31.5.2018

MT

Il-Ġurnal Uffiċjali tal-Unjoni Ewropea

L 135/1

---

It-testi oriġinali tan-NU/KEE biss għandhom effett ġuridiku skont id-dritt internazzjonali pubbliku. L-istatus u d-data ta' dħul fis-seħħ ta' dan ir-Regolament għandhom jiġu vverifikati fl-aħħar verżjoni tad-dokument tal-istatus tan-NU/KEE TRANS/WP.29/343, disponibbli fuq:

http://www.unece.org/trans/main/wp29/wp29wgs/wp29gen/wp29fdocstts.html

Ir-Regolament Nru 0 tal-Kummissjoni Ekonomika għall-Ewropa tan-Nazzjonijiet Uniti (NU/KEE) — Dispożizzjonijiet uniformi dwar l-Approvazzjoni tat-Tip Internazzjonali ta' Vettura Sħiħa (IWVTA) [2018/780]

Data tad-dħul fis-seħħ: 19 ta' Lulju 2018

WERREJ

REGOLAMENT

1.

Kamp ta' applikazzjoni

2.

Definizzjonijiet

3.

Applikazzjoni għall-approvazzjoni

4.

Approvazzjoni

5.

Speċifikazzjonijiet

6.

Proċedura tat-test

7.

Modifika tat-tip tal-IWVTA u modifika tal-approvazzjoni

8.

Konformità tal-produzzjoni

9.

Penali għal nuqqas ta' konformità tal-produzzjoni

10.

Produzzjoni mwaqqfa għalkollox

11.

Ismijiet u indirizzi tas-Servizzi Tekniċi responsabbli mit-twettiq tat-testijiet tal-approvazzjoni u tal-Awtoritajiet tal-Approvazzjoni tat-Tip

12.

Dispożizzjonijiet introduttorji u tranżizzjonali

13.

Dispożizzjonijiet speċjali għal Partijiet Kontraenti li japplikaw dan ir-Regolament

ANNESSI

1.

Formola ta' komunikazzjoni

2.

Arranġament tal-marka tal-approvazzjoni tat-tip

3.

Proċeduri li għandhom jiġu segwiti għall-IWVTA

4.

Lista ta' rekwiżiti għall-finijiet tal-IWVTA

5.

Dokument ta' informazzjoni għall-finijiet tal-IWVTA

6.

Speċifikazzjonijiet dwar id-Dikjarazzjoni ta' Konformità (DoC) tal-IWVTA

7.

Definizzjoni tal-klassi tal-IWVTA u tat-tip tal-IWVTA

8.

Numru tal-approvazzjoni tat-tip għall-IWVTA

9.

Notifika jekk jidħlu fis-seħħ rekwiżiti ġodda għal-U-IWVTA eżistenti

1.   KAMP TA' APPLIKAZZJONI

1.1.   Dan ir-Regolament japplika għall-vetturi tal-kategorija M1 (1). Ir-Regolament jispeċifika r-rekwiżiti għall-approvazzjoni tat-tip ta' vettura sħiħa.

2.   DEFINIZZJONIJIET

Għall-finijiet ta' dan ir-Regolament u tar-Regolamenti tan-NU elenkati fl-Anness 4, sakemm ma jiġix speċifikat mod ieħor fihom:

2.1.

“Manifattur” tfisser il-persuna jew il-korp responsabbli lejn l-awtorità tal-approvazzjoni għall-aspetti kollha tal-proċess tal-approvazzjoni tat-tip u biex tiġi żgurata tal-konformità tal-produzzjoni. Mhuwiex essenzjali li l-persuna jew il-korp ikunu involuti b'mod dirett fl-istadji kollha tal-kostruzzjoni tal-vettura li tkun hija s-suġġett tal-proċess tal-approvazzjoni. 2.1.1. “Rappreżentant tal-manifattur” tfisser kwalunkwe persuna fiżika jew ġuridika stabbilita fit-territorju ta' waħda mill-Partijiet Kontraenti li japplikaw dan ir-Regolament li tkun maħtura kif xieraq mill-manifattur biex tirrappreżentah quddiem l-awtorità tal-approvazzjoni u biex taġixxi f'ismu fi kwistjonijiet koperti minn dan ir-Regolament. F'dan ir-Regolament, meta ssir referenza għall-manifattur, din tfisser jew il-“Manifattur” jew ir-“Rappreżentant tal-manifattur”.

2.2.

“Klassi tal-IWVTA” tfisser grupp ta' vetturi li ma jvarjawx f'aspetti essenzjali bħal dawk speċifikati fil-paragrafu 1.1 tal-Anness 7. 2.2.1. “Tip tal-IWVTA” tfisser grupp ta' vetturi li jistgħu jiġu approvati taħt IWVTA waħda kif definit fil-paragrafu 1.2 tal-Anness 7. Il-vetturi f'tip tal-IWVTA jappartjenu għall-istess klassi tal-IWVTA u jkollhom l-istess livell ta' konformità mar-rekwiżiti stabbiliti fl-Anness 4. Tip tal-IWVTA jista' jkun fih varjanti u verżjonijiet kif definiti fil-paragrafi 1.3 u 1.4 tal-Anness 7.

