11.11.2019

Il-Ġurnal Uffiċjali tal-Unjoni Ewropea

L 290/8

REGOLAMENT TA’ IMPLIMENTAZZJONI TAL-KUMMISSJONI (UE) 2019/1881

tat-8 ta’ Novembru 2019

li jemenda r-Regolament (UE) Nru 37/2010 biex jikklassifika s-sustanza diflubenżuron fir-rigward tal-limitu massimu ta’ residwi tagħha

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (KE) Nru 470/2009 tal-Parlament Ewropew u tal-Kunsill tas-6 ta’ Mejju 2009 li jistabbilixxi l-proċeduri Komunitarji għall-istabbiliment ta’ limiti ta’ residwi ta’ sustanzi farmakoloġikament attivi fl-oġġetti tal-ikel li joriġinaw mill-annimali, u li jħassar ir-Regolament tal-Kunsill (KEE) Nru 2377/90 u li jemenda d-Direttiva 2001/82/KE tal-Parlament Ewropew u tal-Kunsill u r-Regolament (KE) Nru 726/2004 tal-Parlament Ewropew u tal-Kunsill (1), u b’mod partikolari l-Artikolu 14 flimkien mal-Artikolu 17 tiegħu,

Wara li kkunsidrat l-opinjoni tal-Aġenzija Ewropea għall-Mediċini fformulata mill-Kumitat għall-Prodotti Mediċinali għall-Użu Veterinarju,

Billi:

(1)

L-Artikolu 17 tar-Regolament (KE) Nru 470/2009 jirrikjedi li l-limitu massimu ta’ residwi (“MRL”) għas-sustanzi farmakoloġikament attivi maħsuba għall-użu fl-Unjoni fi prodotti mediċinali veterinarji għall-annimali li jipproduċu l-ikel jew fi prodotti bijoċidali użati fit-trobbija tal-annimali jiġi stabbilit f’Regolament.

(2)	It-Tabella 1 tal-Anness tar-Regolament tal-Kummissjoni (UE) Nru 37/2010 (2) tistabbilixxi s-sustanzi farmakoloġikament attivi u l-klassifikazzjoni tagħhom fir-rigward tal-MRLs fl-oġġetti tal-ikel li joriġinaw mill-annimali.

(3)	Is-sustanza diflubenżuron diġà hija inkluża f’dik it-tabella bħala sustanza permessa għall-ispeċijiet ta’ salmonidi, applikabbli għall-muskoli, u għall-ġilda.

(4)

Fis-7 ta’ Mejju 2014, il-Kummissjoni talbet lill-Aġenzija Ewropea għall-Mediċini (“EMA”) toħroġ opinjoni ġdida dwar id-diflubenżuron f’konformità mal-Artikolu 11 tar-Regolament (KE) Nru 470/2009, filwaqt li tqis il-potenzjal ġenotossiku tal-metabolit tad-diflubenżuron, 4-kloroanilin, kif ukoll ir-riżultati tal-evalwazzjonijiet iktar reċenti tad-diflubenżuron bħala pestiċida, li saru mill-Awtorità Ewropea dwar is-Sigurtà fl-Ikel (EFSA) (3), u bħala prodott bijoċidali, ikkoordinata miċ-Ċentru Konġunt tar-Riċerka tal-Kummissjoni (4).

(5)

Fl-opinjoni tiegħu tas-7 ta’ Mejju 2015, il-Kumitat għall-Prodotti Mediċinali għall-Użu Veterinarju (“CVMP”) ikkonkluda li ma ġiex ikkonfermat li l-metabolit ġenotossiku huwa preżenti fil-muskoli tal-ħut u adotta opinjoni fejn innota li kienet meħtieġa iktar data dwar il-formazzjoni u t-tnaqqis ta’ 4-kloroanilin fil-muskoli tal-ħut sabiex jiġi kkaratterizzat għalkollox ir-riskju, jekk hemm, għall-konsumatur mill-esponiment għad-diflubenżuron. Ir-rapporti disponibbli pubblikament dwar il-farmakoloġija tad-diflubenżuron indikaw li fin-nagħaġ, fis-swidi u fit-tiġieġ, instab li l-4-kloroanilin kienet metabolit minuri. Abbażi ta’ dik l-opinjoni, l-EMA rrakkomandat li tiġi emendata l-entrata eżistenti tad-diflubenżuron fl-ispeċijiet ta’ salmonidi fit-Tabella 1 tal-Anness tar-Regolament tal-Kummissjoni (UE) Nru 37/2010 u li jiġi stabbilit MRL proviżorju, sakemm ma jkunx hemm data addizzjonali dwar ir-residwi.

(6)

Wara li kkunsidrat ir-rakkomandazzjoni mill-EMA, il-Kummissjoni ċċarat f’Marzu 2017 li r-Regolament (KE) Nru 470/2009 jippermetti biss l-istabbiliment ta’ MRL proviżorju f’każijiet fejn id-data xjentifika ma tkunx kompluta u fejn ma jkun hemm l-ebda raġuni biex wieħed jissoponi li r-residwi tas-sustanza fil-livell propost jikkostitwixxu periklu għas-saħħa tal-bniedem. Fil-każ tad-diflubenżuron hemm possibbiltà li l-metabolit ġenotossiku 4-kloroanilin ikun preżenti fil-ħut ittrattat b’livelli li jistgħu jkunu ta’ periklu għas-saħħa tal-bniedem, u konsegwentement tqies li l-istabbiliment ta’ MRL proviżorju mhuwiex xieraq, skont il-Kummissjoni. Il-Kummissjoni enfasizzat ukoll il-konklużjoni tal-EFSA 2015 (5) b’rabta mal-użu tad-diflubenżuron fi prodotti għall-protezzjoni tal-pjanti, u indikat li d-data disponibbli ma kinitx biżżejjed biex turi li l-użi rappreżentattivi kienu sikuri għall-konsumaturi. Għal dawk ir-raġunijiet, il-Kummissjoni stiednet lis-CVMP jirrevedi l-opinjoni tiegħu tas-7 ta’ Mejju 2015.

(7)

Fil-15 ta’ Marzu 2018, is-CVMP adotta l-opinjoni reveduta tiegħu dwar l-istabbiliment ta’ limiti massimi ta’ residwi għad-diflubenżuron (6). Abbażi ta’ dik l-opinjoni, l-EMA rrakkomandat li tiġi emendata l-entrata eżistenti tad-diflubenżuron fl-ispeċijiet ta’ salmonidi fit-Tabella 1 tal-Anness tar-Regolament tal-Kummissjoni (UE) Nru 37/2010 sabiex l-MRL jitnaqqas. Il-valur tal-MRL huwa ffissat għal 10 µg/kg sabiex jiġi żgurat li l-esponiment tal-konsumatur għall-4-kloroanilin jibqa’ f’livell aċċettabbli.

(8)

F’konformità mal-Artikolu 5 tar-Regolament (KE) Nru 470/2009, l-EMA trid tikkunsidra li tuża l-MRLs stabbiliti għal sustanza farmakoloġikament attiva li tinsab f’oġġett tal-ikel partikolari għal oġġett tal-ikel ieħor li jkun ġej mill-istess speċi, jew l-MRLs stabbiliti għal sustanza farmakoloġikament attiva fi speċi waħda jew iktar għal speċijiet oħra.

(9)	L-EMA jidhrilha li l-estrapolazzjoni tal-entrata tad-diflubenżuron għall-ħut bil-pinen mhijiex xierqa f’dan iż-żmien minħabba nuqqas ta’ evidenza li l-metabolit 4-kloroanilin mhuwiex iffurmat fi kwalunkwe ammont rilevanti f’kull speċi kkonċernata.

(10)	Skont l-opinjonijiet tas-CVMP u r-rakkomandazzjoni tal-EMA, jidher li għall-protezzjoni tas-saħħa tal-bniedem jeħtieġ li l-MRL għad-diflubenżuron jitnaqqas minn 1 000 μg/kg għal 10 μg/kg.

(11)	Għalhekk, jenħtieġ li r-Regolament (UE) Nru 37/2010 jiġi emendat skont dan.

(12)	Huwa xieraq li l-partijiet ikkonċernati jingħataw perjodu ta’ żmien raġonevoli biex jieħdu l-miżuri li jaf ikunu meħtieġa biex jikkonformaw mal-MRL il-ġdid għad-diflubenżuron.

(13)	Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Prodotti Mediċinali Veterinarji,

ADOTTAT DAN IR-REGOLAMENT:

Artikolu 1

L-Anness tar-Regolament (UE) Nru 37/2010 huwa emendat kif stabbilit fl-Anness ta’ dan ir-Regolament.

Artikolu 2

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Għandu japplika mill-10 ta’ Jannar 2020.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, it-8 ta’ Novembru 2019.

Għall-Kummissjoni

Il-President

Jean-Claude JUNCKERS

(1) ĠU L 152, 16.6.2009, p. 11.

(2) Ir-Regolament tal-Kummissjoni (UE) Nru 37/2010 tat-22 ta’ Diċembru 2009 dwar is-sustanzi farmakoloġikament attivi u l-klassifikazzjoni tagħhom fir-rigward tal-limiti massimi ta’ residwu fl-oġġetti tal-ikel li ġejjin mill-annimali (ĠU L 15, 20.1.2010, p. 1).

(3) EFSA Journal 2012;10(9):2870. Conclusion on the peer review of the pesticide risk assessment of confirmatory data submitted for the active substance Diflubenzuron (Konklużjoni dwar ir-rieżami bejn il-pari tal-valutazzjoni tar-riskju tal-pestiċida tad-data ta’ konferma ppreżentata għas-sustanza attiva Diflubenżuron).

(4) Ir-rapport ta’ valutazzjoni tad-diflubenżuron, disponibbli fuq http://dissemination.echa.europa.eu/Biocides/ActiveSubstances/0062-18/0062-18_Assessment_Report.pdf

(5) EFSA Journal 2015;13(12):4222. Peer review on the review of the approval of the active substance diflubenzuron regarding the metabolite PCA (Rieżami bejn il-pari tar-rieżami dwar l-approvazzjoni tas-sustanza attiva diflubenżuron fir-rigward tal-metabolit PCA)

(6) EMA/CVMP/153976/2018, Opinjoni sommarja dwar l-MRL tad-Diflubenżuron, is-16 ta’ Marzu 2018

ANNESS

Fit-Tabella 1 tal-Anness tar-Regolament (UE) Nru 37/2010, l-entrata tas-sustanza “diflubenżuron” hija sostitwita b’dan li ġej:

Sustanza Farmakoloġikament Attiva	Residwu Markatur	Speċi ta’ Annimal	MRLs	Tessuti fil-Mira	Dispożizzjonijiet Oħra (skont l-Artikolu 14(7) tar-Regolament (KE) Nru 470/2009)	Klassifikazzjoni Terapewtika
“Diflubenżuron	Diflubenżuron	Salmonidi	10 µg/kg	Muskoli u ġilda fi proporzjonijiet naturali	L-EBDA ENTRATA	Aġenti antiparassitiċi/Aġenti kontra l-ektoparassiti”

11.11.2019

Il-Ġurnal Uffiċjali tal-Unjoni Ewropea

L 290/12

REGOLAMENT TA’ IMPLIMENTAZZJONI TAL-KUMMISSJONI (UE) 2019/1882

tat-8 ta’ Novembru 2019

li jiftaħ proċeduri tal-offerti għall-ammont ta’ għajnuna għall-ħażna privata taż-żejt taż-żebbuġa

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) Nru 1308/2013 tal-Parlament Ewropew u tal-Kunsill tas-17 ta’ Diċembru 2013 li jistabbilixxi organizzazzjoni komuni tas-swieq fi prodotti agrikoli u li jħassar ir-Regolamenti tal-Kunsill (KEE) Nru 922/72, (KEE) Nru 234/79, (KE) Nru 1037/2001 u (KE) Nru 1234/2007 (1), u b’mod partikulari l-Artikolu 18(2) u l-punti (m) u (o) tal-ewwel paragrafu tal-Artikolu 20 tiegħu,

Billi:

(1)	Il-prezzijiet għaż-żjut taż-żebbuġa verġni fis-swieq Spanjoli, Griegi u Portugiżi baqgħu konsistentement baxxi u qrib il-limiti ta’ referenza stabbiliti fl-Artikolu 1a(1)(g) tar-Regolament tal-Kunsill (UE) Nru 1370/2013 (2) għal diversi xhur.

(2)

Il-prospettiva ta’ ħsad tajjeb konsekuttiv fl-Unjoni, l-akkumulazzjoni ta’ stokkijiet u l-inċertezzi attwali fil-kummerċ estern joħolqu żbilanċ bejn il-provvista u d-domanda, li min-naħa tiegħu jeżerċita pressjoni ’l isfel fuq il-prezzijiet taż-żjut taż-żebbuġa verġni u jikkawża tfixkil serju għal partijiet kbar tas-suq tal-Unjoni.

(3)	Spanja hija l-iktar produttur importanti taż-żejt taż-żebbuġa fl-Unjoni u hija price leader. L-istokkijiet eċċezzjonalment għoljin fi Spanja għalhekk jirriskjaw li jtawlu u jaggravaw it-tfixkil serju tas-suq tal-Unjoni għaż-żjut taż-żebbuġa verġni.

(4)	Sabiex jitnaqqas l-iżbilanċ attwali bejn il-provvista u d-domanda u sabiex jittaffew dawk il-kundizzjonijiet diffiċli tas-suq, jixraq li tingħata għajnuna għall-ħażna privata għaż-żjut taż-żebbuġa verġni.

(5)	Ir-Regolament Delegat tal-Kummissjoni (UE) 2016/1238 (3) u r-Regolament ta’ Implimentazzjoni tal-Kummissjoni (UE) 2016/1240 (4), li jistabbilixxu regoli komuni għall-implimentazzjoni ta’ skema ta’ ħżin privat, jenħtieġ li japplikaw għall-għajnuna għall-ħżin privat taż-żjut taż-żebbuġa verġni.

(6)	L-ammont ta’ għajnuna jenħtieġ li jiġi ffissat permezz ta’ proċedura tal-offerti b’mod li jippermetti sistema operattiva flessibbli. Għal dan il-għan, jixraq li jiġu previsti diversi subperjodi għat-tressiq tal-offerti.

(7)	Sabiex l-operaturi differenti jkunu jistgħu jibbenefikaw mill-miżura, kull operatur jenħtieġ li għal kull subperjodu iressaq massimu ta’ offerta waħda skont il-kategorija taż-żjut taż-żebbuġa verġni.

