(1)

Fit-18 ta' Frar 2016, il-Kummissjoni Ewropea (“il-Kummissjoni”) fetħet investigazzjoni antidumping fir-rigward ta' importazzjonijiet fl-Unjoni ta' ċerta karta termali ħafifa li joriġinaw mill-Korea t'Isfel (“il-pajjiż ikkonċernat”) fuq il-bażi tal-Artikolu 5 tar-Regolament tal-Kunsill (KE) Nru 1225/2009 (2). Hija ppubblikat Notifika ta' Bidu f'Il-Ġurnal Uffiċjali tal-Unjoni Ewropea (3) (“in-Notifika ta' Bidu”).

(2)

Il-Kummissjoni bdiet l-investigazzjoni wara lment ippreżentat fl-4 ta' Jannar 2016 mill-Assoċjazzjoni Ewropea tal-Karta Termali (ETPA) (“l-ilmentatur”) f'isem il-produtturi li jirrappreżentaw aktar minn 25 % tal-produzzjoni totali tal-Unjoni ta' ċerta karta termali ħafifa. L-ilment kien jinkludi evidenza ta' dumping u ta' ħsara materjali li tirriżulta minnu li kienet suffiċjenti biżżejjed biex tiġġustifika li tinbeda l-investigazzjoni.

(3)

Fin-Notifika ta' Bidu, il-Kummissjoni stiednet lill-partijiet biex jagħmlu kuntatt magħha sabiex jipparteċipaw fl-investigazzjoni. Barra minn hekk, il-Kummissjoni speċifikament infurmat lill-produtturi magħrufa tal-Unjoni, lill-produtturi esportaturi magħrufa u lill-awtoritajiet Koreani, lill-importaturi magħrufa, lill-utenti u lill-kummerċjanti dwar il-bidu ta' investigazzjoni u stednithom jipparteċipaw.

(4)

Il-partijiet interessati kellhom l-opportunità li jikkummentaw dwar il-bidu tal-investigazzjoni u li jitolbu għal seduta mal-Kummissjoni u/jew mal-Uffiċjal tas-Seduta fil-proċedimenti kummerċjali (“l-Uffiċjal tas-Seduta”).

(5)

Saru żewġ seduti mal-Uffiċjal tas-Seduta fuq talba tal-grupp Hansol, li jappartjenu għalih iż-żewġ produtturi esportaturi relatati li kkooperaw. Matul l-ewwel seduta ta' Marzu 2016, il-partijiet talbu li jkunu eżentati milli jwieġbu għall-kwestjonarju għal diversi konvertituri relatati. Wara s-seduta u żjara ta' verifika lil wieħed mill-konvertituri relatati biex jiġu aċċertati l-argumenti li jirfdu t-talba għal eżenzjoni, il-Kummissjoni dehrilha li l-kwestjonarju kellu jimtela minn wieħed mill-konvertituri relatati u ingħatat eżenzjoni lit-tliet konvertituri relatati l-oħra. Fit-tieni seduta ta' Settembru 2016, iż-żewġ produtturi esportaturi li kienu qed jikkooperaw, għadd ta' importaturi u utenti mhux relatati, u rappreżentanti tal-gvern Korean indikaw għadd ta' asserzjonijiet rigward id-definizzjoni tal-prodott ikkonċernat, l-ilement, il-ħsara, ir-rabta ta' kawżalità u l-interess tal-Unjoni.

(6)

Fin-Notifika ta' Bidu, il-Kummissjoni ddikjarat ukoll li kellha mnejn tagħmel kampjunar tal-partijiet interessati b'konformità mal-Artikolu 17 tar-Regolament bażiku.

(7)

Fin-Notifika ta' Bidu tagħha, il-Kummissjoni stqarret li kienet għażlet b'mod provviżorju kampjun tal-produtturi tal-Unjoni. Il-Kummissjoni għażlet il-kampjun abbażi tal-akbar volum rappreżentattiv tal-bejgħ filwaqt li żgurat firxa ġeografika. Dan il-kampjun kien jikkonsisti minn tliet produtturi tal-Unjoni f'żewġ Stati Membri differenti. Il-produtturi tal-Unjoni fil-kampjun kienu jirrappreżentaw bejn 75 % u 95 % (4) tal-volumi tal-bejgħ lil klijenti mhux relatati fl-Unjoni tal-kumpaniji li ppreżentaw ruħhom fl-eżerċizzju permanenti u tal-volum tal-bejgħ totali stmat lil klijenti mhux relatati fl-Unjoni. Il-Kummissjoni stiednet lill-partijiet interessati biex jikkummentaw dwar il-kampjun provviżorju. L-ebda parti ma kkummentat dwar il-kampjun provviżorju, għaldaqstant il-kampjun provviżorju ġie kkonfermat. Il-kampjun huwa rappreżentattiv tal-industrija tal-Unjoni.

(8)

Sabiex tiddeċiedi jekk il-kampjunar kienx meħtieġ u, jekk iva, biex tagħżel kampjun, il-Kummissjoni staqsiet lill-importaturi mhux relatati biex jipprovdu l-informazzjoni speċifikata fin-notifika ta' bidu.

(9)

Konvertitur mhux relatat b'attivitajiet ta' importazzjoni pprovda l-informazzjoni mitluba u qabel li jiġi inkluż fil-kampjun. Fid-dawl tal-għadd baxx ta' tweġibiet, il-Kummissjoni ddeċidiet li l-kampjunar ma kienx meħtieġ. Ma sar l-ebda kumment.

(10)

Il-Kummissjoni bagħtet kwestjonarji liż-żewġ produtturi esportaturi mhux relatati, jiġifieri Hansol Paper Co., Ltd (“Hansol Paper”) u Hansol Artone Paper Co., Ltd (“Artone”), li t-tnejn jappartjenu għall-grupp Hansol kif ukoll lill-kummerċjant relatat tagħhom Hansol Europe B.V. (“Hansol Europe”) u l-konvertitur relatat Schades Ltd (“Schades”). Intbagħtu wkoll kwestjonarji lit-tliet produtturi tal-Unjoni fil-kampjun, u lil madwar 50 parti (26 utent, 21 intermedjarju, żewġ assoċjazzjonijiet u importatur mhux relatat) li kienu esprimew interess fl-investigazzjoni.

(11)

Waslu t-tweġibiet għall-kwestjonarju mingħand iż-żewġ produtturi esportaturi u l-kummerċjant relatat tagħhom, il-tliet produtturi tal-Unjoni fil-kampjun, disa' konvertituri mhux relatati, żewġ kummerċjanti f'livelli differenti, konvertitur mhux relatat b'attivitajiet ta' importazzjoni u assoċjazzjoni waħda. Barra minn hekk, ħdax-il parti wieġbu permezz ta' sottomissjonijiet f'format ħieles.

(12)

Il-Kummissjoni fittxet u vverifikat l-informazzjoni kollha li dehrilha neċessarja għal determinazzjoni provviżorja ta' dumping, il-ħsara li tirriżulta u l-interess tal-Unjoni. Iż-żjarat ta' verifika skont l-Artikolu 16 tar-Regolament bażiku saru fil-bini tal-kumpaniji li ġejjin:

(13)

Minħabba n-numru limitat ta' partijiet li ppreżentaw xi data, uħud miċ-ċifri ppreżentati hawn taħt huma fil-forma ta' meded.

(14)

L-investigazzjoni ta' dumping u ħsara kopriet il-perjodu mill-1 ta' Jannar 2015 sal-31 ta' Diċembru 2015 (“il-perjodu ta' investigazzjoni”). L-eżami tax-xejriet relevanti għall-ivvalutar tal-sara kien ikopri l-perjodu mill-1 ta' Jannar 2012 sa tmiem il-perjodu ta' investigazzjoni (“il-perjodu kkunsidrat”).

(15)

Il-prodott ikkonċernat huwa karta termali ħafifa (LWTP — Light Weight Thermal Paper) li tiżen 65 gr/m2 jew inqas; f'rombli ta' wisgħa ta' 20 ċm jew aktar, piż tar-romblu (inkluża l-karta) ta' 50 kg jew aktar u dijametru tar-romblu (inkluża l-karta) ta' 40 ċm jew aktar (“rombli jumbo”); b'kisja ta' taħt fuq naħa waħda jew fuq iż-żewġ naħat jew mingħajrha; miksija b'sustanza termosensittiva (jiġifieri taħlita ta' (jiġifieri taħlita taż-żebgħa u l-iżviluppatur li jirreaġixxu u jifformaw immaġni meta tiġi applikata s-sħana) fuq naħa waħda jew fuq iż-żewġ naħat; u b'kisja ta' fuq jew mingħajrha, li toriġina mir-Repubblika tal-Korea, li bħalissa taqa' fil-kodiċijiet tan-NM ex 4809 90 00, ex 4811 90 00, ex 4816 90 00 u ex 4823 90 85 (“il-prodott ikkonċernat”).

(16)

LWTP tista' tiġi prodotta b'diversi tipi ta' żviluppaturi: bi żviluppaturi li fihom il-bisfenol A u l-bisfenol S (LWTP li fih il-fenol), jew bi żviluppaturi li la fihom ebda fenol (LWTP ħielsa mill-fenol) Din l-investigazzjoni tikkonċerna ż-żewġ tipi ta' LWTP.

(17)

Karta termali ħafifa tintuża fl-applikazzjonijiet tal-punt tal-bejgħ (point of sale — POS) bħar-riċevuti li jagħtu l-ħwienet.

(18)

L-investigazzjoni uriet li l-prodotti li ġejjin għandhom l-istess karatteristiċi fiżiċi u tekniċi bażiċi kif ukoll l-istess użi bażiċi:

(19)

Il-Kummissjoni ddeċidiet f'dan l-istadju li dawk il-prodotti għaldaqstant huma simili skont it-tifsira tal-Artikolu 1(4) tar-Regolament bażiku.

(20)

Il-produttur esportatur li kkoopera talab l-esklużjoni tal-LWTP ħielsa mill-fenol mill-iskop mill-ambitu tal-prodott fuq il-bażi li l-LWTP ħielsa mill-fenol la hija maħduma u lanqas esportata mir-Repubblika tal-Korea u li hija differenti mil-LWTP li fiha l-fenol, minħabba l-istruttura kimika, il-perċezzjoni tal-konsumaturi, il-proċessi tal-produzzjoni, l-utenti aħħarin u l-prezz tas-suq. L-istess parti talbet ukoll l-esklużjoni tal-LWTP li jiżen inqas minn 44 gr/m2.

(21)

F'dan ir-rigward, l-investigazzjoni uriet li hemm diversi tipi ta' LWTP — inklużi dawk bil-fenol jew mingħajru u dawk inqas minn 44 gr/m2 — u li kollha jiffurmaw prodott wieħed, minħabba li kollha għandhom karatteristiċi bażiċi simili, proċessi ta' produzzjoni simili, utenti aħħarin identiċi u huma interkambjabbli mill-perspettiva tal-utenti u tal-konsumaturi. Tabilħaqq, l-investigazzjoni uriet li t-tipi tal-prodotti kollha jikkonsistu f'karta bażi b'kisja sensittiva għas-sħana u li essenzjalment il-prodotti kollha huma r-riżultat ta' proċessi simili. Barra minn hekk, it-tipi kollha ta' LWTP għandhom proprjetajiet simili u jintużaw għall-istampar b'karta termali. Għalhekk, mill-perspettiva tal-utent u tal-konsumatur, kollha għandhom riżultati aħħarin simili.

(22)

Aktar minn dan, wieħed għandu jinnota li t-talba għall-esklużjoni tal-LWTP li tiżen inqas minn 44 gr/m2 kienet fi kwalunkwe każ mhux sustanzjata mill-evidenza.

(23)

Minkejja li l-produttur esportatur iddikjara li jista' jkun hemm perċezzjoni differenti bejn l-LWTP li jinkludi l-fenol jew le, ma ġiet ippreżentata l-ebda evidenta sostanzjata biex tiġġustifika dik it-talba u l-investigazzjoni kkonfermat li l-maġġoranza kbira tal-konsumaturi mhux konxja mill-għamla partikolari tal-LWTP u għaldaqstant ma jagħmlux differenza bejn LWTP li fija l-fenol u dik li ma fihiex. Barra minn hekk, il-prezzijiet tas-suq ma jvarjawx ħafna bejn l-LWTP li fiha l-fenol u dik li ma fihiex. Għalhekk, hija kkonkludiet proviżjonalment li t-tipi kollha tal-LWTP jikkompetu ma' xulxin, minkejja b'xi varjazzjoni fil-prezz. Il-kompetizzjoni fil-prezz fost it-tipi ta' prodotti hija żviluppata aktar fit-taqsima 5.2.4.

(24)

Għar-raġunijiet ta' hawn fuq, il-prodotti li jiżnu inqas minn 44 gr/m2 u l-LWTP ħielsa mill-fenol ma jistgħux jiġu esklużi mid-definizzjoni tal-prodott simili f'dan l-istadju. Għalhekk iż-żewġ talbiet ma ntlaqgħux.

(25)

Fil-perjodu ta' investigazzjoni, il-grupp Hansol biegħ 15–25 % tal-volum ta' bejgħ totali tal-prodott ikkonċernat tiegħu tal-Unjoni jew direttament lil partijiet mhux relatati jew indirettament għal bejgħ mill-ġdid permezz ta' partijiet relatati; il-parti l-kbira tal-bejgħ tal-Unjoni (bejn 75 % u 85 %) kienet bejgħ lil partijiet relatati biex jiġi kkonvertit f'rombli żgħar. Il-meded jingħataw għal raġunijiet ta' kunfidenzjalità. Sabiex isir kalkolu rappreżentattiv tad-dumping, iż-żewġ kanali tal-bejgħ ġew inklużi f'dak il-kalkolu u ingħataw il-piż xieraq.

(26)

Il-Kummissjoni l-ewwel eżaminat jekk il-volum totali tal-bejgħ domestiku għall-produtturi esportaturi li kkooperaw kienx rappreżentattiv, b'konformità mal-Artikolu 2(2) tar-Regolament bażiku. Il-bejgħ domestiku ikun rappreżentattiv jekk il-volum totali tal-bejgħ tal-prodott simili lil konsumaturi indipendenti fis-suq domestiku għal kull produttur li jesporta jkun mill-inqas 5 % tal-volum tal-bejgħ totali tal-esportazzjoni tal-prodott ikkonċernat lill-Unjoni matul il-perjodu ta' investigazzjoni. Fuq din il-bażi, il-bejgħ totali mill-produtturi esportaturi tal-prodott simili fis-suq dometstiku kienu rappreżentattivi.

(27)

Il-Kummissjoni sussegwentement identifikat it-tipi tal-prodott mibjugħa domestikament li kienu identiċi jew jixbħu sew lit-tipi tal-prodotti mibjugħa għall-esportazzjoni lill-Unjoni għall-produtturi esportaturi mal-bejgħ domestiku rappreżentattiv.

(28)

Il-Kummissjoni imbagħad eżaminat jekk il-bejgħ domestiku mill-produtturi esportaturi fis-suq domestiku tagħha għal kull tip ta' prodott li huwa identiku jew komparabbli mat-tip ta' prodott mibjugħ għall-esportazzjoni lill-Unjoni kienx rappreżentattiv, b'konformità mal-Artikolu 2(2) tar-Regolament bażiku. Il-bejgħ domestiku ta' tip ta' prodott huwa rappreżentattiv jekk il-volum totali tal-bejgħ domestiku ta' dak it-tip ta' prodott lil konsumaturi indipendenti matul il-perjodu ta' investigazzjoni jirrappreżenta mill-inqas 5 % tal-volum totali tal-bejgħ tal-esportazzjoni tal-prodott identiku jew komparabbli lejn l-Unjoni. Il-Kummissjoni stabbiliet li tliet prodotti inbiegħu f'volumi inqas minn 5 % tal-volum totali tal-bejgħ tal-esportazzjoni lejn l-Unjoni. Dawn it-tipi ta' prodotti ġew ikkunsidrati li huma tipi ta' prodotti komparabbli ma' dawk mibjugħa fis-suq domestiku, bl-unika differenza fil-piż tal-karta u f'każ wieħed, it-tip ta' fenol użat. Għal dawn it-tipi ta' prodotti, il-valur normal ġie kkostruwit.

(29)

Il-Kummissjoni imbagħad iddefiniet il-proporzjon tal-bejgħ profittabbli lill-konsumaturi indipendenti fis-suq domestiku għal kull tip ta' prodott matul il-perjodu ta' investigazzjoni sabiex tiddeċiedi jekk tużax il-bejgħ domestiku attwali għall kalkolu tal-valur normali, b'konformità mal-Artikoli 2(4) tar-Regolament bażiku.

(30)

Il-valur normali huwa bbażat fu il-prezz domestiku attwali għal kull tip ta' prodott, irrispettivament minn jekk dak il-bejgħ kien profittabbli jew le, jekk:

(31)

F'dan il-każ, il-valur normali huwa medju ponderat tal-prezzijiet tal-bejgħ domestiku kollha ta' dak it-tip ta' prodott matul il-perjodu ta' investigazzjoni.

(32)

Il-valur normali huwa l-prezz domestiku attwali għal kull tip ta' prodott tal-bejgħ domestiku profittabbli biss tat-tipi ta' prodotti matul il-perjodu ta' investigazzjoni, jekk:

(33)

L-analiżi tal-bejgħ domestiku uriet li l-parti l-kbira tal-bejgħ domestiku kien profittabbli u li l-prezz tal-bejgħ medju ponderat kien ogħla mill-kost tal-produzzjoni. Għaldaqstant, il-valur normali kien ikkalkulat bħala medju ponderat tal-prezzijiet tal-bejgħ domestiku kollu matul il-perjodu ta' investigazzjoni.

(34)

Għal dawk it-tip ta' prodotti li ma kellhom ebda bejgħ jew li kellhom bejgħ insuffiċjenti tal-prodott simili fi kwantitajiet rappreżentattivi fis-suq domestiku, il-Kummissjoni kkostruwiet il-valur normali b'konformità mal-Artikolu 2(3) u (6) tar-Regolament bażiku.

(35)

Il-valur normali ġie kkostruwit billi ingħadd dan li ġej mal-kost medju tal-produzzjoni tal-prodott simili tal-produtturi esportaturi matul il-perjodu ta' investigazzjoni:

(36)

Għat-tipi ta' prodotti li ma nbigħux fi kwantitajiet rappreżentattivi fis-suq domestiku, ingħaddu l-ispejjeż u l-profitt medji tal-SG&A tat-tranżazzjonijiet li saru fl-andament normali kummerċjali fis-suq domestiku għal dawk it-tipi. Għat-tipi ta' prodotti li ma nbiegħu xejn fis-suq domestiku, ingħaddu l-ispejjeż u l-profitt medji tal-SG&A tat-tranżazzjonijiet kollha li saru fl-andament normali kummerċjali fis-suq domestiku.

(37)

Kif spjegat fil-premessa 25, il-bejgħ tal-Unjoni tal-grupp Hansol matul il-perjodu ta' investigazzjoni kien jikkonsisti f'rombli jumbo mibjugħa lil partijiet relatati għal bejgħ mill-ġdid, iżda l-maġġoranza kbira tal-bejgħ lill-Unjoni kienet il-bejgħ tal-prodott ikkonċernat lil kumpaniji relatati għall konverżjoni f'rombli żgħar li sussegwentement inbiegħu mill-ġdid lil konsumaturi mhux relatati.

(38)

Rigward il-bejgħ tal-prodott ikkonċernat dirett lill-konsumaturi indipendenti fl-Unjoni, il-prezz tal-esportazzjoni kien il-prezz attwalment imħallas jew li jrid jiġi mħallas għall-prodott ikkonċernat meta jkun mibjugħ għall-esportazzjoni lejn l-Unjoni, b'konformità mal-Artikolu 2(8) tar-Regolament bażiku.

(39)

Għall-bejgħ tal-prodott ikkonċernat lejn l-Unjoni permezz ta' kumpaniji relatati li jaġixxu bħala importatur/kummerċjant u/jew bħala konvertitur, il-prezz tal-esportazzjoni kien stabbilit fuq il-bażi tal-prezz li bih il-prodott importat jew importat u kkonvertit kien mibjugħ mill-ġdid għall-ewwel darba lil konsumaturi indipendenti fl-Unjoni, b'konformità mal-Artikolu 2(9) tar-Regolament bażiku. Il-prezz tal-bejgħ tal-parti relatata lil konsumaturi mhux relatati ġie aġġustat lura għal prezz tal-fabbrika billi tnaqqas l-SG&A tal-parti relatata, ammont raġonevoli tal-profitt u tal-allowances oħra kull meta applikabbli. Jekk il-bejgħ kien jikkonċerna rombli żgħir, il-kostijiet tal-konverżjoni rrappurtati u vverifikati tnaqqsu mis-somma.

(40)

Rigward il-marġini tal-profitt użat, skont il-każistika stabbilita tal-qrati tal-Unjoni, il-Kummissjoni ma użatx il-marġini tal-profitt tal-kumpaniji relatati minħabba li dawn mhumiex ikkunsidrati affidabbli. Importatur mhux relatat ikkoopera iżda il-profittabbiltà tiegħu kienet kunfidenzjali u ma tistax tiġi żvelata. Għalhekk, fin-nuqqas ta' kull informazzjoni oħra, intuża marġini ta' profitt raġonevoli li kien intuża fi proċediment preċedenti rigward prodott ieħor ta' karta (karta fina miksija) maħdum minn industrija simili (5). Minħabba li ż-żewġ prodotti u industriji huma simili ħafna (it-tnejn huma industriji intensivi fil-kapital u barra minn hekk xi produtturi tal-LWTP jipproduċu wkoll karta fina miksija), dan il-metodu biex jiġi ddeterminat marġini ta' profitt raġonevoli instab li kien raġonevoli. Il-marġini tal-profitt użat, fin-nuqqas ta' kull informazzjoni oħra disponibbli, huwa ta' 4,5 %.

(41)

Il-Kummissjoni qabblet il-valur normali u l-prezz tal-esportazzjoni tal-produtturi esportaturi fuq il-bażi tal-prezz mill-fabbrika.

(42)

Meta kienet iġġustifikata bil-ħtieġa ta' tqabbil ġust, il-Kummissjoni aġġustat il-valur normali u/jew il-prezz tal-esportazzjoni għad-differenzi li jaffettwaw il-prezzijiet u l-komparabilità tal-prezz, b'konformità mal-Artikolu 2(10) tar-Regolament bażiku.

(43)

Minħabba li l-oriġini tar-rombli jumbo użati għall-produzzjoni u l-bejgħ tar-rombli żgħar ma kinitx traċċabbli, il-prezz tal-esportazzjoni tar-rombli jumbo mibjugħa lill-partijiet relatati biex jiġu kkonvertiti f'rombli żgħar ġie mqabbel ma' valur normali stabbilit f'livell aggregat, jiġifieri għal kull tip ta' prodott, ibbażat fuq prezz tal-bejgħ u kost tal-produzzjoni domestiku medju kemm għal Hansol Paper kif ukoll għal Artone.

(44)

Il-marġini tad-dumping għall -prezzijiet tal-esportazzjoni għall-bejgħ dirett tar-rombli jumbo lil partijiet mhux relatati u l-bejgħ tar-rombli jumbo permezz ta' partijiet relatati ġie stabbilit billi tqabbel il-prezz ta' esportazzjoni ta' Hansol Paper għal kull tip ta' prodott mal-valur normali ta' Hansol Paper għal kull tip ta' prodott u l-prezz ta' esportazzjoni ta' Artone għal kull tip ta' prodott mal-valur normali ta' Artone għal kull tip ta' prodott.

(45)

Għalhekk il-marġini tad-dumping ikkalkulat huwa ta' 10 %–15 % tal-bejgħ tar-rombli jumbo li sussegwentement jiġu kkonvertiti f'rombli żgħar għall-bejgħ lil partijiet mhux relatati u 0,5–5 % għall-bejgħ ta' rombli jumbo lil partijiet mhux relatati u lil partijiet relatati.

