(1)

F'April 2011, wara investigazzjoni antisussidji (l-“investigazzjoni oriġinali”), il-Kunsill, permezz tar-Regolament ta' Implimentazzjoni (UE) Nru 405/2011 (2) (ir-“Regolament definittiv”), impona dazju kompensatorju definittiv fuq l-importazzjonijiet ta' ċerti staneg u vireg tal-azzar li ma jsaddadx (“SSB”) li bħalissa jaqgħu taħt il-kodiċi NM 7222 20 21, 7222 20 29, 7222 20 31, 7222 20 39, 7222 20 81 u 7222 20 89 u li joriġinaw mill-Indja.

(2)

Ir-Regolament definittiv impona dazju kompensatorju ta' rati li jvarjaw bejn it-3,3 % u l-4,3 % fuq importazzjonijiet mill-produtturi esportaturi fil-kampjun, 4,0 % fuq il-kumpaniji li kkooperaw li ma kinux inklużi fil-kampjun u rata ta' dazju ta' 4,3 % fuq il-kumpaniji l-oħra kollha fl-Indja.

(3)

F'Lulju 2013, wara rieżami ta' nofs it-terminu parzjali (“ir-rieżami ta' nofs it-terminu”), il-Kunsill, permezz tar-Regolament ta' Implimentazzjoni (UE) Nru 721/2013 (3) (“ír-Regolament emendatorju”), biddel ir-rata ta' dazju applikabbli għall-produttur esportatur Indjan Viraj Profiles Limited, Palghar, Maharashtra and Mumbai, Maharashtra (“Viraj”) minn 4,3 % għal 0 % u rreveda r-rata ta' dazju għall-kumpaniji l-oħra kollha minn 4,3 % għal 4,0 %.

(4)

F'Ġunju 2015, il-Kummissjoni ppubblikat avviż ta' skadenza imminenti tal-miżuri kompensatorji fuq l-SSB li joriġinaw mill-Indja f'Il-Ġurnal Uffiċjali tal-Unjoni Ewropea (4).

(5)

Fit-28 ta' Jannar 2016, il-European Steel Association (“Eurofer”), li tirrapreżenta iktar minn 25 % tal-produzzjoni kollha tal-SSB fl-Unjoni Ewropea (“l-Unjoni]”), ippreżentat talba għal rieżami skont l-Artikolu 18 tar-Regolament tal-Kunsill (KE) Nru 597/2009 (5).

(6)

Eurofer ibbażat it-talba tagħha fuq ir-raġunament li l-iskadenza tal-miżuri x'aktarx twassal għal kontinwazzjoni tas-sussidjar u għall-kontinwazzjoni jew ir-rikorrenza ta' ħsara għall-industrija tal-Unjoni.

(7)

Wara li stabbilixxiet li kien hemm biżżejjed provi għall-bidu ta' rieżami ta'skadenza, fis-27 ta' April 2016, il-Kummissjoni ppubblikat Notifika ta' Bidu f'Il-Ġurnal Uffiċjali tal-Unjoni Ewropea (6) (in-“Notifika ta' Bidu”).

(8)

Fin-Notifika ta' Bidu, il-Kummissjoni stiednet lill-partijiet kollha interessati biex jikkuntattjawha sabiex jipparteċipaw fl-investigazzjoni.

(9)

Barra minn hekk, il-Kummissjoni speċifikament informat lill-Eurofer; il-produtturi tal-Unjoni magħrufa u l-assoċjazzjonijiet tagħhom; l-importaturi magħrufa u utenti tal-SSB fl-Unjoni; kif ukoll il-Gvern tal-Indja (il-“GTI”) u l-produtturi esportaturi magħrufa fl-Indja dwar il-bidu tar-rieżami ta'skadenza u stednithom jipparteċipaw.

(10)

Il-partijiet interessati kollha kellhom l-opportunità li jikkummentaw dwar il-bidu tal-investigazzjoni u li jitolbu smigħ mal-Kummissjoni u/jew mal-Uffiċjal tas-Seduta fil-proċedimenti tal-kummerċ.

(11)

Fin-Notifika ta' Bidu, il-Kummissjoni ddikjarat li hija tista' tieħu kampjuni mill-partijiet interessati, skont l-Artikolu 27 tar-Regolament bażiku.

(12)

Fin-Notifika ta' Bidu, il-Kummissjoni ddikjarat li kienet għażlet b'mod provviżorju kampjun ta' produtturi tal-Unjoni.

(13)

F'konformità mal-Artikolu 27(1) tar-Regolament bażiku, il-Kummissjoni għażlet il-kampjun fuq il-bażi tal-akbar volum rappreżentattiv ta' bejgħ li seta' jkun investigat fiż-żmien disponibbli, filwaqt li żgurat firxa ġeografika.

(14)

Il-kampjun provviżorju magħżul kien fih tliet produtturi tal-Unjoni li jkopru madwar 50 % tal-bejgħ totali tal-produtturi tal-Unjoni li kkooperaw. Il-Kummissjoni stiednet lill-partijiet interessati biex jikkumentaw dwar il-kampjun provviżorju.

(15)

Il-Kummissjoni kienet innotifikata li wieħed mill-produtturi tal-Unjoni kien irrapporta bejgħ bejn il-membri tal-grupp bħala bejgħ lill-Unjoni u għalhekk issostitwietu bi produttur tal-Unjoni ieħor. Il-kampjun finali kien ikopri wkoll 50 % tal-bejgħ totali tal-produtturi tal-Unjoni li kkooperaw.

(16)

Fin-Notifika ta' Bidu, il-Kummissjoni stiednet lill-importaturi u lill-assoċjazzjonijiet rappreżentattivi tagħhom sabiex jippreżentaw ruħhom u sabiex jagħtu informazzjoni speċifika neċessarja sabiex jiġi deċiż jekk it-teħid tal-kampjuni kienx meħtieġ u, jekk iva, biex tagħżel kampjun. Ippreżentaw ruħhom żewġ importaturi.

(17)

Biex tiddeċiedi jekk it-teħid tal-kampjuni kienx meħtieġ u, jekk iva, biex tagħżel kampjun, il-Kummissjoni talbet lill-produtturi esportaturi kollha fl-Indja biex jipprovdu l-informazzjoni speċifikata fin-Notifika ta' Bidu. Barra minn hekk, il-Kummissjoni talbet lill-awtoritajiet tal-Indja sabiex jidentifikaw u/jew jikkuntattjaw produtturi esportaturi oħrajn, jekk ikun hemm, li jistgħu jkunu interessati jieħdu sehem fl-investigazzjoni.

(18)

Erbatax-il produttur esportatur jew gruppi ta' produtturi esportaturi, li jirrapreżentaw madwar 46 % tal-importazzjonijiet totali fl-Unjoni ta' SSB mill-Indja, taw l-informazzjoni mitluba fl-Anness I tan-Notifika ta' Bidu għall-finijiet tat-teħid tal-kampjun. Il-Kummissjoni ħadet kampjun ta' tliet produtturi esportaturi jew gruppi ta' produtturi esportaturi bl-ogħla volum ta' bejgħ ta' esportazzjoni lejn l-Unjoni (li jirrappreżenta 62 % tal-volum tal-esportazzjonijiet mill-kumpaniji li kkooperaw) li setgħu jiġu raġonevolment investigati fiż-żmien disponibbli.

(19)

Skont l-Artikolu 27(2) tar-Regolament bażiku, il-produtturi esportaturi kollha magħrufa kkonċernati, u l-awtoritajiet tal-Indja, ġew ikkonsultati dwar l-għażla tal-kampjun. Ma sar l-ebda kumment.

(20)

Fin-Notifika ta' Bidu, il-Kummissjoni stiednet lill-utenti u lill-assoċjazzjonijiet rappreżentattivi tagħhom, u organizzazzjonijiet tal-konsumaturi sabiex jippreżentaw ruħhom u jikkooperaw. L-ebda utent fl-Unjoni jew l-assoċjazzjonijiet tagħhom ma ppreżenta ruħu.

(21)

Il-Kummissjoni bagħtet kwestjonarji lill-partijiet kollha magħrufa li huma kkonċernati u lill-kumpaniji l-oħrajn kollha li ppreżentaw ruħhom sal-iskadenzi kif stabbilit fin-Notifika ta' Bidu.

(22)

Dan kien jinkludi l-GTI, tliet esportaturi produtturi fil-kampjun fl-Indja, tliet produtturi tal-Unjoni fil-kampjun, żewġ importaturi msemmija fil-premessa (16) hawn fuq, il-Eurofer, u assoċjazzjoni oħra ta' produtturi tal-Unjoni.

(23)

Ir-risposti għall-kwestjonarji waslu mingħand tliet produtturi tal-Unjoni fil-kampjun, il-Eurofer, il-GTI, u tliet produtturi esportaturi fl-Indja fil-kampjun.

(24)

Il-Kummissjoni fittxet u vverifikat l-informazzjoni kollha li kkunsidrat neċessarja għad-determinazzjoni tal-probabbiltà ta' kontinwazzjoni jew ta' rikorrenza ta' sussidjar; u ta' kontinwazzjoni jew ta' rikorrenza ta' ħsara; u jekk iż-żamma tal-miżuri kompensatorji tmurx kontra l-interess tal-Unjoni.

(25)

Iż-żjarat ta' verifika skont l-Artikolu 26 tar-Regolament bażiku saru fil-bini tal-GTI f'Delhi, l-Indja u fil-bini tal-Eurofer fi Brussell, il-Belġju, u l-kumpaniji li ġejjin:

(26)

L-investigazzjoni tal-probabbiltà ta' kontinwazzjoni jew ta' rikorrenza ta' ssusidjar u ħsara kopriet il-perjodu mill-1 ta' April 2015 sal-31 ta' Marzu 2016 (il-“PIR”).

(27)

L-istħarriġ ta' tendenzi rilevanti għall-valutazzjoni tal-probabbiltà ta' kontinwazzjoni jew ta' rikorrenza ta' ħsara kopra l-perjodu mill-1 ta' Jannar 2012 sa tmiem il-perjodu tal-investigazzjoni tar-rieżami (“il-perjodu kkunsidrat”).

(28)

Il-prodott ikkonċernat huwa l-istess prodott bħal dak definit fl-investigazzjoni oriġinali, jiġifieri vireg u staneg ta' azzar li ma jsaddadx, mhux maħduma aktar wara li jiġu ffurmati fil-kesħa jew irfinuti fil-kesħa, minbarra staneg u vireg ta' sezzjoni trasversali ċirkolari b'dijametru ta' 80 mm jew aktar (l-“SSB” jew il-“prodott taħt rieżami”), li bħalissa jaqgħu taħt il-kodiċi NM 7222 20 21, 7222 20 29, 7222 20 31, 7222 20 39, 7222 20 81 u 7222 20 89 u joriġinaw mill-Indja (il-“prodott ikkonċernat”).

(29)

L-investigazzjoni uriet li l-prodotti li ġejjin għandhom l-istess karatteristiċi fiżiċi u tekniċi bażiċi kif ukoll l-istess użi bażiċi:

(30)

Il-Kummissjoni kkonkludiet li dawn il-prodotti huma prodotti simili skont l-Artikolu 2(c) tar-Regolament bażiku.

(31)

Skont l-Artikolu 18(1) tar-Regolament bażiku, il-Kummissjoni eżaminat jekk l-iskadenza tal-miżuri eżistenti tistax x'aktarx twassal għal kontinwazzjoni tas-sussidjar.

