qasam tal-enerġija, inkluż billi juża u japplika r-riżultati tar-riċerka u l-innovazzjoni minn Orizzont Ewropa u jgħin biex dawn jintużaw fuq skala ikbar jekk dan ikun jista' jgħin l-indirizzar ta' kwistjonijiet ambjentali, klimatiċi jew ta' tranżizzjoni enerġetika. Il-Kunsill Ewropew tal-Innovazzjoni ta' Orizzont Ewropa jista' jipprovdi appoġġ għall-espansjoni u l-kummerċjalizzazzjoni ta' ideat rivoluzzjonarji ġodda li jistgħu jirriżultaw mill-implimentazzjoni tal-proġetti LIFE. Bl-istess mod, jenħtieġ li jiġu kkunsidrati wkoll is-sinerġiji mal-Fond ta' Innovazzjoni fil-qafas tas-Sistema għall-Iskambju ta' Kwoti tal-Emissjonijiet, stabbilita taħt id-Direttiva 2003/87/KE tal-Parlament Ewropew u tal-Kunsill (15).

(14)

Azzjoni li tkun irċeviet kontribuzzjoni mill-Programm LIFE jenħtieġ li tkun tista' tirċievi wkoll kontribuzzjoni minn programmi oħrajn tal-Unjoni, dment li tali kontribuzzjonijiet ma jkoprux l-istess spejjeż. L-azzjonijiet li jirċievu finanzjament kumulattiv minn programmi differenti tal-Unjoni jenħtieġ li jiġu awditjati darba biss u b'mod li jkopri l-programmi kollha tal-Unjoni involuti u r-regoli applikabbli rispettivi tagħhom.

(15)

Il-komunikazzjoni tal-Kummissjoni tat-3 ta' Frar 2017 dwar l-Analiżi tal-Implimentazzjoni Ambjentali: L-isfidi ewlenin u kif ser ngħaqdu l-isforzi biex nagħtu riżultati aħjar (EIR) tindika li huwa meħtieġ progress sinifikanti biex titħaffef l-implimentazzjoni tal-acquis tal-Unjoni dwar l-ambjent u biex jittejbu l-integrazzjoni u l-inklużjoni tal-objettivi ambjentali u klimatiċi f'politiki oħra. Il-Programm LIFE jenħtieġ għalhekk li jaġixxi bħala katalizzatur biex jiġu indirizzati l-isfidi orizzontali u sistemiċi kif ukoll il-kawżi fundamentali għan-nuqqasijiet fl-implimentazzjoni identifikati fl-EIR u biex jinkiseb il-progress meħtieġ permezz tal-iżvilupp, l-ittestjar u r-replikazzjoni ta’ approċċi ġodda; l-appoġġ, il-monitoraġġ u r-rieżami tal-iżvilupp tal-politika; it-titjib tal-governanza dwar kwistjonijiet ambjentali, tat-tibdil fil-klima u ta’ tranżizzjoni tal-enerġija relatati, inkluż permezz tat-tisħiħ tal-involviment tal-partijiet ikkonċernati fil-livelli kollha, it-tisħiħ tal-kapaċitajiet, il-komunikazzjoni u l-għarfien; il-mobilizzazzjoni tal-investimenti mill-programmi ta' investiment tal-Unjoni jew sorsi finanzjarji oħra, u permezz tal-appoġġ għal azzjonijiet biex jingħelbu d-diversi ostakli għall-implimentazzjoni effettiva tal-pjanijiet ewlenin mitluba mil-leġiżlazzjoni ambjentali.

(16)

It-twaqqif u t-treġġigħ lura tat-telf tal-bijodiversità u d-degradazzjoni tal-ekosistema, inkluż f'ekosistemi tal-baħar, jeħtieġu appoġġ għall-iżvilupp, l-implimentazzjoni, l-infurzar u l-valutazzjoni tal-leġiżlazzjoni u l-politika rilevanti tal-Unjoni, inkluż il-komunikazzjoni tal-Kummissjoni tal-20 ta' Mejju 2020 dwar l-Istrateġija tal-UE għall-Bijodiversità għall-2030 - Inreġġgħu n-natura lura f’ħajjitna, id-Direttiva tal-Kunsill 92/43/KEE (16), id-Direttiva 2009/147/KE tal-Parlament Ewropew u tal-Kunsill (17) u r-Regolament (UE) Nru 1143/2014 tal-Parlament Ewropew u tal-Kunsill (18), b'mod partikolari bl-iżvilupp ta' bażi ta' għarfien għall-iżvilupp u l-implimentazzjoni tal-politika u bl-iżvilupp, l-ittestjar, il-wiri u l-applikazzjoni tal-aħjar prattiki u soluzzjonijiet, bħal pereżempju l-ġestjoni effettiva, fuq skala żgħira jew imfassla apposta għal kuntesti lokali, reġjonali jew nazzjonali speċifiċi, inkluż approċċi integrati għall-implimentazzjoni tal-oqfsa ta' azzjoni mogħtija prijorità adottati skont id-Direttiva 92/43/KEE. Dan ir-Regolament jenħtieġ li jikkontribwixxi għall-integrazzjoni tal-azzjoni dwar il-bijodiversità fil-politiki tal-Unjoni u għall-kisba tal-ambizzjoni ġenerali li 7,5 % tal-infiq annwali taħt il-qafas finanzjarju pluriennali jiġi ddedikat għall-objettivi tal-bijodiversità fl-2024 u 10 % tal-infiq annwali taħt il-qafas finanzjarju pluriennali jiġi ddedikat għall-objettivi tal-bijodiversità fl-2026 u fl-2027, filwaqt li jitqiesu s-sovrappożizzjonijiet eżistenti bejn l-għanijiet klimatiċi u dawk tal-bijodiversità.

L-Unjoni u l-Istati Membri jenħtieġ li jimmonitorjaw in-nefqa tagħhom relatata mal-bijodiversità biex jissodisfaw l-obbligi ta' rappurtar tagħhom skont il-Konvenzjoni dwar id-Diversità Bijoloġika. Jenħtieġ li jiġu ssodisfati wkoll ir-rekwiżiti għal monitoraġġ previsti f'leġiżlazzjoni rilevanti oħra tal-Unjoni. Jenħtieġ li l-infiq tal-Unjoni relatat mal-bijodiversità jiġi mmonitorjat f'konformità ma' metodoloġija effettiva, trasparenti u komprensiva li tiġi stabbilita mill-Kummissjoni, f'kooperazzjoni mal-Parlament Ewropew u mal-Kunsill, kif imsemmi fil-Ftehim Interistituzzjonali tas-16 ta' Diċembru 2020 bejn il-Parlament Ewropew, il-Kunsill tal-Unjoni Ewropea u l-Kummissjoni Ewropea dwar dixxiplina baġitarja, dwar kooperazzjoni fi kwistjonijiet ta' baġit u dwar ġestjoni finanzjarja tajba, kif ukoll dwar riżorsi proprji ġodda, inkluż pjan direzzjonali lejn l-introduzzjoni ta' riżorsi proprji ġodda (19).

(17)

L-evalwazzjonijiet u l-valutazzjonijiet reċenti, inkluż ir-rieżami ta' nofs it-terminu tal-Istrateġija tal-UE għall-Bijodiversità sal-2020 u l-Kontroll tal-Idoneità tal-leġiżlazzjoni dwar in-Natura, jindikaw li waħda mill-kawżi sottostanti ewlenin tal-implimentazzjoni insuffiċjenti tal-leġiżlazzjoni tal-Unjoni dwar in-natura u tal-istrateġija għall-bijodiversità hija n-nuqqas ta' finanzjament adegwat.

L-istrumenti ewlenin ta' finanzjament tal-Unjoni, inkluż il-Fond Ewropew għall-Iżvilupp Reġjonali stabbilit skont ir-Regolament (UE) Nru 1301/2013 tal-Parlament Ewropew u tal-Kunsill (20) (il-“Fond Ewropew għall-Iżvilupp Reġjonali”) u l-Fond ta' Koeżjoni stabbilit skont ir-Regolament 1300/2013 tal-Parlament Ewropew u tal-Kunsill (21) (il-“Fond ta’ Koeżjoni”), il-Fond Agrikolu Ewropew għall-Iżvilupp Rurali stabbilit skont ir-Regolament (UE) 1305/2013 tal-Parlament Ewropew u tal-Kunsill (22) (il-“Fond Agrikolu Ewropew għall-Iżvilupp Rurali”) u l-Fond Ewropew għall-Affarijiet Marittimi, is-Sajd u l-Akkwakultura stabbilit skont Regolament tal-Parlament Ewropew u tal-Kunsill dwar il-Fond Ewropew għall-Affarijiet Marittimi, is-Sajd u l-Akkwakultura u li jħassar ir-Regolament (UE) Nru 508/2014 (“il-Fond Ewropew għall-Affarijiet Marittimi, is-Sajd u l-Akkwakultura”), jistgħu jikkontribwixxu b'mod sinifikanti biex jiġu ssodisfati dawk il-ħtiġijiet, fuq bażi komplementari. Il-Programm LIFE jista' jtejjeb aktar l-effiċjenza ta' tali inklużjoni permezz ta' proġetti strateġiċi dwar in-natura ddedikati li jaġixxu ta' katalizzatur għall-implimentazzjoni tal-leġiżlazzjoni u tal-politika tal-Unjoni dwar in-natura u l-bijodiversità, inkluż l-azzjonijiet stabbiliti fl-oqfsa ta' azzjoni prijoritizzati adottati skont id-Direttiva 92/43/KEE. Il-proġetti strateġiċi dwar in-natura jenħtieġ li jappoġġaw programmi ta' azzjonijiet fl-Istati Membri immirati lejn l-inklużjoni tal-objettivi tan-natura u tal-bijodiversità rilevanti f'politiki u fi programmi ta' finanzjament oħra, u b'hekk ikun żgurat li jiġu mmobilizzati fondi adattati għall-implimentazzjoni ta' dawk il-politiki.

L-Istati Membri jenħtieġ li jitħallew jiddeċiedu fi ħdan il-Pjan Strateġiku tagħhom għall-Politika Agrikola Komuni li jużaw ċertu proporzjon tal-allokazzjoni tal-Fond Agrikolu Ewropew għall-Iżvilupp Rurali sabiex jinkiseb appoġġ għal azzjonijiet li jikkumplementaw il-proġetti strateġiċi dwar in-natura kif definiti skont dan ir-Regolament.

(18)

Il-promozzjoni tal-ekonomija ċirkolari u l-effiċjenza fir-riżorsi jirrikjedu bidla fil-mod kif il-materjali u l-prodotti, inkużi l-plastiks, jiġu mfassla, prodotti, ikkunsmati, imsewwija, użati mill-ġdid, irriċiklati u mormija, u jirrikjedu fokus fuq iċ-ċiklu tal-ħajja kollu tal-prodotti. Il-Programm LIFE jenħtieġ li jikkontribwixxi għat-tranżizzjoni lejn mudell ta' ekonomija ċirkolari permezz ta' appoġġ finanzjarju li jimmira lejn varjetà ta' atturi(bħal negozji, awtoritajiet pubbliċi u konsumaturi, b'mod partikolari billi japplika, jiżviluppa, u jirreplika l-aħjar teknoloġiji, prattiki u soluzzjonijiet imfassla apposta għal kuntesti lokali, reġjonali jew nazzjonali speċifiċi, inkluż permezz ta' approċċi integrati għall-applikazzjoni tal-ġerarkija tal-iskart u permezz tal-implimentazzjoni ta' pjanijiet ta' prevenzjoni u ġestjoni tal-iskart. Permezz tal-appoġġ tal-implimentazzjoni tal-komunikazzjoni tal-Kummissjoni tas-16 ta' Jannar 2018 dwar Strateġija Ewropea għall-plastiks f'ekonomija ċirkolari, tista' tittieħed azzjoni biex tkun indirizzata l-problema tal-iskart fil-baħar b'mod partikolari.

(19)

Livell għoli ta’ protezzjoni ambjentali huwa ta’ importanza fundamentali għas-saħħa u l-benesseri taċ-ċittadini tal-Unjoni. Il-Programm LIFE jenħtieġ li jappoġġa l-objettivi tal-Unjoni fir-rigward tal-produzzjoni u l-użu ta' sustanzi kimiċi b’modi li jwasslu għall-minimizzazzjoni tal-effetti negattivi sinifikanti fuq is-saħħa tal-bniedem u l-ambjent, bil-ħsieb li jintlaħaq l-objettiv ta’ ambjent mhux tossiku fl-Unjoni. Jenħtieġ li l-Programm LIFE jappoġġa wkoll attivitajiet biex tiġi faċilitata l-implimentazzjoni tad-Direttiva 2002/49/KE tal-Parlament Ewropew u tal-Kunsill (23) sabiex jinkisbu livelli ta’ storbju li ma jirriżultawx f’impatti negattivi sinifikanti u riskji għas-saħħa tal-bniedem.

(20)

L-objettiv fit-tul tal-Unjoni fir-rigward tal-politika dwar l-arja huwa li jinkisbu livelli ta' kwalità tal-arja li ma jikkawżawx riskji u impatti negattivi sinifikanti fuq is-saħħa tal-bniedem u l-ambjent, filwaqt li jissaħħu s-sinerġiji bejn it-titjib fil-kwalità tal-arja u t-tnaqqis tal-emissjonijiet ta' gassijiet b'effett ta' serra. Il-pubbliku huwa konxju ħafna dwar it-tniġġis tal-arja u ċ-ċittadini jistennew li l-awtoritajiet jaġixxu, b’mod partikolari f’żoni fejn il-popolazzjoni u l-ekosistemi huma esposti għal livelli għolja ta’ sustanzi li jniġġsu fl-arja. Id-Direttiva (UE) 2016/2284 tal-Parlament Ewropew u tal-Kunsill (24) tenfasizza r-rwol li jista' jkollu l-finanzjament tal-Unjoni biex jintlaħqu l-objettivi ta' arja nadifa. Għalhekk, jenħtieġ li l-Programm LIFE jappoġġa proġetti, inkluż proġetti integrati strateġiċi, li għandhom il-potenzjal li jisfruttaw fondi pubbliċi u privati, biex ikunu eżempji tal-aħjar prattika u jaġixxu ta' katalizzaturi għall-implimentazzjoni ta' pjanijiet u leġiżlazzjoni dwar il-kwalità tal-arja fil-livell lokali, reġjonali, multireġjonali, nazzjonali u transnazzjonali.

