(1)

Fid-29 ta’ Settembru 2015, il-Kunsill awtorizza lill-Kummissjoni u lir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà biex jiftħu n-negozjati mar-Repubblika tal-Armenja dwar ftehim qafas.

(2)

Dawk in-negozjati ġew kompluti b’suċċess, u l-Ftehim ta’ Sħubija Komprensiv u Msaħħaħ bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa waħda, u r-Repubblika tal-Armenja, min-naħa l-oħra (“il-Ftehim”), ġie inizjalat fil-21 ta’ Marzu 2017.

(3)

Il-Ftehim ser jiġi ffirmat f’isem l-Unjoni u applikat fuq bażi proviżorja f’konformità mal-Artikolu 385 tal-Ftehim, sakemm jidħol fis-seħħ f’data aktar tard.

(4)

Il-Ftehim ikopri wkoll kwistjonijiet li jaqgħu taħt il-kompetenzi tal-Komunità Ewropea tal-Enerġija Atomika.

(5)

L-iffirmar u l-konklużjoni tal-Ftehim huma soġġetti għal proċedura separata fir-rigward ta’ kwistjonijiet li jaqgħu taħt it-Trattat dwar l-Unjoni Ewropea u t-Trattat dwar il-Funzjonament tal-Unjoni Ewropea.

(6)

Għaldaqstant, jenħtieġ li l-Ftehim jiġi konkluż ukoll f’isem il-Komunità Ewropea tal-Enerġija Atomika f’dak li għandu x’jaqsam mal-kwistjonijiet li jaqgħu taħt it-Trattat Euratom.

(7)

L-Artikolu 102 tat-Trattat Euratom jiddikjara li l-Ftehim ma jistax jidħol fis-seħħ għall-Komunità Ewropea tal-Enerġija Atomika sakemm il-Kummissjoni Ewropea ma tkunx ġiet notifikata mill-Istati Membri li l-Ftehim sar applikabbli f’konformità mad-dispożizzjonijiet tal-liġijiet nazzjonali rispettivi tagħhom.

(8)

Jenħtieġ li l-konklużjoni tal-Ftehim mill-Kummissjoni Ewropea, li taġixxi f’isem il- Komunità Ewropea tal-Enerġija Atomika, tiġi approvata fir-rigward tal-kwistjonijiet li jaqgħu fil-kompetenza tal-Komunità Ewropea tal-Enerġija Atomika,

(1)

Għadd ta’ regoli dwar l-għajnuna mill-Istat adottati bħala parti mill-inizjattiva tal-2012 dwar il-Modernizzazzjoni tal-Għajnuna mill-Istat għandhom jiskadu sa tmiem l-2020. B’mod partikolari, ir-Regolamenti tal-Kummissjoni (UE) Nru 1407/2013 (2) u (UE) Nru 651/2014 (3) se jiskadu fil-31 ta’ Diċembru 2020.

(2)

Sabiex tipprovdi prevedibbiltà u ċertezza legali, filwaqt li tħejji għal aġġornament possibbli fil-futur tar-regoli dwar l-għajnuna mill-Istat adottati bħala parti mill-inizjattiva Modernizzazzjoni tal-Għajnuna mill-Istat, il-Kummissjoni se tieħu azzjoni f’żewġ fażijiet.

(3)

L-ewwel nett, il-Kummissjoni għandha testendi b’sentejn il-perjodu ta’ applikazzjoni tar-regoli dwar l-għajnuna mill-Istat, li kieku kienu jiskadu sa tmiem l-2020. It-tieni, f’konformità mal-Linji Gwida tal-Kummissjoni għal Regolamentazzjoni Aħjar (4), il-Kummissjoni se tevalwa dawk ir-regoli flimkien mar-regoli l-oħra dwar l-għajnuna mill-Istat, li ġew adottati bħala parti mill-inizjattiva tal-Modernizzazzjoni tal-Għajnuna mill-Istat. Il-Kummissjoni nediet l-evalwazzjoni ta’ dawn ir-regoli fis-7 ta’ Jannar 2019 fil-forma ta’ “kontroll tal-idoneità”. Fil-kuntest tal-Patt Ekoloġiku Ewropew (5) u l-Aġenda Diġitali Ewropea, il-Kummissjoni diġà ħabbret l-intenzjoni tagħha li tirrevedi serje ta’ linji gwida sa tmiem l-2021. Abbażi ta’ dan, il-Kummissjoni se tiddeċiedi jekk testendix aktar jew taġġorna r-regoli.

(4)

Meta jitqies l-ambitu wiesa’ tal-kontroll tal-idoneità u l-fatt li r-riżultati tal-evalwazzjonijiet mhux se jkunu disponibbli qabel tard fl-2020, ma tistax tittieħed deċiżjoni ta’ politika fil-ħin dwar it-tfassil tar-regoli dwar l-għajnuna mill-Istat ta’ wara l-2020 biex jiġu żgurati ċ-ċertezza legali u l-istabbiltà għall-partijiet ikkonċernati fir-rigward tar-regoli applikabbli wara l-2020. Għalhekk hija meħtieġa estensjoni biex tippermetti valutazzjoni xierqa tar-regoli dwar l-għajnuna mill-Istat u tiżgura l-prevedibbiltà u l-istabbiltà ta’ dawn ir-regoli għall-Istati Membri.

