(1)

L-Unjoni għandha kompetenza esklużiva fir-rigward ta’ kwistjonijiet monetarji u tar-rata tal-kambju għall-Istati Membri li l-munita tagħhom hija l-euro. Meta t-Trattati jagħtu kompetenza esklużiva lill-Unjoni f’qasam speċifiku, hija l-Unjoni biss li tista’ tilleġiżla u tadotta atti legalment vinkolanti, waqt li l-Istati Membri jistgħu jagħmlu dan huma stess biss jekk jingħataw is-setgħa għal dan mill-Unjoni.

(2)

Taħt l-Artikolu 219(3) tat-Trattat dwar il-Funzjonament tal-Unjoni Ewropea, il-Kunsill għandu jiddetermina l-arranġamenti xierqa għan-negozjati u għall-konklużjoni ta’ ftehimiet dwar kwistjonijiet monetarji jew tas-sistema tal-kambju.

(3)

Qabel l-introduzzjoni tal-euro, Franza kienet ikkonkludiet ftehimiet dwar kwistjonijiet tar-rata tal-kambju mal-Unjoni Ekonomika u Monetarja tal-Afrika tal-Punent (Union économique et monétaire ouest-africaine, “UEMOA”), mal-Komunità Ekonomika u Monetarja tal-Afrika Ċentrali (Communauté économique et monétaire de l’Afrique Centrale, “CEMAC”) u mal-Comoros, li kienu maħsuba biex jiggarantixxu l-konvertibilità tal-frank CFA u tal-frank Comorjan fi frank Franċiż b’parità fissa (2). Malli fl-1 ta’ Jannar 1999 l-euro ħa post il-frank Franċiż, il-Kunsill awtorizza lil Franza biex tkompli tali ftehimiet li kienu fis-seħħ f’dik id-data (“ftehimiet preżenti”) skont il-qafas stabbilit fid-Deċiżjoni 98/683/KE (3).

(4)

L-Artikoli 4 u 5 tad-Deċiżjoni 98/683/KE jistabbilixxu proċeduri differenti dwar in-negozjar u l-modifika tal-ftehimiet preżenti skont jekk in-natura jew il-kamp ta’ applikazzjoni ta’ dawk il-ftehimiet jeħtiġux jinbidlu jew le.

(5)

Franza u l-Istati tal-UEMOA jinsabu fil-proċess li jissostitwixxu l-ftehim preżenti bejniethom tal-4 ta’ Diċembru 1973 bi ftehim ġdid ta’ kooperazzjoni dwar kwistjonijiet relatati mar-rata tal-kambju. Dan il-ftehim ġdid ta’ kooperazzjoni ġie ffirmat fil-21 ta’ Diċembru 2019 u huwa akkumpanjat minn ftehim ġdid ta’ garanzija li għandu jiġi konkluż mal-Bank Ċentrali tal-Istati tal-UEMOA. Fit-22 ta’ Mejju 2020, il-Gvern Franċiż ippreżenta abbozz ta’ liġi lill-Assemblea Nazzjonali Franċiża biex jiġi ratifikat il-ftehim ġdid ta’ kooperazzjoni.

(6)

Is-sostituzzjoni tal-ftehimiet preżenti dwar kwistjonijiet relatati mar-rata tal-kambju bejn Franza u l-UEMOA, is-CEMAC u l-Comoros mhijiex koperta mill-Artikoli 4 u 5 tad-Deċiżjoni 98/683/KE. Dan huwa l-każ anki jekk in-natura u l-kamp ta’ applikazzjoni ta’ tali ftehimiet ġodda ta’ kooperazzjoni jibqgħu l-istess, jiġifieri biex tiġi żgurata konvertibilità bejn l-euro u l-muniti tal-UEMOA, tas-CEMAC u tal-Comoros b’parità fissa sostnuta minn impenn baġitarju minn Franza.

(7)

Jenħtieġ li Franza tingħata s-setgħa li tissostitwixxi l-ftehimiet preżenti mal-UEMOA, mas-CEMAC u mal-Comoros. F’konformità mad-Deċiżjoni 98/683/KE, il-proċeduri differenti jenħtieġ li jibqgħu japplikaw skont jekk is-sostituzzjoni taffettwax jew le n-natura jew il-kamp ta’ applikazzjoni ta’ dawk il-ftehimiet. Relattivament għaż-żewġ proċeduri, ikun meħtieġ li jiġu involuti l-korpi kompetenti tal-Unjoni f’konformità mar-reġim eżistenti ta’ kondiviżjoni tal-informazzjoni u tal-approvazzjoni, skont il-każ, qabel ma l-ftehimiet preżenti jiġu sostitwiti bil-ftehimiet ġodda ta’ kooperazzjoni.

