(1)

Sabiex tkun permessal-flessibbiltà, il-kontroparti għandha tkun tista’ tiddelega r-rapportar ta’ kuntratt lill-kontroparti l-oħra jew lil parti terza. Il-kontropartijiet għandhom ukoll ikunu jistgħu jiftiehmu li jiddelegaw ir-rappurtar lil entità terza komuni inkluż kontroparti ċentrali (CCP), din tal-aħħar tissottometti rapport wieħed, inkluż it-tabella rilevanti tal-oqsma, lir-repożitorju tat-tranżazzjonijiet. F’dawn iċ-ċirkostanzi u sabiex tkun żgurata l-kwalità tad-dejta, ir-rapport għandu jindika li sar f’isem iż-żewġ kontropartijiet u li se jinkludi s-sett sħiħ ta’ dettalji li kieku kienu jiġu rrapportati kieku l-kuntratt ġie rrappurtat separatament.

(2)

Biex jiġu evitati inkonsistenzi fit-tabelli tad-Dejta Komuni, kull kontroparti f’kuntratt derivattiv għandha tiżgura li d-Dejta Komuni rappurtata hija mifthiema bejn iż-żewġ partijiet tat-tranżazzjoni. Identifikatur kummerċjali uniku se jgħin fir-rikonċiljazzjoni tad-dejta fil-każ li l-kontropartijiet ikunu qed jirrappurtaw lil repożitorji tat-tranżazzjonijiet differenti.

(3)

Biex jiġi evitat rapportar doppju u biex jonqos il-piż tar-rapportar, fejn kontroparti waħda jew CCP tirrapporta f’isem iż-żewġ kontropartijiet, il-kontroparti jew is-CCP għandha tkun tista’ tibgħat rapport wieħed lir-repożitorju tat-tranżazzjonijiet li jkun fih l-informazzjoni rilevanti.

(4)

Il-valuwazzjoni tal-kuntratti tad-derivattivi hija essenzjali biex tippermetti lir-regolaturi jissodisfaw il-mandati tagħhom, b’mod partikolari fir-rigward tal-istabbiltà finanzjarja. Il-valwazzjoni skont is-suq jew il-valwazzjoni skont mudell tal-valur ta’ kuntratt tindika s-sinjal u d-daqs tal-iskopertura relatata ma’ dak il-kuntratt, u tikkumplimenta l-informazzjoni dwar il-valur oriġinali speċifikat fil-kuntratt.

(5)

Il-ġbir ta’ informazzjoni dwar kollateral li jappartjeni għal kuntratt partikolari huwa essenzjali biex jiġi żgurat monitoraġġ xieraq tal-iskoperturi. Biex dan ikun possibbli, il-kontropartijiet li jikkollateralizzaw it-tranżazzjonijiet tagħhom għandhom jirrapportaw id-dettalji tal-kollateralizzazzjoni fuq bażi ta’ livell ta’ tranżazzjoni. Meta l-kollateral jiġi kkalkulat fuq il-bażi tal-pożizzjonijiet netti li jirriżultaw minn sett ta’ kuntratti, u għalhekk mhux rapportat fuq bażi ta’ livell ta’ tranżazzjoni iżda fuq bażi ta’ portafoll, il-kontropartijiet għandhom ikunu jistgħu jirrapportaw il-portafoll billi jużaw kodiċi uniku jew sistema numerika kif determinat mill-kontroparti. Dak il-kodiċi uniku għandu jidentifika l-portafoll speċifiku li fuqu l-kollateral huwa skambjat fejn il-kontroparti jkollha aktar minn portafoll wieħed u għandu wkoll jiżgura li kuntratt ta’ derivattiv jista’ jintrabat mal-portafoll partikolari li għalih ikun qed jinżamm il-kollateral.

(6)

Dan ir-Regolament huwa bbażat fuq l-abbozzi tal-istandards tekniċi regolatorji sottomessi mill-Awtorità Ewropea tat-Titoli u s-Swieq (AETS) lill-Kummissjoni u jirrifletti r-rilevanza tar-rwol tar-repożitorji tat-tranżazzjonijiet biex titjieb it-trasparenza tas-swieq lejn il-pubbliku u r-regolaturi, id-dejta li tiġi rrappurtata lil, tinġabar u titqiegħed għad-dispożizzjoni minn repożitorji tat-tranżazzjonijiet skont il-klassi tad-derivattivi u n-natura tat-tranżazzjoni.

(7)

L-AETS ikkonsultat lill-awtoritajiet rilevanti u l-membri tas-Sistema Ewropea tal-Banek Ċentrali (SEBĊ) qabel issottomettiet l-abbozz tal-istandards tekniċi regolatorji li dan ir-Regolament huwa bbażat fuqhom. Skont l-Artikolu 10 tar-Regolament (UE) Nru 1095/2010, tal-Parlament Ewropew u tal-Kunsill tal-24 ta’ Novembru 2010 li jistabbilixxi Awtorità Superviżorja Ewropea (Awtorità Ewropea tat-Titoli u s-Swieq) (3), l-AETS għamlet ukoll konsultazzjonijiet pubbliċi miftuħa dwar l-abbozzi tal-istandards tekniċi regolatorji, analizzat il-kostijiet u l-benefiċċji potenzjali relatati u talbet l-opinjoni tal-Grupp tal-Partijiet Interessati tat-Titoli u s-Swieq tal-AETS stabbilit skont l-Artikolu 37 ta’ dak ir-Regolament,

(1)

Għandu jiġi pprovdut qafas biex jinġabru r-regoli applikabbli għall-obbligu tal-ikklerjar, l-applikazzjoni tiegħu, l-eżenzjonijiet possibbli u t-tekniki ta’ mitigazzjoni tar-riskji li għandhom jiġu stabbiliti meta ma jkunx jista’ jsir ikklerjar ma’ kontroparti ċentrali (CCP). Biex tkun żgurata l-koerenza bejn dawn id-dispożizzjonijiet, li għandhom jidħlu fis-seħħ fl-istess ħin, u biex tkun iffaċilitata stampa komprensiva u aċċess effiċjenti għall-partijiet interessati u b’mod partikolari dawk li huma soġġetti għall-obbligi, huwa xieraq li l-biċċa l-kbira tal-istandards tekniċi regolatorji meħtieġa skont it-Titolu II tar-Regolament (UE) Nru 648/2012 jinġabru f’Regolament wieħed.

(2)

Fid-dawl tan-natura globali tas-suq tad-derivattivi OTC (over the counter), dan ir-Regolament għandu jikkunsidra l-linji gwida u rakkomandazzjonijiet rilevanti miftiehma internazzjonalment dwar ir-riformi fis-suq tad-derivattivi OTC u l-ikklerjar obbligatorju kif ukoll ir-regoli relatati żviluppati f’ġurisdizzjonijiet oħra. B’mod partikolari l-qafas għad-determinazzjoni ta’ obbligu tal-ikklerjar iqis ir-rekwiżiti tal-Ikklerjar Obbligatorju ppubblikati mill-Organizzazzjoni Internazzjonali tal-Kummissjonijiet tat-Titoli. Dan se jsostni, kemm jista’ jkun, il-konverġenza lejn l-approċċ f’ġurisdizzjonijiet oħra.

(3)

Sabiex jiġu identifikati b’mod ċar għadd limitat ta’ kunċetti li joħorġu mir-Regolament (UE) Nru 648/2012, kif ukoll biex jiġu speċifikati t-termini tekniċi meħtieġa għall-iżvilupp ta’ dan l-istandard tekniku, għandhom jiġu definiti għadd ta’ termini.

(4)

Arranġament tal-ikklerjar indirett ma għandux jesponi CCP, membru tal-ikklerjar, klijent jew klijent indirett għal riskju tal-kontroparti addizzjonali u l-assi u l-pożizzjonijiet tal-klijent indiretti għandhom jibbenefikaw minn livell xieraq ta’ protezzjoni. Għalhekk huwa essenzjali li kwalunkwe tip ta’ arranġament tal-ikklerjar indirett jikkonforma mal-kondizzjonijiet minimi biex tiġi żgurata s-sigurtà tagħhom. Għal dak il-għan, il-partijiet involuti f’arranġamenti tal-ikklerjar indiretti għandhom ikunu soġġetti għal obbligi speċifiċi. Arranġamenti bħal dawn jestendu lil hinn mir-relazzjoni kuntrattwali bejn klijenti indiretti u l-klijent ta’ membru tal-ikklerjar li jipprovdi servizzi tal-ikklerjar indiretti.

(5)

Ir-Regolament (UE) Nru 648/2012 jirrikjedi li CCP tkun sistema stabbilita skont id-Direttiva 98/26/KE tal-Parlament Ewropew u tal-Kunsill tad-19 ta’ Mejju 1998 dwar finalità ta’ settlement fis-sistemi ta’ settlement ta’ pagamenti u titoli (3). Dan jimplika li l-membri tal-ikklerjar tas-CCPs għandhom jikkwalifikaw bħala parteċipanti fis-sens ta’ dik id-Direttiva. Għalhekk biex jiġi żgurat livell ekwivalenti ta’ protezzjoni lil klijenti indiretti kif mogħti lil klijenti skont ir-Regolament (UE) Nru 648/2012, huwa meħtieġ li jiġi żgurat li l-klijenti li jipprovdu servizzi tal-ikklerjar indiretti jkunu istituzzjonijiet tal-kreditu, ditti tal-investiment jew istituzzjonijiet ta’ kreditu jew ditti tal-investiment ekwivalenti minn pajjiż terz.