(5)

Għalhekk, il-perjodu ta’ applikazzjoni tar-Regolamenti (UE) Nru 1407/2013 u (UE) Nru 651/2014 għandu jiġi estiż bi tliet snin sal-31 ta’ Diċembru 2023.

(6)

Ir-Regolamenti (UE) Nru 1407/2013 u (UE) Nru 651/2014 għandhom għalhekk jiġu emendati kif meħtieġ.

(7)

Bħala konsegwenza tal-estensjoni tal-perjodu ta’ applikazzjoni tar-Regolament (UE) Nru 651/2014, xi Stati Membri jistgħu jixtiequ jestendu l-validità tal-miżuri ta’ għajnuna eżentati skont dak ir-Regolament u dwar liema informazzjoni sommarja ġiet ipprovduta skont il-punt (a) tal-Artikolu 11 ta’ dak ir-Regolament. Sabiex tiġi pprovduta trasparenza, jenħtieġ li l-Istati Membri jikkomunikaw lill-Kummissjoni l-informazzjoni mqassra aġġornata rigward l-estensjoni ta’ dawk il-miżuri.

(8)

L-iskemi stabbiliti fit-Taqsimiet 1 (bl-eċċezzjoni tal-Artikolu 15), 2, 3, 4, 7 (bl-eċċezzjoni tal-Artikolu 44) u 10 tal-Kapitolu III tar-Regolament (UE) Nru 651/2014, li għandhom baġit annwali medju tal-għajnuna mill-Istat li jaqbeż il-EUR 150 miljun, li ġew eżentati għal aktar minn sitt xhur skont deċiżjoni tal-Kummissjoni u li l-Istat Membru rispettiv jixtieq jestendi għall-perjodu wara l-31 ta’ Diċembru 2020, għandhom ikomplu jiġu eżentati sal-31 ta’ Diċembru 2023, sakemm l-Istati Membri jkunu pprovdew lill-Kummissjoni bl-informazzjoni sommarja aġġornata u jkunu ssottomettew rapport ta’ evalwazzjoni finali f’konformità mal-pjan ta’ evalwazzjoni approvat mill-Kummissjoni.

(9)

Fid-dawl tal-konsegwenzi ekonomiċi u finanzjarji li għandha l-pandemija tal-COVID-19 fuq l-impriżi u biex tiġi żgurata l-konsistenza mar-rispons ta’ politika ġenerali adottat mill-Kummissjoni, l-aktar fil-perjodu 2020-2021, ir-Regolament (UE) Nru 651/2014 għandu jiġi emendati skont dan. B’mod partikolari, l-impriżi li saru impriżi f’diffikultà bħala konsegwenza tal-pandemija tal-COVID-19, għandhom jibqgħu eliġibbli taħt ir-Regolament (UE) Nru 651/2014 għal perjodu limitat ta’ żmien. Bl-istess mod, l-impriżi, li temporanjament jew b’mod permanenti jagħtu s-sensja lill-persunal minħabba t-tifqigħa COVID-19, ma għandhomx jitqiesu li kisru l-impenji ta’ rilokazzjoni mogħtija qabel il-31 ta’ Diċembru 2019 meta jirċievu l-għajnuna reġjonali. Dawk id-dispożizzjonijiet eċċezzjonali għandhom japplikaw għal perjodu limitat mill-1 ta’ Jannar 2020 sat-30 ta’ Ġunju 2021.

(10)

Ir-Regolamenti (UE) Nru 1407/2013 u (UE) Nru 651/2014 għandhom għalhekk jiġu emendati kif meħtieġ,

(1)

Ir-Regolament (UE) 2015/2283 jipprevedi li l-ikel ġdid awtorizzat u inkluż fil-lista tal-Unjoni biss jista’ jitqiegħed fis-suq fl-Unjoni.

(2)

Skont l-Artikolu 8 tar-Regolament (UE) 2015/2283, ġie adottat ir-Regolament ta’ Implimentazzjoni tal-Kummissjoni (UE) 2017/2470 (2) li jistabbilixxi lista tal-Unjoni ta’ ikel ġdid awtorizzat.

(3)

Fid-29 ta’ Frar 2012, il-kumpanija Scioec Diagnostic Technologies, GmbH infurmat lill-Kummissjoni, skont l-Artikolu 5 tar-Regolament (KE) Nru 258/97 tal-Parlament Ewropew u tal-Kunsill (3), dwar l-intenzjoni tagħha li tqiegħed fis-suq l-“estratt ta’ proteina mill-kliewi tal-qżieqeż” bħala ingredjent ġdid tal-ikel biex jintuża f’oġġetti tal-ikel għall-skopijiet mediċi speċjali kif definit fir-Regolament (UE) Nru 609/2013 tal-Parlament Ewropew u tal-Kunsill (4), u fis-supplimenti tal-ikel kif definit fid-Direttiva 2002/46/KE tal-Parlament Ewropew u tal-Kunsill (5). Għalhekk, l-estratt ta’ proteina mill-kliewi tal-qżieqeż kien inkluż fil-lista tal-Unjoni ta’ ikel ġdid.

