(1)

Sabiex jiġi żgurat li d-dossiers ta’ reġistrazzjoni jikkonformaw mar-Regolament (KE) Nru 1907/2006, l-Artikolu 41 ta’ dak ir-Regolament jeħtieġ li l-Aġenzija Ewropea għas-Sustanzi Kimiċi (“l-Aġenzija”) tagħżel perċentwali speċifiku ta’ dossiers ta’ reġistrazzjoni għall-kontroll tal-konformità. Dan il-kontroll jista’ jwassal għal abbozz ta’ deċiżjoni li jeħtieġ li r-reġistranti jissottomettu kull informazzjoni meħtieġa biex ir-reġistrazzjonijiet jikkonformaw mar-rekwiżiti ta’ informazzjoni rilevanti.

(2)

Kemm il-valutazzjoni mill-Aġenzija (2) u mill-Kummissjoni (3) dwar l-operat tar-Regolament (KE) Nru 1907/2006 kif ukoll l-istudju mwettaq mill-awtoritajiet kompetenti Ġermaniżi (4) jindikaw li x’aktarx għadd sinifikanti ta’ dossiers ta’ reġistrazzjoni mhumiex konformi, li jxekkel il-ksib effettiv tal-objettivi tar-Regolament (KE) Nru 1907/2006.

(3)

Fir-“Rapport Ġenerali dwar l-operat tar-REACH u rieżami ta’ ċerti elementi”, il-Kummissjoni identifikat in-nuqqas ta’ konformità tad-dossiers ta’ reġistrazzjoni bħala kwistjoni li teħtieġ azzjoni urġenti.

(4)

Wara l-aħħar skadenza għar-reġistrazzjoni, huwa possibbli li jkun hemm ippjanar aħjar minn qabel tal-kontrolli tal-konformità abbażi tal-għarfien imtejjeb tal-għadd effettiv ta’ sustanzi rreġistrati u tal-esperjenza miksuba mill-Aġenzija b’rabta mal-valutazzjoni tad-dossier.

(5)

Wara konsultazzjoni mal-Aġenzija kif riflessa fil-pjan ta’ azzjoni konġunt dwar il-valutazzjoni tar-REACH (5) maqbul mis-servizzi tal-Kummissjoni u mill-ECHA, li talab il-Kunsill fil-Konklużjonijiet tiegħu tas-26 ta’ Ġunju 2019 (6), il-Kummissjoni tqis li, biex tissaħħaħ il-konformità mar-rekwiżiti ta’ informazzjoni rilevanti, il-perċentwali minimu tad-dossiers ta’ reġistrazzjoni li jridu jiġu kkontrollati għall-konformità mal-elementi kollha elenkati fl-Artikolu 41(1) tar-Regolament (KE) Nru 1907/2006 jenħtieġ li jiżdied minn 5 % għal 20 % tar-reġistrazzjonijiet totali li l-Aġenzija tirċievi għal kull limitu ta’ tunnellaġġ sal-iskadenza tal-2018. Dan il-perċentwali jitqies realistiku għall-Aġenzija minħabba r-riżorsi li għandha.

(6)

Fil-pjan ta’ azzjoni konġunt maqbul mis-servizzi tal-Kummissjoni u mill-ECHA ġie maqbul li l-mira ta’ 20 % jenħtieġ li tinkiseb sal-31 ta’ Diċembru 2023, għar-reġistrazzjonijiet fil-limiti tat-tunnellaġġ ta’ 100 tunnellata jew aktar fis-sena, u sal-31 ta’ Diċembru 2027 għar-reġistrazzjonijiet fil-limiti tat-tunnellaġġ ta’ anqas minn 100 tunnellata fis-sena, li jiġu sottomessi sal-iskadenza tal-2018.

(7)

Għaldaqstant, jenħtieġ li r-Regolament (KE) Nru 1907/2006 jiġi emendat skont dan.

(8)

Il-miżuri previsti f’dan ir-Regolament huma skont l-opinjoni tal-Kumitat stabbilit skont l-Artikolu 133 tar-Regolament (KE) Nru 1907/2006,

(1)

Fit-12 ta’ Awwissu 2019, il-Kummissjoni Ewropea (“il-Kummissjoni”) bdiet investigazzjoni anti-dumping fir-rigward tal-importazzjonijiet fl-Unjoni ta’ċerti pjanċi u kojls tal-azzar inossidabbli llaminati bis-sħana (“SSHR” jew “il-prodott li qed jiġi investigat”) li joriġinaw mill-Indoneżja, mir-Repubblika tal-Poplu taċ-Ċina (“PRC”) u mit-Tajwan (“il-pajjiżi kkonċernati”), abbażi tal-Artikolu 5 tar-Regolament (UE) 2016/1036. Hija ppubblikat Notifika ta’ Bidu f’Il-Ġurnal Uffiċjali tal-Unjoni Ewropea (2) (“in-Notifika ta’ Bidu”).

(2)

Il-Kummissjoni bdiet l-investigazzjoni wara lment ippreżentat fit-28 ta’ Ġunju 2019 mill-Assoċjazzjoni Ewropea tal-Azzar, (“il-Eurofer” jew “l-ilmentatur”) f’isem erba’ produtturi tal-Unjoni li jirrappreżentaw il-produzzjoni kollha tal-Unjoni tal-prodott li qed jiġi investigat. L-ilment kien jinkludi evidenza ta’ dumping mill-pajjiżi kkonċernati u dannu materjali li rriżulta minnu li kienu biżżejjed biex jiġġustifikaw il-bidu tal-investigazzjoni.

(3)

Il-Kummissjoni għamlet l-importazzjonijiet tal-prodott ikkonċernat soġġetti għal reġistrazzjoni skont l-Artikolu 14(5) tar-Regolament bażiku bir-Regolament ta’ Implimentazzjoni tal-Kummissjoni (UE) 2020/104 (3).

(4)

Fin-Notifika ta’ Bidu, il-Kummissjoni stiednet lill-partijiet interessati jagħmlu kuntatt magħha sabiex jipparteċipaw fl-investigazzjoni. Barra minn hekk, il-Kummissjoni għarrfet speċifikament lill-ilmentatur, lill-prodotturi esportaturi magħrufa fil-pajjiżi kkonċernati u lill-awtoritajiet tal-pajjiżi kkonċernati, lill-importaturi u lill-utenti magħrufa fl-Unjoni dwar il-bidu tal-investigazzjoni, u stednithom jipparteċipaw.

(5)

Il-partijiet interessati kellhom l-opportunità li jikkummentaw dwar il-bidu tal-investigazzjoni u jitolbu seduta ta’ smigħ mal-Kummissjoni u/jew mal-Uffiċjal tas-Seduta fil-proċedimenti kummerċjali. Il-Kummissjoni rċeviet kummenti li huma indirizzati fit-Taqsimiet 2.3 u 5.2.3.

(6)

Fin-Notifika ta’ Bidu, il-Kummissjoni ddikjarat li kien hemm il-possibbiltà li tagħżel kampjun minn fost il-partijiet interessati skont l-Artikolu 17 tar-Regolament bażiku.

(7)

Fin-Notifika ta’ Bidu, il-Kummissjoni sostniet li kienet iddeċidiet li tillimita għal għadd raġonevoli l-produtturi tal-Unjoni li kienu se jiġu investigati billi tapplika l-kampjunar u li kienet għażlet b’mod provviżorju kampjun ta’ produtturi tal-Unjoni. Il-Kummissjoni għażlet il-kampjun provviżorju abbażi tal-volumi tal-produzzjoni u tal-bejgħ fl-Unjoni rrappurtati mill-produtturi tal-Unjoni fil-kuntest tal-analiżi tal-valutazzjoni permanenti ta’ qabel il-bidu, filwaqt li qieset ukoll il-pożizzjoni ġeografika tagħhom. Il-kampjun provviżorju stabbilit b’dan il-mod kien jikkonsisti minn tliet produtturi tal-Unjoni li jammontaw għal aktar minn 78 % tal-produzzjoni u 88 % tal-bejgħ fl-Unjoni tal-prodott simili, u li jinsabu fi tliet Stati Membri differenti. Id-dettalji ta’ dan il-kampjun provviżorju saru disponibbli fil-fajl għall-ispezzjoni mill-partijiet interessati, bil-possibbiltà li jagħmlu l-kummenti tagħhom. Ma sar l-ebda kumment.

(8)

B’riżultat ta’ dan ta’ hawn fuq, il-kampjun provviżorju tal-produtturi tal-Unjoni ġie kkonfermat. Dan kien jikkonsisti minn Aperam Belgium (“Aperam”), Acciai Speciali Terni S.p.A. (“AST”) u OTK Stainless Oy (“OTK”). Il-kampjun definittiv huwa rappreżentattiv tal-industrija tal-Unjoni.

(9)

Biex tiddeċiedi jekk kienx hemm bżonn li jittieħed kampjun u, jekk iva, biex tagħżel kampjun, il-Kummissjoni talbet lill-importaturi kollha mhux relatati biex jipprovdu l-informazzjoni speċifikata fin-Notifika ta’ Bidu.

(10)

Żewġ importaturi mhux relatati ppreżentaw lilhom infushom bħala partijiet interessati u pprovdew l-informazzjoni mitluba. Minħabba l-għadd żgħir ta’ tweġibiet li waslu, il-kampjunar ma kienx meħtieġ. Iż-żewġ importaturi kienu mistiedna jwieġbu kwestjonarju.

(11)

Wara li kkunsidrat l-għadd ta’ produtturi magħrufa tal-prodott ikkonċernat fil-pajjiżi kkonċernati, in-Notifika ta’ Bidu pprevediet biss il-kampjunar fil-PRC u għalhekk, il-Kummissjoni talbet lill-produtturi esportaturi Ċiniżi kollha biex jipprovdu l-informazzjoni speċifikata fin-Notifika ta’ Bidu biex tiddeċiedi jekk kienx meħtieġ kampjunar u, jekk iva, biex tagħżel kampjun.

(12)

Barra minn hekk, il-Kummissjoni talbet lill-Ambaxxata tar-Repubblika tal-Indoneżja fi Brussell, lill-Missjoni tar-Repubblika tal-Poplu taċ-Ċina għall-Unjoni Ewropea u lill-Uffiċċju Rappreżentattiv ta’ Tajpej fl-Unjoni Ewropea sabiex jidentifikaw u/jew jikkuntattjaw lil produtturi esportaturi oħrajn, jekk disponibbli, li jistgħu jkunu interessati li jipparteċipaw fl-investigazzjoni.

(13)

Kien hemm biss żewġ produtturi esportaturi fl-Indoneżja li kienu magħrufa lill-Kummissjoni fil-bidu tal-investigazzjoni. Għalhekk, il-Kummissjoni ma kienx beħsiebha tagħżel kampjun. L-ebda produttur esportatur ieħor ma ppreżenta ruħu. Konsegwentement, il-Kummissjoni wettqet l-investigazzjoni dwar iż-żewġ produtturi esportaturi fl-Indoneżja.

(14)

Ħames produtturi esportaturi fil-PRC ipprovdew l-informazzjoni mitluba fin-Notifika ta’ Bidu u qablu li jiġu inklużi fil-kampjun. F’konformità mal-Artikolu 17(1) tar-Regolament bażiku, il-Kummissjoni għażlet kampjun ta’ tliet kumpaniji, li raġonevolment setgħu jiġu investigati fiż-żmien disponibbli. Il-bażi għall-għażla tal-kampjun kienet l-akbar volumi ta’ esportazzjonijiet lejn l-Unjoni.

(15)

F’konformità mal-Artikolu 17(2) tar-Regolament bażiku, il-produtturi esportaturi magħrufa u kkonċernati kollha, u l-awtoritajiet tal-PRC, ġew ikkonsultati dwar l-għażla tal-kampjun. Ma sar l-ebda kumment.

(16)

Wara ż-żjarat ta’ verifika, minħabba n-nuqqasijiet fl-informazzjoni pprovduta minn produttur esportatur Ċiniż inkluż fil-kampjun, il-Kummissjoni ddeċidiet li tinjora l-informazzjoni mogħtija minn dan il-produttur abbażi tal-Artikolu 18(1) tar-Regolament bażiku (4).

(17)

B’riżultat ta’ dan ta’ hawn fuq, il-kampjun tal-produtturi esportaturi Ċiniżi tnaqqas għal żewġ kumpaniji, li jkopru madwar 92 % tal-esportazzjonijiet Ċiniżi tal-prodott ikkonċernat lejn l-Unjoni fil-perjodu ta’ investigazzjoni, li xorta kien meqjus bħala livell għoli ta’ kooperazzjoni.

(18)

Fin-Notifika ta’ Bidu, il-kampjunar ma kienx previst għat-Tajwan peress li kien hemm produttur esportatur wieħed biss li kienet taf bih il-Kummissjoni. Madankollu, ftit qabel il-bidu, il-Kummissjoni ġiet infurmata mill-Uffiċċju Rappreżentattiv ta’ Tajpej fl-Unjoni Ewropea li jista’ jkun hemm total ta’ 12-il produttur esportatur addizzjonali tal-prodott ikkonċernat fit-Tajwan. Għalhekk, mal-bidu, il-Kummissjoni staqsiet lit-13-il parti biex iwieġbu għall-mistoqsijiet dwar il-kampjunar u, sussegwentement, biex iwieġbu għal xi mistoqsijiet oħra maħsuba biex jiċċaraw ir-rwol u l-attivitajiet preċiżi tagħhom. Abbażi ta’ dan, il-Kummissjoni setgħet eventwalment tidentifika żewġ produtturi esportaturi tal-prodott ikkonċernat fit-Tajwan. Għalhekk, ma kienx meħtieġ li jittieħdu kampjuni.

(19)

Iż-żewġ produtturi esportaturi kienu jirrappreżentaw madwar 56 % tal-volum totali tal-esportazzjonijiet mit-Tajwan lejn l-Unjoni. It-tweġibiet ta’ sebgħa mill-partijiet Tajwaniżi kkuntattjati mill-Kummissjoni mal-bidu wrew li dawn il-kumpaniji kienu fil-fatt ċentri ta’ servizz indipendenti u/jew negozjanti u li l-biċċa l-kbira tal-esportazzjonijiet Tajwaniżi, jekk mhux kollha, li kien fadal lejn l-Unjoni eventwalment saru minn dawn il-partijiet. Dawn iċ-ċentri ta’ servizz ma kellhom l-ebda faċilità ta’ laminazzjoni bis-sħana jew ta’ laminazzjoni bil-kesħa u għalhekk ma kinux jikkwalifikaw bħala produttur tal-prodott ikkonċernat. Barra minn hekk, il-valur miżjud tagħhom kien żgħir meta mqabbel mal-kost tal-inputs tagħhom. Madankollu, fid-dawl tat-tweġibiet li waslu mingħandhom dwar il-mistoqsijiet imsemmija fil-premessa (18) ta’ hawn fuq, il-Kummissjoni segwiet billi pprovdiet lil dawn il-partijiet kwestjonarju konċiż sabiex tikseb fehim tajjeb tal-funzjonament tal-bejgħ domestiku u tal-esportazzjoni Tajwaniż tal-prodott li qed jiġi investigat.

(20)

Oriġinarjament, erba’ produtturi esportaturi Ċiniżi li bagħtu lura l-formola tal-kampjunar talbu eżami individwali skont l-Artikolu 17(3) tar-Regolament bażiku. Il-Kummissjoni għamlet il-kwestjonarju disponibbli online fil-jum tal-bidu (5). Barra minn hekk, meta ħabbret il-kampjun, il-Kummissjoni infurmat lill-produtturi esportaturi li ma kinux inklużi fil-kampjun li kienu meħtieġa jipprovdu tweġiba għall-kwestjonarju jekk kienu jixtiequ li jiġu eżaminati individwalment. Madankollu, l-ebda waħda mill-kumpaniji ma pprovdiet tweġiba għall-kwestjonarju. Għalhekk, ma ngħatat l-ebda konċessjoni għal eżami individwali.

(21)

Il-Kummissjoni bagħtet kwestjonarju dwar l-eżistenza ta’ distorsjonijiet sinifikanti fil-PRC fis-sens tal-Artikolu 2(6a)(b) tar-Regolament bażiku lill-Gvern tar-Repubblika tal-Poplu taċ-Ċina (“GOC”).

(22)

Barra minn hekk, fl-ilment l-ilmentatur ipprovda biżżejjed evidenza prima facie ta’ distorsjonijiet tal-materja prima fl-Indoneżja u l-PRC fir-rigward tal-prodott ikkonċernat. Għalhekk, kif tħabbar fin-Notifika ta’ Bidu, l-investigazzjoni kopriet dawk id-distorsjonijiet fil-materja prima biex tiddetermina jekk għandhomx jiġu applikati d-dispożizzjonijiet tal-Artikolu 7(2a) u 7(2b) tar-Regolament bażiku fir-rigward tal-Indoneżja u l-PRC. Għal din ir-raġuni, il-Kummissjoni bagħtet kwestjonarji addizzjonali f’dan ir-rigward lill-Gvern tal-Indoneżja (“GOI”) u lill-GOC.

(23)

Il-Kummissjoni bagħtet kwestjonarji lit-tliet produtturi tal-Unjoni inklużi fil-kampjun, lill-ilmentatur, liż-żewġ importaturi mhux relatati u liż-żewġ utenti li kienu ppreżentaw ruħhom, lid-disa’ produtturi esportaturi fil-pajjiżi kkonċernati u lill-operaturi ekonomiċi l-oħra kollha li ppreżentaw ruħhom u talbu kwestjonarju. L-istess kwestjonarji kienu wkoll disponibbli onlajn (6) fil-jum tal-bidu.

(24)

Waslu tweġibiet għall-kwestjonarju mingħand it-tliet produtturi tal-Unjoni inklużi fil-kampjun, żewġ importaturi mhux relatati, żewġ utenti, iż-żewġ produtturi esportaturi magħrufa mill-Indoneżja, it-tliet produtturi esportaturi inklużi fil-kampjun mill-PRC, iż-żewġ produtturi esportaturi fit-Tajwan u ċentru ta’ servizz mhux relatat fit-Tajwan. Waslet ukoll tweġiba għall-kwestjonarju mingħand il-GOI. Ma waslet l-ebda tweġiba mill-GOC għal xi waħda miż-żewġ kwestjonarji mibgħuta.

(25)

Il-Kummissjoni fittxet u vverifikat l-informazzjoni kollha li qieset meħtieġa għal determinazzjoni provviżorja ta’ dumping, id-dannu li jirriżulta u l-interess tal-Unjoni. Iż-żjarat ta’ verifika skont l-Artikolu 16 tar-Regolament bażiku saru fil-bini tal-partijiet li ġejjin:

(26)

Fir-rigward tal-proċedura tal-Artikoli 7(2a) u 7(2b) tar-Regolament bażiku, saret konsultazzjoni mal-GOI.

(27)

L-investigazzjoni tad-dumping u d-dannu kopriet il-perjodu bejn l-1 ta’ Lulju 2018 u t-30 ta’ Ġunju 2019 (“il-perjodu ta’ investigazzjoni”). L-eżami tax-xejriet rilevanti għall-valutazzjoni tad-dannu kopra l-perjodu mill-1 ta’ Jannar 2016 sat-tmiem tal-perjodu ta’ investigazzjoni (“il-perjodu taħt kunsiderazzjoni”).

(28)

Fid-dawl tal-evidenza suffiċjenti disponibbli fil-bidu tal-investigazzjoni li indikat l-eżistenza ta’ distorsjonijiet sinifikanti fis-sens tal-Artikolu 2(6a)(b) tar-Regolament bażiku fir-rigward tal-PRC, il-Kummissjoni qieset li kien xieraq li tiftaħ l-investigazzjoni fir-rigward tal-produtturi esportaturi minn dan il-pajjiż b’kunsiderazzjoni tal-Artikolu 2(6a) tar-Regolament bażiku.

(29)

Konsegwentement, sabiex tiġbor id-data meħtieġa għall-applikazzjoni eventwali tal-Artikolu 2(6a) tar-Regolament bażiku, fin-Notifika ta’ Bidu l-Kummissjoni stiednet lill-produtturi esportaturi kollha fil-PRC sabiex jipprovdu l-informazzjoni mitluba fl-Anness III tan-Notifika ta’ Bidu rigward l-inputs użati għall-produzzjoni tal-SSHR. Ħames produtturi esportaturi Ċiniżi ppreżentaw l-informazzjoni rilevanti.

(30)

Sabiex tikseb l-informazzjoni li tqis bħala meħtieġa għall-investigazzjoni tagħha fir-rigward tal-allegati distorsjonijiet sinifikanti skont it-tifsira tal-Artikolu 2(6a)(b) tar-Regolament bażiku, il-Kummissjoni bagħtet kwestjonarju lill-GOC kif deskritt fil-premessa (21). Ma waslet l-ebda tweġiba mingħand il-GOC. Sussegwentement, il-Kummissjoni informat lill-GOC li kienet se tuża l-fatti disponibbli fis-sens tal-Artikolu 18 tar-Regolament bażiku biex tiddetermina l-eżistenza tad-distorsjonijiet sinifikanti fil-PRC.

(31)

Fin-Notifika ta’ Bidu, il-Kummissjoni stiednet ukoll lill-partijiet interessati kollha jressqu l-fehmiet tagħhom, jippreżentaw informazzjoni u jipprovdu evidenza ta’ sostenn fir-rigward tal-adegwatezza tal-applikazzjoni tal-Artikolu 2(6a) tar-Regolament bażiku fi żmien 37 jum mid-data tal-pubblikazzjoni ta’ din in-Notifika f’Il-Ġurnal Uffiċjali tal-Unjoni Ewropea. Żewġ produtturi esportaturi għamlu kummenti dwar l-eżistenza ta’ distorsjonijiet sinifikanti.

(32)

Fin-Notifika ta’ Bidu, il-Kummissjoni speċifikat ukoll li, fid-dawl tal-evidenza disponibbli, jista’ jkollha bżonn tagħżel pajjiż rappreżentattiv xieraq skont l-Artikolu 2(6a)(a) tar-Regolament bażiku sabiex jiġi ddeterminat il-valur normali abbażi ta’ prezzijiet jew ta’ valuri referenzjarji mingħajr distorsjoni.

(33)

Fid-9 ta’ Settembru 2019, il-Kummissjoni ppubblikat l-ewwel nota għall-fajl (“in-Nota tad-9 ta’ Settembru”) biex tikseb l-opinjonijiet tal-partijiet interessati dwar is-sorsi rilevanti li l-Kummissjoni tista’ tuża biex tiddetermina l-valur normali, skont it-tieni paragrafu tal-Artikolu 2(6a)(e) tar-Regolament bażiku. F’din in-nota, il-Kummissjoni pprovdiet lista tal-fatturi tal-produzzjoni kollha, bħall-materjali, l-enerġija u x-xogħol użati fil-produzzjoni tal-prodott ikkonċernat mill-produtturi esportaturi. Barra minn hekk, abbażi tal-kriterji li jiggwidaw l-għażla ta’ prezzijiet jew valuri referenzjarji mingħajr distorsjoni, il-Kummissjoni identifikat pajjiżi rappreżentattivi possibbli (jiġifieri l-Brażil, il-Malasja, l-Afrika t’Isfel u t-Turkija).

(34)

Il-Kummissjoni tat lill-partijiet interessati kollha l-opportunità li jikkummentaw. Il-Kummissjoni rċeviet kummenti mingħand żewġ produtturi esportaturi Ċiniżi u l-ilmentatur. Il-GOC ma pprovda l-ebda kumment.

(35)

Il-Kummissjoni indirizzat il-kummenti li waslu fit-tieni nota dwar is-sorsi għad-determinazzjoni tal-valur normali tal-10 ta’ Ottubru 2019 (“in-Nota tal-10 ta’ Ottubru”). Il-Kummissjoni stabbiliet ukoll lista provviżorja ta’ fatturi tal-produzzjoni u kkonkludiet li, f’dak l-istadju, il-Brażil kien l-aktar pajjiż rappreżentattiv xieraq skont l-ewwel inċiż tal-Artikolu 2(6a)(a) tar-Regolament bażiku. Il-Kummissjoni stiednet lill-partijiet interessati biex jagħtu l-kummenti tagħhom, iżda ma rċeviet l-ebda kumment.

(36)

Il-prodott ikkonċernat minn din l-investigazzjoni huwa prodotti tal-azzar inossidabbli llaminati ċatti, kemm jekk ikunu f’kojls u kemm jekk ma jkunux (inklużi l-prodotti maqtugħa skont id-daqs u li jkunu strixxi dojoq), li ma jinħadmux aktar wara li jiġu llaminati bis-sħana u li jeskludu prodotti, mhux f’kojls, b’wisa’ ta’ 600 mm jew aktar u ta’ ħxuna li taqbeż 10 mm, li bħalissa jaqgħu taħt il-kodiċijiet SA 7219 11, 7219 12, 7219 13, 7219 14, 7219 22, 7219 23, 7219 24, 7220 11 u 7220 12 u li joriġinaw mir-Repubblika tal-Poplu taċ-Ċina, mit-Tajwan u mill-Indoneżja. Il-kodiċijiet SA huma mogħtija biss bħala informazzjoni.

(37)

L-investigazzjoni wriet li l-prodotti li ġejjin għandhom l-istess karatteristiċi fiżiċi, kimiċi u tekniċi bażiċi kif ukoll l-istess użi bażiċi:

(38)

F’dan l-istadju, il-Kummissjoni għalhekk iddeċidiet li dawk il-prodotti huma prodotti simili fis-sens tal-Artikolu 1(4) tar-Regolament bażiku.

(39)

Marcegaglia u ż-żewġ produtturi esportaturi fl-Indoneżja sostnew li l-kojls suwed jenħtieġ li jiġu esklużi mill-ambitu tal-investigazzjoni. Huma sostnew li din l-investigazzjoni tkopri żewġ tipi differenti ta’ kojls tal-azzar inossidabbli, jiġifieri kojls bojod u suwed, u li għalkemm kemm il-kojls suwed kif ukoll dawk bojod huma kklassifikati taħt l-istess kodiċijiet SA (kif iddefinit fin-Notifika ta’ Bidu), il-proprjetajiet u l-użi intenzjonati tagħhom ivarjaw. Fir-rigward tal-proprjetajiet fiżiċi u kimiċi, Marcegaglia fost l-oħrajn sostniet li, f’termini ta’ reżistenza għall-korrużjoni, il-kojls suwed saħansitra lanqas ma huma prodotti tal-azzar inossidabbli. Skont Marcegaglia, dawn huma prodotti nofshom lesti, li la kienu ttemprati u lanqas imnaddfa.

(40)

Barra minn hekk, skont Marcegaglia, l-SSHR suwed huma magħmula permezz ta’ laminazzjoni fis-sħana ta’ ċangaturi u huma prinċipalment, jekk mhux esklussivament, fornuti lil rilaminaturi. Marcegaglia argumentat li s-SSHR suwed jistgħu fil-fatt jintużaw biss għal ipproċessar ulterjuri (rilaminazzjoni) f’kojls imnaddfa jew f’kojls tal-azzar inossidabbli illaminati fil-kiesaħ u li hemm biss żewġ rilaminaturi fl-Unjoni, jiġifieri Marcegaglia u parti oħra ħafna iżgħar. Hija ddikjarat li l-SSHR suwed, bħala kategorija tal-prodott, huma iktar simili għal ċangaturi tal-azzar inossidabbli milli għall-SSHR bojod minħabba n-natura intrinsika tagħhom ta’ prodott nofsu lest.

(41)

Minbarra dan, skont Marcegaglia, l-SSHR bojod kienu prodott lest tal-azzar inossidabbli magħmul bit-temprar u t-tindif tal-SSHR suwed. Dawn tal-aħħar huma għalhekk il-materja prima indispensabbli għall-manifattura tal-SSHR bojod daqskemm iċ-ċangaturi huma l-materja prima indispensabbli għall-manifattura tal-SSHR suwed. Bħala tali, l-SSHR bojod jistgħu jintużaw mingħajr aktar ipproċessar mill-utenti finali għal applikazzjoni industrijali diretta (eż. l-industriji tal-karozzi, tal-makkinarju u petrokimiċi). Huma jiġu fornuti lill-kumpaniji tal-qtugħ tal-pjanċi, lill-manifatturi tat-tubi u lill-kumpaniji ta’ laminazzjoni bil-kesħa għal aktar ipproċessar.

(42)

Fl-aħħar nett, il-partijiet ikkonċernati sostnew li l-industrija tal-Unjoni mhijiex interessata li tforni l-koljs suwed fis-suq minħabba li dawn jippreferu jużaw huma stess il-kojls suwed li jipproduċu biex ikomplu jikkonvertuhom f’kojls bojod u prodotti oħra li jiġu wara fil-katina tal-produzzjoni. Għalhekk, skont huma, is-sigurtà tal-provvista tal-kojls suwed tkun f’riskju li kieku dawn jiġu inklużi fil-kamp ta’ applikazzjoni tal-miżuri, jekk ikun il-każ.

(43)

Eurofer opponiet il-pretensjonijiet imsemmija fil-premessi (39) sa (42). Fost l-oħrajn din insistiet li kemm il-kojls suwed kif ukoll dawk bojod huma prodotti ċatti tal-azzar inossidabbli bl-istess karatteristiċi fiżiċi u kompożizzjoni kimika għall-istess gradi, immanifatturati mill-istess materja prima (essenzjalment il-kromju, ir-ruttam tal-azzar inossidabbli u n-nikil) u li l-valur miżjud għall-ipproċessar tal-kojls suwed f’kojls bojod huwa limitat u jirrappreżenta inqas minn 8 % tal-kost tal-produzzjoni ta’ kojl abjad. Eurofer irreferiet ukoll għal kapaċità kumplessiva mhux użata ta’ aktar minn 2 miljun tunnellata fost il-produtturi tal-Unjoni u indikat li l-industrija tal-Unjoni tista’ u hija lesta tissodisfa d-domanda kollha tal-SSHR fis-suq tal-Unjoni, irrispettivament mit-tip ta’ prodott meħtieġ. Barra minn hekk, din ippreżentat li, fuq is-sit web tagħhom, diversi produtturi tal-Unjoni nnotifikaw li jistgħu jfornu kojls suwed u li huma lesti jagħmlu dan. B’konsegwenza ta’ dan, din sostniet li s-sigurtà tal-provvista tal-kojls suwed mhijiex f’riskju iżda indikat ir-riskju ta’ ċirkomvenzjoni jekk jiġu esklużi l-kojls suwed.