(6)

Għandhom jiġu stabbiliti arranġamenti tal-ikklerjar indiretti sabiex jiġi żgurat li l-klijenti indiretti jkunu jistgħu jiksbu livell ekwivalenti ta’ protezzjoni bħall-klijenti diretti f’xenarju ta’ inadempjenza. Wara l-falliment ta’ membru tal-ikklerjar li jiffaċilita arranġament tal-ikklerjar indirett, klijenti indiretti għandhom jiġu inklużi fit-trasferiment tal-pożizzjonijiet tal-klijenti lejn membru tal-ikklerjar alternattiv skont ir-rekwiżiti tal-portabbiltà stabbiliti fl-Artikoli 39 u 48 tar-Regolament (UE) Nru 648/2012. Salvagwardji xierqa kontra l-falliment ta’ klijent għandhom jeżistu wkoll fl-arranġamenti tal-ikklerjar indiretti u għandhom jappoġġjaw it-trasferiment tal-pożizzjonijiet indiretti tal-klijenti lejn fornitur alternattiv ta’ servizzi tal-ikklerjar.

(7)

Peress li l-arranġamenti tal-ikklerjar indiretti jistgħu jagħtu lok għal riskji speċifiċi, il-partijiet kollha inklużi f’arranġament tal-ikklerjar indiretti, inklużi l-membri tal-ikklerjar u s-CCPs, għandhom regolarment jidentifikaw, jimmonitorjaw u jimmaniġġjaw kwalunkwe riskji materjali li jirriżultaw mill-arranġament. Il-qsim xieraq tal-informazzjoni bejn l-klijenti li jipprovdu servizzi tal-ikklerjar indiretti u l-membri tal-ikklerjar li jiffaċilitaw dawk is-servizzi huwa speċjalment importanti f’dan il-kuntest. Il-membri tal-ikklerjar għandhom jużaw l-informazzjoni pprovduta mill-klijenti għal skopijiet ta’ mmaniġġjar tar-riskji biss u għandhom jimpedixxu l-użu ħażin ta’ informazzjoni kummerċjalment sensittiva, inkluż permezz tal-użu ta’ separazzjonijiet effettivi bejn id-diviżjonijiet differenti ta’ istituzzjoni finanzjarja biex jiġu evitati l-konflitti ta’ interess

(8)

Meta tawtorizza CCP sabiex tikklerja klassi ta’ derivattivi OTC, l-awtorità kompetenti hija meħtieġa tinnotifika l-Awtorità Ewropea tat-Titoli u s-Swieq (AETS). Din in-notifika għandha tinkludi informazzjoni dettaljata li hija meħtieġa sabiex l-AETS twettaq il-proċess ta’ valutazzjoni tagħha, inkluża l-informazzjoni dwar il-likwidità u l-volum tal-klassi rilevanti ta’ derivattivi OTC. Għalkemm l-informazzjoni timxi mingħand l-awtorità kompetenti lejn l-AETS, huwa s-CCP li tkun talbet l-awtorizzazzjoni li għandha inizjalment tipprovdi l-informazzjoni meħtieġa lill-awtoritajiet kompetenti li mbagħad ikunu jistgħu jikkomplimentawha.

(9)

Għalkemm l-informazzjoni kollha li għandha tiġi inkluża fin-notifika mill-awtorità kompetenti lill-AETS għall-fini tal-obbligu tal-ikklerjar tista’ mhux dejjem tkun disponibbli, speċjalment għal prodotti ġodda, għandhom jiġu pprovduti l-istimi disponibbli, inkluża indikazzjoni ċara tas-suppożizzjonijiet li saru. In-notifika għandu jkun fiha wkoll informazzjoni dwar il-kontropartijiet, bħalma huma t-tip u l-għadd ta’ kontropartijiet, il-passi meħtieġa biex jibdew jikklerjaw ma’ CCP, il-kapaċità ġuridika u operazzjonali tagħhom jew il-qafas tal-immaniġġjar tar-riskji tagħhom sabiex l-AETS tkun tista’ tivvaluta l-kapaċità tal-kontropartijiet attivi li jikkonformaw mal-obbligu tal-ikklerjar mingħajr ma jiddisturbaw lis-suq.

(10)

In-notifika mingħand l-awtorità kompetenti lill-AETS għandu jkun fiha informazzjoni fuq il-livell ta’ standardizzazzjoni, id-disponibbiltà tal-likwidità u tal-prezz, sabiex l-ESMA tivvaluta jekk klassi ta’ derivattivi OTC għandhiex tkun soġġetta għall-obbligu tal-ikklerjar. Il-kriterji relatati mal-istandardizzazzjoni tat-termini kuntrattwali u l-proċessi operattivi tal-klassi rilevanti tal-OTC huma indikatur tal-istandardizzazzjoni tat-termini ekonomiċi ta’ klassi ta’ derivattivi OTC peress li huwa biss meta tali termini ekonomiċi jiġu standardizzati li t-termini kontrattwali u l-proċessi operattivi jkunu jistgħu jiġu standardizzati. Il-kriterji relatati mad-disponibbiltà tal-likwidità u l-prezzijiet jiġu vvalutati mill-AETS b’konsiderazzjonijiet differenti mill-valutazzjoni mwettqa mill-awtorità kompetenti meta tawtorizza lis-CCP. Il-likwidità f’dan il-kuntest tiġi vvalutata fuq perspettiva usa’ u hija differenti mil-likwidità wara li jkun japplika l-obbligu tal-ikklerjar. B’mod partikolari, il-fatt li kuntratt ikun likwidu biżżejjed biex jiġi kklerjat minn CCP waħda ma jimplikax neċċessarjament li għandu jkun soġġett għall-obbligu tal-ikklerjar. Il-valutazzjoni tal-AETS ma għandux jirreplika jew jiddupplika l-analiżi li tkun diġà twettqet mill-awtorità kompetenti.

(11)

L-informazzjoni li għandha tiġi pprovduta mill-awtorità kompetenti għall-fini tal-obbligu tal-ikklerjar għandha tippermetti lill-AETS tivvaluta d-disponibbiltà tal-informazzjoni dwar l-ipprezzar. F’dan ir-rigward, l-aċċess ta’ CCP għall-informazzjoni dwar l-ipprezzar f’punt wieħed taż-żmien ma jfissirx li l-parteċipanti fis-suq ikunu jistgħu jaċċessaw l-informazzjoni dwar l-ipprezzar fil-ġejjieni. Bħala riżultat, il-fatt li CCP jkollha aċċess għall-informazzjoni tal-prezz meħtieġa biex timmaniġġja r-riskji tal-ikklerjar ta’ kuntratti tad-derivattivi f’ċertu klassi ta’ derivattivi OTC, ma jimplikax awtomatikament li din il-klassi ta’ derivattivi OTC għandha tkun soġġetta għall-obbligu tal-ikklerjar.

(12)

Il-livell tad-dettalji disponibbli fir-reġistru tal-klassijiet ta’ kuntratti tad-derivattivi OTC soġġetti għall-obbligu tal-ikklerjar jiddependi fuq ir-rilevanza ta’ dawn id-dettalji biex tiġi identifikata kull klassi ta’ kuntratti ta’ derivattivi OTC. B’riżultat ta’ dan il-livell ta’ dettalji fir-reġistru jista’ jvarja bejn il-klassijiet differenti ta’ kuntratti tad-derivattivi OTC.

(13)

Il-permess għall-aċċess minn diversi CCPs għal ċentru tat-tranżazzjonijiet iwessa’ l-aċċess tal-parteċipanti għal dak iċ-ċentru u għalhekk isaħħaħ il-likwidità kumplessiva. Madankollu huwa meħtieġ f’dawn iċ-ċirkustanzi li jiġi speċifikat il-kunċett ta’ frammentazzjoni tal-likwidità f’ċentru f’każ li dan jista’ jhedded l-funzjonament bla xkiel u fl-ordni tas-swieq għall-klassi ta’ strumenti finanzjarji li għalihom issir it-talba.

(14)

Il-valutazzjoni tal-awtorità kompetenti taċ-ċentru tat-tranżazzjonijiet mingħand min CCP tkun talbet aċċess u tal-awtorità kompetenti tas-CCP għandhom ikunu bbażati fuq il-mekkaniżmi disponibbli biex tiġi evitata l-frammentazzjoni tal-likwidità f’ċentru tat-tranżazzjonijiet.

(15)

Biex tiġi evitata l-frammentazzjoni tal-likwidità, il-parteċipanti kollha f’ċentru tat-tranżazzjonijiet għandhom ikunu kapaċi jikklerjaw it-tranżazzjonijiet kollha mwettqa bejniethom. Madankollu, ma jkunx proporzjonat li l-membri kollha tal-ikklerjar ta’ CCP eżistenti jkunu meħtieġa jsiru wkoll membri tal-ikklerjar ta’ kwalunkwe CCP ġdida li taqdi lil dan iċ-ċentru tat-tranżazzjonijiet. Fejn hemm entitajiet li huma membri tal-ikklerjar taż-żewġ CCPs, dawn jistgħu jiffaċilitaw it-trasferiment u l-ikklerjar tat-tranżazzjonijiet eżegwiti minn parteċipanti tas-suq moqdija separatament miż-żewġ CCPs, biex ikun limitat ir-riskju tal-frammentazzjoni likwidità. Madankollu, huwa importanti li talba għall-aċċess għal ċentru tat-tranżazzjonijiet minn CCP ma tifframmentax il-likwidità b’mod li jiżdiedu r-riskji li għalihom hija skoperta s-CCP eżistenti.