2.3.

“Approvazzjoni tat-Tip Internazzjonali ta' Vettura Sħiħa (IWVTA)” tfisser approvazzjoni tat-tip tal-IWVTA għal dan ir-Regolament, fejn Parti Kontraenti li tapplika dan ir-Regolament tiċċertifika li t-tip tal-IWVTA jissodisfa d-dispożizzjonijiet rilevanti ta' dan ir-Regolament. 2.3.1. “IWVTA Universali (U-IWVTA)” tfisser IWVTA fejn ir-Regolamenti tan-NU applikabbli elenkati fl-Anness 4, Parti A, Taqsima I, kollha jkunu mħarsa skont il-verżjoni ta' dawn ir-Regolamenti tan-NU kif elenkati f'dik it-taqsima jew fi kwalunkwe verżjoni suċċessiva. 2.3.2. “IWVTA b'rikonoxximent limitat (L-IWVTA)” tfisser IWVTA fejn: (a) Mhux ir-Regolamenti tan-NU elenkati fl-Anness 4, Parti A, Taqsima I kollha jkunu mħarsa; u/jew (b) Ir-Regolamenti tan-NU elenkati fl-Anness 4, Parti A, Taqsima I kollha jew xi wħud minnhom ikunu mħarsa skont verżjoni preċedenti għal dik elenkata f'dik it-taqsima.

2.4.	“Dokument ta' informazzjoni” tfisser id-dokument stipulat fl-Anness 5 li jippreskrivi l-informazzjoni li għandha tingħata mill-applikant. Dan jista' jkun fil-forma ta' fajl elettroniku.

2.5.	“Folder ta' informazzjoni” tfisser folder li jinkludi d-dokument ta' informazzjoni, id-dejta, id-disinji, ir-ritratti u materjal rilevanti ieħor, ipprovduti mill-applikant. Dan jista' jkun fil-forma ta' fajl elettroniku.

2.6.

“Pakkett ta' informazzjoni” tfisser il-folder ta' informazzjoni flimkien mar-rapporti tat-testijiet u d-dokumenti l-oħra kollha miżjuda mad-dokument ta' informazzjoni mis-Servizz Tekniku jew mill-awtorità tal-approvazzjoni waqt it-twettiq tal-funzjonijiet tagħhom, li jkun jinkludi l-indiċi għall-pakkett ta' informazzjoni. Dan jista' jkun fil-forma ta' fajl elettroniku.

2.7.

“Indiċi għall-pakkett ta' informazzjoni” tfisser id-dokument li jelenka l-kontenut tal-pakkett ta' informazzjoni, innumerat kif xieraq jew immarkat b'mod ieħor sabiex jidentifika b'mod ċar il-paġni kollha. Il-format tad-dokument għandu jkun b'tali mod li jippreżenta rekord tal-passi suċċessivi fil-ġestjoni tal-approvazzjoni tat-tip, b'mod partikolari meta jkunu saru xi reviżjonijiet jew aġġornamenti.

2.8.

“Kompetenza teknika” tfisser, skont l-Artikolu 2 tal-Ftehim tal-1958, li Parti Kontraenti għandha l-kapaċità li tivverifika l-konformità ta' tip tal-IWVTA ma' dan ir-Regolament, abbażi tal-approvazzjonijiet tat-tip individwali ppreżentati mill-manifattur fl-applikazzjoni tiegħu u l-kapaċità li tikkonferma li s-sistemi u l-komponenti tal-vettura huma installati skont ir-Regolamenti tan-NU individwali elenkati fl-Anness 4. Dan ifisser li Parti Kontraenti li tapplika dan ir-Regolament mhux neċessarjament ikollha l-kompetenza teknika meħtieġa biex toħroġ approvazzjonijiet tat-tip fir-rigward tar-Regolamenti tan-NU kollha elenkati fl-Anness 4.

2.9.

“Dikjarazzjoni ta' Konformità (DoC)” tfisser l-informazzjoni għal vettura individwali li tappartjeni għal tip tal-IWVTA, approvata skont dan ir-Regolament, li tiċċertifika għal liema mir-Regolamenti tan-NU elenkati fl-Anness 4 u għal liema verżjonijiet ġie approvat it-tip tal-IWVTA fil-mument tal-produzzjoni tagħha.

2.10.

“Komponent” tfisser tagħmir jew part ta' vettura li huwa suġġett għar-rekwiżiti ta' kwalunkwe wieħed mir-Regolamenti tan-NU elenkati fl-Anness 4 u li huwa maħsub biex ikun parti minn vettura, li t-tip tiegħu jista' jiġi approvat indipendentement minn vettura meta r-Regolament tan-NU jagħmel dispożizzjonijiet espliċiti biex dan isir.

2.11.