(8)

Sabiex l-għajnuna għall-ħażna privata tkun effettiva u jkollha impatt reali fuq is-suq, l-għajnuna jenħtieġ li tingħata għaż-żjut taż-żebbuġa verġni bl-ingrossa. Billi huwa normali fis-settur taż-żebbuġ li l-prodott jinħażen, l-offerti jenħtieġ li jiġu aċċettati wkoll għaż-żjut taż-żebbuġa verġni li jkunu diġà maħżuna.

(9)

Sabiex ikollhom effett reali fuq il-bilanċ bejn il-provvista u d-domanda tas-sena kurrenti, jenħtieġ li l-kwantitajiet taż-żjut taż-żebbuġa verġni li jibbenefikaw minn għajnuna għall-ħażna privata ma jiġux ikkummerċjalizzati matul perjodu minimu ta’ ħżin. Il-perjodu minimu ta’ ħżin jenħtieġ li jiġi ffissat għal 180 jum.

(10)	Għal raġunijiet ta’ effiċjenza u ta’ simplifikazzjoni amministrattivi, jenħtieġ li l-offerti jkunu eliġibbli biss għal kwantitajiet ta’ mhux anqas minn 50 tunnellata.

(11)

Sabiex ma jitħalliex jaqa’ l-prezz, biex ikun hemm reazzjoni malajr għall-kundizzjonijiet diffiċli tas-suq u sabiex tiġi żgurata l-ġestjoni effiċjenti ta’ din il-miżura, jenħtieġ li dan ir-Regolament jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

(12)	Il-Kumitat għall-Organizzazzjoni Komuni tas-Swieq Agrikoli ma tax opinjoni fil-limitu ta’ żmien stabbilit mill-President tiegħu,

ADOTTAT DAN IR-REGOLAMENT:

Artikolu 1

1. Għandha tinfetaħ proċedura tal-offerti separata għall-għajnuna għall-ħażna privata ta’ kull waħda mill-kategoriji taż-żjut taż-żebbuġa verġni li ġejjin kif definit fil-punt (1) tal-Parti VIII tal-Anness VII tar-Regolament (UE) Nru 1308/2013 skont il-punt (b) tal-ewwel paragrafu tal-Artikolu 17 ta’ dak ir-Regolament:

(a)	żejt taż-żebbuġa extra verġni;

(b)	żejt taż-żebbuġa verġni;

(c)	żejt taż-żebbuġa lampante.

2. Ir-Regolament Delegat (UE) 2016/1238 u r-Regolament ta’ Implimentazzjoni (UE) 2016/1240 għandhom japplikaw.

Artikolu 2

1. L-offerti għandhom jitressqu matul is-subperjodi li ġejjin, b’kull waħda li tintemm f’12.00 (ħin ta’ Brussell):

(a)	mill-21 ta’ Novembru 2019 sas-26 ta’ Novembru 2019;

(b)	mit-12 ta’ Diċembru 2019 sas-17 ta’ Diċembru 2019;

(c)	mit-22 ta’ Jannar 2020 sas-27 ta’ Jannar 2020;

(d)	mill-20 ta’ Frar 2020 sal-25 ta’ Frar 2020.

Jekk l-aħħar jum tas-subperjodu jaħbat festa pubblika, il-limitu ta’ żmien għandu jkun 12.00 (ħin ta’ Brussell) tal-jum tax-xogħol ta’ qabel.

2. Għal kull subperjodu, l-operaturi għandhom iressqu mhux aktar minn offerta waħda għal kull wieħed mill-prodotti msemmija fl-Artikolu 1(1).

3. Il-kwantità minima għal kull offerta għandha tkun ta’ 50 tunnellata.

4. L-ammont ta’ garanzija msemmija fl-Artikolu 40(b) tar-Regolament (UE) 2016/1240 għandu jkun ta’ EUR 50 għal kull tunnellata.

5. L-għajnuna għandha tingħata għall-prodotti msemmija fl-Artikolu 1(1) bl-ingrossa.

6. L-offerti jistgħu jitressqu għall-prodotti li jkunu diġà maħżuna.

7. L-offerti jistgħu jitressqu biss fil-Greċja, fi Spanja, fi Franza, fil-Kroazja, fl-Italja, f’Ċipru, f’Malta, fil-Portugall u fis-Slovenja.

Artikolu 3

L-Istati Membri għandhom jinnotifikaw lill-Kummissjoni bl-offerti ammissibbli kollha sa mhux aktar tard min-12:00 (ħin ta’ Brussell) tal-jum ta’ wara l-aħħar jum ta’ kull subperjodu għat-tressiq imsemmi fl-Artikolu 2(1).

Artikolu 4

Il-kuntratti ta’ għajnuna għall-ħażna privata għandhom ikopru perjodu ta’ ħażna ta’ 180 jum.

Artikolu 5

Dan ir-Regolament għandu jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, it-8 ta’ Novembru 2019.

Għall-Kummissjoni

Il-President

Jean-Claude JUNCKER

(1) ĠU L 347, 20.12.2013, p. 671.

(2) Ir-Regolament tal-Kunsill (UE) Nru 1370/2013 tas-16 ta’ Diċembru 2013 li jiddetermina miżuri dwar l-iffissar ta’ ċerti għajnuniet u rifużjonijiet relatati mal-organizzazzjoni komuni tas-swieq tal-prodotti agrikoli (ĠU L 346, 20.12.2013, p. 12).

(3) Ir-Regolament Delegat tal-Kummissjoni (UE) 2016/1238 tat-18 ta’ Mejju 2016 li jissupplimenta r-Regolament (UE) Nru 1308/2013 tal-Parlament Ewropew u tal-Kunsill fir-rigward tal-intervent pubbliku u l-għajnuna għall-ħżin privat (ĠU L 206, 30.7.2016, p. 15).

(4) Ir-Regolament ta’ Implimentazzjoni tal-Kummissjoni (UE) 2016/1240 tat-18 ta’ Mejju 2016 li jistabbilixxi regoli għall-applikazzjoni tar-Regolament (UE) Nru 1308/2013 tal-Parlament Ewropew u tal-Kunsill fir-rigward ta’ intervent pubbliku u ta’ għajnuna għall-ħżin privat (ĠU L 206, 30.7.2016, p. 71).

11.11.2019

Il-Ġurnal Uffiċjali tal-Unjoni Ewropea

L 290/18

DEĊIŻJONI TA’ IMPLIMENTAZZJONI TAL-KUMMISSJONI (UE) 2019/1885

tas-6 ta’ Novembru 2019

li tistabbilixxi r-regoli għall-kalkolu, il-verifika u r-rappurtar ta’ data dwar ir-rimi ta’ skart f’landfill muniċipali f’konformità mad-Direttiva tal-Kunsill 1999/31/KE u li tħassar id-Deċiżjoni tal-Kummissjoni 2000/738/KE

(notifikata bid-dokument C(2019) 7874)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Direttiva tal-Kunsill 1999/31/KE tas-26 ta’ April 1999 dwar ir-rimi ta’ skart f’landfill (1), u b’mod partikolari l-Artikoli 5a(4) u 15(5) tagħha,

Billi:

(1)	L-Istati Membri għandhom jirrappurtaw l-ammont ta’ skart muniċipali mitfugħ f’landfill sabiex juru li l-miri stipulati fid-Direttiva 1999/31/KE huma ssodisfati. Jenħtieġ li r-regoli għall-kalkolu ta’ dawk il-miri jiżguraw li d-data pprovduta mill-Istati Membri kollha tkun valida u komparabbli.

(2)

Sabiex jiġi żgurat li l-kalkolu jirrifletti kemm verament qed isir rimi fil-landfills, jenħtieġ li l-ammont ta’ skart rapportat li ntefa’ f’landfill ikun jinkludi l-iskart muniċipali kollu mormi f’landfills imsemmi fil-punti (b) u (c) tal-Artikolu 5a(1) tad-Direttiva 1999/31/KE u li ma ssir l-ebda korrezzjoni għall-kontenut ta’ ndewwa tiegħu. F’ċerti każijiet, l-iskart muniċipali trattat aċċettat u ddepożitat fil-landfills, bħalma huwa l-iskart muniċipali bijodegradabbli stabbilizzat, jgħin biex jiżgura konformità mar-rekwiżiti stabbiliti fil-punt 5 tal-Anness I tad-Direttiva 1999/31/KE dwar miżuri li għandhom jittieħdu biex jitnaqqsu l-inkonvenjenzi u l-perikli li jiġu mil-landfill. Peress li tali skart muniċipali fil-fatt jiġi depożitat fil-landfill, jenħtieġ li jiġi inkluż fl-ammont ta’ skart muniċipali rrappurtat bħala mormi f’landfills u jenħtieġ li ma jiġix jiġi assenjat għal operazzjonijiet ta’ rkupru.

(3)

Peress li l-miri tal-landfills għall-iskart muniċipali stabbiliti fid-Direttiva 1999/31/KE jikkonċernaw l-istess fluss ta’ skart bħall-miri ta’ riċiklaġġ għall-iskart muniċipali stabbiliti fid-Direttiva 2008/98/KE tal-Parlament Ewropew u tal-Kunsill (2), ir-regoli ta’ kalkolu għall-iskart muniċipali rrappurtat li ġie mormi f’landfills jenħtieġ li jkunu konsistenti mar-regoli ta’ kalkolu għar-riċiklaġġ tal-iskart muniċipali stabbilit fid-Direttiva 2008/98/KE u fid-Deċiżjoni ta’ Implimentazzjoni tal-Kummissjoni (UE) 2019/1004 (3).

Għalhekk, f’sitwazzjoni fejn l-iskart muniċipali jiġi ttrasportat minn Stat Membru lejn Stat Membru ieħor jew lejn pajjiż terz għall-fini ta’ riċiklaġġ jew irkupru ieħor f’konformità mar-Regolament (KE) Nru 1013/2006 tal-Parlament Ewropew u tal-Kunsill (4), l-ammont ta’ skart li jitneħħa fil-pajjiż ta’ destinazzjoni matul it-trattament preliminari qabel ma l-iskart muniċipali jidħol fl-operazzjoni ta’ riċiklaġġ, u li mbagħad jintrema f’landfill, jenħtieġ li jkun inkluż fl-ammont ta’ skart muniċipali rrappurtat li jkun intrema f’landfill mill-Istat Membru fejn ikun inġabar l-iskart muniċipali.

(4)

Skont l-Artikolu 5a(1)(c) tad-Direttiva 1999/31/KE, l-ammont ta’ skart muniċipali li jgħaddi minn operazzjonijiet ta’ rimi b’inċinerazzjoni sabiex imbagħad jintrema f’landfill għandu jiġi rrappurtat bħala mormi f’landfill. Sabiex jiġi żgurat li l-ammont ta’ skart muniċipali rrappurtat bħala mormi f’landfill ma jinkludix frazzjonijiet ta’ skart muniċipali li jgħaddu minn operazzjonijiet ta’ rimi ta’ inċinerazzjoni iżda li fil-fatt ma jintremewx f’landfills, il-materjali li joriġinaw mill-iskart muniċipali li mbagħad jiġu rkuprati mill-iskart li jirriżulta minn operazzjonijiet ta’ rimi b’inċinerazzjoni jenħtieġ li jitnaqqsu mill-input għall-operazzjonijiet ta’ rimi b’inċinerazzjoni.

(5)

L-Artikolu 11a tad-Direttiva 2008/98/KE jistabbilixxi regola speċifika fir-rigward tal-kalkolu tal-ammont ta’ skart muniċipali li jiġi ppreparat għall-użu mill-ġdid, kalkolu li jeskludi l-iskart kollu li jitneħħa b’riżultat ta’ operazzjonijiet ta’ verifika, ta’ tindif u ta’ tiswija biex ikun jista’ jintuża mill-ġdid mingħajr ma jkompli jiġi separat jew proċessat b’mod preliminari. Meta mbagħad l-iskart li jitneħħa jintrema f’landfill, dan jenħtieġ li jiġi inkluż fl-ammont ta’ skart muniċipali rrappurtat bħala mormi f’landfill sabiex jiġi evitat li la jiġi rrappurtat bħala mħejji għall-użu mill-ġdid u lanqas bħala li ntrema f’landfill, u biex jiġi żgurat li d-data dwar l-iskart muniċipali tkun koerenti u tirrifletti kemm verament qed isir rimi fil-landfills.

(6)

F’konformità mal-Artikolu 4(1) tad-Deċiżjoni ta’ Implimentazzjoni (UE) 2019/1004, l-iskart li jitneħħa waqt ir-riċiklaġġ tal-bijoskart muniċipali ma għandux jiġi inkluż fir-rati ta’ riċiklaġġ għall-iskart muniċipali. Meta mbagħad l-iskart li jitneħħa jintrema f’landfill, dan jenħtieġ li jiġi inkluż fl-ammont ta’ skart muniċipali rrappurtat bħala mormi f’landfill sabiex jiġi evitat li la jiġi rrappurtat bħala riċiklat u lanqas bħala li ntrema f’landfill, u sabiex jiġi żgurat li d-data dwar l-iskart muniċipali tkun koerenti u tirrifletti kemm verament qed isir rimi fil-landfills.

(7)

Skont l-Artikolu 5a(1)(d) tad-Direttiva 1999/31/KE, l-ammont ta’ skart prodott matul l-operazzjonijiet ta’ riċiklaġġ tal-iskart muniċipali li mbagħad jintrema f’landfill ma għandux jiġi rrappurtat bħala mormi f’landfill. Sabiex tiġi żgurata l-konsistenza mal-punti tal-kalkolu għar-riċiklaġġ tal-iskart muniċipali stabbiliti fid-Deċiżjoni ta’ Implimentazzjoni (UE) 2019/1004, huwa meħtieġ li jiġi speċifikat li l-iskart prodott matul l-operazzjonijiet ta’ riċiklaġġ jirreferi għal skart prodott waqt l-ipproċessar mill-ġdid li jseħħ wara dawk il-punti tal-kalkolu.

(8)

L-Istati Membri għandhom jirrappurtaw data dwar l-implimentazzjoni tal-paragrafi 2, 5 u 6 tal-Artikolu 5 tad-Direttiva 1999/31/KE fil-format stabbilit mill-Kummissjoni. Id-data għandha tkun akkumpanjata minn rapport ta’ verifika tal-kwalità. Jenħtieġ li dak il-format jiżgura li l-informazzjoni rrapportata tipprovdi bażi suffiċjenti biex jiġi vverifikat u mmonitorjat il-progress biex jinkisbu l-miri stabbiliti fil-paragrafi 2, 5 u 6 tal-Artikolu 5 ta’ dik id-Direttiva.

