(1)

F'lulju 2005, permezz tar-Regolament (KE) Nru 1174/2005 (2), il-Kunsill impona dazju antidumping definittiv fuq importazzjonijiet ta' pallet trucks tal-idejn u l-partijiet essenzjali tagħhom li joriġinaw fir-Repubblika Popolari taċ-Ċina (ir-RPĊ). Il-miżuri kienu jikkonsistu f'dazju antidumping ad valorem li jvarja bejn 7,6 % u 46,7 %.

(2)

F'lulju 2008, permezz tar-Regolament (KE) Nru 684/2008 (3), il-Kunsill, wara analiżi interim tal-ambitu tal-prodott, ikkjarifika l-ambitu tal-prodott tal-investigazzjoni oriġinali.

(3)

F'Ġunju 2009, bir-Regolament (KE) Nru 499/2009 (4), il-Kunsill, wara investigazzjoni kontra ċ-ċirkumvenzjoni, estenda d-dazju definittiv antidumping applikabbli fuq “il-kumpaniji l-oħra kollha” impost mir-Regolament (KE) Nru 1174/2005 għal importazzjonijiet ta' pallet trucks tal-idejn u l-partijiet essenzjali tagħhom mibgħuta mit-Tajlandja, sew jekk dikjarati li joriġinaw fit-Tajlandja u sew jekk le.

(4)

F'Ottubru 2011, bir-Regolament ta' Implimentazzjoni (UE) Nru 1008/2011 (5), il-Kunsill impona dazju antidumping definittiv fuq importazzjonijiet ta' pallet trucks tal-idejn u l-partijiet essenzjali tagħhom li joriġinaw mir-RPĊ wara analiżi ta' skadenza skont l-Artikolu 11(2) tar-Regolament bażiku. Id-dazju estiż kif imsemmi fil-premessa 3 hawn fuq inżamm ukoll mir-Regolament ta' Implimentazzjoni (UE) Nru 1008/2011.

(5)

Il-miżuri fis-seħħ bħalissa huma dazju antidumping impost mir-Regolament ta' Implimentazzjoni tal-Kunsill (UE) Nru 1008/2011, wara analiżi tal-iskadenza skont l-Artikolu 11(2) tar-Regolament tal-Kunsill (KE) Nru 1225/2009 (l-investigazzjoni tal-analiżi tal-iskadenza) kif emendat mir-Regolament ta' Implimentazzjoni tal-Kunsill (UE) Nru 372/2013 (6) wara analiżi interim skont l-Artikolu 11(3) tar-Regolament bażiku (l-investigazzjoni tal-analiżi interim). Ir-rata ta' dazju fuq l-importazzjonijiet fl-Unjoni ta' pallet trucks tal-idejn u l-partijiet essenzjali tagħhom li joriġinaw fir-Repubblika Popolari taċ-Ċina (“il-pajjiż konċernat” jew “ir-RPĊ”) bħalissa huwa ta' 70,8 %. Il-miżuri huma applikabbli wkoll għal importazzjonijiet ta' pallet trucks tal-idejn u l-partijiet essenzjali tagħhom ikkonsenjati mit-Tajlandja, sew jekk iddikjarati li joriġinaw mit-Tajlandja jew le skont ir-Regolament ta' Implimentazzjoni tal-Kunsill (KE) Nru 499/2009 wara investigazzjoni kontra ċ-ċirkumvenzjoni skont l-Artikolu 13 tar-Regolament bażiku.

(6)

Il-Kummissjoni Ewropea (il-Kummissjoni) irċeviet talba għal analżi ta' “esportatur ġdid” skont l-Artikolu 11(4) tar-Regolament bażiku. It-talba ġiet ippreżentata fit-3 ta' Mejju 2013 minn Ningbo Logitrans Handling Equipment Co., Ltd (l-applikant), prodottur esportatur ta' pallet trucks tal-idejn u l-partijiet essenzjali tagħhom fir-RPĊ.

(7)

L-applikant sostna li jopera skont il-kundizzjonijiet ta' ekonomija tas-suq kif definiti fl-Artikolu 2(7)(c) tar-Regolament bażiku.