“Sistema tal-vettura” tfisser assemblaġġ ta' apparati kkombinati biex iwettaq funzjoni speċifika waħda jew aktar f'vettura u li huwa suġġett għar-rekwiżiti ta' kwalunkwe wieħed mir-Regolamenti tan-NU elenkati fl-Anness 4.

2.12.

“Ċertifikat tal-approvazzjoni tat-tip” tfisser id-dokument li bih l-awtorità tal-approvazzjoni tiċċertifika uffiċjalment li tip ta' vettura, tagħmir jew parts ġie approvat jew li t-tali approvazzjoni ġiet immodifikata.

3.   APPLIKAZZJONI GĦALL-APPROVAZZJONI

3.1.   L-applikazzjoni għall-approvazzjoni ta' tip tal-IWVTA fir-rigward tal-IWVTA għandha tiġi ppreżentata mill-manifattur lill-awtorità tal-approvazzjoni tal-Parti Kontraenti skont id-dispożizzjonijiet tal-Iskeda 3 tal-Ftehim tal-1958.

3.2.   L-applikazzjoni għandha tkun akkumpanjata bid-dokumentazzjoni li ġejja:

3.2.1.

Il-folder ta' informazzjoni li jkun fih l-informazzjoni meħtieġa skont l-Anness 5;

3.2.2.

Iċ-ċertifikati tal-approvazzjoni tat-tip kif meħtieġ mill-paragrafu 5.1.2 (U-IWVTA) jew il-paragrafu 5.1.3 (L-IWVTA) ta' hawn taħt.

3.3.   L-applikazzjoni għall-approvazzjoni u d-dokumentazzjoni ta' akkumpanjament għandhom jiġu mfassla bl-Ingliż. Il-manifattur għandu jipprovdi wkoll traduzzjoni tad-dokumentazzjoni fil-lingwa mitluba mill-Parti Kontraenti li tipproċessa l-applikazzjoni. Iċ-ċertifikati tal-approvazzjoni tat-tip li jakkumpanjaw l-applikazzjoni m'għandhomx għalfejn jiġu tradotti.

3.4.   Vettura/i rappreżentattiva/i tat-tip tal-IWVTA li jrid jiġi approvat għandhom jiġu ppreżentati lill-awtorità tal-approvazzjoni jew lis-servizz tekniku magħżul tagħha responsabbli mit-twettiq tal-ispezzjonijiet tal-Anness 3.

3.5.   Il-manifattur għandu jassenja deżinjazzjoni tat-tip unika għal kull tip tal-IWVTA fi klassi tal-IWVTA.

3.6.   Il-varjanti u l-verżjonijiet kollha f'tip tal-IWVTA wieħed għandhom ikunu koperti mill-istess applikazzjoni għall-IWVTA.

3.7.   L-applikazzjonijiet għat-tipi tal-IWVTA kollha fi klassi tal-IWVTA waħda għandhom jiġu ppreżentati lill-istess awtorità tal-approvazzjoni.

4.   APPROVAZZJONI

4.1.   Għandhom jiġu segwiti l-proċeduri tal-Anness 3.

4.2.   Jekk it-tip tal-IWVTA ppreżentat għall-approvazzjoni skont dan ir-Regolament jissodisfa d-dispożizzjonijiet rilevanti ta' dan ir-Regolament, l-approvazzjoni ta' dak it-tip għandha tingħata b'kont meħud tal-paragrafu 12.2.

4.3.   Numru tal-approvazzjoni tat-tip għandu jiġi assenjat lil kull tip tal-IWVTA approvat skont l-Anness 8.

4.4.   Notifika ta' approvazzjoni jew ta' estensjoni, ta' rifjut jew ta' rtirar tal-approvazzjoni ta' tip tal-IWVTA skont dan ir-Regolament għandha tiġi kkomunikata, permezz ta' bażi tad-dejta fuq sit tal-Internet sikur skont l-Iskeda 5 tal-Ftehim tal-1958, lill-Partijiet Kontraenti li japplikaw dan ir-Regolament, permezz tal-formola ta' komunikazzjoni konformi mal-mudell fl-Anness 1 (2).

4.5.   Il-marka tal-approvazzjoni tat-tip għandha titwaħħal, bħala mezz ta' identifikazzjoni tat-tip tal-IWVTA, b'mod li jolqot l-għajn u f'post faċilment aċċessibbli kif speċifikat fid-dokument ta' informazzjoni fl-Anness 5, ma' kull vettura konformi ma' tip tal-IWVTA, approvat skont dan ir-Regolament. Tali marka tal-approvazzjoni tat-tip għandha tkun skont l-Anness 2.

4.6.   Il-marka tal-approvazzjoni preskritta fil-paragrafu 4.5 ta' hawn fuq ma tistax tiġi sostitwita b'Identifikatur Uniku (UI) kif imsemmi fl-Iskeda 5 tal-Ftehim tal-1958.