(9)

Għall-fini tar-rappurtar ta’ data dwar il-kisba tal-miri tal-landfills għall-iskart muniċipali bijodegradabbli stabbiliti fl-Artikolu 5(2) tad-Direttiva 1999/31/KE, l-Istati Membri kienu qed jużaw il-format stabbilit fid-Deċiżjoni tal-Kummissjoni 2000/738/KE (5). Peress li d-dispożizzjonijiet ta’ dik id-Deċiżjoni relatati mas-sottomissjoni ta’ rapporti dwar l-implimentazzjoni tad-Direttiva 1999/31/KE ma għadhomx validi, jenħtieġ li dik id-Deċiżjoni titħassar. Sabiex tiġi żgurata l-kontinwità, jenħtieġ li jiġu adottati dispożizzjonijiet tranżizzjonali fir-rigward tad-data ta’ skadenza għar-rapportar tad-data dwar l-implimentazzjoni tal-Artikolu 5(2) tad-Direttiva 1999/31/KE għas-snin ta’ referenza mill-2016 sal-2017.

(10)

Ir-regoli għall-kalkolu, għall-verifika u għar-rapportar tad-data dwar l-implimentazzjoni tal-punti 5 sa 6 tal-Artikolu 5 tad-Direttiva 1999/31/KE huma marbuta mill-qrib mar-regoli li jistabbilixxu l-formati għar-rapportar ta’ dik id-data u tad-data dwar l-implimentazzjoni tal-Artikolu 5(2) ta’ dik id-Direttiva. Sabiex tiġi żgurata l-koerenza bejn dawk ir-regoli u jiġi ffaċilitat l-aċċess għalihom, jenħtieġ li ż-żewġ settijiet ta’ regoli jiġu stabbiliti f’Deċiżjoni waħda.

(11)	Il-miżuri stipulati f’din id-Deċiżjoni huma f’konformità mal-opinjoni tal-Kumitat stabbilit bl-Artikolu 39 tad-Direttiva 2008/98/KE,

ADOTTAT DIN ID-DEĊIŻJONI:

Artikolu 1

Definizzjoni

Għall-finijiet ta’ din id-Deċiżjoni, “ammont” tfisser massa mkejla f’tunnellati.

Artikolu 2

Kalkolu tal-iskart muniċipali rrapportat bħala mormi f’landfill skont l-Artikolu 5a tad-Direttiva 1999/31/KE

1. L-ammont ta’ skart muniċipali rrappurtat bħala mormi f’landfill għandu jinkludi l-iskart muniċipali kollu msemmi fil-punti (b) u (c) tal-Artikolu 5a(1) tad-Direttiva 1999/31/KE li jiġi ddepożitat fil-landfills, inkluż fejn id-depożitu ta’ skart muniċipali trattat f’landfills jiżgura konformità mal-punt 5 tal-Anness I tad-Direttiva 1999/31/KE.

L-ammont ta’ skart muniċipali rrappurtat bħala mormi f’landfill ma għandux jiġi kkoreġut billi jitnaqqas il-kontenut ta’ ndewwa tiegħu.

2. Għall-finijiet tal-Artikolu 5a(1)(b) tad-Direttiva 1999/31/KE, meta l-iskart muniċipali jiġi ttrasportat lejn Stat Membru ieħor jew jiġi esportat mill-Unjoni lejn pajjiż terz għall-fini ta’ riċiklaġġ jew irkupru ieħor f’konformità mar-Regolament (KE) Nru 1013/2006, l-ammont ta’ skart li jirriżulta minn operazzjonijiet ta’ trattament li saru qabel ir-riċiklaġġ jew irkupru ieħor, u li mbagħad jintrema f’landfill jew jgħaddi għal proċess ta’ inċinerazzjoni sabiex imbagħad jintrema f’landfill fil-pajjiż tad-destinazzjoni għandu jiġi inkluż fl-ammont ta’ skart muniċipali rrappurtat li jkun intrema f’landfill mill-Istat Membru li fih ikun inġabar l-iskart muniċipali.

3. Għall-finijiet tal-Artikolu 5a(1)(c) tad-Direttiva 1999/31/KE, l-ammont ta’ skart muniċipali li jgħaddi minn operazzjonijiet ta’ rimi ta’ inċinerazzjoni sabiex imbagħad jintrema f’landfill għandu jkun l-ammont ta’ skart muniċipali li jidħol f’faċilitajiet għal operazzjonijiet ta’ inċinerazzjoni kklassifikati bħala D10 f’konformità mal-Anness I tad-Direttiva 2008/98/KE wara, li jitnaqqsu l-materjali li joriġinaw mill-iskart muniċipali li mbagħad jiġu rkuprati mill-iskart li jirriżulta minn dawn l-operazzjonijiet ta’ rimi b’inċinerazzjoni.

L-ammont ta’ materjali li għandhom jitnaqqsu għandu jiġi kkalkulat billi jitqies is-sehem ta’ skart muniċipali fl-iskart kollu li jidħol fil-faċilità u, fejn xieraq, il-kompożizzjoni ta’ skart għajr skart muniċipali li jidħol fil-faċilità.

4. Għall-finijiet tal-Artikolu 5a(1)(d) tad-Direttiva 1999/31/KE, għandu japplika dan li ġej:

(a)

l-iskart li jirriżulta minn operazzjonijiet ta’ verifika, ta’ tindif u ta’ tiswija biex jiġi mħejji skart muniċipali għall-użu mill-ġdid u li mbagħad jintrema f’landfill għandu jiġi inkluż fl-ammont ta’ skart muniċipali rrappurtat bħala mormi f’landfill. Mill-iskart muniċipali rrappurtat bħala mormi f’landfill, l-Istati Membri jistgħu jnaqqsu partijiet ta’ prodotti jew ta’ komponenti ta’ prodotti li jitneħħew matul l-operazzjonijiet ta’ tiswija biex iħejju skart muniċipali għall-użu mill-ġdid;

(b)	il-materjali li jkunu tneħħew b’mod mekkaniku waqt jew wara t-trattament aerobiku jew anaerobiku tal-bijoskart muniċipali u li mbagħad jintremew f’landfill għandhom jiġu inklużi fl-ammont ta’ skart muniċipali rrappurtat bħala mormi f’landfill;

(c)	l-iskart prodott matul l-operazzjonijiet ta’ riċiklaġġ tal-iskart muniċipali għandu jkun skart li jiġi prodott matul operazzjonijiet ta’ riċiklaġġ li l-iskart muniċipali jgħaddi minnu wara l-punt tal-kalkolu kif definit fl-Artikoli 3 u 4 tad-Deċiżjoni ta’ Implimentazzjoni (UE) 2019/1004.

Artikolu 3

Rapportar tad-data

1. L-Istati Membri għandhom jirrapportaw id-data u jippreżentaw ir-rapport tal-verifika tal-kwalità dwar l-implimentazzjoni tal-Artikolu 5(2) tad-Direttiva 1999/31/KE fil-format stabbilit fl-Anness I.

2. L-Istati Membri għandhom jirrapportaw id-data u jippreżentaw ir-rapport tal-verifika tal-kwalità dwar l-implimentazzjoni tal-Artikolu 5(5) u (6) tad-Direttiva 1999/31/KE fil-format stabbilit fl-Anness II.

3. Il-Kummissjoni għandha tippubblika d-data rrapportata mill-Istati Membri sakemm fir-rigward tal-informazzjoni inkluża fir-rapporti ta’ verifika tal-kwalità Stat Membru ma jkunx ipprovda rikjesta ġustifikata biex ma tiġix ippubblikata ċerta data.

Artikolu 4

Tħassir

Id-Deċiżjoni 2000/738/KE hija mħassra.

Artikolu 5

Dispożizzjoni tranżitorja

Id-data dwar l-implimentazzjoni tal-Artikolu 5(2) tad-Direttiva 1999/31/KE għas-snin ta’ referenza 2016 u 2017 għandha tiġi rrapportata lill-Kummissjoni sal-31 ta’ Diċembru 2019.

Artikolu 6

Destinatarji

Din id-Deċiżjoni hija indirizzata lill-Istati Membri.

Magħmul fi Brussell, is-6 ta’ Novembru 2019.

Għall-Kummissjoni

Karmenu VELLA

Membru tal-Kummissjoni

(1) ĠU L 182, 16.7.1999, p. 1.

(2) Id-Direttiva 2008/98/KE tal-Parlament Ewropew u tal-Kunsill tad-19 ta’ Novembru 2008 dwar l-iskart u li tħassar ċerti Direttivi (ĠU L 312, 22.11.2008, p. 3).

(3) Id-Deċiżjoni ta’ Implimentazzjoni tal-Kummissjoni (UE) 2019/1004 tas-7 ta’ Ġunju 2019 li tistabbilixxi regoli għall-kalkolu, għall-verifika u għar-rapportar tad-data dwar l-iskart skont id-Direttiva 2008/98/KE tal-Parlament Ewropew u tal-Kunsill u li tħassar id-Deċiżjoni ta’ Implimentazzjoni tal-Kummissjoni C(2012) 2384 (ĠU L 163, 20.6.2019, p. 66).

(4) Ir-Regolament (KE) Nru 1013/2006 tal-Parlament Ewropew u tal-Kunsill tal-14 ta’ Ġunju 2006 dwar vjeġġi ta’ skart (ĠU L 190, 12.7.2006, p. 1).

(5) Id-Deċiżjoni tal-Kummissjoni 2000/738/KE tas-17 ta’ Novembru 2000 li tikkonċerna kwestjonarji għar-rapporti tal-Istati Membri dwar l-implimentazzjoni tad-Direttiva 1999/31/KE dwar it-tpoġġija tal-iskart f’landfill (ĠU L 298, tal-25.11.2000, p. 24).

ANNESS I

Format għar-rappurtar ta’ data dwar ir-rimi f’landfill ta’ skart muniċipali bijodegradabbli msemmi fl-Artikolu 3(1)

1. Format għar-rappurtar tad-data

Skart muniċipali bijodegradabbli prodott fl-1995, jew l-aħħar sena qabel l-1995 li għaliha hemm disponibbli data standardizzata tal-Eurostat, jew is-sena stipulata fit-Trattat tal-Adeżjoni rispettiv għall-Istati Membri li ngħaqdu mal-UE wara l-adozzjoni tad-Direttiva tal-Kunsill 1999/31/KE (1)		Skart muniċipali bijodegradabbli ddepożitat f’landfills fis-sena ta’ referenza
Sena	(t)	(t)

2. Format għar-rapport ta’ verifika tal-kwalità li jakkumpanja d-data

I. Informazzjoni ġenerali

Stat Membru:

Organizzazzjoni li qed tibgħat id-data u d-deskrizzjoni:

Persuna ta’ kuntatt/dettalji ta’ kuntatt:

Sena ta’ referenza:

Data tal-ġarr/verżjoni:

Link għall-pubblikazzjoni tad-data mill-Istat Membru (jekk hemm):

II. Informazzjoni dwar ir-rimi f’landfill ta’ skart muniċipali bijodegradabbli

Deskrizzjoni tal-organizzazzjoni tal-ġbir tad-data, is-sorsi tad-data u l-metodoloġija użata

Deskrizzjoni tat-tipi ta’ skart ikklassifikati fil-livell nazzjonali bħala skart muniċipali bijodegradabbli

Deskrizzjoni ta’ kwalunkwe stima użata biex tkopri lakuni fid-data

Spjegazzjoni ta’ differenzi sinifikanti mid-data tas-sena ta’ referenza preċedenti

Deskrizzjoni tal-kwistjonijiet ewlenin li jaffettwaw l-akkuratezza tad-data

(1) Id-Direttiva tal-Kunsill 1999/31/KE tas-26 ta’ April 1999 dwar ir-rimi ta’ skart f’landfill (ĠU L 182, 16.7.1999, p. 1).

ANNESS II

Format għar-rappurtar ta’ data dwar l-iskart muniċipali msemmi fl-Artikolu 3(2)

1. Format għar-rappurtar tad-data

Ġenerazzjoni tal-iskart muniċipali

(t)

Ir-rimi f’landfill (1)

(t)

Rimi b’inċinerazzjoni (2)

(t)

L-irkupru materjali tal-iskart mir-rimi b’inċinerazzjoni

(t)

Għall-finijiet tal-kalkolu ta’ jekk intlaħqux il-miri stipulati fil-paragrafi 5 u 6 tal-Artikolu 5 tad-Direttiva tal-Kunsill 1999/31/KE tas-26 ta’ April 1999 dwar ir-rimi ta’ skart f’landfills (ĠU L 182, 16.7.1999, p. 1), is-somma tal-iskart muniċipali li huwa soġġett għal rimi f’landfills u skart muniċipali li jgħaddi minn operazzjonijiet ta’ rimi b’inċinerazzjoni sabiex imbagħad jintrema f’landfills wara t-tnaqqis ta’ materjal irkuprat aktar tard minn skart li jirriżulta minn tali operazzjonijiet ta’ rimi b’inċinerazzjoni, hija diviża bl-ammont ta’ skart muniċipali ġġenerat.

2. Format għar-rapport ta’ verifika tal-kwalità li jakkumpanja d-data

I. Informazzjoni ġenerali

Stat Membru:

Organizzazzjoni li qed tibgħat id-data u d-deskrizzjoni:

Persuna ta’ kuntatt/dettalji ta’ kuntatt:

Sena ta’ referenza:

Data ta’ ġarr/verżjoni:

Link għall-pubblikazzjoni tad-data mill-Istat Membru (jekk hemm):

II. Informazzjoni dwar ir-rimi tal-iskart muniċipali f’landfills

Deskrizzjoni tal-entitajiet involuti fil-ġbir tad-data

Isem l-istituzzjoni	Deskrizzjoni tar-responsabbiltajiet ewlenin
Żid ir-ringieli skont kif meħtieġ

Deskrizzjoni tal-metodi użati

2.1.

Deskrizzjoni ġenerali tal-ġbir tad-data dwar ir-rimi ta’ skart muniċipali fil-landfills, inklużi s-sorsi tad-data (id-data amministrattiva; stħarriġ; reġistru elettroniku; data mill-operaturi tal-iskart; data mill-muniċipalitajiet)

2.2.

Deskrizzjoni tal-metodoloġija li tintuża biex tinkludi l-iskart li jirriżulta mill-operazzjonijiet ta’ trattament qabel ir-riċiklaġġ jew irkupru ieħor tal-iskart muniċipali li mbagħad jintrema f’landfill

2.2.1.