(44)

Il-Kummissjoni analizzat dawn id-dikjarazzjonijiet. Fir-rigward tal-karatteristiċi tal-prodott, l-investigazzjoni sabet li l-kojls suwed u l-kojls bojod għandhom l-istess kompożizzjoni kimika. B’mod partikolari, il-kojls suwed huma mmanifatturati mill-istess materjal bażiku u għalhekk għandhom l-istess karatteristiċi bħall-kojls bojod skont il-grad tal-azzar. Minn dan isegwi li l-kojls suwed jaqgħu taħt l-istess intestaturi tan-Nomenklatura Magħquda bħall-kojls bojod koperti mill-proċediment, li jibdew b’7219 jew 7220. Dawn iż-żewġ intestaturi jaqgħu taħt it-Taqsima “azzar inossidabbli” fil-Kapitolu 72 (Ħadid u azzar) tan-Nomenklatura Magħquda. Il-kojls suwed u bojod għandhom ukoll l-istess proprjetajiet fiżiċi peress li għandhom dimensjonijiet simili. Il-kojls suwed u bojod huma interskambjabbli għal rilaminaturi b’faċilitajiet ta’ rikottura u ta’ purifikazzjoni tal-metall, li tabilħaqq ifisser li hemm riskju ta’ ċirkomvenzjoni jekk il-kojls suwed jiġu esklużi mill-ambitu tal-prodott ikkonċernat.

(45)

Fir-rigward tal-allegazzjoni ta’ nuqqas ta’ interess mill-industrija tal-Unjoni biex tbigħ il-kojls suwed, din il-pretensjoni ma kienet sostanzjata bl-ebda evidenza. Għall-kuntrarju ta’ dan, l-investigazzjoni wriet li l-industrija tal-Unjoni għandha kapaċità żejda sinifikanti, li hija disponibbli b’mod ugwali għall-kojls suwed u bojod, u li, minkejja ċ-ċirkostanzi diffiċli tas-suq, fil-perjodu ta’ investigazzjoni din biegħet volumi sinifikanti ħafna ta’ kojls suwed fis-suq tal-Unjoni, inkluż (iżda mhux esklussivament) lil Marcegaglia. Dan juri li hija għandha interess ġenwin biex taqdi lis-suq.

(46)

Abbażi ta’ dan, hija kkonkludiet b’mod provviżorju li l-kojls suwed u bojod jikkondividu l-istess karatteristiċi fiżiċi u kimiċi bażiċi u jiffurmaw grupp wieħed ta’ prodotti. Għalhekk, id-dikjarazzjonijiet imsemmija fil-premessi (39) sa (42) ġew miċħuda.

(47)

Diversi partijiet sostnew li l-SSHR ta’ wisa’ ta’ 1 600 mm u aktar, inklużi SSHR ta’ wisa’ ta’ 2 000 mm, jenħtieġ li jiġu esklużi mill-ambitu tal-investigazzjoni minħabba li l-introduzzjoni ta’ miżuri anti-dumping fuq dan il-materjal speċjali tkompli tnaqqas il-possibbiltà ta’ xiri ta’ materjal li diġà huwa diffiċli ħafna li jinkiseb. Dan jillimita wkoll il-kompetittività tagħhom kontra produtturi mhux tal-Unjoni ta’ tubi wweldjati b’dijametru kbir.

(48)

Din id-dikjarazzjoni ġiet miċħuda. L-SSHR ta’ wisa’ ta’ 1 600 mm jew aktar għandhom l-istess karatteristiċi kimiċi bħal SSHR iżgħar. Għandhom ukoll l-istess karatteristiċi fiżiċi bażiċi ħlief għall-wisa’. SSHR ta’ wisa’ akbar jistgħu faċilment jiġu ttrasformati f’SSHR iżgħar permezz ta’ operazzjonijiet ta’ qtugħ sempliċi. Għalhekk hemm riskju ta’ ċirkomvenzjoni jekk il-kojls ikbar jiġu esklużi mill-kamp ta’ applikazzjoni tal-prodott ikkonċernat.

(49)

Il-Konsorzju għall-importazzjonijiet ta’ SST HRF (7) sostna li l-kojls bi ħxuna ta’ aktar minn 10 mm jenħtieġ li jiġu esklużi, peress li hemm biss żewġ impjanti fl-Unjoni li jistgħu jipproduċu SSHR bi ħxuna ta’ aktar minn 13-il mm. Il-Kummissjoni ma tara l-ebda raġuni valida biex teskludi dawn il-kojls, li mingħajr l-ebda dubju għandhom l-istess karatteristiċi fiżiċi u kimiċi bażiċi u l-istess użi bħat-tipi l-oħra kollha ta’ prodotti fl-ambitu tal-prodott. Barra minn hekk u kif indikat mill-Konsorzju nnifsu, l-industrija tal-Unjoni għandha l-kapaċità li tissupplixxihom. Għalhekk, il-pretensjoni ġiet miċħuda.

(50)

Matul il-perjodu ta’ investigazzjoni, kien hemm żewġ produtturi esportaturi fl-Indoneżja, il-kumpaniji ITSS u GCNS. Il-kumpaniji kienu relatati ma’ xulxin permezz tal-kumpanija prinċipali aħħarija tagħhom, il-produttur tal-azzar Ċiniż Tsingshan Steel Group.

(51)

Flimkien mal-kumpanija Indoneżjana PT Bintang Delapan, Tsingshan Steel Group stabbilixxa l-Park Industrijali Morowali tal-Indoneżja (“IMIP”) f’Sulawesi, l-Indoneżja (8). Il-kumpaniji li ġejjin relatati permezz ta’ Tsingshan Steel Group u li jinsabu fl-IMIP kienu involuti fl-investigazzjoni:

(52)

Iż-żewġ produtturi esportaturi naqsu milli jipprovdu struttura globali sinifikanti tal-grupp fit-tweġibiet tagħhom għall-kwestjonarju u matul iż-żjarat ta’ verifika. Barra minn hekk, in-negozjanti relatati involuti fil-bejgħ tal-esportazzjonijiet ma pprovdew l-ebda tweġiba għall-kwestjonarju.

(53)

Għalhekk, il-Kummissjoni ma setgħetx tivverifika r-relazzjoni bejn il-produtturi esportaturi u l-fornituri tagħhom ta’ mineral tan-nikil, li hija meqjusa bħala materja prima kruċjali li tagħti lill-prodott li qed jiġi investigat il-karatteristiċi inossidabbli tiegħu. B’mod partikolari, il-Kummissjoni ma setgħetx tistabbilixxi jekk il-fornituri allegatament mhux relatati kinux fil-fatt indipendenti mill-produtturi esportaturi.

(54)

B’konsegwenza ta’ dan, il-Kummissjoni ma setgħetx tivvaluta jekk il-mineral tan-nikil fornut minn partijiet relatati identifikati b’mod pożittiv kienx inxtara bi prezz ta’ distakkament.

(55)

Barra minn hekk, il-Kummissjoni ma setgħetx tivverifika r-relazzjoni mal-klijent li allegatament mhux relatat ta’ negozjant domestiku relatat. Għalhekk, il-Kummissjoni injorat il-bejgħ bejn in-negozjant relatat u l-klijent li allegatament mhux relatat meta ddeterminat il-valur normali.

(56)

Fl-aħħar nett, minħabba n-nuqqas ta’ kooperazzjoni tan-negozjanti relatati involuti fil-bejgħ tal-esportazzjonijiet, il-Kummissjoni ma setgħetx tiddetermina l-prezz tal-esportazzjoni lill-ewwel klijent mhux relatat u l-kostijiet attwali mġarrba minn dawk in-negozjanti relatati. Għalhekk, il-Kummissjoni ma setgħetx tikkalkula l-prezz tal-esportazzjoni abbażi tad-data pprovduta mill-produtturi esportaturi għalkemm l-informazzjoni kollha pprovduta mill-GCNS u l-ITSS setgħet tiġi vverifikata mar-rekords tal-kumpaniji.

(57)

Permezz ta’ ittra tal-20 ta’ Diċembru 2019, il-Kummissjoni infurmat lill-GCNS u lill-ITSS bl-intenzjoni tagħha li tapplika l-Artikolu 18 tar-Regolament bażiku fir-rigward ta’ ċerti aspetti tal-kalkolu tal-marġni tad-dumping. F’dan ir-rigward, il-produtturi esportaturi ssottomettew kummenti fis-7 ta’ Jannar 2020.

(58)

Fil-kummenti tagħhom dwar l-applikazzjoni tal-Artikolu 18 tar-Regolament bażiku, il-produtturi esportaturi ssottomettew li r-Regolament bażiku ma jippermettix lill-Kummissjoni tikkonkludi li l-informazzjoni pprovduta mill-produtturi esportaturi dwar ix-xiri tal-mineral tan-nikil mhijiex affidabbli biss għar-raġuni li r-relazzjoni bejn il-produtturi esportaturi u l-fornituri tagħhom ma setgħetx tiġi stabbilita. GCNS u ITSS irreferew għall-ġurisprudenza tal-Organizzazzjoni Dinjija tal-Kummerċ (“WTO”) (9) u l-Ftehim dwar il-Valutazzjoni Doganali tad-WTO (10), li minnhom irriżulta li t-tranżazzjonijiet bejn partijiet relatati ma jistgħux jitqiesu a priori bħala inaċċettabbli jew li mhumiex f’kundizzjonijiet ta’ distakkament. Fl-aħħar nett, il-produtturi esportaturi fakkru li l-Kummissjoni vverifikat ix-xiri ta’ mineral tan-nikil matul iż-żjara ta’ verifika.

(59)

F’dan ir-rigward, il-Kummissjoni kkonfermat li tabilħaqq l-informazzjoni pprovduta mill-kumpaniji fil-grupp (GCNS, ITSS, SMI, u TSI) dwar l-identità tal-fornitur, il-volumi u l-valuri tax-xiri ta’ materja prima ġiet ivverifikata. Madankollu, u minkejja r-regoli u l-ġurisprudenza tad-WTO dwar tranżazzjonijiet bejn partijiet relatati, billi ma kinux jipprovdu l-istruttura dinjija tal-grupp, il-produtturi esportaturi żammew lura lill-Kummissjoni saħansitra milli teżamina jekk it-tranżazzjonijiet ta’ xiri kinux imwettqa bi prezz ta’ distakkament.

(60)

Għalhekk, il-Kummissjoni kkonfermat l-intenzjoni tagħha li tinjora l-prezz tax-xiri rrapportat tal-mineral tan-nikil u tissostitwih bil-fatti disponibbli skont l-Artikolu 18 tar-Regolament bażiku.

(61)

Rigward il-kalkolu tal-prezz tal-esportazzjoni, il-produtturi esportaturi reġgħu għamlu l-aħjar sforzi tagħhom biex jiżguraw il-kooperazzjoni tan-negozjanti relatati involuti fil-bejgħ tal-esportazzjoni. Il-produtturi esportaturi ssuġġerew ukoll li l-Kummissjoni tuża l-informazzjoni disponibbli fil-fajl bħala fatti disponibbli.

(62)

F’dan ir-rigward, il-Kummissjoni ddeċidiet b’mod provviżorju li tuża d-data disponibbli fil-fajl ipprovduta mill-partijiet interessati fl-Unjoni, li kkooperaw fl-investigazzjoni mill-bidu tagħha u bagħtu t-tweġibiet għall-kwestjonarju.

(63)

Bħala konklużjoni, il-Kummissjoni użat b’mod provviżorju l-fatti disponibbli sabiex tistabbilixxi jew tissostitwixxi ċerta informazzjoni skont l-Artikolu 18 tar-Regolament bażiku fil-punt deskritt hawn fuq.

(64)

Il-Kummissjoni l-ewwel eżaminat jekk il-volum totali ta’ bejgħ domestiku ta’ kull produttur esportatur li kkoopera kienx rappreżentattiv, skont l-Artikolu 2(2) tar-Regolament bażiku. Il-bejgħ domestiku jkun rappreżentattiv jekk it-total tal-volum tal-bejgħ domestiku tal-prodott simili lill-klijenti indipendenti fis-suq domestiku għal kull produttur esportatur ikun jirrappreżenta mill-anqas 5 % tal-volum totali tal-bejgħ għall-esportazzjoni tiegħu tal-prodott ikkonċernat lejn Unjoni matul il-perjodu ta’ investigazzjoni.

(65)

Fuq din il-bażi, il-bejgħ totali tal-GCNS tal-prodott simili fis-suq domestiku nstab li ma kienx rappreżentattiv.

(66)

Għalhekk, meta tip ta’ prodott ma kienx jinbiegħ fis-suq domestiku, il-Kummissjoni ħadmet il-valur normali skont l-Artikolu 2(3) u (6) tar-Regolament bażiku.

(67)

Il-valur normali nħadem billi żdied dan li ġej mal-kost medju tal-produzzjoni tal-prodott simili tal-GCNS matul il-perjodu ta’ investigazzjoni:

(68)

Il-kost tal-mineral tan-nikil ġie aġġustat kif spjegat fil-premessi (79) sa (82).

(69)

Il-GCNS xtrat ċerti servizzi u inputs fil-forma ta’ prodotti nofshom lesti mill-fornituri relatati li jinsabu fl-IMIP. Il-Kummissjoni eżaminat jekk dan ix-xiri sarx bi prezz ta’ distakkament. F’dan ir-rigward, fejn disponibbli, il-Kummissjoni qabblet il-prezz tax-xiri mal-prezz tal-fornitur relatat lil klijent mhux relatat. Fejn dan il-prezz ma kienx disponibbli, il-Kummissjoni qabblet il-prezz tax-xiri ma’ prezz tas-suq ikkalkulat li jqis il-kostijiet tal-produzzjoni, l-SG&A, u profitt raġonevoli tal-fornitur relatat. Fejn xieraq, il-Kummissjoni aġġustat l-ispejjeż ta’ dawk is-servizzi u l-inputs imġarrba minn GCNS skont l-Artikolu 2(5) tar-Regolament bażiku.

(70)

Abbażi tat-test tar-rappreżentattività spjegat fil-premessa (64), il-bejgħ totali mill-ITSS tal-prodott simili fis-suq domestiku kien rappreżentattiv.

(71)

Imbagħad, il-Kummissjoni identifikat it-tipi ta’ prodotti mibjugħa fuq livell domestiku li kienu identiċi jew paragunabbli għat-tipi ta’ prodotti mibjugħa għall-esportazzjoni lejn l-Unjoni għall-ITSS b’bejgħ domestiku rappreżentattiv.

(72)

Il-Kummissjoni mbagħad eżaminat jekk il-bejgħ domestiku mill-ITSS fis-suq domestiku tagħha għal kull tip ta’ prodott li huwa identiku jew paragunabbli mat-tip ta’ prodott mibjugħ għall-esportazzjoni lejn l-Unjoni, kienx rappreżentattiv, skont l-Artikolu 2(2) tar-Regolament bażiku. Il-bejgħ domestiku ta’ tip ta’ prodott huwa rappreżentattiv jekk il-volum totali tal-bejgħ domestiku ta’ dak it-tip ta’ prodott lil klijenti indipendenti matul il-perjodu ta’ investigazzjoni jirrappreżenta mill-inqas 5 % tal-volum totali tal-bejgħ b’esportazzjoni tal-prodott identiku jew komparabbli lejn l-Unjoni. Il-Kummissjoni stabbiliet li l-bejgħ ta’ tip wieħed ta’ prodott fis-suq domestiku kien rappreżentattiv.

(73)

Imbagħad, il-Kummissjoni ddefinixxiet il-proporzjon tal-bejgħ bi profitt lill-konsumaturi indipendenti fis-suq domestiku għal kull tip ta’ prodott matul il-perjodu ta’ investigazzjoni biex tiddeċiedi jekk tużax il-bejgħ domestiku attwali għall-kalkolu tal-valur normali, skont l-Artikolu 2(4) tar-Regolament bażiku.

(74)

Il-valur normali huwa bbażat fuq il-prezz domestiku reali għal kull tip ta’ prodott, irrispettivament minn jekk dak il-bejgħ huwiex profitabbli jew le, jekk:

(75)

F’dan il-każ, il-valur normali huwa l-medja ponderata tal-prezzijiet tal-bejgħ domestiku kollu ta’ dak it-tip ta’ prodott matul il-perjodu ta’ investigazzjoni.

(76)

Il-valur normali huwa l-prezz domestiku attwali għal kull tip ta’ prodott tal-bejgħ domestiku bi profitt tat-tipi ta’ prodotti biss matul il-perjodu ta’ investigazzjoni, jekk:

(77)

L-analiżi tal-bejgħ domestiku wriet li 13,7 % tal-bejgħ domestiku kollu tat-tip ta’ prodott kien profittabbli u li l-prezz tal-bejgħ medju ponderat kien ogħla mill-kost tal-produzzjoni. Għaldaqstant, il-valur normali kien ikkalkulat bħala medja ponderata tal-bejgħ profittabbli biss.

(78)

Meta tip ta’ prodott ma kienx jinbiegħ fi kwantitajiet rappreżentattivi fis-suq domestiku, il-Kummissjoni ħadmet il-valur normali skont l-Artikolu 2(3) u (6) tar-Regolament bażiku.

(79)

Il-valur normali nħadem billi żdied dan li ġej mal-kost medju tal-produzzjoni tal-prodott simili tal-ITSS matul il-perjodu ta’ investigazzjoni:

(80)

Il-kost tal-mineral tan-nikil ġie aġġustat kif spjegat fil-premessi (79) sa (82).

(81)

L-ITSS xtrat ċerti servizzi u inputs mill-fornituri relatati li jinsabu fl-IMIP. Il-Kummissjoni eżaminat jekk dan ix-xiri sarx bi prezz ta’ distakkament. F’dan ir-rigward, fejn disponibbli, il-Kummissjoni qabblet il-prezz tax-xiri mal-prezz tal-fornitur relatat lil klijent mhux relatat. Fejn dan il-prezz ma kienx disponibbli, il-Kummissjoni qabblet il-prezz tax-xiri ma’ prezz tas-suq mibni billi qieset il-kostijiet tal-produzzjoni, l-SG&A, u profitt raġonevoli mill-fornitur relatat. Fejn xieraq, il-Kummissjoni aġġustat l-ispejjeż ta’ dawk is-servizzi u l-inputs imġarrba mill-ITSS skont l-Artikolu 2(5) tar-Regolament bażiku.

(82)

Kif spjegat fil-premessi (52) sa (54) u (57) sa (60), il-Kummissjoni injorat il-kostijiet tal-mineral tan-nikil kif irrappurtati miż-żewġ produtturi esportaturi u mill-fornituri relatati tagħhom ta’ ċerti inputs imsemmija fil-premessi (69) u (78). Il-Kummissjoni kien beħsiebha tuża l-prezz tas-suq tal-mineral tan-nikil fl-Indoneżja bħala fatti disponibbli u tissostitwixxi l-kostijiet reali tal-mineral tan-nikil b’dak il-prezz.

(83)

F’dan ir-rigward, fil-qafas tal-konsultazzjonijiet mal-GOI dwar distorsjonijiet potenzjali tal-materja prima skont l-Artikolu 7(2a) tar-Regolament bażiku, il-Kummissjoni talbet informazzjoni statistika dwar il-volumi u l-valuri tal-bejgħ domestiku, li l-GOI normalment ikun ġabar skont il-leġiżlazzjoni applikabbli (11). Il-GOI, madankollu, ipprovda biss informazzjoni dwar il-volumi ta’ bejgħ domestiku. Għalhekk, din l-informazzjoni ma kinitx kompluta u ma setgħetx tintuża biex jiġi stabbilit prezz tas-suq Indoneżjan domestiku tal-mineral tan-nikil.

(84)

B’konsegwenza ta’ dan, il-Kummissjoni użat il-prezz li fil-fatt tħallas minn produttur esportatur wieħed li pprovda informazzjoni dwar il-kontenut tan-nikil tal-mineral tan-nikil għat-tranżazzjonijiet tax-xiri kollha tiegħu. Il-Kummissjoni qieset li l-kontenut tan-nikil, li jinfluwenza l-prezz tal-mineral tan-nikil, jenħtieġ li jitqies meta jiġu ssostitwiti l-kostijiet tal-mineral tan-nikil irrappurtati mill-kumpaniji fil-grupp. Il-Kummissjoni identifikat l-aktar tranżazzjonijiet tax-xiri għaljin għal kull kontenut tan-nikil u qieset li dawk it-tranżazzjonijiet u l-prezzijiet x’aktarx kienu l-inqas affettwati minn relazzjoni bejn il-fornitur u x-xerrej. Il-Kummissjoni stabbiliet l-ispejjeż aġġustati ta’ minerali tan-nikil ibbażati fuq il-medja peżata tal-prezz tax-xiri tat-tranżazzjonijiet magħżula b’kunsiderazzjoni tal-volum totali mixtri mill-kumpanija f’kull grupp ta’ kontenut tan-nikil.

(85)

Il-kostijiet aġġustati tal-mineral tan-nikil intużaw ukoll biex jiġu kkalkulati mill-ġdid il-kostijiet tal-produzzjoni tal-inputs nofshom lesti mixtrija mill-fornituri relatati msemmija fil-premessi (69) u (78), meta ġie eżaminat jekk l-inputs rilevanti nxtrawx mill-produtturi esportaturi bi prezz ta’ distakkament. Meta kien evidenti li l-fornituri użaw mineral tan-nikil b’kontenut ta’ nikil aktar baxx, il-kostijiet aġġustati rriflettew id-differenza.

(86)

Il-produtturi esportaturi pprovdew informazzjoni li huma esportaw lejn l-Unjoni permezz ta’negozjanti relatati f’pajjiżi terzi u negozjant mhux relatat f’pajjiż terz.

(87)

Kif spjegat fil-premessi (52) u (56), in-negozjanti relatati involuti fil-bejgħ b’esportazzjoni ma kkooperawx fl-investigazzjoni. Għalhekk, il-prezz tal-esportazzjoni ġie stabbilit skont l-Artikolu 18 tar-Regolament bażiku fuq il-bażi tal-informazzjoni disponibbli fil-fajl u vverifikata mill-Kummissjoni. Sabiex jiġi ddeterminat il-prezz tal-esportazzjoni, il-Kummissjoni l-ewwel stabbiliet il-prezz tal-importazzjoni fl-Unjoni abbażi tal-informazzjoni fil-fajl ipprovduta mill-partijiet interessati li kkooperaw fl-Unjoni. Il-Kummissjoni aġġustat aktar dak il-prezz għall-ispejjeż kollha mġarrba bejn l-importazzjoni u l-bejgħ mill-ġdid, inkluż it-trasport, l-assigurazzjoni, l-immaniġġar u t-tagħbija, l-ispejjeż SG&A, u għall-profitti li nkisbu, abbażi ta’ informazzjoni vverifikata pprovduta mill-produtturi esportaturi jew informazzjoni disponibbli pubblikament (eż. dikjarazzjonijiet finanzjarji awditjati pubblikament disponibbli ta’ wieħed min-negozjanti relatati ddikjarati).

(88)

Il-Kummissjoni qabblet il-valur normali u l-prezz tal-esportazzjoni tal-produtturi esportaturi fuq bażi ex-works.

(89)

Fejn kien iġġustifikat mill-ħtieġa li jkun żgurat paragun ġust, il-Kummissjoni aġġustat il-valur normali u/jew il-prezz tal-esportazzjoni għad-differenzi li jaffettwaw il-prezzijiet u l-paragonabbiltà tal-prezz, skont l-Artikolu 2(10) tar-Regolament bażiku. Saru aġġustamenti fil-valur normali għat-trasport, l-assigurazzjoni, l-immaniġġar u t-tagħbija. Saru aġġustamenti fil-prezz tal-esportazzjoni għall-kostijiet ta’ kreditu u l-kummissjoni tan-negozjant mhux relatat f’pajjiż terz.

(90)

Il-Kummissjoni qabblet il-valur normali medju ponderat ta’ kull tip ta’ prodott simili mal-prezz tal-esportazzjoni medju ponderat tat-tip korrispondenti tal-prodott li qed jiġi investigat, skont l-Artikoli 2(11) u (12) tar-Regolament bażiku.

(91)

Fuq din il-bażi, il-marġnijiet ta’ dumping medji ponderati provviżorji, espressi bħala perċentwal tal-prezz CIF fil-fruntiera tal-Unjoni, bid-dazju mhux imħallas, huma 19,3 % għall-GCNS u 16,2 % għall-ITSS.

(92)

Kif spjegat fil-premessi (50) u (51), il-produtturi esportaturi huma relatati. Għalhekk, il-Kummissjoni stabbiliet marġni tad-dumping medju ponderat uniku għaż-żewġ kumpaniji fil-livell ta’ 19,2 %.

(93)

Billi l-importazzjonijiet tal-produtturi esportaturi li kkooperaw kienu jikkostitwixxu 100 % tal-esportazzjonijiet totali lejn l-Unjoni matul il-perjodu ta’ investigazzjoni, il-Kummissjoni qieset li huwa rappreżentattiv li tistabbilixxi l-marġni tad-dumping residwu fil-livell tal-produtturi esportaturi li kkooperaw.

(94)

Il-marġnijiet provviżorji tad-dumping, espressi bħala perċentwal tal-prezz CIF fil-fruntiera tal-Unjoni, bid-dazju mhux imħallas, huma kif ġej:

(95)

Kif spjegat fil-premessa (16) fir-rigward ta’ wieħed mit-tliet produtturi esportaturi Ċiniżi inklużi fil-kampjun, il-Kummissjoni ddeċidiet li tagħmel użu mid-dispożizzjonijiet tal-Artikolu 18 tar-Regolament bażiku u injorat l-informazzjoni pprovduta minn dan il-produttur esportatur.

(96)

Il-Kummissjoni ħadet din id-deċiżjoni minħabba li matul iż-żjara ta’ verifika l-kumpanija naqset milli tispjega fil-ħin diversi ċifri ppreżentati fit-tweġiba għall-kwestjonarju u torbothom mal-kontijiet awditjati, il-kontijiet tal-ġestjoni tal-kostijiet u d-data fl-applikazzjonijiet interni tal-IT użati. Xi ċifri, bħall-volumi tal-produzzjoni għal kull tip ta’ prodott, il-konsum tal-inputs tal-enerġija, l-allokazzjoni tal-prodotti sekondarji u l-ispejjeż ġenerali tal-manifattura, li kienu meqjusa kruċjali għall-kalkolu tal-marġni individwali tad-dumping, ma setgħux jiġu rrikonċiljati mad-dokumenti msemmija hawn fuq jew l-iskemi tal-allokazzjoni tagħhom ma setgħux jiġu spjegati biżżejjed. Barra minn hekk, minħabba dewmien fil-forniment tad-data u l-ispjegazzjonijiet mitluba, il-Kummissjoni ma setgħet tivverifika bl-ebda mod ċerti partijiet tat-tweġibiet għall-kwestjonarju relatati mad-determinazzjoni tal-valur normali. Għalhekk, il-Kummissjoni ma rċevietx l-informazzjoni meħtieġa fil-limiti taż-żmien stabbiliti fir-Regolament bażiku biex tistabbilixxi marġni tad-dumping għall-kumpanija.

(97)

Skont l-Artikolu 18(4) tar-Regolament bażiku, permezz tal-ittra tat-18 ta’ Diċembru 2019, il-parti interessata ġiet mgħarrfa bir-raġunijiet tal-intenzjoni tal-Kummissjoni li tinjora l-informazzjoni pprovduta u ngħatat l-opportunità li tipprovdi spjegazzjonijiet ulterjuri.

(98)

Il-kumpanija wieġbet l-ittra tal-Kummissjoni fis-7 ta’ Jannar 2020. Fit-tweġiba tagħha, il-kumpanija ma kkontestatx il-fatt li n-nuqqasijiet elenkati fl-ittra tal-Kummissjoni kienu eżistew. Madankollu, il-kumpanija sostniet li dawn in-nuqqasijiet ma kinux serji biżżejjed biex tapplika l-Artikolu 18 tar-Regolament bażiku. Il-kumpanija argumentat li n-nuqqasijiet identifikati mill-Kummissjoni fl-ittra tagħha kienu kkawżati mill-fatt li l-informazzjoni pprovduta minn kumpanija relatata waħda kienet ġeneralment ikkumpilata u trattata manwalment minflok permezz ta’ sistema tal-IT. Għalhekk, kienet aktar suxxettibbli li jkollha nuqqasijiet. Il-kumpanija kkonkludiet li minkejja dan, il-Kummissjoni setgħet tikkalkula marġni ta’ dumping individwali abbażi tal-informazzjoni vverifikata fuq il-post.

(99)

Il-Kummissjoni ma qablitx mad-dikjarazzjoni tal-kumpanija li, fuq il-bażi tal-informazzjoni vverifikata fuq il-post, kien possibbli li jiġi kkalkulat marġni ta’ dumping individwali. Kif stabbilit fil-premessa (93) hawn fuq, in-natura u l-ammont ta’ nuqqasijiet identifikati fuq il-post — irrispettivament minn x’tista’ tkun l-oriġini tagħhom — u l-fatt li l-kumpanija ma kinitx kapaċi tirriżolvihom matul iż-żjara ta’ verifika kollha, effettivament waqqfu lill-Kummissjoni milli tikkalkula marġni ta’ dumping fuq il-bażi ta’ data vverifikata. Għaldaqstant, il-Kummissjoni b’mod provviżorju injorat l-informazzjoni pprovduta mill-produttur esportatur u f’dan l-istadju kkonfermat l-użu tal-fatti disponibbli fir-rigward ta’ dan il-produttur esportatur.

