(1)

Permezz tar-Regolament (UE) Nru 513/2013 (5), il-Kummissjoni Ewropea (“il-Kummissjoni”) imponiet dazju antidumping provviżorju fuq l-importazzjonijiet fl-Unjoni Ewropea (“l-Unjoni”) ta' moduli fotovoltajċi bis-silikon kristallin (“moduli”) u l-komponenti ewlenin (jiġifieri ċ-ċelloli u l-wejfers) li joriġinaw jew li jiġu kkunsinjati mir-Repubblika Popolari taċ-Ċina (“ir-RPĊ”).

(2)

Grupp ta' produtturi esportaturi ta mandat lill-Kamra tal-Kummerċ taċ-Ċina għall-Importazzjoni u għall-Esportazzjoni ta' Makkinarju u ta' Prodotti Elettroniċi (“CCCME” — China Chamber of Commerce for Import and Export of Machinery and Electronic Products) sabiex tippreżenta impenn fuq il-prezz f'isimhom lill-Kummissjoni, kif fil-fatt għamlu. Huwa ċar mit-termini ta' dan l-impenn fuq il-prezz li huwa jikkostitwixxi ġabra ta' impenji individwali fuq il-prezz għal kull produttur esportatur, li hija, għal raġunijiet ta' prattiċità tal-amministrazzjoni, ikkoordinata mis-CCCME.

(3)

Permezz tad-Deċiżjoni 2013/423/UE (6), il-Kummissjoni aċċettat dan l-impenn fuq il-prezz fir-rigward tad-dazju antidumping provviżorju. Permezz tar-Regolament (UE) Nru 748/2013 (7), il-Kummissjoni emendat ir-Regolament (UE) Nru 513/2013 sabiex tintroduċi l-bidliet tekniċi meħtieġa minħabba l-aċċettazzjoni tal-impenn fir-rigward tad-dazju antidumping provviżorju.

(4)

Permezz tar-Regolament ta' Implimentazzjoni (UE) Nru 1238/2013, il-Kunsill impona dazju antidumping definittiv fuq l-importazzjonijiet ta' moduli u ta' ċelloli fl-Unjoni li joriġinaw jew li jintbagħtu mir-RPĊ (“il-prodotti kkonċernati”). Permezz tar-Regolament ta' Implimentazzjoni (UE) Nru 1239/2013, il-Kunsill impona wkoll dazju antidumping definittiv fuq l-importazzjonijiet fl-Unjoni tal-prodotti kkonċernati.

(5)

Wara n-notifika ta' verżjoni emendata tal-impenn fuq il-prezz minn grupp ta' produtturi esportaturi (“il-produtturi esportaturi”) flimkien mas-CCCME, il-Kummissjoni kkonfermat, permezz tad-Deċiżjoni ta' Implimentazzjoni 2013/707/UE (8), li aċċettat l-impenn fuq il-prezz kif emendat (“l-impenn”) għall-perjodu ta' applikazzjoni ta' miżuri definittivi. L-Anness ta' din id-Deċiżjoni jelenka b'mod partikolari l-produtturi esportaturi li għalihom ġie aċċettat l-impenn, fost l-oħrajn il-kumpaniji li ġejjin:

(6)

Permezz tad-Deċiżjoni ta' Implimentazzjoni 2014/657/UE (9), il-Kummissjoni aċċettat proposta mill-produtturi esportaturi flimkien mas-CCCME għal kjarifiki rigward l-implimentazzjoni tal-impenn għall-prodotti kkonċernati koperti mill-impenn, jiġifieri l-moduli u ċ-ċelloli li joriġinaw jew li jintbagħtu mir-RPĊ u li attwalment jaqgħu taħt il-kodiċijiet NM ex 8541 40 90 (il-kodiċijiet TARIC 8541409021, 8541409029, 8541409031 u 8541409039) magħmula mill-produtturi esportaturi (“il-prodott kopert”). Id-dazji antidumping u kumpensatorji msemmija fil-premessa 4 hawn fuq, flimkien mal-impenn, huma flimkien imsejħa, minn hemm 'il quddiem, “miżuri”.

(7)

Permezz tar-Regolament ta' Implimentazzjoni (UE) 2015/866 (10) il-Kummissjoni rtirat l-aċċettazzjoni tal-impenn għal tliet produtturi esportaturi.

(8)

Permezz tar-Regolament ta' Implimentazzjoni (UE) 2015/1403 (11) il-Kummissjoni rtirat l-aċċettazzjoni tal-impenn għal produttur esportatur ieħor.

(9)

Permezz tar-Regolament ta' Implimentazzjoni (UE) 2015/2018 (12) il-Kummissjoni rtirat l-aċċettazzjoni tal-impenn għal żewġ produtturi esportaturi.

(10)

Il-Kummissjoni bdiet investigazzjoni ta' rieżami tal-iskadenza tal-miżuri antidumping permezz ta' Notifika ta' Bidu ppubblikata f'Il-Ġurnal Uffiċjali tal-Unjoni Ewropea (13) fil-5 ta' Diċembru 2015.

(11)

Il-Kummissjoni bdiet investigazzjoni ta' rieżami tal-iskadenza tal-miżuri kompensatorji permezz ta' Notifika ta' Bidu ppubblikata f'Il-Ġurnal Uffiċjali tal-Unjoni Ewropea (14) fil-5 ta' Diċembru 2015.