4.7.   Għal sistemi ta' vetturi kif definiti fil-paragrafu 2.11 ta' hawn fuq, li l-approvazzjonijiet tagħhom huma referenzjati f'IWVTA, m'hemm għalfejn titwaħħal l-ebda marka tal-approvazzjoni tat-tip. Il-marki tal-approvazzjoni għal komponenti kif definiti fil-paragrafu 2.10 ta' hawn fuq għandhom jitwaħħlu kif preskritt mir-Regolamenti tan-NU elenkati fl-Anness 4.

4.8.   Il-marka tal-approvazzjoni tat-tip għandha tkun tista' tinqara b'mod ċar u ma tkunx tistax titħassar.

4.9.   Jekk il-pjanċa tad-dejta tal-vettura titwaħħal mill-manifattur, il-marka tal-approvazzjoni tat-tip għandha titqiegħed qribha jew fuqha.

4.10.   Għall-U-IWVTA, il-marka tal-approvazzjoni għandha tkun f'konformità mal-mudell tal-Anness 2, Taqsima I. Għal-L-IWVTA, il-marka tal-approvazzjoni għandha tkun f'konformità mal-mudell tal-Anness 2, Taqsima II.

4.11.   Il-varjanti u l-verżjonijiet kollha f'tip tal-IWVTA wieħed għandhom jiġu approvati f'IWVTA waħda.

4.12.   L-approvazzjonijiet għat-tipi tal-IWVTA kollha fi klassi tal-IWVTA waħda għandhom jiġu pproċessati mill-istess awtorità tal-approvazzjoni.

4.13.   Klassi tal-IWVTA ġdida tiġi ġġenerata mal-għoti tal-ewwel approvazzjoni għal tip tal-IWVTA li jinsab f'din il-klassi tal-IWVTA. Approvazzjonijiet suċċessivi għal tipi tal-IWVTA oħrajn jistgħu jirreferu għal din il-klassi tal-IWVTA eżistenti, dejjem jekk il-kundizzjonijiet tal-paragrafu 1.1 tal-Anness 7 jkunu ssodisfati.

5.   SPEĊIFIKAZZJONIJIET

5.1.   Ċertifikati meħtieġa

5.1.1.   It-tip tal-IWVTA għandu jissodisfa r-rekwiżiti preskritti f'dan ir-Regolament kif ukoll dawk speċifikati fir-Regolamenti tan-NU elenkati fl-Anness 4, Parti A, Taqsima I. Dan għandu jintwera permezz ta' ċertifikati tal-approvazzjoni tat-tip f'konformità ma' dawk ir-Regolamenti tan-NU li jkopru l-varjanti u l-verżjonijiet kollha tat-tip tal-IWVTA. Fil-każijiet fejn dawn ir-Regolamenti tan-NU jinkludu rekwiżiti kemm għal parts kif ukoll għall-installazzjoni tagħhom fuq il-vettura, iż-żewġ aspetti għandhom ikunu koperti minn approvazzjonijiet tat-tip.

5.1.2.   Għall-U-IWVTA, għandhom jiġu inklużi ċ-ċertifikati tal-approvazzjoni tat-tip meħtieġa mir-Regolamenti tan-NU kollha applikabbli u elenkati fl-Anness 4, Parti A, Taqsima I skont il-verżjoni elenkata f'dik it-taqsima jew fi kwalunkwe verżjoni suċċessiva oħra.

5.1.3.   Għal-L-IWVTA, wieħed jew aktar ċertifikati tal-approvazzjoni tat-tip meħtieġa mill-paragrafu 5.1.2 ta' hawn fuq jistgħu jitneħħew jew jiġu sostitwiti biċ-ċertifikat skont verżjoni preċedenti tar-Regolament tan-NU rispettiv.

5.2.   Dikjarazzjoni ta' Konformità (DoC) (3)

5.2.1.   Jekk Parti Kontraenti titlob hekk, il-manifattur tal-vettura għandu jipprovdi u jtella' fuq il-bażi tad-dejta fuq sit tal-Internet sikur tan-NU, għal kull vettura individwali maħsuba biex titqiegħed fis-suq f'dik il-Parti Kontraenti u li tappartjeni għal tip approvat skont dan ir-Regolament, l-informazzjoni meħtieġa biex jiġi ġġenerat DoC tal-vetturi kkonċernati f'dik il-bażi tad-dejta. Il-proċess u l-informazzjoni meħtieġa huma stipulati fl-Anness 6.

5.2.2.   Minkejja l-paragrafu 5.2.1 ta' hawn fuq, il-manifattur tal-vettura jista' wkoll jipprovdi u jtella' l-informazzjoni meħtieġa għal kull vettura individwali koperta minn IWVTA irrispettivament mid-destinazzjoni tagħha.

5.2.3.   L-informazzjoni msemmija fil-paragrafu 5.2.1 ta' hawn fuq għandha tittella' fil-ħin dovut għat-tqegħid fis-suq tal-vetturi fil-Partijiet Kontraenti.

