(1)

F’April 2007, il-Kunsill, skont ir-Regolament (KE) Nru 452/2007, impona dazji anti-dumping definittivi ta’ bejn 9,9 % u 38,1 % fuq l-importazzjonijiet ta’ twavel għall-mogħdija li joriġinaw mir-Repubblika Popolari taċ-Ċina (“RPĊ” jew “iċ-Ċina”) u mill-Ukrajna (2); f’Diċembru 2010, permezz tar-Regolament (UE) Nru 1243/2010 (3), il-Kunsill impona dazju anti-dumping definittiv fuq l-importazzjonijiet ta’ twavel għall-mogħdija ta’ Since Hardware (Guangzhou) Co, produttur esportatur Ċiniż ta’ twavel għall-mogħdija, wara investigazzjoni ġdida skont l-Artikolu 5 tar-Regolament bażiku (“l-investigazzjonijiet oriġinali”).

(2)

F’Jannar 2010, il-miżuri ġew emendati bir-Regolament ta’ Implimentazzjoni (UE) Nru 77/2010 wara rieżami ta’ esportatur ġdid skont l-Artikolu 11(4) tar-Regolament bażiku (4).

(3)

F’Marzu 2010, il-miżuri ġew emendati bir-Regolament ta’ Implimentazzjoni (UE) Nru 270/2010 wara rieżami interim skont l-Artikolu 11(3) tar-Regolament bażiku (5).

(4)

F’Settembru 2010, bir-Regolament ta’ Implimentazzjoni (UE) Nru 805/2010, il-Kunsill impona mill-ġdid dazju anti-dumping definittiv fuq l-importazzjonijiet ta’ twavel għall-mogħdija ta’ Foshan Shunde Yongjian Housewares and Hardware Co. Ltd, Foshan, produttur esportatur Ċiniż ta’ twavel għall-mogħdija (6), bħala miżura biex jikkonforma mas-sentenza tal-Qorti tal-Ġustizzja fil-Kawża C-141/08 P (7).

(5)

F’Ottubru 2012, bir-Regolament ta’ Implimentazzjoni (UE) Nru 987/2012, il-Kunsill impona mill-ġdid dazju anti-dumping definittiv fuq l-importazzjonijiet ta’ twavel għall-mogħdija li joriġinaw miċ-Ċina, immanifatturati minn Zhejiang Harmonic Hardware Products Co. Ltd (8), bħala miżura biex jikkonforma mas-sentenza tal-Qorti tal-Ġustizzja fil-Kawża T-274/07 (9).

(6)

F’Lulju 2013, wara rieżami ta’ skadenza skont l-Artikolu 11(2) u rieżami interim skont l-Artikolu 11(3) tar-Regolament bażiku, il-Kunsill, bir-Regolament ta’ Implimentazzjoni (UE) Nru 695/2013, estenda l-miżuri għal ħames snin oħra fir-rigward tal-importazzjonijiet ta’ twavel għall-mogħdija li joriġinaw miċ-Ċina u rrevoka l-miżuri fuq l-importazzjonijiet ta’ twavel għall-mogħdija li joriġinaw mill-Ukrajna (10).

(7)

Wara l-pubblikazzjoni ta’ avviż ta’ skadenza imminenti (11), il-Kummissjoni rċeviet talba għal rieżami ta’ skadenza skont l-Artikolu 11(2) tar-Regolament bażiku (“it-talba għal rieżami”).

(8)

It-talba saret fl-20 ta’ April 2018 minn tliet produtturi tal-Unjoni (Colombo New Scal S.p.A, Rörets Polska Sp. z o.o. u Vale Mill (Rochdale) Ltd), li jirrappreżentaw aktar minn 50 % tal-produzzjoni totali tal-Unjoni ta’ twavel għall-mogħdija (“l-applikanti”).

(9)

It-talba għal rieżami kienet ibbażata fuq ir-raġunijiet li l-iskadenza tal-miżuri probabbli tirriżulta f’kontinwazzjoni jew f’rikorrenza ta’ dumping u ħsara lill-industrija tal-Unjoni.

(10)

Billi ddeterminat, wara li kkonsultat mal-Kumitat stabbilit bl-Artikolu 15(1) tar-Regolament bażiku, li kienet teżisti biżżejjed evidenza għall-bidu ta’ rieżami ta’ skadenza, fid-19 ta’ Lulju 2018, il-Kummissjoni ħabbret permezz ta’ avviż ippubblikat f’Il-Ġurnal Uffiċjali tal-Unjoni Ewropea (12), il-bidu ta’ rieżami ta’ skadenza skont l-Artikolu 11(2) tar-Regolament bażiku (“Notifika ta’ bidu”).

(11)

L-investigazzjoni ta’ kontinwazzjoni jew ta’ rikorrenza tad-dumping kopriet il-perjodu mill-1 ta’ Jannar 2017 sal-31 ta’ Diċembru 2017 (“il-perjodu ta’ investigazzjoni tar-rieżami”). L-eżami tax-xejriet rilevanti għall-valutazzjoni tal-probabbiltà ta’ kontinwazzjoni jew ta’ rikorrenza tad-dannu kopra l-perjodu mill-1 ta’ Jannar 2014 sa tmiem il-perjodu ta’ investigazzjoni (“il-perjodu meqjus”).

(12)

Il-Kummissjoni informat b’mod uffiċjali lill-applikanti, lil produtturi oħra magħrufa tal-Unjoni, lill-produtturi esportaturi, lill-importaturi, lill-utenti fl-UE magħrufa li huma kkonċernati, u lir-rappreżentanti tal-pajjiż esportatur ikkonċernat dwar il-bidu tar-rieżami ta’ skadenza.

(13)

Il-partijiet interessati ngħataw l-opportunità li jesprimu l-fehmiet tagħhom bil-miktub u li jitolbu seduta ta’ smigħ fil-limitu ta’ żmien stipulat fin-Notifika ta’ Bidu.

(14)

Fin-Notifika ta’ Bidu, il-Kummissjoni ddikjarat li hija tista’ tieħu kampjun mill-partijiet interessati skont l-Artikolu 17 tar-Regolament bażiku.

(15)

Fin-Notifika ta’ Bidu, il-Kummissjoni ddikjarat li hija kienet għażlet b’mod proviżorju kampjun ta’ produtturi tal-Unjoni, skont l-Artikolu 17 tar-Regolament bażiku. Il-kampjun kien jikkonsisti minn erba’ produtturi tal-Unjoni li kellhom l-akbar volum rappreżentattiv tal-bejgħ u l-produzzjoni fl-UE matul il-perjodu ta’ investigazzjoni tar-rieżami li seta’ jiġi investigat b’mod raġonevoli fiż-żmien disponibbli. Dawn l-erba’ kumpaniji rrappreżentaw aktar minn 55 % tal-volum tal-produzzjoni u tal-bejgħ tal-industrija tal-Unjoni fil-perjodu ta’ investigazzjoni tar-rieżami. Il-partijiet interessati ġew mistiedna jikkummentaw dwar il-kampjun proviżorju.

(16)

Produttur wieħed tal-Unjoni li ma ġiex inkluż fil-kampjun proviżorju esprima l-appoġġ tiegħu għall-kampjunar proviżorju. Ma tressaq l-ebda kumment ieħor. Għaldaqstant, il-kampjun proviżorju ġie ikkonfermat. Il-kampjun tqies li kien rappreżentattiv għall-industrija tal-Unjoni.

(17)

Sussegwentement, wieħed mill-produtturi tal-Unjoni inklużi fil-kampjun ma pprovdiex tweġiba għall-kwestjonarju u għalhekk ġie eskluż mill-kampjun tal-produtturi tal-Unjoni. Il-produtturi tal-Unjoni li kien fadal irrappreżentaw aktar minn 50 % tal-volum totali tal-produzzjoni u tal-bejgħ tal-Unjoni u għalhekk il-kampjun xorta tqies bħala rappreżentattiv għall-industrija tal-Unjoni.

(18)

Sabiex jiġi deċiż jekk il-kampjunar kienx meħtieġ u, f’dak il-każ biex jintgħażel kampjun, l-importaturi kollha mhux relatati ġew mistiedna jipparteċipaw f’din l-investigazzjoni. Dawk il-partijiet intalbu jippreżentaw lilhom infushom billi jipprovdu lill-Kummissjoni l-informazzjoni mitluba fl-Anness II tan-Notifika ta’ bidu.

(19)

L-ebda importatur mhux relatat fl-UE ma kkoopera.

(20)

Sabiex tiddeċiedi jekk il-kampjunar kienx meħtieġ u, f’dak il-każ, biex tagħżel kampjun, il-Kummissjoni talbet lill-produtturi/esportaturi magħrufa kollha fir-RPĊ sabiex jipprovdu l-informazzjoni speċifikata fin-Notifika ta’ Bidu. Barra minn hekk, din talbet lill-Missjoni tar-RPĊ għall-Unjoni Ewropea sabiex tidentifika u/jew tikkuntattja lil produtturi esportaturi oħra, jekk kien hemm, li setgħu kienu interessati jipparteċipaw fl-investigazzjoni.

(21)

L-ebda esportatur/produttur fir-RPĊ ma pprovda l-informazzjoni mitluba u lanqas ma kkoopera fl-investigazzjoni fil-limiti ta’ żmien stabbiliti fin-Notifika ta’ Bidu.

(22)

Il-Kummissjoni nnotifikat lill-Missjoni tar-Repubblika tal-Poplu taċ-Ċina li minħabba n-nuqqas ta’ kwalunkwe kooperazzjoni mill-esportaturi/produtturi fir-RPĊ, kien beħsiebha tapplika l-Artikolu 18 tar-Regolament bażiku u għalhekk tibbaża s-sejbiet tagħha dwar il-kontinwazzjoni jew ir-rikorrenza ta’ dumping u ħsara fir-rigward tal-esportaturi/produtturi fir-RPĊ fuq il-fatti disponibbli.

(23)

Il-Kummissjoni bagħtet kwestjonarji lill-gvern tar-RPĊ (“GTĊ”) u lill-erba’ produtturi tal-Unjoni inklużi fil-kampjun. Il-GTĊ ma pprovda l-ebda tweġiba għall-kwestjonarju. Tliet produtturi tal-Unjoni inklużi fil-kampjun ipprovdew tweġibiet għall-kwestjonarju.

(24)

Il-Kummissjoni fittxet u vverifikat l-informazzjoni kollha li qieset neċessarja għad-determinazzjoni tal-probabbiltà ta’ kontinwazzjoni jew ta’ rikorrenza ta’ dumping u ta’ dannu u għad-determinazzjoni tal-interess tal-Unjoni. Twettqu żjarat ta’ verifika fuq il-post tal-partijiet interessati li ġejjin:

Produtturi tal-Unjoni:

(25)

Fid-dawl tal-evidenza suffiċjenti disponibbli fil-bidu tal-investigazzjoni li tindika l-eżistenza ta’ distorsjonijiet sinifikanti skont it-tifsira tal-Artikolu 2(6a)(b) tar-Regolament bażiku, il-Kummissjoni nediet l-investigazzjoni abbażi tal-Artikolu 2(6a) tar-Regolament bażiku. Sabiex tikseb l-informazzjoni li tqis bħala meħtieġa għall-investigazzjoni tagħha fir-rigward tal-allegati distorsjonijiet sinifikanti skont it-tifsira tal-Artikolu 2(6a)(b) tar-Regolament bażiku, il-Kummissjoni bagħtet kwestjonarju lill-GTĊ. Barra minn hekk, fil-punt 5.3.2 tan-Notifika ta’ Bidu, il-Kummissjoni stiednet lill-partijiet interessati kollha jressqu l-fehmiet tagħhom, jippreżentaw informazzjoni u jipprovdu evidenza ta’ sostenn fir-rigward tal-applikazzjoni tal-Artikolu 2(6a) tar-Regolament bażiku fi żmien 37 jum mid-data tal-pubblikazzjoni tan-Notifika ta’ Bidu f’Il-Ġurnal Uffiċjali tal-Unjoni Ewropea. Fir-rigward tas-sorsi rilevanti, il-Kummissjoni stiednet lill-produtturi kollha fil-pajjiż ikkonċernat biex jipprovdu l-informazzjoni mitluba fl-Anness III tan-Notifika ta’ Bidu fi żmien 15-il jum mid-data tal-pubblikazzjoni tan-Notifika ta’ Bidu.

(26)

Ma waslet l-ebda tweġiba għall-kwestjonarju mill-GTĊ. Ma saret l-ebda preżentazzjoni tal-informazzjoni mitluba fl-Anness III tan-Notifika ta’ Bidu, u lanqas dwar l-adegwatezza tal-użu tal-Artikolu 2(6a) tar-Regolament bażiku, fl-iskadenzi previsti.

(27)

Fil-punt 5.3.2 tan-Notifika ta’ Bidu, il-Kummissjoni speċifikat ukoll li, fid-dawl tal-evidenza disponibbli, din jista’ jkollha bżonn tagħżel pajjiż rappreżentattiv xieraq skont l-Artikolu 2(6a)(a) tar-Regolament bażiku bil-għan li tiddetermina l-valur normali abbażi ta’ prezzijiet jew ta’ punti ta’ riferiment mingħajr distorsjoni.

(28)

Fis-6 ta’ Settembru 2018, il-Kummissjoni informat lill-partijiet interessati permezz ta’ nota (“in-Nota tas-6 ta’ Settembru”) dwar is-sorsi rilevanti li kien beħsiebha tuża biex tiddetermina l-valur normali. F’dik in-nota, il-Kummissjoni pprovdiet lista tal-fatturi kollha tal-produzzjoni, bħall-materjal prima, il-manodopera u l-enerġija li jintużaw fil-produzzjoni tat-twavel għall-mogħdija mill-produtturi esportaturi. Barra minn hekk, abbażi tal-kriterji li jiggwidaw l-għażla tal-prezzijiet jew tal-punti ta’ riferiment mingħajr distorsjoni, il-Kummissjoni identifikat tliet pajjiżi rappreżentattivi potenzjali: il-Brażil, is-Serbja u t-Turkija.

(29)

Il-Kummissjoni tat l-opportunità lill-partijiet interessati kollha biex jikkummentaw. Il-Kummissjoni rċeviet kummenti mingħand wieħed mill-applikanti.

(30)

Il-Kummissjoni, kif spjegat fil-premessi (105)-(106), indirizzat il-kummenti li waslu mingħand l-applikant fit-tieni nota dwar is-sorsi għad-determinazzjoni tal-valur normali datata s-26 ta’ Ottubru 2018 (“in-Nota tas-26 ta’ Ottubru”). Fin-Nota tas-26 ta’ Ottubru, il-Kummissjoni stabbiliet il-lista tal-fatturi tal-produzzjoni u kkonkludiet li, f’dak l-istadju, it-Turkija kienet l-aktar pajjiż rappreżentattiv xieraq skont l-ewwel inċiż tal-Artikolu 2(6a)(a) tar-Regolament bażiku. Il-Kummissjoni stiednet lill-partijiet interessati biex jikkummentaw. Ma wasal l-ebda kumment.

(31)

Fl-4 ta’ Lulju 2019, il-Kummissjoni żvelat il-fatti u l-kunsiderazzjonijiet essenzjali li fuq il-bażi tagħhom kien beħsiebha żżomm id-dazji anti-dumping (“żvelar finali”). Il-partijiet kollha ngħataw perjodu li fih setgħu jikkummentaw dwar l-iżvelar.

(32)

Ma ġie riċevut l-ebda kumment li jikkontesta s-sejbiet tal-Kummissjoni.

(33)

Il-prodott soġġett għal dan ir-rieżami ta’ skadenza huwa twavel għall-mogħdija, kemm jekk bis-saqajn jew mingħajrhom, b’wiċċ jew le minn fejn joħroġ il-fwar u/jew is-sħana u/jew l-arja, inklużi twavel għall-kmiem, u l-partijiet essenzjali tagħhom, jiġifieri s-saqajn, il-wiċċ u fejn tisserraħ il-ħadida (“il-prodott taħt rieżami”), li bħalissa jaqgħu taħt il-kodiċijiet NM ex 3924 90 00, ex 4421 99 99, ex 7323 93 00, ex 7323 99 00, ex 8516 79 70 u ex 8516 90 00 (kodiċijiet TARIC 3924900010, 4421999910, 7323930010, 7323990010, 8516797010 u 8516900051), u li joriġinaw mir-Repubblika tal-Poplu taċ-Ċina.

(34)

L-investigazzjoni tar-rieżami attwali kkonfermat li, kif stabbilit fl-investigazzjonijiet oriġinali, it-twavel għall-mogħdija prodotti u mibjugħa fis-suq domestiku fiċ-Ċina u fil-pajjiż rappreżentattiv tat-Turkija, u t-twavel għall-mogħdija prodotti u mibjugħa mill-industrija tal-Unjoni fis-suq tal-UE għandhom l-istess karatteristiċi fiżiċi u tekniċi bażiċi u l-istess użi bażiċi.

(35)

Għalhekk, dawn il-prodotti huma meqjusa bħala prodotti simili skont it-tifsira tal-Artikolu 1(4) tar-Regolament bażiku.

(36)

F’konformità mal-Artikolu 11(2) tar-Regolament bażiku, il-Kummissjoni eżaminat jekk huwiex probabbli li l-iskadenza tal-miżuri fis-seħħ twassal għal kontinwazzjoni jew rikorrenza tad-dumping mir-RPĊ.

(37)

L-ebda wieħed mill-esportaturi/produtturi Ċiniżi ma kkoopera fl-investigazzjoni. Dawn naqsu milli jippreżentaw kwalunkwe informazzjoni jew jipprovdu evidenza ta’ sostenn fir-rigward tal-allegati distorsjonijiet sinifikanti skont it-tifsira tal-Artikolu 2(6a)(b) tar-Regolament bażiku. Bl-istess mod, l-ebda wieħed mill-produtturi esportaturi ma ppreżenta tweġiba għall-kwestjonarju.

(38)

Il-GTĊ ma pprovda l-ebda tweġiba għall-kwestjonarju u lanqas ma indirizza l-evidenza fil-fajl tal-każ ipprovdut mill-applikant, inkluż id-“Dokument ta’ Ħidma tal-Persunal tal-Kummissjoni dwar Distorsjonijiet Sinifikanti fl-Ekonomija tar-Repubblika tal-Poplu taċ-Ċina għall-Finijiet tal-Investigazzjonijiet għad-Difiża tal-Kummerċ” (“ir-Rapport”) (13).

