16.3.2021

Il-Ġurnal Uffiċjali tal-Unjoni Ewropea

L 89/3

REGOLAMENT TA’ IMPLIMENTAZZJONI TAL-KUMMISSJONI (UE) 2021/453

tat-15 ta' Marzu 2021

li jistabbilixxi standards tekniċi ta’ implimentazzjoni għall-applikazzjoni tar-Regolament (UE) Nru 575/2013 tal-Parlament Ewropew u tal-Kunsill fir-rigward tar-rekwiżiti speċifiċi ta’ rapportar għar-riskju tas-suq

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) Nru 575/2013 tas-26 ta’ Ġunju 2013 tal-Parlament Ewropew u tal-Kunsill dwar ir-rekwiżiti prudenzjali għall-istituzzjonijiet ta’ kreditu u d-ditti tal-investiment u li jemenda r-Regolament (UE) Nru 648/2012 (1), u b’mod partikolari l-Artikolu 430(6) tiegħu,

Billi:

(1)

Fl-2019, il-Kumitat ta’ Basel dwar is-Superviżjoni Bankarja (Basel Committee on Banking Supervision, BCBS) ippubblika r-reviżjoni tar-“Rekwiżiti kapitali minimi għar-riskju tas-suq”, bil-għan li jindirizza d-dgħufijiet fit-trattament prudenzjali li jagħti l-banek lill-attivitajiet tal-portafoll tan-negozjar u introduċa, fost l-oħrajn, ir-rekwiżit għal approċċ standardizzat sensittiv għar-riskju tas-suq, li huwa mfassal u kkalibrat biex iservi ta’ riżerva kredibbli għall-approċċ tal-mudelli interni.

(2)

Ir-Regolament (UE) 2019/876 tal-Parlament Ewropew u tal-Kunsill (2) emenda r-Regolament (UE) Nru 575/2013 biex jintroduċi fil-qafas prudenzjali tal-Unjoni r-rekwiżit għall-istituzzjonijiet li jirrapportaw informazzjoni dwar ir-rekwiżiti ta’ fondi proprji skont dan l-approċċ standardizzat alternattiv u sensittiv għar-riskju.

(3)

Jenħtieġ li jiġu stabbiliti rekwiżiti uniformi ta’ rapportar dwar il-fondi proprji skont dan l-approċċ standardizzat alternattiv fir-rigward tar-rapportar lill-awtoritajiet kompetenti f’konformità mal-Artikolu 430b tar-Regolament (UE) Nru 575/2013 u f’konformità mal-att delegat imsemmi fl-Artikolu 461a ta’ dak ir-Regolament.

(4)

Skont l-Artikolu 430b(1) tar-Regolament (UE) Nru 575/2013, ir-rekwiżiti speċifiċi ta’ rapportar għar-riskju tas-suq stabbiliti f’dak l-Artikolu jenħtieġ li japplikaw mid-data tal-applikazzjoni tal-att delegat imsemmi fl-Artikolu 461a ta’ dak ir-Regolament. Għalhekk huwa xieraq li d-data tal-applikazzjoni ta’ dan ir-Regolament tkun tikkoniċidi mad-data tal-applikazzjoni ta’ dak l-att delegat.

(5)	Dan ir-Regolament huwa bbażat fuq l-abbozz tal-istandards tekniċi ta’ implimentazzjoni ppreżentat lill-Kummissjoni mill-Awtorità Bankarja Ewropea (ABE).

(6)

L-ABE wettqet konsultazzjonijiet pubbliċi miftuħa dwar l-abbozz tal-istandards tekniċi ta’ implementazzjoni li fuqu huwa bbażat dan ir-Regolament, analizzat il-kosti u l-benefiċċji potenzjali relatati u talbet il-parir tal-Grupp tal-Partijiet Bankarji Konċernati stabbilit skont l-Artikolu 37 tar-Regolament (UE) Nru 1093/2010 tal-Parlament Ewropew u tal-Kunsill (3),

ADOTTAT DAN IR-REGOLAMENT:

Artikolu 1

Dati ta’ referenza u dati ta’ rapportar

1. L-istituzzjonijiet għandhom jirrapportaw l-informazzjoni msemmija fl-Artikoli 430b, 94 (1) u 325a (1) tar-Regolament (UE) Nru 575/2013 lill-awtoritajiet kompetenti fuq bażi trimestrali kif din l-informazzjoni tkun tinsab fil-31 ta’ Marzu, it-30 ta’ Ġunju, it-30 ta’ Settembru u l-31 ta’ Diċembru.

2. L-istituzzjonijiet għandhom jirrapportaw l-informazzjoni msemmija fil-paragrafu 1 sa tmiem il-ġurnata tax-xogħol tal-jiem li ġejjin: it-12 ta’ Mejju, il-11 ta’ Awwissu, il-11 ta’ Novembru u l-11 ta’ Frar.

3. Meta l-jum imsemmi fil-paragrafu 2 ma jkunx jum tax-xogħol fl-Istat Membru tal-awtorità kompetenti li lilha għandha tiġi rrapportata l-informazzjoni, jew ikun is-Sibt jew il-Ħadd, l-informazzjoni għandha tiġi ppreżentata sa tmiem il-ġurnata tax-xogħol tal-jum tax-xogħol li jsegwi.

4. L-istituzzjonijiet għandhom jipprovdu lill-awtoritajiet kompetenti kull korrezzjoni fl-informazzjoni rrapportata mingħajr dewmien bla bżonn.

Artikolu 2

Rapportar dwar il-limiti stabbiliti fl-Artikoli 94(1) u 325a(1) tar-Regolament (UE) Nru 575/2013

L-istituzzjonijiet għandhom jirrapportaw informazzjoni dwar id-daqs tan-negozju tagħhom fil-karta bilanċjali u barra minnha li huwa soġġett għar-riskju tas-suq, u dwar id-daqs tal-portafoll tan-negozjar tagħhom, fuq bażi individwali jew fuq bażi konsolidata, kif applikabbli, billi jużaw il-mudell 90 tal-Anness I u f’konformità mal-istruzzjonijiet tat-Taqsima 1 tal-Parti II tal-Anness II ta’ dan ir-Regolament.

Artikolu 3

Rapportar dwar l-approċċ standardizzat alternattiv

L-istituzzjonijiet għandhom jirrapportaw ir-riżultati tal-kalkoli bbażati fuq l-approċċ standardizzat alternattiv kif imsemmi fl-Artikolu 430b(1) tar-Regolament (UE) Nru 575/2013 fuq bażi individwali jew fuq bażi konsolidata, kif applikabbli, billi jużaw il-formola 91 tal-Anness I ta’ dan ir-Regolament u f’konformità mal-istruzzjonijiet tat-Taqsima 2 tal-Parti II tal-Anness II ta’ dan ir-Regolament.

