It-testi oriġinali tan-NU/KEE biss għandhom effett ġuridiku skont id-dritt internazzjonali pubbliku. L-istatus u d-data ta' dħul fis-seħħ ta' dan ir-Regolament jenħtieġ li jiġu ċċekkjati fl-aħħar verżjoni tad-dokument tal-istatus tan-NU/KEE TRANS/WP.29/343 disponibbli fuq:

http://www.unece.org/trans/main/wp29/wp29wgs/wp29gen/wp29fdocstts.html

Ir-Regolament Nru 11 tal-Kummissjoni Ekonomika għall-Ewropa tan-Nazzjonijiet Uniti (NU/KEE) — Dispożizzjonijiet uniformi dwar l-approvazzjoni ta' vetturi fir-rigward tal-latches tal-bibien u tal-komponenti għaż-żamma tal-bibien [2019/1354]

Jinkorpora t-test validu kollu sa:

Is-Suppliment 2 tas-serje ta' emendi 04 — Id-data tad-dħul fis-seħħ: 28 ta' Mejju 2019

WERREJ

REGOLAMENT

1.

Kamp tal-applikazzjoni

2.

Definizzjonijiet

3.

Applikazzjoni għall-approvazzjoni

4.

Approvazzjoni

5.

Rekwiżiti ġenerali

6.

Rekwiżiti tal-prestazzjoni

7.

Proċeduri tat-test

8.

Modifiki u estensjoni tal-approvazzjoni tat-tip tal-vettura

9.

Konformità tal-produzzjoni

10.

Penali għan-nuqqas ta' konformità tal-produzzjoni

11.

Produzzjoni mwaqqfa għalkollox

12.

Ismijiet u indirizzi tas-Servizzi Tekniċi responsabbli mit-twettiq tat-testijiet tal-approvazzjoni, tal-Awtoritajiet tal-Approvazzjoni tat-Tip

13.

Dispożizzjonijiet tranżizzjonali

ANNESSI

1.

Komunikazzjoni

2.

Arranġamenti tal-marki tal-approvazzjoni

3.

Testijiet tat-tagħbija wieħed, tnejn, u tlieta bl-applikazzjoni ta' forza fuq il-latch

4.

Proċeduri tat-test tal-inerzja

5.

Proċedura tat-test fuq iċ-ċappetti

6.

Bieba tal-ġenb skorrevoli — Test tal-bibien kompluti

1.   KAMP TAL-APPLIKAZZJONI

Dan ir-Regolament japplika għal vetturi tal-kategoriji M1 u N1 (1) fir-rigward tal-latches u l-komponenti li jżommu l-bibien bħalma huma ċ-ċappetti u mezzi oħrajn ta' sostenn fuq il-bibien, li jistgħu jintużaw għad-dħul jew il-ħruġ tal-okkupanti, u li jistgħu jippreżentaw riskju li l-okkupanti jintefgħu 'il barra minn vettura b'riżultat ta' ħabta.

2.   DEFINIZZJONIJIET

Għall-finijiet ta' dan ir-Regolament:

2.1.   “Approvazzjoni ta' vettura” tfisser l-approvazzjoni ta' tip ta' vettura fir-rigward tal-latches tal-bibien u l-komponenti għaż-żamma tal-bibien.

2.2.   “Tip ta' vettura” tfisser kategorija ta' vetturi motorizzati li ma jvarjawx f'aspetti essenzjali bħal:

2.2.1.

Id-deżinjazzjoni tat-tip ta' vettura mill-manifattur;

2.2.2.

It-tip ta' latch;

2.2.3.

It-tip ta' komponent għaż-żamma tal-bieba;

2.2.4.

Il-mod li bih il-latches u l-komponenti għaż-żamma tal-bibien ikunu armati mal-istruttura tal-vettura u miżmuma minnha;

2.2.5.

It-tip ta' bibien skorrevoli;

2.3.   “Latch awżiljarju ta' bieba” huwa latch mgħammar b'pożizzjoni fully latched bi jew mingħajr pożizzjoni ta' latching sekondarja, u armat ma' bieba jew ma' sistema ta' bieba mgħammra b'sistema ta' latch primarju tal-bieba.

2.4.   “Sistema ta' latch awżiljarju ta' bieba” tikkonsisti, bħala minimu, minn latch awżiljarju ta' bieba u striker.

2.5.   “Bieba ta' wara” hija bieba jew sistema ta' bieba fuq wara nett ta' vettura motorizzata li permezz tagħha l-passiġġieri jistgħu jidħlu jew joħorġu (inkluż meta jintremew 'il barra) mill-vettura jew li minnha tista' titgħabba jew tinħatt il-merkanzija. Ma tinkludix:

(a)	Għatu tal-bagoll; jew

(b)	Bieba jew tieqa magħmula kompletament minn materjal tal-ħġieġ u li l-latches u/jew is-sistemi taċ-ċappetti tagħha jkunu mwaħħlin direttament mal-materjal tal-ħġieġ;

2.6.   “Membru ta' mal-body” hija dik il-parti taċ-ċappetta li normalment tkun imwaħħla mal-istruttura tal-body tal-vettura;

2.7.   Protezzjonijiet addizzjonali

2.7.1.

“Sistema tal-illokkjar għas-sikurezza tat-tfal” hija apparat tal-lokkjar li jista' jiġi attivat u miftuħ indipendentement mill-apparati tal-illokkjar l-oħrajn u li, meta jintuża, jimpedixxi t-tħaddim tal-manku intern tal-bieba jew apparat ieħor ta' rilaxx. L-apparat għar-rilaxx/attivar tal-lokk jista' jkun manwali jew inkella jaħdem bl-elettriku u jista' jkun fi kwalunkwe post fuq jew ġewwa l-vettura;

2.7.2.