(39)

Fis-27 ta’ Lulju 2018, il-Kummissjoni informat lill-Missjoni tar-Repubblika tal-Poplu taċ-Ċina li, minħabba n-nuqqas ta’ kwalunkwe kooperazzjoni mill-esportaturi/produtturi fir-RPĊ, kien beħsiebha tibbaża s-sejbiet tagħha fuq il-fatti disponibbli skont l-Artikolu 18 tar-Regolament bażiku. Il-Kummissjoni enfasizzat ukoll li sejba bbażata fuq il-fatti disponibbli tista’ tkun inqas favorevoli għall-parti kkonċernata u stednithom biex jikkummentaw. Il-Missjoni tar-Repubblika tal-Poplu taċ-Ċina ma pprovdiet l-ebda kumment.

(40)

Abbażi ta’ dan, skont l-Artikolu 18(1) tar-Regolament bażiku, is-sejbiet fir-rigward tal-probabbiltà ta’ kontinwazzjoni jew ta’ rikorrenza ta’ dumping stabbiliti hawn taħt kienu bbażati fuq il-fatti disponibbli, b’mod partikolari, fuq l-informazzjoni inkluża fit-talba għal rieżami u l-istatistika bbażata fuq id-data rrapportata lill-Kummissjoni mill-Istati Membri skont l-Artikolu 14(6) tar-Regolament bażiku (“il-bażi tad-data msemmija fl-Artikolu 14(6)”), kif ukoll l-istatistika bbażata fuq id-data tal-esportazzjoni rrapportata mill-bażi tad-data uffiċjali tad-dwana Ċiniża (“il-bażi tad-data Ċiniża”). Barra minn hekk, il-Kummissjoni użat sorsi oħra ta’ informazzjoni disponibbli għall-pubbliku bħall-bażijiet tad-data Global Trade Atlas (14) (“GTA”) u l-Orbis Bureau van Dijk (15) (“Orbis”).

(41)

Skont l-Artikolu 2(1) tar-Regolament bażiku, “il-valur normali għandu normalment ikun ibbażat fuq il-prezzijiet imħallsa jew pagabbli, fil-kors ordinarju tal-kummerċ, minn klijenti indipendenti fil-pajjiż esportatu r”.

(42)

Madankollu, skont l-Artikolu 2(6a)(a) tar-Regolament bażiku, “(f)il-każ li jiġi determinat […] li mhuwiex xieraq li jintużaw prezzijiet u kostijiet domestiċi fil-pajjiż esportatur minħabba l-eżistenza f’dak il-pajjiż ta’ distorsjonijiet sinifikanti fis-sens tal-punt (b), il-valur normali għandu jiġi kkalkolat esklużivament abbażi tal-kostijiet tal-produzzjoni u tal-bejgħ li jirriflettu prezzijiet jew valuri ta’ riferiment mingħajr distorsjon i”, u “għandu jinkludi ammont raġonevoli u mingħajr distorsjoni għal kostijiet amministrattivi, tal-bejgħ u ġenerali u għal profitt i”.

(43)

Kif spjegat aktar fid-dettall fit-Taqsima 4.2, f’din l-investigazzjoni l-Kummissjoni kkonkludiet li, abbażi tal-evidenza disponibbli, l-applikazzjoni tal-Artikolu 2(6a) tar-Regolament bażiku kienet xierqa.

(44)

L-Artikolu 2(6a)(b) tar-Regolament bażiku jiddefinixxi “d-distorsjonijiet sinifikanti huma dawk id-distorsjonijiet li jseħħu meta prezzijiet jew kostijiet irrappurtati, inklużi l-kostijiet ta’ materji primi u ta’ enerġija, ma jkunux ir-riżultat ta’ forzi tas-suq ħieles għax ikunu affettwati minn intervent sostanzjali tal-gvern. Meta tkun valutata l-eżistenza ta’ distorsjonijiet sinifikanti għandha tingħata attenzjoni, inter alia, lill-impatt potenzjali ta’ element wieħed jew aktar mis-segwenti:

(45)

Skont l-Artikolu 2(6a)(b) tar-Regolament bażiku, il-valutazzjoni tal-eżistenza ta’ distorsjonijiet sinifikanti skont it-tifsira tal-Artikolu 2(6a)(a) għandha tqis, fost l-oħrajn, il-lista mhux eżawrjenti ta’ elementi fid-dispożizzjoni ta’ qabel. Skont l-Artikolu 2(6a)(b) tar-Regolament bażiku, fil-valutazzjoni tal-eżistenza ta’ distorsjonijiet sinifikanti, għandhom jitqiesu l-impatt potenzjali ta’ wieħed jew aktar minn dawn l-elementi fuq il-prezzijiet u l-kostijiet fil-pajjiż esportatur tal-prodott taħt rieżami. Fil-fatt, billi dik il-lista mhijiex kumulattiva, m’hemmx bżonn li jitqiesu l-elementi kollha biex ikun hemm sejba ta’ distorsjonijiet sinifikanti. Barra minn hekk, l-istess ċirkostanzi fattwali jistgħu jintużaw biex juru l-eżistenza ta’ element wieħed jew aktar tal-lista. Madankollu, kwalunkwe konklużjoni dwar distorsjonijiet sinifikanti skont it-tifsira tal-Artikolu 2(6a)(a) għandha ssir abbażi tal-evidenza kollha inkwistjoni. Il-valutazzjoni ġenerali dwar l-eżistenza ta’ distorsjonijiet tista’ tqis ukoll il-kuntest u s-sitwazzjoni ġenerali fil-pajjiż esportatur, b’mod partikolari meta l-kunċett ta’ “ekonomija tas-suq soċjalista” stabbilit fil-Kostituzzjoni Ċiniża u fis-sistema legali kollha jipprovdi lill-gvern setgħat sostanzjali biex jintervjeni fl-ekonomija b’tali mod li l-prezzijiet u l-kostijiet ma jirriżultawx mill-iżvilupp liberu tal-forzi tas-suq.

(46)

L-Artikolu 2(6a)(c) tar-Regolament bażiku jipprevedi li “[f]ejn il-Kummissjoni jkollha indikazzjonijiet fondati sew tal-eżistenza potenzjali ta’ distorsjonijiet sinifikanti kif imsemmija fil-punt (b) f’ċertu pajjiż jew f’ċertu settur f’dak il-pajjiż, u fejn ikun xieraq għall-applikazzjoni effettiva ta’ dan ir-Regolament, il-Kummissjoni għandha tipproduċi, tippubblika u taġġorna regolarment rapport li jiddeskrivi ċ-ċirkostanzi tas-suq imsemmija fil-punt (b) f’dak il-pajjiż jew settu r”.

(47)

Il-partijiet interessati kienu mistiedna biex jirribattu, jikkummentaw jew jissupplimentaw l-evidenza li kienet inkluża fil-fajl tal-investigazzjoni fil-mument tal-bidu. F’dak ir-rigward, preċedentement il-Kummissjoni pproduċiet ir-Rapport. Ir-Rapport jindika l-eżistenza ta’ intervent sostanzjali tal-gvern f’ħafna livelli tal-ekonomija, inklużi distorsjonijiet speċifiċi f’ħafna fatturi ewlenin tal-produzzjoni (bħall-art, l-enerġija, il-kapital, il-materja prima u l-manodopera), kif ukoll f’setturi speċifiċi (bħas-settur tal-azzar jew tal-kimika). Ir-Rapport tqiegħed fil-fajl tal-investigazzjoni fl-istadju tal-bidu.

(48)

It-talba tal-applikant appoġġjat ukoll l-allegazzjonijiet dwar distorsjonijiet sinifikanti skont it-tifsira tal-Artikolu 2(6a)(b) imsemmi hawn fuq, f’konformità mar-Rapport, b’mod partikolari fir-rigward tad-distorsjonijiet fis-settur tal-azzar, b’mod partikolari minħabba l-fatt li, skont l-applikant, l-azzar irrappreżenta mill-inqas 40 % tal-kostijiet totali tal-manifattura tal-produtturi tat-twavel għall-mogħdija.

(49)

Il-Kummissjoni eżaminat jekk kienx xieraq li jintużaw prezzijiet u kostijiet domestiċi fiċ-Ċina, minħabba l-eżistenza ta’ distorsjonijiet sinifikanti skont it-tifsira tal-Artikolu 2(6a)(b) tar-Regolament bażiku. Il-Kummissjoni għamlet dan abbażi tal-evidenza disponibbli fil-fajl, inkluża l-evidenza inkluża fir-Rapport, li tiddependi fuq sorsi disponibbli għall-pubbliku. Dik l-analiżi kopriet l-eżami tal-interventi sostanzjali tal-gvern fl-ekonomija tar-RPĊ b’mod ġenerali, iżda wkoll is-sitwazzjoni speċifika tas-suq fis-settur rilevanti, inkluż il-prodott taħt rieżami.

(50)

Il-GTĊ naqas milli jikkummenta jew jipprovdi evidenza li tappoġġja jew tirribatti l-evidenza li teżisti fil-fajl tal-każ, inkluż ir-Rapport.

(51)

Is-sistema ekonomika Ċiniża hija bbażata fuq il-kunċett ta’ “ekonomija tas-suq soċjalist a”. Dak il-kunċett huwa stabbilit fil-Kostituzzjoni Ċiniża u jiddetermina l-governanza ekonomika taċ-Ċina. Il-prinċipju ewlieni huwa s-“sjieda pubblika soċjalista tal-mezzi tal-produzzjoni, jiġifieri s-sjieda min-nies kollha u s-sjieda kollettiva mill-persuni li jaħdm u”. L-ekonomija tal-Istat hija “l-forza mexxejja tal-ekonomija nazzjonal i” u l-Istat għandu l-mandat “li jiżgura l-konsolidazzjoni u t-tkabbir tagħh a” (16). Konsegwentement, l-istruttura ġenerali tal-ekonomija Ċiniża mhux biss tippermetti interventi sostanzjali tal-gvern fl-ekonomija, iżda li tali interventi jsiru b’mod espliċitu. Il-kunċett ta’ supremazija tas-sjieda pubblika fuq is-sjieda privata huwa mifrux fis-sistema legali sħiħa u huwa enfasizzat bħala prinċipju ġenerali fil-partijiet fundamentali kollha tal-leġiżlazzjoni. Il-liġi Ċiniża fil-qasam tal-proprjetà hija eżempju ċar: din tirreferi għall-istadju primarju tas-soċjaliżmu u tafda lill-Istat bil-ħarsien tas-sistema ekonomika bażika li skontha s-sjieda pubblika għandha rwol dominanti. Forom oħra ta’ sjieda huma tollerati, fejn il-liġi tippermettilhom jiżviluppaw spalla ma’ spalla mas-sjieda tal-Istat (17).

(52)

Barra minn hekk, skont il-leġiżlazzjoni Ċiniża, l-ekonomija tas-suq soċjalista hija żviluppata taħt it-tmexxija tal-Partit Komunista Ċiniż (CCP). L-istruttura tal-Istat Ċiniż u tas-CCP huma marbutin ma’ xulxin f’kull livell (legali, istituzzjonali, personali), li jiffurmaw superstruttura li fiha ma tkunx tista’ ssir distinzjoni bejn ir-rwoli tas-CCP u tal-Istat. Wara emenda tal-Kostituzzjoni Ċiniża f’Marzu 2018, ir-rwol mexxej tas-CCP ingħata prominenza saħansitra akbar billi ġie affermat mill-ġdid fit-test tal-Artikolu 1 tal-Kostituzzjoni. Wara l-ewwel sentenza diġà eżistenti tad-dispożizzjoni: “is-sistema soċjalista hija s-sistema bażika tar-Repubblika Popolari taċ-Ċin a”, iddaħħlet it-tieni sentenza ġdida li taqra: “[il-]karatteristika li tiddefinixxi s-soċjaliżmu b’karatteristiċi Ċiniżi hi t-tmexxija tal-Partit Komunista taċ-Ċina.” (18) Dan juri l-kontroll inkontestat u dejjem akbar tas-CCP fuq is-sistema ekonomika taċ-Ċina. Din it-tmexxija u l-kontroll huma inerenti għas-sistema Ċiniża u jmorru ferm lil hinn mis-sitwazzjoni abitwali fil-pajjiżi l-oħra fejn il-gvernijiet jeżerċitaw kontroll makroekonomiku ġenerali li fil-limitazzjonijiet tiegħu hemm forzi tas-suq ħieles.

(53)

L-Istat Ċiniż iwettaq politika ekonomika intervenzjonista biex isegwi għanijiet li jikkoinċidu mal-aġenda politika stipulata mis-CCP, minflok ma jirrifletti l-kundizzjonijiet ekonomiċi prevalenti f’suq ħieles (19). L-għodod ekonomiċi intervenzjonisti li jintużaw mill-awtoritajiet Ċiniżi jinqasmu f’diversi friegħi, inklużi s-sistema tal-ippjanar industrijali, is-sistema finanzjarja, kif ukoll fil-livell tal-ambjent regolatorju.

(54)

L-ewwel, fil-livell ta’ kontroll amministrattiv globali, id-direzzjoni tal-ekonomija Ċiniżi hija rregolata minn sistema kumplessa ta’ ppjanar industrijali li jaffettwa l-attivitajiet ekonomiċi kollha fil-pajjiż. It-totalità ta’ dawn il-pjanijiet tkopri matriċi komprensiv u kumpless ta’ setturi u politiki trażversali u hija preżenti fil-livelli kollha tal-gvern. Il-pjanijiet fil-livell provinċjali huma dettaljati filwaqt li l-pjanijiet nazzjonali jistabbilixxu miri usa’. Il-pjanijiet jispeċifikaw ukoll il-mezzi biex jiġu appoġġjati l-industriji/is-setturi rilevanti kif ukoll il-perjodi ta’ żmien li fihom jeħtieġ li jintlaħqu l-objettivi. Xi pjanijiet għadhom jinkludu miri espliċiti tal-output, filwaqt li din kienet karatteristika regolari fiċ-ċikli tal-ippjanar preċedenti. Skont il-pjanijiet, is-setturi u/jew il-proġetti industrijali individwali qed jiġu identifikati bħala prijoritajiet (pożittivi jew negattivi) skont il-prijoritajiet tal-gvern u l-għanijiet ta’ żvilupp speċifiċi attribwiti lilhom (aġġornament industrijali, espansjoni industrijali, eċċ.). L-operaturi ekonomiċi, privati u tal-Istat kollha kemm huma għandhom jaġġustaw b’mod effettiv l-attivitajiet kummerċjali tagħhom skont ir-realtajiet imposti mis-sistema tal-ippjanar. Dan mhuwiex biss minħabba n-natura vinkolanti tal-pjanijiet iżda anke minħabba l-fatt li l-awtoritajiet Ċiniżi rilevanti fil-livelli kollha tal-gvern jaderixxu mas-sistema ta’ pjanijiet u jużaw is-setgħat mogħtija lilhom skont kif ikun meħtieġ, u b’hekk jisfurzaw lill-operaturi ekonomiċi jikkonformaw mal-prijoritajiet stabbiliti fil-pjanijiet (ara wkoll it-Taqsima 3.2.2.5) (20).

(55)

It-tieni, fil-livell tal-allokazzjoni tar-riżorsi finanzjarji, is-sistema finanzjarja taċ-Ċina hija ddominata mill-banek kummerċjali tal-Istat. Dawk il-banek, meta jkunu qed jistabbilixxu u jimplementaw il-politika tas-self tagħhom, jeħtieġ li jallinjaw ruħhom mal-objettivi tal-politika industrijali tal-gvern minflok ma primarjament jivvalutaw il-merti ekonomiċi ta’ proġett partikolari (ara wkoll it-taqsima 3.2.2.8) (21). L-istess japplika għall-komponenti l-oħra tas-sistema finanzjarja Ċiniża, bħas-swieq tal-istokks, is-swieq tal-bonds, is-swieq tal-ekwità privata, eċċ. Barra minn hekk, dawn il-partijiet tas-settur finanzjarju għajr is-settur bankarju huma istituzzjonalment u operazzjonalment stabbiliti b’mod li mhuwiex xprunat biex itejjeb il-funzjonament effiċjenti tas-swieq finanzjarji iżda biex jiżgura l-kontroll u jippermetti l-intervent mill-Istat u mis-CCP (22).

(56)

It-tielet, fil-livell tal-ambjent regolatorju, l-interventi mill-Istat fl-ekonomija jieħdu għadd ta’ forom. Pereżempju, ir-regoli tal-akkwist pubbliku jintużaw regolarment sabiex jintlaħqu għanijiet ta’ politika għajr l-effiċjenza ekonomika, u b’hekk idgħajfu l-prinċipji bbażati fuq is-suq fil-qasam. Il-leġiżlazzjoni applikabbli tipprevedi b’mod speċifiku li l-akkwist pubbliku għandu jsir sabiex jiġi ffaċilitat l-ilħuq tal-għanijiet imfassla mill-politiki tal-Istat. Madankollu, in-natura ta’ dawn l-għanijiet għadha mhix iddefinita, u b’hekk tħalli marġni wiesa’ ta’ apprezzament għall-korpi tat-teħid ta’ deċiżjonijiet (23). Bl-istess mod, fil-qasam tal-investiment, il-gvern Ċiniż iżomm kontroll u influwenza sinifikanti fuq id-destinazzjoni u d-daqs kemm tal-investiment tal-Istat kif ukoll tal-investiment privat. L-iskrinjar tal-investiment, kif ukoll diversi inċentivi, restrizzjonijiet, u projbizzjonijiet relatati mal-investiment jintużaw mill-awtoritajiet bħala għodda importanti biex jiġu appoġġjati l-għanijiet tal-politika industrijali, bħaż-żamma tal-kontroll tal-Istat fuq setturi ewlenin jew it-tisħiħ tal-industrija domestika (24).

(57)

Fil-qosor, il-mudell ekonomiku Ċiniż huwa bbażat fuq ċerti assjomi bażiċi li jipprevedu u jħeġġu interventi tal-gvern li jinqasmu f’diversi friegħi. Tali interventi sostanzjali tal-gvern jinsabu f’kunflitt mal-azzjoni libera tal-forzi tas-suq, li jirriżulta fid-distorsjoni tal-allokazzjoni effettiva tar-riżorsi f’konformità mal-prinċipji tas-suq (25).

(58)

Fir-RPĊ, l-intrapriżi li joperaw taħt is-sjieda, il-kontroll u/jew is-superviżjoni jew il-gwida tal-politika mill-Istat, jirrappreżentaw parti essenzjali mill-ekonomija.