(8)

Huwa sostna wkoll li ma kienx jesporta pallet trucks tal-idejn u l-partijiet essenzjali tagħhom lejn l-Unjoni matul il-perjodu tal-investigazzjoni li fuqu kienu bbażati l-miżuri antidumping, jiġifieri mill-1 ta' April 2003 sal-31 ta' Marzu 2004 (il-perjodu tal-investigazzjoni oriġinali). Huwa qal li lanqas ma esporta l-prodott konċernat matul il-perjodu tal-investigazzjoni tal-analiżi interim sussegwenti, jiġifieri mill-1 ta' Jannar 2011 sal-31 ta' Diċembru 2011.

(9)

Barra minn hekk, l-applikant iddikjara li ma kien relatat mal-ebda produttur esportatur ta' pallet trucks tal-idejn u l-partijiet essenzjali tagħhom li kienu suġġetti għall-miżuri antidumping imsemmija hawn fuq.

(10)

L-applikant kompla jiddikjara li kien beda jesporta pallet trucks tal-idejn u l-partijiet essenzjali tagħhom lejn l-Unjoni wara tmiem il-perjodu tal-investigazzjoni oriġinali u l-perjodu tal-investigazzjoni tal-analiżi interim sussegwenti.

(11)

Il-Kummissjoni eżaminat l-evidenza prima facie mressqa mill-applikant u kkunsidrata bħala ġustifikazzjoni suffiċjenti biex tibda analiżi skont l-Artikolu 11(4) tar-Regolament bażiku. Wara konsultazzjoni mal-Kumitat Konsultattiv u wara li l-industrija tal-Unjoni kkonċernata ngħatat l-opportunità tikkummenta, il-Kummissjoni tat bidu għal analiżi skont l-Artikolu 11(4) tar-Regolament bażiku bir-Regolament tal-Kummissjoni (UE) Nru 32/2014 (7).

(12)

Skont l-Artikolu 2 tar-Regolament (UE) Nru 32/2014, id-dazju antidumping impost bir-Regolament ta' Implimentazzjoni tal-Kunsill (UE) Nru 1008/2011 kif emendat mir-Regolament ta' Implimentazzjoni tal-Kunsill (UE) Nru 372/2013 ġie mħassar fir-rigward ta' importazzjonijiet ta' pallet trucks tal-idejn u l-partijiet essenzjali tagħhom prodotti u mibjugħa għall-esportazzjoni lejn l-Unjoni mill-applikant. Fl-istess waqt, skont l-Artikolu 3 tar-Regolament (UE) Nru 32/2014, l-awtoritajiet doganali kienu ordnati jieħdu passi xierqa biex jirreġistraw dawn l-importazzjonijiet.

(13)

Ir-Regolament (UE) Nru 32/2014 iddetermina li jekk l-investigazzjoni turi li l-applikant jissodisfa r-rekwiżiti li jiġi stabbilit dazju individwali, jista' jkun hemm bżonn li tiġi emendata r-rata ta' dazju applikabbli attwalment skont l-Artikolu 1(2) tar-Regolament ta' Implimentazzjoni (UE) Nru 1008/2011 kif emendat mir-Regolament ta' Implimentazzjoni (UE) Nru 372/2013.

(14)

Il-prodott konċernat huwa pallet trucks tal-idejn u l-partijiet essenzjali tagħhom, jiġifieri x-xażi u s-sistemi idrawliċi, li bħalissa jaqgħu taħt il-kodiċi NM ex 8427 90 00 (kodiċi TARIC 8427 90 00 11 u 8427 90 00 19) u ex 8431 20 00 (kodiċi TARIC 8431 20 00 11 u 8431 20 00 19) u li joriġinaw fir-RPĊ (il-prodott konċernat).

(15)

Il-Kummissjoni nnotifikat uffiċjalment lill-industrija tal-Unjoni, l-applikant u r-rappreżentanti tal-pajjiż esportatur dwar il-bidu tal-analiżi. Il-partijiet interessati ngħataw l-opportunità jressqu l-opinjoni tagħhom bil-miktub u jinstemgħu.

(16)

Il-Kummissjoni fittxet u vverifikat l-informazzjoni kollha li qieset neċessarja għad-determinazzjoni tal-istatus tal-esportatur ġdid, il-kundizzjonijiet tal-ekonomija tas-suq u d-dumping. Il-Kummissjoni bagħtet formola ta' pretensjoni għal trattament ta' ekonomija tas-suq u kwestjonarju lill-applikant u l-kumpaniji relatati tiegħu u rċeviet risposta qabel l-iskadenza stabbilita għal dak il-għan. Twettqu żjarat ta' verifika fuq il-post tal-applikant u l-kumpanija relatata fid-Danimarka, Logitrans A/S.

