(1)

Fil-15 ta’ April 2014, il-Kummissjoni adottat rapport dwar l-applikazzjoni tar-Regolament tal-Kunsill (KE) Nru 2201/2003 (3). Ir-rapport ikkonkluda li r-Regolament (KE) Nru 2201/2003 huwa strument li jiffunzjona sew li ġab benefiċċji importanti għaċ-ċittadini, iżda li r-regoli eżistenti jistgħu jittejbu. Għandhom isiru għadd ta’ emendi għal dak ir-Regolament. Fl-interess taċ-ċarezza, dak ir-Regolament jenħtieġ li jiġi riformulat.

(2)

Dan ir-Regolament jistabbilixxi regoli uniformi ta’ ġurisdizzjoni għad-divorzju, għas-separazzjoni legali u għall-annullament taż-żwieġ kif ukoll għat-tilwim dwar ir-responsabbiltà tal-ġenituri b’element internazzjonali. Huwa jiffaċilita ċ-ċirkolazzjoni tad-deċiżjonijiet, kif ukoll tal-istrumenti awtentiċi u ta’ ċerti ftehimiet fl-Unjoni billi jistabbilixxi dispożizzjonijiet dwar ir-rikonoxximent u l-infurzar tagħhom fi Stati Membri oħra. Barra minn hekk, dan ir-Regolament jikkjarifika d-dritt tal-minuri li jingħata opportunità jesprimi fehmtu fi proċedimenti li huwa suġġett għalihom u fih ukoll dispożizzjonijiet li jikkomplementaw il-Konvenzjoni tal-Aja tal-25 ta’ Ottubru tal-1980 dwar l-Aspetti Ċivili tal-Ħtif Internazzjonali tal-Minuri ("il-Konvenzjoni tal-Aja tal-1980") f’relazzjonijiet bejn l-Istati Membri. Għalhekk jenħtieġ li dan ir-Regolament jgħin biex tissaħħaħ iċ-ċertezza legali u tiżdied il-flessibbiltà, biex jiġi żgurat li l-aċċess għall-proċedimenti tal-qorti jitjieb u biex jiġi żgurat li tali proċedimenti jsiru aktar effiċjenti.

(3)

Il-funzjonament korrett u bla xkiel ta’ spazju ta’ ġustizzja tal-Unjoni b’rispett għas-sistemi u t-tradizzjonijiet legali differenti tal-Istati Membri huwa essenzjali għall-Unjoni. F’dan ir-rigward, il-fiduċja reċiproka fis-sistemi ta’ ġustizzja ta’ xulxin jenħtieġ li tkompli tittejjeb. L-Unjoni ffissat l-objettiv lilha nnifisha li toħloq, iżżomm u tiżviluppa żona ta’ libertà, sigurtà u ġustizzja, li fiha l-moviment liberu tal-persuni u l-aċċess għall-ġustizzja jkunu żgurati. Bil-għan li jiġu implimentati dak l-objettiv, id-drittijiet tal-persuni, b’mod partikolari il-minuri, fi proċeduri ġuridiċi jenħtieġ li jissaħħu sabiex tiġi ffaċilitata l-kooperazzjoni tal-awtoritajiet ġudizzjarji u amministrattivi u l-infurzar tad-deċiżjonijiet fi kwistjonijiet tal-liġi tal-familja b’implikazzjonijiet transfruntiera. Jenħtieġ li r-rikonoxximent reċiproku tad-deċiżjonijiet fi kwistjonijiet ċivili jittejbu, l-aċċess għall-ġustizzja jiġi ssimplifikat u l-iskambji ta’ informazzjoni bejn l-awtoritajiet tal-Istati Membri jitjiebu.

(4)

Għal dan il-għan, l-Unjoni għandha tadotta, fost affarijiet oħra, miżuri fil-qasam tal-kooperazzjoni ġudizzjarja fi kwistjonijiet ċivili li jkollhom implikazzjonijiet transfruntiera, b’mod partikolari meta jkun neċessarju għat-tħaddim kif suppost tas-suq intern. Jenħtieġ li t-terminu "kwistjonijiet ċivili" jiġi interpretat b’mod awtonomu, f’konformità mal-ġurisprudenza stabbilita tal-Qorti tal-Ġustizzja tal-Unjoni Ewropea (“il-Qorti tal-Ġustizzja”). Jenħtieġ li jitqies bħala kunċett awtonomu li għandu jiġi interpretat b’riferiment, l-ewwel nett, għall-objettivi u għas-sistema ta’ dan ir-Regolament u, it-tieni nett, għall-prinċipji ġenerali li jirriżultaw mill-corpus tas-sistemi legali nazzjonali. Għaldaqstant, jenħtieġ li t-terminu "kwistjonijiet ċivili" jiġi interpretat fis-sens li jista’ wkoll jinkludi miżuri li, mill-perspettiva tas-sistema legali ta’ Stat Membru, jistgħu jaqgħu taħt id-dritt pubbliku. Jenħtieġ li jkopri b’mod partikolari l-applikazzjonijiet, il-miżuri jew id-deċiżjonijiet kollha fi kwistjonijiet ta’ "responsabbiltà tal-ġenituri" fis-sens ta’ dan ir-Regolament, f’konformità mal-objettivi tiegħu.

(5)

Dan ir-Regolament ikopri "kwistjonijiet ċivili", li jinkludi proċedimenti tal-qorti ċivili u d-deċiżjonijiet li jirriżultaw kif ukoll strumenti awtentiċi u ċerti ftehimiet extra-ġudizzjarji fi kwistjonijiet matrimonjali u kwistjonijiet ta’ responsabbiltà tal-ġenituri. Barra minn hekk, jenħtieġ li t-terminu "kwistjonijiet ċivili" ikopri applikazzjonijiet, miżuri jew deċiżjonijiet kif ukoll strumenti awtentiċi u ċerti ftehimiet extra-ġudizzjarji li jikkonċernaw ir-ritorn ta’ minuri skont il-Konvenzjoni tal-Aja tal-1980, li, skont il-ġurisprudenza tal-Qorti tal-Ġustizzja u f’konformità mal-Artikolu 19 tal-Konvenzjoni tal-Aja tal-1980, mhumiex proċedimenti dwar il-mertu tar-responsabbiltà tal-ġenituri iżda huma relatati mill-qrib magħha u huma indirizzati minn ċerti dispożizzjonijiet ta’ dan ir-Regolament.

(6)

Sabiex tiġi ffaċilitata ċ-ċirkolazzjoni ta’ deċiżjonijiet kif ukoll ta’ strumenti awtentiċi u ċerti ftehimiet fi kwistjonijiet matrimonjali u kwistjonijiet ta’ responsabbiltà tal-ġenituri, huwa neċessarju u xieraq li r-regoli li jirregolaw il-ġurisdizzjoni u r-rikonoxximent u l-infurzar tad-deċiżjonijiet jiġu rregolati minn strument legali tal-Unjoni li jkun vinkolanti u applikabbli direttament.

(7)

Sabiex l-ugwaljanza għall-minuri kollha tkun assigurata, dan ir-Regolament jenħtieġ li jkopri d-deċiżjonijiet kollha dwar ir-responsabbiltà tal-ġenituri, inkluż il-miżuri għall-protezzjoni tal-minuri, indipendentement minn kwalunkwe konnessjoni ma’ proċedimenti matrimonjali jew proċedimenti oħra.

(8)

Madankollu, ladarba l-applikazzjoni tar-regoli dwar ir-responsabbiltà tal-ġenituri ta’ sikwit titfaċċa fil-kuntest ta’ proċedimenti matrimonjali, huwa xieraq li jkun hemm strument uniku għal kwistjonijiet ta’ divorzju u responsabbiltà tal-ġenituri.

(9)

Fir-rigward ta’ deċiżjonijiet dwar divorzju, separazzjoni legali jew annullament taż-żwieġ, jenħtieġ li dan ir-Regolament japplika biss għax-xoljiment ta’ rabtiet matrimonjali. Jenħtieġ li dan ma jittrattax kwistjonijiet bħar-raġunijiet għal divorzju, effetti patrimonjali taż-żwieġ jew kwalunkwe miżura anċillari oħra. Deċiżjonijiet li jirrifjutaw ix-xoljiment ta’ rabtiet matrimonjali jenħtieġ li ma jkunux koperti mid-dispożizzjonijiet tiegħu dwar ir-rikonoxximent.

(10)

Fir-rigward tal-proprjetà tal-minuri, dan ir-Regolament għandu japplika biss għall-miżuri għall-protezzjoni tal-minuri, jiġifieri n-nomina u l-funzjonijiet ta’ persuna jew korp li jkollu l-inkarigu tal-proprjetà tal-minuri, li jirrappreżenta jew li jgħin lill-minuri, u l-amministrazzjoni, il-konservazzjoni jew it-trasferiment tal-proprjetà tal-minuri. F’dan il-kuntest, jenħtieġ li dan ir-Regolament, pereżempju, japplika f’każijiet fejn is-suġġett tal-proċedimenti jkun il-ħatra ta’ persuna jew korp li jamministra l-proprjetà tal-minuri. Il-miżuri relatati mal-proprjetà tal-minuri li ma jikkonċernawx il-protezzjoni tal-minuri jenħtieġ li jkomplu jiġu rregolati mir-Regolament (UE) Nru 1215/2012 tal-Parlament Ewropew u tal-Kunsill (4). Madankollu, jenħtieġ li jkun possibbli li d-dispożizzjonijiet ta’ dan ir-Regolament dwar il-ġurisdizzjoni fuq kwistjonijiet inċidentali japplikaw f’tali każijiet.

(11)

Kwalunkwe tip ta’ tqegħid ta’ minuri fil-kura f’familja – jiġifieri, skont il-liġi u l-proċedura nazzjonali, ma’ individwu wieħed jew aktar – jew f’kustodja istituzzjonali, pereżempju f’orfanatrofju jew dar tat-tfal, fi Stat Membru ieħor jenħtieġ li jaqa’ fil-kamp ta’ applikazzjoni ta’ dan ir-Regolament, sakemm ma jiġix eskluż espliċitament, li huwa per eżempju l-każ għat-tqegħid bi ħsieb ta’ adozzjoni, tqegħid ma’ ġenitur jew, fejn applikabbli, ma’ kwalunkwe familjari qarib ieħor kif iddikjarat mill-Istat Membru riċeventi. B’riżultat ta’ dan, anke "tqegħid edukattiv" ordnat minn qorti jew organizzat minn awtorità kompetenti bil-qbil tal-ġenituri jew tal-minuri jew fuq talba tagħhom wara imġiba devjanti tal-minuri, jenħtieġ li jiġi inkluż. Jenħtieġ li jiġi eskluż biss, it-tqegħid – kemm jekk edukattiv kif ukoll jekk punittiv – ordnat jew organizzat wara att tal-minuri li, jekk jitwettaq minn adult, jista’ jammonta għal att punibbli skont il-liġi kriminali nazzjonali, irrispettivament minn jekk fil-każ partikolari dan jistax iwassal għal kundanna.

(12)

Jenħtieġ li dan il-Regolament ma japplikax għall-istabbiliment tal-paternità u l-maternità, peress li din hija kwistjoni differenti mill-attribuzzjoni tar-responsabbiltà tal-ġenituri, u lanqas ma jenħtieġ li japplika għall-kwistjonijiet oħra konnessi mal-istatus tal-persuni.

(13)

L-obbligi ta’ manteniment huma esklużi mill-kamp ta’ applikazzjoni ta’ dan ir-Regolament peress li dawn l-obbligi huma diġà koperti mir-Regolament tal-Kunsill (KE) Nru 4/2009 (5). Minbarra l-qrati għall-post fejn jirrisjedi normalment il-konvenut, jew il-kreditur, il-qrati li jkollhom il-ġurisdizzjoni fi kwistjonijiet matrimonjali skont dan ir-Regolament jenħtieġ li ġeneralment ikollhom il-ġurisdizzjoni biex jiddeċiedu dwar l-obbligi ta’ manteniment anċillari bejn il-konjuġi jew l-eks konjuġi bl-applikazzjoni tal-punt (c) tal-Artikolu 3 ta’ dak ir-Regolament. Il-qrati li jkollhom il-ġurisdizzjoni skont dan ir-Regolament fi kwistjonijiet ta’ responsabbiltà tal-ġenituri, ikollhom b’mod ġenerali l-ġurisdizzjoni biex jiddeċiedu dwar l-obbligi ta’ manteniment anċillari tal-minuri bl-applikazzjoni tal-punt (d) tal-Artikolu 3 ta’ dak ir-Regolament.

(14)

Skont il-ġurisprudenza tal-Qorti tal-Ġustizzja, jenħtieġ li t-terminu "qorti" tingħata tifsira wiesgħa sabiex tkopri wkoll awtoritajiet amministrattivi, jew awtoritajiet oħra, bħal nutara, li jeżerċitaw ġurisdizzjoni f’ċerti kwistjonijiet matrimonjali jew kwistjonijiet ta’ responsabbiltà tal-ġenituri. Jenħtieġ li kwalunkwe ftehim approvat mill-qorti wara eżami tal-mertu tal-każ f’konformità mal-liġi u l-proċedura nazzjonali jiġi rikonoxxut jew infurzat bħala "deċiżjoni". Jenħtieġ li ftehimiet oħra li jiksbu effett legali vinkolanti fl-Istat Membru tal-oriġini wara l-intervent formali ta’ awtorità pubblika jew awtorità oħra kif ikkomunikata lill-Kummissjoni minn Stat Membru għal dak il-fini jingħataw effett fi Stati Membri oħra f’konformità mad-dispożizzjonijiet speċifiċi dwar strumenti awtentiċi u ftehimiet f’dan ir-Regolament. Jenħtieġ li dan ir-Regolament ma jippermettix ċirkolazzjoni libera ta’ sempliċi ftehimiet privati. Madankollu, ftehimiet li la jkunu deċiżjoni u lanqas strument awtentiku iżda li jkunu ġew irreġistrati minn awtorità pubblika kompetenti li tagħmel dan, jenħtieġ li jiġu ċċirkolati. Tali awtoritajiet pubbliċi jistgħu jinkludu nutara li jirreġistraw ftehimiet, anke fejn dawn jeżerċitaw professjoni liberali.

