5.5.2015

Il-Ġurnal Uffiċjali tal-Unjoni Ewropea

L 114/1

REGOLAMENT TA' IMPLIMENTAZZJONI TAL-KUMMISSJONI (UE) 2015/712

tat-28 ta' April 2015

li jemenda r-Regolament (UE) Nru 103/2012 dwar il-klassifikazzjoni ta' ċerti prodotti fin-Nomenklatura Magħquda

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament tal-Kunsill (KEE) Nru 2658/87 tat-23 ta' Lulju 1987 dwar in-nomenklatura tat-tariffa u l-istatistika u dwar it-Tariffa Doganali Komuni ta' Dwana (1), u b'mod partikolari l-Artikolu 9(1)(a) tiegħu,

Billi:

(1)	Ir-Regolament tal-Kunsill (UE) Nru 953/2013 (2) emenda l-Anness I tar-Regolament (KEE) Nru 2658/87 u ssostitwixxa l-kodiċijiet NM 8528 59 10 , 8528 59 40 u 8528 59 80 permezz tal-kodiċijiet NM 8528 59 20 , 8528 59 31 , 8528 59 39 u 8528 59 70 .

(2)

Ir-Regolament ta' Implimentazzjoni tal-Kummissjoni (UE) Nru 103/2012 (3) dwar il-klassifikazzjoni tal-prodotti, adottat sabiex tiġi żgurata l-applikazzjoni uniformi tan-Nomenklatura Magħquda stabbilita bir-Regolament (KEE) Nru 2658/87, jagħmel referenza għall-kodiċi NM li ma għadhiex teżisti. Għalhekk din għandha tiġi emendata, sabiex tqis il-kodiċi NM xierqa fis-seħħ.

(3)	Il-Kumitat tal-Kodiċi Doganali ma ressaqx opinjoni fil-limitu taż-żmien li ġie stabbilit mill-President tiegħu,

ADOTTAT DAN IR-REGOLAMENT:

Artikolu 1

L-Anness tar-Regolament ta' Implimentazzjoni (UE) Nru 103/2012 hu sostitwit bit-test li jinsab fl-Anness ta' dan ir-Regolament.

Artikolu 2

Dan ir-Regolament jidħol fis-seħħ fl-għoxrin jum wara l-pubblikazzjoni tiegħu f'Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, it-28 ta' April 2015.

Għall-Kummissjoni,

F'isem il-President,

Heinz ZOUREK

Direttur Ġenerali għat-Tassazzjoni u l-Unjoni Doganali

(1) ĠU L 256, 7.9.1987, p. 1.

(2) Ir-Regolament tal-Kummissjoni (UE) Nru 953/2013 tas-26 ta' Settembru 2013 li jemenda l-Anness I tar-Regolament tal-Kunsill (KEE) Nru 2658/87 dwar in-nomenklatura tat-tariffa u l-istatistika u dwar it-Tariffa Doganali Komuni (ĠU L 263, 5.10.2013, p. 4).

(3) Ir-Regolament ta' Implimentazzjoni tal-Kummissjoni (UE) Nru 103/2012 tas-7 ta' Frar 2012 dwar il-klassifikazzjoni ta' ċerti prodotti fin-Nomenklatura Magħquda (ĠU L 36, 9.2.2012, p. 17).

ANNESS

“ANNESS

Deskrizzjoni tal-prodotti

Klassifikazzjoni

(Kodiċi-NM)

Raġunijiet

(1)

(2)

(3)

Pannell ta' skrin modulari mhux armat (hekk imsejjaħ ‘ħajt LED’), li jikkonsisti minn ħafna moduli fil-forma ta' madum, b'kull maduma jkollha daqs bejn wieħed u ieħor ta' 38 × 38 × 9 cm.

Kull maduma fiha dijodji li jarmu d-dawl (LEDs) aħmar, aħdar u ikħal u riżoluzzjoni ta' 16 × 16-il pixel, bid-daqs ta' kull tikka jkun 24 mm, luminożità ta' 2 000 cd/m2 u frekwenza ta' ripetizzjoni ta' aktar minn 300 Hz. Ikunu jinkludu wkoll iċ-ċirkwiti elettroniċi tat-tħaddim.

Il-pannell jiġi ppreżentat flimkien ma' sistema ta' pproċessar li tinkludi:

—	proċessur tal-vidjo li jaċċetta sinjali ta' diversi tipi (bħal CVBS, Y/C, YUV/RGB, (HD-)SDI jew DVI) u li jippermetti li l-immaġini/il-vidjo j/tiġi aġġustat/a għad-daqs tal-pannell tal-iskrin,

—	proċessur tas-sinjal li jippermetti l-immappajr fuq il-pannell tal-iskrin tal-pixels mis-sinjal riċevut.

Is-sinjal ipproċessat jintbagħat mill-proċessur tas-sinjal lil distributur tad-dejta bl-użu ta' kejbils tal-fibra ottika. Id-distributur tad-dejta min-naħa tiegħu jibgħat id-dejta lid-diversi madumiet tal-pannell tal-iskrin.

L-iskrin huwa ppreżentat bħala adattat għal avvenimenti sportivi jew ta' divertiment, fis-sinjal ta' reklamar, eċċ., iżda mhux adattat għal wiri mill-qrib.

8528 59 39

Il-klassifikazzjoni hija ddeterminata mir-regoli ġenerali 1, 2(a) u 6 għall-interpretazzjoni tan-Nomenklatura Magħquda, u l-kliem tal-kodiċi NM 8528 , 8528 59 u 8528 59 39 .

Billi l-pannell tal-iskrin huwa kapaċi juri l-vidjo ma jistax jitqies bħala apparat elettriku għal skopijiet ta' senjalar bl-użu ta' indikazzjoni viżwali. Il-klassifikazzjoni taħt l-intestatura 8531 bħala pannell tal-iskrin ta' indikazzjoni hija għalhekk eskluża.

Minħabba l-karatteristiċi oġġettivi tiegħu, bħad-daqs tal-iskrin, l-istandards tat-televiżjoni appoġġjat (CVBS) u l-modalità ta' vidjo, id-daqs ta' kull tikka li mhux adattat għall-wiri mill-qrib u l-luminożità qawwija, l-użu maħsub tal-pannell tal-iskrin hu għal avvenimenti sportivi jew ta' divertiment, fis-sinjal ta' reklamar, eċċ. Għaldaqstant, ma jitqiesx li hu ta' tip użat biss jew prinċipalment f'sistema awtomatika tal-ipproċessar tad-dejta tal-intestatura 8471 Il-klassifikazzjoni taħt is-subintestatura 8528 51 00 hija għaldaqstant eskluża wkoll.

Minħabba li l-pannell tal-iskrin huwa kapaċi juri sinjali minn magna awtomatika għall-ipproċessar tad-dejta (ADP — automatic data-processing) f'livell suffiċjenti għall-użu prattiku mal-magna ADP, dan jitqies li kapaċi juri sinjali minn magni awtomatiċi għall-ipproċessar tad-dejta b'livell aċċettabbli ta' funzjonalità.

Għaldaqstant għandu jiġi kklassifikat taħt il-kodiċi NM 8528 59 39 bħala displays oħrajn tal-kulur forma ta' pannelli tal-iskrin ċatti li jistgħu juru sinjali minn magni awtomatiċi għall-ipproċessar tad-dejta b'livell aċċettabbli ta' funzjonalità.”

5.5.2015

Il-Ġurnal Uffiċjali tal-Unjoni Ewropea

L 114/4

REGOLAMENT TA' IMPLIMENTAZZJONI TAL-KUMMISSJONI (UE) 2015/713

tal-4 ta' Mejju 2015

li jistabbilixxi l-valuri standard tal-importazzjoni għad-determinazzjoni tal-prezz ta' dħul ta' ċertu frott u ħxejjex

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) Nru 1308/2013 tal-Parlament Ewropew u tal-Kunsill tas- 17 ta' Diċembru 2013 li jistabbilixxi organizzazzjoni komuni tas-swieq fi prodotti agrikoli u li jħassar ir-Regolamenti tal-Kunsill (KEE) Nru 922/72, (KEE) Nru 234/79, (KE) Nru 1037/2001 u (KE) Nru 1234/2007 (1),

Wara li kkunsidrat ir-Regolament ta' Implimentazzjoni (UE) Nru 543/2011 tas-7 ta' Ġunju 2011 li jippreskrivi regoli dettaljati dwar l-applikazzjoni tar-Regolament tal-Kunsill (KE) Nru 1234/2007 fir-rigward tas-setturi tal-frott u l-ħxejjex u tal-frott u l-ħxejjex ipproċessati (2) u b'mod partikolari l-Artikolu 136(1) tiegħu,

Billi:

(1)

Ir-Regolament ta' Implimentazzjoni (UE) Nru 543/2011 jistipula, skont ir-riżultat tan-negozjati kummerċjali multilaterali taċ-Ċiklu tal-Urugwaj, il-kriterji li bihom il-Kummissjoni tiffissal-valuri standard għall-importazzjonijiet minn pajjiżi terzi, għall-prodotti u għall-perjodi stipulati fl-Anness XVI, il-Parti A tiegħu.

