(1)

Permezz tar-Regolament ta' Implimentazzjoni (UE) Nru 430/2013 (2) (“ir-Regolament ikkontestat”), il-Kunsill impona dazju definittiv antidumping b'rati li jvarjaw minn 14,9 % sa 57,8 % fuq importazzjonijiet ta' fittings tal-fondut għal tubi jew pajpijiet bil-kamin, ta' ħadid fondut malleabbli, li attwalment jaqgħu taħt il-kodiċi NM ex 7307 19 10 (kodiċi TARIC 7307191010) u li joriġinaw mir-Repubblika tal-Poplu taċ-Ċina u mit-Tajlandja. Komponenti ta' fittings b'kompressjoni bl-użu tal-kamin metriku ISO DIN 13 u kaxxi fejn jingħaqdu l-kejbils tal-ħadid malleabbli bil-kamin ċirkolari mingħajr ma jkollhom għatu mhumiex koperti mid-dazju.

(2)

Fit-12 ta' Ġunju 2013, produttur esportatur Ċiniż li kkoopera, Jinan Meide Castings Co., Ltd. (“Jinan Meide jew l-applikant”), ippreżentaw applikazzjoni fil-Qorti Ġenerali tal-Unjoni Ewropea (“il-Qorti Ġenerali”) fejn talbu l-annullament tar-Regolament ikkontestat sa fejn dan japplika għall-applikant (3).

(3)

Fis-sentenza tagħha fit-30 ta' Ġunju 2016, il-Qorti Ġenerali sabet li d-drittijiet ta' difiża Jinan Meide kienu miksura bit-tiċħid tat-talba tiegħu għall-iżvelar tal-kalkoli ta' valur normali bl-użu ta' dejta kunfidenzjali minn produttur ta' pajjiż analogu. Jinan Meide kienet kisbet awtorizzazzjoni esklużiva mill-produttur ta' pajjiż analogu u rrinunzjat il-kunfidenzjalità tad-dejta tagħha. B'mod partikolari, il-Qorti Ġenerali sabet li l-Kummissjoni kienet żbaljata meta ddependiet fuq il-ħtieġa ta' konformità mal-prinċipju ta' trattament indaqs sabiex tiċħad din it-talba għall-iżvelar. Il-Qorti Ġenerali ddeċidiet li ma jistax jiġi eskluż li jekk it-talba kienet aċċettata, l-eżitu tal-investigazzjoni seta' kien differenti. Għalhekk, il-Qorti annullat ir-Regolament ikkontestat sa fejn kien impona dazju ta' antidumping fuq l-importazzjonijiet ta' fittings tal-fondut għal tubi jew pajpijiet bil-kamin, ta' ħadid fondut malleabbli manifatturati minn Jinan Meide.

(4)

Skont l-Artikolu 266 tat-Trattat dwar il-Funzjonament tal-Unjoni Ewropea l-istituzzjonijiet tal-Unjoni għandhom l-obbligu li jikkonformaw mas-sentenza tal-Qorti Ġenerali tat-30 ta' Ġunju 2016.

(5)

Fis-sentenza tagħha fil-kawża T-2/95 (4) (“il-kawża IPS”), il-Qorti ta' Prim'Istanza għarfet li, fil-kawżi fejn proċediment jikkonsisti f'bosta stadji amministrattivi, l-annullament ta' wieħed minn dawn l-istadji ma jannullax il-proċediment kollu. Il-proċediment antidumping huwa eżempju ta' proċediment b'bosta stadji bħal dan. Konsegwentement, l-annullament tar-Regolament ikkontestat fil-konfront ta' parti waħda ma jimplikax l-annullament tal-proċedura sħiħa qabel l-adozzjoni ta' dak ir-Regolament. L-istituzzjonijiet tal-UE għandhom il-possibbiltà li jirrimedjaw l-aspetti tar-Regolament ikkontestat li wasslu għall-annullament tiegħu, filwaqt li jitħallew kif inhuma dawk il-partijiet mhux ikkontestati u li mhumiex affettwati mis-sentenza tal-Qorti — kif ġie deċiż mill-Qorti tal-Ġustizzja fil-kawża C-458/98 P (5).

(6)

Jenħtieġ li jiġi nnutat li apparti l-konklużjoni li l-Kummissjoni kienet żbaljata meta ddependiet fuq il-ħtieġa li tikkonforma mal-prinċipju ta' trattament ugwali sabiex tiċħad it-talba ta' Jinan Meide għall-iżvelar, il-konklużjonijiet l-oħrajn kollha magħmula fir-Regolament ikkontestat li ma kinux ikkontestati fil-limiti taż-żmien għal kontestazzjoni jew li kienu kkontestati iżda ġew miċħuda mis-sentenza tal-Qorti Ġenerali jew ma ġewx eżaminati mill-Qorti Ġenerali u għalhekk ma wasslux għall-annulament tar-Regolamet ikkontestat, jibqgħu validi.

(7)

Wara s-sentenza tal-Qorti Ġenerali tat-30 ta' Ġunju 2016, il-Kummissjoni ppubblikat avviż (6) dwar il-ftuħ mill-ġdid parzjali tal-investigazzjoni dwar l-antidumping dwar importazzjonijiet ta' fittings tal-fondut għal tubi jew pajpijiet bil-kamin, ta' ħadid fondut malleabbli, li joriġinaw mir-Repubblika tal-Poplu taċ-Ċina. Il-ftuħ mill-ġdid kien limitat fil-kamp tal-applikazzjoni tiegħu għall-implimentazzjoni tas-sentenza tal-Qorti Ġenerali fir-rigward ta' Jinan Meide.

(8)

Il-Kummissjoni uffiċjalment avżat lil Jinan Meide, lir-rappreżentanti tal-pajjiż esportatur u lill-industrija tal-Unjoni dwar il-ftuħ parzjali mill-ġdid tal-investigazzzjoni. Il-partijiet interessati ngħataw l-opportunità li jagħtu l-fehmiet tagħhom bil-miktub u li jitolbu li jinstemgħu fil-limitu taż-żmien stipulat fl-avviż.

(9)

Wara l-kummenti inizjali rċevuti, il-partijiet interessati kollha magħrufa li huma kkonċernati mill-investigazzjoni oriġinali ġew ikkuntattjati u ngħataw l-opportunità li jagħmlu l-fehmiet tagħhom magħrufa bil-miktub u li jitolbu smigħ.

(10)

Il-partijiet interessati kollha li talbu dan ingħataw l-opportunità li jinstemgħu mill-Kummissjoni u/jew mill-Uffiċjal tas-seduta.

(11)

Il-Kummissjoni rċeviet sottomissjonijiet dwar diversi aspetti tal-investigazzjoni minn Jinan Meide, minn produtturi esportaturi Ċiniżi oħrajn, minn produttur esportatur Tajlandiż, minn ħames produtturi u minn tmien importaturi mhux relatati.

(12)

Jinan Meide argumentat li l-illegalità mwettqa mill-Istituzzjonijiet tal-Unjoni li wasslet għall-annullament tar-Regolament ikkontestat ma tistax tiġi rregolarizzata u l-proċediment jenħtieġ li jiġi tterminat mingħajr l-impożizzjoni mill-ġdid ta' kwalunkwe dazju antidumping fuq Jinan Meide.

(13)

Kif imsemmi fuq fil-premessa (4), il-Qorti ta' Prim'Istanza fil-Kawża IPS irrikonixxiet li, f'każijiet fejn proċediment jikkonsisti f'għadd ta' stadji amministrattivi, bħal fi proċediment antidumping, l-annullament ta' wieħed minn dawk l-istadji ma jannullax il-proċediment sħiħ. Peress li l-Istituzzjonijiet tal-Unjoni huma obbligati li jikkonformaw mas-sentenza tal-Qorti, dan jimplika l-possibbiltà li tirrimedja l-aspetti tar-Regolament ikkontestat li wasslu għall-annullament tiegħu, filwaqt li ma jbiddlux il-partijiet mhux ikkontestati. It-talba għalhekk ma ntlaqgħetx.

(14)

Importatur wieħed mhux relatat qal li ma huwiex proċeduralment possibbli li terġa' tinfetaħ investigazzjoni li ġiet konkluża qabel peress li konsegwentament, kienu jseħħu nuqqasijiet sostanzjali, bħal li tiġi aċċettata informazzjoni ġdida wara l-għeluq ta' każ, id-diskriminazzjoni kontra l-partijiet l-oħrajn kollha tal-investigazzjoni li l-marġnijiet tagħhom tad-dumping kienu jkunu differenti li kieku l-marġni tad-dumping ta' Jinan Meide kien emendat, u ksur tal-liġi tal-UE u tad-WTO fis-sens li miżuri antidumping ma jistgħux jiġu applikati b'mod retroattiv.

(15)

Dan l-importatur sostna wkoll li l-ftuħ mill-ġdid ma jidhirx li huwa permess taħt it-termini tar-Regolament bażiku.

(16)

L-istess parti stqarret ukoll li l-Kummissjoni mhijiex awtorizzata li tieħu azzjoni biex timplimenta sentenza tal-Qorti fir-rigward ta' Regolament tal-Kunsill, minħabba li l-Kummissjoni ma kinitx il-konvenuta fil-Kawża T-424/13. Hija sostniet li l-Kummissjoni teħtieġ li tirċievi struzzjonijiet formali mill-Kunsill biex tniedi ftuħ mill-ġdid.

(17)

Huwa ċar mis-sentenza ta' kawżi magħquda C-283/14 u C-284/14 (7) li l-Istituzzjonijiet tal-UE jistgħu jerġgħu jiftħu investigazzjoni antidumping biex jemendaw irregularitajiet misjuba mill-Qrati Ewropej minkejja li din mhijiex stipulata mod ieħor espressament fir-Regolament bażiku. L-Istituzzjonijiet tal-UE fil-fatt, huma meħtieġa li jieħdu l-miżuri neċessarji biex jirrimedjaw l-illegalitajiet. F'dan il-każ, il-Kummissjoni, bħala l-awtorità ta' investigazzjoni, reġgħet fetħet l-investigazzjoni sabiex timplimenta s-sentenza tal-Qorti. Il-ftuħ mill-ġdid ta' din l-investigazzjoni jsegwi l-proċeduri legali meħtieġa mir-Regolament bażiku, li jipprevedu l-adozzjoni mill-Kummissjoni wara li tikkonsulta l-Istati Membri skont il-proċedura ta' eżami msemmija fl-Artikolu 15(3) tar-Regolament bażiku. Għaldaqstant, it-talbiet ġew miċħuda.

(18)

Importatur wieħed qal li ma kienx ċar sa fejn ftuħ mill-ġdid seta' jitwettaq skont id-dispożizzjonijiet tar-Regolament bażiku attwali peress li huwa ċar li l-Kummissjoni kellha l-intenzjoni li tkompli l-investigazzjoni daqslikieku kellha terġa' lura għaż-żmien meta r-Regolament tal-Kunsill (KE) Nru 1225/2009 (8) kien għadu fis-seħħ.

(19)

Il-liġi applikabbli għal din l-investigazzjoni mill-ġdid hija r-Regolament (KE) Nru 1225/2009 li kienet il-liġi sostantiva fil-mument tal-adozzjoni tar-regolament annullat mill-Qorti. Fi kwalunkwe każ, ir-Regolament (UE) 2016/1036 huwa kodifikazzjoni tar-Regolament (KE) Nru 1225/2009 u l-emendi tiegħu. Għalhekk l-argument ma ntlaqax.

(20)

Produttur esportatur mit-Tajlandja argumenta li l-Kummissjoni għandha terġa' timponi d-dazju ta' 40,8 % fuq Jinan Meide mingħajr modifika peress li l-Qorti Ġenerali ma sabet l-ebda nuqqas ma' ebda waħda mill-konklużjonijiet, imma irregolarità proċedurali biss. Sostna wkoll li kwalunkwe rikonsiderazzjoni sostantiva tista' tindirizza biss il-kalkolu tal-valur normali għal Jinan Meide u l-konklużjonijiet l-oħrajn kollha fir-Regolament ikkontestat jenħtieġ li jibqgħu validi peress li ma kienx hemm indikazzjoni fis-sentenza tal-Qorti Ġenerali li r-rimedju tal-irregolarità proċedurali jenħtieġ li jirriżulta fi kwalunkwe bidliet sostantivi għall-kalkolu tal-valur normali għal Jinan Meide.

(21)

Fis-sentenza li twassal għall-ftuħ mill-ġdid attwali, il-Qorti Ġenerali qieset li ma setax jiġi eskluż li jekk it-talba għall-iżvelar ta' dejta kunfidenzjali tal-produttur ta' pajjiż analogu kienet ġiet aċċettata, ir-riżultat tal-investigazzjoni seta' kien differenti. Għalhekk, il-ftuħ mill-ġdid għandu jeżamina l-impatt possibbli fuq is-sustanza ta' din l-investigazzjoni. Għalhekk l-argument ma ntlaqax.

(22)

Importatur mhux relatat argumenta li minħabba li l-industrija tal-Unjoni ma kkummentax dwar il-ftuħ mill-ġdid, dan allegatament kien ifisser li m'hemmx interess mill-Unjoni biex titwettaw din l-investigazzjoni li nfetħet mill-ġdid.

(23)

In-nuqqas ta' sottomissjoni minn ċertu tip ta' operatur ma jistax per se jwassal għal konklużjoni dwar is-sustanza f'investigazzjoni. Fi kwalunkwe każ, ħames produtturi tal-Unjoni talbu lill-Kummissjoni biex terġa' timponi d-dazju antidumping b'mod urġenti fuq Jinan Meide u anke biex terġa' tirreġistra importazzjonijiet għall-imponiment retroattiv potenzjali ta' dazji sabiex jiġi limitat id-dannu li s-sitwazzjoni kurrenti qed tikkawża għall-produtturi tal-Unjoni. Għalhekk l-argument ma ntlaqax.

(24)

Jinan Meide sostniet li hija jenħtieġ li tikseb aċċess komprensiv għall-informazzjoni kollha sottomessa mill-produttur ta' pajjiż analogu u żmien abbundanti biex tressaq kummenti. It-tali informazzjoni kollha kienet disponibbli għal Jinan Meide, u Jinan Meide kellha biżżejjed żmien biex tippreżenta l-kummenti wara l-qafas ta' żmien previsti fir-Regolament bażiku, inkluż bosta seduti ta' smigħ mat-tim tal-każ u mal-Uffiċjal tas-Seduta. Wara l-iżvelar tal-informazzjoni kunfidenzjali u l-kalkoli tad-dumping, Jinan Meide ppreżentat ukoll sottomissjonijiet barra l-iskadenzi stipulati għal dak il-għan, li minkejja dan, xorta ġew ikkunsidrati.

(25)

Jinan Meide ddikjarat li jenħtieġ li ma titwettaqx sitwazzjoni normali ta' test ta' kummerċ peress li l-produttur ta' pajjiż analogu ma setgħax jipprovdi spiża affidabbli ta' produzzjoni skont it-tip ta' prodott simili. Importatur wieħed appoġġa dan l-argument peress li allokazzjoni tal-ispiża bbażata fuq il-fatturat tassumi li l-istess marġni ta' profitt huwa ġġenerat għat-tipi kollha ta' prodotti, li allegatament, mhuwiex affidabbli.

(26)

Madankollu, il-Kummissjoni konsistentement twettaq is-sitwazzjoni normali ta' test ta' kummerċ fl-investigazzjonijiet tagħha. B'mod partikolari, l-Artikolu 2(5) tar-Regolament bażiku jitratta speċifikament sitwazzjonijiet bħal dawn kif imsemmi minn Jinan Meide, u jistipula li fl-assenza ta' metodu iktar xieraq, tingħata preferenza lill-allokazzjoni tal-ispejjeż abbażi tal-fatturat. F'dan ir-rigward, huwa nnutat li l-ispejjeż kienu allokati fuq il-bażi tal-fatturat u li l-ebda metodu xieraq ieħor ma ġie propost minn xi parti interessata. Din id-deċiżjoni biex jiġu allokati l-ispejjeż abbażi tal-fatturat u biex titwettaq sitwazzjoni normali ta' test ta' kummerċ, għalhekk inżammet.

(27)

Jinan Meide talbet li t-tipi ta' prodotti li huma mibjugħa mill-produttur tal-pajjiż analogu fi kwantitajiet ta' inqas minn 200 kg jenħtieġ li ma jitqisux fil-kalkolu tal-valur normali peress li l-prezzijiet ta' dawn it-tipi ta' prodotti allegatament m'humiex ta' min jorbot fuqhom. Ta' min jinnota li matul l-investigazzjoni oriġinali, Jinan Meide sostniet li t-test ta' rappreżentattività ta' 5 % jenħtieġ li ma jitwettaqx meta l-valur normali huwa stabbilit f'pajjiż analogu, u f'dak iż-żmien, din it-talba ntlaqgħet mill-Kummissjoni. It-talba biex ma jitqiesx il-bejgħ ta' tipi ta' prodotti li jinbiegħu fi kwantitajiet ta' inqas minn 200 kg ma ntlaqgħetx peress li l-prezzijiet tal-bejgħ għal tipi ta' prodott simili mibjugħa fi kwantitajiet ta' inqas minn 200 kg ma jistgħux jiġu kkunsidrati bħala inaffidabbli peress li kienu vverifikati u nstabu li kienu affidabbli bħal kwalunkwe prezz tal-bejgħ ieħor.

(28)

Importatur wieħed qabel mal-argument ta' Jinan Meide peress li l-volatilità tal-prezzijiet għal tipi ta' prodotti li ma jinbiegħux malajr allegatament tkun għolja. Dan ifisser li t-tipi ta' prodott jistgħu jkollhom kwalità u struttura tal-kosti simili ħafna imma jistgħu jinbiegħu bi prezzijiet differenti ħafna. Madankollu, il-Kummissjoni stabbiliet li, fir-rigward tal-produttur tal-pajjiż analogu, il-volatilità tal-prezzijiet hija għolja għat-tipi kollha tal-prodotti, anke għall-oġġetti li jinbiegħu l-iżjed. Għalhekk, il-volatilità għolja allegata tal-prezzijiet ma tistax tintuża bħala argument biex jiġu esklużi t-tipi ta' prodotti li ma jinbiegħux malajr mill-kalkolu tad-dumping. It-talba għalhekk ma ntlaqgħetx.

(29)

Jinan Meide ddikjarat ukoll li minħabba li l-Kummissjoni kienet allokat l-ispejjeż tal-produttur tal-pajjiż analogu abbażi tal-fatturat, il-valur normali jenħtieġ li ma jinħadimx jekk it-tipi komparabbli tal-prodott simili fil-pajjiż analogu nbiegħu fi kwantitajiet ta' anqas minn 200 kg, imma l-valur normali jenħtieġ li jiġi stabbilit f'tali każijiet abbażi tal-prezzijiet ta' tipi simili oħrajn li jinbiegħu fi kwantitajiet ikbar. Din it-talba wkoll ma ntlaqgħetx peress li l-allokazzjoni tal-ispejjeż kollha abbażi tal-fatturat hija konformi mal-Artikolu 2(5) tar-Regolament bażiku u l-argumenti ta' Jinan Meide ma kienux biżżejjed biex jiġġustifikaw metodoloġija differenti f'dan il-każ partikolari.

(30)

Jinan Meide ressqet talbiet dwar l-aġġustamenti fid-dejta tal-produttur tal-pajjiż analogu dwar il-kreditu, l-ispejjeż tal-ippakkjar, il-livell ta' kummerċ, it-tariffi bankarji, it-trasport domestiku, in-noti ta' kreditu, l-użu ta' materja prima differenti u l-produttività tax-xogħol differenti.

(31)

Il-Kummissjoni aċċettat it-talba rigward it-trasport domestiku u l-ispejjeż ta' kreditu bħala waħda relatata ma' klijent uniku wieħed ta' produttur tal-pajjiż analogu u l-aġġustamenti korrispondenti saru fil-kalkolu ta' dumping ta' Jinan Meide.

(32)

Fir-rigward tat-talbiet rigward id-differenza fil-produttività tax-xogħol u l-użu ta' materja prima differenti, Jinan Meide allegat li l-produttività iktar baxxa għal kull ħaddiem u l-użu ta' materja prima differenti wasslu għal żieda moderata fl-ispiża tal-produttur tal-pajjiż analogu meta mqabbla ma' Jinan Meide. F'dan ir-rigward, jenħtieġ li jiġi nnutat li filwaqt li xi differenzi fl-effiċjenza jew fil-produttività jistgħu jeżistu bejn il-kumpaniji, il-prinċipju ewlieni ta' kalkoli antidumping huwa li jiżgura l-komparabbiltà bejn il-prezzijiet tal-esportazzjoni u l-valur normali, li ma teħtieġx li ċ-ċirkostanzi ta' produttur ta' pajjiż analogu u esportatur f'pajjiż b'ekonomija li mhijiex tas-suq jkunu kompletament allinjati. Fil-fatt, huma biss id-differenzi għal fatturi li jaffettwaw il-prezzijiet u l-komparabbiltà tal-prezzijiet bejn pajjiż produttur analogu u esportatur f'pajjiż b'ekonomija li mhijiex tas-suq li jiġġustifikaw aġġustament.

(33)

It-talbiet l-oħra nstabu li ma kinux sostnuti mill-evidenza miġbura mill-post u preżenti fil-fajl u għalhekk ġew miċħuda.

(34)

Waqt il-preparazzjoni tal-iżvelar finali għal Jinan Meide, il-Kummissjoni identifikat żball klerikali fir-rigward tal-aġġustament għat-taxxi indiretti fil-kalkolu tad-dumping għal Jinan Meide. Għall-kuntrarju għal dak li l-Kummissjoni ddikjarat fit-test tar-Regolamenti proviżorji (9) u definittivi (10), minħabba żball klerikali, l-aġġustament għal taxxi indiretti ma sarx fiż-żmien tal-iżvelar finali ta' Jinan Meide, minkejja li sar fi stadju proviżjonali. Dan l-iżball ġie kkoreġut għal raġunijiet ta' amministrazzjoni tajba.