Artikolu 4

Formati tal-iskambju tad- data u informazzjoni assoċjata mal-preżentazzjonijiet

1. L-istituzzjonijiet għandhom jirrapportaw l-informazzjoni msemmija fl-Artikoli 2 u 3 ta’ dan ir-Regolament fil-formati u r-rappreżentazzjonijiet tal-iskambju tad-data speċifikati mill-awtorità kompetenti tagħhom u għandhom jirrispettaw id-definizzjoni tal-punt tad-data tal-mudell tal-punt tad-data u l-formuli ta’ validazzjoni stabbiliti fl-Anness III.

2. Informazzjoni mhux meħtieġa jew mhux applikabbli ma għandhiex tiġi inkluża fil-preżentazzjoni tad-data.

3. Il-valuri numeriċi għandhom jiġu ppreżentati kif ġej:

(a)	punti tad-data bit-tip ta’ data“Monetarja” għandhom jiġu rrapportati bl-użu minimu ta’ preċiżjoni ekwivalenti għal eluf ta’ unitajiet;

(b)	punti tad-data bit-tip ta’ data“Perċentwali” għandhom jiġu espressi għal kull unità b’minimu ta’ preċiżjoni ekwivalenti għal erba’ pożizzjonijiet deċimali;

(c)	punti tad-data bit-tip ta’ data“Numru Sħiħ” għandhom jiġu rrapportati billi ma jintużawx deċimali u preċiżjoni ekwivalenti għal unitajiet.

4. L-istituzzjonijiet għandhom jiġu identifikati biss permezz tal-Identifikatur tal-Entità Ġuridika (Legal Entity Identifier, LEI) tagħhom. L-entitajiet ġuridiċi u l-kontropartijiet għajr l-istituzzjonijiet għandhom jiġu identifikati permezz tal-LEI tagħhom fejn dan ikun disponibbli.

5. L-informazzjoni rrapportata mill-istituzzjonijiet għandha tkun assoċjata ma’ dan li ġej:

(a)	ir-rapportar tad-data ta’ referenza u l-perjodu ta’ referenza;

(b)	il-munita tar-rapportar;

(c)	l-istandard tal-kontabilità;

(d)	l-Identifikatur tal-Entità Ġuridika (LEI) tal-istituzzjoni tar-rapportar;

(e)	l-ambitu tal-konsolidazzjoni.

Artikolu 5

Dħul fis-seħħ u data tal-applikazzjoni

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Għandu japplika tat-5 ta' Ottubru 2021.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, tat-15 ta' Marzu 2021.

Għall-Kummissjoni

Il-President

Ursula VON DER LEYEN

(1) ĠU L, 176, 27.6.2013, p. 1.

(2) Ir-Regolament (UE) 2019/876 tal-Parlament Ewropew u tal-Kunsill tal-20 ta’ Mejju 2019 li jemenda r-Regolament (UE) Nru 575/2013 dwar il-proporzjon ta’ lieva finanzjarja, il-proporzjon ta’ finanzjament stabbli nett, rekwiżiti għall-fondi proprji u obbligazzjonijiet eliġibbli, riskju ta’ kreditu tal-kontroparti, riskju tas-suq, skoperturi għal kontropartijiet ċentrali, skoperturi għal impriżi ta’ investiment kollettiv, skoperturi kbar, rekwiżiti ta’ rapportar u divulgazzjoni, u r-Regolament (UE) Nru 648/2012 (ĠU L 150, 7.6.2019, p. 1).

(3) Ir-Regolament (UE) Nru 1093/2010 tal-Parlament Ewropew u tal-Kunsill tal-24 ta’ Novembru 2010 li jistabbilixxi Awtorità Superviżorja Ewropea (Awtorità Bankarja Ewropea), u li jemenda d-Deċiżjoni Nru 716/2009/KE u jħassar id-Deċiżjoni tal-Kummissjoni 2009/78/KE (ĠU L 331, 15.12.2010, p. 12).

ANNESS I

REKWIŻITI SPEĊIFIĊI TA’ RAPPORTAR GĦAR-RISKJU TAS-SUQ

MUDELLI COREP
Numru tal-mudell	Kodiċi tal-mudell	Isem tal-mudell/grupp ta’ mudelli	L-isem fil-qosor
		Limiti
90	C 90.00	LIVELLI LIMITU TAL-PORTAFOLL TAN-NEGOZJAR U TAR-RISKJU TAS-SUQ	OTK
		Approċċ Standardizzat Alternattiv għar-riskju tas-suq
91	C 91.00	REKWIŻITI TA’ FONDI PROPRJI	MKR ASA SUM

C 90.00 Il-portafoll tan-negozjar u l-limiti tar-riskju tas-suq (OTK)


			Negozju fil-karta bilanċjali u barra minnha soġġett għal riskju tas-suq						Assi totali
			Tqassim skont il-ktieb regolatorju					f’% tal-assi totali
				Portafoll tan-negozjar		Portafoll mhux tan-negozjar
				li minnhom: Operazzjonijiet tal-portafoll tan-negozjar għall-finijiet tal-Artikolu 94 CRR		Pożizzjonijiet soġġetti għar-riskju tal-kambju	Pożizzjonijiet soġġetti għar-riskju tal-komoditajiet
				Total	f’% tal-assi totali	Pożizzjonijiet soġġetti għar-riskju tal-kambju	Pożizzjonijiet soġġetti għar-riskju tal-komoditajiet
		0010	0020	0030	0040	0050	0060	0070	0080
0010	Xahar 3
0020	Xahar 2
0030	Xahar 1

C 91.00 Approċċ Standardizzat Alternattiv: Sommarju (MKR ASA SUM)