(2)

Il-valur standard tal-importazzjoni huwa kkalkulat kull ġurnata tax-xogħol skont l-Artikolu 136(1) tar-Regolament ta' Implimentazzjoni (UE) Nru 543/2011, billi jqis id-dejta varjabbli ta' kuljum. Għalhekk dan ir-Regolament għandu jidħol fis-seħħ fil-jum tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

ADOTTAT DAN IR-REGOLAMENT:

Artikolu 1

Il-valuri standard tal-importazzjoni msemmija fl-Artikolu 136 tar-Regolament ta' Implimentazzjoni (UE) Nru 543/2011 huma stipulati fl-Anness għal dan ir-Regolament.

Artikolu 2

Dan ir-Regolament għandu jidħol fis-seħħ fil-jum tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, l-4 ta' Mejju 2015.

Għall-Kummissjoni,

F'isem il-President,

Jerzy PLEWA

Direttur Ġenerali għall-Agrikoltura u l-Iżvilupp Rurali

(1) ĠU L 347, 20.12.2013, p. 671.

(2) ĠU L 157, 15.6.2011, p. 1.

ANNESS

Il-valuri standard tal-importazzjoni għad-determinazzjoni tal-prezz ta' dħul ta' ċertu frott u ħxejjex

(EUR/100 kg)
Kodiċi tan-NM	Kodiċi tal-pajjiż terz (1)	Valur standard tal-importazzjoni
0702 00 00	IL	153,9
	MA	85,5
	MK	119,9
	TN	392,6
	TR	96,0
	ZZ	169,6
0707 00 05	AL	49,4
	TR	127,5
	ZZ	88,5
0709 93 10	MA	102,7
	TR	135,7
	ZZ	119,2
0805 10 20	EG	50,6
	IL	71,3
	MA	59,7
	ZZ	60,5
0805 50 10	BR	107,1
	TR	81,3
	ZZ	94,2
0808 10 80	AR	101,4
	BR	100,1
	CL	120,1
	CN	167,0
	MK	28,2
	NZ	146,5
	US	216,1
	UY	92,0
	ZA	132,4
	ZZ	122,6

(1) In-nomenklatura tal-pajjiżi stabbilita bir-Regolament tal-Kummissjoni (UE) Nru 1106/2012 tas-27 ta' Novembru 2012 li jimplimenta r-Regolament (KE) Nru 471/2009 tal-Parlament Ewropew u tal-Kunsill dwar statistika Komunitarja relatata mal-kummerċ estern ma' pajjiżi li mhumiex membri, fir-rigward tal-aġġornament tan-nomenklatura tal-pajjiżi u t-territorji (ĠU L 328, 28.11.2012, p. 7). Il-kodiċi “ZZ” jirrappreżenta “ta' oriġini oħra”.

5.5.2015

Il-Ġurnal Uffiċjali tal-Unjoni Ewropea

L 114/6

DEĊIŻJONI TA' IMPLIMENTAZZJONI TAL-KUMMISSJONI (UE) 2015/714

tal-24 ta' April 2015

dwar il-validità ta' ċerta informazzjoni vinkolanti dwar it-tariffi

(notifikata bid-dokument C(2015) 2888)

(It-testi bil-Franċiż, bil-Ġermaniż, bl-Ingliż, bil-Portugiż u bl-Ispanjol biss huma awtentiċi)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament tal-Kunsill (KEE) Nru 2913/92 tat-12 ta' Ottubru 1992 li jwaqqaf il-Kodiċi Doganali tal-Komunità (2), u b' mod partikolari l-Artikolu 12(5)(a)(iii) tiegħu,

Wara li kkunsidrat ir-Regolament tal-Kummissjoni (KEE) Nru 2454/93 tat-2 ta' Lulju 1993 li jiffissa d-dispożizzjonijiet għall-implementazzjoni tar-Regolament tal-Kunsill (KEE) Nru 2913/92 li jistabbilixxi l-Kodiċi Doganali Komunitarju (3), u b'mod partikolari t-tieni inċiż l-Artikolu 9(1) tiegħu,

Billi:

(1)

L-informazzjoni vinkolanti dwar it-tariffi (BTI) imsemmija fl-Anness fiha klassifikazzjoni tariffarja mhux kompatibbli mar-regoli ġenerali għall-interpretazzjoni tan-Nomenklatura Magħquda (NM) stabbilita fit-Taqsima I tal-Parti Wieħed, tal-Anness I tar-Regolament (KEE) Nru 2658/87 u mhix konsistenti ma' BTI oħra.

(2)

Il-prodotti koperti mill-BTI msemmija fl-Anness huma meraq tal-frott, meraq tal-frott konċentrat, meraq tal-ħaxix jew meraq tal-ħaxix konċentrat, imħallat u mhux, kif ukoll addittivi, miżjuda bl-ilma jew ilma effervexxenti. Il-klassifikazzjoni tariffarja ta' dawk il-prodotti kif stabbilita fil-BTI mhijiex skont il-kodiċijiet TARIC 2202 90 10 19, 2202 90 10 99, 2202 90 91 90, 2202 90 95 90 and 2202 90 99 90, rispettivament.

(3)

Biex tiġi żgurata l-ugwaljanza bejn l-operaturi u l-applikazzjoni uniformi tat-TARIC, il-BTI msemmija fl-Anness ma tibqax valida. Għalhekk, l-awtoritajiet doganali li ħarġu l-informazzjoni jirrevokawha mill-aktar fis possibli wara n-notifika ta' din id-Deċiżjoni u jinnotifikaw lill-Kummissjoni dwar dan.

(4)	Skont l-Artikolu 12(6) tar-Regolament (KEE) Nru 2913/92, id-detentur tal-BTI jingħata, għal ċertu perjodu ta' żmien, il-possibbiltà li jinvoka l-BTI li ma baqgħetx valida soġġetta għall-kundizzjonijiet stipulati fl-Artikolu 14(1) tar-Regolament (KEE) Nru 2454/93.

(5)	Il-miżuri stipulati f'din id-Deċiżjoni huma skont l-opinjoni tal-Kumitat tal-Kodiċi Doganali,

ADOTTAT DIN ID-DEĊIŻJONI:

Artikolu 1

1. L-informazzjoni vinkolanti dwar it-tariffi msemmija fil-kolonna 1 tat-tabella stabbilita fl-Anness, li tkun inħarġet mill-awtoritajiet doganali speċifikati fil-kolonna 2 ta' dik it-tabella għall-klassifikazzjoni tariffarja speċifikata fil-kolonna 3 ta' dik it-tabella ma tibqax valida skont il-paragrafu 2.

2. L-awtoritajiet doganali speċifikati fil-kolonna 2 tat-tabella stabbilita fl-Anness jirrevokaw l-informazzjoni vinkolanti dwar it-tariffi msemmija fil-kolonna 1 ta' dik it-tabella u jinnotifikaw lid-detenturi tagħha fl-aktar data kmieni possibbli u fi kwalunkwe każ mhux aktar tard minn għaxart ijiem min-notifika ta' din id-Deċiżjoni.

3. Meta awtorità doganali tirrevoka l-informazzjoni vinkolanti dwar it-tariffi u tagħmel in-notifika skont il-paragrafu 2, din tinnotifika lill-Kummissjoni b'dan.

Artikolu 2

L-informazzjoni vinkolanti dwar it-tariffi msemmija fl-Anness tista' tibqa' tiġi invokata skont l-Artikolu 12(6) tar-Regolament (KEE) Nru 2913/92 għal perjodu ta' sitt xhur mid-data tan-notifika tar-revoka tal-informazzjoni vinkolanti dwar it-tariffi lid-detentur.

Artikolu 3

Din id-Deċiżjoni hija indirizzata lir-Repubblika Federali tal-Ġermanja, ir-Renju ta' Spanja, ir-Repubblika ta' Franza, ir-Repubblika tal-Awstrija, ir-Repubblika tal-Portugall u r-Renju Unit tal-Gran Brittanja u l-Irlanda ta' Fuq.

Magħmul fi Brussell, l-24 ta' April 2015.

Għall-Kummissjoni,

F'isem il-President,

Heinz ZOUREK

Direttur Ġenerali għat-Tassazzjoni u l-Unjoni Doganali

(1) ĠU L 256, 7.9.1987, p. 1.

(2) ĠU L 302, 19.10.1992, p. 1.

(3) ĠU L 253, 11.10.1993, p. 1.

