(1)

Permezz tal-ittra tat-23 ta' Marzu 2015, il-Kummissjoni bagħtet talba għal informazzjoni lill-Gran Dukat tal-Lussemburgu (“il-Lussemburgu”) (2) dwar il-prattika tiegħu dwar id-deċiżjoni tat-taxxa fir-rigward tal-grupp Engie (dak iż-żmien GDF Suez) (3). F'dik l-ittra, il-Kummissjoni talbet lil-Lussemburgu jipprovdi kull deċiżjoni tat-taxxa mogħtija lil kwalunkwe entità ta' dak il-grupp mill-2004 sad-data tal-ittra, indirizzata lil dak il-grupp jew lil kwalunkwe entità minn dak il-grupp li kienet fis-seħħ f'dak iż-żmien jew li kienet fis-seħħ fl-10 snin ta' qabel, kif ukoll il-kontijiet annwali ta' dak il-grupp u tal-entitajiet legali ta' dak il-grupp għall-2011, l-2012 u l-2013, u kopji tad-dikjarazzjonijiet tat-taxxa.

(2)

Fil-25 ta' Ġunju 2015, il-Lussemburgu wieġeb għal dik it-talba billi ppreżenta informazzjoni dwar id-deċiżjonijiet tat-taxxa meħuda mill-amministrazzjoni tat-taxxa tal-Lussemburgu favur diversi kumpaniji tal-grupp Engie reżidenti fil-Lussemburgu, inkluż GDF Suez LNG Supply S.A. (“LNG Supply”) (4) u GDF Suez Treasury Management S.à.r.l. (“GSTM”). (5) B'mod partikolari, il-Lussemburgu pprovda żewġ talbiet għal deċiżjoni tat-taxxa u l-approvazzjonijiet rispettivi tagħhom li kkonċernaw żewġ tranżazzjonijiet intragrupp kważi identiċi relatati ma' trasferimenti ta' assi minn kumpaniji oħra tal-grupp Engie lil LNG Supply u GSTM rispettivament. Fiż-żewġ każijiet, it-trasferimenti ġew iffinanzjati b'self bla mgħax konvertibbli b'mod obbligatorju denominat bħala “ZORA” (6) (“LNG ZORA” u “GSTM ZORA” rispettivament; kollettivament, iż-“ZORAs”) u b'Kuntratti Forward ta' Bejgħ Imħallas Minn Qabel (il-“Kuntratt Forward tal-LNG” u l-“Kuntratt Forward tal-GSTM rispettivament”; kollettivament, il-“Kuntratti Forward”).

(3)

Permezz tal-ittra tal-1 ta' April 2016, il-Kummissjoni indikat li, abbażi tal-informazzjoni ppreżentata mil-Lussemburgu, ma setgħetx teskludi li d-deċiżjonijiet tat-taxxa meħuda favur dawk il-kumpaniji tal-grupp Engie kien fihom għajnuna mill-Istat inkompatibbli. Konsegwentement hija talbet lil-Lussemburgu jipprovdi raġunijiet għaliex dawk il-miżuri mhumiex selettivi jew inkella kif jistgħu jiġu ġġustifikati skont il-liġi tal-Unjoni dwar l-għajnuna mill-Istat u biex jippreżenta aktar informazzjoni u kjarifiki.

(4)

Bl-ittra tat-3 ta' Mejju 2016, il-Kummissjoni fakkret lil-Lussemburgu biex jipprovdi l-informazzjoni msemmija fil-premessa 3.

(5)

Fit-23 ta' Mejju 2016, il-Lussemburgu wieġeb għat-talba tal-Kummissjoni għall-informazzjoni tal-1 ta' April 2016.

(6)

Fid-19 ta' Settembru 2016, il-Kummissjoni adottat id-deċiżjoni li tiftaħ proċedura ta' investigazzjoni formali skont l-Artikolu 108(2) tat-Trattat dwar it-trattament tat-taxxa mogħti lil Engie abbażi tad-deċiżjonijiet tat-taxxa meħuda mil-Lussemburgu fuq il-bażi li dan jista' jikkostitwixxi għajnuna mill-Istat fl-ambitu tat-tifsira tal-Artikolu 107(1) tat-Trattat (“id-Deċiżjoni tal-ftuħ”) (7).

(7)

Fil-21 ta' Novembru 2016, il-Lussemburgu ppreżenta, permezz ta' ittra, il-kummenti tiegħu dwar id-deċiżjoni tal-Ftuħ u l-informazzjoni mitluba.

(8)

Fit-3 ta' Frar 2017, id-deċiżjoni tal-Ftuħ ġiet ippubblikata f'Il-Ġurnal Uffiċjali tal-Unjoni Ewropea (8). Il-Kummissjoni stiednet lill-partijiet interessati jippreżentaw il-kummenti tagħhom dwar il-miżura.

(9)

Fis-27 ta' Frar 2017, il-Kummissjoni rċeviet osservazzjonijiet mingħand Engie dwar id-deċiżjoni tal-Ftuħ. Permezz tal-ittra tal-10 ta' Marzu 2017, il-Kummissjoni bagħtithom lil-Lussemburgu, li ngħata l-opportunità li jirreaġixxi.

(10)

Permezz tal-ittra tat-22 ta' Marzu 2017, wara l-osservazzjonijiet mil-Lussemburgu u minn Engie, il-Kummissjoni talbet lil-Lussemburgu jipprovdi aktar informazzjoni.

(11)

Fl-10 ta' April 2017, il-Lussemburgu ppreżenta ittra fejn indika li l-osservazzjonijiet ta' Engie huma konformi mal-osservazzjonijiet tiegħu.

(12)

Fit-12 ta' Mejju 2017, il-Lussemburgu ppreżenta l-informazzjoni mitluba fit-22 ta' Marzu 2017.

(13)

Fl-1 ta' Ġunju 2017, saret laqgħa bejn is-servizzi tal-Kummissjoni, Engie u l-Lussemburgu. Il-kontenut tal-laqgħa ġie rreġistrat fil-minuti miftiehma bejn il-Kummissjoni u l-Lussemburgu. Wara l-laqgħa, il-Lussemburgu bagħat informazzjoni addizzjonali fis-16 ta' Ġunju 2017.

(14)

Permezz tal-ittra tal-11 ta' Diċembru 2017, wara osservazzjonijiet li saru mil-Lussemburgu u minn Engie matul il-laqgħa tal-1 ta' Ġunju 2017, il-Kummissjoni ċċarat ċerti aspetti tal-investigazzjoni (“l-Ittra tal-11 ta' Diċembru 2017”) u talbet informazzjoni addizzjonali. Il-Kummissjoni stiednet lil-Lussemburgu jibgħat kopja ta' din l-ittra lil Engie.

(15)

Fil-31 ta' Jannar 2018, il-Lussemburgu u Engie ppreżentaw l-osservazzjonijiet tagħhom għall-Ittra tal-11 ta' Diċembru 2017. Fl-istess data, il-Lussemburgu ppreżenta wkoll l-informazzjoni mitluba fl-Ittra tal-11 ta' Diċembru 2017.

(16)

Il-grupp Engie (li qabel kien il-grupp GDF Suez) jikkonsisti minn Engie S.A., kumpanija stabbilità fi Franza, u l-kumpaniji kollha li huma kkontrollati direttament jew indirettament minn Engie S.A. (kollettivament imsejħa “Engie”). Engie hija r-riżultat ta' fużjoni fl-2008 bejn il-gruppi Franċiżi GDF u Suez (li qabel kienet Lyonnaise des Eaux) (9). Engie għandha l-kwartieri ġenerali fi Franza. Engie S.A. hija elenkata fil-boroż ta' Pariġi, ta' Brussell u tal-Lussemburgu (10).

(17)

Engie hija preżenti fi tliet setturi ewlenin: il-produzzjoni tal-enerġija, il-gass naturali u l-gass naturali likwifikat, u s-servizzi tal-effiċjenza fl-enerġija. Engie hija prinċipalment attiva fil-produzzjoni u l-provvista tal-enerġija (11) u fin-negozju, fl-esplorazzjoni, fil-produzzjoni, fil-forniment, fit-trasport tal-enerġija u fid-distribuzzjoni tal-gass naturali, fis-servizzi tal-effiċjenza fl-enerġija, u fl-infrastruttura tal-enerġija.

(18)

Engie timpjega 153 090 ruħ madwar id-dinja f'70 pajjiż (12). Fl-2016, id-dħul ta' Engie ammonta għal EUR 66,6 biljun (13). Mid-dħul totali rreġistrat mill-grupp, EUR 52,2 biljun daħlu mill-Ewropa (14). Fl-2016, 67,3 % tal-qligħ tal-grupp qabel l-imgħax, it-taxxa, id-deprezzament u l-ammortizzament (EBITDA) ġie ġġenerat fl-Ewropa (15).

(19)

Fil-Lussemburgu, Engie hija preżenti permezz ta' diversi entitajiet legali, li wħud minnhom huma involuti fit-tranżazzjonijiet li huma s-suġġett tad-deċiżjonijiet tat-taxxa kkontestati. Compagnie Européenne de Financement C.E.F. S.A. (“CEF”) (16) hija sussidjarja ta' Engie inkorporata fil-Lussemburgu fl-1933. L-għan tal-kumpanija huwa l-akkwist ta' interessi b'parteċipazzjoni fil-Lussemburgu u f'entitajiet barranin u l-ġestjoni, l-isfruttament u l-kontroll ta' dawn l-interessi (17). Hija primarjament responsabbli biex tipprovdi garanziji u self intrakumpaniji għal sussidjarji tal-grupp. Id-dħul tas-CEF huwa derivat mill-imgħax u mit-tariffi imposti għall-forniment ta' dawn is-selfiet u l-garanziji (18).

(20)

GSTM hija kumpanija Lussemburgiża li hija proprjetà sħiħa tas-CEF. Twettaq attivitajiet ta' ġestjoni u ta' finanzjament tat-teżor għal Engie mil-Lussemburgu. Skont it-talba għal deċiżjoni tat-taxxa tal-15 ta' Ġunju 2012, “b'mod ġenerali, GSTM tagħti self f'diversi denominazzjonijiet (notevolment EUR u USD) lil kumpaniji relatati u twettaq attività ta' ppuljar ta' flus […]. L-attività tal-ippuljar ta' flus ta' GSTM ġeneralment tvarja bejn EUR [2-7] u [7-12-il] EUR 10 biljun” (19).

(21)

GDF Suez LNG Holding S.à.r.l. (“LNG Holding”) (20) hija sussidjarja ta' Engie inkorporata fil-Lussemburgu fl-2009. L-għan tal-kumpanija huwa l-akkwist ta' interessi b'parteċipazzjoni fil-Lussemburgu u f'entitajiet barranin u l-ġestjoni ta' dawn l-interessi (21). LNG Holding hija proprjetà sħiħa ta' CEF.

(22)

LNG Supply hija proprjetà sħiħa ta' LNG Holding. Hija attiva fix-xiri, fil-bejgħ u fin-negozju ta' LNG, gass u prodotti derivati mill-gass, kif ukoll fit-twassil ta' LNG. Għandha għadd sinifikanti ta' kuntratti fis-seħħ ma' kumpaniji internazzjonali tal-enerġija (22). Fl-2018, Engie ħabbret l-intenzjoni tagħha li tbigħ partijiet min-negozju tal-LNG tagħha, inkluż LNG Supply, lil Total S.A (23).

(23)

Din id-Deċiżjoni tikkonċerna żewġ settijiet ta' deċiżjonijiet tat-taxxa meħuda mill-amministrazzjoni tat-taxxa tal-Lussemburgu favur il-kumpaniji tal-grupp Engie (“id-deċiżjonijiet tat-taxxa kkontestati”). Id-deċiżjonijiet tat-taxxa kkontestati jikkonċernaw żewġ tranżazzjonijiet intragrupp simili implimentati minn Engie bejn kumpaniji differenti tal-grupp. Fiż-żewġ każijiet, Engie ttrasferixxit sett ta' assi li jikkostitwixxu attività ta' negozju kompletament funzjonali għand sussidjarja fil-Lussemburgu liema sussidjarja mbagħad kellha tmexxi din l-attività kummerċjali.

(24)

Il-ħlas tal-prezz mis-sussidjarja ġie ffinanzjat b'self fuq 15-il sena, bla mgħax u konvertibbli b'mod obbligatorju (“ZORA”) mogħti minn grupp intermedjarju reżidenti fil-Lussemburgu. Iż-ZORA ma jġorrx imgħax perjodiku iżda, mal-konverżjoni s-sussidjarja se tħallas lis-sellief ishma li jirrappreżentaw il-valur nominali taż-ZORA flimkien ma' “bonus” li jikkonsisti mill-profitti kollha li tkun għamlet is-sussidjarja matul il-ħajja taż-ZORA bit-tnaqqis ta' marġni limitat (24) miftiehem mal-awtoritajiet tat-taxxa tal-Lussemburgu (l-ammont ta' dan il-“bonus” jiġi riferut fid-deċiżjonijiet kkontestati u fid-dikjarazzjonijiet tat-taxxa tal-kumpaniji bħala “Akkumulazzjoni ZORA”) (25).

(25)

Min-naħa tagħha, l-entità intermedjarja tiffinanzja simultanjament dan is-self permezz ta' Kuntratt Forward ta' Bejgħ Imħallas Minn Qabel (il-“Kuntratt Forward) u li għamlet ma' holding li wkoll hija reżidenti fil-Lussemburgu u li hija l-uniku azzjonist kemm tas-sussidjarja kif ukoll tal-entità intermedjarja. Skont il-Kuntratt Forward, il-holding tħallas lill-kumpanija intermedjarja ammont daqs il-valur nominali taż-ZORA mal-akkwiżizzjoni tad-drittijiet għall-ishma li s-sussidjarja se toħroġ mal-konverżjoni taż-ZORA. Għalhekk, jekk is-sussidjarja tagħmel profitti matul il-ħajja taż-ZORA, il-holding tirċievi, mal-konverżjoni taż-ZORA, l-ishma li jinkorporaw il-valur tal-Akkumulazzjoni ZORA. Bħala konsegwenza, il-holding tipprovdi lis-sussidjarja bil-finanzjament biex takkwista l-assi permezz tal-Kuntratt Forward u taż-ZORA.

(26)

Id-deċiżjonijiet tat-taxxa kkontestati jaqblu ma' dan it-trattament tat-taxxa li ġej tal-kumpaniji involuti: is-sussidjarja se tnaqqas kull sena provvedimenti għall-Akkumulazzjonijiet ZORA li se jitħallsu mal-konverżjoni. Għalhekk, is-sussidjarja mhux se tkun intaxxata ħlief fuq marġini limitat miftiehem mal-awtoritajiet tat-taxxa. Meta l-holding tirrealizza l-Akkumulazzjonijiet ZORA (26), dan il-profitt se jkun eżentat mit-taxxa skont l-applikazzjoni tar-reġim tal-eżenzjoni tal-parteċipazzjonijiet tal-Lussemburgu, li jippermetti li ma titħallasx taxxa, taħt ċerti kundizzjonijiet, fuq profitt li jkun ġej minn parteċipazzjonijiet f'kumpaniji oħra. L-entità intermedjarja mhijiex intaxxata lanqas minħabba li l-profitt realizzat mill-konverżjoni taż-ZORA (l-Akkumulazzjonijiet ZORA) jiġi kkumpensat b'telf tal-istess ammont li jirriżulta mill-Kuntratt Forward (27). Ir-riżultat finali huwa li l-Akkumulazzjonijiet ZORA jitnaqqsu fil-livell tas-sussidjarja u li l-istess ammont ma jkun soġġett għal tassazzjoni lanqas fil-livell tal-holding, peress li jitqies dħul eżentat mit-taxxa. Għalhekk, l-Akkumulazzjonijiet Zora, li prattikament jirrappreżentaw il-profitt kollu magħmul mis-sussidjarja matul il-ħajja taż-ZORA, jibqa' mhux intaxxat fil-Lussemburgu (28).

(27)

L-istruttura deskritta fil-premessi 23 sa 26 tidher fil-Grafika 1.

Grafika 1

Illustrazzjoni tal-istrutturi stabbiliti fid-deċiżjonijiet tat-taxxa kkontestati

Ishma (inklużi l-Akkumulazzjonijiet ZORA)

Kuntratt Forward

Dћul

Ishma (inklużi l-Akkumulazzjonijiet ZORA)

ZORA

Assi

Sellief

Sussidjarja

Holding

(28)

Dan it-trattament tat-taxxa ġie approvat f'żewġ settijiet ta' deċiżjonijiet tat-taxxa li jikkonċernaw żewġ strutturi differenti maħluqa minn Engie.

(29)

L-ewwel sett ta' deċiżjonijiet tat-taxxa jikkonċerna t-trasferiment tal-attività li tikkonċerna x-xiri, il-bejgħ u n-negozju ta' gass LNG u ta' prodotti derivati mill-gass (“LNG Business”) (29) mill-kumpanija tal-Lussemburgu Suez LNG Trading S.A. (“LNG Trading”) għal għand LNG Supply. Dan jinkludi ħames deċiżjonijiet tat-taxxa meħuda mill-amministrazzjoni tat-taxxa tal-Lussemburgu wara talbiet għal deċiżjoni tat-taxxa ppreżentati mill-konsulent tat-taxxa ta' Engie (“konsulent tat-taxxa”) f'isem kumpaniji differenti ta' Engie (kollettivament, id-“deċiżjonijiet tat-taxxa LNG”).

(30)

It-tieni sett ta' deċiżjonijiet tat-taxxa jikkonċerna t-trasferiment tal-ġestjoni tat-teżor u tal-attivitajiet ta' finanzjament (“Financing and Treasury Business”) (30) minn CEF għal GSTM. Dan jinkludi żewġ deċiżjonijiet tat-taxxa meħuda mill-amministrazzjoni tat-taxxa tal-Lussemburgu wara talbiet għal deċiżjoni tat-taxxa ppreżentati mill-konsulent tat-taxxa f'isem kumpaniji differenti ta' Engie (kollettivament, id-“deċiżjonijiet tat-taxxa GSTM”).

(31)

Il-holdings f'kull waħda minn dawn l-istrutturi maħluqa fid-deċiżjonijiet tat-taxxa GSTM huma, rispettivament, LNG Holding u CEF (kollettivament, il-“Holdings”). L-entitajiet intermedjarji li taw iż-ZORAs huma, rispettivament GDF Suez LNG (Lussemburgu) S.à.r.l. (“LNG Lussemburgu”) u Electrabel Invest Lussemburgu SA (“EIL”, kollettivament ma' LNG Lussemburgu, “Selliefa”). Fl-aħħar nett, is-sussidjarji li akkwistaw u qed iħaddmu LNG Business u the Financing and Treasury Business huma, rispettivament, LNG Supply u GSTM (kollettivament is-“Sussidjarji”).

(32)

Skont it-talba għal deċiżjoni tat-taxxa LNG tal-2008, LNG Trading se tinkorpora żewġ kumpaniji taxxabbli ġodda Lussemburgiżi: LNG Lussemburgu u LNG Supply. It-talba għad-deċiżjoni tat-taxxa LNG tal-2008 stipulat li LNG Business se tinbiegħ lil LNG Lussemburgu li mbagħad tbiegħha lil LNG Supply (31). Madankollu, aktar tard din l-istruttura ġiet modifikata: skont it-talba għal deċiżjoni tat-taxxa LNG tal-2009, CEF l-ewwel akkwistat ishma ta' LNG Trading, u inkorporat lil LNG Lussemburgu, LNG Supply u LNG Holding. LNG Holding imbagħad ħadet ir-rwol ta' LNG Trading (32) fl-istruttura (33).

(33)

L-istruttura hija implimentata kif ġej:

(34)

Il-Lussemburgu ppreżenta kopji tal-ftehimiet li jirriflettu l-implimentazzjoni minn Engie tat-tranżazzjonijiet deskritti fid-deċiżjonijiet tat-taxxa tal-LNG:

(35)

Skont it-talba għal deċiżjoni tat-taxxa LNG tal-2008, kif aċċettata mill-amministrazzjoni tat-taxxa tal-Lussemburgu, il-profitt annwali li tiġġenera LNG Supply se jkun ugwali għal marġni miftiehem mal-amministrazzjoni tat-taxxa tal-Lussemburgu (“Marġni LNG”). Għalhekk, LNG Supply se tiġi ntaxxata biss fuq dak il-marġni. Id-differenza bejn il-profitt li fil-fatt jiġi ġġenerat kull sena minn LNG Supply u l-Marġini LNG (l-akkumulazzjonijiet ZORA) hija meqjusa bħala spiża deduċibbli relatata ma' LNG ZORA. (49)

(36)

Il-Marġni LNG huwa stabbilit fit-talba għal deċiżjoni tat-taxxa LNG tal-2008 f'ammont li jikkorrispondi għal “firxa netta kumplessiva ta' [1/(50–100)%] tal-valur tal-ammont gross tal-assi kif muri fil-karta tal-bilanċ ta' [LNG Supply], tali firxa netta madankollu ma tkunx inqas minn [0,00-0,50] % tal-fatturat annwali gross derivat mill-Intrapriża” (50). Skont it-talba għal deċiżjoni tat-taxxa LNG tal-2008, “[il-Marġni LNG] se jikkwalifika bħala distakkat” minħabba li LNG Supply mhux ser “iġġarrab kambju u/jew riskju ta' dejn mitluf fuq in-negozju tagħha” (51). It-talba għal deċiżjoni tat-taxxa LNG tal-2008 tkompli tispjega li “id-dħul gross ta' […] ta' [LNG Supply], bit-tnaqqis tal-ispiża operazzjonali kollha mġarrba u bit-tnaqqis tal-ispiża fuq iż-ZORA huwa bejn wieħed u ieħor [il-Marġni LNG]” (52).

(37)

Fi kliem ieħor, qabel il-konverżjoni taż-ZORA, il-bażi tat-taxxa ta' LNG Supply hija limitata għall-Marġni LNG. Il-konverżjoni ma għandha l-ebda impatt fuq il-bażi tat-taxxa ta' LNG Supply, minħabba li l-Akkumulazzjonijiet ZORA jkunu tnaqqsu minn LNG Supply kull sena qabel il-konverżjoni.

(38)

It-talba għal deċiżjoni tat-taxxa LNG tal-2008, kif aċċettata mill-amministrazzjoni tat-taxxa tal-Lussemburgu, tippermetti lil LNG Lussemburgu, matul il-ħajja ta' LNG Zora, li jew iżżomm il-valur ta' ZORA fil-kontijiet tagħha bil-valur kontabilistiku (53) ew, alternattivament, li żżid (jew tnaqqas) il-valur tiegħu mill-prezz tal-akkwist tiegħu għall-prezz ta' tifdija mistenni (54). Għalhekk, matul il-ħajja ta' LNG ZORA, LNG Lussemburgu tista' tagħżel li ma tikkontabbilizza l-ebda dħul taxxabbli jew spiża deduċibbli għal skopijiet ta' taxxa relatata maż-ZORA. Kif se jiġi spjegat fil-premessa 52 hawn taħt, LNG Lussemburgu għażlet li żżomm il-valur ta' ZORA skont il-valur kontabbillistiku.

(39)

Mal-konverżjoni, LNG Lussemburgu se tirċievi l-Ishma ta' LNG Supply, li l-valur tagħhom se jinkorpora l-prezz tal-ħruġ taż-ZORA flimkien mal-Akkumulazzjonijiet ZORA akkumulati sad-data tal-konverżjoni. Skont it-talba għal deċiżjoni tat-taxxa tal-2008, il-konverżjoni hija rregolata mir-reġim speċjali stabbilit fl-Artikolu 22bis tal-Kodiċi tat-Taxxa fuq id-Dħul tal-Lussemburgu (loi modifiée du 4 décembre 1967 concernant l'impôt sur le revenu, “LIR”), sakemm LNG Supply ma tagħżilx li ma tapplikahx. (55) Skont din id-dispożizzjoni, il-konverżjoni tas-self f'ishma mhux se twassal għal xi qligħ kapitali għall-finijiet ta' taxxa (56). Għalhekk, l-Akkumulazzjonijiet ZORA li se tirċievi LNG Lussemburgu mal-konverżjoni mhux se jkunu suġġetti għat-taxxa mal-konverżjoni (57).

(40)

Skont it-talba għal deċiżjoni tat-taxxa LNG tal-2008, kif aċċettata mill-amministrazzjoni tat-taxxa tal-Lussemburgu, LNG Holding se tirreġistra l-pagament skont il-Kuntratt Forward fil-kontijiet tagħha bħala “Assi Finanzjarji Fissi” (58). It-talba għad-deċiżjoni tat-taxxa LNG tal-2008 tispjega li dawk l-assi “se jkunu u se jkomplu jiġu valwati skont il-prezz tal-kost” (59). Għalhekk, LNG Holding mhux se tikkontabbilizza dħul taxxabbli jew spejjeż deduċibbli għall-finijiet tat-taxxa qabel il-konverżjoni taż-ZORA u t-trasferiment minn LNG Lussemburgu tal-Ishma ta' LNG Supply li jkunu għadhom kif inħarġu.

(41)

It-talba għal deċiżjoni tat-taxxa LNG tal-2008 LNG titlob ukoll konferma li “għall-finijiet tal-Artikolu 166 LIR […] il-partiċipazzjoni akkwistata minn [LNG Holding] skont il-Kuntratt Forward [LNG] se tikkwalifika bħala tali mal-mument li l-Kuntratt Forward [LNG] jiġi konkluż ” (60) u li “kwalunkwe dħul (dividendi u qligħ kapitali) derivat minn kumpaniji Lussemburgiżi se jiġi eżentat fuq il-bażi tal-Artikolu 166 LIR” (61). Kif spjegat fit-Taqsima 2.3.2, l-Artikolu 166 LIR huwa d-dispożizzjoni tal-liġi tat-taxxa fuq id-dħul tal-kumpaniji li tirregola l-eżenzjoni tal-parteċipazzjonijiet fil-Lussemburgu. Taħt ir-reġim ta' eżenzjoni tal-parteċipazzjonijiet, dħul li jiġi mill-parteċipazzjonijiet f'entitajiet oħra, bħal ishma, huwa eżentat mit-taxxa sakemm jiġu ssodisfati ċerti kundizzjonijiet.

(42)

Konsegwentement, kwalunkwe dħul taxxabbli b'rabta mas-sjieda tal-Ishma ta' LNG Supply maħruġa fil-qafas tal-konverżjoni ta' LNG ZORA se jkun eżentat mit-taxxa fil-livell ta' LNG Holding bil-kundizzjoni li jiġu ssodisfati r-rekwiżiti tal-Artikolu 166 LIR.

(43)

Skont it-talba għal deċiżjoni tat-taxxa dwar il-konverżjoni ta' LNG, kif aċċettata mill-amministrazzjoni tat-taxxa tal-Lussemburgu, Engie twettaq l-ewwel konverżjoni parzjali ta' LNG ZORA f'ishma għal ammont stmat f'dik id-data ta' USD [300–400] miljun. Dakinhar tal-konverżjoni, tiġi adottata deċiżjoni biex jitnaqqas il-kapital nominali ta' LNG Supply b'ammont daqs l-ammont tal-konverżjoni. Skont it-talba għal deċiżjoni tat-taxxa, “[f] jew [LNG Lussemburgu] il-Konverżjoni Parzjali taż-ZORA ma għandhiex konsegwenzi fuq it-taxxa” (62). “Minħabba t-tnaqqis tal-kapital minn [LNG Supply], [LNG Holding] se tirrikonoxxi profitt ugwali għad-differenza bejn l-ammont nominali ta' ishma kkonvertiti u l-ammont ta' konverżjoni. Dan il-profitt se jkun viżibbli fil-kotba ta' [LNG Holding] u huwa kopert mill-eżenzjoni tal-parteċipazzjonijiet” (63). Għalhekk, il-profitt miksub minn LNG Holding fil-mument tal-kanċellazzjoni tal-ishma minħabba t-tnaqqis kapitali se jkun eżentat mit-taxxa. Dan il-profitt jikkorrispondi għall-Akkumulazzjonijiet ZORA inkorporati fl-Ishma ta' LNG Supply li tirċievi LNG Holding mal-konverżjoni.

(44)

Id-dikjarazzjonijiet tat-taxxa ppreżentati mil-Lussemburgu jirriflettu t-trattament tat-taxxa mogħti lill-kumpaniji involuti fit-tranżazzjonijiet kif deskritt fid-deċiżjonijiet tat-taxxa LNG.

(45)

Il-kontijiet statutorji ta' LNG Supply tal-2010 jindikaw li fl-2009 sar “ftehim ta' self konvertibbli b'mod obbligatorju f'ishma bejn LNG Lussemburgu u LNG Supply” għal ammont ta' USD 646 miljun b'maturità ta' 15-il sena mit-30 ta' Ottubru 2009 (64).

(46)

LNG ZORA huwa rrappurtat bħala obbligazzjoni fil-karta tal-bilanċ u huwa inkluż fid-dikjarazzjoni tat-taxxa ta' LNG Supply għal ammont ugwali għall-valur nominali taż-ZORA (USD 646 miljun) mill-2009 sal-2013 (65). Fl-2014, l-ammont tnaqqas b'USD 193,8 miljun għal USD [300 – 600] miljun wara l-konverżjoni parzjali li saret dik is-sena (66).

(47)

Għal kull sena, ammont ugwali għall-Akkumulazzjonijiet ZORA ġie rreġistrat bħala obbligazzjoni ta' LNG Supply (67) kontra l-ispiża korrispondenti fir-rapport tal-introjtu (68) u konsegwentement ġie mnaqqas mill-bażi tat-taxxa ta' LNG Supply. L-Akkumulazzjonijiet ZORA akkumulati rappurtati fid-dikjarazzjonijiet tat-taxxa ta' LNG Supply huma ppreżentati fi Table 1. It-tnaqqis tal-Akkumulazzjonijiet ZORA akkumulati b'EUR 193,8 miljun fl-2014 huwa dovut għall-impatt tal-konverżjoni parzjali ta' LNG ZORA, li huwa wkoll parzjalment paċut mill-Akkumulazzjonijiet ZORA addizjonali għal dik is-sena. (69)

Tabella 1

Akkumulazzjonijiet ZORA akkumulati mniżżla fid-dikjarazzjonijiet tat-taxxa ta' LNG Supply

(48)

LNG Supply hija ntaxxata fuq il-Marġni LNG. Kif jidher għas-sena 2011 (70), il-Marġni LNG jiġi kkalkulat bħala [1/(50–100)%] tal-assi medji totali tal-kumpanija b'minimu ta' [0,0–0,50]% tal-fatturat gross annwali, f'konformità mad-deċiżjoni tat-taxxa LNG tal-2008. Il-valur medju tal-assi li jiffinanzjaw iż-ZORA kien jammonta għal USD 752 703 699 fl-2011. Għalhekk, il-marġini ta' [1/(50-100)%] ammonta għal USD [100 000–150 000]. Il-fatturat irreġistrat kien ta' USD 1 573 579 569, għalhekk il-marġni ta' [0,0–0,50]% ta' dan l-ammont kien ta' USD [3 500 000-4 000 000]. Bħala tali, dan l-ammont tal-aħħar kien meqjus bħala l-bażi tat-taxxa ta' LNG Supply għall-perjodu tal-2011 (71). LNG Supply għalhekk ħallset EUR [500 000-1 500 000] (72) f'taxxa fuq id-dħul tal-kumpaniji għas-sena tat-taxxa 2011.

Grafika 2

Kalkolu tal-bażi tat-taxxa ta' LNG Supply, kif ippreżentat fl-Anness 3 tad-dikjarazzjoni tat-taxxa tal-2011

Akkumulazzjoni ZORA

L-ammont tal-akkumulazzjoni ZORA kif indikat fil-kontijiet annwali mhuwiex konformi mal-ftehimiet bil-quddiem iffirmati mill-awtoritajiet tat-taxxa fid-9 ta' Settembru 2008 u f'Marzu 2012.

Konsegwentement, tfasslet karta tal-bilanċ tat-taxxa sabiex jiġi rreġistrat l-ammont korrett. Skont il-ftehim bil-quddiem, il-kumpanija mhijiex taxxabbli fuq il-marġini tagħha (ara hawn taħt).

Kalkolu tal-marġni

Marġni nett [1/(50–100)%] tal-valur tal-assi grossi (jiġifieri l-valur medju tal-assi li jiffinanzjaw iż-ZORA) b'minimu ta' [0,0-0,5 %] tal-fatturat gross derivat mill-assi li ġew ittrasferiti lill-Kumpanija (jiġifieri l-qligħ totali tal-Kumpanija)

Marġni minimu

Marġni nett ta' [1/(50-100)%] tal-valur medju tal-assi li jiffinanzjaw iż-ZORA.

(49)

Skont il-kontijiet statutorji ta' LNG Supply tal-2014, il-konverżjoni parzjali ta' LNG ZORA nqasmet “bejn parti mill-ammont nominali u parti mill-akkumulazzjoni” (73). Għaldaqstant, kemm il-valur nominali taż-ZORA kif ukoll l-Akkumulazzjonijiet ZORA akkumulati tnaqqsu b'USD 193,8 miljun fl-2014. (74) F'Settembru 2014, LNG Supply żiedet il-kapital tagħha b'USD 699,9 miljun (75) biex tirrimborża parzjalment lil LNG ZORA. L-Ishma ta' LNG Supply inħarġu bil-valur nominali u sussegwentement ġew ikkanċellati permezz ta' tnaqqis kapitali bl-ammont nominali tagħhom (76). Din il-konverżjoni ma kellhiex konsegwenzi fuq it-taxxa għal LNG Supply.

(50)

Fl-2015, peress li LNG Supply kienet f'pożizzjoni li qed tagħmel it-telf, l-Akkumulazzjonijiet ZORA saru negattivi, b'USD [650–850] miljun, li għalhekk naqqsu, l-ewwel l-Akkumulazzjonijiet ZORA akkumulati li kien baqa' ta' (USD [450–550]) għal USD 0, u mbagħad il-valur nominali pendenti ta' LNG ZORA għal USD [200–250] miljun. (77)

(51)

Fl-2016, l-Akkumulazzjonijiet ZORA reġgħu kienu negattivi b'USD [100–200] miljun, u b'hekk komplew inaqqsu l-ammont pendenti ta' LNG ZORA għal USD [100–200] miljun (78).

(52)

Skont id-dikjarazzjonijiet tat-taxxa ta' LNG Lussemburgu, il-valur ta' LNG ZORA nżamm fl-ammont nominali tiegħu (USD 646 miljun) sal-konverżjoni parzjali tiegħu fl-2014 (79), f'konformità mad-deċiżjoni tat-taxxa LNG tal-2008 (80). Il-Kuntratt Forward LNG jidher ukoll fid-dikjarazzjoni tat-taxxa ta' LNG Lussemburgu bħala obbligazzjoni għall-istess ammont (81).

(53)

Fl-2014, bħala riżultat tal-konverżjoni parzjali, kemm il-valur ta' LNG ZORA (assi) kif ukoll tal-Kuntratt Forward LNG (obbligazzjoni) naqsu b'USD 193,8 miljun għal USD 452,2 miljun, mingħajr impatt fuq ir-rapport tal-introjtu. (82) LNG Lussemburgu ma għażlitx li tapplika l-Artikolu 22bis LIR.

(54)

Fl-2015, kif spjegat fil-premessa 50, il-valur ta' LNG ZORA tnaqqas għal USD [300–600] miljun minħabba Akkumulazzjonijiet ZORA negattivi. LNG Lussemburgu għalhekk naqqset il-valur ta' LNG ZORA għal dan l-ammont u fl-istess ħin naqqset il-valur tal-Kuntratt Forward LNG għall-istess ammont (83).

(55)

Fl-2016, l-istess aġġustamenti twettqu għal LNG ZORA u għall-Kuntratt Forward ta' LNG biex inaqqsu l-valur tagħhom għal USD [100–200] miljun (84).

(56)

Iż-ZORA huwa kontabbilizzat fil-kontijiet statutorji ta' LNG Holding bħala assi finanzjarju (85). Mill-2012, parteċipazzjoni f'LNG Supply għal ammont ugwali għall-valur nominali ta' LNG ZORA tidher ukoll fid-dikjarazzjoni tat-taxxa ta' LNG Holding taħt il-kategorija tal-parteċipazzjonijiet eliġibbli skont l-Artikolu 166 LIR (86).

(57)

Skont id-dikjarazzjoni tat-taxxa u l-kontijiet statutorji tal-2014 ta' LNG Holding, il-kanċellazzjoni tal-Ishma ta' LNG Supply, li ġew riċevuti b'riżultat tal-konverżjoni parzjali ta' LNG ZORA fl-2014, iġġenerat qligħ kapitali ta' USD 506,2 miljun (87), li baqgħu ma ġew intaxxati xejn bis-saħħa tal-applikazzjoni tar-reġim ta' eżenzjoni tal-parteċipazzjonijiet (l-Artikolu 166 LIR).

(58)

Fl-2015 u fl-2016, LNG Holding ikkontabbilizzat aġġustament ta' indeboliment fuq il-Kuntratt Forward tal-LNG li jirrifletti t-tnaqqis fil-valur ta' LNG ZORA wara l-Akkumulazzjonijiet ZORA negattivi, kif spjegat fil-premessi 50 u 51 (88). Dan l-indeboliment kien rifless bħala imposta fir-rapport tal-introjtu ta' LNG Holding.

(59)

Skont it-talba għad-deċiżjoni tat-taxxa tal-2010 GSTM, Engie se timplimenta struttura simili għal dik deskritta fid-deċiżjonijiet tat-taxxa ta' LNG: GSTM takkwista l-Financing and Treasury Business u tiffinanzja l-akkwist permezz ta' GSTM ZORA mogħti minn EIL. Mal-konverżjoni (89), GSTM toħroġ ishma (“Ishma ta' GSTM”) li jinkorporaw l-ammont nominali taż-ZORA biż-żieda/bit-tnaqqis tal-Akkumulazzjonijiet ZORA. Imbagħad, EIL tiffinanzja l-investiment f'GSTM ZORA permezz tal-Kuntratt Forward GSTM li tkun għamlet ma' CEF. Skont dak il-kuntratt, EIL se taqbel li tittrasferixxi lil CEF l-Ishma ta' GSTM. Il-prezz tal-Ishma ta' GSTM jikkorrispondi għall-ammont nominali ta' GSTM ZORA. (90)

(60)

It-talba għal deċiżjoni tat-taxxa GSTM tal-2012 fiha pożizzjoni tat-taxxa fuq l-istess ZORA li hija kważi identika għal dik tat-talba għal deċiżjoni tat-taxxa LNG tal-2008, ħlief li din id-deċiżjoni tikkontempla, inter alia, żieda potenzjali futura fl-ammont ta' GSTM ZORA (91).

(61)

Il-Lussemburgu ppreżenta kopji tad-dokumenti u tal-ftehimiet li jirriflettu l-implimentazzjoni minn Engie tat-tranżazzjonijiet deskritti fid-deċiżjonijiet tat-taxxa GSTM:

(62)

Skont it-talba għal deċiżjoni tat-taxxa GSTM tal-2010, kif approvata mill-amministrazzjoni tat-taxxa tal-Lussemburgu, il-profitt annwali taxxabbli ta' GSTM għandu jkun ugwali għal marġni miftiehem mal-amministrazzjoni tat-taxxa tal-Lussemburgu (“Marġni tal-GSTM”). Għalhekk, GSTM se tiġi ntaxxata biss fuq dak il-marġni. Id-differenza bejn il-profitt li fil-fatt jiġi ġġenerat minn GSTM u l-Marġini GSTM (l-Akkumulazzjonijiet ZORA) hija meqjusa bħala spiża deduċibbli relatata ma' GSTM ZORA (105).

(63)

Il-marġni GSTM huwa stabbilit fit-talba għal deċiżjoni tat-taxxa GSTM tal-2010 bħala ammont li jikkorrispondi għal “firxa netta kumplessiva ta' [1/(50-100)%] fuq il-valur prinċipali tal-assi kollha tagħha, inklużi dawk l-assi finanzjati b'self normali” (106). It-talba għal deċiżjoni tat-taxxa GSTM tal-2010 tikkunsidra li l-Marġini GSTM huwa skont il-prinċipju tad-distakkament (107).

(64)

It-talba għal deċiżjoni tat-taxxa GSTM tal-2012 tikkontempla modifika fil-Marġni tal-GSTM. Din tgħid li l-ammont tiegħu “se jiġi ddeterminat f'ittra APA futura akkumpanjata minn rapport dwar l-PT [l-ipprezzar tat-trasferiment]” (108). Skont il-kontijiet finanzjarji statutorji tal-2011 tal-GSTM (109), il-bidla fil-Marġni GSTM mill-1 ta' Jannar 2012 kienet minħabba d-dħul fis-seħħ taċ-Ċirkolari Amministrattiva tat-28 ta' Jannar 2011 dwar l-attivitajiet ta' finanzjament intragrupp (“Ċirkulari 164/2”) (110). Din iċ-Ċirkolari talbet il-preżentazzjoni ta' studji dwar l-ipprezzar ta' trasferiment (“PT”) fir-rigward ta' kwalunkwe talba għal deċiżjoni tat-taxxa li titlob il-ftehim dwar prezzijiet ta' trasferiment għal tranżazzjonijiet ta' finanzjament intragrupp (bħall-Marġni tal-GSTM) (111). Għaldaqstant, il-konsulent tat-taxxa ppreżenta, permezz tal-ittri tal-11 ta' Lulju 2012 u tal-11 ta' Novembru 2013, żewġ talbiet għal deċiżjoni tat-taxxa bi studji PT li jikkonċernaw l-istabbiliment tal-Marġni GSTM (112). Skont il-Lussemburgu, dawn it-talbiet għal deċiżjoni tat-taxxa ma ġewx approvati mill-amministrazzjoni tat-taxxa. Fi kliem ieħor, l-amministrazzjoni tat-taxxa tal-Lussemburgu ma ħarġitx deċiżjoni tat-taxxa li tikkonferma l-valur tal-marġni tal-GSTM propost mill-konsulent tat-taxxa ta' Engie fl-ittri tiegħu tal-11 ta' Lulju 2012 u tal-11 ta' Novembru 2013 (113).

