(1)

Fit-23 ta' Marzu 2006, il-Kummissjoni adottat ir-Regolament (KE) Nru 553/2006 (2) li jistabbilixxi miżuri antidumping provviżorji fuq l-importazzjonijiet ta' ċertu xedd tas-saqajn bil-parti ta' fuq tal-ġilda (“xedd tas-saqajn”) li joriġinaw mir-Repubblika tal-Poplu taċ-Ċina (ir-“RPĊ” jew “iċ-Ċina”) u mill-Vjetnam (ir-“Regolament provviżorju”).

(2)

Permezz tar-Regolament (KE) Nru 1472/2006 (3), il-Kunsill impona dazji antidumping definittivi li jvarjaw bejn 9,7 % u 16,5 % fuq l-importazzjonijiet ta' ċertu lbies tar-riġlejn bil-parti ta' fuq tal-ġilda, li joriġinaw mill-Vjetnam u mir-RPĊ għal sentejn (“ir-Regolament tal-Kunsill (KE) Nru 1472/2006” jew “ir-Regolament ikkontestat”).

(3)

Permezz tar-Regolament (KE) Nru 388/2008 (4) il-Kunsill estenda l-miżuri antidumping definittivi fuq l-importazzjoni ta' ċerti tipi ta' xedd tas-saqajn bil-parti ta' fuq tal-ġilda li joriġinaw mir-RPĊ għal importazzjonijiet ikkunsinjati mir-Reġjun Amministrattiv Speċjali (“RAS”) tal-Macao, kemm jekk iddikjarati li joriġinaw mir-RAS tal-Macao kif ukoll jekk le.

(4)

Wara eżami tal-iskadenza mibdi fit-3 ta' Ottubru 2008 (5), il-Kunsill kompla jestendi l-miżuri antidumping għal 15-il xahar permezz tar-Regolament (UE) Nru 1294/2009 (6), jiġifieri sal-31 ta' Marzu 2011, meta l-miżuri skadew (“ir-Regolament (KE) Nru 1294/2009”).

(5)

Brosmann Footwear (HK) Ltd, Seasonable Footwear (Zhongshan) Ltd, Lung Pao Footwear (Guangzhou) Ltd u Risen Footwear (HK) Co Ltd, kif ukoll Zhejiang Aokang Shoes Co. Ltd (“l-appellanti”) ikkontestaw ir-Regolament ikkontestat fil-Qorti tal-Prim Istanza (issa: il-Qorti Ġenerali). B'sentenzi tal-4 ta' Marzu 2010 fil-Kawża T-401/06 Brosmann Footwear (HK) u Oħrajn vs. il-Kunsill [2010] Ġabra II-671 u tal-4 ta' Marzu 2010 fil-Kawżi Magħquda T-407/06 u T-408/06 Zhejiang Aokang Shoes u Wenzhou Taima Shoes vs. il-Kunsill [2010] Ġabra II-747, il-Qorti Ġenerali ma laqgħatx dawk il-kontestazzjonijiet.

(6)

L-appellanti appellaw minn dawn is-sentenzi. Fis-sentenzi tagħha tat-2 ta' Frar 2012 fil-Kawża C--249/10P Brosmann et al u tal-15 ta' Novembru 2012 fil-Kawża C-247/10P Zhejiang Aokang Shoes Co. Ltd (“is-sentenzi Brosmann u Aokang”), il-Qorti tal-Ġustizzja annullat dawn is-sentenzi. Hija ddeċidiet li l-Qorti Ġenerali wettqet żball ta' liġi meta hija ddeċidiet li l-Kummissjoni ma kinitx meħtieġa li teżamina talbiet għal trattament ta' ekonomija tas-suq (“TES”) skont l-Artikolu 2(7)(b) u (c) tar-Regolament bażiku minn negozjanti mhux inklużi fil-kampjun (paragrafu 36 tas-sentenza fil-Kawża C-249/10 P u paragrafi 29 u 32 tas-sentenza fil-Kawża C-247/10 P).

(7)

Il-Qorti tal-Ġustizzja mbagħad tat sentenza hi stess f'dan il-qasam. Hija ddeċidiet li: “[…] il-Kummissjoni kellha teżamina t-talbiet dokumentati li l-appellanti ppreżentawlha fuq il-bażi tal-Artikolu 2(7)(b) u (c) tar-Regolament bażiku sabiex jibbenefikaw minn SES fil-kuntest tal-proċedura antidumping [li hija] prevista mir-Regolament kontenzjuż. Barra minn hekk għandu jiġi kkonstatat li ma huwiex eskluż li eżami bħal dan kien iwassal għall-impożizzjoni, fir-rigward tagħhom, ta' dazju antidumping definittiv differenti mid-dazju ta' 16,5 % li huwa applikabbli fir-rigward tagħhom bis-saħħa tal-Artikolu 1(3) tar-regolament ikkontestat. Fil-fatt, minn din id-dispożizzjoni huwa ċar li dazju antidumping definittiv ta' 9,7 % ġie impost fir-rigward tal-operatur uniku taċ-Ċina li jidher fil-kampjun li kiseb it-TES. Kif jirriżulta mill-paragrafu 38 hawn fuq, kieku l-Kummissjoni kienet ikkonstatat li l-kundizzjonijiet ta' ekonomija tas-suq kienu jipprevalu wkoll għall-appellanti, dawn tal-aħħar, meta l-kalkolu ta' marġni individwali ma kienx possibbli, kellhom jibbenefikaw ukoll minn din l-aħħar imsemmija rata” (paragrafu 42 tas-sentenza fil-Kawża C-249/10 P u paragrafu 36 tas-sentenza fil-Kawża C-247/10 P).

(8)

B'konsegwenza ta' dan, hija ħassret ir-Regolament ikkontestat, sa fejn jirrigwarda l-appellanti kkonċernati.

(9)

F'Ottubru 2013, il-Kummissjoni, permezz ta' notifika ppubblikata f'Il-Ġurnal Uffiċjali tal-Unjoni Ewropea (7), ħabbret li hija kienet iddeċidiet li terġa' tibda l-proċediment antidumping fil-punt eżatt li fih saret l-illegalità u li teżamina jekk il-kundizzjonijiet tal-ekonomija tas-suq ipprevalewx għall-appellanti għall-perjodu mill-1 ta' April 2004 sal-31 ta' Marzu 2005 u stiednet lill-partijiet interessati sabiex jippreżentaw ruħhom.

(10)

F'Marzu 2014, il-Kunsill, permezz tad-Deċiżjoni ta' Implimentazzjoni 2014/149/UE (8), irrifjuta l-proposta tal-Kummissjoni li jadotta Regolament ta' Implimentazzjoni tal-Kunsill li jerġa' jimponi dazju antidumping definittiv u jiġbor b'mod definittiv id-dazju provviżorju impost fuq ċertu lbies tar-riġlejn bil-parti ta' fuq tal-ġilda li joriġinaw mir-Repubblika tal-Poplu taċ-Ċina u prodotti minn Brosmann Footwear (HK) Ltd, Seasonable Footwear (Zhongshan) Ltd, Lung Pao Footwear (Guangzhou) Ltd, Risen Footwear (HK) Co. Ltd u Zhejiang Aokang Shoes Co. Ltd u temm il-proċedimenti fir-rigward ta' dawk il-produtturi. Il-Kunsill kien tal-fehma li l-importaturi li jkunu xtraw żraben minn dawk il-produtturi esportaturi, li għalihom id-dazji doganali rilevanti kienu ġew rimborżati mill-awtoritajiet nazzjonali kompetenti fuq il-bażi tal-Artikolu 236 tar-Regolament tal-Kunsill (KEE) Nru 2913/92 (9) (il-“Kodiċi Doganali tal-Komunità”), kienu kisbu aspettattivi leġittimi fuq il-bażi tal-Artikolu 1(4) tar-Regolament ikkontestat, li kien għamel id-dispożizzjonijiet tal-Kodiċi Doganali Komunitarju, u b'mod partikolari l-Artikolu 221 tiegħu, applikabbli għall-ġbir tad-dazji.

(11)

Tliet importaturi tal-prodott ikkonċernat, C&J Clark International Ltd (“Clark”), Puma SE (“Puma”) u Timberland Europe B.V. (“Timberland”) (“l-importaturi kkonċernati”) ikkontestaw il-miżuri antidumping fuq importazzjonijiet ta' ċertu xedd tas-saqajn miċ-Ċina u mill-Vjetnam u invokaw il-ġurisprudenza msemmija fil-premessi minn (5) sa (7) quddiem il-Qrati nazzjonali tagħhom, li rrinvijaw il-kwistjoni lill-Qorti tal-Ġustizzja għal deċiżjoni preliminari.