			Pożizzjonijiet soġġetti għal metodu bbażat fuq is-sensittivitajiet
			Sensittivitajiet delta mhux ponderati			Rekwiżiti ta’ fondi proprji skont ix-xenarji differenti
			Sensittivitajiet delta mhux ponderati			Xenarju ta’ korrelazzjoni baxxa				Xenarju ta’ korrelazzjoni medja				Xenarju ta’ korrelazzjoni għolja
			Pożittiv	Negattiv	Sensittivitajiet netti għal kull klassi ta’ riskju	Riskju Delta	Riskju Vega	Riskju ta’ Kurvatura	Total	Riskju Delta	Riskju Vega	Riskju ta’ Kurvatura	Total	Riskju Delta	Riskju Vega	Riskju ta’ Kurvatura	Total
			0010	0020	0030	0040	0050	0060	0070	0080	0090	0100	0110	0120	0130	0140	0150
0010	Total (Approċċ standardizzat alternattiv)
0020	Metodu bbażat fuq is-sensittività	Riskju ġenerali tar-rata tal-imgħax (GIRR)
0030		Riskju tal-firxa tal-kreditu għal nontitolizzazzjonijiet (CSR)
0040		Riskju ta' firxiet tal-kreditu għal titolizzazzjoni mhux inkluża fil-portafoll tan-negozjar ta' korrelazzjoni alternattiva (non-ACTP CSR)
0050		Riskju ta' firxiet tal-kreditu għal titolizzazzjoni inkluża fil-portafoll tan-negozjar ta' korrelazzjoni alternattiva (ACTP CSR)
0060		Riskju tal-ekwità (EQU)
0070		Riskju tal-komoditajiet (COM)
0080		Riskju tal-kambju (FX)
0090	Riskju ta’ inadempjenza	Nontitolizzazzjonijiet
0100		Titolizzazzjoni mhux inkluża fil-portafoll alternattiv ta’ negozjar ta’ korrelazzjoni (non-ACTP)
0110		Titolizzazzjoni inkluża fil-portafoll alternattiv ta’ negozjar ta’ korrelazzjoni (ACTP)
0120	Riskju residwu	Sottostanti eżotiċi
0130	Riskju residwu	Riskji residwi oħra

			Pożizzjonijiet soġġetti għar-riskju ta’ inadempjenza		Pożizzjonijiet soġġetti għal riskju residwu	Rekwiżiti ta' fondi proprji	L-ammont totali tal-iskopertura għar-riskju
			Ammonti grossi ta' inadempjenza immedjata u mhux mistennija (jump-to-default, JTD)		Valur nozzjonali gross
			Twal	Qosra	Valur nozzjonali gross
			0160	0170	0180	0190	0200
0010	Total (Approċċ standardizzat alternattiv)
0020	Metodu bbażat fuq is-sensittività	Riskju ġenerali tar-rata tal-imgħax (GIRR)
0030		Riskju tal-firxa tal-kreditu għal nontitolizzazzjonijiet (CSR)
0040		Riskju ta' firxiet tal-kreditu għal titolizzazzjoni mhux inkluża fil-portafoll tan-negozjar ta' korrelazzjoni alternattiva (non-ACTP CSR)
0050		Riskju ta' firxiet tal-kreditu għal titolizzazzjoni inkluża fil-portafoll tan-negozjar ta' korrelazzjoni alternattiva (ACTP CSR)
0060		Riskju tal-ekwità (EQU)
0070		Riskju tal-komoditajiet (COM)
0080		Riskju tal-kambju (FX)
0090	Riskju ta’ inadempjenza	Nontitolizzazzjonijiet
0100		Titolizzazzjoni mhux inkluża fil-portafoll alternattiv ta’ negozjar ta’ korrelazzjoni (non-ACTP)
0110		Titolizzazzjoni inkluża fil-portafoll alternattiv ta’ negozjar ta’ korrelazzjoni (ACTP)
0120	Riskju residwu	Sottostanti eżotiċi
0130	Riskju residwu	Riskji residwi oħra

ANNESS II

STRUZZJONIJIET GĦALL-MILI TAL-MUDELLI FL-ANNESS I DWAR REKWIŻITI SPEĊIFIĊI TAR-RAPPORTAR GĦAR-RISKJU TAS-SUQ

PARTI I: STRUZZJONIJIET ĠENERALI

1. Struttura u konvenzjonijiet

1.1. Struttura

Għall-finijiet tar-rapportar tal-informazzjoni skont dan ir-Regolament ta’ Implimentazzjoni, l-istituzzjonijiet iridu jimlew żewġ mudelli separati:

(a)	mudell għar-rapportar tal-informazzjoni dwar il-limiti stabbiliti fl-Artikoli 94 u 325a tar-Regolament (UE) Nru 575/2013 u

(b)	mudell għar-rapportar tas-sommarju tal-pożizzjonijiet u tar-rekwiżiti teoretiċi tal-fondi proprji abbażi tal-approċċ standardizzat alternattiv.

1.2. Konvenzjoni tal-enumerazzjoni

Il-konvenzjonijiet segwenti jintużaw fir-referenzi għall-kolonni, ir-ringieli u ċ-ċelloli tal-mudelli f’dawn l-istruzzjonijiet u r-regoli ta’ validazzjoni użati għall-validazzjoni tal-informazzjoni rrapportata:

(a)	fl-istruzzjonijiet tintuża n-notazzjoni ġenerali segwenti: {Mudell;Ringiela;Kolonna};

(b)	fil-każ ta’ referenzi jew regoli ta’ validazzjoni f’mudell, li jirreferu biss għal punti tad-data ta’ dak il-mudell jew jużaw biss lilhom, il-mudell mhuwiex speċifikat: {Ringiela;Kolonna};

(c)	fil-każ ta’ mudelli b’kolonna waħda biss, issir referenza għar-ringieli biss: {Mudell;Ringiela};

(d)	sinjal ta’ asterisk jintuża biex jesprimi li r-regola ta referenza jew validazzjoni tapplika għar-ringieli jew għall-kolonni speċifikati qabel.

1.3. Il-konvenzjoni dwar is-sinjali

Kull ammont li jżid il-fondi proprji jew ir-rekwiżiti tal-fondi proprji għandu jiġi rrapportat bħala ċifra pożittiva. Kull ammont li jnaqqas it-total tal-fondi proprji jew tar-rekwiżiti tal-fondi proprji għandu jiġi rrapportat bħala ċifra negattiva. Meta jkun hemm sinjal negattiv (-) qabel id-deżinjazzjoni ta’ element, ma jkun mistenni li tiġi rrapportata ebda ċifra pożittiva għal dak l-element.

1.4. Taqsiriet

Għall-finijiet ta’ dan l-Anness, ir-Regolament (UE) Nru 575/2013 huwa deżinjat bħala “CRR”.