“Sistema tal-illokkjar totali” hija sistema li biha l-manku tar-rilaxx intern tal-bieba jew kwalunkwe apparat intern tar-rilaxx tal-latch ta' kwalunkwe waħda mill-bibien tal-vettura jsiru inoperabbli għajr billi jitħaddmu l-lokkijiet tas-sistema;

2.8.   “Bibien” tfisser bibien biċ-ċappetti jew bibien skorrevoli li jwasslu direttament f'kompartiment li jkun fih pożizzjoni bilqiegħda waħda jew aktar u li ma jkunux bibien li jintwew, bibien li jirromblaw 'il fuq u bibien iddisinjati biex jitwaħħlu jew jitneħħew faċilment minn vetturi motorizzati mmanifatturati għal tħaddim mingħajr bibien;

2.9.   “Sistema ta' twissija għall-għeluq tal-bibien” hija sistema li tattiva sinjal viżiv ippożizzjonat fejn jista' jidher b'mod ċar mis-sewwieq meta s-sistema tal-latch tal-bieba ma tkunx fil-pożizzjoni fully latched u waqt li l-ignixin tkun attivata;

2.10.   “Sistema ta' ċappetti tal-bieba” hija ċappetta waħda jew aktar użata biex tinżamm bieba;

2.11.   “Sistema ta' latch tal-bieba” hija magħmula bħala minimu, minn latch u striker;

2.12.   “Membru ta' mal-bieba” hija dik il-parti taċ-ċappetta li normalment tkun imwaħħla mal-istruttura tal-bieba u li tikkostitwixxi l-parti li tinfetaħ u tingħalaq;

2.13.   “Sistema tal-bieba” hija l-bieba, il-latch, l-istriker, iċ-ċappetti, il-kombinazzjonijiet tal-kanal li fuqu tiżżerżaq il-bieba (sliding track) u komponenti oħrajn għaż-żamma tal-bibien li jkunu jinsabu fuq il-bieba u d-dawra li tiċċirkondaha. Is-sistema tal-bieba ta' bieba doppja tinkludi ż-żewġ bibien;

2.14.   “Bieba doppja” hija sistema ta' żewġ bibien fejn il-bieba ta' quddiem jew bieba li togħla 'l fuq (wing door) tinfetaħ l-ewwel u din taqbad mal-bieba ta' wara jew mal-bieba msakkra, li tinfetaħ it-tieni;

2.15.   “Fork-bolt” hija l-parti tal-latch li taqbad mal-istriker u żżommu meta tkun fil-pożizzjoni latched;

2.16.   “Direzzjoni tal-ftuħ tal-fork-bolt” hija d-direzzjoni opposta għal dik li fiha l-istriker jidħol fil-latch biex iħaddem il-fork-bolt;

2.17.   “Pożizzjoni fully latched” hija l-kundizzjoni ta' gganċjar tal-latch li żżomm il-bieba f'pożizzjoni magħluqa għalkollox;

2.18.   “Ċappetta” hija biċċa apparat li jintuża biex il-bieba tiġi ppożizzjonata b'mod relattiv mal-istruttura tal-body tal-vettura u li jikkontrolla l-mogħdija taċ-ċaqliq tal-bieba għad-dħul u l-ħruġ tal-passiġġieri;

2.19.   “Pern taċ-ċappetta” huwa dak il-porzjon taċ-ċappetta li normalment iqabbad ma' xulxin il-body tal-vettura u l-membri tal-bieba u jistabbilixxi l-assi taċ-ċaqliq;

2.20.   “Latch” huwa apparat użat sabiex iżomm il-bieba f'pożizzjoni magħluqa relattiv mal-body tal-vettura b'mekkaniżmu għar-rilaxx (jew tħaddim) intenzjonali;

2.21.   “Latch primarju tal-bieba” huwa latch mgħammar kemm b'pożizzjoni fully latched kif ukoll b'pożizzjoni ta' latching sekondarja u ddeżinjat bħala “latch primarju tal-bieba” mill-manifattur. Aktar tard, il-manifattur ma jistax jibdel dik id-deżinjazzjoni. Kull manifattur għandu, meta jkun mitlub jagħmel dan, jipprovdi informazzjoni dwar liema latches jkunu “latches primarji tal-bieba” għal vettura jew marka/mudell partikolari;

2.22.   “Sistema ta' latch primarju tal-bieba” hija magħmula, bħala minimu, minn latch primarju tal-bieba u striker;

2.23.   “Pożizzjoni ta' latching sekondarja” tirreferi għall-kundizzjoni ta' gganċjar tal-latch li żżomm il-bieba f'pożizzjoni parzjalment magħluqa;

2.24.   “Bieba tal-ġenb ta' quddiem” hija bieba li, f'dehra mill-ġenb, ikollha 50 fil-mija jew aktar tal-erja tal-ftuħ tagħha 'l quddiem mill-punt l-aktar lura fuq id-dahar tas-sit tas-sewwieq, meta d-dahar tas-sit jkun aġġustat fl-iżjed pożizzjoni vertikali u lura, li tipprovdi aċċess dirett għall-passiġġieri biex jidħlu jew joħorġu mill-vettura;

2.25.   “Bieba tal-ġenb ta' wara” hija bieba li, f'dehra mill-ġenb, ikollha 50 fil-mija jew aktar tal-erja tal-ftuħ tagħha fuq wara tal-iżjed punt lura fuq id-dahar tas-sit tas-sewwieq, meta s-sit tas-sewwieq ikun aġġustat fl-iżjed pożizzjoni vertikali u lura tiegħu, li tipprovdi aċċess dirett għall-passiġġieri biex jidħlu jew joħorġu mill-vettura;

2.26.   “Striker” huwa apparat li jorbot fuqu l-latch biex iżomm il-bieba fil-pożizzjoni fully latched jew fil-pożizzjoni ta' latching sekondarja;

2.27.   “Għatu tal-bagoll” huwa panel jiċċaqlaq tal-body tal-vettura li jipprovdi aċċess minn barra l-vettura għal spazju separat għalkollox mill-kompartiment tal-okkupant permezz ta' separatur imwaħħal b'mod permanenti jew dahar tas-sit fiss jew li jintewa.