(17)

Il-perjodu tal-investigazzjoni tal-analiżi tad-determinazzjoni tad-dumping kopra l-perjodu mill-1 ta' Lulju 2012 sal-31 ta' Diċembru 2013 (il-perjodu ta' investigazzjoni tal-analiżi).

(18)

L-investigazzjoni kkonfermat li l-applikant ma kienx esporta l-prodott konċernat matul il-perjodu tal-investigazzjoni oriġinali, jiġifieri mill-1 ta' April 2003 sal-31 ta' Marzu 2004, u lanqas fil-perjodu ta' investigazzjoni ta' analiżi interim sussegwenti, jiġifieri mill-1 ta' Jannar sal-31 ta' Diċembru 2011, u li kien beda jesporta lejn l-Unjoni wara dawn il-perjodi.

(19)

L-applikant seta' wkoll juri li ma kellu l-ebda rabta, diretta jew indiretta, ma' ebda produttur esportatur Ċiniż soġġett għall-miżuri antidumping fis-seħħ fir-rigward tal-prodott konċernat.

(20)

Għaldaqstant, qed jiġi kkonfermat li l-applikant għandu jitqies bħala “esportatur ġdid” skont l-Artikolu 11(4) tar-Regolament bażiku, u għandu għalhekk jiġi stabbilit marġni individwali għalih.

(21)

Skont l-Artikolu 2(7)(b) tar-Regolament bażiku, il-Kummissjoni tiddetermina l-valur normali skont l-Artikolu 2(1) sa (6) ta' dak ir-Regolament għal produtturi esportaturi fir-RPĊ li jikkonformaw mal-kriterji fl-Artikolu 2(7)(c) ta' dak ir-Regolament u li għalhekk jistgħu jingħataw TES.

(22)

L-applikant huwa kumpanija privata, li hija totalment proprjetà ta' kumpanija li l-azzjonisti diretti tagħha huma kumpaniji fl-Unjoni Ewropea. Id-deċiżjonijiet tal-operat ta' kuljum jittieħdu mid-direttur eżekuttiv li hu ċittadin tal-Unjoni Ewropea u wkoll membru tal-bord tad-diretturi. Id-deċiżjonijiet kummerċjali ewlenin jittieħdu mill-bord tal-azzjonisti. La kien hemm il-preżenza ta' xi uffiċjal relatat mal-Istat, u lanqas ma kien hemm xi interferenza oħra tal-Istat fir-RPĊ fit-teħid tad-deċiżjonijiet.

(23)

Imbagħad, l-input prinċipali għall-manifattura tal-pallet trucks tal-idejn u l-partijiet essenzjali tagħhom fil-każ tal-applikant kienu partijiet tal-metall nofshom lesti magħmulin minn azzar bil-karbonju illaminat bis-sħana mixtri mingħand fornituri differenti fir-RPĊ, jiġifieri diġà pproċessati f'partijiet tal-azzar tal-karbonju illaminat bis-sħana.

(24)

Abbażi ta' informazzjoni disponibbli għall-pubbliku (8) kien stabbilit li l-prezzijiet tal-partijiet tal-metall proċessati mħallsa mill-applikant kienu suffiċjentement għolja biex jirriflettu l-prezzijiet tal-azzar fis-suq internazzjonali u l-valur miżjud għall-proċessar tal-azzar illaminat bis-sħana f'partijiet tal-metall nofshom lesti. Bħala riżultat, id-distorsjoni tal-prezzijiet tal-azzar mhux proċessat fir-RPĊ stabbilit matul l-investigazzjoni ta' analiżi interim (9) ma nstabx li ġiet ittrasferita fuq il-prezzijiet tal-partijiet tal-metall proċessat imħallsa mill-applikant f'dan il-każ.

(25)

Fuq il-bażi ta' dan ta' hawn fuq, kien għalhekk konkluż li l-applikant wera li kien issodisfa l-kriterju 1 tal-Artikolu 2(7)(c) tar-Regolament bażiku.

(26)

Imbagħad, l-applikant kellu sett wieħed ċar ta' reġistri bażiċi tal-kontabbiltà li ġew awditjati indipendentement skont standards internazzjonali tal-kontabbiltà u applikati għall-iskopijiet kollha. Għalhekk ġie konkluż li l-applikant wera li kien issodisfa l-kriterju 2 tal-Artikolu 2(7)(c) tar-Regolament bażiku.