(12)

Il-Kummissjoni bdiet ukoll rieżami interim parzjali tal-miżuri antidumping u l-miżuri kompensatorji permezz ta' Notifika ta' Bidu ppubblikata f'Il-Ġurnal Uffiċjali tal-Unjoni Ewropea (15) fil-5 ta' Diċembru 2015.

(13)

Permezz tar-Regolament ta' Implimentazzjoni (UE) 2016/115 (16) il-Kummissjoni rtirat l-aċċettazzjoni tal-impenn għal produttur esportatur ieħor.

(14)

Permezz tar-Regolament ta' Implimentazzjoni (UE) 2016/185 (17), il-Kummissjoni estendiet id-dazju antidumping definittiv impost bir-Regolament ta' Implimentazzjoni tal-Kunsill (UE) Nru 1238/2013 fuq l-importazzjonijiet tal-prodotti kkonċernati li joriġinaw jew li huma kkunsinjati mir-Repubblika Popolari taċ-Ċina għal importazzjonijiet tal-prodott ikkonċernat ikkunsinjati mill-Malasja u mit-Tajwan, kemm jekk iddikjarati bħala li joriġinaw fil-Malasja jew fit-Tajwan kif ukoll jekk le.

(15)

Permezz tar-Regolament ta' Implimentazzjoni (UE) 2016/184 (18), il-Kummissjoni estendiet id-dazju kumpensatorju definittiv impost bir-Regolament ta' Implimentazzjoni tal-Kunsill (UE) Nru 1239/2013 fuq l-importazzjonijiet tal-prodotti kkonċernati li joriġinaw mir-Repubblika Popolari taċ-Ċina jew ikkunsinjati minnha għal importazzjonijiet tal-prodott ikkunsinjati mill-Malasja u mit-Tajwan, kemm jekk iddikjarati bħala li joriġinaw fil-Malasja jew fit-Tajwan kif ukoll jekk le.

(16)

Permezz tar-Regolament ta' Implimentazzjoni (UE) 2016/1045 (19) il-Kummissjoni rtirat l-aċċettazzjoni tal-impenn għal produttur esportatur ieħor.

(17)

Permezz tar-Regolament ta' Implimentazzjoni (UE) 2016/1382 (20) il-Kummissjoni rtirat l-aċċettazzjoni tal-impenn għal ħames produtturi esportaturi oħra.

(18)

Permezz tar-Regolament ta' Implimentazzjoni (UE) 2016/1402 (21) il-Kummissjoni rtirat l-aċċettazzjoni tal-impenn għal tliet produtturi esportaturi oħra.

(19)

Permezz tar-Regolament ta' Implimentazzjoni (UE) 2016/1998 (22) il-Kummissjoni rtirat l-aċċettazzjoni tal-impenn għal ħames produtturi esportaturi oħra.

(20)

Permezz tar-Regolament ta' Implimentazzjoni (UE) 2016/2146 (23) il-Kummissjoni rtirat l-aċċettazzjoni tal-impenn għal żewġ produtturi esportaturi oħra.

(21)

Wara l-iskadenza u r-rieżami interim imsemmija fil-premessi 10-12, il-Kummissjoni żammet il-miżuri fis-seħħ bir-Regolamenti ta' Implimentazzjoni (UE) 2017/366 (24) u (UE) 2017/367 (25).

(22)

Il-Kummissjoni bdiet ukoll rieżami interim parzjali dwar il-forma tal-miżuri permezz ta' Notifika ta' Bidu ppubblikata f'Il-Ġurnal Uffiċjali tal-Unjoni Ewropea (26) fit-3 ta' Marzu 2017.

(23)

Permezz tar-Regolament ta' Implimentazzjoni (UE) 2017/454 (27) il-Kummissjoni rtirat l-aċċettazzjoni tal-impenn għal erba' produtturi esportaturi.

(24)

Permezz tad-Deċiżjoni ta' Implimentazzjoni (UE) 2017/615 (28), il-Kummissjoni aċċettat proposta mingħand grupp ta' produtturi esportaturi flimkien mas-CCCME rigward l-implimentazzjoni tal-impenn.

(25)

Permezz tar-Regolament ta' Implimentazzjoni (UE) 2017/941 (29) il-Kummissjoni rtirat l-aċċettazzjoni tal-impenn għal żewġ produtturi esportaturi.

(26)

Il-produtturi esportaturi qablu, fost l-oħrajn, li ma jbigħux il-prodott kopert lill-ewwel klijent indipendenti fl-Unjoni inqas minn ċertu prezz minimu tal-importazzjoni (minimum import price, “l-MIP”), sal-limitu tal-livell annwali assoċjat tal-importazzjonijiet lejn l-Unjoni (“il-livell annwali”) stipulat fl-impenn. L-MIP huwa stabbilit fuq bażi ekwivalenti ta' flus. Jekk it-terminu ta' pagament huwa differenti mill-bażi ekwivalenti ta' flus, jiġi applikat ċertu tnaqqis għall-valur tal-fattura meta titqabbel il-konformità mal-MIP.