5.2.4.   L-informazzjoni msemmija fil-paragrafu 5.2.1 ta' hawn fuq tista' tittella' wkoll mill-awtorità tal-approvazzjoni f'isem il-manifattur. F'dan il-każ, hija r-responsabbiltà tal-manifattur li jipprovdi lill-awtorità tal-approvazzjoni bl-informazzjoni meħtieġa u jibqa' responsabbli għall-preċiżjoni tagħha.

6.   PROĊEDURA TAT-TEST

6.1.   Meta l-konformità mar-rekwiżiti tal-paragrafu 5.1 ta' hawn fuq tintwera billi jiġu ppreżentati ċ-ċertifikati kollha meħtieġa li jkopru l-varjanti u l-verżjonijiet kollha tat-tip tal-IWVTA, l-ebda test ieħor ma għandu jkun meħtieġ għall-komponenti msemmija f'dawn iċ-ċertifikati.

7.   MODIFIKA TAT-TIP TAL-IWVTA U MODIFIKA TAL-APPROVAZZJONI

7.1.   Fil-każ ta' kwalunkwe bidla fit-tip tal-IWVTA fir-rigward ta' xi punt partikolari rreġistrat fil-folder ta' informazzjoni, għandha tapplika l-proċedura speċifikata fil-paragrafu 2, Skeda 3 tal-Ftehim tal-1958.

7.1.1.   L-awtorità tal-approvazzjoni tat-tip li tagħti l-estensjoni tal-approvazzjoni għandha taġġorna n-numru tal-approvazzjoni b'numru ta' estensjoni, inkrementat skont in-numru ta' estensjonijiet suċċessivi diġà mogħtija skont l-Anness 8, u toħroġ il-formola ta' komunikazzjoni riveduta ddenotata b'dan in-numru tal-estensjoni.

7.2.   IWVTA eżistenti tista' tiġi mmodifikata biss permezz ta' estensjoni jew reviżjoni jekk jiġu ssodisfati l-kundizzjonijiet kollha li ġejjin:

7.2.1.

Il-vetturi qabel u wara l-modifika jappartjenu għall-istess klassi tal-IWVTA.

7.2.2.

L-istatus tal-IWVTA qabel u wara l-modifika ma jinbidilx bejn rikonoxximent universali u rikonoxximent limitat.

7.2.3.

Wara l-modifika l-vetturi kollha koperti mill-estensjoni jew reviżjoni huma konformi mal-istess verżjoni ta' kull Regolament tan-NU inkluż.

7.3.   Għal bidliet li ma jissodisfawx kwalunkwe waħda mill-kundizzjonijiet tal-paragrafi 7.2.1 u 7.2.2, għandha tinħareġ IWVTA ġdida. Għal bidliet li ma jissodisfawx il-kundizzjoni definita fil-paragrafu 7.2.3 l-IWVTA għandha tiġi maqsuma (ara wkoll il-paragrafu 7.4.4).

7.4.   Meta jidħlu fis-seħħ rekwiżiti ġodda (li jirriżultaw minn emendi tal-Anness 4), il-manifattur li jkollu l-approvazzjoni tat-tip għandu jinnotifika lill-awtorità tal-approvazzjoni li ħarġet l-U-IWVTA dwar waħda mill-għażliet speċifikati fis-subparagrafi ta' hawn taħt.

In-notifika titqies li tkun saret meta l-manifattur jinnotifika lill-awtorità tal-approvazzjoni, permezz ta' formola ta' komunikazzjoni konformi mal-mudell fl-Anness 9.

7.4.1.   It-tip tal-IWVTA kkonċernat mhux affettwat mir-rekwiżiti l-ġodda. F'dak il-każ, ma għandha tkun meħtieġa l-ebda emenda għall-approvazzjoni tat-tip.

7.4.2.   It-tip tal-IWVTA huwa affettwat u l-manifattur irid iżomm l-istatus universali tal-IWVTA u għalhekk japplika għal estensjoni tal-approvazzjoni tat-tip. Il-marka tal-approvazzjoni tat-tip għandha tiġi aġġornata kif meħtieġ.

7.4.3.   It-tip tal-IWVTA huwa affettwat, iżda l-manifattur ma jixtieqx iżomm l-istatus universali tal-IWVTA. F'dak il-każ, l-U-IWVTA għandha tiġi rtirata (effettiv fid-data li fiha l-IWVTA ma tibqax aktar universali). Għall-produzzjoni kontinwa, għandha tinħareġ L-IWVTA ġdida. Madankollu, meta tingħata din l-L-IWVTA l-ġdida, id-dispożizzjonijiet tranżizzjonali tar-Regolament tan-NU Nru 0 u tar-Regolamenti tan-NU elenkati fl-Anness 4 għandhom jiġu interpretati bħallikieku ġiet estiża IWVTA eżistenti.