(35)

Fit-12 ta' April 2017, il-Kummissjoni nfurmat lill-partijiet interessati kollha dwar il-konklużjonijiet imsemmija fuq, li abbażi tagħhom kien maħsub li jiġi propost li jkun impost mill-ġdid dazju antidumping fuq importazzjonijiet ta' fittings tal-fondut għal tubi jew pajpijiet bil-kamin, ta' ħadid fondut malleabbli, li jeskludi komponenti ta' fittings b'kompressjoni bl-użu tal-kamin metriku ISO DIN 13 u kaxxi fejn jingħaqdu l-kejbils tal-ħadid malleabbli bil-kamin ċirkolari mingħajr ma jkollhom bżonn għatu, minn Jinan Meide abbażi tal-fatti miġbura u ppreżentati marbuta mal-investigazzjoni oriġinali.

(36)

Jinan Meide u tliet importaturi mhux relatati sostnew li l-Kummissjoni ma setgħetx tipproċedi bil-korrezzjoni tal-iżball kleriku (fir-rigward tal-aġġustament għat-taxxi indiretti fil-kalkolu tagħha tal-marġni tad-dumping) fil-qafas tal-ftuħ mill-ġdid preżenti peress li l-iżball klerikali ma kienx relatat mal-implimentazzjoni tas-sentenza tal-Qorti Ġenerali. Jinan Meide talbet u ngħatat ukoll seduta ta' smigħ mal-Uffiċjal tas-Seduta. Żewġ importaturi mhux relatati sostnew li l-Kummissjoni hija prekluża milli tqiegħed il-produttur esportatur f'pożizzjoni agħar milli kien fiha oriġinarjament.

(37)

Jinan Meide tenniet l-affermazzjoni tagħha li l-Kummissjoni jenħtieġ li titratta t-tipi ta' prodotti li għalihom il-volum tal-bejgħ tal-pajjiż analogu kien inqas minn 200 kg bħat-tipi ta' prodotti li kważi jaqblu jew li ma jaqblux u li ma tistax tiddependi fuq spejjeż mhux affidabbli biex teskludi bejgħ minn determinazzjoni tal-valur normali.

(38)

Jinan Meide kkontestat id-deċiżjoni tal-Kummissjoni li tirrifjuta t-talbiet ta' aġġustamenti tagħha fir-rigward tal-livell ta' kummerċ, l-ispejjeż tal-ippakkjar, l-ispejjeż tal-krediti, l-ispejjeż tal-assigurazzjoni domestika u d-differenzi fil-materja prima u l-produttività.

(39)

Jinan Meide sostniet li jenħtieġ li l-ebda dazju ma jkun impost fuqha b'riżultat ta' vjolazzjonijiet proċedurali allegati u irregolaritajiet oħrajn f'dawn il-proċedimenti. F'dan il-kuntest, il-kumpanija sostniet li żball fl-iżvelar tat-23 ta' Diċembru 2016 tefa' fid-dubju jekk il-Kummissjoni żvelatx il-verżjoni kunfidenzjali tal-kalkoli magħmula fi stadju definittiv tal-investigazzjoni oriġinali, u li l-iżvelar ma spjegax id-differenzi allegati mal-kalkoli magħmula fl-investigazzjoni oriġinali. Sostniet ukoll li l-Kummissjoni rrifjutat li tiżvela ċerti elementi minkejja t-talbiet ripetuti ta' Jinan Meide. Sostniet ukoll li l-allegazzjonijiet magħmula fil-Każ T-424/13, imma li ma ġewx indirizzati mill-Qorti Ġenerali baqgħu validi u se jkomplu jivvizzjaw il-miżuri fil-każ li jerġgħu jiġu imposti.

(40)

Il-Kummissjoni tfakkar li waqt il-preparazzjoni tal-iżvelar finali għal Jinan Meide, hija identifikat żball klerikali fir-rigward tal-aġġustament għat-taxxi indiretti fil-kalkolu tad-dumping għal Jinan Meide. Għal raġunijiet ta' amministrazzjoni tajba, il-Kummissjoni pproponiet li tikkoreġi dan l-iżball f'dak l-istadju u żvelat din il-proposta lill-partijiet interessati kollha b'mod xieraq.

(41)

Wara li kkunsidrat l-argumenti kollha mressqa, il-Kummissjoni ddeċidiet li taċċetta t-talba ta' Jinan Meide u li ma tikkoreġix l-iżball klerikali. Wara l-opinjoni tal-Uffiċjal tas-Seduta, il-Kummissjoni kkunsidrat li ma hemm l-ebda prinċipju ġenerali ta' projbizzjoni ta' reformatio in peius fil-ftuħ mill-ġdid ta' każijiet ta' difiża tal-kummerċ—jiġifieri li parti interessata soġġetta għall-ftuħ mill-ġdid ta' każijiet ta' difiża tal-kummerċ tista' titqiegħed f'pożizzjoni inqas favorevoli minn dik li kienet fiha qabel ma sar dak il-ftuħ mill-ġdid. Madankollu, il-Kummissjoni kkonkludiet li, f'dan il-każ speċifiku, l-iskop tal-ftuħ mill-ġdid jenħtieġ li jkun limitat għall-iżvelar tad-dejta mill-pajjiż analogu, jirċievi kummenti minn partijiet interessati u jekk meħtieġ, jirrevedi d-dazju kif xieraq. Peress li l-iżball fil-kalkoli fir-rigward tar-rimborż tal-VAT għal bejgħ f'esportazzjonijiet, u b'mod partikolari, ir-rata ta' rimborż tal-VAT mhuwiex relatat mad-dejta miksuba mingħand il-produttur fil-pajjiż analogu, tali korrezzjoni hija kkunsidrata li tkun barra mill-iskop tal-investigazzjoni miftuħa mill-ġdid.

(42)

Fid-29 ta' Mejju 2017, il-Kummissjoni bagħtet id-Dokument ta' Informazzjoni Supplimentari fejn infurmat lill-partijiet interessati tad-deċiżjoni tagħha li ma tikkoreġix l-iżball kleriku li għalih hemm referenza fil-premessa (34). Il-Kummissjoni rċeviet kummenti minn importatur wieħed biss, li tenniet li minħabba l-iżvelar limitat lill-importaturi, mhijiex f'pożizzjoni li tikkumenta fuq l-aġġustamenti. Għaldaqstant, fl-assenza ta' argumenti għall-kuntrarju, il-konklużjonijiet dwar l-aġġustamenti huma kkonfermati.

(43)

Fir-rigward tat-tipi ta' prodotti mibjugħa f'kwantitajiet ta' anqas minn 200 kg, Jinan Meide rreferiet għall-opinjoni tal-Avukat Ġenerali fil-każ Goldstar (11) li “sabiex il-prezzijiet domestiċi jkunu komparabbli, irid ikun hemm volum suffiċjenti ta' bejgħ f'termini assoluti fuq is-suq domestiku li jirriżulta mill-fatt li l-prezzijiet domestiċi jistgħu jvarjaw minn post tal-bejgħ għall-ieħor. Barra minn hekk, il-prezzijiet jistgħu jvarjaw matul perjodu ta' referenza wieħed”, u “sabiex ikun rappreżentattiv, dik il-medja ponderata trid tkun ibbażata fuq numru minimu ta' bejgħ”.

(44)

Fid-dawl ta' dan, ta' min jinnota li l-Avukat Ġenerali kompla l-opinjoni tiegħu fis-subparagrafu li ġej li dan “iżda, ma jfissirx li l-istituzzjonijiet tal-Komunità, għandhom ikunu meħtieġa wkoll japplikaw limitu assolut, apparti l-limitu relattiv imsemmi qabel fejn il-bejgħ inqas minn dan il-limitu ma għandux jitqies, għandu jkun stabbilit għal 5 % u kkalkulat għal kull mudell. Ma jagħmilx ħafna sens li wieħed jistabbilixxi limitu minimu assolut b'mod ġenerali peress li l-valur ta' ċifra assoluta tiddependi wisq mill-qrib fuq in-natura tal-prodott.” Għalhekk, l-opinjoni tal-Avukat Ġenerali fil-fatt tikkonferma li tabilħaqq, m'huwiex neċessarju li wieħed japplika limitu minimu assolut, bħal-limitu assolut tal-200 kg sostnut minn Jinan Meide.

(45)

Fir-rigward tal-kwistjoni tal-varjazzjonijiet fil-prezzijiet, kif indikat fil-premessa (28) above, din affettwat it-tipi kollha ta' prodotti u mhux biss it-tipi ta' prodotti mibjugħa fi kwantitajiet ta' anqas minn 200 kg.

(46)

Importatur wieħed mhux relatat appoġġa lit-talba ta' Jinan Meide fir-rigward tar-rappreżentattività ta' prodotti b'fatturat baxx u tenna l-kummenti tiegħu f'dan ir-rigward. Huwa ta stqarrija ġenerali li l-pożizzjoni tal-Kummissjoni tikkontradixxi l-esperjenza ġenerali tas-suq. L-istqarrija tal-Kummissjoni hija bbażata fuq dejta miksuba mill-produttur tal-pajjiż analogu. Meta wieħed iqis li d-dikjarazzjoni ma ġietx sostitwuta iktar u fid-dawl tal-premessi (28)u (42) et seq. hawn fuq, it-talba għalhekk ma tintlaqgħax.

(47)

Fir-rigward tad-dikjarazzjoni li tikkonċerna l-ispejjeż mhux affidabbli, Jinan Meide ddikjara li l-Kummissjoni eventwalment rrikorriet għas-sett inizjali tad-dejta tal-ispejjeż li ġie sottomess, minkejja li allegatament, inizjalment kienet ikkunsidrat li dan ma kienx jilħaq l-istandards. Dan l-argument ma kienx appoġġjat mill-fatti tal-investigazzjoni. Fil-fatt, il-Kummissjoni qatt ma kkunsidrat li l-ewwel sett ta' dejta tal-ispejjeż ma kienx jilħaq l-istandards. F'tali ċirkostanzi, bħalma sostna Jinan Meide, mhuwiex xieraq għalhekk li l-ispejjeż irrapurtati mill-produttur tal-pajjiż analogu ma jitqisux kompletament.

(48)

Importatur wieħed mhux relatat tenna l-kumment tiegħu li l-allokazzjoni tal-ispiża bbażata fuq il-fatturat tassumi li l-istess marġni ta' profitt huwa ġġenerat għat-tipi kollha ta' prodotti, li allegatament, jikkontradixxi l-loġika osservata fis-suq. Id-dikjarazzjoni ma ġietx sostanzjata ulterjorment. Kif iddikjarat fil-premessa (26) hawn fuq, f'konformità mar-Regolament bażiku, fl-assenza ta' metodu iktar xieraq, se tingħata preferenza lill-allokazzjoni tal-ispejjeż abbażi tal-fatturat. L-ispejjeż kienu allokati fuq il-bażi tal-fatturat u ebda metodu ieħor iktar xieraq ma ġie propost minn xi parti interessata. Għaldaqstant id-dikjarazzjoni ġiet miċħuda.

(49)

Fir-rigward tal-livell ta' aġġustament tal-kummerċ, Jinan Meide tenniet l-affermazzjoni tagħha li meta jiġi determinat jekk livell ta' aġġustament tal-kummerċ huwiex garantit jew le, huwa suffiċjenti li tiġi stabbilita differenza fil-prezzijiet medji għal kategoriji differenti ta' klijenti. Madankollu, l-Artikolu 2(10)(d)(i) tar-Regolament jirrikjedi li jkun hemm “differenza kostanti u distinta fil-prezzijiet tal-bejjiegħ għal-livelli differenti ta' kummerċ.” Għalhekk, paragun sempliċi tal-prezzijiet medji mhuwiex meqjus bħala biżżejjed biex tiġi stabbilita differenza tant kostanti u distinta fil-prezzijiet. Għall-kuntrarju, analiżi tal-informazzjoni fil-fajl turi li t-tipi kollha tal-klijenti huma fis-segmenti kollha tal-firxa ta' prezzijiet.

(50)

Importatur wieħed mhux relatat sostna li l-Kummissjoni jenħtieġ li twettaq livell ta' aġġustament tal-kummerċ, iżda minħabba nuqqas ta' aċċess għad-dejta, dan ma setax jikkummenta iktar. Huwa sostna wkoll li minħabba n-nuqqas ta' aċċess għall-kalkolu tal-marġni tad-dumping, ma setax jikkummenta iktar. F'dan ir-rigward, huwa mfakkar li l-Kummissjoni għandha l-obbligu li tipproteġi informazzjoni kunfidenzjali li rċeviet minn partijiet interessati. Madankollu, is-sottomissjonijiet mhux kunfidenzjali kollha huma disponibbli għall-partijiet interessati, li huma mistiedna jikkummentaw. Il-Kummissjoni iżda tinnota li, kif indikat fil-premessa (49) above, l-informazzjoni fil-fajl uriet li f'dan il-każ, ma kienx hemm differenzi kostanti u distinti fil-prezzijiet imposti lit-tipi differenti tal-klijenti. Livell ta' aġġustament fil-kummerċ għalhekk mhuwiex xieraq.

(51)

Fir-rigward tal-provvediment għall-ispejjeż tal-kreditu, tnaqqas il-provvediment skont l-informazzjoni dwar id-dokumentazzjoni tal-bejgħ, kemm min-naħa tal-prezz ta' esportazzjoni kif ukoll min-naħa tal-parti tal-valur normali. Jinan Meide argumentat li l-provvediment għall-ispejjeż tal-kreditu fuq il-parti tal-valur normali jenħtieġ li jsir abbażi tan-numru reali ta' jiem bejn l-irċevuta u l-pagament peress li l-Kummissjoni allegatament naqqas prevvediment għall-ispejjeż tal-kreditu fuq il-bejgħ mill-esportazzjoni minkejja li ma kien hemm l-ebda terminu ta' pagament fuq id-dokumentazzjoni tal-bejgħ. Din id-dikjarazzjoni nstabet li ma kinitx appoġġata mill-evidenza fil-fajl tal-investigazzjoni. Jinan Meide lanqas ma kienet kapaċi tipprovdi evidenza biex issostni d-dikjarazzjoni tagħha. Barra minn hekk, ġie stabbilit li kemm min-naħa tal-parti tal-valur normali kif ukoll min-naħa tal-prezz tal-esportazzjoni, il-pagament attwali ta' sikwit sar wara t-terminu ta' pagament fuq id-dokumentazzjoni tal-bejgħ. Il-kalkolu tal-provvediment fuq l-ispiża tal-kreditu abbażi tad-data attwali tal-pagament fuq il-valur normali u abbażi tal-informazzjoni li tinsab fid-dokumentazzjoni ta' bejgħ tal-prezz tal-esportazzjoni għalhekk ma jwassalx għal kumpariżi ġusta. Il-Kummissjoni għalhekk sostniet l-approċċ tagħha li tistabbilixxi provvediment għal spejjeż tal-kreditu fuq il-bażi tal-informazzjoni dwar id-dokumentazzjoni ta' bejgħ kemm għall-valur normali kif ukoll fuq il-prezz tal-esportazzjoni.

(52)

Fir-rigward tal-provvediment għall-ispejjeż tal-imballaġġ, Jinan Meine tennet id-dikjarazzjonijiet tagħha li l-provvediment tal-ispejjeż tal-imballaġġ kien żbaljat u l-provvediment li kien għad fadal għall-ispejjeż tal-imballaġġ kien baxx ħafna u mhux raġonevoli. Madankollu, ma ssostantjatx l-argument tagħha iktar, b'mod partikolari dwar ir-raġuni għala l-provvediment li kien għad fadal kienet anormalment daqshekk baxx. Il-Kummissjoni għalhekk żammet il-metodoloġija tagħha fir-rigward tal-provvediment għall-ispejjeż ta' imbalaġġ.

(53)

Fl-aħħar mill-aħħar, il-Kummissjoni tiċħad l-allegazzjonijiet ta' Jinan Meide dwar il-ksur proċedurali u irregolaritajiet oħra f'dawn il-proċedimenti. Il-Kummissjoni osservat il-prinċipji kollha u rrispettat il-passi proċedurali kollha. Il-Kummissjoni reġgħet fetħet l-investigazzjoni, żvelat id-dejta mill-pajjiż analogu, kif kien meħtieġ sabiex timplimenta s-sentenza tal-Qorti, u rrevediet ir-rata ta' dazju ta' Jinan Meide skont dan. Fil-passi kollha tal-investigazzjoni, il-partijiet interessati ngħataw l-opportunità li jikkummentaw, kif ukoll li jinstemgħu waqt seduta. Fil-fatt, tul il-proċedimenti kollha, il-Kummissjoni kienet trasparenti u involuta u organizzat laqgħat fuq it-talba ta' Jinan Meide għal kjarifiki u seduti. Il-Kummissjoni kkjarifikat il-problema teknika relatata ma' fajl ħażin tal-Excel li kellu kalkoli li rriżultaw fl-inkonsistenzi msemmija minn Jinan Meide. Fi kwalunkwe każ, dan l-iżball ma kellu l-ebda impatt fuq il-marġni ta' dumping u ġie kkoreġut minnufih. Il-Kummissjoni żvelat l-informazzjoni kunfidenzjali kollha lil Jinan Meide, inkluż il-fajl kunfidenzjali biċ-ċifri wżati għall-marġni ta' dumping fl-2013. Fir-rigward tat-talbiet li saru quddiem il-Qorti Ġenerali iżda li ma kienux indirizzati minn din is-sentenza, il-Kummissjoni tikkontesta l-illegalitajiet allegati kollha indikat minn Jinan Meide. Il-Kummissjoni wettqet id-dover tagħha li timplimenta s-sentenza tal-qorti billi tindirizza l-illegalitajiet iddikjarati mill-Qorti Ġenerali. Abbażi ta' dan, il-Kummissjoni ma tistax tara ksur proċedurali msemmi minn Jinan Meide u terġa' tiddikjara li hija kkonformat mal-prinċipji u r-rekwiżiti proċedurali kollha, u b'hekk ippermettiet lil Jinan Meide (u partijiet interessati oħra) biex teżerċita d-drittijiet proċedurali tagħha tul l-investigazzjoni.

(54)

Jinan Meide tenniet ukoll l-argumenti tagħha dwar id-differenza fil-produttività tax-xogħol u dwar l-użi tal-materjali prima differenti mingħajr ma pprovdiet iktar argumenti jew evidenza f'dan ir-rigward. Din il-pożizzjoni kienet appoġġjata minn importatur wieħed mhux relatat. Dawn l-argumenti ġew indirizzati fil-premessa (32) above.

(55)

Importatur wieħed mhux relatat tenna d-dikjarazzjoni tiegħu li l-ftuħ mill-ġdid bħala tali ma kienx kumpatibbli mad-dispożizzjonijiet tar-Regolament bażiku. Kif indikat fil-premessa (17), huwa ċar mis-sentenza ta' kawżi magħquda C-283/14 u C-284/14 (12) li l-Istituzzjonijiet tal-UE jistgħu jerġgħu jiftħu investigazzjoni antidumping biex jemendaw irregularitajiet misjuba mill-Qrati Ewropej minkejja li din mhijiex stipulata mod ieħor espressament fir-Regolament bażiku. L-istituzzjonijiet tal-Unjoni fil-fatt, huma meħtieġa li jieħdu l-miżuri neċessarji biex jirrimedjaw l-illegalitajiet. It-talba għalhekk ma ntlaqgħetx.

(56)

Importatur ieħor mhux relatat indika l-effetti negattivi tad-dazji antidumping (minħabba l-impatt fuq il-profitabbiltà u l-fatturat, kif ukoll il-kundizzjonijiet il-ġodda tas-swieq, jiġifieri, il-prezzijiet ġodda, sorsi ġodda). Kif stipulat fil-premessa (41) hawn fuq, l-għan tal-ftuħ mill-ġdid preżenti kien limitat għall-implimentazzjoni tas-sentenza tal-Qorti Ġenerali fir-rigward ta' Jinan Meide, speċjalment biex jiżvela d-dejta kunfidenzjali tal-produttur tal-pajjiż analogu lil Jinan Meide. It-talba għalhekk ma ntlaqgħetx.

(57)

Importatur wieħed mhux relatat sostna li l-bidla (żieda allegata) fir-rata tad-dazju kienet tinħtieġ valutazzjoni mill-ġdid tal-impatt tad-dazju fuq importaturi u utenti. Madankollu, kif iddikjarat fil-premessa (41), il-Kummissjoni ma ħaditx passi biex tikkoreġi l-iżball klerikali relatat mar-rimborż tal-VAT għaliex kien ikkunsidrat bħala barra l-kamp ta' applikazzjoni tal-investigazzjoni li nfetħet mill-ġdid. It-talba għalhekk ma ntlaqgħetx.

(58)

L-istess parti sostniet wkoll li l-Kummissjoni jenħtieġ li twettaq reviżjoni interim peress li l-perjodu ta' investigazzjoni oriġinali kien aktar minn ħames snin fil-passat. L-għan tal-ftuħ mill-ġdid ġie definit b'mod ċar fl-avviż ta' ftuħ mill-ġdid (13). Ftuħ mill-ġdid u rieżami ta' interim huma strumenti b'għanijiet differenti. Fi kliem ieħor, l-għan ta' dan il-ftuħ mill-ġdid kien li tiġi implimentata s-sentenza tal-Qorti Ġenerali fir-rigward ta' Jinan Meide. Min-naħa l-oħra, rieżamijiet ta' interim huma strument b'kundizzjonijiet legali definiti b'mod ċar, speċjalment sabiex jiġu rieżaminati l-miżuri fis-seħħ minħabba ċirkostanzi mibdula ta' natura dejjiema. It-talba għalhekk ma ntlaqgħetx.

