14.12.2017

MT

Il-Ġurnal Uffiċjali tal-Unjoni Ewropea

L 331/1

---

DEĊIŻJONI TAL-KUNSILL (UE) 2017/2307

tad-9 ta' Ottubru 2017

dwar il-konklużjoni tal-Ftehim bejn l-Unjoni Ewropea u r-Repubblika taċ-Ċilì dwar il-kummerċ ta' prodotti organiċi

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b'mod partikolari l-ewwel subparagrafu tal-Artikolu 207(4), flimkien mal-punt (a)(v) tat-tieni subparagrafu tal-Artikolu 218(6) u l-Artikolu 218(7) tiegħu,

Wara li kkunsidra l-proposta mill-Kummissjoni Ewropea,

Wara li kkunsidra l-kunsens tal-Parlament Ewropew (1),

Billi:

(1)	F'konformità mad-Deċiżjoni tal-Kunsill (UE) 2017/436 (2), il-Ftehim bejn l-Unjoni Ewropea u r-Repubblika taċ-Ċilì dwar il-kummerċ ta' prodotti organiċi (“il-Ftehim”) ġie ffirmat fis-27 ta' April 2017, soġġett għall-konklużjoni tiegħu.

(2)	Fil-Ftehim, l-Unjoni u Repubblika taċ-Ċilì jirrikonoxxu l-ekwivalenza tar-regoli rispettivi tagħhom dwar il-produzzjoni organika u s-sistemi ta' kontroll fir-rigward tal-prodotti organiċi.

(3)

Il-Ftehim għandu l-għan li jrawwem il-kummerċ ta' prodotti organiċi, li jikkontribwixxi għall-iżvilupp u l-espansjoni tas-settur organiku fl-Unjoni u fir-Repubblika taċ-Ċili u li jikseb livell għoli ta' rispett għall-prinċipji tal-produzzjoni organika, ta' garanzija tas-sistemi ta' kontroll u ta' integrità tal-prodotti organiċi. Huwa għandu wkoll l-għan li jtejjeb il-protezzjoni tal-logos rispettivi għall-prodotti organiċi tal-Unjoni u Repubblika taċ-Ċilì u li jsaħħaħ il-kooperazzjoni regolatorja bejn il-Partijiet fir-rigward ta' kwistjonijiet relatati mal-produzzjoni organika.

(4)

Il-Kumitat Konġunt dwar il-Prodotti Organiċi (“il-Kumitat Konġunt”), stabbilit skont l-Artikolu 8(1) tal-Ftehim, jittratta ċerti aspetti tal-implimentazzjoni tal-Ftehim. B'mod partikolari, il-Kumitat Konġunt għandu s-setgħa li jemenda l-listi ta' prodotti fl-Annessi I u II tal-Ftehim. Jenħtieġ li l-Kummissjoni tkun awtorizzata biex tirrappreżenta lill-Unjoni fil-Kumitat Konġunt.

(5)

Jenħtieġ li l-Kummissjoni tingħata s-setgħa li tapprova, f'isem l-Unjoni, emendi għal-listi ta' prodotti fl-Annessi I u II tal-Ftehim, bil-kundizzjoni li tinforma minn qabel lir-rappreżentanti tal-Istati Membri bl-emendi li għalihom ikollha l-intenzjoni li tagħti l-approvazzjoni tagħha fil-Kumitat Konġunt u li tipprovdi lir-rappreżentanti tal-Istati Membri bl-informazzjoni rilevanti kollha li tkun wasslitha biex tikkonkludi li l-ekwivalenza tista' tiġi aċċettata.

(6)

Barra minn hekk, sabiex ikun hemm reazzjoni fil-pront fejn il-kundizzjonijiet għall-ekwivalenza ma jkunux qed jiġu sodisfatti aktar, jenħtieġ li l-Kummissjoni tingħata s-setgħa li tissospendi unilateralment ir-rikonoxximent tal-ekwivalenza, bil-kundizzjoni li tinforma minn qabel lir-rappreżentanti tal-Istati Membri qabel ma tagħmel dan.

(7)

Fil-każijiet fejn ir-rappreżentanti tal-Istati Membri li jkunu jirrappreżentaw minoranza li timblokka joġġezzjonaw għall-pożizzjoni ppreżentata mill-Kummissjoni, il-Kummissjoni m'għandhiex titħalla tapprova emendi għal-listi ta' prodotti fl-Annessi I u II u lanqas li tissospendi r-rikonoxximent ta' ekwivalenza. F'tali każijiet, il-Kummissjoni għandha tippreżenta proposta għal Deċiżjoni tal-Kunsill fuq il-bażi tal-Artikolu 218(9) tat-Trattat.

(8)	Jenħtieġ li l-Ftehim jiġi approvat,

ADOTTA DIN ID-DEĊIŻJONI:

Artikolu 1

1.   Il-Ftehim bejn l-Unjoni Ewropea u r-Repubblika taċ-Ċilì dwar il-kummerċ ta' prodotti organiċi huwa b'dan approvat f'isem l-Unjoni.

2.   It-test tal-Ftehim huwa mehmuż ma' din id-Deċiżjoni.

Artikolu 2

Il-President tal-Kunsill għandu, f'isem l-Unjoni, jagħti n-notifika prevista fl-ewwel paragrafu tal-Artikolu 15 tal-Ftehim (3).

Artikolu 3

Il-Kummissjoni għandha tirrappreżenta lill-Unjoni fil-Kumitat Konġunt.

Artikolu 4

L-emendi li jsiru fil-listi ta' prodotti fl-Annessi I u II tal-Ftehim skont il-punt (b) tal-Artikolu 8(3) tal-Ftehim għandhom jiġu approvati mill-Kummissjoni f'isem l-Unjoni.

Qabel l-approvazzjoni mill-Kummissjoni ta' tali emendi, hija għandha tinforma lir-rappreżentanti tal-Istati Membri dwar il-pożizzjoni prevista tal-Unjoni billi tipprovdi dokument ta' informazzjoni li jagħti r-riżultati tal-valutazzjoni tal-ekwivalenza mwettqa fir-rigward tal-lista ta' prodotti ġdida jew aġġornata fl-Anness I jew II, inklużi:

(a)	il-lista ta' prodotti kkonċernati, flimkien ma' indikazzjoni tal-kwantitajiet previsti għall-esportazzjoni lejn l-Unjoni;

(b)	ir-regoli tal-produzzjoni applikati għall-prodotti kkonċernati fir-Repubblika taċ-Ċilì, flimkien ma' indikazzjoni dwar kif tkun ġiet solvuta kwalunkwe differenza sostanzjali mid-dispożizzjonijiet rilevanti tal-Unjoni;

(c)	jekk rilevanti, sistema ta' kontroll ġdida jew aġġornata applikata għall-prodotti kkonċernati, flimkien ma' indikazzjoni dwar kif tkun ġiet solvuta kwalunkwe differenza sostanzjali mid-dispożizzjonijiet rilevanti tal-Unjoni;

(d)	kwalunkwe informazzjoni oħra meqjusa rilevanti mill-Kummissjoni.

Fejn ikun hemm numru ta' rappreżentanti ta' Stati Membri, li jirrappreżentaw minoranza li timblokka taħt it-tieni subparagrafu tal-punt (a) tal-Artikolu 238(3) tat-Trattat, li joġġezzjonaw, il-Kummissjoni għandha tagħmel proposta taħt l-Artikolu 218(9) tat-Trattat.

Artikolu 5

Kwalunkwe deċiżjoni mill-Unjoni biex tissospendi unilateralment, taħt l-Artikolu 3(4) u (5) tal-Ftehim, ir-rikonoxximent tal-ekwivalenza tal-liġijiet u r-regolamenti elenkati fl-Anness IV tal-Ftehim, inklużi l-verżjonijiet aġġornati u kkonsolidati ta' dawk il-liġijiet u r-regolamenti, kif imsemmi fl-Anness V tal-Ftehim, għandha tittieħed mill-Kummissjoni.

Qabel ma l-Kummissjoni tieħu tali deċiżjoni, hija għandha tinforma lir-rappreżentanti tal-Istati Membri skont il-proċedura stabbilita fl-Artikolu 4 ta' din id-Deċiżjoni.

Artikolu 6

Din id-Deċiżjoni għandha tidħol fis-seħħ fl-1 ta' Jannar 2018.

---

(1)  Il-Kunsens tal-14 ta' Settembru 2017 (għadu mhux ippubblikat fil-Ġurnal Uffiċjali).

(2)  Id-Deċiżjoni tal-Kunsill (UE) 2017/436 tas-6 ta' Marzu 2017 dwar l-iffirmar, f'isem l-Unjoni Ewropea, tal-Ftehim bejn l-Unjoni Ewropea u r-Repubblika taċ-Ċilì dwar il-kummerċ ta' prodotti organiċi (ĠU L 67, 14.3.2017, p. 33).

(3)  Id-data tad-dħul fis-seħħ tal-Ftehim se tiġi ppubblikata fil-Ġurnal Uffiċjali tal-Unjoni Ewropea mis-Segretarjat Ġenerali tal-Kunsill.

---

14.12.2017

MT

Il-Ġurnal Uffiċjali tal-Unjoni Ewropea

L 331/4

---

TRADUZZJONI

FTEHIM

bejn l-Unjoni Ewropea u r-Repubblika taċ-Ċilì dwar il-kummerċ ta' prodotti organiċi

L-UNJONI EWROPEA, minn hawn 'il quddiem imsejħa “l-Unjoni”,

minn naħa waħda, u

IR-REPUBBLIKA TAĊ-ĊILÌ, minn hawn 'il quddiem imsejħa “iċ-Ċilì”,

min-naħa l-oħra,

kollettivament imsejħin “il-Partijiet”,

FILWAQT LI JIRRIKONOXXU s-sħubija kummerċjali bejniethom li ilha teżisti u b'saħħitha bbażata fuq il-prinċipji komuni u l-valuri riflessi fil-Ftehim li jistabbilixxi assoċjazzjoni bejn il-Komunità Ewropea u l-Istati Membri tagħha, minn naħa waħda, u r-Repubblika taċ-Ċilì, min-naħa l-oħra;

DETERMINATI li jikkontribwixxu għall-iżvilupp u l-espansjoni tas-setturi organiċi tagħhom billi joħolqu opportunitajiet ġodda għall-esportazzjoni;

DETERMINATI li jrawmu l-kummerċ ta' prodotti organiċi u konvinti li dan il-Ftehim sejjer jiffaċilita l-kummerċ ta' prodotti mkabbra u manifatturati b'mod organiku bejn il-Partijiet;

FILWAQT LI JFITTXU li jiksbu livell għoli ta' rispett għall-prinċipji tal-produzzjoni organika, tal-garanzija tas-sistemi tal-kontroll u tal-integrità tal-prodotti organiċi;

IMPENJATI li jsaħħu l-kooperazzjoni regolatorja dwar kwistjonijiet relatati mal-produzzjoni organika;

FILWAQT LI JIRRIKONOXXU l-importanza tar-reċiproċità u t-trasparenza fil-kummerċ internazzjonali għall-benefiċċju tal-partijiet ikkonċernati kollha;

FILWAQT li jżommu f'moħħhom li l-Ftehim tal-Organizzazzjoni Dinjija tal-Kummerċ (WTO) dwar l-Ostakli Tekniċi għall-Kummerċ jinkoraġġixxi lill-Membri tad-WTO biex jikkunsidraw pożittivament li jaċċettaw bħala ekwivalenti regolamenti tekniċi ta' Membri oħrajn, anke jekk dawn ikunu differenti minn tagħhom, kemm-il darba jkunu sodisfatti li dawk ir-regolamenti jwettqu adegwatament l-għanijiet tar-regolamenti tagħhom stess;

FILWAQT LI JINNUTAW li l-kunfidenza permanenti fl-affidabbiltà kontinwa tal-proċeduri ta' valutazzjoni u tas-sistema ta' kontroll tal-Parti l-oħra hija element essenzjali ta' tali aċċettazzjoni ta' ekwivalenza;

FILWAQT LI JIBNU fuq id-drittijiet u l-obbligi rispettivi tagħhom taħt il-Ftehim li jistabbilixxi d-WTO u ftehimiet u arranġamenti multilaterali, reġjonali u bilaterali oħrajn li għalihom huma Partijiet;

FTIEHMU KIF ĠEJ:

Artikolu 1

Skop

L-għan ta' dan il-Ftehim huwa li jitrawwem il-kummerċ tal-prodotti agrikoli u ikel magħmula b'mod organiku bejn l-Unjoni u ċ-Ċilì, skont il-prinċipji tan-nondiskriminazzjoni u tar-reċiproċità.

Artikolu 2

Definizzjonijiet

Għall-finijiet ta' dan il-Ftehim, għandhom japplikaw id-definizzjonijiet li ġejjin:

(1)	“ekwivalenza” tfisser il-kapaċità ta' liġijiet u regolamenti differenti, kif ukoll ta' sistemi ta' spezzjoni u ta' ċertifikazzjoni differenti, li jilħqu l-istess għanijiet;

(2)	“awtorità kompetenti” tfisser aġenzija uffiċjali li jkollha ġurisdizzjoni fuq il-liġijiet u r-regolamenti elenkati fl-Anness III jew IV u li tkun responsabbli għall-implimentazzjoni ta' dan il-Ftehim;

(3)

“awtorità ta' kontroll” tfisser awtorità ta' Stat Membru tal-Unjoni li lilha l-awtorità rilevanti tkun ikkonferixxiet, bis-sħiħ jew b'mod parzjali, il-kompetenza tagħha għall-ispezzjonijiet jew iċ-ċertifikazzjoni fil-qasam tal-produzzjoni organika skont il-liġijiet u r-regolamenti elenkati fl-Anness III;

(4)	“korp ta' kontroll” tfisser entità privata indipendenti li twettaq spezzjonijiet u ċertifikazzjoni fil-qasam tal-produzzjoni organika skont il-liġijiet u r-regolamenti elenkati fl-Anness III jew IV.

Artikolu 3

Rikonoxximent ta' ekwivalenza

1.   Fir-rigward tal-prodotti elenkati fl-Anness I, l-Unjoni tirrikonoxxi l-liġijiet u r-regolamenti taċ-Ċilì elenkati fl-Anness IV bħala ekwivalenti għal-liġijiet u r-regolamenti tagħha elenkati fl-Anness III.

2.   Fir-rigward tal-prodotti elenkati fl-Anness II, iċ-Ċilì jirrikonoxxi l-liġijiet u r-regolamenti tal-Unjoni elenkati fl-Anness III bħala ekwivalenti għal-liġijiet u r-regolamenti tiegħu elenkati fl-Anness IV.