(4)

Fl-14 ta’ Mejju 2019, il-kumpanija Dr Health Care España, S.L. talbet lill-Kummissjoni biex jiġu estiżi l-kundizzjonijiet tal-użu tal-estratt ta’ proteina mill-kliewi tal-qżieqeż fis-sens tal-Artikolu 10(1) tar-Regolament (UE) 2015/2283. L-applikazzjoni talbet biex jiġu inklużi pilloli b’kisja enterika bħala forma permessa ta’ estratt ta’ proteina mill-kliewi tal-qżieqeż biex tintuża f’oġġetti tal-ikel għal skopijiet mediċi speċjali u fis-supplimenti tal-ikel, minbarra l-pellets inkapsulati b’kisja enterika li bħalissa huma awtorizzati

(5)

Il-Kummissjoni ma talbitx opinjoni mill-Awtorità Ewropea dwar is-Sigurtà fl-Ikel, peress li l-emenda tal-kundizzjonijiet tal-użu tal-ikel ġdid l-estratt ta’ proteina mill-kliewi tal-qżieqeż permezz tal-inklużjoni ta’ pilloli b’kisja enterika bħala forma permessa ta’ estratt ta’ proteina mill-kliewi tal-qżieqeż li tintuża f’ikel għal skopijiet mediċi speċjali u fis-supplimenti tal-ikel mhijiex tali li tista’ tbiddel l-effetti ta’ dan l-ikel ġdid awtorizzat fuq is-saħħa tal-bniedem.

(6)

Il-livell massimu tal-estratt ta’ proteina mill-kliewi tal-qżieqeż bħala ikel ġdid li attwalment huwa awtorizzat biex jintuża f’pellets inkapsulati b’kisja enterika f’oġġetti ta’ ikel għal skopijiet mediċi speċjali, u fis-supplimenti tal-ikel, huwa ta’ tliet kapsuli kuljum, li jikkorrispondu għal 12,6 mg ta’ estratt mill-kliewi tal-qżieqeż kuljum. L-użu propost tal-forma ta’ pilloli b’kisja enterika mhux se jbiddel il-livell massimu attwalment awtorizzat tal-ikel ġdid. Għalhekk, huwa xieraq li tiġi emendata t-taqsima tal-lista tal-Unjoni dwar il-kundizzjonijiet tal-użu tal-estratt ta’ proteina mill-kliewi tal-qżieqeż sabiex jiġi awtorizzat l-użu tagħha wkoll f’forma ta’ pilloli b’kisja enterika fl-istess livell massimu awtorizzat bħall-forom diġà awtorizzati ta’ użu ta’ dan l-ikel ġdid.

(7)

Għalhekk, jenħtieġ li l-Anness tar-Regolament ta’ Implimentazzjoni (UE) 2017/2470 jiġi emendat skont dan.

(8)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

(1)

Skont l-Artikolu 50(2)(a) tar-Regolament (UE) Nru 1151/2012, l-applikazzjoni tal-Italja biex id-denominazzjoni “Pecorino del Monte Poro” tiddaħħal fir-reġistru, ġiet ippubblikata f’Il-Ġurnal Uffiċjali tal-Unjoni Ewropea (2).

(2)

Il-Kummissjoni ma rċeviet l-ebda dikjarazzjoni ta’ oppożizzjoni skont l-Artikolu 51 tar-Regolament (UE) Nru 1151/2012, u għalhekk jenħtieġ li d-denominazzjoni “Pecorino del Monte Poro” tiġi rreġistrata,

(3)

Permezz ta’ ittra tal-20 ta’ Jannar 2020, l-awtoritajiet Taljani infurmaw lill-Kummissjoni li l-impriża Cooperativa Fattoria della Piana Società Agricola stabbilita fit-territorju tagħhom kienet legalment ikkummerċjalizzat il-prodott li jibbenefika mid-denominazzjoni tal-bejgħ “Pecorino Monteporo” bl-użu kontinwu ta’ din id-denominazzjoni għal aktar minn ħames snin, u li dan il-punt kien invokat fil-kuntest tal-proċedura nazzjonali ta’ oppożizzjoni.

(4)

Peress li l-impriża Cooperativa Fattoria della Piana Società Agricola tissodisfa l-kundizzjonijiet previsti fl-Artikolu 15(1) tar-Regolament (UE) Nru 1151/2012 għall-għoti ta’ perjodu tranżitorju li fih tkun tista’ tuża d-denominazzjoni tal-bejgħ b’mod legali wara r-reġistrazzjoni tagħha, jenħtieġ tingħata perjodu tranżitorju ta’ tliet snin li matulu tkun tista’ tuża d-denominazzjoni “Pecorino Monteporo”.

(5)

Il-miżuri previsti f’dan ir-Regolament huma skont l-opinjoni tal-Kumitat tal-Politika dwar il-Kwalità tal-Prodotti Agrikoli,

(1)

L-Unjoni hija l-akbar produttur tal-inbid fid-dinja. Fis-snin ta’ kummerċjalizzazzjoni 2014/2015 sa 2018/2019, il-produzzjoni annwali medja tal-inbid fl-Unjoni kienet ta’ 167,6 miljun ettolitru. Is-sena tas-suq tal-inbid tibda mill-1 ta’ Awwissu u tintemm fil-31 ta’ Lulju tas-sena ta’ wara. L-Unjoni hija responsabbli għal 45 % taż-żoni tal-vitikultura globali, 65 % tal-produzzjoni globali, 60 % tal-konsum globali u 70 % tal-esportazzjonijiet lejn pajjiżi terzi. L-akbar ħames pajjiżi produtturi tal-inbid fl-Unjoni huma, f’ordni dixxendenti ta’ volumi ta’ produzzjoni, l-Italja, Franza, Spanja, il-Ġermanja u l-Portugall.