3.   APPLIKAZZJONI GĦALL-APPROVAZZJONI

3.1.   L-applikazzjoni għall-approvazzjoni ta' tip ta' vettura fir-rigward tal-latches tal-bibien u l-komponenti għaż-żamma tal-bibien għandha tiġi ppreżentata mill-manifattur tal-vettura jew mir-rappreżentant akkreditat tiegħu.

3.2.   Din għandha tkun akkumpanjata mid-dokumenti msemmija hawn taħt, fi tliet kopji, u mid-dettalji li ġejjin:

3.2.1.

Tpinġijiet tal-bibien u tal-latches u l-komponenti tagħhom għaż-żamma tal-bibien fuq skala xierqa u f'dettall suffiċjenti;

3.2.2.

Deskrizzjoni teknika tal-latches u tal-komponenti għaż-żamma tal-bibien.

3.3.   L-applikazzjoni għandha tkun akkumpanjata wkoll minn:

3.3.1.

Lott ta' ħames settijiet ta' komponenti taż-żamma tal-bibien għal kull bieba. Madankollu, meta jintużaw l-istess settijiet għal diversi bibien, ikun biżżejjed li jiġi ppreżentat lott wieħed ta' settijiet. Settijiet ta' komponenti għaż-żamma tal-bibien huma differenti minn xulxin biss minħabba li jkunu ddisinjati sabiex jitwaħħlu fuq ix-xellug jew fuq il-lemin ma jitqisux bħala differenti;

3.3.2.

Grupp ta' ħames latches kompluti, inkluż il-mekkaniżmu ta' attwazzjoni tagħhom, għal kull bieba. Madankollu, meta jintużaw l-istess latches kompluti għal diversi bibien, ikun biżżejjed li jiġi ppreżentat lott wieħed ta' latches. Latches li huma differenti minn xulxin biss minħabba li jkunu ddisinjati sabiex jintramaw fuq ix-xellug jew fuq il-lemin ma jitqisux bħala differenti.

3.4.   Vettura, rappreżentattiva tat-tip ta' vettura li għandu jiġi approvat, għandha tiġi ppreżentata lis-servizz tekniku responsabbli għat-twettiq tat-testijiet tal-approvazzjoni.

4.   APPROVAZZJONI

4.1.   Jekk it-tip ta' vettura mressaq għall-approvazzjoni skont dan ir-Regolament ikun jissodisfa r-rekwiżiti tal-paragrafi 5, 6 u 7 ta' hawn taħt, dak it-tip ta' vettura għandu jiġi approvat.

4.2.   Għandu jiġi assenjat numru tal-approvazzjoni għal kull tip approvat. L-ewwel żewġ figuri (03) għandhom jindikaw is-serje tal-emendi li tinkorpora l-aħħar emendi tekniċi importanti li jkunu saru fir-Regolament fiż-żmien tal-ħruġ tal-approvazzjoni. L-istess Parti Kontraenti ma tistax tassenja l-istess numru lill-istess tip ta' vettura jekk il-bibien ma jkunux mgħammra b'latches jew b'komponenti għaż-żamma tal-bibien tal-istess tip, jew jekk il-latches u l-komponenti għaż-żamma tal-bibien ma jkunux armati bl-istess mod bħal fuq il-vettura mressqa għall-approvazzjoni; min-naħa l-oħra, tista' tassenja l-istess numru lil tip ieħor ta' vettura li l-bibien tagħha jkunu mgħammra bl-istess latches u komponenti għaż-żamma tal-bibien armati bl-istess mod bħal fuq il-vettura mressqa għall-approvazzjoni.

4.3.   L-avviż tal-approvazzjoni jew tal-estensjoni jew taċ-ċaħda tal-approvazzjoni ta' tip ta' vettura skont dan ir-Regolament għandu jiġi kkomunikat lill-Partijiet għall-Ftehim li jkunu qegħdin japplikaw dan ir-Regolament, permezz ta' formola li tikkonforma mal-mudell fl-Anness 1 ta' dan ir-Regolament.

4.4.   Ma' kull vettura li tikkonforma ma' tip ta' vettura approvata skont dan ir-Regolament, b'mod li jolqot l-għajn u f'post faċilment aċċessibbli kif speċifikat fil-formola tal-approvazzjoni, għandha titwaħħal marka tal-approvazzjoni internazzjonali magħmula minn:

4.4.1.

Ċirku madwar l-ittra “E” segwit bin-numru distintiv tal-pajjiż li jkun ta l-approvazzjoni (2);

4.4.2.

In-numru ta' dan ir-Regolament, segwit bl-ittra “R”, sing u n-numru tal-approvazzjoni, fuq il-lemin taċ-ċirku deskritt fil-paragrafu 4.4.1.