(65)

It-talba għal deċiżjoni tat-taxxa GSTM tal-2010 tindika wkoll li “fil-każ improbabbli li t-trattament kontabilistiku ma jkunx totalment konformi mal-obbligi skont il-ftehim ZORA, il-profitt jew it-telf riżultanti rifless fil-kontijiet annwali mhux se jaffettwa l-pożizzjoni tat-taxxa stabbilita hawn fuq” (114).

(66)

Għalhekk il-konklużjoni hija li qabel il-konverżjoni ta' GSTM ZORA, il-bażi tat-taxxa ta' GSTM hija limitata għall-Marġni GSTM. Il-konverżjoni ta' GSTM ZORA ma għandhiex impatt fuq il-bażi tat-taxxa ta' GSTM.

(67)

It-trattament tat-taxxa mogħti lil EIL huwa simili għal dak deskritt għal LNG Lussemburgu (115), u jsegwi argumenti identiċi (116). Għalhekk, matul il-ħajja ta' GSTM ZORA, EIL tista' tagħżel li ma tikkontabbilizza l-ebda dħul taxxabbli jew spiża deduċibbli. Mal-konverżjoni, jekk EIL tagħżel li tapplika r-reġim speċjali stipulat fl-Artikolu 22bis LIR, hija mhux se tirrikonoxxi dħul (117) u għalhekk ma tkun dovuta l-ebda taxxa fuq id-dħul tal-kumpaniji (118). Kif se jiġi spjegat fil-premessa 76, EIL tagħżel li żżomm il-valur ta' GSTM ZORA skont il-valur kontabilistiku.

(68)

It-trattament tat-taxxa mogħti lil CEF huwa simili għal dak deskritt għal LNG Holding (119). Għaldaqstant, CEF mhijiex se tikkontabilizza dħul taxxabbli jew spejjeż deduċibbli għal skopijiet ta' taxxa qabel il-konverżjoni taż-ZORA (120).

(69)

It-talba għal deċiżjoni tat-taxxa GSTM tal-2010 titlob ukoll għal konferma li “il-parteċipazzjoni mixtrija minn CEF skont il-Kuntratt Forward se tikkwalifika bħala parteċipazzjoni diretta fil-kapital ta' GSTM mal-mument li fih jiġi konkluż il-Kuntratt Forward għall-finijiet tal-Artikolu 166 LIR” (121). Konsegwentement, kwalunkwe dħul taxxabbli b'rabta mas-sjieda tal-Ishma ta' GSTM se jkun eżentat mit-taxxa fil-livell ta' CEF, bil-kundizzjoni li jiġu ssodisfati r-rekwiżiti tal-Artikolu 166 LIR.

(70)

Id-dikjarazzjonijiet tat-taxxa ppreżentati mil-Lussemburgu jirriflettu t-trattament tat-taxxa mogħti lill-kumpaniji involuti fit-tranżazzjonijiet kif deskritt fid-deċiżjonijiet tat-taxxa GSTM.

(71)

Il-kontijiet statutorji tal-2012 ta' GSTM jindikaw li EIL “tat self konvertibbli b'mod obbligatorju ta' EUR 1 036 912 506,84 lil [GSTM] b'maturità ta' 15-il sena minnĠunju, 17 2011” (122).

(72)

GSTM ZORA huwa rrappurtat bħala obbligazzjoni fil-karta tal-bilanċ inkluża fid-dikjarazzjoni tat-taxxa ta' GSTM għal ammont ugwali għall-valur nominali taż-ZORA (EUR 1 036 912 506,84). Dak l-ammont ma jvarjax matul is-snin (123).

(73)

Għal kull sena, ammont ugwali għall-Akkumulazzjonijiet ZORA ġie rreġistrat bħala obbligazzjoni ta' GSTM (124) kontra l-ispiża korrispondenti fir-rapport tal-introjtu (125) u konsegwentement ġie mnaqqas mill-bażi tat-taxxa ta' GSTM. L-allokazzjonijiet ZORA akkumulati rrappurtati fid-dikjarazzjonijiet tat-taxxa ta' GSTM matul il-perjodu 2011 sal-2015 huma ppreżentati Table 2 hawn taħt.

Tabella 2

Akkumulazzjonijiet ZORA akkumulati mniżżla fid-dikjarazzjonijiet tat-taxxa ta' GSTM

(74)

Skont id-deċiżjoni tat-taxxa GSTM tal-2010, GSTM hija ntaxxata fuq il-Marġni GSTM. Il-Grafika 3 hawn taħt jidher kif ġie ddeterminat l-marġni GSTM għas-sena 2011 (126). Il-“qligħ nett qabel it-taxxa u l-Akkumulazzjoni ZORA” ammontaw għal EUR 45 522 581. Il-bażi tat-taxxa ta' GSTM hija kkalkolata bħala [1/(50–100)%] tal-assi medji totali tal-kumpanija għall-perjodu tal-2011, li ammontaw għal EUR 3,7 biljun. Il-profitt taxxabbli miżmum minn GSTM fuq din il-bażi jammonta għal EUR [500 000–600 000] (li miegħu jiżdied ammont iddenominat bħala “remunerazzjoni ta' kapital” li jammonta għal EUR [6 000–11 000]). Id-differenza bejn dan l-ammont u “l-qligħ nett qabel it-taxxa u l-Akkumulazzjoni ZORA” hija l-ammont ta' EUR 44,9 miljun, li ġie rreġistrat fid-dikjarazzjoni tat-taxxa bħala Akkumulazzjoni ZORA deduċibbli għall-finijiet ta' taxxa.

Grafika 3

Kalkolu tal-bażi tat-taxxa ta' GSTM għas-sena 2011, kif ippreżentat fl-Anness 3 tad-dikjarazzjoni tat-taxxa tal-2011 ta' GSTM

(75)

Id-dikjarazzjonijiet tat-taxxa ta' GSTM juru li, kif indikat qabel (127), il-Marġni ta' GSTM inbidel wara l-2011. Kif muri għas-snin 2012 u 2013, il-marġni ta' GSTM mhuwiex stabbilit għal [1/(50–100)%] fuq il-valur tal-assi, kif kien inizjalment ikkontemplat fit-talba għal deċiżjoni tat-taxxa GSTM tal-2010, iżda għal [0-1 %] fuq il-valur tad-djun li jiffinanzjaw l-assi (128). Fl-2014, il-Marġni ta' GSTM kien stabbilit għal [0-1 %] tal-ammont totali ta' self u riċevibbli. Id-dikjarazzjonijiet tat-taxxa jindikaw li l-Marġini ta' GSTM għal dawn is-snin ġie kkalkulat b'referenza għat-talbiet għal deċiżjoni tat-taxxa tal-11 ta' Lulju 2012 u tal-11 ta' Novembru 2013 (129) li, kif indikat fil-premessa (64) qatt ma ġew aċċettati mill-amministrazzjoni tat-taxxa tal-Lussemburgu.

Grafika 4

Il-kalkolu tal-bażi tat-taxxa ta' GSTM b'referenza għat-talbiet għal deċiżjonijiet tal-2010 u tal-2012 fl-Anness 3 għad-dikjarazzjoni tat-taxxa tal-2012 ta' GSTM

L-Annessi tad-Déclaration pour l'impôt sur le revenu des collectivités et pour l'impôt commercial għall-2012 u d-dikjarazzjoni tal-assi personali mill-1 ta' Jannar 2013 f'isem:

GDF SUEZ Treasury Management S.à r.l tax No 2011 2416 545

Noti ta' spjegazzjoni

Kummenti ġenerali

Qed issir referenza għall-ittri tal-konsulent tat-taxxa tad-9 ta' Frar 2010 u tal-15 ta' Ġunju 2012.

Marġni fuq in-negozju ta' finanzjament

Qed issir referenza għall-ftehimiet dwar l-ipprezzar ta' trasferiment bil-quddiem tal-konsulent tat-taxxa tal-11 ta' Lulju 2012 u tal-11 ta' Novembru 2013 (l-APAs).

Il-marġni fuq in-negozju ta' finanzjament huwa kkalkolat kif ġej:

Redittu fuq il-kapital ta' riskju

Kalkolu tal-akkumulazzjoni ZORA

(76)

Il-valur ta' GSTM ZORA fil-kotba ta' EIL inżamm skont l-ammont nominali, EUR 1 036 912 507 (130), f'konformità mal-għażla mogħtija mid-deċiżjonijiet tat-taxxa GSTM (131).

(77)

Finalment, tidher ukoll parteċipazzjoni f'GSTM għal ammont ugwali għall-valur nominali ta' GSTM ZORA fid-dikjarazzjoni tat-taxxa ta' CEF taħt il-kategorija tal-parteċipazzjonijiet eliġibbli skont l-Artikolu 166 LIR (132).

(78)

Ir-regoli ordinarji tat-tassazzjoni tal-kumpaniji fil-Lussemburgu jinsabu fl-LIR. Skont l-Artikolu 159 LIR, il-kumpaniji residenti għall-finijiet ta' taxxa huma soġġetti għal taxxa fuq it-totalità tal-profitti tagħhom (133). L-Artikolu 163 LIR jipprevedi li t-taxxa fuq id-dħul tal-kumpaniji tal-Lussemburgu hija applikabbli għall-profitt taxxabbli ta' kontribwent f'sena partikolari (134). Qabel l-2013, il-kumpaniji kollha soġġetti għat-taxxa fil-Lussemburgu kienu ntaxxati fuq il-profitt taxxabbli tagħhom bir-rata tat-taxxa standard ta' 28,80 % (135). Sa mill-2013, ir-rata tat-taxxa standard saret 29,22 %.

(79)

L-Artikolu 18(1) LIR jipprevedi l-metodu biex jiġi stabbilit il-profitt annwali ta' kontribwent kumpanija: “Il-profitt huwa determinat bħala d-differenza bejn l-assi netti fit-tmiem u l-assi netti fil-bidu tal-perjodu tar-rapportar, biż-żieda tal-ġbid għall-użu personali u bit-tnaqqis tal-kontribuzzjonijiet addizzjonali li saru matul il-perjodu tar-rapportar”.

(80)

L-Artikolu 23 LIR jispjega li l-valur tal-assi netti għandu jiġi determinat skont ir-regoli u l-prinċipji tal-kontabilità (136).

(81)

L-Artikolu 40 LIR jistabbilixxi l-prinċipju li l-karta tal-bilanċ tat-taxxa tintrabat mal-karta tal-bilanċ kummerċjali (“accrochement du bilan fiscal au bilan commercial”). Skont dan il-prinċipju, il-karta tal-bilanċ tat-taxxa — li tistabbilixxi l-bażi tat-taxxa annwali — għandha tikkorrispondi għall-karta tal-bilanċ kummerċjali sakemm ma tapplikax regola tat-taxxa speċifika li teħtieġ l-użu ta' valur differenti. (137)

(82)

Skont l-Artikolu 97(1) LIR, introjtu minn dħul minn investiment jenħtieġ li jinkludi dividendi, parteċipazzjonijiet fi profitti u kwalunkwe profitt ieħor allokat abbażi ta' ishma jew parteċipazzjonijiet oħra f'kumpaniji (138).

(83)

Fir-rigward tat-tassazzjoni tad-dividendi u dħul ieħor li jirriżulta minn parteċipazzjonijiet, l-Artikolu 166 LIR jintroduċi l-hekk imsejjaħ “reġim ta' eżenzjoni tal-parteċipazzjonijiet” fil-Lussemburgu. Dan ir-reġim jipprevedi eżenzjoni mit-taxxa fuq id-dħul tal-kumpaniji, mit-taxxa minn ras il-għajn u mit-taxxa fuq il-ġid nett għal dħul li jiġi mill-parteċipazzjonijiet miżmuma minn entitajiet li jissodisfaw ċerti kriterji. Fl-opinjoni tiegħu dwar l-abbozz ta' liġi li jinkorpora din id-dispożizzjoni fil-LIR, il-Kunsill tal-Istat tal-Lussemburgu jgħid li dan ir-reġim huwa ġġustifikat sabiex tiġi evitata tassazzjoni tripla għal raġunijiet ta' ekwità fiskali u ordni ekonomika (139).

(84)

L-Artikolu 166(2) LIR jelenka l-entitajiet li jistgħu jibbenefikaw mill-eżenzjoni tal-parteċipazzjonijiet, li jinkludu kumpaniji b'ishma konġunti soġġetti għat-taxxa fil-Lussemburgu (bħal “société anonyme” u “société à responsabilité limitée”), u l-kumpaniji elenkati skont l-Artikolu 2 tad-Direttiva tal-Kunsill 90/435/KEE (140).

(85)

Sabiex wieħed jibbenefika mill-eżenzjoni, iridu jiġu ssodisfati żewġ kundizzjonijiet kumulattivi: l-ewwel, l-entitajiet irid ikollhom jew jimpenjaw ruħhom li se jżommu l-parteċipazzjoni għal perjodu mhux interrott ta' mill-inqas 12-il xahar; it-tieni, il-parteċipazzjoni ma għandhiex tkun ta' inqas minn 10 % tal-kapital tal-entità bil-parteċipazzjoni fiha jew minn prezz ta' akkwist ta' EUR 1,2 miljun (141).

(86)

Dment li dawn iż-żewġ kundizzjonijiet ikunu ssodisfati, id-dħul li jkun ġej mill-parteċipazzjoni (dividendi, qligħ kapitali jew kwalunkwe dħul ieħor li jkun ġej mill-parteċipazzjoni) ikun eżentat għal kollox mit-taxxa tal-kumpaniji tal-Lussemburgu. Skont l-Artikolu 166(9) LIR u r-Règlement grand-ducal du 21 décembre 2001 (“Digriet tal-21 ta' Diċembru 2001”), (142) l-eżenzjoni tal-partiċipazzjonijiet tapplika wkoll għall-qligħ kapitali (revenus dégagés par la cession de la participation) (143).

(87)

It-tassazzjoni tal-profitti li jiġu mqassma fil-livell tal-entità li tiddistribwixxi hija rregolata mill-Artikolu 164 LIR. L-Artikolu 164(1) LIR jipprevedi li, sabiex tiġi ddeterminata l-bażi tat-taxxa, huwa irrilevanti jekk il-profitt ikunx tqassam jew (144) le. L-Artikolu 164(2) LIR jispjega x'għandu jinftiehem bħala “distribuzzjoni” għall-finijiet tal-Artikolu 164(1) LIR u f'din il-kategorija jinkludi d-distribuzzjonijiet lil kwalunkwe tip ta' azzjonist, lil detenturi ta' ċertifikati ta' parteċipazzjoni, lill-ishma tal-fundaturi, lil ishma ta' tgawdija, jew lil kwalunkwe titolu ieħor, inklużi bonds b'rendiment varjabbli (145).

(88)

Il-prinċipju ġenerali li jikkonċerna l-konverżjoni tal-assi huwa stabbilit fl-Artikolu 22(5) LIR, li skontu skambju ta' assi jenħtieġ li jiġi kkunsidrat bħala l-bejgħ tal-assi partikolari, segwit bl-akkwist tal-assi akkwistat bi prezz li jikkorrispondi għall-valur ta' disponiment stmat tiegħu (146), u b'hekk potenzjalment iwassal għal qligħ kapitali taxxabbli.

(89)

Bħala eċċezzjoni għal din ir-regola ġenerali, l-Artikolu 22bis (2) numru 1 LIR jistipula li l-konverżjoni ta' self f'kapital azzjonarju tad-debitur ma twassalx għal realizzazzjoni ta' qligħ kapitali għal skopijiet ta' taxxa tad-dħul tal-kumpaniji. Dik l-istess dispożizzjoni tipprevedi li tali eċċezzjoni ma tkoprix l-imgħax dovut fuq is-self li jikkorrispondi għas-sena tal-konverżjoni sad-data tal-iskambju (147).

(90)

L-Artikolu 6 tal-Liġi dwar l-Adattament tat-Taxxa tal-Lussemburgu jew Steueranpassungsgesetz (“StAnpG”) tipprojbixxi li t-taxxi jiġu evażi jew mitigati permezz ta' abbuż minn forom jew minn kostruzzjonijiet li huma legali taħt il-liġi ċivili. Skont l-Artikolu 6 StAnpG, jekk il-forma legali jew il-kostruzzjoni li ddawwar tranżazzjoni ma tkunx xierqa f'termini tas-sustanza tagħha, it-taxxa għandha tiġi vvalutata skont is-sustanza tat-tranżazzjoni, daqslikieku ġiet konkluża fil-forma legali xierqa. (148)

(91)

Fid-Deċiżjoni tal-ftuħ tagħha, il-Kummissjoni kienet tal-fehma preliminari li t-trattament tat-taxxa mogħti abbażi tad-deċiżjonijiet tat-taxxa kkontestati jidher li jikkostitwixxi għajnuna mill-Istat fl-ambitu tal-Artikolu 107(1) tat-Trattat u qajmet dubji dwar il-kompatibbiltà ta' dawk il-miżuri mas-suq intern.

(92)

B'mod aktar speċifiku, fid-Deċiżjoni tal-ftuħ, il-Kummissjoni qajmet id-dubji li ġejjin:

(93)

Taħt l-ewwel dubju, il-Kummissjoni esprimiet dubji dwar id-deduzzjoni tal-Akkumulazzjonijiet ZORA (149). Il-Kummissjoni ddubitat il-kwalifikazzjoni tal-Akkumulazzjonijiet Zora bħala imgħax fl-ambitu tal-Artikolu 109 LIR u għalhekk id-deduzzjoni tagħhom. B'mod aktar preċiż, il-Kummissjoni kkunsidrat li l-Akkumulazzjonijet ZORA jenħtieġ li jitqiesu bħala distribuzzjonijiet tal-profitt f'konformità mal-Artikolu 164(1) u (2) LIR u għalhekk id-deduzzjoni ma kellhiex tiġi permessa. Il-Kummissjoni qajmet ukoll dubji li meta ppermetta d-deduzzjoni tal-Akkumulazzjonijiet ZORA, il-Lussemburgu applika ħażin l-Artikolu 164(3) LIR. Din id-dispożizzjoni teħtieġ l-inklużjoni fil-bażi tat-taxxa ta' kumpanija, bħala distribuzzjoni tal-profitti moħbija, ta' kwalunkwe ammont imħallas lill-azzjonist tagħha mhux skont il-prinċipju ta' distakkament. B'mod aktar preċiż, il-Kummissjoni staqsiet jekk kumpanija indipendenti li tinnegozja skont il-prinċipju ta' distakkament kinitx tagħti self lil LNG Supply u lil GSTM bl-istess termini bħaż-ZORAs.

(94)

F'każ li l-awtoritajiet tat-taxxa tal-Lussemburgu kellhom id-dritt li jippermettu d-deduzzjoni tal-Akkumulazzjonijiet ZORA, il-Kummissjoni qajmet dubju ieħor li jista' jinqasam f'żewġ partijiet:

(95)

Fl-aħħar nett, it-tielet dubju kien ibbażat fuq l-effett kombinat tad-deduċibbiltà tal-Akkumulazzjonijiet ZORA fuq il-livell tas-Sussidjarji u n-nontassazzjoni tad-dħul korrispondenti fil-livell ta' EIL u LNG Lussemburgu minħabba l-applikazzjoni tal-Artikolu 22bis LIR (152). Meta għaqqad dawn it-tnejn flimkien, il-Lussemburgu approva n-nontassazzjoni effettiva ta' sehem imdaqqas mill-profitti ġġenerati min-negozji ta' GSTM u ta' LNG Supply fil-Lussemburgu. Il-Kummissjoni staqsiet jekk dan tbigħedx l-objettiv tas-sistema tat-taxxa tal-kumpaniji tal-Lussemburgu, li skont l-Artikolu 163 LIR huwa li jintaxxa l-profitti tal-kumpaniji kollha soġġetti għat-taxxa fil-Lussemburgu (153).

(96)

Bħala parti minn dan it-tielet dubju, il-Kummissjoni staqsiet ukoll jekk it-trattament tat-taxxa approvat mid-deċiżjonijiet tat-taxxa jistax jikkostitwixxi applikazzjoni żbaljata tal-Artikolu 166 LIR, li l-objettiv tiegħu huwa li tiġi eliminata t-tassazzjoni ekonomika doppja tal-istess profitt. B'mod partikolari, il-Kummissjoni nnotat li l-applikazzjoni tal-Artikolu 166 LIR deher li kienet invokata minn CEF u minn LNG Holding biex jiġu eżentati profitti li ma kinux ġew intaxxati fil-livell ta' GSTM u ta' LNG Supply (154).

(97)

Il-Kummissjoni indikat li d-deċiżjonijiet tat-taxxa kkontestati kienu jidhru li jipprovdu vantaġġ selettiv mhux biss lill-kumpaniji azzjonarji CEF u LNG Holding iżda wkoll lill-grupp Engie kollu kemm hu (155).

(98)

Il-Kummissjoni kienet ukoll tal-fehma preliminari li l-effett tad-deċiżjonijiet tat-taxxa kkontestati jista' jidderoga mid-dispożizzjonijiet tal-Lussemburgu dwar l-abbuż tad-dritt fil-qasam tat-taxxa (l-Artikoli 5 u 6 StAnpG) (156).

(99)

F'laqgħa fl-1 ta' Ġunju 2017 u fl-ittra tal-11 ta' Diċembru 2017, wara l-preżentazzjoni ta' informazzjoni addizzjonali mil-Lussemburgu u minn Engie, il-Kummissjoni kompliet tiżviluppa xi aspetti oħra tal-valutazzjoni tagħha tal-każ. Il-Kummissjoni nnutat li l-Artikolu 109(1) LIR mhuwiex applikabbli għal kumpaniji inkorporati skont il-liġi tal-Lussemburgu u/jew għat-taxxa tal-kumpaniji residenti fil-Lussemburgu. Il-Kummissjoni nnutat ukoll li l-Artikolu 22bis LIR huwa reġim fakultattiv u li l-kumpaniji involuti f'dan il-każ, sal-lum, għadhom ma għażlux li japplikawh. Fl-aħħar nett, il-Kummissjoni indikat li, skont il-Lussemburgu, id-deċiżjonijiet tat-taxxa kkontestati huma bbażati fuq ir-reġim ġenerali tat-taxxa tal-kumpaniji (“se fondent sur le régime général d'imposition sur les sociétés”) (157) u b'mod partikolari fuq il-prinċipju li l-karta tal-bilanċ tat-taxxa tiġi marbuta mal-karta tal-bilanċ kummerċjali (“le principe de l'accrochement du bilan fiscal au bilan commercial”) (158). F'dan ir-rigward, u kif indikat fid-deċiżjoni tal-Ftuħ (159), is-sistema ta' referenza applikabbli tista' tkun is-sistema tat-taxxa tal-kumpaniji tal-Lussemburgu, li l-objettiv tagħha huwa li jiġi ntaxxat il-profitt tal-kumpaniji soġġetti għat-taxxa tal-kumpaniji fil-Lussemburgu.

(100)

Barra minn hekk, il-Kummissjoni spjegat fl-Ittra tal-11 ta' Diċembru 2017, fir-rigward tal-vantaġġ lill-grupp Engie (160), li peress li l-objettiv tas-sistema tat-taxxa tal-kumpaniji tal-Lussemburgu huwa li jinkludi, fil-prinċipju, fil-bażi tat-taxxa, il-profitti kollha rreġistrati fil-kontijiet tal-kumpanija, it-tranżazzjonijiet ta' finanzjament intragrupp bejn kumpaniji li għal skopijiet ta' taxxa huma residenti fil-Lussemburgu ma għandhom ikollhom l-ebda impatt fuq is-somma tal-bażijiet tat-taxxa ta' dawn l-entitajiet jew, fi kliem ieħor, fuq il-bażi tat-taxxa kombinata tagħhom. Madankollu, f'dan il-każ, il-Kummissjoni nnotat li d-deċiżjonijiet tat-taxxa kkontestati jwasslu għal tnaqqis fil-bażi tat-taxxa kombinata ta' Engie fil-Lussemburgu (raġunament fil-livell ta' grupp).

(101)

Il-Lussemburgu l-ewwel ifakkar li, f'konformità mal-Artikolu 114 tat-Trattat, id-dispożizzjonijiet tat-taxxa jaqgħu taħt ir-responsabbiltà tal-Istati Membri. Huwa biss jekk dispożizzjoni tat-taxxa tikser l-Artikolu 107 tat-Trattat li l-Kummissjoni tista' tivvalutaha.

(102)

It-tieni, il-Lussemburgu jikkontesta l-preżenza ta' vantaġġ selettiv, fuq il-bażi tar-raġunijiet li ġejjin.

(103)

L-ewwel nett, skont il-Lussemburgu, l-Artikolu 109 LIR japplika biss għall-individwi u mhux applikabbli għall-kumpaniji.

(104)

It-tieni nett, il-Lussemburgu jargumenta li ż-ZORAs huma, mill-perspettiva tat-taxxa tal-Lussemburgu, strument ta' dejn; għalhekk, ma jistgħux jiġu assimilati bħala parteċipazzjonijiet ta' ekwità (161). Din il-klassifikazzjoni hija ġġustifikata prinċipalment għax ma jeżistux drittijiet assoċjati ta' vot, drittijiet ta' ġestjoni, dividendi jew dividendi ta' likwidazzjoni, l-obbligu ta' ħlas lura f'data fissa, in-nuqqas ta' att notarizzat li jirrikonoxxi żieda fil-kapital u l-forma legali tal-kuntratt. Barra minn hekk, il-Lussemburgu jargumenta li ż-ZORAs mhumiex strument ta' nota li jagħti d-dritt ta' xi sehem annwali mill-profitti jew ta' xi dividendi ta' likwidazzjoni. Għalhekk, l-Artikoli 164(1) u 164(2) LIR, fil-fehma tal-Lussemburgu, mhumiex applikabbli.

(105)

It-tielet nett, rigward il-prinċipju ta' distakkament taż-ZORAs, il-Lussemburgu jqis li l-Kummissjoni injorat il-kategoriji differenti ta' investituri. Iż-ZORAS mhumiex ftehimiet standard ta' self iżda strumenti atipiċi li jkopru lil dak li qed jissellef kontra kull riskju operazzjonali u jippermettu lill-investitur jibbenefika minn redditu aħjar fuq l-investiment. Minħabba l-volatilità tas-suq u d-dipendenza fuq il-finanzjament, l-użu ta' ZORA huwa loġiku għal minn qed isellef u fis-suq finanzjarju jistgħu jiġu osservati strumenti simili bħal titoli li jirreplikaw il-prestazzjoni ta' sottostanti partikolari. Għalhekk, it-termini taż-ZORA huma distakkati u l-Artikolu 164(3) LIR, skont il-Lussemburgu, mhuwiex applikabbli.

(106)

Skont il-Lussemburgu, is-sistema ta' referenza tikkonsisti, l-ewwel nett, mill-Artikoli 18, 40 u 23 LIR, li jistipulaw id-determinazzjoni tal-bażi tat-taxxa, ir-rabta tal-karta tal-bilanċ kummerċjali mal-karta tal-bilanċ tat-taxxa u l-prinċipju tal-prudenza; u t-tieni, mill-Artikolu 22bis LIR.

(107)

Il-Lussemburgu jargumenta li d-determinazzjoni tal-profitt taxxabbli, kif definit fl-Artikolu 18 LIR, issegwi żewġ kunċetti ewlenin: l-ewwel nett, ir-rabta tal-karta tal-bilanċ kummerċjali mal-karta tal-bilanċ tat-taxxa (l-Artikolu 40 LIR), u t-tieni, il-kunċett tal-prudenza, skont liema profitt ma jistax jiġi ntaxxat sakemm ma jkunx sar.

(108)

Fir-rigward tal-Artikolu 22bis LIR, il-Lussemburgu jgħid li dan huwa reġim fakultattiv applikabbli għall-kumpaniji b'konformità mal-Artikolu 162 LIR (162).

(109)

Il-Lussemburgu jikkontesta li l-Artikolu 163 LIR jinkludi kwalunkwe objettiv, jew prinċipju, tas-sistema tat-taxxa tal-kumpaniji tal-Lussemburgu skont liema l-profitti kollha rreġistrati minn kumpaniji residenti fil-Lussemburgu għandhom jiġu intaxxati. Il-Lussemburgu jqis li dan l-objettiv la huwa kkunsidrat u lanqas rifless f'xi dispożizzjoni tal-liġi. Skont il-Lussemburgu, id-definizzjoni ta' sistema ta' referenza għandha tkun ibbażata fuq liġijiet u mhux fuq prinċipju jew objettiv ipotetiku, li l-interpretazzjoni tiegħu tirriskja li wieħed imur lil hinn mit-termini preċiżi tal-liġi.

(110)

Il-Lussemburgu jargumenta li, meta aċċetta d-deduċibbiltà tal-ispejjeż relatati maż-ZORAs, it-trattament tat-taxxa approvat mid-deċiżjonijiet tat-taxxa kkontestati kien kompletament konformi mal-Artikoli 14 sa 60 LIR u b'hekk mal-Artikoli 18, 40 u 23 LIR. Il-Lussemburgu jqis li l-Kummissjoni injorat li l-ispejjeż deduċibbli fil-livell ta' GSTM u ta' LNG Supply la huma mgħaxijiet u lanqas dividendi. Ir-rimborż taż-ZORA jista' jkun bi prezz ogħla mill-valur nominali tal-istrument. F'konformità mal-kunċett tal-prudenza, min jissellef għandu jirrikonoxxi spiża li tirrifletti dan ir-riskju. Skont l-Artikoli 18, 40 u 23 LIR, din l-ispiża hija deduċibbli mit-taxxa.

(111)

Il-Lussemburgu jqis li t-trattament tat-taxxa approvat mid-deċiżjonijiet tat-taxxa kkontestati kien kompletament konformi mal-Artikoli 97 u 22bis LIR. Il-Lussemburgu jargumenta li l-Kummissjoni kienet żbaljata meta kkunsidrat li kwalunkwe mgħax kapitalizzat għandu jkun taxxabbli. B'mod aktar ġenerali, il-Lussemburgu jsostni li l-Kummissjoni ma qisitx li, kif spjegat fil-premessa 110, l-ispejjeż deduċibbli la huma mgħax u lanqas dividendi. Il-kunċett tal-prudenza jippresupponi li spiża, li hija deduċibbli għal finijiet tat-taxxa għal parti waħda, mhux neċessarjament twassal għal profitt taxxabbli għall-parti l-oħra. Iż-ZORAs għandhom jiġu valwati fil-livell ta' min isellef bil-prezz tal-akkwist u mhux bil-prezz tas-suq. Għalhekk, il-Lussemburgu jqis li ż-ZORAs ma jwasslux għal dħul taxxabbli fil-livell ta' min isellef sad-data tal-konverżjoni.

(112)

Minn perspettiva tat-taxxa, mad-data tal-konverżjoni, jiġi rikonoxxut profitt, ugwali għad-differenza bejn il-prezz tal-akkwist u l-valur tas-suq tal-ishma. Madankollu, il-Lussemburgu jargumenta li EIL u LNG Lussemburgu jistgħu jagħżlu l-mekkaniżmu tal-Artikolu 22bis LIR. L-ishma riċevuti minn min isellef jistgħu jitqiesu bħala li jissostitwixxu ż-ZORAs. F'każ bħal dan, l-ishma jistgħu jiġu valwati fil-kontijiet skont l-ammont nominali taż-ZORAs.

(113)

Madankollu, il-Lussemburgu jiċċara li wara r-rimborż parzjali taż-ZORA minn LNG Supply li sar fl-2014, LNG Lussemburgu ma għażlitx ir-reġim fakultattiv tal-Artikolu 22bis LIR u rrikonoxxiet profitt taxxabbli.

(114)

Il-Lussemburgu jqis li d-deċiżjonijiet tat-taxxa kkontestati ma jmorrux lil hinn mill-prinċipju ta' distakkament billi jaċċettaw metodu ta' determinazzjoni tal-profitti ta' GSTM u ta' LNG Supply ibbażat fuq ir-riskji, il-funzjonijiet u l-assi involuti minn kull entità.

(115)

Il-Lussemburgu jikkontesta kull applikazzjoni ħażina tal-Artikolu 166 LIR, peress li d-deċiżjonijiet tat-taxxa kkontestati jikkonfermaw biss applikazzjoni stretta u korrett tad-dispożizzjonijiet tat-taxxa differenti applikabbli għal kull impriża soġġetta għat-taxxa tal-kumpaniji.

(116)

Il-Lussemburgu jikkontesta li l-objettiv tal-Artikolu 166 LIR huwa li tiġi evitata tassazzjoni ekonomika doppja. Il-Lussemburgu jqis li skont l-Artikolu 166 LIR, il-profitti ma għandhomx għalfejn ikunu ġew intaxxati qabel biex jibbenefikaw mill-eżenzjoni tal-parteċipazzjoni. L-uniċi kundizzjonijiet biex wieħed jibbenefika mill-eżenzjoni tal-parteċipazzjonijiet huma n-natura tal-istrument, il-persentaġġ miżmum fil-kapital tal-entità bil-parteċipazzjoni fiha jew il-prezz tal-akkwist, u l-perjodu li jdumu jinżammu l-parteċipazzjonijiet. Fil-każ preżenti, l-Artikolu 166 LIR ġie applikat b'konformità ma' dawn il-kundizzjonijiet kollha. Fuq din il-bażi, il-Lussemburgu jqis mhux biss li s-sistema tat-taxxa fuq id-dħul tal-kumpaniji tal-Lussemburgu ma teħtieġx li l-profitti kollha jiġu ntaxxati iżda wkoll li skont l-Artikolu 166 LIR, profitti eliġibbli għall-eżenzjoni tal-parteċipazzjonijiet mhux bilfors jirriżultaw minn profitti ntaxxati.

(117)

Il-Lussemburgu qal ukoll li jekk il-Kummissjoni tikkunsidra li l-Artikolu 166 LIR ma jidderogax mis-sistema ta' referenza, allura din għandha turi li d-deċiżjonijiet tat-taxxa kkontestati jippermettu applikazzjoni derogatorja tal-Artikolu 166 LIR għal CEF u LNG Holding. Il-Lussemburgu jikkontesta b'mod partikolari l-applikazzjoni kombinata tal-Artikoli 164 LIR u 166 LIR, peress li l-Artikolu 164 LIR mhuwiex prerekwiżit għall-applikazzjoni tal-Artikolu 166 LIR. L-Artikolu 164 LIR japplika biss għall-profitti distrubwitti minn kumpanija domestika, filwaqt li l-Artikolu 166 LIR għandu ambitu usa', u r-reġim ta' eżenzjoni tal-parteċipazzjonijiet huwa applikabbli għall-profitti li jiġu minn parteċipazzjonijiet domestiċi jew barranin. Minkejja dan, il-Lussemburgu espressament jirrikonoxxi li, ħlief fil-każ ta' parteċipazzjonijiet barranin, il-parteċipazzjonijiet kollha li l-profitt tagħhom jista' jibbenefika mill-Artikolu 166 huma wkoll soġġetti għall-Artikolu 164 LIR (163).

(118)

Rigward ir-raġunament fuq livell ta' grupp (ara l-premessa 100), il-Lussemburgu jtenni l-pożizzjoni tiegħu li r-raġunament tal-Kummissjoni ma jistax ikun ibbażat fuq sistema ta' referenza inadegwata u ineżistenti. Il-Lussemburgu jenfasizza li l-liġi tal-Lussemburgu ma tispeċifikax li t-tranżazzjonijiet ta' finanzjament intragrupp bejn entitajiet residenti għal finijiet ta' taxxa fil-Lussemburgu ma jistgħux iżidu jew inaqqsu s-somma tal-bażijiet tat-taxxa ta' dawn l-entitajiet fil-Lussemburgu, jew fi kliem ieħor il-bażi ta' taxxa kombinata tal-grupp fil-Lussemburgu. Barra minn hekk, il-Lussemburgu jispjega li sabiex jiġi ddeterminat jekk miżura hijiex selettiva, jeħtieġ li l-Kummissjoni turi l-miżura tidderoga mis-sistema ta' referenza nnifisha u mhux mill-objettiv tas-sistema ta' referenza.

(119)

Il-Lussemburgu jargumenta li biex tiġi stabbilita s-selettività ta' miżura, il-Kummissjoni teħtieġ turi li kumpaniji minn settur speċifiku huma trattati b'mod preferenzjali meta mqabbla ma' oħrajn u tirreferi għall-annullament tad-deċiżjoni tal-Kummissjoni fil-każ Comunidad Autonoma de Galicia (164).

(120)

Il-Lussemburgu jikkontesta wkoll id-dikjarazzjoni li għamlet il-Kummissjoni li kwalunkwe spiża deduċibbli għat-taxxa reġistrata mill-emittent ta' ZORA b'rabta mal-Akkumulazzjonijiet ZORA tkun ġiet inkluża fil-bażi tat-taxxa tad-detentur, u għalhekk ma jkollhiex impatt fuq il-bażi tat-taxxa tal-grupp fil-Lussemburgu. Il-Lussemburgu jfakkar li l-Artikolu 22bis LIR jippermetti lil min isellef self konvertibbli li ma jikkontabbilizzax qligħ kapitali fil-mument tal-konverżjoni. Għalhekk, skont il-Lussemburgu, l-intervent ta' EIL u LNG Lussemburgu ma naqqasx il-bażi tat-taxxa tal-grupp Engie meta mqabbel ma' sitwazzjoni li fiha kien juża ZORA dirett.

(121)

Il-Lussemburgu jikkontesta kull abbuż ta' drittijiet. B'mod partikolari, il-Lussemburgu jiċħad l-insinwazzjoni tal-Kummissjoni li huwa approva tranżazzjoni simulata fl-ambitu tal-Artikolu 5 tas-StAnpG u jfakkar li l-partijiet kollha għandhom eżistenza ġuridika reali u wettqu l-obbligi kuntrattwali tagħhom. Il-Lussemburgu jiċħad ukoll l-argument li l-istruttura legali tat-tranżazzjoni mhijiex konformi mas-sustanza, bit-tranżazzjonijiet stabbiliti biex jiffinanzjaw it-trasferiment tal-assi fi ħdan il-grupp skont it-tifsira tal-Artikolu 6 tas-StAnpG.

(122)

Fl-aħħar nett, fil-każ li l-Kummissjoni kellha tadotta deċiżjoni negattiva, il-Lussemburgu jqis din għandha tapplika biss għall-ġejjieni u li l-Kummissjoni ma għandhiex titlob irkupru tal-allegata għajnuna mill-Istat, f'konformità mal-prinċipji taċ-ċertezza legali u tal-aspettattivi leġittimi.

(123)

Engie tqis li ż-ZORAs huma strumenti ta' dejn. L-ammont totali li għandu jiġi rimborżat jiddependi fuq il-prestazzjoni ta' min issellef. Għalhekk, Engie targumenta li min sellef ma għandux jirċievi dħul qabel il-konverżjoni. Barra minn hekk, sal-konverżjoni tiegħu, iż-ZORA huwa strument ta' dejn fil-kontijiet u jiġi trattata bħala tali kemm għall-finijiet tal-kontabilità kif ukoll għall-finijiet fiskali.

(124)

Engie targumenta li d-deduċibbiltà tal-ispejjeż relatati maż-ZORA fil-livell ta' minn jissellef hija konformi mal-liġi tat-taxxa applikabbli. L-ispejjeż relatati mar-rimborż taż-ZORA li huma kontabbilizzati fil-kontijiet f'konformità mar-regoli tal-kontabilità applikabbli, huma deduċibbli għat-taxxa skont il-prinċipju bażiku tat-taxxa ta' rabta bejn il-karta tal-bilanċ tal-kontabilità u l-karta tal-bilanċ tat-taxxa. F'konformità mal-prinċipju tal-prudenza tal-kontabilità, min isellef mhux permess jikkontabbilizza profitt fil-kontijiet tiegħu qabel il-konverżjoni taż-ŻORA f'ishma. Għalhekk, huwa biss fid-data tal-konverżjoni li min sellef jikkontabbilizza profitt, li huwa taxxabbli. Madankollu, skont Engie, l-Artikolu 22bis LIR jippermetti lil kumpanija tikseb differiment temporanju tat-taxxa f'każ ta' konverżjoni ta' self konvertibbli. Fl-aħħar nett, EIL u LNG Lussemburgu koprew ir-riskji tagħhom billi daħlu f'Kuntratti Forward, rispettivament, ma' CEF u ma' LNG Holding. Id-dħul ta' CEF u LNG Holding li jkun ġej mill-investimenti tagħhom huwa taxxabbli skont il-liġi tat-taxxa rilevanti, inkluż l-Artikolu 166 LIR.

(125)

Engie spjegat f'aktar dettal l-attivitajiet trasferiti lil LNG Supply u lil GSTM li jikkonsistu, rispettivament, f'kuntratt fit-tul (madwar 20 sena) ta' provvista ta' gass naturali likwifikat (“kuntratt LNG”) fil-Jemen u l-assi anċillari tagħha (kapaċità tat-terminal u kapaċità ta' trasport) fuq naħa waħda, u fuq in-naħa l-oħra l-attivitajiet ta' ppuljar ta' flus tal-grupp (165).

(126)

Engie spjegat ukoll li ż-ZORA bejn LNG Supply u LNG Lussemburgu biss ġie parzjalment konvertit fl-2014 minħabba profitti kbar li għamlet LNG Supply. Wara l-konverżjoni parzjali, LNG Lussemburgu ikkontabbilizzat dħul taxxabbli. LNG Lussemburgu ma għażlitx ir-reġim tal-Artikolu 22bis LIR. Fl-istess sena fiskali, l-entità kkontabbilizzat spiża deduċibbli tal-istess ammont minħabba t-trasferiment tal-ishma lil LNG Holding fil-qafas tal-Kuntratt Forward LNG.