(27)

L-impenn jikkjarifika wkoll, f'lista mhux eżawrjenti, dak li jikkostitwixxi ksur tal-impenn. Il-lista tinkludi, b'mod partikolari, li jsiru arranġamenti ta' kumpens mal-klijenti, li jsiru dikjarazzjonijiet qarrieqa rigward l-oriġini tal-prodott ikkonċernat jew l-identità tal-esportatur. Il-parteċipazzjoni f'sistema ta' kummerċ li tista' twassal għal riskju ta' evażjoni wkoll tikkostitwixxi ksur. Il-lista tinkludi wkoll li l-ħruġ ta' fattura kummerċjali, kif definit fl-impenn, li t-tranżazzjoni finanzjarja li tkun ibbażata fuqha ma tkunx skont il-valur nominali tagħha, huwa ksur.

(28)

Barra minn hekk, il-produtturi esportaturi impenjaw ruħhom li ma jbigħu l-ebda prodott ħlief il-prodott kopert, immanifatturat jew ikkummerċjalizzat minnhom aktar minn limitu perċentwali żgħir tal-valur totali tal-bejgħ tal-prodott kopert lill-istess klijenti li lilhom ibigħu l-prodott kopert (“il-limitu parallel tal-bejgħ”).

(29)

L-impenn jobbliga wkoll lill-produtturi esportaturi sabiex jipprovdu lill-Kummissjoni b'informazzjoni dettaljata dwar il-bejgħ kollu tal-esportazzjoni tagħhom lejn l-Unjoni fuq bażi trimestrali (“ir-rapporti trimestrali”). Ir-rappurtar jinkludi wkoll rappurtar ta' bejgħ mill-ġdid lill-ewwel klijent indipendenti fl-Unjoni permezz ta' importatur relatat elenkat fl-impenn. Dawn ir-rapporti tal-aħħar jippermettu li l-Kummissjoni tissorvelja jekk il-prezz tal-bejgħ mill-ġdid tal-importatur relatat lill-ewwel klijent indipendenti huwiex skont l-MIP. Il-bejgħ ta' prodotti oħra minbarra l-prodott kopert lill-istess klijenti wkoll għandu jiġi rrappurtat. Din id-dejta ppreżentata f'dawn ir-rapporti trimestrali trid tkun kompluta u korretta u t-tranżazzjonijiet irrappurtati għandhom ikunu totalment konformi mat-termini tal-impenn.

(30)

Il-produttur esportatur huwa responsabbli għall-ksur ta' kwalunkwe parti relatata, sew jekk tkun elenkata fl-impenn kif ukoll jekk le.

(31)

Il-produtturi esportaturi impenjaw ruħhom ukoll li jikkonsultaw mal-Kummissjoni rigward kwalunkwe diffikultà jew kwistjoni, teknika jew ta' xort'oħra, li tista' tinqala' matul l-implimentazzjoni tal-impenn.

(32)

L-impenn jistipula wkoll li l-Kummissjoni tista' tirtira l-aċċettazzjoni tal-impenn fi kwalunkwe ħin matul il-perjodu ta' żmien ta' applikazzjoni tagħha jekk il-monitoraġġ u l-infurzar ikunu imprattikabbli.

(33)

L-impenn jobbliga wkoll lill-produtturi esportaturi li jinnotifikaw lill-Kummissjoni fi żmien xieraq f'każ li jkun beħsiebhom jistabbilixxu parti fl-Unjoni li jkunu relatati magħha.

(34)

Bil-għan li jiżguraw konformità mal-impenn, il-produtturi esportaturi impenjaw ruħhom ukoll li jippermettu żjarat ta' verifika fil-post fil-proprjetà tagħhom biex tiġi vverifikata l-eżattezza u l-kompletezza tad-dejta ppreżentata lill-Kummissjoni fir-rapporti trimestrali msemmija u li jipprovdu l-informazzjoni kollha meqjusa bħala meħtieġa mill-Kummissjoni.

(35)

L-impenn jistipula wkoll li l-aċċettazzjoni tal-impenn mill-Kummissjoni hija bbażata fuq il-fiduċja u jenħtieġ li kwalunkwe azzjoni li tista' tagħmel ħsara lir-relazzjoni ta' fiduċja stabbilita mal-Kummissjoni tiġġustifika l-irtirar tal-impenn.

(36)

Filwaqt li għamlet monitoraġġ tal-konformità mal-impenn, il-Kummissjoni vverifikat l-informazzjoni ppreżentata miż-żewġ produtturi esportaturi BLD Solar u Topray Solar li kienet rilevanti għall-impenn. Barra minn hekk, il-Kummissjoni wettqet ukoll żjarat ta' verifika fil-bini ta' dawn il-produtturi esportaturi. Is-sejbiet elenkati fil-premessi minn 37 sa 48 jindirizzaw il-problemi identifikati għal BLD Solar u Topray Solar li jobbligaw lill-Kummissjoni tirtira l-aċċettazzjoni tal-impenn għal dawn iż-żewġ produtturi esportaturi.

