—

wara li kkunsidra l-baġit ġenerali tal-Unjoni Ewropea għas-sena finanzjarja 2011 (1),

—

wara li kkunsidra l-kontijiet annwali konsolidati tal-Unjoni Ewropea għas-sena finanzjarja 2011 (COM(2012) 436 — C7–0225/2012) (2),

—

wara li kkunsidra r-rapport dwar il-ġestjoni baġitarja u finanzjarja — Taqsima I — Il-Parlament Ewropew — Sena finanzjarja 2011 (3),

—

wara li kkunsidra r-rapport annwali tal-Awditur Intern għas-sena finanzjarja 2011,

—

wara li kkunsidra r-rapport annwali tal-Qorti tal-Awdituri dwar l-implimentazzjoni tal-baġit għas-sena finanzjarja 2011, flimkien mat-tweġibiet tal-istituzzjonijiet li jkunu qed jiġu verifikati (4),

—

wara li kkunsidra d-dikjarazzjoni ta’ assigurazzjoni (5) dwar l-affidabilità tal-kontijiet, kif ukoll il-legalità u r-regolarità tal-operazzjonijiet li jaqgħu taħthom, ipprovduta mill-Qorti tal-Awdituri għas-sena finanzjarja 2011 skont l-Artikolu 287 tat-Trattat dwar il-Funzjonament tal-Unjoni Ewropea,

—

wara li kkunsidra l-Artikoli 314(10) u l-Artikolu 318 tat-Trattat dwar il-Funzjonament tal-Unjoni Ewropea kif ukoll l-Artikolu 106a tat-Trattat Euratom,

—

wara li kkunsidra r-Regolament tal-Kunsill (KE, Euratom) Nru 1605/2002 tal-25 ta’ Ġunju 2002 rigward ir-Regolament Finanzjarju applikabbli għall-baġit ġenerali tal-Komunitajiet Ewropej (6), u b’mod partikolari l-Artikoli 145, 146 u 147 tiegħu,

—

wara li kkunsidra r-Regolament (UE, Euratom) Nru 966/2012 tal-Parlament Ewropew u tal-Kunsill tal-25 ta’ Ottubru 2012 dwar ir-regoli finanzjarji applikabbli għall-baġit ġenerali tal-Unjoni u li jħassar ir-Regolament tal-Kunsill (KE, Euratom) Nru 1605/2002 (7), u b’mod partikolari l-Artikoli 164, 165 u 166 tiegħu,

—

wara li kkunsidra l-Artikolu 13 tar-regoli interni dwar l-implimentazzjoni tal-baġit tal-Parlament Ewropew (8),

—

wara li kkunsidra l-Artikolu 166(1) tar-Regolament (UE, Euratom) Nru 966/2012 skont liema kull Istituzzjoni tal-Unjoni għandha tieħu l-passi kollha xierqa biex twettaq l-osservazzjonijiet li jakkompanjaw id-deċiżjoni ta’ kwittanza tal-Parlament Ewropew,

—

wara li kkunsidra r-riżoluzzjoni tiegħu tal-25 ta’ Marzu 2010 dwar il-linji gwida għall-proċedura baġitarja 2011 — Taqsimiet I, II, IV, V, VI, VII, VIII u IX (9),

—

wara li kkunsidra r-riżoluzzjoni tiegħu tat-18 ta’ Mejju 2010 dwar l-estimi tad-dħul u tal-infiq tal-Parlament Ewropew għas-sena finanzjarja 2011 (10),

—

wara li kkunsidra l-Artikoli 77 u 80(3) u l-Anness VI tar-Regoli ta’ Proċedura tiegħu,

—

wara li kkunsidra r-rapport tal-Kumitat għall-Kontroll tal-Baġit (A7–0063/2013),

A.

billi fil-11 ta’ Lulju 2012 il-President adotta l-kontijiet tal-Parlament għas-sena finanzjarja 2011,

B.

billi fiċ-ċertifikazzjoni tal-kontijiet definittivi, l-uffiċjal tal-kontabilità tal-Parlament afferma l-assigurazzjoni raġonevoli tiegħu li l-kontijiet jippreżentaw stampa vera u ġusta tal-pożizzjoni finanzjarja tal-Parlament fl-aspetti materjali kollha, u li ma waslet għall-attenzjoni tiegħu l-ebda kwistjoni li dwarha jesprimi riżerva,

C.

billi s-Segretarju Ġenerali ċċertifika, fl-24 ta’ April 2012, l-assigurazzjoni raġonevoli tiegħu li l-baġit tal-Parlament ġie implimentat skont il-prinċipji tal-ġestjoni finanzjarja tajba u li l-qafas ta’ kontroll stabbilit joffri l-garanziji neċessarji dwar il-legalità u r-regolarità tal-operazzjonijiet li jaqgħu taħtu,

D.

billi, b’segwitu tal-awditjar tagħha, il-Qorti tal-Awdituri kkonkludiet li, għan-nefqa amministrattiva tal-2011, l-istituzzjonijiet kollha ħaddmu s-sistemi ta’ superviżjoni u ta’ kontroll meħtieġa mir-Regolament Finanzjarju u 93 % tas-56 pagament eżaminat (3 pagamenti akkont bil-quddiem u 53 pagament finali) irriżultaw eżenti minn żbalji materjali,

E.

billi, konformement mal-proċedura abitwali, intbagħat kwestjonarju lill-amministrazzjoni tal-Parlament u t-tweġibiet waslu lura u ġew diskussi mill-Kumitat għall-Kontroll tal-Baġit, fil-preżenza tal-Viċi President responsabbli mill-Baġit u tas-Segretarju Ġenerali kif ukoll tal-Awditur Intern;

1.

Jenfasizza l-valur miżjud tal-proċedura parlamentari li twassal għall-kwittanza annwali tal-Parlament; itenni li l-kwittanza tal-Parlament toffri possibilità addizzjonali biex isir, pubblikament, eżami kritiku tal-ġestjoni finanzjarja tal-istituzzjoni, b’hekk iċ-ċittadini tal-Unjoni jiġu ffaċilitati biex jifhmu l-istruttura ta’ governanza partikolari tal-Parlament, il-metodi ta’ ħidma tiegħu u l-prezz ta’ Ewropa demokratika;

2.

Jitlob lill-Bureau jinkludi diskussjoni dwar ir-rapport tal-kwittanza bħala punt speċifiku tal-aġenda f’Mejju jew Ġunju, ftit wara li jkun ġie adottat mill-plenarja;

3.

Jenfasizza li l-kontroll huwa neċessarju biex jiġi garantit li l-amministrazzjoni tal-Parlament tinżamm responsabbli u li fid-dawl tal-interess kbir fost iċ-ċittadini tal-Unjoni u tal-opinjoni pubblika fil-proċedura ta’ kwittanza tal-Parlament, huwa essenzjali għall-Parlament jevita kwalunkwe riskju ta’ ġestjoni mtappna u għalhekk jopera b’mod kompletament trasparenti biex jiggarantizzi li ċ-ċittadini tal-Unjoni jingħataw stampa veritiera u preċiża tal-mod kif il-Parlament jużaw ir-riżorsi mpoġġija għad-dispożizzjoni tiegħu;

4.

Ifakkar li billi l-Parlament huwa l-awtorità responsabbli għall-ħruġ tad-deċiżjoni finali dwar il-kwittanza, huwa tal-akbar importanza li l-proċedura titmexxa b’manjiera eżemplari fil-każ tal-Parlament, u li huwa neċessarju għalhekk li jiġi evitat anki l-iċken nuqqas li jaf itebba’ r-riżultati politiċi li kisbet l-istituzzjoni demokratika tal-Ewropa u l-isforzi tagħha biex tilħaq aktar trasparenza u ġestjoni finanzjarja aktar soda;

5.

Jindika li din ir-riżoluzzjoni tibqa’ prinċipalment ikkonċentrata fuq l-implimentazzjoni tal-baġit u fuq il-kwittanza tiegħu għas-sena finanzjarja 2011 u li l-objettiv ewlieni tagħha huwa dak li tiżgura li l-flus pubbliċi tal-kontribwenti jintużaw bl-aħjar mod possibbli filwaqt li tagħmel enfasi fuq fejn jista’ jsir titjib; jinkoraġġixxi lill-korpi responsabbli tal-Parlament ikomplu jtejbu, fil-livelli kollha possibbli, l-effiċjenza tal-xogħol ta’ kuljum tal-Parlament bil-għan li liċ-ċittadini tal-Unjoni jingħataw dejjem servizz aħjar;

6.

Josserva b’sodisfazzjon il-kwalità tal-iskambju ta’ opinjonijiet bejn il-Viċi President responsabbli mill-Baġit, is-Segretarju Ġenerali u l-Kumitat għall-Kontroll tal-Baġit fit-22 ta’ Jannar 2013 fil-kuntest tal-kwittanza tal-Parlament tal-2011; itenni li l-amministrazzjoni tal-Parlament tinżamm responsabbli matul l-proċedura kollha u li r-rapporti ta’ kwittanza dwar l-implimentazzjoni tal-baġit tal-Parlament u l-attivitajiet tal-Kumitat għall-Kontroll Baġitarju matul dawn l-aħħar għaxar snin żvolġew rwol importanti u ġabu żviluppi ferm pożittivi fil-ġestjoni finanzjarja tal-Parlament, bħall-istatut tal-Membri u dak tal-assistenti huwa determinat ikompli din l-evoluzzjoni promettenti lejn l-eċċellenza u t-trasparenza fil-ġestjoni finanzjarja pubblika;

7.

Itenni l-proposta tiegħu li l-Bureau għandu jiċċirkola aktar “White Papers” dwar punti tal-politika ta’ interess ġenerali lill-Membri kollha, biex dawn ikunu jistgħu jiġu diskussi bir-reqqa fi ħdan il-gruppi politiċi qabel ma tittieħed deċiżjoni finali;

8.

Jilqa’ favorevolment il-fatt li, fit-22 ta’ Settembru 2011, ir-rappreżentanti tal-Bureau u tal-Kumitat għall-Baġits laħqu ftehim dwar miżuri ta’ tfaddil addizzjonali li sussgwentement ġew inkorporati fil-baġit 2012 tal-Parlament; huwa ferm konvint li dawk il-miżuri ta’ tfaddil intelliġenti li jammontaw għal kważi EUR 40 000 000 ma jolqtu la l-effiċjenza tal-attivitajiet tal-Parlament u lanqas ir-riżorsi għad-dispożizzjoni ta’ kull Membru; jistieden lis-Segretarju Ġenerali jżomm informati lill-Kunsill u lill-Kummissjoni dwar ir-riżultati li jikseb il-Parlament u, għal dan il-għan, jikseb informazzjoni dwar azzjonijiethom tagħhom u jitlob li jkun informat bit-tweġibiet irċevuti; jindika, madankollu, li t-tfaddil għandu jsir billi jintefqu inqas flus, u mhux permezz ta’ pagamenti qabel jew wara, jew trasferimenti bejn il-baġits;

9.

Ifakkar lill-President u lis-Segretarju Ġenerali fir-riżoluzzjoni tiegħu tas-6 ta’ Frar 2013 (11), li fiha l-Parlament “ifakkar fid-deċiżjoni adottata fil-plenarja li l-Kunsill jippreżenta pjan direzzjonali sa Ġunju 2013 dwar il-postijiet tax-xogħol multipli tal-PE u jistenna li ż-żewġ kumitati kkonċernati, is-Segretarju Ġenerali u l-Bureau jipprovdu lill-Membri b’ċifri u informazzjoni aġġornati dwar l-impatt ambjentali u finanzjarju tal-arranġament ta’ postijiet tax-xogħol multipli; jissuġġerixxi li s-servizzi tal-PE għall-valutazzjoni tal-impatt jeżaminaw din il-kwistjoni, inkluż fir-rigward tal-impatt tal-preżenza jew tal-preżenza parzjali tal-PE fuq il-komunitajiet u r-reġjuni rispettivi u jippreżentaw valutazzjoni sa Ġunju 2013 biex il-konklużjonijiet tagħhom jitqiesu fil-kuntest tal-QFP li jmiss”; jindika li Ġunju 2013 qorob ħafna;

10.

Jinnota li l-Parlament hu marbut permezz tat-Trattat li jaħdem minn tliet postijiet tax-xogħol u dan jinvolvi spejjeż addizzjonali; jinnota wkoll li kwalunkwe bidla ta’ din is-sitwazzjoni mhix f’idejn il-Parlament iżda f’idejn l-Istati Membri; iħeġġeġ, għaldaqstant, lill-Istati Membri jirrevedu l-kwistjoni tas-sede u l-postijiet tax-xogħol tal-Parlament fir-rieżami li jmiss tat-Trattat billi jemendaw il-Protokoll 6;

11.

Josserva li r-Regolament Finanzjarju l-ġdid (Regolament (UE, Euratom) Nru 966/2012) u r-Regoli ta’ Applikazzjoni tiegħu daħlu fis-seħħ fl-1 ta’ Jannar 2013 u ġabu magħhom tibdil kbir fil-ġestjoni finanzjarja, partikolarment billi żguraw ġestjoni finanzjarja tajba aktar soda kif ukoll il-ħarsien tal-interessi finanzjarji tal-Unjoni, introduċew mekkaniżmi finanzjarji li jippermettu l-mobilizzazzjoni ta’ fondi terzi bħala ingranaġġ fuq il-fondi tal-Unjoni u naqqsu l-burokrazija, filwaqt li ressqu l-attenzjoni mill-formalitajiet amministrattivi għar-riżultati; jinkoraġġixxi lis-servizzi tal-Parlament, bħal fir-reviżjonijiet tal-imgħoddi tar-Regolament Finanzjarju, jimplimentaw dawk ir-regoli mingħajr dewmien u b’impatt negattiv kemm jista’ jkun minimu fuq l-amministrazzjoni tal-Parlament; jixtieq ikun informat, qabel tinbeda l-proċedura ta’ kwittanza 2012, jekk ir-Regolament Finanzjarju l-ġdid wassalx għal tnaqqis fl-għadd ta’ persunal meħtieġ għall-ġestjoni finanzjarja;

12.