(59)

Fir-rigward tas-sjieda tal-Istat fis-settur tat-twavel għall-mogħdija, kif stabbilit mir-rieżami ta’ skadenza preċedenti, l-għadd ta’ produtturi ta’ twavel għall-mogħdija fiċ-Ċina huwa potenzjalment għoli. Fin-nuqqas ta’ kwalunkwe informazzjoni ppreżentata mill-GTĊ dwar is-settur, u minħabba n-natura fframmentata tiegħu, huwa diffiċli li jitfasslu konklużjonijiet ġenerali dwar il-mudelli ta’ sjieda tas-settur. Madankollu, fir-rigward tal-fornituri ta’ inputs għall-produzzjoni tal-prodott taħt rieżami, kif ippreżentat mill-applikant, l-inputs tal-azzar jikkostitwixxu bejn 40 u 60 % tal-kostijiet tal-manifattura tal-produtturi tat-twavel għall-mogħdija. Għalhekk, il-prezzijiet tal-azzar huma fattur sinifikanti tal-kost fil-proċess tal-produzzjoni tat-twavel għall-mogħdija. Kif stabbilit mill-Kummissjoni fir-Rapport tagħha, jippersisti livell sostanzjali ta’ sjieda mill-gvern Ċiniż fis-settur tal-azzar. Għadd ta’ produtturi ewlenin huma l-proprjetà tal-Istat, filwaqt li xi wħud jissemmew b’mod speċifiku fil-“Pjan għall-Aġġustament u t-Titjib tal-Industrija tal-Azzar għall-perjodu 2016-2020” (26) bħala eżempji tal-kisbiet tat-12-il perjodu ta’ ppjanar ta’ ħames snin (bħal Baosteel, Anshan Iron and Steel, Wuhan Iron and Steel, eċċ.). Filwaqt li l-qasma nominali bejn l-għadd ta’ intrapriżi tal-Istat (“SOEs”) u kumpaniji privati hija stmata li hija kważi ugwali, erbgħa mill-ħames produtturi tal-azzar Ċiniżi kklassifikati mal-aqwa għaxra tal-akbar produtturi tal-azzar fid-dinja huma SOEs (27). Għalhekk, il-produzzjoni tal-komponent ewlieni tat-twavel għall-mogħdija hija soġġetta għal sjieda tal-Istat sinifikanti u għalhekk għal intervent mill-Istat.

(60)

Fir-rigward tal-kontroll mill-Istat, il-gvern u s-CCP iħaddnu strutturi li jiżguraw l-influwenza kontinwa tagħhom fuq l-intrapriżi, inklużi dawk li jipproduċu twavel għall-mogħdija u l-komponenti tagħhom. L-Istat (u f’ħafna aspetti anke s-CCP) mhux biss jifformula u jissorvelja b’mod attiv l-implimentazzjoni tal-politiki ekonomiċi ġenerali minn intrapriżi individwali, iżda jiddikjara wkoll id-drittijiet tiegħu li jipparteċipa fit-teħid ta’ deċiżjonijiet operazzjonali tagħhom, u b’hekk jeżerċita ċertu livell ta’ kontroll fuq l-intrapriżi Ċiniżi (28). L-elementi li jindikaw l-eżistenza ta’ dan il-kontroll mill-gvern fuq l-intrapriżi fis-settur tal-produzzjoni tat-twavel għall-mogħdija kif ukoll fis-setturi tagħhom li jfornu l-inputs huma żviluppati aktar fit-Taqsima 3.2.2.4. Barra minn hekk, speċifikament fil-każ ta’ wieħed mill-komponenti ewlenin li jintużaw fit-twavel għall-mogħdija – tubi wweldjati tal-azzar, li jirrappreżentaw bejn 25 u 30 % tal-kost totali tal-manifattura – il-Kummissjoni preċedentement stabbiliet interferenza mill-Istat anke meta ma kien hemm l-ebda sjieda tal-Istat jew sjieda parzjali tal-Istat tal-kumpaniji produtturi, li rriżulta f’deċiżjonijiet kummerċjali li ma ttieħdux b’reazzjoni għas-sinjali tas-suq (29). L-investigazzjoni wasslet għall-konklużjoni li kien hemm interferenza sinifikanti mill-Istat fis-settur Ċiniż tat-tubi wweldjati tal-azzar, li jservi fil-biċċa kbira tiegħu l-produtturi tat-twavel għall-mogħdija, u li din taffettwa l-kostijiet tagħhom.

(61)

Fir-rigward tas-superviżjoni u l-gwida tal-politika mill-Istat fis-settur tal-produzzjoni tat-twavel għall-mogħdija u s-settur tal-azzar li huwa l-fornitur ewlieni tal-inputs, l-analiżi hija stabbilita fit-Taqsimiet 3.2.2.4 u 3.2.2.5 hawn taħt. Bil-livell għoli ta’ kontroll u intervent mill-gvern f’dawn is-setturi tal-aħħar kif deskritt f’dawn it-taqsimiet, anke l-produtturi tat-twavel għall-mogħdija bi sjieda privata huma mwaqqfa milli joperaw skont il-kundizzjonijiet tas-suq.

(62)

Għaldaqstant, il-Kummissjoni kkonkludiet li s-suq tat-twavel għall-mogħdija u dak tal-fornituri ewlenin tiegħu fir-RPĊ kien servut f’miżura sinifikanti minn intrapriżi soġġetti għal sjieda, kontroll jew superviżjoni jew gwida tal-politika mill-gvern Ċiniż. Barra minn hekk, il-Kummissjoni kkonkludiet li s-suq tal-komponenti ewlenin tal-azzar tat-twavel għall-mogħdija huwa sa punt sinifikanti servut minn intrapriżi li joperaw taħt is-sjieda, il-kontroll jew is-superviżjoni jew il-gwida tal-politika tal-awtoritajiet.

(63)

L-Istat Ċiniż qiegħed f’pożizzjoni li jinterferixxi fil-prezzijiet u fil-kostijiet permezz tal-preżenza tal-Istat fid-ditti. B’mod partikolari, iċ-ċelloli tas-CCP fl-intrapriżi, kemm jekk tal-Istat kif ukoll privati, jirrappreżentaw mezz importanti li permezz tiegħu l-Istat jista’ jinterferixxi fid-deċiżjonijiet kummerċjali. Skont il-liġi tal-kumpaniji tar-RPĊ, f’kull kumpanija għandha tiġi stabbilita organizzazzjoni tas-CCP (li jkollha mill-anqas tliet membri tas-CCP kif speċifikat fil-Kostituzzjoni tas-CCP (30)) u l-kumpanija għandha tipprovdi l-kundizzjonijiet meħtieġa għall-attivitajiet tal-organizzazzjoni tal-partit. Fil-passat, jidher li dan ir-rekwiżit mhux dejjem ġie segwit jew infurzat b’mod strett. Madankollu, minn tal-inqas l-2016, is-CCP saħħaħ il-pretensjonijiet tiegħu li jikkontrolla d-deċiżjonijiet kummerċjali fl-SOEs bħala kwistjoni ta’ prinċipju politiku. Huwa rrapportat ukoll li s-CCP jeżerċita pressjoni fuq il-kumpaniji privati biex jagħmlu l-“patrijottiżmu” prijorità u jsegwu d-dixxiplina tal-partit (31). Fl-2017, ġie rrapportat li kienu jeżistu ċelloli tal-partiti f’madwar 70 % ta’ madwar 1,86 miljun kumpanija bi sjieda privata, li rriżulta fi pressjoni dejjem akbar biex l-organizzazzjonijiet tas-CCP ikollhom l-aħħar kelma fir-rigward tad-deċiżjonijiet kummerċjali fil-kumpaniji rispettivi tagħhom (32). Dawn ir-regoli għandhom applikazzjoni ġenerali fl-ekonomija Ċiniża kollha, fost is-setturi kollha, inkluż is-settur tal-manifattura tat-twavel għall-mogħdija. Għaldaqstant, huwa stabbilit li dawn ir-regoli japplikaw ukoll għall-produtturi tat-twavel għall-mogħdija u għall-fornituri tal-inputs tagħhom.

(64)

Pereżempju, l-istrutturi tas-CCP jikkoinċidu personalment mal-korp maniġerjali fil-każ ta’ mill-inqas produttur wieħed tat-twavel għall-mogħdija - Since Hardware (Guangzhou) Co. Ltd. - li jiddikjara “rwol ewlieni” fis-suq, kemm fir-rigward tal-operazzjonijiet tal-produzzjoni kif ukoll dawk tal-esportazzjoni (33). Il-Kummissjoni sabet li l-President tal-Bord tad-Diretturi u d-Direttur Eżekuttiv tal-kumpanija kien membru tal-Kumitat Konsultattiv Politiku tal-Poplu Muniċipali ta’ Guangzhou, u membru tal-Kumitat Permanenti tal-Kumitat Konsultattiv Politiku tal-Poplu tad-distrett ta’ Guangzhou Huadu (34).

(65)

Dawn il-fatturi jindikaw direttament l-eżistenza tal-interferenzi tal-gvern, permezz ta’, pereżempju, il-preżenza u l-involviment tas-CCP, sal-interferenza mill-GTĊ fil-prezzijiet u l-kostijiet fil-produzzjoni tat-twavel għall-mogħdija.

(66)

Il-preżenza tal-Istat u l-intervent mill-Istat fis-swieq finanzjarji (ara wkoll it-Taqsima 3.2.2.8) kif ukoll fil-provvista ta’ materja prima u ta’ inputs iħallu effett addizzjonali ta’ distorsjoni fuq is-suq (35). B’mod partikolari, fir-rigward tal-komponenti tal-azzar tat-twavel għall-mogħdija, il-Kummissjoni sabet f’investigazzjonijiet reċenti li jeżistu rabtiet mill-qrib bejn il-proċessi tat-teħid ta’ deċiżjonijiet tal-manifatturi Ċiniżi tal-prodotti tal-azzar u l-Istat, b’mod partikolari s-CCP (36).

(67)

Abbażi ta’ dawn kollha ta’ hawn fuq, u fin-nuqqas ta’ kooperazzjoni u informazzjoni li topponi s-sejba preliminari ta’ hawn fuq, f’dan l-istadju l-Kummissjoni kkonkludiet li l-preżenza tal-Istat fid-ditti Ċiniżi, inkluż fis-settur tal-produzzjoni tat-twavel għall-mogħdija, kif ukoll fis-settur finanzjarju u setturi oħra tal-input, flimkien mal-qafas deskritt fit-Taqsima 3.2.2.3 u fit-taqsimiet sussegwenti, tippermetti lill-GTĊ jinterferixxi fir-rigward tal-prezzijiet u tal-kostijiet.

(68)

Id-direzzjoni tal-ekonomija Ċiniża hija ddeterminata f’livell sinifikanti minn sistema elaborata ta’ ppjanar li tistabbilixxi prijoritajiet u tippreskrivi l-għanijiet li l-gvernijiet ċentrali u lokali għandhom jiffokaw fuqhom. Jeżistu pjanijiet rilevanti fil-livelli kollha tal-gvern u dawn ikopru virtwalment is-setturi ekonomiċi kollha. L-objettivi stabbiliti mill-istrumenti tal-ippjanar huma ta’ natura vinkolanti u l-awtoritajiet f’kull livell amministrattiv jimmonitorjaw l-implimentazzjoni tal-pjanijiet mil-livell korrispondenti aktar baxx tal-gvern. B’mod ġenerali, is-sistema ta’ ppjanar fiċ-Ċina tirriżulta f’riżorsi mmexxija għal setturi ddeżinjati bħala strateġiċi jew inkella politikament importanti mill-gvern, minflok jiġu allokati f’konformità mal-forzi tas-suq (37).

(69)

Il-Kummissjoni sabet li, filwaqt li deher li ma kienet teżisti l-ebda politika pubblika u/jew dokument ta’ politika speċifiċi għas-settur li jikkonċernaw direttament il-manifattura tat-twavel għall-mogħdija, il-produzzjoni tat-twavel għall-mogħdija kienet għadha soġġetta għal dokumenti ta’ ppjanar ġeneralment ċentrali, kif ġie kkonfermat ukoll minn studju Ċiniż speċjalizzat fis-suq dwar it-twavel għall-mogħdija. (38) Dan l-istudju tal-aħħar iwettaq analiżi speċifika tal-iżvilupp tas-settur abbażi tal-isfond li jiġi ssodisfat it-13-il FYP ċentrali.

(70)

Barra minn hekk, kif ippreżentat mill-applikant, bejn 40 % u 60 % tal-kostijiet li jirriżultaw mill-manifattura tat-twavel għall-mogħdija joriġinaw mid-diversi inputs tal-azzar li jintużaw fil-produzzjoni tat-twavel għall-mogħdija. Minbarra dan, materja prima oħra, inklużi l-inputs kimiċi (ragħwa, plastik, żebgħa jew kisi) kif ukoll l-inputs tat-tessuti (drapp tal-qoton) tinfluwenza l-istruttura tal-kost u tal-ipprezzar fil-produzzjoni tat-twavel għall-mogħdija. F’dak ir-rigward, il-Kummissjoni sabet intervent sinifikanti mill-gvern fil-materja prima li tintuża biex jiġu prodotti t-twavel għall-mogħdija (39). L-għadd kbir ta’ dokumenti u miżuri tal-ordni pubbliku li nstabu għandhom il-potenzjal li jinfluwenzaw l-azzjoni libera tal-forzi tas-suq fis-suq tal-materja prima msemmija, u b’hekk jaffettwaw il-prezzijiet tal-komponenti tat-twavel għall-mogħdija, u bl-istess mod il-kostijiet tal-manifattura tal-prodott taħt rieżami.

(71)

Pereżempju, l-azzar huwa kopert mill-“Pjan għall-Aġġustament u t-Titjib tal-Industrija tal-Azzar għall-perjodu 2016-2020” (it-13-il FYP għall-Azzar”), li jkopri virtwalment l-aspetti kollha tal-iżvilupp tal-industrija, inklużi l-għanijiet tal-kapaċità tal-produzzjoni, l-aġġornament u l-iżgurar ta’ provvista effettiva, ir-ristrutturar tal-industrija, l-appoġġ finanzjarju, il-miri kwantitattivi u l-post ġeografiku tal-fabbriki tal-azzar. Bl-istess mod, it-13-il FYP għall-Industrija Petrokimika u Kimika (2016-2020) jipprevedi regolamentazzjoni stretta tas-settur kimiku, li jkopri l-materja prima li tintuża biex jiġu prodotti elementi tar-roti, bħal-lasktu, iż-żebgħa u l-plastik.

(72)

Barra minn hekk, is-settur tal-azzar huwa kkaratterizzat minn preżenza kbira ta’ SOEs (ara l-premessa (59)). L-azzar huwa rregolat mill-qrib minn għadd ta’ pjanijiet, direttivi u dokumenti oħrajn iffokati fuq l-azzar, li jinħarġu fil-livell nazzjonali, reġjonali u muniċipali, bħall-“Pjan għall-Aġġustament u t-Titjib tal-Industrija tal-Azzar għall-perjodu 2016-2020”. Dan il-Pjan jiddikjara li l-industrija tal-azzar hija “settur importanti u fundamentali tal-ekonomija Ċiniża, pedament nazzjonali” (40).

(73)

Il-“Katalogu għall-Iggwidar tar-Ristrutturar tal-Industrija (Verżjoni tal-2011) (Emenda tal-2013)” (41) (“il-Katalogu”) jelenka l-ħadid u l-azzar bħala industriji mħeġġa. B’mod partikolari l-Katalogu jħeġġeġ “l-iżvilupp u l-applikazzjoni ta’ teknoloġiji għal prodotti tal-azzar bi prestazzjoni aħjar, bi kwalità għolja u għall-aġġornar ta’ dawn, inklużi iżda mhux limitati għal folji awtomobilistiċi b’saħħithom ħafna ta’ mhux anqas minn 600 MPa, azzar għall-pipelines bi prestazzjoni għolja għat-trażmissjoni taż-żejt u tal-gass, pjanċi wesgħin u ħoxnin b’saħħithom ħafna għall-bastimenti, azzar għall-inġinerija marina, pjanċi bi ħxuna moderata ta’ mhux anqas minn 420 MPa għal binjiet, għal pontijiet u għal strutturi oħra, azzar għal binarji ferrovjarji b’veloċità għolja u għal merkanzija tqila, azzar tas-siliċju b’livell baxx ta’ telf ta’ ħadid u b’induzzjoni manjetika għolja, azzar li jiflaħ għall-korrużjoni u għall-użu, azzar inossidabbli li jiffranka r-riżorsi tal-liga (azzar inossidabbli ferritiku modern, azzar inossidabbli dupleks, u azzar inossidabbli tan-nitroġenu), żbarri speċjali tal-azzar u vireg tal-fildiferru għal parts bażiċi bi prestazzjoni għolja (skorfini u boltijiet bi prestazzjoni għolja bi Grad ta’ 12,9 jew aktar, molol b’saħħithom ħafna, u berings b’ħajja twila), u materjali fonduti tal-azzar speċjali ta’ kwalità għolja (azzar tal-għodda u tal-forom, azzar inossidabbli, u azzar għall-makkinarju, fost l-oħrajn )” . L-applikabbiltà tal-Katalogu ġiet ikkonfermata mill-investigazzjoni reċenti kontra s-sussidji ta’ ċerti prodotti ċatti rromblati bis-sħana tal-ħadid, tal-azzar mhux illigat jew ta’ azzar ieħor (“HRF”) li joriġinaw mir-RPĊ (42).

(74)

Is-settur kimiku huwa soġġett ukoll għal intervent qawwi mill-Istat fiċ-Ċina. L-ewwel, dan huwa kkaratterizzat mid-dominanza ta’ SOEs. Xi wħud mill-akbar kumpaniji kimiċi fiċ-Ċina huma SOEs, u s-sjieda tal-Istat tirrappreżenta ishma sinifikanti tal-assi totali tal-kumpaniji kimiċi (43). It-tieni, is-settur kimiku huwa kkontrollat mill-Istat permezz ta’ diversi dokumenti ta’ ppjanar u regolatorji li jinħarġu minn leġiżlaturi u aġenziji amministrattivi sussegwenti fil-livelli kollha tal-gvern. Dawn il-miżuri kollha ta’ ppjanar huma applikati f’diversi livelli amministrattivi b’mod diskrezzjonali, ikkontrollat u sistematiku, u soġġetti għal rieżami kostanti mill-gvern (44).