(32)

Fuq il-bażi tal-informazzjoni inkluża fit-talba għal rieżami u fit-tweġibiet għall-kwestjonarju tal-Kummissjoni, ġew investigati l-iskemi li ġejjin, li allegatament kienu jinvolvu l-għoti ta' sussidji:

(33)

L-iskemi elenkati fil-punti (a), (c), (d), (g) u (i) hawn fuq huma bbażati fuq il-Foreign Trade (Development and Regulation) Act 1992 (Nru 22 tal-1992) li daħal fis-seħħ fis-7 ta' Awwissu 1992 (“Att dwar il-Kummerċ Barrani”). L-Att dwar il-Kummerċ Barrani jawtorizza lill-GTI biex joħroġ notifiki dwar il-politika tal-esportazzjoni u l-importazzjoni. Dawn huma mogħtija fil-qosor fid-dokumenti msejħa “Foreign Trade Policy”, li jinħarġu mill-Ministeru tal-Kummerċ kull ħames (5) snin u jiġu aġġornati regolarment. Żewġ dokumenti tal-Foreign Trade Policy huma rilevanti għall-perjodu tal-investigazzjoni tar-rieżami ta' din l-investigazzjoni: Foreign Trade Policy 2009-2014 (“FTP 09-14”) u Foreign Trade Policy 2015-2020 (“FTP 15-20”). Dan tal-aħħar daħal fis-seħħ f'April 2015. Il-GTI jistabbilixxi wkoll il-proċeduri li jirregolaw l-FTP 09-14 u l-FTP 15-20 fil-“Handbook of Procedures, Volume I, 2009-2014” (“HOP I 04-09”) u l-“Handbook of Procedures, Volume I, 2015-2020” (“HOP I 15-20”) rispettivament. Il-Manwali ta' Proċeduri (“Handbooks of Procedures”) huma aġġornati fuq bażi regolari.

(34)

Id-DDS speċifikata taħt il-punt (b) hawn fuq hija bbażata fuq it-Taqsima 75 tal-Att dwar id-Dwana tal-1962, it-Taqsima 37 tal-Att tas-Sisa Ċentrali tal-1944, fuq it-Taqsimiet 93 A u 94 tal-Att Finanzjarju tal-1994 u fuq id-Dwana, Dazji tas-Sisa Ċentrali u Regoli ta' Rifużjoni ta' Taxxa tas-Servizz tal-1995. Ir-rati ta' rifużjoni huma ppubblikati fuq bażi regolari.

(35)

L-Eżenzjoni tal-Kreditu għall-Esportazzjoni minn Taxxi fuq l-Imgħax taħt il-punt (e) hawn fuq hija bbażata fuq l-Att tat-Taxxa fuq l-Imgħax, 1974.

(36)

L-ECS fil-punt (f) hawn fuq hija bbażata fuq it-Taqsimiet 21 u 35 A tal-Att dwar ir-Regolamentazzjoni Bankarja tal-1949, li jippermetti lir-Reserve Bank of India (“RBI”) jidderieġi l-banek kummerċjali fil-qasam tal-kreditu għall-esportazzjoni.

(37)

Il-Garanziji ta' Self u t-trasferimenti ta' fondi diretti mill-GTI msemmija fil-punt (h) hawn fuq huma rregolati mill-Politika tal-Gvern dwar il-Garanziji.

(38)

Il-PSI fil-punt (j), applikabbli mill-1 ta' April 2013, huwa bbażat fuq Riżoluzzjoni Nru: PSI–2013/(CR–54)/IND–8, maħruġ mill-Government of Maharashtra Industries, Energy and Labour Department.

(39)

L-Iskemi ta' Sussidju Reġjonali msemmija fil-punt (k) huma rregolati mill-gvernijiet reġjonali.

(40)

Id-deskrizzjoni ddettaljata tal-iskema tinsab fil-paragrafi minn 4.1.1 sa 4.1.14 tal-FTP 09-14 u l-Kapitoli minn 4.1 sa 4.30 tal-HOP I 09-14, kif ukoll fil-paragrafi minn 4.03 sa 4.24 tal-FTP 15-20 u l-Kapitoli minn 4.04 sa 4.52 tal-HOP I 15-20.

(41)

L-AAS tikkonsisti f'sitt sottoskemi, kif deskritt f'iktar dettall fil-premessa (42) iktar 'l isfel. Dawn is-sottoskemi huma differenti, inter alia, fl-ambitu tal-eliġibbiltà. Il-manifatturi-esportaturi u n-negozjanti-esportaturi “marbuta” ma' manifatturi ta' sostenn huma eliġibbli għall-esportazzjonijiet fiżiċi AAS u għall-AAS għal sottoskemi ta' rekwiżit annwali. Il-manifatturi-esportaturi li jfornu lill-esportatur finali huma eliġibbli għall-AAS għall-provvisti intermedji. Kuntratturi ewlenin li jfornu lill-kategoriji ta' “esportazzjoni preżunta” msemmija fil-paragrafu 7.02 tal-FTP 15-20, bħal fornituri ta' unità orjentata lejn l-esportazzjoni (export oriented unit, “EOU”), huma eliġibbli għas-sottoskema tal-esportazzjoni preżunta tal-AAS. Eventwalment, il-fornituri intermedji tal-manifatturi-esportaturi huma eliġibbli għall-benefiċċji ta' “esportazzjoni preżunti” skont is-sottoskemi tal-Ordni għar-Rilaxx bil-Quddiem (Advance Release Order) u l-ħruġ ta' ittra ta' kreditu interna immedjatament kif tagħlaq dik ta' qabel.

(42)

L-AAS tista' tinħareġ għal:

(43)

Il-Kummissjoni skopriet li l-produtturi esportaturi li kkooperaw li kienu qed jużaw l-iskema kisbu konċessjonijiet taħt l-ewwel sottoskema, jiġifieri l-esportazzjonijiet fiżiċi tal-AAS matul il-perjodu tal-investigazzjoni tar-rieżami. Għalhekk, mhuwiex neċessarju li jkun stabbilit l-ammont ta' kumpens tas-sottoskemi mhux użati li jifdal.

(44)

Għal skopijiet ta' verifika mill-awtoritajiet Indjani, detentur ta' Awtorizzazzjoni bil-Quddiem huwa legalment obbligat li jżomm “rendikont veru u proprju tal-konsum u l-utilizzazzjoni ta' prodotti bla dazju importati/akkwistati domestikament” f'format speċifikat (il-Kapitoli 4.47, 4.51 u l-Appendiċi 4H HOP I 15-20), jiġifieri reġistru ta' konsum attwali. Dan ir-reġistru jrid jiġi vverifikat minn kontabilist awtorizzat estern/kontabilist estern tal-ispejjeż u x-xogħlijiet li jiċċertifika li r-reġistri preskritti u r-rekords rilevanti ġew eżaminati u li l-informazzjoni fornuta skont l-Appendiċi 4H hija vera u korretta f'kull aspett.

(45)

Fir-rigward tas-sottoskema użata matul il-perjodu tal-investigazzjoni tar-rieżami mill-kumpaniji kkonċernati, jiġifieri l-esportazzjonijiet fiżiċi, il-konċessjoni ta' importazzjoni u l-obbligu ta' esportazzjoni, dawn huma ffissati fil-volum u fil-valur mill-GTI u jiġu ddokumentati fuq l-Awtorizzazzjoni. Barra minn hekk, fil-ħin tal-importazzjoni u tal-esportazzjoni, it-tranżazzjonijiet korrispondenti għandhom ikunu dokumentati minn uffiċjali tal-Gvern fuq l-Awtorizzazzjoni. Il-volum tal-importazzjonijiet permessi skont l-AAS huwa ddeterminat mill-GTI fuq il-bażi ta' Regoli Standard ta' Input-Output (“SIONs”) li jeżistu għall-biċċa l-kbira tal-prodotti, inkluż il-prodott ikkonċernat.

(46)

Il-materjali importati biex jintużaw għall-manifattura mhumiex trasferibbli u jridu jintużaw biex ikun maħdum il-prodott esportat li jirriżulta. L-obbligu ta' esportazzjoni jrid ikun issodisfat fil-limitu ta' żmien stipulat wara l-ħruġ tal-liċenzja (18-il xahar b'żewġ estensjonijiet possibbli ta' sitt (6) xhur kull waħda).

(47)

Il-Kummissjoni stess stabbilixxiet li ma hemm l-ebda konnessjoni mill-qrib bejn il-materjal meħtieġ għall-manifattura importat u l-prodotti lesti esportati. Il-materjal meħtieġ għall-manifattura eliġibbli huwa wkoll importat u użat għal prodotti oħra minbarra l-prodott ikkonċernat. Barra minn hekk, il-liċenzji għal diversi prodotti jistgħu jinġabru flimkien. Dan ifisser li l-esportazzjonijiet koperti mil-liċenzja AAS ta' prodott wieħed tista' tagħti dritt għal importazzjonijiet mingħajr dazju ta' materjal meħtieġ għall-manifattura koperti minn liċenzja AAS għal prodott ieħor.

(48)

Matul iż-żjara ta' verifika mwettqa mill-Kummissjoni, wieħed mill-produtturi esportaturi kkonferma li minħabba dan in-nuqqas ta' rabta ċara, il-konsum tal-materjal meħtieġ għall-manifattura qed jiġi rrappurtat fuq il-bażi ta' SIONs. Il-produttur esportatur l-ieħor li kien qed juża l-iskema ddikjara li għandu sistema ta' ttraċċar li permezz tagħha materjal meħtieġ għall-manifattura importat taħt l-iskema huwa ttraċċat sal-prodott finali. Madankollu, il-kumpanija ma kinitx f'pożizzjoni li tagħti deskrizzjoni ta' din is-sistema fid-dokumenti interni tagħha. Din is-sistema qatt ma ġiet ivverifikata.

(49)

Wieħed mill-esportaturi produtturi ma setax jippreżenta appendiċi 4H għal-liċenzji AAS tagħhom. Il-produttur esportatur l-ieħor ippreżenta appendiċi 4H wieħed li ma kien juri l-ebda remissjoni eċċessiva. Madankollu, mill-kliem tad-dikjarazzjoni tal-kontabilist awtorizzat f'appendiċi 4H u kkonfermat mill-GTI matul iż-żjara ta' verifika jirriżulta li l-eżami mill-kontabilist awtorizzat huwa limitat għal jekk iċ-ċifri fl-Appendiċi 4H rilevanti jaqblux mar-rekords tal-kumpanija. Barra minn hekk, produttur esportatur partikolari kkonferma li l-kontabilist awtorizzat jiffoka fuq jekk l-obbligu ta' esportazzjoni jaqbilx mal-awtorizzazzjoni ta' importazzjoni skont is-SION taħt il-liċenzji rilevanti. Ma jistaqsix u lanqas jeżamina jekk il-konsum reali jikkorrispondix mas-SION rilevanti. Konsegwentement, il-kontabilist awtorizzat ma jivverifikax jekk ir-rekords infushom jurux stampa reali u vera tal-konsum u użu tal-merkanzija importata mingħajr dazju/mixtrija lokalment. Għandu jiġi nnotat li matul u wara ż-żjara ta' verifika l-GTI ma kienx f'pożizzjoni li jagħti lill-Kummissjoni kopja waħda tal-appendiċi 4H sottomessi lilu mill-produtturi esportaturi fil-kampjun. Fil-qosor, il-Kummissjoni kkonkludiet li ż-żewġ kumpaniji li kienu qed jużaw l-iskema ma kinux f'pożizzjoni li juru li d-dispożizzjonijiet rilevanti tal-FTP ġew issodisfati.

(50)

L-eżenzjoni mid-dazji ta' importazzjoni hija sussidju fit-tifsira tal-Artikolu 3(1)(a)(ii) u l-Artikolu 3(2) tar-Regolament bażiku, jiġifieri tikkostitwixxi kontribut finanzjarju tal-Gvern tal-Indja billi tnaqqas id-dħul mid-dazju li kieku kien ikun dovut u tagħti benefiċċju lill-esportatur investigat peress li ttejjeb il-likwidità tiegħu.

(51)

Barra minn hekk, l-esportazzjonijiet fiżiċi tal-AAS jiddependu fil-liġi fuq il-prestazzjoni tal-esportazzjoni, u għalhekk preżunti bħala speċifiċi u kumpensabbli skont l-Artikolu 4(4), l-ewwel subparagrafu, il-punt (a) tar-Regolament bażiku. Mingħajr impenn li tesporta, kumpanija ma tistax tikseb benefiċċji minn din l-iskema.

