(1)

Fil-31 ta' Marzu 2016, il-Kummissjoni Ewropea (“il-Kummissjoni”) fetħet investigazzjoni antidumping fir-rigward ta' importazzjonijiet fl-Unjoni ta' ċerti żbarri u vireg li jirrinforzaw il-konkos li joriġinaw mir-Repubblika tal-Belarussja (“il-Belarussja”, jew “il-pajjiż ikkoncernat”) fuq il-bażi tal-Artikolu 5 tar-Regolament tal-Kunsill (KE) Nru 1225/2009 (2) (“ir-Regolament bażiku”). In-Notifika ta' Bidu ġiet ippubblika f'Il-Ġurnal Uffiċjali tal-Unjoni Ewropea (3) (“in-Notifikazzjoni ta' Bidu”).

(2)

Il-Kummissjoni bdiet l-investigazzjoni wara lment ippreżentat fil-15 ta' Frar 2016 mill-Assoċjazzjoni Ewropea tal-Azzar, (“l-ilmentatur”) f'isem il-produtturi li jirrappreżentaw 44 % tal-produzzjoni totali tal-Unjoni ta' ċerti żbarri u vireg li jirrinforzaw il-konkos. Ma resaq l-ebda produttur ieħor biex jesprimi xi oppożizzjoni jew pożizzjoni newtrali.

(3)

Għalhekk, il-limiti rilevanti kif stabbiliti fl-Artikolu 5(4) tar-Regolament bażiku (4) ġew issodisfati fil-mument tat-tnedija tal-każ. Hekk kif l-investigazzjoni tkun miftuħa, mhuwiex neċessarju li l-kundizzjonijiet jiġu ssodisfati permanenti matul l-investigazzjoni kollha. Il-Qorti kkonfermat dan għas-sitwazzjoni fejn kumpanija tirtira l-appoġġ tagħha għall-ilment (5); l-istess raġunament japplika b'analoġija f'sitwazzjoni fejn l-ambitu tal-prodott jinbidel.

(4)

Fin-Notifikazzjoni ta' Bidu, il-Kummissjoni stiednet lill-partijiet interessati jikkuntattjawha sabiex jipparteċipaw fl-investigazzjoni. Barra minn hekk, il-Kummissjoni speċifikament infurmat lill-ilmentaturi, lil produtturi magħrufa oħrajn tal-Unjoni, lill-produttur esportatur wieħed magħruf tal-Belarussja u lill-awtoritajiet tar-Repubblika tal-Belarussja kif ukoll lil importaturi u utenti magħrufa, rigward il-bidu tal-investigazzjoni, u stednithom jieħdu sehem.

(5)

Il-partijiet interessati kellhom l-opportunità li jikkummentaw dwar il-bidu tal-investigazzjoni u li jitolbu seduta ta' smigħ mal-Kummissjoni u/jew mal-Uffiċjal tas-Seduta fil-proċedimenti kummerċjali.

(6)

Fin-Notifikazzjoni ta' Bidu, il-Kummissjoni għarrfet ukoll lill-partijiet interessati li kienet qiegħda tipprevedi l-użu tal-Afrika ta' Isfel jew tal-Istati Uniti tal-Amerika (“il-USA”) bħala l-pajjiż terz b'ekonomija tas-suq (“il-pajjiż analogu”) skont it-tifsira tal-Artikolu 2(7)(a) tar-Regolament bażiku. Il-partijiet interessati kellhom l-opportunità li jitolbu seduta mal-Kummissjoni u/jew mal-Uffiċjal tas-Seduta fil-proċedimenti kummerċjali.

(7)

Fin-Notifikazzjoni ta' Bidu tagħha, il-Kummissjoni qalet li tista' tieħu kampjun tal-partijiet interessati skont l-Artikolu 17 tar-Regolament bażiku.

(8)

Fin-Notifikazzjoni ta' Bidu tagħha, il-Kummissjoni ddikjarat li kienet għażlet provviżorjament kampjun ta' produtturi mill-Unjoni fuq il-bażi tal-volum tal-produzzjoni u tal-bejgħ tal-prodott li qiegħed jiġi investigat, u tal-post ġeografiku. Dan il-kampjun kien jikkonsisti f'ħames produtturi tal-Unjoni. Il-produtturi tal-Unjoni fil-kampjun kienu jirrappreżentaw 22.4 % tal-produzzjoni totali tal-Unjoni u 24.4 % tal-bejgħ totali tal-Unjoni tal-prodott ikkonċernat. Il-kumpaniji jinsabu fi Franza, il-Ġermanja, l-Italja, il-Polonja u Spanja, b'mod li jkopru varjetà ġeografika wiesgħa. Il-Kummissjoni stiednet lill-partijiet interessati biex jikkumentaw dwar dan il-kampjun provviżorju. Ma wasal l-ebda kumment. Għalhekk, ġie konkluż li l-kampjun kien rappreżentattiv tal-industrija tal-Unjoni.

(9)

Sabiex tiddeċiedi jekk huwiex meħtieġ il-kampjunar u, jekk iva, biex tagħżel kampjun, il-Kummissjoni talbet lill-importaturi mhux relatati sabiex jipprovdu l-informazzjoni speċifikata fin-Notifikazzjoni ta' Bidu.

(10)

Sitt importaturi mhux relatati pprovdew l-informazzjoni mitluba u qablu li jiġu inklużi fil-kampjun. Skont l-Artikolu 17(1) tar-Regolament bażiku, il-Kummissjoni għażlet kampjun ta' tliet importaturi fuq il-bażi tal-akbar volum ta' importazzjonijiet lejn l-Unjoni. It-tliet kumpaniji inklużi fil-kampjun kienu jirrappreżentaw 80 % ta' importazzjonijiet mhux relatati tal-prodott ikkonċernat li joriġina fil-Belarussja. F'konformità mal-Artikolu 17(2) tar-Regolament bażiku, l-importaturi kollha magħrufa kkonċernati ġew ikkonsultati dwar l-għażla tal-kampjun. Ma wasal l-ebda kumment.

(11)

Il-Kummissjoni bagħtet kwestjonarji lill-ħames produtturi tal-Unjoni li ttieħdu fil-kampjun, il-produttur esportatur li kkoopera fil-pajjiż ikkonċernat, lil produttur wieħed fil-USA, magħżul bħala l-pajjiż analogu kif spjegat fil-premessa (32) hawn taħt, lil tliet importaturi inklużi fil-kampjun, lil tmien utenti magħrufa fil-mument tal-ftuħ tal-investigazzjoni u lil utent addizzjonali wieħed li ppreżenta ruħu fi stadju avvanzat tal-proċedura.

(12)

Ġew riċevuti tweġibiet għall-kwestjonarju mingħand ħames produtturi tal-Unjoni inklużi fil-kampjun, mill-produttur esportatur li kkoopera fil-pajjiż ikkonċernat, minn produttur wieħed fil-USA (“il-pajjiż analogu”) u żewġ importaturi mhux relatati.

(13)

Il-Kummissjoni fittxet u vverifikat l-informazzjoni kollha li dehrilha neċessarja għal determinazzjoni provviżorja ta' dumping, il-ħsara li tirriżulta u l-interess tal-Unjoni. Iż-żjarat ta' verifika skont l-Artikolu 16 tar-Regolament bażiku saru fil-bini tal-kumpaniji li ġejjin:

(14)

L-investigazzjoni ta' dumping u tad-dannu kopriet il-perjodu mill-1 ta' Jannar 2015 sal-31 ta' Diċembru 2015 (“il-perjodu ta' investigazzjoni”, jew “PI”). L-analiżi tax-xejriet relevanti għall-valutazzjoni tad-dannu kopriet il-perjodu ta' bejn l-1 ta' Jannar 2012 u tmiem il-perjodu tal-investigazzjoni (“il-perjodu kkunsidrat”).

(15)

Il-prodott ikkonċernat huwa ċerti żbarri u vireg li jirrinforzaw il-konkos, tal-ħadid jew tal-azzar li mhuwiex liga, mhux iktar maħdum milli mikwi, irrumblat bis-sħana, jew estrużi bis-sħana, iżda inklużi dawk milwija wara r-rumblar u wkoll dawk li fihom għafsiet, kustilji, skanalaturi jew deformazzjonijiet oħrajn magħmulin waqt il-proċess tal-irrumblar, li joriġinaw mill-Belarussja u li bħalissa huma kklassifikati fi ħdan il-kodiċijiet tan-NM ex 7214 10 00, ex 7214 20 00, ex 7214 30 00, ex 7214 91 10, ex 7214 91 90, ex 7214 99 10, ex 7214 99 71, ex 7214 99 79 u ex 7214 99 95 (“il-prodott ikkonċernat”). L-iżbarri u l-vireg li jirrinforzaw il-konkos tal-ħadid jew tal-azzar b'reżistenza għolja għar-reħi huma esklużi.

(16)

L-investigazzjoni uriet li l-prodott ikkonċernat u l-prodott immanifatturat u mibjugħ fis-suq domestiku tal-USA, kif ukoll il-prodott immanifatturat mill-industrija tal-Unjoni u mibjugħ fis-suq tal-Unjoni għandhom l-istess karatteristiċi fiżiċi, kimiċi u tekniċi bażiċi u l-istess użi. Għaldaqstant huma kkunsidrati provviżorjament bħala simili skont l-Artikolu 1(4) tar-Regolament bażiku.

(17)

Il-produttur esportatur fil-Belarussja ġibed l-attenzjoni għal allegata inkonsistenza fid-deskrizzjoni tal-ambitu tal-prodott bejn l-ilment (li jirreferi għal żewġ kodiċijiet NM) u n-Notifikazzjoni ta' Bidu (li jirreferi għal disa' kodiċi NM). Ġie allegat li għal din ir-raġuni l-evalwazzjoni tad-dannu fl-ilment ma tirreferix għall-istess ambitu bħal dak fil-proċediment inizjat sussegwenti. Barra minn hekk innota wkoll li l-kumpanija esportat biss skont iż-żewġ kodiċijiet NM li ssemmew fl-ilment.

(18)

L-ilment tabilħaqq isemmi żewġ kodiċijiet NM fid-deskrizzjoni tal-prodott filwaqt li n-Notifikazzjoni ta' Bidu elenkati disa' minnhom. Il-Kummissjoni tinnota li l-kodiċi NM mogħtija fin-Notifikazzjoni ta' Bidu huma mogħtija għal skop ta' informazzjoni biss, kif iddikjarat b'mod ċar. Tkompli tinnota li l-investigazzjoni nfetħet abbażi tad-deskrizzjoni tal-prodott ikkonċernat provvdut fl-ilment li essenzjalment ikopri disa' kodiiċijiet NM irrispettivament mir-referenza u, għaldaqstant, il-kodiċijiet NM addizzjonali ma kellhom l-ebda impatt fuq l-evidenza pprovduta fl-ilment. Għalhekk din l-allegazzjoni ta' inkoerenza fid-deskrizzjoni tal-prodott ġiet miċħuda.

(19)

F'konformità mal-Artikolu 2(7)(a) tar-Regolament bażiku, il-Belarussja mhix meqjusa bħala pajjiż b'ekonomija tas-suq. Għalhekk il-valur normali fir-rigward tal-esportazzjonijiet tal-Belarussja lejn l-Unjoni ġie stabbilit fuq il-bażi ta' dejta miksuba minn produttur f'pajjiż terz b'ekonomija tas-suq.