(75)

Kif speċifikat mill-Kummissjoni fir-Rapport tagħha, id-dokument komprensiv tal-ippjanar li jiġġestixxi s-settur kimiku huwa t-13-il FYP għall-Industrija Petrokimika u Kimika (2016-2020), li nħareġ fit-18 ta’ Ottubru 2016 mill-MIIT. Dan jiggwida l-iżvilupp tal-industrija petrokimika u kimika għall-perjodu bejn l-2016 u l-2020, f’konformità mad-dispożizzjonijiet tat-13-il FYP nazzjonali, u l-istrateġija Magħmula fiċ-Ċina 2025. Il-Pjan imsemmi jistabbilixxi objettivi ta’ żvilupp u jagħti struzzjonijiet dwar il-miri ta’ produzzjoni minn segmenti tal-industrija, iżda jimponi wkoll kontroll mill-gvern fuq il-kapaċità tal-produzzjoni, u fuq deċiżjonijiet korporattivi (45). Fost il-prodotti koperti mill-Pjan hemm diversi inputs li jintużaw fil-produzzjoni tat-twavel għall-mogħdija, b’mod partikolari materjal ta’ żebgħa/kisi fil-forma ta’ taħlitiet tal-eposside/poliester (46). Bl-istess mod, is-suq għal dawn il-prodotti tal-aħħar huwa ġestit ukoll mill-Istat fil-livell provinċjali, bħal fil-Provinċja Hebei, permezz tat-13-il FYP għall-iżvilupp tal-Industrija Petrokimika fil-Provinċja ta’ Hebei, li jistabbilixxi mudelli ta’ żvilupp għal subsetturi speċifiċi, inkluż permezz tal-kontroll tal-kapaċità (li jkopri ż-żebgħa u l-poliesteri) (47).

(76)

Is-suq għal input ieħor għall-produzzjoni tat-twavel għall-mogħdija – it-tessuti tal-qoton - huwa ġestit ukoll mill-Istat Ċiniż permezz ta’ dokumenti ta’ ppjanar, b’mod partikolari t-13-il FYP komprensiv għall-Iżvilupp tal-Industrija tat-Tessuti. Dan il-pjan tal-aħħar jistabbilixxi l-politika biex: “improve the management of cotton import quotas; increase the utilisation rate of quotas; meet the textile enterprises’ demand for high-quality cotton; establish a link between the reserve cotton’s floor price and the domestic and foreign spot market prices, speed up reserve cotton absorption; keep on improving the cotton price formation mechanism, the cotton target price subsidy policy and the cotton trade remedy measures” (tittejjeb il-ġestjoni tal-kwoti tal-importazzjonijiet tal-qoton; tiżdied ir-rata tal-użu tal-kwoti; tiġi ssodisfata d-domanda tal-intrapriżi tat-tessuti għal qoton ta’ kwalità għolja; tiġi stabbilita rabta bejn il-prezz minimu tal-qoton ta’ riżerva u l-prezzijiet spot tas-suq domestiku u barrani, jiġi aċċellerat l-assorbiment tal-qoton ta’ riżerva; ikomplu jittejbu l-mekkaniżmu għall-formazzjoni tal-prezz tal-qoton, il-politika dwar is-sussidju tal-prezz fil-mira tal-qoton u l-miżuri ta’ rimedju fil-kummerċ tal-qoton) (48). Dawn il-linji ta’ politika huma riflessi ulterjorment fid-dokumenti ta’ gwida settorjali, b’mod partikolari fit-13-il Pjan ta’ Ħames Snin għall-Iżvilupp tal-Industrija tat-Tessuti tal-Qoton li nħareġ mill-Assoċjazzjoni taċ-Ċina għall-Industrija tat-Tessuti tal-Qoton. Dan il-Pjan tal-aħħar jistabbilixxi b’mod partikolari l-għanijiet ta’ żvilupp tal-industrija tal-qoton għall-2020, inklużi ż-żieda fil-proporzjonijiet għall-bejgħ, il-profitti u l-esportazzjonijiet, kif ukoll il-miri tal-produzzjoni (49). L-istess Pjan jagħti wkoll struzzjonijiet biex “strengthen market regulation [..]further to the Guiding Opinions issued by the State on the development of the relevant industrie s” (tissaħħaħ ir-regolamentazzjoni tas-suq [..] flimkien mal-Opinjonijiet ta’ Gwida li jinħarġu mill-Istat dwar l-iżvilupp tal-awtoritajiet rilevanti), b’mod partikolari billi […] “amend[ing] processing trade regulations in accordance with cotton textile production,” (jiġi emendat l-ipproċessar tar-regolamenti dwar il-kummerċ skont il-produzzjoni tat-tessuti tal-qoton) jew “ensur[ing] coherence with the relevant industry catalogues amended and issued by the Stat e” (tiġi żgurata l-koerenza mal-katalogi tal-industrija rilevanti li jiġu emendati u li jinħarġu mill-Istat) (50).

(77)

Kif muri fid-dokumenti ta’ ppjanar imsemmija hawn fuq, jidher li l-GTĊ ma jiġġestix biss l-iżvilupp tas-suq fis-settur tat-twavel għall-mogħdija nnifsu, iżda anke għall-maġġoranza kbira tal-inputs li jikkostitwixxu l-komponenti ewlenin tat-twavel għall-mogħdija, skont firxa wiesgħa ta’ għodod ta’ politika u direttivi relatati, fosthom: mal-kompożizzjoni u r-ristrutturar tas-suq, mal-materja prima, mal-ġestjoni tal-kapaċità, mal-firxa tal-prodotti, mat-titjib eċċ. Permezz ta’ dawn il-mezzi u ta’ oħrajn, il-GTĊ jidderieġi u jikkontrolla firxa sħiħa ta’ aspetti fl-iżvilupp u fil-funzjonament tas-setturi msemmija (51). Il-problema attwali tal-kapaċità żejda fis-setturi Ċinizi tal-azzar u tal-kimika, hija eżempju ċar tal-implikazzjonijiet tal-politiki tal-GTĊ u d-distorsjonijiet li jirriżultaw f’dawn is-setturi (52). Min-naħa tagħhom, dawn id-distorsjonijiet jaffettwaw il-prezzijiet tal-komponenti ewlenin tat-twavel għall-mogħdija, u b’hekk jikkawżaw distorsjoni fil-kostijiet tal-produzzjoni tagħhom, li ma jistgħux jibqgħu jitqiesu bħala bbażati fis-suq.

(78)

Fil-qosor, il-Kummissjoni stabbilixxiet li l-GTĊ għandu fis-seħħ politiki pubbliċi li jinfluwenzaw l-forzi tas-suq ħieles fis-settur tal-manifattura tat-twavel għall-mogħdija, b’mod partikolari billi jinfluwenzaw il-forzi tas-suq ħieles f’setturi li jfornu l-komponenti kollha tat-twavel għall-mogħdija.

(79)

Skont l-informazzjoni fil-fajl, is-sistema Ċiniża tal-falliment ipproduċiet riżultati inadegwati fl-ilħuq tal-objettivi ewlenin tagħha stess, bħal dawk ta’ saldu ġust tal-pretensjonijiet u tad-djun u ta’ salvagwardja tad-drittijiet u tal-interessi legali tal-kredituri u tad-debituri. Dan jidher li huwa msejjes fil-fatt li filwaqt li l-liġi Ċiniża dwar il-falliment tiddependi b’mod formali fuq prinċipji simili għal dawk li jiġu applikati f’liġijiet korrispondenti ta’ pajjiżi oħra għajr iċ-Ċina, is-sistema Ċiniża hija kkaratterizzata minn nuqqas ta’ infurzar sistematiku. L-għadd ta’ fallimenti jibqa’ magħruf li huwa baxx meta mqabbel mad-daqs tal-ekonomija tal-pajjiż, mhux l-inqas minħabba li l-proċedimenti ta’ insolvenza jbatu minn għadd ta’ nuqqasijiet, li effettivament jiffunzjonaw bħala diżinċentiv għall-preżentazzjonijiet ta’ fallimenti. Barra minn hekk, ir-rwol tal-Istat fil-proċedimenti ta’ insolvenza għadu wieħed b’saħħtu u attiv, li spiss ikollu influwenza diretta fuq l-eżitu tal-proċedimenti (53).

(80)

Barra minn hekk, in-nuqqasijiet tas-sistema tad-drittijiet tal-proprjetà huma partikolarment ovvji fir-rigward tas-sjieda tad-drittijiet tal-art u tal-użu tal-art fiċ-Ċina (54). L-art kollha hi proprjetà tal-Istat Ċiniż (art rurali ta’ proprjetà kollettiva u art urbana tal-Istat). L-allokazzjoni tagħha għadha tiddependi biss fuq l-Istat. Hemm dispożizzjonijiet legali li għandhom l-għan li jallokaw id-drittijiet għall-użu tal-art b’mod trasparenti u li huma mmirati lejn il-prezzijiet tas-suq, pereżempju bl-introduzzjoni ta’ proċeduri ta’ offerti. Madankollu, dawn id-dispożizzjonijiet ma jiġux irrispettati b’mod regolari, fejn ċerti akkwirenti jiksbu l-art tagħhom mingħajr ħlas jew b’rati aktar baxxi mir-rati tas-suq (55). Barra minn dan, l-awtoritajiet spiss isegwu għanijiet politiċi speċifiċi, inkluż l-implimentazzjoni tal-pjanijiet ekonomiċi, meta jkunu qed jallokaw l-art (56).

(81)

Bħal setturi oħra fl-ekonomija Ċiniża, is-settur tat-twavel għall-mogħdija huwa soġġett għar-regoli ordinarji dwar il-liġijiet Ċiniżi dwar il-falliment, u dawk korporattivi u tal-proprjetà. Dan għandu l-effett li s-settur tat-twavel għall-mogħdija wkoll ikun soġġett għad-distorsjonijiet minn fuq għal isfel li jirriżultaw mill-applikazzjoni diskriminatorja jew l-infurzar inadegwat tal-liġijiet dwar il-falliment u tal-proprjetà. Barra minn hekk, investigazzjoni preċedenti żvelat li l-operazzjonijiet relatati mad-drittijiet għall-użu tal-art kienu soġġetti għal distorsjonijiet mill-Istat (57). Din l-investigazzjoni ma żvelat xejn li jitfa’ dubju fuq dawn is-sejbiet. Bħala tali, il-Kummissjoni kkonkludiet b’mod preliminari li l-liġijiet Ċiniżi dwar il-fallimenti u l-proprjetà ma jaħdmux kif suppost, u b’hekk jirriżultaw f’distorsjonijiet meta ditti insolventi jkunu qed jinżammu fil-wiċċ u meta jiġu allokati d-drittijiet għall-użu tal-art fir-RPĊ.

(82)

Sistema ta’ pagi bbażati fuq is-suq ma tistax tiżviluppa kompletament fiċ-Ċina minħabba li l-ħaddiema u l-impjegaturi huma mxekkla fid-drittijiet tagħhom għal organizzazzjoni kollettiva. Iċ-Ċina ma rratifikatx għadd ta’ konvenzjonijiet essenzjali tal-Organizzazzjoni Internazzjonali tax-Xogħol (ILO), b’mod partikolari dawk dwar il-libertà ta’ assoċjazzjoni u dwar in-negozjar kollettiv (58). Skont il-liġi nazzjonali, organizzazzjoni waħda biss tat-trade unions hija attiva. Madankollu, din l-organizzazzjoni mhijiex indipendenti mill-awtoritajiet tal-Istat u l-involviment tagħha fin-negozjar kollettiv u fil-protezzjoni tad-drittijiet tal-ħaddiema għadu rudimentali (59). Barra minn dan, il-mobbiltà tal-forza tax-xogħol Ċiniża hija ristretta mis-sistema tar-reġistrazzjoni tal-unitajiet domestiċi, li tillimita l-aċċess għall-firxa sħiħa tal-benefiċċji tas-sigurtà soċjali u oħrajn lir-residenti lokali ta’ żona amministrattiva partikolari. Dan tipikament jirriżulta f’ħaddiema li ma jkollhomx ir-reġistrazzjoni tar-residenza lokali li jsibu ruħhom f’pożizzjoni ta’ impjieg vulnerabbli u jirċievu introjtu aktar baxx mid-detenturi tar-reġistrazzjoni tar-residenza (60). Dawk is-sejbiet iwasslu għad-distorsjoni tal-kostijiet tal-pagi fiċ-Ċina.

(83)

Is-settur tal-manifattura tat-twavel għall-mogħdija u l-fornituri tal-inputs ewlenin, inklużi s-setturi tal-azzar, tal-kimika u tat-tessuti huma soġġetti wkoll għas-sistema Ċiniża tal-liġi tax-xogħol deskritta. Għalhekk, is-settur tat-twavel għall-mogħdija huwa affettwat minn distorsjonijiet tal-kostijiet tal-pagi kemm direttament (peress li l-manodopera tirrappreżenta bejn 15 % u 35 % tal-kost tal-produzzjoni tat-twavel għall-mogħdija) kif ukoll indirettament (meta jkollu aċċess għall-kapital jew inputs minn kumpaniji soġġetti għall-istess sistema tax-xogħol fiċ-Ċina).

(84)

Għaldaqstant, il-Kummissjoni kkonkludiet li l-kostijiet tal-pagi kienu b’distorsjoni fis-settur tal-manifattura tat-twavel għall-mogħdija u fis-setturi tal-komponenti ewlenin tiegħu.

(85)

L-aċċess għall-kapital għal atturi korporattivi fiċ-Ċina huwa soġġett għal diversi distorsjonijiet.

(86)

L-ewwel, is-sistema finanzjarja Ċiniża hija kkaratterizzata mill-pożizzjoni b’saħħitha tal-banek tal-Istat (61), li, meta jagħtu aċċess għal finanzjament, iqisu kriterji oħra għajr il-vijabbiltà ekonomika ta’ proġett. B’mod simili għall-SOEs mhux finanzjarji, il-banek jibqgħu marbutin mal-Istat mhux biss permezz tas-sjieda iżda wkoll permezz ta’ azzjonijiet personali (l-ogħla eżekuttivi tal-istituzzjonijiet finanzjarji tal-Istat fl-aħħar mill-aħħar jinħatru mis-CCP) (62) u, għal darb’oħra eżatt bħal fil-każ tal-SOEs mhux finanzjarji, il-banek jimplimentaw b’mod regolari ordnijiet pubbliċi mfassla mill-gvern. Meta jagħmlu dan, il-banek jikkonformaw ma’ obbligu legali espliċitu li jmexxu n-negozju tagħhom f’konformità mal-ħtiġijiet tal-iżvilupp ekonomiku u soċjali nazzjonali u skont il-gwida tal-politiki industrijali tal-Istat (63). Dan jiġi amplifikat permezz ta’ regoli eżistenti addizzjonali, li jmexxu l-finanzi f’setturi li l-gvern jagħżel bħala mħeġġa jew li b’xi mod ieħor huma importanti (64).

(87)

Filwaqt li huwa rikonoxxut li diversi dispożizzjonijiet legali jirreferu għall-ħtieġa li jiġu rrispettati l-imġiba bankarja normali u r-regoli prudenzjali bħall-ħtieġa li tiġi eżaminata l-affidabbiltà kreditizja tal-mutwatarju, l-evidenza massiva, inklużi s-sejbiet li saru fl-investigazzjonijiet tad-difiża tal-kummerċ, tissuġġerixxi li dawn id-dispożizzjonijiet għandhom biss rwol sekondarju fl-applikazzjoni tad-diversi strumenti legali.

(88)

Barra minn hekk, il-klassifikazzjonijiet tal-bonds u tal-kreditu spiss huma b’distorsjoni għal diversi raġunijiet, inkluż il-fatt li l-valutazzjoni tar-riskju tiġi influwenzata mill-importanza strateġika tad-ditta għall-gvern Ċiniż u mis-saħħa ta’ kwalunkwe garanzija impliċita mill-gvern. L-istimi jissuġġerixxu b’mod qawwi li l-klassifikazzjonijiet tal-kreditu Ċiniżi jikkorrispondu għal klassifikazzjonijiet internazzjonali aktar baxxi.

(89)

Dan jirriżulta fi preġudizzju għas-self lil SOEs, ditti privati kbar u konnessi tajjeb u ditti f’setturi industrijali ewlenin, li jimplika li d-disponibbiltà u l-kost tal-kapital mhumiex ugwali għall-atturi kollha fis-suq.

(90)

It-tieni, il-kostijiet tas-self inżammu baxxi b’mod artifiċjali biex jiġi stimolat it-tkabbir tal-investiment. Dan wassal għall-użu eċċessiv tal-investiment kapitali b’redditi dejjem aktar baxxi fuq l-investiment. Dan jintwera mit-tkabbir riċenti fl-ingranaġġ korporattiv fis-settur tal-Istat minkejja tnaqqis kbir fil-profitabbiltà, li jissuġġerixxi li l-mekkaniżmi li jitħaddmu fis-sistema bankarja ma jsegwux tweġibiet kummerċjali normali.

(91)

It-tielet, minkejja li f’Ottubru 2015 inkisbet liberalizzazzjoni tar-rata tal-imgħax nominali, is-sinjali tal-prezzijiet għadhom mhumiex ir-riżultat ta’ forzi tas-suq ħieles, iżda huma influwenzati minn distorsjonijiet ikkawżati mill-gvern. Fil-fatt, is-sehem tas-self fir-rata tal-valur referenzjarju jew taħt din ir-rata għadu jirrappreżenta 45 % tas-self kollu u r-rikors għall-kreditu mmirat jidher li żdied, peress li dan is-sehem żdied b’mod sostanzjali mill-2015 minkejja li l-kundizzjonijiet ekonomiċi marru għall-agħar. Rati tal-imgħax baxxi b’mod artifiċjali jirriżultaw fi prezz aktar baxx, u sussegwentement fl-użu eċċessiv tal-kapital.

