Tabella tal-kategoriji tas-sajd imsemmija fl-Artikolu 1(1)

Kategoriji tas-sajd		Il-qabdiet totali permissibbli u t-tunnellaġġ ta' referenza
1	Bastimenti tas-sajd li jistadu għall-krustaċji ħlief għall-awwista u l-granċ	5 000 tunnellata
2	Bastimenti tat-tkarkir (mingħajr friża) u bastimenti tas-sajd bil-konz tal-qiegħ għall-merluzz l-iswed	6 000 tunnellata
3	Bastimenti tas-sajd għall-ispeċijiet tal-ħut tal-qiegħ minbarra l-merluzz l-iswed, b'irkaptu ieħor mhux bix-xbieki tat-tkarkir	3 000 tunnellata
4	Bastimenti tas-sajd għat-tonn bit-tartaruni	12 500 tunnellata (tunnellaġġ ta' referenza)
5	Bastimenti tas-sajd għat-tonn bil-qasab u x-xlief u bastimenti tas-sajd bil-konz tal-wiċċ	7 500 tunnellata (tunnellaġġ ta' referenza)
6	Bastimenti tat-tkarkir użati għas-sajd għall-ħut pelaġiku li jkunu mgħammra bi friża	225 000 tunnellata (*)
7	Bastimenti tas-sajd għall-ħut pelaġiku frisk	15 000 tunnellata (**)
8	Iċ-ċefalopodi	[pm] tunnellati

---

(*)  Dan l-ammont jista' jinqabeż b'10 % mingħajr konsegwenzi għall-kontribuzzjoni finanzjarja mħallsa mill-Unjoni Ewropea b'rabta mal-aċċess

(**)  Jekk jintużaw dawn l-opportunitajiet tas-sajd, dawn għandhom jitnaqqsu mill-qabda totali permissibbli prevista għall-kategorija 6.

Abbażi tal-pariri xjentifiċi disponibbli, iż-żewġ partijiet jistgħu jiftehmu fil-Kumitat Konġunt dwar l-għoti ta' opportunitajiet tas-sajd għall-bastimenti tat-tkarkir mgħammra bi friża li jintużaw għas-sajd għall-ispeċijiet tal-ħut tal-qiegħ li għalihom ikun ġie identifikat ammont żejjed.

ANNESS 1

IL-KUNDIZZJONIJIET LI JIRREGOLAW L-ATTIVITAJIET TAS-SAJD MILL-BASTIMENTI TAL-UNJONI EWROPEA FIŻ-ŻONA TAS-SAJD TAL-MAURITANIA

KAPITOLU I

DISPOŻIZZJONIJIET ĠENERALI

1.   Ħatra tal-awtorità kompetenti

Għall-finijiet ta' dan l-Anness u sakemm ma jkunx indikat mod ieħor, kull referenza għall-Unjoni Ewropea jew għall-Mauritania bħala l-awtorità kompetenti tfisser:

—	għall-Unjoni Ewropea: il-Kummissjoni Ewropea, fejn xieraq permezz tad-delegazzjoni tal-Unjoni Ewropea f'Nouakchott (post ċentrali);

—	għall-Mauritania: il-Ministeru responsabbli għas-Sajd permezz tad-Direttorat inkarigat mill-Programmazzjoni u l-Kooperazzjoni (post ċentrali), minn hawn 'il quddiem imsejjaħ il-“Ministeru”.

2.   Żona tas-sajd tal-Mauritania

Il-koordinati taż-żona tas-sajd tal-Mauritania huma mogħtija fl-Appendiċi 2. Il-bastimenti tal-Unjoni Ewropea jistgħu jwettqu l-attivitajiet tas-sajd tagħhom fil-limiti stabbiliti għal kull kategorija tas-sajd fid-dokumenti tekniċi mogħtija fl-Appendiċi 1.

3.   Identifikazzjoni tal-bastimenti

3.1.   Il-marki ta' identifikazzjoni ta' kull bastiment tal-Unjoni Ewropea għandhom ikunu konformi mar-regolamenti tal-Unjoni Ewropea f'dan il-qasam. Dawn ir-regolamenti għandhom jiġu kkomunikati lill-Ministeru qabel l-applikazzjoni provviżorja tal-Protokoll. Kull modifika tagħhom għandha tiġi nnotifikata lill-Ministeru tal-anqas xahar qabel id-dħul fis-seħħ tagħha.

3.2.   Kull bastiment li jaħbi l-marki, l-isem jew ir-reġistrazzjoni tiegħu għandu jiġi ppenalizzat bis-sanzjonijiet previsti fil-liġijiet tal-Mauritania li jkunu fis-seħħ.

4.   Kontijiet bankarji

Il-Mauritania għandha tibagħat lill-Unjoni Ewropea, qabel id-dħul fis-seħħ tal-Protokoll, id-dettalji tal-kont(ijiet) bankarju/i (il-kodiċi BIC u IBAN) li fih(om) għandhom jitħallsu s-somom dovuti mill-bastimenti tal-Unjoni Ewropea skont il-Protokoll. L-ispejjeż marbutin mat-trasferimenti bankarji għandhom iħallsuhom is-sidien tal-bastimenti.

5.   Modalitajiet ta' ħlas

5.1.   Il-ħlasijiet għandhom isiru f'euro kif ġej:

—	għat-tariffi: permezz ta' trasferiment f'wieħed mill-kontijiet bankarji msemmijin fil-paragrafu 4, lit-Teżor tal-Mauritania;

—	għall-ispejjeż relatati mat-taxxa parafiskali: permezz ta' trasferiment f'wieħed mill-kontijiet bankarji msemmijin fil-paragrafu 4, lill-Gwardakosta tal-Mauritania;

—	għall-multi: permezz ta' trasferiment f'wieħed mill-kontijiet bankarji msemmijin fil-paragrafu 4, lit-Teżor tal-Mauritania.

5.2.   L-ammonti msemmijin fil-paragrafu 5.1 ta' hawn fuq jitqiesu li jkunu waslu fir-realtà jekk it-Teżor jew il-Ministeru jikkonfermaw dan abbażi ta' notifiki min-naħa tal-Bank Ċentrali tal-Mauritania.

6.   Ħatra ta' destinatarju

Kull bastiment tal-UE li jkun beħsiebu jħott il-ħut l-art jew jittrażbordah f'port tal-Mauritania għandu jiġi rrappreżentat minn destinatarju li jkun residenti hemmhekk, li għandu jirrappreżentah ukoll b'rabta ma' obbligi jew affarijiet prattiċi oħrajn li joħorġu minn dan il-Ftehim.

KAPITOLU II

LIĊENZJI

Fil-kuntest ta' dan l-Anness, il-liċenzja maħruġa mill-Mauritania lill-bastimenti tal-Unjoni Ewropea hija ekwivalenti għall-awtorizzazzjoni tas-sajd prevista fir-Regolamenti tal-Unjoni Ewropea li huma fis-seħħ.

Iż-żewġ Partijiet għandhom jiftehmu sabiex jippromwovu l-ħolqien ta' sistema ta' liċenzji elettronika.

1.   Talbiet għall-ħruġ tal-liċenzji

1.1.   L-Unjoni Ewropea għandha tibgħat lill-Ministeru l-listi tal-bastimenti, skont il-kategorija tas-sajd, li jitolbu li joperaw fil-limiti stabbiliti fid-dokumenti tekniċi tal-Protokoll, għoxrin (20) jum kalendarju qabel ma jibda l-perjodu ta' validità tal-liċenzji mitluba. Dawn il-listi għandhom jintbagħtu preferibbilment b'mezzi elettroniċi u magħhom iridu jintbagħtu d-dokumenti meħtieġa u l-prova tal-ħlas. L-applikazzjonijiet għal-liċenzji li ma jaslux fiż-żmien stipulat hawn fuq ma jistgħux jiġu pproċessati.

1.2.   Dawn id-dokumenti għandhom jinkludu, għal kull kategorija tas-sajd:

(a)	l-għadd ta' bastimenti;

(b)	għal kull bastiment, il-karatteristiċi tekniċi prinċipali, kif imsemmija fil-fajl tal-bastimenti tas-sajd tal-Unjoni Ewropea;

(c)	l-irkaptu tas-sajd;

(d)	l-ammont ta' ħlasijiet dovuti, maqsumin skont l-intestatura;

(e)	l-għadd ta' baħrin mill-Mauritania li għandhom jittellgħu abbord skont il-Kapitolu IX ta' dan l-Anness.

1.3.   Għat-tiġdid ta' liċenzja kull xahrejn, kull tliet xhur jew kull sena skont il-Protokoll fis-seħħ, għal bastiment li l-karatteristiċi tekniċi tiegħu ma jkunux inbidlu, it-talba għat-tiġdid għandu jkollha magħha biss il-provi tal-ħlas tat-tariffi u tal-ħlas tat-taxxa parafiskali.

2.   Dokumenti meħtieġa għat-talba għall-ħruġ ta' liċenzja

2.1.   Meta ssir l-ewwel talba għall-ħruġ ta' liċenzja minn kull bastiment, l-Unjoni Ewropea għandha tippreżenta formola ta' applikazzjoni għal-liċenzja lill-Ministeru, mimlija għal kull bastiment li jitlob liċenzja skont il-mudell li jidher fl-Appendiċi 3 ta' dan l-Anness. Din il-formola tispeċifika b'mod partikulari l-għadd ta' sajjieda mill-Mauritania mtellgħin abbord skont il-Kapitolu IX ta' dan l-Anness.

2.2.   Meta jagħmel l-ewwel talba għall-ħruġ ta' liċenzja, sid il-bastiment irid jinkludi magħha d-dokumenti li ġejjin u jibgħathom preferibbilment b'mod elettroniku:

(a)	kopja ċċertifikata mill-Istat tal-bandiera taċ-Ċertifikat tat-Tunnellaġġ Internazzjonali li jindika t-tunnellaġġ tal-bastiment mogħti f'TG, iċċertifikat mill-organizzazzjonijiet internazzjonali akkreditati;

(b)

ritratt riċenti bil-kulur (li jkun ittieħed fl-aħħar sena), li jkun iċċertifikat mill-awtoritajiet kompetenti tal-Istat tal-bandiera u li juri l-bastiment mill-ġenb fl-istat attwali tiegħu, u li fuqu jkunu jidhru wkoll isem il-bastiment u s-sinjal internazzjonali tas-sejħa bir-radju tal-bastiment, jekk dan ikun rilevanti. Ir-ritratt elettroniku li jintbagħat irid ikollu riżoluzzjoni ta' mill-inqas 72 dpi (1 400 b'1 050 pixel). Jekk jintbagħat ritratt stampat, dan irid ikun fih tal-inqas 15-il cm b'10 cm;

(c)	id-dokumenti meħtieġa għall-inklużjoni fir-Reġistru nazzjonali tal-bastimenti tal-Mauritania. Din ir-reġistrazzjoni hija bla ħlas. L-ispezzjoni prevista fil-kuntest tar-reġistrazzjoni fir-Reġistru nazzjonali tal-bastimenti hija waħda amministrattiva biss.

2.3.   Kull tibdil fit-tunnellaġġ ta' bastiment jobbliga lil sid il-bastiment ikkonċernat jibgħat kopja, iċċertifikata mill-Istat tal-bandiera, taċ-ċertifikat il-ġdid tat-tunnellaġġ, mogħti f'TG, kif ukoll li jibgħat id-dokumenti li jiġġustifikaw din il-bidla, b'mod partikulari l-kopja tal-applikazzjoni li huwa jkun bagħat lill-awtoritajiet kompetenti, l-approvazzjoni ta' dawn l-awtoritajiet u d-dettalji tal-bidliet li jkunu saru. Bl-istess mod, f'każ ta' bidla fl-istruttura jew fid-dehra esterna tal-bastiment, għandu jiġi ppreżentat ritratt ġdid li jkun iċċertifikat mill-awtoritajiet kompetenti tal-Istat tal-bandiera.

3.   Eliġibbiltà għas-sajd

3.1.   Jiġu aċċettati biss it-talbiet għall-ħruġ ta' liċenzji tas-sajd għal dawk il-bastimenti li għalihom ikunu ntbagħtu d-dokumenti meħtieġa skont il-paragrafi 2.1 u 2.2 ta' hawn fuq.

3.2.   Kull bastiment li jkun jixtieq iwettaq xi attività tas-sajd fil-qafas ta' dan il-Protokoll għandu jkun irreġistrat fir-reġistru tal-bastimenti tas-sajd tal-Unjoni Ewropea u għandu jkun eliġibbli biex jistad fiż-żona tas-sajd tal-Mauritania. Il-bastiment m'għandux ikun imniżżel bħala bastiment li jkun inqabad jistad b'mod illegali, mhux irrappurtat u mhux irregolat.

3.3.   Sabiex bastiment ikun eliġibbli, sid il-bastiment, il-kaptan u l-bastiment innifsu ma għandhomx ikunu pprojbiti milli jistadu fil-Mauritania. Huma għandhom ikunu f'sitwazzjoni regolari fil-konfront tal-awtoritajiet tal-Mauritania, jiġifieri jridu jkunu ssodisfaw l-obbligi kollha preċedenti li jkunu ġejjin mill-attivitajiet tas-sajd tagħhom fil-Mauritania.

4.   Ħruġ tal-liċenzji

4.1.   Il-Ministeru għandu joħroġ il-liċenzji għall-bastimenti wara li r-rappreżentant tas-sid jippreżenta l-provi individwali tal-ħlas għal kull bastiment (l-irċevuti mfassla mit-Teżor), kif speċifikat fil-Kapitolu I, mill-inqas għaxart (10) ijiem kalendarji qabel ma l-liċenzji jsiru validi.

4.2.   Il-liċenzji oriġinali jistgħu jinġabru mingħand is-servizzi tal-Ministeru f'Nouadhibou (mingħand id-Direttorat marittimu reġjonali). Il-Ministeru jibgħat kopja skenjata ta' dawn il-liċenzji oriġinali lill-Unjoni Ewropea b'mezzi elettroniċi.

4.3.   Barra minn hekk, il-liċenzji għandhom jindikaw il-perjodu ta' validità, il-karatteristiċi tekniċi tal-bastiment, l-għadd ta' baħrin mill-Mauritania u r-referenzi għall-ħlasijiet tat-tariffi.

4.4.   Il-bastimenti li jingħataw liċenzja se jitniżżlu fil-lista tal-bastimenti li huma awtorizzati jistadu li se tintbagħat fl-istess ħin u mingħajr dewmien lill-Gwardakosta tal-Mauritania u lill-Unjoni Ewropea.

It-talbiet għall-ħruġ tal-liċenzji li ma jkunux intlaqgħu mill-Ministeru għandhom jiġu nnotifikati lill-Unjoni Ewropea. Jekk ikun il-każ, il-Ministeru għandu jagħti kreditu fuq il-ħlasijiet li jista' jkun hemm relatati magħhom, wara li jitnaqqas il-bilanċ li jista' jkun hemm tal-multi li jkun għad iridu jitħallsu.

4.5.   Il-liċenzji tas-sajd għandhom jinżammu l-ħin kollu abbord il-bastiment li jkun ingħata l-liċenzja u jintwerew, waqt kull kontroll, lill-awtoritajiet li jkollhom id-dritt jitolbu dan. Għal perjodu massimu ta' 30 jum kalendarju minn meta tinħareġ il-liċenzja, il-bastiment jista' jżomm, b'mod temporanju, kopja ta' din il-liċenzja, dejjem jekk dan il-bastiment ikun imniżżel fir-realtà fil-lista tal-bastimenti awtorizzati msemmija fil-paragrafu 4(4). Matul dan il-perjodu, din il-kopja se titqies bħala ekwivalenti għal-liċenzja oriġinali.

5.   Validità u użu tal-liċenzji

5.1.   Il-liċenzja tas-sajd għandha tkun valida biss għall-perjodu kopert mill-ħlas tat-tariffa bil-kundizzjonijiet speċifikati fid-dokument tekniku.

Il-liċenzji jinħarġu għal perjodi ta' xahrejn għas-sajd għall-gambli u għal tliet xhur jew tnax-il xahar għall-kategoriji l-oħra. Dawn jistgħu jiġġeddu.

Il-liċenzji jibdew jgħoddu mill-ewwel jum tal-perjodu mitlub.

Biex wieħed jistabbilixxi l-validità tal-liċenzji, għandu jirreferi għal perjodi kalendarji annwali mill-1 ta' Jannar sal-31 ta' Diċembru. L-ewwel perjodu tal-Protokoll jibda fid-data tal-applikazzjoni provviżorja tiegħu u jispiċċa fil-31 ta' Diċembru tal-istess sena. L-aħħar perjodu tal-Protokoll jispiċċa fl-aħħar tal-perjodu ta' applikazzjoni tiegħu. L-ebda liċenzja ma tista' tibda matul perjodu annwali u tispiċċa matul il-perjodu annwali ta' wara.

Il-bastimenti tas-sajd għat-tonn bit-tartaruni, il-bastimenti tas-sajd għat-tonn bil-qasab u x-xlief u l-bastimenti tas-sajd bil-konz li jibbenefikaw mil-liċenzji tas-sajd fil-pajjiżi tas-sottoreġjun jistgħu jsemmu fuq l-applikazzjoni għal liċenzja, il-pajjiż, l-ispeċijiet u t-tul tal-validità tal-liċenzji tagħhom bil-ħsieb li jiġi ffaċilitat id-dħul u l-ħruġ tagħhom miż-żona tas-sajd.