(16)

Skont l-Artikolu 8(4) tar-Regolament (UE) Nru 648/2012, talba għal aċċess għal ċentru tat-tranżazzjonijiet minn CCP ma għandhiex teħtieġ l-interoperabbiltà, u konsegwentement, dan ir-Regolament ma għandux jippreskrivi l-interoperabbiltà bħala l-uniku mod biex tissolva l-frammentazzjoni tal-likwidità. Madankollu, dan ir-Regolament ma għandux jipprekludi CCPs milli jidħlu f’tali arranġament fuq bażi volontarja jekk ikunu ssodisfati l-kundizzjonijiet meħtieġa għall-istabbiliment tiegħu

(17)

Sabiex jiġi stabbilit liema kuntratti tad-derivattivi OTC huma oġġettivament miżurabbli bħala li jnaqqsu r-riskji relatati direttament mal-attività kummerċjali jew l-attività ta’ finanzjament tat-teżor, il-kontropartijiet nonfinanzjarji għandhom japplikaw wieħed mill-kriterji previsti f’dan ir-Regolament inkluż id-definizzjoni tal-kontabbiltà bbażata fuq ir-regoli tal-Istandards Internazzjonali ta’ Rapportar Finanzjarju (IFRS). Id-definizzjoni tal-kontabbiltà tista’ tintuża minn kontropartijiet anki jekk dawn ma japplikawx ir-regoli tal-IFRS. Għal dawk il-kontropartijiet nonfinanzjarji li jistgħu jużaw regoli tal-kontabbiltà lokali, huwa mistenni li l-parti l-kbira tal-kuntratti kklassifikati bħala ħeġġing skont ir-regoli lokali tal-kontabbiltà jaqgħu fi ħdan id-definizzjoni ġenerali tal-kuntratti li jnaqqsu r-riskji relatati direttament mal-attività kummerċjali jew attività tal-finanzjament tat-teżor previsti f’dan ir-Regolament.

(18)

F’xi ċirkostanzi, jista’ ma jkunx possibbli li tiħħeġġja riskju bl-użu ta’ kuntratt tad-derivattivi relatat direttament kuntratt b’eżattament l-istess sottostanti u d-data tas-saldu bħar-riskju li jkun qed jiġi kopert. F’każ bħal dan, il-kontroparti nonfinanzjarja tista’ tuża ħeġġing abbażi ta’ indikatur permezz ta’ strument korrelat mill-qrib biex tkopri l-iskopertura tagħha bħal strument b’termini sottostanti differenti iżda qrib ħafna ta’ mġiba ekonomika. Barra minn hekk, ċerti gruppi ta’ kontropartijiet nonfinanzjarji li jidħlu f’kuntratti tad-derivattivi OTC, permezz ta’ entità uniku, biex jiħħeġġjaw ir-riskju tagħhom fir-rigward tar-riskji kumplessivi tal-grupp jistgħu jużaw ħeġġing makro jew tal-portafoll. Dak il-ħeġġing makro, tal-portafoll jew abbażi ta’ indikatur ta’ kuntratti tad-derivattivi OTC jistgħu jikkostitwixxu ħeġġing għall-iskop ta’ dan ir-Regolament u għandhom jiġu meqjusa skont il-kriterji għall-istabbiliment ta’ liema kuntratti tad-derivattivi OTC qegħdin oġġettivament jitnaqqsu r-riskji.

(19)

Riskju jista’ jevolvi maż-żmien u sabiex jadattaw għall-evoluzzjoni tar-riskji, il-kuntratti tad-derivattivi OTC inizjalment eżegwiti biex inaqqsu r-riskji relatati ma’ attività kummerċjali jew finanzjament tat-teżor jistgħu jkollhom jiġu paċuti permezz ta’ użu addizzjonali ta’ kuntratti ta’ derivattivi OTC. Bħala riżultat, il-ħeġġing ta’ riskju jista’ jintlaħaq b’kombinazzjoni ta’ kuntratti tad-derivattivi OTC inkluż kuntratti tad-derivattivi OTC ta’ tpaċija li jtemmu lil dawk il-kuntratti tad-derivattivi OTC li ma baqgħux relatati mar-riskju kummerċjali jew ta’ finanzjament tat-teżor.

(20)

Il-firxa tar-riskji relatati direttament ma’ attivitajiet kummerċjali u finanzjament tat-teżor hija wiesgħa ħafna u tvarja skont is-setturi ekonomiċi differenti. Riskji relatati mal-attivitajiet kummerċjali huma tipikament marbuta mal-inputs għall-funzjoni produttiva ta’ kumpanija kif ukoll prodotti u servizzi li tbigħ jew tipprovdi. Attivitajiet ta’ finanzjament tat-teżor huma tipikament relatati mal-immaniġġjar tal-finanzjament fuq terminu ta’ żmien qasir u twil ta’ entità, inkluż id-dejn tagħha, u l-modi kif tinvesti r-riżorsi finanzjarji li tiġġenera, jew ikollha, inkluż l-immaniġġjar tal-flus. Attivitajiet ta’ finanzjament tat-teżor u attivitajiet kummerċjali jistgħu jiġu affettwati minn sorsi ta’ riskji komuni, bħall-kambju, il-prezzijiet tal-komoditajiet, l-inflazzjoni jew ir-riskju tal-kreditu. Minħabba li d-derivattivi OTC huma konklużi biex jiħħeġġjaw riskju partikolari, meta jiġu analizzati r-riskji marbuta direttament ma’ attivitajiet kummerċjali jew ta’ finanzjament tat-teżor, dawk ir-riskji għandhom jiġu definiti b’mod konsistenti li jkopri ż-żewġ attivitajiet. Barra minn hekk, is-separazzjoni taż-żewġ kunċetti tista’ jkollha konsegwenzi mhux intenzjonati, minħabba li skont is-settur li fih joperaw il-kontropartijiet nonfinanzjarji, riskju partikolari jista’ jiġi ħħeġġjat taħt attività kummerċjali jew taħt attività ta’ finanzjament tat-teżor.

(21)

Filwaqt li l-limiti tal-ikklerjar għandhom jiġu stabbiliti b’konsiderazzjoni għar-rilevanza sistemika tar-riskji relatati, huwa importanti li wieħed jikkunsidra li d-derivattivi OTC li jnaqqsu r-riskji huma esklużi mill-kompjutazzjoni tal-limiti tal-ikklerjar u li l-limiti tal-ikklerjar jippermettu eċċezzjoni għall-prinċipju tal-obbligu tal-ikklerjar għal dawk il-kuntratti tad-derivattivi OTC li jistgħu jitqiesu li mhumiex konklużi għal għanijiet ta’ ħħeġġjar. Aktar speċifikament, il-valur tal-limiti tal-ikklerjar għandhom jiġu riveduti perjodikament u għandhom jiġu ddeterminati skont il-klassi tal-kuntratti tad-derivattivi OTC. Il-klassijiet tad-derivattivi OTC determinati għall-iskop tal-limiti tal-ikklerjar jistgħu jkunu differenti mill-klassijiet tad-derivattivi OTC għall-iskop tal-obbligu tal-ikklerjar. Meta ġie stipulat il-valur tal-limitu tal-ikklerjar, għandha titqies kif dovut il-ħtieġa li jiġi ddefinit indikatur uniku li jirrifletti r-rilevanza sistemika tas-somma tal-pożizzjonijiet netti u l-iskoperturi għal kull kontroparti u għal kull klassi tal-assi tad-derivattivi OTC. Barra minn hekk, peress li l-limiti tal-ikklerjar qed jintużaw minn kontropartijiet nonfinanzjarji, għandu jkun sempliċi li jiġu implimentati.

(22)

Id-determinazzjoni tal-valur tal-limiti tal-ikklerjar għandhom iqisu r-rilevanza sistemika tas-somma tal-pożizzjonijiet netti u l-iskoperturi għal kull kontroparti u kull klassi ta’ derivattivi OTC skont ir-Regolament (UE) Nru 648/2012. Madankollu, għandu jitqies li dawn il-pożizzjonijiet u l-iskoperturi netti huma differenti minn skopertura netta għall-kontropartijiet kollha u l-klassi sħiħa ta’ assi. Barra minn hekk, f’konformità mar-Regolament (UE) Nru 648/2012 dawn il-pożizzjonijiet netti għandhom jingħaddu sabiex tiġi ddeterminata d-data li trid titqies biex jiġu stipulati l-limiti tal-ikklerjar. Hija s-somma gross totali li tirriżulta miż-żieda ta’ dawn il-pożizzjonijiet netti li għandha titqies meta jiġu stabbiliti l-limiti tal-ikklerjar. Il-valur nozzjonali gross li jirriżulta minn dik iż-żieda għandu jintuża bħala referenza biex jiġu stabbiliti l-limiti tal-ikklerjar.