(92)

It-tkabbir kumplessiv tal-kreditu fiċ-Ċina jindika deterjorament tal-effiċjenza tal-allokazzjoni tal-kapital mingħajr l-ebda sinjal ta’ ssikkar tal-kreditu li jkun mistenni f’ambjent tas-suq mingħajr distorsjoni. Bħala riżultat, is-self improduttiv żdied b’mod rapidu fis-snin riċenti. Meta kellu jiffaċċja sitwazzjoni ta’ dejn f’riskju li kien qed jiżdied, il-gvern Ċiniż għażel li jevita l-inadempjenzi. Konsegwentement, il-kwistjonijiet ta’ dejn mitluf ġew ittrattati permezz tar-riportament tad-dejn, sabiex b’hekk inħolqu l-hekk imsejħa kumpaniji “żombi”, jew permezz tat-trasferiment tas-sjieda tad-dejn (pereżempju permezz ta’ fużjonijiet jew swaps ta’ dejn għal ekwità), mingħajr ma neċessarjament titneħħa l-problema kumplessiva tad-dejn jew jiġu indirizzati l-kawżi ewlenin tagħha.

(93)

Essenzjalment, minkejja l-passi li ttieħdu reċentement sabiex jiġi lliberalizzat is-suq, is-sistema ta’ kreditu korporattiva fiċ-Ċina hija affettwata minn kwistjonijiet u distorsjonijiet sistemiċi sinifikanti li jirriżultaw mir-rwol mifrux kontinwu tal-Istat fis-swieq tal-kapital.

(94)

Il-manifatturi tat-twavel għall-mogħdija jew il-fornituri tagħhom tal-materja prima u ta’ inputs oħra bbenefikaw ukoll minn din is-sistema finanzjarja. Fil-fatt, l-investigazzjoni ma żvelat xejn li jikkwalifika s-settur tat-twavel għall-mogħdija bħala soġġett għal regoli differenti mhux soġġetti għal intervent sostanzjali ġenerali tal-gvern fis-sistema finanzjarja. Din is-sistema twassal biex il-kundizzjonijiet tas-suq jiġu affettwati b’mod sever fil-livelli kollha tal-produzzjoni tal-prodott finali u tal-inputs.

(95)

Fid-dawl ta’ dan ta’ hawn fuq, il-Kummissjoni kkonkludiet li l-produtturi Ċiniżi tat-twavel għall-mogħdija kellhom aċċess għall-finanzi mogħtija mill-istituzzjonijiet li jimplimentaw l-objettivi tal-ordni pubbliku jew li nkella ma jaġixxux b’mod indipendenti mill-Istat.

(96)

Il-Kummissjoni nnotat li d-distorsjonijiet deskritti fir-Rapport huma karatteristika għall-ekonomija Ċiniża. L-evidenza disponibbli turi li l-fatti u l-karatteristiċi tas-sistema Ċiniża kif deskritt hawn fuq fit-Taqsimiet 3.2.2.2 – 3.2.2.5 kif ukoll fil-Parti A tar-Rapport japplikaw fil-pajjiż kollu u fis-setturi kollha tal-ekonomija. L-istess japplika għad-deskrizzjoni tal-fatturi tal-produzzjoni kif stabbilit hawn fuq fit-Taqsimiet 3.2.2.6 – 3.2.2.8 u fil-Parti B tar-Rapport.

(97)

Il-Kummissjoni tfakkar li sabiex jiġu prodotti t-twavel għall-mogħdija, tenħtieġ firxa wiesgħa ta’ inputs. Meta l-produtturi tat-twavel għall-mogħdija jixtru/jikkuntrattaw dawn l-inputs, il-prezzijiet li jħallsu (u li huma rreġistrati bħala l-kostijiet tagħhom) jiġu esposti b’mod ċar għall-istess distorsjonijiet sistemiċi msemmija qabel. Pereżempju, il-fornituri tal-inputs iħaddmu manodopera li hija soġġetta għad-distorsjonijiet. Jistgħu jissellfu flus li jkunu soġġetti għad-distorsjonijiet fuq is-settur finanzjarju/l-allokazzjoni tal-kapital. Barra minn hekk, dawn huma soġġetti għas-sistema ta’ ppjanar li tapplika fil-livelli kollha tal-gvern u tas-setturi. Għal darb’oħra, din l-investigazzjoni ma wasslitx evidenza li turi l-kuntrarju.

(98)

Bħala konsegwenza, mhux biss ma jistgħux jintużaw il-prezzijiet tal-bejgħ domestiku tal-prodott taħt rieżami, iżda l-kostijiet tal-input kollha (inklużi l-materja prima, l-enerġija, l-art, il-finanzjament, il-manodopera, eċċ.) huma vvizzjati wkoll minħabba li l-formazzjoni tal-prezzijiet tagħhom hija affettwata minn intervent sostanzjali tal-gvern, kif deskritt fil-Partijiet A u B tar-Rapport. Fil-fatt, l-interventi tal-gvern deskritti fir-rigward tal-allokazzjoni tal-kapital, l-art, il-manodopera, l-enerġija u l-materja prima huma preżenti fir-RPĊ kollha. Dan ifisser, pereżempju, li input li minnu nnifsu kien prodott fiċ-Ċina permezz tal-kombinazzjoni ta’ firxa ta’ fatturi tal-produzzjoni huwa espost għal distorsjonijiet sinifikanti. L-istess japplika għall-input, lejn l-input u l-bqija.

(99)

L-analiżi stabbilita fit-Taqsimiet 3.2.2.2 sa 3.2.2.9, li tinkludi eżami tal-evidenza kollha disponibbli relatata mal-intervent taċ-Ċina fl-ekonomija tagħha b’mod ġenerali, kif ukoll fis-settur tal-manifattura tat-twavel għall-mogħdija (inkluż il-prodott taħt rieżami), uriet li l-prezzijiet jew il-kostijiet, inklużi l-kostijiet tal-materja prima, tal-enerġija u tal-manodopera, mhumiex ir-riżultat ta’ forzi tas-suq ħieles minħabba li huma affettwati minn intervent sostanzjali tal-gvern fis-sens tal-Artikolu 2(6a)(b) tar-Regolament bażiku kif muri mill-impatt attwali jew potenzjali ta’ wieħed jew aktar mill-elementi rilevanti elenkati fih. Abbażi ta’ dan, u fin-nuqqas ta’ kwalunkwe kooperazzjoni mill-GTĊ, il-Kummissjoni kkonkludiet li mhuwiex xieraq li jintużaw prezzijiet u kostijiet domestiċi biex jiġi stabbilit il-valur normali f’dan il-każ.

(100)

Konsegwentement, il-Kummissjoni mbagħad fasslet il-valur normali b’mod esklużiv abbażi tal-kostijiet tal-produzzjoni u tal-bejgħ li jirriflettu prezzijiet jew punti ta’ riferiment mingħajr distorsjoni, jiġifieri, f’dan il-każ, abbażi tal-kostijiet korrispondenti tal-produzzjoni u tal-bejgħ f’pajjiż rappreżentattiv xieraq, f’konformità mal-Artikolu 2(6a)(a) tar-Regolament bażiku, kif diskuss fit-taqsima li ġejja.

(101)

L-għażla tal-pajjiż rappreżentattiv kienet ibbażata fuq il-kriterji li ġejjin:

(102)

Kif imsemmi fil-premessa (28), fin-Nota tas-6 ta’ Settembru, il-Kummissjoni għarrfet lill-partijiet interessati li hija identifikat tliet pajjiżi rappreżentattivi possibbli: il-Brażil, is-Serbja u t-Turkija u stiednet lill-partijiet interessati biex jikkummentaw u jissuġġerixxu pajjiżi oħrajn. Wieħed biss mill-applikanti ressaq kummenti billi appoġġja l-għażla tat-Turkija, filwaqt li pprovda argumenti kontra l-għażla tal-Brażil u s-Serbja. Ma kien hemm l-ebda suġġeriment ta’ pajjiż ieħor.

(103)

Il-Brażil, is-Serbja u t-Turkija huma kollha klassifikati bħala pajjiżi b’livell simili ta’ żvilupp ekonomiku bħar-RPĊ, jiġifieri huma kollha kklassifikati bħala pajjiżi “b’introjtu medju superjuri” mill-Bank Dinji.

(104)

Hemm ftit pajjiżi fid-dinja li jipproduċu l-prodott taħt rieżami. Wara l-analiżi tad-data disponibbli u b’mod partikolari d-data mill-GTA u Orbis, il-Kummissjoni identifikat il-Brażil, is-Serbja u t-Turkija bħala pajjiżi rappreżentattivi possibbli għal din l-investigazzjoni.

(105)

Wieħed mill-applikanti ressaq kummenti li jissuġġerixxu li l-livelli tal-produzzjoni u tal-konsum domestiku tal-prodott taħt rieżami fil-Brażil u s-Serbja mhumiex sinifikanti. L-applikant sostna li l-produtturi f’dawn il-pajjiżi kienu qed jixtru l-prodott taħt rieżami mir-RPĊ biex jissupplimentaw il-produzzjoni tagħhom stess.

(106)

B’rispons għal dawn id-dikjarazzjonijiet, il-Kummissjoni nnotat li l-applikant ma pprovda l-ebda evidenza li tiddefinixxi l-livell tal-produzzjoni f’dawn il-pajjiżi u l-ebda argument fir-rigward tar-raġuni għaliex jenħtieġ li tali livell ma jitqiesx bħala sinifikanti. Fin-nuqqas ta’ kwalunkwe evidenza konfliġġenti u abbażi tal-informazzjoni disponibbli, il-Kummissjoni kkonfermat li l-produzzjoni tal-prodott taħt rieżami qed issir fit-tliet pajjiżi u għalhekk id-dikjarazzjoni ġiet miċħuda.

(107)

Il-Kummissjoni analizzat bir-reqqa d-data rilevanti kollha disponibbli fil-fajl għall-fatturi tal-produzzjoni fit-tliet pajjiżi rappreżentattivi potenzjali u nnotat dan li ġej:

(108)

Skont l-Artikolu 2(6a)(a) tar-Regolament bażiku, il-valur normali maħdum għandu jinkludi ammont mingħajr distorsjoni u raġonevoli għall-kostijiet amministrattivi, tal-bejgħ u ġenerali (“SG&A”) u għall-profitti. Barra minn hekk, kien meħtieġ li jiġi stabbilit valur għall-kostijiet ġenerali tal-manifattura biex ikopri l-kostijiet mhux inklużi fil-fatturi tal-produzzjoni. Konsegwentement, il-Kummissjoni eżaminat jekk kienx hemm produtturi tal-prodott taħt rieżami b’data finanzjarja disponibbli għall-pubbliku matul il-perjodu ta’ investigazzjoni tar-rieżami fit-tliet pajjiżi t’hawn fuq.

(109)

Din l-għażla saret permezz ta’ Orbis. Billi l-produzzjoni tat-twavel għall-mogħdija normalment mhijiex attività primarja, ġew identifikati u ntużaw diversi kodiċijiet tan-NACE (70) għal din l-għażla:

Dawn il-kodiċijiet kienu relatati mal-produtturi tat-twavel għall-mogħdija magħrufa lill-Kummissjoni mit-talba għal rieżami u ċerti investigazzjonijiet preċedenti msemmija fil-premessi (1) sa (6).

(110)

B’riżultat tal-investigazzjoni ta’ hawn fuq, minn lista ta’ pajjiżi li jipproduċu t-twavel għall-mogħdija u li għandhom żvilupp ekonomiku simili bħar-RPĊ (jiġifieri l-Arġentina, il-Brażil, il-Kolombja, l-Ekwador, il-Malasja, il-Messiku, il-Perù, ir-Russja, is-Serbja, l-Afrika t’Isfel, it-Tajlandja u t-Turkija), ġew identifikati 433 kumpanija attiva b’data finanzjarja disponibbli matul il-perjodu ta’ investigazzjoni. Skont l-informazzjoni disponibbli l-ħames kumpaniji li ġejjin biss dehru li kellhom produzzjoni tat-twavel għall-mogħdija:

Tabella 1

Lista ta’ kumpaniji

(111)

Il-partijiet interessati ngħataw il-possibbiltà li jikkummentaw dwar din il-lista u li jikkomplementawha b’kumpaniji addizzjonali f’pajjiż rappreżentattiv possibbli li jafu bih u li kellu data disponibbli għall-pubbliku. L-ebda kumment ma ġie ppreżentat fir-rigward tal-lista ta’ kumpaniji magħżula.

(112)

L-analiżi tal-Kummissjoni żvelat li l-kumpanija fis-Serbja biegħet biss żewġ mudelli ta’ twavel għall-mogħdija u l-kumpaniji fil-Brażil biegħu ħafna aktar prodotti apparti twavel għall-mogħdija, li x’aktarx irrappreżentaw parti kbira mill-fatturat tagħhom u mill-kostijiet tal-bejgħ, ġenerali u amministrattivi (“SG&A”). Għalhekk, il-Kummissjoni kkonkludiet li ċ-ċifri disponibbli għal dawn il-kumpaniji ma jirrappreżentawx biżżejjed il-kost li jiġġarrab għall-bejgħ tat-twavel għall-mogħdija.

(113)

Għall-kuntrarju ta’ dan, il-Kummissjoni sabet li l-kumpaniji Torok biegħu varjetà ta’ twavel għall-mogħdija u kellhom firxa aktar baxxa ta’ produzzjoni ta’ prodotti oħra, u b’hekk il-Kummissjoni qieset li ċ-ċifri disponibbli għal dawn il-kumpaniji x’aktarx ikunu aktar preċiżi fir-rigward tal-produzzjoni u tal-bejgħ tat-twavel għall-mogħdija u aktar xierqa meta tiġi ssostitwita data dwar ammont mingħajr distorsjoni u raġonevoli għall-SG&A u l-profitti.

(114)

Fid-dawl ta’ dan ta’ hawn fuq, it-Turkija ssodisfat il-kriterji kollha stabbiliti fl-Artikolu 2(6a)(a) tar-Regolament bażiku, sabiex titqies bħala pajjiż rappreżentattiv xieraq. Fin-nota tas-26 ta’ Ottubru, il-Kummissjoni infurmat lill-partijiet interessati li kien beħsiebha tuża lit-Turkija bħala l-pajjiż rappreżentattiv u stiednet lill-partijiet interessati biex jikkummentaw. Ma wasal l-ebda kumment.

(115)

B’konsegwenza ta’ dan, il-Kummissjoni użat id-data tat-Turkija u l-kumpaniji Torok li ġejjin:

biex tistabbilixxi kostijiet korrispondenti tal-produzzjoni u l-bejgħ f’pajjiż rappreżentattiv xieraq skont l-Artikolu 2(6a)(a) tar-Regolament bażiku.

(116)

Skont it-tieni paragrafu tal-Artikolu 2(6a)(a) tar-Regolament bażiku, “il-valur normali maħdum għandu jinkludi ammont raġonevoli u mingħajr distorsjoni għal kostijiet amministrattivi, tal-bejgħ u ġenerali u għal profitti”. Barra minn hekk, kien jeħtieġ li jiġi stabbilit valur għall-kostijiet ġenerali tal-manifattura biex ikopri l-kostijiet mhux inklużi fil-fatturi tal-produzzjoni msemmija hawn fuq.

(117)

Sabiex tistabbilixxi valur mingħajr distorsjoni tal-kostijiet ġenerali tal-manifattura u minħabba n-nuqqas ta’ kooperazzjoni mill-produtturi esportaturi Ċiniżi, il-Kummissjoni użat l-informazzjoni disponibbli skont l-Artikolu 18 tar-Regolament bażiku. Għalhekk, abbażi tad-data pprovduta fit-talba għal rieżami, il-Kummissjoni stabbilixxiet l-ammont tal-kostijiet ġenerali tal-manifattura (71) rrappreżentati fil-kostijiet totali tal-manifattura, espress bħala perċentwal. Dan il-perċentwal imbagħad ġie applikat għall-valur mingħajr distorsjoni tal-kost tal-manifattura biex jinkiseb il-valur mingħajr distorsjoni tal-kostijiet ġenerali tal-manifattura, skont il-mudell prodott.

(118)

Biex tistabbilixxi ammont mingħajr distorsjoni u raġonevoli għall-SG&A u l-profitt, il-Kummissjoni bbażat ruħha fuq id-data finanzjarja għall-2017 għaż-żewġ kumpaniji Torok.

(119)

Il-Kummissjoni użat l-medja peżata tal-SG&A u l-profitt taż-żewġ kumpaniji kif irrapportata f’Orbis għas-sena 2017.

(120)

Fin-Nota tas-26 ta’ Ottubru, il-Kummissjoni ddikjarat li, biex tfassal il-valur normali skont l-Artikolu 2(6a)(a) tar-Regolament bażiku, hija kienet se tuża l-GTA biex tistabbilixxi l-kost mingħajr distorsjoni tal-fatturi kollha ta’ produzzjoni relatati mal-materja prima. Il-Kummissjoni użat data mill-Istitut Tork tal-Istatistika għax-xogħol u d-data finanzjarja, disponibbli f’Orbis, miż-żewġ kumpaniji Torok elenkati fil-premessa (115) biex tistabbilixxi l-kostijiet SG&A, il-profitti u l-kostijiet ġenerali.

(121)

Biex tiddetermina l-valur normali skont l-Artikolu 2(6a)(a) tar-Regolament bażiku, il-Kummissjoni analizzat id-data kollha disponibbli għall-fatturi tal-produzzjoni u ddeċidiet li tuża s-sorsi u l-valuri li ġejjin:

Tabella 2

Fatturi tal-produzzjoni tat-twavel għall-mogħdija

(122)

Tavla għall-mogħdija hija ġeneralment biċċa dejqa u ċatta ta’ injam jew metall protetta b’kopertura protetta mis-sħana u ta’ spiss ikollha saqajn li jistgħu jingħalqu, li fuqha jistgħu jiġu mgħoddija ħwejjeġ jew bjankerija. Skont id-definizzjoni tal-prodott taħt rieżami kopert minn din l-investigazzjoni, din tista’ tinkludi wkoll wiċċ minn fejn joħroġ il-fwar, wiċċ fejn minn fejn toħroġ is-sħana, wiċċ minn fejn toħroġ l-arja, twavel għall-kmiem, u partijiet oħra. Il-materja prima ewlenija li tintuża fit-twavel għall-mogħdija hija l-metall, primarjament l-azzar (folja tal-metall, tubi, wajers). Materja prima oħra li tintuża fil-produzzjoni tat-twavel għall-mogħdija tinkludi żebgħa/kisi, partijiet tal-plastik, ragħwa u drapp.