(8)

Għalhekk, jenħtieġ li d-Deċiżjoni 98/683/KE tiġi emendata skont dan,

(1)

Skont il-punt (8) tal-Artikolu 287 tad-Direttiva 2006/112/KE, l-Estonja tista’ teżenta mit-taxxa fuq il-valur miżjud (“il-VAT”) lil persuni soġġetti għat-taxxa li l-fatturat annwali tagħhom ma jaqbiżx l-ekwivalenti ta’ EUR 16 000 fil-munita nazzjonali bir-rata tal-konverżjoni fil-jum tal-adeżjoni tagħha.

(2)

Permezz tad-Deċiżjoni ta’ Implimentazzjoni tal-Kunsill (UE) 2017/563 (2), l-Estonja kienet awtorizzata tintroduċi miżura speċjali li tidderoga mill-punt (8) tal-Artikolu 287 tad-Direttiva 2006/112/KE (“il-miżura ta’ deroga”) biex teżenta mill-VAT lil persuni taxxabbli li l-fatturat annwali tagħhom ma jaqbiżx EUR 40 000. L-Estonja kienet awtorizzata tapplika l-miżura ta’ deroga mill-1 ta’ Jannar 2018 sal-31 ta’ Diċembru 2020 jew sad-dħul fis-seħħ ta’ direttiva li temenda l-Artikoli 281 sa 294 tad-Direttiva 2006/112/KE, skont liema data tiġi l-ewwel.

(3)

Fit-18 ta’ Frar 2020, il-Kunsill adotta d-Direttiva (UE) 2020/285 (3) li temenda l-Artikolu 281 sa 294 tad-Direttiva 2006/112/KE fir-rigward tal-iskema speċjali għall-impriżi ż-żgħar u li tistabbilixxi regoli ġodda għall-impriżi ż-żgħar, inkluż l-iffissar tas-soll massimu tal-fatturat annwali tal-Istat Membru għal 85 000 jew l-ekwivalenti fil-munita nazzjonali.

(4)

Permezz tal-ittra rreġistrata mal-Kummissjoni fid-9 ta’ Ottubru 2020, l-Estonja talbet awtorizzazzjoni biex tkompli tapplika l-miżura ta’ deroga sal-31 ta’ Diċembru 2024.

(5)

Permezz tal-ittra bid-data tal-15 ta’ Ottubru 2020, il-Kummissjoni infurmat lill-Istati Membri l-oħra, skont it-tieni subparagrafu tal-Artikolu 395(2) tad-Direttiva 2006/112/KE, bit-talba li għamlet l-Estonja. B’ittra datata d-19 ta’ Ottubru 2020, il-Kummissjoni nnotifikat lill-Estonja li kellha l-informazzjoni kollha li tqis meħtieġa biex tqis it-talba.

(6)

Il-miżura ta’ deroga hija skont l-għanijiet tal-komunikazzjoni tal-Kummissjoni tal-25 ta’ Ġunju 2008 bit-titolu “Aħseb l-Ewwel fiż-Żgħir” — “Att dwar in-Negozji ż-Żgħar” għall-Ewropa.

(7)

Fuq il-bażi tal-informazzjoni li pprovdiet l-Estonja, il-miżura ta’ deroga ser ikollha biss impatt negliġibbli fuq l-ammont globali tad-dħul mit-taxxa miġbur mill-Estonja fl-istadju tal-konsum finali. Il-persuni taxxabbli xorta ser ikunu jistgħu jagħżlu l-arranġamenti normali tal-VAT f’konformità mal-Artikolu 290 tad-Direttiva 2006/112/KE.

(8)

Il-miżura ta’ deroga mhix ser taffettwa b’mod negattiv lir-riżorsi proprji tal-Unjoni mill-VAT minħabba li l-Estonja ser twettaq kalkolu ta’ kumpens skont l-Artikolu 6 tar-Regolament tal-Kunsill (KEE, Euratom) Nru 1553/89 (4).

(9)

Minħabba l-impatt pożittiv potenzjali tal-miżura ta’ deroga fis-simplifikazzjoni tal-obbligi tal-VAT billi jitnaqqsu l-piż amministrattiv u l-ispejjeż għan-negozji ż-żgħar, l-Estonja għandha tkun awtorizzata li tkompli tapplika l-miżura ta’ deroga għal perjodu ulterjuri.