3.   Fil-każ ta' modifika, revoka jew sostituzzjoni ta', jew żieda ma', il-liġijiet u r-regolamenti elenkati fl-Anness III jew IV, ir-regoli l-ġodda għandhom jiġu kkunsidrati bħala ekwivalenti għar-regoli tal-Parti l-oħra sakemm il-Parti l-oħra ma toġġezzjonax skont il-proċeura stipulata fil-paragrafu 4.

4.   Jekk Parti tikkunsidra li l-liġijiet, regolamenti jew proċeduri amministrattivi u l-prattiki tal-Parti l-oħra ma jibqgħux jissodisfaw ir-rekwiżiti għall-ekwivalenza, hija għandha toħroġ talba raġunata lill-Parti l-oħra biex temenda l-liġi, ir-regolament jew il-proċedura jew prattika amministrattiva rilevanti u tipprovdi qafas ta' żmien adegwat, li m'għandux ikun ta' inqas minn tliet xhur, biex tiġi żgurata l-ekwivalenza. Jekk, wara l-iskadenza ta' dak il-perjodu, il-Parti kkonċernata tkun għadha tqis li r-rekwiżiti għall-ekwivalenza ma ġewx sodisfatti, din tista' tissospendi b'mod unilaterali r-rikonoxximent tal-ekwivalenza tal-liġijiet u r-regolamenti elenkati fl-Anness III jew IV fir-rigward tal-prodotti rilevanti elenkati fl-Anness I jew II.

5.   Tista' tittieħed ukoll deċiżjoni li jiġi sospiż unilateralment ir-rikonoxximent tal-ekwivalenza tal-liġijiet u r-regolamenti elenkati fl-Anness III jew IV fir-rigward tal-prodotti rilevanti elenkati fl-Anness I jew II, wara l-iskadenza ta' perjodu ta' avviż ta' tliet xhur, meta Parti waħda ma tkunx ipprovdiet l-informazzjoni meħtieġa taħt l-Artikolu 6 jew ma taqbilx dwar reviżjoni bejn il-pari taħt l-Artikolu 7.

6.   Fir-rigward ta' prodotti mhux elenkati fl-Anness I jew II, u skont il-punt (b) tal-Artikolu 8(3), l-ekwivalenza għandha tiġi eżaminata fuq talba ta' Parti waħda mill-Kumitat Konġunt stabbilit skont l-Artikolu 8(1).

Artikolu 4

L-importazzjoni u t-tqegħid fis-suq

1.   L-Unjoni għandha taċċetta l-importazzjoni fit-territorju tagħha, u t-tqegħid fis-suq bħala prodotti organiċi, tal-prodotti elenkati fl-Anness I, sakemm dawk il-prodotti huma konformi mal-liġijiet u mar-regolamenti taċ-Ċilì elenkati fl-Anness IV u huma akkumpanjati minn ċertifikat ta' spezzjoni, kif previst fl-Anness V tar-Regolament tal-Kummissjoni (KE) Nru 1235/2008 tat-8 ta' Diċembru 2008 li jistabbilixxi r-regoli dettaljati għall-implimentazzjoni tar-Regolament tal-Kunsill (KE) Nru 834/2007 dwar l-arranġamenti għall-importazzjonijiet ta' prodotti organiċi minn pajjiżi terzi, maħruġ minn korp ta' kontroll rikonoxxut miċ-Ċilì u indikat lill-Unjoni taħt il-paragrafu 3.

2.   Iċ-Ċilì għandu jaċċetta l-importazzjoni fit-territorju tiegħu, u t-tqegħid fis-suq bħala prodotti organiċi, tal-prodotti elenkati fl-Anness II, sakemm dawk il-prodotti huma konformi mal-liġijiet u mar-regolamenti tal-Unjoni elenkati fl-Anness III u huma akkumpanjati minn ċertifikat maħruġ minn awtorità ta' kontroll jew korp ta' kontroll tal-Unjoni skont ir-Riżoluzzjoni Nru 7880 tad-Direttorat Nazzjonali tas-Servizz Agrikolu u t-Trobbija tal-Annimali, tad-29 ta' Novembru 2011, li jistabbilixxi l-kontenut minimu għaċ-ċertifikati tal-agrikoltura organika, fil-qafas tal-Liġi 20.089.

3.   Kull Parti tirrikonoxxi lill-awtoritajiet ta' kontroll jew lill-korpi ta' kontroll indikati mill-Parti l-oħra bħala responsabbli għat-twettiq tal-kontrolli rilevanti fir-rigward ta' prodotti organiċi koperti mir-rikonoxximent ta' ekwivalenza kif imsemmi fl-Artikolu 3 u għall-ħruġ ta' ċertifikat ta' spezzjoni kif imsemmi fil-paragrafi 1 u 2 ta' dan l-Artikolu bil-għan li jiġu importati u mqiegħda fis-suq fit-territorju tal-Parti l-oħra.

Il-Parti importatriċi, b'kooperazzjoni mal-Parti l-oħra, għandha tassenja kodiċijiet numeriċi lil kull awtorità ta' kontroll u korp ta' kontroll rilevanti indikati mill-Parti l-oħra.

Artikolu 5

Tikkettar

1.   Prodotti importati minn Parti waħda mill-Parti l-oħra skont dan il-Ftehim għandhom jissodisfaw ir-rekwiżiti dwar it-tikkettar stipulati fil-liġijiet u fir-regolamenti tal-Parti l-oħra elenkati fl-Annessi III u IV. Dawk il-prodotti jista' jkollhom il-logo organiku tal-Unjoni, il-logo organiku taċ-Ċilì jew iż-żewġ logos, kif stipulat fil-liġijiet u fir-regolamenti rilevanti, sakemm jikkonformaw mar-rekwiżiti tat-tikkettar għal-logo rispettiv jew għaż-żewġ logos.

2.   Il-Partijiet jimpenjaw ruħhom biex jiġi evitat kwalunkwe użu ħażin tat-termini li jirreferu għall-produzzjoni organika, inklużi derivattivi jew diminuttivi bħal “bijo” u “eko”, fir-rigward ta' prodotti li huma koperti mir-rikonoxximent tal-ekwivalenza msemmi fl-Artikolu 3.

3.   Il-Partijiet jimpenjaw ruħhom li jipproteġu l-logo organiku tal-Unjoni u l-logo organiku taċ-Ċilì stipulati fil-liġijiet u fir-regolamenti rilevanti kontra kwalunkwe użu ħażin jew imitazzjoni. Il-Partijiet għandhom jiżguraw li l-logo organiku tal-Unjoni u l-logo organiku taċ-Ċilì jintużaw biss għat-tikkettar, għar-reklamar jew għad-dokumenti kummerċjali ta' prodotti li jikkonformaw mal-liġijiet u mar-regolamenti elenkati fl-Annessi III u IV.

Artikolu 6

Skambju ta' informazzjoni

Il-Partijiet għandhom iwettqu skambji tat-tagħrif rilevanti kollu li għandu x'jaqsam mal-implimentazzjoni u l-applikazzjoni ta' dan il-Ftehim. B'mod partikolari, sal-31 ta' Marzu tat-tieni sena wara d-dħul fis-seħħ ta' dan il-Ftehim, u sussegwentement sal-31 ta' Marzu ta' kull sena, kull Parti għandha tibgħat lill-oħra:

—	rapport li jkun fih informazzjoni fir-rigward tat-tipi u l-kwantitajiet ta' prodotti organiċi esportati taħt dan il-Ftehim, li jkopri l-perjodu minn Jannar sa Diċembru tas-sena ta' qabel; kif ukoll

—	rapport dwar l-attivitajiet ta' monitoraġġ u ta' superviżjoni mwettqa mill-awtorità kompetenti, ir-riżultati miksuba u l-miżuri korrettivi meħuda, li jkopri l-perjodu minn Jannar sa Diċembru tas-sena ta' qabel.

Fi kwalunkwe ħin, kull Parti għandha tinforma mingħajr dewmien lill-Parti l-oħra dwar:

—	kwalunkwe aġġornament tal-lista tal-awtoritajiet kompetenti, awtoritajiet ta' kontroll u korpi ta' kontroll tagħhom, inklużi d-dettalji rilevanti tal-kuntatt (b'mod partikolari l-indirizz u l-indirizz tal-Internet);

—

kwalunkwe bidliet jew revoki li tkun beħsiebha twettaq fir-rigward ta' liġijiet jew regolamenti elenkati fl-Annessi III u IV, kwalunkwe proposti għal liġijiet jew regolamenti ġodda jew kwalunkwe bidliet rilevanti fi proċeduri u prattiki amministrattivi relatati ma' prodotti organiċi elenkati fl-Annessi I u II;

—	kwalunkwe bidliet jew revoki li adottat għal liġijiet jew regolamenti elenkati fl-Annessi III u IV, kwalunkwe leġiżlazzjoni ġdida jew bidliet rilevanti fi proċeduri u prattiki amministrattivi relatati ma' prodotti organiċi elenkati fl-Annessi I u II; kif ukoll dwar

—	kwalunkwe bidliet fl-indirizzi tal-Internet stabbiliti fl-Anness V.

Artikolu 7

Reviżjonijiet bejn il-pari

1.   Wara avviż bil-quddiem ta' mill-inqas tliet xhur, kull Parti għandha tippermetti lill-uffiċjali jew esperti nominati mill-Parti l-oħra jwettqu reviżjonijiet bejn il-pari fit-territorju tagħha biex tivverifika li l-awtoritajiet ta' kontroll u l-korpi ta' kontroll rilevanti jkunu qed iwettqu l-kontrolli meħtieġa taħt dan il-Ftehim.

2.   Kull Parti għandha tikkoopera ma', u tassisti lil, il-Parti l-oħra, safejn huwa permess skont il-liġi applikabbli, fit-twettiq tar-reviżjonijiet bejn il-pari msemmija fil-paragrafu 1, li jistgħu jinkludu żjarat f'uffiċċji tal-awtoritajiet ta' kontroll u tal-korpi ta' kontroll rilevanti, ta' faċilitajiet tal-ipproċessar u ta' operaturi ċertifikati.

Artikolu 8

Kumitat Konġunt dwar il-Prodotti Organiċi

1.   Il-Partijiet b'dan jistabbilixxu Kumitat Konġunt dwar il-Prodotti Organiċi (“il-Kumitat Konġunt”) magħmul minn rappreżentanti, maħturin kif xieraq, tal-Unjoni, minn naħa waħda, u tal-Gvern taċ-Ċilì, min-naħa l-oħra.

2.   Għandhom isiru konsultazzjonijiet fil-Kumitat Konġunt sabiex l-implimentazzjoni tiġi faċilitata u biex l-għan ta' dan il-Ftehim jitmexxa 'l-quddiem.

3.   Il-funzjonijiet tal-Kumitat Konġunt għandhom ikunu li:

(a)	jimmaniġġja dan il-Ftehim, billi jieħu d-deċiżjonijiet meħtieġa għall-implimentazzjoni u l-funzjonament tajjeb tiegħu;

(b)	jeżamina kwalunkwe talba minn Parti waħda biex jaġġorna, jew jestendi għal prodotti ġodda, il-lista ta' prodotti fl-Anness I jew II u li jadotta deċiżjoni biex jimmodifika l-Anness I jew II jekk l-ekwivalenza tkun rikonoxxuta mill-Parti l-oħra;

(c)

jsaħħaħ il-kooperazzjoni dwar il-liġijiet, ir-regolamenti, l-istandards u l-proċeduri tal-valutazzjoni tal-konformità fir-rigward tal-produzzjoni organika, li għaliha għandu jiddiskuti kwalunkwe kwistjoni teknika jew regolatorja oħra relatata mar-regoli tal-produzzjoni organika u mas-sistemi ta' kontroll bil-ħsieb li tiżdied il-konverġenza bejn il-liġijiet, ir-regolamenti u l-istandards;

(d)	jikkunsidra kwalunkwe kwistjoni oħra fir-rigward tal-implimentazzjoni ta' dan il-Ftehim.

4.   Il-Partijiet għandhom, skont il-liġijiet u r-regolamenti rispettivi tagħhom, jimplimentaw id-deċiżjonijiet adottati mill-Kumitat Konġunt taħt il-punt (b) tal-paragrafu 3 u jinfurmaw lil xulxin b'dan fi żmien tliet xhur mid-data tal-adozzjoni tagħhom (1).

5.   Il-Kumitat Konġunt għandu jopera permezz ta' konsensus. Għandu jadotta r-regoli ta' proċedura tiegħu. Jista' jistabbilixxi sottokumitati u gruppi ta' ħidma biex jittrattaw kwistjonijiet speċifiċi.

6.   Il-Kumitat Konġunt għandu jinforma lill-Kumitat dwar Standards, Regolamenti Tekniċi u Stima ta' Konformità stabbilit fl-Artikolu 88 tal-Ftehim li jistabbilixxi assoċjazzjoni bejn il-Komunità Ewropea u l-Istati Membri tagħha, minn naħa waħda, u r-Repubblika taċ-Ċilì, min-naħa l-oħra, dwar id-deċiżjonijiet u x-xogħol tiegħu.

7.   Il-Kumitat Konġunt għandu jiltaqa' darba f'sena, fl-Unjoni u fiċ-Ċilì b'mod alternat, f'data li dwarha jsir qbil reċiprokament. Jekk iż-żewġ Partijiet jaqblu, tista' ssir laqgħa tal-Kumitat Konġunt permezz ta' vidjo jew telekonferenza.

8.   Il-Kumitat Konġunt għandu jiġi kopresedut miż-żewġ Partijiet.

Artikolu 9

Soluzzjoni ta' tilwim

Kwalunkwe tilwima dwar l-interpretazzjoni jew l-applikazzjoni ta' dan il-Ftehim għandha tiġi riżolta permezz ta' konsultazzjonijiet bejn il-Partijiet fi ħdan il-Kumitat Konġunt. Il-Partijiet għandhom jippreżentaw lill-Kumitat Konġunt l-informazzjoni rilevanti meħtieġa għal eżami bir-reqqa tal-kwistjoni, bil-għan li tiġi riżolta t-tilwima.

Artikolu 10

Kunfidenzjalità

Ir-rappreżentanti, esperti u aġenti oħra tal-Partijiet għandhom ikunu meħtieġa, anke wara li jkunu temmew id-doveri tagħhom, li ma jiżvelaw ebda tagħrif miksub fil-qafas ta' dan il-Ftehim li jkun kopert mill-obbligu tas-segretezza professjonali.