(46)

Kif ġie spjegat fil-premessa 25, 15 %–25 % tal-esportazzjonijiet tal-grupp Hansol lejn l-Unjoni kienu bejgħ (dirett jew indirett) ta' rombli jumbo matul il-perjodu ta' investigazzjoni, filwaqt li l-bejgħ rimanenti kien bejgħ ta' rombli jumbo lil partijiet relatati li ġew ikkonvertiti jew mibjugħa mill-ġdid bħala rombli żgħar. Il-marġini tad-dumping ta' hawn fuq ġew ponderati skont dan. Dan sar billi ġie applikat il-proporzjon tal-bejgħ tar-rombli jumbo għal bejgħ dirett jew indirett lil partijiet mhux relatati (jiġifieri 15 %–25 %) mal-marġini tad-dumping ikkalkulat għar-rombli jumbo (0,5 %–5 %) u billi ġie applikat il-proporzjon tal-bejgħ tar-rombli jumbo lil partijiet relatati għall-konveżjoni f'rombli żgħar u l-bejgħ sussegwenti tagħhom lil partijiet mhux relatati (jiġifieri 75 %–85 %) mal-marġini tad-dumping ikkalkulat għar-rombli jumbo ikkonvertiti f'rombli żgħar (10 %–15 %).

(47)

Għall-produtturi esportaturi li kkooperaw, il-Kummissjoni qabblet il-valur normali medju ponderat għal kull tip tal-prodott simili mal-prezz tal-esportazzjoni medju ponderat tat-tip korrispondenti tal-prodott ikkonċernat, b'konformità mal-Artikolu 2(11) u (12) tar-Regolament bażiku.

(48)

Fuq din il-bażi, il-marġini tad-dumping medju ponderati provviżorji espressi bħala perċentwal tal-prezz fil-fruntiera CIF tal-Unjoni, ħieles mid-dazju, huma kif ġej:

(49)

Għall-produtturi esportaturi l-oħrajn kollha fir-Repubblika tal-Korea, il-Kummissjoni stabbiliet il-marġini tad-dumping abbażi tal-fatti disponibbli, skont l-Artikolu 18 tar-Regolament bażiku. Għal dan il-għan, il-Kummissjoni ddeterminat il-livell ta' kooperazzjoni tal-produtturi esportaturi. Il-livell ta' kooperazzjoni huwa l-volum ta' esportazzjonijiet tal-produtturi esportaturi li kkooperaw lejn l-Unjoni espress bħala proporzjon tal-volum totali ta' esportazzjoni — kif irrapportat fl-istatistika tal-importazzjonijiet tal-Eurostat — mill-pajjiż ikkonċernat lejn l-Unjoni.

(50)

Il-livell tal-kooperazzjoni f'dan il-każ huwa għoli minħabba li l-importazzjonijiet tal-produtturi esportaturi li kkooperaw kienu jikkostitwixxu l-esportazzjonijiet kollha lill-Unjoni matul il-perjodu ta' investigazzjoni. Abbażi ta' dan, il-Kummissjoni ddeċidiet li tibbaża l-marġini residwu tad-dumping fil-livell tal-kumpanija li kkooperat.

(51)

Il-prodott simili kien immanifatturat minn ħames produtturi fl-Unjoni matul il-perjodu ta' investigazzjoni. Dawn jikkostitwixxu l-“industrija tal-Unjoni” skont it-tifsira tal-Artikolu 4(1) tar-Regolament bażiku.

(52)

Il-produzzjoni totali tal-Unjoni matul il-perjodu ta' investigazzjoni kienet stabbilita għal madwar 372 645 tunnellata. Il-Kummissjoni stabbiliet iċ-ċifra abbażi tat-tweġiba għall-kwestjonarju li ppreżenta l-ilmentatur, u vverifikata mat-tweġibiet tal-kwestjonarju individwali tal-produtturi tal-Unjoni fil-kampjun. Kif indikat fil-premessa 7, tliet produtturi tal-Unjoni intgħażlu fil-kampjun li jirrappreżentaw bejn 75 u 95 % tat-total tal-produzzjoni tal-Unjoni tal-prodott simili.

(53)

Il-Kummissjoni stabbiliet il-konsum tal-Unjoni abbażi tal-bejgħ lil konsumaturi mhux relatati fl-Unjoni mill-industrija tal-Unjoni (sors: it-tweġiba għall-kwestjonarju li ppreżenta l-ilmentatur u tweġibiet individwali vverifikati għall-kwestjonarju tal-produtturi tal-Unjoni fil-kampjun), l-istimi tal-ilmentatur tal-importazzjonijiet tal-LWTP mill-Istati Uniti tal-Amerika (USA) u mir-Repubblika tal-poplu taċ-Ċina (RPĊ) u l-bejgħ fl-Unjoni tal-produttur esportatur (sors: il-kwestjonarju dwar id-dumping).

(54)

Il-konsum tal-Unjoni żviluppa kif ġej:

Tabella 1

Il-konsum tal-Unjoni (tunnellati)

(55)

Matul il-perjodu kkunsidrat il-konsum tal-Unjoni żdied bi 15 %, l-aktar fil-perjodu 2012–2013 u mbagħad fil-perjodu 2014–2015.

(56)

Il-Kummissjoni stabbiliet il-volum tal-importazzjonijiet abbażi tat-tweġiba għall-kwestjonarju li ssottometta l-produttur esportatur. Is-sehem mis-suq tal-importazzjonijiet ġie stabbilit abbażi tal-konsum tal-Unjoni (ara l-premessa 53).

(57)

L-importazzjonijiet fl-Unjoni mill-pajjiż ikkonċernat żviluppaw kif ġej:

Tabella 2

Il-volum tal-importazzjoni (tunnellati) u s-sehem mis-suq

(58)

Fl-2015 l-importazzjonijiet mir-Repubblika tal-Korea kienu 22,8 darba akbar minn dawk tal-2012. Is-sehem tagħhom mis-suq żdied minn 0,7 % fl-2012 għal 13,6 % fil-perjodu ta' investigazzjoni.

(59)

Il-Kummissjoni stabbiliet il-prezzijiet tal-importazzjonijiet abbażi tat-tweġiba għall-kwestjonarju li ssottometta l-produttur esportatur.

(60)

Il-prezz medju tal-importazzjonijiet fl-Unjoni mill-pajjiż ikkonċernat żviluppa kif ġej:

Tabella 3

Prezzijiet tal-importazzjoni (EUR/tunnellati)

(61)

Il-prezz medju tal-importazzjonijiet fl-Unjoni mill-pajjiż ikkonċernat naqas ġeneralment bi 15 %. Huwa nnutat li l-prezz fl-2012 huwa bbażat fuq livell baxx ħafna ta' importazzjonijiet. Hemm koinċidenza ċara fiż-żmien bejn iż-żieda fl-ishma mis-suq u t-tnaqqis fil-prezz.

(62)

Il-Kummissjoni ddeterminat it-twaqqigħ tal-prezz matul il-perjodu ta' investigazzjoni billi qabblet:

(63)

B'konformità mal-metodoloġija spjegata fil-premessa 25, il-Kummissjoni qieset il-volum tal-bejgħ tal-prodott ikkonċernat jew direttament lil partijiet mhux relatati u l-bejgħ lil partijiet relatati fl-Unjoni iddestinat għall-konverżjoni f'rombli żgħar.

(64)

It-tqabbil tal-prezz sar fuq bażi ta' tip ma' tip. Fejn kien meħtieġ it-tranżazzjonijiet ġew dovutament aġġustati. Tnaqqsu r-roħs u l-iskontar. Ir-riżultat tat-tqabbil kien espress bħala perċentwal tal-fatturat tal-industrija tal-Unjoni fil-kampjun matul il-perjodu ta' investigazzjoni. Dan wera marġini ta' tnaqqis medju ponderat ta' 8,1 % mill-importazzjonijiet mill-pajjiż ikkonċernat fis-suq tal-Unjoni. Instab li madwar 84 % tal-volumi tal-importazzjoni kienu qed iroħħsu l-prezz.

(65)

B'konformità mal-Artikolu 3(5) tar-Regolament bażiku, l-analiżi tal-impatt li għandhom l-importazzjonijiet li huma l-oġġett ta' dumping fuq l-industrija tal-Unjoni kienet tinkludi evalwazzjoni tal-indikaturi ekonomiċi kollha li għandhom effett fuq l-istat tal-industrija tal-Unjoni matul il-perjodu kkunsidrat.

(66)

Għad-determinazzjoni tal-ħsara, il-Kummissjoni ddistingwiet bejn l-indikaturi tal-ħsara makroekonomiċi u dawk mikroekonomiċi. Il-Kummissjoni evalwat l-indikaturi makroekonomiċi fuq il-bażi ta' data inkluża fit-tweġiba tal-kwestjonarju u sottomissjonijiet sussegwenti mill-ilmentatur. Il-Kummissjoni evalwat l-indikaturi makroekonomiċi fuq il-bażi ta' data inkluża fit-tweġiba tal-kwestjonarju u sottomissjonijiet sussegwenti mill-produtturi tal-Unjoni fil-kampjun. Irriżulta li ż-żewġ settijiet ta' dejta jirrappreżentaw is-sitwazzjoni ekonomika tal-industrija tal-Unjoni.

(67)

L-indikaturi makroekonomiċi huma: il-produzzjoni, il-kapaċità tal-produzzjoni, il-volum tal-bejgħ, is-sehem mis-suq, it-tkabbir, l-impjiegi, il-produttività u l-kobor tal-marġini tad-dumping u l-irkupru minn dumping fil-passat.

(68)

L-indikaturi mikroekonomiċi huma: il-prezzijiet medji ta' kull unità, il-kost ta' kull unità, il-kosti lavorattivi, l-inventarji, il-profittabbiltà, il-fluss tal-flus, l-investimenti, ir-redditu fuq l-investiment, u l-kapaċità li jiġi ġġenerat il-kapital.

(69)

Il-produzzjoni totali tal-Unjoni, il-kapaċità tal-produzzjoni u l-użu tal-kapaċità żviluppaw matul il-perjodu kkunsidrat kif ġej:

Tabella 4

Il-produzzjoni, il-kapaċità tal-produzzjoni u l-użu tal-kapaċità

(70)

Il-produzzjoni tal-prodott li qed jiġi investigat hija impriża b'kost fiss għoli. Matul il-perjodu kkunsidrat, il-volum tal-produzzjoni tal-industrija tal-Unjoni naqas b'wieħed fil-mija. Wieħed josserva tnaqqis fil-livell tal-produzzjoni fl-2013 u fl-2014, meta produttur tal-Unjoni fil-kampjun għadda minn ċerti diffikultajiet.

(71)

Kollox ma' kollox il-kapaċità tal-produzzjoni kienet relattivament stabbli. Iċ-ċifra fl-2012 kienet baxxa b'mod anormali u tirrifletti l-fatt li produttur wieħed tal-Unjoni waqqaf il-produzzjoni ta' dan il-prodott għal ċertu żmien minħabba ċirkostanzi eċċezzjonali. Dan il-produttur opera b'mod normali fl-2013. Wieħed jinnota wkoll li produttur ieħor tal-Unjoni, l-iċken wieħed, ilu gradwalment inaqqas il-produzzjoni tal-prodott inkwistjoni matul il-perjodu kkunsidrat.

(72)

It-tnaqqis ġenerali tar-rata tal-użu tal-kapaċità huwa marbut mat-tnaqqis fil-volum tal-produzzjoni. Kif spjegat fil-premessa 125 hawn taħt, ir-rata għolja tal-kapaċità tal-użu li tidher fit-Tabella 4 ma tfissirx li l-industrija ma tistax tipproduċi aktar.

(73)

Il-volum tal-bejgħ u s-sehem mis-suq tal-industrija tal-Unjoni żviluppaw hekk matul il-perjodu kkunsidrat:

Tabella 5

Il-volum tal-bejgħ u s-sehem mis-suq

(74)

Il-volum tal-bejgħ tal-industrija tal-Unjoni fis-suq tal-Unjoni żdied b'1 % matul il-perjodu kkunsidrat.

(75)

Matul il-perjodu kkunsidrat, is-sehem mis-suq tal-industrija tal-Unjoni naqas minn 96,9 % għal 85,1 % peress li ma setgħetx tibbenefika miż-żieda fil-konsum. Sabiex iżżomm il-livelli tal-bejgħ tagħha u tevita tnaqqis tant ieħor aktar qawwi tas-sehem tagħha mis-suq, l-industrija tal-Unjoni ġiet imġiegħla tbaxxi l-prezzijiet tal-bejgħ tagħha minħabba pressjoni kontinwa fuq il-prezz li għamlu l-importazzjonijiet ikkonċernati.

(76)

Il-konsum tal-Unjoni żdied bi 15 % matul il-perjodu kkunsidrat, filwaqt li l-volum tal-bejgħ tal-industrija tal-Unjoni fis-suq tal-Unjoni staġna. Għaldaqstant l-industrija tal-Unjoni tilfet mis-sehem mis-suq, bil-kuntrarju għall-importazzjonijiet mill-pajjiż ikkonċernat, li s-sehem tiegħu mis-suq żdied matul il-perjodu kkunsidrat u assorbixxa ż-żieda kollha fil-konsum.

(77)

L-impjiegi u l-produttività żviluppaw matul il-perjodu kkunsidrat kif ġej:

Tabella 6

Impjiegi u produttività

(78)

Il-livell tal-impjiegi tal-industrija tal-Unjoni ma nbidilx ħafna fil-perjodu kkunsidrat. Il-livell tal-impjiegi jsegwi mill-qrib il-produzzjoni. L-industrija tal-Unjoni ppruvat iżżomm l-impjiegi minkejja l-profittabbiltà dejjem tonqos.

(79)

Il-produttività tal-forza tax-xogħol tal-industrija tal-Unjoni, imkejla bħala output għal kull persuna impjegata kull sena, ma varjatx ħafna. Il-proċess tal-produzzjoni kien diġà ottimizzat għal livell sinifikanti.

(80)

Il-marġini tad-dumping kien ferm ogħla mil-livell de minimis. L-impatt tal-kobor tal-marġini attwali tad-dumping fuq l-industrija tal-Unjoni ma kinitx negliġibbli, meta wieħed iqis il-volum dejjem jiżdied u l-prezzijiet dejjem jonqsu tal-importazzjonijiet mill-pajjiż ikkonċernat.

(81)

Din hi l-ewwel investigazzjoni antidumping dwar il-prodott ikkonċernat. Għalhekk, ma kienx hemm dejta disponibbli biex jiġu vvalutati l-effetti ta' dumping possibbli fil-passat.

(82)

Il-prezzijiet medji ponderati tal-bejgħ ta' unità tal-produtturi tal-Unjoni inklużi fil-kampjun lill-klijenti mhux relatati fl-Unjoni żviluppaw kif ġej matul il-perjodu kkunsidrat:

Tabella 7

Il-prezzijiet tal-bejgħ fl-Unjoni

(83)

Matul il-perjodu kkunsidrat, il-prezzijiet tal-bejgħ fuq bażi medja naqsu (– 11 %), mhux bħall-kost korrispondenti (+ 3 %). Fil-perjodu ta' investigazzjoni, il-prezzijiet tal-bejgħ kienu fuq bażi medja aktar baxxi mill-kost tal-produzzjoni għal kull unità.

(84)

Sabiex jillimitaw it-telf tas-sehem mis-suq, il-produtturi tal-Unjoni segwew ix-xejra 'l isfel fil-prezz tal-importazzjonijiet u baxxew il-prezz tal-bejgħ b'mod sinifikanti. Iż-żieda fil-kost tal-produzzjoni tista' tiġi parzjalment spjegata mill-fatt li l-produzzjoni tal-LWTO hija impriża b'kostijiet fissi għoljin korrelati mat-tnaqqis fil-produzzjoni (– 3 % fost il-produtturi tal-Unjoni fil-kampjun). Il-produtturi tal-Unjoni paċew parzjalment iż-żieda fil-kost tal-materja prima li rriżultat minn rata tal-kambju żvantaġġuża USD/EUR (il-polpa tal-karta hija kkummerċjata f'USD) billi żammew kontroll qawwi fuq kosti oħrajn u billi rrazzjonalizzaw.

(85)

Il-kostijiet lavorattivi medji tal-produtturi tal-Unjoni fil-kampjun żviluppaw kif ġej matul il-perjodu kkunsidrat:

Tabella 8

Kostijiet lavorattivi għal kull impjegat

(86)

Matul il-perjodu kkunsidrat, is-salarju ġenerali medju ta' kull impjegat żdied b'4 %. Dan huwa kongruwenti maż-żieda globali fil-prezzijiet fl-Unjoni minħabba l-inflazzjoni

(87)

Il-livelli tal-istokks tal-produtturi tal-Unjoni fil-kampjun żviluppaw kif ġej matul il-perjodu kkunsidrat:

Tabella 9

Inventarji

(88)

Matul il-perjodu kkunsidrat il-livell tal-ħażniet tal-għeluq naqas bi 7 %. B'mod ġenerali il-prodott simili huwa maħdum fuq il-bażi ta' ordnijiet speċifiċi mill-utenti. L-istokks mhumiex ikkunsidrati indikatur importanti ta' ħsara għal din it-tip ta' industrija minħabba li ġeneralment dawn isegwu l-produzzjoni u mhumiex akbar mill-produzzjoni ta' xahar. L-istokks tal-għeluq bħala perċentwal tal-produzzjoni juru perċentwal simili fil-bidu u fl-aħħar tal-perjodu kkunsidrat.

(89)

Il-profittabbiltà, il-fluss tal-flus, l-investimenti u r-redditu fuq l-investimenti tal-produtturi tal-Unjoni fil-kampjun żviluppaw kif ġej matul il-perjodu kkunsidrat:

Tabella 10

Il-profittabbiltà, il-fluss tal-flus, l-investimenti u r-redditu fuq l-investiment

(90)

Il-Kummissjoni stabbiliet il-profittabbiltà tal-produtturi tal-Unjoni fil-kampjun billi esprimiet il-profitt nett qabel it-taxxa tal-prodott simili lil konsumaturi mhux relatati fl-Unjoni bħala perċentwal tal-fatturat ta' dak il-bejgħ.

(91)

Matul il-perjodu kkunsidrat il-profittabbiltà żviluppat b'mod negattiv minn sitwazzjoni ta' profitt fl-2012 għal-telf fil-perjodu ta' investigazzjoni (– 0,5 %). Filwaqt li x-xejra hija parzjalment marbuta mar-razzjonalizzazzjoni f'uħud mill-produtturi tal-Unjoni, il-pressjoni konsiderevoli fuq il-prezz u l-volum li saret fuq l-industrija tal-Unjoni miż-żieda fl-importazzjonijiet mill-pajjiż ikkonċernat matul il-perjodu 2013–2015 ma ppermettewx li l-industrija tal-Unjoni tibbenefika miż-żieda fil-konsum fl-Unjoni.

(92)

Il-fluss tal-flus nett jirrappreżenta l-kapaċità tal-produtturi tal-Unjoni li jiffinanzjaw huma stess l-attivitajiet tagħhom. Ix-xejra fil-fluss tal-flus nett segwiet xejra qawwija 'l isfel, l-aktar minħabba t-tnaqqis fil-profittabbiltà.

(93)

Ir-redditu fuq l-investimenti huwa l-profitt f'perċentwal tal-valur skont il-kotba nett tal-investimenti. Dan naqas (– 72 %), skont il-profittabbiltà. Ħlief għal investiment speċifiku minn produttur tal-Unjoni biex itejjeb l-effiċjenza fil-perjodu 2014–2015, il-produtturi fil-kampjun żammew il-livell ta' investiment tagħhom għall-ammonti assolutament meħtieġa biex ikompli għaddejjin bix-xogħol.

(94)

Il-kapaċità li jiġi ġġenerat kapital ġie effettwat mit-tnaqqis fil-profittabbiltà, kif jidher mil-livell baxx ta' investimenti għal din it-tip ta' industrija.

(95)

Matul il-perjodu kkunsidrat, il-ħsara lill-industrija tal-Unjoni hija materjali u evidenti f'termini ta' indikaturi ta' ħsara relatati mal-prezz bħal tnaqqis fil-prezz tal-bejgħ (– 11 %), tnaqqis fil-profittabbiltà (minn + 13 % għal – 0,5 %), il-fluss tal-flus u r-redditu fuq l-assi nett. Minħabba t-tnaqqis fil-prezzijiet tal-bejgħ, l-azzjonijiet konkreti biex tiżdied l-effiċjenza u l-kontroll qawwi fuq il-kosti ma setgħux jipproteġu lill-produtturi tal-Unjoni milli jagħmlu telf matul il-perjodu ta' investigazzjoni. Barra minn hekk, għal dak li jirrigwarda indikaturi ta' ħsara relatati mal-volum, l-industrija tal-Unjoni ma setgħetx tibbenefika miż-żieda fil-konsum tal-Unjoni. Tabilħaqq, is-sehem mis-suq tal-produtturi tal-Unjoni naqas bi 12-il punt perċentwali mal-il-perjodu kkunsidrat.

(96)

Minħabba l-ispeċifiċitajiet ta' din it-tip ta' industrija (intensiva fil-kapital u b'ħidma bażikament bla waqfien), l-indikaturi relatati mal-volum bħall-volum tal-produzzjoni jew tal-bejgħ urew xejra pjuttost stabbli f'termini assoluti. Madankollu, wieħed irid jara dan f'kuntest ta' domanda dejjem tiżdied, għalhekk f'termini relattivi is-sitwazzjoni ddeterjorat.

(97)

Minkejja azzjonijiet konkreti (bħal fid-dawl ta' aktar perfezzjonament tal-proċessi interni) mill-industrija tal-Unjoni matul il-perjodu kkunsidrat biex titjieb il-prestazzjoni ġenerali tagħha, il-qagħda tagħha ddeterjorat b'mod sinifikanti jiġifieri fir-rigward tal-profittabbiltà u t-telf tas-sehem mis-suq. Id-diffikultajiet biex jiġi ġġenerat il-kapital ipposponew ċerti investimenti.

(98)

Abbażi ta' dan ta' hawn fuq, il-Kummissjoni kkonkludiet f'dan l-istadju li l-industrija tal-Unjoni ġarrbet ħsara materjali skont it-tifsira tal-Artikolu 3(5) tar-Regolament bażiku.

(99)

F'konformità mal-Artikolu 3(6) tar-Regolament bażiku, il-Kummissjoni eżaminat jekk l-importazzjonijiet oġġett ta' dumping mill-pajjiżi konċernati kkawżawx dannu materjali lill-industrija tal-Unjoni. B'konformità mal-Artikolu 3(7) tar-Regolament bażiku, il-Kummissjoni eżaminat ukoll jekk fatturi oħra magħrufin setgħux fl-istess ħin jikkawżaw ħsara lill-industrija tal-Unjoni. Il-Kummissjoni żgurat li kull dannu possibbli kkawżat minn fatturi oħrajn barra l-importazzjonijiet oġġett ta' dumping mill-pajjiżi konċernati ma kienx attribwit għall-importazzjonijiet oġġett ta' dumping. Dawn il-fatturi huma: importazzjonijiet oħra, l-effetti tal-prezzijiet tal-LWTP ħielsa mill-fenol, il-prezzijiet antidumping fl-USA, il-prestazzjoni tal-esportazzjoni tal-produtturi tal-Unjoni, iż-żieda fil-kompetizzjoni fosthom, sensiela ta' kwistjonijiet dwar kosti, Internet globali u żieda fid-diġitalizzazzjoni (jiġifieri żieda fil-ħlasijiet mhux karataċeji), pressjoni fuq il-prezz minn katini kbar tal-bejgħ bl-imnut u r-razzjonalizzazzjoni fl-industrija tal-Unjoni.

(100)

Il-prezzijiet tal-produtturi esportaturi naqsu b'medja ta' 15 % matul il-perjodu kkunsidrat. Bit-tnaqqis kontinwu tal-prezz tal-bejgħ ta' kull unità fil-livell ta' dumping matul il-perjodu kkunsidrat, il-produtturi mill-pajjiżi kkonċernati setgħu ikabbru s-sehem tagħhom mis-suq b'mod sinifikanti mill-2012 (0,7 %) sal-perjodu ta' investigazzjoni (13,6 %).