(12)

Fl-4 ta' Frar 2016, fil-Kawżi magħquda C-659/13 C&J Clark International Limited u C-34/14 Puma SE, il-Qorti tal-Ġustizzja ddikjarat ir-Regolamenti (KE) Nru 1472/2006 u (KE) Nru 1294/2009 bħala invalidi sa fejn il-Kummissjoni Ewropea ma eżaminatx it-TES u t-talbiet għal trattament individwali (“TI”) ippreżentati mill-produtturi esportaturi fir-RPĊ u l-Vjetnam mhux inklużi fil-kampjun (“is-sentenzi”), kuntrarjament għar-rekwiżiti stabbiliti fl-Artikoli 2(7)(b) u 9(5) tar-Regolament tal-Kunsill (KE) Nru 384/96 tat-22 ta' Diċembru 1995 dwar il-protezzjoni kontra l-importazzjonijiet li huma l-oġġett ta' dumping minn pajjiżi mhux membri tal-Komunità Ewropea (10).

(13)

Rigward it-tielet kawża C-571/14, Timberland Europe B.V. kontra Inspecteur van de Belastingdienst, kantoor Rotterdam Rijnmond, il-Qorti tal-Ġustizzja ddeċidiet fil-11 ta' April 2016 li tħassar il-kawża mir-reġistru fuq talba tal-Qorti nazzjonali tar-rinviju.

(14)

L-Artikolu 266 TFUE jistipula li l-Istituzzjonijiet iridu jieħdu l-miżuri neċessarji biex jikkonformaw mas-sentenzi tal-Qorti. Fil-każ ta' annullament ta' att adottat mill-Istituzzjonijiet fil-kuntest ta' proċedura amministrattiva, bħall-antidumping, il-konformità mas-sentenza tal-Qorti tikkonsisti fil-bdil tal-att annullat b'att ġdid, li fih l-illegalità identifikata mill-Qorti tiġi eliminata (11).

(15)

Skont il-ġurisprudenza tal-Qorti, il-proċedura ta' sostituzzjoni tal-att annullat tista' titkompla fil-punt li fih saret l-illegalità (12). Dan jimplika b'mod partikolari li, f'sitwazzjoni fejn att li jikkonkludi proċedura amministrattiva jiġi annullat, l-annullament mhux neċessarjament jaffettwa l-atti preparatorji, bħall-bidu tal-proċedura antidumping. F'sitwazzjoni fejn Regolament li jimponi miżuri definittivi ta' antidumping jiġi annullat, dan ifisser li wara l-annullament, il-proċedura kontra d-dumping tkun għadha miftuħa, għaliex l-att li jikkonkludi l-proċediment antidumping jisparixxi mill-ordni legali (13) tal-Unjoni, ħlief jekk l-illegalità tkun saret fl-istadju tal-bidu.

(16)

Minbarra l-fatt li l-Istituzzjonijiet ma eżaminawx it-talbiet għal MET u TI mressqa minn produtturi esportaturi fir-RPĊ u l-Vjetnam mhux inklużi fil-kampjun, is-sejbiet l-oħra kollha magħmula fir-Regolamenti (KE) Nru 1472/2006 u (UE) Nru 1294/2009 jibqgħu validi.

(17)

F'dan il-każ, l-illegalità saret wara l-bidu. Għalhekk, il-Kummissjoni ddeċidiet li terġa' tibda l-proċediment antidumping preżenti li kien għadu miftuħ fil-punt li fih saret l-illegalità u teżamina jekk kinux jipprevalu l-kundizzjonijiet tal-ekonomija tas-suq għall-produtturi esportaturi kkonċernati għall-perjodu mill-1 ta' April 2004 sal-31 ta' Marzu 2005, li kien il-perjodu ta' investigazzjoni (“il-perjodu ta' investigazzjoni”). Il-Kummissjoni eżaminat ukoll, fejn xieraq, jekk il-produtturi esportaturi kkonċernati jikkwalifikawx għal TI skont 9(5) tar-Regolament tal-Kunsill (KE) Nru 1225/2009 (14) (ir-“Regolament bażiku qabel ma ġie emendat”) (15).

(18)

Permezz tar-Regolament ta' Implimentazzjoni (UE) 2016/1395 (16), il-Kummissjoni reġgħet imponiet dazju antidumping definittiv u ġabret b'mod definittiv id-dazju provviżorju impost fuq l-importazzjonijiet ta' Clark u Puma u ta' ċertu lbies għar-riġlejn bil-parti ta' fuq tal-ġilda li joriġinaw mir-RPĊ u prodotti minn tlettax-il produtturi esportaturi Ċiniżi li ppreżentaw talbiet għal TES u għal TI fl-investigazzjoni oriġinali, iżda li ma kinux ġew inklużi fil-kampjun matul l-investigazzjoni.

(19)

Permezz tar-Regolament ta' Implimentazzjoni (UE) 2016/1647 (17), il-Kummissjoni reġgħet imponiet dazju antidumping definittiv u ġabret b'mod definittiv id-dazju provviżorju impost fuq l-importazzjonijiet ta' Clark, Puma u Timberland ta' ċertu lbies għar-riġlejn bil-parti ta' fuq tal-ġilda li joriġinaw mill-Vjetnam u prodotti minn ċerti produtturi esportaturi Vjetnamiżi li ppreżentaw talbiet għal TES u għal TI, iżda li ma kinux ġew inklużi fil-kampjun.

(20)

Permezz tar-Regolament ta' Implimentazzjoni (UE) 2016/1731 (18), il-Kummissjoni imponiet mill-ġdid dazju antidumping definittiv u li jiġbor b'mod definittiv id-dazju provviżorju impost fuq importazzjonijiet ta' Puma u Timberland ta' ċertu xedd tas-saqajn bil-parti ta' fuq tal-ġilda li joriġinaw mir-Repubblika tal-Poplu taċ-Ċina u prodotti minn General Footwear Ltd u ta' ċertu lbies tar-riġlejn bil-parti ta' fuq tal-ġilda li joriġinaw fil-Vjetnam u prodotti minn Diamond Vietnam Co Ltd u TY Hung Footgearmex/Footwear Co. Ltd (iktar' il quddiem “TY Hung Co Ltd.”) li ppreżentat talbiet għal TES u għal TI, iżda ma ġewx inklużi fil-kampjun.

(21)

Fid-dawl tal-implimentazzjoni tas-sentenza fil-kawżi magħquda C-659/13 C & J Clark International Limited u C-34/14 Puma SE imsemmijin hawn fuq fil-premessa (12), il-Kummissjoni adottat ir-Regolament ta' Implimentazzjoni (UE) 2016/223 (19). Fl-Artikolu 1 ta' dan ir-Regolament il-Kummissjoni tat struzzjonijiet lill-awtoritajiet doganali nazzjonali biex jibagħtu t-talbiet kollha għall-ħlas lura tad-dazji antidumping definittivi mħallsa fuq l-importazzjonijiet ta' xedd tas-saqajn ġejjin miċ-Ċina u l-Vjetnam li sar minn importaturi bbażata fuq l-Artikolu 236 tal-Kodiċi Doganali tal-Komunità u bbażata fuq il-fatt li produttur esportatur mhux fil-kampjun talab TES jew TI fl-investigazzjoni oriġinali. Il-Kummissjoni għandha tivvaluta t-talbiet TES jew TI rilevanti u timponi mill-ġdid rata tad-dazju adegwata. Fuq din il-bażi, l-awtoritajiet doganali nazzjonali għandhom imbagħad jiddeċiedu dwar it-talba għal ħlas lura u l-maħfra tad-dazji antidumping.

(22)

Il-validità tar-Regolament (UE) 2016/223 hija soġġetta għal talba għal deċiżjoni preliminari mressqa mill-Finanzgericht Düsseldorf fid-9 ta' Mejju 2016 (Deichmann SE vs. Hauptzollamt Duisburg; kawża C-256/16). Din it-talba għal deċiżjoni preliminari tressqet fil-kuntest ta' kawża bejn Deichmann SE, importatur Ġermaniż ta' xedd tas-saqajn u l-awtorità Doganali nazzjonali rilevanti, Hauptzollamt Duisburg. Il-kawża kienet tirrigwarda r-rimborż tad-dazji antidumping imħallsa minn Deichmann SE dwar l-importazzjonijiet ta' xedd tas-saqajn ġejjin mil-fornitur Ċiniż tiegħu Chengdu Sunshine Shoes Co. Ltd. li ressqet talba għal TES u TI u ma kinitx parti mill-kampjun.