7.4.4.   Fil-każ li l-manifattur jixtieq li jagħżel iż-żewġ alternattivi (paragrafi 7.4.2 u 7.4.3 ta' hawn fuq) fl-istess ħin għal porzjonijiet differenti tal-produzzjoni tiegħu, l-approvazzjoni tat-tip għandha tiġi maqsuma minħabba d-definizzjoni ta' tip tal-IWVTA (Anness 7, Parti A, paragrafu 1.2.1, subparagrafu (b)). F'dan il-każ l-U-IWVTA eżistenti għandha tiġi estiża u tibqa' U-IWVTA għall-porzjon tal-produzzjoni li jiġi modifikat sabiex jissodisfa r-rekwiżiti applikabbli reċentement. Għall-parti tal-produzzjoni li tibqa' ma tinbidilx, għandha tinħareġ L-IWVTA ġdida b'numru tal-approvazzjoni ġdid. Madankollu, meta tingħata din l-L-IWVTA l-ġdida, id-dispożizzjonijiet tranżizzjonali tar-Regolament tan-NU Nru 0 u tar-Regolamenti tan-NU elenkati fl-Anness 4 għandhom jiġu interpretati bħallikieku ġiet estiża IWVTA eżistenti. Id-deżinjazzjonijiet tat-tip tal-manifattur għandhom jidentifikaw b'mod ċar it-tipi tal-IWVTA differenti f'dawk iż-żewġ approvazzjonijiet.

7.5.   Fil-każ li manifattur iwettaq bidliet tekniċi fuq tip ta' vettura li kien kopert minn L-IWVTA u dawn iwasslu biex il-vettura ssir tissodisfa r-rekwiżiti għal-livell universali, għandha tinħareġ U-IWVTA ġdida. L-“L-IWVTA” preeżistenti tista' tibqa' valida jew tiġi rtirata jekk ma tkunx meħtieġa aktar.

Fil-proċess tal-għoti tal-U-IWVTA l-ġdida, ir-regoli li ġejjin għandhom jiġu mħarsa:

(a)

Ir-rekwiżiti tekniċi għal tip ta' vettura eżistenti japplikaw għat-tagħmir u l-parts kollha approvati diġà skont il-verżjonijiet tar-Regolamenti tan-NU elenkati fl-Anness 4, Parti A, Taqsima I u inklużi fl-L-IWVTA preeżistenti dejjem jekk ma tkun saret ebda bidla fit-tagħmir jew parts rilevanti li tirriżulta f'tip ġdid;

(b)	Ir-rekwiżiti tekniċi għal tip ta' vettura ġdid japplikaw fil-każi l-oħra kollha.

8.   KONFORMITÀ TAL-PRODUZZJONI

Il-proċeduri tal-konformità tal-produzzjoni għandhom ikunu konformi ma' dawk stipulati fl-Iskeda 1 tal-Ftehim tal-1958 b'dawn ir-rekwiżiti li ġejjin:

8.1.	Kull vettura approvata skont dan ir-Regolament għandha tkun immanifatturata b'mod li tkun konformi mat-tip approvat billi tissodisfa r-rekwiżiti stabbiliti fil-paragrafu 5 ta' hawn fuq;

8.2.

L-awtorità tal-approvazzjoni li tkun tat l-approvazzjoni tat-tip tista' fi kwalunkwe ħin tivverifika l-metodi għall-kontroll tal-konformità applikati f'kull faċilità tal-produzzjoni. Tali verifika għandha primarjament tikkonċerna l-vettura sħiħa u l-attivitajiet tal-assemblaġġ relatati u m'għandhiex, mingħajr ġustifikazzjoni raġonevoli, tirrepeti valutazzjonijiet preċedenti mwettqa għal Regolamenti tan-NU separati li jinkludu parti mill-IWVTA.

9.   PENALI GĦAL NUQQAS TA' KONFORMITÀ TAL-PRODUZZJONI

9.1.   L-approvazzjoni mogħtija fir-rigward tat-tip tal-IWVTA skont dan ir-Regolament tista' tiġi rtirata jekk ma jkunx hemm konformità mar-rekwiżiti jew jekk vettura li jkollha fuqha l-marka tal-approvazzjoni tat-tip ma tkunx konformi mat-tip tal-IWVTA approvat.

9.2.   Jekk Parti Kontraenti li tapplika dan ir-Regolament tirtira approvazzjoni li tkun tat qabel, hija għandha minnufih tinnotifika b'dan lill-Partijiet Kontraenti l-oħrajn li japplikaw dan ir-Regolament, permezz ta' formola ta' komunikazzjoni li tkun konformi mal-eżempju fl-Anness 1.

10.   PRODUZZJONI MWAQQFA GĦALKOLLOX

Jekk id-detentur tal-approvazzjoni jwaqqaf għalkollox il-manifattura ta' tip tal-IWVTA approvat skont dan ir-Regolament, huwa għandu jgħarraf b'dan lill-awtorità tal-approvazzjoni, li tkun tat l-approvazzjoni. Malli tirċievi l-komunikazzjoni rilevanti, dik l-awtorità tal-approvazzjoni għandha tgħarraf lill-Partijiet Kontraenti li japplikaw dan ir-Regolament permezz ta' formola ta' komunikazzjoni konformi mal-eżempju fl-Anness 1 bl-użu tal-bażi tad-dejta fuq sit tal-Internet sikur skont l-Iskeda 5 tal-Ftehim tal-1958, Reviżjoni 3.