Deskrizzjoni tal-approċċ biex tiġi żgurata t-traċċabbiltà tal-iskart muniċipali meta jgħaddi minn trattament, inkluż l-użu ta’ kodiċijiet relatati mal-ġenerazzjoni tal-iskart muniċipali (bħal dawk fil-Kapitolu 20 fil-lista ta’ skart stabbilita mid-Deċiżjoni tal-Kummissjoni 2000/532/KE tat-3 ta’ Mejju 2000 li tissostitwixxi d-Deċiżjoni 94/3/KE li tistabbilixxi lista ta’ skart skont l-Artikolu 1(a) tad-Direttiva tal-Kunsill 75/442/KEE dwar l-iskart u d-Deċiżjoni tal-Kunsill 94/904/KE li tistabbilixxi lista ta’ skart perikoluż skont l-Artikolu 1(4) tad-Direttiva tal-Kunsill 91/689/KEE dwar skart perikoluż, ĠU L 226, 6.9.2000, p. 3) u kodiċijiet relatati mal-iskart mit-trattament tal-iskart (bħal dawk fil-Kapitolu 19 fil-lista ta’ skart stabbilita b’dik id-Deċiżjoni)

2.3.

Deskrizzjoni tal-approċċ biex jiġi inkluż skart li jirriżulta minn operazzjonijiet ta’ trattament qabel ir-riċiklaġġ jew irkupru ieħor ta’ skart muniċipali u mbagħad mormi f’landfills barra l-Istat Membru

2.4.

Deskrizzjoni tal-ġbir tad-data dwar l-iskart muniċipali li jgħaddi minn operazzjonijiet ta’ rimi b’inċinerazzjoni sabiex imbagħad jintrema f’landfill, inkluża l-metodoloġija użata għall-kalkolu tal-materjali li joriġinaw mill-iskart muniċipali li jiġu rkuprati mill-iskart li jirriżulta minn operazzjonijiet ta’ rimi b’inċinerazzjoni.

2.5.

Deskrizzjoni ta’ kwalunkwe stima użata biex tkopri lakuni fid-data dwar l-iskart muniċipali f’landfill

2.6.

Differenzi mid-data tas-sena ta’ referenza preċedenti

Bidliet metodoloġiċi sinifikanti fil-metodu tal-kalkolu użat għas-sena ta’ referenza attwali, jekk hemm (b’mod partikolari r-reviżjonijiet retrospettivi, in-natura tagħhom u jekk għandux jiġi mmarkat waqfien fis-serje għal sena speċifika)

Spjegazzjoni li tagħti dettalji dwar il-kawżi tad-differenza bejn it-tunnellaġġ meta l-iskart muniċipali li jkun soġġett għal operazzjonijiet ta’ rimi ta’ skart f’landfills jew ta’ rimi b’inċinerazzjoni sabiex sussegwentement ikun jista’ jintrema f’landfill juri varjazzjoni akbar minn 10 % mid-data ppreżentata għas-sena ta’ referenza ta’ qabel

Akkuratezza tad-data

3.1

Deskrizzjoni tal-kwistjonijiet ewlenin li jaffettwaw il-akkuratezza tad-data dwar ir-rimi ta’ skart muniċipali f’landfill

3.2.

Deskrizzjoni tal-ambitu u tal-validità tal-istħarriġ għall-ġbir tad-data dwar ir-rimi f’landfills tal-iskart muniċipali

Kunfidenzjalità

Ġustifikazzjoni biex ma jiġux ippubblikati partijiet speċifiċi ta’ dan ir-rapport, fejn issir talba għal dan.

Siti web, dokumenti ta’ referenza u pubblikazzjonijiet nazzjonali ewlenin

(1) Din il-kolonna ma tinkludix skart li jgħaddi minn operazzjonijiet ta’ rimi b’inċinerazzjoni sabiex imbagħad jintrema f’landfills.

(2) Ir-rimi ta’ inċinerazzjoni jirreferi għal operazzjonijiet imwettqa mill-faċilitajiet ikklassifikati bħala D10 fl-Anness I tad-Direttiva 2008/98/KE tal-Parlament Ewropew u tal-Kunsill tad-19 ta’ Novembru 2008 dwar l-iskart u li tħassar ċerti Direttivi (ĠU L 312, 22.11.2008, p. 3).

11.11.2019

Il-Ġurnal Uffiċjali tal-Unjoni Ewropea

L 290/26

DEĊIŻJONI TA’ IMPLIMENTAZZJONI TAL-KUMMISSJONI (UE) 2019/1886

tas-7 ta’ Novembru 2019

li temenda d-Deċiżjoni 2010/346/UE dwar ir-reġjonalizzazzjoni tar-Rumanija għall-applikazzjoni tal-miżuri protettivi fir-rigward tal-anemija infettiva taż-żwiemel

(notifikata bid-dokument CC(2019) 7873)

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Direttiva tal-Kunsill 90/425/KEE tas-26 ta’ Ġunju 1990 dwar l-iċċekkjar veterinarju applikabbli għall-kummerċ intra-Unjoni ta’ ċertu annimali ħajjin u prodotti bil-ħsieb tat-tlestija tas-suq intern (1), u b’mod partikolari l-Artikolu 10(4) tagħha,

Billi:

(1)

L-anemija infettiva taż-żwiemel (“EIA”) hija marda virali li taffettwa biss lill-annimali tal-familja Equidae. Il-perjodu ta’ inkubazzjoni normalment ikun bejn ġimgħa u tliet ġimgħat, iżda jista’ jkun twil sa tliet xhur. L-Equidae infettati jibqgħu infettati għal dejjem u jistgħu potenzjalment jittrażmettu l-infezzjoni lil equidae oħrajn. L-infezzjoni bl-EIA għandha tendenza li ma tidhirx jekk il-mewt ma tirriżultax minn wieħed mill-attakki kliniċi akuti waqt il-viremija, u b’hekk il-probabbiltà ta’ trażmissjoni tikber b’mod sostanzjali. It-trażmissjoni lokali sseħħ bi trasferiment tad-demm minn annimal ekwin infettat permezz ta’ tmigħ interrott ta’ xidjiet li jerdgħu d-demm, u in utero lill-fetu. Il-mezz ewlieni tat-tixrid fuq distanza kbira tal-marda huwa l-moviment tal-annimali infettati, is-semen, l-ova u l-embrijuni tagħhom, u l-użu ta’ siringi kontaminati jew l-infużjoni ta’ prodotti ta’ demm li fihom il-virus.

(2)

L-EIA hija marda notifikabbli b’mod obbligatorju skont l-Anness I tad-Direttiva tal-Kunsill 2009/156/KE (2). Barra minn hekk, id-Direttiva tal-Kunsill 82/894/KEE (3) tistipula li t-tifqigħat ta’ EIA għandhom ikunu notifikati lill-Kummissjoni u lil Stati Membri oħra permezz tas-Sistema ta’ Notifika tal-Mard tal-Annimali (“ADNS”).

(3)

Kuntrarjament għas-sitwazzjoni tas-saħħa tal-annimali fi Stati Membri oħra, l-EIA hija endemika f’ċerti partijiet tar-Rumanija u l-programm ta’ eradikazzjoni nazzjonali għadu ma tlestiex. Għal din ir-raġuni, id-Deċiżjoni tal-Kummissjoni 2010/346/UE (4) tipprevedi miżuri protettivi fir-rigward tal-anemija infettiva taż-żwiemel fir-Rumanija.

(4)

Madankollu, fil-laqgħa ta’ Ġunju 2019 tal-Kumitat Permanenti dwar il-Pjanti, l-Annimali, l-Ikel u l-Għalf, l-awtoritajiet kompetenti tar-Rumanija ppreżentaw rapport tas-sitwazzjoni lill-Istati Membri l-oħra u lill-Kummissjoni li wera li sar progress b’mod ġenerali fl-eradikazzjoni tal-marda u li ċerti partijiet tar-Rumanija baqgħu ħielsa mill-marda għal aktar minn 12-il xahar jew il-prevalenza tal-marda baqgħet fil-limiti osservati reġjonalment fi Stati Membri oħra. Għalhekk, jixraq li tiġi ddefinita l-parti tat-territorju tar-Rumanija li fir-rigward tagħha għandhom jiġu applikati l-miżuri protettivi stipulati fid-Deċiżjoni 2010/346/UE.

(5)	Għaldaqstant, jenħtieġ li l-Anness tad-Deċiżjoni 2010/346/UE jiġi emendat skont dan.

(6)	Il-miżuri previsti f’din id-Deċiżjoni huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

ADOTTAT DIN ID-DEĊIŻJONI:

Artikolu 1

L-Anness tad-Deċiżjoni 2010/346/UE huwa sostitwit bl-Anness ta’ din id-Deċiżjoni.

Artikolu 2

Din id-Deċiżjoni hija indirizzata lill-Istati Membri.

Magħmul fi Brussell, is-7 ta’ Novembru 2019.

Għall-Kummissjoni

Vytenis ANDRIUKAITIS

Membru tal-Kummissjoni

(1) ĠU L 224, 18.8.1990, p. 29.

(2) Id-Direttiva tal-Kunsill 2009/156/KE tat-30 ta’ Novembru 2009 dwar kundizzjonijiet tas-saħħa tal-annimali li jirregolaw il-moviment u l-importazzjoni minn pajjiżi terzi ta’ ekwidi (ĠU L 192, 23.7.2010, p. 1).

(3) Id-Direttiva tal-Kunsill 82/894/KEE tal-21 ta' Diċembru 1982 dwar in-notifika ta’ mard tal-annimali fil-Komunità (ĠU L 378, 31.12.1982, p. 58).

(4) Id-Deċiżjoni tal-Kummissjoni 2010/346/UE tat-18 ta’ Ġunju 2010 dwar miżuri protettivi fir-rigward tal-anemija infettiva taż-żwiemel fir-Rumanija (ĠU L 155, 22.6.2010, p. 48).

ANNESS

“ANNESS

Reġjuni kif imsemmija fl-Artikolu 1(1)(e):

Stat Membru	Reġjun	Kumment
Ir-Rumanija	Bihor
	Satu Mare
	Maramureș
	Bistriț-Năsăud
	Sălaj
	Cluj
	Mureș
	Harghita
	Alba
	Sibiu
	Brașov
	Hunedora
	Caraș-Severin
	Gorj
	Vâlcea
	Tulcea

”

11.11.2019

Il-Ġurnal Uffiċjali tal-Unjoni Ewropea

L 290/29

DEĊIŻJONI TA’ IMPLIMENTAZZJONI TAL-KUMMISSJONI (UE) 2019/1887

tas-7 ta’ Novembru 2019

li temenda d-Deċiżjoni ta’ Implimentazzjoni 2014/709/UE fir-rigward tad-disponibbiltà u l-puntwalità tal-informazzjoni fuq il-lista ta’ stabbilimenti approvati

(notifikata bid-dokument C(2019) 7899)

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Direttiva tal-Kunsill 89/662/KEE tal-11 ta’ Diċembru 1989 dwar spezzjonijiet veterinarji fil-kummerċ intra-Komunitarju bil-ħsieb tat-tlestija tas-suq intern (1), u b’mod partikolari l-Artikolu 9(4) tagħha,

Wara li kkunsidrat id-Direttiva tal-Kunsill 90/425/KEE tas-26 ta’ Ġunju 1990 dwar l-iċċekkjar veterinarju applikabbli għall-kummerċ intra-Unjoni ta’ ċertu annimali ħajjin u prodotti bil-ħsieb tat-tlestija tas-suq intern (2), u b’mod partikolari l-Artikolu 10(4) tagħha,

Wara li kkunsidrat id-Direttiva tal-Kunsill 2002/99/KE tas-16 ta’ Diċembru 2002 li tistabbilixxi r-regoli sanitarji għall-annimali u li jiddeterminaw il-produzzjoni, l-ipproċessar, id-distribuzzjoni u l-introduzzjoni ta’ prodotti li joriġinaw mill-annimali u li huma għall-konsum uman (3), u b’mod partikolari l-Artikolu 4(3) tagħha,

Billi:

(1)

Id-Deċiżjoni ta’ Implimentazzjoni tal-Kummissjoni 2014/709/UE (4) tistabbilixxi l-miżuri ta’ kontroll tas-saħħa tal-annimali marbutin mad-deni Afrikan tal-ħnieżer fl-Istati Membri jew fiż-żoni tagħhom li huma elenkati fl-Anness tagħha (l-Istati Membri kkonċernati). Dik id-Deċiżjoni ta’ Implimentazzjoni tipprevedi projbizzjonijiet tat-tqassim ta’ kunsinni ta’ ħnieżer domestiċi u prodotti tal-ħnieżer, kif ukoll it-tqassim ta’ kunsinni ta’ ħnieżer selvaġġi u prodotti tal-ħnieżer selvaġġi miż-żoni elenkati fl-Anness tagħha. Tistabbilixxi wkoll regoli oħra mmirati lejn il-prevenzjoni tat-tixrid tad-deni Afrikan tal-ħnieżer, inkluż ir-rekwiżiti ta’ informazzjoni għall-Istati Membri. Il-miżuri ta’ kontroll tas-saħħa tal-annimali stipulati fid-Deċiżjoni ta’ Implimentazzjoni 2014/709/UE japplikaw b’mod parallel għal dawk stabbiliti fid-Direttiva tal-Kunsill 2002/60/KE (5), u huma intenzjonati biex jiġġieldu t-tixrid tad-deni Afrikan tal-ħnieżer b’mod partikolari fil-livell tal-Unjoni.

(2)

Id-Deċiżjoni ta’ Implimentazzjoni 2014/709/UE tipprevedi wkoll derogi mill-projbizzjoni fuq it-tqassim tal-laħam frisk tal-majjal u ta’ ċerti preparazzjonijiet tal-laħam tal-majjal u prodotti tal-laħam tal-majjal li jkun fihom jew li jkunu jikkonsistu minn dan il-laħam miż-żoni mniżżlin fil-Partijiet II, III jew IV tal-Anness ta’ dik id-Deċiżjoni ta’ Implimentazzjoni, lil Stati Membri oħra u lil pajjiżi terzi.