ANNESS

Informazzjoni vinkolanti dwar it-tariffi Nru ta' referenza	Awtorità tad-Dwana	Klassifikazzjoni tariffarja
1	2	3
AT 2009/000570	Zollamt Wien	2202 90 10 19
AT 2009/000573	Zollamt Wien	2202 90 10 19
AT 2009/000574	Zollamt Wien	2202 90 10 19
DE 23376/12-1	Hauptzollamt Hannover	2202 90 10 19
DE 6324/12-1	Hauptzollamt Hannover	2202 90 10 19
DE B/810/09-1	Hauptzollamt Hannover	2202 90 10 19
DE B/811/09-1	Hauptzollamt Hannover	2202 90 10 19
DE B/812/09-1	Hauptzollamt Hannover	2202 90 10 19
DE B/813/09-1	Hauptzollamt Hannover	2202 90 10 19
DE B/815/09-1	Hauptzollamt Hannover	2202 90 10 19
ES -2009-000120-0019/09	Departamento de Aduanas E II.EE, Madrid	2202 90 10 19
FR -PRO-2012-004802	Direction Générale des Douanes et Droits Indirects, Montreuil	2202 90 10 19
FR -RTC-2013-164920	Direction Générale des Douanes et Droits Indirects, Montreuil	2202 90 10 19
FR -RTC-2014-006435	Direction Générale des Douanes et Droits Indirects, Montreuil	2202 90 10 19
PT 2014-IPV-020	Autoridade Tributária Aduaneira, Lisboa	2202 90 10 19
PT 2014-IPV-021	Autoridade Tributária Aduaneira, Lisboa	2202 90 10 19
PT 2014-IPV-023	Autoridade Tributária Aduaneira, Lisboa	2202 90 10 19
PT 2014-IPV-024	Autoridade Tributária Aduaneira, Lisboa	2202 90 10 19
ES -2009-000122-0019/09	Departamento de Aduanas E II.EE, Madrid	2202 90 10 99
ES -2009-000125-0019/09	Departamento de Aduanas E II.EE, Madrid	2202 90 10 99
GB 120294213	HM Revenue & Customs, Southend-on-Sea	2202 90 10 99
DE 6948/14-1	Hauptzollamt Hannover	2202 90 95 90

5.5.2015

Il-Ġurnal Uffiċjali tal-Unjoni Ewropea

L 114/9

DEĊIŻJONI TAL-KUMMISSJONI (UE) 2015/715

tat-30 ta' April 2015

li temenda l-Anness I tar-Regolament (KE) Nru 715/2009 tal-Parlament Ewropew u tal-Kunsill dwar il-kondizzjonijiet għall-aċċess għan-networks ta' trażmissjoni tal-gass naturali

(Test b'rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (KE) Nru 715/2009 tal-Parlament Ewropew u tal-Kunsill tat-13 ta' Lulju 2009 dwar il-kondizzjonijiet għall-aċċess għan-networks ta' trażmissjoni tal-gass naturali u li jħassar ir-Regolament (KE) Nru 1775/2005 (1), u b'mod partikolari l-Artikolu 23(2) tiegħu,

Billi:

(1)	Id-Deċiżjoni tal-Kummissjoni 2012/490/UE (2) emendat il-proċeduri għall-amministrazzjoni tal-konġestjoni u r-rekwiżiti ta' trasparenza stabbiliti fl-Anness I tar-Regolament (KE) Nru 715/2009 bil-ħsieb li jiġu implimentati regoli Ewropej għall-amministrazzjoni tal-konġestjoni armonizzati.

(2)

Fil-proċess tal-implimentazzjoni tad-Deċiżjoni 2012/490/UE ħarġu inkonsistenzi fir-rigward tad-data tal-pubblikazzjoni tar-rapport tal-Aġenzija dwar il-monitoraġġ tal-konġestjoni fil-punti ta' interkonnessjoni u tad-data tal-pubblikazzjoni tad-dejta tal-operaturi tas-sistema ta' trażmissjoni. Sabiex l-Aġenzija tingħata d-dejta meħtieġa biex tissodisfa r-rwol ta' monitoraġġ tagħha li jinħtieġ għall-implimentazzjoni effettiva tad-Deċiżjoni 2012/490/UE, jinħtieġ li jinbidlu l-orizzont tal-pubblikazzjoni tad-dejta mill-operaturi tas-sistema ta' trażmissjoni u d-data meta l-Aġenzija għandha tippubblika r-rapport.

(3)	Għalhekk, l-Anness I tar-Regolament (KE) Nru 715/2009 għandu jiġi emendat skont dan.

(4)	Il-miżuri stipulati f'din id-Deċiżjoni huma skont l-opinjoni tal-Kumitat stabbilit bl-Artikolu 51 tad-Direttiva 2009/73/KE tal-Parlament Ewropew u tal-Kunsill (3),

ADOTTAT DIN ID-DEĊIŻJONI:

Artikolu 1

L-Anness I tar-Regolament (KE) Nru 715/2009 huwa emendat skont l-Anness ta' din id-Deċiżjoni.

Artikolu 2

Din id-Deċiżjoni tidħol fis-seħħ fl-għoxrin jum wara l-pubblikazzjoni tagħha f'Il-Ġurnal Uffiċjali tal-Unjoni Ewropea.

Magħmul fi Brussell, it-30 ta' April 2015.

Għall-Kummissjoni

Il-President

Jean-Claude JUNCKER

(1) ĠU L 211, 14.8.2009, p. 36.

(2) Id-Deċiżjoni tal-Kummissjoni 2012/490/UE tal-24 ta' Awwissu 2012 dwar l-emenda għall-Anness I tar-Regolament (KE) Nru 715/2009 tal-Parlament Ewropew u tal-Kunsill dwar il-kondizzjonijiet għall-aċċess għan-networks ta' trażmissjoni tal-gass naturali (ĠU L 231, 28.8.2012, p. 16).

(3) Id-Direttiva 2009/73/KE tal-Parlament Ewropew u tal-Kunsill tat-13 ta' Lulju 2009 dwar ir-regoli komuni għas-suq intern tal-gass u li temenda d-Direttiva 2003/55/KE (ĠU L 211, 14.8.2009, p. 94).

ANNESS

L-Anness I tar-Regolament (KE) Nru 715/2009, huwa emendat kif ġej:

(1)

Il-punt 2.2.1 (2) jinbidel bit-test li ġej:

“(2)

Abbażi tal-informazzjoni ppubblikata mill-operaturi tas-sistema tat-trażmissjoni skont it-Taqsima 3 ta' dan l-Anness u, fejn xieraq, ivvalidata mill-awtoritajiet regolatorji nazzjonali, l-Aġenzija għandha tippubblika sal-1 ta' Ġunju ta' kull sena, b'bidu mis-sena 2015, rapport ta' monitoraġġ dwar il-konġestjoni fil-punti ta' interkonnessjoni fir-rigward tal-prodotti ta' kapaċità kostanti li jkunu nbiegħu fis-sena ta' qabel filwaqt li tqis, safejn possibbli, in-negozjar ta' kapaċità fis-suq sekondarju u l-użu ta' kapaċità interrompibbli.”

(2)

Il-punt 3.3 (2) jinbidel bit-test li ġej:

“(2)	Fil-punti rilevanti kollha, l-informazzjoni skont il-paragrafu 3.3(1)(a), (b) u (d) għandha tiġi ppubblikata għal perjodu ta' mill-inqas 24-il xahar bil-quddiem.”

5.5.2015

Il-Ġurnal Uffiċjali tal-Unjoni Ewropea

L 114/11

DEĊIŻJONI (UE) 2015/716 TAL-BANK ĊENTRALI EWROPEW

tat-12 ta' Frar 2015

li temenda d-Deċiżjoni BĊE/2004/2 li tadotta r-Regoli tal-Proċedura tal-Bank Ċentrali Ewropew (BĊE/2015/8)

IL-KUNSILL GOVERNATTIV TAL-BANK ĊENTRALI EWROPEW,

Wara li kkunsidra l-Istatut tas-Sistema Ewropea tal-Banek Ċentrali u tal-Bank Ċentrali Ewropew (minn hawn 'il quddiem l-“Istatut tas-SEBĊ”), u b'mod partikolari l-Artikolu 12.3 tiegħu,

Billi:

(1)

Huwa xieraq li jiġu adattati r-regoli dwar il-proċess tat-teħid tad-deċiżjonijiet tal-Kunsill Governattiv permezz ta' proċedura bil-miktub, kif iddefinit ulterjorment fl-Artikoli 13g, 13h u 13i tar-Regoli tal-Proċedura tal-Bank Ċentrali Ewropew, sabiex jiġu indirizzati l-ħtiġijiet speċifiċi tal-proċedura ta' nuqqas ta' oġġezzjoni skont l-Artikolu 26(8) tar-Regolament tal-Kunsill (UE) Nru 1024/2013 (1).

(2)

Fir-rigward ta' proċedura bil-miktub fl-ambitu tal-Artikoli 13g sa 13i tar-Regoli tal-Proċedura tal-Bank Ċentrali Ewropew u soġġett għall-iskadenzi speċifiċi stabbiliti fihom, huwa xieraq li jiġi ffissat massimu ta' ħamest ijiem tax-xogħol għal kunsiderazzjoni minn kull membru tal-Kunsill Governattiv sabiex il-membri tal-Kunsill Governattiv, b'mod konformi mal-Artikolu 26(8) tar-Regolament (UE) Nru 1024/2013, ikunu jistgħu jilħqu ftehim dwar kwalunkwe oġġezzjoni possibbli, inkluża l-ispjegazzjoni bil-miktub, għal abbozz ta' deċiżjoni f'perijodu ta' żmien ta' mhux aktar minn għaxart ijiem.