5.2.   Il-ħruġ ta' liċenzja ma jagħmilx ħsara lill-preżenza effettiva tal-bastiment fiż-żona tas-sajd tal-Mauritania matul il-perjodu ta' validità ta' din il-liċenzja.

5.3.   Kull liċenzja tas-sajd għandha tinħareġ f'isem bastiment speċifiku. Din mhijiex trasferibbli. Madankollu, f'każ ta' telf jew waqfien fit-tul ta' bastiment minħabba ħsara teknika gravi, il-liċenzja tal-bastiment inizjali tinbidel b'liċenzja għal bastiment ieħor li jkun jidħol fl-istess kategorija tas-sajd, sakemm ma jinqabiżx it-tunnellaġġ awtorizzat għal din il-kategorija.

5.4.   Sid il-bastiment li jkun ġralu l-ħsara, jew ir-rappreżentant tiegħu, għandu jirritorna l-liċenzja tas-sajd ikkanċellata lill-Ministeru.

5.5.   L-aġġustamenti addizzjonali fl-ammonti mħallsa li jistgħu jkunu meħtieġa f'każ ta' sostituzzjoni tal-liċenzja għandhom isiru qabel il-ħruġ tal-liċenzja ta' sostituzzjoni.

6.   Spezzjonijiet tekniċi

6.1.   Darba fis-sena, kif ukoll wara xi tibdil fit-tunnellaġġ jew fil-kategorija tas-sajd li jwassal għall-użu ta' rkaptu tas-sajd differenti, kull bastiment tal-Unjoni Ewropea għandu jidħol fil-port ta' Nouadhibou sabiex issirlu spezzjoni kif previst mir-regolamenti fis-seħħ. Dawn l-ispezzjonijiet iridu jitwettqu fi żmien tmienja u erbgħin siegħa mill-wasla tal-bastiment fil-port.

Fil-każ tal-bastimenti tas-sajd għat-tonn bit-tartaruni, tal-bastimenti tas-sajd bil-qasab u x-xlief u tal-bastimenti tas-sajd bil-konz tal-wiċċ, kull bastiment li jkun qed jopera għall-ewwel darba fil-kuntest tal-ftehim għandhom isirulu l-ispezzjonijiet previsti mir-regolamenti fis-seħħ qabel ma jirċievi l-liċenzja tiegħu. Dawn l-ispezzjonijiet jistgħu jseħħu f'port barrani li jrid ikun hemm qbil dwaru. F'dan il-każ, l-ispejjeż kollha marbutin ma' din l-ispezzjoni għandhom jitħallsu minn sid il-bastiment.

6.2.   Wara l-ispezzjoni teknika, il-kaptan tal-bastiment jingħata ċertifikat ta' konformità, b'validità ugwali għal dik tal-liċenzja, li jiġi estiż, mingħajr ħlas u awtomatikament, għall-bastimenti li jġeddu l-liċenzja tagħhom matul dik is-sena. Dan iċ-ċertifikat għandu jinżamm dejjem abbord. Huwa għandu jispeċifika wkoll il-kapaċità tal-bastimenti tas-sajd għall-ħut pelaġiku li jagħmlu t-trażbord.

6.3.   L-ispezzjonijiet tekniċi għandhom iservu biex tiġi ċċekkjata l-konformità tal-karatteristiċi tekniċi u tal-irkaptu abbord u biex jiġi vverifikat li d-dispożizzjonijiet dwar l-ekwipaġġ mill-Mauritania jkunu ġew issodisfati.

6.4.   L-ispejjeż relatati mal-ispezzjonijiet għandhom jitħallsu mis-sidien b'rati li jiġu stabbiliti skont ir-rati ffissati mir-regolamenti tal-Mauritania u kkomunikati lill-Unjoni Ewropea. Dawn ma jistgħux ikunu ogħla mis-somom imħallsin normalment mill-bastimenti l-oħrajn għall-istess servizz.

6.5.   In-nuqqas ta' ħarsien ta' xi waħda mid-dispożizzjonijiet previsti fil-paragrafi 6.1 u 6.2 ta' hawn fuq iwassal għas-sospensjoni awtomatika tal-liċenzja tas-sajd sa ma s-sid iħares l-obbligi tiegħu.

KAPITOLU III

TARIFFI

1.   Tariffi

1.1.   It-tariffi huma kkalkulati għal kull bastiment bil-kundizzjonijiet mogħtija fid-dokumenti tekniċi tal-Protokoll u abbażi tar-rati annwali stabbiliti fihom. L-ammonti tat-tariffi jinkludu kull dazju u taxxa fuqhom, minbarra t-taxxa parafiskali, it-taxxi tal-port u l-ħlasijiet dovuti għas-servizzi.

1.2.   Il-Ministeru jikkalkula t-tariffi billi jqis il-qabdiet li jkunu saru matul il-perjodu ta' validità tal-liċenzji u wara li jitnaqqsu l-ħlasijiet li jkunu saru bil-quddiem biex jinħarġu dawn il-liċenzji.

1.3.   Il-Ministeru jgħarraf lis-sidien tal-bastimenti jew lid-destinatarji tagħhom bil-kalkoli tat-tariffi fix-xahar ta' wara l-perjodu ta' validità tal-liċenzji. Fl-istess ħin, tintbagħat kopja ta' dawn il-kalkoli lill-Unjoni Ewropea.

1.4.   It-tariffi għandhom jitħallsu permezz ta' trasferiment f'wieħed mill-kontijiet bankarji msemmijin fil-paragrafu 4 tal-Kapitolu I. F'każ li jkunu saru ħlasijiet eċċessivi, it-Teżor tal-Mauritania jagħti kreditu lis-sid jew lid-destinatarju tiegħu għalihom, li jista' jitnaqqas minn xi ħlas sussegwenti.

1.5.   F'każ li jkun hemm nuqqas ta' qbil dwar l-ammont tat-tariffi stabbilit, iż-żewġ Partijiet għandhom jikkonsultaw lil xulxin mingħajr dewmien, fosthom waqt il-laqgħa tal-Kumitat Konġunt, jekk ikun hemm bżonn, u għandhom jivverifikaw il-kalkoli tal-qabdiet u l-kalkolu tat-tariffi korrispondenti.

2.   Tariffi in natura

2.1.   Is-sidien tal-bastimenti tat-tkarkir użati għas-sajd għall-ħut pelaġiku li jkunu mgħammra bi friża u tal-bastimenti użati għas-sajd għall-gambli tal-Unjoni Ewropea li jistadu fil-qafas ta' dan il-Protokoll għandhom jikkontribwixxu (b'rabta mal-qabdiet inċidentali tagħhom tal-ħut) għall-politika ta' distribuzzjoni tal-ħut lill-popolazzjonijiet fil-bżonn, sa 2 % tal-qabdiet tagħhom ta' ħut pelaġiku ttrażbordat jew imniżżel l-art wara l-qabda.

2.2.   L-ammont ta' 2 % għandu jiġi kkalkulat abbażi tal-qabdiet kollha, ikunu x'ikunu l-ispeċijiet u irrispettivament mill-valur kummerċjali tagħhom, u għandu jiżdied mal-qabda totali permissibbli. Il-qabdiet użati għat-tariffi in natura jridu jirriflettu l-kompożizzjoni, skont l-ispeċi, tal-qabdiet totali abbord il-bastiment fil-mument tat-trażbord ta' dawn it-2 %.

Madankollu, għall-bastimenti li jkunu qed jistadu għas-sawrell u għall-kavalli, l-ammont ta' 2 % jista' jittieħed mill-qabdiet tas-sawrell (ta' daqs kbir jew, jekk ma jkunx hemm, ta' daqs medju) jew, jekk ma jkunx hemm, mill-qabdiet tal-laċċ (ta' daqs kbir jew, jekk ma jkunx hemm, ta' daqs medju). Għall-bastimenti li jkunu qed jistadu għas-sardin, l-ammont ta' 2 % se jittieħed fl-istess kwantitajiet mill-qabdiet tas-sawrell u mill-qabdiet tal-laċċ miżmumin abbord, jew, jekk ma jkunx hemm, mill-qabdiet tas-sardin miżmumin abbord.

2.3.   Il-qabdiet użati għat-tariffi in natura jridu jingħataw lill-Għaqda nazzjonali tad-distribuzzjoni tal-ħut. Rappreżentant tal-Għaqda nazzjonali tad-distribuzzjoni tal-ħut irid joħroġ, b'mod sistematiku, irċevuta li rċieva din it-tariffa in natura u jrid jiffirmaha, u l-kaptan tal-bastiment irid jingħata kopja tagħha.

2.4.   Il-qabdiet użati għat-tariffi in natura jistgħu jingħataw billi jinħattu l-art mal-moll jew billi jiġu ttażbordati fil-port. F'każ li l-qabdiet jiġu ttrażbordati fil-port, id-dgħajjes li għal fuqhom ikunu qed jiġu ttrażbordati dawn il-qabdiet iridu jkunu adattati għalkollox għall-attivitajiet meħtieġa, sabiex ikun żgurat li kollox imur sew waqt it-trażbord. Il-kaptan tal-bastiment tas-sajd għall-ħut pelaġiku jista' jagħżel id-dgħajsa tal-Mauritania li tkun l-iktar adattata biex jitwettqu dawn l-attivitajiet f'kollaborazzjoni mad-destinatarju tiegħu u mal-Għaqda nazzjonali tad-distribuzzjoni tal-ħut.

2.5.   Jekk ikun hemm riskji għas-sigurtà tal-bastiment tas-sajd jew tad-dgħajsa tal-Mauritania jew tal-ekwipaġġi tagħhom, jew imminar ċar ta' din is-sigurtà, il-kaptan tal-bastiment tas-sajd jista' jirrifjuta li jkompli bl-attività ta' trażbord tal-qabdiet għal fuq dik id-dgħajsa tal-Mauritania u għandu javża lir-rappreżentant tal-Għaqda nazzjonali tad-distribuzzjoni tal-ħut b'dan, li għandu jibgħatlu dgħajsa oħra.

2.6.   L-attivitajiet tal-ħatt l-art tal-qabdiet użati għat-tariffi in natura jridu jiġu ppjanati u organizzati b'mod li ma jaffettwawx ħażin l-andament tajjeb tal-attivitajiet tal-bastiment tas-sajd.

2.7.   Jekk ma jkunx hemm biżżejjed postijiet tal-ħżin fil-mument meta jkunu se jinħattu l-art il-qabdiet, il-kaptan tal-bastiment tas-sajd jitneħħielu kompletament u definittivament l-obbligu li jħott l-art il-qabdiet bħala tariffa in natura għall-qabda korrispondenti. F'dak il-każ, ir-rappreżentant tal-Għaqda nazzjonali tad-distribuzzjoni tal-ħut għandu joħroġlu ċertifikat dwar dan, li jikkonferma li l-qabdiet li kellhom jingħataw bħala tariffa in natura ma setgħux jinħattu l-art minħabba li ma kienx hemm postijiet tal-ħżin fuq l-art. Il-qabdiet li ma jinħattux l-art minħabba li ma jkunx hemm biżżejjed postijiet tal-ħżin u li b'hekk jinżammu abbord għandhom jitnaqqsu mill-qabda totali permissibbli.

2.8.   It-tariffa in natura teskludi kategorikament kull forma oħra ta' kontribuzzjoni imposta. Hija ma tista' twassal għall-ebda bidla f'ammont ekwivalenti fi flus u lanqas ma tista' tikkostitwixxi dejn.

2.9.   Il-qabdiet li jikkorrispondu għat-tariffa in natura għandhom jittieħdu mill-Għaqda nazzjonali tad-distribuzzjoni tal-ħut u jitqassmu lill-popolazzjonijiet fil-bżonn bil-kundizzjonijiet previsti fil-liġijiet tal-Mauritania.

2.10.   Kull sena, l-Għaqda nazzjonali tad-distribuzzjoni tal-ħut għandha tfassal rapport dwar l-użu ta' din it-tariffa in natura, dwar min ibbenefika minnha, dwar il-kwantitajiet ta' ħut imqassmin u l-kundizzjonijiet li bihom tqassmu dawn il-kwantitajiet. Dan ir-rapport jiġi evalwat mill-Kumitat Konġunt.

2.11.   F'każ li jkun hemm xi diffikultà fl-applikazzjoni ta' dawn id-dispożizzjonijiet, iż-żewġ Partijiet għandhom jikkonsultaw lil xulxin, fosthom waqt laqgħa tal-Kumitat Konġunt, sabiex jaqsmu bejniethom l-informazzjoni kollha li tista' tkun utli dwar din l-applikazzjoni u jidentifikaw l-iktar soluzzjonijiet adattati biex jingħelbu dawn id-diffikultajiet.

3.   Taxxa parafiskali

3.1.   Ir-rati tat-taxxa parafiskali għall-bastimenti tas-sajd industrijali huma pagabbli fil-valuta lokali, skont id-digriet li jistabbilixxi t-taxxa parafiskali, skont dan li ġej:

Kategorija tas-sajd għall-krustaċji, għaċ-ċefalopodi u għall-ħut tal-qiegħ: Tunnellaġġ (f'TG) Ammont kull tliet xhur (f'MRO) < 99 50 000 100-200 100 000 200-400 200 000 400-600 400 000 > 600 600 000

Kategorija tas-sajd (għall-ħut li jpassi ħafna u għall-ħut pelaġiku): Tunnellaġġ Ammont fix-xahar (f'MRO) < 2 000 50 000 2 000 -3 000 150 000 3 000 -5 000 500 000 5 000 -7 000 750 000 7 000 -9 000 1 000 000 > 9 000 1 300 000

3.2.   Bl-eċċezzjoni tal-kategoriji 4 u 5, it-taxxa parafiskali hija dovuta għal trimestru sħiħ, jew diversi trimestri, irrispettivament mill-preżenza ta' perjodu ta' waqfien għal raġunijiet bijoloġiċi.

3.3.   Ir-rata tal-kambju (MRO/EUR) li għandha tintuża għall-ħlas tat-taxxa parafiskali għal sena kalendarja għandha tkun ir-rata medja tas-sena ta' qabel ikkalkulata mill-Bank Ċentrali tal-Mauritania u mibgħuta mill-Ministeru sa mhux aktar tard mill-1 ta' Diċembru tas-sena ta' qabel l-applikazzjoni tagħha.

3.4.   Trimestru għandu jikkonsisti minn wieħed mill-perjodi ta' tliet xhur li jibdew fl-1 ta' Ottubru, fl-1 ta' Jannar, fl-1 ta' April u fl-1 ta' Lulju, ħlief għall-ewwel u l-aħħar perjodu tal-Protokoll.

4.   Kundizzjonijiet speċifiċi li japplikaw għall-bastimenti tas-sajd għat-tonn

4.1.   Id-dikjarazzjonijiet tal-qabdiet stabbiliti minn kull kaptan ta' bastiment tas-sajd għat-tonn jiġu ttrattati u vverifikati mill-istituti xjentifiċi responsabbli għall-verifika tad-dejta dwar il-qabdiet tat-tonn fl-Istati Membri, bħalma huma l-IRD (l-Istitut tar-Riċerka għall-Iżvilupp), l-IEO (l-Istitut Spanjol tal-Oċeanografija) u l-INIAP (l-Istitut Nazzjonali tar-Riċerka dwar l-Agrikoltura u s-Sajd), u tintbagħat kopja tal-ġurnali kollha ta' abbord tas-sajd lill-IMROP (l-Istitut tar-Riċerka dwar l-Oċeanografija u s-Sajd tal-Mauritania).

4.2.   Abbażi ta' dawn id-dikjarazzjonijiet tal-qabdiet ivverifikati mill-istituti xjentifiċi, għal kull bastiment tas-sajd għat-tonn, l-Unjoni Ewropea għandha tistabbilixxi kalkolu finali tat-tariffi li jridu jitħallsu mill-bastiment għall-istaġun annwali tiegħu għas-sena kalendarja ta' qabel.

4.3.   L-Unjoni Ewropea għandha tgħarraf lill-Mauritania u lil sid il-bastiment b'dan il-kalkolu finali qabel it-30 ta' Ġunju tas-sena ta' wara s-sena li fiha jkunu saru l-qabdiet. Meta l-kalkolu finali jkun jirrigwarda s-sena attwali, dan għandu jiġi nnotifikat lill-Mauritania u lil sid il-bastiment sa mhux aktar tard minn xahar wara d-data tal-iskadenza tal-Protokoll.

4.4.   Il-Mauritania tista' tikkontesta l-kalkolu finali, abbażi ta' evidenza dokumentata, fi żmien 30 jum minn meta jintbagħat dan il-kalkolu. Fil-każ ta' nuqqas ta' qbil, il-Partijiet għandhom jikkonsultaw lil xulxin fil-Kumitat Konġunt. Jekk il-Mauritania ma joġġezzjonawx fi żmien 30 jum, il-kalkolu finali jitqies adottat.

4.5.   Jekk il-kalkolu finali jkun ogħla mit-tariffa fissa mħallsa bil-quddiem għall-kisba tal-liċenzja tas-sajd, sid il-bastiment irid iħallas il-bilanċ fi żmien 45 jum minn meta il-Mauritania tapprova l-kalkolu. Jekk il-kalkolu finali jkun inqas mit-tariffa fissa mħallsa bil-quddiem, sid il-bastiment ma jistax jirkupra s-somma li jifdal.