(52)

Is-sottoskema użata fil-każ preżenti ma tistax titqies bħala sistema permissibbli ta' rifużjoni ta' dazju jew sistema ta' rifużjoni ta' dazju fil-kuntest tal-Artikolu 3(1)(a)(ii) tar-Regolament bażiku. Din ma hijiex konformi mar-regoli stabbiliti fl-Anness I, entrata (i), l-Anness II (definizzjoni u regoli għar-rifużjoni) u l-Anness III (definizzjoni u regoli għal rifużjoni b'sostituzzjoni) tar-Regolament bażiku. Il-GTI ma applikax sistema jew proċedura ta' verifika b'mod effettiv biex jikkonferma jekk il-materjal meħtieġ għall-manifattura ġiex ikkonsmat fil-produzzjoni tal-prodott esportat u f'liema ammonti (l-Anness II(4) tar-Regolament bażiku u, fil-każ ta' skemi ta' rifużjoni b'sostituzzjoni, l-Anness (III)(II)(2) tar-Regolament bażiku). Huwa kkunsidra wkoll li l-SIONs għall-prodott ikkonċernat ma kinux preċiżi biżżejjed u li fihom infushom ma jistgħux jikkostitwixxu sistema ta' verifika ta' konsum attwali billi t-tfassil ta' dawk in-normi standard ma jippermettix li l-GTI jivverifika bi preċiżjoni suffiċjenti x'ammonti ta' materjal meħtieġ għall-manifattura ġie kkonsmat fil-produzzjoni tal-esportazzjoni. Barra minn hekk, il-GTI ma għamilx eżami ulterjuri bbażat fuq il-materjal meħtieġ għall-manifattura effettivament involut, għalkemm dan ikollu jsir fin-nuqqas ta' sistema ta' verifika applikata b'mod effettiv (l-Anness II(5) u l-Anness III(II)(3) għar-Regolament bażiku).

(53)

Is-sottoskema hija għalhekk kumpensabbli.

(54)

Fin-nuqqas ta' sistemi awtorizzati ta' rifużjoni tad-dazju jew sistemi ta' rifużjoni b'sostituzzjoni, il-benefiċċju kumpensatorju huwa r-remissjoni tad-dazji tal-importazzjoni totali normalment dovuti mal-importazzjoni tal-materjal meħtieġ għall-manifattura. F'dan ir-rigward, huwa osservat li r-Regolament bażiku ma jipprovdix biss għall-ammont kumpensatorju tar-remissjoni “eċċessiva” tad-dazji. Skont l-Artikolu 3(1)(a)(ii) u l-Anness I(i) tar-Regolament bażiku hija biss ir-remissjoni eċċessiva ta' dazji li tista' tiġi kkumpensata meta jkunu sodisfatti l-kundizzjonijiet tal-Annessi II u III tar-Regolament bażiku. Madanakollu, dawn il-kundizzjonijiet ma ġewx issodisfati fil-każ preżenti. Għalhekk, jekk ma jkunx muri proċess ta' sorveljanza adegwat, l-eċċezzjoni msemmija hawn fuq għal skemi ta' rifużjoni mhix applikabbli u tapplika r-regola normali tal-ammont kumpensatorju fuq l-ammont ta'dazji mhux imħallsa (dħul mifluf), pjuttost milli kwalunkwe remissjoni eċċessiva intenzjonata. Kif stabbilit fl-Annessi II(II) u III(II) tar-Regolament bażiku, mhijiex ir-responsabbiltà tal-awtorità tal-investigazzjoni li tikkalkula din ir-remissjoni eċċessiva. Għall-kuntrarju ta' dan, skont l-Artikolu 3(1)(a)(ii) tar-Regolament bażiku, l-awtorità tal-investigazzjoni għandha tistabbilixxi biss biżżejjed evidenza sabiex tiċħad l-adegwatezza tas-sistema ta' verifika allegata.

(55)

Kif spjegat fil-premessa (47) hawn fuq, l-intitolament għall-benefiċċju (jiġifieri l-esportazzjoni bil-liċenzja) u l-għoti tal-benefiċċju (jiġifieri importazzjoni ħielsa mid-dazju tal-materjal meħtieġ għall-manifattura) mhumiex marbutin mill-qrib ma' xulxin. Ma għandhomx għalfejn iseħħu f'xi ordni jew prossimità ta' żmien partikolari. Huwa għalhekk possibbli li filwaqt li l-intitolament iseħħ matul il-perjodu tal-investigazzjoni tar-rieżami, l-għoti relatat jista' jseħħ kemm qabel kif ukoll wara l-perjodu tal-investigazzjoni tar-rieżami. Barra minn hekk, permezz ta' ġbir flimkien, l-intitolament għall-benefiċċji skont liċenzja għal prodott wieħed jista' jiġi ttrasferit sabiex fl-aħħar mill-aħħar ikun ta' benefiċċju għal prodott ieħor.

(56)

Fir-Regolament definittiv l-ammont tas-sussidju mill-AAS kien ikkalkulat abbażi tad-dazji tal-importazzjonijiet mitlufa fuq il-materjal kollu importat għall-prodotti SSB taħt l-iskema matul il-perjodu tal-investigazzjoni oriġinali. Dan l-ammont ta' sussidju mbagħad ġie allokat fuq l-fatturat tal-esportazzjoni tal-prodott ikkonċernat matul il-perjodu ta' investigazzjoni oriġinali.

(57)

Iż-żewġ produtturi esportaturi li kienu jużaw l-AAS qablu mal-valutazzjoni tal-Kummissjoni kif stabbilita fil-premessa (55) hawn fuq u kkonfermaw li l-esportazzjonijiet matul il-perjodu tal-investigazzjoni tar-rieżami tal-prodott ikkonċernat kien jintitolahom għal benefiċċju, li parti minnu kienet ingħatat jew ser tingħata barra mill-perjodu tal-investigazzjoni tar-rieżami. Barra minn hekk, wieħed mill-produtturi esportaturi kkonferma li, minħabba l-mod ta' kif sar il-proċess tat-tidwib, ma jistax ikun eskluż li importazzjonijiet tal-materjal meħtieġ għall-manifattura taħt liċenzji AAS għal SSB spiċċa fi prodotti oħra u li importazzjonijiet ta' materjal meħtieġ għall-manifattura taħt liċenzji AAS għal prodotti oħra spiċċa f'SSB. Konsegwentement, il-produttur esportatur qabel li jekk tħares biss lejn id-dazju ċedut għall-importazzjonijiet taħt liċenzji AAS għal SSB matul il-perjodu tal-investigazzjoni tar-rieżami ma jirriflettix il-benefiċċju reali mogħti lill-esportazzjonijiet ta' SSB matul dak il-perjodu tal-iskema. Minħabba n-nuqqas ta' data adegwata, il-Kummissjoni ma kinitx f'pożizzjoni li tikkalkula l-ammont ta' sussidju fuq il-bażi ta' dazji ta' importazzjoni ċeduti fuq il-materjali kollha importati għal SSB fl-iskema matul il-perjodu tal-investigazzjoni tar-rieżami bħal fl-investigazzjoni oriġinali.

(58)

F'dawn iċ-ċirkustanzi, iż-żewġ kumpaniji qablu li jikkalkulaw l-ammont tas-sussidju fuq il-bażi tat-tranżazzjonijiet tal-esportazzjoni kollha kklerjati matul il-perjodu tal-investigazzjoni tar-rieżami skont il-liċenzji tal-AAS relatati mal-prodott ikkonċernat. Kull kumpanija pproponiet metodoloġija adegwata għas-sitwazzjoni partikolari tagħha (f'dan il-każ skont il-firxa ta' materja prima importata għall-produzzjoni tal-prodott ikkonċernat). Jew bl-użu tas-SION jew bil-valur miżjud medju taħt il-liċenzji kollha preċedenti miftuħa għall-prodott ikkonċernat, l-ammont ta' dazju mfaddal fuq importazzjonijiet tal-materjal meħtieġ għall-manifattura seta' jiġi kkalkulat b'mod affidabbli. Il-Kummissjoni kkunsidrat dawn il-metodoloġiji bħala adegwati u aċċettatahom.

(59)

Skont l-Artikolu 7(2) tar-Regolament bażiku dawn l-ammonti ta' sussidju ġew allokati fuq il-fatturat totali mill-esportazzjoni tal-prodott ikkonċernat matul il-perjodu tal-investigazzjoni tar-rieżami bħala d-denominatur adegwat, għax is-sussidju huwa subordinat għall-prestazzjoni tal-esportazzjoni u ma ngħatax b'referenza għall-kwantitajiet manifatturati, prodotti, esportati jew trasportati.

(60)

Għalhekk, il-Kummissjoni stabbiliet li rati ta' sussidju fir-rigward ta' din l-iskema matul il-perjodu tal-investigazzjoni tar-rieżami kienu jammontaw għal 0,88 % għal Chandan Steel Limited u 1,56 % għal Isinox Steel Limited.

(61)

Id-deskrizzjoni dettaljata tad-DDS tinsab fil-Custom & Central Excise Duties Drawback Rules 1995 kif emendata b'notifiki suċċessivi.

(62)

Kull manifattur-esportatur jew negozjant-esportatur huwa eliġibbli għal din l-iskema.

(63)

Esportatur eliġibbli jista' japplika għal ammont ta' rifużjoni li jiġi kkalkulat bħala perċentwal tal-valur frank abbord (free-on-board, “FOB”) tal-prodotti esportati taħt din l-iskema. Ir-rati ta' rifużjoni kienu stabbiliti mill-GTI għal numru ta' prodotti, inkluż il-prodott ikkonċernat. Huma jiġu ddeterminati fuq il-bażi tal-kwantità medja jew il-valur medju tal-materjal użat għall-manifattura ta' prodott u l-ammont medju tad-dazji mħallsa fuq il-materjal użat għall-manifattura. Dawn huma applikabbli irrispettivament minn jekk ikunux tħallsu d-dazji tal-importazzjoni jew le. Matul il-perjodu tal-investigazzjoni tar-rieżami, ir-rata DDS kienet 1,9 % sat-22 ta' Novembru 2015, imbagħad 2 % b'limitu massimu ta' 3,2 INR/kg sal-10 ta' Frar 2016, u mbagħad 2 % b'limitu massimu ta' 4,3 INR/kg wara din id-data.

(64)

Biex tibbenefika minn din l-iskema, kumpanija trid tesporta. Fil-mument meta d-dettalji tal-konsenja jiddaħħlu fis-server Doganali (ICEGATE), huwa indikat li l-esportazzjoni qed issir taħt id-DDS u l-ammont DDS huwa ffissat irrevokabbilment. Wara li l-kumpanija tal-konsenja tkun ippreżentat il-Manifest Ġenerali tal-Esportazzjoni (Export General Manifest, EGM) u l-Uffiċċju Doganali jkun qabbel b'mod sodisfaċenti dak id-dokument mad-data fil-polza tat-tagħbija, ikunu ġew issodisfati l-kundizzjonijiet kollha sabiex jiġi awtorizzat il-ħlas tal-ammont ta' rifużjoni jew permezz ta' ħlas dirett fil-kont bankarju tal-esportatur jew permezz ta' mandat.

(65)

L-esportatur għandu jipproduċi wkoll evidenza ta' realizzazzjoni tar-rikavat mill-esportazzjoni permezz ta' dokumentazzjoni bankarja li tikkonferma l-ħlas mill-esportazzjoni (Bank Realisation Certificate, BRC). Dan id-dokument jista' jiġi pprovdut wara li jkun tħallas l-ammont ta' rifużjoni iżda l-GTI jirkupra l-ammont imħallas jekk l-esportatur jonqos milli jippreżenta l-BRC fi żmien raġonevoli.

(66)

L-ammont ta' rifużjoni jista' jintuża għal kwalunkwe għan.

(67)

Skont l-istandards Indjani tal-kontabilità, l-ammont ta' rifużjoni tad-dazji jista' jiddaħħal fil-kotba fuq bażi tad-dovuti bħala dħul fil-kontijiet kummerċjali, malli jitwettaq l-obbligu ta' esportazzjoni.

(68)

Il-Kummissjoni kkonkludiet li l-produtturi esportaturi kollha li kkooperaw komplew jibbenefikaw mid-DDS matul il-perjodu tal-investigazzjoni tar-rieżami.

(69)

Id-DDS tipprovdi sussidji fil-kuntest tal-Artikolu 3(1)(a)(i) u l-Artikolu 3(2) tar-Regolament bażiku. L-hekk imsejjaħ ammont ta' rifużjoni tad-dazju huwa kontribuzzjoni finanzjarja mill-GTI minħabba li jieħu l-forma ta' trasferiment dirett tal-fondi mill-GTI. Ma hemm l-ebda restrizzjoni fuq l-użu ta' dawn il-fondi. Barra minn hekk, l-ammont ta' rifużjoni tad-dazji jagħti benefiċċju lill-esportatur, peress li jtejjeb il-likwidità tiegħu.

