ISSN 1977-074X
Il-Ġurnal Uffiċjali
tal-Unjoni Ewropea
L 103I
Edizzjoni bil-Malti
Leġiżlazzjoni
Volum 63
3 ta' April 2020
|
ISSN 1977-074X |
||
|
Il-Ġurnal Uffiċjali tal-Unjoni Ewropea |
L 103I |
|
|
|
||
|
Edizzjoni bil-Malti |
Leġiżlazzjoni |
Volum 63 |
|
Werrej |
|
II Atti mhux leġiżlattivi |
Paġna |
|
|
|
DEĊIŻJONIJIET |
|
|
|
* |
|
MT |
L-Atti li t-titoli tagħhom huma stampati b'tipa ċara huma dawk li għandhom x'jaqsmu mal-maniġment ta' kuljum ta' materji agrikoli, u li ġeneralment huma validi għal perijodu limitat. It-titoli ta'l-atti l-oħra kollha huma stampati b'tipa skura u mmarkati b'asterisk quddiemhom. |
II Atti mhux leġiżlattivi
DEĊIŻJONIJIET
|
3.4.2020 |
MT |
Il-Ġurnal Uffiċjali tal-Unjoni Ewropea |
LI 103/1 |
DEĊIŻJONI TAL-KUMMISSJONI (UE) 2020/491
tat-3 ta’ April 2020
dwar l-eżenzjoni mid-dazji fuq l-importazzjoni u l-eżenzjoni mill-VAT fuq l-importazzjonijiet tal-merkanzija meħtieġa biex jiġu miġġielda l-effetti tat-tifqigħa tal-COVID-19 matul l-2020
(notifikata bid-dokument C(2020) 2146)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat id-Direttiva tal-Kunsill 2009/132/KE tad-19 ta’ Ottubru 2009 li tiddetermina l-kamp ta’ applikazzjoni tal-Artikolu 143(b) u (c) tad-Direttiva 2006/112/KE dwar l-eżenzjoni mit-taxxa fuq il-valur miżjud fuq l-importazzjoni finali ta’ ċerti oġġetti (1), u b’mod partikolari l-ewwel paragrafu tal-Artikolu 53 tagħha, flimkien mal-Artikolu 131 tal-Ftehim dwar il-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika,
Wara li kkunsidrat ir-Regolament tal-Kunsill (KE) Nru 1186/2009 tas-16 ta’ Novembru 2009 li jistabbilixxi sistema Komunitarja ta’ eżenzjonijiet mid-dazju doganali (2), u b’mod partikolari l-ewwel paragrafu tal-Artikolu 76 tiegħu, flimkien mal-Artikolu 131 tal-Ftehim dwar il-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika,
Billi:
|
(1) |
Fit-30 ta’ Jannar 2020 l-Organizzazzjoni Dinjija tas-Saħħa (id-WHO) iddikjarat it-tifqigħa tal-COVID-19 bħala emerġenza tas-saħħa pubblika ta’ tħassib internazzjonali. Fil-11 ta’ Marzu 2020, id-WHO ddikjarat it-tifqigħa tal-COVID-19 bħala pandemija. Il-COVID-19 issa pprovokat infezzjonijiet fl-Istati Membri kollha. Minħabba l-għadd ta’ każijiet li qed jiżdied b’mod allarmanti u n-nuqqas ta’ mezzi biex tiġi ttrattata t-tifqigħa tal-COVID-19, għadd ta’ Stati Membri ddikkjaraw stat ta’ emerġenza nazzjonali. |
|
(2) |
Sabiex jiġu miġġielda l-effetti tat-tifqigħa tal-COVID-19, saru talbiet mill-Italja fid-19 ta’ Marzu 2020, minn Franza fil-21 ta’ Marzu 2020, mill-Ġermanja u Spanja fit-23 ta’ Marzu 2020, mill-Awstrija, Ċipru, iċ-Ċekja, l-Estonja, il-Greċja, il-Kroazja, il-Litwanja, in-Netherlands, il-Polonja, il-Portugall u s-Slovenja fl-24 ta’ Marzu 2020, mill-Belġju, il-Bulgarija, id-Danimarka, il-Finlandja, l-Ungerija, l-Irlanda, il-Lussemburgu, il-Latvja, ir-Rumanija, is-Slovakkja u r-Renju Unit fil-25 ta’ Marzu 2020, mill-Iżvezja u Malta fis-26 ta’ Marzu 2020, għall-eżenzjoni mid-dazji fuq l-importazzjoni u għall-eżenzjoni mit-taxxa fuq il-valur miżjud (“VAT”) fuq il-merkanzija importata. |
|
(3) |
Il-pandemija tal-COVID-19 u l-isfidi estremi li ġġib magħha jikkostitwixxu diżastru skont it-tifsira tat-Taqsima C tal-Kapitolu XVII tar-Regolament (KE) Nru 1186/2009 u tal-Kapitolu 4 tat-Titolu VIII tad-Direttiva 2009/132/KE. Għalhekk jixraq li tingħata eżenzjoni mid-dazji fuq l-importazzjoni imponibbli fuq il-merkanzija importata għall-finijiet deskritti fl-Artikolu 74 tar-Regolament (KE) Nru 1186/2009 u eżenzjoni mit-taxxa fuq il-valur miżjud (VAT) imponibbli fuq il-merkanzija importata għall-finijiet deskritti fl-Artikolu 51 tad-Direttiva 2009/132/KE. |
|
(4) |