4.6.   F'dak li għandu x'jaqsam mat-taxxa parafiskali, din għandha titħallas pro rata għaż-żmien fiż-żona tas-sajd tal-Mauritania. Ix-xhur ta' ħlas korrispondenti jitqiesu bħala perjodi ta' 30 jum ta' sajd effettiv. Din id-dispożizzjoni tippreżerva l-karattru integrali ta' din it-taxxa u għalhekk kull xahar ta' ħlas mibdi għandu jitħallas.

4.7.   Bastiment li jkun stad bejn ġurnata u 30 jum f'sena, għandu jħallas taxxa għal xahar. It-tieni xahar ta' ħlas minn din it-taxxa jkun dovut wara l-ewwel perjodu ta' 30 jum u għal kull perjodu bħal dan sussegwenti. Il-ħlasijiet addizzjonali kull xahar għandhom isiru sa mhux aktar tard minn għaxart ijiem wara l-ewwel jum ta' kull perjodu kumplimentari.

KAPITOLU IV

DIKJARAZZJONI TAL-QABDIET

1.   Ġurnal ta' abbord tas-sajd

1.1.   Il-kaptani tal-bastimenti għandhom l-obbligu li jirreġistraw kuljum kull attività speċifikata fil-ġurnal ta' abbord tas-sajd li l-mudell tiegħu huwa mehmuż fl-Appendiċi 4 ta' dan l-Anness u li jista' jiġi emendat skont ir-regolamenti tal-Mauritania. Dan id-dokument irid jimtela b'mod korrett u li jkun jista' jinqara, u jiġi ffirmat mill-kaptan tal-bastiment. Għall-bastimenti li jistadu għal speċijiet tal-ħut li jpassi ħafna għandhom japplikaw id-dispożizzjonijiet tal-paragrafu 8 ta' dan il-Kapitolu.

1.2.   Il-ġurnali ta' abbord tas-sajd għandhom jintbagħtu b'wieħed mill-modi li ġejjin:

(a)	għall-bastimenti li għandhom l-obbligu ta' ħatt l-art jew ta' trażbord, il-kopja oriġinali ta' kull ġurnal ta' abbord tas-sajd għandha tingħata lill-Gwardakosta tal-Mauritania, li għandha tikkonferma bil-miktub li rċeviet dan id-dokument;

(b)

għall-bastimenti l-oħra, f'każ li joħorġu miż-żona tas-sajd tal-Mauritania mingħajr ma jgħaddu l-ewwel minn port ta' dan il-pajjiż, il-kopja oriġinali ta' kull ġurnal ta' abbord tas-sajd għandha tintbagħat fi żmien sebat ijiem mill-wasla f'xi port ieħor, u f'kull każ fi żmien 20 jum mill-ħruġ miż-żona tal-Mauritania;

(c)	fl-istess perjodu, is-sid għandu jibgħat kopja ta' dan il-ġurnal ukoll lill-awtoritajiet nazzjonali tal-Istat Membru tal-bandiera tiegħu kif ukoll lill-Unjoni Ewropea, permezz tad-Delegazzjoni;

(d)	preferibbilment bil-posta elettronika fl-indirizz tal-posta elettronika nnotifikat mill-Mauritania u mogħti fl-Appendiċi 12;

(e)	jew permezz ta' faks mibgħut fuq in-numru nnotifikat mill-Mauritania;

(f)	jew permezz ta' ittra mibgħuta lill-Mauritania.

1.3.   Mingħajr ħsara għas-sanzjonijiet previsti fir-regolamenti tal-Mauritania, in-nuqqas ta' ħarsien ta' xi waħda mid-dispożizzjonijiet previsti fil-paragrafi 1.1 u 1.2 ta' hawn fuq iwassal għas-sospensjoni awtomatika tal-liċenzja tas-sajd sa ma s-sid iħares l-obbligi tiegħu.

2.   Ġurnal tas-sajd supplimentari (Dikjarazzjonijiet tal-ħatt l-art u tat-trażbord)

2.1.   Meta jsir il-ħatt l-art jew it-trażbord, il-kaptani tal-bastimenti għandhom l-obbligu li jimlew b'mod korrett u li jkun jista' jinqara u li jiffirmaw il-ġurnal tas-sajd supplimentari li l-mudell tiegħu huwa mehmuż fl-Appendiċi 6 ta' dan l-Anness.

2.2.   Fi tmiem kull attività ta' ħatt l-art, is-sid għandu jibgħat minnufih il-ġurnal tas-sajd supplimentari oriġinali lill-Gwardakosta tal-Mauritania u kopja tiegħu lill-Ministeru. Fi żmien sebat ijiem tax-xogħol, għandha tintbagħat kopja tiegħu lill-awtoritajiet nazzjonali tal-Istat Membru tal-bandiera kif ukoll lill-Unjoni Ewropea, permezz tad-Delegazzjoni.

2.3.   Fi tmiem kull trażbord awtorizzat, il-kaptan għandu jibgħat minnufih il-ġurnal tas-sajd supplimentari oriġinali lill-Gwardakosta tal-Mauritania u kopja tiegħu lill-Ministeru. Fi żmien sebat ijiem tax-xogħol, għandha tintbagħat kopja tiegħu lill-awtoritajiet nazzjonali tal-Istat Membru tal-bandiera kif ukoll lill-Unjoni Ewropea, permezz tad-Delegazzjoni.

2.4.   In-nuqqas ta' ħarsien ta' xi waħda mid-dispożizzjonijiet previsti fil-paragrafi 2.1, 2.2 u 2.3 ta' hawn fuq iwassal għas-sospensjoni awtomatika tal-liċenzja tas-sajd sa ma s-sid iħares l-obbligi tiegħu.

3.   Affidabbiltà tad-dejta

3.1.   L-informazzjoni inkluża fid-dokumenti msemmija fil-paragrafi ta' hawn fuq għandha tirrifletti r-realtà tas-sajd sabiex tkun tista' tikkostitwixxi waħda mill-bażijiet għas-superviżjoni tat-tibdil fir-riżorsi tas-sajd.

3.2.   Japplikaw il-liġijiet tal-Mauritania li huma fis-seħħ dwar id-daqsijiet minimi tal-qabdiet miżmumin abbord u dawn qed jingħataw fl-Appendiċi 7.

3.3.   Lista ta' fatturi ta' konverżjoni li japplikaw għall-qabdiet mingħajr ras/sħaħ u/jew imnaddfa/sħaħ hija mogħtija fl-Appendiċi 8.

4.   Tranżizzjoni għal sistema elettronika

Iż-żewġ Partijiet qed jistabbilixxu protokoll għall-iskambju elettroniku tad-dejta kollha marbuta mal-qabdiet u mad-dikjarazzjonijiet (jiġifieri għal sistema elettronika ta' rappurtar tad-dejta, bl-Ingliż imsejħa “Electronic Reporting System”), liema dejta tissejjaħ “dejta tal-ERS”, li qed jingħata fl-Appendiċi 10. Iż-żewġ Partijiet jipprevedu l-implimentazzjoni ta' dan il-protokoll u s-sostituzzjoni tal-verżjonijiet stampati tad-dikjarazzjonijiet tal-qabdiet bid-dejta tal-ERS malli l-Mauritania ddaħħal fis-seħħ l-apparat u s-softwer meħtieġ.

5.   Tolleranza tad-differenzi

Fuq il-bażi ta' kampjun rappreżentattiv, it-tolleranza bejn il-qabdiet iddikjarati fil-ġurnal ta' abbord tas-sajd u l-evalwazzjoni ta' dawn il-qabdiet magħmula matul spezzjoni jew waqt il-ħatt l-art ma għandhiex tkun ta' aktar minn:

9 % għall-ħut frisk, u

4 % għall-ħut pelaġiku u mhux pelaġiku ffriżat.

6.   Qabdiet inċidentali

Il-qabdiet inċidentali huma speċifikati fid-dokumenti tekniċi li jiffurmaw parti minn dan il-Protokoll. Kull qbiż tal-perċentwali tal-qabdiet inċidentali awtorizzati jista' jiġi ppenalizzat.

7.   Dikjarazzjoni ta' kull tliet xhur tal-qabdiet kumulattivi

7.1.   L-Unjoni Ewropea għandha tgħarraf lill-Mauritania, f'forma elettronika u skont il-formati mogħtija fl-Appendiċi 19, bil-kwantitajiet kumulattivi maqbudin mill-bastimenti tagħha għall-kategoriji kollha tas-sajd qabel it-tmiem ta' kull trimestru attwali għat-tliet xhur ta' qabel.

7.2.   Id-dejta għandha tinqasam skont ix-xahar, il-kategorija tas-sajd, il-bastiment u l-ispeċi.

7.3.   Iż-żewġ Partijiet jaqblu dwar il-kalkolu finali tal-qabdiet annwali waqt laqgħa tal-Kumitat Konġunt.

7.4.   Il-fatturi ta' konverżjoni li japplikaw għas-sajd għall-ħut pelaġiku għall-ipproċessar tal-qabdiet mingħajr ras/sħaħ u/jew imnaddfa/sħaħ jinsabu fl-Appendiċi 8.

8.   Kundizzjonijiet speċifiċi li japplikaw għall-bastimenti tas-sajd għat-tonn

8.1.   Fuq il-bastimenti tas-sajd għat-tonn għandu jinżamm ġurnal ta' abbord, skont il-mudell mehmuż fl-Appendiċi 5 ta' dan l-Anness, għal kull perjodu tas-sajd fl-ilmijiet tal-Mauritania. Dan għandu jimtela anke f'każ fejn ma jinqabadx ħut.

8.2.   Il-ġurnali ta' abbord tas-sajd għandhom jintbagħtu b'wieħed mill-modi li ġejjin:

(a)	meta bastiment tas-sajd ikun għaddej minn port tal-Mauritania, il-kopja oriġinali ta' kull ġurnal ta' abbord tas-sajd għandha tingħata lill-Gwardakosta tal-Mauritania, li għandha tikkonferma bil-miktub li rċeviet dan id-dokument;

(b)

meta bastiment tas-sajd ikun ħiereġ miż-żona tas-sajd tal-Mauritania mingħajr ma jgħaddi l-ewwel minn port ta' dan il-pajjiż, il-kopja oriġinali ta' kull ġurnal ta' abbord tas-sajd għandha tintbagħat fi żmien 14-il jum mill-wasla f'xi port ieħor, u f'kull każ fi żmien 45 jum mill-ħruġ miż-żona tal-Mauritania;

(c)	fl-istess perjodu, is-sid għandu jibgħat kopja ta' dan il-ġurnal ukoll lill-awtoritajiet nazzjonali tal-Istat Membru tal-bandiera tiegħu kif ukoll lill-Unjoni Ewropea, permezz tad-Delegazzjoni;

(d)	preferibbilment bil-posta elettronika fl-indirizz tal-posta elettronika nnotifikat mill-Mauritania u mogħti fl-Appendiċi 12;

(e)	jew permezz ta' faks mibgħut fuq in-numru nnotifikat mill-Mauritania;

(f)	jew permezz ta' ittra mibgħuta lill-Mauritania.

8.3.   Il-bastimenti tas-sajd għat-tonn għandhom iħarsu r-rakkomandazzjonijiet kollha adottati mill-Kummissjoni Internazzjonali għall-Konservazzjoni tat-Tonn tal-Atlantiku (l-ICCAT).

KAPITOLU V

ĦATT L-ART U TRAŻBORD

1.   Ħatt l-art

1.1.   Il-flotta li tintuża għas-sajd għall-ħut tal-qiegħ għandha l-obbligu li tħott il-qabdiet l-art.

1.2.   Fuq talba tas-sid, jingħataw eżenzjonijiet speċifiċi għall-flotta li tintuża għas-sajd għall-gambli matul il-perjodi ta' sħana estrema, b'mod partikulari f'Awwissu u f'Settembru.

1.3.   L-obbligu tal-ħatt l-art ma jimplikax l-obbligu tal-ħżin u tal-ipproċessar.

1.4.   Il-flotta li tintuża għas-sajd għall-ħut pelaġiku frisk għandha l-obbligu li tħott il-qabdiet l-art fil-limiti tal-kapaċità tal-unitajiet tal-ipproċessar f'Nouadhibou u tad-domanda stabbilita tas-suq.

1.5.   L-obbligu ta' ħatt l-art ma jgħoddx għall-aħħar qabda (jiġifieri l-qabda ta' qabel il-ħruġ miż-żoni tas-sajd tal-Mauritania għal assenza ta' mhux inqas minn tliet xhur). Fil-każ tal-bastimenti użati għas-sajd għall-gambli, dan il-perjodu huwa ta' xahrejn.

1.6.   Il-kaptan ta' bastiment tal-Unjoni Ewropea għandu jibgħat id-data tal-ħatt l-art tiegħu lill-Awtorità tal-Port Awtonomu ta' Nouadhibou (il-PAN) u lill-Gwardakosta tal-Mauritania, bil-faks jew bil-posta elettronika, mill-inqas 24 siegħa qabel din id-data, u għandu jibgħat kopja lid-Delegazzjoni tal-Unjoni Ewropea, filwaqt li jipprovdi l-informazzjoni li ġejja:

(a)	isem il-bastiment tas-sajd li għandu jħott il-qabdiet l-art;

(b)	id-data u l-ħin previsti għall-ħatt l-art;

(c)	il-kwantità (mogħtija f'kilogrammi ta' piż ħaj) ta' kull speċi li għandha tinħatt l-art (identifikata bil-kodiċi alfa 3 tal-FAO tagħha).

1.7.   Bi tweġiba għan-notifika msemmija hawn fuq, il-Gwardakosta tal-Mauritania għandha tibgħat, fit-12-il siegħa ta' wara, il-qbil tagħha b'faks jew bil-posta elettronika lill-kaptan jew lir-rappreżentant tiegħu, u għandha tibgħat kopja ta' dan lid-Delegazzjoni tal-Unjoni Ewropea.

1.8.   Il-bastiment tal-Unjoni Ewropea li jħott il-ħut l-art f'port tal-Mauritania huwa eżenti minn kull taxxa jew imposta b'effett ekwivalenti apparti l-ħlasijiet u l-imposti tal-port li japplikaw għall-bastimenti tal-Mauritania fl-istess kundizzjonijiet.

1.9.   Il-prodott tas-sajd jibbenefika minn arranġamenti ta' kontroll doganali skont il-liġijiet tal-Mauritania li huma fis-seħħ. Għalhekk, huwa eżenti minn kull proċedura doganali u dazju doganali jew imposta b'effett ekwivalenti meta jidħol fil-port tal-Mauritania jew meta jiġi esportat, u huwa jitqies bħala merkanzija “ammessa temporanjament” (“ħażna temporanja”).

1.10.   Is-sid għandu jiddeċiedi d-destinazzjoni tal-produzzjoni tal-bastiment tiegħu. Din tista' tiġi pproċessata, tinħażen skont arranġamenti ta' kontroll doganali, tinbiegħ fil-Mauritania jew tiġi esportata (f'valuta barranija).

1.11.   Għall-bejgħ fil-Mauritania, maħsub għas-suq tal-Mauritania, għandhom jitħallsu l-istess taxxi u imposti li japplikaw għall-prodotti tas-sajd tal-Mauritania.

1.12.   Il-benefiċċji jistgħu jiġu esportati mingħajr ħlasijiet supplimentari (eżenzjoni mid-dazji doganali u mill-imposti b'effett ekwivalenti).

2.   Trażbord

2.1.   Kull bastiment użat għas-sajd għall-ħut pelaġiku li jkun mgħammar bi friża li jista' jwettaq trażbord, skont iċ-ċertifikat ta' konformità, għandu l-obbligu li jwettaq it-trażbord mal-moll jew mal-baga 10 tal-Port Awtonomu ta' Nouadhibou, ħlief għall-aħħar qabda.

2.2.   Fil-qafas ta' proġetti tal-iżvilupp ekonomiku li jirriflettu l-għanijiet tal-Artikolu 7 tal-Protokoll, l-awtoritajiet tal-Mauritania jistgħu jipprevedu l-ħolqien ta' kundizzjonijiet partikulari għall-ħatt l-art u għat-trażbord. Iż-żewġ Partijiet għandhom jiddiskutu dan waqt il-laqgħat tal-Kumitat Konġunt.

2.3.   Il-bastiment tal-Unjoni Ewropea li jwettaq trażbord fil-Port Awtonomu ta' Nouadhibou huwa eżenti minn kull taxxa jew imposta b'effett ekwivalenti apparti l-ħlasijiet u l-imposti tal-port li japplikaw għall-bastimenti tal-Mauritania fl-istess kundizzjonijiet.

2.4.   L-obbligu ta' trażbord ma jgħoddx għall-aħħar qabda (jiġifieri l-qabda ta' qabel il-ħruġ miż-żoni tas-sajd tal-Mauritania għal assenza ta' mhux inqas minn tliet xhur).

2.5.   Il-kaptan ta' bastiment tal-Unjoni Ewropea għandu jibgħat id-data tat-trażbord tiegħu lill-Awtorità tal-Port Awtonomu ta' Nouadhibou (il-PAN) u lill-Gwardakosta marittima tal-Mauritania, bil-faks jew bil-posta elettronika, mill-inqas 24 siegħa qabel din id-data, u għandu jibgħat kopja lid-Delegazzjoni tal-Unjoni Ewropea, filwaqt li jipprovdi l-informazzjoni li ġejja:

(a)	isem il-bastiment tas-sajd li għandu jittrażborda l-qabdiet;

(b)	id-data u l-ħin previsti għat-trażbord;

(c)	il-kwantità (mogħtija f'kilogrammi ta' piż ħaj) ta' kull speċi li għandha tiġi ttrażbordata (identifikata bil-kodiċi alfa 3 tal-FAO tagħha).

