(1)

Sabiex jiġu żgurati operazzjonijiet sikuri u effiċjenti tal-inġenji tal-ajru, tal-ajrudromi, tal-ġestjoni tat-traffiku tal-ajru, tan-navigazzjoni bl-ajru u tan-netwerk Ewropew tal-ġestjoni tat-traffiku tal-ajru, jeħtieġ li jiġi previst ċertu titjib fir-regoli operattivi relatati mal-użu tal-ispazju tal-ajru, tat-tagħmir tal-inġenji tal-ajru u tas-sistemi tas-servizzi tal-ġestjoni tat-traffiku tal-ajru u tan-navigazzjoni bl-ajru kif ukoll tal-kostitwenti tagħhom meħtieġa għall-użu tal-ispazju tal-ajru. Għalhekk, jenħtieġ li jiġu stabbiliti rekwiżiti ġodda u aġġornati dwar l-interoperabilità b’rabta mas-sikurezza fir-Regolament ta’ Implimentazzjoni tal-Kummissjoni (UE) Nru 1206/2011 (2) u fir-Regolament ta’ Implimentazzjoni tal-Kummissjoni (UE) Nru 1207/2011 (3).

(2)

Filwaqt li jitqiesu l-esperjenzi mill-implimentazzjoni li għadha għaddejja tal-kapaċità tas-sorveljanza fl-ajru u tal-kapaċità tal-ipproċessar tad-data tas-sistemi ta’ fuq l-art, l-installazzjoni effettiva u f’waqtha tat-tagħmir tal-inġenji tal-ajru hija meħtieġa biex tippermetti lill-katina sħiħa tas-sorveljanza tikseb il-benefiċċji mistennija fl-iskadenzi stabbiliti. Il-kriterji għal eżenzjonijiet mir-rekwiżiti biex l-inġenji tal-ajru jiġu mgħammra jenħtieġ li jiġu emendati biex jipprovdu ċarezza dwar liema inġenji tal-ajru jridu jiġu mgħammra u liema se jibbenefikaw minn eżenzjoni minn dawk ir-rekwiżiti. Fl-istess ħin, jenħtieġ li l-għadd kumplessiv ta’ inġenji tal-ajru li jiġu mgħammra jibqa’ effettiv u jenħtieġ li ma jimponix piż ekonomiku bla bżonn.

(3)

Għadd sinifikanti ta’ inġenji tal-ajru mgħammra diġà huma ċċertifikati skont l-istandard internazzjonali għall-partijiet u għat-tagħmir li jintużaw fl-ajru għas-sistemi tas-sorveljanza, u dan jikkorrispondi għall-Anness 10 tal-Konvenzjoni ta’ Chicago, il-Volum IV, it-Tielet Edizzjoni, inkluż l-emendi kollha sa Nru 77. Dak l-istandard huwa kompatibbli għalkollox mas-sistemi tas-sorveljanza antiċipati. L-obbligu tal-użu tal-istandard li jikkorrispondi għall-Anness 10 tal-Konvenzjoni ta’ Chicago, il-Volum IV, ir-Raba’ Edizzjoni, inklużi l-emendi kollha sa Nru 85, kif previst attwalment fl-Anness II tar-Regolament (UE) Nru 1207/2011, jimponi piż ekonomiku bla bżonn. Għaldaqstant, l-istandard li jikkorrispondi għall-Anness 10 tal-Konvenzjoni ta’ Chicago, il-Volum IV, it-Tielet Edizzjoni, inklużi l-emendi kollha sa Nru 77, jenħtieġ li jitqies bħala r-rekwiżit minimu. Għalhekk, l-istandards tekniċi minimi li l-operaturi tal-inġenji tal-ajru jridu jikkonformaw magħhom u li huma stabbiliti fir-Regolament ta’ Implimentazzjoni (UE) Nru 1207/2011 jenħtieġ li jiġu emendati.

(4)

L-inġenji tal-ajru tal-istat li joperaw bħala traffiku tal-ajru ġenerali jenħtieġ li jiġu mgħammra bi transponders tar-radars sekondarji tas-sorveljanza operabbli konformi mar-rekwiżiti applikabbli għall-inġenji tal-ajru ċivili stabbiliti fil-punti (a) u (c) tal-Artikolu 5(5) tar-Regolament ta’ Implimentazzjoni (UE) Nru 1207/2011. Il-proċeduri u l-kundizzjonijiet relatati mal-inġenji tal-ajru tal-istat li ma jistgħux jiġu mgħammra bi transponders tar-radars sekondarji tas-sorveljanza operabbli jenħtieġ li jibqgħu dawk stabbiliti fl-Artikolu 8 tar-Regolament ta’ Implimentazzjoni (UE) Nru 1207/2011.

(5)

Ir-rekwiżiti għall-arranġamenti formali dwar it-trasferiment tad-data tas-sorveljanza bejn il-fornituri tas-servizzi tan-navigazzjoni bl-ajru jenħtieġ li jiġu emendati ħalli jirriflettu x-xenarji tad-distribuzzjoni tad-data eżistenti biex jiġi ffaċilitat l-iskambju tad-data tas-sorveljanza u biex jiġu evitati limitazzjonijiet ta’ piż eċċessiv fuq il-fornitur li jwassal id-data.

(6)

Sabiex tiġi żgurata l-effettività tal-operazzjonijiet tal-inġenji tal-ajru tal-istat, jenħtieġ li tiġi stabbilita l-abbiltà tas-sistema Ewropea tal-ġestjoni tat-traffiku tal-ajru li tiżgura li dawk l-inġenji tal-ajru tal-istat involuti f’operazzjonijiet u f’taħriġ sensittivi jkunu kapaċi joperaw bl-għoti ta’ kodiċijiet SSR diskreti, u għalhekk jenħtieġ li r-Regolament ta’ Implimentazzjoni (UE) Nru 1206/2011 jiġi emendat skont dan.