(127)

Engie kkonfermat ukoll li l-applikazzjoni tal-Artikolu 22bis LIR fil-fatt ma kellha l-ebda impatt fuq id-dħul taxxabbli ta' min sellef iż-ZORA (LNG Lussemburgu jew EIL) peress li l-prezz tal-bejgħ u d-data tal-bejgħ huma ffissati bil-quddiem mill-Kuntratti Forward. F'dan ir-rigward, matul il-laqgħa tal-1 ta' Ġunju 2017 kien ġie diskuss, taħt liema xenarju LNG Lussemburgu jew EIL jirrealizzaw profitt jew telf taxxabbli, peress li ż-ZORAs ġew iħħeġġjati bil-Kuntratti Forward. Engie ċċarat li kwalunkwe dħul taxxabbli li jiġi mill-konverżjoni taż-ZORAs huwa rifless minn telf korrispondenti deduċibbli għat-taxxa fuq il-Kuntratti Forward.

(128)

Finalment, f'dak li għandu x'jaqsam mal-qafas ġuridiku applikabbli fil-livell tal-kumpaniji azzjonarji (jiġifieri CEF u LNG Holding), Engie speċifikat li fid-data tat-trasferiment tal-ishma, u f'każ li l-valur tal-ishma jkun ogħla mill-prezz tal-akkwist stabbilit fil-Kuntratti Forward, il-kumpanija azzjonarja ma tikkontabilizza l-ebda profitt. Tali profitt jista' jiġi kontabbilizzat biss aktar tard jekk u meta l-ishma tal-emittenti jinbiegħu jew jiġu kkanċellati. Skont Engie, dan il-profitt potenzjali jista' jiġi eżentat mit-taxxa skont ir-reġim ta' eżenzjoni tal-parteċipazzjonijiet applikabbli għall-kumpaniji kollha fil-Lussemburgu skont l-Artikolu 166 LIR.

(129)

Engie targumenta li l-implimentazzjoni ta' GSTM u ta' LNG ZORAs tirrispetta d-deċiżjonijiet tat-taxxa adottati f'konformità mal-liġi tat-taxxa u ma twassalx għal nontassazzjoni doppja. L-Engie spjegat aktar fil-laqgħa ta' Ġunju 2017 li, fil-każ li wieħed isegwi raġunament ekonomiku u mhux wieħed legali, għandu jitqies it-tul ta' żmien twil taż-ZORA u mhux jiffoka fuq is-snin ta' profitt li matulhom tħallsu taxxi limitati. Engie spjegat li, f'każ li wieħed isegwi raġunament b'entità b'entità u mhux approċċ ekonomiku jew kumplessiv, ir-reġim huwa simetriku.

(130)

Engie spjegat aktar li GSTM ZORA għadu ma wassal għall-ebda konverżjoni. Għadu ma ġie kontabbilizzat l-ebda profitt ta' EIL sal-lum. LNG ZORA kien parzjalment ikkonvertit f'ishma fl-2014 u b'hekk wassal għal profitt ugwali għall-Akkumulazzjonijiet ZORA akkumulati fil-livell ta' LNG Lussemburgu. LNG Lussemburgu ma għażlitx ir-reġim fakultattiv ta' differiment tat-taxxa previst mill-Artikolu 22bis LIR u l-profitt realizzat mill-konverżjoni tqies fid-determinazzjoni tal-bażi tat-taxxa tagħha għall-2014.

(131)

Engie spjegat aktar ir-rwoli preċiżi ta' EIL u LNG Lussemburgu. Ir-rwoli qed jiġu deskritti fir-rapporti tal-PT ippreparati minn Engie biex tiġġustifika ż-ZORAs u tippreżentah lill-Kummissjoni flimkien mal-osservazzjonijiet tagħha dwar id-deċiżjoni tal-Ftuħ (ir-“Rapporti PT”). EIL u LNG Lussemburgu huma deskritti fir-Rapporti tal-PT bħala l-“Investitur” li jieħu r-riskji kollha marbuta man-negozji u li jwettaq il-funzjonijiet ewlenin relatati ma' tal-aħħar filwaqt li fl-istess ħin dawn l-entitajiet huma koperti b'mod sħiħ mill-perspettiva ta' riskju mill-Kuntratti Forward (166). Engie spjegat li minn perspettiva ta' pprezzar ta' trasferiment, sabiex tiġi ddeterminata r-remunerazzjoni tal-emittent taż-ZORA, huwa possibbli li minn sellef iż-ZORA jiġi amalgamat max-xerrej tal-ishma konvertiti skont il-Kuntratti Forward.

(132)

Meta wieħed iqis li l-intervent ta' EIL u LNG Lussemburgu huwa newtrali minn perspettiva ekonomika u kummerċjali, il-Kummissjoni, fil-laqgħa tal-1 ta' Ġunju 2017, talbet li tiġi spjegata l-ħtieġa ta' dawn l-entitajiet biex jiġi ffinanzjat it-trasferiment tal-assi. Engie kkonfermat li setgħet strutturat il-finanzjament tat-trasferiment tal-attivitajiet b'mod differenti. Filwaqt li jeżistu modi oħra kif din l-operazzjoni tista' tiġi strutturata, l-istruttura preżenti ġiet magħżula minħabba li pprovdiet aktar flessibilità għall-ġestjoni tal-kumpaniji u aktar għażliet għal operazzjonijiet futuri, li huma kriterji importanti għall-organizzazzjoni ta' grupp ta' kumpaniji.

(133)

Engie targumenta li l-kumpaniji kkonċernati ma jibbenefikawx minn xi vantaġġ peress li ma jibbenefikawx minn xi tnaqqis ta' taxxa mhux ġustifikat. Engie tgħid li d-deduzzjoni tal-Akkumulazzjonijiet ZORA ma tikkostitwixxix vantaġġ kompetittiv. Barra minn hekk, Engie tqis li ma jistax ikun hemm vantaġġ kompetittiv mill-kombinazzjoni tar-reġim applikat għal minn issellef iż-ZORAs u r-reġim applikat għal minn sellef, peress li dan il-vantaġġ ma seħħx minħabba li ma saritx konverżjoni ta' GSTM ZORA u d-deċiżjoni li ma jintużax l-Artikolu 22bis LIR għal LNG ZORA.

(134)

L-ewwel nett, Engie tqis li d-deċiżjonijiet tat-taxxa kkontestati ma jinvolvu l-ebda miżura individwali ta' għajnuna.

(135)

Engie tikkontesta s-sistema ta' referenza użata mill-Kummissjoni fid-deċiżjoni tal-Ftuħ. Engie tqis li l-Artikoli 109(1) u 164 LIR mhumiex applikabbli, l-ewwel wieħed għax jikkonċerna biss individwi u t-tieni wieħed għaliex ma jikkonċernax is-self. Is-sistema korretta ta' referenza hija kkostitwita mill-Artikoli 18 sa 45 LIR, li jinkorporaw il-prinċipji fundamentali tal-liġi tat-taxxa tal-Lussemburgu għad-determinazzjoni tal-bażi taxxabbli ta' kumpanija, pereż. il-prinċipju tal-prudenza (l-Artikolu 23 LIR), ir-rabta tal-karta tal-bilanċ tat-taxxa mal-karta tal-bilanċ kummerċjali (l-Artikolu 40 LIR) u d-deduċibbiltà tal-ispejjeż tan-negozju (l-Artikolu 45 LIR).

(136)

Skont Engie, id-deċiżjonijiet tat-taxxa kkontestati ma jitbegħdux mis-sistema ta' referenza applikabbli. Iż-żieda tad-dejn hija spiża finanzjarja għal minn jissellef. Din l-ispiża finanzjarja tiġi kontabbilizzata fil-kontijiet annwali u hija deduċibbli f'konformità mal-prinċipju li l-karta tal-bilanċ tat-taxxa hija rabuta mal-karta tal-bilanċ kummerċjali u mad-deduzzjoni tal-ispejjeż operazzjonali. Min-naħa l-oħra, fil-każ ta' Akkumulazzjoni ZORA negattiva, it-tnaqqis tad-dejn iwassal għal kontabbilizzazzjoni ta' dħul taxxabbli. Il-konverżjoni sussegwenti tas-self f'ishma ma tpoġġix f'dubju l-kwalifikazzjoni inizjali tal-istrument bħala dejn. Rigward EIL u LNG Lussemburgu, l-Artikolu 22bis LIR jagħtihom il-possibbiltà jagħżlu, fiż-żmien tal-konverżjoni, differiment ta' taxxa. LNG Lussemburgu ma għażlitx dan ir-reġim wara l-konverżjoni parzjali ta' LNG ZORA fl-2014 u kkontabbilizzat profitt taxxabbli. GSTM ZORA u l-bqija ta' LNG ZORA ma wasslu għall-ebda konverżjoni sal-lum. Ma ġie realizzat ebda dħul u ma seta' jsir l-ebda użu mir-reġim fakultattiv tal-Artikolu 22bis LIR. Għalhekk, Engie tqis li kemm fis-sustanza tagħhom kif ukoll fl-implimentazzjoni tagħhom, id-deċiżjonijiet tat-taxxa kkontestati ma jidderogawx mis-sistema ta' referenza.

(137)

Fuq il-bażi tar-rapporti tal-PT, Engie targumenta li l-metodu użat biex jiġi stmat il-marġni taxxabbli fil-livell ta' min issellef (jiġifieri r-remunerazzjoni ta' min issellef) jirrappreżenta approssimazzjoni affidabbli ta' riżultat ibbażat fuq is-suq f'konformità mal-prinċipju ta' distakkament. Il-funzjonijiet, ir-riskji u l-assi tal-entitajiet legali differenti ġew remunerati skont prodotti simili fis-suq. Iż-żewġ Rapporti tal-PT ippreżentati jivvalutaw il-funzjonijiet u r-riskji mwettqa minn min issellef (LNG Supply jew GSTM) u l-“Investitur” (li mhuwiex identifikat b'mod preċiż) u jikkonkludu li kważi r-riskji kollha huma mġarrba mill-“Investitur” filwaqt li min issellef huwa involut fil-ġestjoni ta' kuljum tan-negozji ttrasferiti. Ir-rapporti tal-PT jidentifikaw il-metodu tal-prezz kumparabbli mhux kontrollat (Comparable Uncontrolled Price) (167) bħala l-metodu rilevanti biex tiġi vvalutata n-natura ta' distakkament ta' ZORA u r-remunerazzjoni ta' fondi negozjati fil-borża bħala remunerazzjoni komparabbli. Fl-aħħar nett, ir-Rapporti tal-PT jikkonkludu li r-rimunerazzjoni ta' min issellef hija konformi mar-remunerazzjoni ta' fondi negozjati fil-borża u b'hekk trid titqies li hija distakkata.

(138)

Skont Engie, il-konferma mid-deċiżjonijiet tat-taxxa kkontestati tal-applikazzjoni kkombinata tad-dispożizzjonijiet ikkonċernati tal-liġi tal-Lussemburgu hija konsistenti mal-objettiv tas-sistema tat-taxxa tal-kumpaniji tal-Lussemburgu li tintaxxa l-profitti ta' kwalunkwe kumpanija soġġetta għat-taxxa fil-Lussemburgu wara li tittieħed f'kunsiderazzjoni r-remunerazzjoni tal-istrumenti tad-dejn. Kull min jissellef ikun soġġett għall-istess trattament tat-taxxa, jiġifieri d-deduċibbiltà tal-ispejjeż finanzjarji. Bl-istess mod, kull min isellef, li jikkonkludi self simili, ikun soġġett għall-istess trattament tat-taxxa, jiġifieri tassazzjoni ta' profitt ta' kontabbiltà fil-mument tal-ħlas lura, ħlief jekk jagħżel differiment tat-taxxa.

(139)

Engie kkontestat ukoll kull abbuż tal-liġi. L-entitajiet involuti fit-tranżazzjonijiet huma kollha entitajiet legali. Barra minn hekk, it-tranżazzjonijiet ikkontestati għandhom raġunament ekonomiku li huwa l-finanzjament tat-trasferiment ta' attivitajiet. Għalhekk, Engie tqis li l-Lussemburgu ma eżentax l-Akkumulazzjonijiet ZORA mit-taxxi u lanqas approva xi evażjoni tat-taxxa jew abbuż tal-liġi nazzjonali.

(140)

It-tieni, Engie tqis li, peress li d-deċiżjonijiet tat-taxxa kkontestati sempliċiment jikkonfermaw il-liġi nazzjonali applikabbli, huma għandhom jiġu vvalutati bħala skema. F'dan ir-rigward, Engie tqis li skemi bħal dawn, kif iċċarat mid-deċiżjonijiet tat-taxxa kkontestati, mhumiex selettivi. Huma ta' natura ġenerali peress li huma applikabbli, individwalment jew b'mod kumulattiv, mingħajr distinzjoni għall-operaturi ekonomiċi kollha mingħajr ebda kundizzjoni. L-applikabbiltà tagħhom mhix soġġetta għall-ħruġ ta' deċiżjonijiet tat-taxxa li f'dan il-każ intalbu għal raġunijiet ta' ċertezza legali. Kull impriża f'sitwazzjoni legali u fattwali komparabbli fid-dawl tal-objettiv tas-sistema tat-taxxa, jiġifieri t-tassazzjoni tal-profitti, tista' tibbenefika minn dawn l-iskemi. Għalhekk, skont Engie, dawn ma joħolqux, bl-effetti tagħhom, xi diskriminazzjoni jew differenzazzjoni bejn l-impriżi.

(141)

It-tielet, l-Engie ssostni li l-miżuri inkwistjoni jirriżultaw mill-prinċipji ta' gwida tas-sistema tat-taxxa tal-Lussemburgu, b'mod partikolari mill-prinċipju tal-prudenza.

(142)

Engie tikkontesta li s-sistema tat-taxxa tal-kumpaniji tal-Lussemburgu għandha l-objettiv li jintaxxa l-profitti rreġistrati fil-kontijiet. Is-sistema ta' referenza hija s-sistema tat-taxxa tal-kumpaniji tal-Lussemburgu, inkluż l-Artikolu 166 LIR, li l-applikazzjoni tiegħu ġiet approvata fid-deċiżjonijiet tat-taxxa kkontestati.

(143)

Engie tindika wkoll li d-deċiżjonijiet tat-taxxa kkontestati ma jidderogawx mill-Artikolu 166 LIR. Skont is-sistema tat-taxxa tal-kumpaniji tal-Lussemburgu, kwalunkwe dividend jew qligħ kapitali rreġistrat minn kontribwent ma jistax jiġi intaxxat jekk jiġu ssodisfati l-kundizzjonijiet tal-Artikolu 166 LIR. Engie tinnota li l-kundizzjonijiet tal-Artikolu 166 LIR ġew issodisfati meta LNG Supply naqqset il-kapital tagħha bil-kanċellazzjoni tal-ishma ġodda li nħarġu. Għalhekk, Engie tqis li d-deċiżjonijiet tat-taxxa kkontestati ma jitbegħdux mir-regoli fiskali applikabbli u ma wasslux għal tnaqqis fit-taxxi, li kienu jkunu dovuti fin-nuqqas tagħhom.

(144)

Engie tikkunsidra wkoll, f'konformità mal-Artikoli 99 u 101 tal-Kostituzzjoni tal-Lussemburgu li l-awtoritajiet tat-taxxa tal-Lussemburgu ma jistgħux jidderogaw mill-kondizzjonijiet stretti stabbiliti fl-Artikolu 166 LIR.

(145)

Engie tinnota li d-deċiżjoni tal-Ftuħ tirreferi għal miżura ta' għajnuna individwali potenzjali u mhux għall-Artikolu 166 LIR, li huwa skema. Fil-każ li l-Kummissjoni ma kinitx se tikkunsidra l-Artikolu 166 LIR bħala deroga minnu nnifsu, iżda tixħet dubju biss fuq l-applikazzjoni tiegħu fid-deċiżjonijiet tat-taxxa kkontestati, il-Kummissjoni naqset milli turi li d-deċiżjonijiet tat-taxxa kkontestati jidderogaw mill-Artikolu 166 LIR.

(146)

Engie targumenta li l-estensjoni tar-reġim tal-eżenzjoni tal-parteċipazzjonijiet - li inizjalment ġie introdott fil-Lussemburgu fl-1940 - kienet skont l-objettiv li jinbena s-suq intern. Skont Engie, dan huwa preċiżament l-objettiv tad-Direttiva 90/435/KEE. Engie tqis li din id-Direttiva ma tirrikjedix tassazzjoni tal-profitti li jkunu se jiġu distribwiti.

(147)

Fir-rigward tar-raġunament fil-livell ta' grupp, Engie tindika li l-valutazzjoni tas-selettività hija pertinenti biss fil-livell ta' entità ġuridika individwali u mhux fil-livell ta' grupp. L-Engie tifhem li f'deċiżjonijiet passati (168), il-Kummissjoni kkunsidrat li analiżi fil-livell ta' grupp ma kinitx ġustifikata.

(148)

Skont Engie, is-sistema tat-taxxa tal-kumpaniji tal-Lussemburgu ma tinvolvi l-ebda prinċipju ta' trattament simetriku bejn kumpaniji residenti għal finijiet tat-taxxa li jkunu parti mill-istess tranżazzjoni u lanqas “regoli ta' rbit” kif rakkomandat mill-OECD (169). Engie ttenni li kull entità tal-grupp kienet intaxxata f'konformità mar-regoli applikabbli kif ikkonfermat mid-deċiżjonijiet tat-taxxa kkontestati.

(149)

Engie tispjega li t-tranżazzjonijiet li t-trattament tat-taxxa tagħhom kien approvat mid-deċiżjonijiet tat-taxxa kkontestati jsegwu objettiv ekonomiku, jiġifieri li jiġi ffinanzjat it-trasferiment tal-assi. Għalhekk, skont Engie, il-kriterji tal-Artikolu 6 StAnpG ma ġewx issodisfatti f'dan il-każ.

(150)

Skont Engie, il-benefiċjarji tad-deċiżjonijiet tat-taxxa kkontestati ma ġewx ittrattati b'mod differenti minn kumpaniji oħra li ma jibbenefikawx minn tali deċiżjonijiet tat-taxxa, minħabba li d-deċiżjonijiet tat-taxxa kkontestati jikkonfermaw biss l-applikazzjoni korretta tar-regoli tat-taxxa applikabbli fil-Lussemburgu. Għalhekk, id-deċiżjonijiet tat-taxxa kkontestati la jiddiskriminaw de jure u lanqas de facto lil impriżi oħra f'sitwazzjoni fattwali u legali komparabbli ma' dik ta' Engie fid-dawl tal-objettivi tas-sistema tat-taxxa tal-Lussemburgu.

(151)

Fl-aħħar nett, Engie targumenta li fil-każ li l-Kummissjoni kellha tikkwalifika d-deċiżjonijiet tat-taxxa kkontestati bħala għajnuna inkompatibbli mas-suq intern, ma setgħetx tordna l-irkupru tagħhom mingħajr ma tikser numru ta' prinċipji tal-liġi ġenerali, jiġifieri l-prinċipji taċ-ċertezza legali, l-aspettattivi leġittimi, l-amministrazzjoni tajba u t-trattament ugwali.

(152)

B'mod partikolari, skont Engie, il-Kummissjoni tista' biss turi l-eżistenza ta' vantaġġ selettiv billi timponi b'mod retroattiv l-interpretazzjoni tagħha stess tal-liġi tat-taxxa tal-Lussemburgu biex tikkonkludi li din kienet applikata ħażin f'dan il-każ. L-inċertezza legali li tirriżulta għandha tkun limitata min-nonretroattività tal-effetti tad-deċiżjoni.

(153)

Kif deskritt fil-premessa 92, id-deċiżjoni tal-Ftuħ qajmet tliet dubji ewlenin. F'din id-Deċiżjoni, il-Kummissjoni se tiffoka l-valutazzjoni tagħha fuq it-tielet dubju, jiġifieri l-effett tad-deduċibbiltà tal-Akkumulazzjonijiet ZORA u l-eżenzjoni tad-dħul korrispondenti, u se tispjega għaliex id-dubji espressi fid-deċiżjoni tal-Ftuħ ma naqsux.

(154)

Skont l-Artikolu 107(1) tat-Trattat kull għajnuna mogħtija minn Stat Membru jew permezz ta' riżorsi tal-Istat, fi kwalunkwe forma, li twassal għal distorsjoni jew għal theddida ta' distorsjoni tal-kompetizzjoni billi tiffavorixxi lil ċerti impriżi jew il-provvediment ta' ċerti oġġetti, hija inkompatibbli mas-suq intern peress li taffettwa l-kummerċ bejn l-Istati Membri.

(155)

Sabiex miżura tiġi klassifikata bħala għajnuna fl-ambitu tal-Artikolu 107(1) tat-Trattat, għandhom jiġu ssodisfati l-kundizzjonijiet kollha stabbiliti f'dik id-dispożizzjoni (170). Għalhekk, irid ikun hemm, l-ewwel nett, intervent mill-Istat jew permezz ta' riżorsi tal-Istat; it-tieni, dan l-intervent irid ikun jista' jaffettwa l-kummerċ bejn l-Istati Membri; it-tielet, irid ikun jikkonferixxi għajnuna selettiva lil impriża u, ir-raba', irid ikun ifixkel jew jhedded li jfixkel il-kompetizzjoni (171).

(156)

Fir-rigward tal-ewwel kundizzjoni għal konstatazzjoni ta' għajnuna, id-deċiżjonijiet tat-taxxa kkontestati nħarġu mill-amministrazzjoni tat-taxxa tal-Lussemburgu, li hija organu tal-Istat tal-Lussemburgu. Dawk id-deċiżjonijiet tat-taxxa kienu jinvolvu aċċettazzjoni minn dik l-amministrazzjoni ta' ċertu trattament tat-taxxa. Abbażi ta' dawk id-deċiżjonijiet, il-kumpaniji tal-grupp Engie LNG Supply, LNG Lussemburgu, LNG Holding, GSTM, EIL u CEF stabbilixxew l-obbligazzjoni tagħhom għat-taxxa tal-kumpaniji fil-Lussemburgu fuq bażi annwali. Dawk id-deċiżjonijiet tat-taxxa huma sussegwentement użati minn dawk il-kumpaniji tal-grupp Engie għad-dikjarazzjonijiet annwali tagħhom tat-taxxa tal-kumpaniji, li ġew aċċettati mill-amministrazzjoni tat-taxxa tal-Lussemburgu bħala li jikkorrispondu għall-obbligazzjoni tagħhom għat-taxxa tal-kumpaniji fil-Lussemburgu. Il-vantaġġ tat-taxxa mogħti fuq il-bażi tad-deċiżjonijiet tat-taxxa kkontestati huwa għalhekk imputabbli lil-Lussemburgu.

(157)

Fir-rigward tal-finanzjament tal-miżuri permezz ta' riżorsi tal-Istat, il-Qorti tal-Ġustizzja konsistentement sostniet li miżura li permezz tagħha l-awtoritajiet pubbliċi jagħtu lil ċerti impriżi eżenzjoni mit-taxxa li, għalkemm ma tinvolvix trasferiment pożittiv ta' riżorsi tal-Istat, tqiegħed lill-persuni li għalihom tapplika f'sitwazzjoni finanzjarja aktar favorevoli minn ta' kontribwenti oħra, tikkostitwixxi għajnuna mill-Istat (172). F'dan il-każ, id-deċiżjonijiet tat-taxxa kkontestati jikkonfermaw li l-Akkumulazzjonijiet ZORA huma spejjeż deduċibbli għal finijiet ta' taxxa fil-livell ta' LNG Supply u ta' GSTM, filwaqt li d-dħul korrispondenti, ladarba jiġi realizzat fil-livell ta' LNG Holding u CEF rispettivament, ikun eżentat mit-tassazzjoni. B'konsegwenza ta' dan, l-ammonti tal-Akkumulazzjonijiet ZORA, li jirrappreżentaw porzjon imdaqqas mill-profitti ġġenerati minn LNG Supply u GSTM, jibqgħu mhux intaxxati fil-Lussemburgu. Għaldaqstant, it-trattament tat-taxxa mogħti abbażi tad-deċiżjonijiet tat-taxxa kkontestati jista' jingħad li jnaqqsu l-obbligazzjoni tat-taxxa fuq id-dħul tal-kumpaniji tal-grupp Engie fil-Lussemburgu u għalhekk iwassal għal telf ta' riżorsi tal-Istat. Dan huwa minħabba li kwalunkwe spiża tal-kumpaniji tal-grupp Engie ddikjarata deduċibbli għal finijiet ta' taxxa fil-Lussemburgu, kif ukoll kull dħul tal-kumpaniji tal-grupp Engie ddikjarat eżentat mit-taxxa fil-Lussemburgu jirriżultaw f'telf ta' dħul mit-taxxa li, li kieku kien ikun disponibbli għal-Lussemburgu (173). Għalhekk, il-miżuri huma ffinanzjati permezz ta' riżorsi tal-Istat.

(158)

Fir-rigward tat-tieni kundizzjoni għal konstatazzjoni ta' għajnuna, il-kumpaniji li jibbenefikaw mid-deċiżjonijiet tat-taxxa kkontestati huma parti minn Engie group, grupp multinazzjonali li jopera fi swieq varji tal-enerġija f'diversi Stati Membri, u għalhekk kwalunkwe għajnuna favur tagħhom tista' taffettwa l-kummerċ intra-Unjoni. Bl-istess mod, meta pprovda trattament tat-taxxa favorevoli lill-Engie, il-Lussemburgu potenzjalment ġibed lejh investiment lejn Stati Membri li ma setgħux jew li mhux se joffru trattament tat-taxxa favorevoli bl-istess mod. Peress li d-deċiżjoni tat-taxxa kkontestata ssaħħaħ il-pożizzjoni kompetittiva tal-benefiċjarju tagħha meta mqabbel ma' impriżi oħra li jikkompetu fil-kummerċ intra-UE, din trid titqies li tista' taffettwa tali kummerċ (174).

(159)

Bl-istess mod, fir-rigward tar-raba' kundizzjoni għal konstatazzjoni ta' għajnuna, miżura mogħtija mill-Istat titqies li tfixkel jew thedded li tfixkel il-kompetizzjoni meta tkun tista' ttejjeb il-pożizzjoni kompetittiva tal-benefiċjarju tagħha meta mqabbel ma' impriżi oħra li jikkompeti magħhom (175).

(160)

B'mod partikolari, Engie hija attiva fl-elettriku, fil-gass naturali u fl-LNG, fis-servizzi tal-effiċjenza fl-enerġija u fi swieq oħra relatati f'diversi Stati Membri tal-UE. Dawn huma kollha swieq li fihom Engie tiffaċċja kompetizzjoni minn impriżi oħra. Kif se jintwera, it-trattament tat-taxxa mogħti abbażi tad-deċiżjonijiet tat-taxxa kkontestati jeħles lil Engie minn obbligazzjoni tat-taxxa li li kieku kienet tkun obbligata ġġarrab fil-ġestjoni ta' kuljum tal-attivitajiet normali tagħha. Għalhekk, l-għajnuna mogħtija abbażi ta' dawn id-deċiżjonijiet tat-taxxa għandha titqies li tfixkel jew thedded li tfixkel il-kompetizzjoni billi ssaħħaħ il-pożizzjoni finanzjarja ta' Engie fis-swieq li fihom topera. It-trattament tat-taxxa mogħti fuq il-bażi tad-deċiżjonijiet tat-taxxa kkontestati jillibera riżorsi li Engie tista' tuża, pereżempju biex tinvesti fl-operazzjonijiet tan-negozju tagħha, tagħmel investimenti ulterjuri jew ittejjeb ir-remunerazzjoni tal-azzjonisti, b'hekk toħloq distorsjoni tal-kompetizzjoni fis-swieq fejn topera għax jeħles lil Engie minn obbligazzjoni tat-taxxa li li kieku kien ikollha tħallas u li impriżi kompetituri jkollhom iġarrbu. Għalhekk, f'dan il-każ, ir-raba' kundizzjoni għal konstatazzjoni ta' għajnuna hija ssodisfata wkoll.

(161)

Fir-rigward tat-tielet kundizzjoni għal sejba ta' għajnuna, il-funzjoni ta' deċiżjoni tat-taxxa hija li jiġi kkonfermat minn qabel il-mod kif tapplika s-sistema tat-taxxa ordinarja għal każ partikolari fid-dawl tal-fatti u ċ-ċirkostanzi speċifiċi tiegħu. Madankollu, bħal kwalunkwe miżura oħra tat-taxxa, it-trattament tat-taxxa mogħti fuq il-bażi ta' deċiżjoni tat-taxxa jrid jirrispetta r-regoli dwar l-għajnuna mill-Istat. Meta deċiżjoni tat-taxxa tapprova trattament tat-taxxa li ma jirriflettix dak li jirriżulta minn applikazzjoni normali tas-sistema tat-taxxa ordinarja, mingħajr ġustifikazzjoni, il-miżura tagħti vantaġġ selettiv lid-destinatarju tagħha sa fejn dak it-trattament tat-taxxa jirriżulta fit-titjib tal-pożizzjoni finanzjarja ta' dik l-imapriża fl-Istat Membru meta mqabbla ma' impriżi f'sitwazzjoni fattwali u legali komparabbli fid-dawl tal-objettiv tas-sistema tat-taxxa.

(162)

F'konformità mad-dubji espressi fid-Deċiżjoni tal-Ftuħ (176), il-Kummissjoni tqis li t-trattament tat-taxxa approvat mid-deċiżjonijiet tat-taxxa kkontestati jikkostitwixxi vantaġġ selettiv. L-eżistenza ta' dan il-vantaġġ selettiv jista' jiġi stabbilit b'analiżi tal-effetti tat-trattament tat-taxxa mogħti lil Engie minn angoli differenti. Fit-Taqsima 6.2, il-Kummissjoni se tistabbilixxi l-eżistenza ta' vantaġġ selettiv billi tanalizza l-effetti tad-deċiżjonijiet tat-taxxa kkontestati fil-livell individwali tal-entitajiet azzjonarji LNG Holding u CEF. Fit-Taqsima 6.3, il-Kummissjoni se tistabbilixxi l-eżistenza ta' vantaġġ selettiv billi tanalizza l-effetti tad-deċiżjonijiet tat-taxxa kkontestati fil-livell ta' grupp. Fl-aħħar nett, fit-Taqsima 6.4 il-Kummissjoni se turi li, meta ma applikax ir-regoli domestiċi tiegħu kontra l-abbuż tat-taxxa, il-Lussemburgu ta vantaġġ selettiv lil Engie.

(163)

Kull meta miżura adottata mill-Istat ittejjeb il-pożizzjoni finanzjarja netta ta' impriża, ikun hemm vantaġġ għall-finijiet tal-Artikolu 107(1) tat-Trattat (177). Sabiex tiġi stabbilita l-eżistenza ta' vantaġġ, għandha ssir referenza għall-effett tal-miżura stess (178). Fir-rigward ta' miżuri fiskali, vantaġġ jista' jingħata permezz ta' tipi differenti ta' tnaqqis tal-piż tat-taxxa ta' impriża u, b'mod partikolari, permezz ta' tnaqqis fil-bażi taxxabbli jew fl-ammont ta' taxxa dovut (179).

(164)

Id-deċiżjonijiet tat-taxxa kkontestati japprovaw trattament tat-taxxa li fuq il-bażi tiegħu GSTM, EIL, CEF, LNG Supply, LNG Lussemburgu u LNG Holding iddeterminaw il-profitt taxxabbli tagħhom għal finijiet ta' taxxa tad-dħul tal-kumpaniji fuq bażi annwali. Dak it-trattament tat-taxxa, min-naħa tiegħu, jiddetermina l-obbligazzjoni tat-taxxa fuq id-dħul tal-kumpaniji fil-Lussemburgu matul il-perjodu kopert mid-deċiżjonijiet tat-taxxa kkontestati u għalhekk x'aktarx jipprovdi vantaġġ selettiv.

(165)

Konsegwentement, fir-rigward tal-argument ta' Engie fil-premessa 133 li ma jistax ikun hemm vantaġġ minħabba li t-trattament tat-taxxa ma seħħx minħabba n-nuqqas ta' konverżjoni ta' GSTM ZORA, il-Kummissjoni tosserva li l-eżistenza tal-vantaġġ ma tiddependix fuq il-konverżjoni taż-ZORAs, anki jekk, kif spjegat fit-Taqsima 8, għall-finijiet tad-determinazzjoni tal-ammont ta' rkupru, il-vantaġġ jimmaterjalizza biss fil-mument li fih id-dħul li jirċievu CEF u LNG Holding jiġi eżentat (180).

(166)

Barra minn hekk, kif ukoll biex jiġu indirizzati xi osservazzjonijiet imqajma mil-Lussemburgu (181) u minn Engie (182), il-Kummissjoni tfakkar li din id-Deċiżjoni ma tikkonċernax ir-reġim ta' eżenzjoni tal-parteċipazzjonijiet stabbilit fl-Artikolu 166 LIR bħala tali, iżda pjuttost l-applikazzjoni ta' reġim bħal dan għaċ-ċirkostanzi speċifiċi tal-każ, kif approvat mill-awtoritajiet tat-taxxa tal-Lussemburgu meta ħarġu d-deċiżjonijiet tat-taxxa kkontestati. Fil-fatt, it-trattament tat-taxxa li qed jiġi valutat jikkonsisti f'li ġiet permessa l-applikazzjoni tal-eżenzjoni tal-parteċipazzjonijiet fuq dħul riċevut minn LNG Holding u minn CEF li ġie mill-parteċipazzjoni tagħhom, rispettivament, f'LNG Supply u f'GSTM, u dan jikkorrispondi ekonomikament għal ammonti mnaqqsa bħala spejjeż (l-Akkumulazzjonijiet ZORA) fil-livell ta' LNG Supply u GSTM. L-effett kombinat tad-deduċibbiltà tal-ammont tal-Akkumulazzjonijiet ZORA u l-eżenzjoni tad-dħul korrispondenti huwa li prattikament il-profitt kollu realizzat minn LNG Supply u minn GSTM effettivament baqa' mhux intaxxat (183). Kif spjegat fit-Taqsima 6.2.1, dan it-trattament tat-taxxa jidderoga mill-qafas ta' referenza, li huwa s-sistema tat-taxxa tal-kumpaniji tal-Lussemburgu. Barra minn hekk, dan jikkostitwixxi diskriminazzjoni mhux ġustifikata fil-konfront ta' impriżi oħra soġġetti għall-istess qafas ta' referenza fil-Lussemburgu, li jkun intaxxat fuq it-totalità tal-profitt tagħhom.

(167)

L-Artikolu 107 tat-Trattat jipprojbixxi biss għajnuna li “tiffavorixxi ċerti impriżi jew ċerti produtturi ta' ċerti prodotti”, jiġifieri, tipprojbixxi miżuri li jagħtu vantaġġ selettiv (184). Sabiex tikklassifika miżura tat-taxxa nazzjonali bħala selettiva skont dik l-analiżi, il-Qorti tal-Ġustizzja fasslet l-hekk imsejjaħ test fi tliet stadji. Skont dan it-test, il-Kummissjoni trid tibda billi tidentifika s-sistema ta' referenza. Wara, trid turi li l-miżura tat-taxxa inkwistjoni hija deroga minn dik is-sistema ta' referenza, sa fejn din tiddifferenzja bejn l-operaturi li, fid-dawl tal-objettiv li timmira lejh dik is-sistema, huma f'sitwazzjoni fattwali u legali komparabbli (selettività prima facie) (185). Fl-aħħar nett, miżura tat-taxxa li tikkostitwixxi deroga mill-applikazzjoni tas-sistema ta' referenza tista' madankollu tkun ġustifikata jekk l-Istat Membru kkonċernat ikun jista' juri li din il-miżura tirriżulta direttament mill-prinċipji bażiċi jew ta' gwida ta' dik is-sistema tat-taxxa (186). Jekk dak huwa l-każ, il-miżura tat-taxxa ma tkunx selettiva. L-oneru tal-prova f'dan l-aħħar pass huwa tal-Istat Membru.

(168)

Għalhekk, l-analiżi tal-eżistenza ta' vantaġġ selettiv trid tibda bl-identifikazzjoni tas-sistema ta' referenza applikabbli fl-Istat Membru kkonċernat. Huwa skont dik is-sistema ta' referenza li jrid jiġi ddeterminat jekk il-miżura tikkostitwixxix deroga li twassal għal trattament favorevoli meta mqabbla ma' impriżi oħra f'sitwazzjoni fattwali u legali komparabbli fid-dawl tal-objettivi tas-sistema.

(169)

Sistema ta' referenza hija magħmula minn sett konsistenti ta' regoli li japplikaw abbażi ta' kriterji oġġettivi għall-impriżi kollha li jaqgħu fl-ambitu tagħha kif definit mill-objettiv tagħha. Dawk ir-regoli jiddefinixxu mhux biss l-ambitu tas-sistema, iżda wkoll il-kundizzjonijiet li taħthom tapplika s-sistema, id-drittijiet u l-obbligi tal-impriżi soġġetti għaliha u t-teknikalitajiet tal-funzjonament tas-sistema (187). Fil-każ tat-taxxi, is-sistema ta' referenza hija bbażata fuq elementi bħall-bażi tat-taxxa, il-persuni taxxabbli, l-avveniment taxxabbli u r-rati tat-taxxa (188).

(170)

F'dan il-każ, il-Kummissjoni se tistabbilixxi fit-Taqsima 6.2.1. li t-trattament tat-taxxa mogħti abbażi tad-deċiżjonijiet tat-taxxa kkontestati jikkostitwixxi deroga mis-sistema ġenerali tat-taxxa fuq id-dħul tal-kumpaniji tal-Lussemburgu. Fit-Taqsima 6.2.2, se turi li dan it-trattament tat-taxxa jidderoga wkoll minn sistema ta' referenza aktar ristretta li tikkonsisti esklużivament mir-regoli tas-sistema ġenerali tat-taxxa fuq id-dħatul tal-kumpaniji tal-Lussemburgu li jirregolaw l-eżenzjoni tal-parteċipazzjonijiet u t-tassazzjoni tad-distribuzzjonijiet tal-profitti.

(171)

Id-deċiżjonijiet tat-taxxa kkontestati nħarġu favur bosta kumpaniji ta' Engie residenti fil-Lussemburgu sabiex jiddeterminaw l-obbligazzjoni tagħhom lejn it-taxxa fuq id-dħul tal-kumpaniji skont ir-regoli ordinarji tat-tassazzjoni tad-dħul tal-kumpaniji fil-Lussemburgu. Fid-dawl ta' dan, il-Kummissjoni tqis li s-sistema ta' referenza fil-każ preżenti hija magħmula minn dawn ir-regoli, jiġifieri s-sistema ġenerali tat-taxxa fuq id-dħul tal-kumpaniji tal-Lussemburgu.

(172)

F'dan il-każ, id-dispożizzjonijiet ewlenin tal-liġi (189) jindikaw li s-sistema tat-taxxa fuq id-dħul tal-kumpaniji tapplika għall-kumpaniji kollha residenti fil-Lussemburgu sabiex jiddeterminaw l-obbligazzjoni tagħhom tat-taxxa fuq id-dħul tal-kumpaniji.

(173)

Skont l-Artikolu 159(1) LIR, il-kumpaniji kollha bl-uffiċċju prinċipali jew bil-ġestjoni ċentrali fit-territorju tal-Lussemburgu, għal finijiet ta' taxxa, jitqiesu bħala residenti fil-Lussemburgu u huma soġġetti għat-taxxa tal-kumpaniji. Skont l-Artikolu 159(2) LIR, il-kumpaniji residenti huma soġġetti għat-taxxa fuq it-totalità tal-profitt tagħhom (sur l'ensemble des revenus du kontributive). B'mod konsistenti ma' din id-dispożizzjoni, l-Artikolu 163 LIR jistipula li t-taxxa fuq id-dħul tal-kumpaniji hija applikabbli fuq il-profitt taxxabbli realizzat mill-kontribwent f'sena kalendarja partikolari.

(174)

Il-profitt taxxabbli (revenu imposable) ta' kontribwenti kumpaniji jiġi ddeterminat fuq il-bażi tal-profitt kontabbilistiku tagħhom. L-Artikolu 18 LIR (190) jispjega kif jiġi ddeterminat il-profitt annwali tal-kontribwent. Skont din id-dispożizzjoni, il-profitt huwa d-differenza bejn l-assi netti investiti fi tmiem il-perjodu tas-sena tat-taxxa u l-assi netti investiti fil-bidu tal-perjodu tas-sena tat-taxxa, flimkien mal-irtirar għall-użu personali, bit-tnaqqis ta' kontribuzzjonijiet addizzjonali mwettqa matul is-sena.

(175)

Għalhekk, sabiex jiġi ddeterminat il-profitt li se jkun soġġett għat-taxxa huwa l-ewwel meħtieġ li jiġu ddeterminati l-valuri tal-assi netti investiti tal-kumpanija li se jintużaw għal skopijiet ta' taxxa. Għal dan l-għan, l-Artikolu 23 LIR (191) jispjega li l-valur tal-assi netti għandu jiġi determinat skont ir-regoli u l-prinċipji tal-kontabbiltà u l-Artikolu 40 (192) jistabbilixxi l-prinċipju li l-karta tal-bilanċ tat-taxxa trid tintrabat mal-karta tal-bilanċ kummerċjali, skont liema prinċipju l-valuri fil-karta tal-bilanċ tat-taxxa jenħtieġ li jikkorrispondu għall-valuri fil-karta tal-bilanċ kummerċjali sakemm ma tapplikax regola tat-taxxa speċifika li teħtieġ l-użu ta' valur differenti (193). Dan ifisser li, skont is-sistema ġenerali tat-taxxa tal-kumpaniji tal-Lussemburgu, il-profitt kontabilistiku ta' kumpanija huwa inkluż fil-bażi tat-taxxa tagħha, sakemm dispożizzjoni speċifika tal-liġi ma tindikax mod ieħor.