2.6.   Bi tweġiba għan-notifika msemmija hawn fuq, il-Gwardakosta tal-Mauritania għandha tibgħat, fit-12-il siegħa ta' wara, il-qbil tagħha b'faks jew bil-posta elettronika lill-kaptan jew lir-rappreżentant tiegħu, u għandha tibgħat kopja ta' dan lid-Delegazzjoni tal-Unjoni Ewropea.

2.7.   Il-Mauritania tirriżerva d-dritt li tirrifjuta t-trażbord jekk il-bastiment li jkun qiegħed iġorr il-ħut kien involut f'sajd illegali, mhux irrappurtat u mhux irregolat kemm ġoż-żoni tas-sajd tal-Mauritania kif ukoll 'il barra minnhom.

KAPITOLU VI

KONTROLL

1.   Dħul fiż-żona tas-sajd tal-Mauritania u ħruġ minnha

1.1.   Kull dħul fiż-żona tas-sajd tal-Mauritania u ħruġ minnha min-naħa ta' bastiment tal-UE li jkollu awtorizzazzjoni tas-sajd irid jiġi nnotifikat lill-Mauritania sa 36 siegħa qabel dan id-dħul jew il-ħruġ, ħlief fil-każ tal-bastimenti tas-sajd għat-tonn bit-tartaruni, tal-bastimenti tas-sajd għat-tonn bil-qasab u x-xlief u tal-bastimenti tas-sajd bil-konz, li ma jistgħux idumu iktar minn sitt sigħat f'din iż-żona.

1.2.   Meta tkun qed issir in-notifika tad-dħul jew tal-ħruġ tal-bastiment, għandha tintbagħat b'mod partikulari l-informazzjoni li ġejja:

(a)	isem il-bastiment;

(b)	is-sinjal tas-sejħa bir-radju tal-bastiment;

(c)	id-data (fil-format jj/xx/ssss), il-ħin (fil-format UTC) u l-punt ta' qsim tal-fruntiera (fil-format gradi/minuti/sekondi) previsti;

(d)	il-kwantità ta' kull speċi miżmuma abbord, identifikata bil-kodiċi alfa 3 tal-FAO tagħha u mogħtija f'kilogrammi ta' piż ħaj jew, fejn ikun meħtieġ, fl-għadd ta' ħut individwali;

(e)	il-preżentazzjoni tal-prodotti.

1.3.   In-notifika għandha tintbagħat bħala prijorità bil-posta elettronika fl-indirizz tal-posta elettronika nnotifikat mill-Mauritania u mogħti fl-Appendiċi 12, jew inkella, jekk dan ma jkunx possibbli, għandha tintbagħat bil-faks jew bir-radju fuq in-numru tat-telefown jew il-frekwenza nnotifikata mill-istess awtoritajiet u mogħtija fl-istess Appendiċi. Il-Mauritania għandha jikkonferma minnufih li tkun irċeviet in-notifika bil-posta elettronika jew bil-faks.

1.4.   Din l-informazzjoni dwar id-dħul u l-ħruġ tal-bastimenti għandha tintbagħat ukoll, fl-istess ħin, lid-Delegazzjoni tal-Unjoni Ewropea li tinsab fil-Mauritania fl-indirizz tal-posta elettronika mogħti fl-Appendiċi 12.

1.5.   Il-Mauritania għandha tgħarraf minnufih lill-bastimenti kkonċernati u lill-UE b'kull tibdil fl-indirizz elettroniku, fin-numru tat-telefown jew fil-frekwenza tat-trażmissjonijiet. Id-dettalji dwar dan it-tibdil għandhom jinhemżu mal-minuti tal-laqgħa tal-Kumitat Konġunt li ssir wara t-tibdil.

1.6.   Kull bastiment li jinqabad jistad fiż-żona tal-Mauritania mingħajr ma jkun innotifika l-preżenza tiegħu minn qabel jitqies bhala bastiment tas-sajd mhux awtorizzat.

1.7.   Ir-rapporti tad-dħul u l-ħruġ għandhom jinżammu abbord il-bastiment għal mill-inqas sena wara d-data ta' notifika.

1.8.   Meta jkunu fiż-żona tas-sajd tal-Mauritania, il-bastimenti tal-Unjoni Ewropea għandhom jissorveljaw kontinwament il-frekwenzi tas-sejħa internazzjonali (l-istazzjon 16 tal-VHF jew HF 2 182 KHz).

1.9.   Meta jirċievu l-messaġġi tal-ħruġ miż-żona tas-sajd, l-awtoritajiet tal-Mauritania jirriżervaw id-dritt li jiddeċiedu li jagħmlu verifika qabel ma l-bastimenti joħorġu miż-żona abbażi ta' kampjunar li jsir fil-port ta' Nouadhibou jew dak ta' Nouakchott.

1.10.   Dawn il-verifiki ma għandhomx idumu aktar minn sitt sigħat fil-każ tal-bastimenti użati għas-sajd għall-ħut pelaġiku (il-kategoriji 6 u 7) u aktar minn tliet sigħat fil-każ tal-bastimenti użati għall-kategoriji l-oħra.

1.11.   In-nuqqas ta' ħarsien tad-dispożizzjonijiet imsemmija fil-paragrafi ta' hawn fuq iwassal għal dawn is-sanzjonijiet:

(a)	l-ewwel darba: — il-bastiment titbiddillu r-rotta, jekk dan ikun possibbli; — it-tagħbija abbord tinħatt u tiġi kkonfiskata mit-Teżor Pubbliku; — il-bastiment iħallas multa li tkun daqs l-inqas multa mill-medda ta' multi previsti fir-regolamenti tal-Mauritania;

(b)

it-tieni darba: — il-bastiment titbiddillu r-rotta, jekk dan ikun possibbli; — it-tagħbija abbord tinħatt u tiġi kkonfiskata mit-Teżor Pubbliku; — il-bastiment iħallas multa li tkun daqs l-ogħla multa mill-medda ta' multi previsti fir-regolamenti tal-Mauritania; — il-liċenzja titħassar għall-bqija tal-perjodu ta' validità tagħha;

(c)	it-tielet darba: — il-bastiment titbiddillu r-rotta, jekk dan ikun possibbli; — it-tagħbija abbord tinħatt u tiġi kkonfiskata mit-Teżor Pubbliku; — il-liċenzja tiġi rtirata definittivament; — il-kaptan u l-bastiment ma jitħallewx joperaw aktar fil-Mauritania.

1.12.   F'każ li l-bastiment li jkun wettaq l-offiża jaħrab, il-Ministeru għandu jgħarraf lill-Unjoni Ewropea u lill-Istat Membru tal-bandiera b'dan sabiex ikunu jistgħu jiġu applikati s-sanzjonijiet previsti fil-paragrafu 1.11 ta' hawn fuq.

2.   Dispożizzjonijiet marbutin mal-ispezzjonijiet fil-port u fuq il-baħar

2.1.   Il-Mauritania għandha tieħu l-miżuri meħtieġa sabiex l-ispezzjonijiet li jsiru abbord il-bastimenti tal-Unjoni Ewropea fil-port u fuq il-baħar fil-kuntest ta' dan il-Ftehim:

(a)

isiru minn bastimenti u/jew uffiċjali tal-Gwardakosta tal-Mauritania li jkunu awtorizzati u identifikati b'mod ċar bħala bastimenti u uffiċjali maħturin mill-Mauritania sabiex iwettqu l-verifiki tas-sajd. Kull uffiċjal tal-Gwardakosta tal-Mauritania jrid ikun tħarreġ fil-verifiki tas-sajd u jrid ikollu karta tas-servizz maħruġa mill-Mauritania li tkun turi l-identità u l-kariga tiegħu;

(b)	ma jikkompromettu bl-ebda mod is-sikurezza tal-bastiment u tal-ekwipaġġ.

2.2.   Fil-każ ta' spezzjoni fuq il-baħar, l-uffiċjali tal-Gwardakosta tal-Mauritania ma jistgħux jitilgħu abbord bastiment tal-Unjoni Ewropea mingħajr ma jibagħtu avviz minn qabel dwar dan permezz ta' sejħa bir-radju fuq il-frekwenza tal-VHF jew billi jużaw il-kodiċi internazzjonali tas-sinjali. Kull mezz tat-trasport użat għall-ispezzjoni jrid ikollu fuqu, b'mod ċar u viżibbli, bandiera uffiċjali jew simbolu li juri li huwa qed iwettaq attivitajiet ta' spezzjoni tas-sajd f'isem il-Mauritania.

2.3.   Il-kaptan tal-bastiment tal-Unjoni Ewropea għandu jiffaċilita l-imbark tal-uffiċjali tal-Gwardakosta tal-Mauritania u għandu jiffaċilitalhom xogħolhom. Huwa għandu jikkoopera mal-uffiċjali tal-Gwardakosta tal-Mauritania.

2.4.   L-ispezzjoni għandha ssir mill-għadd ta' uffiċjali tal-Gwardakosta tal-Mauritania li jkun adattat għaċ-ċirkustanzi tal-ispezzjoni, u dawn l-uffiċjali jridu jagħtu prova tal-identità u tal-kariga tagħhom qabel ma jwettqu l-ispezzjoni.

2.5.   L-uffiċjali tal-Gwardakosta tal-Mauritania jistgħu jeżaminaw il-partijiet kollha tal-bastiment, it-tagħmir kollu, l-irkaptu kollu, il-qabdiet kollha, id-dokumenti kollha u r-reġistrazzjonijiet tat-trażmissjonijiet kollha li huma jqisu bħala meħtieġa biex jiżguraw li hemm konformità ma' dan il-Ftehim. Huma jistgħu jistaqsu wkoll xi mistoqsijiet lill-kaptan, lill-membri tal-ekwipaġġ u lill-persuni l-oħra kollha li jkunu abbord il-bastiment spezzjonat. Huma jistgħu jagħmlu kopja ta' kull dokument li jqisu li huwa rilevanti.

2.6.   L-uffiċjali tal-Gwardakosta tal-Mauritania ma jistgħux jindaħlu fejn jidħol id-dritt tal-kaptan tal-bastiment tal-Unjoni Ewropea li jikkomunika ma' sid il-bastiment u/jew mal-awtorità tal-Istat tal-bandiera tal-bastiment.

2.7.   L-uffiċjali tal-Gwardakosta tal-Mauritania għandhom jibqgħu abbord il-bastiment tal-Unjoni Ewropea għall-ħin meħtieġ sabiex iwettqu l-kompiti marbutin mal-ispezzjoni biss. F'kull każ, l-ispezzjoni m'għandhiex iddum iktar minn tliet sigħat fil-każ tal-bastimenti użati għas-sajd għall-ħut pelaġiku u siegħa u nofs fil-każ tal-bastimenti użati għall-kategoriji l-oħra kollha, ħlief jekk dan ikun assolutament meħtieġ.

2.8.   L-uffiċjali tal-Gwardakosta tal-Mauritania għandhom iwettqu l-ispezzjoni b'mod li jnaqqas kemm jista' jkun l-impatt fuq il-bastiment, l-attività tas-sajd u l-merkanzija tiegħu, kif ukoll fuq il-ħatt l-art jew it-trażbord.

2.9.   Il-Mauritania se tiżgura li kull ilment marbut mal-ispezzjoni ta' bastiment tal-Unjoni Ewropea jiġi ttrattat bl-istess mod u bir-reqqa, skont il-liġijiet nazzjonali.

2.10.   Il-Mauritania tista' tawtorizza lill-UE tieħu sehem fl-ispezzjonijiet fil-port u fuq il-baħar bħala osservatur.

2.11.   Fi tmiem kull spezzjoni, l-uffiċjali tal-Gwardakosta tal-Mauritania għandhom ifasslu rapport tal-ispezzjoni li jkun fih ir-riżultati tal-ispezzjoni, il-ksur allegat u l-miżuri sussegwenti li tista' tieħu eventwalment il-Mauritania.

2.12.   Il-kaptan tal-bastiment tal-Unjoni Ewropea għandu d-dritt jagħmel xi kummenti fir-rapport tal-ispezzjoni.

2.13.   Ir-rapport tal-ispezzjoni għandu jiġi ffirmat mill-uffiċjal tal-Gwardakosta tal-Mauritania li jkun fasslu u mill-kaptan tal-bastiment tal-Unjoni Ewropea. Il-firma tal-kaptan timplika biss li huwa rċieva kopja tiegħu. Jekk il-kaptan jirrifjuta li jiffirma r-rapport tal-ispezzjoni, għandu jikteb ir-raġunijiet għal dan fir-rapport stess, flimkien mal-frażi “nirrifjuta li niffirma”.

2.14.   Meta r-rapport jitfassal bl-idejn, il-kitba trid tkun tinqara u trid tintuża linka li ma titħassarx.

2.15.   L-uffiċjali tal-Gwardakosta tal-Mauritania għandhom jagħtu kopja tar-rapport tal-ispezzjoni lill-kaptan tal-bastiment tal-Unjoni Ewropea qabel ma jinżlu minn fuq il-bastiment. Il-Mauritania għandha tibgħat kopja tar-rapport tal-ispezzjoni lill-Unjoni Ewropea fi żmien 24 siegħa mill-ispezzjoni fil-każ tal-ispezzjoni fil-port u fi żmien erbat ijiem mill-ispezzjoni fil-każ tal-ispezzjoni fuq il-baħar, ikunu x'ikunu l-konklużjonijiet li joħorġu mill-ispezzjoni.

3.   Sistema ta' monitoraġġ konġunt tal-kontrolli fuq l-art u fuq il-baħar

3.1.   Iż-żewġ Partijiet jistgħu jiddeċiedu li jistabbilixxu sistema ta' monitoraġġ konġunt tal-kontrolli fuq l-art u fuq il-baħar. Għal dan il-għan, huma għandhom jaħtru rappreżentanti li jattendu l-attivitajiet ta' kontroll u ta' spezzjoni mwettqin mis-servizzi nazzjonali rispettivi tal-kontroll u li jistgħu jagħmlu osservazzjonijiet dwar l-implimentazzjoni ta' dan il-Protokoll.

3.2.   Dawn ir-rappreżentanti għandu jkollhom:

—	kwalifika professjonali;

—	esperjenza adegwata fil-qasam tas-sajd;

—	għarfien tajjeb tad-dispożizzjonijiet tal-Ftehim u ta' dan il-Protokoll.

3.3.   Meta dawn ir-rappreżentanti jattendu l-ispezzjonijiet, dawn jitwettqu mis-servizzi nazzjonali tal-kontroll u dawn ir-rappreżentanti ma jistgħux, fuq l-inizjattiva tagħhom stess, jeżerċitaw is-setgħat ta' spezzjoni mogħtija lill-uffiċjali nazzjonali.

3.4.   Meta dawn ir-rappreżentanti jakkumpanjaw lill-uffiċjali nazzjonali, għandu jkollhom aċċess għall-bastimenti, il-postijiet u d-dokumenti li jkunu qed jiġu spezzjonati mill-uffiċjali, sabiex jiġbru l-informazzjoni mhux personali meħtieġa biex iwettqu ħidmiethom.

3.5.   Ir-rappreżentanti għandhom jakkumpanjaw lis-servizzi nazzjonali tal-kontroll fiż-żjarat tagħhom fil-portijiet abbord il-bastimenti mal-moll, fiċ-ċentri tal-irkant pubbliku, fil-ħwienet tal-bejjiegħa tal-ħut bl-ingrossa, fl-imħażen bil-friża u f'postijiet oħra għall-ħatt u l-ħażna tal-ħut qabel ma jitqiegħed fis-suq u jibda jinbiegħ.

3.6.   Ir-rappreżentanti għandhom ifasslu u jippreżentaw rapport dwar il-kontrolli li jkunu attendew kull erba' xhur. Dan ir-rapport għandu jintbagħat lill-awtoritajiet kompetenti. Dawn l-awtoritajiet għandhom jagħtu kopja tiegħu lill-Parti Kontraenti l-oħra.

3.7.   Iż-żewġ Partijiet jistgħu jiddeċiedu li jwettqu mill-inqas żewġ spezzjonijiet kull sena alternattivament fil-Mauritania u fl-Ewropa.

3.8.   Ir-rappreżentant fl-attivitajiet ta' monitoraġġ konġunt għandu jirrispetta l-materjal u t-tagħmir li jkun hemm abbord il-bastimenti u f'faċilitajiet oħra, kif ukoll il-kunfidenzjalità tad-dokumenti kollha li jkollu aċċess għalihom. Iż-żewġ Partijiet jaqblu li jiżguraw kunfidenzjalità stretta matul attivitajiet bħal dawn. Ir-rappreżentant għandu jiżvela r-riżultati tal-ħidma tiegħu lill-awtoritajiet kompetenti tiegħu biss.

3.9.   Dan il-programm japplika għall-portijiet ta' ħatt l-art tal-Unjoni Ewropea u għall-portijiet tal-Mauritania.

3.10.   Kull Parti Kontraenti għandha tagħmel tajjeb għall-ispejjeż kollha tar-rappreżentant tagħha fl-attivitajiet ta' monitoraġġ konġunt, inklużi l-ispejjeż tal-ivjaġġar u tal-akkomodazzjoni.