(7)

It-tifqigħa tal-pandemija tal-virus tal-Covid-19 u l-impatt li rriżulta fuq is-settur tal-avjazzjoni wasslu għal ostakli mhux prevedibbli għall-operaturi tal-inġenji tal-ajru biex iwettqu l-attivitajiet tagħhom sabiex l-inġenji tal-ajru jkunu konformi ma’ ċerti rekwiżiti tar-Regolament ta’ Implimentazzjoni (UE) Nru 1207/2011. B’riżultat ta’ dan, l-iskadenza għall-operaturi tal-inġenji tal-ajru stabbilita fl-Artikolu 5(5), fl-Artikolu 8(1) u fl-Artikolu 8(2) tar-Regolament ta’ Implimentazzjoni (UE) Nru 1207/2011 jenħtieġ li tiġi posposta għas-7 ta’ Diċembru 2020, u r-Regolament ta’ Implimentazzjoni (UE) Nru 1207/2011 jenħtieġ li jiġi emendat skont dan.

(8)

Għalhekk, jenħtieġ li r-Regolament ta’ Implimentazzjoni (UE) Nru 1206/2011 u r-Regolament ta’ Implimentazzjoni (UE) Nru 1207/2011 jiġu emendati skont dan.

(9)

Il-miżuri previsti f’dan ir-Regolament huma skont l-opinjoni tal-Kumitat imsemmi fl-Artikolu 127(1) tar-Regolament (UE) 2018/1139,

(1)

L-importazzjonijiet fl-Unjoni ta’ partijiet essenzjali tar-roti li joriġinaw fir-Repubblika tal-Poplu taċ-Ċina (“iċ-Ċina”) huma soġġetti għal dazju anti-dumping (“id-dazju estiż”), bħala riżultat tal-estensjoni tad-dazju anti-dumping impost fuq l-importazzjonijiet ta’ roti li joriġinaw miċ-Ċina permezz tar-Regolament (KE) Nru 71/97.

(2)

Skont l-Artikolu 3 tar-Regolament (KE) Nru 71/97, il-Kummissjoni tingħata s-setgħa tadotta l-miżuri meħtieġa biex tawtorizza l-eżenzjoni tal-importazzjonijiet ta’ partijiet essenzjali tar-roti li ma jevitawx id-dazju anti-dumping.

(3)

Dawn il-miżuri ta’ implimentazzjoni huma stabbiliti fir-Regolament (KE) Nru 88/97 li jistabbilixxi s-sistema ta’ eżenzjoni speċifika.

(4)

Fuq din il-bażi, il-Kummissjoni eżentat għadd ta’ persuni li jimmuntaw ir-roti mid-dazju estiż (“il-partijiet eżentati”).

(5)

Kif previst fl-Artikolu 16(2) tar-Regolament (KE) Nru 88/97, il-Kummissjoni ppubblikat il-listi sussegwenti tal-Partijiet eżentati f’Il-Ġurnal Uffiċjali tal-Unjoni Ewropea (5).

(6)

L-aktar Deċiżjoni ta’ Implimentazzjoni tal-Kummissjoni (UE) 2019/1087 (6) riċenti dwar l-eżenzjonijiet skont ir-Regolament (KE) Nru 88/97 kienet adottata fid-19 ta’ Ġunju 2019.

(7)

Għall-finijiet ta’ din id-Deċiżjoni, japplikaw id-definizzjonijiet stabbiliti fl-Artikolu 1 tar-Regolament (KE) Nru 88/97.

(8)

Bejn id-19 ta’ Diċembru 2016 u s-17 ta’ Ottubru 2019, il-Kummissjoni rċeviet mill-Partijiet elenkati fit-Tabelli 1 u 3, it-talbiet għal eżenzjoni bl-informazzjoni kollha meħtieġa sabiex tiddetermina jekk dawn it-talbiet kinux ammissibbli skont l-Artikolu 4(1) tar-Regolament (KE) Nru 88/97.

(9)

Il-Partijiet li talbu eżenzjoni ngħataw il-possibbiltà li jikkummentaw dwar il-konklużjonijiet tal-Kummissjoni dwar l-ammissibbiltà tat-talbiet tagħhom.

(10)

Skont l-Artikolu 5(1) tar-Regolament (KE) Nru 88/97, sakemm tittieħed deċiżjoni dwar il-mertu tat-talbiet mill-Partijiet li qed jitolbu eżenzjoni, il-pagament tad-dazju estiż fir-rigward ta’ kull importazzjoni ta’ partijiet essenzjali tar-roti ddikjarati għaċ-ċirkolazzjoni libera minn dawn il-Partijiet elenkati fit-Tabelli 1 u 3 ta’ hawn taħt ġie sospiż mid-data li fiha l-Kummissjoni rċeviet it-talbiet rispettivi tagħhom ’il quddiem.

(11)

Ġie konkluż l-eżami tal-mertu tat-talbiet tal-Partijiet elenkati fit-Tabella 1.

Tabella 1

(12)

Matul l-eżami tagħha, il-Kummissjoni stabbiliet li l-valur tal-partijiet li joriġinaw fiċ-Ċina jikkostitwixxi anqas minn 60 % tal-valur totali tal-partijiet tar-roti kollha mmuntati miż-żewġ Partijiet. Dan kien japplika wkoll għall-maġġoranza tar-roti mmuntati miż-żewġ Partijiet.

(13)

Konsegwentement, il-Kummissjoni kkonkludiet li l-operazzjonijiet ta’ montatura rispettivi ta’ Merida Polska Sp. Z o.o. u ta’ Juan Luna Cabrera ma jaqgħux fil-kamp ta’ applikazzjoni tal-Artikolu 13(2) tar-Regolament (UE) 2016/1036.