(15)

Fir-rigward ta’ "strument awtentiku", it-terminu "għoti tas-setgħa" f’dan ir-Regolament jenħtieġ li jiġi interpretat b’mod awtonomu f’konformità mad-definizzjoni ta’ "strument awtentiku" użata orizzontalment fi strumenti oħra tal-Unjoni u fid-dawl tal-finijiet ta’ dan ir-Regolament.

(16)

Għalkemm proċedimenti ta’ ritorn skont il-Konvenzjoni tal-Aja tal-1980 mhumiex proċedimenti dwar il-mertu tar-responsabbiltà tal-ġenituri, jenħtieġ li d-deċiżjonijiet li jordnaw ir-ritorn ta’ minuri skont il-Konvenzjoni tal-Aja tal-1980 jibbenefikaw minn rikonoxximent u infurzar skont il-Kapitolu IV ta’ dan ir-Regolament fejn ikun meħtieġ li dawn jiġu infurzati fi Stat Membru ieħor minħabba sekwestru ulterjuri wara li jkun ġie ordnat ir-ritorn. Dan huwa mingħajr preġudizzju għall-possibbiltà li jinbdew proċedimenti ġodda għar-ritorn ta’ minuri skont il-Konvenzjoni tal-Aja tal-1980 fir-rigward tas-sekwestru ulterjuri. Barra minn hekk, jenħtieġ li dan ir-Regolament ikompli japplika għal aspetti oħra f’sitwazzjonijiet ta’ tneħħija jew żamma illegali ta’ minuri, pereżempju id-dispożizzjonijiet dwar il-ġurisdizzjoni għall-qorti tal-Istat Membru ta’ residenza abitwali, u d-dispożizzjonijiet dwar ir-rikonoxximent u l-infurzar għal kwalunkwe ordni magħmula minn dik il-qorti.

(17)

Dan ir-Regolament jenħtieġ, bħall-Konvenzjoni tal-Aja tad-19 ta’ Ottubru 1996 fuq il-Ġurisdizzjoni, il-Liġi Applikabbli, Rikonoxximent, Infurzar u Kooperazzjoni dwar ir-Responsabbiltà tal-Ġenituri u Miżuri għall-Protezzjoni tat-Tfal ("il-Konvenzjoni tal-Aja tal-1996"), li japplika għall-minuri kollha sal-età ta’ 18-il sena anke f’każijiet fejn huma jkunu kisbu l-kapaċità qabel dik l-età skont il-liġi li tirregola l-istatus personali tagħhom, pereżempju permezz ta’ emanċipazzjoni minħabba żwieġ. Jenħtieġ li dan jevita trikkib mal-kamp ta’ applikazzjoni tal-Konvenzjoni tal-Aja tat-13 ta’ Jannar 2000 dwar il-Protezzjoni Internazzjonali tal-Adulti li tapplika mill-età ta’ 18-il sena ’l quddiem u fl-istess ħin, jevita lakuni bejn dawk iż-żewġ strumenti. Jenħtieġ li l-Konvenzjoni tal-Aja tal-1980, u konsegwentement anke l-Kapitolu III ta’ dan ir-Regolament. li jikkomplementa l-applikazzjoni tal-Konvenzjoni tal-Aja tal-1980 f’relazzjonijiet bejn l-Istati Membri, ikomplu japplikaw għal minuri sal-età ta’ 16-il sena.

(18)

Għall-fini ta’ dan ir-Regolament, jenħtieġ li persuna tiġi kkunsidrata li għandha "drittijiet ta’ kustodja" fejn, skont deċiżjoni, b’leġittimità jew bi ftehim li jkollu effett legali skont il-liġi tal-Istat Membru fejn il-minuri jkollu residenza abitwali, detentur tar-responsabbiltà tal-ġenituri ma jistax jiddeċiedi dwar il-post ta’ residenza tal-minuri mingħajr il-kunsens ta’ dik il-persuna, irrispettivament mit-termini użati skont il-liġi nazzjonali. F’xi sistemi legali li jżommu t-termini "kustodja" u "aċċess", il-ġenitur bla kustodja jista’ fil-fatt iżomm responsabbiltajiet importanti għal deċiżjonijiet li jikkonċernaw lill-minuri li jmorru lil hinn minn sempliċi dritt ta’ aċċess.

(19)

Ir-raġunijiet tal-ġurisdizzjoni fi kwistjonijiet ta’ responsabbiltà tal-ġenituri huma ffurmati fid-dawl tal-aħjar interessi tal-minuri u jenħtieġ li jiġu applikati skont dawn. Kwalunkwe referenza għall-aħjar interessi tal-minuri jenħtieġ li tiġi interpretata fid-dawl tal-Artikolu 24 tal-Karta tad-Drittijiet Fundamentali tal-Unjoni Ewropea (“il-Karta”) u l-Konvenzjoni tan-Nazzjonijiet Uniti dwar id-Drittijiet tat-Tfal tal-20 ta’ Novembru 1989 ("il-Konvenzjoni tan-NU dwar id-Drittijiet tat-Tfal") kif implimentati mil-liġi u l-proċedura nazzjonali.

(20)

Sabiex jiġu ssalvagwardjati l-aħjar interessi tal-minuri, jenħtieġ li l-ġurisdizzjoni l-ewwel nett tiġi ddeterminata skont il-kriterju tal-prossimità. Konsegwentement, jenħtieġ li l-Istat Membru tar-residenza abitwali tal-minuri jkollu l-ġurisdizzjoni, ħlief għal ċerti każijiet stabbiliti f’dan ir-Regolament, pereżempju,fejn ikun hemm tibdil fir-residenza tal-minuri jew skont ftehim bejn id-detenturi tar-responsabbiltà tal-ġenituri.

(21)

Meta ma jkun għadu pendenti l-ebda proċediment fi kwistjonijiet ta’ responsabbiltà tal-ġenituri u r-residenza abitwali tal-minuri tinbidel wara rilokazzjoni leġittima, jenħtieġ li l-ġurisdizzjoni ssegwi lill-minuri sabiex tinżamm il-prossimità. Għal proċedimenti li jkunu diġà pendenti, iċ-ċertezza legali u l-effiċjenza tal-ġustizzja jiġġustifikaw li din il-ġurisdizzjoni tinżamm sakemm dawn il-proċedimenti jkunu rriżultaw f’deċiżjoni finali jew ikunu ntemmu b’xi mod ieħor. Madankollu, jenħtieġ li l-qorti li quddiemha jkollha proċedimenti pendenti tkun intitolata f’ċerti ċirkostanzi li tittrasferixxi l-ġurisdizzjoni lill-Istat Membru fejn il-minuri jkun qed jgħix wara rilokazzjoni leġittima.

(22)

F’każijiet ta’ tneħħija jew żamma illegali ta’ minuri, u mingħajr preġudizzju għall-possibbiltà tal-għażla tal-qorti skont dan ir-Regolament, jenħtieġ li l-qrati tal-Istat Membru tar-residenza abitwali tal-minuri jżommu l-ġurisdizzjoni tagħhom sakemm tiġi stabbilita residenza abitwali ġdida fi Stat Membru ieħor u jiġu ssodisfati xi kondizzjonijiet speċifiċi. Jenħtieġ li l-Istati Membri li jkollhom ġurisdizzjoni kkonċentrata jqisu li jippermettu li l-qorti invokata għall-applikazzjoni ta’ ritorn skont il-Konvenzjoni tal-Aja tal-1980 teżerċita wkoll il-ġurisdizzjoni maqbula jew aċċettata mill-partijiet skont dan ir-Regolament fi kwistjonijiet ta’ responsabbiltà tal-ġenituri fejn ikun intlaħaq ftehim bejn il-partijiet matul dawn il-proċedimenti ta’ ritorn. Jenħtieġ li tali ftehimiet jinkludu ftehimiet kemm dwar ir-ritorn kif ukoll dwar in-nonritorn tal-minuri. Jekk jintlaħaq ftehim dwar nonritorn, jenħtieġ li l-minuri jibqa’ fl-Istat Membru tar-residenza abitwali l-ġdida u jenħtieġ li l-ġurisdizzjoni għal kwalunkwe proċedimenti ta’ kustodja futuri hemmhekk tiġi ddeterminata abbażi tar-residenza abitwali l-ġdida tal-minuri.

(23)

Taħt kondizzjonijiet speċifiċi stabbiliti minn dan ir-Regolament, jenħtieġ li jkun possibbli li l-ġurisdizzjoni fi kwistjonijiet ta’ responsabbiltà tal-ġenituri tiġi stabbilita wkoll fi Stat Membru fejn il-proċedimenti għal divorzju, separazzjoni legali jew annullament ta’ żwieġ ikunu pendenti bejn il-ġenituri, jew fi Stat Membru ieħor li l-minuri jkollu konnessjoni sostanzjali miegħu u li l-partijiet ikunu ftehmu dwaru minn qabel, mhux aktar tard minn meta l-qorti tiġi invokata, jew li jkunu aċċettaw espressament matul dawk il-proċedimenti, anke jekk il-minuri ma jkunx residenti abitwali f’dak l-Istat Membru, dment li l-eżerċitar ta’ tali ġurisdizzjoni jkun fl-aħjar interessi tal-minuri. Skont il-ġurisprudenza tal-Qorti tal-Ġustizzja, kwalunkwe persuna għajr il-ġenituri li, skont il-liġi nazzjonali, ikollha l-kapaċità ta’ parti tal-proċedimenti mibdija mill-ġenituri, jenħtieġ li tiġi kkunsidrata bħala parti tal-proċedimenti għall-finijiet ta’ dan ir-Regolament u għalhekk, l-oppożizzjoni minn dik il-parti għall-għażla ta’ ġurisdizzjoni li tkun saret mill-ġenituri tal-minuri inkwistjoni, wara d-data li fiha l-qorti tkun ġiet invokata, jenħtieġ li tipprekludi li tiġi stabbilita l-aċċettazzjoni tal-estensjoni tal-ġurisdizzjoni mill-partijiet kollha tal-proċedimenti f’dik id-data. Qabel ma teżerċita l-ġurisdizzjoni tagħha abbażi ta’ għażla ta’ ftehim jew aċċettazzjoni tal-qorti, il-qorti jenħtieġ li teżamina jekk dan il-ftehim jew l-aċċettazzjoni kinitx ibbażata fuq għażla libera u informata tal-partijiet ikkonċernati u li ma kinitx ir-riżultat ta’ vantaġġ li tkun ħadet xi parti mis-sitwazzjoni prekarja jew il-pożizzjoni dgħajfa tal-parti l-oħra. L-aċċettazzjoni tal-ġurisdizzjoni matul il-proċedimenti jenħtieġ li tiġi rrekordjata mill-qorti skont il-liġi u l-proċedura nazzjonali.

(24)

Jenħtieġ li kwalunkwe ġurisdizzjoni miftehma jew aċċettata tieqaf, dment li ma jiġix miftiehem mod ieħor mill-partijiet, hekk kif deċiżjoni f’dawk il-proċedimenti dwar kwistjonijiet ta’ responsabbiltà tal-ġenituri ma tkunx għadha soġġetta għal appell ordinarju jew il-proċedimenti jkunu ntemmu għal xi raġuni oħra, sabiex jiġi rispettat ir-rekwiżit ta’ prossimità għal kwalunkwe proċediment ġdid fil-futur.

(25)

Meta r-residenza abitwali ta’ minuri ma tkunx tista’ tiġi stabbilita u l-ġurisdizzjoni lanqas ma tkun tista’ tiġi ddeterminata abbażi ta’ ftehim dwar l-għażla tal-qorti, jenħtieġ li l-qrati tal-Istat Membru fejn il-minuri jkun preżenti jkollhom il-ġurisdizzjoni. Jenħtieġ li din ir-regola tapplika wkoll għal minuri refuġjati u minuri li huma internazzjonalment spostati minħabba inkwiet li jinqala’ fl-Istat Membru ta’ residenza abitwali tagħhom. Madankollu, fid-dawl ta’ dan ir-Regolament flimkien mal-Artikolu 52(2) tal-Konvenzjoni tal-Aja tal-1996, jenħtieġ li din ir-regola tal-ġurisdizzjoni tapplika biss għal minuri li kellhom ir-residenza abitwali tagħhom fi Stat Membru qabel l-ispostament. Fejn ir-residenza abitwali tal-minuri qabel l-ispostament kien fi Stat terz, jenħtieġ li tapplika r-regola tal-ġurisdizzjoni tal-Konvenzjoni tal-Aja tal-1996 dwar it-tfal refuġjati u tfal internazzjonalment spostati.

(26)

F’każijiet eċċezzjonali, qorti tal-Istat Membru tar-residenza abitwali tal-minuri jaf ma tkunx l-aktar qorti adatta biex tittratta l-każ. Bħala eċċezzjoni u skont ċerti kondizzjonijiet, filwaqt li ma tkun taħt l-ebda obbligu li tagħmel dan, jenħtieġ li l-qorti li jkollha l-ġurisdizzjoni tkun tista’ tittrasferixxi l-ġurisdizzjoni tagħha f’każ speċifiku għal qorti ta’ Stat Membru ieħor jekk din il-qorti tkun f’pożizzjoni aħjar biex tivvaluta l-aħjar interessi tal-minuri fil-każ partikolari. Skont il-ġurisprudenza tal-Qorti tal-Ġustizzja, jenħtieġ li t-trasferiment ta’ ġurisdizzjoni fi kwistjonijiet ta’ responsabbiltà tal-ġenituri, minn qorti ta’ Stat Membru, isir biss għal qorti ta’ Stat Membru ieħor li miegħu l-minuri jkollu "konnessjoni partikolari". Dan ir-Regolament jenħtieġ li jistabbilixxi lista eżawrjenti tal-elementi deċiżivi ta’ tali "konnessjoni partikolari" għal dawk il-finijiet. Jenħtieġ li l-qorti li jkollha ġurisdizzjoni tagħmel it-talba lill-qorti ta’ Stat Membru ieħor biss jekk id-deċiżjoni preċedenti tagħha li tissospendi l-proċedimenti u li tagħmel talba għat-trasferiment tal-ġurisdizzjoni tkun saret finali, fil-każ fejn dik id-deċiżjoni tkun tita’ tiġi appellata skont il-liġi nazzjonali.