(20)

Matul il-PI, l-importazzjonijiet mill-Belarussja ammontaw għal madwar 488 000 tunnellata, b'sehem mis-suq ta' madwar 5 %. L-Istati Membri li huma importaturi ewlenin kienu l-Ġermanja, il-Litwanja, il-Polonja u n-Netherlands. L-unika manifattur magħruf mill-Belarussja kkoopera mal-investigazzjoni u wieġeb il-kwestjonarju. Dan il-manifattur biegħ il-prodott ikkonċernat lejn l-Unjoni direttament jew permezz ta' negozjanti relatati stabbiliti fl-Unjoni u fil-USA..

(21)

Skont l-Artikolu 2(7)(a) tar-Regolament bażiku, il-valur normali kien determinat fuq il-bażi tal-prezz jew tal-valur kostrutt f'pajjiż terz b'ekonomija tas-suq. Għal dan il-għan, kellu jintgħażel pajjiż terz b'ekonomija tas-suq (“il-pajjiż analogu”).

(22)

Kif imsemmi fil-premessa (6), fin-Notifikazzjoni ta' Bidu, il-Kummissjoni infurmat lill-partijiet interessati li hija pprevediet l-Afrika t'Isfel jew il-USA bħala pajjiż terz b'ekonomija tas-suq għall-iskop li jiġi stabbilit il-valur normali.

(23)

Ġew riċevuti kummenti dwar il-pajjiż analogi proposti mingħand l-uniku produttur esportatur tal-Belorussja li kkoopera. Huwa sostna li la l-Afrika t'Isfel u lanqas il-USA ma kienet għażla adegwata bħala pajjiż analogu minħabba li, fost raġunijiet oħra, il-kapaċità ta' produzzjoni, l-ammont attwali tal-produzzjoni, il-proċess ta' produzzjoni fl-Afrika t'Isfel u fil-USA kienu differenti meta mqabbla ma dawk tal-produtturi tal-Belarussja. Barra minn hekk, din il-parti sostniet li l-produtturi domestiċi fl-Afrika t'Isfel u l-USA identifikati mill-ilmentaturi kienu direttament relatati mal-produtturi tal-Unjoni. Għaldaqstant, l-imparzjalità tad-dejta miġbura f'dawn il-pajjiżi minn dawn it-tali produtturi tista' tiġi attakkata. Din il-parti pproponiet li r-Russja kienet tkun l-aktar għażla adegwata bħala pajjiż analogu minħabba li l-industrija tal-vireg tal-azzar Russa għandha l-aktar livell simili ta' żvilupp meta mqabbla ma' dik tal-Belarussja, il-proċess ta' produzzjoni huwa bbażat ukoll fuq fdalijiet tal-metall u l-vireg tal-azzar prodotti huma simili fejn jidħlu l-kwalità u l-ispeċifikazzjonijiet tekniċi. Madankollu, il-Kummissjoni nnutat li din il-parti ma provdietx evidenza li turi li l-produtturi tal-Afrika t'Isfel jew tal-USA ma kinux qed jużaw fdalijiet tal-metall biex jipproduċu l-prodott ikkonċernat jew li fl-istruttura tal-kosti tagħhom il-materja prima ma kinitx tirrappreżenta 60 %–70 % tal-kost tal-produzzjoni. F'kull każ, il-Kummissjoni investigat jekk l-Afrika t'Isfel u l-USA (kif ukoll il-Brażil) setgħux jitqiesu bħala pajjiż analogu. Id-dettalji ta' din l-analiżi jinstabu fil-premessi (28) sa (34).

(24)

Bil-għan li jintgħażel pajjiż analogu terz b'ekonomija tas-suq, il-Kummissjoni kkuntattjat lill-produtturi magħrufa kollha mhux biss fl-Afrika t'Isfel u fil-USA, iżda wkoll fit-Turkija, l-Ukraina, il-Federazzjoni Russa, il-Bożnija-Ħerzegovina, il-Messiku, il-Korea, ir-Repubblika Dominikana, in-Norveġja u fl-Isvizzera. Il-Kummissjoni talbet informazzjoni dwar is-suq domestiku tagħhom u biex jirrappurtaw dwar it-tip ta' prodotti manifatturati, il-kapaċità ta' produzzjoni, il-volum tal-produzzjoni, il-volum ta' bejgħ fuq is-suq domestiku, li jiddeskrivu l-proċess ta' produzzjoni, it-tip ta' materja prima użata, is-sehem ta' materja prima, l-ispejjeż għall-enerġija u għax-xogħol fi ħdan il-kosti totali tal-manifattura tal-prodott ikkonċernat, u fl-aħħar nett dwar ir-rieda tagħhom li jikkooperaw fl-investigazzjoni.

(25)

Barra minn hekk, l-awtoritajiet tal-pajjiżi terzi msemmija hawn fuq ġew ikkuntattjati.

(26)

L-awtoritajiet Russi infurmaw lill-Kummissjoni li l-ebda wieħed mill-produtturi magħrufa Russi jew l-assoċjazzjonijiet tagħhom ma urew interess f'din l-investigazzjoni. Għalhekk, fin-nuqqas ta' kooperazzjoni minn kwalunkwe produttur Russu, ir-Russja ma tistax titqies bħala analogu.

(27)

Tliet produtturi biss wieġbu għall-istħarriġ inizjali. Dawn kienu jinsabu fil-Brażil, l-Afrika t'Isfel u fil-USA. Il-produtturi tal-Afrika t'Isfel u tal-Istati Uniti kienu relatati ma' uħud mill-applikanti. Il-produttur Brażiljan kien jifforma parti minn grupp ta' kumpaniji li kellhom faċilitajiet ta' produzzjoni f'diversi pajjiżi, inklużi l-USA, il-Messiku u r-Repubblika Dominikana. Dan il-produttur ma kienx relatat ma' dawk li għamlu l-ilment.

(28)

It-tliet tweġibiet ġew eżaminati b'rabta mal-ilment u mal-kummenti riċevuti. Instab li l-konsum domestiku fl-Afrika t'Isfel huwa relattivament żgħir, madwar 435 000 tunnellata biss, li l-kapaċità ta' produzzjoni tal-produttur tal-Afrika ta' Isfel huwa madwar 10 % tal-produttur tal-Belarussja, u l-materja prima ewlenija użata huwa l-mineral tal-ħadid filwaqt li l-produttur esportatur tal-Belarussja juża l-fdalijiet tal-metall. Għalhekk, il-Kummissjoni ddeċidiet li twarrab l-Afrika t'Isfel bħala pajjiż analogu potenzjali.

(29)

Il-Brażil għandu konsum domestiku ta' madwar 3,5 miljun tunnellata u importazzjonijiet (li madwar 95 % minnhom joriġinaw mit-Turkija), soġġetti għal dazju ad valorem ta' 12 %, li jirrappreżenta madwar 5,5 % tal-konsum Brażiljani. Il-proċess ta' produzzjoni tal-produttur li offra li jikkopera huwa bbażat fuq il-fdalijiet tal-metall u ħadid mhux maħdum, filwaqt li l-produttur esportatur tal-Belarussja juża prinċipalment fdalijiet tal-metall u l-volum ta' produzzjoni tiegħu huwa madwar 50 % tal-produttur tal-Belarussja.

(30)

Il-konsum domestiku tal-USA kien ta' madwar 7,7 miljun tunnellata. Kien hemm mill-anqas tmien produtturi domestiċi. Kien hemm fis-seħħ restrizzjonijiet fuq l-importazzjonijiet (6) iżda l-importazzjonijiet kienu madankollu jirrappreżentaw madwar 23 % tal-konsum totali, prinċipalment b'oriġini mit-Turkija u l-Ġappun. Il-produttur Amerikan kien juża proċess ta' produzzjoni simili għal dak użat mill-produttur tal-Belarussja. Il-volum tal-produzzjoni tiegħu kien ta' madwar 52 % ta' dak tal-produttur tal-Belarussja.

(31)

Fuq il-bażi ta' din l-analiżi, il-Kummissjoni qieset li s-sitwazzjoni tas-suq kif tinsab fil-Brażil u fil-USA hija biżżejjed kompetittiva. Għalhekk, il-Kummissjoni ddeċidiet li tagħżel lill-Brażil u lill-USA bħala pajjiż analogu potenzjali.

(32)

Il-kwestjonarji għall-pajjiż analogu ġew mibgħuta liż-żewġ produtturi li kkooperaw imsemmija hawn fuq. Madankollu, wara li rċieva l-kwestjonarju għall-pajjiż analogu, il-produttur Brażiljan informa lill-Kummissjoni bid-deċiżjoni tiegħu li jirtira l-kooperazzjoni tiegħu fl-investigazzjoni. Il-Kummissjoni rċeviet reazzjoni xieraq mill-produttur tal-USA.

(33)

Il-Kummissjoni osservat li l-produttur tal-USA li kien qed jikkoopera kien relatat ma' wieħed mill-ilmentaturi, kif allegat minn produttur esportatur fil-Belarussja. Madankollu, anki jekk produttur fil-pajjiż analogu ikun relatat ma' produttur tal-Unjoni, rabta bħal din la tinvalida u lanqas taffettwa d-determinazzjoni tal-valur normali (7).

(34)

F'dan l-istadju tal-proċediment il-Kummissjoni kkonkludiet li l-USA huwa pajjiż analogu xieraq skont l-Artikolu 2(7)(a) tar-Regolament bażiku.

(35)

L-informazzjoni li waslet mingħand il-produttur fil-pajjiż analogu li kkoopera ntużat bħala bażi għad-determinazzjoni tal-valur normali, skont l-Artikolu 2(7)(a) tar-Regolament bażiku.

(36)

L-ewwel nett, il-Kummissjoni eżaminat jekk, b'mod konformi mal-Artikolu 2(2) tar-Regolament bażiku, il-volum totali tal-bejgħ tal-prodott simili lil klijenti indipendenti fil-USA kienx globalment rappreżentattiv. Għal dan l-għan, dan il-volum totali tal-bejgħ ġie mqabbel mal-volum totali tal-prodott ikkonċernat esportat mill-produttur esportatur tal-Belarussja lejn l-Unjoni. Fuq dik il-bażi, il-Kummissjoni sabet li l-prodott simili kien inbiegħ fi kwantitajiet rappreżentattivi fis-suq tal-USA.

(37)

It-tieni, il-Kummissjoni identifikat dawk it-tipi ta' prodotti mibjugħa domestikament mill-produttur tal-pajjiż analogu li kienu identiċi jew direttament paragunabbli mat-tipi mibjugħa għall-esportazzjoni lejn l-Unjoni mill-produttur esportatur tal-Belarussja. Hija qabblet, fuq bażi ta' tip ta' prodott, il-volumi ta' bejgħ fil-USA mal-esportazzjonijiet mill-produttur esportatur tal-Belarussja lejn l-Unjoni. Dan it-tqabbil wera li t-tipi kollha tal-prodott ġew mibjugħa fi kwantitajiet rappreżentattivi fil-USA.

