(1)

Fil-kuntest tan-notifika tar-Renju Unit fid-29 ta’ Marzu 2017 tal-intenzjoni tiegħu li joħroġ mill-Unjoni skont l-Artikolu 50 tat-Trattat dwar l-Unjoni Ewropea (TUE), is-27 Stat Membru ieħor, imlaqqgħin fl-20 ta’ Novembru 2017 fil-marġini tal-Kunsill, għażlu lil Pariġi, Franza, bħala s-sede l-ġdida tal-Awtorità Superviżorja Ewropea (l-Awtorità Bankarja Ewropea) (l-“Awtorità”).

(2)

B’kont meħud tar-“Rapport konġunt tan-negozjaturi tal-Unjoni Ewropea u tal-Gvern tar-Renju Unit dwar il-progress fl-ewwel fażi tan-negozjati skont l-Artikolu 50 tat-TUE dwar il-ħruġ ordinat tar-Renju Unit mill-Unjoni Ewropea” tat-8 ta’ Diċembru 2017 u b’mod partikolari tal-kapitolu dwar is-saldu finanzjarju, u tal-impenn tar-Renju Unit li jikkontribwixxi għall-baġit ġenerali tal-Unjoni għas-snin finanzjarji 2019 u 2020 daqslikieku jkun għadu fl-Unjoni u li jħallas is-sehem tiegħu tal-finanzjament tal-impenji pendenti fil-31 ta’ Diċembru 2020, l-ispejjeż tar-rilokazzjoni tas-sede tal-Awtorità kkawżati mid-deċiżjoni tar-Renju Unit li joħroġ mill-Unjoni għandhom jitħallsu mill-kontribwenti kollha tal-Unjoni permezz tal-baġit ġenerali tal-Unjoni. Ir-Renju Unit offra li jiddiskuti ma’ dawk l-aġenziji tal-Unjoni li għandhom is-sede tagħhom f’Londra dwar kif jistgħu jnaqqsu l-ispejjeż tal-ħruġ tagħhom.

(3)

B’kont meħud tal-Artikolu 50(3) tat-TUE, jenħtieġ li l-Awtorità tibda tokkupa s-sede l-ġdida tagħha mit-30 ta’ Marzu 2019.

(4)

Sabiex jiġi żgurat il-funzjonament tajjeb tal-Awtorità fil-post il-ġdid tagħha, jenħtieġ li jiġi konkluż ftehim dwar il-kwartieri ġenerali bejn l-Awtorità u Franza u li jiġi approvat proġett ta’ bini skont l-Artikolu 88 tar-Regolament ta’ Delega tal-Kummissjoni (UE) Nru 1271/2013 (3) qabel ma l-Awtorità tibda tokkupa s-sede l-ġdida tagħha. Jenħtieġ li s-sede l-ġdida tkun lesta u adatta għall-fini ta’ rilokazzjoni permanenti sat-30 ta’ Marzu 2019. Jenħtieġ li l-ftehim dwar il-kwartieri ġenerali jirrifletti r-responsabbiltà tal-awtoritajiet Franċiżi li jipprovdu l-aktar kundizzjonijiet xierqa biex jiġi żgurat li l-Awtorità tiffunzjona sewwa fil-kuntest tar-rilokazzjoni tagħha.

(5)

It-trasferiment tas-sede tal-Awtorità la jaffettwa l-pjan tal-istabbiliment kif adottat mill-Parlament Ewropew u mill-Kunsill, u lanqas l-applikazzjoni tar-Regolamenti tal-Persunal għall-uffiċjali jew għall-aġenti l-oħra li jaħdmu fl-Awtorità.

(6)

Jenħtieġ li r-rilokazzjoni tal-Awtorità ma jkollha l-ebda konsegwenza rigward l-eżekuzzjoni tal-mandati distinti tal-Awtoritajiet Superviżorji Ewropej jew iż-żamma tal-istatus legali separat tagħhom. Ir-rilokazzjoni tista’ tippermetti, fejn ikun applikabbli, il-kondiviżjoni bejn aġenziji tal-Unjoni ta’ servizzi ta’ appoġġ amministrattiv u servizzi ta’ ġestjoni tal-faċilitajiet li ma jkunux relatati mal-attivitajiet ewlenin.