(14)

Għal din ir-raġuni, u skont l-Artikolu 7(1) tar-Regolament (KE) Nru 88/97, il-Partijiet elenkati fit-Tabella 1 jissodisfaw il-kundizzjonijiet għall-eżenzjoni mid-dazju estiż.

(15)

F’konformità mal-Artikolu 7(2) tar-Regolament (KE) Nru 88/97, jenħtieġ li l-eżenzjonijiet jidħlu fis-seħħ mid-dati tal-wasla tat-talbiet ’il quddiem. Id-dejn doganali fir-rigward tad-dazju estiż mill-Partijiet li qed jitolbu eżenzjoni jenħtieġ li, għalhekk, jitqies null mill-istess data.

(16)

Il-Partijiet ġew infurmati bil-konklużjonijiet tal-Kummissjoni dwar il-merti tat-talbiet tagħhom u ngħataw opportunità biex jikkummentaw dwarhom.

(17)

Peress li l-eżenzjonijiet japplikaw biss għall-Partijiet speċifikament imsemmija fit-Tabella 1, jenħtieġ li l-Partijiet eżentati jinnotifikaw lill-Kummissjoni (7) mingħajr dewmien dwar kull tibdil f’din id-data(pereżempju, wara li jinbidel l-isem, il-forma ġuridika jew l-indirizz jew wara lil jitwaqqfu entitajiet ġodda tal-montatura).

(18)

F’każ ta’ bidla fir-referenza, jenħtieġ li l-Partijiet eżentati jipprovdu l-informazzjoni rilevanti kollha, b’mod partikolari dwar kull modifika fl-attivitajiet tagħhom marbuta ma’ operazzjonijiet ta’ montatura. Fejn xieraq, il-Kummissjoni se taġġorna r-referenzi għal tali Parti.

(19)

Il-partijiet eżentati jew sospiżi elenkati fit-Tabella 2, bejn it-2 ta’ Mejju 2019 u l-20 ta’ Frar 2020, innotifikaw lill-Kummissjoni dwar il-bidliet fir-referenzi tagħhom (l-ismijiet, il-forom ġuridiċi jew l-indirizzi). Il-Kummissjoni, wara li eżaminat l-informazzjoni mressqa, ikkonkludiet li dawn il-bidliet bl-ebda mod ma jaffettwaw l-operazzjonijiet ta’ montatura fir-rigward tal-kundizzjonijiet ta’ eżenzjoni jew sospensjoni stabbiliti fir-Regolament (KE) Nru 88/97.

(20)

Filwaqt li l-eżenzjoni jew is-sospensjoni ta’ dawn il-Partijiet mid-dazju estiż awtorizzata skont l-Artikolu 7(1) tar-Regolament (KE) Nru 88/97 tibqa’ mhux affettwata, ir-referenzi għal dawn il-Partijiet jenħtieġ li jiġu aġġornati.

Tabella 2

(21)

L-eżami tal-mertu tat-talbiet mill-Partijiet elenkati fit-Tabella 3 għadu għaddej. Sakemm tittieħed deċiżjoni dwar il-mertu tat-talbiet tagħhom, il-pagament tad-dazju estiż għal dawn il-Partijiet huwa sospiż.

(22)

Billi s-sospensjonijiet se japplikaw biss għall-Partijiet speċifikament imsemmija fit-Tabella 3, jenħtieġ li dawn il-partijiet jinnotifikaw lill-Kummissjoni (8) minnufih dwar kwalunkwe bidla f’din id-data (pereżempju wara bidla fl-isem, fil-forma ġuridika jew fl-indirizz jew wara t-twaqqif ta’ entitajiet ġodda ta’ montatura).

(23)

F’każ ta’ bidla fir-referenza, jenħtieġ li l-Parti tipprovdi l-informazzjoni rilevanti kollha, b’mod partikolari dwar kull modifika fl-attivitajiet tagħha marbuta ma’ operazzjonijiet ta’ montatura. Fejn xieraq, il-Kummissjoni se taġġorna r-referenzi ta’ tali Parti.

Tabella 3

(24)

Jenħtieġ li s-sospensjoni tal-pagament tad-dazji għall-Partijiet li qed jiġu eżaminati titneħħa għall-Parti elenkata fit-Tabella 4.

Tabella 4

(25)

Fit-3 ta’ Lulju 2019, il-Kummissjoni rċeviet talba minn dik il-Parti biex tiġi rtirata l-applikazzjoni għal eżenzjoni, waqt li kien għaddej l-eżami tal-merti tagħha u l-pagament tad-dazju estiż kien sospiż.

(26)

Il-Kummissjoni aċċettat l-irtirar u konsegwentement is-sospensjoni tal-pagament tad-dazju estiż jenħtieġ li titneħħa. Id-dazju estiż għandu jinġabar mid-data tal-wasla tat-talba għal eżenzjoni mressqa minn dik il-Parti, li hija d-data li fiha daħlet fis-seħħ is-sospensjoni, jiġifieri l-25 ta’ Ottubru 2018.

(27)

Il-Parti ġiet informata bil-konklużjonijiet tal-Kummissjoni u ngħatat l-opportunità tikkummenta dwarhom. Ma ġie ppreżentat l-ebda kumment.

(28)

Il-Partijiet eżentati elenkati fit-Tabella 5 nnotifikaw lill-Kummissjoni, bejn it-30 ta’ Ġunju 2019 u t-3 ta’ Frar 2020, b’dan li ġej: l-għeluq tal-attivitajiet tagħha (Bicicletas Monty S.A.), u r-rinunzja tal-eżenzjoni mill-pagament ta’ dazju estiż (Gor Kolesa, proizvodnja, d.o.o)

(29)

Konsegwentement, skont il-prinċipju ta’ amministrazzjoni tajba, l-awtorizzazzjoni ta’ eżenzjoni mill-pagament tad-dazju estiż għaż-żewġ Partijiet eżentati elenkati fit-Tabella 5 jenħtieġ li tiġi revokata.