(100)

Għalhekk, id-deskrizzjoni tal-kalkolu tal-marġni tad-dumping ta’ hawn taħt tirreferi għaż-żewġ produtturi esportaturi Ċiniżi li għad fadal fil-kampjun.

(101)

Skont l-Artikolu 2(1) tar-Regolament bażiku, “il-valur normali għandu normalment ikun ibbażat fuq il-prezzijiet imħallsa jew pagabbli, fil-kors ordinarju tal-kummerċ, minn klijenti indipendenti fil-pajjiż esportatur”.

(102)

Madankollu, skont l-Artikolu 2(6a)(a) tar-Regolament bażiku, “(f)il-każ li jiġi determinat […] li mhuwiex xieraq li jintużaw prezzijiet u kostijiet domestiċi fil-pajjiż esportatur minħabba l-eżistenza f’dak il-pajjiż ta’ distorsjonijiet sinifikanti fis-sens tal-punt (b), il-valur normali għandu jiġi kkalkolat esklużivament abbażi tal-kostijiet tal-produzzjoni u tal-bejgħ li jirriflettu prezzijiet jew valuri ta’ riferiment mingħajr distorsjoni”, u “għandu jinkludi ammont raġonevoli u mingħajr distorsjoni għal kostijiet amministrattivi, tal-bejgħ u ġenerali u għal profitti”. Kif spjegat aktar fid-dettall hawn taħt, f’din l-investigazzjoni l-Kummissjoni kkonkludiet li, abbażi tal-evidenza disponibbli, u fid-dawl tan-nuqqas ta’ kooperazzjoni mill-GOC, l-applikazzjoni tal-Artikolu 2(6a) tar-Regolament bażiku kienet xierqa.

(103)

L-Artikolu 2(6a)(b) tar-Regolament bażiku jiddefinixxi “Id-distorsjonijiet sinifikanti huma dawk id-distorsjonijiet li jseħħu meta prezzijiet jew kostijiet irrappurtati, inklużi l-kostijiet ta’ materji primi u ta’ enerġija, ma jkunux ir-riżultat ta’ forzi tas-suq ħieles għax ikunu affettwati minn intervent sostanzjali tal-gvern. Meta tkun valutata l-eżistenza ta’ distorsjonijiet sinifikanti għandha tingħata attenzjoni, inter alia, lill-impatt potenzjali ta’ element wieħed jew aktar mis-segwenti:

(104)

Skont l-Artikolu 2(6a)(b) tar-Regolament bażiku, il-valutazzjoni tal-eżistenza ta’ distorsjonijiet sinifikanti fis-sens tal-Artikolu 2(6a)(a) għandha tqis, fost l-oħrajn, il-lista mhux eżawrjenti ta’ elementi fid-dispożizzjoni ta’ qabel. Skont l-Artikolu 2(6a)(b) tar-Regolament bażiku, fil-valutazzjoni tal-eżistenza ta’ distorsjonijiet sinifikanti, għandhom jitqiesu l-impatt potenzjali ta’ wieħed jew aktar minn dawn l-elementi fuq il-prezzijiet u l-kostijiet fil-pajjiż esportatur tal-prodott ikkonċernat. Fil-fatt, billi dik il-lista mhijiex kumulattiva, m’hemmx bżonn li jitqiesu l-elementi kollha biex ikun hemm sejba ta’ distorsjonijiet sinifikanti. Barra minn hekk, l-istess ċirkostanzi fattwali jistgħu jintużaw biex juru l-eżistenza ta’ element wieħed jew aktar tal-lista. Madankollu, kwalunkwe konklużjoni dwar distorsjonijiet sinifikanti fis-sens tal-Artikolu 2(6a)(a) għandha ssir fuq il-bażi tal-evidenza kollha disponibbli. Il-valutazzjoni kumplessiva dwar l-eżistenza ta’ distorsjonijiet tista’ tqis ukoll il-kuntest ġenerali u s-sitwazzjoni fil-pajjiż esportatur, b’mod partikolari fejn l-elementi fundamentali tal-istruttura ekonomika u amministrattiva tal-pajjiż esportatur jipprovdu lill-gvern b’setgħat sostanzjali biex jintervjeni fl-ekonomija b’tali mod li l-prezzijiet u l-kostijiet ma jkunux ir-riżultat tal-iżvilupp ħieles tal-forzi tas-suq.

(105)

L-Artikolu 2(6a)(c) tar-Regolament bażiku jipprevedi li “[f]ejn il-Kummissjoni jkollha indikazzjonijiet fondati sew tal-eżistenza potenzjali ta’ distorsjonijiet sinifikanti kif imsemmija fil-punt (b) f’ċertu pajjiż jew f’ċertu settur f’dak il-pajjiż, u fejn ikun xieraq għall-applikazzjoni effettiva ta’ dan ir-Regolament, il-Kummissjoni għandha tipproduċi, tippubblika u taġġorna regolarment rapport li jiddeskrivi ċ-ċirkostanzi tas-suq imsemmija fil-punt (b) f’dak il-pajjiż jew settu r”.

(106)

Skont din id-dispożizzjoni, il-Kummissjoni ħarġet rapport tal-pajjiż dwar il-PRC (minn hawn’ il quddiem “ir-Rapport”), (12) li juri l-eżistenza ta’ intervent sostanzjali tal-gvern f’ħafna livelli tal-ekonomija, inklużi distorsjonijiet speċifiċi f’bosta fatturi ewlenin ta’ produzzjoni (bħall-art, l-enerġija, il-kapital, il-materja prima u x-xogħol) kif ukoll f’setturi speċifiċi (bħall-azzar u s-sustanzi kimiċi). Ir-Rapport tqiegħed fil-fajl tal-investigazzjoni fl-istadju tal-bidu. L-ilment kien fih ukoll xi evidenza rilevanti li tikkomplementa r-Rapport. Il-partijiet interessati kienu mistiedna biex jirribattu, jikkummentaw jew jissupplimentaw l-evidenza li kienet inkluża fil-fajl tal-investigazzjoni fil-mument tal-bidu.

(107)

B’mod paritkolari, l-ilment irrefera għal prattiki li jaffettwaw il-kostijiet u l-prezzijiet fis-settur tal-azzar inossidabbli:

(108)

Kif indikat fil-premessa (30), il-GOC la kkummenta u lanqas ma pprovda evidenza li tappoġġa jew li tirribatti l-evidenza eżistenti dwar il-fajl tal-każ, inkluż ir-Rapport u l-evidenza addizzjonali li ġiet ipprovduta mill-ilmentatur, dwar l-eżistenza ta’ distorsjonijiet sinifikanti u/jew dwar l-adegwatezza tal-applikazzjoni tal-Artikolu 2(6a) tar-Regolament bażiku fil-każ inkwistjoni.

(109)

Il-kummenti f’dan ir-rigward waslu mingħand tnejn mill-produtturi esportaturi, li ddikjaraw li l-kalkolu tal-valur normali skont l-Artikolu 2(6a) tar-Regolament bażiku mhuwiex kompatibbli mal-Ftehim dwar l-Anti-Dumping (“ADA”) tad-WTO. F’dan ir-rigward, il-produtturi esportaturi ddikjaraw li l-Kummissjoni jenħtieġ li ma tiddevjax mill-metodoloġija standard biex tistabbilixxi l-valur normali, sakemm l-ADA ma jkunx jippermetti mod ieħor, u jenħtieġ li ssegwi l-metodoloġija standard skont l-Artikolu 2 tal-ADA. Barra minn hekk, il-partijiet interessati sostnew ukoll li l-kunċett ta’ distorsjonijiet sinifikanti lanqas biss jeżisti fl-ADA.

(110)

Barra minn hekk, il-produtturi esportaturi ddikjaraw li ma ġiet ippreżentata l-ebda evidenza fil-fajl li l-allegati interventi governattivi elenkati fir-Rapport u l-ilment kienu wasslu għal distorsjonijiet fil-prezz tal-inputs għall-produzzjoni tal-prodott ikkonċernat.

(111)

Għall-finijiet ta’ din l-investigazzjoni, il-Kummissjoni kkonkludiet fil-premessa (157) li huwa xieraq li jiġi applikat l-Artikolu 2(6a) tar-Regolament bażiku. Il-Kummissjoni tqis li l-Artikolu 2(6a) huwa għalhekk applikabbli. Barra minn hekk, il-Kummissjoni tqis li din id-dispożizzjoni hija konsistenti mal-obbligi tad-WTO tal-Unjoni Ewropea. Hija l-fehma tal-Kummissjoni li, kif iċċarat f’DS473 EU-Biodiesel (l-Arġentina), id-dispożizzjonijiet tar-Regolament bażiku li japplikaw b’mod ġenerali fir-rigward tal-Membri kollha tad-WTO, b’mod partikolari t-tieni subparagrafu tal-Artikolu 2(5) tar-Regolament bażiku jippermettu l-użu ta’ data minn pajjiż terz, aġġustata kif xieraq meta tali aġġustament ikun meħtieġ u sostanzjat. Il-Kummissjoni fl-aħħar nett fakkret li t-tilwima DS473 UE-Bijodiżil (l-Arġentina) ma kinitx tikkonċerna l-applikazzjoni tal-Artikolu 2(6a) tar-Regolament bażiku, li huwa l-bażi ġuridika rilevanti għad-determinazzjoni tal-valur normali f’din l-investigazzjoni. Għalhekk, il-Kummissjoni ċaħdet din il-pretensjoni.

(112)

Il-Kummissjoni eżaminat jekk kienx xieraq li jintużaw il-prezzijiet u l-kostijiet domestiċi fil-PRC, minħabba l-eżistenza ta’ distorsjonijiet sinifikanti fis-sens tal-Artikolu 2(6a)(b) tar-Regolament bażiku. Il-Kummissjoni għamlet dan abbażi tal-evidenza disponibbli fil-fajl, inkluża l-evidenza inkluża fir-Rapport, li kienet tiddependi fuq sorsi disponibbli għall-pubbliku. Dik l-analiżi kopriet l-eżami tal-interventi sostanzjali tal-gvern fl-ekonomija tal-PRC inġenerali, iżda anke s-sitwazzjoni speċifika tas-suq fis-settur rilevanti, inkluż il-prodott ikkonċernat.

(113)

Rigward it-tieni pretensjoni, il-Kummissjoni nnotat li l-eżistenza tad-distorsjonijiet sinifikanti li jwasslu għall-applikazzjoni tal-Artikolu 2(6a) tar-Regolament bażiku mhijiex marbuta mal-eżistenza ta’ kapitolu settorjali speċifiku li jkopri l-prodott li qed jiġi investigat. Ir-Rapport jiddeskrivi tipi differenti ta’ distorsjonijiet preżenti fil-PRC li huma trasversali u applikabbli fl-ekonomija Ċiniża kollha u jaffettwaw il-prezzijiet u/jew il-materja prima u l-kostijiet tal-produzzjoni tal-prodott li qed jiġi investigat. Kif spjegat fit-Taqsimiet b) sa i) t’hawn taħt, l-industrija SSHR hija soġġetta għal għadd ta’ interventi mill-gvern deskritti fir-Rapport (kopertura mill-Pjanijiet ta’ Ħames Snin u dokumenti oħra, distorsjonijiet tal-materja prima, distorsjonijiet finanzjarji, eċċ.), li huma elenkati b’mod espliċitu u referenzjati f’dan ir-regolament. Barra minn hekk, il-premessi (104), (121) sa (122), (124) sa (128), (135), (138), (141), (151), (153) sa (154) ta’ dan ir-Regolament taw ukoll dettalji dwar għadd ta’ distorsjonijiet applikabbli għas-settur SSHR u/jew għall-materja prima tiegħu u/jew lill-inputs tiegħu lil hinn mid-distorsjonijiet sinifikanti li diġà jinsabu fir-Rapport. Iċ-ċirkostanzi tas-suq u l-politiki u l-pjanijiet sottostanti li jagħtu lok għal distorsjonijiet sinifikanti għadhom applikabbli għas-settur SSHR u dak tal-kostijiet tal-produzzjoni tiegħu, minkejja li r-Rapport ġie rilaxxat f’Diċembru 2017. L-ebda parti ma ressqet xi evidenza li turi l-kuntrarju. Barra minn hekk, is-sorsi addizzjonali ta’ distorsjonijiet sinifikanti li jinsabu fir-Regolament għadhom applikabbli u l-ebda parti ma ressqet xi evidenza bil-kontra.

(114)

Għalhekk, il-Kummissjoni ċaħdet b’mod provviżorju l-pretensjonijiet li għamlu ż-żewġ produtturi esportaturi.

(115)

Is-sistema ekonomika Ċiniża hija bbażata fuq il-kunċett ta’ “ekonomija tas-suq soċjalist a”. Dak il-kunċett huwa inkorporat fil-Kostituzzjoni Ċiniża u jiddetermina l-governanza ekonomika tal-PRC. Il-prinċipju ewlieni huwa s-“sjieda pubblika soċjalista tal-mezzi tal-produzzjoni, jiġifieri s-sjieda min-nies kollha u s-sjieda kollettiva mill-persuni li jaħdm u”. L-ekonomija tal-Istat hija “l-forza mexxejja tal-ekonomija nazzjonal i” u l-Istat għandu l-mandat “li jiżgura l-konsolidazzjoni u t-tkabbir tagħh a” (13). B’konsegwenza ta’ dan, l-istruttura ġenerali tal-ekonomija Ċiniża mhux biss tippermetti interventi sostanzjali mill-gvern fl-ekonomija, iżda li tali interventi jsiru b’mod espliċitu. Il-kunċett ta’ supremazija tas-sjieda pubblika fuq is-sjieda privata huwa mifrux fis-sistema legali sħiħa u huwa enfasizzat bħala prinċipju ġenerali fil-partijiet fundamentali kollha tal-leġiżlazzjoni. Il-liġi Ċiniża fil-qasam tal-proprjetà hija eżempju ċarissimu: din tirreferi għall-istadju primarju tas-soċjaliżmu u tafda lill-Istat bil-ħarsien tas-sistema ekonomika bażika li skontha s-sjieda pubblika għandha rwol dominanti. Forom oħra ta’ sjieda huma tollerati, fejn il-liġi tippermettilhom jiżviluppaw spalla ma’ spalla mas-sjieda tal-Istat (14).

(116)

Barra minn hekk, skont il-leġiżlazzjoni Ċiniża, l-ekonomija tas-suq soċjalista hija żviluppata taħt it-tmexxija tal-Partit Komunista Ċiniż (“CCP”). L-istrutturi tal-Istat Ċiniż u tas-CCP huma marbutin ma’ xulxin f’kull livell (legali, istituzzjonali, personali), u jiffurmaw superstruttura li fiha ma hemmx distinzjoni bejn ir-rwoli tas-CCP u tal-Istat. Wara emenda tal-Kostituzzjoni Ċiniża f’Marzu 2018, ir-rwol ewlieni tas-CCP ingħata prominenza saħansitra akbar billi ġie affermat mill-ġdid fit-test tal-Artikolu 1 tal-Kostituzzjoni. Wara l-ewwel sentenza diġà eżistenti tad-dispożizzjoni: “is-sistema soċjalista hija s-sistema bażika tar-Repubblika tal-Poplu taċ-Ċin a”, iddaħħlet it-tieni sentenza ġdida li taqra: “[il-]karatteristika li tiddefinixxi s-soċjaliżmu b’karatteristiċi Ċiniżi hi t-tmexxija tal-Partit Komunista taċ-Ċina.” (15) Dan juri l-kontroll mhux ikkontestat u dejjem akbar tas-CCP fuq is-sistema ekonomika tal-PRC. Din it-tmexxija u dan il-kontroll huma inerenti għas-sistema Ċiniża u jmorru ferm lil hinn mis-sitwazzjoni abitwali fil-pajjiżi l-oħra fejn il-gvernijiet jeżerċitaw kontroll makroekonomiku ġenerali li fil-limitazzjonijiet tiegħu hemm forzi tas-suq ħieles.

(117)

L-Istat Ċiniż iwettaq politika ekonomika intervenzjonista biex isegwi għanijiet li jikkoinċidu mal-aġenda politika stipulata mis-CCP, minflok ma jirrifletti l-kundizzjonijiet ekonomiċi prevalenti f’suq ħieles (16). L-għodod ekonomiċi intervenzjonisti li jintużaw mill-awtoritajiet Ċiniżi jinqasmu f’diversi friegħi, inklużi s-sistema tal-ippjanar industrijali, is-sistema finanzjarja, kif ukoll fil-livell tal-ambjent regolatorju.

(118)

L-ewwel, fil-livell ta’ kontroll amministrattiv kumplessiv, id-direzzjoni tal-ekonomija Ċiniżi hija rregolata minn sistema kumplessa ta’ ppjanar industrijali li jaffettwa l-attivitajiet ekonomiċi kollha fil-pajjiż. Dawn il-pjanijiet kollha jkopru matriċi komprensiva u kumplessa ta’ setturi u politiki trasversali u huma preżenti fil-livelli kollha tal-gvern. Il-pjanijiet fil-livell provinċjali huma ddettaljati filwaqt li l-pjanijiet nazzjonali jistabbilixxu miri usa’. Il-pjanijiet jispeċifikaw ukoll il-mezzi biex jiġu appoġġjati l-industriji/is-setturi rilevanti kif ukoll il-perjodi ta’ żmien li fihom jeħtieġ li jintlaħqu l-objettivi. Xi pjanijiet għadhom jinkludu miri espliċiti tal-output, filwaqt li din kienet karatteristika regolari fiċ-ċikli tal-ippjanar preċedenti. Skont il-pjanijiet, is-setturi u/jew il-proġetti industrijali individwali qed jiġu identifikati bħala prijoritajiet (pożittivi jew negattivi) skont il-prijoritajiet tal-gvern u l-għanijiet ta’ żvilupp speċifiċi attribwiti lilhom (aġġornament industrijali, espansjoni industrijali, eċċ.). L-operaturi ekonomiċi, privati u tal-Istat kollha kemm huma għandhom jaġġustaw b’mod effettiv l-attivitajiet kummerċjali tagħhom skont ir-realtajiet imposti mis-sistema tal-ippjanar. Dan mhuwiex biss minħabba n-natura vinkolanti tal-pjanijiet iżda anke minħabba l-fatt li l-awtoritajiet Ċiniżi rilevanti fil-livelli kollha tal-gvern jaderixxu mas-sistema ta’ pjanijiet u jużaw is-setgħat mogħtija lilhom skont kif ikun meħtieġ, u b’hekk jisfurzaw lill-operaturi ekonomiċi jikkonformaw mal-prijoritajiet stabbiliti fil-pjanijiet (ara wkoll it-taqsima e t’hawn taħt) (17).

(119)

It-tieni nett, fil-livell tal-allokazzjoni tar-riżorsi finanzjarji, is-sistema finanzjarja tal-PRC hija ddominata mill-banek kummerċjali tal-Istat. Dawk il-banek, meta jkunu qed jistabbilixxu u jimplementaw il-politika tas-self tagħhom, jeħtieġ li jallinjaw lilhom infushom mal-objettivi tal-politika industrijali tal-gvern minflok ma jivvalutaw qabel kollox il-merti ekonomiċi ta’ proġett partikolari (ara wkoll it-taqsima h t’hawn taħt) (18). L-istess japplika għall-komponenti l-oħra tas-sistema finanzjarja Ċiniża, bħas-swieq tal-istokks, is-swieq tal-bonds, is-swieq tal-ekwità privata, eċċ. Barra minn hekk, dawn il-partijiet tas-settur finanzjarju għajr is-settur bankarju huma istituzzjonalment u operazzjonalment stabbiliti b’mod li mhuwiex xprunat biex itejjeb il-funzjonament effiċjenti tas-swieq finanzjarji iżda biex jiżgura l-kontroll u jippermetti l-intervent mill-Istat u mis-CCP (19).

(120)

It-tielet, fil-livell tal-ambjent regolatorju, l-interventi mill-Istat fl-ekonomija jieħdu għadd ta’ forom. Pereżempju, ir-regoli tal-akkwist pubbliku jintużaw regolarment sabiex jintlaħqu għanijiet ta’ politika għajr l-effiċjenza ekonomika, u b’hekk idgħajfu l-prinċipji bbażati fuq is-suq fil-qasam. Il-leġiżlazzjoni applikabbli tipprevedi b’mod speċifiku li l-akkwist pubbliku għandu jsir sabiex jiġi ffaċilitat l-ilħuq tal-għanijiet imfassla mill-politiki tal-Istat. Madankollu, in-natura ta’ dawn l-għanijiet għadha mhix iddefinita, u b’hekk tħalli marġni wiesa’ ta’ apprezzament għall-korpi tat-teħid ta’ deċiżjonijiet (20). Bl-istess mod, fil-qasam tal-investiment, il-GOC iżomm kontroll u influwenza sinifikanti fuq id-destinazzjoni u fuq id-daqs tal-investiment tal-Istat u wkoll dak privat. L-iskrinjar tal-investiment, kif ukoll diversi inċentivi, restrizzjonijiet, u projbizzjonijiet relatati mal-investiment jintużaw mill-awtoritajiet bħala għodda importanti biex jiġu appoġġjati l-għanijiet tal-politika industrijali bħaż-żamma tal-kontroll tal-Istat fuq setturi ewlenin jew it-tisħiħ tal-industrija domestika (21).

(121)

Fil-qosor, il-mudell ekonomiku Ċiniż huwa bbażat fuq ċerti assjomi bażiċi, li jipprevedu u jħeġġu diversi interventi tal-gvern. Tali interventi sostanzjali tal-gvern huma f’kunflitt mal-azzjoni libera tal-forzi tas-suq, u dan iwassal għad-distorsjoni tal-allokazzjoni effettiva tar-riżorsi skont il-prinċipji tas-suq (22).

(122)

Fil-PRC, l-intrapriżi li joperaw taħt is-sjieda, il-kontroll u/jew is-superviżjoni politika jew il-gwida tal-Istat jirrappreżentaw parti essenzjali mill-ekonomija.

(123)

Il-GOC u s-CCP iżommu strutturi li jiżguraw il-kontinwazzjoni tal-influwenza tagħhom fuq l-intrapriżi, u b’mod partikolari fuq l-intrapriżi tal-Istat (State-owned enterprises, SOEs). L-Istat (u f’ħafna aspetti anke s-CCP) mhux biss jifformula u jissorvelja b’mod attiv l-implimentazzjoni tal-politiki ekonomiċi ġenerali minn SOEs individwali, iżda jeżerċita wkoll id-drittijiet tiegħu li jipparteċipa fit-teħid ta’ deċiżjonijiet operazzjonali fl-SOEs. Tipikament dan isir permezz tar-rotazzjoni ta’ uffiċjali tal-partit (cadres) bejn l-awtoritajiet tal-gvern u l-SOEs, permezz tal-preżenza ta’ membri tal-partit fuq il-korpi eżekuttivi tal-SOEs u ta’ ċelloli tal-partit fil-kumpaniji (ara wkoll it-taqsima d), kif ukoll permezz tat-tfassil tal-istruttura korporattiva tas-settur tal-SOEs (23). Inkambju, l-SOEs igawdu status partikolari fl-ekonomija Ċiniża, li jinvolvi għadd ta’ benefiċċji ekonomiċi, b’mod partikolari ħelsien mill-kompetizzjoni u aċċess preferenzjali għal inputs rilevanti, inklużi l-finanzi (24).

(124)

Speċifikament fis-settur tal-azzar, għad hemm grad sostanzjali ta’ sjieda mill-GOC. Filwaqt li l-qasma nominali bejn l-għadd ta’ SOEs u kumpaniji privati hija stmata li hija kważi ugwali, erbgħa mill-ħames produtturi tal-azzar Ċiniżi kklassifikati mal-aqwa 10 tal-akbar produtturi tal-azzar fid-dinja huma SOEs (25). Fl-istess ħin, filwaqt li fl-2016 l-aqwa għaxar produtturi kienu jirrappreżentaw biss madwar 36 % tal-produzzjoni totali tal-industrija, il-GOC stabbilixxa l-mira fl-istess sena li jikkonsolida bejn 60 % u 70 % tal-produzzjoni tal-ħadid u tal-azzar f’madwar għaxar intrapriżi fuq skala kbira sal-2025 (26). Din l-intenzjoni ġiet ripetuta mill-GOC f’April 2019, fejn dan ħabbar il-ħruġ ta’ linji gwida dwar il-konsolidazzjoni tal-industrija tal-azzar (27). Tali konsolidazzjoni tista’ tinvolvi fużjonijiet furzati ta’ kumpaniji privati profitabbli ma’ SOEs bi prestazzjoni baxxa (28). Eżempju ta’ fużjoni reċenti huma l-produtturi tal-azzar Baosteel Group Corp. u Wuhan Iron & Steel Group Corp. fl-2016, li ħolqu t-tieni l-akbar produttur tal-azzar fid-dinja (29). Il-produtturi ewlenin tal-azzar inossidabbli huma proprjetà tal-Istat, pereżempju TISCO, Baosteel, Ansteel Lianzhong, Jiujuan Iron and Steel u Tangshan.

(125)

Barra minn hekk, il-PRC hija l-konsumatur ewlieni dinji tan-nikil. In-nikil huwa materja prima importanti li, flimkien mal-kromju, tagħti lill-azzar inossidabbli l-proprjetajiet inossidabbli tiegħu. Il-kontenut tan-nikil huwa wkoll il-fattur ewlieni fil-kost għall-minerali tan-nikil, li, min-naħa tiegħu, huwa l-fattur ewlieni tal-ispiża għall-inputs immedjati tal-prodott ikkonċernat. Huwa jintuża fil-produzzjoni tal-SSHR f’diversi forom, pereżempju minerali tan-nikil, ħadid fondut grezz, ferronikil, nikil pur, ruttam tan-nikil, ruttam tal-azzar inossidabbli. L-ilmentatur ikkalkula li n-nikil fil-forom varji tiegħu kien jammonta għal aktar minn 50 % tal-ispejjeż tal-produzzjoni tal-azzar inossidabbli fil-PRC (30). Fl-2016, il-pajjiż uża 1,04 miljun tunnellata, li kienu jammontaw għal 52 % tal-konsum globali tan-nikil. Fl-2017, il-konsum Ċiniż kien mistenni li jiżdied bi 2,9 % għal 1,07 miljun tunnellata. Il-produzzjoni tal-azzar inossidabbli tirrappreżenta l-użu dominanti għan-nikil fil-PRC (84 %). Dan il-proporzjon huwa ogħla b’mod sinifikanti mill-medja internazzjonali (64 %). Il-konsum tan-nikil żdied b’mod qawwi fl-2016 u l-2017 (31), hekk kif il-produzzjoni Ċiniża tal-azzar inossidabbli espandiet bi 15,7 % għal 24,9 miljun tunnellata. Minħabba li l-produzzjoni fil-bqija tad-dinja żdiedet b’4,3 % biss, is-sehem tal-PRC fil-produzzjoni dinjija laħaq l-54,5 %. Iż-żieda fil-produzzjoni hija minħabba nfiq infrastrutturali qawwi mill-GOC u kostruzzjoni soda tal-proprjetà immobbli. L-istatistika indikat li ħafna mill-investiment ta’ assi fissi tal-PRC ġie organizzat mill-GOC u l-SOEs tiegħu, li t-tnejn li huma wrew tkabbir ogħla fl-investiment mis-settur privat (32).

(126)

Minħabba l-livell għoli ta’ intervent mill-gvern fl-industrija tal-azzar u fl-industrija tal-metall mhux tal-ħadid (“NFM”), u sehem kbir ta’ SOEs f’dawn is-setturi, anke l-produtturi privati tal-azzar ma jitħallewx joperaw skont il-kundizzjonijiet tas-suq. Fil-fatt, kemm l-intrapriżi pubbliċi kif ukoll dawk privati fis-settur tal-azzar huma soġġetti wkoll għal superviżjoni u gwida politika kif stabbilit fit-taqsima e) hawn taħt.

(127)

Fuq il-bażi ta’ dan ta’ hawn fuq, huwa konkluż li s-suq tal-SSHR fil-PRC kien fornut b’mod sinifikanti minn intrapriżi soġġetti għas-sjieda, il-kontroll jew is-superviżjoni ta’ politika jew gwida mill-GOC.

(128)

Minbarra li jeżerċita kontroll fuq l-ekonomija permezz tas-sjieda ta’ SOEs u mezzi oħra, il-GOC huwa f’pożizzjoni biex jinterferixxi mal-prezzijiet u mal-kostijiet permezz tal-preżenza tal-Istat fid-ditti. Filwaqt li d-dritt għall-ħatra u t-tneħħija ta’ membri kruċjali tal-maniġment fl-SOEs mill-awtoritajiet rilevanti tal-Istat, kif previst fil-leġiżlazzjoni Ċiniża, jista’ jitqies li jirrifletti d-drittijiet ta’ sjieda korrispondenti, (33) iċ-ċelloli tas-CCP fl-intrapriżi, kemm dawk tal-Istat kif ukoll dawk privati, jirrappreżentaw mezz importanti ieħor li permezz tiegħu l-Istat jista’ jinterferixxi fid-deċiżjonijiet tan-negozju. Skont il-liġi tal-kumpaniji tal-PRC, f’kull kumpanija għandha tiġi stabbilita organizzazzjoni tas-CCP (li jkollha mill-anqas tliet membri tas-CCP kif speċifikat fil-Kostituzzjoni tas-CCP (34)) u l-kumpanija għandha tipprovdi l-kundizzjonijiet meħtieġa għall-attivitajiet tal-organizzazzjoni tal-partit. Fil-passat, jidher li dan ir-rekwiżit mhux dejjem ġie segwit jew infurzat b’mod strett. Madankollu, minn tal-inqas l-2016, is-CCP saħħaħ il-pretensjonijiet tiegħu li jikkontrolla d-deċiżjonijiet kummerċjali fl-SOEs bħala kwistjoni ta’ prinċipju politiku. Huwa rrapportat ukoll li s-CCP teżerċita pressjoni fuq il-kumpaniji privati biex tqiegħed il-“patrijottiżmu” bħala prijorità u ssegwi d-dixxiplina tal-partit (35). Fl-2017, ġie rrapportat li kienu jeżistu ċelloli tal-partiti f’madwar 70 % ta’ madwar 1,86 miljun kumpanija bi sjieda privata, li rriżulta fi pressjoni dejjem akbar biex l-organizzazzjonijiet tas-CCP ikollhom l-aħħar kelma fir-rigward tad-deċiżjonijiet kummerċjali fil-kumpaniji rispettivi tagħhom (36). Dawn ir-regoli għandhom applikazzjoni ġenerali fl-ekonomija Ċiniża kollha, fost is-setturi kollha, inkluż għall-produtturi tal-SSHR u għall-fornituri tal-inputs tagħhom.