Artikolu 11

Reviżjoni

1.   Fejn xi waħda mill-Partijiet tfittex li ssir reviżjoni ta' dan il-Ftehim, għandha tissottometti talba raġunata lill-Parti l-oħra.

2.   Il-Partijiet jistgħu jafdaw lill-Kumitat Konġunt bil-kompitu li jikkunsidra kwalunkwe tali talba u, jekk xieraq, li jagħmel rakkomandazzjonijiet, b'mod partikolari bil-għan li jinfetħu negozjati fuq partijiet ta' dan il-Ftehim li ma jistgħux jinbidlu skont il-punt (b) tal-Artikolu 8(3).

Artikolu 12

Implimentazzjoni tal-Ftehim

Il-Partijiet għandhom jieħdu l-passi kollha, kemm jekk ġenerali kif ukoll jekk speċifiċi, biex jiżguraw il-konformità mal-obbligi taħt dan il-Ftehim. Huma għandhom jastjenu minn kwalunkwe miżura li tkun tista' tipperikola t-twettiq tal-għan ta' dan il-Ftehim.

Artikolu 13

Annessi

L-Annessi ta' dan il-Ftehim għandhom jifformaw parti integrali minnu.

Artikolu 14

Kamp ta' applikazzjoni territorjali

Dan il-Ftehim għandu japplika, minn naħa waħda, għat-territorji li fihom jiġi applikat it-Trattat dwar il-Funzjonament tal-Unjoni Ewropea u taħt il-kundizzjonijiet stabbiliti f'dak it-Trattat u, min-naħa l-oħra, għat-territorju taċ-Ċilì.

Artikolu 15

Dħul fis-seħħ u tul ta' żmien

Dan il-Ftehim għandu jidħol fis-seħħ fl-ewwel jum tat-tielet xahar wara l-aħħar notifika tat-tlestija tal-proċeduri interni meħtieġa minn kull Parti.

Dan il-Ftehim huwa konkluż għal perjodu inizjali ta' tliet snin. Huwa jiġi mġedded indefinittivament sakemm l-Unjoni jew iċ-Ċilì ma jinnotifikawx lill-Parti l-oħra b'oġġezzjoni tagħhom għal tali tiġdid qabel jiskadi l-perjodu inizjali.

Kwalunkwe Parti tista' tinnotifika lill-Parti l-oħra bil-miktub dwar l-intenzjoni tagħha li tiddenunzja dan il-Ftehim. Id-denunzja għandha ssir effettiva tliet xhur wara n-notifika.

Artikolu 16

Testi awtentiċi

Dan il-Ftehim huwa ffirmat f'żewġ eżemplari bl-Ingliż u bl-Ispanjol, b'kull test ikun ugwalment awtentiku.

---

(1)  Iċ-Ċilì għandu jimplimenta d-deċiżjonijiet tal-Kumitat Konġunt permezz tal-Acuerdos de Ejecución, skont l-Artikolu 54, punt 1, ir-raba' paragrafu tal-Kostituzzjoni Politika tar-Repubblika taċ-Ċilì (Constitución Política de la República de Chile).

---

---

---

---

---

---

14.12.2017

MT

Il-Ġurnal Uffiċjali tal-Unjoni Ewropea

L 331/19

---

REGOLAMENT TA' IMPLIMENTAZZJONI TAL-KUMMISSJONI (UE) 2017/2308

tat-13 ta' Diċembru 2017

dwar l-awtorizzazzjoni ta' preparat ta' Bacillus subtilis (DSM 5750) u Bacillus licheniformis (DSM 5749) bħala addittiv fl-għalf għall-ħnienes mhux miftuma (detentur tal-awtorizzazzjoni Chr. Hansen A/S)

(Test b'rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (KE) Nru 1831/2003 tal-Parlament Ewropew u tal-Kunsill tat-22 ta' Settembru 2003 fuq l-addittivi għall-użu fl-għalf tal-annimali (1), u b'mod partikulari l-Artikolu 9(2) tiegħu,

Billi:

(1)

Ir-Regolament (KE) Nru 1831/2003 jipprevedi l-awtorizzazzjoni tal-addittivi għall-użu fl-għalf tal-annimali u r-raġunijiet u l-proċeduri għall-għoti ta' din l-awtorizzazzjoni. L-Artikolu 10 ta' dak ir-Regolament jipprevedi l-evalwazzjoni mill-ġdid ta' addittivi awtorizzati skont id-Direttiva tal-Kunsill 70/524/KEE (2).

(2)

Il-preparat ta' Bacillus subtilis (DSM 5750) u Bacillus licheniformis (DSM 5749) kien awtorizzat bla limitu ta' żmien skont id-Direttiva 70/524/KEE bħala addittiv tal-għalf, għall-ħnieżer tat-tismin u għall-ħnienes bir-Regolament tal-Kummissjoni (KE) Nru 2148/2004 (3). Għaldaqstant, dak il-preparat iddaħħal fir-Reġistru tal-addittivi tal-għalf bħala prodott eżistenti, skont l-Artikolu 10(1) tar-Regolament (KE) Nru 1831/2003. Dan il-preparat kien awtorizzat għal għaxar snin għall-ħnienes miftuma, għall-ħnieżer tas-simna, għall-ħnieżer nisa, għall-għoġġiela għat-trobbija u għad-dundjani għat-tismin bir-Regolament ta' Implimentazzjoni tal-Kummissjoni (UE) 2017/447 (4).

(3)

B'konformità mal-Artikolu 10(2) tar-Regolament (KE) Nru 1831/2003 flimkien mal-Artikolu 7 ta' dak ir-Regolament, tressqet applikazzjoni għall-evalwazzjoni mill-ġdid tal-preparat ta' Bacillus subtilis (DSM 5750) u Bacillus licheniformis (DSM 5749) bħala addittiv tal-għalf għall-ħnienes. L-applikazzjoni kienet ukoll għall-valutazzjoni ta' dan il-preparat għal użu ġdid fl-ilma tax-xorb. L-applikant talab li l-addittiv jiġi kklassifikat fil-kategorija tal-addittivi “addittivi żootekniċi”. Ma' dik l-applikazzjoni ntbagħtu wkoll id-dettalji u d-dokumenti meħtieġa skont l-Artikolu 7(3) tar-Regolament (KE) Nru 1831/2003.

(4)

Fl-opinjoni tagħha tat-12 ta' Lulju 2016 (5), l-Awtorità Ewropea dwar is-Sigurtà fl-Ikel (“l-Awtorità”) ikkonkludiet li skont il-kundizzjonijiet proposti tal-użu, il-preparat ta' Bacillus subtilis (DSM 5750) u Bacillus licheniformis (DSM 5749) ma għandux effett avvers fuq saħħet l-annimali, fuq saħħet il-bniedem jew fuq l-ambjent. L-awtorità qieset li l-addittiv għandu l-potenzjal li jtejjeb iż-żieda fil-piż tal-ħnienes mhux miftuma meta jintuża fl-għalf jew fl-ilma tax-xorb. L-Awtorità tqis li ma hemmx bżonn ta' rekwiżiti speċifiċi għas-sorveljanza ta' wara t-tqegħid fis-suq. Hija vverifikat ukoll ir-rapport dwar il-metodu tal-analiżi tal-addittiv tal-għalf, fl-għalf li ġie ppreżentat mil-Laboratorju ta' Referenza stabbilit bir-Regolament (KE) Nru 1831/2003.

(5)

Il-valutazzjoni tal-preparat ta' Bacillus subtilis (DSM 5750) u Bacillus licheniformis (DSM 5749) turi li l-kundizzjonijiet għall-awtorizzazzjoni, kif previsti fl-Artikolu 5 tar-Regolament (KE) Nru 1831/2003, huma ssodisfati. Għaldaqstant, jenħtieġ li l-użu ta' dak il-preparat jiġi awtorizzat kif speċifikat fl-Anness ta' dan ir-Regolament.

(6)	Il-miżuri previsti f'dan ir-Regolament huma konformi mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

ADOTTAT DAN IR-REGOLAMENT:

Artikolu 1

Awtorizzazzjoni

Il-preparat speċifikat fl-Anness, li jifforma parti mill-kategorija tal-addittivi “addittivi żootekniċi” u mill-grupp funzjonali “stabbilizzanti għall-batterja li jkun hemm fil-musrana”, huwa awtorizzat bħala addittiv fl-għalf tal-annimali, soġġett għall-kundizzjonijiet stipulati f'dak l-Anness.

Artikolu 2

Dħul fis-seħħ

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

---

(1)  ĠU L 268, 18.10.2003, p. 29.

(2)  Id-Direttiva tal-Kunsill 70/524/KEE tat-23 ta' Novembru 1970 li tirrigwarda adittivi f'għalf għall-bhejjem (ĠU L 270, 14.12.1970, p. 1).

(3)  Ir-Regolament tal-Kummissjoni (KE) Nru 2148/2004 tas-16 ta' Diċembru 2004 dwar l-awtorizzazzjonijiet permanenti u proviżorji ta' ċerti addittivi u l-awtorizzazzjoni ta' użi ġodda ta' addittiv diġà awtorizzat fl-għalf tal-bhejjem (ĠU L 370, 17.12.2004, p. 24).

(4)  Ir-Regolament ta' Implimentazzjoni tal-Kummissjoni (UE) 2017/447 tal-14 ta' Marzu 2017 li jikkonċerna l-awtorizzazzjoni ta' preparazzjoni ta' Bacillus subtilis (DSM 5750) u Bacillus licheniformis (DSM 5749) bħala addittiv tal-għalf għall-ħnieżer nisa, għall-ħnienes miftuma, għall-ħnieżer għas-simna, għall-għoġġiela għat-trobbija u għad-dundjani għas-simna u li jemenda r-Regolamenti (KE) Nru 1453/2004, (KE) Nru 2148/2004 u (KE) Nru 600/2005 (detentur tal-awtorizzazzjoni Chr. Hansen A/S) (ĠU L 69, 15.3.2017, p. 19).

(5)  EFSA Journal 2016; 14(9):4558.

---

---

14.12.2017

MT

Il-Ġurnal Uffiċjali tal-Unjoni Ewropea

L 331/23

---

REGOLAMENT TA' IMPLIMENTAZZJONI TAL-KUMMISSJONI (UE) 2017/2309

tat-13 ta' Diċembru 2017

għat-twettiq ta' tnaqqis mill-kwoti tas-sajd disponibbli għal ċerti stokkijiet fl-2017 minħabba sajd eċċessiv ta' stokkijiet oħrajn fis-snin ta' qabel u li jemenda r-Regolament ta' Implimentazzjoni (UE) 2017/1345

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament tal-Kunsill (KE) Nru 1224/2009 tal-20 ta' Novembru 2009 li jistabbilixxi sistema Komunitarja ta' kontroll għall-iżgurar tal-konformità mar-regoli tal-Politika Komuni tas-Sajd, li jemenda r-Regolamenti (KE) Nru 847/96, (KE) Nru 2371/2002, (KE) Nru 811/2004, (KE) Nru 768/2005, (KE) Nru 2115/2005, (KE) Nru 2166/2005, (KE) Nru 388/2006, (KE) Nru 509/2007, (KE) Nru 676/2007, (KE) Nru 1098/2007, (KE) Nru 1300/2008, (KE) Nru 1342/2008 u li jħassar ir-Regolamenti (KEE) Nru 2847/93, (KE) Nru 1627/94 u (KE) Nru 1966/2006 (1), u b'mod partikolari l-Artikolu 105(1), (2), (3) u (5) tiegħu,

Billi:

(1)	Il-kwoti tas-sajd għas-sena 2016 ġew stabbiliti bir-Regolamenti li ġejjin: — ir-Regolament tal-Kunsill (UE) Nru 1367/2014 (2), — Ir-Regolament tal-Kunsill (UE) 2015/2072 (3), — Ir-Regolament tal-Kunsill (UE) 2016/72 (4), u — Ir-Regolament tal-Kunsill (UE) 2016/73 (5).

(2)	Il-kwoti tas-sajd għas-sena 2017 ġew stabbiliti bir-Regolamenti li ġejjin: — Ir-Regolament tal-Kunsill (UE) 2016/1903 (6), — Ir-Regolament tal-Kunsill (UE) 2016/2285 (7), — Ir-Regolament tal-Kunsill (UE) 2016/2372 (8), u — Ir-Regolament tal-Kunsill (UE) 2017/127 (9).

(3)	Skont l-Artikolu 105(1) tar-Regolament (KE) Nru 1224/2009, meta l-Kummissjoni tkun stabbiliet li Stat Membru jkun qabeż il-kwoti tas-sajd li kienu allokati lilu, il-Kummissjoni għandha tnaqqas il-kwoti tas-sajd futuri ta' dak l-Istat Membru.

(4)	Ir-Regolament ta' Implimentazzjoni tal-Kummissjoni (UE) 2017/1345 (10) stabbilixxa tnaqqis ta' kwoti tas-sajd għal ċerti stokkijiet fl-2017 minħabba sajd eċċessiv ta' dawk l-istokkijiet fis-snin ta' qabel.

(5)	Madankollu, għal ċerti Stati Membri ma seta' jsir ebda tnaqqis bir-Regolament ta' Implimentazzjoni (UE) 2017/1345 mill-kwoti allokati għall-istokkijiet li nstadu b'mod eċċessiv, għaliex dawn il-kwoti mhumiex disponibbli għal dawk l-Istati Membri fis-sena 2017.

(6)

L-Artikolu 105(5) tar-Regolament (KE) Nru 1224/2009 jistipula li, jekk ma jkunx possibbli li jsir tnaqqis fuq l-istokk li nstad b'mod eċċessiv fis-sena ta' wara dik is-sena fejn sar is-sajd eċċessiv, għaliex l-Istat Membru kkonċernat ma għandux kwota disponibbli, it-tnaqqis għandu jsir fuq stokkijiet oħrajn fl-istess żona ġeografika jew bl-istess valur kummerċjali. Skont il-Komunikazzjoni tal-Kummissjoni 2012/C 72/07 (11) jenħtieġ li t-tali tnaqqis preferibbilment isir minn kwoti allokati għal stokkijiet mistada mill-istess flotta li tkun wettqet is-sajd li jeċċedi l-kwota, filwaqt li jitqies il-bżonn li jiġi evitat l-iskartar tal-ħut fis-sajd imħallat.