(27)

Ma' dan, l-applikant ma kellu l-ebda self minn istituzzjonijiet finanzjarji Ċiniżi u lanqas ma kellu self li ma kienx mogħti skont il-kundizzjonijiet tas-suq fejn jidħlu garanziji, rata tal-imgħax u kundizzjonijiet oħra. Ma kien hemm indikazzjoni tal-ebda distorsjoni jew vantaġġ ieħor marbut mal-post jew il-bini jew kwalunkwe interferenza oħra mill-Istat fl-operat tal-applikant. L-applikant lanqas ma kien ikkunsidrat bħala kumpanija ta' teknoloġija għolja biex b'hekk potenzjalment ikun jista' jirċievi xi benefiċċju mill-Istat f'dik il-kapaċità. Għalhekk ġie konkluż li l-applikant wera li kien issodisfa l-kriterju 3 tal-Artikolu 2(7)(c) tar-Regolament bażiku.

(28)

Instab ukoll li l-applikant kien suġġett għal-liġijiet rilevanti Ċiniżi tal-falliment u l-proprjetà, li l-applikazzjoni tagħhom hija mfassla biex tiggarantixxi ċ-ċertezza u l-istabbiltà legali għall-operat tad-ditti. Ma kienx hemm indikazzjonijiet li dawn il-liġijiet ma jkunux applikabbli u implimentati għall-applikant. Għalhekk ġie konkluż li l-applikant wera li kien issodisfa l-kriterju 4 tal-Artikolu 2(7)(c) tar-Regolament bażiku.

(29)

Fl-aħħar, l-investigazzjoni ma żvelat l-ebda restrizzjoni fuq l-użu u l-konverżjoni ta' muniti barranin. It-tranżazzjonijiet tal-kambju tal-applikant twettqu skont ir-rati tas-suq u seta' jiddisponi liberament mill-użu tal-fondi proprji tiegħu. Għalhekk ġie konkluż li l-applikant wera li kien issodisfa l-kriterju 5 tal-Artikolu 2(7)(c) tar-Regolament bażiku.

(30)

Fuq il-bażi ta' dak li jirriżulta hawn fuq, ġie konkluż li l-applikant seta' jingħata TES biex b'hekk il-valur normali tiegħu jiġi ddeterminat skont l-Artikolu 2(1) sa (6) tar-Regolament bażiku.

(31)

Il-Kummissjoni żvelat ir-riżultati tal-analiżi TES lill-applikant, lill-awtoritajiet tar-RPĊ u lill-industrija tal-Unjoni u tathom l-opportunità jikkummentaw.

(32)

L-industrija tal-Unjoni sostniet li l-prezz internazzjonali tal-azzar ibbażat fuq informazzjoni disponibbli għall-pubbliku (ara l-premessa 24 iktar 'il fuq) mhijiex bażi xierqa għat-tqabbil peress li l-prezzijiet imħallsa minn operaturi iżgħar fis-suq tal-azzar ikunu tal-inqas 20 % ogħla mill-prezzijiet internazzjonali ta' referenza. L-industrija tal-Unjoni qalet ukoll li l-prezz imħallas għall-partijiet tal-metall proċessat użati fil-produzzjoni tal-pallet trucks tal-idejn fl-Unjoni jkun ħafna ogħla mill-prezzijiet imħallsa mill-applikant li fih innifsu jindika li l-prezz imħallas mill-applikant għal dawn il-partijiet ikun soġġett għal distorsjoni.

(33)

Il-prezzijiet internazzjonali ta' referenza kienu wkoll użati bħala bażi ta' paragun fl-investigazzjoni ta' analiżi interim u ma sar l-ebda aġġustament għal dawn il-prezzijiet (10). Tabilħaqq, peress li kwalunkwe primjum imħallas fuq il-prezzijiet internazzjonali ta' referenza jiddependi fuq fatturi individwali speċifiċi għal kull operatur fis-suq, ma hemm ebda bażi oġġettiva li jsir aġġustament ġenerali għaż-żieda allegata. Għalhekk it-talba li l-prezzijiet internazzjonali ta' referenza jiġu aġġustati kienet miċħuda.