KAPITOLU VII

KSUR TAR-REGOLI

1.   Rapport taż-żjara u dikjarazzjoni ta' ksur

1.1.   Kull ksur tar-regoli li jiġi stabbilit b'rabta ma' bastiment tal-Unjoni Ewropea jrid jissejjes fuq sejbiet oġġettivi u materjali tal-fatti li jippermettu li dan il-ksur jitqies bħala tali min-naħa tal-uffiċjali tal-Gwardakosta tal-Mauritania. Ma jistax ikun hemm biss suspett ta' ksur.

1.2.   Il-kaptan tal-bastiment irid jiffirma r-rapport tal-ispezzjoni, li jispeċifika ċ-ċirkustanzi u r-raġunijiet li wasslu għall-ksur, u fih jista' jinkludi r-riżervi tiegħu dwaru, u l-Gwardakosta tal-Mauritania trid tagħtih minnufih kopja ta' dan ir-rapport skont il-paragrafu 2.15 tal-Kapitolu VI. Din il-firma ma tippreġudikax id-drittijiet tal-kaptan u l-mezzi ta' difiża li huwa jista' juża fil-konfront tal-ksur tar-regoli li bih ikun qed jiġi akkużat.

1.3.   Il-Gwardakosta tal-Mauritania għandha tfassal id-dikjarazzjoni ta' ksur b'mod preċiż abbażi tal-ksur eventwali stabbilit u rreġistrat fir-rapport tal-ispezzjoni mfassal wara l-ispezzjoni tal-bastiment. Ma' din id-dikjarazzjoni jrid ikun hemm il-provi materjali li jippermettu li wieħed jiġġustifika b'mod oġġettiv li verament seħħ il-ksur stabbilit.

1.4.   Il-konformità tal-karatteristiċi li joħorġu mill-ispezzjoni teknika (il-Kapitolu II) għandha titqies waqt l-ispezzjoni.

2.   Notifika tal-ksur

2.1.   Fil-każ ta' ksur, il-Gwardakosta tal-Mauritania għandha tibgħat id-dikjarazzjoni ta' ksur minnufih lir-rappreżentant tal-bastiment permezz ta' ittra, flimkien mar-rapport tal-ispezzjoni. Il-Gwardakosta tal-Mauritania għandha tgħarraf lill-Unjoni Ewropea mingħajr dewmien b'dan u tibagħtilha d-dokumenti rilevanti.

2.2.   Fil-każ ta' ksur li ma jistax jitwaqqaf fuq il-baħar, il-kaptan, fuq talba tal-Gwardakosta tal-Mauritania, għandu jieħu l-bastiment tiegħu fil-port ta' Nouadhibou (jiġifieri l-bastiment titbiddillu r-rotta) u l-Gwardakosta tal-Mauritania għandha tgħarraf lill-Unjoni Ewropea mingħajr dewmien b'dan. Fil-każ ta' ksur irrikonoxxut mill-kaptan, li jista' jitwaqqaf fuq il-baħar, il-bastiment ikun jista' jkompli jistad. Fiż-żewġ każijiet, wara li jieqaf il-ksur, il-bastiment ikun jista' jkompli jistad.

3.   Soluzzjoni tal-ksur mingħajr ma tinbidel ir-rotta tal-bastiment

3.1.   Skont dan il-Protokoll, ir-reati jistgħu jiġu solvuti kemm bi proċedura bonarja, kif ukoll bi proċedura ġudizzjarja.

3.2.   Qabel ma jiġi solvut il-ksur u sa mhux iktar tard minn 24 siegħa minn meta jiġi nnotifikat il-ksur, il-Mauritania tibgħat lill-Unjoni Ewropea l-informazzjoni ddettaljata kollha dwar il-fatti tal-ksur u l-konsegwenzi li jista' jkun hemm.

3.3.   Il-Gwardakosta tal-Mauritania għandha tlaqqa' lill-Kumitat tal-Proċedura Bonarja. L-informazzjoni kollha dwar l-andament tal-proċedura bonarja jew ġudizzjarja marbuta mar-reati mwettqin mill-bastimenti tal-Unjoni Ewropea għandha tintbagħat mill-aktar fis possibbli lill-Unjoni Ewropea. Jekk ikun meħtieġ, is-sid jista' jiġi rrappreżentat fil-Kumitat tal-Proċedura Bonarja minn żewġ persuni permezz ta' deroga mogħtija mill-President ta' dan il-Kumitat. Is-sid huwa awtorizzat jippreżenta l-argumenti tiegħu u jipproduċi kull informazzjoni kumplimentari dwar iċ-ċirkustanzi tas-sitwazzjoni.

3.4.   Is-sid jew ir-rappreżentant tiegħu u l-Unjoni Ewropea għandhom jiġu mgħarrfa mill-aktar fis possibbli bir-riżultati tal-Kumitat tal-Proċedura Bonarja permezz tad-Delegazzjoni.

3.5.   Il-ħlas eventwali tal-multa għandu jsir permezz ta' trasferiment ta' fondi sa mhux aktar tard minn 30 jum wara l-ftehim bonarju. F'każ li l-bastiment ikun irid joħroġ miż-żona tas-sajd tal-Mauritania, il-ħlas irid ikun sar qabel dan il-ħruġ. L-irċevuta tat-Teżor Pubbliku, jew SWIFT awtentikata mill-Bank Ċentrali tal-Mauritania (il-BĊM) fil-ġranet mhux tax-xogħol, għandhom iservu bħala prova tal-ħlas tal-multa.

3.6.   Jekk il-proċedura bonarja tfalli, il-Ministeru għandu jibgħat il-fajl lill-prosekutur pubbliku mingħajr dewmien. F'każ ta' sentenza ġudizzjarja li twassal għal multa, il-ħlas tal-multa għandu jsir permezz ta' trasferiment ta' fondi sa mhux aktar tard minn 30 jum wara t-tranżazzjoni. L-irċevuta tat-Teżor Pubbliku, jew SWIFT awtentikata mill-Bank Ċentrali tal-Mauritania (il-BĊM) fil-ġranet mhux tax-xogħol, għandhom iservu bħala prova tal-ħlas tal-multa.

4.   Soluzzjoni tal-ksur b'tibdil fir-rotta tal-bastiment

4.1.   Il-bastiment li tkun inbidlitlu r-rotta wara li jkun instab ksur għandu jinżamm fil-port sa ma titlesta l-proċedura bonarja.

4.2.   Qabel ma titwettaq kull proċedura ġudizzjarja, għandha tipprova tinstab soluzzjoni bonarja għall-ksur allegat bil-kundizzjonijiet previsti fil-paragrafi 3.3 sa 3.5. Din il-proċedura għandha titlesta sa mhux iktar tard minn tlett ijiem tax-xogħol wara li jibda t-tibdil fir-rotta tal-bastiment.

4.3.   Qabel ma tibda l-proċedura bonarja u fi żmien 48 siegħa minn meta jibda t-tibdil fir-rotta tal-bastiment, il-Mauritania għandha tibgħat lill-Unjoni Ewropea l-informazzjoni ddettaljata kollha dwar il-fatti tal-ksur u l-konsegwenzi li jista' jkun hemm.

4.4.   Jekk il-proċedura bonarja tfalli, il-Ministeru għandu jibgħat il-fajl lill-prosekutur pubbliku mingħajr dewmien. F'każ ta' sentenza ġudizzjarja li twassal għal multa, il-ħlas tal-multa għandu jsir skont il-punt 3.6.

4.5.   Skont il-leġiżlazzjoni fis-seħħ, sid il-bastiment għandu jagħmel garanzija bankarja li l-ammont tagħha jkun stabbilit mill-awtorità jew mit-tribunal kompetenti fi żmien 72 siegħa minn x'ħin tintemm il-proċedura bonarja u li tkun tqis l-ispejjeż li jkunu ġejjin mit-tlugħ abbord il-bastiment għall-ispezzjoni, kif ukoll l-ammont tal-multi u tal-kumpens li jrid iħallas min ikun wettaq il-ksur. Il-garanzija bankarja għandha tkun irrevokabbli sakemm tintemm il-proċedura legali. Hija għandha tiġi rrilaxxata jekk il-proċedura tintemm mingħajr kundanna. Bl-istess mod, f'każ ta' kundanna li twassal għal multa li tkun inqas mill-garanzija ddepożitata, id-differenza għandha tiġi rrilaxxata mill-awtorità kompetenti tal-Mauritania.

4.6.   Il-bastiment jiġi rrilaxxat:

(a)	jew meta jitwettqu l-obbligi miftehma waqt il-proċedura bonarja;

(b)

jew meta tiġi ddepożitata l-garanzija bankarja msemmija fil-paragrafu 4.5 ta' hawn fuq u din tiġi aċċettata mill-Ministeru, sakemm jitlestew il-proċeduri legali. L-irċevuta tat-Teżor Pubbliku, jew SWIFT awtentikata mill-Bank Ċentrali tal-Mauritania (il-BĊM) fil-ġranet mhux tax-xogħol, għandhom iservu bħala prova tal-ħlas tal-garanzija.

5.   Skambju tal-informazzjoni dwar il-kontrolli u l-ksur tar-regoli

Iż-żewġ Partijiet jintrabtu li jsaħħu l-proċeduri meħtieġa sabiex ikun hemm djalogu kontinwu dwar l-azzjonijiet ta' kontroll imwettqin, il-fajls dwar il-ksur tar-regoli li jkunu miftuħin, ir-riżultati tal-proċeduri bonarji u ġudizzjarji u kull diffikultà marbuta mat-twettiq tal-kontrolli u mal-monitoraġġ tal-fajls dwar il-ksur tar-regoli.

KAPITOLU VIII

SISTEMA TA' MONITORAĠĠ BIS-SATELLITA (VMS)

Il-monitoraġġ bis-satellita tal-bastimenti tal-Unjoni Ewropea għandu jsir permezz ta' trażmissjoni doppja skont sistema trijangulari bil-mod li ġej:

(1)	bastiment tal-UE — ĊMS tal-Istat tal-bandiera — ĊMS tal-Mauritania

(2)	bastiment tal-UE — ĊMS tal-Mauritania — ĊMS tal-Istat tal-bandiera

F'każ li jkun hemm xi diffikultà fl-implimentazzjoni tas-sistema trijangulari, iż-żewġ Partijiet jieħdu l-miżuri meħtieġa biex isolvu dawn id-diffikultajiet waqt il-laqgħat tal-Kumitat Konġunt

1.   Messaġġi dwar il-pożizzjoni tal-bastimenti — is-sistema tal-VMS

Meta jkunu fiż-żona tas-sajd tal-Mauritania, il-bastimenti tal-UE li jkollhom awtorizzazzjoni tas-sajd għandhom ikunu mgħammra b'sistema ta' monitoraġġ bis-satellita (Sistema ta' Monitoraġġ tal-Bastimenti — VMS) li tiżgura l-komunikazzjoni awtomatika u kontinwa tal-pożizzjoni tagħhom, kull siegħa, liċ-ċentru għall-kontroll tas-sajd (iċ-Ċentru tal-Monitoraġġ tas-Sajd — iċ-ĊMS) tal-Istat tal-bandiera tagħhom.

2.   Modi ta' trażmissjoni

2.1.   Kull messaġġ dwar il-pożizzjoni għandu jinkludi l-informazzjoni li ġejja:

(a)	l-identifikazzjoni tal-bastiment;

(b)	il-pożizzjoni ġeografika l-iżjed riċenti tal-bastiment (il-lonġitudni, il-latitudni), b'marġni ta' żball tal-pożizzjoni ta' inqas minn 500 metru, u b'intervall ta' fiduċja ta' 99 %;

(c)	id-data u l-ħin li fihom tkun ġiet irreġistrata l-pożizzjoni;

(d)	il-veloċità tal-bastiment u d-direzzjoni li fiha jkun qed jivvjaġġa;

(e)	u għandu jkun ikkonfigurat skont il-format mogħti fl-Appendiċi 9 ta' dan l-Anness.

2.2.   L-ewwel pożizzjoni rreġistrata wara d-dħul fiż-żona tas-sajd tal-Mauritania għandha tiġi identifikata bil-kodiċi “ENT”. Il-pożizzjonijiet kollha ta' wara għandhom jiġu identifikati bil-kodiċi “POS”, ħlief għall-ewwel pożizzjoni rreġistrata wara l-ħruġ miż-żona tas-sajd tal-Mauritania, li għandha tiġi identifikata bil-kodiċi “EXI”.

2.3.   Iċ-ĊMS tal-Istat tal-bandiera u ċ-ĊMS tal-Mauritania għandhom jipprovdu l-ipproċessar awtomatiku u, jekk ikun meħtieġ, it-trażmissjoni elettronika tal-messaġġi dwar il-pożizzjoni. Il-messaġġi dwar il-pożizzjoni għandhom jiġu rreġistrati b'mod sigur u għandhom jinżammu għal perjodu ta' tliet snin.

3.   Trażmissjoni min-naħa tal-bastiment f'każ ta' ħsara fis-sistema tal-VMS

3.1.   Il-kaptan għandu jiżgura f'kull ħin li s-sistema tal-VMS tal-bastiment tiegħu tkun qed taħdem bis-sħiħ u li l-messaġġi dwar il-pożizzjoni jkunu qed jiġu trażmessi b'mod korrett liċ-ĊMS tal-Istat tal-bandiera.

3.2.   Fil-każ ta' ħsara teknika jew ta' ħsara fl-apparat ta' monitoraġġ kontinwu bis-satellita installat abbord il-bastiment tas-sajd, il-kaptan tal-bastiment għandu jittrażmetti l-informazzjoni speċifikata fil-paragrafu 2.1 bil-posta elettronika, bir-radju jew bil-faks fil-ħin dovut liċ-ĊMS tal-Istat tal-bandiera. F'dawn iċ-ċirkustanzi jkun irid jintbagħat Rapport tal-Pożizzjoni globali kull erba' sigħat. Iċ-ĊMS tal-Istat tal-bandiera għandu jibgħat dawn il-messaġġi minnufih liċ-ĊMS tal-Mauritania.

3.3.   F'każ ta' ħsara fis-sistema tal-VMS abbord il-bastiment jew ta' funzjonament ħażin tagħha, il-kaptan u/jew is-sid għandhom jiżguraw li l-ħsara tissewwa jew li s-sistema tal-VMS tinbidel fi żmien massimu ta' ħamest ijiem. Wara dan iż-żmien, il-bastiment ikkonċernat ikollu joħroġ miż-żona tas-sajd tal-Mauritania jew jidħol f'port tal-Mauritania. Jekk il-bastiment jidħol f'xi port tal-Mauritania matul dan il-perjodu ta' ħamest ijiem, huwa ma jkunx jista' jkompli bl-attivitajiet tas-sajd tiegħu fiż-żona tas-sajd tal-Mauritania sakemm is-sistema tal-VMS tiegħu ma tkunx qed taħdem b'mod perfett, ħlief jekk il-Mauritania tawtorizzawh jagħmel dan. Fil-każ ta' problema teknika gravi li tkun teħtieġ dewmien supplimentari, tista' tingħata deroga ta' mhux aktar minn 15-il jum fuq talba tal-kaptan.

3.4.   Bastiment tas-sajd jista' jitlaq minn port wara li jkollu nuqqas tekniku fis-sistema tal-VMS tiegħu biss jekk:

—	din is-sistema tkun qed taħdem mill-ġdid b'mod li jissodisfa lill-Istat tal-bandiera; jew jekk

—	jirċievi awtorizzazzjoni biex jagħmel dan mill-Istat tal-bandiera. F'dan il-każ, l-Istat tal-bandiera għandu jgħarraf lill-Mauritania bid-deċiżjoni tiegħu qabel ma l-bastiment jitlaq mill-port.

4.   Komunikazzjoni sigura tal-messaġġi dwar il-pożizzjoni bejn iċ-ĊMS tal-Istat tal-bandiera u l-Mauritania

4.1.   Iċ-ĊMS tal-Istat tal-bandiera għandu jibgħat awtomatikament u mingħajr dewmien il-messaġġi dwar il-pożizzjoni tal-bastimenti kkonċernati liċ-ĊMS tal-Mauritania. Iċ-ĊMS tal-Istat tal-bandiera u ċ-ĊMS tal-Mauritania għandhom jiskambjaw l-indirizzi elettroniċi ta' kuntatt tagħhom. Huma għandhom jgħarrfu minnufih lil xulxin b'kull tibdil f'dawn l-indirizzi.

4.2.   It-trażmissjoni tal-messaġġi dwar il-pożizzjoni bejn iċ-ĊMS tal-Istat tal-bandiera u ċ-ĊMS tal-Mauritania għandha ssir b'mod elettroniku bl-użu ta' sistema sigura tal-komunikazzjoni.

4.3.   Iċ-ĊMS tal-Mauritania għandu jgħarraf liċ-ĊMS tal-Istat tal-bandiera u lill-Unjoni Ewropea b'mod elettroniku u minnufih b'kull interruzzjoni fil-wasla tal-messaġġi konsekuttivi dwar il-pożizzjoni ta' bastiment li jkollu awtorizzazzjoni tas-sajd, meta l-bastiment ikkonċernat ma jkunx innotifika l-ħruġ tiegħu miż-żona tas-sajd tal-Mauritania.