(38)

Sussegwentement, il-Kummissjoni eżaminat għall-produttur tal-pajjiż analogu jekk kull tip ta' prodott ikkonċernat li kien jinbiegħ fis-suq domestiku setax jitqies li kien jinbiegħ fit-tmexxija ordinarja tal-kummerċ kif iddefinita fl-Artikolu 2(4) tar-Regolament bażiku. Dan sar billi gћal kull tip ta' prodott ġie stabbilit il-proporzjon tal-bejgћ bi qligħ lil klijenti indipendenti fis-suq domestiku matul il-perjodu tal-investigazzjoni. It-tranżazzjonijiet tal-bejgħ tqiesu bħala profittabbli meta l-prezz unitarju kien ugwali jew ogħla mill-ispiża tal-produzzjoni. L-ispiża tal-produzzjoni ta' kull tip ta' prodott tal-produttur tal-USA matul il-perjodu ta' investigazzjoni ġiet b'hekk determinata.

(39)

Fejn il-volum tal-bejgħ ta' tip ta' prodott, mibjugħ bi prezz tal-bejgħ nett daqs jew ogħla mill-kost tal-produzzjoni kkalkulat, kien jirrappreżenta aktar minn 80 % tal-volum tal-bejgħ totali ta' dak it-tip, u fejn il-prezz tal-bejgħ medju peżat ta' dak it-tip kien daqs jew ogħla mill-kost tal-produzzjoni, il-valur normali kien ibbażat fuq il-prezz domestiku attwali. Dan il-prezz kien ikkalkulat bħala medja peżata tal-prezzijiet tal-bejgħ domestiku kollu ta' dak it-tip, li sar matul il-perjodu tal-investigazzjoni. Fil-każ tat-tipi ta' prodott mibjugħa mill-produttur tal-pajjiż analogu, il-volum tal-bejgħ bi profitt ta' tipi ta' prodott kien jirrappreżenta 80 % jew aktar tal-volum totali tal-bejgħ ta' dak it-tip.

(40)

Fl-aħħar nett, it-tipi kollha ta' prodott esportati mill-Belarussja lejn l-Unjoni kienu wkoll mibjugħa fl-Istati Uniti. Għaldaqstant, ma kien hemm l-ebda ħtieġa biex jiġi kostruwit il-valur normali għal xi tip tal-prodott esportat.

(41)

Il-produttur esportatur li kkoopera tal-Belarussja esporta lejn l-Unjoni jew permezz ta' negozjanti relatati li jinsabu fl-Awstrija, il-Litwanja, il-Polonja, il-Ġermanja u l-USA jew biegħ direttament lill-ewwel klijent indipendenti. Kif indikat fil-premessa (13) hawn fuq, it-tliet negozjanti relatati ewlenin kollha ġew verifikati fuq il-post.

(42)

Rigward il-bejgħ dirett mill-produttur esportatur lill-ewwel konsumaturi indipendenti, il-prezz tal-esportazzjoni kien il-prezz attwalment imħallas jew li jrid jiġi mħallas għall-prodott ikkonċernat meta jkun mibjugħ għall-esportazzjoni lejn l-Unjoni, b'konformità mal-Artikolu 2(8) tar-Regolament bażiku.

(43)

Għall-bejgħ li sar permezz ta' negozjanti relatati li jaġixxu bħala importaturi, il-prezz tal-esportazzjoni ġie stabbilit fuq il-bażi tal-Artikolu 2(9) tar-Regolament bażiku. F'dan il-każ, l-aġġustamenti tal-prezz saru għall-kostijiet kollha mġarrba bejn l-importazzjoni u l-bejgħ mill-ġdid, li jinkludu l-bejgħ, l-ispejjeż ġenerali u amministrattivi (spejjeż SG&A) (li jvarjaw minn madwar 1 % għal 2,5 %) u għal marġini raġonevoli ta' qligħ għan-negozjanti involuti fil-bejgħ (inqas minn 1 %).

(44)

Il-Kummissjoni qabblet il-valur normali u l-prezz tal-esportazzjoni tal-produttur esportatur fil-kampjun fuq il-bażi tal-prezz mill-fabbrika.

(45)

Meta kienet iġġustifikata bil-ħtieġa ta' tqabbil ġust, il-Kummissjoni aġġustat il-valur normali u/jew il-prezz tal-esportazzjoni għad-differenzi li jaffettwaw il-prezzijiet u l-komparabilità tal-prezz, b'konformità mal-Artikolu 2(10) tar-Regolament bażiku.

(46)

Rigward il-prezzijiet tal-esportazzjoni tal-produttur esportatur, saru aġġustamenti għall-ispejjeż tat-trasport, l-assigurazzjoni u t-tqandil (li jvarjaw minn madwar 4 % sa 7,5 % skont in-negozjant relatat ikkonċernat jew il-produttur esportatur), l-ispejjeż ta' kreditu u l-ispejjeż bankarji (li jvarjaw minn 0 % sa 1,5 % skont in-negozjant relatat ikkonċernat jew il-produttur esportatur), li jirrappreżentaw b'kollox madwar 8 % tal-valur tal-bejgħ. Dwar il-prezzijiet domestiċi tal-produttur tal-pajjiż analogu, saru aġġustamenti għall-ispejjez tat-trasport domestiku u t-trattament (medja ta' 5,3 % tal-valur tal-bejgħ), kif ukoll l-ispejjeż tal-kreditu (b'rata annwali ta' 1,15 %).

(47)

Il-paragun sar għal 100 % tat-tipi tal-prodott esportati u mibjugħa lejn l-Unjoni mill-produttur esportatur tal-Belarussja u l-kummerċjanti relatati tiegħu.

(48)

Matul seduta li saret fl-14 ta' Ottubru 2016, ir-rappreżentanti tal-produttur esportatur tal-Belarussja allegaw li l-valur normali għandu jiġi aġġustat biex jirrifletti l-prezzijiet medji tax-xiri tal-fdalijiet u l-proporzjon tal-konsum tiegħu fil-produzzjoni tal-prodott ikkonċernat mill-Belarussja.

(49)

L-ewwel nett il-Kummissjoni tenfasizza li l-valur normali ma kienx kostruwit, imma kien ibbażat biss fuq il-bejgħ, b'tali mod li aġġustament bħal dan huwa eskluż fil-livell tal-istabbiliment tal-valur normali.

(50)

It-tieni, il-Kummissjoni tifhem li din il-kumpanija jista' jkun li xtaqet tqajjem il-kwistjoni ta' paragum ġust u għalhekk analizzat din l-allegazzjoni skont l-Artikolu 2(10)(k). L-investigazzjoni wriet li l-produttur esportatur tal-Belarussja xtara fdalijiet ta' materjal jew minn fornituri lokali jew minn fornituri Russi.

(51)

Il-Kummissjoni tinnota li, bħala pajjiż b'ekonomija mhux tas-suq, il-prezzijiet u l-ispejjeż fil-Belarussja jitqiesu bħala distorti. B'hekk, il-konċessjoni ta' aġġustamenti li jistrieħu fuq il-prezzijiet u l-ispejjeż tal-Belarussja, kif ukoll fuq il-proporzjoni li jirriżulta tal-konsum, ikun ifisser li jkun qiegħed jintuża l-prezz distort tal-Belarussja. Għalhekk il-Kummissjoni ċaħdet din l-allegazjoni f'dan ir-rigward. Anki kieku l-Kummissjoni kellha tagħti prova tad-distorsjoni konkreta tal-prezzijiet tal-Belarussja, il-Kummissjoni tosserva li l-ilment stabbilixxa prima facie li t-tali distorsjonijiet jeżistu, u li l-esportatur tal-Belarussja ma pprovdiex evidenza sostanzjata biex jiddisputa dawn l-allegazzjonijiet.

(52)

Fir-rigward tal-fdalijiet importati mir-Russja l-Kummissjoni osservat matul l-investigazzjoni li l-prezz tal-materja prima fil-USA u fil-Federazzjoni Russa huwa simili (8). Barra minn dan, l-investigazzjoni uriet li l-proporzjon tal-fdalijiet fil-USA huwa simili għal dak li rrapporta l-produttur esportatur tal-Belarussja, jiġifieri bejn 60 u 70 %. Għalhekk, il-Kummissjoni kkonkludiet b'mod provviżorju li l-prezz għax-xiri tal-fdalijiet fil-USA ma jaffettwax il-komparabbiltà tal-prezzijiet. Din l-allegazzjoni ġiet miċħuda b'mod provviżorju.

(53)

Għall-produttur esportatur li kkoopera il-Kummissjoni qabblet il-valur normali medju peżat ta' kull tip ta' prodott simili fil-pajjiż analogu (ara l-premessa (47) iktar 'il fuq) mal-prezz tal-esportazzjoni medju peżat tat-tip korrispondenti tal-prodott ikkonċernat, skont l-Artikolu 2(11) u (12) tar-Regolament bażiku. Fuq il-bażi ta' dan, il-marġnijiet medji ponderati ta' dumping proviżorji espressi bħala perċentwal tal-prezz CIF fil-fruntiera tal-Unjoni, bid-dazju mhux imħallas, huma 58,4 %.

(54)

Il-livell ta' kooperazzjoni huwa għoli minħabba li l-importazzjonijiet tal-produttur esportatur li kkoopera jammontaw għat-totalità tal-esportazzjonijiet lejn l-Unjoni matul il-perjodu tal-investigazzjoni. Fuq din il-bażi, il-Kummissjoni ddeċidiet li tibbaża l-marġni ta' dumping residwu fil-livell tal-produttur esportatur li kkoopera bl-ogħla marġni ta' dumping.

(55)

Il-marġnijiet provviżorji tad-dumping mogħtija bħala perċentwal tal-prezz CIF fil-fruntiera tal-Unjoni, bid-dazju mhux imħallas, huma kif ġej:

(56)

Il-prodott simili kien immanifatturat minn 31 produttur tal-Unjoni. Dawn huma meqjusin li jikkostitwixxu l-industrija tal-Unjoni skont l-Artikolu 4(1) u l-Artikolu 5(4) tar-Regolament bażiku u għandhom minn hawn 'il quddiem jissejħu “l-industrija tal-Unjoni”.

(57)

L-informazzjoni kollha disponibbli rigward l-industrija tal-Unjoni, bħall-informazzjoni ppreżentata fl-ilment, id-dejta miġbura mill-produtturi tal-Unjoni u l-assoċjazzjoni tagħhom qabel u wara l-bidu tal-investigazzjoni, u t-tweġibiet tal-kwestjonarju tal-produtturi tal-Unjoni mdaħħla fil-kampjun, intużaw sabiex tiġi stabbilita l-produzzjoni totali tal-Unjoni għall-perjodu tal-investigazzjoni.

(58)

Abbażi ta' dan, il-produzzjoni totali tal-Unjoni kienet stmata li hija madwar 12,7 miljun tunnellata matul il-PI. Din iċ-ċifra tinkludi l-produzzjoni tal-produtturi kollha tal-Unjoni, kemm tal-produtturi inklużi fil-kampjun kif ukoll il-produtturi li ma humiex, ikkalkulata abbażi tad-dejta verifikata ppreżentata mill-ilmentatur.

(59)

Kif indikat fil-premessa (8) ta' hawn fuq, il-ħames produtturi tal-Unjoni inklużi fil-kampjun jirrappreżentaw 22,4 % tal-produzzjoni totali stmata fl-Unjoni tal-prodott simili. F'dan ir-rigward, għandu jitqies li l-produzzjoni tal-Unjoni tal-prodott ikkonċernat hija frammentata ħafna, u dan jintwera mill-għadd kbir ta' produtturi tal-Unjoni msemmija fil-premessa (56) u għalhekk il-kampjun ta' ħames (5) produtturi huwa rappreżentattiv tal-industrija tal-Unjoni.