(23)

Barra minn hekk, l-istruttura tal-attività tad-derivattivi OTC ta’ kontropartijiet nonfinanzjarji normalment twassal għal livell baxx ta’ nnettjar peress li l-kuntratti tad-derivattivi OTC jiġu konklużi fl-istess direzzjoni. Bħala riżultat, id-differenza bejn is-somma tal-pożizzjonijiet netti u l-iskoperturi għal kull kontroparti u għal kull klassi ta’ derivattivi OTC tkun qrib ħafna tal-valur gross tal-kuntratti. Għalhekk, u sabiex jintlaħaq l-għan tas-sempliċità, il-valur gross tal-kuntratti tad-derivattivi OTC għandu jintuża bħala indikatur validu tal-kejl li jrid jitqies fid-determinazzjoni tal-limitu tal-ikklerjar.

(24)

Minħabba li n-nonfinanzjarji li ma jaqbżux il-limitu tal-ikklerjar mhumiex meħtieġa jagħmlu valwazzjoni skont is-suq tal-kuntratti tad-derivattivi OTC tagħhom, ma jkunx raġonevoli li dan il-kejl jintuża sabiex jiġu ddeterminati l-limiti tal-ikklerjar peress li dan kieku jimponi piż kbir fuq in-nonfinanzjarji li ma jkunx proporzjonat mar-riskju li jindirizza. Minflok, l-użu tal-valur nozzjonali tal-kuntratti tad-derivattivi OTC jippermetti approċċ sempliċi li ma jkunx skopert għal avvenimenti esterni għan-nonfinanzjarji.

(25)

Il-qbiż ta’ wieħed mill-valuri stabbiliti għal klassi ta’ derivattivi OTC għandu jiskatta l-qbiż tal-limitu tal-ikklerjar għall-klassijiet kollha, minħabba li l-kuntratti tad-derivattivi OTC li jnaqqsu r-riskji huma esklużi mill-kalkolu tal-limitu tal-ikklerjar, bil-konsegwenzi li l-qbiż tal-limitu tal-ikklerjar humiex relatati biss mal-obbligu tal-ikklerjar iżda jestendi għat-tekniki tal-mitigazzjoni tar-riskji, u l-approċċ għall-obbligi rilevanti skont ir-Regolament (UE) Nru 648/2012 applikabbli għal kontropartijiet nonfinanzjarji għandu jkun sempliċiment minħabba n-natura mhux sofistikata tal-biċċa l-kbira tagħhom.

(26)

Għal dawk il-kuntratti tad-derivattivi OTC li mhumiex ikklerjati, għandhom japplikaw tekniki tal-mitigazzjoni tar-riskji, bħal konferma f’waqtha. Il-konferma ta’ kuntratti tad-derivattivi OTC tista’ tirreferi għal ftehim qafas wieħed jew aktar, ftehimiet qafas ta’ konferma, jew termini standard oħra. Tista’ tieħu l-forma ta’ kuntratt eżegwit elettronikament jew dokument iffirmat miż-żewġ kontropartijiet.

(27)

Huwa essenzjali li l-kontropartijiet jikkonfermaw it-termini tat-tranżazzjonijiet tagħhom mill-aktar fis possibbli wara l-eżekuzzjoni tat-tranżazzjoni, speċjalment meta t-tranżazzjoni tiġi pproċessata jew titwettaq elettronikament, sabiex ikun żgurat ftehim komuni u ċertezza legali tat-termini tat-tranżazzjoni. Kontropartijiet li jidħlu f’kuntratti tad-derivattivi OTC mhux standard jew kumplessi, b’mod partikolari, jista’ jkollhom bżonn jimplimentaw għodod sabiex jikkonformaw mar-rekwiżit li jikkonferma l-kuntratti tad-derivattivo OTC tagħhom fil-ħin. Il-konferma fil-ħin tantiċipa wkoll li f’dan il-qasam jistgħu jevolvu prassi rilevanti tas-suq.

(28)

Biex ir-riskji jkomplu jiġu mmitigati, rikonċiljazzjoni tal-portafoll tippermetti lil kull kontroparti twettaq analiżi komprensiva ta’ portafoll ta’ tranżazzjonijiet kif jidhru mill-kontroparti tagħha sabiex jiġi identifikat fil-pront kwalukwe nuqqas ta’ ftehim fit-termini ewlenin tat-tranżazzjonijiet. Tali termini għandhom jinkludu valwazzjoni ta’ kull tranżazzjoni u jistgħu jinkludu wkoll dettalji rilevanti oħra bħad-data effettiva, id-data skedata tal-maturità, kwalunkwe pagament jew data tas-saldu, il-valur nozzjonali tal-kuntratt u l-munita tat-tranżazzjoni, l-istrument sottostanti, il-pożizzjoni tal-kontropartijiet, il-konvenzjoni dwar il-ġurnata tax-xogħol u kwalunkwe rata fissa jew varjabbli rilevanti tal-kuntratt tad-derivattivi OTC.

(29)

Fid-dawl tal-profili differenti tar-riskji u sabiex ir-rikonċiljazzjoni tal-portafoll tkun teknika tal-mitigazzjoni tar-riskju proporzjonata, il-frekwenza tar-rikonċiljazzjoni u d-daqs tal-portafoll li se jitqies għandhom ikunu differenti skont in-natura tal-kontropartijiet. Għandhom jiġu applikati rekwiżiti aktar eżiġenti kemm għall-kontropartijiet finanzjarji kif ukoll għall-kontropartijiet nonfinanzjarji li jaqbżu l-limitu tal-ikklerjar filwaqt li għandhom japplikaw frekwenzi aktar baxxi għall-kontrapartijiet nonfinanzjarji li ma jaqbżux il-limitu tal-ikklerjar, irrispettivament mill-kategorija tal-kontroparti tagħhom li tgawdi wkoll minn din ir-rikonċiljazzjoni inqas frekwenti għal dik il-parti tal-portafoll tagħha.

(30)

Kompressjoni tal-portafoll tista’ wkoll tkun għodda effiċjenti għall-iskopijiet tal-mitigazzjoni tar-riskji skont iċ-ċirkostanzi, bħalma huma d-daqs tal-portafoll ma’ kontroparti, il-maturità, l-iskop u l-livell tal-istandardizzazzjoni tal-kuntratti tad-derivattivi OTC. Il-kontropartijiet finanzjarji u l-kontropartijiet nonfinanzjarji li għandhom portafoll ta’ kuntratti tad-derivattivi OTC mhux ikklerjati minn CCP ‘il fuq mil-livell stabbilit f’dan ir-Regolament għandu jkollhom proċeduri fis-seħħ biex janalizzaw il-possibbiltà li jużaw kompressjoni tal-portafoll li tippermettilhom inaqqsu r-riskji tal-kreditu tal-kontroparti tagħhom.

(31)

Ir-riżoluzzjoni tat-tilwim għandha l-għan li timmitiga r-riskji li jirriżultaw minn kuntratti li ma jiġux ikklerjati ċentralment. Meta derivattivi OTC jidħlu fi tranżazzjonijiet ma’ xulxin, il-kontropartijiet għandu jkollhom qafas miftiehem biex isolvu kwalunkwe tilwima relatata li tista’ tinqala’. Il-qafas għandu jirreferi għal mekkaniżmi ta’ riżoluzzjoni bħal arbitraġġ terz jew mekkaniżmu ta’ stħarriġ mis-suq. Il-qafas għandu l-għan li jevita li t-tilwim mhux solvut jikber u jesponi lill-kontropartijiet għal riskji addizzjonali. It-tilwim għandu jiġu identifikat, immaniġġjati u divulgat b’mod xieraq.

(32)

Sabiex jiġu speċifikati l-kundizzjonijiet tas-suq li jimpedixxu l-valwazzjoni skont is-suq, huwa meħtieġ li jiġu speċifikati swieq inattivi. Suq jista’ jkun inattivi għal diversi raġunijiet inkluż meta ma jseħħux tranżazzjonijiet tas-suq b’mod regolari fuq bażi distakkata, fejn bażi distakkata għandu jkollha l-istess tifsira bħal għall-iskopijiet tal-kontabbiltà.

(33)

Dan ir-Regolament japplika għal kontropartijiet finanzjarji u l-kontropartijiet nonfinanzjarji ‘il fuq mil-limitu tal-ikklerjar u jqis id-Direttiva 2006/49/KE tal-Parlament Ewropew u tal-Kunsill tal-14 ta’ Ġunju 2006 dwar l-adegwatezza tal-kapital ta’ kumpaniji tal-investiment u istituzzjonijiet ta’ kreditu (4), li tistabbilixxi wkoll rekwiżiti li għandhom jiġu ssodisfati meta ssir valwazzjoni skont mudell.

(34)

Għalkemm id-disinn tal-mudell użat għall-valwazzjoni skont mudell jista’ jiġi żviluppat internament jew esternament, sabiex tiġi żgurata r-responsabbiltà xierqa, l-approvazzjoni tal-mudell hija r-responsabbiltà tal-bord tad-diretturi jew tal-kumitat delegat ta’ dan il-bord.