(23)

Fl-20 ta' April 2016, skont l-Artikolu 1 tar-Regolament (UE) 2016/223, l-awtoritajiet doganali Franċiżi nnotifikaw lill-Kummissjoni dwar it-talbiet għall-ħlas lura ta' importaturi fl-Unjoni u pprovdew dokumenti ta' sostenn. In-notifika lill-awtoritajiet doganali Franċiżi elenkat 46 kumpanija bħala fornituri ta' xedd tas-saqajn li ġejjin miċ-Ċina u l-Vjetnam.

(24)

Għal għadd kbir ta' dawn il-kumpaniji (36 kumpanija — elenkati fl-Anness III ta' dan ir-Regolament), il-Kummissjoni m'għandha l-ebda rekord li dawn il-kumpaniji ppreżentaw kwalunkwe formola ta' talba għal TES jew TI fl-investigazzjoni oriġinali. Fost dawn il-kumpaniji hemm ukoll kumpaniji li mhumiex ikkonċernati mill-investigazzjoni peress li pereżempju ma jinsabux fiċ-Ċina jew fil-Vjetnam jew kumpaniji kummerċjali li f'kull każ mhux intitolati għal marġni ta' dumping individwali. It-talbiet għal rimborż rilevanti ta' importaturi fl-Unjoni għalhekk m'għandhomx jingħataw, peress li r-Regolament ikkontestat ma kienx ġie annullat sa fejn huma kkonċernati.

(25)

Mill-għaxar (10) kumpaniji li jifdal, erbgħa kienu diġà ġew ivvalutati individwalment jew bħala parti minn grupp ta' kumpaniji magħżula fil-kampjun ta' produtturi esportaturi fl-investigazzjoni oriġinali (elenkati fl-Anness IV ta' dan ir-Regolament). Peress li l-ebda waħda minn dawn il-kumpaniji ma rċevew rata ta' dazju individwali, id-dazju għaċ-Ċina ta' 16,5 % applikat fuq l-importazzjonijiet ta' xedd tas-saqajn provenjenti minn Feng Tay Chine u r-rata ta' dazju residwa ta' 10 % għall-Vjetnam applikat għall-importazzjonijiet minn Pou Yuen Vietnam Enterprise u Pou Yuen Vietnam Company Ltd kif ukoll Sky High Trading Limited. Dawn ir-rati ma ġewx affettwati mis-sentenza msemmija fil-premessa (12). It-talbiet għal rimborż rilevanti ta' importaturi fl-Unjoni għalhekk m'għandhomx jingħataw, peress li r-Regolament ikkontestat ma kienx ġie annullat sa fejn huma kkonċernati.

(26)

Tlieta mis-sitt kumpaniji li jifdal (elenkati fl-Anness V ta' dan ir-Regolament) diġà kienu ġew ivvalutati individwalment jew bħala parti minn grupp ta' kumpaniji fl-ambitu għall-implimentazzjoni tas-sentenza msemmija fil-premessa (12), jiġifieri fir-Regolament (UE) 2016/1647 imsemmi fil-premessa (19). It-talbiet għal rimborż rilevanti ta' importaturi fl-Unjoni m'għandhomx għalhekk jiġu mogħtija, minħabba li t-taxxa reġgħet ġiet imposta fuqhom.

(27)

Fost it-tliet kumpaniji li fadal, Fujian Sunshine Footwear Co Ltd u Foshan Nanhai Shyang Yuu Footwear Ltd (li jissejjaħ Shyang Yuu Footwear fin-notifika tad-dwana Franċiża) kienu produtturi esportaturi Ċiniżi li ma kinux fil-kampjun u li ssottomettew formula għal talba TES/TI. Il-Kummissjoni vvalutat it-talbiet għal TES u għal TI pprovduti minn dawn il-kumpaniji.

(28)

Din tal-aħħar “Capital Concord Enterprises Ltd” kienet relatata ma' waħda mill-kumpanniji msemmija fil-premessa (27), iżda ma kinitx tipproduċi jew tbigħ xedd tas-saqajn. Għalhekk mhijiex intitolata għal rata ta' dazju individwali.

(29)

Fil-qosor, f'dan ir-Regolament, il-Kummissjoni vvalutat it-talbiet għal TES/TI tat-tliet produtturi esportaturi Ċiniżi, jiġifieri Chengdu Sunshine Shoes Co. Ltd., Fujian Sunshine Footwear Co Ltd u Foshan Nanhai Shyang Yuu Footwear Ltd, li pprovdew tali formoli ta' applikazzjoni u li ma kinux fil-kampjun.

(30)

Il-Kummissjoni għandha l-possibbiltà li tirrimedja l-aspetti tar-Regolament ikkontestat li wasslu għall-annullament tiegħu, filwaqt li ma tbiddilx il-partijiet tal-valutazzjoni li ma kinux milquta mis-sentenza (20).

(31)

Dan ir-Regolament ifittex li jirrimedja l-aspetti tar-Regolament ikkontestat li nstabu li huma inkonsistenti mar-Regolament bażiku, u li għaldaqstant wasslu għad-dikjarazzjoni ta' invalidità f'dak li jirrigwarda l-produtturi esportaturi msemmijin fil-premessa (29).

(32)

Il-konstatazzjonijiet kollha l-oħra magħmula fir-Regolament ikkontestat u fir-Regolament ta' Implimentazzjoni (UE) Nru 1294/2009, li ma kinux dikjarati invalidi mill-Qorti tal-Ġustizzja, jibqgħu validi u huma b'dan inkorporati fir-Regolament preżenti.

(33)

Għaldaqstant, il-premessi li ġejjin huma limitati għall-valutazzjoni l-ġdida meħtieġa għall-konformità mas-sentenzi.

(34)

Il-Kummissjoni eżaminat jekk kinux jipprevalu TES jew TI għall-produtturi esportaturi msemmija fil-premessa (29) (“il-produtturi esportaturi kkonċernati”) li ressqu talbiet għal TES/TI għall-perjodu tal-investigazzjoni. L-iskop ta' din id-determinazzjoni huwa li jiġi aċċertat il-grad li fih l-importaturi kkonċernati huma intitolati li jirċievu pagament mill-ġdid ta' dazju antidumping imħallas fir-rigward ta' dazji antidumping imħallsa fuq esportazzjonijiet ta' dawn il-fornituri.

(35)

Jekk l-analiżi tiżvela li TES jew TI kellhom jingħataw lill-produtturi esportaturi kkonċernati li l-esportazzjonijiet tagħhom kienu soġġetti għad-dazju antidumping imħallas mill-importaturi kkonċernati, rata ta' dazju individwali trid tiġi attribwita li dak il-produttur esportatur u l-ħlas lura tad-dazju jkun limitat għal ammont li jikkorrispondi għad-differenza bejn id-dazju mħallas, jiġifieri 16,5 %, u d-dazju impost fuq l-unika kumpanija esportatriċi fil-kampjun li kisbet TES, jiġifieri Golden Step, 9,7 %.

(36)

Jekk l-analiżi tiżvela li kellu jingħata TI lill-produttur esportatur Ċiniż li t-TES tiegħu kienet rifjutata, rata ta' dazju individwali jkollha tkun attribwita lill-produttur esportatur ikkonċernat u l-ħlas lura ta' dazju jkun limitat għal ammont li jikkorrispondi għad-differenza bejn it-taxxa mħallsa, jiġifieri 16,5 %, u r-rata ta' dazju individwali kkalkulata għall-produttur esportatur ikkonċernat, jekk ikun hemm.

(37)

Min-naħa l-oħra, f'każ li l-analiżi ta' tali talbiet tat-TES u tat-TI tiżvela li kemm it-TES kif ukoll it-TI għandhom jiġu miċħuda, ma jista' jingħata l-ebda ħlas lura ta' dazji antidumping.

(38)

Kif spjegat fil-premessa (12), il-Qorti tal-Ġustizzja annullat ir-Regolament ikkontestat u r-Regolament (UE) Nru 1294/2009 fir-rigward tal-esportazzjonijiet ta' ċertu xedd tas-saqajn minn ċerti produtturi esportaturi Ċiniżi u Vjetnamiżi, sa fejn il-Kummissjoni ma eżaminatx it-talbiet għal TES u għal TI ppreżentati mill-produtturi esportaturi kkonċernati.

(39)

Għaldaqstant, il-Kummissjoni eżaminat it-talbiet għal TES u għal TI ta' dawn il-produtturi esportaturi kkonċernati biex tiġi ddeterminata r-rata tad-dazju applikabbli għall-esportazzjonijiet tagħhom. Il-valutazzjoni wriet li l-informazzjoni pprovduta ma kinitx turi li l-produtturi esportaturi kkonċernati kienu jaħdmu f'kundizzjonijiet ta' ekonomija tas-suq jew li jikkwalifikaw għal trattament individwali (ara għal spjegazzjoni dettaljatal-premessi (40) et seq. hawn taħt).