(2)

Minħabba l-pandemija tal-COVID-19 u minħabba r-restrizzjonijiet estensivi fuq il-moviment ta’ persuni li ddaħħlu fis-seħħ fl-Istati Membri, il-vitikulturi u l-produtturi tal-inbid esperjenzaw tfixkil ekonomiku li wassal għal diffikultajiet finanzjarji u għal problemi ta’ fluss ta’ flus.

(3)

It-tixrid tal-marda u l-miżuri fis-seħħ illimitaw id-disponibbiltà tal-ħaddiema, u b’hekk ġew imxekkla speċifikament l-istadji tal-produzzjoni, tal-ipproċessar u tat-trasport ta’ għeneb għall-inbid u ta’ nbid.

(4)

L-għeluq obbligatorju ta’ ristoranti, lukandi, bars, kif ukoll il-kanċellazzjoni ta’ festi u ċelebrazzjonijiet bħal tiġijiet, ċelebrazzjonijiet għall-għeluq is-snin u avvenimenti tan-negozju fl-Unjoni u f’pajjiżi terzi, issospenda l-operat tas-settur tal-ospitalità u tal-catering għal diversi xhur. Barra minn hekk, minn Marzu 2020, l-attivitajiet tat-turiżmu u tat-turiżmu relatat mal-inbid, bħalma huma l-avvenimenti tat-tidwiq tal-inbid, il-fieri, u x-xiri u l-konsum tal-inbid fil-post tas-sors, ġew interrotti bil-kbir fil-maġġoranza tal-Istati Membri.

(5)

Minħabba f’hekk, kien hemm bidliet sinifikanti fix-xejriet tad-domanda għall-inbid. Id-domanda tal-konsumaturi daret lejn il-konsum tal-inbid fid-dar. Filwaqt li l-konsumaturi żiedu l-konsum ta’ ċerti prodotti tal-inbid fid-dar, dan il-konsum akbar fid-dar ma kkumpensax għat-tnaqqis fid-domanda fl-industrija tal-ospitalità u tal-catering.

(6)

L-għeluq ta’ ristoranti u stabbilimenti oħra tal-ospitalità wassal għal tnaqqis fil-fatturat tal-produtturi tal-inbid. Fil-Ġermanja, il-produtturi tal-inbid tilfu 50 % tal-fatturat tagħhom fl-ewwel kwart tal-2020, minħabba li ma kellhomx bejgħ lir-ristoranti. Kien hemm ukoll tnaqqis ta’ 23 % fil-bejgħ lill-ħwienet speċjalizzati tal-inbid, li ħafna minnhom jikkummerċjalizzaw inbejjed ta’ livell ogħla. Skont l-estimi tal-industrija tal-Unjoni kollha, l-għeluq ta’ ristoranti, bars u lukandi, mill-bidu tal-għeluq tar-ristoranti f’nofs Marzu sal-aħħar ta’ Mejju 2020, wassal għal tnaqqis ta’ 30 % fil-volum tal-inbid mibjugħ u għal tnaqqis fil-valur ta’ 50 % meta mqabbel mal-bejgħ qabel l-għeluq.

(7)

Minkejja t-taffija reċenti ta’ ċerti miżuri u t-tħaffif ta’ ċerti restrizzjonijiet fuq il-moviment ta’ persuni, inkluż il-ftuħ mill-ġdid ta’ ristoranti u stabbilimenti tal-ospitalità, is-sitwazzjoni mhix mistennija li tiġi għan-normal fis-sitt xhur jmiss. Ir-ristoranti u stabbilimenti oħra tal-ospitalità se jkollhom jirrispettaw il-kundizzjonijiet ta’ tbegħid soċjali li jillimitaw in-numru ta’ klijenti. Barra minn hekk, f’ħafna Stati Membri, ċerti restrizzjonijiet għadhom fis-seħħ fir-rigward tad-daqs tal-laqgħat soċjali, inklużi avvenimenti privati bħal tiġijiet, fejn tradizzjonalment jiġi kkunsmat l-inbid.

(8)

It-turiżmu dinji, li huwa mistenni jesperjenza tnaqqis ta’ 70 % fil-fatturat fit-tieni kwart tal-2020, ukoll mhux mistenni li jirkupra biżżejjed fis-sitt xhur li jmiss biex jikkumpensa għan-nuqqas ta’ konsum fir-ristoranti waqt il-perjodu fejn ir-restrizzjonijiet estensivi tal-moviment ta’ persuni kienu fis-seħħ.

(9)

B’mod ġenerali, huwa stmat li l-konsum tal-inbid fl-Unjoni fis-sena ta’ kummerċjalizzazzjoni 2019/2020 se jonqos għal 108 miljun ettolitru. Dan huwa tnaqqis ġenerali fil-konsum ta’ aktar minn 8 % fis-sena ta’ kummerċjalizzazzjoni 2019/2020 meta mqabbel mal-medja tal-ħames snin ta’ kummerċjalizzazzjoni li għaddew.