(27)

F’ċirkostanzi eċċezzjonali u meta jitqiesu l-aħjar interessi tal-minuri fil-każ partikolari, qorti ta’ Stat Membru li ma jkollhiex ġurisdizzjoni skont dan ir-Regolament, iżda jkollha konnessjoni partikolari mal-minuri f’konformità ma’ dan ir-Regolament, jenħtieġ li tkun tista’ titlob trasferiment tal-ġurisdizzjoni mill-qorti kompetenti tal-Istat Membru tar-residenza abitwali tal-minuri. Madankollu, jenħtieġ li dak ma jkunx permess f’każijiet ta’ tneħħija jew żamma illegali tal-minuri. Jenħtieġ li tkun il-liġi nazzjonali tal-Istat Membru rikjest li tidentifika din il-qorti kompetenti speċifika.

(28)

Jenħtieġ li t-trasferiment tal-ġurisdizzjoni, kemm jekk mitlub minn qorti li tixtieq tittrasferixxi l-ġurisdizzjoni tagħha jew minn qorti li tixtieq tikseb il-ġurisdizzjoni, ikollu effett biss għall-każ partikolari li fih isir. Jenħtieġ li ladarba l-proċedimenti li għalihom ikun intalab u ngħata t-trasferiment tal-ġurisdizzjoni jaslu fi tmiemhom, it-trasferiment ma jipproduċi l-ebda effett għal proċedimenti futuri.

(29)

Fejn l-ebda qorti ta’ Stat Membru ma jkollha ġurisdizzjoni skont dan ir-Regolament, jenħtieġ li l-ġurisdizzjoni tiġi ddeterminata, f’kull Stat Membru, mil-liġijiet ta’ dak l-Istat Membru. It-terminu "liġijiet ta’ dak l-Istat Membru" jenħtieġ li jinkludi l-istrumenti internazzjonali fis-seħħ f’dak l-Istat Membru.

(30)

Jenħtieġ li dan ir-Regolament ma jimpedixxix lill-qrati ta’ Stat Membru li ma jkollhomx ġurisdizzjoni fuq il-mertu tal-każ milli jieħdu miżuri proviżorji, inkluż protettivi, f’każijiet urġenti, fir-rigward tal-persuna jew il-proprjetà ta’ minuri preżenti f’dak l-Istat Membru. Jenħtieġ li dawk il-miżuri ma jiġu rikonoxxuti u infurzati f’ebda Stat Membru ieħor skont dan ir-Regolament, bl-eċċezzjoni ta’ miżuri li ttieħdu biex jipproteġu lill-minuri minn riskju serju kif imsemmi fil-punt (b) tal-Artikolu 13(1) tal-Konvenzjoni tal-Aja tal-1980. Il-miżuri li ttieħdu biex jipproteġu lill-minuri minn tali riskju jenħtieġ li jibqgħu fis-seħħ sakemm qorti tal-Istat Membru tar-residenza abitwali tal-minuri tkun ħadet il-miżuri li tqis adatti. Sa fejn il-protezzjoni tal-aħjar interessi tal-minuri tkun tirrikjedi dan, il-qorti jenħtieġ li tinforma, direttament jew permezz tal-Awtoritajiet Ċentrali, lill-qorti tal-Istat Membru li jkollha ġurisdizzjoni fuq il-mertu tal-każ skont dan ir-Regolament dwar il-miżuri li ttieħdu. Madankollu, jenħtieġ li n-nuqqas li tingħata tali informazzjoni ma jkunx raġuni għan-nuqqas ta’ rikonoxximent tal-miżura.

(31)

Jenħtieġ li qorti li jkollha biss ġurisdizzjoni fuq miżuri proviżorji, inkluż miżuri protettivi, jekk tiġi invokata b’applikazzjoni fuq il-mertu tal-każ, tiddikjara b’mozzjoni tagħha stess li ma għandha l-ebda ġurisdizzjoni jekk qorti ta’ Stat Membru ieħor ikollha ġurisdizzjoni rigward il-mertu tal-każ skont dan ir-Regolament.

(32)

Jekk l-eżitu tal-proċedimenti quddiem qorti ta’ Stat Membru li ma jkollux ġurisdizzjoni skont dan ir-Regolament jiddependi fuq id-determinazzjoni ta’ kwistjoni inċidentali li taqa’ fil-kamp ta’ applikazzjoni ta’ dan ir-Regolament, jenħtieġ li dan ir-Regolament ma jimpedixxix lill-qrati ta’ dak l-Istat Membru milli jiddeterminaw dik il-kwistjoni. Għaldaqstant, jekk is-suġġett tal-proċedimenti jkun, pereżempju, tilwima dwar suċċessjoni li fiha jkun involut il-minuri u jeħtieġ li jinħatar tutur ad litem biex jirrappreżenta lill-minuri f’dawk il-proċedimenti, l-Istat Membru li jkollu ġurisdizzjoni għat-tilwima dwar is-suċċessjoni jenħtieġ li jitħalla jaħtar lit-tutur għall-proċedimenti pendenti, irrispettivament minn jekk ikollux ġurisdizzjoni għal kwistjonijiet ta’ responsabbiltà tal-ġenituri skont dan ir-Regolament. Kwalunkwe tali determinazzjoni jenħtieġ li tipproduċi biss effetti fil-proċedimenti li għalihom kienet saret.

(33)

Jekk il-validità ta’ att legali mwettaq jew li għandu jitwettaq f’isem minuri fi proċedimenti dwar suċċessjoni quddiem qorti ta’ Stat Membru tirrikjedi permess jew approvazzjoni minn qorti, qorti f’dak l-Istat Membru jenħtieġ li jkun jista’ jiddeċiedi jekk jippermettix jew japprovax tali att legali anke jekk ma jkollux il-ġurisdizzjoni skont dan ir-Regolament. It-terminu "att legali" jenħtieġ li jinkludi, pereżempju, l-aċċettazzjoni jew iċ-ċaħda ta’ wirt jew ftehim bejn il-partijiet dwar il-kondiviżjoni jew id-distribuzzjoni tal-patrimonju.

(34)

Jenħtieġ li dan ir-Regolament ikun mingħajr preġudizzju għall-applikazzjoni tad-dritt internazzjonali pubbliku dwar l-immunità diplomatika. Meta l-ġurisdizzjoni skont dan ir-Regolament ma tistax tiġi eżerċitata minħabba l-immunità diplomatika f’konformità mad-dritt internazzjonali, jenħtieġ li l-ġurisdizzjoni tiġi eżerċitata f’konformità mad-dritt nazzjonali fi Stat Membru li fih il-persuna kkonċernata ma tgawdix tali immunità.

(35)

Dan ir-Regolament jiddefinixxi f’liema mument qorti titqies li tiġi invokata għall-finijiet ta’ dan ir-Regolament. Fid-dawl taż-żewġ sistemi differenti li jeżistu fl-Istati Membri, li jew jirrikjedu li l-att promotur jiġi nnotifikat l-ewwel lill-konvenut, jew li l-ewwel jiġi ppreżentat lill-qorti, jenħtieġ li jkun biżżejjed li jkun ittieħed l-ewwel pass skont il-liġi nazzjonali, dment li l-applikant ma jkun sussegwentement naqas milli jieħu ebda pass li kien meħtieġ jieħu skont il-liġi nazzjonali sabiex ikollu t-tieni pass effetwat. Filwaqt li tieħu kont tal-importanza li qed tikber tal-medjazzjoni u metodi oħra ta’ soluzzjoni alternattiva għat-tilwim, anke matul proċedimenti tal-qorti, f’konformità mal-ġurisprudenza tal-Qorti tal-Ġustizzja, jenħtieġ li qorti titqies ukoll li ġiet invokata fil-mument meta l-att promotur jew dokument ekwivalenti jiġi ppreżentat lill-qorti f’każijiet fejn il-proċedimenti sadanittant ikunu ġew sospiżi, bil-ħsieb li tinstab soluzzjoni amikevoli, fuq applikazzjoni tal-parti li tagħmel ir-rikors, mingħajr ma l-att promotur ikun għadu ġie nnotifikat lill-konvenut u mingħajr ma l-konvenut ikollu għarfien dwar il-proċedimenti jew ikun ipparteċipa fihom b’xi mod, dment li l-parti li għamlet ir-rikors ma tkunx sussegwentement naqset milli tieħu ebda pass li kien meħtieġ tieħu sabiex issir in-notifika fuq il-konvenut. Skont il-ġurisprudenza tal-Qorti tal-Ġustizzja, fil-każ ta’ lis pendens, id-data li fiha tkun ġiet ippreżentata proċedura obbligatorja ta’ konċiljazzjoni quddiem awtorità nazzjonali ta’ konċiljazzjoni jenħtieġ li titqies bħala d-data li fiha "qorti" titqies li ġiet invokata.

(36)

Jenħtieġ li r-Regolament (KE) Nru 1393/2007 tal-Parlament Ewropew u tal-Kunsill (6) japplika għan-notifika ta’ dokumenti fi proċedimenti mibdija skont dan ir-Regolament.

(37)

Qorti ta’ Stat Membru li tiġi invokata li ma jkollha ebda ġurisdizzjoni fuq il-mertu tal-każ skont dan ir-Regolament u li qorti ta’ Stat Membru ieħor ikollha ġurisdizzjoni fuq il-mertu tal-każ skont dan ir-Regolament, jenħtieġ li tiddikjara b’mozzjoni tagħha stess li ma għandha ebda ġurisdizzjoni. Madankollu, qorti ta’ Stat Membru li jkollu konnessjoni partikolari mal-minuri f’konformità ma’ dan ir-Regolament jenħtieġ li jkollha d-diskrezzjoni li titlob li l-ġurisdizzjoni tiġi ttrasferita skont dan ir-Regolament iżda ma tkunx obbligata tagħmel dan.

(38)

Fl-interessi tal-amministrazzjoni armonjuża tal-ġustizzja, huwa neċessarju li tiġi minimizzata l-possibbiltà ta’ proċedimenti konkurrenti u li jiġi żgurat li ma jingħatawx deċiżjonijiet irrikonċiljabbli fi Stati Membri differenti. Jenħtieġ li jkun hemm mekkaniżmu ċar u effettiv għas-soluzzjoni ta’ każijiet lis pendens u azzjonijiet relatati, u biex jiġu evitati l-problemi li jirriżultaw minn differenzi nazzjonali fir-rigward tad-determinazzjoni taż-żmien meta każ jitqies pendenti. Għall-finijiet ta’ dan ir-Regolament, dak iż-żmien jenħtieġ li jiġi definit b’mod awtonomu. Madankollu, sabiex tiżdied l-effettività ta’ ftehimiet esklużivi dwar l-għażla tal-qorti, jenħtieġ li d-dispożizzjonijiet ta’ dan ir-Regolament dwar lis pendens ma jkunux ta’ ostaklu meta l-ġenituri jikkonferixxu ġurisdizzjoni esklużiva lill-qrati ta’ Stat Membru.

(39)

Il-proċedimenti fi kwistjonijiet ta’ responsabbiltà tal-ġenituri skont dan ir-Regolament kif ukoll proċedimenti ta’ ritorn skont il-Konvenzjoni tal-Aja tal-1980 jenħtieġ li, bħala prinċipju bażiku, jipprovdu lill-minuri li jkun soġġett għal dawk il-proċedimenti u li jkun kapaċi jifforma fehmtu, f’konformità mal-ġurisprudenza tal-Qorti tal-Ġustizzja, opportunità ġenwina u effettiva biex jesprimi fehmtu u meta jiġu vvalutati l-aħjar interessi tal-minuri, jenħtieġ li jingħata l-piż dovut lil dawk il-fehmiet. L-opportunità tal-minuri li jesprimi fehmtu liberament f’konformità mal-Artikolu 24(1) tal-Karta u fid-dawl tal-Artikolu 12 tal-Konvenzjoni tan-NU dwar id-Drittijiet tat-Tfal taqdi rwol importanti fl-applikazzjoni ta’ dan ir-Regolament. Madankollu, jenħtieġ li r-Regolament iħalli f’idejn il-liġi u l-proċedura nazzjonali tal-Istati Membri biex jiġi ddeterminat min ser jisma’ lill-minuri u kif il-minuri għandu jinstema’. Konsegwentement, ma għandux ikun il-fini ta’ dan ir-Regolament li jistabbilixxi jekk jenħtieġx li l-minuri jinstema’ mill-imħallef direttament jew minn espert imħarreġ apposta li mbagħad jirrapporta lill-qorti, jew jekk jenħtieġx li l-minuri jinstema’ fl-awla tal-qorti jew f’post ieħor jew b’mezzi oħrajn. Barra minn hekk, filwaqt li jibqa’ dritt tal-minuri, is-smigħ tal-minuri ma jistax jikkostitwixxi obbligu assolut, iżda jenħtieġ li jiġi vvalutat b’kont meħud tal-aħjar interessi tal-minuri, pereżempju f’każijiet li jinvolvu ftehimiet bejn il-partijiet.

Filwaqt li, skont il-ġurisprudenza tal-Qorti tal-Ġustizzja, mhuwiex rekwiżit tal-Artikolu 24 tal-Karta u tar-Regolament (KE) Nru 2201/2003 li l-qorti tal-Istat Membru tal-oriġini tieħu l-fehmiet tal-minuri f’kull kawża permezz ta’ smigħ, u li dik il-qorti għaldaqstant iżżomm livell ta’ diskrezzjoni, il-ġurisprudenza tipprevedi wkoll li, fejn dik il-qorti tiddeċiedi li tipprovdi l-opportunità biex il-minuri jinstemgħu, il-qorti meħtieġa tieħu l-miżuri kollha li huma xierqa għall-arranġament ta’ dan is-smigħ, filwaqt li tqis l-aħjar interessi tal-minuri u ċ-ċirkostanzi ta’ kull kawża individwali, sabiex tiżgura l-effettività ta’ dawk id-dispożizzjonijiet, u biex toffri opportunità ġenwina u effettiva lill-minuri biex jesprimu l-fehmiet tagħhom. Jenħtieġ li l-qorti tal-Istat Membru tal-oriġini, sa fejn possibbli u filwaqt li dejjem tqis l-aħjar interessi tal-minuri, tuża l-mezzi kollha disponibbli għaliha skont il-liġi nazzjonali kif ukoll l-istrumenti speċifiċi tal-kooperazzjoni ġudizzjarja internazzjonali, inkluż, meta jkun adatt, dawk previsti mir-Regolament tal-Kunsill (KE) Nru 1206/2001 (7).