(35)

Meta kontropartijiet ikunu jistgħu japplikaw eżenzjoni intragrupp wara n-notifika tagħhom lill-awtoritajiet kompetenti iżda mingħajr ma jistennew tmiem il-perjodu ta’ nuqqas ta’ oġġezzjoni minn dawk l-awtoritajiet kompetenti, huwa importanti li jiġi żgurat li l-awtoritajiet kompetenti jiksbu informazzjoni fil-ħin, xierqa u suffiċjenti biex jivvalutaw jekk għandhomx joġġezzjonaw għall-użu tal-eżenzjoni.

(36)

Id-daqs, il-volumi u l-frekwenza antiċipati tal-kuntratti tad-derivattivi OTC intragrupp jistgħu jkunu ddeterminati fuq il-bażi tat-tranżazzjonijiet intragrupp storiċi tal-kontropartijiet kif ukoll abbażi tal-mudell antiċipat u l-attività mistennija fil-futur.

(37)

Meta kontropartijiet japplikaw eżenzjoni intragrupp, huma għandhom jiddivulgaw pubblikament informazzjoni sabiex tiġi żgurata t-trasparenza fir-rigward tal-parteċipanti tas-suq u l-kredituri potenzjali. Dan huwa partikolarment importanti għal kredituri potenzjali tal-kontropartijiet f’termini ta’ valutazzjoni tar-riskji. Id-divulgazzjoni għandha l-għan li timpedixxi l-perċezzjoni ħażina li l-kuntratti tad-derivattivi OTC huma kklerjati ċentralment jew soġġetti għal tekniki tal-mitigazzjoni tar-riskji meta dan ma jkunx il-każ.

(38)

Il-qafas ta’ żmien biex tinkiseb konferma fil-ħin jeħtieġ sforzi ta’ adattament fosthom tal-bidliet fil-prassi tas-suq u t-tisħiħ tas-sistemi tal-IT. Minħabba li r-ritmu tal-adattament għall-konformità jista’ jvarja skont il-kategorija tal-kontrapartijiet u l-klasis tal-assi tad-derivattivi OTC, l-istipular ta’ dati progressivi tal-applikazzjoni li jirrispondu għal dawn id-differenzi jippermetti t-tisħiħ tal-qafas ta’ żmien għall-konferma ta’ dawk il-kontropartijiet u l-prodotti li jistgħu jkunu lesti aktar malajr.

(39)

L-istandards stabbiliti għar-rikonċiljazzjoni tal-portafoll, il-kompressjoni tal-portafoll jew ir-riżoluzzjoni tat-tilwim jeħtieġu lill-kontropartijiet jistabbilixxu proċeduri, politiki, proċessi, u jemendaw dokumentazzjoni li jieħdu iż-żmien. Id-dħul fis-seħħ tar-rekwiżiti relatati għandu jitressaq lura sabiex jingħata żmien lill-kontropartijiet jieħdu l-passi meħtieġa biex jikkonformaw.

(40)

Dan ir-Regolament huwa bbażat fuq l-abbozz tal-istandards tekniċi regolatorji sottomess mill-Awtorità Ewropea tat-Titoli u s-Swieq lill-Kummissjoni.

(41)

Skont l-Artikolu 10 tar-Regolament (UE) Nru 1095/2010 tal-Parlament Ewropew u tal-Kunsill (5), l-AETS wettqet konsultazzjonijiet pubbliċi miftuħa dwar l-abbozz tal-istandards tekniċi regolatorji, analizzat il-kostijiet u l-benefiċċji potenzjali relatati u talbet l-opinjoni tal-Grupp tal-Partijiet Interessati tat-Titoli u s-Swieq stabbilit skont l-Artikolu 37 tar-Regolament (UE) Nru 1095/2010,

(1)

Għandhom jiġu stabbiliti regoli li jispeċifikaw l-informazzjoni li għandha tingħata lill-Awtorità Ewropea tat-Titoli u s-Swieq (AETS) bħala parti minn applikazzjoni għar-reġistrazzjoni bħala repożitorju tat-tranżazzjonijiet.

(2)

Kwalunkwe persuna li tapplika għar-reġistrazzjoni bħala repożitorju tat-tranżazzjonijiet għandha tipprovdi informazzjoni dwar l-istruttura tal-kontrolli interni tagħha u l-indipendenza tal-korpi ta’ governanza tagħha, sabiex l-AETS tkun tista’ tivvaluta jekk l-istruttura ta’ governanza korporattiva tiżgurax l-indipendenza tar-repożitorju tat-tranżazzjonijiet u jekk ir-rutini ta’ rappurtar tagħha humiex adegwati.

(3)

L-AETS, kif stabbilita mir-Regolament (UE) Nru 1095/2010 tal-Parlament Ewropew u tal-Kunsill tal-24 ta’ Novembru 2010 li jistabbilixxi Awtorità Superviżorja Ewropea (Awtorità Ewropea tat-Titoli u s-Swieq) (3), hija responsabbli għar-reġistrazzjoni u s-superviżjoni tar-repożitorji tat-tranżazzjonijiet skont it-Titolu VI tar-Regolament (UE) Nru 648/2012. Bl-iskop li l-AETS tkun tista’ tivvaluta r-reputazzjoni tajba, kif ukoll l-esperjenza u l-ħiliet tal-maniġment superjuri prospettiv tar-repożitorju tat-tranżazzjonijiet, repożitorju tat-tranżazzjonijiet applikant għandu jipprovdi l-informazzjoni rilevanti biex titwettaq din il-valutazzjoni.

(4)

Ir-repożitorju tat-tranżazzjonijiet applikant għandu jipprovdu informazzjoni lill-AETS biex juri li għandu r-riżorsi finanzjarji meħtieġa għad-dispożizzjoni tiegħu biex iwettaq il-funzjonijiet tiegħu fuq bażi kontinwa u arranġamenti adegwati għall-kontinwità tal-operat.

(5)

Għalkemm meta repożitorju tat-tranżazzjonijiet jopera permezz ta’ fergħat, dawn mhumiex persuni ġuridiċi separati, għandha tingħata informazzjoni separata dwar il-fergħat sabiex l-AETS tkun tista’ tidentifika b’mod ċar il-pożizzjoni tal-fergħat fl-istruttura organizzazzjonali tar-repożitorju tat-tranżazzjonijiet, tivvaluta l-idoneità għad-doveri u l-adegwatezza tal-maniġment superjuri tal-fergħat u tevalwa jekk il-mekkaniżmi ta’ kontroll, il-konformità u funzjonijiet oħra fis-seħħ humiex meqjusa robusti u biżżejjed biex jidentifikaw, jevalwaw u jimmaniġġjaw ir-riskji tal-fergħat b’mod xieraq.

(6)

Huwa importanti għal applikant li jipprovdi lill-AETS b’informazzjoni dwar servizzi anċillari, jew linji oħrajn ta’ negozju li r-repożitorju tat-tranżazzjonijiet joffri minbarra l-attività ewlenija tiegħu tar-rappurtar tad-derivattivi, partikolarment rigward l-attività ewlenija tiegħu ta’ rappurtar regolatorju.

(7)

Sabiex l-AETS tivvaluta l-kontinwità u l-funzjonament fl-ordni tas-sistemi teknoloġiċi ta’ repożitorju tat-tranżazzjonijiet applikant, dak l-applikant għandu jipprovdi lill-AETS b’deskrizzjonijiet ta’ dawk is-sistemi teknoloġiċi rilevanti u kif jiġu mmaniġġjati. L-applikant għandu jiddeskrivi wkoll kwalunkwe arranġamenti ta’ esternalizzazzjoni li huma rilevanti għas-servizzi tiegħu.

(8)

It-tariffi assoċjati mas-servizzi pprovduti mir-repożitorji tat-tranżazzjonijiet huma informazzjoni importanti biex il-parteċipanti tas-suq ikunu jistgħu jagħmlu għażla infurmata u għandhom għalhekk ikunu parti mill-applikazzjoni għar-reġistrazzjoni bħala repożitorju tat-tranżazzjonijiet.

(9)

Minħabba li l-parteċipanti tas-suq u r-regolaturi joqogħdu fuq id-dejta miżmuma mir-repożitorji tat-tranżazzjonijiet, rekwiżiti stretti tal-operat u taż-żamma tar-rekords għandhom ikunu distingwibbli b’mod ċar f’applikazzjoni għar-reġistrazzjoni ta’ repożitorju tat-tranżazzjonijiet.

(10)

Mudelli tal-immaniġġjar tar-riskji assoċjati mas-servizzi pprovduti minn repożitorju tat-tranżazzjonijiet huma element meħtieġ fl-applikazzjoni għar-reġistrazzjoni tiegħu biex il-parteċipanti tas-suq ikunu jistgħu jagħmlu għażla infurmata.

(11)

Sabiex ikun żgurat aċċess sħiħ għar-repożitorju tat-tranżazzjonijiet, fornituri ta’ servizz terzi jingħataw aċċess nondiskriminatorju għall-informazzjoni miżmuma mir-repożitorju tat-tranżazzjonijiet, bil-kundizzjoni li l-entità li tipprovdi d-dejta u l-kontropartijiet relevanti jkunu taw il-kunsens tagħhom. Repożitorju tat-tranżazzjonijiet applikant għandu għalhekk jipprovdi lill-AETS bl-informazzjoni dwar il-politiki u l-proċeduri tal-aċċess tiegħu.