(7)	L-Istati Membri kkonċernati ġew ikkonsultati dwar it-tnaqqis propost minn kwoti allokati għal stokkijiet oħrajn differenti minn dawk li kienu suġġetti għas-sajd eċċessiv.

(8)

Fl-2016, Spanja stadet aktar mill-kwota tagħha għall-marlin abjad fl-Oċean Atlantiku (WHM/ATLANT). It-tnaqqis dovut ġie applikat wara r-Regolament ta' Implimentazzjoni (UE) 2017/1345 sal-massimu tal-kwota disponibbli għall-marlin abjad fl-2017, f'konformità mal-linji gwida stabbiliti fil-Komunikazzjoni 2012/C 72/07. Billi l-kwota tal-marlin abjad għall-2017 fl-Oċean Atlantiku mhijiex suffiċjenti, Spanja, permezz ta' ittra bid-data tad-9 ta' Awwissu 2017, talbet li jiġi applikat it-tnaqqis li jifdal, inkluż tnaqqis pendenti mis-snin preċedenti, fuq il-kwota tal-pixxispad għall-2017 fl-Oċean Atlantiku, fit-Tramuntana ta' 5° N (SWO/AN05N). Dik it-talba jenħtieġ li tiġi aċċettata f'konformità mal-Artikolu 105(5) tar-Regolament (KE) Nru 1224/2009.

(9)

Fl-2016, Spanja stadet aktar mill-kwota tagħha għall-alonga fl-Oċean Atlantiku, fit-Tramuntana ta' 5° N (ALB/AN05N). Permezz ta' ittra tal-20 ta' Lulju 2017, Spanja talbet li jitqassam it-tnaqqis dovut fuq tliet snin. Fid-dawl tal-informazzjoni li ngħatat u meta wieħed iqis li l-paragrafu 5 tar-Rakkomandazzjoni Supplementari 13-05 tal-ICCAT, fir-rigward tal-programm ta' reabilitazzjoni tal-alonga tat-Tramuntana tal-Atlantiku (12), jistabbilixxi li s-sajd żejjed għandu jitnaqqas fi żmien massimu ta' sentejn, it-tixrid ugwali tat-tnaqqis fuq perjodu ta' sentejn jista'eċċezzjonalment jiġi aċċettat b'mod alternattiv.

(10)

Barra minn hekk, l-awtoritajiet tas-sajd Spanjoli skoprew li ċ-ċifri dwar il-qbid għall-2016 mibgħuta lill-Kummissjoni għall-alonga fl-Oċean Atlantiku, fit-Tramuntana ta' 5° N, kienu żbaljati. Abbażi tad-dejta kkoreġuta trażmessa minn Spanja fl-4 ta' Awwissu 2017, jidher li l-kwota ta' Spanja għall-alonga fl-Oċean Atlantiku, fit-Tramuntana ta' 5° N, inqabżet b'ammont iżgħar minn dak ikkunsidrat għat-tnaqqis stabbilit bir-Regolament ta' Implimentazzjoni (UE) 2017/1345. It-tnaqqis mill-kwota Spanjola tal-2017 għall-alonga fl-Oċean Atlantiku, fit-Tramuntana ta' 5° N, għalhekk jenħtieġ li jiġi aġġustat.

(11)

Wara l-pubblikazzjoni tar-Regolament ta' Implimentazzjoni (UE) 2017/1345, l-awtoritajiet Portugiżi sabu li ċ-ċifri għall-qabda tal-2016 trażmessi lill-Kummissjoni għall-pixxispad fl-Oċean Atlantiku, fit-Tramuntana ta' 5° N, (SWO/AN05N) kienu żbaljati. Abbażi tad-dejta kkoreġuta mibgħuta mill-Portugall fit-22 ta' Awwissu 2017, jidher li l-kwota Portugiża għall-pixxispad fl-Oċean Atlantiku, fit-Tramuntana ta' 5° N, inqabżet b'ammont iżgħar minn dak ikkunsidrat għat-tnaqqis stabbilit bir-Regolament ta' Implimentazzjoni (UE) 2017/1345. It-tnaqqis fil-kwota Portugiża għall-2017 għall-pixxispad fl-Oċean Atlantiku, fit-Tramuntana ta' 5° N, għalhekk jenħtieġ li jiġi aġġustat.

(12)

Fis-17 ta' Mejju 2017, il-Litwanja talbet biex jiġu aġġornati id-dikjarazzjonijiet tal-qabdiet tagħha rigward il-kavalli fl-ilmijiet tal-Unjoni IIa; l-ilmijiet tal-Unjoni u l-ilmijiet Norveġiżi IVa (MAC/* 4 A-EN). Abbażi ta' dejta aġġornata mibgħuta mil-Litwanja fl-istess data, jidher li l-kwota Litwana għall-2016 inqabżet għall-kavalli fl-ilmijiet tal-Unjoni IIa; L-ilmijiet tal-Unjoni u l-ilmijiet Norveġiżi IVa kif ukoll l-istokk ġenitur, jiġifieri l-kavalli fiż-żoni VI, VII, VIIIa, VIIIb, VIIId u VIIIe; l-ilmijiet tal-Unjoni u l-ilmijiet internazzjonali ta' Vb; l-ilmijiet internazzjonali ta' IIa, XII u XIV (MAC/2CX14-). It-tnaqqis korrispondenti għaldaqstant jenħtieġ li jiġi miżjud mal-Anness tar-Regolament ta' Implimentazzjoni (UE) 2017/1345.

(13)

Fl-10 ta' Awwissu 2017, ir-Renju Unit informa lill-Kummissjoni li l-qabdiet inċidentali ta' mazzola griża fl-ilmijiet tal-Unjoni u f'dawk internazzjonali taż-żoni I, V, VI, VII, VIII, XII u XIV (DGS/* 15X14) kienu ġew irrappurtati b'mod żbaljat. Wara l-korrezzjonijiet ippreżentati fit-30 ta' Awwissu 2017 mir-Renju Unit f'sistema ta' rappurtar tad-dejta dwar il-qabdiet aggregati, jidher li l-użu ta' qabdiet inċidentali ta' mazzola griża fl-ilmijiet tal-Unjoni u f'dawk internazzjonali taż-żoni I, V, VI, VII, VIII, XII u XIV, baqa' taħt il-kwota allokata għall-2016. Għalhekk, jenħtieġ li t-tnaqqis korrispondenti jitneħħa mill-Anness tar-Regolament ta' Implimentazzjoni (UE) 2017/1345.

(14)

F'Ottubru 2017, korrezzjoni fl-algoritmi tas-sistema ta' rappurtar tad-dejta dwar il-qabdiet aggregati kixfet is-sajd żejjed mid-Danimarka tal-gamblu tat-Tramuntana fl-ilmijiet ta' Greenland fiż-żona NAFO 1 (PRA/N1GRN.). Għaldaqstant, jenħtieġ li l-Anness tar-Regolament ta' Implimentazzjoni (UE) 2017/1345 jiġi emendat skont dan.

(15)

Wara bidliet fid-definizzjonijiet taż-żoni tal-istokk stabbiliti fir-Regolament (UE) 2017/127 sabiex jippermettu r-rappurtar preċiż tal-qabdiet, it-tnaqqis applikabbli lin-Netherlands għal sajd żejjed tal-pollakkju iswed fiż-żoni III u IV; fl-ilmijiet tal-Unjoni IIa, IIIb, IIIc u fl-ilmijiet tas-subdiviżjonijiet 22-32 (POK/2A34) fis-sena 2016 jenħtieġ li issa jiġi applikat għall-kwota tal-pollakkju iswed għall-2017 fiż-żoni IIIa u IV; l-ilmijiet tal-Unjoni IIa (POK/2C3A4).

(16)

Fl-2017, il-Kunsill Internazzjonali għall-Esplorazzjoni tal-Baħar (ICES), fil-parir tiegħu u skont il-punt ta' riferiment għall-2016, kien emenda ż-żoni ta' ġestjoni taċ-ċiċċirell. Għalhekk, it-tnaqqis dovut mid-Danimarka u r-Renju Unit wara s-sajd żejjed għaċ-ċiċċirell fl-ilmijiet tal-Unjoni fiż-żona ta' ġestjoni 1 għaċ-ċiċċirell (SAN/234_1) fl-2016 huwa mħaddem fuq il-kwota tal-2017 għaċ-ċiċċirell fl-ilmijiet tal-Unjoni taż-żona tal-ġestjoni taċ-ċiċċirell 1r (SAN234_1R).

(17)

Barra minn hekk, ċertu tnaqqis stipulat mir-Regolament ta' Implimentazzjoni (UE) 2017/1345 jidher li huwa akbar mill-kwota addattata disponibbli għas-sena 2017 u, b'riżultat ta' dan, it-tnaqqis ma jistax isir kollu f'dik is-sena. Skont il-Komunikazzjoni Nru 2012/C 72/07, jenħtieġ li l-ammonti li jifdal jitnaqqsu mill-kwoti addattati disponibbli għas-snin ta' wara sa ma jintradd lura l-ammont kollu tas-sajd eċċessiv.

(18)	Għaldaqstant, jenħtieġ li r-Regolament ta' Implimentazzjoni (UE) 2017/1345 jiġi emendat skont dan,

ADOTTAT DAN IR-REGOLAMENT:

Artikolu 1

Il-kwoti tas-sajd għas-sena 2017 li huma stabbiliti fir-Regolamenti (UE) 2016/1903, (UE) 2016/2285, (UE) 2016/2372 u (UE) 2017/127 li hemm referenza għalihom fl-Anness I ta' dan ir-Regolament għandhom jitnaqqsu permezz tat-twettiq tat-tnaqqis tal-istokkijiet alternattivi stipulati f'dak l-Anness.

Artikolu 2

L-Anness tar-Regolament ta' Implimentazzjoni (UE) 2017/1345 jinbidel bit-test fl-Anness II ta' dan ir-Regolament.

Artikolu 3

Dan ir-Regolament għandu jidħol fis-seħħ fis-seba' jum wara l-pubblikazzjoni tiegħu f'Il-Ġurnal Uffiċjali tal-Unjoni Ewropea.

---

(1)  ĠU L 343, 22.12.2009, p. 1.

(2)  Ir-Regolament tal-Kunsill (UE) Nru 1367/2014 tal-15 ta' Diċembru 2014 li jiffissa għall-2015 u l-2016 l-opportunitajiet tas-sajd għall-bastimenti tal-UE għal ċerti stokkijiet ta' ħut tal-baħar fond (ĠU L 366, 20.12.2014, p. 1).

(3)  Ir-Regolament tal-Kunsill (UE) 2015/2072 tas-17 ta' Novembru 2015 li jiffissa l-opportunitajiet tas-sajd għall-2016 għal ċerti stokkijiet ta' ħut u gruppi ta' stokkijiet ta' ħut applikabbli fil-Baħar Baltiku u li jemenda r-Regolamenti (UE) Nru 1221/2014 u (UE) 2015/104 (ĠU L 302, 19.11.2015, p. 1).

(4)  Ir-Regolament tal-Kunsill (UE) 2016/72 tat-22 ta' Jannar 2016 li jistabbilixxi l-opportunitajiet tas-sajd għall-2016 għal ċerti stokkijiet tal-ħut u ċerti gruppi ta' stokkijiet tal-ħut, applikabbli fl-ilmijiet tal-Unjoni u, għal bastimenti tas-sajd tal-Unjoni, f'ċerti ilmijiet mhux tal-Unjoni, u li jemenda r-Regolament (UE) 2015/104 (ĠU L 22, 28.1.2016, p. 1).

(5)  Ir-Regolament tal-Kunsill (UE) 2016/73 tat-18 ta' Jannar 2016 li jistabbilixxi l-opportunitajiet tas-sajd għall-2016 għal ċerti stokkijiet tal-ħut fil-Baħar l-Iswed (ĠU L 16, 23.1.2016, p. 1).

(6)  ir-Regolament tal-Kunsill (UE) 2016/1903 tat-28 ta' Ottubru 2016 li jiffissa l-opportunitajiet tas-sajd għall-2017 għal ċerti stokkijiet ta' ħut u gruppi ta' stokkijiet ta' ħut applikabbli fil-Baħar Baltiku u li jemenda r-Regolament (UE) 2016/72 (ĠU L 295, 29.10.2016, p. 1).

(7)  ir-Regolament tal-Kunsill (UE) 2016/2285 tat-12 ta' Diċembru 2016 li jiffissa għall-2017 u l-2018 l-opportunitajiet tas-sajd għall-bastimenti tas-sajd tal-Unjoni għal ċerti stokkijiet ta' ħut tal-fond u li jemenda r-Regolament (UE) 2016/72 (ĠU L 344, 17.12.2016, p. 32).

(8)  ir-Regolament tal-Kunsill (UE) 2016/2372 tad-tad-19 ta' Diċembru 2016 li jiffissa l-opportunitajiet tas-sajd għall-2017 għal ċerti stokkijiet ta' ħut u gruppi ta' stokkijiet ta' ħut fil-Baħar l-Iswed (ĠU L 352, 23.12.2016, p. 26).

(9)  Ir-Regolament tal-Kunsill (UE) 2017/127 tal-20 ta' Jannar 2017 li jistabbilixxi għall-2017 l-opportunitajiet tas-sajd għal ċerti stokkijiet tal-ħut u ċerti gruppi ta' stokkijiet tal-ħut, applikabbli fl-ilmijiet tal-Unjoni u, għal bastimenti tas-sajd tal-Unjoni, f'ċerti ilmijiet mhux tal-Unjoni (ĠU L 24, 28.1.2017, p. 1).

(10)  Ir-Regolament ta' Implimentazzjoni tal-Kummissjoni (UE) 2017/1345 tat-18 ta' Lulju 2017 li jwettaq tnaqqis tal-kwoti tas-sajd disponibbli għal ċerti stokkijiet fl-2017 minħabba sajd żejjed fis-snin preċedenti (ĠU L 186, 19.7.2017, p. 6).

(11)  Komunikazzjoni tal-Kummissjoni – Linji Gwida għat-tnaqqis tal-kwoti skont l-Artikolu 105(1), (2) u (5) tar-Regolament (KE) Nru 1224/2009 (2012/C 72/07) (ĠU C 72, 10.3.2012, p. 27).

