15.5.2014   

MT

Il-Ġurnal Uffiċjali tal-Unjoni Ewropea

L 144/1

(1)

Fl-10 ta' Lulju 2008, Marker Völkl International GmbH (minn hawn 'il quddiem imsejjaħ “il-kwerelant”), produttur Ġermaniż tal-iskis, irreġistra ilment li jallega li s-Slovenja kienet tat għajnuna statali lill-kumpanija Elan d.o.o. (minn hawn 'il quddiem imsejħa “Elan”; fid-data tal-ilment kienet magħrufa bħala Skimar d.o.o.). Il-Kummissjoni bagħtet numru ta' talbiet għal informazzjoni lis-Slovenja, li għalihom is-Slovenja wieġbet b'ittri datati l-14 ta' Ottubru 2008, it-30 ta' Jannar 2010 u t-22 ta' Frar 2010. F'Novembru 2009, il-Kummissjoni bagħtet ukoll talba għal informazzjoni lill-kwerelant, li wieġeb fil-5 ta' Marzu 2010.

(2)

Permezz ta' ittra datata t-12 ta' Mejju 2010, il-Kummissjoni infurmat lis-Slovenja li kienet iddeċidiet li tibda l-proċedura stabbilita fl-Artikolu 108(2) tat-Trattat dwar il-Funzjonament tal-Unjoni Ewropea fir-rigward tal-għajnuna.

(3)

Id-deċiżjoni tal-Kummissjoni li tibda l-proċedura ġiet ippubblikata f'Il-Ġurnal Uffiċjali tal-Unjoni Ewropea. (2) Il-Kummissjoni stiednet lill-partijiet interessati biex jissottomettu l-kummenti tagħhom fuq il-miżuri. Il-Kummissjoni ma rċeviet l-ebda kumment mingħand partijiet terzi interessati.

(4)

Wara d-Deċiżjoni tal-ftuħ, is-Slovenja ssottomettiet aktar informazzjoni permezz ta' ittri datati d-9, l-10 u s-16 ta' Ġunju 2010 (din tal-aħħar b'annessi datati s-26 ta' Mejju, it-28 ta' Mejju, il-31 ta' Mejju, it-2 ta' Ġunju u l-14 ta' Ġunju 2010). Fis-16 ta' Awwissu 2011, il-Kummissjoni bagħtet talba għal informazzjoni lill-awtoritajiet Sloveni, li għaliha wieġbu permezz ta' ittra tal-10 ta' Ottubru 2011. Bosta annessi ma' dik l-ittra kienu sottomessi fil-11 ta' Ottubru 2011. Wara laqgħa bejn is-servizzi tal-Kummissjoni u rappreżentanti tal-kumpanija, is-Slovenja ppreżentat informazzjoni addizzjonali permezz ta' ittri datati s-6 ta' Marzu, it-30 ta' Marzu, it-13 ta' April, is-16 ta' April, it-23 ta' April, l-10 ta' Mejju, il-15 ta' Mejju u t-30 ta' Mejju 2012.

(5)

Elan, kumpanija b'responsabbiltà limitata hija attiva fil-produzzjoni ta' tagħmir għall-iskijjar u opri tal-baħar bħal jottijiet. Il-kumpanija tinsab f'Begunje na Gorenjskem, is-Slovenja, li fit-totalità tagħha hija eliġibbli għall-għajnuna reġjonali skont l-Artikolu 107(3)(a) TFUE. (3) Fil-preżent, Elan timpjega madwar 460 membru tal-persunal u għandha żewġ diviżjonijiet prinċipali: diviżjoni tal-isport tax-xitwa u diviżjoni tal-baħar. Il-kumpanija għandha sussidjarja waħda biss fis-Slovenja, Elan Inventa d.o.o. (tagħmir tal-isports), kif ukoll bosta kumpaniji kummerċjali f'pajjiżi oħra.

(6)

Sa Ġunju 2010, u meta seħħew il-miżuri li qed jiġu eżaminati, Elan kienet organizzata b'mod differenti. Din kienet tikkonsisti mill-kumpanija ewlenija Elan li kellha ishma f'erba' sussidjarji:

(7)

Elan hija proprjetà tal-Istat. Bħalissa, 66,4 % tal-ishma tagħha huma miżmuma minn Posebna družba za podjetniško svetovanje, d.d. (minn hawn 'il quddiem imsejħa “PDP”), kumpanija azzjonarja finanzjarja proprjetà ta' tliet fondi tal-Istat. Ħamsa u għoxrin fil-mja oħra tal-ishma f'Elan huma miżmuma minn Triglav Naložbe, finančna družba, d.d. (minn hawn 'il quddiem imsejħa “Triglav Naložbe”), kumpanija finanzjarja għal kumpanija tal-assigurazzjoni prinċipalment proprjetà tal-Istat. It-8,6 % li jifdal huma miżmuma minn Prvi pokojninski sklad, li huwa fond tal-pensjoni tal-Istat (ara l-Punt 2.2 għal deskrizzjoni dettaljata tal-azzjonisti ta' Elan). Meta kienu ttieħdu l-miżuri taħt investigazzjoni, Elan kien ukoll prinċipalment proprjetà tal-Istat. L-istruttura ta' azzjonisti tagħha, madankollu, kien kemxejn differenti (ara wkoll il-Punt 2.2).

(8)

Fir-rigward tas-sitwazzjoni finanzjarja ta' Elan, wara sena iebsa fl-2004, il-kumpanija għamlet profitt fl-2005 u fl-2006 u d-dħul kien qed jikber. Kien fl-2007 meta s-sitwazzjoni tal-kumpanija bdiet sejra lura, li wassal għal tnaqqis fid-dħul u telf nett fis-snin 2007-2008. Evalwazzjoni aktar dettaljata tal-qagħda finanzjarja ta' Elan hija pprovduta fil-premessi minn (68) sa (74).

(9)

Bħalissa, Elan tinsab fil-proċess ta' privatizzazzjoni. L-azzjonist ewlieni PDP qed tippjana li tbiegħ is-sehem tagħha fil-kumpanija u bħalissa qed tinnegozja mal-offerenti potenzjali.

(10)

Peress li l-istruttura tas-sjieda kif ukoll l-identità tas-sidien tal-Elan u l-governanza korporattiva tagħhom hija rilevanti għall-kwistjoni dwar jekk il-miżuri favur Elan jikkonsistux f'riżorsi tal-Istat u humiex imputabbli għall-Istat, f'dan li ġej, se tiġi pprovduta deskrizzjoni qasira ta' kull proprjetarju, segwita minn ħarsa ġenerali tal-ishma f'Elan miżmuma minn kull wieħed minnhom matul iż-żmien. Għandu jiġi nnutat li l-istruttura tas-sjieda ta' Elan inbidlet bejn iż-żmien tal-ewwel injezzjoni ta' kapital fl-2007 (Miżura 1) u t-tieni injezzjoni ta' kapital fl-2008 (Miżura 2) u li komplew iseħħu iktar kambjamenti minn dak iż-żmien. Id-dettalji huma pprovduti hawn taħt (ara l-premessi minn (19) sa (22)).

(11)

Kapitalska družba pokojninskega in invalidskega zavarovanja, d.d. (minn hawn 'il quddiem imsejħa “KAD”) hija kumpanija azzjonarja li l-uniku azzjonist tagħha hija s-Slovenja. KAD tamministra fondi ta' pensjonijiet u assi tal-Istat għas-Slovenja. Hija responsabbli wkoll għall-privatizzazzjoni ta' assi proprjetà tal-Istat. KAD hija soġġetta għall-Att tal-Kumpaniji Sloven (“ZGD-1, Zakon o gospodarskih družbah”). Għaldaqstant, KAD għandha assemblea, bord superviżorju u bord ta' ġestjoni. Il-Gvern Sloven jaħtar il-15-il membru tal-assemblea (li ħamsa minnhom jirrappreżentaw pensjonanti u ħaddiema b'diżabilità, ħamsa jirrappreżentaw lil min jimpjega u persuni assigurati u ħamsa jirrappreżentaw il-Gvern Sloven) u d-disa' membri kollha tal-bord ta' sorveljanza. Ir-rappreżentanti tal-gvern huma mistiedna għal-laqgħat tal-assemblea.

(12)

Prvi pokojninski sklad huwa l-Fond tal-Ewwel Pensjoni tar-Repubblika tas-Slovenja, li jfisser li huwa 100 % proprjetà tal-Istat. KAD qed tmexxi dan il-fond ta' pensjoni, u tikkontrolla wkoll is-sehem li PPS għandha f'Elan (minn hawn 'il quddiem imsejħa “KAD-PPS”).

(13)

Družba za svetovanje f'upravljanje, d.o.o. (minn hawn 'il quddiem imsejħa “DSU”) hija kumpanija ta' ġestjoni u ta' konsulenza ta' responsabbiltà limitata li hija 100 % proprjetà tal-Istat. Hija responsabbli wkoll, inter alia, għall-privatizzazzjoni ta' assi proprjetà tal-Istat. DSU għandha kunsill ta' sorveljanza, li jikkonsisti minn tliet membri. Tnejn huma maħtura mill-gvern Sloven u wieħed jinħatar mill-impjegati tal-kumpanija. Sakemm jinħatar rappreżentant tal-impjegati, is-Slovenja wkoll taħtar ukoll it-tielet membru. Il-kunsill ta' sorveljanza jaħtar direttur tal-kumpanija, li jamministra t-tranżazzjonijiet kummerċjali ta' DSU.

(14)

Zavarovalnica Triglav, d.d., (minn hawn 'il quddiem imsejħa “Zavarovalnica Triglav”) hija kumpanija li toffri kull tip ta' assigurazzjoni tal-ħajja u mhux tal-ħajja, tas-saħħa u tal-inċidenti. Is-67,7 % tal-ishma tagħha huma miżmuma minn kumpaniji li huma direttament jew indirettament fil-maġġoranza proprjetà tal-Istat. Fiż-żmien tal-għoti, l-azzjonisti prinċipali ta'Zavarovalnica Triglav kienu: Zavod za pokojninsko in invalidsko zavarovanje (minn hawn 'il quddiem imsejħa bħala “ZIPZ”, l-Istitut tal-Assigurazzjoni għall-Pensjoni u d-Diżabbiltà), 100 % proprjetà tal-Istat, li għandha sehem ta' 34,5 % f'Zavarovalnica Triglav; Slovenska odškodninska družba, d.d. (minn hawn 'il quddiem imsejħa “SOD”, l-inkorporazzjoni Slovena tal-indennizz), 100 % proprjetà tal-Istat, li għandha sehem ta' 28,1 % f'Zavarovalnica Triglav; NLB, d.d., 50 % proprjetà tal-Istat, li għandha sehem ta' 3,1 % f'Zavarovalnica Triglav u HIT d.d., 100 % proprjetà tal-Istat, li għandhom sehem ta' 1,1 % f'Zavarovalnica Triglav. L-ebda wieħed mill-azzjonisti l-oħra ta' Zavarovalnica Triglav ma kellu sehem li kien ogħla minn 1,8 % fil-kumpanija.

(15)

Zavarovalnica Triglav għandha bord superviżorju li jikkonsisti fi tmien membri u bord ta' ġestjoni. Ħames membri tal-bord superviżorju jirrappreżentaw l-interessi tal-azzjonisti u huma eletti mil-laqgħa ġenerali ta' Zavarovalnica Triglav. It-tliet membri l-oħra jirrappreżentaw l-interessi tal-impjegati.

(16)

Triglav Naložbe hija kumpanija finanzjarja. Fiż-żmien tat-tieni injezzjoni ta' kapital, 80 % tal-ishma ta' Triglav Naložbe kienu proprjetà ta' Zavarovalnica Triglav. Dan tal-aħħar huwa min-naħa tiegħu proprjetà fil-maġġoranza tal-Istat (ara l-premessa (14)). Il-kapital li jifdal ta' Triglav Naložbe hu mifrux ħafna fost investituri individwali, l-ebda wieħed ma jkollu sehem ogħla minn 0,67 %. Triglav Naložbe, għandha bord superviżorju u bord ta' ġestjoni. Il-bord superviżorju huwa magħmul minn tliet membri u huwa maħtur mil-laqgħa ġenerali ta' Triglav Naložbe.

(17)

PDP hija kumpanija azzjonarja finanzjarja, li ġiet stabbilita f'Ġunju 2009. Hija proprjetà ta' tliet fondi proprjetà tal-Istat, jiġifieri KAD, DSU u SOD u taġixxi bħala kumpanija ta' ristrutturazzjoni f'isem l-Istat Sloven. PDP tista', taħt kuntratt, tieħu f'idejha t-tmexxija tal-intrapriżi proprjetà tal-Istat f'diffikultà, teżerċita d-drittijiet tal-vot kollha, tinstalla bord superviżorju u bord ta' ġestjoni u twettaq miżuri ta' riabilitazzjoni għall-Istat. (4) PDP għandha ishma f'diversi kumpaniji Sloveni li qabel kienu proprjeta ta' fondi parastatali (5) u qed tfittex investituri strateġiċi għal xi wħud minnhom.

(18)

KD Kapital, finančna družba, d.o.o. (minn hawn 'il quddiem “KD Kapital”), kumpanija attiva fl-investiment kapitali. Kd Kapital tappartjeni lill-grupp Skupina KD  (6) u hija ta' sidien privati.

(19)

Fl-2007, meta ngħatat l-ewwel miżura, il-kumpaniji li ġejjin kellhom sehem f'Elan: KAD (30,48 %), KAD-PPS (10,3 %), DSU (17,34 %), Triglav Naložbe (13,16 %), Zavarovalnica Triglav (11,89 %) u KD Kapital (16,83 %).

(20)

F'April 2008, KD Kapital biegħet is-sehem tagħha lil KAD. Wara din it-tranżazzjoni, u fiż-żmien tat-tieni injezzjoni ta' kapital, il-kumpaniji li ġejjin kellhom sehem f'Elan: KAD (47,31 %), KAD-PPS (10,3 %), DSU (17,34 %), Triglav Naložbe (13,16 %) u Zavarovalnica Triglav (11,89 %).

(21)

Fl-2010, KAD u DSU vestew l-ishma tagħhom ta' Elan fil-kumpanija azzjonarja finanzjarja PDP. Illum, PDP għandha 66,4 % tal-ishma f'Elan. KAD-PPS għandha 8,6 % u Triglav Naložbe 25 %.

(22)

It-Tabella 1 tipprovdi ħarsa ġenerali tal-ishma miżmuma minn kull azzjonist rispettiv fiż-żmien tal-Miżura 1, il-Miżura 2 u f'Mejju 2012:

Tabella 1

(23)

Fl-2006, Elan ipprevediet programm ta' investiment ambizzjuż għall-grupp dwar investimenti f'bini, tagħmir u kummerċjalizzazzjoni tal-marka, abbażi ta' pjan ta' żvilupp strateġiku għall-perjodu 2006-2010 (imfassal mill-bord superviżorju ta' Elan f'Diċembru 2005). Għas-snin 2006-2007 kienu ppjanati investimenti ta' EUR 20,2 miljun. Sabiex jiġu ffinanzjati dawk l-investimenti, Elan ipproponiet żieda fil-kapital ta' EUR 20,2 miljun lill-azzjonisti tagħha. Sadanittant, matul l-2006, Elan bdiet tixtri tagħmir tal-produzzjoni ġdid, li kien previst ukoll bil-pjan ta' żvilupp strateġiku.

(24)

Fid-29 ta' Jannar 2007, Elan u l-azzjonisti ta' Elan iffirmaw ittra ta' intenzjoni, li fiha qablu li l-azzjonisti jinjettaw EUR 10,225 miljun f'Elan (madwar nofs l-EUR 20,2 miljun previst fil-pjan ta' żvilupp strateġiku 2006-2010). Kull azzjonist qabel li jipparteċipa fiż-żieda fil-kapital skont il-proporzjon tas-sehem tiegħu f'Elan. Id-deċiżjoni ttieħdet abbażi ta' valutazzjoni tal-kumpanija mill-konsulenza indipendenti […] (*) u diversi dokumenti oħra abbozzati minn Elan innifisha kif ukoll minn KAD, l-azzjonist maġġoritarju ta' Elan. […] sar kalkolu tal-valur ġust tal-kumpanija fuq il-bażi tal-medja tal-kalkolu (għal kull diviżjoni) ta' (i) il-proporzjon tal-prezz/ftehimiet b'parametru referenzjarju tal-medju ponderat tan-negozjar magħmul riċentement, (ii) il-proporzjonijiet tal-prezz/qligħ ta' kumpaniji applikabbli fl-2005 u (iii) seba' darbiet il-valur tal-EBITDA inkluż 25 % tal-potenzjal ta' ffrankar stmat. Minn din il-medja, id-djun bl-imgħax ta' terminu qasir u nofs l-investimenti identifikati li ma setgħux jiġu ffinanzjati mill-flus tal-flus preżunt kienu mnaqqsa. Il-kalkolu b'leħħa ta' KAD tal-valur ta' Elan ġie elaborat fuq il-bażi tal-metodu tal-fluss tal-flus skontat, bl-użu ta' projezzjonijiet tan-negozju pprovduti minn Elan lill-bord ta' sorveljanza tagħha.

(25)

Qabel dan, f'Mejju 2006, Elan kienet informat l-azzjonisti tagħha li, għalkemm kienet qed tpoġġi l-flussi tal-flus ħielsa kollha f'investimenti previsti fil-pjan ta' żvilupp Strateġiku 2006-2010, kapital addizzjonali jkun meħtieġ biex jiġu realizzati l-investimenti neċessarji. (7) F'dan li ġej, f'Novembru 2006, Elan ippreparat analiżi aktar dettaljata tal-effetti ta' żieda fil-kapital, (8) skont liema l-investimenti jwasslu għal profitt nett kumulattiv għad-diviżjoni tal-isport tax-xitwa ta' EUR 15,4 miljun matul il-perjodu 2006-2010, meta mqabbel ma' telf nett kumulattiv mingħajr iż-żieda fil-kapital ta' EUR 4,8 miljun. Barra minn hekk il-profitt nett kumulattiv tad-diviżjoni tal-baħar għall-perjodu 2006-2010 tkun ogħla kieku ż-żieda fil-kapital saret (EUR 14,9 miljun meta mqabbel ma' EUR 8 miljun). Fl-istess ħin, l-azzjonist maġġoritarju ta' Elan KAD stima l-valur tal-grupp li jkun EUR 22,8 miljun. Il-bordijiet superviżorji tal-azzjonisti KAD, DSU, Zavarovalnica Triglav u Triglav Naložbe approvaw l-injezzjoni ta' kapital sa minn Diċembru 2006 u Jannar 2007 rispettivament.

(26)

Formalment, iż-żieda fil-kapital ġiet ikkonfermata waqt l-assemblea tal-azzjonisti tal-25 ta' Ottubru 2007. Il-ħlasijiet tal-azzjonisti ġew imwettqa fil-15 ta' Novembru 2007 proporzjonalment mas-sehem ta' sjieda tal-azzjonist rispettiv. L-EUR 10,225 miljun ġew injettati f'Elan, li min-naħa tagħha tat self tal-azzjonisti ta' EUR 5,8 miljun lil Elan Winter sport u self tal-azzjonisti ta' EUR 4,425 miljun lil Elan Marine. Dak is-self tal-azzjonisti aktar tard ġie konvertit f'ekwità f'Elan Winter sport u Elan Marine. Kif deskritt hawn fuq, Elan Winter sport u Elan Marine ġew amalgamati fil-kumpanija ewlenija Elan f'Ġunju 2010 (ara l-premessa (6)).

(27)

Waħda mir-raġunijiet għad-differenza fiż-żmien bejn l-ittra ta' intenzjoni u l-ftehim formali tal-azzjonisti kienet li KD Kapital, l-uniku azzjonist privat f'Elan f'dak iż-żmien, li kellu minoranza li timblokka, imblokka d-deċiżjoni formali għaż-żieda fil-kapital. Ir-raġuni għall-imblukkar ta' KD Kapital kienet tilwima bejn KAD u Kd Kapital fuq tibdiliet fil-bord superviżorju ta' Elan. Kif spjegat mis-Slovenja, KD Kapital kienet ukoll azzjonist b'50 % ta' wieħed mill-kompetituri ta' Elan, Seaway Group d.o.o. u kienet intenzjonata tinstalla rappreżentant ta' KD Kapital fil-bord superviżorju ta' Elan. KAD ikkunsidrat li dan mhux aċċettabbli fid-dawl tal-ishma ta' KD Kapital f'Seaway. Sabiex tiġi solvuta din il-kwistjoni, fil-bidu ta' Ottubru 2007, KAD offriet lil KD Kapital opzjoni put, bil-kundizzjoni li KD Kapital tivvota favur il-proposta ta' KAD rigward it-tilwima dwar il-membri tal-bord superviżorju.

(28)

Wara din l-offerta, KD Kapital fl-aħħar qablet li ż-żieda fil-kapital, u kif deskritt hawn fuq, l-azzjonisti ħadu d-deċiżjoni formali f'Ottubru 2007.

(29)

Minkejja ż-żieda fil-kapital ta' Novembru 2007, l-istaġun ħażin tax-xitwa tal-2007/2008 (affettwat mix-xitwa “ħadra” ta' qabel tal-2006/2007) wassal għal aktar diffikultajiet tal-grupp. Elan kien qed jaffaċċa insolvenza fil-bidu tal-2008.

(30)

Meta SKB banka d.d. irrifjuta li jiffinanzja aktar lil Elan fil-bidu tal-2008, KD Kapital eżerċizzat l-opzjoni put tagħha f'Marzu 2008, u b'effett minn April 2008. KAD xrat l-ishma ta' KD Kapital u b'hekk żiedet is-sehem tagħha f'Elan. Minn dak iż-żmien, Elan saret kompletament kumpanija proprjetà tal-Istat (ara l-premessa (20)).

(31)

Biex ilaħħqu mas-sitwazzjoni finanzjarja diffiċli, l-azzjonisti ta' Elan ħatru bord ġdid ta' ġestjoni f'April 2008. Il-maniġment beda taħdidiet mal-banek biex jintlaħaq ftehim fuq l-iskedar mill-ġdid tal-pretensjonijiet tal-banek kontra Elan u b'hekk jiġi evitat falliment tal-kumpanija. Il-banek kienu lesti biss li jagħmlu dan bil-kundizzjoni li l-azzjonisti ta' Elan jipprovdu kapital addizzjonali lill-kumpanija.

(32)

F'dan l-isfond, f'Marzu 2008, Elan talbet l-azzjonisti tagħha għal kapital ġdid addizzjonali. Abbażi ta' pjan fit-tul għal Elan għall-perjodu 2008-2012, imfassal minn Elan f'Ġunju 2008 (minn hawn 'il quddiem "pjan fit-tul 2008-2012"), Elan talbet l-azzjonisti tagħha b'mod aktar konkret għal EUR 25 miljun f'Ġunju/Lulju 2008. L-azzjonisti ta' Elan ikkunsidraw il-pjan fit-tul 2008-2012 bħala mhux adegwat biex jiġu injettati EUR 25 miljun. L-azzjonisti kienu lesti biss li jinjettaw EUR 10 miljun, u għamlu din iż-żieda fil-kapital kondizzjonali fuq ftehim minn qabel bejn Elan u l-banek tagħha biex jiskedaw mill-ġdid id-djun ta' Elan. L-azzjonisti ġew mitluba wkoll pjan supplimentari fit-tul għal Elan. (9) Wara din it-talba, Elan ħejjiet pjan ta' Riabilitazzjoni addizzjonali, datat it-8 ta' Awwissu 2008 (minn hawn 'il quddiem "pjan ta' Riabilitazzjoni"). Elan, madankollu, ma kinitx kapaċi tilħaq ftehim mal-banek tagħha dwar l-iskedar mill-ġdid tad-dejn. Għall-kuntrarju, wieħed mill-kredituri ta' Elan, jiġifieri SKB banka d.d., beda proċedimenti tal-qorti sabiex isaħħaħ il-pretensjonijiet tiegħu u f'Awwissu 2008, il-Qorti ta' Ljubljana nnotifikat lil Elan inġunzjoni biex tħallas id-dejn li għandha pendenti. L-infurzar ta' din l-ordni kien iwassal għall-falliment tal-kumpanija.

(33)

Fid-dawl ta' dan, Elan sejħet għal laqgħa urġenti tal-azzjonisti li saret fit-28 ta' Awwissu 2008. Waqt din il-laqgħa, wara proposta minn KAD, l-azzjonisti ta' Elan iddeċidew li jinjettaw EUR 10 miljun f'Elan, għalkemm il-kundizzjoni li Elan tilħaq ftehim mal-banek tagħha dwar l-iskedar mill-ġdid tad-djun ma ntlaħaqx.

(34)

Il-bord superviżorju ta' KAD approva l-injezzjoni tal-kapital diġà qabel il-laqgħa tal-azzjonisti f'Awwissu 2008; il-bord superviżorju tal-azzjonisti l-oħra approva d-deċiżjoni li jiġu injettati EUR 10 miljun f'Elan mhux aktar tard mill-bidu ta' Settembru 2008.

(35)

Il-ħlasijiet tal-azzjonisti saru fit-8 ta' Settembru 2008 proporzjonalment mas-sehem ta' sjieda tal-azzjonist rispettiv. Kif deskritt fil-premessa (6), l-attivitajiet tal-isport tax-xitwa u tal-baħar ta'Elanġew organizzati f'żewġ sussidjarji fiż-żmien tal-għoti, jiġifieri Elan Winter sportuElan Marine L-EUR 10 miljun ġew injettati f'Elan, li mbagħad qiegħdet EUR 5,924 miljun f'Elan Winter sport u EUR 4,076 miljun f'Elan Marine

(36)

Il-pjan fit-tul 2008-2012, imfassal f'Ġunju 2008 minn Elan, kien jiddeskrivi l-ewwel is-sitwazzjoni ekonomika u finanzjarja ta' Elan group. Huwa ppropona diversi miżuri ta' ristrutturar fuq il-livell ta' Elan Winter sport (aġġustament ta' investimenti f'kumpaniji affiljati, aġġustamenti tal-inventarji u benefiċċji għat-terminazzjoni tal-impjieg) u fuq il-livell ta' Elan Marine (aġġustamenti tal-inventarji, benefiċċji tat-terminazzjoni tal-impjieg, tniżżil fil-valur ta' forom tal-baħar). Minbarra dawn il-miżuri ta' ristrutturar, l-azzjonijiet li ġejjin kienu previsti għal Elan Winter sport:

(37)

Għal Elan Marine, il-pjan fit-tul 2008-2012 ippreveda l-azzjonijiet li ġejjin:

(38)

Il-pjan fit-tul 2008-2012 imbagħad ipprovda t-tbassir għall-grupp u s-sussidjarji tiegħu, ibbażat fuq is-suppożizzjoni li l-miżuri ta' ristrutturar u l-azzjonijiet deskritti hawn fuq ġew implimentati. Skont dawn il-previżjonijiet, Elan Winter sport tkun qed tagħmel qligħ mill-2010 'il quddiem, u Elan Marine tkun qed tagħmel qligħ mill-2011 'il quddiem. Il-pjan ikkonkluda li Elan kellha bżonn kapital addizzjonali ta' EUR [23-26] miljun sabiex jintlaħqu l-bżonnijiet ta' likwidità tagħha. Kieku ġie provdut tali kapital biss, Elan setgħet twassal lura redditi adegwati lill-azzjonisti tagħha.

(39)

Il-pjan ta' Riabilitazzjoni, imfassal f'Awwissu 2008 minn Elan, l-ewwel ppreżenta l-istruttura tal-kumpanija ta' Elan group u s-sitwazzjoni finanzjarja u ekonomika ta' Elan Winter sport u Elan Marine, inkluża analiżi dettaljata tal-obbligazzjonijiet, l-ispejjeż iżda wkoll id-dħul. Imbagħad analizza l-operazzjonijiet ta' Elan Winter sport u Elan Marine minn Jannar 2008 sa Ġunju 2008. Fl-aħħar nett, il-pjan inkluda parti dwar ir-riabilitazzjoni tal-kumpanija. Skont il-pjan, l-azzjonijiet proposti f'din il-parti setgħu jitwettqu biss kieku kapital ġdid ġie injettat f'Elan u d-djun tal-banek ġew skedati mill-ġdid. Il-pjan ta' Riabilitazzjoni, madankollu, ma speċifikax l-ammonti meħtieġa.

(40)

Il-pjan ta' Riabilitazzjoni ppreveda l-miżuri li ġejjin għal Elan Winter sport:

(41)

Il-miżuri li ġejjin ġew previsti għal Elan Marine:

(42)

Il-pjan ta' Riabilitazzjoni mbagħad ipprovda l-projezzjonijiet għas-snin 2008-2012, skont liem Elan Winter sport tkun qed tagħmel qligħ mill-2010 u Elan Marine tkun qed tagħmel qligħ mill-2011 'il quddiem.