(12)

Sabiex twettaq id-doveri tagħha ta’ awtorizzazzjoni b’mod effikaċi, l-AETS għandha tirċievi l-informazzjoni kollha mingħand ir-repożitorji tat-tranżazzjonijiet, il-partijiet terzi relatati u l-partijiet terzi għand min ir-repożitorji tat-tranżazzjonijiet ikunu esternalizzaw funzjonijiet u attivitajiet operazzjonali. Din l-informazzjoni hija meħtieġa biex tiġi vvaluta jew titlesta l-valutazzjoni tal-applikazzjoni għar-reġistrazzjoni u d-dokumentazzjoni fiha.

(13)

Dan ir-Regolament huwa bbażat fuq l-abbozz tal-istandards tekniċi regolatorji sottomess mill-AETS lill-Kummissjoni.

(14)

Skont l-Artikolu 10 tar-Regolament (UE) Nru 1095/2010, l-AETS wettqet konsultazzjonijiet pubbliċi miftuħa dwar l-abbozz tal-istandards tekniċi regolatorji, analizzat il-kostijiet u l-benefiċċji potenzjali relatati u talbet l-opinjoni tal-Grupp tal-Partijiet Interessati tat-Titoli u s-Swieq tal-AETS stabbilit skont l-Artikolu 37 ta’ dak ir-Regolament,

(1)

Huwa essenzjali li jiġu identifikati b’mod ċar il-kuntratti rilevanti u l-kontropartijiet rispettivi tagħhom. Wara approċċ funzjonali, l-entitajiet li jaċċessaw id-dejta miżmuma mir-repożitorji tat-tranżazzjonijiet għandhom jitqiesu skont il-kompetenzi li għandhom u l-funzjonijiet imwettqa minnhom.

(2)

L-Awtorità Ewropea tat-Titoli u s-Swieq (AETS) għandu jkollha aċċess għad-dejta kollha fil-livell tat-tranżazzjonijiet miżmuma mir-repożitorji tat-tranżazzjonijiet, għall-fini ta’ superviżjoni tar-repożitorji tat-tranżazzjonijiet, biex tkun tista’ tagħmel talbiet għal informazzjoni, tieħu miżuri superviżorji xierqa u timmonitorja wkoll jekk reġistrazzjoni bħala repożitorju tat-tranżazzjonijiet għandhiex tinżamm jew tiġi rtirata.

(3)

Minħabba r-responsabbiltajiet tagħha skont ir-Regolament (UE) Nru 1095/2010 tal-Parlament Ewropew u tal-Kunsill tal-24 ta’ Novembru 2010 li jistabbilixxi Awtorità Superviżorja Ewropea (Awtorità Ewropea tat-Titoli u s-Swieq) (3) u r-Regolament (UE) Nru 648/2012, l-AETS għandha tingħata aċċess fuq mandati differenti. L-aċċess għad-dejta minn membri individwali tal-persunal tal-AETS għandu jkun konformi ma’ kull wieħed minn dawk il-mandati speċifiċi.

(4)

Il-Bord Ewropew dwar ir-Riskju Sistemiku (BERS), l-AETS u l-membri rilevanti tas-Sistema Ewropea tal-Banek Ċentrali (SEBĊ), inklużi wħud mill-banek ċentrali nazzjonali u l-awtoritajiet rilevanti tat-titoli u s-swieq tal-Unjoni, għandhom mandat għall-monitoraġġ u l-preservazzjoni tal-istabbiltà finanzjarja fl-Unjoni, u għalhekk għandu jkollhom aċċess għal dejta dwar it-tranżazzjonijiet għall-kontropartijiet kollha għall-fini tal-kompiti rispettivi tagħhom f’dak ir-rigward.

(5)

Is-superviżuri u s-sorveljaturi tal-kontropartijiet ċentrali (CCPs) jeħtieġu aċċess li jippermettilhom jeżerċitaw b’mod effettiv il-kompiti tagħhom fir-rigward ta’ tali entitajiet, u għalhekk għandu jkollhom aċċess għall-informazzjoni kollha neċessarja għal mandat ta’ dan it-tip.

(6)

L-aċċess mill-membri rilevanti tas-SEBĊ iservi biex jitwettqu l-kompiti bażiċi tagħhom, partikolarment ta’ bank ċentrali ta’ ħruġ, il-mandat ta’ stabbiltà finanzjarja tagħhom, u f’xi każijiet is-superviżjoni prudenzjali fuq xi kontropartijiet. Billi ċerti membri tas-SEBĊ għandhom kompiti differenti taħt il-leġiżlazzjoni nazzjonali, dawn għandhom jingħataw aċċess għad-dejta skont mandati differenti elenkati fl-Artikolu 81(3) tar-Regolament (UE) Nru 648/2012.

(7)

L-awtoritajiet rilevanti tat-titoli u s-swieq tal-Unjoni għandhom, bħala kompitu ewlieni, il-protezzjoni tal-investitur fil-ġurisdizzjonijiet rispettivi tagħhom u għandhom jingħataw aċċess għal dejta dwar it-tranżazzjonijiet fir-rigward ta’ swieq, parteċipanti, prodotti u elementi sottostanti koperti mill-mandati ta’ sorveljanza u infurzar tagħhom.

(8)

L-awtoritajiet maħtura skont l-Artikolu 4 tad-Direttiva 2004/25/KE tal-Parlament Ewropew u tal-Kunsill tal-21 ta’ April 2004 fuq offerti ta’ xiri (4) għandhom jingħataw aċċess għal tranżazzjonijiet f’derivattivi ta’ ekwità fejn is-sottostanti huwa jew ammess għan-negozjar f’suq regolat fil-ġurisdizzjoni tagħhom, għandu l-indirizz legali tiegħu fi ħdan il-ġurisdizzjoni tagħhom jew huwa offerent għal tali impriża u l-kunsiderazzjoni li joffri tinkludi titoli.

(9)

L-Aġenzija għall-Kooperazzjoni tar-Regolaturi tal-Enerġija (ACER) għandha tingħata aċċess għall-fini ta’ monitoraġġ tas-swieq tal-enerġija fil-livell tal-operaturi sabiex tindividwa u tiskoraġġixxi abbuż mis-suq b’kooperazzjoni mal-awtoritajiet regolatorji nazzjonali, u l-monitoraġġ tas-swieq tal-enerġija fil-livell tal-operaturi sabiex tindividwa u tiskoraġġixxi l-abbuż mis-suq skont ir-Regolament (UE) Nru 1227/2011 tal-Parlament Ewropew u tal-Kunsill tal-25 ta’ Ottubru 2011 dwar l-integrità u t-trasparenza tas-swieq tal-enerġija fil-livell tal-operaturi (REMIT) (5). L-ACER għandha għalhekk ikollha aċċess għad-dejta kollha miżmuma minn repożitorju tat-tranżazzjonijiet fir-rigward tad-derivattivi tal-enerġija.

(10)

Ir-Regolament (UE) Nru 648/2012 ikopri biss id-dejta dwar it-tranżazzjonijiet u mhux dik ta’ qabel it-tranżazzjonijiet bħal ordnijiet għal tranżazzjonijiet kif meħtieġ skont ir-Regolament (UE) Nru 1227/2011. Għalhekk, ir-repożitorji tat-tranżazzjonijiet ma għandhomx jitqiesu bħala s-sors xieraq ta’ informazzjoni lill-ACER f’dak ir-rigward.

(11)

Taħt approċċ funzjonali għall-aċċess għad-dejta miżmuma mir-repożitorji tat-tranżazzjonijiet, is-superviżjoni prudenzjali hija komponent essenzjali. Bl-istess mod, awtoritajiet differenti jista’ jkollhom mandat ta’ superviżjoni prudenzjali. Għalhekk, l-aċċess għal dejta tat-tranżazzjonijiet dwar l-entitajiet rilevanti għandu jiġi żgurat għall-awtoritajiet kollha elenkati taħt l-Artikolu 81(3) tar-Regolament (UE) Nru 648/2012.

(12)

L-entitajiet li jaċċessaw repożitorju tad-dejta tat-tranżazzjonijiet taħt l-Artikolu 81(3) tar-Regolament (UE) Nru 648/2012 għandhom jiżguraw li jżommu u jinfurzaw politiki sabiex jiżguraw li huma biss il-persuni rilevanti li jaċċessaw l-informazzjoni għal fini ddefinita tajjeb u legalment fondata, filwaqt li jkunu ċari wkoll dwar persuni oħra possibbli awtorizzati li jaċċessaw tali dejta.

(13)

L-aċċess għad-dejta għandu jitqies fi ħdan it-tliet livelli ta’ aggregazzjoni. Id-dejta tat-tranżazzjonijiet għandha tinkludi dettalji individwali tat-tranżazzjonijiet; dejta tal-pożizzjoni għandha tqis dejta aggregata tal-pożizzjoni skont is-sottostanti/il-prodott għal kontropartijiet individwali; u dejta nozzjonali aggregata għandha tikkorrispondi għal pożizzjonijiet kumplessivi skont is-sottostanti/il-prodott mingħajr dettalji tal-kontroparti. Aċċess għal dejta tat-tranżazzjonijiet għandu jagħti aċċess ukoll għal-livell tal-pożizzjoni u dejta aggregata. Aċċess għal dejta tal-pożizzjoni ikun qed jagħti aċċess ukoll għal dejta aggregata, iżda mhux dejta fil-livell tat-tranżazzjonijiet. Min-naħa l-oħra, l-aċċess għal dejta nozzjonali aggregata għandu jkun il-kategorija l-anqas granulari u ma għandux jippermetti aċċess għal dejta tal-pożizzjoni jew tat-tranżazzjoni.