(37)

Waqt iż-żjara ta' verifika f'Diċembru 2016, il-kontijiet ta' BLD Solar urew li l-akbar erba' klijenti allegatament mhux relatati kellhom ammonti sostanzjali li għadhom iridu jitħallsu għal moduli mixtrija minn BLD Solar. Pereżempju, klijent wieħed ma kienx ħallas għal aktar minn sena mill-aħħar xirja. Il-bilanċ li kien għadu jrid jitħallas kien jammonta għal aktar minn 8 % tal-bejgħ kollu ta' BLD Solar lil dan il-klijent. Dawn il-pagamenti pendenti jikkostitwixxu “krediti illimitati” li huma benefiċċji għall-klijenti. Mhumiex permessi billi l-konformità mal-MIP ma tistax tiġi verifikata għal dawn it-tranżazzjonijiet kif stabbilit fil-premessa 26. BLD Solar ħarġet għadd kbir ta' noti ta' debitu jumejn qabel iż-żjara ta' verifika, u allegatament talbet għall-pagamenti pendenti. L-ebda nota ta' debitu ma kienet iddaħħlet fil-kontijiet. Barra minn hekk, BLD Solar naqset milli tikkonsulta lill-Kummissjoni fuq din il-kwistjoni għall-kuntrarju tal-obbligi stabbiliti fil-premessa 31.

(38)

BLD Solar ħallset ammont sostanzjali lil wieħed mill-erba' klijenti msemmija fil-premessa 37. Dan il-benefiċċju jikkostitwixxi arranġament kumpensatorju. Barra minn hekk, il-pagament ma ġiex rappurtat. Il-Kummissjoni analizzat l-implikazzjonijiet ta' dan il-benefiċċju u kkonkludiet li BLD Solar kisret l-obbligu tagħha li ma tidħolx f'arranġamenti kumpensatorji, kif imsemmi fil-premessa 27. Barra minn hekk, billi ma rrappurtatx dan il-benefiċċju, BLD kisret l-obbligi ta' rappurtar imsemmija fil-premessa 29.

(39)

Skont l-informazzjoni disponibbli pubblikament, BLD Solar kellha uffiċċju fl-Unjoni bl-istess indirizz bħal wieħed mill-klijenti tagħha msemmi fil-premessa 37. BLD Solar iddikjarat li din hija kooperazzjoni kummerċjali li ma seħħitx. Klijent ieħor mill-erba' msemmija fil-premessa 37 ippubblika sit web li huwa kważi identiku għas-sit ta' BLD Solar, inkluż l-istess żbalji lingwistiċi.

(40)

Il-Kummissjoni sabet ukoll li BLD tat kont tal-bejgħ lil żewġ importaturi taħt kont tal-klijenti konġunt. Madankollu, fir-rapporti trimestrali tagħha tal-Kummissjoni, BLD iddikjarat dawn il-klijenti bħala entitajiet differenti, u għaldaqstant qajmet dubju fuq il-korrettezza tar-rapporti, kif imsemmi fil-premessa 29. Barra minn hekk, BLD tat spjegazzjonijiet kontradittorji rigward ir-relazzjonijiet kummerċjali ma' wieħed mill-klijenti li huwa relatat ma' produttur esportatur Ċiniż li mhuwiex soġġett għall-impenn.

(41)

Il-Kummissjoni analizzat is-sejbiet stabbiliti fil-premessi minn 39 sa 40 u kkonkludiet li dawn għamlu ħsara lir-relazzjoni ta' fiduċja stabbilita mal-Kummissjoni.

(42)

Barra minn hekk, il-Kummissjoni kkonkludiet li s-sejbiet stabbiliti fil-premessi 37 u (38), BLD Solar kisret it-termini tal-impenn, kif deskritt fil-premessi 26, 27, 29 u 31.

(43)

Apparti l-moduli, Topray Solar biegħet kwantitajiet kbar ta' hekk imsejħa prodotti għall-konsumatur bħal funtani solari u ċarġers solari forma ta' valiġġetta (briefcase chargers). Dawn il-prodotti mhumiex koperti mill-impenn. Ma jenħtieġ li toħroġ l-ebda fattura għal dawn il-prodotti. Madankollu, Topray Solar unilateralment iddefiniet dawn il-prodotti bħala prodott kopert mill-impenn u ħarġet fatturi tal-impenn għall-istess klijenti li kienu jinkludu: Kemm prodotti koperti kif ukoll prodotti mhux koperti mill-impenn. Barra minn hekk, il-valur tal-prodott mhux kopert mill-impenn kien jaqbeż il-limitu parallel tal-bejgħ għall-istess klijenti. Barra minn hekk, Topray Solar ma kkonsultatx lill-Kummissjoni għall-kuntrarju tal-obbligi stabbiliti fil-premessa 31.

(44)

Apparti l-bejgħ imsemmi fil-premessa 43, Topray Solar biegħet prodotti addizzjonali mhux koperti mill-impenn (pereżempju kontrolluri taċ-ċarġ solari) lill-istess klijenti mingħajr ma rrappurtat dan il-bejgħ lill-Kummissjoni. Dan il-bejgħ kompla jżid l-eċċess tal-limitu parallel tal-bejgħ imsemmi fil-premessa 43 u jikkostitwixxi ksur tal-obbligi ta' rappurtar imsemmija fil-premessa 29.