(7)

Jenħtieġ li r-relazzjonijiet bejn l-istituzzjonijiet tal-Unjoni jitmexxew b’kooperazzjoni reċiproka leali, u li kull istituzzjoni taġixxi fil-limiti tas-setgħat mogħtija lilha fit-TUE u fit-Trattat dwar il-Funzjonament tal-Unjoni Ewropea u f’konformità mal-proċeduri, il-kundizzjonijiet u l-objettivi stabbiliti fihom.

(8)

Sabiex l-Awtorità tingħata biżżejjed żmien għar-rilokazzjoni, jenħtieġ li dan ir-Regolament jidħol fis-seħħ b’urġenza wara l-adozzjoni tiegħu skont il-proċedura leġislattiva ordinarja.

(9)

Għaldaqstant jenħtieġ li ir-Regolament (UE) Nru 1093/2010 tal-Parlament Ewropew u tal-Kunsill (4) jiġi emendat skont dan,

(1)

Fil-kuntest n-notifika tar-Renju Unit fid-29 ta’ Marzu 2017 tal-intenzjoni tiegħu li joħroġ mill-Unjoni skont l-Artikolu 50 tat-Trattat dwar l-Unjoni Ewropea (“TUE”), is-27 Stati Membri l-oħra, imlaqqa’ fl-20 ta’ Novembru 2017 fil-marġini tal-Kunsill, għażlu lil Amsterdam, in-Netherlands, bħala s-sede l-ġdida tal-Aġenzija Ewropea għall-Mediċini (“l-Aġenzija”).

(2)

B’kont meħud tal-Artikolu 50(3) TUE, jenħtieġ li l-Aġenzija tibda tokkupa s-sede il-ġdida tagħha mit-30 ta’ Marzu 2019.

(3)

Sabiex jiġi żgurat il-funzjonament tajjeb tal-Aġenzija fil-post il-ġdid tagħha, jenħtieġ li jiġi konkluż ftehim dwar il-kwartieri ġenerali bejn l-Aġenzija u n-Netherlands qabel ma l-Aġenzija tibda tokkupa s-sede l-ġdida tagħha.

(4)

Huwa ta’ min ifaħħar lill-awtoritajiet tan-Netherlands li qed jagħmlu sforzi biex jiżguraw l-effikaċja operattiva, il-kontinwità u l-funzjonament bla interruzzjoni tal-Aġenzija matul u wara r-rilokazzjoni. Madankollu, minħabba s-sitwazzjoni straordinarja, l-Aġenzija jista’ jkollha tiffoka temporanjament fuq il-kompiti ewlenin tagħha u tistabbilixxi ordni ta’ prijorità għall-attivitajiet l-oħra skont l-impatt tagħhom fuq is-saħħa pubblika u l-kapaċità tal-Aġenzija li tiffunzjona.

(5)

Jenħtieġ li l-Kummissjoni tissorvelja l-proċess ġenerali ta’ rilokazzjoni tal-Aġenzija għas-sede l-ġdida tagħha u tassisti dak il-proċess fil-limiti tal-kompetenzi tagħha.

(6)

Sabiex l-Aġenzija tingħata biżżejjed żmien għar-rilokazzjoni, jenħtieġ li dan ir-Regolament jidħol fis-seħħ bħala kwistjoni ta’ urġenza.

(7)

Għalhekk jenħtieġ li r-Regolament (KE) Nru 726/2004 tal-Parlament Ewropew u tal-Kunsill (3) jiġi emendat skont dan,

(1)

Ir-Regolament (UE) Nru 1303/2013 tal-Parlament Ewropew u tal-Kunsill (2) jistabbilixxi d-dispożizzjonijiet komuni u ġenerali applikabbli għall-Fondi Strutturali u ta’ Investiment Ewropej.

(2)

Ir-Regolament (UE) 2017/2305 tal-Parlament Ewropew u tal-Kunsill (3) emenda r-Regolament (UE) Nru 1303/2013, inter alia, fir-rigward tar-riżorsi allokati għall-koeżjoni ekonomika, soċjali u territorjali.

(3)

Il-baġit ġenerali tal-Unjoni Ewropea għas-sena finanzjarja 2018 (4) emenda l-programmazzjoni finanzjarja għall-Inizjattiva favur l-Impjieg taż-Żgħażagħ (“YEI”) billi żied l-approprjazzjonijiet ta’ impenn għall-allokazzjoni speċifika għall-YEI b’ammont ta’ EUR 116,7 miljuni fi prezzijiet attwali u l-ammont globali ta’ approprjazzjonijiet ta’ impenn għall-YEI fl-2018 għal EUR 350 miljun fi prezzijiet attwali.