(34)

Fir-rigward tal-prezz imħallas għall-partijiet tal-metall proċessat użati fil-produzzjoni tal-pallet trucks tal-idejn fl-Unjoni, l-evidenza ta' sostenn sottomessa mill-industrija tal-Unjoni ma wrietx li l-prezzijiet imħallsa mill-applikant għal dawn il-partijiet huma soġġetti għal distorsjoni. Dan minħabba li, kif spjegat fil-premessa 33 aktar 'il fuq kwalunkwe primjum imħallas fuq il-prezzijiet internazzjonali ta' referenza jiddependi fuq fatturi individwali speċifiċi għal kull operatur fis-suq, għalhekk ma hemmx bażi oġġettiva li jsir aġġustament ġenerali għaż-żieda allegata. Barra minn hekk, l-evidenza sottomessa wriet għadd sinifikanti ta' fatturi oħra li jaffettwaw il-prezz ta' dawn il-partijiet tal-metall minbarra l-prezzijiet tal-azzar u dan ma ppermetta l-ebda konklużjoni dwar il-livell xieraq ta' dawn il-partijiet li jista' jintuża bħala valur refernzjarju. Għalhekk, l-argument li l-prezzijiet imħallsa għall-partijiet tal-metall proċessat fl-Unjoni jindikaw li l-prezz imħallas mill-applikant għal dawn il-partijiet huwa soġġett għal distorsjoni ġie miċħud.

(35)

L-industrija tal-Unjoni argumentat ukoll li l-prezzijiet tal-azzar fir-RPĊ huma ssussidjati u ġeneralment distorti u li dan il-fatt fih innifsu jkun biżżejjed biex il-prezzijiet tal-partijiet tal-metall proċessati ulterjorment fir-RPĊ jitqiesu li huma distorti wkoll.

(36)

Skont il-ġurisprudenza tal-Qorti Ġenerali, filwaqt li l-Kummissjoni tista' tibbaża fuq konsiderazzjonijiet makroekonomiċi bħal distorsjonijiet fil-prezz tal-materja prima fil-livell industrijali/settorjali, id-determinazzjoni tat-TES trid issir individwalment għal kull kumpanija, jiġifieri ssir valutazzjoni ta' jekk il-prezzijiet imħallsa mill-kumpanija individwali għall-input tagħha jirriflettux il-valuri tas-suq (11). Barra minn hekk, ġie ċċarat ukoll li l-Kummissjoni tista' tqabbel il-prezzijiet medji domestiċi Ċiniżi tal-materja prima mal-medja tal-prezzijiet internazzjonali sabiex tiddetermina jekk għandux jingħata TES fuq din il-bażi (12).

(37)

Kif spjegat fil-premessa 24 ġie stabbilit li d-distorsjonijiet osservati fil-prezz fis-suq tal-azzar mhux proċessat fir-RPĊ ma nstabx li qed jiġu ttrasferiti fuq il-prezzijiet tal-partijiet tal-metall proċessat imħallsa mill-applikant. Dan l-approċċ huwa konformi mal-ġurisprudenza peress li jqis is-sitwazzjoni individwali tal-applikant u għalhekk l-argument tal-industrija tal-Unjoni f'dan ir-rigward ġie miċħud.

(38)

Fl-aħħar nett, l-industrija tal-Unjoni qalet li l-attribuzzjoni ta' marġni tal-antidumping individwali lill-applikant tikkostitwixxi riskju għoli ta' ċirkumvenzjoni peress li l-applikant diġà xtara pallet trucks tal-idejn minn fornitur ieħor fir-RPĊ u esportahom mill-ġdid lejn l-Unjoni.

(39)

Id-dikjarazzjoni ta' riskju akbar ta' ċirkumvenzjoni ma ġiet sostnuta bl-ebda evidenza. B'mod partikolari, l-applikant instab li ma kienx relatat mal-fornitur inkwestjoni jew ma' xi fornitur ieħor fir-RPĊ. L-investigazzjoni għalhekk ma kkonfermat l-ebda riskju akbar ta' ċirkumvenzjoni f'dan il-każ speċifiku. Fl-aħħar nett, ir-riskju ta' ċirkumvenzjoni per se mhuwiex kriterju msemmi fl-Artikolu 2(7)(c) tar-Regolament bażiku u għalhekk mhuwiex rilevanti fid-determinazzjoni ta' jekk kumpanija tikkwalifikax għat-TES. B'konsegwenza, dan l-argument ma ntlaqax.