(59)

Finalment, parti waħda sostniet li l-Kummissjoni messha analizzat id-dikjarazzjonijiet li tqajmu fil-proċedimenti tal-qorti anki jekk dawn ma kinux indirizzati mill-qorti sabiex tiġi evitata aktar litigazzjoni. Il-Kummissjoni tinnota li l-għan tal-ftuħ mill-ġdid preżenti kien limitat għall-implimentazzjoni tas-sentenza tal-Qorti Ġenerali fir-rigward ta' Jinan Meide, speċjalment biex jiżvela d-dejta kunfidenzjali tal-produttur tal-pajjiż analogu lil Jinan Meide. It-talba għalhekk ma ntlaqgħetx.

(60)

Il-paragun tal-prezz ta' esportazzjoni medju ponderat mal-valur normali medju ponderat ikkalkulat mill-ġdid skont it-tip tal-prodott fuq bażi ta' ex fabbrika wera l-eżistenza tad-dumping. Il-marġni stabbilit tad-dumping, espress bħala perċentwal tal-prezz tal-importazzjoni tas-CIF mal-fruntiera tal-Unjoni, bid-dazju mhux imħallas, kien ta' 39,2 %.

(61)

Il-Kummissjoni ħadet kont tal-kummenti li saru mill-partijiet u kkonkludiet li l-implimentazzjoni tas-sentenza tal-Qorti Ġenerali jenħtieġ li tieħu l-għamla tal-iżvelar mill-ġdid lil Jinan Meide tal-iżvelar finali tal-15 ta' Marzu 2013 bl-informazzjoni addizzjonali dwar il-kalkoli ta' valur normali bl-użu ta' dejta kunfidenzjali tal-produttur tal-pajjiż analogu. Wara l-iżvelar mill-ġdid, il-Kummissjoni rċeviet u kkunsidrat kummenti minn Jinan Meide u partijiet interessati oħra. Abbażi ta' din il-valutazzjoni u tal-konsiderazzjonijiet fil-premessi (40) sa (58) ta' hawn fuq, il-Kummissjoni kkunsidrat li huwa xieraq li terġa' timponi d-dazju antidumping fuq importazzjonijiet ta' fittings tal-fondut għal tubi jew pajpijiet bil-kamin, ta' ħadid fondut malleabbli, li jeskludi komponenti ta' fittings b'kompressjoni bl-użu tal-kamin metriku ISO DIN 13 u kaxxi fejn jingħaqdu l-kejbils tal-ħadid malleabbli bil-kamin ċirkolari mingħajr ma jkollhom bżonn għatu, immanifatturat minn Jinan Meide.

(62)

L-industrija tal-Unjoni rrappreżentata mill-ħames produtturi tal-Unjoni li għadhom attivi, argumentat li s-sitwazzjoni wara l-annullament tad-dazju antidumping għal Jinan Meide tiġġustifika reġistrazzjoni tal-importazzjonijiet. It-talba ġiet imtennija wara d-divulgazzjoni finali.

(63)

Skont l-Artikolu 9(5) tar-Regolament bażiku, l-uniku għan ta' tali reġistrazzjoni madankollu hija l-ġbir retroattiv possibbli ta' dazji. Il-kundizzjonijiet għal ġbir retroattiv ta' dazji madankollu ma ntlaqgħux fil-każ preżenti. Għalhekk, mhijiex iġġustifikata reġistrazzjoni ta' importazzjonijiet.

(64)

Abbażi ta' dak li ntqal hawn fuq, il-Kummissjoni kkunsidrat li kien xieraq li terġa' timponi d-dazju definittiv antidumping fuq importazzjonijiet ta' fittings fonduti ta' tubi jew pajpijiet bil-kamin, ta' ħadid fondut malleabbli, li jeskludi komponenti ta' fittings b'kompressjoni bl-użu tal-kamin metriku ISO DIN 13 u kaxxi fejn jingħaqdu l-kejbils tal-ħadid malleabbli bil-kamin ċirkolari mingħajr ma jkollhom għatu, li attwalment jaqgħu fil-kodiċi NM ex 7307 19 10 (kodiċi TARIC 7307191010) u li joriġinaw mir-Repubblika tal-Poplu taċ-Ċina u mmanifatturati minn Jinan Meide bir-rata ta' 39,2 %.

(65)

Din il-proċedura ma taffettwax id-data li fiha se jiskadu l-miżuri imposti mir-Regolament ikkontestat skont l-Artikolu 11(2) tar-Regolament bażiku.

(66)

Il-Kumitat stabbilit bl-Artikolu 15(1) tar-Regolament (UE) 2016/1036 ma tax opinjoni.

(1)

Permezz ta' notifika elettronika bid-data tas-17 ta' Mejju 2010, ir-Rumanija nnotifikat lill-Kummissjoni, f'konformità mal-Artikolu 108(3) tat-Trattat, skema ta' għajnuna li tipprovdi sostenn pubbliku favur ajruporti reġjonali (2) żgħar. In-notifika ġiet irreġistrata taħt il-każ Nru N 185/2010.

(2)

Il-Kummissjoni talbet informazzjoni addizzjonali dwar il-miżura notifikata fit-23 ta' Ġunju 2010, is-7 ta' Ottubru 2010, it-3 ta' Diċembru 2010 u s-17 ta' Marzu 2011. L-awtoritajiet Rumeni pprovdew l-informazzjoni mitluba fit-22 ta' Lulju 2010, is-27 ta' Ottubru 2010, l-20 ta' Jannar 2011 u l-5 ta' April 2011.

(3)

Fil-15 ta' Settembru 2010 l-awtoritajiet Rumeni infurmaw lill-Kummissjoni dwar ċertu tibdil għall-iskema notifikata, b'mod partikolari fir-rigward tan-numru ta' benefiċjarji.

(4)

Permezz ta' ittra bid-data tal-24 ta' Mejju 2011, il-Kummissjoni infurmat lir-Rumanija li kienet iddeċidiet li tibda l-proċedura ta' investigazzjoni formali stabbilita fl-Artikolu 108(2) tat-TFUE fir-rigward tal-għajnuna notifikata u ta' miżuri oħra favur ajruporti li ma kinux parti min-notifika iżda tressqu quddiem il-Kummissjoni mir-Rumanija fil-fażi ta' valutazzjoni preliminari (minn hawn 'il quddiem, “id-deċiżjoni tal-ftuħ”). (3) B'mod partikolari, fil-fażi tal-valutazzjoni preliminari, il-Kummissjoni ġiet infurmata mill-awtoritajiet Rumeni li l-ajruporti reġjonali kienu ngħataw finanzjament pubbliku fil-perjodu 2007 — 2009 biex jiġi kopert telf operattiv.

(5)

Il-Kummissjoni adottat Rettifika għad-deċiżjoni tal-ftuħ fit-23 ta' Ġunju 2011.

(6)

Id-deċiżjoni tal-ftuħ ġiet ippubblikata f'Il-Ġurnal Uffiċjali tal-Unjoni Ewropea. (4) Il-Kummissjoni talbet lill-partijiet interessati jippreżentaw il-kummenti tagħhom.

(7)

B'ittri bid-dati tas-27 ta' Ġunju 2011, il-5 ta' Lulju 2011 u d-19 ta' Awwissu 2011, ir-Rumanija ppreżentat il-kummenti tagħha dwar id-deċiżjoni tal-ftuħ.

(8)

Il-Kummissjoni rċeviet kummenti minn tliet partijiet interessati, jiġifieri t-trasportatur tal-ajru Carpatair, l-ajruport ta' Cluj — Napoca u l-assoċjazzjoni Rumena tal-Ajruporti (minn hawn 'il quddiem “RAA”).

(9)

Permezz ta' ittra bid-data tas-16 ta' Settembru 2011, il-Kummissjoni bagħtet il-kummenti tal-partijiet interessati lir-Rumanija.

(10)

Permezz ta' ittra bid-data tal-25 ta' Lulju 2011, ir-Rumanija rtirat in-notifika tagħha tal-iskema ta' finanzjament ippjanata tal-investimenti fl-infrastruttura fl-ajruporti reġjonali żgħar tar-Rumanija. Ir-Rumanija impenjat ruħha sabiex tiffinanzja dawn l-ajruporti f'konformità mad-Deċiżjoni tal-Kummissjoni 2005/842/KE (5) dwar l-applikazzjoni tal-Artikolu 86(2) tat-Trattat tal-KE [issal-Artikolu 106(2) TFEU] (minn hawn 'il quddiem “id-Deċiżjoni SGEI tal-2005”). Konsegwentement, fil-31 ta' Ottubru 2011, il-Kummissjoni għalqet l-investigazzjoni tagħha rigward dik il-miżura. Il-proċedura ta' investigazzjoni formali baqgħet miftuħa fir-rigward tal-finanzjament pubbliku mogħti lill-ajruporti reġjonali tar-Rumanija fil-perjodu 2007 — 2009.

(11)

Il-linji gwida tal-Kummissjoni dwar l-għajnuna mill-Istat għall-ajruporti u l-linji tal-ajru (minn hawn 'il quddiem “il-Linji Gwida tal-2014 dwar l-Avjazzjoni”) ġew ippubblikati f'Il-Ġurnal Uffiċjali tal-Unjoni Ewropea fl-4 ta' April 2014. (6) Dawn issostitwixxew il-linji gwida tal-2005 dwar il-finanzjament ta' ajruporti u għajnuna tal-bidu lil linji tal-ajru li jitilqu minn ajruporti reġjonali (minn hawn 'il quddiem, “il-Linji Gwida tal-2005 dwar l-Avjazzjoni”).

(12)

Fil-15 ta' April 2014 ġie ppubblikat avviż f'Il-Ġurnal Uffiċjali tal-Unjoni Ewropea li stieden lill-Istati Membri u l-partijiet interessati jippreżentaw kummenti dwar l-applikazzjoni tal-Linji Gwida tal-2014 dwar l-Avjazzjoni, f'dan il-każ fi żmien xahar mid-data tal-pubblikazzjoni. Il-Kummissjoni ma rċeviet l-ebda tweġiba għal dik l-istedina.

(13)

Kif diġà msemmi hawn fuq, fil-qafas tan-notifika tal-investimenti fl-infrastruttura f'ajruporti reġjonali żgħar, ir-Rumanija infurmat lill-Kummissjoni li l-parti l-kbira tal-ajruporti reġjonali fir-Rumanija kienu qed jagħmlu t-telf, u li t-telf operattiv tagħhom kien kopert mill-finanzjament pubbliku fuq bażi annwali.

(14)

Tabella 1 turi l-lista tal-finanzjament pubbliku magħmul disponibbli lill-ajruporti tal-kategorija D (7) fil-perjodu 2007 — 2009, kif ippreżentata mir-Rumanija.

Tabella 1

Finanzjament pubbliku mogħti lil 13-il ajruport reġjonali (eluf ta' RON)

(15)

Matul il-fażi ta' investigazzjoni preliminari r-Rumanija sostniet li dan il-finanzjament jammonta l-aktar għal għajnuna eżentata mir-rekwiżit ta' notifika abbażi tad-Deċiżjoni SGEI tal-2005. L-unika eċċezzjoni tkun il-finanzjament pubbliku mogħti lill-ajruport ta' Timișoara. Dan il-finanzjament qed jiġi investigat mill-Kummissjoni taħt il-każ Nru SA.31662. (8)

(16)

B'mod partikolari, ir-Rumanija ddikjarat li l-finanzjament pubbliku mogħti kull sena lill-ajruporti reġjonali rrappreżenta kumpens għall-għoti ta' servizz ta' interess ekonomiku ġenerali (minn hawn 'il quddiem “SGEI”). F'dan is-sens, il-miżura tkun osservat b'mod kumulattiv il-kundizzjonijiet stabbiliti mid-Deċiżjoni dwar l-SGEI tal-2005, jiġifieri:

(17)

Id-Deċiżjoni tal-Gvern 398/1997 tirreferi għat-trasferiment tas-sjieda tal-ajruporti reġjonali mill-Ministeru tat-Trasport lill-kunsilli tal-kontei lokali u għaldaqstant il-bidla tal-istatut tagħhom minn “regii autonome” b'karatteristiċi speċjali ta' interess nazzjonali għal “regii autonome” b'karatteristiċi speċjali ta' interess lokali. Id-Deċiżjoni tinkludi fost l-oħrajn dispożizzjonijiet rigward l-assi, il-baġits u l-persunal tagħhom. Id-Deċiżjoni tistabbilixxi fl-Annessi tagħha dispożizzjonijiet rigward l-istruttura organizzattiva u l-finanzjament tal-ajruporti. L-Annessi jelenkaw ukoll l-attivitajiet ta' dawk li jmexxu l-ajruport (eż. il-ġestjoni tal-infrastruttura tal-ajruport, l-organizzazzjoni u l-provvista ta' servizzi tal-immaniġġjar, l-iżgurar tas-sigurtà ta', fost affarijiet oħra, l-inġenji tal-ajru, il-passiġġieri, l-attivitajiet tal-ajruport, l-iżvilupp, il-manutenzjoni u l-modernizzazzjoni tar-runways, l-erji tar-rampa tat-taxiways, it-tagħmir, eċċ.) iżda ma jippreżentawx dawn l-attivitajiet bħala PSOs imposti fuq dawk li jmexxu l-ajruport. Il-lista ta' attivitajiet tapplika għall-ajruporti kkonċernati kollha b'mod ġenerali jiġifieri ma hemmx lista separata għal kull ajruport. Ir-Rumanija ddikjarat li dawn l-attivitajiet, jiġifieri l-ġestjoni ġenerali tal-ajruporti inkwistjoni, jenħtieġ li jitqiesu bħala SGEI u l-kompatibilità tal-miżura jenħtieġ li tiġi vvalutata skont l-Artikolu 106 tat-Trattat.

(18)

Fir-rigward tal-finanzjament tal-ajruporti, id-Deċiżjoni tal-Gvern 398/1997 tistabbilixxi li l-ispejjeż operattivi u kapitali tal-ajruporti inkwistjoni jiġu koperti minn riżorsi proprji supplimentati minn finanzjament pubbliku. L-awtoritajiet Rumeni jsostnu li dan il-mekkaniżmu jipprevjeni l-kumpens żejjed sa fejn l-ajruporti jistgħu jirċievu biss l-ammont meħtieġ biex ikopru l-ispejjeż kollha, biex għaldaqstant jiġi evitat il-kumpens żejjed.

(19)

Barra minn hekk, l-awtoritajiet Rumeni indikaw li attivitajiet mhux direttament marbuta mal-attivitajiet ewlenin tal-ajruporti mhumiex qed jiġu sussidjati, f'konformità mal-punti (34) u 53(iv) tal-Linji Gwida tal-2005 dwar l-Avjazzjoni.

(20)

Wieħed mill-ajruporti elenkati fit-Tabella 1, l-ajruport ta' Constanța, mhuwiex soġġett għad-Deċiżjoni tal-Gvern 398/1997. L-awtoritajiet Rumeni ċċaraw li l-finanzjament pubbliku għal dan l-ajruport jirrappreżenta kumpens għat-twettiq tal-PSOs skont id-Deċiżjoni tal-Gvern 523/1998. Din id-Deċiżjoni tistabbilixxi li Societatea Națională “Aeroportul Internațional Constanța” hija kumpanija li għandha l-ishma li hija l-proprjetà tal-Istat u li l-entità ġuridika antika (Regia Autonoma Aeroportul International Constanța — Mihail Kogalniceanu) hija abolita. Id-Deċiżjoni u l-annessi tagħha jinkludu dispożizzjonijiet rigward l-assi, l-istruttura organizzattiva, il-finanzjament u jelenkaw l-attivitajiet li jridu jitwettqu minn dawk li jmexxu l-ajruport (eż. l-operat tal-infrastruttura tal-ajruport, l-organizzazzjoni u l-provvista ta' servizzi tal-immaniġġjar, l-iżgurar tas-sigurtà tal-passiġġieri, l-inġenji tal-ajru, eċċ., il-manutenzjoni tar-runways, it-taxiways, l-erji tar-rampa, eċċ.). Dawn l-attivitajiet mhumiex ippreżentati bħala PSOs imposti fuq dawk li jmexxu l-ajruport. Fir-rigward tal-finanzjament, id-Deċiżjoni tal-Gvern 523/1998 tistabbilixxi li skont it-tip ta' assi u spejjeż li jridu jiġu ffinanzjati, l-ispejjeż jiġu ffinanzjati minn riżorsi proprji u krediti jew minn riżorsi proprji supplimentati minn finanzjament pubbliku jew minn finanzjament pubbliku biss (9). L-awtoritajiet Rumeni speċifikaw ukoll li dan l-ajruport huwa bażi militari tar-Rumanija u l-Istati Uniti, għalhekk il-kontinwità operazzjonali tiegħu hija kkunsidrata bħala objettiv strateġiku ta' sigurtà nazzjonali.

(21)

Għall-ajruport fil-pussess tal-Istat (Constanța) il-finanzjament inkwistjoni jingħata mill-baġit tal-Istat. Għall-bqija tal-ajruporti, li s-sjieda tagħhom ġiet trasferita lill-awtoritajiet lokali mid-Deċiżjoni tal-Gvern 398/1997, il-finanzjament pubbliku jingħata mill-awtoritajiet lokali pemezz ta' riżorsi lokali.

(22)

Il-benefiċjarji huma l-operaturi tal-ajruporti tar-Rumanija f'Arad, Bacău, Baia Mare, Cluj — Napoca, Craiova, Iași, Oradea, Satu — Mare, Sibiu, Suceava, Târgu — Mureș, Tulcea u Constanța.

(23)

Tabella 2 turi t-traffiku fl-ajruporti kkonċernati fil-perjodu li qed jiġi valutat 2007 — 2009 kif ukoll fis-snin riċenti (2013 — 2015).

Tabella 2

Traffiku fit-tlettax-il ajruport

(24)

Mit-13-il ajruport, ħames ajruporti biss (Arad, Baia Mare, Satu Mare, Constanța u Oradea) kellhom ajruport tal-UE ieħor f'distanza ta' 100 km jew 60 minuta ta' vvjaġġar. L-ajruport Arad huwa 50 km u 40 minuta f'ħin tal-ivvjaġġar mill-Ajruport ta' Timișoara. L-ajruporti ta' Baia Mare u Satu Mare jinsabu 76 km u siegħa (1) u għaxar (10) minuti f'ħin tal-ivvjaġġar minn xulxin. L-ajruport ta' Constanța jinsab 45 km u 30 minuta f'ħin tal-ivvjaġġar mill-Ajruport ta' Tuzla. L-ajruport ta' Oradea jinsab 80 km u madwar siegħa (1) u 30 minuta f'ħin tal-ivvjaġġar mill-ajruport ta' Debrecen, li jinsab fl-Ungerija.

Tabella 3

Distanza u ħin ta' vvjaġġar lejn l-eqreb ajruporti

(25)

Fir-rigward tal-ajruporti li għalihom jinstab ajruport ieħor f'anqas minn 100 kilometru jew 60 minuta ta' ħin tal-ivvjaġġar, l-awtoritajiet Rumeni ntalbu jiddeskrivu l-ispeċifiċitajiet tal-ajruporti kkonċernati, jekk hemm, li jistgħu jiġġustifikaw il-preżunzjoni li dawk l-ajruporti jinsabu f'żoni ta' lħuq differenti, kif definiti mil-Linji Gwida tal-2014 dwar l-Avjazzjoni. (11)

(26)

Bħala tweġiba għal din it-talba mill-Kummissjoni, ir-Rumanija ċċarat dan li ġej (12):

(27)

L-ajruport ta' Arad huwa miftuħ għal traffiku tal-passiġġieri u l-merkanzija domestiku u internazzjonali u jopera runway ta' 1 800 × 45 m. Il-kapaċità tal-ajruport tammonta għal 200 passiġġier/siegħa. L-ajruport għandu tagħmir tekniku ta' kwalità għolja. Skont ir-Rumanija, fil-ħin tal-preżentazzjoni tal-informazzjoni, l-awtoritajiet lokali approvaw finanzjament għall-estensjoni u l-modernizzazzjoni tal-ajruport ta' Arad minħabba, fost l-oħrajn, l-objettiv strateġiku tal-awtoritajiet lokali li jikkonvertu l-ajruport f'ċentru intermodulari tal-passiġġieri u l-merkanzija għall-iżvilupp tar-reġjun.

(28)

Matul il-perjodu 2007 — 2009, l-ajruport kien iffukat fuq it-traffiku low-cost. Blueair operat diversi destinazzjonijiet Ewropej (Verona, Valencia, Stuttgart, Barcelona, Treviso) u Ryanair serviet destinazzjoni waħda (Milano) għall-perjodu April — Ġunju 2008.

(29)

L-awtoritajiet Rumeni ppreżentaw lill-Kummissjoni analiżi — imħejjija mill-ajruport fl-2008 — tal-attività ta' dak iż-żmien u t-traffiku tal-passiġġieri għall-perjodu 2009 — 2020.

(30)

L-analiżi uriet:

(31)

Skont l-analiżi, l-ajruport iddependa fil-parti l-kbira tiegħu fuq traffiku low cost bħala fattur ewlieni li jwassal għat-tkabbir: fl-2008 88 % tat-traffiku globali tal-passiġġieri kien irrappreżentat minn titjiriet skedati operati minn Blue Air u 11 % mit-traffiku tar-Ryanair. L-analiżi assumiet diversifikazzjoni ta' konnessjonijiet tal-linja tal-ajru bl-attirazzjoni ta' linja tal-ajru low-cost ġdida, EasyJet.

(32)

Il-previżjonijiet ippreżentati fl-analiżi bassru li l-ajruport ta' Arad se jżid it-traffiku tiegħu minn 128 834 passiġġier fl-2008 għal1 064 116-il passiġġer fl-2020 f'xenarju ottimistiku.