PARTI II: STRUZZJONIJIET RELATATI MAL-MUDELL

1. C 90.00 – Il-portafoll tan-negozjar u l-limiti tar-riskju tas-suq

1.1. Kummenti ġenerali

L-informazzjoni li tingħata f’dan il-mudell għandha tirrifletti r-riżultat tal-kalkolu msemmi fl-Artikolu 94 CRR (deroga għal negozju żgħir fil-portafoll tan-negozjar), u d-daqs tan-negozju fil-karta bilanċjali u barra minnha ta’ istituzzjoni li jkun soġġett għar-riskju tas-suq ikkalkolat skont l-Artikolu 325a CRR. Din l-informazzjoni tiddetermina jekk japplikax l-obbligu li tiġi rrapportata informazzjoni dwar l-“approċċ standardizzat alternattiv” jew l-“approċċ ta’ mudelli interni alternattivi” msemmijin fl-Artikolu 430 CRR.

1.2. Struzzjonijiet dwar pożizzjonijiet speċifiċi

Ir-riżultat tal-kalkolu msemmi fl-Artikolu 94 CRR u l-informazzjoni dwar id-daqs tan-negozju fil-karta bilanċjali u barra minnha ta’ istituzzjoni soġġett għar-riskju tas-suq ikkalkolati skont l-Artikolu 325a CRR għandhom jiġu rrapportati separatament għal kull tmiem ix-xahar fit-trimestru li għalih jirreferi r-rapport fir-ringieli minn 0010 sa 0030.

Ringiela	Referenzi legali u struzzjonijiet
0010	Xahar 3 Data sa tmiem it-tielet xahar tat-trimestru li għalih jirreferi r-rapport
0020	Xahar 2 Data sa tmiem it-tieni xahar tat-trimestru li għalih jirreferi r-rapport
0030	Xahar 1 Data sa tmiem l-ewwel xahar tat-trimestru li għalih jirreferi r-rapport

Kolonna	Referenzi legali u struzzjonijiet
0010	Negozju fil-karta bilanċjali u barra minnha soġġett għal riskju tas-suq Artikolu 325 a(2) CRR L-istituzzjonijiet jirrapportaw l-ammont assolut li jirrifletti n-negozju tal-istituzzjoni fil-karta bilanċjali u barra minnha soġġett għar-riskju tas-suq ikkalkolat f’konformità mal-Artikolu 325a(2) CRR.
0020 – 0060	Tqassim skont il-ktieb regolatorju In-negozju fil-karta bilanċjali u barra minnha soġġett għar-riskju tas-suq għandu jiġi diżaggregat skont il-portafoll tan-negozjar u l-portafoll mhux tan-negozjar.
0020	Portafoll tan-negozjar Il-punti (a), (c) u (f) tal-Artikolu 325a(2) CRR
0030 – 0040	li minnhom: Operazzjonijiet tal-portafoll tan-negozjar għall-finijiet tal-Artikolu 94 CRR L-Artikolu 94(3) CRR Kif jesiġi l-punt (b) tal-Artikolu 94(3) CRR, l-istituzzjonijiet għandhom jirrapportaw il-valuri tas-suq sal-aħħar jum tax-xahar; meta l-valuri tas-suq ma jkunux disponibbli, il-valuri ġusti fl-istess data, jew, fejn il-valuri tas-suq u l-valuri ġusti ma jkunux disponibbli f’dik id-data partikolari, l-aktar valur tas-suq jew valur ġust riċenti.
0030	Total L-Artikolu 94(3) CRR L-ammont assolut ta’ pożizzjonijiet twal u qosra għandu jingħadd kif jirrikjedi l-punt (c) tal-Artikolu 94(3) CRR.
0040	f’% tal-assi totali Il-punt (a) tal-Artikolu 94(1) CRR Id-daqs tal-portafoll tan-negozjar għall-finijiet tal-Artikolu 94 CRR għandu jiġi espress bħala perċentwal tal-assi totali.
0050 – 0060	Portafoll mhux tan-negozjar Il-punti (d), (e) u (f) tal-Artikolu 325a(2) CRR Pożizzjonijiet fil-portafoll mhux tan-negozjar soġġetti għar-riskju tas-suq għandhom jiġu rrapportati diżaggregati f’pożizzjonijiet soġġetti għar-riskju tal-kambju u pożizzjonijiet soġġetti għar-riskju tal-komoditajiet. L-ammonti rilevanti għandhom jiġu ddeterminati skont il-punti (d) u (e) tal-Artikolu 325a(2) CRR.
0070	f’% tal-assi totali Il-punt (a) tal-Artikolu 325a(1) CRR In-negozju fil-karta bilanċjali u barra minnha soġġett għar-riskju tas-suq għandu jiġi espress bħala perċentwal tal-assi totali.
0080	Assi totali Il-punt (a) tal-Artikolu 94(1) CRR Il-punt (a) tal-Artikolu 325a(1) CRR

2. C 91.00 – Ir-Riskju tas-Suq: Sommarju tal-Approċċ Standardizzat Alternattiv (MKR ASA SUM)

2.1. Kummenti Ġenerali

Dan il-mudell jipprovdi informazzjoni fil-qosor dwar il-kalkolu tar-rekwiżiti ta’ fondi proprji għar-Riskju tas-Suq skont l-Approċċ Standardizzat Alternattiv (ASA), stabbilit fil-Kapitolu 1a tat-Titolu IV tal-Parti Tlieta CRR.

Skont l-Approċċ Standardizzat Alternattiv (ASA), l-istituzzjonijiet għandhom jikkalkulaw ir-rekwiżiti ta’ fondi proprji għar-riskju tas-suq fir-rigward tal-portafoll ta’ pożizzjonijiet fil-portafoll tan-negozjar jew pożizzjonijiet fil-portafoll mhux tan-negozjar li huma soġġetti għar-riskju tal-kambju jew tal-komoditajiet bħala s-somma tat-tliet komponenti segwenti:

(a)	Ir-rekwiżit ta’ fondi proprji skont il-metodu bbażat fuq is-sensittivitajiet kif stabbilit fit-Taqsima 2 tal-Kapitolu 1a tat-Titolu IV tal-Parti Tlieta CRR;

(b)	Ir-rekwiżit ta’ fondi proprji għar-riskju ta’ inadempjenza kif stabbilit fit-Taqsima 5 tal-Kapitolu 1a tat-Titolu IV tal-Parti Tlieta CRR għal pożizzjonijiet fil-portafoll tan-negozjar;

(c)	Ir-rekwiżiti ta’ fondi proprji għar-riskji residwi kif stabbilit fit-Taqsima 4 tal-Kapitolu 1a tat-Titolu IV tal-Parti Tlieta CRR għal pożizzjonijiet fil-portafoll tan-negozjar.