(129)

Speċifikament fis-settur tal-azzar, kif diġà ġie indikat, ħafna mill-produtturi ewlenin huma proprjetà tal-Istat (ara l-premessa (123)). Xi wħud huma msemmija speċifikament fil-“Pjan għall-Aġġustament u t-Titjib tal-Industrija tal-Azzar għas-snin 2016-2020” (37). L-esportaturi produtturi ewlenin tal-Istat ta’ spiss huma l-produtturi ewlenin fid-dinja tal-SSHR, kemm jekk integrati kif ukoll jekk le. Pereżempju, Shanxi Taiyuan Iron & Steel Co. Ltd. (“TISCO”), li hija proprjetà tal-Istat Ċiniż issemmi fuq is-sit web tagħha li hija “kumpanija kbira tal-ħadid u tal-azzar kif ukoll intrapriża ewlenija fl-industrija globali tal-azzar inossidabbl i”, “l-akbar intrapriża tal-azzar inossidabbli mgħammra bl-akbar kapaċità fuq livell globali u l-aktar teknoloġija u tagħmir aġġornat i”. Għalhekk, “TISCO żviluppat f’kumpless tal-ħadid u tal-azzar fuq skala kbira b’mod straordinarju, li huwa integrat man-negozju tal-estrazzjoni tal-ħadid, il-produzzjoni, l-ipproċessar, il-forniment u n-negozjar tal-ħadid u tal-azza r” (38). Baosteel hija intrapriża ewlenija oħra Ċiniża tal-Istat li hija involuta fil-manifattura tal-azzar inossidabbli u hija miżmuma minn China Baowu Steel Group Co. Ltd (preċedentement Baosteel Group u Wuhuan Iron & Steel) li ġie kkonsolidat reċentement (39).

(130)

Il-GOC huwa preżenti wkoll fl-intrapriżi tal-azzar inossidabbli permezz ta’ ħatriet personali. Eżempju ta’ dan l-approċċ huwa l-produttur tal-azzar inossidabbli TISCO, fejn id-Deputat Segretarju tal-Kumitat tas-CCP ġie nominat ukoll bħala l-President ta’ TISCO b’deċiżjoni mill-Kumitat tas-CCP u l-Gvern tal-Provinċja ta’ Shanxi (40).

(131)

Il-preżenza u l-intervent mill-Istat fis-swieq finanzjarji (ara wkoll it-taqsima h) kif ukoll fil-provvista ta’ materja prima u ta’ inputs għandhom effett ta’ distorsjoni addizzjonali fuq is-suq tal-SSHR (41). B’hekk, il-preżenza tal-Istat f’ditti, inklużi SOEs, fis-settur tal-azzar u f’setturi oħrajn (bħas-settur finanzjarju u dak tal-input inkluż l-NFM) tippermetti lill-GOC jinterferixxi fir-rigward tal-prezzijiet u tal-kostijiet.

(132)

Il-GOC jintervjeni b’mod dirett fl-ipprezzar tal-kapital, il-manodopera, l-art, il-materja prima u l-inputs bażiċi għall-proċess tal-produzzjoni. Għalkemm il-prezzijiet għall-prodotti finali huma fil-biċċa l-kbira ddeterminati mill-mekkaniżmi tas-suq, id-distorsjonijiet fil-prezzijiet li nħolqu fil-bidu tal-katina tal-valur jitfgħu dellijiet twal fuq dawn il-prezzijiet stess u joħolqu sinjali tal-prezzijiet “ħżiena” li ma jirriflettux l-iskarsezzi veri fl-industrija u jgħawġu l-bilanċi tal-profitt u t-telf tal-atturi kollha involuti.

(133)

Id-direzzjoni tal-ekonomija Ċiniża hija ddeterminata f’livell sinifikanti minn sistema elaborata ta’ ppjanar li tistabbilixxi prijoritajiet u tippreskrivi l-għanijiet li l-gvernijiet ċentrali u lokali għandhom jiffokaw fuqhom. Jeżistu pjanijiet rilevanti fil-livelli kollha tal-gvern u dawn ikopru virtwalment is-setturi ekonomiċi kollha. L-objettivi stabbiliti mill-istrumenti tal-ippjanar huma ta’ natura vinkolanti u l-awtoritajiet f’kull livell amministrattiv jimmonitorjaw l-implimentazzjoni tal-pjanijiet mil-livell korrispondenti aktar baxx tal-gvern. B’mod ġenerali, is-sistema tal-ippjanar fil-PRC tirriżulta fis-sitwazzjoni fejn ir-riżorsi jintbagħtu lejn setturi ddeżinjati bħala strateġiċi jew inkella politikament importanti mill-gvern, minflok ma jkunu allokati skont il-forzi tas-suq (42).

(134)

L-industrija tal-azzar hija meqjusa bħala industrija essenzjali mill-GOC (43). Dan huwa kkonfermat fil-bosta pjanijiet, direttivi u dokumenti oħrajn iffokati fuq l-azzar, li jinħarġu fil-livell nazzjonali, reġjonali u muniċipali, bħall-“Pjan għall-Aġġustament u t-Titjib tal-Industrija tal-Azzar għas-snin 2016-2020”. Dan il-Pjan jiddikjara li l-industrija tal-azzar hija “settur importanti u fundamentali tal-ekonomija Ċiniża, pedament nazzjonali” (44). Il-kompiti u l-objettivi ewlenin stabbiliti f’dan il-Pjan ikopru l-aspetti kollha tal-iżvilupp tal-industrija (45).

(135)

It-13-il Pjan ta’ Ħames Snin dwar l-Iżvilupp Ekonomiku u Soċjali (46) jipprevedi appoġġ għall-intrapriżi li jipproduċu tipi ta’ prodotti tal-azzar ta’ livell għoli (47). Dan jiffoka wkoll fuq il-kisba ta’ kwalità, ta’ durabbiltà u ta’ affidabbiltà tal-prodotti permezz tas-sostenn lill-kumpaniji li jużaw teknoloġiji relatati mal-produzzjoni tal-azzar nadif, il-laminazzjoni bi preċiżjoni u t-titjib fil-kwalità (48).

(136)

Il-“Katalogu għall-Iggwidar tar-Ristrutturar tal-Industrija (Verżjoni tal-2011) (Emenda tal-2013)” (49) (“il-Katalogu”) jelenka l-ħadid u l-azzar bħala industriji mħeġġa.

(137)

Il-GOC jiggwida wkoll l-iżvilupp tas-settur skont firxa wiesgħa ta’ għodod politiċi u ta’ direttivi relatati, fost l-oħrajn: mal-kompożizzjoni u r-ristrutturar tas-suq, mal-materja prima, mal-investiment, mal-eliminazzjoni tal-kapaċità, mal-firxa ta’ prodotti, mar-rilokazzjoni, mat-titjib, eċċ. Permezz ta’ dawn il-mezzi u ta’ oħrajn, il-GOC jidderieġi u jikkontrolla virtwalment kull aspett fl-iżvilupp u fil-funzjonament tas-settur (50). Il-problema attwali tal-kapaċità żejda hija l-aktar eżempju ċar tal-implikazzjonijiet tal-politiki tal-GOC u tad-distorsjonijiet riżultanti.

(138)

Fil-qosor, l-GOC għandu miżuri fis-seħħ biex iħeġġeġ lill-operaturi jikkonformaw mal-objettivi tal-ordni pubbliku li jappoġġjaw l-industriji mħeġġa, inkluża l-produzzjoni tal-SSHR, bħala parti mis-settur tal-azzar imħeġġeġ. Tali miżuri jimpedixxu lill-forzi tas-suq milli joperaw b’mod normali.

(139)

Skont l-informazzjoni fil-fajl, is-sistema Ċiniża tal-falliment ipproduċiet riżultati inadegwati fl-ilħuq tal-objettivi ewlenin tagħha stess, bħal dawk ta’ saldu ġust tal-pretensjonijiet u tad-djun u ta’ salvagwardja tad-drittijiet u tal-interessi legali tal-kredituri u tad-debituri. Dan jidher li huwa msejjes fil-fatt li filwaqt li l-liġi Ċiniża dwar il-falliment tistrieħ formalment fuq prinċipji simili għal dawk li jiġu applikati f’liġijiet korrispondenti f’pajjiżi oħra minbarra l-PRC, is-sistema Ċiniża hija karatterizzata minn nuqqas ta’ infurzar sistematiku. L-għadd ta’ fallimenti jibqa’ magħruf li huwa baxx meta mqabbel mad-daqs tal-ekonomija tal-pajjiż, mhux l-inqas minħabba li l-proċedimenti ta’ insolvenza jbatu minn għadd ta’ nuqqasijiet, li effettivament jiffunzjonaw bħala diżinċentiv għall-preżentazzjonijiet ta’ fallimenti. Barra minn hekk, ir-rwol tal-Istat fil-proċedimenti ta’ insolvenza għadu wieħed b’saħħtu u attiv, li spiss ikollu influwenza diretta fuq l-eżitu tal-proċedimenti (51).

(140)

Barra minn hekk, in-nuqqasijiet tas-sistema tad-drittijiet ta’ proprjetà huma partikolarment evidenti fir-rigward tas-sjieda tal-art u d-drittijiet għall-użu tal-art fil-PRC. (52) L-art kollha hi proprjetà tal-Istat Ċiniż (art rurali ta’ proprjetà kollettiva u art urbana tal-Istat). L-allokazzjoni tagħha għadha tiddependi biss fuq l-Istat. Hemm dispożizzjonijiet legali li għandhom l-għan li jallokaw id-drittijiet għall-użu tal-art b’mod trasparenti u li huma mmirati lejn il-prezzijiet tas-suq, pereżempju bl-introduzzjoni ta’ proċeduri ta’ offerti. Madankollu, dawn id-dispożizzjonijet ma jiġux irrispettati b’mod regolari, fejn ċerti akkwirenti jiksbu l-art tagħhom mingħajr ħlas jew b’rati aktar baxxi mir-rati tas-suq (53). Barra minn dan, l-awtoritajiet spiss isegwu għanijiet politiċi speċifiċi, inkluża l-implimentazzjoni tal-pjanijiet ekonomiċi, meta jkunu qed jallokaw l-art (54).

(141)

L-istess bħas-setturi l-oħra fl-ekonomija Ċiniża, il-produtturi tal-SSHR huma soġġetti għar-regoli ordinarji dwar il-liġijiet Ċiniżi dwar il-falliment, dwar il-liġi tal-kumpaniji u dwar il-proprjetà. L-effett ta’ dan huwa li anke dawn il-kumpaniji huma soġġetti għad-distorsjonijiet minn fuq għal isfel li jirriżultaw mill-applikazzjoni diskriminatorja jew mill-infurzar inadegwat tal-liġijiet dwar il-falliment u l-proprjetà. L-investigazzjoni attwali ma żvelat xejn li jqajjem dubji dwar dawn is-sejbiet. Għalhekk, il-Kummissjoni kkonkludiet b’mod preliminari li l-liġijiet Ċiniżi dwar il-fallimenti u l-proprjetà ma jaħdmux kif suppost, u b’hekk iwasslu għal distorsjonijiet meta jiġu miżmuma ħajjin ditti insolventi u meta jiġu allokati d-drittijiet għall-użu tal-art fil-PRC. Dawk il-kunsiderazzjonijiet, abbażi tal-evidenza disponibbli, jidhru li huma applikabbli bis-sħiħ anke fis-settur tal-azzar inossidabbli.

(142)

Fid-dawl ta’ dan ta’ hawn fuq, il-Kummissjoni kkonkludiet li kien hemm applikazzjoni diskriminatorja jew infurzar inadegwat tal-liġijiet dwar il-falliment u l-proprjetà fis-settur tal-azzar, inkluż fir-rigward tal-prodott ikkonċernat.

(143)

Mhuwiex possibbli li fil-PRC tiżviluppa bis-sħiħ sistema ta’ pagi bbażata fuq is-suq peress li d-drittijiet ta’ organizzazzjoni kollettiva tal-ħaddiema u tal-impjegaturi huma mxekkla. Il-PRC ma rratifikatx għadd ta’ konvenzjonijiet essenzjali tal-Organizzazzjoni Internazzjonali tax-Xogħol (“ILO”), b’mod partikolari dawk dwar il-libertà ta’ assoċjazzjoni u dwar in-negozjar kollettiv (55). Skont il-liġi nazzjonali, organizzazzjoni waħda biss tat-trade unions hija attiva. Madankollu, din l-organizzazzjoni mhijiex indipendenti mill-awtoritajiet tal-Istat u l-involviment tagħha fin-negozjar kollettiv u fil-protezzjoni tad-drittijiet tal-ħaddiema għadu rudimentali (56). Barra minn dan, il-mobbiltà tal-forza tax-xogħol Ċiniża hija ristretta mis-sistema tar-reġistrazzjoni tal-unitajiet domestiċi, li tillimita l-aċċess għall-firxa sħiħa tal-benefiċċji tas-sigurtà soċjali u oħrajn lir-residenti lokali ta’ żona amministrattiva partikolari. Dan tipikament jirriżulta f’ħaddiema li ma jkollhomx ir-reġistrazzjoni tar-residenza lokali li jsibu ruħhom f’pożizzjoni ta’ impjieg vulnerabbli u jirċievu introjtu aktar baxx mid-detenturi tar-reġistrazzjoni tar-residenza (57). Dawk is-sejbiet iwasslu għad-distorsjoni tal-kostijiet lavorattivi fil-PRC.

(144)

Ma ġiet ippreżentata l-ebda evidenza li turi li s-settur tal-azzar, inklużi l-produtturi tal-SSHR, mhuwiex soġġett għas-sistema Ċiniża dwar il-liġi tax-xogħol deskritta. Għaldaqstant, il-parti tal-SSHR mis-settur tal-azzar hija għalhekk affettwata mid-distorsjonijiet tal-kostijiet tal-pagi kemm direttament (meta jkun qed isir il-prodott ikkonċernat) kif ukoll indirettament (meta jiġu aċċessati l-kapital jew inputs minn kumpaniji soġġetti għall-istess sistema tax-xogħol fil-PRC).

(145)

L-aċċess għall-kapital għal atturi korporattivi fil-PRC huwa soġġett għal diversi distorsjonijiet.

(146)

L-ewwel nett, is-sistema finanzjarja Ċiniża hija karatterizzata mill-pożizzjoni b’saħħitha tal-banek tal-Istat (58), li, meta jagħtu aċċess għal finanzjament, iqisu kriterji oħra għajr il-vijabbiltà ekonomika ta’ proġett. B’mod simili għall-SOEs mhux finanzjarji, il-banek jibqgħu marbuta mal-Istat mhux biss permezz tas-sjieda iżda wkoll permezz ta’ azzjonijiet personali (l-ogħla eżekuttivi tal-istituzzjonijiet finanzjarji tal-Istat fl-aħħar mill-aħħar jinħatru mis-CCP) (59) u, għal darb’oħra eżatt bħal fil-każ tal-SOEs mhux finanzjarji, il-banek jimplimentaw b’mod regolari ordnijiet pubbliċi mfassla mill-gvern. Meta jagħmlu dan, il-banek jikkonformaw ma’ obbligu legali espliċitu li jmexxu n-negozju tagħhom f’konformità mal-ħtiġijiet tal-iżvilupp ekonomiku u soċjali nazzjonali u skont il-gwida tal-politiki industrijali tal-Istat (60). Dan jiġi amplifikat permezz ta’ regoli eżistenti addizzjonali, li jmexxu l-finanzi f’setturi li l-gvern jagħżel bħala mħeġġa jew li b’xi mod ieħor huma importanti (61).

(147)

Filwaqt li huwa rikonoxxut li diversi dispożizzjonijiet legali jirreferu għall-ħtieġa li jiġu rrispettati l-imġiba bankarja normali u r-regoli prudenzjali bħall-ħtieġa li tiġi eżaminata l-affidabbiltà kreditizja tal-mutwatarju, l-evidenza massiva, inklużi s-sejbiet li saru fl-investigazzjonijiet tad-difiża tal-kummerċ, tissuġġerixxi li dawn id-dispożizzjonijiet għandhom biss rwol sekondarju fl-applikazzjoni tad-diversi strumenti legali.

(148)

Barra minn hekk, il-klassifikazzjonijiet tal-bonds u tal-kreditu ta’ spiss huma distorti għal diversi raġunijiet, inkluż il-fatt li l-valutazzjoni tar-riskju tiġi influwenzata mill-importanza strateġika tad-ditta għall-GOC u mis-saħħa ta’ kull garanzija impliċita mill-gvern. L-istimi jissuġġerixxu b’mod qawwi li l-klassifikazzjonijiet tal-kreditu Ċiniżi jikkorrispondu b’mod sistematiku għal klassifikazzjonijiet internazzjonali aktar baxxi (62).

(149)

Dan huwa amplifikat minn regoli eżistenti addizzjonali, li jirregolaw il-finanzi f’setturi li l-gvern jagħżel bħala inkoraġġiti jew li b’xi mod ieħor huma importanti (63). Dan jirriżulta fi preġudizzju għas-self lil SOEs, ditti privati kbar u konnessi tajjeb u ditti f’setturi industrijali ewlenin, li jimplika li d-disponibbiltà u l-kost tal-kapital mhumiex ugwali għall-atturi kollha fis-suq.

(150)

It-tieni, il-kostijiet tas-self inżammu baxxi b’mod artifiċjali biex jiġi stimolat it-tkabbir tal-investiment. Dan wassal għall-użu eċċessiv tal-investiment kapitali b’redditi dejjem aktar baxxi fuq l-investiment. Dan jintwera mit-tkabbir riċenti fl-ingranaġġ korporattiv fis-settur tal-istat minkejja tnaqqis kbir fil-profitabbiltà, li jissuġġerixxi li l-mekkaniżmi li jitħaddmu fis-sistema bankarja ma jsegwux tweġibiet kummerċjali normali.

(151)

It-tielet nett, minkejja li f’Ottubru 2015 inkisbet liberalizzazzjoni tar-rata tal-imgħax nominali, is-sinjali tal-prezzijiet għadhom mhumiex ir-riżultat ta’ forzi tas-suq ħieles, iżda huma influwenzati minn distorsjonijiet ikkawżati mill-gvern. Tabilħaqq, is-sehem ta’ self bir-rata ta’ referenza jew taħtha għadu jirrappreżenta 45 % tas-self kollu u r-rikors għal kreditu mmirat jidher li żdied, peress li dan is-sehem żdied notevolment mill-2015 minkejja d-deterjorament fil-kundizzjonijiet ekonomiċi. Rati tal-imgħax baxxi b’mod artifiċjali jirriżultaw fi prezz aktar baxx, u sussegwentement fl-użu eċċessiv tal-kapital.

(152)

It-tkabbir kumplessiv tal-kreditu fil-PRC jindika deterjorament tal-effiċjenza tal-allokazzjoni tal-kapital mingħajr ebda sinjal ta’ restrizzjoni kreditizja li tkun mistennija f’ambjent tas-suq mingħajr distorsjoni. Bħala riżultat, is-self improduttiv żdied b’mod rapidu fis-snin riċenti. Quddiem sitwazzjoni ta’ żieda tad-dejn f’riskju, il-GOC għażel li jevita l-inadempjenzi. B’konsegwenza ta’ dan, il-kwistjonijiet ta’ dejn mitluf ġew ittrattati permezz ta’ riportament ta’ dejn, sabiex b’hekk inħolqu l-hekk imsejħa kumpaniji “zombie”, jew permezz tat-trasferiment tas-sjieda tad-dejn (eż. permezz ta’ fużjonijiet jew swaps ta’ dejn għal ekwità), mingħajr ma neċessarjament titneħħa l-problema kumplessiva tad-dejn jew jiġu indirizzati l-kawżi ewlenin tagħha.

(153)

Essenzjalment, minkejja l-passi reċenti li ttieħdu biex is-suq jiġi lliberalizzat, is-sistema tal-kreditu korporattiv fil-PRC hija affettwata minn distorsjonijiet sinifikanti bħala riżultat tar-rwol pervażiv kontinwu tal-istat fis-swieq kapitali.

(154)

Ma ġiet ippreżentata l-ebda evidenza li turi li s-settur tal-azzar, inkluża l-produzzjoni tal-azzar inossidabbli, se jkun eżentat mill-intervent tal-gvern deskritt hawn fuq fis-sistema finanzjarja. Għalhekk, l-intervent sostanzjali tal-gvern fis-sistema finanzjarja jwassal biex il-kundizzjonijiet tas-suq jiġu affettwati b’mod serju fil-livelli kollha.

(155)

Il-Kummissjoni nnotat li d-distorsjonijiet deskritti fir-Rapport kienu karatteristiċi għall-ekonomija Ċiniża. L-evidenza disponibbli turi li l-fatti u l-karatteristiċi tas-sistema Ċiniża kif deskritt hawn fuq fit-Taqsimiet a)-e) kif ukoll fil-Parti A tar-Rapport japplikaw fil-pajjiż kollu u fis-setturi kollha tal-ekonomija. L-istess japplika għad-deskrizzjoni tal-fatturi tal-produzzjoni kif stabbilit hawn fuq fit-Taqsimiet f)-h) t’hawn fuq u fil-Parti B tar-Rapport.

(156)

Il-Kummissjoni tfakkar li sabiex jiġu prodotti l-SSHR, hemm bżonn firxa wiesgħa ta’ inputs. Meta l-produtturi tal-SSHR jixtru/jikkuntrattaw dawn l-inputs, il-prezzijiet li jħallsu (u li huma rreġistrati bħala l-kostijiet tagħhom) huma kjarament esposti għall-istess distorsjonijiet sistemiċi msemmija qabel. Pereżempju, il-fornituri tal-inputs iħaddmu manodopera li hija soġġetta għad-distorsjonijiet. Jistgħu jissellfu flus li jkunu soġġetti għad-distorsjonijiet fuq is-settur finanzjarju/l-allokazzjoni tal-kapital. Barra minn hekk, huma soġġetti għas-sistema ta’ ppjanar li tapplika fil-livelli kollha tal-gvern u fis-setturi kollha.

(157)

Bħala konsegwenza, mhux biss il-prezzijiet tal-bejgħ domestiku tal-SSHR mhumiex xierqa għall-użu skont it-tifsira tal-Artikolu 2(6a)(a) tar-Regolament bażiku, iżda l-kostijiet kollha tal-input (inklużi l-materja prima, l-enerġija, l-art, il-finanzjament, ix-xogħol, eċċ.) huma wkoll ivvizzjati minħabba li l-formazzjoni tal-prezzijiet tagħhom hija affettwata minn intervent sostanzjali tal-gvern, kif deskritt fil-Partijiet A u B tar-Rapport. Tabilħaqq, l-interventi tal-gvern deskritti fir-rigward tal-allokazzjoni tal-kapital, l-art, il-manodopera, l-enerġija u l-materja prima huma preżenti fil-PRC kollha. Dan ifisser, pereżempju, li input li ġie prodott fil-PRC permezz tal-kombinazzjoni ta’ firxa ta’ fatturi tal-produzzjoni huwa espost għal distorsjonijiet sinifikanti. L-istess japplika għall-input, lejn l-input u l-bqija. Fl-investigazzjoni attwali la l-GOC u lanqas il-produtturi esportaturi ma ppreżentaw l-ebda evidenza jew argument li juri l-kuntrarju.

(158)

L-analiżi stabbilita fil-punti a) sa i) ta’ din it-taqsima, li tinkludi eżami tal-evidenza kollha disponibbli relatata mal-intervent tal-PRC fl-ekonomija tagħha b’mod ġenerali kif ukoll fis-settur tal-azzar uriet li l-prezzijiet jew il-kostijiet tal-prodott ikkkonċernat, inklużi l-kostijiet tal-materja prima, tal-enerġija u tax-xogħol, mhumiex ir-riżultat ta’ forzi tas-suq ħieles għax huma affettwati minn intervent sostanzjali tal-gvern skont it-tifsira tal-Artikolu 2(6a)(b) tar-Regolament bażiku kif muri mill-impatt attwali jew potenzjali ta’ wieħed jew aktar mill-elementi rilevanti elenkati fih. Abbażi ta’ dan, u fin-nuqqas ta’ ebda kooperazzjoni mill-GOC, il-Kummissjoni kkonkludiet li mhuwiex xieraq li jintużaw prezzijiet u kostijiet domestiċi biex jiġi stabbilit il-valur normali f’dan il-każ.

(159)

B’konsegwenza ta’ dan, il-Kummissjoni pproċediet biex tibni l-valur normali esklussivament abbażi tal-kostijiet tal-produzzjoni u tal-bejgħ li jirriflettu l-prezzijiet jew il-valuri referenzjarji mingħajr distorsjoni, jiġifieri, f’dan il-każ, abbażi tal-kostijiet korrispondenti tal-produzzjoni u tal-bejgħ f’pajjiż rappreżentattiv xieraq, f’konformità mal-Artikolu 2(6a)(a) tar-Regolament bażiku, kif diskuss fit-taqsima li ġejja.

(160)

L-għażla tal-pajjiż rappreżentattiv kienet ibbażata fuq il-kriterji li ġejjin:

(161)

Kif spjegat fil-premessi (33) sa (35) il-Kummissjoni ppubblikat żewġ noti għall-fajl dwar is-sorsi għad-determinazzjoni tal-valur normali.

(162)

Fin-Nota tad-9 ta’ Settembru, il-Kummissjoni infurmat lill-partijiet interessati li, abbażi tal-kriterji elenkati fil-premessa (157), hija kienet identifikat l-erba’ pajjiżi rappreżentattivi possibbli li ġejjin: Il-Brażil, il-Malasja, l-Afrika t’Isfel u t-Turkija.

(163)

Il-Kummissjoni rċeviet kummenti minn tliet partijiet interessati: l-ilmentatur u tnejn mill-produtturi esportaturi Ċiniżi inklużi fil-kampjun.

(164)

Iż-żewġ produtturi esportaturi Ċiniżi sostnew fis-sottomissjonijiet tagħhom li l-Malasja tkun l-aħjar pajjiż rappreżentattiv għaliex tissodisfa l-kriterji kollha tal-Artikolu 2(6a)(a) tar-Regolament bażiku, filwaqt li l-Brażil u l-Afrika t’Isfel allegatament għandhom livell aktar baxx ta’ protezzjoni soċjali u ambjentali.

(165)

Min-naħa l-oħra, fis-sottomissjoni tiegħu l-ilmentatur indika li ma kien hemm l-ebda produzzjoni tal-prodott li qed jiġi investigat fil-Malasja jew fit-Turkija.

(166)

Il-kumpanija Malasjana identifikata bħala produttur potenzjali tal-prodott li qed jiġi investigat hija, skont is-sottomissjoni tal-ilmentatur, involuta biss fir-rilaminazzjoni ta’ kojls illaminati bis-sħana f’kojls illaminati bil-kesħa u apparentament la kellha workshop tat-tidwib u lanqas linja ta’ laminazzjoni bis-sħana. L-ilmentatur ibbaża l-pretensjonijiet tiegħu f’dan ir-rigward fuq ir-rapport finanzjarja kkonsolidat u awditjat tal-Grupp Acerinox tal-2017. Ir-rapport finanzjarju tal-Grupp tal-2018 ukoll ikkonferma din l-allegazzjoni.

(167)

Fir-rigward tat-Turkija, l-ilmentatur stqarr li l-kumpanija inkwistjoni kienet involuta biss fil-produzzjoni ta’ ammont insinifikanti ta’ prodotti tal-azzar inossidabbli. Barra minn hekk, din il-produzzjoni kienet limitata għal prodotti twal tal-azzar martensitiku b’billetti bħala materja prima, li fil-fatt jeskludu l-produzzjoni tal-prodott li qed jiġi investigat.

(168)

Ir-riċerka li saret mill-Kummissjoni stess ikkonfermat il-pretensjonijiet tal-ilmentatur abbażi tar-rapport ikkonsolidat u awditjat tal-2018 tal-grupp Acerinox u s-siti web uffiċjali taż-żewġ kumpaniji inkwistjoni.

(169)

L-ilmentatur ikkonferma li l-prodott li qed jiġi investigat huwa prodott fl-Afrika t’Isfel minn waħda mill-kumpaniji tal-Grupp Acerinox, kif indikat mill-Kummissjoni fin-Nota tad-9 ta’ Settembru. Madankollu, l-ilmentatur qajjem diversi argumenti favur l-għażla tal-Brażil bħala pajjiż rappreżentattiv minflok l-Afrika t’Isfel.

(170)

L-ewwel nett, l-ilmentatur indika li f’termini ta’ żvilupp ekonomiku mkejjel bl-indiċi tal-ING, il-Brażil huwa ħafna eqreb lejn il-PRC mill-Afrika t’Isfel (l-Afrika t’Isfel għandha pożizzjoni ferm aktar baxxa f’din l-istatistika).