Jilqa’ pożittivament il-Kodiċi ta’ Kondotta l-ġdid għall-Membri tal-Parlament Ewropew fir-rigward tal-interessi finanzjarji u l-kunflitti ta’ interess adottati mill-plenarja tiegħu tal-1 ta’ Diċembru 2011; josserva li l-Membri huma meħtieġa jikkomunikaw integralment kull attività rimunerata barra mill-Parlament, ir-rimunerazzjoni li jaqalgħu, u kwalunkwe funzjoni oħra li jaqdu li tista’ tagħti lok għal kunflitti ta’ interess; ikompli josserva li l-kodiċi jipprojbixxi espressament lill-Membri milli jaċċettaw kwalunkwe somma ta’ flus jew rigal ieħor talli jinfluwenzaw id-deċiżjonijiet tal-Parlament; josserva b’sodisfazzjon li jistabbilixxi regoli ċari dwar l-aċċettazzjoni ta’ rigali u dwar ex Membri li jinvolvu ruħhom fl-attivitajiet ta’ lobbying; jistenna li r-regoli ta’ implimentazzjoni se jiġu komunikati lill-Membri b’mod adegwat, u li d-dikjarazzjonijiet se jiġu vverifikati abbażi ta’ kampjun;

13.

Jinsab imħasseb dwar il-fatt li, sena wara d-dħul fis-seħħ tal-Kodiċi ta’ Kondotta, il-miżuri ta’ implimentazzjoni fir-rigward tal-Artikolu 5(3) – biex tkun żgurata trasparenza fir-rigward ta’ spejjeż tal-ivvjaġġar, alloġġ u sussistenza mħallsa minn terzi — għadhom ma ġewx adottati; jindika li huwa imperattiv li l-miżuri ta’ implimentazzjoni jiġu adottati malajr; jemmen bis-sħiħ li l-ispejjeż ta’ terzi tal-ivvjaġġar, alloġġ u sussistenza li jammontaw għal EUR 150 jew aktar iridu jiġu divulgati;

14.

Jistieden lill-amministrazzjoni tal-Parlament tippubblika d-dikjarazzjonijiet kollha tal-interessi finanzjarji tal-Membri Parlamentari, sena b’sena, u f’forma li tista’ tinqara b’magna, fit-taqsima tal-profil tal-Membri Parlamentari tas-sit tal-Parlament;

15.

Josserva l-pubblikazzjoni ta’ rapport soċjali, li jagħti tagħrif ta’ siwi dwar ir-riżorsi umani tal-Parlament; jitlob li r-rapport tal-2012 ikun ippubblikat qabel l-aħħar ta’ Settembru 2013; jikkonstata wkoll li bejn l-2010 u l-2011 l-organigramma tal-Parlament irreġistra żieda ta’ 4 % prinċipalment minħabba r-responsabilitajiet ġodda u l-ammont ta’ xogħol akbar minħabba t-Trattat ta’ Lisbona u l-adeżjoni prevista tal-Kroazja mal-Unjoni;

16.

Jitlob li korsijiet għat-taħriġ tal-persunal, u korsijiet intensivi tal-lingwa b’mod partikolari, jitfasslu b’mod li jirrifletti b’mod aktar effikaċi l-iskeda tax-xogħol tad-diversi tipi ta’ persunal tal-Parlament, inklużi l-assistenti parlamentati akkreditati;

17.

Jirrakkomanda li jingħata segwitu għar-rakkomandazzjoni tal-Qorti tal-Awdituri biex jiġi garantit li t-tibdil fis-sitwazzjoni tal-persunal jiġi reġistrat f’waqtu u tiġi implimentata sistema għall-monitoraġġ f’waqtu ta’ dik l-informazzjoni;

18.

Ifakkar li l-2011 kienet it-tieni sena sħiħa li fiha l-Istatut il-ġdid tal-Membri u l-Istatut tal-Assistenti kien fis-seħħ (it-tnejn applikabbli mill-14 ta’ Lulju 2009); josserva li l-Miżuri ta’ Implimentazzjoni għall-Istatut tal-Assistenti ġew emendati erba’ darbiet f’dawk is-sentejn għall-applikazzjoni tat-Titolu VII tal-Kondizzjonijiet tal-Impjieg applikabbli għall-aġenti l-oħra tal-Unjoni Ewropea (CEOS) u l-Miżuri ta’ Implimentazzjoni abbażi tal-proposti tal-Grupp Temporanju ta’ Evalwazzjoni u tas-Segretarju Ġenerali; ifakkar li l-implimentazzjoni tat-Titolu VII tas-CEOS ħolqot skema unika li tirregola l-istatus tal-assistenti parlamentari akkreditati (APA) li jaħdmu fit-tliet postijiet tax-xogħol tal-Parlament, li ssostitwiet is-sebgħa u għoxrin sistema nazzjonali differenti fil-qasam tar-relazzjoni kuntattwali, tassazzjoni u sigurtà soċjali u li attwalment ma hemm l-ebda element li jissuġġerixxi bżonn ta’ adattament tar-regoli applikabbli għall-assistenti parlamentari msemmija fl-ambitu tat-Titolu VII tas-CEOS; jissuġerixxi li ssir evalwazzjoni kompluta tal-Istatut tal-Assistenti, inklużi adattamenti potenzjali għar-regoli qabel l-elezzjonijiet Ewropej li ġejjin;

19.

Josserva li fl-2011 il-Parlament irċieva dħul li ammonta għal EUR 173 293 432 (EUR 243 094 204 fl-2010) li inkluda EUR 23 815 077 fi dħul assenjat;

20.

Jikkonstata li ċ-ċifri ta’ għeluq tal-kontijiet tal-Parlament għas-sena finanzjarja 2011 huma ppreżentati kif ġej:

21.

Josserva li l-approprjazzjonijiet awtorizzati fil-baġit inizjali tal-Parlament għall-2011 kienu jammontaw għal EUR 1 685 829 393, li jirrappreżentaw żieda ta’ 5 % mill-baġit tal-2010 (EUR 1 607 363 235), u li fl-2011, bil-kontra tal-2010, l-ebda baġit emendatorju ma kien ippreżentat;

22.

Jikkonstata li fl-2011 ġie impenjat 93 % (96 % fl-2010) tal-approprjazzjonijiet definittivi, b’rata ta’ kanċellazzjoni ugwali għal 6 % (3 % fl-2010), u li, bħal fis-snin preċedenti, intlaħaq livell għoli ta’ implimentazzjoni tal-baġit; josserva wkoll iż-żieda rapida fl-approprjazzjonijiet kanċellati, dovuta, primarjament, għan-nuqqas ta’ ħlas, fl-2011, tal-aġġustament salarjali annwali lill-persunal ta’ 1,7 %, b’segwitu għad-deċiżjoni rilevanti tal-Kunsill;

23.

Jinsab imħasseb dwar iż-żieda sinifikanti ta’ riporti lejn l-2011 (EUR 240 268 630 (13)) u jitlob ippjanar aħjar tan-nefqa; jistieden lill-amministrazzjoni tinverti din it-tendenza fil-prospettiva tal-elezzjonijiet Ewropej futuri;

24.

Josserva li l-baġit tal-Unjoni għall-2011 ammonta għal EUR 141,9 biljun f’approprjazzjonijiet ta’ impenn, li minnhom EUR 1 686 miljun għall-baġit tal-Parlament; ikompli josserva li din iċ-ċifra hija ftit ‘il fuq minn 1 % tal-baġit tal-Unjoni u tirrappreżenta 20 % tal-ammont ta’ EUR 8 454 miljun iddestinati għan-nefqa amministrattiva tal-istituzzjonijiet tal-Unjoni fit-totalità tagħhom għall-2011, konformement mal-Ftehim Interistituzzjonali bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-ġestjoni finanzjarja tajba;

25.

Japprezza l-fatt li ma sar l-ebda trasferiment ta’ tlaqqit (mopping-up transfer) bejn l-2011 u l-2012; jerġa’ jistieden lill-amministrazzjoni tiegħu ssegwi l-objettiv ta’ ppjanar u dixxiplina baġitarji aħjar u iktar ċari u li, fl-interessi taċ-ċarezza baġitarja, in-nefqa fuq il-bini, jew kwalunkwe nefqa oħra ta’ entità analoga, tiddaħħal individwalment fil-baġit pjuttost milli tkun iffinanzjata permezz ta’ ammonti mhux użati;

26.

Josserva li, fl-2011, l-erba’ intestaturi ewlenin tal-baġit tal-Parlament kienu “uffiċjali u persunal temporanju”, “bini u nefqiet relatati”, “Membri” u “nefqa relatata mal-assistenza parlamentari”, li jirrappreżentaw 70 % tal-impenji totali;

27.

Ifakkar li l-ammont ta’ EUR 85,9 miljun imħallas lura mill-Belġju lill-Parlament fil-bidu tal-2010 u allokat għal proġetti ta’ bini għandu jitqies bħala dħul assenjat estern fl-ambitu tal-Artikolu 21 tar-Regolament Finanzjarju;

28.

Josserva li, fiċ-ċertifikazzjoni tiegħu tal-kontijiet definittivi, l-uffiċjal tal-kontabilità tal-Parlament iddikjara l-assigurazzjoni raġonevoli tiegħu li l-kontijiet jippreżentaw stampa vera u ġusta tal-pożizzjoni finanzjarja tal-Parlament fl-aspetti materjali kollha; josserva wkoll id-dikjarazzjoni tiegħu li skont din ma waslet għall-attenzjoni tiegħu l-ebda kwistjoni li dwarha jesprimi riżerva;

29.

Ifakkar fid-deċiżjoni tal-President tiegħu fil-11 ta’ Lulju 2012 dwar l-adozzjoni tal-kontijiet għas-sena finanzjarja 2011;

30.

Jilqa’ pożittivament id-dikjarazzjoni tas-Segretarju Ġenerali, iddatata l-24 ta’ April 2012, fil-kapaċità tiegħu ta’ Uffiċjal Awtorizzanti Prinċipali b’Delega, dwar ir-rapporti annwali tal-attività tal-uffiċjali awtorizzanti għall-2011, li fiha jiċċertifika li għandu assigurazzjoni raġonevoli li l-baġit tal-Parlament ġie implimentat skont il-prinċipji tal-ġestjoni finanzjarja tajba u li l-qafas ta’ kontroll stabbilit joffri l-garanziji neċessarji dwar il-legalità u r-regolarità tal-operazzjonijiet li jaqgħu taħtu;

31.

Jilqa’ pożittivament il-fatt li l-awditjar tal-Qorti tal-Awdituri sab li s-sistemi ta’ superviżjoni u ta’ kontroll tan-nefqa amministrattiva kollha kemm hi, meħtieġa mir-Regolament Finanzjarju, kienu effikaċi u li l-pagamenti tan-nefqa amministrattiva fl-2011 ma kienx fihom żbalji materjali;

32.

Jieħu nota tal-konstatazzjoni speċifika dwar il-Parlament li tinsab fir-rapporti annwali tal-Qorti tal-Awdituri għall-2011, kif ukoll it-tweġibiet tal-Parlament, dwar l-informazzjoni għad-dispożizzjoni tas-servizzi tal-Parlament dwar is-sitwazzjoni personali u familjari tal-membri tal-persunal li ma kinitx aġġornata jew ipproċessata korrettament u li f’wieħed minn fost dawn il-każijiet, wasslet għal ħlas eċċessiv; jieħu nota li f’dak il-każ l-irkupru tal-ammonti mħallsa b’eċċess beda f’Novembru 2011, u t-tnaqqis sar mill-paga tal-membru tal-persunal ikkonċernat; jinkoraġġixxi, madankollu, kontrolli aktar rigorużi biex bil-għan li jiġi evitat il-ħlas eċċessiv fil-futur;

33.

Jieħu nota, barra minn hekk, li skont r-regoli interni għall-impjieg ta’ APA, dawn tal-aħħar jitħallew jippreżentaw ċertifikat mediku u dokumenti oħrajn meħtieġa għall-istipulazzjoni ta’ kuntratti fi żmien tliet xhur wara d-data li fiha jiddekorri l-kuntratt għar-reklutaġġ inizjali tagħhom, u li billi din id-deroga tikkontradixxi d-dispożizzjonijiet stabbiliti fl-Artikoli 128 u 129 tas-CEOS, tali artikoli għandhom isiru konformi mar-regoli applikabbli għall-assistenti akkreditati; jieħu wkoll nota li, fir-rigward tar-rispett tar-rekwiżiti li jikkonċernaw l-għarfien lingwistiku, fl-ebda wieħed mill-għaxar każijiet suġġetti għall-awditjar ma kien hemm fajls b’dokumenti li juru li kienu twettqu kontrolli ta’ tali rekwiżit;

34.

Jappoġġa t-tweġibiet mogħtija mill-Parlament fil-proċedura kontradittorja mal-Qorti tal-Awdituri;

35.

Josserva l-konstatazzjoni tal-Qorti tal-Awdituri skont liema, fil-proċeduri ta’ reklutaġġ tal-APA li ġew suġġetti għal awditjar, il-fajl ma kien fih l-ebda dokument li juri li kienu ġew eżegwiti kontrolli ex-ante fuq id-dokumenti ta’ reklutaġġ; josserva t-tweġiba tas-servizzi rilevanti tal-Parlament li, wara r-reviżjoni tal-listi ta’ kontrolli u l-introduzzjoni tal-kontroverifiki, id-dokumentazzjoni relatata ma’ dawk il-verifiki issa qiegħda tinżamm;

36.

Jiddispjaċih li l-Qorti tal-Awdituri sabet dgħufijiet fl-applikazzjoni tal-kriterji ta’ selezzjoni u ta’ aġġudikazzjoni fir-rigward ta’ żewġ proċeduri ta’ akkwist tal-Parlament mill-10 sottoposti għall-awditjar relatati mal-manutenzjoni tal-bini u mas-servizzi tal-istampar; jistieden għal darb’oħra lill-Bureau jerġa’ jeżamina l-mekkaniżmi ta’ kontroll kollha għall-akkwist pubbliku bil-għan li jiggarantixxi l-aktar prezzijiet kompetittivi għall-beni u s-servizzi offruti;

37.

Jiddispjaċih dwar il-fatt li, minħabba tnaqqis fil-piż amministrattiv għal kuntratti ta’ valur baxx, bil-għan li tiżdied il-parteċipazzjoni fl-appalti tal-SMEs, l-amministrazzjoni ma għandhiex l-għadd ta’ SMEs li ħadu kuntratti ta’ valur baxx; għaldaqstant is-Segretarjat Ġenerali ma setax juri jekk it-tnaqqis fil-piż amminstrattiv fil-fatt wassalx għal żieda fil-parteċipazzjoni tal-SMEs u għaldaqstant l-effikaċja tal-miżuri meħuda; jitlob li jiġi monitorjat l-għadd ta’ SMEs li ħadu kuntratti ta’ valur baxx;

38.

Josserva li, fil-laqgħa tal-kumitat kompetenti tat-22 ta’ Jannar 2013 mal-Awditur Intern, dan tal-aħħar ippreżenta r-rapport annwali tiegħu ffirmat fis-26 ta’ Lulju 2012 li fih indika li, fl-2011, wettaq l-eżerċizzju ta’ awditjar li ġej fuq l-amministrazzjoni tal-Parlament:

39.