(3)

Ċerti derogi huma possibbli biss jekk il-ħnieżer li minnhom huma derivati l-prodotti inkwistjoni jikkonformaw mar-rekwiżiti tal-Artikolu 11 tad-Deċiżjoni ta’ Implimentazzjoni 2014/709/UE, il-biċċeriji, l-impjanti tat-tqattigħ u l-stabbilimenti tal-ipproċessar tal-laħam jikkonformaw mal-kundizzjonijiet għall-approvazzjoni stipulati fl-Artikolu 12 tiegħu, u jekk il-prodotti inkwistjoni jiġu prodotti u pproċessati f’konformità mal-proċess u ċ-ċertifikazzjoni speċifiċi kif meħtieġ f’konformità mal-Artikolu 13 tiegħu.

(4)

L-Artikolu 14 tad-Deċiżjoni ta’ Implimentazzjoni 2014/709/UE attwalment jeħtieġ li l-Istati Membri kull sitt xhur mid-data tad-Deċiżjoni ta’ Implimentazzjoni 2014/709/UE, jikkomunikaw lill-Kummissjoni u lill-Istati Membri l-oħra, il-lista aġġornata tal-istabbilimenti approvati msemmija fl-Artikolu 12 u kwalunkwe informazzjoni rilevanti dwar l-applikazzjoni tal-Artikoli 11, 12 u 13 ta’ dak l-att. Sabiex tiġi ottimizzata l-ħtieġa ta’ trasparenza fejn jidħlu Stati Membri oħra u pajjiżi terzi u sabiex jiġi razzjonalizzat l-iskambju ta’ informazzjoni, jenħtieġ li l-Istati Membri jkollhom ir-responsabbiltà li regolarment jaġġornaw il-lista ta’ stabbilimenti approvati kif imsemmi fl-Artikolu 12 u kwalunkwe informazzjoni rilevanti msemmija fl-Artikoli 11, 12 u 13 tad-Deċiżjoni ta’ Implimentazzjoni 2014/709/UE. Barra minn hekk, jenħtieġ li l-Istati Membri puntwalment, pubblikament u faċilment jagħmlu din l-informazzjoni disponibbli għal Stati Membri oħra u għall-pajjiżi terzi. Jenħtieġ għalhekk li l-Artikolu 14 ta’ dik id-Deċiżjoni ta’ Implimentazzjoni jiġi emendat skont dan.

(5)	Il-miżuri previsti f’din id-Deċiżjoni huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

ADOTTAT DIN ID-DEĊIŻJONI:

Artikolu 1

L-Artikolu 14 tad-Deċiżjoni ta’ Implimentazzjoni 2014/709/UE huwa sostitwit b’dan li ġej:

“Artikolu 14

Informazzjoni b’rabta mal-Artikoli 11, 12 u 13

L-Istati Membri għandhom ifasslu u jżommu aġġornata lista ta’ stabbilimenti approvati skont l-Artikolu 12 (lista ta’ stabbilimenti approvati) u jagħmluha disponibbli għall-Kummissjoni, għall-Istati Membri l-oħra u għall-pubbliku.

L-Istati Membri għandhom minnufih jinfurmaw lill-Kummissjoni u lill-Istati Membri l-oħra dwar:

(a)	kwalunkwe bidla fil-lista tagħhom ta’ stabbilimenti approvati; kif ukoll

(b)	kwalunkwe informazzjoni rilevanti dwar l-applikazzjoni tal-Artikoli 11, 12 u 13.”.

Artikolu 2

Din id-Deċiżjoni hija indirizzata lill-Istati Membri.

Magħmul fi Brussell, is-7 ta’ Novembru 2019.

Għall-Kummissjoni

Vytenis ANDRIUKAITIS

Membru tal-Kummissjoni

(1) ĠU L 395, 30.12.1989, p. 13.

(2) ĠU L 224, 18.8.1990, p. 29.

(3) ĠU L 18, 23.1.2003, p. 11.

(4) Id-Deċiżjoni ta’ Implimentazzjoni tal-Kummissjoni 2014/709/UE tad-9 ta’ Ottubru 2014 dwar miżuri ta’ kontroll tas-saħħa tal-annimali marbutin mad-deni Afrikan tal-ħnieżer f’ċertu Stati Membri u li tħassar id-Deċiżjoni ta’ Implimentazzjoni 2014/178/UE (ĠU L 295, 11.10.2014, p. 63).

(5) Id-Direttiva tal-Kunsill 2002/60/KE tas-27 ta’ Ġunju 2002 li tistipula d-disposizzjonijiet speċifiċi għall-kontroll tad-deni tal-majjal Afrikan u li temenda d-Direttiva 92/119/KEE fir-rigward tal-marda Teschen u tad-deni tal-majjal Afrikan (ĠU L 192, 20.7.2002, p. 27).

11.11.2019

Il-Ġurnal Uffiċjali tal-Unjoni Ewropea

L 290/31

RAKKOMANDAZZJONI TAL-KUMMISSJONI (UE) 2019/1888

tas-7 ta’ Novembru 2019

dwar il-monitoraġġ tal-preżenza tal-akrilammid f’ċerti oġġetti tal-ikel

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea, u b’mod partikolari l-Artikolu 292 tiegħu,

Billi:

(1)

Ir-Regolament tal-Kummissjoni (UE) 2017/2158 (1) jintroduċi obbligi speċifiċi għall-operaturi biex jipproduċu u jqiegħdu fis-suq ċerti oġġetti tal-ikel sabiex jistabbilixxu programm għall-kampjunar u għall-analiżi tagħhom stess tal-livelli ta’ akrilammid fl-oġġetti tal-ikel u biex japplikaw miżuri speċifiċi ta’ mitigazzjoni bl-għan li jiksbu l-iktar livell baxx ta’ akrilammid li jista’ raġonevolment jintlaħaq taħt il-livelli tal-parametri referenzjarji stabbiliti b’dak ir-Regolament.

(2)

Ir-Regolament Nru (KE) Nru 882/2004 tal-Parlament Ewropew u tal-Kunsill (2) jistabbilixxi l-obbligu għall-awtoritajiet kompetenti biex iwettqu kontrolli uffiċjali sabiex jivverifikaw il-konformità mar-regoli bl-għan li, b’mod partikolari, (a) jipprevjenu, jeliminaw jew inaqqsu r-riskji għall-bnedmin u għall-annimali għal livelli aċċettabbli, kemm direttament jew mill-ambjent, u (b) jiggarantixxu prattiki ġusti fil-kummerċ tal-għalf u tal-ikel kif ukoll jipproteġu l-interessi tal-konsumatur, inkluż it-tikkettar tal-għalf u tal-ikel u forom oħra ta’ informazzjoni lill-konsumatur. Il-kontrolli uffiċjali jenħtieġ li jitwettqu wkoll sabiex tiġi vverifikata l-konformità mal-obbligi stabbiliti f’konformità mar-Regolament (UE) 2017/2158.

(3)

Huwa rikonoxxut li d-data disponibbli dwar il-preżenza tal-akrilammid f’ċerti oġġetti tal-ikel imsemmi fl-Artikolu 1(2) tar-Regolament (UE) 2017/2158 hija insuffiċjenti, minkejja l-obbligi stabbiliti fl-Artikolu 4 ta’ dak ir-Regolament u r-riżultati tal-kontrolli uffiċjali li twettqu. Id-data disponibbli dwar il-preżenza tal-akrilammid fl-oġġetti tal-ikel li ma jaqgħux fil-kamp ta’ applikazzjoni tar-Regolament (UE) 2017/2158, iżda li jista’ jkun fihom livelli sinifikanti ta’ akrilammid u/jew li jistgħu jkunu kontributuri rilevanti għall-esponiment djetetiku għall-akrilammid, hija insuffiċjenti.

(4)

Għalhekk, sabiex jiġi żgurat livell għoli ta’ protezzjoni tas-saħħa tal-bniedem, jixraq li l-awtoritajiet kompetenti u l-operaturi tan-negozju tal-ikel, fl-ambitu tal-kompetenza tagħhom, mingħajr preġudizzju għall-obbligi stabbiliti bir-Regolament (UE) 2017/2158 u abbażi tar-Regolament (KE) Nru 882/2004, jimmonitorjaw il-preżenza tal-akrilammid f’tali oġġetti tal-ikel fid-dawl tal-adozzjoni ta’ miżuri ta’ ġestjoni tar-riskji possibbli, li jenħtieġ li jikkomplementaw dawk li diġà huma previsti bir-Regolament (UE) 2017/2158.

(5)	Bil-ħsieb li l-awtoritajiet kompetenti u l-operaturi tan-negozju tal-ikel jiġu ggwidati rigward l-oġġetti l-ikel li jridu jiġu mmonitorjati, ġiet stabbilita lista mhux eżawrjenti ta’ kategoriji tal-ikel/oġġetti tal-ikel.

(6)	Bl-adozzjoni tar-Regolament (UE) 2017/2158 u ta’ din ir-Rakkomandazzjoni, ir-Rakkomandazzjonijiet tal-Kummissjoni 2010/307/UE (3) u 2013/647/UE (4) saru obsoleti u għalhekk jenħtieġ li jitħassru.

ADOTTAT DIN IR-RAKKOMANDAZZJONI:

(1)

Mingħajr preġudizzju għall-obbligi stabbiliti abbażi tar-Regolament (KE) Nru 882/2004, l-awtoritajiet kompetenti fl-Istati Membri jenħtieġ li jimmonitorjaw regolarment il-preżenza tal-akrilammid u l-livelli tiegħu fl-oġġetti tal-ikel, b’mod partikolari fl-oġġetti tal-ikel elenkati fl-Anness.

Mingħajr preġudizzju għall-obbligi stabbiliti fir-Regolament (UE) 2017/2158, l-operaturi tan-negozju tal-ikel jenħtieġ li jimmonitorjaw regolarment il-preżenza tal-akrilammid u l-livelli tiegħu fl-oġġetti tal-ikel, b’mod partikolari fl-oġġetti tal-ikel elenkati fl-Anness.

(2)

L-Istati Membri u l-operaturi tan-negozju tal-ikel jenħtieġ li jittrażmettu lill-Awtorità Ewropea dwar is-Sigurtà fl-Ikel (EFSA) sal-1 ta’ Ottubru ta’ kull sena, id-data miġbura matul is-sena ta’ qabel permezz tal-attivitajiet ta’ monitoraġġ tagħhom għall-kompilazzjoni f’bażi tad-data waħda, f’konformità mar-rekwiżiti tal-Gwida tal-EFSA dwar id-Deskrizzjoni Standard tal-Kampjuni (SSD) għall-Ikel u għall-Għalf, u mar-rekwiżiti addizzjonali speċifiċi tar-rappurtar tal-EFSA (5).

(3)

Sabiex jiġi żgurat li l-kampjuni jkunu rappreżentattivi, l-Istati Membri jenħtieġ li jsegwu l-proċeduri tal-kampjunar stabbiliti fil-Parti B tal-Anness tar-Regolament tal-Kummissjoni (KE) Nru 333/2007 (6).

Il-proċedura tal-kampjunar applikata mill-operatur tan-negozju tal-ikel tista’ tiddevja mid-dispożizzjonijiet tar-Regolament (KE) Nru 333/2007 iżda jenħtieġ li tibqa’ rappreżentattiva tal-lott.

(4)

L-Istati Membri jenħtieġ li jwettqu l-analiżi tal-akrilammid f’konformità mal-kriterji stabbiliti fir-Regolament (KE) Nru 333/2007.

L-operaturi tan-negozju tal-ikel jenħtieġ li jiżguraw li l-analiżi tal-akrilammid titwettaq f’konformità mar-rekwiżiti u mal-kriterji previsti fl-Anness III tar-Regolament (UE) 2017/2158.

(5)	Ir-Rakkomandazzjonijiet 2010/307/UE u 2013/647/UE b’dan jitħassru.

Magħmul fi Brussell, is-7 ta’ Novembru 2019.

Għall-Kummissjoni

Vytenis ANDRIUKAITIS

Membru tal-Kummissjoni

(1) Ir-Regolament tal-Kummissjoni (UE) 2017/2158 tal-20 ta’ Novembru 2017 li jistabbilixxi miżuri ta’ mitigazzjoni u livelli ta’ parametri referenzjarji għat-tnaqqis tal-preżenza tal-akrilammid fl-ikel (ĠU L 304, 21.11.2017, p. 24)

(2) Ir-Regolament (KE) Nru 882/2004 tal-Parlament Ewropew u tal-Kunsill tad-29 ta’ April 2004 dwar il-kontrolli uffiċjali mwettqa biex tiġi żgurata l-verifikazzjoni tal-konformità mal-liġi ta’ l-għalf u l-ikel, mas-saħħa tal-annimali u mar-regoli dwar il-welfare tal-annimali (ĠU L 165, 30.4.2004, p. 1).

(3) Ir-Rakkomandazzjoni tal-Kummissjoni 2010/307/UE tat-2 ta’ Ġunju 2010 dwar il-monitoraġġ tal-livelli tal-akrilammid fl-ikel (ĠU L 137, 3.6.2010, p. 4).

(4) Ir-Rakkomandazzjoni tal-Kummissjoni 2013/647/UE tat-8 ta’ Novembru 2013 dwar investigazzjonijiet tal-livelli tal-akrilammid fl-ikel (ĠU L 301, 12.11.2013, p. 15).

(5) http://www.efsa.europa.eu/en/consultations/call/180307

(6) Ir-Regolament tal-Kummissjoni (KE) Nru 333/2007 tat-28 ta’ Marzu 2007 li jistabbilixxi l-metodi ta’ teħid ta’ kampjuni u analiżi għall-kontroll uffiċjali ta’ livelli ta’ ċomb, kadmju, merkurju, landa inorganika, 3-MCPD u benzo(a)pyrene fl-oġġetti tal-ikel (ĠU L 88, 29.3.2007, p. 29).

ANNESS

LISTA MHUX EŻAWRJENTI TA’ OĠĠETTI TAL-IKEL GĦALL-MONITORAĠĠ TAL-PREŻENZA TAL-AKRILAMMID

Prodotti tal-patata

—

Rösti

—	Croquettes, pommes duchesse, pommes noisettes, …

—	Casserole tal-patata (u casserole tal-ħaxix)

—	Frakass tal-patata u tal-laħam

—	Frakass tal-patata u tal-ġobon

Prodotti tal-furnara

—	Bziezen/panini (panini tal-hamburgers, bziezen tal-qamħ integrali, bziezen tal-ħalib, ...)

—	Pita bread, tortillas Messikani

—	Croissants

—

Doughnuts

—	Speċjalitajiet tal-ħobż (pereżempju ħobż bil-pumpernikel, ciabatta biż-żebbuġ, ħobż bil-basal, ...)