(70)

Ir-rata ta' rifużjoni tad-dazju għall-esportazzjonijiet hija ddeterminata mill-GTI fuq bażi ta' prodott. Madankollu, għalkemm is-sussidju huwa msejjaħ rifużjoni tad-dazju, l-iskema ma għandhiex il-karatteristiċi ta' sistema ta' rifużjoni ta' dazju permissibbli jew sistema ta' rifużjoni b'sostituzzjoni fil-kuntest tat-tifsira tal-Artikolu 3(1)(a)(ii) tar-Regolament bażiku. Il-ħlas f'kontanti lill-esportatur mhuwiex marbut ma' ħlasijiet reali ta' dazji fuq l-importazzjoni fuq il-materja prima, u mhuwiex kreditu fuq id-dazju biex ipatti għad-dazji fuq importazzjoni ta' materja prima fil-passat jew fil-futur.

(71)

Matul iż-żjara ta' verifika, il-GTI ddikjara li kien hemm rabta adegwata bejn ir-rati ta' rifużjoni kif ukoll id-dazji mħallsa fuq il-materja prima. Dan minħabba li l-GTI jqis il-kwantità jew il-valur medji tal-materjal li jintuża għall-manifattura tal-prodott kif ukoll l-ammont medju ta' dazji mħallsa fuq il-materjal li jintuża għall-manifattura fid-determinazzjoni tar-rati ta' rifużjoni fuq id-dazji.

(72)

Madankollu, il-Kummissjoni ma tikkunsidrax li r-rabta allegata bejn ir-rati ta' rifużjoni u d-dazji mħallsa fuq il-materja prima hija biżżejjed sabiex l-iskema tkun tikkonforma mar-regoli stipulati fl-Anness I, l-Anness II (definizzjoni u regoli għar-rifużjoni) u l-Anness III (definizzjoni u regoli għas-sistema ta' rifużjoni b'sostituzzjoni) tar-Regolament bażiku. B'mod partikolari, l-ammont tal-kreditu mhuwiex ikkalkulat skont il-materjal meħtieġ użat għall-manifattura. Barra minn hekk, ma hemm l-ebda sistema jew proċedura fis-seħħ biex tikkonferma liema materjal meħtieġ għall-manifattura (inkluż l-ammont u l-oriġini tiegħu) jiġi kkonsmat fil-proċess tal-produzzjoni tal-prodott esportat jew jekk sarx ħlas żejjed ta' dazji tal-importazzjoni fis-sens tal-entrata (I) tal-Anness I u l-Annessi II u III tar-Regolament bażiku. Barra minn hekk, ma sar l-ebda studju ulterjuri mill-GTI fuq il-bażi tal-materjal meħtieġ għall-manifattura u t-tranżazzjonijiet li effettivament intużaw jew saru sabiex jiddetermina jekk kienx hemm ħlas eċċessiv. Għalhekk, it-talba ġiet miċħuda.

(73)

Konsegwentement, il-ħlas li jieħu l-forma ta' trasferiment dirett tal-fondi mill-GTI sussegwenti għal esportazzjonijiet li jsiru mill-esportaturi għandu jitqies bħala għotja diretta tal-GTI li tiddependi fuq il-prestazzjoni tal-esportazzjoni u għalhekk huwa kkunsidrat bħala speċifiku u kumpensatorju skont l-Artikolu 4(4), l-ewwel subparagrafu, il-punt (a) tar-Regolament bażiku.

(74)

Skont l-Artikoli 3(2) u 5 tar-Regolament bażiku, l-ammont ta' sussidji kumpensatorji kien ikkalkulat f'termini tal-benefiċċju li jingħata lil min jirċevih, li jinstab li jeżisti matul il-perjodu tal-investigazzjoni tar-rieżami. F'dan ir-rigward, ġie kkunsidrat li l-benefiċċju huwa mogħti lil min jirċevih fil-mument meta ssir tranżazzjoni ta' esportazzjoni f'din l-iskema. F'dan il-mument il-GTI jkun obbligat li jħallas l-ammont ta' rifużjoni, xi ħaġa li tikkostitwixxi kontribuzzjoni finanzjarja fis-sens tal-Artikolu 3(1)(a)(ii) tar-Regolament bażiku. Ladarba l-awtoritajiet doganali joħorġu polza tat-tagħbija tal-esportazzjoni li turi, fost ħwejjeġ oħra, l-ammont ta' rifużjoni li għandu jingħata għal dik it-tranżazzjoni ta' esportazzjoni, il-GTI ma jkollu l-ebda diskrezzjoni dwar jekk jagħtix is-sussidju jew le. Fid-dawl ta' dan ta' hawn fuq, u billi ma hemm l-ebda evidenza kredibbli li turi mod ieħor, huwa meqjus xieraq li l-benefiċċju skont id-DDS jiġi vvalutat bħala t-total tal-ammonti ta' rifużjoni miksuba fuq it-tranżazzjonijiet tal-esportazzjoni li jkunu saru taħt din l-iskema matul il-perjodu tal-investigazzjoni tar-rieżami.

(75)

Skont l-Artikolu 7(2) tar-Regolament bażiku dawn l-ammonti ta' sussidju ġew allokati fuq il-fatturat totali mill-esportazzjoni tal-prodott ikkonċernat matul il-perjodu tal-investigazzjoni tar-rieżami bħala d-denominatur adegwat, għax is-sussidju huwa suġġett għall-prestazzjoni tal-esportazzjoni u ma ngħatax b'referenza għall-kwantitajiet manifatturati, prodotti, esportati jew trasportati.

(76)

Għalhekk, il-Kummissjoni stabbiliet li r-rati ta' sussidju fir-rigward ta' din l-iskema matul il-perjodu tal-investigazzjoni tar-rieżami kienu jammontaw għal 1,02 % għal Chandan Steel Limited, għal 0,66 % għal Isinox Steel Limited u 1,82 % għall-Venus Group.

(77)

L-investigazzjoni żvelat li l-iskema twaqqfet u ma tat l-ebda benefiċċju lill-produtturi esportaturi fil-kampjun matul il-perjodu tal-investigazzjoni tar-rieżami, li uriet li ma kinitx meħtieġa evalwazzjoni ulterjuri tal-effett kumpensatorju tagħha għall-finijiet ta' din l-investigazzjoni.

(78)

L-investigazzjoni żvelat li l-ebda wieħed mill-produtturi esportaturi fil-kampjun ma kien ibbenefika minn din l-iskema matul il-perjodu tal-investigazzjoni tar-rieżami, li uriet li ma kinitx meħtieġa evalwazzjoni ulterjuri tal-effett kumpensatorju tagħha għall-finijiet ta' din l-investigazzjoni.

(79)

L-investigazzjoni żvelat li l-iskema twaqqfet u ma tat l-ebda benefiċċju lill-produtturi esportaturi fil-kampjun matul il-perjodu tal-investigazzjoni tar-rieżami, li uriet li ma kinitx meħtieġa evalwazzjoni ulterjuri tal-effett kumpensatorju tagħha għall-finijiet ta' din l-investigazzjoni.

(80)

L-investigazzjoni żvelat li l-produtturi esportaturi kollha fil-kampjun użaw din l-iskema matul il-perjodu tal-investigazzjoni tar-rieżami. Madankollu, peress li rriżulta li l-inċentivi li ħadu kienu negliġibbli, ma kinitx meħtieġa evalwazzjoni ulterjuri tal-effett kumpensatorju tagħha għall-finijiet ta' din l-investigazzjoni.

(81)

L-investigazzjoni żvelat li l-produtturi esportaturi kollha fil-kampjun użaw din l-iskema matul il-perjodu tal-investigazzjoni tar-rieżami. Madankollu, peress li rriżulta li l-inċentivi li ħadu kienu negliġibbli, ma kinitx meħtieġa evalwazzjoni ulterjuri tal-effett kumpensatorju tagħha għall-finijiet ta' din l-investigazzjoni.

(82)

L-investigazzjoni żvelat li l-ebda produttur esportatur fil-kampjun ma rċieva garanziji ta' self u trasferimenti ta' fondi diretti mill-GTI, li setgħu jagħtu benefiċċju matul il-perjodu tal-investigazzjoni tar-rieżami, u għalhekk ma kinitx meħtieġa evalwazzjoni ulterjuri tal-effett kumpensatorju tagħha għall-finijiet ta' din l-investigazzjoni.

(83)

Id-deskrizzjoni dettaljata tal-MEIS tinsab fil-Kapitolu 3 tal-FTP 15-20 u fil-Kapitolu 3 tal-HOP I 15-20.

(84)

L-MEIS hija l-iskema suċċessur ta' ħames (5) skemi oħra (il-Focus Market Scheme, il-Focus Product Scheme, il-Market Linked Focus Product Scheme, l-Agricultural Infrastructure Incentive Scrip u l-VKGUY).

(85)

Kull manifattur-esportatur jew negozjant-esportatur huwa eliġibbli għal din l-iskema.

(86)

Il-kumpaniji eliġibbli jistgħu jibbenefikaw mill-MEIS billi jesportaw prodotti speċifiċi lejn pajjiżi speċifiċi li huma kkategorizzati fil-Grupp A (“Swieq Tradizzjonali” inklużi l-Istati Membri kollha tal-UE), fil-Grupp B (“Swieq Emerġenti u Iffokati”) u l-Grupp C (“Swieq oħrajn”). Il-pajjiżi li jaqgħu taħt kull grupp u l-lista ta' prodotti b'rati ta' ppremjar korrispondenti kienu speċifikati fit-Tabella 1 u fit-Tabella 2 rispettivament tal-Appendiċi 3B tal-FTP 15-20. Lejn it-tmiem tal-perjodu tal-investigazzjoni tar-rieżami id-distinzjoni bejn diversi swieq ġiet abolita u l-iskema saret disponibbli għal kulħadd.

(87)

Il-benefiċċju jieħu l-forma ta' kreditu ta' dazju ekwivalenti għal perċentwal tal-valur FOB tal-esportazzjoni. Fil-każ tal-SSB, fil-bidu tal-perjodu tal-investigazzjoni tar-rieżami dan il-perċentwal instab li huwa 2 % għal esportazzjonijiet lejn il-pajjiżi tal-Grupp B u 0 % għal esportazzjonijiet lejn il-pajjiżi tal-Grupp A u Ċ. Kif imsemmi fil-premessa (86) hawn fuq, fi tmiem il-perjodu tal-investigazzjoni tar-rieżami, id-distinzjoni bejn il-gruppi ta' pajjiżi ġiet abolita u t-2 % ġiet applikabbli għall-pajjiżi kollha. Ċerti tipi ta' esportazzjonijiet huma esklużi mill-iskema, pereżempju, l-esportazzjonijiet ta' prodotti importati jew prodotti ttrasbordati, esportazzjonijiet preżunti, esportazzjonijiet ta' servizzi u l-fatturat tal-esportazzjoni ta' unitajiet li joperaw taħt żoni ekonomiċi speċjali/unitajiet li joperaw fl-esportazzjoni.

(88)

Il-krediti tad-dazju taħt l-MEIS huma trasferibbli liberament u huma validi għal perjodu ta' 18-il xahar mid-data tal-ħruġ. Jistgħu jintużaw għal: (i) ħlas tad-dazji doganali fuq l-importazzjonijiet ta' materjal meħtieġ għall-manifattura jew ta' oġġetti inklużi oġġetti kapitali, (ii) ħlas ta' dazji tas-sisa fuq l-akkwist domestiku ta' materjal meħtieġ għall-manifattura jew ta' oġġetti inklużi oġġetti kapitali u, (iii) ħlas tat-taxxa tas-servizzi fuq l-akkwist ta' servizzi.

(89)

Fuq is-sit web tad-Direttorat Ġenerali tal-Kummerċ Barrani trid timtela applikazzjoni onlajn għat-talba għall-benefiċċji taħt l-MEIS. Dokumentazzjoni rilevanti (poloz tat-tagħbija, dokumentazzjoni bankarja li tikkonferma l-ħlas mill-esportazzjoni u ċertifikat tal-iżbark) trid tkun mehmuża mal-applikazzjoni onlajn. L-Awtorità Reġjonali (“RA”) rilevanti tal-GTI toħroġ il-kreditu ta' dazju wara li tagħmel skrutinju tad-dokumenti. Sakemm l-esportatur jipprovdi d-dokumentazzjoni rilevanti, l-RA ma għandha ebda diskrezzjoni fuq l-għoti tal-krediti tad-dazju.