(21)

Id-Direttiva 2000/60/KE tal-Parlament Ewropew u tal-Kunsill (25) stabbiliet qafas għall-protezzjoni tal-ilmijiet tal-wiċċ, l-ilmijiet tal-kosta, l-ilmijiet transitorji u l-ilma ta' taħt l-art tal-Unjoni. L-objettivi ta' dik id-Direttiva ser ikunu appoġġati b'implimentazzjoni mtejba u bl-integrazzjoni tal-objettivi tal-politika dwar l-ilma f'oqsma ta' politika oħra. Il-Programm LIFE jenħtieġ għaldaqstant li jappoġġa proġetti li jikkontribwixxu għall-implimentazzjoni effettiva tad-Direttiva 2000/60/KE u ta' leġiżlazzjoni rilevanti oħra tal-Unjoni dwar l-ilma li tikkontribwixxi lejn il-kisba ta' status tajjeb tal-korpi tal-ilma tal-Unjoni permezz tal-applikazzjoni, l-iżvilupp u r-replikazzjoni tal-aħjar prattiki, kif ukoll permezz tal-mobilizzazzjoni ta' azzjonijiet komplementari fl-ambitu ta' programmi jew sorsi finanzjarji oħra tal-Unjoni.

(22)

Il-protezzjoni u r-restawr tal-ambjent tal-baħar huma wieħed mill-miri ġenerali tal-politika ambjentali tal-Unjoni. Il-Programm LIFE jenħtieġ li jappoġġa dawn li ġejjin: il-ġestjoni, il-konservazzjoni, ir-restawr u l-monitoraġġ tal-bijodiversità u tal-ekosistemi tal-baħar, b'mod partikolari f'siti tal-baħar ta' Natura 2000, u l-protezzjoni tal-ispeċi skont l-oqfsa ta' azzjoni prijoritizzati adottati skont id-Direttiva 92/43/KEE; il-kisba ta' Status Ambjentali Tajjeb f'konformità mad-Direttiva 2008/56/KE tal-Parlament Ewropew u tal-Kunsill (26); il-promozzjoni ta' ibħra nodfa u b'saħħithom; l-implimentazzjoni tal-komunikazzjoni tal-Kummissjoni tas-16 ta’ Jannar 2018 dwar Strateġija Ewropea għall-Plastik f’Ekonomija Ċirkolari, l-indirizzar b’mod partikolari tal-problema tal-irkaptu tas-sajd mitluf u tal-iskart fil-baħar; u l-promozzjoni tal-involviment tal-Unjoni fil-governanza tal-oċeani internazzjonali, li hija essenzjali biex jintlaħqu l-għanijiet tal-Aġenda 2030 għall-Iżvilupp Sostenibbli tan-Nazzjonijiet Uniti u biex jiġu garantiti oċeani b'saħħithom għall-ġenerazzjonijiet futuri. Il-proġetti integrati strateġiċi u l-proġetti strateġiċi dwar in-natura tal-Programm LIFE jenħtieġ li jinkludu azzjonijiet rilevanti li jkollhom il-mira li jipproteġu l-ambjent tal-baħar.

(23)

It-titjib tal-governanza fuq kwistjonijiet ambjentali, tat-tibdil fil-klima u kwistjonijiet relatati ta’ tranżizzjoni enerġetika jirrikjedi l-involviment tas-soċjetà ċivili billi tiżdied is-sensibilizzazzjoni tal-pubbliku, inkluż permezz ta’ strateġija ta’ komunikazzjoni li tieħu kont tal-media l-ġodda u n-netwerks soċjali, l-involviment tal-konsumaturi, u t-twessigħ tal-involviment tal-partijiet ikkonċernati, inkluż l-organizzazzjonijiet nongovernattivi (NGOs), f’konsultazzjonijiet dwar il-politiki relatati u l-implimentazzjoni tagħhom fil-livelli kollha. Għaldaqstant, huwa xieraq li l-Programm LIFE jappoġġa firxa wiesgħa ta’ NGOs kif ukoll netwerks ta’ entitajiet mingħajr skop ta’ qligħ li jsegwu għan li huwa ta’ interess ġenerali għall-Unjoni, u li huma primarjament attivi fil-qasam tal-ambjent jew l-azzjoni dwar il-klima, bl-għoti, b’mod kompetittiv u trasparenti, ta’ għotjiet operattivi sabiex jgħinu lil NGOs, netwerks u entitajiet bħal dawn, jagħtu kontribut effettiv lill-politika tal-Unjoni, u biex jibnu u jsaħħu l-kapaċità tagħhom biex b'hekk isiru sħab aktar effiċjenti.

(24)

Filwaqt li t-titjib tal-governanza fil-livelli kollha jenħtieġ li jkun objettiv trasversali għas-sottoprogrammi kollha tal-Programm LIFE, il-Programm LIFE jenħtieġ li jappoġġa l-iżvilupp, l-implimentazzjoni u l-infurzar tal-acquis dwar l-ambjent u l-klima u l-konformità miegħu, b'mod partikolari l-leġiżlazzjoni orizzontali dwar il-governanza ambjentali, inkluża l-leġiżlazzjoni li timplimenta l-Konvenzjoni Aarhus (NU/KEE).

(25)

Il-Programm LIFE jenħtieġ li jħejji u jappoġġa lill-atturi fis-suq għal tranżizzjoni lejn ekonomija sostenibbli, ċirkolari, effiċjenti fl-użu tal-enerġija, ibbażata fuq l-enerġija rinnovabbli, newtrali għall-klima u reżiljenti għat-tibdil fil-klima billi jittestja opportunitajiet tan-negozju ġodda, jaġġorna l-ħiliet professjonali, jiffaċilita l-aċċess tal-konsumaturi għal prodotti u servizzi sostenibbli, jinvolvi u jagħti s-setgħa lill-influwenzaturi, u jittestja metodi ġodda biex jiġu adattati l-proċessi eżistenti u l-pajsaġġ kummerċjali. Biex ikun appoġġat użu kummerċjali usa' ta' soluzzjonijiet sostenibbli, jenħtieġ li jiġu promossi l-aċċettazzjoni tal-pubbliku ġenerali u l-involviment tal-konsumatur.

(26)

Il-Programm LIFE huwa mfassal biex jappoġġa t-turija ta’ tekniki, approċċi u l-aħjar prattiki li jistgħu jiġu replikati u użati fuq skala ikbar. Soluzzjonijiet innovattivi jistgħu jikkontribwixxu għat-titjib tal-prestazzjoni ambjentali u s-sostenibbiltà, b’mod partikolari għall-iżvilupp ta’ prattiki ta’ biedja sostenibbli fiż-żoni attivi fl-oqsma tal-klima, l-ilma, il-ħamrija, il-bijodiversità u l-iskart. Jenħtieġ li ssir enfasi f’dan ir-rigward fuq is-sinerġiji ma’ programmi u politiki oħra, bħas-Sħubija Ewropea għall-Innovazzjoni għall-Produttività u s-Sostenibbiltà Agrikola u l-Iskema ta’ Ġestjoni u Verifika Ambjentali tal-UE.

(27)

Fil-livell tal-Unjoni, investimenti kbar f'azzjonijiet dwar l-ambjent u l-klima huma primarjament iffinanzjati minn programmi ta' finanzjament ewlenin tal-Unjoni. Għaldaqstant huwa essenzjali li jiżdiedu l-isforzi ta’ inklużjoni biex jiġu żgurati s-sostenibbiltà, il-protezzjoni tal-bijodiversità u l-protezzjoni kontra t-tibdil fil-klima ta' attivitajiet taħt programmi ta’ finanzjament oħra tal-Unjoni u l-integrazzjoni ta’ salvagwardji tas-sostenibbiltà fl-istrumenti kollha tal-Unjoni. Fil-kuntest tar-rwol tagħhom ta’ katalizzaturi, il-proġetti integrati strateġiċi u l-proġetti strateġiċi dwar in-natura li jridu jiġu żviluppati fl-ambitu tal-Programm LIFE jenħtieġ li jisfruttaw opportunitajiet ta' finanzjament fi ħdan dawk il-programmi ta' finanzjament u sorsi oħrajn ta' finanzjament, bħalma huma l-fondi nazzjonali, u joħolqu sinerġiji.

(28)

Is-suċċess ta’ proġetti strateġiċi dwar in-natura u ta’ proġetti integrati strateġiċi jiddependi minn kooperazzjoni mill-qrib bejn l-awtoritajiet nazzjonali, reġjonali u lokali u l-atturi mhux Statali affettwati mill-objettivi tal-Programm LIFE. Il-prinċipji ta’ trasparenza u ta’ żvelar rigward deċiżjonijiet dwar l-iżvilupp, l-implimentazzjoni, il-valutazzjoni u l-monitoraġġ ta’ proġetti jenħtieġ, għalhekk, li jiġu applikati, b’mod partikolari fil-każ ta’ integrazzjoni jew meta jkunu involuti sorsi ta’ finanzjament multipli.

(29)

Filwaqt li jirrifletti l-importanza li jiġi indirizzat it-tibdil fil-klima b'mod koordinat u ambizzjuż, f'konformità mal-impenji tal-Unjoni biex timplimenta l-Ftehim ta' Pariġi dwar it-Tibdil tal-Klima u l-Għanijiet ta' Żvilupp Sostenibbli tan-Nazzjonijiet Uniti, il-Programm LIFE ser jikkontribwixxi biex jiġu inklużi azzjonijiet dwar il-klima u biex tinkiseb mira ġenerali ta' mill-inqas 30 % tal-infiq tal-baġit tal-UE li jappoġġa l-objettivi klimatiċi. L-azzjonijiet fl-ambitu tal-Programm LIFE huma mistennija li jikkontribwixxu 61 % tal-pakkett finanzjarju ġenerali tal-Programm LIFE għal objettivi klimatiċi. Matul it-tħejjija u l-implimentazzjoni tal-Programm LIFE ser jiġu identifikati azzjonijiet rilevanti, u dawn ser jiġu valutati mill-ġdid fil-kuntest tal-evalwazzjonijiet u l-proċessi ta' rieżami rilevanti. Jenħtieġ li, f'konformità mal-Patt Ekoloġiku Ewropew, l-azzjonijiet taħt il-programm LIFE jirrispettaw il-prinċipju 'la tagħmilx ħsara'.

(30)

Fl-implimentazzjoni tal-Programm LIFE, jenħtieġ li tingħata kunsiderazzjoni xierqa lill-istrateġija għar-reġjuni ultraperiferiċi, li tinsab fil-komunikazzjoni tal-Kummissjoni tal-24 ta' Ottubru 2017 dwar sħubija strateġika aktar b'saħħitha u mġedda mar-reġjuni ultraperiferiċi tal-UE, fid-dawl tal-Artikolu 349 TFUE u l-ħtiġijiet u l-vulnerabbiltajiet speċifiċi ta' dawk ir-reġjuni. Il-politiki tal-Unjoni, għajr dawk fil-qasam tal-ambjent, tal-klima u dawk rilevanti fil-qasam tal-enerġija, jenħtieġ li jiġu kkunsidrati wkoll.

(31)

B'appoġġ għall-implimentazzjoni tal-Programm LIFE, il-Kummissjoni jenħtieġ li tikkollabora man-netwerk tal-Punti ta' Kuntatt Nazzjonali tal-Programm LIFE biex tistimula l-kooperazzjoni bil-għan li s-servizzi tal-Punt ta' Kuntatt Nazzjonali madwar l-Unjoni jitjiebu u jsiru aktar effettivi, sabiex iżżid il-kwalità ġenerali tal-proposti ppreżentati, torganizza seminars u workshops, tippubblika listi ta' proġetti ffinanzjati fl-ambitu tal-Programm LIFE jew twettaq attivitajiet oħra, pereżempju kampanji tal-media, sabiex isiru magħrufa aktar ir-riżultati tal-proġetti u jiġi ffaċilitat l-iskambju ta' esperjenza, għarfien u l-aħjar prattiki u r-replikazzjoni tar-riżultati ta' proġetti fl-Unjoni kollha, u b'hekk ikunu promossi l-kooperazzjoni u l-komunikazzjoni. Jenħtieġ li tali attivitajiet ikunu mmirati b'mod partikolari lejn l-Istati Membri li fihom hemm użu baxx ta' fondi u jenħtieġ li jiffaċilitaw il-komunikazzjoni u l-kooperazzjoni bejn il-benefiċjarji tal-proġetti, l-applikanti u l-partijiet ikkonċernati ta' proġetti li tlestewjew dawk li għadhom għaddejjin fl-istess qasam. Huwa essenzjali li tali attivitajiet ta’ komunikazzjoni u kooperazzjoni jiġu indirizzati lill-awtoritajiet reġjonali u lokali u lill-partijiet ikkonċernati.

(32)

Il-kwalità jenħtieġ li tkun il-kriterju li jirregola l-evalwazzjoni tal-proġett u l-proċess tal-għoti fil-Programm LIFE. Sabiex tiġi ffaċilitata l-implimentazzjoni tal-objettivi tal-Programm LIFE madwar l-Unjoni u biex tiġi promossa kwalità għolja fi proposti ta’ proġetti, jenħtieġ li jitqiegħed għad-dispożizzjoni finanzjament għal proġetti ta’ assistenza teknika li jimmiraw lejn parteċipazzjoni effettiva fil-Programm LIFE. Il-Kummissjoni jenħtieġ li ssegwi kopertura ġeografika effettiva u bbażata fuq il-kwalità madwar l-Unjoni, inkluż billi tappoġġa lill-Istati Membri biex itejbu l-kwalità tal-proġetti permezz tat-tisħiħ tal-kapaċitajiet. Parteċipazzjoni effettiva baxxa għall-Programm LIFE, l-attivitajiet eliġibbli u l-kriterji għall-għoti tal-Programm LIFE jenħtieġ li jkunu speċifikati fil-Programm ta' Ħidma Pluriennali ggwidat mill-parteċipazzjoni u r-rata ta' suċċess tal-applikanti mill-Istati Membri rilevanti, b'kont meħud, fost l-oħrajn, tal-popolazzjoni u tad-densità tal-popolazzjoni, tal-arja totali tas-siti ta' Natura 2000 għal kull Stat Membru espressa bħala proporzjon tal-arja totali ta' Natura 2000, u tal-proporzjon tat-territorju ta' Stat Membru kopert minn siti ta' Natura 2000. Jenħtieġ li l-attivitajiet eliġibbli jkunu ta' tali natura li jkollhom l-għan li jtejbu l-kwalità tal-applikazzjoni għall-proġetti.