(43)

Kif deskritt hawn fuq fil-premessi (2)-(3), fit-12 ta' Mejju 2010 il-Kummissjoni ddeċidiet li tiftaħ proċedura ta' investigazzjoni formali (“id-deċiżjoni ta' ftuħ”). F'din id-deċiżjoni ta' ftuħ, il-Kummissjoni kkunsidrat fuq bażi preliminari li ż-żewġ injezzjonijiet ta' kapital kienu jinvolvu għajnuna mill-Istat favur Elan Ski u Elan Marine. Hija esprimiet dubji dwar jekk din l-għajnuna mill-Istat tistax tiġi kkunsidrata kompatibbli mas-Suq Intern. Bħala punt preliminari, il-Kummissjoni eżaminat jekk il-benefiċjarji kienux kumpaniji f'diffikultà.

(44)

Il-Punt 10 tal-Linji Gwida ta' Salvataġġ u Ristrutturar jistabbilixxi ċerti ċirkostanzi li taħthom kumpanija tista' tiġi preżunta li hi f'diffikultajiet, bħal tnaqqis sinifikanti fil-kapital. Fid-deċiżjoni ta' ftuħ, kien ikkunsidrat li Elan Ski u Elan Marine ma jissodisfawx il-kriterji tal-Punt 10 tal-Linji Gwida ta' Salvataġġ u Ristrutturar. Madankollu, skont il-Punt 11 tal-Linji Gwida, kumpanija xorta tista' titqies bħala waħda f'diffikultà fejn is-sinjali tas-soltu ta' kumpanija li tkun f'diffikultà huma preżenti. Fid-dawl taż-żieda fit-telf, it-tnaqqis fid-dħul u s-sitwazzjoni finanzjarja diffiċli tal-grupp ta' Elan b'mod ġenerali, il-Kummissjoni kkunsidrat li Elan Ski u Elan Marine jistgħu jitqiesu bħala kumpaniji f'diffikultà mill-inqas fis-snin 2007 u 2008.

(45)

L-ewwel nett, il-Kummissjoni evalwat jekk il-miżuri joriġinawx minn riżorsi tal-Istat u jekk dawn humiex imputabbli lill-Istat. Fid-dawl tal-fatt li KAD hija 100 % proprjetà tas-Slovenja, li s-Slovenja taħtar il-membri kollha tal-assemblea u tal-bord superviżorju, u li r-rappreżentanti tal-gvern Sloven jipparteċipaw f'kull assemblea u fil-laqgħat tal-bord superviżorju, il-Kummissjoni kkonkludiet b'mod preliminari li l-miżuri li ħadet KAD jirriżultaw minn riżorsi tal-Istat u huma attribwibbli lill-Istat. Dwar il-miżuri mogħtija mis-sidien l-oħra ta' Elan, li huma, KAD-PPS, DSU, Triglav Naložbe u Triglav Insurance, il-Kummissjoni kkonkludiet li kellu jiġi vverifikat waqt il-proċedura ta' investigazzjoni formali jekk huma wkoll tnisslux minn riżorsi tal-Istat u kienux imputabbli lill-Istat.

(46)

It-tieni nett, il-Kummissjoni eżaminat jekk il-miżuri mogħtija jikkostitwixxux vantaġġ lill-benefiċjarji. Kien hemm dubji dwar jekk il-miżuri jissodisfawx it-test ta' investitur f'ekonomija tas-suq. Fl-ewwel miżura, l-uniku azzjonist privat f'Elan, KD Kapital, ma riedx jieħu sehem. Jidher li l-miżura ma kinitx ibbażata fuq pjan tan-negozju jew informazzjoni oħra fuq il-qligħ potenzjali fuq l-investiment fil-ġejjieni. Meta saret l-injezzjoni tal-kapital, il-benefiċjarji dehru li kienu f'diffikultajiet finanzjarji. Fit-tieni miżura, l-ebda kumpanija privata ma ħadet sehem. Filwaqt li huwa veru li pjan għal perjodu fit-tul u pjan ta' Riabilitazzjoni ġew stabbiliti qabel l-azzjonisti ddeċidew dwar l-injezzjoni ta' kapital, kien hemm indikazzjonijiet li l-azzjonisti ta' Elan kkunsidraw dawk il-pjanijiet bħala mhux adegwati. Meta ngħatat it-tieni miżura, Elan Ski u Elan Marine kienu għadhom qed jaffaċċjaw diffikultajiet finanzjarji.

(47)

It-tielet nett, il-Kummissjoni kkunsidrat li l-miżuri meħuda mis-Slovenja aktarx ifixklu l-kompetizzjoni u jaffettwaw il-kummerċ bejn l-Istati Membri, kif hemm kummerċ bejn l-Istati Membri f'tagħmir għall-iskijjar u opri tal-baħar.

(48)

Il-Kummissjoni b'mod preliminari vvalutat jekk il-miżuri kienux kumpatibbli taħt il-Linji Gwida għas-Salvataġġ u r-Ristrutturar. Fid-dawl tad-diffikultajiet tagħhom, u fin-nuqqas ta' kumpaniji b'saħħithom oħra fil-grupp, Elan Ski u Elan Marine fil-prinċipju huma eliġibbli għall-għajnuna ta' salvataġġ u ta' ristrutturar. Peress li l-miżuri mogħtija ħadu l-forma ta' żieda fil-kapital, ma setgħux jitqiesu bħala għajnuna ta' salvataġġ. Rigward il-kompatibilità tagħhom bħala għajnuna għar-ristrutturar, ma kienx ċar jekk il-kundizzjonijiet rispettivi ġewx sodisfatti kollha. B'mod partikolari, ma kienx ċar jekk l-għajnuna kinitx limitata għall-minimu neċessarju u ma kien hemm l-ebda indikazzjoni ta' kontribuzzjoni tagħhom stess u ta' miżuri kompensatorji.

(49)

Kien ukoll eżaminat b'mod preliminari jekk il-miżuri jistgħux ikunu għajnuna reġjonali kompatibbli. Filwaqt li ż-żewġ benefiċjarji jinsabu f'reġjun eliġibbli għall-għajnuna taħt l-Artikolu 107(3)(a) TFUE, ma kienx ċar, jekk humiex eliġibbli għal din l-għajnuna, peress li ż-żewġ benefiċjarji kienu f'diffikultà fil-mument tal-għotja.

(50)

Is-Slovenja ressqet il-kummenti tagħha b'ittri datati d-9, l-10 u s-16 ta' Ġunju 2010. Informazzjoni addizzjonali ntbagħtet fl-10 ta' Ottubru 2011 u permezz tal-ittri datati s-6 ta' Marzu, it-30 ta' Marzu, it-13 ta' April, is-16 ta' April, it-23 ta' April, l-10 ta' Mejju, il-15 ta' Mejju u t-30 ta' Mejju 2012 (ara l-premessa (4)).

(51)

Fil-qosor, skont is-Slovenja l-miżuri ma jinvolvux għajnuna mill-Istat, peress li ma jirriżultawx minn riżorsi tal-Istat u mhumiex imputabbli lill-Istat. Anke jekk jissodisfaw dawn ir-rekwiżiti, il-miżuri ma jagħtux vantaġġ lill-benefiċjarju, peress li s-Slovenja aġixxiet skont il-prinċipju tal-investitur f'ekonomija tas-suq. Barra minn hekk, is-Slovenja tippreżenta li l-miżuri ma kinux jaffettwaw il-kummerċ u lanqas jgħawwġu l-kompetizzjoni minħabba li, skont is-Slovenja, is-suq tat-tagħmir tal-isports tax-xitwa huwa ferm konsolidat ma' xejra ta' aktar konsolidazzjoni u li Elan kienet biss u kompetitur dgħajjef lil operaturi ferm akbar f'dak is-suq.

(52)

Is-Slovenja ma tressaq l-ebda argument 'il quddiem fir-rigward il-kompatibbiltà potenzjali tal-Miżura 1 mas-suq Intern, kieku l-miżura kienet tinvolvi għajnuna mill-Istat. Fir-rigward tas-Slovenja, il-Miżura 2 tista' titqies kompatibbli skont il-Linji Gwida ta' Salvataġġ u Ristrutturar.

(53)

Is-Slovenja tippreżenta li ma kellha l-ebda influwenza fiż-żieda fil-kapital azzjonarju ta' Elan.

(54)

Hija tfakkar li sabiex jiġu kkunsidrati bħala għajnuna mill-Istat, il-miżuri għandhom ikunu mogħtija direttament jew indirettament permezz ta' riżorsi tal-Istat u li l-miżuri għandhom ikunu imputabbli lill-Istat. Taqbel li jekk Stat Membru jkollu influwenza dominanti fuq impriża, il-kundizzjoni ta' “riżorsi tal-Istat” tkun imwettqa. Madankollu, ma jistax jiġi awtomatikament preżunt jekk Stat Membru jkun f'pożizzjoni li jeżerċita influwenza dominanti fuq impriża, li hu effettivament eżerċita din l-influwenza f'kawża partikolari. F'dan il-kuntest, is-Slovenja tirreferi għas-sentenza (10) ta' Stardust Marine li stabbilixxiet sett ta' indikaturi biex jiġi ddeterminat jekk din l-influwenza ġietx effettivament eżerċitata mill-Istat f'kawża partikolari. Dawn l-indikaturi jinkludu l-integrazzjoni lejn l-istrutturi tal-amministrazzjoni pubblika, in-natura tal-attivitajiet ta' kumpanija u l-eżerċizzju ta' dawn tal-aħħar fis-suq f'kundizzjonijiet normali ta' kompetizzjoni ma' operaturi privati, l-istatus legali tal-impriża, l-intensità tas-superviżjoni eżerċitata mill-awtoritajiet pubbliċi fuq il-maniġment tal-impriża. Is-Slovenja tirrimarka li għandha tingħata importanza xierqa lill-fatt jekk impriża ġietx stabbilita taħt il-liġi privata.

(55)

F'dan il-kuntest, is-Slovenja tressaq argumenti għal kull entità involuta f'injezzjonijiet ta' kapital, kif ġej:

(56)

KAD hija entità tal-liġi privata li topera fis-suq f'kundizzjonijiet kompetittivi. Għalkemm KAD hija kkontrollata mill-Istat, ma jistax jiġi konkluż fuq din il-bażi biss li r-rikapitalizzazzjonijiet taħt valutazzjoni huma imputabbli lill-Istat. Ma ntweriex involviment tal-Istat fir-rikapitalizzazzjonijiet għar-raġunijiet li ġejjin: L-azzjonijiet ta' KAD huma soġġetti għall-Att tal-Kumpaniji Sloven (“ZGD-1, Zakon o gospodarskih družbah”); ir-rimi tal-assi tagħha mhuwiex ristrett bil-liġi; KAD hija ffinanzjata esklussivament minn dividendi, imgħax u dħul ieħor iġġenerat minn investimenti u operazzjonijiet kummerċjali; u r-rikapitalizzazzjoni ta' Elan kienet deċiża mill-bord superviżorju, li huwa indipendenti fit-teħid tad-deċiżjonijiet tiegħu. Filwaqt li huwa minnu li KAD hija fdata mill-Istat bil-ġestjoni ta' fondi tal-pensjonijiet u l-konklużjoni tal-privatizzazzjonijiet ta' kumpaniji, l-interess pubbliku li jinsab f'dawn il-ħidmiet ma jistax jinfluwenza miżuri meħuda minn KAD b'mod li dawk l-azzjonijiet għandhom jitqiesu bħala imputabbli.

(57)

DSU hija direttament proprjetà tal-Istat, iżda mhijiex iffinanzjata mill-Istat u għandha l-għan li timmassimizza l-valur tal-investimenti tagħha. Filwaqt li huwa minnu li DSU hija fdata mill-Istat bil-ġestjoni ta' fondi tal-pensjonijiet u l-konklużjoni tal-privatizzazzjonijiet ta' kumpaniji, l-interess pubbliku involut f'dawn il-ħidmiet ma jistax jinfluwenza miżuri meħuda minn DSU b'mod li dawk l-azzjonijiet għandhom jitqiesu bħala imputabbli lill-Istat.

(58)

Zavarovalnica Triglav hija biss indirettament proprjetà tal-Istat u l-attivitajiet tagħha huma esklussivament ibbażati fuq is-suq. l-Istat m'għandu l-ebda influwenza diretta fuq l-operat tagħha. Huwa minnu li l-membri tal-bord superviżorju ta' Zavarovalnica Triglav huma eletti mill-azzjonisti tagħha; dawn huma però, eletti bħala individwi privati u l-ebda wieħed minnhom ma kellu l-ebda pożizzjoni fil-gvern jew l-amministrazzjoni Sloveni.

(59)

Triglav Naložbe hija indirettament proprjetà tal-Istat permezz ta' Zavarovalnica Triglav. L-għan tagħha huwa li tiġġenera profitt. L-Istat m'għandu l-ebda influwenza diretta fuq l-operazzjonijiet ta' Triglav Naložbe u l-bord superviżorju tagħha jikkonsisti minn individwi privati indipendenti. Barra minn hekk, Triglav Naložbe ffinanzjat ir-rikapitalizzazzjoni permezz ta' self kummerċjali.

(60)

Skont is-Slovenja, il-Miżura 1 ma tatx vantaġġ lil Elan għar-raġunijiet li ġejjin: F'Diċembru 2005, Elan adottat il-pjan ta' żvilupp Strateġiku 2006-2010, inklużi pjanijiet ta' żvilupp dettaljati għas-sussidjarji ta' Elan f'dak iż-żmien. Il-pjan ta' żvilupp 2006-2010 ippreveda investimenti kemm fid-diviżjoni tal-isport tax-xitwa u kemm fid-diviżjoni tal-baħar. Biex timplimenta dawn l-investimenti, f'Mejju 2006, Elan ipproponiet lill-azzjonisti tagħha biex jiżdied il-kapital ta' Elan fis-snin 2006-2009 b'EUR 20,2 miljun. L-azzjonisti vvalutaw din il-proposta b'mod prudenti u Elan ipprovdiethom b'dokumenti li juru b'mod ċar li tali żieda fil-kapital tkun profittabbli għall-azzjonisti. KAD, l-azzjonist maġġoritarju ta' Elan għamlet l-evalwazzjoni tagħha stess taż-żieda fil-kapital proposta f'Novembru 2006, filwaqt li kkonkludiet li ż-żieda fil-kapital tkun investiment għaqli. Triglav Naložbe rrevediet ukoll it-tbassir ta' Elan u qablet mal-injezzjoni tal-kapital fuq din il-bażi. Barra minn hekk, l-azzjonisti ta' Elan kienu jinħtieġu valutazzjoni indipendenti tal-grupp, kompitu li għalih […] ġiet magħżula (ara l-premessa (24)). Din il-valutazzjoni wriet li l-investimenti kienu meħtieġa, u li l-investiment jista' fi kwalunkwe każ jiġi rkuprat permezz ta' bejgħ ta' ishma b'valur ġust lil sieħeb strateġiku.

(61)

Abbażi tal-kunsiderazzjonijiet imsemmija hawn fuq, Elan u l-azzjonisti tagħha kkonkludew ittra ta' intenzjoni f'Jannar 2007, fejn qablu li l-azzjonisti jinjettaw EUR 10,225 miljun fl-impriża. Kif ukoll KD Kapital, l-unika azzjonist privat ta' Elan daħlet fl-ittra ta' intenzjoni mingħajr l-ebda kundizzjonijiet. Is-Slovenja tqis li din id-deċiżjoni ttieħdet mill-azzjonisti bil-għan li jkun jemm qligħ raġonevoli fuq il-kapital li investew u li huma għalhekk aġixxew f'konformità mal-prinċipju tal-investitur f'ekonomija tas-suq.

(62)

Rigward il-fatt li l-assemblea tal-azzjonisti ma qablitx formalment li tinjetta l-kapital qabel Ottubru 2007, is-Slovenja tispjega li d-dewmien kien minħabba tilwima bejn KD Kapital l-azzjonist minoritarju privat f'Elan, u KAD l-azzjonist maġġoritarju f'Elan. KD Kapital kien azzjonist b'50 % f'wieħed mill-kompetituri ta' Elan bl-isem ta' Seaway group d.o.o. KD Kapital kienet qed taħseb biex tinstalla rappreżentant tal-interessi tagħha fil-bord superviżorju ta' Elan, li l-azzjonisti l-oħra ma ridux jaċċettaw fid-dawl tal-parteċipazzjoni azzjonarja ta' KD Kapital f'kompetitur. It-tilwima ġiet riżolta meta KAD offriet lil KD Kapital opzjoni put. Wara din is-soluzzjoni, l-azzjonisti kollha ta' Elan inkluża KD Kapital, qablu formalment li jinjettaw EUR 10,225 miljun f'Elan.

(63)

Skont is-Slovenja, fil-bidu tal-2008, Elan kien qrib l-insolvenza. Il-bord superviżorju u l-azzjonisti rreaġixxew mill-ewwel billi ħatru membri ġodda lill-bord ta' ġestjoni ta' Elan, li bdew negozjati mal-banek ta' Elan dwar l-iskedar mill-ġdid tad-djun. Il-banek, madankollu, talab għal injezzjoni ta' kapital addizzjonali mill-azzjonisti. Fid-dawl ta' dan, Elan, flimkien mal-assistenza ta' konsulent estern, ippreparat strateġija ta' bidla f'Mejju 2008; F'Ġunju 2008, il-pjan fit-tul 2008-2012 kien imwaqqaf minn Elan u f'Awwissu 2008, il-maniġment ta' Elan adotta pjan ta' Riabilitazzjoni. Fil-11 ta' Lulju 2008, l-azzjonisti qablu li jiżdied il-kapital bil-kundizzjoni li l-banek l-ewwel jaqblu fuq skedar mill-ġdid tad-dejn fid-dawl ta' dawn id-dokumenti. Barra minn hekk, skont is-Slovenja, l-azzjonisti kkonsidraw il-valur tal-kumpanija, kif stabbilit minn valutazzjoni tal-ekwità ta' Elan minn kumpanija tal-awditjar indipendenti. (11) Skont din il-valutazzjoni, il-valur tas-suq ta' Elan sal-31 ta' Diċembru 2007 kien ta' EUR 38 059 000. Barra minn hekk, l-azzjonisti kkunsidraw kalkolu b'leħħa tal-valur ta' Elan datat l-1 ta' Lulju 2008. Fit-28 ta' Awwissu 2008, l-azzjonisti fl-aħħar iddeċidew li jinjettaw il-kapital mingħajr ftehim minn qabel mill-banek għal skedar mill-ġdid ta' dejn. Is-Slovenja targumenta li kieku sar mod ieħor, l-azzjonisti setgħu tilfu l-investiment kollu f'Elan. Fid-dawl ta' dak li ssemma hawn fuq, is-Slovenja tikkunsidra li l-azzjonisti ta' Elan aġixxew skont il-prinċipju tal-investitur f'ekonomija tas-suq.

(64)

Skont is-Slovenja, il-miżuri ma setgħux joħolqu distorsjoni fil-kompetizzjoni u ma kellhom l-ebda effett fuq il-kummerċ lanqas. L-ewwel nett, Elan kienet kompetitriċi għal operaturi ferm akbar fis-suq tas-ski fl-istess żmien meta ngħataw l-injezzjonijiet tal-kapital. It-tieni nett, il-kompetituri ta' Elan kienu jinħtieġu azzjoni mill-azzjonisti privati tagħhom biex jirkupraw minn telf fis-snin 2007-2008.

(65)

Is-Slovenja biss tippreżenta argumenti ta' kompatibbiltà fir-rigward tal-Miżura 2. Hija targumenta li din il-Miżura kienet kompatibbli skont il-Linji Gwida ta' Salvataġġ u Ristrutturar, peress li Elan ippreparat pjan ta' ristrutturar vijabbli, li jinkludi titjib fil-grupp prinċipalment minn miżuri interni.

(66)

Tabilħaqq, is-Slovenja targumenta li wara ż-żieda fil-kapital fl-2008, Elan eżerċitat il-pjanijiet tagħha kif mistħoqq u rnexxiela tiskeda mill-ġdid is-selfiet ta' terminu qasir tagħha. F'Jannar 2009, ġew adottati pjanijiet ta' senja u f'Ottubru 2009, Elan biegħet is-sussidjarji tagħha Elan Yachting d.o.o. u Elan Marine Charter d.o.o. F'April 2010, Elan Brod d.o.o., misjuba f'Obrovac, il-Kroazja, inbiegħet. B'mod ġenerali, id-dħul minn dawn it-tneħħijiet ammontaw għal EUR [3,1-3,6] miljun. F'Mejju 2010, Elan kienet kapaċi tikseb finanzjament ġdid billi tidħol fi ftehim ta' self fit-tul mal-banek tagħha li jammonta għal EUR [21,5-25,5] miljun]. Is-self il-ġdid intuża biex jitħallas lura self preċedenti. Finalment, fl-1 ta' Ġunju 2010, Elan Winter sport u Elan Marine ġew magħqudin f'kumpanija ewlenija Elan. Is-Slovenja għandha wkoll allegat effett kumpensatorju tat-terminazzjoni tal-impriża konġunta tal-iski tal-Amerka ta' Fuq tagħha ma' Dal Bello Sports. […] il-partijiet fl-14 ta' Diċembru 2009 qablu li jtemmu l-ftehim tal-impriża konġunta tagħhom. Il-Ftehim ta' Distribuzzjoni Kanadiż ġie terminat mill-1 ta' Jannar 2010, il-Ftehim ta' Distribuzzjoni tal-Istati Uniti sussegwentement ġie terminat mill-1 ta' Jannar 2011.

(67)

Il-Kummissjoni teżamina jekk il-benefiċjarju rċeviex għajnuna mill-Istat skont it-tifsira tal-Artikolu 107(1) TFUE (ara l-punt 5.2 hawn taħt), u jekk iva, jekk din l-għajnuna tkunx kompatibbli mas-suq intern (ara l-punt 5.3 hawn taħt). Biex dan isir, huwa meħtieġ li jiġi definit meta l-benefiċjarju potenzjali jitqies bħala kumpanija f'diffikultà (ara l-punt 5.1 hawn taħt).

(68)

Skont il-Punt 10 tal-Linji Gwida tal-R&R, kumpanija tkun f'diffikultà jekk aktar minn nofs il-kapital tagħha jkun intilef tul it-12-il xahar preċedenti, jew jekk tilħaq il-kriterji biex tkun soġġetta għal proċeduri kollettivi ta' insolvenza taħt il-liġi nazzjonali. Kif konkluż ukoll mid-deċiżjoni tal-ftuħ, la sussidjarji u lanqas il-grupp kollu kemm hu ma ssodisfaw il-Punt 10 tal-Linji Gwida tal-R&R fl-2007.

(69)

Skont il-Punt 11 tal-Linji Gwida tal-R&R, ditta xorta tista' titqies bħala waħda f'diffikultajiet, b'mod partikolari fejn il-karatteristiċi tas-soltu ta' impriża f'diffikultà huma preżenti, bħal-livell ta' telf dejjem jikber, it-tnaqqis fid-dħul, iż-żieda fl-inventarji tal-istokk, l-eċċess fil-kapaċità, it-tnaqqis fil-fluss tal-flus, iż-żieda fid-dejn, fil-piż tal-imgħax, kif ukoll it-tnaqqis jew it-telf totali tal-valur nett tal-assi.

(70)

F'dan il-kuntest, għandu jiġi nnutat li fil-perjodu 2003-2006 id-dħul tal-grupp żdied minn EUR 109,2 miljun għal EUR 122,4 miljun. Barra minn hekk, bl-eċċezzjoni tas-sena 2004, il-grupp ta' Elan rreġistra qligħ nett matul dan il-perjodu. Is-sitwazzjoni finanzjarja ta' Elan bdiet tiddeterjora matul is-sena 2007. Id-dħul tal-grupp fl-2007 naqas b'EUR 5 miljun għal EUR 117,5 miljun u niżel għal EUR 100 miljun fl- 2008. Fl-istess ħin ir-riżultat tal-grupp ta' Elan irriżulta negattiv fl-2007, billi waqa' minn EUR 0,6 miljun fl- 2006 għal EUR – 8,4 miljun fl-2007 u EUR – 12,7 miljun fl-2008.

Tabella 2

Indikaturi finanzjarji ewlenin għal Elan group

(71)

Dan jista' jiġi spjegat parzjalment bl-istaġun tax-xitwa moderat tal-2006-2007 (ix-xitwa “ħadra”) li laqtet il-bejgħ tad-diviżjoni tal-isport tax-xitwa. Il-bejgħ ta' Elan Ski niżel minn EUR 48,1 miljun fl-2006 għal EUR 40,8 miljun fl-2007 u kompla naqas għal EUR 37,7 miljun fl-2008. Fl-istess ħin ir-riżultat ta' Elan Ski naqas minn EUR – 0,5 miljun fl-2006 għal EUR – 6,7 miljun fl-2007 u EUR – 13,0 miljun fl-2008.

Tabella 3

Elan Ski

(72)

Id-diviżjoni tal-baħar ta' Elan żiedet id-dħul mill-bejgħ tagħha b'mod konsiderevoli fl-2007 minn EUR 31,8 miljun għal EUR 38,6 miljun, imma rreġistrat telf żgħir ta' EUR – 0,3 miljun. Madankollu, is-sitwazzjoni marret għall-agħar fl-2008, meta l-bejgħ waqa' b'terz minn EUR 38,6 miljun għal EUR 25,9 miljun u Elan Marine soffriet telf nett ta' EUR – 10,2 miljun.

Tabella 4

Elan Marine

(73)

Fid-dawl taċ-ċifri finanzjarji ppreżentati fit-tabelli minn 2 sa 4, huwa ċar li Elan ma kinitx tinsab f'diffikultà fil-bidu tas-sena 2007, meta ngħatat il-Miżura 1 (ara l-premessi (78) sa (85)).

(74)

Madankollu, kif jidher mill-informazzjoni finanzjarja ta' hawn fuq, matul l-2007 is-sitwazzjoni finanzjarja ta' Elan bdiet tiddeterjora u saret serja ħafna fl-2008. Il-kumpanija kienet qed issofri dħul li kien qed jonqos u telf li kien qed jiżdied u kienet qed taffaċċja l-insolvenza kien fil-bidu tal-2008 (ara l-premessi (29)-(34) u l-premessa (63)). Jista' jiġi konkluż li Elan għandha titqies bħala impriża li kienet f'diffikultà skont il-linji gwida ta' salvataġġ u ristrutturar fiż-żmien tal-għoti tal-Miżura 2. Il-ftehim tal-azzjonisti ta' Elan biex titkompla l-injezzjoni ta' kapital kienet motivata mill-fatt li Elan kieku kienet tfalli (ara l-premessa minn (31) sa (33)).

(75)

L-Artikolu 107(1) TFUE jistabbilixxi li kwalunkwe għajnuna mogħtija minn Stat Membru jew permezz ta' riżorsi tal-Istat fi kwalunkwe forma, li tgħawweġ jew thedded li tgħawweġ il-kompetizzjoni billi tiffavorixxi ċerti impriżi jew il-produzzjoni ta' ċerti oġġetti u taffettwa l-kummerċ bejn l-Istati Membri hija inkompatibbli mas-Suq Intern.

(76)

Il-kundizzjonijiet stabbiliti fl-Artikolu 107(1) TFUE huma kumulattivi u b'hekk biex miżura tikkwalifika bħala għajnuna mill-Istat għandhom jiġu sodisfatti l-kundizzjonijiet kollha fl-istess ħin.

(77)

Is-Slovenja prinċipalment targumenta li l-Miżura 1 ngħatat skont il-prinċipju tal-investitur f'ekonomija tas-suq u li għalhekk ma hemm l-ebda vantaġġ għall-benefiċjarju. Barra minn hekk, tippreżenta li f'kwalunkwe każ, l-injezzjoni ta' kapital ma kinitx imputabbli għall-Istat (ara l-premessi (53)-(63)).

(78)

L-ewwel nett, għandu jiġi ddeterminat meta eżattament l-Miżura 1 ingħatat lil Elan. Fil-prinċipju, miżura tal-Istat f'kull każ għandha tiġi kkunsidrata mogħtija malli l-Istat Membru jimpenja ruħu lilha, jiġifieri ladarba l-Istat Membru huwa legalment obbligat li jipprovdi l-miżura. Kif deskritt hawn fuq (ara l-premessa (24)), l-azzjonisti ta' Elan u Elan iffirmaw ittra ta' intenzjoni fid-29 ta' Jannar 2007, iżda ż-żieda fil-kapital ma ġietx formalment ikkonfermata qabel l-assemblea tal-azzjonisti ta' Elan f'Ottubru 2007. Għalhekk għandu jiġi determinat jekk l-ittra ta' intenzjoni diġà tista' titqies li torbot fuq l-azzjonisti b'mod li jippermetti li jiġi konkluż li l-Miżura 1 tista' tiġi kkunsidrata bħala mogħtija fid-data meta ġiet iffirmata ittra ta' intenzjoni.