(40)

F’każijiet ta’ tneħħija jew żamma illegali ta’ minuri, jenħtieġ li r-ritorn tal-minuri jinkiseb mingħajr dewmien, u għal dan il-għan jenħtieġ li tkompli tapplika l-Konvenzjoni tal-Aja tal-1980 kif kumplementata minn dan ir-Regolament, b’mod partikolari l-Kapitolu III.

(41)

Sabiex jikkonkludu l-proċedimenti ta’ ritorn skont il-Konvenzjoni tal-Aja tal-1980 kemm jista’ jkun malajr, jenħtieġ li l-Istati Membri, f’koerenza mal-istruttura tal-qrati nazzjonali tagħhom, jikkunsidraw li jikkonċentraw il-ġurisdizzjoni għal dawk il-proċedimenti f’għadd kemm jista’ jkun limitat ta’ qrati. Il-ġurisdizzjoni għal każijiet ta’ sekwestru ta’ minuri tista’ tkun ikkonċentrata f’qorti waħda unika għall-pajjiż kollu jew f’għadd limitat ta’ qrati, bl-użu, pereżempju, tal-għadd ta’ qrati tal-appell bħala punt tat-tluq u l-ġurisdizzjoni għal każijiet ta’ sekwestru internazzjonali ta’ minuri tiġi kkonċentrata f’qorti ġenerali waħda f’kull distrett ta’ qorti tal-appell.

(42)

Fi proċedimenti ta’ ritorn skont il-Konvenzjoni tal-Aja tal-1980, il-qrati f kull istanza jenħtieġ li jagħtu d-deċiżjoni tagħhom fi żmien sitt ġimgħat, ħlief fejn ċirkostanzi eċċezzjonali ma jippermettux dan. Jenħtieġ li l-fatt li jintużaw mezzi oħra ta’ soluzzjoni alternattiva għat-tilwim bħala tali ma jitqiesx bħala ċirkostanza eċċezzjonali li tippermetti li l-perijodu ta’ żmien jinqabeż. Madankollu, ċirkostanzi eċċezzjonali jistgħu jinqalgħu waqt l-użu ta’ tali mezzi jew bħala riżultat tagħhom. Għal qorti ġenerali, il-perijodu ta’ żmien jenħtieġ li jibda fil-mument li tiġi invokata l-qorti. Għal qorti ta’ istanza ogħla, jenħtieġ li jibda fil-mument li jkunu ttieħdu l-passi proċedurali meħtieġa kollha. Tali passi jistgħu jinkludu, skont is-sistema legali kkonċernata, notifika tal-appell lill-konvenut, fl-Istat Membru fejn tinsab il-qorti jew fi Stat Membru ieħor, trasmissjoni tal-fajl u l-appell lill-qorti tal-appell fl-Istati Membri fejn l-appell jeħtieġ li jiġi ppreżentat lill-qorti li d-deċiżjoni tagħha tkun appellata, jew applikazzjoni minn parti biex tiġi konvokata seduta fejn tali applikazzjoni tinħtieġ skont il-liġi nazzjonali. Jenħtieġ li l-Istati Membri jikkunsidraw ukoll li jillimitaw l-għadd ta’ appelli possibbli minn deċiżjoni li tagħti jew tirrifjuta r-ritorn ta’ minuri skont il-Konvenzjoni tal-Aja tal-1980 għal appell wieħed.

(43)

Fil-każijiet kollha li jikkonċernaw il-minuri, u b’mod partikulari f’każijiet ta’ sekwestru internazzjonali ta’ minuri, il-qrati jenħtieġ li jqisu l-possibbiltà li jiksbu soluzzjonijiet permezz tal-medjazzjoni u mezzi adatti oħra, assistiti, fejn adatt, min-netwerks u l-istrutturi ta’ appoġġ eżistenti għal medjazzjoni f’tilwim transfruntier dwar responsabbiltà tal-ġenituri. Madankollu jenħtieġ li tali sforzi ma jtawlux bla bżonn il-proċedimenti ta’ ritorn skont il-Konvenzjoni tal-Aja tal-1980. Barra minn hekk, il-medjazzjoni tista’ mhux dejjem tkun adatta, b’mod speċjali f’każijiet ta’ vjolenza domestika. Fejn matul il-proċedimenti ta’ ritorn skont il-Konvenzjoni tal-Aja tal-1980, il-ġenituri jilħqu ftehim mhux biss dwar ir-ritorn jew in-nonritorn tal-minuri, u wkoll dwar kwistjonijiet oħrajn ta’ responsabbiltà tal-ġenituri, jenħtieġ li dan ir-Regolament, f’ċerti ċirkostanzi, jagħmilha possibbli għalihom li jaqblu li l-qorti invokata skont il-Konvenzjoni tal-Aja tal-1980 jenħtieġ li jkollha l-ġurisdizzjoni li tagħti effett legali vinkolanti lill-ftehim tagħhom, billi tinkorporah f’deċiżjoni, tapprovah jew billi tuża kwalunkwe forma oħra prevista mil-liġi u l-proċedura nazzjonali. Għalhekk, l-Istati Membri li jkollhom ġurisdizzjoni konċentrata jenħtieġ li jqisu li jippermettu lill-qorti li tiġi invokata bil-proċedimenti ta’ ritorn skont il-Konvenzjoni tal-Aja tal-1980 teżerċita wkoll il-ġurisdizzjoni miftehma jew aċċettata mill-partijiet skont dan ir-Regolament fi kwistjonijiet ta’ responsabbiltà tal-ġenituri fejn il-ftehim tal-partijiet ikun intlaħaq matul dawk il-proċedimenti ta’ ritorn.

(44)

Jenħtieġ li l-qorti tal-Istati Membru li lejh jew fih, il-minuri tneħħa jew inżamm illegalment, tkun tista’ tirrifjuta r-ritorn tiegħu f’każijiet speċifiċi u debitament ġustifikati, kif permess mill-Konvenzjoni tal-Aja tal-1980. Qabel ma tagħmel dan, jenħtieġ li tqis jekk ġewx stabbiliti jew jekk jistgħux jittieħdu miżuri adatti ta’ protezzjoni biex jipproteġu lill-minuri mir-riskju serju msemmi fil-punt (b) tal-Artikolu 13(1) tal-Konvenzjoni tal-Aja tal-1980.

(45)

Fejn qorti tqis li tirrifjuta r-ritorn ta’ minuri unikament fuq il-bażi tal-punt (b) tal-Artikolu 13(1) tal-Konvenzjoni tal-Aja tal-1980, jenħtieġ li ma tirrifjutax ir-ritorn tal-minuri jekk il-parti li qed titlob ir-ritorn tal-minuri tissodisfa lill-qorti, jew il-qorti tkun issodisfata mod ieħor, li jkunu saru arranġamenti adegwati biex tiġi żgurata l-protezzjoni tal-minuri wara r-ritorn tiegħu. Eżempji għal tali arranġamenti jistgħu jinkludu digriet tal-qorti minn dak l-Istat Membru li jipprojbixxi lill-applikant milli javviċina lill-minuri, miżura proviżorja jew protettiva, minn dak l-Istat Membru li tippermetti lill-minuri joqogħdu mal-ġenitur li jaħtaf li jkun il-kustodju primarju sakemm tingħata deċiżjoni dwar is-sustanza tal-kustodju f’dak l-Istat Membru wara r-ritorn, jew it-turija ta’ faċilitajiet mediċi disponibbli għal minuri fil-bżonn ta’ trattament. L-għażla ta’ liema tip ta’ arranġament ikun adegwat fil-każ partikolari jenħtieġ li tiddependi mir-riskju serju konkret li għalih x’aktarx ikun espost il-minuri f’każ ta’ ritorn mingħajr tali arranġamenti. Il-qorti li tfittex tistabbilixxi jekk ikunux saru arranġamenti adegwati jenħtieġ li primarjament toqgħod fuq il-partijiet u, fejn meħtieġ u adatt, titlob l-assistenza ta’ Awtoritajiet Ċentrali jew imħallfin tan-netwerk, b’mod partikolari fin-Netwerk Ġudizzjarju Ewropew f’materji ċivili u kummerċjali, kif stabbilit bid-Deċiżjoni tal-Kunsill 2001/470/KE, (8) u n-Netwerk Internazzjonali tal-Imħallfin tal-Aja.

(46)

Fejn xieraq, meta jkun ordnat ir-ritorn tal-minuri, jenħtieġ li jkun possibbli li l-qorti tordna kwalunkwe miżura proviżorja, inkluż protettiva, skont dan ir-Regolament, li hija tqis neċessarja biex il-minuri jiġi protett mir-riskju serju ta’ ħsara fiżika jew psikoloġika involut fir-ritorn li mod ieħor iwassal għal rifjut tar-ritorn. Jenħtieġ li tali miżuri proviżorji u ċ-ċirkolazzjoni tagħhom ma jdewmux il-proċedimenti ta’ ritorn skont il-Konvenzjoni tal-Aja tal-1980 jew jimminaw id-delimitazzjoni tal-ġurisdizzjoni bejn il-qorti invokata bil-proċedimenti ta’ ritorn skont il-Konvenzjoni tal-Aja tal-1980 u l-qorti li jkollha l-ġurisdizzjoni fuq il-mertu tar-responsabbiltà tal-ġenituri skont dan ir-Regolament. Jekk ikun meħtieġ, jenħtieġ li l-qorti invokata bil-proċedimenti ta’ ritorn skont il-Konvenzjoni tal-Aja tal-1980 tikkonsulta lill-qorti jew lill-awtoritajiet kompetenti tal-Istati Membru tar-residenza abitwali tal-minuri, bl-assistenza tal-Awtoritajiet Ċentrali jew l-imħallfin ta’ netwerk, b’mod partikolari fin-Netwerk Ġudizzjarju Ewropew f’materji ċivili u kummerċjali u n-Netwerk Internazzjonali tal-Imħallfin ta’ The Hague. Jenħtieġ li dawk il-miżuri jiġu rikonoxxuti u infurzati fl-Istati Membri l-oħra kollha inkluż l-Istati Membri li jkollhom ġurisdizzjoni skont dan ir-Regolament sakemm qorti ta’ tali Stat Membru tkun ħadet il-miżuri li hija tqis adatti. Tali miżuri proviżorji, inkluż dawk protettivi, jistgħu jinkludu, pereżempju, li l-minuri jkompli jirrisjedi ma min ikollu r-responsabbiltà ewlenija li jieħu ħsiebu jew kif jenħtieġ li jsir kuntatt mal-minuri wara r-ritorn sakemm il-qorti tar-residenza abitwali tal-minuri tkun ħadet il-miżuri li tqis adatti. Dan għandu jkun mingħajr preġudizzju għal kwalunkwe miżura jew deċiżjoni tal-qorti tar-residenza abitwali tal-minuri wara r-ritorn tagħhom.

(47)

Jenħtieġ li jkun possibbli li deċiżjoni li tordna r-ritorn tal-minuri tiġi ddikjarata infurzabbli proviżorjament, minkejja kwalunkwe appell, fejn ir-ritorn tal-minuri qabel id-deċiżjoni dwar l-appell ikun meħtieġ fl-aħjar interessi tal-minuri. Il-liġi nazzjonali tista’ tispeċifika minn liema qorti d-deċiżjoni tista’ tiġi ddikjarata infurzabbli proviżorjament.

(48)

Meta l-qorti tal-Istat Membru li lejh jew fih il-minuri jitneħħa jew jinżamm b’mod illegali tiddeċiedi li tirrifjuta r-ritorn tal-minuri skont il-Konvenzjoni tal-Aja tal-1980, jenħtieġ li fid-deċiżjoni tagħha tirreferi b’mod espliċitu għall-artikoli rilevanti tal-Konvenzjoni tal-Aja tal-1980 li fuqhom ikun ġie bbażat ir-rifjut. Irrispettivament minn jekk tali deċiżjoni ta’ rifjut tkunx finali jew tkunx għadha soġġetta għal appell, din tista’ madankollu tiġi sostitwita minn deċiżjoni sussegwenti, mogħtija fi proċedimenti tal-kustodja mill-qorti tal-Istat Membru tar-residenza abitwali tal-minuri qabel it-tneħħija jew iż-żamma illegali. Matul dawn il-proċedimenti, iċ-ċirkostanzi kollha, inkluż, iżda mhux limitat biss għall-imġieba tal-ġenituri, jenħtieġ li jiġu eżaminati bir-reqqa, b’kont meħud tal-aħjar interessi tal-minuri. Jekk id-deċiżjoni dwar il-mertu tad-drittijiet ta’ kustodja li tirriżulta minn dan timplika r-ritorn tal-minuri, ir-ritorn jenħtieġ li jseħħ mingħajr ma tkun meħtieġa ebda proċedura speċjali għar-rikonoxximent u l-infurzar ta’ dik id-deċiżjoni f’ebda Stat Membru ieħor.

(49)

Il-qorti li tirrifjuta r-ritorn tal-minuri fuq il-bażi unika tal-punt (b) tal-Artikolu 13(1), jew tal-Artikolu 13(2), jew tat-tnejn li huma, tal-Konvenzjoni tal-Aja tal-1980 jenħtieġ li, fuq inizjattiva tagħha stess, toħroġ ċertifikat bl-użu tal-formola xierqa stabbilita f’dan ir-Regolament. Il-fini ta’ dan iċ-ċertifikat huwa li jinforma lill-partijiet bil-possibbiltà li tiġi invokata qorti fl-Istat Membru fejn il-minuri kien abitwalment residenti immedjatament qabel it-tneħħija jew iż-żamma illegali, fi żmien tliet xhur min-notifika tad-deċiżjoni li tirrifjuta r-ritorn tal-minuri, b’applikazzjonijiet dwar il-mertu tad-drittijiet ta’ kustodja, jew, jekk dik il-qorti tkun diġà invokata, li jikkomunika lill-qorti dokumenti rilevanti relatati mal-proċedimenti tar-ritorn.