(45)

Il-Kummissjoni analizzat l-implikazzjonijiet ta' din ix-xejra ta' kummerċ u kkonkludiet li hemm riskju għoli ta' kumpens trażversali tal-MIP, jiġifieri jekk il-prodotti koperti u l-prodotti mhux koperti jinbiegħu lill-istess klijenti f'eċċess għal-limitu parallel tal-bejgħ. Il-Kummissjoni kkonkludiet li x-xejra tal-kummerċ identifikata tagħmel il-monitoraġġ tal-impenn ta' Topray Solar imprattikabbli.

(46)

Topray Solar biegħet ukoll kwantitajiet sinifikanti ta' prodotti mhux koperti mill-impenn (pereżempju kontrolluri taċ-ċarġ solari) lill-importatur relatat tagħha fl-Unjoni. Topray Solar ma setgħetx turi li dawn il-prodotti kienu ultimament mhux mibjugħa lil klijent li xtara moduli b'mod parallel. Il-Kummissjoni analizzat l-implikazzjoni ta' din ix-xejra ta' kummerċ u kkonkludiet li jeżisti riskju għoli ta' kumpens trażversali sa fejn l-importatur relatat ta' Topray Solar jista' jbigħ prodotti mhux koperti mill-impenn lill-istess klijenti li jixtru moduli b'mod parallel mingħand Topray Solar. Din ix-xejra kummerċjali tagħmel il-monitoraġġ tal-impenn ta' Topray Solar imprattikabbli. Topray Solar naqset ukoll milli tirrapporta dawn it-tranżazzjonijiet lill-Kummissjoni, u b'hekk kisret l-obbligi kif deskritti fil-premessa 29.

(47)

Il-Kummissjoni sabet ukoll li Topray Solar tat kont tal-bejgħ lil żewġ importaturi taħt kont tal-klijenti konġunt. Madankollu, fir-rapporti trimestrali tagħha tal-Kummissjoni, Topray Solar iddikjarat dawn il-klijenti bħala entitajiet differenti, u għaldaqstant qajmet dubju dwar il-korrettezza tar-rapporti, kif imsemmi fil-premessa 29.

(48)

Topray Solar naqset ukoll milli tinnotifika lil-Kummissjoni dwar l-akkwist ta' żewġ kumpaniji relatati fl-Unjoni, bi ksur tar-rekwiżit stabbilit fil-premessa 33 hawn fuq. Barra minn hekk, tranżazzjoni tal-bejgħ minuri lil waħda minn dawn il-kumpaniji kienet irrappurtata bħala bejgħ lil importatur mhux relatat, bi ksur tal-obbligi msemmija fil-premessa 29.

(49)

L-impenn jistipula li ksur minn produttur esportatur individwali ma jwassalx awtomatikament għal irtirar tal-aċċettazzjoni tal-impenn għall-produtturi esportaturi kollha. F'dan il-każ, il-Kummissjoni hija mitluba li tivvaluta l-impatt ta' dak il-ksur partikolari fuq il-prattikabbiltà tal-impenn bl-effett għall-produtturi esportaturi kollha u s-CCCME.

(50)

Għalhekk il-Kummissjoni vvalutat l-impatt tal-ksur minn BLD Solar u Topray Solar dwar il-prattikabbiltà tal-impenn bl-effett għall-produtturi esportaturi kollha u s-CCCME.

(51)

Ir-responsabbiltà għall-ksur hija biss tal-produtturi esportaturi inkwistjoni; il-monitoraġġ ma żvela l-ebda ksur sistematiku minn għadd kbir ta' produtturi esportaturi jew mis-CCCME.

(52)

Għaldaqstant, il-Kummissjoni kkonkludiet li l-funzjonament ġenerali tal-impenn mhuwiex affettwat u li ma hemm l-ebda raġuni għall-irtirar tal-aċċettazzjoni tal-impenn għall-produtturi esportaturi kollha u s-CCCME.

(53)

Il-partijiet interessati ngħataw l-opportunità li jinstemgħu u li jippreżentaw kummenti skont l-Artikolu 8(9) tar-Regolament antidumping bażiku u l-Artikolu 13(9) tar-Regolament antisussidji bażiku. Il-Kummissjoni rċeviet kummenti mingħand assoċjazzjoni li tirrappreżenta lill-produtturi tal-Unjoni ta' moduli u ċelloli solari

(54)

L-assoċjazzjoni talbet lill-Kummissjoni sabiex tirtira l-aċċettazzjoni tal-impriża għaż-żewġ produtturi esportaturi b'effett retroattiv billi qieset li dan il-ksur għamel ħsara serja u ripetuta lill-industria tal-Unjoni u ħoloq distorsjoni fis-suq tal-Unjoni.

(55)

Il-Kummissjoni eżaminat jekk hemmx raġunijiet biex jiġu invalidati fatturi tal-impenn individwali maħruġa miż-żewġ produtturi esportaturi skont l-Artikolu 3(2)(b) tar-Regolament ta' Implimentazzjoni (UE) Nru 1238/2013 l-Artikolu 2(2)(b) tar-Regolament ta' Implimentazzjoni (UE) Nru 1239/2013.

(56)

Rigward BLD Solar, il-Kummissjoni ma setgħetx tistabbilixxi li kien hemm rabta diretta bejn il-prattiki kummerċjali deskritti fil-premessi 36 sa 41 u fatturi tal-impenn individwali. Għaldaqstant, hija tqis li mhuwiex xieraq li jiġu invalidati l-ebda fatturi tal-impenn.