(12)  https://www.iccat.int/Documents/Recs/compendiopdf-e/2013-05-e.pdf

---

---

---

14.12.2017

MT

Il-Ġurnal Uffiċjali tal-Unjoni Ewropea

L 331/36

---

REGOLAMENT TA' IMPLIMENTAZZJONI TAL-KUMMISSJONI (UE) 2017/2310

tat-13 ta' Diċembru 2017

li jiftaħ il-kwota tariffarja għall-2018 għall-importazzjoni, fl-Unjoni Ewropea, ta' ċerti oġġetti li joriġinaw min-Norveġja li ġejjin mill-ipproċessar ta' prodotti agrikoli koperti mir-Regolament (UE) Nru 510/2014 tal-Parlament Ewropew u tal-Kunsill

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) Nru 510/2014 tal-Parlament Ewropew u tal-Kunsill tas-16 ta' April 2014 li jistabbilixxi l-arranġamenti kummerċjali applikabbli għal ċerti prodotti li jirriżultaw mill-ipproċessar tal-prodotti agrikoli u jħassar ir-Regolamenti tal-Kunsill (KE) Nru 1216/2009 u (KE) Nru 614/2009 (1), u b'mod partikolari l-Artikolu 16(1)(a) tiegħu,

Wara li kkunsidrat id-Deċiżjoni tal-Kunsill 2004/859/KE tal-25 ta' Ottubru 2004 dwar il-konklużjoni ta' Ftehim fl-għamla ta' Skambju ta' Ittri bejn il-Komunità Ewropea u r-Renju tan-Norveġja fuq il-Protokoll 2 għall-Ftehim Bilaterali dwar il-Kummerċ Ħieles bejn il-Komunità Ekonomika Ewropea u r-Renju tan-Norveġja (2), u b'mod partikolari l-Artikolu 3 tagħha,

Billi:

(1)

Il-Protokoll 2 għall-Ftehim bejn il-Komunità Ekonomika Ewropea u r-Renju tan-Norveġja tal-14 ta' Mejju 1973 (3) (“il-Ftehim Bilaterali dwar il-Kummerċ Ħieles bejn il-Komunità Ekonomika Ewropea u r-Renju tan-Norveġja”) u l-Protokoll 3 tal-Ftehim ŻEE (4) jiddeterminaw l-arranġamenti kummerċjali għal ċerti prodotti agrikoli u prodotti agrikoli pproċessati bejn il-Partijiet Kontraenti.

(2)

Il-Protokoll 3 għall-Ftehim ŻEE jipprevedi dazju b'rata żero għall-ilmijiet li jkollhom iz-zokkor jew materjal ta' taħlil ieħor miżjud magħhom jew li jkunu mogħtija t-togħma, li jaqgħu taħt il-kodiċi NM 2202 10 00, u għal xarbiet mhux alkoħoliċi oħrajn, li jaqgħu taħt il-kodiċi NM 2202 91 00 u 2202 99 li ma fihomx prodotti li jaqgħu taħt l-intestaturi 0401 sa 0404 jew xaħam miksub minn prodotti li jaqgħu taħt l-intestaturi 0401 sa 0404.

(3)

Id-dazju b'rata żero għal dawk l-ilmijiet u għal dawk ix-xarbiet l-oħra ġie sospiż temporanjament għan-Norveġja għal perjodu ta' żmien illimitat permezz tal-Ftehim fl-għamla ta' Skambju ta' Ittri bejn il-Komunità Ewropea u r-Renju tan-Norveġja dwar il-Protokoll 2 għall-Ftehim Bilaterali dwar il-Kummerċ Ħieles bejn il-Komunità Ekonomika Ewropea u r-Renju tan-Norveġja (5) (minn hawn 'il quddiem imsejjaħ “il-Ftehim fl-għamla ta' Skambju ta' Ittri”), li ġie approvat bid-Deċiżjoni 2004/859/KE. F'konformità mal-Ftehim fl-għamla ta' Skambju ta' Ittri, l-importazzjonijiet bla dazju ta' oġġetti li jaqgħu taħt il-kodiċijiet NM 2202 10 00, ex 2202 91 00 u ex 2202 99 li joriġinaw fin-Norveġja għandhom jiġu permessi biss fil-limiti ta' kwota bla dazju. Għandu jitħallas dazju fuq l-importazzjonijiet li jaqbżu l-allokazzjoni tal-kwota.

(4)	Ir-Regolament ta' Implimentazzjoni tal-Kummissjoni (UE) 2016/2034 (6) fetaħ kwota tariffarja għall-2017 għall-importazzjoni fl-Unjoni ta' oġġetti li jaqgħu taħt il-kodiċijiet NM 2202 10 00, ex 2202 91 00 u ex 2202 99 li joriġinaw min-Norveġja.

(5)

Il-Ftehim fl-għamla ta' Skambju ta' Ittri jeżiġi li jekk il-kwota tariffarja msemmija hawn fuq tkun ġiet eżawrita sal-31 ta' Ottubru 2017, il-kwota tariffarja applikabbli mill-1 ta' Jannar tas-sena ta' wara tiżdied b'10 %. Skont id-dejta mogħtija lill-Kummissjoni, il-kwota annwali għall-2017 għall-ilmijiet u x-xarbiet ikkonċernati miftuħa bir-Regolament ta' Implimentazzjoni (UE) 2016/2034, ġiet eżawrita fil-5 ta' Settembru 2017.

(6)

Għalhekk, għandha tinfetaħ kwota tariffarja miżjuda għall-ilmijiet u x-xarbiet ikkonċernati mill-1 ta' Jannar sal-31 ta' Diċembru 2018, skont il-Ftehim fl-Għamla ta' Skambju ta' Ittri. Il-kwota annwali miftuħa għall-2017 bir-Regolament ta' Implimentazzjoni (UE) 2016/2034 kellha volum ta' 17,303 miljun litru. Għalhekk, il-kwota għall-2018 se tkun miftuħa b'volum 10 % ogħla ta' 19,033 miljun litru.

(7)	Ir-Regolament ta' Implimentazzjoni tal-Kummissjoni (UE) 2015/2447 (7) jistipula r-regoli għall-ġestjoni tal-kwoti tariffarji. Il-kwota tariffarja miftuħa b'dan ir-Regolament jenħtieġ li tiġi ġestita skont dawk ir-regoli.

(8)	Il-miżuri previsti f'dan ir-Regolament huma konformi mal-opinjoni tal-Kumitat għall-kwistjonijiet orizzontali dwar il-kummerċ ta' prodotti agrikoli pproċessati li mhumiex elenkati fl-Anness I,

ADOTTAT DAN IR-REGOLAMENT:

Artikolu 1

1.   Mill-1 ta' Jannar sal-31 ta' Diċembru 2018, il-kwota tariffarja bla dazju stipulata fl-Anness se tkun miftuħa għall-oġġetti li joriġinaw min-Norveġja li huma elenkati f'dak l-Anness, skont il-kundizzjonijiet speċifikati fih.

2.   Ir-regoli tal-oriġini stabbiliti fil-Protokoll 3 għall-Ftehim bejn il-Komunità Ekonomika Ewropea u r-Renju tan-Norveġja tal-14 ta' Mejju 1973 għandhom japplikaw għall-oġġetti elenkati fl-Anness ta' dan ir-Regolament.

3.   Għall-kwantitajiet importati li jaqbżu l-volum tal-kwota stabbilit fl-Anness, għandu japplika dazju preferenzjali ta' EUR 0,047 għal kull litru.

Artikolu 2

Il-kwota tariffarja bla dazju msemmija fl-Artikolu 1(1) għandha tiġi ġestita mill-Kummissjoni skont l-Artikoli 49 sa 54 tar-Regolament ta' Implimentazzjoni (UE) 2015/2447.

Artikolu 3

Dan ir-Regolament għandu jidħol fis-seħħ fis-seba' jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

Għandu japplika mill-1 ta' Jannar 2018.

---

(1)  ĠU L 150, 20.5.2014, p. 1.

(2)  ĠU L 370, 17.12.2004, p. 70.

(3)  ĠU L 171, 27.6.1973, p. 2.

(4)  ĠU L 1, 3.1.1994, p. 3.

(5)  ĠU L 370, 17.12.2004, p. 72.

(6)  Ir-Regolament ta' Implimentazzjoni tal-Kummissjoni (UE) 2016/2034 tal-21 ta' Novembru 2016 li jiftaħ il-kwota tariffarja għall-2017 għall-importazzjoni, fl-Unjoni Ewropea, ta' ċerti oġġetti li joriġinaw min-Norveġja li ġejjin mill-ipproċessar ta' prodotti agrikoli koperti mir-Regolament (UE) Nru 510/2014 tal-Parlament Ewropew u tal-Kunsill (ĠU L 314, 21.11.2016, p. 4).

(7)  Ir-Regolament ta' Implimentazzjoni tal-Kummissjoni (UE) 2015/2447 tal-24 ta' Novembru 2015 li jistabbilixxi regoli dettaljati għall-implimentazzjoni ta' ċerti dispożizzjonijiet tar-Regolament (UE) Nru 952/2013 tal-Parlament Ewropew u tal-Kunsill li jistabbilixxi l-Kodiċi Doganali tal-Unjoni (ĠU L 343, 29.12.2015, p. 558).

---

---

14.12.2017

MT

Il-Ġurnal Uffiċjali tal-Unjoni Ewropea

L 331/39

---

REGOLAMENT TA' IMPLIMENTAZZJONI TAL-KUMMISSJONI (UE) 2017/2311

tat-13 ta' Diċembru 2017

li jistipula l-medja ponderata tar-rati massimi għat-terminazzjoni ta' telefonati bil-mobile madwar l-Unjoni u li jħassar ir-Regolament ta' Implimentazzjoni (UE) 2016/2292

(Test b'rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) Nru 531/2012 tal-Parlament Ewropew u tal-Kunsill tat-13 ta' Ġunju 2012 dwar roaming fuq netwerks pubbliċi ta' komunikazzjoni mobbli fi ħdan l-Unjoni (1), u b'mod partikolari l-Artikolu 6e(2) tiegħu,

Billi:

(1)

Skont ir-Regolament (UE) Nru 531/2012, mill-15 ta' Ġunju 2017, il-fornituri domestiċi ma għandhom jimponu ebda ħlas supplimentari addizzjonali mal-prezz bl-imnut domestiku fuq il-klijenti tar-roaming fi kwalunkwe Stat Membru għal kwalunkwe telefonata roaming regolata rċevuta, fil-limiti permessi minn politika ta' użu ġust.

(2)	Ir-Regolament (UE) Nru 531/2012 jippermetti li l-fornituri domestiċi, wara l-15 ta' Ġunju 2017, japplikaw ħlas supplimentari flimkien mal-prezz domestiku bl-imnut, għall-konsum ta' servizzi regolati ta' roaming bl-imnut li jaqbeż kwalunkwe limitu stipulat taħt politika ta' użu ġust.

(3)	Ir-Regolament (UE) Nru 531/2012 jillimita kwalunkwe ħlas supplimentari applikat għal telefonati tar-roaming regolati rċevuti għall-medja ponderata tar-rati massimi għat-terminazzjoni ta' telefonati bil-mobile madwar l-Unjoni.

(4)	Ir-Regolament ta' Implimentazzjoni tal-Kummissjoni (UE) 2016/2292 (2) jistabbilixxi l-medja ponderata tar-rati massimi għat-terminazzjoni ta' telefonati bil-mobile madwar l-Unjoni li għandha tiġi applikata fl-2017 abbażi tal-valuri tad-data kif kienu fl-1 ta' Lulju 2016.

(5)

Il-Korp ta' Regolaturi Ewropej tal-Komunikazzjonijiet Elettroniċi pprovda lill-Kummissjoni b'informazzjoni aġġornata miġbura mill-awtoritajiet regolatorji nazzjonali tal-Istati Membri dwar il-livell massimu tar-rati għat-terminazzjoni tat-telefonati bil-mobile li jkunu imponew, skont l-Artikoli 7 u 16 tad-Direttiva 2002/21/KE tal-Parlament Ewropew u tal-Kunsill (3) u l-Artikolu 13 tad-Direttiva 2002/19/KE tal-Parlament Ewropew u tal-Kunsill (4), f'kull suq nazzjonali għat-terminazzjoni ta' telefonati bil-vuċi bl-ingrossa fuq networks individwali tal-mobile; u l-għadd totali ta' abbonati f'kull Stat Membru.

(6)

Skont ir-Regolament (UE) Nru 531/2012, il-Kummissjoni kkalkulat il-medja ponderata tar-rati massimi għat-terminazzjoni ta' telefonati bil-mobile madwar l-Unjoni billi: (i) tiġi mmultiplikata r-rata massima għat-terminazzjoni ta' telefonati bil-mobile permessa fi Stat Membru partikolari bl-għadd totali ta' abbonati f'dak l-Istat Membru; (ii) dan il-prodott jingħadd fost l-Istati Membri kollha; u (iii) issir diviżjoni tas-somma totali miksuba bl-għadd totali ta' abbonati fl-Istati Membri kollha, abbażi tal-valuri tad-data tal-1 ta' Lulju 2017. Għal Stati Membri mhux fiż-żona tal-Euro, ir-rata tal-kambju rilevanti hija l-medja tat-tieni kwart tal-2017 miksuba mill-bażi tad-dejta tal-Bank Ċentrali Ewropew.

(7)	Għalhekk jenħtieġ li jkun aġġornat il-valur tal-medja pponderata tar-rati massimi għat-terminazzjoni ta' telefonati bil-mobile madwar l-Unjoni stabbiliti skont ir-Regolament ta' Implimentazzjoni (UE) 2016/2292.

(8)	Għalhekk ir-Regolament ta' Implimentazzjoni (UE) 2016/2292 jenħtieġ li jitħassar.

(9)	Skont ir-Regolament (UE) Nru 531/2012, il-Kummissjoni għandha tirrevedi l-medja ponderata tar-rati massimi għat-terminazzjoni ta' telefonati bil-mobile madwar l-Unjoni kull sena.

(10)	Il-miżuri stipulati f'dan ir-Regolament huma konformi mal-opinjoni tal-Kumitat għall-Komunikazzjoni,

ADOTTAT DAN IR-REGOLAMENT:

Artikolu 1

Il-medja ponderata tar-rati massimi għat-terminazzjoni ta' telefonati bil-mobile madwar l-Unjoni hija stabbilita għal EUR 0,0091 kull minuta.

Artikolu 2

Ir-Regolament ta' Implimentazzjoni (UE) 2016/2292 jitħassar.

Artikolu 3

Dan ir-Regolament għandu jidħol fis-seħħ fl-għoxrin jum wara l-pubblikazzjoni tiegħu f'Il-Ġurnal Uffiċjali tal-Unjoni Ewropea.

---

(1)  ĠU L 172, 30.6.2012, p. 10.