(176)

Bħala konklużjoni, is-sistema tat-taxxa tal-kumpaniji tal-Lussemburgu tapplika għall-kumpaniji kollha bl-uffiċċju ewlieni jew bil-ġestjoni ċentrali fit-territorju tal-Lussemburgu, u l-bażi għall-kalkolu tal-profitt taxxabbli huwa l-profitt kontabbilistiku. Għalhekk, l-objettiv tas-sistema tat-taxxa tal-kumpaniji tal-Lussemburgu hija t-tassazzjoni tal-profitt tal-kumpaniji kollha soġġetti għat-taxxa fil-Lussemburgu, kif determinat fil-kontijiet tagħhom.

(177)

Dan fil-prinċipju la huwa kkontestat mil-Lussemburgu u lanqas minn Engie (194). Skont il-Lussemburgu (195), is-sistema ta' referenza tikkonsisti, l-ewwel nett, mill-Artikoli 18, 40 u 23 LIR, li jikkonċernaw id-determinazzjoni tal-bażi tat-taxxa, ir-rabta tal-karta tal-bilanċ kummerċjali mal-karta tal-bilanċ tat-taxxa u l-prinċipju tal-prudenza (196) u t-tieni nett mill-Artikolu 22bis LIR. Skont Engie (197), is-sistema ta' referenza hija kkostitwita mill-Artikoli 18 sa 45 LIR, li jinkorporaw il-prinċipji fundamentali tal-liġi tat-taxxa tal-Lussemburgu għad-determinazzjoni tal-bażi tat-taxxa ta' kumpanija, pereż. il-prinċipju tal-prudenza, ir-rabta tal-karta tal-bilanċ tat-taxxa mal-karta tal-bilanċ kummerċjali u d-deduċibbiltà tal-ispejjeż tan-negozju (198). Engie taqbel espressivament li l-objettiv tas-sistema tat-taxxa tal-kumpaniji tal-Lussemburgu hija t-tassazzjoni tal-profitt tal-kumpaniji kollha soġġetti għat-taxxa fil-Lussemburgu. (199)

(178)

Id-definizzjoni tas-sistema ġenerali tat-taxxa tal-kumpaniji tal-Lussemburgu bħala l-qafas ta' referenza hija konformi mal-każistika tal-Qorti, li konsistentement sostniet li fil-każ ta' miżuri li jikkonċernaw id-determinazzjoni tal-obbligazzjoni tat-taxxa fuq id-dħul ta' kumpanija, is-sistema ta' referenza li għandha tiġi kkunsidrata hija s-sistema ta' taxxa fuq id-dħul tal-kumpaniji tal-Istat Membru inkwistjoni li tapplika għall-impriżi kollha, u mhux id-dispożizzjonijiet speċifiċi ta' dik is-sistema applikabbli biss għal ċerti kontribwenti jew għal ċerti tranżazzjonijiet. Pereżempju, fil-World Duty Free, kawża li tikkonċerna r-regoli li jirregolaw l-investimenti f'parteċipazzjonijiet azzjonarji, il-Qorti approvat il-pożizzjoni tal-Kummissjoni li s-sistema ta' referenza kienet is-sistema tat-taxxa tal-kumpaniji Spanjola u mhux ir-regoli speċifiċi li jirregolaw it-trattament tat-taxxa ta' dawk l-investimenti (200).

(179)

Il-Kummissjoni tqis li l-limitazzjoni tal-qafas ta' referenza għal dispożizzjonijiet speċifiċi tal-liġi ġenerali tat-taxxa tad-dħul li jkunu mmirati għal ċerti tranżazzjonijiet jew ċerti impriżi tkun tfisser li l-identifikazzjoni tas-sistema ta' referenza f'każ partikolari tkun totalment dipendenti fuq jekk l-Istat Membru inkwistjoni jkunx adotta regoli tat-taxxa speċifiċi, minflok ma tħares lejn l-objettiv tas-sistema tat-taxxa. Billi jiġu adottati regoli speċifiċi applikabbli biss għal ċerti impriżi jew tranżazzjonijiet, l-Istat Membru jista' jargumenta li t-trattament tat-taxxa ta' dawn il-kumpaniji jew it-tranżazzjonijiet qatt ma jikkostitwixxi deroga mill-qafas ta' referenza. Dan jipproteġi li dawk il-miżuri kontra l-applikazzjoni tal-Artikolu 107 tat-Trattat u b'hekk il-kontroll tal-għajnuna mill-Istat ma jibqax effettiv. Fi kliem ieħor, l-aċċettazzjoni ta' dan l-approċċ ifisser li l-kwalifika ta' miżura bħala deroga mis-sistema ta' referenza tkun kompletament dipendenti fuq it-teknika regolatorja użata mill-Istat Membru. Kif il-Qorti diġà ddeċidiet, dan huwa inkompatibbli mal-prinċipju stabbilit sew li skontu l-Artikolu 107 tat-Trattat jiddefinixxi miżura bħala għajnuna mill-Istat fir-rigward tal-effetti tagħha, u għalhekk indipendentement mit-tekniki użati (201).

(180)

Il-Lussemburgu ma jikkontestax b'mod espliċitu li l-qafas ta' referenza huwa s-sistema ġenerali tat-taxxa tal-kumpaniji. Madankollu, iqis li l-objettiv tat-taxxa fuq il-profitti li jagħmlu l-kumpaniji soġġetti għat-taxxa fil-Lussemburgu la huwa kkunsidrat u lanqas rifless fid-dispożizzjonijiet tal-liġi tat-taxxa fuq id-dħul u li d-dispożizzjonijiet tal-liġi ma jistgħux jiġu interpretati bħala li jeħtieġu li l-profitt kollu magħmul minn kumpanija soġġetta għat-taxxa fil-Lussemburgu għandu jkun intaxxat, fiċ-ċirkostanzi kollha, anke kontra t-test tal-liġi (202). Il-Lussemburgu u Engie invokaw f'dan ir-rigward il-prinċipju tal-legalità, li jgħid li l-mod kif it-taxxi huma determinati huwa stabbilit mil-liġi, li għandha tkun interpretata b'mod strett, u jekk ċerta sitwazzjoni ma tkunx stipulata b'mod ċar mil-liġi (silenzju tal-leġiżlatur), din ma tistax tkun soġġetta għal tassazzjoni (203).

(181)

Il-Kummissjoni ma taqbilx ma' din l-allegazzjoni.

(182)

L-ewwel nett, il-Kummissjoni ma tifhimx kif it-tassazzjoni tal-profitt tal-kumpaniji kollha soġġetti għat-taxxa ma tistax tkun l-objettiv ta' sistema tat-taxxa tal-kumpaniji. Fil-fatt, il-Kummissjoni tinnota li l-Lussemburgu ma jipproponix objettiv alternattiv fil-kummenti tiegħu. It-tieni nett, il-Kummissjoni tinnota wkoll li Engie taqbel mal-fatt li l-objettiv tas-sistema tat-taxxa tal-kumpaniji tal-Lussemburgu hija t-tassazzjoni tal-profitt tal-kumpaniji kollha soġġetti għat-taxxa fil-Lussemburgu (204). It-tielet, kif deskritt fil-premessi 172 sa 176, qari sempliċi tad-dispożizzjonijiet rilevanti tal-liġi jkun biżżejjed biex jiġi konkluż li s-sistema tat-taxxa tal-kumpaniji tal-Lussemburgu għandha l-għan li tintaxxa l-profitt tal-kumpaniji kollha soġġetti għat-taxxa fil-Lussemburgu, kif determinat abbażi tal-kontijiet tagħhom.

(183)

Meta jinvokaw il-prinċipju tal-legalità, il-Lussemburgu u Engie jidhru li qed jirreferu għall-eżistenza ta' eċċezzjoni jew lakuna fil-liġi tat-taxxa tal-Lussemburgu li kienet twassal għal nontassazzjoni effettiva ta' virtwalment il-profitti kollha magħmula minn LNG Supply u minn GSTM fil-Lussemburgu. L-essenza ta' dan l-argument hija li f'dawk il-każijiet dawn l-eċċezzjonijiet jew lakuni jkunu parti mis-sistema ta' referenza u għalhekk ma jistax ikun hemm deroga.

(184)

Il-Kummissjoni ma taċċettax dan l-argument. Peress li l-istrutturi mfassla minn Engie fis-sentenzi tat-taxxa kkontestati huma — kif il-Lussemburgu u Engie jammettu (205) — miftuħa għal kull operatur fis-suq, dan ifisser li kull impriża tista' tittrasferixxi n-negozju tagħha għand sussidjarja, twaqqaf struttura ta' finanzjament simili u tispiċċa tiġi intaxxata biss fuq porzjon marġinali tal-profitti tagħha, bħal Engie. Fi kliem ieħor, skont dan l-argument, kwalunkwe kontribwent fil-Lussemburgu jista' jagħżel li jiġi intaxxat fuq it-totalità tal-profitt tiegħu jew jibqa' virtwalment mhux intaxxat. Il-Kummissjoni ma tistax taċċetta din il-konklużjoni. Dan mhux biss jikser il-karatteristika ġenerali ta' kwalunkwe sistema tat-taxxa li skontha l-ammont ta' taxxi li għandhom jitħallsu ma jistax jiġi ddeterminat b'mod unilaterali mill-kontribwent, iżda wkoll il-prinċipju bażiku — komuni għal kull Stat Membru — li t-taxxi fuq id-dħul għandhom jiġu imposti skont l-abbiltà tal-kontribwent li jħallas. Barra minn hekk, dan iqiegħed f'riskju l-kapaċità mill-Istat li jimmobilizza r-riżorsi meħtieġa biex jiffinanzja l-baġit tiegħu, u b'hekk irendi mhux effettiva lis-sistema tat-taxxa tiegħu.

(185)

Fil-prattika, l-approċċ li qed jiddefendu l-Lussemburgu u Engie jwassal biex il-kontroll tal-għajnuna mill-Istat ma jkunx effettiv, peress li l-Istati Membri jitħallew jintroduċu fis-sistemi tat-taxxa tagħhom - b'mod intenzjonali jew le - eċċezzjonijiet mhux ġustifikati mill-prinċipju ġenerali ta' tassazzjoni tal-profitt li minnhom jistgħu jibbenefikaw kategoriji sħaħ ta' impriżi jew ta' tranżazzjonijiet. Minħabba li eċċezzjonijiet bħal dawn ikunu parti mill-qafas ta' referenza, dawn qatt ma jistgħu jikkostitwixxu għajnuna mill-Istat.

(186)

Bħala argument relatat, il-Lussemburgu jiddikjara wkoll li l-qafas ta' referenza għandu jiġi definit b'referenza għal korp ta' regoli espressament stipulat mil-leġiżlatur nazzjonali u mhux għal “prinċipju” jew “objettiv” allegat, li l-interpretazzjoni tiegħu tmur lil hinn mit-termini ċari u preċiżi tal-liġi (206).

(187)

Il-Kummissjoni ma taqbilx li sistema ta' referenza ma tistax tiġi definita b'referenza għall-objettivi tagħha, bħat-tassazzjoni tal-profitt tal-kumpaniji kollha soġġetti għat-taxxa. Għall-kuntrarju, dan huwa l-mod standard li bih il-ġurisprudenza tal-Qorti ddefinixxiet il-qafas ta' referenza fil-każijiet ta' għajnuna mill-Istat fil-qasam tat-taxxa fuq id-dħul tal-kumpaniji (207). Tabilħaqq, il-Kummissjoni hija meħtieġa tiddefinixxi l-objettiv tas-sistema sabiex tistabbilixxi s-selettività, billi fid-dawl ta' dak l-objettiv biss tista' turi jekk impriżi li huma esklużi mill-vantaġġ humiex f'sitwazzjoni legali u fattwali li hija komparabbli ma' dik tal-benefiċjarji tal-miżura inkwistjoni (208). Fi kwalunkwe każ, l-objettiv tas-sistema tat-taxxa tal-kumpaniji tal-Lussemburgu, li tapplika għall-kontribwenti kumpaniji kollha soġġetti għat-taxxa fil-Lussemburgu, huwa definit fil-liġi, kif ġie spjegat fil-premessi minn 172 sa 176 u, għal darb' oħra, il-Lussemburgu ma identifika l-ebda objettiv alternattiv. Għaldaqstant, dan l-argument ma għandux jintlaqa'.

(188)

Fid-dawl ta' dak li ntqal hawn fuq, il-Kummissjoni tikkonkludi li s-sistema ta' referenza applikabbli hija s-sistema tat-taxxa tal-kumpaniji tal-Lussemburgu, li l-objettiv tagħha huwa t-tassazzjoni tal-profitt tal-kumpaniji kollha soġġetti għat-taxxa fil-Lussemburgu (209). Il-fatt li jista' jkun hemm xi eċċezzjonijiet jew aġġustamenti fil-mod kif tiġi ddeterminata l-bażi tat-taxxa, kif jallegaw il-Lussemburgu (210) jew Engie (211), ma jdgħajjifx din il-konklużjoni. Huwa għalhekk skont dik is-sistema ta' referenza li jrid jiġi ddeterminat jekk it-trattament tat-taxxa mogħti fuq il-bażi tad-deċiżjonijiet tat-taxxa kkontestati jikkostitwixxix deroga li twassal għal trattament favorevoli meta mqabbla ma' impriżi oħra f'sitwazzjoni fattwali u legali komparabbli fid-dawl tal-objettivi tas-sistema (212).

(189)

LNG Holding u CEF jistgħu jitqiesu f'sitwazzjoni legali u fattwali komparabbli għall-kontribwenti kumpaniji kollha soġġetti għat-taxxa fil-Lussemburgu fid-dawl tal-objettiv tas-sistema ġenerali tat-taxxa tal-kumpaniji tal-Lussemburgu, jiġifieri t-tassazzjoni tal-profitt tal-kumpaniji kollha soġġetti għat-taxxa fil-Lussemburgu. Fid-dawl ta' dak l-objettiv, il-kontribwenti kumpaniji kollha li huma kapaċi jiġġeneraw profitt huma, bħala kwistjoni ta' prinċipju, f'sitwazzjoni fattwali u legali komparabbli meta tiġi vvalutata l-obbligazzjoni tat-taxxa tad-dħul korporattiv tagħhom fil-Lussemburgu.

(190)

Il-fatt li — għall-kuntrarju ta' kontribwenti oħra — LNG Holding u CEF jirċievu distribuzzjonijiet tal-profitt minn entitajiet b'parteċipazzjoni fihom li jistgħu jkunu soġġetti għal eżenzjoni tal-parteċipazzjonijiet skont l-Artikolu 166 LIR ma jagħmilx lil dawn iż-żewġ entitajiet mhux komparabbli ma' kontribwenti li ma jibbenefikawx minn din l-eżenzjoni fid-dawl tal-objettiv tas-sistema. L-eżenzjoni stipulata skont din id-dispożizzjoni tingħata biss lil ċertu tip ta' dħul sakemm jintlaħqu xi kundizzjonijiet. Madankollu, in-natura tad-dħul li tagħmel il-kumpanija (id-distribuzzjoni tal-profitti eliġibbli taħt l-Artikolu 166 LIR jew profitt kummerċjali ieħor magħmul mill-kumpanija), u l-bqija tal-kundizzjonijiet stabbiliti skont l-Artikolu 166 LIR (213) ma għandhomx impatt fuq l-objettiv tas-sistema, li huwa t-tassazzjoni tal-profitt tal-kumpaniji kollha soġġetti għat-taxxa fil-Lussemburgu (214). Tabilħaqq, jekk il-benefiċċju minn ċerta eżenzjoni mit-taxxa tal-kumpaniji jkun biżżejjed biex impriża ma tkunx tista' titqabbel ma' impriżi oħra li ma jibbenefikawx minn dik l-eżenzjoni, l-eżenzjonijiet mit-taxxa tal-kumpaniji, min-natura tagħhom, qatt ma jkunu jitqiesu bħala selettivi.

(191)

Fid-dawl tal-qafas ta' referenza deskritt fil-punt 6.2.1.1, il-bażi tal-valutazzjoni tal-obbligazzjoni tat-taxxa tad-dħul korporattiv tagħhom hija l-istess għall-kontribwenti kumpaniji kollha fil-Lussemburgu, jiġifieri l-ammont tal-profitt nett kif determinat fil-kontijiet tagħhom (215).

(192)

It-trattament tat-taxxa approvat mid-deċiżjonijiet tat-taxxa kkontestati jippermetti eżenzjoni ta' dħul riċevut minn LNG Holding u CEF: id-dħul li jirriżulta mill-parteċipazzjoni tagħhom f'LNG Supply u GSTM, rispettivament. Billi d-deċiżjonijiet tat-taxxa kkontestati u l-ftehimiet iffirmati mill-partijiet, u li l-Lussemburgu jammetti b'mod espliċitu (216), juru li hemm rabta diretta u ċara bejn dak id-dħul u l-Akkumulazzjonijiet ZORA mnaqqsa mill-bażi tat-taxxa ta' LNG Supply u GSTM rispettivament. Fil-fatt, kwalunkwe profitt li għamlu LNG Supply u GSTM li jaqbeż il-Marġni LNG u l-marġni GSTM jitnaqqas mill-bażijiet tat-taxxa tagħhom fil-forma ta' Akkumulazzjonijiet ZORA (u b'hekk jibqa' mhux intaxxat). Il-profitt taxxabbli tas-sussidjarji huwa għalhekk limitat għall-Marġni LNG u l-Marġni GSTM. Il-profitt mhux intaxxat imnaqqas fil-forma ta' Akkumulazzjonijiet ZORA mbagħad jiġi inkorporat fl-Ishma ta' LNG u fl-Ishma ta' GSTM, li huma, bis-saħħa taż-ZORAs u tal-Kuntratti Forward, riċevuti mal-konverżjoni minn LNG Holding u CEF rispettivament. Madankollu, meta l-profitt inkorporat fl-Ishma ta' LNG u fl-Ishma ta' GSTM jiġi realizzat bħala dħul fil-livell ta' LNG Holding u CEF, din jista' jibbenefika mill-eżenzjoni tal-parteċipazzjonijiet (217), u b'hekk jibqa' wkoll mhux intaxxata fil-livell ta' dawk il-kumpaniji.

(193)

Il-konsegwenza hija li prattikament il-profitt kollu realizzat minn LNG Supply u GSTM jitħalla rispettivament għand LNG Holding u CEF, u mhux intaxxat. Madankollu, dak il-profitt huwa realizzat minn kumpaniji soġġetti għat-taxxa fil-Lussemburgu u huwa rreġistrat fil-kontijiet, l-ewwel ta' LNG Supply u GSTM, u aktar tard ta' LNG Holding u CEF. Konsegwentement, skont is-sistema ordinarja ta' tassazzjoni, għandu jkun soġġett għal tassazzjoni fil-Lussemburgu. Għaldaqstant, it-trattament tat-taxxa mogħti fuq il-bażi tad-deċiżjoni tat-taxxa kkontestata jikkostitwixxi deroga mill-qafas ta' referenza.

(194)

Il-Lussemburgu jerġa' jqajjem il-prinċipju tal-legalità. Huwa jqis li t-termini tad-dispożizzjonijiet tal-liġi li ġew applikati fid-deċiżjonijiet tat-taxxa kkontestati huma ċari u ma jaċċettax interpretazzjoni ratio legis jew skont l-objettivi tagħhom. Peress li t-test tad-dispożizzjonijiet tal-liġi ġie rispettat, ma jistax ikun hemm deroga u għalhekk ma hemmx vantaġġ (218).

(195)

B'dan l-argument, il-Lussemburgu jikkunsidra essenzjalment li miżura ma tistax tikkostitwixxi vantaġġ selettiv jekk tikkonforma mal-liġi nazzjonali, minħabba li f'dan il-każ ma tikkostitwixxix deroga. Fil-fehma tal-Kummissjoni, dan l-argument huwa ineffettiv. Kif diġà ġie spjegat, il-miżuri ta' għajnuna mill-Istat huma vvalutati fir-rigward tal-effetti tagħhom. Għalhekk, id-definizzjoni ta' miżura bħala għajnuna ma tistax tiddependi fuq il-legalità tagħhom taħt l-ordni ġuridiku nazzjonali. Kieku dan kien il-każ, prattikament l-ebda miżura mill-Istat ma tikkwalifika bħala għajnuna mill-Istat (219). Għall-kuntrarju, kull meta l-applikazzjoni ta' dispożizzjoni waħda jew aktar tal-liġi għal każ speċifiku tagħti lok għal eċċezzjoni mir-regola ġenerali stabbilita fis-sistema ta' referenza (f'dan il-każ, it-tassazzjoni tal-profitt tal-kumpaniji kollha soġġetti għat-taxxa fil-Lussemburgu), dak it-trattament tat-taxxa jrid jitqies li jikkostitwixxi deroga. Barra minn hekk, jekk din id-deroga twassal għal diskriminazzjoni fil-konfront ta' impriżi f'sitwazzjoni legali u fattwali komparabbli fid-dawl tal-objettiv tas-sistema, it-trattament tat-taxxa inkwistjoni jrid jitqies a priori selettiv, u dan irrispettivament minn jekk it-termini tad-dispożizzjonijiet applikati ġewx irrispettati jew le.

(196)

Bħala konsegwenza, it-trattament tat-taxxa mogħti fuq il-bażi tad-deċiżjonijiet tat-taxxa kkontestati jidderoga mis-sistema ġenerali tat-taxxa tal-kumpaniji tal-Lussemburgu u għalhekk jikkostitwixxi vantaġġ ekonomiku għal LNG Holding u CEF. Il-fatt li teżisti fil-liġi tat-taxxa fuq id-dħul tal-kumpaniji ta' għadd ta' derogi oħra ma jneħħix in-natura derogatorja tat-trattament tat-taxxa mogħti fuq il-bażi tad-deċiżjonijiet tat-taxxa kkontestati (220).

(197)

Barra minn hekk, kif stabbilit fit-Taqsima 6.2.1.1, LNG Holding u CEF huma f'sitwazzjoni legali u fattwali komparabbli għall-kontribwenti kumpaniji kollha soġġetti għat-taxxa tal-kumpaniji fil-Lussemburgu. Għalhekk, it-trattament tat-taxxa mogħti lil LNG Holding u CEF abbażi tad-deċiżjonijiet tat-taxxa kkontestati jagħti vantaġġ lil dawn iż-żewġ kumpaniji meta mqabbel mal-kontribwenti kumpaniji l-oħra kollha f'sitwazzjoni legali u fattwali komparabbli fid-dawl tal-objettiv tat-taxxa fuq id-dħul tal-kumpaniji tal-Lussemburgu.

(198)

Fid-dawl ta' dak li ntqal hawn fuq, il-Kummissjoni tikkonkludi li l-vantaġġ mogħti fuq il-bażi tad-deċiżjonijiet tat-taxxa kkontestati huwa prima facie selettiv.

(199)

Fi kwalunkwe każ, anki kieku jitqiesu biss il-kontribwenti kumpaniji li huma soġġetti għar-regoli dwar l-eżenzjoni tal-parteċipazzjonijiet u t-tassazzjoni tad-distribuzzjonijiet tal-profitti li jinsabu f'sitwazzjoni legali u fattwali komparabbli ma' LNG Holding u CEF, fit-Taqsima 6.2.2 il-Kummissjoni se turi wkoll li dawk il-kontribwenti kumpaniji huma esklużi wkoll mill-vantaġġ tat-taxxa mogħti lil LNG Holding u CEF.

(200)

Engie ssostni li l-aġġustamenti imposti mil-liġi tat-taxxa għall-profitt iddeterminati fil-karta tal-bilanċ kummerċjali tal-kontribwent, u b'mod partikolari r-reġim ta' eżenzjoni tal-parteċipazzjonijiet, huma parti mill-qafas ta' referenza (221). Fil-prattika, b'din l-allegazzjoni Engie qed tipprova tirrestrinġi l-qafas ta' referenza għad-dispożizzjonijiet speċifiċi tal-liġi tat-taxxa fuq id-dħul li jirregolaw l-eżenzjoni tal-parteċipazzjonijiet u t-tassazzjoni fuq id-distribuzzjonijiet tal-profitti. Skont dan il-qafas ta' referenza ristrett, il-valutazzjoni tal-impriżi li jinsabu f'sitwazzjoni legali u fattwali komparabbli ma' LNG Holding u CEF se tkun neċessarjament limitata għal dawk il-kontribwenti li għalihom japplikaw dawn id-dispożizzjonijiet. Madankollu, kif se jintwera f'din it-Taqsima, taħt dan il-qafas ta' referenza aktar ristrett it-trattament tat-taxxa mogħti abbażi tad-deċiżjonijiet tat-taxxa kkontestati huwa wkoll prima facie selettiv.

(201)

L-Artikolu 164(1) LIR jipprevedi li, sabiex tiġi ddeterminata l-bażi tat-taxxa ta' kumpanija, huwa irrilevanti jekk il-profitt ikunx tqassam jew le. Dan ifisser li l-profitt imqassam minn kumpanija ma jnaqqasx il-bażi tat-taxxa tagħha, jiġifieri mhuwiex deduċibbli. Bħala konsegwenza, il-profitt jista' jiġi distribwit biss wara t-taxxa. Kif spjegat fil-premessa 87, l-Artikolu 164(2) LIR japplika għad-distribuzzjonijiet ta' kwalunkwe tip lill-azzjonisti.

(202)

Min-naħa l-oħra, il-benefiċjarji jirreġistraw il-profitt imqassam fil-kontijiet tagħhom bħala dħul. Skont il-prinċipju tal-irbit tal-karta tal-bilanċ kummerċjali mal-karta tal-bilanċ tat-taxxa, dan id-dħul, li huwa parti mill-profitt realizzat minn dawk il-kumpaniji u b'hekk irreġistrat fil-kontijiet tagħhom, fil-prinċipju jiġi inkluż fil-bażi tat-taxxa tagħhom. Dik l-inklużjoni għalhekk twassal għal tassazzjoni ekonomika doppja, sakemm ma tiġix applikata l-eżenzjoni tal-parteċipazzjonijiet skont id-dispożizzjonijiet tal-Artikolu 166 LIR (222). L-eżenzjoni taħt din id-dispożizzjoni tapplika għal dħul li jiġi minn “parteċipazzjonijiet”, terminu li mhuwiex definit fil-liġi. Madankollu, kif iċċara l-Lussemburgu, il-parteċipazzjonijiet kollha li d-dħul minnhom jista' jibbenefika mill-eżenzjoni skont l-Artikolu 166 LIR (inklużi l-ishma) huma koperti wkoll mill-obbligu taħt l-Artikolu 164 LIR (bl-eċċezzjoni tal-parteċipazzjonijiet f'entitajiet barranin) (223). Għalhekk, skont is-sistema ordinarja tat-taxxa tal-kumpaniji tal-Lussemburgu, l-eżenzjoni tal-parteċipazzjonijiet tapplika fuq il-profitt wara t-taxxa (jiġifieri ma tistax tiġi applikata għal ammonti mnaqqsa mill-bażi tat-taxxa tal-entità tad-distribuzzjoni) (224).

(203)

Wara d-Digriet tal-21 ta' Diċembru 2001, l-eżenzjoni tal-parteċipazzjonijiet hija applikabbli mhux biss għall-profitt imqassam mill-entità bil-parteċipazzjoni fiha, iżda wkoll għall-qligħ kapitali li jirriżulta minn parteċipazzjonijiet eliġibbli għar-reġim (225). Qligħ kapitali huwa d-dħul li jirriżulta mid-differenza bejn il-valur tar-realizzazzjoni ta' parteċipazzjoni (fil-każ ta' bejgħ jew kanċellazzjoni) u l-valur tal-akkwist tagħha. Il-qligħ kapitali li jirriżulta minn parteċipazzjonijiet jirrifletti jew profitt li diġà sar mill-entità bil-parteċipazzjoni fiha iżda li għadu ma ġiex iddistribwit jew profitt li jkun mistenni li jiġi realizzat fil-ġejjieni, u għalhekk, mhux imqassam lanqas. Skont l-Artikoli 18 LIR u 40 LIR, il-profitt kollu jrid neċessarjament jiġi inkluż fil-bażi tat-taxxa tal-entità bil-parteċipazzjoni fiha. Barra minn hekk, peress li ma ġiex distribwit mill-entità bil-parteċipazzjoni fiha l-profitt ma jistax, b'definizzjoni, ikun l-oġġett ta' xi tnaqqis. Għaldaqstant, anki fil-każ ta' qligħ kapitali, l-eżenzjoni tal-parteċipazzjonijiet hija applikabbli għal dħul li ma jistax jikkorrispondi għall-ammonti mnaqqsa mill-bażi tat-taxxa tal-entità bil-parteċipazzjoni fiha (bħall-Akkumulazzjonijiet ZORA).

(204)

Fi kliem ieħor, taħt qafas ta' referenza ristrett magħmul esklussivament mir-regoli dwar l-eżenzjoni tal-parteċipazzjonijiet u t-tassazzjoni tad-distribuzzjonijiet tal-profitti, l-eżenzjoni tal-parteċipazzjonijiet hija applikabbli għal dħul li ma jikkorrispondix għall-ammonti mnaqqsa mill-bażi tat-taxxa tal-entità bil-parteċipazzjoni fiha, u dan irrispettivament minn jekk dak id-dħul ikunx ikkwalifikat bħala distribuzzjoni ta' profitti jew bħala qligħ kapitali.

(205)

LNG Holding u CEF huma f'sitwazzjoni legali u fattwali komparabbli mal-kontribwenti kumpaniji kollha li jirċievu dħul minn parteċipazzjonijiet u li għalhekk huma soġġetti għar-regoli dwar l-eżenzjoni tal-parteċipazzjonijiet u tat-tassazzjoni tad-distribuzzjonijiet tal-profitti fil-Lussemburgu. Dawk l-impriżi għandhom l-istess tip ta' strumenti bħal LNG Holding u CEF (parteċipazzjonijiet) u d-dħul riċevut minn dawn l-istrumenti huwa tal-istess natura tad-dħul riċevut minn LNG Holding u minn CEF, li fil-prinċipju jikkwalifika għall-applikazzjoni tal-eżenzjoni tal-parteċipazzjonijiet.

(206)

Id-deċiżjonijiet tat-taxxa kkontestati jippermettu lil LNG Holding u lil CEF (entitajiet residenti għal finijiet ta' taxxa fil-Lussemburgu) li japplikaw l-eżenzjoni tal-parteċipazzjonijiet fuq dħul li jikkorrispondi ekonomikament għal ammonti mnaqqsa bħala spejjeż (Akkumulazzjonijiet ZORA) fil-livell ta', rispettivament, LNG Supply u GSTM (ukoll residenti fil-Lussemburgu).

(207)

Fil-fatt, id-deċiżjonijiet tat-taxxa kkontestati jikkonfermaw li kull profitt li sar minn LNG Supply u minn GSTM li jaqbeż il-Marġni LNG u l-Marġni GSTM (u għalhekk imnaqqas mill-bażijiet tat-taxxa tagħhom fil-forma ta' Akkumulazzjonijiet ZORA) huwa inkorporat fl-Ishma ta' LNG u fl-Ishma ta' GSTM. Dawk l-ishma huma, skont iz-ZORAs u l-Kuntratti Forward, riċevuti mal-konverżjoni minn LNG Holding u CEF rispettivament. Wara, meta l-profitt inkorporat fl-Ishma ta' LNG u fl-Ishma ta' GSTM jiġi realizzat bħala dħul fil-livell ta' LNG Holding u CEF, ikun jista' jibbenefika mill-eżenzjoni tal-parteċipazzjonijiet (226).

(208)

L-eżistenza ta' rabta diretta u ċara bejn id-dħul li jibbenefika mill-eżenzjoni tal-parteċipazzjonijiet fil-livell tal-Holdings u l-ammonti mnaqqsa bħala spejjeż fil-livell tas-Sussidjarji hija evidenti fil-każ tal-konverżjoni parzjali ta' LNG ZORA. F'dan il-każ, kif juru d-dikjarazzjonijiet tat-taxxa, id-dħul realizzat minn LNG Holding bħala riżultat tal-konverżjoni parzjali u tal-kanċellazzjoni tal-Ishma ta' LNG Supply fl-2014 jikkorrispondi b'mod ekonomiku għall-Akkumulazzjonijiet ZORA mnaqqsa minn LNG Supply bejn l-2009 u l-2014, li LNG Holding irċeviet permezz ta' LNG ZORA u tal-Kuntratt Forward LNG (227). Dan ġie kkonfermat b'mod ċar mil-Lussemburgu: “La plus-value comptable de 506,2 MUSD réalisée par LNG Holding correspond économiquement à l'accroissement de valeur de LNG Supply entre 2009 et 2014” (228).

(209)

L-applikazzjoni tal-eżenzjoni tal-parteċipazzjonijiet għal dħul fil-livell ta' Holdings li jikkorrispondi ekonomikament għal ammonti mnaqqsa bħala spejjeż fil-livell tas-Sussidjarji tikkostitwixxi eċċezzjoni għall-qafas ta' referenza deskritt fit-Taqsima 6.2.2.1 hawn fuq li jgħid li l-eżenzjoni tal-parteċipazzjonijiet hija applikabbli għad-dħul li ma jikkorrispondix għal ammonti mnaqqsa mill-bażi tat-taxxa tal-entità bil-parteċipazzjoni fiha. L-effett ta' din id-deroga huwa li prattikament il-profitt kollu ġġenerat minn LNG Supply u minn GSTM qatt ma jiġi soġġett għal tassazzjoni fil-Lussemburgu. B'konsegwenza t-trattament tat-taxxa approvat mid-deċiżjonijiet tat-taxxa kkontestati jtejjeb il-pożizzjoni finanzjarja ta' LNG Holding u ta' CEF. Fil-fatt, skont is-sistema ordinarja deskritta fit-Taqsima 6.2.2.1 hawn fuq, id-dħul li jirċievu dawn l-entitajiet ma kienx ikun imnaqqas (fil-forma ta' Akkumulazzjonijiet ZORA) fil-livell tas-Sussidjarji. Dak id-dħul kien ikun aktar baxx minħabba li l-profitt korrispondenti kien ikun preċedentement soġġett għal tassazzjoni għand is-Sussidjarji.

(210)

Il-Lussemburgu u Engie jikkontestaw l-applikabilità tal-Artikolu 164(2) LIR għall-Akkumulazzjonijiet ZORA. Fi kliem ieħor, il-Lussemburgu u Engie jikkontestaw li l-Akkumulazzjonijiet ZORA jistgħu jitqiesu bħala distribuzzjonijiet ta' profitti.

(211)

F'dan ir-rigward, il-Kummissjoni tfakkar li LNG Holding tikkwalifika espressament il-profitt li jirriżulta mill-kanċellazzjoni tal-Ishma ta' LNG Supply bħala “dividendi eżentati”, jiġifieri bħala distribuzzjoni ta' profitt, fid-dikjarazzjoni tat-taxxa tagħha tas-sena 2014 (229).

(212)

Barra minn hekk, kif spjegat fil-premessi 207 u 208, teżisti rabta diretta u ċara bejn id-dħul li jista' jiġi eżentat fil-livell ta' LNG Holding u ta' CEF u l-ammonti mnaqqsa minn LNG Supply u GSTM bħala spejjeż (l-Akkumulazzjonijiet ZORA). Għalhekk, minn perspettiva ekonomika, id-dħul riċevut minn LNG Holding u minn CEF huwa ekwivalenti għal distribuzzjoni tal-profitti (230).

(213)

Fi kwalunkwe każ, il-Kummissjoni tfakkar li l-kwalifika formali tal-profitt eżentat fil-livell ta' LNG Holding u ta' CEF bħala distribuzzjoni ta' profitt jew bħala qligħ kapitali hija irrilevanti. Fil-fatt, kif spjegat fit-Taqsima 6.2.2.1, skont il-qafas ta' referenza ristrett magħmul esklussivament mir-regoli dwar l-eżenzjoni tal-parteċipazzjonijiet u tat-tassazzjoni tad-distribuzzjonijiet tal-profitti, l-eżenzjoni tal-parteċipazzjonijiet hija applikabbli għal dħul li ma jikkorrispondix għall-ammonti mnaqqsa mill-bażi tat-taxxa tal-entità bil-parteċipazzjoni fiha, u dan irrispettivament minn jekk dak id-dħul ikunx ikkwalifikat bħala distribuzzjoni ta' profitti jew bħala qligħ kapitali (231).

(214)

Bħala konklużjoni, it-trattament tat-taxxa mogħti lil LNG Holding u lil CEF fuq il-bażi tad-deċiżjonijiet tat-taxxa kkontestati jidderoga mir-regoli ġenerali tas-sistema tat-taxxa tal-kumpaniji tal-Lussemburgu li tirregola l-eżenzjoni tal-parteċipazzjonijiet u t-tassazzjoni tad-distribuzzjonijiet tal-profitti.

(215)

Barra minn hekk, din id-deroga tagħti lok għal diskriminazzjoni meta mqabbla ma' impriżi oħra li huma f'sitwazzjoni legali u fattwali komparabbli ma' dik ta' LNG Holding u CEF fid-dawl tal-objettiv tas-sistema. Fil-fatt, kontribwenti kumpaniji oħra li jirċievu dħul minn parteċipazzjonijiet u għalhekk huma soġġetti għar-regoli dwar l-eżenzjoni tal-parteċipazzjonijiet u tat-tassazzjoni tad-distribuzzjonijiet tal-profitti fil-Lussemburgu huma esklużi mill-benefiċċju tal-vantaġġ tat-taxxa mogħti lil LNG Holding u lil CEF, anki jekk huma f'sitwazzjoni fattwali u legali komparabbli fid-dawl tal-objettiv tas-sistema. Huwa minnu li dawk il-kontribwenti kollha jistgħu jibbenefikaw mill-eżenzjoni taħt l-Artikolu 166 LIR. Madankollu, l-eżenzjoni tal-parteċipazzjonijiet kienet tiġi applikata għal dħul relattivament aktar baxx, (jiġifieri profitt wara t-taxxa tal-entità bil-parteċipazzjoni fiha), kif spjegat fil-premessa 209.

(216)

Il-Lussemburgu jgħid li l-Artikolu 166 LIR ma jeħtieġx, biex jiġi applikat, li l-qligħ li jirriżulta mill-parteċipazzjonijiet irid ikun ġie intaxxat qabel u li d-dispożizzjonijiet tal-Artikolu 164 LIR mhumiex kundizzjoni sine qua non għall-applikazzjoni tal-Artikolu 166 LIR (232). Bl-istess mod, Engie tqis li l-kondizzjonijiet għall-applikazzjoni tal-Artikolu 166 LIR kollha ġew rispettati, għalhekk ma jistax ikun hemm deroga (233). Kemm il-Lussemburgu kif ukoll Engie jikkontestaw li l-objettiv tal-Artikolu 166 LIR huwa l-evitar tat-tassazzjoni doppja b'diversi argumenti relatati, fost l-oħrajn, mad-Direttiva tal-Kunsill (UE) 2015/121 (234) (“id-Direttiva dwar il-kumpaniji prinċipali u sussidjarji”).

(217)

Il-Kummissjoni jkollha tirrifjuta din il-linja ta' argument.

(218)

L-ewwel nett, il-fatt li ma hemmx rabta espliċita bejn l-Artikolu 166 LIR u l-Artikolu 164(1) u (2) LIR mhuwiex rilevanti. Il-Lussemburgu kkonferma espressament (235) li l-parteċipazzjonijiet kollha eliġibbli għall-eżenzjoni taħt l-Artikolu 166 LIR jaqgħu wkoll taħt l-Artikolu 164(1) u (2) LIR fil-livell tal-entità bil-parteċipazzjoni fiha (236). Il-konsegwenza ta' dan hija li taħt il-qafas ta' referenza deskritt fit-Taqsima 6.2.2.1, l-eżenzjoni tal-parteċipazzjonijiet hija applikabbli għal dħul li ma jistax jikkorrispondi għal ammonti mnaqqsa mill-bażi tat-taxxa tal-entità bil-parteċipazzjoni fiha. Bħala eċċezzjoni għal din ir-regola, id-deċiżjonijiet tat-taxxa kkontestati jippermettu l-applikazzjoni tal-eżenzjoni tal-parteċipazzjonijiet fil-livell tal-Holdings (entitajiet residenti għal finijiet ta' taxxa fil-Lussemburgu) għal dħul li jikkorrispondi ekonomikament għall-ammonti mnaqqsa bħala spejjeż (l-Akkumulazzjonijiet Zora) fil-livell tas-Sussidjarji (ukoll residenti fil-Lussemburgu). Għaldaqstant, it-trattament tat-taxxa mogħti fuq il-bażi tad-deċiżjoni tat-taxxa kkontestata jidderogaw mill-qafas ta' referenza.

(219)

It-tieni, anki fin-nuqqas ta' rabta espliċita bejn iż-żewġ dispożizzjonijiet, il-komplementarjetà tal-Artikolu 166 LIR u l-Artikolu 164(1) u (2) LIR hija neċessarja sabiex tiġi żgurata l-konsistenza loġika tas-sistema tat-taxxa. Jekk l-istess ammont jista' jitnaqqas bħala spiża fil-livell tal-entità bil-parteċipazzjoni fiha u jkun eżentat bħala dħul fil-livell tal-benefiċjarju, dak il-profitt jevita t-tassazzjoni fil-Lussemburgu. Din l-interpretazzjoni tippermetti lil kwalunkwe grupp korporattiv jevita faċilment l-objettiv tas-sistema tat-taxxa tal-kumpaniji tal-Lussemburgu, li huwa li jintaxxa l-profitt tal-kumpaniji kollha soġġetti għat-taxxa fil-Lussemburgu, billi jqassam lill-azzjonist tiegħu l-profitt kollu preċedenti mhux intaxxat tas-sussidjarji (237). Barra minn hekk, interpretazzjoni bħal din tkun ukoll inkonsistenti mal-objettiv li tiġi evitata tassazzjoni doppja jew tripla (238).