(101)

Iż-żieda kontinwa fl-importazzjonijiet mir-Repubblika tal-Korea wara l-espansjoni fil-kapaċità tal-produttur esportatur bi prezzijiet imnaqqsa kellha impatt negattiv ċar fuq il-prestazzjoni tal-industrija tal-Unjoni. Importazzjonijiet oġġett ta' dumping sfurzaw lill-industrija tal-Unjoni biex tbaxxi l-prezzijiet tal-bejgħ fl-Unjoni sabiex tillimita t-telf tas-sehem mis-suq, li rriżultaw f'telf fil-perjodu ta' investigazzjoni. Barra minn hekk, il-volum tal-bejgħ tal-industrija tal-Unjoni baqa' stabbli, għalhekk ma setgħetx tibbenefika miż-żieda fil-konsum fl-Unjoni u għaldaqstant tilfet kważi 12 % tas-sehem mis-suq.

(102)

Fid-dawl tal-koinċidenza stabbilita b'mod ċar fiż-żmien bejn, minn naħa waħda, il-livell dejjem jiżdied ta' importazzjonijiet oġġett ta' dumping bi prezzijiet dejjem jonqsu — li nstab li kienu wkoll qed iwaqqgħu l-prezzijiet tal-Unjoni — u, min-naħa l-oħra, l-istaġnar tal-volum tal-bejgħ tal-industrija tal-Unjoni, it-telf tas-sehem mis-suq u t-tnaqqis fil-prezz li rriżultaw f'qagħda ta' telf fost il-produtturi fil-kampjun, il-konklużjoni hija li l-importazzjonijiet oġġett ta' dumping kienu responsabbli għall-qagħda ta' ħsara għall-industrija tal-Unjoni.

(103)

Il-volum ta' importazzjonijiet minn pajjiżi terzi oħrajn żviluppa matul il-perjodu kunsidrat kif ġej:

Tabella 11

Importazzjonijiet minn pajjiżi terzi

(104)

L-importazzjonijiet mill-pajjiż ikkonċernat huma kważi kollha importazzjonijiet lejn l-Unjoni. Importazzjonijiet oħra (mill-USA u mir-RPĊ) naqsu b'37 % matul il-perjodu ta' investigazzjoni. Is-sehem mis-suq ta' tali importazzjonijiet kien ta' 1,3 % fil-perjodu ta' investigazzjoni, għalhekk inqas mid-de minimis u x'aktarx li ma kinux il-kawża ta' xi ħsara lill-produtturi tal-Unjoni u ksur tar-rabta ta' kawżalità.

(105)

Il-volum tal-bejgħ (bejgħ mhux relatat) tal-produtturi tal-Unjoni fil-kampjun żviluppa kif ġej matul il-perjodu kkunsidrat:

Tabella 12

Il-prestazzjoni tal-esportazzjonijiet tal-produtturi tal-Unjoni fil-kampjun

(106)

Il-volum tal-esportazzjonijiet lil konsumaturi mhux relatati żdied f'27 % matul il-perjodu kkunsidrat. Rigward il-prezzijiet, dawn naqsu matul il-perjodu ta' investigazzjoni (– 2 %), iżda inqas mill-prezz fis-suq tal-Unjoni (– 11 %). Fid-dawl tal-fatt li l-profittabbiltà fis-swieq tal-esportazzjoni, anke jekk kienet qed tonqos, kienet aħjar milli fl-Unjoni, il-produtturi tal-Unjoni ħatfu ċerti opportunitajiet tal-esportazzjoni sabiex jimmassimizzaw il-kapaċità tal-użu u jtaffu l-kosti fissi.

(107)

Abbażi ta' dan ta' hawn fuq, il-prestazzjoni tal-esportazzjoni tal-industrija tal-Unjoni x'aktarx li ma kinitx il-kawża ta' xi ħsara lill-produtturi tal-Unjoni u tikser ir-rabta ta' kawżalità.

(108)

Il-produttur esportatur iddikjara li l-industrija tal-Unjoni ġarrbet ħsara peress li produttur wieħed fil-kampjun ma setax ibiegħ LWTP fl-USA minħabba d-dazji għoljin antidumping li jaffettwaw dan il-prodott.

(109)

Dawn iċ-ċirkostanzi kellhom xi impatt fuq produttur wieħed tal-Unjoni fir-rigward tal-volum tal-produzzjoni (ara l-premessa 70 hawn fuq). Madankollu, dawk iċ-ċirkostanzi ma kienx ikollhom effett fuq ħafna mid-data li tirrigwarda lil dak il-produttur tal-Unjoni, bħall-profittabbiltà fuq il-bejgħ fl-Unjoni u l-fluss tal-flus.

(110)

Fi kwalunkwe każ l-impatt huwa limitat fir-rigward tal-industrija tal-Unjoni inġenerali. Ir-raġunijiet huma ħafna. I-ewwel nett, il-kwistjoni tirrigwarda wieħed biss mill-produtturi tal-Unjoni — wieħed għandu jinnota li ż-żewġ produtturi l-oħra fil-kampjun, li ma kinux soġġetti għall-miżuri, żiedu l-bejgħ tagħhom lejn l-USA. It-tieni, il-produttur fil-kwistjoni irnexxielu jikkumpensa parzjalment billi żied l-esportazzjonijiet lejn swieq oħra. L-aħħar nett, l-Istati Uniti neħħiet id-dazji antidumping inkwistjoni fi Frar tal-2015. L-impatt globali fil-perjodu ta' investigazzjoni huwa għaldaqstant kważi ineżistenti.

(111)

Abbażi ta' dan ta' hawn fuq, l-impatt tad-dazji antidumping fl-USA mhuwiex ikkunsidrat sinifikanti għall-industrija globali fl-Unjoni sabiex jikser ir-rabta ta' kawżalità.

(112)

Il-produttur esportatur iddikjara li t-tnaqqis fil-prezz tal-Unjoni ma kiex ikkawżat mill-importazzjonijiet Koreani iżda pjuttost minn tnaqqis fil-prezz tal-LWTP ħielsa mill-fenol, prodott maħdum u mibjugħ mill-industrija tal-Unjoni, iżda mhux esportat mir-Repubblika tal-Korea. Din l-allegazzjoni hija bbażata fuq il-prezz tax-xiri ta' ċerti kumpaniji relatati mal-produttur esportatur (xiri minn żewġ produtturi fl-Unjoni).

(113)

F'dan ir-rigward wieħed għandu jinnota li, kif spjegat hawn fuq (ara l-premessa 20 u wara), l-LWTP ħielsa mill-fenol hija interkambjabbli u tikkompeti mal-LWTP li fiha l-fenol, għaldaqstant il-prezzijiet tagħha jistgħu jiġu wkoll influwenzati mill-importazzjonijiet Koreani u mis-suq ġenerali, fejn l-LWTP li fiha l-fenol hija predominanti (84 % tal-konsum fl-Unjoni). Barra minn hekk, id-dejta tal-industrija tal-Unjoni uriet li matul il-perjodu kkunsidrat il-prezzijiet tal-bejgħ ta' kull unità tal-LWTP ħielsa mill-fenol naqsu inqas mill-prezzijiet tal-bejgħ ta' kull unità tal-LWTP li fiha l-fenol. Mela fil-fatt it-tnaqqis fil-prezz huwa iktar importanti meta jiġi injorat l-impatt tal-bejgħ tal-industrija tal-Unjoni ta' LWTP ħielsa mill-fenol. Barra minn hekk, instab li l-kalkolu tat-twaqqigħ fil-prezz ibbażat fuq tqabbil bejn prodotti simili, jiġifieri esklużi t-tipi ħielsa mill-fenol li ma kinux importati, kien sinifikanti.

(114)

Skont ċerti partijiet, il-produtturi tal-Unjoni ġarrbu ħsara minħabba l-kompetizzjoni dejjem tiżdied fosthom (għall-użu tal-kapaċità). kosti għoljin (minħabba żieda madwar id-dinja fil-prezzijiet tal-materja prima marbuta mar-rata tal-kambju USD/EUR u żieda fil-kosti lavorattivi u tal-enerġija), Internet globali u żieda fid-diġitalizzazzjoni (jiġifieri żieda fil-ħlasijiet mhux karataċeji) u pressjoni fuq il-prezz minn katini kbar tal-bejgħ bl-imnut (bħal pompi tal-petrol u supermarkets). Madankollu, ebda wieħed minn dawn il-fatturi ma nstab li kien jikser ir-rabta ta' kawżalità bejn il-ħsara materjali u l-importazzjonijiet oġġett ta' dumping mir-Repubblika tal-Korea.

(115)

Ma hemm l-ebda evidenza ta' prattiki antikompetittivi. Xejn fil-fajl ma wera li l-kompetizzjoni fost il-produtturi tal-Unjoni (għall-użu tal-kapaċità) ma kinitx ġusta.

(116)

Fir-rigward tal-allegazzjoni ta' kosti għoljin, wieħed jinnota li l-produtturi tal-Unjoni żammew kontroll qawwi fuq il-kosti matul il-perjodu kkunsidrat, biż-żieda tkun żgħira (+ 3 %). Tali żieda tinkludi kwalunkwe tibdil fil-prezzijiet tal-polpa tal-karta (li tirrappreżenta madwar terz tal-kosti totali tal-LWTP), il-kosti tal-enerġija u l-kosti lavorattivi, b'dawn tal-aħħar eżaminati aktar fid-dettal fil-premessi 85–86.

(117)

L-investigazzjoni ma setgħetx tikkonferma li l-Internet globali u ż-żieda fid-diġitalizzazzjoni (jiġifieri aktar ħlasijiet mhux karatċeji) setgħu jkunu sors ta' ħsara lill-industrija tal-Unjoni. Għall-kuntrarju, instab li l-konsum fl-Unjoni tal-LWTP żdied b'mod stabbli.

(118)

Rigward l-allegazzjoni li jkun hemm xi pressjoni fuq il-prezz minn katini kbar tal-bejgħ bl-imnut (bħal pompi tal-petrol u supermarkets), il-aprtijiet interessati ma pprovdew ebda evidenza sostanzjata u l-investigazzjoni ma setgħetx tikkonfermaha.

(119)

Wieħed ikompli jinnota li l-investigazzjoni wriet li xi produtturi tal-Unjoni għaddew minn proċessi ta' ristrutturar u riorganizzazzjoni fil-passat qrib bl-għan li jtejbu l-kompetittività tagħhom. Uħud minn dawn il-proċessi għadhom għaddejjin u uħud mill-azzjonijiet konkreti previsti, bħal investimenti speċifiċi, ġew imfixkla mill-effett tal-importazzjonijiet oġġett ta' dumping fuq il-profittabbiltà ta' dawk il-produtturi, u għalhekk kellhom impatt fuq il-kapaċità tagħhom li jiġġeneraw kapital. Għalhekk dan il-fattur ma nstabx li kien jikser ir-rabta ta' kawżalità bejn il-ħsara materjali u l-importazzjonijiet oġġett ta' dumping mir-Repubblika tal-Korea.

(120)

Abbażi ta' dan ta' hawn fuq, il-Kummissjoni kkonkludiet f'dan l-istadju li l-ħsara materjali lill-industrija tal-Unjoni kienet ikkawżata mill-importazzjonijiet oġġett ta' dumping mill-pajjiż ikkonċernat u l-fatturi l-oħra, meta kkunsidrati separatament jew flimkien, ma kinux jiksru r-rabta ta' kawżalità.

(121)

Il-Kummissjoni ddistingwiet u sseparat l-effetti tal-fatturi kollha magħrufin dwar is-sitwazzjoni tal-industrija tal-Unjoni mill-effetti ta' ħsara tal-importazzjonijiet oġġett ta' dumping. Instab li l-fatturi l-oħra identifikati bħall-prestazzjoni tal-esportazzjoni tal-produtturi tal-Unjoni, id-dazji antidumping fl-USA, il-kosti ogħla u sensiela ta' proċessi ta' razzjonalizzazzjoni proviżjonalment ma kinux jiksru r-rabta ta' kawżalità, anke jekk wieħed iqis l-effett possibbli kkombinat tagħhom.

(122)

B'konformità mal-Artikolu 21 tar-Regolament bażiku, il-Kummissjoni eżaminat jekk setgħetx b'mod ċar tikkonkludi li ma kienx fl-interess tal-Unjoni li tadotta miżuri f'dan il-każ, minkejja d-determinazzjoni ta' dumping ta' ħsara. Id-determinazzjoni tal-interess tal-Unjoni kienet ibbażata fuq apprezzament tal-interessi varji kollha involuti, inklużi dawk tal-industrija tal-Unjoni, il-kummerċjanti fil-livelli differenti u l-utenti.

(123)

L-industrija tal-Unjoni tikkonsisti f'ħames produtturi li jinsabu fi tliet Stati Membri (il-Ġermanja, Spanja u l-Finlandja). Ħadd minnhom ma oppona l-bidu tal-investigazzjoni.

(124)

Il-produtturi kollha tal-Unjoni ipparteċipaw attivament fl-investigazzjoni u argumentaw li l-impożizzjoni ta' miżuri tista' tissalvagwardja l-impjiegi, tippromwovi investimenti aktar u tikkontribwixxi biex titreġġa' lura x-xejra ta' tnaqqis fil-profittabbiltà li ġiet osservata minn meta l-esportatur Korean daħal fis-suq tal-Unjoni.

(125)

L-industrija tal-Unjoni diġà għaddiet minn ristrutturar sinifikanti fil-passat u hija kostantement attenta sabiex ittejjeb l-effiċjenza tagħha fil-proċess tal-produzzjoni. It-tqabbil taċ-ċifri tal-volum tal-produzzjoni fit-Tabella 4 hawn fuq mal konsum tal-Unjoni deskritt fil-premessi 53 sa 55 juri li, kuntrarju għal dak li ddikjarat parti waħda, l-industrija tal-Unjoni tista' tlaħħaq mad-domanda fl-Unjoni. Ir-rata għolja tal-kapaċità tal-użu li tidher fit-Tabella 4 hawn fuq ma tfissirx li l-industrija tal-unjoni ma tistax tipproduċi aktar. Minn naħa waħda, il-produtturi tal-Unjoni għandhom apparat li jservi skopi diversi bi “swing capacity”, jiġifieri il-kapaċità ddawwar il-produzzjoni lejn prodott differenti. Min-naħa l-oħra, il-produttur iżgħar tal-Unjoni li qiegħed gradwalment inaqqas il-produzzjoni tal-prodott inkwistjoni jista' jikkunsidra mill-ġdid din l-għażla jekk ikun hemm kompetizzjoni ġusta.

(126)

Wieħed jistenna li l-impożizzjoni ta' miżuri se tistabbilixxi mill-ġdid kondizzjonijiet ekwivalenti ta' kompetizzjoni u livell ġust tal-prezz fis-suq tal-Unjoni, u se ttejjeb il-profittabbiltà tal-industrija tal-Unjoni għal livelli kkunsidrati normali għal din l-industrija intensiva fil-kapital. Li kieku ma kienx hemm dazji, uħud mill-produtturi tal-Unjoni forsi kienu jnaqqsu l-attivitajiet LWTP tagħhom, u anke jwaqqfuhom, u jnaqqsu l-impjiegi. Dan jista' jirriżulta f'suq inqas kompetittiv u utenti b'sorsi ta' forniment aktar limitati.

(127)

Fin-nuqqas ta' miżuri, is-sitwazzjoni tal-industrija tal-Unjoni x'aktarx li tkompli tiddeterjora. X'aktarx ikun hemm aktar telf fil-profitt u fis-sehem mis-suq minħabba li ma hemmx raġunijiet biex jiġi stabbilit li t-tnaqqis fil-prezz se jonqos fl-assenza tal-miżuri.

(128)

Il-Kummissjoni għalhekk ikkonkludiet f'dan l-istadju li l-impożizzjoni ta' dazji antidumping tkun fl-interess tal-industrija tal-Unjoni.

(129)

Is-servizzi tal-Kummissjoni bagħtu kwestjonarji lil 50 parti interessata. Madankollu, mhux kollha wieġbu għall-kwestjonarji. Saru rappreżentazzjonijiet minn 25 konvertitur, kummerċjanti f'kull livell u minn assoċjazzjoni waħda (il-Konfederazzjoni tal-Industriji tal-Karta Ewropej, “CEPI”) iżda 14-il parti biss attwalment wieġbet għall-kwestjonarju. Dawn it-tweġibiet madankollu ma kinux dejjem eżawrjenti, b'uħud minnhom biss allegazzjonijiet mhux ikkonfermati minn evidenza verifikabbli.

(130)

Tlieta mill-konvertituri li ma wieġbux għall-kwestjonarju, esprimew li huma favur il-miżuri, l-aktar minħabba li l-miżuri jistabbilixxu mill-ġdid kundizzjonijiet ġusti tal-kompetizzjoni fis-suq tal-UE. Għal dak li jirrigwarda l-volum tax-xiri ta' LWTP, dawn il-konvertituri għandhom aktar piż minn dawk li ma esprimewx opinjoni jew li kienu kontra l-miżuri. Barra minn hekk CEPI kienet favur il-miżuri, u ddikjarat li l-industriji ġenerali upstream, il-konvertituri mhux relatati u l-konsumaturi finali ikunu effettwati b'mod negattiv mill-importazzjonijiet Koreani oġġett ta' dumping.

(131)

Il-partijiet li huma kontra l-impożizzjoni tal-miżuri jibżgħu minn skarsezza ta' karta u żidiet fil-prezz, nuqqas ta' sorsi alternattivi ta' forniment, prattiki antikompetittivi mill-produtturi tal-Unjoni, u fl-aħħar nett, it-tmiem ta' xi attivitajiet tal-konvertiment u/jew tal-konvertituri. Madankollu, l-investigazzjoni wriet li hemm ħafna sorsi ta' forniment disponibbli fl-Unjoni Ewropea, ma hemm l-ebda indikazzjoni ta' prattiki antikompetittivi mill-produtturi tal-Unjoni u li l-impożizzjoni ta' miżuri mhux se tirrikjedi żidiet sinifikanti fil-prezzijiet, meta wieħed jikkunsidra wkoll il-livell tal-marġini tad-dumping.

(132)

Fl-aħħar nett, kemm il-produttur esportatur kif ukoll il-Gvern tar-Repubblika tal-Korea ddikjaraw li l-analiżi ta' interess tal-Unjoni jeħtieġ tqis l-investimenti li għamel il-grupp Hansol fl-Unjoni fil-perjodu 2013–2016 u l-għadd ta' impjiegi li jappartjenu għall-konvertituri relatati. Madankollu, dawn ma pprovdewx evidenza speċifika għall-produzzjoni tal-LWTP.

(133)

Barra minn hekk, peress li l-miżura tistabbilixxi mill-ġdid il-kompetizzjoni ġusta biss fis-suq tal-Unjoni, qed jiġi kkunsidrat li l-miżuri antidumping se jirrikjedu li l-importazzjonijiet tal-prodott ikkonċernat se jidħlu fl-Unjoni bi prezzijiet li jagħmlux ħsara. Dan għandhom jibbenefikaw minnu l-konvertituri indipendenti.

(134)

Il-Kummissjoni għalhekk ikkonkludiet f'dan l-istadju li l-impatt tad-dazji antidumping fuq il-partijiet li huma kontra l-miżuri mhuwiex akbar mill-effett pożittiv tal-miżuri għall-industrija tal-Unjoni. Rigward il-partijiet li għamlu rappreżentazzjonijiet mhux sostanzjati, l-investigazzjoni ma setgħetx turi li l-impożizzjoni tal-miżuri kien se jkollha impatt sinifikanti fuqhom, jekk xejn.

(135)

Abbażi ta' dak ta' hawn fuq, il-Kummissjoni kkonkludiet li ma kienx hemm raġunijiet serji li ma kienx fl-interess tal-Unjoni li timponi miżuri fuq importazzjonijiet ta' LWTP li joriġinaw mir-Repubblika tal-Korea f'dan l-istadju tal-investigazzjoni.

(136)

Abbażi tal-konklużjonijiet li waslet għalihom il-Kummissjoni dwar dumping, ħsara, kawżalità u l-interess tal-Unjoni, jeħtieġ li jiġu imposti miżuri provviżorji sabiex ma tkomplix issir ħsara li qed tiġi kkawżata lill-industrija tal-Unjoni minn importazzjonijiet oġġett ta' dumping.

(137)

Sabiex tiddetermina l-livell tal-miżuri, il-Kummissjoni l-ewwel stabbiliet l-ammont ta' dazju neċessarju biex tiġi eliminata l-ħsara mġarrba mill-industrija tal-Unjoni.

(138)

Il-ħsara tiġi eliminata kieku l-industrija tal-Unjoni kienet kapaċi tkopri l-kosti tal-produzzjoni u tikseb profitt qabel it-taxxa fuq il-bejgħ tal-prodott simili fis-suq tal-Unjoni li jista' jinkiseb raġonevolment f'kundizzjonijiet normali tal-kompetizzjoni minn industrija ta' dan it-tip fis-settur, jiġifieri fin-nuqqas ta' importazzjonijiet oġġett ta' dumping.

(139)

Fl-ilment tal-ilmentatur talab biex il-Kummissjoni tuża “madwar 10 %” tal-fatturat bħala marġini ta' profitt raġonevoli mhux ta' ħsara. L-investigazzjoni wriet li l-profittabbiltà attwali tal-industrija tal-Unjoni qabel iż-żieda qawwija fl-importazzjonijiet Koreani kellhom impatt kbir kienet ta' 13 % fl-2012 u 11,5 % fl-2013. Għal dawn ir-raġunijiet, il-Kummissjoni għalhekk tikkunsidra li l-marġini tal-profitt miksub mill-industrija fis-sena l-aktar rappreżentattiva, jiġifieri s-sena 2013, huwa bażi xierqa għal profitt fil-mira.

(140)

Abbażi ta' dan, il-Kummissjoni kkalkulat prezz mhux ta' ħsara ta' prodott simili għall-industrija tal-Unjoni billi żiedet il-marġini tal-profitt imsemmi hawn fuq ta' 11,5 % mal-kost tal-produzzjoni matul il-perjodu ta' investigazzjoni tal-produtturi tal-Unjoni fil-kampjun.

(141)

Il-Kummissjoni imbagħad iddeterminat il-livell tal-eliminazzjoni tal-ħsara fuq il-bażi ta' tqabbil tal-medja ponderata tal-prezz tal-importazzjoni tal-produttur esportatur li kkoopera fil-pajjiż ikkonċernat, kif stabbilit għall-kalkoli tat-twaqqigħ tal-prezz, mal-medja ponderata tal-prezz mingħajr ħsara tal-prodott simili mibjugħ mill-produtturi tal-Unjoni fil-kampjun fis-suq tal-Unjoni matul il-perjodu ta' investigazzjoni. Kwalunkwe differenza li tirriżulta minn dan it-tqabbil ingħatat bħala perċentwal tal-valur CIF medju ponderat tal-importazzjoni. Il-marġini ta' ħsara ġie stabbilit b'mod provviżorju għal 35,8 %.

(142)

Miżuri antidumping provviżorji jeħtieġ li jiġu imposti fuq importazzjonijiet ta' ċerta karta termali ħafifa li joriġinaw mir-Repubblika tal-Korea, b'konformità mar-regola tad-dazju inferjuri fl-Artikolu 7(2) tar-Regolament bażiku. Il-Kummissjoni qabblet il-marġnijiet tal-ħsara u l-marġnijiet tad-dumping. L-ammont tad-dazji jeħtieġ jiġi stabbilit fil-livell li hu l-inqas bejn l-marġini tad-dumping u dak tal-ħsara, jiġifieri fil-livell tal-marġini tad-dumping.