Tabella 5

(1)

Skont l-Artikolu 47(1) tad-Direttiva 2006/43/KE, l-Istati Membri jistgħu jippermettu t-trasferiment ta’ dokumenti ta’ ħidma tal-awditjar jew ta’ dokumenti oħrajn li jinżammu mill-awdituri statutorji jew mid-ditti tal-awditjar approvati minnhom, kif ukoll it-trasferiment ta’ rapporti dwar spezzjonijiet jew investigazzjonijiet li jirrigwardaw l-awditi inkwistjoni lill-awtoritajiet kompetenti ta’ pajjiż terz, dment li dawn l-awtoritajiet ikunu jissodisfaw ir-rekwiżiti li jkunu ġew ddikjarati bħala adegwati mill-Kummissjoni u jkun hemm arranġamenti ta’ ħidma reċiproċi bejniethom u bejn l-awtoritajiet kompetenti tal-Istati Membri kkonċernati.

(2)

Id-Deċiżjoni dwar l-adegwatezza skont l-Artikolu 47(3) tad-Direttiva 2006/43/KE ma tindirizzax ir-rekwiżiti speċifiċi l-oħrajn għat-trasferiment ta’ dokumenti ta’ ħidma tal-awditjar jew ta’ dokumenti oħra miżmuma minn awdituri statutorji jew ditti tal-awditjar kif ukoll tar-rapporti dwar spezzjonijiet jew investigazzjonijiet, bħalma huma l-ftehimiet dwar arranġamenti reċiproki għal ħidma bejn l-awtoritajiet kompetenti stabbiliti fl-Artikolu 47(1)(d) tad-Direttiva 2006/43/KE, jew ir-rekwiżiti għat-trasferiment ta’ data personali stabbiliti fl-Artikolu 47(1)(e) ta’ dik id-Direttiva.

(3)

Il-kooperazzjoni dwar it-trasferiment ta’ dokumenti ta’ ħidma tal-awditjar jew dokumenti oħra miżmuma minn awdituri statutorji jew ditti tal-awditjar kif ukoll tar-rapporti dwar spezzjonijiet jew investigazzjonijiet lill-awtorità kompetenti ta’ pajjiż terz huwa rifless tal-interess pubbliku sostanzjali relatat mat-twettiq ta’ sorveljanza pubblika indipendenti. Għaldaqstant, l-awtoritajiet kompetenti tal-Istati Membri għandhom, fil-qafas tal-arranġamenti ta’ ħidma msemmija fl-Artikolu 47(2) tad-Direttiva 2006/43/KE, jiżguraw li l-awtorità kompetenti tal-Afrika t’Isfel tuża kull dokument ittrasferit lilha skont l-Artikolu 47(1) ta’ din id-Direttiva biex teżerċita l-funzjonijiet tagħha għas-sorveljanza pubblika, għall-garanzija tal-kwalità u għall-investigazzjonijiet fuq l-awdituri u d-ditti tal-awditjar biss.

(4)

Meta jitwettqu kontrolli jew investigazzjonijiet, l-awdituri statutorji u d-ditti tal-awditjar m’għandhomx jitħallew jagħtu aċċess, jew jittrażmettu dokumenti ta’ ħidma tal-awditjar jew dokumenti oħra lill-awtorità kompetenti tal-Afrika t’Isfel taħt xi kundizzjoni oħra li mhix stipulata fl-Artikolu 47 tad-Direttiva 2006/43/KE u f’din id-Deċiżjoni.

(5)

Mingħajr preġudizzju għall-Artikolu 47(4) tad-Direttiva 2006/43/KE, l-Istati Membri għandhom jiżguraw li, għall-iskop ta’ sorveljanza pubblika, għall-garanzija tal-kwalità u għall-investigazzjonijiet fuq l-awdituri statutorji u d-ditti tal-awditjar, il-kuntatti bejn l-awdituri statutorji jew id-ditti tal-awditjar approvati minnhom u mill-awtorità kompetenti tal-Afrika t’Isfel jseħħu permezz tal-awtoritajiet kompetenti tal-Istat Membru kkonċernat.

(6)

B’konformità mal-Artikolu 47(1)(d) tad-Direttiva 2006/43/KE, il-possibbiltà li l-Istati Membri jippermettu t-trasferiment lill-awtorità kompetenti tal-Afrika t’Isfel ta’ dokumenti ta’ ħidma tal-awditjar jew dokumenti oħra miżmuma minn awdituri statutorji jew ditti tal-awditjar approvati minnhom u t-trasferiment tar-rapporti ta’ spezzjoni jew ta’ investigazzjoni hija suġġetta għall-kundizzjoni li l-arranġamenti ta’ ħidma jiġu miftiehma bejn l-awtoritajiet kompetenti kkonċernati.

(7)

L-Istati Membri għandhom jiżguraw li tali arranġamenti ta’ ħidma bejn l-awtoritajiet kompetenti tagħhom u l-awtorità kompetenti tal-Afrika t’Isfel jiġu miftiehma abbażi ta’ reċiproċità u jkunu soġġetti għall-kundizzjonijiet stipulati fl-Artikolu 47(1) u (2) tad-Direttiva 2006/43/KE, fosthom il-protezzjoni ta’ kwalunkwe sigriet professjonali u interess kummerċjali, inkluż il-proprjetà industrijali u intellettwali misjuba f’dokumenti dwar l-entitajiet awditjati u d-ditti tal-awditjar li jkunu awditjaw lil dawk l-entitajiet.