(60)

Il-produttur esportatur tal-Belarussja allega li ma kienx hemm biżżejjed evidenza prima facie tal-eżistenza ta' dannu fl-ilment, li għalhekk ma kellux jiġi aċċettat. L-argument idur b'mod partikolari fuq preżentazzjoni żbaljata fl-ilment tal-ispejjeż allegatament artifiċjalment irħas tal-akkwist tal-fdalijiet li minnhom jibbenefika l-produttur esportatur. Il-produttur tal-Belarussja allega li tali miżrappreżentazzjoni tinvalida l-ilment għal kollox.

(61)

Kif imsemmi fil-premessa (19) hawn fuq, il-Belarussja huwa pajjiż b'ekonomija mhux tas-suq u, b'riżultat ta' dan, il-valur normali ġie ddeterminat fuq il-bażi tal-metodoloġija tal-pajjiż analogu. Għalhekk ma kienet meħtieġa l-ebda determinazzjoni dwar jekk il-fdalijiet kinux akkwistati bi prezzijiet artifiċjalment baxxi mill-produttur tal-Belarussja. Il-Kummissjoni ma tarax is-sustanza jew ir-rilevanza ta' din l-allegazzjoni u lanqas ma tara r-rilevanza tagħha fl-istabbiliment tad-dannu għall-industrija tal-Unjoni.

(62)

Il-konsum tal-Unjoni ġie stabbilit abbażi tal-volum tal-bejgħ totali tal-industrija tal-Unjoni fis-suq tal-Unjoni u tal-importazzjonijiet totali. Il-konsum tal-Unjoni naqas bejn is-senin 2012 u 2013, iżda reġa' laħaq il-livell tal-2012 tiegħu fl-2014 u kompla jiżdied b'mod moderat fil-PI. Il-konsum tal-Unjoni żdied kumplessivament bi 3 % tul il-perjodu kkunsidrat.

(63)

Ġie kkostatat li l-iżvilupp rigward l-importazzjonijiet lejn l-Unjoni mill-Belarussja matul il-perjodu kkunsidrat kien kif ġej:

(64)

Il-volumi tal-importazzjoni mill-Belarussja kważi ttripplika matul il-perjodu kkunsidrat. Is-sehem mis-suq tal-importazzjonijiet mill-Belarussja ukoll żdied matul il-perjodu kkunsidrat, minn 1.8 % fl-2012 għal 5 % fil-PI.

(65)

It-tabella ta' hawn taħt turi l-prezz medju tal-importazzjonijiet mill-Belarussja:

(66)

Il-prezzijiet medji tal-importazzjonijiet mill-Belarussja naqsu matul il-perjodu kkunsidrat, wara tnaqqis fil-prezzijiet tal-fdalijiet, li jintuża bħala materja prima kemm fil-Belarussja kif ukoll fl-Unjoni. Madankollu, it-tnaqqis ta' 25 % fil-prezzijiet ta' esportazzjonijiet mill-Belarussja lejn l-UE kien akbar mit-tnaqqis fil-prezzijiet tal-produtturi tal-Unjoni fil-kampjun u tal-prezzijiet medji ta' esportaturi maġġuri oħrajn tal-prodott ikkonċernat lejn l-Unjoni matul l-istess perjodu. B'riżultat ta' dan, matul il-PI, il-prezzijiet tal-importazzjonijiet mill-Belarussja kienu aktar baxxi mill-prezzijiet tal-produtturi tal-Unjoni u mill-prezzijiet medji tal-importazzjonijiet minn xi wieħed mill-pajjiżi terzi ewlenin l-oħra preżenti fis-suq.

(67)

Sabiex jiġi ddeterminat jekk kienx hemm twaqqigħ fil-prezz matul il-PI, u sa liema punt, il-prezzijiet tal-bejgħ b'medja ponderata għal kull tip ta' prodott tal-produtturi tal-Unjoni inklużi fil-kampjun mitluba lill-klijenti mhux relatati fis-suq tal-Unjoni, u aġġustati għal livell mill-fabbrika billi tnaqqsu l-ispejjeż reali tal-konsenja (0,5 %-5 %), tas-senseriji (0 %-1,5 %), skonti (0,9 %-2,3 %) u l-ispejjeż ta' kreditu (0,2 %-0,5 %), ġew mqabbla mal-prezzijiet medji ponderati korrispondenti skont it-tip tal-importazzjonijiet oġġett ta' dumping mill-produttur tal-Belarussja lill-ewwel klijent indipendenti fis-suq tal-Unjoni, stabbiliti fuq bażi CIF.

(68)

Ir-riżultat tat-tqabbil, meta mniżżel bħala perċentwal tal-fatturat tal-produtturi tal-Unjoni fil-kampjun matul il-PI wera marġni ta' twaqqigħ tal-prezzijiet ta' 4,5 %. Il-prezzijiet aktar baxxi tal-importazzjonijiet oġġett ta' dumping meta mqabblin ma' dawk tal-Unjoni, jispjegaw iż-żieda sinifikanti fil-volum tal-importazzjonijiet mill-Belarussja u fis-sehem tas-suq miżmum mill-importazzjonijiet mill-Belarussja mill-2014 'l quddiem.

(69)

Il-produttur esportatur tal-Belarussja ppreżenta ċerti dokumenti għat-tqabbil tal-prezzijiet tal-bejgħ tal-produtturi Pollakki u tal-Belarussja bl-għan li jsostni li l-prezzijiet tal-Belarussja kienu fil-fatt ogħla matul il-PI mill-prezzijiet tal-produtturi tal-Unjoni. F'dan ir-rigward ta' min ifakkar li l-kalkoli tat-twaqqigħ tal-prezzijiet kif ukoll il-mikroindikaturi rigward il-livell tal-prezzijiet huma bbażati fuq id-dejta miġbura mill-produtturi mill-Unjoni fil-kampjun filwaqt li d-dejta ppreżentata mill-kumpanija tal-Belarussja msemmija rreferiet għal produtturi Pollakki mhux fil-kampjun. Għalhekk, id-dejta ppreżentta ma għandha l-ebda effett fuq il-kostatazzjonijiet tal-Kummissjoni għar-rigward tat-twaqqigħ tal-prezzijiet u tax-xejriet tal-indikaturi makroekonomiċi matul il-perjodu kkunsidrat kif deskritt fil-premessa (83). Barra minn hekk, din hija dejta aggregata tal-kumpaniji kollha fil-kampjun u tat-tranżazzjonijiet ta' bejgħ mhux relatati kollha tagħhom li huma meħuda f'kunsiderazzjoni sabiex jiġi stabbilit it-twaqqigħ tal-prezzijiet u x-xejriet tal-mikroindikaturi. Madankollu, il-Kummissjoni tikkonferma li matul il-PI il-prezzijiet tal-Belarussja kienu qegħdin taħt dawk ta' kull wieħed mill-produtturi tal-UE inklużi fil-kampjun.

(70)

Skont l-Artikolu 3(5) tar-Regolament bażiku, l-analiżi tal-impatt tal-importazzjonijiet li huma oġġett ta' dumping mill-Belarussja fuq l-industrija tal-Unjoni inkludew evalwazzjoni tal-fatturi ekonomiċi kollha li influwenzaw l-istat tal-industrija tal-Unjoni matul il-perjodu kkonċernat.

(71)

Kif imsemmi fil-premessa (59), il-kampjunar intuża għall-analiżi tad-dannu possibbilment imġarrab mill-industrija tal-Unjoni.

(72)

Sabiex jiġi analizzat id-dannu, il-Kummissjoni għamlet distinzjoni bejn l-indikaturi tad-dannu makroekonomiċi u dawk mikroekonomiċi. F'dan ir-rigward, is-sitwazzjoni ekonomika tal-industrija tal-Unjoni hija vvalutata abbażi ta' (a) indikaturi makroekonomiċi, jiġifieri l-produzzjoni, il-kapaċità tal-produzzjoni, l-użu tal-kapaċità, il-volum tal-bejgħ, is-sehem mis-suq u t-tkabbir, l-impjiegi, il-produttività, id-daqs tal-marġni ta' dumping attwali u l-irkupru minn dumping imgħoddi, li għalihom id-dejta nġabret fil-livell tal-industrija totali tal-Unjoni u fuq il-bażi ta' (b) indikaturi mikroekonomiċi, jiġifieri l-prezzijiet medji tal-unità, il-kost ta' unità, il-profittabilità, il-fluss tal-flus, l-investimenti, ir-redditu fuq l-investimenti u l-abbiltà li jiżdied il-kapital, l-istokks u l-kost lavorattiv, li għalihom id-dejta kienet miġbura fil-livell tal-produtturi tal-Unjoni inklużi fil-kampjun.

(73)

L-informazzjoni kollha disponibbli rigward l-industrija tal-Unjoni, inkluża l-informazzjoni pprovduta fl-ilment, id-dejta miġbura mill-produtturi tal-Unjoni qabel u wara t-tnedija tal-investigazzjoni, u t-tweġibiet tal-kwestjonarju tal-produtturi tal-Unjoni inklużi fil-kampjun, intużat sabiex tistabbilixxi indikaturi makroekonomiċi, u b'mod partikolari d-dejta li għandha x'taqsam ma' produtturi tal-Unjoni mhux inklużi fil-kampjun.

(74)

L-indikaturi mikroekonomiċi ġew stabbiliti fuq il-bażi tal-informazzjoni li ngħatat mill-produtturi tal-Unjoni inklużi fil-kampjun fir-risposti tagħhom għall-kwestjonarju.

(75)

Ix-xejriet għal produzzjoni tal-Unjoni, il-kapaċità tal-produzzjoni u l-użu tal-kapaċità żviluppaw kif ġej matul il-perjodu kkunsidrat:

(76)

Tul il-perjodu kkunsidrat il-volum tal-produzzjoni tal-Unjoni naqas b'5 %. Fil-kunsiderazzjoni tal-fatt li l-kapaċità tal-produzzjoni baqgħet kostanti matul dan il-perjodu, it-tnaqqis fil-produzzjoni wassal għal tnaqqis fl-użu tal-kapaċità b'4 punti perċentwali minn 71 % fl-2012 għal 67 % fil-PI.

(77)

Il-bejgħ tal-produtturi tal-Unjoni inkluda bejgħ lil kumpaniji relatati. Dan il-bejgħ lil kumpaniji relatati kien jirrappreżenta, matul il-perjodu kkunsidrat, madwar 10 % tal-konsum tal-Unjoni. Il-volum tal-bejgħ, is-sehem mis-suq u t-tkabbir ġew għalhekk ivvalutati separatament għall-bejgħ relatat u għas-suq ħieles (il-bejgħ mhux relatat). F'dak li jirrigwarda l-bejgħ relatat huwa kkonfermat li dawn huma diretti lejn l-utenti relatati u mhux lejn il-kumpaniji tan-negozju relatati u għalhekk mhumiex magħduda darbtejn fil-kalkolu tal-konsum totali tal-Unjoni.