(40)

Wara d-divulgazzjoni, l-industrija tal-Unjoni tenniet l-argumenti tagħha li l-prezzijiet tal-azzar abbażi ta' informazzjoni disponibbli għall-pubbliku ma kinux bażi xierqa għat-tqabbil peress li l-prezzijiet imħallsa minn operaturi iżgħar fis-suq tal-azzar ikunu ogħla mill-prezzijiet internazzjonali ta' referenza u wkoll ogħla mill-prezzijiet imħallsa mill-kumpaniji li kienu suġġetti għall-investigazzjoni ta' analiżi interim imsemmija fil-premessa 24 hawn fuq. L-industrija tal-Unjoni sostniet ukoll li t-tqabbil tal-prezzijiet li sar mill-Kummissjoni msemmi fil-premessa 24 ma jqisx kif xieraq il-kost tal-proċessar tal-partijiet tal-metall.

(41)

Dak li qalet l-industrija tal-Unjoni madankollu ma kienx sostnut b'aktar evidenza. Għalhekk, tqies li dawn il-kummenti kienu sempliċement tennija tal-argumenti ta' qabel li diġà ġew indirizzati fil-premessi 32 sa 37 hawn fuq u ġew miċħuda.

(42)

Il-Kummissjoni, l-ewwel eżaminat jekk il-volum tal-bejgħ domestiku totali tal-prodott simili lil konsumaturi indipendenti fis-suq domestiku kienx rappreżentattiv, jiġifieri jekk il-volum totali ta' dak il-bejgħ kienx jirrappreżenta mill-inqas 5 % tal-volum totali tal-bejgħ tal-esportazzjoni tiegħu tal-prodott konċernat lejn l-Unjoni waqt il-perjodu tal-investigazzjoni ta' analiżi, skont l-Artikolu 2(2) tar-Regolament bażiku. Il-Kummissjoni sabet li l-bejgħ kumplessiv tal-prodott simili fis-suq domestiku ma kienx rappreżentattiv minħabba li kien taħt il-limitu ta' 5 %.

(43)

Peress li ma kienx hemm volum ta' bejgħ domestiku rappreżentattiv, il-Kummissjoni użat valur normali maħdum skont l-Artikolu 2(3) u (6) tar-Regolament bażiku.

(44)

Il-valur normali nħadem billi ngħaddew flimkien l-ispiża medja tal-produzzjoni matul il-perjodu tal-investigazzjoni ta' analiżi, l-ispejjeż medji ponderati tal-bejgħ, ġenerali u amministrattivi (SG&A) li saru u l-profit medju ponderat li sar mill-applikant fuq il-bejgħ domestiku tal-prodott simili, fl-andament ordinarju tal-kummerċ, matul il-perjodu tal-investigazzjoni ta' analiżi.

(45)

L-applikant esporta pallet trucks tal-idejn iżda wkoll il-partijiet essenzjali tagħhom (is-sistemi idrawliċi) li huma wkoll prodott konċernat. L-esportazzjonijiet tas-sistemi idrawliċi kienu ta' valur u volum relattivament baxxi matul il-perjodu tal-investigazzjoni ta' analiżi. Barra minn hekk, l-idrawliċi ma kinux mibjugħa mill-ġdid lil konsumaturi indipendenti mill-kumpanija relatata fl-Unjoni. Minflok, dawn intużaw esklussivament għall-produzzjoni tal-pallet trucks tal-idejn mill-kumpanija relatata fl-Unjoni li mbagħad biegħet il-prodott lest (pallet trucks tal-idejn) fis-suq tal-Unjoni. Konsegwentement, ma kienx hemm prezz tal-bejgħ mill-ġdid tal-idrawliċi. Barra minn hekk, billi l-analiżi attwali tikkonċerna biss kumpanija waħda, ma kienx hemm dejta oħra disponibbli li fuq il-bażi tagħha seta' jiġi stabbilit raġonevolment prezz ta' bejgħ mill-ġdid tal-idrawliċi. Fid-dawl ta' dan, ma ġiex stabbilit prezz tal-esportazzjoni għall-idrawliċi. Bi ftehim mal-applikant, il-prezz tal-esportazzjoni stabbilit għall-pallet trucks tal-idejn tqies bħala rappreżentattiv tal-partijiet essenzjali, u għalhekk intuża hu.