(143)

Abbażi ta' dak ta' hawn fuq, ir-rati provviżorji antidumping, espressi fil-prezz CIF tal-Unjoni fil-fruntiera, ħieles mid-dazju doganali, għandhom ikunu kif ġej:

(144)

Kif spjegat fil-premessa 50, il-livell tal-kooperazzjoni f'dan il-każ huwa għoli minħabba li l-importazzjonijiet tal-produtturi esportaturi li kkooperaw kienu jikkostitwixxu l-esportazzjonijiet kollha lill-Unjoni matul il-perjodu ta' investigazzjoni. Għalhekk, id-dazju residwu antidumping huwa bbażat fil-livell tal-kumpanija li kkooperat.

(145)

Kumpanija tista' titlob l-applikazzjoni ta' dawn ir-rati ta' dazju antidumping individwali jekk sussegwentement tibdel l-isem tal-entità tagħha. It-talba trid tiġi indirizzata lill-Kummissjoni (6). It-talba trid tkun tinkludi l-informazzjoni kollha relevanti li tkun tista' turi li l-bidla ma taffettwax id-dritt tal-kumpanija li tibbenefika mir-rata tad-dazju li tapplika għaliha. Jekk il-bidla fl-isem tal-kumpanija ma jaffettwax id-dritt tagħha li tibbenefika mir-rata tad-dazju li tapplika għaliha, avviż formali li jinforma dwar il-bidla fl-isem se jiġi ppubblikat f'Il-Ġurnal Uffiċjali tal-Unjoni Ewropea.

(146)

Biex ikun żgurat infurzar xieraq ta' dazji antidumping, ir-rata tad-dazju antidumping għall-“kumpaniji kollha l-oħrajn” għandha tkun applikata mhux biss għall-produtturi esportaturi li ma kkooperawx f'din l-investigazzjoni, imma anki għall-produtturi li ma kellhomx esportazzjonijiet lejn l-Unjoni matul il-perjodu ta' investigazzjoni.

(147)

Fl-interess ta' amministrazzjoni soda, il-Kummissjoni se tistieden lill-partijiet interessati biex jippreżenta kummenti bil-miktub u/jew biex jitolbu seduta mal-Kummissjoni u/jew mal-Uffiċjal tas-Seduta fi proċedimenti kummerċjali fi żmien skadenza stipulata.

(148)

Il-konklużjonijiet rigward l-impożizzjoni ta' dazji provviżorji huwa provviżorji u jistgħu jiġu emendati fi stadju definittiv tal-investigazzjoni,

(1)

Permezz ta' notifika elettronika rreġistrata fis-16 ta' Settembru 2013 (SANI Nru 8899), ikkoreġuta bil-komunikazzjoni tal-25 ta' Settembru 2013, l-awtoritajiet Ungeriżi nnotifikaw, skont il-paragrafu 65 tal-Linji Gwida dwar l-għajnuna nazzjonali b'għan reġjonali għall-2007-2013 (2) (minn hawn'il quddiem “RAG 2007-13”) l-intenzjoni tagħhom li jagħtu għajnuna reġjonali għal proġett ta' investiment kbir li għandu jitwettaq f'Győr minn AUDI HUNGARIA MOTOR Ltd. (minn hawn 'il quddiem “AHM”).

(2)

Permezz ta' ittra datata d-9 ta' Lulju 2014, il-Kummissjoni infurmat lill-Ungerija bid-deċiżjoni tagħha li tibda l-proċedura stabbilita fl-Artikolu 108(2) tat-TFUE (minn hawn 'il quddiem “id-deċiżjoni ta' ftuħ”) fir-rigward tal-għajnuna reġjonali li għandha tiġi implimentata favur il-proġett ta' investiment ta' AHM, bil-għan li titwettaq valutazzjoni fil-fond abbażi tal-Komunikazzjoni mill-Kummissjoni dwar il-kriterji għal valutazzjoni fil-fond tal-ħajnuna reġjonali għal proġetti kbar ta' investiment (3) (minn issa 'l quddiem “IDAC”).

(3)

L-Ungerija ppreżentat kummenti u l-informazzjoni meħtieġa għall-valutazzjoni fil-fond permezz ta' ittra datata d-9 ta' Ottubru 2014 (2014/101245).

(4)

Id-deċiżjoni tal-Kummissjoni li tibda l-proċedura ta' investigazzjoni formali kienet ippubblikata f'Il-Ġurnal Uffiċjali tal-Unjoni Ewropea fil-21 ta' Novembru 2014 (4). Partijiet terzi ġew mistiednajippreżentaw il-kummenti tagħhom.

(5)

Permezz ta' ittri datati l-25 ta' Novembru 2014 (2014/119782), it-28 ta' Lulju 2015 (2015/074087) u l-24 ta' Awwissu 2015 (2015/083208), il-Kummissjoni talbet aktar informazzjoni, li ġiet provduta mill-Ungerija permezz ta' ittri datati t-13 ta' Frar 2015 (2015/014716), it-30 ta' Settembru 2015 (2015/096577) u d-9 ta' Ottubru 2015 (2015/100135).

(6)

Il-Kummissjoni ma rċeviet l-ebda kumment minn partijiet interessati.

(7)

L-awtoritajiet Ungeriżi għandhom l-intenzjoni li jippromwovu l-iżvilupp reġjonali billi jiprovdu għajnuna reġjonali fil-forma ta' għotja diretta u benefiċċju tat-taxxa korporattiva lil AHM għal investimenti fuq il-lokalità tal-AHM fi Győr, li jinstab fir-reġjun ta' Transdanubia tal-Punent (Nyugat-Dunántúl). Transdanubia tal-Punent hija żona assistita eliġibbli għal għajnuna reġjonali skont l-Artikolu 107(3)(a) tat-TFUE b'limitu massimu tal-għajnuna reġjonali standard għal intrapriżi kbar ta' 30 % ekwivalenti tal-għotja gross (minn hawn 'il quddiem “EGħG”) skont il-mappa għal għajnuna reġjonali Ungeriża 2007-2013 (5).

(8)

Il-benefiċjarju tal-għajnuna huwa AHM, sussidjarja akkwiżita totalment ta' Audi Hungaria Services Zrt. Audi Hungaria Services Zrt. hija sussidjarja ta' AUDI AG, li hija membru tal-Grupp Volkswagen (minn hawn 'il quddiem “il-Grupp VW”). Is-sede prinċipali tal-Grupp VW jinsab f'Wolfsburg, fil-Ġermanja, u l-kummerċ tiegħu huwa maqsum f'żewġ diviżjonijiet, id-Diviżjoni tal-Karozzi u d-Diviżjoni tas-Servizzi Finanzjarji. Id-Diviżjoni tal-Karozzi tinkludi żewġ oqsma kummerċjali: “karozzi tal-passiġġieri” u “vetturi kummerċjali, inġinerija tal-elettriku”

(9)

Id-Diviżjoni tal-Karozzi tal-Grupp VW hija magħmula minn tnax-il ditta: Volkswagen, AUDI, ŠKODA, SEAT, Bentley, Porsche, Bugatti, Lamborghini, Ducati, vetturi kummerċjali Volkswagen, Scania u MAN. Kull ditta għandha l-karattru tagħha u topera bħala entità indipendenti fuq is-suq. Il-Grupp Volkswagen jimmanifattura karozzi li jvarjaw minn karozzi żgħar għal vetturi lussużi u kummerċjali.

(10)

Fl-2014, il-Grupp Volkswagen opera total ta' 118-il fabbrika madwar id-dinja (6) u kkonsenja 10,1 miljun karozza lil klijenti, li jikkorrispondi għal sehem ta' 12 % tas-suq tal-karozzi tal-passiġġieri fid-dinja. Id-dħul tiegħu laħaq EUR 202 biljun, u kellu 592 586 impjegat (7).

(11)

Fl-2014, AUDI AG impjegat 79 483 persuna, ikkonsenjat 1,7 miljun vetturi ġodda lil klijenti globalment, u d-dħul tagħha laħaq EUR 53 biljun.

(12)

Fl-2014, AHM ipproduċiet 135 232 karozza, kellha 11 274 impjegat u d-dħul tagħha laħaq EUR 7,2 biljun.

(13)

AHM tipproduċi magni u komponenti għal magni fi Győr. Barra minn dan, AHM kienet timmunta karozzi permezz ta' approċċ ibbażat fuq pjattaforma, qabel ma kien ikkompletat il-proġett ta' investiment notifikat fit-tmiem tal-2014.

(14)

Il-proġett ta' investiment kellu tliet objettivi: aktar flessibilità u diversifikazzjoni fl-operazzjoni tal-immuntar, output akbar ta' karozzi mmuntati, u approfondiment tal-integrazzjoni vertikali tal-proċess tal-produzzjoni tal-karozzi.

(15)

L-ewwel objettiv kien li tiżdied il-flessibilità tal-operazzjoni tal-immuntar bis-sostituzzjoni tat-teknoloġija preċedenti bbażata fuq pjattaforma permezz tal-hekk imsejħa teknoloġija tal-proċess ta' manifattura bbażat fuq moduli (Modularer Querbaukasten, minn hawn 'il quddiem “MQB”). Filwaqt li t-teknoloġija bbażata fuq pjattaforma użata fi Győr kienet tippermetti biss l-immuntar ta' karozzi bl-użu tal-istess pjattaforma (prinċipalment tal-istess tul jew tul simili, li ħafna drabi jappartjenu biss għal segment wieħed), it-teknoloġija MQB li għadha kif ġiet installata tippermetti l-immuntar ta' karozzi ta' tulijiet differenti u li jappartjenu għal firxa ta' segmenti (f'dan il-każ is-segmenti A u B u teoretikament is-segment A0 ukoll, […] (*1)) fuq l-istess linja ta' manifattura. It-teknoloġija l-ġdida kienet installata f'impjant ġdid, filwaqt li l-attività l-antika tal-immuntar ibbażat fuq pjattaforma twaqqfet kompletament b'mod gradwali fl-2014, u l-linja tal-immuntar l-antika ġiet żarmata u tneħħiet. Il-produzzjoni kollha tal-karozzi fi Győr issa hija bbażata fuq it-teknoloġija MQB. It-teknoloġija MQB hija bbażata fuq il-prinċipju ta' modularità (standardizzazzjoni tal-komponenti ta' mudelli differenti, li jappartjenu għal segmenti tas-suq differenti), li jippermetti ffrankar kbir fl-ispejjeż. Minħabba l-istandardizzazzjoni meħtieġa, u minħabba d-distanza fiżika (madwar 1,5 km) bejn il-post tal-immuntar l-antik u dak ġdid, il-linja tal-immuntar l-antika ma setgħetx tiġi integrata fil-proċess tal-produzzjoni l-ġdid. L-impjant il-ġdid jippermetti l-manifattura ta' diversi mudelli ta' karozzi tal-passiġġieri tad-ditta Audi: il-ġenerazzjonijiet il-ġodda tal-mudelli li diġà kienu mmuntati fil-passat fi Győr (Audi TT Coupé, TT Roadster u A3 Cabriolet) u membru kompletament ġdid tal-familja tal-mudell A3 b'vettura b'erba' bibien (A3 Sedan). Il-mudelli suċessivi kienu soġġetti għal diversi bidliet fir-rigward ta' disinn u ta' titjib tekniku. Madankollu, il-kontinwità fir-rigward tal-kwalità, l-istandards għolja tad-disinn transġenerazzjonali u l-iżvilupp tekniku, kif ukoll iż-żamma ta' dimensjonijiet ġeometriċi prinċipali u tagħmir, irriżultat fi klassifikazzjoni mhux mibdula minn POLK (8). L-Audi TT Coupé u t-TT Roadster jibqgħu fis-segment B, filwaqt li l-A3 Cabriolet baqgħet fis-segment A u l-A3 Sedan il-ġdida wkoll se tiġi elenkata fis-segment A.

(16)

It-tieni objettiv tal-proġett kien li tiżdied il-kapaċità teknika globali tal-operazzjoni tal-immuntar fi Győr minn [60 000-110 000] għal [130 000-180 000] karozza tal-passiġġieri kull sena. Hu previst li bħala medja dan juża […] % tal-kapaċità l-ġdida għall-manifattura ta' karozzi tas-segment A u […] % għall-manifattura ta' karozzi tas-segment B. Il-kapaċità miżjuda tippermetti kemm l-immuntar tal-prodott addizzjonali (A3) u għadd ogħla ta' mudelli suċċessivi.

(17)

It-tielet objettiv tal-proġett kellu l-għan li japprofondixxi l-integrazzjoni vertikali tal-attivitajiet ta' produzzjoni fi Győr. L-operazzjoni tal-immuntar preċedenti hija mibdula f'impjant ta' produzzjoni kompletament integrat għall-karozzi tal-passiġġieri: l-investiment fl-impjant tal-immuntar il-ġdid huwa akkompanjat mill-bini ta' ħanut tal-karrozzerija, ħanut taż-żebgħa u ħanut tax-xogħol tal-pressa, li jservu b'mod predominanti fil-produzzjoni tal-mudelli msemmija hawn fuq. Parti żgħira biss (sa […] %) tal-output tal-ħanut il-ġdid tal-karrozzerija u taż-żebgħa jiġi kkonsenjat, fil-forma ta' qafas ta' vettura, lil impjanti oħra ta' manifattura tal-karozzi tal-Grupp VW barra miż-ŻEE. Madwar […] % tal-partijiet tal-karrozzerija manifatturati fil-ħanut tax-xogħol tal-pressal-ġdid jintużaw għall-manifattura ta' karozzi fi Győr. Il-[…] % l-oħra tal-partijiet tal-karrozzerija manifatturati fi Győr jitqassmu lil siti oħra tal-produzzjoni tal-Grupp VW. Fil-bidu, kien ippjanat li dawn il-partijiet tal-karrozzerija jintużaw fil-produzzjoni ta' vetturi li jappartjenu għas-segment B ta' POLK. Madankollu, wara d-deċiżjoni ta' ftuħ l-Ungerija infurmat lill-Kummissjoni li minħabba tibdil fid-domanda, is-sehem ta' […] % tal-output tal-ħanut tax-xogħol tal-pressa seta' jintuża — f'siti ta' produzzjoni oħra tal-Grupp VW — għall-produzzjoni tal-karozzi A0 sa C.

(18)

Ix-xogħol fuq il-proġett ta' investiment beda fi Frar 2011 u tlesta fil-31 ta' Diċembru 2014.

(19)

Fil-każ preżenti, in-nefqa eliġibbli tikkonsisti f'investimenti f'bini, makkinarju u tagħmir, iżda mhux f'assi intanġibbli. Assi użati huma esklużi.

(20)

L-ispejjeż totali eliġibbli tal-investiment tal-proġett ta' investiment f'valur nominali jammontaw għal HUF 342 936 miljun (EUR 1 144 miljun (9)). F'valur preżenti (10) dan l-ammont huwa HUF 355 550 miljun (EUR 1 186 miljun). It-tabella I tipprovdi analiżi tal-ispejjeż eliġibbli totali.

Tabella I

Spejjeż eliġibbli tal-investiment f'valur nominali (miljuni ta' HUF)

(21)

L-awtoritajiet Ungeriżi jikkonfermaw li l-kontribuzzjoni proprja tal-benefiċjarju, mingħajr kwalunkwe appoġġ pubbliku, jaqbeż 25 % tal-ispejjeż eliġibbli.

(22)

Il-bażi ġuridika nazzjonali għall-appoġġ finanzjarju huwa dan li ġej:

(23)

AHM applikat għal għotja diretta fil-5 ta' Marzu 2010, jiġifieri qabel il-bidu tax-xogħlijiet fuq il-proġett ta' investiment. Fis-26 ta' Marzu 2010, l-awtoritajiet Ungeriżi kkonfermaw li l-proġett ta' investiment huwa fil-prinċipju eliġibbli għall-għajnuna li saret applikazzjoni għaliha. L-awtoritajiet Ungeriżi għamlu offerta ta' għajnuna relatata mal-għotja diretta għall-proġett ta' investiment (ħlief għall-ħanut tax-xogħol tal-pressa) fit-8 ta' Settembru 2010, li ġiet aċċettata minn AHM fl-1 ta' Ottubru 2010. Fir-rigward tal-għotja diretta għall-ħanut tax-xogħol tal-pressa, l-offerta saret fis-27 ta' April 2011, u ġiet aċċettata fl-4 ta' Mejju 2011.

(24)

Il-benefiċjarju applika għal benefiċċju tat-taxxa (li għalih jeżisti intitolament legali soġġett għall-approvazzjoni tal-Kummissjoni) fid-29 ta' Ottubru 2010 (u fir-rigward tal-ħanut tax-xogħol tal-pressa fis-27 ta' Jannar 2011), jiġifieri qabel il-bidu tax-xogħlijiet tal-investiment.

(25)

L-għajnuna ngħatat, soġġetta għall-approvazzjoni tal-Kummissjoni, permezz ta' ftehim ta' għotja ffirmat fis-6 ta' Lulju 2011 (u fit-28 ta' Settembru 2011 għall-ħanut tax-xogħol tal-pressa).

(26)

L-Ungerija għandha l-għan li tagħti għajnuna ta' HUF 39 952 miljun (EUR 133,3 miljun) f'valur preżenti. Minħabba li n-nefqa totali eliġibbli ppjanata f'valur preżenti għall-proġett hija ta' HUF 355 550 miljun (EUR 1 186 miljun), l-intensità tal-għajnuna proposta hija ta' 11,24 % EGħG.

(27)

L-awtoritajiet Ungeriżi jikkonfermaw li l-għajnuna għall-proġett mhux se tkun kombinata ma' għajnuna riċevuta għall-istess spejjeż eliġibbli minn sorsi oħra lokali, reġjonali, nazzjonali jew tal-Unjoni, u li la l-ammont massimu ta' għajnuna approvat f'valur preżenti u lanqas l-intensità ta' għajnuna approvata m'huma se jinqabżu jekk l-ammont tan-nefqa eliġibbli jiddevja mill-ammont stmat.

(28)

AHM irċeviet għajnuna għal investiment għal attivitajiet ta' investiment preċedenti fi Győr, li bdew qabel l-2003 u fl-2006.

(29)

L-għajnuna notifikata qed tingħata bil-kundizzjoni li l-benefiċjarju jżomm l-investiment fir-reġjun assistit għal perjodu minimu ta' ħames snin wara li dan jitlesta.

(30)

L-awtoritajiet Ungeriżi impenjaw ruħhom li jippreżentaw lill-Kummissjoni:

(31)

Fid-deċiżjoni ta' ftuħ, il-Kummissjoni nnutat li l-proġett tal-għajnuna jirrispetta l-kriterji standard ta' kompatibilità stabbiliti f'RAG 2007-13, u li l-ammont ta' għajnuna propost u l-intensità tal-għajnuna ma jaqbżux il-massimu permess. Minkejja dan, minħabba d-dispożizzjonijiet tal-paragrafu 68 ta' RAG 2007-13, il-Kummissjoni ma setgħetx tikkonferma l-kompatibilità tal-għajnuna mas-suq intern fl-eżami preliminari.

(32)

Il-paragrafu 68 ta' RAG 2007-13 jirrikjedi li l-Kummissjoni tiftaħ l-investigazzjoni formali u tipproċedi għal valutazzjoni fil-fond tal-effett ta' inċentiv, il-proporzjonalità, kif ukoll l-effetti pożittivi u negattivi tal-għajnuna, fejn is-sehem tas-suq tal-benefiċjarju fil-prodott rilevanti u fis-suq ġeografiku jaqbeż 25 % qabel jew wara l-investiment (minn hawn 'il quddiem anke “paragrafu 68(a)-test”) jew fejn il-kapaċità maħluqa mill-investiment taqbeż 5 % ta' suq li jkun sejjer lura b'mod relattiv jew assolut (minn hawn 'il quddiem anke “paragrafu 68(b)-test”).

(33)

Il-Kummissjoni ma setgħetx teskludi fl-eżami preliminari li l-limitu tas-sehem tas-suq u l-limitu li jirrigwardja ż-żieda fil-kapaċità mill-investiment f'suq bi prestazzjoni baxxa ma kinux jinqabżu fis-swieq rilevanti.

(34)

B'mod aktar speċifiku, il-Kummissjoni qajmet dubji dwar il-proposta tal-Ungerija li tiddefinixxi s-suq tal-prodott rilevanti bħala s-segmenti kombinati A0, A u B tal-klassifikazzjoni POLK,u ħalliet id-definizzjoni preċiża tas-suq tal-prodott rilevanti miftuħa, u qieset id-definizzjonijiet tas-suq kollha alternattivi plawżibbli, inkluż partikolarment l-aktar segmentazzjoni dejqa li għaliha hemm dejta disponibbli (14). Minħabba li AHM se tipproduċi karozzi kif ukoll partijiet tal-karrozzerija għal karozzi li jappartjenu għas-segmenti A u B, u teoretikament għas-segment A0, il-Kummissjoni qieset li dawn is-segmenti individwali kif ukoll is segmenti kombinati kollha għandhom jitqiesu bħala swieq tal-prodott rilevanti plawżibbli għal dan il-każ.

(35)

Fir-rigward ta' sottodiviżjoni possibbli bejn Vetturi tal-Passiġġieri (“PCV”) u Vetturi Kummerċjali Ħfief (“LCV”), il-Kummissjoni kienet tal-opinjoni li PCVs u LCVs mhux se jitqiesu separatament.

(36)

Il-Kummissjoni wkoll ma setgħetx tieħu pożizzjoni finali dwar id-definizzjoni tas-suq ġeografiku. Hi ma setgħetx tikkonkludi jekk is-suq ġeografiku huwiex iż-Żona Ekonomika Ewropea (minn hawn 'il quddiem “iż-ŻEE”), jew, kif issuġġerit mill-Ungerija, jikkonsistix tal-anqas mis-swieq kombinati tal-Ewropa kollha, l-Amerika ta' Fuq u t'Isfel u ċ-Ċina.

(37)

L-analiżi skont il-paragrafu 68(a) tal-RAG 2007-13 stabbiliet li l-limitu tas-sehem tas-suq ta' 25 % applikabbli jinqabeż fis-segmenti A u B individwali u kombinati fiż-ŻEE fis-snin kollha kkonċernati, u fis-segment A0 u B kombinati mill-2011.

(38)

Għall-analiżi skont il-paragrafu 68(b), il-Kummissjoni stabbiliet li s-swieq tal-prodotti rilevanti kellhom prestazzjoni anqas milli mistenni fiż-ŻEE, u għalhekk il-Kummissjoni kellha tivverifika jekk il-kapaċitajiet maħluqa mill-proġett jaqbżux il-5 % tad-daqs tas-swieq rilevanti.

(39)

Il-Kummissjoni qieset li, għall-applikazzjoni tat-test tal-paragrafu 68(b), l-approċċ ta' żieda fil-kapaċità grossa huwa xieraq. L-approċċ ta' żieda fil-kapaċità netta (jiġifieri tnaqqis tal-kapaċità eżistenti mill-kapaċità totali ppjanata) jipprevjeni lill-Kummissjoni milli tivvaluta l-effett tal-għajnuna mill-Istat fuq swieq li qed imorru lura u li qed ibatu minn kapaċitajiet strutturali żejda, kull meta l-investiment assistit ma jestendix il-kapaċità eżistenti b'aktar minn 5 % tad-daqs tas-suq. Madankollu, it-test tal-paragrafu 68(b) ġie introdott bl-objettiv speċifiku li jiġu identifikati dawk is-sitwazzjonijiet fejn is-suq ikun qed imur lura, u d-daqs tal-investiment assistit għandu impatt maġġuri fuq il-kompetituri.

(40)

L-analiżi skont il-paragrafu 68(b) għall-proġett tal-investiment (ħlief il-ħanut tax-xogħol tal-pressa) uriet li l-limitu ta' 5 % jinqabeż biss jekk il-kapaċità totali tal-produzzjoni tintuża għall-manifattura ta' karozzi tas-segment B. Abbażi tal-istimi tal-produzzjoni kif indikati mill-Ungerija, mhuwiex probabbli li jinqabeż il-limitu ta' 5 % għal kwalunkwe wieħed mis-segmentazzjonijiet tas-suq tal-karozzi plawżibbli.