4.5.   Jekk il-vettura tkun konformi ma' tip ta' vettura approvat, skont Regolament wieħed jew aktar annessi mal-Ftehim, fil-pajjiż li ta l-approvazzjoni skont dan ir-Regolament, is-simbolu preskritt fil-paragrafu 4.4.1 ma għandux għalfejn jiġi ripetut; f'każ bħal dan, ir-Regolament u n-numri tal-approvazzjoni u s-simboli addizzjonali tar-Regolamenti kollha li skonthom tkun ingħatat l-approvazzjoni fil-pajjiż li jkun ta l-approvazzjoni skont dan ir-Regolament għandhom jitqiegħdu f'kolonni vertikali fuq in-naħa tal-lemin tas-simbolu preskritt fil-paragrafu 4.4.1.

4.6.   Il-marka tal-approvazzjoni għandha tkun tista' tinqara b'mod ċar u ma tkunx tista' titħassar.

4.7.   Il-marka tal-approvazzjoni għandha titqiegħed fuq il-pjanċa tad-data tal-vettura inkella qrib tagħha.

4.8.   L-Anness 2 ta' dan ir-Regolament jagħti eżempji ta' arranġamenti tal-marki tal-approvazzjoni.

5.   REKWIŻITI ĠENERALI

5.1.   Ir-rekwiżiti japplikaw għall-bibien kollha tal-ġenb u ta' wara u l-komponenti tal-bibien ħlief dawk fuq il-bibien li jintwew, il-bibien li jirromblaw 'il fuq, il-bibien li jinqalgħu minn posthom, u l-bibien iddisinjati biex jipprovdu ħruġ tal-emerġenza.

5.2.   Latches tal-bibien

5.2.1.   Kull sistema ta' bibien biċ-ċappetti għandha tkun mgħammra b'tal-inqas sistema ta' latch primarju waħda tal-bieba.

5.2.2.   Kull sistema ta' bieba li skorrevoli għandha tkun mgħammra jew:

(a)	B'sistema ta' latch primarju tal-bieba, inkella

(b)	Sistema ta' latch tal-bieba b'pożizzjoni fully latched u sistema ta' twissija għall-għeluq tal-bieba.

6.   REKWIŻITI TAL-PRESTAZZJONI

6.1.   Bibien biċ-ċappetti

6.1.1.   Test tat-tagħbija numru wieħed

6.1.1.1.   L-ebda sistema ta' latch primarju tal-bieba u sistema ta' latch awżiljarju tal-bieba, meta tkun fil-pożizzjoni fully latched, ma għandha tissepara meta tiġi applikata tagħbija ta' 11 000 N fid-direzzjoni perpendikulari mal-wiċċ tal-latch b'mod li l-latch u l-ankraġġ tal-istriker ma jingħafsux ma' xulxin, meta jiġu ttestjati skont il-paragrafu 7.1.1.1.

6.1.1.2.   Fil-pożizzjoni ta' latching sekondarja, is-sistema ta' latch primarju ma għandhiex tissepara meta tiġi applikata tagħbija ta' 4 500 N fl-istess direzzjoni bħal fil-paragrafu 6.1.1.1, meta tiġi ttestjata skont il-paragrafu 7.1.1.1.

6.1.2.   Test tat-tagħbija numru tnejn

6.1.2.1.   L-ebda sistema ta' latch primarju tal-bieba u sistema ta' latch awżiljarju tal-bieba, meta tkun fil-pożizzjoni fully latched, ma għandha tissepara meta tiġi applikata tagħbija ta' 9 000 N fid-direzzjoni tal-ftuħ tal-fork-bolt u b'mod parallel mal-wiċċ tal-latch, meta tiġi ttestjata skont il-paragrafu 7.1.1.1.

6.1.2.2.   Fil-pożizzjoni ta' latching sekondarja, is-sistema ta' latch primarju ma għandhiex tissepara meta tiġi applikata tagħbija ta' 4 500 N fl-istess direzzjoni, bħal fil-paragrafu 6.1.2.1, meta ttestjata skont il-paragrafu 7.1.1.1.

6.1.3.   Test tat-tagħbija numru tlieta (applikabbli għal bibien li jinfetħu f'direzzjoni vertikali)

6.1.3.1.   L-ebda sistema ta' latch primarju tal-bieba ma għandha tinħall mill-pożizzjoni fully latched meta tiġi applikata tagħbija vertikali ta' 9 000 N.

6.1.4.   Tagħbija tal-inerzja

Kull sistema ta' latch primarju tal-bieba u sistema ta' latch awżiljarju tal-bieba għandha tissodisfa r-rekwiżiti tal-paragrafu 6.1.4.1 jew tal-paragrafu 6.1.4.2 jew il-kalkolu tar-rekwiżiti tar-reżistenza għat-tagħbija tal-inerzja fil-paragrafu 6.1.4.3.

6.1.4.1.   L-ebda sistema ta' latch primarju tal-bieba u sistema ta' latch awżiljarju tal-bieba fuq kull bieba biċ-ċappetti ma għandha tinħall mill-pożizzjoni fully latched meta tiġi applikata tagħbija ta' inerzja ta' 30 g fuq is-sistema ta' latches tal-bibien, inkluż il-latch u l-apparat tal-attivazzjoni tiegħu, fid-direzzjonijiet paralleli mal-assi lonġitudinali u trasversali tal-vettura bl-apparat tal-illokkjar mhux attivat u meta ttestjat skont il-paragrafu 7.1.1.2.