(14)

Dan ir-Regolament huwa bbażat fuq l-abbozz tal-istandards tekniċi regolatorji sottomess mill-Awtorità Ewropea tat-Titoli u s-Swieq lill-Kummissjoni.

(15)

B’konformità mal-Artikolu 10 tar-Regolament (UE) Nru 1095/2010, l-AETS ikkonsultat l-awtoritajiet rilevanti u l-membri tas-Sistema Ewropea tal-Banek Ċentrali (SEBĊ) qabel ma ssottomettiet abbozz ta’ standards tekniċi regolatorji li fuqhom huwa msejjes dan ir-Regolament. L-AETS għamlet ukoll konsultazzjonijiet pubbliċi miftuħa dwar dawn l-abbozzi ta’ standards tekniċi regolatorji, analizzat il-kostijiet u l-benefiċċji potenzjali relatati u talbet l-opinjoni tal-Grupp tal-Partijiet Interessati tat-Titoli u s-Swieq tal-AETS stabbilit skont l-Artikolu 37 ta’ dak ir-Regolament,

(1)

Ir-Regolament (UE) Nru 648/2012 jistabbilixxi, fost affarijiet oħra, rekwiżiti prudenzjali għal kontropartijiet ċentrali (CCPs) biex jiżgura li dawn ikunu sikuri u sodi u jikkonformaw fi kwalunkwe ħin mar-rekwiżiti kapitali. Minħabba li, fil-biċċa l-kbira, riskji li ġejjin minn attivitajiet tal-ikklerjar huma koperti minn riżorsi finanzjarji speċifiċi, tali rekwiżiti kapitali għandhom jiżguraw li CCP, fi kwalunkwe ħin, hija kapitalizzata adegwatement kontra r-riskji tal-kreditu, ir-riskji tal-kontropartijiet, ir-riskji tas-suq, ir-riskji operazzjonali, ir-riskji legali u dawk kummerċjali li mhumiex diġà koperti minn dawk ir-riżorsi finanzjarji speċifiċi u li tkun tista’ twettaq stralċ jew ristrutturar ordinati tal-operazzjonijiet tagħha jekk dan ikun meħtieġ.

(2)

It-trattament tal-kapital tal-istituzzjonijiet ta’ kreditu u d-ditti tal-investiment għandhom jitqiesu speċifikament fir-rigward tal-istandards tekniċi peress li s-CCPs huma esposti, waqt li jkunu qiegħdin iwettqu attivitajiet mhux koperti, għal riskji li huma simili għar-riskji mġarrba mill-istituzzjonijiet ta’ kreditu u d-ditti ta’ investiment. Il-partijiet rilevanti tal-Prinċipji għall-Infrastruttura tas-Suq Finanzjarju maħruġa mill-Kumitat dwar is-Sistemi tal-Pagamenti u s-Saldu u l-Organizzazzjoni Internazzjonali tal-Kummissjonijiet tat-Titoli (“Prinċipji CPSS-IOSCO”) għandhom jitqiesu wkoll. Sabiex jiġi żgurat li huma kapaċi li jorganizzaw stralċ jew ristrutturar ordinati tal-attivitajiet tagħhom, is-CCPs għandu jkollhom biżżejjed riżorsi finanzjarji biex jifilħu l-ispejjeż operazzjonal tul perjodu ta’ żmien xieraq. CCP għandha tkun kapaċi, matul tali perjodu ta’ żmien, li tistabbilixxi kwalunkwe tip ta’ arranġament sabiex tirriorganizza l-operazzjonijiet kritiċi tagħha, inklużi r-rikapitalizzazzjoni, is-sostituzzjoni tal-maniġment, ir-reviżjoni tal-istrateġiji kummerċjali tagħha, l-istruttrua tal-ispejjeż jew tal-miżati, ir-ristrutturar tas-servizzi pprovduti minnha, il-likwidazzjoni tal-portafoll tal-ikklerjar tagħha jew il-fużjoni ma’ — jew it-trasferiment ta’ attivitajiet għal — CCP oħra. Matul l-istralċ jew ir-ristrutturar CCP xorta trid tkompli l-operazzjonijiet tagħha. Filwaqt li f’dan il-każ ċerti spejjeż, bħal dawk ta’ kummerċjalizzazzjoni, jistgħu jonqsu, spejjeż oħra, bħal spejjeż legali, jistgħu jiżdiedu. Għalhekk, l-użu tal-ispejjeż operazzjonali grossi annwali huwa meqjus bħala approssimazzjoni xierqa tal-ispejjeż attwali waqt l-istralċ jew ir-ristrutturar tal-operazzjonijiet tas-CCPs. Sabiex titqies id-diversità tal-prattiki tal-kontabbiltà fost is-CCPs, l-ispejjeż operazzjonali għandhom jitqiesu skont l-Istandards Internazzjonali tar-Rapportar Finanzjarju (IFRS) adottati skont ir-Regolament (KE) Nru 1606/2002 tal-Parlament Ewropew u tal-Kunsill tad-19 ta’ Lulju 2002 dwar l-applikazzjoni ta’ standards internazzjonali tal-kontabbiltà (3) jew skont għadd limitat ta’ regoli oħra applikabbli fil-qasam, kif indikat mil-liġi tal-Unjoni.

(3)

Billi l-kapital għandu jkun dejjem biżżejjed biex jiżgura stralċ ordinat u protezzjoni adegwata kontra r-riskji rilevanti kif meħtieġ mill-Artikolu 16(2) tar-Regolament (UE) Nru 648/2012, jeħtieġ li tiġi stabbilita għodda ta’ twissija bikrija biex permezz tagħha l-awtoritajiet kompetenti jkunu jistgħu jiksbu għarfien biżżejjed bil-quddiem tas-sitwazzjoni li fiha l-kapital tas-CCP ikun qrib ir-rekwiżit kapitali, billi jiġi introdott limitu ta’ notifika stabbilit għal 110 % tar-rekwiżit kapitali.

(4)

Minkejja d-diffikultajiet biex tiġi kkwanitifkata l-iskopertura għal riskju operazzjonali, id-Direttiva 2006/48/KE tal-Parlament Ewropew u tal-Kunsill tal-14 ta’ Ġunju 2006 rigward il-bidu u l-eżerċizzju tan-negozju tal-istituzzjonijiet ta’ kreditu (4) huwa l-parametru referenzjarju rilevanti għall-fini li jiġi stabbilit rekwiżit kapitali għas-CCPs. B’mod konsistenti mad-Direttiva 2006/48/KE, id-definizzjoni ta’ riskju operazzjonali għandha tinkludi r-riskju legali fir-rigward ta’ standards tekniċi fuq rekwiżiti kapitali għal kontropartijiet ċentrali.

(5)

Id-Direttiva 2006/48/KE u d-Direttiva 2006/49/KE tal-Parlament Ewropew u tal-Kunsill tal-14 ta’ Ġunju 2006 dwar l-adegwatezza tal-kapital ta’ kumpaniji tal-investiment u istituzzjonijiet ta’ kreditu (5) huma referenza xierqa għall-fini li jiġu stabbiliti rekwiżiti kapitali biex ikopru r-riskji tal-kreditu, tal-kontroparti u tas-suq mhux koperti minn riżorsi finanzjarji speċifiċi, peress li dawn huma simili għal dawk imwettqa minn istituzzjonijiet ta’ kreditu jew ditti tal-investiment.

(6)

CCP ma għandhiex għalfejn iżżomm kapital għall-iskoperturi ta’ negozju u l-kontribuzzjonijiet għall-fond tal-inadempjenza li jirriżultaw minn arranġament ta’ interoperabbiltà fejn huma ssodisfati l-Artikoli 52 u 53 tar-Regolament (UE) Nru 648/2012. Madankollu, fejn dawn ir-rekwiżiti ma jiġux issodisfati, ir-rabtiet bejn is-CCPs jistgħu jesponuhom għal riskju addizzjonali jekk il-kollateral sottomess minnhom mhuwiex kompletament protett u protett f’każ ta’ falliment jew jekk il-kontribuzzjonijiet għall-fond tal-inadempjenza huma f’riskju f’każ li membru tal-ikklerjar ta’ CCP riċeventi jsir inadempjenti. Għalhekk, f’każijiet bħal dawn l-allokazzjonijiet ta’ kapital għandhom japplikaw għall-kontribuzzjonijiet għall-fond tal-inadempjenza u l-iskoperturi ta’ negozju ma’ CCPs oħra. Sabiex jiġu evitati effetti ta’ kontaġju, it-trattament rigward il-kontribuzzjonijiet għall-fond tal-inadempjenza għal CCPs oħra għandu ġeneralment ikun iktar konservattiv mit-trattament għall-iskoperturi ta’ istituzzjonijiet ta’ kreditu għas-CCPs. Ir-riżorsi proprji ta’ CCP użati biex tikkontribwixxi għall-fond tal-inadempjenza ta’ CCP oħra ma għandhomx jitqiesu għall-finijiet tal-Artikolu 16(2) tar-Regolament (UE) Nru 648/2012 għaliex dawn mhumiex investiti skont il-politika ta’ investiment tagħha. Dawn lanqas ma għandhom jingħaddu darbtejn għall-fini tal-kalkolu ta’ skoperturi ppeżati għar-riskju li jirriżultaw minn dawn il-kontribuzzjonijiet.