(171)

Madankollu, anke jekk f’termini ta’ data attwali tal-ING l-Afrika t’Isfel hija aktar ’il bogħod mill-PRC milli mill-Brażil, it-tliet pajjiżi kollha għadhom ikklassifikati bħala pajjiżi b’introjtu medju superjuri mill-Bank Dinji. Għalhekk, il-Kummissjoni ċaħdet din il-pretensjoni.

(172)

It-tieni, l-ilmentatur iddikjara li l-Afrika t’Isfel kienet l-akbar produttur dinji tal-kromju, input importanti għall-azzar inossidabbli, u għalhekk il-livell tal-prezz ta’ dan l-input ma jkunx rappreżentattiv.

(173)

Il-fatt li pajjiż jipproduċi input tal-prodott li qed jiġi investigat ma jagħmilx awtomatikament il-livell tal-prezz tal-importazzjonijiet ta’ dak il-prodott f’dak il-pajjiż mhux rappreżentattiv. L-ilmentatur ma pprovdiex evidenza tal-impatt tal-produzzjoni domestika kbira fuq il-prezz tal-importazzjoni. Għalhekk, il-Kummissjoni kkonkludiet li din il-pretensjoni hija bla bażi.

(174)

Fl-aħħar nett, l-ilmentatur ipprovda lill-Kummissjoni l-kontijiet awditajti disponibbli għall-pubbliku tal-produttur Brażiljan tal-prodott li qed jiġi investigat imsemmi fin-Nota tad-9 ta’ Settembru, li jistgħu jintużaw bħala sors ta’ data għall-kostijiet SG&A u l-profitt meħtieġ fil-kalkolu tal-valur normali. Għall-produttur tal-Afrika t’Isfel identifikat fl-istess Nota, tali data kienet disponibbli biss fil-livell konsolidat tal-grupp.

(175)

Abbażi tal-kwalità u d-dettall tad-data finanzjarja faċilment disponibbli fil-Brażil, kif ipprovduta mill-ilmentatur, kif ukoll b’kunsiderazzjoni tar-rappreżentattività tal-fatturi tal-produzzjoni kif spjegat fit-taqsima 3.2.2.3 t’hawn taħt, il-Kummissjoni kkonkludiet li l-Brażil jenħtieġ li jitqies bħala pajjiż rappreżentattiv xieraq fin-Nota tagħha tal-10 ta’ Ottubru.

(176)

Wara li stabbiliet lill-Brażil bħala pajjiż rappreżentattiv xieraq f’termini ta’ livell ta’ żvilupp u disponibbiltà ta’ statistika rilevanti dwar l-importazzjoni u data finanzjarja, il-Kummissjoni ma qisitx li kien meħtieġ li jiġi vvalutat il-livell ta’ protezzjoni soċjali u ambjentali tal-pajjiżi rappreżentattivi potenzjali.

(177)

Ma wasal l-ebda kumment mill-partijiet interessati fir-rigward tan-Nota tal-10 ta’ Ottubru.

(178)

Fid-dawl tal-analiżi ta’ hawn fuq, il-Brażil jissodisfa l-kriterji kollha stabbiliti fl-ewwel inċiż tal-Artikolu 2(6a)(a) tar-Regolament bażiku biex jitqies bħala pajjiż rappreżentattiv xieraq. B’mod partikolari, minbarra li għandu livell ta’ żvilupp ekonomiku simili għall-PRC, il-Brażil għandu produzzjoni sostanzjali tal-prodott li qed jiġi investigat u sett komplut ta’ data disponibbli għall-fatturi tal-produzzjoni, għall-SG&A u għall-profitt matul il-perjodu ta’ investigazzjoni.

(179)

Abbażi tal-informazzjoni sottomessa mill-partijiet interessati u informazzjoni rilevanti oħra disponibbli fil-fajl, il-Kummissjoni stabbiliet fin-Nota tad-9 ta’ Settembru lista inizjali ta’ fatturi ta’ produzzjoni u sorsi maħsuba biex jintużaw għall-fatturi kollha ta’ produzzjoni bħall-materjali, l-enerġija u x-xogħol użati fil-produzzjoni tal-prodott li qed jiġi investigat mill-produtturi esportaturi. Il-Kummissjoni ddikjarat li, sabiex tibni l-valur normali skont l-Artikolu 2(6a)(a) tar-Regolament bażiku, sa fejn kien possibbli kienet se tuża l-Atlas tal-Kummerċ Globali (Global Trade Atlas, “GTA”) biex tistabbilixxi l-kost mingħajr distorsjoni tal-fatturi tal-produzzjoni, l-istatistika tal-Organizzazzjoni Internazzjonali tax-Xogħol (International Labour Organization, “ILO”) u l-istatistika nazzjonali sabiex tistabbilixxi l-kostijiet lavorattivi mingħajr distorsjoni, u sorsi oħra skont il-pajjiż rappreżentattiv magħżul biex tistabbilixxi l-kostijiet mingħajr distorsjoni tal-enerġija (bħall-elettriku, il-gass naturali, u l-ilma). Fl-istess nota, il-Kummissjoni identifikat il-kodiċijiet tas-Sistema Armonizzata (SA) ta’ fatturi ta’ produzzjoni li, abbażi tal-informazzjoni pprovduta mill-partijiet interessati, kienu inizjalment meqjusa li ntużaw għall-analiżi tal-GTA.

(180)

F’dan ir-rigward, wasal biss kumment mingħand l-ilmentatur li jindika li għal xi fatturi tal-produzzjoni l-kodiċijiet SA proposti mill-Kummissjoni kellhom kopertura wiesgħa wisq u jistgħu jinkludu taħlita ta’ prodotti li ma jkunux rappreżentattivi tal-kompożizzjoni kimika tal-inputs li fil-fatt jintużaw fil-produzzjoni tal-prodott li qed jiġi investigat. Il-Kummissjoni ħadet nota ta’ dan il-kumment. Dan tqies fi stadji ulterjuri tal-investigazzjoni skont il-kodiċijiet tal-prodotti tal-pajjiż rappreżentattiv u skont is-sejbiet miż-żjarat ta’ verifika tal-produtturi esportaturi.

(181)

Il-Kummissjoni kompliet tanalizza l-informazzjoni inizjali li waslet dwar il-kodiċijiet SA mill-partijiet interessati u sabet li ċerti fatturi tal-produzzjoni, jiġifieri ċerta materja prima u ċerti oġġetti tal-konsum, possibbilment ma kinux ikklassifikati b’mod korrett. Il-kodiċijiet SA emendati u l-lista ta’ fatturi ta’ produzzjoni ġew ippubblikati fin-Nota tal-10 ta’ Ottubru. Il-Kummissjoni analizzat ukoll id-disponibbiltà tad-data dwar l-importazzjonijiet li tintuża għall-kalkolu tal-valuri referenzjarji għall-kostijiet mingħajr distorsjoni u vverifikat l-eżistenza ta’ restrizzjonijiet fil-pajjiż rappreżentattiv li jikkonċernaw l-esportazzjonijiet tal-fatturi tal-produzzjoni.

(182)

Fin-Nota tal-10 ta’ Ottubru, il-Kummissjoni informat li kienet se tuża l-GTA biex tistabbilixxi l-kostijiet mingħajr distorsjoni tal-fatturi tal-produzzjoni, l-istatistika tal-ILO u sorsi oħra disponibbli għall-pubbliku (65) biex tistabbilixxi l-kostijiet lavorattivi mingħajr distorsjoni, u t-tariffi imposti minn fornituri Brażiljani magħżula tal-elettriku, tal-gass naturali u tal-ilma biex tistabbilixxi l-kostijiet mingħajr distorsjoni ta’ dawk it-tipi ta’ enerġija.

(183)

Fl-istess nota, il-Kummissjoni informat ukoll lill-partijiet interessati li, biex tistabbilixxi l-SG&A u l-profitt mingħajr distorsjoni, se tuża d-data finanzjarja tal-uniku produttur Brażiljan magħruf tal-prodott li qed jiġi investigat li għalih hija disponibbli għall-pubbliku data finanzjarja ddettaljata — Aperam Inox America do Sul S.A. Il-partijiet interessati ma ppreżentawx data finanzjarja disponibbli għall-pubbliku ta’ kwalunkwe produttur ieħor tal-prodott li qed jiġi investigat fil-Brażil u l-Kummissjoni ma sabitx tali data.

(184)

Wara n-Nota tal-10 ta’ Ottubru, il-Kummissjoni ma rċeviet l-ebda kumment ieħor dwar is-sorsi għall-kostijiet u għall-valuri refernzjarji mingħajr distorsjoni. Għalhekk, is-sorsi elenkati fil-premessi (178) u (180) ġew ikkonfermati b’mod provviżorju.

(185)

Kif diġà ntqal fil-premessa (176) u (178) sa (179), il-Kummissjoni fittxet li tistabbilixxi lista inizjali tal-fatturi tal-produzzjoni u tas-sorsi li kienu maħsuba li jintużaw għall-fatturi kollha tal-produzzjoni bħall-materjali, l-enerġija u l-manodopera użati fil-produzzjoni tal-prodott ikkonċernat mill-produtturi esportaturi.

(186)

Il-Kummissjoni ma reċeviet l-ebda kumment dwar il-lista ta’ fatturi tal-produzzjoni wara n-Nota tal-10 ta’ Ottubru fejn, abbażi tal-informazzjoni li waslet mingħand il-partijiet interessati, il-Kummissjoni stabbiliet lista tal-kodiċijiet SA potenzjali li jikkorrispondu għall-fatturi tal-produzzjoni użati fil-manifattura tal-prodott ikkonċernat.

(187)

Il-Kummissjoni mbagħad stabbiliet lista definittiva tal-fatturi tal-produzzjoni u l-kodiċijiet SA korrispondenti wara ż-żjarat ta’ verifika fil-bini tal-produtturi esportaturi inklużi fil-kampjun.

(188)

Meta titqies l-informazzjoni kollha sottomessa mill-partijiet interessati u miġbura waqt iż-żjarat ta’ verifika, fejn applikabbli, ġew identifikati l-fatturi tal-produzzjoni u l-kodiċijiet SA li ġejjin:

Tabella 1

(189)

Matul iż-żjarat ta’ verifika, il-Kummissjoni vverifikat il-materja prima u l-materjali awżiljari użati fil-manifattura tal-prodott ikkonċernat.

(190)

Għall-materja prima kollha u l-materjali awżiljarji kollha, bl-eċċezzjoni ta’ dawk deskritti fil-premessi (190) u (192) hawn taħt, il-Kummissjoni bbażat ruħha fuq il-prezzijiet tal-importazzjoni fil-pajjiż rappreżentattiv. Il-prezz tal-importazzjoni fil-pajjiż rappreżentattiv ġie ddeterminat bħala l-medja ponderata tal-prezzijiet ta’ unità tal-importazzjonijiet mill-pajjiżi terzi kollha minbarra l-PRC. Il-Kummissjoni ddeċidiet li teskludi l-importazzjonijiet mill-PRC lejn il-pajjiż rappreżentattiv peress li fil-premessa (156) ikkonkludiet li mhuwiex xieraq li jintużaw il-prezzijiet u l-kostijiet domestiċi fil-PRC minħabba l-eżistenza ta’ distorsjonijiet sinifikanti skont l-Artikolu 2(6a)(b) tar-Regolament bażiku. Minħabba li ma hemm l-ebda evidenza li turi li l-istess distorsjonijiet ma jaffettwawx bl-istess mod il-prodotti maħsuba għall-esportazzjoni, il-Kummissjoni kkunsidrat li l-istess distorsjonijiet affettwaw il-prezzijiet tal-esportazzjoni. Barra minn hekk, jidher li l-prezz tal-importazzjoni tal-materja prima ewlenija esportata mill-PRC lejn il-Brażil huwa aktar baxx mill-medja peżata tal-importazzjonijiet ta’ pajjiżi oħra. Barra minn hekk, ġiet eskluża wkoll id-data dwar l-importazzjoni fuq l-importazzjonijiet fil-pajjiż rappreżentattiv minn fost il-membri mhux tad-WTO elenkati fl-Anness 1 tar-Regolament (UE) 2015/755 tal-Parlament Ewropew u tal-Kunsill (67). L-Artikolu 2(7) tar-Regolament bażiku jikkunsidra li l-prezzijiet domestiċi f’dawk il-pajjiżi ma jistgħux jintużaw għall-iskop tad-determinazzjoni tal-valur normali u, fi kwalunkwe każ, tali data dwar l-importazzjoni kienet negliġibbli.

(191)

Sabiex tistabbilixxi l-prezz mingħajr distorsjoni tal-materja prima, ikkonsenjata sal-bieb tal-fabbrika tal-produttur esportatur kif previst fl-ewwel inċiż tal-Artikolu 2(6a)(a) tar-Regolament bażiku, il-Kummissjoni żiedet il-kostijiet tat-trasport internazzjonali u tal-assigurazzjoni (68) u applikat id-dazju tal-importazzjoni tal-pajjiż rappreżentattiv. Fi stadju aktar tard, matul il-kalkoli tal-marġni tad-dumping individwali, il-Kummissjoni żiedet il-kostijiet tat-trasport domestiku speċifiċi għall-kumpanija mal-prezz tal-importazzjoni. Il-kostijiet tat-trasport internazzjonali u dak domestiku għall-materja prima kollha kif ukoll il-kostijiet tal-assigurazzjoni ġew stmati abbażi tad-data vverifikata pprovduta mill-produttur esportatur li kkoopera.

(192)

Għal xi materja prima li għaliha ma kien hemm l-ebda valur referenzjarju jew il-valur referenzjarju disponibbli tqies bħala mhux rappreżentattiv (69) abbażi tal-istatistika tal-importazzjonijiet fil-pajjiż rappreżentattiv, il-Kummissjoni użat valuri referenzjarji bbażati fuq prezzijiet internazzjonali mingħajr distorsjoni jew data raġonevoli oħra. Dan sar għal ħames inputs:

(193)

Fejn il-prezz tal-esportazzjoni (73) ntuża biex jiġi ddeterminat il-prezz mingħajr distorsjoni ta’ materja prima, ma sar l-ebda aġġustament ulterjuri għad-data mill-GTA. Il-Kummissjoni qieset li l-kostijiet bejn fornitur Brażiljan u port internazzjonali kienu jirrappreżentaw il-kostijiet bejn tali fornitur u l-klijent Brażiljan tiegħu. Għalhekk, il-prezz mill-GTA jista’ jiġi aċċettat bħala l-prezz tal-materja prima kif ikkonsenjata sal-bieb tal-fabbrika tal-produttur esportatur.

(194)

Għal xi materja prima u materjali awżiljarji (74), il-produtturi esportaturi inklużi fil-kampjun ma setgħux jiddeterminaw il-volum tal-konsum fir-rekords tagħhom jew ma seta’ jiġi stabbilit l-ebda valur referenzjarju xieraq fil-pajjiż rappreżentattiv. B’mod ġenerali, dawk l-inputs kienu negliġibbli f’termini ta’ kostijiet. Dawn il-kostijiet ġew inklużi fl-ispejjeż ġenerali tal-manifattura kif spjegat fil-premessa (198), billi l-kostijiet attwali ta’ dik il-materja prima kienu jirrappreżentaw sehem negliġibbli fuq il-kostijiet attwali totali tal-manifattura tal-kumpaniji esportaturi inklużi fil-kampjun. Il-fatturi tal-produzzjoni li ġew tmexxew għall-ispejjeż ġenerali ġew elenkati fid-divulgazzjonijiet speċifiċi għall-kumpanija.

(195)

Biex tistabbilixxi l-valur referenzjarju għall-kostijiet lavorattivi, il-Kummissjoni użat l-istatistika tal-ILO flimkien ma’ informazzjoni pubblikament disponibbli dwar il-kostijiet lavorattivi addizzjonali mġarrba minn impjegatur fil-Brażil.

(196)

L-istatistika tal-ILO (75) pprovdiet data dwar is-sigħat medji li kull persuna impjegata effettivament taħdem fil-ġimgħa u d-dħul fix-xahar tal-impjegati fil-manifattura matul il-perjodu ta’ investigazzjoni. Bl-użu ta’ dik id-data, il-Kummissjoni kkalkolat salarju fis-siegħa fil-manifattura, li miegħu ġew miżjuda kostijiet addizzjonali relatati mal-manodopera (76) (kontribuzzjonijiet tas-sigurtà soċjali u tal-qgħad imġarrba mill-impjegatur).

(197)

Il-prezz tal-elettriku mitlub minn wieħed mill-akbar fornituri tal-elettriku fil-Brażil, il-kumpanija EDP Brazil, kien faċilment disponibbli (77). L-informazzjoni kienet iddettaljata biżżejjed biex jiġi identifikat il-prezz tal-elettriku u l-prezz għall-użu tas-sistema tad-distribuzzjoni (modalidade tarifaria azul) imħallas mill-utenti industrijali.

(198)

Ta’ min jinnota li fil-Brażil, l-awtorità regolatorja Agência Nacional de Energia Elétrica (78) (“ANEEL”) tobbliga lill-fornituri tal-elettriku jżidu t-tariffi tagħhom b’ċertu perċentwal biex tirregola l-konsum tal-elettriku fil-pajjiż. L-ANEEL tuża sistema ta’ indikaturi (79) (aħdar, isfar, aħmar 1, aħmar 2) biex tissenjala jekk il-prezz tal-elettriku jkollux jibqa’ kif propost mill-fornitur (aħdar) jew jekk ikollux jiżdied b’0,010 BRL/kWh (isfar), b’0,030 BRL/kWh (aħmar 1), jew b’0,050 BRL/kWh (aħmar 2). L-ANEEL tippubblika l-indikaturi kull xahar u għall-perjodu ta’ investigazzjoni kienu diġà disponibbli fuq is-sit web tal-EDP Brazil (80). Fid-determinazzjoni tal-kostijiet tal-elettriku mingħajr distorsjoni, il-Kummissjoni qieset l-indikaturi applikati matul il-perjodu ta’ investigazzjoni u aġġustat il-prezz skont dan.

(199)

It-tariffa tal-ilma hija faċilment disponibbli kif imposta mill-kumpanija Sabesp li hija responsabbli għall-provvista tal-ilma, għall-ġbir tad-drenaġġ u għat-trattament tiegħu fl-Istat ta’ Sao Paulo. L-informazzjoni tippermetti li jiġu identifikati t-tariffi (81) applikabbli għall-utenti industrijali fil-perjodu ta’ investigazzjoni għal diversi subreġjuni u muniċipalitajiet tal-Istat ta’ Sao Paulo (82). Il-Kummissjoni bbażat id-determinazzjoni tagħha tal-kostijiet mingħajr distorsjoni għall-ilma u għall-ġbir tad-drenaġġ fuq it-tariffa applikabbli għall-klijenti industrijali fiż-żona Metropolitana tal-Istat ta’ Sao Paulo matul il-perjodu ta’ investigazzjoni.

(200)

Il-prezz tal-gass naturali huwa faċilment disponibbli kif mitlub mill-akbar distributur tal-gass fil-Brażil, il-kumpanija Comgas, li tiffoka fuq l-Istat ta’ Sao Paulo. L-informazzjoni pprovduta fuq is-sit web (83) ta’ Comgas tippermetti li jiġi ddeterminat il-prezz tal-gass naturali pprovdut lill-utenti industrijali.

(201)

L-ispejjeż ġenerali tal-manifattura mġarrba mill-produtturi esportaturi li kkooperaw żdiedu bil-kostijiet tal-materja prima u l-materjali awżiljarji msemmija fil-premessa (192) u sussegwentement ġew espressi bħala sehem mill-kostijiet tal-manifattura attwalment imġarrba minn kull wieħed mill-produtturi esportaturi inklużi fil-kampjun. Dan il-perċentwal ġie applikat għall-kostijiet tal-manifattura mingħajr distorsjoni.

(202)

Għall-SG&A u l-profitt, Il-Kummissjoni użat id-data finanzjarja tal-uniku produttur Brażiljan magħruf tal-prodott li qed jiġi investigat li għalih hija disponibbli għall-pubbliku data finanzjarja ddettaljata — Aperam Inox America do Sul S.A. Il-kontijiet awditjati disponibbli għall-pubbliku tal-kumpanija ġew mgħarrfa lill-partijiet interessati bħala dokument mehmuż man-Nota tal-10 ta’ Ottubru.

(203)

Sabiex tistabbilixxi l-valur normali maħdum, il-Kummissjoni segwiet il-passi li ġejjin.

(204)

L-ewwel, il-Kummissjoni stabbiliet il-kostijiet mingħajr distorsjoni tal-manifattura. Hija applikat il-kostijiet unitarji mingħajr distorsjoni għall-konsum effettiv tal-fatturi individwali tal-produzzjoni tal-produttur esportatur inkluż fil-kampjun. Il-kostijiet tal-manifattura ġew imnaqqsa bil-kostijiet mingħajr distorsjoni tal-prodotti sekondarji li ntużaw mill-ġdid fil-proċess tal-produzzjoni kif irrappurtat mill-kumpaniji.

(205)

It-tieni, biex waslet għall-kostijiet tal-produzzjoni mingħajr distorsjoni, il-Kummissjoni żiedet l-ispejjeż ġenerali tal-manifattura ddeterminati kif deskritt fil-premessa (199) mal-kostijiet tal-manifattura mingħajr distorsjoni.

(206)

Fl-aħħar nett, għall-kostijiet tal-produzzjoni stabbiliti kif deskritt fil-premessa (203), il-Kummissjoni applikat l-SG&A u l-profitt ta’ Aperam Inox America do Sul S.A. kif spjegat fil-premessa (200).

(207)

L-SG&A, espressi bħala perċentwal tal-Kostijiet tal-Prodotti Mibjugħa (Costs of Goods Sold, “COGS”) u applikati għall-kostijiet tal-produzzjoni mingħajr distorsjoni, laħqu t-13,90 %.

(208)

Il-profitt espress bħala perċentwal tal-COGS u applikat għall-kostijiet tal-produzzjoni mingħajr distorsjoni laħaq is-7,65 %.

(209)

Il-valur normali kkalkulat kif deskritt fil-premessi minn (202) sa (206) tnaqqas bil-valur mingħajr distorsjoni tal-prodotti sekondarji mibjugħa mill-kumpaniji inklużi fil-kampjun.

(210)

Abbażi ta’ dak, il-Kummissjoni fasslet il-valur normali għal kull tip ta’ prodott fuq bażi ex-works, f’konformità mal-Artikolu 2(6a)(a) tar-Regolament bażiku. Peress li fil-kampjun kien għad fadal boss żewġ produtturi esportaturi Ċiniżi, il-Kummissjoni fasslet il-valur normali għal kull tip ta’ prodott għal dawn il-produtturi esportaturi biss.

(211)

Il-produtturi esportaturi Ċiniżi inkwistjoni esportaw lejn l-Unjoni direttament lil klijenti indipendenti jew permezz ta’ kumpaniji relatati li jaġixxu bħala esportaturi relatati f’pajjiż terz jew importaturi relatati fl-Unjoni.

(212)

Fejn il-produtturi esportaturi esportaw il-prodott ikkonċernat direttament lill-konsumaturi indipendenti fl-Unjoni, il-prezz tal-esportazzjoni kien il-prezz li tħallas attwalment jew dak pagabbli għall-prodott ikkonċernat meta nbiegħ għall-esportazzjoni lejn l-Unjoni, skont l-Artikolu 2(8) tar-Regolament bażiku.

(213)

Fejn il-produtturi esportaturi esportaw il-prodott ikkonċernat lejn l-Unjoni permezz ta’ importaturi relatati fl-Unjoni, il-prezz tal-esportazzjoni ġie stabbilit fuq il-bażi tal-prezz li bih il-prodott importat inbiegħ għall-ewwel darba lil klijenti indipendenti fl-Unjoni, skont l-Artikolu 2(9) tar-Regolament bażiku. F’dan il-każ, l-aġġustamenti fil-prezz saru għall-kostijiet kollha mġarrba bejn l-importazzjoni u l-bejgħ mill-ġdid, inklużi l-ispejjeż SG&A u profitt raġonevoli.

(214)

Il-Kummissjoni qabblet il-valur normali u l-prezz tal-esportazzjoni tal-produtturi esportaturi Ċiniżi inklużi fil-kampjun fuq bażi ex-works.

(215)

Fejn iġġustifikat mill-ħtieġa li jkun żgurat tqabbil ġust, il-Kummissjoni aġġustat il-valur normali u/jew il-prezz tal-esportazzjoni għad-differenzi li jaffettwaw il-prezzijiet u l-komparabbiltà tal-prezzijiet, skont l-Artikolu 2(10) tar-Regolament bażiku. Saru aġġustamenti fejn xieraq għall-kostijiet tat-trasport, l-assigurazzjoni, l-immaniġġjar, it-tagħbija u l-kostijiet anċillari; il-kost tal-kreditu; it-tariffi bankarji; il-kostijiet SG&A tal-esportaturi relatati, inkluża ż-żieda fuq il-prezz.

(216)

Il-PRC tapplika politika ta’ rimborż parzjali biss tal-VAT mal-esportazzjoni u f’dan il-każ, skont ix-xahar tal-PI, ma ġiex rimborżat VAT ta’ bejn 0 % u 3 %. Sabiex ikun żgurat li l-valur normali ġie espress fl-istess livell ta’ tassazzjoni bħall-prezz tal-esportazzjonijiet, il-valur normali ġie aġġustat ’il fuq b’dik il-parti tal-VAT imposta fuq l-esportazzjonijiet tal-prodott ikkonċernat li ma kinitx ġiet rimborżata lill-produtturi esportaturi Ċiniżi.

(217)

Għall-produtturi esportaturi inklużi fil-kampjun, il-Kummissjoni qabblet il-medja ponderata tal-valur normali ta’ kull tip ta’ prodott simili mal-medja ponderata tal-prezz tal-esportazzjoni tat-tip korrispondenti tal-prodott ikkonċernat, skont l-Artikolu 2(11) u 2(12) tar-Regolament bażiku.

(218)

Fuq dik il-bażi, il-marġnijiet ta’ dumping medji ponderati provviżorji, espressi bħala perċentwal tal-prezz CIF fil-fruntiera tal-Unjoni, bid-dazju mhux imħallas, huma 108,4 % għal STSS u 55,6 % għal FSS.

(219)

Il-marġni tad-dumping tal-kumpaniji Ċiniżi li kkooperaw u li ma ġewx inklużi fil-kampjun, Xiangshui Defeng Metals Co., Ltd u Fujian Dingxin Technology Co., Ltd., huwa l-medja ponderata bejn iż-żewġ marġnijiet tad-dumping individwali għall-kumpaniji inklużi fil-kampjun u stabbilit għal 87,9 %.

(220)

Wara li kkunsidrat il-livell għoli tal-kooperazzjoni tal-produtturi esportaturi Ċiniżi f’livell ta’ 92 % tal-esportazzjonijiet Ċiniżi totali tal-prodott li qed jiġi investigat lejn l-Unjoni, il-Kummissjoni qieset li kien rappreżentattiv li tistabbilixxi l-marġni tad-dumping residwu applikabbli għall-produtturi esportaturi l-oħra kollha (li ma kkooperawx), inkluża l-kumpanija li rċeviet l-Artikolu 18 f’livell ta’ 108,4 %, li jikkorrispondi għall-ogħla marġni ta’ dumping individwali tal-kumpaniji Ċiniżi inklużi fil-kampjun.

(221)

Fuq din il-bażi, il-marġni medju ponderat tad-dumping provviżorju espress bħala perċentwal tal-prezz CIF fil-fruntiera tal-Unjoni, bid-dazju mhux imħallas, huwa kif ġej:

(222)

Kif imsemmi fil-premessa (24), żewġ produtturi esportaturi fit-Tajwan, Yusco Group u Walsin, ikkooperaw fl-investigazzjoni billi pprovdew tweġiba għall-kwestjonarju. L-ebda produttur esportatur ieħor fit-Tajwan ma ġie identifikat jew ippreżenta ruħu.

(223)

Barra minn hekk, kif ġie indikat ukoll fil-premessa (24), iċ-ċentru ta’ servizz mhux relatat YC Inox ikkoopera fl-investigazzjoni billi pprovda tweġiba għall-kwestjonarju. Din il-kumpanija ma kinitx relatata maż-żewġ produtturi Tajwaniżi li kkooperaw. Il-kooperazzjoni tagħha ppermettiet lill-Kummissjoni biex tikseb fehim tajjeb tal-funzjonament tas-swieq domestiċi u tal-esportazzjoni Tajwaniżi tal-prodott li qed jiġi investigat. B’mod partikolari, fuq il-bażi tal-informazzjoni pprovduta minn din il-parti u l-verifika tagħha, il-Kummissjoni setgħet tasal għal konklużjonijiet raġonevoli dwar l-aktar destinazzjoni probabbli tal-bejgħ domestiku rrapportat taż-żewġ produtturi esportaturi li kkooperaw.

(224)

Il-bejgħ domestiku ta’ Yusco Group tal-prodott simili fil-perjodu ta’ investigazzjoni sar jew direttament lil klijenti mhux relatati jew indirettament permezz ta’ ċentru tas-servizz domestiku relatat. Fiż-żewġ każijiet, seta’ jiġi stabbilit li xi ftit minn dan il-bejgħ kien eventwalment destinat għall-esportazzjoni. Il-bejgħ tal-esportazzjoni ta’ Yusco Group lejn l-Unjoni fil-perjodu ta’ investigazzjoni sar direttament lil klijenti indipendenti jew indirettament permezz ta’ ċentru ta’ servizz relatat li jinsab fit-Tajwan jew negozjant relatat irreġistrat f’Hong Kong iżda li jinsab fit-Tajwan u l-PRC.

(225)

Fil-każ ta’ Walsin, il-bejgħ domestiku u tal-esportazzjoni tal-prodott simili fil-perjodu ta’ investigazzjoni sar direttament lil klijenti mhux relatati.