6.1.4.2.   Barra minn hekk, l-ebda sistema ta' latch primarju tal-bieba u sistema ta' latch awżiljarju tal-bieba fuq kull bieba ta' wara biċ-ċappetti ma għandha tinħall mill-pożizzjoni fully latched meta tiġi applikata tagħbija ta' inerzja ta' 30 g fuq is-sistema tal-latch tal-bieba, inkluż il-latch u l-apparat tal-attivazzjoni tiegħu, fid-direzzjoni parallela mal-assi vertikali tal-vettura, bl-apparat tal-illokkjar mhux attivat u meta ttestjat skont il-paragrafu 7.1.1.2.

6.1.4.3.   Għal kull komponent jew subassemblaġġ, tista' tiġi kkalkulata r-reżistenza minima għat-tagħbija tal-inerzja f'direzzjoni partikolari. Ir-reżistenza kkombinata għall-operazzjoni tal-ftuħ tal-latch trid tassigura li s-sistema tal-latch tal-bieba, meta tkun armata sewwa fil-bieba tal-vettura, tibqa' latched meta tiġi soġġetta għal tagħbija ta' inerzja ta' 30 g fid-direzzjonijiet tal-vettura speċifikati fil-paragrafu 6.1.4.1 u 6.1.4.2, kif applikabbli, skont il-paragrafu 7.1.1.2.

6.1.5.   Ċappetti tal-bibien

6.1.5.1.   Kull sistema ta' ċappetti tal-bieba għandha:

(a)	Iżżomm il-bieba;

(b)	Ma tisseparax meta tiġi applikata tagħbija lonġitudinali ta' 11 000 N;

(c)	Ma tisseparax meta tiġi applikata tagħbija trasversali ta' 9 000 N, u

(d)	Fuq bibien li jinfetħu f'direzzjoni vertikali, ma tisseparax meta tiġi applikata tagħbija vertikali ta' 9 000 N.

6.1.5.2.   It-testijiet kollha meħtieġa mill-paragrafu 6.1.5.1 isiru skont il-paragrafu 7.1.2.

6.1.5.3.   Jekk tiġi ċċekkjata ċappetta waħda f'sistema ta' ċappetti minflok is-sistema ta' ċappetti kollha, iċ-ċappetta trid tiflaħ tagħbija proporzjonali man-numru totali ta' ċappetti fis-sistema taċ-ċappetti.

6.1.5.4.   Fuq bibien tal-ġenb b'ċappetti mmuntati fuq wara li jistgħu jitħaddmu b'mod indipendenti mill-bibien l-oħra,

(a)	Il-manku ta' ġewwa tal-bieba ma għandux ikun operattiv meta l-veloċità tal-vettura tkun ogħla minn 4 km/h jew aktar; kif ukoll

(b)	Għandha tkun ipprovduta sistema ta' twissija għall-għeluq tal-bieba għal dawn il-bibien.

6.2.   Bibien tal-ġenb skorrevoli

6.2.1.   Test tat-tagħbija numru wieħed

6.2.1.1.   Tal-inqas sistema ta' latch waħda tal-bieba, meta tkun fil-pożizzjoni fully latched, ma għandhiex tissepara meta tiġi applikata tagħbija ta' 11 000 N fid-direzzjoni perpendikulari mal-wiċċ tal-latch, meta tiġi ttestjata skont il-paragrafu 7.2.1.1.

6.2.1.2.   Fil-każ ta' sistema ta' latch primarju tal-bieba, meta tkun fil-pożizzjoni ta' latching sekondarja, is-sistema tal-latch tal-bieba ma għandhiex tissepara meta tiġi applikata tagħbija ta' 4 500 N fl-istess direzzjoni bħal fil-paragrafu 6.2.1.1, meta tiġi ttestjata skont il-paragrafu 7.2.1.1.

6.2.2.   Test tat-tagħbija numru tnejn

6.2.2.1.   Tal-inqas sistema ta' latch waħda tal-bieba, meta tkun fil-pożizzjoni fully latched, ma għandhiex tissepara meta tiġi applikata tagħbija ta' 9 000 N fid-direzzjoni tal-ftuħ tal-fork-bolt u parallela mal-wiċċ tal-latch meta tiġi ttestjata skont il-paragrafu 7.2.1.1.

6.2.2.2.   Fil-każ ta' sistema ta' latch primarju tal-bieba, meta tkun fil-pożizzjoni ta' latching sekondarja, is-sistema ta' latch primarju ma għandhiex tissepara meta tiġi applikata tagħbija ta' 4 500 N fl-istess direzzjoni bħall-paragrafu 6.2.2.1, meta tiġi ttestjata skont il-paragrafu 7.2.1.1.

6.2.3.   Tagħbija tal-inerzja

Kull sistema ta' latch ta' bieba li tissodisfa r-rekwiżiti tal-paragrafi 6.2.1 u 6.2.2 għandha tissodisfa r-rekwiżiti dinamiċi jew tal-paragrafu 6.2.3.1 inkella l-kalkolu tar-rekwiżiti tal-inerzja tal-paragrafu 6.2.3.2.

6.2.3.1.   Is-sistema tal-latch tal-bieba ma għandhiex tinħall mill-pożizzjoni fully latched meta tiġi applikata tagħbija ta' inerzja ta' 30 g fuq is-sistema tal-latch tal-bieba, inkluż il-latch u l-apparat tal-attivazzjoni tiegħu, fid-direzzjonijiet paralleli mal-assi lonġitudinali u vertikali tal-vettura bl-apparat tal-illokkjar mhux attivat u meta ttestjata skont il-paragrafu 7.2.1.2.