11.   ISMIJIET U INDIRIZZI TAS-SERVIZZI TEKNIĊI RESPONSABBLI MIT-TWETTIQ TAT-TESTIJIET TAL-APPROVAZZJONI U TAL-AWTORITAJIET TAL-APPROVAZZJONI TAT-TIP

F'konformità mad-dispożizzjonijiet tal-Artikolu 2.2 tal-Ftehim tal-1958, il-Partijiet Kontraenti li japplikaw dan ir-Regolament għandhom jikkomunikaw l-ismijiet u l-indirizzi tas-Servizzi Tekniċi li jkunu ħatru biex jivverifikaw li d-dispożizzjonijiet rilevanti ta' dan ir-Regolament ikunu ġew issodisfati u tal-awtoritajiet tal-approvazzjoni li jagħtu l-approvazzjonijiet u li lilhom għandhom jintbagħtu l-formoli ta' komunikazzjoni msemmija fl-Anness 1.

12.   DISPOŻIZZJONIJIET INTRODUTTORJI U TRANŻIZZJONALI

12.1.   Minn 9 xhur wara d-data tad-dħul fis-seħħ ta' dan ir-Regolament u suġġett għall-kundizzjonijiet tal-paragrafi 13.1 u 13.5, Parti Kontraenti li tapplika dan ir-Regolament għandha taċċetta kwalunkwe IWVTA maħruġa skont dan ir-Regolament u m'għandhiex titlob għal approvazzjonijiet separati skont dawk ir-Regolamenti tan-NU elenkati fl-Anness 4, Parti A, Taqsima I, li l-konformità magħhom hija ċċertifikata b'din l-IWVTA.

12.2.   Meta tingħata approvazzjoni tat-tip skont dan ir-Regolament, id-dispożizzjonijiet tranżizzjonali tal-verżjoni tar-Regolamenti tan-NU kif elenkati fl-Anness 4 u ta' kwalunkwe verżjoni suċċessiva ta' dawn ir-Regolamenti tan-NU għandhom jiġu rispettati, madankollu, għandhom jitqiesu d-dispożizzjonijiet speċjali tal-paragrafu 13.3 ta' hawn taħt.

13.   DISPOŻIZZJONIJIET SPEĊJALI GĦAL PARTIJIET KONTRAENTI LI JAPPLIKAW DAN IR-REGOLAMENT

13.1.   Irrispettivament minn jekk Parti Kontraenti tapplikax xi wieħed mir-Regolamenti tan-NU elenkati fl-Anness 4, Parti A, Taqsima I, din għandha taċċetta f'konformità mal-prinċipji stipulati fl-Artikoli 1 u 3 tal-Ftehim tal-1958 kwalunkwe U-IWVTA bħala evidenza ta' konformità għas-sistemi, tagħmir u parts kollha tal-vettura approvati permezz tagħha. Madankollu, il-vetturi bir-roti li jkollhom U-IWVTA skont ir-Regolament tan-NU Nru 0 jibqgħu suġġetti għar-rekwiżiti nazzjonali jew reġjonali dwar is-sistemi, tagħmir u parts ta' vetturi li mhumiex koperti mir-Regolamenti tan-NU elenkati fl-Anness 4.

13.2.   Irrispettivament minn jekk Parti Kontraenti tapplikax xi wieħed mir-Regolamenti tan-NU elenkati fl-Anness 4, Parti A, Taqsima I, din tista' toħroġ approvazzjonijiet tat-tip għal dan ir-Regolament suġġett għall-Artikolu 2 tal-Ftehim tal-1958, b'kont meħud tal-paragrafu 2.8 ta' hawn fuq.

13.3.   Irrispettivament minn jekk Parti Kontraenti tapplikax xi wieħed mir-Regolamenti tan-NU elenkati fl-Anness 4, Parti A, Taqsima I, din għandha, għall-finijiet tal-għoti ta' IWVTA, taċċetta kwalunkwe approvazzjoni tat-tip maħruġa skont ir-Regolamenti tan-NU elenkati fl-Anness 4, Parti A, Taqsima I.

Għall-U-IWVTA, din għandha taċċetta l-approvazzjonijiet tat-tip maħruġa skont il-verżjoni tar-Regolamenti tan-NU kif elenkati fl-Anness 4, Parti A, Taqsima I, jew l-approvazzjonijiet tat-tip maħruġa għal kwalunkwe verżjonijiet suċċessivi tar-Regolamenti tan-NU ppreżentati skont il-paragrafu 5.1.2 ta' hawn fuq.