(41)

Fir-rigward tal-kapaċità li tinħoloq għall-produzzjoni ta' partijiet ta' karrozzerija mill-ħanut tax-xogħol tal-pressa, l-analiżi skont il-paragrafu 68(b) turi li l-limitu ta' 5 % jista' jinqabeż biss jekk is-sehem tal-produzzjoni ta' karozzi tas-segment B fi Győr jiżdied b'mod sinifikanti. Għalhekk, il-Kummissjoni ħalliet miftuħa l-mistoqsija dwar jekk il-kapaċità tal-ħanut tal-pressa jaqbiżx il-5 % tad-daqs tas-suq imkejjel bl-użu tad-dejta ta' konsum apparenti tal-prodott ikkonċernat qabel l-investiment.

(42)

Minħabba li l-Kummissjoni ma setgħetx tistabbilixxi li l-limiti stabbiliti fil-paragrafu 68(a) u (b) tal-RAG 2007-13 ma nqabżux, iddeċidiet li tibda l-proċedura formali ta' investigazzjoni. Hija ddikjarat b'mod partikolari li jekk il-kummenti riċevuti b'risposta għall-bidu tal-investigazzjoni formali ma jippermettux lill-Kummissjoni tikkonkludi mingħajr ebda dubju li l-limiti rilevanti mhumiex maqbuża, hija kienet se twettaq valutazzjoni fil-fond tal-proġett tal-investiment abbażi tal-IDAC. L-Ungerija u partijiet terzi interessati ġew mistiedna jippreżentaw il-kummenti tagħhom.

(43)

Il-partijiet terzi interessati ma ppreżentaw l-ebda kumment.

(44)

L-Ungerija ssostni l-pożizzjoni tagħha li s-suq tal-prodott għandu jkun definit bħala s-segmenti A0 sa B kombinati (klassifikazzjoni POLK).

(45)

L-awtoritajiet Ungeriżi jibqgħu tal-opinjoni li s-sostitwibilità min-naħa tad-domanda teżisti fil-marġini ta' kull segment tal-karozzi tal-passiġġieri individwali rilevanti kif rikonoxxut mill-Kummissjoni fid-deċiżjonijiet preċedenti tagħha (15). Minħabba li hemm il-possibilità ta'sostituzzjoni fil-katina tan-naħa tad-domanda tas-segmenti A0 u B fis-segment A, l-awtoritajiet Ungeriżi jqisu s-segmenti affetwati bħala grupp ta' segment kombinat.

(46)

Huma jargumentaw ukoll li l-iskop proprju tal-introduzzjoni tat-teknoloġija MQB huwa li tiżdied il-flessibilità min-naħa tal-provvista, li tippermetti lill-benefiċjarju jimmanifattura karozzi tal-passiġġieri għas-segmenti A0, A u B fuq l-istess linja tal-produzzjoni bbażata fuq MQB, u li tippermetti l-bidla fil-produzzjoni minn suq wieħed għal ieħor, biex b'hekk l-effetti tal-għajnuna jkunu jistgħu jinħassu fuq dawn is-swieq kollha.

(47)

L-Ungerija ssostni l-opinjoni tagħha li s-suq ġeografiku rilevanti għall-industrija tal-karozzi huwa s-suq globali, billi ttenni l-argumenti ppreżentati fil-fażi tan-notifika:

(48)

Għalhekk, l-Ungerija tqis li s-suq ġeografiku rilevanti huwa usa' miż-ŻEE, u jinkludi tal-anqas l-Ewropa kollha, l-Amerika ta' Fuq u t'Isfel, u ċ-Ċina.

(49)

Barra minn hekk, l-Ungerija tenfasizza li fid-dinja kollha, Győr huwa l-uniku sit ta produzzjoni għall-AUDI TT Coupé, AUDI TT Roadster, AUDI A3 Cabriolet u għalhekk tindirizza d-domanda globali. Il-produzzjoni fi Győr tal-A3 Sedan hija wkoll distribwita globalment (ħlief għal dawk manifatturati esklussivament għas-suq Ċiniż f'Foshan, fiċ-Ċina).

(50)

L-awtoritajiet Ungeriżi jsostnu li għandu jintuża l-approċċ tal-kapaċità netta fit-test tal-paragrafu 68(b). L-objettiv tal-proġett ta' investiment hu, fost l-oħrajn, l-estensjoni tal-impjant eżistenti fi Győr. L-integrazzjoni vertikali tal-proċess tal-produzzjoni timplika li l-kapaċità preċedenti ([60 000-110 000] vettura fis-sena tas-segmenti A u B) issa se tiġi ttrattata fl-impjant tal-immuntar li għadu kif inbena, u fil-faċiitajiet tal-produzzjoni l-ġodda.

(51)

L-Ungerija targumenta li irrispettivament minn (i) jekk vettura hijiex immuntata biss f'impjant speċifiku jew immanifatturata fi proċess tal-produzzjoni integrat vertikalment, jew (ii) jekk il-mudelli tal-ġenerazzjoni l-ġdida jistax ikollhom karatteristiċi differenti, il-prodott finali jibqa' fl-istess segment. Għaldaqstant, il-kapaċità ta' [60 000-110 000] vettura fis-sena li kienu prodotti (immuntati) qabel il-proġett ta' investiment se jibqgħu jkunu prodotti wara bħala riżultat tal-proġett ta' investiment. Minbarra din il-kapaċità eżistenti, se jkun hemm kapaċità oħra ta' produzzjoni ta' [60 000-80 000] vettura.

(52)

Għalhekk, iż-żieda fil-kapaċità netta tammonta għal massimu ta' [60 000-80 000] vettura fis-sena fl-istess grupp ta' segment (A u B) bħal qabel. Din il-kapaċità netta ma taqbiżx il-limitu ta' 5 % stabbilit fil-paragrafu 68(b) ta' RAG 2007-13.

(53)

L-awtoritajiet Ungeriżi kkunsidraw li s-sehem ta' […] % tal-output tal-ħanut tax-xogħol tal-pressa li se jintuża fil-vetturi tas-segment B li huma manifatturati f'siti oħra ta' produzzjoni tal-Grupp VW mhux se jwasslu għal żieda fil-produzzjoni globali ta' karozzi tas-segment B fil-Grupp VW, billi dawn se jissostitwixxu biss il-partijiet tal-karrozzerija pressati mixtrija minn barra permezz ta' oħrajn li jipproduċu huma stess. Skont l-Ungerija, il-metodu tal-kalkolu applikat mill-Kummissjoni fid-deċiżjoni ta' ftuħ iwassal sempliċement għal għadd doppju tal-kapaċità ta' produzzjoni maħluqa fil-Grupp VW. Barra minn hekk, kif imsemmi fil-premssa 17 ta' din id-deċiżjoni, minħabba t-tibdil fil-pjanijiet tal-benefiċjarju, dawn il-partijiet tal-karrozzerija jintużaw għall-produzzjoni ta' karozzi li jappartjenu għas-segmenti A0 sa C.

(54)

L-awtoritajiet Ungeriżi jqisu li abbażi tal-argumenti msemmija hawn fuq dwar id-definizzjoni korretta tal-prodott rilevanti u s-suq ġeografiku, kif ukoll l-applikazzjoni ta' approċċ ta' żieda fil-kapaċità netta, il-limiti stabbiliti fil-paragrafu 68 tal-RAG 2007-13 mhux se jinqabżu u li l-għajnuna tista' tkun awtorizzata mingħajr il-ħtieġa ta' valutazzjoni fil-fond tal-għajnuna.

(55)

Minkejja dan, l-Ungerija pprovdiet l-informazzjoni neċessarju biex titwettaq valutazzjoni fil-fond.

(56)

L-Ungerija tqis li l-investiment jikkontribwixxi għall-iżvilupp reġjonali ta' Győr u ta' Transdanubia tal-Punent għar-raġunijiet li ġejjin:

(57)

L-awtoritajiet Ungeriżi spjegaw li qabel ma ħadu d-deċiżjoni tagħhom dwar l-għoti tal-għajnuna, bil-ħsieb ta' aktar żvilupp reġjonali fir reġjun ta' Transdanubia tal-Punent, ġew ikkunsidrati miżuri oħra ta' politika, bħal pereżempju, aktar żvilupp tal-infrastruttura pubblika jew titjib fis-sistema tal-edukazzjoni. Fi snin preċedenti, madankollu, diġà kienu ttieħdu dawn il-miżuri ta' politika ġenerali li ġejjin:

(58)

Minkejja l-iżviluppi msemmija hawn fuq, ir-reġjun għadu mhuwiex żviluppat biżżejjed meta mqabbel ma' ċerti reġjuni tal-viċinat (Burgenland u Bratislava), u l-medja tal-Unjoni Ewropea f'termini tal-PDG per capita, l-impjieg, l-infrastruttura u l-edukazzjoni.

(59)

Ġie konkluż li l-għajnuna mill-Istat għal dan il-proġett ta' investiment kbir kienet strument aktar effiċjenti biex jiġi mmirat u promoss l-iżvilupp fir-reġjun. L-awtoritajiet Ungeriżi jenfasizzaw ukoll li anke jekk l-għajnuna tista' titqies bħala miżura selettiva, din ingħatat abbażi ta' skemi tal-għajnuna li huma eliġibbli wkoll għal kwalunkwe investitur ieħor fl-Ungerija jekk jissodisfa l-kriterji speċifiċi stabbiliti fil-leġiżlazzjoni.

(60)

L-Ungerija offriet informazzjoni biex tipprova li l-għajnuna taqa' taħt ix-Xenarju 2 tal-IDAC, minħabba li din tipprovdi inċentiv lill-benefiċjarju biex iwettaq l-investiment sħiħ fl-impjant ta' Győr aktar milli jqassam parti minnu f'[lokalità 1 f'żona mhux assistita fiż-ŻEE] u parti oħra f'[lokalità 2 f'żona assistita fiż-ŻEE eliġibbli għal għajnuna reġjonali skont l-Artikolu 107(3)(c) tat-TFUE]. B'mod partikolari, l-Ungerija pprovdiet dokumenti tal-kumpanija rilevanti, ġenwini u kontemporanji li jisġjegaw il-proċess ta' teħid ta' deċiżjonijiet f'diversi stadji fir-rigward tal-lokalità tal-investiment u li jipprovdu dejta finanzjarja tax-xenarju kontrofattwali, li t-tnejn huma deskritti hawn taħt.

(61)

Fil-Grupp VW, id-deċiżjonijiet ta' investiment jitħejjew fi proċess ta' teħid ta' deċiżjonijiet f'diversi stadji, fejn dawk li jieħdu d-deċiżjonijiet janalizzaw diversi siti fi proċess ta' tqabbil kompetittiv. Il-fażijiet prinċipali huma: (1) L-ippjanar tal-Bejgħ fit-Tul (LAP) u d-diskussjonijiet dwar l-ippjanar, (2) L-iżvilupp tal-prodott, deċiżjoni dwar il-prodott u l-għażla minn qabel tas-sit, u (3) Deċiżjoni dwar l-investiment u l-lokalità.

(62)

Il-proċess ta' teħid ta' deċiżjonijiet rigward l-investiment notifikat segwa dan il-proċess ġenerali. Minħabba li dan jikkonċerna investiment tad-ditta legalment indipendenti AUDI, id-deċiżjonijiet rilevanti kellhom jittieħdu fil-livell tad-ditta u jiġu kkonfermati fil-livell tal-grupp.

(63)

L-introduzzjoni ta' prodotti ġodda fil-Grupp VW issegwi l-hekk imsejjaħ proċess tal-ħolqien ta' prodott (PEP) li jvarja mill-ippjanar tal-prodott sal-bidu tal-produzzjoni (SOP). Il-PEP jikkonsisti mill-erba' fażijiet prinċipali deskritti fil-figura t'hawn taħt:

Deċiżjoni dwar il-prodott / Għażla minn qabel tas-sit

Deċiżjoni dwar l-investiment u dwar is-sit tal-produzzjoni

LAP Diskussjonijiet dwar l-ippjanar

Investiment fl-implimentazzjoni tal-proġett

[…]

SOP

(64)

Il-punt tat-tluq huwa l-fażi tal-Ippjanar tal-Bejgħ fit-Tul, fejn jiġi analizzat it-tbassir tal-iżvilupp tas-suq u tad-domanda potenzjali kif ukoll il-fluttwazzjonijiet fis-suq. L-LAP jippjana l-iżviluppi ta' prodotti għas-[…]snin ta' wara, u jidentifika liema kapaċitajiet ta' produzzjoni addizzjonali għandhom jinbnew, jew liema aġġustamenti huma meħtieġa għall-kapaċitajiet eżistenti. L-LAP huwa rifless fid-diskussjonijiet dwar l-ippjanar (PR) annwali, li huma konklużi mill-Bord Superviżorju tal-Grupp u li jinkludu l-qafas finanzjarju tal-investimenti skedati.

(65)

F'AUDI AG, l-ippjanar huwa bbażat fuq l-LAP kkonsolidat tal-Grupp VW. Fid-diskussjonijiet dwar l-ippjanar tal-[20xx], il-Grupp diġà kien identifika l-bżonn ta' kapaċitajiet tal-produzzjoni miżjuda għall-vetturi fis-segmenti A0 u A. F'dan l-istadju, dawn il-kapaċitajiet addizzjonali ma kinux attribwiti għal xi sit speċifiku.

(66)

Minħabba r-rati tal-użu diġà għolja tal-kapaċitajiet tal-produzzjoni installati fl-impjanti ta' produzzjoni ta' vetturi eżistenti, l-LAP indika li l-kapaċitajiet eżistenti, fuq medda twila ta' żmien, ma jkunux suffiċjenti biex ikopru l-bżonnijiet li jinħolqu mit-tkabbir previst fil-volum tal-bejgħ.

(67)

Matul din il-fażi, diversi dipartimenti tal-AUDI, il-Grupp VW u s-siti ta' produzzjoni kkonċernati jaħdmu flimkien biex iħejju kemm id-deċiżjoni dwar il-prodott kif ukoll l-għażla minn qabel tas-sit. Id-dipartiment ta' kontroll tal-Grupp […] jieħu rwol ċentrali u ta' konsolidazzjoni matul din il-fażi.

(68)

L-ewwel pass f'din it-tieni fażi huwa l-proċess tal-iżvilupp tal-prodott, li skont ir-regoli interni tal-benefiċjarju jibda tal-anqas […] qabel il-bidu previst tad-data tal-produzzjoni. Minħabba li l-proġett notifikat jinkludi erba' mudelli, id-deċiżjoni dwar il-fattibilità tal-proġett ittieħdet fi żminijiet differenti, b'dati differenti ppjanati għall-bidu tal-produzzjoni għal dawn il-mudelli (20).

(69)

Id-deċiżjoni tal-produzzjoni, jiġifieri d-deċiżjoni għall-produzzjoni ta' prodott propost fl-LAP, tirrikjedi li l-iżvilupp tal-prodott jilħaq mira ta' fattibilità definita minn qabel. Id-dħul mistenni ġġenerat mill-prodott il-ġdid jitqabbel mal-ispejjeż meħtieġa għall-produzzjoni (inkluż l-investiment). Sabiex tkun determinata l-ispiża mistennija tal-produzzjoni, l-ewwel titwaqqaf ipotetikament lokalità partikolari bħala assunzjoni tal-ippjanar (premessa tal-lokalità). Il-premessa tal-lokalità tintuża sabiex tiġi determinata l-ewwel struttura tal-ispiża u l-qafas tal-prodott. Din ma tiddeterminax minn qabel sit tal-produzzjoni speċifiku, imma sservi bħala linja bażi għall-valutazzjoni ta' spejjeż tal-produzzjoni mistennija.

(70)

[…]; għal prodott kompletament ġdid […] il-premessa tal-lokalità hija normalment ibbażata fuq indikaturi tal-prestazzjoni, jiġifieri l-lokalità bl-aqwa ċifri ta' prestazzjoni tintgħażel bħala l-ewwel ipoteżi. Fil-prattika, jitqiesu wkoll kriterji addizzjonali, bħal kapaċitajiet liberi jew strutturi adattati. Filwaqt li għall-kalkoli dwar id-deċiżjoni dwar il-prodott il-profitabilità tal-prodott hija ta' importanza kbira, il-lokalitajiet alternattivi possibbli qed jiġu żviluppati u analizzati wkoll.

(71)

Fil-livell tad-ditta, il-VAP (Kumitat għall-Prodotti) u l-PSK (Kumitat għall-Istrateġija tal-Prodott) ta' AUDI AG ħadu deċiżjonijiet li kkonfermaw il-fattibilità tal-proġett għall-erba' mudelli. Id-deċiżjonijiet identifikaw bħala premessi tal-lokalità preliminari [il-lokalità 3 f'żona mhux assistita taż-ŻEE] għall-A3 Cabriolet u l-partijiet tal-karrozzerija tal-A3 Sedan, u Győr għall-A3 Sedan, TT Coupé u TT Roadster. Dawn id-deċiżjonijiet ġew imbagħad ikkonfermati fil-livell tal-Grupp minn K-VAP/K-PSK.

(72)

Ladarba tittieħed id-deċiżjoni dwar il-prodott, il-pass li jmiss ikun l-għażla tal-aktar lokalità adattata għall-proġett (jiġifieri d-deċiżjoni dwar il-lokalità). [Il-Grupp ta' Kontroll] jibda tipikament mis-siti kollha tal-produzzjoni ta' Volkswagen u jqassar din il-lista għal dawk il-lokalitajiet li jidhru adattati għall-investiment (21). Bħala riżultat ta' dan il-proċess, jiġu speċifikati x-xenarji tal-investiment u tal-produzzjoni għal kull sit realistiku, u dawn jinġabru f'forma mqassra f'rakkomandazzjoni għal deċiżjoni.

(73)

L-Ungerija spjegat li fil-prinċipju, fl-identifikazzjoni ta' lokalitajiet adattati, l-integrazzjoni ta' kapaċitajiet addizzjonali f'faċilitajiet li jintużaw biss parzjalment, jew l-estensjoni ta' siti eżistenti huma preferibbli għal investiment f'żona ġdida minħabba li b'hekk jiġu evitati spejjeż addizzjonali (pereżempju l-konnessjoni tal-impjant il-ġdid mal-infrastruttura pubblika, l-integrazzjoni tas-sit il-ġdid fin-netwerk tal-loġistika tal-Grupp, eċċ.). F'dan il-każ, il-possibilità ta' investiment f'żona ġdida fl-Ewropa tal-Lvant ġie meqjus fi stadju bikri tal-proċess tat-teħid ta' deċiżjonijiet, iżda dan ma ġiex konkretizzat u ġie abbandunat meta tkompla l-proċess tat-teħid ta' deċiżjonijiet dwar il-prodott fil-livell tad-ditta AUDI (22). Għalhekk, fil-proċess tal-iskrinjar għal lokalitajiet adattati, [il-Grupp ta' Kontroll] iffoka fuq siti eżistenti tal-Grupp.

(74)

Jekk il-valutazzjoni tal-lokalità ma tikkonċernax investiment f'żona ġdida, iż-żewġ kriterji ewlenin għall-identifikazzjoni ta' lokalitajiet adattati huma jekk jistgħux jiġu installati kapaċitajiet addizzjonali f'impjant eżistenti (jiġifieri “spazju għal tkabbir jew aġġustament”), u jekk il-faċilitajiet eżistenti fis-sit humiex kompatibbli mal-proġett ippjanat (jiġifieri “struttura kompatibbli”).

(75)

Fl-applikazzjoni ta' dawn il-kriterji, [il-Grupp ta' Kontroll] identifika erba' lokalitajiet possibbli. Abbażi tad-dokumenti tal-kumpanija pprovduti mill-Ungerija, l-istatus preliminari tal-valutazzjoni ta' [il-Grupp ta' Kontroll] tal-erba' xenarji tal-investiment kien diskuss minn AUDI u l-Grupp fi […] 2009 (23).

Tabella II

Għażliet tal-investiment

(76)

Id-dokumenti tal-kumpanija jinkludu u jqabblu l-ispejjeż tal-produzzjoni speċifiċi għal-lokalità għal dawn l-Għażliet, li jikkonsistu fl-ispejjeż tal-investiment u l-ispejjeż tal-produzzjoni li se jitħallsu matul il-perjodu ta' referenza.

(77)

Minħabba dawn l-ispejjeż tal-produzzjoni — u b'kunsiderazzjoni tal-fatt li [lokalità 3 f'żona mhux assistita fiż-ŻEE] kienet laħqet il-limitu f'termini ta' kapaċità tal-produzzjoni, u li kwalunkwe produzzjoni addizzjonali kienet tirrikjedi nefqa strutturali maġġuri — il-Bord tal-Maniġment tal-Grupp iddieċieda fil-[…] 2010, kif dokumentat mill-minuti ppreżentati tal-laqgħa, li jeskludi l-Għażliet A u B mill-ippjanar ulterjuri, u ta struzzjonijiet lil AUDI (i) biex tkompli b'aktar ippjanar għall-produzzjoni ta' vetturi fis-sit ta' Győr, (ii) biex tħejji rakkomandazzjonijiet għal deċiżjonijiet għall-Bord Superviżorju ta' VW u AUDI kif ukoll għall-K-VAI (25) (iii) u biex tieħu l-passi meħtieġa biex tikseb l-għajnuna mill-Istat.

(78)

Abbażi ta' rakkomandazzjoni mill-[Grupp ta' Kontroll] it-tqabbil ta' kalkoli aġġornati għal-lokalitajiet C u D u b'kunsiderazzjoni tal-għajnuna reġjonali mill-Istat possibbli mill-istat Ungeriż, il-K-VAI iddeċieda, fl-14 ta' Diċembru 2010, li jillokalizza l-investiment fi Győr (jiġifieri Għażla D). L-Ungerija pprovdiet evidenza tal-analiżi kontrofattwali meqjusa li hija deskritta fl-Anness 1 għal din id-Deċiżjoni, imma mhix ippubblikata għal raġunijiet ta' sigriet kummerċjali, u ppreżentat kopja tal-minuti tal-laqgħa.

(79)

Biex tipprova l-proporzjonalità tal-għajnuna, l-Ungerija bbażat ruħha fuq il-kalkoli użati għall-effett tal-inċentiv.

(80)

Il-kalkolu finali użat mill-Ungerija biex tispjega x-xenarju kontrofattwali u biex turi l-effett ta' inċentiv turi li meta mqabbla mal-Għażla C, l-Għażla D għandha żvantaġġ fl-ispiża ta' EUR 143,3 miljun (il-valur preżenti fil-ħin tad-deċiżjoni dwar l-investiment u l-lokalità tal-benefiċjarju, jiġifieri valur preżenti fl-2010).

(81)

Dan l-iżvantaġġ fl-ispiża jammonta għal EUR 153,8 miljun fi prezzijiet tal-2013 (26), li hija s-sena applikabbli għall-kalkolu tal-għajnuna, u għalhekk anke għall-proporzjonalità.

(82)

Minkejja l-għajnuna massima permissibbli ta' EUR 133,3 miljun (f'valur preżenti tal-2013) (27), għad hemm żvantaġġ fl-ispiża ta' EUR 20,5 miljun għall-Għażla D.

(83)

L-Ungerija tqis li l-għajnuna hi proporzjonata minħabba li din ma tikkumpensax kompletament l-iżvantaġġ tal-lokalità.

(84)

L-Ungerija tenfasizza li l-għajnuna reġjonali sservi biss biex tikkumpensa għall-ispejjeż addizzjonali tal-Għażla D (espansjoni tas-sit tal-produzzjoni fi Győr) meta mqabbla mal-Għażla C (produzzjoni fl-impjanti eżistenti ta' [lokalità 2 f'żona assistita fiż-ŻEE eliġibbli għal għajnuna reġjonali skont l-Artikolu 107(3)(c) tat-TFUE] u [lokalità 1 f'żona mhux assistita fiż-ŻEE]). Din l-għajnuna hi proporzjonata u m'għandha l-ebda effett fuq il-kompetizzjoni, minħabba li l-proġett ta' investiment u l-effetti li jirriżultaw minnu fuq il-kompetizzjoni u l-kummerċ, xorta waħda kienu jseħħu.