(33)

F'konformità mal-kommunikazzjoni tal-Kummissjoni tat-18 ta’ Jannar 2018 dwar "Azzjonijiet tal-UE għat-titjib tal-governanza u l-konformità ambjentali", in-Netwerk tal-Unjoni Ewropea għall-Implimentazzjoni u l-Infurzar tal-Liġi Ambjentali (IMPEL), in-Netwerk Ewropew tal-Prosekuturi għall-Ambjent (ENPE), u l-Forum tal-Unjoni Ewropea tal-Imħallfin għall-Ambjent (EUFJE) inħolqu biex jiffaċilitaw il-kollaborazzjoni bejn l-Istati Membri u jkollhom irwol uniku fl-infurzar tal-leġiżlazzjoni ambjentali tal-Unjoni. Huma jagħtu kontribut sostanzjali biex tissaħħaħ il-konsistenza fl-implimentazzjoni u l-infurzar tal-leġiżlazzjoni ambjentali tal-Unjoni fl-Unjoni kollha, filwaqt li jiġu evitati distorsjonijiet tal-kompetizzjoni, u biex itejbu l-kwalità tal-ispezzjoni ambjentali u l-mekkaniżmi tal-infurzar tal-liġi permezz ta' sistema ta' networking kemm fil-livell tal-Unjoni kif ukoll fil-livell tal-Istati Membri, u jipprovdu għall-iskambju ta' informazzjoni u esperjenza f'livelli amministrattivi differenti, permezz ta' taħriġ u diskussjonijiet fil-fond dwar kwistjonijiet ambjentali u aspetti ta' infurzar, inkluż il-proċessi ta' monitoraġġ u ta' għoti ta' permessi. Fid-dawl tal-kontribut tagħhom għall-objettivi tal-Programm LIFE, jixraq li jiġi awtorizzat l-għoti ta' għotjiet lil IMPEL, ENPE u EUFJE mingħajr sejħa għal proposti sabiex ikompli jingħata appoġġ lill-attivitajiet ta' dawk il-partijiet ikkonċernati. Barra minn hekk, f'każijiet oħra, tista' ma tkunx meħtieġa sejħa skont ir-rekwiżiti ġenerali tar-Regolament (UE, Euratom) 2018/1046 tal-Parlament Ewropew u tal-Kunsill (27) (ir-“Regolament Finanzjarju”), per eżempju għall-korpi maħtura mill-Istati Membri u li joperaw taħt ir-responsabbiltà tagħhom, fejn dawk l-Istati Membri jkunu identifikati bħala benefiċjarji ta' għotja b'att leġiżlattiv tal-Unjoni.

(34)

Jixraq li jiġi stabbilit pakkett finanzjarju għall-Programm LIFE li għandu jikkostitwixxi l-ammont ta' referenza primarja, fi ħdan it-tifsira tal-punt 18 tal-Ftehim Interistituzzjonali tas-16 ta’ Diċembru 2020 bejn il-Parlament Ewropew, il-Kunsill tal-Unjoni Ewropea u l-Kummissjoni Ewropea dwar dixxiplina baġitarja, dwar kooperazzjoni f’materji baġitarji u dwar ġestjoni finanzjarja tajba, kif ukoll dwar riżorsi proprji ġodda, inkluż pjan direzzjonali lejn l-introduzzjoni ta’ riżorsi proprji ġodda, għall-Parlament Ewropew u l-Kunsill matul il-proċedura baġitarja annwali.

(35)

Ir-rati ta' kofinanzjament massimi ta' għotjiet iffinanzjati taħt il-Programm LIFE jenħtieġ li jiġu stabbiliti f'livelli li jkunu meħtieġa sabiex jinżamm il-livell effettiv ta' sostenn ipprovdut mill-Programm LIFE. Sabiex titqies l-adattabbiltà meħtieġa fid-dawl tal-firxa eżistenti ta' azzjonijiet u entitajiet, rati ta' kofinanzjament speċifiċi jenħtieġ li jiffaċilitaw iċ-ċertezza, filwaqt li jżommu grad ta' flessibbiltà proporzjonat għal ħtiġijiet jew rekwiżiti speċifiċi. Ir-rati ta' kofinanzjament speċifiċi jenħtieġ li jkunu dejjem soġġetti għar-rati massimi ta' kofinanzjament rilevanti stabbiliti.

(36)

Ir-Regolament Finanzjarju adottat mill-Parlament Ewropew u mill-Kunsill abbażi tal-Artikolu 322 TFUE japplika għal dan ir-Regolament. Ir-Regolament Finanzjarju jistabbilixxi regoli dwar l-implimentazzjoni tal-baġit tal-Unjoni, inkluż ir-regoli dwar għotjiet, premjijiet, akkwist, ġestjoni indiretta, strumenti finanzjarji, garanziji baġitarji, assistenza finanzjarja u r-rimborż ta' esperti esterni. Ir-regoli adottati abbażi tal-Artikolu 322 TFUE jinkludu wkoll reġim ġenerali ta' kondizzjonalità għall-protezzjoni tal-baġit tal-Unjoni.

(37)

F'konformità mar-Regolament Finanzjarju, ir-Regolament (UE, Euratom) Nru 883/2013 tal-Parlament Ewropew u tal-Kunsill (28) ir-Regolamentii tal-Kunsill (KE, Euratom) Nru 2988/95 (29), (Euratom, KE) Nru 2185/96 (30) u (UE) 2017/1939 (31), l-interessi finanzjarji tal-Unjoni jridu jiġu protetti permezz ta’ miżuri proporzjonati, inkluż miżuri relatati mal-prevenzjoni, is-sejbien, il-korrezzjoni u l-investigazzjoni ta’ irregolaritajiet, inkluż frodi mal-irkupru ta’ fondi mitlufa, imħallsa bi żball jew użati b’mod mhux korrett, u, fejn xieraq, mal-impożizzjoni ta’ penali amministrattivi. B'mod partikolari, f'konformità mar-Regolamenti (Euratom, KE) Nru 2185/96 u (UE, Euratom) Nru 883/2013, l-Uffiċċju Ewropew Kontra l-Frodi (OLAF) għandu s-setgħa li jwettaq investigazzjonijiet amministrattivi, inkluż kontrolli u spezzjonijiet fuq il-post, bil-għan li jiġi stabbilit jekk kienx hemm frodi, korruzzjoni jew kwalunkwe attività illegali oħra li taffettwa l-interessi finanzjarji tal-Unjoni.

L-Uffiċċju tal-Prosekutur Pubbliku Ewropew (l-UPPE) għandu s-setgħa, skont ir-Regolament (UE) 2017/1939, li jinvestiga u jressaq għall-prosekuzzjoni reati kriminali li jaffettwaw l-interessi finanzjarji tal-Unjoni kif previst fid-Direttiva (UE) 2017/1371 tal-Parlament Ewropew u tal-Kunsill (32). F'konformità mar-Regolament Finanzjarju, kwalunkwe persuna jew entità li tirċievi fondi mill-Unjoni trid tikkoopera bis-sħiħ fil-protezzjoni tal-interessi finanzjarji tal-Unjoni, tagħti d-drittijiet u l-aċċess neċessarji lill-Kummissjoni, lill-OLAF, lill-Qorti Ewropea tal-Awdituri u, fir-rigward ta' dawk l-Istati Membri li jipparteċipaw fil-kooperazzjoni msaħħa skont ir-Regolament (UE) 2017/1939, lill-UPPE, u tiżgura li kwalunkwe parti terza involuta fl-implimentazzjoni ta’ fondi tal-Unjoni tagħti drittijiet ekwivalenti.

(38)

It-tipi ta' finanzjament u l-metodi ta' implimentazzjoni tal-baġit għall-Programm LIFE jenħtieġ li jintgħażlu skont l-abbiltà tagħhom li jiksbu l-objettivi speċifiċi tal-azzjonijiet u li jwasslu għal riżultati, filwaqt li jitqiesu, b'mod partikolari, il-kostijiet tal-kontrolli, il-piż amministrattiv, u r-riskju mistenni ta' nuqqas ta' konformità. Għal għotjiet, l-użu ta' somom f'daqqa, rati fissi u skali ta' kostijiet unitarji jenħtieġ li jiġu kkunsidrati. Jenħtieġ li l-Kummissjoni tiżgura implimentazzjoni li tinftiehem faċilment, u tippromwovi simplifikazzjoni reali għall-iżviluppaturi tal-proġetti.

(39)

Fejn ikun adatt, l-objettivi ta' politika tal-Programm LIFE jenħtieġ li jiġu indirizzati permezz ta' strumenti finanzjarji u garanziji baġitarji taħt ir-Regolament (UE) 2021/523, inkluż permezz tal-ammont allokat mill-Programm LIFE, kif speċifikat fil-programmi ta' ħidma pluriennali taħt dak il-Programm.

(40)

Skont l-Artikolu 94 tad-Deċiżjoni tal-Kunsill 2013/755/UE (33), l-entitajiet stabbiliti f'pajjiżi u territorji extra-Ewropej huma eliġibbli għal finanzjament soġġett għar-regoli u l-objettivi tal-Programm LIFE u għal arranġamenti possibbli applikabbli għall-Istat Membru li miegħu huwa marbut il-pajjiż jew it-territorju extra-Ewropew rilevanti. Il-parteċipazzjoni ta' tali entitajiet fil-Programm LIFE jenħtieġ li tiffoka primarjament fuq proġetti li jaqgħu taħt is-sottoprogramm 'Natura u Bijodiversità'.

(41)

L-iskema volontarja għall-Bijodiversità u s-Servizzi Ekosistemiċi fit-Territorji Extra-Ewropej (BEST) tippromwovi l-konservazzjoni tal-bijodiversità, inkluż l-bijodiversità tal-baħar, u l-użu sostenibbli ta' servizzi ekosistemiċi, inkluż approċċi bbażati fuq l-ekosistema għall-adattament u t-tgħaffija tat-tibdil fil-klima, fir-Reġjuni Ultraperifiċi tal-Unjoni u fil-Pajjiżi u fit-Territorji Extra-Ewropej. Permezz tal-azzjoni preparatorja BEST adottata fl-2011 u l-Programm BEST 2.0 u l-proġett BEST RUP sussegwenti, il-BEST għenet biex titqajjem kuxjenza dwar l-importanza ekoloġika tar-Reġjuni Ultraperiferiċi u tal-Pajjiżi u t-Territorji Extra-Ewropej u r-rwol ewlieni tagħhom fil-konservazzjoni tal-bijodiversità globali. Il-Kummissjoni Ewropea tistma li l-ħtieġa għal appoġġ finanzjarju għal proġetti fuq il-post f'dawk it-territorji hija ta' EUR 8 miljun fis-sena. Fid-Dikjarazzjonijiet Ministerjali tagħhom tal-2017 u l-2018, il-Pajjiżi u t-Territorji Extra-Ewropej esprimew l-apprezzament tagħhom għal din l-iskema ta' għotjiet żgħar għall-bijodiversità. Huwa għaldaqstant xieraq li l-Programm LIFE jiffinanzja għotjiet żgħar għall-bijodiversità, inkluż azzjonijiet ta' tisħiħ tal-kapaċitajiet u azzjonijiet li għandhom effett katalitiku, kemm fir-Reġjuni Ultraperiferiċi kif ukoll fil-Pajjiżi u t-Territorji Extra-Ewropej.

(42)

Il-Programm LIFE jenħtieġ li jkun miftuħ għal pajjiżi terzi skont il-ftehimiet bejn l-Unjoni u dawk il-pajjiżi li jistabbilixxu l-kondizzjonijiet speċifiċi għall-parteċipazzjoni tagħhom.

(43)

Pajjiżi terzi li huma membri taż-Żona Ekonomika Ewropea (iż-ŻEE) jistgħu jieħdu sehem fil-programmi tal-Unjoni fil-qafas tal-kooperazzjoni stabbilit skont il-Ftehim taż-Żona Ekonomika Ewropea (34), li jipprevedi l-implimentazzjoni tal-programmi abbażi ta' deċiżjoni adottata skont dak il-Ftehim. Il-pajjiżi terzi jistgħu wkoll jipparteċipaw fuq il-bażi ta' strumenti legali oħra. Jenħtieġ li tiġi introdotta dispożizzjoni speċifika f'dan ir-Regolament li tirrikjedi li pajjiżi terzi jagħtu d-drittijiet neċessarji u l-aċċess meħtieġ lill-uffiċjal tal-awtorizzazzjoni responsabbli, lill-OLAF u lill-Qorti tal-Awdituri biex jeżerċitaw b'mod komprensiv il-kompetenzi rispettivi tagħhom.

(44)

Skont il-paragrafi 22 u 23 tal-Ftehim Interistituzzjonali tat-13 ta' April 2016 dwar it-Tfassil Aħjar tal-Liġijiet (35), jenħtieġ li l-Programm LIFE jiġi evalwat abbażi tal-informazzjoni miġbura f'konformità ma' rekwiżiti speċifiċi ta' monitoraġġ, filwaqt li jiġi evitat piż amministrattiv, b'mod partikolari fuq l-Istati Membri, kif ukoll ir-regolamentazzjoni żejda. Jenħtieġ li dawk ir-rekwiżiti, fejn xieraq, jinkludu indikaturi li jistgħu jitkejlu bħala bażi għall-evalwazzjoni tal-effetti tal-Programm LIFE fil-prattika. L-impatt sħiħ tal-Programm LIFE huwa dovut għat-totalità tal-kontributi indiretti, fit-tul u diffiċli li jitkejlu biex tinkiseb il-firxa sħiħa ta' objettivi klimatiċi u ambjentali tal-Unjoni. Għall-monitoraġġ tal-Programm LIFE, l-indikaturi tal-output dirett u r-rekwiżiti ta' segwiment stabbiliti f'dan ir-Regolament jenħtieġ li jiġu kkomplementati minn aggregazzjoni ta' indikaturi speċifiċi fil-livell tal-proġetti li jridu jiġu deskritti fil-programmi ta' ħidma pluriennali jew is-sejħiet għal proposti, fost l-oħrajn fir-rigward ta' Natura 2000 u l-emissjonijiet ta' ċerti sustanzi li jniġġsu fl-arja.

(45)

abiex jiġu żgurati kondizzjonijiet uniformi għall-implimentazzjoni ta' dan ir-Regolament fir-rigward tal-adozzjoni tal-programmi ta' ħidma pluriennali, jenħtieġ li setgħat ta' implimentazzjoni jiġu kkonferiti lill-Kummissjoni. Jenħtieġ li dawk is-setgħat ikunu eżerċitati f'konformità mar-Regolament (UE) Nru 182/2011 tal-Parlament Ewropew u tal-Kunsill (36).