(33)

Fir-rigward tal-ajruport ta' Timișoara, it-traffiku tal-passiġġieri tiegħu żdied minn 859 329 passiġġier fl-2007, 886 083 passiġġier fl-2008 u 991 758 passiġġier fl-2009. Mill-2007 sal-2009, l-ajruport kien ċentru reġjonali għal Carpatair, trasportatur reġjonali ta' servizzi sħaħ li opera madwar 32 destinazzjoni domestika u Ewropea. Linji tal-ajru oħra bħal Tarom, Lufthansa, Austrian Airlines, Malev, Alitalia, Moldavian Airlines, Alpi Eagles, Skyeurope Airlines, Wizzair servew lil dan l-ajruport.

(34)

Il-karatteristiċi tar-runway fl-ajruport ta' Baia Mare ppermettew l-operazzjoni fuq bażi regolari ta' inġenji tal-ajru b'kapaċità massima ta' 75 passiġġier għal titjiriet fuq distanza qasira.

(35)

Il-karatteristiċi tar-runway fl-ajruport ta' Satu Mare jippermettu l-operazzjoni ta' inġenji tal-ajru b'post bilqiegħda sa180 passiġġier għal titjiriet fuq distanza medja. Il-kapaċità tal-ajruport tammonta għal 100 passiġġier/siegħa.

(36)

L-ajruport ta' Tuzla jopera firxa tal-ħaxix użata minn inġenji tal-ajru żgħar (jiġifieri ma jaqbżux il-piż massimu għat-tluq (MTOW) ta' 5 700 kg (13)) u m'għandu l-ebda sistema ta' navigazzjoni bir-radju. Fil-perjodu 2007 — 2009, in-numru ta' movimenti tal-inġenji tal-ajru ta' MTOW massimu ta' 5 700 kg mill-ajruport ta' Constanța kien aktar baxx b'mod sinifikanti (5 sa 16-il darba aktar baxx fil-perjodu li qed jiġi valutat) milli fl-ajruport ta' Tuzla. L-ajruport ta' Tuzla jservi prinċipalment titjiriet speċjalizzati filwaqt li l-ajruport ta' Constanța jservi inġenji tal-ajru medji u kbar għal traffiku kummerċjali.

(37)

L-ajruport ta' Debrecen (Ungerija) jinsab 80 km mill-ajruport ta' Oradea, iżda l-ħin ta¦ vvjaġġar huwa ta' mill-inqas siegħa (1) u 30 minuta minħabba li l-vjaġġ jinkludi kontroll tal-passaporti fil-fruntiera mir-Rumanija li mhijiex fiż-żona Schengen għall-Ungerija li hija fiż-żona Schengen. L-ajruport ta' Debrecen kellu 42 900 passiġġier fl-2007, 42 650 passiġġier fl-2008 u 25 060 passiġġier fl-2009. Iż-żewġ ajruporti kellhom mudelli ta' negozju differenti fl-2007-2009 peress li l-ajruport ta' Debrecen kien iffukat fuq titjiriet charter (bi traffiku low cost li żviluppa biss f'dawn l-aħħar snin), filwaqt li l-ajruport ta' Oradea kien iffukat fuq titjiriet domestiċi minn trasportaturi nazzjonali u reġjonali ta' servizzi sħaħ.

(38)

Il-baġit totali tal-miżura li qed tiġi valutata huwa 490 401,3 elef RON, kif deskritt fit-Tabella 1.

(39)

Fil-31 ta' Lulju 2015, il-Kummissjoni fetħet żewġ proċeduri ta' investigazzjoni formali dwar fost l-oħrajn miżuri ta' finanzjament pubbliku favur l-Ajruport ta' Cluj-Napoca mogħtija matul il-perjodu mill-2010 sal-2014 (14) u l-ajruport ta' Târgu Mureș mogħtija mill-2011 sal-2014 (15), għajr dawk koperti mill-investigazzjoni soġġetta għal din id-Deċiżjoni.

(40)

Kif spjegat fil-premessa 4 hawn fuq, fid-deċiżjoni tal-ftuħ, il-Kummisjoni ddeċidiet li tiftaħ il-proċedura ta' investigazzjoni formali fir-rigward tal-għajnuna notifikata u l-finanzjament pubbliku fil-perjodu 2007 — 2009 biex jiġi kopert telf operattiv. Sussegwentement, wara l-irtirar mir-Rumanija tan-notifika tagħha tal-iskema ta' finanzjament ippjanat ta' investimenti fl-infrastruttura, il-proċedura ta' investigazzjoni formali baqgħet miftuħa fir-rigward tal-finanzjament pubbliku mogħti lill-ajruporti reġjonali tar-Rumanija fil-perjodu 2007 — 2009 (ara l-premessa 10 hawn fuq).

(41)

Fid-deċiżjoni tal-ftuħ, il-Kummissjoni kienet tal-fehma preliminari li l-kundizzjonijiet biex il-kumpens għall-SGEIs ma jikkostitwixxix vantaġġ fis-sens tal-Artikolu 107 tat-Trattat ma ġewx sodisfatti b'mod kumulattiv f'dan il-każ.

(42)

Fil-fatt, skont ir-raba' kundizzjoni tas-sentenza Altmark (16), il-kumpens irid ikun limitat għall-minimu meħtieġ għal impriża effiċjenti sabiex tevadi l-kwalifika tal-għajnuna mill-Istat. Dan il-kriterju jitqies bħala sodisfatt jekk il-benefiċjarji tal-kumpens ikunu ntgħażlu wara proċedura tal-offerti. Fin-nuqqas ta' dan, il-livell ta' kumpens irid jiġi determinat abbażi ta' analiżi tal-ispejjeż li impriża tipika, immexxija tajjeb u adegwatament mogħnija b'mezzi sabiex tkun tista' tissodisfa l-bżonnijiet neċessarji ta' servizz pubbliku, kienet tagħmel sabiex twettaq tali obbligi, filwaqt li jiġi kkunsidrat id-dħul rilevanti kif ukoll il-profitt raġjonevoli għat-twettiq ta' dawn l-obbligi.

(43)

Il-Kummissjoni kienet tal-fehma preliminari li din il-kundizzjoni ma ġietx sodisfatta peress li l-operaturi tal-ajruporti benefiċjarji ma kinux intgħażlu wara proċedura pubblika tal-offerti. Ir-Rumanija lanqas ma ddikjarat li l-kumpens kien ġie stabbilit abbażi ta' analiżi tal-ispejjeż ta' operatur tipiku tal-ajruport, immexxi sew u provdut b'mod adegwat b'mezzi biex jiġi provdut is-servizz pubbliku.

(44)

Għalhekk il-Kummissjoni kkunsidrat li l-miżura provdiet lill-benefiċjarji b'vantaġġ ekonomiku u wasslet għall-konklużjoni preliminari li s-sussidji operattivi annwali kkostitwixxew għajnuna mill-Istat fis-sens tal-Artikolu 107 tat-Trattat.

(45)

Il-Kummissjoni nnotat ukoll li r-Rumanija ma kkontestatx il-kwalifika tal-għajnuna tal-miżura.

(46)

Fir-rigward tal-kompatibilità tal-miżura, il-Kummissjoni kellha dubji jekk il-kriterji stabbiliti mid-Deċiżjoni dwar l-SGEI tal-2005 kinux ġew imħarsa u għalhekk li s-sussidji operattivi mħallsa kull sena lill-ajruporti ġew eżentati mir-rekwiżit tan-notifika, kif iddikjarat inizjalment mir-Rumanija.

(47)

F'dan is-sens, il-Kummissjoni l-ewwel innotat li sabiex id-Deċiżjoni dwar l-SGEI tal-2005 tkun applikabbli f'każijiet speċifiċi, is-servizzi inkwistjoni jridu jikkwalifikaw bħala SGEIs ġenwini u jkunu definiti b'mod ċar bħala tali mill-Istat Membru.

(48)

Il-Kummissjoni kienet tal-fehma li f'dan il-każ ma ġietx ipprovduta biżżejjed informazzjoni mir-Rumanija biex jiġi ġustifikat li l-operat tat-tlettax-il ajruport reġjonali jenħtieġ li jiġi kkunsidrat bħala SGEI fis-sens li ż-żoni servuti minn dawk l-ajruporti ma jkunux konnessi b'mod suffiċjenti mal-bqija tal-pajjiż jekk dawn jitħallew f'idejn il-forzi tas-suq biss.

(49)

Il-Kummissjoni kompliet tikkunsidra li s-servizzi tal-ajruport ma kinux ġew definiti b'mod ċar bħala SGEIs mill-Istat Membru. Il-Kummissjoni kienet tal-fehma preliminari li d-duplikazzjoni apparenti ta' ajruporti reġjonali fir-Rumanija fl-istess żona ta' lħuq tista' tkun raġuni għaliex dawk l-ajruporti kienu qed jagħmlu t-telf. Għal dan il-għan, il-Kummissjoni nnotat li diversi minn dawn l-ajruporti kellhom inqas minn 50 000 passiġġier fis-sena u kienu lokalizzati f'distanza lineari ta' anqas minn 100 km minn xulxin.

(50)

Għalhekk il-Kummissjoni kienet tal-fehma li d-definizzjoni tas-servizz pubbliku ma kinitx ċara biżżejjed u tista' tinkludi żball ċar sa fejn l-operat tal-ajruporti seta' ġie definit bħala SGEI mingħajr ħtieġa effettiva li tiġi żgurata konnessjoni xierqa taż-żona ta' lħuq ta' kull ajruport mal-bqija tad-dinja.

(51)

Il-Kummissjoni kellha dubji wkoll jekk ir-rekwiżiti tal-Artikolu 4 tad-Deċiżjoni dwar l-SGEI tal-2005 relatati mal-kontenut tal-att ta' inkarigu kinux ġew sodisfatti għalkollox.

(52)

Fl-aħħar nett, il-Kummissjoni nnotat li għalkemm l-awtoritajiet Rumeni kkonfermaw li l-attivitajiet ewlenin biss tal-ajruporti kienu qed jiġu ssussidjati, ma kienx ċar biżżejjed jekk fil-fatt kinux ġew issussidjati biss l-ispejjeż tal-attivitajiet eliġibbli. L-ebda dispożizzjoni speċifika biex jiġu llimitati l-ispejjeż eliġibbli għall-attivitajiet ewlenin tal-ajruporti ma kienet inkluża fl-atti ta' inkarigu.

(53)

Il-kummenti tar-Rumanija dwar id-deċiżjoni tal-ftuħ irreferew prinċipalment għad-dubji mqajma mill-Kummissjoni dwar l-iskema tal-għajnuna mill-Istat għall-finanzjament tal-infrastruttura għall-ajruporti bi traffiku annwali ta' anqas minn 1 miljun passiġġier, li n-notifika tagħha ġiet irtirata.

(54)

Fir-rigward tal-finanzjament pubbliku għall-ajruporti reġjonali tar-Rumanija, bħala tweġiba għall-opinjoni tal-Kummissjoni skont liema l-abbundanza żejda apparenti tal-ajruporti f'ċerti reġjuni tista' tfixkel l-iżvilupp tal-ajruporti inkwistjoni, ir-Rumanija sostniet li s-sitwazzjoni tal-ajruporti reġjonali (bi traffiku baxx li ma jippermettilhomx li jilħqu livell ta' profitabbiltà) kienet primarjament minħabba l-istat tal-iżvilupp tar-reġjuni fejn jinsabu dawk l-ajruporti, aktar milli minħabba d-distanza lejn ajruporti tal-viċinat.

(55)

Fir-rigward tal-finanzjament pubbliku abbażi tad-Deċiżjoni tal-Gvern 398/1997, ir-Rumanija ċċarat li l-ammonti ma jitħallsux fil-bidu tas-sena abbażi ta' previżjonijiet ta' spejjeż u li kwalunkwe eċċess ma jiġix ritornat lill-Istat fl-aħħar tas-sena finanzjarja kif iddikjarat fid-deċiżjoni tal-ftuħ, iżda li dan il-finanzjament jingħata fil-mument meta jitwettqu l-attivitajiet abbażi ta' ġustifikazzjonijiet u fil-limiti tal-baġit approvat.

(56)

Il-kummenti ta' Carpatair jirreferu parzjalment għall-finanzjament pubbliku lill-ajruport ta' Timișoara u Wizz Air. Kif spjegat fil-premessa 15, il-finanzjament pubbliku tal-ajruport ta' Timișoara u Wizz Air huwa soġġett għal proċedura ta' investigazzjoni formali oħra (17). F'dan li ġej, il-Kummissjoni għalhekk se tqassar biss il-kummenti ta' Carpatair b'rilevanza għall-każ preżenti.

(57)

Carpatair issostni li l-għajnuna operatorja hija ġeneralment ikkunsidrata bħala illegali u kontra l-interess tal-UE, u jenħtieġ li tingħata biss f'ċirkostanzi eċċezzjonali. L-għoti ta' għajnuna operatorja lill-ajruporti fl-opinjoni ta' Carpatair jkun ta' tfixkil għall-industrija, għar-raġunijiet li ġejjin:

(58)

Carpatair jindika li l-għajnuna operatorja għandha effett negattiv fuq is-swieq tat-trasport bl-ajru u tas-servizzi tal-ajruport minħabba li twassal għal kompetizzjoni inġusta bejn ajruporti u fl-aħħar mill-aħħar għal kompetizzjoni inġusta bejn linji tal-ajru li joperaw minn dawk l-ajruporti. Bħala tali, l-għajnuna operatorja tikkawża kompetizzjoni inġusta bejn l-ajruporti fir-Rumanija u taffettwa wkoll b'mod negattiv lill-ajruporti f'pajjiżi tal-viċinat bħall-Ungerija.

(59)

RAA hija entità ġuridika tal-liġi privata mingħajr skop ta' qligħ li tirrappreżenta l-ajruporti ċivili tar-Rumanija.

(60)

RAA tikkummenta dwar l-enfasi tad-deċiżjoni tal-ftuħ fuq l-aspetti relatati mal-iskema tal-għajnuna mill-Istat għall-finanzjament tal-infrastruttura. RAA essenzjalment issostni li l-infrastruttura tal-parti l-kbira tal-ajruporti reġjonali fir-Rumanija tirrikjedi aġġornament u hija ta' livell ferm anqas minn dik tal-ajruporti ta' Stati Membri oħra tal-UE. Skont l-RAA il-finanzjament pubbliku għat-titjib tal-infrastruttura tal-ajruport ikun iġġustifikat min-nuqqas ta' alternattiva ta' trasport fattibbli u affidabbli fir-Rumanija (l-ebda awtostradi jew ferroviji ta' veloċità għolja).

(61)

Skont l-ajruport ta' Cluj — Napoca, il-finanzjament pubbliku mogħti lilu mill-kunsill lokali serva biex issussidja biss l-attivitajiet mhux ekonomiċi u għaldaqstant kien barra mill-kamp ta' applikazzjoni tal-Artikolu 107(1) tat-Trattat.

(62)

B'mod partikolari, l-ammonti inkwistjoni kellhom preżumibbilment l-għan li jkopru spejjeż ta' ċerti attivitajiet mhux ekonomiċi li jseħħu ġol-ajruport (bħall-Għassa tal-Fruntiera, il-Brigata tal-Forzi Speċjali, id-Dwana, il-Pulizija, l-Unità tal-Avjazzjoni Speċjali) kif ukoll l-ispejjeż tal-infrastruttura ta' sostenn u t-tagħmir inklużi l-manutenzjoni, it-titjib, il-ġestjoni tal-infrastruttura, spejjeż bis-servizzi awżiljarji provduti mill-ajruport, il-prevenzjoni tan-nar, l-assistenza f'emerġenza, il-miżuri ta' sigurtà. Skont l-ajruport ta' Cluj — Napoca, dawk l-ispejjeż jaqgħu taħt ir-responsabbiltà tal-Istat fl-eżerċizzju tas-setgħat uffiċjali tiegħu u għalhekk ma jaqgħux fil-kamp ta' applikazzjoni tar-regoli dwar l-għajnuna mill-Istat.

(63)

L-ajruport kompla jsostni li fil-perjodu 2007 — 2009, l-ajruport ma rreġistra l-ebda telf operattiv.

(64)

Permezz ta' ittra bid-data tas-17 ta' Ottubru 2011, ir-Rumanija ppreżentat lill-Kummissjoni l-kummenti tagħha dwar l-osservazzjonijiet ippreżentati mill-partijiet interessati fl-investigazzjoni.

(65)

Għalkemm dawn il-kummenti rreferew esklussivament għall-iskema notfikata ta' għajnuna mill-Istat għal investimenti fl-infrastruttura, xi wħud minn dawk il-kummenti huma ta' rilevanza għall-valutazzjoni tas-sussidji operatorji li qed jiġu vvalutati f'din id-Deċiżjoni. Dawk il-kummenti jinġabru fil-qosor fil-paragrafi li ġejjin.

(66)

Ir-Rumanija ssostni li l-parti l-kbira tal-ajruporti reġjonali tar-Rumanija għandhom traffiku annwali ta' anqas minn 50 000 passiġġier u l-ebda wieħed minn dawn l-ajruporti ma jaqbeż it-300 000 passiġġier sal-2015. Abbażi ta' dan, ir-Rumanija tikkunsidra li mhuwiex probabbli li s-sostenn pubbliku għal dawk l-ajruporti jaffettwa l-kompetizzjoni u jfixkel il-kummerċ bejn l-Istati Membri.

(67)

Lanqas id-distanza bejn dawk l-ajruporti ma taffettwa l-iżvilupp tagħhom bi kwalunkwe mod, skont ir-Rumanija. Dan għaliex anke f'dawk il-każijiet fejn id-distanza lineari bejn l-ajruporti hija ta' anqas minn 100 km, il-ħin ta' vvjaġġar huwa ġeneralment ta' aktar minn sagħtejn (2) b'tali mod li l-ajruporti inkwistjoni ma jeżerċitaw l-ebda pressjoni kompetittiva fuq xulxin.

(68)

Kif spjegat fil-premessa 10 hawn fuq, wara l-irtirar mir-Rumanija tan-notifika tagħha tal-iskema ta' finanzjament ippjanat tal-investimenti fl-infrastruttura, il-proċedura ta' investigazzjoni formali baqgħet miftuħa fir-rigward tal-finanzjament pubbliku mogħti lill-ajruporti reġjonali tar-Rumanija fil-perjodu 2007 — 2009. Għalhekk, il-valutazzjoni stabbilita hawn taħt tikkonċerna dik il-miżura.

(69)

Fid-dawl tad-deċiżjonijiet biex tinfetaħ investigazzjoni formali għall-Ajruport ta' Cluj-Napoca u l-ajruport ta' Târgu Mureș adottati fil-31 ta' Lulju 2015 (ara l-punt 39 hawn fuq), il-Kummissjoni tikkunsidra li huwa xieraq li tingħalaq l-investigazzjoni preżenti għall-ajruporti kollha soġġetti għaliha, ħlief għall-ajruport ta' Cluj-Napoca u l-ajruport ta' Târgu Mureș. Il-Kummissjoni biħsiebha tagħlaq l-investigazzjoni SA.30931 fir-rigward ta' dawk iż-żewġ ajruporti flimkien mal-investigazzjonijiet miftuħa fil-31 ta' Lulju 2015. Konsegwentement, il-valutazzjoni stabbilta hawn taħt tapplika biss għall-miżuri mogħtija lill-11-il ajruport l-ieħor.

(70)

Skont l-Artikolu 107(1) tat-Trattat, kull għajnuna, ta' kwalunkwe forma, mogħtija minn Stat Membru jew permezz ta' riżorsi tal-Istat, li twassal għal distorsjoni jew theddida ta' distorsjoni għall-kompetizzjoni billi tiffavorixxi ċerti impriżi jew il-provvista ta' ċerti oġġetti għandha, sa fejn tolqot il-kummerċ bejn l-Istati Membri, tkun inkompatibbli mas-suq intern sakemm ma jkunx ipprovdut mod ieħor mil-liġi.

(71)

Il-kriterji stabbiliti fl-Artikolu 107(1) tat-Trattat huma kumulattivi. Għalhekk, sabiex jiġi determinat jekk il-miżuri taħt skrutinju jikkostitwixxu għajnuna mill-Istat fis-sens tal-Artikolu 107(1) tat-Trattat, il-kundizzjonijiet kollha msemmija hawn fuq jeħtieġ li jiġu sodisfatti. Jiġifieri, is-sostenn finanzjarju:

(72)

Skont il-ġurisprudenza stabbilita, il-Kummissjoni trid l-ewwel tistabbilixxi jekk dawk li jmexxu l-ajruport humiex impriżi fis-sens tal-Artikolu 107(1) tat-Trattat. Il-kunċett ta' impriża jkopri kull entità involuta f'attività ekonomika, irrispettivament mill-istatus ġuridiku tagħha u l-mod kif tiġi ffinanzjata. (18) Kull attività li tikkonsisti fl-offerta ta' oġġetti jew servizzi f'suq partikolari hija attività ekonomika.

(73)

Fl- Ajruport ta' Leipzig-Halle, il-Qorti Ġenerali sostniet li mid-data tas-sentenza f' Aéroports de Paris (12 ta' Diċembru 2000), l-applikazzjoni tar-regoli tal-għajnuna mill-Istat għall-finanzjament tal-infrastruttura tal-ajruport ma setgħetx tibqa' tiġi eskluża.

(74)

Il-Kummissjoni għalhekk tikkonkludi li tal-anqas mit-12 ta' Diċembru 2000, min imexxi l-ajruport kien involut f'attività ekonomika u li jikkostitwixxi impriża fis-sens tal-Artikolu 107(1) tat-Trattat (ara wkoll il-punt 29 tal-Linji Gwida tal-2014 dwar l-Avjazzjoni).