(85)

L-awtoritajiet Ungeriżi jsostnu l-opinjoni tagħhom li l-għajnuna ma tistax tkun klassifikata bħala għajnuna illegali fis-sens tal-Artikolu 1(f) tar-Regolament tal-Kunsill (UE) 2015/1589 (minn hawn 'il quddiem “ir-Regolament Proċedurali”) (28). F'dan il-kuntest, l-awtoritajiet Ungeriżi jispjegaw dan li ġej:

(86)

L-Artikolu 108(3) tat-TFUE jobbliga lill-Istati Membri jinnotifikaw il-miżuri ta' għajnuna ppjanati lill-Kummissjoni. Bl-adozzjoni tar-Regolament ta' Eżenzjoni ta' Kategorija għall-għajnuna ta' investiment reġjonali (minn hawn 'il quddiem “RAG BER”) (29), il-Kummissjoni kienet illimitat dan l-obbligu għal miżuri li jaqbżu l-limitu tan-notifika. L-awtoritajiet Ungeriżi interpretaw din id-dispożizzjoni bħala waħda li tfisser li miżuri ta' għajnuna, taħt il-limitu tan-notifika u taħt skema eżistenti jistgħu, fil-każijiet kollha, jingħataw u jiddaħħlu fis-seħħ fil-kompetenza tal-Istati Membri.

(87)

L-Ungerija tkompli billi targumenta li din l-interpretazzjoni hija wkoll konformi mad-dispożizzjonijiet tal-IDAC, li fl-opinjoni tagħhom tikkonferma li l-Istati Membri jżommu l-possibilità li jagħtu għajnuna sal-livell li jikkorrispondi għall-ammont massimu permissibbli li investiment b'nefqa eliġibbli ta' EUR 100 miljun jista' jirċievi taħt ir-regoli applikabbli, anke meta l-Kummissjoni adottat deċiżjoni negattiva (30).

(88)

Barra minn hekk, qatt ma kien hemm dubju min-naħa tal-Kummissjoni dwar dan l-approċċ u l-interpretazzjoni, kemm fil-proċedura ta' notifika attwali kif ukoll fin-notifiki preċedenti mwettqa mill-awtoritajiet Ungreiżi (31) u jidher ukoll għall-Ungerija li l-Kummissjoni interpretat l-obbligu ta' notifika minn Stati Membri bl-istess mod bħall-awtoritajiet Ungeriżi fil-passat (32).

(89)

Barra minn hekk, l-awtoritajiet Ungeriżi jenfasizzaw ukoll li skont il-ġurisprudenza stabbilita tal-Qrati Ewropej (33) l-Istati Membri li jikkonformaw mal-obbligu tan-notifika tagħhom taħt l-Artikolu 108(3) tat-TFUE ma jistgħux ikunu f'pożizzjoni aktar detrimentali meta mqabbla ma' dawk li jiksru d-dmir ta' notifika, għaliex dan imur kontra l-għan bażiku tal-Artikolu 108(3) tat-TFUE. Għalhekk, interpretazzjoni li ma tippermettix lill-Istati Membri jagħtu l-għajnuna sal-limitu tan-notifika individwali tikkontradixxi wkoll il-ġurisprudenza b'konsegwenza negattiva estensiva kemm fuq l-Istati Membri kif ukoll fuq il-benefiċjarji.

(90)

Skont id-dispożizzjonijiet t'hawn fuq, l-awtoritajiet Ungeriżi ddeċidew li jressqu l-għajnuna eżentata favur l-AHM abbażi ta' skema ta' għajnuna eżistenti (XR 47/2011). Madankollu, l-ammont mogħti ma qabiżx il-limitu ta' notifika applikabbli, billi l-parti tal-għajnuna li taqbeż il-limitu ngħatat fuq il-kundizzjoni tad-deċiżjoni finali tal-Kummissjoni. L-awtoritajiet Ungeriżi jikkonfermaw li ma tħallset l-ebda għajnuna 'l fuq mil-limitu ta' notifika, u lanqas se titħallas mingħajr l-approvazzjoni tal-Kummissjoni.

(91)

L-awtoritajiet Ungeriżi għalhekk iqisu li huma kkonformaw għalkollox mal-obbligu tagħhom li jinnotifikaw lill-Kummissjoni bl-ammont tal-għajnuna li jaqbeż il-limitu ta' notifika, u għaldaqstant l-għajnuna li ngħatat lil AHM ma tikkostitwixxix “għajnuna illegali”.

(92)

L-appoġġ finanzjarju fil-forma ta' għotja diretta u benefiċċju tat-taxxa korporattiva ngħata/se jingħata mil-awtoritajiet Ungeriżi u huwa ffinanzjat permezz tal-baġit ġenerali tal-Istat. Għalhekk l-appoġġ jingħata minn Stat Membru u permezz ta' riżorsi tal-Istat, fis-sens tal-Artikolu 107(1) tat-TFUE.

(93)

Minħabba li l-għajnuna qed tingħata lil kumpanija waħda, AHM, il-miżura hija selettiva.

(94)

L-appoġġ finanzjarju fil-forma ta' benefiċċju tat-taxxa korporattiva jeħles lill-kumpanija minn spejjeż li normalment kien ikollha tħallas hi stess. L-appoġġ finanzjarju fil-forma ta' għotja diretta jipprovdi lill-kumpanija vantaġġ li ma kienx ikollha taħt kundizzjonijiet normali tas-suq. Għalhekk, il-kumpanija tibbenefika minn vantaġġ ekonomiku fuq il-kompetituri tagħha.

(95)

L-appoġġ finanzjarju ngħata/se jingħata għal investiment fis-settur tal-karozzi, li hu soġġett għal kummerċ intensiv bejn l-Istati Membri, u li parzjalment jissostitwixxi l-provvisti ta' oġġetti intermedjarji minn Stati Membri oħra. Għalhekk, il-miżura taffetwa l-kummerċ bejn l-Istati Membri.

(96)

Dan il-vantaġġ mogħti lil AHM u l-produzzjoni tagħha jfisser li hemm tgħawwiġ fil-kompetizzjoni jew theddid ta' tgħawwiġ tal-kompetizzjoni.

(97)

Konsegwentement, il-Kummissjoni tqis li l-miżura prevista tikkostitwixxi għajnuna mill-Istat fis-sens tal-Artikolu 107(1) tat-TFUE.

(98)

Il-Kummissjoni tinnota li l-awtoritajiet Ungeriżi nnotifikaw il-pakkett tal-għajnuna kollu lil AHM, iżda l-ammont li jaqbeż il-limitu tan-notifika ngħata biss fuq kundizzjoni tal-approvazzjoni tal-Kummissjoni, filwaqt li l-ammont taħt il-limitu tan-notifika kien tħallas abbażi ta' skema ta' għajnuna ta' eżenzjoni ta' kategorija. Il-Kummissjoni tqis li dan l-approċċ jikser l-Artikolu 108(3) tat-TFUE u għalhekk l-għajnuna hija illegali, kif definit fl-Artikolu 1(f) tar-Regolament Proċedurali.

(99)

Il-Kummissjoni ma taqbilx mal-argumenti mressqa mill-awtoritajiet Ungeriżi dwar l-interpretazzjoni tar-RAG BER. Skont l-Artikolu 7(e) tar-RAG BER għajnuna reġjonali tibqa' soġġetta għall-obbligu tan-notifika skont l-Artikolu 108(3) tat-TFUE, jekk l-ammont totali tal-għajnuna mis-sorsi kollha jaqbeż il-75 % tal-ammont massimu tal-għajnuna li jista' jirċievi investiment b'nefqa eliġibbli ta' EUR 100 miljun, bl-applikazzjoni tal-limitu tal-għajnuna standard fis-seħħ għal intrapriżi kbar fil-mappa approvata tal-għajnuna reġjonali fid-data li fiha se tingħata l-għajnuna. Din id-dispożizzjoni, li tikkorrispondi għall-paragrafu 64 tar-RAG 2007-13, ġiet inkorporata fl-Artikolu 6(2) tar-Regolament tal-Kummissjoni (KE) Nru 800/2008 (34) (“GBER”).

(100)

L-iskemi ta' għajnuna użati mill-awtoritajiet Ungeriżi għall-pakkett ta' għajnuna lil AHM jirreferu għall-Artikolu 7(e) tar-RAG BER u għall-paragrafu 64 tar-RAG 2007-13.

(101)

In-nefqa eliġibbli tal-investiment taqbeż EUR 100 miljun, u l-ammont ta' għajnuna kombinat (għotja u benefiċċju tat-taxxa) jaqbeż il-limitu tan-notifika. Għall-kalkolu tal-limitu tan-notifika trid titqies l-għajnuna mis-sorsi kollha. Din il-pożizzjoni ġiet ikkonfermata mill-Kummissjoni f'każ preċedenti (SA.32036 — il-każ Mondi Swiecie (35)). Ladarba jinqabeż dan il-limitu, il-pakkett tal-għajnuna, kollu kemm hu (36), ma jibqax jaqa taħt ir-RAG BER u jrid jiġi notifikat lill-Kummissjoni, li tivvaluta l-kompatibilità tiegħu abbażi tal-linji gwida applikabbli. F'dan il-kuntest, il-Kummissjoni vvalutat il-pakkett ta' għajnuna notifikat mill-awtoritajiet Ungeriżi abbażi tal-kriterji ġenerali ta' kompatibilità tar-RAG 2007-13, u kkonkludiet fid-deċiżjoni ta' ftuħ tagħha li filwaqt li dawk il-kriterji ġew rispettati, hija kellha dubji dwar ir-rispett għal-limiti tas-suq provduti fil-paragrafu 68 tar-RAG 2007-13. Għaldaqstant, ikun kontra r-regoli applikabbli li jiġu applikati l-kundizzjonijiet ta' kompatibilità tar-RAG 2007-13 għall-pakkett ta' għajnuna notifikat, imma li jitqies li l-ammont li huwa taħt il-limitu tan-notifika jista' jingħata legalment abbażi tal-iskemi eżistenti u d-dispożizzjonijiet tar-RAG BER qabel ma l-Kummissjoni tieħu deċiżjoni dwar il-miżura ta' għajnuna notifikata.

(102)

Fir-rigward tan-nota f'qiegħ il-paġna 56 tal-IDAC, il-Kummissjoni preċedentement irrifjutat l-argument li l-awtorità tagħha li teżamina l-kompatibilità ta' miżura ta' għajnuna taħt l-IDAC hija limitata għall-parti mill-ammont tal-għajnuna mitlub li tkun aktar mil-limitu ta' notifika (37). Il-Kummissjoni trid tiftakar l-obbligu tagħha li tivverifika, abbażi ta' valutazzjoni aktar dettaljata, l-effett ta' inċentiv u l-proporzjonalità ta' miżuri tal-għajnuna li għalihom hija applikabbli dik il-valutazzjoni fil-fond, jiġifieri għajnuna reġjonali notifikabbli mogħtija għal proġetti ta' investiment kbar li jissodisfaw il-kundizzjonijiet rilevanti kif stabbiliti fir-RAG 2007-13.

(103)

Fir-rigward tal-possibilità li tingħata għajnuna sal-limitu tan-notifika stabbilit fl-Artikolu 6(2) tal-GBER, huwa importanti li wieħed jinnota li t-test tan-nota f'qiegħ il-paġna 56 tal-IDAC jiddikjara sempliċement li l-Istat Membru jżomm il-possibilità li jagħti għajnuna sal-limitu tan-notifika. Il-loġika tal-arkitettura tar-regoli applikabbli (RAG BER, RAG 2007-13, IDAC) hija li meta l-ammont tal-għajnuna mis-sorsi kollha huwa limitat għal-limitu tan-notifika, l-Istat Membru mhuwiex meħtieġ li jippreżenta l-proġett għal valutazzjoni dettaljata mill-Kummissjoni u jista' jimplimenta l-miżura tal-għajnuna skont il-kundizzjonijiet stabbiliti fir-Regolament ta' eżenzjoni ta' kategorija. Madankollu, hekk kif l-Istat Membru jiddeċiedi li jagħti pakkett ta' għajnuna li jaqbeż il-limitu tan-notifika, l-ammont kollu jkun soġġett għall-obbligu ta' notifika u l-kompatibilità tiegħu tiġi valutata abbażi tal-linji gwida applikabbli. Dan hu eżattament dak li jingħad ukoll fil-Premessa 7 tal-GBER fejn din tiddikjara li “Għajnuna mill-Istat skont it-tifsira tal-Artikolu 87(1) tat-Trattat li mhix koperta b'dan ir-Regolament għandha tibqa' suġġetta għar-rekwiżit tan-notifika meħtieġa skont l-Artikolu 88(3) tat-Trattat. Dan ir-Regolament għandu jkun bla ħsara għall-possibbiltà li Stati Membri jinnotifikaw għajnuna li l-għanijiet tagħha jikkorrispondu mal-għanijiet koperti minn dan ir-Regolament. Din l-għajnuna tkun evalwata mill-Kummissjoni b'mod partikolari fuq il-bażi tal-kundizzjonijiet stabbiliti f'dan ir-Regolament u skont il-kriterji stipulati fil-linji gwida speċifiċi u l-oqfsa adottati mill-Kummissjoni kull fejn l-għajnuna kkonċernata taqa' fl-ambitu ta' dawn l-istrumenti speċifiċi”.

(104)

Qabel ma l-Kummissjoni tieħu deċiżjoni dwar l-għajnuna notifikata, l-Istat Membru jista' jirtira n-notifika u jagħti l-għajnuna abbażi tar-regolament għal eżenzjoni ta' kategorija applikabbli, jekk l-ammont tal-għajnuna jitnaqqas sal-livell tan-notifika jew taħt dan il-livell, u jiġu rispettati d-dispożizzjonijiet kollha tal-eżenzjoni ta' kategorija applikata.

(105)

L-awtoritajiet Ungeriżi jinvokaw prassi ta' teħid ta' deċiżjonijiet preċedenti tal-Kummissjoni (38). Il-Kummissjoni tqis li ċ-ċirkostanzi fil-każ ikkwotat Ibiden ma jistgħux jitqabblu ma' dan il-każ, għax dan ittieħed abbażi ta' bażi legali differenti (RAG 2000-2006) u MSF 2002 (39), u mhux fl-applikazzjoni tar-RAG BER u tar-RAG 2007-13. Fi kwalunkwe każ, il-Kummissjoni żviluppat prassi ta' teħid ta' deċiżjonijiet differenti tul dawn l-aħħar snin (pereżempju fid-deċiżjonijiet Mondi u BMW imsemmijin hawn fuq).

(106)

Finalment, il-konklużjonijiet t'hawn fuq mhumiex mibdula mill-argument li l-każistika stabbiliet li Stati Membri li jikkonformaw mal-obbligu ta' notifika tagħhom skont l-Artikolu 108(3) tat-TFUE ma jistgħux jitpoġġew f'pożizzjoni aktar detrimentali minn dawk li kienu kisru l-obbligu ta' notifika. Il-Kummissjoni tinnota li fis-sentenza ċitata (40), dan l-argument sar fir-rigward tal-valutazzjoni tal-kompatibilità ta' miżura ta' għajnuna li kienet implimentata bi ksur tal-obbligi skont l-Artikolu 108(3) tat-TFUE. Il-qorti kkonkludiet li rekwiżit addizzjonali biex jitqiesu l-effetti reali tal-għajnuna li diġà ġiet implimentata jista' jagħti inċentiv lill-Istati Membri biex jinnotifikaw proġetti ta' investiment lill-Kummissjoni biss ladarba dawn ikunu tlestew, u dan iċaħħad il-projbizzjoni skont l-Artikolu 108(3) tat-TFUE mill-effettività tagħha. Għalhekk, il-Kummissjoni tqis li l-każistika invokata mill-awtoritajiet Ungeriżi mhijiex rilevanti fir-rigward tal-obbligu ta' notifika skont l-Artikolu 108(3) tat-TFUE.

(107)

Fid-dawl ta' dan t'hawn fuq, il-Kummissjoni tikkonkludi li l-għajnuna mogħtija lil AHM hija illegali. Madankollu, din il-konklużjoni ma tinfluwenzax il-valutazzjoni tal-kompatibilità tagħha mas-suq intern.

(108)

L-objettiv tal-għajnuna hu li tippromwovi l-iżvilupp reġjonali. Minħabba li l-ftehim tal-għotja għall-investiment mingħajr il-ħanut tax-xogħol tal-pressa kien iffirmat fis-6 ta' Lulju 2011 (għall-ħanut tax-xogħol tal-pressa fis-26 ta' Settembru 2011), soġġett biss għall-approvazzjoni tal-Kummissjoni, il-Kummissjoi tqis li l-għajnuna ngħatat qabel Lulju 2014, u għalhekk għandha tkun ivvalutata — skont il-paragrafu 188 tar-RAG 2014-20 — abbażi tar-RAG 2007-13, u b'mod partikolari d-dispożizzjonijiet tiegħu dwar l-għajnuna għall-investiment reġjonali għal proġetti ta' investiment kbar kif stabbilit fil-paragrafu 68. Jekk il-kummenti riċevuti b'risposta għall-ftuħ tal-investigazzjoni formali fil-perjodu preskritt ma jippermettux lill-Kummissjoni tikkonkludi mingħajr ebda dubju fl-investigazzjoni formali li l-limiti stabbiliti fil-paragrafu 68(a) u l-paragrafu 68(b) tar-RAG 2007-13 ma nqabżux, jinħtieġ li din tipproċedi b'valutazzjoni fil-fond abbażi tal-kriterji stabbiliti fl-IDAC.

(109)

Il-Kummissjoni trid twettaq il-valutazzjoni tagħha fi tliet passi:

(110)

Il-Kummissjoni diġà stabbiliet fil-paragrafu 54 tad-deċiżjoni ta' ftuħ li l-għajnuna tissodisfa l-kriterji ta' kompatibilità ġenerali stabbiliti fir-RAG 2007-13. L-investigazzjoni formali ma kixfet l-ebda element li kien se jqajjem dubju dwar din il-valutazzjoni. Il-Kummissjoni tinnota b'mod partikolari dan li ġej:

(111)

Meta jitqiesu dawn il-kunsiderazzjonijiet, il-Kummissjoni tqis li l-kriterji ta' kompatibilità standard tar-RAG ġew sodisfati.

(112)

Il-Kummissjoni ddikjarat, fil-premessa 105 tad-deċiżjoni ta' ftuħ, li jekk il-kummenti li tirċievi b'risposta għall-bidu tal-investigazzjoni formali ma jippermettux lill-Kummissjoni tikkonkludi mingħajr ebda dubju li l-limiti stabbiliti fit-testi tal-paragrafu 68(a) u (b) mhumiex maqbuża, il-Kummissjoni se twettaq valutazzjoni fil-fond tal-proġett tal-investiment abbażi tal-IDAC. Il-Kummissjoni trid tivvaluta jekk il-kummenti li tkun irċeviet jippermettux din il-konklużjoni.

(113)

Fil-paragrafu 65 tad-deċiżjoni ta' ftuħ tagħha, il-Kummissjoni qieset li għall-iskopijiet tal-paragrafu 68 tar-RAG 2007-13, il-prodotti kkonċernati mill-proġett tal-investiment huma karozzi tal-passiġġieri li jappartjenu għas-segmenti tas-suq A0, A u B skont is-segmentazzjoni minn POLK.

(114)

Fil-premessa 80 tad-deċiżjoni ta' ftuħ, il-Kummissjoni ħalliet id-definizzjoni preċiża tas-suq tal-prodott rilevanti miftuħa, u qieset id-definizzjonijiet tas-suq kollha alternattivi u plawżibbli, inkluż b'mod partikolari l-aktar segmentazzjoni dejqa li għaliha hemm dejta disponibbli. Minħabba li AHM se tipproduċi karozzi kif ukoll partijiet tal-karrozzerija għal karozzi li jappartjenu għas-segmenti A u B, u minħabba li teoretikament tista' tipproduċi, għal karozzi li jappartjenu għas-segment A0, il-Kummissjoni qieset li dawn is-segmenti individwali kif ukoll is segmenti kombinati A0 sa B u A sa B għandhom jitqiesu bħala swieq tal-prodott rilevanti plawżibbli għal dan il-każ.

(115)

Fil-kummenti tagħha għad-deċiżjoni ta' ftuħ (kif deskritt fil-premessi 44 sa 46 ta' din id-deċiżjoni), l-Ungerija sostniet il-pożizzjoni tagħha diġà riflessa fid-deċiżjoni ta' ftuħ, mingħajr ma żiedet ebda kumment jew informazzjoni li kient għadha ma ġietx ippreżentata fil-fażi preliminari tal-eżami. B'mod partikolari, l-Ungerija sostniet l-opinjoni tagħha li s-suq tal-prodott rilevanti għandu jkun definit bħala grupp ta' segmenti kombinati ta' vetturi li jappartjenu għas-segmenti A0, A u B, u li s-suq ġeografiku għandu jkun definit bħala wieħed li jinkludi tal-anqas is-suq kombinat tal-Ewropa kollha, l-Amerika ta' Fuq u t'Isfel, u ċ-Ċina (mhux biss is-suq taż-ŻEE).

(116)

Fir-rigward tas-suq tal-prodott, il-Kummissjoni tqis dan li ġej: id-deċiżjoni li twettaq valutazzjoni fil-fond ma tippreġudikax l-eżitu tal-valutazzjoni tal-kompatibilità fil-fond li tirriżulta. Madankollu,qabel ma tapprova l-għajnuna, il-Kummissjoni trid tkun sodisfatta li l-kontribuzzjoni pożittiva li tirriżulta mill-miżura tal-għajnuna se tikkumpensa, fi kwalunkwe każ, l-effetti negattivi tagħha fuq il-kummerċ u l-kompetizzjoni. Għaldaqstant, sabiex ikun deċiż jekk valutazzjoni fil-fond dwar il-kompatibilità tal-miżura tal-għajnuna għandhiex titwettaq jew le, id-definizzjoni tas-suq tal-prodott għandha tkun dejqa kemm jista' jkun, b'kunsiderazzjoni tal-karatteristiċi speċifiċi tal-karozzi li se jkunu manifatturati.

(117)

Il-prassi tal-użu tad-definizzjoni tas-suq l-aktar dejqa abbażi ta' segmenti individwali fl-industrija tal-karozzi għandha l-bażi tagħha f'deċiżjonijiet komparabbli, inkluż deċiżjonijiet finali (43).

(118)

Din il-prattika dwar il-każijiet għandha l-bażi tagħha f'kunsiderazzjonijiet ekonomiċi ta' kompetizzjoni rilevanti minħabba li hija bbażata fuq l-opinjoni li kompetituri fis-segmenti kollha tas-suq, inkluż l-iżgħar segment possibbli, jistħoqqilhom protezzjoni minn atturi li jiddominaw is-suq.