(8)

Meta t-trasferiment ta’ dokumenti ta’ ħidma tal-awditjar jew ta’ dokumenti oħra miżmumin minn awdituri statutorji jew ditti tal-awditjar, u ta’ rapporti dwar spezzjonijiet jew investigazzjonijiet lill-awtoritajiet kompetenti tal-Afrika t’Isfel jkun jinvolvi d-divulgazzjoni ta’ data personali, din id-divulgazzjoni tkun skont il-liġi biss jekk tikkonforma wkoll mar-rekwiżiti tat-trasferimenti internazzjonali tad-data stabbiliti fir-Regolament (UE) 2016/679 tal-Parlament Ewropew u tal-Kunsill (2). Għaldaqstant, l-Artikolu 47(1)(e) tad-Direttiva 2006/43/KE jirrikjedi li l-Istati Membri jiżguraw li t-trasferiment ta’ data personali bejn l-awtoritajiet kompetenti tagħhom u l-awtoritajiet kompetenti tal-Afrika t’Isfel se jkun konformi ma’ kwalunkwe prinċipju u regola applikabbli dwar il-protezzjoni tad-data u, b’mod partikolari, mad-dispożizzjonijiet tal-Kapitolu V tar-Regolament (UE) 2016/679. L-Istati Membri għandhom jiżguraw li jiġu previsti salvagwardji xierqa għat-trasferiment ta’ data personali, f’konformità mal-Artikolu 46 tar-Regolament (UE) 2016/679. Barra minn hekk, l-Istati Membri jenħtieġ li jiżguraw li l-awtoritajiet kompetenti tal-Afrika t’Isfel ma jkomplux jiddivulgaw data personali li tkun tinsab fid-dokumenti trasferiti mingħajr il-qbil minn qabel tal-awtoritajiet kompetenti tal-Istati Membri kkonċernati.

(9)

Il-Bord Regolatorju Indipendenti tal-Awdituri (IRBA) huwa l-awtorità kompetenti tal-Afrika t’Isfel responsabbli għas-sorveljanza pubblika, l-iżgurar tal-kwalità esterna u l-investigazzjonijiet ta’ awdituri u ditti tal-awdituri. Huwa jimplimenta salvagwardji adegwati li jipprojbixxu u jissanzjonaw id-divulgazzjoni tal-informazzjoni kunfidenzjali mill-impjegati attwali jew ta’ qabel lil kull persuna terza jew awtorità. Skont l-Att tal-2005 dwar il-Professjoni tal-Awditjar tal-Afrika t’Isfel u l-Kodiċi ta’ Kondotta tal-IRBA, l-IRBA jista’ jittrasferixxi lill-awtoritajiet kompetenti tal-Istati Membri dokumenti ekwivalenti għal dawk imsemmija fl-Artikolu 47(1) tad-Direttiva 2006/43/KE.

(10)

Id-dokumenti miksuba mill-IRBA fit-twettiq ta’ spezzjonijiet u rapporti ta’ spezzjoni jistgħu jiġu kondiviżi biss bil-kunsens tal-awditur jew tad-ditta tal-awditjar irreġistrati mal-IRBA. Dan ir-rekwiżit jista’ jippreżenta diffikultajiet fl-implimentazzjoni tar-rekwiżiti għall-kooperazzjoni regolatorja stipulata fl-Artikolu 47 tad-Direttiva 2006/43/KE. Għalhekk, il-kooperazzjoni regolatorja bejn l-IRBA u l-awtoritajiet kompetenti tal-Istati Membri għandha tkun soġġetta għal monitoraġġ mill-qrib u għal rieżami mill-Kummissjoni biex jiġi vvalutat jekk ir-rekwiżit ta’ kunsens jippreżentax ostaklu għall-iskambju ta’ informazzjoni fil-prattika.

(11)

L-IRBA hija l-awtorità kompetenti responsabbli biex tikkoopera u tidħol fi ftehimiet bilaterali mal-awtoritajiet kompetenti tal-Istati Membri għat-trasferiment ta’ dokumenti ta’ ħidma tal-awditjar. Il-kunfidenzjalità tad-dokumenti ta’ ħidma tal-awditjar hija żgurata mil-“liġi komuni” tal-Afrika t’Isfel dwar is-segretezza professjonali, li tistabbilixxi dover professjonali ġenerali u obbligu li l-kunfidenzjalità tal-materjal tal-klijent tiġi osservata mill-awditur.

(12)

Skont il-liġijiet u r-regolamenti tal-Afrika t’Isfel, l-IRBA jista’ jkun soġġett għar-rekwiżit li tiġi kondiviża l-informazzjoni msemmija fl-Artikolu 47(1) tad-Direttiva 2006/43/KE b’ “regolatur xieraq” iżda għandu setgħat diskrezzjonali biex jiddeċiedi jekk tali kondiviżjoni ulterjuri tkunx ta’ protezzjoni tal-pubbliku u tal-interess pubbliku. Meta jiffirmaw ftehimiet ta’ ħidma bilaterali mal-IRBA, l-awtoritajiet kompetenti tal-Istati Membri jistgħu jitolbu li l-IRBA jintalab jagħti l-kunsens tiegħu minn qabel jekk l-IRBA jkun imġiegħel jittrasferixxi lil “regolatur xieraq” xi informazzjoni mhux pubblika li tkun waslet matul il-kooperazzjoni. Barra minn hekk, huma għandhom jikkunsidraw rekwiżit li l-IRBA jista’ jaqsam tali informazzjoni biss ma’ dawk l-entitajiet identifikati fil-ftehimiet, u jiddikjara li dawn l-entitajiet għandhom iżommu tali informazzjoni bħala kunfidenzjali u privileġġata. Barra minn hekk, l-ipproċessar ta’ data personali jista’ jsir biss għall-iskop speċifikat imsemmi f’din id-Deċiżjoni, kif iddikjarat fil-premessa 3 u fl-Artikolu 1, u skont il-kundizzjonijiet imsemmija b’mod partikolari taħt il-premessa 8 ta’ din id-Deċiżjoni.