(75)

Filwaqt li dawk li jmexxu l-ajruport iridu jitqiesu bħala li jikkostitwixxu impriżi fis-sens tal-Artikolu 107(1) tat-Trattat tal-anqas mit-12 ta' Diċembru 2000, irid jiġi mfakkar li mhux l-attivitajiet kollha ta' min imexxi ajruport huma neċessarjament ta' natura ekonomika (ara wkoll il-punt 34 tal-Linji Gwida tal-2014 dwar l-Avjazzjoni). (19)

(76)

Il-Qorti tal-Ġustizzja sostniet li attivitajiet li normalment jaqgħu taħt ir-responsabbiltà tal-Istat fl-eżerċizzju tas-setgħat uffiċjali tiegħu bħala awtorità pubblika mhumiex ta' natura ekonomika u ma jaqgħux fil-kamp ta' applikazzjoni tar-regoli dwar l-għajnuna mill-Istat.

(77)

Għalhekk, il-finanzjament tal-attivitajiet li jaqgħu fil-mandat tal-politika pubblika jew tal-infrastruttura relatata direttament ma' dawk l-attivitajiet inġenerali ma jikkostitwixxix għajnuna mill-Istat. (20) F'ajruport, attivitajiet bħall-kontroll tat-traffiku tal-ajru, il-pulizija, id-dwana, it-tifi tan-nar, attivitajiet meħtieġa biex tiġi salvagwardjata l-avjazzjoni ċivili kontra atti ta' interferenza illegali u l-investimenti relatati mal-infrastruttura u t-tagħmir meħtieġa biex jitwettqu dawn l-attivitajiet huma ġeneralment ikkunsidrati bħala ta' natura mhux ekonomika (ara wkoll il-punt 35 tal-Linji Gwida tal-2014 dwar l-Avjazzjoni). (21)

(78)

Madankollu, il-finanzjament pubbliku ta' attivitajiet mhux ekonomiċi ma jridx iwassal għal diskriminazzjoni mhux dovuta bejn il-linji tal-ajru u dawk li jmexxu ajruport. Fil-fatt, hija ġurisprudenza stabbilita li jkun hemm vantaġġ fejn l-awtoritajiet pubbliċi jeħilsu lill-impriżi mill-ispejjeż inerenti għall-attivitajiet ekonomiċi tagħhom. (22) Għalhekk, jekk f'sistema ġuridika partikolari jkun normali li l-linji tal-ajru jew dawk li jmexxu l-ajruport iġarrbu l-ispejjeż ta' ċerti servizzi, filwaqt li ċerti linji tal-ajru jew xi wħud minn dawk li jmexxu l-ajruport li jipprovdu l-istess servizzi f'isem l-istess awtoritajiet pubbliċi ma jridux iġarrbu dawk l-ispejjeż, dawn tal-aħħar jistgħu jgawdu minn vantaġġ, anke jekk dawk is-servizzi huma kkunsidrati fihom infushom bħala mhux ekonomiċi (ara wkoll il-punt 37 tal-Linji Gwida tal-2014 dwar l-Avjazzjoni).

(79)

Ir-Rumanija fl-ebda ħin ma ddikjarat li l-finanzjament mogħti lil kwalunkwe ajruport reġjonali soġġett għal din id-Deċiżjoni kien ikopri spejjeż li jikkwalifikaw bħala spejjeż ta' mandat tal-politika pubblika. Lanqas xi wieħed mill-operaturi tal-ajruport, minbarra l-Ajruport ta' Cluj — Napoca, ma ddikjara matul l-investigazzjoni li dan huwa l-każ. Fil-fatt, il-mekkaniżmu ta' kumpens huwa mfassal biex ikopri d-differenza bejn id-dħul u t-telf tal-ajruporti, mingħajr ma ssir distinzjoni bejn l-ispejjeż ta' mandat tal-politika pubblika u tipi oħra ta' spejjeż. Din il-kwistjoni tista' titħalla miftuħa fir-rigward tal-Ajruport ta' Cluj — Napoca u l-Ajruport ta' Târgu Mureș, peress li din id-Deċiżjoni ma tagħlaqx l-investigazzjoni pendenti fir-rigward ta' dawk l-ajruporti. Fil-każ tal-ajruporti l-oħra, il-Kummissjoni tikkonkludi li l-miżuri ma jikkostitwixxux kumpens għall-ispejjeż tal-mandat tal-politika pubblika.

(80)

Il-kunċett ta' għajnuna mill-Istat japplika għal kull vantaġġ mogħti direttament jew indirettament, iffinanzjat mir-riżorsi tal-Istat, mogħti mill-Istat innifsu jew minn kwalunkwe korp intermedjarju li jaġixxi permezz ta' setgħat mogħtija lilu. Għaldaqstant, japplika wkoll għall-vantaġġi kollha mogħtija minn awtoritajiet reġjonali jew lokali tal-Istati Membri, ikun xi jkun l-istatus u d-deskrizzjoni tagħhom. (23)

(81)

F'dan il-każ, il-finanzjament jingħata direttament mill-Istat jew l-awtoritajiet lokali permezz tar-riżorsi tagħhom stess. Għalhekk, il-Kummissjoni tikkonferma li l-miżuri kollha li qed jiġu valutati jingħataw permezz tar-riżorsi mill-Istati u huma imputabbli lill-Istat.

(82)

Il-finanzjament pubbliku mogħti lil dawk li jmexxu l-ajruport, immirat lejn il-kumpens għat-telf imġarrab fit-twettiq tal-attività ordinarja tagħhom. Xejn fl-evidenza fattwali disponibbli lill-Kummissjoni jew fil-kummenti rċevuti mir-Rumanija jew mill-partijiet terzi ma jissuġġerixxi li l-awtoritajiet li jagħmlu l-għotja jistgħu jistennew xi redditu finanzjarju bħala riżultat ta' dawk il-miżuri ta' finanzjament meta jiddeċiedu li jagħtuhom. Għalhekk, il-miżuri inkwistjoni ma jikkonformawx mal-prinċipju tal-operatur tal-ekonomija tas-suq.

(83)

Matul l-investigazzjoni r-Rumanija ddikjarat li l-finanzjament pubbliku kkontestat jirrappreżenta kumpens għall-provvista ta' SGEIs.

(84)

Fil-każ ta' intrapriżi inkarigati bil-provvista ta' SGEI, sabiex tikkonkludi jekk il-miżuri li qed jiġu vvalutati jikkostitwixxux vantaġġ ekonomiku jew le fis-sens tal-Artikolu 107(1) tat-Trattat, il-Kummissjoni trid teżamina l-osservanza tal-kundizzjonijiet stabbiliti mill-Qorti fis-sentenza tagħha fil-kawża Altmark. (24) Dawn il-kundizzjonijiet jistgħu jinġabru fil-qosor kif ġej:

(85)

Dawk l-erba' kundizzjonijiet iridu jiġu sodisfatti b'mod kumulattiv. Għalhekk, jekk waħda minnhom ma tiġix sodisfatta, ma jistax jiġi ddikjarat li l-miżuri inkwistjoni ma jinvolvux vantaġġ ekonomiku abbażi tas-sentenza Altmark.

(86)

Ir-rekwiżit tal-ewwel kundizzjoni Altmark jikkoinċidi mar-rekwiżit ta' inkarigu ċar u definizzjoni tal-SGEI provdut mill-Artikolu 106(2) tat-Trattat. (25)

(87)

Artikolu 106(2) tat-Trattat japplika biss għal “kull impriża responsabbli sabiex topera” SGEI. Il-Qorti tal-Ġustizzja konsistentement enfasizzat il-ħtieġa għal att ta' inkarigu. (26) Għalhekk, il-ħtieġa għal definizzjoni ċara tal-SGEI hija inerenti għal u inseparabbli mill-idea ta' inkarigu u tirriżulta direttament mill-Artikolu 106(2) tat-Trattat.

(88)

Fil-Komunikazzjoni tal-2001 dwar servizzi ta' interess ġenerali, il-Kummissjoni kienet diġà enfasizzat ir-rabta bejn definizzjoni ċara, inkarigu u neċessità u proporzjonalità tal-kumpens għall-SGEI skont l-Artikolu 106(2) tat-Trattat. (27) Paragrafu 22 ta' dik il-Komunikazzjoni spjega li “f'kull wiehed mill-każijiet, sabiex tapplika l-eċċezzjoni provvduta bl-Artikolu 106(2) tat-Trattat, il-missjoni tas-servizz pubbliku teħtieġ li tiġi ddefinita biċ-ċar u trid tiġi fdata b'mod espliċitu permezz ta' att ta' awtorità pubblika […]. Dan l-obbligu huwa meħtieġ sabiex jiġu żgurati ċ-ċarezza legali kif ukoll it-trasparenza rigward iċ-ċittadini u huwa indispensabbli għall-Kummissjoni li twettaq l-istima tagħha tal-proporzjonalità”. L-inkarigu u d-definizzjoni huma għaldaqstant prerekwiżit loġiku ta' kwalunkwe valutazzjoni sinifikanti tal-livell proporzjonat ta' kull kumpens. Il-Qrati tal-Unjoni enfasizzaw b'mod konsistenti l-ħtieġa għal definizzjoni ċara tal-PSOs għall-applikazzjoni kemm tal-eżenzjoni Altmark kif ukoll tal-Artikolu 106(2) tat-Trattat. (28)

(89)

Anke l-Komunikazzjoni mill-Kummissjoni tal-2011 dwar l-applikazzjoni tar-regoli dwar l-għajnuna mill-Istat tal-Unjoni Ewropea għall-kumpens mogħti għall-fornitura ta' servizzi ta' interess ekonomiku ġenerali, (29) tiċċara li l-SGEI u l-PSOs iridu jkunu definiti b'mod ċar minn qabel. Skont il-paragrafu 51 tagħha, biex l-Artikolu 106(2) tat-Trattat japplika, l-operazzjoni ta' SGEI trid tiġi inkarigata lil impriża waħda jew aktar. L-impriżi inkwistjoni jridu għalhekk ikunu ġew inkarigati b'kompitu speċjali mill-Istat. L-ewwel kriterju Altmark jirrikjedi li l-impriża tkun inkarigata sabiex twettaq PSOs. Għaldaqstant, sabiex tikkonforma mal-ġurisprudenza Altmark, jenħtieġ inkarigu ta' servizz pubbliku, li jiddefinixxi l-obbligi tal-fornitur tal-SGEI inkwistjoni u dawk tal-awtorità pubblika li qed tinkariga l-SGEI inkwistjoni. Skont il-paragrafu 52 'il quddiem, il-kompitu ta' servizz pubbliku jrid jiġi assenjat permezz ta' att wieħed jew aktar li jridu tal-anqas jispeċifikaw il-PSOs; l-impriża u, fejn applikabbli, it-territorju kkonċernat; in-natura ta' kull dritt esklussiv jew speċjali assenjat lill-impriża mill-awtorità inkwistjoni.

(90)

F'dan il-każ, ir-Rumanija ddikjarat li l-finanzjament pubbliku mogħti lill-ajruporti inkwistjoni fil-perjodu 2007 — 2009 irrappreżenta kumpens għall-għoti ta' SGEIs. Ir-Rumanija ddikjarat li d-Deċiżjoni tal-Gvern 398/1997 stabbiliet b'mod ċar u trasparenti l-PSOs, il-parametri għall-kalkolu tal-kumpens u l-arranġamenti sabiex jiġi evitat kull kumpens żejjed.

(91)

Madankollu, filwaqt li d-Deċiżjoni tal-Gvern 398/1997 stabbiliet li l-ispejjeż operatorji u kapitali tal-ajruporti elenkati fiha jkunu koperti minn riżorsi proprji supplimentati mill-finanzjament pubbliku u elenkat l-attivitajiet li jridu jitwettqu minn dawk li jmexxu l-ajruport madwar l-ajruporti kollha kkonċernati (jiġifieri mhux għal kull ajruport b'mod individwali), din ma imponietx PSOs ċari fuq dawk li jmexxu l-ajruporti.

(92)

Fir-rigward tal-ajruport ta' Constanța, filwaqt li d-Deċiżjoni tal-Gvern 523/1998 stabbiliet liema spejjeż iridu jew jiġu supplimentati minn finanzjament pubbliku jew jiġu koperti b'mod sħiħ minn finanzjament pubbliku u elenkat l-attivitajiet li jridu jitwettqu minn dawk li jmexxu l-ajruport, ma imponietx PSOs ċari fuq dawk li jmexxu l-ajruport.

(93)

Id-dikjarazzjoni tar-Rumanija li s-servizzi tal-ajruport ikunu essenzjali għall-iżvilupp ekonomiku tar-reġjuni rispettivi jew għandhom l-għan li jwettqu objettiv ta' sigurtà strateġika mhijiex biżżejjed biex jitqies li l-benefiċjarji ġew inkarigati b'mod korrett bl-SGEI sal-punt tal-PSOs.

(94)

Fir-rigward tal-kwistjoni dwar jekk l-ajruporti inkwistjoni jikkwalifikawx bħala servizzi ġenwini ta' interess ekonomiku ġenerali, il-Kummissjoni tħalli din il-mistoqsija miftuħa minħabba li mhijiex meħtieġa valutazzjoni f'dan ir-rigward peress li, kif spjegat hawn fuq, il-PSOs mhumiex definiti b'mod ċar f'att ta' inkarigu. Mhuwiex meħtieġ għalhekk li l-Kummissjoni tieħu pożizzjoni dwar dan l-aspett.

(95)

Għalhekk, il-miżuri inkwistjoni ma jikkonformawx ma' Altmark 1.

(96)

Ir-raba' kriterju Altmark jipprevedi li l-kumpens irid ikun il-minimu meħtieġ sabiex ma jikkwalifikax bħala għajnuna. Dan il-kriterju jkun sodisfatt jekk il-benefiċjarju tal-kumpens ikun intgħażel wara proċedura tal-offerti li tippermetti l-għażla tal-offerent kapaċi li jipprovdi l-SGEI meħtieġa bl-inqas spiża għall-komunità jew, f'nuqqas ta' dan, jekk il-kumpens ikun ġie kalkolat b'referenza għall-ispejjeż ta' impriża effiċjenti.

(97)

F'dan il-każ, il-benefiċjarji ma ntgħażlux wara proċedura tal-offerti. Ukoll ma hemmx evidenza li turi li l-livell ta' kumpens ġie determinat abbażi ta' analiżi tal-ispejjeż li impriża tipika, immexxija tajjeb u adegwatament mogħnija b'mezzi sabiex tkun tista' tissodisfa r-rekwiżiti neċessarji ta' servizz pubbliku, kienet tagħmel sabiex twettaq tali obbligi, filwaqt li jiġi kkunsidrat id-dħul rilevanti kif ukoll il-profitt raġjonevoli għat-twettiq ta' dawn l-obbligi (mhux definiti b'mod korrett — ara l-premessi 86-95). Il-Kummissjoni għalhekk tikkunsidra li ma jistax jiġi konkluż li l-finanzjament pubbliku inkwistjoni ġie determinat abbażi tal-ispejjeż ta' impriża effiċjenti.

(98)

Konsegwentament, il-miżuri li qed jiġu investigati ma jikkonformawx ma' Altmark 4.

(99)

Minħabba li l-kundizzjonijiet Altmark 1 u 4 ma ġewx imħarsa, il-Kummissjoni tikkonkludi li l-erba' kundizzjonijiet stabbiliti mill-Qorti tal-Ġustizzja fil-kawża Altmark ma ġewx sodisfatti b'mod kumulattiv fil-każ preżenti. Ladarba lanqas il-prinċipju tal-operatur tal-ekonomija tas-suq ma ġie mħares kif imsemmi fil-premessa 82 hawn fuq, il-miżuri li qed jiġu valutati taw vantaġġ ekonomiku lil min imexxi l-ajruporti.

(100)

Barra minn hekk, dak il-vantaġġ ekonomiku huwa selettiv minħabba li huwa indirizzat lejn ċerti impriżi li jappartjenu għal settur ekonomiku partikolari, jiġifieri l-ajruporti.

(101)

Il-kompetizzjoni bejn l-ajruporti tista' tiġi valutata fid-dawl tal-kriterji tal-linji tal-ajru magħżula, u b'mod partikolari billi jiġu mqabbla fatturi bħat-tip ta' servizzi tal-ajruport provduti u l-klijenti kkonċernati, il-popolazzjoni jew l-attività ekonomika, il-konġestjoni, l-eżistenza ta' aċċess mill-art, u l-livell ta' imposti u kundizzjonijiet kummerċjali globali għall-użu tal-infrastruttura u s-servizzi tal-ajruport (ara l-punt 43 tal-Linji Gwida tal-2014 dwar l-Avjazzjoni).

(102)

Barra minn hekk, l-operaturi tal-ajruport huma f'kompetizzjoni għall-ġestjoni tal-infrastruttura tal-ajruport, inklużi f'ajruporti lokali u reġjonali. Il-finanzjament pubbliku ta' ajruport jista' għalhekk iwassal għal distorsjoni tal-kompetizzjoni fis-swieq għall-operat tal-infrastruttura tal-ajruporti. Barra minn hekk, il-finanzjament pubbliku lill-ajruporti jista' jwassal għal distorsjoni tal-kompetizzjoni u jkollu effett fuq il-kummerċ fi swieq tat-trasport bl-ajru madwar l-Unjoni. Fl-aħħar nett, il-kompetizzjoni intermodali tista' tiġi affettwata wkoll minn finanzjament pubbliku lill-ajruporti (ara l-punt 44 tal-Linji Gwida tal-2014 dwar l-Avjazzjoni).

(103)

Għalhekk, il-miżuri li qed jiġu valutati wasslu għal distorsjoni tal-kompetizzjoni jew tal-anqas heddew li jwasslu għal distorsjoni tal-kompetizzjoni u affettwaw il-kummerċ bejn Stati Membri.

(104)

Abbażi ta' dak li ntqal hawn fuq, il-Kummissjoni tikkonkludi li l-miżuri li qed jiġu valutati jikkostitwixxu għajnuna mill-Istat għall-dawk l-ajruporti fis-sens tal-Artikolu 107(1) tat-Trattat.

(105)

Il-valutazzjoni magħmula skont it-Taqsima 3.2.2 “Tip ta' għajnuna: għajnuna eżistenti jew ġdida” (paragrafi 93 sa 95) tad-deċiżjoni tal-ftuħ dwar jekk l-għajnuna jenħtieġx li tiġi kkunsidrata bħala għajnuna eżistenti jew ġdida skont id-dispożizzjonijiet tal-Anness V tal-Att dwar il-kundizzjonijiet tal-adeżjoni tar-Repubblika tal-Bulgarija u r-Rumanija tibqa' valida. Għalhekk, il-miżuri ma jikkwalifikawx bħala għajnuna eżistenti.

(106)

Il-miżuri li qed jiġu investigati ddaħħlu fis-seħħ qabel approvazzjoni formali mill-Kummissjoni. Għalhekk, jikkonstitwixxu għajnuna illegali sakemm ma jissodisfawx il-kundizzjonijiet rilevanti ta' att tal-Unjoni li jipprevedi eżenzjoni ta' kategorija mill-obbligu tan-notifika stabbilit fl-Artikolu 108 tat-TFUE għal ċerti kategoriji ta' għajnuna. F'dan il-każ, l-uniku att possibbli li seta' potenzjalment jipprovdi eżenzjoni bħal din huwa d-Deċiżjoni dwar l-SGEI tal-2005.

(107)

Matul l-investigazzjoni, ir-Rumanija sostniet li l-għajnuna lit-tlettax-il ajruport inkwistjoni tikkonforma mal-kundizzjonijiet stabbiliti fid-Deċiżjoni dwar l-SGEI tal-2005, li kienet fis-seħħ meta ngħataw il-miżuri inkwistjoni.

(108)

Id-Deċiżjoni dwar l-SGEI tal-2005 applikat għal ajruporti:

(109)

Id-Deċiżjoni dwar l-SGEI tal-2005 applikat biss għal għajnuna fil-forma ta' kumpens għal servizzi pubbliċi għal servizzi SGEI ġenwini. Sabiex jibbenefika minn din l-eżenzjoni, kumpens għal servizzi pubbliċi għall-operat ta' SGEI jrid jikkonforma wkoll mal-kundizzjonijiet dettaljati stabbiliti fl-Artikoli 4, 5 u 6 tagħha. (31)

(110)

L-Artikolu 4 tad-Deċiżjoni dwar l-SGEI tal-2005 jirrikjedi li l-SGEI jiġi inkarigat lill-impriża kkonċernata permezz ta' att uffiċjali wieħed jew aktar, li jistabbilixxi, fost l-oħrajn, in-natura u l-perjodu ta' validità tal-PSOs, il-parametri għall-kalkolu, il-kontroll u r-reviżjoni tal-kumpens, u l-arranġamenti meħtieġa biex jiġi evitat jew biex jitħallas lura kwalunkwe kumpens żejjed. L-Artikolu 5 tad-Deċiżjoni dwar l-SGEI tal-2005 stabbilixxa li l-ammont ta' kumpens irid jiġi limitat għal dak li hu meħtieġ biex jiġu koperti l-ispejjeż imġarrba fit-twettiq tal-PSOs, filwaqt illi jitqiesu d-dħul rilevanti kollu kif ukoll il-profitt raġjonevoli. Fl-aħħar nett, l-Artikolu 6 tad-Deċiżjoni dwar l-SGEI tal-2005 jirrikjedi lill-Istati Membri jwettqu kontrolli regolari biex jiżguraw li l-impriżi ma jkunux qed jirċeivu kumpens li jaqbeż l-ammont determinat skont l-Artikolu 5.

(111)

Kif indikat fit-taqsima 7.1.4.1, ir-Rumanija naqset milli turi li dawk li jmexxu l-ajruporti kienu inkarigati b'PSOs definiti b'mod ċar permezz tal-allegati atti ta' inkarigu li fuqhom kienet tiddependi, jiġifieri d-Deċiżjoni tal-Gvern 398/1997 u d-Deċiżjoni tal-Gvern 523/1998. Għalhekk, ir-rekwiżiti tal-Artikolu 4 ma ġewx sodisfatti.

(112)

Konsegwentement, l-għajnuna lill-ħdax-il entità li tmexxi l-ajruporti ma tistax titqies kompatibbli mas-suq intern u eżentata mir-rekwiżit ta' notifika abbażi tad-Deċiżjoni dwar l-SGEI tal-2005.