(40)

Huwa meħtieġ li jiġi indikat li l-oneru tal-prova jaqa' fuq il-produttur li jixtieq jibbenefika mit-TES bis-saħħa tal-Artikolu 2(7)(b) tar-Regolament bażiku. Għal dan il-għan, l-ewwel subparagrafu tal-Artikolu 2(7)(c) jipprovdi li t-talba ppreżentata minn produttur bħal dan trid tinkludi provi suffiċjenti, hekk kif stabbiliti f'dik id-dispożizzjoni, li l-produttur jopera f'kundizzjonijiet ta' ekonomija tas-suq. B'hekk, ma hemm l-ebda obbligu fuq l-Istituzzjonijiet tal-Unjoni sabiex jippruvaw li l-produttur ma jissodisfax il-kundizzjonijiet stabbiliti biex wieħed jibbenefika mill-imsemmi status. Għall-kuntrarju ta' dan, huwa f'idejn l-Istituzzjonijiet tal-Unjoni li jivvalutaw jekk il-provi fornuti mill-produttur humiex biżżejjed sabiex juru li l-kriterji stabbiliti mill-ewwel subparagrafu tal-Artikolu 2(7)(c) huma ssodisfati biex jingħata TES, u hija l-qorti tal-Unjoni li għandha tivverifika jekk din il-valutazzjoni hijiex ivvizzjata bi żball manifest (paragrafu 32 tas-sentenza fil-Kawża C-249/10 P u paragrafu 24 tas-sentenza fil-Kawża C-247/10 P).

(41)

F'konformità mal-Artikolu 2(7)(c) tar-Regolament bażiku l-ħames kriterji elenkati f'dan l-Artikolu għandhom jiġu ssodisfati biex produttur esportatur ikun jista' jingħata TES. Għaldaqstant, il-Kummissjoni kkunsidrat li jekk jonqos li jiġi ssodisfat għallanqas kriterju wieħed, dan ikun biżżejjed biex tiġi miċħuda t-talba għal TES.

(42)

Tnejn mill-produtturi esportaturi kkonċernati (il-Kumpanija 4 u 6) (21) ma setgħux juru li jissodisfaw il-kriterju 1 (Deċiżjonijiet tan-negozju). B'mod aktar speċifiku, l-informazzjoni pprovduta mill-Kumpanija 4 wriet limitazzjonijiet fil-kwantitajiet tal-bejgħ fis-swieq domestiċi u tal-esportazzjoni. Il-kumpanija ma tatx prova li minkejja dawn il-limitazzjonijiet, deċiżjonijiet tan-negozju ttieħdu bħala reazzjoni għas-sinjali tas-suq li jirriflettu l-provvista u d-domanda mingħajr indħil sinifikanti mill-Istat. Fir-rigward tal-Kumpanija 6, ma wrietx kif jittieħdu deċiżjonijiet fil-kumpanija u għalhekk li dawn id-deċiżjonijiet kienu ttieħdu skont is-sinjali tas-suq u mingħajr indħil sinifikanti tal-Istat.

(43)

L-ebda minn dawn it-tliet kumpaniji ma setgħu juru li jissodisfaw il-kriterju 2 (Kontabilità). Il-kontijiet tal-kumpaniji kollha wrew nuqqasijiet u ma kinux konformi mal-istandards internazzjonali tal-kontabilità. Pereżempju, għall-kumpanija 4 il-bilanċ ta' assi fissi kien nieqes kif ukoll il-metodu ta' deprezzament u t-tipi ta' assi fissi ta' din il-kumpanija. Ma kien hemm l-ebda taxxa tad-dħul irreġistrat minkejja li profitti u sussidji riċevuti ma kinux riflessi fil-karta tal-bilanċ. Għall-Kumpanija 6 kien hemm inkonsistenzi bejn l-ammonti rrappurtati fil-karti tal-b ilanċ ta' snin konsekuttivi. Fl-aħħar nett, kien hemm bosta nuqqasijiet fir-rapporti finanzjarji tal-Kumpanija 5, b'mod speċifiku dwar ammont żejjed ta' Kapital. Għalhekk, il-Kumpanija 5 ma ppreżentatx informazzjoni dwar l-oriġini tal-kapital żejjed jew kif ġiet evalwata.

(44)

Rigward il-Kriterju 3 (Assi u “riport”), l-ebda wieħed mit-tliet produtturi esportaturi kkonċernati ma seta' juri li ma ġew riportati l-ebda distorsjoni mis-sistema preċedenti ta' ekonomija mhux tas-suq. L-ebda waħda mill-kumpaniji ma tat informazzjoni konklużiva dwar jekk dawn id-drittijiet għall-użu tal-art kienux trasferiti u/jew x'kienu t-termini u l-valur tad-drittijiet tal-użu tal-art.

(45)

Għar-raġunijiet elenkati fil-premessa (40), l-ebda wieħed mill-produtturi esportaturi kkonċernati ma ġie vvalutat għall-kriterju 4 (Liġijiet dwar il-falliment u l-proprjetà) u 5 (Konverżjonijiet tar-rata tal-kambju).

(46)

Fuq il-bażi ta' dan ta' hawn fuq, il-Kummissjoni kkonkludiet li l-ebda wieħed mit-tliet produtturi esportaturi Ċiniżi kkonċernati ma għandhom jingħataw TES u infurmat lill-produtturi esportaturi kkonċernati b'dan, li ġew mistiedna jipprovdu kummenti. L-ebda kummenti ma kienu riċevuti mit-tliet produtturi esportaturi Ċiniżi kkonċernati.

(47)

Għaldaqstant, l-ebda wieħed mit-tliet produtturi esportaturi Ċiniżi kkonċernati ma ssodisfa l-kundizzjonijiet kollha stabbiliti fl-Artikolu 2(7)(c) tar-Regolament bażiku u, b'riżultat ta' dan, it-TES ġie miċħud lilhom kollha.

(48)

Skont l-Artikolu 9(5) tar-Regolament bażiku qabel l-emenda tiegħu, fejn japplika l-Artikolu 2(7)(a) tal-istess Regolament, għandu madankollu jiġi speċifikat dazju individwali għall-esportaturi li jistgħu juru li huma jissodisfaw il-kriterji kollha stabbiliti fl-Artikolu 9(5) tar-Regolament bażiku qabel l-emenda tiegħu.

(49)

Kif imsemmi fil-premessa (40) huwa meħtieġ li jiġi indikat li l-oneru tal-prova jaqa' fuq il-produttur li jixtieq jibbenefika mit-TI skont l-Artikolu 9(5) tar-Regolament bażiku qabel l-emenda tiegħu. Għal dan l-għan, l-ewwel subparagrafu tal-Artikolu 9(5) jipprovdi li t-talba ppreżentata trid tiġi sostanzjata kif xieraq. B'hekk, ma hemm l-ebda obbligu fuq l-Istituzzjonijiet tal-Unjoni sabiex jippruvaw li l-esportatur ma jissodisfax il-kundizzjonijiet stabbiliti biex wieħed jibbenefika mill-imsemmi status. Għall-kuntrarju, huwa f'idejn l-istituzzjonijiet tal-UE li jevalwaw jekk il-provi fornuti mill-esportatur humiex biżżejjed biex juru li l-kriterji stabbiliti fl-Artikolu 9(5) tar-Regolament bażiku qabel l-emenda tiegħu huma ssodisfati biex jingħata t-TI.

(50)

Skont l-Artikolu 9(5) tar-Regolament bażiku, qabel ma ġie emendat, l-esportaturi għandhom juru fuq il-bażi ta' talba sostanzjata kif xieraq li l-ħames kriterji kollha elenkati f'dan l-Artikolu huma sodisfatti sabiex ikun jista' jingħata t-TI.

(51)

Għaldaqstant, il-Kummissjoni kkunsidrat li n-nuqqas li jiġi ssodisfat mill-inqas kriterju wieħed kien biżżejjed sabiex tiġi miċħuda t-talba għal TI.

(52)

Il-ħames kriterji huma dawn li ġejjin:

(53)

It-tliet produtturi esportaturi kkonċernati li talbu għal TES talbu wkoll għal TI fil-każ li ma jingħatawx TES.

(54)

Wieħed mit-tliet produtturi esportaturi kkonċernati (Kumpanija 4) ma setgħax juri li jissodisfa l-kriterju 2 (Bejgħ tal-esportazzjoni u l-prezzijiet stabbiliti b'mod liberu). B'mod iktar speċifiku, l-Artikoli ta' Assoċjazzjoni ta' dan il-produttur esportatur stabbilixxa limitazzjoni għal kwantitajiet tal-bejgħ fi swieq speċifiċi. Għaldaqstant naqas milli juri li d-deċiżjonijiet tan-negozju, bħalma huma l-kwantitajiet tal-esportazzjonijiet, huma determinati b'mod liberu u magħmulin skont is-sinjali tas-suq li jirriflettu l-provvista u d-domanda.