6.2.3.2.   Ir-reżistenza minima għat-tagħbija tal-inerzja tista' tiġi kkalkolata għal kull komponent jew subassemblaġġ. Ir-reżistenza kkombinata tagħhom għall-operazzjoni tal-ftuħ tal-latch trid tassigura li s-sistema tal-latch ta' bieba, meta tkun armata sewwa fil-bieba tal-vettura, tibqa' latched meta tiġi soġġetta għal tagħbija ta' inerzja ta' 30 g fid-direzzjonijiet tal-vettura speċifikati fil-paragrafu 6.2.1 jew 6.2.2, kif applikabbli, skont il-paragrafu 7.2.1.2.

6.2.4.   Sistema tal-bibien

6.2.4.1.   Il-kombinazzjoni ta' kurrent taż-żerżiq jew mezzi oħrajn ta' sostenn għal kull bieba skorrevoli, waqt li tkun fil-pożizzjoni fully latched, ma għandhiex tissepara minn mad-dawra tal-bieba meta tiġi applikata forza totali ta' 18 000 N fuq il-bieba tul l-assi trasversali tal-vettura skont il-paragrafu 7.2.2.

6.2.4.2.   Il-bieba skorrevoli, meta tiġi ttestjata skont il-paragrafu 7.2.2, ma tgħaddix minn dan ir-rekwiżit jekk isseħħ xi waħda minn dawn li ġejjin:

6.2.4.2.1.

Separazzjoni li tippermetti sfera b'dijametru ta' 100 mm tgħaddi mingħajr tfixkil mill-intern tal-vettura għall-estern tal-vettura, filwaqt li tinżamm il-forza meħtieġa.

6.2.4.2.2.

Xi wieħed mill-apparat għall-applikazzjoni tal-forza jilħaq spostament totali ta' 300 mm.

6.3.   Lokkijiet tal-bibien

6.3.1.   Kull bieba għandha tkun mgħammra tal-inqas b'apparat wieħed tal-illokkjar li, meta jintuża, għandu jimpedixxi t-tħaddim tal-manku estern ta' bieba jew ta' apparat ta' kontroll ieħor tar-rilaxx estern tal-latch u li jkollu mezz ta' tħaddim u apparat għar-rilaxx/attivar tal-lokk fuq ġewwa tal-vettura.

6.3.1.1.   Jekk tkun installata, is-sistema tal-illokkjar totali tista' tiġi attivata biss meta ċ-ċavetta tal-ignixin ma tkunx fil-modalità ta' tħaddim tal-magna u għandha tiġi installata f'kombinazzjoni ma' tal-inqas waħda mill-miżuri li ġejjin:

(a)

Sistema tal-allarm b'detezzjoni interna skont ir-Regolament Nru 116 jew ir-Regolament Nru 97, jew tagħmir ieħor li kapaċi jindividwa l-moviment tal-okkupant. L-attivazzjoni tas-sistema tal-illokkjar totali għandu jiġi pprojbit meta jiġi individwat moviment ta' xi okkupant fil-kompartiment tal-passiġġieri; jew

(b)	Apparat ta' twissija akustika (eż. ħorn) li jista' jiġi attivat mill-ġewwieni tal-vettura f'każ li l-ignixin tintefa u s-sistema tal-illokkjar totali tiġi attivata.

6.3.2.   Il-bibien tal-ġenb ta' wara

Kull bieba tal-ġenb ta' wara għandha tkun mgħammra tal-inqas b'apparat wieħed tal-illokkjar li, meta jiġi attivat, jimpedixxi t-tħaddim tal-manku intern ta' bieba jew ta' apparat ta' kontroll intern ieħor għar-rilaxx tal-latch u li jeħtieġ azzjonijiet separati biex jiġi ddiżattivat il-lokk tal-bieba u jitħaddem il-manku intern tal-bieba jew ta' apparat ta' kontroll intern ieħor għar-rilaxx tal-latch.

6.3.2.1.   L-apparat tal-illokkjar jista' jkun:

(a)	sistema tal-illokkjar għas-sikurezza tat-tfal; jew

(b)	apparat għar-rilaxx/attivar tal-lokk li jinsab fuq ġewwa tal-vettura u li huwa aċċessibbli faċilment għas-sewwieq tal-vettura jew ta' okkupant bilqiegħda maġenb il-bieba.

6.3.2.2.   Kwalunkwe sistema deskritta fil-paragrafu 6.3.2.1(a) u (b) għandha tkun permessa bħala element addizzjonali tal-illokkjar.

6.3.3.   Il-bibien ta' wara

Kull bieba ta' wara mgħammra b'manku intern jew b'apparat kontroll intern ieħor għar-rilaxx tal-latch, għandha tkun mgħammra b'tal-inqas apparat wieħed tal-illokkjar li jinsab fuq ġewwa tal-vettura li, meta jiġi attivat, jimpedixxi t-tħaddim tal-manku intern tal-bieba jew tal-apparat ta' kontroll intern ieħor għar-rilaxx tal-latch u li jeħtieġ azzjonijiet separati sabiex tinfetaħ il-bieba u jitħaddem il-manku intern tal-bieba jew tal-apparat ta' kontroll intern ieħor għar-rilaxx tal-latch.

6.3.3.1.   L-apparat tal-illokkjar jista' jkun:

(a)	Sistema tal-illokkjar għas-sikurezza tat-tfal; jew

(b)	Tagħmir tar-rilaxx/attivazzjoni tal-lokk li jkun jinsab ġewwa l-vettura u li jkun aċċessibbli faċilment; jew

(c)	Sistema li trendi l-manku ta' ġewwa tal-bieba jew tal-apparat ta' kontroll intern ieħor tar-rilaxx tal-latch għal din il-bieba inoperattiv meta l-veloċità tal-vettura tkun 4 km/h jew aktar; jew

(d)	Kwalunkwe taħlita tal-punti (a), (b) jew (c) hawn fuq.