(79)

F'dan il-kuntest, il-Kummissjoni tinnota li, skont l-għarfien espert legali pprovdut mis-Slovenja, (12) il-liġi Slovena ma tirregolax speċifikament in-natura tal-ittra ta' intenzjoni. Din l-ittra ta' intenzjoni tista' tkun jew sempliċi reġistrazzjoni mhux vinkolanti ta' negozjati kurrenti, jew ftehim prekuntrattwali jew ftehim. In-natura legali ta' ittra ta' intenzjoni għandha tiġi stabbilita fuq bażi ta' kawża b'kawża, b'kunsiderazzjoni tal-formulazzjoni tal-ittra ta' intenzjoni, iċ-ċirkostanzi taħt liem kienet iffirmata u r-regoli ġenerali ta' interpretazzjoni skont il-liġi Slovena.

(80)

Skont l-Artikolu 15 tal-Kodiċi Sloven tal-Obbligazzjonijiet (13), ftehim huwa vinkolanti meta l-partijiet jaqblu dwar l-elementi ewlenin tal-ftehim. B'mod partikolari, il-partijiet għall-ftehim għandhom jiġu speċifikati u kull ftehim għandu jkollu “causa”.

(81)

F'dan il-kuntest, il-Kummissjoni tinnota li skont il-formulazzjoni tal-ittra ta' intenzjoni, il-partijiet għall-ftehim ma kienux speċifikati b'mod ċar; l-ammont totali taż-żieda tal-kapital kienet diġà stabbilita fl-ittra ta' intenzjoni (EUR 10,225 miljun); Ammont nominali massima ta' kapital ġdid maħruġa u l-prezz minimu għal kull kapital ġdid is-sehem kien stabbilit; Kull firmatarju azzjonist qablu li jipparteċipaw b'mod proporzjonali mal-ishma tagħha f'dak iż-żmien; l-għan tal-injezzjoni ta' kapital kien speċifikat (prinċipalment investimenti f'Elan Winter sport u Elan Marine) u ġie stabbilit mekkaniżmu ta' kontroll biex jiġi monitorat l-użu tal-kapital. Barra minn hekk, għandu jiġi kkunsidrat li l-ittra ta' intenzjoni ma kinitx biss magħmula bejn l-azzjonisti ta' Elan, iżda bejn l-azzjonisti u Elan. L-ewwel wieħed għandu jinjetta kapital f'Elan, filwaqt li tal-aħħar għandhom jirreġistraw l-ishma ġodda u jużaw l-injezzjoni tal-kapital bil-mod speċifikat fl-ittra ta' intenzjoni. Fid-dawl ta' dan, il-Kummissjoni tqis li l-partijiet qablu mal-elementi kollha ewlenin neċessarji sabiex jidħlu fi ftehim li jorbot.

(82)

Barra minn hekk, il-kliem tal-ittra ta' intenzjoni jindikaw li l-partijiet daħlu fi ftehim li jorbot: l-azzjonisti u Elan“ikkonfermaw l-intenzjoni tagħhom li jżidu l-kapital”; l-azzjonisti “se jappoġġaw injezzjoni ta' kapital”; l-ishma l-ġodda “se jitħallsu f'kontanti”.

(83)

Barra minn hekk, immedjatament wara li ġiet iffirmata ittra ta' intenzjoni, Elan ikkonkludiet kuntratt għall-kunsinna ta' linja ta' produzzjoni ġdida, li tista' tiġi interpretata bħala indikazzjoni li Elan kienet qed tistenna l-azzjonisti jinjettaw il-kapital fil-kumpanija.

(84)

Fl-aħħar nett, il-kompetenza legali mressqa mis-Slovenja tasal għall-konklużjoni li l-ittra ta' intenzjoni kellha effetti vinkolanti ladarba ġiet ffirmata, jiġifieri li l-azzjonisti kienu obbligati li jadottaw id-deċiżjoni biex jinjettaw il-kapital u li jħallsu l-kapital wara li kienet iitieħdet tali deċiżjoni. Skont din il-kompetenza, il-mistoqsija dwar jekk l-obbligu għall-vot għaż-żieda tal-kapital hux eżegwibbli għadha ma ġietx deċiża mill-qrati Sloveni; parti li tikser tali ftehim madankollu tkun normalment responsabbli għad-danni.

(85)

Fid-dawl tal-argumenti ppreżentati hawn fuq, il-Kummissjoni tikkonkludi li d-data tal-iffirmar tal-ittra ta' intenzjoni, li kienet id-29 ta' Jannar 2007, tista' titqies bħala d-data tal-għoti tal-Miżura 1.

(86)

Sabiex titqies bħala għajnuna mill-Istat, miżura trid tkun speċifika jew selettiva peress li tiffavorixxi biss ċerti impriżi jew il-produzzjoni ta' ċerti oġġetti.

(87)

L-Artikolu 107(1) TFUE jirreferi għall-kunċett ta' impriża fid-definizzjoni tal-benefiċjarju tal-għajnuna. Kif ikkonfermat mill-Unjoni tal-Qrati, impriża għall-finijiet ta' dik id-dispożizzjoni ma għandhiex għalfejn tkun entità legali waħda, iżda tista' tinkludi grupp ta' kumpaniji. (14) Il-kriterju ewlieni fid-determinazzjoni ta' jekk hemmx impriża skont it-tifsira ta' dik id-dispożizzjoni hija jekk hijiex involuta “unità ekonomika”. Unità ekonomika tista' tkun magħmula minn għadd ta' persuni legali. Fil-kawża preżenti, Elan kienet l-entità legali li fiha ġie injettat il-kapital. Fiż-żmien tal-għoti, Elan kellha erba' sussidjarji, jiġifieri Elan Winter sport, Elan Marine, Elan Inventa d.o.o. u Marine Nova d.o.o. (ara l-premessa (6)). Wara l-injezzjoni ta' kapital, Elan ipprovdiet self mill-azzjonisti lil Elan Winter sport u Elan Marine. Dan is-self mill-azzjonisti kien aktar tard ikkonvertit f'ekwità fis-sussidjarji. Għandu għalhekk jiġi kkunsidrat jekk il-grupp bħala tali jew Elan Winter sport u Elan Marine biss rispettivament ibbenefikawx mill-injezzjoni ta' kapital.

(88)

L-ewwel nett, f'termini ta' relazzjonijiet tas-sjieda, huwa nnutat li Elan kellha 100 % tal-ishma fiż-żewġ sussidjarji, jiġifieri Elan Winter sport u Elan Marine. Elan għalhekk tikkontrolla l-attivitajiet tan-negozju kollha ta' dawk is-sussidjarji.

(89)

It-tieni nett, Elan Winter sport u Elan Marine wettqu l-attivitajiet ewlenin ta' Elan fiż-żmien tal-għoti, li kienu l-produzzjoni ta' skis u snowboards kif ukoll il-produzzjoni ta' jottijiet. Is-sussidjarji l-oħra jew ma kinux attivi fis-suq (Marine Nova d.o.o.) jew kienu attivi biex jappoġġaw l-attivitajiet ewlenin ta' Elan (Elan Inventa d.o.o.). Meta Elan ġie ristrutturat, Elan Winter sport u Elan Marine ġew amalgamati fil-kumpanija prinċipali Elan, element ieħor li jindika li l-grupp jista' jitqies bħala benefiċjarju.

(90)

Fid-dawl ta' dawn l-argumenti stipulati hawn fuq huwa konkluż li l-grupp kollu ta' Elan għandu jitqies bħala benefiċjarju taż-żjieda fil-kapital. Bħala l-pass li jmiss, għandu jiġi vvalutat jekk il-miżura tagħtix vantaġġ lill-benefiċjarju.

(91)

Jekk miżura tissodisfa r-rekwiżiti tal-prinċipju tal-investitur privat f'ekonomija tas-suq, l-eżistenza ta' vantaġġ tista' tiġi eskluża. Skont il-każistika, investitur fis-suq jipprova jimmassimizza r-redditu fuq l-assi tiegħu skont iċ-ċirkustanzi u l-interessi tiegħu, anki fil-każ ta' investiment f'impriża li fiha diġà għandu parteċipazzjoni azzjonarja. (15) F'dan il-kawża, irid ikun evalwat jekk l-azzjonisti tal-benefiċjarju aġixxewx skont dan il-prinċipju, billi d-deċiżjoni ta' investiment tagħhom tiġi bbażata fuq informazzjoni ex-ante li ppermettiet li t-tranżazzjoni tagħmel sens ekonomiku.

(92)

F'dan il-kuntest, il-Kummissjoni tieħu nota taċ-ċirkostanzi li wasslu għall-injezzjoni ta' kapital u l-informazzjoni li fuqha kienet ibbażata d-deċiżjoni tal-azzjonisti. Kif deskritt hawn fuq, fiż-żmien tal-għotja, Elan ma kinitx kumpanija f'diffikultà fit-tifsira tal-Linji Gwida ta' Salvataġġ u Ristrutturar (ara l-premessi (68) sa (73). Id-deċiżjoni li jiġi injettat kapital ġdid f'Elan ttieħdet abbażi ta' valutazzjoni tal-kumpanija mill-konsulenza indipendenti […] u diversi dokumenti oħra abbozzati minn Elan innifisha kif ukoll minn KAD, l-azzjonist maġġoritarju ta' Elan. L-analiżi dettaljata ta' Elan tal-effetti ta' żieda fil-kapital indikat li l-investimenti jwasslu għal profitt nett kumulattiv għad-diviżjoni tal-isport tax-xitwa ta' EUR 15,4 miljun matul il-perjodu 2006-2010, meta mqabbel ma' telf nett kumulattiv mingħajr iż-żieda fil-kapital ta' EUR 4,8 miljun. Barra minn hekk il-profitt nett kumulattiv tad-diviżjoni tal-baħar għall-perjodu 2006-2010 ikun ogħla kieku sseħħ iż-żieda fil-kapital (ara l-premessi minn (23) sa (24)).

(93)

Fid-dawl ta' dan ta' hawn fuq, huwa kkunsidrat li l-azzjonisti ta' Elan aġixxew f'konformità mal-prinċipju ta' investitur f'ekonomija tas-suq meta injettaw il-flus fil-kumpanija u li l-Miżura 1 għalhekk ma tagħtix vantaġġ lill-benefiċjarju. Billi l-preżenza ta' għajnuna mill-Istat diġà tista' tiġi eskluża fuq dik il-bażi, mhux evalwat jekk il-Miżura 1 hijiex imputabbli lill-Istat. Il-Kummissjoni tikkonkludi li l-Miżura 1 ma kinitx tinvolvi għajnuna mill-Istat.

(94)

Fir-rigward tal-Miżura 2, is-Slovenja prinċipalment targumenta li l-Miżura 2 ngħatat skont il-prinċipju tal-investitur f'ekonomija tas-suq u li għalhekk ma hemm l-ebda vantaġġ għall-benefiċjarju. Barra minn hekk, tippreżenta li f'kwalunkwe każ, l-injezzjoni ta' kapital ma kinitx imputabbli għall-Istat (ara l-premessi (53)-(63)). Fl-aħħar nett, tikkunsidra li l-miżura ma kellha l-ebda effett fuq il-kummerċ u li ma kien hemm l-ebda distorsjoni tal-kompetizzjoni (ara l-premessa (64)).

(95)

Sabiex titqies bħala għajnuna fis-sens tal-Artikolu 107(1) TFUE, miżura għandha tingħata direttament jew indirettament minn riżorsi tal-Istat u għandha tkun imputabbli lill-Istat.

(96)

Skont il-ġurisprudenza, ir-riżorsi ta' impriża għandhom jitqiesu riżorsi tal-Istat jekk l-Istat ikun jista', billi teżerċita influwenza dominanti tagħha fuq dawk l-impriżi, jidderieġi l-użu tar-riżorsi tagħhom. (16)

(97)

Madankollu, il-kapaċità tal-Istat li jikkontrolla l-entitajiet involuti fl-għoti tal-miżuri ma tiġġustifikax awtomatikament il-preżunzjoni li l-azzjonijiet tal-entitajiet huma imputabbli lill-Istat. Il-Qorti kompliet tispjega l-kunċett ta' imputabbiltà fi Stardust Marine. (17) Hi pprovdiet l-indikaturi li ġejjin biex tiġi stabbilita l-imputabbità: l-integrazzjoni tal-impriża pubblika fl-istrutturi tal-amministrazzjoni pubblika; in-natura tal-attivitajiet tagħha u l-eżerċizzju ta' dawn tal-aħħar fis-suq f'kundizzjonijiet normali ta' kompetizzjoni ma' operaturi privati; l-istatus legali tal-impriża (fis-sens li tkun soġġetta għal-liġi pubblika jew il-liġi ordinarja tal-kumpaniji); l-intensità tas-superviżjoni eżerċitata mill-awtoritajiet pubbliċi fuq il-ġestjoni tal-impriża; kwalunkwe indikatur ieħor li juri, fil-kawża partikolari, involviment mill-awtoritajiet pubbliċi fl-adozzjoni ta' miżura jew l-improbabbiltà li ma jkunux involuti, filwaqt li jikkunsidra wkoll fid-dawl tal-portata tiegħu, il-kontenut tiegħu jew il-kundizzjonijiet li hemm fih.

(98)

Kif deskritt fil-premessa (54), is-Slovenja tirreferi għas-sentenza ta' Stardust Marine u targumenta li s-sjieda tagħha ta' KAD u DSU ma għandhiex timplika awtomatikament l-imputabbiltà tal-azzjonijiet tagħhom lill-Istat. Fir-rigward ta' Triglav Naložbe u Zavarovalnica Triglav, is-Slovenja tqis li dawn il-kumpaniji mhumiex ikkontrollati mill-Istat u li fi kwalunkwe każ, l-azzjonijiet tagħhom mhumiex imputabbli lill-Istat lanqas. Fil-kuntest ta' imputabbiltà, is-Slovenja partikolarment tirrimarka li l-azzjonisti kollha ta' Elan huma inkorporati taħt il-liġi privata, li permezz tagħha biss jiġi offrut livell sodisfaċenti ta' indipendenza ta' dawn il-kumpaniji mill-Istat.

(99)

Bħala rimarka preliminari, il-Kummissjoni tenfasizza li l-fatt li kumpanija li hija proprjetà tal-Istat hija inkorporata taħt il-liġi privata waħedha mhix biżżejjed biex teskludi l-imputabbiltà tal-azzjonijiet tagħha lill-Istat. Ma għandha ssir l-ebda distinzjoni bejn kawżi fejn l-għajnuna tingħata direttament mill-Istat u kawżi fejn tingħata minn korpi pubbliċi jew privati stabbiliti jew maħtura mill-Istat sabiex jamministraw l-għajnuna. Barra minn hekk, kif deskritt hawn fuq, il-Qorti ddikjarat li hemm bosta indikaturi għall-imputabbiltà, li minnhom il-kwistjoni ta' jekk kumpanija hijiex suġġetta għal-liġi privata jew pubblika hija biss waħda (ara l-premessa (97)). Għalhekk, għandu jiġi eżaminat jekk hemmx fatti oħra li jindikaw li l-Miżura 2 hija imputabbli lill-Istat.

(100)

F'dan ir-rigward, il-Kummissjoni tinnota li hemm bosta indikazzjonijiet li l-Istat kien b'mod attiv involut fid-deċiżjoni tal-azzjonisti li jinjettaw kapital addizzjonali fil-benefiċjarju. Għalkemm is-Slovenja laqgħet rapporti tal-midja li jindikaw ir-rwol tal-Istat li jsalva lil Elan bħala “għajdut” jew “riżultat ta' simplifikazzjoni eċċessiva”, dawn ir-rapporti juru l-perċezzjoni pubblika dwar l-approċċ ta' politika industrijali tal-gvern f'dak iż-żmien. Kif spjegat aktar hawn taħt, il-perċezzjoni li l-Gvern Sloven segwa approċċ ta' politika industrijali attiva fiż-żmien in kwistjoni hija tabilħaqq sostnuta mir-rieżami tal-OECD tal-governanza korporattiva fis-Slovenja, li jenfasizza wkoll li kien adottat pjan ta' azzjoni għal riforma tal-governanza korporattiva fis-Slovenja mill-gvern biss. kważi sena wara l-Miżura 2, jiġifieri f'nofs l-2009. (18) Għalhekk, f'Ġunju 2008 meta s-sitwazzjoni prekarja ta' Elan kienet evidenti għad-dinja ta' barra l-midja rrappurtat dwar l-appoġġ mill-Istat potenzjali lil Elan. Rivista sportiva Ġermaniża fis-6 ta' Ġunju 2008 kitbet li skont xniegħat il-Gvern kien qed jaħseb li jinjetta EUR 5,7 miljun f'Elan sabiex jikkumpensa għall-istaġun ħażin tax-xitwa li kien għadu kif għadda. (19) Il-midja Slovena ddiskutew ukoll is-sitwazzjoni ta' Elan, u billi enfasizzaw l-importanza ta' appoġġ mill-Istat biex jiġu salvati l-impjiegi. Pereżempju l-akbar televiżjoni kummerċjali (indipendenti) PopTv irrappurtaw fuq il-websajt tagħhom fis-26 ta' Ġunju 2008 li l-ġestjoni u l-bord superviżorju ta' Elan kienu qed ifittxu li s-soluzzjoni għad-diffikultajiet finanzjarji tal-kumpanija tiġi mill-Istat, filwaqt li indikaw li jekk l-Istat ma jgħinx b'injezzjoni finanzjarja, aktar minn 700 impjieg kien f'periklu. (20)

(101)

Kif diskuss f'aktar dettall hawn taħt, l-involviment tal-awtoritajiet pubbliċi jew l-improbabbiltà tagħhom li ma jkunux involuti huwa l-aktar ovvju fil-każ tal-akbar azzjonist ta' Elan, KAD (li kien jikkontrolla 57,61 % tal-ishma ta' Elan fiż-żmien tal-injezzjoni ta' kapital) u ta' DSU (li l-ishma tagħha kienu jammontaw għal 17,34 % tal-ishma ta' Elan). Anki l-konsulenza indipendenti […] ġibdet l-attenzjoni dwar l-importanza ta' kunsiderazzjonijiet politiċi għat-teħid tad-deċiżjonijiet ta' KAD u DSU fir-rapport ta' valutazzjoni tagħha tat-22 ta' Diċembru 2006. (21) Fil-kuntest ta' analiżi ta' privatizzazzjoni possibbli ta' Elan (f'dak iż-żmien magħrufa bħala Skimar d.o.o.), […] kkonkludiet li tnejn mis-sidien tagħha, KAD u DSU, kienu 100 % ikkontrollati mill-gvern u li konsegwentement kien hemm probabbiltà li d-deċiżjoni tagħhom li jbigħu tkun politikament kif ukoll ekonomikament motivata.

(102)

Il-Kummissjoni tivverifika fuq il-livell ta' kull azzjonista jekk dan kienx ikkontrollat mill-Istat u jekk il-fondi użati għall-injezzjoni ta' kapital jistgħux jitqiesu bħala riżorsi mill-Istat. Barra minn hekk, il-Kummissjoni tiddetermina jekk id-deċiżjoni li jiġi injettat il-kapital f'Elan hijiex imputabbli lill-Istat. F'dan il-kuntest, il-Kummissjoni tagħti attenzjoni partikolari lill-kompożizzjoni tal-bord superviżorju ta' kull azzjonista u jekk il-bord superviżorju kellux jaqbel mal-injezzjoni ta' kapital f'Elan fl-2008. Il-Kummissjoni mbagħad teżamina elementi addizzjonali li jindikaw involviment mill-awtoritajiet pubbliċi jew l-improbabbiltà li ma jkunux involuti fl-adozzjoni tal-miżura

(103)

Il-Kummissjoni tinnota li s-Slovenja kellha 100 % tal-ishma ta' KAD, l-azzjonist maġġoritarju ta' Elan fiż-żmien tal-għotja. Il-gvern Sloven ħatar il-membri kollha tal-assemblea ta' KAD kif ukoll il-bord superviżorju (ara premessa (11))). Skont l-artikli ta' assoċjazzjoni ta' KAD, dan tal-aħħar għandu japprova l-konklużjoni ta' tranżazzjoni li l-valur tagħha jeċċedi 1 % tal-kapital azzjonarju ta' KAD. L-injezzjoni ta' kapital taħt valutazzjoni kienet kwalifikata bħala tali tranżazzjoni, u l-bord superviżorju ta' KAD iddiskuta u qabel mal-injezzjoni ta' kapital f'Elan fil-134 laqgħa tiegħu fl-10 ta' Lulju 2008 u fil-135 laqgħa tiegħu f'Awwissu 2008. (22)

(104)

Billi s-Slovenja hija proprjetarja ta' KAD, wieħed jista' jassumi li hija f'pożizzjoni li tikkontrolla l-kumpanija u li fil-prinċipju, ir-riżorsi ta' KAD jistgħu jitqiesu bħala riżorsi tal-Istat. Għall-kuntrarju tal-fehma tas-Slovenja, il-fatt li l-fondi użati għal injezzjoni ta' kapital joriġinaw minn dividendi, interessi u dħul ieħor ta' KAD, ma jbiddilx din il-konklużjoni. L-użu ta' dividendi, interessi jew dħul ieħor, li jista' minflok ikun ġie mħallas lill-Istat bħala azzjonist kontrollanti tal-kumpanija, huwa tnaqqis ta' riżorsi tal-Istat u għalhekk jista' jitqies l-użu ta' riżorsi tal-Istat. (23)

(105)

Dwar l-imputabbiltà tal-Miżura 2, il-Kummissjoni tqis li KAD ma kinitx tinjetta l-kapital fin-nuqqas tal-influwenza tal-awtoritajiet pubbliċi fuq fit-teħid ta' deċiżjonijiet tagħha. L-influwenza Statali qawwija ma tistax tiġi derivata biss mill-fatt li s-Slovenja kienet l-uniku azzjonist ta' KAD f'dak iż-żmien, li l-membri kollha tal-bord superviżorju tal-KAD ġew maħtura mis-Slovenja, u li l-bord superviżorju kellu jaqbel mat-tranżazzjoni. Indikatur addizzjonali tal-involviment mill-qrib tal-Istat fit-teħid tad-deċiżjonijiet tal-KAD huwa l-fatt li r-rappreżentanti tal-Gvern Sloven jipparteċipaw f'kull assemblea u laqgħa tal-bord superviżorju (ara l-premessa (45)).

(106)

L-influwenza tal-gvern fuq it-teħid tad-deċiżjonijiet ta' KAD (u ta' fond ieħor ikkontrollat mill-Istat, il-fond ta' restituzzjoni SOD) sabiex jintlaħqu l-għanijiet tal-politika industrijali hija enfasizzata wkoll fir-rieżami tal-OECD tal-Governanza Korporattiva tal-OECD fis-Slovenja: “Iż-żewġ fondi pprovdew il-Gvern b'mekkaniżmu b'saħħtu sabiex jinfluwenza l-bordijiet u l-ġestjoni ta' kumpaniji privatizzati u, fl-aħħar mill-aħħar, biex ikollhom rwol attiv fid-determinazzjoni tat-tibdil ta' proprjetarji. Minn naħa dan jidher (għall-inqas inizjalment) li kien motivat minn xewqa biex jiġi mmaniġġat il-limitu sa fejn kumpaniji barranin kisbu kontroll fuq ditti domestiċi industriji importanti. Il-limitu ta' sjieda diretta u indiretta ppermettiet lill-gvernijiet tal-passat biex jeżerċitaw rwol sinifikanti ħafna, u kultant mhux trasparenti, fl-influwenzar tat-tħaddim tas-setturi kbar tal-intrapriżi kummerċjali tas-Slovenja u fis-suq għall-kontroll korporattiv.” (24)

(107)

Id-dokument tal-gvern Sloven “Aġġustamenti Strutturali 2010 u 2011” (25) jenfasizza iktar ir-rwol li KAD u l-fond ta' restituzzjoni kkontrollata mill-Istat SOD kienu lagħbu billi sservew l-għanijiet ta' politika industrijali tas-Slovenja, pereżempju fl-għoti ta' assistenza lil Elan. Taħt l-Intestatura 2.1.1. “Stabbiliment ta' aġenzija pubblika għall-governanza ta' intrapriżi tal-Istat u t-trasformazzjoni ta' KAD u SOD” id-dokument jiddikjara: “Ristrutturar ifisser li KAD u SOD għandhom ikunu meħlusa mill-investimenti strateġiċi kollha: ... — investimenti ħżiena li saru strateġiċi minħabba li l-Istat jixtieq jipprovdilhom għajnuna biex jgħelbu d-diffikultajiet tagħhom (Mura, Elan).” Il-karatterizzazzjoni li l-investiment ta' KAD f'Elan kien sar strateġiku “minħabba li l-Istat jixtieq jipprovdi għajnuna” lil Elan hija f'kuntrast qawwi mal-asserzjoni tas-Slovenja li KAD kienet indipendenti fit-teħid tad-deċiżjonijiet tagħha (ara l-premessa (56)). Il-dokument tal-gvern ikompli jispjega li t-trasferiment ta' investimenti strateġiċi ħżiena mill-parastatali direttament lejn l-Istat kienet fuq kollox biċċa xogħol relatata mal-persunal u li l-kumpanija ta' ristrutturar PDP, stabbilita minn KAD u SOD, ġiet trasferita direttament lil sjieda tal-Istat minħabba li t-tim ma setax jibqa' parti minn KAD u SOD. (26)

(108)

Il-Kummissjoni stiednet lis-Slovenja biex tipprovdi kummenti dwar id-dokumenti msemmija hawn fuq. Is-Slovenja affermat li ma kien hemm l-ebda deċiżjoni tal-gvern rigward ir-rikapitalizzazzjoni ta' Elan. Is-Slovenja indikat li r-rieżami tal-OECD, li jiddeskrivi kif KAD u SOD ipprovdew lill-gvern b'mekkaniżmu b'saħħtu biex jinfluwenza l-bordijiet u l-ġestjoni ta' kumpaniji privatizzati, ma semmiex lil DSU, Zavarovalnica Triglav u Triglav Naložbe u li d-dokument tal-Gvern Sloven ma jsemmi l-ebda influwenza statali diretta jew indiretta fir-rigward tal-assi miżmuma minn Zavarovalnica Triglav jew Triglav Naložbe. Barra minn hekk, is-Slovenja tiġbed l-attenzjoni fuq passaġġ fir-rieżami tal-OECD li jsemmi li “n-nuqqas ta' koordinazzjoni ċentrali ħoloq diffikultajiet għall-ġestjoni effettiva tal-interessi tas-sjieda tal-Gvern”. Din tkompli billi tispjega li KAD dejjem kienet taħt ir-responsabbiltà tal-Ministeru tal-Finanzi, mentri l-Ministeru tal-Ekonomija kien responsabbli għas-settur tal-manifattura, fejn tappartjeni Elan. Fir-rigward tad-dokument tal-gvern Sloven li jirreferi għal investimenti ħżiena li kienu jsiru strateġiċi, is-Slovenja tirrimarka li Mura, it-tieni eżempju ta' investimenti bħal dawn imsemmija fid-dokument apparti Elan, kien f'idejn il-proċeduri ta' falliment f'Ottubru 2009.

(109)

Il-kummenti pprovduti mis-Slovenja ma jikkonfutawx l-argumenti stipulati hawn fuq li jindikaw l-involviment mill-awtoritajiet pubbliċi fl-adozzjoni tal-miżura jew l-improbabbiltà li ma jkunux involuti. Id-dikjarazzjoni li l-gvern ma kienx involut fid-deċiżjoni ta' rikapitalizzazzjoni hija biss affermazzjoni. Il-fatt li r-rieżami tal-OECD ma jsemmix b'mod speċifiku lil DSU, Zavarovalnica Triglav u Triglav Naložbe u li jitkellem dwar nuqqas ta' koordinazzjoni ċentrali ma jbiddilx l-istampa ġenerali mpinġija fir-rieżami tal-OECD, jiġifieri li l-gvern Sloven kien qed jintervjeni b'mod attiv fl-ekonomija u jsegwi skopijiet ta' politika industrijali. Fir-rigward ta' kumpaniji li mhumiex imsemmija b'mod speċifiku fir-rieżami tal-OECD u fid-dokument tal-gvern Sloven, Zavarovalnica Triglav u Triglav Naložbe, dettalji tal-kontroll eżerċitat mill-Istat huma mogħtija hawn taħt. Fl-istess ħin wieħed għandu jżomm f'moħħu li dawn il-kumpaniji kienu azzjonisti minoritarji li kellhom biss 25 % tal-isma ta' Elan. Fl-aħħar nett, fir-rigward tad-dokument tal-gvern, il-fatt li kumpanija oħra f'diffikultajiet ikkunsidrat “investiment strateġiku” falliet hija rrilevanti għall-valutazzjoni tal-kawża preżenti.