(10)

L-esportazzjonijiet lejn pajjiżi terzi huma partikolarment importanti għas-settur tal-inbid tal-Unjoni. Fl-2019, l-esportazzjonijiet ammontaw għal EUR 12,1 biljun. Matul il-pandemija tal-COVID-19, l-esportazzjonijiet ġew affettwati minn sfidi loġistiċi kif ukoll minn tnaqqis fil-konsum minħabba r-restrizzjonijiet fuq il-moviment ta’ persuni imposti anke f’pajjiżi terzi. It-tifqigħa tal-pandemija tal-COVID-19 fiċ-Ċina wasslet għal konġestjoni sinifikanti tal-portijiet hemmhekk u fi bnadi oħra, kif ukoll għal żieda fit-tħassir totali jew parzjali tat-tbaħħir, li wasslu biex il-kontenituri saru aktar skarsi, ir-rati tal-merkanzija żdiedu b’mod sinifikanti u l-esportaturi raw il-vjaġġi tagħhom jiġi posposti. Barra minn hekk, l-esportazzjonijiet tal-inbid tal-Unjoni kienu diġà ġew affettwati b’mod negattiv mit-tariffi ogħla fuq l-importazzjoni li l-Istati Uniti imponew fuq ċerti importazzjonijiet tal-inbid mill-Unjoni. Minn Ottubru 2019, l-Istati Uniti, li hija s-suq ewlieni tal-esportazzjoni tal-inbid tal-Unjoni, imponiet tariffi fuq l-importazzjoni ad valorem ta’ 25 % fuq l-inbejjed bla gass tal-Unjoni.

(11)

B’mod ġenerali, l-esportazzjonijiet tal-inbid tal-Unjoni lejn pajjiżi terzi mistennija jonqsu b’14 % fis-sena ta’ kummerċjalizzazzjoni 2019/2020, kemm meta mqabbla mas-sena ta’ kummerċjalizzazzjoni ta’ qabel, kif ukoll meta mqabbla mal-medja tal-ħames snin ta’ kummerċjalizzazzjoni li għaddew. Meta mqabbla ma’ Mejju 2019, l-esportazzjonijiet ta’ nbejjed Franċiżi, Taljani u Spanjoli lejn pajjiżi terzi naqsu b’mod sinifikanti f’Mejju 2020: L-esportazzjonijiet tal-inbid Franċiż lejn pajjiżi terzi naqsu bi 33 % fil-volum u b’55 % fil-valur; L-esportazzjonijiet tal-inbid Taljan lejn pajjiżi terzi naqsu bi 22 % fil-volum u b’26 % fil-valur; u l-esportazzjonijiet tal-inbid Spanjol lejn pajjiżi terzi naqsu bi 63 % fil-volum u bi 43 % fil-valur. L-esportazzjonijiet tal-inbejjed frizzanti ġew affettwati b’mod partikolari fuq l-istess perjodi ta’ referenza. Skont l-estimi tal-industrija tal-inbid, f’Mejju 2020, l-esportazzjonijiet tax-Champagne lejn l-Istati Uniti u ċ-Ċina naqsu b’64 % fil-volum u b’55 % fil-valur, l-esportazzjonijiet tal-Prosecco lejn pajjiżi terzi naqsu b’27 % fil-volum u bi 32 % fil-valur, u l-esportazzjonijiet tal-Cava lejn pajjiżi terzi naqsu b’40 % fil-volum u fil-valur.

(12)

Barra minn hekk, bħalissa hemm volumi kbar ta’ nbid maħżun minħabba l-ħsad eċċezzjonali ta’ 174,4 miljun ettolitru fis-sena ta’ kummerċjalizzazzjoni 2018/2019, li żied l-istokkijiet inizjali fis-sena ta’ kummerċjalizzazzjoni 2019/2020 b’14 % meta mqabbel mas-sena ta’ kummerċjalizzazzjoni 2018/2019. L-inbid mhux mibjugħ irid jinħażen.

(13)

Minħabba ċ-ċirkostanzi msemmija hawn fuq, dawn l-avvenimenti jiġu kkwalifikati bħala perjodu ta’ żbilanċ serju ħafna fis-suq.

(14)

Biex il-vitikulturi u l-produtturi tal-inbid jiġu megħjuna jsibu bilanċ f’dan il-perjodu ta’ żbilanċ serju ħafna fis-suq, jixraq li tiġi awtorizzata l-adozzjoni ta’ ftehimiet u deċiżjonijiet tal-bdiewa, tal-assoċjazzjonijiet tal-bdiewa jew tal-assoċjazzjonijiet ta’ tali assoċjazzjonijiet, jew tal-organizzazzjonijiet tal-produtturi rikonoxxuti, tal-assoċjazzjonijiet ta’ organizzazzjonijiet tal-produtturi rikonoxxuti, u tal-organizzazzjonijiet interprofessjonali rikonoxxuti li jikkonċernaw il-produzzjoni ta’ għeneb għall-inbid u ta’ nbid, fuq bażi temporanja għal perjodu ta’ sitt xhur. Dawk il-miżuri jinkludu: (i) it-trasformazzjoni u l-ipproċessar; (ii) il-ħżin; (iii) il-promozzjoni konġunta; (iv) rekwiżiti ta’ kwalità; u (v) l-ippjanar temporanju tal-produzzjoni.