(46)

Il-bejgħ tal-esportazzjoni sar permezz tal-importatur relatat fl-Unjoni li reġa' biegħ il-prodott lil konsumaturi indipendenti fl-Unjoni. Għaldaqstant, il-prezz tal-esportazzjoni ġie stabbilit skont l-Artikolu 2(9) tar-Regolament bażiku, fuq il-bażi tal-prezz li bih il-prodott importat inbiegћ mill-ġdid gћall-ewwel darba lil konsumaturi indipendenti fl-Unjoni billi tnaqqsu l-ispejjeż kollha mġarrba bejn l-importazzjoni u l-bejgћ mill-ġdid (SG&A) u marġni raġonevoli ta' profit. Intużaw is-SG&A attwali tal-importatur relatat. Fir-rigward tal-marġni raġonevoli tal-profitt, fin-nuqqas ta' kwalunkwe informazzjoni oħra disponibbli, intużat stima ta' marġni ta' profitta' 5 %.

(47)

Wara d-divulgazzjoni l-applikant ikkontesta l-livell tal-SG&A relatat mal-bejgħ tal-prodott konċernat stabbilit waqt l-investigazzjoni billi qal li spejjeż għolja mġarrba waqt fil-bejgħ ta' prodotti oħra ma għandhomx jiġu attribwiti lill-prodott konċernat. Din l-istqarrija kienet tikkontradixxi d-dejta verifikata. L-applikant ma setax jipprovdi allokazzjoni tal-ispejjeż alternattiva u lanqas xi evidenza li ssostni l-istqarrija tiegħu u għalhekk din it-talba ġiet miċħuda.

(48)

Wara d-divulgazzjoni, l-applikant stqarr li minkejja r-relazzjoni bejn l-esportatur u l-importatur relatat fl-Unjoni, il-prezzijiet tal-esportazzjoni kienu skont il-prinċipju tad-distakkament u ma għandux jitqies li mhumiex affidabbli. Għalhekk, l-applikant ikkunsidra li l-prezz tal-esportazzjoni għandu jiġi stabbilit skont l-Artikolu 2(8) tar-Regolament bażiku abbażi tal-prezzijiet imħallsa mill-importatur relatat.

(49)

L-evidenza pprovduta mill-applikant ma ssostnix l-argument li l-prezz ġie stabbilit skont il-prinċipju tad-distakkament. Għalhekk, il-prezz tat-trasferiment bejn il-kumpaniji relatati ma kienx f'livell li jippermetti lill-importatur relatat jagħmel profitt raġonevoli fl-Unjoni. Il-Kummissjoni għalhekk ikkonkludiet li l-prezz tat-trasferiment intern ma kienx jirrifletti l-valur tas-suq xieraq tal-prodott konċernat, u din it-talba ġiet miċħuda.

(50)

Alternattivament, anke wara d-divulgazzjoni l-applikant stqar li d-dazji antidumping imħallsa kienu riflessi kif dovut fil-prezzijiet tal-bejgħ mill-ġdid u fil-prezzijiet tal-bejgħ sussegwenti fl-Unjoni u, għalhekk, meta jinħadem il-prezz tal-esportazzjoni, l-ammont tad-dazji antidumping imħallas ma għandux jitnaqqas f'konformità mal-Artikolu 11(10) tar-Regolament bażiku.

(51)

L-evidenza pprovduta mill-applikant ma setgħetx, madankollu, turi li d-dazji antidumping kienu riflessi kif dovut fil-prezzijiet tal-bejgħ mill-ġdid u fil-prezzijiet tal-bejgħ sussegwenti fl-Unjoni. L-evidenza ssuġġeriet żieda minima ħafna li seħħet wara l-perjodu tal-investigazzjoni. Għaldaqstant, din it-talba ġiet miċħuda.

(52)

Il-valur normali u l-prezz tal-esportazzjoni tqabblu fuq bażi ta' prezz mill-fabbrika. Sabiex ikun żgurat paragun ġust, saret konċessjoni xierqa fil-forma ta' aġġustamenti għad-differenzi li jaffetwaw il-paragunabilità tal-prezzijiet skont l-Artikolu 2(10) tar-Regolament bażiku. Fuq din il-bażi, saru aġġustamenti għat-trasport, l-ispejjeż tal-ippakkjar u t-tariffi tal-importazzjoni, inklużi d-dazji doganali (4 %) u d-dazji antidumping (46,7 % u 70,8 %, imposti mir-Regolament ta' Implimentazzjoni (UE) Nru 1008/2011 u emendat bir-Regolament ta' Implimentazzjoni (UE) Nru 372/2013 rispettivament) direttament fuq il-prezz tal-esportazzjoni fil-każijiet kollha fejn intwera għal differenzi li jaffettwaw il-pargunabbiltà tal-prezzijiet. L-ispejjeż tat-trasport u l-ippakkjar imsemmija qabel, skont l-Artikolu 19 tar-Regolament bażiku, huma kkunsidrati bħala informazzjoni kunfidenzjali. Madankollu, din l-informazzjoni ġiet ivverifikata mill-Kummissjoni u nstab li ma tiddevjax mil-livelli normali.