Jindika li fost l-aktar konklużjonijiet sinifikanti stabbiliti fir-rapport annwali tal-Awditur Intern insibu dawn l-aspetti li ġejjin:

40.

Josserva u jsostni l-opinjonijiet espressi mill-Awditur Intern dwar:

41.

Ifakkar li fl-2003 u fl-2004 r-rieżami oriġinali tal-Qafas ta’ Kontroll Intern ta lok għal 14-il rapport ta’ awditjar li koprew id-dipartimenti kollha u s-servizzi ċentrali u li kien fihom 452 azzjoni maqbula mmirati għat-titjib tal-livelli kumplessivi ta’:

42.

Ifakkar li saru eżerċizzji ta’ awditjar ta’ kontroll fuq l-implimentazzjoni ta’ 452 azzjoni fl-2005/2006 u fl-2007/2008 u, f’servizz minnhom b’perċentwal għoli ta’ azzjonijiet pendenti, anki fl-2009; jenfasizza li r-riżultat ta’ din is-sensiela ta’ eżerċizzji ta’ awditjar kien il-fatt li fi tmiem l-2010 għadhom pendenti 68 azzjoni tar-rieżami oriġinali tal-Qafas ta’ Kontroll Intern;

43.

Josserva b’sodisfazzjon li s-Servizz tal-Awditjar Intern għadu jagħti prijorità lir-rieżami tal-Qafas ta’ Kontroll Intern li beda fl-2003; jieħu nota tal-fatt li, mit-30 ta’ Settembru 2011, wara eżerċizzji ta’ awditjar ta’ kontroll suċċessivi, baqgħu inkompluti 38 azzjoni minn 452 azzjoni inizjalment maqbula; jilqa’ pożittivament il-fatt li l-ebda waħda minn dawn l-azzjonijiet ma hija kklassifikata bħala kritika mis-Servizz tal-Awditjar Intern; jistieden lit-tmexxija dipartimentali u ċentrali jimplimentaw it-38 azzjoni pendenti skaduti li baqa’ qabel it-tmiem tal-leġislatura attwali;

44.

Jilqa’ favorevolment il-fatt li, f’Ġunju 2011, impriża ta’ reviżuri esterni ċċertifikat li s-Servizz tal-Awditjar Intern tal-Parlament jirrispetta d-definizzjoni ta’ Awditjar Intern, b’Kodiċi ta’ Kondotta u Standards u li dan jirrappreżenta l-ogħla livell ta’ konformità; jinkoraġġixxi s-Servizz tal-Awditjar Intern jibni fuq il-pedamenti tajbin diġà eżistenti u jkompli jallinja s-Servizz tal-Awditjar Intern mal-aqwa prassi; jirrikonoxxi li matul it-tieni nofs tal-2011, is-Servizz tal-Awditjar Intern diġà implimenta bosta elementi importanti tas-suġġerimenti ta’ titjib li waslulu u li l-pjan ta’ azzjoni li fadal kien se jiġi eżegwit matul il-perjodu sa tmiem l-2012;

45.

Jenfasizza li konformement mal-politiki ta’ trasparenza fil-konfront taċ-ċittadini tal-Unjoni għandha tkun disponibbli wara ċertu ammont ta’ żmien fuq is-sit tal-Parlament sommarju tan-numru u t-tip ta’ eżerċizzji ta’ awditjar intern imwettqa, ir-rakkomandazzjonijiet magħmula u l-azzjoni meħuda fuq dawk ir-rakkomandazzjonijiet; jixtieq jiġi infurmat dwar liema minn dawn id-dokumenti għadhom mhumiex disponibbli għall-pubbliku, u r-raġunijiet għal dan;

46.

Jilqa’ favorevolment it-tweġibiet bil-miktub għar-riżoluzzjoni dwar il-kwittanza tal-2010 mibgħuta lill-Kumitat għall-Kontroll tal-Baġit fis-16 ta’ Novembru 2012; jiddispjaċih madankollu li ma kienx possibbli li dawk it-tweġibiet jaslu qabel il-bidu tal-eżerċizzju tal-kwittanza tal-2011; jistenna li, għall-eżerċizzju tal-kwittanza tal-2012, ikun possibbli li jsir skambju ta’ opinjonijiet bejn is-Segretarju Ġenerali u l-Kumitat għall-Kontroll tal-Baġit qabel it-tmiem ta’ Ottubru 2013;

47.

Japprezza d-deċiżjoni formali dwar l-interruzzjoni tal-Premju għall-Ġurnaliżmu li fl-2011 kien jirrappreżenta nefqa ta’ EUR 154 205 kif ippropona l-Kumitat għall-Kontroll tal-Baġit u vvotat fil-plenarja fir-rapport dwar il-kwittanza tal-2010; jirrikonoxxi li ssaħħew il-kuntatti mal-ġurnalisti fl-Istati Membri bis-saħħa tal-organizzazzjoni ta’ seminars tematiċi fl-ibliet kapitali, b’hekk ġiet sfruttata l-kapaċità amministrattiva eżistenti tal-Parlament, filwaqt li l-ġurnalisti ngħataw l-opportunità jiskambjaw l-opinjonijiet mal-Membri u jifhmu bis-sħiħ l-istruttura tal-Parlament u r-rwol tiegħu fil-proċess leġiżlattiv;

48.

Jitlob, għat-tieni darba wara kienet saret l-ewwel talba marbuta mal-proċedura ta’ kwittanza tal-2010, rapport komplut dwar kif żviluppaw il-proġetti ta’ Free Software fir-rigward tal-użu u l-utenti fil-Parlament, l-interazzjoni maċ-ċittadini u l-attivitajiet ta’ akkwist; jistieden, għat-tieni darba, biex jiġu investigati fi studju komplut, l-obbligi tal-Parlament skont l-Artikolu 103 tar-Regoli ta’ Proċedura fir-rigward ta’ Free Software u Open Standards; jiddispjaċih li s-soluzzjonijiet Free Software u Open Source ma jintużawx b’mod aktar mifrux fl-infrastrutturi tal-IT tal-Parlament.

49.

Josserva t-tweġiba tas-Segretarju Ġenerali li tindika li l-allowances tal-Parlament koprew 1 599 kuntratt ta’ assistenti akkreditati u 2 868 kuntratt ta’ assistenti lokali fl-2011;

50.

Jenfasizza l-kwalità eċċellenti tas-servizzi ta’ interpretazzjoni u ta’ traduzzjoni tal-Parlament; josserva li dawn ikomplu jikkostitwixxu parti konsiderevoli tal-baġit tal-Parlament; josserva li d-deċiżjoni dwar il-“Multilingwiżmu integrali mal-użu effiċjenti tar-riżorsi tas-servizz ta’ interpretazzjoni”, adottata mill-Bureau fl-2011, iżżid l-effiċjenza tas-servizzi ta’ interpretazzjoni u tnaqqas il-kostijiet strutturali; jistieden lill-Parlament jippreżenta dokument dettaljat dwar l-istruttura tal-kostijiet tat-traduzzjoni u tal-interpretazzjoni u miżuri biex jitnaqqsu aktar dawn il-kostijiet u biex titjieb l-effiċjenza tas-servizzi, mingħajr ma tiġi mittiefsal-kwalità ġenerali;

51.

Josserva li 192 membru tal-persunal jirrappurtaw lid-Diretturi Ġenerali mingħajr ma jirrappurtaw għand Direttur; jitlob lis-Segretarju Ġenerali jirrevedi din is-sitwazzjoni biex ikun żgurat li ma jkunux qed jinħolqu “kabinetti” mhux uffiċjali għad-Diretturi Ġenerali; jitlob lis-Segretarju Ġenerali biex fir-rieżami jinkludi valutazzjoni tal-gradi, tas-setgħat u tal-kompetenzi ta’ dawn il-membri tal-persunal;

52.

Josserva li d-Diretturi Ġenerali jagħtu kont annwalment dwar il-qadi ta’ dmirijiethom f’rapporti ta’ attività li jikkostitwixxu strument ta’ ġestjoni interna li l-iskop primarju tiegħu huwa dak li lis-Segretarju Ġenerali tingħtalu stampa ġenerali ċara ta’ ħidmet l-amministrazzjoni, u partikolarment ta’ kwalunkwe dgħufija; josserva li, fir-rigward tar-rapporti annwali ta’ attività relatati mas-sena finanzjarja 2011, l-ebda uffiċjal awtorizzanti ma inkluda riżervi fid-dikjarazzjonijiet tiegħu dwar l-identifikazzjoni, min-naħa tad-diretturi ġenerali, ta’ problemi sinifikanti marbuta mal-mod ta’ kif jintużaw ir-riżorsi jew dwar in-nuqqas ta’ proċeduri ta’ kontroll biex jiġu garantiti l-legalità u r-regolarità tal-operazzjonijiet;

53.

Jindika li r-rapport ta’ attività tad-Direttorati Ġenerali jinkludi, f’anness, lista ta’ eċċezzjonijiet, li tispeċifika d-derogi mir-regolamenti applikabbli u mill-proċeduri standard; jesprimi tħassib dwar il-fatt li, għal uħud mid-Direttorati, l-għadd ta’ tali eċċezzjonijiet għadu għoli u jipproponi li jsir aktar sforz biex jiġi evitat rikors għal dan l-espedjent ħalli jitranġaw is-sitwazzjonijiet anomali;

54.

Japprezza l-impenn tad-DĠ Presidenza favur it-tkomplija tat-titjib fil-ġestjoni finanzjarja permezz tal-eżami bir-reqqa tad-diversi aspetti tal-implimentazzjoni tal-baġit u tal-proċeduri assoċjati; jinnota b’mod partikolari l-isforzi li saru fil-qasam tas-sensibilizzazzjoni tal-persunal fir-rigward tal-proċeduri ta’ akkwist u tal-operazzjonijiet baġitarji;

55.

Itenni li l-qasam tas-sigurtà huwa settur sensittiv ħafna fi kwalunkwe Parlament, imma saħansitra aktar f’Parlament multinazzjonali b’viżibilità għolja u bi żjarat kostanti minn Kapijiet ta’ Stat u ta’ gvern; josserva li l-preżenza medja kuljum fir-reċinti tal-Parlament fi Brussell hija 12 000;

56.

Jieħu nota tal-adozzjoni mill-Bureau, b’unanimità, tal-“Kunċett ta’ Sigurtà Globali Ġdid” fis-6 ta’ Lulju 2011 li jinkludi l-idea li d-diversi punti ta’ dħul għall-Parlament jiġu riżervati għall-kategoriji differenti ta’ utenti; jitlob li jkun informat dwar l-implimentazzjoni tal-“Kunċett ta’ Sigurtà Globali Ġdid” sa tmiem l-2013;

57.

Josserva li l-Parlament jistenna li l-internalizzazzjoni tas-servizzi ta’ sigurtà se tnaqqas l-ispejjeż fi Brussell u fi Strasburgu b’EUR 11 250 000 fil-perjodu bejn 2013 u l-2016 u b’EUR 5 640 000 għal kull sena sussegwenti; jitlob li jiġu garantiti l-introduzzjoni u ż-żamma tal-ogħla standards għal sigurtà mmirata permezz ta’ programm ta’ taħriġ kontinwu; jitlob li jsir rapport annwali li jkun fih informazzjoni dettaljata dwar l-iżvilupp tal-kostijiet tas-servizz tas-sigurtà, inklużi ż-żieda tal-kostijiet għall-pensjonijiet tal-persunal impjegat f’dawn is-servizzi, u dwar il-miżuri meħuda biex ikunu żgurati l-portata u l-kwalità tas-servizz;

58.

Itenni x-xewqa tiegħu li, bil-għan li tiżdied is-sigurtà, il-Membri jkunu suġġetti għal kontroll elettroniku meta jidħlu fir-reċinti tal-Parlament jew meta joħorġu minnhom;

59.

Jitlob li jirċievi informazzjoni mingħand is-Segretarju Ġenerali dwar il-proċedura li għandha tiġi segwita dwar l-evalwazzjoni tar-reġistru konġunt ta’ trasparenza, prevista fl-2013, skont il-ftehim interistituzzjonali milħuq fl-2011;

60.

Josserva li aktar minn 1 500 membru tal-persunal għandhom ulied iskritti l-Iskejjel Ewropej, u għaldaqstant jinsab sorpriż bil-fatt li sar jaf li l-Parlament ma jiżvolġi l-ebda rwol fil-governanza tas-sistema tal-Iskejjel Ewropej;

61.

Jistieden lis-Segretarju Ġenerali jistudja liema rwol jista’ jkollu l-Parlament fil-governanza tas-sistema tal-Iskejjel Ewropej, minħabba l-għadd kbir ta’ membri tal-persunal li jiddependu fuqhom għall-edukazzjoni ta’ wliedhom, u jirreferi lill-kumitat repsonsabbli qabel tmiem is-sena;

62.

Jieħu nota tal-fatt li l-kuntratt mal-aġenzija tal-ivvjaġġar attwali se jiskadi fil-31 ta’ Diċembru 2013 u li bdew il-preparamenti għal sejħa għal offerti ġdida; jiddispjaċih bil-fatt li, filwaqt li l-kuntratt jipprevedi l-possibilità ta’ awditjar finanzjarju, dan ma kienx il-każ għal awditjar tal-istruttura u tar-rendiment tal-aġenzija tal-ivvjaġġar; jinsisti biex il-kuntratt futur jinkludi l-possibilità ta’ awditjar finanzjarju intermedju u finali fil-qasam finanzjarju u tar-rendiment; japprezza l-fatt, kif mitlub mill-Kumitat għall-Kontroll tal-Baġit, li l-amministrazzjoni se jkollha wkoll rikors għall-kompetenzi esterni hija u tistabbilixxi d-dokumentazzjoni tal-offerta u matul il-proċedura ta’ selezzjoni, b’hekk jiġi garantit li l-Parlament jagħżel l-aħjar soluzzjoni li tirriżulta f’semplifikazzjonijiet u ffrankar importanti tal-ispejjeż; jisħaq fuq il-fatt li l-kuntratt il-ġdid għandu jqis l-aqwa proporzjon bejn il-kwalità u l-prezz u l-aħjar valur għall-flus bi prezzijiet kompetittivi;

63.