(119)

B'mod aktar speċifiku, dan l-approċċ huwa bbażat fuq it-teorija li s-sostitwibbiltà min-naħa tad-domanda bejn żewġ prodotti teżisti jekk dawn jitqiesu bħala sostituti mill-konsumaturi minħabba l-karatteristiċi, il-prezz u l-użu intiż tagħhom. Permezz tal-prattika tagħha li teżamina ishma tas-suq anke fl-iżgħar segment tas-suq tal-karozzi possibbli li għalih hija disponibbli l-informazzjoni, il-Kummissjoni ssegwi eżattament din il-loġika: jiġifieri tqis li s-sostitwibbiltà f'termini ta' prezz, karatteristiċi u użu intiż hija l-aktar b'saħħitha bejn prodotti li jappartjenu għall-istess segment. F'dan is-sens, l-applikazzjoni tal-aktar segment tas-suq dejjaq possibbli bħala suq wieħed plawżibbli tirrifletti l-loġika tal-punt 28 tal-Linji Gwida dwar l-Għaqdiet Orizzontali (44) li jiddikjara li “Prodotti jistgħu jiġu differenzjati f'suq rilevanti b'mod li ċertu prodotti huma sostituti eqreb minn oħra. Aktar mal-grad ta' sostituzzjoni bejn il-prodotti tad-ditti magħquda jkun għoli, aktar id-ditti magħquda jżidu l-prezzijiet b'mod sinifikattiv. […] L-inċentiv tad-ditti magħquda li jgħolli l-prezzijiet x'aktarx huwa aktar ristrett meta ditti rivali jipproduċu sostituti li huma qrib għall-prodotti tad-ditti magħquda milli meta huma joffru sostituti li huma inqas fil-qrib (…)”

(120)

Din hija wkoll ir-raġuni għalfejn karozzi konvenzjonali huma tradizzjonalment maqsuma f'segmenti, u għalfejn l-industrija tal-karozzi tassenja mudelli għad-diversi segmenti magħrufa sew. Hija din il-kunsiderazzjoni li mexxiet il-prattika tal-Kummissjoni fid-definizzjoni tas-suq rilevanti f'każijiet dwar karozzi, anke f'termini tas-segmenti individwali u din hija r-raġuni għalfejn l-Ungerija ppreżentat l-argumenti dwar is-swieq rilevanti f'dan il-każ kif ukoll f'każijiet oħra fil-passat f'termini ta' segmenti.

(121)

L-Ungerija ma ppreżentat ebda argument ieħor addizzjonali li seta' jikkontradixxi din l-opinjoni. Barra minn hekk, il-Kummissjoni ma rċeviet l-ebda informazzjoni minn partijiet terzi matul l-investigazzjoni formali li setgħet tippermetti li s-segmentazzjoni tas-suq tinftiehem aħjar. Għalhekk, il-Kummissjoni ssostni l-approċċ tagħha li tħalli miftuħa d-definizzjoni eżatta tas-suq tal-prodott rilevanti u biex tapplika approċċ ta' definizzjonijiet tas-suq alternattivi plawżibbli, li jiddefinixxu segmenti ta' karozzi individwali (inkluż l-aktar segmentazzjoni dejqa li għaliha hemm dejta disponibbli). Għaldaqstant, il-Kummissjoni tkompli tqis li s-segmenti individwali ta' A0, A u B, kif ukoll is-segment kombinat A0 sa B u A sa B ilkoll jenħtieġ li jitqiesu bħala swieq tal-prodotti plawżibbli rilevanti għal dan il-każ (45).

(122)

Fir-rigward tas-suq ġeografiku, il-Kummissjoni ssostni l-valutazzjoni inizjali tagħha fid-deċiżjoni ta' ftuħ (ara l-premessa 87 tad-deċiżjoni ta' ftuħ) li s-suq rilevanti huwa s-suq taż-ŻEE jew suq akbar; il-Kummissjoni ma tistax teskludi li s-suq ġeografiku huwa limitat għas-suq taż-ŻEE.

(123)

Il-Kummissjoni tinnota li l-Ungerija ssostni l-argumenti diġà mressqa fl-eżami preliminari, imma li din ma ppreżentatx aktar elementi jew informazzjoni matul l-investigazzjoni formali (ara l-premessa 47 ta' din id-deċiżjoni). Il-Kummissjoni tqis li dawn l-argumenti mhumiex suffiċjenti biex itaffu t-tħassib li s-suq ġeografiku seta' jkun limitat għas-suq taż-ŻEE. B'mod partikolari, il-Kummissjoni tqis dan li ġej:

(124)

Il-fatt li l-akbar produtturi tal-karozzi huma attivi fuq skala internazzjonali u f'kompetizzjoni globali mhijiex prova suffiċjenti li s-swieq individwali huma integrati u jikkostitwixxu suq dinji uniku (jew suq kombinat li jinkludi l-Ewropa kolla, l-Amerika ta' Fuq u t'Isfel, u ċ-Ċina). L-istess japplika għall-argument li l-akbar għaxar OEMs għandhom siti tal-manifattura u sistemi ta' distribuzzjoni madwar id-dinja kollha. Fil-fatt, il-Kummissjoni tqis li l-instabilità fir-rata tal-kambju tista' tissemma bħala fattur li wassal biex l-OEMs jibnu impjanti tal-produzzjoni aktar qrib id-domanda reġjonali, u li l-istess jista' jgħodd għal politiki ta' protezzjoni effettiva (tariffi għolja fuq importazzjonijiet ta' produtturi finali, tariffi baxxi fuq produtturi intermedjarji, li jagħti inċentiv għal produzzjoni/immuntar lokali). It-tielet argument għall-eżistenza ta' strutturi ta' produzzjoni globalizzati, minkejja swieq mhux integrati, huwa l-fatt li ċerti stati jippermettu importazzjonijiet biss jekk l-impriżi konġunti għall-produzzjoni lokali jinħolqu b'mod parallel. Għalhekk, il-preżenza globali ta' atturi kbar bħala manifatturi mhijiex fiha nnifisha indikazzjoni tal-eżistenza ta' suq globali (jew usa' miż-ŻEE). Bl-istess mod, l-eżistenza ta' sistemi ta' distribuzzjoni li jestendu madwar id-dinja ma tikkostitwixxix prova li s-suq huwa globali (jew usa' miż-ŻEE) minn perspettiva ta' kompetizzjoni. Il-fatt li l-Grupp AUDI AG/VW għandu l-ħseib li jservi lis-suq dinji għal tlieta mill-erba' mudelli ta' karozzi, u li jservi s-suq dinji minbarra ċ-Ċina bil-mudelli tal-A3 Sedan minn sit wieħed biss, lanqas ma huwa suffiċjenti biex jappoġġja konklużjoni li s-suq ġeografiku huwa usa' miż-ŻEE.

(125)

Barra minn hekk, l-argument li f'livell għoli ta' flussi ta' kummerċ, pereżempju l-fatt li madwar 13 % tal-karozzi tas-segment A u aktar minn 25 % tal-karozzi tas-segment B tal-produzzjoni taż-ŻEE huma esportati lejn reġjuni oħra tad-dinja, huwa insuffiċjenti biex wieħed jipprova l-eżistenza ta' suq globali (jew f'dan il-każ usa' miż-ŻEE). Il-Kummissjoni tqis li, filwaqt li l-flussi tal-kummerċ jistgħu jagħtu kontribut fuq livell ta' żoni ġeografiċi differenti billi titqies l-importanza tal-importazzjonijiet u l-esportazzjonijiet relattivi għal-livelli tal-produzzjoni lokali u tal-konsum, l-eżistenza ta' flussi ta' kummerċ fiha nnifisha mhijiex prova biżżejjed biex wieħed iqis li jeżisti suq ġeografiku integrat. Fil-fatt, jista' jkun hemm trasportazzjonijiet bejn iż-ŻEE u reġjuni oħra, imma dan ma jfissirx li s-swieq huma integrati fis-sens li l-kundizzjonijiet tas-suq (pereżempju l-prezzijiet) f'suq wieħed jinfluwenzaw il-kundizzjonijiet tas-suq fl-ieħor. Dan jgħodd partikolarment fejn it-trasportazzjonijiet osservati huma relatati primarjament ma' trasportazzjonijiet mill-manifatturi stess, għall-kuntrarju għat-trasportazzjonijiet minn importaturi u esportaturi indipendenti li jimpenjaw ruħhom f'arbitraġġ tal-prezzijiet. Il-prezzijiet jistgħu jkunu kompletament speċifiċi għas-suq (eż. għoljin f'suq wieħed, baxxi f'ieħor), u mhux allinjati mal-kundizzjonijiet ta' suq integrat allegat. L-analiżi tal-flussi tal-kummerċ ma tindirizzax il-kwistjoni prinċipali fid-definizzjoni tas-suq, jiġifieri jekk l-importazzjonijiet jew l-esportazzjonijiet jistgħux jegħlbu żieda fil-prezz fis-suq lokali. Il-Kummissjoni tinnota li l-Ungerija ma ppreżentatx aktar materjal empiriku li seta' jipprova l-eżistenza ta' ċaqliq korrelatat fil-prezzijiet, jew ir-reattività tal-importazzjonijiet netti għall-bidliet fi prezzijiet relattivi.

(126)

Il-Kummissjoni tirrikonoxxi li l-importanza ta' ostakoli għall-kummerċ qed tonqos maż-żmien. Madankollu, il-Kummissjoni hija konvinta li wieħed mill-fatturi ewlenin tal-produzzjoni barranija, u d-deċiżjonijiet ta' rilokazzjoni tal-manifatturi tal-karozzi tal-UE huma ostakoli għall-aċċess għas-suq fis-swieq fil-mira. Ostakoli ta' tariffi għoljin ixekklu serjament l-aċċess għall-esportaturi tal-UE, speċjalment fl-Asja. Ostakoli mhux tariffarji, inkluż rekwiżiti ta' ċertifikazzjoni ta' piż u diskriminatorji, ir-rekwiżiti addizzjonali ta' ttestjar, it-taxxi tas-sisa, eċċ., għandhom impatt qawwi fuq l-esportazzjonijiet ta' vetturi tal-UE lejn is-swieq fix-Xlokk tal-Asja, iċ-Ċina u tal-Amerika t'Isfel. Il-Kummissjoni tammetti li l-Istati Uniti hija l-aktar destinazzjoni importanti għall-esportazzjonijiet globali ta' karozzi tal-UE. Madankollu, l-UE u l-Istati Uniti għandhom approċċi tassew diverġenti għar-regolamentazzjoni u s-sorveljanza tas-suq. Din id-diverġenza regolatorja hija probabbilment anke llum l-aktar ostakolu sinifikanti għall-aċċess għall-esportazzjonijiet tal-karozzi tal-UE lejn l-Istati Uniti.

(127)

Il-Kummissjoni kompliet tieħu nota, kif dovut, tal-argumenti mressqa dwar l-ispejjeż tat-trasport li qed jonqsu. Il-Kummissjoni mhix kompletament konvinta f'dan ir-rigward. L-iżviluppi futuri fir-rigward tat-tnaqqis fl-ispejjeż tat-trasport ma jistgħux jiġu kkonfermati b'mod ċar fis-sitwazzjoni ekonomika attwali fejn l-ispejjeż tal-fjuwil qed ivarjaw. Għaldaqstant, it-tnaqqis futur fl-ispejjeż imsemmi ma jistax jitqies bħala garantit.

(128)

L-awtoritajiet Ungeriżi pprovdew ukoll analiżi ta' korrelazzjoni tal-prezzijiet tal-karozzi fl-Istati Uniti u prezz medju ta' karozza għal kampjun ta' għaxar pajjiżi Ewropej għas-segmenti A u B fil-perjodu bejn Q1 tal-2005 u Q2 tal-2010, kif ukoll analiżi ta' korrelazzjonijiet bejn tliet pari ta' pajjiżi Ewropej, jiġifieri l-Ġermanja u Franza, il-Ġermanja u l-Italja, u l-Ġermanja u r-Renju Unit fl-istess perjodu. Din l-analiżi għandha l-ħsieb li turi li l-korrelazzjoni bejn prezzijiet fl-Amerika ta' Fuq u l-prezz medju tal-għaxar pajjiżi miż-ŻEE magħżula tista' titqabbel mal-korrelazzjoni bejn prezzijiet tal-karozzi tal-Ġermanja, Franza, l-Italja u r-Renju Unit. Huma jikkonkludu li l-analiżi tappoġġja l-konklużjoni li l-Amerika ta' Fuq u ż-ŻEE għandhom jitqiesu bħala suq ġeografiku wieħed. Minħabba li mhuwiex ikkontestat li dawn il-pajjiżi msemmija l-aħħar jinsabu fl-istess suq ġeografiku, dan ifisser a fortiori li anke l-Amerika ta' Fuq u ż-ŻEE jenħtieġ li jkunu fl-istess suq ġeografiku.

(129)

Il-Kummissjoni tinnota li s-sett tad-dejta li fuqu twettqet l-analiżi ppreżentata mill-awtoritajiet Ungeriżi hija bbażata, għal kull wieħed mis-segmenti tas-suq meqjusa (segmenti A u B), u għal kull waħda mis-sitt żoni ġeografiċi identifikati hawn fuq, jiġifieri l-Amerika ta' Fuq, kampjun ta' għaxar pajjiżi miż-ŻEE, il-Ġermanja, Franza, l-Italja u r-Renju Unit fuq sett tad-dejta ta' 22 punt tad-dejta li jkopru l-perjodu minn Q1 tal-2005 sa Q2 tal-2010. L-analiżi tal-korrelazzjoni twettqet fuq il-livell tal-indiċi u fuq id-differenzi bejn l-indiċijiet. (46)

(130)

Il-korrelazzjoni t'hawn fuq twettqet abbażi tal-indiċi katina Fisher. L-indiċi katina Fisher, bħall-indiċijiet tal-prezz ġenerali, għandu l-għan li jevalwa l-evoluzzjoni tal-prezzijiet ta' pakkett ta' prodotti partikolari f'reġjun partikolari għal intervall ta' żmien partikolari. Jagħmel dan bil-komputazzjoni tal-medja ppeżata normalizzata ta' prezzijiet. Il-prezz medju għalhekk iqis il-konsum relattiv tal-oġġetti fil-pakkett, u jitnaqqas kontra perjodu ta' referenza (47). Hemm diversi modi għall-komputazzjoni ta' indiċi u fil-letteratura ekonomika nbnew diversi indiċijiet L-indiċi Fisher huwa indiċi derivat, minħabba li huwa l-medja (ġeometrika) ta' żewġ indiċijiet oħra magħrufa bħala l-indiċijiet Paasche u Laspeyres. F'dan il-każ speċifiku, l-awtoritajiet Ungeriżi jipproponu wkoll verżjoni tal-indiċi Fisher li huwa “katina”. Dan ifisser li l-bidla fil-prezz mhuwiex relattiv għall-perjodu immedjatament qabel, imma huwa relattiv għall-perjodu ta' referenza magħżul għan-normalizzazzjoni.

(131)

Ir-riżultati miksuba għas-segment A huma kif ġej: il-korrelazzjoni bejn l-indiċi tal-prezz tal-Amerika ta' Fuq u l-indiċi tal-prezz għall kampjun ta' għaxar pajjiżi taż-ŻEE magħżula jammonta għal 0,94. Dan l-istudju sab li dan huwa simili għall-korrelazzjoni bejn l-indiċijiet tal-prezz għall-Ġermanja u Franza, l-Italja u r-Renju Unit li jvarjaw bejn 0,90 għal 0,95.

(132)

L-ewwel, il-Kummissjoni ma toġġezzjonax għall-użu tal-indiċi u b'mod partikoari l-użu tal-indiċi katina Fisher. Madankollu, il-Kummissjoni għandha dubji dwar id-dejta sottostanti li ntużat għall-komputazzjoni ta' dan l-indiċi. Fil-fatt, ma jistax ikun eskluż li tista' tirriżulta korrelazzjoni falza minn xi effett tal-kompożizzjoni minħabba żviluppi simili (komuni) fil-mudelli tal-konsum (li jiddeterminaw il-piżijiet fl-indiċi, eż. bidla lejn mudelli li jiswew aktar fis-segment) minflok permezz ta' żviluppi fil-prezzijiet infushom.

(133)

It-tieni, il-Kummissjoni tinnota li l-analiżi titwettaq fuq livelli tal-indiċi sempliċi filwaqt li tipikament analiżi tal-korrelazzjoni jenħtieġ li tieħu ħsieb l-eżistenza ta' żviluppi komuni fil-prezz (eż. immexxija minn żviluppi komuni fl-ispejjeż) sabiex jiġu esklużi u biex tiġi evitata korrelazzjoni falza. Din tissejjaħ korrelazzjoni parzjali. Din l-analiżi għadha ma saritx, għalhekk dawn il-valuri ta' korrelazzjoni jistgħu jkunu foloz.

(134)

It-tielet, ta' min jinnota li livell apparentement għoli ta' korrelazzjoni (bħal f'dan il-każ) jista' jkun ukoll falz jekk is-serje taż-żmien ma tkunx stazzjonarja, jiġifieri meta jkun hemm xejra taż-żmien. Huwa fatt magħruf li meta żewġ serje taż-żmien ma jkunux stazzjonarji, il-livell ta' korrelazzjoni huwa artifiċjalment għoli. Prattika tajba tgħid li l-analiżi tal-korrelazzjoni tagħmel sens meta s-serje taż-żmien ikunu stazzjonarji. Għalhekk, l-ebda valur ta' evidenza ma għandu jingħata lil valuri ta' korrelazzjoni li jirriżultaw minn serje taż-żmien mhux stazzjonarja. F'dan il-każ, iż-żewġ serje tal-indiċi mhumiex stazzjonarji, u b'hekk juru xejra ċara. Dan jitfa' dubji fuq il-validità tar-riżultati tal-korrelazzjoni. Ta' min isemmi li l-awtoritajiet Ungeriżi jirrikonoxxu dan u jispjegaw li jkun għalhekk aħjar li l-ewwel is-serja ssir stazzjonarja billi jittieħdu d-differenzi (jiġifieri l-eliminazzjoni tax-xejra taż-żmien) u jiġu komputati l-korrelazzjonijiet fuq dawn is-serje taż-żmien modifikati. Huma jaslu għall-konklużjoni li l-valuri ta' korrelazzjoni jistgħu jitqabblu, u għalhekk il-kamp ta' applikazzjoni tas-suq ġeografiku għandu jinkludi lill-Amerika ta' Fuq.

(135)

Il-Kummissjoni ma taqbilx ma' din l-analiżi. Fil-fatt, ir-riżultati tal-korrelazzjoni tas-serje taż-żmien modifikata tal-prezzijiet (wara l-eliminazjzoni tax-xejra taż-żmien), huma rispettivament, għall-Amerika ta' Fuq u l-kampjun tal-għaxar pajjiżi taż-ŻEE magħżula, il-Ġermanja u Franza, il-Ġermanja u l-Italja u l-Ġermanja u r-Renju Unit 0,39, 0,60, 0,60 u 0,55. Il-korrelazzjoni bejn l-Amerika ta' Fuq u l-kampjun tal-għaxar pajjiżi taż-ŻEE magħżula hija għalhekk pjuttost baxxa (0,39) u b'mod partikolari sostanzjalment aktar baxxa mill-korrelazzjonijiet referenzjarji kkomputati fuq bidliet fl-indiċi tal-prezz katina Fisher bejn il-Ġermanja u Franza, il-Ġermanja u l-Italja u l-Ġermanja u r-Renju Unit.

(136)

Jidher li din l-evidenza ma tappoġġjax il-konklużjoni li s-suq ġeografiku rilevanti għas-segment A jinkludi wkoll l-Amerika ta' Fuq. Barra minn hekk, l-analiżi tal-korrelazzjoni tidher li qed tistrieħ fuq xi assunzjonijiet simplifikati li ma ġewx rikonoxxuti jew ittestjati biżżejjed, eż. in-nuqqas ta' xokkijiet komuni u l-eżistenza ta' xejriet taż-żmien potenzjalment differenti. Barra minn hekk, ir-riżultati tat-test tal-korrelazzjoni, jekk affidabbli, pjuttost jappoġġjaw l-ipoteżi tal-kamp ta' applikazzjoni aktar dejjaq tas-suq ġeografiku.

(137)

Minħabba li s-sehem tas-suq tal-benefiċjarju tal-għajnuna fis-suq taż-ŻEE għas-segment A jaqbeż il-25 %, il-limitu tat-test tal-paragrafu 68(a) li 'l fuq minnu tkun meħtieġa valutazzjoni fil-fond, xorta waħda jinqabeż. Għalhekk mhuwiex meħtieġ li wieħed janalizza r-riżultati tas-segment B. L-Ungerija ma ppreżentatx riżultati tal-korrelazzjoni għas-segment A0.

(138)

Fid-dawl ta' dan kollu, u minħabba li l-Kummissjoni ma rċevietx informazzjoni addizzjonali matul l-investigazzjoni formali li kienet tippermettilha li tikkonkludi li s-suq ġeografiku rilevanti huwa usa' miż-ŻEE, hija ssostni l-konklużjoni tagħha li s-suq ġeografiku rilevanti — indipendentement mid-definizzjoni magħżula tas-suq tal-prodott — huwa ż-ŻEE jew suq akbar. Għal darb'oħra, il-Kummissjoni tenfasizza li jinħtieġ li jiġi verifikat li l-kontribuzzjoni pożittiva li tirriżulta mill-miżura tal-għajnuna fi kwalunkwe każ se tikkumpensal-effetti negattivi fuq il-kummerċ u l-kompetizzjoni. Għaldaqstant, sabiex ikun deċiż jekk għandhiex titwettaq valutazzjoni fil-fond dwar il-kompatibilità tal-miżura tal-għajnuna jew le, id-definizzjoni tas-suq ġeografiku għandha tkun dejqa kemm jista' jkun, b'kunsiderazzjoni tal-karatteristiċi speċifiċi tal-karozza/i li se tkun/jkunu manifatturata/i.

(139)

Il-Kummissjoni wettqet it-test stabbilit fil-punt 68(a) tar-RAG fis-swieq tal-prodotti u ġeografiċi kollha plawżibbli biex tivverifika jekk is-sehem tas-suq tal-benefiċjarju jaqbiżx il-25 % qabel u wara l-investiment.

(140)

Minħabba l-fatt li ma setax jiġi stabbilit suq wieħed rilevanti tal-prodott u ġeografiku, kellhom jitqiesu r-riżultati tas-swieq kollha plawżibbli. Is-sehem tas-suq tal-Grupp VW jammonta għal aktar minn 25 % tas-segmenti A u B individwali u kombinati fiż-ŻEE fis-snin kollha kkonċernati. Fis-segment kombinat ta' A0, A u B fiż-ŻEE, il-limitu ta' 25 % jinqabeż mis-sena 2011. Għalhekk il-Kummissjoni tikkonkludi li l-limitu stabbilit fil-paragrafu 68(a) jinqabeż fi kwalunkwe każ, tkun xi tkun id-definizzjoni tas-suq tal-prodott, u li għalhekk mhuwiex neċessarju li wieħed jiddeċiedi dwar definizzjoni definita għas-suq tal-prodott.

(141)

Minħabba li r-riżultat tat-test tal-paragrafu 68(a) diġà jirrikjedi l-proċediment għall-valutazzjoi fil-fond tal-għajnuna, mhuwiex meħtieġ li tittieħed opinjoni definita dwar l-eżitu tat-test tal-paragrafu 68(b).

(142)

Hekk kif jinqabeż il-limitu tat-test ta' 68(a), il-Kummissjoni ddeċidiet li twettaq verifika dettaljata, wara l-ftuħ tal-proċedura prevista fl-Artikolu 108(2) tat-TFUE, li l-għajnuna hija meħtieġa biex tipprovdi effett ta' inċentiv għall-investiment u li l-benefiċċji għall-miżuri tal-għajnuna jissuperaw it-tgħawwiġ tal-kompetizzjoni u l-effetti fuq il-kummerċ li jirriżultaw bejn l-Istati Membri.

(143)

Il-valutazzjoni fil-fond titwettaq abbażi tal-IDAC.

(144)

Ir-reġjun tat-Transdanubia tal-Punent huwa eliġibbli għal għajnuna reġjonali skont l-Artikolu 107(3)(a) tat-TFUE. Il-Kummissjoni tinnota l-effetti reġjonali pożittivi tal-investiment, kif ippreżentati mill-Ungerija (ara l-premessa 56), u tqis li b'mod partikolari l-effetti diretti u indiretti tal-ħolqien ta' impjiegi, il-potenzjal li jiġu attirati fornituri u fornituri tas-servizzi addizzjonali, it-trasferiment tal-għarfien fir-reġjun u t-tijib fil-bażi tal-ħiliet reġjonali jirrapreżentaw kontribut sinifikanti għall-iżvilupp tar-reġjun u għall-kisba tal-objettiv ta' koeżjoni tal-UE.