(50)

Fejn proċedimenti dwar il-mertu tad-drittijiet ta’ kustodja diġà jkunu pendenti fl-Istat Membru fejn il-minuri kien abitwalment residenti immedjatament qabel it-tneħħija jew iż-żamma illegali fil-mument li qorti invokata b’applikazzjoni ta’ ritorn skont il-Konvenzjoni tal-Aja tal-1980 tirrifjuta r-ritorn tal-minuri biss fuq il-bażi tal-punt (b) tal-Artikolu 13(1), jew tal-Artikolu 13(2), jew tat-tnejn, tal-Konvenzjoni tal-Aja tal-1980, jenħtieġ li l-qorti li rrifjutat ir-ritorn tal-minuri, jekk tkun konxja minn dawk il-proċedimenti, tibgħat fi żmien xahar mid-data tad-deċiżjoni tagħha kopja […] tad-deċiżjoni, iċ-ċertifikat adatt u, fejn applikabbli, traskrizzjoni, sommarju jew minuti tas-seduta kif ukoll kwalunkwe dokument ieħor li tqis rilevanti għall-qorti invokata bil-proċedimenti dwar il-mertu tad-drittijiet ta’ kustodja. It-terminu "kwalunkwe dokument ieħor li tqis rilevanti" jenħtieġ li jirreferi għal kwalunkwe dokument li jkun fih informazzjoni li jista’ jkollha influwenza fuq l-eżitu ta’ dawk l-proċedimenti ta’ kustodja, jekk tali informazzjoni ma tkunx diġà tinsab fid-deċiżjoni li tirrifjuta r-ritorn.

(51)

Fejn ma jkun għadu pendenti ebda proċediment dwar il-mertu tad-drittijiet ta’ kustodja fl-Istat Membru fejn il-minuri kienu abitwalment residenti immedjatament qabel it-tneħħija jew iż-żamma inġusta u parti tinvoka qorti ta’ dak l-Istat Membru fi żmien tliet xhur mid-data tan-notifika tad-deċiżjoni li rrifjutat l-minuri ma jiġix ritornat, jenħtieġ li dik il-parti tippreżenta lill-qorti invokata bl-applikazzjoni dwar il-mertu tad-drittijiet ta’ kustodja, kopja tad-deċiżjoni li tirrifjuta r-ritorn tal-minuri skont il-Konvenzjoni tal-Aja tal-1980, iċ-ċertifikat adatt u; fejn applikabbli, traskrizzjoni, sommarju jew minuti tas-seduta. Dan ma jipprekludix lill-qorti invokata milli titlob kwalunkwe dokument addizzjonali li tqis rilevanti, li jkun fih informazzjoni li jista’ jkollha influwenza fuq l-eżitu tal-proċedimenti dwar il-mertu tad-drittijiet ta’ kustodja, jekk tali informazzjoni ma tkunx diġà tinsab fid-deċiżjoni li tirrifjuta r-ritorn.

(52)

Jekk il-qorti li jkollha ġurisdizzjoni fuq il-mertu tad-drittijiet ta’ kustodja tiġi invokata minn parti fi żmien tliet xhur min-notifika tad-deċiżjoni li tirrifjuta r-ritorn tal-minuri skont il-Konvenzjoni tal-Aja tal-1980, jew jekk proċedimenti dwar il-kustodja kienu diġà pendenti quddiem dik il-qorti fil-mument li rċeviet dik id-deċiżjoni mill-qorti li rrifjutat ir-ritorn tal-minuri, jenħtieġ li kwalunkwe deċiżjoni li tirriżulta minn dawk il-proċedimenti dwar il-mertu tad-drittijiet ta’ kustodja li tinvolvi r-ritorn tal-minuri lejn dak l-Istat Membru tkun infurzabbli fi kwalunkwe Stat Membru ieħor f’konformità mat-Taqsima 2 tal-Kapitolu IV ta’ dan ir-Regolament, mingħajr ma tkun meħtieġa ebda proċedura speċjali u mingħajr ebda possibbiltà li jkun hemm oppożizzjoni għar-rikonoxximent tagħha. Dan jenħtieġ li japplika dment li u sa fejn ma tinstabx li teżisti irrikonċiljabbiltà ma’ deċiżjoni posterjuri relatata mar-responsabbiltà tal-ġenituri li tikkonċerna l-istess minuri, sakemm ikun inħareġ ċertifikat għal "deċiżjonijiet privileġġjati" għad-deċiżjoni dwar il-mertu tad-drittijiet ta’ kustodja li jinvolvu r-ritorn tal-minuri. Jekk il-qorti li jkollha ġurisdizzjoni fuq il-mertu tad-drittijiet ta’ kustodja tiġi invokata wara li jkunu skadew it-tliet xhur, jew il-kondizzjonijiet għall-ħruġ ta’ ċertifikat għal dawn id-deċiżjonijiet privileġġjati ma jkunux sodisfatti, jenħtieġ li d-deċiżjoni riżultanti dwar il-mertu tad-drittijiet ta’ kustodja tiġi rikonoxxuta u infurzata fi Stati Membri oħra f’konformità mat-Taqsima 1 tal-Kapitolu IV ta’ dan ir-Regolament.

(53)

Mingħajr preġudizzju għal strumenti oħra tal-Unjoni, fejn ma jkunx possibbli li tinstema’ parti jew il-minuri in persona, u fejn ikunu disponibbli l-mezzi tekniċi, il-qorti tista’ tikkunsidra li torganizza smigħ permezz ta’ vidjokonferenza jew permezz ta’ kwalunkwe teknoloġija ta’ komunikazzjoni oħra għajr jekk, minħabba iċ-ċirkostanzi partikolari tal-każ, l-użu ta’ tali teknoloġija ma jkunx adatt għall-andament ġust tal-proċedimenti.

(54)

Il-fiduċja reċiproka fl-amministrazzjoni tal-ġustizzja fl-Unjoni tiġġustifika l-prinċipju li deċiżjonijiet fi kwistjonijiet matrimonjali jew fi kwistjonijiet ta’ responsabbiltà tal-ġenituri meħuda fi Stat Membru jenħtieġ li jkunu rikonoxxuti fl-Istati Membri kollha mingħajr il-ħtieġa għal ebda proċedura ta’ rikonoxximent. B’mod partikulari, meta ppreżentati b’deċiżjoni meħuda fi Stat Membru ieħor u jingħata divorzju, separazzjoni legali jew l-annullament taż-żwieġ, li ma tistax tiġi kkontestata iżjed ġewwa l-Istati Membri ta’ oriġini, l-awtoritajiet kompetenti tal-Istat Membru rikjest jenħtieġ li jirrikonoxxu d-deċiżjoni leġittima mingħajr ma tkun neċessarja ebda proċedura speċjali u jaġġornaw l-atti tal-istat ċivili tagħhom skont dan. Huwa f’idejn il-liġi nazzjonali li tiddeċiedi jekk ir-raġunijiet għar-rifjut jistgħux jitqajmu minn parti jew ex officio kif previst mil-liġi nazzjonali. Dan ma jipprekludi lil ebda parti interessata milli tapplika, skont dan ir-Regolament, għal deċiżjoni li ma hemm ebda raġuni għal rifjut ta’ rikonoxximent kif imsemmi f’dan ir-Regolament. Jenħtieġ li jkun fuq il-bażi tal-liġi nazzjonali tal-Istat Membru fejn issir tali applikazzjoni li jiġi ddeterminat min jista’ jitqies parti interessata intitolata li tagħmel tali applikazzjoni.

(55)

Ir-rikonoxximent u l-infurzar ta’ deċiżjonijiet, strumenti awtentiċi u ftehimiet mogħtija fi Stat Membru jenħtieġ li jkunu bbażati fuq il-prinċipju tal-fiduċja reċiproka. Għaldaqstant jenħtieġ li r-raġunijiet għal nuqqas ta’ rikonoxximent jinżammu fil-livelli minimi neċessarji fid-dawl tal-għan sottostanti ta’ dan ir-Regolament li huwa li jiġu ffaċilitati r-rikonoxximent u l-infurzar u li effettivament jiġu protetti l-aħjar interessi tal-minuri.

(56)

Ir-rikonoxximent ta’ deċiżjoni jenħtieġ li jiġi rrifjutat biss jekk raġuni għal rifjut ta’ rikonoxximent waħda jew aktar kif previst f’dan ir-Regolament ikunu preżenti. Il-lista ta’ raġunijiet għal rifjut ta’ rikonoxximent f’dan ir-Regolament jenħtieġ li tkun eżawrjenti. Jenħtieġ li ma jkunx possibbli li jiġu invokati bħala raġunijiet għal rifjut, raġunijiet li ma jkunux elenkati f’dan ir-Regolament, bħal, pereżempju, ksur tar-regola lis pendens. Fi kwistjonijiet ta’ responsabbiltà tal-ġenituri, deċiżjoni aktar reċenti dejjem tieħu preċedenza fuq deċiżjoni aktar bikrija b’effett għall-futur sa fejn ma jkunux rikonċiljabbli.

(57)

B’rabta mal-opportunità mogħtija lil minuri biex jesprimi l-fehmiet tiegħu, jenħtieġ li tkun il-qorti tal-oriġini li tiddeċiedi dwar il-metodu xieraq għas-smigħ tal-minuri. Għaldaqstant, jenħteġ li ma jkunx possibbli li tiġi miċħuda r-rikonoxximent ta’ deċiżjoni għar-raġuni unika li l-qorti tal-oriġini tkun użat metodu differenti biex tisma’ lill-minuri minn dak li kieku tuża qorti fl-Istat Membru tar-rikonoxximent. L-Istat Membru fejn jiġi invokat ir-rikonoxximent jenħtieġ li ma jirrifjutax ir-rikonoxximent fejn tapplika waħda mill-eċċezzjonijiet minn din ir-raġuni partikolari għal rifjut kif permess minn dan ir-Regolament. L-effett ta’ dawk l-eċċezzjonijiet huwa li jenħtieġ li ma jkunx possibbli li qorti fl-Istat Membru ta’ infurzar tirrifjuta li tinforza deċiżjoni għall-unika raġuni li l-minuri ma ngħatax l-opportunità jesprimi l-fehmiet tiegħu, filwaqt li jitqiesu l-aħjar interessi tiegħu, jekk il-proċedimenti kienu jikkonċernaw biss il-proprjetà tal-minuri u dment li l-għoti ta’ tali opportunità ma kienx meħtieġ fid-dawl tas-suġġett tal-proċedimenti, jew fil-każ tal-eżistenza ta’ raġunijiet serji meta titqies, b’mod partikolari, l-urġenza tal-każ. Tali raġunijiet serji jistgħu jingħataw, pereżempju, fejn ikun hemm perikolu imminenti għall-integrità fiżika u psikoloġika tal-minuri jew għall-ħajtu u kwalunkwe dewmien ulterjuri jista’ jirriskja li dan il-perikolu jsir realtà.

(58)

Barra minn hekk, l-għan li l-litigazzjoni transfruntiera rigward il-minuri tieħu inqas żmien u flus jiġġustifika l-abolizzjoni tad-dikjarazzjoni tal-infurzabbiltà jew ir-reġistrazzjoni għall-infurzar, kif applikabbli, qabel l-infurzar fl-Istat Membru tal-infurzar għad-deċiżjonijiet kollha dwar kwistjonijiet ta’ responsabbiltà tal-ġenituri. Filwaqt li r-Regolament (KE) Nru 2201/2003 abolixxa dan ir-rekwiżit biss għal ċerti deċiżjonijiet li jagħtu drittijiet ta’ aċċess u ċerti deċiżjonijiet li jinvolvu r-ritorn ta’ minuri, dan ir-Regolament jenħtieġ li jabolixxih għall-infurzar transfruntier tad-deċiżjonijiet kollha fi kwistjonijiet ta’ responsabbiltà tal-ġenituri filwaqt li jżomm trattament saħansitra aktar favorevoli ta’ ċerti deċiżjonijiet li jagħtu drittijiet ta’ aċċess u ċerti deċiżjonijiet li jinvolvu r-ritorn ta’ minuri. B’riżultat ta’ dan, soġġett għal dan ir-Regolament, deċiżjoni meħuda mill-qorti ta’ kwalunkwe Stat Membru ieħor jenħtieġ li titqies daqslikieku ttieħdet fl-Istat Membru tal-infurzar.

(59)

Meta jiġu ordnati miżuri proviżorji, inkluż dawk protettivi, minn qorti li għandha ġurisdizzjoni fuq il-mertu tal-każ, iċ-ċirkolazzjoni ta’ dawk il-miżuri jenħtieġ li tiġi żgurata skont dan ir-Regolament. Madankollu, miżuri proviżorji, inkluż protettivi, li jkunu ġew ordnati minn tali qorti mingħajr ma l-konvenut ikun tħarrek biex jidher jenħtieġ li ma jiġux rikonoxxuti u infurzati skont dan ir-Regolament sakemm id-deċiżjoni li jkun fiha l-miżura ma tkunx ingħatat lill-konvenut qabel l-infurzar. Jenħtieġ li dan ma jipprekludix ir-rikonoxximent u l-infurzar ta’ tali miżuri skont il-liġi nazzjonali. Fejn miżuri proviżorji, inkluż protettivi, jiġu ordnati minn qorti ta’ Stat Membru li ma jkollhiex ġurisdizzjoni fuq il-mertu tal-każ, jenħtieġ li ċ-ċirkolazzjoni tagħhom tkun limitata, skont dan ir-Regolament, għal miżuri meħuda f’kawżi internazzjonali ta’ sekwestru ta’ tfal u bil-għan li l-minuri jiġi protett mir-riskju serju msemmi fil-punt (b) tal-Artikolu 13(1) tal-Konvenzjoni tal-Aja tal-1980. Dawk il-miżuri jenħtieġ li japplikaw sakemm qorti ta’ Stat Membru li jkollha ġurisdizzjoni fuq il-mertu tal-każ skont dan ir-Regolament tkun ħadet il-miżuri li hi tqis xierqa.