(90)

Il-Kummissjoni kkonkludiet li l-produtturi esportaturi fil-kampjun li kkooperaw rċevew benefiċċji taħt l-MEIS matul il-perjodu tal-investigazzjoni tar-rieżami.

(91)

L-MEIS tipprovdi sussidji skont it-tifsira tal-Artikolu 3(1)(a)(ii) u l-Artikolu 3(2) tar-Regolament bażiku. Kreditu ta' dazju tal-MEIS huwa kontribuzzjoni finanzjarja mill-GTI, billi l-kreditu eventwalment jintuża biex ipaċi d-dazji tal-importazzjoni, u b'hekk inaqqas id-dħul mid-dazju tal-GTI li kieku kien irid jitħallas. Barra minn hekk, il-kreditu ta' dazju tal-MEIS jagħti benefiċċju lill-esportatur, minħabba li jtejjeb il-likwidità tiegħu.

(92)

Barra dan, l-MEIS hija suġġetta skont il-liġi fuq il-prestazzjoni tal-esportazzjoni, u għalhekk hija meqjusa bħala speċifika u kumpensabbli skont l-Artikolu 4(4), l-ewwel subparagrafu, il-punt (a) tar-Regolament bażiku.

(93)

Din l-iskema ma tistax titqies bħala sistema permissibbli ta' rifużjoni tad-dazji jew sistema ta' rifużjoni b'sostituzzjoni fit-tifsira tal-Artikolu 3(1)(a)(ii) tar-Regolament bażiku. Mhijiex konformi mar-regoli stretti stabbiliti fl-Anness I punt (i), fl-Anness II (definizzjoni u regoli għar-rifużjoni) u fl-Anness III (definizzjoni u regoli għar-rifużjoni b'sostituzzjoni) tar-Regolament bażiku. Esportatur ma għandu l-ebda obbligu li fir-realtà jikkonsma l-prodotti importati mingħajr dazju fil-proċess tal-produzzjoni u l-ammont ta' kreditu ma jiġix ikkalkulat skont il-materjal għall-manifattura li verament jintuża. Ma hemm l-ebda sistema jew proċedura fis-seħħ biex tikkonferma liema materjal meħtieġ għall-manifattura jiġi kkunsmat fil-proċess tal-produzzjoni tal-prodott esportat jew jekk sarx ħlas żejjed ta' dazji tal-importazzjoni fit-tifsira tal-punt (I) tal-Anness I u l-Annessi II u III tar-Regolament bażiku. Esportatur huwa eliġibbli għall-benefiċċji tal-MEIS irrispettivament minn jekk jimportax xi materjal meħtieġ għall-manifattura jew le. Biex jinkiseb il-benefiċċju, huwa biżżejjed li esportatur sempliċiment jesporta l-prodotti mingħajr ma jkollu juri li kien importat xi materjal meħtieġ għall-manifattura. Għalhekk, anki l-esportaturi li jakkwistaw il-materjal għall-manifattura kollu tagħhom lokalment u ma jimportaw l-ebda prodott li jista' jintuża bħala materjal għall-manifattura, xorta huma intitolati li jibbenefikaw mill-MEIS. Barra minn hekk, esportatur jista' juża l-krediti ta' dazju tal-MEIS biex jimporta prodotti kapitali għalkemm il-prodotti kapitali mhumiex koperti mill-kamp ta' applikazzjoni tas-sistemi permissibbli ta' rifużjoni tad-dazji, kif stabbilit fl-Anness I punt (i) tar-Regolament bażiku, minħabba li ma jiġux ikkunsmati fil-produzzjoni tal-prodotti esportati. Barra minn hekk, ma sar l-ebda studju ulterjuri mill-GTI fuq il-bażi tal-materjal meħtieġ għall-manifattura i u t-tranżazzjonijiet li effettivament intużaw jew saru sabiex jiġi ddeterminat jekk kienx hemm ħlas eċċessiv.

(94)

Skont l-Artikoli 3(2) u 5 tar-Regolament bażiku, l-ammont ta' sussidji kompensatorji kien ikkalkulat f'termini tal-benefiċċju li jingħata lil min jirċevih, li jinstab li jeżisti matul il-perjodu tal-investigazzjoni tar-rieżami. F'dan ir-rigward, ġie kkunsidrat li l-benefiċċju huwa mogħti lil min jirċevih fil-mument meta ssir tranżazzjoni ta' esportazzjoni f'din l-iskema.

(95)

Skont l-Artikolu 7(2) tar-Regolament bażiku dawn l-ammonti ta' sussidju ġew allokati fuq il-fatturat totali mill-esportazzjoni tal-prodott ikkonċernat matul il-perjodu tal-investigazzjoni tar-rieżami bħala d-denominatur adegwat, għax is-sussidju huwa suġġett għall-prestazzjoni tal-esportazzjoni u ma ngħatax b'referenza għall-kwantitajiet manifatturati, prodotti, esportati jew trasportati.

(96)

Għalhekk, il-Kummissjoni stabbiliet li r-rati ta' sussidju fir-rigward ta' din l-iskema matul il-perjodu tal-investigazzjoni tar-rieżami kienu jammontaw għal 1,31 % għal Chandan Steel Limited, għal 1,33 % għal Isinox Steel Limited u 1,00 % għal Venus Group.

(97)

Wara l-iżvelar, wieħed mill-partijiet argumenta li kien biss il-benefiċċju mogħti fir-rigward tal-bejgħ lill-Unjoni matul il-perjodu tal-investigazzjoni tar-rieżami li għandu jiġi kkompensat. Madankollu, kif imsemmi fil-premessa (95) hawn fuq, skont l-Artikolu 7(2) tar-Regolament bażiku, l-ammont tas-sussidju kien allokat fuq il-fatturat tal-esportazzjoni totali tal-prodott ikkonċernat matul il-perjodu tal-investigazzjoni tar-rieżami bħala denominatur adegwat. L-ammont tal-benefiċċju allokat għall-fatturat iġġenerat mill-esportazzjonijiet lill-Unjoni kien imbagħad ikkompensat.

(98)

L-investigazzjoni żvelat li l-ebda wieħed mill-produtturi esportaturi fil-kampjun ma kien ibbenefika minn din l-iskema matul il-perjodu tal-investigazzjoni tar-rieżami, li uriet li ma kinitx meħtieġa evalwazzjoni ulterjuri tal-effett kompensatorju tagħha għall-finijiet ta' din l-investigazzjoni.

(99)

L-investigazzjoni żvelat li l-ebda produttur esportatur fil-kampjun ma bbenefika minn dawn l-iskemi matul il-perjodu tal-investigazzjoni tar-rieżami, u għalhekk ma kinitx meħtieġa evalwazzjoni ulterjuri tal-effett kompensatorju tagħha għall-finijiet ta' din l-investigazzjoni.

(100)

L-ammonti ta' sussidji kompensabbli skont id-dispożizzjonijiet tar-Regolament bażiku, espressi ad valorem, għall-produttur esportatur li kkoopera kienu kif ġej:

Tabella 1

Sussidji kompensatorji

(101)

L-ammont totali ta' sussidjar jaqbeż il-limitu de minimis imsemmi fl-Artikolu 14(5) tar-Regolament bażiku.

(102)

Skont l-Artikolu 18(2) tar-Regolament bażiku, il-Kummissjoni eżaminat jekk l-iskadenza tal-miżuri fis-seħħ tkunx probabbli li twassal għal kontinwazzjoni tas-sussidjar.

(103)

Bħalma ntqal fil-premessi (31) sa (101) hawn fuq, kien stabbilit li matul il-perjodu tal-investigazzjoni tar-rieżami, l-esportaturi Indjani tal-prodott ikkonċernat komplew igawdu mis-sussidju kompensatorju mill-awtoritajiet Indjani.

(104)

L-iskemi tas-sussidji jagħtu benefiċċji rikorrenti u ma hemm l-ebda indikazzjoni li dawn il-benefiċċji se jintemmu fil-futur prevedibbli. Tabilħaqq, is-sussidjar taħt id-DDS u l-MEIS żdied matul il-perjodu tal-investigazzjoni tar-rieżami. Ir-rata u l-limitu taħt id-DDS żdiedu filwaqt li l-MEIS, li kienet disponibbli għall-esportazzjonijiet lejn grupp ta' pajjiżi fil-bidu tal-perjodu tal-investigazzjoni tar-rieżami (l-Istati Membri esklużi), saret disponibbli għall-pajjiżi kollha lejn it-tmiem tagħha. L-aħħar bidla għamlet l-esportazzjonijiet lejn l-Unjoni iktar attraenti.

(105)

Minkejja li l-prezzijiet tal-SSB lejn l-Unjoni huma simili għal dawk lejn swieq terzi, il-produtturi esportaturi fil-kampjun kollha għandhom kapaċitajiet sinifikattivi żejda li jvarjaw minn 14 % sa 66 %. L-użu tal-kapaċitajiet tal-produtturi esportaturi li kkooperaw kollha (li jirrapreżentaw madwar 46 % tal-importazzjonijiet totali tal-SSB tal-Unjoni mill-Indja) hija ta' madwar 42 %. Il-kapaċità żejda ta' dawk il-produtturi biss hija ta' madwar 156 000 tunnellaġġ metriku, jiġifieri 50 % tal-konsum kollu tal-Unjoni matul il-perjodu tal-investigazzoni tar-rieżami. Ikkunsidrat li ċ-ċifra ma tinkludix il-kapaċità żejda tal-produtturi esportaturi li jirrapreżetaw lill-kumplament tal-54 % tal-importazzjonijiet totali tal-SSB tal-Unjoni mill-Indja kif ukoll dawk il-produtturi Indjani li ma jesportawx lejn l-Unjoni, din hija stima konservattiva fi-rigward tal-kapaċità żejda totali fl-Indja.

(106)

Skont l-abbozz tal-Politika Nazzjonali dwar l-Azzar fl-Indja għall-2017, fl-2015, l-Indja kienet l-unika ekonomija kbira fid-dinja fejn id-domanda għall-azzar kompliet turi tkabbir pożittiv ta' 5,3 %. Filwaqt li l-produzzjoni għall-konsum domestiku fost il-produtturi esportaturi fil-kampjun matul il-perjodu tal-investigazzjoni tar-rieżami kienet tvarja minn 1 sa 17 % tal-produzzjoni totali, il-kapaċità żejda tal-produtturi esportaturi li kkooperaw hi ta' madwar 58 %. Konsegwentement, anki jekk it-tkabbir tal-konsum domestiku baqa' fil-livell tal-2015, għandu jieħu numru ta' snin biex ikun kapaċi jassorbi l-kapaċità żejda.

(107)

Is-suq tal-Unjoni huwa attraenti, minkejja l-miżuri. Il-produtturi esportaturi kollha li kkooperaw huma orjentati lejn l-esportazzjoni, u jesportaw bejn 83 % u 99 % tal-produzzjoni tal-SSB kollha tagħhom. Minkejja l-miżuri fis-seħħ, l-Unjoni baqgħet destinazzjoni importanti għall-esportazzjoni għall-produtturi esportaturi fil-kampjun, li jirrapreżentaw minn 35 % sa 53 % tal-esportazzjonijiet tal-SSB kollha tagħhom matul il-perjodu tal-investigazzjoni tar-rieżami. Jekk il-miżuri jitneħħew, huwa probabbli li l-volumi tal-esportazzjoni lejn l-Unjoni, li diġà huma sinifikattivi matul il-perjodu tal-investigazzjoni tar-rieżami, jiżdiedu. Tabilħaqq, kif diskuss diġà fil-premessa (183) iktar 'l isfel, dan jidher ċar mill-eżempju ta' produttur esportatur wieħed, li d-dazju tiegħu kien imnaqqas għal 0 % wara r-rieżami ta' nofs it-terminu fl-2013.

(108)

Fid-dawl ta' dan ta' hawn fuq, il-Kummissjoni kkonkludiet li hemm probabbiltà ta' kontinwazzjoni tas-sussidjar.

(109)

Matul il-perjodu tal-investigazzjoni tar-rieżami, il-prodott simili kien prodott minn 25 produttur. Huma jikkostitwixxu “l-industrija tal-Unjoni” skont it-tifsira tal-Artikolu 9(1) tar-Regolament bażiku.