(123)

L-istruttura tal-kost tvarja skont it-tip tat-tavla li tkun qed tiġi prodotta, jiġifieri twavel ta’ livell għoli jinkludu tipi differenti ta’ materjal mit-twavel ta’ livell bażiku. Il-Kummissjoni bbażat ruħha fuq it-talba għal rieżami biex tispeċifika l-fatturi tal-produzzjoni li jintużaw fil-produzzjoni tat-twavel għall-mogħdija. Kif issemma hawn fuq, l-ebda waħda mill-partijiet interessati ma pprovdiet xi kumment f’dan ir-rigward. Għall-materja prima kollha, il-valur tal-unità mingħajr distorsjoni ġie ddeterminat mill-prezz medju tal-importazzjonijiet għall-pajjiż rappreżentattiv mill-pajjiżi terzi kollha għajr ir-RPĊ għall-perjodu ta’ investigazzjoni tar-rieżami kif irreġistrat fil-GTA. L-importazzjonijiet mir-RPĊ ġew esklużi minħabba d-distorsjonijiet sinifikanti eżistenti f’dan il-pajjiż kif stabbilit fit-Taqsima 4.2 ta’ hawn fuq.

(124)

Sabiex jiġi stabbilit il-valur normali skont il-metodoloġija tal-Kummissjoni, id-dazji fuq l-importazzjoni tal-fatturi tal-produzzjoni u l-materjali importati fit-Turkija, kif ukoll il-kostijiet tat-trasport domestiku għandhom jiżdiedu ma’ dawn il-prezzijiet tal-importazzjoni. Dan jirriżulta f’valur normali ogħla peress li d-dazji fuq l-importazzjoni jżidu aktar il-prezzijiet tal-importazzjoni tal-fatturi tal-produzzjoni. B’konsegwenza ta’ dan, dan jirriżulta f’marġni tad-dumping saħansitra ogħla. B’kunsiderazzjoni tas-sejba fil-premessi (137) u (138) kif ukoll in-natura ta’ din l-investigazzjoni tar-rieżami ta’ skadenza, li hija ffokata biex jinstab jekk id-dumping tkompliex matul il-perjodu ta’ investigazzjoni tar-rieżami pjuttost milli biex jinstab il-kobor preċiż tiegħu, il-Kummissjoni ddeċidiet li aġġustamenti għad-dazji fuq l-importazzjoni u t-trasport domestiku ma kinux meħtieġa.

(125)

L-Istitut Tork tal-Istatistika jippubblika informazzjoni ddettaljata dwar il-pagi f’setturi ekonomiċi differenti fit-Turkija. Il-Kummissjoni użat l-aħħar statistika disponibbli (2016) (72) li tirrapporta l-paga medja fis-siegħa għas-settur tal-manifattura f’diversi kodiċijiet tan-NACE REV 2 (b’mod konkret 25, 27 u 32; id-data dwar il-pagi hija disponibbli biss f’livell ta’ żewġ kodiċijiet diġitali) identifikati għall-produzzjoni tat-twavel għall-mogħdija.

(126)

Il-valur medju fix-xahar tal-2016 ġie aġġustat b’mod xieraq skont l-inflazzjoni permezz tal-indiċi tal-prezzijiet tal-produtturi domestiċi (73) kif ġie ppubblikat mill-Istitut Tork tal-Istatistika.

(127)

Skont it-talba għal rieżami, l-enerġija (l-elettriku u l-gass naturali) li qed tiġi kkunsmata matul il-proċess tal-produzzjoni hija insinifikanti. Billi l-investigazzjoni ma żvelat l-ebda informazzjoni li tmur kontra din id-dikjarazzjoni, din ġiet aċċettata u għalhekk, għall-fini ta’ din l-investigazzjoni, il-kost tal-enerġija tqies bħala negliġibbli.

(128)

Sabiex tistabbilixxi l-valur normali mfassal, il-Kummissjoni kompliet billi segwiet iż-żewġ passi li ġejjin.

(129)

L-ewwel, il-Kummissjoni stabbiliet il-kostijiet tal-manifattura mingħajr distorsjoni. Fin-nuqqas ta’ kooperazzjoni mill-produtturi esportaturi, il-Kummissjoni bbażat ruħha fuq l-informazzjoni pprovduta mill-applikanti fit-talba għal rieżami dwar l-użu ta’ kull fattur (il-materjali u l-manodopera) għall-produzzjoni ta’ tliet mudelli ta’ twavel għall-mogħdija (ta’ livell baxx u għoli). Il-Kummissjoni mmultiplikat il-fatturi tal-użu bil-kostijiet mingħajr distorsjoni għal kull unità li ġew osservati fil-pajjiż rappreżentattiv tat-Turkija.

(130)

It-tieni, kif ġie nnotat fil-premessa (117), fir-rigward tal-kostijiet tal-manifattura identifikati hawn fuq, il-Kummissjoni applikat il-kostijiet ġenerali tal-manifattura, l-SG&A u l-profitt. Dawn ġew iddeterminati abbażi tad-data finanzjarja għall-2017 għaż-żewġ kumpaniji Torok (il-premessa (115)) u l-istimi tal-applikanti fit-talba għal rieżami. Il-Kummissjoni żiedet l-entrati li ġejjin fil-kost tal-manifattura mingħajr distorsjoni:

(131)

Abbażi ta’ dan ta’ hawn fuq, il-Kummissjoni fasslet il-valur normali għal kull tip ta’ prodott fuq bażi ta’ kif joħroġ mill-fabbrika, f’konformità mal-Artikolu 2(6a)(a) tar-Regolament bażiku. Minħabba n-nuqqas ta’ kooperazzjoni mill-produtturi/esportaturi Ċiniżi, ma setax jiġi stabbilit liema mudelli tat-twavel għall-mogħdija kienu prodotti fiċ-Ċina. Għalhekk, il-Kummissjoni bbażat ruħha fuq l-informazzjoni pprovduta mill-applikant fit-talba għal rieżami skont l-Artikolu 18 tar-Regolament bażiku. Għal dan il-għan, l-applikanti identifikaw tliet mudelli tat-twavel għall-mogħdija, ta’ livell baxx u għoli. Ġie stabbilit valur normali għal dawn il-mudelli.

(132)

Minħabba l-fatt li l-ebda wieħed mill-produtturi esportaturi Ċiniżi ma kkoopera, il-valur normali ġie stabbilit fuq bażi tal-pajjiż kollu.

(133)

B’konsegwenza tan-nuqqas ta’ kooperazzjoni, il-prezzijiet ta’ esportazzjoni ġew stabbiliti abbażi tal-fatti disponibbli skont l-Artikolu 18 tar-Regolament bażiku (ara l-premessa (40)). B’mod simili għar-rieżami ta’ skadenza preċedenti (imsemmi fil-premessa (6)), il-Kummissjoni użat data dwar l-importazzjoni li ġiet irrapportata fil-bażi tad-data tal-Artikolu 14(6)) biex tiddetermina l-prezzijiet tal-esportazzjoni.

(134)

Billi, fil-bażi tad-data msemmija fl-Artikolu 14(6), il-volumi tal-importazzjoni jiġu rrapportati f’kg, il-Kummissjoni kkonvertiet iċ-ċifri rrapportati f’biċċiet (unitajiet) billi użat it-tabella ta’ korrelazzjoni li ġiet stabbilita fir-rieżami ta’ skadenza preċedenti msemmi fil-premessa (6).

(135)

Billi dawn il-prezzijiet jiġu rrapportati fuq bażi ta’ Kost, Assigurazzjoni u Nol (“CIF”), il-Kummissjoni naqset ammont għall-kost tat-trasport bejn ir-RPĊ u l-fruntiera tal-UE abbażi tal-istimi pprovduti fit-talba għal rieżami.

(136)

Il-Kummissjoni qabblet il-valur normali mfassal li ġie stabbilit skont l-Artikolu 2(6a)(a) tar-Regolament bażiku, mal-prezz medju tal-esportazzjoni EXW għall-UE kif stabbilit hawn fuq.

(137)

Il-marġnijiet ta’ dumping identifikati, espressi bħala perċentwal tal-prezz CIF fil-fruntiera tal-Unjoni, bid-dazju mhux imħallas, varjaw bejn 43 % u 67 %.

(138)

Għalhekk, il-Kummissjoni kkonkludiet li d-dumping tkompla matul il-perjodu ta’ investigazzjoni tar-rieżami.

(139)

Wara li rriżulta dumping matul il-perjodu tal-investigazzjoni ta’ rieżami, il-Kummissjoni analizzat il-probabbiltà ta’ kontinwazzjoni ta’ dumping jekk il-miżuri jiġu revokati.

(140)

B’konsegwenza tan-nuqqas ta’ kooperazzjoni tal-produtturi/esportaturi fir-RPĊ, il-Kummissjoni bbażat il-valutazzjoni tagħha fuq il-fatti disponibbli skont l-Artikolu 18 tar-Regolament bażiku, jiġifieri fuq is-sejbiet tar-rieżami ta’ skadenza preċedenti li ssemma fil-premessa (6) (“ir-rieżami ta’ skadenza preċedenti”), fuq l-informazzjoni pprovduta fit-talba għal rieżami, il-bażi tad-data msemmija fl-Artikolu 14(6) u fuq il-bażi tad-data Ċiniża. Ġew analizzati l-elementi li ġejjin: il-kapaċità tal-produzzjoni fir-RPĊ, il-prezzijiet Ċiniżi tal-esportazzjoni lejn swieq ta’ pajjiżi terzi oħra u kemm huwa attraenti s-suq tal-UE.

(141)

Minħabba n-nuqqas ta’ kooperazzjoni, l-ebda wieħed mill-esportaturi/produtturi Ċiniżi ma pprovda xi informazzjoni fir-rigward tal-kapaċità tal-produzzjoni attwali fiċ-Ċina. Barra minn hekk, ma hemm l-ebda informazzjoni disponibbli għall-pubbliku dwar it-twavel għall-mogħdija bħal statistika jew studji dwar is-suq u għalhekk is-sejbiet kellhom ikunu bbażati fuq l-informazzjoni pprovduta fit-talba u s-sejbiet tar-rieżami ta’ skadenza preċedenti, bħall-informazzjoni disponibbli skont l-Artikolu 18 tar-Regolament bażiku.

(142)

Fir-rieżami ta’ skadenza preċedenti, il-kapaċità tal-produzzjoni fir-RPĊ ġiet stmata għal madwar tmien miljun biċċa, li rrappreżentat madwar 80 % tal-konsum fl-UE fl-2009 u li tkopri kważi 100 % tal-konsum fl-UE matul il-perjodu ta’ investigazzjoni tar-rieżami attwali (8,3 miljun biċċa - ara l-premessa (158)). Madankollu, skont rieżami sunset li twettaq mill-awtoritajiet tal-Istati Uniti dwar l-istess prodott importat mir-RPĊ fl-Istati Uniti (74), li ġie konkluż fit-8 ta’ Marzu 2016 (75) bl-impożizzjoni mill-ġdid ta’ miżuri anti-dumping kontra l-importazzjonijiet Ċiniżi ta’ twavel għall-mogħdija sal-2021 (“ir-Rieżami Sunset tal-Istati Uniti”), il-kapaċità tal-produzzjoni Ċiniża żdiedet mill-2009, li tissuġġerixxi li l-kapaċità tal-produzzjoni attwali fir-RPĊ matul il-perjodu ta’ investigazzjoni tar-rieżami saħansitra qabżet il-konsum fl-UE matul l-istess perjodu.

(143)

Barra minn hekk, abbażi tas-sejbiet fir-rieżami ta’ skadenza preċedenti, il-produtturi Ċiniżi jistgħu faċilment jinstallaw kapaċità ta’ produzzjoni addizzjonali minħabba li l-proċess tal-manifattura huwa prinċipalment ibbażat fuq il-manodopera. Barra minn hekk, il-produtturi Ċiniżi tat-twavel għall-mogħdija jipproduċu wkoll prodotti oħra tal-metall f’linji tal-produzzjoni li jistgħu faċilment jintużaw għall-produzzjoni tat-twavel għall-mogħdija. Dan jippermetti lill-produtturi Ċiniżi jżidu l-produzzjoni tat-twavel għall-mogħdija billi jittrasferixxu l-produzzjoni bejn il-linji tal-produzzjoni eżistenti skont id-domanda. Tali żieda fil-kapaċità ma tirrikjedi l-ebda investiment jew ħila importanti u, għaldaqstant, il-bidla bejn prodotti differenti hija faċli. L-investigazzjoni attwali ma żvelat l-ebda informazzjoni li tnaqqas l-importanza ta’ dawn is-sejbiet.

(144)

Għalhekk, ġie konkluż li hemm kapaċitajiet ta’ produzzjoni għolja disponibbli fir-RPĊ, li jkopru mill-inqas kważi 100 % tal-konsum kollu fl-UE, li jistgħu jiżdiedu faċilment anke aktar.

(145)

Billi ma kien hemm l-ebda kooperazzjoni mill-esportaturi/produtturi Ċiniżi, il-Kummissjoni kellha tibbaża ruħha fuq il-fatti disponibbli biex tistabbilixxi l-prezzijiet ta’ esportazzjoni miċ-Ċina lejn swieq ta’ pajjiżi terzi oħra. Fin-nuqqas ta’ kwalunkwe informazzjoni affidabbli oħra, il-Kummissjoni użat data dwar l-esportazzjoni mill-bażi tad-data Ċiniża. Għalkemm din inġabret f’livell ta’ “kodiċi tariffarju” bi tmien ċifri u għalhekk tinkludi diversi prodotti domestiċi oħra li mhumiex twavel għall-mogħdija, din tqieset bħala l-aktar punt ta’ riferiment raġonevoli disponibbli li jagħti indikazzjonijiet sinifikanti ta’ livelli ta’ prezzijiet possibbli lejn swieq tal-esportazzjoni ta’ pajjiżi terzi oħra.

(146)

Skont il-bażi tad-data Ċiniża matul il-perjodu ta’ investigazzjoni tar-rieżami, it-tliet swieq esportaturi ewlenin għar-RPĊ f’termini ta’ volum kienu l-Istati Uniti, l-UE u l-Ġappun. Filwaqt li kemm l-Istati Uniti kif ukoll l-UE huma swieq kbar, il-Ġappun huwa ferm iżgħar. F’termini ta’ prezzijiet, il-prezz medju tal-unità għall-UE kien ogħla mill-prezz għall-Istati Uniti u simili għal dak tal-Ġappun.

(147)

Matul il-perjodu ta’ investigazzjoni tar-rieżami, l-esportaturi/produtturi Ċiniżi komplew jesportaw lejn is-suq tal-UE bi prezzijiet li kienu s-suġġett ta’ dumping, kif stabbilit hawn fuq fil-premessa (138). Billi l-prezzijiet ta’ esportazzjoni Ċiniżi lejn is-swieq tal-esportazzjoni l-oħra ewlenin huma simili (76) jew aktar baxxi (77) mill-prezzijiet lejn l-UE, dan jissuġġerixxi li l-esportaturi/produtturi Ċiniżi għandhom imġiba ta’ esportazzjoni simili lejn swieq ta’ pajjiżi terzi oħra. Dan jidher li ġie kkonfermat mir-Rieżami Sunset tal-Istati Uniti skont liema l-miżuri anti-dumping fir-rigward tal-importazzjonijiet Ċiniżi tat-twavel għall-mogħdija lejn l-Istati Uniti ġew estiżi.

(148)

L-analiżi dwar l-esportazzjonijiet Ċiniżi żvelat li, minkejja l-miżuri anti-dumping fis-seħħ, is-suq tal-UE jibqa’ wieħed mill-aktar swieq tal-esportazzjoni importanti għall-produtturi Ċiniżi tat-twavel għall-mogħdija. Il-prezzijiet Ċiniżi tal-esportazzjoni lejn swieq oħra huma bħala medja aktar baxxi minn dawk tal-esportazzjonijiet lejn l-UE. Dan jissuġġerixxi li s-suq tal-UE jħalli aktar qligħ u għalhekk attraenti għall-esportazzjonijiet Ċiniżi. Meta jitqies il-Ġappun, l-istatistika turi li dan huwa suq ferm iżgħar u l-esportazzjonijiet miċ-Ċina lejn il-Ġappun ma żdidux b’mod sinifikanti matul l-aħħar snin. Minħabba d-domanda limitata fis-suq Ġappuniż, mhuwiex probabbli li l-esportazzjonijiet Ċiniżi lejn il-Ġappun se jiżdiedu b’mod sinifikanti.

(149)

Dan ġie kkonfermat mill-fatt li s-sehem mis-suq Ċiniż matul il-perjodu ta’ investigazzjoni tar-rieżami kien għadu 11 % minkejja l-miżuri anti-dumping fis-seħħ (ara l-premessa (160)). Madwar 80 % ta’ dawn l-importazzjonijiet joriġinaw mill-kumpanija Ċiniża bl-aktar dazju anti-dumping individwali baxx. Dan jindika b’mod ċar li l-UE għadha suq attraenti għall-produtturi Ċiniżi tat-twavel għall-mogħdija u li l-importazzjonijiet mir-RPĊ x’aktarx jiżdiedu jekk il-miżuri jitħallew jiskadu.

(150)

Fil-qafas tar-rieżami sunset tal-Istati Uniti, kif imsemmi fil-premessa (142), f’Marzu tal-2016, id-Dipartiment tal-Kummerċ fl-Istati Uniti ta avviż (78) dwar il-kontinwazzjoni tal-ordni tad-dazju anti-dumping fuq it-twavel għall-mogħdija mir-RPĊ għal ħames snin oħra, jiġifieri sal-2021. Ir-rata tad-dazju anti-dumping għall-“kumpaniji l-oħra kollha” hija ta’ 157,68 % (79) (meta mqabbla ma’ 42,3 % fl-UE). Matul ir-rieżami, l-awtoritajiet tal-Istati Uniti sabu li, għalkemm l-importazzjonijiet tat-twavel għall-mogħdija mir-RPĊ lejn l-Istati Uniti kienu għadhom preżenti, il-miżuri kellhom effett ta’ tnaqqis (minn 1,1 miljun fl-2012 għal 0,43 miljun fl-2014); sitwazzjoni li x’aktarx mhix se tinbidel fil-futur qrib.

(151)

Billi s-suq tal-UE huwa prattikament magħluq għall-produtturi Ċiniżi, hemm probabbiltà kbira li l-produtturi Ċiniżi tat-twavel għall-mogħdija se jittrasferixxu jew jerġgħu jibdew l-esportazzjonijiet tagħhom lejn l-UE jekk il-miżuri jitħallew jiskadu u li tali esportazzjonijiet isiru bi prezzijiet li jkunu s-suġġett ta’ dumping.