(10)

Jenħtieġ li l-awtorizzazzjoni biex tiġi applikata l-miżura ta’ deroga tkun limitata fiż-żmien. Jenħtieġ li l-limitu ta’ żmien ikun biżżejjed biex tkun tista’ ssir evalwazzjoni tal-effettività u l-adegwatezza tal-livell limitu. Barra minn hekk, id-Direttiva (UE) 2020/285 tirrikjedi li, sal-31 ta’ Diċembru 2024, l-Istati Membri jadottaw u jippubblikaw il-liġijiet, ir-regolamenti u d-dispożizzjonijiet amministrattivi neċessarji biex jikkonformaw mal-Artikolu 1 ta’ dik id-Direttiva, u li japplikaw dawk id-dispożizzjonijiet mill-1 ta’ Jannar 2025. Għalhekk, jixraq li l-Estonja tiġi awtorizzata tapplika l-miżura ta’ deroga sal-31 ta’ Diċembru 2024.

(11)

Sabiex jiġu evitati effetti ta’ tfixkil, l-Estonja għandha tkun tista tapplika l-miżura ta’ deroga mingħajr interruzzjoni. Għalhekk jenħtieġ li l-awtorizzazzjoni mitluba tingħata b’effett mill-1 ta’ Jannar 2021, sabiex tiġi garantita l-kontinwità tal-arranġamenti preċedenti awtorizzati bid-Deċiżjoni ta’ Implimentazzjoni (UE) 2017/563.

(12)

Għalhekk, id-Deċiżjoni ta’ Implimentazzjoni (UE) 2017/563 jenħtieġ li tiġi emendata skont dan,

(1)

Permezz tad-Deċiżjoni ta’ Implimentazzjoni tal-Kunsill (UE) 2016/2266 (2), in-Netherlands ġie awtorizzat, skont l-Artikolu 19 tad-Direttiva 2003/96/KE, japplika rata tat-taxxa mnaqqsa fuq l-elettriku pprovdut lill-istazzjonijiet tal-iċċarġjar għall-vetturi elettriċi sal-31 ta’ Diċembru 2020.

(2)

Fit-30 ta’ Marzu 2020 in-Netherlands talab awtorizzazzjoni li jkompli japplika rata tat-taxxa mnaqqsa fuq l-elettriku pprovdut lill-istazzjonijiet tal-iċċarġjar għall-vetturi elettriċi għall-perjodu bejn l-1 ta’ Jannar 2021 u l-1 ta’ Jannar 2025. Fuq talba tal-Kummissjoni, in-Netherlands ipprovda informazzjoni addizzjonali b’appoġġ għall-applikazzjoni tiegħu fl-20 ta’ Novembru 2020.

(3)

Ir-rata tat-taxxa mnaqqsa hija maħsuba biex tippromwovi aktar l-użu tal-vetturi elettriċi billi tnaqqas l-ispejjeż għall-elettriku użat biex iħaddem lil tali vetturi.

(4)

L-użu ta’ vetturi elettriċi ma jinvolvix l-emissjoni ta’ sustanzi li jniġġsu l-arja li joriġinaw mill-kombustjoni ta’ petrol u diżil jew karburanti fossili oħrajn u għaldaqstant jikkontribwixxi għat-titjib fil-kwalità tal-arja fl-ibliet. Barra minn hekk, l-użu ta’ vetturi elettriċi jista’ jnaqqas l-emissjonijiet tas-CO2, partikolarment fejn l-elettriku użat huwa prodott minn sorsi ta’ enerġija rinnovabbli. Għaldaqstant, l-applikazzjoni ta’ rata tat-taxxa mnaqqsa fuq l-elettriku pprovdut lill-istazzjonijiet tal-iċċarġjar għall-vetturi elettriċi mistennija tagħti kontribut lejn l-ilħuq tal-objettivi tal-politiki ambjentali, tas-saħħa u tal-klima tal-Unjoni.

(5)

In-Netherlands enfasizza li r-rata tat-taxxa mnaqqsa tkun tapplika għall-forniment tal-elettriku lill-istazzjonijiet tal-iċċarġjar għall-vetturi tal-elettriku permezz ta’ konnessjoni diretta mal-grilja elettrika, fosthom l-istazzjonijiet tal-iċċarġjar pubbliċi u xi stazzjonijiet tal-iċċarġjar privati jew korporattivi.

(6)

In-Netherlands talab li r-rata tat-taxxa mnaqqsa fuq l-elettriku tapplika biss għall-istazzjonijiet tal-iċċarġjar fejn l-elettriku jintuża biex tiġi ċċarġjata vettura elettrika direttament u li ma tapplikax għall-elettriku pprovdut permezz ta’ skambju ta’ batteriji.