(110)

Fid-dawl ta' dan ta' hawn fuq, huwa konkluż li l-injezzjoni ta' kapital ta' KAD fl-2008 f'Elan tikkonsisti minn riżorsi tal-Istat u hija imputabbli lis-Slovenja.

(111)

Kif deskritt fil-premessa (12), KAD qed tmexxi lil PPS u tikkontrolla l-ishma tagħha. Għalhekk, il-parteċipazzjoni ta' KAD-PPS fl-injezzjoni ta' kapital għandha titqies bl-istess mod tal-parteċipazzjoni ta' KAD. Il-kunsens tal-bord superviżorju ta' KAD għall-injezzjoni ta' kapital fil-134 laqgħa tiegħu fl-10 ta' Lulju 2008 inkluda wkoll il-kunsens li jiġi injettat il-kapital f'isem PPS. (27) L-istess jgħodd għad-deċiżjoni meħuda matul il-135 laqgħa tal-bord superviżorju ta' KAD f'Awwissu 2008.

(112)

Għalhekk, huwa konkluż li l-injezzjoni ta' kapital ta' KAD-PPS f'Elan fl-2008 tikkonsisti f'riżorsi tal-Istat u hija imputabbli lis-Slovenja.

(113)

Il-Kummissjoni tinnota li DSU kienet 100 % direttament proprjetà tal-Istat fil-mument tal-għotja. Il-kunsill superviżorju tagħha jikkonsisti minn tliet membri tal-Kunsill, li tnejn minnhom huma magħżula minn azzjonist, jiġifieri s-Slovenja (ara l-premessa (13)). Fiż-żmien tal-injezzjonijiet ta' kapital, it-tielet membru wkoll kien inħatar mill-Istat. Skont l-Artikoli ta' Assoċjazzjoni, il-kunsill superviżorju jadotta deċiżjonijiet b'maġġoranza ta' voti u qed jissorvelja l-ġestjoni tan-negozju ta' DSU. Il-kunsill superviżorju ta' DSU studja u approva l-injezzjoni ta' kapital f'Elan f'sessjoni straordinarja fil-11 ta' Lulju 2008 u emendata b'mod parzjali d-deċiżjoni tiegħu f'żewġ sessjonijiet straordinarji fis-26 ta' Awwissu 2008 u t-8 ta' Settembru 2008. (28)

(114)

Billi s-Slovenja hija proprjetarja ta' DSU, wieħed jista' jassumi li hija f'pożizzjoni li tikkontrolla l-kumpanija u li fil-prinċipju, ir-riżorsi ta' DSU jistgħu jitqiesu bħala riżorsi tal-Istat. Għall-kuntrarju tas-Slovenja, il-fatt li l-fondi użati għall-injezzjoni ta' kapital joriġinaw minn dividendi, interessi u dħul ieħor ta' DSU, ma jbiddilx din il-konklużjoni, kif spjegat fil-premessa (104).

(115)

Dwar l-imputabbiltà tal-Miżura 2, għandu jkun ikkunsidrat li t-tliet membri kollha tal-kunsill superviżorju fiż-żmien tal-għotja kienu maħtura mis-Slovenja, l-uniku azzjonist ta' DSU, u li l-kunsill superviżorju kellu jaqbel mat-tranżazzjoni. Kif stabbilit hawn fuq, l-influwenza ta' konsiderazzjonijiet politiċi fuq it-teħid ta' deċiżjonijiet ta' DSU hija rikonoxxuta fir-rapport ta' valutazzjoni […] tat-22 ta' Diċembru 2006. (29) Il-fatt li flimkien ma' KAD fl-2010 DSU ittrasferixxiet l-ishma ta' Elan tagħha lill-kumpanija azzjonarja PDP ukoll għandu jitqies fid-dawl tal-ispjegazzjonijiet mogħtija hawn fuq dwar il-kwistjoni ta' kif il-gvern Sloven iddeċieda li jindirizza investimenti parastatali li kienu saru strateġiċi minħabba li l-Istat xtaq jipprovdilhom għajnuna biex jegħlbu d-diffikultajiet tagħhom. B'konnessjoni maċ-ċirkostanzi ġenerali l-oħra li jitkellmu favur l-involviment tal-awtoritajiet pubbliċi fl-adozzjoni tal-miżura jew l-improbabbiltà tagħhom li ma jkunux involuti, il-Kummissjoni tqis li DSU ma kinitx tinjetta l-kapital fin-nuqqas tal-influwenza tal-awtoritajiet pubbliċi fuq it-teħid ta' deċiżjonijiet tagħha.

(116)

Għalhekk, huwa konkluż li l-injezzjoni ta' kapital ta' DSU fl-2008 f'Elan tikkonsisti minn riżorsi tal-Istat u hija imputabbli lis-Slovenja.

(117)

Zavarovalnica Triglav mhijiex direttament proprjetà tas-Slovenja. Il-Kummissjoni tosserva, madankollu, li s-Slovenja indirettament għandha s-sjieda ta' żewġ terzi ta' Zavarovalnica Triglav (ara l-premessa (14)). L-azzjonisti maġġoritarji tagħha huma ZIPZ, l-Istitut tal-Assigurazzjoni tal-Pensjoni u d-Diżabbiltà tas-Slovenja u SOD, korporazzjoni tal-indennizz. It-tnejn huma 100 % proprjetà tal-Istat. L-ebda wieħed mill-azzjonisti l-oħra ma għandu sehem ogħla minn 1,8 % f'Zavarovalnica Triglav.

(118)

Ħamsa mit-tmien tal-membri tal-bord superviżorju ta' Zavarovalnica Triglav, inklużi l-president tagħha u viċi-president, jirrappreżentaw l-azzjonisti u huma maħtura minnhom. Kif deskritt fil-premessa (14), l-azzjonisti maġġoritarji ta' Zavarovalnica Triglav huma 100 % kumpaniji proprjetà tal-Istat. Għalhekk, huwa fil-prinċipju l-Istat li jaħtar dawn il-ħames membri tal-bord superviżorju u l-membri tal-bord superviżorju jirrappreżentaw l-interess tal-Istat. Il-Kummissjoni tosserva li kien il-bord ta' ġestjoni ta' Zavarovalnica Triglav li vvota favur iż-żieda fil-kapital fl-assemblea ġenerali ta' Elan fit-28 ta' Awwissu 2008, iżda għamel dan bil-kundizzjoni li l-bord superviżorju jagħti l-kunsens tiegħu għat-tranżazzjoni. Il-bord superviżorju aċċetta l-injezzjoni ta' kapital fl-4 ta' Settembru 2008. (30)

(119)

Billi s-Slovenja kienet indirettament proprjetarja ta' żewġ terzi tal-ishma f'Zavarovalnica Triglav, wieħed jista' jassumi li hija f'pożizzjoni li tikkontrolla l-kumpanija u li fil-prinċipju, ir-riżorsi ta' Zavarovalnica Triglav jistgħu jitqiesu bħala riżorsi tal-Istat.

(120)

Għandha tingħata attenzjoni għall-fatt li l-Istat jaħtar il-maġġoranza tal-Membri tal-bord superviżorju ta' Zavarovalnica Triglav, inkluż il-president u l-viċi president, u li l-bord superviżorju kellu jagħti l-kunsens tiegħu għall-injezzjoni ta' kapital.

(121)

B'konnessjoni maċ-ċirkostanzi ġenerali l-oħra diskussi hawn fuq li jitkellmu b'mod ċar favur li l-involviment tal-awtoritajiet pubbliċi fl-adozzjoni tal-miżura jew l-improbabbiltà tagħhom li ma jkunux involuti, il-miżura hija kkunsidrata imputabbli lis-Slovenja,

(122)

Triglav Naložbe mhijiex direttament proprjetà tas-Slovenja. Il-Kummissjoni tosserva, madankollu, li s-Slovenja indirettament għandha s-sjieda tal-maġġoranza tal-ishma ta' Triglav Naložbe. Fiż-żmien tal-għotja tal-miżura, Zavarovalnica Triglav b'mod effettiv kellha l-proprjetà ta' 80 % tal-ishma ta' Triglav Naložbe. Zavarovalnica Triglav mbagħad hija indirettament fil-maġġoranza proprjetà tas-Slovenja (ara l-premessa (14)). Għalhekk, indirettament, is-Slovenja għandha aktar minn 51 % tal-ishma ta' Triglav Naložbe. L-ebda wieħed mill-azzjonisti l-oħra ma għandu sehem ogħla minn 0,67 % fil-kumpanija.

(123)

It-tliet membri tal-bord superviżorju jirrappreżentaw l-azzjonisti interess u jiġu eletti minnhom. Billi l-Istat indirettament huwa l-azzjonist maġġoritarju fi Triglav Naložbe, wieħed irid iqis li l-Istat jista' jiddeċiedi min jiġi nnominat fil-bord superviżorju biex jirrappreżenta l-interess tas-Slovenja. Il-bord superviżorju ta' Triglav Naložbe kellu jaqbel mal-injezzjoni ta' kapital f'Elan, u għamel dan fis-seba' laqgħa straordinarja fit-3 ta' Settembru 2008. (31)

(124)

Billi s-Slovenja kienet indirettament proprjetarja tal-maġġoranza ta' Triglav Naložbe, wieħed jista' jassumi li hija f'pożizzjoni li tikkontrolla l-kumpanija u li fil-prinċipju, ir-riżorsi ta' Triglav Naložbe jistgħu jitqiesu bħala riżorsi tal-Istat. Għall-kuntrarju tas-Slovenja, il-fatt li l-fondi użati għall-injezzjoni ta' kapital joriġinaw minn self ma jbiddilx din il-konklużjoni, kif spjegat fil-premessa (104).

(125)

Billi wieħed iżomm f'moħħu li l-Istat jaħtar il-membri kollha tal-bord superviżorju ta' Triglav Naložbe u li l-bord superviżorju kellu jagħti l-kunsens tiegħu għall-injezzjoni ta' kapital, f'konnessjoni maċ-ċirkostanzi ġenerali l-oħra diskussi hawn fuq li jitkellmu b'mod ċar favur l-involviment tal-awtoritajiet pubbliċi fl-adozzjoni tal-miżura jew l-improbabbiltà tagħhom li ma jkunux involuti, il-miżura hija kkunsidrata imputabbli lis-Slovenja

(126)

Il-kompożizzjoni tal-bordijiet superviżorji tal-azzjonisti ta' Elan u l-fatt li l-bordijiet superviżorji kellhom jaqblu mal-injezzjoni ta' kapital fl-2008 diġà jissuġġerixxi li l-miżura in kwistjoni hija imputabbli lill-Istat. (32)

(127)

Barra minn hekk, il-Kummissjoni għandha indikazzjonijiet qawwija — kif stabbilit hawn fuq — għall-involviment mill-qrib tal-Istat fit-teħid ta' deċiżjonijiet ta' KAD — bil-bosta l-aktar azzjonist importanti ta' Elan li kien jikkontrolla 57,61 % tal-kapital fiż-żmien tal-injezzjoni ta' kapital — u DSU. Dawn l-indikazzjonijiet ġejjin mir-rapport tal-OECD, ir-rapport ta' […], dokumenti ppubblikati mill-gvern Sloven, u rapporti tal-istampa.

(128)

Barra minn hekk, il-komportament parallel tal-ħames azzjonisti ta' Elan li kienu kollha kkontrollati mill-Istat jagħti indikazzjoni tal-involviment tal-Istat fid-deċiżjoni tal-azzjonisti, peress li jidher improbabbli li ħames operaturi privati u indipendenti setgħu qablu li jinjettaw kapital f'kumpanija f'diffikultà fl-istess ħin u fl-istess kundizzjonijiet.

(129)

Fid-dawl ta' dan ta' hawn fuq huwa konkluż li l-Miżura 2 tikkonsisti minn riżorsi tal-Istat u hija imputabbli lis-Slovenja.

(130)

Sabiex titqies bħala għajnuna mill-Istat, miżura trid tkun speċifika jew selettiva minħabba li tiffavorixxi biss ċerti impriżi jew il-produzzjoni ta' ċerti oġġetti.

(131)

Huwa meqjus li l-grupp kollu ta' Elan għandu jitqies bħala benefiċjarju taż-żieda fil-kapital fl-2008 għall-istess raġunijiet tal-Miżura 1 (ara premessi (87)-(90)). Bħala l-pass li jmiss, għandu jiġi vvalutat jekk il-miżura tagħtix vantaġġ lill-benefiċjarju.

(132)

Jekk miżura tissodisfa r-rekwiżiti tal-prinċipju tal-investitur privat f'ekonomija tas-suq, l-eżistenza ta' vantaġġ tista' tiġi eskluża. Kif deskritt hawn fuq, investitur fis-suq jipprova jimmassimizza r-redditu fuq l-assi tiegħu (ara l-premessa (91)).

(133)

F'dan il-kuntest, il-Kummissjoni l-ewwel tinnota li Elan kienet qed tiffaċċja diffikultajiet fit-tifsira tal-Linji Gwida ta' Salvataġġ u Ristrutturar meta ngħatat il-Miżura 2 (ara l-premessa (74)). Barra minn hekk, skont is-Slovenja, Elan kienet qed taffaċċja l-insolvenza fil-bidu tal-2008, u kellha diskrepanza fil-likwidità ta' EUR [12,6-15 miljun].

(134)

Is-Slovenja targumenta li l-azzjonisti ta' Elan ibbażaw id-deċiżjoni tagħhom li jinjettaw kapital addizzjonali fuq diversi dokumenti mħejjija minn Elan u konsulenti esterni, li juri li d-deċiżjoni kienet ġustifikata.

(135)

Filwaqt li huwa minnu li Elan fassal pjan fit-tul 2008-2012 għall-grupp, għandu jiġi kkunsidrat li dan il-pjan ippreveda żieda fil-kapital ta' EUR 25 miljun bħala bażi biex jintlaħqu redditi adegwati fil-futur u l-azzjonisti ta' Elan kkunsidraw dan il-pjan fit-tul bħala mhux adegwat għat-twettiq ta' injezzjoni ta' kapital ta' dak l-ammont. Il-pjan ta' Riabilitazzjoni ta' Awwissu 2008 kien jikkonsisti prinċipalment minn previżjonijiet u ma pprovdiex informazzjoni dwar iż-żieda tal-kapital ippjanata. Kemm il-pjan fit-tul 2008-2012 u kemm il-pjan ta' Riabilitazzjoni kienu mwaqqfa minn Elan, mingħajr l-involviment ta' konsulent estern. Dokument ieħor ipprovdut mis-Slovenja f'dak li għandu x'jaqsam mat-tieni żieda fil-kapital kellu kalkolu b'leħħa tal-valur ta' Elan, imħejji minn KAD, datat Lulju 2008. Dan id-dokument, madankollu, ma jappoġġax l-argument tas-Slovenja li l-azzjonisti ta' Elan aġixxew bħal investituri prudenti, minħabba li skont dik l-istima, jekk l-obbligazzjonijiet potenzjali huma kkunsidrati Elan kellha ekwità negattiva b'valur li jammonta għal EUR [29,5-34] miljun f'Lulju 2008. Barra minn hekk, il-kalkoli b'leħħa jirrimarkaw li l-projezzjonijiet fil-pjan fit-tul 2008-2012 ta' Elan jistgħu jkunu ottimisti żżejjed fid-dawl ta' esperjenzi preċedenti, f'liema każ il-valur tal-kumpanija jkun aktar baxx.

(136)

Is-Slovenja ressqet ukoll valutazzjoni ta' ekwità ta' Elan wara l-metodu tal-fluss tal-flus skontat. Din il-valutazzjoni tal-ekwità, imħejjija minn […] f'Ġunju 2008, ikkunsidrat li l-valur tas-suq ta' Elan fil-31 ta' Diċembru 2007 kien għadu pożittiv, li jammonta għal EUR [35-40] miljun. Madankollu, kif deskritt hawn fuq (ara l-premessi (70) sa (74)), is-sitwazzjoni ta' Elan marret għall-agħar drastikament matul is-sena 2008. Fid-dawl ta' dawn l-iżviluppi l-valutazzjoni tal-ekwità ta' hawn fuq għandha tkun ikkunsidrata skaduta fit-28 ta' Awwissu 2008 meta l-azzjonisti ta' Elan iddeċidew fuq l-injezzjoni ta' kapital u ma tistax toqgħod fuqha biex jintwera li l-azzjonisti ta' Elan aġixxew bħal investituri tas-suq prudenti, b'mod partikolari meta jiġu kkunsidrati ċ-ċirkostanzi tat-tieni injezzjoni ta' kapital.

(137)

Kif deskritt fil-premessa (32), l-azzjonisti għamlu kull żieda fil-kapital kondizzjonali fuq ftehim minn qabel tal-banek biex jiskedaw mill-ġdid is-self eżistenti ta' Elan. Għalkemm tali ftehim ma setax jintlaħaq qabel iż-żieda fil-kapital, l-azzjonisti ta' Elan ipproċedew bl-injezzjoni ta' kapital minħabba li Elan kieku kienet tfalli.

(138)

Kieku l-banek kienu qablu li jiskedaw mill-ġdid is-self qabel iż-żieda fil-kapital, dan seta' jkun sinjal li dawn jemmnu f'ritorn għall-vijabbiltà ta' Elan. Madankollu, dan ma kienx il-każ, u għall-kuntrarju, wieħed mill-banek anki talab għal ordni tal-qorti biex jiġi nfurzat id-dejn pendenti kontra Elan. Il-pożizzjoni tal-bank tista' tiġi kkunsidrata bħala sinjal li s-suq ma kienx jemmen fir-ritorn għall-vijabbiltà ta' Elan.

(139)

Barra minn hekk, għandu wkoll ikun ikkunsidrat li sa mill-2007 l-azzjonisti kienu injettaw EUR 10,225 miljun f'Elan, mingħajr suċċess. Għandu jiġi ċċarat li, għalkemm l-injezzjoni ta' kapital tal-2007 kienet ibbażata fuq l-hekk imsejjaħ pjan ta' żvilupp strateġiku li taħtu Elan oriġinarjament kienet talbet għal investimenti ta' EUR 20,2 miljun, l-injezzjoni ta' kapital tal-2008 ta' EUR 10 miljun ma tistax titqies bħala tieni tranche tal-investiment skont il-pjan ta' żvilupp strateġiku oriġinali. L-injezzjoni ta' kapital tal-2008 kienet meħtieġa sabiex tkun evitata l-insolvenza billi jiġu koperti n-nuqqas ta' likwidità u t-telf mġarrba ta' Elan, il-kapital ma kienx iddedikati għall-għanijiet stipulati fil-pjan ta' żvilupp strateġiku (ara l-premessa (23)).

(140)

Fl-aħħar nett, il-Kummissjoni tinnota li l-azzjonisti kollha fil-mument tal-għotja tal-miżura kienu proprjetà tal-Istat, jiġifieri li l-ebda azzjonist privat ma ħa sehem fiż-żieda fil-kapital.

(141)

Fid-dawl ta' dan ta' hawn fuq, il-Kummissjoni tikkonkludi li l-Miżura 2 ma ngħatax skont il-prinċipju tal-investitur privat f'ekonomija tas-suq u tat vantaġġ lil Elan.

(142)

Il-Kummissjoni tinnota li l-benefiċjarju jkun attiv fi swieq li huma miftuħa għall-kompetizzjoni. Kwalunkwe għotja Statali provduti lil tali impriża tista' tipprovdiha b'vantaġġ fuq kompetituri oħrajn li ma jibbenefikawx minn għotjiet bħal dawn. Għall-kuntrarju tas-Slovenja mhuwiex rilevanti f'dan il-kuntest jekk il-kompetituri ta' Elan kellhomx sehem akbar fis-suq minn Elan jew jekk dawk il-kompetituri rċevew ukoll fondi mill-azzjonisti tagħhom.

(143)

Meta l-għajnuna mogħtija minn Stat Membru ssaħħaħ il-pożizzjoni ta' impriża meta mqabbla ma' impriżi oħra li jikkompetu f'kummerċ intra-UE, dawn tal-aħħar għandhom jitqiesu bħala affettwati minn dik l-għajnuna. (33) Hemm kummerċ bejn l-Istati Membri fit-tagħmir għall-iskijjar u l-opri tal-baħar, li huma l-oġġetti li l-benefiċjarju jimmanifattura u jikkummerċjalizza.

(144)

Fid-dawl ta' dan ta' hawn fuq, il-Kummissjoni tikkonkludi li l-Miżura 2 tista' tgħawweġ il-kompetizzjoni u li jista' jkollha effett fuq il-kummerċ.

(145)

Minħabba l-argumenti t'hawn fuq, il-Kummissjoni tikkonkludi li l-Miżura 2 tinvolvi għajnuna mill-Istat skont it-tifsira tal-Artikolu 107(1) TFUE lil Elan. Is-Slovenja ma rrispettatx l-obbligu stand-still skont l-Artikolu 108 (3) TFUE.

(146)

L-Artikoli 107(2) u 107(3) TFUE jipprovdu għal eżenzjonijiet għar-regola ġenerali li l-għajnuna mill-Istat hija inkompatibbli mas-suq intern kif iddikjarat fl- Artikolu 107(1) TFUE.

(147)

F'dan il-kuntest, għandu jiġi osservat li l-piż ta' prova tal-kompatibilità tal-għajnuna mas-Suq Intern, b'deroga mill-Artikolu 107(1) TFUE huwa merfugħ prinċipalment mill-Istat Membru kkonċernat, li għandu juri li l-kundizzjonijiet għal dik id-deroga huma sodisfatti. (34)

(148)

Il-Kummissjoni tevalwa l-kompatibilità tal-Miżura 2 taħt dawn l-eċċezzjonijiet. Peress li l-miżura inkwistjoni kienet mogħtija lil kumpanija f'diffikultà (ara l-punt 5.1 ta' hawn fuq), il-Kummissjoni l-ewwel tevalwa l-kompatibilità tal-miżura skont il-Linji Gwida ta' Salvataġġ u Ristrutturar. It-tieni, huwa kkunsidrat jekk il-miżura tistax titqies bħala kompatibbli fuq kwalunkwe bażi oħra.

(149)

Skont il-Punt 33 tal-Linji Gwida ta' Salvataġġ u Ristrutturar, kumpaniji f'diffikultà biss huma eliġibbli għall-għajnuna ta' salvataġġ u ta' ristrutturar. Elan hija eliġibbli, peress li tista' tiġi kkunsidrata li kienet kumpanija f'diffikultà fiż-żmien tat-tieni injezzjoni ta' kapital (ara l-premessa (74)).

(150)

Skont il-Linji Gwida ta' Salvataġġ u Ristrutturar, għajnuna ta' salvataġġ trid tissodisfa ċerti rekwiżiti, li mhux kollha huma sodisfatti mill-miżura in kwistjoni:

(151)

Għalhekk, l-injezzjonijiet ta' kapital inkwistjoni ma jistgħux jitqiesu bħala għajnuna ta' salvataġġ.

(152)

Il-miżura ma tissodisfax ir-rekwiżiti kollha għal għajnuna ta' ristrutturar stabbiliti fil-Linji Gwida ta' Salvataġġ u Ristrutturar lanqas, peress li l-ebda miżuri ta' kumpens li setaw ipattu għall-effett avvers tal-għajnuna fuq il-kundizzjonijiet tal-kummerċ ma ġew ipprovduti.

(153)

Skont il-Punti minn 38 sa 42 tal-Linji Gwida ta' Salvataġġ u Ristrutturar, ir-ristrutturazzjoni trid tkun akkumpanjata minn miżuri ta' kumpens fi proporzjon mal-effetti ta' tfixkil tal-għajnuna u, partikolarment, id-daqs u l-importanza relattiva tad-ditta benefiċjarja fis-suq tagħha. Il-Punt 40 tal-Linji Gwida jistipula li l-miżuri ta' kumpens għandhom b'mod partikolari jseħħu fis-suq/swieq fejn l-impriża ser ikollha pożizzjoni sinifikanti fis-suq wara r-ristrutturar. Is-Slovenja tistqarr li ċerti ċessjonijiet mwettqa minn Elan fl-2009 u l-2010 kellhom effett kumpensatorju.

(154)

Fir-rigward tad-diviżjoni tal-isport tax-xitwa ta' Elan, is-Slovenja tiddeskrivi lil Elan bħala “waħda mill-aħħar ditti tat-tagħmir tal-isport tax-xitwa awtonomi” u tirreferi għaliha bħala “biss kompetitur dgħajjef [sic] għal parteċipanti ħafna akbar fis-suq.” (35) Il-karatterizzazzjoni tal-aħħar mhijiex, madankollu, f'konformità mad-deskrizzjoni li l-azzjonist maġġoritarju attwali ta' Elan jagħti dwar id-ditta. PDP tirrimarka li fl-2010 Elan biegħet 448 000 pari skis u 217 000 snowboards, li Elan irrappreżentat 13 % tal-produzzjoni globali tal-iskis u li kienet is-seba' ditta globali tal-iskijar bis-sehem tas-suq tad-ditta tagħha li jammonta għal madwar 8 % tas-suq globali.

(155)

Is-Slovenja ma tipproponi l-ebda definizzjoni speċifika tal-prodott jew suq/swieq ġeografiku/ċi, fejn hija attiva d-diviżjoni tal-isport tax-xitwa ta' Elan. Kif spjegat hawn taħt, billi titqies l-informazzjoni pprovduta mis-Slovenja u filwaqt li jitqiesu l-kunsiderazzjonijiet fir-rigward tad-definizzjoni tas-suq minn prattika merger tal-passat, (36) għandu jiġi konkluż li Elan kellha ishma tas-suq konsiderevoli mill-inqas f'xi swieq rilevanti konċernati.

(156)

Sabiex tiġi vvalutata l-importanza relattiva tal-kumpanija fis-swieq li fihom hija attiva, il-Kummissjoni eżaminat l-evidenza disponibbli, inklużi dokumenti strateġiċi mfassla minn Elan innifisha. Minbarra aċċessorji, Elan timmanifattura b'mod partikolari skis tal-alpi u snowboards. Minn naħa waħda dawn jinbiegħu bħala prodotti tad-ditta ta' Elan lil imnutanti (minn hawn 'il quddiem imsejjaħ bħala “s-suq tal-konsumaturi”); Min-naħa l-oħra Elan taġixxi bħala l-hekk imsejjaħ manifattur ta' tagħmir oriġinali u tipprovdi skis u snowboards lil manifatturi (rivali) oħrajn (minn hawn 'il quddiem imsejħa bħala “is-suq tal-OEM”). Għandu jiġi nnotat li fil-Każ Nru COMP/M.3765 — AMER SALOMON il-Kummissjoni kkunsidrat f'Diċembru 2005 minħabba l-iskopijiet ta' dik id-deċiżjoni inter alia swieq ta' prodotti separati għal tipi differenti ta' tagħmir tal-isport tax-xitwa, inklużi swieq ta' prodotti rilevanti separati għall-iskis tal-alpi, għal snowboards u għas-suq tal-OEM għal skis tal-alpi. Is-swieq tal-bejgħ bl-imnut għat-tagħmir tal-isport tax-xitwa kienu kkunsidrati nazzjonali, mentri s-swieq tal-OEM kienu kkunsidrati mill-inqas wiesa' daqs iż-ŻEE fl-ambitu ta' applikazzjoni. (37) Fid-Development Plan Elan Ski OEM 2006-2010 tagħha l-kumpanija tindika s-sehem tas-suq globali tagħha tal-produzzjoni OEM tal-iskis tal-2005 bħala 21 % u tispjega “[…]” Id-Development Plan Elan Sportartikel 2006-2010 jindika li Elan ikkonsidrat lilha nnifisha bħala l-produttur ewlieni dinji ta' snowboards b'riżultat tal-produzzjoni ta' 268 000 fl-2005, li jilħaq sehem ta' 16 %. Il-maġġoranza l-kbira ta' dan ir-riżultat jikkonċerna n-negozju tal-OEM, filwaqt li 30 000 snowboard nbiegħet fl-2005 taħt id-ditta Elan. Fir-rigward ta' skis tad-ditta Elan id-Development Plan Market and brand focused penetration strategy Elan Brand 2006-2010 jindika sehem mis-suq globali ta' 7,5 %, li jelenka lil Elan fin-nru 7 fir-rigward ta' sehem mis-suq. Madankollu, id-dokument jenfasizza li d-ditta kienet temmen li tista' tilħaq pożizzjoni taħt l-aqwa ħames ditti f'nofs it-terminu, billi jispjega li […].