(226)

Il-Kummissjoni eżaminat il-bejgħ domestiku rrapportat minn Yusco Group u Walsin. Abbażi tas-sejbiet li saru matul il-verifiki fuq il-post fit-Tajwan, għat-tranżazzjonijiet fejn id-destinazzjoni tal-oġġetti kienet portijiet tal-baħar jew fabbriki tad-dwana (85) (jiġifieri 0 % VAT), jew għal ċertu bejgħ domestiku ieħor li ġie rrappurtat u abbażi tal-ispjegazzjonijiet mogħtija fuq il-post mill-produtturi esportati jew YC Inox, il-Kummissjoni kklassifikat mill-ġdid dan il-bejgħ domestiku bħala bejgħ tal-esportazzjoni. Għalhekk, dawn it-tranżazzjonijiet ġew esklużi mit-tranżazzjonijiet tal-bejgħ domestiku li ntużaw biex jiġi kkalkolat il-valur normali.

(227)

Il-Kummissjoni l-ewwel eżaminat jekk il-volum totali tal-bejgħ domestiku għal kull produttur esportatur investigat kienx rappreżentattiv, skont l-Artikolu 2(2) tar-Regolament bażiku. Il-bejgħ domestiku jkun rappreżentattiv jekk it-total tal-volum tal-bejgħ domestiku tal-prodott simili lill-klijenti indipendenti fis-suq domestiku għal kull produttur esportatur ikun jirrappreżenta mill-anqas 5 % tal-volum totali tal-bejgħ għall-esportazzjoni tiegħu tal-prodott ikkonċernat lejn Unjoni matul il-perjodu ta’ investigazzjoni.

(228)

Fuq din il-bażi, il-volum totali tal-bejgħ domestiku tal-prodott li qed jiġi investigat minn Yusco Group u Walsin fis-suq domestiku nstab li kien rappreżentattiv.

(229)

Imbagħad il-Kummissjoni identifikat it-tipi ta’ prodotti mibjugħa domestikament li kienu identiċi jew paragunabbli għat-tipi ta’ prodotti mibjugħa għall-esportazzjoni lejn l-Unjoni għall-produtturi esportaturi li qed jiġu investigati b’bejgħ domestiku rappreżentattiv.

(230)

Wara, il-Kummissjoni analizzat jekk it-tipi ta’ prodotti mibjugħa mill-produtturi esportaturi investigati fis-suq domestiku tagħhom imqabbla mat-tipi ta’ prodotti mibjugħa għall-esportazzjoni lejn l-Unjoni kinux rappreżentattivi, skont l-Artikolu 2(2) tar-Regolament bażiku. Il-bejgħ domestiku ta’ tip ta’ prodott huwa rappreżentattiv jekk il-volum totali tal-bejgħ domestiku ta’ dak it-tip ta’ prodott lil konsumaturi indipendenti matul il-perjodu ta’ investigazzjoni jirrappreżenta mill-inqas 5 % tal-volum totali tal-bejgħ b’esportazzjoni tal-prodott identiku jew komparabbli lejn l-Unjoni.

(231)

Imbagħad, il-Kummissjoni ddefinixxiet il-proporzjon tal-bejgħ bi profitt lill-konsumaturi indipendenti fis-suq domestiku għal kull tip ta’ prodott matul il-perjodu ta’ investigazzjoni biex tiddeċiedi jekk tużax il-bejgħ domestiku attwali għall-kalkolu tal-valur normali, skont l-Artikolu 2(4) tar-Regolament bażiku.

(232)

Il-valur normali huwa bbażat fuq il-prezz domestiku reali għal kull tip ta’ prodott, irrispettivament minn jekk dak il-bejgħ huwiex profitabbli jew le, jekk:

(233)

F’dan il-każ, il-valur normali huwa l-medja ponderata tal-prezzijiet tal-bejgħ domestiku kollu ta’ dak it-tip ta’ prodott matul il-perjodu ta’ investigazzjoni.

(234)

Il-valur normali huwa l-prezz domestiku attwali għal kull tip ta’ prodott tal-bejgħ domestiku bi profitt tat-tipi ta’ prodotti biss matul il-perjodu ta’ investigazzjoni, jekk:

(235)

Għal dawk it-tipi ta’ prodotti li ma kellhom l-ebda bejgħ jew li kellhom bejgħ insuffiċjenti tal-prodott simili fi kwantitajiet rappreżentattivi fis-suq domestiku, il-Kummissjoni fasslet il-valur normali f’konformità mal-Artikolu 2(3) u (6) tar-Regolament bażiku.

(236)

Il-valur normali tfassal billi żdied dan li ġej mal-kost medju tal-produzzjoni tal-prodott simili tal-produtturi esportaturi investigati matul il-perjodu ta’ investigazzjoni:

(237)

Għat-tipi tal-prodott mhux mibjugħa fi kwantitajiet rappreżentattivi fis-suq domestiku, żdiedu l-ispejjeż SG&A medji u l-profitt tat-tranżazzjonijiet li saru matul il-perkors normali tan-negozju fis-suq domestiku għal dawk it-tipi. Għat-tipi ta’ prodotti mhux mibjugħa fis-suq domestiku, jew li ma nstabx bejgħ għalihom matul il-perkors normali tan-negozju, żdiedu l-ispejjeż SG&A medji ponderati u l-profitt tat-tranżazzjonijiet kollha li saru matul il-perkors normali tan-negozju fis-suq domestiku.

(238)

Il-produtturi esportaturi esportaw lejn l-Unjoni jew direttament lil konsumaturi indipendenti jew permezz ta’ kumpaniji relatati.

(239)

Għalhekk, il-prezz tal-esportazzjoni kien stabbilit abbażi tal-prezz reali mħallas jew pagabbli għall-prodott ikkonċernat meta mibjugħ għall-esportazzjoni lejn l-Unjoni, skont l-Artikolu 2(8) tar-Regolament bażiku.

(240)

Il-Kummissjoni qabblet il-valur normali u l-prezz tal-esportazzjoni tal-produtturi esportaturi fuq bażi ex-works.

(241)

Fejn iġġustifikat mill-ħtieġa li jkun żgurat paragun ġust, il-Kummissjoni aġġustat il-valur normali u/jew il-prezz tal-esportazzjoni għad-differenzi li jaffettwaw il-prezzijiet u l-komparabbiltà tal-prezzijiet skont l-Artikolu 2(10) tar-Regolament bażiku.

(242)

Fejn kien xieraq, saru aġġustamenti għat-trasport, l-assigurazzjoni, l-immaniġġjar, it-tagħbija u l-kostijiet anċillari, it-tariffi tal-ippakkjar, il-kost tal-kreditu, it-tariffi tal-bank, il-kummissjonijiet u l-SG&A.

(243)

Għall-produtturi esportaturi, il-Kummissjoni qabblet il-valur normali medju ponderat ta’ kull tip ta’ prodott simili mal-medja ponderata tal-prezz tal-esportazzjoni tat-tip korrispondenti tal-prodott ikkonċernat, skont l-Artikoli 2(11) u (12) tar-Regolament bażiku.

(244)

Fuq din il-bażi, il-marġnijiet ta’ dumping provviżorji, espressi bћala perċentwal tal-prezz CIF fuq il-fruntiera tal-Unjoni, bid-dazju mhux imħallas, huma kif ġej:

(245)

Il-livell ta’ kooperazzjoni f’dan il-każ tqies bħala għoli u l-ebda produttur esportatur ieħor ma seta’ jiġi identifikat. Konsegwentement, il-Kummissjoni kkunsidrat li kien rappreżentattiv li l-marġni ta’ dumping residwu jiġi stabbilit fil-livell tal-produttur esportatur bl-ogħla marġni ta’ dumping.

(246)

Il-prodott simili kien manifatturat minn 5 (gruppi ta’) produtturi magħrufa fl-Unjoni matul il-perjodu ta’ investigazzjoni. Dawn jikkostitwixxu l-“industrija tal-Unjoni” fis-sens tal-Artikolu 4(1) tar-Regolament bażiku.

(247)

Il-produzzjoni totali tal-Unjoni waqt il-perjodu ta’ investigazzjoni ġiet stabbilita għal madwar 4,6 miljun tunnellata, inkluża l-produzzjoni għas-suq marbut. Il-Kummissjoni stabbiliet din iċ-ċifra abbażi tal-informazzjoni kollha disponibbli dwar l-industrija tal-Unjoni, jiġifieri t-tweġiba vverifikata għall-kwestjonarju li waslet mingħand Eurofer, fejn kienet possibbli kontroverifikata mat-tweġibiet ivverifikati għall-kwestjonarju tal-produtturi tal-Unjoni inklużi fil-kampjun.

(248)

Kif indikat fil-premessa (7), fil-kampjun intgħażlu tliet produtturi tal-Unjoni li kienu jirrappreżentaw aktar minn 78 % tal-produzzjoni totali tal-Unjoni tal-prodott simili. Dawn huma kollha produtturi integrati vertikalment.

(249)

Sabiex jiġi stabbilit jekk l-industrija tal-Unjoni sofrietx dannu u sabiex jiġi ddeterminat il-konsum u l-indikaturi ekonomiċi diversi relatati mas-sitwazzjoni tal-industrija tal-Unjoni, il-Kummissjoni eżaminat jekk l-użu sussegwenti tal-produzzjoni tal-industrija fl-Unjoni tal-prodott simili kellux jiġi kkunsidrat fl-analiżi, u sa liema punt.

(250)

L-industrija tal-Unjoni hija integrata vertikalment u l-SSHR huma meqjusa bħala materjal intermedju għall-produzzjoni ta’ diversi prodotti downstream b’valur miżjud, jiġifieri prodotti llaminati bil-kesħa. Il-Kummissjoni sabet li parti sostanzjali mill-produzzjoni tal-produtturi totali tal-Unjoni kienet maħsuba għal użu marbut.

(251)

Id-distinzjoni bejn is-suq marbut u s-suq ħieles hija l-aktar rilevanti għall-analiżi tad-dannu minħabba li l-prodotti maħsuba għall-użu marbut mhumiex esposti għal kompetizzjoni diretta mill-importazzjonijiet, billi jinbiegħu fl-istess kumpanija jew gruppi ta’ kumpaniji abbażi tal-prezzijiet tat-trasferiment stabbiliti skont il-politiki tal-prezzijiet interni u għalhekk mhumiex direttament marbuta mal-prezzijiet fis-suq ħieles.

(252)

Min-naħa l-oħra, il-produzzjoni li hija maħsuba għall-bejgħ fis-suq ħieles qiegħda tikkompeti direttament mal-importazzjonijiet tal-prodott ikkonċernat u hija mibjugħa bi prezzijiet tas-suq ħieles.

(253)

Sabiex kemm jista’ jkun tagħti stampa kompleta tal-industrija tal-Unjoni, il-Kummissjoni talbet id-data tal-attività kollha tal-SSHR u vverifikat jekk il-produzzjoni kinitx maħsuba għall-użu marbut jew għas-suq ħieles.

(254)

Il-Kummissjoni eżaminat ċerti indikaturi ekonomiċi relatati mal-industrija tal-Unjoni abbażi tad-data għas-suq ħieles biss. Dawn l-indikaturi huma: il-volum tal-bejgħ u l-prezzijiet tal-bejgħ fis-suq tal-Unjoni; is-sehem fis-suq; il-volumi u l-prezzijiet tal-esportazzjonijiet u l-profittabbiltà. Fejn kien possibbli u xieraq, is-sejbiet tal-eżaminazzjoni ġew imqabbla mad-data għas-suq marbut, sabiex jipprovdu stampa sħiħa tas-sitwazzjoni tal-industrija tal-Unjoni.

(255)

Madankollu, indikaturi ekonomiċi oħra jistgħu jiġu eżaminati b’mod siewi biss billi wieħed jirreferi għall-attività sħiħa tal-SSHR, inkluż l-użu marbut tal-industrija tal-Unjoni. Dawn huma: il-produzzjoni; il-kapaċità u l-użu tal-kapacità l-investimenti; l-ishma; l-impjiegi; il-produttività; u l-pagi. Dan minħabba li dawn jiddependu fuq l-attività tal-produzzjoni kollha, kemm jekk l-SSHR jinżammu għal użu marbut kif ukoll jekk jinbiegħu fis-suq ħieles.

(256)

Il-Kummissjoni stabbiliet il-konsum tal-Unjoni abbażi: (a) tad-data tal-Eurofer dwar il-bejgħ tal-industrija tal-Unjoni tal-prodott simili lil klijenti mhux relatati fl-Unjoni, kemm jekk bejgħ dirett kif ukoll jekk indirett, kontroverifikata mal-produtturi tal-Unjoni inklużi fil-kampjun; u (b) l-importazzjonijiet tal-prodott li qed jiġi investigat lejn l-Unjoni mill-pajjiżi terzi kollha kif irrappurtat fil-Eurostat.

(257)

Il-konsum tal-Unjoni fuq is-suq ħieles matul il-perjodu kkunsidrat żviluppa kif ġej:

Tabella 2

Il-konsum ħieles fis-suq tal-Unjoni (tunnellati)

(258)

Matul il-perjodu taħt kunsiderazzjoni, il-konsum tal-Unjoni baqa’ stabbli.

(259)

Il-Kummissjoni stabbilixxiet il-konsum marbut tal-Unjoni fuq il-bażi tal-użu marbut tal-produtturi kollha magħrufa fl-Unjoni. Fuq din il-bażi, il-konsum marbut tal-Unjoni matul il-perjodu kkunsidrat żviluppa kif ġej:

Tabella 3

Il-konsum marbut fis-suq tal-Unjoni (tunnellati)

(260)

Il-konsum marbut fis-suq tal-Unjoni baqa’ pjuttost stabbli b’xi fluttwazzjonijiet minuri matul il-perjodu kkunsidrat, u naqas b’inqas minn 1 % fil-perjodu ta’ investigazzjoni.

(261)

Bl-amalgamazzjoni taż-żewġ tabelli ta’ qabel, il-konsum globali — li b’hekk jammonta għall-konsum marbut u fis-suq ħieles — evolva kif ġej matul il-perjodu kkunsidrat:

Tabella 4

Il-konsum kumplessiv (marbut u fis-suq ħieles) (tunnellati)

(262)

It-tabella ta’ hawn fuq turi li l-konsum kumplessiv segwa l-istess xejra kif ġiet osservata fil-konsum tas-suq ħieles u fil-konsum marbut, u b’hekk baqa’ stabbli matul il-perjodu kkunsidrat. Il-konsum kumplessiv kien ukoll konformi mal-produzzjoni totali tal-Unjoni (ara t-tabella 7).

(263)

Il-Kummissjoni eżaminat jekk l-importazzjonijiet tal-SSHR li joriġinaw mill-pajjiżi kkonċernati jenħtieġx li jiġu vvalutati b’mod kumulattiv skont l-Artikolu 3(4) tar-Regolament bażiku.

(264)

Dik id-dispożizzjoni tistipula li l-importazzjonijiet minn aktar minn pajjiż wieħed għandhom jiġu vvalutati b’mod kumulattiv biss jekk ikun iddeterminat li:

(265)

Il-marġnijiet ta’ dumping stabbiliti fir-rigward tal-importazzjonijiet minn kull wieħed mit-tliet pajjiżi kkonċernati huma ppreżentati fil-qosor fil-premessi (91), (218) u (241). Dawn huma kollha ogħla mil-limiti de minimis stabbiliti fl-Artikolu 9(3) tar-Regolament bażiku.

(266)

Il-volum tal-importazzjonijiet minn kull wieħed mit-tliet pajjiżi kkonċernati ma kienx negliġibbli. L-ishma tas-suq tal-importazzjonijiet meta mqabbla mal-konsum tas-suq ħieles fil-perjodu ta’ investigazzjoni kienu ta’ 18,3 % għall-PRC, 9,1 % għall-Indoneżja u 3,0 % għat-Tajwan.

(267)

Il-kundizzjoni tal-kompetizzjoni ta’ bejn l-importazzjonijiet oġġett ta’ dumping minn kull wieħed mit-tliet pajjiżi kkonċernati, u bejniethom u l-prodott simili tal-Unjoni kienu simili. Fil-fatt, l-SSHR li joriġinaw mill-Indoneżja, mill-PRC u mit-Tajwan ikkompetew ma’ xulxin meta jiġu importati għall-bejgħ fis-suq tal-Unjoni, u mal-prodott simili prodott mill-industrija tal-Unjoni, peress li kollha kemm huma jinbiegħu lil kategoriji simili ta’ klijenti.

(268)

Fis-sottomissjoni tagħha fil-bidu, l-STSS sostniet li l-importazzjonijiet mill-PRC jenħtieġ li ma jiġux kumulati fid-dawl tal-iżvilupp differenti tagħhom f’termini ta’ volum u prezzijiet. Hija ddikjarat li l-importazzjonijiet mill-PRC naqsu gradwalment matul il-perjodu taħt kunsiderazzjoni filwaqt li l-prezzijiet żdiedu, b’mod partikolari fl-2017.

(269)

Filwaqt li huwa minnu li l-prezzijiet tal-importazzjonijiet Ċiniżi żdiedu matul il-perjodu kkunsidrat, dawn kienu f’livelli ferm inqas mill-prezzijiet tal-bejgħ tal-industrija tal-Unjoni matul il-perjodu kkunsidrat. Il-volumi tal-importazzjonijiet Ċiniżi żdiedu wkoll b’mod sinifikanti, u s-sehem mis-suq tagħhom kien ’il fuq minn 16 % matul il-perjodu kollu. L-investigazzjoni wriet li l-importazzjonijiet mill-pajjiżi kkonċernati jikkompetu ma’ xulxin fid-dawl tal-Artikolu 3(4)(b) tar-Regolament bażiku. Il-volumi tal-importazzjoni mill-PRC naqsu mill-2017 sal-perjodu ta’ investigazzjoni (ara t-tabella 5: minn indiċi 135 fl-2017 għal 129 fl-2018 għal 114 fil-perjodu ta’ investigazzjoni). Fl-istess ħin, il-volumi ta’ importazzjoni mill-Indoneżja żdiedu b’mod qawwi (mill-indiċi 16 sa 42 726 sa 106 202). F’ċifri assoluti, iż-żieda fil-volum mill-Indoneżja kienet ikbar mit-tnaqqis mill-PRC mill-2017 sal-perjodu ta’ investigazzjoni. Il-volumi tal-importazzjoni mit-Tajwan żdiedu b’mod stabbli mill-2017 sal-2018 iżda mbagħad waqgħu fil-perjodu ta’ investigazzjoni (mill-indiċi 137 sa 173 sa 128). B’mod ġenerali, l-importazzjonijiet mill-pajjiżi kkonċernati meħudin flimkien żdiedu b’mod kontinwu matul il-perjodu kkunsidrat (minn indiċi 100 fl-2016 għal 136 fl-2017 u 156 fl-2018 għal 166 fil-perjodu ta’ investigazzjoni).

(270)

Għalhekk, u għall-kuntrarju tad-dikjarazzjoni li għamlet l-STSS, il-kriterji kollha stabbiliti fl-Artikolu 3(4) tar-Regolament bażiku ġew issodisfati u l-importazzjonijiet mill-pajjiżi kkonċernati kienu eżaminati b’mod kumulattiv sabiex jiġi ddeterminat id-dannu.

(271)

Il-Kummissjoni stabbiliet il-volum tal-importazzjonijiet abbażi tad-data tal-Eurostat. Is-sehem mis-suq tal-importazzjonijiet ġie stabbilit billi l-volum tal-importazzjonijiet ġie mqabbel mal-konsum tas-suq ħieles tal-Unjoni.

(272)

L-importazzjonijiet lejn l-Unjoni mill-pajjiżi kkonċernati żviluppaw kif ġej:

Tabella 5

Il-volumi tal-importazzjoni (tunnellati) u s-sehem mis-suq

(273)

L-importazzjonijiet mill-pajjiżi kkonċernati żdiedu b’66 % matul il-perjodu taħt kunsiderazzjoni, u laħqu aktar minn 30 % tal-konsum tas-suq ħieles tal-Unjoni fil-perjodu ta’ investigazzjoni.

(274)

Il-Kummissjoni stabbiliet il-prezzijiet tal-importazzjonijiet abbażi tad-data tal-Eurostat. Il-prezz medju ponderat tal-importazzjonijiet mill-pajjiżi kkonċernati lejn l-Unjoni żviluppa kif ġej:

Tabella 6

Prezzijiet tal-importazzjonijiet mill-pajjiżi kkonċernati (EUR/tunnellata)

(275)

Filwaqt li l-prezzijiet tal-importazzjoni mill-PRC u t-Tajwan żdiedu b’21 % u 25 % rispettivament, madankollu, il-prezzijiet tal-importazzjoni mill-Indoneżja naqsu b’mod sinifikanti b’25 % matul il-perjodu kkunsidrat (il-prezzijiet tal-importazzjoni mill-pajjiżi kkonċernati żdiedu b’medja ta’ 18 %). Minkejja ż-żieda ġenerali, il-prezzijiet tal-importazzjoni mill-pajjiżi kkonċernati jibqgħu aktar baxxi b’mod kostanti mill-prezzijiet tal-industrija tal-Unjoni matul l-istess perjodu (ara t-Tabella 11).

(276)

Il-Kummissjoni ddeterminat it-twaqqigħ tal-prezz matul il-perjodu ta’ investigazzjoni billi qabblet:

(277)

It-tqabbil tal-prezzijiet sar tip b’tip għat-tranżazzjonijiet fl-istess livell ta’ kummerċ, b’aġġustament debitu fejn meħtieġ, u wara tnaqqis tar-rifużjonijiet u tal-iskontijiet. Ir-riżultat tat-tqabbil kien espress bħala perċentwal tal-fatturat tal-produtturi tal-industrija tal-Unjoni inklużi fil-kampjun matul il-perjodu ta’ investigazzjoni. Dan wera marġni medju ponderat ta’ twaqqigħ tal-prezz ta’ 10,7 % għall-importazzjonijiet mill-Indoneżja, 9,3 % għall-importazzjonijiet mill-PRC u 4,1 % għall-importazzjonijiet mit-Tajwan.

(278)

Skont l-Artikolu 3(5) tar-Regolament bażiku, l-eżami tal-impatt tal-importazzjonijiet oġġett ta’ dumping fuq l-industrija tal-Unjoni kien jinkludi valutazzjoni tal-indikaturi ekonomiċi kollha li għandhom effett fuq l-istat tal-industrija tal-Unjoni matul il-perjodu kkunsidrat.

(279)

Kif imsemmi fil-premessa (7), intuża l-kampjunar għad-determinazzjoni tad-dannu possibbli li ġarrbet l-industrija tal-Unjoni.

(280)

Biex tiddetermina d-dannu, il-Kummissjoni għamlet distinzjoni bejn l-indikaturi tad-dannu makroekonomiċi u dawk mikroekonomiċi. Il-Kummissjoni evalwat l-indikaturi makroekonomiċi abbażi ta’ data inkluża fit-tweġiba għall-kwestjonarju tal-Eurofer, li ġiet ivverifikata kif xieraq, fir-rigward tal-produtturi kollha tal-Unjoni. Il-Kummissjoni evalwat l-indikaturi mikroekonomiċi abbażi tad-data fit-tweġibiet għall-kwestjonarju tat-tliet produtturi tal-Unjoni inklużi fil-kampjun, li ġew ivverifikati kif xieraq. Iż-żewġ settijiet ta’ data nstabu li kienu rappreżentattivi tas-sitwazzjoni ekonomika tal-industrija tal-Unjoni.

(281)

L-indikaturi makroekonomiċi huma: il-produzzjoni, il-kapaċità tal-produzzjoni, l-użu tal-kapaċità, il-volum tal-bejgħ, il-kwota tas-suq, it-tkabbir, l-impjiegi, il-produttività u d-daqs tal-marġni tad-dumping.

(282)

L-indikaturi mikroekonomiċi huma: il-prezzijiet medji ta’ unità, il-kost ta’ unità, il-kostijiet lavorattivi, il-profittabbiltà, il-fluss ta’ flus, l-investimenti u r-redditu fuq l-investimenti.

(283)

Il-produzzjoni totali, il-kapaċità ta’ produzzjoni u l-użu tal-kapaċità tal-Unjoni żviluppaw kif ġej matul il-perjodu kkunsidrat:

Tabella 7

Il-produzzjoni, il-kapaċità tal-produzzjoni u l-użu tal-kapaċità

(284)

Il-volum tal-produzzjoni tal-industrija tal-Unjoni kien stabbli sal-2018 imbagħad naqas bi 3 % fil-perjodu ta’ investigazzjoni. Iċ-ċifri tal-kapaċità rrapportati jirreferu għall-kapaċità attwali, ħaġa li timplika li kienu tqiesu l-aġġustamenti, meqjusa bħala standards mill-industrija, għall-ħin tat-twaqqif, għall-manutenzjoni, għall-ostakoli u għal perjodi normali oħra ta’ waqfien. Fuq din il-bażi, il-kapaċità tal-produzzjoni baqgħet prattikament stabbli, b’żieda marġinali ta’ 1 % matul il-perjodu kkunsidrat.

(285)

B’riżultat ta’ tnaqqis fil-produzzjoni u żieda żgħira fil-kapaċità, l-użu tal-kapaċità naqas b’4 % matul il-perjodu kkunsidrat, u kien taħt is-70 % b’mod kostanti.

(286)

Il-volum tal-bejgħ u s-sehem mis-suq tal-industrija tal-Unjoni fis-suq ħieles żviluppaw hekk matul il-perjodu kkunsidrat:

Tabella 8

Il-volum u s-sehem mis-suq tal-bejgħ ħieles

(287)

Il-volum ta’ bejgħ tal-industrija tal-Unjoni naqas bi 13 % matul il-perjodu kkonċernat.

(288)

Is-sehem mis-suq tal-industrija tal-Unjoni naqas ukoll b’mod sinifikanti, bi kważi 10 punti perċentwali, għalkemm il-konsum fl-Unjoni baqa’ stabbli matul il-perjodu kkunsidrat.

(289)

F’dak li jirrigwarda s-suq marbut, l-volum u s-sehem mis-suq marbut tal-industrija tal-Unjoni żviluppaw hekk matul il-perjodu kkunsidrat:

Tabella 9

Volum marbut u sehem mis-suq (tunnellati)

(290)

Il-volum marbut tal-industrija tal-Unjoni (magħmul minn SSHR miżmum mill-industrija tal-Unjoni għall-użu downstream) fis-suq tal-Unjoni baqa’ stabbli għal madwar 3,6 miljun tunnellata matul il-perjodu kkunsidrat.

(291)

Is-sehem mis-suq marbut tal-industrija tal-Unjoni (espress bħala perċentwal tal-produzzjoni totali tal-Unjoni) żdied bi ftit fl-2017 u mbagħad baqa’ stabbli madwar 78 % matul il-bqija tal-perjodu.

(292)

Għalhekk, fid-dawl tax-xejra stabbli tas-suq marbut tal-Unjoni matul il-perjodu kkunsidrat, it-tnaqqis fil-bejgħ tal-industrija tal-Unjoni kien ir-riżultat ta’ pressjoni akbar eżerċitata mill-importazzjonijiet mill-pajjiżi kkonċernati.

(293)

Iċ-ċifri ta’ hawn fuq fir-rigward tal-produzzjoni, il-volum tal-bejgħ u s-sehem mis-suq, li lkoll juru tendenza ta’ tnaqqis matul il-perjodu kkunsidrat, juru li l-industrija tal-Unjoni ma setgħetx tikber, la f’termini assoluti u lanqas f’relazzjoni mal-konsum.

(294)

L-impjiegi u l-produttività żviluppaw kif ġej matul il-perjodu kkunsidrat:

Tabella 10

L-impjiegi u l-produttività

(295)

Il-livell tal-impjiegi tal-industrija tal-Unjoni relatat mal-produzzjoni tal-SSHR żdied marġinalment b’4 % matul il-perjodu kkunsidrat. Fid-dawl tat-tnaqqis żgħir fil-produzzjoni, il-produttività tal-forza tax-xogħol tal-industrija tal-Unjoni, imkejla bħala tunnellati għal kull impjegat prodott fis-sena, naqset b’mod sinifikanti matul il-perjodu kkunsidrat.

(296)

Il-marġnijiet kollha tad-dumping kienu ogħla b’mod sinifikanti mil-livell de minimis. L-impatt tad-daqs tal-marġnijiet attwali tad-dumping fuq l-industrija tal-Unjoni kien sostanzjali, meta tqis il-volum u l-prezzijiet tal-importazzjonijiet mill-pajjiżi kkonċernati.

(297)

Il-prezzijiet medji ponderati tal-bejgħ ta’ unità tal-produtturi tal-Unjoni fil-kampjun lil klijenti mhux relatati fl-Unjoni żviluppaw kif ġej matul il-perjodu kkunsidrat:

Tabella 11

Il-prezzijiet tal-bejgħ fl-Unjoni

(298)

Il-prezzijiet medji tal-bejgħ ta’ unità żdiedu bi 17 % matul il-perjodu kkunsidrat, li ma kienx biżżejjed biex ilaħħaq mal-iżvilupp tal-kost tal-produzzjoni li żdied b’20 % matul l-istess perjodu. Fil-biċċa l-kbira, l-evoluzzjoni tal-kostijiet kienet xprunata minn żidiet importanti fil-prezzijiet tal-materja prima, bħan-nikil, il-molibdenu u l-kromju. Billi bejn l-2016 u l-2018 l-industrija tal-Unjoni kienet kapaċi tgħaddi din iż-żieda fil-kost f’termini relattivi mal-prezzijiet tal-bejgħ tagħha, fil-perjodu ta’ investigazzjoni ma setgħetx tgħaddi b’mod sħiħ iż-żieda fil-kost, peress li ż-żieda fil-kost kienet akbar miż-żieda fil-prezzijiet.