(220)

L-Artikolu 107 tat-Trattat jiddefinixxi miżuri ta' għajnuna b'rabta mal-effetti ekonomiċi tagħhom fis-suq, mhux b'rabta mal-legalità tagħhom skont l-ordni ġuridiku nazzjonali, mat-tekniki leġiżlattivi użati jew mal-intenzjoni tal-leġiżlatur. Konsegwentement, sal-punt li l-effett flimkien tad-deduċibbiltà tal-Akkumulazzjonijiet ZORA u l-eżenzjoni tad-dħul korrispondenti huwa li prattikament il-profitt kollu realizzat mis-Sussidjarji ma jkunx ġie ntaxxat fil-livell tal-Holdings, u b'hekk jagħti lok għal diskriminazzjoni ma' impriżi f'sitwazzjoni legali u fattwali komparabbli, il-miżura tal-Istat li tapprova tali trattament tat-taxxa trid prima facie titqies li tagħti vantaġġ selettiv. Din il-konklużjoni hija irrispettivament minn jekk ġewx rispettati l-kundizzjonijiet tal-Artikoli 166 u 164 LIR, minn jekk hemmx rabta espliċita bejn dawn id-dispożizzjonijiet jew mill-objettiv tad-Direttiva dwar il-kumpaniji prinċipali u sussidjarji.

(221)

Engie tirreferi għas-sentenza tal-Qorti fil-kawża tas-Service Public Fédéral Finances (239) li tinterpreta d-dispożizzjonijiet tad-Direttiva dwar il-kumpaniji prinċipali u sussidjarji li kienu fis-seħħ fiż-żmien meta nħarġu d-deċiżjonijiet tat-taxxa kkontestati (240). Skont Engie, il-Qorti kkonfermat f'dik is-sentenza li d-Direttiva dwar il-Kumpaniji Prinċipali u Sussidjarji — applikabbli għal sitwazzjonijiet transfruntiera — ma teħtieġx li l-profitt soġġett għall-eżenzjoni tal-parteċipazzjonijiet ikun ġie ntaxxat qabel. Engie tqis li bl-applikazzjoni tal-istess reġim ta' eżenzjoni għal sitwazzjonijiet interni, il-Lussemburgu għażel li jiżgura trattament ugwali bejn gruppi korporattivi b'sussidjarji fil-Lussemburgu u gruppi korporattivi b'sussidjarji fi Stati Membri oħra. Peress li ż-żewġ sitwazzjonijiet huma fattwalment identiċi u l-istess dispożizzjonijiet huma applikabbli fiż-żewġ każijiet, Engie tqis li l-eżenzjoni tal-parteċipazzjonijiet ma tistax titqies li tapplika biss fis-sitwazzjoni transfruntiera imma mhux f'dik interna.

(222)

Fil-bidu, il-Kummissjoni tiċċara li din id-Deċiżjoni tikkonċerna sitwazzjoni purament interna, li fiha l-kumpaniji kollha involuti fit-tranżazzjonijiet differenti previsti fid-deċiżjonijiet tat-taxxa kkontestati huma reżidenti għall-finijiet tat-taxxa fil-Lussemburgu. Il-vantaġġ selettiv ġej minn deroga li tikkonsisti mill-fatt li l-profitt realizzat minn żewġ sussidjarji tal-grupp Engie reżidenti fil-Lussemburgu baqa' prattikament mhux intaxxati fil-livell tal-azzjonisti tagħhom, li huwa wkoll reżidenti fil-Lussemburgu. Għalhekk, il-Kummissjoni ma investigatx jekk miżura simili, applikata għal sitwazzjoni li fiha l-entitajiet b'parteċipazzjoni fihom ma kinux reżidenti tat-taxxa fil-Lussemburgu, tkunx tikkostitwixxi vantaġġ selettiv ukoll.

(223)

Il-Kummissjoni tirrifjuta l-argument li l-Lussemburgu jrid neċessarjament japplika għal sitwazzjoni purament interna trattament aktar favorevoli milli jkun japplika għall-istess tranżazzjoni fuq livell transfruntier. Tirriżulta diskrepanza minħabba d-differenzi fil-kwalifika legali — u għalhekk fit-trattament tat-taxxa — ta' strument jew tranżazzjoni transfruntiera skont il-liġijiet ta' żewġ ġurisdizzjonijiet tat-taxxa differenti, li twassal għal nontassazzjoni. Tali diskrepanzi, madankollu, ma għandhomx fil-prinċipju jseħħu f'sitwazzjoni purament interna, fejn il-loġika interna u l-koerenza tas-sistema huma mmirati preċiżament lejn il-prevenzjoni ta' dawn it-tip ta' lakuni. Huwa magħruf sew li sabiex jiġi limitat l-evitar tat-taxxa, l-Unjoni, l-OECD u l-komunità internazzjonali tat-taxxa qegħdin jagħmlu sforzi biex inaqqsu d-differenzi fil-leġiżlazzjonijiet tat-taxxa u jagħlqu d-diskrepanzi u d-diskrepanzi eżistenti. Għalhekk li wieħed jargumenta, kif tidher li tagħmel Engie, li l-Lussemburgu għandu japplika d-diskrepanzi transfruntiera eżistenti wkoll fuq livell intern, anki kontra l-loġika tas-sistema tat-taxxa, mhux biss huwa legalment inkonsistenti, iżda jmur ukoll kontra dawn l-isforzi.

(224)

Il-ġurisprudenza tal-Qorti tal-Ġustizzja, u b'mod partikolari s-sentenza tas-Service public federal Finances, ma tgħid xejn differenti. Dan il-każ jikkonċerna liġi Belġjana li estendiet l-applikazzjoni tad-Direttiva dwar il-kumpanija prinċipali u sussidjarja anki għal sitwazzjonijiet purament interni. Il-Qorti Belġjana rreferiet lill-Qorti tal-Ġustizzja mistoqsija għal sentenza preliminari rigward l-interpretazzjoni tad-Direttiva (241). Is-sentenza tikkonferma li l-objettiv tad-Direttiva huwa li jiġu eliminati każijiet ta' tassazzjoni doppja ta' profitti mqassma minn sussidjarji lill-kumpaniji prinċipali tagħhom u li jiġu eliminati żvantaġġi għal kumpaniji transfruntiera minħabba trattament tat-taxxa anqas vantaġġjuż tar-relazzjonijiet transfruntiera bejn kumpaniji prinċipali u sussidjarji meta mqabbla ma' relazzjonijiet purament interni (242). Fid-dawl ta' dan l-ispirtu, u f'konformità mal-ġurisprudenza dwar il-libertajiet fundamentali, il-Qorti tgħid li “il-libertajiet ta' moviment iggarantiti mit-Trattat jipprekludu lil Stat Membru milli jitratta b'mod inqas vantaġġuż id-dividendi ta' oriġini barranija milli d-dividendi ta' oriġini nazzjonali, sakemm din id-differenza fi trattament ma tikkonċernax sitwazzjonijiet li ma jistgħux jiġu mqabbla oġġettivament jew jekk tkun iġġustifikata minn raġunijiet imperattivi ta' interess pubbliku” (243). Fi kliem ieħor, din is-sentenza sempliċiment tapplika l-ġurisprudenza stabbilita sew li skontha l-libertajiet fundamentali jipprevjenu lill-Istati Membri milli jittrattaw sitwazzjonijiet domestiċi aktar favorevoli minn sitwazzjonijiet transfruntiera komparabbli. Madankollu dan mhuwiex veru bil-kontra: L-Istati Membri mhumiex meħtieġa, kif jidher li qed tissuġġerixxi Engie, li jestendu għal sitwazzjonijiet purament interni trattament tat-taxxa aktar favorevoli applikabbli għal sitwazzjonijiet transfruntiera, b'mod partikolari jekk dak it-trattament aktar favorevoli jirriżulta minn diskrepanzi jew lakuni li jwasslu għal nontassazzjoni (244).

(225)

L-argument li skontu l-vantaġġ tat-taxxa mogħti lil LNG Holding u lil CEF abbażi tad-deċiżjonijiet tat-taxxa kkontestati huwa ta' applikazzjoni ġenerali, peress li kwalunkwe impriża oħra tista' potenzjalment ikollha aċċess għal benefiċċju simili billi tirreplika l-istruttura implimentata minn Engie, huwa wkoll ineffettiv. Skont il-ġurisprudenza stabbilita tal-Qorti, il-fatt li l-għadd ta' impriżi li jistgħu jitolbu intitolament taħt miżura nazzjonali huwa kbir ħafna jew li dawk l-impriżi jappartjenu għal diversi setturi ekonomiċi mhuwiex biżżejjed sabiex tiġi ddubitata n-natura selettiva tal-miżura (245). L-istess prinċipju jista' jiġi applikat f'każijiet fejn il-vantaġġ jirriżulta minn deċiżjoni tat-taxxa li tapplika kombinazzjoni ta' dispożizzjonijiet tal-liġi għal sett speċifiku ta' fatti meta dawn il-fatti jkunu jistgħu jiġu rreplikati minn impriżi oħra. Il-Qorti stabbilixxiet ukoll li l-Kummissjoni mhijiex meħtieġa, sabiex tistabbilixxi s-selettività ta' miżura, li tidentifika ċerti karatteristiċi speċifiċi li huma karatteristiċi ta' u komuni għall-impriżi li jistgħu jkunu jirċievu vantaġġ tat-taxxa, li bihom ikunu jistgħu jintgħażlu minn dawk l-impriżi li huma esklużi mill-vantaġġ (246).

(226)

Fid-dawl ta' dak li ntqal hawn fuq, il-Kummissjoni tikkonkludi li taħt qafas ta' referenza aktar ristrett li jikkonsisti esklussivament mir-regoli ġenerali tat-taxxa fuq id-dħul tal-kumpaniji tal-Lussemburgu li jirregolaw l-eżenzjoni tal-parteċipazzjonijiet u t-tassazzjoni tad-distribuzzjonijiet tal-profitti, il-vantaġġ mogħti fuq il-bażi tad-deċiżjonijiet tat-taxxa kkontestati huwa prima facie selettiv billi jiffavorixxi lil LNG Holding u lil CEF meta mqabbla mal-impriżi li huma f'sitwazzjoni legali u fattwali komparabbli.

(227)

Skont il-ġurisprudenza stabbilita, il-kunċett ta' għajnuna mill-Istat ma jirreferix għal miżuri tal-Istat li jiddistingwu bejn l-impriżi u li huma, għalhekk, prima facie selettivi, fejn dik id-differenzazzjoni tirriżulta min-natura u mil-loġika tas-sistema u li huwa l-Istat Membru kkonċernat li jrid jippruvaha (247).

(228)

Miżura li toħloq eċċezzjoni għall-applikazzjoni tas-sistema ġenerali tat-taxxa tista' tkun iġġustifikata min-natura u mill-istruttura kumplessiva tas-sistema tat-taxxa jekk l-Istat Membru kkonċernat ikun jista' juri li l-miżura tirriżulta direttament mill-prinċipji bażiċi jew ta' gwida tas-sistema tat-taxxa tiegħu jew meta din tkun ir-riżultat ta' mekkaniżmi inerenti meħtieġa għall-funzjonament u l-effettività tas-sistema (248). F'dak ir-rigward, trid issir distinzjoni bejn, minn naħa, l-objettivi attribwiti għal reġim partikolari ta' taxxa, li huma esterni għaliha u min-naħa l-oħra l-mekkaniżmi inerenti fis-sistema tat-taxxa nnifisha, li huma meħtieġa biex jinkisbu dawn l-objettivi (249).

(229)

La l-Lussemburgu u lanqas l-Engie ma ressqu ġustifikazzjoni possibbli għat-trattament favorevoli approvat mid-deċiżjonijiet tat-taxxa kkontestati favur LNG Holding u CEF. F'dan ir-rigward, il-Kummissjoni tfakkar li l-oneru ta' din il-ġustifikazzjoni jaqa' fuq l-Istat Membru. Għalhekk, fin-nuqqas ta' kwalunkwe ġustifikazzjoni mressqa mil-Lussemburgu, il-Kummissjoni jkollha tikkonkludi li l-vantaġġ tat-taxxa mogħti lil LNG Holding u lil CEF ma jistax jiġi ġġustifikat min-natura jew l-iskema ġenerali tas-sistema tat-taxxa tal-kumpaniji tal-Lussemburgu.

(230)

Fi kwalunkwe każ, il-Kummissjoni ma setgħet tidentifika l-ebda raġuni possibbli li tiġġustifika t-trattament preferenzjali għal LNG Holding u CEF li jista' jingħad li tirriżulta direttament mill-prinċipji intrinsiċi, bażiċi jew ta' gwida tas-sistema ta' referenza jew li hija r-riżultat ta' mekkaniżmi inerenti meħtieġa għall-funzjonament u l-effettività tas-sistema (250).

(231)

Il-Kummissjoni tinnota li, skont il-Kunsill tal-Istat tal-Lussemburgu (251), wieħed mill-objettivi tar-reġim ta' eżenzjoni tal-parteċipazzjonijiet ikkontemplati fl-Artikolu 166 LIR huwa li tiġi evitata tassazzjoni doppja jew tripla għal raġunijiet ta' ekwità fiskali (252). It-tassazzjoni doppja tirreferi għal sitwazzjonijiet fejn l-istess profitt jiġi ntaxxat darbtejn mill-istess kontribwent (imsejħa wkoll tassazzjoni legali doppja) jew fir-rigward ta' żewġ kontribwenti differenti (tassazzjoni ekonomika doppja). Il-Kummissjoni taċċetta li eżenzjoni mit-tassazzjoni li għandha l-għan li tevita t-tassazzjoni ekonomika doppja tista' tkun ġustifikata min-natura u mill-istruttura ġenerali tas-sistema tat-taxxa (253). Għalhekk, l-applikazzjoni tal-eżenzjoni skont l-Artikolu 166 LIR biex tiġi evitata t-tassazzjoni ekonomika doppja jew tripla tista' tirriżulta direttament minn prinċipji bażiċi jew ta' gwida tas-sistema tat-taxxa tagħha.

(232)

Madankollu, il-vantaġġ mogħti fuq il-bażi tad-deċiżjonijiet tat-taxxa kkontestati ma jikkonsistix esklussivament fl-applikazzjoni tal-eżenzjoni tal-parteċipazzjonijiet, iżda fl-applikazzjoni tagħha fil-livell tal-Holdings għal dħul li jikkorrispondi ekonomikament għall-ammonti mnaqqsa bħala spejjeż (l-Akkumulazzjonijiet ZORA) mis-Sussidjarji, li jwasslu għal nontassazzjoni bis-saħħa ta' LNG Holding u CEF ta' virtwalment il-profitt kollu realizzat minn LNG Supply u GSTM. F'dawn iċ-ċirkostanzi, it-trattament tat-taxxa mogħti lil LNG Holding u CEF abbażi tad-deċiżjonijiet tat-taxxa kkontestati ma jistax iservi l-għan li tiġi evitata tassazzjoni ekonomika doppja. L-applikazzjoni kombinata tal-eżenzjoni u t-tnaqqis hija determinata fid-deċiżjonijiet tat-taxxa kkontestati u b'hekk l-amministrazzjoni tat-taxxa tal-Lussemburgu kienet konxja li qatt ma seta' jkun hemm tassazzjoni ekonomika doppja. Bħala konsegwenza, it-trattament tat-taxxa mogħti fuq il-bażi tad-deċiżjonijiet tat-taxxa kkontestati mhux relatat mal-objettiv li tiġi evitata tassazzjoni ekonomika doppja (potenzjali jew reali) jew mat-taxxa tripla jew kwalunkwe raġuni oħra relatata mal-ekwità fiskali. Għalhekk, dawn l-objettivi ma jistgħux jiġu invokati b'mod validu bħala ġustifikazzjoni għad-differenza fit-trattament li tirriżulta mill-miżuri kkontestati.

(233)

F'dan ir-rigward, il-Kummissjoni tinnota li, kif enfasizzat il-Qorti fil-passat, sabiex l-eżenzjonijiet mit-taxxa jkunu ġustifikati min-natura jew mill-iskema ġenerali tas-sistema tat-taxxa tal-Istat Membru kkonċernat, l-Istati Membri jridu jiżguraw li dawk l-eżenzjonijiet ikunu konsistenti mal-prinċipju tal-proporzjonalità u ma jmorrux lil hinn minn dak li huwa meħtieġ, fis-sens li l-objettiv leġittimu li jkun fil-mira ma jkunx jista' jintlaħaq b'miżuri b'firxa iżgħar (254). F'dan il-każ, l-applikazzjoni tal-eżenzjoni tal-parteċipazzjonijiet għal dħul riċevut minn LNG Holding u minn CEF li tikkorrispondi ekonomikament għall-ammonti mnaqqsa bħala spejjeż (l-Akkumulazzjonijiet ZORA) minn LNG Supply u GSTM bl-ebda mod ma tista' titqies proporzjonata biex tiġi evitata t-tassazzjoni ekonomika doppja u lanqas ma tikkontribwixxi għall-prinċipju tal-ekwità fiskali. Is-sitwazzjoni hija pjuttost bil-maqlub: il-miżuri kkontestati jippermettu lil LNG Holding u lil CEF, u lil Engie bħala grupp, li jibbenefikaw minn nontassazzjoni doppja. Għalhekk, l-applikazzjoni tal-eżenzjoni mit-taxxa f'dan il-każ tmur lil hinn minn dak li huwa meħtieġ u proporzjonat biex jintlaħaq dan l-objettiv.

(234)

F'dan ir-rigward, skont il-Qorti, benefiċċju jrid ikun konsistenti mhux biss mal-karatteristiċi inerenti tas-sistema tat-taxxa inkwistjoni iżda wkoll fir-rigward tal-mod li bih dik is-sistema tkun implimentata (255). F'dan il-każ, il-vantaġġ tat-taxxa mogħti fuq il-bażi tad-deċiżjonijiet tat-taxxa kkontestati huwa inkonsistenti mhux biss ma' wieħed mill-objettivi tal-eżenzjoni tal-parteċipazzjonijiet iżda wkoll mal-loġika tas-sistema li fiha huwa mdaħħal ir-reġim, li hija t-tassazzjoni tal-profitt tal-kumpaniji kollha soġġetti għat-taxxa fil-Lussemburgu (256).

(235)

Bħala konklużjoni, il-vantaġġ tat-taxxa mogħti lil LNG Holding u lil CEF ma jistax jiġi ġġustifikat min-natura u mil-loġika tas-sistema.

(236)

Fid-dawl ta' dak li ntqal hawn fuq, il-Kummissjoni tikkonkludi li l-vantaġġ tat-taxxa mogħti lil LNG Holding u lil CEF fuq il-bażi tad-deċiżjonijiet tat-taxxa kkontestati huwa selettiv.

(237)

Mingħajr preġudizzju għall-konklużjoni fil-premessa 236, analiżi tal-effetti tad-deċiżjonijiet tat-taxxa kkontestati fil-livell tal-grupp u mhux biss tal-entitajiet legali individwali twassal għall-istess konklużjoni: it-trattament tat-taxxa mogħti fuq il-bażi tad-deċiżjonijiet tat-taxxa kkontestati jagħti vantaġġ selettiv lil Engie.

(238)

F'dan il-kuntest, Engie targumenta li s-selettività f'miżuri fiskali tista' tiġi misjuba biss fil-livell tal-kontribwent individwali u mhux fil-livell ta' grupp u tirreferi għad-deċiżjonijiet tal-Kummissjoni f'FIAT (257) u Groepsrentebox (258).

(239)

F'dan ir-rigward, il-Kummissjoni tinnota li, skont id-dikjarazzjonijiet tat-taxxa pprovduti mil-Lussemburgu, mill-2015 l-entitajiet GSTM, EIL, LNG Supply, LNG Lussemburgu u LNG Holding ifformaw unità fiskali permezz ta' CEF għall-finijiet tat-taxxa tal-Lussemburgu fejn CEF operat bħala l-kumpanija prinċipali tal-unità (259). Għalhekk skont il-liġi tat-taxxa tal-Lussemburgu, dawk il-kumpaniji ma kinux ittrattati mill-2015 bħala entitajiet separati, iżda ħallsu t-taxxi tagħhom fuq bażi konsolidata, jiġifieri daqslikieku kienu kontribwent wieħed (260). Il-Kummissjoni tqis li din iċ-ċirkostanza biss kienet diġà tiġġustifika valutazzjoni kombinata, mill-inqas mill-2015.

(240)

Fi kwalunkwe każ, anki jekk dawn l-entitajiet ma jiffurmawx unità fiskali, l-argument ta' Engie ma jistax jiġi aċċettat. Kif spjegat ukoll fit-Taqsima 6.6, mill-kliem stess tal-Artikolu 107 tat-Trattat jidher li r-regoli dwar l-għajnuna mill-Istat janalizzaw l-effetti ekonomiċi tal-miżuri tal-Istat fir-rigward ta' “impriżi” u mhux ta' entitajiet ġuridiċi separati. Impriża trid tinftiehem bħala unità ekonomika anki jekk tikkonsisti minn diversi persuni ġuridiċi (261). Sabiex tiddetermina jekk bosta entitajiet jiffurmawx unità ekonomika, il-Qorti tal-Ġustizzja tħares lejn l-eżistenza ta' sehem ta' kontroll jew rabtiet funzjonali, ekonomiċi jew organiċi (262). F'dan il-każ, GSTM, EIL, LNG Supply, LNG Lussemburgu u LNG Holding huma kkontrollati b'mod sħiħ minn CEF, li min-naħa tagħha hija kkontrollata minn Engie S.A. Għalhekk, dawk l-entitajiet kollha għandhom jitqiesu bħala li huma parti minn impriża waħda.

(241)

Barra minn hekk, il-vantaġġ mogħti fuq il-bażi tad-deċiżjonijiet tat-taxxa kkontestati jikkonsisti fl-applikazzjoni ta' eżenzjoni tal-parteċipazzjonijiet, fil-livell ta' Holdings, għal dħul li jikkorrispondi ekonomikament għall-ammonti mnaqqsa bħala spejjeż (l-Akkumulazzjonijiet ZORA) mis-Sussidjarji. Għalhekk, sabiex tiġi ddeterminata l-eżistenza ta' vantaġġ huwa loġiku li jiġu vvalutati wkoll l-effetti kkombinati tal-miżuri tat-taxxa fiż-żewġ livelli. Il-fatt li l-liġi tat-taxxa fuq id-dħul tal-Lussemburgu tikkonċerna entitajiet individwali ma jdgħajjifx din il-konklużjoni. Fil-fatt, il-Kummissjoni tinnota li t-talbiet għal deċiżjonijiet tat-taxxa ppreżentati mill-konsulent tat-taxxa jikkonċernaw it-trattament tat-taxxa tal-entitajiet ġuridiċi kollha tal-grupp Engie involuti fit-tranżazzjonijiet u li dawn l-entitajiet huma kollha soġġetti għat-taxxa fil-Lussemburgu.

(242)

Din iċ-ċirkostanza tagħmel dan il-każ differenti mill-każijiet Groepsrentebox u FIAT. F'Groepsrentebox, il-Kummissjoni ddeċidiet li tivvaluta l-iskema fil-livell individwali billi l-miżura inkwistjoni kienet tapplika għal entitajiet individwali (263). Bl-istess mod, f'FIAT, il-miżura (id-deċiżjoni tat-taxxa) ikkonċernat biss il-profitt taxxabbli ta' entità ġuridika waħda, filwaqt li l-kontropartijiet fit-tranżazzjoni kienu reżidenti fi Stat Membru ieħor. Konsegwentement, kwalunkwe dħul inqas mit-taxxa, li kien il-bażi tal-vantaġġ f'dak il-każ, kien neċessarjament ibbażat fuq ir-riżultati tal-entità reżidenti fil-Lussemburgu u ma kienx jeħtieġ li jqis impatt newtrali possibbli tal-miżura fil-livell ta' kumpaniji oħra fil-grupp FIAT bħala riżultat tat-trattament tagħhom minn Stati Membri oħra (264).

(243)

Għall-kuntrarju, f'dan il-każ, l-effett tal-miżura (nontassazzjoni ta' parti mill-profitt realizzat minn xi entitajiet fil-Lussemburgu) ġejja mill-applikazzjoni flimkien ta' eżenzjoni u ta' tnaqqis fil-livell tal-entitajiet differenti tal-grupp, li kollha huma residenti għal finijiet ta' taxxa fil-Lussemburgu. B'hekk, valutazzjoni tal-effett ikkombinat tad-deċiżjonijiet tat-taxxa fil-livell tal-grupp Engie fil-Lussemburgu hija adegwata biex jiġi apprezzat b'mod sħiħ ir-riżultat tat-trattament tat-taxxa.

(244)

Fi kwalunkwe każ, il-Kummissjoni tfakkar li mhijiex marbuta bil-prattika deċiżjonali tagħha. Kull miżura ta' għajnuna potenzjali trid tiġi vvalutata abbażi tal-merti tagħha stess skont il-kriterji oġġettivi tal-Artikolu 107(1) tat-TFUE, sabiex anki jekk intwera li teżisti prattika ta' deċiżjoni kuntrarja, dan ma jkunx jista' jaffettwa l-konstatazzjonijiet ta' din id-Deċiżjoni (265).

(245)

Kif stabbilit fit-Taqsima 6.2.1.1, f'dan il-każ is-sistema ta' referenza hija s-sistema tat-taxxa tal-kumpaniji tal-Lussemburgu, li għandha l-għan li tintaxxa l-profitt tal-kumpaniji kollha soġġetti għat-taxxa fil-Lussemburgu. Il-bażi għall-kalkolu tal-profitt taxxabbli huwa l-profitt kontabbilistiku realizzat mill-kontribwent (il-prinċipju tar-rabta tal-karti tal-bilanċ kummerċjali mal-karta tal-bilanċ tat-taxxa). Dan l-objettiv japplika għall-kontribwenti kumpaniji kollha fil-Lussemburgu.

(246)

It-tranżazzjonijiet ikkonċernati mid-deċiżjonijiet tat-taxxa kkontestati huma tranżazzjonijiet intragrupp li jikkonsistu, l-ewwel nett, mit-trasferiment ta' ċerti assi lis-Sussidjarji ta' Engie soġġetti għat-taxxa fil-Lussemburgu u, it-tieni nett, mil-finanzjament ta' dawk it-trasferimenti mill-Holdings, li huma wkoll soġġetti għat-taxxa fil-Lussemburgu (266).

(247)

Meta wieħed iqis li t-trattament tat-taxxa ta' dawk it-tranżazzjonijiet intragrupp iridu jiġu vvalutati fl-isfond tas-sistema tat-taxxa tal-kumpaniji tal-Lussemburgu u sabiex jiġi ddeterminat jekk it-trattament tat-taxxa mogħti lill-Engie abbażi tad-deċiżjonijiet tat-taxxa kkontestati jidderogawx minn dik is-sistema ta' referenza, il-Kummissjoni se tillimita l-analiżi tagħha għal paragun ma' tranżazzjoni ta' finanzjament intragrupp oħra tal-istess tip u, konsegwentement, se tivvaluta r-regoli tas-sistema tat-taxxa fuq id-dħul tal-kumpaniji tal-Lussemburgu li tirregola t-tranżazzjonijiet ta' finanzjament intragrupp bejn entitajiet fi grupp reżidenti fil-Lussemburgu.

(248)

Il-Kummissjoni se tistabbilixxi li, skont is-sistema tat-taxxa fuq id-dħul tal-kumpaniji tal-Lussemburgu, il-ħlas ta' remunerazzjoni fil-qafas ta' tranżazzjoni ta' finanzjament (267) bejn żewġ gruppi ta' entitajiet soġġetti għat-taxxa fil-Lussemburgu ma jistax jirriżulta fi tnaqqis tal-bażi kombinata tat-taxxa tal-grupp fil-Lussemburgu, u dan irrispettivament min-natura tal-mezzi ta' finanzjament użati jew tal-livell tar-remunerazzjoni. “Il-bażi kombinata tat-taxxa” trid, f'dan il-kuntest, tinftiehem bħala s-somma tal-bażijiet tat-taxxa tal-entitajiet kollha tal-grupp involuti fi tranżazzjoni ta' finanzjament intragrupp li hija soġġetta għat-taxxa fil-Lussemburgu.

(249)

Skont is-sistema tat-taxxa fuq id-dħul tal-kumpaniji tal-Lussemburgu, il-mezzi ta' finanzjament jistgħu jinqasmu f'żewġ kategoriji: l-ewwel, strumenti ta' parteċipazzjoni, bħal ishma, li l-profitt tagħhom jista' jikkwalifika għall-eżenzjoni tal-parteċipazzjonijiet skont l-Artikolu 166 LIR (“parteċipazzjonijiet”); u t-tieni, strumenti u kuntratti oħra li l-profitt tagħhom ma jistax jibbenefika mill-eżenzjoni tal-parteċipazzjonijiet (“strumenti nonparteċipattivi”).

(250)

Fil-każ ta' strumenti nonparteċipattivi, skont il-prinċipji tal-kontabbiltà tal-Lussemburgu u dawk internazzjonali (268), il-pagament tar-remunerazzjoni (bħall-pagament tal-imgħax fuq self) jiddaħħal fil-kontijiet ta' min jissellef bħala spiża. L-istess ammont jiġi rreġistrat f'xi stadju bħala dħul minn min sellef.

(251)

Fir-rigward tat-trattament tat-taxxa, li jsegwi l-prinċipju tar-rabta tal-karta tal-bilanċ kummerċjali u ma' dik tat-taxxa (269), id-dħul kontabbilizzat minn min isellef fil-prinċipju se jkun taxxabbli, filwaqt li l-ispiża kontabbilizzata minn min jissellef fil-prinċipju se tkun deduċibbli għal finijiet ta' taxxa. Għalhekk, il-ħlas tar-remunerazzjoni li tiġi minn strument nonparteċipattiv ma jwassalx għal tnaqqis tal-bażi kombinata tat-taxxa tal-grupp fil-Lussemburgu meta mqabbel mal-bażi kombinata tat-taxxa qabel il-ħlas (270).

(252)

Fil-każ ta' parteċipazzjonijiet, bħall-ishma, il-ħlas tar-remunerazzjoni jieħu l-forma ta' distribuzzjoni tal-profitti. Minn perspettiva ta' kontabbiltà, l-ammonti distribwiti jiġu kontabbilizzati mill-benefiċjarju (l-entità li jkollha l-parteċipazzjoni) bħala dħul. Madankollu, is-somom distribwiti skont id-definizzjoni kienu parti mill-profitt tal-entità ta' distribuzzjoni, jiġifieri ma ġewx kontabbilizzati bħala spiża (271).

(253)

Rigward it-trattament tat-taxxa, kif spjegat fil-premessi 201 u 202, skont l-Artikolu 164(1) u (2) LIR, l-entità tad-distribuzzjoni ma tistax tnaqqas mill-bażi tat-taxxa tagħha l-profitt imqassam. Barra minn hekk, skont il-prinċipju tar-rabta tal-karta tal-bilanċ kummerċjali u ma' dik tat-taxxa, anki l-benefiċjarju se jinkludi l-profitt imqassam fil-bażi tat-taxxa tiegħu. Dan ifisser li d-distribuzzjoni tal-profitti se twassal għal tassazzjoni ekonomika doppja sakemm ma tikkwalifikax għall-eżenzjoni tal-parteċipazzjonijiet skont l-Artikolu 166 LIR (272). Għalhekk, id-distribuzzjoni tal-profitti li jiġu minn parteċipazzjoni ma twassalx għal tnaqqis tal-bażi kombinata tat-taxxa tal-grupp fil-Lussemburgu meta mqabbel mas-sitwazzjoni qabel id-distribuzzjoni.

(254)

Bħala konklużjoni, skont is-sistema tat-taxxa fuq id-dħul tal-kumpaniji tal-Lussemburgu, il-ħlas ta' rimunerazzjoni fil-qafas ta' tranżazzjoni ta' finanzjament intragrupp bejn entitajiet reżidenti għal finijiet tat-taxxa fil-Lussemburgu, kemm jekk permezz ta' parteċipazzjoni jew permezz ta' strument nonparteċipattiv, ma jistax jirriżulta fi tnaqqis tal-bażi kombinata tat-taxxa tal-grupp fil-Lussemburgu.

(255)

Il-Lussemburgu jargumenta li fid-definizzjoni tas-sistema ta' referenza, il-Kummissjoni bilfors trid tagħmel referenza għat-test tal-liġi. F'dan ir-rigward, huwa sostna li l-prinċipju skont liema l-ħlas tar-remunerazzjoni (jew id-distribuzzjoni tal-profitti) relatat ma' tranżazzjoni ta' finanzjament intragrupp bejn entitajiet reżidenti fil-Lussemburgu ma jistax iwassal għal tnaqqis tal-bażi kombinata tat-taxxa tal-grupp fil-Lussemburgu mhuwiex stipulat fil-liġi.

(256)

L-ewwel nett, il-Kummissjoni tfakkar li, għall-kuntrarju ta' dak li qed jgħid il-Lussemburgu, l-objettiv tas-sistema tat-taxxa tal-Lussemburgu, jiġifieri t-tassazzjoni tal-profitti tal-kumpaniji kollha soġġetti għat-taxxa fil-Lussemburgu, jinsab fil-liġi kif spjegat fil-premessi 171 sa 176. Il-prinċipju li l-ħlas ta' rimunerazzjoni relatata ma' tranżazzjoni ta' finanzjament intragrupp bejn entitajiet soġġetti għat-taxxa fil-Lussemburgu ma jistax jirriżulta fi tnaqqis tal-bażi kombinata tat-taxxa tal-grupp jista' jiġi derivat direttament minn dan l-objettiv. Tabilħaqq, jekk il-pagament ta' remunerazzjoni jista' jagħti lok għal tnaqqis tal-bażi kombinata tat-taxxa tal-grupp fil-Lussemburgu meta mqabbel mal-bażi tat-taxxa ta' qabel il-pagament, allura parti mill-profitt ta' minn sellef u/jew ta' minn issellef taħrab it-taxxa, peress li ma tiġi inkluża fl-ebda bażi tat-taxxa. Dan ir-riżultat ikun f'kontradizzjoni fil-beraħ mal-objettiv tas-sistema. Barra minn hekk, possibbiltà bħal din trendi s-sistema tat-taxxa tal-Lussemburgu diskriminatorja, peress li tippermetti lil kumpaniji ta' grupp jeskludu parti mill-profitt tagħhom mill-bażi tat-taxxa tagħhom, possibbiltà li ma tingħatax lill-kumpaniji indipendenti.

(257)

It-tieni, jekk l-LIR ma tirreferix b'mod espliċitu għat-tranżazzjonijiet ta' finanzjament jew għar-rimunerazzjoni ta' tranżazzjonijiet ta' finanzjament, din tistabbilixxi b'mod ċar u mhux ambigwu kif il-pagament tar-rimunerazzjoni għandu jiġi ntaxxat għal kull kategorija ta' strumenti ta' finanzjament. Il-Kummissjoni wriet fil-premessi 249 sa 254, abbażi tal-liġi tat-taxxa tal-Lussemburgu, li l-pagament ta' rimunerazzjoni relatata ma' tranżazzjoni ta' finanzjament intragrupp bejn entitajiet soġġetti għat-taxxa fil-Lussemburgu ma jistax iwassal għal tnaqqis tal-bażi kombinata tat-taxxa.

(258)

Il-Kummissjoni tqis li l-gruppi korporattivi kollha involuti fi tranżazzjonijiet ta' finanzjament intragrupp bejn entitajiet ta' grupp residenti fil-Lussemburgu huma f'sitwazzjoni legali u fattwali kumparabbli ma' Engie, u dan irrispettivament min-natura tal-istrument ta' finanzjament użat.

(259)

Ġie spjegat fit-Taqsima 6.3.1 li l-objettiv tas-sistema tat-taxxa huwa t-tassazzjoni tal-profitt tal-kumpaniji kollha soġġetti għat-taxxa fil-Lussemburgu. Kontra dan il-prinċipju, il-gruppi korporattivi kollha involuti fi tranżazzjonijiet ta' finanzjament intragrupp bejn entitajiet ta' grupp residenti fil-Lussemburgu huma neċessarjament komparabbli, peress li l-istrument ta' finanzjament magħżul u l-ammont tar-rimunerazzjoni għall-finanzjament ma għandhomx x'jaqsmu ma' dan il-prinċipju (273).

(260)

It-tip ta' strument magħżul għall-finanzjament jista' jkollu impatt fuq it-tip ta' rimunerazzjoni, id-dati u l-modalitajiet tal-pagament ta' tali remunerazzjoni, kif ukoll fuq id-drittijiet assenjati lil “minn isellef” jew lid-“detentur” tal-istrument. Pereżempju, fil-każ ta' ishma ordinarji, li huma strumenti ta' parteċipazzjoni, ir-remunerazzjoni tieħu l-forma ta' distribuzzjoni ta' profitt, li l-ammont u t-termini tiegħu huma tipikament deċiżi mill-korpi korporattivi tal-entità li toħroġ l-ishma. Barra minn hekk, ma hemmx obbligu li l-ammont tal-finanzjament jiġi rimborżat. L-ishma ordinarji jistgħu wkoll jagħtu d-dritt tal-vot fil-laqgħa tal-azzjonisti u li jiġu rrappreżentati fil-bord tad-diretturi, fil-bord superviżorju jew f'korpi korporattivi oħra. B'kuntrast, fil-każ ta' strumenti nonparteċipattivi, bħal self, it-termini u l-ammont tar-remunerazzjoni (imgħax) jiġu stabbiliti miż-żewġ partijiet fil-ftehim u min isellef fil-prinċipju ma jkollux dritt jipparteċipa jew jikkontrolla b'xi mod il-ġestjoni ta' min issellef. Barra minn hekk, hemm obbligu kuntrattwali biex jiġi rimborżat il-valur nominali tas-self.

(261)

Il-Kummissjoni tqis li l-ebda waħda minn dawn id-differenzi ma taffettwa b'xi mod il-prinċipju bażiku li, skont is-sistema tat-taxxa fuq id-dħul tal-kumpaniji tal-Lussemburgu, il-profitt kollu realizzat mill-kumpaniji jrid ikun soġġett għat-tassazzjoni u li għalhekk il-pagament tar-remunerazzjoni għal tranżazzjonijiet ta' finanzjament intragrupp bejn kumpaniji residenti fil-Lussemburgu ma jistax iwassal għal tnaqqis tal-bażi kombinata tat-taxxa tal-grupp fil-Lussemburgu. Skont dan il-prinċipju, l-għażla ta' strument ta' finanzjament minflok ieħor ma tagħmilx kumpanija anqas komparabbli.

(262)

Fil-fatt, fil-każ tal-istrumenti ta' parteċipazzjoni, bħal ishma, diġà ġie spjegat fit-Taqsima 6.3.1 li skont l-Artikolu 164(1) u (2) LIR, il-profitti mqassma jkollhom jiġu inklużi, u għalhekk soġġetti għat-taxxa, għall-inqas fil-bażi tat-taxxa tal-entità bil-parteċipazzjoni fiha. Fil-każ ta' strumenti nonparteċipattivi, pereżempju self, l-imgħax imħallas minn min issellef huwa deduċibbli mill-bażi tat-taxxa tiegħu iżda jiġi inkluż bħala dħul taxxabbli fil-bażi tat-taxxa tas-sellief. Għalhekk, minkejja d-differenzi fit-termini u l-modalitajiet tar-remunerazzjoni u tar-rimborż tal-finanzjament, kif ukoll fid-drittijiet u fl-obbligi tal-partijiet, fiż-żewġ każijiet il-pagament tar-remunerazzjoni ma jwassalx għal tnaqqis fil-bażi kombinata tat-taxxa tal-kumpaniji involuti fit-tranżazzjoni.

(263)

Il-Kummissjoni tqis li l-argumenti magħmula mil-Lussemburgu li l-istruttura implimentata minn Engie tipprovdi aktar flessibbiltà minn tranżazzjoni diretta bejn il-Holdings u Sussidjarji u li tippermetti lil Engie tiffinanzja n-negozji akkwistati u fl-istess ħin tillimita l-profil tar-riskju tas-Sussidjarji (274) mhumiex effettivi, peress li l-ebda waħda minn dawn ir-raġunijiet ma għandha xi effett fir-rigward tal-prinċipju li, skont is-sistema tat-taxxa fuq id-dħul tal-kumpaniji tal-Lussemburgu, il-pagament tar-rimunerazzjoni għal tranżazzjonijiet ta' finanzjament intragrupp bejn kumpaniji residenti fil-Lussemburgu ma jistax iwassal għal tnaqqis tal-bażi kombinata tat-taxxa tal-grupp fil-Lussemburgu.

(264)

Għalhekk, jista' jiġi konkluż li l-gruppi korporattivi kollha involuti fi tranżazzjonijiet ta' finanzjament intragrupp bejn kumpaniji residenti fil-Lussemburgu huma f'sitwazzjoni legali u fattwali komparabbli ma' Engie. L-intervent tas-Selliefa fl-istruttura li waqqfet Engie ma jaffettwax din il-konklużjoni peress li s-Selliefa huma residenti fil-Lussemburgu wkoll u l-għan ta' dawk l-istrutturi jibqa' li jiġi ffinanzjat it-trasferiment tal-assi, kif jammettu l-Lussemburgu u Engie.

(265)

Il-Kummissjoni tqis li t-trattament tat-taxxa mogħti abbażi tad-deċiżjonijiet tat-taxxa kkontestati jidderoga mit-trattament tat-taxxa tat-tranżazzjonijiet ta' finanzjament intragrupp bejn entitajiet fi grupp residenti fil-Lussemburgu skont is-sistema tat-taxxa fuq id-dħul tal-kumpaniji tal-Lussemburgu.