(57)

Rigward Topray Solar, il-Kummissjoni tqis il-każijiet fejn il-prodotti koperti mill-impriża inbiegħu flimkien mal-prodotti mhux koperti mill-impriża lill-istess klijent u fejn il-fatturi tal-impenn nħarġu għall-bejgħ ta' prodotti mhux koperti mill-impriża. Il-Kummissjonin tqis li Topray Solar, billi ħarġet fatturi tal-impenn f'dawn il-każijiet, kienet f'pożizzjoni li taħbi l-eċċess tal-limitu tal-bejgħ parallel. Għaldaqstant, il-Kummissjoni kkonkludiet li hemm rabta diretta bejn il-prattika kummerċjali li tikkostitwixxi ksur tal-impriża u l-kwistjoni ta' dawn il-fatturi tal-impenn individwali.

(58)

It-tranżazzjonijiet ta' bejgħ imsemmija fil-premessa 57 minn Topray Solar huma marbuta mal-fatturi tal-impenn segwenti:

(59)

Il-Kummissjoni ddivulgat ir-raġunijiet għall-invalidazzjoni u l-lista ta' fatturi lil Topray Solar u lill-importaturi kkonċernati kif irrappurtat minn Topray Solar fir-rapporti perjodiċi tagħha. Il-Kummissjoni ggarantiet ċerti estensjonijiet kemm lil Topray Solar kif ukoll lil diversi importaturi biex jippreżentaw il-kummenti tagħhom b'ġustifikazzjoni rraġunata.

(60)

Topray Solar għamlet dikjarazzjonijiet ġenerali li bi żball irrappurtat il-prodotti solari mhux koperti mill-impenn u li dan l-iżball mhuwiex biżżejjed biex jiskatta l-invalidazzjoni tal-fatturi tal-impenn. Iddikjarat ukoll li ma għandha l-ebda intenzjoni li tikser l-impenn. Topray Solar iddikjarat ukoll li kien hemm ftehim ħażin dwar il-prodotti solari mhux koperti mill-impenn.

(61)

Kif imsemmi fil-premessi 29 u 31, l-esportatur huwa obbligat li joħroġ fatturi tal-impenn skont id-dispożizzjonijiet tal-impenn. Kull diffikultà jew dubju rigward l-implimentazzjoni jridu jiġu kkonsultati mal-Kummissjoni. F'dan ir-rigward, il-Kummissjoni rreferiet għall-gwida komprensiva li nħarġet fir-rigward tat-terminu “prodott kopert”. Barra minn hekk, il-Kummissjoni għamlet diversi seminars, fost affarijiet oħra, rigward din il-kwistjoni. Fl-aħħar nett, il-valutazzjoni dwar jekk għandhiex tiġi invalidata fattura tal-impenn hija bbażata biss fuq evidenza fattwali.

(62)

Għaldaqstant, l-argumenti msemmija fil-premessa 60 huma rrifjutati.

(63)

Topray Solar ikkontestat ukoll l-invalidazzjoni tal-fatturi. Hia ddikjarat li l-Artikolu 8 u 10(5) tar-Regolament antidumping bażiku u l-Artikolu 13 u 16(5) tar-Regolament antisussidji bażiku ma jagħtux is-setgħa li jinvalidaw il-fatturi tal-impenn. Hija ddikjarat li l-Kummissjoni ma tistax timponi dazji/tordna lid-dwana biex timponi dazji fuq importazzjonijiet rilaxxati għal ċirkolazzjoni libera qabel id-data tal-irtirar tal-aċċettazzjoni tal-impenn jekk l-importazzjonijiet ma jkunux ġew irreġistrati. Id-dikjarazzjoni hija bbażata fuq ftehim li l-Kummissjoni tista' tiddeċiedi li timponi dazji provviżorji qabel l-irtirar tal-aċċettazzjoni tal-impenn. Skont l-Artikolu 8(10) tar-Regolament antidumping bażiku u l-Artikolu 13(10) tar-Regolament antisussidji bażiku, jista' jiġi impost dazju provviżorju f'każ li l-investigazzjoni li tkun wasslet għall-impenn ma tkunx ġiet kompluta. Dan mhuwiex il-każ fil-każ inkwistjoni fejn l-investigazzjonijiet ġew kompluti bl-impożizzjoni ta' dazji antidumping u kumpensatorji definittivi. Barra minn hekk, is-setgħa li jiġu invalidati fatturi tal-impenn ġejja direttament mill-Artikolu 3(2)(b) tar-Regolament ta' Implimentazzjoni (UE) Nru 1238/2013 u l-Artikolu 2(2)(b) tar-Regolament ta' Implimentazzjoni (UE) Nru 1239/2013. Konsegwentement, skont l-Artikolu 8(9) tar-Regolament antidumping bażiku u l-Artikolu 13(9) tar-Regolament antisussidji bażiku, f'każ ta' ksur jew irtirar tal-aċċettazzjoni tal-impenn mill-Kummissjoni, id-dazji definittivi għandhom japplikaw awtomatikament. Għaldaqstant, id-dikjarazzjoni hija rrifjutata.

(64)

Barra minn hekk, sitt importaturi ppreżentaw kummenti rigward l-invalidazzjoni tal-fatturi tal-impenn.