(145)

Il-paragrafi 17 u 18 tal-IDAC jenfasizzaw li l-għajnuna mill-Istat fil-forma ta' sussidji għall-investiment hija biss wieħed mill-mezzi biex jingħelbu l-fallimenti tas-suq u għall-promozzjoni tal-iżvilupp ekonomiku f'reġjuni żvantaġġjati. L-għajnuna tikkostitwixxi strument xieraq jekk tipprovdi vantaġġi speċifiċi meta mqabbla ma' miżuri oħra ta' politika. Skont il-paragrafu 18 tal-IDAC, huma biss “miżuri li għalihom l-Istat Membru kkunsidra għażliet politiċi oħra, u li għalihom huma stabbiliti l-vantaġġi tal-użu ta' strument selettiv bħalma hija l-għajnuna mill-Istat għal kumpanija speċifika, huma kkunsidrati bħala li jikkostitwixxu strument xieraq”.

(146)

L-Ungerija spjegat li diġà ttieħdu miżuri ġenerali għall-appoġġ tal-iżvilupp ekonomiku fil-livelli nazzjonali u reġjonali permezz ta' investiment f'infrastruttura bażika u fatturi produttivi, imma r-reġjun għadu fost ir-reġjuni żvantaġġjati tal-UE. Il-Kummissjoni tqis li l-iżviluppi fl-infrastruttura u miżuri oħra ġenerali biss mhumiex biżżejjed biex jitnaqqsu l-iżblanċi reġjonali.

(147)

L-Ungerija bbażat ukoll l-ispjegazzjoni tagħha dwar l-adegwatezza tal-istrument tal-għajnuna fuq is-sitwazzjoni ekonomika fir-reġjun tat-Transdanubia tal-Punent, u pprovdiet evidenza li turi li r-reġjun huwa żvantaġġat meta mqabbel ma' reġjuni fuq il-fruntiera fl-Awstrija (Burgenland) u fis-Slovakkja (Bratislavský kraj). Fl-istess ħin, l-indikaturi ekonomiċi ta' Transdanubia tal-Punent huma madwar il-medja tal-Ungerija. Madankollu, il-Kummissjoni tinnota li — kif juri l-istatus ta' Transdanubia tal-Punent bħala reġjun eliġibbli għall-għajnuna reġjonali skont l-Artikolu 107(3)(a) tat-TFUE, b'limitu ta' intensità tal-għajnuna ta' 30 % — is-sitwazzjoni soċjoekonomika ta' Transdanubia tal-Punent huwa taħt il-livell tal-medja tal-UE.

(148)

Minħabba dan, il-Kummissjoni tikkonkludi li l-miżura tal-għajnuna hija strument xieraq biex jiġi segwit l-objettiv tal-iżvilupp reġjonali fir-reġjun assistit ikkonċernat.

(149)

Minħabba li hemm ħafna raġunijiet validi biex kumpanija tillokalizza l-investiment tagħha f'reġjun partikolari, anke mingħajt ma tingħata l-għajnuna, l-IDAC tirrikjedi li l-Kummissjoni tivverifika fid-dettall li l-għajnuna hi meħtieġa biex tipprovdi effett ta' inċentiv għall-investiment. L-objettiv ta' din il-valutazzjoni dettaljata hu li jkun determinat jekk l-għajnuna fil-fatt tikkontribwixxix għall-bidla fl-imġiba tal-benefiċjarju, sabiex iwettaq investiment (addizzjonali) fir-reġjun assistit ikkonċernat. F'dan il-kuntest, l-Istat Membru huwa mitlub ukoll li jagħti deskrizzjoni komprensiva tax-xenarju kontrofattwali fejn ma tingħata l-ebda għajnuna lill-benefiċjarju. Ix-xenarji jridu jkunu ddikjarati realistiċi mill-Kummissjoni. Din il-verifika ta' effett sostantiv ta' inċentiv tmur lil hinn mill-verifika ta' jekk humiex sodisfatti r-rekwiżiti formali fir-rigward tal-effett ta' inċentiv stabbilit fir-RAG 2007-13 (ara l-paragrafu 68 tar-RAG 2007-13).

(150)

Il-paragrafu 22 tal-IDAC jiddikjara li l-effett (sostantiv) ta' inċentiv jista' jkun ipprovat f'żewġ xenarji possibbli: fin-nuqqas ta' għajnuna, ma jsir l-ebda investiment minħabba li mingħajr l-għajnuna, l-investiment ma jkunx profitabbli għall-kumpanija fi kwalunkwe lokalità (xenarju 1); fin-nuqqas ta' għajnuna, l-investiment iseħħ f'lokalità oħra tal-UE (xenarju 2).

(151)

L-IDAC tirrikjedili l-Istat Membru juri lill-Kummissjoni l-eżistenza tal-effett ta' inċentiv tal-għajnuna, u jipprovdi evidenza ċara li l-għajnuna fil-fatt kellha impatt fuq l-għażla tal-investiment jew fuq l-għażla tal-lokalità. Għalhekk dan ipoġġi l-oneru tal-provi rigward l-eżistenza ta' effett ta' inċentiv fuq l-Istat Membru. Il-paragrafu 25 tal-IDAC jindika li l-Istat Membru jista' jipprovdi prova tal-effett ta' inċentiv tal-għajnuna billi jipprovdi dokumenti tal-kumpanija li juru li jkun sar tqabbil bejn l-ispejjeż u l-benefiċċji fil-lokalizzazzjoni tar-reġjun assistit magħżul għall-investiment ma' lokalità alternattiva. L-Istat Membru hu mistieden li joqgħod fuq rapporti finanzjarji, pjanijiet kummerċjali intreni u dokumenti li jelaboraw id-diversi xenarji ta' investiment.

(152)

Il-Kummissjoni tinnota li l-awtoritajiet Ungeriżi ppreżentaw l-informazzjoni meħtieġa (ara l-premessa 60) f'forma ta' evidenza komprensiva kontemporanja u ġenwina li tiddokumenta l-proċess ta' teħid ta' deċiżjonijiet f'diveri stadji tal-Grupp VW u AUDI AG dwar id-deċiżjoni tal-investiment u l-lokalità, fejn jiddikjaraw li l-għajnuna lil AHM taqa' taħt ix-xenarju 2, u li jispjegaw xenarju kontrofattwali li, minbarra Győr, jinvolvi diversi lokalitajiet alternattivi (kombinazzjonijiet ta' lokalitajiet), li jinsabu fi [pajjiż 1 u pajjiż 2 taż-ŻEE].

(153)

Dawn il-lokalitajiet jinvolvu siti eżistenti fi Győr, [lokalità 2 f'żona assistita fiż-ŻEE eliġibbli għal għajnuna reġjonali skont l-Artikolu 107(3)(c) tat-TFUE], [lokalità 1 f'żona mhux assistita fiż-ŻEE], u [lokalità 3 f'żona mhux assistita fiż-ŻEE]. Filwaqt li Győr u [lokalità 2 f'żona assistita fiż-ŻEE eliġibbli għal għajnuna reġjonali skont l-Artikolu 107(3)(c) tat-TFUE] jinsabu f'reġjuni assistiti (b'limiti massimi ta' intensità tal-għajnuna ta' 30 % u 15 % rispettivament, fid-data tan-notifika), [lokalità 1 f'żona mhux assistita fiż-ŻEE], u [lokalità 3 f'żona mhux assistita fiż-ŻEE].jinsabu f'reġjuni mhux assistiti fi [pajjiż 2 taż-ŻEE].

(154)

Il-kalkoli u l-istimi tal-ispejjeż għall-erba' għażliet twettqu bl-istess livell ta' eżattezza. L-għażliet li jinvolvu s-siti ta' [lokalità 3 f'żona mhux assistita fiż-ŻEE] (Għażliet A u B) kienu diġà ġew esklużi fi […] 2010, minħabba li l-impjant ta' [lokalità 3 f'żona mhux assistita fiż-ŻEE] kien laħaq il-limiti tiegħu f'termini ta' kapaċità tal-produzzjoni u l-investiment kien jirrikjedi nefqa strutturali maġġuri li kienet tirriżulta fi spejjeż totali ogħla. Għalhekk kienu biss l-Għażla C (produzzjoni ta' mudelli ta' A3 Sedan u Audi TT fi [lokalità 2 f'żona assistita fiż-ŻEE eliġibbli għal għajnuna reġjonali skont l-Artikolu 107(3)(c) tat-TFUE] u l-produzzjoni ta' A3 Cabriolat fi [lokalità 1 f'żona mhux assistita fiż-ŻEE] u l-Għażla D (produzzjoni tal-erba' mudelli fi Győr) li baqgħu bħala għażliet kompetittivi.

(155)

Aktar il-quddiem fil-proċess tal-ippjanar, twettqu diversi kalkoli u stimi ta' spejjeż. Id-dokumenti pprovduti juru li dawn il-kalkoli kienu bbażati fuq l-istess assunzjonijiet u l-Ungerija spjegat li matul il-proċess ta' teħid ta' deċiżjonijiet l-istimi tal-ispejjeż għall-Għażla C u l-Għażla D inżammu fl-istess livell ta' eżattezza. Id-dokumenti jindikaw ukoll li dawn il-kalkoli kienu komparabbli.

(156)

Il-Kummissjoni tinnota li AUDI AG kienet diġà esplorat il-possibilità ta' għajnuna mill-Istat fl-istadji bikrin tal-fażi tat-teħid tad-deċiżjonijiet dwar l-investiment u l-lokalità. L-applikazzjoni għall-għajnuna mill-benefiċjarju fil-5 ta' Marzu 2010, il-konferma tal-Ungerija fis-26 ta' Marzu 2010 li l-investiment huwa fil-prinċipju eliġibbli għall-għajnuna, kif ukoll l-offerta inizjali ta' għajnuna mill-Ungerija tat-30 ta' Marzu 2010 seħħew qabel setgħet tiġi eliminata kwalunkwe waħda mill-għażliet. L-istimi tal-ispejjeż ippreżentati mill-Bord tal-Maniġment tal-Grupp fi […] 2010 diġà kienu jinkludu għajnuna potenzjali mill-Istat li kellha tingħata mill-Ungerija. F'dak il-mument, ġiet ikkunsidrata wkoll għajnuna potenzjali minn [pajjiż 1 taż-ŻEE], iżda wara din twarrbet, għax ma kienx ikun realistiku li tiġi riċevuta l-għajnuna fi [pajjiż 1 taż-ŻEE] (48).

(157)

Kif deskritt fil-premessa 80 ta' din id-deċiżjoni, l-istimi finali għall-ispejjeż tal-produzzjoni li jistgħu jiġu attribwiti għal-lokalità rriżultaw fi żvantaġġ fl-ispiża ta' EUR 143,3 miljun għall-Għażla D (Győr) mqabbla ma Għażla C ([lokalità 2 f'żona assistita fiż-ŻEE eliġibbli għal għajnuna reġjonali skont l-Artikolu 107(3)(c) tat-TFUE], u [lokalità 1 f'żona mhux assistita fiż-ŻEE],) fiż-żmien meta ż-żewġ għażliet tal-investiment u tal-lokalità ġew ippreżentati għal deċiżjoni finali li kellha tittieħed minn K-VAI fl-14 ta' Diċembru 2010. Kif dokumentat fil-minuti tal-laqgħa ta'K-VAI, abbażi ta' dik l-analiżi kontrofattwali, u ta' ċerti kriterji kwalitattivi, kif ukoll abbażi tad-disponibilità ta' għajnuna mill-Istat, il-K-VAI iddeċieda li jillokalizza l-proġett ta' investiment fi Győr fl-14 ta' Diċembru 2010.

(158)

Il-Kummissjoni terġa' tafferma l-opinjoni tagħha (ara l-premessa 110 ta' din id-deċiżjoni), li diġà ngħatat fid-deċiżjoni ta' ftuħ, li r-rekwiżiti formali fir-rigward tal-effett ta' inċentiv stabbilit fil-paragrafu 38 tar-RAG 2007-13 ġew sodisfatti: (i) fir-rigward tal-għotja — kif spjegat fil-premessa 23 ta' din id-deċiżjoni — il-benefiċjarju ppreżenta applikazzjoni għall-għajnuna u l-awtorità responsabbli għall-amministrazzjoni tal-iskema sussegwentement ikkonfermat bil-miktub li, soġġett għal verifika dettaljata, il-proġett fil-prinċipju ssodisfa l-kundizzjonijiet tal-eliġibilità stabbiliti mill-iskema, qabel ma nbeda x-xogħol fuq il-proġett; (ii) fir-rigward tal-benefiċċju tat-taxxa, kif deskritt fil-premessa 24 ta' din id-deċiżjoni, il-benefiċjarju applika għalih ħafna qabel il-bidu tax-xogħol, u fir-rigward tal-benefiċċju tat-taxxa hemm intitolament legali — soġġett għall-approvazzjoni tal-Kummissjoni — ma kienx meħtieġ li l-benefiċjarju jistenna kwalunkwe konferma tal-eliġibilità preliminari mill-awtoritajiet Ungeriżi.

(159)

Il-Kummissjoni tqis, fir-rigward tal-effett sostantiv ta' inċentiv, li l-għajnuna kellha effettivament impatt fuq l-għażla tal-lokalità tal-investiment: id-deċiżjoni tal-Grupp VW li jillokalizza l-proġett inkwistjoni fi Győr ittieħdet biss wara l-konferma li l-proġett ta' investiment se jkun eliġibbli għal għajnuna mill-Istat u huwa appoġġjat minn awtoritajiet pubbliċi, u l-K-VAI (l-entità responsabbli għat-teħid tad-deċiżjoni finali dwar l-investiment u l-lokalità) approva l-lokalità soġġett għad-disponibilità tal-għajnuna mill-Istat. Għalhekk, il-Kummissjoni tqis, skont il-paragrafi 23 u 25 tal-IDAC, li x-xenarju kontrofattwali ppreżentat mill-Ungerija huwa realistiku u appoġġjat minn evidenza ġenwina u kontemporanja. Għaldaqstant, l-għajnuna għandha effett (sostentiv) ta' inċentiv reali. Bit-tnaqqis fid-differenza fil-vijabilità favur Győr, l-għajnuna kkontribwiet għat-tibdil fid-deċiżjoni dwar il-lokalità tal-kumpanija benefiċjarja. Mingħajr l-għajnuna, l-investiment ma kienx iseħħ fi Győr.

(160)

Sabiex l-għajnuna tkun proporzjonali, l-ammont u l-intensità tal-għajnuna għandhom ikunu limitati għall-ammont minimu meħtieġ biex dan l-investiment iseħħ fir-reġjun assistit.

(161)

B'mod ġenerali, l-għajnuna reġjonali titqies li hija proporzjonali għas-serjetà tal-problemi li jaffetwaw ir-reġjuni assistiti jekk din tirrispetta l-limitu massimu tal-għajnuna reġjonali applikabbli, inkluż it-tnaqqis awtomatiku u progressiv fil-limitu massimu tal-għajnuna reġjonali għal proġetti ta' investiment kbar (li diġà huwa parti mill-mappa tal-għajnuna reġjonali applikabbli). L-intensità tal-għajnuna applikata f'dan il-każ mhijiex ogħla mil-limiti massimi ta' għajnuna reġjonali kkoreġuti mill-mekkaniżmu tat-tnaqqis, kif diġà stabbilit fil-premessa 110 ta' din id-deċiżjoni.

(162)

Minbarra l-prinċipju ġenerali ta' proporzjonalità li jinsab fir-RAG 2007-13, l-IDAC tirrikjedi t-twettiq ta' valutazzjoni aktar dettaljata. Taħt ix-xenarju 2 tal-IDAC, l-għajnuna titqies proporzjonata jekk din tkun ugwali għad-differenza bejn l-ispejjeż netti għall-benefiċjarju biex jinvesti fir-reġjun assistit u l-ispejjeż netti għal investiment fil-lokalità alternattiva.

(163)

Il-Kummissjoni tqis, abbażi tad-dokumentazzjoni ppreżentata (ara l-premessi 79 sa 82), li l-għajnuna kienet limitata għall-ammont neċessarju, minħabba li din ma taqbiżx id-differenza fl-ispejjeż bejn Għażla D (il-lokalizzazzjoni tal-investiment fi Győr) u l-Għażla C (il-lokalizzazzjoni tal-investiment fi [lokalità 2 f'żona assistita fiż-ŻEE eliġibbli għal għajnuna reġjonali skont l-Artikolu 107(3)(c) tat-TFUE] u [lokalità 1 f'żona mhux assistita fiż-ŻEE]). Il-kalkolu li sar fiż-żmien tal-analiżi kontrofattwali juri li mingħajr l-għajnuna, Győr kien se jiswa EUR 144,3 miljun aktar (f'valur preżenti fl-2010) mill-kombinazzjoni tal-lokalità [lokalità 2 f'żona assistita fiż-ŻEE eliġibbli għal għajnuna reġjonali skont l-Artikolu 107(3)(c) tat-TFUE] u [lokalità 1 f'żona mhux assistita fiż-ŻEE].

(164)

Dan l-iżvantaġġ fl-ispiża jammonta għal EUR 153,8 miljun f'termini tal-2013, li hija s-sena applikabbli għall-kalkolu tal-għajnuna, u għalhekk anke għall-proporzjonalità.

(165)

Id-differenza dovuta għal nefqa ogħla ta' darba setgħet titnaqqas permezz tal-għajnuna mill-Istat possibbli. Meta titqies l-għajnuna ta' EUR 133,3 miljun f'valur preżenti tal-2013, l-Għażla D xorta waħda għandha żvantaġġ fl-ispiża ta' EUR 20,5 miljun meta mqabbla mal-Għażla C. Il-Kummissjoni tinnota li l-iżvantaġġ fl-ispiża li jibqa' kien aċċettabbli mill-Grupp Volkswagen minħabba ċerti vantaġġi mhux kwantifikabbli ta' Győr, eż. il-possibilità li jiġu prodotti l-erba' derivattivi MQB f'impjant wieħed tal-AUDI, u tqis li ntweriet il-proporzjonalità tal-għajnuna.

(166)

Il-paragrafu 40 tal-IDAC jiddikjara li “jekk […] l-analiżi kontrofattwali tissuġġerixxi li mingħajr l-għajnuna, l-investiment xorta waħda kien jitwettaq, kien x'kien il-każ, ukoll jekk possibbilment minn lokalità oħra (it-tieni (2) xenarju), u jekk l-għajnuna tkun proporzjonali, l-indikazzjonijiet possibbli ta' deformazzjonijiet bħalma huma sehem qawwi tas-suq u żieda fil-kapaċità f'suq li l-prestazzjoni tiegħu hija inqas mil-livell standard, għandhom fil-prinċipju, ikunu l-istess, irrispettivament mill-għajnuna.”.

(167)

Minħabba li l-miżura tal-għajnuna tappoġġja d-deċiżjoni ta' investiment tax-xenarju 2 u li l-għajnuna hi limitata għall-ammont minimu, ma setgħux jiġu identifikati effetti negattivi fuq il-kompetizzjoni. L-investiment kien jitwettaq f'lokalità oħra, li fi kwalunkwe każ jirriżulta fl-istess livell ta' tgħawwiġ tal-kompetizzjoni. Għalhekk, il-Kummissjoni tqis li l-għajnuna ma għandhiex effetti negattivi fuq il-kompetizzjoni.

(168)

Skont il-paragrafu 53 tal-IDAC jekk, mingħajr l-għajnuna l-investiment kien jiġi lokalizzat f'reġjun aktar fqir (aktar żvantaġġi reġjonali — intensità massima ogħla ta' għajnuna reġjonali) jew f'reġjun li jitqies li għandu l-istess livell ta' żvantaġġi reġjonali bħar-reġjun fil-mira (l-istess intensità massima ta' għajnuna reġjonali), dan jikkostitwixxi element negattiv fit-test globali tal-ibbilanċjar, li x'aktarx ma jkunx ikkumpensat minn xi element pożittiv, minħabba li dan imur kontra l-loġika interenti tal-għajnuna reġjonali.

(169)

Minħabba li l-Ungerija kkonfermat li l-possibilità teoretika li jitwaqqaf impjant tal-produzzjoni ġdid fl-Ewropa tal-Lvant kienet twarrbet minn AUDI fl-istadji bikrin tal-proċess ta' teħid ta' deċiżjonijiet u li l-ebda waħda mis-siti eżistenti b'intensità ogħla ta' għajnuna jew bl-istess intensità tal-għajnuna ma ġiet meqjusa bħala lokalità fattibbli (ara n-nota f'qiegħ il-paġna 23), il-Kummissjoni tqis li l-għajnuna m'għandha l-ebda effett ta' antikoeżjoni li jista' jmur kontra l-loġika interenti tal-għajnuna reġjonali.

(170)

Wara li ġie stabbilit li l-għajnuna tipprovdi inċentiv għat-twettiq tal-investiment fir-reġjun ikkonċernat, u li hija proporzjonata, huwa meħtieġ li jiġu bilanċjati l-effetti pożittivi tal-għajnuna mal-effetti negattivi tagħha.

(171)

Il-valutazzjoni kkonfermat li l-miżura tal-għajnuna għandha effett ta' inċentiv li jattira investiment li joffri kontribut importanti għall-iżvilupp reġjonali ta' reġjun żvantaġġjat li huwa eliġibbli għall-għajnuna reġjonali skont l-Artikolu 107(3)(a) tat-TFUE, mingħajr ma jċaħħad mill-investiment lil kwalunkwe reġjun bl-istess limitu massimu ta' intensità tal-għajnuna jew bl-limitu massimu ogħla ta' intensità ta' għajnuna (l-ebda effett ta' antikoeżjoni). Il-Kummissjoni tqis li l-attirar ta' investiment lejn reġjun aktar fqir huwa aktar ta' benefiċċju għall-koeżjoni fl-Unjoni milli kieku l-istess investiment kellu jiġi lokalizzat f'reġjun aktar żviluppat. Kif iddikjarat fil-paragrafu 53 tal-IDAC, il-Kummissjoni tqis li “l-effetti pożittivi tal-għajnuna reġjonali li tikkumpensa biss għad-differenza tal-ispejjeż netti relatati għal post alternattiv ta' investiment aktar żviluppat […], ikun normalment ikkunsidrat, skont it-test ta' bilanq, bħala li jissupera l-effetti negattivi fil-post alternattiv għall-investiment il-ġdid”.

(172)

Fid-dawl ta' dan, il-Kummissjoni ssib li, minħabba li l-għajnuna hija proporzjonali għad-differenza tal-ispejjeż netti għat-twettiq tal-investiment fil-lokalità magħżula, kif imqabbla ma' lokalità alternattiva aktar żviluppata, l-effetti pożittivi tal-għajnuna, f'termini tal-objettiv u l-adegwatezza tagħha, kif muri hawn fuq, jissuperaw l-effetti negattivi fil-lokalità alternattiva.

(173)

Skont il-paragrafu 68 tar-RAG 2007-13, u fid-dawl tal-valutazzjoni fil-fond imwettqa abbażi tal-IDAC, il-Kummissjoni tikkonkludi li l-għajnuna hija meħtieġa biex tipprovdi effett ta' inċentiv għall-investiment u li l-benefiċċji tal-miżura tal-għajnuna jissuperaw it-tgħawwiġ li jirriżulta mill-kompetizzjoni u l-effett negattiv fuq il-kummerċ bejn l-Istati Membri.

(174)

Il-Kummissjoni ssib li l-Ungerija inplimentat illegalment l-għajnuna reġjonali favur il-proġett ta' investiment minn AHM, bi ksur tal-Artikolu 108(3) tat-TFUE. Madankollu, il-Kummissjoni tikkonkludi li l-għajnuna ta' investiment reġjonali favur AUDI HUNGARIA MOTOR Ltd. — mogħtija qabel l-1 ta' Lulju 2014 bil-kundizzjoni li din hija parzjalment soġġetta għall-approvazzjoni tal-Kummissjoni — tissodisfa l-kundizzjonijiet kollha stabbiliti fir-RAG 2007-13 u fl-IDAC u għalhekk tista' titqies kompatibbli mas-suq intern skont l-Artikolu 107(3)(a) tat-TFUE,