(55)

Barra minn hekk, l-ebda wieħed mit-tliet produtturi esportaturi ma setgħu juru li jissodisfaw il-kriterju 3 (Kumpanija — il-ġestjoni ewlenija u ishma- hi indipendenti biżżejjed mill-indħil tal-Istat). L-ebda waħda mill-kumpaniji ma setgħet turi li d-drittijiet għall-użu tal-art kienu ttrasferiti lilhom jew fuq liema termini u kundizzjonijiet. Barra minn hekk, il-Kumpanija 6 ma pprovdiet l-ebda informazzjoni dwar il-kompożizzjoni tal-bord tagħha u kif jittieħdu d-deċiżjonijiet fil-kumpanija. Fuq din il-bażi, l-ebda wieħed minn dawn it-tliet produtturi esportaturi kkonċernati ma wera li kien indipendenti biżżejjed mill-indħil tal-Istat.

(56)

Għaldaqstant, l-ebda wieħed mit-tliet produtturi esportaturi kkonċernati ma ssodisfa l-kundizzjonijiet stabbiliti fl-Artikolu 9(5) tar-Regolament bażiku qabel l-emendar tiegħu u l-Kummissjoni infurmat lill-produtturi esportaturi kkonċernati skont dan, u dawn ġew mistiedna jipprovdu l-kummenti tagħhom. Ma ġie riċevut l-ebda kumment mingħand l-ebda wieħed mit-tliet produtturi esportaturi kkonċernati u, b'riżultat ta' dan, it-TI ġie miċħud lilhom kollha.

(57)

Id-dazju antidumping residwu li japplika għaċ-Ċina għandu għalhekk jiġi impost għat-tliet produtturi esportaturi kkonċernati għall-perjodu ta' applikazzjoni tar-Regolament (KE) Nru 1472/2006. Il-perjodu ta' applikazzjoni ta' dak ir-Regolament kien inizjalment mis-7 ta' Ottubru 2006 sas-7 ta' Ottubru 2008. Wara l-bidu ta' eżami ta' skadenza, dan ġie estiż fit-30 ta' Diċembru 2009 sal-31 ta' Marzu 2011. L-illegalità identifikata fis-sentenzi hija li l-Istituzzjonijiet tal-Unjoni ma stabbilixxewx jekk il-prodotti manifatturati mill-produtturi esportaturi kkonċernati għandhomx ikunu soġġetti għal dazju residwu jew għal dazju individwali. Fuq il-bażi tal-illegalità identifikata mill-Qorti, ma hemmx raġuni legali għall-eżenzjoni sħiħa tal-prodotti manufatturati mill-produtturi esportaturi kkonċernati mill-ħlas ta' dazju antidumping. Att ġdid li jirrimedja l-illegalità kkostatata mill-Qorti għalhekk jeħtieġ biss li jagħmel valutazzjoni mill-ġdid tar-rata ta' dazju antidumping applikabbli, u mhux tal-miżuri stess.

(58)

Billi ġie konkluż li d-dazju residwu għandu jkun impost mill-ġdid fir-rigward tal-produtturi esportaturi kkonċernati bl-istess rata li kienet ġiet oriġinarjament imposta bir-Regolament kontestat u r-Regolament (UE) Nru 1294/2009, l-ebda bidliet ma huma meħtieġa għar-Regolament tal-Kunsill (KE) Nru 388/2008. Dak ir-Regolament jibqa' validu.

(59)

Wara li tqiesu l-kummenti magħmula u l-analiżi tagħhom, ġie konkluż li d-dazju residwu antidumping applikabbli għaċ-Ċina, jiġifieri 16,5 %, għandu jkun impost mill-ġdid għall-perjodu ta' applikazzjoni tar-Regolament ikkontestat.

(60)

Il-produtturi esportaturi kkonċernati u l-partijiet kollha li ppreżentaw ruħhom kienu infurmati bil-fatti u l-kunsiderazzjonijiet essenzjali li fuq il-bażi tagħhom kien maħsub li tkun rakkomandata l-impożizzjoni mill-ġdid tad-dazju antidumping definittiv fuq l-esportazzjonijiet tat-tliet produtturi esportaturi kkonċernati. Dawn ingħataw perjodu taż-żmien li fih kellhom jagħmlu r-rappreżentazzjonijiet sussegwenti għad-divulgazzjoni.

(61)

Wara l-iżvelar, il-Kummissjoni rċeviet kummenti f'isem (i) il-Federation of Sports and Goods (“FESI”) u l-Koalizzjoni Ewropea tax-Xedd tas-Saqajn; (ii) Il-grupp ta' kumpaniji Deichmann (“Deichmann”) u (iii) Skechers SARL (“Skechers”), it-tnejn li huma importaturi tal-ilbies tar-riġlejn fl-Unjoni.

(62)

Fil-kummenti tagħhom dwar l-iżvelar, FESI u l-Koalizzjoni Ewropea tax-Xedd tas-Saqajn, l-ewwel innutaw li l-implimentazzjoni attwali hija bbażata fuq l-istess bażi legali u raġunijiet bħar-Regolamenti adottati qabel mill-Kummissjoni relatati mal-istess proċedura ta' implimentazzjoni, jiġifieri r-Regolament (UE) 2016/1395, ir-Regolament (UE) 2016/1647 u r-Regolament (UE) 2016/1731. Għalhekk, fir-risposta tagħhom għad-divulgazzjoni, huma sempliċement semmew, u inkorporaw b'referenza, il-kummenti li kienu ppreżentaw fir-rigward tar-Regolamenti msemmija hawn fuq, fis-16 ta' Diċembru 2015, fis-6 ta' Ġunju 2016, fis-16 ta' Ġunju 2016 u fil-11 ta' Awwissu 2016 rispettivament, mingħajr, madankollu, ma spjegaw il-kummenti u t-talbiet tagħhom.

(63)

FESI l u l-Koalizzjoni Ewropea tax-Xedd tas-Saqajn tennew prinċipalment li l-ftuh mill-ġdid tal-proċediment u l-impożizzjoni retroattiva mill-ġdid tad-dazju antidumping (i) ikun nieqes minn kwalunkwe bażi legali u li l-Kummissjoni ma jkollhiex il-kompetenza tadotta miżuri ulterjuri biex tikkonforma b'mod ostensibbli mal-obbligu fl-Artikolu 266 TFUE; (ii) jikser il-prinċipji ta' ċertezza tad-dritt, il-protezzjoni ta' aspettattivi leġittimi u n-nonretroattività; (iii) ikun sproporzjonat u fi ksur tal-Artikolu 5(4) TUE kif ukoll tal-Artikolu 266 TFUE; u (iv) ikun fi ksur tal-prinċipju ta' nondiskriminazzjoni.

(64)

Bi tweġiba għal dawn l-osservazzjonijiet il-Kummissjoni tirreferi għar-Regolament (UE) 2016/1395, ir-Regolament (UE) 2016/1647 u r-Regolament (UE) 2016/1731 li indirizzaw bis-sħiħ il-kummenti magħmula minn FESI u l-Koalizzjoni Ewropea tax-Xedd tas-Saqajn fl-implimentazzjoni attwali. Minħabba li l-FESI u l-Koalizzjoni Ewropea tax-Xedd tas-Saqajn ma elaboratx fuq l-argumenti tagħhom aktar, il-Kummissjoni tqis li dawn kienu wieġbu b'mod sħiħ f'dawn ir-Regolamenti u l-konklużjonijiet li saru f'dan ir-rigward f'dawn ir-Regolamenti huma b'dan ikkonfermati.

(65)

Barra minn hekk, FESI u l-Koalizzjoni Ewropea tax-Xedd tas-Saqajn sostnew li fl-interess taċ-ċertezza legali, il-Kummissjoni m'għandhiex tadotta u tippubblika ebda att legali ieħor dwar l-implimentazzjoni tas-sentenza tal-Qorti tal-Ġustizzja fil-kawżi magħquda C-659/13 u C-34/14, sakemm il-Qorti tal-Ġustizzja tiddeċiedi fuq rinviju għal deċiżjoni preliminari li għadu ma ġiex konkluż mressaq mill-Finanzgericht Düsseldorf (Kawża C-256/16), imsemmi fil-premessa (22), dwar il-validità tar-Regolament ta' Implimentazzjoni (UE) 2016/223.