(60)

Billi l-proċeduri ta’ infurzar jistgħu jkunu kemm ġudizzjarji kif ukoll extra-ġudizzjarji skont il-liġi nazzjonali, l-"awtoritajiet kompetenti għall-infurzar" jistgħu jinkludu qrati, uffiċjali ġudizzjarji u kwalunkwe awtorità oħra kif iddeterminat mil-liġi nazzjonali. Fejn, flimkien mal-awtoritajiet kompetenti għall-infurzar, jissemmew ukoll il-qrati f’dan ir-Regolament, dan jenħtieġ li jkopri każijiet fejn skont il-liġi nazzjonali, korp għajr qorti jkun l-awtorità kompetenti għall-infurzar, iżda ċerti deċiżjonijiet huma riservati għall-qrati, jew mill-bidu jew fil-forma ta’ rieżami tal-atti tal-awtorità kompetenti għall-infurzar. Jenħtieġ li jkun f’idejn l-awtorità kompetenti għall-infurzar jew il-qorti tal-Istat Membru tal-infurzar li tordna jew tieħu miżuri speċifiċi, jew tagħmel arranġamenti biex dawn jittieħdu, fl-istadju tal-infurzar, bħal kwalunkwe miżura mhux koerċittiva li tista’ tkun disponibbli fil-liġi nazzjonali ta’ dak l-Istat Membru, jew kwalunkwe miżura koerċittiva li tista’ tkun disponibbli f’dik il-liġi, inkluż multi, ħabs jew it-teħid tal-minuri permezz ta’ uffiċjal ġudizzjarju.

(61)

Sabiex jiġi ffaċilitat l-infurzar ta’ deċiżjonijiet dwar l-eżerċizzju tad-drittijiet ta’ aċċess minn Stat Membru ieħor, l-awtoritajiet kompetenti għall-infurzar jew il-qrati fl-Istat Membru tal-infurzar jenħtieġ li jkunu intitolati jispeċifikaw dettalji marbutin ma’ ċirkostanzi prattiċi, jew kondizzjonijiet legali meħtieġa skont il-liġi tal-Istat Membru tal-infurzar. Jenħtieġ li l-arranġamenti previsti f’dan ir-Regolament jiffaċilitaw l-infurzar ta’ deċiżjoni fl-Istat Membru tal-infurzar, li kieku ma tkunx infurzabbli mod ieħor minħabba n-nuqqas ta’ ċarezza tagħha, sabiex l-awtorità kompetenti għall-infurzar jew il-qorti tal-infurzar tkun tista’ tagħmel id-deċiżjoni aktar konkreta u preċiża. Jenħtieġ li anke kwalunkwe arranġament ieħor biex jitħarsu r-rekwiżiti legali skont il-liġi nazzjonali dwar l-infurzar tal-Istat Membru tal-infurzar, bħal, pereżempju, il-parteċipazzjoni ta’ awtorità għall-protezzjoni tat-tfal jew psikologu fl-istadju tal-infurzar, isir bl-istess mod. Madankollu, kwalunkwe arranġament bħal dan jenħtieġ li ma jinterferixxix fl-elementi essenzjali tad-deċiżjoni dwar id-drittijiet ta’ aċċess, jew imur lil hinn minnhom. Barra minn hekk, jenħtieġ li s-setgħa, skont dan ir-Regolament, li jiġu aġġustati miżuri ma tippermettix lill-qorti tal-infurzar li tissostitwixxi miżuri li mhumiex magħrufa fil-liġi tal-Istat Membru tal-infurzar, b’miżuri differenti.

(62)

Jenħtieġ li l-infurzar fi Stat Membru ta’ deċiżjoni li ttieħdet fi Stat Membru ieħor mingħajr dikjarazzjoni ta’ infurzabbiltà ma jipperikolax ir-rispett għad-drittijiet tad-difiża. Għaldaqstant, jenħtieġ li l-persuna li jkun qed jintalab infurzar kontriha tkun tista’ tapplika għar-rifjut tar-rikonoxximent jew tal-infurzar ta’ deċiżjoni jekk hi tqis li jkun hemm preżenti waħda mir-raġunijiet għar-rifjut tar-rikonoxximent jew tal-infurzar ta’ dan ir-Regolament. Huwa f’idejn il-liġi nazzjonali li tiddetermina jekk huwiex meħtieġ li r-raġunijiet għar-rifjut ta’ rikonoxximent stabbiliti f’dan ir-Regolament jiġu eżaminati ex officio jew meta ssir l-applikazzjoni. Għaldaqstant, jenħtieġ li l-istess eżami jkun possibbli fil-kuntest tar-rifjut tal-infurzar. L-applikazzjoni ta’ kwalunkwe raġuni nazzjonali għar-rifjut jenħtieġ li ma jkollhiex l-effett li testendi l-kondizzjonijiet u l-modalitajiet tar-raġunijiet previsti f’dan ir-Regolament.

(63)

Parti li tikkontesta l-infurzar ta’ deċiżjoni mogħtija fi Stat Membru ieħor jenħtieġ li, sa fejn ikun possibbli u skont is-sistema legali tal-Istat Membru tal-infurzar, tkun tista’ tagħmel dan fil-proċedura għall-infurzar u tkun tista’ tqajjem, fi proċedura waħda, flimkien mar-raġunijiet għal rifjut previsti f’dan ir-Regolament, ir-raġunijiet għal rifjut disponibbli skont il-liġi tal-Istat Membru fejn ikun qed jintalab l-infurzar li jkomplu japplikaw għax ma jkunux inkompatibbli mar-raġunijiet previsti f’dan ir-Regolament. Dawk ir-raġunijiet jistgħu jinkludu, pereżempju, oġġezzjonijiet ibbażati fuq żbalji formali skont il-liġi nazzjonali f’att ta’ infurzar jew fuq l-affermazzjoni li l-azzjoni meħtieġa mid-deċiżjoni tkun diġà twettqet jew tkun saret impossibbli, pereżempju, fil-każ ta’ force majeure, mard serju tal-persuna li għandha ser jgħaddi l-minuri, il-priġunerija jew il-mewt ta’ dik il-persuna, il-fatt li l-Istat Membru li fih ikun ser jiġi rritornat il-minuri jkun inbidel f’żona ta’ gwerra wara li tkun ittieħdet id-deċiżjoni, jew ir-rifjut tal-infurzar ta’ deċiżjoni li skont il-liġi tal-Istat Membru fejn jintalab l-infurzar ma jkollha ebda kontenut infurzabbli u ma tkunx tista’ tiġi aġġustata għal dan il-għan.

(64)

Sabiex il-persuna li kontriha jkun qed jintalab l-infurzar tiġi infurmata bl-infurzar ta’ deċiżjoni meħuda fi Stat Membru ieħor, iċ-ċertifikat stabbilit skont dan ir-Regolament, jekk meħtieġ akkumpanjat mid-deċiżjoni, jenħtieġ li jiġi nnotifikat lil dik il-persuna fi żmien raġonevoli qabel l-ewwel miżura ta’ infurzar. F’dak il-kuntest, l-ewwel miżura ta’ infurzar jenħtieġ li tfisser l-ewwel miżura ta’ infurzar wara din in-notifika. Skont il-ġurisprudenza tal-Qorti tal-Ġustizzja, il-parti li kontriha jkun qed jintalab l-infurzar għandha d-dritt għal rimedju effettiv, li jinkludi l-possibbiltà li jinbdew proċedimenti biex tiġi kkontestata l-infurzabbiltà tad-deċiżjoni qabel il-bidu effettiv tal-infurzar.

(65)

Fi kwistjonijiet ta’ responsabbiltà tal-ġenituri, l-infurzar dejjem ser jikkonċerna minuri, u f’bosta każijiet ser jikkonċerna l-mument li fih il-minuri jgħaddi għand persuna oħra għajr il-persuna li l-minuri jkun qed jgħix magħha f’dak iż-żmien u/jew ir-rilokazzjoni tal-minuri fi Stat Membru ieħor. L-għan ewlieni għaldaqstant jenħtieġ li jkun li jinstab il-bilanċ it-tajjeb bejn id-dritt tal-applikant, bħala prinċipju, li jikseb l-implimentazzjoni ta’ deċiżjoni mill-aktar fis possibbli wkoll f’każijiet transfruntiera fi ħdan l-Unjoni u, jekk ikun meħtieġ, saħansitra bl-applikazzjoni ta’ miżuri koerċittivi, u l-ħtieġa li l-esponiment tal-minuri għal miżuri koerċittivi ta’ infurzar possibbilment trawmatizzanti jiġi limitat, sa fejn possibbli, f’każijiet fejn dan ma jkunx jista’ jiġi evitat. Din il-valutazzjoni jenħtieġ li ssir mill-awtoritajiet kompetenti għall-infurzar u l-qrati f’kull Stat Membru fid-dawl ta’ kull każ individwali.

(66)

Dan ir-Regolament jipprova jistabbilixxi kondizzjonijiet indaqs f’dak li jirrigwarda l-infurzar transfruntier ta’ deċiżjonijiet fi kwistjonijiet ta’ responsabbiltà tal-ġenituri fost l-Istati Membri. F’għadd ta’ Stati Membri, dawn id-deċiżjonijiet diġà huma infurzabbli anke jekk għadhom soġġetti għal appell, jew diġà qed isir appell kontrihom. Fi Stati Membri oħrajn, hija infurzabbli biss deċiżjoni finali li ma tkunx għadha soġġetta għal appell ordinarju. Sabiex jittratta sitwazzjonijiet ta’ urġenza, dan ir-Regolament għaldaqstant jipprevedi li ċerti deċiżjonijiet fi kwistjonijiet ta’ responsabbiltà tal-ġenituri jistgħu jiġu ddikjarati infurzabbli b’mod proviżorju mill-qorti tal-Istat Membru tal-oriġini anke jekk ikunu għadhom soġġetti għal appell, jiġifieri deċiżjonijiet li jordnaw ir-ritorn ta’ minuri skont il-Konvenzjoni tal-Aja tal-1980 u deċiżjonijiet li jagħtu drittijiet ta’ aċċess.

(67)

Fil-proċeduri ta’ infurzar li jikkonċernaw minuri, madankollu, hu importanti li l-awtoritajiet kompetenti għall-infurzar jew il-qrati jkunu jistgħu jirreaġixxu malajr għal bidla rilevanti fiċ-ċirkostanzi, inkluż oġġezzjonijiet kontra d-deċiżjoni fl-Istat Membru tal-oriġini, it-telf tal-infurzabbiltà tad-deċiżjoni u ostakli jew sitwazzjonijiet ta’ emerġenza li jiltaqgħu magħhom fl-istadju tal-infurzar. Għaldaqstant, jenħtieġ li l-proċedimenti ta’ infurzar jiġu sospiżi, mal-applikazzjoni jew b’mozzjoni tal-qorti jew tal-awtorità stess, fejn l-infurzabbiltà tad-deċiżjoni tiġi sospiża fl-Istat Membru tal-oriġini. L-awtorità jew il-qorti kompetenti għall-infurzar jenħtieġ madankollu li ma tkunx obbligata tinvestiga attivament jekk sadanittant l-infurzabbiltà tkunx ġiet sospiża, wara appell jew b’mod ieħor, fl-Istat Membru tal-oriġini, jekk ma jkun hemm ebda indikazzjoni li dan huwa l-każ. Barra minn hekk, is-sospensjoni jew ir-rifjut tal-infurzar fl-Istat Membru tal-infurzar jenħtieġ li jkun mal-applikazzjoni u, anke fejn jinstab li teżisti raġuni waħda jew aktar minn dawk imniżżla f’dan ir-Regolament jew permessi minnu, is-sospensjoni jew ir-rifjut tal-infurzar fl-Istat Membru tal-infurzar jenħtieġ li jitħalla għad-diskrezzjoni tal-awtorità kompetenti għall-infurzar jew il-qorti.

(68)

Fejn id-deċiżjoni tkun għadha soġġetta għal appell fl-Istat Membru tal-oriġini u ż-żmien għall-preżentazzjoni ta’ appell ordinarju jkun għadu ma għalaqx, l-awtorità kompetenti għall-infurzar jew il-qorti fl-Istat Membru tal-infurzar jenħtieġ li jkollha d-diskrezzjoni, mal-applikazzjoni, biex tissospendi, il-proċedimenti ta’ infurzar. F’dawk il-każijiet tista’ tispeċifika ż-żmien li fih għandu jiġi ppreżentat kwalunkwe appell fl-Istat Membru tal-oriġini, sabiex tinkiseb jew tinżamm is-sospensjoni tal-proċedimenti ta’ infurzar. L-ispeċifikazzjoni ta’ limitu ta’ żmien jenħtieġ li jkollha effett biss għall-proċedimenti ta’ infurzar u jenħtieġ li ma taffettwax id-data tal-għeluq għall-preżentazzjoni ta’ appell skont ir-regoli proċedurali tal-Istat Membru tal-oriġini.

(69)

F’każijiet eċċezzjonali, jenħtieġ li jkun possibbli li l-awtorità kompetenti għall-infurzar jew il-qorti tissospendi l-proċedimenti ta’ infurzar jekk l-infurzar jesponi lill-minuri għal riskju serju ta’ ħsara fiżika jew psikoloġika minħabba xkiel temporanju li jkun inħoloq wara li ttieħdet id-deċiżjoni, jew permezz ta’ kwalunkwe bidla sinifikanti oħra taċ-ċirkostanzi. L-infurzar jenħtieġ li jerġa’ jkompli hekk kif ir-riskju serju ta’ ħsara fiżika jew psikoloġika ma jibqax jeżisti. Jekk jibqa’ jeżisti, madankollu, qabel ma jiġi rrifjutat l-infurzar, jenħtieġ li jittieħed kwalunkwe pass xieraq, skont il-liġi u l-proċedura nazzjonali, inkluż, fejn xieraq bl-assistenza ta’ professjonisti rilevanti oħrajn, bħal assistenti soċjali jew psikologi tat-tfal, biex isir tentattiv biex tiġi żgurata l-implimentazzjoni tad-deċiżjoni. B’mod partikolari, jenħtieġ li l-awtorità kompetenti għall-infurzar jew il-qorti, skont il-liġi u l-proċedura nazzjonali, jippruvaw jegħlbu kwalunkwe xkiel li jinħoloq minn bidla fiċ-ċirkostanzi, bħal, pereżempju, oġġezzjoni ċara mill-minuri mleħħna biss wara li tkun ittieħdet id-deċiżjoni li tkun tant qawwija li, jekk tiġi injorata, dan ikun jammonta għal riskju serju ta’ ħsara fiżika jew psikoloġika għall-minuri.