(65)

Żewġ importaturi ddikjaraw li nnegozjaw bona fide ma' Topray Solar u ma setgħux ikunu f'pożizzjoni li jkunu jafu li Topray Solar ma rrispettatx l-impenn. L-ewwel importatur iddikjara wkoll li l-prodotti mhux koperti ammontaw għal parti żgħira meta mqabbel mal-moduli solari li xtara minn Topray Solar. Barra minn hekk, l-ewwel importatur iddikjara li l-invalidazzjoni tal-fatturi tkun devastanti u li tkun responsabbli għal ċirkustanzi lil hinn mill-kontroll tiegħu. It-tieni importatur iddikjara li kellu operazzjoni kummerċjali waħda biss ma' Topray Solar f'Awwissu 2013 u li ma kienx jaf bl-aċċettazzjoni tal-impenn dak iż-żmien.

(66)

Il-Kummissjoni tfakkar li jenħtieġ li l-importaturi jkunu konxji li jista' jiġġarrab dejn doganali bħala riskju normali tan-negozju, fil-ħin tal-aċċettazzjoni tad-dikjarazzjoni għar-rilaxx f'ċirkolazzjoni libera kif deskritt fil-premessi 11 u 12 anke jekk il-Kummissjoni taċċetta impenn offrut mill-manifattur li jkunu qed jixtru, direttament jew indirettament, mingħandu kif stipulat fid-Deċiżjoni 2013/423/UE li taċċetta l-impenn u kkonfermat bid-Deċiżjoni ta' Implimentazzjoni 2013/707/UE. Il-Kummissjoni tinnota wkoll li l-prodott mhux kopert mixtri mill-ewwel importatur ma rrappreżentax parti żgħira: kienet taqbeż sew il-limitu parallel tal-bejgħ. Barra minn hekk, il-Kummissjoni tenfasizza li d-Deċiżjoni 2013/423/UE ġiet ippubblikata qabel il-konklużjoni tat-tranżazzjoni tal-bejgħ iddikjarata mit-tieni importatur. Il-Kummissjoni tinnota wkoll li ħadd mill-importaturi ma kkontesta li l-fatturi tal-impenn inħarġu minn prodotti mhux koperti mill-impenn. Għaldaqstant, l-argumenti taż-żewġ importaturi ġew rifjutati.

(67)

It-tielet importatur ippreżenta biss id-dokumentazzjoni rispettiva relatata mal-fattura tal-impenn li l-Kummissjoni tipproponi biex tinvalida. L-istess bħaż-żewġ importaturi msemmija fil-premessi 65 u 66, dan l-importatur ma kkontestax li l-fattura tal-impenn inħarġet għal prodott mhux kopert mill-impenn. Għaldaqstant, il-Kummissjoni tikkonferma s-sejba inizjali tagħha li l-fattura tal-impenn trid tiġi invalidata.

(68)

It-raba' importatur iddikjara li ma jistax jinżamm responsabbli għall-ksur ta' Topray Solar u l-fattura tal-impenn inħarġet għall-pannelli solari, li huma prodott kopert mill-impenn. Barra minn hekk, dan l-importatur ippreżenta kummenti ġenerali li jikkonċernaw in-nuqqas ta' limitu ta' żmien raġonevoli għall-preżentazzjoni. Il-ħames importatur iddikjara li l-prezz tal-moduli solari mixtrija minn Topray Solar kienu ogħla sew mill-MIP allegat u li importaw inqas jew l-istess kwantità ta' prodotti oħrajn (kontrolluri) għajr il-pannelli solari.

(69)

Il-Kummisjoni l-ewwel tfakkar li l-“prodott kopert” mill-impenn huwa biss il-pannelli solari li huma espliċitament imsemmija fil-premessa 6. L-MIP mhuwiex applikabbli għal prodotti mhux koperti mill-impenn, b'mod partikulari għal panelli solari li jaqgħu barra mill-kamp ta' applikazzjoni definit fil-premessa 6. Ma jagħmilx sens li jitqabbel il-prezz tal-bejgħ tal-prodott mhux kopert mill-impenn mal-MIP allegat. Dawn il-prodotti ma kinux soġġetti għall-investigazzjoni; għaldaqstant il-prezz tagħhom ma jistax jiġi verifikat u mqabbel mal-MIP allegat. Topray Solar ma kellha toħroġ l-ebda fattura tal-impenn għal prodotti mhux koperti mill-impenn. Bil-ħruġ ta' dawn il-fatturi tal-impenn li kisru l-impenn, Topray Solar kienet f'pożizzjoni li tgħatti l-eċċess tal-limitu parallel tal-bejgħ. Il-bejgħ tal-kontrolluri msemmija mill-ħames importatur jikkostitwixxi livell addizzjonali għall-ksur diġà eżistenti tal-limitu parallel tal-bejgħ kif imsemmi fil-premessa 44. Fir-rigward tal-limitu ta' żmien raġonevoli biex jibagħtu l-kummenti, il-Kummissjoni tfakkar li, minkejja l-estensjoni mogħtija lir-raba' importatur, hija naqset milli tippreżenta aktar kummenti dwar is-sustanza tad-divulgazzjoni. Għaldaqstant il-Kummissjoni tirrifjuta dawn l-argumenti.