Jekk l-aħħar verżjoni ta' Regolament tan-NU individwali ma tkunx elenkata fl-Anness 4, Parti A, Taqsima I u minkejja l-fatt li d-dispożizzjonijiet tranżizzjonali ta' din l-aħħar verżjoni m'għadhomx jobbligaw lill-Partijiet Kontraenti jaċċettaw approvazzjonijiet skont il-verżjoni preċedenti, l-approvazzjonijiet maħruġa skont il-verżjoni tar-Regolament tan-NU elenkata fl-Anness 4, Parti A, Taqsima I għandhom jiġu aċċettati.

13.4.   Irrispettivament minn jekk Parti Kontraenti tapplikax xi wieħed mir-Regolamenti tan-NU elenkati fl-Anness 4, Parti A, Taqsima I, din għandha, għall-finijiet tat-tqegħid fis-suq ta' tagħmir u spare parts għall-vetturi koperti minn IWVTA aċċettata minn dik il-Parti Kontraenti, taċċetta l-approvazzjonijiet tat-tip skont ir-Regolamenti tan-NU elenkati fl-Anness 4, Parti A, Taqsima I bħala evidenza ta' konformità għat-tagħmir u l-parts rispettivi.

Madankollu, Parti Kontraenti li ma tapplikax xi wħud mir-Regolamenti tan-NU elenkati fl-Anness 4, Parti A, Taqsima I tista' tinnotifika lis-segretarjat tal-Kumitat Amministrattiv li għal dawn ir-Regolamenti tan-NU mhijiex marbuta b'dan l-obbligu li taċċetta l-approvazzjonijiet tat-tip maħruġa skont dawn ir-Regolamenti tan-NU bħala evidenza ta' konformità għat-tagħmir u l-parts rispettivi. In-notifika għandha tidentifika b'mod speċifiku r-Regolament(i) tan-NU li għalihom spare parts b'approvazzjoni tat-tip tan-NU mhux se jiġu aċċettati fin-nuqqas ta' ċertifikazzjoni nazzjonali jew reġjonali ulterjuri.

13.5.   Suġġett għal notifika lis-segretarjat tal-Kumitat Amministrattiv, Parti Kontraenti tista' taċċetta L-IWVTA f'konformità mal-prinċipji stipulati fl-Artikoli 1, 3 u 12 tal-Ftehim tal-1958. Għal dan il-fini, hija għandha tinnotifika lis-segretarjat tal-Kumitat Amministrattiv bir-Regolamenti tan-NU u l-verżjonijiet tagħhom li għalihom se taċċetta approvazzjonijiet tat-tip bħala evidenza ta' konformità għas-sistemi, tagħmir u parts kollha tal-vettura approvati permezz tagħhom. Kwalunkwe tibdil għal-livell ta' aċċettazzjoni għandu jiġi notifikat ukoll qabel id-data tal-applikazzjoni.

Għal din in-notifika, għandu jintuża l-format ipprovdut fl-Anness 4, Parti A, Taqsima II. Il-parti Kontraenti għandha mbagħad taċċetta bħala evidenza ta' konformità, kwalunkwe L-IWVTA li tinkludi mill-inqas l-approvazzjonijiet tat-tip li huma f'konformità man-notifika mill-Parti Kontraenti fir-rigward tal-Anness 4, Parti A, Taqsima II.

---

(1)  Kif definit fir-Riżoluzzjoni Konsolidata dwar il-Kostruzzjoni tal-Vetturi (R.E.3), id-dokument ECE/TRANS/WP.29/78/Rev.2, paragrafu 2.2.1. – www.unece.org/trans/main/wp29/wp29wgs/wp29gen/wp29resolutions.html

(2)  Sad-data speċifikata mid-WP.29 wara li l-bażi tad-dejta fuq sit tal-Internet sikur skont l-Iskeda 5 tal-Ftehim tal-1958 (Reviżjoni 3) tkun operattiva u tinkludi din il-funzjonalità, għandha tiġi kkomunikata notifika ta' approvazzjoni jew ta' estensjoni, ta' rifjut jew ta' rtirar tal-approvazzjoni ta' tip tal-IWVTA skont dan ir-Regolament, kif meħtieġ mill-Artikolu 5.2 tar-Reviżjoni 3 tal-Ftehim tal-1958, permezz ta' kopja fuq karta jew f'format elettroniku, lill-Partijiet Kontraenti tal-Ftehim li japplikaw dan ir-Regolament permezz ta' formola konformi mal-mudell fl-Anness 1 ta' dan ir-Regolament u ritratti u/jew dijagrammi u disinji pprovduti mill-applikant għall-approvazzjoni, f'format li ma jeċċedix A4 (210 × 297 mm) jew mitwija f'dak il-format u fuq skala xierqa.

(3)  Dan il-paragrafu għandu japplika minn data speċifikata mid-WP.29 wara li l-bażi tad-dejta fuq sit tal-Internet sikur skont l-Iskeda 5 tar-Reviżjoni 3 tal-Ftehim tal-1958 tkun operattiva u tinkludi din il-funzjonalità.

---

---

---

---

---

---

---

---

---

---