(66)

Skont l-Artikolu 278 TFUE, azzjoni legali kontra l-atti legali adottati mill-Istituzzjonijiet m'għandhiex ikollha effett sospensiv. Barra minn hekk, skont il-ġurisprudenza, Qorti nazzjonali tista' tissospendi l-applikazzjoni ta' att legali biss meta l-kriterji stabbiliti fis-sentenzi Zuckerfabrik Süderdithmarschen/Altana huma ssodisfati. Il-Qorti ta' referenza fil-Kawża C-256/16 ma ssospendietx l-applikazzjoni tar-Regolament ta' Implimentazzjoni (UE) 2016/223. Għaldaqstant, il-Kummissjoni m'għandha l-ebda bażi biex ma tikkonformax ma' dak ir-Regolament. Fi kwalunkwe każ, il-validità ta' dan ir-Regolament hija indipendenti mill-validità tar-Regolament ta' Implimentazzjoni (UE) 2016/223.

(67)

FESI u l-Koalizzjoni Ewropea tax-Xedd tas-Saqajn fl-aħħarnett sostnew li fi ksur tal-prinċipju ta' amministrazzjoni tajba, il-Kummissjoni għamlet valutazzjoni superfiċjali tal-istatus tal-kumpaniji msemmija fl-Anness III ta' dan ir-Regolament mingħajr ma eżaminat l-informazzjoni kunfidenzjali disponibbli fir-rekords tagħha u li hija kklassifikat kumpaniji b'mod żbaljat f'dak l-Anness minkejja li debitament ippreżentaw talbiet għal MET/TI fil-proċediment tax-xedd għas-saqajn tal-2005.

(68)

Il-Kummissjoni qiegħda hawnhekk tikkonferma li l-ebda waħda mill-kumpaniji elenkati fl-Anness III ma għandha kwalunkwe rekord li rċeviet talba għal MET jew TI matul l-investigazzjoni oriġinali. FESI u l-Koalizzjoni Ewropea tax-Xedd tas-Saqajn ma taw l-ebda prova tal-eżistenza ta' tali talbiet. Kif imsemmi fil-premessa (24), fost il-kumpaniji elenkati fl-Anness III, kien hemm kumpaniji li mhumiex ikkonċernati mill-investigazzjoni peress li ma jinsabux pereżempju fiċ-Ċina jew fil-Vjetnam, jew li dawn kienu kumpaniji kummerċjali u fi kwalunkwe każ mhux intitolati għal marġni ta' dumping individwali. Għalhekk, il-Kummissjoni ma laqgħetx din it-talba.

(69)

Fir-rigward ta' Deichmann, hija l-ewwel sostniet li l-Kummissjoni ma għandha l-ebda bażi legali biex tinvestiga t-talbiet għal MET/IT provenjenti minn produtturi esportaturi fl-investigazzjoni oriġinali. Deichmann argumentat li l-proċediment, li ngħalqet bl-iskadenza tal-miżuri fl-31 ta' Marzu 2011, ma kinitx invalidata mis-sentenza fil-kawżi magħquda C-659/13 u C-34/14, u li għalhekk, ma tistax tinfetaħ mill-ġdid.

(70)

Fir-rigward tal-argument, li l-miżuri inkwistjoni skadew fil-31 ta' Marzu 2011, il-Kummissjoni ma tarax raġuni għala l-iskadenza tal-miżura tkun ta' relevanza għall-possibbiltà li l-Kummissjoni tadotta att ġdid li jissostitwixxi l-att annullat. Is-sentenza li tannulla l-att inizjali tiftaħ mill-ġdid, skont il-ġurisprudenza, il-proċedura amministrattiva, li tista' terġa' tibda' mill-punt fejn saret l-illegalità.

(71)

Għaldaqstant, il-proċedimenti antidumping, bħala riżultat tal-annullament tal-att li jikkonkludi l-proċedimenti, għadhom miftuħa. Il-Kummissjoni hija taħt obbligu li tagħlaq dawk il-proċedimenti, billi r-Regolament bażiku jistipula li investigazzjoni għandha tingħalaq b'att tal-Kummissjoni.

(72)

It-tieni, Deichmann sostniet li l-proċediment attwali huwa bi ksur tal-prinċipji ta' nuqqas ta' retroattività u ta' ċertezza legali, kif ukoll tal-Artikolu 10 tar-Regolament bażiku.

(73)

Rigward l-argument li jikkonċerna r-retroattività abbażi tal-Artikolu 10 tar-Regolament bażiku u l-Artikolu 10 tal-Ftehim Antidumping tad-WTO (“WTO ADA”), l-Artikolu 10(1) tar-Regolament bażiku, li jsegwi t-test tal-Artikolu 10(1) tad-WTO ADA, jistipula li għandhom jiġu applikati miżuri provviżorji u dazji antidumping definittiv biss għal prodotti li jidħlu f'ċirkolazzjoni libera wara ż-żmien meta tidħol fis-seħħ id-deċiżjoni meħuda skont l-Artikolu 7(1) jew 9(4) tar-Regolament bażiku, skont il-każ. F'dan il-każ, id-dazji antidumping in kwistjoni huma applikati biss għal prodotti li jidħlu f'ċirkolazzjoni libera wara li r-Regolament provviżorju u kkontestat (definittiv) meħud skont l-Artikolu 7(1) u 9(4) tar-Regolament bażiku rispettivament kien daħal fis-seħħ. Retroattività fis-sens tal-Artikolu 10(1) tar-Regolament bażiku, madankollu, tirreferi biss għal sitwazzjoni fejn l-oġġetti ġew introdotti f'ċirkolazzjoni libera qabel ma l-miżuri ġew introdotti, kif jirriżulta mill-istess test ta' din id-dispożizzjoni kif ukoll mill-eċċezzjoni prevista fl-Artikolu 10(4) tar-Regolament bażiku.

(74)

Il-Kummissjoni tosserva wkoll li la hemm retroattività u lanqas ksur taċ-ċertezza tad-dritt u l-aspettattivi leġittimi fil-każ preżenti.

(75)

Rigward ir-retroattività, il-ġurisprudenza tal-Qorti tiddistingwi, meta tevalwa jekk miżura hijiex retroattiva, bejn l-applikazzjoni ta' regola ġdida għal sitwazzjoni li saret definittiva (li ssir referenza għaliha wkoll bħala sitwazzjoni legali eżistenti jew definittivament stabbilita) (22), u sitwazzjoni li bdiet qabel id-dħul fis-seħħ tar-regola l-ġdida, iżda li għadha mhix definittiva (li ssir referenza għaliha wkoll bħala sitwazzjoni temporanja) (23).

(76)

Fil-każ preżenti, is-sitwazzjoni tal-importazzjonijiet tal-prodotti kkonċernati li seħħew matul il-perjodu ta' applikazzjoni tar-Regolament (KE) Nru 1472/2006 għadha ma saritx definittiva, minħabba li, bħala riżultat tal-annullament tar-Regolament ikkontestat, id-dazju antidumping applikabbli għalihom għadu ma ġiex stabbilit b'mod definittiv. Fl-istess ħin, l-importaturi tax-xedd tas-saqajn ġew avżati li dan id-dmir jista' jiġi impost bil-pubblikazzjoni tan-Notifika ta' Bidu (24) u r-Regolament provviżorju. Hija l-ġurisprudenza stabbilita tal-Qrati tal-Unjoni li l-operaturi ma jistgħux jakkwistaw aspettattivi leġittimi sakemm l-istituzzjonijiet ikunu adottaw att li jagħlaq il-proċedura amministrattiva, li ssir waħda definittiva (25).

(77)

Dan ir-Regolament jikkostitwixxi applikazzjoni immedjata għall-effetti futuri ta' sitwazzjoni li għadha għaddejja: Id-dazji fuq ix-xedd tas-saqajn ġew imposti mill-awtoritajiet doganali nazzjonali. Bħala riżultat ta' talbiet għal rimborż, li ma ġewx deċiżi b'mod definittiv, dawn jikkostitwixxu sitwazzjoni li għadha għaddejja. Dan ir-Regolament jistabbilixxi r-rata tad-dazju applikabbli għal dawn l-importazzjonijiet, u b'hekk jirregola l-effetti futuri ta' sitwazzjoni li għadha għaddejja.

(78)

Fi kwalunkwe każ, anki jekk kien hemm retroattività fis-sens tad-dritt tal-Unjoni, quod non, din ir-retroattività hija xorta waħda ġġustifikata għar-raġuni li ġejja:

(79)

Ir-regoli sostantivi tal-liġi tal-Unjoni jistgħu japplikaw għas-sitwazzjonijiet eżistenti qabel id-dħul fis-seħħ tagħhom sa fejn jirriżulta b'mod ċar mit-termini, l-objettivi jew l-iskema ġenerali tagħhom li tali effett għandu jingħatalhom (26). B'mod partikulari, fil-Kawża C-337/88 Società agricola fattoria alimantare (SAFA) (27) ġie deċiż li: [G]ħalkemm b'mod ġenerali l-prinċipju taċ-ċertezza legali jipprekludi li miżura tal-Komunità tieħu effett f'punt fiż-żmien qabel il-pubblikazzjoni tagħha, dan jista' jkun eċċezzjonalment il-każ fejn l-iskop li għandu jintlaħaq ikun jitlob hekk u fejn l-aspettattivi leġittimi ta' dawk ikkonċernati jkun irrispettat kif xieraq.