(157)

Peress li d-diviżjoni tal-isport tax-xitwa hija responsabbli għall-akbar parti bil-bosta tad-dħul ta' Elan u peress li l-pożizzjoni b'saħħitha ta' Elan dettaljata hawn fuq, tal-anqas f'ċerti setturi tan-negozju tal-isport tax-xitwa, kellhom jittieħdu miżuri kompensatorji b'mod partikolari f'dan il-qasam. Billi jiġu eżaminati l-elementi indikati mis-Slovenja bħala miżuri ta' kumpens meħuda fid-diviżjoni tal-isport tax-xitwa, l-unika ċessjoni kien il-bejgħ ta' sehem [17,5 % — 20 %] tal-kapital li Elan kellha fl-imsieħeb ta' Impriża Konġunta ta' distribuzzjoni tagħha Dal Bello Sports (minn hawn 'il quddiem msejjaħ bħala “Dal Bello”) fl-Istati Uniti. Iċ-ċessjoni ta' Elan kienet il-konsegwenza tat-terminazzjoni tal-Impriża Konġunta ta' kummerċjalizzazzjoni u distribuzzjoni ma' Dal Bello fl-Amerika ta' Fuq. Elan targumenta li t-tmiem tal-kooperazzjoni wassal għal tnaqqis fil-bejgħ ta' Elan fil-Kanada u fl-Istati Uniti u f'dan tara “effett ta' kumpens”.

(158)

L-ewwel ħaġa li għandha tiġi nnotata hi li la pjan fit-tul 2008-2012 u lanqas il-Pjan ta' Riabilitazzjoni ma jsemmu l-bejgħ tal-ishma ta' Dal Bello, u għalhekk il-bejgħ ma jistax jiġi kkunsidrat bħala “parti integrali tar-ristrutturar”, kif previst fil-Punt 40 tal-Linji Gwida għas-Salvataġġ u r-Ristrutturazzjoni. Tabilħaqq, eżami aktar mill-qrib tat-tranżazzjoni juri li l-kooperazzjoni ta' kummerċjalizzazzjoni u distribuzzjoni kienet terminata fuq inizjattiva ta'Dal Bello. Is-Slovenja kkonċediet li “l-problemi ta' Elan fl-2008 u t-tiftix ta' Dal Bello għal imsieħeb aktar affidabbli fuq żmien twil wassal għal diskussjoni dwar it-terminazzjoni tal-kooperazzjoni li mill-bqija kienet ta' suċċess. Dawn id-diskussjonijiet irriżultaw fil-Ftehim ta' Terminazzjoni tal-Impriża Konġunta tal-14 ta' Diċembru 2009 …” Fid-dawl ta' dan ta' hawn fuq iċ-ċessjoni ta' Elan minħabba dawn ir-raġunijiet diġà ma tistax tiġi kkwalifikata bħala miżura ta' kumpens.

(159)

Barra minn hekk, filwaqt li t-tnaqqis tal-bejgħ, wassal għal tnaqqis fis-sehem fis-suq tal-benefiċjarju, jista' f'ċirkostanzi oħra jikkostitwixxi miżura ta' kumpens, il-Kummissjoni tinnota li f'dan il-każ, it-tranżazzjoni tikkonċerna s-suq tal-bejgħ bl-imnut, li qabel kien jitqies nazzjonali mill-Kummissjoni, (38) u li l-bejgħ tal-iskis ta' Elan kien fi kwalunkwe każ imnaqqas biss fis-suq tal-Amerika ta' Fuq, iżda mhux fis-suq/swieq Ewropew/Ewropej u għalhekk ma jistax jikkumpensa għat-tfixkil maħluq fiż-ŻEE. Barra minn hekk, l-Impriża Konġunta kienet attiva fil-kummerċjalizzazzjoni u d-distribuzzjoni tal-iskis, u mhux fil-manifattura tagħhom. L-attività ċentrali ta' Elan hija, madankollu, il-manifattura tal-iskis u snowboards. Ċessjonijiet f'suq prinċipali tal-benefiċjarju biss jistgħu jitqiesu bħala miżuri ta' kumpens xierqa.

(160)

Is-Slovenja argumentat ukoll li t-tnaqqis tal-impjegati attivi fil-produzzjoni tal-iskis u t-tnaqqis tal-investimenti kummerċjali tagħha jistgħu jitqiesu bħala miżuri ta' kumpens.

(161)

Iżda, kif muri mill-Pjan Għal Perjodu ta' Żmien Twil ta' Elan u mill-Pjan ta' Riabilitazzjoni tagħha, dawn il-miżuri għandhom jitqiesu bħala miżuri ta' razzjonalizzazzjoni sempliċi bil-għan li jnaqqsu l-ispejjeż u jżidu l-effiċjenza sabiex terġa' tinkiseb il-vijabbiltà finanzjarja. Il-miżuri ma kinux meħuda sabiex titnaqqas il-preżenza ta' Elan fis-suq jew biex ipattu għal kwalunkwe tfixkil fil-kompetizzjoni li jirriżulta mill-għajnuna rċevuta minn Elan.

(162)

Fis-settur marittimu, is-Slovenja targumenta li dawn iċ-ċessjonijiet li ġejjin kellhom effett kumpensatorju: Fl-2009 Elan biegħet żewġ kumpaniji involuti fil-kiri ta' jottijiet, Elan Yachting d.o.o. and Elan Marine Charter d.o.o. Fl-2010 Elan Brod d.o.o., kumpanija li tinsab fil-Kroazja li kienet primarjament involuta fil-produzzjoni ta' dgħajjes bil-mutur, kienet mibjugħa. Is-Slovenja tafferma li l-kumpaniji ma kinux qed jagħmlu telf strutturalment, li attivitajiet ta' kiri mwettqa minn Elan Yachting d.o.o. u Elan Marine Charter d.o.o.kienu qed jappoġġaw il-penetrazzjoni tal-jottijiet ta' Elan fis-swieq ewlenin ta' Elan u li l-irtirar mis-segment tas-suq tad-dgħajjes bil-mutur naqqas sostjanzalment il-preżenza ta' Elan fis-suq tad-dgħajjes ta' divertiment u tal-isport.

(163)

Il-Kummissjoni tfakkar li, skont il-Punt 40 tal-Linji Gwida ta' Salvataġġ u Ristrutturar, il-miżuri ta' kumpens għandhom jittieħdu partikolarment fis-suq/swieq fejn l-impriża se jkollha pożizzjoni sinifikanti fis-suq wara r-ristrutturar. Talbiet għal tħassir u għeluq tal-attivitajiet li jagħmlu t-telf li fi kwalunkwe każ ikunu meħtieġa biex terġa' tiġi stabbilita l-vijabbiltà mhumiex ikkunsidrati bħala tnaqqis tal-kapaċità għall-iskop tal-valutazzjoni dwar il-miżuri ta' kumpens.

(164)

Wieħed irid iżomm f'moħħu li n-negozju tal-baħar ma jikkostitwixxix l-attività prinċipali ta' Elan. Il-kumpanija tiġġenera sehem akbar b'mod konsiderevoli tad-dħul tagħha fid-diviżjoni tal-isport tax-xitwa. Skont il-previżjoni finanzjarja għall-2011, id-dħul totali tad-diviżjoni tal-baħar kien mistenni li jilħaq biss EUR [20-24] miljun, meta mqabbel ma' EUR [58-68] miljun fid-diviżjoni tal-isport tax-xitwa. Barra minn hekk, id-diviżjoni tal-isport tax-xitwa rċeviet ukoll il-parti l-kbira (EUR 5,924 miljun) tal-injezzjoni ta' kapital ta' EUR 10 miljun f'Elan. Fid-dawl tal-Punt 40 tal-Linji Gwida ta' Salvataġġ u Ristrutturar jidher dubjuż kemm, jekk iċ-ċessjonijiet fid-diviżjoni tal-baħar jistgħu jitqiesu kollha bħala miżuri ta' kumpens xierqa peress li, kif ukoll aktar dettalljat hawn taħt, in-negozju tal-baħar mhuwiex l-istess suq fejn id-ditta għandha l-aktar pożizzjoni sinifikanti fis-suq wara r-ristrutturar.

(165)

Sabiex tapprezza għal kollox l-argumenti ppreżentati mis-Slovenja, il-Kummissjoni madankollu, eżaminat sa liema punt is-Slovenja setgħet targumenta li ttieħdu miżuri ta' kumpens xierqa fin-negozju tal-baħar. Qabel ir-ristrutturar il-kapaċità massima tal-produzzjoni ta' Elan kienet ta' [280-330] dgħajjes bil-qlugħ u [45-55]dgħajjes bil-mutur. Is-Slovenja ma tipproponi l-ebda definizzjoni speċifika tal-prodott tal-baħar jew suq/swieq ġeografiku/ċi, f'liema tkun tista' titqies l-importanza relattiva tagħha. Fis-sottomissjonijiet tagħha titkellem dwar tnaqqis tal-preżenza ta' Elan fis-“suq tad-dgħajjes ta' divertiment u tal-isports”, u fl-istess ħin tirreferi għall-irtirar tagħha mis-“segment tas-suq tad-dgħajjes bil-mutur”.

(166)

Madankollu, l-analiżi tad-dokumenti disponibbli, inklużi dokumenti strateġiċi mfassla minn Elan innifisha, li jittrattaw il-pożizzjoni kompetittiva tad-diviżjoni tal-baħar ta' Elan tipprovdi aktar fehmiet fl-importanza relattiva tal-kumpanija dwar is-suq tal-baħar. Id-Development Plan Elan Marine Division 2006-2010 iddikjara li s-suq dinji tad-dgħajjes ġodda kollha kien ta' madwar EUR 25 biljun, li minnhom 80 % kienu power boats u 20 % dgħajjes bil-qlugħ bl-istess proporzjon li japplika għall-Ewropa. Elan iddeskriviet is-suq bħala “frammentat ħafna” u poġġiet is-sehem tas-suq tal-UE tal-programm ta' tbaħħir tagħha fuq bejn wieħed u ieħor [0-5] %, tal-programm tagħha tad-dgħajjes bil-mutur ta' << 1 %. Il-Pjan ta' Żvilupp però, irrimarka lejn l-eżistenza ta' segments tas-suq differenti kkaratterizzati minn kundizzjonijiet kompetittivi, inklużi barrieri tad-dħul. Il-Pjan fit-Tul ta' Elan tal-Grupp Skimar 2008-2012 ta' Ġunju 2008 ipprovda għal segmentazzjoni tas-suq tad-dgħajjes skont it-tul tad-dgħajsa u stqarr li l-kompetizzjoni kienet l-iktar ħarxa fis-segment tad-dgħajjes iż-żgħar (30 pied), mentri Elan timmanifattura u tbiegħ prodotti ta' kategorija medja ta' minn 30 sa 50 pied fit-tul u kienet qed tippjana li tiżviluppa mudelli ġodda […]. L-iktar stqarrija ċara dwar is-sehem tas-suq ta' Elan fis-segment fejn tara lilha nnisfisha tikkompeti tiġi minn preżentazzjoni tal-azzjonist maġġoritarju kurrenti ta' Elan PDP li tistqarr: “Fl-2010 Elan, f'segment tad-dgħajjes bil-qlugħ bejn 32 u 60 pied (li jirrappreżentaw 20 % tas-suq nawtiku) biegħet 122 dgħajsa, biex b'hekk ġabet sehem tas-suq ta' 5,2”. Jidher plawżibbli li s-segmentazzjoni tas-suq tuża kriterji bħat-tip ta' saħħa (qlugħ, mutur) u d-daqs bħala punt tat-tluq. Fin-nuqqas ta' fehma opposta, għall-iskop ta' din id-deċiżjoni l-Kummissjoni tista' taċċetta l-valutazzjoni tal-PDP li Elan kellha sehem tas-suq ta' > 5 % fis-suq frammentat tad-dgħajjes tal-qlugħ.

(167)

Skont dak li ntqal hawn fuq, anke kieku ċ-ċessjonijiet ta' Elan fid-diviżjoni tal-baħar setgħu jittieħdu in konsiderazzjoni għall-iskop tal-valutazzjoni ta' kompatibbiltà tal-Kummissjoni, ġewwa s-settur tal-baħar kwalunkwe miżuri ta' kumpens setgħu seħħew fil-manifattura tad-dgħajjes tal-qlugħ, li kienet b'mod ċar l-attività prinċipali tad-diviżjoni ta' Elan marine u fejn, kif diskuss, il-kumpanija kellha sehem mhux negliġibbli, skont Elan, “tas-suq frammentat sew”. Iċ-ċessjoni tal-attivitajiet ta' kiri l-iktar li kienu qed jappoġġaw indirettament il-bejgħ tal-jottijiet ta' Elan, u ċ-ċessjoni tal-produzzjoni tad-dgħajjes tal-mutur, settur li Elan ħareġ minnu permezz tal-bejgħ ta' Elan Brod d.o.o. f'daqqa, u għalhekk mhux f'konformità mal-Punt 40 tal-Linji Gwida ta' Salvataġġ u Ristrutturar. Sa fejn jikkonċerna d-dgħajjes tal-mutur, Elan bdiet tipproduċi dgħajjes bħal dawn fis-sena 2002, bl-intenzjoni li tuża r-reputazzjoni miksuba fis-settur tad-dgħajjes tal-qlugħ għall-produzzjoni tad-dgħajjes tal-mutur ukoll. Madankollu, il-bejgħ kien l-iktar għoli b'50 dgħajsa tal-mutur fl-2006 u l-2007 u imbagħad naqas għal [25-29] fl-2008 u [7-9] dgħajjes biss fl-2009.

(168)

Sottomissjonijiet mis-Slovenja jenfasizzaw ukoll il-fatt li l-azzjonisti ta' Elan u l-banek ikkonsidraw l-attivitajiet ċessati li huma attivitajiet mhux ewlenija. (39) Għandu jkun innotat ukoll li l-bejgħ tas-sussidjarji ta' Elan ma kienx ippjanat li jpatti għal tfixkil fil-kompetizzjoni. It-tliet sussidjarji kienu qed iġarrbu telf fiż-żmien tal-bejgħ kif ukoll fis-snin qabel il-bejgħ. Is-Slovenja informat lill-Kummissjoni li r-riżultat nett totali (magħqud) ta' Elan Yachting d.o.o. u Elan Marine Charter d.o.o kien EUR – 157 000 fl-2007, EUR – 100 000 fl-2008 u EUR – 57 000 fl-2009. Kif ukoll Elan Brod d.o.o irreġistrat telf waqt il-perjodu kollu, jiġifieri EUR -58 000 fis-sena 2006, EUR -436 000 fl-2007, EUR – 1 miljun fl-2008 u EUR – 1,5 miljun fl-2009. Fid-dawl ta' dawn in-numri l-istqarrija tas-Slovenja li l-kumpaniji ma kinux qed jagħmlu telf strutturalment tidher li hija biss dikjarazzjoni li tfittex l-interessi tagħha stess. Kif stipulat hawn fuq, skont il-Linji Gwida ta' Salvataġġ u Ristrutturar talbiet għal tħassir u għeluq tal-attivitajiet li jagħmlu t-telf li fi kwalunkwe każ ikunu meħtieġa biex terġa' tiġi stabbilita l-vijabbiltà mhumiex ikkunsidrati bħala tnaqqis tal-kapaċità għall-iskop tal-valutazzjoni dwar il-miżuri ta' kumpens. It-telf għoli rreġistrat minn tliet sussidjarji nawtiċi mibjugħa u t-tendenza 'l isfel kontinwa ta' Elan Brod d.o.o. iżda jenfasizzaw li ċ-ċessjonijiet kienu fi kwalunkwe każ neċessarji biex terġa' tiġi stabbilita l-vijabbiltà u jistgħu wkoll għal din ir-raġuni ma jkunux ikkonsidrati li jikkwalifikaw bħala miżuri ta' kumpens.

(169)

Il-Kummissjoni b'hekk tikkonkludi li ċ-ċessjonijiet ta' Elan u t-tnaqqis ta' ħaddiema tagħha u tal-ispejjeż ta' kummerċjalizzazzjoni ma jistgħux ikunu kkwalifikati bħala miżuri ta' kumpens. Peress li ma ġewx implimentati l-ebda miżuri ta' kumpens, anke jekk jittieħed in konsiderazzjoni l-Punt 56 tal-Linji Gwida ta' Salvataġġ u Ristrutturar, li jistipula li l-kundizzjonijiet sabiex tiġi awtorizzata l-għajnuna jistgħu jkunu inqas stretti f'oqsma assistiti fir-rigward tal-implimentazzjoni ta' miżuri ta' kumpens, il-Kummissjoni għandha tikkonkludi li r-rekwiżiti tal-Linji Gwida ta' Salvataġġ u Ristrutturar mhumiex milħuqa fir-rigward tan-neċessità biex jiġu implimentati l-miżuri ta' kumpens xierqa. Peress li r-rekwiżiti għal għajnuna ta' ristrutturar kompatibbli stipulati fil-Linji Gwida huma kumulattivi, huwa biżżejjed li tiġi eskluża l-appikabbiltà tal-Linji Gwida jekk rekwiżit wieħed biss ma jkunx milħuq. Il-Kummissjoni għalhekk ma tivvalutax iktar jekk ir-rekwiżiti l-oħra jkunux intlaħqu. Fid-dawl ta' dan ta' hawn fuq, huwa konkluż li l-Miżura 2 ma tistax tkun ikkonsidrata kompatibbli skont il-Linji Gwida ta' Salvataġġ u Ristrutturar.

(170)

L-eżenzjonijiet fl-Artikolu 107(2) TFUE ma japplikawx fil-kawża preżenti għax din il-miżura ma għandhiex karattru soċjali, ma kinitx mogħtija lil konsumaturi individwali, mhix iddiżinjata biex tagħmel tajjeb għall-ħsara kkawżata minn diżastri naturali jew okkorrenzi eċċezzjonali u ma kinitx mogħtija lill-ekonomija ta' ċerti żoni tar-Repubblika Federali tal-Ġermanja affettwata mid-diviżjoni tal-pajjiż.

(171)

Aktar eżenzjonijiet huma stipulati fl-Artikolu 107(3) TFUE.

(172)

L-Artikolu 107(3)(a) TFUE jiddikjara li “għajnuna maħsuba sabiex tippromwovi l-iżvilupp ekonomiku ta' reġjun fejn il-livell tal-għajxien huwa baxx b'mod anormali jew fejn ikun hemm stat serju ta' nuqqas ta' impjieg” tista' tiġi ddikjarata kompatibbli mas-suq intern. Elan tinsab f'reġjun eliġibbli għall-għajnuna taħt l-Artikolu 107(3)(a) TFUE. (40) Il-kompatibilità tal-għajnuna tal-Istat lil żoni assistiti hija rregolata mil-Linji Gwida għall-Għajnuna Reġjonali. (41) Taħt il-Linji Gwida għall-Għajnuna Reġjonali, għajnuna mill-Istat tista' fil-prinċipju tiġi mogħtija biss lil kumpaniji li mhumiex f'diffikultà. Elan però kienet f'diffikultajiet fiż-żmien tal-għotja tal-miżura (ara l-premessa (74)). Għalhekk, il-Miżura 2 ma tistax tkun ikkonsidrata bħala għajnuna regjonali kompatibbli.

(173)

Fid-dawl ta' dan t'hawn fuq, il-Kummissjoni tikkonkludi li l-għajuna mhix eliġibbli għad-deroga stipulata fl-Artikolu 107(3)(a) TFUE.

(174)

L-Artikolu 107(3)(b) TFUE jiddikjara li "għajnuna maħsuba sabiex tippromwovi l-eżekuzzjoni ta' proġetti fuq skala kbira ta' interess komuni Ewropew, jew sabiex tirrimedja taħwid serju fl-ekonomija ta' Stat Membru" tista' tkun iddikjarata kompatibbli mas-suq intern.

(175)

Il-Kummissjoni tinnota li l-għajnuna in kwistjoni ma kinitx iddiżinjata sabiex tiġi promossal-eżekuzzjoni ta' proġett importanti ta' interess komuni Ewropew u l-Kummissjoni lanqas ma sabet evidenza li kienet iddiżinjata sabiex jiġi rimedjat tfixkil serju fl-ekonomija Slovena.

(176)

Fid-dawl ta' dan t'hawn fuq, il-Kummissjoni tikkonkludi li l-għajuna ma tikkwalifikax għad-deroga stipulata fl-Artikolu 107(3)(b) TFUE.

(177)

L-Artikolu 107(3)(d) TFUE jiddikjara li għajnuna sabiex tiġi promossal-kultura u l-preservazzjoni tal-patrimonju meta din l-għajnuna ma tolqotx il-kundizzjonijiet tal-kummerċ u tal-kompetizzjoni fl-Unjoni sa grad li jkun kuntrarju għall-interess komuni, Dan l-Artikolu ovvjament ma japplikax għall-kawża kurrenti.

(178)

L-Artikolu 107(3)(c) TFUE jipprovdi għall-awtorizzazzjoni tal-għajnuna tal-Istat maħsuba sabiex tiffaċilita l-iżvilupp ta' ċerti attivitajiet jew ta' ċerti reġjuni ekonomiċi, basta dik l-għajnuna ma tfixkilx il-kondizzjonijiet tal-kummerċ sa grad li jkun kuntrarju għallinteress komuni. Il-Kummissjoni żviluppat numru ta' linji gwida u komunikazzjonijiet li jispjegaw kif se tapplika d-deroga li tinsab f'dan l-Artikolu. Peress li l-miżuri in kwistjoni kienu mogħtija lil kumpanija f'diffikultà, il-Kummissjoni evalwat biss il-kompatibilità tal-miżura taħt il-Linji Gwida ta' Salvataġġ u Ristrutturar. L-ebda waħda mil-linji gwida u komunikazzjonijiet l-oħra hija applikabbli għall-miżura taħt valutazzjoni.

(179)

Għalhekk, l-għajnuna taħt valutazzjoni tikkostitwixxi għajnuna tal-Istat inkompatibbli.

(180)

Skont it-TFUE u l-każistika stabbilita tal-Qorti tal-Ġustizzja, il-Kummissjoni hija kompetenti biex tiddeċiedi li l-Istat ikkonċernat irid ineħħi jew ibiddel l-għajnuna (42) meta tkun sabet li huwa inkompatibbli mas-suq intern. Il-Qorti żammet b'mod konsistenti li l-obbligu fuq Stat li jneħħi għajnuna meqjusa mill-Kummissjoni bħala inkompatibbli mas-suq intern huwa ddiżinjat biex jistabblixxi mill-ġdid is-sitwazzjoni eżistenti minn qabel. (43) F'dan il-kuntest, il-Qorti stabbilixxiet li dan l-objettiv huwa milħuq ladarba r-riċevitur ikun ħallas lura l-ammonti mogħtija b'għajnuna llegali, biex b'hekk jittieħed il-vantaġġ li kien gawda minnu fuq il-kompetituri tiegħu fis-suq, u s-sitwazzjoni qabel il-pagament tal-għajnuna tkun irkuprata. (44)

(181)

Wara l-każistika, l-Artikolu 14 tar-Regolament Proċedurali stipula li “fejn jittieħdu deċiżjonijiet negattivi f'każijiet ta' għajnuna illegali, il-Kummissjoni għandha tiddeċiedi li l-Istat Membru kkonċernat għandu jieħu l-miżuri kollha meħtieġa sabiex jirkupra l-għajnuna mill-benefiċjarju.”

(182)

B'hekk, peress li l-miżura disponibbli għandha tiġi kkunsidrata bħala għajnuna llegali u inkompatibbli, l-għajnuna għandha tiġi rikoverata sabiex terga' tiġi stabbilita s-sitwazzjoni li kienet teżisti fuq is-suq qabel l-għotja tal-għajnuna. L-irkupru għalhekk ikopri ż-żmien minn meta seħħ il-vantaġġ lill-benefiċjarju, jiġifieri meta l-għajnuna tpoġġiet a dispożizzjoni tal-benefiċjarju sakemm isir irkupru effettiv u jġorr l-interessi ta' rkupru sakemm iseħħ irkupru effettiv.

(183)

L-injezzjoni ta' kapital fl-2008 għandha bżonn tiġi rkuprata fit-totalità tagħha peress li d-deċiżjonijiet tal-ħames entitajiet kollha li qed jieħdu sehem fl-operazzjoni huma imputabbli lill-Istat. L-ammont totali tal-injezzjoni ta' kapital kien EUR 10 miljun, li EUR 5,924 miljun minnhom kienu injettati f'Elan Winter sport u EUR 4,076 miljun f'Elan Marine. Dawn iż-żewġ kumpaniji, f'Ġunju 2010 kienu madankollu, magħqudin fil-kumpanija ewlenija tagħhom Elan. Id-data minn meta għandhom jiġu kkalkulati l-interessi ta' rkupru hija d-data meta l-kapital kien effettivament impoġġi a dispożizzjoni tal-benefiċjarju, li kienet it-8 ta' Settembru 2008.

(184)

L-injezzjoni ta' kapital a favur ta' Elan deċiża f'Jannar 2007 (il-Miżura 1) ma tinvolvix għajnuna mill-Istat, peress li d-deċiżjoni tal-azzjonisti kienet konformi mal-prinċipju tal-investitur f'ekonomija tas-suq.

(185)

L-injezzjoni ta' kapital a favur ta' Elan deċiża f'Awwissu 2008 (il-Miżura 2) tinvolvi għajnuna mill-Istat. L-għajnuna mill-Istat mhix kompatibbli mas-suq intern. Ma tilħaqx il-kriterji tal-Linji Gwida ta' Salvataġġ u Ristrutturar. L-ebda wieħed mid-dispożizzjonijiet tal-Artikolu 107(2) u (3) TFUE ma jintlaħaq lanqas. Għalhekk, l-injezzjoni ta' kapital ta' EUR 10 miljun għandha tiġi rikoverata minn Elan flimkien mal-interssi ta' rkupru.

(a)

l-ammont totali (interessi prinċipali u rikoverati) li għandu jiġi rikoverat mill-benefiċjarju;

(b)

deskrizzjoni dettaljata tal-miżuri diġà meħuda u ppjanati li jkunu konformi ma' din id-Deċiżjoni;

(c)

dokumenti li juru li l-benefiċjarju ġie ordnat iħallas lura l-għajnuna.

15.5.2014   

MT

Il-Ġurnal Uffiċjali tal-Unjoni Ewropea

L 144/29

(1)

Fil-5 ta' Ġunju 2007, [l-ilmentatur] (*) ressaq ilment lill-Kummissjoni Ewropea dwar injezzjoni ta' kapital inizjali ta' EUR 150 miljun li minnha gawdiet il-kumpanija Ducroire (minn hawn 'il quddiem “SA Ducroire”) meta nħolqot f'Settembru 2004 mill-Office National du Ducroire (minn hawn 'il quddiem “l-ONDD”).

(2)

Permezz tal-ittra tas-7 ta' Diċembru 2007, il-Kummissjoni għamlet xi mistoqsijiet dettaljati lill-Belġju. It-tweġibiet għal dawn il-mistoqsijiet, li magħhom kienu mehmuża diversi dokumenti kif ukoll pjan ta' direzzjoni tan-negozju, wasslulha fit-12 ta' Frar 2008.

(3)

Fid-9 ta' Settembru 2008 saret laqgħa bejn l-ilmentatur u s-servizzi tal-Kummissjoni.

(4)

Il-Kummissjoni bagħtet verżjoni mhux kunfidenzjali tal-ilment lill-Belġju fl-4 ta' Diċembru 2008.

(5)

Verżjoni mhux kunfidenzjali tal-kummenti tal-Belġju kif ukoll mistoqsijiet speċifiċi ġew indirizzati lill-ilmentatur fit-12 u fis-17 ta' Diċembru 2008. L-ilmentatur wieġeb għalihom permezz ta' ittra tas-6 ta' Novembru 2009.

(6)

Saru mistoqsijiet ulterjuri lill-Belġju fil-21 ta' April 2010 li għalihom il-Belġju wieġbet fit-23 ta' Lulju 2010.

(7)

Fit-23 ta' Frar 2011, il-Kummissjoni ddeċidiet li tiftaħ il-proċedura ta' investigazzjoni formali prevista fl-Artikolu 108(2), tat-Trattat dwar il-Funzjonament tal-Unjoni Ewropea (minn hawn 'il quddiem “TFUE”) (3) fir-rigward tal-miżuri ta' għajnuna possibbli li ġejjin: (i) il-garanzija mill-Istat Belġjan li rċieva l-ONDD għar-riskji kummerċjabbli tiegħu; (ii) trasferiment intern wieħed jew diversi trasferimenti interni ta' riżorsi favur l-assigurazzjoni tar-riskji kummerċjabbli u (iii) il-kapital sottoskritt mill-ONDD favur attivitajiet ta' assigurazzjoni tar-riskji kummerċjabbli ta' SA Ducroire. Il-Kummissjoni stiednet lill-partijiet interessati jissottomettu l-kummenti tagħhom dwar il-miżuri inkwistjoni.

(8)

Saru żewġ laqgħat bejn l-awtoritajiet Belġjani, l-ONDD, SA Ducroire u s-servizzi tal-Kummissjoni fis-17 ta' Marzu 2011 u fit-28 ta' April 2011 rispettivament.