Jilqa’ pożittivament l-fatt li l-Bureau, fit-23 ta’ Marzu 2011, iffinalizza Pjan ta’ Azzjoni għall-perjodu 2011-2014 bl-għan li jimplimenta l-Istrateġija ta’ Komunikazzjoni aġġornata tal-Parlament; josserva li l-Pjan ta’ Azzjoni jikkonċentra fuq l-elezzjonijiet parlamentari tal-2014 u li jiddefinixxi sensiela ta’ 21 attività speċifika biex ikunu sensibilizzati ċ-ċittadini dwar l-attività leġiżlattiva tal-Parlament, u biex titħeġġeġ il-parteċipazzjoni tagħhom fiha;

64.

Jilqa’ pożittivament is-suċċess li wera ċ-ċentru tal-viżitaturi l-ġdid meta jitqies f’termini tal-għadd ta’ viżitaturi (253 000) li laqa’ fl-ewwel sena ta’ attività;

65.

Jinsisti fuq il-fatt li l-baġit iddestinat għall-komunikazzjoni għandu jintuża biss biex jagħti liċ-ċittadini informazzjoni fattwali dwar il-politiki tal-Unjoni; jenfasizza li dan japplika wkoll għall-attivitajiet dwar il-midja soċjali;

66.

Jiddispjaċih li l-pubbliku ta’ EuroparlTV, minkejja aktar numeruż fl-2011 meta mqabbel mal-2010 (14), għadu b’ċifri baxxi ħafna fil-każ ta’ utenti individwali diretti (esklużi l-aċċessi permezz ta’ ftehimiet ta’ sħubija ma’ stazzjonijiet televiżivi reġjonali) għadd li kien għadu jirċievi finanzjamenti notevoli fl-2011, li ammontaw għal kważi EUR 8 000 000 (partita 3 2 4 6); jiddispjaċih ukoll li ma saret l-ebda evalwazzjoni tal-kostijiet u tal-benefiċċji fir-rigward ta’ EuroparlTV, minkejja t-talba fformulata mill-Parlament fir-riżoluzzjoni tiegħu dwar il-kwittanza tal-2010; josserva d-deċiżjoni tal-Bureau tat-12 ta’ Diċembru 2012 biex tiġi implimentata sensiela ta’ riformi bil-għan li jinkiseb iffrankar sinifikanti; jistenna li tali evalwazzjoni tal-kostijiet u tal-benefiċċji tiġi preżentata qabel il-proċedura ta’ kwittanza 2012;

67.

Jesprimi tħassib bil-kost dejjem ikbar tal-Premju LUX fl-2011 (15); jitlob li l-ġestjoni ta’ dan il-premju tkun aktar effiċjenti mil-lat tal-kostijiet u jissuġġerixxi għaldaqstant li l-Awditur Intern jikkunsidra li jagħmel rieżami tal-amministrazzjoni tiegħu biex jinkiseb dan l-għan; jissuġerixxi bil-qawwi li limitu massimu evidenti għandu jitfassal għall-ispejjeż tal-avveniment;

68.

Josserva li l-pjan ta’ direzzjoni għad-Dar tal-Istorja Ewropea fi Brussell kien approvat mill-Bureau fis-26 ta’ Settembru 2011 u li l-Kummissjoni esprimiet id-disponibilità tagħha li tagħti kontribut mhux speċifikat fil-kostijiet operattivi tal-proġett u se tikkomunika lill-Parlament qabel l-aħħar tas-sajf 2013 it-termini ta’ tali kontribut; jiddispjaċih li l-ebda kontribut mhu mistenni mill-Kummissjoni għall-kostijiet tal-bidu tal-proġett;

69.

Japprezza l-proċedura l-ġdida li tippermetti l-irkupru ta’ pagamenti żejda wara pagamenti għall-akkoljenza ta’ gruppi ta’ viżitaturi; iqis li hi ħasra li l-possibilità ta’ pagament permezz ta’ trasferiment bankarju hi disponibbli biss għal kontijiet personali, u mhux għal trasferimenti fil-kontijiet tal-organizzazzjonijiet; jinsab imħasseb dwar ir-riskju sinifikanti għas-sigurtà marbuta mal-pagamenti bi flus kontanti lill-gruppi ta’ viżitaturi, għal ammonti li jistgħu anki jkunu aktar minn EUR 30 000, billi l-Parlament jista’ jqassam sa EUR 388 000 f’ġurnata waħda; jindika li d-Direttiva 2005/60/KE tal-Parlament Ewropew u tal-Kunsill tas-26 ta’ Ottubru 2005 dwar il-prevenzjoni tal-użu tas-sistema finanzjarja għall-iskop tal-ħasil tal-flus u l-finanzjament tat-terroriżmu (16) tirrikjedi li tittieħed attenzjoni fir-rigward ta’ tranżazzjonijiet li jinvolvu somom akbar minn EUR 15 000, ammont li regolarment jinqabeż fil-pagamenti tal-Parlament lill-viżitaturi;

70.

Jindika li f’Lulju 2011 inħoloq Direttorat ġdid għall-Valutazzjoni tal-Impatt fi ħdan id-DĠ IPOL, b’deċiżjoni tal-Bureau; josserva li l-objettiv ewlieni tad-Direttorat hu li jforni lill-Parlament valutazzjonijiet tal-impatt indipendenti biex jappoġġa l-attività leġiżlattiva tiegħu; jilqa’ b’sodisfazzjon il-fatt li l-ħolqien tad-Direttorat ma kellu l-ebda piż fil-baġit;

71.

Jitlob analiżi globali min-naħa ta’ korp indipendenti tal-ġestjoni finanzjarja tajba, tal-effikaċja u tal-effiċjenza tal-kuntratti konklużi mal-fornituri esterni tas-servizzi fil-qasam tat-teknoloġija tal-informazzjoni b’attenzjoni partikolari fuq:

72.

Jiddeplora d-dipendenza eċċessiva mill-kompetenzi (tekniċi) esterni, speċjalment fis-setturi tat-teknoloġija tal-informazzjoni, li tirriżulta minn żbilanċi strutturali bejn ir-riżorsi interni u esterni; jindika li l-esternalizzazzjoni tat-teknoloġija tal-informazzjoni għandha tiggarantixxi dejjem li l-ġestjoni u l-kontroll ta’ tali funzjoni jibqgħu f’idejn il-Parlament u li t-theddid għas-sigurtà u l-kunfidenzjalità tad-data jiġu valutati u mitigati kif imiss;

73.

Jistieden lis-Segretarju Ġenerali jippreżenta lill-Bureau pjan intiż li jittratta u jtejjeb is-servizz tal-forniment tal-ikel minħabba n-numru ogħla ta’ klijenti fil-kantins, fir-restoranti u fil-barijiet tal-Parlament (l-attivitajiet globali żdiedu b’madwar 150 % mill-2002 sal-2011, minn 1,472 miljun klijent fl-2002 sa 3,711 miljun klijent fl-2011);

74.

Josserva d-deċiżjonijiet li ġejjin adottati mill-Bureau fl-2011, fil-kuntest ta’ strateġija immobiljari f’terminu medju adottata fl-2010, u dwar ir-realizzazzjoni ta’ għadd ta’ proġetti importanti bil-għan l-bini jibda jiġi użat mill-bidu tal-leġislatura li jmiss,

75.

Jirrikonoxxi li metodoloġija ġdida, simili għal dik adottata mill-Kummissjoni, ġiet introdotta fl-2011 għall-ispezzjoni u l-akkwist ta’ proprjetà; josserva li, skont din il-metodoloġija l-ġdida, it-trasparenza u l-kompetizzjoni se jissaħħew ulterjorment permezz tal-pubblikazzjoni, fil-Ġurnal Uffiċjali, tad-dokumenti marbuta mal-akkwist; josserva li l-metodoloġija l-ġdida diġà ġiet applikata mill-Kumitat Immobiljari għall-eżami tal-applikazzjonijiet u tal-offerti rċevuti għall-ispezzjoni tas-suq immobiljari fi Brussell, jiġifieri għas-sostituzzjoni tal-binjiet Eastman u Montoyer 63 u t-tiftix ta’ uffiċini ġodda;

76.

Jindika li kwalunkwe strateġija immobiljari għandha tqis ukoll il-kostijiet dejjem ogħla tal-manutenzjoni tal-bini mixtri;

77.

Josserva n-nuqqas ta’ selezzjoni tal-kandidati marbuta mal-istedina biex wieħed jippreżenta offerta għall-proġett tal-bini Konrad Adenauer għax il-prezzijiet proposti ppreżentati bħala tweġiba tal-istedina biex wieħed jippreżenta offerta kienu ferm ogħla mill-istimi; isostni d-deċiżjoni tal-uffiċjal awtorizzanti b’delega biex ma jaġġudikax l-appalt; jistenna li l-prezz globali tal-proġett ma jaqbiżx l-EUR 482,7 miljun previsti f’Ottubru 2011;

78.

Josserva f’dan ir-rigward li l-kuntratti kollha promossi mill-Parlament relatati mal-kostruzzjoni tal-bini u max-xogħol ta’ tagħmir għandhom ikunu suġġetti għal aġġudikazzjoni b’appalt fuq l-aktar bażi wiesgħa possibbli, u dejjem f’livell Ewropew; jirrakkomanda li, jekk, bħala eċċezzjoni, isir rikors għall-proċedura negozjata, il-prezzijiet għandhom ikunu bbażati fuq il-kostijiet tal-kostruzzjoni, inklużi marġnijiet raġonevoli stretti għall-operaturi ekonomiċi;

79.

Jiddispjaċih li, għat-tieni darba, ġew skoperti difetti strutturali fil-binjiet tal-Parlament, din id-darba fit-travi tal-injam tas-saqaf tal-emiċiklu tal-Parlament ta’ Brussell; jistieden lid-DĠ INLO jagħmel rieżami sħiħ tal-qagħda strutturali tal-bini kollu tal-Parlament, billi jibda b’dak li għadu taħt garanzija tal-kuntrattur kontra kwalunkwe difett moħbi, jekk huwa possibbli bl-għajnuna ta’ xi esperti magħżula li ġejjin mill-uffiċċji nazzjonali kompetenti tad-diversi Stati Membri u b’użu sħiħ tal-għarfien akkumulat fi ħdan l-istituzzjoni; jistieden lis-Segretarju Ġenerali jippreżenta fi żmien qasir lill-Bureau pjan komplut bid-dettalji tekniċi kollha għal dawn ix-xogħlijiet, kif ukoll l-ispejjeż involuti;

80.

Jenfasizza li huwa fundamentali li l-proċeduri ta’ akkwist pubbliku jkunu koerenti mal-esiġenzi tal-Parlament u jgħinuh jissodisfahom; jisħaq fuq il-fatt li dawn għandhom jirrispettaw ir-rekwiżiti regolatorji u l-prinċipji fundamentali li jirregolaw l-akkwist pubbliku, il-klawsoli tal-kuntratt u l-kriterji użati fil-proċedura ta’ evalwazzjoni tal-offerti, u jkunu suġġetti għal sistema ta’ kontroll adegwat intiż li jissorvelja l-eżekuzzjoni tal-ordnijiet maħruġa bl-użu tal-kuntratti qafas;

81.

Jiġbed l-attenzjoni għall-fatt li matul il-proċeduri ta’ akkwist pubbliku huma involuti interessi differenti, iżda mhumiex dejjem imqassma bejn is-settur pubbliku u privat u li l-akkwist pubbliku huwa settur b’riskju għoli li jeħtieġ attenzjoni kontinwa u mill-qrib u li fih l-ippjanar avvanzat kostanti tal-bżonnijiet jirriżulta kruċjali;

82.

Jisħaq li, minħabba l-kumplessità tal-kuntest ġuridiku u l-esiġenzi fattwali kumplessi ħafna, f’kull fażi tal-proċeduri ta’ akkwist (analiżi tal-esiġenzi inizjali, tħejjija tas-sejħa għal offerti, tfassil tas-sejħiet għal offerti u tal-ispeċifikazzjonijiet, kuntatti mal-offerenti, il-ftuħ tal-offerti, l-evalwazzjoni tal-offerti, id-deċiżjoni tal-aġġudikazzjoni, l-istipulazzjoni tal-kuntratti) jeżistu riskji speċifiċi għall-ilħuq tal-objettivi;

83.

Ifakkar li matul akkwist pubbliku ma għandhiex tiġi skartata l-possibilità ta’ kunflitti ta’ interess potenzjali li għandhom minflok jiġu ttrattati kif imiss u li l-Parlament għandu jsaħħaħ u jżomm il-mekkaniżmi ta’ verifika biex jippermetti ġestjoni u prevenzjoni korretti ta’ eventwali kunflitti ta’ interess;

84.

Josserva li, fl-2011 u fl-2012, is-Servizz tal-Awditjar Intern wettaq eżerċizzju ta’ awditjar komprensiv tal-proċedura ta’ akkwist pubbliku u tal-eżekuzzjoni tal-kuntratti fi ħdan id-DĠ ITEC u li r-rapport definittiv adottat f’Ġunju 2012 kien fih pjan ta’ azzjoni f’sitt punti intiż li jittratta l-problemi mqajma; ikompli josserva li flimkien mad-diretturi tad-DĠ ITEC intlaħaq qbil li l-awditjar jiġi implimentat sal-31 ta’ Diċembru 2012; jindika li l-ispeċifikazzjonijiet tas-sejħa għal offerti huma, min-natura tagħhom stess, estremament kumplessi peress li jinvolvu pluralità ta’ lottijiet, profili tekniċi u metodi ta’ eżekuzzjoni tal-kuntratti;

85.

Jilqa’ pożittivament il-fatt li l-awditjar imsemmi hawn fuq konkluż mad-DĠ ITEC irnexxielu jirranġa bosta mil-lakuni proċedurali kkonstatati fl-ewwel awditjar trasversali tal-akkwist fl-2005 u fl-2006; josserva b’dispjaċir, madankollu, li ġew identifikati l-lakuni li ġejjin:

86.

Josserva li s-servizzi ċentrali bagħtu lill-awtorità tal-baġit ir-rapport annwali dwar il-kuntratti aġġudikati fl-2011 abbażi tal-informazzjoni fornuta mid-dipartimenti awtorizzanti, u jikkonstata wkoll il-kompożizzjoni segwenti tal-kuntratti kollha aġġudikati fl-2011 u fl-2010:

(Rapport annwali dwar il-kuntratti aġġudikati mill-Parlament Ewropew, 2011, p. 5)

87.

Josserva li l-kompożizzjoni tal-kuntratti aġġudikati fl-2011 u fl-2010 skont it-tip ta’ proċedura hija s-segwenti:

(Rapport annwali dwar il-kuntratti aġġudikati mill-Parlament Ewropew, 2011, p. 6-7)

88.