(80)

Fil-każ preżenti l-għan huwa li jiġi rrispettat l-obbligu tal-Kummissjoni skont l-Artikolu 266 TFUE. Ladarba, fis-sentenzi msemmija fil-premessa (12) hawn fuq, il-Qorti sabet illegalità biss fir-rigward tad-determinazzjoni tar-rata ta' dazju applikabbli, u mhux fir-rigward tal-impożizzjoni tal-miżuri nfushom (jiġifieri, fir-rigward tas-sejba ta' dumping, dannu u interess tal-Unjoni), il-produtturi esportaturi kkonċernati ma setgħux leġittimament jistennew li ma jiġu imposti l-ebda miżuri antidumping definittivi. Konsegwentement, dik l-impożizzjoni, anki jekk kienet retroattiva, quod non, ma tistax titqies li kisret l-aspettattivi leġittimi.

(81)

It-tielet nett, Deichmann sostniet li l-affermazzjoni tal-Kummissjoni, fil-premessa (38) li l-Qorti tal-Ġustizzja annullat ir-Regolament ikkontestat u r-Regolament (UE) Nru 1294/2009 fir-rigward tal-esportazzjonijiet ta' ċerti xedd tas-saqajn minn ċerti produtturi esportaturi Ċiniżi u Vjetnamiżi hija żbaljata, sa fejn is-sentenza fil-kawżi C-659/13 u C-34/14 ma tannullax ir-Regolamenti (KE) Nru 1472/2006 u (UE) Nru 1294/2009 f'dak li għandu x'jaqsam mat-tliet produtturi esportaturi kkonċernati, iżda din kienet annullat dawn ir-Regolamenti b'effett erga omnes. Skont Deichmann, li kieku l-Kummissjoni kellha timponi mill-ġdid dazju antidumping biss fuq l-importazzjonijiet mit-tliet produtturi esportaturi kkonċernati, u mhux fuq l-importazzjonijiet minn produtturi esportaturi oħra affettwati bl-istess mod permezz tas-sentenza tal-Qorti tal-Ġustizzja fil-kawżi magħquda C-659/13 C & J Clark International Limited u C-34/14 Puma SE, dan jikkostitwixxi diskriminazzjoni mhux ġustifikata fir-rigward ta' importazzjonijiet ta' dawn il-produtturi esportaturi l-oħra, u ikun qed jikser l-Artikolu 266 TFUE.

(82)

Fir-rigward tat-talba ta' trattament diskriminatorju vis-à-vis l-importazzjonijiet ta' produtturi esportaturi oħra milquta mis-sentenza tal-Qorti tal-Ġustizzja fil-Kawżi magħquda C-659/13 C & J Clark International Limited u C-34/14 Puma SE, il-Kummissjoni tosserva li l-produtturi esportaturi u ċerti importaturi kkonċernati minn dan ir-Regolament jibbenefikaw minn protezzjoni ġudizzjarja fil-qrati tal-Unjoni kontra dan ir-Regolament. Importaturi oħra jgawdu tali protezzjoni permezz ta' qrati u tribunali nazzjonali, li jaġixxu bħala mħallfin tal-liġi ordinarja tal-Unjoni.

(83)

L-allegazzjoni ta' diskriminazzjoni hija daqstant ieħor bla bażi. Kif imsemmi fil-premessa (21), fid-dawl tal-implimentazzjoni tas-sentenza fil-kawżi magħquda C-659/13 C & J Clark International Limited u C-34/14 Puma SE, il-Kummissjoni adottat ir-Regolament ta' Implimentazzjoni (UE) 2016/223 li jistabbilixxi proċedura għall-valutazzjoni ta' ċertu trattament tal-ekonomija tas-suq u talbiet individwali għat-trattament li jsiru minn produtturi esportaturi miċ-Ċina u mill-Vjetnam, u li jimplimentaw is-sentenza tal-Qorti tal-Ġustizzja fil-kawżi magħquda C-659/13 u C-34/14. Fl-Artikolu 1 ta' dan ir-Regolament il-Kummissjoni tat struzzjonijiet lill-awtoritajiet doganali nazzjonali biex jibagħtu t-talbiet kollha għall-ħlas lura tad-dazji antidumping definittivi mħallsa fuq l-importazzjonijiet ta' xedd tas-saqajn ġejjin miċ-Ċina u l-Vjetnam li sar minn importaturi bbażata fuq l-Artikolu 236 tal-Kodiċi Doganali tal-Komunità u bbażata fuq il-fatt li produttur esportatur mhux fil-kampjun talab TES jew TI fl-investigazzjoni oriġinali. Il-Kummissjoni għandha tivvaluta t-talbiet TES jew TI rilevanti u timponi mill-ġdid rata tad-dazju adegwata. Fuq din il-bażi, l-awtoritajiet doganali nazzjonali għandhom imbagħad jiddeċiedu dwar it-talba għal ħlas lura u l-maħfra tad-dazji antidumping.

(84)

Għalhekk, għall-importazzjonijiet kollha ta' xedd tas-saqajn fejn il-kriterji ta' hawn fuq ikunu ssodisfati, il-Kummissjoni se teżamina t-talbiet ta' TES u ta' TI li d-dazji antidumping jerġgħu jiġu imposti fuq il-bażi tal-kriterji oġġettivi stabbiliti fl-Artikoli 2(7)(b) u 9(5) tar-Regolament bażiku qabel l-emenda tiegħu. Għalhekk, il-produtturi esportaturi kollha l-oħra mir-RPĊ u l-Vjetnam li mhumiex inklużi fil-kampjun u l-importaturi tagħhom se jiġu trattati bl-istess mod fi stadju aktar tard skont il-proċedura stipulata fir-Regolament ta' Implimentazzjoni (UE) 2016/223. Huwa biss fejn ma jkunx hemm proċeduri nazzjonali pendenti li l-ebda valutazzjoni għal MET u għal TI ma għandhom jitwettqu, peress li ma jservi l-ebda skop prattiku.

(85)

Ir-raba' nett, Deichmann stqarret li kien ikun diskriminatorju li jiġi impost mill-ġdid dazju antidumping fuq it-tliet produtturi esportaturi kkonċernati, peress li l-ebda dazju antidumping ma ġie impost mill-ġdid wara s-Sentenzi Brosmann u Aokang.

(86)

Din l-istqarrija mhijiex fondata. Importaturi li importaw minn Brosman u erba' produtturi esportaturi oħra kkonċernati mis-sentenza fil-kawżi C-247/10P u C-249/10P, jinsabu f'sitwazzjoni legali u fattwali differenti, minħabba li l-produtturi esportaturi tagħhom iddeċidew li jikkontestaw ir-Regolament ikkontestat kif ukoll billi ġew rimborżati d-dazji tagħhom, sabiex huma protetti mill-Artikolu 221(3) tal-Kodiċi Doganali tal-Komunità. Ebda sfida bħal din, u l-ebda tali rimborż ma seħħew għal oħrajn.

(87)

Il-ħames nett, Deichmann allegat li kien hemm diversi irregolaritajiet proċedurali li rriżultaw minn din l-investigazzjoni. Fl-ewwel lok, huma argumentaw li l-produtturi esportaturi kkonċernati jistgħu ma jkunux iktar f'pożizzjoni li jipprovdu kummenti siewja jew jipprovdu evidenza addizzjonali biex jappoġġjaw it-talbiet tagħhom għal MET/IT li jkunu għamlu bosta snin ilu. Pereżempju, il-kumpaniji jistgħu ma jkunux għadhom jeżistu jew dokumenti rilevanti jisgħtu ma jkunux disponibbli.

(88)

Barra minn hekk, Deichmann argumentat li bil-kontra matul l-investigazzjoni oriġinali, il-miżuri tal-Kummissjoni de facto u de jure jaffettwaw biss lill-importaturi, billi dawn ma għandhom ebda mezz li jipprovdi xi influwenza sinifikanti u ma jistax jobbliga lill-fornituri tagħhom biex jikkooperaw mal-Kummissjoni.