2.2. Struzzjonijiet dwar pożizzjonijiet speċifiċi

Kolonna

Referenzi legali u struzzjonijiet

0010 – 0150

Pożizzjonijiet soġġetti għal metodu bbażat fuq is-sensittivitajiet

Ir-rekwiżiti ta’ fondi proprji kkalkolati skont il-metodu bbażat fuq is-sensittivitajiet għal riskji delta, vega u kurvatura għal strumenti b’opzjonalità u mingħajrha, kif applikabbli, għandhom jiġu rrapportati separatament u bħala somma fil-mudell.

Il-proċess biex jiġu kkalkulati r-rekwiżiti ta’ fondi proprji speċifiċi għall-klassi tar-riskju għandu jitwettaq għal tliet xenarji differenti għal kull klassi ta’ riskju, li għandhom jiġu riflessi fit-taqsima separata tal-mudell:

—	ix-xenarju ta’ korrelazzjoni baxxa fil-kolonni minn 0040 sa 0070;

—	ix-xenarju ta’ korrelazzjoni medja fil-kolonni minn 0080 sa 0110;

—	ix-xenarju ta’ korrelazzjoni għolja fil-kolonni minn 0120 sa 0150.

0010 – 0030

Sensittivitajiet delta mhux ponderati

0010

Sensittivitajiet delta mhux ponderati – Pożittivi

L-Artikolu 325f(3) u l-Artikolu 325r CRR.

L-istituzzjonijiet għandhom jikkalkulaw is-sensittività tal-portafoll tagħhom għal kull fattur ta’ riskju fil-klassi ta’ riskju f’konformità mal-Artikolu 325f(3) CRR. Għandhom jirrapportaw is-somma tas-sensittivitajiet pożittivi kollha għall-fatturi ta’ riskju delta fil-klassi ta’ riskju.

0020

Sensittivitajiet delta mhux ponderati – Negattivi

L-Artikolu 325f(3) u l-Artikolu 325r CRR.

L-istituzzjonijiet għandhom jikkalkulaw is-sensittività tal-portafoll tagħhom għal kull fattur ta’ riskju fil-klassi ta’ riskju f’konformità mal-Artikolu 325f (3) CRR. Huma għandhom jirrapportaw is-somma tas-sensittivitajiet negattivi kollha għall-fatturi ta’ riskju delta fil-klassi ta’ riskju.

0030

Sensittivitajiet delta mhux ponderati – Sensittivitajiet netti għal kull klassi ta’ riskju

L-istituzzjonijiet għandhom jirrapportaw is-somma netta tas-sensittivitajiet pożittivi kollha u s-sensittivitajiet negattivi kollha lill-fatturi ta’ riskju delta differenti fil-klassi ta’ riskju.

0040, 0080, 0120

Riskju Delta

Il-punt (a) tal-Artikolu 325e(1) u l-Artikolu 325f CRR

L-istituzzjonijiet għandhom jirrapportaw ir-rekwiżit ta’ fondi proprji speċifiku għall-klassi tar-riskju fir-rigward tar-riskju delta msemmi fl-Artikolu 325f(8) CRR fix-xenarju applikabbli.

0050, 0090, 0130

Riskju Vega

Il-punt (b) tal-Artikolu 325e(1) u l-Artikolu 325f CRR

L-istituzzjonijiet għandhom jirrapportaw ir-rekwiżit ta’ fondi proprji speċifiku għall-klassi tar-riskju fir-rigward tar-riskju vega msemmi fl-Artikolu 325f(8) CRR fix-xenarji applikabbli.

0060, 0100, 0140

Riskju ta’ Kurvatura

Il-punt (c) tal-Artikolu 325(1) u l-Artikolu 325 g CRR

0070, 0110, 0150

Total

L-Artikolu 325h(3) CRR.

Għal kull xenarju l-istituzzjonijiet għandhom jirrapportaw is-somma tar-rekwiżiti ta’ fondi proprji speċifiċi għall-klassi ta’ riskju delta, vega u kurvatura.

0160 – 0170

Pożizzjonijiet soġġetti għar-riskju ta’ inadempjenza – Ammonti grossi ta’ inadempjenza immedjata u mhux mistennija (jump-to-default, JTD)

L-istituzzjonijiet għandhom jirrapportaw l-ammonti grossi ta’ inadempjenza immedjata u mhux mistennija għall-iskoperturi tagħhom għal strumenti mhux ta’ titolizzazzjoni kkalkolati skont l-Artikolu 325w CRR, għal titolizzazzjonijiet mhux inklużi fl-ACTP determinati skont l-Artikolu 325z ta’ dak is-CRR, u għal skoperturi ta’ titolizzazzjoni u skoperturi mhux ta’ titolizzazzjoni inklużi fl-ACTP determinati skont l-Artikolu 325ac CRR b’diżaggregazzjoni bejn skoperturi twal u qosra.

0160

Twal

0170

Qosra

0180

Pożizzjonijiet soġġetti għal riskju residwu – Valur nozzjonali gross

L-Artikolu 325u CRR.

L-istituzzjonijiet għandhom jirrapportaw l-ammonti nozzjonali grossi, kif imsemmi fl-Artikolu 325u(3) CRR, tal-istrumenti msemmijin fl-Artikolu 325u(2) CRR li huma soġġetti għar-rekwiżit ta’ fondi proprji għar-riskji residwi kif imsemmi fil-paragrafi (1) u (4) tal-Artikolu 325u CRR.

0190

Rekwiżiti ta’ Fondi Proprji

L-Artikolu 325h(4), l-Artikoli minn 325w sa 325ad u l-Artikolu 325u CRR

Ir-rekwiżit kapitali ddeterminat skont il-Kapitolu 1a tat-Titolu IV tal-Parti Tlieta CRR għal pożizzjonijiet fil-kamp ta’ applikazzjoni tal-approċċ standardizzat alternattiv.