(7)

Rata tat-taxxa mnaqqsa fuq l-elettriku pprovdut lill-vetturi elettriċi permezz ta’ stazzjonijiet tal-iċċarġjar ittejjeb il-vijabbiltà kummerċjali tal-istazzjonijiet tal-iċċarġjar aċċessibbli għall-pubbliku fin-Netherlands, li għandu jwassal biex l-użu ta’ karozzi elettriċi isir attraenti u jirriżulta f’titjib fil-kwalità tal-arja.

(8)

Minħabba n-numru limitat ta’ vetturi elettriċi u l-fatt li l-livell tat-taxxa fuq l-elettriku pprovdut lill-vetturi elettriċi permezz ta’ stazzjonijiet tal-iċċarġjar li jkunu għall-użu kummerċjali ser ikun ogħla mil-livell tat-taxxa minimu stipulat fl-Artikolu 10 tad-Direttiva 2003/96/KE, x’aktarx li r-rata tat-taxxa mnaqqsa ma twassalx għal distorsjonijiet fil-kompetizzjoni għall-perjodu li matulu tintalab l-awtorizzazzjoni u għaldaqstant mhijiex ser taffettwa ħażin il-funzjonament xieraq tas-suq intern.

(9)

Il-livell tat-taxxa fuq l-elettriku pprovdut lill-vetturi elettriċi permezz ta’ stazzjonijiet tal-iċċarġjar li ma jkunux għall-użu kummerċjali ser ikun ogħla mil-livell tat-taxxa minimu fir-rigward tal-użu mhux kummerċjali stipulat fl-Artikolu 10 tad-Direttiva 2003/96/KE.

(10)

Kull awtorizzazzjoni li tingħata f’konformità mal-Artikolu 19(1) tad-Direttiva 2003/96/KE trid tkun għal żmien limitat b’mod strett. Sabiex jiġi żgurat li l-perjodu tal-awtorizzazzjoni jkun twil biżżejjed sabiex l-operaturi ekonomiċi rilevanti ma jiġux skoraġġuti milli jagħmlu l-investimenti meħtieġa, huwa xieraq li l-awtorizzazzjoni tingħata għall-perjodu mitlub. Madankollu, l-awtorizzazzjoni għandha tieqaf tapplika mid-data tal-applikazzjoni ta’ kwalunkwe dispożizzjoni ġenerali dwar il-vantaġġi tat-taxxa għall-elettriku pprovdut għall-vetturi elettriċi li tiġi adottata mill-Kunsill skont l-Artikolu 113 jew kwalunkwe dispożizzjoni rilevanti oħra tat-Trattat dwar il-Funzjonament tal-Unjoni Ewropea, fil-każ fejn tali dispożizzjonijiet isiru applikabbli qabel l-1 ta’ Jannar 2025.

(11)

Sabiex tiġi evitata żieda fil-piż amministrattiv għad-distributuri u ridistributuri tal-elettriku li jirriżulta mit-tibdil fir-rati tat-taxxa applikabbli, in-Netherlands jenħtieġ li jkun jista’ japplika r-rata tat-taxxa mnaqqsa fuq l-elettriku pprovdut għall-vetturi elettriċi mingħajr interruzzjoni. Għalhekk jenħtieġ li l-awtorizzazzjoni mitluba tingħata b’effett mill-1 ta’ Jannar 2021, sabiex tiġi garantita l-kontinwità tal-arranġamenti preċedenti awtorizzati bid-Deċiżjoni ta’ Implimentazzjoni (UE) 2016/2266.

(12)

Din id-Deċiżjoni hija mingħajr preġudizzju għall-applikazzjoni tar-regoli tal-Unjoni dwar l-għajnuna mill-Istat,

(1)

Ir-Regolament (UE) 2020/1042 jistabbilixxi miżuri temporanji fir-rigward tal-inizjattiva taċ-ċittadini Ewropej biex jiġu indirizzati l-isfidi li l-organizzaturi tal-inizjattivi taċ-ċittadini, l-amministrazzjonijiet nazzjonali u l-istituzzjonijiet tal-Unjoni ffaċċjaw wara li l-Organizzazzjoni Dinjija tas-Saħħa ħabbret f’Marzu 2020 li t-tifqigħa tal-COVID-19 kienet saret pandemija dinjija. Fix-xhur ta’ wara din id-dikjarazzjoni, l-Istati Membri adottaw miżuri restrittivi kontra l-kriżi tas-saħħa pubblika. B’riżultat ta’ dan, il-ħajja pubblika waqfet fi kważi l-Istati Membri kollha. Ir-Regolament (UE) 2020/1042 għalhekk estenda ċerti limiti ta’ żmien stabbiliti fir-Regolament (UE) 2019/788.