(89)

Il-Kummissjoni tosserva li ma hemm xejn fir-Regolament bażiku li jirrikjedi li l-Kummissjoni tagħti kumpaniji esportaturi li jitolbu TES/TI l-possibilità li jikkompletaw informazzjoni fattwali nieqsa. Hija tfakkar li skont il-ġurisprudenza, l-oneru tal-prova jaqa' fuq il-produttur li jixtieq jibbenefika mit-TES/IT bis-saħħa tal-Artikolu 2(7)(b) tar-Regolament bażiku. Għal dan il-għan, l-ewwel subparagrafu tal-Artikolu 2(7)(c) jipprovdi li t-talba ppreżentata minn produttur bħal dan trid tinkludi provi suffiċjenti, hekk kif stabbiliti f'dik id-dispożizzjoni, li l-produttur jopera f'kundizzjonijiet ta' ekonomija tas-suq. B'hekk, kif sostnut mill-Qorti fis-sentenzi Brosmann u Aokang, l-Istituzzjonijiet mhumiex obbligati li jippruvaw li l-produttur ma jissodisfax il-kundizzjonijiet stabbiliti għar-rikonoxximent ta' dan l-istatus. Għall-kuntrarju, hija l-Kummissjoni li għandha tevalwa jekk il-provi fornuti mill-produttur ikkonċernat humiex biżżejjed sabiex juru li l-kriterji imposti mill-ewwel subparagrafu tal-Artikolu 2(7)(c) tar-Regolament bażiku huma ssodisfati sabiex jingħatalu TES/TI (ara l-premessa (40) hawn fuq). Id-dritt għal smigħ jikkonċerna l-evalwazzjoni ta' dawn il-fatti, iżda ma jinkludix id-dritt għal rimedju ta' informazzjoni defiċjenti. Inkella, il-produttur esportatur jista' jtawwal b'mod indefinit il-valutazzjoni, billi jipprovdi informazzjoni biċċa biċċa.

(90)

F'dan ir-rigward, ta' min ifakkar li ma hemm l-ebda obbligu li l-Kummissjoni titlob li l-produttur esportatur jikkumplimenta t-talba għal TESTI. Kif imsemmi fil-premessa preċedenti, il-Kummissjoni tista' tibbaża l-ġudizzju tagħha fuq it-tagħrif ippreżentat mill-produttur esportatur. Fi kwalunkwe każ, il-produtturi esportaturi kkonċernati ma kkontestawx il-valutazzjoni tat-talbiet tagħhom għal TES/TI mill-Kummissjoni, u ma identifikawx liema dokumenti jew persuni ma għadhomx aktar disponibbli. L-allegazzjoni hija għalhekk tant astratta li l-Istituzzjonijiet ma jistgħux iqisu dawk id-diffikultajiet meta jwettqu l-evalwazzjoni ta' talbiet tat-TES/TI. Billi dan l-argument huwa bbażat fuq spekulazzjoni u mhux appoġġjat minn indikazzjonijiet preċiżi dwar liema dokumenti u persuni ma għadhomx aktar disponibbli u dwar ir-rilevanza ta' dawn id-dokumenti u persuni għall-valutazzjoni tat-talba għal TES/TI, dan l-argument jiġi rifjutat.

(91)

Għal dak li jirrigwarda l-affermazzjoni li l-importatur ma jkollu l-ebda mezz sabiex jipprovdi xi kontribut sinifikanti, il-Kummissjoni tosserva dan li ġej: l-ewwel, l-importaturi ma jgawdux id-drittijiet tad-difiża, peress li l-miżuri antidumping mhumiex diretti kontrihom, iżda fil-konfront ta' produtturi esportaturi. It-tieni, l-importaturi kellhom l-opportunità li jikkummentaw fuq dan il-punt diġà matul il-proċedura amministrattiva qabel l-adozzjoni tar-Regolament ikkontestat. It-tielet, jekk l-importaturi kienu tal-opinjoni li kien hemm irregolarità f'dan ir-rigward, huma kellhom jagħmlu l-arranġament kuntrattwali meħtieġa mal-fornituri tagħhom biex jiġi żgurat li jkollhom id-dokumentazzjoni neċessarja. Għalhekk, il-pretensjoni trid tiġi miċħuda.

(92)

Is-sitt punt, Deichmann argumentat li l-Kummissjoni naqset milli teżamina jekk l-impożizzjoni tad-dazji antidumping ikunux fl-interess tal-Unjoni u argumentat li l-miżuri jkunu kontra l-interess tal-Unjoni minħabba li (i) il-miżuri diġà kellhom l-effett intiż meta kienu imposti l-ewwel darba; (ii) il-miżuri ma jikkawżawx benefiċċju addizzjonali għall-industrija tal-Unjoni; (iii) il-miżuri ma kinux se jaffettwaw il-produtturi esportaturi u (iv) il-miżuri kienu se jimponu spiża importanti fuq l-importaturi fl-Unjoni.

(93)

Dan il-każ jikkonċerna biss t-talbiet għal TES/IT, għax dan huwa l-uniku punt li fiha żball ta' liġi ma ġiet identifikata mill-Qrati tal-Unjoni. Għall-interess tal-Unjoni, il-valutazzjoni fir-Regolament (KE) Nru 1472/2006 tibqa' għal kollox valida. Barra minn hekk, din il-miżura hija ġġustifikata bl-għan li jiġu protetti l-interessi finanzjarji tal-Unjoni.

(94)

Fl-aħħar nett, Deichmann stqarret li d-dazju antidumping, jekk ikun impost mill-ġdid, ma jistgħax jinġabar minħabba l-istatut ta' limitazzjonijiet tal-Artikolu 103 tal-Kodiċi Doganali tal-Komunità kien għalaq. Skont Deichmann, din is-sitwazzjoni tista' tikkostitwixxi abbuż ta' poter minn naħa tal-Kummissjoni.

(95)

Il-Kummissjoni tfakkar li skont l-Artikolu 103 tal-Kodiċi Doganali tal-Komunità, l-istatut tal-limitazzjonijiet ma japplikax meta jiġi ppreżentat appell skont l-Artikolu 44 tal-Kodiċi Doganali tal-Komunità, bħal f'dawn il-kawżi kollha, li jikkonċernaw appelli abbażi tal-Artikolu 236 tal-Kodiċi Doganali tal-Komunità.

(96)

Fir-rigward ta' Skechers, hija irrikonoxxiet li l-ebda wieħed mill-produtturi esportaturi kkonċernati minn din l-implimentazzjoni ma kien il-fornitur tiegħu, u għaldaqstant qieset li l-konklużjonijiet ma kinux rilevanti għas-sitwazzjoni ta' din il-parti. Din il-parti sostniet li l-konklużjonijiet tal-implimentazzjoni attwali ma jistgħux għaldaqstant jikkostitwixxu bażi biex jiġu miċħuda t-talbiet għal rimborż ippreżentati fid-dwana nazzjonali. L-importatur talab ukoll li t-talbiet għal TES/TI tal- fornituri tiegħu għandhom jiġu investigati fuq il-bażi tad-dokumenti pprovduti mill-awtoritajiet doganali Belġjani rilevanti lill-Kummissjoni.

(97)

Fir-rigward tat-talba ta' hawn fuq, il-Kummissjoni tirreferi għar-Regolament ta' Implimentazzjoni (UE) 2016/223 li jistabbilixxi proċedura għall-valutazzjoni ta' ċerti talbiet għal trattament ta' ekonomija tas-suq u għal trattment individwali li jsiru minn produtturi esportaturi miċ-Ċina u mill-Vjetnam, u li jimplimenta s-sentenza tal-Qorti tal-Ġustizzja fil-kawżi magħquda C-659/13 u C-34/14 li tistabbilixxi l-proċedura li għandha tiġi segwita f'dan ir-rigward. B'mod partikolari, skont l-Artikoli 1 u 2 ta' dak ir-Regolament, il-Kummissjoni se teżamina t-talbiet rilevanti għal TES/TI hekk kif tkun irċeviet id-dokumentazzjoni rilevanti mill-awtoritajiet doganali. Ta' min jinnota li l-awtoritajiet doganali Belġjani sadattant ipprovdew lill-Kummissjoni b'lista ta' produtturi esportaturi mhux fil-kampjun miċ-Ċina u l-Vjetnam, li allegatament kienu talbu TES jew TI matul l-investigazzjoni oriġinali, u li kienu fornituri lill-importaturi li jitolbu r-rimborż tad-dazji. Bħalissal-Kummissjoni qed twettaq valutazzjoni ta' dawn id-dikjarazzjonijiet fejn ikun xieraq. Din l-investigazzjoni għadha għaddejja.

(98)

Dan ir-Regolament huwa konformi mal-opinjoni tal-Kumitat stabbilit permezz tal-Artikolu 15(1) tar-Regolament (UE) 2016/1036,