(13)

Skont l-Artikolu 1 tad-Deċiżjoni ta’ Implimentazzjoni tal-Kummissjoni (UE) 2016/1010 (3), diversi awtoritajiet kompetenti ta’ pajjiżi jew territorji terzi, inklużi l-IRBA, ġew iddikjarati adegwati skont it-tifsira tal-Artikolu 47(1)(c) tad-Direttiva 2006/43/KE għall-finijiet ta’ trasferimenti ta’ dokumenti ta’ ħidma tal-awditjar jew ta’ dokumenti oħra u ta’ rapporti ta’ spezzjoni u ta’ investigazzjoni. Skont l-Artikolu 3 tad-Deċiżjoni ta’ Implimentazzjoni (UE) 2016/1010, dik id-Deċiżjoni ta’ Implimentazzjoni ma baqgħetx tapplika fir-rigward tal-IRBA fl-1 ta’ Awwissu 2019.

(14)

Għalkemm l-IRBA ma daħal f’ebda arranġament ta’ ħidma bilaterali ma’ xi waħda mill-awtoritajiet kompetenti tal-Istati Membri qabel il-31 ta’ Lulju 2019, xi Stati Membri wrew interess li jiżviluppaw il-kooperazzjoni mal-IRBA.

(15)

Il-Kumitat tal-Korpi Ewropej għas-Sorveljanza tal-Awditjar (CEAOB) ivvaluta mill-ġdid il-qafas legali fl-Afrika t’Isfel, ibbażat fuq l-Att dwar il-Professjoni tal-Awditjar tal-2005, li ma nbidlitx mindu saret id-Deċiżjoni ta’ Implimentazzjoni (UE) 2016/1010. Filwaqt li titqies il-valutazzjoni teknika tas-CEAOB imsemmija fl-Artikolu 30(7)(c) tar-Regolament (UE) Nru 537/2014 tal-Parlament Ewropew u tal-Kunsill (4), l-IRBA jissodisfa r-rekwiżiti li jenħtieġ li jiġu ddikjarati adegwati għall-finijiet tal-Artikolu 47(1)(c) tad-Direttiva 2006/43/KE.

(16)

Din id-Deċiżjoni ma taffettwax l-arranġamenti ta’ kooperazzjoni msemmijin fl-Artikolu 25(4) tad-Direttiva 2004/109/KE tal-Parlament Ewropew u tal-Kunsill (5).

(17)

Kwalunkwe konklużjoni dwar l-adegwatezza tar-rekwiżiti milħuqa mill-awtoritajiet kompetenti ta’ pajjiż terz skont l-ewwel subparagrafu tal-Artikolu 47(3) tad-Direttiva 2006/43/KE ma tippreġudika l-ebda deċiżjoni li l-Kummissjoni tadotta dwar l-ekwivalenza tas-sorveljanza pubblika, l-aċċertament tal-kwalità, l-investigazzjoni u l-penali għall-awdituri u l-entitajiet tal-awditjar ta’ dak il-pajjiż terz skont l-Artikolu 46(2) ta’ dik id-Direttiva.

(18)

Din id-Deċiżjoni għandha l-għan li tiffaċilita l-kooperazzjoni effettiva bejn l-awtoritajiet kompetenti tal-Istati Membri u l-IRBA. L-għan tagħha huwa li tippermetti lil dawn l-awtoritajiet li jeżerċitaw il-funzjonijiet tagħhom għas-sorveljanza pubblika, għall-garanzija tal-kwalità u għall-investigazzjonijiet, u fl-istess waqt, sabiex tħares id-drittijiet tal-partijiet ikkonċernati. Fil-każ li awtorità kompetenti tiddeċiedi li tidħol f’arranġamenti ta’ ħidma abbażi ta’ reċiproċità mal-IRBA sabiex tippermetti t-trasferiment ta’ dokumenti ta’ ħidma tal-awditjar u dokumenti oħrajn li jkunu miżmuma mill-awdituri jew mid-ditti tal-awditjar statutorji u ta’ rapporti dwar l-ispezzjoni u l-investigazzjoni, l-Istat Membru kkonċernat ikollu l-obbligu jikkomunika lill-Kummissjoni l-arranġamenti ta’ ħidma reċiproċi li jiġu konklużi mal-IRBA sabiex il-Kummissjoni titpoġġa f’pożizzjoni li tivvaluta jekk il-kooperazzjoni tkunx konformi mal-Artikolu 47 tad-Direttiva 2006/43/KE.

(19)

L-għan aħħari tal-kooperazzjoni dwar is-sorveljanza tal-awditjar bejn l-awtoritajiet kompetenti tal-Istati Membri u l-IRBA huwa li tinkiseb fiduċja reċiproka fis-sistemi ta’ sorveljanza ta’ xulxin u biex tissaħħaħ il-konverġenza tal-kwalità tal-awditjar. Tali dipendenza reċiproka u konverġenza msaħħa jkunu bbażati fuq l-ekwivalenza tas-sistemi ta’ sorveljanza tal-awditjar tal-Unjoni u l-Afrika t’Isfel. Konsegwentement, fl-aħħar mill-aħħar it-trasferimenti tad-dokumenti ta’ ħidma tal-awditjar jew ta’ dokumenti oħra miżmuma minn awdituri statutorji jew ditti tal-awditjar kif ukoll ta’ rapporti dwar spezzjonijiet jew investigazzjonijiet għandhom ikunu eċċezzjoni.

(20)

Minħabba li hemm nuqqas ta’ esperjenza prattika f’kooperazzjoni superviżorja mal-IRBA, u għaldaqstant minħabba nuqqas ta’ kapaċità li attwalment jiġi vvalutat jekk ir-rekwiżit biex l-IRBA jikseb il-kunsens minn qabel tal-awditur jew tad-ditta tal-awditjar sabiex jiġu kondiviżi d-dokumenti miksuba fit-twettiq ta’ spezzjonijiet u rapporti ta’ spezzjoni jippreżenta ostakolu għall-iskambju ta’ informazzjoni fil-prattika, din id-Deċiżjoni għandha tkun applikabbli għal perjodu ta’ żmien limitat.