Josserva li, minn total ta’ 238 kuntratt aġġudikat fl-2011, 100, b’valur ta’ EUR 535 miljun, kienu bbażati fuq proċeduri miftuħa jew ristretti, u 133, b’valur ta’ EUR 31 miljun, kienu bbażati fuq proċeduri negozjati;

89.

Josserva li, fl-2011, l-approprjazzjonijiet iskritti fl-partita baġitarja 400 ntużaw bil-mod li ġej:

90.

Josserva li, fl-2011, l-approprjazzjonijiet iskritti fl-partita baġitarja 402 intużaw bil-mod li ġej (17):

91.

Josserva li, fl-2011, l-approprjazzjonijiet iskritti fl-partita baġitarja 403 ntużaw bil-mod li ġej (18):

92.

Jieħu nota li l-Parlament għandu 10 roti ta’ servizz għad-dispożizzjoni tal-Membri u tal-persunal matul is-sessjonijiet ta’ Strasburgu, flimkien ma’ 40 rota għad-dispożizzjoni mill-belt ta’ Strasburgu; itenni t-talba tiegħu biex dawn iċ-ċifri jiżdiedu b’mod raġonevoli f’kunsiderazzjoni tal-kostijiet limitati relatati u tad-domanda qawwija;

93.

Huwa tal-fehma li għandha titqies il-possibilità li jsir titjib ambjentali u ffrankar intelliġenti fil-baġit tal-Parlament, billi jiddaħħlu metodi ta’ ħidma differenti u teknoloġiji moderni li jkunu aktar ekoloġiċi u orħos iżda li ma jippreġudikawx l-attività tal-Parlament, inkluż l-użu tal-vidjokonferenzi.

94.

Jitlob jiġi informat dwar it-total ta’ kW/h prodotti mill-panelli solari tal-Parlament;

95.

Itenni s-sostenn tiegħu għall-proġett pilota dwar E-committee; jissuġġerixxi b’qawwa li l-Membri għandhom jingħataw l-possibilità f’dan il-kuntest li jagħżlu li jirċievu jew le dokumentazzjoni fuq karta fil-laqgħat tal-kumitati, biex jonqos b’mod sinifikanti l-użu tal-karta fil-Parlament.

—

wara li kkunsidra l-baġit ġenerali tal-Unjoni Ewropea għas-sena finanzjarja 2011 (1),

—

wara li kkunsidra l-kontijiet annwali konsolidati tal-Unjoni Ewropea għas-sena finanzjarja 2011 (COM(2012) 436 — C7–0226/2012) (2),

—

wara li kkunsidra r-rapport annwali tal-Qorti tal-Awdituri dwar l-implimentazzjoni tal-baġit għas-sena finanzjarja 2011, flimkien mat-tweġibiet tal-istituzzjonijiet li jkunu qed jiġu verifikati (3),

—

wara li kkunsidra d-dikjarazzjoni ta’ assigurazzjoni (4) dwar l-affidabilità tal-kontijiet, kif ukoll dwar il-legalità u r-regolarità tal-operazzjonijiet li jaqgħu taħthom, ipprovduta mill-Qorti tal-Awdituri għas-sena finanzjarja 2011 skont l-Artikolu 287 tat-Trattat dwar il-Funzjonament tal-Unjoni Ewropea,

—

wara li kkunsidra l-Artikolu 314(10) u l-Artikoli 317, 318 u 319 tat-Trattat dwar il-Funzjonament tal-Unjoni Ewropea,

—

wara li kkunsidra r-Regolament tal-Kunsill (KE, Euratom) Nru 1605/2002 tal-25 ta’ Ġunju 2002 rigward ir-Regolament Finanzjarju applikabbli għall-baġit ġenerali tal-Komunitajiet Ewropej (5), u b’mod partikolari l-Artikoli 50, 86, 145, 146 u 147 tiegħu,

—

wara li kkunsidra r-Regolament (UE, Euratom) Nru 966/2012 tal-Parlament Ewropew u tal-Kunsill tal-25 ta’ Ottubru 2012 dwar ir-regoli finanzjarji applikabbli għall-baġit ġenerali tal-Unjoni u li jħassar ir-Regolament tal-Kunsill (KE, Euratom) Nru 1605/2002 (6), u b’mod partikolari l-Artikoli 164, 165 u 166 tiegħu,

—

wara li kkunsidra d-Deċiżjoni Nru 31/2008 tas-Segretarju Ġenerali tal-Kunsill/Rappreżentant Għoli għall-Politika Barranija u ta’ Sigurtà Komuni dwar ir-rimborż tal-ispejjeż tal-ivvjaġġar tad-delegati tal-Membri tal-Kunsill (7),

—

wara li kkunsidra l-Ftehim Interistituzzjonali bejn il-Parlament Ewropew, il-Kunsill u l-Kummissjoni tas-17 ta’ Mejju 2006 dwar id-dixxiplina baġitarja u l-amministrazzjoni finanzjarja tajba (8),

—

wara li kkunsidra l-Artikolu 77 u l-Anness VI tar-Regoli ta’ Proċedura tiegħu,

—

wara li kkunsidra r-rapport tal-Kumitat għall-Kontroll tal-Baġit (A7–0061/2013),

A.

billi l-konklużjonijiet tal-Kunsill Ewropew tat-18 u d-19 ta’ Ottubru 2012 rrimarkaw li “l-leġittimità u r-responsabbiltà demokratika […] għandhom jiġu esplorati aktar”;

B.

billi l-Kumitat għall-Kontroll tal-Baġit tal-Parlament qiegħed għall-ewwel darba janalizza l-implimentazzjoni u l-ġestjoni, mill-Kunsill Ewropew, tal-baġit amministrattiv tiegħu;

C.

billi l-istituzzjonijiet kollha tal-Unjoni għandhom ikunu trasparenti għalkollox u jagħtu rendikont sħiħ liċ-ċittadini tal-Unjoni għall-fondi fdati lilhom bħala istituzzjonijiet tal-Unjoni;

1.

Jinnota b’sodisfazzjon li, abbażi tal-ħidma ta’ awditjar tagħha, il-Qorti tal-Awdituri kkonkludiet li l-pagamenti kollha kemm huma għas-sena li ntemmet fil-31 ta’ Diċembru 2011 għan-nefqa amministrattiva u ta’ tip ieħor tal-istituzzjonijiet u tal-korpi kienu ħielsa minn żbalji materjali;

2.

Jirrimarka li fir-rapport annwali tal-2011, il-Qorti tal-Awdituri inkludiet osservazzjonijiet dwar il-Kunsill Ewropew u l-Kunsill rigward il-proċeduri ta’ akkwist relatati mas-servizzi tat-tindif u x-xiri ta’ uniformijiet u żraben, fejn ġew identifikati ċertu dgħufijiet fl-applikazzjoni tal-kriterji ta’ għażla u ta’ aġġudikazzjoni;

3.

Jieħu nota tat-tweġibiet mogħtija għall-osservazzjonijiet tal-Qorti tal-Awdituri u jaqbel mar-rakkomandazzjonijiet tal-Qorti tal-Awdituri li l-uffiċjali awtorizzanti għandhom itejbu d-disinn, il-koordinazzjoni u t-twettiq tal-proċeduri tal-akkwist permezz ta’ kontrolli xierqa u gwida aħjar; jirrakkomanda wkoll applikazzjoni aktar stretta tar-regoli tal-akkwist, li l-istituzzjonijiet kollha tal-Unjoni huma obbligati jirrispettaw;

4.

Jinnota li fl-2011, il-Kunsill Ewropew u l-Kunsill kellhom approprjazzjonijiet ta’ impenn għal livell ta’ EUR 506 842 003,08 (EUR 642 000 000 fl-2010) disponibbli, b’rata ta’ użu ta’ 90 %, li kienet iktar baxxa milli fl-2010; huwa mħasseb li r-rata ta’ sottoeżekuzzjoni għoliet u baqgħet għolja; jitlob li r-rata ta’ sottoeżekuzzjoni tittejjeb u biex il-bidliet li saru jiġu mmonitorjati, u jissuġġerixxi li jiġu żviluppati indikaturi ewlenin tal-prestazzjoni fl-aktar oqsma kritiċi, bħall-paketti tal-ivvjaġġar tad-delegati, il-loġistika u l-interpretazzjoni;

5.

Jenfasizza r-rwol li t-Trattat dwar il-Funzjonament tal-Unjoni Ewropea jagħti lill-Parlament fir-rigward tal-kwittanza baġitarja;

6.

Iqis li l-baġit tal-Kunsill Ewropew u tal-Kunsill għandu jinqasam biex jikkontribwixxi għat-trasparenza tal-ġestjoni finanzjarja tagħhom u biex jitjieb l-għoti ta’ rendikont miż-żewġ istituzzjonijiet;

7.

Jinnota li, għall-kuntrarju ta’ dak li sostna l-Kunsill, ma hemm l-ebda “ftehim bejn l-irġiel” fir-rigward tal-kwittanza għall-Kunsill;

8.

Itenni t-tama tiegħu li l-Parlament jirċievi r-rapport annwali tal-attività komplet, inkluża ħarsa ġenerali komprensiva lejn ir-riżorsi umani kollha mqassma skont il-kategorija, il-grad, is-sess, iċ-ċittadinanza u t-taħriġ vokazzjonali; jirrimarka li s-servizz legali tal-Parlament, kif ukoll esperti legali indipendenti, jaqblu li l-Parlament għandu dritt ta’ informazzjoni;

9.

Jittama li l-Parlament se jirċievi d-deċiżjonijiet tal-baġit interni tal-Kunsill;

10.

Jieħu nota speċjali u juri tħassib fir-rigward tar-rakkomandazzjonijiet tal-awditjar intern għas-sena 2011 fir-rigward tal-kuntratti ta’ konsulenza fil-qasam tal-IT u l-kuntratti tas-sigurtà, fejn għadhom jeżistu dgħufijiet fil-ġestjoni finanzjarja u fil-proċeduri tal-akkwist;

11.

Huwa mħasseb dwar is-segwitu mogħti lill-awditjar finanzjarju mwettaq qabel l-2010, li fil-kuntest tiegħu għadhom ma ġewx implimentati xi rakkomandazzjonijiet relatati mal-programmi ta’ ħidma tal-2007, tal-2008 u tal-2009; iħeġġeġ lill-Kunsill jieħu miżuri konkreti biex tittejjeb l-implimentazzjoni ta’ dawk ir-rakkomandazzjonijiet;

12.

Jieħu nota tal-fatt li l-Kunsill ħa miżuri biex itejjeb il-prestazzjoni tal-proġett immobiljari “Ewropa”, u b’mod partikolari talli waqqaf tim permanenti biex isegwi t-twettiq tal-proġett flimkien mal-pjan ta’ rappurtar u l-ħolqien ta’ pjattaforma għad-dokumenti;

13.

Jistieden lill-Kunsill jipprovdi spjegazzjoni bil-miktub dettaljata dwar l-ammont totali ta’ approprjazzjonijiet użati fix-xiri tal-bini Résidence Palace, il-partiti baġitarji li minnhom ittieħdu dawk l-approprjazzjonijiet, il-pagamenti parzjali li tħallsu s’issa, il-pagamenti parzjali li għad iridu jitħallsu u l-iskop li se jaqdi l-bini, u dan mhux aktar tard mill-1 ta’ Lulju 2013;

14.

Jieħu nota tal-bidliet fundamentali għall-baġit għas-sena 2011, bil-ħolqien tas-Servizz Ewropew għall-Azzjoni Esterna (SEAE) u t-tnaqqis tal-infiq previst għall-funzjonament tal-Kunsill Ewropew u tal-Kunsill;

15.

Huwa diżappuntat ħafna li l-ħolqien tas-SEAE ma ġiex antiċipat fl-abbozz tal-baġit għall-2011; jieħu nota li kienet meħtieġa żieda fl-approprjazzjonijiet biex isiru l-preparamenti għall-adeżjoni tal-Kroazja u biex jissaħħaħ l-uffiċċju tal-President tal-Kunsill Ewropew;

16.

Jistieden lill-Kunsill jippreżenta informazzjoni dettaljata dwar il-Ftehimiet tal-Livell tas-Servizz stabbiliti mas-SEAE u l-miżuri konkreti meħuda biex tiġi promossal-modernizzazzjoni amministrattiva; huwa tal-fehma li l-ġestjoni tar-riżorsi umani tal-Kunsill ma kinitx effiċjenti biżżejjed;

17.

Jiddispjaċih li l-Kunsill għadu qed jirrifjuta li jwieġeb il-mistoqsijiet tal-Parlament u jqis li s-superviżjoni effikaċi tal-implimentazzjoni tal-baġit tal-Unjoni tirrikjedi li l-Kunsill ikun lest ikollu djalogu miftuħ u formali mal-Kumitat tal-Parlament għall-Kontroll tal-Baġit; jenfasizza l-ħtieġa li ż-żewġ istituzzjonijiet ikollhom kooperazzjoni sodisfaċenti;

18.

Itenni li l-Parlament għadu qed jistenna t-tweġiba tal-Kunsill dwar l-azzjonijiet u t-talba għal dokumenti li jinsabu fir-riżoluzzjoni tiegħu tal-10 ta’ Mejju 2012 (9); jistieden lis-Segretarju Ġenerali tal-Kunsill jipprovdi lill-kumitat tal-Parlament responsabbli għall-proċedura ta’ kwittanza, tweġibiet bil-miktub komprensivi għal dawn il-mistoqsijiet;

19.

Itenni li l-infiq tal-Kunsill għandu jiġi skrutinizzat bl-istess mod kif jiġi skrutinizzat l-infiq ta’ istituzzjonijiet oħra; huwa tal-fehma li l-elementi fundamentali ta’ tali skrutinju huma stipulati fir-riżoluzzjoni tiegħu tat-23 ta’ Ottubru 2012 (10);

20.

Jiddispjaċih minħabba d-diffikultajiet fil-proċeduri ta’ kwittanza għas-snin finanzjarji tal-2007, l-2008, l-2009 u l-2010, li kienu dovuti għal nuqqas ta’ kooperazzjoni min-naħa tal-Kunsill; jirrimarka li l-Parlament irrifjuta li jagħti l-kwittanza lis-Segretarju Ġenerali tal-Kunsill għall-implimentazzjoni tal-baġit tal-Kunsill għas-snin finanzjarji 2009 u 2010 għar-raġunijiet mogħtija fir-riżoluzzjonijiet tiegħu tal-10 ta’ Mejju 2011 (11), tal-25 ta’ Ottubru 2011 (12), tal-10 ta’ Mejju 2012 (13) u tat-23 ta’ Ottubru 2012 (14);

21.