—

Pancakes

—	Cookies iqarmċu magħmula minn strixxa rqiqa ta’ għaġina u moqlija kompletament fiż-żejt

—

Churros

Prodotti taċ-ċereali

—	Crackers tar-ross

—	Crackers tal-qamħirrum

—	Bukkuni taċ-ċereali (pereżempju l-qamħirrum estruż u/jew il-prodotti tal-qamħ)

—	Muesli inkaljat bl-għasel

Oħrajn

—	Crisps/fries tal-ħaxix

—	Ġewż inkaljat

—	Żrieragħ żejtnin inkaljati

—	Frott imnixxef

—	Żrieragħ tal-kawkaw inkaljati u prodotti derivati mill-kawkaw

—	Żebbuġ fis-salmura

—	Sostituti tal-kafè mhux ibbażati fuq iċ-ċikwejra jew iċ-ċereali

—	Fudge, karamella, qubbajt, ...

11.11.2019

Il-Ġurnal Uffiċjali tal-Unjoni Ewropea

L 290/34

DEĊIŻJONI TAL-BORD MANIĠERJALI TAL-UNJONI EWROPEA TAL-AĠENZIJA TAL-UNJONI EWROPEA GĦAT-TAĦRIĠ FL-INFURZAR TAL-LIĠI

tal-5 ta' Awwissu 2019

li tistabbilixxi regoli interni li jikkonċernaw ir-restrizzjoni ta' ċerti drittijiet ta' suġġetti tad-data fir-rigward tal-ipproċessar tad-data personali fil-qafas tal-funzjonament tas-CEPOL

IL-BORD MANIĠERJALI,

Wara li kkunsidra t-Trattat dwar il-Funzjonament tal-Unjoni Ewropea,

Wara li kkunsidra r-Regolament (UE) 2018/1725 tal-Parlament Ewropew u tal-Kunsill tat-23 ta’ Ottubru 2018 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta’ tali data, u li jħassar ir-Regolament (KE) Nru 45/2001 u d-Deċiżjoni Nru1247/2002/KE (1), u b’mod partikolari l-Artikolu 25 tiegħu,

Wara li kkunsidra r-Regolament (UE) 2015/2219 tal-Parlament Ewropew u tal-Kunsill tal-25 ta’ Novembru 2015 dwar l-Aġenzija tal-Unjoni Ewropea għat-Taħriġ fl-Infurzar tal-Liġi (CEPOL) u li jissostitwixxi u jħassar id-Deċiżjoni tal-Kunsill 2005/681/JHA (2),

Wara li kkunsidra l-opinjoni tal-KEPD tal-20 ta’ Ġunju 2019 u l-Gwida tal-KEPD dwar l-Artikolu 25 tar-Regolament il-ġdid u r-regoli interni (3),

Billi:

(1)	Is-CEPOL twettaq l-attivitajiet tagħha skont ir-Regolament (UE) 2015/2219.

(2)

Skont l-Artikolu 25(1) tar-Regolament (UE) 2018/1725 ir-restrizzjonijiet fuq l-applikazzjoni tal-Artikoli 14 sa 22, 35 u 36, kif ukoll l-Artikolu 4 ta' dak ir-Regolament sa fejn id-dispożizzjonijiet tiegħu jikkorrispondu għad-drittijiet u għall-obbligi previsti fl-Artikoli 14 sa 22 għandhom ikunu bbażati fuq regoli interni li għandhom jiġu adottati mill-Aġenzija, fejn dawn mhumiex ibbażati fuq atti legali adottati fuq il-bażi tat-Trattati.

(3)	Dawn ir-regoli interni, inkluż id-dispożizzjonijiet tagħhom dwar il-valutazzjoni tan-neċessità u l-proporzjonalità ta' restrizzjoni, m'għandhomx japplikaw fejn att legali adottat fuq il-bażi tat-Trattati jipprevedi restrizzjoni tad-drittijiet tas-suġġett tad-data.

(4)	Fejn l-Aġenzija twettaq id-dmirijiet tagħha fir-rigward tad-drittijiet tas-suġġett tad-data skont ir-Regolament (UE) 2018/1725, hija għandha tikkunsidra jekk tapplikax xi waħda mill-eżenzjonijiet stabbiliti f'dak ir-Regolament.

(5)

Fi ħdan il-qafas tal-funzjonament amministrattiv tagħha, l-Aġenzija tista’ twettaq inkjesti amministrattivi, proċedimenti dixxiplinari, twettaq attivitajiet preliminari relatati ma’ każijiet ta’ irregolaritajiet potenzjali rrappurtati lill-OLAF, tipproċessa każijiet ta’ whistleblowing, tipproċessa proċeduri (formali u informali) ta’ fastidju, tipproċessi lmenti interni u esterni, twettaq verifiki interni, twettaq investigazzjonijiet mill-Uffiċjal tal-Protezzjoni tad-Data skont l-Artikolu 45(2) tar-Regolament (UE) 2018/1725 u investigazzjonijiet ta’ sigurtà interni (tal-IT) . Barra minn hekk, l-Aġenzija tista’ tindirizza talbiet għal aċċess għall-fajl mediku tal-membri tal-persunal.

L-Aġenzija tipproċessa diversi kategoriji ta' data personali, inkluż data fattwali (data “oġġettiva” bħal data ta' identifikazzjoni, data ta' kuntatt, data professjonali, dettalji amministrattivi, data riċevuta minn sorsi speċifiċi, komunikazzjonijiet elettroniċi u data tat-traffiku) u/jew data suġġettiva (data “suġġettiva” relatata mal-każ bħal raġunament, data dwar l-imġiba, evalwazzjonijiet, data dwar il-prestazzjoni u l-kondotta u data relatata ma' jew imressqa b'konnessjoni mas-suġġett tal-proċedura jew tal-attività).

(6)	L-Aġenzija, irrappreżentata mid-Direttur Eżekuttiv tagħha, taġixxi bħala l-kontrollur tad-data irrispettivament minn aktar delegazzjonijiet tar-rwol tal-kontrollur fi ħdan l-Aġenzija biex tirrifletti r-responsabbiltajiet operattivi għal operazzjonijiet speċifiċi tal-ipproċessar ta' data personali.

(7)

Id-data personali tinħażen b'mod sigur f'ambjent elettroniku jew fuq karta b'mod li jipprevjeni l-aċċess jew it-trasferiment illegali ta' data lil persuni li m'għandhomx il-ħtieġa li jkunu jafu. Il-fajls mediċi jinħażnu mill-fornitur estern tas-servizzi użat mill-Aġenzija. Id-data personali pproċessata tinżamm għal mhux aktar milli meħtieġ u xieraq għall-finijiet li għalihom id-data tiġi pproċessata għall-perjodu speċifikat fl-avviżi dwar il-protezzjoni tad-data, id-dikjarazzjonijiet ta' privatezza jew ir-rekords tal-Aġenzija.

(8)

Ir-regoli interni għandhom japplikaw għall-operazzjonijiet kollha ta’ pproċessar imwettqa mill-Aġenzija fit-twettiq ta’ inkjesti amministrattivi, proċedimenti dixxiplinari, attivitajiet preliminari relatati ma’ każijiet ta’ irregolaritajiet potenzjali rrappurtati lill-OLAF, proċeduri ta’ whistleblowing, proċeduri (formali u informali) għal każijiet ta’ fastidju, ipproċessar ta’ lmenti interni u esterni, awditjar intern, l-investigazzjonijiet imwettqa mill-Uffiċjal tal-Protezzjoni tad-Data f’konformità mal-Artikolu 45(2) tar-Regolament (UE) 2018/1725, investigazzjonijiet ta’ sigurtà (IT) indirizzati internament jew b’involviment estern (eż. CERT-UE), kif ukoll l-indirizzar ta’ talbiet għal aċċess għall-fajl mediku tagħhom stess.

(9)

Dawn għandhom japplikaw għal operazzjonijiet ta' pproċessar imwettqa qabel il-ftuħ tal-proċeduri msemmija hawn fuq, matul dawn il-proċeduri u matul il-monitoraġġ tas-segwitu għall-eżitu ta' dawn il-proċeduri. Għandha tinkludi wkoll l-assistenza u l-kooperazzjoni pprovduti mill-Aġenzija lill-awtoritajiet nazzjonali u l-organizzazzjonijiet internazzjonali barra mill-investigazzjonijiet amministrattivi tagħha.

(10)	Fil-każijiet fejn japplikaw dawn ir-regoli interni l-Aġenzija trid tagħti ġustifikazzjonijiet fejn tispjega għalfejn ir-restrizzjonijiet huma strettament meħtieġa u proporzjonati f'soċjetà demokratika u jirrispettaw l-essenza tad-drittijiet u l-libertajiet fundamentali.

(11)

F'dan il-qafas l-Aġenzija hija marbuta li tirrispetta, sa fejn hu l-aktar possibli, id-drittijiet fundamentali tas-suġġetti tad-data matul il-proċeduri ta' hawn fuq, b'mod partikolari, dawk relatati mad-dritt għall-għoti ta' informazzjoni, aċċess u rettifika, id-dritt għal tħassir, ir-restrizzjoni tal-ipproċessar, id-dritt għall-komunikazzjoni ta' ksur ta' data personali lis-suġġett tad-data jew għall-kunfidenzjalità tal-komunikazzjoni kif stabbilit fir-Regolament (UE) 2018/1725.

(12)

Madankollu, l-Aġenzija tista' tkun obbligata tirrestrinġi l-informazzjoni lis-suġġett tad-data u drittijiet oħra tas-suġġett tad-data biex tipproteġi, b'mod partikolari, l-investigazzjonijiet tagħha stess, l-investigazzjonijiet u l-proċedimenti ta' awtoritajiet pubbliċi oħra, kif ukoll id-drittijiet ta' persuni oħra relatati mal-investigazzjonijiet tagħha jew proċeduri oħra.

(13)	L-Aġenzija tista' għalhekk tirrestrinġi l-informazzjoni bil-għan li tipproteġi l-investigazzjoni u d-drittijiet u l-libertajiet fundamentali ta' suġġetti oħra tad-data.

(14)	L-Aġenzija għandha timmonitorja perjodikament li l-kundizzjonijiet li jiġġustifikaw ir-restrizzjoni għadhom japplikaw u tneħħi r-restrizzjoni jekk ma jibqgħux japplikaw.

(15)	Il-Kontrollur għandu jinforma lill-Uffiċjal tal-Protezzjoni tad-Data fil-mument tad-differiment u matul ir-reviżjonijiet,

ADOTTA DIN ID-DEĊIŻJONI:

Artikolu 1

Suġġett u kamp ta’ applikazzjoni

1. Din id-Deċiżjoni tistabbilixxi regoli relatati mal-kundizzjonijiet li taħthom l-Aġenzija fil-qafas tal-proċeduri tagħha stabbiliti fil-paragrafu 2 tista' tirrestrinġi l-applikazzjoni tad-drittijiet stabbiliti fl-Artikoli 14 sa 21, 35 u 36, kif ukoll l-Artikolu 4 tagħha, b'segwitu tal-Artikolu 25 tar-Regolament (UE) 2018/1725.

2. Fil-qafas tal-funzjonament amministrattiv tal-Aġenzija, din id-Deċiżjoni tapplika għall-operazzjonijiet tal-ipproċessar dwar data personali mill-Uffiċċju għall-finijiet ta’: twettiq ta' inkjesti amministrattivi, proċedimenti dixxiplinarji, attivitajiet preliminari relatati ma' każijiet ta' irregolaritajiet potenzjali rrapportati lill-OLAF, l-ipproċessar ta' każijiet ta' żvelar ta' informazzjoni protetta, proċeduri (formali u informali) ta' fastidju, l-ipproċessar ta' lmenti interni u esterni, it-twettiq ta' awditi interni, investigazzjonijiet imwettqa mill-Uffiċjal tal-Protezzjoni tad-Data f'konformità mal-Artikolu 45(2) tar-Regolament (UE) 2018/1725, l-investigazzjonijiet dwar is-sigurtà (tal-IT) indirizzati internament jew b'involviment estern (eż. CERT-UE), kif ukoll l-indirizzar ta’ talbiet għal aċċess għall-fajl mediku tagħhom stess.

3. Il-kategoriji ta' data kkonċernati huma data fattwali (data 'oġġettiva' bħal data ta' identifikazzjoni, data ta' kuntatt, data professjonali, dettalji amministrattivi, data riċevuta minn sorsi speċifiċi, komunikazzjonijiet elettroniċi u data tat-traffiku) u/jew data suġġettiva (data 'suġġettiva' relatata mal-każ bħal raġunament, data dwar l-imġiba, evalwazzjonijiet, data dwar il-prestazzjoni u l-kondotta u data relatata ma' jew imressqa b'konnessjoni mas-suġġett tal-proċedura jew tal-attività).

4. Fejn l-Aġenzija twettaq id-dmirijiet tagħha fir-rigward tad-drittijiet tas-suġġett tad-data skont ir-Regolament (UE) 2018/1725, hija għandha tikkunsidra jekk tapplikax xi waħda mill-eżenzjonijiet stabbiliti f'dak ir-Regolament.

5. Soġġett għall-kundizzjonijiet stabbiliti f'din id-Deċiżjoni, ir-restrizzjonijiet jistgħu japplikaw għad-drittijiet li ġejjin: l-għoti ta' informazzjoni lis-suġġetti tad-data, id-dritt ta' aċċess, rettifika, tħassir, restrizzjoni tal-ipproċessar, komunikazzjoni ta' ksur ta' data personali lis-suġġett tad-data jew il-kunfidenzjalità tal-komunikazzjoni.

Artikolu 2

Speċifikazzjoni tal-kontrollur u tas-salvagwardji

1. Is-salvagwardji fis-seħħ biex jiġi evitat ksur, kxif jew żvelar mhux awtorizzat ta' data huma dawn li ġejjin:

(a)	Id-dokumenti tal-karti għandhom jinżammu f’armarji siguri u għandhom ikunu aċċessibbli għall-persunal awtorizzat biss;

(b)	Id-data elettronika kollha għandha tinħażen skont il-prattica tal-Aġenzija, kif ukoll f'folders elettroniċi speċifiċi aċċessibbli biss għall-persunal awtorizzat. Livelli ta’ aċċess xierqa għandhom jingħataw b’mod individwali;

(c)

L-ambjent tal-IT tal-Aġenzija huwa aċċessibbli permezz ta’ sistema ta’ sign-on waħda mqabbda awtomatikament mal-ID u l-password tal-utent. Is-sostituzzjoni ta’ utenti hija pprojbita strettament. Ir-rekords elettroniċi għandhom jinżammu b'mod sigur biex tiġi salvagwardjata l-kunfidenzjalità u l-privatezza tad-data fihom;

(d)	Il-fornitur estern tas-servizzi li jaħżen il-fajls mediċi huwa marbut bi klawżoli kuntrattwali speċifiċi dwar il-kunfidenzjalità u l-ipproċessar ta’ data personali;

(e)	Il-persuni kollha li jkollhom aċċess għad-data huma marbuta bl-obbligu tal-kunfidenzjalità.