(4)

Jenħtieġ li jiġi aġġustat ’l isfel l-ammont ta’ approprjazzjonijiet ta’ impenn għall-2020 biex jirrifletti l-forniment minn qabel għall-2018. Għalhekk, ir-Regolament (UE) Nru 1303/2013 jenħtieġ li jiġi emendat skont dan.

(5)

Meta l-Artikolu 92(1) tar-Regolament (UE) Nru 1303/2013 ġie emendat bir-Regolament (UE) 2017/2305, ċerta data finanzjarja mniżżla fil-punt (a) tal-Artikolu 1(2) tar-Regolament (UE) 2017/2305 kienet żbaljata. Dik id-data finanzjarja jenħtieġ li tinbidel bid-data korretta. Ir-Regolament (KE) Nru 1303/2013 jenħtieġ għalhekk li jiġi emendat skont dan.

(6)

Minħabba l-urġenza li l-programmi li jappoġġaw il-YEI jiġu emendati, huwa xieraq li tiġi pprovduta eċċezzjoni għall-perjodu ta’ tmien ġimgħat imsemmi fl-Artikolu 4 tal-Protokoll Nru 1 dwar ir-rwol tal-Parlamenti nazzjonali fl-Unjoni Ewropea, li huwa anness mat-Trattat dwar l-Unjoni Ewropea, mat-Trattat dwar il-Funzjonament tal-Unjoni Ewropea u mat-Trattat li jistabbilixxi l-Komunità Ewropea tal-Enerġija Atomika.

(7)

Minħabba l-urġenza li l-programmi li jappoġġaw il-YEI jiġu emendati, dan ir-Regolament jenħtieġ li jidħol fis-seħħ fil-jum wara l-pubblikazzjoni tiegħu f’Il-Ġurnal Uffiċjali tal-Unjoni Ewropea,

(1)

Il-Fond Ewropew ta’ Aġġustament (FEG) għall-Globalizzazzjoni għandu l-iskop li jagħti appoġġ lill-ħaddiema li jkunu ngħataw is-sensja u lill-persuni li kienu jaħdmu għal rashom u kellhom iwaqqfu l-attività tagħhom minħabba bidliet strutturali kbar fl-andament kummerċjali dinji bħala riżultat tal-globalizzazzjoni, bħala riżultat tal-kontinwazzjoni tal-kriżi finanzjarja u ekonomika globali, jew bħala riżultat ta’ kriżi finanzjarja u ekonomika globali ġdida, u li jassistihom fir-reintegrazzjoni tagħhom fis-suq tax-xogħol.

(2)

Il-FEG ma jridx jaqbeż l-ammont massimu annwali massimu ta’ EUR 150 miljun (prezzijiet tal-2011), kif previst fl-Artikolu 12 tar-Regolament tal-Kunsill (UE, Euratom) Nru 1311/2013 (3).

(3)

Fl-24 ta’ April 2018, il-Portugall ippreżenta applikazzjoni biex timmobilizza l-FEG, b’rabta ma’ sensji fil-manifattura tas-settur tal-ilbies fir-reġjuni ta’ Norte, Centro u Lisbona fil-Portugall. Din l-applikazzjoni ġiet issupplimentata b’informazzjoni addizzjonali mogħtija skont l-Artikolu 8(3) tar-Regolament (UE) Nru 1309/2013. Din l-applikazzjoni tikkonforma mar-rekwiżiti għad-determinazzjoni ta’ kontribuzzjoni finanzjarja mill-FEG, kif stabbilit fl-Artikolu 13 tar-Regolament (UE) Nru 1309/2013.

(4)

F’konformità mal-Artikolu 6(2) tar-Regolament (UE) Nru 1309/2013, il-Portugall iddeċieda li jipprovdi servizzi personalizzati kofinanzjati mill-FEG lil 730 żagħżugħ li jinsabu barra mill-impjieg, edukazzjoni jew taħriġ (NEETs) ukoll.

(5)

Għaldaqstant, il-FEG jenħtieġ li jiġi mmobilizzat sabiex tingħata kontribuzzjoni finanzjarja li tammonta għal EUR 4 655 883 għall-applikazzjoni ppreżentata mill-Portugall.

(6)

Sabiex iż-żmien li jittieħed għall-mobilizzazzjoni tal-FEG jitnaqqas kemm jista’ jkun, din id-deċiżjoni jenħtieġ li tapplika mid-data tal-adozzjoni tagħha,