(2)

Ir-Regolament (UE) 2020/1042 jagħti s-setgħa lill-Kummissjoni biex testendi ulterjorment il-perjodi ta’ ġbir bi tliet xhur fir-rigward tal-inizjattivi li għalihom il-perjodu ta’ ġbir ikun għadu għaddej fil-mument ta’ tifqigħa ġdida tal-COVID-19 f’ċerti ċirkostanzi. Il-kundizzjonijiet għal kwalunkwe estensjoni ulterjuri huma simili għal dawk li wasslu għall-estensjoni inizjali wara t-tifqigħa tal-COVID-19 f’Marzu 2020, jiġifieri li mill-inqas kwart tal-Istati Membri jew għadd ta’ Stati Membri li jirrappreżentaw aktar minn 35 % tal-popolazzjoni tal-Unjoni japplikaw miżuri b’rispons għall-pandemija tal-COVID-19, li jxekklu b’mod sostanzjali l-abbiltà tal-organizzaturi li jiġbru dikjarazzjonijiet ta’ appoġġ f’forma miktuba u li jinfurmaw lill-pubbliku dwar l-inizjattivi li għaddejjin tagħhom.

(3)

Mill-adozzjoni tar-Regolament (UE) 2020/1042 f’Lulju 2020, il-Kummissjoni ilha tissorvelja mill-qrib is-sitwazzjoni fl-Istati Membri.

(4)

Fis-17 ta’ Diċembru 2020, il-Kummissjoni tat estensjoni oħra ta’ tliet xhur għal inizjattivi li kienu fil-proċess li jiġbru dikjarazzjonijiet ta’ appoġġ fl-1 ta’ Novembru 2020 (3), wara l-valutazzjoni tagħha li l-kundizzjonijiet għall-għoti ta’ tali estensjoni skont ir-Regolament (UE) 2020/1042 ġew issodisfati. Ingħatat estensjoni proporzjonata lill-inizjattivi li bdew il-perjodu tal-ġbir tagħhom bejn l-1 ta’ Novembru u l-17 ta’ Diċembru 2020.

(5)

Mill-1 ta’ Novembru 2020, is-sitwazzjoni fejn tidħol il-pandemija kkawżata mill-COVID-19 f’diversi Stati Membri ma nbidlitx b’xi mod sinifikanti. Sal-aħħar ta’ Jannar 2021, għadd sostanzjali ta’ Stati Membri kien għad kellhom fis-seħħ miżuri li jirrestrinġu ċ-ċirkolazzjoni libera taċ-ċittadini fit-territorju tagħhom sabiex iwaqqfu jew irażżnu t-trażmissjoni tal-COVID-19. Ħames (5) Stati Membri rrappurtaw li fl-1 ta’ Frar 2021 kienu qed japplikaw miżuri nazzjonali ta’ konfinament, li jipprojbixxu jew jirrestrinġu b’mod sostanzjali l-libertà taċ-ċittadini li jduru liberament mat-territorju tagħhom, filwaqt li 11-il Stat Membru rrappurtaw li kienu qed japplikaw miżuri lokali ta’ konfinament. Dawk il-miżuri ta’ konfinament ġew ikkombinati ma’ miżuri addizzjonali b’effetti restrittivi simili fuq il-ħajja pubblika fit-territorju tagħhom jew mill-inqas partijiet sostanzjali minnu, inklużi restrizzjonijiet fuq l-aċċessibbiltà ta’ spazji pubbliċi, l-għeluq jew il-ftuħ limitat ta’ ħwienet, ristoranti u pubs, restrizzjonijiet severi fuq il-kapaċità ta’ laqgħat u laqgħat pubbliċi u privati u l-impożizzjoni ta’ curfews. Dawk il-miżuri meħuda flimkien jaffettwaw ukoll b’mod sostanzjali l-kapaċità tal-organizzaturi li jiġbru dikjarazzjonijiet ta’ appoġġ f’forma miktuba u li jinfurmaw lill-pubbliku dwar l-inizjattivi kontinwi tagħhom. Abbażi tal-informazzjoni disponibbli bħalissa, dawk il-miżuri, jew miżuri b’effett simili, x’aktarx li jibqgħu fis-seħħ għal perjodu ta’ mill-inqas tliet xhur.

(6)

L-Istati Membri kkonċernati jirrappreżentaw mill-inqas kwart tal-Istati Membri, u aktar minn 35 % tal-popolazzjoni tal-Unjoni.