(78)

Ix-xejriet rigward il-volumi tal-bejgħ, is-sehem mis-suq u t-tkabbir żviluppaw kif ġej matul il-perjodu kkunsidrat:

(79)

Il-volum tal-bejgħ tal-industrija tal-Unjoni lil klijenti mhux relatati naqas b'6 % fil-perjodu kkonċernat, sitwazzjoni riflessa anki fit-tnaqqis ta' 7 punti perċentwali mis-sehem fis-suq bejn l-2012 u l-PI. Dan seħħ minkejja żieda fil-konsum fis-suq tal-Unjoni fl-istess perjodu. Bejn l-2012 u l-2013 kien hemm tnaqqis fil-volumi tal-bejgħ meta x-xejra tal-volumi tal-bejgħ segwiet eżattament ix-xejra fil-konsum — u l-industrija tal-Unjoni kienet kapaċi żżomm l-istess sehem mis-suq. Madankollu, fil-perjodu bejn l-2013 u l-PI, is-sitwazzjoni nbidlet kompletament. Is-suq tal-Unjoni kiber b'10 % f'dan il-perjodu u fl-istess waqt l-industrija tal-Unjoni tilfet 7 punti perċentwali mis-sehem tagħha fis-suq. Fl-istess ħin il-volum tal-importazzjonijiet mill-Belarussja u s-sehem mis-suq tagħhom żdied b'rata mgħaġġla. Dan juri li l-industrija tal-Unjoni ma setgħetx tibbenefika mit-tkabbir fil-konsum tal-Unjoni minħabba ż-żieda, li qiegħda tiżdied, fis-sehem mis-suq tal-importazzjonijiet oġġett ta' dumping.

(80)

Konformi mat-tnaqqis fil-produzzjoni u l-bejgħ, kien osservat li l-livell tal-impjiegi fl-industrija tal-Unjoni ukoll naqas bi 2 % bejn l-2012 u l-PI. Madankollu, dan it-tnaqqis fl-impjiegi ma wassalx għal żieda fil-produttività, imkejla bħala l-produzzjoni kull persuna impjegata kull sena, peress li t-tnaqqis fil-volum tal-produzzjoni fil-perjodu kkunsidrat kien aktar qawwi mit-tnaqqis fl-impjiegi.

(81)

Il-marġni ta' dumping tal-produttur esportatur tal-Belarussja huma konsiderevoli (ara l-premessa (55) hawn fuq). Meta jitqiesu l-volum, is-sehem mis-suq u l-prezzijiet tal-importazzjonijiet oġġett ta' dumping mill-Belarussja, diskussi hawn fuq, l-impatt tal-marġnijiet effettivi tad-dumping fuq l-industrija tal-Unjoni ma jistax jitqies li huwa negliġibbli.

(82)

Billi preċedentement ma kienet saret l-ebda sejba ta' importazzjonijiet soġġetti ta' dumping tal-prodott, l-industrija tal-Unjoni mhix qiegħda tirkupra minn xi prassi preċedenti ta' dumping fir-rigward tal-prodott ikkonċernat.

(83)

Il-prezzijiet medji tal-bejgħ tal-produtturi tal-Unjoni fil-kampjun lill-klijenti mhux relatati kienu baxxi fl-ewwel parti tal-perjodu kkunsidrat (2012-2013) minħabba l-impatt tal- “iskema tal-frodi tal-VAT” (ara l-premessi (106) sa (111)). Fit-tieni parti tal-perjodu kkunsidrat (2014-PI),dawn kienu baxxi minħabba l-importazzjonijiet li huma l-oġġett ta' dumping mill-Belarussja. Matul il-perjodu kkunsidrat il-prezzijiet fl-Unjoni żdiedu bi 22 % mill-2012 sal-PI. It-tnaqqis fil-prezz jirrifletti xejra ġenerali ta' tnaqqis fil-kost tal-materja prima ewlenija madwar id-dinja. Madankollu, minħabba tnaqqis ulterjuri fil-prezzijiet eżerċitat mill-importazzjonijiet li huma l-oġġett ta' dumping mill-Belarussja, fejn it-tnaqqis fil-prezzijiet kien ikbar milli sempliċiment jirrifletti l-kost tal-materja prima, il-produtturi tal-Unjoni ma setgħux ireġġgħu lura l-prezzijiet imnaqqsa bl-iskema tal-frodi tal-VAT għal livelli normali u mhux distorti, biex jibbenefikaw mit-tnaqqis fil-kosti tal-materja prima ewlenija, iżda kellhom iżommu prezzijiet inqas milli taħt kompetizzjoni normali.

(84)

Matul il-perjodu kkunsidrat, il-kosti tal-industrija tal-Unjoni naqsu b'20 %, liema tnaqqis kien anqas minn tnaqqis fil-prezzijiet. Dan huwa spjegat permezz ta' kosti ogħla tal-enerġija u lavorattivi. Bħala riżultat, matul il-perjodu kkunsidrat, il-profitabilità tal-industrija tal-Unjoni marret għall-agħar.

(85)

Matul il-perjodu kkunsidrat, il-fluss tal-flus tal-produtturi tal-Unjoni, l-investiment, ir-redditu fuq l-investiment u l-kapaċità tagħhom li jiġġeneraw kapital żviluppaw kif ġej:

(86)

Il-profittabbiltà tal-produtturi tal-Unjoni fil-kampjun huwa espress bħala l-profitt nett qabel it-taxxa tal-prodott simili lil konsumaturi fl-Unjoni bħala perċentwali tal-fatturat ta' dak il-bejgħ. Il-produtturi tal-Unjoni fil-kampjun kienu qed jagħmlu profitt fl-2012 iżda bdew jagħmlu t-telf mill-2013 'il quddiem. Barra minn hekk, il-profittabbiltà tagħhom tilħaq l-anqas livell tagħha fil-PI, li tikkorrelata mal-ogħla volumi ta' importazzjonijiet mill-Belarussja u l-anqas livell tal-prezzijiet tagħha tul il-perjodu kollu kkunsidrat.

(87)

Il-fluss tal-flus, li hija l-kapaċità tal-industrija li tiffinanzja l-attivitajiet tagħha, għalkemm kien pożittiv matul il-perjodu kkunsidrat, mar lura matul il-perjodu kollu kkunsidrat.

(88)

Il-produtturi tal-Unjoni kienu għadhom jistgħu jinvestu matul il-perjodu kollu kkunsidrat iżda l-evoluzzjoni tal-profittabilità u l-likwidità affettwat negattivament ukoll l-investimenti li tul il-perjodu kkunsidrat naqsu b'29 %. Barra minn hekk, ir-redditu fuq l-investimenti huwa dejjem negattiv mill-2013'il quddiem skont ix-xejra fil-profittabbilità.

(89)

Fid-dawl ta' dak li ntqal hawn fuq, jista' jiġi konkluż li l-prestazzjoni finanzjarja tal-produtturi tal-Unjoni inklużi fil-kampjun kienet negattiva matul il-PI.

(90)

Il-livell ta' stokks tal-produtturi tal-Unjoni inklużi fil-kampjun żdied b'25 % matul il-perjodu kkunsidrat. Madankollu, il-proporzjon ta' stokks mal-volum ta' produzzjoni baqa' stabbli matul il-perjodu kkunsidrat (minn 1 % għal 1,5 %) — il-livell tal-istokks isegwi t-tendenza ta' tnaqqis fil-volum ta' produzzjoni.

(91)

Il-medja tal-kosti lavorattivi tal-produtturi tal-Unjoni inklużi fil-kampjun żdiedet modestament matul il-perjodu kkunsidrat. Il-kost lavorattiv kien jirrappreżenta anqas minn 10 % tal-kosti totali tal-produzzjoni. Għalhekk il-kost lavorattiv ma jirrappreżentax fattur determinanti fl-evoluzzjoni tal-kost tal-produzzjoni.

(92)

L-investigazzjoni wriet li l-industrija tal-Unjoni ma bbenefikatx miż-żieda fil-konsum matul il-perjodu kkunsidrat. Għall-kuntrarju, l-industrija tal-Unjoni sofriet tnaqqis ta' 6 % fil-volumi tal-bejgħ matul il-perjodu kkunsidrat u s-sehem mis-suq tagħha naqas b'6 punti perċentwali (fl-isfond ta' żieda ta' 3 % tal-konsum totali). Dawn ix-xejriet jidhru aktar b'mod ċar meta jittieħed f'kunsiderazzjoni l-perjodu mill-2013 sal-PI, meta l-volumi tal-importazzjonijiet mill-Belarussja kienu qegħdin jikbru b'mod rapidu u s-sehem tagħhom mis-suq kien qed jiżdied. Matul l-istess perjodu, l-industrija tal-Unjoni tilfet 7 punti perċentwali tas-sehem mis-suq, f'kuntest ta' żieda fil-konsum (+ 10 %). L-industrija tal-Unjoni ġarrbet ukoll tnaqqis ta' 5 % fil-produzzjoni matul il-perjodu kkunsidrat, li rriżulta fi tnaqqis fl-utilizzazzjoni tal-kapaċità minn 71 % għal 67 %.

(93)

Barra minn hekk, minħabba iżjed kompetizzjoni inġusta minn importazzjonijiet li huma l-oġġett ta' dumping, l-industrija tal-Unjoni kellha tnaqqas il-prezzijiet tagħha b'medja ta' 22 % fil-perjodu kkunsidrat li rriżulta fi tnaqqis minn profitt ta' 1,3 % fl-2012 għal telf ta' 2,1 % fil-PI minkejja t-tnaqqis tal-kosti u l-impjiegi.

(94)

Fl-aħħar nett, indikaturi finanzjarji oħra bħar-redditu fuq l-assi, il-likwidità u l-investimenti wkoll ġew affettwati b'mod negattiv matul il-perjodu kkunsidrat.

(95)

Fid-dawl ta' dak li ssemma, il-konklużjoni provviżorja hija li l-industrija tal-Unjoni sofriet dannu materjali skont l-Artikolu 3(5) tar-Regolament bażiku.

(96)

Skont l-Artikolu 3(6) u (7) tar-Regolament bażiku, il-Kummissjoni eżaminat jekk l-importazzjonijiet li kienu oġġett ta' dumping mill-Belarussja kkawżawx dannu lill-industrija tal-Unjoni sal-punt li jista' jiġi kkunsidrat bħala wieħed materjali. Il-fatturi magħrufin apparti l-importazzjonijiet oġġett ta' dumping, li fl-istess ħin jistgħu jkunu qegħdin jikkawżaw dannu lill-industrija tal-Unjoni, ġew eżaminati wkoll sabiex jiġi żgurat li d-dannu possibbli kkawżat minn dawn il-fatturi l-oħra ma kienx dovut għall-importazzjonijiet oġġett ta' dumping.