(53)

Wara d-divulgazzjoni l-applikant għamel talba għal aġġustament tal-livell tal-kummerċ bażat fuq differenza allegata bejn il-bejgħ fis-suq domestiku u fis-suq tal-esportazzjoni. L-applikant qal li l-bejgħ fis-suq domestiku sar kollu lil utenti aħħarija filwaqt li l-bejgħ fl-Unjoni sar lil negozjanti jew importaturi. L-applikant qal li għandu jsir aġġustament speċjali skont l-Artikolu 2(10)(d)(ii) tar-Regolament bażiku.

(54)

L-applikant ma pprovda l-ebda informazzjoni ġdida jew addizzjonali biex isostni t-talba tiegħu. Fuq il-bażi tal-informazzjoni miġbura u verifikata matul l-investigazzjoni ma setax jiġi stabbilit li l-iskonti lil negozjanti u importaturi kienu marbuta ma' differenza fil-funzjonijiet tal-bejgħ. Għalhekk, ma setax jintwera li l-allegata differenza fil-livell tal-kummerċ kellu impatt fuq il-prezzijiet tal-bejgħ u affetwat il-paragunabilità tal-prezzijiet. It-talba ġiet miċħuda fuq din il-bażi.

(55)

Skont l-Artikolu 2(11) u (12) tar-Regolament bażiku, il-marġni tad-dumping ġie stabbilit abbażi ta' paragun ta' valur medju normali ponderat ma' prezz medju tal-esportazzjoni ponderat, kif stabbilit hawn fuq.

(56)

Il-paragun wera l-eżistenza ta' dumping f'livell ta' 54,1 %, espress bħala perċentwali tal-prezz Kost, Assigurazzjoni u Merkanzija (Cost, Insurance, and Freight — CIF) fuq il-fruntiera tal-Unjoni, bid-dazju mhux imħallas.

(57)

Il-marġni tad-dumping kif stabbilit kien taħt il-livell tal-eliminazzjoni tad-dannu madwar il-pajjiż kollu li kien stabbilit għar-RPĊ fl-investigazzjoni oriġinali msemmija fil-premessa 1 aktar 'il fuq. Għalhekk għandu jiġi impost dazju bbażat fuq il-marġni tad-dumping fuq l-importazzjonijiet ta' pallet trucks tal-idejn u l-partijiet essenzjali tagħhom prodotti minn Ningbo Logitrans Handling Equipment Co., Ltd. u r-Regolament ta' Implimentazzjoni (UE) Nru 372/2013 għandu jiġi emendat skont dan.

(58)

Fid-dawl ta' dak li jirriżulta hawn fuq, id-dazju antidumping kif stabbilit għandu jiġi impost retroattivament fuq l-importazzjonijiet tal-prodott konċernat li saru suġġetti għal reġistrazzjoni skont l-Artikolu 3 tar-Regolament (UE) Nru 32/2014.

(59)

Il-partijiet konċernati ġew infurmati bil-fatti u l-kunsiderazzjonijiet essenzjali li fuq il-bażi tagħhom kien hemm l-intenzjoni li jiġi impost, fuq l-importazzjonijiet ta' hand pallet trucks u l-partijiet essenzjali tagħhom mill-applikant, dazju antidumping emendat u li dan id-dazju jiġi impost retroattivament fuq l-importazzjonijiet li saru suġġetti għal reġistrazzjoni. Il-kummenti tagħhom tqiesu u ttieħdu f'kunsiderazzjoni fejn xieraq.

(60)

Din l-analiżi ma taffettwax id-data li fiha jiskadu l-miżuri imposti mir-Regolament ta' Implimentazzjoni (UE) Nru 1008/2011 kif emendat mir-Regolament ta' Implimentazzjoni (UE) Nru 372/2013 skont l-Artikolu 11(2) tar-Regolament bażiku.

(61)

Il-miżuri stipulati f'dan ir-Regolament huma konformi mal-opinjoni tal-Kumitat stabbilit bl-Artikolu 15(1) tar-Regolament bażiku.