(7)

Għal dawk ir-raġunijiet, jista’ jiġi konkluż li l-kundizzjonijiet għall-għoti ta’ estensjoni tal-perjodi ta’ ġbir huma ssodisfati fir-rigward ta’ inizjattivi li għalihom il-perjodu ta’ ġbir kien għadu għaddej fl-1 ta’ Frar 2021. Dawk il-perjodi ta’ ġbir għandhom għalhekk jiġu estiżi bi tliet xhur.

(8)

Fil-każ ta’ inizjattivi li għalihom il-perjodu ta’ ġbir beda bejn l-1 ta’ Frar 2021 u d-data tal-adozzjoni ta’ din id-Deċiżjoni, il-perjodu ta’ ġbir għandu jiġi estiż sal-1 ta’ Mejju 2022.

(9)

Fir-rigward ta’ inizjattivi li għalihom il-perjodu ta’ ġbir intemm bejn l-1 ta’ Frar 2021 u d-data tal-adozzjoni ta’ din id-Deċiżjoni, din id-Deċiżjoni għandha tapplika b’mod retroattiv,

(1)

Il-Batrachochytrium salamandrivorans (Bsal) huwa fungus patoġenu tas-salamandri li jaffettwa l-popolazzjonijiet tas-salamandri miżmuma u selvaġġi, u jista’ jikkawża morbidità u mortalità sinifikanti f’dawn il-popolazzjonijiet. Il-Bsal huwa letali għal ċerti speċijiet ta’ salamandri, filwaqt li speċijiet oħra huma kompletament jew parzjalment reżistenti għalih, iżda jistgħu jġorruh fuq ġildhom, u għaldaqstant ikun riżerva u sors ta’ infezzjoni, għal speċijiet oħra ta’ salamandri, jew ta’ kontaminazzjoni għall-ambjent tagħhom.

(2)

L-infezzjoni bil-Bsal s’issa okkorriet fil-Belġju, fil-Ġermanja, fin-Netherlands, fir-Renju Unit u fi Spanja, kemm fil-popolazzjonijiet tas-salamandri miżmuma kif ukoll f’dawk selvaġġi skont id-data miġbura fil-kuntest tal-proġett Ewropew “Mitigazzjoni ta’ marda infettiva ġdida fis-salamandri biex jiġi miġġieled it-telf tal-bijodiversità Ewropea” (2) u dik li nġabret warajh. Il-Bsal maħsub li oriġina fl-Asja tal-Lvant u li huwa mifrux hemmhekk, peress li huwa endemiku mill-inqas fil-Ġappun, fit-Tajlandja u fil-Vjetnam. Fl-istess ħin, hemm nuqqas ta’ informazzjoni dwar kemm hu mifrux f’partijiet oħra tal-Unjoni u tad-dinja. Il-kummerċ tas-salamandri infettati jew trasportaturi jikkontribwixxi għat-tixrid tal-Bsal u l-marda tirrappreżenta riskju importanti għall-bijodiversità fiż-żoni li tikkolonizza.

(3)

Id-Deċiżjoni ta’ Implimentazzjoni tal-Kummissjoni (UE) (UE) 2018/320 (3) kif emendata bid-Deċiżjoni ta’ Implimentazzjoni tal-Kummissjoni (UE) 2019/1998 (4) tistabbilixxi l-miżuri għall-protezzjoni tas-saħħa tal-annimali fil-kummerċ intra-Unjoni ta’ kunsinni ta’ salamandri u l-introduzzjoni ta’ dawn il-kunsinni fl-Unjoni. Id-Deċiżjoni ta’ Implimentazzjoni (UE) 2018/320 ġiet adottata abbażi ta’ Opinjoni Xjentifika tal-Awtorità Ewropea dwar is-Sigurtà fl-Ikel tal-25 ta’ Ottubru 2017 (5) (“l-Opinjoni tal-EFSA”) u tal-Assistenza Teknika u Xjentifika tal-Awtorità Ewropea dwar is-Sigurtà fl-Ikel tal-21 ta’ Frar 2017 (6) (“Assistenza Xjentifika u Teknika tal-EFSA”) Dik id-Deċiżjoni tapplika sal-20 ta’ April 2021.