(97)

L-investigazzjoni wriet li l-konsum tal-Unjoni żdied b'3 % matul il-perjodu kkunsidrat u fl-istess ħin il-volum tal-importazzjonijiet li joriġinaw mill-Belarussja żdied b'mod sinifikanti. Matul l-aħħar sentejn tal-perjodu kkunsidrat, il-volum ta' importazzjonijiet mill-Belarussja u s-sehem tagħhom fis-suq tal-Unjoni żdied b'175 %. Iż-żieda fl-importazzjoniet oġġett ta' dumping ikkoinċidiet mat-tnaqqis fis-sehem mis-suq tal-industrija tal-Unjoni:

(98)

Fir-rigward tal-pressjoni fuq il-prezzijiet li teżisti fis-suq tal-Unjoni matul il-perjodu kkunsidrat, instab li l-prezzijiet medji tal-importazzjoni mill-Belarussja kienu qegħdin jonqsu b'mod mgħaġġel speċjalment fl-aħħar sentejn tal-perjodu kkunsidrat. Fl-PI, il-livell tal-prezzijiet ta' importazzjonijiet mill-Belarussja diġà kien aktar baxx mill-prezzijiet medji tal-bejgħ tal-industrija tal-Unjoni u mill-prezzijiet tal-bejgħ tal-importazzjonijiet minn pajjiżi terzi preżenti fis-suq tal-Unjoni.

(99)

Minħabba l-pressjoni fuq il-prezzijiet ikkawżata mill-volumi dejjem akbar tal-importazzjonijiet mill-Belarussja, l-industrija tal-Unjoni ma setgħetx tkopri l-ispejjeż tagħha.

(100)

Abbażi ta' dak li ntqal hawn fuq, il-konklużjoni hija, li ż-żieda tal-importazzjonijiet mill-Belarussja li huma oġġett ta' dumping bi prezzijiet li jwaqqgħu dawk tal-industrija tal-Unjoni, ikkawżaw id-dannu materjali li sofriet l-industrija tal-Unjoni.

(101)

Skont id-dejta tal-produtturi tal-Unjoni fil-kampjun, il-volumi tal-esportazzjonijiet lejn klijenti mhux relatati f'pajjiżi terzi naqsu b'5 % matul il-perjodu kkunsidrat. Għaldaqstant, jista' jiġi konkluż li din il-parti tal-attività ta' bejgħ tal-industrija tal-Unjoni ma setgħetx tkun il-kawża tad-dannu materjali misjub.

(102)

Il-bejgħ tal-Unjoni lil partijiet relatati żdied b'14 % matul il-perjodu kkunsidrat, b'livell ta' prezzijiet li kienu b'mod konsistenti ogħla minn dawk ta' bejgħ lil partijiet mhux relatati. Anki jekk dawn il-prezzijiet huma prezzijiet ta' trasferiment, jista' jiġi konkluż li din il-parti tal-attività ta' bejgħ tal-industrija tal-Unjoni ma setgħetx tkun il-kawża tad-dannu materjali misjub. Għall-kuntrarju, iż-żieda f'dan il-bejgħ u l-fatt li dawn il-prezzijiet huma ogħla mill-prezzijiet lil klijenti mhux relatati jindika li d-dannu li ġarrbet l-industrija tal-Unjoni seta' kien saħansitra aktar sostanzjali li kieku ma kienx għal dan il-bejgħ lill-partijiet relatati.

(103)

Għandu jiġi enfasizzat ukoll li l-marġni tat-twaqqigħ tal-prezzijiet u tan-nuqqas ta' bejgħ ġew stabbiliti billi tqabblu l-prezzijiet tal-importazzjoni mill-Belarussja mal-prezzijiet tal-bejgħ tal-produtturi tal-Unjoni lil klijenti mhux relatati. Għalhekk il-bejgħ lil kumpaniji relatati ma ħalliex effett biex jiġi stabbilit it-twaqqigħ tal-prezzijiet u n-nuqqas ta' bejgħ.

(104)

Matul il-perjodu kkunsidrat l-ishma individwali tas-suq tal-pajjiżi terzi żdiedu biss marġinalment bl-eċċezzjoni tal-Ukraina fejn iż-żieda fis-sehem mis-suq kienet sostanzjali f'termini relattivi iżda xorta s-sehem mis-suq ta' dan il-pajjiż f'termini assoluti kien negliġibbli. Ta' min jinnota wkoll li tul il-perjodu kkunsidrat il-prezzijiet tal-importazzjonijiet minn pajjiżi terzi kienu bħala medja dejjem ogħla mill-prezzijiet tal-industrija tal-Unjoni. L-uniku pajjiż esportatur bi prezzijiet medji aktar baxxi minn tal-industrija tal-Unjoni kien il-Belarussja fil-PI li kienet l-istess sena meta l-volumi tal-importazzjonijiet mill-Belarussja żdiedu b'mod l-aktar rapidu. Għalhekk, qegħda tinġibed il-konklużjoni li anki kieku l-importazzjonijiet minn pajjiżi terzi setgħu kellhom xi impatt fuq is-sitwazzjoni tal-industrija tal-Unjoni, l-importazzjonijiet mill-Belarussja b'mod ċar baqgħu l-kawża ewlenija tad-dannu.

(105)

Il-fattur ewlieni tal-kost fil-produzzjoni tal-prodott ikkonċernat huwa l-fdalijiet tal-ħadid u tal-azzar. Matul il-perjodu kkonċernat, il-prezz ta' din il-materja prima naqas madwar id-dinja. Il-produtturi tal-Unjoni li jipproduċu billetti mill-fdalijiet esperjenzaw tnaqqis fil-kost tal-materja prima ta' bejn 23 % u 32 % u l-produtturi tal-Unjoni li jużaw billetti bħala materja prima ta' madwar 24 %. Skont id-dejta mill-produtturi tal-Unjoni fil-kampjun, il-kost totali tal-manifattura tal-prodott ikkonċernat naqas b'20 % matul il-perjodu kkunsidrat, it-tnaqqis fil-prezzijiet tal-materja prima kien ibbilanċjat xi ftit, prinċipalment minn kosti lavorattivi ogħla (madwar 10 % bħala medja). Għaldaqstant, jista' jiġi konkluż li l-evoluzzjoni tal-kosti ma setgħetx tkun il-kawża tad-dannu materjali misjub. Min-naħa l-oħra minħabba t-tnaqqis fil-prezzijiet, l-aktar minħabba importazzjonijiet li huma l-oġġett ta' dumping mill-Belarussja, l-industrija tal-Unjoni ma setgħetx tibbenefika minn kostijiet li qegħdin jonqsu u dan it-tifdil fil-kosti ma kienx rifless fl-indikaturi finanzjarji tagħha.

(106)

Il-produttur esportatur tal-Belarussja allega li wieħed mill-fatturi importanti li jaffettwaw il-prestazzjoni tal-industrija tal-Unjoni matul il-perjodu kkunsidrat kienet l-hekk imsejħa “skema tal-frodi tal-VAT”. L-iskema affetwat l-aktar lis-suq Pollakk. Fl-2012 kien ġie organizzat il-kampjonat Ewropew tal-futbol f'dan il-pajjiż u, fil-mument, is-settur tal-kostruzzjoni kien qiegħed jiffjorixxi u d-domanda għall-iżbarri kienet għolja ħafna. Xi kummerċjanti bla skruplu kienu allegatament qegħdin joperaw fis-suq u ħadu vantaġġ minn din l-opportunità u stabbilew t-twaqqif ta' “karusell tal-frodi” tal-VAT. Inħolqu kumpaniji tal-isem fil-Polonja li jixtru l-iżbarri minn Stat Membru ieħor u jerġgħu jbiegħuhom fil-Polonja bil-VAT lokali tiġi imposta fuq il-fattura. Madankollu, dawn il-kumpanniji tal-isem qatt ma kienu jagħtu rendikont tal-VAT miġbura. Allegatament minħabba l-prezzijiet baxxi fis-suq Pollakk ikkawżati minn tali kumpaniji kummerċjali frawdulwenti, il-produtturi Pollakki tilfu sehem mis-suq u esperjenzaw telf finanzjarju.

(107)

Tabilħaqq, ġie kkonfermat li l-frodi tal-VAT deskritta hawn fuq kellha impatt kbir mill-akbar fuq is-suq tal-iżbarri fil-Polonja. Ħafna produtturi regolari tal-azzar kellhom iħabbtu wiċċhom ma' tnaqqis fil-prestazzjoni ekonomika tagħhom minħabba t-tħarbit fis-suq. Xi wħud mill-kumpaniji saħansitra ssospendew il-produzzjoni tal-iżbarri għal ftit ġimgħat fil-bidu ta' Jannar 2013 bħala riżultat ta' dawn l-attivitajiet illegali. Madankollu, għandu jiġi enfasizzat li ma hemmx koinċidenza bejn l-iskema tal-frodi tal-VAT u l-importazzjonijiet li huma l-oġġett ta' dumping mill-Belarussja fejn jolqot iż-żmien u l-impatt. L-iskema tal-frodi ntemmet meta l-Gvern Pollakk applika mekkaniżmi tal-VAT retroattivi mill-1 ta' Ottubru 2013. L-impatt tagħha huwa viżibbli fin-nuqqas f'daqqa tal-volumi tal-bejgħ u l-volumi tal-produzzjoni tal-industrija tal-Unjoni fl-2013. Madankollu, is-sitwazzjoni marret lura għan-normal fl-2014 filwaqt li fl-istess ħin il-fluss akbar ta' importazzjonijiet oġġett ta' dumping bdiet taffettwa b'mod negattiv il-livell tal-prezzijiet, is-sehem mis-suq u l-prestazzjoni finanzjarja tal-industrija tal-Unjoni. Għalhekk, l-impatt tal-frodi tal-VAT fuq il-qagħda ekonomika tal-manifatturi Pollakki huwa limitat għas-snin meta l-importazzjoni mill-Belarussja lejn is-suq tal-Unjoni kienet relattivament baxxa bħala volum u bi prezz relattivament għoli. Barra minn hekk ma kien hemm l-ebda konsegwenzi li jinfirxu fuq is-suq tal-iżbarri Pollakk meta l-frodisti temmew l-attivitajiet tagħhom. Dawn il-kostatazzjonijiet huma fil-fatt ikkonfermati mill-preżentazzjoni addizzjonali (u l-evidenza ta' sostenn) pprovduta mill-produttur esportatur tal-Belarussja dwar il-qagħda fis-suq Pollakk matul u wara li kienet attiva l-iskema tal-frodi tal-VAT. Għalhekk huwa ċar li din il-kwistjoni tista' tiġi separata mill-effetti ta' importazzjonijiet li huma l-oġġett ta' dumping u mhix qiegħda tikser ir-rabta kawżali bejn l-importazzjonijiet li huma l-oġġett ta' dumping mill-Belarussja u d-dannu mġarrab mill-industrija tal-Unjoni.

(108)

Il-produttur esportatur tal-Belarussja sostna wkoll li bħala riżultat ta' din l-iskema tal-frodi tal-VAT deskritta hawn fuq, ċerti kumpaniji produtturi li jinsabu fil-Latvja u fis-Slovakkja fallew. Il-kumpanija tindika għalhekk li x-xejriet negattivi fil-volumi ta' produzzjoni u ta' bejgħ tal-industrija tal-Unjoni huwa kkawżati mill-għajbien ta' ċerti kumpaniji mis-suq li mhux marbut mal-attività ta' esportazzjoni tal-produttur esportatur tal-Belarussja.