(2)  Ir-Regolament ta' Implimentazzjoni tal-Kummissjoni (UE) 2016/2292 tas-16 ta' Diċembru 2016 li jistipula l-medja ponderata tar-rati massimi għat-terminazzjoni ta' telefonati bil-mobile madwar l-Unjoni u li jħassar ir-Regolament (UE) 2015/2352 (ĠU L 344, 17.12.2016, p. 77).

(3)  Id-Direttiva 2002/21/KE tal-Parlament Ewropew u tal-Kunsill tas-7 ta' Marzu 2002 dwar kwadru regolatorju komuni għan-networks ta' komunikazzjonijiet u servizzi elettroniċi (Direttiva Kwadru) (ĠU L 108, 24.4.2002, p. 33).

(4)  Id-Direttiva 2002/19/KE tal-Parlament Ewropew u tal-Kunsill tas-7 ta' Marzu 2002 dwar l-aċċess għal, u l-interkonnessjoni ta', netwerks ta' komunikazzjonijiet elettroniċi u faċilitajiet assoċjati (Id-Direttiva tal-Aċċess) (ĠU L 108, 24.4.2002, p. 7).

---

14.12.2017

MT

Il-Ġurnal Uffiċjali tal-Unjoni Ewropea

L 331/41

---

REGOLAMENT TA' IMPLIMENTAZZJONI TAL-KUMMISSJONI (UE) 2017/2312

tat-13 ta' Diċembru 2017

dwar l-awtorizzazzjoni ta' użu ġdid tal-preparazzjoni ta' Bacillus subtilis C-3102 (DSM 15544) bħala addittiv tal-għalf għall-ħnieżer nisa, għall-ħnienes mhux miftuma u għall-klieb (detentur tal-awtorizzazzjoni, Asahi Calpis Wellness Co. Ltd., irrappreżentat minn Asahi Calpis Wellness Co. Ltd. Europe Representative Office)

(Test b'rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (KE) Nru 1831/2003 tal-Parlament Ewropew u tal-Kunsill tat-22 ta' Settembru 2003 fuq l-addittivi għall-użu fl-għalf tal-annimali (1), u b'mod partikulari l-Artikolu 9(2) tiegħu,

Billi:

(1)	Ir-Regolament (KE) Nru 1831/2003 jipprevedi l-awtorizzazzjoni tal-addittivi għall-użu fl-għalf tal-annimali u r-raġunijiet u l-proċeduri għall-għoti ta' din l-awtorizzazzjoni.

(2)	B'konformità mal-Artikolu 7 tar-Regolament (KE) Nru 1831/2003, intbagħtu applikazzjonijiet għal użu ġdid tal-preparat tal-Bacillus subtilis C-3102 (DSM 15544). Ma' dawk l-applikazzjonijiet intbagħtu d-dettalji u d-dokumenti meħtieġa skont l-Artikolu 7(3) tar-Regolament (KE) Nru 1831/2003.

(3)	L-applikazzjoni tikkonċerna l-awtorizzazzjoni ta' użu ġdid tal-preparazzjoni ta' Bacillus subtilis C-3102 (DSM 15544) bħala addittiv fl-għalf għall-ħnieżer nisa, għall-ħnienes mhux miftuma u għall-klieb, biex tiġi kklassifikata fil-kategorija ta' “addittivi żootekniċi”.

(4)

Il-preparazzjoni ta' Bacillus subtilis C-3102 (DSM 15544),, li tinsab fil-kategorija tal-addittivi “addittivi zootekniċi”, ġiet awtorizzata għal għaxar snin bħala addittiv fl-għalf tat-tiġieġ għat-tismin bir-Regolament tal-Kummissjoni (KE) Nru 1444/2006 (2); għall-ħnienes miftuma, permezz tar-Regolament tal-Kummissjoni (UE) Nru 333/2010 (3); għat-tiġieġ imrobbija biex ibidu, għad-dundjani, għall-ispeċijiet tat-tjur minuri u għasafar ornamentali u selvaġġi oħrajn, permezz tar-Regolament tal-Kummissjoni (UE) Nru 184/2011 (4), u għat-tiġieġ tal-bajd u għall-ħut ornamentali permezz tar-Regolament ta' Implimentazzjoni tal-Kummissjoni (UE) 2016/897 (5).

(5)

Fl-opinjoni tagħha tal-21 ta' Marzu 2017 (6), l-Awtorità Ewropea dwar is-Sigurtà fl-Ikel (“l-Awtorità”) ikkonkludiet li skont il-kundizzjonijiet tal-użu proposti, il-preparazzjoni tal-Bacillus subtilis C-3102 (DSM 15544) ma għandhiex effett avvers fuq saħħet l-annimali, fuq saħħet il-bniedem u fuq l-ambjent. Hija kkonkludiet ukoll li l-addittiv għandu l-potenzjal li jtejjeb il-parametri tal-kapaċità żooteknika tal-ħnieżer nisa u tal-ħnienes mhux miftuma u li jżid il-materja niexfa fil-ħmieġ tal-klieb. L-Awtorità tqis li ma hemmx bżonn ta' rekwiżiti speċifiċi għas-sorveljanza ta' wara t-tqegħid fis-suq. Hija vverifikat ukoll ir-rapport dwar il-metodu tal-analiżi tal-addittiv fl-għalf, fl-għalf li ġie ppreżentat mil-Laboratorju ta' Referenza stabbilit bir-Regolament (KE) Nru 1831/2003.

(6)

Il-valutazzjoni tal-preparazzjoni tal-Bacillus subtilis C-3102 (DSM 15544) turi li l-kundizzjonijiet għall-awtorizzazzjoni, kif stipulati fl-Artikolu 5 tar-Regolament (KE) Nru 1831/2003, huma ssodisfati. Għaldaqstant, jenħtieġ li l-użu ta' dik il-preparazzjoni jiġi awtorizzat kif speċifikat fl-Anness ta' dan ir-Regolament.

(7)	Il-miżuri previsti f'dan ir-Regolament huma konformi mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

ADOTTAT DAN IR-REGOLAMENT:

Artikolu 1

Il-preparazzjoni speċifikata fl-Anness, li tifforma parti mill-kategorija tal-addittivi “addittivi żootekniċi” u mill-grupp funzjonali “stabbilizzanti għall-batterji li jkun hemm fil-musrana”, huwa awtorizzat bħala addittiv għall-użu fin-nutrizzjoni tal-annimali soġġett għall-kundizzjonijiet stipulati f'dak l-Anness.

Artikolu 2

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

---

(1)  ĠU L 268, 18.10.2003, p. 29.

(2)  Ir-Regolament tal-Kummissjoni (KE) Nru 1444/2006 tad-29 ta' Settembru 2006 rigward l-awtorizzazzjoni tal-Bacillus subtilis C-3102 (Calsporin) bħala addittiv fl-għalf (ĠU L 271, 30.9.2006, p. 19).

(3)  Ir-Regolament tal-Kummissjoni (UE) Nru 333/2010 tat-22 ta' April 2010 dwar l-awtorizzazzjoni ta' użu ġdid għal Bacillus subtilis C-3102 (DSM 15544) bħala addittiv fl-għalf għal ħnienes miftuma (id-detentur tal-awtorizzazzjoni Calpis Co. Ltd., il-Ġappun, irrappreżentat fl-Unjoni Ewropea minn Calpis Co. Ltd. Europe Representative Office) (ĠU L 102, 23.4.2010, p. 19).

(4)  Ir-Regolament tal-Kummissjoni (UE) Nru 184/2011 tal-25 ta' Frar 2011 dwar l-awtorizzazzjoni ta' Bacillus subtilis C-3102 (DSM 15544) bħala addittiv tal-għalf għat-tiġieġ imkabbra biex ibidu, għad-dundjani, għall-ispeċi tat-tjur minuri u għasafar ornamentali u selvaġġi oħrajn, (detentur tal-awtorizzazzjoni Calpis Co. Ltd. il-Ġappun, irrappreżentat minn Calpis Co. Ltd. Europe Representative Office) (ĠU L 53, 26.2.2011, p. 33).

(5)  Ir-Regolament ta' Implimentazzjoni tal-Kummissjoni (UE) 2016/897 tat-8 ta' Ġunju 2016 dwar l-awtorizzazzjoni ta' preparat ta' Bacillus subtilis (C-3102) (DSM 15544) bħala addittiv tal-għalf għat-tiġieġ tal-bajd u għall-ħut ornamentali, u li jemenda r-Regolamenti (KE) Nru 1444/2006, (UE) Nru 333/2010 u (UE) Nru 184/2011 rigward id-detentur tal-awtorizzazzjoni (li huwa Asahi Calpis Wellness Co. Ltd.) (ĠU L 152, 9.6.2016, p. 7).

(6)  EFSA Journal 2017; 15(4):4760 u EFSA Journal 2017; 15(4):4761.

---

---

14.12.2017

MT

Il-Ġurnal Uffiċjali tal-Unjoni Ewropea

L 331/44

---

REGOLAMENT TA' IMPLIMENTAZZJONI TAL-KUMMISSJONI (UE) 2017/2313

tat-13 ta' Diċembru 2017

li jistabbilixxi l-ispeċifikazzjonijiet tal-format tal-passaport tal-pjanti għaċ-ċaqliq fit-territorju tal-Unjoni u tal-passaport tal-pjanti għall-introduzzjoni u għaċ-ċaqliq f'żona protetta

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) 2016/2031 tal-Parlament Ewropew u tal-Kunsill tas-26 ta' Ottubru 2016 dwar il-miżuri protettivi kontra pesti tal-pjanti, li jemenda r-Regolamenti (UE) Nru 228/2013, (UE) Nru 652/2014 u (UE) Nru 1143/2014 tal-Parlament Ewropew u tal-Kunsill u li jħassar id-Direttivi tal-Kunsill 69/464/KEE, 74/647/KEE, 93/85/KEE, 98/57/KE, 2000/29/KE, 2006/91/KE u 2007/33/KE (1), u b'mod partikolari l-Artikolu 83(7) tiegħu,

Billi:

(1)

L-Artikolu 83(7) tar-Regolament (UE) 2016/2031 jagħti s-setgħa lill-Kummissjoni biex tadotta l-ispeċifikazzjonijiet tal-format tal-passaporti tal-pjanti għaċ-ċaqliq fit-territorju tal-Unjoni u tal-passaporti tal-pjanti għall-introduzzjoni u għaċ-ċaqliq f'żona protetta. Sabiex il-passaporti tal-pjanti ikollhom viżibilità faċli u jkunu jistgħu jinqraw sewwa, għandu jkollhom formati standardizzati. Dan jiżgura wkoll li l-passaporti tal-pjanti jkunu jistgħu jiġu distinti faċilment minn kull informazzjoni jew tikketta oħra.

(2)

Minħabba d-differenzi fid-daqs u fil-karatteristiċi tal-pjanti, tal-prodotti mill-pjanti jew ta' oġġetti oħra li għalihom ikun meħtieġ passaport tal-pjanti, jenħtieġ li jiġi żgurat ċertu livell ta' flessibilità fejn jidħlu l-ispeċifikazzjonijiet tal-format tal-passaporti tal-pjanti. Għalhekk, f'kull kategorija ta' passaporti tal-pjanti stabbilita fil-Partijiet A sa D tal-Anness, jenħtieġ li jkunu disponibbli diversi mudelli alternattivi sabiex ikunu jistgħu jitqiesu d-differenzi tal-pjanti, tal-prodotti mill-pjanti jew ta' oġġetti oħra li għalihom ikun meħtieġ passaport tal-pjanti. Barra minn hekk, dawk il-mudelli ma jenħtieġx li jipprevedu speċifikament id-daqs tal-passaport tal-pjanti, l-użu ta' burdura, il-proporzjonijiet tad-daqs tal-elementi tagħhom u t-tipa li tintuża fihom.

(3)

L-elementi tal-passaport tal-pjanti jenħtieġ li jkunu maqsuma f'għamla rettangolari jew kwadra, u jenħtieġ li jkunu separati b'mod ċar minn kull kitba jew stampa oħra b'burdura jew xi ħaġa oħra. L-esperjenza wriet li dan huwa importanti biex tissaħħaħ il-viżibilità tal-passaporti tal-pjanti u l-karatteristiċi distintivi tagħhom minn kull informazzjoni jew tikketta oħra.

(4)	Għal raġunijiet ta' ċertezza legali, dan ir-Regolament jenħtieġ li japplika mill-istess data bħar-Regolament (UE) 2016/2031.

(5)

Ħafna pjanti, prodott mill-pjanti u oġġetti oħra li għalihom se jinħarġu passaporti skont id-Direttiva tal-Kummissjoni 92/105/KEE (2) qabel id-data tal-applikazzjoni ta' dan ir-Regolament se jkunu għadhom fis-suq jew se jiġu mċaqilqa wara dik id-data. Billi ma hemmx tħassib għas-saħħa li jirrikjedi bidla immedjata tal-ispeċifikazzjonijiet tal-format, jenħtieġ li l-passaport tal-pjanti maħruġa qabel l-14 ta' Diċembru 2019 jibqgħu validi sal-14 ta' Diċembru 2023.

(6)	Il-miżuri previsti f'dan ir-Regolament huma konformi mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

ADOTTAT DAN IR-REGOLAMENT:

Artikolu 1

Mudelli għall-passaport tal-pjanti

1.   Il-passaporti tal-pjanti għaċ-ċaqliq fit-territorju tal-Unjoni għandhom jikkonformaw ma' wieħed mill-mudelli previsti fil-Parti A tal-Anness.

2.   Il-passaporti tal-pjanti għall-introduzzjoni u għaċ-ċaqliq f'żona protetta għandhom jikkonformaw ma' wieħed mill-mudelli previsti fil-Parti B tal-Anness.

3.   Il-passaporti tal-pjanti għaċ-ċaqliq fit-territorju tal-Unjoni, flimkien ma' tikketta taċ-ċertifikazzjoni skont it-tieni subparagrafu tal-Artikolu 83(5) tar-Regolament (UE) 2016/2031, għandhom jikkonformaw ma' wieħed mill-mudelli previsti fil-Parti C tal-Anness.

4.   Il-passaporti tal-pjanti għall-introduzzjoni u għaċ-ċaqliq f'żona protetta, flimkien ma' tikketta taċ-ċertifikazzjoni skont it-tieni subparagrafu tal-Artikolu 83(5) tar-Regolament (UE) 2016/2031, għandhom jikkonformaw ma' wieħed mill-mudelli previsti fil-Parti D tal-Anness.