(4)

L-Opinjoni tal-EFSA u l-Assistenza Teknika tal-EFSA u pubblikazzjonijiet xjentifiċi aktar reċenti (7) enfasizzaw ukoll bosta lakuni u inċertezzi fl-għarfien attwali fir-rigward ta’ ħafna aspetti tan-natura tal-Bsal. L-istandards tal-kummerċ internazzjonali tal-Organizzazzjoni Dinjija tas-Saħħa tal-Annimali (OIE) għadhom mhumiex żviluppati għalkollox fir-rigward tal-metodi tad-dijanjostika tal-Bsal u għadhom ma ġewx riveduti fir-rigward tar-rakkomandazzjonijiet għall-kummerċ internazzjonali tas-salamandri.

(5)

Il-Bsal huwa elenkat fl-Anness II tar-Regolament (UE) 2016/429, u għaldaqstant jaqa’ fid-definizzjoni ta’ marda elenkata għall-finijiet tar-Regolament (UE) 2016/429. Il-Bsal jaqa’ wkoll fid-definizzjoni ta’ marda tal-kategorija D, kif stabbilita fir-Regolament ta’ Implimentazzjoni tal-Kummissjoni (UE) 2018/1882 (8) għall-annimali tal-Ordni Caudata, li tinkludi s-salamandri. Madankollu, ir-regoli tal-Unjoni dwar il-movimenti fl-Unjoni u d-dħul fl-Unjoni ta’ kunsinni ta’ annimali terrestri u ta’ annimali akkwatiċi stabbiliti fl-atti delegati u ta’ implimentazzjoni tal-Kummissjoni adottati skont ir-Regolament (UE) 2016/429 ma japplikawx għall-Caudata, peress li l-Caudata taqa’ fid-definizzjoni ta’ “annimali oħra” f’dan ir-Regolament. Minħabba n-nuqqas attwali ta’ għarfien fir-rigward tal-bosta aspetti tan-natura tal-Bsal kif ukoll in-nuqqas ta’ kwalunkwe linja gwida u rakkomandazzjoni internazzjonali fir-rigward tal-kummerċ f’dawk l-annimali, għadhom ma ġewx adottati atti delegati u ta’ implimentazzjoni tal-Kummissjoni għall-Caudata, filwaqt li ġew adottati għall-annimali terrestri u għall-annimali akkwatiċi.

(6)

Il-Kummissjoni rrevediet is-sitwazzjoni tas-saħħa tal-annimali fir-rigward tal-Bsal fl-Unjoni u tal-miżuri ta’ protezzjoni tas-saħħa tal-annimali previsti fid-Deċiżjoni ta’ Implimentazzjoni (UE) 2018/320 mal-awtoritajiet kompetenti tal-Istati Membri. Peress li l-miżuri stabbiliti fid-Deċiżjoni ta’ Implimentazzjoni (UE) 2018/320 tqiesu xierqa, l-Istati Membri ma ħadu l-ebda miżuri kummerċjali oħra biex jiġġieldu kontra l-Bsal. Għalkemm it-tifqigħat tal-Bsal jidhru li bħalissa huma limitati għal ċerti reġjuni ta’ ċerti Stati Membri, it-tixrid ulterjuri tal-Bsal permezz tal-kummerċ intra-Unjoni jirrappreżenta riskju sinifikanti.

(7)

Għaldaqstant, huwa xieraq li jiġu adottati miżuri ta’ emerġenza fuq livell tal-Unjoni biex jiġi evitat it-tixrid tal-Bsal u biex jiġi evitat tfixkil mhux ġustifikat fil-kummerċ tas-salamandri. Meta titqies l-effettività tal-miżuri stabbiliti fid-Deċiżjoni ta’ Implimentazzjoni (UE) 2018/320, huwa xieraq li jiġu adottati miżuri simili dwar il-movimenti fi ħdan l-Unjoni u dwar id-dħul fl-Unjoni ta’ kunsinni tas-salamandri mill-21 ta’ April 2021 għal perjodu limitat ta’ żmien sakemm jiġu adottati miżuri aktar permanenti tas-saħħa tal-annimali, bħal fil-każ ta’ mard li jaffettwa l-annimali terrestri u l-annimali akkwatiċi.