(70)

Is-sitt importatur iddikjara li l-prodotti l-oħra li ħarġu fatturi tal-impenn għalihom kienu pannelli solari mixtrija għal skopijiet dimostrattivi.

(71)

Il-Kummissjoni tinnota li fil-fatt parti mill-fattura tal-impenn setgħet titqies bħala kampjun u l-importatur seta' segwa l-proċedura doganali rispettiva għall-kampjuni biex jirrilaxxahom f'ċirkolazzjoni libera fl-Unjoni. Madankollu, dan ma kienx il-każ u l-importatur ma kkontestax li Topray Solar ħarġet fatturi tal-impenn għal prodott mhux kopert mill-impenn. Għaldaqstant, dan l-argument ġie rifjutat.

(72)

Għaldaqtstant, f'konformità mal-Artikolu 3(2)(b) tar-Regolament ta' Implimentazzjoni (UE) Nru 1238/2013 u l-Artikolu 2(2)(b) tar-Regolament ta' Implimentazzjoni (UE) Nru 1239/2013, dawn il-fatturi huma ddikjarati invalidi. Id-dejn doganali mġarrab fiż-żmien tal-aċċettazzjoni tad-dikjarazzjoni għar-rilaxx f'ċirkolazzjoni libera għandu jiġi rkuprat mill-awtoritajiet doganali nazzjonali skont l-Artikolu 105(3)-(6) tar-Regolament (UE) Nru 952/2013 tal-Parlament Ewropew u tal-Kunsill (30) meta jidħol fis-seħħ l-irtirar tal-impenn fir-rigward tal-produttur esportatur. L-awtoritajiet doganali nazzjonali responsabbli għall-ġbir tad-dazji se jiġu infurmati kif xieraq.

(73)

F'dan il-kuntest, il-Kummissjoni tfakkar li skont l-Artikolu 3(1)(b) moqri flimkien mal-Anness III, Nru 7 tar-Regolament ta' Implimentazzjoni (UE) Nru 1238/2013 u skont l-Artikolu 2(1)(b) moqri flimkien mal-Anness 2, Nru 7 tar-Regolament ta' Implimentazzjoni (UE) Nru 1239/2013, l-importazzjonijiet huma eżenti mid-dazji biss jekk il-fattura tindika l-prezz u tnaqqis possibbli għall-prodott kopert. Meta ma jinżammux dawn il-kundizzjonijiet, id-dazji huma dovuti, anki meta l-fattura kummerċjali li takkumpanja l-prodotti ma tkunx ġiet invalidata mill-Kummissjoni.

(74)

Għalhekk, skont l-Artikolu 8(9) tar-Regolament antidumping bażiku u l-Artikolu 13(9) tar-Regolament antisussidji bażiku, kif ukoll skont it-termini tal-impenn, il-Kummissjoni kkonkludiet li jenħtieġ li l-aċċettazzjoni tal-impenn għal BLD Solar u Topray Solar tiġi rtirata.

(75)

Għaldaqstant, skont l-Artikolu 8(9) tar-Regolament antidumping bażiku u l-Artikolu 13(9) tar-Regolament antisussidji bażiku, id-dazju antidumping definittiv impost mill-Artikolu 1 tar-Regolament ta' Implimentazzjoni (UE) Nru 1238/2013 u d-dazju kumpensatorju definittiv impost mill-Artikolu 1 tar-Regolament ta' Implimentazzjoni (UE) Nru 1239/2013 japplikaw awtomatikament għall-importazzjonijiet tal-prodott ikkonċernat li joriġinaw jew jiġu kkunsinjati mir-RPĊ u li huma magħmula minn Topray Solar u BLD Solar mill-ġurnata tad-dħul fis-seħħ ta' dan ir-Regolament.

(76)

Il-Kummissjoni tfakkar ukoll li meta l-awtoritajiet doganali tal-Istati Membri jkollhom indikazzjonijiet li l-prezz ippreżentat f'fattura tal-impenn ma jkunx jikkorrispondi mal-prezz li fil-fatt tħallas, jenħtieġ li huma jinvestigaw jekk kienx hemm ksur tar-rekwiżit li jiġi inkluż kwalunkwe tnaqqis fl-irċevuti tal-impenn jew jekk il-prezz minimu tal-importazzjoni (MIP) ma jkunx ġie rispettat. Jekk l-awtoritajiet doganali tal-Istati Membri jikkonkludu li kien hemm ksur bħal dan jew jekk l-MIP ma ġiex rispettat, jenħtieġ li jiġbru d-dazji bħala konsegwenza ta' dan. Fuq il-bażi tal-Artikolu 4(3) tat-Trattat, sabiex jiġi ffaċilitat ix-xogħol tal-awtoritajiet doganali tal-Istati Membri, jenħtieġ li f'sitwazzjonijiet bħal dawn il-Kummissjoni taqsam it-test kunfidenzjali u informazzjoni oħra dwar l-impenn għall-iskop uniku ta' proċedimenti nazzjonali.

(77)

Għal skopijiet ta' informazzjoni, it-tabella fl-Anness II ta' dan ir-Regolament telenka lill-produtturi esportaturi li għalihom l-aċċettazzjoni tal-impenn mid-Deċiżjoni ta' Implimentazzjoni 2013/707/UE mhijiex affettwata,