(21)

Minkejja l-limiti ta’ żmien, il-Kummissjoni se timmonitorja fuq bażi regolari l-iżviluppi tas-suq, l-evoluzzjoni tal-oqfsa superviżorji u regolatorji u l-effettività tal-kooperazzjoni superviżorja, filwaqt li tqis l-esperjenza miksuba matul il-kooperazzjoni superviżorja bbażata wkoll fuq il-kontribut tal-Istati Membri. B’mod partikolari, il-Kummissjoni tista’ twettaq reviżjoni speċifika ta’ din id-Deċiżjoni fi kwalunkwe ħin qabel it-tmiem tal-iskadenza tagħha fil-każ li żviluppi rilevanti li jseħħu jagħmluha neċessarja li d-dikjarazzjoni ta’ adegwatezza mogħtija b’din id-Deċiżjoni tiġi vvalutata mill-ġdid. Tali rivalutazzjoni tista’ twassal għar-revoka ta’ din id-Deċiżjoni.

(22)

Il-Kontrollur Ewropew għall-Protezzjoni tad-Data ta l-opinjoni tiegħu fit-3 ta’ Diċembru 2019.

(23)

Il-miżuri stipulati f’din id-Deċiżjoni huma konformi mal-opinjoni tal-Kumitat stabbilit skont l-Artikolu 48(1) tad-Direttiva 2006/43/KE,

(1)

Id-Deċiżjoni ta’ Implimentazzjoni tal-Kummissjoni (UE) 2019/784 (2) tarmonizza l-kundizzjonijiet tekniċi essenzjali għad-disponibbiltà u għall-użu effiċjenti tal-banda ta’ frekwenzi bejn l-24,25 u s-27,5 GHz fl-Unjoni għal sistemi terrestri li huma kapaċi jipprovdu servizzi ta’ komunikazzjoni elettronika tal-broadband mingħajr fili.

(2)

Il-banda ta’ frekwenzi ta’ bejn l-24,25 u s-27,5 GHz (“26 GHz”) ġiet armonizzata globalment għat-Telekomunikazzjoni Mobbli Internazzjonali (3) (IMT) fil-Konferenza Dinjija tal-2019 dwar ir-Radjukomunikazzjoni (WRC-19) permezz ta’ emendi għar-Regolamenti tar-Radju tas-Settur tar-Radjukomunikazzjoni tal-Unjoni Internazzjonali tat-Telekomunikazzjoni (ITU-R).

(3)

Ir-Regolamenti tar-Radju tal-ITU-R, kif emendati (4), introduċew limiti tal-emissjonijiet ’l barra mill-banda (“limiti ta’ protezzjoni”) applikabbli f’żewġ stadji għas-sistemi terrestri mingħajr fili tal-ġenerazzjoni li jmiss (5G) li huma kapaċi jipprovdu servizzi ta’ komunikazzjoni elettronika tal-broadband mingħajr fili fil-banda ta’ frekwenzi ta’ 26 GHz għall-protezzjoni tas-servizz (passiv) ta’ esplorazzjoni tad-dinja bis-satellita (EESS) fil-banda ta’ frekwenzi ta’ bejn it-23,6 u l-24 GHz (5). Dawk il-limiti ta’ protezzjoni huma inqas stretti mil-limiti armonizzati tal-UE (6). L-applikazzjoni tal-limiti tal-ewwel stadju fl-Unjoni jenħtieġ li tiżgura d-disponibbiltà fil-pront ta’ tagħmir tal-5G u tiffaċilita investimenti iktar rapidi fl-infrastruttura tal-5G fis-suq uniku. Il-limiti tat-tieni stadju, flimkien mar-rekwiżit li l-ebda sistema terrestri b’densità għolja għall-provvista ta’ servizzi tal-aċċess mingħajr fili, għandhom jiġu implimentati f’medda ta’ frekwenzi taħt it-23,6 GHz, u għandhom jiżguraw il-protezzjoni adegwata tal-EESS (passiv) kif ukoll is-servizzi satellitari meteoroloġiċi fil-banda ta’ frekwenzi ta’ bejn it-23,6 u l-24 GHz.

(4)

Il-limiti ta’ protezzjoni tal-ewwel stadju applikabbli sal-1 ta’ Settembru 2027 skont ir-Regolamenti tar-Radju tal-ITU-R jistgħu jżidu r-riskju ta’ interferenza li tagħmel ħsara lill-EESS (passiv) li jkun qed jopera globalment (eż. is-sistema Copernicus u ċerti satelliti meteoroloġiċi) skont ir-ritmu tal-iskjerament tas-sistemi terrestri mingħajr fili tal-ġenerazzjoni li jmiss (5G) fil-banda ta’ 26 GHz. Għalhekk, huwa essenzjali li l-limiti ta’ protezzjoni tat-tieni stadju jibdew japplikaw qabel il-bidu tal-iskjerament tal-massa tas-sistemi tal-5G fl-Unjoni, li huwa mistenni mill-2025 ’il quddiem (7).

(5)

L-applikazzjoni kontinwa tal-limiti attwali iktar stretti ta’ protezzjoni fis-suq uniku, armonizzati fil-livell tal-UE, tipprovdi protezzjoni akbar tal-EESS (passiv) fit-territorju kollu tal-Unjoni. Madankollu, l-applikazzjoni ta’ limiti ta’ protezzjoni fl-Unjoni li kienu jvarjaw minn dawk applikati fil-bqija tad-dinja, b’mod partikolari billi kienu iktar stretti, tista’ taffettwa l-livell ta’ disponibbiltà u ta’ għażla tat-tagħmir, li mbagħad jista’ jkollha impatt negattiv fuq l-ispejjeż tat-tagħmir u l-iskala ta’ investimenti f’netwerks b’kapaċità għolja (5G).