(70)

L-istrumenti awtentiċi u l-ftehimiet bejn il-partijiet dwar separazzjoni legali u divorzju li jkollhom effett legali vinkolanti fi Stat Membru wieħed jenħtieġ li jiġu ttrattati bħala ekwivalenti għal "deċiżjonijiet" għall-iskop tal-applikazzjoni tar-regoli dwar ir-rikonoxximent. L-istrumenti awtentiċi u l-ftehimiet bejn il-partijiet fi kwistjonijiet ta’ responsabbiltà tal-ġenituri li huma infurzabbli fi Stat Membru wieħed jenħtieġ li jiġu ttrattati bħala ekwivalenti għal "deċiżjonijiet" għall-fini tal-applikazzjoni tar-regoli dwar ir-rikonoxximent u l-infurzar.

(71)

Għalkemm l-obbligu li l-minuri jingħata l-opportunità li jesprimi l-fehmiet tiegħu skont dan ir-Regolament jenħtieġ li ma japplikax għal strumenti awtentiċi u ftehimiet, id-dritt tal-minuri li jesprimi l-fehmiet tiegħu jenħtieġ li jibqa’ japplika skont l-Artikolu 24 tal-Karta u fid-dawl tal-Artikolu 12 tal-Konvenzjoni tan-NU dwar id-Drittijiet tat-Tfal kif implimentati skont il-liġi u l-proċedura nazzjonali. Jenħtieġ li l-fatt li l-minuri ma jkunx ingħata l-opportunità li jesprimi l-fehmiet tiegħu ma jkunx awtomatikament raġuni għar-rifjut tar-rikonoxximent u l-infurzar ta’ strumenti awtentiċi u ftehimiet fi kwistjonijiet ta’ responsabbiltà tal-ġenituri.

(72)

Fi kwistjonijiet ta’ responsabbiltà tal-ġenituri, jenħtieġ li l-Awtoritajiet Ċentrali jinħatru fl-Istati Membri kollha. Jenħtieġ li l-Istati Membri jqisu l-ħatra tal-istess Awtorità Ċentrali għal dan ir-Regolament kif maħtura u għall-Konvenzjoni tal-Aja tal-1980 u dik tal-1996. Jenħtieġ li l-Istati Membri jiżguraw li l-Awtoritajiet Ċentrali ikollhom biżżejjed riżorsi finanzjarji u umani biex ikunu jistgħu jwettqu l-kompiti assenjati lilhom skont dan ir-Regolament.

(73)

Jenħtieġ li d-dispożizzjonijiet ta’ dan ir-Regolament dwar il-kooperazzjoni fi kwistjonijiet tar-responsabbiltà tal-ġenituri ma japplikawx għall-ipproċessar tal-applikazzjonijiet għar-ritorn skont il-Konvenzjoni tal-Aja tal-1980 li, skont l-Artikolu 19 ta’ dik il-Konvenzjoni u l-ġurisprudenza stabbilita mill-Qorti tal-Ġustizzja, mhumiex proċedimenti dwar il-mertu tar-responsabbiltà tal-ġenituri. Madankollu jenħtieġ li l-applikazzjoni tal-Konvenzjoni tal-Aja tal-1980 tkun ikkomplementata mid-dispożizzjonijiet ta’ dan ir-Regolament dwar is-sekwestru internazzjonali ta’ minuri u mill-Kapitolu ta’ dan ir-Regolament dwar ir-rikonoxximent u l-infurzar u l-Kapitolu dwar id-dispożizzjonijiet ġenerali.

(74)

L-Awtoritajiet Ċentrali jenħtieġ li jassistu lill-qrati u lill-awtoritajiet kompetenti, u f’ċerti każijiet anke lid-detenturi tar-responsabbiltà tal-ġenituri, fi proċeduri transfruntiera u jikkooperaw kemm fi kwistjonijiet ġenerali kif ukoll f’każijiet speċifiċi, inkluż għall-finijiet li jiffavorixxu soluzzjoni amikevoli ta’ tilwim familjari.

(75)

Ħlief f’każijiet urġenti, u mingħajr preġudizzju għall-kooperazzjoni u l-komunikazzjoni diretta bejn il-qrati permessa skont dan ir-Regolament, it-talbiet skont dan ir-Regolament li jikkonċernaw il-kooperazzjoni fi kwistjonijiet ta’ responsabbiltà tal-ġenituri jistgħu jsiru mill-qrati u mill-awtoritajiet kompetenti u jenħtieġ li jitressqu quddiem l-Awtorità Ċentrali tal-Istat Membru tal-qorti jew tal-awtorità kompetenti rikjedenti. Ċerti talbiet jistgħu jsiru wkoll mid-detenturi tar-responsabbiltà tal-ġenituri u jenħtieġ li jitressqu quddiem l-Awtorità Ċentrali tar-residenza abitwali tal-applikant. Tali talbiet jenħtieġ li jkun fihom talbiet għall-għoti ta’ informazzjoni u assistenza lid-detenturi tar-responsabbiltà tal-ġenituri li qegħdin jitolbu r-rikonoxximent u l-infurzar ta’ deċiżjonijiet fit-territorju tal-Awtorità Ċentrali rikjesta b’mod partikolari dwar id-drittijiet ta’ aċċess u r-ritorn tal-minuri, inkluż, fejn meħtieġ, informazzjoni dwar kif jakkwistaw l-għajnuna legali; talbiet biex ikun iffaċilitat ftehim bejn id-detenturi tar-responsabbiltà tal-ġenituri permezz tal-medjazzjoni jew b’mezzi oħra ta’ soluzzjoni alternattiva għat-tilwim, u talbiet lill-qorti jew lill-awtorità kompetenti biex tqis il-ħtieġa li tieħu miżuri għall-protezzjoni tal-persuna jew il-proprjetà tal-minuri.

(76)

Eżempju ta’ każ urġenti li jippermetti l-kuntatt inizjali dirett mal-qorti jew l-awtorità kompetenti tal-Istat Membru rikjest ikun talba diretta lill-awtorità kompetenti ta’ Stat Membru ieħor biex tqis il-ħtieġa li jittieħdu miżuri għall-protezzjoni tal-minuri fejn il-minuri jkunu preżunti li jinsabu f’riskju imminenti. L-obbligu li l-proċedura ssir permezz tal-mezzi tal-Awtorità Ċentrali jenħtieġ li jkun obbligatorju biss għat-talbiet inizjali; kwalunkwe komunikazzjoni sussegwenti mal-qorti, awtorità kompetenti jew applikant tista’ wkoll issir direttament.

(77)

Jenħtieġ li l-Awtoritajiet Ċentrali jew l-awtoritajiet kompetenti ma jkunux preklużi milli jidħlu fi jew iżommu ftehimiet jew arranġamenti eżistenti mal-Awtoritajiet Ċentrali jew mal-awtoritajiet kompetenti ta’ wieħed jew aktar mill-Istati Membri l-oħrajn li jippermettu komunikazzjonijiet diretti fir-relazzjonijiet reċiproċi tagħhom. L-awtoritajiet kompetenti jenħtieġ li jinfurmaw lill-Awtoritajiet Ċentrali tagħhom dwar tali ftehimiet jew arranġamenti.

(78)

F’każijiet speċifiċi fi kwistjonijiet ta’ responsabbiltà tal-ġenituri li jaqgħu fil-kamp ta’ applikazzjoni ta’ dan ir-Regolament, jenħtieġ li l-Awtoritajiet Ċentrali jikkooperaw ma’ xulxin biex jipprovdu assistenza lill-qrati u lill-awtoritajiet kompetenti kif ukoll lid-detenturi tar-responsabbiltà tal-ġenituri. L-assistenza mogħtija mill-Awtorità Ċentrali rikjesta jenħtieġ li tinkludi, b’mod partikulari, il-lokalizzazzjoni tal-minuri, direttament jew permezz tal-qrati, ta’ awtoritajiet kompetenti jew ta’ korpi oħra, meta dan ikun meħtieġ biex titwettaq talba skont dan ir-Regolament, u l-għoti ta’ kwalunkwe informazzjoni rilevanti fi proċeduri fi kwistjonijiet ta’ responsabbiltà tal-ġenituri.

(79)

Jenħtieġ ukoll li l-Awtoritajiet Ċentrali rikjesti jieħdu l-passi adatti kollha biex jiffaċilitaw il-komunikazzjoni bejn il-qrati, fejn meħtieġ, b’mod partikolari għall-applikazzjoni tar-regoli dwar it-trasferiment tal-ġurisdizzjoni, dwar miżuri proviżorji, inkluż miżuri protettivi f’każijiet urġenti, b’mod partikolari fejn huma relatati mas-sekwestru internazzjonali ta’ minuri u mmirati biex il-minuri jiġi protett mir-riskju serju msemmi f’punt (b) tal-Artikolu 13(1) tal-Konvenzjoni tal-Aja tal-1980, u dwar lis pendens u azzjonijiet dipendenti. Għal dan il-għan, huwa possibbli li l-għoti ta’ informazzjoni għal komunikazzjoni diretta ulterjuri tkun suffiċjenti f’xi każijiet, pereżempju, l-għoti ta’ dettalji ta’ kuntatt tal-awtoritajiet tal-benesseri tal-minuri, il-maġistrati ta’ netwerk jew il-qorti kompetenti.

(80)

Sabiex jinkisbu l-għanijiet ta’ dan ir-Regolament u mingħajr preġudizzju għal ebda rekwiżit skont id-dritt proċedurali nazzjonali tagħha, qorti jew awtorità kompetenti rikjedenti jenħtieġ li jkollha d-diskrezzjoni li tagħżel liberament bejn il-mezzi differenti disponibbli għaliha biex tikseb l-informazzjoni meħtieġa.

(81)

Meta ssir talba b’raġunijiet li jsostnuha għal rapport jew għal kwalunkwe informazzjoni rilevanti oħra fil-proċeduri fi kwistjonijiet ta’ responsabbiltà tal-ġenituri fl-Istat Membru rikjedenti, l-Awtoritajiet Ċentrali, direttament jew permezz tal-qrati, l-awtoritajiet kompetenti jew korpi oħrajn tal-Istat Membru rikjest jenħtieġ li jwettqu tali talba. It-talba jenħtieġ li tinkludi b’mod partikulari deskrizzjoni tal-proċeduri li għalihom hija meħtieġa l-informazzjoni u s-sitwazzjoni fattwali li wasslet għal dawk il-proċeduri.

(82)

Meta qorti ta’ Stat Membru tkun diġà ħadet deċiżjoni fi kwistjonijiet ta’ responsabbiltà tal-ġenituri jew tkun qed tikkontempla tali deċiżjoni u l-implimentazzjoni tad-deċiżjoni għandha sseħħ fi Stat Membru ieħor, jenħtieġ li l-qorti tkun tista’ titlob li l-qrati jew l-awtoritajiet kompetenti ta’ dak l-Istat Membru l-ieħor jassistu fl-implimentazzjoni tad-deċiżjoni. Dan jenħtieġ li japplika, pereżempju, għal deċiżjonijiet li jagħtu aċċess issorveljat li għandu jiġi eżerċitat fi Stat Membru ieħor għajr l-Istat Membru fejn tkun lokalizzata l-qorti li tordna l-aċċess jew li jinvolvu kwalunkwe miżura ta’ akkumpanjament oħra tal-qrati jew tal-awtoritajiet kompetenti fl-Istat Membru fejn għandha tiġi implimentata d-deċiżjoni.

(83)

Fejn qorti jew awtorità kompetenti ta’ Stat Membru tqis it-tqegħid ta’ minuri fi Stat Membru ieħor, jenħtieġ li titwettaq proċedura ta’ konsultazzjoni biex jinkiseb il-kunsens qabel it-tqegħid. Il-qorti jew l-awtorità kompetenti li tqis it-tqegħid jenħtieġ li tikseb il-kunsens tal-awtorità kompetenti tal-Istat Membru li l-minuri jkun ser jitqiegħed fih qabel ma tordna jew tirranġa t-tqegħid. Barra minn hekk, f’konformità mal-ġurisprudenza tal-Qorti tal-Ġustizzja, l-Istati Membri jenħtieġ li jistabbilixxu regoli u proċeduri ċari għall-finijiet tal-kunsens li jrid jinkiseb skont dan ir-Regolament, sabiex tiġi żgurata ċ-ċertezza legali u l-ħeffa. Fost l-oħrajn, jenħtieġ li l-proċeduri jippermettu lill-awtorità kompetenti tagħti jew tirrifjuta l-kunsens tagħha minnufih. Jenħtieġ li n-nuqqas ta’ tweġiba fi żmien tliet xhur ma jinftehimx bħala kunsens u jenħtieġ li mingħajr kunsens it-tqegħid ma jsirx. It-talba għall-kunsens jenħtieġ li tinkludi mill-inqas rapport dwar il-minuri flimkien mar-raġunijiet għall-proposta tat-tqegħid jew l-għoti ta’ kura, kemm mistenni jdum it-tqegħid, informazzjoni dwar kwalunkwe finanzjament, u tkun issupplimentata minn kwalunkwe informazzjoni oħra li l-Istat Membru rikjest jista’ jqis li tkun pertinenti bħal kwalunkwe superviżjoni prevista tal-miżura, l-arranġamenti għal kuntatt mal-ġenituri, familjari oħra jew persuni li magħhom il-minuri jkollu relazzjoni mill-qrib, jew ir-raġunijiet għaliex tali kuntatt mhuwiex ikkontemplat fid-dawl tal-Artikolu 8 tal-Konvenzjoni Ewropea għall-Protezzjoni tad-Drittijiet tal-Bniedem u tal-Libertajiet Fundamentali. B’kont meħud tal-ġurisprudenza tal-Qorti tal-Ġustizzja, fejn il-kunsens għat-tqegħid ikun ingħata għal perijodu speċifiku ta’ żmien, dak il-kunsens jenħtieġ li ma japplikax għal deċiżjonijiet jew arranġamenti li jestendu d-durata tat-tqegħid. F’dawn iċ-ċirkostanzi, jenħtieġ li ssir talba ġdida għall-kunsens.