Ifakkar li matul in-negozjati dwar Regolament Finanzjarju ġdid, ma seta’ jintlaħaq l-ebda ftehim dwar modi kif il-proċedura ta’ kwittanza tista’ tittejjeb; jemmen li jekk il-Kunsill ikompli jirrifjuta li jikkoopera mal-Parlament, il-Kumitat għall-Kontroll tal-Baġit tal-Parlament ikun kostrett li jagħmel lill-Kummisjoni l-mistoqsijiet u t-talbiet tiegħu għal informazzjoni rigward il-baġit tal-Kunsill;

22.

Itenni li l-Kummissjoni, fit-tweġiba tagħha tal-25 ta’ Novembru 2011 għall-ittra tal-President tal-Kumitat għall-Kontroll tal-Baġit, tgħid li huwa mixtieq li l-Parlament ikompli jagħti, jiddiferixxi jew jirrifjuta li jagħti l-kwittanza lill-istituzzjonijiet l-oħra – inkluż il-Kunsill – kif kien il-każ s’issa;

23.

Iqis li huwa mixtieq li l-Parlament jeżerċita s-setgħa tiegħu li jagħti l-kwittanza skont l-Artikoli 316, 317 u 319 tat-Trattat dwar il-Funzjonament tal-Unjoni Ewropea skont l-interpretazzjoni u l-prattika attwali, jiġifieri li jagħti l-kwittanza għal kull intestatura tal-baġit b’mod individwali biex tinżamm it-trasparenza u r-responsabbiltà demokratika fir-rigward tal-kontribwenti tat-taxxa tal-Unjoni;

24.

Jistmerr il-fatt li l-Kunsill mhuwiex trasparenti biżżejjed u jenfasizza li l-istituzzjonijiet kollha tal-Unjoni għandhom id-dmir li jirrispettaw l-istess standards fir-rigward tat-trasparenza; huwa konvint li l-Parlament u l-Kunsill, bħala koleġiżlaturi, għandhom japplikaw l-istess standards ta’ trasparenza u jistieden lill-Kunsill itejjeb il-prestazzjoni tiegħu f’dan il-qasam mingħajr dewmien.

—

wara li kkunsidra l-baġit ġenerali tal-Unjoni Ewropea għas-sena finanzjarja 2011 (1),

—

wara li kkunsidra l-kontijiet annwali konsolidati tal-Unjoni Ewropea għas-sena finanzjarja 2011 (COM(2012) 436 — C7–0224/2012) (2),

—

wara li kkunsidra r-rapport tal-Kummissjoni dwar is-segwitu għad-deċiżjoni ta’ kwittanza għas-sena finanzjarja 2010 (COM(2012) 585), u d-dokumenti ta’ ħidma tas-servizzi tal-Kummissjoni li jakkumpanjaw dan ir-rapport (SWD(2012) 340 u SWD(2012) 330),

—

wara li kkunsidra l-komunikazzjoni mill-Kummissjoni tas-6 ta’ Ġunju 2012 intitolata “Sinteżi tal-kisbiet tal-ġestjoni tal-Kummissjoni fl-2011” (COM(2012) 281),

—

wara li kkunsidra r-Rapport Annwali tal-Kummissjoni lill-Awtorità tal-Kwittanza dwar l-awditjar intern imwettaq fl-2011(COM(2012) 563), u d-dokument ta’ ħidma tas-servizzi tal-Kummissjoni li jakkumpanja dan ir-rapport (SWD(2012) 283),

—

wara li kkunsidra r-Rapport Annwali tal-Qorti tal-Awdituri dwar l-implimentazzjoni tal-baġit għas-sena finanzjarja 2011, flimkien mar-risposti tal-istituzzjonijiet (3) (ir-Rapport Annwali), u r-rapporti speċjali tal-Qorti tal-Awdituri,

—

wara li kkunsidra d-dikjarazzjoni ta’ assigurazzjoni (4) dwar l-affidabilità tal-kontijiet kif ukoll il-legalità u r-regolarità tal-operazzjonijiet li jaqgħu taħthom, ipprovduta mill-Qorti tal-Awdituri għas-sena finanzjarja 2011 skont l-Artikolu 287 tat-Trattat dwar il-Funzjonament tal-Unjoni Ewropea,

—

wara li kkunsidra r-rakkomandazzjoni tal-Kunsill tat-12 ta’ Frar 2013 dwar il-kwittanza li għandha tingħata lill-Kummissjoni fir-rigward tal-implimentazzjoni tal-baġit għas-sena finanzjarja 2011(05752/2013 — C7-0038/2013),

—

wara li kkunsidra r-rakkomandazzjoni tal-Kunsill tat-12 ta’ Frar 2013 dwar il-kwittanza li għandha tingħata lill-aġenziji eżekuttivi fir-rigward tal-implimentazzjoni tal-baġit għas-sena finanzjarja 2011 (05754/2013 — C7-0039/2013),

—

wara li kkunsidra l-Artikoli 317, 318 u 319 tat-Trattat dwar il-Funzjonament tal-Unjoni Ewropea kif ukoll l-Artikolu 106a tat-Trattat Euratom,

—

wara li kkunsidra r-Regolament tal-Kunsill (KE, Euratom) Nru 1605/2002 tal-25 ta’ Ġunju 2002 rigward ir-Regolament Finanzjarju applikabbli għall-baġit ġenerali tal-Komunitajiet Ewropej (5), u b’mod partikulari l-Artikoli 55, 145, 146 u 147 tiegħu,

—

wara li kkunsidra r-Regolament (UE, Euratom) Nru 966/2012 tal-Parlament Ewropew u tal-Kunsill tal-25 ta’ Ottubru 2012 dwar ir-regoli finanzjarji applikabbli għall-baġit ġenerali tal-Unjoni u li jħassar ir-Regolament tal-Kunsill (KE, Euratom) Nru 1605/2002 (6), u b’mod partikolari l-Artikoli 62, 164, 165 u 166 tiegħu,

—

wara li kkunsidra r-Regolament tal-Kunsill (KE) Nru 58/2003 tad-19 ta’ Diċembru 2002 li jfassal l-istatut għall-aġenziji eżekuttivi li jridu jiġu fdati b’ċerti kompiti fit-tmexxija tal-programmi tal-Komunità (7), u b’mod partikolari l-Artikolu 14(2) u (3) tiegħu,

—

wara li kkunsidra l-Artikolu 76 u l-Anness VI tar-Regoli ta’ Proċedura tiegħu,

—

wara li kkunsidra r-rapport tal-Kumitat għall-Kontroll tal-Baġit u l-opinjonijiet tal-kumitati l-oħra kkonċernati (A7-0116/2013),

A.

billi l-Ewropa qed tiffaċċja kriżi ekonomika u finanzjarja flimkien ma’ kriżi ta’ fiduċja fl-istituzzjonijiet, sitwazzjoni li tirrikjedi li l-Parlament ikun partikolarment rigoruż meta jiskrutinja l-kontijiet tal-Kummissjoni;

B.

billi l-Qorti tal-Awdituri, għat-18-il darba konsekuttiva, ma setgħatx tagħti dikjarazzjoni ta’ assigurazzjoni pożittiva rigward il-legalità u r-regolarità tal-pagamenti;

C.

billi l-Istati Membri attwalment qed jinnegozjaw il-Qafas Finanzjarju Pluriennali (QFP) il-ġdid għall-2014–2020;

D.

billi f’sitwazzjoni ta’ tnaqqis fir-riżorsi, kaġun mill-kriżi ekonomika u finanzjarja, iqis il-bżonn tal-hekk imsejħa “Solidarjetà Intelliġenti” – l-użu tal-fondi tal-Unjoni għall-implimentazzjoni tar-riformi, josserva d-dixxiplina finanzjarja u jiżgura l-istabilità politiku u ekonomikament;

E.

billi, skont it-Trattat dwar il-Funzjonament tal-Unjoni Ewropea (TFUE), il-Kummissjoni għandha r-responsabilità aħħarija għall-implimentazzjoni tal-baġit tal-Unjoni, waqt li l-Istati Membri huma rikjesti jikkooperaw b’mod sinċier mal-Kummissjoni biex jiġi żgurat li l-approprjazzjonijiet jintużaw bi qbil mal-prinċipji tal-amministrazzjoni finanzjarja tajba;

F.

billi l-Artikolu 287(1) tat-TFUE jipprevedi li l-“Qorti tal-Awdituri tipprovdi lill-Parlament Ewropew u lill-Kunsill dikjarazzjoni li biha tiċċertifika l-affidabbiltà tal-kontijiet u l-legalità u r-regolarità tal-operazzjonijiet li jaqgħu taħthom …”;

G.

billi l-eżerċizzji ta’ awditjar tar-rendiment li jkejlu sa liema punt l-infiq kiseb l-objettivi segwiti saru dejjem aktar importanti;

H.

billi n-nuqqasijiet fis-sistema doganali jitolbu bilanċ aħjar bejn il-kontrolli mnaqqsa u żieda fil-kontrolli ex post;

I.

billi l-amministrazzjoni tal-Kummissjoni għandha tiġi ppreżentata b’mod ġust bil-ħsieb li tissaħħaħ il-fiduċja pubblika fl-istituzzjonijiet;

J.

billi l-Istrateġija Ewropa 2020 għat-tkabbir u l-impjiegi hi strateġija komprensiva li tkopri l-attivitajiet ta’ kważi s-servizzi kollha tal-Kummissjoni responsabbli għall-politiki interni, u billi l-2011 kienet l-ewwel sena sħiħa li matulha ġiet implimentata l-istrateġija;

K.

billi d-djalogu interistituzzjonali previst fl-Artikolu 318 TAT-TFUE għandu jkun l-opportunità biex titqanqal kultura ġdida bbażata fuq ir-rendiment fi ħdan il-Kummissjoni;

L.

billi l-Kumitat għall-Kontroll tal-Baġit għandu jkun involut aktar mill-qrib fil-monitoraġġ tal-infiq tal-Kummissjoni fil-ġejjieni; jistenna kooperazzjoni aħjar mal-Qorti tal-Awdituri bil-għan li jitfasslu proposti aktar estensivi dwar titjib fl-effiċjenza fil-proċeduri ta’ awditjar;

M.

billi s-setgħat u r-riżorsi tal-Kumitat għall-Kontroll tal-Baġit fil-proċedura ta’ kwittanza għandhom jiġu eżaminati u stabbiliti fid-dettall f’rapport ta’ inizjattiva proprja;

1.

Jistieden lill-Kummissjoni, bil-ħsieb tal-għoti tal-kwittanza, tippreżenta lill-Parlament pjan ta’ azzjoni għall-kisba tal-azzjonijiet prijoritarji li ġejjin:

Komunikazzjoni tal-Kummissjoni dwar il-protezzjoni tal-baġit tal-Unjoni

Rata ta’ żball fil-ġestjoni kondiviża

Jistieden lill-Kummissjoni:

DĠ AGRI

DĠ REGIO

Rata ta’ żball fil-ġestjoni ċentralizzata

DĠ Riċerka

Rapport ta’ valutazzjoni (l-Artikolu 318 tat-TFUE) u użu msaħħaħ tal-awditi tar-rendiment

Introjti u riżorsi proprji tradizzjonali

Sabiex tiżgura protezzjoni xierqa tal-interessi finanzjarji tal-Unjoni, u bil-ħsieb li tgħammar l-Unjoni b’biżżejjed riżorsi proprji għat-tkabbir, il-Kummissjoni għandha:

2.

Huwa allarmat bin-numru kbir ħafna ta’ attivitajiet finanzjarji offshore, kif żvelat mill-inkjesta riċenti “Offshore Leaks”; jistieden lill-Kummissjoni tieħu miżuri urġenti biex telimina dawn il-possibilitajiet ta’ devjazzjoni ta’ eluf ta’ biljuni ta’ euro barra miċ-ċirkwit finanzjarju normali sabiex primarjament tiġi evitata t-taxxa u biex jinħbew fondi illegali mill-awtoritajiet tat-taxxa fl-Istati Membri.

3.

Jissuġġerixxi bil-qawwa li l-Kummissjoni għandha tieħu miżuri biex tiżgura li l-attivitajiet bankarji kollha relatati mal-konsulenza dwar strutturi offshore u l-istabbiliment tagħhom, isiru illegali u li l-ebda bank fl-Unjoni Ewropea involut f’attivitajiet bħal dawn ma jirċevi jew ma jkun jista’ jirċievi finanzjament Ewropew taħt kwalunkwe skema jew jibbenefika minn miżuri ta’ appoġġ nazzjonali.

4.

Jistenna li jirċievi, fi żmien xahrejn, abbozz ta’ proposti leġiżlattivi mill-Kummissjoni biex twaqqaf il-prattika tal-użu ta’ rifuġji fiskali minn individwi, kumpaniji u saħansitra istituzzjonijiet pubbliċi.

5.

Jilqa’ s-segwitu li ngħata mill-Kummissjoni għat-talba tal-Parlament għal aktar trasparenza fir-rigward tal-Istrumenti ta’ Inġinerija Finanzjarja (SIF), b’mod partikulari billi r-rapportar mill-Istati Membri dwar il-kwistjonijiet finanzjarji u ta’ implimentazzjoni fil-leġiżlazzjoni relevanti jsir proċedura obbligatorja (13), u jinnota li r-Rapport sommarju dwar il-progress li sar fil-finanzjament u l-implimentazzjoni tal-SIF li tħabbar mill-Kummissjoni fir-rapport tagħha dwar is-segwitu għad-deċiżjoni ta’ kwittanza għas-sena finanzjarja 2010 (COM(2012) 585) ġie trażmess fiż-żmien dovut lill-Parlament; jinnota wkoll li dan tal-aħħar jipprovdi data dwar id-deskrizzjoni tal-SIF u l-arranġamenti għall-implimentazzjoni tagħhom, l-identifikazzjoni tal-entitajiet implimentattivi u l-ammonti ta’ assistenza mħallsa lill-Istrumenti ta’ Inġinerija Finanzjarja u minnhom;

6.

Jinnota li l-ammont ta’ fondi strutturali implimentati permezz tal-SIF kompla jiżdied matul il-perjodu 2007–2013, b’mod partikolari għall-istrumenti li jimmiraw lejn l-imrpiżi; jindika li aktar minn 90 % tal-ammonti effettivament imħallsa lid-destinatarji finali marru għand impriżi; jitlob lill-Kummissjoni tiċċara liema perċentwali tal-ammonti li fil-fatt ġew żburżati marru għand impriżi li verament kienu privati, meta mqabbla ma’ impriżi li l-maġġoranza tal-azzjonijiet tagħhom huma proprjetà tas-settur pubbliku;

7.