(6)

Ir-Riżoluzzjoni 242 tad-WRC-19, li hija parti integrali mir-Regolamenti tar-Radju tal-ITU-R, tirrikonoxxi li l-baned ta’ frekwenzi immedjatament taħt il-banda ta’ frekwenzi ta’ bejn it-23,6 u l-24 GHz mhumiex maħsuba għall-użu ma’ applikazzjonijiet mobbli b’densità għolja. Dan ir-rikonoxximent fil-livell internazzjonali jikkontribwixxi għall-protezzjoni tal-EESS (passiv) f’dik il-banda flimkien mal-limiti ta’ protezzjoni tat-tieni stadju applikabbli għall-banda ta’ frekwenzi ta’ 26 GHz skont ir-Regolamenti tar-Radju tal-ITU-R. Tali miżuri jtejbu l-protezzjoni tal-EESS (passiv) u l-kwalità tad-data satellitari neċessarja għat-tbassir tat-temp. Għal dan l-għan, jenħtieġ li ma jkun hemm l-ebda skjerament ġdid ta’ sistemi terrestri li jkunu kapaċi jipprovdu servizzi ta’ komunikazzjoni elettronika fil-medda ta’ frekwenzi ta’ bejn 22 u 23,6 GHz fl-Unjoni. Barra minn hekk, jistgħu jiġu kkunsidrati azzjonijiet rilevanti biex tiġi żgurata l-protezzjoni tal-EESS (passiv), jekk tali sistemi jkunu jistgħu jiġu skjerati b’densità għolja f’dik il-medda ta’ frekwenzi ’l barra mill-Unjoni.

(7)

Skont l-Artikolu 4(2) tad-Deċiżjoni Nru 676/2002/KE u fid-dawl tal-ħtieġa urġenti li tiġi ppreservata ċ-ċertezza regolatorja fis-suq uniku bl-għan li jiġi implimentat l-Artikolu 54 tad-Direttiva (UE) 2018/1972 tal-Parlament Ewropew u tal-Kunsill (8), il-Kummissjoni talbet lill-Konferenza Ewropea tal-Amministrazzjonijiet Postali u tat-Telekomunikazzjoni (CEPT) (9), biex fil-qafas tal-Mandat tal-Kummissjoni lis-CEPT tiżviluppa kundizzjonijiet tekniċi armonizzati għall-użu tal-ispettru b’appoġġ għall-introduzzjoni tas-sistemi terrestri mingħajr fili tal-ġenerazzjoni li jmiss (5G) fl-Unjoni (10), u tivvaluta u tirrapporta kwalunkwe adattament tal-limiti ta’ protezzjoni skont id-Deċiżjoni ta’ Implimentazzjoni (UE) 2019/784.

(8)

Bħala rispons, is-CEPT ippreżentat input tekniku f’ittra tas-6 ta’ Marzu 2020 (11) li tipprovdi kjarifika għal porzjon mir-rikjesta tal-Kummissjoni u tirrakkomanda wkoll approċċ ippreferut għall-protezzjoni tal-EESS (passiv) fil-banda ta’ frekwenzi ta’ bejn 23,6 u 24 GHz filwaqt li jitqiesu l-eżitu tad-WRC-19 u l-ħtieġa għall-protezzjoni fit-tul tal-EESS (passiv). B’mod partikolari, dan l-approċċ jinkludi data iktar kmieni għat-tranżizzjoni lejn il-limiti tat-tieni stadju, sabiex jiġi evitat ir-riskju tal-iżvilupp tat-tagħmir tal-5G għas-suq tal-massa bl-użu tal-limiti tal-ewwel stadju, kif ukoll ir-rekwiżit ta’ prevenzjoni tal-iskjerament b’densità għolja ta’ sistemi terrestri li jkunu kapaċi jipprovdu servizzi ta’ komunikazzjoni elettronika tal-broadband mingħajr fili fil-banda ta’ frekwenzi ta’ bejn it-22 u t-23,6 GHz.

(9)

Għalhekk, jenħtieġ li d-Deċiżjoni ta’ Implimentazzjoni (UE) 2019/784 tiġi emendata sabiex jiġi ppreservat il-bilanċ tal-politiki tal-Unjoni dwar l-iskjerament tas-sistemi tal-5G u l-monitoraġġ tal-atmosfera u tas-superfiċe tad-dinja, u sabiex jissaħħaħ ir-rwol tal-Unjoni bħala mexxejja fl-ekosistema globali tal-5G tat-tagħmir u tas-servizzi.

(10)

Barra minn hekk, is-CEPT ilha tiżviluppa sensiela ta’ għodod tekniċi (12) biex tindirizza l-iskjerament tal-5G fil-banda ta’ frekwenzi ta’ 26 GHz, abbażi tal-użu tal-ispettru skont ir-reġimi ta’ awtorizzazzjoni għajr id-drittijiet individwali tal-użu bħall-awtorizzazzjoni ġenerali jew awtorizzazzjoni individwali/ġenerali kkombinata. Tipprovdi gwida lill-Istati Membri dwar xi soluzzjonijiet possibbli li jistgħu jiġu implimentati fil-livell nazzjonali f’konformità mal-obbligi tagħhom rigward dik il-banda u filwaqt li jitqies l-iskjerament kontinwu tal-istazzjonijiet satellitari terrestri fl-EESS, is-Servizz tar-Riċerka Spazjali (SRS) u s-Servizz Satellitari Fiss (FSS).

(11)

Il-miżuri previsti f’din id-Deċiżjoni huma skont l-opinjoni tal-Kumitat dwar l-Ispettru tar-Radju stabbilit bid-Deċiżjoni Nru 676/2002/KE,