(84)

Fejn deċiżjoni għat-tqegħid ta’ minuri f’kustodja istituzzjonali jew f’kura ta’ familja tkun qed tiġi kkontemplata fl-Istat Membru tar-residenza abitwali tal-minuri, il-qorti jenħtieġ li tqis, fl-aktar stadju bikri tal-proċedimenti, miżuri xierqa biex jiġi żgurat ir-rispett tad-drittijiet tal-minuri, b’mod partikolari d-dritt li jippreserva l-identità tiegħu u d-dritt li jżomm kuntatt mal-ġenituri, jew, fejn xieraq, ma’ familjari oħra, fid-dawl tal-Artikoli 8, 9 u 20 tal-Konvenzjoni tan-NU dwar id-Drittijiet tat-Tfal. Fejn il-qorti tkun konxja ta’ konnessjoni mill-qrib tal-minuri ma’ Stat Membru ieħor, miżuri xierqa jistgħu jinkludu b’mod partikolari, fejn il-punt (b) tal-Artikolu 37 tal-Konvenzjoni ta’ Vjenna dwar ir-Relazzjonijiet Konsulari huwa applikabbli, notifika lill-Korp Konsulari ta’ dak l-Istat Membru. Il-qorti tista’ ssir konxja wkoll ta’ dan minn informazzjoni pprovduta mill-Awtorità Ċentrali ta’ dak l-Istat Membru l-ieħor. Miżuri xierqa jistgħu jinkludu wkoll talba skont dan ir-Regolament lil dak l-Istat Membru għal informazzjoni dwar ġenitur, familjari jew persuni oħra li jistgħu jkunu adatti biex jieħdu ħsieb il-minuri. Barra minn hekk, skont iċ-ċirkostanzi, il-qorti tista’ titlob ukoll informazzjoni dwar il-proċeduri u d-deċiżjonijiet rigward ġenitur jew aħwa tal-minuri. Jenħtieġ li l-aħjar interessi tal-minuri jibqgħu l-kunsiderazzjoni ewlenija. B’mod partikolari, jenħtieġ li l-ebda waħda minn dawk id-dispożizzjonijiet ma taffettwa l-liġi jew il-proċedura nazzjonali applikabbli għal kwalunkwe deċiżjoni ta’ tqegħid meħuda mill-qorti jew mill-awtorità kompetenti fl-Istat Membru li tikkontempla t-tqegħid. B’mod partikolari, jenħtieġ li dawk id-dispożizzjonijiet ma jpoġġu l-ebda obbligu fuq l-awtoritajiet tal-Istat Membru li jkollu l-ġurisdizzjoni li jqiegħed lill-minuri fl-Istat Membru l-ieħor jew ikomplu jinvolvu lil dak l-Istat Membru fid-deċiżjoni jew il-proċedimenti tat-tqegħid.

(85)

Billi fi kwistjonijiet ta’ responsabbiltà tal-ġenituri ż-żmien huwa prezzjuż, l-informazzjoni mitluba skont id-dispożizzjonijiet ta’ dan ir-Regolament dwar il-kooperazzjoni, inkluż dwar il-ġbir u l-iskambju ta’ informazzjoni rilevanti fi proċeduri ta’ kwistjonijiet ta’ responsabbiltà tal-ġenituri, u d-deċiżjoni tal-għoti jew tar-rifjut tal-kunsens għat-tqegħid tal-minuri fi Stat Membru ieħor, jenħtieġ li tintbagħat lill-Istat Membru rikjedenti mill-Awtorità Ċentrali tal-Istat Membru rikjest sa mhux aktar tard minn tliet xhur wara l-wasla tat-talba, ħlief meta ċirkostanzi eċċezzjonali jagħmlu dan impossibbli. Dan jenħtieġ li jinkludi l-obbligu li l-awtorità nazzjonali kompetenti tipprovdi l-informazzjoni lill-Awtorità Ċentrali rikjesta, jew tispjega għaliex ma tistax tipprovdiha, qabel jagħlaq iż-żmien li fih tista’ tagħmel dan f’konformità ma’ dak il-perijodu ta’ żmien. Madankollu, l-awtoritajiet kompetenti kollha involuti jenħtieġ li jistinkaw biex jipprovdu t-tweġiba saħansitra aktar malajr milli f’dan il-perijodu ta’ żmien massimu.

(86)

Il-fatt li l-laqgħat tal-Awtoritajiet Ċentrali għandhom jissejħu, b’mod partikolari, mill-Kummissjoni fi ħdan il-qafas tan-Netwerk Ġudizzjarju Ewropew fi kwistjonijiet ċivili u kummerċjali skont id-Deċiżjoni 2001/470/KE, jenħtieġ li ma jipprekludix li jiġu organizzati laqgħat oħra tal-Awtoritajiet Ċentrali.

(87)

Sakemm dan ir-Regolament ma jipprevedix mod ieħor, ir-Regolament (UE) Nru 2016/679 tal-Parlament Ewropew u tal-Kunsill (9) jenħtieġ li japplika għall-ipproċessar ta’ data personali mill-Istat Membru mwettaq b’applikazzjoni ta’ dan ir-Regolament. B’mod partikolari, sabiex ma jkunx ipperikolat it-twettiq ta’ talba skont dan ir-Regolament, pereżempju għar-ritorn tal-minuri f’konformità mal-Konvenzjoni tal-Aja tal-1980 jew biex qorti tqis il-ħtieġa li jittieħdu miżuri għall-protezzjoni tal-persuna jew tal-proprjetà tal-minuri, in-notifika tas-suġġett tad-data kif mitlub mill-Artikolu 14(1)-(4) tar-Regolament (UE) Nru 2016/679, pereżempju dwar id-data mitluba għal-lokalizzazzjoni tal-minuri, tista’ tiġi diferita sakemm it-talba li għaliha tintalab din l-informazzjoni tkun twettqet. Din l-eċċezzjoni qed issir f’konformità mal-Artikolu 14(5) kif ukoll il-punti (f), (g), (i) u (j) tal-Artikolu 23(1) tar-Regolament (UE) Nru 2016/679. Jenħtieġ li dan ma jipprekludix intermedjarju, qorti jew awtorità kompetenti li lilha tkun ġiet trasmessa l-informazzjoni, milli tieħu miżuri għall-protezzjoni tal-minuri, jew milli tippermetti li jittieħdu tali miżuri, fejn il-minuri jkun fil-periklu jew ikun hemm indikazzjonijiet ta’ riskju bħal dan.

(88)

F’każijiet fejn id-divulgazzjoni jew il-konferma tal-informazzjoni rilevanti tista’ tipperikola s-saħħa, is-sikurezza jew il-libertà tal-minuri jew ta’ persuna oħra, pereżempju fejn tkun seħħet vjolenza domestika u l-qorti ordnat li l-indirizz il-ġdid tal-minuri ma jiġix divulgat lill-applikant, dan ir-Regolament jagħmel li jista’ biex isib bilanċ delikat. Filwaqt li dan ir-Regolament jenħtieġ li jipprevedi li Awtorità Ċentrali, qorti jew awtorità kompetenti jenħtieġ li ma tiddivulga jew tikkonferma lill-applikant jew lil parti terza ebda informazzjoni miġbura jew mibgħuta għall-finijiet ta’ dan ir-Regolament jekk tiddetermina li dan jista’ jipperikola s-saħħa, is-sikurezza jew il-libertà tal-minuri jew ta’ persuna oħra, jenħtieġ li dan madankollu jissottolinja li dak jenħtieġ li ma jimpedixxix il-ġbir u t-trasmissjoni tal-informazzjoni minn u bejn l-Awtoritajiet Ċentrali, il-qrati jew l-awtoritajiet kompetenti sakemm ikun meħtieġ biex jitwettqu l-obbligi skont dan ir-Regolament. Dan ifisser li fejn possibbli u xieraq, jenħtieġ li jkun possibbli li applikazzjoni tiġi pproċessata skont dan ir-Regolament mingħajr ma l-applikant jingħata l-informazzjoni kollha meħtieġa għall-ipproċessar tagħha. Pereżempju, fejn il-liġi nazzjonali hekk tipprevedi, Awtorità Ċentrali tista’ tagħmel rikors f’isem applikant mingħajr ma tgħaddi l-informazzjoni lill-applikant dwar fejn jinsab il-minuri. Madankollu, f’każijiet fejn is-sempliċi talba tista’ tkun diġà tipperikola s-saħħa, is-sikurezza jew il-libertà tal-minuri jew ta’ persuna oħra, jenħtieġ li ma jkun hemm l-ebda obbligu skont dan ir-Regolament li ssir tali talba.

(89)

Sabiex jiġi żgurat li ċ-ċertifikati li għandhom jintużaw flimkien mal-applikazzjoni tal-Kapitoli III u IV ta’ dan ir-Regolament jinżammu aġġornati, is-setgħa li tadotta atti f’konformità mal-Artikolu 290 tat-Trattat dwar il-Funzjonament tal-Unjoni Ewropea (TFUE) jenħtieġ li tiġi delegata lill-Kummissjoni b’rispett lejn l-emendi għall-Annessi minn I sa IX għal dan ir-Regolament. Huwa partikolarment importanti li l-Kummissjoni twettaq konsultazzjonijiet xierqa matul il-ħidma ta’ tħejjija tagħha, anke fil-livell ta’ esperti, u li dawk il-konsultazzjonijiet jitwettqu f’konformità mal-prinċipji stabbiliti fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet (10). B’mod partikolari, sabiex jiżgura parteċipazzjoni ugwali fit-tħejjija ta’ atti delegati, il-Kunsill jirċievi d-dokumenti kollha fl-istess ħin mal-esperti tal-Istati Membri, u l-esperti tagħhom sistematikament ikollhom aċċess għall-laqgħat tal-gruppi ta’ esperti tal-Kummissjoni li jittrattaw it-tħejjija ta’ atti delegati.

(90)

Il-kontinwità bejn il-Konvenzjoni tal-1998 imfassla abbażi tal-Artikolu K.3 tat-Trattat dwar l-Unjoni Ewropea dwar il-Ġurisdizzjoni u r-Rikonoxximent u l-Infurzar tas-Sentenzi f’Materji Matrimonjali ("il-Konvenzjoni Brussell II") (11), ir-Regolament (KE) Nru 1347/2000, ir-Regolament (KE) Nru 2201/2003 u dan ir-Regolament jenħtieġ li tiġi żgurata sa fejn id-dispożizzjonijiet ma jkunux inbidlu, u jenħtieġ li jiġu stabbiliti proviżjonijiet tranżizzjonali għal dan il-għan. L-istess ħtieġa għal kontinwità tapplika fir-rigward tal-interpretazzjoni, inkluż mill-Qorti tal-Ġustizzja, tal-Konvenzjoni Brussell II u tar-Regolamenti (KE) Nru 1347/2000 u (KE) Nru 2201/2003.

(91)

Huwa mfakkar li għal ftehimiet ma’ Stat terz wieħed jew aktar konklużi minn Stat Membru qabel id-data tal-adeżjoni tiegħu mal-Unjoni, japplika l-Artikolu 351 TFUE.

(92)

Il-liġi applikabbli fi kwistjonijiet ta’ responsabbiltà tal-ġenituri jenħtieġ li tiġi ddeterminata f’konformità mad-dispożizzjonijiet tal-Kapitolu III tal-Konvenzjoni tal-Aja tal-1996. Fl-applikazzjoni ta’ dik il-Konvenzjoni fi proċedimenti quddiem qorti ta’ Stat Membru li fih japplika dan ir-Regolament, ir-referenza għall-Artikolu 15(1) ta’ dik il-Konvenzjoni għad-"dispożizzjonijiet tal-Kapitolu II" ta’ dik il-Konvenzjoni jenħtieġ li jkunu mifhuma bħala li qed jirreferu għad-"dispożizzjonijiet ta’ dan ir-Regolament".

(93)

Għall-funzjonament tajjeb ta’ dan ir-Regolament, jenħtieġ li l-Kummissjoni tivvaluta l-applikazzjoni tagħha u tipproponi tali emendi li jidhru neċessarji.

(94)

Il-Kummissjoni jenħtieġ li tpoġġi għad-dispożizzjoni tal-pubbliku l-informazzjoni kkomunikata mill-Istati Membri u taġġornaha.

(95)

F’konformità mal-Artikolu 3 u l-Artikolu 4a(1) tal-Protokoll Nru 21 dwar il-pożizzjoni tar-Renju Unit u l-Irlanda fir-rigward tal-ispazju ta’ libertà, sigurtà u ġustizzja, anness mat-Trattat dwar l-Unjoni Ewropea (TUE) u mat-TFUE, dawk l-Istati Membri nnotifikaw ix-xewqa tagħhom li jieħdu sehem fl-adozzjoni u fl-applikazzjoni ta’ dan ir-Regolament.

(96)

F’konformità mal-Artikoli 1 u 2 tal-Protokoll Nru 22 dwar il-pożizzjoni tad-Danimarka, anness mat-TUE u mat-TFUE, id-Danimarka mhijiex qed tieħu sehem fl-adozzjoni ta’ dan ir-Regolament u mhijiex marbuta bih jew soġġetta għall-applikazzjoni tiegħu.

(97)

Il-Kontrollur Ewropew għall-Protezzjoni tad-Data ġie kkonsultat f’konformità mat-tieni subparagrafu tal-Artikolu 41(2) u l-Artikolu 46(d) tar-Regolament (KE) Nru 45/2001 tal-Parlament Ewropew u tal-Kunsill (12) u ta opinjoni fil-15 ta’ Frar 2018 (13).

(98)

Minħabba li l-għanijiet ta’ dan ir-Regolament ma jistgħux jinkisbu b’mod suffiċjenti mill-Istati Membri minħabba d-differenzi bejn ir-regoli nazzjonali li jirregolaw il-ġurisdizzjoni u r-rikonoxximent u l-infurzar ta’ deċiżjonijiet iżda jistgħu, minħabba l-applikabbiltà diretta u n-natura vinkolanti ta’ dan ir-Regolament, jinkisbu aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju ta’ sussidjarjetà kif stabbilit fl-Artikolu 5 tat-TUE. F’konformità mal-prinċipju ta’ proporzjonalità kif stabbilit f’dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkisbu dawk l-għanijiet.