0200

L-ammont totali tal-iskopertura għar-riskju

Il-punt (b) tal-Artikolu 92(3) CRR u l-Artikolu 92(4) CRR

Ringiela	Referenzi legali u struzzjonijiet
0010	Totali (approċċ standardizzat alternattiv)
0020 – 0080	Metodu bbażat fuq is-sensittivitajiet It-Taqsima 2 tal-Kapitolu 1a tat-Titolu IV tal-Parti Tlieta CRR
0020	Riskju ġenerali tar-rata tal-imgħax (GIRR) Il-punt (b) tal-Artikolu 325d(1) CRR
0030	Riskju tal-firxa tal-kreditu għal nontitolizzazzjonijiet (CSR) Il-punt (ii) tal-Artikolu 325d(1) CRR
0040	Riskju ta’ firxiet tal-kreditu għal titolizzazzjoni mhux inkluża fil-portafoll tan-negozjar ta’ korrelazzjoni alternattiva (non-ACTP CSR) Il-punt (iii) tal-Artikolu 325d(1) CRR
0050	Riskju ta’ firxiet tal-kreditu għal titolizzazzjoni inkluża fil-portafoll tan-negozjar ta’ korrelazzjoni alternattiva (ACTP CSR) Il-punt (iv) tal-Artikolu 325d(1) CRR
0060	Riskju tal-ekwità (EQU) Il-punt (v) tal-Artikolu 325d(1) CRR
0070	Riskju tal-komoditajiet (COM) Il-punt (vi) tal-Artikolu 325d(1) CRR
0080	Riskju tal-kambju (FX) Il-punt (vii) tal-Artikolu 325d(1) CRR
0090 – 0110	Riskju ta’ inadempjenza It-Taqsima 5 tal-Kapitolu 1a tat-Titolu IV tal-Parti Tlieta CRR
0090	Nontitolizzazzjonijiet Is-Subtaqsima 1 tat-Taqsima 5 tal-Kapitolu 1a tat-Titolu IV tal-Parti Tlieta CRR
0100	Titolizzazzjoni mhux inkluża fil-portafoll alternattiv ta’ negozjar ta’ korrelazzjoni (non-ACTP) Is-Subtaqsima 2 tat-Taqsima 5 tal-Kapitolu 1a tat-Titolu IV tal-Parti Tlieta CRR
0110	Titolizzazzjoni inkluża fil-portafoll alternattiv ta’ negozjar ta’ korrelazzjoni (ACTP) Is-Subtaqsima 3 tat-Taqsima 5 tal-Kapitolu 1a tat-Titolu IV tal-Parti Tlieta CRR
0120 – 0130	Riskju residwu It-Taqsima 4 tal-Kapitolu 1a tat-Titolu IV tal-Parti Tlieta CRR
0120	Sottostanti eżotiċi Il-punt (a) tal-Artikolu 325u(2) CRR
0130	Riskji residwi oħra Il-punt (b) tal-Artikolu 325u(2) CRR

16.3.2021

Il-Ġurnal Uffiċjali tal-Unjoni Ewropea

L 89/17

DEĊIŻJONI TA’ IMPLIMENTAZZJONI TAL-KUMMISSJONI (UE) 2021/455

tal-15 ta’ Marzu 2021

li temenda d-Deċiżjoni ta’ Implimentazzjoni (UE) 2019/1326 fir-rigward tal-istandards armonizzati għall-kompatibbiltà elettromanjetika tal-apparati u elementi ta’ kommutazzjoni għaċ-ċirkwiti tal-kontroll, u tat-tagħmir multimedjali

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) Nru 1025/2012 tal-Parlament Ewropew u tal-Kunsill tal-25 ta’ Ottubru 2012 dwar l-Istandardizzazzjoni Ewropea, li jemenda d-Direttivi tal-Kunsill 89/686/KEE u 93/15/KEE u d-Direttivi 94/9/KE, 94/25/KE, 95/16/KE, 97/23/KE, 98/34/KE, 2004/22/KE, 2007/23/KE, 2009/23/KE u 2009/105/KE tal-Parlament Ewropew u tal-Kunsill u li jħassar id-Deċiżjoni tal-Kunsill 87/95/KEE u d-Deċiżjoni Nru 1673/2006/KE tal-Parlament Ewropew u tal-Kunsill (1), u b’mod partikolari l-Artikolu 10(6) tiegħu,

Billi:

(1)

F’konformità mal-Artikolu 13 tad-Direttiva 2014/30/UE tal-Parlament Ewropew u tal-Kunsill (2), it-tagħmir elettriku li jkun f’konformità mal-istandards armonizzati jew partijiet minnhom, li r-referenzi tagħhom ikunu ġew ippubblikati f’Il-Ġurnal Uffiċjali tal-Unjoni Ewropea, għandu jkun preżunt li hu konformi mar-rekwiżiti essenzjali koperti minn dawk l-istandards jew partijiet minnhom stabbiliti fl-Anness I ta’ dik id-Direttiva.

(2)

Permezz tad-Deċiżjoni ta’ Implimentazzjoni C(2016) 7641 (3), il-Kummissjoni għamlet talba lill-Kumitat Ewropew għall-Istandardizzazzjoni (CEN), lill-Kumitat Ewropew għall-Istandardizzazzjoni Elettroteknika (CENELEC) u lill-Istitut Ewropew tal-Istandards tat-Telekomunikazzjoni (ETSI) għall-abbozzar u għar-reviżjoni ta’ standards armonizzati għall-kompatibbiltà elettromanjetika b’appoġġ għad-Direttiva 2014/30/UE.

(3)

Abbażi tat-talba stabbilita fid-Deċiżjoni ta’ Implimentazzjoni C(2016) 7641, is-CEN u s-CENELEC irrevedew l-istandard armonizzat EN 60947-5-2:2007 għall-apparati u elementi ta’ kommutazzjoni għaċ-ċirkwiti tal-kontroll, li r-referenza tiegħu hija ppubblikata fis-serje C ta’ Il-Ġurnal Uffiċjali tal-Unjoni Ewropea (4). Dan irriżulta fl-adozzjoni tal-istandard armonizzat EN IEC 60947-5-2:2020.

(4)	Il-Kummissjoni, flimkien mas-CEN u s-CENELEC, ivvalutat jekk dawk l-istandards armonizzati jikkonformawx mat-talba stabbilita fid-Deċiżjoni ta’ Implimentazzjoni C(2016) 7641.

(5)	L-istandard armonizzat EN IEC 60947-5-2:2020 jissodisfa r-rekwiżiti li għandu l-għan li jkopri u li huma stabbiliti fid-Direttiva 2014/30/UE. Għalhekk huwa xieraq li r-referenza ta’ dak l-istandard tiġi ppubblikata f’Il-Ġurnal Uffiċjali tal-Unjoni Ewropea.

(6)

L-Anness I tad-Deċiżjoni ta’ Implimentazzjoni tal-Kummissjoni (UE) 2019/1326 (5) jelenka r-referenzi tal-istandards armonizzati li jikkonferixxu preżunzjoni ta’ konformità mad-Direttiva 2014/30/UE. Sabiex jiġi żgurat li r-referenzi tal-istandards armonizzati abbozzati b’appoġġ għad-Direttiva 2014/30/UE ikunu elenkati f’att wieħed, ir-referenza tal-istandard EN IEC 60947-5-2:2020 jenħtieġ li tiġi inkluża f’dak l-Anness.