(3)

L-Artikolu 10.2 tal-Istatut tas-SEBĊ jeħtieġ li l-membri tal-Kunsill Governattiv jeżerċitaw id-dritt tagħhom li jivvutaw personalment. Dan huwa element importanti tal-indipendenza tal-membri tal-Kunsill Governattiv, peress li huma membri ex officio u ma jistgħux jiġu ssostitwiti fit-tfigħ tal-vot tagħhom minn persuna oħra, ħlief jekk il-membru ma jkunx jista' jattendi laqgħat għal perijodu twil skont it-tifsira tal-Artikolu 10.2 tal-Istatut tas-SEBĊ. Vot jew kumment dwar is-sustanza minn membru tal-Kunsill Governattiv li jintbagħat b'mod elettroniku bħala parti mit-teħid ta' deċiżjoni tal-Kunsill Governattiv permezz ta' proċedura bil-miktub ma għandux għalfejn ikollu l-firma fiżika ta' dan il-membru tal-Kunsill Governattiv. Dan huwa konformi mar-rekwiżiti tal-Artikolu 10.2 tal-Istatut tas-SEBĊ.

(4)

F'każijiet fejn is-sottomissjoni elettronika ta' vot jew kummenti minn membru tal-Kunsill Governattiv ma tkunx fattibbli, dak il-membru tal-Kunsill Governattiv jista' jawtorizza espressament lil persuna oħra biex tiffirma l-vot jew kummenti dwar is-sustanza. Dik il-firma mill-persuna awtorizzata sempliċement tikkonferma li dak huwa l-vot jew dawk huma l-kummenti li jkun esprima personalment il-membru rispettiv tal-Kunsill Governattiv.

(5)	Id-Deċiżjoni BĊE/2004/2 (2) għandha tiġi emendata sabiex tieħu inkunsiderazzjoni dawn l-iżviluppi,

ADOTTA DIN ID-DEĊIŻJONI:

Artikolu 1

Emendi għar-Regoli tal-Proċedura tal-Bank Ċentrali Ewropew

Id-Deċizjoni BĊE/2004/2 hija emendata kif ġej:

L-Artikolu 4.7 huwa mibdul b'dan li ġej:

“Għajr kif huwa pprovdut fl-Artikolu 4.8, id-deċiżjonijiet jistgħu jittieħdu wkoll bi proċedura bil-miktub, ħlief jekk joġġezzjonaw ta' mill-inqas tliet membri tal-Kunsill Governattiv. Proċedura bil-miktub għandha teħtieġ: (i) normalment mhux anqas minn ħamest ijiem ta' xogħol biex tiġi kkunsidrata minn kull membru tal-Kunsill Governattiv; u (ii) l-approvazzjoni espressa jew taċita personali ta' kull membru tal-Kunsill Governattiv (jew is-supplent tiegħu/tagħha skont l-Artikolu 4.4); u (iii) verbal ta' deċiżjoni bħal dik fil-minuti tal-laqgħa ta' wara tal-Kunsill Governattiv. Id-Deċiżjonijiet li għandhom jittieħdu bil-proċedura bil-miktub għandhom jiġu approvati mill-membri tal-Kunsill Governattiv bid-dritt tal-vot meta tingħata l-approvazzjoni.”

Il-paragrafi li ġejjin huwa miżjuda mal-Artikolu 4:

“4.8

Fl-ambitu tal-Artikoli 13g sa 13i, id-deċiżjonijiet jistgħu jittieħdu wkoll bi proċedura bil-miktub, ħlief jekk joġġezzjonaw ta' mill-inqas ħames membri tal-Kunsill Governattiv. Proċedura bil-miktub għandha teħtieġ massimu ta' ħamest ijiem ta' xogħol, jew fil-każ tal-Artikolu 13h, jumejn xogħol għall-konsiderazzjoni minn kull membru tal-Kunsill Governattiv.

4.9	Għal kwalunkwe proċedura bil-miktub, membru tal-Kunsill Governattiv (jew is-supplent tagħhom skont l-Artikolu 4.4) jista' jawtorizza espressament lil persuna oħra biex tiffirma l-vot tagħhom jew kumment tagħhom dwar is-sustanza kif approvat minnhom personalment.”

Artikolu 2

Dħul fis-seħħ

Din id-Deċizjoni għandha tidħol fis-seħħ fid-data meta tiġi adottata.

Magħmul fi Frankfurt am Main, it-12 ta' Frar 2015.

Il-President tal-BĊE

Mario DRAGHI

(1) Regolament tal-Kunsill (UE) Nru 1024/2013 tal-15 ta' Ottubru 2013 li jikkonferixxi kompiti speċifiċi lill-Bank Ċentrali Ewropew fir-rigward ta' politiki relatati mas-superviżjoni prudenzjali ta' istituzzjonijiet ta' kreditu (ĠU L 287, 29.10.2013, p. 63).

(2) Deċizjoni BĊE/2004/2 tad-19 ta' Frar 2004 li taddotta r-Regoli tal-Proċedura tal-Bank Ċentrali Ewropew (ĠU L 80, 18.3.2004, p. 33).

5.5.2015

Il-Ġurnal Uffiċjali tal-Unjoni Ewropea

L 114/13

DEĊIŻJONI Nru 1/2015 TAS-SOTTOKUMITAT SANITARJU U FITOSANITARJU BEJN L-UE U R-REPUBBLIKA TAL-MOLDOVA

tat-12 ta' Marzu 2015

li biha jadotta r-Regoli ta' Proċedura tiegħu [2015/717]

IS-SOTTOKUMITAT SANITARJU U FITOSANITARJU BEJN L-UE U R-REPUBBLIKA TAL-MOLDOVA,

Wara li kkunsidra l-Ftehim ta' Assoċjazzjoni bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa, u r-Repubblika tal-Moldova, min-naħa l-oħra (1) (“il-Ftehim”), u b'mod partikolari l-Artikolu 191 tiegħu,

Billi:

(1)	F'konformità mal-Artikolu 464 tal-Ftehim, partijiet mill-Ftehim ġew applikati b'mod provviżorju mill-1 ta' Settembru 2014.

(2)	Skont l-Artikolu 191(2) tal-Ftehim, is-Sottokumitat Sanitarju u Fitosanitarju (“is-Sottokumitat SFS”) għandu jqis kull kwistjoni relatata mal-implimentazzjoni tal-Kapitolu 4 (Il-Miżuri Sanitarji u Fitosanitarji) tat-Titolu V (Il-Kummerċ u Kwistjonijiet relatati mal-Kummerċ) ta' dan il-Ftehim.

(3)	Skont l-Artikolu 191(5) tal-Ftehim, is-Sottokumitat SFS għandu jadotta r-regoli ta' proċedura tiegħu stess,

ADOTTA DIN ID-DEĊIŻJONI:

Artikolu 1

B'dan qegħdin jiġu adottati r-Regoli ta' Proċedura tas-Sottokumitat SFS, kif stipulati fl-Anness.

Artikolu 2

Din id-Deċiżjoni tidħol fis-seħħ fid-data tal-adozzjoni tagħha.

Magħmul f'Chisinau, it-12 ta' Marzu 2015.

Għas-Sottokumitat SFS

Il-President

V. LOGHIN

Segretarji

S. TIRIGAN

R. FREIGOFAS

(1) ĠU L 260, 30.8.2014, p. 4.

ANNESS

REGOLI TA' PROĊEDURA TAS-SOTTOKUMITAT SANITARJU U FITOSANITARJU BEJN L-UE U R-REPUBBLIKA TAL-MOLDOVA

Artikolu 1

Dispożizzjonijiet Ġenerali

1. Is-Sottokumitat Sanitarju u Fitosanitarju (“is-Sottokumitat SFS”), stabbilit f'konformità mal-Artikolu 191(1) tal-Ftehim ta' Assoċjazzjoni bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa, u r-Repubblika tal-Moldova, min-naħa l-oħra (“il-Ftehim”) jassisti lill-Kumitat ta' Assoċjazzjoni fil-konfigurazzjoni tal-Kummerċ, kif stipulat fl-Artikolu 438(4) tal-Ftehim (“il-Kumitat ta' Assoċjazzjoni fil-konfigurazzjoni tal-Kummerċ”) fit-twettiq ta' dmirijietu.

2. Is-Sottokumitat SFS iwettaq il-funzjonijiet tiegħu stipulati fl-Artikolu 191(2) tal-Ftehim fid-dawl tal-għanijiet tal-Kapitolu 4 tat-Titolu V stipulati fl-Artikolu 176 tal-Ftehim.

3. Is-Sottokumitat SFS ikun imsawwar minn rappreżentanti tal-Kummissjoni Ewropea u tar-Repubblika tal-Moldova, responsabbli għall-kwistjonijiet sanitarji u fitosanitarji.

4. Rappreżentant tal-Kummissjoni Ewropea jew tar-Repubblika tal-Moldova li jkollu r-responsabbiltà għall-kwistjonijiet sanitarji u fitosanitarji jaġixxi bħala President tas-Sottokumitat SFS f'konformità mal-Artikolu 2.

5. Il-Partijiet f'dawn ir-Regoli ta' Proċedura jiġu definiti kif stipulat fl-Artikolu 461 tal-Ftehim.

Artikolu 2

Presidenza

Il-Partijiet ikollhom il-Presidenza tas-Sottokumitat SFS, b'mod alternat, għal perjodu ta' 12-il xahar. L-ewwel perjodu jibda fid-data tal-ewwel laqgħa tal-Kunsill ta' Assoċjazzjoni u jintemm fil-31 ta' Diċembru tal-istess sena.