(152)

Abbażi ta’ dan ta’ hawn fuq, ġie konkluż li l-UE hija suq attraenti għall-esportaturi Ċiniżi.

(153)

Abbażi tal-kapaċità tal-produzzjoni sinifikanti fir-RPĊ, u l-kapaċità li tiżdied il-kapaċità mingħajr kostijiet sinifikanti, l-imġiba Ċiniża tal-prezzijiet lejn pajjiżi terzi oħra u l-attraenza tas-suq tal-UE għall-produtturi/esportaturi Ċiniżi, il-Kummissjoni kkonkludiet li hemm probabbiltà kbira li r-revoka tal-miżuri anti-dumping tirriżulta f’kontinwazzjoni tad-dumping.

(154)

Matul il-perjodu ta’ investigazzjoni tar-rieżami, il-prodott simili kien prodott minn 10 produtturi magħrufa fl-UE. Dawn jikkostitwixxu l-industrija tal-Unjoni fis-sens tal-Artikolu 4(1) tar-Regolament bażiku.

(155)

Il-produzzjoni totali tal-Unjoni matul il-perjodu ta’ investigazzjoni tar-rieżami ġiet stabbilita għal 5,2 miljun biċċa. Il-Kummissjoni stabbiliet din iċ-ċifra abbażi tad-data pprovduta mill-applikant, li ġiet imqabbla mad-data vverifikata tal-kumpaniji inklużi fil-kampjun.

(156)

Il-konsum fl-UE ġie stabbilit abbażi tal-volum tal-importazzjoni kif irreġistrat fil-bażi tad-data msemmija fl-Artikolu 14(6) u l-volumi tal-bejgħ tal-industrija tal-Unjoni fl-UE kif ippreżentati mill-applikant. Dawn il-volumi tal-bejgħ ġew ivverifikati u aġġornati fejn kien meħtieġ fir-rigward tal-informazzjoni vverifikata mill-produtturi tal-Unjoni inklużi fil-kampjun.

(157)

Għar-raġunijiet deskritti fil-premessa (133), il-Kummissjoni stabbiliet il-volumi tal-importazzjoni mir-RPĊ abbażi tal-fatti disponibbli skont l-Artikolu 18 tar-Regolament bażiku. Għal dan il-għan, il-volum tal-importazzjoni mir-RPĊ ġie stabbilit abbażi tad-data rreġistrata fil-bażi tad-data msemmija fl-Artikolu 14(6).

(158)

Matul il-perjodu meqjus il-konsum fl-UE żviluppa kif ġej:

Tabella 3

Konsum fl-UE

(159)

Matul il-perjodu meqjus, il-konsum fl-UE żdied b’5 %. Din iż-żieda saret bejn l-2014 u l-2015 u l-konsum baqa’ kostanti wara dan.

(160)

Matul il-perjodu meqjus, l-importazzjonijiet fl-UE mir-RPĊ u s-sehem mis-suq żviluppaw kif ġej:

Tabella 4

Importazzjonijiet mir-RPĊ u s-sehem mis-suq

(161)

L-importazzjonijiet naqsu bejn l-2014 u l-2016 bi 53 %, iżda reġgħu żdiedu fil-perjodu ta’ investigazzjoni tar-rieżami b’54 %. B’mod ġenerali tul il-perjodu meqjus dawn naqsu b’27 %. Is-sehem mis-suq tal-importazzjonijiet Ċiniżi segwa l-istess xejra, jiġifieri naqas minn 15,8 % fl-2014 għal 7,1 % fl-2016 u mbagħad reġa’ żdied bi 3,8 punti perċentwali u laħaq 10,9 % matul il-perjodu ta’ investigazzjoni tar-rieżami. Filwaqt li s-sehem mis-suq tal-importazzjonijiet Ċiniżi naqas b’mod ġenerali b’31 % matul il-perjodu meqjus, dan baqa’ sinifikanti.

(162)

Minħabba n-nuqqas ta’ kooperazzjoni tal-produtturi esportaturi Ċiniżi, il-prezz medju tal-importazzjoni tal-importazzjonijiet mir-RPĊ kellu jiġi stabbilit abbażi tal-fatti disponibbli skont l-Artikolu 18 tar-Regolament bażiku, jiġifieri abbażi tal-informazzjoni inkluża fil-bażi tad-data msemmija fl-Artikolu 14(6) u billi ntużat l-istess tabella ta’ korrelazzjoni li ġiet stabbilita fir-rieżami ta’ skadenza preċedenti. Abbażi ta’ dan, il-prezzijiet tal-importazzjoni l-ewwel żdiedu mill-2014 għall-2015 b’20 % iżda mbagħad naqsu għal-livelli tal-2014. Matul il-perjodu ta’ investigazzjoni tar-rieżami, il-prezzijiet kienu ta’ EUR 8,7/biċċa.

Tabella 5

Prezzijiet tal-importazzjoni

(163)

Biex jiġi ddeterminat it-twaqqigħ tal-prezzijiet matul il-perjodu ta’ investigazzjoni tar-rieżami, il-prezz medju peżat tal-bejgħ tal-produtturi tal-Unjoni inklużi fil-kampjun li ntalab lill-klijenti mhux relatati fis-suq tal-UE, aġġustat għal-livell tal-prezz mill-fabbrika (jiġifieri esklużi l-kostijiet tat-trasport fl-UE u wara tnaqqis tal-iskontijiet u r-ribassi), tqabbel mal-prezz medju peżat korrispondenti tal-importazzjonijiet kif stipulat iktar ’il fuq fil-premessa (162), fuq bażi ta’ CIF, u mbagħad ġie inkluż id-dazju doganali u anti-dumping.

(164)

It-tqabbil wera li, meta mogħtija bħala perċentwal tal-fatturat tal-produtturi tal-Unjoni inklużi fil-kampjun matul il-perjodu ta’ investigazzjoni tar-rieżami, l-importazzjonijiet miċ-Ċina kienu qed iwaqqgħu l-prezzijiet tal-industrija tal-Unjoni bi kważi 2,3 %. Meta tnaqqas id-dazju anti-dumping fis-seħħ, il-marġni tat-twaqqigħ ammonta għal 19,4 %.

(165)

L-importazzjonijiet minn pajjiżi terzi mhux soġġetti għal miżuri ġew stabbiliti abbażi tal-bażi tad-data msemmija fl-Artikolu 14(6) kif deskritt fil-premessa (156).

Tabella 6

Importazzjonijiet minn pajjiżi terzi mhux soġġetti għal miżuri

(166)

Il-volum tal-importazzjonijiet mill-pajjiżi terzi kollha mhux soġġetti għal miżuri żdied bi 28 % matul il-perjodu meqjus. Il-volum tal-importazzjonijiet mill-pajjiżi terzi kollha mhux soġġetti għal miżuri fit-totalità tagħhom kien ta’ madwar 2,8 miljun biċċa fil-perjodu ta’ investigazzjoni tar-rieżami, li jfisser sehem mis-suq ta’ 32,9 %. Il-maġġoranza ta’ dawn l-importazzjonijiet oriġinaw mill-Ukrajna u mit-Turkija. L-importazzjonijiet mill-Ukrajna żdiedu minn 0,7 miljun biċċa għal 1,0 miljun biċċa mill-2014 sal-2016 u baqgħu fl-istess livell matul il-perjodu ta’ investigazzjoni tar-rieżami. L-importazzjonijiet mit-Turkija l-ewwel żdiedu minn 0,9 miljun biċċa għal 1,3 miljun biċċa bejn l-2014 u l-2016 u mbagħad reġgħu naqsu għal 1,0 miljun biċċa fil-perjodu ta’ investigazzjoni tar-rieżami. L-importazzjonijiet mill-Indja baqgħu relattivament stabbli (madwar 0,5 – 0,6 miljun biċċa) matul il-perjodu meqjus. Il-volum tal-importazzjonijiet minn pajjiżi terzi oħra kien baxx, filwaqt li żdied minn 0,1 miljun biċċa għal 0,2 miljun biċċa matul il-perjodu meqjus. F’termini ta’ sehem mis-suq, dan irriżulta f’żieda ta’ tliet punti perċentwali għal 12 % għall-Ukrajna, żieda ta’ 1,1 punt perċentwali għat-Turkija għal 11,9 % u tnaqqis għall-Indja minn 6,6 % fl-2014 għal 6,1 % fil-perjodu ta’ investigazzjoni tar-rieżami. Is-sehem tas-suq ta’ pajjiżi terzi oħra żdied minn 0,7 % għal 2,9 % matul il-perjodu meqjus.

(167)

Il-prezz medju tal-importazzjonijiet mill-Ukrajna naqas minn EUR 11,3/biċċa fl-2014 għal EUR 10,5/biċċa fil-perjodu ta’ investigazzjoni tar-rieżami. Matul l-istess perjodu, il-prezz medju tal-importazzjonijiet mit-Turkija żdied bi ftit minn EUR 10,5/biċċa għal EUR 10,7/biċċa. Il-prezz tal-importazzjonijiet mill-Indja żdied b’mod aktar sinifikanti, minn EUR 7,9/biċċa fl-2014 għal EUR 11,0/biċċa fil-perjodu ta’ investigazzjoni tar-rieżami. Il-prezz medju peżat tal-importazzjonijiet mill-pajjiżi terzi kollha fit-totalità tagħhom baqa’ relattivament stabbli, filwaqt li żdied minn EUR 10,4/biċċa fl-2014 għal EUR 10,8/biċċa fil-perjodu ta’ investigazzjoni tar-rieżami.

(168)

Skont l-Artikolu 3(5) tar-Regolament bażiku, l-eżami tal-impatt tal-importazzjonijiet li huma s-suġġett ta’ dumping fuq l-industrija tal-Unjoni kien jinkludi evalwazzjoni tal-fatturi u l-indiċijiet ekonomiċi kollha li affettwaw l-istat tal-industrija tal-Unjoni matul il-perjodu meqjus.

(169)

Għall-fini tal-analiżi tad-dannu, l-indikaturi tad-dannu ġew stabbiliti f’żewġ livelli:

(170)

Il-produzzjoni totali tal-Unjoni, il-kapaċità tal-produzzjoni u l-użu tal-kapaċità żviluppaw kif ġej matul il-perjodu meqjus:

Tabella 7

Produzzjoni, kapaċità tal-produzzjoni u użu tal-kapaċità

(171)

Il-produzzjoni totali tal-Unjoni baqgħet stabbli matul il-perjodu meqjus filwaqt li l-kapaċità żdiedet b’erba’ punti perċentwali. Din iż-żieda żgħira fil-kapaċità tal-produzzjoni kienet prinċipalment ir-riżultat tal-awtomatizzazzjoni u ta’ titjib fuq skala żgħira li neħħa ċerti ostakoli fil-proċess tal-produzzjoni. Għalhekk, matul il-perjodu meqjus, ir-rata tal-użu tal-kapaċità naqset bi ftit minn 72 % għal 69 %, filwaqt li rriflettiet iż-żieda fil-kapaċità u volumi tal-produzzjoni kostanti.

(172)

Il-volum tal-bejgħ tal-industrija tal-Unjoni ġie stabbilit abbażi tad-data pprovduta mill-applikant. L-informazzjoni pprovduta ġiet kontroverifikata u aġġornata fejn kien meħtieġ mal-informazzjoni vverifikata mit-tliet produtturi tal-Unjoni inklużi fil-kampjun.

(173)

Matul il-perjodu meqjus, il-volum tal-bejgħ tal-industrija tal-Unjoni żviluppa kif ġej:

Tabella 8

Volum tal-bejgħ

(174)

Il-bejgħ mill-industrija tal-Unjoni fis-suq tal-UE żdied bi ftit bejn l-2014 u l-2016 u wara baqa’ stabbli matul il-perjodu ta’ investigazzjoni tar-rieżami. Matul il-perjodu meqjus, b’kollox dan żdied b’4 %.

(175)

Is-sehem mis-suq tal-industrija tal-Unjoni naqas minn 57,0 % għal 56,1 % matul il-perjodu meqjus. Dan jirriżulta mill-fatt li l-bejgħ tal-industrija tal-Unjoni żdied bi ftit inqas (4 %) mill-konsum fl-UE, li żdied b’5 % matul il-perjodu meqjus, kif deskritt fil-premessa (158).

Tabella 9

Sehem mis-suq

(176)

Matul il-perjodu meqjus il-livell tal-impjiegi u l-produttività żviluppaw kif ġej:

Tabella 10

Impjiegi u produttività

(177)

L-impjiegi varjaw bi ftit, filwaqt li b’mod ġenerali naqsu bi 2 % matul il-perjodu meqjus. B’mod aktar speċifiku, kien hemm żieda mill-2014 għall-2015 wara tnaqqis mill-2015 għall-perjodu ta’ investigazzjoni tar-rieżami. Il-produttività, imkejla bħala output (biċċiet) għal kull persuna impjegata fis-sena, varjat ukoll bi ftit, filwaqt li b’mod ġenerali żdiedet bi 2 % matul il-perjodu meqjus. Żewġ fatturi ewlenin affettwaw l-għadd ta’ impjegati u l-produttività: l-integrazzjoni vertikali tal-proċess tal-produzzjoni minn naħa waħda u l-awtomatizzazzjoni min-naħa l-oħra. Filwaqt li l-ewwel waħda żiedet l-impjiegi, it-tieni waħda naqset l-għadd ta’ impjegati, li rriżultat b’mod ġenerali f’impjiegi relattivament stabbli b’varjazzjonijiet żgħar biss. B’mod ġenerali, din irriżultat f’żieda fil-produttività.

(178)

Kif spjegat fil-premessi (158) u (159), il-konsum fl-UE żdied b’5 % bejn l-2014 u l-perjodu ta’ investigazzjoni tar-rieżami. B’mod parallel, il-volum tal-bejgħ mill-industrija tal-Unjoni fis-suq tal-Unjoni żdied b’4 % u s-sehem mis-suq tal-industrija tal-Unjoni żdied b’1 %. Il-produzzjoni tal-industrija tal-Unjoni baqgħet stabbli u l-impjiegi naqsu bi ftit ((2 %) il-premessa (177)) matul l-istess perjodu. Għalhekk, jista’ jiġi konkluż li l-industrija tal-Unjoni esperjenzat biss tkabbir żgħir li kien inqas mit-tkabbir tas-suq matul il-perjodu meqjus.

(179)

Id-dumping kompla matul il-perjodu ta’ investigazzjoni tar-rieżami f’livell sinifikanti. Il-produtturi esportaturi Ċiniżi komplew ukoll iwaqqgħu l-prezzijiet tal-bejgħ tal-industrija tal-Unjoni matul il-perjodu ta’ investigazzjoni tar-rieżami.

(180)

Fl-istess ħin, il-livell tal-importazzjonijiet miċ-Ċina baqa’ sinifikanti u ammonta għal sehem mis-suq ta’ 10,9 % fil-perjodu ta’ investigazzjoni tar-rieżami. Għalhekk, l-impatt tad-daqs tal-marġni tad-dumping attwali miċ-Ċina fuq l-industrija tal-Unjoni ma jistax jitqies bħala negliġibbli.

(181)

Il-prezz unitarju medju tal-bejgħ u l-kost tal-produzzjoni tal-produtturi tal-Unjoni inklużi fil-kampjun lill-klijenti mhux relatati fl-UE żviluppaw kif ġej matul il-perjodu meqjus.

Tabella 11

Prezz tal-bejgħ u kost tal-produzzjoni

(182)

Il-prezzijiet medji naqsu b’6 % matul il-perjodu meqjus. Sa ċertu punt, dan it-tnaqqis irrifletta l-bidla fis-suq fejn l-hekk imsejħa “ħwienet bi skontijiet kbar” żiedu s-sehem mis-suq tagħhom meta mqabbla mas-supermarkets tradizzjonali, li rriżulta fi pressjoni akbar fuq il-prezzijiet.

(183)

Il-kost unitarju tal-produzzjoni naqas bi 3 % matul il-perjodu meqjus b’riżultat tal-awtomatizzazzjoni u żied l-integrazzjoni vertikali li rriżultat f’effiċjenza akbar. Madankollu, il-prezzijiet tal-bejgħ naqsu bi ftit aktar mill-kost, li ħallew impatt negattiv fuq il-profitabbiltà tal-industrija tal-Unjoni bejn l-2014 u l-perjodu ta’ investigazzjoni tar-rieżami, kif muri fit-Tabella 14.

(184)

Il-kostijiet lavorattivi medji żviluppaw kif ġej matul il-perjodu meqjus:

Tabella 12

Kostijiet lavorattivi

(185)

Il-pagi medji kienu qed ivarjaw matul il-perjodu meqjus, iżda madankollu baqgħu pjuttost stabbli. Matul il-perjodu meqjus dawn żdiedu b’1 %.

(186)

Il-volum tal-istokks tal-għeluq żviluppa kif ġej matul il-perjodu meqjus:

Tabella 13

L-istokks

(187)

Il-livell tal-istokks kien qed jonqos matul il-perjodu meqjus u kien 32 % inqas fil-perjodu ta’ investigazzjoni tar-rieżami fir-rigward tal-livell tiegħu fl-2014.

(188)

Il-profittabbiltà, il-fluss tal-flus, l-investimenti u r-redditu fuq l-investimenti tal-industrija tal-Unjoni żviluppaw kif ġej matul il-perjodu meqjus:

Tabella 14

Profittabbiltà, fluss tal-flus, investimenti, redditu fuq l-investiment u kapaċità li jiġi ġġenerat kapital

(189)

Il-Kummissjoni stabbilixxiet il-profittabbiltà tal-produtturi tal-Unjoni inklużi fil-kampjun billi esprimiet il-profitt nett qabel it-taxxa tal-bejgħ tal-prodott simili lill-klijenti mhux relatati fl-Unjoni bħala perċentwal tal-fatturat ta’ dak il-bejgħ. Matul il-perjodu meqjus, il-profitabbiltà tal-industrija tal-Unjoni naqset b’mod gradwali minn 6,3 % fl-2014 għal 3,6 % fil-perjodu ta’ investigazzjoni tar-rieżami. Minkejja li jħalli l-qligħ, matul il-perjodu meqjus il-livell tal-profitti miksuba baqa’ inqas mill-profitt fil-mira li kien meqjus xieraq għal din l-industrija fl-investigazzjoni oriġinali (jiġifieri 7,0 %).