(46)

Sabiex jiġi żgurat li l-appoġġ għall-Programm LIFE u l-implimentazzjoni tiegħu huma konsistenti mal-politiki u l-prijoritajiet tal-Unjoni jenħtieġ li s-setgħa biex jiġu adottati atti f'konformità mal-Artikolu 290 tat-TFUE tiġi ddelegata lill-Kummissjoni, u dan bil-għan li temenda dan ir-Regolament billi tirrevedi jew tikkomplimenta l-indikaturi jew li tissupplimenta dan ir-Regolament billi tiddefinixxi indikaturi speċifiċi għal kull sottoprogramm u tip ta' proġett, kif ukoll sabiex jiġi stabbilit il-qafas għall-monitoraġġ u l-evalwazzjoni. Huwa ta' importanza partikolari li l-Kummissjoni twettaq konsultazzjonijiet adatti waqt il-ħidma preparatorja tagħha, inkluż fil-livell tal-esperti, u li dawk il-konsultazzjonijiet jitwettqu f'konformità mal-prinċipji stabbiliti fil-Ftehim Interistituzzjonali tat-13 ta' April 2016 dwar it-Tfassil Aħjar tal-Liġijiet. B'mod partikolari, biex tiġi żgurata parteċipazzjoni ugwali fit-tħejjija tal-atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jkunu qed jittrattaw it-tħejjija tal-atti delegati.

(47)

Minħabba li l-għanijiet ta' dan ir-Regolament, jiġifieri li jingħata kontribut għal livell għoli ta' protezzjoni ambjentali u azzjoni ambizzjuża dwar il-klima, għall-iżvilupp sostenibbli u għall-ilħuq tal-objettivi u tal-miri tal-leġiżlazzjoni, l-istrateġiji, il-pjanijiet u l-impenji internazzjonali tal-Unjoni dwar l-ambjent, il-bijodiversità, il-klima, l-ekonomija ċirkolari u dawk rilevanti dwar l-enerġija rinnovabbli u l-effiċjenza fl-użu tal-enerġija permezz ta' governanza tajba u approċċ b'diversi partijiet ikkonċernati, ma jistgħux jintlaħqu b'mod suffiċjenti mill-Istati Membri iżda jistgħu, minħabba l-iskala u l-effetti ta' dan ir-Regolament, jintlaħqu aħjar fil-livell tal-Unjoni, l-Unjoni tista' tadotta miżuri, skont il-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F'konformità mal-prinċipju tal-proporzjonalità kif stabbilit f'dak l-Artikolu, dan ir-Regolament ma jmurx lil hinn minn dak li huwa meħtieġ sabiex jintlaħqu dawk l-għanijiet.

(48)

Għalhekk ir-Regolament (UE) Nru 1293/2013 jenħtieġ li jitħassar.

(49)

Huwa xieraq li tiġi żgurata tranżizzjoni bla xkiel mingħajr interruzzjoni bejn il-Programm għall-Ambjent u l-Azzjoni Klimatika (LIFE) preċedenti u l-Programm LIFE u li l-bidu tal-Programm LIFE jiġi allinjat ma' dak tal-qafas finanzjarju pluriennali kif stabbilit fir-Regolament (UE, Euratom) 2020/2093. Għalhekk, dan ir-Regolament jenħtieġ li jidħol fis-seħħ b’urġenza u jenħtieġ li japplika b'effett retroattiv mill-1 ta' Jannar 2021,

(1)

Dan ir-Regolament għandu l-għan li jiżgura l-funzjonament bla xkiel tas-suq uniku diġitali f’soċjetà miftuħa u demokratika, billi jindirizza l-użu ħażin tas-servizzi ta’ hosting għal finijiet terroristiċi u jikkontribwixxi għas-sigurtà pubblika fl-Unjoni kollha. Il-funzjonament tas-suq uniku diġitali jenħtieġ li jittejjeb billi tissaħħaħ iċ-ċertezza legali għall-fornituri ta’ servizzi ta’ hosting u tissaħħaħ il-fiduċja tal-utenti fl-ambjent online, kif ukoll billi jissaħħu s-salvagwardji għal-libertà ta’ espressjoni, inklużi d-dritt li wieħed jirċievi u jagħti informazzjoni u ideat f’soċjetà miftuħa u demokratika u l-libertà u l-pluraliżmu tal-media.

(2)

Il-miżuri regolatorji biex tiġi indirizzata d-disseminazzjoni ta’ kontenut terroristiku online jenħtieġ li jiġu kkomplementati bl-istrateġiji tal-Istati Membri għall-indirizzar tat-terroriżmu, inklużi t-tisħiħ tal-litteriżmu fil-media u tal-ħsieb kritiku, l-iżvilupp ta’ narrattivi alternattivi u kontronarrattivi, u inizjattivi oħra biex jitnaqqsu l-impatt ta’, u l-vulnerabbiltà għal, il-kontenut terroristiku online, kif ukoll investiment fil-ħidma soċjali, inizjattivi ta’ deradikalizzazzjoni u involviment mal-komunitajiet affettwati, biex tiġi prevenuta b’mod sostnut ir-radikalizzazzjoni fis-soċjetà.

(3)

L-indirizzar ta’ kontenut terroristiku online, li huwa parti minn problema akbar ta’ kontenut illegali online, jirrikjedi taħlita ta’ miżuri leġiżlattivi, mhux leġiżlattivi u volontarji bbażati fuq kollaborazzjoni bejn l-awtoritajiet u l-fornituri ta’ servizzi ta’ hosting, b’mod li jirrispetta bis-sħiħ id-drittijiet fundamentali.

(4)

Il-fornituri ta’ servizzi ta’ hosting li huma attivi fuq l-Internet għandhom rwol essenzjali fl-ekonomija diġitali billi joħolqu konnessjoni bejn in-negozju u ċ-ċittadini u billi jiffaċilitaw id-dibattitu pubbliku u d-distribuzzjoni u t-twassil ta’ informazzjoni, opinjonijiet u ideat, filwaqt li jikkontribwixxu b’mod sinifikanti għall-innovazzjoni, it-tkabbir ekonomiku u l-ħolqien ta’ impjiegi fl-Unjoni. Madankollu, is-servizzi tal-fornituri ta’ servizzi ta’ hosting f’ċerti każijiet jiġu abbużati minn partijiet terzi għall-fini li jwettqu attivitajiet illegali online. Problema partikolari hi l-użu ħażin ta’ dawk is-servizzi minn gruppi terroristiċi u s-sostenituri tagħhom biex jiddisseminaw kontenut terroristiku online sabiex iwasslu l-messaġġ tagħhom, jirradikalizzaw u jirreklutaw segwaċi, u biex jiffaċilitaw u jidderieġu l-attività terroristika.

(5)

Minkejja li mhijiex l-uniku fattur, il-preżenza ta’ kontenut terroristiku online wriet li hija katalizzatur għar-radikalizzazzjoni ta’ individwi li tista’ twassal għal atti terroristiċi, u għalhekk għandha konsegwenzi negattivi serji għall-utenti, għaċ-ċittadini u għas-soċjetà inġenerali kif ukoll għall-fornituri ta’ servizzi ta’ hosting online li jospitaw tali kontenut, peress li timmina l-fiduċja tal-utenti tagħhom u tagħmel ħsara lill-mudelli tan-negozju tagħhom. Fid-dawl tar-rwol ċentrali tagħhom u l-mezzi u l-kapaċitajiet teknoloġiċi assoċjati mas-servizzi li jipprovdu, il-fornituri ta’ servizzi ta’ hosting online għandhom responsabbiltajiet soċjetali partikolari biex jipproteġu s-servizzi tagħhom minn użu ħażin mit-terroristi u jgħinu biex jiġi indirizzat il-kontenut terroristiku disseminat permezz tas-servizzi online tagħhom, filwaqt li jittieħed kont tal-importanza fundamentali tal-libertà ta’ espressjoni, inkluża l-libertà li wieħed jirċievi u jagħti informazzjoni u ideat f’soċjetà miftuħa u demokratika.

(6)

L-isforzi fil-livell tal-Unjoni fil-ġlieda kontra l-kontenut terroristiku online bdew fl-2015 permezz ta’ qafas ta’ kooperazzjoni volontarja bejn l-Istati Membri u l-fornituri ta’ servizzi ta’ hosting. Dawk l-isforzi jenħtieġ li jkunu kkomplementati b’qafas leġiżlattiv ċar sabiex tkompli titnaqqas l-aċċessibbiltà tal-kontenut terroristiku online u tiġi indirizzata b’mod adegwat problema li qed tevolvi b’mod rapidu. Il-qafas leġiżlattiv għandu l-għan li jibni fuq l-isforzi volontarji, li ġew imsaħħa bir-Rakkomandazzjoni tal-Kummissjoni (UE) 2018/334 (3), u jwieġeb għall-appelli li saru mill-Parlament Ewropew biex jissaħħu l-miżuri għall-indirizzar tal-kontenut online li huwa illegali u dannuż f’konformità mal-qafas orizzontali stabbilit bid-Direttiva 2000/31/KE tal-Parlament Ewropew u tal-Kunsill (4), kif ukoll mill-Kunsill Ewropew, biex jittejbu s-sejbien u t-tneħħija ta’ kontenut online li jinstiga atti terroristiċi.

(7)

Jenħtieġ li dan ir-Regolament ma jaffettwax l-applikazzjoni tad-Direttiva 2000/31/KE. B’mod partikolari, kwalunkwe miżura meħuda minn fornitur ta’ servizzi ta’ hosting f’konformità ma’ dan ir-Regolament, inkluża kwalunkwe miżura speċifika, ma għandhiex minnha nnifisha twassal biex dak il-fornitur ta’ servizzi ta’ hosting jitlef il-benefiċċju tal-eżenzjoni mir-responsabbiltà previst f’dik id-Direttiva. Barra minn hekk, dan ir-Regolament ma jaffettwax is-setgħat tal-awtoritajiet u l-qrati nazzjonali li jistabbilixxu r-responsabbiltà ta’ fornituri ta’ servizzi ta’ hosting fejn il-kondizzjonijiet stabbiliti f’dik id-Direttiva għal eżenzjoni mir-responsabbiltà ma jkunux sodisfatti.

(8)

F’każ ta’ konflitt bejn dan ir-Regolament u d-Direttiva 2010/13/UE tal-Parlament Ewropew u tal-Kunsill (5) fir-rigward ta’ dispożizzjonijiet li jirregolaw is-servizzi tal-media awdjoviżiva kif definit fil-punt (a) tal-Artikolu 1(1) ta’ dik id-Direttiva, jenħtieġ li tkun id-Direttiva 2010/13/UE li tipprevali. Dan jenħtieġ li ma jaffettwax l-obbligi taħt dan ir-Regolament, b’mod partikolari fir-rigward tal-fornituri ta’ servizzi ta’ pjattaformi ta’ video-sharing.

(9)

Dan ir-Regolament jenħtieġ li jistabbilixxi r-regoli biex jiġi indirizzat l-użu ħażin tas-servizzi ta’ hosting għall-fini tad-disseminazzjoni ta’ kontenut terroristiku online sabiex ikun garantit il-funzjonament bla xkiel tas-suq intern. Dawk ir-regoli jenħtieġ li jirrispettaw b’mod sħiħ id-drittijiet fundamentali protetti fl-Unjoni u, b’mod partikolari, dawk garantiti mill-Karta tad-Drittijiet Fundamentali tal-Unjoni Ewropea (il-“Karta”).

(10)

Dan ir-Regolament għandu l-għan li jikkontribwixxi għall-protezzjoni tas-sigurtà pubblika filwaqt li jistabbilixxi salvagwardji xierqa u robusti biex jiżgura l-protezzjoni tad-drittijiet fundamentali, inklużi d-drittijiet tar-rispett għall-ħajja privata, għal protezzjoni tad-data personali, għal-libertà ta’ espressjoni, inklużi l-libertà li wieħed jirċievi u jagħti informazzjoni, il-libertà ta’ intrapriża, u d-dritt għal rimedju effettiv. Barra minn hekk, hija projbita kwalunkwe diskriminazzjoni. Jenħtieġ li l-awtoritajiet kompetenti u l-fornituri ta’ servizzi ta’ hosting jadottaw biss miżuri li huma meħtieġa, xierqa u proporzjonati f’soċjetà demokratika, b’kont meħud tal-importanza partikolari mogħtija lil-libertà ta’ espressjoni u ta’ informazzjoni u l-libertà u l-pluraliżmu tal-media, li jikkostitwixxu l-pedamenti essenzjali ta’ soċjetà pluralista u demokratika u huma l-valuri li fuqhom hija bbażata l-Unjoni. Jenħtieġ li l-miżuri li jaffettwaw il-libertà ta’ espressjoni u ta’ informazzjoni jkunu strettament immirati biex jindirizzaw id-disseminazzjoni ta’ kontenut terroristiku online, filwaqt li jibqa’ rispettat id-dritt li wieħed jirċievi u jagħti informazzjoni legalment, b’kont meħud tar-rwol ċentrali tal-fornituri ta’ servizzi ta’ hosting biex jiffaċilitaw id-dibattitu pubbliku u d-distribuzzjoni u t-twassil ta’ fatti, opinjonijiet u ideat skont il-liġi. Il-miżuri online effettivi biex jindirizzaw il-kontenut terroristiku online u l-protezzjoni tal-libertà ta’ espressjoni u ta’ informazzjoni mhumiex għanijiet konfliġġenti, iżda huma għanijiet komplementari u li jsaħħu lil xulxin b’mod reċiproku.