(109)

Għar-rigward ta' din l-allegazzjoni, għandu jiġi enfasizzat li l-istima tal-makroindikaturi murija fil-premessi (75) sa (82) ma ħaditx f'kunsiderazzjoni l-kumpanija li ma kinux jeżistru fil-PI. Għall-kumpaniji li ma rċevewx kwstjonarji, l-informazzjoni relevanti għall-makroindikaturi kienet stmata abbażi tal-produzzjoni attwali fil-PI. Għalhekk, l-għejbien tal-kumpaniji inkwistjoni mis-suq mhux rifless fl-indikaturi li juru l-iżvilupp negattiv fil-volumi ta' produzzjoni u tal-bejgħ tal-industrija tal-Unjoni. Għandu jiġi enfasizzat li kienu dawn kellhom jiġu kkunsidrati l-kwadru ġenerali tad-dannu kien ikun anki agħar.

(110)

Fl-aħħar nett, il-produttur esportatur tal-Belarussja ikkonċernat jallega li l-volumi u l-prezzijiet tal-importazzjoni tal-importazzjonijiet minn dan il-pajjiż fis-snin bejn l-2014 u l-PI mhumiex rappreżentattivi tal-strateġija ta' bejgħ “normali” tal-kumpanija. Il-kumpanija tallega li l-attività tal-esportazzjoni miżjuda tagħha fl-Unjoni f'dawn is-snin kienet riżultat tad-differenza bejn id-domanda u l-provvista tal-prodott ikkonċernat fis-swieq tal-Polonja u tal-Istati Baltiċi, li kienet ir-riżultat tad-disturbi kkawżati mill-frodi tal-VAT. Il-kumpanija tallega li l-Kummissjoni għandha tinvestiga l-volumi u l-livell tal-prezzijiet tal-importazzjonijiet mill-Belarussja fil-perjodu ta' wara l-PI. Il-kumpanija tallega li tali investigazzjoni ta' dejta ta' wara l-PI tqieset bħala ġustifikata mill-Kummissjoni fil-proċedimenti ta' dan l-aħħar rigward l-importazzjonijiet ta' azzar manjetiku bi grani orjentati (GOES — grain oriented electrical steel).

(111)

Dwar dan ta' hawn fuq ta' min jinnota l-ewwel nett li l-eżistenza ta' lakuna bejn id-domanda u l-provvista tal-prodott ikkonċernat mhix ikkonfermata mill-kostatazzjonijiet tal-investigazzjoni. L-iskema tal-frodi tal-VAT tabilħaqq affettwat b'mod negattiv il-prestazzjoni tal-produtturi fil-Polonja fl-2013, iżda l-impatt tagħha kien marbut mal-livell baxx tal-prezzijiet tal-prodott kkonċernat mibjugħ mill-kumpaniji kummerċjali frawdolenti, mhux minn xi nuqqas ta' provvista. Wara Ottubru 2013 dan l-effett negattiv tneħħa kif spjegat fil-premessa (107). Il-produtturi tal-Unjoni fil-Polonja setgħu mbagħad jużaw liberament il-kapaċità disponibbli tagħhom ta' produzzjoni ('il fuq minn 40 %) biex jissupplixxu lill-klijenti kemm fil-Polonja kif ukoll fl-Istati Baltiċi. In-nuqqas tagħhom li jżidu l-bejgħ u s-sehem mis-suq tagħhom matul is-sena 2014 u l-PI kien riżultat tal-kompetizzjoni minn importazzjonijiet li huma l-oġġett ta' dumping mill-Belarussja li żdiedu drastikament. It-tieni, huwa nnotat li t-talba biex tiġi eżaminata d-dejta ta' wara l-PI waslet tard ħafna fil-proċedura. Il-Kummissjoni se tinġbor id-dejta ta' wara l-PI u tikkunsidra jekk reviżjoni tal-iżviluppi ta' wara l-PI tkunx xierqa f'dan il-każ fl-istadju definittiv tal-investigazzjoni. Madankollu, diġà f'dan l-istadju għandu jiġi osservat li ċ-ċirkustanzi f'dan il-proċediment ma jistgħux jitqiesu bħala simili għal dawk tal-investigazzjoni dwar il-GOES.

(112)

Intwera li kien hemm żieda sostanzjali fil-volum u fis-sehem mis-suq tal-importazzjonijiet li huma oġġett ta' dumping li joriġinaw mill-Belarussja fil-perjodu kkunsidrat. B'żieda ma' dan, instab li dawn l-importazzjonijiet kellhom prezzijiet kienu mwaqqa', paragunati mal-prezzijiet imposti mill-industrija tal-Unjoni fuq is-suq tal-Unjoni matul il-PI.

(113)

Iż-żieda fil-volum u s-sehem mis-suq tal-importazzjonijiet mill-Belarussja li huma oġġett ta' dumping, seħħet fl-istess żmien meta s-sitwazzjoni finanzjarja tal-industrija tal-Unjoni kienet qed tiddeterjora, ħaġa li tidher b'mod speċjali mill-2014 'l quddiem. Għaldaqstant, minkejja l-irkupru fil-konsum, l-industrija tal-Unjoni ma setgħetx iżżid il-bejgħ u l-prezzijiet tagħha, u konsegwentement l-indikaturi finanzjarji, bħall-profittabilità, baqgħu negattivi.

(114)

L-eżami tal-fatturi l-oħra magħrufa li setgħu kkawżaw dannu lill-industrija tal-Unjoni żvela li dawn il-fatturi mhumiex tali li jkissru r-rabta kawżali stabbilita bejn l-importazzjonijiet li huma l-oġġett ta' dumping mill-Belarussja u d-dannu li ġarrbet l-industrija tal-Unjoni.

(115)

Fuq il-bażi tal-analiżi ta' hawn fuq, li ddistingwiet u sseparat l-effetti tal-fatturi kollha magħrufa fuq is-sitwazzjoni tal-industrija tal-Unjoni mill-effetti dannużi tal-importazzjonijiet li huma oġġett ta' dumping, ġie konkluż b'mod provviżorju li l-importazzjonijiet li huma oġġett ta' dumping mill-Belarussja kkawżaw dannu materjali lill-industrija tal-Unjoni skont it-tifsira tal-Artikolu 3(6) tar-Regolament bażiku.

(116)

Skont l-Artikolu 21 tar-Regolament bażiku, ġie eżaminat jekk, minkejja s-sejba provviżorja ta' dumping li jikkawża dannu, jeżistux raġunijiet b'saħħithom biex jiġi konkluż li f'dan il-każ partikolari mhuwiex fl-interess tal-Unjoni li jiġu adottati miżuri. L-analiżi dwar l-interessi tal-Unjoni kienet ibbażata fuq il-valutazzjoni tal-interessi kollha involuti, inklużi dawk tal-industrija tal-Unjoni, tal-importaturi, u tal-utenti.

(117)

L-industrija tal-Unjoni hija magħmula minn aktar minn 65 produttur, li jinstabu fi Stati Membri differenti tal-Unjoni, u li jimpjegaw direttament aktar minn 4 600 persuna meta mqabbla mal-prodott simili, matul il-PI.

(118)

Ġie stabbilit li l-industrija tal-Unjoni ġarrbet dannu materjali kkawżat mill-importazzjonijiet li huma oġġett ta' dumping mill-Belarussja. Ta' min ifakkar li l-industrija tal-Unjoni ma setgħetx tibbenefika bis-sħiħ miż-żieda fil-konsum u l-qagħda finanzjarja tal-industrija tal-Unjoni baqgħet fraġli.

(119)

Huwa mistenni li l-impożizzjoni ta' dażji antidumping trodd lura kundizzjonijiet kummerċjali ġusti fis-suq tal-Unjoni, u tippermetti lill-industrija tal-Unjoni biex tallinja l-prezzijiet tagħha tal-prodott simili mal-kosti tal-produzzjoni.

(120)

Huwa mistenni wkoll li l-impożizzjoni ta' miżuri se tippermetti lill-industrija tal-Unjoni biex tirkupra mill-inqas il-parti tas-sehem mis-suq li ntilfet matul il-perjodu kkunsidrat, b'impatt pożittiv fuq il-profittabbiltà u l-qagħda finanzjarja ġenerali tagħha. L-impożizzjoni tal-miżuri tippermetti li l-industrija żżomm u tiżviluppa aktar l-isforzi tagħha biex tkun kosteffiċjenti.

(121)

Jekk il-miżuri ma jiġux imposti, huwa mistenni aktar telf fis-sehem mis-suq u l-profittabilità tal-industrija tal-Unjoni tibqa' sejra lura.

(122)

Għaldaqstant, ġie konkluż b'mod provviżorju li l-impożizzjoni tal-miżuri antidumping fuq l-importazzjonijiet li joriġinaw mill-Belarussja tkun fl-interess tal-industrija tal-Unjoni.

(123)

Il-kooperazzjoni tal-utenti tal-prodott ikkonċernat kienet baxxa. Mit-tmien utenti magħrufa kkuntattjati fil-bidu tal-proċedura, kumpanija waħda biss kienet interessata li tikkopera. Madankollu, lanqas din il-kumpanija ma wieġbet il-kwestjonarju tal-utenti mibgħut mill-Kummissjoni.

(124)

Fil-każ tal-importaturi kien hemm sitt kumpaniji li wieġbu għall-kwestjonarju dwar it-teħid tal-kampjuni inkluż fin-Notifikazzjoni ta' Bidu. Tlieta minn dawn il-kumpaniji, li jirrappreżentaw 81 % tal-volum tal-importazzjonijiet tal-prodott ikkonċernat irrappurtati minn dawk li wieġbu, sussegwentement ġew magħżula għall-kampjun.

(125)

Tnejn biss mit-tliet importaturi fil-kampjun bagħtu tweġibiet għall-kwestjonarji mibgħut mill-Kummissjoni. Wieħed minnhom indika li l-kumpannija inkwistjoni mhix biss importatur tal-prodott ikkonċernat iżda fil-verità utent u għandha titqies bħala tali fil-proċedura.

(126)

L-importatur beda jakkwista l-prodott ikkonċernat matul il-PI li minnu 78 % ġew impurtati mill-Belarussja u dan għamlu b'marġinu żgħir ta' qligħ. Dan juri li dan l-importatur straħ fuq l-opportunità ta' prezzijiet tal-importazzjoni baxxi mill-Belarussja u ħoloq bażi ta' klijentela ġdida. L-azzjonijiet ta' dan l-importatur għalhekk ma jistgħġux jitqiesu bħala reazzjoni għal flussi kummerċjali stabbiliti. Għalhekk dan se jfittex opportunitajiet oħra ta' negozju meta tinbidel is-sitwazzjoni tas-suq wara l-impożizzjoni tal-miżuri.

(127)

L-utent ġarrab telf fuq il-bejgħ ta' prodotti lesti downstream li fihom żbarri. Dawn tal-aħħar kienu akkwistati nofshom mill-industrija tal-Unjoni, terz mill-Belarussja u l-bqija minn pajjiżi terzi bħaċ-Ċina u t-Turkija. Dan l-utent għaldaqstant juża sorsi kif jaqbillu fejn jidħlu prezzijiet, disponibbiltà u kwalità. Il-proporzjon ta' xiri mill-Belarussja jista' jkun affettwat mill-miżuri maħsuba u pjuttost jillimitaw jew jibdlu l-għażla ta' żbarri li jiġu akkwistati, iżda ma jidhirx li jaffettwa lil dan l-utent b'mod fundamentali. Il-kawża tat-telf jidher li hi strutturali u mhux relatata mal-kisba tal-materjal mill-Belarussja.