(110)

Il-ħsara ġiet stmata fuq il-bażi tat-tendenzi fir-rigward tal-produzzjoni, il-kapaċità tal-produzzjoni, l-użu tal-kapaċità, il-bejgħ, is-sehem mis-suq, l-impjiegi, il-produttività u t-tkabbir miġbur fuq il-livell tal-industrija totali tal-Unjoni u tendenzi li jikkonċernaw il-prezzijiet, il-profittabbiltà, il-likwidità, l-abbiltà li jżidu l-kapital u investimenti, stokks, redditu fuq l-investiment u pagi miġburin fil-livell tal-produtturi tal-Unjoni fil-kampjun.

(111)

Matul il-perjodu kkunsidrat, minbarra l-2013, kien hemm kundizzjonijiet tas-suq pożittivi b'żieda fil-konsum tal-SSB fl-Unjoni. Kif imsemmi fil-premessa (3) hawn fuq, fl-2013, rieżami ta' nofs terminu naqqas id-dazju applikabbli għal Viraj għal 0 %.

(112)

Il-Kummissjoni stabbilixxiet il-konsum tal-Unjoni billi għaddet flimkien:

(113)

Il-konsum tal-SSB fl-Unjoni żviluppa kif ġej:

Tabella 2

Il-konsum tal-Unjoni (TM)

(114)

Il-konsum tal-Unjoni żdied b'16 % matul il-perjodu kkunsidrat. Analiżi sena b'sena turi tnaqqis inizjali ta' 4 % bejn l-2012 u l-2013, u żieda gradwali sussegwenti ta' 20 punt perċentwali jew iktar minn 55 elf tunnellata matul il-perjodu mill-2014 sa tmiem il-perjodu tal-investigazzjoni tar-rieżami.

(115)

Il-Kummissjoni stabbilixxiet il-volum ta' importazzjonijiet ta' SSB mill-Indja fl-Unjoni fuq il-bażi ta' data tal-Eurostat u l-ishma tas-suq tal-importazzjonijiet billi qabblet dawn il-volumi tal-importazzjonijiet mal-konsum tal-Unjoni kif muri fit-Tabella 2.

(116)

Importazzjonijiet ta' SSB mill-Indja lejn l-Unjoni żviluppaw kif kif ġej:

Tabella 3

Volum ta' importazzjonijiet mill-Indja (MT) u ishma mis-suq

(117)

Il-volum ta' importazzjoni mill-Indja lejn l-Unjoni żdied b'mod sinifikattiv b'64 % bi kważi 18 000 tunnellata matul il-perjodu kkunsidrat. Analiżi sena b'sena turi tnaqqis inizjali fl-2013, u żieda gradwali sussegwenti ta' 57 punti perċentwali fl-2014, żieda oħra ta' 7 punti perċentwali sal-2015 u l-perjodu tal-investigazzjoni tar-rieżami.

(118)

Inizjalment, bejn l-2012 u l-2013, l-importazzjonijiet mill-Indja kienu stabbli filwaqt li l-konsum tal-Unjoni naqas bi 3 %. Bejn l-2013 u l-perjodu tal-investigazzjoni tar-rieżami l-importazzjonijiet mill-Indja żdiedu b'64 % filwaqt li l-konsum tal-Unjoni żdied b'20 %. Peress li ż-żieda tal-importazzjonijiet mill-Indja kienet ogħla miż-żieda tal-konsum tal-Unjoni, is-sehem tas-suq ta' dawk l-importazzjonijiet żdied minn 10 % għal 14 %.

(119)

Il-Kummissjoni użat il-prezzijiet tal-importazzjonijiet mill-Indja rrappurtati mill-Eurostat.

(120)

Il-prezz medju tal-importazzjonijiet ta' SSB lejn l-Unjoni żviluppa kif ġej:

Tabella 4

Prezzijiet tal-importazzjoni mill-Indja

(121)

Il-prezzijiet tal-importazzjonijiet mill-Indja naqsu b'14 % matul il-perjodu kkunsidrat bl-iktar tnaqqis iseħħ bejn l-2012 u l-2013. Naqsu b'11 % fl-2013 u b'5 punti perċentwali iktar fl-2014, biex żiedu 5 punti perċentwali fl-2015 u tnaqqis ieħor ta' 3 punti perċentwali fil-perjodu tal-investigazzjoni tar-rieżami.

(122)

Għalkemm dan it-tnaqqis segwa t-tendenza 'l isfel tal-prezzijiet tal-materja prima, il-Kummissjoni nnotat li matul il-perjodu kollu kkunsidrat, il-prezz medju tal-importazzjoni għal kull unità mill-Indja kien ferm inqas kemm mill-prezz medju tal-bejgħ ta' kull unità u mill-prezz medju tal-ispiża ta' produzzjoni ta' kull unità tal-industrija tal-Unjoni kif irrappurtat fit-tabella 9, u dan irriżulta fi pressjoni qawwija fuq il-prezz fir-rigward tal-prezzijiet tal-bejgħ tal-Unjoni.

(123)

Il-Kummissjoni stabbilixxiet it-twaqqigħ tal-prezz matul il-perjodu tal-investigazzjoni tar-rieżami billi qabblet:

(124)

It-tqabbil tal-prezzijiet sar fuq bażi ta' tip b'tip għal tranżazzjonijiet fl-istess livell ta' kummerċ, aġġustati kif xieraq meta meħtieġ, u wara tnaqqis tar-roħs u tal-iskontijiet. Ir-riżultat tat-tqabbil kien espress bħala perċentwal tal-fatturat tal-industrija tal-Unjoni fil-kampjun matul il-perjodu tal-investigazzjoni tar-rieżami.

(125)

It-tqabbil wera, għal produtturi esportaturi li kkooperaw, marġni ta' twaqqigħ tal-prezz medju ponderat ta' 12 % fis-suq tal-Unjoni matul il-perjodu tal-investigazzjoni tar-reieżami.

(126)

Il-Kummissjoni stabbilixxiet il-volum ta' importazzjonijiet minn pajjiżi oħra minbarra l-Indja fuq il-bażi ta' data tal-Eurostat u l-ishma tas-suq ta' dawn l-importazzjonijiet billi qabblet il-volumi tal-importazzjonijiet mal-konsum tal-Unjoni kif muri fit-Tabella 2.

(127)

L-importazzjonijiet ta' SSB fl-Unjoni minn pajjiżi oħra żviluppaw kif ġej:

Tabella 5

Importazzjonijiet ta' SSB minn pajjiżi oħra

(128)

Il-volum ta' importazzjonijiet minn pajjiżi terzi minbarra l-Indja naqas b'8 % meta mqabbel maż-żieda ta' 64 % tal-volum tal-importazzjonijiet mill-Indja.

(129)

Matul il-perjodu kkunsidrat, is-sehem tas-suq ta' importazzjonijiet minn pajjiżi oħra minbarra l-Indja naqas minn 8 % għal 6 % filwaqt li s-sehem tas-suq ta' importazzjonijiet mill-Indja żdied minn 10 % għal 14 %.

(130)

L-ishma tas-suq tal-iktar żewġ pajjiżi importaturi importanti wara l-Indja naqsu matul il-perjodu kkunsidrat. Għall-Iżvizzera s-sehem tas-suq naqas minn 4 % għal 3 % u għall-Ukrajna minn 2 % għal 1 %.

(131)

Fil-kuntest tal-konsum tal-Unjoni li żdied b'16 % u sehem mis-suq tal-industrija tal-Unjoni li naqas b'3 % matul il-perjodu kkunsidrat, dan ifisser li l-importazzjonijiet mill-Indja iggwadanjaw is-suq mhux mill-industrija tal-Unjoni biss iżda wkoll minn importazzjonijiet oħra.

(132)

Il-prezz medju tal-importazzjonijiet minn pajjiżi terzi oħrajn naqas b'rata ferm inqas mgħaġġla mill-prezzijiet tal-importazzjoni mill-Indja. Naqsu bi 6 % filwaqt li l-prezzijiet tal-importazzjoni mill-Indja naqsu b'14 %.

(133)

Il-prezzijiet tal-importazzjoni mill-Iżvizzera u mill-Ukrajna huma bħala medja ogħla b'mod sinifikattiv mill-prezzijiet tal-importazzjoni mill-Indja matul il-perjodu kkunsidrat kollu. Madankollu, dawn il-prezzijiet mhux bilfors huma direttament komparabbli, peress li l-prezz medju huwa affettwat minn taħlita ta' prodotti differenti.

(134)

Barra minn hekk, il-volumi tal-importazzjonijiet mill-Iżvizzera (+ 7 %) u mill-Ukrajna (– 16 %) b'mod partikolari, jew mill-pajjiżi terzi l-oħrajn kollha (– 8 %) b'mod ġenerali ma kellhomx daqstant żidiet qawwija bħal dawk mill-Indja (+ 64 %).

(135)

Filwaqt li l-volum tal-importazzjonijiet mill-Indja żdied bi kważi 17 000 tunnellata matul il-perjodu kkunsidrat, il-volum tal-importazzjonijiet mill-Ukrajna naqas b'madwar 700 tunnellata, dak mill-Iżvizzera żdied b'madwar 700 tunnellata u dak mill-pajjiżi terzi kollha l-oħrajn (inklużi l-Iżvizzera u l-Ukrajna) b'madwar 1 700 tunnellata.

(136)

Fuq il-bażi ta' dan li ntqal hawn fuq u fid-dawl tal-volumi ta' importazzjoni ferm iżgħar mill-Iżvizzera u mill-Ukrajna meta mqabblin ma' dawk mill-Indja, ma hemm ebda indikazzjoni li l-importazzjonijiet minn dawn iż-żewġ pajjiżi kienu qegħdin jikkaġunaw ħsara għall-industrija tal-Unjoni.

(137)

Importazzjonijiet minn pajjiżi oħra minbarra l-Indja (inklużi l-Iżvizzera u l-Ukrajna) għandhom — bħala medja — prezzijiet ogħla mill-importazzjonijiet mill-Indja u kellhom telf ta' sehem mis-suq ta' 2 % matul il-perjodu kkunsidrat.

(138)

B'konformità mal-Artikolu 8(4) tar-Regolament bażiku, il-Kummissjoni eżaminat l-effett tal-importazzjonijiet sussidjati fuq l-industrija tal-Unjoni billi evalwat l-indikaturi ekonomiċi kollha li kellhom effett fuq l-istat tal-industrija tal-Unjoni matul il-perjodu kkunsidrat.

(139)

Kif imsemmi fil-premessa (12) hawn fuq, intuża t-teħid ta' kampjuni sabiex jiġi stabbilit il-ħsara li setgħet sofriet l-industrija tal-Unjoni.

(140)

Għad-determinazzjoni tal-ħsara, il-Kummissjoni għamlet distinzjoni bejn l-indikaturi ta' ħsara makroekonomiċi u mikroekonomiċi.

(141)

Il-Kummissjoni evalwat l-indikaturi makroekonomiċi abbażi ta' data fit-talba għal rieżami, data sottomessa mill-Eurofer u fit-tweġibiet ivverifikati għall-kwestjonarju tal-produtturi tal-Unjoni fil-kampjun. Id-data kienet tirrigwarda lill-produtturi tal-Unjoni kollha.

(142)

Il-Kummissjoni evalwat l-indikaturi mikroekonomiċi abbażi tad-data inkluża fit-tweġibiet għall-kwestjonarju mill-produtturi tal-Unjoni fil-kampjun.

(143)

Irriżulta li ż-żewġ settijiet ta' data jirrappreżentaw is-sitwazzjoni ekonomika tal-industrija tal-Unjoni.

(144)

L-indikaturi makroekonomiċi huma: il-produzzjoni, il-kapaċità tal-produzzjoni, l-użu tal-kapaċità, il-volum tal-bejgħ, is-sehem mis-suq, it-tkabbir, l-impjiegi, il-produttività, il-kobor tal-ammont ta' sussidji kompensatorji, u l-irkupru mis-sussidjar ta' qabel.

(145)

L-indikaturi mikroekonomiċi huma: il-prezzijiet medji ta' unità, il-kost ta' unità, il-kostijiet lavorattivi, l-inventarji, il-profittabbiltà, il-flussi tal-flus, l-investimenti, ir-redditu fuq l-investimenti u l-kapaċità ta' ġenerazzjoni tal-kapital.