Artikolu 2

Rekwiżiti għall-elementi tal-passaporti tal-pjanti

L-elementi tal-passaport tal-pjanti, kif stabbiliti fl-Anness VII tar-Regolament (UE) 2016/2031, għandhom jitqassmu f'għamla rettangolari jew kwadra, u għandhom ikunu jistgħu jinqraw mingħajr l-użu ta' għajnuniet viżivi.

Għandhom ikunu mdawra b'burdura, jew isseparati b'mod ieħor minn kull kitba jew stampa oħra, sabiex ikunu viżibbli faċilment u jkunu distinti b'mod ċar.

Artikolu 3

Id-dħul fis-seħħ

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

Artikolu 4

Data tal-applikazzjoni

Dan ir-Regolament għandu japplika mill-14 ta' Diċembru 2019.

Il-passaporti tal-pjanti maħruġa qabel l-14 ta' Diċembru 2019, skont id-Direttiva 92/105/KEE, għandhom jibqgħu validi sal-14 ta' Diċembru 2023.

---

(1)  ĠU L 317, 23.11.2016, p. 4.

(2)  Id-Direttiva tal-Kummissjoni 92/105/KEE tat-3 ta' Diċembru 1992 li tistabbilixxi grad ta' standardizzazzjoni għal passaporti ta' pjanti biex jintużaw għaċ-ċaqliq ta' ċerti pjanti, prodotti ta' pjanti jew oġġetti oħra ġewwa l-Komunità, u li tistabbilixxi l-proċeduri dettaljati dwar il-ħruġ ta' passaporti simili u l-kundizzjonijiet u l-proċeduri dettaljati għall-bdil tagħhom (ĠU L 4, 8.1.1993, p. 22).

---

---

14.12.2017

MT

Il-Ġurnal Uffiċjali tal-Unjoni Ewropea

L 331/53

---

REGOLAMENT TA' IMPLIMENTAZZJONI TAL-KUMMISSJONI (UE) 2017/2314

tat-13 ta' Diċembru 2017

li jiffissa l-koeffiċjent ta' allokazzjoni li għandu jiġi applikat għall-kwantitajiet koperti mill-applikazzjonijiet għal liċenzji tal-importazzjoni mressqin mill-20 ta' Novembru 2017 sat-30 ta' Novembru 2017 u li jiddeterminaw il-kwantitajiet li għandhom jiżdiedu mal-kwantità ffissata għas-subperjodu mill-1 ta' Lulju 2018 sal-31 ta' Diċembru 2018 fil-qafas tal-kwoti tariffarji miftuħin bir-Regolament (KE) Nru 2535/2001 fis-settur tal-ħalib u l-prodotti tal-ħalib

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) Nru 1308/2013 tal-Parlament Ewropew u tal-Kunsill tas-17 ta' Diċembru 2013 li jistabbilixxi organizzazzjoni komuni tas-swieq fi prodotti agrikoli u li jħassar ir-Regolamenti tal-Kunsill (KEE) Nru 922/72, (KEE) Nru 234/79, (KE) Nru 1037/2001 u (KE) Nru 1234/2007 (1), u b'mod partikolari l-Artikolu 188 tiegħu,

Billi:

(1)	Ir-Regolament tal-Kummissjoni (KE) Nru 2535/2001 (2) fetaħ kwoti tariffarji annwali għall-importazzjoni ta' prodotti tas-settur tal-ħalib u tal-prodotti tal-ħalib.

(2)

Il-kwantitajiet koperti mill-applikazzjonijiet għal liċenzji tal-importazzjoni mressqin mill-20 ta' Novembru 2017 sat-30 ta' Novembru 2017 għas-subperjodu mill-1 ta' Jannar 2018 sat-30 ta' Ġunju 2018 huma ogħla mill-kwantitajiet disponibbli għal ċerti kwoti. Għalhekk, jeħtieġ li jiġi ddeterminat sa liema punt jistgħu jinħarġu l-liċenzji għall-importazzjoni, billi jiġi stabbilit il-koeffiċjent ta' allokazzjoni li għandu jiġi applikat għall-kwantitajiet mitluba, ikkalkulati f'konformità mal-Artikolu 7(2) tar-Regolament tal-Kummissjoni (KE) Nru 1301/2006 (3).

(3)

Il-kwantitajiet koperti mill-applikazzjonijiet għal liċenzji tal-importazzjoni mressqin mill-20 ta' Novembru 2017 sat-30 ta' Novembru 2017 għas-subperjodu mill-1 ta' Jannar 2018 sat-30 ta' Ġunju 2018 huma inqas mill-kwantitajiet disponibbli għal ċerti kwoti. Għaldaqstant, jixraq li jiġu ddeterminati l-kwantitajiet li għalihom ma tressqux applikazzjonijiet, u li dawn il-kwantitajiet jiżdiedu mal-kwantità ffissata għas-subperjodu tal-kwota sussegwenti.

(4)	Sabiex tiġi ggarantita l-effikaċja tal-miżura, jixraq li dan ir-Regolament jidħol fis-seħħ dakinhar tal-pubblikazzjoni tiegħu f'Il-Ġurnal Uffiċjali tal-Unjoni Ewropea,

ADOTTA DAN IR-REGOLAMENT:

Artikolu 1

1.   Il-kwantitajiet koperti mill-applikazzjonijiet għal liċenzji tal-importazzjoni mressqin skont ir-Regolament (KE) Nru 2535/2001 għas-subperjodu mill-1 ta' Jannar 2018 sat-30 ta' Ġunju 2018 għandhom jinħarġu skont il-koeffiċjent ta' allokazzjoni li jidher fl-Anness ta' dan ir-Regolament.

2.   Il-kwantitajiet koperti mill-applikazzjonijiet għal liċenzji tal-importazzjoni li ma tressqux skont ir-Regolament (KE) Nru 2535/2001, li għandhom jiżdiedu mas-subperjodu mill-1 ta' Lulju 2018 sal-31 ta' Diċembru 2018, jidhru fl-Anness ta' dan ir-Regolament.

Artikolu 2

Dan ir-Regolament jidħol fis-seħħ dakinhar tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

---

(1)  ĠU L 347, 20.12.2013, p. 671.

(2)  Ir-Regolament tal-Kummissjoni (KE) Nru 2535/2001 tal-14 ta' Diċembru 2001 li jipprovdi regoli dettaljati biex ikun applikat ir-Regolament tal-Kunsill (KE) Nru 1255/1999 rigward l-arranġamenti tal-importazzjoni tal-ħalib u tal-prodotti tal-ħalib u biex jinfetħu kwoti tat-tariffa (ĠU L 341, 22.12.2001, p. 29).

(3)  Ir-Regolament tal-Kummissjoni (KE) Nru 1301/2006 tal-31 ta' Awwissu 2006 li jistabbilixxi regoli komuni għall-amministrazzjoni ta' kwoti ta' tariffi fuq l-importazzjoni għal prodotti agrikoli ġestiti b'sistema ta' liċenzji ta' importazzjoni (ĠU L 238, 1.9.2006, p. 13).

---

---

14.12.2017

MT

Il-Ġurnal Uffiċjali tal-Unjoni Ewropea

L 331/57

---

DEĊIŻJONI TAL-KUNSILL (PESK) 2017/2315

tal-11 ta' Diċembru 2017

li tistabbilixxi Kooperazzjoni Strutturata Permanenti (PESCO) u li tiddetermina l-lista ta' Stati Membri Parteċipanti

IL-KUNSILL TAL-UNJONI EWROPEA,

Wara li kkunsidra t-Trattat dwar l-Unjoni Ewropea, b'mod partikolari l-Artikolu 46(2) tiegħu,

Wara li kkunsidra l-Protokoll Nru 10 dwar il-koperazzjoni strutturata permanenti stabbilita bl-Artikolu 42 tat-Trattat dwar l-Unjoni Ewropea mehmuż mat-Trattat dwar l-Unjoni Ewropea u mat-Trattat dwar il-Funzjonament tal-Unjoni Ewropea,

Wara li kkunsidra l-proposta mir-Repubblika Federali tal-Ġermanja, ir-Renju ta' Spanja, ir-Repubblika Franċiża u r-Repubblika Taljana,

Wara li kkunsidra l-opinjoni tar-Rappreżentant Għoli tal-Unjoni għall-Affarijiet Barranin u l-Politika ta' Sigurtà (ir-Rappreżentant Għoli),

Billi:

(1)

L-Artikolu 42(6) tat-Trattat dwar l-Unjoni Ewropea (TUE) jipprevedi li dawk l-Istati Membri li l-kapaċitajiet militari tagħhom jissodisfaw kriterji ogħla, u li jkunu ħadu impenji aktar vinkolanti lejn xulxin f'dan il-qasam bil-ħsieb tal-missjonijiet l-aktar impenjattivi għandhom jistabbilixxu kooperazzjoni strutturata permanenti (PESCO) fil-qafas tal-Unjoni.

(2)

Fit-13 ta' Novembru 2017, il-Kunsill u r-Rappreżentant Għoli rċevew notifika konġunta f'konformità mal-Artikolu 46(1) TUE minn 23 Stat Membru, u fis-7 ta' Diċembru 2017 minn żewġ Stati Membri oħra, li dawk l-Istati Membri kollha għandhom l-intenzjoni li jipparteċipaw fil-PESCO fuq il-bażi li huma jissodisfaw ir-rekwiżiti msemmija hawn fuq u li ħadu l-impenji aktar vinkolanti ma' xulxin f'dan il-qasam kif indikat fl-Anness għal din id-Deċiżjoni u fuq il-bażi tal-elementi l-oħrajn kollha fin-notifika, inkluż il-preambolu u l-prinċipji gwida tal-PESCO indikati fl-Anness I għan-notifika, li huma jibqgħu impenjati fl-intier tagħha, u tfakkar ukoll fl-Artikolu 42 tat-TUE, inkluż l-Artikolu 42(7) (1).

(3)	L-impenji aktar vinkolanti indikati fl-Anness għal din id-Deċiżjoni huma konsistenti mal-kisba tal-objettivi stabbiliti fl-Artikolu 1 tal-Protokoll Nru 10 għat-Trattati u l-kompiti msemmija fl-Artikolu 2 ta' dak il-Protokoll.

(4)

Id-deċiżjoni tal-Istati Membri li jipparteċipaw fil-PESCO hija volontarja u fiha nnifisha ma taffettwax is-sovranità nazzjonali jew il-karattru speċifiku tal-politika ta' sigurtà u difiża ta' ċerti Stati Membri. Il-kontribuzzjonijiet mill-Istati Membri parteċipanti biex jissodisfaw l-impenji aktar vinkolanti taħt il-PESCO isiru f'konformità mad-dispożizzjonijiet kostituzzjonali applikabbli tagħhom.

(5)	Iż-żieda fil-proġetti konġunti u kollaborattivi ta' żvilupp tal-kapaċitajiet ta' difiża, hija fost l-impenji vinkolanti taħt il-PESCO. Tali proġetti jistgħu jiġu appoġġati b'kontribuzzjonijiet mill-baġit tal-Unjoni f'konformità mat-Trattati u skont l-istrumenti u l-programmi rilevanti tal-Unjoni.

(6)	L-Istati Membri parteċipanti stabbilixxew fil-Pjanijiet Nazzjonali ta' Implimentazzjoni rispettivi tagħhom il-kapaċità tagħhom li jissodisfaw l-impenji aktar vinkolanti li ħadu lejn xulxin.

(7)	Ladarba l-kondizzjonijiet neċessarji ġew issodisfati, huwa għaldaqstant xieraq li l-Kunsill jadotta deċiżjoni li tistabbilixxi PESCO.

(8)	Kwalunkwe Stat Membru ieħor li jkun jixtieq li jipparteċipa aktar 'il quddiem fil-PESCO jista' jinnotifika l-intenzjoni tiegħu li jagħmel dan lill-Kunsill u lir-Rappreżentant Għoli f'konformità mal-Artikolu 46(3) TUE.

(9)	Ir-Rappreżentant Għoli ser ikun involut bis-sħiħ fil-proċedimenti relatati mal-PESCO.

(10)

Jenħtieġ li jkun hemm konsistenza bejn l-azzjonijiet meħuda fil-qafas tal-PESCO u azzjonijiet oħrajn tal-PESK u politiki oħrajn tal-Unjoni. Il-Kunsill u, fl-oqsma ta' responsabbiltà rispettivi tagħhom, ir-RGħ u l-Kummissjoni, jenħtieġ li jikkooperaw sabiex jimmassimizzaw is-sinerġiji fejn applikabbli.

(11)

F'konformità mal-Artikolu 5 tal-Protokoll Nru 22 dwar il-pożizzjoni tad-Danimarka anness mat-TUE u mat- Trattat dwar il-Funzjonament tal-Unjoni Ewropea, id-Danimarka ma tipparteċipax fl-elaborazzjoni u fl-implementazzjoni ta' deċiżjonijiet u azzjonijiet tal-Unjoni li jkollhom implikazzjonijiet ta' difiża. Għalhekk id-Danimarka mhijiex marbuta b'din id-Deċiżjoni,

ADOTTA DIN ID-DEĊIŻJONI:

Artikolu 1

Stabbiliment ta' Kooperazzjoni Strutturata Permanenti

Kooperazzjoni Strutturata Permanenti (PESCO) fil-qafas tal-Unjoni hija b'dan stabbilita bejn dawk l-Istati Membri li l-kapaċitajiet militari tagħhom jissodisfaw kriterji ogħla kif imsemmi fl-Artikolu 1 tal-Protokoll Nru 10, u li jkunu ħadu impenji lejn xulxin f'dan il-qasam kif imsemmi f'Artikolu 2 ta' dak il-Protokoll, bil-ħsieb tal-missjonijiet l-aktar impenjattivi, u biex isir kontribut għall-issodisfar tal-livell ta' ambizzjoni tal-Unjoni.

Artikolu 2

Stati Membri Parteċipanti

L-Istati Membri li jipparteċipaw fil-PESCO għandhom ikunu dawn li ġejjin:

—

Belġju,

—	Bulgarija,

—	Repubblika Ċeka,

—

Ġermanja,

—

Estonja,

—

Irlanda,

—

Greċja,

—

Spanja,

—

Franza,

—

Kroazja,

—

Italja,

—

Ċipru,

—

Latvja,

—

Litwanja,

—	Lussemburgu,

—

Ungerija,

—	Netherlands,

—

Awstrija,

—

Polonja,

—	Portugall,

—

Rumanija,

—

Slovenja,

—	Slovakkja,

—	Finlandja,

—

Żvezja.