(128)

Iż-żewġ kumpaniji, minkejja r-rwol tagħhom li jidher differenti fil-proċediment, qajmu madankollu l-istess punt kontra l-impożizzjoni tal-miżuri: a) kapaċità insuffiċjenti tal-produtturi tal-Unjoni li jissodisfaw id-domanda tas-suq tal-Unjoni, b) nuqqas suffiċjenti ta' firxa ta' prodotti manifatturati mill-produtturi tal-Unjoni u c) diffikultajiet biex wieħed jaqleb minn fornitur għall-ieħor peress li allegatament Stati Membri differenti jirrekjedu ċertifikati differenti ta' omologazzjoni għall-prodott ikkonċernat.

(129)

L-ewwel allegazzjoni mhix sostnuta mill-kostatazzjonijiet provviżorji — l-utilizzazzjoni tal-kapaċità tal-industrija tal-Unjoni hija fil-livell ta' 67 % u dan iħalli ħafna iżjed kapaċità ħielsa mill-importazzjonijiet kollha tal-Belarussja lejn l-Unjoni.

(130)

It-tieni allegazzjoni ma kinitx issostanzjata. Min-naħa l-oħra ir-risposti għall-kwestjonarji mill-produtturi tal-Unjoni fil-kampjun juru b'mod ċar li huma qegħdin jipproduċu u jbigħu il-firxa sħiħa ta' tipi ta' prodotti.

(131)

Fir-rigward tat-tielet allegazzjoni, għandu jkun enfasizzat li l-produtturi tal-Unjoni diġà qegħdin ifornu lil diversi Stati Membri mingħajr l-ebda diffikultà apparenti.

(132)

Importatur ieħor, li qiegħed jikkoopera, mhux fil-kampjun, fis-sottomissjoni separata tiegħu qajjem il-kwistjoni tal-akkordju li allegatament jeżisti fost il-produtturi tal-Unjoni. Madankollu, il-kumpanija ma pprovdietx dokumenti li jsostnu din l-allegazzjoni. Il-kwistjoni tal-allegat akkordju ta' kartell sussegwentement tqajmet mill-produttur esportatur tal-Belarussja. Il-Kummissjoni qiegħda tevalwa l-informazzjoni pprovduta mill-produttur esportatur tal-Belarussja. Madankollu, peress li din waslet tard ħafna matul il-proċediment, dan il-punt ma setax jiġi indirizzat u konkluż f'dan l-istadju. Fi kwalunkwe każ, huwa nnotat li l-informazzjoni pprovduta mill-kumpanija tidher li torbot ma' akkużi li potenzjalment jinvolvu kumpanija waħda biss li hija inkluża fil-kampjun tal-produtturi tal-Unjoni. Barra minn hekk, il-proċedura ta' verifika inkwistjoni mibdija mill-awtorità tal-kompetizzjoni Taljana għadha ma ġietx konkluża (9). Il-Kummissjoni ser tinvestiga din l-allegazzjoni f'iktar dettall fl-istadju definittiv tal-investigazzjoni.

(133)

Fl-aħħar nett, utent ieħor, li ma għamilx lilu nnifsu magħruf lill-Kummissjoni fi stadju aktar bikri tal-proċediment, ressaq tweġiba għall-kwestjonarju tal-utenti fi tmiem l-istadju provviżorju tal-investigazzjoni. Is-sottomissjoni waslet tard ħafna fil-proċediment tal-istadju provviżorju tal-investigazzjoni u għalhekk ma setgħetx tiġi analizzata u indirizzati f'dan l-istadju. Il-Kummissjoni ser tinvestiga u tanalizza din ir-risposta tal-kwestjonarju f'iktar dettall fl-istadju definittiv tal-investigazzjoni.

(134)

Meta wieħed jikkunsidra dan ta' hawn fuq, il-Kummissjoni f'dan il-waqt hija tal-fehma li l-impatt kumplessiv fuq l-utenti u l-importaturi, kif ukoll l-effetti restrittivi possibbli fuq il-kompetizzjoni huma limitati.

(135)

Fid-dawl ta' dan ta' hawn fuq, ġie provviżorjament konkluż li kollox ma' kollox, abbażi tal-informazzjoni disponibbli li tikkonċerna l-interess tal-Unjoni, ma hemm l-ebda raġuni sinifikanti kontra l-impożizzjoni ta' miżuri provviżorji fuq l-importazzjonijiet tal-prodott ikkonċernat mill-Belarussja.

(136)

Kwalunkwe effett negattiv fuq l-utenti u l-importaturi mhux relatati jittaffa permezz tad-disponibbiltà ta' sorsi alternattivi ta' provvista.

(137)

Barra minn hekk, meta jiġi kkunsidrat l-impatt globali tal-miżuri antidumping fuq is-suq tal-Unjoni, l-effetti pożittivi, b'mod partikolari fuq l-industrija tal-Unjoni, jidhru li jegħlbu l-impatti potenzjalment negattivi fuq il-gruppi ta' interess l-oħra.

(138)

Fid-dawl tal-konklużjonijiet milħuqa fir-rigward tad-dumping, id-dannu, il-kawżalità u l-interess tal-Unjoni, għandhom jiġu imposti miżuri antidumping provviżorji sabiex jiġi evitat li ssir aktar ħsara lill-industrija tal-Unjoni ħtija tal-importazzjonijiet oġġett ta' dumping.

(139)

Sabiex jiġi ddeterminat il-livell ta' dawn il-miżuri, ittieħdu f'kunsiderazzjoni l-marġnijiet tad-dumping li nstabu u l-ammont ta' dazju neċessarju sabiex jiġi eliminat id-dannu sofrut mill-industrija tal-Unjoni.

(140)

Meta kien qed jiġi kkalkulat l-ammont ta' dazju meħtieġ sabiex jitneħħew l-effetti dannużi tad-dumping, tqies li kwalunkwe miżura li tittieħed għandha tippermetti lill-industrija tal-Unjoni tkopri l-kosti tal-produzzjoni tagħha u tikseb profitt qabel it-taxxa li jista' jinkiseb b'mod raġonevoli minn industrija ta' dan it-tip f'kundizzjonijiet normali ta' kompetizzjoni, jiġifieri fin-nuqqas ta' importazzjonijiet li huma oġġett ta' dumping, fuq il-bejgħ tal-prodott simili fl-Unjoni.

(141)

Sabiex jiġi ddeterminat il-profitt fil-mira, il-Kummissjoni ħadet inkonsiderazzjoni l-profitti magħmula mill-bejgħ mhux relatat li jintużaw sabiex jiġi stabbilit il-livell għall-eliminazzjoni tad-dannu.

(142)

Matul il-perjodu kollu kkunsidrat kien biss fl-2012 li l-industrija tal-Unjoni għamlet profitt iżda l-profitt minimali ta' 1,3 % li nkiseb f'dik is-sena kien milqut mill-impatt tal-“iskema tal-frodi tal-VAT” u sussegwentement minn tnaqqis fil-prezz kif spjegat fil-premessi (83) u (106) sa (111). Għalhekk, il-profitt li nkiseb fl-2012 ma jistax jitqies bħala “qligħ fil-mira” raġonevoli li tippermetti l-irkupru finanzjarju u bih jitħeġġu l-investimenti.

(143)

Il-profitt fil-mira propost mill-ilmentatur kien ta' 9,9 % u kien ibbażat fuq il-profitt fil-mira użat fil-każ riċenti ta' anti-dumping kontra l-importazzjonijiet ta' prodott tal-azzar li huwa relatati mill-qrib, jiġifieri l-vireg tal-wajer. Madankollu, il-Kummissjoni tqis li jkun aktar xieraq li jintuża l-profitt fil-mira bbażat fuq il-kostatazzjonijiet tal-każ l-aktar reċenti dwar żbarri u vireg tal-azzar b'reżistenza għolja għar-reħi għar-rinfurzar tal-konkos, jiġifieri 4,8 %. Huwa nnotat li dan il-marġni ta' profitt, kuntrajru għal dak propost mill-ilmentatur, inkiseb fl-2012 jiġifieri fi ħdan il-perjodu kkunsidrat f'dan il-każ. Barra minn hekk, iż-żewġ prodotti huma simili ħafna, huma prodotti parzjalment mill-istess kumpaniji u bl-użu tal-istess linji ta' produzzjoni.

(144)

Abbażi ta' dan, il-livell ta' eliminazzjoni tad-dannu ġie kkalkulat bħala t-tqabbil bejn il-prezz medju ponderat tal-importazzjonijiet li huma oġġett ta' dumping, kif stabbilit għall-kalkoli tat-twaqqigħ tal-prezz fil-premessa (68) hawn fuq, u l-prezz mhux dannuż gћall-industrija tal-Unjoni tal-prodott simili.

(145)

Kwalunkwe differenza minn dan it-tqabbil ġiet imbagħad imfissra bħala perċentwal tal-prezz CIF tal-importazzjoni medju totali.

(146)

Fid-dawl ta' dak kollu msemmi, ġie meqjus li skont l-Artikolu 7(2) tar-Regolament bażiku, għandhom jiġu imposti dazji provviżorji antidumping rigward l-importazzjonijiet ta' żbarri li joriġinaw mill-Belarussja fil-livell inferjuri tal-marġnijiet tad-dumping u tad-dannu, skont ir-regola tad-dazju inferjuri.

(147)

Abbażi ta' dak ta' hawn fuq, ir-rati provviżorji tad-dazju antidumping ġew stabbiliti permezz tat-tqabbil tal-marġnijiet tad-dannu u tal-marġnijiet tad-dumping. Għaldaqstant, id-dazji antidumping proposti huma kif ġej:

(148)

Kull dikjarazzjoni li titlob l-applikazzjoni ta' dawn ir-rati ta' dazju antidumping tal-kumpanniji individwali (pereż. wara bidla fl-isem tal-entità jew wara t-twaqqif ta' entitajiet ġodda tal-produzzjoni jew tal-bejgħ) għandha tiġi indirizzata lill-Kummissjoni (10) flimkien mal-informazzjoni kollha rilevanti, b'mod partikolari kwalunkwe bidla fl-attivitajiet tal-kumpannija marbuta mal-produzzjoni, mal-bejgħ domestiku u esportat, assoċjat per eżempju ma' dik il-bidla fl-isem jew dik il-bidla fl-entità tal-produzzjoni jew tal-bejgħ. Jekk ikun xieraq, ir-Regolament jiġi emendat kif meħtieġ billi tiġi aġġornata l-lista tal-kumpaniji li jibbenefikaw minn rati tad-dazju individwali.

(149)

Sabiex jiġi żgurat infurzar xieraq tad-dazju antidumping, il-livell tad-dazju residwu ma għandux japplika biss għall-produtturi esportaturi li ma kkooperawx iżda anke għal dawk il-produtturi li ma kellhomx esportazzjonijiet lejn l-Unjoni matul il-PI.

(150)

Fl-interess ta' amministrazzjoni soda, il-Kummissjoni se tistieden lill-partijiet interessati biex jippreżentaw kummenti bil-miktub u/jew biex jitolbu seduta mal-Kummissjoni u/jew mal-Uffiċjal tas-Seduta fi proċedimenti kummerċjali fi żmien skadenza stipulata.

(151)

Il-konklużjonijiet li jikkonċernaw l-impożizzjoni ta' dazji provviżorji huma provviżorji u jistgħu jiġu emendati fl-istadju definittiv tal-investigazzjoni.