(15)

Tali ftehimiet u deċiżjonijiet jistgħu jinkludu, pereżempju: (i) l-ipproċessar tal-inbid għal skopijiet oħra, bħad-distillazzjoni tal-inbid f’alkoħol; (ii) il-ħolqien u l-individwazzjoni ta’ kapaċitajiet tal-ħżin għall-volum akbar ta’ nbid li jrid jinħażen; (iii) il-promozzjoni tal-konsum tal-inbid; (iv) il-qbil dwar rekwiżiti ta’ kwalità li jirrestrinġu l-kummerċjalizzazzjoni tal-inbejjed għal dawk li jirrispettaw dawn ir-rekwiżiti; u (v) miżuri ta’ ppjanar biex jitnaqqsu l-volumi għall-ħsad futur.

(16)

Jenħtieġ li kwalunkwe ftehim jew deċiżjoni tiġi awtorizzata temporanjament għal perjodu ta’ sitt xhur. Il-ħsad li jmiss għas-sena ta’ kummerċjalizzazzjoni 2020/2021 li tibda f’Awwissu 2020, u l-perjodu saċ-ċelebrazzjonijiet tal-aħħar tas-sena, fejn b’mod partikolari jiġu kkunsmati u esportati nbejjed ta’ kwalità għolja u nbejjed frizzanti, huma l-perjodi li fihom huwa mistenni li dawn il-miżuri jkollhom l-aktar impatt.

(17)

F’konformità mal-ewwel subparagrafu tal-Artikolu 222(1) tar-Regolament (UE) Nru 1308/2013, għandha tingħata awtorizzazzjoni jekk din ma tfixkilx il-funzjonament tas-suq intern, u jekk il-ftehimiet u d-deċiżjonijiet ikunu strettament immirati biex jistabbilizzaw is-settur. Dawn il-kundizzjonijiet speċifiċi jeskludu ftehimiet u deċiżjonijiet li direttament jew indirettament iwasslu għat-tqassim tas-swieq, għad-diskriminazzjoni msejsa fuq in-nazzjonalità jew għall-iffissar tal-prezzijiet. Jekk il-ftehimiet u d-deċiżjonijiet ma jissodisfawx dawn il-kundizzjonijiet, jew ma jibqgħux jissodisfaw dawn il-kundizzjonijiet, l-Artikolu 101(1) tat-Trattat japplika għal dawn il-ftehimiet u d-deċiżjonijiet.

(18)

Jenħtieġ li l-awtorizzazzjoni prevista f’dan ir-Regolament tkopri t-territorju tal-Unjoni, peress li l-iżbilanċ serju ħafna fis-suq huwa komuni għall-Unjoni kollha.

(19)

Biex l-Istati Membri jkunu f’qagħda li jivvalutaw jekk il-ftehimiet u d-deċiżjonijiet li jikkonċernaw il-produzzjoni tal-għeneb għall-inbid ifixklux jew le l-funzjonament tas-suq intern, u jekk humiex strettament immirati biex jistabbilizzaw is-settur tal-inbid, jenħtieġ li tingħata informazzjoni lill-awtoritajiet kompetenti tal-Istat Membru, inkluż l-awtoritajiet tal-kompetizzjoni ta’ dak l-istat, li għandu l-ogħla sehem tal-volum stmat tal-produzzjoni tal-għeneb għall-inbid u tal-inbid kopert minn dawk il-ftehimiet jew deċiżjonijiet, dwar il-ftehimiet konklużi u d-deċiżjonijiet meħuda u dwar il-volum tal-produzzjoni ta’ għeneb għall-inbid u ta’ nbid kif ukoll dwar il-perjodu taż-żmien li jkopru.

(20)

Minħabba l-iżbilanċ serju ħafna fis-suq, il-ħtieġa li jitqiesu l-istokk eżistenti tal-inbid, it-tnaqqis fil-konsum u t-telf ta’ swieq tal-esportazzjoni u biex jgħin lis-settur tal-inbid jirkupra fil-perjodu li fih ir-restrizzjonijiet tal-COVID-19 jiġu mħaffa, inkluż sa u wara ċ-ċelebrazzjonijiet ta’ tmiem is-sena, dan ir-Regolament jenħtieġ li jidħol fis-seħħ fil-jum wara dak tal-pubblikazzjoni tiegħu.

(21)

Il-miżuri previsti f’dan ir-Regolament huma f’konformità mal-opinjoni tal-Kumitat għall-Organizzazzjoni Komuni tas-Swieq Agrikoli,

(1)

F’konformità mal-proċedura stabbilita fl-Artikoli 19 sa 22 tar-Regolament (UE) 2018/1877, il-Kummissjoni għandha tippreżenta proposta sal-15 ta’ Ġunju 2020 li tispeċifika (a) l-ammont tat-tieni ħlas parzjali tal-kontribuzzjoni għall-2020, (b) ammont annwali rivedut tal-kontribuzzjoni għall-2020, f’każijiet fejn l-ammont ivarja mill-bżonnijiet reali.