(7)	Għalhekk jeħtieġ li titneħħa mis-serje C ta’ Il-Ġurnal Uffiċjali tal-Unjoni Ewropea, ir-referenza tal-istandard armonizzat EN 60947-5-2:2007, flimkien mar-referenza tal-istandard emendatorju għalih EN 60947-5-2:2007/A1:2012.

(8)

L-Anness II tad-Deċiżjoni ta’ Implimentazzjoni (UE) 2019/1326 jelenka r-referenzi tal-istandards armonizzati abbozzati b’appoġġ għad-Direttiva 2014/30/UE rtirati mis-serje C ta’ Il-Ġurnal Uffiċjali tal-Unjoni Ewropea. Għalhekk huwa xieraq li f’dak l-Anness tiġi inkluża r-referenza tal-istandard armonizzat EN 60947-5-2:2007, flimkien mar-referenza tal-istandard emendatorju għalih EN 60947-5-2:2007/A1:2012.

(9)

Abbażi tat-talba stabbilita fid-Deċiżjoni ta’ Implimentazzjoni C(2016) 7641, is-CEN u s-CENELEC emendaw l-istandard armonizzat EN 55035:2017, li r-referenza tiegħu hija inkluża fl-Anness I tad-Deċiżjoni ta’ Implimentazzjoni (UE) 2019/1326. Dan irriżulta fl-adozzjoni tal-istandard emendatorju EN 55035:2017/A11:2020. L-istandard armonizzat EN 55035:2017/A11:2020 għandu l-għan li jissostitwixxi l-istandards armonizzati li ġejjin, flimkien ma’ kwalunkwe standard emendatorju jew korrettorju għalih: EN 55020:2007, li r-referenza tiegħu ma ġietx ippubblikata f’Il-Ġurnal Uffiċjali tal-Unjoni Ewropea; EN 55024: 2010 li r-referenza tiegħu hija ppubblikata fis-serje C ta’ Il-Ġurnal Uffiċjali tal-Unjoni Ewropea (6); u EN 55103-2:2009 li r-referenza tiegħu hija inkluża fl-Anness II tad-Deċiżjoni ta’ Implimentazzjoni (UE) 2019/1326, bid-data tal-irtirar tat-18 ta’ Novembru 2021, li jelenka r-referenzi tal-istandards armonizzati abbozzati b’appoġġ għad-Direttiva 2014/30/UE li ġew irtirati minn Il-Ġurnal Uffiċjali tal-Unjoni Ewropea.

(10)

L-istandard armonizzat EN 55035:2017, kif emendat bi EN 55035:2017/A11:2020, huwa konformi mat-talba stabbilita fid-Deċiżjoni ta’ Implimentazzjoni C(2016) 7641 u jissodisfa r-rekwiżiti essenzjali li għandu l-għan li jkopri u li huma stabbiliti fid-Direttiva 2014/30/UE. Għalhekk huwa xieraq li l-entrata dwar l-istandard armonizzat EN 55035:2017 fl-Anness I tad-Deċiżjoni ta’ Implimentazzjoni (UE) 2019/1326 tinbidel sabiex ir-referenza ta’ EN 55035:2017 tiġi inkluża flimkien mar-referenza ta’ EN 55035:2017/A11:2020, u biex ir-referenza tal-istandard armonizzat EN 55024:2010 tiġi inkluża fl-Anness II ta’ dik id-Deċiżjoni.

(11)

Sabiex il-manifatturi jingħataw biżżejjed żmien biex iħejju għall-applikazzjoni tal-istandard armonizzat EN IEC 60947-5-2:2020, u għall-irtirar tar-referenza ta’ EN 55024:2010, jeħtieġ li jiġu differiti r-referenzi tal-istandards armonizzati li ġejjin, flimkien mar-referenza tal-istandard emendatorju rilevanti għalihom: EN 60947-5-2:2007, kif emendat bi EN 60947-5-2:2007/A1:2012, u EN 55024:2010.

(12)

L-istandard armonizzat EN 55035:2017 introduċa bidliet sinifikanti fl-ispeċifikazzjonijiet stabbiliti fl-istandard armonizzat EN 55103-2:2009. Għalhekk, fl-istandard armonizzat EN55035:2017, is-CENELEC ipprovda perjodu twil għall-korpi nazzjonali tal-istandardizzazzjoni biex jissostitwixxu l-istandards nazzjonali li jittrasponu l-istandard armonizzat EN 55103-2:2009. Peress li d-disinn ta’ għadd ta’ prodotti koperti mill-istandard armonizzat EN 55103-2:2009, bħal apparat tal-awdjo, tal-vidjo, awdjoviżiv u tal-kontroll tat-tidwil għad-divertiment, jeħtieġ li jiġi modifikat b’mod sinifikanti sat-18 ta’ Novembru 2021 minħabba li l-istandard armonizzat EN 55103-2:2009 ma jibqax jipprovdi preżunzjoni ta’ konformità wara dik id-data, għadd ta’ manifatturi jistgħu ma jkunux f’pożizzjoni li jissodisfaw dik l-iskadenza. Għalhekk huwa xieraq li, b’mod eċċezzjonali, tiġi posposta d-data tal-irtirar tal-istandard armonizzat EN 55103-2:2009. Għalhekk, l-entrata dwar l-istandard armonizzat EN 55103-2:2009 fl-Anness II tad-Deċiżjoni ta’ Implimentazzjoni (UE) 2019/1326 jenħtieġ li tiġi emendata skont dan.

(13)	Għalhekk, jenħtieġ li d-Deċiżjoni ta’ Implimentazzjoni (UE) 2019/1326 tiġi emendata skont dan.

(14)

Il-konformità ma’ standard armonizzat tikkonferixxi preżunzjoni ta’ konformità mar-rekwiżiti essenzjali korrispondenti stabbiliti fil-leġiżlazzjoni tal-Unjoni dwar l-armonizzazzjoni mid-data tal-pubblikazzjoni tar-referenza ta’ tali standard f’Il-Ġurnal Uffiċjali tal-Unjoni Ewropea. Għalhekk, jenħtieġ li din id-Deċiżjoni tidħol fis-seħħ fil-jum tal-pubblikazzjoni tagħha,

ADOTTAT DIN ID-DEĊIŻJONI:

Artikolu 1

L-Anness I tad-Deċiżjoni ta’ Implimentazzjoni (UE) 2019/1326 huwa emendat f’konformità mal-Anness I ta’ din id-Deċiżjoni.