(9)

Fl-4 ta' Mejju 2011, l-awtoritajiet Belġjani talbu għal estensjoni ta' erba' ġimgħat tal-limitu ta' żmien għat-tweġiba għall-ftuħ tal-proċedura formali ta' investigazzjoni (minn hawn 'il quddiem “id-Deċiżjoni ta' ftuħ”). Fil-5 ta' Mejju 2011, il-Kummissjoni infurmat lill-awtoritajiet Belġjani li ma kellha l-ebda oġġezzjoni għat-talba ta' estensjoni taż-żmien u talbet aktar informazzjoni relatata mal-laqgħa tat-28 ta' April 2011.

(10)

Fl-1 ta' Ġunju 2011, l-awtoritajiet Belġjani taw it-tweġiba tagħhom għall-kummenti u l-mistoqsijiet magħmula mill-Kummissjoni fid-Deċiżjoni ta' ftuħ. L-annessi għat-tweġiba tagħhom intbagħtu fid-9 u fl-10 ta' Ġunju 2011.

(11)

Wara din it-tweġiba, il-Kummissjoni talbet aktar informazzjoni fis-27 ta' Lulju 2011.

(12)

Sabiex iħejju t-tweġiba tagħhom għall-mistoqsijiet tal-Kummissjoni, l-awtoritajiet Belġjani organizzaw żewġ laqgħat tekniċi mas-servizzi tal-Kummissjoni u l-benefiċjarju tal-miżuri ta' għajnuna, rispettivament fis-26 ta' Settembru u fit-18 ta' Ottubru 2011. Informazzjoni addizzjonali dwar it-temi diskussi f'dawn il-laqgħat intbagħtet mill-Belġju fl-14 ta' Novembru 2011.

(13)

Fil-5 ta' Diċembru 2011, l-awtoritajiet Belġjani bagħtu t-tweġiba tagħhom għall-mistoqsijiet tal-Kummissjoni tas-27 ta' Lulju 2011.

(14)

Fit-23 ta' April 2012 il-Kummissjoni talbet xi dettalji dwar l-informazzjoni differenti sottomessa, li l-awtoritajiet Belġjani pprovdew fis-16 ta' Mejju 2012.

(15)

Saret laqgħa bejn l-awtoritajiet Belġjani, l-ONDD, SA Ducroire u s-servizzi tal-Kummissjoni fil-21 ta' Mejju 2012, li warajha l-awtoritajiet Belġjani bagħtu aktar spjegazzjonijiet permezz tal-ittra tal-31 ta' Mejju 2012. Bl-ittra tal-14 ta' Ġunju 2012, l-awtoritajiet Belġjani tennew il-pożizzjoni tagħhom dwar il-miżura ta' allokazzjoni tal-kapital ikkontestata mill-Kummissjoni.

(16)

L-ONDD hija “istituzzjoni pubblika awtonoma” li topera fis-suq tal-assigurazzjoni tal-kreditu u li tibbenefika minn appoġġ u mill-garanzija tal-Istat Belġjan.

(17)

Sal-31 ta' Awwissu 2003, l-attivitajiet kollha mwettqa mill-ONDD kienu f'ismu stess, taħt il-garanzija tal-Istat. Ma kien hemm l-ebda kontijiet separati bejn l-attività ta' assigurazzjoni tal-kreditu ta' żmien qasir u u dik ta' żmien twil, lanqas f'dak li jirrigwarda r-riskji kummerċjabbli u dawk mhux kummerċjabbli. Il-komunikazzjoni tal-Kummissjoni lill-Istati Membri skont l-Artikolu 93(1) tat-Trattat KE li tapplika l-Artikoli 92 u 93 tat-Trattat lil assigurazzjoni ta' esportazzjonijiet bi kreditu ta' żmien qasir (minn hawn 'il quddiem “il-Komunikazzjoni dwar l-assigurazzjoni ta' esportazzjoni bi kreditu”) (4) tikkwalifika bħala kummerċjabbli r-riskji kummerċjali u politiċi ta' inqas minn sentejn, fuq debituri (5) stabbiliti f'wieħed mill-pajjiżi tal-Unjoni Ewropea jew f'ċerti pajjiżi membri tal-OECD, jiġifieri l-Awstralja, il-Kanada, l-Islanda, il-Ġappun, New Zealand, in-Norveġja, l-Isvizzera u l-Istati Uniti tal-Amerika (6).

(18)

Fl-1 ta' Settembru 2003, l-ONDD fetaħ kont “kummerċjali” li, skont l-awtoritajiet Belġjani, ma kienx igawdi mill-garanzija tal-Istat, li ġie allokat, minn dik id-data, għall-attività kollha relatata mar-riskji għal perjodu qasir. Kapital ta' EUR [45-70] miljun kien ġie allokat lil dan il-kont kummerċjali, biex b'hekk kiseb l-approvazzjoni tar-regolatur nazzjonali tal-assiguraturi, l-Office de Contrôle des Assurances (l-Awtorità Superviżorja tal-Assigurazzjonijiet — minn hawn 'il quddiem “l-OCA”). F'dan il-kont kummerċjali ma kinitx teżisti kontabilità separata bejn ir-riskji kummerċjabbli u dawk mhux kummerċjabbli.

(19)

F'Mejju 2004, l-ONDD iddeċieda li joħloq sussidjarja għall-attivitajiet eżistenti tiegħu ta' assigurazzjoni tal-kreditu ta' żmien qasir bil-ħolqien ta' SA Ducroire. Skont l-awtoritajiet Belġjani, id-deċiżjoni li tinħoloq SA Ducroire ittieħdet biex tiġi rrispettata l-Komunikazzjoni dwar l-assigurazzjoni ta' esportazzjoni bi kreditu li tistieden lill-Istati Membri sabiex jemendaw il-pjanijiet tagħhom għall-assigurazzjoni tal-kreditu għall-esportazzjoni sabiex l-aġenziji ta' assigurazzjoni tal-kreditu għall-esportazzjoni ma jibqgħux igawdu mill-appoġġ tal-Istat f'dak li jirrigwarda r-riskji meqjusa bħala “kummerċjabbli”.

(20)

Id-deċiżjoni li tinħoloq SA Ducroire u li tingħata kapital ta' EUR 150 miljun ittieħdet mill-Bord tad-Diretturi tal-11 ta' Mejju 2004 abbażi ta' pjan ta' direzzjoni tan-negozju mfassal mill-ONDD għall-2005-2007 li fih ġew meqjusa żewġ xenarji: xenarju A) definit bħala “realistiku”, ibbażat fuq il-klima ekonomika u msejjes fuq tkabbir tal-ammonti assigurati bi 3 %; u xenarju B) definit bħala “dinamiku”, ibbażat fuq approċċ proattiv f'termini ta' konkwista tas-suq imsejjes fuq ipotesi ta' tkabbir id-doppju ta' dak tax-xenarju realistiku, jiġifieri ta' 6 % (7).

(21)

SA Ducroire ġiet stabbilita fit-23 ta' Settembru 2004, data li fiha l-ONDD issottoskriva EUR 150 miljun għall-kapital ta' din il-kumpanija, li minnhom EUR 100 miljun ġew rilaxxati minnufih filwaqt li l-EUR 50 miljun li kien fadal ġew rilaxxati fl-2009.

(22)

Fl-1 ta' Jannar 2005, l-ONDD ittrasferixxa l-portafoll tiegħu ta' riskji għal żmien qasir lil SA Ducroire li tat bidu għall-attivitajiet tagħha minn dik id-data. Min-naħa tiegħu l-ONDD kompla jaħdem fuq ir-riskji għal żmien twil.

(23)

Għalhekk, SA Ducroire tamministra r-riskji kummerċjabbli kollha skont it-tifsira tal-Komunikazzjoni dwar l-assigurazzjoni għall-esportazzjoni bi kreditu (li, b'definizzjoni, huma għal żmien qasir) kif ukoll ir-riskji mhux kummerċjabbli għal żmien qasir, bħar-riskji ta' inqas minn sentejn relatati ma' debituri stabbiliti barra l-OECD.

(24)

Fl-2007, SA Ducroire akkwistat 33 % tal-kapital ta' Komerčni ύvěrová pojišt'ovna EGAP (KUP) (il-fergħa kummerċjali tal-aġenzija nazzjonali Ċeka tal-assigurazzjoni tal-kreditu għall-esportazzjoni) għas-somma ta' EUR [12-14]-il miljun. Dan l-akkwist kien sar flimkien ma' SACE BT, li kienet akkwistat ukoll 33 % tal-kapital ta' KUP. Fl-2009, SA Ducroire akkwistat l-ishma kollha ta' SACE BT fil-kapital ta' KUP għas-somma ta' EUR [0-20] miljun. SA Ducroire b'hekk akkwistat 66 % tal-kapital ta' KUP għal ammont totali ta' EUR [10-35] miljun. Minn dan l-aħħar ammont EUR 12-il miljun wara ġew irreġistrati bħala deprezzament fuq il-holding (aġġustament negattiv tal-valur tal-investiment).

(25)

Fil-5 ta' Ġunju 2007, tressaq ilment lill-Kummissjoni. Skont l-ilmentatur, l-ONDD għamel l-allokazzjoni tal-kapital f'kundizzjonijiet li investitur privat ma kienx jipprovdi. Minn naħa, ir-redditu ta' SA Ducroire, kif mistennija bl-injezzjoni tal-kapital huwa inqas minn dak mistenni minn investitur privat. Min-naħa l-oħra, il-kapital allokat lil SA Ducroire kien jaqbeż il-kapital meħtieġ, kemm f'termini ta' regoli prudenzjali dwar l-ekwità minima adegwata kif ukoll fir-rigward tal-medja tal-proporzjon ta' solvenza (primjums netti/ekwità) tal-parteċipanti l-oħrajn fis-settur. Skont l-ilmentatur, kien biss permezz tal-“kapitalizzazzjoni żejda” fl-2004 li SA Ducroire u SACE BT setgħu jitfgħu, matul it-tieni nofs tal-2006, offerta konġunta “imbattibbli” għax-xiri ta' 66 % tal-ishma ta' KUP.

(26)

L-investigazzjoni li nbdiet fit-23 ta' Frar 2011 tirrigwarda l-miżuri li ġejjin:

(27)

Fir-rigward tal-Miżura 3, id-deċiżjoni tal-ftuħ waslet għall-konklużjoni li l-partijiet li ġejjin tal-allokazzjoni tal-kapital lil SA Ducroire ma jikkostitwixxux għajnuna (8):

(28)

L-għajnuna ġdida possibbli inkwistjoni (Miżura 3) tirrigwarda biss il-parti tal-kapital allokat lil SA Ducroire li ma tappoġġjax l-attività ta' assigurazzjoni tal-kreditu tar-riskji mhux kummerċjabbli u li taqbeż il-parti tal-kapital li kienet diġà ta' benefiċċju għall-attività relatata mar-riskji kummerċjabbli fi ħdan l-ONDD fil-31 ta' Diċembru 2004 (eżatt qabel it-trasferiment tal-attivitajiet ta' assigurazzjoni tar-riskji fuq żmien qasir lil SA Ducroire).

(29)

Għall-finijiet ta' din id-deċiżjoni, japplikaw dawn id-definizzjonijiet li ġejjin:

(30)

Il-kapital addizzjonali jinkludi għalhekk b'mod partikolari l-kapital supplimentari (ara l-grafika fil-premessa (141)).

(31)

Fid-deċiżjoni ta' ftuħ, il-Kummissjoni assumiet l-eżistenza ta' kapital addizzjonali u supplimentari sostanzjali minħabba d-disparità bejn il-kapital ta' EUR 150 miljun mogħti lil SA Ducroire meta nħolqot u l-kapital ta' EUR [45-70] miljun allokati fi ħdan l-ONDD fil-kont kummerċjali ddedikat, mill-1 ta' Settembru 2003 sal-31 ta' Diċembru 2004, għall-attività relatata mar-riskji fuq żmien qasir, li kienet tinkludi r-riskji kummerċjabbli. Il-Kummissjoni għalhekk indikat li kien jidher li jeżisti kapital addizzjonali u supplimentari u li r-redditu mistenni tiegħu ma kienx jidher suffiċjenti.

(32)

In-nuqqas tal-ONDD u ta' SA Ducroire li jikkonformaw mal-punt 4.3 tal-Komunikazzjoni dwar l-assigurazzjoni ta' esportazzjoni bi kreditu (ara l-premessi (17) u (19)), jiġifieri li jkollhom amministrazzjoni u kontabilità separata li tiddistingwi bejn ir-riskji kummerċjabli u r-riskji mhux kummerċjabbli, għamilha impossibbli għall-Kummissjoni li tidentifika bi preċiżjoni l-kobor tal-“kapital supplimentari” fl-istadju tal-ftuħ tal-proċedura ta' investigazzjoni formali. Għalhekk fid-deċiżjoni tal-ftuħ tagħha, il- Kummissjoni stiednet lill-awtoritajiet Belġjani sabiex jikkonformaw mal-punt 4.3 tal-Komunikazzjoni dwar l-assigurazzjoni ta' esportazzjoni bi kreditu u jindikaw il-partijiet tal-kapital li kienu jsostnu rispettivament l-attività tar-riskji mhux kummerċjabbli fuq żmien qasir u l-attività tar-riskji kummerċjabbli, qabel u wara t-trasferiment tagħhom lil SA Ducroire.

(33)

Il-Kummissjoni ma rċeviet l-ebda kumment mill-partijiet interessati, fl-iskadenzi stabbiliti, dwar il-ftuħ tal-proċedura.

(34)

Il-Belġju ddikjara li l-ONDD dejjem iffoka fuq ir-riskji mhux kummerċjabbli u l-prevalenza ta' dawn ir-riskji fil-portafoll tiegħu kienet kostanti. Wara l-1993 (11) u qabel l-adeżjoni tal-għaxar Stati Membri ġodda tal-Unjoni Ewropea (UE) f'Mejju 2004, l-attività relatata mar-riskji kummerċjabbli fi ħdan l-ONDD kienet żgħira ħafna. Fl-aħħar tal-2003, il-primjums relatati ma' din l-attività kienu jammontaw biss għal madwar [0-1 %] tal-portafoll tar-riskju fuq żmien qasir u l-ammonti assigurati kienu jammontaw biss għal madwar EUR […] miljun (ara t-Tabella 1 hawn taħt). Għandu jkun innutat li l-perċentwal baxx ħafna ta' riskji kummerċjabbli li dak iż-żmien kien kopert, kien kopert biss minħabba r-rabta ta' dawn ir-riskji ma' riskju mhux kummerċjabbli (12).

(35)

Kien biss mill-1 ta' Mejju 2004, fi żmien l-adeżjoni tal-għaxar Stati Membri ġodda fl-Unjoni Ewropea, li l-bilanċ bejn ir-riskji kummerċjabbli u r-riskji mhux kummerċjabbli fuq żmien qasir inbidel fi ħdan il-portafoll tal-ONDD peress li s-sehem tar-riskji kummerċjabbli fil-portafoll tal-ONDD għadda minn [0-1 %] (f'termini ta' primjums) fl-2003 għal [15-20 %] fl-2004 (ara t-Tabella 1 hawn taħt). Din il-bidla kienet ir-riżultat ta' ċaqliq awtomatiku tal-kategorija mhux kummerċjabbli lejn il-kategorija kummerċjbbli tar-riskji fuq żmien qasir marbuta mad-debituri stabbiliti fl-għaxar Stati Membri ġodda tal-Unjoni Ewropea.

(36)

F'dak li jirrigwarda l-Miżura 1, l-awtoritajiet Belġjani żiedu wkoll li l-garanzija tal-Istat Belġjan ġiet diżattivata mill-1 ta' Settembru 2003 fir-rigward tar-riskji kummerċjabbli minħabba t-trasferimenti tagħhom fil-kont kummerċjali li għalih l-ONDD kiseb l-approvazzjoni tal-OCA (13), preċiżament minħabba li dan il-kont ma kienx igawdi mill-garanzija tal-Istat (l-attivitajiet li jgawdu mill-garanzija tal-Istat mhumiex irregolati mill-OCA).

(37)

F'dak li jirrigwarda t-trasferimenti interni possibbli tar-riżorsi favur ir-riskji kummerċjabbli fi ħdan l-ONDD, l-awtoritajiet Belġjani jargumentaw li minħabba ċ-ċokon tal-attività tar-riskji kummerċjabbli, kwalunkwe trasferiment ta' riżorsi kien inkonċepibbli u fi kwalunkwe każ ikun de minimis  (14).

(38)

L-awtoritajiet Belġjani jikkonkludu li għall-Miżura 1 u għall-Miżura 2, l-ammonti involuti huma fi kwalunkwe każ de minimis  (15).

Tabella 1:

L-evoluzzjoni tal-primjums u tal-ammonti assigurati għar-riskji kummerċjabbli u mhux kummerċjabbli għal perjodu qasir (poloz globali esportaturi — għal mien qasir)

(39)

Sabiex jiġġustifikaw li l-kapital allokat mill-ONDD lil SA Ducroire kien meħtieġ u kien jissodisfa l-kriterju tal-investitur privat, l-awtoritajiet Belġjani ressqu l-argumenti li ġejjin: (1) it-tranżazzjoni għandha tkun analizzata fil-kuntest tagħha, dak ta' trasferiment ta' attività eżistenti fil-forma ta' ħolqien ta' sussidjarja, (2) il-kontribuzzjoni f'kapital hija ġġustifikata abbażi tar-regoli ta' solvenza, (3) ir-redditu mistenni tal-attivitajiet kummerċjabbli ta' SA Ducroire kien biżżejjed biex jikkonvinċi lil investitur privat fl-ekonomija tas-suq jagħmel dan l-investiment.

(40)

L-awtoritajiet Belġjani jqisu li l-kontribuzzjoni f'kapital għandha tiġi evalwata fil-kuntest tagħha li huwa dak ta' trasferiment ta' attività eżistenti. L-attività kollha mqiegħda f'SA Ducroire meta nħolqot kienet tikkorrispondi purament għal trasferiment tal-portafoll tal-attivitajiet fuq perjodu qasir tal-ONDD.

(41)

Għal dan il-għan, l-awtoritajiet Belġjani jiddikjaraw li l-entrati kollha tal-karta tal-bilanċ tal-kont kummerċjali relatati mal-attività kummerċjali ġew trasferiti fil-karta tal-bilanċ tal-ftuħ ta' SA Ducroire. Fuq in-naħa tal-assi, ir-riċevibbli direttament marbuta mal-poloz tal-assigurazzjoni diġà fil-portafoll biss ġew trasferiti (l-investimenti ma ġewx trasferiti). Fuq in-naħa tal-obbligazzjonijiet, l-entrati trasferiti jirrigwardaw biss dawk marbuta mal-portafoll tal-assigurazzjoni eżistenti u jeskludu għalhekk il-kapital, ir-riżervi u l-provvedimenti ta' ugwalizzazzjoni u d-diżastri (18). L-awtoritajiet Belġjani jenfasizzaw li l-EUR [45-70] miljun allokati fil-kont kummerċjali mhumiex trasferiti lil SA Ducroire peress li l-identifikazzjoni tal-ammont tal-kapital kienet soġġetta għal evalwazzjoni speċifika.

(42)

L-awtoritajiet Belġjani jsostnu li l-kapital allokat għall-kont kummerċjali mhuwiex paragun rilevanti biex wieħed jivvaluta l-ħtiġijiet ta' kapital ta' SA Ducroire. Il-ħtieġa ta' kapital tal-kont kummerċjali kienet stmata permezz tal-applikazzjoni mekkanika tar-regoli tad-Direttiva 2002/13/KE tal-Parlament Ewropew u tal-Kunsill tal-5 ta' Marzu 2002 li temenda d-Direttiva 73/239/KEE tal-Kunsill fir-rigward tal-ħtiġiet tal-marġini ta' solvenza għal intrapriżi ta' assigurazzjoni mhux tal-ħajja (19) (minn hawn 'il quddiem “Direttiva Solvenza I”) li jikkorrispondu għar-regoli prudenzjali biex tinkiseb l-approvazzjoni tal-OCA għall-attività fuq żmien qasir peress li din ma baqgħetx tgawdi mill-garanzija tal-Istat, iżda dan il-kapital mhuwiex il-kapital ekonomiku meħtieġ biex ikopri l-profil tar-riskju ta' din l-attività.

(43)

Skont l-awtoritajiet Belġjani, hemm differenza bejn l-imġiba ta' investitur privat li jfittex ir-redditu ta' investiment ġdid u impriża ewlenija li toħloq sussidjarja għall-attivitajiet eżistenti tagħha. Li jiġi ġġudikat mod ieħor jista' skont l-awtoritajiet Belġjani jġiegħel lil kumpanija pubblika tbigħ jew twaqqaf attività ekonomika jekk din ma jkollhiex redditu biżżejjed għal investitur privat f'ekonomija tas-suq, li jkun ksur tal-prinċipju tan-newtralità tal-kapital pubbliku stabbilit fl-Artikolu 345 tat-TFUE.

(44)

L-awtoritajiet Belġjani jsostnu li fl-2004, żewġ metodi setgħu jiġu kkunsidrati sabiex jiġu ddeterminati l-ħtiġijiet ta' kapital tal-assiguraturi tal-kreditu: (a) il-metodu klassiku tas-settur tal-assigurazzjoni inġenerali, stabbilit mid-Direttiva Solvenza I u li huwa bbażat fuq ir-remunerazzjoni tar-riskji (jiġifieri l-primjums — “premium based approach”) u (b) il-metodu bbażat fuq ir-riskji involuti (“exposure based approach”), bħal pereżempju l-metodu tar-regoli ta' Basel applikati fis-settur bankarju u l-metodu Standard & Poor's għad-determinazzjoni tal-kapital meħtieġ għal assiguratur tal-kreditu.

(45)

Fil-każ ta' SA Ducroire, l-awtoritajiet Belġjani jqisu li l-metodu previst mid-Direttiva Solvenza I ma jirriflettix biżżejjed il-profil finanzjarju globali ta' assiguratur.

(46)

Skont id-Direttiva Solvenza I, il-ħtieġa tal-marġini ta' likwidità hija ugwali għall-ogħla ammont bejn żewġ riżultati, wieħed ibbażat fuq l-ammont annwali tal-primjums jew kontribuzzjonijiet, u l-ieħor fuq il-piż medju tal-pretensjonijiet għall-aħħar tliet snin finanzjarji. Madankollu, il-limitu minimu assolut huwa ta' EUR 3 miljun għas-snin 2004 sal-2006 u ta' EUR 3,2 miljun għas-snin 2007 sal-2009.

(47)

L-applikazzjoni ta' dawn ir-regoli mill-ONDD twassal għal livell ta' kapital minimu għal SA Ducroire ta' madwar EUR 3 sa 3,3 miljun  (20), bejn l-2005 u l-2007, fuq il-bażi tal-informazzjoni tal-pjan ta' direzzjoni tan-negozju (ara t-Tabella 2: hawn taħt).

(48)

Il-Belġju ssostni li l-ħtiġijiet ta' kapital tal-assiguraturi tal-kreditu jiddependu aktar fuq ir-riskji involuti milli fuq ir-remunerazzjoni tar-riskji (il-primjums) u li l-metodoloġiji bbażati fuq ir-riskji involuti (“exposure based approach”) (bħal pereżempju l-Artikolu 8 tal-Liġi tal-1939 dwar l-ONDD, il-metodu Standard & Poor's, jew il-metodu tar-regoli ta' Basel użati fis-settur bankarju) huma aktar adattati mid-Direttiva Solvenza I, ibbażata fuq ir-remunerazzjoni tar-riskji (“premium based approach”).

(49)

Skont l-awtoritajiet Belġjani, il-portafoll tar-riskji assigurati minn SA Ducroire mhux tas-soltu peress li, għall-kuntrarju tal-parti l-kbira tal-kompetituri tagħha, hija tkopri l-aktar riskji mhux kummerċjabbli fis-sens tal-Komunikazzjoni dwar l-assigurazzjoni ta' esportazzjoni bi kreditu. Il-livell ta' riskju assoċjat ma' portafoll bħal dan huwa sostanzjalment ogħla minn dak ta' portafoll esklussivament jew parzjalment magħmul minn riskji kummerċjabbli u jiġġustifika skont il-Belġju l-użu ta' regoli aktar prudenti.

(50)

L-awtoritajiet Belġjani jqisu l-applikazzjoni tal-Artikolu 8 tal-Liġi tal-31 ta' Awwissu 1939 dwar l-ONDD (21) (minn hawn 'il quddiem il-“Liġi tal-1939”) xierqa f'dan il-każ minħabba li hija ispirata mill-“exposure based approach”. Huwa importanti li wieħed jinnota li l-Artikolu 8 tal-Liġi tal-1939 ma għandu l-ebda ambitu regolatorju għal SA Ducroire minħabba li japplika biss għall-ONDD.

(51)

Barra minn hekk, għalkemm l-Artikolu 8 jindika l-ammont massimu tal-impenji tal-ONDD li jirriżultaw mill-attivitajiet tiegħu f'ismu stess bil-garanzija tal-Istat kif ukoll minn dawk f'isem l-Istat, l-awtoritajiet Belġjani jikkunsidraw li l-Artikolu 8 tal-Liġi tal-1939 jikkostitwixxi punt ta' referenza minimu għal SA Ducroire, li ma tgawdix minn garanzija tal-Istat.

(52)

Bl-applikazzjoni tal-Artikolu 8(1) tal-Liġi tal-1939  (22), li jindika li l-impenji ma jistgħux jaqbżu 20 darba l-ammont totali tal-allokazzjoni u tar-riżerva ġenerali, l-awtoritajiet Belġjani jistmaw (23) il-ħtieġa ta' kapital ta' SA Ducroire għal madwar EUR 92 sa 106 miljun bejn l-2005 u l-2007 abbażi tal-pjan ta' direzzjoni tan-negozju, (ara t-Tabella 2: hawn taħt).

(53)

Fil-kummenti tagħhom, l-awtoritajiet Belġjani jirreferu għall-metodu żviluppat minn Standard & Poor's sabiex jiddeterminaw il-kapital meħtieġ minn assiguratur tal-kreditu.

(54)

Biex jiġi stabbilit il-livell ta' dan il-kapital (24), Standard & Poor's jużaw mudell ibbażat fuq ir-riskji involuti (“exposure based approach”) flimkien ma' valutazzjoni tar-riassigurazzjoni tal-assiguratur. Il-kapital meħtieġ huwa ddeterminat skont metodoloġija li tqabbel il-pretensjonijiet grossi mal-ammonti assigurati grossi (“the gross loss over gross exposure method”) fuq perjodu ta' (normalment) 10 snin. L-ogħla proporzjon matul dan il-perjodu huwa mmultiplikat b'fattur ta' 1,25 u applikat għall-ammonti assigurati proġettati u aġġustati sabiex jirriflettu r-riassigurazzjoni. Il-mudell huwa bbażat fuq l-ipoteżi li l-portafoll tal-assiguratur huwa raġonevolment diversifikat tajjeb ġeografikament u skont il-linja tan-negozju (“line of business”).

(55)

Għalkemm jirreferu għalih, l-awtoritajiet Belġjani ma użawx il-metodu ta' Standard & Poor's sabiex jiddeterminaw il-livell tal-kapital meħtieġ għal SA Ducroire.

(56)

Skont l-awtoritajiet Belġjani, ir-regoli ta' Basel huma aktar adattati sabiex wieħed jivvaluta s-solvenza tal-assiguraturi tal-kreditu milli r-regoli prudenzjali fis-seħħ, jiġifieri d-Direttiva LikwidtàI. In-natura tal-attivitajiet tal-assiguraturi tal-kreditu u l-prinċipju ta' prekawzjoni jiġġustifikaw l-użu tar-regoli ta' Basel. Skont l-awtoritajiet, l-assigurazzjoni tal-kreditu tixbaħ lill-attività ta' kreditu tal-banek fil-livell tar-riskju tal-kontroparti (l-aktar ir-riskju ta' nuqqas ta' ħlas mid-debitur). Barra minn hekk, l-attività ta' SA Ducroire, għall-kuntrarju ta' dik ta' assiguraturi ta' kreditu oħrajn privati, tinkludi essenzjalment riskji ta' kreditu fuq debituri li jinsabu f'pajjiżi inqas żviluppati jew pajjiżi emerġenti (riskji li jinsabu fiż-Żona 2 (25)).

(57)

Għalhekk, skont l-awtoritajiet Belġjani, il-proporzjon ta' Cooke tar-regoli prudenzjali ta' Basel I li jeħtieġ kapitalizzazzjoni minima ugwali għal 8 % tal-impenji netti, huwa aktar xieraq biew wieħed jevalwa s-solvenza tal-assiguraturi tal-kreditu.

(58)

Jidher mill-minuti tal-Bord tad-Diretturi tal-ONDD tal-20 ta' April 2004 li dan tal-aħħar ibbaża fuq il-proporzjon ta' Cooke sabiex jiddetermina l-kapital meħtieġ għal SA Ducroire waqt li fl-istess ħin ikkunsidra l-ħtieġa li jipprovdi lill-kumpanija b'responsabbiltà limitata kredibbiltà suffiċjenti fil-konfront tal-kompetituri tagħha.