(8)

Il-Bsal jista’ jiġi trażmess bejn l-ispeċijiet tas-salamandri nattivi ta’ reġjuni differenti u l-kontaminazzjoni kroċjata tista’ sseħħ f’diversi stabbilimenti mmexxija minn operaturi li jżommu u jiskambjaw is-salamandri. Dan iżid ir-riskju tat-trażmissjoni tal-Bsal minn salamandri kkummerċjalizzati jkun xi jkun l-istatus tas-saħħa tal-post tal-oriġini tagħhom u s-sitwazzjoni tas-saħħa tagħhom fl-ambjent naturali. Jenħtieġ għalhekk li l-kunsinni tas-salamandri maħsuba għall-movimenti bejn l-Istati Membri jew għad-dħul fl-Unjoni jkunu soġġetti għal miżuri li jtaffu dak ir-riskju. Jenħtieġ madankollu li dawn il-miżuri ma japplikawx għall-movimenti mhux kummerċjali ta’ salamandri domestiċi, bħal movimenti mhux kummerċjali koperti mir-regoli stabbiliti fir-Regolament (UE) Nru 576/2013 tal-Parlament Ewropew u tal-Kunsill (9). Dawn il-movimenti mhux kummerċjali jikkonċernaw, u huma limitati għall-annimali taħt il-kura ta’ sidhom jew ta’ persuni awtorizzati u li jakkumpanjawhom u li ma jinvolvux it-trasferiment tas-sjieda. Għalhekk, il-movimenti mhux kummerċjali tas-salamandri domestiċi jirrappreżentaw riskju negliġibbli għat-tixrid tal-Bsal għas-salamandri kkummerċjalizzati jew għas-salamandri li jgħixu fl-ambjent naturali.

(9)

Jenħtieġ li s-salamandri li jiġu skambjati biss bejn stabbilimenti konfinati approvati mill-awtorità kompetenti f’konformità mar-Regolament (UE) 2016/429 ma jkunux suġġetti għall-kwarantina jew għall-ittestjar peress li l-miżuri ta’ bijosigurtà fis-seħħ f’dawk l-istabbilimenti konfinati huma xierqa biex itaffu r-riskju tat-tixrid tal-Bsal.

(10)

Jenħtieġ li l-kunsinni tas-salamandri li daħlu fl-Unjoni u li diġà għaddew minn kwarantina bi ttestjar b’riżultati negattivi, jew li jkunu rċevew trattament sodisfaċenti fl-Unjoni fi stabbiliment xieraq wara d-dħul tagħhom fl-Unjoni, ma jkunux suġġetti għal kwarantina jew ittestjar ripetuti, jekk huma maħsuba li jiġu mċaqalqa lejn Stat Membru ieħor, dment li żżammew iżolati minn salamandri bi status ta’ saħħa differenti.

(11)

Hemm nuqqas ta’ informazzjoni dwar il-kapaċitajiet tekniċi tas-servizzi veterinarji u tal-laboratorji madwar id-dinja biex jittestjaw għall-Bsal, filwaqt li bosta korpi fl-Unjoni Ewropea qegħdin fuq quddiem fil-progress tad-dijanjożi u tat-trattament tal-Bsal. Jenħtieġ għalhekk li l-kunsinni tas-salamandri li jidħlu fl-Unjoni jitqiegħdu fi kwarantina fi stabbiliment xieraq, u jiġu ttestjati u ttrattati wara d-dħul tagħhom fl-Unjoni.

(12)

Jenħtieġ li l-pajjiżi terzi u t-territorji approvati għall-ħruġ ta’ ċertifikati tas-saħħa tal-annimali għad-dħul fl-Unjoni ta’ kunsinni tas-salamandri jiġu limitati għal dawk li huma membri tal-OIE u li b’hekk jiġu obbligati li jħarsu l-istandards internazzjonali għall-ħruġ ta’ ċertifikati tas-saħħa tal-annimali.

(13)

Jenħtieġ li t-trattamenti jiġu speċifikati u jkunu f’konformità mal-protokolli li diġà huma deskritti fil-letteratura rieżaminata bejn il-pari kif enfasizzata mill-Assistenza Xjentifika u Teknika tal-EFSA jew ma’ oħrajn komparabbli.

(14)

Jenħtieġ li l-kunsinni tas-salamandri jkunu awtorizzati biss biex jidħlu fl-Unjoni mill-awtorità kompetenti tal-post ta’ kontroll fuq il-fruntiera tad-dħul fl-Unjoni, jekk dik l-awtorità tirċievi attestazzjoni mill-persuna fiżika jew ġuridika responsabbli għall-istabbiliment tad-destinazzjoni li tikkonferma li l-kunsinni se jiġu aċċettati.

(15)

Jenħtieġ li l-miżuri ta’ emerġenza previsti minn din id-Deċiżjoni japplikaw mid-data tal-applikazzjoni tar-Regolament (UE) 2016/429 u jenħtieġ li jiġu riveduti filwaqt li titqies il-gravità tas-sitwazzjoni epidemjoloġika minħabba żviluppi ġodda u rappurtar annwali mill-awtoritajiet kompetenti tal-Istati Membri.

(16)

Il-miżuri previsti f’din id-Deċiżjoni huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,