(2)

F’konformità mal-Artikolu 46 tar-Regolament (UE) 2018/1877, fit-8 ta’ April 2020, il-Bank Ewropew tal-Investiment (BEI) bagħat lill-Kummissjoni l-estimi aġġornati tiegħu tal-impenji u tal-pagamenti taħt l-istrumenti li jiġġestixxi,

(3)

L-Artikolu 20(1) tar-Regolament (UE) 2018/1877 jipprevedi li s-sejħiet għal kontribuzzjonijiet l-ewwel jeżawrixxu l-ammonti previsti fil-Fondi Ewropej għall-Iżvilupp preċedenti. Għaldaqstant, jenħtieġ li ssir sejħa għal fondi taħt l-Għaxar Fond Ewropew għall-Iżvilupp (l-“10 FEŻ”) għall-BEI u taħt il-Ħdax-il Fond Ewropew għall-Iżvilupp (il-“11-il FEŻ”) għall-Kummissjoni,

(4)

L-Artikolu 55 tar-Regolament (UE) 2018/1877 jipprevedi li l-ammonti minn proġetti taħt l-10 FEŻ jew minn Fondi Ewropej għall-Iżvilupp preċedenti oħrajn mhux impenjati skont l-Artikolu 1(3) tal-Ftehim Intern bejn ir-Rappreżentanti tal-Gvernijiet tal-Istati Membri tal-Unjoni Ewropea, imlaqqgħin fi ħdan il-Kunsill, dwar l-iffinanzjar ta’ għajnuna mill-Unjoni Ewropea taħt il-Qafas Finanzjarju Pluriennali għall-perijodu mill-2014 sal-2020, skont il-Ftehim ta’ Sħubija AKP-UE, u dwar l-allokazzjoni ta’ assistenza finanzjarja għall-Pajjiżi u Territorji extra-Ewropej li għalihom tapplika r-Raba’ Parti tat-Trattat dwar il-Funzjonament tal-Unjoni Ewropea (il-“Ftehim Intern”), jew diżimpenjati skont l-Artikolu 1(4) tal-Ftehim Intern, dment li ma jiġix deċiż mod ieħor mill-Kunsill b’mod unanimu, għandhom inaqqsu dik il-parti mill-kontribuzzjonijiet tal-Istati Membri stabbilita fil-punt (a) tal-Artikolu 1(2) tal-Ftehim Intern.

(5)

Permezz tad-Deċiżjoni (UE) 2019/1800 (3), il-Kunsill adotta, fl-24 ta’ Ottubru 2019, fuq proposta mill-Kummissjoni, id-deċiżjoni li tistabbilixxi l-ammont annwali tal-kontribuzzjonijiet għall-FEŻ mill-Istati Membri għall-2020 li jikkonsisti minn EUR 4 400 000 000 għall-Kummissjoni, u minn EUR 300 000 000 għall-BEI,

(1)

Is-CS2JU twettaq l-attivitajiet tagħha skont ir-Regolament tal-Kunsill (UE) Nru 558/2014.

(2)

F’konformità mal-Artikolu 25(1) tar-Regolament (UE) 2018/1725, ir-restrizzjonijiet tal-applikazzjoni tal-Artikoli 14 sa 22, 35 u 36, kif ukoll tal-Artikolu 4 ta’ dan ir-Regolament sa fejn id-dispożizzjonijiet tiegħu jikkorrispondu mad-drittijiet u mal-obbligi previsti fl-Artikoli 14 sa 22, jenħtieġ li jkunu bbażati fuq regoli interni li jridu jiġu adottati mis-CS2JU, fejn dawn mhumiex ibbażati fuq atti legali adottati fuq il-bażi tat-Trattati.

(3)

Dawn ir-regoli interni, inkluż id-dispożizzjonijiet tagħhom dwar il-valutazzjoni tan-neċessità u l-proporzjonalità ta’ restrizzjoni, jenħtieġ li ma japplikawx fejn att legali adottat abbażi tat-Trattati jipprevedi restrizzjoni tad-drittijiet tas-suġġett tad-data.

(4)

Fil-qafas tal-funzjonament amministrattiv tagħha, is-CS2JU tista’ twettaq inkjesti amministrattivi, proċedimenti dixxiplinari, twettaq attivitajiet preliminari relatati ma’ każijiet ta’ irregolaritajiet potenzjali rrapportati lill-OLAF, tipproċessa każijiet ta’ żvelar ta’ informazzjoni protetta, tipproċessa proċeduri (formali u informali) ta’ fastidju, tipproċessa lmenti interni u esterni, twettaq awditi interni, twettaq investigazzjonijiet mill-Uffiċjal tal-Protezzjoni tad-Data f’konformità mal-Artikolu 45(2) tar-Regolament (UE) 2018/1725 u investigazzjonijiet interni ta’ sigurtà (tal-IT).

(5)

Is-CS2JU tipproċessa diversi kategoriji ta’ data personali, inkluż hard data (data“oġġettiva” bħal data ta’ identifikazzjoni, data ta’ kuntatt, data professjonali, dettalji amministrattivi, data riċevuta minn sorsi speċifiċi, komunikazzjonijiet elettroniċi u data tat-traffiku) u soft data (data“suġġettiva” relatata mal-każ bħal data dwar ir-raġunament, data dwar l-imġiba, evalwazzjonijiet, data dwar il-prestazzjoni u l-kondotta u data relatata ma’ jew imressqa b’konnessjoni mas-suġġett tal-proċedura jew tal-attività) (4).