(11)

Sabiex tiġi pprovduta ċarezza dwar l-azzjonijiet li għandhom jieħdu kemm il-fornituri ta’ servizzi ta’ hosting kif ukoll l-awtoritajiet kompetenti biex jindirizzaw id-disseminazzjoni ta’ kontenut terroristiku online, jenħtieġ li dan ir-Regolament jistabbilixxi definizzjoni ta’ ‘kontenut terroristiku’ għal finijiet preventivi, konsistenti mad-definizzjonijiet ta’ reati terroristiċi taħt id-Direttiva (UE) 2017/541 tal-Parlament Ewropew u tal-Kunsill (6). Minħabba l-ħtieġa li tiġi indirizzata l-propaganda terroristika online l-aktar dannuża, jenħtieġ li dik id-definizzjoni tkopri materjal li jinstiga jew jissolleċita minn xi ħadd it-twettiq, jew il-kontribuzzjoni għat-twettiq, ta’ reati terroristiċi, jew jissolleċita minn xi ħadd il-parteċipazzjoni f’attivitajiet ta’ grupp terroristiku, jew jigglorifika attivitajiet terroristiċi inkluż bid-disseminazzjoni ta’ materjal li juri attakk terroristiku. Jenħtieġ li d-definizzjoni tinkludi wkoll materjal li jipprovdi istruzzjoni għall-manifattura jew l-użu ta’ splussivi, armi tan-nar jew armi oħra jew sustanzi tossiċi jew perikolużi, kif ukoll sustanzi kimiċi, bijoloġiċi, radjoloġiċi u nukleari (CBRN, chemical, biological, radiological, nuclear), jew dwar metodi u tekniki speċifiċi oħra, inkluża l-għażla ta’ miri, għall-fini tat-twettiq, jew il-kontribuzzjoni għat-twettiq, ta’ reati terroristiċi. Tali materjal jinkludi testi, immaġnijiet, reġistrazzjonijiet awdjo u filmati, kif ukoll trażmissjonijiet diretti ta’ reati terroristiċi, li jikkawża l-periklu li jitwettqu aktar reati bħal dawn. Meta jiġi vvalutat jekk il-materjal jikkostitwixxix kontenut terroristiku fis-sens ta’ dan ir-Regolament, jenħtieġ li l-awtoritajiet kompetenti u l-fornituri ta’ servizzi ta’ hosting jieħdu kont ta’ fatturi bħan-natura u l-formulazzjoni ta’ dikjarazzjonijiet, il-kuntest li fih ikunu saru d-dikjarazzjonijiet u l-potenzjal tagħhom li jwasslu għal konsegwenzi dannużi fir-rigward tas-sigurtà u s-sikurezza tal-persuni. Jenħtieġ li l-fatt li l-materjal kien prodott minn, ikun attribwibbli għal, jew disseminat f’isem, persuna, grupp jew entità inklużi fil-lista tal-Unjon ta’ persuni, gruppi u entitajiet involuti f’atti terroristiċi u suġġetti għal miżuri restrittivi jikkostitwixxi fattur importanti fil-valutazzjoni.

(12)

Jenħtieġ li materjal disseminat għal finijiet edukattivi, ġurnalistiċi, artistiċi jew ta’ riċerka, jew għal finijiet ta’ sensibilizzazzjoni kontra attività terroristika, ma jkunx ikkunsidrat bħala kontenut terroristiku. Meta jiġi ddeterminat jekk l-materjal ipprovdut minn fornitur ta’ kontenut jikkostitwixxix “kontenut terroristiku” kif definit f’dan ir-Regolament, jenħtieġ li jitqies b’mod partikolari d-dritt għal-libertà ta’ espressjoni u ta’ informazzjoni, inklużi l-libertà u l-pluraliżmu tal-media u l-libertà tal-arti u x-xjenzi. Speċjalment f’każijiet fejn il-fornitur ta’ kontenut ikollu responsabbiltà editorjali, kwalunkwe deċiżjoni dwar it-tneħħija tal-materjal disseminat jenħtieġ li tqis l-istandards ġurnalistiċi stabbiliti mir-regolamentazzjoni tal-istampa jew tal-media f’konformità mal-liġi tal-Unjoni, inkluża l-Karta. Barra minn hekk, jenħtieġ li l-espressjoni ta’ fehmiet radikali, polemiċi jew kontroversjali fid-dibattitu pubbliku dwar kwistjonijiet politiċi sensittivi ma titqiesx bħala kontenut terroristiku.

(13)

Sabiex tiġi indirizzata b’mod effettiv id-disseminazzjoni ta’ kontenut terroristiku online, filwaqt li jiġi żgurat ir-rispett għall-ħajja privata tal-individwi, jenħtieġ li dan ir-Regolament japplika għall-fornituri ta’ servizzi tas-soċjetà ta’ informazzjoni li jaħżnu u jiddisseminaw lill-pubbliku informazzjoni u materjal ipprovduti minn utent tas-servizz fuq talba, irrispettivament minn jekk il-ħżin u d-disseminazzjoni lill-pubbliku ta’ tali informazzjoni u materjal humiex ta’ natura sempliċiment teknika, awtomatika u passiva. Il-kunċett ta’ “ħżin” jenħtieġ li jinftiehem bħala ż-żamma ta’ data fil-memorja ta’ server fiżiku jew virtwali. Jenħtieġ għalhekk li l-fornituri ta’ servizzi ta’ “sempliċi kondutturi” jew ta’ “caching”, kif ukoll ta’ servizzi oħra pprovduti f’saffi oħra tal-infrastruttura tal-Internet, li ma jinvolvux ħżin, bħal reġistri u reġistraturi, kif ukoll fornituri ta’ sistemi tal-ismijiet tad-dominji (DNS), servizzi ta’ pagament jew ta’ attakk distribwit li jwaqqaf is-servizz (DdoS) jaqgħu barra mill-kamp ta’ applikazzjoni ta’ dan ir-Regolament.

(14)

Il-kunċett ta’ “disseminazzjoni lill-pubbliku” jenħtieġ li jinkludi t-tqegħid ta’ informazzjoni għad-dispożizzjoni ta’ għadd potenzjalment illimitat ta’ persuni, jiġifieri li l-informazzjoni ssir faċilment aċċessibbli għall-utenti b’mod ġenerali, mingħajr ma tkun meħtieġa azzjoni ulterjuri mill-fornitur ta’ kontenut, irrispettivament minn jekk dawk il-persuni effettivament jaċċessawx l-informazzjoni inkwistjoni. Għaldaqstant, fejn l-aċċess għall-informazzjoni jirrikjedi reġistrazzjoni jew ammissjoni għal grupp ta’ utenti, jenħtieġ li dik l-informazzjoni titqies li hija disseminata lill-pubbliku biss meta l-utenti li jfittxu li jaċċessaw l-informazzjoni huma awtomatikament reġistrati jew ammessi mingħajr deċiżjoni jew għażla mill-bniedem dwar lil min jingħata l-aċċess. Jenħtieġ li s-servizzi ta’ komunikazzjoni interpersonali, kif definiti fil-punt (5) tal-Artikolu 2 tad-Direttiva (UE) 2018/1972 tal-Parlament Ewropew u tal-Kunsill (7), bħal emails jew servizzi ta’ messaġġi privati, jaqgħu barra mill-kamp ta’ applikazzjoni ta’ dan ir-Regolament. L-informazzjoni jenħtieġ li titqies bħala maħżuna u disseminata lill-pubbliku fis-sens ta’ dan ir-Regolament biss fejn tali attivitajiet jitwettqu fuq talba diretta tal-fornitur ta’ kontenut. Konsegwentement, il-fornituri ta’ servizzi, bħall-infrastruttura tal-cloud, li jiġu pprovduti fuq talba ta’ partijiet oħra għajr il-fornituri ta’ kontenut u li jkunu ta’ benefiċċju għal dawn tal-aħħar indirettament biss, jenħtieġ li ma jkunux koperti minn dan ir-Regolament. Jenħtieġ li dan ir-Regolament ikopri, pereżempju, il-fornituri ta’ media soċjali, filmati, servizzi ta’ kondiviżjoni ta’ immaġni u awdjo, kif ukoll servizzi tal-kondiviżjoni ta’ fajls u servizzi oħra tal-cloud, sa fejn dawk is-servizzi jintużaw biex jagħmlu l-informazzjoni maħżuna disponibbli għall-pubbliku fuq talba diretta tal-fornitur ta’ kontenut. Fejn fornitur ta’ servizz ta’ hosting joffri diversi servizzi, dan ir-Regolament jenħtieġ li japplika biss għas-servizzi li jaqgħu fil-kamp ta’ applikazzjoni tiegħu.

(15)

Spiss jiġi disseminat kontenut terroristiku lill-pubbliku permezz ta’ servizzi ta’ hosting ipprovduti minn fornituri ta’ servizzi stabbiliti f’pajjiżi terzi. Sabiex jiġu protetti l-utenti fl-Unjoni u jiġi żgurat li l-fornituri kollha ta’ servizzi ta’ hosting li joperaw fis-suq uniku diġitali jkunu soġġetti għall-istess rekwiżiti, dan ir-Regolament jenħtieġ li japplika għall-fornituri kollha ta’ servizzi rilevanti offruti fl-Unjoni, irrispettivament mill-pajjiż tal-istabbiliment prinċipali tagħhom. Fornitur ta’ servizzi ta’ hosting jenħtieġ li jitqies bħala wieħed li joffri servizzi fl-Unjoni jekk huwa jippermetti lil persuni fiżiċi jew ġuridiċi fi Stat Membru wieħed jew aktar jużaw is-servizzi tiegħu u jkollu konnessjoni sostanzjali ma’ dak l-Istat Membru jew dawk l-Istati Membri.

(16)

Jenħtieġ li jkun hemm konnessjoni sostanzjali mal-Unjoni fejn il-fornitur ta’ servizzi ta’ hosting ikollu stabbiliment fl-Unjoni, fejn is-servizzi tiegħu jkunu użati minn għadd sinifikanti ta’ utenti fi Stat Membru wieħed jew aktar, jew fejn l-attivitajiet tiegħu jkunu mmirati lejn Stat Membru wieħed jew aktar. L-immirar ta’ attivitajiet lejn Stat Membru wieħed jew aktar jenħtieġ li jiġi ddeterminat abbażi taċ-ċirkostanzi rilevanti kollha, inkluż fatturi bħall-użu ta’ lingwa jew ta’ munita li ġeneralment jintużaw fl-Istat Membru kkonċernat, jew il-possibbiltà li jiġu ordnati prodotti jew servizzi minn tali Stat Membru. Tali immirar jista’ jirriżulta wkoll mid-disponibbiltà ta’ applikazzjoni fil-ħażna nazzjonali rilevanti ta’ applikazzjonijiet, jew mill-fornitura ta’ riklamar lokali jew riklamar f’lingwa ġeneralment użata fl-Istat Membru kkonċernat, jew mill-ġestjoni tar-relazzjonijiet mal-klijenti pereżempju bl-għoti ta’ servizz lill-klijenti f’lingwa ġeneralment użata f’dak l-Istat Membru. Jenħtieġ ukoll li tiġi preżunta konnessjoni sostanzjali fejn fornitur ta’ servizzi ta’ hosting jidderieġi l-attivitajiet tiegħu lejn Stat Membru wieħed jew aktar kif stipulat fil-punt (c) tal-Artikolu 17(1) tar-Regolament (UE) Nru 1215/2012 tal-Parlament Ewropew u tal-Kunsill (8). Jenħtieġ li s-sempliċi aċċessibbiltà ta’ website ta’ fornitur ta’ servizzi ta’ hosting, ta’ indirizz elettroniku jew ta’ dettalji oħrajn ta’ kuntatt fi Stat Membru wieħed jew aktar, ikkunsidrati waħedhom, ma tkunx suffiċjenti biex tikkostitwixxi konnessjoni sostanzjali. Barra minn hekk, jenħtieġ li l-forniment ta’ servizz sempliċiment għall-fini ta’ konformità mal-projbizzjoni ta’ diskriminazzjoni stabbilita fir-Regolament (UE) 2018/302 tal-Parlament Ewropew u tal-Kunsill (9) ma jitqiesx, fuq dik il-bażi biss, bħala li jikkostitwixxi konnessjoni sostanzjali mal-Unjoni.

(17)

Il-proċedura u l-obbligi li jirriżultaw minn ordnijiet ta’ tneħħija li jirrikjedu li l-fornituri ta’ servizzi ta’ hosting ineħħu jew jiddiżattivaw l-aċċess għal kontenut terroristiku, wara valutazzjoni mill-awtoritajiet kompetenti, jenħtieġ li jiġu armonizzati. Minħabba l-veloċità li biha jiġi disseminat il-kontenut terroristiku bejn is-servizzi online, jenħtieġ li jiġi impost obbligu fuq il-fornituri ta’ servizzi ta’ hosting biex jiżguraw li l-kontenut terroristiku identifikat fl-ordni ta’ tneħħija jitneħħa jew li l-aċċess għalih jiġi diżattivat fl-Istati Membri kollha fi żmien siegħa minn meta tasal l-ordni ta’ tneħħija. Ħlief f’każijiet ta’ emerġenza debitament ġustifikati, jenħtieġ li l-awtorità kompetenti tipprovdi lill-fornitur ta’ servizzi ta’ hosting b’informazzjoni dwar il-proċeduri u l-iskadenzi applikabbli tal-inqas minn 12-il siegħa qabel ma toħroġ għall-ewwel darba ordni ta’ tneħħija lil dak il-fornitur ta’ servizzi ta’ hosting. Ikunu jseħħu każijiet ta’ emerġenza debitament ġustifikati fejn it-tneħħija ta’, jew id-diżattivazzjoni tal-aċċess għal, kontenut terroristiku li jsiru tard aktar minn siegħa wara l-wasla tal-ordni ta’ tneħħija jirriżultaw f’dannu serju, bħal f’sitwazzjonijiet ta’ theddida imminenti għall-ħajja jew l-integrità fiżika ta’ persuna, jew meta tali kontenut juri avvenimenti kurrenti li jirriżultaw f’dannu għall-ħajja jew l-integrità fiżika ta’ persuna. Jenħtieġ li l-awtorità kompetenti tiddetermina jekk il-każijiet jikkostitwux każijiet ta’ emerġenza u jekk debitament jiġġustifikawx id-deċiżjoni tagħha fl-ordni ta’ tneħħija. Fejn il-fornitur ta’ servizzi ta’ hosting ma jkunx jista’ jikkonforma mal-ordnijiet ta’ tneħħija fi żmien siegħa minn meta tasallu, għal raġunijiet ta’ force majeure jew impossibbiltà de facto, inklużi raġunijiet ta’ natura teknika jew operattiva li jkunu oġġettivament ġustifikabbli, jenħtieġ li huwa jinforma lill-awtorità kompetenti emittenti kemm jista’ jkun malajr u jikkonforma mal-ordni ta’ tneħħija hekk kif is-sitwazzjoni tiġi riżolta.