(59)

Fil-fatt, il-proporzjon magħżul mill-awtoritajiet Belġjani fil-kalkoli mhuwiex ta' 8 % kif preskritt mir-regoli ta' Basel I iżda ta' 10 % sabiex jipprovdu bafer ta' sigurtà.

(60)

Il-kapital iddeterminat b'dan il-mod mill-ONDD għal SA Ducroire u kif indikat (26) fil-pjanijiet finanzjarji sottomessi lir-regolatur u fin-nota ta' informazzjoni tal-20 ta' April 2004 li fuq il-bażi tagħha l-Bord tad-Diretturi ta l-kunsens tiegħu fil-prinċipju għall-ħolqien ta' SA Ducroire b'kapital sottoskritt ta' EUR 150 miljun, kien ta' madwar EUR 68 sa 74 miljun għal tmiem l-2006, (ara t-Tabella 2: hawn taħt). Is-suppożizzjonijiet magħmula kienu jinkludu biss il-kopertura tar-riskji li jinsabu fiż-Żona 2 u fl-għaxar pajjiżi li ssieħbu fl-Unjoni Ewropea f'Mejju 2004.

(61)

Għall-kuntrarju, fin-nota tal-istrateġija tat-28 ta' Settembru 2004 (27), il-kapital stmat mill-ONDD skont il-proporzjon ta' Cooke (10 % tal-impenji netti), bejn l-2005 u l-2007, kien ta' madwar EUR 74 sa 101 miljun. Għall-kuntrarju tal-projezzjonijiet finanzjarji tan-nota ta' April 2004, il-projezzjonijiet finanzjarji ta' Settembru 2004 kienu jinkludu l-kopertura tar-riskji kollha fuq żmien qasir, biex b'hekk kienu jinkorporaw iż-Żoni 1 u 2 kollha. F'din in-nota ġie konkluż li “kapital imħallas ta' EUR 100 miljun huwa biżżejjed biex titwettaq l-attività fuq żmien qasir ta' poloz globali għall-esportaturi sal-2007 iżda wara dan il-perjodu jkollu jiġi rivedut”.

(62)

L-awtoritajiet Belġjani jikkunsidraw li l-applikazzjoni tal-proporzjon ta' Cooke mhijiex metodu xieraq biex wieħed jaqsam il-ħtiġijiet ta' kapital bejn l-attività kummerċjabbli u l-attività mhux kummerċjabbli, peress li l-metodu tal-proporzjon ta' Cooke, li jiġi applikat għall-ammonti tal-impenji, joħloq ċerta linearità peress li ma jikkunsidrax biżżejjed il-varjetà tad-diversi riskji sottostanti.

(63)

Ir-regoli tas-Solvenza II ġejjin mid-Direttiva 2009/138/KE tal-Parlament Ewropew u tal-Kunsill tal-25 ta' Novembru 2009 dwar il-bidu u l-eżerċizzju tan-negozju tal-assigurazzjoni u tar-riassigurazzjoni (28) (minn hawn 'il quddiem “Direttiva Solvenza II”).

(64)

Biex titħaddem id-diviżjoni tal-ħtiġijiet ta' kapital bejn l-attivitajiet kummerċjabbli minn naħa u dawk mhux kummerċjabbli min-naħa l-oħra, l-ONDD żviluppa fl-2011 metodoloġija li huwa jqis aktar xierqa. Din hija l-formula standard ta' Solvenza II (29), żviluppata bħala parti mill-Quantitative Impact Study 5 (QIS 5), akkumpanjata minn mudell intern tal-ħtieġa ta' kapital li jkopri r-riskju politiku u kkalibrat sabiex jissodisfa solvenza ugwali għal rating A u applikata bil-parametri korrispondenti għall-2004.

(65)

Skont l-awtoritajiet Belġjani, wieħed jista' raġonevolment iqis li investitur privat prudenti kien jibbaża ruħu fuq din il-metodoloġija fl-2004.

(66)

Il-formula standard ta' Solvenza II QIS 5 ġiet applikata mill-ONDD għar-riskji kollha minbarra r-riskji politiċi. Skont l-awtoritajiet Belġjani, ir-riskju politiku fl-assigurazzjoni tal-kreditu jixbaħ lil forma ta' riskju ta' katastrofi. Madankollu, skont l-awtoritajiet Belġjani, ir-riskju ta' katastrofi għall-assigurazzjoni tal-kreditu mhijiex koperta tajjeb bil-formula standard ta' Solvenza II QIS 5. Għaldaqstant, fil-fehma tagħhom, huwa ġġustifikat li wieħed juża mudell intern għall-istima tal-ħtieġa ta' kapital tar-riskji politiċi.

(67)

Skont dan il-metodu, il-ħtieġa ta' kapital ta' SA Ducroire hija stmata (30) għal madwar EUR 80 sa 99 miljun, bejn l-2005 u l-2007, u għal madwar EUR [125-150] miljun fl-2009 abbażi tal-pjan ta' direzzjoni tan-negozju (ara t-Tabella 2: hawn taħt). Il-parti l-kbira ta' din il-ħtieġa ta' kapital ġejja mill-kopertura tar-riskju politiku.

(68)

Wara talba mill-Kummissjoni, l-awtoritajiet Belġjani stmaw il-ħtieġa ta' kapital ta' SA Ducroire bl-applikazzjoni tal-formula standard ta' Solvenza II QIS 5 għal kull tip ta' riskju (inkluż ir-riskju politiku). F'dan il-każ, il-ħtieġa ta' kapital ta' SA Ducroire hija (31) inqas minn EUR 23 sa 25 miljun bejn l-2005 u l-2007 u inqas minn EUR [25-50] miljun għall-2009 (ara t-Tabella 2: hawn taħt).

Tabella 2:

Determinazzjoni tal-kapital ta' SA Ducroire mill-ONDD/l-awtoritajiet Belġjani għas-snin 2005, 2007 u 2009 skont żewġ xenarji ta' tkabbir u skont metodi differenti

(69)

Fil-kummenti tiegħu tas-16 u tal-31 ta' Mejju 2012, l-ONDD qal li, wara d-deċiżjonijiet strateġiċi meħuda bejn l-2007 u l-2009 (pereżempju, tibdil fl-istrateġija tar-riassigurazzjoni, tibdil fil-parametri tar-riskji tal-portafoll tar-riskji mhux kummerċjabbli) li ma kinux previsti fil-pjan strateġiku tiegħu tal-2004, saru xi trasferimenti interni tal-kapital min-negozju mhux kummerċjabbli għan-negozju kummerċjabbli.

(70)

Skont l-awtoritajiet Belġjani, l-injezzjoni ta' kapital inizjali tal-ONDD meta nħolqot SA Ducroire tissodisfa l-kriterju tal-investitur privat f'ekonomija tas-suq.

(71)

Fin-nota ta' April 2004, l-ONDD assuma, skont ix-xenarju 1B ibbażat fuq tkabbir tal-attivitajiet ta' 6 %, rata ta' redditu azzjonarju (“return on equity” jew “ROE”) ta' 1,3 % sa 1,5 % għall-ewwel tliet snin ta' attività ta' SA Ducroire (2005, 2006, u 2007) inklużi l-provvedimenti ta' ugwalizzazzjoni, u ta' 2,2 % sa 2,9 % għal dawn l-istess snin mingħajr il-provvedimenti ta' ugwalizzazzjoni.

Tabella 3:

Projezzjonijiet finanzjarji ta' April 2004 (ambitu: Żona 1 “10 pajjiżi msieħba” + Żona 2)

(72)

Fin-nota ppreżentata lill-Bord tad-Diretturi tiegħu tat-28 ta' Settembru 2004 — jiġifieri wara l-ħolqien ta' SA Ducroire fit-23 ta' Settembru 2004 — l-ONDD assuma, skont ix-xenarju “dinamiku — tkabbir ta' 6 %”, ROE ta' 1,3 % sa 1,9 % għat-tliet snin 2005, 2006, u 2007 inklużi l-provvedimenti ta' ugwalizzazzjoni, u ta' 2,8 % sa 4,3 % għal dawn l-istess snin mingħajr provvedimenti ta' ugwalizzazzjoni. Il-projezzjonijiet finanzjarji ta' Settembru 2004 jippreżentaw riżultati kemxejn differenti minn dawk ta' April 2004 peress li dawk ta' Settembru 2004 huma bbażati fuq firxa ta' attivitajiet usa' (iż-Żona 1 kollha). Barra minn hekk ċerti suppożizzjonijiet kienu riveduti f'Settembru 2004.

Tabella 4:

Projezzjonijiet finanzjarji — Settembru 2004 (ambitu: Żona 1 u Żona 2 kollha)

(73)

Għall-kuntrarju tan-nota ta' April 2004, l-ROE huwa kkalkulat abbażi ta' EUR 100 miljun ta' kapital imħallas, mingħajr ma ġew ikkunsidrati l-EUR 50 miljun supplimentari investiti iżda mhux imħallsa.

(74)

F'dak li jirrigwarda l-ROE mistenni għall-attività tar-riskji kummerċjabbli, l-awtoritajiet Belġjani spjegaw li t-tqassim kif stipulat fin-nota tal-istrateġija ppreżentata lill-Bord tad-Diretturi tat-28 ta' Settembru 2004 (36) ma għandux ikun ikkunsidrat għall-analiżi tar-redditu mill-attivitajiet kummerċjabbli u mhux kummerċjabbli. L-awtoritajiet Belġjani spjegaw (37) li dawn il-projezzjonijiet huma assurdi, peress li l-livell ta' pretensjonijiet kien stmat għoli żżejjed għar-riskji li saru kummerċjabbli fl-2004, filwaqt li ma ġietx ikkunsidrata l-possibbiltà għal assiguratur li jaġġusta l-primjums f'każ ta' ammont kbir ta' pretensjonijiet li fil-fatt kien osservat. L-awtoritajiet Belġjani jfakkru li l-Bord tad-Diretturi tal-ONDD ma bbażax ruħu fuq it-tqassim magħmul fl-Anness 9 tan-nota strateġika sabiex jiddeċiedi l-livell ta' kapitalizzazzjoni ta' SA Ducroire.

(75)

Għalhekk dawn il-projezzjonijiet tal-2004 ma servewx ta' bażi għat-tqassim tal-projezzjonijiet tar-riskji kummerċjabbli u mhux kummerċjabbli ppreżentati lill-Kummissjoni f'Ġunju 2011. Il-kummenti ta' Ġunju 2011, min-naħa tagħhom, kienu bbażati fuq l-istorja ta' qabel l-2004 u fuq il-prestazzjoni tal-kompetituri ta' SA Ducroire f'dak iż-żmien. Il-Belġju jemmen li l-approċċ użat fil-kummenti ta' Ġunju 2011 jirrifletti aħjar ir-raġunamenti li seta' segwa investitur privat fl-2004, u fl-istess waqt jibqa' konsistenti mar-riżultat ikkonsolidat.

(76)

Fil-kummenti tagħhom ta' Ġunju 2011, l-awtoritajiet Belġjani stmaw ir-redditu għall-attivitajiet kummerċjabbli meta mqabbel mal-kapital allokat għal din l-attività skont il-mudell ta' Solvenza II (formula standard QIS 5 u mudell intern), metodu li ġie żviluppat ex post wara t-talba tal-Kummissjoni. Għandu jiġi nnutat li d-differenza bejn l-ammont tal-kapital minimu skont dan il-mudell, jiġifieri EUR 82 miljun, u l-kapital effettivament imħallas ta' EUR 100 miljun ġie allokat lill-attività kummerċjabbli u mhux kummerċjabbli b'mod proporzjonat mas-sehem rispettiv tagħhom fil-kapital minimu ta' EUR 82 miljun. Minn dan jirriżulta li l-kapital “aġġustat” stmat mill-ONDD għar-riskji kummerċjabbli jammonta għal EUR 9,8 miljun għall-2005 (38) (ara t-Tabella 5 hawn taħt).

(77)

Abbażi tal-projezzjonijiet finanzjarji riveduti u ppreżentati mill-awtoritajiet Belġjani fl-2011 u l-istimi tagħhom tal-kapital allokat għall-attività relatata mar-riskji kummerċjabbli kif spjegat fil-premessa (76), ir-redditu mill-attività tar-riskji kummerċjabbli għall-2005-2007, kif stabbilit mill-awtoritajiet Belġjani huwa ppreżentat hawn taħt:

Tabella 5:

Projezzjonijiet finanzjarji kkalkulati mill-ġdid fl-2011 (39)

(78)

L-ROE huwa kkalkulat mill-awtoritajiet Belġjani fuq il-bażi ta' EUR 100 miljun ta' kapital imħallas, mingħajr ma jiġu kkunsidrati l-EUR 50 miljun supplimentari investiti iżda mħallsa biss fl-2009.

(79)

Għad-dubju mqajjem fid-deċiżjoni tal-ftuħ li investitur privat jitlob remunerazzjoni fuq il-kapital mhux imħallas minħabba li jitilfu f'każ ta' falliment, l-awtoritajiet Belġjani wieġbu li huma jkomplu jsostnu l-pożizzjoni tagħhom, jiġifieri li l-kapital ta' EUR 50 miljun ma għandux jiġi kkunsidrat fil-kalkolu tal-profittabbiltà sakemm ikun effettivament imħallas. Fil-fehma tagħhom, il-falliment (jekk wieħed jissupponi li dan jirriżulta f'talba għall-bilanċ tal-kapital sottoskritt) ikollu biss l-effett li jnaqqas it-tul ta' tali investiment. Huma żiedu wkoll li, sal-ħlas tiegħu fl-2009, l-ONDD seta' jqiegħed liberament dan il-kapital ta' EUR 50 miljun fuq is-suq sabiex igawdi minn redditu korrispondenti.

(80)

Barra minn hekk, skont l-awtoritajiet Belġjani, rata ta' investiment ta' 2 %, użata fil-projezzjonijiet tal-2004 u kkunsidrata fil-kalkoli ppreżentati fit-Tabella 5, hija inqas minn dik li investitur privat kien aktarx juża. Bl-użu ta' rata ta' investiment ta' 3,5 %, l-awtoritajiet Belġjani ddeterminaw li l-projezzjoni tal-profittabbiltà tan-negozju kummerċjabbli (ROE aġġustat għall-provvediment ta' ugwalizzazzjoni) tilħaq bejn l-2005-2007 livell ta' madwar 9,7 sa 10,4 % (meta mqabbla ma' madwar 7,7 sa 8,4 % b'rata ta' investiment ta' 2 %) (41).

(81)

L-awtoritajiet Belġjani jqisu li r-rata l-aktar xierqa għall-valutazzjoni tar-redditu mistenni tal-investiment hija dik tal-“Economic Return on Revenue” (minn hawn 'il quddiem “ROR”), għalkemm din ir-rata hija nieqsa mill-projezzjonijiet finanzjarji ex ante (pjan ta' direzzjoni tan-negozju tal-ONDD). Din ir-rata hija kkalkulata bit-tqabbil tad-dħul tekniku (qabel l-allokazzjoni għall-provvediment ta' ugwalizzazzjoni) mal-fatturat (primjums tal-assigurazzjoni). Skont l-awtoritajiet Belġjani, l-ROR huwa l-aktar adattat peress li:

(82)

B'ROR ta' 16,5 % u 18,5 % rispettivament fl-2005 u fl-2006, SA Ducroire tkun aktar profittabbli (42) mit-tliet atturi l-kbar tal-assigurazzjoni tal-kreditu Coface, Euler Hermes u Atradius li l-ROR tagħhom fl-2005 u fl-2006 kienu rispettivament 9,7 % u 10,9 %, 16,0 % u 16,9 %, 9,3 % u 11,9 %.

(83)

Bi tweġiba għal kumment tal-Kummissjoni li seħqet li aktarx li investitur privat ma kienx jibbaża biss fuq il-proporzjon ROR sabiex jivvaluta r-redditu mill-investiment li jippjana li jagħmel, l-awtoritajiet Belġjani pproponew żewġ metodoloġiji ġodda, sabiex jiġġustifikaw li r-redditu ta' SA Ducroire kien biżżejjed fil-mument tal-kapitalizzazzjoni tagħha. Dawn huma (a) il-mudell “Capital Asset Pricing Model” (minn hawn 'il quddiem “CAPM”) (43), li permezz tiegħu tkun tista' tiġi vvalutata r-rata tar-redditu mistenni mis-suq għal assi finanzjarju bbażat fuq ir-riskju tiegħu u (b) valutazzjoni komparattiva (“benchmarking”) tar-redditu tal-assiguraturi tal-kreditu.

(84)

Skont il-mudell CAPM, l-ispiża tal-kapital hija ddeterminata bil-formula li ġejja:

(85)

L-awtoritajiet Belġjani stmaw il-kost tal-kapital ta' SA Ducroire kif indikat fil-grafika li ġejja.

(86)

Skont l-istimi tal-ONDD ibbażati fuq is-CAPM, investitur privat fis-settur Belġjan tal-assigurazzjoni mhux tal-ħajja kien jitlob fl-2004 redditu ta' mill-inqas ta' 7-8 %.

(87)

Biex jinkiseb il-valutazzjoni komparattiva tar-redditu storiku tas-settur, l-awtoritajiet Belġjani ħolqu kampjun ta' assiguraturi billi għażlu lil dawk li jissodisfaw dawn il-kriterji: (a) atturi Ewropej, (b) li l-attività ewlenija tagħhom hija l-assigurazzjoni tal-kreditu, (c) li huma attivi l-aktar fis-settur tar-riskji kummerċjabbli u għandhom attività fis-settur tar-riskji mhux kummerċjabbli, minbarra l-kumpaniji soġġetti għal proċedura ta' għajnuna mill-Istat jew li nħolqu wara l-2004 u minbarra s-sussidjarji ta' kumpanija li ntgħażlet fil-kampjun. Il-kampjun jinkludi 11-il assiguratur. Skont l-awtoritajiet Belġjani, għall-assiguraturi tal-kreditu attivi l-aktar fis-settur tar-riskji kummerċjabbli, wieħed josserva ROE medju ta' 6 sa 7,5 % skont il-perjodu kkunsidrat (jiġifieri inklużi jew esklużi s-snin tal-kriżi). L-ROE medju għal dawn il-11-il assiguratur fl-2004 huwa ta' 7,8 % meta mqabbel ma' 13.3 % ROE medju għat-tliet atturi ta' referenza tas-suq (ara t-Tabella 6).

Tabella 6:

Valutazzjoni komparattiva ta' redditu tal-assiguraturi tal-kreditu mressaq mill-Belġju

(88)

Skont l-awtoritajiet Belġjani, ir-redditu mistenni qabel il-provvediment ta' ugwalizzazzjoni (ROE qabel il-provvedimebt ta' ugwalizzazzjoni) tal-attività tar-riskji kummerċjabbli, skont il-projezzjonijiet finanzjarji kkalkulati mill-ġdid mill-awtoritajiet Belġjani fl-2011 taħt ix-xenarju 1B (ara t-Tabella 5), huwa konformi mal-aspettattivi ta' redditu li kien ikollu investitur privat fl-2004 (kif stmati mill-awtoritajiet Belġjani abbażi tal-ispiża tal-kapital skont il-mudell CAPM u fuq il-bażi tal-valutazzjoni komparattiva tar-redditu tal-assiguraturi tal-kreditu, ara l-premessi (86) u (87) rispettivament).

(89)

Wara t-talba tal-Kummissjoni, magħmula fid-deċiżjoni tal-ftuħ, għall-konformità mal-punt 4.3 tal-Komunikazzjoni dwar l-assigurazzjoni ta' esportazzjoni bi kreditu li teħtieġ ġestjoni separata u kontijiet separati għall-attivitajiet tal-assigurazzjoni tar-riskji kummerċjabbli u tar-riskji mhux kummerċjabbli, l-awtoritajiet Belġjani wieġbu li separazzjoni bħal din tal-kontijiet mhijiex meħtieġa. Wara l-1 ta' Jannar 2005, l-attivitajiet għal żmien qasir (riskji kummerċjabbli u mhux kummerċjabbli) isiru fi ħdan SA Ducroire bħala parti mit-trasferiment ta' attività eżistenti. Skont l-awtoritajiet Belġjani, peress li SA Ducroire ma għadhiex tgawdi mill-appoġġ tal-Istat, anki għall-attività relatata mar-riskji mhux kummerċjabbli li hija twettaq, il-Belġju huwa tal-fehma li mhemmx bżonn li jsiru kontijiet separati.

(90)

L-Artikolu 107(1) tat-TFUE jipprovdi li, ħlief għad-derogi previsti fit-Trattati, kull għajnuna, ta' kwalunkwe forma, mogħtija minn Stat Membru jew permezz ta' riżorsi tal-Istat, li twassal għal distorsjoni jew theddida ta' distorsjoni għall-kompetizzjoni billi tiffavorixxi ċerti impriżi jew ċerti produtturi għandha, safejn tolqot il-kummerċ bejn l-Istati Membri, tkun inkompatibbli mas-suq intern.

(91)

Il-Kummissjoni trid l-ewwel tanalizza jekk il-miżuri inkwistjoni humiex għajnuna mill-Istat skont l-Artikolu 107(1) tat-TFUE. Għaldaqstant, fit-taqsimiet li ġejjin, hija tanalizza l-miżuri fid-dawl tad-diversi kriterji li jikkostitwixxu għajnuna.

(92)

Skont il-punti 3.1 u 3.2 tal-Komunikazzjoni dwar l-assigurazzjoni ta' esportazzjoni bi kreditu, il-garanzija tal-Istat li minnha tgawdi kumpanija tal-assigurazzjoni tal-kreditu għall-esportazzjoni tista' tagħtiha vantaġġ finanzjarju fil-konfront tal-kompetituri tagħha. Għalhekk, l-investigazzjoni li nbdiet fit-23 ta' Frar 2011 (ara l-premessa (26)) kienet tirrigwarda prinċipalment il-garanzija tal-Istat Belġjan li minnha gawda l-ONDD għall-attività tiegħu marbuta mar-riskji kummerċjabbli.

(93)

Mill-1 ta' Settembru 2003, kont “kummerċjali” li ma kienx igawdi, skont l-awtoritajiet Belġjani, mill-garanzija tal-Istat ġie assenjat għall-attività tal-ONDD marbuta mar-riskji fuq żmien qasir, inklużi r-riskji kummerċjabbli.

(94)

Peress li fi ħdan l-ONDD ma kinux jeżistu kontijiet separati li jippermettu li wieħed jiddistingwi bejn l-attività ta' assigurazzjoni tar-riskji kummerċjabbli u dik marbuta mar-riskji mhux kummerċjabbli, l-awtoritajiet Belġjani ġew mistiedna jispjegaw il-parti tal-garanzija tal-Istat li setgħet titqies bħala allokata, sal-31 ta' Awwissu 2003, għall-attività marbuta mar-riskji kummerċjabbli. Huma ġew mistiedna wkoll jipprovdu l-evidenza li din il-garanzija waqfet fil-31 ta' Awwissu 2003 u mhux meta nħolqot SA Ducroire fl-1 ta' Jannar 2005.

(95)

L-awtoritajiet Belġjani ddikjaraw li l-ONDD waqaf joffri kopertura tar-riskji fuq debituri fiż-“Żona 1” (51) fl-1993. Wara l-1993, l-attività tal-ONDD kienet immirata biss lejn ir-riskji mhux kummerċjabbli. L-ONDD kien jaċċetta b'mod pjuttost eċċezzjonali l-kopertura tar-riskji kummerċjabbli.

(96)

Kif intqal fil-premessa (34), il-Belġju ddikjara li l-attività marbuta mar-riskji kummerċjabbli fi ħdan l-ONDD qabel Mejju 2004 kienet żgħira ħafna. Barra minn hekk, il-perċentwal baxx ħafna ta' riskji kummerċjabbli li dak iż-żmien kien kopert, kien kopert biss minħabba r-rabta ta' dawn ir-riskji ma' riskju mhux kummerċjabbli. Każ ipotetiku maħsub (52) huwa deskritt kif ġej: “Persuna assigurata X kienet tbigħ oġġetti lil intermedjarju A li jinsab fiż-żona 1, li kien jerġa' jbigħ l-oġġetti lill-klijent finali B, li jinsab fiż-żona 2. Ħafna drabi l-oġġetti kienu jitwasslu direttament lill-klijent finali B. Il-ħlas tal-fattura tal-assigurat X mill-intermedjarju A kien de facto marbut mal-ħlas tal-fattura tal-intermedjarju A mill-klijent finali B. Il-partijiet assigurati ġeneralment ma kinux isibu kopertura mingħand assiguratur ieħor tal-kreditu minħabba li dawn kienu operazzjonijiet li jiddependu fuq ir-riskju politiku tal-pajjiż fejn kien jinsab il-klijent finali B”.

(97)

L-awtoritajiet Belġjani affermaw mill-ġdid li dawn ir-riskji ma kinux isibu kopertura mingħand assiguraturi tal-kreditu oħrajn privati.

(98)

Fid-dawl tal-fatturi msemmija fil-premessi (93) sa (95), huwa stmat li dawn ir-riskji, għalkemm teoretikament jikkwalifikaw bħala kummerċjabbli (minħabba r-relazzjoni ewlenija bejn l-esportatur assigurat X, u l-intermedjarju A), fil-prattika għandhom jitqiesu bħala riskji mhux kumerċjabbli, minħabba l-kundizzjonijiet tas-suq ta' dan il-perjodu. Barra minn hekk, qabel Mejju 2004, dawn ir-riskji kienu koperti mill-ONDD b'mod għal kollox eċċezzjonali peress li kienu jirrappreżentaw inqas minn [0-2 %] tal-primjums (fil-perjodu 2000-2004) tal-portafoll fuq perjodu qasir tal-ONDD (ara l-premessa (34)).

(99)

L-awtoritajiet Belġjani ġabu wkoll l-evidenza li l-garanzija tal-Istat li minnha kien igawdi l-ONDD għall-attività tiegħu marbuta mar-riskji kummerċjabbli waqfet taħdem mill-1 ta' Settembru 2003. Fil-fatt, din il-garanzija ntemmet mat-trasferiment tar-riskji kummerċjabbli fil-kont kummerċjali, kont li għalih l-ONDD kiseb l-approvazzjoni tal-OCA (53), preċiżament minħabba li dan il-kont ma kellux garanzija mill-Istat. Id-Digriet Irjali li jiddefinixxi l-attivitajiet imwettqa mill-ONDD f'ismu stess mingħajr il-garanzija tal-Istat, ippubblikat fl-1 ta' Settembru 2003, data li fiha daħal fis-seħħ, jiddefinixxi l-operazzjonijiet li għandhom jitħallsu minn dan il-kont. Wara d-dħul fis-seħħ tad-Digriet Irjali (54), kull kopertura ta' riskji permezz ta' polza ta' esportazzjoni u ta' inqas minn sentejn hija rregolata mill-Artikolu 3(2) tal-Liġi tal-1939 (attività f'isem l-ONDD mingħajr il-garanzija tal-Istat).

(100)

Bħala konklużjoni, id-dubji mqajma mill-Kummissjoni fid-deċiżjoni tal-ftuħ u li kienu jirrigwardaw l-eżistenza ta' vantaġġ għall-attività ta' assigurazzjoni tar-riskji kummerċjabbli minħabba l-garanzija tal-Istat għandhom jitneħħew. Fil-fatt, huwa kkunsidrat li l-garanzija tal-Istat li minnha gawda l-ONDD għall-attività tiegħu marbuta mar-riskji kummerċjabbli sa Awwissu 2003 ma tatx vantaġġ kompetittiv lil din l-attività meta mqabbla mal-kompetituri tiegħu, peress li ma kienet teżisti l-ebda attività verament kummerċjabbli. Barra minn hekk, ma kien hemm l-ebda tentattiv ta' żvilupp ta' attività verament kummerċjabbli fuq il-bażi tal-garanzija tal-Istat. Wieħed jista' jikkonkludi wkoll li l-attività kollha marbuta mar-riskji fuq żmien qasir ma baqgħetx tgawdi mill-garanzija tal-Istat mill-1 ta' Settembru 2003.

(101)

Ma kienx hemm trasferimenti interni favur ir-riskji kummerċjabbli fi ħdan l-ONDD minħabba li ma kien hemm ebda attività ta' riskji verament kummerċjabbli. Ma kien hemm l-ebda tentattiv ta' żvilupp ta' attività verament kummerċjabbli fuq il-bażi ta' trasferiment ta' riżorsi tal-attività mhux kummerċjabbli (ara l-premessa (98)). Bħala konklużjoni, ma hemm l-ebda evidenza li ssostni l-eżistenza ta' trasferimenti ta' riżorsi favur ir-riskji kummerċjabbli fi ħdan l-ONDD jew ta' kwalunkwe vantaġġ li minnu seta' gawda l-ONDD wara trasferimenti bħal dawn.