Artikolu 3

Impenji aktar vinkolanti f'konformità mal-Protokoll Nru 10

1.   Sabiex jintlaħqu l-objettivi stabbiliti fl-Artikolu 1 tal-Protokoll Nru 10 u l-kompiti msemmija fl-Artikolu 2 ta' dak il-Protokoll, l-Istati Membri parteċipanti għandhom jagħmlu kontribuzzjonijiet li jissodisfaw l-impenji aktar vinkolanti li jkunu ħadu lejn xulxin kif indikat fl-Anness.

2.   Għal dan il-għan, l-Istati Membri parteċipanti għandhom jirrevedu annwalment, u għandhom jaġġornaw kif xieraq, il-Pjanijiet Nazzjonali ta' Implimentazzjoni tagħhom fejn għandhom jiddeskrivu kif ser jilħqu l-impenji aktar vinkolanti, filwaqt li jispeċifikaw kif ser jissodisfaw l-objettivi aktar preċiżi li għandhom jiġu stabbiliti f'kull fażi. Il-Pjanijiet Nazzjonali ta' Implimentazzjoni aġġornati għandhom jiġu kkomunikati annwalment lis-Servizz Ewropew għall-Azzjoni Esterna (SEAE) u lill-Aġenzija Ewropea għad-Difiża (EDA), u għandhom ikunu disponibbli għall-Istati Membri parteċipanti kollha.

Artikolu 4

Governanza PESCO

1.   Il-governanza tal-PESCO għandha tiġi organizzata:

—	fil-livell tal-Kunsill u;

—	fil-qafas ta' proġetti implimentati minn gruppi ta' dawk l-Istati Membri parteċipanti li jkunu qablu bejniethom li jwettqu tali proġetti.

2.   F'konformità mal-Artikolu 46(6) TUE, il-Kunsill għandu jadotta deċiżjonijiet u rakkomandazzjonijiet li:

(a)	jipprovdu direzzjoni u gwida strateġika għall-PESCO;

(b)	jistabbilixxu s-sekwenza tal-issodisfar tal-impenji aktar vinkolanti indikati fl-Anness matul iż-żewġ fażijiet inizjali konsekuttivi (is-snin 2018 – 2020 u 2021 – 2025) u jispeċifikaw fil-bidu ta' kull fażi l-objettivi aktar preċiżi għal-issodisfar tal-impenji aktar vinkolanti indikati fl-Anness;

(c)

jaġġornaw, u jsaħħu jekk neċessarju, l-impenji aktar vinkolanti indikati fl-Anness fid-dawl tal-kisbiet li jkunu saru permezz tal-PESCO, sabiex jirriflettu l-kuntest tas-sigurtà tal-Unjoni kif jevolvi. Tali deċiżjonijiet għandhom jittieħdu b'mod partikolari fi tmiem il-fażijiet imsemmija fil-punt (b) tal-paragrafu 2, abbażi ta' proċess ta' rieżami strateġiku li jivvaluta l-issodisfar tal-impenji tal-PESCO;

(d)	jivvalutaw il-kontribuzzjonijiet tal-Istati Membri parteċipanti biex jissodisfaw l-impenji maqbula, f'konformità mal-mekkaniżmu deskritt fl-Artikolu 6;

(e)	jistabbilixxu l-lista ta' proġetti li għandhom jiġu żviluppati taħt il-PESCO, li jirriflettu kemm appoġġ għall-iżvilupp tal-kapaċitajiet kif ukoll il-forniment ta' appoġġ sostanzjali skont il-mezzi u l-kapaċitajiet għal operazzjonijiet u missjonijiet tal-Politika ta' Sigurtà u ta' Difiża Komuni;

(f)	jistabbilixxu sett ta' regoli ta' governanza komuni għall-proġetti, li l-Istati Membri parteċipanti li jkunu qed jieħdu sehem fi proġett individwali jistgħu jadattaw bħala neċessarji għal dak il-proġett;

(g)

jistabbilixxu, fi żmien debitu, f'konformità mal-Artikolu 9(1), il-kondizzjonijiet ġenerali li skonthom Stati terzi jkunu jistgħu b'mod eċċezzjonali jiġu mistiedna biex jipparteċipaw fi proġetti individwali; u li jiddeterminaw f'konformità mal-Artikolu 9(2) jekk Stat terz partikolari jissodisfax dawn il-kondizzjonijiet; u

(h)	jipprevedu kwalunkwe miżura oħra meħtieġa biex tkompli tiġi implimentata din id-Deċiżjoni.

Artikolu 5

Proġetti PESCO

1.   Wara proposti mill-Istati Membri parteċipanti li biħsiebhom jieħdu sehem fi proġett individwali, ir-Rappreżentant Għoli jista' jagħmel rakkomandazzjoni rigward l-identifikazzjoni u l-evalwazzjoni ta' proġetti PESCO, abbażi ta' valutazzjonijiet mogħtija f'konformità mal-Artikolu 7, għal deċiżjonijiet u rakkomandazzjonijiet tal-Kunsill li għandhom jiġu adottati f'konformità mal-Artikolu 4(2)(e), wara parir militari mill-Kumitat Militari tal-Unjoni Ewropea (EUMC).

2.   L-Istati Membri Parteċipanti li jkollhom l-intenzjoni li jipproponu xi proġett individwali għandhom jinfurmaw lill-Istati Membri parteċipanti l-oħra fi żmien debitu qabel ma jippreżentaw il-proposta tagħhom, sabiex jinġabar appoġġ u tingħatalhom l-opportunità li jissieħbu sabiex iressqu l-proposta b'mod kollettiv.

Il-membri ta' proġett għandhom ikunu dawk l-Istati Membri parteċipanti li jkunu ressqu l-proposta. Il-lista tal-membri ta' proġett ta' kull proġett individwali għandha tinhemeż mad-deċiżjoni tal-Kunsill imsemmija fl-Artikolu 4(2)(e).

L-Istati Membri parteċipanti li jieħdu sehem fi proġett jistgħu jaqblu bejniethom li jaċċettaw Stati Membri parteċipanti oħra li sussegwentement jixtiequ jieħdu sehem fil-proġett.

3.   L-Istati Membri parteċipanti li jieħdu sehem fi proġett għandhom jaqblu bejniethom dwar l-arranġamenti għall-kooperazzjoni tagħhom u l-ambitu ta' dik il-kooperazzjoni, u l-ġestjoni ta' dak il-proġett. L-Istati Membri parteċipanti li jieħdu sehem fi proġett għandhom jinfurmaw regolarment lill-Kunsill dwar l-iżvilupp tal-proġett, kif xieraq.

Artikolu 6

Arranġamenti dwar superviżjoni, valutazzjoni u rapportar

1.   Il-Kunsill, fil-qafas tal-Artikolu 46(6) TUE, għandu jiżgura l-unità, il-konsistenza u l-effikaċja tal-PESCO. Ir-Rappreżentant Għoli għandu wkoll jikkontribwixxi lejn dawk l-objettivi.

2.   Ir-Rappreżentant Għoli għandu jkun involut bis-sħiħ fil-proċedimenti relatati mal-PESCO, f'konformità mal-Protokoll Nru 10.

3.   Ir-Rappreżentant Għoli għandu jippreżenta rapport annwali dwar il-PESCO lill-Kunsill. Dan ir-rapport għandu jkun ibbażat fuq il-kontributi mill-EDA, skont l-Artikolu 7(3)(a), u mis-SEAE, skont l-Artikolu 7(2)(a). Ir-rapport tar-Rappreżentant Għoli għandu jiddeskrivi l-istat tal-implimentazzjoni tal-PESCO, inkluż l-issodisfar, minn kull Stat Membru parteċipanti, tal-impenji tiegħu skont il-Pjan Nazzjonali ta' Implimentazzjoni tiegħu.

L-EUMC għandu jipprovdi pariri u rakkomandazzjonijiet militari lill-Kumitat Politiku u ta' Sigurtà rigward il-proċess ta' valutazzjoni annwali tal-PESCO.

Abbażi tar-rapport annwali dwar il-PESCO ippreżentat mir-Rappreżentant Għoli, il-Kunsill għandu jirrieżamina darba fis-sena jekk l-Istati Membri parteċipanti għadhomx jissodisfaw l-impenji aktar vinkolanti msemmija fl-Artikolu 3.

4.   Kwalunkwe deċiżjoni dwar is-sospensjoni tal-parteċipazzjoni ta' Stat Membru għandha tiġi adottata f'konformità mal-Artikolu 46(4) TUE biss wara li l-Istat Membru jkun ingħata żmien iddefinit b'mod ċar għal konsultazzjoni individwali u miżuri ta' reazzjoni.

Artikolu 7

Appoġġ mis-SEAE u l-EDA

1.   Taħt ir-responsabbiltà tar-Rappreżentant Għoli, ukoll fil-kapaċità tiegħu ta' Kap tal-EDA, is-SEAE, inkluż l-Istat Maġġur tal-UE (EUMS), u l-EDA għandhom jipprovdu b'mod konġunt il-funzjonijiet segretarjali neċessarji għall-PESCO ħlief fil-livell tal-Kunsill, u f'dan ir-rigward punt ta' kuntatt uniku.

2.   Is-SEAE, inkluż l-EUMS, għandu jappoġġa l-funzjonament tal-PESCO b'mod partikolari billi:

(a)	jikkontribwixxi għall-valutazzjoni tar-Rappreżentant Għoli, fir-rapport annwali tiegħu dwar il-PESCO, tal-kontribuzzjonijiet tal-Istati Membri parteċipanti fir-rigward tal-aspetti operazzjonali, f'konformità mal-Artikolu 6.

(b)

jikkoordina l-valutazzjoni ta' proposti għal proġetti previsti fl-Artikolu, 5 b'mod partikolari fl-oqsma ta' disponibbiltà, interoperabbiltà, flessibbiltà u skjerament ta' forzi. B'mod partikolari, is-SEAE, inkluż l-EUMS, għandu jivvaluta l-konformità tal-proġetti proposti mal-ħtiġijiet operazzjonali u l-kontribut tiegħu għalihom.

3.   L-EDA għandha tappoġġa l-PESCO, b'mod partikolari billi:

(a)

tikkontribwixxi għall-valutazzjoni tar-Rappreżentant Għoli, fir-rapport annwali tiegħu, tal-kontribuzzjonijiet tal-Istati Membri parteċipanti, f'konformità mal-Artikolu 6, fir-rigward tal-kapaċitajiet, b'mod partikolari kontribuzzjonijiet li jkunu saru f'konformità mal-impenji aktar vinkolanti msemmija fl-Artikolu 3.

(b)

tiffaċilita proġetti ta' żvilupp tal-kapaċitajiet, b'mod partikolari billi tikkoordina l-valutazzjoni tal-proposti għal proġetti previsti fl-Artikolu 5, b'mod partikolari fil-qasam tal-iżvilupp tal-kapaċitajiet. B'mod partikolari, l-EDA għandha tappoġġa lill-Istati Membri biex jiġi żgurat li ma jkun hemm ebda duplikazzjoni mhux neċessarja ma' inizjattivi eżistenti anke f'kuntesti istituzzjonali oħra.

Artikolu 8

Finanzjament

1.   L-infiq amministrattiv tal-istituzzjonijiet tal-Unjoni u s-SEAE li jirriżulta mill-implimentazzjoni ta' din id-Deċiżjoni għandu jiġġarrab mill-baġit tal-Unjoni. L-infiq amministrattiv tal-EDA għandu jkun soġġett għar-regoli rilevanti dwar il-finanzjament tal-EDA f'konformità mad-Deċiżjoni tal-Kunsill (PESK) 2015/1835 (2).

2.   L-infiq amministrattiv li jirriżulta minn proġetti mwettqa fil-qafas tal-PESCO għandu jiġi appoġġat primarjament mill-Istati Membri parteċipanti li jieħdu sehem fi proġett individwali. Kontribuzzjonijiet mill-baġit ġenerali tal-Unjoni jistgħu jsiru lil tali proġetti f'konformità mat-Trattati u f'konformità mal-istrumenti rilevanti tal-Unjoni.

Artikolu 9

Parteċipazzjoni ta' Stati terzi fi proġetti individwali

1.   Il-kondizzjonijiet ġenerali għall-parteċipazzjoni ta' Stati terzi fi proġetti individwali għandhom jiġu speċifikati f'deċiżjoni tal-Kunsill adottata f'konformità mal-Artikolu 4(2), li tista' tinkludi mudell għal arranġamenti amministrattivi ma' Stati terzi.

2.   Il-Kunsill għandu jiddeċiedi f'konformità mal-Artikolu 46(6) TUE jekk Stat terz, li l-Istati Membri parteċipanti li jieħdu sehem fi proġett ikunu jixtiequ jistiednu biex jieħu sehem f'dak il-proġett, jissodisfax ir-rekwiżiti indikati fid-deċiżjoni msemmija fil-paragrafu 1.

3.   Wara deċiżjoni pożittiva kif imsemmi fil-paragrafu 2, l-Istati Membri parteċipanti li jieħdu sehem fi proġett jistgħu jidħlu f'arranġamenti amministrattivi mal-Istat terz ikkonċernat għall-fini tal-parteċipazzjoni tiegħu f'dak il-proġett. Tali arranġamenti għandhom jirrispettaw il-proċeduri u l-awtonomija deċiżjonali tal-Unjoni.

Artikolu 10

Regoli ta' sigurtà

Id-dispożizzjonijiet tad-Deċiżjoni tal-Kunsill 2013/488/UE (3) għandhom japplikaw fil-kuntest tal-PESCO.

Artikolu 11

Dħul fis-seħħ

Din id-Deċiżjoni tidħol fis-seħħ fil-jum tal-adozzjoni tagħha.

---

(1)  In-notifika hija pubblikata flimkien ma' din id-Deċiżjoni (ara paġna ta' 65 dan il-Ġurnal Uffiċjali).

(2)  Id-Deċiżjoni tal-Kunsill (PESK) 2015/1835 tat-12 ta' Ottubru 2015 li tiddefinixxi l-istatut, is-sede u r-regoli operazzjonali tal-Aġenzija Ewropea għad-Difiża (ĠU L 266, tat-13 ta' Ottubru 2015, p. 55).

(3)  Id-Deċiżjoni tal-Kunsill 2013/488/UE tat-23 ta' Settembru 2013 dwar ir-regoli tas-sigurtà għall-protezzjoni ta' informazzjoni klassifikata tal-UE (ĠU L 274, 15.10.2013, p. 1).

---

---

---