(266)

Minn naħa waħda, l-Akkumulazzjonijiet ZORA, meta pożittivi, jiġu rreġistrati kull sena bħala spiża deduċċibbli mis-Sussidjarji. Min-naħa l-oħra, mal-konverżjoni tal-LNG ZORA, l-Ishma ta' LNG Supply — li jinkludu l-Akkumulazzjonijiet ZORA — jiġu immedjatament trasferiti għand LNG Holding skont il-Kuntratt Forward LNG. Għalhekk, l-LNG Holding tirċievi r-rimunerazzjoni għall-finanzjament ipprovdut lil LNG Supply (li LNG Supply tkun naqqset mill-bażi tat-taxxa tagħha). Madankollu, LNG Holding tikkontabbilizza l-Ishma ta' LNG Supply fil-kontijiet tagħha skont il-valur nominali ta' ZORA, jiġifieri ma tinkludix l-Akkumulazzjonijiet ZORA.

(267)

Għaldaqstant, id-deċiżjonijiet tat-taxxa kkontestati jippermettu sitwazzjoni fejn ir-remunerazzjoni mħallsa minn LNG Supply għall-finanzjament li tkun irċeviet, jiġifieri l-ħruġ ta' ishma għal ammont ugwali għall-Akkumulazzjonijiet ZORA, twassal għal tnaqqis fil-bażi tat-taxxa ta' LNG Supply (il-valur tal-Akkumulazzjonijiet Zora) li ma kienx ġie kkumpensat (u mhux se tiġi kkumpensat fil-futur) permezz ta' żieda fil-bażi tat-taxxa ta' LNG Holding (jew ta' żieda effettiva fil-bażi tat-taxxa ta' LNG Lussemburgu).

(268)

Ir-raġunament ta' hawn fuq irid jiġi traspost mutatis mutandis għal GSTM, EIL u CEF (275),

(269)

Fil-qosor, id-deċiżjonijiet tat-taxxa japprovaw trattament tat-taxxa tar-remunerazzjoni mħallsa minn LNG Supply u minn GSTM għall-finanzjament ipprovdut, rispettivament, minn LNG Holding u minn CEF, li jippermetti tnaqqis fil-bażi kombinata tat-taxxa tal-grupp Engie fil-Lussemburgu.

(270)

Fid-dawl ta' dak li ntqal hawn fuq, il-Kummissjoni tqis li t-trattament tat-taxxa mogħti lil Engie abbażi tad-deċiżjonijiet tat-taxxa kkontestati jidderoga mis-sistema ta' referenza u b'hekk jikkostitwixxi vantaġġ ekonomiku għall-grupp Engie.

(271)

Skont il-Qorti, il-valutazzjoni tas-selettività tinvolvi “tiftix ta' jekk l-esklużjoni ta' ċerti operaturi mill-benefiċċju ta' vantaġġ fiskali li jirriżulta minn miżura li tidderoga minn sistema komuni fiskali tikkostitwixxix trattament diskriminatorju fir-rigward tagħhom” (276).

(272)

Kif stabbilit fit-Taqsima 6.3.2, il-gruppi kollha involuti fi tranżazzjonijiet ta' finanzjament intragrupp bejn kumpaniji residenti fil-Lussemburgu huma f'sitwazzjoni legali u fattwali komparabbli ma' Engie fid-dawl tal-objettivi tas-sistema. Madankollu, gruppi bħal dawn mhux se jkollhom aċċess għall-vantaġġ mogħti lil Engie peress li, kif ġie stabbilit fit-Taqsima 6.3.1, skont is-sistema tat-taxxa fuq id-dħul tal-kumpaniji tal-Lussemburgu, il-ħlas ta' rimunerazzjoni fil-qafas ta' tranżazzjoni ta' finanzjament bejn żewġ entitajiet ta' grupp residenti fil-Lussemburgu ma jistax jirriżulta fi tnaqqis tal-bażi kombinata tat-taxxa tal-grupp fil-Lussemburgu, u dan ikun xi jkun it-tip ta' strument ta' finanzjament jew kuntratt użat jew il-livell tar-remunerazzjoni. Għalhekk, il-miżuri inkwistjoni jikkostitwixxu diskriminazzjoni fir-rigward ta' dawn l-operaturi.

(273)

Konsegwentement, il-vantaġġ mogħti lil Engie fuq il-bażi tad-deċiżjonijiet tat-taxxa kkontestati huwa prima facie selettiv.

(274)

Il-Lussemburgu (277) u Engie (278) jaffermaw li l-gruppi korporattivi li jużaw bħala strument ta' finanzjament ZORA dirett bejn żewġ entitajiet residenti fil-Lussemburgu, jiġifieri mingħajr entità intermedjarja u kuntratt forward prepagat, ikollhom aċċess għall-istess vantaġġ ta' Engie, jiġifieri tnaqqis fil-bażi kombinata tat-taxxa tal-grupp fil-Lussemburgu, u li konsegwentement, ma hemm l-ebda deroga mill-qafas ta' referenza.

(275)

Il-Kummissjoni tixtieq tfakkar mill-bidu nett li, sabiex tkun stabbilita s-selettività, mhuwiex meħtieġ li jintwera li kull impriża f'sitwazzjoni legali u fattwali komparabbli hija eskluża mill-vantaġġ mogħti lill-benefiċjarju tal-miżura. Huwa biżżejjed li jintwera, kif il-Kummissjoni diġà għamlet fil-premessa (271), li “ċerti operaturi” li jkunu f'sitwazzjoni legali u fattwali komparabbli fid-dawl tal-objettiv tas-sistema, ikunu esklużi mill-benefiċċju tal-vantaġġ tat-taxxa mogħti lill-benefiċjarju (279). Għalhekk, anki jekk kategorija speċifika ta' impriżi — gruppi korporattivi li jużaw ZORA diretta — tista' tibbenefika wkoll mill-istess trattament tat-taxxa ta' Engie, din iċ-ċirkustanza fiha nfisha ma tkunx biżżejjed biex jiġi konkluż li l-vantaġġ mogħti lil Engie mhux prima facie selettiv.

(276)

Fi kwalunkwe każ, il-Kummissjoni tqis li, kuntrarju għal dak li jsostnu l-Lussemburgu u Engie, grupp li juża ZORA dirett bejn żewġ entitajiet residenti fil-Lussemburgu ma jibbenefikax mill-istess trattament tat-taxxa bħal ta' Engie.

(277)

Dan huwa fil-fatt ikkonfermat mid-dikjarazzjonijiet tat-taxxa pprovduti mil-Lussemburgu, li juri li t-trattament tat-taxxa ta' ZORA isegwi t-trattament tat-taxxa ta' kwalunkwe strument nonparteċipattiv (280): is-Sussidjarji jirreġistraw kull sena bħala spiża deduċibbli mit-taxxa l-provvedimenti għall-pagamenti futuri tal-Akkumulazzjonijiet ZORA (281) u, mal-konverżjoni, LNG Lussemburgu tirreġistra l-Akkumulazzjonijiet ZORA bħala dħul taxxabbli (282).

(278)

Fi kliem ieħor, bħal fil-każ ta' kwalunkwe strument nonparteċipattiv ieħor, il-pagament tar-remunerazzjoni relatata maż-ZORAs (jiġifieri l-konverżjoni tal-Akkumulazzjonijiet ZORA) ma jwassalx għal tnaqqis tal-bażi kombinata tat-taxxa tal-grupp fil-Lussemburgu meta mqabbel mal-bażi tat-taxxa eżistenti qabel dak il-pagament (283).

(279)

Il-Lussemburgu jargumenta (284) li f'każ ta' konverżjoni ta' ZORA dirett, il-profitt li jirriżulta mill-pagament tar-remunerazzjoni, jiġifieri mill-konverżjoni ta' Akkumulazzjonijiet ZORA, ma jkunx intaxxat fil-livell tas-Sellief jekk dan jagħżel li japplika r-reġim speċjali skont l-Artikolu 22bis LIR. Skont din id-dispożizzjoni, il-konverżjoni ta' self f'parteċipazzjonijiet fil-kapital tal-kumpanija ma tagħtix lok għal xi qligħ kapitali, u għalhekk ma għandha tkun dovuta l-ebda taxxa fuq id-dħul korporattiv mal-konverżjoni, l-istess kif jiġri fl-istrutturi mwaqqfa minn Engie.

(280)

Il-Kummissjoni ma taċċettax dan l-argument. L-Artikolu 22bis LIR ma jwassalx għan-nontassazzjoni tal-Akkumulazzjonijiet ZORA konvertiti f'ishma. L-ewwel nett, minħabba li l-Artikolu 22bis LIR ma jkunx applikabbli għall-Akkumulazzjoijiet ZORA; u t-tieni nett, għaliex anki kieku kien japplika, l-effett tiegħu ma jkunx eżenzjoni permanenti mit-tassazzjoni tal-Akkumulazzjonijiet ZORA fil-livell tal-benefiċjarju.

(281)

Fil-fatt l-Artikolu 22bis LIR ma jkunx applikabbli għall-Akkumulazzjoijiet ZORA. Din id-dispożizzjoni tiddistingwi b'mod ċar il-qligħ kapitali li jirriżulta mill-konverżjoni tal-istrument ta' finanzjament f'ishma mir-remunerazzjoni ta' dan l-istrument qabel il-konverżjoni tiegħu u espressament tistipula li dawn l-ishma ma jistgħux jibbenefikaw mill-eżenzjoni skont l-Artikolu 22bis LIR: “en cas de conversion d'un emprunt capitalisant convertible, l'intérêt capitalisé se rapportant à la période d'exploitation en cours précédant la conversion est imposable au moment de l'échange ” (285). It-termini “emprunt capitalisant convertible” u “intérêt capitalisé” mhumiex definiti fil-liġi. Madankollu, skont il-Lussemburgu, iż-ZORAs huma self konvertibbli. Barra minn hekk, l-Akkumulazzjonijiet ZORA ma jitħallsux kull sena iżda jiġu miżjuda għall-prezz tal-ħruġ taż-ZORA biss mal-konverżjoni sabiex jiġi stabbilit l-ammont li għandu jiġi kkonvertit f'ishma. Ma hemmx differenza bejn “intérêt capitalisé” li jkun ikkonvertit f'ishma fil-mument tal-konverżjoni ta' self u l-Akkumulazzjonijiet ZORA. Konsegwentement, mal-konverżjoni, il-parti tal-ishma li jkunu għadhom kif inħarġu, li tikkorrispondi għall-Akkumulazzjonijiet ZORA hija taxxabbli u għandha tiġi inkluża fil-bażi tat-taxxa tal-benefiċjarju.

(282)

Għalhekk, f'dan il-każ l-eżenzjoni skont l-Artikolu 22bis LIR tista' fit-teorija tapplika biss għall-ishma li jikkorrispondu għall-valur nominali taż-ZORA iżda mhux għall-ishma li jikkorrispondu għall-Akkumulazzjonijiet taż-Zora, li għandhom jiġu inklużi direttament fil-bażi tat-taxxa tal-benefiċjarju.

(283)

Barra minn hekk, anki jekk l-Artikolu 22bis LIR kien applikabbli għall-Akkumulazzjonijiet Zora, dan ma jwassalx għal eżenzjoni permanenti ta' dan il-profitt. Fil-fatt, huwa ċar mill-kliem tal-Artikolu 22bis (4) LIR li din id-dispożizzjoni sempliċiment tippermetti differiment temporanju tat-tassazzjoni (286). Il-fatt li mhuwiex maħsub biex jiffaċilita n-nontassazzjoni, kif jissuġġerixxu l-Lussemburgu u Engie, huwa kkonfermat b'mod ċar mill-amministrazzjoni tat-taxxa tal-Lussemburgu fiċ-Ċirkulari tas-27 ta' Novembru 2002 li tikkonċerna l-applikazzjoni ta' din id-dispożizzjoni (“Ċirkulari 22bis”) (287). Din iċ-Ċirkulari tispjega li l-qligħ kapitali li jirriżulta mill-konverżjoni jiġi ttrasferit biss għall-assi riċevuti bi skambju (f'dan il-każ, l-ishma) iżda jibqa' fil-prinċipju taxxabbli meta jiġu realizzati (288).

(284)

Bħala konklużjoni, il-Kummissjoni wriet li l-vantaġġ mogħti lil Engie fuq il-bażi tad-deċiżjonijiet tat-taxxa kkontestati ma jkunx disponibbli għal impriżi oħra f'sitwazzjoni legali u fattwali komparabbli ma' ta' Engie fid-dawl tal-objettiv tas-sistema. Għalhekk, dan il-vantaġġ irid jitqies prima facie bħala selettiv. Din il-konklużjoni mhijiex imdgħajfa mill-fatt li l-istruttura implimentata minn Engie hija fil-prinċipju miftuħa għal kwalunkwe grupp fil-Lussemburgu. Hija ġurisprudenza stabbilita li l-fattur determinanti għall-valutazzjoni tas-selettività huwa li l-miżura tidderoga mill-qafas ta' referenza ġenerali u b'hekk tagħti lok għal diskriminazzjoni, li hija dak li l-Kummissjoni stabbilixxiet f'din it-Taqsima (289).

(285)

La l-Lussemburgu u lanqas l-Engie ma ressqu ġustifikazzjoni possibbli għat-trattament favorevoli approvat mid-deċiżjonijiet tat-taxxa kkontestati favur Engie. F'dan ir-rigward, il-Kummissjoni tfakkar li l-oneru ta' din il-ġustifikazzjoni jaqa' fuq l-Istat Membru.

(286)

Għalhekk, fin-nuqqas ta' kwalunkwe ġustifikazzjoni mressqa mil-Lussemburgu, il-Kummissjoni jkollha tikkonkludi li l-vantaġġ tat-taxxa mogħti lil Engie ma jistax jiġi ġġustifikat min-natura jew mill-iskema ġenerali ta' dik is-sistema.

(287)

Fir-rigward ta' kwalunkwe ġustifikazzjoni li l-Lussemburgu jista', b'mod ipotetiku — li ma għamilx — iqajjem fir-rigward tal-evitar ta' tassazzjoni ekonomika doppja, il-Kummissjoni tirreferi għall-valutazzjoni tagħha fit-Taqsima 6.2.3.

(288)

Fid-dawl ta' dak li ntqal, u mingħajr preġudizzju għall-konklużjonijiet tal-premessa 6.2.4, il-Kummissjoni tikkonkludi li l-vantaġġ tat-taxxa mogħti lil Engie fuq il-bażi tad-deċiżjonijiet tat-taxxa kkontestati huwa ta' natura selettiva.

(289)

Bħala linja ta' raġunament alternattiva, il-Kummissjoni tqis ukoll li d-dubji tagħha espressi fil-premessa 158 tad-Deċiżjoni ta' Ftuħ, jiġifieri, jekk in-nuqqas ta' tassazzjoni tal-grupp Lussemburgiż idderogax mir-regoli domestiċi tiegħu stess dwar l-abbuż tad-dritt fil-qasam tat-tassazzjoni ma naqsux.

(290)

Kif stabbilit fit-Taqsima 6.2.1.1, il-qafas ta' referenza huwa s-sistema tat-taxxa fuq id-dħul tal-kumpaniji tal-Lussemburgu, li għandha l-għan li tintaxxa l-profitt tal-kumpaniji kollha soġġetti għat-taxxa fil-Lussemburgu. Il-bażi għall-kalkolu tal-profitt taxxabbli huwa l-profitt iddeterminat fil-kontijiet tagħhom. Dan l-objettiv japplika għall-kontribwenti kumpaniji kollha reżidenti fil-Lussemburgu.

(291)

Ir-regoli kontra l-abbuż tat-taxxa huma s-sett ta' regoli mfassla biex jevitaw li l-kontribwenti jevitaw l-objettiv ewlieni tas-sistema ta' referenza, jiġifieri t-tassazzjoni tal-profitt korporattiv. Għalhekk, dawn ir-regoli jridu jinftiehmu bħala parti inerenti mis-sistema ta' referenza, peress li dawn jiżguraw il-konsistenza interna tas-sistema u jimmiraw li jinkisbu l-objettivi fundamentali tagħha.

(292)

L-Artikolu 6 StAnpG jipprojbixxi li t-taxxi jiġu evażi jew mitigati permezz ta' abbuż minn forom jew minn kostruzzjonijiet li huma legali taħt il-liġi ċivili. Skont din id-dispożizzjoni, jekk il-forma legali jew il-kostruzzjoni li ddawwar tranżazzjoni ma tkunx xierqa f'termini tas-sustanza tagħha, it-taxxa għandha tiġi vvalutata skont is-sustanza tat-tranżazzjoni, daqslikieku ġiet konkluża fil-forma legali xierqa (290). Skont il-Lussemburgu, din id-dispożizzjoni tippermetti lill-amministrazzjoni tat-taxxa tinjora kostruzzjonijiet legali jew tranżazzjonijiet konklużi esklussivament għal raġunijiet ta' taxxa u mhux motivati minn xi kunsiderazzjoni ekonomika, madankollu mingħajr ma tillimita l-għażliet disponibbli għall-kontribwent (291).

(293)

Skont iċ-Ċirkolari Amministrattiva tal-21 ta' Awwissu 1989 (iċ-“Ċirkolari tal-1989”) (292), l-Artikolu 6 StAnpG huwa applikabbli għall-proċeduri kollha tat-taxxa, inklużi d-deċiżjonijiet tat-taxxa maħruġa mill-amministrazzjoni tat-taxxa tal-Lussemburgu. Meta toħroġ deċiżjoni, l-amministrazzjoni tat-taxxa tal-Lussemburgu trid tiżgura li l-istruttura u/jew it-tranżazzjonijiet kif ippreżentati mill-kontribwent fit-talba għad-deċiżjoni ma tikkostitwixxix abbuż tal-liġi kif deskritt fl-Artikolu 6 StAnpG. Dan ifisser li l-awtoritajiet tat-taxxa tal-Lussemburgu ma għandhomx jagħtu deċiżjonijiet vinkolanti bħal deċiżjonijiet tat-taxxa f'każ li r-raġuni prinċipali tal-kontribwent li jitlob tali deċiżjoni tkun li jikseb benefiċċju tat-taxxa (293). Iċ-Ċirkolari tal-1989 tikkonferma wkoll li huwa rekwiżit obbligatorju għall-amministrazzjoni tat-taxxa tal-Lussemburgu li teskludi l-eżistenza ta' abbuż potenzjali tal-liġi qabel ma tagħti deċiżjoni tat-taxxa (294).

(294)

Skont il-Lussemburgu, fuq il-bażi tal-ġurisprudenza rilevanti, sabiex miżura tikkostitwixxi abbuż tal-liġi, jeħtieġ li jiġu ssodisfati erba' kriterji: l-ewwel, l-użu ta' forom ta' liġi privata jew ta' istituzzjonijiet mill-kontribwent; it-tieni, eżitu ta' evitar tat-taxxa jew ta' tnaqqis fl-obbligazzjoni tat-taxxa ta' kwalunkwe tip għall-kontribwent; it-tielet, l-użu ta' mezzi legali inadegwati mill-kontribwent; u r-raba', in-nuqqas ta' raġunijiet mhux relatati mat-taxxa biex jiġġustifikaw il-mezzi legali magħżula mill-kontribwent. (295)

(295)

L-ewwel kriterju jeżiġi li l-istruttura ta' tranżazzjoni partikolari, kif imfassla mill-kontribwent, tuża forom ta' liġi privata jew istituzzjonijiet (“Formen und Gestaltungsmöglichkeiten des bürgerlichen Rechts”). Peress li ma hemmx definizzjoni eżatta tas-sustanza tal-forom tal-liġi privata u istituzzjonijiet, la fl-Artikolu 6 StAnpG u lanqas fil-ġurisprudenza, huwa madankollu mifhum li dawn għandhom jiġu definiti bħala kwalunkwe mezz legali li ma jkunx relatat mal-liġi pubblika. Bħala tali, l-inkorporazzjoni ta' kumpanija u l-implimentazzjoni ta' kuntratti ta' finanzjament intragrupp għandhom jitqiesu bħala l-użu mill-kontribwent ta' forma ta' liġi privata jew istituzzjoni (296).

(296)

It-tieni kriterju jeżiġi li permezz tal-istruttura abbużiva, il-kontribwent ikun jista' jnaqqas l-obbilgazzjoni tiegħu tat-taxxa (“Minderung der Steuerpflicht”) billi jevita t-taxxa, permezz ta' eżenzjoni mit-taxxa jew billi jnaqqas il-bażi tat-taxxa (297).

(297)

It-tielet kriterju jeżiġi li l-kontribwent juża mezz legali mhux xierqa (“unangemessene rechtliche Gestalung”) fil-qafas tal-istruttura potenzjalment abbużiva. Skont il-Lussemburgu (298), dan ifisser li l-mezzi magħżula jridu jippermettu lill-kontribwent jikseb effett tat-taxxa li ma jistax ikun konformi mal-intenzjoni tal-leġiżlatur (299). Skont il-Lussemburgu, biex tintlaħaq din il-kundizzjoni, huwa meħtieġ li r-riżultat ekonomiku segwit ikun jista' jinkiseb b'tal-inqas żewġ mezzi, li waħda minnhom ma tkunx xierqa. L-użu ta' mezzi mhux xierqa jrid jippermetti ffrankar tat-taxxa li ma kienx ikun possibbli bl-użu ta' mezz xieraq ieħor.

(298)

Ir-raba' kriterju huwa n-nuqqas ta' raġunijiet mhux relatati mit-taxxa biex jiġġustifika l-mezzi legali magħżula mill-kontribwent sabiex jinkisbu l-objettivi ekonomiċi tat-tranżazzjoni jew tal-istruttura. Skont il-Lussemburgu (300) l-ġurisprudenza tgħid li raġunijiet mhux tat-taxxa, bħal raġunijiet ekonomiċi, iridu jkunu reali u jipprovdu biżżejjed benefiċċju ekonomiku għall-kontribwent (301). L-eżistenza ta' dawn ir-raġunijiet ekonomiċi hija biżżejjed biex ma tiġix applikata d-dispożizzjoni ta' kontra l-abbuż.

(299)

Fuq il-bażi tal-informazzjoni pprovduta mil-Lussemburgu, il-Kummissjoni tikkonkludi li l-amministrazzjoni tat-taxxa tal-Lussemburgu ma kellhiex toħroġ id-deċiżjonijiet tat-taxxa kkontestati, minħabba li l-istrutturi stabbiliti minn Engie huma abbużivi fl-ambitu tal-Artikolu 6 StAnpG.

(300)

Fil-fatt, it-tranżazzjonijiet ippreżentati minn Engie fit-talbiet għal deċiżjoni tat-taxxa jissodisfaw il-kundizzjonijiet deskritti fit-Taqsima 6.4.1 għall-applikazzjoni tal-Artikolu 6 StAnpG.

(301)

Mhuwiex qed jiġi kkontestat li Engie użat forom tal-liġi privata jew istituzzjonijiet sabiex timplimenta l-istrutturi deskritti fid-deċiżjoni tat-taxxa kkontestata: il-kuntratti Forward u selfiet konvertibbli bħaż-ZORAs. Għalhekk, l-ewwel kriterju għall-applikazzjoni tal-Artikolu 6 StAnpG huwa ssodisfat.

(302)

Huwa evidenti, kif stabbilit fit-Taqsimiet 6.2.1, 6.2.2 u 6.3.3, li d-deċiżjonijiet tat-taxxa kkontestati jippermettu lil Engie tnaqqas b'mod sinifikanti l-obbligazzjoni tat-taxxa tagħha fil-livell ta' grupp fil-Lussemburgu, peress li l-profitt realizzat mill-attivitajiet ittrasferiti lis-Sussidjarji (LNG Business u Financing and Treasury Business) jibqgħu virtwalment mhux intaxxat. Għalhekk, it-tieni kriterju għar-rikonoxximent ta' abbuż tad-dritt huwa ssodisfat ukoll.

(303)

It-tielet kriterju jirrikjedi, bħala l-ewwel pass, li jiġi stabbilit l-objettiv ekonomiku tat-tranżazzjoni inkwistjoni. B'hekk biss ikun possibbli li jiġi ddeterminat jekk dan l-objettiv jistax jinkiseb b'mezzi differenti minn dawk magħżula mill-kontribwent. Fit-tieni stadju, huwa meħtieġ li jiġi stabbilit jekk il-mezz magħżul mill-kontribwent mhuwiex mhux xieraq, fis-sens li jippermetti għal tnaqqis fit-taxxa li ma jistax ikun konformi mal-intenzjoni tal-leġiżlatur u li ma kienx ikun possibbli bl-użu ta' xi mezz xieraq ieħor.

(304)

F'dan il-każ jidher, l-ewwel nett, li r-riżultat ekonomiku ta' Engie permezz tal-istrutturi deskritti fid-deċiżjonijiet tat-taxxa kkontestati huwa l-finanzjament tal-akkwist ta' LNG Business u ta' Financing and Treasury Business mis-Sussidjarji. Lanqas ma huwa kkontestat li l-istess riżultat ekonomiku jista' jinkiseb permezz ta' diversi mezzi oħra ta' finanzjament: ekwità diretta jew strumenti ta' dejn bejn is-Sussidjarji u l-Holdings (302).

(305)

It-tieni nett, kif il-Kummissjoni stabbilixxiet fit-Taqsimiet 6.2 u 6.3, l-effett tal-istrutturi li ħolqot Engie huwa prattikament n-nontassazzjoni tal-profitt realizzat mis-Sussidjarji fil-Lussemburgu. Ir-riżultat mhuwiex kompatibbli mal-objettiv fundamentali tas-sistema tat-taxxa tal-kumpaniji tal-Lussemburgu, li huwa t-tassazzjoni tal-profitt tal-kumpaniji soġġetti għat-taxxa fil-Lussemburgu. Għaldaqstant, dan l-effett ma jistax ikun konformi mal-intenzjoni tal-leġiżlatur. Barra minn hekk, effett bħal dan ma kienx ikun possibbli kieku t-trasferiment tal-attivitajiet lis-Sussidjarji ġie ffinanzjat permezz ta' ekwità diretta jew strumenti ta' dejn. Għalhekk, l-istrutturi li użat Engie ma jikkostitwixxux mezzi legali xierqa biex jiffinanzjaw it-trasferiment tal-attivitajiet lis-Sussidjarji.

(306)

Fl-aħħar nett, il-Kummissjoni ma setgħet tidentifika l-ebda raġuni ekonomika li hija reali u li tipprovdi biżżejjed benefiċċju ekonomiku għall-istrutturi kumplessi li ħolqot Engie apparti milli tiffranka b'mod sinifikanti mit-taxxa.

(307)

Il-Lussemburgu jsostni (303) li l-istrutturi implimentati permezz tal-Kuntratti Forward u taż-ZORAs ikunu meħtieġa biex jiffinanzjaw l-akkwist tan-negozji mis-Sussidjarji. Dan l-argument huwa żbaljat. Fil-fatt, kif juru d-deċiżjonijiet tat-taxxa kkontestati, il-finanzjament huwa pprovdut mill-Holdings lis-Selliefa, li fl-istess jum jagħmluh disponibbli għas-Sussidjarji. Fi kliem ieħor, huma l-Holdings li qed jipprovdu l-finanzjament lis-Sssidjarji biex jakkwistaw l-assi.

(308)

Il-Kummissjoni tinnota li l-Ftehim dwar it-Trasferiment ta' LNG u l-Proposta ta' Trasferiment ta' GSTM diġà kienu jinkludu dispożizzjonijiet dwar il-finanzjament tat-trasferiment tan-negozji. Il-Ftehim ta' Trasferiment LNG jispeċifika li bi skambju għall-assi riċevuti, LNG Supply għandha toħroġ lil LNG Trading ċedoli għal ammont ekwivalenti għall-ammont nominali taż-ZORA (304). Fl-istess linja, il-Proposta ta' Trasferiment GSTM tgħid li CEF se tittrasferixxi fergħa ta' attività bi skambju ma' ċedola mingħand GSTM (305). Dawn iċ-ċedoli juru li t-trasferiment ta' assi kien diġà ġie ffinanzjat mill-Holdings bi strumenti ta' dejn. Fi kliem ieħor, il-Kuntratti Forward u ż-ZORAs kienu strutturi purament żejda, li jissostitwixxu tranżazzjonijiet ta' dejn dirett diġà eżistenti bejn il-Holdings u s-Sussidjarji (306). Ir-rwol tas-Selliefa bħala sempliċi entitajiet pass-through mingħajr possibbiltà li jagħmlu xi profitt jikkonferma li l-intervent tagħhom ma għandu l-ebda skop ekonomiku ieħor ħlief li jippermetti l-iffrankar tat-taxxa.

(309)

Il-Lussemburgu jargumenta wkoll li l-istrutturi kumplessi implimentati minn Engie jipprovdu aktar flessibbiltà u jippermettulha tiffinanzja n-negozji akkwistati filwaqt li fl-istess ħin tillimita l-profil tar-riskju tas-Sussidjarji. Dan l-argument ukoll mhuwiex sostanzjat. Fil-fatt, l-istess għan seta' jinkiseb permezz ta' ħruġ dirett ta' ishma mis-Sussidjarji lill-Holdings. Tranżazzjoni ta' ekwità diretta bejn il-Holdings u s-Sussidjarji tipprovdi l-istess protezzjoni lis-Sussidjarji bħall-istruttura kumplessa maħluqa minn Engie. L-istrutturi li ħolqot Engie jistgħu jassorbu telf għal ammont ugwali għan-nominali taż-ZORAs. F'każ li t-telf jaqbeż il-valur nominali taż-ZORAs, jiġi affettwat il-kapital tas-Sussidjarji. F'każ ta' injezzjoni ta' kapital għal ammont ugwali għan-nominali taż-ZORA, is-Sussidjarji kien ikollhom eżattament l-istess bafer kapitali, qabel mal-kapital inizjali jiġi affettwat mit-telf. Barra minn hekk, il-Kummissjoni tirrifjuta l-argument li ż-żieda ta' saff addizzjonali (is-Selliefa) u l-użu ta' prodotti finanzjarji kumplessi (iż-ZORA u l-Kuntratti Forward) minflok injezzjonijiet sempliċi ta' kapital jistgħu jżidu l-flessibbiltà. Għall-kuntrarju, dan joħloq xi kwistjonijiet ta' riskju operazzjonali għall-grupp: l-użu ta' entitajiet pass-through, minflok ma jġib il-flessibbiltà, joħloq piż amministrattiv, jinvolvi riskju ta' eżekuzzjoni għall-Holdings u jżid l-ispejjeż tat-tranżazzjoni.

(310)

Bħala konklużjoni, l-istrutturi kumplessi li ħolqot Engie jistgħu jitqiesu bħala ekonomikament ekwivalenti għal tranżazzjonijiet ta' finanzjament dirett bejn il-Holdings u s-Sussidjarji, sew jekk fil-forma ta' strumenti ta' ekwità jew ta' dejn. Tkun xi tkun il-forma li kellha titqies bħala ekwivalenti ekonomiku għall-istrutturi kumplessi li ħolqot Engie, din kienet twassal għat-tassazzjoni tal-profitt sottostanti. Dan ifisser li, fi kwalunkwe każ, ma hemm l-ebda raġuni ekonomika reali u li tipprovdi biżżejjed benefiċċju ekonomiku għal Engie biex tagħżel l-istrutturi kumplessi stabbiliti fid-deċiżjonijiet tat-taxxa kkontestati għajr li tiffranka b'mod sinifikanti mit-taxxa.

(311)

Għalhekk, il-kriterji tal-Artikolu 6 StAnpG huma ssodisfati u għalhekk l-istrutturi kumplessi li ħolqot Engie kellhom jitqiesu abbużivi mill-amministrazzjoni tat-taxxa tal-Lussemburgu. Skont iċ-Ċirkolari tal-1989, l-amministrazzjoni tat-taxxa għandha biss tagħti deċiżjoni tat-taxxa meta r-raġuni ewlenija għal din id-deċiżjoni ma tkunx benefiċċju tat-taxxa. Konsegwentement, bl-approvazzjoni tat-talbiet għad-deċiżjoni tat-taxxa, l-amministrazzjoni tat-taxxa tal-Lussemburgu applikat ħażin il-liġi u tat vantaġġ lil Engie fil-forma ta' esklużjoni mit-tassazzjoni ta' kważi l-profitt kollu realizzat minn żewġ sussidjarji tagħha (LNG Supply u GSTM) fil-Lussemburgu (307).

(312)

Billi l-vantaġġ mogħti lil Engie fuq il-bażi tad-deċiżjonijiet tat-taxxa kkontestati huwa bbażat fuq applikazzjoni ħażina tal-liġi li, fid-definizzjoni tagħha, mhijiex disponibbli għal impriżi oħra, il-Kummissjoni tikkonkludi skont dan ir-raġunament li dan il-vantaġġ huwa ta' natura selettiva.

(313)

Peress li t-trattament tat-taxxa mogħti fuq il-bażi tad-deċiżjonijiet tat-taxxa kkontestati jissodisfa l-kundizzjonijiet kollha tal-Artikolu 107(1) tat-Trattat, dan irid jitqies li jikkostitwixxi għajnuna mill-Istat fl-ambitu ta' dik id-dispożizzjoni. Dik l-għajnuna tirriżulta fi tnaqqis tal-imposti li normalment għandhom jiġġarrbu minn Engie matul l-operazzjonijiet tan-negozju tagħha u għalhekk għandu jitqies li jagħti għajnuna operatorja lil Engie.

(314)

Fit-Taqsima 6.2, il-Kummissjoni kkonkludiet li t-trattament tat-taxxa mogħti abbażi tad-deċiżjonijiet tat-taxxa kkontestati jagħti vantaġġ selettiv lil LNG Holding u lil CEF fl-ambitu tal-Artikolu 107(1) tat-Trattat, peress li dawn iwasslu għal tnaqqis tal-profitt taxxabbli ta' dawk l-entitajiet u, b'hekk, tal-obbligazzjoni tat-taxxa tal-kumpaniji tagħhom fil-Lussemburgu. LNG Holding u CEF jiffurmaw parti mill-grupp Engie.

(315)

Ir-regoli dwar l-eżenzjoni tal-parteċipazzjonijiet jikkonċernaw il-profitt imqassam minn kumpanija waħda fi grupp lil kumpanija oħra. F'dan il-każ, id-deċiżjoni tapprova l-eżenzjoni ta' dħul fil-livell ta' LNG Holding u ta' CEF li jikkorrispondi ekonomikament għal ammonti mnaqqsa bħala spejjeż fil-livell ta', rispettivament, LNG Supply u GSTM, u b'hekk tagħti lok għal nontassazzjoni effettiva ta' prattikament il-profitt kollu realizzat minn LNG Supply u minn GSTM, minbarra marġni limitat. Għalhekk hemm sitwazzjoni ta' deduzzjoni u eżenzjoni li, kif indikat fil-premessa 243, għandha impatt pożittiv fuq l-obbligazzjoni tat-taxxa ta' Engie fil-Lussemburgu.

(316)

Bl-istess mod, entitajiet ġuridiċi separati jistgħu jitqiesu li jiffurmaw unità ekonomika waħda għall-finijiet tal-applikazzjoni tar-regoli dwar l-għajnuna mill-Istat. Dik l-unità ekonomika mbagħad titqies bħala l-impriża rilevanti li qed tibbenefika mill-miżura tal-għajnuna. Kif il-Qorti tal-Ġustizzja diġà ddeċidiet, “li l-kunċett ta' impriża, meta jitqiegħed f'dan il-kuntest, għandu jinftiehem bħala li jkopri unità ekonomika anki jekk, mill-perspettiva ġuridika, din l-unità ekonomika hija magħmula minn diversi persuni fiżiċi jew ġuridiċi” (308). Sabiex tiddetermina jekk bosta entitajiet jiffurmawx unità ekonomika, il-Qorti tal-Ġustizzja tħares lejn l-eżistenza ta' sehem ta' kontroll jew rabtiet funzjonali, ekonomiċi jew organiċi (309). F'dan il-każ, kemm LNG Holding kif ukoll CEF huma kkontrollati bis-sħiħ minn Engie S.A., il-kumpanija prinċipali possedenti tal-grupp Engie.

(317)

Konsegwentement, kwalunkwe trattament tat-taxxa favorevoli mogħti lil LNG Holding u lil CEF mill-amministrazzjoni tat-taxxa tal-Lussemburgu mhux biss huwa ta' benefiċċju għal dawn l-entitajiet, iżda għal Engie fl-intier tagħha, billi jipprovdi riżorsi finanzjarji addizzjonali lill-grupp kollu. Għalhekk, minkejja l-fatt li dak il-grupp huwa organizzat f'personalitajiet ġuridiċi differenti u d-deċiżjonijiet tat-taxxa kkontestati jikkonċernaw it-trattament tat-taxxa ta' entitajiet individwali, dak il-grupp irid jitqies bħala unità ekonomika waħda li tibbenefika mill-miżura tal-għajnuna kkuntestata (310).

(318)

Barra minn hekk, il-konklużjoni tal-premessa 317 hija msaħħa mill-konstatazzjonijiet tat-Taqsimiet 6.3 u 6.4, fejn il-Kummissjoni stabbiliet li t-trattament tat-taxxa mogħti abbażi tad-deċiżjonijiet tat-taxxa kkontestati jagħti vantaġġ selettiv fl-ambitu tal-Artikolu 107(1) tat-Trattat lill-Grupp Engie fil-Lussemburgu, peress li dawn iwasslu għal tnaqqis tal-bażi kombinata tat-taxxa tal-grupp f'dan l-Istat Membru.

(319)

L-għajnuna mill-Istat għandha titqies kompatibbli mas-suq intern jekk taqa' f'xi waħda mill-kategoriji elenkati fl-Artikolu 107(2) tat-Trattat u tista' titqies kompatibbli mas-suq intern jekk il-Kummissjoni jirriżultalha li taqa” f'xi waħda mill-kategoriji elenkati fl-Artikolu 107(3) tat-Trattat. Madankollu, huwa l-Istat Membru li jagħti l-għajnuna li jerfa' l-oneru li jipprova li l-għajnuna mill-Istat mogħtija minnu hija kompatibbli mas-suq intern skont l-Artikoli 107(2) jew 107(3) tat-Trattat.

(320)

Il-Lussemburgu ma invoka l-ebda waħda mir-raġunijiet għal konstatazzjoni tal-kompatibbiltà skont xi waħda minn dawk id-dispożizzjonijiet għall-għajnuna mill-Istat li huwa ta fuq il-bażi tad-deċiżjonijiet tat-taxxa kkontestati. Engie ma invokat l-ebda raġuni minn dawn lanaqs.

(321)

Barra minn hekk, peress li t-trattament tat-taxxa mogħti fuq il-bażi tad-deċiżjonijiet tat-taxxa kkontestati jeħles lil Engie minn obbligazzjoni tat-taxxa li kieku kienet tkun obbligata ġġarrab fl-immaniġġjar ta' kuljum tal-attivitajiet normali, l-għajnuna mogħtija fuq il-bażi ta' dawk id-deċiżjonijiet tat-taxxa tikkostitwixxi għajnuna operattiva. Bħala regola ġenerali, tali għajnuna normalment ma tistax titqies kompatibbli mas-suq intern skont l-Artikolu 107(3) tat-Trattat minħabba li ma tiffaċilitax l-iżvilupp ta' ċerti attivitajiet jew ta' ċerti oqsma ekonomiċi. Barra minn hekk, il-vantaġġi tat-taxxa inkwistjoni mhumiex limitati fiż-żmien, jonqsu jew proporzjonati għal dak li huwa meħtieġ biex jinstab rimedju għal falliment speċifiku tas-suq jew biex jiġi ssodisfat kwalunkwe objettiv ta' interess ġenerali fl-oqsma kkonċernati. Għalhekk ma setgħux jitqiesu kompatibbli.

(322)

Konsegwentement, l-għajnuna mill-Istat mogħtija lill-grupp Engie mil-Lussemburgu hija inkompatibbli mas-suq intern.

(323)

Skont l-Artikolu 108(3) tat-Trattat, l-Istati Membri huma obbligati jinfurmaw lill-Kummissjoni bi kwalunkwe pjan għall-għoti ta' għajnuna (obbligu ta' notifika) u ma jistgħu jimplimentaw l-ebda miżura ta' għajnuna proposta qabel ma l-Kummissjoni tadotta deċiżjoni finali dwar l-għajnuna inkwistjoni (obbligu ta' waqfien).

(324)

Il-Kummissjoni tinnota li l-Lussemburgu ma nnotifika lill-Kummissjoni dwar l-ebda pjan li jagħti l-miżura ta' għajnuna kkontestata, u lanqas ma rrispetta l-obbligu ta' waqfien stabbilit fl-Artikolu 108(3) tat-Trattat. Għaldaqstant, skont l-Artikolu 1(f) tar-Regolament tal-Kunsill (UE) 2015/1589 (311), it-trattament tat-taxxa mogħti abbażi tad-deċiżjonijiet tat-taxxa kkontestati jikkostitwixxi għajnuna illegali, li ngħatat bi ksur tal-Artikolu 108(3) tat-Trattat.

(325)

Il-Lussemburgu sostna (312) li l-Kummissjoni kisret id-dritt tiegħu li jinstema', peress li l-fokus tal-investigazzjoni tal-Kummissjoni allegatament inbidel minn meta ġiet adottata d-Deċiżjoni tal-Ftuħ, kif muri permezz tal-Ittra tal-11 ta' Diċembru 2017. Skont il-Lussemburgu, il-Kummissjoni missha jew għalqet il-proċedura li kienet għaddejja u fetħet każ ġdid jew adottat deċiżjoni biex testendi d-Deċiżjoni tal-Ftuħ sabiex tagħti lil-Lussemburgu l-opportunità jagħti l-opinjonijiet tiegħu b'mod xieraq dwar l-allegat fokus ġdid tal-investigazzjoni tal-Kummissjoni.

(326)

Barra minn hekk, Engie ssostni (313) li d-dritt tagħha ta' difiża nkiser peress li ma ngħatatx l-opportunità tippreżenta l-kummenti tagħha dwar l-analiżi tal-Kummissjoni tad-deċiżjonijiet tat-taxxa tal-Lussemburgu fil-perjodu bejn l-2009 u l-2016 li jirreferu għall-eżistenza ta' ZORA jew ta' “Ftehimiet ta' Self Konvertibbli b'Mod Obbligatorju” u t-trattament tat-taxxa u tal-kontabbiltà rispettiv tagħhom.