Jinnota bi tħassib li l-Istrumenti ta’ Inġinerija Finanzjarja għall-iżvilupp urban u l-effiċjenza enerġetika/l-enerġiji rinnovabbli jirrappreżentaw 17 % biss tal-ammont imħallas lill-Istrumenti ta’ Inġinerija Finanzjarja kollha fi tmiem l-2011 u, barra minn hekk, li l-fluss għal ġo proġetti urbani konkreti baqa’ bil-mod;

8.

Jappoġġja t-tagħlim li ħadet il-Kummissjoni skont ir-rapport sommarju msemmi hawn fuq fir-rigward tar-rapportaġġ mill-Istati Membri, kif ġej:

9.

Jinnota li l-Kummissjoni qabbdet lil grupp ta’ esperti (14) jfasslu rapport dwar l-użu tal-FEŻR bħala appoġġ għall-SIF; iqis li dan hu l-ewwel pass u jinsab inkwetat li l-analiżi tan-netwerk ta’ valutazzjoni esperta tiżvela għadd ta’ problemi serji, pereżempju, in-nuqqas ta’ evidenza biex jiġi stabbilit jekk l-iskala ta’ appoġġ tikkorrispondix mad-daqs tan-nuqqasijiet fis-suq għas-self u l-finanzjament ekwitattiv; in-nuqqas ta’ evidenza li minnha jista’ jiġi vvalutat jekk il-fondi ta’ kapital ta’ riskju mwaqqfa bl-appoġġ tal-FEŻR humiex kbar biżżejjed biex ikunu vijabbli; l-iskarsezza tad-data rigward l-ispejjeż biex jitwaqqfu u jiġu operati l-SIF meta mqabbla ma’ għotjiet li ma jitħallsux lura; u l-kumplessità tar-regolamenti u l-inċertezza dwar l-interpretazzjoni tagħhom;

10.

Jistieden lill-Kummissjoni tieħu passi konkreti biex ittejjeb b’mod sinifikanti l-użu tal-SIF bil-ħsieb li l-interessi finanzjarji tal-Unjoni jkunu protetti aħjar;

11.

Itenni li l-Parlament stieden lill-Kummissjoni tivvaluta b’mod oġġettiv u kritiku l-esperjenzi bl-SIF fil-Politika ta’ Koeżjoni għall-perjodu ta’ programmazzjoni tal-2007-2013, tipprovdi valutazzjoni tar-riskji li tikkunsidra l-Istrumenti ta’ Inġinerija Finanzjarja differenti b’mod separat, kif ukoll tqis l-istruttura tar-riskji tal-benefiċjarji tal-SIF, u tirrapporta annwalment lill-Parlament, fiż-żmien dovut qabel il-proċedura ta’ kwittanza rispettiva, dwar l-użu tal-SIF fl-Istati Membri, inklużi indikaturi paragunabbli dwar l-effettività, l-effiċjenza u l-ekonomija tal-SIF, u anke dwar kif il-Kummissjoni tikkoordina, tiżgura l-konsistenza u ttaffi r-riskju li jkun hemm elementi doppji bejn l-oqsma ta’ politika;

12.

Jiddispjaċih li l-Kummissjoni tinjora b’mod kostanti t-talba li ilha ssir mill-Parlament biex iżżid il-firma tal-Kummissarju responsabbli mar-rapporti ta’ attività annwali tad-Direttorat Ġenerali relatat tiegħu/tagħha; jinnota, madankollu, li r-Rapport ta’ Sinteżi jiġi adottat mill-Kulleġġ tal-Kummissarji u jinkludi dikjarazzjoni speċifika li tenfasizza r-responsabilità finali tal-Kummissjoni għall-ġestjoni tal-uffiċjali awtorizzanti tagħha abbażi tal-assigurazzjonijiet u r-riżervi li jkunu għamlu fir-rapport ta’ attività annwali tagħhom; hu għalhekk tal-opinjoni li l-Kulleġġ, meta adotta r-Rapport ta’ Sinteżi, ħa nota tal-problemi fid-direttorati ġenerali rispettivi u jista’ jinżamm responsabbli;

13.

Jistieden lill-Kummissjoni tkompli ttejjeb il-kwalità u l-paragunabilità tar-rapporti ta’ attività annwali;

14.

Jilqa’ l-fatt li l-Kummissjoni tat aċċess lill-Parlament għas-sommarji annwali tal-Istati Membri; jiddeplora, madankollu, il-fatt li 17-il Stat Membru biss taw permess lill-Kummissjoni biex tagħmel dan; jitlob lill-Kummissjoni tikkomunika liema passi u miżuri se tieħu biex tiżgura li l-10 Stati Membri li għad fadal jagħtu wkoll il-permess tagħhom;

15.

Jilqa’ r-regoli ġodda introdotti fir-Regolament Finanzjarju (UE, Euratom) Nru 966/2012 dwar l-approvazzjoni regolari tal-prefinanzjamenti, u jħeġġeġ lill-Kummissjoni tkompli bl-isforzi tagħha biex issegwi r-rakkomandazzjonijiet tal-Qorti tal-Awdituri fir-rigward tad-data u l-metodi kontabilistiċi relevanti;

16.

Jirrikonoxxi li l-proposti tal-Kummissjoni għall-perjodu ta’ programmazzjoni tal-2014–2020 fil-biċċa l-kbira tagħhom issodisfaw it-tħassib li l-Parlament esprima fir-riżoluzzjoni tiegħu li takkumpanja d-deċiżjoni dwar il-kwittanza għall-implimentazzjoni tal-baġit fl-2008 (15), bil-proposta għall-introduzzjoni ta’ korrezzjonijiet finanzjarji netti għall-Istati Membri, kif ukoll proċeduri u kundizzjonijiet simplifikati skont liema l-pagamenti jistgħu jiġu interrotti jew sospiżi; jinnota li dawn il-proposti jiċċaraw ukoll ċerti regoli dwar l-eliġibilità u jipprojbixxu b’mod ċar il-possibilità li l-awtoritajiet maniġerjali jagħżlu proġetti fiżikament lesti jew kompletament implimentati qabel l-applikazzjoni għal finanzjament (l-hekk imsejħa “proġetti retrospettivi”);

17.

Jistieden lill-Kummissjoni tinvestiga l-possibbiltajiet għat-twaqqif ta’ sistema korrettiva għal oqsma ta’ nfiq li huma suxxettibbli għal żbalji, u li fiha l-valur materjali totali ta’ żbalji fis-sena ikun parzjalment jew għalkollox imnaqqas, mit-talbiet annwali ta’ rimborż li jsiru mill-organizzazzjonijiet li jakkreditaw, skont il-gravità tal-irregolaritajiet;

18.

Ifakkar li l-Artikolu 287 tat-TFUE jipprevedi li: “Il-Qorti tal-Awdituri tipprovdi lill-Parlament Ewropew u lill-Kunsill dikjarazzjoni li biha tiċċertifika l-affidabbiltà tal-kontijiet u l-legalità u r-regolarità tal-operazzjonijiet li jaqgħu taħthom (…)”;

19.

Ifakkar li barra li tagħti opinjoni rigward l-affidabbiltà tal-kontijiet, il-Qorti tal-Awdituri tagħti tliet opinjonijiet dwar il-legalità u r-regolarità tal-operazzjonijiet li jaqgħu taħt il-kontijiet; hu tal-fehma li d-diversi opinjonijiet ma jiffaċilitawx il-valutazzjoni li jridu jagħmlu l-Membri tal-Parlament Ewropew dwar l-implimentazzjoni tal-baġit mill-Kummissjoni;

20.

Jindika li l-Qorti tal-Awdituri tistabbilixxi, fuq il-bażi tal-eżerċizzji ta’ awditjar tagħha, ir-rata ta’ żball l-aktar probabbli, li fl-2011 kienet ta’ 3,9 % għall-pagamenti; jindika li fuq il-bażi ta’ standards internazzjonali ta’ awditjar, il-Qorti tal-Awdituri tieħu 2 % bħala livell minimu ta’ materjalità bħala rata ġeneralment aċċettabbli għall-iżbalji u li, jekk ir-rata ta’ żball l-aktar probabli tkun akbar minn dan il-limitu minimu, il-Qorti se tagħti opinjoni negattiva;

21.

Jindika li bi qbil mal-internazzjonali ta’ awditjar, hija r-responsabbiltà tal-awditur estern li jistabbilixxi b’indipendenza sħiħa l-limitu minimu ta’ materjalità;

22.

Jenfasizza li għandha ssir distinzjoni bejn l-iżbalji u l-frodi u jikkunsidra li, fil-maġġoranza l-kbira tal-każi, l-iżbalji jirriżultaw minn żbalji akmministrattivi, b’mod partikolari marbuta mal-kumplessità tar-regoli tal-Unjoni u nazzjonali, li jistgħu jiġu korretti; ifakkar lill-Kummissjoni, madankollu, li r-rata attwali ta’ żbalji għadha għolja b’mod inaċċettabbli u li l-Parlament għandu approċċ ta’ tolleranza żero fir-rigward tal-iżbalji;

23.

Jissottolinja l-fatt li rata ta’ żball fiha nnifisha ma tagħtix perspettiva komprensiva tal-effettività tal-politiki tal-Unjoni; hu, għaldaqstant, tal-fehma li l-eżerċizzji ta’ awditjar tal-konformità għandhom jiġu ssuplimentati b’awditi tar-rendiment li jivvalutaw l-ekonomija, l-effiċjenza u l-effettività tal-istrumenti ta’ politika tal-Unjoni; jindika l-fatt li l-Accountability Office tal-Gvern tal-Istati Uniti jikkonċentra aktar fuq l-eżerċizzji ta’ awditjar tar-rendiment u mhux fuq dawk tal-konformità;

24.

Josserva li hemm xi differenzi ta’ fehmiet bejn il-Qorti tal-Awdituri u l-Kummissjoni fir-rigward tal-mod kif għandhom jiġu kkalkulati l-iżbalji, b’mod partikulari rigward jekk il-prefinanzjament għandux jiġi inkluż jew eskluż, rigward l-ittrattar tal-iżbalji kwantifikabbli u mhux, u rigward il-mod kif għandhom jiġu kkunsidrati l-irkupri u l-korrezzjonijiet finanzjarji fil-valutazzjoni globali tal-impatt finanzjarju tal-iżbalji u l-kapaċità korrettiva tas-sistemi; hu tal-fehma li l-approċċi differenti huma riflessjoni tar-rwoli differenti li jiżvolġu rispettivament l-istituzzjonijiet, speċifikament ir-rwol ta’ awditur minn naħa u dak ta’ amministratur min-naħa l-oħra; jitlob li l-Qorti tal-Awdituri tqis il-possibbiltà li tissepara dawn il-kategoriji differenti kontroversjali ta’ rati ta’ żbalji fir-rapport annwali li jmiss tagħha u tikklassifika skont il-qasam il-politika u r-riżultati tal-irkupru u l-korrezzjonijiet finanzjarji;

25.

Jifhem li, mal-mogħdija taż-żmien, il-kompetenza u l-metodoloġija jistgħu jinbidlu; jinsisti, madankollu, li hemm bżonn li r-riżultati tal-eżerċizzji ta’ awditjar jibgħu paragunabbli sabiex il-Parlament ikun jista’ jagħmel valutazzjoni politika fuq żmien itwal;

26.

Jappella, għaldaqstant, li tissaħħaħ il-kooperazzjoni bejn l-entitajiet ta’ awditjar nazzjonali u l-Qorti Ewropea tal-Awdituri fir-rigward tal-kontrolli ta’ ġestjoni kondiviża, skont l-Artikolu 287(3) tat-TFUE;

27.

Jipproponi li titqies il-possibilità li l-entitajiet ta’ awditjar nazzjonali joħorġu, fil-kapaċità tagħhom ta’ awdituri esterni indipendenti u skont l-istandards internazzjonali ta’ awditjar, ċertifikati nazzjonali ta’ awditjar għall-ġestjoni tal-fondi tal-Unjoni; dawn iċ-ċertifikati jiġu ppreżentati lill-gvernijiet tal-Istati Membri bil-ħsieb li jitressqu waqt il-proċess ta’ kwittanza skont proċedura interistituzzjonali adegwata li trid tiġi stabbilita;

28.

Jilqa’ l-fatt li l-kontijiet annwali tal-Unjoni għas-sena finanzjarja 2011 jippreżentaw b’mod ġust, u f’kull aspett materjali, il-pożizzjoni tal-Unjoni fil-31 ta’ Diċembru 2011, u r-riżultati tal-operazzjonijiet tagħha u tal-flussi ta’ flusha għas-sena li kienet għadha kif intemmet;

29.

Jinnota b’sodisfazzjon li l-introjtu sottostanti għall-kontijiet tas-sena li ntemmet fil-31 ta’ Diċembru 2011 hu legali u regolari f’kull aspett materjali;

30.

Jinnota b’sodisfazzjon li l-impenji sottostanti għall-kontijiet tas-sena li ntemmet fil-31 ta’ Diċembru 2011 huma legali u regolari f’kull aspett materjali;

31.

Jiddispjaċih profondament li l-pagamenti għadhom materjalment milqutin minn żbalji;

32.

Jifhem li l-bażi għal din l-opinjoni negattiva tal-Qorti tal-Awdituri hi l-osservazzjoni li s-sistemi superviżorji u ta’ kontroll huma biss parzjalment effettiv u li, b’riżultat ta’ dan, il-pagamenti huma milqutin minn rata ta’ żball tal-ogħla probabilità ta’ 3,9 %;

33.

Jinnota bi tħassib li l-gruppi ta’ politiki li jirrigwardaw l-agrikoltura; l-appoġġ għas-suq u l-appoġġ dirett; l-iżvilupp rurali, l-ambjent, is-sajd u s-saħħa; il-politika reġjonali, l-enerġija u t-trasport; l-impjiegi u l-affarijiet soċjali, kif ukoll riċerka u politiki interni oħra huma materjalment milquta minn żball;

34.

Ifakkar li l-istima tar-rata ta’ żball l-aktar probabbli għall-pagamenti fis-sena finanzjarja 2010 kienet ta’ 3,7 % u fis-sena finanzjarja 2009 kienet ta’ 3,3 %; jinsab diżappuntat ħafna dwar din iż-żieda peress li taqleb it-tendenza pożittiva osservata fis-snin 2007, 2008 u 2009; jistieden, għalhekk, lill-Kummissjoni tieħu l-passi meħtieġa biex tikseb tendenza li turi tnaqqis konsistenti fir-rata ta’ żball; jisħaq li l-Parlament hu tal-fehma li l-ilħiq ta’ dawn il-miri huwa parti essenzjali biex jinkiseb valur sħiħ għall-infiq tal-Unjoni fil-futur u biex isir progress lejn DAS pożittiv” (16);

35.