Jenħtieġ li l-Istati Membri jinfurmaw lill-Kummissjoni dwar in-natura u l-kwantitajiet tal-oġġetti diversi ta’ merkanzija permessi mingħajr dazju fuq l-importazzjoni u mingħajr VAT bil-għan li jiġu miġġielda l-effetti tat-tifqigħa tal-COVID-19, dwar l-organizzazzjonijiet li l-Istati Membri awtorizzaw għad-distribuzzjoni jew għall-forniment ta’ dik il-merkanzija, u dwar il-miżuri li ħadu biex il-merkanzija ma tkunx tista’ tintuża għal skopijiet oħra għajr biex jiġu miġġielda l-effetti ta’ din it-tifqigħa. |
|
(5) |
Filwaqt li jitqiesu l-isfidi estremi li jiffaċċjaw l-Istati Membri, jenħtieġ li l-eżenzjoni mid-dazji fuq l-importazzjoni u l-eżenzjoni mill-VAT jingħataw għall-importazzjonijiet li jsiru mit-30 ta’ Jannar 2020. Jenħtieġ li l-eżenzjoni tibqa’ fis-seħħ sal-31 ta’ Lulju 2020. Qabel it-tmiem ta’ dan il-perjodu, is-sitwazzjoni se tiġi rieżaminata u fejn meħtieġ, f’konsultazzjoni mal-Istati Membri, dan il-perjodu jista’ jiġi estiż. |
|
(6) |
Fis-26 ta’ Marzu 2020, l-Istati Membri ġew ikkonsultati f’konformità mal-Artikolu 76 tar-Regolament (KE) Nru 1186/2009 u l-Artikolu 53 tad-Direttiva 2009/132/KE, |
ADOTTAT DIN ID-DEĊIŻJONI:
Artikolu 1
1. Il-merkanzija għandha tiddaħħal mingħajr dazji fuq l-importazzjoni skont it-tifsira tal-Artikolu 2(1)(a) tar-Regolament (KE) Nru 1186/2009 u tkun eżentata mit-taxxa fuq il-valur miżjud (VAT) fuq l-importazzjonijiet skont it-tifsira tal-Artikolu 2(1)(a) tad-Direttiva tal-Kunsill 2009/132/KE, meta jiġu ssodisfati l-kundizzjonijiet li ġejjin:
|
(a) |
il-merkanzija tkun maħsuba għal xi wieħed minn dawn l-iskopijiet li ġejjin:
|
|
(b) |
il-merkanzija tissodisfa r-rekwiżiti stabbiliti fl-Artikoli 75, 78, 79 u 80 tar-Regolament (KE) Nru 1186/2009 u fl-Artikoli 52, 55, 56 u 57 tad-Direttiva 2009/132/KE; |
|
(c) |
il-merkanzija hija importata għar-rilaxx għaċ-ċirkolazzjoni libera mill-organizzazzjonijiet tal-Istat, fosthom korpi tal-Istat, korpi pubbliċi u korpi oħra rregolati mil-liġi pubblika jew f’isimhom, jew minn organizzazzjonijiet approvati mill-awtoritajiet kompetenti fl-Istati Membri jew f’isimhom. |
2 Il-merkanzija għandha tiddaħħal ukoll mingħajr dazji fuq l-importazzjoni skont it-tifsira tal-Artikolu 2(1)(a) tar-Regolament (KE) Nru 1186/2009 u tkun eżentata mill-VAT fuq l-importazzjonijiet skont it-tifsira tal-Artikolu 2(1)(a) tad-Direttiva 2009/132/KE, meta din tkun importata għar-rilaxx għaċ-ċirkolazzjoni libera minn aġenziji li jagħtu l-għajnuna f’każ ta’ diżastru jew f’isimhom, sabiex tissodisfa l-ħtiġijiet tagħhom f’każ ta’ diżastru matul il-perjodu li fih jagħtu l-għajnuna lill-persuni affettwati mill-COVID-19 jew lil dawk li jinsabu f’riskju li jiġu affettwati minnha jew li huma involuti fil-ġlieda kontra t-tifqigħa tal-COVID-19.
Artikolu 2
L-Istati Membri għandhom jikkomunikaw l-informazzjoni li ġejja lill-Kummissjoni, sa mhux aktar tard mit-30 ta’ Novembru 2020:
|
(a) |
lista tal-organizzazzjonijiet approvati mill-awtoritajiet kompetenti fl-Istati Membri kif imsemmi fil-punt (c) tal-Artikolu 1(1); |
|
(b) |
informazzjoni dwar in-natura u l-kwantitajiet tal-oġġetti diversi ta’ merkanzija li jkunu ddaħħlu mingħajr dazji fuq l-importazzjoni u mingħajr VAT skont l-Artikolu 1; |
|
(c) |
il-miżuri li ħadu biex jiżguraw il-konformità mal-Artikoli 78, 79, u 80 tar-Regolament (KE) Nru 1186/2009 u mal-Artikoli 55, 56 u 57 tad-Direttiva 2009/132/KE fir-rigward tal-merkanzija li taqa’ fil-kamp ta’ applikazzjoni ta’ din id-Deċiżjoni. |
Artikolu 3
L-Artikolu 1 għandu japplika għall-importazzjonijiet li jsiru mit-30 ta’ Jannar 2020 sal-31 ta’ Lulju 2020.
Artikolu 4
Din id-Deċiżjoni hija indirizzata lill-Istati Membri.
Magħmul fi Brussell, it-3 ta’ April 2020.
Għall-Kummissjoni
Paolo GENTILONI
Membru tal-Kummissjoni