(113)

Skont l-Artikolu 10 tad-Deċiżjoni tal-Kummissjoni 2012/21/UE (minn hawn 'il quddiem “id-Deċiżjoni SGEI tal-2011”) (32), kull għajnuna li ngħatat effett qabel id-dħul fis-seħħ tagħha li ma kinitx kompatibbli mas-suq intern u lanqas ma kienet eżentata mir-rekwiżit ta' notifika skont id-Deċiżjoni dwar l-SGEI tal-2005 tista' tiġi ddikjarata kompatibbli mas-suq intern u eżentata mir-rekwiżi ta' notifika minn qabel jekk l-għajnuna tissodisfa l-kundizzjonijiet stabbiliti fiha. Għal raġunijiet simili għal dawk stabbiliti fit-taqsima 7.1.4.1, l-għajnuna ma tissodisfax il-kundizzjonijiet stabbiliti fl-Artikoli 4, 5 u 6 tad-Deċiżjoni dwar l-SGEI tal-2011, li huma fil-parti l-kbira tagħhom simili għall-Artikoli 4, 5 u 6 fid-Deċiżjoni dwar l-SGEI tal-2005. Għalhekk, l-għajnuna ma tistax titqies kompatibbli mas-suq intern u eżentata mir-rekwiżit ta' notifika abbażi tad-Deċiżjoni dwar l-SGEI tal-2011.

(114)

Il-miżuri inkwistjoni għaldaqstant jikkonstitwixxu għajnuna mill-Istat illegali.

(115)

Għar-raġunijiet spjegati hawn fuq, l-għajnuna ma tistax tiġi dikjarata kompatibbli mas-suq intern f'konformità mad-Deċiżjoni dwar l-SGEI tal-2005 u d-Deċiżjoni dwar l-SGEI tal-2011. Konsegwentement, il-Kummissjoni se tivvaluta l-kompatibilità tal-miżuri inkwistjoni abbażi tal-kriterji stabbiliti rispettivament fil-Qafas dwar l-SGEI tal-2011 u l-Linji Gwida tal-2014 dwar l-Avjazzjoni, li jidhru li huma l-uniċi bażijiet legali possibbli skont liema jista' potenzjalment jiġi konkluż li dawk il-miżuri huma kompatibbli mas-suq intern.

(116)

L-Artikolu 106(2) tat-Trattat jistabbilixxi li “kull impriża responsabbli sabiex topera servizzi ta' importanza ekonomika ġenerali jew li jkollha l-karattru ta' monopolju fiskali għandha tkun suġġetta għar-regoli tat-Trattati, b'mod partikolari dawk li jirriferu għall-kompetizzjoni, sa fejn l-applikazzjoni ta' dawn ir-regoli ma jostakolawx it-twettiq de jure jew de facto tal-funzjonijiet speċifiċi mogħtija lil dik l-impriża. L-iżvilupp tal-kummerċ ma għandux jiżviluppa b'mod kuntrarju għall-interessi tal-Unjoni.”

(117)

L-Artikolu jipprevedi deroga mill-projbizzjoni tal-għajnuna mill-Istat li tinsab fl-Artikolu 107 tat-Trattat sal-punt li l-għajnuna hija neċessarja u proporzjonali biex tiġi żgurata l-prestazzjoni tal-SGEI taħt kundizzjonijiet ekonomiċi aċċettabbli. Skont l-Artikolu 106(3) tat-Trattat hija r-responsabbiltà tal-Kummissjoni li tassigura l-applikazzjoni ta' dan l-Artikolu, inkluż, fost l-oħrajn, billi tispeċifika skont liema kundizzjonijiet tikkunsidra li huma sodisfatti l-kriterji tan-neċessità u l-proporzjonalità.

(118)

Qabel il-31 ta' Jannar 2012, il-qafas Komunitarju għal għajnuna mill-Istat fil-forma ta' kumpens għal servizzi pubbliċi (minn hawn 'il quddiem “il-Qafas dwar l-SGEI tal-2005”) (33) u d-Deċiżjoni dwar l-SGEI tal-2005 irrappreżentaw il-politika tal-Kummissjoni tal-applikazzjoni tad-deroga tal-Artikolu 106(2) tat-Trattat.

(119)

Fil-31 ta' Jannar 2012 il-pakkett SGEI l-ġdid, inkluż il-qafas għal għajnuna mill-Istat fil-forma ta' kumpens għal servizzi pubbliċi tal-Unjoni Ewropea (2011) (minn hawn 'il quddiem “il-qafas dwar l-SGEI tal-2011”) (34) u “id-Deċiżjoni dwar l-SGEI tal-2011” daħal fis-seħħ.

(120)

Skont il-paragrafu 69 tal-Qafas dwar l-SGEI tal-2011, “il-Kummissjoni se tapplika l-prinċipji stabbiliti f'din il-Komunikazzjoni għal għajnuna li ma tkunx skont il-liġi li dwarha tieħu deċiżjoni wara l-31 ta' Jannar 2012 anke jekk l-għajnuna tkun ingħatat qabel din id-data”.

(121)

Paragrafu 16 tal-Qafas dwar l-SGEI tal-2011 jistabbilixxi r-rekwiżiti biex SGEI jiġi kkunsidrat bħala inkarigat b'mod validu. B'mod partikolari l-paragrafu 16(a) u wara jistabbilixxi li l-att ta' inkarigu jrid jiddeskrivi l-kontenut u t-terminu ta' żmien ta' PSOs. Għalhekk, għall-istess raġunijiet diġà msemmija fit-taqsimiet 7.1.4.1 u 7.3 hawn fuq, f'dan il-każ l-għajnuna ma tistax tiġi kkunsidrata kompatibbli taħt il-Qafas dwar l-SGEI tal-2011.

(122)

Il-Kummissjoni għalhekk tikkunsidra li l-miżura tal-għajnuna inkwistjoni ma tistax tiġi ddikjarata kompatibbli mas-suq intern skont l-Artikolu 106(2) tat-Trattat.

(123)

Il-Linji Gwida tal-2014 dwar l-Avjazzjoni japplikaw għal għajnuna operatorja mogħtija lil ajruporti qabel l-4 ta' April 2014. (35) Il-kundizzjonijiet ta' kompatibilità stabbiliti fil-Linji Gwida tal-2014 dwar l-Avjazzjoni għall-għajnuna operatorja lill-ajruporti jvarjaw skont jekk l-għajnuna ngħatatx qabel jew wara l-4 ta' April 2014, id-data tad-dħul fis-seħħ tal-linji gwida. (36)

(124)

L-għajnuna operatorja mogħtija qabel id-dħul fis-seħħ tal-Linji Gwida tal-2014 dwar l-Avjazzjoni, jiġifieri qabel l-4 ta' April 2014, tista' tiġi ddikjarata kompatibbli sakemm jiġu sodisfatti l-kundizzjonijiet li ġejjin:

(125)

Il-miżuri ta' sostenn operatorji mogħtija lill-ajruporti reġjonali tar-Rumanija kellhom l-għan li jippermettu li l-ajruporti jkollhom biżżejjed kapital biex ikomplu joperaw b'mod vijabbli. Skont ir-Rumanija, l-ajruporti reġjonali għandhom rwol strumentali fil-promozzjoni ta' aċċessibilità għal żoni ta' lħuq u l-finanzjament inkwistjoni jtejjeb is-sigurtà, is-sikurezza u l-effiċjenza tal-ajruport, filwaqt li jikkontribbwixxi lejn l-ilħuq ta' objettivi ta' żvilupp reġjonali usa'. Barra minn hekk, l-aktar mod ta' trasport konvenjenti lejn/minn dawk ir-reġjoni huwa l-ivvjaġġar bl-ajru, minbarra servizzi tat-triq/ferrovjarji, li madankollu fir-Rumanija, minħabba l-kundizzjoni fqira tal-infrastruttura, jinvolvu ħinijiet tal-ivvjaġġjar konsiderevolment itwal.

(126)

Madankollu, il-Kummissjoni tinnota li fid-dawl tal-prossimità mill-qrib bejn xi wħud mill-ajruporti fl-investigazzjoni, duplikazzjoni possibbli tal-infrastruttura tal-ajruporti tista' timmilita kontra li t-tisjib ta' finanzjament għal dawk l-ajruporti jissodisfa objettiv definit b'mod ċar ta' interess komuni. Għalhekk il-Kummissjoni trid tivvaluta li l-finanzjament ta' dawk l-ajruporti ma jwassalx għad-duplikazzjoni tal-infrastruttura tal-ajruport fl-istess żona ta' lħuq.

(127)

Il-Linji Gwida tal-2014 dwar l-Avjazzjoni jiddefinixxu iż-“żona ta' lħuq ta' ajruport” bħala l-konfini ta' suq ġeografiku, li normalment ikun stabbilit għal madwar 100 kilometru jew madwar 60 minuta ta' vvjaġġar bil-karozza, bix-xarabank, bil-ferrovija jew bil-ferrovija ta' velocità għolja. Id-definizzjoni taż-żona ta' lħuq ta' ajruport partikolari jeħtieġ li tqis l-ispeċifiċitajiet ta' kull ajruport partikolari. Id-daqs u l-forma taż-żona ta' lħuq jiddependu fuq diversi karatteristiċi tal-ajruport, inkluż il-mudell tan-negozju tiegħu, il-lokazzjoni tieġħu u d-destinazzjoni li jservi.

(128)

Kif stabbilit fil-premessa 24 hawn fuq, l-uniċi ajruporti soġġetti għall-valutazzjoni preżenti li għalihom ajruport ieħor huwa preżenti fiż-żona ta' lħuq ta' 100 km jew 60 minuta ta' ħin ta' vvjaġġar bit-triq, bil-ferrovija jew bil-ferrovija ta' veloċità għolja, kif stabbilit fil-punt 25 (12) tal-linji gwida tal-2014 dwar l-Avjazzjoni huma Arad, Baia Mare, Satu Mare, Constanța u Oradea. Għall-ajruporti l-oħra kollha, il-Kummissjoni tikkunsidra li l-għajnuna kkontribwiet biex tinżamm fi stat ta' operat l-infrastruttura meħtieġa għall-mobilità taċ-ċittadini u l-aċċessibilità tar-reġjuni fejn jinsabu dawk l-ajruporti, minħabba b'mod partikolari l-kwalità ħażina tal-infrastruttura tat-triq u dik ferrovjarja. Għalhekk, għal dawk l-ajruporti, l-għajnuna kkontribwiet għat-twettiq ta' objettiv ta' interess komuni għall-Unjoni. Fir-rigward tal-bqija tal-ajruporti, il-Kummissjoni tinnota dan li ġej.

(129)

L-ajruport ta' Arad jinsab 50 km biss minnTimișoara, li jammonta għal ħin ta' vvjaġġar bit-triq ta' 40 minuta.

(130)

L-ajrporti ta' Timișoara u Arad kellhom mudelli ta' negozju differenti matul il-perjodu 2007-2009. Timișoara kien ajruport stabbilit sew li jsegwi mudell ta' negozju li huwa differenti b'mod sinifikanti minn dak tal-ajruport ta' Arad. L-ajruport ta' Timișoara offra prinċipalment titjiriet skedati ta' trasportaturi reġjonali u internazzjonali ta' servizzi sħaħ li jgħaqqdu Timișoara ma' għadd ta' bliet Rumeni u Ewropej (43) filwaqt li, kif imsemmi fil-premessi 28 u 31 hawn fuq, il-mudell ta' negozju ta' Arad kien ibbażat fuq traffiku low-cost. Iż-żewġ ajruporti baqgħu joperaw taħt mudelli differenti mill-2009 'il quddiem bi traffiku low-cost imnaqqas drastikament u sussegwentement intemm fl-ajruport ta' Arad (l-ajruport serva biss 8 632 passiġġier fl-2015 u skont informazzjoni pubblikament disponibbli, ma kellu l-ebda traffiku tal-passiġġieri kummerċjali fl-2016) u l-ajruport ta' Timișoara li kien immirat lejn it-traffiku low cost. Il-fatt li l-mudelli ta' negozju tal-ajruporti f'Timișoara u Arad kienu differenti matul il-perjodu li qed jiġi valutat u wara dan il-perjodu huwa indikzzjoni li ż-żewġ ajruporti huma sostituti imperfetti għal xulxin.

(131)

Skont il-punt 85 tal-Linji Gwida tal-Avjazzjoni, id-duplikazzjoni ta' ajruporti li ma jagħmlux qligħ jew il-ħolqien ta' kapaċità addizzjonali mhux użata ma jikkontribwixxux għal objettiv ta' interess komuni. F'dan ir-rigward, il-Kummmissjoni tinnota li Timișoara kien profitabbli matul il-perjodu li qed jiġi valutat. Barra minn hekk, l-ajruport ta' Timișoara għamel investimenti f'diversi terminali matul 2007 — 2010 biex jespandi l-kapaċità tiegħu u jakkomoda aktar traffiku tal-ajru (eż. estensjoni u modernizzazzjoni tat-terminal tat-titjiriet internazzjonali fl-2007, estensjoni tat-terminal tat-tluq domestiku fil-perjodu 2008 — 2010). L-ajruport ta' Timișoara għalhekk, għalkemm ħafna akbar, kellu jinvesti biex jikber, għalhekk mhuwiex probabbli li mingħajr l-għajnuna għal Arad, Timișoara seta' assorba t-traffiku ta' Arad mingħajr aktar investimenti. Din hija indikazzjoni oħra tal-grad imperfett ta' sostitwibbiltà bejn iż-żewġ ajruporti.

(132)

Fid-dawl tal-argumenti mressqa fil-premessi 130 u 131 hawn fuq, il-Kummissjoni tikkonkludi li filwaqt li l-ajruport ta' Arad jinsab fl-istess żona ta' lħuq bħall-ajruport ta' Timișoara, ma hemmx duplikazzjoni bejn iż-żewġ ajruporti.

(133)

Abbażi ta' dak imsemmi hawn fuq, il-Kummissjoni tista' tikkonkludi li l-għajnuna lill-ajruport ta' Arad ikkontribwiet għall-mobilità taċ-ċittadini u l-aċċessibilità tar-reġjun fejn jinsab u għalhekk serviet objettiv definit tajjeb ta' interess komuni.

(134)

Fir-rigward tal-ajruporti ta' Baia Mare u Satu Mare, dawn jinsabu 76 km minn xulxin u ż-żewġ ajruporti servew l-aktar titjiriet skedati lejn Bukarest operati mit-trasportatur nazzjonali tar-Rumanija, TAROM. Abbażi ta' informazzjoni pubblikament disponibbli, fl-ajruport ta' Baia Mare, matul il-perjodu 2007-2009, TAROM opera diversi titjiriet kull ġimgħa lejn Bukarest, filwaqt li l-Austrian Airlines operaw destinazzjoni waħda (Vjenna) matul il-perjodu April 2008 — Frar 2009 u Blueair serviet tliet destinazzjonijiet Ewropej għal ftit xhur biss (Ottubru sa Diċembru 2009). TAROM opera wkoll diversi titjiriet fil-ġimgħa mill-ajruport ta' Satu Mare għal Bukarest. Madankollu, minħabba l-kundizzjoni ħażina tal-infrastruttura tat-toroq f'dik iż-żona, il-ħin ta' vvjaġġar bejn iż-żewġ ajruporti huwa ta' siegħa (1) u għaxar (10) minuti bit-triq, li jaqbeż il-kriterju tal-ħin ta' vvjaġġar ta' 60 minuta użat biex tiġi delineata ż-żona ta' lħuq ta' ajruport skont il-Linji Gwida tal-2014 dwar l-Avjazzjoni.

(135)

Barra minn hekk, kif imsemmi fil-premessi 34 u 35 hawn fuq, kien hemm differenza fid-daqs tal-inġenji tal-ajru li setgħu jiġu operati b'mod regolari fiż-żewġ ajruporti minħabba fid-differenza fl-infrastruttura.

(136)

Għalhekk, fid-dawl tal-argumenti stabbiliti fil-premessi 134 u 135 hawn fuq, filwaqt li ż-żewġ ajruporti jinsabu fi ħdan il-kriterju tad-distanza ta' 100 kilometru użat biex tiġi delineata ż-żona ta' lħuq ta' ajruport skont il-Linji Gwida tal-2014 dwar l-Avjazzjoni, il-Kummissjoni tikkonkludi li ma hemmx duplikazzjoni bejniethom.

(137)

Abbażi ta' dak imsemmi hawn fuq, il-Kummissjoni tikkonkludi li l-għajnuna rċevuta minn kull wieħed miż-żewġ ajruporti kkontribwixxiet għal objettiv definit sew ta' interess komuni permezz taż-żieda fil-mobilità u l-aċċessibilità fiż-żoni fejn jinsabu dawn l-ajruporti.

(138)

L-ajruport ta' Constanța jinsab 45 km u ħin ta' vvjaġġar ta' 0h30 mill-ajruport ta' Tuzla. Fl-2007-2009, Constanța offra titjiriet skedati lejn diversi destinazzjonijiet Ewropej u għalhekk kellu mudell ta' negozju differenti meta mqabbel ma' Tuzla li ma offra l-ebda servizzi tal-ajruport għal avjazzjoni kummerċjali u ffoka fuq titjiriet speċjalizzati (eż. għal skopijiet agrikoli, għal skopijiet tar-reklamar, kif ukoll titjiriet ta' divertiment, taħriġ u emerġenza). Konsegwentement, għalkemm l-ajruport ta' Tuzla jinsab fl-istess żona ta' lħuq bħall-ajruport ta' Constanța, ma jistax jitqies bħala “ajruport” fis-sens tal-punt 25(6) tal-Linji Gwida tal-2014 dwar l-Avjazzjoni u għalhekk ma jistax jitqies bħala d-duplikazzjoni tal-infrastruttura fl-ajruport ta' Constanța.

(139)

Abbażi ta' dan, il-Kummissjoni tikkonkludi li l-għajnuna lill-ajruport ta' Constanța kkontribwixxiet għal objettiv definit sew ta' interess komuni billi żiedet il-mobilità u l-aċċessibilità fiż-żona fejn jinsab l-ajruport.

(140)

Oradea jinsab 80 km 'il bogħod minn Debrecen (l-Ungerija), iżda l-ħin ta' vvjaġġar huwa ta' mill-anqas siegħa (1) u 30 minuta (minħabba l-ħtieġa li tgħaddi minn fruntiera mhux tax-Schengen).

(141)

Barra minn hekk, matul l-2007-2009 l-ajruporti kellhom mudell ta' negozju differenti bl-ajruport ta' Oradea li opera titjiriet domestiċi minn trasportaturi reġjonali u nazzjonali ta' servizzi sħaħ u l-ajruport ta' Debrecen li ffoka f'dak iż-żmien fuq titjiriet charter (bi traffiku low cost li żviluppa biss fis-snin riċenti). Din hija indikazzjoni li ż-żewġ ajruporti fil-perjodu li qed jiġi valutat kienu sostituti imperfetti għal xulxin. Għalhekk, filwaqt li ż-żewġ ajruporti jinsabu fi ħdan il-kriterju tad-distanza ta' 100 kilometru użat biex tiġi delineata ż-żona ta' lħuq ta' ajruport skont il-Linji Gwida tal-2014 dwar l-Avjazzjoni, il-Kummissjoni tikkonkludi li ma hemmx duplikazzjoni bejniethom.

(142)

Abbażi ta' dak imsemmi hawn fuq, il-Kummissjoni tikkonkludi li l-għajnuna lill-ajruport ta' Oradea kkontribwiet għal objettiv definit sew ta' interess komuni permezz ta' żieda fil-mobilità u l-aċċessibilità fiż-żona fejn jinsab l-ajruport.

(143)

Fir-rigward tan-neċessità tal-għajnuna, il-punt 116 tal-Linji Gwida tal-2014 dwar l-Avjazzjoni jirrikjedi li l-għajnuna operatorja ġġib magħha titjib materjali li s-suq innifsu ma jistax iġib. Skont il-punt 120 tal-Linji Gwida tal-2014 dwar l-Avjazzjoni, l-Istati Membri jridu juru li l-għajnuna hija adegwata biex jinkiseb l-objettiv maħsub jew biex jiġu solvuti l-problemi maħsuba biex jiġu indirizzati mill-għajnuna. Dan huwa l-każ jekk, mingħajr l-għajnuna inkwistjoni, probabbilment l-ajruporti tar-Rumanija inkistjoni kien ikollhom joħorġu mis-suq, u dan kien iċaħħad lir-reġjuni tar-Rumanija minn infrastruttura tat-trasport li għandha rwol sinifikanti fl-aċċessibilità u l-iżvilupp tagħhom, jew inaqqas l-attività tagħhom sa grad sinifikanti. Skont il-Linji Gwida tal-2014 dwar l-Avjazzjoni, ajruporti iżgħar jista' jkollhom diffikultajiet fl-iżgurar tal-finanzjament tal-operazzjoni tagħhom mingħajr finanzjament pubbliku. Skont il-punt 118 tal-Linji Gwida tal-2014 dwar l-Avjazzjoni, ajruporti bi traffiku tal-passiġġieri annwali taħt il-200 000 passiġġier fis-sena jistgħu ma jkunux jistgħ jkopru l-ispejjeż operatorji tagħhom fil-parti l-kbira tagħhom. F'dan is-sens, il-Kummissjoni tinnota li t-traffiku fil-ħdax-il ajruport soġġetti għal din il-valutazzjoni kien taħt il-200 000 passiġġier fil-perjodu 2007-2009.