(18)

L-ordni ta’ tneħħija jenħtieġ li tinkludi dikjarazzjoni tar-raġunijiet li tikkwalifika l-materjal li jkun meħtieġ jitneħħa jew li għalih l-aċċess ikun meħtieġ li jiġi diżattivat bħala kontenut terroristiku u tipprovdi biżżejjed informazzjoni sabiex dak il-kontenut jiġi lokalizzat, billi tindika l-URL preċiż u, fejn meħtieġ, kwalunkwe informazzjoni oħra addizzjonali, bħal screenshot tal-kontenut inkwistjoni. Jenħtieġ li dik id-dikjarazzjoni ta’ raġunijiet tippermetti lill-fornitur ta’ servizzi ta’ hosting u, fl-aħħar nett, lill-fornitur tal-kontenut jeżerċitaw b’mod effettiv id-dritt tagħhom ta’ rimedju ġuridiku. Jenħtieġ li r-raġunijiet provduti ma jimplikawx id-divulgazzjoni ta’ informazzjoni sensittiva li tista’ tipperikola investigazzjonijiet kurrenti.

(19)

Jenħtieġ li l-awtorità kompetenti tippreżenta l-ordni ta’ tneħħija direttament lill-punt ta’ kuntatt maħtur jew stabbilit mill-fornitur ta’ servizzi ta’ hosting għall-finijiet ta’ dan ir-Regolament permezz ta’ kwalunkwe mezz elettroniku li kapaċi jipproduċi rekord bil-miktub taħt kondizzjonijiet li jippermettu lill-fornitur ta’ servizzi ta’ hosting jistabbilixxi l-awtentiċità tal-ordni, inklużi l-akkuratezza tad-data u l-ħin meta hija tintbagħat u tasal, pereżempju permezz ta’ posta elettronika sigura jew pjattaformi jew kanali siguri oħra, inklużi dawk magħmula disponibbli mill-fornitur ta’ servizzi ta’ hosting, f’konformità mal-liġi tal-Unjoni dwar il-protezzjoni tad-data personali. Jenħtieġ li dak ir-rekwiżit ikun jista’ jiġi ssodisfat bl-użu, inter alia, ta’ servizzi elettroniċi kwalifikati ta’ konsenja rreġistrati kif previst fir-Regolament (UE) Nru 910/2014 tal-Parlament Ewropew u tal-Kunsill (10). Fejn l-istabbiliment prinċipali tal-fornitur ta’ servizzi ta’ hosting ikun, jew ir-rappreżentant legali tiegħu jirrisjedi jew ikun stabbilit, fi Stat Membru differenti minn dak tal-awtorità kompetenti emittenti, jenħtieġ li kopja tal-ordni ta’ tneħħija tiġi simultanjament ippreżentata lill-awtorità kompetenti ta’ dak l-Istat Membru.

(20)

Jenħtieġ li jkun possibbli għall-awtorità kompetenti tal-Istat Membru fejn il-fornitur ta’ servizzi ta’ hosting ikollu l-istabbiliment prinċipali tiegħu, jew fejn ir-rappreżentant legali tiegħu jirrisjedi jew ikun stabbilit li tiskrutinizza l-ordni ta’ tneħħija maħruġa mill-awtoritajiet kompetenti ta’ Stat Membru ieħor biex tiddetermina jekk tiksirx serjament jew manifestament dan ir-Regolament jew id-drittijiet fundamentali minquxa fil-Karta. Kemm il-fornitur tal-kontenut kif ukoll il-fornitur ta’ servizzi ta’ hosting jenħtieġ li jkollhom id-dritt li jitolbu tali skrutinju mill-awtorità kompetenti fl-Istat Membru fejn il-fornitur ta’ servizzi ta’ hosting ikollu l-istabbiliment prinċipali tiegħu jew fejn ir-rappreżentant legali tiegħu jirrisjedi jew ikun stabbilit. Fejn issir tali talba, jenħtieġ li dik l-awtorità kompetenti tadotta deċiżjoni dwar jekk l-ordni ta’ tneħħija fihiex tali ksur. Fejn dik id-deċiżjoni ssib li sar tali ksur, jenħtieġ li l-ordni ta’ tneħħija ma jibqax ikollha effetti legali. L-iskrutinju jenħtieġ li jsir b’mod rapidu sabiex jiġi żgurat li kontenut li jitneħħa jew li jiġi diżattivat bi żball jerġa’ jiddaħħal malajr kemm jista’ jkun.

(21)

Jenħtieġ li l-fornituri ta’ servizzi ta’ hosting li jkunu esposti għal kontenut terroristiku jinkludu, fit-termini u l-kondizzjonijiet tagħhom, dispożizzjonijiet li jindirizzaw l-użu ħażin tas-servizzi tagħhom għall-fini tad-disseminazzjoni ta’ kontenut terroristiku lill-pubbliku. Jenħtieġ li huma japplikaw dawk id-dispożizzjonijiet b’mod diliġenti, trasparenti, proporzjonat u nondiskriminatorju.

(22)

Fid-dawl tal-iskala tal-problema u tal-ħeffa meħtieġa biex jiġi identifikat u jitneħħa b’mod effettiv il-kontenut terroristiku, it-teħid ta’ miżuri speċifiċi, effettivi u proporzjonati, jikkostitwixxi element essenzjali fl-indirizzar ta’ kontenut terroristiku online. Bil-ħsieb li jnaqqsu l-aċċessibbiltà tal-kontenut terroristiku fuq is-servizzi tagħhom, jenħtieġ li l-fornituri ta’ servizzi ta’ hosting esposti għal kontenut terroristiku jistabbilixxu miżuri speċifiċi b’kont meħud tar-riskji u l-livell ta’ esponiment għal kontenut terroristiku kif ukoll tal-effetti fuq id-drittijiet ta’ partijiet terzi u l-interess pubbliku tal-informazzjoni. Jenħtieġ li l-fornituri ta’ servizzi ta’ hosting jiddeterminaw liema miżura speċifika adatta, effettiva u proporzjonata jenħtieġ li tiġi stabbilita biex jiġi identifikat u jitneħħa kontenut terroristiku. Miżuri speċifiċi jistgħu jinkludu miżuri jew kapaċitajiet tekniċi jew operattivi adatti bħar-reklutaġġ ta’ persunal jew mezzi tekniċi biex jidentifikaw u jneħħu jew jiddiżattivaw mingħajr dewmien l-aċċess għal kontenut terroristiku, mekkaniżmi għall-utenti biex jirrappurtaw jew jimmarkaw kontenut terroristiku allegat, jew kwalunkwe miżura oħra li l-fornitur ta’ servizzi ta’ hosting iqis adatta u effettiva biex tiġi indirizzata d-disponibbiltà ta’ kontenut terroristiku fuq is-servizzi tiegħu.

(23)

Jenħtieġ li, meta jistabbilixxu miżuri speċifiċi, il-fornituri ta’ servizzi ta’ hosting jiżguraw li d-dritt tal-utenti għal-libertà ta’ espressjoni u ta’ informazzjoni kif ukoll għal-libertà u l-pluraliżmu tal-media kif protetti mill-Karta jiġu ppreżervati. Minbarra kwalunkwe rekwiżit stipulat fil-liġi, inkluż leġiżlazzjoni dwar il-protezzjoni tad-data personali, il-fornituri ta’ servizzi ta’ hosting jenħtieġ li jaġixxu bid-diliġenza dovuta u jimplimentaw salvagwardji, fejn xieraq, inklużi sorveljanza u verifiki mill-bniedem, biex tiġi evitata kwalunkwe deċiżjoni mhux intenzjonata jew żbaljata li twassal għat-tneħħija ta’, jew id-diżattivazzjoni tal-aċċess għal, kontenut li mhuwiex kontenut terroristiku.

(24)

Jenħtieġ li l-fornitur ta’ servizzi ta’ hosting jirrapporta lill-awtorità kompetenti dwar il-miżuri speċifiċi stabbiliti sabiex dik l-awtorità tkun tista’ tiddetermina jekk il-miżuri humiex effettivi u proporzjonati u jekk, kieku jintużaw il-mezzi awtomatizzati, il-fornitur ta’ servizzi ta’ hosting ikollux il-kapaċità meħtieġa għas-sorveljanza u l-verifika mill-bniedem. Fil-valutazzjoni tal-effettività u l-proporzjonalità tal-miżuri, jenħtieġ li l-awtoritajiet kompetenti jqisu l-parametri rilevanti, inklużi l-għadd tal-ordnijiet ta’ tneħħija maħruġa lill-fornitur ta’ servizzi ta’ hosting, id-daqs u l-kapaċità ekonomika tal-fornitur ta’ servizzi ta’ hosting u l-impatt tas-servizzi tiegħu fid-disseminazzjoni tal-kontenut terroristiku, pereżempju abbażi tal-għadd ta’ utenti fl-Unjoni, kif ukoll is-salvagwardji stabbiliti biex jiġi indirizzat l-użu ħażin tas-servizzi tiegħu għall-fini tad-disseminazzjoni ta’ kontenut terroristiku online.

(25)

Fejn l-awtorità kompetenti tqis li l-miżuri speċifiċi stabbiliti ma jkunux biżżejjed biex jindirizzaw ir-riskji, jenħtieġ li hija tkun tista’ tirrikjedi li jiġu adottati miżuri speċifiċi addizzjonali li jkunu adatti, effettivi u proporzjonati. Ir-rekwiżit biex jiġu implimentati tali miżuri speċifiċi addizzjonali jenħtieġ li ma jwassalx għal obbligu ġenerali ta’ monitoraġġ jew għal xi tfittxija attiva ta’ fatti fis-sens tal-Artikolu 15(1) tad-Direttiva 2000/31/KE u lanqas għal obbligu li jintużaw għodod awtomatizzati. Madankollu, jenħtieġ li l-fornituri ta’ servizzi ta’ hosting jkunu jistgħu jużaw għodod awtomatizzati jekk iqisu li dan ikun adatt u meħtieġ biex jindirizzaw b’mod effettiv l-użu ħażin tas-servizzi tagħhom għall-fini tad-disseminazzjoni ta’ kontenut terroristiku.

(26)

L-obbligu tal-fornituri ta’ servizzi ta’ hosting li jippreservaw il-kontenut imneħħi u d-data relatata, jenħtieġ li jkun stabbilit għal finijiet speċifiċi u limitati għal perijodu li jkun meħtieġ. Hemm bżonn li r-rekwiżit ta’ preservazzjoni jiġi estiż għad-data relatata fejn kwalunkwe tali data inkella tista’ tintilef bħala konsegwenza tat-tneħħija tal-kontenut terroristiku inkwistjoni. Id-data relatata tista’ tinkludi data bħal ‘data dwar l-abbonati, b’mod partikolari data li tappartjeni għall-identità tal-fornitur tal-kontenut, kif ukoll data dwar l-aċċess, inkluża data dwar id-data u l-ħin tal-użu mill-fornitur tal-kontenut u dwar il-log-in u l-log-off mis-servizz, flimkien mal-indirizz IP allokat mill-fornitur ta’ servizz ta’ aċċess għall-Internet lill-fornitur tal-kontenut.

(27)

L-obbligu li jiġi ppreservat il-kontenut għal proċedimenti ta’ rieżami amministrattiv jew ta’ stħarriġ ġudizzjarju huwa meħtieġ u ġustifikat fid-dawl tal-bżonn li jkunu stabbiliti rimedji effettivi għall-fornituri ta’ kontenut li l-kontenut tagħhom ikun tneħħa jew li l-aċċess għalih ikun ġie diżattivat, kif ukoll biex tiġi żgurata r-reintegrazzjoni ta’ dak il-kontenut, skont l-eżitu ta’ dawk il-proċedimenti. L-obbligu tal-preservazzjoni tal-materjal għal finijiet ta’ investigazzjoni jew prosekuzzjoni huwa ġustifikat u meħtieġ fid-dawl tal-valur li l-materjal jista’ jkollu għall-fini tal-interruzzjoni jew prevenzjoni ta’ attività terroristika. Għalhekk, jenħtieġ li l-preservazzjoni, ta’ kontenut terroristiku mneħħi, għal finijiet ta’ prevenzjoni, sejbien, investigazzjoni u prosekuzzjoni ta’ reati terroristiċi titqies bħala ġustifikata wkoll. Jenħtieġ li l-kontenut terroristiku u d-data relatata jinħażnu biss għal perijodu li jkun meħtieġ biex jippermetti lill-awtoritajiet tal-infurzar tal-liġi jiċċekkjaw il-kontenut terroristiku u jiddeċiedu jekk ikunx meħtieġ għal dawk il-finijiet. Għall-finijiet ta’ prevenzjoni, sejbien, investigazzjoni u prosekuzzjoni ta’ reati terroristiċi, jenħtieġ li l-preservazzjoni meħtieġa tad-data tkun limitata għal data li x’aktarx ikollha rabta ma’ reati terroristiċi, u li għalhekk tista’ tikkontribwixxi għall-prosekuzzjoni ta’ reati terroristiċi jew għall-prevenzjoni ta’ riskji serji għas-sigurtà pubblika. Fejn fornituri ta’ servizzi ta’ hosting ineħħu, jew jiddiżattivaw l-aċċess għal, materjal, b’mod partikolari permezz ta’ miżuri speċifiċi tagħhom stess, jenħtieġ li huma jinfurmaw lill-awtoritajiet kompetenti minnufih dwar il-kontenut li jkun fih informazzjoni li tinvolvi theddida imminenti għall-ħajja jew suspett ta’ reat terroristiku.

(28)

Biex tiġi żgurata l-proporzjonalità, jenħtieġ li l-perijodu ta’ preservazzjoni jkun limitat għal sitt xhur biex il-fornituri ta’ kontenut ikollhom biżżejjed żmien biex jibdew il-proċedimenti ta’ rieżami amministrattiv jew ta’ stħarriġ ġudizzjarju u biex jippermettu l-aċċess lill-awtoritajiet tal-infurzar tal-liġi għad-data rilevanti għall-investigazzjoni u l-prosekuzzjoni ta’ reati terroristiċi. Madankollu, fuq it-talba tal-awtorità kompetenti jew tal-qorti, jenħtieġ li dak il-perijodu jkun jista’ jiġi estiż kemm meħtieġ f’każijiet fejn dawk il-proċedimenti jinbdew iżda ma jiġux iffinalizzati fi żmien dak il-perijodu ta’ sitt xhur. It-tul tal-perijodu ta’ żmien ta’ preservazzjoni jenħtieġ li jkun biżżejjed biex jippermetti lill-awtoritajiet tal-infurzar tal-liġi jippreservaw il-materjal meħtieġ fir-rigward tal-investigazzjonijiet u l-prosekuzzjonijiet, filwaqt li jiżguraw bilanċ mad-drittijiet fundamentali.