(327)

Il-Kummissjoni tqis li d-drittijiet proċedurali tal-Lussemburgu u ta' Engie ġew rispettati bis-sħiħ f'dan il-każ.

(328)

L-ewwel u qabel kollox il-Kummissjoni tinnota li l-ambitu tal-investigazzjoni tal-Kummissjoni dwar l-għajnuna mill-Istat baqgħet l-istess bejn id-Deċiżjoni tal-ftuħ u l-adozzjoni ta' din id-Deċiżjoni. Iż-żewġ deċiżjonijiet jikkonċernaw l-istess deċiżjonijiet tat-taxxa kkontestati, l-istess benefiċjarji (LNG Holding, CEF kif ukoll il-grupp Engie) u l-istess tħassib dwar l-għajnuna mill-Istat (dwar jekk it-trattament tat-taxxa mogħti lil LNG Holding, lil CEF u lill-grupp Engie abbażi tad-deċiżjonijiet tat-taxxa kkontestati, jikkonformax mar-regoli dwar l-għajnuna mill-Istat skont l-Artikolu 107(1) tat-Trattat).

(329)

Fid-Deċiżjoni tal-ftuħ, il-Kummissjoni esprimiet id-dubji inizjali tagħha dwar il-kompatibbiltà mar-regoli tal-għajnuna mill-Istat tat-trattament tat-taxxa mogħti abbażi tad-deċiżjonijiet tat-taxxa kkontestati lill-entitajiet differenti tal-grupp Engie fil-Lussemburgu. L-għan ta' fażi ta' investigazzjoni fil-fond wara Deċiżjoni ta' ftuħ huwa li jitressqu elementi addizzjonali ta' fatt u liġi għall-attenzjoni tal-Kummissjoni. Dawk l-elementi jistgħu jkomplu jiżviluppaw jew jindirizzaw id-dubji inizjali tal-Kummissjoni kif stipulati f'deċiżjoni ta' ftuħ. Għaldaqstant, fl-aħħar ta' dik il-proċedura, l-analiżi tal-Kummissjoni setgħet inbidlet, li jimplika li d-deċiżjoni finali tista' tvarja xi ftit mid-deċiżjoni tal-ftuħ, mingħajr ma dawk id-differenzi jaffettwaw il-legalità tad-deċiżjoni finali (314).

(330)

Kien b'konsegwenza tas-sottomissjonijiet bil-miktub li ngħataw mil-Lussemburgu u minn Engie dwar it-tħassib dwar l-għajnuna mill-Istat li tqajjem mill-Kummissjoni fid-Deċiżjoni ta' Ftuħ li l-analiżi tal-Kummissjoni kompliet tiżviluppa f'dan il-każ. Pereżempju, il-Lussemburgu ċċara matul il-proċedura amministrattiva (315) li wara r-rimborż parzjali tal-LNG ZORA, li seħħ fl-2014, LNG, Lussemburgu ma għażiltx ir-reġim fakultattiv tal-Artikolu 22bis(2) LIR, iżda li kwalunkwe profitt taxxabbli li jirriżulta mill-konverżjoni taż-ZORA ġie rifless b'telf korrispondenti li jitnaqqas mit-taxxa fil-Kuntratt Forward LNG. It-test tal-Kuntratti Forward ingħata mil-Lussemburgu wara d-Deċiżjoni ta' ftuħ, fil-21 ta' Novembru 2016, u r-rwol ta' LNG Lussemburgu u EIL bħala entitajiet intermedjarji u l-funzjonament tal-Artikolu 22bis (2) ġie spjegat fid-dettall mil-Lussemburgu u minn Engie lill-Kummissjoni fil-laqgħa tal-1 ta' Ġunju 2017.

(331)

Madankollu, is-suġġett tal-investigazzjoni tal-Kummissjoni dwar l-għajnuna mill-Istat, jiġifieri t-trattament tat-taxxa ta' entitajiet differenti tal-grupp Engie fil-Lussemburgu bħala riżultat tad-deċiżjonijiet tat-taxxa kkontestati, qatt ma nbidel mill-adozzjoni tad-Deċiżjoni tal-ftuħ. L-istess jgħodd għad-dubji ewlenin tal-Kummissjoni rigward il-konformità tal-miżuri kkontestati mar-regoli dwar l-għajnuna mill-Istat (316). Kien biss fl-interess tat-trasparenza li s-servizzi tal-Kummissjoni bagħtu l-Ittra tal-11 ta' Diċembru 2017 lil-Lussemburgu, li din imbagħad bgħat lil Engie.

(332)

Fir-rigward ta' Engie, il-Kummissjoni tfakkar li, bħala parti interessata, hija għandha biss id-dritt tressaq kummenti bħala tweġiba għad-Deċiżjoni ta' ftuħ u mhux fuq l-informazzjoni ppreżentata mil-Lussemburgu wara d-Deċiżjoni ta' ftuħ. Madankollu, Engie ngħatat, u fil-fatt użat, opportunità tippreżenta l-kummenti tagħha lill-Kummissjoni f'diversi okkażjonijiet, kemm bil-miktub kif ukoll bil-fomm.

(333)

Konsegwentement, il-Kummissjoni tqis li d-drittijiet proċedurali tal-Lussemburgu u ta' Engie ġew rispettati f'dan il-każ.

(334)

L-Artikolu 16(1) tar-Regolament (UE) 2015/1589 jistabbilixxi obbligu fuq il-Kummissjoni li tordna l-irkupru ta' għajnuna illegali u inkompatibbli. Dik id-dispożizzjoni tistipula wkoll li l-Istat Membru kkonċernat għandu jieħu l-miżuri kollha neċessarji biex jirkupra l-għajnuna illegali li jinstab li tkun inkompatibbli. L-Artikolu 16(2) tar-Regolament (UE) 2015/1589 jistabbilixxi li l-għajnuna li għandha tiġi rkuprata tinkludi l-imgħax mid-data li fiha l-għajnuna illegali kienet għad-dispożizzjoni tal-benefiċjarju sad-data tal-irkupru effettiv tagħha. Ir-Regolament tal-Kummissjoni (KE) Nru 794/2004 (317) jelabora dwar il-metodi li għandhom jintużaw għall-kalkolu tal-imgħax ta' rkupru. Fl-aħħar nett, l-Artikolu 16(3) tar-Regolament (UE) 2015/1589 jgħid li “irkupru għandu jsir mingħajr dewmien u f'konformità mal-proċeduri tal-liġi nazzjonali tal-Istat Membru kkonċernat, sakemm jippermettu li l-eżekuzzjoni tad-deċiżjoni tal-Kummissjoni ssir b'mod immedjat u effettiv”.

(335)

Skont l-Artikolu 1(c) tar-Regolament (UE) 2015/1589 “għajnuna ġdida” tfisser kull għajnuna, jiġifieri, skemi ta' għajnuna u għajnuna individwali, li mhijiex għajnuna eżistenti, inklużi bidliet f'għajnuna eżistenti.

(336)

Skont l-Artikolu 17 Regolament (UE) 2015/1589, is-setgħa tal-Kummissjoni li tirkupra l-għajnuna hija soġġetta għal perjodu ta' limitazzjoni ta' 10 snin. Il-perjodu ta' limitazzjoni jibda dakinhar li fih l-għajnuna illegali tingħata lill-benefiċarju bħala għajnuna individwali jew bħala għajnuna taħt skema ta' għajnuna. Kull azzjoni meħudha mill-Kummissjoni jew minn Stat Membru, li jaġixxi fuq it-talba tal-Kummissjoni, fir-rigward tal-għajnuna illegali tinterrompi l-perjodu ta' limitazzjoni. Ma' kull interruzzjoni l-perjodu ta' limitazzjoni jerġa' jibda jiddekorri mill-bidu. Il-perjodu ta' limitazzjoni jkun sospiż sakemm id-deċiżjoni tal-Kummissjoni tkun is-suġġett tal-proċedimenti pendenti quddiem il-Qorti tal-Ġustizzja. Fl-aħħar, kull għajnuna li fir-rigward tagħha jkun skada l-perjodu ta' limitazzjoni titqies li hija għajnuna eżistenti.

(337)

F'dan il-każ, id-deċiżjonijiet tat-taxxa kkontestati nħarġu mill-amministrazzjoni tat-taxxa tal-Lussemburgu u l-għajnuna ngħatat inqas minn 10 snin qabel id-data li fiha l-Kummissjoni ppreżentat l-ewwel talba tagħha għal informazzjoni lil-Lussemburgu dwar id-deċiżjonijiet tat-taxxa kkontestati (it-23 ta' Marzu 2015) (318). B'konsegwenza, kull għajnuna mogħtija lil Engie fuq il-bażi tad-deċiżjonijiet tat-taxxa kkontestati tikkostitwixxi għajnuna ġdida.

(338)

L-Artikolu 16(1) tar-Regolament (UE) 2015/1589 jipprevedi li l-Kummissjoni ma għandhiex teħtieġ l-irkupru tal-għajnuna jekk dan imur kontra xi prinċipju ġenerali tal-liġi tal-Unjoni.

(339)

Il-Lussemburgu u Engie jinvokaw il-prinċipji taċ-ċertezza legali u tal-aspettattivi leġittimi biex jevitaw l-irkupru ta' għajnuna illegali u inkompatibbli billi jużaw argumenti simili.

(340)

Fir-rigward taċ-ċertezza legali, il-Lussemburgu jargumenta li dan il-prinċipju jimpedixxi l-irkupru f'dan il-każ minħabba l-“kumplessità tal-analiżi tal-iskemi tat-taxxa skont l-għajnuna mill-Istat” u minħabba li l-Kummissjoni tkun qed timponi l-interpretazzjoni tagħha tal-liġi Lussemburgiża (319). Il-Lussemburgu jinvoka r-rieda tajba tiegħu meta japplika d-deċiżjonijiet tat-taxxa kkontestati b'mod li jikkorrispondi strettament mal-applikazzjoni konsistenti tiegħu mil-Lussemburgu (320). Imbagħad jirreferi (321) għad-deċiżjonijiet tal-Kummissjoni tas-17 ta' Lulju 2013 dwar Spanish tax lease system (322) u d-deċiżjonijiet f'1929 Holding (323) u f'Belgian Coordination Centres (324) u jargumenta li, fid-dawl ta' dawn il-każijiet, kwalunkwe deċiżjoni negattiva jenħtieġ li tidħol fis-seħħ biss għall-ġejjieni wara perjodu tranżizzjonali.

(341)

Engie ssostni wkoll li l-Kummissjoni qed tadotta approċċ innovattiv (325) u qed timponi b'mod retroattiv l-interpretazzjoni tagħha stess tal-liġi tat-taxxa tal-Lussemburgu, u qed titbiegħed minn xi prinċipji tal-liġi tat-taxxa tal-Lussemburgu (il-prinċipju li l-karta tal-bilanċ tintrabat mal-karta tal-bilanċ kummerċjali) u qed turi nuqqas ta' konsistenza mal-qafas ta' referenza definit fid-deċiżjoni tal-Kummissjoni fil-każ FIAT (326). Engie tirreferi wkoll għad-deċiżjoni tal-Kummissjoni dwar l-iskema tat-taxxa applikabbli għal gruppi ta' interess ekonomiku (327) li fiha l-Kummissjoni jkollha rkupru limitat fuq il-bażi li l-ġestjoni allegatament ħażina tal-fajl ħolqot inċertezza legali (328).

(342)

Fl-aħħar nett, il-Lussemburgu (329) u Engie (330) jargumentaw li l-irkupru jwassal għal riskju ta' riperkussjonijiet ekonomiċi serji jew ta' tfixkil serju kemm għal-Lussemburgu kif ukoll għal Engie.

(343)

Fir-rigward tal-prinċipju tal-aspettativi leġittimi, Engie invokat argumenti u preċedenti simili għal dawk li qajjem il-Lussemburgu b'rabta maċ-ċertezza legali (il-bona fide tal-Lussemburgu fl-implimentazzjoni tad-deċiżjonijiet dwar it-taxxa u r-referenza għad-deċiżjonijiet dwar 1929 Holding u dwar Belgian Coordination Centres) (331). Hija ssostni wkoll li l-irkupru ma jistax isir minħabba s-sentenza Unicredito (332), li allegatament tippermetti lil impriża tagħżel dak li huwa l-inqas intaxxat għal tranżazzjoni (333).

(344)

Filwaqt li l-prinċipji ġenerali tad-dritt tal-Unjoni jispiraw il-qafas legali kollu tal-Unjoni, il-Qorti tat interpretazzjoni restrittiva ħafna għal dawn il-prinċipji fil-kuntest tal-irkupru. Il-prinċipju taċ-ċertezza legali huwa prinċipju ġenerali tad-dritt tal-Unjoni li jipprevedi l-prevedibbiltà tar-regoli u tal-effetti legali tagħhom. Skont il-ġurisprudenza, il-prinċipju taċ-ċertezza legali jipprevjeni lill-Kummissjoni milli ttawwal b'mod indefinit l-eżerċizzju tas-setgħat tagħha (334). Il-Qorti tal-Ġustizzja ddikjarat ukoll li l-unika raġuni li fuqha jista' jiġi invokat dak il-prinċipju f'każijiet eċċezzjonali, hija meta l-Kummissjoni tkun manifestament naqset milli taġixxi u kisret b'mod ċar id-dover ta' diliġenza tagħha fl-eżerċizzju tas-setgħat superviżorji tagħha (335).

(345)

F'dan il-każ, peress li d-deċiżjonijiet tat-taxxa kkontestati qatt ma ġew innotifikati lill-Kummissjoni mil-Lussemburgu, u lanqas ma kienu disponibbli pubblikament, il-Kummissjoni saret taf dwarhom biss fil-25 ta' Ġunju 2015, meta l-Lussemburgu wieġeb għat-talba tagħha għal informazzjoni tal-25 ta' Marzu 2015. Għalhekk, ma kien hemm l-ebda dewmien mhux ġustifikat u lanqas ma kien hemm ksur mill-Kummissjoni tal-obbligi tagħha ta' diliġenza fl-eżerċizzju tas-setgħat tagħha li jistgħu jiġġustifikaw l-applikazzjoni ta' dan il-prinċipju sabiex jiġi evitat l-irkupru.

(346)

Il-fatt li l-Lussemburgu jikkunsidra li huwa applika in bona fede l-liġi tiegħu stess b'mod li jqis korrett u konsistenti mal-prattika preċedenti tiegħu, jew li ma jaqbilx mal-interpretazzjoni tas-sistema ta' referenza adottata mill-Kummissjoni, huwa irrelevanti għall-finijiet tal-obbligu ta' rkupru tiegħu. L-aċċettazzjoni tal-argument tal-Lussemburgu twassal għar-riżultat inaċċettabbli li Stat Membru li b'mod konsistenti jagħti għajnuna illegali u inkompatibbli ma jkunx obbligat li jirkupraha lura. Dan ifisser ukoll li s-sempliċi fatt li miżura ta' għajnuna ġiet implimentata f'konformità mal-interpretazzjoni tal-Istat Membru tal-liġi nazzjonali proprja jista' jiġi invokat sabiex jiġi evitat l-irkupru. Din il-konklużjoni tipperikola l-infurzar tar-regoli dwar l-għajnuna mill-Istat fir-rigward ta' kwalunkwe miżura ta' għajnuna li tqieset bħala illegali u inkompatibbli, peress li l-obbligu ta' rkupru ma jistax ikun ibbażat fuq l-intenzjoni tal-Istati Membri meta ngħatat l-għajnuna, iżda fuq id-distorsjonijiet tal-kompetizzjoni maħluqa minn dik l-għajnuna. Barra minn hekk, il-“kumplessità” allegata tal-analiżi tal-miżuri tat-taxxa mill-Kummissjoni mhijiex argument aċċettabbli fir-rigward tal-obbligu ta' rkupru stabbilit mir-Regolament (UE) 2015/1589.

(347)

Fir-rigward tal-allegat “approċċ ġdid” li fuqu hija bbażata d-deċiżjoni attwali, il-Kummissjoni tirrifjutaha din l-affermazzjoni. L-analiżi mwettqa mill-Kummissjoni hija konsistenti mad-deċiżjonijiet preċedenti tagħha u mal-ġurisprudenza: l-eżistenza ta' vantaġġ selettiv ġiet ivvalutata skont ir-regoli ordinarji tat-tassazzjoni tal-profitt korporattiv fil-Lussemburgu. F'dan ir-rigward, filwaqt li l-Istati Membri jgawdu minn awtonomija fiskali fil-qasam tat-tassazzjoni diretta, kwalunkwe miżura fiskali li jadotta Stat Membru trid tikkonforma mar-regoli tal-Unjoni dwar l-għajnuna mill-Istat, li jorbtu lill-Istati Membri u għandhom prevalenza fuq il-leġiżlazzjoni domestika tagħhom (336). Il-fatt li l-Lussemburgu jew Engie ma jistgħux jaqblu dwar l-interpretazzjoni ta' ċerti dispożizzjonijiet jew li l-fatti li fuqhom hija bbażata din id-Deċiżjoni huma differenti minn dawk li fuqhom huma bbażati deċiżjonijiet oħra preċedenti ma jagħmilx l-approċċ tal-Kummissjoni “innovattiv”. Barra minn hekk, kif diġà ntwera, il-qafas ta' referenza definit mill-Kummissjoni f'din id-Deċiżjoni huwa kompletament konsistenti mad-deċiżjonijiet preċedenti tagħha mhux biss fil-każ FIAT, iżda wkoll fil-każ ta' Amazon u tal-ġurisprudenza tal-Qorti (337).

(348)

Fir-rigward tal-prinċipju tal-aspettattivi leġittimi, dan il-prinċipju jista' jiġi invokat minn kwalunkwe persuna f'sitwazzjoni fejn istituzzjoni tal-Unjoni “tkun ikkawżatilha aspettattivi li huma ġġustifikati” (338). Limitazzjonijiet importanti japplikaw biex jiġi invokat dak il-prinċipju. L-ewwel nett, il-Qorti qalet li dan il-prinċipju ma jistax jiġi invokat sakemm il-persuna li qed tagħmel it-talba “ma ngħatatx assigurazzjonijiet preċiżi min-naħa tal-amministrazzjoni” (339). Dawn l-assigurazzjonijiet kellhom jingħataw mill-istituzzjonijiet tal-Unjoni (340). It-tieni, l-Istati Membri ma jistgħux jinvokaw dak il-prinċipju f'każijiet fejn ikunu naqsu milli jinnotifikaw il-miżura ta' għajnuna lill-Kummissjoni (341). It-tielet nett, l-allegat nuqqas ta' azzjoni tal-Kummissjoni huwa irrilevanti meta miżura ta' għajnuna ma tkunx ġiet innotifikata lilha (342) u, konsegwentement, is-silenzju tal-Kummissjoni ma jistax jiġi interpretat bħala awtorizzazzjoni impliċita tal-miżura li tista' twassal għal aspettattivi leġittimi (343). F'dan il-każ, la l-Lussemburgu ma nnotifika d-deċiżjoni tat-taxxa kkontestata lill-Kummissjoni u lanqas il-Kummissjoni ma tat assigurazzjonijiet preċiżi lil-Lussemburgu li d-deċiżjonijiet tat-taxxa kkontestati ma jikkostitwixxux għajnuna. Għalhekk, il-Lussemburgu ma jistax juża l-prinċipju tal-aspettattivi leġittimi.

(349)

Minkejja li l-Lussemburgu u Engie serħu fuq l-prassi deċiżjonali preċedenti tal-Kummissjoni kemm fil-kuntest taċ-ċertezza legali kif ukoll tal-aspettattivi leġittimi, il-Kummissjoni tfakkar, bħala kwistjoni preliminari, li mhijiex marbuta mal-prassi tagħha tat-teħid tad-deċiżjonijiet (344). Barra minn hekk, il-każijiet imsemmija ma jsostnux l-argumenti tal-Lussemburgu u ta' Engie.

(350)

F'Belgian Coordination Centres, ir-raġuni għaliex il-Kummissjoni ma ordnatx l-irkupru tal-għajnuna kien minħabba li ma kinitx sabet oġġezzjoni f'deċiżjoni preċedenti rigward skema Belġjana b'karatteristiċi simili. Il-Kummissjoni għalhekk qieset li d-deċiżjoni preċedenti tagħha dwar il-miżura Belġjana tat aspettattiva leġittima lill-benefiċjarji dwar l-iskema l-ġdida li vvalutat f'dak iż-żmien. Bl-istess mod, fid-Deċiżjoni tagħha dwar l-iskema tat-taxxa applikabbli għall-gruppi b'interess ekonomiku, il-Kummissjoni qiset li żewġ ċirkostanzi eċċezzjonali ġġustifikaw in-nonirkupru tal-għajnuna mogħtija: l-ewwel nett, il-Kummissjoni damet biex teżerċita s-setgħat tagħha biex teżamina l-iskema, peress li ma kinitx segwiet diversi ittri ppreżentati minn Franza, u t-tieni, il-benefiċjarji fl-iskema ġew żgwidati dwar il-legalità tagħha minħabba deċiżjoni preċedenti tal-Kummissjoni meta qieset li miżura simili ma kinitx tikkostitwixxi għajnuna. Preċiżament, l-inċertezza maħluqa minn din id-deċiżjoni preċedenti ġġustifikat id-deċiżjoni tal-Kummissjoni fil-każ Spanish tax lease li ma tirkuprax l-għajnuna mogħtija qabel il-pubblikazzjoni tad-Deċiżjoni dwar l-iskema tat-taxxa applikabbli għal raggruppamenti ta' interess ekonomiku. L-ebda waħda minn dawn iċ-ċirkostanzi ma teżisti f'dan il-każ. Lanqas ma l-Kummissjoni kellha xi dewmien eċċezzjonali jew ma l-Lussemburgu jew Engie ġew żgwidati minn xi deċiżjoni preċedenti tal-Kummissjoni dwar arranġament tat-taxxa simili.

(351)

Ir-referenza għal 1929 Holding hija ugwalment ineffettiva. F'dan il-każ, il-Kummissjoni kkunsidrat li l-ebda għajnuna ma għandha tiġi rkuprata minħabba n-natura tal-iskema ta' għajnuna eżistenti li kienet ġiet adottata fl-1929, jiġifieri qabel id-dħul fis-seħħ tat-Trattat. Imbagħad iddeċidiet li tagħti perjodu tranżizzjonali biex tintemm l-iskema minħabba xi ċirkostanzi eċċezzjonali seħħew f'dak il-każ, jiġifieri l-perjodu eċċezzjonalment twil li matulu kienet fis-seħħ l-iskema (76 sena) u l-fatt li t-tneħħija immedjata tal-miżura kien ikun jista' jkollha konsegwenzi relattivament serji għall-impjiegi u t-tkabbir ekonomiku fil-Lussemburgu, fejn 13 000-il kumpanija holding kienu attivi f'pajjiż b'popolazzjoni attiva ta' mhux aktar minn 110 000 ħaddiem. Għal darb'oħra l-ebda waħda minn dawn iċ-ċirkostanzi ma teżisti f'dan il-każ: lanqas ma tistal-għajnuna mogħtija fil-każ preżenti titqies bħala għajnuna eżistenti, u lanqas ma jista' jkun hemm xi konsegwenzi ekonomiċi serji għal-Lussemburgu mill-irkupru tal-għajnuna mingħand Engie. Il-Kummissjoni tirrifjuta wkoll l-argumenti dwar il-konsegwenzi ekonomiċi serji tal-irkupru fuq Engie. Kif il-Qorti diġà stabbiliet, l-irkupru ma jistax ikun affettwat miċ-ċirkostanzi marbuta mas-sitwazzjoni ekonomika tal-benefiċjarju (345).

(352)

L-irkupru lanqas ma huwa impedit mill-ġurisprudenza tal-Qorti f'Unicredito. Din is-sentenza kulma tgħid huwa li fl-istadju tal-irkupru l-awtoritajiet nazzjonali jistgħu jqisu trattament tat-taxxa aktar favorevoli mit-trattament ordinarju li kien jingħata lill-benefiċjarju “fin-nuqqas ta' għajnuna illegali u skont regoli domestiċi li huma kompatibbli mad-dritt Komunitarju” (346). Għalhekk, il-fatt li impriża tista' tagħżel “l-għażla l-inqas taxxabbli” għal tranżazzjoni jew “trattament tat-taxxa aktar favorevoli mis-sistema ordinarja” bl-ebda mod ma jipprevjeni l-irkupru meta tali alternattiva jew trattament jikkostitwixxi preċiżament il-miżura ta' għajnuna illegali indirizzata mid-deċiżjoni tal-Kummissjoni.

(353)

Engie targumenta li d-Deċiżjoni ta' Ftuħ ma għandhiex motivazzjoni suffiċjenti. B'mod partikolari, skont Engie, il-Kummissjoni ddedikat paragrafu wieħed biss għall-applikazzjoni tad-deċiżjonijiet tat-taxxa kkontestati tal-preżunzjoni ta' selettività ta' miżuri individwali u għall-affermazzjoni ta' deroga allegata mir-regoli tal-Lussemburgu dwar l-abbuż tad-dritt. Dan in-nuqqas ta' raġunament iwassal għal ksur tal-prinċipju ta' amministrazzjoni tajba li jimpedixxi wkoll l-irkupru (347).

(354)

Il-Kummissjoni ma tistax taċċetta li kien hemm kwalunkwe ksur tal-prinċipju ta' amministrazzjoni tajba. Il-Kummissjoni saret taf dwar l-eżistenza tal-miżuri ta' għajnuna fil-25 ta' Ġunju 2015 biss, meta l-Lussemburgu wieġeb għat-talba tagħha għal informazzjoni tal-25 ta' Marzu 2015. Għalhekk, ma kien hemm ebda dewmien mhux ġustifikat fil-proċedura.

(355)

Dwar in-nuqqas ta' motivazzjoni, il-Kummissjoni tfakkar li d-Deċiżjoni ta' Ftuħ trid biss “tiġbor fil-qosor l-elementi rilevanti ta' fatt u ta' liġi, li tinkludi evalwazzjoni provviżorja tal-miżura tal-Istat inkwistjoni intiża sabiex tiddetermina jekk din għandhiex in-natura ta' għajnuna, u li tesponi r-raġunijiet li joħolqu d-dubji dwar il-kompatibbiltà tagħha mas-suq komuni” (348). Minħabba n-natura preliminari tal-valutazzjoni, l-irkupru ma jistax jiġi evitat permezz ta' perċezzjoni ta' nuqqas ta' raġunament fid-Deċiżjoni ta' Ftuħ. Fi kwalunkwe każ, il-Kummissjoni tfakkar li l-allegat nuqqas ta' raġunament tal-preżunzjoni ta' selettività ta' miżuri individwali huwa argument ineffettiv minħabba li l-Kummissjoni ma tibbażax din id-Deċiżjoni fuq dik il-preżunzjoni.

(356)

Fl-aħħar nett, Engie tinvoka ksur tal-prinċipju ta' trattament ugwali, billi argumentat li deċiżjoni ta' rkupru taffettwa biss l-Engie u l-ebda kontribwent ieħor li bbenefika mill-istess trattament tat-taxxa (349). Madankollu, il-Qorti diġà kkunsidrat li l-fatt li impriżi oħrajn jingħataw għajnuna mill-Istat, anki kompetituri, huwa irrilevanti biex jiġi ddeterminat jekk miżura partikolari tikkostitwixxix għajnuna mill-Istat (350). Peress li l-irkupru huwa l-konsegwenza loġika ta' eżistenza ta' għajnuna illegali, dan ir-raġunament irid japplika a fortiori għall-ħlas lura tal-għajnuna illegali mill-Istat.

(357)

Bħala konklużjoni, l-ebda prinċipju ġenerali tad-dritt ma jipprevjeni l-irkupru f'dan il-każ.

(358)

L-obbligu fuq Stat Membru li jabolixxi għajnuna illegali meqjusa mill-Kummissjoni bħala inkompatibbli mas-suq intern huwa mfassal biex jistabbilixxi mill-ġdid is-sitwazzjoni kompetittiva li kienet teżisti qabel fis-suq. F'dan il-kuntest, il-Qorti tal-Ġustizzja ddikjarat li dak l-objettiv jintlaħaq meta l-benefiċjarju jkun ħallas lura l-ammonti mogħtija f'għajnuna illegali, u b'hekk jitlef il-vantaġġ li jkun ibbenefika minnu għall-kuntrarju tal-kompetituri tiegħu fis-suq, u tkun ġiet irrestawrata s-sitwazzjoni ta' qabel ma ngħatat l-għajnuna.

(359)

L-ebda dispożizzjoni tad-dritt tal-Unjoni ma tirrikjedi li l-Kummissjoni, meta tordna l-ħlas lura ta' għajnuna ddikjarata inkompatibbli mas-suq intern, tistabbilixxi l-ammont eżatt tal-għajnuna li għandu jitħallas lura (351). Pjuttost, huwa biżżejjed li d-deċiżjoni tal-Kummissjoni tinkludi informazzjoni li tippermetti lid-destinatarju tad-deċiżjoni jiddetermina dak l-ammont mingħajr diffikultà (352). Id-dritt tal-Unjoni jitlob biss li l-irkupru tal-għajnuna li ngħatat kontra l-liġi jirrestawra l-pożizzjoni tal-istatus quo ante u li dak il-ħlas lura jsir skont ir-regoli tad-dritt nazzjonali (353). Għaldaqstant, il-Kummissjoni tista' tillimita ruħha li tiddikjara li hemm obbligu ta' ħlas lura tal-għajnuna inkwistjoni u tħalli f'idejn l-awtoritajiet nazzjonali biex jikkalkulaw l-ammont eżatt tal-għajnuna li għandu jitħallas lura (354).

(360)

Fir-rigward ta' għajnuna illegali mill-Istat fil-forma ta' miżuri tat-taxxa, l-ammont li għandu jiġi rkuprat għandu jiġi kkalkolat fuq il-bażi ta' tqabbil bejn it-taxxa effettivament imħallsa u l-ammont li kellu jitħallas fin-nuqqas tad-deċiżjonijiet tat-taxxa kkontestati. Id-differenza bejn iż-żewġ valuri tirrappreżenta l-għajnuna mogħtija lill-benefiċjarju, li trid tiġi rkuprata għal kollox.

(361)

Kif spjegat fit-Taqsima 6, l-għajnuna mogħtija fuq il-bażi tad-deċiżjonijiet tat-taxxa kkontestati jikkonsisti fl-applikazzjoni ta' eżenzjoni tal-parteċipazzjonijiet fil-livell ta' LNG Holding u ta' CEF għal dħul li jikkorrispondi ekonomikament għall-ammonti mnaqqsa bħala spejjeż fil-livell ta' LNG Supply u ta' GSTM rispettivament (355). Din l-applikazzjoni kombinata ta' eżenzjoni u tnaqqis għall-istess ammonti ħalliet prattikament il-profitt kollu realizzat minn LNG Supply u GSTM mhux intaxxat. Għalhekk, il-vantaġġ effettivament jimmaterjalizza fil-mument li fih tiġi applikata l-eżenzjoni tal-parteċipazzjoni, fil-livell ta' LNG Holding u ta' CEF, fuq id-dħul li jikkorrispondi għall-Akkumulazzjonijiet Zora li qabel kienu mnaqqsa fil-livell ta' LNG Supply u ta' GSTM rispettivament. F'dan ir-rigward, il-Kummissjoni tinnota li, sal-31 ta' Diċembru 2016 (356), GSTM ZORA kien għadu ma ġiex ikkonvertit f'Ishma ta' GSTM, li jfisser li fir-rigward ta' din it-tranżazzjoni, l-eżenzjoni tal-parteċipazzjoni għadha ma ġietx applikata. Bħala konsegwenza, l-għajnuna mogħtija fuq il-bażi tad-deċiżjonijiet tat-taxxa tal-GSTM għadha ma mmaterjalizzatx u għalhekk ma hemm l-ebda ammont ta' rkupru (ħlief jekk GSTM ZORA kien ikkonvertit f'Ishma ta' GSTM, dawn l-ishma ġew ikkanċellati jew mibjugħa u l-eżenzjoni tal-parteċipazzjonijiet ġiet applikata fuq il-profitt korrispondenti bejn l-31 ta' Diċembru 2016 u d-data ta' din id-Deċiżjoni).

(362)

B'kuntrast ma' dan, LNG ZORA ġie parzjalment ikkonvertit fl-2014 u l-Ishma ta' LNG Supply riċevuti minn LNG Holding mal-konverżjoni ġew ikkanċellati fl-istess sena, u dan wassal għal dħul ta' USD 506,2 miljun għal-LNG Holding. Dan id-dħul baqa' mhux intaxxat skont l-applikazzjoni tal-eżenzjoni tal-parteċipazzjonijiet. Dan l-ammont jikkorrispondi għall-ispiża mnaqqsa, bħala Akkumulazzjonijiet ZORA, fil-livell ta' LNG Supply.

(363)

L-ammont li jrid jiġi rkuprat għandu jiġi stabbilit fid-dawl tal-kunsiderazzjonijiet ta' hawn fuq: L-ewwel, billi jittieħed kwalunkwe dħul irreġistrat fid-dikjarazzjonijiet tat-taxxa ta' LNG Holding li jikkorrispondi għal Akkumulazzjonijiet ZORA kkonvertiti li qabel kienu mnaqqsa fil-livell ta' LNG Supply (357); u t-tieni, billi jiġu applikati għall-ammont li jirriżulta r-regoli ordinarji tat-tassazzjoni tal-profitt korporattiv fil-Lussemburgu, inklużi t-taxxa standard fuq id-dħul korporattiv, it-taxxa muniċipali, is-soprataxxi u t-taxxa fuq il-ġid. Is-somma li tirriżulta tikkostitwixxi l-ammont ta' għajnuna li għandu jiġi rkuprat sabiex jiġi eliminat il-vantaġġ selettiv mogħti mil-Lussemburgu fuq il-bażi tad-deċiżjonijiet tat-taxxa kkontestati. Sas-sena fiskali 2016 inkluża, il-Kummissjoni tinnota li l-ammont ta' dħul irreġistrat fid-dikjarazzjonijiet tat-taxxa ta' LNG Holding li jikkorrispondi għall-Akkumulazzjonijiet ZORA kkonvertiti mnaqqsa fil-livell ta' LNG Supply kien ta' USD 506,2 miljun, mogħti fis-sena fiskali 2014 (358).

(364)

Il-metodoloġija deskritta fil-premessa 363 għandha tapplika għal CEF, fil-każ li xi ammont ta' għajnuna mmaterjalizza permezz tal-konverżjoni (totali jew parzjali) ta' GSTM ZORA f'Ishma ta' GSTM, il-kanċellazzjoni jew il-bejgħ tagħhom, u l-applikazzjoni sussegwenti tal-eżenzjoni tal-parteċipazzjonijiet fid-dikjarazzjonijiet tat-taxxa ta' CEF sad-data tal-adozzjoni ta' din id-Deċiżjoni. L-istess japplika għal kwalunkwe għajnuna addizzjonali mogħtija lil LNG Holding fid-data tal-adozzjoni ta' din id-Deċiżjoni bħala riżultat ta' kwalunkwe konverżjoni ulterjuri ta' LNG ZORA, il-kanċellazzjoni jew il-bejgħ ta' Ishma ta' LNG Supply korrispondenti u l-applikazzjoni tal-eżenzjoni tal-parteċipazzjonijiet fid-dikjarazzjonijiet tat-taxxa ta' LNG Holding.

(365)

Fid-dawl tal-kummenti fit-Taqsimiet 6.6 u 8.3, il-Kummissjoni tqis li l-Lussemburgu għandu, l-ewwel nett, jirkupra l-għajnuna illegali u inkompatibbli li diġà mmetarjalizzat mingħand LNG Holding (359). Jekk LNG Holding ma tkunx f'pożizzjoni li tħallas lura l-ammont sħiħ tal-għajnuna riċevuta b'riżultat tad-deċiżjoni tat-taxxa kkontestata, il-Lussemburgu għandu jirkupra l-ammonti li jifdal mingħand Engie S.A. jew/u mingħand kwalunkwe suċċessur tagħha jew kumpaniji tal-grupp, minħabba li dik l-entità tikkontrolla l-grupp Engie, li huwa l-unità ekonomika waħdanija li tibbenefika mill-għajnuna. B'dan il-mod, il-vantaġġ mhux dovut mogħti fuq il-bażi tad-deċiżjonijiet tat-taxxa kkontestati jiġi eliminat u s-sitwazzjoni li kienet teżisti qabel fis-suq tiġi restawrata permezz tal-irkupru.

(366)

Kif spjegat fit-Taqsima 6.2, hija l-applikazzjoni tal-eżenzjoni tal-parteċipazzjonijiet fil-livell ta' LNG Holding u ta' CEF għal dħul li jikkorrispondi ekonomikament għal ammonti mnaqqsa bħala spejjeż fil-livell ta' LNG Supply u GSTM (Akkumulazzjonijiet ZORA) li toħloq vantaġġ mhux dovut u li tikkostitwixxi b'mod materjali l-għajnuna mogħtija mil-Lussemburgu fuq il-bażi tad-deċiżjonijiet tat-taxxa kkontestati. Il-Kummissjoni ma tpoġġix f'dubju bħala tali l-legalità skont il-liġi tat-taxxa tal-Lussemburgu tal-istruttura kollha stabbilita minn Engie għat-trasferiment taż-żewġ negozji. Huwa sempliċement toġġezzjona għall-effetti prattiċi ta' din l-istruttura fuq l-obbligazzjoni tat-taxxa totali tal-grupp Engie, jiġifieri li virtwalment il-profitti kollha magħmula minn LNG Supply u GSTM effettivament tħallew mhux intaxxati. B'mod partikolari, il-Kummissjoni teħtieġ lil-Lussemburgu biex, inter alia, ma japplikax l-eżenzjoni tal-parteċipazzjonijiet fil-livell tal-Holdings għal kwalunkwe dħul li jikkorrispondi għal ammonti li qabel kienu mnaqqsa mill-bażi tat-taxxa tas-Sussidjarji.

(367)

Peress li l-Ftehimiet ZORA se jiskadu fl-2024 u fl-2026 (360), parti kbira mill-vantaġġ mogħti lil Engie permezz tad-deċiżjonijiet ikkontestati effettivament jimmaterjalizzaw fil-futur, skont l-għażliet ta' Engie rigward meta tikkonverti ż-ZORAs f'ishma ta' LNG Supply u ta' GSTM, u l-kanċellazzjoni jew il-bejgħ sussegwenti tagħhom. Għal din ir-raġuni, il-Kummissjoni tqis li, minbarra l-obbligu tal-irkupru tal-għajnuna diġà materjalizzata kif deskritt fit-Taqsima 8, il-Lussemburgu jrid ma jaċċettax l-applikazzjoni tal-eżenzjoni tal-parteċipazzjonijiet, fil-livell ta' LNG Holding u ta' CEF, għal dħul li jikkorrispondi għal Akkumulazzjonijiet ZORA li diġà kienu tnaqqsu rispettivament minn LNG Supply u GSTM, irrispettivament minn jekk dan iseħħx fid-dati tal-maturità tal-Ftehimiet ZORA fl-2024 u fl-2026, qabel jew anki wara l-2026 (361).

(368)

Peress li parti kbira mill-għajnuna mogħtija lil Engie għadha ma materjalizzatx, u sabiex jiġi verifikat li dan mhux se jseħħ fil-futur, il-Kummissjoni se jkollha bżonn tirċievi mingħand il-Lussemburgu, fost l-oħrajn, id-dikjarazzjonijiet tat-taxxa, il-kontijiet statutorji u l-valutazzjonijiet finali tat-taxxa tal-entitajiet li ġejjin tal-grupp Engie: Engie LNG Supply, S.A., Engie Treasury Management S.à.r.l., Engie LNG Holding S.à.r.l., Engie Invest International S.A. (inklużi d-dikjarazzjonijiet tat-taxxa u l-valutazzjonijiet tat-taxxa skont ir-reġim ta' unità fiskali waħda) (362), Engie LNG (il-Lussemburgu) S.à.r.l. u Electrabel Invest Lussemburgu S.A.. Il-Kummissjoni se jkollha bżonn ukoll tirċievi kwalunkwe deċiżjonijiet tat-taxxa ġodda, maħruġa mil-Lussemburgu favur l-entitajiet elenkati hawn fuq jew kwalunkwe entità oħra tal-grupp Engie, dwar it-trattament tat-taxxa tal-istrutturi mwaqqfa minn Engie fid-deċiżjonijiet tat-taxxa kkontestati. Din l-informazzjoni hija meħtieġa biex tiġi żgurata l-implimentazzjoni sħiħa ta' din id-Deċiżjoni matul iż-żmien. Fil-fatt, il-Kummissjoni mbagħad se tivverifika għal kull sena finanzjarja li, fost l-oħrajn, l-ebda eżenzjoni tal-parteċipazzjonijiet ma ġiet applikata fil-livell ta' Engie LNG Holding S.à.r.l. u ta' Engie Invest International S.A. fuq dħul li jikkorrispondi għall-Akkumulazzjonijiet ZORA imnaqqsa fil-livell ta', rispettivament, Engie LNG Supply, S.A., u Engie Treasury Management S.à.r.l. Dan l-obbligu ta' monitoraġġ huwa irrispettivament minn jekk it-tranżazzjoni proposta deskritta fil-premessa (22) hijiex finalizzata jew le, jiġifieri jekk il-kumpanija prinċipali ta' Engie LNG Supply, S.A., hijiex tal-grupp Engie jew tal-Grupp Total. Barra minn hekk, jekk Engie tiddeċiedi li tirrevedi l-istrutturi stabbiliti fid-deċiżjonijiet tat-taxxa kkontestati, il-Lussemburgu għandu jinforma lill-Kummissjoni dwar il-bidliet rilevanti u l-impatt tagħhom fuq it-total tal-obbligazzjoni fiskali fil-Lussemburgu tal-Grupp Engie. L-obbligi stabbiliti f'din il-premessa jibqgħu sakemm l-ishma ta' LNG Supply u ta' GSTM jiġu kkonvertiti kompletament u sussegwentement ikkanċellati jew mibjugħa.