7.   PROĊEDURI TAT-TEST

7.1.   Bibien biċ-ċappetti

7.1.1.   Latches tal-bibien

7.1.1.1.   Testijiet tat-tagħbija wieħed, tnejn, u tlieta bl-applikazzjoni ta' forza

Il-konformità mal-paragrafi 6.1.1, 6.1.2 u 6.1.3 tintwera skont l-Anness 3.

7.1.1.2.   Applikazzjoni tal-forza tal-inerzja

Il-konformità mal-paragrafu 6.1.4 tintwera skont l-Anness 4.

7.1.2.   Ċappetti tal-bibien

Il-konformità mal-paragrafu 6.1.5 tintwera skont l-Anness 5.

7.2.   Bibien tal-ġenb skorrevoli

7.2.1.   Latches tal-bibien

7.2.1.1.   Testijiet tat-tagħbija wieħed u tnejn bl-applikazzjoni ta' forza

Il-konformità mal-paragrafi 6.2.1 u 6.2.2 tintwera skont l-Anness 3.

7.2.1.2.   Applikazzjoni tal-forza tal-inerzja

Il-konformità mal-paragrafu 6.2.3 tintwera skont l-Anness 4.

7.2.2.   Sistema tal-bibien

Il-konformità mal-paragrafu 6.2.4 tintwera skont l-Anness 6.

8.   MODIFIKI U ESTENSJONI TAL-APPROVAZZJONI TAT-TIP TAL-VETTURA

8.1.   Kull modifika għat-tip tal-vettura għandha tiġi nnotifikata lill-Awtorità tal-Approvazzjoni tat-Tip li tkun approvat it-tip tal-vettura. L-Awtorità tal-Approvazzjoni tat-Tip tista' mbagħad jew:

8.1.1.

Tqis li l-modifika li saret x'aktarx mhux se jkollha effetti negattivi apprezzabbli u li jkun xi jkun il-każ, il-vettura xorta għadha konformi mar-rekwiżiti; jew

8.1.2.

Tesiġi rapport ieħor tat-test mis-Servizz Tekniku responsabbli għat-twettiq tat-testijiet.

8.2.   Konferma jew ċaħda ta' approvazzjoni, fejn jiġu speċifikati l-alterazzjonijiet, għandha tiġi kkomunikata permezz tal-proċedura li ġiet speċifikata fil-paragrafu 4.3 t'aktar 'il fuq lill-Partijiet għall-Ftehim li japplikaw dan ir-Regolament.

8.3.   L-Awtorità tal-Approvazzjoni tat-Tip li toħroġ l-estensjoni tal-approvazzjoni għandha tagħti numru tas-serje lil kull formola ta' komunikazzjoni li ssir għal estensjoni bħal din.

9.   KONFORMITÀ TAL-PRODUZZJONI

9.1.   Kull vettura li jkollha marka tal-approvazzjoni kif preskritt skont dan ir-Regolament għandha tikkonforma mat-tip tal-vettura approvat fir-rigward tal-elementi li kapaċi jimmodifikaw il-karatteristiċi tal-latches tal-bibien u l-komponenti għaż-żamma tal-bibien jew il-mod li bih ikunu armati.

9.2.   Sabiex tiġi vverifikata l-konformità kif preskritt fil-paragrafu 9.1 hawn fuq, għandhom isiru numru suffiċjenti ta' kontrolli aleatorji fuq vetturi manifatturati f'serje li jkollhom il-marka tal-approvazzjoni meħtieġa minn dan ir-Regolament.

9.3.   Bħala regola ġenerali, kif intqal aktar 'il fuq, il-kontrolli għandhom ikunu limitati għat-teħid tal-kejl. Madankollu, jekk ikun meħtieġ, il-latches u l-komponenti għaż-żamma tal-bibien għandhom ikunu soġġetti għat-testijiet imsemmija fil-paragrafi 5 u 6 hawn fuq, magħżula mis-servizz tekniku responsabbli għat-twettiq tat-testijiet tal-approvazzjoni.

10.   PENALI GĦAN-NUQQAS TA' KONFORMITÀ TAL-PRODUZZJONI

10.1.   L-approvazzjoni mogħtija fir-rigward ta' tip ta' vettura skont dan ir-Regolament tista' tiġi rtirata jekk ir-rekwiżiti stipulati fil-paragrafu 9.1 hawn fuq ma jiġux rispettati, jew jekk l-imsemmija latches u komponenti għaż-żamma tal-bibien ma jgħaddux mit-testijiet previsti fil-paragrafu 9.2 hawn fuq.

10.2.   Jekk Parti għall-Ftehim li tapplika dan ir-Regolament tirtira approvazzjoni li tkun tat qabel, għandha tavża b'dan minnufih lill-Partijiet Kontraenti l-oħra li japplikaw dan ir-Regolament, permezz ta' kopja tal-formola tal-approvazzjoni li fl-aħħar ikollha, f'ittri kbar, l-annotazzjoni ffirmata u datata “APPROVAZZJONI RTIRATA”.

11.   PRODUZZJONI MWAQQFA GĦALKOLLOX

Jekk id-detentur tal-approvazzjoni jwaqqaf għalkollox il-manifattura ta' tip ta' vettura skont dan ir-Regolament, hu għandu jgħarraf b'dan lill-Awtorità tal-Approvazzjoni tat-Tip li tkun tat l-approvazzjoni. Meta tirċievi l-komunikazzjoni rilevanti, dik l-Awtorità għandha tgħarraf b'dan lill-Partijiet l-oħra għall-Ftehim li japplikaw dan ir-Regolament, u dan permezz ta' kopja tal-formola tal-approvazzjoni li jkollha miktub fl-aħħar, b'ittri kbar, l-annotazzjoni iffirmata u ddatata: “PRODUZZJONI MWAQQFA”.