(144)

Skont il-punt 124 tal-Linji Gwida tal-2014 dwar l-Avjazzjoni, l-għajnuna operatorja għandha effett ta' inċentiv jekk ikun probabbli li, fl-assenza tal-għajnuna operatorja, u filwaqt li tiġi kkunsidrata l-preżenza possibbli tal-għajnuna għall-investimenti u l-livell tat-traffiku, il-livell tal-attività ekonomika tal-ajruport ikkonċernat jitnaqqas b'mod sinifikanti. Fil-każ preżenti, mingħajr l-għajnuna, l-attività tal-benefiċjarji kienet tonqos b'mod sinifikanti jekk mhux tispiċċa għalkollox minħabba telf mhux kopert. Skont il-punt 125 tal-Linji Gwida tal-2014 dwar l-Avjazzjoni, sabiex tkun proporzjonata, l-għajnuna operatorja lill-ajruporti trid tkun limitata għall-minimu meħtieġ sabiex l-attività megħjuna sseħħ. Il-miżuri li qed jiġu investigati kienu limitati għall-minimu meħtieġ biex jiġi kkumpensat it-telf u biex l-ajruporti jkunu jistgħu joperaw b'mod vijabbli.

(145)

Għalhekk, il-Kummissjoni tikkonkludi li l-għajnuna operatorja kollha kienet meħtieġa u limitata għall-minimu meħtieġ biex isseħħ l-attività megħjuna.

(146)

Kif stabbilit fil-premessa 24 hawn fuq, l-uniċi ajruporti soġġetti għall-valutazzjoni preżenti li għalihom ajruport ieħor huwa preżenti fi ħdan 100 km jew ħin ta' vvjaġġar ta' 60 minuta bit-triq, bil-ferrovija jew bil-ferrovija ta' veloċità għolja huma Arad, Baia Mare, Satu Mare, Constanța u Oradea. Kif spjegat fil-premessa 128 hawn fuq, għall-ajruporti l-oħra kollha, il-Kummissjoni tikkunsidra li l-għajnuna kkontribwiet biex tinżamm fi stat ta' operat l-infrastruttura meħtieġa għall-mobilità taċ-ċittadini u l-aċċessibilità tar-reġjuni fejn jinsabu dawk l-ajruporti, minħabba b'mod partikolari l-kwalità ħażina tal-infrastruttura tat-triq u dik ferrovjarja. Għalhekk, għal dawk l-ajruporti, l-għajnuna kkontribwiet għat-twettiq ta' objettiv ta' interess komuni għall-Unjoni u ma rriżultatx f'distorsjonijiet mhux dovuti tal-kompetizzjoni. Fir-rigward tal-bqija tal-ajruporti, il-Kummissjoni tinnota dan li ġej.

(147)

Il-Kummissjoni tinnota li fil-perjodu li qed jiġi vvalutat, l-ajruport ta' Arad kellu traffiku limitat ħafna, kemm f'termini assoluti kif ukoll meta mqabbel mal-ajruport ta' Timișoara (li jinsab f'distanza ta' 50 km u ħin ta' vvjaġġar ta' 40 minuta). In-numru ta' passiġġieri kull sena fl-ajruport ta' Arad varja bejn 67 183 u 128 835 fil-perjodu li qed jiġi valutat, filwaqt li fl-ajruport ta' Timișoara t-traffiku varja bejn 859 329 sa 991 758 passiġġier kull sena. It-traffiku fl-ajruport ta' Arad irrappreżenta biss 7,8 % tat-traffiku fl-ajruport ta' Timișoara fl-2007, 14,5 % fl-2008 u 8,8 % fl-2009. L-impatt kompetittiv tal-għajnuna rċevuta mill-ajruport ta' Arad fuq l-ajruport ta' Timișoara kien limitat ħafna fid-dawl tad-differenza fil-livell tat-traffiku bejn iż-żewġ ajruporti (44). B'mod aktar ġenerali, l-effetti kompetittivi globali tal-għajnuna kienu neċessarjament modesti fid-dawl tal-ammont żgħir ta' traffiku fl-ajruport. Barra minn hekk, l-evoluzzjoni tat-traffiku fiż-żewġ ajruporti ma tidhirx li hija korrelatata. It-traffiku fl-ajruport ta' Arad żdied minn 67 183 passiġġier fl-2007 għal 128 835 fl-2008 u naqas għal xi 88 147 passiġġier fl-2009 filwaqt li l-ajruport ta' Timișoara żied it-traffiku tiegħu b'mod stabbli (minn 859 329 passiġġier fl-2007 għal 886 083 passiġġier fl-2008 u 991 758 passiġġier fl-2009) (45). Dan in-nuqqas ta' korrelazzjoni jissuġġerixxi li ż-żewġ ajruporti servew ħtiġijiet u segmenti tas-suq differenti u ma kinux sempliċement qed jiddupplikaw lil xulxin.

(148)

Barra minn hekk, minħabba li l-ajruport ta' Timișoara kien profitabbli bejn l-2007 u l-2009 u għamel investiment biex tiżdied il-kapaċità tiegħu, mhuwiex probabbli l-effett tal-għajnuna għall-ajruport ta' Arad kellu impatt materjali fuq l-operazzjonijiet tal-ajruport ta' Timișoara

(149)

Fid-dawl ta' dak imsemmi hawn fuq, il-Kummissjoni tikkunsidra li d-distorsjonijiet tal-kompetizzjoni b'riżultat tal-għajnuna kienu limitati u m'għamlux tajjeb għall-kontribuzzjoni tal-għajnuna għall-mobilità u l-aċċessibilità.

(150)

Minħabba l-livell tat-traffiku estremament baxx taż-żewġ ajruporti fil-perjodu li qed jiġi valutat (minn 15 334 passiġġier fl-2007 għal 24 983 passiġġier fl-2009 għal Baia Mare u minn 5 883 passiġġier għal 11 101 passiġġier fl-2009 għal Satu Mara) u d-differenza fid-daqs tat-tip ta' inġenji tal-ajru operati kif indikat fil-premessi 34 u 35 hawn fuq, il-Kummissjoni tikkonkludi li d-distorsjonijiet tal-kompetizzjonijiet ikkawżati mill-għajnuna kienu limitati ħafna u m'għamlux tajjeb għall-kontribuzzjoni pożittiva tal-għajnuna għall-mobilità u l-aċċessibilità.

(151)

Kif spjegat fil-premessa 138 hawn fuq, Constanța li opera traffiku kummerċjali kellu mudell ta' negozju differenti mill-ajruport ta' Tuzla fil-viċin, li ma offra l-ebda servizz tal-ajruport għal avjazzjoni kummerċjali. L-ajruport ta' Tuzla lanqas ma huwa “ajruport” fis-sens tal-punt 25(6) tal-Linji Gwida tal-2014 dwar l-Avjazzjoni. Barra minn hekk, Constanța kellu traffiku baxx ħafna fil-perjodu li qed jiġi valutat, li jillimita d-distorsjonijiet tal-kompetizzjoni li rriżultaw mill-għajnuna li rċieva. Għalhekk, il-Kummissjoni tikkonkludi li l-kontribuzzjoni tal-għajnuna rċevuta mill-ajruport ta' Constanța fl-2007 — 2009 għall-mobilita u l-aċċessibilità għamlet tajjeb għal kwalunkwe distorsjoni tal-kompetizzjoni b'riżultat ta' dik l-għajnuna.

(152)

Kif spjegat fil-premessi 37 u 140 hawn fuq, Oradea jinsab 80 km 'il bogħod minn Debrecen (l-Ungerija), iżda l-ħin ta' vvjaġġar huwa tal-inqas siegħa (1) u 30 minuta (minħabba li ħtieġa li tgħaddi minn fruntiera li mhijiex tax-Schengen). Barra minn hekk, matul 2007-2009 Oraea kellu traffiku baxx ħafna (anqas minn 40 000 passiġġier) u kellu mudell ta' negozju differenti meta mqabbel mal-ajruport ta' Debrecen (ara l-premessa 141).

(153)

Abbażi ta' dan, il-Kummissjoni tikkunsidra li l-kontribuzzjoni tal-għajnuna rċevuta mill-ajruport ta' Oradea għall-mobilità u l-aċċessibbiltà għamlet tajjeb għal kwalunkwe distorsjoni tal-kompetizzjoni b'riżultat ta' dik l-għajnuna.

(154)

Abbażi tal-valutazzjoni t'hawn fuq, il-Kummissjoni tikkonkludi li l-għajnuna mogħtija fl-2007 — 2009 lill-ajruporti tar-Rumanija f'Arad, Bacău, Baia Mare, Craiova, Iași, Oradea, Satu — Mare, Sibiu, Suceava, Tulcea u Constanța fil-perjodu 2007 — 2009 hija kompatibbli mas-suq intern skont l-Artikolu 107(3)(c) tat-Trattat.

(155)

Din il-valutazzjoni hija għalkollox mingħajr preġudizzju għal kwalunkwe valutazzjoni potenzjali fil-futur mill-Kummissjoni ta' kwalunkwe għajnuna potenzjali mogħtija li dawk l-ajruporti wara l-4 ta' April 2014, peress li kwalunkwe għajnuna bħal din tkun trid tiġi valutata bi kriterji li jvarjaw minn dawk applikabbli għall-miżuri inkwistjoni (46).

(156)

Il-finanzjament mogħti mill-awtoritajiet pubbliċi Rumeni bejn l-2007 — 2009 lill-ajruporti li jinsabu f'Arad, Bacău, Baia Mare, Craiova, Iași, Oradea, Satu — Mare, Sibiu, Suceava, Tulcea u Constanța jikkostitwixxi għajnuna mill-Istat illegali li hija kompatibbli mas-suq intern skont l-Artikolu 107(3)(c) TFUE.

(157)

Għar-raġunijiet spjegati fil-premessa 69, l-investigazzjoni għall-finanzjament pubbliku mogħti lill-ajruport ta' Cluj-Napoca u l-ajruport ta' Târgu Mureș bejn l-2007 — 2009 tibqa' miftuħa,

(1)

Permezz ta' ittra datata l-5 ta' Lulju 2013, (1) tellUs IT AS (iktar tard ingħaqdet ma' “New Mind”, (2) u għalhekk imsejħa bħala “New Mind | tellUs” jew “l-Ilmentatur”), għamlet ilment dwar għajnuna mill-Istat lill-Awtorità dwar l-attivitajiet ekonomiċi ta' Innovasjon Norge (“Innovation Norway” jew “IN”) fis-suq tal-infrastruttura tal-web u servizzi relatati, fi ħdan is-settur tat-turiżmu. L-Awtorità rċeviet u rreġistrat l-ilment fit-8 ta' Lulju 2013.

(2)

Wara eżaminazzjoni preliminari tal-ilment, fis-16 ta' Lulju 2014, l-Awtorità ddeċidiet li tiftaħ proċedura ta' investigazzjoni formali prevista fl-Artikolu 1(2) tal-Parti I tal-Protokoll 3 billi adottat id-Deċiżjoni Nru 300/14/COL (“id-deċiżjoni tal-ftuħ”). (3) Permezz ta' din id-deċiżjoni, l-Awtorità stiednet lill-awtoritajiet Norveġiżi u lill-partijiet interessati biex jissottomettu l-kummenti tagħhom.

(3)

Permezz ta' ittra datata l-1 ta' Settembru 2014, (4) l-awtoritajiet Norveġiżi pprovdew kummenti għad-deċiżjoni tal-ftuħ. Fit-30 ta' Settembru 2014, l-Awtorità ltaqgħet mal-awtoritajiet Norveġiżi u mal-IN. F'din l-okkażjoni, l-awtoritajiet Norveġiżi pprovdew informazzjoni u kjarifiki ġodda dwar is-sottomissjoni tagħhom datata l-1 ta' Settembru 2014. L-Awtorità staqsiet ukoll lill-IN mistoqsijiet oħra li twieġbu permezz ta' ittra elettronika datata s-17 ta' Ottubru 2014. (5)

(4)

Permezz ta' ittra elettronika tad-9 ta' Ottubru 2014, (6) l-Awtorità rċeviet kummenti minn parti interessata waħda, l-Ilmentatur. Permezz ta' ittra tal-10 ta' Ottubru 2014, (7) l-Awtorità ressqithom lill-awtoritajiet Norveġiżi. L-Awtorità kellha konferenza telefonika mal-IN fis-27 ta' Ottubru 2014 u fil-5 ta' Novembru 2014.

(5)

Permezz ta' ittra datata l-24 ta' Novembru 2014, (8) l-awtoritajiet Norveġiżi ressqu l-kummenti tagħhom dwar l-osservazzjonijiet tal-Ilmentatur u iktar informazzjoni dwar il-każ.

(6)

Wara dan, l-Awtorità rċeviet informazzjoni addizzjonali dwar il-każ mill-Ilmentatur u mill-IN. (9) L-informazzjoni rċevuta mill-Ilmentatur intbagħtet lill-awtoritajiet Norveġiżi.

(7)

Din id-deċiżjoni tikkonċerna l-attivitajiet tal-IN fi ħdan is-settur tat-turiżmu.

(8)

L-IN hija kumpanija pubblika, li għandha l-mandat li tappoġġja l-innovazzjoni u l-iżvilupp tal-intrapriżi u l-industrija tan-Norveġja. L-IN tappoġġja l-industrija nazzjonali tat-turiżmu. L-IN stabbiliet u timmaniġġja s-sit web visitnorway.com, l-iktar sit web Norveġiż tat-turiżmu li jżuruh nies. (10)

(9)

Permezz ta' visitnorway.com, l-IN tipprovdi servizzi lill-Bordijiet Reġjonali għat-Turisti (“RTBs”) (11) u lill-Organizzazzjonijiet ta' Ġestjoni tad-Destinazzjoni (“DMOs”). (12) L-RTBs u d-DMOs huma entitajiet lokali/reġjonali li jippromwovu t-turiżmu fiż-żoni ġeografiċi rispettivi tagħhom.

(10)

Dawn is-servizzi jinkludu (i) infrastruttura tal-web u servizzi relatati u (ii) l-kummerċjalizzazzjoni u l-promozzjoni tas-servizzi fis-settur tat-turiżmu. (13)

(11)

L-Ilmentatur u d-deċiżjoni tal-ftuħ jirreferu għall-possibbiltà ta' miżuri ta' għajnuna mill-Istat rigward l-infrastruttura tal-web u servizzi relatati. B'mod speċifiku, l-Artikolu 1 tad-deċiżjoni tal-ftuħ jirreferi għal tliet miżuri possibbli ta' għajnuna mill-Istat.

(12)

L-ewwel allegata miżura ta' għajnuna mill-Istat tikkonċerna l-għajnuna mill-Istat favur l-IN permezz tal-profitti msemmija meta jipprovdu infrastruttura tal-web u servizzi relatati mal-RTBs u d-DMOs.

(13)

It-tieni miżura hija l-allegat nuqqas tas-separazzjoni kontabilistika u metodoloġija trasparenti tal-allokazzjoni tal-kostijiet li tissepara l-attivitajiet ekonomiċi u mhux ekonomiċi tal-IN. B'mod partikolari, kwistjoni rilevanti hija jekk il-provvista ta' infrastruttura tal-web u servizzi relatati mill-IN hijiex kontrosussidjata bil-fondi pubbliċi rċevuti biex jitwettaq servizz mhux ekonomiku, jiġifieri l-promozzjoni ġenerali tan-Norveġja bħala destinazzjoni turistika.

(14)

It-tielet allegata miżura ta' għajnuna mill-Istat tikkonċerna għajnuna mill-Istat favur l-RTBs u d-DMOs, fil-forma li l-prezzijiet mitluba għall-infrastruttura tal-web u servizzi relatati mhumiex suffiċjenti biex joħolqu redditu raġonevoli għall-IN fuq l-investimenti tagħha.

(15)

L-IN twaqqfet fl-2003 mill-Gvern Norveġiż permezz tal-Att dwar Innovation Norway (14) (“l-Att dwar l-IN”). L-Istat għandu 51 % tal-kumpanija, u l-kontej għandhom d-49 % l-oħra. (15)

(16)

Il-kumpanija twaqqfet bl-iskop li tkun l-istrument tal-Gvern Norveġiż biex jippromwovi l-iżvilupp tan-negozju li jiġġenera valur fil-pajjiż kollu. (16) L-IN tamministra u timplimenta diversi skemi ta' għajnuna min-Norveġja. L-IN tappoġġja s-settur nazzjonali tat-turiżmu. Skont l-awtoritajiet Norveġiżi: “L-IN hija fost l-oħrajn fdata bil-kompitu li toffri servizzi ta' kummerċjalizzazzjoni tal-web biex tilħaq il-popolazzjoni internazzjonali u nazzjonali fuq is-sit web uffiċjali visitnorway.com”. (17)

(17)

Il-promozzjoni lokali u reġjonali tat-turiżmu hija żgurata mill-RTBs u d-DMOs. Skont l-informazzjoni pprovduta mill-awtoritajiet Norveġiżi, (18) fin-Norveġja hemm madwar 300 organizzazzjoni reġjonali u lokali għat-turiżmu, jiġifieri RTBs u DMOs. L-għan ewlieni tagħhom huwa li jirranġaw l-attivitajiet tat-turiżmu u joffru informazzjoni dwar it-turiżmu. Il-fokus tal-RTBs huwa fuq il-kummerċjalizzazzjoni tar-reġjun internazzjonalment, filwaqt li d-DMOs jaħdmu kemm fuq livell internazzjonali kif ukoll nazzjonali biex jikkummerċjalizzaw destinazzjonijiet speċifiċi. (19) B'mod ġenerali, l-azzjonisti tagħhom huma kemm kumpaniji pubbliċi, kif ukoll privati. (20) L-RTBs huma b'mod ġenerali organizzati bħala kumpaniji b'responsabbiltà limitata, li l-ishma tagħhom huma propjetà tal-awtoritajiet tal-kontej u tar-rappreżentanti tal-industrija tat-turiżmu. Id-DMOs huma lokali u l-istruttura azzjonista tagħhom tvarja. Madankollu, b'mod ġenerali huma propjetà tal-awtoritajiet lokali u tan-negozji lokali tat-turiżmu.

(18)

L-RTBs u d-DMOs ma jfittxux li jkabbru l-profitt għas-sidien tagħhom. L-objettiv tagħhom huwa pjuttost li jistimulaw l-attività ekonomika tas-settur tat-turiżmu fiż-żoni ġeografiċi rispettivi tagħhom. (21)

(19)

L-infrastruttura tal-web u servizzi relatati fis-settur tat-turiżmu huma pprovduti permezz ta' “Sistema ta' Ġestjoni tad-Destinazzjoni” (“DMS”). (22)

(20)

Permezz ta' DMS, kumpanija tal-IT toffri servizz fejn il-klijenti tagħha (kumpaniji ta' ġestjoni tad-destinazzjoni (23)) jistgħu jissottomettu u jaġġornaw l-informazzjoni dwar siti turistiċi, lukandi, ristoranti, avvenimenti u informazzjoni simili fl-istess ħin fuq il-paġna web tagħhom stess, u fuq kanali esterni bħal visitnorway.com, Google Maps, kjoskijiet tal-informazzjoni għat-turisti, portali mobbli u gazzetti stampati. L-informazzjoni tintuża mill-pubbliku għall-ibbukkjar jew għal skopijiet oħra.

(21)

DMS tista' tipprovdi funzjonijiet differenti: (i) funzjoni ta' destinatur (jiġifieri l-ħolqien ta' bażi ta' dejta ta' punti ta' interess jew informazzjoni istantanja li tikkonċerna avvenimenti, lukandi, ristoranti, wirjiet tal-arti, eċċ.); (ii) funzjoni ta' distribuzzjoni (jiġifieri l-informazzjoni maħżuna fil-bażi ta' dejta titqassam lill-kanali u lill-pjattaformi differenti); u (iii) funzjoni ta' tfittxija (jiġifieri tintuża fuq is-siti web biex jiġu mfittxija u ppreżentati prodotti tat-turiżmu).

(22)

Illustrazzjoni grafika ta' dawn is-servizzi hija inkluża fil-premessa 43 ta' hawn taħt.

(23)

Il-kummerċjalizzazzjoni u l-promozzjoni tas-servizzi jistgħu jirreferu għall-promozzjoni ġenerali ta' żona ġeografika jew għall-promozzjoni ta' negozji speċifiċi.

(24)

Promozzjoni ġenerali timplika li l-viżitaturi jiġu offruti informazzjoni ġenerali tat-turiżmu dwar il-pajsaġġi, it-tradizzjonijiet kulinarji, it-temp eċċ. Promozzjoni tan-negozju speċifiku tirreferi għal kummerċjalizzazzjoni ta' kontenuti speċifiċi (jiġifieri informazzjoni dwar il-lukanda, ir-ristoranti, l-avvenimenti kulturali, eċċ.)

(25)

Barra minn hekk, bil-promozzjoni ta' kontenuti speċifiċi fuq visitnorway.com, jistgħu jiġu identifikati żewġ possibilitajiet differenti, jew l-informazzjoni hija ppubblikata direttament fuq is-sit web (jiġifieri l-informazzjoni hija ospitata fi ħdan is-sit web), jew inkella ħolqa għal sit web estern li jippubblika l-informazzjoni speċifika.