5.   Funzjonament ħażin tas-sistema ta' komunikazzjoni

5.1.   Il-Mauritania għandha tiżgura li t-tagħmir elettroniku tagħhom ikun kompatibbli ma' dak taċ-ĊMS tal-Istat tal-bandiera. Huma għandhom jgħarrfu lill-Unjoni Ewropea minnufih b'kull nuqqas ta' funzjonament fil-komunikazzjoni u fil-wasla tal-messaġġi dwar il-pożizzjoni bil-għan li tinstab soluzzjoni teknika mill-aktar fis possibbli għal dan. Il-Kumitat Konġunt għandu jipprova jsolvi kwalunkwe tilwim li jista' jirriżulta minn dan.

5.2.   Il-kaptan għandu jitqies bħala responsabbli għal kull manipulazzjoni ppruvata tas-sistema tal-VMS tal-bastiment li jkollha l-għan li tfixkel l-operat tagħha jew li tiffalsifika l-messaġġi tagħha dwar il-pożizzjoni tal-bastiment. Kull ksur għandu jiġi ppenalizzat bis-sanzjonijiet previsti fil-Protokoll.

6.   Bidla fil-frekwenza tal-messaġġi dwar il-pożizzjoni

6.1.   Abbażi ta' evidenza dokumentata li tipprova ksur, il-Mauritania tista' tistaqsi liċ-ĊMS tal-Istat tal-bandiera, filwaqt li jibagħtu kopja wkoll lill-Unjoni Ewropea, li jnaqqas l-intervall biex il-bastiment jibgħat il-messaġġi dwar il-pożizzjoni tiegħu għal kull nofsiegħa għal perjodu partikulari tal-investigazzjoni. Il-Mauritania għandha tibgħat din l-evidenza dokumentata liċ-ĊMS tal-Istat tal-bandiera u lill-Unjoni Ewropea. Iċ-ĊMS tal-Istat tal-bandiera għandu jibgħat minnufih il-messaġġi dwar il-pożizzjoni lill-Mauritania fuq il-frekwenza l-ġdida.

6.2.   Fi tmiem il-perjodu partikulari tal-investigazzjoni, il-Mauritania għandhom jgħarrfu liċ-ĊMS tal-Istat tal-bandiera u lill-Unjoni Ewropea dwar il-monitoraġġ li jista' jkun meħtieġ.

KAPITOLU IX

TLUGĦ ABBORD TAS-SAJJIEDA MILL-MAURITANIA

1.   L-għadd ta' sajjieda mill-Mauritania li għandhom jittellgħu abbord

1.1.   Sid il-bastiment tas-sajd għandu jtella' abbord il-bastiment tas-sajd tal-Unjoni Ewropea xi sajjieda mill-Mauritania biex jaħdmu bħala membri tal-ekwipaġġ fuq il-bastiment għall-perjodu li matulu l-basitiment ikun qed iwettaq attivitajiet tas-sajd fiż-żona tas-sajd tal-Mauritania.

1.2.   Il-Ministeru jistabbilixxi u jżomm lista li tkun konformi mal-istandards internazzjonali, li jkun fiha biżżejjed sajjieda mill-Mauritania li jkunu mħarrġin sewwa u jkollhom il-kwalifiki u l-esperjenza u jkunu adattati, li minnha s-sidien tal-bastimenti tas-sajd tal-Unjoni Ewropea jistgħu jagħżlu b'mod ħieles is-sajjieda li se jtellgħu abbord il-bastimenti tagħhom biex jaħdmu fuqhom skont il-paragrafu 1.1. Din il-lista tintbagħat lis-sidien, lill-Unjoni Ewropea u lill-Istati Membri tal-bandiera.

1.3.   L-għadd minimu ta' sajjieda mill-Mauritania li jridu jittellgħu abbord skont il-paragrafi 1.1 u 1.2 huwa dan li ġej:

(a)	għall-bastimenti tas-sajd għat-tonn bit-tartaruni, sajjied wieħed għal kull bastiment;

(b)	għall-bastimenti tas-sajd għat-tonn bil-qasab u x-xlief, tliet sajjieda għal kull bastiment;

(c)	għall-bastimenti użati għas-sajd għall-gambli u għas-sajd għall-ħut tal-qiegħ, 60 % tal-ekwipaġġ, mogħti għall-eqreb numru iżgħar sħiħ, minbarra l-uffiċjali;

(d)

għall-bastimenti tat-tkarkir użati għas-sajd għall-ħut pelaġiku, 60 % tal-ekwipaġġ li jkollu karigi marbutin mal-produzzjoni (li jkun jaħdem fl-ipproċessar, fl-ippakkjar u fl-iffriżar), hekk kif indikat fil-pjan tal-ekwipaġġ tal-bastiment imsemmi kif dovut mill-awtorità kompetenti tal-Istat tal-bandiera.

1.4.   Jekk sid il-bastiment tas-sajd itella' abbord uffiċjali studenti mill-Mauritania, in-numru tagħhom jitnaqqas mill-għadd minimu ta' sajjieda mill-Mauritania meħtieġ skont il-paragrafu 1.3.

1.5.   Is-sid ta' bastiment tas-sajd imsemmi fil-punt (d) tal-paragrafu 1.3 jista' juża l-għadd ta' sajjieda mill-Mauritania meħtieġ fil-qafas ta' sistema ta' rotazzjoni abbord jew fuq l-art iddokumentata u ppjanata, li tippermettilu jamministra l-bastiment tas-sajd tiegħu b'mod responsabbli u effettiv, filwaqt li jħares il-miżuri adottati mill-Istat tal-bandiera skont il-liġijiet nazzjonali u f'konformità mal-liġijiet tal-UE.

1.6.   Il-kaptan għandu jżomm reġistru tas-sajjieda li jkunu qed jaħdmu abbord il-bastiment tiegħu, u għandu jfassal lista tal-ekwipaġġ li għandu jiffirmaha kif jixraq jew li għandha tiffirmaha xi persuna oħra awtorizzata minnu. Il-lista tal-ekwipaġġ għandha tinżamm aġġornata u tinkludi dejta ddettaljata għal kull sajjied, tal-inqas dwar dan li ġej:

(a)	il-grad jew il-kariga;

(b)	iċ-ċittadinanza;

(c)	id-data u l-post tat-twelid;

(d)	it-tip ta' karta tal-identità u n-numru tagħha.

1.7.   Il-kontroll tal-ħarsien tar-rekwiżiti msemmija fil-paragrafu 1 għandu x'jaqsam mal-lista tal-ekwipaġġ tal-bastiment tas-sajd tal-Unjoni Ewropea fil-mument tal-ispezzjoni, hekk kif tfasslet u ġiet iffirmata mill-kaptan jew minn xi persuna oħra li huwa jkun awtorizza.

2.   Kundizzjonijiet tal-aċċess tas-sajjieda mill-Mauritania għall-bastimenti tas-sajd tal-Unjoni Ewropea

2.1.   Il-Ministeru għandu jiżgura li l-lista msemmija fil-paragrafu 1.2 tkun tinkludi d-dejta ddettaljata ta' kull sajjied fosthom tal-inqas ismu u kunjomu, id-data u l-post tat-twelid tiegħu, il-kwalifiki tiegħu u d-dokumenti marbutin mal-istatus tiegħu ta' sajjied u mal-esperjenza tiegħu.

2.2.   Il-Ministeru għandu jiżgura li kull sajjied li jkun imniżżel fuq il-lista msemmija fil-paragrafu 1.2 ikun jissodisfa tal-inqas ir-rekwiżiti li ġejjin: is-sajjied

(a)	jaf il-vokabularju bażiku tas-sigurtà b'waħda mil-lingwi tax-xogħol li ġejjin: bil-Franċiż, bl-Ispanjol jew bl-Ingliż;

(b)	għandu passaport validu maħruġ mill-awtoritajiet tal-Mauritania;

(c)	għandu tessera ta' baħri valida maħruġa mill-awtoritajiet tal-Mauritania jew dokument ekwivalenti għaliha;

(d)	għandu ċertifikat validu li juri li huwa rċieva taħriġ bażiku dwar is-sigurtà fuq il-baħar għall-persunal tal-bastimenti tas-sajd skont l-istandards internazzjonali li huma fis-seħħ;

(e)

għandu ċertifikat mediku validu li juri li huwa jista' jwettaq ħidmietu abbord il-bastiment tas-sajd u li huwa ma għandu l-ebda marda li tittieħed u ma għandu sintomi tal-ebda marda li tista' tipperikola s-saħħa u s-sigurtà tal-persuni l-oħra li jkunu abbord; l-eżami mediku jrid jitwettaq skont l-istandards internazzjonali li jkunu fis-seħħ u jrid jinkludi testijiet tar-raġġi X għat-tuberkulożi;

(f)	għandu dokumenti li jistgħu jiddaħħlu fit-tessera jew fid-dokument imsemmi fil-punt (c) tal-paragrafu 2.2 li jiddeskrivu fid-dettall il-kompetenzi li kiseb u isem kull bastiment tas-sajd li ħadem fuqu u t-tip tiegħu, kif ukoll il-grad jew il-kariga tiegħu abbord u ż-żmien li dam jaħdem fuqu;

(g)	għandu l-kuntratt oriġinali tax-xogħol bħala sajjied iffirmat kif xieraq;

(h)	għandu kull dokument ieħor meħtieġ mill-Istat tal-bandiera tal-bastiment tas-sajd u minn sid il-bastiment tas-sajd.

2.3.   Kull dokument imsemmi fil-paragrafu 2.2, inklużi l-punti (c) sa (h), għandu jinħareġ f'waħda mil-lingwi uffiċjali tar-Repubblika Iżlamika tal-Mauritania jew tal-pajjiż tal-ħruġ jew iktar, u għandu jkollu miegħu traduzzjoni bl-Ingliż.

2.4.   Skont l-istandards internazzjonali li huma fis-seħħ, id-dokumenti kollha msemmija fil-punti (c) sa (h) tal-paragrafu 2.2 għandhom jitqiesu validi biss jekk ikunu jissodisfaw għalkollox id-dispożizzjonijiet tal-paragrafu 2.3, jekk ikunu ġew iffirmati kif xieraq, jekk ikun għadhom validi fil-mument tat-tlugħ abbord u jekk l-Istat tal-bandiera tal-bastiment tas-sajd jiggarantixxi li t-taħriġ u l-eżamijiet li għalihom ikunu nħarġu d-dokumenti jkunu jissodsfaw għalkollox ir-rekwiżiti tal-Istat tal-bandiera.

Għal dan il-għan, il-Mauritania tawtorizza lill-uffiċjali maħturin mill-Istat tal-bandiera jwettqu, fit-territorju tagħhom, l-evalwazzjonijiet u l-verifiki meħtieġa b'rabta ma' dan. Skont il-prinċipju tal-kooperazzjoni leali, l-Istati Membri tal-Unjoni Ewropea jikkooperaw bejniethom biex iwettqu l-missjonijiet li joħorġu minn dan il-paragrafu sabiex iħaffu l-piż amministrattiv tar-Repubblika Iżlamika tal-Mauritania.

2.5.   Is-sajjieda mill-Mauritania għandhom jagħtu lill-kaptan, fuq talba tiegħu, id-dokumenti msemmija fil-paragrafu 2.2 għall-finijiet tal-kontrolli. Il-kaptan jista' jżomm kopja ta' dawn id-dokumenti għal finijiet amministrattivi.

2.6.   Sid il-bastiment tas-sajd jew il-kaptan li jkun qed jaġixxi f'ismu għandhom id-dritt li jirrifjutaw li jtellgħu abbord il-bastiment tas-sajd tal-UE sajjied mill-Mauritania li ma jkunx jissodisfa r-rekwiżiti tal-paragrafi 2.2 sa 2.4.

3.   Il-prinċipji u d-drittijiet fundamentali fuq il-post tax-xogħol

3.1.   Is-sajjieda mill-Mauritania li jkunu ttellgħu abbord biex jaħdmu fuq il-bastimenti tas-sajd tal-Unjoni Ewropea, min jaħtarhom u s-sidien tal-bastimenti tas-sajd ikkonċernati għandhom jiġu ttrattati skont il-liġijiet li japplikaw għall-implimentazzjoni tat-tmien konvenzjonijiet fundamentali tal-Organizzazzjoni Internazzjonali tax-Xogħol (l-ILO) li l-membri tagħha jridu jippromwovu u jimplimentaw skont l-istqarrija tal-1998 tagħha dwar il-prinċipji u d-drittijiet fundamentali fuq il-post tax-xogħol. Dawn il-konvenzjonijiet għandhom x'jaqsmu mal-libertà tal-assoċjazzjoni u mar-rikonoxximent fir-realtà tad-dritt li jkun hemm ftehim kollettiv, mat-tneħħija ta' kull forma ta' xogħol sfurzat jew obbligatorju, mat-tneħħija fir-realtà tal-ħaddiema tfal u mat-tneħħija tad-diskriminazzjoni b'rabta mal-impjiegi u mal-professjonijiet.

3.2.   Il-baħrin mill-Mauritania li jkunu ttellgħu abbord il-bastimenti tas-sajd tal-Unjoni Ewropea jibbenefikaw minn kuntratt tax-xogħol bil-mitkub, stabbilit skont il-liġijiet u l-ftehimiet kollettivi li japplikaw u li jinkludi d-dettalji dwar il-kundizzjonijiet tax-xogħol u tal-ħajja abbord il-bastiment.

4.   Awtorizzazzjoni temporanja biex jittellgħu abbord inqas sajjieda mill-Mauritania milli suppost

4.1.   Il-bastimenti tas-sajd tal-Unjoni Ewropea jistgħu jbaħħru mingħajr ma jkollhom abbord l-għadd minimu ta' sajjieda mill-Mauritania meħtieġ, imsemmi fil-paragrafu 1, eżatt wara li jkunu avżaw lill-awtoritajiet kompetenti tal-port tat-tlugħ abbord, meta:

(a)	l-awtorità kompetenti tal-Mauritania ma tkunx qiegħdet il-lista msemmija fil-paragrafu 1.2 għad-dispożizzjoni ta' sid il-bastiment jew tar-rappreżentant tiegħu meta dan ikun qed jirrekluta s-sajjieda;

(b)	ma jkunx hemm biżżejjed sajjieda mill-Mauritania li jkunu mħarrġin sewwa u jkollhom il-kwalifiki u l-esperjenza u jkunu adattati u jkunu jinsabu fuq il-lista msemmija fil-paragrafu 1.2;

(c)	sid il-bastiment tas-sajd jew il-kaptan li jaġixxi f'ismu ma jkunx ħalla lil wieħed mis-sajjieda mill-Mauritania jew iktar jitilgħu abbord, għalkemm dawn ikunu waslu fil-ħin fejn il-bastiment, skont il-paragrafu 2.6;

(d)

wieħed mis-sajjieda mill-Mauritania jew iktar li jkollhom jitilgħu abbord biex jaħdmu fuq il-bastiment tas-sajd ma jitfaċċawx fil-ħin meta jitħabbar it-tluq tal-bastiment. L-awtorità kompetenti tal-port tat-tlugħ abbord għandha tavża minnufih lill-Gwardakosta tal-Mauritania u lid-Direttorat marittimu reġjonali dwar dan u għandha tibgħat kopja ta' din in-notifika mill-ewwel lil sid il-bastiment tas-sajd jew lid-destinatarju li jkun qed jaġixxi f'ismu.

4.2.   Jekk sajjied mill-Mauritania li jkun ittella' abbord biex jaħdem fuq bastiment tas-sajd tal-Unjoni Ewropea jkollu jerġa' jittieħed lura lejn il-port meta l-bastiment ikun ħiereġ miż-żona tas-sajd tal-Mauritania, għal raġuni waħda jew iktar li jagħtuh id-dritt li jiġi ripatrijat, il-bastiment jista' jkompli ħiereġ 'il barra jew jerġa' jibda joħroġ 'il barra minn din iż-żona mingħajr ma jibdel is-sajjied ikkonċernat b'sajjied ieħor mill-Mauritania.

4.3.   Sabiex jiġu applikati l-paragrafi 4.1 sa 4.2, is-sajjieda mill-Mauritania li jibqgħu l-art fil-qafas ta' sistema ta' rotazzjoni abbord jew fuq l-art iddokumentata u ppjanata, imsemmija fil-paragrafu 1.6, jitqiesu bħala sajjieda li kienu abbord, dejjem jekk abbord il-bastiment ikun hemm kopji ffirmati tal-kuntratt tax-xogħol tagħhom.

5.   Pieni u multi mogħtija fil-każijiet l-oħra fejn ma jitħarisx l-għadd meħtieġ ta' sajjieda mill-Mauritania abbord

5.1.   Jekk sid il-bastiment tas-sajd ma jtellax abbord l-għadd meħtieġ ta' sajjieda mill-Mawritajna skont il-paragrafu 1 għal raġunijiet oħra minbarra dawk imsemmija fil-paragrafu 4, dan is-sid ikollu jħallas multa fissa ta' EUR 20 għal kull sajjied mill-Mauritania li ma jkunx abbord għal kull jum ta' sajd li l-bastiment ikun għadda fiż-żona tas-sajd tal-Mauritania mingħajr l-għadd meħtieġ ta' sajjieda mill-Mauritania abbord.

5.2.   Il-Ministeru għandu jibgħat fattura lil sid il-bastiment tas-sajd għall-multa li dan ikun weħel skont il-paragrafu 5.1 u l-ammont ta' din il-fattura għandu jissejjes fuq l-għadd reali ta' ġranet tas-sajd u mhux fuq il-perjodu ta' validità tal-liċenzja.