Artikolu 3

Laqgħat

1. Ħlief fejn ikun miftiehem mod ieħor mill-Partijiet, is-Sottokumitat SFS jiltaqa' fi żmien tliet xhur wara d-dħul fis-seħħ ta' dan il-Ftehim, u sussegwentement fuq it-talba ta' xi waħda mill-Partijiet jew mill-inqas darba fis-sena.

2. Kull laqgħa tas-Sottokumitat SFS tkun imsejħa mill-Presidenza tagħha f'post u fi żmien maqbulin bejn il-Partijiet. L-avviż ta' sejħa għal-laqgħa jinħareġ mill-President tas-Sottokumitat SFS mhux aktar tard minn 28 jum kalendarju qabel il-bidu tal-laqgħa, sakemm il-Partijiet ma jiftehmux mod ieħor.

3. Fejn ikun possibbli, il-laqgħa regolari tas-Sottokumitat SFS tissejjaħ fi żmien dovut qabel il-laqgħa regolari tal-Kumitat ta' Assoċjazzjoni fil-konfigurazzjoni tal-Kummerċ.

4. Il-laqgħat tas-Sottokumitat SFS jistgħu jsiru permezz ta' kwalunkwe tagħmir teknoloġiku bi qbil bħalma huma l-vidjokonferenzi jew l-awdjokonferenzi.

5. Is-Sottokumitat SFS jista' wkoll jindirizza kwalunkwe kwistjoni mingħajr ma jiltaqa', permezz tal-korrispondenza.

Artikolu 4

Delegazzjonijiet

Qabel kull laqgħa, il-Partijiet jiġu mgħarrfin mis-Segretarjat tas-Sottokumitat SFS dwar l-għamla prevista tad-delegazzjoni ta' kull Parti li tkun se tattendi l-laqgħa.

Artikolu 5

Segretarjat

1. Uffiċjal tal-Kummissjoni Ewropea u uffiċjal tar-Repubblika tal-Moldova jaġixxu b'mod konġunt bħala Segretarji tas-Sottokumitat SFS u jwettqu kompiti segretarjali b'mod konġunt, fi spirtu ta' fiduċja reċiproka u kooperazzjoni.

2. Is-Segretarjat tal-Kumitat ta' Assoċjazzjoni fil-konfigurazzjoni tal-Kummerċ ikun mgħarraf b'kull deċiżjoni, opinjoni, rakkomandazzjoni, rapport u azzjoni oħra maqbula tas-Sottokumitat SFS.

Artikolu 6

Korrispondenza

1. Il-korrispondenza indirizzata lis-Sottokumitat SFS tintbagħat lis-Segretarju ta' waħda mill-Partijiet, li min-naħa tiegħu jgħarraf lis-Segretarju l-ieħor.

2. Is-Segretarjat tas-Sottokumitat SFS jiżgura li l-korrispondenza indirizzata lis-Sottokumitat SFS tingħadda lill-President tas-Sottokumitat SFS u tiġi ċċirkolata, fejn xieraq, bħala dokumenti msemmija fl-Artikolu 7.

3. Il-korrispondenza mill-President tintbagħat lill-Partijiet mis-Segretarjat f'isem il-President. Din il-korrispondenza tiġi ċċirkolata, fejn xieraq, kif previst fl-Artikolu 7.

Artikolu 7

Dokumenti

1. Id-dokumenti jiġu ċċirkolati mis-Segretarji tas-Sottokumitat SFS.

2. Parti tittrażmetti d-dokumenti tagħha lis-Segretarju tagħha. Is-Segretarju jittrażmetti dawk id-dokumenti lis-Segretarju tal-Parti l-oħra.

3. Is-Segretarju tal-Unjoni jiċċirkola d-dokumenti mar-rappreżentanti rilevanti tal-Unjoni u f'tali korrispondenza jikkopja sistematikament lis-Segretarju tar-Repubblika tal-Moldova u lis-Segretarji tal-Kumitat ta' Assoċjazzjoni fil-konfigurazzjoni tal-Kummerċ.

4. Is-Segretarju tar-Repubblika tal-Moldova jiċċirkola d-dokumenti lir-rappreżentanti rilevanti tar-Repubblika tal-Moldova u f'tali korrispondenza jikkopja sistematikament lis-Segretarju tal-Unjoni u lis-Segretarji tal-Kumitat ta' Assoċjazzjoni fil-konfigurazzjoni tal-Kummerċ.

5. Is-Segretarji tas-Sottokumitat SFS iservu bħala punti ta' kuntatt għal skambji previsti fl-Artikolu 184 tal-Ftehim.

Artikolu 8

Kunfidenzjalità

Sakemm ma jkunx deċiż mod ieħor mill-Partijiet, il-laqgħat tas-Sottokumitat SFS ma jkunux pubbliċi. Meta Parti tippreżenta informazzjoni mmarkata bħala kunfidenzjali lis-Sottokumitat SFS, il-Parti l-oħra tittratta dik l-informazzjoni bħala tali.

Artikolu 9

Aġendi għal-laqgħat

1. Titfassal aġenda provviżorja għal kull laqgħa kif ukoll abbozz tal-konklużjonijiet operattivi kif previst fl-Artikolu 10 mis-Segretarjat tas-Sottokumitat SFS abbażi tal-proposti li jsiru mill-Partijiet. L-aġenda provviżorja tkun tinkludi punti li s-Segretarjat tas-Sottokumitat SFS ikun irċieva talba dwarhom mingħand xi Parti biex jiddaħħlu fl-aġenda, sostnuti mid-dokumenti rilevanti, mhux aktar tard minn 21 jum kalendarju qabel id-data tal-laqgħa.

2. L-aġenda provviżorja, flimkien mad-dokumenti rilevanti, jiġu ċċirkolati kif previst fl-Artikolu 7 mhux aktar tard minn 15-il jum kalendarju qabel il-bidu tal-laqgħa.

3. L-aġenda tiġi adottata mis-Sottokumitat SFS fil-bidu ta' kull laqgħa. Kull punt minbarra dawk li jidhru fl-aġenda provviżorja jista' jitqiegħed fuq l-aġenda jekk il-Partijiet jaqblu li jsir hekk.

4. Il-President tas-Sottokumitat SFS jista', bil-qbil tal-Parti l-oħra, jistieden rappreżentanti ta' korpi oħra tal-Partijiet jew esperti indipendenti ta' qasam partikolari fuq bażi ad hoc sabiex jattendu l-laqgħat tas-Sottokumitat SFS bil-għan li jipprovdu tagħrif dwar suġġetti speċifiċi. Il-Partijiet jiżguraw li dawn l-osservaturi jew esperti jirrispettaw kull rekwiżit ta' kunfidenzjalità.

5. Il-President tas-Sottokumitat SFS jista', f'konsultazzjoni mal-Partijiet, iqassar il-perjodi ta' żmien speċifikati fil-paragrafi 1 u 2 sabiex jittieħed kont ta' ċirkostanzi speċjali.

Artikolu 10

Minuti u konklużjonijiet operattivi

1. Jitħejja abbozz tal-minuti ta' kull laqgħa b'mod konġunt mis-Segretarji tas-Sottokumitat SFS.

2. Bħala regola ġenerali, dwar kull punt fuq l-aġenda, il-minuti jinkludu:

(a)	lista tal-parteċipanti fil-laqgħa, lista ta' uffiċjali li jakkumpanjawhom u lista ta' kull osservatur jew espert li jkun attenda l-laqgħa;

(b)	id-dokumentazzjoni ppreżentata lis-Sottokumitat SFS;

(c)	id-dikjarazzjonijiet li s-Sottokumitat SFS ikun talab li jiddaħħlu fil-minuti; u

(d)	konklużjonijiet operattivi tal-laqgħa, kif previst fil-paragrafu 4.

3. L-abbozz tal-minuti jiġi ppreżentat lis-Sottokumitat SFS għall-approvazzjoni. Dawn il-minuti jiġu approvati fi żmien 28 jum kalendarju wara kull laqgħa tas-Sottokumitat SFS. Tintbagħat kopja lil kull wieħed mid-destinatarji msemmija fl-Artikolu 7.

4. Abbozz tal-konklużjonijiet operattivi ta' kull laqgħa jitfassal mis-Segretarju tas-Sottokumitat SFS tal-Parti li jkollha l-presidenza tas-Sottokumitat SFS, u jiġi ċċirkolat lill-Partijiet flimkien mal-aġenda, mhux aktar tard minn 15-il jum kalendarju qabel il-bidu tal-laqgħa. Dan l-abbozz jiġi aġġornat matul il-laqgħa sabiex fi tmiem il-laqgħa, sakemm ma jkunx miftiehem mod ieħor mill-Partijiet, is-Sottokumitat SFS jadotta l-konklużjonijiet operattivi, li jirriflettu l-azzjonijiet ta' segwitu li l-Partijiet qablu dwarhom. Ġaladarba jkun hemm qbil dwarhom, il-konklużjonijiet operattivi jinthemżu mal-minuti u l-implimentazzjoni tagħhom tiġi eżaminata mill-ġdid matul kwalunkwe laqgħa sussegwenti tas-Sottokumitat SFS. Għal dan il-għan, is-Sottokumitat SFS jadotta mudell, li jippermetti li kull azzjoni tiġi segwita fir-rigward ta' skadenza speċifika.