(29)

Dan ir-Regolament jenħtieġ li ma jaffettwax il-garanziji proċedurali jew il-miżuri ta’ investigazzjoni proċedurali relatati mal-aċċess għal kontenut u d-data relatata ppreservati għall-finijiet tal-investigazzjoni u l-prosekuzzjoni ta’ reati terroristiċi, kif regolati taħt il-liġi tal-Unjoni jew dik nazzjonali.

(30)

It-trasparenza tal-politiki tal-fornituri ta’ servizzi ta’ hosting fir-rigward ta’ kontenut terroristiku hija essenzjali biex tissaħħaħ ir-responsabbiltà tagħhom lejn l-utenti tagħhom u biex tissaħħaħ il-fiduċja taċ-ċittadini fis-suq uniku diġitali. Jenħtieġ li l-fornituri ta’ servizzi ta’ hosting li jkunu ħadu azzjoni jew intalbu jieħdu azzjoni taħt dan ir-Regolament f’sena kalendarja partikolari jagħmlu disponibbli pubblikament ir-rapporti annwali dwar it-trasparenza li jkun fihom informazzjoni dwar l-azzjoni meħuda fir-rigward tal-identifikazzjoni u t-tneħħija ta’ kontenut terroristiku.

(31)

Jenħtieġ li l-awtoritajiet kompetenti jippubblikaw rapporti annwali dwar it-trasparenza li jkun fihom informazzjoni dwar l-għadd ta’ ordnijiet ta’ tneħħija, l-għadd ta’ każijiet fejn ma ġietx eżegwita ordni, l-għadd ta’ deċiżjonijiet li kkonċernaw miżuri speċifiċi, l-għadd ta’ każijiet soġġetti għal proċedimenti ta’ rieżami amministrattiv jew ta’ stħarriġ ġudizzjarju u l-għadd ta’ deċiżjonijiet li imponew penali.

(32)

Id-dritt għal rimedju effettiv huwa stabbilit fl-Artikolu 19 tat-Trattat dwar l-Unjoni Ewropea (TUE) u fl-Artikolu 47 tal-Karta. Kull persuna fiżika jew ġuridika għandha d-dritt għal rimedju effettiv quddiem il-qorti nazzjonali kompetenti kontra kwalunkwe waħda mill-miżuri meħuda skont dan ir-Regolament, li tista’ taffettwa b’mod negattiv id-drittijiet ta’ dik il-persuna. Dak id-dritt jenħtieġ li jinkludi, b’mod partikolari, il-possibbiltà li fornituri ta’ servizzi ta’ hosting u fornituri ta’ kontenut jikkontestaw b’mod effettiv l-ordnijiet ta’ tneħħija jew kwalunkwe deċiżjoni li tirriżulta mill-iskrutinju ta’ ordnijiet ta’ tneħħija skont dan ir-Regolament quddiem qorti tal-Istat Membru li l-awtorita’ kompetenti tiegħu jkunu ħarġu l-ordni ta’ tneħħija jew ħadu d-deċiżjoni, kif ukoll il-possibbiltà li fornituri ta’ servizzi ta’ hosting jikkontestaw b’mod effettiv deċiżjoni relatata ma’ miżuri speċifiċi jew penali quddiem qorti tal-Istat Membru li l-awtorità kompetenti tiegħu tkun ħadet dik id-deċiżjoni.

(33)

Il-proċeduri tal-ilmenti jikkostitwixxu salvagwardja neċessarja kontra t-tneħħija żbaljata ta’, jew id-diżattivazzjoni żbaljata tal-aċċess għal, kontenut online fejn tali kontenut ikun protett taħt il-libertà ta’ espressjoni u ta’ informazzjoni. Għaldaqstant jenħtieġ li l-fornituri ta’ servizzi ta’ hosting jistabbilixxu mekkaniżmi tal-ilmenti li jkunu faċli għall-utent u jiżguraw li l-ilmenti jiġu ttrattati mingħajr dewmien u bi trasparenza sħiħa għall-fornitur ta’ kontenut. Jenħtieġ li r-rekwiżit li l-fornitur ta’ servizzi ta’ hosting jerġa’ jdaħħal kontenut li tneħħa jew li l-aċċess għalih ġie diżattivat bi żball ma jaffettwax il-possibbiltà għall-fornitur ta’ servizzi ta’ hosting li jinforza t-termini u l-kondizzjonijiet tiegħu stess.

(34)

Il-protezzjoni legali effettiva skont l-Artikolu 19 TUE u l-Artikolu 47 tal-Karta tirrikjedi li l-fornituri ta’ kontenut ikunu jistgħu jikkonstataw ir-raġunijiet li għalihom il-kontenut ipprovdut minnhom ikun tneħħa jew kellu l-aċċess għalih diżattivat. Għal dak il-għan, il-fornitur ta’ servizzi ta’ hosting jenħtieġ li jqiegħed għad-dispożizzjoni tal-fornitur ta’ kontenut informazzjoni biex ikun jista’ jikkontesta t-tneħħija jew id-diżattivazzjoni. Skont iċ-ċirkostanzi, il-fornituri ta’ servizzi ta’ hosting jistgħu jissostitwixxu kontenut li tneħħa jew li kellu l-aċċess għalih diżattivat b’messaġġ li jindika li l-kontenut tneħħa jew ġie diżattivat skont dan ir-Regolament. Jenħtieġ li, fuq it-talba tal-fornitur ta’ kontenut, tiġi pprovduta aktar informazzjoni dwar ir-raġunijiet għat-tneħħija jew għad-diżattivazzjoni kif ukoll ir-rimedji għat-tneħħija jew id-diżattivazzjoni. Fejn l-awtoritajiet kompetenti jiddeċiedu li għal raġunijiet ta’ sigurtà pubblika, inkluż fil-kuntest ta’ investigazzjoni, ma jkunx xieraq, jew ikun kontro-produttiv, li l-fornitur ta’ kontenut jiġi nnotifikat direttament bit-tneħħija jew id-diżattivazzjoni, jenħtieġ li huma jinfurmaw lill-fornitur ta’ servizzi ta’ hosting b’dan.

(35)

Għall-finijiet ta’ dan ir-Regolament, jenħtieġ li l-Istati Membri jaħtru awtoritajiet kompetenti. Dan m’għandux neċessarjament jimplika l-istabbiliment ta’ awtorità ġdida u jenħtieġ li jkun possibbli li korp eżistenti jiġi inkarigat bil-funzjonijiet previsti f’dan ir-Regolament. Jenħtieġ li dan ir-Regolament jirrikjedi li jinħatru awtoritajiet kompetenti għall-ħruġ ta’ ordnijiet ta’ tneħħija, għall-iskrutinju ta’ ordnijiet ta’ tneħħija, għas-superviżjoni ta’ miżuri speċifiċi u għall-impożizzjoni ta’ penali, filwaqt li jenħtieġ li jkun possibbli għal kull Stat Membru li jiddeċiedi dwar l-għadd ta’ awtoritajiet kompetenti li għandhom jinħatru u jekk ikunux amministrattivi, tal-infurzar tal-liġi jew ġudizzjarji. Jenħtieġ li l-Istati Membri jiżguraw li l-awtoritajiet kompetenti jwettqu l-kompiti tagħhom b’mod oġġettiv u nondiskriminatorju u li ma jfittxu u lanqas jieħdu struzzjonijiet minn kwalunkwe korp ieħor fir-rigward tal-eżerċizzju tal-kompiti taħt dan ir-Regolament. Jenħtieġ li dan ma jipprevjenix superviżjoni f’konformità mad-dritt kostituzzjonali nazzjonali. L-Istati Membri jenħtieġ li jikkomunikaw l-awtoritajiet kompetenti maħtura taħt dan ir-Regolament lill-Kummissjoni, li jenħtieġ li tippubblika online reġistru li jelenka l-awtoritajiet kompetenti. Dak ir-reġistru online jenħtieġ li jkun aċċessibbli faċilment biex jiffaċilita l-verifika rapida tal-awtentiċità tal-ordnijiet ta’ tneħħija mill-fornituri ta’ servizzi ta’ hosting.

(36)

Sabiex jevitaw duplikazzjoni ta’ sforzi u interferenzi potenzjali fl-investigazzjonijiet u biex jimminimizzaw il-piż għall-fornituri ta’ servizzi ta’ hosting affettwati, jenħtieġ li l-awtoritajiet kompetenti jiskambjaw informazzjoni, jikkoordinaw u jikkooperaw ma’ xulxin u, fejn xieraq, mal-Europol, qabel ma joħorġu ordnijiet ta’ tneħħija. Meta tieħu deċiżjoni jekk toħroġx ordni ta’ tneħħija, l-awtorità kompetenti jenħtieġ li tikkunsidra b’mod debitu kwalunkwe notifika ta’ interferenza ma’ xi interess investigattiv (de-confliction). Fejn awtorità kompetenti tiġi infurmata minn awtorità kompetenti ta’ Stat Membru ieħor b’ordni ta’ tneħħija eżistenti, jenħtieġ li hija ma toħroġx ordni ta’ tneħħija li tikkonċerna l-istess suġġett. Fl-implimentazzjoni tad-dispożizzjonijiet ta’ dan ir-Regolament, il-Europol tista’ tipprovdi appoġġ skont il-mandat attwali tagħha u l-qafas legali eżistenti.

(37)

Sabiex tiġi żgurata l-implimentazzjoni effettiva u koerenti biżżejjed tal-miżuri speċifiċi meħuda mill-fornituri ta’ servizzi ta’ hosting, jenħtieġ li l-awtoritajiet kompetenti jikkoordinaw u jikkooperaw ma’ xulxin fir-rigward tal-iskambji li jkollhom mal-fornituri ta’ servizzi ta’ hosting dwar l-ordnijiet ta’ tneħħija u dwar l-identifikazzjoni, l-implimentazzjoni u l-valutazzjoni ta’ miżuri speċifiċi. Il-koordinazzjoni u l-kooperazzjoni huma meħtieġa wkoll fir-rigward ta’ miżuri oħrajn li jimplimentaw dan ir-Regolament, inkluż fir-rigward tal-adozzjoni ta’ regoli dwar penali u l-impożizzjoni ta’ penali. Jenħtieġ li l-Kummissjoni tiffaċilita tali koordinazzjoni u kooperazzjoni.

(38)

Huwa essenzjali li l-awtorità kompetenti tal-Istat Membru responsabbli għall-impożizzjoni ta’ penali tkun infurmata b’mod sħiħ bil-ħruġ ta’ ordnijiet ta’ tneħħija u skambji sussegwenti bejn il-fornitur ta’ servizzi ta’ hosting u l-awtoritajiet kompetenti rilevanti fi Stati Membri oħra. Għal dak il-għan, jenħtieġ li l-Istati Membri jiżguraw mezzi u mekkaniżmi ta’ komunikazzjoni xierqa u siguri li jippermettu l-kondiviżjoni f’waqtha ta’ informazzjoni rilevanti.

(39)

Sabiex jiġu ffaċilitati l-iskambji rapidi bejn l-awtoritajiet kompetenti kif ukoll mal-fornituri ta’ servizzi ta’ hosting, u sabiex tiġi evitata d-duplikazzjoni ta’ sforzi, jenħtieġ li l-Istati Membri jkunu mħeġġa jużaw l-għodod dedikati żviluppati mill-Europol, bħall-applikazzjoni attwali tal-Ġestjoni ta’ Indikazzjoni ta’ Kontenut fuq l-Internet jew is-suċċessuri tagħha.

(40)

L-indikazzjonijiet ta’ kontenut mill-Istati Membri u mill-Europol urew li huma mezz effettiv u rapidu biex jiżdied l-għarfien tal-fornituri ta’ servizzi ta’ hosting dwar kontenut speċifiku li jkun disponibbli permezz tas-servizzi tagħhom u biex ikunu jistgħu jieħdu azzjoni rapida. Jenħtieġ li tali indikazzjonijiet ta’ kontenut, li huma mekkaniżmu ta’ twissija lill-fornituri ta’ servizzi ta’ hosting dwar informazzjoni li tista’ titqies bħala kontenut terroristiku biex il-fornitur ikun jista’ jqis volontarjament jekk dak il-kontenut huwiex kompatibbli mat-termini u l-kondizzjonijiet proprji tiegħu, jibqgħu disponibbli flimkien mal-ordnijiet ta’ tneħħija. Id-deċiżjoni finali dwar jekk għandux jitneħħa l-kontenut minħabba li ma jkunx kompatibbli mat-termini u l-kondizzjonijiet tiegħu tibqa’ f’idejn il-fornitur ta’ servizzi ta’ hosting. Jenħtieġ li dan ir-Regolament ma jaffettwax il-mandat tal-Europol kif stabbilit fir-Regolament (UE) 2016/794 tal-Parlament Ewropew u tal-Kunsill (11). Għalhekk, jenħtieġ li xejn f’dan ir-Regolament ma jinftiehem bħala li jipprekludi lill-Istati Membri u lill-Europol milli jużaw l-indikazzjonijiet ta’ kontenut bħala strument biex jiġi indirizzat il-kontenut terroristiku online.

(41)

Minħabba l-konsegwenzi serji partikolari ta’ ċertu kontenut terroristiku online, jenħtieġ li l-fornituri ta’ servizzi ta’ hosting jinfurmaw minnufih lill-awtoritajiet rilevanti fl-Istat Membru kkonċernat jew lill-awtoritajiet kompetenti tal-Istat Membru fejn ikunu stabbiliti jew fejn ikollhom rappreżentant legali dwar kontenut terroristiku li jinvolvi theddida imminenti għall-ħajja jew suspett ta’ reat terroristiku. Sabiex tiġi żgurata l-proporzjonalità, jenħtieġ li dak l-obbligu jkun limitat għal reati terroristiċi kif definiti fl-Artikolu 3(1) tad-Direttiva (UE) 2017/541. Jenħtieġ li dak l-obbligu li jinfurmaw ma jimplikax obbligu fuq il-fornituri ta’ servizzi ta’ hosting li jfittxu b’mod attiv xi evidenza ta’ theddida imminenti għall-ħajja jew ta’ reat terroristiku suspettat. Jenħtieġ li l-Istat Membru kkonċernat jinftiehem li jkun l-Istat Membru li jkollu ġuriżdizzjoni fuq l-investigazzjoni u l-prosekuzzjoni ta’ dawk ir-reati terroristiċi abbażi tan-nazzjonalità tat-trasgressur jew tal-vittma potenzjali tar-reat jew tal-post fil-mira tal-att terroristiku. F’każ ta’ dubju, jenħtieġ li l-fornituri ta’ servizzi ta’ hosting jippreżentaw l-informazzjoni lill-Europol, li jenħtieġ li tipprovdi l-azzjoni rilevanti ta’ segwitu skont il-mandat tagħha, inkluż billi tgħaddi dik l-informazzjoni lill-awtoritajiet nazzjonali rilevanti. L-awtoritajiet kompetenti tal-Istati Membri jenħtieġ li jkunu jistgħu jużaw tali informazzjoni biex jieħdu miżuri investigattivi li jkunu disponibbli taħt il-liġi tal-Unjoni jew taħt dik nazzjonali.