(6)

Is-CS2JU, rappreżentata mid-Direttur Eżekuttiv tagħha, taġixxi bħala l-kontrollur tad-data irrispettivament minn aktar delegazzjonijiet tar-rwol tal-kontrollur fis-CS2JU biex tirrifletti r-responsabbiltajiet operattivi għal operazzjonijiet speċifiċi ta’ pproċessar ta’ data personali.

(7)

Id-data personali tinħażen b’mod sigur f’ambjent elettroniku jew f’format stampat li jiżgura s-salvagwardji meħtieġa għall-prevenzjoni tal-aċċess għal, jew it-trasferiment illegali ta’ data lil persuni li m’għandhomx dritt bil-liġi għall-aċċess għal data personali ta’ dan it-tip. Id-data personali pproċessata tinżamm għal mhux aktar milli meħtieġ u xieraq għall-finijiet li għalihom id-data tiġi pproċessata għall-perjodu speċifikat fl-avviżi dwar il-protezzjoni tad-data, id-dikjarazzjonijiet ta’ privatezza jew ir-rekords tas-CS2JU.

(8)

Ir-regoli interni jenħtieġ li japplikaw għall-operazzjonijiet kollha ta’ pproċessar imwettqa mis-CS2JU fit-twettiq ta’ inkjesti amministrattivi, proċedimenti dixxiplinari, attivitajiet preliminari relatati ma’ każijiet ta’ irregolaritajiet potenzjali rrapportati lill-OLAF, proċeduri ta’ żvelar ta’ informazzjoni protetta, proċeduri (formali u informali) għal każijiet ta’ fastidju, l-ipproċessar ta’ lmenti interni u esterni, awditi interni, l-investigazzjonijiet imwettqa mill-Uffiċjal tal-Protezzjoni tad-Data f’konformità mal-Artikolu 45(2) tar-Regolament (UE) 2018/1725, l-investigazzjonijiet dwar is-sigurtà (tal-IT) ttrattati internament jew b’involviment estern (eż. CERT-UE).

(9)

Ir-regoli interni jenħtieġ li japplikaw għal operazzjonijiet ta’ pproċessar imwettqa qabel il-ftuħ tal-proċeduri msemmija hawn fuq, matul dawn il-proċeduri u matul il-monitoraġġ tas-segwitu għall-eżitu ta’ dawn il-proċeduri. Jenħtieġ li jkunu applikabbli wkoll għal kull assistenza u kooperazzjoni pprovduti mis-CS2JU lill-awtoritajiet nazzjonali u lill-organizzazzjonijiet internazzjonali barra mill-investigazzjonijiet amministrattivi tagħha.

(10)

F’każijiet fejn japplikaw dawn ir-regoli interni, is-CS2JU għandha tipprovdi ġustifikazzjonijiet fejn tispjega għalfejn ir-restrizzjonijiet huma strettament neċessarji u proporzjonati f’soċjetà demokratika u jirrispettaw il-qofol tad-drittijiet u l-libertajiet fundamentali.

(11)

F’dan il-qafas is-CS2JU hija marbuta li tirrispetta, sa fejn hu l-aktar possibbli u f’konformità sħiħa mal-leġiżlazzjoni u mal-gwida rilevanti, id-drittijiet fundamentali tas-suġġetti tad-data matul il-proċeduri ta’ hawn fuq, b’mod partikolari, dawk relatati mad-dritt għall-għoti ta’ informazzjoni, aċċess u rettifika, id-dritt għat-tħassir, ir-restrizzjoni tal-ipproċessar, id-dritt għall-komunikazzjoni ta’ ksur ta’ data personali lis-suġġett tad-data jew għall-kunfidenzjalità tal-komunikazzjoni kif stabbilit fir-Regolament (UE) 2018/1725.

(12)

Madankollu, is-CS2JU tista’ tkun obbligata tirrestrinġi l-informazzjoni lis-suġġetti tad-data u drittijiet oħra tas-suġġetti tad-data biex tipproteġi, b’mod partikolari, l-investigazzjonijiet tagħha stess, l-investigazzjonijiet u l-proċedimenti ta’ awtoritajiet pubbliċi oħra, kif ukoll id-drittijiet ta’ persuni oħra konnessi mal-investigazzjonijiet tagħha jew ma’ proċeduri oħra.

(13)

Is-CS2JU tista’ għalhekk tirrestrinġi l-informazzjoni bl-għan li tipproteġi l-investigazzjoni u d-drittijiet u l-libertajiet fundamentali ta’ suġġetti oħra tad-data.

(14)

Is-CS2JU jenħtieġ li timmonitorja perjodikament li l-kundizzjonijiet li jiġġustifikaw ir-restrizzjoni jkunu għadhom japplikaw u li tneħħi r-restrizzjoni jekk dawn ma jibqgħux japplikaw.

(15)

Il-Kontrollur jenħtieġ li jinforma lill-Uffiċjal tal-Protezzjoni tad-Data fil-mument tad-differiment u matul ir-reviżjonijiet,