(146)

Il-produzzjoni totali tal-Unjoni, il-kapaċità produttiva u l-użu tal-kapaċità żviluppaw kif ġej matul il-perjodu kkunsidrat:

Tabella 6

Il-produzzjoni, il-kapaċità produttiva u l-użu tal-kapaċità tal-produtturi tal-Unjoni

(147)

Il-volum tal-produzzjoni tal-industrija tal-Unjoni żdied bi 14 % matul il-perjodu kkunsidrat. Analiżi sena b'sena turi li l-ewwel naqas b'6 % fl-2013 u mbagħad żdied bil-mod b'16-il punt perċentwali fl-2014 u b'4 punti perċentwali oħra fl-2015 sabiex baqa' fl-istess livell fil-perjodu tal-investigazzjoni ta' rieżami.

(148)

Il-kapaċità tal-produzzjoni tal-industrija tal-Unjoni żdiedet b'4 % matul il-perjodu kkunsidrat.

(149)

Bħala riżultat taż-żieda fil-volum tal-produzzjoni, l-użu tal-kapaċità mill-industrija tal-Unjoni żdied b'10 % matul il-perjodu kkunsidrat.

(150)

Il-volum tal-bejgħ u s-sehem mis-suq tal-industrija tal-Unjoni żviluppaw hekk matul il-perjodu kkunsidrat:

Tabella 7

Volum tal-bejgħ u sehem mis-suq tal-produtturi tal-Unjoni

(151)

Il-volum tal-bejgħ tal-industrija tal-Unjoni fis-suq tal-Unjoni żdied matul il-perjodu kkunsidrat b'13 % jew b'iktar minn 28 000 tunnellata, li huwa inqas mit-tkabbir tas-suq ta' 16 %, kif irrappurtat fit-Tabella 2.

(152)

Analiżi sena b'sena turi tnaqqis inizjali ta' 4 % bejn l-2012 u l-2013, u żidiet gradwali sussegwenti ta' 12-il punt perċentwali fl-2014, 3 punti fl-2015 u żewġ punti oħra fil-perjodu tal-investigazzjoni tar-rieżami.

(153)

Is-sehem tas-suq tal-industrija tal-Unjoni naqas bi 3 % matul il-perjodu kkunsidrat, minn 82 % fl-2012 u fl-2013 għal 79 % matul il-perjodu bejn l-2014 u l-perjodu tal-investigazzjoni tar-rieżami.

(154)

Il-konsum tal-Unjoni żdied matul il-perjodu kkunsidrat b'16 % jew b'44 000 tunnellata. Il-volum tal-bejgħ tal-industrija tal-Unjoni żdied b'13 % jew iktar minn 23 000 tunnellata li, madankollu, issarraf f'telf tal-industrija tal-Unjoni fis-sehem mis-suq ta' 4 punti perċentwali.

(155)

L-impjiegi u l-produttività tal-industrija tal-Unjoni żviluppaw matul il-perjodu kkunsidrat kif ġej:

Tabella 8

L-impjiegi u l-produttività tal-produtturi tal-Unjoni

(156)

L-impjiegi tal-industrija tal-Unjoni baqgħu fl-istess livell matul il-perjodu kkunsidrat.

(157)

Minħabba ż-żieda fil-produzzjoni ta' 14 % matul il-perjodu kkunsidrat, il-produttività żdiedet ukoll b'14 % matul l-istess perjodu. Analiżi sena b'sena turi tnaqqis inizjali ta' 6 % bejn l-2012 u l-2013, u żidiet sussegwenti ta' 16-il punt perċentwali fl-2014, 4 punti oħra fl-2015 sabiex inżamm l-istess livell fil-perjodu tal-investigazzjoni tar-rieżami.

(158)

Il-Kummissjoni stabbilixxiet li l-importazzjonijiet ta' SSB mill-Indja komplew jidħlu fis-suq tal-Unjoni bi prezzijiet sussidjati. Il-marġni tas-sussidju stabbilit għall-Indja matul il-perjodu tal-investigazzjoni tar-rieżami kien ferm ogħla mil-livell de minimis kif deskritt fil-premessa (100) hawn fuq.

(159)

Dan kien jikkoinċidi mat-tnaqqis fil-prezzijiet tal-importazzjonijiet mill-Indja ta' 14 % matul il-perjodu kkunsidrat. Bħala riżultat ta' dan l-Unjoni ma setgħetx tibbenefika b'mod sħiħ mill-miżuri kompensatorji fis-seħħ peress li s-sehem tas-suq tagħhom naqas b'4 % u l-profittabbiltà naqset bi kważi 5 punti perċentwali.

(160)

Il-prezzijiet medji tal-bejgħ ta' unità tal-produtturi tal-Unjoni fil-kampjun lill-klijenti mhux relatati fl-Unjoni żviluppaw kif ġej matul il-perjodu kkunsidrat:

Tabella 9

Prezzijiet tal-bejgħ medji fl-Unjoni u l-kost għal kull unità

(161)

Il-prezz tal-bejgħ unitarju medju tal-industrija tal-Unjoni lil klijenti mhux relatati fl-Unjoni naqas b'mod konsistenti b'22 % matul il-perjodu kkunsidrat biex laħaq EUR 2 482/tunnellata fil-perjodu tal-investigazzjoni tar-rieżami. L-industrija tal-Unjoni kellha tnaqqas il-prezzijiet tagħha sabiex jirriflettu t-tnaqqis ġenerali tal-prezzijiet tal-bejgħ fis-suq tal-SVA.

(162)

L-ispiża medja tal-produzzjoni tal-industrija tal-Unjoni naqset ftit inqas, bi 18 % matul il-perjodu kkunsidrat. Il-fattur qawwi li influwenza t-tnaqqis fl-ispiża tal-produzzjoni ta' unità kien it-tnaqqis fil-prezzijiet tal-materja prima, iżda wkoll iż-żieda tal-produttività.

(163)

Il-kostijiet lavorattivi medji tal-produtturi tal-Unjoni fil-kampjun żviluppaw kif ġej matul il-perjodu kkunsidrat:

Tabella 10

Kostijiet lavorattivi medji għal kull impjegat

(164)

Il-kostijiet lavorattivi medji għal kull impjegat żdiedu tul il-perjodu kkunsidrat b'żieda marġinali ta' 3 %.

(165)

Il-livelli tal-istokks tal-produtturi tal-Unjoni fil-kampjun żviluppaw kif ġej:

Tabella 11

Stokks

(166)

Il-livell ta' stokkijiet tal-għeluq tal-industrija tal-Unjoni naqas b'16 % matul il-perjodu kkunsidrat. Fil-perjodu tal-investigazzjoni tar-rieżami, il-livell ta' stokkijiet kien jirrappreżenta madwar 5 % tal-produzzjoni tagħhom.

(167)

Il-Kummissjoni stabbiliet il-profittabbiltà tal-industrija tal-Unjoni billi l-profitt nett qabel it-taxxa tal-bejgħ tal-prodott simili lil klijenti mhux relatati fl-Unjoni ġie espress bħala perċentwal tal-fatturat ta' dak il-bejgħ.

(168)

Il-profittabbiltà, il-fluss tal-flus, l-investimenti u r-redditu fuq l-investimenti tal-produtturi tal-Unjoni inklużi fil-kampjun żviluppaw kif ġej matul il-perjodu kkunsidrat:

Tabella 12

Profittabbiltà, fluss tal-flus, investimenti u redditu fuq l-investimenti

(169)

Il-profittabilità tal-industrija tal-Unjoni naqset b'mod gradwali minn 8,1 % fl-2012 għal 3,3 % fil-perjodu tal-investigazzjoni tar-rieżami, jiġifieri tnaqqis ta' 59 %. Analiżi sena b'sena turi tnaqqis drammatiku inizjali ta' 53 % bejn l-2012 u l-2013 u żidiet sussegwenti ta' 32 punt perċentwali fl-2014, iktar tnaqqis żgħir ta' 3 punti perċentwali fl-2015 u iktar tnaqqis drammatiku b'35 punt perċentwali fil-perjodu tal-investigazzjoni tar-rieżami.

(170)

Il-fluss tal-flus nett huwa l-kapaċità tal-industrija tal-Unjoni li tiffinanzja waħidha l-attivitajiet tagħha. Il-fluss tal-flus nett naqas b'42 % matul il-perjodu kkunsidrat. Analiżi sena b'sea juri żvilupp erratiku ta' dan l-indikatur. Kien hemm tnaqqis drammatiku ta' 66 % bejn l-2012 u l-2013 u żidiet sussegwenti ta' 60 punti perċentwali fl-2014, b'iktar żidiet żgħar ta' 6 punti perċentwali fl-2015 segwiti minn tnaqqis drammatiku ta' 42 punti perċentwali fil-perjodu tal-investigazzjoni tar-rieżami.

(171)

It-tnaqqis sostanzjali fil-fluss tal-flus tal-industrija tal-Unjoni huwa prinċipalment spjegat minn tnaqqis sinifikanti fil-profittabbiltà, kif spjegat fil-premessa (169) hawn fuq.

(172)

Matul il-perjodu kkunsidrat, l-investimenti annwali fil-prodott simili li għamlet l-industrija tal-Unjoni naqsu b'9 %, minn EUR 7,7 miljuni fl-2012 għal EUR 7,0 miljuni fil-perjodu tal-investigazzjoni tar-rieżami.

(173)

Ir-redditu fuq l-investiment huwa l-profitt bħala perċentwal tal-valur kontabilistiku nett tal-investimenti. Ir-redditu fuq l-investiment tal-Unjoni mill-produzzoni u l-bejgħ tal-prodott simili naqas b'47 % matul il-perjodu kkunsidrat.

(174)

L-investigazzjoni uriet li minkejja l-miżuri fis-seħħ, ħafna mill-indikaturi ta' ħsara żviluppaw b'mod negattiv u li s-sitwazzjoni ekonomika u finanzjarja tal-industrija tal-Unjoni marret għall-agħar matul il-perjodu kkunsidrat.

(175)

L-industrija tal-Unjoni tilfet is-sehem tas-suq tagħha b'4 % u kisbet b'mod konsistenti inqas profitti, u inqas fluss tal-flus, investimenti u redditu fuq l-investimenti.

(176)

Dawn l-iżviluppi negattivi seħħew b'mod parallel maż-żieda sinifikattiva fil-konsum tal-Unjoni b'16 % matul il-perjodu kkunsidrat. Fl-istess ħin, l-importazzjonijiet mill-Indja kienu qed iżiedu b'mod kostanti l-volum u s-sehem tas-suq tal-Unjoni.

(177)

Dawn l-importazzjonijiet issussidjati mill-Indja waqqgħu il-prezzijiet tal-industrija tal-Unjoni b'12 % fil-perjodu tal-investigazzjoni tar-rieżami, u għamlu pressjoni fuq il-prezz. Fil-fatt, il-pressjoni fuq il-prezz matul il-perjodu tal-investigazzjoni tar-rieżami kienet ikbar minn dik fl-investigazzjoni oriġinali meta t-twaqqigħ tal-prezz kien ta' inqas minn 2 %.

(178)

L-industrija tal-Unjoni kellha għalhekk tnaqqas il-prezzijiet tal-bejgħ tagħha biex tipprova tilllimita t-telf tas-sehem tas-suq. B'konsegwenza ta' dan, il-profitt tagħha, minkejja li baqa' pożittiv (3,3 %) fil-perjodu tal-investigazzjoni tar-rieżami, kien taħt il-profitt fil-mira ta' 9,5 % stabbilit fl-investigazzjoni oriġinali.

(179)

Fl-istess waqt, kif indikat fil-premessa (133) hawn fuq, l-importazzjonijiet ta' SSB minn pajjiżi oħra minbarra l-Indja kienu ogħla mill-importazzjonijiet mill-Indja u t-telf tas-sehem tas-suq ta' 2 % fil-perjodu kkunsidrat.

(180)

Il-Kummissjoni għalhekk ikkonkludiet li l-industrija tal-Unjoni kompliet issofri ħsara matul il-perjodu kkunsidrat u matul il-perjodu tal-investigazzjoni tar-rieżami.