5.3.   Sid il-bastiment tas-sajd jew id-destinatarju li jkun qed jaġixxi f'ismu għandu jħallas il-fattura msemmija fil-paragrafu 5.2 fi żmien tliet xhur minn meta jinstab in-nuqqas ta' konformità msemmi fil-paragrafu 5.1 jew f'data iktar tard li tkun imniżżla fuq il-fattura. L-ammont dovut għandu jiġi ttrasferit għal ġol-kont imsemmi fil-Kapitolu I ta' dan l-Anness, imsejjaħ “Dispożizzjonijiet ġenerali”.

5.4.   In-nuqqas ta' konformità ripetut imsemmi fil-paragrafu 5.1 iwassal għas-sospensjoni awtomatika tal-liċenzja tas-sajd tal-bastiment sa ma jintlaħaq l-għadd meħtieġ ta' sajjieda mill-Mauritania mtellgħin abbord biex jaħdmu fuq il-bastiment.

5.5.   L-ammonti ttrasferiti skont il-paragrafu 5.1 jintużaw biex jitħarrġu sajjieda mill-Mauritania biss li jkunu nkitbu fl-Iskola nazzjonali tal-edukazzjoni fil-qasam marittimu u tas-sajd.

6.   Informazzjoni li għandha tingħata lill-Ministeru

6.1.   Kull Stat tal-bandiera li jkun Stat Membru tal-Unjoni Ewropea għandu jibgħat isem l-awtorità kompetenti tiegħu msemmija fil-paragrafu 2.4 lill-Ministeru abbażi ta' lista mfassla mill-Unjoni Ewropea u miżmuma minnha.

6.2.   Filwaqt li jqis il-punti (d) u (h) tal-paragrafu 2.2, l-Istat tal-bandiera jgħarraf lill-Ministeru kif xieraq, permezz tal-Unjoni Ewropea, bir-rekwiżiti tiegħu marbutin mad-dokumenti supplimentari li huwa jitlob lis-sajjieda li jkunu abbord il-bastimenti tas-sajd li jtajru l-bandiera tiegħu jew li jkunu qed jaħdmu fuqhom jagħtuh.

6.3.   Permezz tal-lista tal-ekwipaġġ imsemmija fil-paragrafu 1.7, sid il-bastiment tas-sajd jew id-destinatarju li jkun qed jaġixxi f'ismu jżomm lill-Ministeru infurmat bit-tlugħ abbord il-bastiment tiegħu tas-sajjieda mill-Mauritania biex jaħdmu fuqu.

6.4.   Malli jirċievi l-informazzjoni msemmija fil-paragrafu 6.3, il-Ministeru għandu jibgħat konferma ffirmata li jkun irċeviha lil sid il-bastiment tas-sajd jew lid-destinatarju li jkun qed jaġixxi f'ismu.

6.5.   Sid il-bastiment tas-sajd jew id-destinatarju li jkun qed jaġixxi f'ismu għandu jibgħat kopja tal-kuntratt tax-xogħol direttament lill-Ministeru fi żmien xahrejn minn meta dan jiġi ffirmat.

6.6.   Malli jirċievi l-kopja tal-kuntratt tax-xogħol skont il-paragrafu 6.5, il-Ministeru għandu jibgħat konferma ffirmata li jkun irċeviha lil sid il-bastiment tas-sajd jew lid-destinatarju li jkun qed jaġixxi f'ismu.

6.7.   F'każ li jkun hemm xi diffikultà fl-applikazzjoni tad-dispożizzjonijiet ta' dan il-Kapitolu, iż-żewġ Partijiet għandhom jikkonsultaw lil xulxin, fosthom waqt laqgħa tal-Kumitat Konġunt, sabiex jaqsmu bejniethom l-informazzjoni kollha li tista' tkun utli dwar din l-applikazzjoni u jidentifikaw l-iktar soluzzjonijiet adattati biex jingħelbu dawn id-diffikultajiet.

KAPITOLU X

OSSERVATURI XJENTIFIĊI

1.   Sistema ta' osservazzjoni hija stabbilita abbord il-bastimenti tal-Unjoni Ewropea.

2.   Għal kull kategorija tas-sajd iż-żewġ Partijiet għandhom jagħżlu mill-inqas żewġ bastimenti fis-sena li għandhom itellgħu abbord osservatur xjentifiku mill-Mauritania, ħlief għall-bastimenti tas-sajd għat-tonn bit-tartaruni, li għalihom it-tlugħ abbord isir fuq talba tal-Ministeru. Fil-każijiet kollha, jista' jkun hemm osservatur wieħed biss kull darba għal kull bastiment.

3.   L-osservatur xjentifiku għandu jibqa' abbord bastiment għal vjaġġ wieħed. Madankollu, fuq talba espliċita ta' waħda mill-Partijiet, dan it-tlugħ abbord jista' jiġi estiż għal diversi vjaġġi skont it-tul medju tal-vjaġġi previsti għal bastiment partikulari.

4.   Il-Ministeru għandu jgħarraf lill-Unjoni Ewropea bl-ismijiet tal-osservaturi xjentifiċi maħtura, li jkollhom id-dokumenti meħtieġa, tal-anqas sebat ijiem tax-xogħol qabel id-data prevista għat-tlugħ abbord tagħhom.

5.   L-ispejjeż kollha marbutin mal-attivitajiet tal-osservaturi xjentifiċi, inklużi s-salarju, ir-rimunerazzjoni u l-kumpens tal-osservaturi għandu jħallashom il-Ministeru.

6.   Il-Ministeru għandu jagħmel l-arranġamenti kollha għat-tlugħ abbord tal-osservatur xjentifiku u għall-iżbark tiegħu.

7.   Il-kundizzjonijiet tal-osservatur xjentifiku abbord il-bastiment għandhom ikunu l-istess bħal dawk tal-uffiċjali tal-bastiment.

8.   L-osservatur xjentifiku għandu jingħata l-faċilitajiet kollha meħtieġa biex iwettaq il-funzjonijiet tiegħu. Il-kaptan għandu jagħtih aċċess għall-mezzi tal-komunikazzjoni meħtieġa biex iwettaq il-funzjonijiet tiegħu, għad-dokumenti marbutin direttament mal-attivitajiet tas-sajd tal-bastiment, jiġifieri l-ġurnal ta' abbord tas-sajd, il-ġurnal tas-sajd supplimentari u l-ġurnal tan-navigazzjoni, kif ukoll għall-partijiet tal-bastiment meħtieġa biex jiġi ffaċilitat ix-xogħol ta' osservazzjoni tiegħu.

9.   L-osservatur xjentifiku għandu jirrapporta lill-kaptan tal-bastiment magħżul lejlet id-data stabbilita għat-tlugħ abbord tiegħu. F'każ li l-osservatur xjentifiku ma jitfaċċax, il-kaptan tal-bastiment jinforma lill-Ministeru u lill-Unjoni Ewropea. F'dan il-każ, il-bastiment għandu l-jedd jitlaq mill-port. Madankollu, il-Ministeru jista', mingħajr dewmien u bi spejjeż tiegħu, itella' abbord osservatur xjentifiku ġdid, mingħajr ma jtellef l-attività tas-sajd tal-bastiment.

10.   L-osservatur xjentifiku għandu jkollu:

—	kwalifika professjonali; u

—	esperjenza adegwata fil-qasam tas-sajd u għarfien tajjeb tad-dispożizzjonijiet ta' dan il-Protokoll.

11.   L-osservatur xjentifiku għandu jara li l-bastimenti tal-Unjoni Ewropea li jkunu qegħdin jaħdmu fiż-żona tas-sajd tal-Mauritania jħarsu d-dispożizzjonijiet ta' dan il-Protokoll.

Huwa għandu jagħmel rapport dwar dan. B'mod partikulari, hu għandu:

—	josserva l-attivitajiet tas-sajd tal-bastimenti;

—	jivverifika l-pożizzjoni tal-bastimenti li jkunu qed iwettqu attivitajiet tas-sajd;

—	jieħu kampjuni bijoloġiċi bħala parti minn programmi xjentifiċi;

—	jieħu nota tal-irkaptu tas-sajd u tal-malji tax-xbieki użati.

12.   Il-kompiti kollha ta' osservazzjoni huma limitati għall-attivitajiet tas-sajd u għall-attivitajiet relatati li huma rregolati minn dan il-Protokoll.

13.   L-osservatur xjentifiku għandu:

—	jieħu l-miżuri x-xierqa kollha sabiex il-kundizzjonijiet tat-tlugħ abbord tiegħu, kif ukoll il-preżenza tiegħu fuq il-bastiment, ma jinterrompux u lanqas itellfu l-ħidmiet tas-sajd;

—	juża l-apparat u l-proċeduri tal-miżuri miftehma għall-kejl tal-malji tax-xbieki użati fil-qafas ta' dan il-Protokoll;

—	jirrispetta l-proprjetà u t-tagħmir li jinstabu fuq il-bastiment, kif ukoll il-kunfidenzjalità ta' kull dokument li huwa tal-imsemmi bastiment.

14.   Fi tmiem il-perjodu ta' osservazzjoni u qabel ma jinżel minn fuq il-bastiment, l-osservatur xjentifiku għandu jagħmel rapport skont il-mudell li jidher fl-Appendiċi 11 ta' dan l-Anness. Għandu jiffirmah fil-preżenza tal-kaptan li jista' jżid jew jitlob li jiżdiedu l-osservazzjonijiet kollha li huwa jqis li huma utli u jiffirma taħthom. Kopja tar-rapport tingħata lill-kaptan tal-bastiment meta l-osservatur xjentifiku jitniżżel l-art, kif ukoll lill-Ministeru u lill-Unjoni Ewropea.

KAPITOLU XI

PROĊEDURI GĦALL-IMPLIMENTAZZJONI TAS-SAJD SPERIMENTALI

1.   Iż-żewġ Partijiet għandhom jiddeċiedu flimkien dwar (i) l-operaturi Ewropej li jistgħu jipprattikaw is-sajd sperimentali; (ii) il-perjodu l-aktar adattat għal dan il-għan; u (iii) l-kundizzjonijiet li japplikaw. Sabiex ikun iffaċilitat ix-xogħol esploratorju tal-bastimenti, il-Ministeru għandu jgħaddilhom l-informazzjoni xjentifika u d-dejta fundamentali l-oħra disponibbli. Iż-żewġ Partijiet għandhom jaqblu dwar il-Protokoll xjentifiku li għandu jintuża bħala l-bażi għal sajd sperimentali bħal dan, u li għandu jintbagħat lill-operaturi kkonċernati.

2.   Is-settur tas-sajd tal-Mauritania għandu jiġi involut ħafna (koordinazzjoni u djalogu dwar il-kundizzjonijiet għall-implimentazzjoni tas-sajd sperimentali).

3.   Il-kampanji tas-sajd sperimentali ma għandhomx idumu aktar minn sitt xhur u anqas minn tliet xhur, sakemm ma jkunx deċiż mod ieħor bi ftehim bejn il-Partijiet.

4.   L-Unjoni Ewropea għandha tibgħat it-talbiet għal-liċenzji tas-sajd sperimentali lill-Mauritania. Hija għandha tibagħtilhom fajl tekniku li jispeċifika:

(a)	il-karatteristiċi tekniċi tal-bastiment;

(b)	il-livell ta' għarfien espert tal-uffiċjali tal-bastiment b'rabta mas-sajd;

(c)	il-proposta għall-parametri tekniċi tal-kampanja tas-sajd sperimentali (kemm se ddum għaddejja l-kampanja, l-irkaptu li se jintuża, ir-reġjuni li se jiġu esplorati, eċċ.);

(d)	il-metodu ta' finanzjament.

5.   Jekk ikun hemm bżonn, il-Mauritania għandha torganizza djalogu dwar l-aspetti tekniċi u finanzjarji mal-Kummissjoni u possibilment ukoll mas-sidien tal-bastimenti kkonċernati.

6.   Qabel ma jibda l-kampanja tas-sajd sperimentali, il-bastiment tal-Unjoni Ewropea għandu jidħol f'port tal-Mauritania biex jiġi spezzjonat hekk kif previst fil-paragrafu 6 tal-Kapitolu II ta' dan l-Anness.

7.   Qabel il-bidu tal-kampanja tas-sajd sperimentali, is-sidien iridu jibagħtu lill-Mauritania u lill-Unjoni Ewropea:

(a)	dikjarazzjoni tal-qabdiet li jkunu diġà abbord;

(b)	il-karatteristiċi tekniċi tal-irkaptu tas-sajd li jkun se jintuża matul il-kampanja tas-sajd sperimentali;

(c)	garanzija li huma se jissodisfaw ir-rekwiżiti tar-regolamenti tal-Mauritania marbutin mas-sajd;

8.   Matul il-kampanja tas-sajd sperimentali fuq il-baħar, is-sidien ikkonċernati għandhom:

(a)

jibagħtu lill-Ministeru u lill-Kummissjoni Ewropea rapport fil-ġimgħa dwar il-qabdiet li jkunu saru kuljum u waqt kull sajda, li jkun jinkludi deskrizzjoni tal-parametri tekniċi tal-kampanja tas-sajd sperimentali (il-pożizzjoni, il-fond, id-data u l-ħin, il-qabdiet u osservazzjonijiet jew kummenti oħrajn);

(b)	jindikaw il-pożizzjoni, il-veloċità u r-rotta tal-bastiment permezz tal-VMS;

(c)

jaraw li jkun hemm osservatur xjentifiku abbord li jkun ċittadin tal-Mauritania jew li jkun ingħażel mill-awtoritajiet tal-Mauritania. Ir-rwol tal-osservatur huwa li jiġbor informazzjoni xjentifika mill-qabdiet kif ukoll li jieħu kampjuni minnhom. L-osservatur għandu jiġi ttrattat bħala uffiċjal tal-bastiment u sid il-bastiment għandu jħallas l-ispejjeż tal-għajxien tiegħu għal kemm idum abbord il-bastiment. Id-deċiżjoni dwar iż-żmien li l-osservatur iqatta' abbord, dwar kemm għandu jdum abbord u dwar il-portijiet tat-tlugħ abbord u tal-iżbark tiegħu għandha tittieħed bi ftehim mal-awtoritajiet tal-Mauritania. Sakemm il-Partijiet ma jiddeċidux mod ieħor, il-bastiment qatt ma għandu jkun obbligat jidħol fil-port aktar minn darba kull xahrejn,

(d)	iżda għandha ssirlu spezzjoni qabel ma joħroġ miż-żona tas-sajd tal-Mauritania jekk l-awtoritajiet tal-Mauritania jitolbu dan u

(e)	għandu jħares ir-regolamenti tal-Mauritania marbutin mal-qasam tas-sajd.

9.   Il-qabdiet li jsiru matul il-kampanja tas-sajd sperimentali xjentifika, inklużi l-qabdiet inċidentali, għandhom jibqgħu l-proprjetà ta' sid il-bastiment, dejjem jekk jitħarsu d-dispożizzjonijiet stipulati mill-Kumitat Konġunt f'dan ir-rigward u d-dispożizzjonijiet tal-Protokoll xjentifiku.

10.   Il-Ministeru għandu jaħtar persuna ta' kuntatt li tkun inkarigata tittratta kull problema mhux prevista li tista' tinqala' u li tista' ttellef l-iżvilupp tas-sajd sperimentali.

ANNESS 2

APPOĠĠ FINANZJARJU GĦALL-PROMOZZJONI TAS-SAJD RESPONSABBLI U SOSTENIBBLI

1.   Suġġett u ammonti

Skont l-Artikolu 3 tal-Protokoll, l-appoġġ finanzjarju għall-promozzjoni tas-sajd responsabbli u sostenibbli huwa magħmul minn erba' oqsma ta' intervent, kif ġej:

	Azzjonijiet possibbli
Prijorità I: KOOPERAZZJONI XJENTIFIKA U TEKNIKA U TAĦRIĠ	Il-monitoraġġ u l-ġestjoni tar-riżorsi u l-implimentazzjoni tal-pjanijiet ta' ġestjoni tas-sajd
Prijorità II: SORVELJANZA	Is-sorveljanza marittima fil-qasam tas-sajd
Prijorità III: L-AMBJENT	Il-preżervazzjoni tal-ambjent tal-baħar u kostali
Prijorità IV: INFRASTRUTTURA TAL-IŻVILUPP	Appoġġ għall-iżvilupp tal-industriji tal-ipproċessar tal-prodotti tal-baħar fuq l-art

2.   Qafas ta' implimentazzjoni

L-Unjoni Ewropea u l-Mauritania għandhom jiftiehmu bejniethom, fil-Kumitat Konġunt previst fl-Artikolu 10 tal-Ftehim, wara d-dħul fis-seħħ ta' dan il-Protokoll, dwar il-kundizzjonijiet tal-eliġibbiltà għal dan l-appoġġ, il-bażi legali, l-ipprogrammar, il-monitoraġġ u l-evalwazzjoni kif ukoll it-termini ta' trasferiment lill-Mauritania.