(299)

Il-kostijiet lavorattivi medji tal-produtturi tal-Unjoni inklużi fil-kampjun żviluppaw kif ġej matul il-perjodu kkunsidrat:

Tabella 12

Kostijiet lavorattivi medji għal kull impjegat

(300)

Il-kostijiet medji lavorattivi għal kull impjegat tal-produtturi tal-Unjoni inklużi fil-kampjun naqsu b’4 % sal-2018, imbagħad reġgħu żdiedu fil-perjodu ta’ investigazzjoni, għalkemm għal livell li għadu 1 % taħt il-livell fl-2016. Dan juri li l-produtturi tal-Unjoni kienu kapaċi jnaqqsu l-kostijiet lavorattivi, minkejja ċ-ċirkostanzi tas-suq li kienu qed jiddeterjoraw.

(301)

Il-livelli tal-istokks tal-industrija tal-Unjoni żviluppaw kif ġej matul il-perjodu kkunsidrat:

Tabella 13

Inventarji

(302)

Matul il-perjodu kkunsidrat il-livell tal-ħażniet tal-għeluq naqas b’20 %. Il-maġġoranza tat-tipi ta’ prodott simili huma prodotti mill-industrija tal-Unjoni skont ordnijiet speċifiċi tal-utenti. Għalhekk, l-istokkijiet mhumiex meqjusa bħala indikatur importanti ta’ dannu għal din l-industrija. Dan ġie kkonfermat ukoll mill-analiżi tal-evoluzzjoni tal-istokkijiet tal-għeluq bħala perċentwal tal-produzzjoni. Kif jidher hawn fuq, dan l-indikatur baqa’ relattivament stabbli matul il-perjodu kkunsidrat fil-livell ta’ madwar 3 % tal-volum tal-produzzjoni.

(303)

Il-Kummissjoni stabbiliet il-profittabbiltà tal-produtturi tal-Unjoni billi l-profitt nett qabel it-taxxa tal-bejgħ tal-prodott simili lil klijenti mhux relatati fl-Unjoni ġie espress bħala perċentwal tal-fatturat ta’ dak il-bejgħ.

(304)

Il-profittabbiltà globali naqset minn 7,2 % fl-2016 għal 3,5 % fil-perjodu ta’ investigazzjoni. Dan it-tnaqqis jikkoinċidi maż-żieda fil-volumi tal-importazzjoni mill-pajjiżi kkonċernati bi prezzijiet ta’ twaqqigħ (ara l-premessa (276)). Ir-redditu fuq l-investimenti segwa l-istess xejra ’l isfel.

(305)

Il-fluss tal-flus nett evolva fil-biċċa l-kbira b’konformità mal-profittabbiltà u r-redditu fuq l-investimenti. Dan kien pożittiv mill-2016 sal-2018, bil-quċċata fl-2017, u sar negattiv fil-perjodu ta’ investigazzjoni, meta l-profittabbiltà kienet fl-iktar punt baxx fil-perjodu kkunsidrat.

(306)

Il-livell ta’ investimenti annwali żdied matul il-perjodu kkunsidrat b’57 %. Madankollu, iż-żieda fil-livelli ta’ investiment ma sarrfitx f’żidiet fil-kapaċità korrispondenti (ara t-tabella 7). Sussegwentement, l-investimenti kellhom biss l-għan li jżommu l-kapaċitajiet eżistenti u li jagħmlu sostituzzjonijiet debiti ta’ assi ta’ produzzjoni meħtieġa.

(307)

Il-konsum baqa’ stabbli matul il-perjodu kkunsidrat. Madankollu, is-sehem mis-suq tal-produtturi tal-Unjoni naqas minn 71,2 % għal 61,9 %.

(308)

L-indikaturi finanzjarji tal-kampjun tal-produtturi tal-Unjoni juru li l-kost tal-produzzjoni tal-industrija tal-Unjoni żdied (+ 20 %) ftit aktar mill-prezz medju tal-bejgħ tagħha (+ 17 %), li fisser li l-industrija tal-Unjoni ma setgħetx tgħaddi b’mod sħiħ iż-żieda fil-kost. Dan irriżulta fi tnaqqis sinifikanti fil-profitt matul il-perjodu kkunsidrat, minn 7,2 % fl-2016 għal 3,5 % fil-perjodu ta’ investigazzjoni. Żvilupp negattiv simili huwa nnotat fir-rigward tal-indikaturi finanzjarji l-oħra, ir-redditu fuq l-investiment u l-fluss tal-flus.

(309)

Il-volum ta’ bejgħ tal-industrija tal-Unjoni naqas bi 13 % u l-volum tal-produzzjoni naqas bi 3 % matul il-perjodu kkunsidrat. Id-differenza hija spjegata mill-importanza għall-industrija tal-Unjoni tas-suq marbut, li madankollu ma żdiditx matul il-perjodu kkunsidrat. L-użu tal-kapaċità kien b’mod kostanti taħt is-70 % u naqas bi tliet punti perċentwali matul il-perjodu kkunsidrat (66 % fil-perjodu ta’ investigazzjoni).

(310)

Fuq il-bażi ta’ dak li ntqal aktar ’il fuq, il-Kummissjoni f’dan l-istadju kkonkludiet li l-industrija tal-Unjoni sofriet dannu materjali skont it-tifsira tal-Artikolu 3(5) tar-Regolament bażiku.

(311)

Skont l-Artikolu 3(6) tar-Regolament bażiku, il-Kummissjoni eżaminat jekk l-importazzjonijiet li huma l-oġġett ta’ dumping mill-pajjiż ikkonċernat ikkawżawx dannu materjali lill-industrija tal-Unjoni. Skont l-Artikolu 3(7) tar-Regolament bażiku, il-Kummissjoni eżaminat ukoll jekk fatturi magħrufa oħrajn setgħux fl-istess ħin ikkawżaw dannu lill-industrija tal-Unjoni. Il-Kummissjoni żgurat li kull dannu possibbli kkawżat minn fatturi għajr l-importazzjonijiet oġġett ta’ dumping mill-pajjiżi kkonċernati ma kienx attribwit għall-importazzjonijiet li kienu l-oġġett ta’ dumping. Fost l-oħrajn, dawn il-fatturi huma: l-importazzjonijiet minn pajjiżi terzi, il-prestazzjoni tal-esportazzjoni tal-industrija tal-Unjoni, iż-żieda fl-ispejjeż tal-produzzjoni, it-tnaqqis fid-domanda tal-Unjoni għal SSHR fl-2018 u d-dipendenza parzjali mill-produtturi tal-Unjoni fuq il-produzzjoni marbuta.

(312)

Il-prezzijiet tal-importazzjoni mit-tliet pajjiżi kkonċernati waqqgħu l-prezzijiet tal-industrija tal-Unjoni, u dan irriżulta f’marġni ta’ twaqqigħ ta’ 4,1 % għat-Tajwan, 9,3 % għall-PRC u 10,7 % għall-Indoneżja (medja ta’ 9,5 %) fil-perjodu ta’ investigazzjoni. L-industrija tal-Unjoni għalhekk ma setgħetx tqis iż-żieda fil-kost tal-produzzjoni fil-prezzijiet tal-bejgħ tagħha tal-Unjoni, li turi l-pressjoni fuq il-prezzijiet eżerċitata mill-importazzjonijiet ikkonċernati. Din is-sitwazzjoni kellha impatt serju fuq il-profittabbiltà tal-industrija tal-Unjoni, li naqset għal livelli baxxi ħafna fil-perjodu ta’ investigazzjoni.

(313)

Il-volum u l-prezzijiet ta’ importazzjonijiet minn pajjiżi terzi oħrajn żviluppaw matul il-perjodu kkunsidrat kif ġej:

Tabella 15

(314)

Matul il-perjodu kkunsidrat, is-sehem mis-suq tal-importazzjonijiet minn pajjiżi terzi naqas b’27 % (jew bi kważi tliet punti perċentwali) għal 7,7 % fil-perjodu ta’ investigazzjoni. Billi matul l-istess perjodu, il-pajjiżi kkonċernati żiedu s-sehem mis-suq tagħhom b’66 % (ara l-premessa (273) u t-tabella 5, it-telf tas-sehem mis-suq mill-industrija tal-Unjoni huwa attribwit għaż-żieda qawwija fis-sehem mis-suq mill-pajjiżi kkonċernati.

(315)

Il-volum tal-importazzjonijiet mill-Korea naqas b’mod qawwi matul il-perjodu kkunsidrat, u s-sehem mis-suq tagħhom naqas kważi bin-nofs, u niżel għal 2,7 % biss matul il-perjodu ta’ investigazzjoni tal-investigazzjoni. Il-prezzijiet medji tal-importazzjonijiet mill-Korea żdiedu bi 18 % matul il-perjodu kkunsidrat, ftit inqas mit-total tal-pajjiżi terzi kollha minbarra l-pajjiżi kkonċernati (24 %). L-importazzjonijiet mill-Afrika t’Isfel kienu stabbli matul il-perjodu kkunsidrat iżda nbiegħu bi prezz ogħla minn dawk mill-pajjiż ikkonċernat, u qatt ma laħqu sehem mis-suq ta’ aktar minn 2,5 %.

(316)

Il-Kummissjoni għalhekk ikkonkludiet b’mod provviżorju li l-importazzjonijiet minn pajjiżi terzi oħra ma kkontribwewx għad-dannu li ġarrbet l-industrija tal-Unjoni.

(317)

Il-volumi u l-prezzijiet tal-esportazzjonijiet tal-industrija tal-Unjoni żviluppat kif ġej matul il-perjodu kkunsidrat:

Tabella 16

(318)

L-industrija tal-Unjoni kienet kapaċi żżid il-volum tal-esportazzjoni tagħha bi 13 % matul il-perjodu kkunsidrat. Il-bejgħ addizzjonali tal-esportazzjoni ta’ madwar 16 000 tunnellata fil-perjodu ta’ investigazzjoni meta mqabbel mal-bidu tal-perjodu kkunsidrat tqabbel mat-telf ta’ 115 000 tunnellata ta’ bejgħ fis-suq tal-Unjoni matul l-istess perjodu. Barra minn hekk, il-produtturi tal-Unjoni setgħu jżidu l-prezzijiet tal-unità tal-esportazzjoni tagħhom b’14 % matul l-istess perjodu. Għalhekk, il-bejgħ tal-esportazzjoni tal-industrija seta’ jikkumpensa biss għal parti żgħira ħafna l-iżviluppi negattivi kemm f’termini ta’ volumi kif ukoll ta’ prezzijiet fis-suq tal-Unjoni. Madankollu, fuq dik il-bażi u għal kuntrarju tad-dikjarazzjoni minn parti interessata waħda, il-prestazzjoni tal-esportazzjoni tal-industrija tal-Unjoni kienet pożittiva u ma setgħetx tikkontribwixxi għad-dannu mġarrab mill-industrija tal-Unjoni.

(319)

Il-kost tal-produzzjoni għal kull tunnellata ta’ SSHR prodott żdied b’20 % matul il-perjodu kkunsidrat (ara t-tabella 11). Dan kien l-aktar minħabba żieda qawwija fil-kostijiet tal-materja prima, fattur li ħalla impatt fuq il-produtturi madwar id-dinja. B’mod partikolari, il-prezz tan-nikil, li huwa t-tieni l-aktar input importanti għal diversi produtturi tal-Unjoni, żdied minn inqas minn USD 9 000 fil-bidu tal-2016 għal iktar minn USD 15 000 f’nofs l-2018 u għal iktar minn USD 12 500 f’Ġunju 2019. L-industrija tal-Unjoni inizjalment kienet kapaċi wkoll tgħaddi din iż-żieda fil-kostijiet fil-prezzijiet tal-bejgħ tagħha, madankollu li rriżultat f’telf importanti tas-sehem mis-suq u l-profittabbiltà. Matul il-perjodu ta’ investigazzjoni, dan ma kienx aktar possibbli minħabba l-pressjoni fuq il-prezzijiet eżerċitata mill-importazzjonijiet oġġett ta’ dumping. B’riżultat ta’ dan, il-profittabbiltà naqset b’mod drammatiku, jiġifieri b’51 % matul il-perjodu kkunsidrat.

(320)

Diversi partijiet iddikjaraw li d-deterjorament li jaffettwa l-industrija tal-Unjoni fit-tieni nofs tal-2018 kien fil-fatt dovut għal tnaqqis fid-domanda; dan it-tnaqqis kien, min-naħa tiegħu, ikkawżat mill-impożizzjoni imminenti ta’ miżuri ta’ salvagwardja, li rriżulta f’konċentrazzjoni tax-xiri fl-ewwel nofs tas-sena, u għal żviluppi ċikliċi fis-suq globali tal-azzar fit-tieni nofs tas-sena. Għall-kuntrarju ta’ dawn l-allegazzjonijiet, l-investigazzjoni ma żvelat l-ebda tnaqqis fil-konsum fis-suq tal-Unjoni iżda pjuttost telf qawwi fis-sehem mis-suq mill-industrija tal-Unjoni minħabba żieda qawwija fl-importazzjonijiet (ara t-taqsima 4.4.2 u t-tabelli 5 u 8). Il-Kummissjoni lanqas ma setgħet torbot it-tnaqqis mal-miżuri ta’ salvagwardja. Għalhekk, il-pretensjoni ġiet miċħuda.

(321)

Bosta partijiet iddikjaraw li l-industrija tal-Unjoni ma tkunx, jew sa ċertu punt, interessata li tbigħ il-prodott ikkonċernat fis-suq ħieles billi tagħti prijorità lill-produzzjoni marbuta. Minkejja li s-suq downstream huwa importanti għall-industrija tal-Unjoni, huwa qed ibigħ ukoll volumi sinifikanti tal-prodott ikkonċernat fis-suq ħieles u għad għandu kapaċità żejda sinifikanti biex jipproduċi u b’hekk ibigħ aktar. Barra minn hekk, is-suq marbut tal-Unjoni ma kibirx matul il-perjodu kkunsidrat. Għal dawn ir-raġunijiet, id-dikjarazzjoni ġiet miċħuda.

(322)

Parti interessata minnhom iddikjarat li l-kapaċità żejda fl-Unjoni kienet kawża ta’ dannu għall-industrija tal-Unjoni. Madankollu, l-investigazzjoni kkonfermat li l-kapaċità tal-produzzjoni totali tal-industrija tal-Unjoni baqgħet stabbli (+ 1 %) matul il-perjodu kkunsidrat, għall-kuntrarju tal-PRC u l-Indoneżja li qed jibnu kapaċitajiet żejda sinifikanti sabiex jesportaw l-output li jirriżulta minn dawn il-kapaċitajiet żejda lejn l-Unjoni, u b’hekk jieħdu sehem mis-suq mill-produtturi tal-Unjoni. Għalhekk, din id-dikjarazzjoni ġiet miċuħda.

(323)

Parti interessata minnhom iddikjarat li, peress li l-industrija tal-Unjoni (u s-settur tal-azzar globalment) kellhom prestazzjoni eċċezzjonalment tajba fl-2017, b’mod partikolari fir-rigward tal-profitti, it-tnaqqis fl-2018 kien fil-fatt konsegwenza naturali. Madankollu, l-investigazzjoni sabet b’mod provviżorju deterjorament sinifikanti f’ċerti indikaturi tad-dannu mill-bidu sal-aħħar tal-perjodu kkunsidrat, li jfisser li l-punt tat-tluq kien l-2016 u mhux l-2017. Fil-fatt, meta mqabbla mal-2016, il-profitabbiltà naqset bin-nofs u kemm il-volumi tal-bejgħ tal-industrija tal-Unjoni fis-suq tal-Unjoni kif ukoll is-sehem mis-suq tagħhom naqsu bi 13 %. Għalhekk, din id-dikjarazzjoni ġiet miċuħda.

(324)

Żewġ partijiet interessati sostnew li l-kostijiet addizzjonali mġarrba mill-produtturi tal-Unjoni tal-prodott simili sabiex jintlaħqu l-istandards stretti tal-UE f’termini ta’ ambjent jagħmilhom inqas kompetittivi fis-suq tal-Unjoni. Fir-rigward ta’ din il-pretensjoni, il-Kummissjoni tqis li l-istandards ambjentali għolja fl-Unjoni ma jistgħux jitqiesu bħala kawża ta’ dannu kkawżat minnha stess. Għall-kuntrarju ta’ dan, l-istandards ambjentali għoljin tal-UE jitqiesu fil-kalkolu tal-prezz fil-mira. Għalhekk, din id-dikjarazzjoni ġiet miċuħda.

(325)

Parti interessata minnhom sostniet li kemm il-prezzijiet tal-industrija tal-Unjoni kif ukoll il-prezzijiet tal-importazzjonijiet Ċiniżi żdiedu, u għalhekk l-importazzjonijiet Ċiniżi ma jistgħux ikunu kawża ta’ dannu. Madankollu, il-prezzijiet tal-importazzjonijiet Ċiniżi baqgħu kontinwament sostanzjalment taħt il-prezzijiet medji tal-industrija tal-Unjoni u waqqgħu wkoll il-prezzijiet tal-Unjoni matul il-perjodu ta’ investigazzjoni. Barra minn hekk, fir-rigward tal-volumi, kien hemm żieda sinifikanti fl-importazzjonijiet mill-PRC matul il-perjodu kkunsidrat li żiedet mal-pressjoni fuq il-prezzijiet. Għalhekk, din id-dikjarazzjoni ġiet miċuħda.

(326)

Fid-dawl tal-kunsiderazzjoni ta’ hawn fuq, il-Kummissjoni provviżorjament stabbiliet rabta kawżali bejn id-dannu mġarrab mill-industrija tal-Unjoni u l-importazzjonijiet li huma l-oġġett ta’ dumping mill-pajjiżi kkonċernati.

(327)

Il-Kummissjoni ddistingwiet u sseparat l-effetti tal-fatturi kollha magħrufa dwar is-sitwazzjoni tal-industrija tal-Unjoni mill-effetti dannużi tal-importazzjonijiet oġġett ta’ dumping. Il-fatturi identifikati l-oħra kollha, b’mod partikolari l-importazzjonijiet minn pajjiżi terzi, il-prestazzjoni tal-esportazzjoni tal-industrija tal-Unjoni, iż-żieda fl-ispejjeż tal-produzzjoni, it-tnaqqis fid-domanda għal SSHR fl-2018, id-dipendenza parzjali mill-produtturi tal-Unjoni fuq il-produzzjoni marbuta, il-kapaċità żejda fl-Unjoni bħala riżultat ta’ kapaċità żejda globali, iċ-ċirkostanzi tas-suq eċċezzjonalment favorevoli fl-2017, il-kostijiet ambjentali addizzjonali mġarrba mill-produtturi tal-Unjoni u ż-żieda fil-prezzijiet tal-importazzjoni mill-PRC nstabu b’mod provviżorju li ma jattenwawx ir-rabta kawżali, anki meta jitqies l-effett ikkombinat possibbli tagħhom.

(328)

Sabiex tiddetermina l-livell tal-miżuri, il-Kummissjoni eżaminat jekk dazju aktar baxx mill-marġni tad-dumping ikunx suffiċjenti biex jitneħħa d-dannu kkawżat mill-importazzjonijiet oġġett ta’ dumping għall-industrija tal-Unjoni.

(329)

F’dan il-każ, l-ilmentaturi allegaw l-eżistenza ta’ distorsjonijiet fil-materja prima skont it-tifsira tal-Artikolu 7(2a) tar-Regolament bażiku fir-rigward ta’ tnejn mill-pajjiżi investigati, jiġifieri l-Indoneżja u l-PRC. Il-valutazzjoni li tikkonċerna dawn il-pajjiżi hija inkluża fit-Taqsima 6.2 hawn taħt.

(330)

Il-Kummissjoni l-ewwel stabbiliet l-ammont ta’ dazju neċessarju biex jiġi eliminat id-dannu mġarrab mill-industrija tal-Unjoni fin-nuqqas ta’ distorsjonijiet fis-sens tal-Artikolu 7(2a) tar-Regolament bażiku. F’dan il-każ, id-dannu jiġi eliminat jekk l-industrija tal-Unjoni tkun kapaċi tkopri l-kostijiet tal-produzzjoni tagħha, inklużi dawk il-kostijiet li jirriżultaw mill-Ftehimiet Ambjentali Multilaterali, u l-protokolli tagħhom, li għalihom l-Unjoni hija parti, u mill-Konvenzjonijiet tal-ILO elenkati fl-Anness Ia tar-Regolament bażiku, u tikseb profitt raġonevoli (“profitt fil-mira”).

(331)

Skont l-Artikolu 7(2c) tar-Regolament bażiku, sabiex tistabbilixxi l-profitt fil-mira, il-Kummissjoni qieset il-fatturi li ġejjin: il-livell ta’ profittabbiltà qabel iż-żieda fl-importazzjonijiet mill-pajjiż li qed jiġi investigat, il-livell ta’ profittabbiltà meħtieġ sabiex ikopri l-kostijiet u l-investimenti kollha, ir-riċerka u żvilupp (R&Ż) u l-innovazzjoni, u l-livell ta’ profittabbiltà li wieħed għandu jistenna f’kundizzjonijiet normali ta’ kompetizzjoni. L-industrija tal-Unjoni ddikjarat li l-2017 kienet sena xierqa biex tiġi stabbilita mira għall-profitt. Il-Kummissjoni tqis li l-2017 kienet sena eċċezzjonalment tajba għall-industrija u li l-profitt miksub mill-produtturi tal-Unjoni inklużi fil-kampjun f’dik is-sena (10,2 %) x’aktarx li jinkiseb jekk jintuża bħala profitt fil-mira. Barra minn hekk, is-sehem mis-suq tal-importazzjonijiet fl-2017 diġà kien ta’ 29,1 %. B’kuntrast ma’ dan, fl-2016 is-sehem mis-suq tal-importazzjonijiet kien konsiderevolment aktar baxx milli fl-2017 (21,5 %). Fin-nuqqas ta’ kwalunkwe informazzjoni oħra, il-Kummissjoni ddeċidiet li tuża b’mod provviżorju l-profitt medju miksub matul is-snin 2016 u 2017 bħala mira għall-profitt. Dak il-profitt huwa ta’ 8,7 %.

(332)

Skont l-Artikolu 7(2c) tar-Regolament bażiku, il-Kummissjoni vvalutat talba magħmula minn produttur wieħed tal-Unjoni fuq investimenti ppjanati li ma kinux implimentati matul il-perjodu kkunsidrat. Abbażi tal-evidenza dokumentarja li waslet, il-Kummissjoni aċċettat dik il-pretensjoni proviżorjament u żiedet l-ammont korrispondenti mal-prezz mhux dannuż ta’ dak il-produttur tal-Unjoni.

(333)

Skont l-Artikolu 7(2d) tar-Regolament bażiku, il-Kummissjoni vvalutat il-kostijiet futuri li jirriżultaw minn Ftehimiet Ambjentali Multilaterali, u l-protokolli taħthom, li għalihom l-Unjoni hija parti, li l-industrija tal-Unjoni se ġġarrab matul il-perjodu tal-applikazzjoni tal-miżura skont l-Artikolu 11(2). Abbażi tal-evidenza disponibbli, il-Kummissjoni stabbiliet kost addizzjonali f’medda ta’ bejn EUR 1,5 u 6 għal kull tunnellata, li ġew miżjuda mal-prezz mhux dannuż.

(334)

Fuq din il-bażi, il-Kummissjoni kkalkolat prezz mhux dannuż tal-prodott simili gћall-industrija tal-Unjoni billi żiedet il-marġni ta’ profitt imsemmi hawn fuq ta’ 8,7 % u l-aġġustamenti skont l-Artikolu 7(2c) u 7(2d) mal-kost tal-produzzjoni tal-produtturi tal-Unjoni inklużi fil-kampjun matul il-perjodu ta’ investigazzjoni.

(335)

Imbagħad, il-Kummissjoni ddeterminat il-livell tal-eliminazzjoni tad-dannu fuq il-bażi ta’ tqabbil tal-prezz ta’ importazzjoni medju ponderat, kif stabbilit għall-produtturi esportaturi li kkooperaw u li ġew ivverifikati fil-pajjiżi kkonċernati fuq bażi ta’ tip b’tip, kif stabbilit għall-kalkoli tat-twaqqigħ tal-prezz, mal-prezz mingħajr dannu medju ponderat tal-prodott simili mibjugħ mill-produtturi tal-Unjoni inklużi fil-kampjun, fis-suq ħieles tal-Unjoni matul il-perjodu ta’ investigazzjoni. Kwalunkwe differenza li tirriżulta minn dan it-tqabbil ġiet espressa bħala perċentwal tal-valur CIF medju ponderat tal-importazzjoni.

(336)

Ir-riżultat ta’ dawn il-kalkoli jidher fit-tabella ta’ hawn taħt.

(337)

Skont l-Artikolu 7(2) tar-Regolament bażiku, il-Kummissjoni l-ewwel eżaminat fir-rigward tal-Indoneżja u l-PRC, jekk il-marġni tad-dumping stabbilit b’mod provviżorju, ikunx ogħla mill-marġni adegwat biex jitneħħa d-dannu lill-industrija tal-Unjoni. Għal dan l-għan, sar tqabbil bejn il-prezz medju ponderat tal-importazzjoni tal-produtturi esportaturi fl-Indoneżja u l-PRC li kkooperaw, u l-prezz fil-mira tal-industrija tal-Unjoni kif spjegat fit-Taqsima 6.1 hawn fuq. Ir-riżultat ta’ dawn il-kalkoli jidher fit-tabella ta’ hawn taħt.

(338)

Peress li l-marġni tal-bejgħ bil-prezz imwaqqa’ li ġie kkalkolat għall-produtturi esportaturi Indoneżjani u Ċiniżi kien aktar baxx mill-marġni tad-dumping, il-Kummissjoni vvalutat jekk hemmx distorsjonijiet fuq il-materja prima fir-rigward tal-prodott ikkonċernat, skont l-Artikolu 7(2a) tar-Regolament bażiku.

(339)

Fl-ilment, l-ilmentatur ipprovda evidenza suffiċjenti li hemm distorsjonijiet fil-materja prima skont it-tifsira tal-Artikolu 7(2a) tar-Regolament bażiku fir-rigward tal-prodott ikkonċernat fl-Indoneżja u fil-PRC. Għalhekk, kif imħabbar fin-Notifika ta’ Bidu, meta vvalutat il-livell xieraq ta’ miżuri fir-rigward tal-Indoneżja u l-PRC, il-Kummissjoni eżaminat l-allegati distorsjonijiet u kwalunkwe distorsjoni oħra fl-Indoneżja u fil-PRC koperta mill-Artikolu 7(2a) tar-Regolament bażiku.

(340)

Il-materja prima ddikjarata li hija affettwata minn dawn id-distorsjonijiet kienu n-nikil (ferronikil, ħadid fondut grezz, il-mineral tan-nikil, ruttam tan-nikil), faħam, u ruttam tal-azzar inossidabbli fl-Indoneżja u r-ruttam tal-azzar inossidabbli, kromju, faħam għall-kokk, ferrokromju, ferrosiliċju, azzar mhux raffinat (inossidabbli), u vanadju fil-PRC.

(341)

Minn din il-materja prima, il-Kummissjoni identifikat il-materja prima ewlenija użata fil-produzzjoni tal-prodott ikkonċernat minn kull wieħed mill-produtturi esportaturi inklużi fil-kampjun. Il-Kummissjoni qieset bħala materji primi prinċipali dawk li jirrappreżentaw mill-anqas 17 % tal-kost tal-produzzjoni tal-prodott ikkonċernat.

(342)

Fir-rigward tal-Indoneżja, l-investigazzjoni kkonfermat li kienu jeżistu distorsjonijiet fit-tifsira tal-Artikolu 7(2a) tar-Regolament bażiku fuq materji primi matul il-perjodu ta’ investigazzjoni fil-forma ta’ projbizzjoni tal-esportazzjoni (90) fuq minerali tan-nikil b’kontenut ta’ nikil ta’ 1,7 % u aktar, taxxa fuq l-esportazzjoni (91) ta’ 10 % fuq minerali tan-nikil b’kontenut ta’ nikil ta’ inqas minn 1,7 %, rekwiżit ta’ liċenzjar (92) u kwota tal-esportazzjoni (93) de facto fuq minerali tan-nikil bil-kontenut tan-nikil tal-aħħar, u rekwiżit ta’ liċenzjar (94) de facto fuq ferronikil u ħadid fondut grezz tan-nikil.

(343)

L-investigazzjoni stabbilixxiet ukoll li l-mineral tan-nikil kien jirrappreżenta aktar minn 17 % tal-kostijiet totali tal-produzzjoni tal-prodott investigat.

(344)

Fl-aħħar nett, l-investigazzjoni kkonkludiet li l-prezz imħallas għall-minerali tan-nikil kien ferm aktar baxx (b’aktar minn 30 %) mill-prezz fis-suq internazzjonali rappreżentattiv, f’konformità mal-Artikolu 7(2a) tar-Regolament bażiku.

(345)

F’dan ir-rigward, il-Kummissjoni qabblet il-prezz tax-xiri tal-produtturi esportaturi Indoneżjani mal-prezz FOB tal-mineral tan-nikil, b’kontenut tan-nikil ta’ 1,8 % fil-Filippini (95). Il-Kummissjoni qieset li l-prezz fil-Filippini kien xieraq billi l-Filippini, bħall-Indoneżja, huma fost il-pajjiżi bl-akbar riżervi ta’ minerali tan-nikil fid-dinja (96). Barra minn hekk, il-kontenut tannikil tal-minerali tan-nikil f’dan is-suq internazzjonali rappreżentattiv kien simili ħafna għall-kontenut medju tan-nikil tal-minerali tan-nikil mixtri mill-produtturi esportaturi Indoneżjani. Fl-aħħar nett, il-Kummissjoni kkunsidrat li l-ispejjeż tat-trasport bejn il-fornitur u l-port inklużi fil-prezz FOB jirriflettu l-kostijiet tat-trasport imġarrba mill-produtturi esportaturi Indoneżjani.