Artikolu 11

Deċiżjonijiet u rakkomandazzjonijiet

1. Is-Sottokumitat SFS ikollu s-setgħa jadotta deċiżjonijiet, opinjonijiet, rakkomandazzjonijiet, rapporti u azzjonijiet konġunti kif previst fl-Artikolu 191 tal-Ftehim. Dawk id-deċiżjonijiet, opinjonijiet, rakkomandazzjonijiet, rapporti u azzjonijiet konġunti jiġu adottati b'kunsens bejn il-Partijiet wara t-tlestija tal-proċeduri interni rispettivi għall-adozzjoni tagħhom. Id-deċiżjonijiet ikunu vinkolanti għall-Partijiet, li jieħdu l-miżuri xierqa biex jimplimentawhom.

2. Kull deċiżjoni, opinjoni jew rakkomandazzjoni tiġi ffirmata mill-President tas-Sottokumitat SFS u awtentikata mis-Segretarji tas-Sottokumitat SFS. Mingħajr preġudizzju għall-paragrafu 3, il-President jiffirma dawk id-dokumenti matul il-laqgħa li fiha tiġi adottata d-deċiżjoni, l-opinjoni, ir-rakkomandazzjoni jew ir-rapport rilevanti.

3. Is-Sottokumitat SFS jista' jieħu deċiżjonijiet, jagħmel rakkomandazzjonijiet u jadotta opinjonijiet jew rapporti bi proċedura bil-miktub, wara t-tlestija tal-proċeduri interni rispettivi għall-adozzjoni tagħhom, jekk il-Partijiet jaqblu li jsir hekk. Il-proċedura bil-miktub tikkonsisti minn skambju ta' noti bejn is-Segretarji, li jaġixxu bi ftehim mal-Partijiet. Għal dak il-għan, it-test tal-proposta jiġi ċċirkolat skont l-Artikolu 7, b'limitu ta' żmien ta' mhux anqas minn 21 jum kalendarju li matulu tiġi mgħarrfa kull riżerva jew emenda. Il-President jista', f'konsultazzjoni mal-Partijiet, iqassar dak il-perjodu ta' żmien sabiex jittieħed kont ta' ċirkostanzi speċjali. Ġaladarba jkun hemm qbil dwar it-test, id-deċiżjoni, l-opinjoni, ir-rakkomandazzjoni jew ir-rapport jiġu ffirmati mill-President u awtentikati mis-Segretarji.

4. L-atti tas-Sottokumitat SFS jingħataw it-titolu ta' “Deċiżjoni”, “Opinjoni”, “Rakkomandazzjoni” jew “Rapport” rispettivament. Kull deċiżjoni tidħol fis-seħħ fid-data tal-adozzjoni tagħha sakemm id-deċiżjoni ma tipprevedix mod ieħor.

5. Id-deċiżjonijiet, l-opinjonijiet, ir-rakkomandazzjonijiet u r-rapporti jiġu ċċirkolati mal-Partijiet.

6. Kull Parti tista' tiddeċiedi dwar l-ippubblikar tad-deċiżjonijiet, tal-opinjonijiet u tar-rakkomandazzjonijiet tas-Sottokumitat SFS fil-pubblikazzjoni uffiċjali rispettiva tagħha.

Artikolu 12

Rapporti

Is-Sottokumitat SFS jippreżenta rapport lill-Kumitat ta' Assoċjazzjoni fil-konfigurazzjoni tal-Kummerċ dwar l-attivitajiet tiegħu u dawk tal-gruppi ta' ħidma tekniċi jew il-gruppi ad hoc imwaqqfin mis-Sottokumitat SFS. Ir-rapport jiġi ppreżentat 25 jum tal-kalendarju qabel il-laqgħa annwali regolari tal-Kumitat ta' Assoċjazzjoni fil-konfigurazzjoni tal-Kummerċ.

Artikolu 13

Lingwi

1. Il-lingwi ta' ħidma tas-Sottokumitat SFS huma l-Ingliż u r-Rumen.

2. Sakemm ma jiġix deċiż mod ieħor, is-Sottokumitat SFS jibbaża d-deliberazzjonijiet tiegħu fuq dokumentazzjoni mħejjija b'dawk il-lingwi.

Artikolu 14

Spejjeż

1. Kull Parti tkopri l-ispejjeż li ġġarrab minħabba li tieħu sehem fil-laqgħat tas-Sottokumitat SFS, kemm fir-rigward tal-persunal, tal-ivvjaġġar u tal-ispejjeż ta' sussistenza kif ukoll fir-rigward tal-infiq tal-posta u tat-telekomunikazzjonijiet.

2. L-infiq marbut mal-organizzazzjoni tal-laqgħat u mar-riproduzzjoni tad-dokumenti jitħallas mill-Parti li tkun qed tospita l-laqgħa.

3. L-infiq marbut ma' servizzi ta' interpretazzjoni fil-laqgħat u t-traduzzjoni ta' dokumenti għal jew mill-Ingliż u r-Rumen kif imsemmi fl-Artikolu 13(1) jitħallsu mill-Parti li tkun qed tospita l-laqgħa.

L-interpretazzjoni u t-traduzzjoni għal jew minn lingwi oħra jitħallsu direttament mill-Parti li tagħmel it-talba.

Artikolu 15

Emenda tar-Regoli ta' Proċedura

Dawn ir-Regoli ta' Proċedura jistgħu jiġu emendati permezz ta' deċiżjoni tas-Sottokumitat SFS f'konformità mal-Artikolu 191(5) tal-Ftehim.

Artikolu 16

Gruppi ta' ħidma tekniċi u gruppi ad hoc

1. Is-Sottokumitat tal-SFS jista' permezz ta' deċiżjoni skont l-Artikolu 191(6) tal-Ftehim joħloq jew jabolixxi, fejn xieraq, gruppi ta' ħidma tekniċi jew gruppi ta' ħidma ad hoc, inklużi gruppi xjentifiċi u gruppi ta' esperti.

2. Is-sħubija fi gruppi ad hoc m'għandhiex bilfors tkun ristretta għar-rappreżentanti tal-Partijiet. Il-Partijiet jiżguraw li l-membri ta' kull grupp maħluq mis-Sottokumitat SFS jirrispettaw kull rekwiżit ta' kunfidenzjalità li jixraq.

3. Sakemm ma jkunx deċiż mod ieħor, il-gruppi maħluqin mis-Sottokumitat SFS jaħdmu taħt l-awtorità tas-Sottokumitat SFS, u jirrappurtaw lilu.

4. Il-laqgħat tal-gruppi ta' ħidma jistgħu jsiru skont il-bżonn, fuq il-post jew permezz ta' vidjokonferenzi jew awdjokonferenzi.

5. Is-Segretarjat tas-Sottokumitat SFS jirċievi kopja ta' kull korrispondenza, dokument u komunikazzjoni rilevanti li jikkonċernaw l-attivitajiet tal-gruppi ta' ħidma.

6. Il-gruppi ta' ħidma jkollhom is-setgħa li jagħmlu rakkomandazzjonijiet bil-miktub quddiem is-Sottokumitat SFS. Ir-rakkomandazzjonijiet isiru b'kunsens u jiġu kkomunikati lill-President tas-Sottokumitat SFS, li min-naħa tiegħu jiċċirkola r-rakkomandazzjonijiet kif previst fl-Artikolu 7.

7. Dawn ir-Regoli ta' Proċedura jiġu applikati mutatis mutandis għal kull grupp ta' ħidma tekniku jew grupp ta' ħidma ad hoc maħluq mis-Sottokumitat SFS, sakemm ma jkunx previst mod ieħor f'dan l-Artikolu. Ir-referenzi għall-Kumitat ta' Assoċjazzjoni fil-konfigurazzjoni tal-Kummerċ jinftiehmu bħala referenzi għas-Sottokumitat SFS.

5.5.2015

Il-Ġurnal Uffiċjali tal-Unjoni Ewropea

L 114/19

DEĊIŻJONI Nru 1/2015 TAS-SOTTOKUMITAT DOGANALI BEJN L-UE U L-ĠEORĠJA

tat-18 ta' Marzu 2015

li biha jadotta r-Regoli ta' Proċedura tiegħu [2015/718]

IS-SOTTOKUMITAT DOGANALI BEJN L-UE U L-ĠEORĠJA,

Wara li kkunsidra l-Ftehim ta' Assoċjazzjoni bejn l-Unjoni Ewropea u l-Komunità Ewropea tal-Enerġija Atomika u l-Istati Membri tagħhom, minn naħa l-waħda, u l-Ġeorġja, min-naħa l-oħra (1), (“il-Ftehim”), u b'mod partikolari l-Artikolu 74 tiegħu,

Billi:

(1)	F'konformità mal-Artikolu 431 tal-Ftehim, partijiet mill-Ftehim ġew applikati b'mod provviżorju mill-1 ta' Settembru 2014.

(2)	Skont l-Artikolu 74 tal-Ftehim, is-Sottokumitat Doganali għandu jagħmel monitoraġġ tal-implimentazzjoni u l-amministrazzjoni tal-Kapitolu 5 (Faċilitazzjoni doganali u kummerċjali) tat-Titolu IV (Kummerċ u Kwistjonijiet relatati mal-Kummerċ) tal-Ftehim.