2. Il-kontrollur tal-operazzjonijiet tal-ipproċessar huwa l-Aġenzija, irrappreżentata mid-Direttur Eżekuttiv tagħha, li jista' jiddelega l-funzjoni tal-kontrollur. Is-suġġetti tad-data għandhom jiġu infurmati dwar il-kontrollur delegat permezz tal-avviżi jew ir-rekords tal-protezzjoni tad-data ppubblikati fuq is-sit web u ċċirkolata internament fl-Aġenzija.

3. Il-perjodu ta' żamma tad-data personali msemmija fl-Artikolu 1(3) m'għandux ikun itwal minn dak meħtieġ u xieraq għall-finijiet li għalihom id-data tiġi pproċessata. Fi kwalunkwe każ m'għandux ikun itwal mill-perjodu ta' żamma speċifikat fl-avviżi tal-protezzjoni tad-data, id-dikjarazzjonijiet tal-privatezza jew ir-rekords imsemmija fl-Artikolu 5(1).

4. Fejn l-Aġenzija tikkunsidra li tapplika restrizzjoni, ir-riskju għad-drittijiet u l-libertajiet tas-suġġett tad-data għandu jintiżen, b'mod partikolari, kontra r-riskju għad-drittijiet u l-libertajiet ta' suġġetti oħra tad-data u r-riskju ta' kanċellazzjoni tal-effett tal-investigazzjonijiet jew il-proċeduri tal-Aġenzija pereżempju billi tinqered l-evidenza. Ir-riskji għad-drittijiet u l-libertajiet tas-suġġett tad-data jikkonċernaw primarjament, iżda mhumiex limitati għal, riskji ta' reputazzjoni u riskji għad-dritt tad-difiża u d-dritt li jinstema'.

Artikolu 3

Restrizzjonijiet

1. Kull restrizzjoni għandha tiġi applikata biss mill-Aġenzija biex tissalvagwardja:

(a)	il-prevenzjoni, l-investigazzjoni, id-detezzjoni u l-prosekuzzjoni ta’ reati kriminali jew l-eżekuzzjoni ta’ pieni kriminali, inkluża s-salvagwardja kontra u l-prevenzjoni ta’ theddid għas-sigurtà pubblika;

(b)	is-sigurtà interna tal-istituzzjonijiet u l-korpi tal-Unjoni, inkluża dik tan-netwerks tal-komunikazzjoni elettronika tagħhom;

(c)	il-protezzjoni tal-indipendenza ġudizzjarja u l-proċedimenti ġudizzjarji;

(d)	il-prevenzjoni, l-investigazzjoni, id-detezzjoni u l-prosekuzzjoni tal-ksur tal-etika għal professjonijiet regolati;

(e)	il-protezzjoni tas-suġġett tad-data jew id-drittijiet u l-libertajiet ta' oħrajn;

(f)	l-infurzar ta' pretensjonijiet skont il-liġi ċivili.

2. Bħala applikazzjoni speċifika tal-finijiet deskritti fil-paragrafu 1 hawn fuq, l-Aġenzija tista' tapplika restrizzjonijiet relatati mad-data personali skambjata mas-servizzi tal-Kummissjoni jew ma' istituzzjonijiet, korpi, aġenziji u uffiċċji oħra tal-Unjoni, ma' awtoritajiet kompetenti tal-Istati Membri jew ma' pajjiżi terzi jew organizzazzjonijiet internazzjonali, fiċ-ċirkostanzi li ġejjin:

(a)

fejn l-eżerċizzju ta' dawk id-drittijiet u l-obbligi jkun jista' jiġi ristrett mis-servizzi tal-Kummissjoni jew minn istituzzjonijiet, korpi, aġenziji u uffiċċji oħra tal-Unjoni fuq il-bażi ta' atti oħra previsti fl-Artikolu 25 tar-Regolament (UE) 2018/1725 jew skont il-Kapitolu IX ta' dak ir-Regolament jew skont l-atti fundaturi ta' istituzzjonijiet, korpi, aġenziji u uffiċċji oħra tal-Unjoni;

(b)

fejn l-eżerċizzju ta' dawk id-drittijiet u obbligi jista' jkun ristrett mill-awtoritajiet kompetenti tal-Istati Membri abbażi tal-atti msemmija fl-Artikolu 23 tar-Regolament (UE) 2016/679 tal-Parlament Ewropew u tal-Kunsill (4), jew taħt miżuri nazzjonali li jittrasponu l-Artikoli 13(3), 15 (3) jew 16(3) tad-Direttiva (UE) 2016/680 tal-Parlament Ewropew u tal-Kunsill (5);

(c)	meta l-eżerċizzju ta' dawk id-drittijiet u l-obbligi jista' jipperikola l-kooperazzjoni tal-Aġenzija ma' pajjiżi terzi jew organizzazzjonijiet internazzjonali fit-twettiq tal-kompiti tagħha.

(d)

Qabel ma tapplika r-restrizzjonijiet fiċ-ċirkustanzi msemmija fil-punti (a) u (b) tal-ewwel subparagrafu, l-Aġenzija għandha tikkonsulta s-servizzi rilevanti tal-Kummissjoni, tal-istituzzjonijiet, tal-korpi, tal-aġenziji, tal-uffiċċji tal-Unjoni jew l-awtoritajiet kompetenti tal-Istati Membri sakemm ma jkunx ċar għall-Aġenzija li l-applikazzjoni ta' restrizzjoni tkun prevista minn wieħed mill-atti msemmija f'dawk il-punti.

3. Kwalunkwe restrizzjoni għandha tkun meħtieġa u proporzjonata billi tqis ir-riskji għad-drittijiet u l-libertajiet tas-suġġetti tad-data u tirrispetta l-essenza tad-drittijiet u l-libertajiet fundamentali f'soċjetà demokratika.

4. Jekk titqies l-applikazzjoni ta’ restrizzjoni, għandu jitwettaq test tan-neċessità u tal-proporzjonalità abbażi tar-regoli preżenti. Dan għandu jiġi ddokumentat fuq bażi ta’ każ b’każ permezz ta’ nota ta’ valutazzjoni interna għall-finijiet ta’ responsabbiltà.

5. Ir-restrizzjonijiet għandhom jitneħħew hekk kif iċ-ċirkostanzi li jiġġustifikawhom ma jkunux għadhom japplikaw. B’mod partikolari, fejn ikun meqjus li l-eżerċitar tad-dritt ristrett ma jibqax jikkanċella l-effett tar-restrizzjoni imposta jew jaffettwa b’mod negattiv id-drittijiet jew il-libertajiet ta’ suġġetti tad-data oħra.

Artikolu 4

Rieżami mill-Uffiċjal tal-Protezzjoni tad-Data

1. L-Aġenzija għandha, mingħajr dewmien żejjed, tinforma lill-Uffiċjal tal-Protezzjoni tad-Data tal-Aġenzija ('l-UPD') kull meta l-kontrollur jirrestrinġi l-applikazzjoni tad-drittijiet tas-suġġetti tad-data, jew jestendi r-restrizzjoni, skont din id-Deċiżjoni. Il-kontrollur għandu jipprovdi lill-UPD bl-aċċess għar-rekord li jinkludi l-valutazzjoni tan-neċessità u l-proporzjonalità tar-restrizzjoni, u jiddokumenta fir-rekord id-data li fiha jinforma lill-UPD.

2. L-UPD jista’ jitlob bil-miktub li l-kontrollur jirrieżamina l-applikazzjoni tar-restrizzjonijiet. Il-kontrollur għandu jinforma lill-UPD bil-miktub dwar l-eżitu tar-rieżami mitlub.

3. Il-kontrollur għandu jinforma lill-UPD meta tkun tneħħiet ir-restrizzjoni.

Artikolu 5

Forniment ta’ informazzjoni lis-suġġett tad-data

1. F’każijiet iġġustifikati kif xieraq u taħt il-kundizzjonijiet stipulati f’din id-deċiżjoni, id-dritt għall-informazzjoni jista’ jiġi ristrett mill-kontrollur fil-kuntest tal-operazzjonijiet tal-ipproċessar li ġejjin:

(a)	it-twettiq ta’ inkjesti amministrattivi u proċedimenti dixxiplinarji;

(b)	attivitajiet preliminari relatati ma’ każijiet ta’ irregolaritajiet potenzjali rrappurtati lill-OLAF;

(c)	proċeduri ta’ żvelar ta’ informazzjoni protetta;

(d)	proċeduri (formali u informali) għal każijiet ta’ fastidju;

(e)	l-ipproċessar ta’ lmenti interni u esterni;

(f)	awditi interni;

(g)	l-investigazzjonijiet imwettqa mill-Uffiċjal tal-Protezzjoni tad-Data f’konformità mal-Artikolu 45(2) tar-Regolament (UE) 2018/1725;

(h)	investigazzjonijiet ta’ sigurtà (tal-IT) ġestiti internament jew b’involviment estern (eż. CERT-UE).

L-Aġenzija għandha tinkludi fl-avviżi tal-protezzjoni tad-data, dikjarazzjonijiet ta' privatezza jew rekords fis-sens tal-Artikolu 31 tar-Regolament (UE) 2018/1725, ippubblikati fuq is-sit web tagħha u/jew iċċirkolati internament biex tinforma lis-suġġetti tad-data bid-drittijiet tagħhom fil-qafas ta' proċedura partikolari, informazzjoni relatata mar-restrizzjoni potenzjali ta' dawn id-drittijiet. L-informazzjoni għandha tkopri liema drittijiet jistgħu jiġu ristretti, ir-raġunijiet u d-durata potenzjali.

2. Mingħajr preġudizzju għad-dispożizzjonijiet tal-paragrafu 3, l-Aġenzija, fejn proporzjonat, għandha tinforma wkoll individwalment lis-suġġetti kollha tad-data, li huma kkunsidrati bħala persuni kkonċernati fl-operazzjoni speċifika tal-ipproċessar, bid-drittijiet tagħhom li jikkonċernaw restrizzjonijiet preżenti jew futuri mingħajr dewmien bla bżonn u bil-miktub.

3. Fejn l-Aġenzija tirrestrinġi, kompletament jew parzjalment, l-għoti ta' informazzjoni lis-suġġetti tad-data msemmija fil-paragrafu 2, hija għandha tirreġistra r-raġunijiet għar-restrizzjoni, ir-raġuni legali skont l-Artikolu 3 ta' din id-Deċiżjoni, inkluż valutazzjoni tan-neċessità u l-proporzjonalità tar-restrizzjoni.

Ir-rekord, u fejn applikabbli, id-dokumenti li jinkludu l-elementi fattwali u legali sottostanti għandhom jiġu rreġistrati. Dawn għandhom isiru disponibbli għall-Kontrollur Ewropew għall-Protezzjoni tad-Data meta jintalbu.

4. Ir-restrizzjoni msemmija fil-paragrafu 3 għandha tkompli tapplika dment li jibqgħu applikabbli r-raġunijiet li jiġġustifikawha.

Fejn ir-raġunijiet għar-restrizzjoni ma jibqgħux japplikaw, l-Aġenzija għandha tipprovdi informazzjoni lis-suġġett tad-data dwar ir-raġunijiet prinċipali li fuqhom tkun ibbażata l-applikazzjoni tar-restrizzjoni. Fl-istess ħin, l-Aġenzija għandha tinforma lis-suġġett tad-data bid-dritt li jressaq ilment mal-Kontrollur Ewropew għall-Protezzjoni tad-Data fi kwalunkwe ħin jew li jfittex rimedju ġudizzjarju fil-Qorti tal-Ġustizzja tal-Unjoni Ewropea.

L-Aġenzija għandha tirrieżamina l-applikazzjoni tar-restrizzjoni kull sitt xhur mill-adozzjoni tagħha u fl-għeluq tal-inkjesta, proċedura jew investigazzjoni rilevanti. Wara dan, kull sitt xhur, il-kontrollur għandu jimmonitorja l-ħtieġa li tinżamm kwalunkwe restrizzjoni.

Artikolu 6

Dritt ta' aċċess mis-suġġett tad-data

1. F'każijiet debitament iġġustifikati u taħt il-kundizzjonijiet stipulati f'din id-deċiżjoni, id-dritt għall-aċċess jista' jiġi ristrett mill-kontrollur fil-kuntest tal-operazzjonijiet tal-ipproċessar li ġejjin, fejn meħtieġ u proporzjonat:

(a)	it-twettiq ta’ inkjesti amministrattivi u proċedimenti dixxiplinarji;

(b)	attivitajiet preliminari relatati ma’ każijiet ta’ irregolaritajiet potenzjali rrappurtati lill-OLAF;

(c)	proċeduri ta’ żvelar ta’ informazzjoni protetta;

(d)	proċeduri (formali u informali) għal każijiet ta’ fastidju;

(e)	l-ipproċessar ta’ lmenti interni u esterni;

(f)	awditi interni;

(g)	l-investigazzjonijiet imwettqa mill-Uffiċjal tal-Protezzjoni tad-Data f’konformità mal-Artikolu 45(2) tar-Regolament (UE) 2018/1725;

(h)	investigazzjonijiet ta’ sigurtà (tal-IT) ġestiti internament jew b’involviment estern (eż. CERT-UE).

(i)	L-indirizzar tat-talbiet għal aċċess għall-fajl mediku proprju.

Meta s-suġġetti tad-data jitolbu aċċess għad-data personali tagħhom ipproċessata fil-kuntest ta' każ speċifiku wieħed jew aktar jew ta' operazzjoni ta' pproċessar partikolari, skont l-Artikolu 17 tar-Regolament (UE) 2018/1725, l-Aġenzija għandha tillimita l-valutazzjoni tagħha tat-talba għal tali data personali biss.