12.   ISMIJIET U INDIRIZZI TAS-SERVIZZI TEKNIĊI RESPONSABBLI MIT-TWETTIQ TAT-TESTIJIET TAL-APPROVAZZJONI U TAL-AWTORITÀ TAL-APPROVAZZJONI TAT-TIP

Il-Partijiet Kontraenti għall-Ftehim li japplikaw dan ir-Regolament għandhom jikkomunikaw lis-Segretarjat tan-Nazzjonijiet Uniti l-ismijiet u l-indirizzi tas-Servizzi Tekniċi responsabbli mit-twettiq tat-testijiet tal-approvazzjoni u tal-Awtorità tal-Approvazzjoni tat-Tip li tagħti l-approvazzjoni, u lil min għandhom jintbagħtu l-formoli li jiċċertifikaw l-approvazzjoni jew iċ-ċaħda jew l-estensjoni jew l-irtirar tal-approvazzjoni, maħruġa f'pajjiżi oħra.

13.   DISPOŻIZZJONIJIET TRANŻIZZJONALI

13.1.   Mid-data uffiċjali tad-dħul fis-seħħ tas-serje tal-emendi 03, l-ebda Parti Kontraenti li tapplika dan ir-Regolament ma għandha tiċħad li tagħti approvazzjonijiet skont dan ir-Regolament kif ġie emendat bis-serje tal-emendi 03.

13.2.   Sat-12 ta' Awwissu 2012, il-Partijiet Kontraenti li jkunu qegħdin japplikaw dan ir-Regolament għandhom ikomplu jagħtu approvazzjonijiet lil dawk it-tipi ta' vetturi li jikkonformaw mar-rekwiżiti ta' dan ir-Regolament kif emendat mis-serje ta' emendi preċedenti.

13.3.   Mit-12 ta' Awwissu 2012, il-Partijiet Kontraenti li jkunu qegħdin japplikaw dan ir-Regolament għandhom jagħtu l-approvazzjonijiet biss jekk it-tip ta' vettura għall-approvazzjoni jissodisfa r-rekwiżiti ta' dan ir-Regolament kif emendat mis-serje tal-emendi 03.

13.4.   L-ebda Parti Kontraenti li tapplika dan ir-Regolament ma għandha tiċħad tip ta' approvazzjoni nazzjonali jew reġjonali ta' vettura tat-tip approvata skont is-serje tal-emendi 03 ta' dan ir-Regolament.

13.5.   Sat-12 ta' Awwissu 2012, l-ebda Parti Kontraenti li tkun qiegħda tapplika dan ir-Regolament ma għandha tiċħad l-approvazzjoni nazzjonali jew reġjonali ta' tip ta' vettura approvat skont is-serje ta' emendi preċedenti ta' dan ir-Regolament.

13.6.   Mit-12 ta' Awwissu 2012, il-Partijiet Kontraenti li jkunu qegħdin japplikaw dan ir-Regolament jistgħu jiċħdu l-ewwel reġistrazzjoni nazzjonali jew reġjonali (l-ewwel dħul fis-servizz) ta' vettura li ma tissodisfax ir-rekwiżiti tas-serje ta' emendi 03 ta' dan ir-Regolament.

13.7.   Mid-data uffiċjali tad-dħul fis-seħħ tas-serje ta' emendi 04, l-ebda Parti Kontraenti li tapplika dan ir-Regolament ma għandha tiċħad li tagħti jew tiċħad li taċċetta approvazzjonijiet tat-tip skont dan ir-Regolament kif emendat mis-serje ta' emendi 04.

13.8.   Mill-1 ta' Settembru 2016, il-Partijiet Kontraenti li japplikaw dan ir-Regolament għandhom jagħtu l-approvazzjonijiet tat-tip biss jekk it-tip ta' vettura li jrid jiġi approvat jissodisfa r-rekwiżiti ta' dan ir-Regolament kif emendat bis-serje ta' emendi 04.

13.9.   Il-Partijiet Kontraenti li japplikaw dan ir-Regolament ma għandhomx jiċħdu li jagħtu estensjonijiet ta' approvazzjonijiet tat-tip għal tipi eżistenti li jkunu ngħataw skont is-serje tal-emendi preċedenti ta' dan ir-Regolament.

13.10.   Il-Partijiet Kontraenti li japplikaw dan ir-Regolament għandhom ikomplu jaċċettaw approvazzjonijiet tat-tip maħruġa għall-ewwel darba qabel l-1 ta' Settembru 2016 skont is-serje tal-emendi preċedenti ta' dan ir-Regolament.

---

(1)  Kif definit fir-Riżoluzzjoni Konsolidata dwar il-Kostruzzjoni tal-Vetturi (R.E.3), dokument ECE/TRANS/WP.29/78/Rev.6, para. 2. — http://www.unece.org/trans/main/wp29/wp29wgs/wp29gen/wp29resolutions.html

(2)  In-numri distintivi tal-Partijiet Kontraenti tal-Ftehim tal-1958 jinsabu fl-Anness 3 tar-Riżoluzzjoni Konsolidata dwar il-Kostruzzjoni tal-Vetturi (R.E.3), id-dokument ECE/TRANS/WP.29/78/Rev. 6, Anness 3 - http://www.unece.org/trans/main/wp29/wp29wgs/wp29gen/wp29resolutions.html