(190)

Il-fluss tal-flus nett minn attivitajiet operatorji ttejjeb għall-ewwel darba mill-2014 għall-2015. Wara dan, mill-2015 għall-perjodu ta’ investigazzjoni tar-rieżami, dan beda jmur għall-agħar f’konformità mal-profitabbiltà. Il-livell tal-investimenti naqas għall-ewwel darba mill-2014 u l-2015 u mbagħad żdied, li rriżulta f’żieda ġenerali ta’ 55 % matul il-perjodu meqjus. Parti kbira mill-investimenti kellhom l-għan li jżidu l-livell tal-integrazzjoni vertikali u l-awtomatizzazzjoni sabiex jitnaqqas il-kost tal-produzzjoni. Iż-żieda fil-kapaċità rrappreżentat biss 4 % u rriżultat mit-titjib fl-effiċjenza (ara l-premessi (170) u (171)).

(191)

Bejn l-2014 u l-perjodu ta’ investigazzjoni tar-rieżami, ir-redditu fuq l-investiment, iddefinit bħala l-profitt f’perċentwal tal-valur kontabilistiku nett tal-investimenti, naqas f’konformità mal-profitabbiltà.

(192)

L-analiżi dwar l-indikaturi makroekonomiċi uriet li s-sitwazzjoni tal-industrija tal-Unjoni ma nbidlitx materjalment fil-perjodu meqjus. Il-produzzjoni, is-sehem mis-suq u l-impjiegi tal-industrija tal-Unjoni baqgħu prattikament fl-istess livelli u l-volumi tal-bejgħ żdiedu bi ftit iżda xorta inqas mill-konsum tal-UE. Min-naħa l-oħra, xi wħud mill-indikaturi mikroekonomiċi rilevanti bħall-profitabbiltà, il-fluss tal-flus u r-redditu fuq l-investimenti marru għall-agħar. Bis-saħħa tal-investimenti fl-integrazzjoni vertikali u l-awtomatizzazzjoni, l-industrija tal-Unjoni setgħet ittejjeb xi ftit il-produttività tagħha u tnaqqas il-kost unitarju tagħha tal-produzzjoni.

(193)

Fl-istess ħin, kien hemm bidliet fis-sitwazzjoni tas-suq, b’mod partikolari li l-hekk imsejħa “ħwienet bi skontijiet kbar” saru attur aktar importanti fid-distribuzzjoni tal-prodott taħt rieżami. Dan irriżulta fi pressjoni akbar fuq il-prezzijiet. Dan, flimkien mal-pressjoni fuq il-prezz tal-importazzjonijiet Ċiniżi li huma s-suġġett ta’ dumping, li kellhom sehem mis-suq sinifikanti u li kienu qed iwaqqgħu l-prezzijiet tal-bejgħ tal-industrija tal-Unjoni matul il-perjodu meqjus, wasslu għal deterjorament tas-sitwazzjoni finanzjarja tal-industrija tal-Unjoni, li l-prezzijiet tagħha naqsu aktar mill-kost tal-produzzjoni.

(194)

Fid-dawl ta’ dan ta’ hawn fuq, jista’ jiġi konkluż li s-sitwazzjoni tal-industrija tal-Unjoni ma marritx għall-agħar b’mod drastiku u li l-miżuri fir-rigward tal-importazzjonijiet Ċiniżi kienu effettivi sa ċertu punt. B’mod partikolari, dawn evitaw li l-industrija tal-Unjoni ġġarrab telf materjali fis-sehem mis-suq. Madankollu, mingħajr l-istabbilizzazzjoni evidenti tas-sehem mis-suq u l-isforzi tat-twaqqigħ tal-kost, il-profitabbiltà tal-industrija tal-Unjoni naqset u baqgħet inqas mill-profitt fil-mira (7 %) matul il-perjodu meqjus. Abbażi ta’ dan, ġie konkluż li l-industrija tal-Unjoni ma sofrietx dannu materjali iżda tibqa’ f’sitwazzjoni fraġli.

(195)

Minħabba s-sejbiet deskritti fil-premessi (192) sa (194), il-Kummissjoni eżaminat jekk hemmx probabbiltà ta’ rikorrenza tad-dannu jekk il-miżuri jiġu rrevokati. Għal dan il-għan ġew eżaminati l-elementi li ġejjin: il-kapaċità tal-produzzjoni u l-kapaċitajiet ta’ riżerva fir-RPĊ, l-attraenza tas-suq tal-UE, l-imġiba tal-prezz tal-produtturi esportaturi Ċiniżi f’suq ta’ pajjiżi terzi oħra u l-livelli tal-prezz probabbli għall-UE jekk il-miżuri jiġu rrevokati u l-effett ta’ importazzjonijiet futuri fuq is-sitwazzjoni tal-industrija tal-Unjoni.

(196)

Kif imsemmi hawn fuq fil-premessa (140), minħabba n-nuqqas ta’ kooperazzjoni tal-produtturi esportaturi Ċiniżi, l-analiżi kienet ibbażata fuq l-Artikolu 18 tar-Regolament bażiku billi ntużaw il-fatti disponibbli. F’dan ir-rigward, il-Kummissjoni bbażat ruħha fuq il-bażi tad-data msemmija fl-Artikolu 14(6), il-bażi tad-data Ċiniża u s-sejbiet ippubblikati fil-qafas tar-rieżami sunset tal-Istati Uniti (80), imsemmi fil-premessa (142) ta’ hawn fuq.

(197)

Kif stabbilit fil-premessi (142) sa (144), il-kapaċità tal-produzzjoni Ċiniża hija sinifikanti, filwaqt li tirrappreżenta mill-inqas kważi 100 % tal-konsum fl-UE. Din tista’ tiżdied faċilment mingħajr ma investimenti sinifikanti jkunu jiddependu fuq l-iżviluppi tas-suq.

(198)

Kif imsemmi fil-premessi (148) sa (152), l-UE hija waħda mis-swieq esportaturi ewlenin għat-twavel għall-mogħdija miċ-Ċina. X’aktarx dan mhux se jinbidel fi żmien qasir, peress li hemm dazji għolja anti-dumping fis-seħħ fuq l-esportazzjonijiet Ċiniżi tat-twavel għall-mogħdija fl-Istati Uniti (suq ieħor ewlieni tal-esportazzjoni għaċ-Ċina) mill-inqas sal-2021. L-investigazzjoni attwali stabbilixxiet ukoll li s-suq tal-UE huwa attreanti f’termini ta’ prezzijiet għall-produtturi Ċiniżi tat-twavel għall-mogħdija. Għalhekk, il-produtturi Ċiniżi x’aktarx se jkomplu l-esportazzjonijiet tagħhom lejn is-suq tal-UE fi kwantitajiet kbar u bi prezzijiet li jkunu s-suġġett ta’ dumping jekk il-miżuri jitħallew jiskadu.

(199)

Il-Kummissjoni analizzat il-livell tal-prezz probabbli tal-importazzjonijiet Ċiniżi għall-UE jekk il-miżuri jitħallew jiskadu. F’dan ir-rigward, tqies li l-livelli tal-prezz attwali għall-UE mingħajr dazju anti-dumping kif ukoll il-livelli tal-prezz għal swieq esportaturi oħra ewlenin ikunu indikazzjoni raġonevoli. Minħabba l-fatt li l-ebda wieħed mill-esportaturi/produtturi Ċiniżi ma kkoopera, il-Kummissjoni bbażat l-analiżi tagħha fuq l-informazzjoni rreġistrata fil-bażi tad-data msemmija fl-Artikolu 14(6) kif ukoll il-bażi tad-data Ċiniża skont l-Artikolu 18 tar-Regolament bażiku.

(200)

Fil-perjodu ta’ investigazzjoni tar-rieżami, il-prezz medju tal-esportazzjonijiet tal-produtturi esportaturi Ċiniżi għas-suq tal-UE mingħajr dazju anti-dumping kien inqas b’mod sinifikanti mill-prezz tal-industrija tal-Unjoni fis-suq tal-UE, li juri marġni tat-twaqqigħ ta’ 19,4 %. Fil-fatt, il-prezzijiet Ċiniżi tal-importazzjoni (mingħajr dazju anti-dumping) (EUR 8,7/biċċa) kienu wkoll inqas mill-prezzijiet tal-importazzjoni minn pajjiżi terzi oħra għas-suq tal-UE (li kienu jvarjaw minn EUR 10,5 sa EUR 12,7/biċċa).

(201)

Fir-rigward tal-prezzijiet Ċiniżi tal-esportazzjoni għas-swieq l-oħra ewlenin Ċiniżi tal-esportazzjoni, jiġifieri l-Ġappun u l-Istati Uniti, dawn kienu simili jew saħansitra inqas mill-prezzijiet tal-esportazzjoni tagħhom għall-UE kif stabbilit fil-premessa (147).

(202)

Għaldaqstant, huwa probabbli li jekk il-miżuri jitħallew jiskadu, il-volumi tal-importazzjoni miċ-Ċina jkunu f’livelli ta’ prezzijiet li jwaqqgħu b’mod sinifikanti l-prezz tal-bejgħ tal-industrija tal-Unjoni fis-suq tal-UE.

(203)

Fid-dawl tal-kunsiderazzjonijiet ta’ hawn fuq, jekk il-miżuri jitħallew jiskadu, l-industrija tal-Unjoni se tiffaċċja żieda importanti fl-importazzjonijiet Ċiniżi, li se jwaqqgħu b’mod sinifikanti l-prezzijiet tal-industrija tal-Unjoni. B’kunsiderazzjoni tal-iżviluppi attwali fis-suq, b’mod partikolari l-bidla lejn il-“ħwienet bi skontijiet kbar” li jikkawżaw pressjoni fuq il-prezzijiet, tali importazzjonijiet ikomplu jżidu l-pressjoni fuq il-prezz fis-suq tal-UE.

(204)

F’tali xenarju, jekk l-industrija tal-Unjoni, f’tentattiv biex tibqa’ tagħmel profitt, iżomm il-livelli tal-prezzijiet attwali tagħha, x’aktarx titlef volum tal-bejgħ u sehem mis-suq b’mod rapidu, anke fil-każ ta’ żieda fil-konsum. Tabilħaqq, it-twavel għall-mogħdija miċ-Ċina huma tal-istess kwalità bħal dawk li jiġu prodotti u li jinbiegħu mill-industrija tal-Unjoni u jistgħu jinbidlu perfettament ma’ xulxin. It-telf tal-volum tal-bejgħ iwassal għal rati aktar baxxi tal-użu tal-kapaċità u għal żieda fil-kost medju tal-produzzjoni. Dan min-naħa l-oħra jwassal għal deterjorament tas-sitwazzjoni finanzjarja tal-industrija tal-Unjoni u għal tnaqqis fil-profitabbiltà tagħha li diġà kienet aktar baxxa mill-profitt fil-mira u li diġà wriet xejra ta’ tnaqqis fil-perjodu meqjus.

(205)

Alternattivament, jekk l-industrija tal-Unjoni tipprova tqabbel il-livelli baxxi tal-prezz tal-importazzjonijiet f’tentattiv biex iżżomm il-volum tal-bejgħ u s-sehem mis-suq tagħha, din ikollha tbigħ f’livelli ta’ prezzijiet li ma jkunux ikopru l-kostijiet unitarji u għalhekk tibda tagħmel it-telf b’mod rapidu. Dan iwassal għal aktar deterjorament ta’ indikaturi finanzjarji oħra u tas-sitwazzjoni finanzjarja tagħha b’mod ġenerali. Il-livell tal-profitabbiltà li diġà kien inkiseb fil-perjodu ta’ investigazzjoni tar-rieżami kien diġà inqas mill-profitt fil-mira u kwalunkwe telf ulterjuri fil-profitabbiltà jdgħajjef b’mod rapidu l-industrija tal-Unjoni, jipperikola l-investimenti li saru fil-perjodu meqjus u jwassal għal sitwazzjoni dannuża.

(206)

Għaldaqstant, il-Kummissjoni kkonkludiet li r-revoka tal-miżuri fuq l-importazzjonijiet tat-twavel għall-mogħdija mir-RPĊ x’aktarx tirriżulta f’rikorrenza ta’ dannu materjali għall-industrija tal-Unjoni.

(207)

Skont l-Artikolu 21 tar-Regolament bażiku, il-Kummissjoni eżaminat jekk iż-żamma tal-miżuri anti-dumping eżistenti tmurx kontra l-interessi tal-Unjoni kollha kemm hi. Id-determinazzjoni tal-interess tal-Unjoni kienet ibbażata fuq apprezzament tad-diversi interessi involuti, jiġifieri dawk tal-industrija tal-Unjoni minn naħa waħda, u dawk tal-importaturi u ta’ partijiet oħra min-naħa l-oħra.

(208)

Il-Kummissjoni tfakkar li, fl-investigazzjonijiet preċedenti, kien meqjus li l-adozzjoni jew iż-żamma tal-miżuri ma tmurx kontra l-interessi tal-Unjoni. Barra minn hekk, il-fatt li din l-investigazzjoni hija rieżami, li b’hekk tanalizza sitwazzjoni li fiha l-miżuri anti-dumping diġà kienu fis-seħħ, jippermetti l-valutazzjoni ta’ kwalunkwe impatt negattiv mhux dovut fuq il-partijiet ikkonċernati mill-miżuri anti-dumping attwali.

(209)

Fuq din il-bażi, ġie eżaminat jekk, minkejja l-konklużjonijiet dwar il-probabbiltà ta’ kontinwazzjoni jew rikorrenza ta’ dumping u ta’ dannu, kienx hemm raġunijiet konvinċenti li jwasslu għall-konklużjoni li mhuwiex fl-interess tal-Unjoni li jinżammu l-miżuri f’dan il-każ partikolari.

(210)

L-investigazzjoni wriet li l-iskadenza tal-miżuri x’aktarx ikollha effett negattiv sinifikanti fuq l-industrija tal-Unjoni (il-premessi (203) sa (206)). Min-naħa l-oħra, il-kontinwazzjoni tal-miżuri tippermetti lill-industrija tal-Unjoni tirkupra aktar mid-dannu preċedenti kkawżat minn importazzjonijiet li jkunu s-suġġett ta’ dumping, tisfrutta l-benefiċċji mill-investimenti li saru matul il-perjodu meqjus u tadatta ruħha għall-bidliet fis-suq billi tkompli l-isforzi tagħha biex iżżid il-produttività u tisfrutta l-potenzjal tagħha f’suq tal-UE li mhuwiex affettwat minn prattiki kummerċjali inġusti.

(211)

Abbażi ta’ dan t’hawn fuq, ġie konkluż li ż-żamma tal-miżuri anti-dumping fis-seħħ huwa fl-interess tal-industrija tal-Unjoni.

(212)

L-ebda importatur mhux relatat ma kkoopera fl-investigazzjoni. L-ebda waħda mill-partijiet interessati l-oħra potenzjali ma ppreżentat lilha nnifisha matul l-investigazzjoni. F’investigazzjonijiet preċedenti, l-analiżi tal-interess tal-Unjoni ma wriet l-ebda impatt negattiv tal-miżuri fuq l-importaturi u partijiet interessati oħra. Barra minn hekk, l-importazzjonijiet minn pajjiżi oħra mingħajr dazji anti-dumping jammontaw għal sehem mis-suq ta’ 33 % u jiżguraw il-kompetizzjoni u l-għażla tal-provvista fis-suq. Għalhekk, ġie konkluż li ma hemm l-ebda evidenza li tissuġġerixxi li l-miżuri fis-seħħ jaffettwaw b’mod konsiderevoli l-importaturi tal-prodott taħt rieżami jew lil partijiet interessati oħra.

(213)

Bħal fl-investigazzjoni preċedenti, l-ebda parti li tirrappreżenta l-interessi tal-utenti aħħarin, bħal assoċjazzjonijiet ta’ konsumaturi, ma ppreżentat lilha nnifisha jew ikkooperat fl-investigazzjoni. Fin-nuqqas kontinwu ta’ kooperazzjoni mill-utenti f’dan ir-rieżami ta’ skadenza, il-Kummissjoni qieset li s-sejbiet tagħha fl-investigazzjonijiet preċedenti għadhom validi u li l-kontinwazzjoni tal-miżuri ma taffettwax b’mod mhux xieraq lill-konsumaturi bħall-unitajiet domestiċi.

(214)

Għalhekk, il-Kummissjoni kkonkludiet li ma hemmx raġunijiet konvinċenti għall-interess tal-Unjoni kontra ż-żamma tal-miżuri anti-dumping definittivi fuq l-importazzjonijiet ta’ twavel għall-mogħdija li joriġinaw mir-RPĊ.

(215)

Isegwi minn dak li ntqal aktar ’il fuq li, skont l-Artikolu 11(2) tar-Regolament bażiku, il-miżuri anti-dumping applikabbli għall-importazzjonijiet ta’ twavel għall-mogħdija li joriġinaw miċ-Ċina għandhom jinżammu.

(216)

Kumpanija tista’ titlob l-applikazzjoni kontinwa ta’ rati ta’ dazju anti-dumping individwali jekk sussegwentement hija tibdel l-isem tal-entità tagħha. It-talba trid tkun indirizzata lill-Kummissjoni (81). It-talba jrid ikun fiha l-informazzjoni kollha rilevanti li tippermetti li jintwera li l-bidla ma taffettwax id-dritt tal-kumpanija li tibbenefika mir-rata tad-dazju li tapplika għaliha. Jekk il-bidla fl-isem tal-kumpanija ma taffettwax id-dritt tagħha li tibbenefika mir-rata tad-dazju li tapplika għaliha, jiġi ppubblikat avviż li jinnotifika dwar il-bidla tal-isem f’Il-Ġurnal Uffiċjali tal-Unjoni Ewropea.

(217)

Fid-dawl tal-Artikolu 109 tar-Regolament (UE, Euratom) 2018/1046 (82) tal-Parlament Ewropew u tal-Kunsill, meta jkollu jiġi rimborżat ammont wara sentenza tal-Qorti tal-Ġustizzja tal-Unjoni Ewropea, l-imgħax li għandu jitħallas għandu jkun ir-rata applikata mill-Bank Ċentrali Ewropew għall-operazzjonijiet ta’ rifinanzjament ewlenin tiegħu, kif ippubblikata fis-serje C ta’ Il-Ġurnal Uffiċjali tal-Unjoni Ewropea, fl-ewwel jum kalendarju ta’ kull xahar.

(218)

Il-miżuri previsti f’dan ir-Regolament huma skont l-opinjoni tal-Kumitat stabbilit bl-Artikolu 15(1) tar-Regolament bażiku,