(26)

Huwa fl-ambitu tal-mandat tal-IN li tippromwovi l-industrija tat-turiżmu fuq livell nazzjonali. Il-Gvern Norveġiż kien parti kkonċernata attiva fis-settur tat-turiżmu sa mill-1903. (24) Hekk kif indikat fil-premessa 17 ta' hawn fuq, fuq livelli reġjonali u lokali, il-promozzjoni tat-turiżmu titwettaq mill-RTBs u d-DMOs. L-ittri tal-baġit annwali tal-Istat, fil-kapitolu ddedikat għall-IN, jipprovdu struzzjonijiet għall-attivitajiet tal-IN fis-settur tat-turiżmu. (25)

(27)

Fl-2007, l-awtoritajiet Norveġiżi adottaw strateġija nazzjonali għall-industrija tat-turiżmu, li stabbiliet l-objettivi ewlenin tal-Gvern għal dan is-settur. (26) Wieħed minn dawn l-objettivi kien li jissaħħaħ ir-rikonoxximent tan-Norveġja bħala destinazzjoni turistika. F'dan ir-rigward, fl-2007, l-IN żviluppat u ħolqot is-sit web visitnorway.com. Skont l-istrateġija tal-industrija tat-turiżmu “[i]s-sit web iħeġġeġ lill-viżitaturi biex isiefru lejn in-Norveġja u jipprovdi informazzjoni tajba u komprensiva dwar in-Norveġja u dwar dak li l-industrija tat-turiżmu għandha x'toffri” . (27)

(28)

Sa mit-twaqqif tas-sit web visitnorway.com, l-IN, minbarra li pprovdiet kontenut ġenerali dwar in-Norveġja (attività mhux ekonomika), offriet ukoll lill-RTBs u d-DMOs, l-abbiltà li jippromwovu l-kontenut tat-turiżmu speċifiku tagħhom (jiġifieri informazzjoni dwar avvenimenti, lukandi, trasport, eċċ.) fuq is-sit web visitnorway.com. L-IN iffirmat ftehimiet standard mal-RTBs u d-DMOs, li permezz tagħhom, il-kontenut speċifiku tat-turiżmu tal-RTBs u d-DMOs huwa ppubblikat fuq visitnorway.com (direttament jew permezz ta' hyperlinks) bil-ħlas ta' miżata annwali għal abbonament ikkalkulata abbażi tal-fatturat annwali tal-RTBs u d-DMOs rispettivi. L-RTBs u d-DMOs storikament kellhom ukoll is-siti web tagħhom stess li fihom jipprovdu informazzjoni ġenerali dwar iż-żoni ġeografiċi rispettivi tagħhom, kif ukoll jippromwovu prodotti speċifiċi tat-turiżmu, jiġifieri servizzi ekonomiċi f'isem il-partijiet ikkonċernati u s-sidien tagħhom.

(29)

Fl-2012, il-Gvern Norveġiż adotta strateġija ġdida għat-turiżmu bil-għan li jtejjeb l-istruttura nazzjonali tat-turiżmu. (28) L-objettivi tal-istrateġija l-ġdida kienu li trendi l-appoġġ pubbliku għas-settur iktar effiċjenti, tnaqqas in-numru ta' atturi involuti u tiżgura iktar koordinazzjoni bejniethom. Barra minn hekk, l-awtoritajiet Norveġiżi ddikjaraw l-għan tagħhom li jevitaw diversifikazzjoni ta' siti web, li jittrattaw it-turiżmu fin-Norveġja, bi strutturi u preżentazzjonijiet differenti, magni tal-ibbukkjar, lingwi u l-bqija, li huma kollha parzjalment iffinanzjati minn diversi korpi tal-Gvern, kontej u muniċipalitajiet.

(30)

Wara dan, fl-2013, il-Ministeru tal-Kummerċ, tal-Industrija u s-Sajd adotta “struttura ġdida tat-turiżmu” bil-għan li jkun iktar faċli għat-turisti biex jagħżlu n-Norveġja bħala destinazzjoni turistika. (29)

(31)

L-ittra tal-baġit tal-IN tal-2013 (l-“Ittra tal-baġit 2013” (30)) tgħid li: “Innovation Norway għandha tiżgura distribuzzjoni tajba tal-esperjenza tal-ivvjaġġar tan-Norveġja permezz ta' visitnorway.com, u tgħin sabiex tagħmel l-atturi fl-industrija tat-turiżmu […]”. Visitnorway.com ġiet għalhekk identifikata bħala element ewlieni fl-istrateġija tal-promozzjoni tat-turiżmu fin-Norveġja. (31) L-IN intalbet biex tespandi s-sit web u żżid l-appoġġ tagħha fl-industrija tat-turiżmu. L-objettiv kien li toffri servizzi ta' kummerċjalizzazzjoni fuq l-Internet biex tilħaq kemm l-udjenza nazzjonali kif ukoll internazzjonali fuq is-sit web uffiċjali visitnorway.com. (32).

(32)

Filwaqt li qieset dan l-objettiv, l-IN bdiet proġett imsejjaħ “l-istruttura l-ġdida ta' visitnorway” (l-“istruttura l-ġdida”). (33) L-istruttura l-ġdida offriet lill-RTBs u d-DMOs mhux biss il-kummerċjalizzazzjoni u l-promozzjoni tas-servizzi (kif sar permezz tal-ftehimiet standard, ara l-premessa 28, iżda anki servizzi oħra.

(33)

L-IN għamlet numru ta' bidliet meħtieġa fil-karatteristiċi u l-funzjonijiet fuq il-pjattaforma visitnorway.com, sabiex tibqa' aġġornata mat-teknoloġija u tkun tista' topera l-pjattaforma b'mod effiċjenti matul iż-żmien. Fl-2013, l-IN bdiet toffri xi wħud mill-funzjonijiet tad-DMS (hawnhekk kollettivament definiti bħala “infrastruttura tal-web u servizzi relatati”) lill-RTBs u d-DMOs Norveġiżi, li xtaqu jaqilbu l-kontenut mis-siti web tagħhom stess għal fuq visitnorway.com. Din l-integrazzjoni tal-kontenut fuq il-pjattaforma visitnorway.com hija konformi mal-objettivi stipulati mill-awtoritajiet Norveġiżi fl-istrateġija l-ġdida tagħhom, fost l-oħrajn biex tiġi evitata diversifikazzjoni tas-siti web li jittrattaw it-turiżmu fin-Norveġja (ara l-premessa 29 ta' hawn fuq).

(34)

Konsegwentement, fl-2014, l-RTBs u d-DMOs kollha kienu offruti ftehimiet ta' sħubija primjum bil-possibbiltà li jużaw visitnorway.com bħala l-paġna ewlenija tagħhom minflok li jiżviluppaw jew iżommu l-paġna ewlenija tagħhom. Il-qlib għal visitnorway.com implika t-tmiem tas-siti web tagħhom. Dawn is-servizzi kienu offruti biss lill-RTBs u d-DMOs u mhux lis-suq ġenerali; jiġifieri mhux lill-utenti potenzjali kollha inklużi l-azzjonisti jew l-konsumaturi esterni tal-RTBs u d-DMOs. (34)

(35)

Ladarba jinqalbu, uħud mis-servizzi li l-RTBs u d-DMOs xtraw qabel minn kumpaniji bħall-Ilmentatur, spiċċaw mingħajr skop. B'mod partikolari, il-funzjoni tat-tfittxija kienet tiġi bla skop għall-RTBs u d-DMOs, u l-kuntratti tal-liċenzja ma' kumpaniji bħal New Mind | tellUs kienu normalment jintemmu. Kuntrarjament, funzjonijiet oħrajn bħall-funzjoni ta' destinatur — xorta waħda kienu meħtieġa biex jinħolqu u jinżammu l-punti ta' interess jew informazzjoni istantanja biex jiġu ppubblikati fuq visitnorway.com.

(36)

Minkejja li ġew offruti ftehimiet ta' sħubija primjum lill-RTBs u d-DMOs kollha, mhux kollha kemm huma kienu/huma interessati fis-servizzi l-ġodda, peress li l-qlib għal visitnorway.com implika, fost l-oħrajn, l-aċċettazzjoni tal-kundizzjonijiet editorjali u tar-restrizzjonijiet imposti mill-IN. (35) Għalhekk, xi wħud mill-RTBs u d-DMOs iżommu ftehimiet standard li permezz tagħhom l-IN tipprovdilhom servizzi ta' promozzjoni u kummerċjalizzazzjoni (ara l-premessa 28 ta' hawn fuq).

(37)

Il-proġett tal-“istruttura l-ġdida” tat-turiżmu fi ħdan visitnorway.com (ara l-premessa 32 ta' hawn fuq) inkluda wkoll żewġ proġetti pilota- Alfa u Beta — fl-2013, qabel l-iffirmar tal-ftehimiet ta' sħubija primjum fl-2014 kif deskritt fil-premessa 34 ta' hawn fuq. Dan se jiġi deskritt iktar f'dan li ġej.

(38)

F'Marzu 2013, l-IN nediet proġett bl-isem “Pilot Alfa” flimkien ma' żewġ klijenti pilota — VisitSørlandet u VisitTrondheim. Pilot Alfa jirreferi għall-qlib tas-siti web ta' Visit Sørlandet AS (36) (RTB) u Visit Trondheim AS (37) (DMO) għall-pjattaforma visitnorway.com.

(39)

Iż-żewġ impriżi kienu magħżula bħala parteċipanti tal-proġett pilota u ffirmaw ftehim ta' sħubija primjum mal-IN sabiex jużaw visitnorway.com. Bħala konsegwenza ta' dawk il-ftehimiet, iż-żewġ kumpaniji biddlu l-URL tagħhom (38) għal visitnorway.com u ma baqgħux jużaw il-paġni ewlenin tagħhom. L-informazzjoni disponibbli fuq dawk il-paġni (jiġifieri informazzjoni ġenerali dwar it-turiżmu u kontenut speċifiku dwar it-turiżmu) ġiet ittrasferita għal visitnorway.com.

(40)

Meta ż-żewġ kumpaniji kienu joperaw is-siti web tagħhom, huma kienu klijenti tal-Ilmentatur. Għaldaqstant, huma użaw il-funzjonijiet destinatur ta' tellUs u tfittxija ta' tellUs u ħallsu miżata għal liċenzja lill-Ilmentatur għal dan l-użu. Madankollu, malli biddlu l-URL tagħhom għal visitnorway.com u għalqu s-siti web tagħhom, dawn il-kumpaniji temmew il-kuntratti tagħhom għall-funzjoni tat-tfittxija, peress li, għal raġunijiet tekniċi, il-funzjoni tat-tfittxija tal-IN biss tista' tintuża fuq visitnorway.com (l-unika magna tat-tiftix fuq is-sit web hija dik żviluppata mill-IN u installata fuq il-pjattaforma).

(41)

Iż-żewġ kumpaniji xorta waħda kellhom jagħmlu kuntratt mal-Ilmentatur jew ditta simili għall-funzjoni ta' destinatur. L-IN mhijiex tipprovdi din il-funzjoni. L-Ilmentatur kien ikun il-fornitur uniku tas-servizzi tad-DMS fis-suq Norveġiż. Madankollu, fl-2012-2013, kompetitur internazzjonali, Citybreak, daħal fis-suq joffri l-funzjoni ta' destinatur, jiġifieri jippermetti l-fornituri tat-turiżmu joħolqu bażi ta' dejta tal-punti ta' interess. (39)

(42)

L-RTBs u d-DMOs li qalbu għal visitnorway.com setgħu għalhekk jagħżlu fost il-kumpaniji differenti li joffru l-funzjoni ta' destinatur (New Mind | tellUs jew CityBreak jew kwalunkwe operatur ieħor li jista' jidħol fis-suq), filwaqt li l-konsumaturi li jużaw s-servizzi ta' tfittxija ta' tellUs jistgħu jużaw biss il-funzjonijiet ta' destinatur ta' tellUs. Meta New Mind | tellUs kien l-uniku fornitur tas-servizzi tal-web u tal-infrastruttura, l-RTBs u d-DMOs kollha kellhom jagħmlu kuntratt ma' New Mind | tellUs, kemm għall-funzjoni ta'tfittxija kif ukoll ta' destinatur.

(43)

L-użi tal-funzjonijiet differenti, qabel u wara Pilot Alfa, huma ppreżentati fil-grafika li ġejja:

Sors: l-Awtorità, abbażi ta' informazzjoni pprovduta mill-awtoritajiet Norveġiżi (Dokument Nru 688213).

(44)

Is-servizzi li l-IN kienet qiegħda tipprovdi lill-RTBs u d-DMOs qabel l-implimentazzjoni tal-proġett bl-istruttura l-ġdida (jiġifieri servizzi ta' kummerċ u promozzjoni online fuq is-sit web visitnorway.com), kienu offruti għal miżata kkalkulata abbażi tal-fatturat annwali tagħhom minflok fuq il-prezz tas-suq tas-servizzi miksuba (ara l-premessa 28 ta' hawn fuq). Din is-sistema tal-prezzijiet kienet applikata wkoll taħt Pilot Alfa, mingħajr spejjeż addizzjonali magħmula għas-servizzi addizzjonali pprovduti mill-IN (l-infrastruttura tal-web u servizzi relatati).

(45)

L-awtoritajiet Norveġiżi spjegaw (40) li r-raġuni għaliex ma żammewx iktar flus għas-servizzi addizzjonali kienet minħabba li s-servizzi l-ġodda kienu qegħdin jiżviluppaw, u li ż-żewġ kumpaniji involuti fil-proġett pilota investew ħafna ħin u sforzi biex jgħinu fl-iżvilupp tal-funzjonijiet il-ġodda tal-IN, u b'hekk jikkumpensaw l-IN billi jipprovdu kummenti siewja u kontribut fuq is-servizzi l-ġodda.

(46)

Minn Lulju 2013 sa Novembru 2013, l-IN ħadet l-impenn tal-“Pilot Beta”. Waqt dan il-proġett pilota, l-IN studjat il-mudelli ġodda tan-negozju inkluż il-possibbiltà li tippromwovi l-ftehimiet ġodda ta' sħubija primjum lill-RTBs u d-DMOs kollha.

(47)

Mill-1 ta' Jannar 2014, l-IN offriet ftehimiet ta' sħubija primjum lid-DMOs u l-RTBs interessati kollha fuq bażi mhux diskriminatorja. L-IN introduċiet mudell tal-ipprezzar ġdid għal dawn is-servizzi, li fih, skont l-awtoritajiet Norveġiżi, il-prezz mitlub kellu l-ħsieb li jirrifletti l-kostijiet tas-servizzi pprovduti mill-IN, flimkien ma' profitt raġonevoli. Il-mudell tal-ipprezzar il-ġdid applika wkoll għaż-żewġ proġetti pilota, jiġifieri VisitSørlandet u VisitTrondheim mill-1 ta' Jannar 2014.

(48)

Konsegwentement, kif indikat fil-figura 2 ta' hawn taħt, l-IN offriet żewġ possibilitajiet differenti lill-RTBs u d-DMOs (41): (i) servizzi taħt il-ftehimiet ta' sħubija primjum (42), u (ii) promozzjoni taħt ftehimiet mhux primjum. (43) Irrispettivament mir-relazzjoni tagħha mal-RTBs u d-DMOs, visitnorway.com tippromwovi n-Norveġja bħala destinazzjoni tat-turiżmu, billi tipprovdi informazzjoni ġenerali dwar il-pajjiż. (44)

(49)

Ftehimiet ta' sħubija primjum kienu ffirmati mill-RTBs u d-DMOs li riedu jaqilbu għal visitnorway.com. Fir-rigward ta' dawk l-RTBs u d-DMOs li ma ridux jaqilbu s-siti web tagħhom għal visitnorway.com (imsieħba mhux primjum), l-IN offriet l-istess servizzi ta' promozzjoni u kummerċjalizzazzjoni bħal qabel, permezz tal-ftehimiet standard.

Figura 2

L-istruttura attwali ta' visitnorway.com

CBIS Product database

Tellus Product database

VisitNorway product database

Full Ownership and full rights

Full Ownership and full rights

Standard Presentation OSLO

Standard Presentation Fjord Norge

RTB Fjord Norge

DMO Oslo

Right to edit

Right to edit

New Structure DMO Trondheim

New Structure RTB Sørlandet

NORWAY

POWERED BY NATURE

Generic Marketing

DMO Specific

Generic marketing about Norway, Sørlandet, Trondheim, Oslo and Fjord Norge

Sors: IN

(50)

New Mind | tellUs fl-ilment tagħha targumenta li l-attivitajiet ta' promozzjoni tal-IN u l-kompiti tagħha fir-rigward ta' visitnorway.com, bħala portal tat-turiżmu nazzjonali, jistgħu jiġu kkunsidrati bħala servizz ta' interess ekonomiku ġenerali (“SGEI”) f'konformità mar-regoli dwar l-għajnuna mill-Istat taż-ŻEE.

(51)

Madankollu, fl-2013, l-IN daħlet f'suq ġdid, (45) billi toffri servizzi ekonomiċi ġodda għall-RTBs u d-DMOs li tippermettilhom jaqilbu s-siti web tagħhom għal fuq visitnorway.com (jiġifieri l-infrastruttura tal-web u servizzi relatati). New Mind | tellUs tikkunsidra li, dawn is-servizzi mhumiex parti mill-mandat mogħti mill-IN u mhumiex ipprovduti mill-IN f'konformità mal-każistika ta' Altmark (46).

(52)

L-Ilmentatur jenfasizza li filwaqt li tipprovdi servizzi ekonomiċi, l-IN ma għandhiex tirċievi għajnuna mill-Istat. (47)

(53)

B'mod partikolari, l-ilment jirreferi għal erba' forom differenti ta' allegata għajnuna mill-Istat:

(54)

Finalment, New Mind | tellUs tallega wkoll li l-IN tinkoraġġixxi lill-klijenti tagħha sabiex iwaqqfu l-kuntratti preċedenti tagħhom ma' New Mind | tellUs, billi toffri servizzi tat-traduzzjoni b'xejn lill-RTBs u d-DMOs li jaqilbu għal visitnorway.com. (48)

(55)

Fis-16 ta' Lulju 2014, l-Awtorità ddeċidiet li tibda l-proċedura ta' investigazzjoni formali prevista fl-Artikolu 1(2) tal-Parti I tal-Protokoll 3.

(56)

Madankollu, l-Awtorità illimitat il-kamp ta' applikazzjoni tal-investigazzjoni formali għal tliet miżuri identifikati mill-Ilmentatur: (i) in-nuqqas ta' implimentazzjoni ta' separazzjoni ta' kontijiet għall-attivitajiet kummerċjali fi ħdan l-IN u n-nuqqas ta' mekkaniżmu għall-allokazzjoni tal-kostijiet, (ii) il-profitti mitlufa minħabba l-orjentazzjoni mingħajr profitt tal-attività ekonomika, u (iii) l-allegata għajnuna mogħtija mill-IN lill-RTBs u d-DMOs fil-forma ta' prezzijiet mhux suffiċjenti biex jinkiseb dħul raġonevoli fuq l-investiment, filwaqt li jiġu pprovduti bl-infrastruttura tal-web u servizzi relatati.

(57)

L-eżenzjoni ġenerali mit-taxxa fuq l-introjtu mogħtija lill-IN kienet eskluża mid-deċiżjoni tal-ftuħ. (49) Proċedura eżistenti ta' għajnuna nbdiet b'rabta ma' din il-kwistjoni.

(58)

Rigward il-miżuri li jaqgħu taħt il-kamp ta' applikazzjoni tad-deċiżjoni tal-ftuħ, l-Awtorità kkunsidrat, fuq bażi preliminari, li l-provvista tal-infrastruttura tal-web u servizzi relatati kienet tikkostitwixxi attività ekonomika, li tista' tiġi separata mis-sempliċi promozzjoni tan-Norveġja bħala destinazzjoni tat-turiżmu. Dawn is-servizzi ġodda ġew offruti mill-RTBs u d-DMOs biss mill-1 ta' Jannar 2014. Għaldaqstant, l-Awtorità kkonkludiet li jekk il-miżuri jikkostitwixxu għajnuna mill-Istat, kienu jitqiesu bħala għajnuna ġdida. (50)

(59)

Barra minn hekk, l-Awtorità kienet ukoll tal-fehma li jekk jiġi stabbilit li l-IN ma kinitx qiegħda toffri prezz tas-suq kompetittiv għas-servizzi pprovduti lill-RTBs u d-DMOs, l-eżistenza ta' għajnuna ġdida mill-Istat favur dawn l-entitajiet ma setgħetx tiġi eskluża.

(60)

Finalment, l-Awtorità kellha dubju kemm l-allegati miżuri ta' għajnuna mill-Istat setgħu jitqiesu kompatibbli mal-ftehim taż-ŻEE skont l-Artikolu 61(3)(c) bħala għajnuna biex jiġu promossi l-attivitajiet tat-turiżmu. (51)

(61)

Filwaqt li jitqiesu dawn il-konklużjonijiet preliminari, l-Awtorità kkunsidrat li ma kellhiex informazzjoni suffiċjenti biex teskludi l-eżistenza tal-għajnuna mill-Istat jew l-inkompatibbiltà tagħha mal-Ftehim taż-ŻEE. Għalhekk inbdiet il-proċedura ta' investigazzjoni formali.

(62)

Hija biss New Mind | tellUs, l-Ilmentatur, li ssottomettiet osservazzjonijiet dwar id-deċiżjoni tal-ftuħ.

(63)

Fuq il-mertu, l-Ilmentatur jenfasizza li l-IN daħlet f'suq li diġà jaħdem sew għall-infrastruttura tal-web u servizzi relatati, li huma servizzi ekonomiċi. Id-dħul f'dan is-suq ma jistax jitqies bħala struzzjoni mill-Istat u jkun ta' kunflitt mal-għan ewlieni tal-IN, li tippromwovi l-intraprenditorija privata.

(64)

New Mind | tellUs qablet mal-konklużjonijiet preliminari tal-Awtorità dwar il-preżenza tar-riżorsi tal-Istat, l-imputabbiltà, is-selettività u d-distorsjoni potenzjali tal-kompetizzjoni.

(65)

Fuq l-eżistenza ta' vantaġġ, l-Ilmentatur iqis li l-IN kontrosussidjat l-infrastruttura tal-web tagħhom u servizzi relatati. Dan huwa minħabba li fi ħdan l-IN ma hemmx separazzjoni xierqa tal-kontijiet, u peress li l-IN ma tagħmilx profitti meta tipprovdi dawn is-servizzi ekonomiċi lill-RTBs u d-DMOs. L-Ilmentatur insista wkoll li l-IN toffri servizzi ta' traduzzjoni mingħajr ħlas (ara l-premessa 54 ta' hawn fuq).

(66)

Rigward l-allegata għajnuna favur l-RTBs u d-DMOs, l-Ilmentatur jargumenta li l-awtoritajiet Norveġiżi ma infurmawhomx dwar id-deċiżjoni tal-ftuħ.