Artikolu 2

L-Anness II tad-Deċiżjoni ta’ Implimentazzjoni (UE) 2019/1326 huwa emendat f’konformità mal-Anness II ta’ din id-Deċiżjoni.

Artikolu 3

Din id-Deċiżjoni għandha tidħol fis-seħħ fil-jum tal-pubblikazzjoni tagħha f’Il-Ġurnal Uffiċjali tal-Unjoni Ewropea.

Magħmul fi Brussell, il-15 ta’ Marzu 2021.

Għall-Kummissjoni

Il-President

Ursula VON DER LEYEN

(1) ĠU L 316, 14.11.2012, p. 12.

(2) Id-Direttiva 2014/30/UE tal-Parlament Ewropew u tal-Kunsill tas-26 ta’ Frar 2014 dwar l-armonizzazzjoni tal-liġijiet tal-Istati Membri relatati mal-kompatibbiltà elettromanjetika (ĠU L 96, 29.3.2014, p. 79).

(3) Id-Deċiżjoni ta’ Implimentazzjoni tal-Kummissjoni C(2016) 7641 tat-30 ta’ Novembru 2016 dwar talba ta’ standardizzazzjoni lill-Kumitat Ewropew għall-Istandardizzazzjoni, lill-Kumitat Ewropew għall-Istandardizzazzjoni Elettroteknika u lill-Istitut Ewropew tal-Istandards tat-Telekomunikazzjoni fir-rigward tal-istandards armonizzati b’appoġġ għad-Direttiva 2014/30/UE tal-Parlament Ewropew u tal-Kunsill tas-26 ta’ Frar 2014 dwar l-armonizzazzjoni tal-liġijiet tal-Istati Membri dwar il-kompatibbiltà elettromanjetika.

(4) ĠU C 246, 13.7.2018, p. 1.

(5) Id-Deċiżjoni ta’ Implimentazzjoni tal-Kummissjoni (UE) 2019/1326 tal-5 ta’ Awwissu 2019 dwar l-istandards armonizzati għall-kompatibilità elettromanjetika abbozzati b’appoġġ għad-Direttiva 2014/30/UE tal-Parlament Ewropew u tal-Kunsill (ĠU L 206, 6.8.2019, p. 27).

(6) ĠU C 246, 13.7.2018, p. 1.

ANNESS I

L-Anness I tad-Deċiżjoni ta’ Implimentazzjoni (UE) 2019/1326 huwa emendat kif ġej:

(1)

l-entrata 2 hija sostitwita b’dan li ġej:

Nru ta’

Referenza tal-istandard

“2.

EN 55035:2017

Kompatibbiltà elettromanjetika għat-tagħmir multimedjali - Rekwiżiti ta’ immunità

EN 55035:2017/A11:2020”;

(2)

tiżdied l-entrata li ġejja:

Nru ta’

Referenza tal-istandard

“15.

EN IEC 60947-5-2:2020

Switchgear u controlgear ta’ vultaġġ baxx - Parti 5-2: Apparati u elementi ta’ kommutazzjoni għaċ-ċirkwiti tal-kontroll - Switches ta’ prossimità”.

ANNESS II

L-Anness II tad-Deċiżjoni ta’ Implimentazzjoni (UE) 2019/1326 huwa emendat kif ġej:

(1)

l-entrata 4 hija sostitwita b’dan li ġej:

Nru ta’

Referenza tal-istandard

Data tal-irtirar

“4.

EN 55103-2:2009

Kompatibbiltà elettromanjetika — Standard tal-familja ta’ prodotti għal apparat tal-awdjo, tal-vidjo, awdjoviżiv u tal-kontroll tat-tidwil għad-divertiment għal użu professjonali — Parti 2: Immunità

28 ta’ Lulju 2022”;

(2)

jiżdiedu l-entrati li ġejjin:

Nru ta’

Referenza tal-istandard

Data tal-irtirar

“12.

EN 55024:2010

Tagħmir tat-teknoloġija tal-informatika - Karatteristiċi ta’ immunità - Limiti u metodi ta’ kejl

16 ta’ Settembru 2022

13.

EN 60947-5-2:2007

Switchgear u controlgear ta’ vultaġġ baxx - Parti 5-2: Apparati u elementi ta’ kommutazzjoni għaċ-ċirkwiti tal-kontroll - Switches ta’ prossimità

EN 60947-5-2:2007/A1:2012

16 ta’ Settembru 2022”.

		ISSN 1977-074X
Il-Ġurnal Uffiċjali tal-Unjoni Ewropea		L 89

Edizzjoni bil-Malti	Leġiżlazzjoni	Volum 64 16 ta' Marzu 2021

Werrej		II Atti mhux leġiżlattivi	Paġna
		REGOLAMENTI
	*	Regolament tal-Kummissjoni (UE) 2021/452 tal-15 ta’ Marzu 2021 li jikkoreġi l-verżjoni bil-lingwa Rumena tar-Regolament (UE) Nru 651/2014 li jiddikjara li ċerti kategoriji ta’ għajnuna huma kompatibbli mas-suq intern skont l-Artikoli 107 u 108 tat-Trattat ( 1 )	1
	*	Regolament ta’ Implimentazzjoni tal-Kummissjoni (UE) 2021/453 tat-15 ta' Marzu 2021 li jistabbilixxi standards tekniċi ta’ implimentazzjoni għall-applikazzjoni tar-Regolament (UE) Nru 575/2013 tal-Parlament Ewropew u tal-Kunsill fir-rigward tar-rekwiżiti speċifiċi ta’ rapportar għar-riskju tas-suq ( 1 )	3
		DEĊIŻJONIJIET
	*	Deċiżjoni tal-Kunsill (UE) 2021/454 tat-12 ta’ Marzu 2021 li testendi aktar id-deroga temporanja mir-Regoli ta’ Proċedura tal-Kunsill introdotta bid-Deċiżjoni (UE) 2020/430, fid-dawl tad-diffikultajiet ta’ vvjaġġar ikkawżati mill-pandemija tal-COVID-19 fl-Unjoni	15
	*	Deċiżjoni ta’ Implimentazzjoni tal-Kummissjoni (UE) 2021/455 tal-15 ta’ Marzu 2021 li temenda d-Deċiżjoni ta’ Implimentazzjoni (UE) 2019/1326 fir-rigward tal-istandards armonizzati għall-kompatibbiltà elettromanjetika tal-apparati u elementi ta’ kommutazzjoni għaċ-ċirkwiti tal-kontroll, u tat-tagħmir multimedjali	17


	(1) Test b'rilevanza għaż-ŻEE.