Jattribwixxi dan l-iżvilupp prinċipalment għaż-żieda tar-rata ta’ żball l-aktar probabbli fil-qasam tal-agrikoltura, u huwa mħasseb b’mod partikulari dwar il-livell għoli ta’ żbalji fl-iżvilupp rurali, fejn l-iktar rata ta’ żbalji probabbli rrappurtata kienet 7,7 %;

36.

Jistieden lill-Qorti tal-Awdituri tadatta r-rapporti speċjali dwar oqsma speċifiċi tal-politika aktar minn qabel biex tkun iggarantita l-komparabilità ma’ perjodi tal-passat;

37.

Jiddispjaċih li l-Kunsill qed ikompli jirrifjuta li jikkoopera mal-Parlament fir-rigward tal-kwittanza tal-Kunsill; jemmen li dan iħalli lill-Kumitat għall-Kontroll tal-Baġit bi ftit strumenti u li eventwalment il-Kumitat se jkun kostrett iressaq il-mistoqsijiet u t-talbiet tiegħu għal informazzjoni dwar il-baġit tal-Kunsill lill-Kummissjoni;

38.

Jinnota li l-Kunsill jirrakkomanda li jagħti kwittanza lill-Kummissjoni għall-implimentazzjoni tal-baġit ġenerali tal-Unjoni għas-sena finanzjarja 2011; jinnota li l-Pajjiżi l-Baxxi, l-Isvezja u r-Renju Unit ivvutaw kontra li tingħata l-kwittanza lill-Kummissjoni għall-eżekuzzjoni tal-baġit tal-Unjoni għas-sena finanzjarja 2011; jieħu nota tal-kummenti ta’ dawn il-pajjiżi:

39.

Jinnota f’dan il-kuntest l-għadd għoli tar-riżervi tal-Kummissjoni rigward is-sistemi ta’ ġestjoni u kontroll tal-FEŻR/il-FK għall-perjodu 2007–2013 fost oħrajn fil-Pajjiżi l-Baxxi u fir-Renju Unit; jinkoraġġixxi lill-Kunsill jasal għal konklużjonijiet mill-kummenti tal-Pajjiżi l-Baxxi, tal-Isvezja u tar-Renju Unit billi jwettaq analiżi inter pares tal-ġestjoni finanzjarja u tal-kwalità tar-rendiment ta’ kull wieħed mill-Istati Membri;

40.

Jenfasizza li, bi qbil mal-Artikolu 317 tat-TFUE, il-Kummissjoni hi fl-aħħar mill-aħħar responsabbli għall-implimentazzjoni tal-baġit tal-Unjoni; jindika li, meta l-Kummissjoni timplimenta l-baġit taħt ġestjoni kondiviża, il-kompiti ta’ implimentazzjoni jiġu ddelegati lill-Istati Membri skont l-Artikolu 53b tar-Regolament Finanzjarju (KE, Euratom) Nru 1605/2002;

41.

Jisħaq fuq il-fatt li, f’dan ir-rigward, ir-responsabilità tad-Diretturi Ġenerali hi ġebla tax-xewka għas-sistema attwali tal-Kummissjoni għall-ġestjoni tal-fondi tal-Unjoni, u jenfasizza l-importanza li dawn jirrappreżentaw b’mod ġust ir-rendimenti maniġerjali fir-rapport ta’ attività annwali tagħhom;

42.

Ifakkar li fir-riżoluzzjoni tiegħu għall-kwittanza għall-2010 il-Parlament ippropona li jkun hemm Kummissarju full-time responsabbli mill-Kontroll tal-Baġit fl-ambitu tal-Kummissjoni tal-2014-2019

43.

Jistenna li l-Istati Membri huma konxji għalkollox dwar l-obbligi tagħhom, skont l-Artikolu 4(3) tat-Trattat dwar l-Unjoni Ewropea u skont il-prinċipju ta’ kooperazzjoni sinċiera, biex jassistu b’mod attiv u effettiv lill-Unjoni fit-twettiq tal-kompiti tagħha li jirriżultaw mit-Trattati;

44.

Jinsisti f’dan il-kuntest fuq l-importanza tal-Artikolu 53b tar-Regolament Finanzjarju (KE, Euratom) Nru 1605/2002, li jipprevedi li, meta jkunu qed jimplimentaw il-baġit, l-Istati Membri għandhom jieħdu kull miżura meħtieġa, inklużi miżuri leġiżlattivi, regolatorji u amministrattivi, għall-protezzjoni tal-interessi finanzjarji tal-Unjoni; jisħaq f’dan ir-rigward fuq il-fatt li l-Artikolu 59(2) tar-Regolament Finanzjarju (UE, Euratom) Nru 966/2012 il-ġdid saħansitra jispeċifika li dawn il-miżuri għandhom jikludu dan li ġej: (a) l-iżgurar li l-azzjonijiet finanzjati mill-baġit jiġu implimentati b’mod korrett u effettiv u f’konformità mar-regoli speċifiċi għas-settur applikabbli għal dak il-għan, u (b) il-prevenzjoni, l-identifikazzjoni u l-korrezzjoni tal-irregolaritajiet u l-frodi;

45.

Josserva li s-sistema attwali ma tiżgurax it-trasparenza sħiħa tal-benefiċjarji tal-appoġġ tal-FEŻR u tal-FK; fl-ambitu tal-qafas eżistenti, il-Kummissjoni tipprovdi portal b’aċċess għal-listi ta’ benefiċjarji disponibbli fuq websajts nazzjonali, li jinsabu fil-lingwa nazzjonali rispettiva biss u ma jsegwux kriterji komuni; jistenna r-regolament futur li jkopri l-istrumenti strutturali sabiex jiġi żgurat li l-Istati Membri jipprovdu d-data fuq il-benefiċjarji finali tal-fondi tal-FEŻR/FK li għandha tiġi ppubblikata fil-websajt uffiċjali tal-Kummissjoni f’waħda mit-tliet lingwi ta’ ħidma tal-Unjoni u bbażata fuq sett ta’ kriterji komuni sabiex ikun hemm lok għal paragun u l-konstatazzjoni ta’ żbalji;

46.

Jiġbed l-attenzjoni għall-preżenza ta’ differenzi sinifikanti fir-rendiment amministrattiv tal-Istati Membri fil-qasam tal-introjtu u n-nefqa fil-ġestjoni konġunta, speċjalment marbuta mas-sejba ta’ irregolaritajiet, frodi u żbalji u segwitu finanzjarju kemm fil-qasam doganali u l-infiq tal-fondi tal-Unjoni; jinnota li s’issal-Kummissjoni tissorvelja r-rendiment amministrattiv b’mod reattiv u każ b’każ u għaldaqstant ma twettaqx biżżejjed analiżi tat-tendenzi biex tidentifika l-oqsma ta’ riskju; jistieden lill-Kummissjoni tapplika l-metodu tal-analiżi tat-tendenzi biex tidentifika r-riskji finanzjarji u tieħu miżuri biex ittejjeb ir-rendiment amministrattiv tal-Istati Membri;

47.

Jilqa’ l-fatt li, f’konformità mal-Artikolu 59(3), (4) u (5) tar-Regolament Finanzjarju (UE, Euratom) Nru 966/2012 il-ġdid, l-awtoritajiet maniġerjali tal-Istati Membri fil-futur huma rikjesti li kull sena jipprovdu lill-Kummissjoni bil-kontijiet tagħhom flimkien ma’ dikjarazzjoni dwar il-ġestjoni, sommarju annwali tar-rapport finali tal-eżerċizzju ta’ awditjar tagħhom u tal-kontrolli, u opinjoni minn korp ta’ awditjar indipendenti;

48.

Jinsab konvint li d-dikjarazzjonijiet imsemmijin hawn fuq, meta kkombinati mal-introduzzjoni ta’ deliberazzjoni awtokritika fil-Kunsill, li għad trid tiddaħħal u li s’issa għadha nieqsa, u analiżi inter pares imparzjali, onesta u miftuħa bejn l-Istati Membri, jirriżultaw f’eżekuzzjoni baġitarja aħjar u aktar effettiv, iżidu r-rendiment tal-politiki, tal-programmi u tal-proġetti u jgħinu biex isaħħu s-solidarjetà fost l-Istati Membri u jieħdu post in-nuqqas reċiproku ta’ fiduċja, riżultat li hu preferibbli għat-tnaqqis baġitarju għad-detriment tal-irkupru ekonomiku u l-fiduċja taċ-ċittadini tal-Unjoni f’Ewropa komuni;

49.

Jilqa’ l-fatt li l-Istati Membri jistgħu, fil-livell xieraq, jippubblikaw l-informazzjoni ta’ hawn fuq u, barra minn hekk, jipprovdu dikjarazzjonijiet iffirmati fil-livell xieraq fuq il-bażi ta’ dik l-informazzjoni; jistieden lill-Kummissjoni tassisti lill-Istati Membri biex jipprovdu dawk id-dikjarazzjonijiet volontarji dwar il-ġestjoni kif imsemmijin fl-Artikolu 59(5) tar-Regolament Finanzjarju (UE, Euratom) Nru 966/2012 il-ġdid billi tippromwovi l-aħjar prattiki; jinsisti li l-Parlament għandu jirċievi kemm id-dikjarazzjonijiet dwar il-ġestjoni, kif ukoll id-dikjarazzjonijiet volontarji;

50.

Jinnota li l-Kummissjoni għandha tiggwida lill-Istati Membri bl-abbozzar ta’ sommarji annwali li jagħmlu sens; jinnota li għal dan l-iskop, l-informazzjoni mogħtija dwar programmi operattivi taħt ġestjoni kondiviża għandha tkun standardizzata fir-rigward tal-forma u l-kontenut; jirrimarka li s-sommarji annwali għandhom jingħataw għad-dispożizzjoni tal-Parlament u m’għandhomx ikunu disponibbli biss bil-lingwa tal-Istat Membru, u b’hekk tiżdied it-trasparenza u r-responsabilizzazzjoni;

51.

JInnota, madankollu, li la l-Qorti tal-Awdituri u lanqas il-Kummissjoni ma jikkunsidraw is-sommarji annwali f’dan l-istadju bħala sors prezzjuż ta’ informazzjoni għall-finijiet tal-valutazzjoni tal-konformità mill-benefiċjarji jew tar-rendiment tagħhom; itenni t-talba tiegħu li l-Kummissjoni għandha tanalizza l-aspetti b’saħħithom u dawk dgħajfin tas-sistemi ta’ kontroll nazzjonali abbażi tas-sommarji annwali li tirċievi; iqis li din is-sitwazzjoni hi inaċċettabbli u jeżiġi li l-Kummissjoni tieħu azzjoni immedjata biex tiżgura li s-sommarji annwali li jmiss ikunu utli għall-valutazzjoni tar-rendiment tal-benefiċjarji;

52.

Jindika li ntwera li s-sommarji annwali pprovduti mill-Istati Membri fil-forma attwali tagħhom ftit jipprovdu valur miżjud u li l-elementi ta’ konformità tas-sommarju annwali attwali sempliċiment jidduplikaw informazzjoni disponibbli faċilment minn sorsi oħrajn (17); iħeġġeġ, għalhekk, lill-Istati Membri kollha jżidu l-utilità tas-sommarji annwali tagħhom billi jinkludu analiżi ġenerali tar-riżultati u dikjarazzjoni dwar il-livell ġenerali ta’ assigurazzjoni biex juru l-impenn tagħhom favur il-ġestjoni finanzjarja tajba tal-fondi tal-UE u favur it-trasparenza; Iħeġġeġ lill-Awstrija, il-Belġju, il-Ġermanja, l-Irlanda, l-Italja, il-Latvja, il-Litwanja, Malta, il-Pajjiżi l-Baxxi, il-Polonja u Spanja b’mod partikolari jsegwu bla dewmien l-eżempju tal-15-il Stat Membru li inkludew “dikjarazzjoni dwar il-livell ġenerali tal-assigurazzjoni” fis-sommarji annwali tagħhom għall-azzjonijiet strutturali fil-Fond Soċjali Ewropew (FSE) u l-FEŻR (18) sabiex il-Kumitat għall-Kontroll tal-Baġit jibbenefika minn din l-informazzjoni matul il-proċedura ta’ kwittanza tal-2012; jistenna li dawk l-Istati Membri li ma jippreżentawx dikjarazzjoni ta’ dan it-tip fiż-żmien dovut se jippreżentaw dikjarazzjoni komprensiva li tispjega r-raġunijiet għal dan in-nuqqas;

53.

Jistieden lill-Istati Membri joħorġu dikjarazzjonijijiet dwar il-ġestjoni nazzjonali fil-livell politiku xieraq u jitlob lill-Kummissjoni tistabbilixxi mudell għal dikjarazzjoni ta’ dan it-tip;

54.

Jistieden lill-Kummissjoni tistabbilixxi fi żmien qasir, f’kooperazzjoni mal-Istati Membri, mudell għad-dikjarazzjonijiet dwar il-ġestjoni nazzjonali li jtihom sinifikat u jagħmilhom paragunabbli; jistieden lill-Kummissjoni tipprovdi b’mod miftuħ l-opinjoni tagħha dwar dawn id-dikjarazzjonijiet; hu tal-fehma li t-tali dikjarazzjonijiet għandhom, inter alia, jiċċertifikaw il-kriterji (bħal kontijiet reali u ġusti, l-effettività tas-sistemi ġestjonali u ta’ kontroll u l-legalità u r-regolarità tat-tranżazzjonijiet sottostanti) u jispeċifikaw l-ambitu tar-riżervi għall-assigurazzjoni u ċ-ċaħdiet; jitlob lill-Kummissjoni tippreżenta proposti biex jitnaqqas il-piż tal-kontrolli għal dawk l-Istati Membri jew ir-reġjuni li konsistentement ikollhom rendiment tajjeb, skont ir-rapport annwali tal-Qorti tal-Awdituri u skont id-dikjarazzjonijiet dwar il-ġestjoni nazzjonali tagħhom stess; hu tal-fehma li l-Qorti tal-Awdituri u l-Kummissjoni għandhom ikunu jistgħu jqisu s-sustanza tad-dikjarazzjonijiet dwar il-ġestjoni nazzjonali fil-ħidma ta’ awditjar tagħhom;

55.

Jinnota d-dettalji speċifikati f’din it-tabella ta’ valutazzjoni rigward iż-żewġ inizjattivi li għandhom x’jaqsmu mal-kontribuzzjonijiet tal-Istati Membri għat-titjib tal-effettività tal-ġestjoni kondiviża:

Tabella ta’ valutazzjoni