(181)

Sabiex tiġi stabbilita l-probabbiltà ta' kontinwazzjoni ta' ħsara li kieku jitħassru l-miżuri kontra l-Indja, il-Kummissjoni analizzat il-kapaċità ta' produzzjoni u l-kapaċità żejda fl-Indja, esportazzjonijiet mill-Indja lejn pajjiżi oħra u l-attraenza tas-suq tal-Unjoni.

(182)

Kif spjegat fil-premessa (105) hawn fuq, il-kapaċità żejda fl-Indja hija stmata b'mod konservattiv bħala iktar minn 156 000 tunnelletta fil-perjodu tal-investigazzjoni tar-rieżami, li diġà tirrapreżenta 50 % tal-konsum tal-Unjoni matul l-istess perjodu.

(183)

Il-Kummissjoni nnotat ukoll li wara t-tnaqqis tar-rata tad-dazju ta' Viraj għal 0 % fl-2013, bħala riżultat tar-rieżami li sar riferiment għalih fil-premessa (3) hawn fuq, dan il-produttur żied il-preżenza tiegħu fis-suq tal-Unjoni b'mod sinifikattiv.

(184)

Fil-fatt, bejn l-2013 u l-perjodu tal-investigazzjoni tar-rieżami, Viraj akkwistat sehem maġġoritarju fl-importazzjonijiet mill-Indja lejn l-Unjoni. L-importazzjonijiet ta' Viraj kważi ttriplikaw matul dan il-perjodu, u żiedu s-sehem tagħhom b'aktar minn 60 %.

(185)

Matul l-istess perjodu, il-volum tal-importazzjonijiet mill-Indja żdied b'64 % u s-sehem tagħhom fis-suq tal-Unjoni żdied b'40 %. Il-maġġoranza kbira ta' din iż-żieda kienet dovuta għaż-żieda sinifikattiva ta' importazzjonijiet ta' Viraj. Dan jindika l-attraenza dejjem tiżdied tas-suq tal-Unjoni għall-produtturi Indjani. Matul l-istess perjodu l-industrija tal-Unjoni tilfet 3 punti perċentwali tas-sehem tas-suq u kważi 5 punti perċentwali ta' profittabbiltà, li wassal għal deterjorazzjoni tas-sitwazzjoni.

(186)

Il-livell ta' prezz tal-esportazzjonijiet lejn pajjiżi oħra kien komparabbli ma' dak tal-esportazzjonijiet tagħhom lejn l-Unjoni.

(187)

Bħala konsegwenza tal-attraenza tas-suq tal-Unjoni deskritta fil-premessi (105), (182) u (183) hawn fuq, jekk il-miżuri jitħassru, mill-inqas parti mill-kapaċità żejda aktarx tiġi diretta lejn is-suq tal-Unjoni. Barra minn hekk, kif deskritt fil-premessa (107) hawn fuq, il-produtturi Indjani huma orjentati ferm lejn l-esportazzjoni.

(188)

L-importazzjonijiet mill-Indja waqqgħu l-prezzijiet tal-bejgħ tal-Unjoni bi 12 %. Din hija indikazzjoni ta' kif x'aktarx ikun il-livell tal-prezzijiet tal-importazzjonijiet mill-Indja li kieku jitħassru l-miżuri. Fuq il-bażi ta' dan, aktarx li l-pressjoni fuq il-prezzijiet fis-suq tal-Unjoni se tiżdied b'mod sinifikattiv jekk titħassar il-miżura u b'hekk tkompli tiġġenera s-sitwazzjoni ekonomika tal-industrija tal-Unjoni.

(189)

Fuq din il-bażi, fin-nuqqas ta' miżuri, il-produtturi esportaturi Indjani aktarx li jżidu l-preżenza tagħhom fis-suq tal-Unjoni, kemm f'termini tal-volumi ta' importazzjoni u tal-ishma mis-suq, bi prezzijiet issussidjati li jwaqqgħu b'mod sinifikattiv il-prezzijiet tal-bejgħ tal-industrija tal-Unjoni.

(190)

Dan ser joħloq pressjoni akbar fuq il-prezzijiet fis-suq tal-Unjoni b'impatt negattiv fuq il-profittabbiltà u s-sitwazzjoni finanzjarja, li tkompli tiġġenera is-sitwazzjoni ekonomika tal-industrija tal-Unjoni.

(191)

Il-Kummissjoni għalhekk ikkonkludiet li hemm probabbiltà kbira ta' kontinwazzjoni ta' ħsara f'każ li l-miżuri jiġu mħassra.

(192)

Skont l-Artikolu 31 tar-Regolament bażiku, il-Kummissjoni eżaminat jekk iż-żamma tal-miżuri kompensatorji eżistenti kontra l-Indja tmurx kontra l-interessi tal-Unjoni b'mod ġenerali.

(193)

Il-Kummissjoni bbażat il-determinazzjoni tal-interess tal-Unjoni abbażi ta' evalwazzjoni tal-interessi varji kollha involuti, inklużi dawk tal-industrija, tal-importaturi u tal-utenti tal-Unjoni. Il-partijiet interessati kollha ngħataw l-opportunità li jesprimu l-opinjonijiet tagħhom skont l-Artikolu 31(2) tar-Regolament bażiku.

(194)

Fuq din il-bażi l-Kummissjoni eżaminat jekk, minkejja l-konklużjonijiet dwar il-probabbiltà ta' kontinwazzjoni ta' ssussidjar u ta' kontinwazzjoni ta' ħsara, kienx hemm raġunijiet konvinċenti li jwasslu għall-konklużjoni li ma kienx fl-interess tal-Unjoni li jinżammu l-miżuri eżistenti.

(195)

Kif spjegat fil-premessa (153) hawn fuq, il-miżuri ma pprekludewx lill-industrija tal-Unjoni milli titlef 4 % tas-sehem fis-suq matul il-perjodu kkunsidrat.

(196)

Fl-istess waqt, il-Kummissjoni kkonkludiet ukoll fil-premessa (188) hawn fuq, li l-industrija tal-Unjoni aktarx tesperjenza deterjorament tas-sitwazzjoni tagħha fil-każ li l-miżuri kompensatorji fir-rigward tal-Indja jitħallew jiskadu.

(197)

Għaldaqstant, il-Kummissjoni kkonkludiet li t-tkomplija tal-miżuri kontra l-Indja tkun ta' benefiċċju għall-industrija tal-Unjoni.

(198)

Il-Kummissjoni bagħtet żewġ kwestjonarji liż-żewġ importaturi li kkooperaw. Kif spjegat fil-premessa (23) hawn fuq l-ebda wieħed minnhom ma rrisponda jew ikkoopera b'xi mod ieħor f'din l-investigazzjoni. L-ebda importatur ieħor ma ppreżenta ruħu.

(199)

Għalhekk, il-Kummissjoni kkonkludiet li ma hemm l-ebda indikazzjoni li ż-żamma tal-miżuri jkollha impatt negattiv fuq l-importaturi li jisboq l-impatt pożittiv tal-miżuri.

(200)

Kif spjegat fil-premessa (20) hawn fuq l-ebda utent tal-Unjoni ma ppreżenta ruħu wara l-bidu jew b'xi mod ikkoopera f'din l-investigazzjoni.

(201)

SVA huma użati f'varjetà ta' applikazzjonijiet inklużi l-industrija tal-karrozzi, apparat domestiku, strumenti mediċi u tal-laboratorju, eċċ.

(202)

Madankollu, kif il-Kummissjoni sabet fl-investigazzjoni oriġinali, l-utenti huma sempliċement intermedjarji li jipproduċu u jissupplixxu l-elementi għall-applikazzjonijiet hawn fuq imsemmija.

(203)

Fil-fatt dawn l-utenti jkunu f'pożizzjoni li jgħaddu ż-żieda fil-prezzijiet kollha jew kważi kollha li tirriżulta mid-dazju kompensatorju lill-utenti finali, filwaqt li jitfakkar li għal dawn tal-aħħar, l-impatt ta' miżuri bħal dawn ikun negliġibbli.

(204)

Dawn il-konstatazzjonijiet kienu kkonfermati f'dan ir-rieżami peress li l-investigazzjoni ma tatx xi indikazzjoni li tannulla l-konstatazzjoni oriġinali għall-perjodu wara l-impożizzjoni tal-miżuri fis-seħħ.

(205)

Barra minn hekk, minkejja li l-miżuri ilhom fis-seħħ mill-2011, l-utenti fl-Unjoni komplew jakkwistaw il-provvisti tagħhom, fost l-oħrajn, mill-Indja. L-utenti ma ppreżentaw l-ebda informazzjoni li turi li kien hemm diffikultajiet biex jinstabu sorsi oħrajn ta' provvista u l-investigazzjoni lanqas ma żvelat tali informazzjoni.

(206)

Abbażi ta' dan, u skont il-konklużjonijiet mill-investigazzjoni oriġinali, il-Kummissjoni kkonkludiet li l-kontinwazzjoni tal-miżuri mhux ser ikollha impatt negattiv sinifikattiv fuq l-utenti.

(207)

Abbażi tad-dikjarazzjonijiet magħmula hawn fuq, il-Kummissjoni kkonkludiet li ma kienx hemm raġunijiet serji biex jiġi konkluż li ma kienx fl-interess tal-Unjoni li l-miżuri kompensatorji eżistenti jiġu estiżi fuq l-importazzjonijiet ta' SVA li joriġinaw mill-Indja.

(208)

Il-partijiet kollha interessati ġew infurmati bil-fatti u l-kunsiderazzjonijiet essenzjali li abbażi tagħhom kien maħsub li jinżammu l-miżuri kompensatorji li huma fis-seħħ. Ingħataw ukoll perjodu li fih setgħu jippreżentaw kummenti wara din il-konstatazzjoni u jitolbu smigħ mal-Kummissjoni u/jew l-Uffiċjal tas-Seduta fil-proċedimenti tal-kummerċ. Is-sottomissjonijiet u l-kummenti ngħataw il-kunsiderazzjoni dovuta.

(209)

Mill-kunsiderazzjonijiet ta' hawn fuq isegwi li, skont l-Artikolu 18 tar-Regolament bażiku, il-miżuri kompensatorji applikabbli għall-importazzjonijiet ta' SSB li joriġinaw mill-Indja imposti bir-Regolament definittiv, kif emendat bir-Regolament li jemenda, għandhom jinżammu.

(210)

Ir-rati tad-dazju kompensatorju tal-kumpaniji individwali speċifikati f'dan ir-Regolament huma applikabbli biss għall-importazzjonijiet tal-prodott ikkonċernat magħmul minn dawn il-kumpaniji u għalhekk mill-entitajiet ġuridiċi speċifiċi msemmija. L-importazzjonijiet tal-prodott ikkonċernat immanifatturat minn kull kumpanija oħra mhux imsemmija speċifikament fil-parti operattiva ta' dan ir-Regolament bl-isem u l-indirizz tagħha, inklużi l-entitajiet relatati ma' dawk imsemmija speċifikament, ma jistgħux jibbenefikaw minn dawn ir-rati u għandhom ikunu suġġetti għar-rata tad-dazju applikabbli għall-“kumpaniji l-oħrajn kollha”.

(211)

Kull dikjarazzjoni li titlob l-applikazzjoni ta' dawn ir-rati ta' dazju kompensatorju individwali (eż. wara bidla fl-isem tal-entità jew wara t-twaqqif ta' entitajiet ġodda tal-produzzjoni jew tal-bejgħ) għandha tiġi indirizzata lill-Kummissjoni (7) flimkien mal-informazzjoni kollha rilevanti, b'mod partikolari kwalunkwe tibdil fl-attivitajiet tal-kumpanija marbuta mal-produzzjoni, mal-bejgħ domestiku u esportat assoċjat, pereżempju, ma' dik il-bidla fl-isem jew dik il-bidla fl-entità tal-produzzjoni jew tal-bejgħ. Jekk ikun xieraq, ir-Regolament wara għandu jiġi emendat skont dan bl-aġġornament tal-lista tal-kumpaniji li jkunu qegħdin jibbenefikaw mir-rati tad-dazju individwali.

(212)

Il-miżuri msemmija f'dan ir-Regolament huma konformi mal-opinjoni tal-Kumitat stabbilit permezz tal-Artikolu 15(1) tar-Regolament (UE) 2016/1036 tal-Parlament Ewropew u tal-Kunsill (8),