(369)

Bħala konklużjoni, il-Kummissjoni ssib li l-Lussemburgu, bi ksur tal-Artikoli 107(1) u 108(3) tat-Trattat, illegalment ta għajnuna mill-Istat lil Engie abbażi tad-deċiżjonijiet tat-taxxa kkontestati. Il-Lussemburgu huwa meħtieġ jirkupra dik l-għajnuna mill-Istat bis-saħħa tal-Artikolu 16 tar-Regolament (UE) 2015/1589 minn LNG Holding jew jekk dan tal-aħħar jonqos milli jħallas lura l-ammont sħiħ tal-għajnuna, minn Engie S.A. jew minn kwalunkwe suċċessur tagħha, jew kumpaniji tal-grupp għall-ammont pendenti tal-għajnuna. Il-Lussemburgu għandu jiżgura wkoll li fil-futur ma tingħata l-ebda għajnuna addizzjonali lil Engie jew lil kwalunkwe kumpanija tal-grupp tagħha bħala riżultat ta' trattament tat-taxxa stabbilit fid-deċiżjonijiet tat-taxxa kkontestati. Għaldaqstant, il-Kummissjoni,

(1)

F'Marzu 2006, il-Kummissjoni talbet informazzjoni mill-awtoritajiet Taljani dwar l-appoġġ potenzjali mill-Istat lil Cantieri del Mediterraneo S.p.A. (“CAMED”) rigward ix-xogħlijiet ippjanati fuq baċir imbattal mill-ilma li jinsab fil-Port ta' Napli (baċir Nru 3). Wara t-tweġiba tal-awtoritajiet Taljani tat-3 ta' April 2006, il-Kummissjoni la aġixxiet u lanqas investigat il-kwistjoni wara l-kummenti Taljani, u s-servizzi tal-Kummissjoni għalqu l-fajl internament, hekk kif l-appoġġ tqies bħala li ma kien jinvolvi ebda għajnuna mill-Istat. L-Italja qatt ma nnotifikat formalment lill-Kummissjoni l-miżuri inkwistjoni.

(2)

Fil-21 ta' Jannar 2013, kumpanija li ssewwi l-bastimenti fil-Port ta' Napli esprimiet tħassib fir-rigward tal-finanzjament ipprovdut mill-awtoritajiet pubbliċi fl-Italja għal tliet proġetti ta' investiment allegatament imwettqa bejn l-2006 u l-2014 għar-rinnovazzjoni ta' tliet baċiri mbattlin mill-ilma (bacini di carenaggio) mħaddmin minn CAMED permezz ta' kuntratt ta' konċessjoni. Il-każ kien irreġistrat bħala SA.36112 (2013/CP) – Allegata għajnuna lil Cantieri del Mediterraneo. Fis-27 ta' Ġunju 2013, l-ilmentatur ipprovda lill-Kummissjoni b'informazzjoni addizzjonali.

(3)

Bejn it-28 ta' Frar 2013 u t-12 ta' Ġunju 2013, il-Kummissjoni talbet informazzjoni mill-awtoritajiet Taljani fid-dawl tal-allegazzjonijiet tal-ilmentatur.

(4)

Fil-21 ta' Ottubru 2013, is-servizzi tal-Kummissjoni kkomunikaw lill-ilmentatur is-sejbiet preliminari tagħhom dwar l-allegata għajnuna mill-Istat lil CAMED u infurmaw lill-ilmentatur li, abbażi tal-informazzjoni disponibbli f'dak iż-żmien, l-allegati miżuri ma dehrux li kienu jikkostitwixxu għajnuna fis-sens tal-Artikolu 107(1) tat-TFUE, minħabba li l-preżenza ta' vantaġġ lil CAMED dehret li kienet eskluża. Is-servizzi tal-Kummissjoni spjegaw li f'dak l-istadju ma kien hemm ebda indikazzjoni li l-għajnuna operattiva kienet ingħatat fil-livell tal-operatur, hekk kif CAMED ma dehritx li ġiet meħlusa mill-kostijiet li normalment kien ikollha ġġorr fil-ġestjoni ta' kuljum jew fl-attivitajiet normali tagħha.

(5)

Bejn id-19 ta' Novembru 2013 u l-10 ta' Frar 2015, l-ilmentatur ippreżenta aktar informazzjoni. B'mod partikolari, l-ilmentatur esprima tħassib li l-miżuri kienu jirrappreżentaw għajnuna illegali għal investiment lill-Awtorità tal-Port ta' Napli u għajnuna operatorja illegali lil CAMED. Is-servizzi tal-Kummissjoni talbu informazzjoni addizzjonali mill-awtoritajiet Taljani fis-17 ta' Ġunju 2014, fl-14 ta' Novembru 2014 u fit-12 ta' Marzu 2015, li għalihom l-awtoritajiet Taljani wieġbu fl-1 ta' Awwissu 2014, fit-3 u fid-29 ta' Settembru 2014, fil-11 ta' Frar 2015 u fl-10 ta' Ġunju 2015. Billi l-informazzjoni disponibbli wriet li l-finanzjament pubbliku diġà ngħata, fl-4 ta' Ġunju 2015, is-servizzi tal-Kummissjoni infurmaw lill-Italja li l-miżuri ser ikunu rreġistrati bħala għajnuna illegali (2015/NN) - Għajnuna għall-Investiment lill-Awtorità tal-Port ta' Napli u lil Cantieri del Mediterraneo S.p.A., u r-regoli proċedurali applikabbli ser ikunu dawk stabbiliti fil-Kapitolu III tar-Regolament tal-Kunsill (KE) Nru 659/1999 (2).

(6)

Fil-21 ta' Settembru 2015, is-servizzi tal-Kummissjoni ltaqgħu mal-awtoritajiet Taljani u l-Kummissjoni talbet informazzjoni addizzjonali fis-7 ta' Ottubru 2015, li għaliha l-awtoritajiet Taljani wieġbu fid-9 ta' Novembru 2015. Fil-11 ta' Novembru 2015, is-servizzi tal-Kummissjoni ltaqgħu mal-ilmentatur.

(7)

Permezz ta' ittra datata t-28 ta' Ġunju 2016, il-Kummissjoni għarrfet lill-awtoritajiet Taljani li kienet iddeċidiet li tibda l-proċedura stabbilita fl-Artikolu 108(2) tat-TFUE fir-rigward tal-għajnuna.

(8)

Id-deċiżjoni tal-Kummissjoni li tibda l-proċedura (“id-Deċiżjoni tal-Ftuħ”) kienet ippubblikata f'Il-Ġurnal Uffiċjali tal-Unjoni Ewropea (3) fis-7 ta' Ottubru 2016. Il-Kummissjoni stiednet lill-partijiet interessati sabiex jippreżentaw il-kummenti tagħhom dwar l-għajnuna/il-miżuri.

(9)

Il-Kummissjoni rċeviet kummenti minn żewġ partijiet interessati: CAMED u l-ilmentatur. Hija bagħtithom lill-awtoritajiet Taljani, li ngħatat l-opportunità li tirreaġixxi; il-kummenti tagħha waslu permezz ta' ittra datata t-12 ta' Jannar 2017.

(10)

Il-Kummissjoni bagħtet mistoqsijiet addizzjonali lill-Italja fid-9 u fis-16 ta' Novembru 2017, li għalihom huma wieġbu fl-24 ta' Novembru 2017.

(11)

Il-Port ta' Napli jinsab fir-reġjun ta' Campania u huwa amministrat minn PAN.

(12)

Fil-Port ta' Napli, hemm tliet baċiri mbattlin mill-ilma li huma proprjetà tal-Istat (baċiri Nri 1, 2 u 3) u żewġ baċiri f'wiċċ l-ilma li huma proprjetà ta' żewġ operaturi privati (baċiri Nri 5 u 6).

(13)

Il-baċiri mbattlin mill-ilma Nri 1, 2 u 3 jintużaw sabiex jiġu pprovduti attivitajiet ta' tiswija tal-bastimenti minn CAMED u, fil-prinċipju, minn kwalunkwe kumpanija oħra li tagħmel tiswija tal-bastimenti skont “Ir-Regolament għall-operat tal-baċiri għat-tiswija tal-bastimenti tal-Port ta' Napli” (4) adottat fl-2002 u mmodifikat aktar tard (ir-“Regolament tal-2002”) (5). Skont l-awtoritajiet Taljani, il-baċiri mbattlin mill-ilma kollha fil-Port ta' Napli għandhom ikunu disponibbli għall-utenti interessati kollha (eż. kumpaniji oħrajn li jagħmlu tiswijiet tal-bastimenti) abbażi ta' ċerti regoli oġġettivi u definiti minn qabel.

(14)

L-awtoritajiet Taljani spjegaw li, wara d-deċiżjoni tal-irtirar mill-Port ta' Napli mill-Fincantieri Group - wieħed mill-akbar operaturi tas-settur tal-bini tal-bastimenti f'dak iż-żmien - fl-aħħar tas-seklu li għadda, il-baċiri kienu jinsabu fi stat ħażin ħafna. F'dak iż-żmien, CAMED (6) kienet attiva bħala kumpanija li tagħmel tiswijiet tal-bastimenti fil-Port ta' Napli permezz ta' att ta' konċessjoni tal-art validu mill-1909 sal-2008. Skont l-awtoritajiet Taljani, CAMED qablet li tinvesti fiż-żona, diment li PAN timpenja ruħha li tagħmel għadd ta' investimenti strutturali fuq il-baċiri mbattlin mill-ilma Nri 1, 2 u 3. Wara talba ppreżentata minn CAMED fl-1999 lil PAN, din tal-aħħar qablet li twettaq xogħlijiet sabiex timmodernizza u tagħmel il-baċir imbattal mill-ilma Nru 3 adegwat għall-użu (“il-Ftehim tal-2001”) (7).

(15)

Fl-2001, CAMED talbet minn PAN l-awtorizzazzjoni sabiex twettaq għadd ta' xogħlijiet fuq il-baċiri bi skambju għal estensjoni għal 40 sena tal-konċessjoni tal-art eżistenti (concessione demaniale). Wara t-talba ta' CAMED, PAN bdiet il-proċedura amministrattiva skont il-liġi Taljana għall-għoti ta' kuntratt għall-konċessjoni tal-art (8). PAN ippubblikat fir-reġistru tal-Muniċipalità u fir-reġistru tagħha stess it-talba ta' CAMED għal konċessjoni tal-art, flimkien mal-pjan tan-negozju għal perjodu ta' 20 jum (mit-18 ta' Jannar 2002 sas-6 ta' Frar 2002). Il-pubblikazzjoni stiednet lill-partijiet interessati sabiex jippreżentaw l-osservazzjonijiet jew il-proposti alternattivi tagħhom. Skont il-proċedura, f'każ ta' oġġezzjonijiet jew ilmenti, id-deċiżjoni dwar l-għoti tal-konċessjoni tittieħed mill-Ministru kompetenti.

(16)

Minħabba li PAN ma rċeviet ebda osservazzjoni wara l-pubblikazzjoni tat-talba ta' CAMED, hija tat lil CAMED l-att dwar il-konċessjoni tal-art (atto di concessione demaniale) Nru 125 tad-29 ta' Lulju 2004 (“il-Konċessjoni tal-2004”) għall-operat u l-użu tat-tliet baċiri mbattlin mill-ilma, bl-obbligu li tagħmilhom disponibbli għall-utenti interessati kollha (pereżempju, kumpaniji oħrajn li jagħmlu tiswija tal-bastimenti) skont ir-Regolament tal-2002. CAMED qablet li tittermina l-konċessjoni tal-art preċedenti, li kienet ilha valida mill-1909. Skont il-Konċessjoni tal-2004, CAMED għandha d-dritt li topera u tuża l-baċiri mbattlin mill-ilma għal 30 sena, li jibdew mit-28 ta' Lulju 2003, minflok l-40 sena mitluba, bi skambju għal miżata fis-sena għall-użu tal-art, ikkalkolata fuq il-bażi ta' parametri legali fissi (EUR/metru kwadru) u aġġustata kull sena għall-inflazzjoni skont id-Digriet Ministerjali tal-15 ta' Novembru 1995. Il-miżata għall-użu tal-art imħallsa matul il-perjodu 2004-2017 hija ppreżentata fit-Tabella 1.

Tabella 1

Miżati ta' konċessjoni

(17)

Skont l-Artikolu 1 tal-Konċessjoni tal-2004, it-tul tal-konċessjoni jippermetti l-amortizzament tal-investimenti preċedenti u programm ġdid ta' investimenti minn CAMED b'valur ta' EUR 24 miljun (lira Taljana 47 662 miljun) (9). Skont il-Konċessjoni tal-2004, CAMED ipprovdiet ukoll garanzija (cauzione) ta' EUR 275 000 fir-rigward tal-obbligi previsti taħt il-konċessjoni.

(18)

Skont l-Artikolu 3 tal-Konċessjoni tal-2004, PAN impenjat ruħha wkoll li twettaq xogħlijiet strutturali fuq iż-żona mogħtija lil CAMED sal-2006 u b'mod aktar speċifiku li: (i) tadatta l-impjant tal-ippompjar tal-baċiri Nri 1 u 2; (ii) tibni kaxxun iċċertifikat ġdid ta' baċir imbattal mill-ilma (barche-porte) għall-baċiri Nri 1, 2 u 3; (iii) tiżviluppa mill-ġdid il-ħitan (paramenti) u l-qiegħ (platea) għall-baċir Nru 2; (iv) twettaq żvilupp strutturali mill-ġdid tal-mollijiet (banchine) u tal-ħitan għall-baċir Nru 2 u l-moll 33b.

(19)

Wara d-Deċiżjoni tal-Ftuħ, l-awtoritajiet Taljani kkjarifikaw li CAMED wettqet investimenti fl-ammont ta' EUR 24 610 420 f'konformità mal-Konċessjoni tal-2004 u investimenti addizzjonali fl-ammont ta' EUR 17 931 075 sal-2016.

(20)

Fl-ewwel sottomissjoni, l-ilmentatur sostna li CAMED irċeviet għajnuna fiż-żewġ livelli: (i) bħala operatur (jiġifieri maniġer tal-baċiri mbattlin mill-ilma), permezz ta' tnaqqis tal-kostijiet għar-rinnovazzjoni tal-infrastruttura (għajnuna operatorja), u (ii) bħala utent tal-infrastruttura (pereżempju, bħala kumpanija li tagħmel tiswija tal-bastimenti), minħabba li l-infrastruttura, li fil-prinċipju għandha tkun miftuħa għall-utenti finali kummerċjali kollha fuq bażi mhux diskriminatorja, kienet fil-fatt użata biss minn CAMED. L-ilment kien fih ukoll allegazzjonijiet ta' antitrust li mhumiex rilevanti għad-deċiżjoni preżenti u li għalihom l-ilmentatur kien id-destinatarju ta' deċiżjoni separata li ġiet adottata fl-24 ta' Lulju 2014.

(21)

Skont l-ilmentatur, il-vantaġġ li rċeviet CAMED ġej mit-twettiq tax-xogħlijiet li ġejjin (“l-Interventi”):

(22)

Bis-sottomissjoni tad-19 ta' Novembru 2013, l-ilmentatur estenda l-kamp ta' applikazzjoni tal-ilment, fejn sostna li l-Interventi taw għajnuna lil PAN, skont il-prattika tal-każistika tal-Kummissjoni (10). Skont l-ilmentatur, ser ikun hemm ukoll għajnuna fil-livell tal-konċessjonarja (CAMED) minħabba li l-konċessjoni ma ġietx fdata permezz ta' offerta pubblika, miftuħa, trasparenti u mhux diskriminatorja. L-ilmentatur issottolinja wkoll in-nuqqas ta' kwalunkwe evidenza li tikkonkludi li l-miżata għall-użu tal-art imħallsa minn CAMED tista' teskludi kwalunkwe vantaġġ. Skont l-ilmentatur, il-metodoloġija prevista mil-leġiżlazzjoni nazzjonali għall-iffissar tal-miżati għall-użu tal-art (ara l-premessa 16) ma tippermettix li jiġi rifless il-valur miżjud tal-infrastruttura wara l-interventi possibbli, minħabba li dan jikkonsisti f'ammont fiss ta' EUR/metru kwadru.

(23)

Fl-1 ta' Ottubru 2015, l-ilmentatur ipprovda wkoll lista ta' deċiżjonijiet ta' PAN (delibere Nru 308/2015, Nru 181/2015, Nru 233/2015, Nru 277/2015, Nru 279/2015, Nru 281/2015, Nru 293/2015, Nru 302/2015) għal xogħlijiet li għandhom jitwettqu fil-baċiri mbattlin mill-ilma, bħala evidenza tal-ksur tal-obbligu ta' waqfien totali.

(24)

L-awtoritajiet Taljani kkjarifikaw qabel l-adozzjoni tad-Deċiżjoni tal-Ftuħ li parti biss mix-xogħlijiet previsti għar-rinnovazzjoni tal-baċir imbattal mill-ilma Nru 3 tlestew fl-2006, wara proċedura ta' akkwist pubbliku (Intervent Nru 1), filwaqt li x-xogħlijiet previsti mill-Interventi 2 u 3 ma kinux tlestew f'dak iż-żmien. Mill-proġett kollu miftiehem ma' CAMED fil-Ftehim tal-2001 u fil-Konċessjoni tal-2004, parti waħda biss fil-fatt twettqet kompletament.

(25)

Skont l-Italja, id-dritt legali li tirċievi l-finanzjament kien diġà ngħata lil PAN fl-1998 skont l-Artikolu 9 tal-Liġi 413/1998, li jistabbilixxi li l-Ministeru tat-Trasport u t-Trasport Marittimu (il-“Ministeru”) għandu jadotta programm ta' investimenti fil-portijiet abbażi tat-talbiet tal-Awtoritajiet tal-Port (11). Jidher li l-programm ta' investimenti ġie adottat permezz ta' żewġ digrieti maħruġa mill-Ministeru u ġie mmodifikat sussegwentement. L-ewwel digriet tas-27 ta' Ottubru 1999 (12) (id-“Digriet Ministerjali tas-27 ta' Ottubru 1999”) jelenka 20 port li jibbenifikaw mill-finanzjament nazzjonali u t-tieni digriet (13) (id-“Digriet Ministerjali tat-2 ta' Mejju 2001”) jestendi dik il-lista għal 25 port. Abbażi ta' dawk id-digrieti, l-Awtoritajiet tal-Port huma awtorizzati li jissellfu jew li jitolbu operazzjonijiet finanzjarji oħrajn għal ammont totali ta' 100 biljun lira Taljana (madwar EUR 51 miljun). Il-Ministeru jħallas lura direttament lill-istituzzjonijiet finanzjarji kull sena (14). Għalhekk, skont l-Italja, il-miżuri favur PAN ingħataw fl-1998 permezz tal-Liġi 413/1998.

(26)

Wara d-Deċiżjoni tal-Ftuħ, l-awtoritajiet Taljani pprovdew kjarifiki addizzjonali dwar l-ammonti ta' investimenti mill-Istat Taljan u minn PAN.

(27)

L-awtoritajiet Taljani indikaw li x-xogħlijiet fuq l-Intervent Nru 1 bdew fil-21 ta' Ottubru 2002 u tlestew fl-24 ta' Jannar 2006. Il-kostijiet imġarrba fiż-żmien meta ġiet adottata d-deċiżjoni preżenti jammontaw għal EUR 12 859 854,50.

(28)

L-Intervent Nru 2 kien koffinanzjat mill-Ministeru fl-ammont ta' EUR 14 971 621,41. L-ammont ta' EUR 5 498 378,59, li għandu jiġi avvanzat parzjalment minn PAN u mbagħad irrimborżat permezz ta' għotjiet ta' flus mill-Ministeru, madankollu ma tħallasx mill-Ministeru.

(29)

Għall-Intervent Nru 2, PAN ipprovdiet riżorsi proprji ta' EUR 2 700 000 (Delibera 89/2016 tat-22 ta' Marzu 2016) u EUR 5 830 000 (Delibera 175/2017 tal-31 ta' Mejju 2017).

(30)

Ix-xogħlijiet fuq l-Intervent Nru 2 bdew fil-5 ta' Novembru 2012 u sa issa għadhom ma tlestewx. Il-kostijiet imġarrba fiż-żmien meta ġiet adottata din id-Deċiżjoni jammontaw għal EUR 11 192 515,79. Il-kostijiet totali għal dan l-intervent huma pproġettati li jammontaw għal EUR 29 000 000.

(31)

Fl-aħħar nett, l-Intervent Nru 3 huwa ffinanzjat parzjalment permezz ta' riżorsi proprji ta' PAN (EUR 5 091 000, ipprovduti f'Delibera 356/2014 tal-24 ta' Diċembru 2014).

(32)

Sa Diċembru 2017, ix-xogħlijiet fir-rigward tal-Intervent Nru 3 kienu għadhom ma bdewx (ix-xogħlijiet ingħataw fid-19 ta' Lulju 2017) u l-kostijiet imġarrba kienu jammontaw għal EUR 6 880,50. Il-kostijiet totali għal dan l-intervent huma pproġettati li jammontaw għal EUR 15 900 000.

(33)

Il-kost totali tal-proġett ta' investiment (jiġifieri, it-tliet interventi kollha) huwa ta' EUR 57 759 874,5, li nqasam fi tliet partijiet kif muri fit-Tabella 2.

Tabella 2

Investimenti pubbliċi ppjanati

(34)

Fid-dawl ta' dak li ntqal hawn fuq, il-finanzjament mill-Istat Taljan diġà mogħti jew impenjat għal dan il-proġett kien jammonta għal EUR 44 138 854,50. Prinċipalment, dan ħa l-forma ta' rimborż dirett magħmul lill-istituzzjonijiet finanzjarji għas-self li daħlet għalih PAN mingħand il-Ministeru, kif ukoll għotjiet diretti lil PAN mill-baġit nazzjonali Taljan. L-awtoritajiet Taljani spjegaw li l-ammont li fadal ta' EUR 13 621 000 (li minnhom EUR 2 700 000 u EUR 5 830 000 kienu għall-Intervent Nru 2 u EUR 5 091 000 għall-Intervent Nru 3) ġie pprovdut minn PAN mir-riżorsi proprji tagħhom, akkumulat fil-kuntest tal-eżerċitar tal-attività ekonomika tagħha tal-ġestjoni tal-port.

(35)

Fit-28 ta' Ġunju 2016, il-Kummissjoni adottat deċiżjoni sabiex tiftaħ investigazzjoni formali fir-rigward tal-miżuri msemmija fuq bil-għan li tindirizza d-dubji tagħha dwar jekk dawn il-miżuri jikkostitwixxux għajnuna mill-Istat skont is-sens tal-Artikolu 107(1) tat-TFUE u jekk humiex kompatibbli mas-suq intern.

(36)

Fid-Deċiżjoni tal-Ftuħ, il-Kummissjoni kkunsidrat b'mod preliminari li l-miżuri jikkostitwixxu għajnuna mill-Istat skont is-sens tal-Artikolu 107(1) tat-TFUE minħabba li PAN irċeviet riżorsi tal-Istat sabiex tammeljora l-faċilitajiet għat-tiswija tal-bastimenti li huma kummerċjalment sfruttati minnha. PAN – bħala entità li twettaq attività ekonomika f'isem il-proprjetarju, jiġifieri l-Istat Taljan – tista' tiġi kkwalifikata bħala impriża. Għalhekk, dak it-trasferiment jidher li jammonta għal trasferiment ta' riżorsi tal-Istat u huwa imputabbli lill-Istat.

(37)

Barra minn hekk, skont id-Deċiżjoni tal-Ftuħ, il-finanzjament pubbliku jidher li jagħti vantaġġ ekonomiku selettiv lil PAN. Il-Kummissjoni qajmet dubji dwar jekk PAN hijiex meħtieġa li twettaq obbligi ta' servizz pubbliku (“OSP”) li ġew definiti b'mod ċar u li jissodisfaw l-erba' kundizzjonijiet kumulattivi ta' Altmark. Is-servizz ipprovdut minn PAN (jiġifieri l-kiri ta' faċilitajiet għat-tiswija tal-bastimenti bi skambju għal rimunerazzjoni) ma juri ebda karatteristika speċjali meta mqabbel ma' dawk ta' attivitajiet ekonomiċi oħrajn. Il-Kummissjoni qajmet dubji dwar jekk (i) PAN fil-fatt hijiex meħtieġa li twettaq OSP u dawk l-obbligi ġew definiti b'mod ċar, (ii) il-parametri li abbażi tagħhom jiġi kkalkolat il-kumpens ġewx stabbiliti minn qabel b'mod oġġettiv u trasparenti, (iii) il-kumpens ma jaqbiżx dak li huwa meħtieġ sabiex ikopri l-kostijiet imġarrba fit-twettiq tal-OSP, filwaqt li jitqiesu d-dħul rilevanti u qligħ raġonevoli għat-twettiq ta' dawk l-obbligi, (iv) l-operatur intgħażilx abbażi ta' proċedura ta' akkwist pubbliku jew jekk il-kostijiet imġarrba għat-twettiq tal-OSP humiex limitati għal dawk ta' impriża tipika (immexxija sewwa u pprovduta bil-mezzi ta' trasport adegwati sabiex tkun tista' tissodisfa r-rekwiżiti tas-servizz pubbliku meħtieġa).

(38)

Il-Kummissjoni kkunsidrat b'mod preliminari li l-proġett ta' investiment ser jippermetti lil PAN tkompli l-attività ekonomika li tikri l-baċiri mbattlin mill-ilma, settur li huwa miftuħ għall-kompetizzjoni u l-kummerċ fil-livell tal-Unjoni, kif ukoll li l-miżura tista' tfixkel il-kompetizzjoni u taffettwa l-kummerċ intra-UE.

(39)

Fid-Deċiżjoni tal-Ftuħ, il-Kummissjoni sabet li l-kwalifika tal-miżuri bħala għajnuna mill-Istat ma tirriżultax fi ksur tal-Artikolu 345 tat-TFUE, li jistabbilixxi l-prinċipju tan-newtralità bejn l-entitajiet pubbliċi u privati. Il-Kummissjoni nnotat b'mod preliminari li l-kunsiderazzjoni tal-miżuri bħala għajnuna mill-Istat ma tidhirx li tiddiskrimina kontra l-proprjetarji pubbliċi, hekk kif il-proprjetarji privati fl-istess negozju jkollhom huma wkoll iħejju pjan ta' negozju ex-ante u jwettqu l-investiment biss jekk ikun profittabbli fuq dik il-bażi. Jekk dan ma jkunx il-każ, kemm il-proprjetarji pubbliċi kif ukoll dawk privati jistgħu potenzjalment jirċievu għajnuna kompatibbli jekk jiġu rrispettati l-kundizzjonijiet kollha previsti fir-regoli applikabbli dwar l-għajnuna mill-Istat fis-settur tal-bini tal-bastimenti.

(40)

Barra minn hekk, fid-Deċiżjoni tal-Ftuħ, il-Kummissjoni kkunsidrat b'mod preliminari li l-miżuri inkwistjoni ma jistgħux jiġu kklassifikati bħala għajnuna eżistenti skont is-sens tal-Artikolu 1(b) tar-Regolament (UE) 2015/1589 (“ir-Regolament Proċedurali”) minħabba li l-appoġġ pubbliku għall-faċilitajiet għall-bini u t-tiswija tal-bastimenti tqies bħala li jikkostitwixxi għajnuna mill-Istat anki qabel is-sentenza ta' Leipzig Halle.

(41)

Fir-rigward tal-għajnuna possibbli lil CAMED, il-Kummissjoni nnotat fid-Deċiżjoni tal-Ftuħ li l-appoġġ pubbliku lil PAN ħelisha parzjalment mill-kostijiet tal-investiment li kwalunkwe proprjetarju privat ieħor ta' faċilitajiet għat-tiswija tal-bastimenti kien ikollu jħallas b'mod sħiħ, sabiex b'hekk tkun tista' titlob miżati aktar baxxi lil CAMED.

(42)

Il-miżuri inkwistjoni huma imputabbli lill-Istat (jiġifieri mogħtija minn PAN, li tifforma parti mill-amministrazzjoni tal-Istat anki jekk l-entità inkwistjoni tgawdi awtonomija legali minn awtoritajiet pubbliċi oħrajn). Barra minn hekk, il-Kummissjoni sabet fid-Deċiżjoni tal-Ftuħ li billi pprovdiet il-baċiri mbattlin mill-ilma lil CAMED potenzjalment taħt ir-rati tas-suq, PAN setgħet tirrinunzja għar-riżorsi tal-Istat.

(43)

Fin-nuqqas ta' sejħa għall-offerti u minħabba li l-miżata għall-użu tal-art li tħallas CAMED lil PAN ġiet ikkalkolata abbażi ta' parametri legali fissi, il-Kummissjoni kkunsidrat b'mod preliminari li l-arranġamenti kuntrattwali bejn PAN u CAMED jistgħu jagħtu vantaġġ ekonomiku possibbli 'il fuq mill-kundizzjonijiet tas-suq lil CAMED billi ġew ipprovduti baċiri mbattlin mill-ilma rinnovati potenzjalment taħt ir-rati tas-suq. Barra minn hekk, anki jekk jista' jiġi aċċettat li CAMED għamlet xi investimenti bi skambju għat-tlestija tal-interventi, ma kien hemm l-ebda indikazzjoni li l-valur tal-investimenti mwettqa minn CAMED għal PAN, flimkien mal-miżata għall-użu tal-art, jikkorrespondu għall-valur tal-interventi mwettqa minn PAN għal CAMED. B'hekk, il-Kummissjoni stiednet lill-awtoritajiet Taljani u lil partijiet terzi jikkummentaw fuq dawn il-konklużjonijiet preliminari.

(44)

Fid-Deċiżjoni tal-Ftuħ, il-Kummissjoni qajmet dubji dwar jekk l-erba' kundizzjonijiet ta' Altmark humiex issodisfati b'mod kumulattiv fir-rigward tal-miżuri b'appoġġ għal CAMED.

(45)

Il-Kummissjoni nnotat ukoll li l-miżuri setgħu jfixklu l-kompetizzjoni u jaffettwaw il-kummerċ intra-UE.

(46)

Fir-rigward tal-kompatibbiltà, il-Kummissjoni kkunsidrat b'mod preliminari li l-baċiri mbattlin mill-ilma mhumiex infrastrutturi tat-trasport, iżda faċilitajiet tal-produzzjoni għat-tarzni minħabba li jintużaw għall-bini tal-bastimenti jew għat-tiswija tal-bastimenti u mhux għal finijiet ta' trasport. Konsegwentement, l-għajnuna ma tistax tiġi vvalutata direttament skont l-Artikolu 107(3)(c) tat-TFUE bħala għajnuna għall-investiment għall-infrastruttura tat-trasport.

(47)

Il-Kummissjoni esprimiet dubji dwar il-kompatibbiltà tal-għajnuna lil PAN skont il-Qafas tas-SIEĠ 2011 u skont ir-regoli dwar l-għajnuna mill-Istat għas-settur tal-bini tal-bastimenti applikabbli fiż-żmien tal-għoti ta' kull miżura. Fid-Deċiżjoni tal-Ftuħ, il-Kummissjoni kkunsidrat b'mod preliminari li l-għoti fil-prinċipju seħħ meta kull wieħed mill-investimenti kien inkluż fil-programm ta' investimenti abbażi tat-talba tal-Awtoritajiet tal-Port. Il-Kummissjoni kienet tal-fehma li l-informazzjoni f'dan ir-rigward kienet insuffiċjenti u stiednet lill-Italja sabiex tipprovdi d-dati tal-għoti rilevanti għal kull miżura/Intervent.

(48)

Madankollu, il-Kummissjoni qajmet dubji dwar il-konformità sħiħa tal-miżuri inkwistjoni minħabba li l-intensità tal-għajnuna dehret li teċċedi l-intensità tal-għajnuna massima permissibbli għall-għajnuna ta' investiment reġjonali għall-faċilitajiet għall-bini tal-bastimenti (li għalihom issir referenza fl-oqfsa suċċessivi), irrispettivament mid-data preċiża tal-għoti ta' kull miżura u taħt il-bażijiet ta' kompatibbiltà li ġejjin li jistgħu jkunu applikabbli għall-għajnuna għall-bini tal-bastimenti:

(49)

Billi l-Italja ma pprovdietx l-informazzjoni meħtieġa sabiex tistabbilixxi d-data ċara tal-għoti, il-Kummissjoni ma kinitx f'pożizzjoni li twettaq valutazzjoni kompleta tal-kompatibbiltà, minħabba li ma setgħetx tidentifika l-bażi ġuridika korretta. Fid-Deċiżjoni tal-Ftuħ, il-Kummissjoni nnotat li ma setax jiġi eskluż li mill-inqas parti mill-miżuri setgħu jiġu ddikjarati kompatibbli skont ir-regoli rilevanti dwar l-għajnuna mill-Istat u stiednet lill-awtoritajiet Taljani sabiex jipprovdu analiżi tal-kompatibbiltà għal kull miżura.

(50)

Il-Kummissjoni qajmet dubji dwar il-kompatibbiltà tal-miżuri taħt il-Qafas tas-SIEĠ 2011 fir-rigward tal-allegata għajnuna lil CAMED.

(51)

Madankollu, billi l-Kummissjoni ma setgħetx teskludi kompletament li mill-inqas parti mill-miżuri lil PAN setgħu jiġu ddikjarati kompatibbli skont ir-regoli rilevanti dwar l-għajnuna mill-Istat li kienu applikabbli fis-settur tal-bini tal-bastimenti fiż-żmien tal-għoti tal-miżuri, ma kienx eskluż li tali valutazzjoni jista' jinfluwenza wkoll il-valutazzjoni tal-kompatibbiltà rigward l-għajnuna lil CAMED. Il-Kummissjoni stiednet lill-awtoritajiet Taljani sabiex jipprovdu analiżi tal-kompatibbiltà għal kull miżura (rigward CAMED) abbażi tal-liġi applikabbli, skont id-dati tal-għoti ta' kull miżura.

(52)

Fil-fehma tal-awtoritajiet Taljani, id-Deċiżjoni tal-Ftuħ tikser is-sorsi primarji tad-dritt tal-Unjoni u l-prinċipji ġenerali ta' amministrazzjoni tajba, ċertezza legali, aspettattiva leġittima u protezzjoni ġudizzjarja effettiva. L-Italja ssostni li kwalunkwe deċiżjoni tal-Kummissjoni effettivament tirrevoka deċiżjoni minn qabel li tagħlaq il-każ, li l-Kummissjoni kienet ħadet fl-2006 (20).

(53)

L-Italja ssostni wkoll li t-tlestija tal-proċedimenti f'perjodu ta' żmien raġonevoli hija prinċipju ġenerali tad-dritt tal-Unjoni (21), li tipprevjeni lill-Kummissjoni milli testendi fid-diskrezzjoni tagħha t-tul tal-fażi preliminari tal-investigazzjoni mibdija wara li tirċievi ilment relatat ma' allegata għajnuna li ma tkunx ġiet innotifikata, sakemm tali miżura ma tkunx illegali (22). Skont l-awtoritajiet Taljani, dan mhuwiex il-każ fil-proċedimenti attwali.

(54)

L-awtoritajiet Taljani jirreferu għall-Artikolu 16(1) tar-Regolament Proċedurali, li abbażi tiegħu l-Kummissjoni ma għandhiex titlob l-irkupru tal-għajnuna jekk dan imur kontra prinċipju ġenerali tad-dritt tal-Unjoni.

(55)

Fir-rigward tal-eżistenza ta' għajnuna lil PAN, l-Italja spjegat li l-awtoritajiet tal-port mhumiex impriżi, iżda entitajiet pubbliċi mhux ekonomiċi (enti pubblici non economici), irregolati bil-liġi pubblika (pereżempju, il-Liġi Nru 84/1994, il-liġi qafas Taljana dwar il-portijiet) (23). L-awtoritajiet tal-port nazzjonali għandhom indipendenza amministrattiva, organizzattiva, regolatorja, baġitarja u finanzjarja. L-Istat Taljan ta lill-awtoritajiet tal-port il-mandat istituzzjonali li jwettqu, f'ismu u biss fl-interess pubbliku, il-funzjonijiet ta' amministrazzjoni, regolamentazzjoni u kontroll tal-portijiet Taljani. Għalhekk, l-awtoritajiet tal-port ma jisfruttawx kummerċjalment l-assi tal-proprjetà tal-Istat, iżda sempliċiment jamministrawhom, b'tali mod li jissodisfaw il-mandat istituzzjonali mogħti lilhom.

(56)

L-awtoritajiet Taljani jsostnu li l-awtoritajiet tal-port ma joffru oġġetti jew servizzi fl-ebda suq u, għalhekk, ma jwettqu ebda attività ekonomika. Skont l-Artikolu 6 tal-Liġi Nru 84/1994, l-awtoritajiet tal-portijiet ma jistgħux iwettqu l-attivitajiet fil-portijiet direttament jew indirettament (24). Barra minn hekk, l-amministrazzjoni tal-portijiet Taljani hija riżervata bil-liġi għall-awtorità tal-port b'responsabbiltà fiż-żona. Għalhekk, skont l-Italja, waqt li jwettqu l-mandat istituzzjonali tal-amministrazzjoni tal-portijiet Taljani, l-awtoritajiet tal-port ma jaġixxux f'suq miftuħ għall-kompetizzjoni billi (i) ebda parti oħra ma tista' twettaq dik l-attività u (ii) huma pprojbiti milli jwettqu attivitajiet ekonomiċi f'setturi miftuħa għall-kompetizzjoni.

(57)

Skont l-awtoritajiet Taljani, il-miżata għall-użu tal-art (canone demaniale) mhijiex kumpens għall-forniment ta' servizz ekonomiku, iżda pjuttost korrispettiv għall-okkupazzjoni privata ta' proprjetà pubblika. Il-ġbir tal-miżata, f'isem l-Istat, jaqa' taħt il-mandat istituzzjonali mogħti lill-awtoritajiet tal-port.

(58)

Skont l-awtoritajiet Taljani, huma biss il-miżati kummerċjali, li jistgħu jiġu deċiżi b'mod indipendenti mill-awtoritajiet tal-port u kkalkolati skont il-valuri fis-suq, illi jistgħu jikkwalifikaw l-attività bħala waħda ekonomika (25). Madankollu, fil-każ preżenti, il-miżata tiġi ddeterminata mid-Digriet Ministerjali Nru 595/1995 abbażi ta' parametri fissi li jirrigwardjaw iż-żona tal-proprjetà li fuqha ngħatat konċessjoni. Il-miżati jiġu applikati mill-awtoritajiet tal-portijiet Taljani kollha għall-konċessjonijiet kollha, irrispettivament mill-użu li l-konċessjonarja tkun bi ħsiebha tagħmel miż-żona inkwistjoni, jew minn kwalunkwe profitt jew telf li jista' jinkiseb. Għalhekk, il-miżata hija parti mill-piż tat-taxxa ġenerali impost fuq entitajiet li joperaw fuq art li hija proprjetà tal-Istat, mhux biss fis-settur tal-bini tal-bastimenti. Barra minn hekk, l-awtoritajiet Taljani jinnotaw li l-miżata ma tistax tiġi stabbilita abbażi tal-valuri tas-suq billi ma hemm ebda suq relatat mas-sjieda u/jew il-ġestjoni tal-assi pubbliċi.

(59)

L-Italja tkompli tispjega li l-miżuri ma kinux selettivi minħabba li x-xogħlijiet fuq il-baċiri mbattlin mill-ilma tal-Port ta' Napli huma wieħed mill-bosta investimenti li l-Istat Taljan għamel f'assi li huma proprjetà tiegħu, li mhumiex relatati biss mal-portijiet. L-Istat Taljan jiffinanzja l-manutenzjoni speċifika ta' varjetà kbira ta' assi li jappartjenu lill-pubbliku, fosthom (skont il-Kodiċi tan-Navigazzjoni u l-Kodiċi Ċivili) il-portijiet Taljani, inklużi baċiri tal-ġebel.

(60)

Barra minn hekk, il-fondi pubbliċi għal xogħlijiet ta' espansjoni, modernizzazzjoni u ammeljorament tal-portijiet allokati abbażi tal-Liġi 413/1998 (u ffinanzjati mill-ġdid skont il-Liġi Nru 388/2000 u l-Liġi Nru 166/2002) kienu disponibbli għall-awtoritajiet tal-portijiet Taljani kollha (26). Il-manutenzjoni speċifika fuq il-baċiri mbattlin mill-ilma Nru 1, 2 u 3 mhijiex deċiżjoni ta' investiment ad hoc, iżda tikkostitwixxi trasferiment intern ta' fondi lill-awtoritajiet pubbliċi f'konformità mas-sistema legali nazzjonali, li tistipula li l-Istat għandu s-sjieda tal-portijiet u huwa responsabbli għall-amministrazzjoni tagħhom. L-awtoritajiet Taljani jsostnu li l-Kummissjoni ma tistax tikkontesta skont l-Artikolu 107 tat-TFUE miżuri li mhumiex selettivi iżda li huma ta' kamp ta' applikazzjoni ġenerali u li jirrappreżentaw espressjoni ta' għażliet ta' politika ekonomika u industrijali ta' Stati Membri individwali.

(61)

Fir-rigward ta' vantaġġ ekonomiku possibbli lil PAN, l-awtoritajiet Taljani jqisu li – skont il-Liġi Nru 84/1994 u l-Liġi Nru 112/1998 (27) – ix-xogħlijiet ta' rinnovazzjoni speċifiċi jitħallsu mill-proprjetarju, jiġifieri l-Istat Taljan u mhux mill-maniġer tal-infrastruttura. Għalhekk, il-finanzjament pubbliku tal-kostijiet speċifiċi tal-manutenzjoni la jnaqqas kwalunkwe piż fuq l-awtorità tal-port u lanqas ma jagħtiha xi vantaġġ.

(62)