3.   Trasparenza u governanza tal-fondi tal-appoġġ settorjali

Sabiex il-fondi tal-appoġġ settorjali jkunu amministrati b'mod effettiv u trasparenti, il-mekkaniżmu ta' implimentazzjoni tal-appoġġ settorjali huwa maħsub bħala strument li għandu miegħu miżuri sempliċi ta' verifika min-naħa taż-żewġ Partijiet, li jinkludu b'mod partikulari dan li ġej:

—	avviż dwar it-trasferiment tal-ħlas parzjali tal-appoġġ settorjali min-naħa tal-UE (dokument li l-Unjoni Ewropea għandha tibgħat lill-Mauritania);

—	trażmissjoni tal-liġi dwar il-finanzi u/jew ta' kull att legali ieħor li jiġġustifika l-allokazzjoni tal-ħlas parzjali ttrasferit għal ġol-kont imsemmi fil-paragrafu 3.10 tal-Artikolu 3 tal-Protokoll għall-appoġġ settorjali (dokument li l-Mauritania għandha tibgħat lill-Unjoni Ewropea);

—

l-effettività tat-twettiq tal-proġetti fuq il-post, l-iktar permezz ta' rapporti tal-Unjoni Ewropea li jitfasslu mill-entitajiet li huma responsabbli għat-twettiq ta' dawn il-proġetti, permezz ta' missjonijiet konġunti tal-UE u tal-Ministeru tas-Sajd li jitwettqu fuq il-post, permezz tal-viżibbiltà ta' dawn l-azzjonijiet fil-mezzi tax-xandir u tal-ftuħ uffiċjali tagħhom bis-sehem tal-Kap tad-Delegazzjoni tal-UE.

4.   Programmazzjoni multiannwali

Skont l-Artikolu 2(4) tal-Protokoll, sa tliet xhur minn meta jitwaqqaf, il-grupp eżekuttiv għandu jibgħat liż-żewġ Partijiet il-proposta għall-programmazzjoni multiannwali marbuta mal-implimentazzjoni tal-fondi tal-appoġġ settorjali, li għandu jkun fiha, b'mod partikulari:

—	il-proġetti li jistgħu jiġu ffinanzjati;

—	l-entitajiet kompetenti li huma responsabbli għall-implimentazzjoni;

—	ir-rekwiżiti finanzjarji ta' kull proġett;

—	indikatur ta' monitoraġġ għal kull proġett;

—	l-iskeda kronoloġika indikattiva tal-implimentazzjoni;

—	indikaturi tal-impatt fuq il-qasam tas-sajd tal-Mauritania;

—	t-tqassim tal-ammonti kull sena u għal kull proġett.

Il-Partijiet jistgħu jibagħtu l-kummenti tagħhom dwar il-programmazzjoni multiannwali sa tletin jum minn meta jirċevuha. Wara l-Partijiet japprovaw din il-programmazzjoni flimkien waqt il-laqgħa tal-Kumitat Konġunt. Sabiex tingħata din l-approvazzjoni, il-Kumitat Konġunt se jiżgura li l-pakketti finanzjarji allokati għall-proġetti differenti u t-tqassim tagħhom fis-sena jkunu koerenti man-natura ta' dawn il-proġetti u mal-kundizzjonijiet u l-limitazzjonijiet tal-implimentazzjoni tagħhom.

5.   L-indikaturi ta' monitoraġġ u tal-impatt

Indikatur ta' monitoraġġ

Għal kull proġett imniżżel fil-programmazzjoni tiegħu, il-grupp eżekuttiv imsemmi fl-Artikolu 3 tal-Protokoll għandu jidentifika indikatur ta' monitoraġġ billi jispeċifika l-għan aħħari, il-mira li għandha tintlaħaq kull sena tat-twettiq (N + 1, 2, 3) u ammont allokat għal dan l-indikatur fis-sena bħala frazzjoni tal-ħlas parzjali mogħti għall-appoġġ settorjali. L-indikatur irid ikun jista' jiġi vverifikat b'mod kwantitattiv.

Indikaturi tal-impatt fuq il-qasam tas-sajd tal-Mauritania

Għal kull proġett imniżżel fil-programmazzjoni tiegħu, il-grupp eżekuttiv imsemmi fl-Artikolu 3 tal-Protokoll għandu jibgħat sett ta' indikaturi tal-impatt fuq il-qasam tas-sajd. Dawn l-indikaturi għandhom jissejsu fuq dejta statistika li tkun ġiet ippubblikata jew le u li tkun tista' tiġi vverifikata mil-lat kwalitattiv jew kwantitattiv, u għandhom jingħataw b'mod li jagħtu valur lill-benefiċċji ekonomiċi u soċjali li kull proġett li jkun iffinanzjat mill-appoġġ settorjali mistenni jġib miegħu.

6.   Programmazzjoni annwali u rappurtar

Skont l-Artikolu 3 tal-Protokoll, għandu jkun hemm programmazzjoni annwali tal-appoġġ settorjali, u għandu jkun hemm monitoraġġ kontinwu tiegħu u rappurtar annwali tar-riżultati tiegħu.

Skont il-paragrafu 3.2 tal-Artikolu 3 tal-Protokoll, fil-31 ta' Diċembru ta' kull sena, il-grupp eżekuttiv għandu jibgħat rapport dwar il-progress li jkun sar b'rabta mal-proġetti implimentati matul is-sena li jkun għadha kif għaddiet, kif ukoll il-programmazzjoni tal-proġetti għas-sena ta' wara, skont il-mudell standard mogħti f'dan l-Anness, li jinkludi b'mod partikulari l-affarijiet li ġejjin:

—	tfakkira tal-programmazzjoni tal-appoġġ settorjali għas-sena N u tal-għanijiet għas-sena N li jkun għadha kif għaddiet għal kull proġett;

—	l-indikaturi tar-riżultati u l-miri stabbiliti, milħuqin u mhux, kif ukoll dettalji dwar id-diffikultajiet li jkunu ġew innutati u l-miżuri korrettivi li jkunu ttieħdu u dwar l-użu tal-ħlas parzjali li l-UE tkun ittrasferiet;

—

l-evalwazzjoni tal-ħlas parzjali annwali li l-UE għandha tittrasferixxi abbażi tal-ammont li għandu jitħallas għal kull indikatur li jkun intlaħaq. Għal kull mira stabbilita għal kull proġett li tkun intlaħqet matul is-sena N, hemm frazzjoni tal-pakkett finanzjarju annwali korrispondenti hekk kif speċifikat fil-programmazzjoni annwali;

—	preżentazzjoni tal-programmazzjoni annwali għas-sena N + 1 u aġġornament tal-programmazzjoni multiannwali.

Ir-rapport dwar il-progress li jkun saru matul is-sena N u l-programmazzjoni għas-sena N+1 għandhom jiġu approvati b'mod konġunt waqt laqgħa tal-Kumitat Konġunt sa mhux iktar tard minn 30 jum wara li jintbagħtu. F'każ li ma tkunx tista' tiġi organizzata laqgħa tal-Kumitat Konġunt f'dan il-perjodu, l-approvazzjoni tista' tingħata bil-miktub permezz ta' skambju ta' ittri.

Iż-żewġ Partijiet jinkuraġġixxu l-missjonijiet tekniċi konġunti, li jistgħu jiġu organizzati fuq talba ta' xi waħda miż-żewġ Partijiet, u li jippermettu li tinġabar l-informazzjoni addizzjonali kollha meħtieġa għall-ġestjoni t-tajba tal-fondi.

7.   Proċeduri għat-trasferiment tal-appoġġ settorjali min-naħa tal-Unjoni Ewropea

Ladarba l-programmazzjoni għas-sena N + 1 tiġi approvata, l-Unjoni Ewropea tagħmel it-trasferiment tal-ħlas parzjali tal-appoġġ settorjali. L-Unjoni Ewropea għandha tittrasferixxi l-ħlas parzjali tal-appoġġ settorjali abbażi ta' approċċ imsejjes fuq ir-riżultati tal-implimentazzjoni tal-proġetti, kif ġej:

(i)	fl-ewwel sena tal-Protokoll jiġi ttrasferit ammont tal-appoġġ settorjali li jikkorrispondi għall-ammont approvat mill-Kumitat Konġunt fil-programmazzjoni multiannwali u fil-programmazzjoni annwali;

(ii)

fis-snin ta' wara, il-ħlasijiet parzjali tal-appoġġ settorjali jiġu ttrasferiti kif ġej: —   Trasferiment tal-ammont kollu: L-Unjoni Ewropea tittrasferixxi 100 % tal-pakkett finanzjarju annwali (EUR X miljuni) għas-sena N + 1 jekk ikunu ntlaħqu l-indikaturi tal-monitoraġġ kollha għal kull proġett għas-sena N, hekk kif stabbiliti fil-programmazzjoni annwali. —   Trasferiment ta' parti mill-ammont biss: Għal proġett partikulari, jekk l-indikatur ta' monitoraġġ ma jintlaħaqx kollu, l-ammont ittrasferit għas-sena N + 1 ikun jikkorrispondi għas-somma (i) tal-perċentwali tal-ilħiq tal-indikatur u (ii) tal-frazzjoni tal-pakkett finanzjarju annwali tal-appoġġ settorjali allokata għall-proġett ikkonċernat. Il-perċentwali tal-ilħiq tal-indikatur jikkorrispondi għar-relazzjoni bejn (i) il-livell tal-indikatur li jkun intlaħaq fir-realtà u (ii) il-livell tal-indikatur fil-mira li għandu jintlaħaq matul is-sena kkonċernata. L-ammont mhux ittrasferit mill-frazzjoni tal-pakkett finanzjarju annwali allokata għall-proġett jista' jiġi ttrasferit fi żmien sitt xhur mid-data inizjali tar-rilaxx tal-fondi jekk l-indikatur tar-riżultati stabbilit għas-sena N jintlaħaq għalkollox. Jekk dan ma jkunx il-każ, l-ammont mhux ittrasferit mill-frazzjoni tal-pakkett finanzjarju annwali allokata għall-proġett jista' jiġi ttrasferit għall-eżerċizzju ta' reviżjoni tas-sena ta' wara. —   L-ebda trasferiment: jekk il-livell ta' twettiq tal-indikatur ta' proġett ma jingħatax fir-rapport dwar il-progress jew jekk dan il-livell ma jkunx iġġustifikat fih, l-UE ma tistax tittrasferixxi l-frazzjoni tal-pakkett finanzjarju annwali allokata għall-proġett ikkonċernat għas-sena N + 1. Il-frazzjoni mhix ittrasferita mill-pakkett finanzjarju annwali allokat għall-proġett tista' tiġi ttrasferita wara, fi żmien sitt xhur mid-data inizjali tar-rilaxx tal-fondi, jekk l-indikatur tar-riżultati stabbilit għas-sena N fl-aħħar mill-aħħar jingħata jew jiġi ġġustifikat;

(iii)

meta jkun qed japprova l-programmazzjoni għas-sena N + 1, il-Kumitat Konġunt għandu jqis il-livell tal-użu fir-realtà tal-pakketti finanzjarji annwali allokati għal kull proġett fis-sena N;

(iv)

meta jkun hemm ċirkustanzi indipendenti li ma jkunux fil-volontà ta' min ikun qed imexxi l-proġett li jwasslu għal tfixkil fl-implimentazzjoni prevista fil-bidu għal dak il-proġett, meta jkun qed japprova l-programmazzjoni għas-sena N + 1, il-Kumitat Konġunt jista' jiddeċiedi li japplika livell ta' trasferiment differenti minn dak li joħroġ li kieku kellu japplika r-regoli msemmija fil-punt (ii), b'mod eċċezzjonali u abbażi ta' ġustifikazzjoni mogħtija kif xieraq minn min ikun qed imexxi l-proġett.

8.   Reviżjoni u sospensjoni

F'każ li jkun hemm diffikultajiet fl-implimentazzjoni tad-dispożizzjonijiet previsti f'dan l-Anness u fl-Artikolu 3 tal-Protokoll, iż-żewġ Partijiet għandhom jiskambjaw mingħajr dewmien informazzjoni dwar il-miżuri korrettivi li jippermettu li dawn jingħelbu.

F'każ li ma jitħarsux il-proċeduri previsti f'dan l-Anness u fl-Artikolu 3 tal-Protokoll, iż-żewġ Partijiet għandhom jiskambjaw mingħajr dewmien informazzjoni dwar il-miżuri korrettivi li għandhom jittieħdu sabiex jerġa' jkun hemm konformità mal-implimentazzjoni tal-appoġġ settorjali. L-Unjoni Ewropea tirriżerva d-dritt li tissospendi kull ħlas ġdid skont l-Artikolu 10 tal-Protokoll jekk ikun il-każ.

9.   Viżibbiltà

Il-Mauritania se tiżgura l-viżibbiltà tal-azzjonijiet implimentati permezz ta' dan l-appoġġ. Għal dan il-għan, il-benefiċjarji għandhom jikkoordinaw mad-Delegazzjoni tal-Unjoni Ewropea f'Nouakchott sabiex jimplimentaw il-“linji gwida marbutin mal-viżibbiltà” kif iddefiniti mill-Kummissjoni Ewropea. B'mod partikulari, kull proġett għandu jkollu miegħu klawżola ta' viżibbiltà għall-appoġġ tal-Unjoni Ewropea, jiġifieri permezz tal-preżentazzjoni tal-logo (“is-simbolu tal-UE”). Fl-aħħar nett, il-Mauritania għandha torganizza kull inawgurazzjoni u jwettquha b'kooperazzjoni mill-qrib mal-Unjoni Ewropea.

MUDELL

RAPPURTAR/RAPPORT DWAR L-UŻU TAL-ĦLASIJIET PARZJALI TAL-APPOĠĠ SETTORJALI

I.   Proġetti mnedija fil-qafas tal-appoġġ settorjali

Matul is-sena [N] tal-Protokoll, tnedew [X] proġetti u komplew jitwettqu [Y] proġetti oħra, skont id-deċiżjonijiet li ttieħdu waqt il-laqgħa tal-Kumitat Konġunt ta' [xahar/sena]. Hawn taħt qed tingħata, bħala tfakkira biss, deskrizzjoni ta' dawn il-proġetti u tal-progress li sar fuqhom s'issa, kif ukoll il-benefiċċji li mistennija joħorġu minnhom:

(1)   Il-proġett numru 1

(a)	Deskrizzjoni tal-proġett

(b)	Progress li sar b'rabta mal-proġett

(c)	Tfakkira dwar il-ħlasijiet li saru qabel fil-qafas tal-proġett u tal-parti mill-appoġġ settorjali allokata għalih

(d)	Tfakkira dwar il-benefiċċji ekonomiċi li mistennija jkun hemm jew aġġornament tagħhom

(2)   Il-proġett numru 2

(a)	Deskrizzjoni tal-proġett

(b)	Progress li sar b'rabta mal-proġett

(c)	Tfakkira dwar il-ħlasijiet li saru qabel fil-qafas tal-proġett u tal-parti mill-appoġġ settorjali allokata għalih

(d)	Tfakkira dwar il-benefiċċji ekonomiċi li mistennija jkun hemm jew aġġornament tagħhom

(3)   Il-proġett N

(a)	Deskrizzjoni tal-proġett

(b)	Progress li sar b'rabta mal-proġett

(c)	Tfakkira dwar il-ħlasijiet li saru qabel fil-qafas tal-proġett u tal-parti mill-appoġġ settorjali allokata għalih

(d)	Tfakkira dwar il-benefiċċji ekonomiċi li mistennija jkun hemm jew aġġornament tagħhom

II.   Sommarju tal-proġetti mnedija fis-sena N

Is-sommarju ta' hawn taħt, mogħti fil-forma ta' tabella, jagħti l-livelli ta' twettiq tal-indikaturi ta' monitoraġġ stabbiliti matul is-sena attwali kif ukoll il-flussi finanzjarji tal-proġett, kif ġej:

Proġett	Investiment totali (f'MRO)	Ammont tal-appoġġ settorjali allokat għall-proġett fis-sena N (f'miljuni ta' euro)	Indikatur ta' monitoraġġ għall-perjodu taż-żmien li fih idum għaddej il-proġett	Mira tal-indikatur għas-sena N	Twettiq fis-sena N	Perċentwali tal-ilħiq tal-indikatur fis-sena N
Il-proġett numru 1:
Il-proġett numru 2:
Il-proġett numru 3:
Il-proġett N:
Ammont totali		X miljuni ta' euro

III.   Preżentazzjoni tal-proġetti għas-sena N + 1

Proġett	Investiment totali (f'MRO)	Ammont inizjali tal-appoġġ settorjali allokat għall-proġett għas-sena attwali (f'miljuni ta' euro) (1)	Indikatur ta' monitoraġġ	Tfakkira tal-qagħda tal-indikatur f'perċentwali tal-ilħiq għas-sena N–1	Mira tal-indikatur għal tmiem is-sena attwali	Ammont totali tal-appoġġ settorjali allokat għall-proġett matul is-sena (f'miljuni ta' euro)
Il-proġett numru 1:
Il-proġett numru 2:
Il-proġett numru 3:
Il-proġett N:
Ammont totali						X miljuni ta' euro

IV.   Proposta għat-trasferiment

Wara li qies din l-evalwazzjoni kif ukoll il-kriterji li bihom saru l- III. Proposta għal trasferiment Fid-dawl tal-imsemmija evalwazzjoni, kif ukoll tal-kriterji għall-ħlasijiet parzjali stabbiliti fil-punt ta' hawn fuq, il-grupp eżekuttiv iqis li l-progress li sar b'rabta mal-implimentazzjoni tal-appoġġ settorjali jiġġustifika trasferiment ta' [speċifika l-ammont totali].

Annessi 1. Talba għat-trasferiment 2. Provi dokumentarji (għall-indikaturi kollha)

---

(1)  Dan l-ammont jikkorrispondi għas-sehem tal-kwota tal-appoġġ settorjali allokat għall-proġett meta wieħed jassumi li l-ħlas parzjali għas-sena ta' qabel ikun ġie ttrasferit kollu.