(102)

Għaldaqstant, il-Miżuri 1 u 2 ma jagħtux vantaġġ skont l-Artikolu 107 tat-TFUE. Għalhekk, mhumiex għajnuna mill-Istat.

(103)

Minn dan jirriżulta li l-analiżi tal-kriterji l-oħrajn li jikkostitwixxu għajnuna (riżorsi tal-Istat, selettività, distorsjoni tal-kompetizzjoni) mhijiex sejra tkun żviluppata għall-Miżuri 1 u 2 fil-partijiet li ġejjin.

(104)

Skont id-deċiżjoni tal-ftuħ (ara l-premessi (27) u (28) ta' din id-deċiżjoni), iż-żewġ ammonti li ġejjin għandhom jitnaqqsu mill-ammont tal-allokazzjoni inizjali ta' kapital ta' SA Ducroire għaliex ma jikkostitwixxux għajnuna:

(105)

Biex issegwi l-approċċ żviluppat fid-deċiżjoni tal-ftuħ, il-Kummissjoni jkollha tibda billi tapplika dawn iż-żewġ kriterji ta' esklużjoni.

(106)

Madankollu, il-Belġju invoka argument ibbażat fuq it-tieni kriterju ta' esklużjoni u li, jekk jirriżulta tajjeb, jeskludi minnufih il-kwalifika ta' għajnuna tal-Miżura 3 kollha. Għaldaqstant il-Kummissjoni sejra l-ewwel turi li dan l-argument mhuwiex validu, qabel ma tapplika ż-żewġ kriterji ta' esklużjoni ppreżentati fid-deċiżjoni tal-ftuħ.

(107)

Bi tweġiba għad-deċiżjoni tal-ftuħ, il-Belġju invoka favur tiegħu u wessa' t-tieni kriterju ta' esklużjoni li l-kapital li, fi ħdan l-ONDD, kien diġà ta' benefiċċju għall-attivitajiet kummerċjabbli eżistenti eżatt qabel it-trasferiment tagħhom lil SA Ducroire fl-1 ta' Jannar 2005 ma jikkostitwixxix għajnuna. B'mod aktar speċifiku, il-Belġju jqis li l-kapital kollu inizjali ta' EUR 150 miljun allokat lil SA Ducroire kien jikkostitwixxi l-kapital ekonomiku assoċjat mal-attivitajiet ta' assigurazzjoni għal żmien qasir (kummerċjabbli u mhux kummerċjabbli) trasferiti. Huwa jqis li l-ħolqien ta' SA Ducroire bil-kapital inizjali tiegħu ta' EUR 150 miljun huwa biss bidla fil-forma ġuridika ta' attività eżistenti u tal-kapital marbut magħha. It-total tal-allokazzjoni inizjali tal-kapital għaldaqstant mhijiex għajnuna. Għalhekk, skont il-Belġju, mhemmx għalfejn ikun ivverifikat kif dan il-kapital intuża wara minn SA Ducroire (jiġifieri, jekk intużax għar-riskji kummerċjabbli jew mhux kummerċjabbli — l-ewwel kriterju ta' esklużjoni) minħabba li dan il-kapital ma kienx għajnuna.

(108)

Biex isostnu din id-dikjarazzjoni, l-awtoritajiet Belġjani jargumentaw li s-sottoskrizzjoni ta' EUR 150 miljun f'kapital lil SA Ducroire kienet meħtieġa, u dan, mill-bidu tal-2005. L-awtoritajiet Belġjani jiġġustifikaw dan il-livell ta' kapitalizzazzjoni abbażi tal-“istandards attwali” żviluppati fil-kuntest tal-adozzjoni tad-Direttiva Solvenza II (56) (metodu msejjaħ “standard” skont il-parametri tekniċi kif stabbiliti fi studju tal-impatt (“QIS 5” għall-Belġju, li jmur lura għal Marzu 2011) għar-riskji kollha ta' SA Ducroire bl-eċċezzjoni tar-riskji politiċi li għalihom intuża mudell intern sabiex tiġi determinata l-ħtieġa ta' kapital li jkopri dawn ir-riskji. Kif indikat fl-intestatura “Solvenza II bil-mudell intern għar-riskji politiċi” tat-Tabella 2, kien meħtieġ kapital ta' EUR [125-150] miljun sabiex ikopri l-livell ta' attività previst fl-2009.

(109)

Il-Kummissjoni tinnota li l-kunċett ta' “kapital marbut mal-attivitajiet trasferiti” huwa definit fid-Deċiżjoni tal-Kummissjoni tal-21 ta' Diċembru 2005“Miżuri relatati mal-ħolqien u l-operat tal-Banque Postale” (57). F'dan il-każ, kien ġie konkuż li t-trasferiment ma kienx jinkludi kapital ġdid peress li l-ekwità marbuta mal-attivitajiet tas-servizzi finanzjarji biss ta' La Poste kienu ġew trasferiti lill-entità ġuridika li kienet għadha kemm inħolqot imsejħa “La Banque Postale”. Fi kliem ieħor, kienet esklussivament ekwità eżistenti u assenjata qabel b'mod ċar għall-proprjetà, id-drittijiet u l-obbligi traferiti. L-analiżi kienet iffukata għalhekk fuq il-kapital li kien diġà formalment marbut mal-attivitajiet trasferiti u mhux fuq stima prospettiva tal-kapital li kien ikun xieraq li jingħata lill-entità l-ġdida bħala appoġġ għall-iżvilupp futur tagħha.

(110)

Kif spjegat qabel, l-attività marbuta mar-riskji għal żmien qasir (kummerċjabbli u mhux kummerċjabbli) trasferita lil SA Ducroire kienet ġestita fi ħdan l-ONDD permezz tal-kont kummerċjali mill-1 ta' Settembru 2003. Kapital ta' EUR [45-70] miljun kien ġie assenjat għal dan il-kont. Barra minn hekk, kif intqal fil-premessa (99), l-ONDD kiseb b'mod speċifiku u biss għall-kont kummerċjali (u l-kapital relatat ta' EUR [45-70] miljun) l-approvazzjoni tar-regolatur nazzjonali tal-asiguraturi (l-OCA). Ir-regoli u s-sorveljanza tal-OCA kienu jirrigwardaw fost l-oħrajn il-konformità mar-regoli ta' solvenza (fond minimu ta' garanzija, marġini ta' solvenza li trid issir) (58). Minn dan isegwi li, abbażi tar-regoli prudenzjali fis-seħħ f'dak iż-żmien, dawn l-attivitajiet għal żmien qasir fil-kont kummerċjali kienu kapitalizzati b'mod adegwat.

(111)

F'dan ir-rigward, il-Kummissjoni tinnota li, skont in-nota interna tal-20 ta' April 2004 (59) li fuq il-bażi tagħha ittieħdet id-deċiżjoni li tinħoloq SA Ducroire u li jingħatalha kapital ta' EUR 150 miljun, il-kapital strettament allokat għall-attività marbuta mar-riskji għal żmien qasir kien il-kapital irreġistrat fil-kont kummerċjali flimkien mal-benefiċċju ta' perjodu ta' 16-il xahar (mill-1 ta' Settembru 2003 sal-31 ta' Diċembru 2004) stmat għal EUR [0-5] miljun. In-nota tgħid li “fuq il-kapital ta' EUR 150 miljun tal-kumpanija b'responsabbiltà limitata, EUR [45-70] miljun ġejjin mit-trasferiment tal-ekwità tal-kont kummerċjali”. Il-Kummissjoni tikkonkludi għalhekk li fil-mument li ġie deċiż li tinħoloq SA Ducroire, il-kapital li seta' jiġi kkunsidrat bħala formalment allokat għall-attivitajiet għal żmien qasir fil-31 ta' Diċembru 2004 kien jammonta biss għal EUR [45-75] miljun (għal EUR [45-70] miljun flimkien mal-benefiċċju stmat ta' EUR [0-5] miljun). Għalhekk, it-trasferiment ta' dan il-kapital biss li jammonta għal EUR [45-75] miljun jikkostitwixxi l-parti tal-kapital li kienet diġà ta' benefiċċju fi ħdan l-ONDD għall-attività marbuta mar-riskji għal żmien qasir u sempliċement trasferita lil SA Ducroire. Għaldaqstant dan it-trasferiment ma jistax ikun vantaġġ ġdid għal din l-attività u allura ma jikkostitwixxix għajnuna.

(112)

Il-Kummissjoni għaldaqstant tiċħad l-allegazzjoni tal-Belġju li l-kapital inizjali kollu ta' EUR 150 miljun huwa l-kapital sempliċement trasferit, li kien diġà allokat fi ħdan l-ONDD għall-attività trasferita u, ma jistax għalhekk jitqies bħala vantaġġ. Il-Kummissjoni tqis li d-differenza bejn l-EUR [45-75] miljun u l-kapital effettivament sottoskritt ta' EUR 150 miljun hija għalhekk kapital addizzjonali li jirrappreżenta vantaġġ ġdid għal din l-attività.

(113)

B'mod sussidjarju, il-Kummissjoni tinnota li n-noti interni tal-2004, li appoġġjaw id-deċiżjoni tal-ONDD li tagħti lil SA Ducroire kapital ta' EUR 150 miljun (ferm ogħla mill-EUR [45-75] miljun allokati fil-kont kummerċjali), jindikaw li l-ONDD ikkunsidra diversi xenarji ta' tkabbir ta' attivitajiet għal SA Ducroire futura. Il-ħtieġa ta' kapital ta' EUR 150 miljun kienet għalhekk iddeterminata abbażi ta' suppożizzjonijiet ta' tkabbir futur tal-attivitajiet ta' SA Ducroire. Minn dan wieħed jista' jikkonkludi li l-approċċ tal-awtoritajiet Belġjani huwa ekwivalenti għall-esklużjoni mill-analiżi tal-eżistenza ta' vantaġġ tal-kapital kollu li wieħed kien iqis li teħtieġ l-entità l-ġdida biex issostni l-iżvilupp futur tagħha. Dan l-approċċ ma jistax jiġi aċċettat. Il-kapital biss, li minnu kienu diġà jibbenefikaw formalment l-attivitajiet trasferiti fi ħdan l-entità ġuridika eżistenti (attivitajiet ta' assigurazzjoni għal żmien qasir fi ħdan l-ONDD), ma jikkostitwixxix vantaġġ ġdid peress li preċiżament l-attivitajiet inkwistjoni kienu diġà qegħdin jibbenefikaw minnu. Bil-maqlub, kull kapital addizzjonali jikkostitwixxi vantaġġ ġdid peress li l-attività inkwistjoni ma kinitx tgawdi minn dan il-kapital qabel it-trasferiment. Id-deċiżjoni li tinħoloq SA Ducroire u li tiġi allokata kapital ta' EUR 150 miljun ma tistax għalhekk titqies bħala sempliċi tibdil tal-forma ġuridika ta' attività eżistenti b'sempliċi trasferiment tal-kapital allokat għall-attività trasferita. Għalhekk, l-affermazzjoni tal-awtoritajiet Belġjani li mill-2004 wieħed seta' jbassar diġà li SA Ducroire kienet ser teħtieġ kapital ta' EUR 150 miljun fl-2009 fuq il-bażi tat-tkabbir mistenni mill-attivitajiet tagħha hija irrilevanti. L-awtoritajiet Belġjani bl-ebda mod ma juru li dan il-kapital ta' EUR 150 miljun kien diġà allokat għall-attivitajiet fuq żmien qasir fi ħdan l-ONDD qabel it-trasferiment tagħhom lil SA Ducroire u li dan il-kapital ta' EUR 150 miljun ma jinkludix għalhekk vantaġġ ġdid għal dawn l-attivitajiet.

(114)

It-tieni nett, anki jekk il-kapital meħtieġ għall-appoġġ tat-tkabbir mistenni mill-attivitajiet kien kriterju rilevanti għal din l-analiżi (li l-Kummissjoni tiddubita), il-Kummissjoni tinnota dan li ġej:

(115)

Il-Bord tad-Diretturi tal-ONDD tal-20 ta' April 2004 ibbaża ruħu fuq metodu ieħor sabiex jistabbilixxi l-kapital meħtieġ għal SA Ducroire, jiġifieri l-proporzjon ta' Cooke, filwaqt li kkunsidra l-ħtieġa li jagħti lil SA Ducroire kredibbiltà suffiċjenti fil-konfront tal-kompetituri tagħha. Fil-fatt, il-proporzjon magħżul fil-kalkoli mhuwiex ta' 8 % kif preskritt mir-regoli ta' Basel I iżda ta' 10 %. Għalhekk, il-kalkoli tal-ħtieġa ta' kapital magħmula fl-2004 kienu jinkludu bafer ta' sigurtà ta' 2 %. Għandu jiġi nnutat li l-kapital stabbilit b'dan il-mod għal tmiem is-sena 2004 kien jammonta għal EUR 66 miljun (62) u għaldaqstant huwa ferm inqas mill-EUR 150 miljun ta' kapital sottoskritt.

(116)

Rigward l-użu tal-proporzjon ta' Cooke biex ikun stabbilit il-kapital meħtieġ, il-Kummissjoni kkritikat, fid-deċiżjoni tal-ftuħ, ir-rilevanza tal-applikazzjoni tar-regoli bankarji (bħall-proporzjon ta' Cooke) għall-assiguraturi tal-kreditu, fid-dawl tal-bosta differenzi bejn ir-riskji li jieħdu l-assiguraturi tal-kreditu u dawk li jieħdu l-banek (ara l-premessa (90) tad-deċiżjoni tal-ftuħ). F'dan ir-rigward, il-Belġju ma ġabx evidenza li r-regoli ta' Basel (il-proporzjon ta' Cooke) — li, fil-liġi, japplikaw esklussivament għas-settur bankarju — huma fil-prattika applikati mill-korpi tal-assigurazzjoni tal-kreditu jew rakkomandati mill-aġenziji ta' klassifikazzjoni jew mill-istanzi tas-sorveljanza tal-assigurazzjonijiet.

(117)

F'dak li jirrigwarda l-applikazzjoni tal-Artikolu 8 tal-Liġi tal-1939 dwar l-ONDD, l-awtoritajiet Belġjani ikkonfermaw li din il-liġi ma tapplikax għal SA Ducroire. Barra minn hekk, dan l-Artikolu jirrigwarda biss lill-attivitajiet proprji tal-ONDD bil-garanzija tal-Istat kif ukoll dawk f'isem l-Istat.

(118)

Għalkemm il-Belġju jirreferi għall-metodu ta' Standard & Poor's, li kien jeżisti f'dak iż-żmien biex jistabbilixxi l-ħtiġijiet ta' kapital tal-assiguraturi tal-kreditu, għandu jiġi nnutat li l-awtoritajiet Belġjani ma ssottomettew l-ebda stima ta' kapital skont dan il-metodu. Barra minn hekk dan ma ntużax mill-ONDD fl-2004.

(119)

B'konklużjoni, anki jekk wieħed jassumi li l-kapital meħtieġ għall-appoġġ tat-tkabbir mistenni tal-attivitajiet ta' SA Ducroire huwa kriterju rilevanti għal din l-analiżi (li l-Kummissjoni tiddubita), l-awtoritajiet Belġjani ma ġabu l-ebda prova li turi b'mod konvinċenti li l-ħtieġa f'kapital relatat mar-riskji għal żmien qasir u trasferit f'SA Ducroire kellha tkun akbar mill-kapital eżistenti fuq il-kont kummerċjali tal-ONDD fl-aħħar tal-2004.

(120)

F'din it-taqsima, il-Kummissjoni wriet li kien jeħtieġ li tiċħad id-dikjarazzjoni tal-awtoritajiet Belġjani li l-allokazzjoni ta' kapital inizjali ta' EUR 150 miljun lil SA Ducroire fl-2004 hija biss it-trasferiment tal-kapital li kien diġà ta' benefiċċju għall-attività relatata mar-riskji għal żmien qasir fi ħdan l-ONDD. Il-Kummissjoni kkonkludiet fil-fatt li l-kapital li kien diġà ta' benefiċċju għall-attività relatata mar-riskji għal żmien qasir fi ħdan l-ONDD qabel it-trasferiment ta' din l-attività lil SA Ducroire kien jammonta għal EUR [45-75] miljun u li għalhekk kien jeżisti kapital addizzjonali ta' EUR [75-100] miljun għal din l-attività.

(121)

Issa jeħtieġ li tiġi eżaminata l-applikazzjoni taż-żewġ kriterji ta' esklużjoni deskritti fid-deċiżjoni tal-ftuħ. L-ewwel ser ikun żviluppat it-tieni kriterju ta' esklużjoni, imbagħad l-ewwel wieħed.

(122)

Fil-premessa (111), il-Kummissjoni kkonkludiet li, fi ħdan l-ONDD, kapital ta' EUR [45-75] miljun kien allokat għall-attività relatata mar-riskji għal żmien qasir fil-31 ta' Diċembru 2004. Biex jiġi applikat it-tieni kriterju ta' esklużjoni, jeħtieġ għalhekk li tiġi stmata fuq il-EUR [45-75] miljun allokati għall-attività tar-riskju għal żmien qasir fl-aħħar tal-2004, il-parti tal-kapital relatata mar-riskji kummerċjabbli (63). Kif deskritt qabel, dawn ir-riskji kummerċjabbli kienu esklussivament magħmula minn riskji assoċjati ma' debituri li jinsabu fl-għaxar Stati li ssieħbu fl-Unjoni Ewropea f'Mejju 2004.

(123)

Kif intqal ukoll qabel, il-kont kummerċjali li kien igawdi minn kapital ta' EUR [45-75] miljun fl-aħħar tal-2004 ma kienx fih kontijiet separati li jgħinu biex jiġi identifikat eżattament il-kapital li kien ta' benefiċċju biss għall-attività relatata mar-riskji kummerċjabbli. Għalhekk jeħtieġ li jiġi stmat is-sehem mill-EUR [45-75] miljun li wieħed jista' raġonevolment jikkunsidra li kien ta' benefiċċju għall-attività relatata mar-riskji kummerċjabbli.

(124)

Skont l-informazzjoni sottomessa lir-regolatur fl-2004, l-ammonti tal-impenji netti kienu ta' EUR 141,6 miljun għar-riskji relatati mal-għaxar Stati Membri ġodda u ta' EUR 661,4 miljun għall-poloz esportaturi kollha għal żmien qasir fl-aħħar tal-2004 (64). Abbażi ta' tqassim tal-EUR [45-75] miljun pro rata fuq il-bażi tal-impenji netti, EUR [10-25] miljun jistgħu għalhekk ikunu kkunsidrati li jikkostitiwixxu l-kapital marbut mar-riskji relatati mal-għaxar Stati msieħba ġodda qabel it-trasferiment tagħhom mill-kont kummerċjali tal-ONDD għal SA Ducroire.

(125)

Il-Kummissjoni tinnota li tali tqassim tal-kapital skont l-impenji netti hija konsistenti mal-approċċ segwit mill-ONDD stess fl-2004 (65).

(126)

Il-Kummissjoni tosserva wkoll li l-awtoritajiet Belġjani u l-ONDD/SA Ducroire konsistentement iddikjaraw matul il-proċedura li r-riskji mhux kummerċjabbli kienu jeħtieġu, għal ammont assigurat speċifiku, aktar kapital mir-riskji kummerċjabbli. Għaldaqstant, l-ammont ta' EUR [10-25] miljun jikkostitwixxi pjuttost limitu massimu milli minimu. Il-Kummissjoni tikkunsidra madankollu raġonevoli li żżomm din iċ-ċifra għaliex hija konsistenti mal-approċċ segwit mill-ONDD stess fl-2004.

(127)

Il-Kummissjoni tikkonkludi minn dan li, fuq l-ammont ta' kapital inizjali ta' EUR 150 miljun, wieħed jista' jqis li l-ammont ta' EUR [10-25] miljun ma jikkostitwixxix vantaġġ għall-attività tar-riskji kummerċjabbli, peress li kien diġà ta' benefiċċju għal din l-attività fi ħdan l-ONDD (66). F'dan il-każ hija biss kwistjoni ta' tibdil fil-forma ġuridika tal-istess attività ekonomika u tal-kapital li minnu kienet tibbenefika. It-trasferiment lil SA Ducroire ta' dan il-kapital mal-attività inkwistjoni għaldaqstant mhuwiex għajnuna.

(128)

B'analoġija, jeħtieġ li wieħed japplika l-istess raġunament għall-ammont tal-kapital relatat mar-riskji marbuta ma' debituri li jinsabu fir-Rumanija u fil-Bulgarija. Fil-fatt, fl-2007, kien hemm klassifikazzjoni mill-ġdid tar-riskji mhux kummerċjabbli marbuta ma' debituri li jinsabu fir-Rumanija u fil-Bulgarija lejn il-kategorija tar-riskji kummerċjabbli, minħabba s-sħubija ta' dawn l-Istati fl-Unjoni Ewropea. Il-kapital li kien diġà ta' benefiċċju għal dawn ir-riskji meta ma kinux kummerċjabbli ma jistax jikkostitwixxi vantaġġ ġdid mis-sempliċi fatt li dawn ir-riskji saru kummerċjabbli wara. Jeħtieġ għalhekk li anki dan il-kapital jiġi eskluż mill-kwalifika ta' għajnuna.

(129)

Għalhekk, il-kapital relatat mar-riskji mhux kummerċjabbli li saru kummerċjabbli huwa eskluż mill-analiżi tal-eżistenza ta' vantaġġ. Fil-kummenti tagħhom tas-16 ta' Mejju 2012, l-awtoritajiet Belġjani stmaw il-kapital relatat mar-riskji marbuta ma' debituri li jinsabu fir-Rumanija u fil-Bulgarija għal EUR [0-2] miljun billi ssopponew li dawn ir-riskji kienu kummerċjabbli fl-2005. Għall-kuntrarju, huma ma pprovdewx stima tal-kapital assoċjat ma' dawn ir-riskji fil-31 ta' Diċembru 2006. Peress li r-riskji inkwistjoni ma kinux partikolarment kummerċjabbli fl-2005, l-istima tal-awtoritajiet Belġjani tal-kapital allokat għal dawn ir-riskji tista tkun sottovalutata. Il-kontijiet separati maħluqa mill-ġdid retrospettivament mill-ONDD bħala parti minn din il-proċedura (il-kummenti tas-16 ta' Mejju 2012), juru li l-kapital allokat għar-riskji mhux kummerċjabbli jonqos b'EUR [0-5] miljun fl-2007 meta mqabbel mal-2006. Dan it-tnaqqis huwa spjegat mit-tibdil tal-kwalifika tar-riskji marbuta mar-Rumanija u mal-Bulgarija (ikkunsidrati bħala riskji kummerċjabbli mill-2007), iżda wkoll minn fatturi oħrajn, bħat-tibdil ta' politika ta' riassigurazzjoni. Abbażi tal-evidenza kollha disponibbli, wieħed jista' raġonevolment jikkunsidra li l-kapital li minnu r-riskji marbuta mal-Bulgarija u mar-Rumanija kienu jibbenefikaw qabel ma saru kumerċjabbli kien jammonta għal EUR [0-5] miljun.

(130)

Fid-dawl ta' dak li ntqal, il-Kummissjoni tikkonkludi li ammont ta' EUR [10-25] miljun kien diġà ta' benefiċċju għar-riskji kummerċjabbli qabel l-1 ta' Jannar 2005 u li t-trasferiment ta' dan il-kapital mal-attivitajiet inkwistjoni ma jistax għalhekk jikkostitwixxi vantaġġ. Bl-istess mod, ammont ta' EUR [0-5] miljun kien diġà ta' benefiċċju għar-riskji li saru kummerċjabbli fl-1 ta' Jannar 2007 (Rumanija u Bulgarija) qabel ma saru kummerċjabbli.

(131)

Kif kien deskritt qabel, kapital ta' EUR [45-75] miljun kien diġà ta' benefiċċju għar-riskji għal żmien qasir qabel it-trasferiment tagħhom lill-ONDD (ara l-premessa (120)). Minn fost dawn il-EUR [45-75] miljun, kien konkluż qabel li wieħed jista' raġonevolment jistma s-sehem tar-riskji kummerċjabbli għal EUR [10-25] miljun. Għalhekk, wieħed jista' raġonevolment jistma s-sehem tar-riskji mhux kummerċjabbli għal EUR [35-50] miljun (li minnhom EUR [0-5] miljun, relatati mar-riskji marbuta mal-Bulgarija u mar-Rumanija, saru kummerċjabbli fl-2007).

(132)

Għall-istess raġunijiet bħal dawk spjegati fil-premessa (127), peress li t-trasferiment tal-EUR [45-75] miljun kollu (inkluż is-sehem tar-riskji mhux kummerċjabbli stmat għal EUR [35-50] miljun) mhuwiex vantaġġ, dan tal-aħħar huwa eskluż mill-analiżi tal-eżistenza ta' għajnuna.

(133)

Bħala konklużjoni, fuq il-kapital inizjali ta' EUR 150 miljun allokat lil SA Ducroire, EUR [75-100] miljun biss jikkostitwixxu kapital addizzjonali, jiġifieri kapital ġdid. L-għoti ta' dawn il-EUR [75-100] miljun biss jista' għalhekk ikun ta' vantaġġ (ara l-premessa (120)).

(134)

Bħalma huwa mfakkar fil-premessa (65) tad-deċiżjoni tal-ftuħ, l-Istati Membri huma liberi li jappoġġjaw l-attività ta' assigurazzjoni ta' riskji mhux kummerċjabbli, minħabba li l-Kummissjoni tikkunsidra li ma jeżisti l-ebda suq għal dawn ir-riskji. Għalhekk ma jistax ikun hemm distorsjoni tal-kompetizzjoni fir-rigward ta' assiguraturi oħrajn. Madankollu, il-Kummissjoni tinnota li ma kien hemm l-ebda separazzjoni tal-kontijiet bejn l-attività tar-riskji kummerċjabbli u dik tar-riskji mhux kummerċjabbli fi ħdan SA Ducroire. Formalment, l-ebda kapital ma kien allokat għall-attività tar-riskji mhux kummerċjabbli. L-ebda parti tal-kapital ta' EUR 150 miljun ma ġiet imwarrba biex tiffinanzja l-attività tar-riskji mhux kummerċjabbli. Għalhekk, approċċ purament formali jista' jwassal biex ma tiġi eskluża l-ebda parti tal-kapital addizzjonali ta' EUR [75-100] miljun. Tali approċċ ikun ferm aktar iġġustifikat minħabba li l-obbligu li jiġu introdotti kontijiet separati huwa espressament previst fil-punt 4.3 tal-Komunikazzjoni dwar l-assigurazzjoni ta' esportazzjoni bi kreditu li kienet fis-seħħ mill-1998. Madankollu, huwa ċar li parti kbira mill-attivitajiet ta' SA Ducroire tirrigwarda l-assigurazzjoni tar-riskji mhux kummerċjabbli. SA Ducroire ma kinitx tkun tista' tassigura dawn ir-riskji mingħajr kapital adegwat. Għaldaqstant, minbarra l-EUR [45-75] miljun (li minnhom EUR [35-50] miljun għar-riskji mhux kummerċjabbli), il-Kummissjoni tista' taċċetta li teskludi wkoll mill-kwalifika ta' għajnuna l-porzjon tal-kapital li jista' jintwera b'mod raġonevoli li ntuża għall-appoġġ tal-attività ta' assigurazzjoni tar-riskji mhux kummerċjabbli.

(135)

Fid-deċiżjoni tal-ftuħ, il-Belġju kien mistieden jiżviluppa metodu li jiddetermina l-porzjon tal-kapital ta' SA Ducroire li jista' jitqies li jappoġġja l-attività tar-riskji kummerċjabbli u dak li jappoġġja l-attività tar-riskji mhux kummerċjabbli. Wara din it-talba tal-Kummissjoni, l-awtoritajiet Belġjani ssottomettew għall-perjodu 2005-2011 karta tal-bilanċ u dikjarazzjoni tad-dħul separati għall-attività tar-riskji kummerċjabbli u dik tar-riskji mhux kummerċjabbli. Il-karta tal-bilanċ tar-riskji mhux kummerċjabbli fil-31 ta' Diċembru 2011 tinkludi kapital ta' EUR [70-110] miljun u dak tar-riskji kummerċjabbli kapital ta' EUR [40-80] miljun. Għalkemm is-separazzjoni tal-kontijiet hija bbażata fuq ċerti suppożizzjonijiet jew informazzjoni parzjalment verifikabbli f'kuntest ta' rikostruzzjoni retrospettiva, il-Kummissjoni tqis il-livelli tal-kapital għall-attività tar-riskji kummerċjabbli u mhux kummerċjabbli fil-31 ta' Diċembru 2011 bħala raġonevoli.

(136)

Il-Kummissjoni għalhekk taċċetta li teskludi mill-kwalifika ta' għajnuna EUR [70-110] miljun peress li de facto dawn jappoġjaw attività li mhijiex soġġetta għall-kompetizzjoni skont il-Komunikazzjoni dwar l-assigurazzjoni ta' esportazzjoni bi kreditu.