(3)	F'konformità mal-Artikolu 74(3)(e) tal-Ftehim, is-Sottokumitat Doganali għandu jadotta r-regoli ta' proċedura tiegħu stess,

ADOTTA DIN ID-DEĊIŻJONI:

Artikolu 1

B'dan qegħdin jiġu adottati r-Regoli ta' Proċedura tas-Sottokumitat Doganali, kif stipulati fl-Anness.

Artikolu 2

Din id-Deċiżjoni tidħol fis-seħħ fid-data tal-adozzjoni tagħha.

Magħmul fi Tbilisi, it-18 ta' Marzu 2015.

Għas-Sottokumitat Doganali

Il-President

S. URIDIA

Segretarji

M. KHVEDELIDZE

K. MYNAR

(1) ĠU L 261, 30.8.2014, p. 4.

ANNESS

REGOLI TA' PROĊEDURA TAS-SOTTOKUMITAT DOGANALI BEJN L-UE U L-ĠEORĠJA

Artikolu 1

Dispożizzjonijiet Ġenerali

1. Is-Sottokumitat Doganali stabbilit f'konformità mal-Artikolu 74(1) tal-Ftehim ta' Assoċjazzjoni bejn l-Unjoni Ewropea u l-Komunità Ewropea dwar l-Enerġija Atomika u l-Istati Membri tagħhom, minn naħa l-waħda, u l-Ġeorġja, min-naħa l-oħra (“il-Ftehim”) iwettaq il-funzjonijiet tiegħu kif previst fl-Artikolu 74(2) u (3) tal-Ftehim.

2. Is-Sottokumitat Doganali jkun imsawwar minn rappreżentanti tal-Kummissjoni Ewropea u tal-Ġeorġja, responsabbli għall-kwistjonijiet doganali jew relatati mad-dwana.

3. Rappreżentant tal-Kummissjoni Ewropea jew tar-Repubblika tal-Ġeorġja li jkollu r-responsabbiltà għall-kwistjonijiet doganali jew relatati mad-dwana jaġixxi bħala President f'konformità mal-Artikolu 2.

4. Il-Partijiet f'dawn ir-Regoli ta' Proċedura jiġu definiti kif previst fl-Artikolu 428 tal-Ftehim.

Artikolu 2

Presidenza

Il-Partijiet iżommu l-Presidenza tas-Sottokumitat Doganali, fuq bażi ta' alternanza, għal perjodu ta' 12-il xahar. L-ewwel perjodu jibda' fid-data tal-ewwel laqgħa tal-Kunsill ta' Assoċjazzjoni u jintemm fil-31 ta' Diċembru tal-istess sena.

Artikolu 3

Laqgħat

1. Ħlief fejn ikun miftiehem mod ieħor mill-Partijiet, is-Sottokumitat Doganali jiltaqa' darba fis-sena jew fuq talba ta' xi waħda mill-Partijiet.

2. Kull laqgħa tas-Sottokumitat Doganali titlaqqa' mill-President fi żmien u f'post li jkun hemm qbil dwaru mill-Partijiet. L-avviż ta' sejħa għal-laqgħa jinħareġ mill-President tas-Sottokumitat Doganali mhux aktar tard minn 28 jum kalendarju qabel il-bidu tal-laqgħa sakemm il-Partijiet ma jiftehmux mod ieħor.

3. Il-laqgħat tas-Sottokumitat Doganali jistgħu jsiru permezz ta' kwalunkwe tagħmir teknoloġiku bi qbil bħalma huma l-vidjokonferenzi jew l-awdjokonferenzi.

4. Is-Sottokumitat Doganali jista' jindirizza kwistjonijiet mingħajr ma jiltaqa', permezz tal-korrispondenza.

Artikolu 4

Delegazzjonijiet

Qabel kull laqgħa, il-Partijiet jiġu mgħarrfin mis-Segretarjat tas-Sottokumitat Doganali, dwar l-għamla prevista tad-delegazzjoni ta' kull Parti li tkun se tattendi l-laqgħa.

Artikolu 5

Segretarjat

1. Uffiċjal tal-Kummissjoni Ewropea u uffiċjal tal-Ġeorġja li huma responsabbli għall-kwistjonijiet doganali jew relatati mad-dwana jaġixxu b'mod konġunt bħala Segretarji tas-Sottokumitat Doganali u jwettqu kompiti segretarjali b'mod konġunt fi spirtu ta' fiduċja reċiproka u kooperazzjoni.

2. Is-Segretarjat tal-Kumitat ta' Assoċjazzjoni fil-konfigurazzjoni tal-Kummerċ, kif stipulat fl-Artikolu 408(4) tal-Ftehim (“il-Kumitat ta' Assoċjazzjoni fil-konfigurazzjoni tal-Kummerċ”) ikun mgħarraf bi kwalunkwe deċiżjoni, opinjoni, rakkomandazzjoni, rapport u azzjoni oħra maqbula tas-Sottokumitat Doganali.

Artikolu 6

Korrispondenza

1. Il-korrispondenza indirizzata lis-Sottokumitat Doganali għandha tintbagħat lis-Segretarju ta' waħda mill-Partijiet, li min-naħa tiegħu jgħarraf lis-Segretarju l-ieħor.

2. Is-Segretarjat tas-Sottokumitat Doganali jiżgura li l-korrispondenza indirizzata lis-Sottokumitat Doganali tingħadda lill-President tas-Sottokumitat Doganali u tiġi ċċirkolata, fejn xieraq bħala dokumenti msemmija fl-Artikolu 7.

3. Il-korrispondenza mill-President tintbagħat lill-Partijiet mis-Segretarjat f'isem il-President. Din il-korrispondenza tiġi ċċirkolata, fejn xieraq, kif previst fl-Artikolu 7.

Artikolu 7

Dokumenti

1. Id-dokumenti jiġu ċċirkolati mis-Segretarji tas-Sottokumitat Doganali.

2. Parti tittrażmetti d-dokumenti tagħha lis-Segretarju tagħha. Is-Segretarju jittrażmetti dawk id-dokumenti lis-Segretarju tal-Parti l-oħra.

3. Is-Segretarju tal-Unjoni jiċċirkola d-dokumenti mar-rappreżentanti rilevanti tal-Unjoni u f'tali korrispondenza jikkopja sistematikament lis-Segretarju tal-Ġeorġja. Is-Segretarju tal-Unjoni jibgħat kopja tad-dokumenti finali lis-Segretarji tal-Kumitat ta' Assoċjazzjoni fil-konfigurazzjoni tal-Kummerċ.

4. Is-Segretarju tal-Ġeorġja jiċċirkola d-dokumenti mar-rappreżentanti rilevanti tal-Ġeorġja u jikkopja sistematikament lis-Segretarju tal-Unjoni f'din il-korrispondenza. Is-Segretarju tal-Ġeorġja jibgħat kopja tad-dokumenti finali lis-Segretarji tal-Kumitat ta' Assoċjazzjoni fil-konfigurazzjoni tal-Kummerċ.

Artikolu 8

Kunfidenzjalità

Sakemm ma jiġix deċiż mod ieħor bejn il-Partijiet, il-laqgħat tas-Sottokumitat Doganali ma jkunux pubbliċi. Meta Parti tippreżenta informazzjoni mmarkata bħala kunfidenzjali lis-Sottokumitat Doganali, il-Parti l-oħra tittratta dik l-informazzjoni bħala tali.

Artikolu 9

Aġendi għal-laqgħat

1. Titfassal aġenda provviżorja għal kull laqgħa mis-Segretarjat tas-Sottokumitat Doganali abbażi tal-proposti li jsiru mill-Partijiet. L-aġenda provviżorja tkun tinkludi punti li s-Segretarjat ikun irċieva talba dwarhom mingħand xi Parti biex jiddaħħlu fl-aġenda, sostnuti mid-dokumenti rilevanti, mhux aktar tard minn 21 jum kalendarju qabel id-data tal-laqgħa.

2. L-aġenda provviżorja, flimkien mad-dokumenti rilevanti, jiġu ċċirkolati kif previst fl-Artikolu 7 mhux aktar tard minn 15-il jum kalendarju qabel il-bidu tal-laqgħa.

3. L-aġenda tiġi adottata mis-Sottokumitat Doganali fil-bidu ta' kull laqgħa. Kull punt minbarra dawk li jidhru fl-aġenda provviżorja jista' jitqiegħed fuq l-aġenda jekk il-Partijiet jaqblu li jsir hekk.

4. Il-President tas-Sottokumitat Doganali jista', bi qbil mal-Parti l-oħra, jistieden rappreżentanti ta' korpi oħra tal-Partijiet jew esperti indipendenti ta' qasam partikolari fuq bażi ad hoc sabiex jattendu l-laqgħat tiegħu bil-għan li jipprovdu tagħrif dwar suġġetti speċifiċi. Il-Partijiet jiżguraw li dawn l-osservaturi jew l-esperti jirrispettaw kull rekwiżit ta' kunfidenzjalità.

5. Il-President tas-Sottokumitat Doganali jista' jqassar il-limiti ta' żmien speċifikati fil-paragrafi 1 u 2, b'konsultazzjoni mal-Partijiet biex jieħu kont ta' ċirkostanzi speċjali.