(42)

Jenħtieġ li l-fornituri ta’ servizzi ta’ hosting jaħtru jew jistabbilixxu punti ta’ kuntatt biex jiffaċilitaw it-trattament mingħajr dewmien tal-ordnijiet ta’ tneħħija. Il-punt ta’ kuntatt jenħtieġ li jservi biss għal finijiet operazzjonali. Jenħtieġ li l-punt ta’ kuntatt ikun jikkonsisti minn kwalunkwe mezz iddedikat, intern jew estern, li jippermetti s-sottomissjoni elettronika ta’ ordnijiet ta’ tneħħija u ta’ mezzi tekniċi jew personali li jippermettu l-ipproċessar mingħajr dewmien tagħhom. Ma huwiex neċessarju li l-punt ta’ kuntatt ikun jinsab fl-Unjoni. Jenħtieġ li l-fornitur ta’ servizzi ta’ hosting ikun liberu li juża punt ta’ kuntatt eżistenti għall-finijiet ta’ dan ir-Regolament, dment li l-punt ta’ kuntatt ikun jista’ jissodisfa l-funzjonijiet previsti f’dan ir-Regolament. Bil-ħsieb li jiġi żgurat li l-kontenut terroristiku jitneħħa jew li l-aċċess għalih ikun diżattivat fi żmien siegħa minn meta tasal l-ordni ta’ tneħħija, jenħtieġ li l-punt ta’ kuntatt tal-fornituri ta’ servizzi ta’ hosting li jkunu esposti għal kontenut terroristiku jkun aċċessibbli fi kwalunkwe mument. Jenħtieġ li l-informazzjoni dwar il-punt ta’ kuntatt tinkludi informazzjoni dwar il-lingwa li biha huwa jista’ jiġi indirizzat. Sabiex tiġi ffaċilitata l-komunikazzjoni bejn il-fornituri ta’ servizzi ta’ hosting u l-awtoritajiet kompetenti, il-fornituri ta’ servizzi ta’ hosting huma mħeġġa jippermettu komunikazzjoni b’waħda mil-lingwi uffiċjali tal-istituzzjonijiet tal-Unjoni li biha jkunu disponibbli t-termini u l-kondizzjonijiet tagħhom.

(43)

Fin-nuqqas ta’ rekwiżit ġenerali biex il-fornituri ta’ servizzi ta’ hosting jiżguraw preżenza fiżika fit-territorju tal-Unjoni, hemm bżonn tiġi żgurata ċarezza dwar liema Stat Membru għandu ġuriżdizzjoni fuq il-fornitur ta’ servizzi ta’ hosting li joffri servizzi fi ħdan l-Unjoni. Bħala regola ġenerali, il-fornitur ta’ servizzi ta’ hosting jaqa’ taħt il-ġuriżdizzjoni tal-Istat Membru li fih ikollu l-istabbiliment prinċipali tiegħu jew fejn ir-rappreżentant legali tiegħu jirrisjedi jew ikun stabbilit. Jenħtieġ li dan ikun mingħajr preġudizzju għar-regoli dwar il-kompetenza stabbiliti għall-fini ta’ ordnijiet ta’ tneħħija u deċiżjonijiet li jirriżultaw mill-iskrutinju ta’ ordnijiet ta’ tneħħija skont dan ir-Regolament. Madankollu, fir-rigward ta’ fornitur ta’ servizzi ta’ hosting li ma jkollu ebda stabbiliment fl-Unjoni u li ma jkunx ħatar rappreżentant legali, jenħtieġ li kwalunkwe Stat Membru jkollu ġurisdizzjoni u għalhekk ikun jista’ jimponi penali, dment li l-prinċipju ta’ ne bis in idem jiġi rispettat.

(44)

Il-fornituri ta’ servizzi ta’ hosting li ma jkunux stabbiliti fl-Unjoni jenħtieġ li jaħtru bil-miktub rappreżentant legali sabiex jiżguraw il-konformità ma’, u l-infurzar ta’, l-obbligi taħt dan ir-Regolament. Jenħtieġ li jkun possibbli għall-fornituri ta’ servizzi ta’ hosting li jaħtru, għall-finijiet ta’ dan ir-Regolament, rappreżentant legali li jkun diġà maħtur għal skopijiet oħrajn, dment li dak ir-rappreżentant legali jkun kapaċi jissodisfa l-funzjonijiet previsti f’dan ir-Regolament. Jenħtieġ li r-rappreżentant legali jkun awtorizzat li jaġixxi f’isem il-fornitur ta’ servizzi ta’ hosting.

(45)

Il-penali huma meħtieġa biex tkun żgurata l-implimentazzjoni, b’mod effettiv, ta’ dan ir-Regolament mill-fornituri ta’ servizzi ta’ hosting. Jenħtieġ li l-Istati Membri jadottaw regoli dwar il-penali, li jistgħu jkunu ta’ natura amministrattiva jew kriminali, kif ukoll, fejn xieraq, linji gwida dwar il-multi. In-nuqqas ta’ konformità f’każijiet individwali jista’ jiġi soġġett għal penali filwaqt li jiġu rispettati l-prinċipji ta’ ne bis in idem u tal-proporzjonalità u jiġi żgurat li tali penali jieħdu kont ta’ falliment sistematiku. Il-penali jistgħu jieħdu forom differenti, inklużi twissijiet formali f’każijiet ta’ ksur minuri jew penali finanzjarji fir-rigward ta’ ksur aktar serju jew sistematiku. Jenħtieġ li jiġu imposti penali partikolarment severi f’każ li l-fornitur ta’ servizzi ta’ hosting jonqos sistematikament jew persistentement milli jneħħi kontenut terroristiku jew milli jiddiżattiva l-aċċess għalih fi żmien siegħa mill-wasla ta’ ordni ta’ tneħħija. Sabiex tiġi żgurata ċertezza legali, jenħtieġ li dan ir-Regolament jistabbilixxi liema tipi ta’ ksur ikunu soġġetti għal penali u liema ċirkostanzi huma rilevanti għall-valutazzjoni tat-tip u l-livell ta’ tali penali. Meta jkun qed jiġi ddeterminat jekk għandhomx ikunu imposti penali finanzjarji, jenħtieġ li debitament jitqiesu r-riżorsi finanzjarji tal-fornitur ta’ servizzi ta’ hosting. Barra minn hekk, jenħtieġ li l-awtorità kompetenti tqis jekk il-fornitur ta’ servizzi ta’ hosting huwiex negozju ġdid jew impriża mikro, żgħira jew ta’ daqs medju kif definita fir-Rakkomandazzjoni tal-Kummissjoni 2003/361/KE (12). Għandhom jitqiesu wkoll ċirkostanzi addizzjonali, bħal jekk l-imġiba tal-fornitur ta’ servizzi ta’ hosting kinitx oġġettivament imprudenti jew kundannabbli jew jekk il-ksur twettaqx b’negliġenza jew intenzjonalment. Jenħtieġ li l-Istati Membri jiżguraw li l-penali imposti għall-ksur ta’ dan ir-Regolament ma jħeġġux it-tneħħija ta’ materjal li ma jkunx kontenut terroristiku.

(46)

L-użu ta’ mudelli standardizzati jiffaċilita l-kooperazzjoni u l-iskambju ta’ informazzjoni bejn l-awtoritajiet kompetenti u l-fornituri ta’ servizzi ta’ hosting, li jippermettilhom jikkomunikaw b’mod aktar rapidu u effettiv. Huwa partikolarment importanti li tiġi żgurata azzjoni mingħajr dewmien meta tasal ordni ta’ tneħħija. Il-mudelli jnaqqsu l-ispejjeż tat-traduzzjoni u jikkontribwixxu għal standard ogħla tal-proċess. Il-mudelli għall-feedback jippermettu skambju standardizzat ta’ informazzjoni u huma partikolarment importanti fejn il-fornituri ta’ servizzi ta’ hosting ma jkunux jistgħu jikkonformaw ma’ ordnijiet ta’ tneħħija. Mezzi awtentikati ta’ preżentazzjoni jistgħu jiggarantixxu l-awtentiċità tal-ordni ta’ tkeċċija, inklużi l-akkuratezza tad-data u l-ħin meta l-ordni ntbagħtet u meta tasal.

(47)

Sabiex tkun possibbli emenda rapida, fejn din tkun meħtieġa, tal-kontenut tal-mudelli li għandhom jintużaw għall-finijiet ta’ dan ir-Regolament, jenħtieġ li tiġi delegata lill-Kummissjoni s-setgħa li tadotta atti skont l-Artikolu 290 tat-Trattat dwar il-Funzjonament tal-Unjoni Ewropea fir-rigward tal-emendar tal-annessi ma’ dan ir-Regolament. Sabiex ikun jista’ jittieħed kont tal-iżvilupp tat-teknoloġija u tal-qafas legali relatat, jenħtieġ li l-Kummissjoni wkoll tingħata s-setgħa li tadotta atti delegati sabiex tissupplimenta dan ir-Regolament b’rekwiżiti tekniċi għal mezzi elettroniċi li għandhom jintużaw mill-awtoritajiet kompetenti għat-trażmissjoni ta’ ordnijiet ta’ tkeċċija. Huwa partikolarment importanti li l-Kummissjoni twettaq konsultazzjonijiet xierqa matul ix-xogħol tagħha ta’ tħejjija, ukoll fil-livell ta’ esperti, u li dawk il-konsultazzjonijiet jiġu mwettqa isiru f’konformità mal-prinċipji stipulati fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet (13). B’mod partikulari, biex tiġi żgurata parteċipazzjoni ugwali fit-tħejjija tal-atti delegati, il-Parlament Ewropew u l-Kunsill jirċievu d-dokumenti kollha fl-istess ħin li fih jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta’ atti delegati.

(48)

Jenħtieġ li l-Istati Membri jiġbru informazzjoni dwar l-implimentazzjoni ta’ dan ir-Regolament. Jenħtieġ li jkun possibbli għall-Istati Membri li jużaw ir-rapporti ta’ trasparenza tal-fornituri ta’ servizzi ta’ hosting u li jikkomplementawhom, fejn meħtieġ, b’aktar informazzjoni dettaljata, bħar-rapporti tagħhom stess ta’ trasparenza skont dan ir-Regolament. Jenħtieġ li jiġi stabbilit programm dettaljat għall-monitoraġġ tal-eżiti, tar-riżultati u tal-impatti ta’ dan ir-Regolament sabiex jitqiesu f’evalwazzjoni tal-implimentazzjoni ta’ dan ir-Regolament.

(49)

Abbażi tas-sejbiet u l-konklużjonijiet fir-rapport ta’ implimentazzjoni u l-eżitu tal-eżerċizzju ta’ monitoraġġ, jenħtieġ li l-Kummissjoni twettaq evalwazzjoni ta’ dan ir-Regolament fi żmien tliet snin mid-data tad-dħul fis-seħħ tiegħu. Jenħtieġ li l-evalwazzjoni tkun ibbażata fuq il-kriterji ta’ effiċjenza, neċessità, effettività, proporzjonalità, rilevanza, koerenza u valur miżjud tal-Unjoni. Jenħtieġ li tivvaluta l-funzjonament ta’ miżuri operazzjonali u tekniċi differenti previsti minn dan ir-Regolament, inkluża l-effettività ta’ miżuri għat-titjib fis-sejbien, l-identifikazzjoni u t-tneħħija ta’ kontenut terroristiku online, l-effettività ta’ mekkaniżmi ta’ salvagwardja kif ukoll l-impatti fuq drittijiet fundamentali potenzjalment affettwati, bħal-libertà ta’ espressjoni u tal-informazzjoni, inklużi l-libertà u l-pluraliżmu tal-media, il-libertà ta’ intrapriża, id-dritt għall-ħajja privata u l-protezzjoni tad-data personali. Jenħtieġ li l-Kummissjoni tivvaluta wkoll l-impatt fuq l-interessi, li jkunu potenzjalment affettwati, ta’ partijiet terzi.

(50)

Minħabba li l-għan ta’ dan ir-Regolament, jiġifieri li jiżgura l-funzjonament bla xkiel tas-suq uniku diġitali billi jindirizza d-disseminazzjoni ta’ kontenut terroristiku online, ma jistax jinkiseb b’mod suffiċjenti mill-Istati Membri iżda jista’ pjuttost, minħabba l-iskala u l-effetti tiegħu, jinkiseb aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju ta’ sussidjarjetà kif stabbilit fl-Artikolu 5 TUE. F’konformità mal-prinċipju ta’ proporzjonalità, kif stabbilit f’dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkiseb dak l-għan,

(1)

L-Artikolu 325 tat-Trattat dwar il-Funzjonament tal-Unjoni Ewropea (TFUE) jirrikjedi li l-Unjoni u l-Istati Membri jiġġieldu l-frodi u kull attività illegali oħra li taffettwa l-interessi finanzjarji tal-Unjoni. Jenħtieġ li l-Unjoni tappoġġa l-attivitajiet f’dawk l-oqsma.

(2)

Appoġġ li ngħata qabel għal tali attivitajiet permezz tad-Deċiżjoni Nru 804/2004/KE tal-Parlament Ewropew u tal-Kunsill (3) (il-programm Erkole), emendata u estiża bid-Deċiżjoni Nru 878/2007/KE tal-Parlament Ewropew u tal-Kunsill (4) (il-programm Erkole II), imħassra u sostitwita bir-Regolament (UE) Nru 250/2014 tal-Parlament Ewropew u tal-Kunsill (5) (il-programm Erkole III), għamilha possibbli li jissaħħu l-attivitajiet imwettqa mill-Unjoni u l-Istati Membri fil-ġlieda kontra l-frodi, il-korruzzjoni u kull attività illegali oħra li taffettwa l-interessi finanzjarji tal-Unjoni.