2. Meta l-Aġenzija tirrestrinġi, b'mod sħiħ jew parzjali, id-dritt ta' aċċess, imsemmi fl-Artikolu 17 tar-Regolament (UE) 2018/1725, hija għandha tieħu l-passi li ġejjin:

(a)

għandha tinforma lis-suġġett tad-data kkonċernat, fit-tweġiba tagħha għat-talba, bir-restrizzjoni applikata u bir-raġunijiet prinċipali għaliha, u bil-possibbiltà li jista' jressaq ilment lill-Kontrollur Ewropew għall-Protezzjoni tad-Data jew li jfittex rimedju ġudizzjarju fil-Qorti tal-Ġustizzja tal-Unjoni Ewropea;

(b)	għandha tiddokumenta f'nota ta' valutazzjoni interna r-raġunijiet għar-restrizzjoni, inkluż il-valutazzjoni tan-neċessità, il-proporzjonalità tar-restrizzjoni u t-tul ta' żmien tagħha.

Restrizzjonijiet imposti fir-rigward tal-aċċess għall-fajl mediku proprju għandhom jikkonċernaw biss talbiet għal aċċess dirett fir-rigward ta’ data medika personali ta’ natura psikoloġika jew psikjatrika, fejn l-aċċess għal tali data x’aktarx jirrappreżenta riskju għas-saħħa tas-suġġett tad-data. Din ir-restrizzjoni għandha tkun proporzjonata għal dak li huwa strettament neċessarju biex jiġi protett is-suġġett tad-data. L-aċċess għal tali informazzjoni għandu jingħata lit-tabib tal-għażla tas-suġġett tad-data.

Il-forniment ta’ informazzjoni msemmi fil-punt (a) jista’ jiġi differit, jitħalla barra jew jiġi miċħud, jekk dan jikkanċella l-effett tar-restrizzjoni f’konformità mal-Artikolu 25(8) tar-Regolament (UE) 2018/1725.

L-Aġenzija għandha tirrieżamina l-applikazzjoni tar-restrizzjoni kull sitt xhur mill-adozzjoni tagħha u fl-għeluq tal-investigazzjoni rilevanti. Wara dan, kull sitt xhur, il-kontrollur għandu jimmonitorja l-ħtieġa li tinżamm kwalunkwe restrizzjoni.

3. Ir-rekord, u fejn applikabbli, id-dokumenti li jinkludu l-elementi fattwali u legali sottostanti għandhom jiġu rreġistrati. Dawn għandhom isiru disponibbli għall-Kontrollur Ewropew għall-Protezzjoni tad-Data meta jintalbu.

Artikolu 7

Dritt ta’ rettifika, tħassir u restrizzjoni ta' pproċessar

1. F'każijiet debitament iġġustifikati u taħt il-kundizzjonijiet stipulati f'din id-deċiżjoni, id-dritt għal rettifika, tħassir u restrizzjoni jista' jiġi ristrett mill-kontrollur fil-kuntest tal-operazzjonijiet tal-ipproċessar li ġejjin, fejn meħtieġ u xieraq:

(a)	it-twettiq ta’ inkjesti amministrattivi u proċedimenti dixxiplinarji;

(b)	attivitajiet preliminari relatati ma’ każijiet ta’ irregolaritajiet potenzjali rrappurtati lill-OLAF;

(c)	proċeduri ta’ żvelar ta’ informazzjoni protetta;

(d)	proċeduri (formali u informali) għal każijiet ta’ fastidju;

(e)	l-ipproċessar ta’ lmenti interni u esterni;

(f)	awditi interni;

(g)	l-investigazzjonijiet imwettqa mill-Uffiċjal tal-Protezzjoni tad-Data f’konformità mal-Artikolu 45(2) tar-Regolament (UE) 2018/1725;

(h)	investigazzjonijiet ta’ sigurtà (tal-IT) ġestiti internament jew b’involviment estern (eż. CERT-UE).

2. Fejn l-Aġenzija tirrestrinġi, kompletament jew parzjalment, l-applikazzjoni tad-dritt għar-rettifika, it-tħassir u r-restrizzjoni tal-ipproċessar imsemmi fl-Artikoli 18, 19(1) u 20(1) tar-Regolament (UE) 2018/1725, hija għandha tieħu l-passi stabbiliti fl-Artikolu 6(2) ta' din id-Deċiżjoni u tirreġistra r-rekord skont l-Artikolu 6(3) tagħha.

Artikolu 8

Il-komunikazzjoni ta’ ksur ta’ data personali lis-suġġett tad-data u l-kunfidenzjalità tal-komunikazzjoni elettronika

1. F'każijiet debitament iġġustifikati u taħt il-kundizzjonijiet stipulati f'din id-deċiżjoni, id-dritt għall-komunikazzjoni ta' ksur ta' data personali jista' jiġi ristrett mill-kontrollur fil-kuntest tal-operazzjonijiet tal-ipproċessar li ġejjin, fejn meħtieġ u xieraq:

(a)	it-twettiq ta’ inkjesti amministrattivi u proċedimenti dixxiplinarji;

(b)	attivitajiet preliminari relatati ma’ każijiet ta’ irregolaritajiet potenzjali rrappurtati lill-OLAF;

(c)	proċeduri ta’ żvelar ta’ informazzjoni protetta;

(d)	l-ipproċessar ta’ lmenti interni u esterni;

(e)	awditi interni;

(f)	l-investigazzjonijiet imwettqa mill-Uffiċjal tal-Protezzjoni tad-Data f’konformità mal-Artikolu 45(2) tar-Regolament (UE) 2018/1725;

(g)	investigazzjonijiet ta’ sigurtà (tal-IT) ġestiti internament jew b’involviment estern (eż. CERT-UE).

2. F'każijiet debitament iġġustifikati u taħt il-kundizzjonijiet stipulati f'din id-deċiżjoni, id-dritt għall-kunfidenzjalità tal-komunikazzjonijiet elettroniċi jista' jiġi ristrett mill-kontrollur fil-kuntest tal-operazzjonijiet tal-ipproċessar li ġejjin, fejn meħtieġ u xieraq:

(a)	it-twettiq ta’ inkjesti amministrattivi u proċedimenti dixxiplinarji;

(b)	attivitajiet preliminari relatati ma’ każijiet ta’ irregolaritajiet potenzjali rrappurtati lill-OLAF;

(c)	proċeduri ta’ żvelar ta’ informazzjoni protetta;

(d)	proċeduri formali għal każijiet ta’ fastidju;

(e)	l-ipproċessar ta’ lmenti interni u esterni;

(f)	investigazzjonijiet ta’ sigurtà (tal-IT) ġestiti internament jew b’involviment estern (eż. CERT-UE).

3. Fejn l-Aġenzija tirrestrinġi l-komunikazzjoni ta' ksur ta' data personali lis-suġġett tad-data jew il-kunfidenzjalità tal-komunikazzjonijiet elettroniċi msemmija fl-Artikoli 35 u 36 tar-Regolament (UE) 2018/1725, għandha tirreġistra u żżomm rekord tar-raġunijiet għar-restrizzjoni f'konformità mal-Artikolu 5(3) ta' din id-deċiżjoni. L-Artikolu 5(4) ta' din id-Deċiżjoni għandu japplika.

Artikolu 9

Dħul fis-seħħ

Din id-Deċiżjoni għandha tidħol fis-seħħ fil-jum wara dak li fih tiġi ppubblikata f'Il-Ġurnal Uffiċjali tal-Unjoni Ewropea.

Magħmul f’Tampere, fil-5 ta’ Awwissu 2019.

Għall-Bord Maniġerjali

Is-Sur Kimmo HIMBERG

President tal-Bord Maniġerjali

(1) ĠU L 295, 21.11.2018, p. 39.

(2) ĠU L 319, 4.12.2015, p. 1.

(3) https://edps.europa.eu/sites/edp/files/publication/18-12-20_guidance_on_article_25_en.pdf

(4) Ir-Regolament (UE) 2016/679 tal-Parlament Ewropew u tal-Kunsill tas-27 ta' April 2016 dwar il-protezzjoni tal-persuni fiżiċi fir-rigward tal-ipproċessar ta' data personali u dwar il-moviment liberu ta' tali data, u li jħassar id-Direttiva 95/46/KE (Regolament Ġenerali dwar il-Protezzjoni tad-Data) (ĠU L 119, 4.5.2016, p. 1).

(5) Id-Direttiva (UE) 2016/680 tal-Parlament Ewropew u tal-Kunsill tas-27 ta' April 2016 dwar il-protezzjoni ta' persuni fiżiċi fir-rigward tal-ipproċessar ta' data personali mill-awtoritajiet kompetenti għall-finijiet tal-prevenzjoni, l-investigazzjoni, is-sejbien jew il-prosekuzzjoni ta' reati kriminali jew l-eżekuzzjoni ta' pieni kriminali, u dwar il-moviment liberu ta' tali data, u li tħassar id-Deċiżjoni Qafas tal-Kunsill 2008/977/ĠAI (ĠU L 119, 4.5.2016, p. 89).

		ISSN 1977-074X
Il-Ġurnal Uffiċjali tal-Unjoni Ewropea		L 290

Edizzjoni bil-Malti	Leġiżlazzjoni	Volum 62 11 ta' Novembru 2019

Werrej		II Atti mhux leġiżlattivi	Paġna
		REGOLAMENTI
	*	Regolament Ta’ Implimentazzjoni Tal-Kummissjoni (UE) 2019/1876 tal-4 ta’ Novembru 2019 li japprova emenda fl-Ispeċifikazzjoni tal-Prodott għal Denominazzjoni ta’ Oriġini Protetta jew Indikazzjoni Ġeografika Protetta Roma (DOP)	1
	*	Regolament ta’ Implimentazzjoni tal-Kummissjoni (UE) 2019/1877 tal-4 ta’ Novembru 2019 li japprova emenda fl-Ispeċifikazzjoni tal-Prodott għal Denominazzjoni ta’ Oriġini Protetta jew Indikazzjoni Ġeografika Protetta Valle d’Itria (IĠP)	3
	*	Regolament ta’ Implimentazzjoni tal-Kummissjoni (UE) 2019/1878 tal-4 ta’ Novembru 2019 li japprova emenda fl-Ispeċifikazzjoni tal-Prodott għal Denominazzjoni ta’ Oriġini Protetta jew Indikazzjoni Ġeografika Protetta (Vigneti delle Dolomiti/Weinberg Dolomiten (IĠP))	4
	*	Regolament ta’ Implimentazzjoni tal-Kummissjoni (UE) 2019/1879 tal-4 ta’ Novembru 2019 li japprova emenda fl-Ispeċifikazzjoni tal-Prodott għal Denominazzjoni ta’ Oriġini Protetta jew Indikazzjoni Ġeografika Protetta (Vallagarina (IĠP))	6
	*	Regolament ta’ Implimentazzjoni tal-Kummissjoni (UE) 2019/1880 tal-4 ta’ Novembru 2019 li jikkonferixxi l-protezzjoni skont l-Artikolu 99 tar-Regolament (UE) Nru 1308/2013 tal-Parlament Ewropew u tal-Kunsill fuq l-isem Vera de Estenas (DOP)	7
	*	Regolament ta’ Implimentazzjoni tal-Kummissjoni (UE) 2019/1881 tat-8 ta’ Novembru 2019 li jemenda r-Regolament (UE) Nru 37/2010 biex jikklassifika s-sustanza diflubenżuron fir-rigward tal-limitu massimu ta’ residwi tagħha ( 1 )	8
	*	Regolament ta’ Implimentazzjoni tal-Kummissjoni (UE) 2019/1882 tat-8 ta’ Novembru 2019 li jiftaħ proċeduri tal-offerti għall-ammont ta’ għajnuna għall-ħażna privata taż-żejt taż-żebbuġa	12
	*	Regolament ta’ Implimentazzjoni tal-Kummissjoni (UE) tat-8 ta’ Novembru 2019 li jemenda għat-307 darba r-Regolament tal-Kunsill (KE) Nru 881/2002 li jimponi ċerti miżuri speċifiċi restrittivi diretti kontra ċerti persuni u entitajiet assoċjati mal-organizzazzjonijiet ISIL (Da’esh) u Al-Qaida	15
		DEĊIŻJONIJIET
	*	Deċiżjoni tal-Kunsill (PESK) 2019/1884 tat-8 ta’ Novembru 2019 li temenda d-Deċiżjoni (PESK) 2016/2382 li tistabbilixxi Kulleġġ Ewropew ta’ Sigurtà u ta’ Difiża (KESD)	17
	*	Deċiżjoni ta’ Implimentazzjoni tal-Kummissjoni (UE) 2019/1885 tas-6 ta’ Novembru 2019 li tistabbilixxi r-regoli għall-kalkolu, il-verifika u r-rappurtar ta’ data dwar ir-rimi ta’ skart f’landfill muniċipali f’konformità mad-Direttiva tal-Kunsill 1999/31/KE u li tħassar id-Deċiżjoni tal-Kummissjoni 2000/738/KE (notifikata bid-dokument C(2019) 7874)	18
	*	DEĊIŻJONI TA’ IMPLIMENTAZZJONI TAL-KUMMISSJONI (UE) 2019/1886 tas-7 ta’ Novembru 2019 li temenda d-Deċiżjoni 2010/346/UE dwar ir-reġjonalizzazzjoni tar-Rumanija għall-applikazzjoni tal-miżuri protettivi fir-rigward tal-anemija infettiva taż-żwiemel (notifikata bid-dokument CC(2019) 7873) ( 1 )	26
	*	Deċiżjoni Ta’ Implimentazzjoni Tal-Kummissjoni (UE) 2019/1887 tas-7 ta’ Novembru 2019 li temenda d-Deċiżjoni ta’ Implimentazzjoni 2014/709/UE fir-rigward tad-disponibbiltà u l-puntwalità tal-informazzjoni fuq il-lista ta’ stabbilimenti approvati (notifikata bid-dokument C(2019) 7899) ( 1 )	29
		RAKKOMANDAZZJONIJIET
	*	Rakkomandazzjoni tal-Kummissjoni (UE) 2019/1888 tas-7 ta’ Novembru 2019 dwar il-monitoraġġ tal-preżenza tal-akrilammid f’ċerti oġġetti tal-ikel	31
		REGOLI TA' PROĊEDURA
	*	Deċiżjoni Tal-Bord Maniġerjali Tal-Unjoni Ewropea Tal-Aġenzija Tal-Unjoni Ewropea Għat-Taħriġ Fl-Infurzar Tal-Liġi tal-5 ta' Awwissu 2019 li tistabbilixxi regoli interni li jikkonċernaw ir-restrizzjoni ta' ċerti drittijiet ta' suġġetti tad-data fir-rigward tal-ipproċessar tad-data personali fil-qafas tal-funzjonament tas-CEPOL	34


	(1) Test b’rilevanza għaż-ŻEE.