Artikolu 10

Minuti u konklużjonijiet operattivi

1. L-abbozz tal-minuti, inklużi l-konklużjonijiet operattivi, ta' kull laqgħa jitfassal mis-Segretarju tas-Sottokumitat Doganali tal-Parti li jkollha l-presidenza tas-Sottokumitat Doganali.

2. L-abbozz tal-minuti, inklużi l-konklużjonijiet operattivi, jiġi ppreżentat lis-Sottokumitat Doganali għall-approvazzjoni. L-abbozz tal-minuti jiġi approvat fi żmien 28 jum kalendarju wara kull laqgħa tas-Sottokumitat Doganali. Tintbagħat kopja lil kull wieħed mid-destinatarji msemmija fl-Artikolu 7.

Artikolu 11

Deċiżjonijiet u rakkomandazzjonijiet

1. Is-Sottokumitat Doganali jkollu s-setgħa jadotta l-arranġamenti prattiċi, il-miżuri, id-deċiżjonijiet u r-rakkomandazzjonijiet kif previst fl-Artikolu 74 tal-Ftehim. Dawk l-arranġamenti prattiċi, il-miżuri, id-deċiżjonijiet u r-rakkomandazzjonijiet jiġu adottati b'kunsens bejn il-Partijiet wara t-tlestija tal-proċeduri interni rispettivi għall-adozzjoni tagħhom. Id-deċiżjonijiet ikunu vinkolanti għall-Partijiet, li jieħdu l-miżuri xierqa biex jimplimentawhom.

2. Kull deċiżjoni jew rakkomandazzjoni tiġi ffirmata mill-President tas-Sottokumitat Doganali u awtentikata mis-Segretarji tas-Sottokumitat Doganali. Mingħajr preġudizzju għall-paragrafu 3, il-President jiffirma dawk id-dokumenti matul il-laqgħa li fiha tiġi adottata d-deċiżjoni jew ir-rakkomandazzjoni rilevanti.

3. Is-Sottokumitat Doganali jista' jieħu deċiżjonijiet jew jagħmel rakkomandazzjonijiet bi proċedura bil-miktub, wara li jitlestew il-proċeduri interni rispettivi, jekk il-Partijiet jaqblu li jsir hekk. Il-proċedura bil-miktub tikkonsisti minn skambju ta' noti bejn is-Segretarji, li jaġixxu bi ftehim mal-Partijiet. Għal dak il-għan, it-test tal-proposta jiġi ċċirkolat skont l-Artikolu 7, b'limitu ta' żmien ta' mhux anqas minn 21 jum kalendarju li matulu tiġi mgħarrfa kull riżerva jew emenda. Il-President jista' jqassar dak il-limitu ta' żmien, b'konsultazzjoni mal-Partijiet biex jieħu kont ta' ċirkostanzi speċjali. Ġaladarba jkun hemm qbil dwar it-test, id-deċiżjoni jew ir-rakkomandazzjoni jiġu ffirmati mill-President u awtentikati mis-Segretarji.

4. L-atti tas-Sottokumitat Doganali jingħataw it-titolu ta' “Deċiżjoni” jew “Rakkomandazzjoni” rispettivament. Kull deċiżjoni tidħol fis-seħħ fid-data tal-adozzjoni tagħha sakemm id-deċiżjoni ma tipprevedix mod ieħor.

5. Id-deċiżjonijiet u r-rakkomandazzjonijiet jiġu ċċirkolati mal-Partijiet.

6. Kull Parti tista' tiddeċiedi dwar l-ippubblikar tad-deċiżjonijiet u r-rakkomandazzjonijiet tas-Sottokumitat Doganali fil-pubblikazzjoni uffiċjali rispettiva tagħha.

Artikolu 12

Rapporti

Is-Sottokumitat Doganali jirrapporta lill-Kumitat ta' Assoċjazzjoni fil-konfigurazzjoni tal-Kummerċ f'kull laqgħa regolari annwali tal-Kumitat ta' Assoċjazzjoni fil-konfigurazzjoni tal-Kummerċ.

Artikolu 13

Lingwi

1. Il-lingwi ta' ħidma tas-Sottokumitat Doganali huma l-Ingliż u l-Ġeorġjan.

2. Sakemm ma jiġix deċiż mod ieħor, is-Sottokumitat Doganali jibbaża d-deliberazzjonijiet tiegħu fuq dokumentazzjoni mħejjija b'dawk il-lingwi.

Artikolu 14

Spejjeż

1. Kull Parti tkopri l-ispejjeż li ġġarrab minħabba li tieħu sehem fil-laqgħat tas-Sottokumitat Doganali, kemm fir-rigward tal-persunal, tal-ivvjaġġar u tal-ispejjeż ta' sussistenza kif ukoll fir-rigward tal-infiq tal-posta u tat-telekomunikazzjonijiet.

2. L-infiq marbut mal-organizzazzjoni tal-laqgħat u mar-riproduzzjoni tad-dokumenti jitħallas mill-Parti li tkun qed tospita l-laqgħa.

3. L-ispejjeż marbutin ma' servizzi ta' interpretazzjoni fil-laqgħat, u t-traduzzjoni ta' dokumenti għal jew mill-Ingliż u l-Ġeorġjan kif imsemmi fl-Artikolu 13(1) jitħallsu mill-Parti li tkun qed tospita l-laqgħa.

L-interpretazzjoni u t-traduzzjoni għal jew minn lingwi oħra jitħallsu direttament mill-Parti li tagħmel it-talba.

Artikolu 15

Emenda tar-Regoli ta' Proċedura

Dawn ir-Regoli ta' Proċedura jistgħu jiġu emendati permezz ta' deċiżjoni tas-Sottokumitat Doganali f'konformità mal-Artikolu 74(3)(e) tal-Ftehim.

		ISSN 1977-074X
Il-Ġurnal Uffiċjali tal-Unjoni Ewropea		L 114

Edizzjoni bil-Malti	Leġiżlazzjoni	Volum 58 5 ta' Mejju 2015

Werrej		II Atti mhux leġiżlattivi	Paġna
		REGOLAMENTI
	*	Regolament ta' Implimentazzjoni tal-Kummissjoni (UE) 2015/712 tat-28 ta' April 2015 li jemenda r-Regolament (UE) Nru 103/2012 dwar il-klassifikazzjoni ta' ċerti prodotti fin-Nomenklatura Magħquda	1
		Regolament ta' Implimentazzjoni tal-Kummissjoni (UE) 2015/713 tal-4 ta' Mejju 2015 li jistabbilixxi l-valuri standard tal-importazzjoni għad-determinazzjoni tal-prezz ta' dħul ta' ċertu frott u ħxejjex	4
		DEĊIŻJONIJIET
	*	Deċiżjoni ta' Implimentazzjoni tal-Kummissjoni (UE) 2015/714 tal-24 ta' April 2015 dwar il-validità ta' ċerta informazzjoni vinkolanti dwar it-tariffi (notifikata bid-dokument C(2015) 2888)	6
	*	Deċiżjoni tal-Kummissjoni (UE) 2015/715 tat-30 ta' April 2015 li temenda l-Anness I tar-Regolament (KE) Nru 715/2009 tal-Parlament Ewropew u tal-Kunsill dwar il-kondizzjonijiet għall-aċċess għan-networks ta' trażmissjoni tal-gass naturali ( 1 )	9
	*	Deċiżjoni (UE) 2015/716 tal-Bank Ċentrali Ewropew tat-12 ta' Frar 2015 li temenda d-Deċiżjoni BĊE/2004/2 li tadotta r-Regoli tal-Proċedura tal-Bank Ċentrali Ewropew (BĊE/2015/8)	11
		ATTI ADOTTATI MINN KORPI STABBILITI PERMEZZ TA' FTEHIMIET INTERNAZZJONALI
	*	Deċiżjoni Nru 1/2015 tas-Sottokumitat Sanitarju u Fitosanitarju bejn l-UE u r-Repubblika tal-Moldova tat-12 ta' Marzu 2015 li biha jadotta r-Regoli ta' Proċedura tiegħu [2015/717]	13
	*	Deċiżjoni Nru 1/2015 tas-Sottokumitat Doganali bejn l-UE u l-Ġeorġja tat-18 ta' Marzu 2015 li biha jadotta r-Regoli ta' Proċedura tiegħu [2015/718]	19

	Rettifika
*	Rettifika għad-Direttiva 2014/23/UE tal-Parlament Ewropew u tal-Kunsill tas-26 ta' Frar 2014 dwar l-għoti ta' kuntratti ta' konċessjoni ( ĠU L 94, 28.3.2014 )	24
*	Rettifika għar-Regolament ta' Implimentazzjoni tal-Kummissjoni (UE) Nru 908/2014 tas-6 ta' Awwissu 2014 li jistabbilixxi r-regoli għall-applikazzjoni tar-Regolament (UE) Nru 1306/2013 tal-Parlament Ewropew u tal-Kunsill fir-rigward tal-aġenziji tal-pagamenti u korpi oħra, il-ġestjoni finanzjarja, l-approvazzjoni ta' kontijiet, ir-regoli dwar kontrolli, garanziji u trasparenza ( ĠU L 255, 28.8.2014 )	25


	(1) Test b'rilevanza għaż-ŻEE