(346)

Għalhekk, ir-rekwiżit skont l-Artikolu 7(2a) tar-Regolament bażiku, jiġifieri l-eżistenza ta’ distorsjoni(jiet) fuq materja prima li tammonta għal aktar minn 17 % tal-kost tal-produzzjoni tal-prodott ikkonċernat, intlaħaq fir-rigward tal-Indoneżja.

(347)

Fir-rigward tal-PRC, l-investigazzjoni kkonfermat li kienu jeżistu distorsjonijiet fis-sens tal-Artikolu 7(2a) tar-Regolament bażiku dwar il-materja prima matul il-perjodu ta’ investigazzjoni fil-forma ta’ taxxa tal-esportazzjoni fuq ir-ruttam tal-azzar inossidabbli, il-ferrosilikon, il-ħandid fondut grezz b’kontenut ta’ nikil u l-ferrokromju; u rekwiżit tal-liċenzjar dwar il-ferrosilikon, il-vanadju, il-ferronikil u l-ferrokromju. Il-Kummissjoni bbażat din is-sejba fuq id-data disponibbli fil-bażi tad-data tal-OECD (97) u fuq il-leġiżlazzjoni rilevanti applikabbli fil-PRC.

(348)

L-investigazzjoni stabbiliet ukoll li, għal kull waħda mill-kumpaniji inklużi fil-kampjun, mill-inqas waħda mill-materji primi ewlenin imsemmija hawn fuq kienet tirrappreżenta aktar minn 17 % tal-kost totali tagħhom tal-produzzjoni tal-prodott investigat (98).

(349)

L-investigazzjoni kkonkludiet li l-prezz imħallas miż-żewġ produtturi esportaturi Ċiniżi inklużi fil-kampjun fil-PRC għal din il-materja prima ewlenija kien ferm inqas mill-prezz fis-suq internazzjonali rappreżentattiv użat għal kull materja prima rispettiva, li għalih intużaw l-istess sorsi għall-bini tal-valur normali skont l-Artikolu 2(6a)(a) tar-Regolament bażiku.

(350)

Għalhekk, ir-rekwiżit skont l-Artikolu 7(2a) tar-Regolament bażiku, jiġifieri l-eżistenza ta’ distorsjoni(jiet) fuq materja prima li tammonta għal aktar minn 17 % tal-kost tal-produzzjoni tal-prodott ikkonċernat, intlaħaq fir-rigward tal-PRC.

(351)

Wara li kkonkludiet li hemm distorsjonijiet fil-materja prima kif previst fl-Artikolu 7(2a) tar-Regolament bażiku fil-każ tal-PRC u l-Indoneżja, il-Kummissjoni eżaminat jekk setgħetx tikkonkludi b’mod ċar li kien fl-interess tal-Unjoni li tiddetermina l-ammont tad-dazji provviżorji skont l-Artikolu 7(2b) tar-Regolament bażiku. Id-determinazzjoni tal-interess tal-Unjoni kienet ibbażata fuq evalwazzjoni tal-informazzjoni pertinenti kollha għal din l-investigazzjoni, inklużi l-kapaċitajiet żejda fil-pajjiżi esportaturi, il-kompetizzjoni għall-materja prima u l-effett fuq il-ktajjen tal-provvista għall-kumpaniji tal-Unjoni skont l-Artikolu 7(2b) tar-Regolament bażiku. Sabiex twettaq din il-valutazzjoni, il-Kummissjoni daħħlet mistoqsijiet speċifiċi fil-kwestjonarji għall-partijiet interessati kollha. L-ilmentatur u l-produtturi tal-Unjoni fil-kampjun ipprovdew rispons għal dawk il-mistoqsijiet.

(352)

Fuq il-bażi tal-informazzjoni pprovduta minn Eurofer, il-kapaċità żejda fil-PRC kien stmat li hi ta’ 26,4 miljun tunnellata fl-2019 (99), u l-kapaċità żejda tas-settur totali tal-azzar inossidabbli fl-Indoneżja kien stmat li hi ta’ erba’ miljun tunnellata fl-2019 (100).

(353)

Madankollu, skont il-kwestjonarju tal-GOI, il-kapaċità żejda fl-Indoneżja bħalissa hija ta’ 2,1 miljun tunnellata. B’kuntrast ma’ dan, is-suq ħieles tal-Unjoni kellu daqs ta’ 1,2 miljun tunnellata. F’termini relattivi, il-kapaċitajiet żejda fil-pajjiżi esportaturi huma għalhekk ta’ daqs enormi.

(354)

Fir-rigward tal-kompetizzjoni għall-materja prima, il-GOC ma pprovda l-ebda informazzjoni sinifikanti dwar is-suq tal-materja prima distorta fil-PRC, kif stabbilit fil-premessa (347). L-ilmentatur iddikjara li billi jżid jew inaqqas b’mod artifiċjali l-livell tal-provvista tal-materja prima, jew sempliċiment billi jiffissal-prezzijiet b’mod ċentrali, il-GOC jista’ jidderieġi l-prezzijiet ’il fuq jew ’l isfel. Kif stabbilit fit-Taqsima 6.2.2 ta’ hawn fuq, is-suq Ċiniż tal-materja prima kien meqjus bħala distort.

(355)

Fir-rigward tal-Indoneżja, l-investigazzjoni sabet li l-Indoneżja għandha wieħed mill-ikbar setturi tal-estrazzjoni tal-minerali tan-nikil fid-dinja. Għalhekk, billi jagħmel restrizzjonijiet fuq l-esportazzjoni fuq il-mineral tan-nikil, il-GOI artifiċjalment iniżżel il-prezzijiet fis-suq domestiku Indoneżjan.

(356)

Iż-żewġ pajjiżi għandhom restrizzjonijiet tal-esportazzjoni fuq l-inputs fli fihom in-nikil, li huwa wkoll it-tieni l-aktar input importanti tal-produtturi tal-Unjoni, kif stabbilit fil-premessa (319).

(357)

Dawn il-kwistjonijiet kollha joħolqu żvantaġġ komparattiv għall-industrija tal-Unjoni meta mqabbla mal-produtturi esportaturi fil-pajjiżi kkonċernati. Il-Kummissjoni tqis li din is-sitwazzjoni mhijiex probabbli li tinbidel fil-futur qrib. Fir-rigward tal-Indoneżja, is-sitwazzjoni reċentement saħansitra marret għall-agħar. Il-miżuri li jippermettu l-esportazzjonijiet ta’ minerali tan-nikil b’kontenut ta’ nikil ta’ inqas minn 1,7 % kellhom jibqgħu fis-seħħ sa Jannar 2022. Il-GOI, madankollu, iddeċieda li jħaffef it-terminazzjoni tagħhom. L-esportazzjonijiet kollha ta’ minerali tan-nikil ġew ipprojbiti minn Jannar 2020 (101). Ma hemm l-ebda evidenza li l-GOI se jreġġa’ lura l-politika tiegħu fil-futur qrib.

(358)

Fin-nuqqas ta’ kooperazzjoni sħiħa mill-importaturi, il-Kummissjoni stabbilixxiet b’mod provviżorju li l-effett ewlieni fuq il-ktajjen tal-provvista se jinħass fil-livell tal-utenti. L-effett possibbli fuq il-ktajjen tal-provvista għall-kumpaniji tal-Unjoni, stipulat skont l-Artikolu 7(2b) tar-Regolament bażiku, kien, fid-dawl tad-differenza importanti bejn il-marġnijiet tad-dumping u tad-dannu għall-pajjiżi esportaturi, ivvalutat fil-kuntest tat-test tal-interess tal-Unjoni skont l-Artikolu 21 tar-Regolament bażiku.

(359)

Kif konkluż fil-premessa (373) hawn taħt, dik l-analiżi rriżultat fid-determinazzjoni li, fid-dawl tal-effett tal-miżuri fil-livell tal-marġni tad-dumping, mhuwiex skont l-interess tal-Unjoni li jiġi applikat l-Artikolu 7(2a) tar-Regolament bażiku.

(360)

Fid-dawl tal-analiżi msemmija hawn fuq, il-Kummissjoni kkonkludiet li, skont l-Artikolu 7 (2a) tar-Regolament bażiku, mhuwiex fl-interess tal-Unjoni li tistabbilixxi l-livell tal-miżuri fil-livell tad-dumping fid-dawl tal-effett negattiv sproporzjonat li dan jista’ jkollu fuq il-ktajjen tal-provvista għall-kumpaniji tal-Unjoni.

(361)

Skont l-Artikolu 21 tar-Regolament bażiku, il-Kummissjoni eżaminat jekk setgħetx tikkonkludi b’mod ċar li ma kienx fl-interess tal-Unjoni li tadotta miżuri f’dan il-każ, minkejja d-determinazzjoni ta’ dumping dannuż. Id-determinazzjoni tal-interess tal-Unjoni kienet ibbażata fuq apprezzament tal-interessi varji kollha involuti, inklużi dawk tal-industrija, tal-importaturi u tal-utenti tal-Unjoni.

(362)

L-industrija tal-Unjoni tinsab f’diversi Stati Membri u timpjega direttament 2 372 impjegat fir-rigward tal-prodott li qed jiġi investigat. L-ebda produttur tal-Unjoni ma oppona l-bidu tal-investigazzjoni. Kif intwera fit-taqsima 4 t’hawn fuq, fl-analiżi tal-indikaturi tad-dannu, l-industrija sħiħa tal-Unjoni esperjenzat deterjorament tas-sitwazzjoni tagħha u kienet affettwata b’mod negattiv mill-importazzjonijiet oġġett ta’ dumping.

(363)

Huwa mistenni li l-impożizzjoni tad-dazji provviżorji anti-dumping se tirrestawra kundizzjonijiet tal-kummerċ ġust fis-suq tal-Unjoni, u twaqqaf id-dipressjoni tal-prezzijiet u tippermetti lill-industrija tal-Unjoni tirkupra. Dan iwassal għal titjib fil-profittabbiltà tal-industrija tal-Unjoni lejn livelli meqjusa neċessarji għal din l-industrija b’kapital intensiv. L-industrija tal-Unjoni ġarrbet dannu materjali kkawżat mill-importazzjonijiet oġġett ta’ dumping mill-pajjiżi kkonċernati. Huwa mfakkar li għadd ta’ indikaturi tad-dannu ewlenin urew xejra negattiva matul il-perjodu kkunsidrat. B’mod partikolari, is-sehem mis-suq u l-volum tal-bejgħ, kif ukoll l-indikaturi relatati mal-prestazzjoni finanzjarja tal-produtturi tal-Unjoni inklużi fil-kampjun, bħall-profittabbiltà u r-redditu fuq l-investiment, ġew affettwati serjament. Għalhekk huwa importanti li l-prezzijiet jitreġġgħu lura għal-livell mhux oġġett ta’ dumping jew tal-anqas mhux dannuż sabiex il-produtturi kollha jkunu jistgħu joperaw fis-suq tal-Unjoni taħt kundizzjonijiet ta’ kummerċ ġust. Fin-nuqqas ta’ miżuri, huwa probabbli ħafna li jkun hemm deterjorament ulterjuri fis-sitwazzjoni ekonomika tal-industrija tal-Unjoni. Prestazzjoni ħażina fuq is-segment SSHR ikollha impatt fuq is-segmenti downstream tal-produtturi tal-Unjoni, u b’mod partikolari l-produzzjoni marbuta tagħhom. Il-produtturi tal-Unjoni jiddependu ħafna fuq il-mudell kummerċjali ta’ taħlita ta’ bejgħ fis-suq ħieles u produzzjoni marbuta. Deterjorament tas-segment tas-suq ħieles jista’ bl-istess mod iqiegħed f’riskju s-segment tal-produzzjoni marbuta, li jirrappreżenta volumi ta’ produzzjoni akbar u ċifri ta’ impjiegi ogħla minn dawk ta’ qabel.

(364)

Għalhekk ġie proviżorjament konkluż li l-impożizzjoni ta’ dazji antidumping tkun fl-interess tal-industrija tal-Unjoni peress li tippermettilha li tirkupra mill-effetti tad-dumping dannuż li nstab.

(365)

Żewġ partijiet ippreżentaw lilhom infushom bħala importaturi mhux relatati u wieġbu għall-kwestjonarju rilevanti. Madankollu, it-tweġiba ta’ waħda minnhom ma ġietx segwita aktar peress li l-importatur irriżulta li kien qed jopera minn barra l-Unjoni.

(366)

It-tieni parti rriżultat li ma kinitx importatur ġenwin iżda ċentru tas-servizzi għal diversi operazzjonijiet. Għalhekk, ma kienx hemm kooperazzjoni minn importaturi ġenwini. Skont l-operatur taċ-ċentru tas-servizzi li kkoopera, iż-żieda fil-prezz tal-prodotti kkonċernati tirriżulta f’kost ogħla tal-manifattura għall-utenti Ewropej tal-prodotti, li tikkawża dannu lil dawn l-utenti. B’mod aktar speċifiku, il-parti għamlet talba ta’ esklużjoni ta’ prodott li hija indirizzata taħt it-Taqsima 2.3 flimkien ma’ talbiet oħra bħal dawn.

(367)

Fuq dik il-bażi, f’dan l-istadju ma hemm l-ebda indikazzjoni li l-miżuri jkunu kontra l-interess tal-importaturi.

(368)

Żewġ utenti kkooperaw fl-investigazzjoni.

(369)

Wieħed mill-utenti li ppreżenta tweġiba għall-kwestjonarju kien produttur ta’ tubi tal-azzar inossidabbli. Fir-rigward ta’ dak l-utent, il-Kummissjoni sabet li, fid-dawl tal-volumi tax-xiri u tal-importazzjoni tagħha, il-profitt totali tagħha u l-profitt derivat minn prodotti tal-output li jinvolvu l-prodott ikkonċernat bħala input, l-impożizzjoni ta’ miżuri ma kinitx se tikkawżalha ħsara bla bżonn.

(370)

It-tieni utent li kkoopera huwa produttur ta’ prodotti tal-azzar inossidabbli li jikkompeti mal-industrija tal-Unjoni f’diversi mis-swieq downstream ewlenin tagħha. Dan jixtri volumi sinifikanti ta’ SSHR mill-industrija tal-Unjoni kif ukoll minn produtturi barra l-Unjoni, inkluż fil-pajjiżi kkonċernati. Dak l-utent qajjem tħassib dwar is-sigurtà tal-prezzijiet tal-provvista u tax-xiri wara kwalunkwe impożizzjoni ta’ dazji. Huwa l-uniku utent indipendenti kbir tal-prodott ikkonċernat fl-Unjoni. Mingħajr il-produzzjoni integrata tal-azzar, dan jiddependi kompletament fuq provvisti ta’ kojls minn partijiet oħra biex jimmanifatturaw il-prodotti downstream tagħha. Il-parti ddikjarat li l-industrija tal-Unjoni mhijiex interessata li tbigħilha volumi kbar addizzjonali ta’ SSHR, u b’mod partikolari tip wieħed ta’ prodott (kojls suwed), bi prezzijiet kompetittivi, peress li l-produtturi tal-Unjoni jippreferu jżommhom għall-użu marbut tagħhom stess. Din id-dikjarazzjoni ġiet miċħuda mill-fatt li l-industrija tal-Unjoni kellha kapaċitajiet żejda matul il-perjodu kkunsidrat, li qabżu d-domanda totali ta’ dak l-utent mill-inqas erba’ darbiet. Barra minn hekk, kif issottometta l-ilmentatur, diversi produtturi tal-Unjoni huma lesti li jfornu kojls suwed kif ġie kkomunikat fuq is-siti web tal-produtturi. Fl-aħħar nett, minħabba l-katini tal-provvista diġà stabbiliti tal-utent u l-kuntatti ma’ produtturi ta’ pajjiżi terzi, huwa raġonevoli wkoll li wieħed jistenna li se tkun tista’ tiddiversifika wkoll il-provvista tagħha billi tixtri aktar minn pajjiżi terzi.

(371)

Sakemm il-fatturi rilevanti kollha (b’mod partikolari s-sorsi, il-volumi u l-prezzijiet qabel id-dazji tax-xiri u l-fatturat miksub fuq prodotti downstream) jibqgħu l-istess meta mqabbla mal-perjodu ta’ investigazzjoni, il-Kummissjoni stabbiliet li l-profitt annwali ġenerali ta’ dak l-utent ikun affettwat serjament b’mod negattiv jekk jiġu imposti dazji fuq l-importazzjonijiet mill-PRC u l-Indoneżja skont l-Artikolu 7(2a) tar-Regolament bażiku.

(372)

Jekk, bl-istess suppożizzjoni bħal fil-premessa (369), jiġu imposti dazji fuq l-importazzjonijiet mill-PRC u l-Indoneżja skont l-Artikolu 7(2) tar-Regolament bażiku, il-profitt annwali kumplessiv jiġi affettwat ukoll iżda fuq livell ferm inqas.

(373)

Ix-xenarji ta’ hawn fuq huma bbażati fuq suppożizzjonijiet statiċi (jiġifieri l-fatturi rilevanti kollha jibqgħu l-istess ħlief li d-dazji se jkunu imposti u għalhekk għandhom jitqiesu). Fil-fatt, huma xenarji tal-agħar każ peress li, kif spjegat hawn taħt, f’każ li jiġu imposti dazji, il-fatturi sottostanti l-oħra x’aktarx li jinbidlu.

(374)

L-ewwel nett, ix-xejriet tas-sorsi u l-prezzijiet tax-xiri mhux se jibqgħu l-istess. Jekk il-prezzijiet tal-importazzjonijiet mill-PRC u mill-Indoneżja b’mod partikolari se jsiru soġġetti għal korrezzjoni ’l fuq, l-importazzjonijiet minn sorsi oħra ta’ provvista x’aktarx se jitkomplew f’volumi akbar. B’mod partikolari, ninnutaw li l-importazzjonijiet mill-Korea t’Isfel kienu f’livelli għoljin sa u inkluż l-2016, meta kienu jammontaw għal 65 000 tunnellata. Fid-dawl tal-iżviluppi tas-suq minn dak iż-żmien, dawn l-importazzjonijiet tilfu ishma importanti mis-suq matul is-snin (ara t-tabella 15) iżda jista’ jkun mistenni li wara l-impożizzjoni tal-miżuri, il-produtturi esportaturi mill-Korea iżda wkoll minn pajjiżi produtturi oħra bħall-Afrika t’Isfel se jerġgħu jiffokaw dejjem aktar fuq is-suq tal-Unjoni peress li se jkunu f’pożizzjoni aħjar biex jikkompetu, għall-benefiċċju tal-utenti. Barra minn hekk, huwa mistenni li minħabba s-solliev offrut mill-miżuri, l-industrija tal-Unjoni se tkun f’pożizzjoni li tbigħ volumi akbar lill-utenti bi prezzijiet kompetittivi. L-industrija tal-Unjoni sempliċement ma tistax taffordja titlef ishma mis-suq importanti fl-Unjoni kif uriet din l-investigazzjoni. Fir-rigward tat-tieni utent imsemmi hawn fuq, minħabba d-daqs u l-importanza tiegħu bħala klijent tal-industrija tal-Unjoni, dan jista’ jkollu xi influwenza li x’aktarx tiżdied f’każ li tixtri volumi saħansitra akbar mill-industrija tal-Unjoni.

(375)

Ta’ min jinnota wkoll li huwa previst li f’Lulju 2021, il-miżuri applikabbli ta’ salvagwardja għall-azzar li jikkonċernaw ukoll il-prodott ikkonċernat se jiskadu. Dan ifisser li minn Lulju 2021, l-utenti se jkollhom aċċess akbar għal sorsi alternattivi minħabba li r-restrizzjonijiet tal-kwota li ilhom fis-seħħ mid-19 ta’ Lulju 2018 se jitneħħew.

(376)

Għalhekk huwa mistenni li l-utenti kumplessivament x’aktarx li jiġu affettwati b’mod negattiv mill-impożizzjoni tad-dazji, iżda li l-impatt tad-dazju fil-livelli stabbiliti għall-PRC u għall-Indoneżja skont l-Artikolu 7(2) tar-Regolament bażiku mhuwiex tali li jkun sproporzjonat, peress li huwa mistenni li l-industrija tal-utenti mbagħad tkun tista’ tadatta għas-sitwazzjoni l-ġdida. Tabilħaqq, jekk il-livell ta’ dazji jiġi stabbilit skont l-Artikolu 7(2) tar-Regolament bażiku, l-utenti kollha li kkooperaw huma mistennija li jibqgħu profitabbli.

(377)

Madankollu, jekk jiġu imposti dazji skont l-Artikolu 7(2a) tar-Regolament bażiku, il-Kummissjoni stabbilixxiet li l-impatt possibbli tal-miżuri kontra l-PRC u l-Indoneżja fil-livell tal-marġni tad-dumping ikun sproporzjonat fid-dawl tal-effetti negattivi b’saħħithom possibbli fuq il-ktajjen tal-provvista għal ċerti kumpaniji tal-Unjoni u b’mod partikolari fuq l-utenti. Tabilħaqq, il-Kummissjoni sabet li f’dan ix-xenarju l-industrija tal-utenti, u b’mod partikolari l-utenti li xtraw volumi sinifikanti mill-PRC u/jew mill-Indoneżja fil-perjodu ta’ investigazzjoni, jistgħu jiġu affettwati b’mod mhux xieraq u bħala riżultat ta’ dan jistgħu jibdew jagħmlu t-telf.

(378)

Fuq il-bażi ta’ dan ta’ hawn fuq, u bil-kundizzjoni li d-dazji jridu jiġu imposti skont l-Artikolu 7(2) tar-Regolament bażiku, il-Kummissjoni kkonkludiet b’mod provviżorju li ma kien hemm l-ebda raġuni konvinċenti li ma kienx fl-interess tal-Unjoni li jiġu imposti miżuri fuq l-importazzjonijiet ta’ ċerti pjanċi u kojls tal-azzar inossidabbli llaminati bis-sħana li joriġinaw mill-pajjiżi kkonċernati f’dan l-istadju tal-investigazzjoni.

(379)

Abbażi tal-konklużjonijiet li waslet għalihom il-Kummissjoni dwar id-dumping, id-dannu, il-kawżalità u l-interess tal-Unjoni, jenħtieġ li jiġu imposti miżuri provviżorji fuq l-importazzjonijiet ta’ prodotti tal-azzar inossidabbli llaminati ċatti, kemm jekk ikunu f’kojls u kemm jekk ma jkunux (inklużi prodotti maqtugħa skont id-daqs u li jkunu strixxi dojoq), li ma jibqgħux jinħadmu wara li jiġu llaminati bis-sħana li joriġinaw mill-Indoneżja, mir-Repubblika tal-Poplu taċ-Ċina u mit-Tajwan, biex jiġi evitat li jsir dannu ulterjuri lill-industrija tal-Unjoni mill-importazzjonijiet oġġett ta’ dumping.

(380)

Jenħtieġ li jiġu imposti miżuri anti-dumping provviżorji fuq l-importazzjonijiet, skont ir-regola tad-dazju inferjuri fl-Artikolu 7(2) tar-Regolament bażiku. Il-Kummissjoni qabblet il-marġnijiet tad-dannu u l-marġnijiet tad-dumping. L-ammont tad-dazji ġie stabbilit fil-livell l-aktar baxx tal-marġni tad-dumping u l-marġni tad-dannu.

(381)

Abbażi ta’ dan ta’ hawn fuq, ir-rati tad-dazju anti-dumping provviżorji, espressi skont il-prezz CIF fil-fruntiera tal-Unjoni, bid-dazju doganali mhux imħallas, jenħtieġ li jkunu kif ġej:

(382)

Ir-rati tad-dazju anti-dumping ta’ kumpaniji individwali speċifikati f’dan ir-Regolament ġew stabbiliti abbażi tas-sejbiet ta’ din l-investigazzjoni. Għaldaqstant, dawn rriflettew il-qagħda li nstabet matul din l-investigazzjoni fir-rigward ta’ dawn il-kumpaniji. Dawn ir-rati ta’ dazju huma esklussivament applikabbli għall-importazzjonijiet tal-prodott ikkonċernat li joriġina mill-pajjiżi kkonċernati u magħmul mill-entitajiet ġuridiċi msemmija. L-importazzjonijiet tal-prodott ikkonċernat immanifatturat minn kwalunkwe kumpanija oħra mhux imsemmija b’mod speċifiku fil-parti operattiva ta’ dan ir-Regolament, inklużi entitajiet relatati ma’ dawk imsemmija b’mod speċifiku, jenħtieġ li jkunu soġġetti għar-rata ta’ dazju applikabbli għall-“kumpaniji l-oħrajn kollha”. Jenħtieġ li ma jkunux soġġetti għal xi rata individwali ta’ dazju anti-dumping.

(383)

Kumpanija tista’ titlob l-applikazzjoni ta’ dawn ir-rati ta’ dazju anti-dumping individwali jekk sussegwentement tibdel l-isem tal-entità tagħha. It-talba trid tkun indirizzata lill-Kummissjoni (102). It-talba għandu jkun fiha l-informazzjoni kollha rilevanti li tippermetti li jintwera li l-bidla ma taffettwax id-dritt tal-kumpanija li tibbenefika mir-rata tad-dazju li tapplika għaliha. Jekk il-bidla fl-isem tal-kumpanija ma jaffettwax id-dritt tagħha li tibbenefika mir-rata ta’ dazju li tapplika għaliha, avviż dwar il-bidla tal-isem jiġi ppubblikat f’Il-Ġurnal Uffiċjali tal-Unjoni Ewropea.

(384)

Sabiex jiġu mminimizzati r-riskji ta’ ċirkomvenzjoni minħabba d-differenza kbira fir-rati tad-dazju, hemm bżonn ta’ miżuri speċjali biex tiġi żgurata l-applikazzjoni xierqa tad-dazji anti-dumping individwali. Il-kumpaniji b’dazji anti-dumping individwali għandhom jippreżentaw fattura kummerċjali valida lill-awtoritajiet doganali tal-Istati Membri. Il-fattura trid tkun konformi mar-rekwiżiti stabbiliti fl-Artikolu 1(3) ta’ dan ir-Regolament. L-importazzjonijiet li ma jkunux akkumpanjati minn dik il-fattura jenħtieġ li jkunu soġġetti għad-dazju anti-dumping applikabbli għall-“kumpaniji l-oħrajn kollha”.

(385)

Filwaqt li l-preżentazzjoni ta’ din il-fattura hija meħtieġa sabiex l-awtoritajiet doganali tal-Istati Membri jkunu jistgħu japplikaw ir-rati tad-dazju anti-dumping individwali fuq l-importazzjonijiet, mhijiex l-uniku element li jrid jitqies mill-awtoritajiet doganali. Tabilħaqq, anke jekk jiġu ppreżentati b’fattura li tissodisfa r-rekwiżiti kollha stabbiliti fl-Artikolu 1(3) ta’ dan ir-Regolament, l-awtoritajiet doganali tal-Istati Membri jenħtieġ li jwettqu l-verifiki tas-soltu tagħhom u jistgħu, bħal fil-każijiet l-oħra kollha, jitolbu dokumenti addizzjonali (dokumenti tat-trasport, eċċ.) sabiex ikunu jistgħu jivverifikaw l-akkuratezza tad-dettalji li jkun hemm fid-dikjarazzjoni u biex jiżguraw li l-applikazzjoni sussegwenti tar-rata tad-dazju tkun ġustifikata, f’konformità mal-liġi doganali.

(386)

Jekk l-esportazzjonijiet minn waħda mill-kumpaniji li jibbenefikaw minn rati ta’ dazju individwali aktar baxxi jiżdiedu b’mod sinifikanti fil-volum, b’mod partikolari wara l-impożizzjoni tal-miżuri kkonċernati, tali żieda fil-volum tista’ titqies bħala waħda li fiha nnifisha tikkostitwixxi bidla fix-xejra tal-kummerċ minħabba l-impożizzjoni ta’ miżuri fis-sens tal-Artikolu 13(1) tar-Regolament bażiku. F’dawn iċ-ċirkostanzi, tista’ tinbeda investigazzjoni kontra ċ-ċirkomvenzjoni, diment li jiġu ssodisfati l-kundizzjonijiet biex din issir. Din l-investigazzjoni tista’, fost l-oħrajn, teżamina l-ħtieġa għat-tneħħija ta’ rata(i) ta’ dazju individwali u l-impożizzjoni konsegwenti ta’ dazju għall-pajjiż kollu.

(387)

Biex ikun żgurat infurzar xieraq tad-dazji anti-dumping, ir-rata tad-dazju anti-dumping għall-kumpaniji l-oħrajn kollha jenħtieġ li tapplika mhux biss għall-produtturi esportaturi li ma kkooperawx f’din l-investigazzjoni, imma anki għall-produtturi li ma kellhomx esportazzjonijiet lejn l-Unjoni matul il-perjodu ta’ investigazzjoni.

(388)

Kif imsemmi fil-premessa (3), il-Kummissjoni għamlet l-importazzjonijiet ta’ ċerti folji u kojls tal-azzar inossidabbli llaminati bis-sħana soġġetti għar-reġistrazzjoni. Ir-reġistrazzjoni saret bil-għan li possibbilment jinġabru d-dazji b’mod retroattiv skont l-Artikolu 10(4) tar-Regolament bażiku. Għalhekk, ir-reġistrazzjoni kienet għadha għaddejja matul il-fażi ta’ divulgazzjoni minn qabel.

(389)

Fid-dawl tas-sejbiet fl-istadju provviżorju, jenħtieġ li r-reġistrazzjoni tal-importazzjonijiet tieqaf/ma titkompliex.

(390)

F’dan l-istadju tal-proċediment ma ttieħdet l-ebda deċiżjoni dwar l-applikazzjoni retroattiva possibbli ta’ miżuri anti-dumping. Deċiżjoni bħal din tittieħed fl-istadju definittiv.