(7)

Iż-żmien meħtieġ għall-istralċ ordinat huwa strettament dipendenti fuq is-servizzi ta’ kklerjar pprovduti minn CCP uniku mill-ambjent tas-suq li fih topera, speċjalment fil-każ fejn CCP oħra tista’ tassumi s-servizzi tagħha. Għalhekk, l-għadd ta’ xhur meħtieġ għall-istralċ għandu jkun ibbażat fuq l-istima tas-CCP stess, soġġetta għall-approvazzjoni tal-awtorità kompetenti. Jeħtieġ li jiġi introdott għadd minimu ta’ sitt xhur sabiex ikun żgurat livell prudenti ta’ rekwiżiti kapitali.

(8)

Riskju kummerċjali jirreferi għar-riskju li CCP tassumi minħabba l-effiċjenza tagħha u bidliet potenzjali fil-kundizzjonijiet kummerċjali ġenerali li x’aktarx ixekklu l-pożizzjoni finanzjarja tagħha bħala konsegwenza ta’ tnaqqis fid-dħul tagħha jew żieda fl-ispejjeż tagħha li jirriżultaw f’telf li għandhom jiġu imposti kontra l-kapital tagħha. Billi l-livell ta’ riskju kummerċjali huwa dipendenti ħafna fuq s-sitwazzjoni individwali ta’ kull CCP u jista’ jiġi kkawżat minn diversi fatturi, bħal proċeduri ineffiċjenti, ambjent tas-suq negattiv, reazzjoni ineffikaċi għall-progress teknoloġiku, jew eżekuzzjoni ta’ livell baxx tal-istrateġiji kummerċjali, ir-rekwiżit kapitali għandu jkun ibbażat fuq stima proprja tas-CCP soġġetta għall-approvazzjoni tal-awtorità kompetenti. Jeħtieġ li jiġi introdott limitu sabiex ikun żgurat livell prudenti ta’ rekwiżiti kapitali.

(9)

L-Awtorità Bankarja Ewropea (ABE) ħadmet f’kooperazzjoni mill-qrib mas-Sistema Ewropea tal-Banek Ċentrali (SEBĊ) u kkonsultat l-Awtorità Ewropea tat-Titoli u s-Swieq (AETS) qabel ma ssottomettiet l-abbozz tal-istandards tekniċi li fuqhom huwa msejjes dan ir-Regolament. Wettqet ukoll konsultazzjonijiet pubbliċi miftuħa dwar l-abbozz tal-istandards tekniċi regolatorji, analizzat il-kostijiet u l-benefiċċji potenzjali relatati u talbet l-opinjoni tal-Grupp tal-Partijiet Bankarji Interessati stabbilit skont l-Artikolu 37 tar-Regolament (UE) Nru 1093/2010 tal-Parlament Ewropew u tal-Kunsill (6).

(10)

Dan ir-Regolament huwa bbażat fuq l-abbozz tal-istandards tekniċi regolatorji sottomess mill-Awtorità Ewropea tat-Titoli u s-Swieq (AETS) lill-Kummissjoni Ewropea,

(1)

Id-dispożizzjonijiet f’dan ir-Regolament huma marbuta mill-qrib, billi jittrattaw ir-rekwiżiti organizzattivi, inkluża ż-żamma tar-rekords u l-kontinwità tal-operat, u r-rekwiżiti prudenzjali, inkluż fir-rigward tal-marġni, il-fond tal-inadempjenza, il-kontrolli tar-riskju tal-likwidità, il-kaskata tal-inadempjenza, il-kollateral, il-politika ta’ investiment, l-analiżi tal-mudelli, l-ittestjar tal-istress u l-ittestjar retrospettiv. Sabiex tiġi żgurata koerenza bejn dawk id-dispożizzjonijiet, li għandhom jidħlu fis-seħħ fl-istess ħin, u biex tiġi ffaċilitata perspettiva komprensiva u aċċess kumpatt għalihom minn persuni soġġetti għal dawk l-obbligi, ikun tajjeb li jiġu inklużi l-istandards tekniċi regolatorji kollha meħtieġa mir-Regolament (UE) Nru 648/2012 f’Regolament wieħed.

(2)

Fid-dawl tan-natura globali tas-swieq finanzjarji, dan ir-Regolament għandu jqis il-Prinċipji għal Infrastrutturi tas-Suq Finanzjarju maħruġa mill-Kumitat dwar is-Sistemi tal-Pagamenti u s-Saldu u l-Organizzazzjoni Internazzjonali tal-Kummissjonijiet tat-Titoli (Prinċipji CPSS-IOSCO) li jservu bħala standard globali għal rekwiżiti regolatorji għal kontropartijiet ċentrali (central counterparties - CCPs).

(3)

Biex jiġi żgurat li s-CCPs ikunu sikuri u sodi fil-kundizzjonijiet kollha tas-suq, huwa importanti li s-CCPs jadottaw proċeduri prudenti ta’ ġestjoni tar-riskju li jkopru b’mod dovut r-riskji kollha li s-CCPs huma jew jistgħu jkunu esposti għalihom. F’dan ir-rigward, l-istandards tal-ġestjoni tar-riskju effettivament implimentati mis-CCPs għandhom ikunu aktar stretti minn dawk stipulati f’dan ir-Regolament jekk ikun meqjus xieraq għall-finijiet ta’ ġestjoni tar-riskju.

(4)

Sabiex jiġi identifikat b’mod ċar għadd limitat ta’ kunċetti li jirriżultaw mir-Regolament (UE) Nru 648/2012, kif ukoll biex jiġu speċifikati t-termini tekniċi neċessarji għall-iżvilupp ta’ dan l-istandard tekniku, għandhom jiġu ddefiniti għadd ta’ termini.

(5)

Huwa importanti li jiġi żgurat li s-CCPs rikonoxxuti ta’ pajjiżi terzi ma jfixklux il-funzjonament ordinat tas-swieq tal-Unjoni. Għal din ir-raġuni, huwa essenzjali li jiġi żgurat li s-CCPs rikonoxxuti mhumiex f’pożizzjoni li jbaxxu r-rekwiżiti tagħhom ta’ ġestjoni tar-riskju taħt l-istandards tal-Unjoni, li jista’ jwassal għal arbitraġġ regolatorju. Permezz tal-informazzjoni li trid tiġi pprovduta lill-AETS dwar ir-rikonoxximent ta’ CCP ta’ pajjiż terz, AETS għandha tkun tista’ tivvaluta jekk dik is-CCP tkunx f’konformità sħiħa mar-rekwiżiti prudenzjali applikabbli f’dak il-pajjiż terz. Barra minn hekk, id-determinazzjoni tal-ekwivalenza mill-Kummissjoni għandha tiżgura li l-liġijiet u r-regolamenti tal-pajjiż terz huma ekwivalenti għal kull dispożizzjoni taħt it-Titolu IV tar-Regolament (UE) Nru 648/2012 u ta’ dan ir-Regolament.

(6)

Sabiex jiġi żgurat livell adegwat ta’ protezzjoni għall-investitur, fir-rikonoxximent ta’ CCPs ta’ pajjiżi terzi, l-Awtorita Ewropea tat-Titoli u s-Swieq (AETS) tista’ tesiġi informazzjoni addizzjonali għal dik strettament meħtieġa biex tivvaluta jekk il-kundizzjonijiet stabbiliti fir-Regolament (UE) Nru 648/2012 huma ssodisfati.

(7)

Il-valutazzjoni kontinwa tal-konformità sħiħa tas-CCP ta’ pajjiż terz mar-rekwiżiti prudenzjali ta’ tali pajjiż terz hija d-dmir tal-awtorità kompetenti tal-pajjiż terz. L-informazzjoni li trid tiġi pprovduta lill-AETS mis-CCP applikanti ta’ pajjiż terz ma għandhiex l-għan li tirrepeti l-valutazzjoni tal-awtorità kompetenti tal-pajjiż terz, iżda li tiżgura li s-CCP tkun soġġetta għal superviżjoni u infurzar effettivi fil-pajjiż terz, u b’hekk jiġi ggarantit livell għoli ta’ protezzjoni għall-investitur.

(8)

Biex ikun possibbli għall-AETS li twettaq valutazzjoni kompleta, l-informazzjoni pprovduta mis-CCP applikanti ta’ pajjiż terz għandha tkun ikkomplementata minn dik l-informazzjoni meħtieġa biex tivvaluta l-effettività tas-superviżjoni kontinwa, tas-setgħat ta’ infurzar, u tal-azzjonijiet meħuda mill-awtorità kompetenti tal-pajjiż terz. Tali informazzjoni għandha tiġi pprovduta taħt l-arranġament ta’ kooperazzjoni stabbilit skont ir-Regolament (UE) Nru 648/2012. Tali arranġament ta’ kooperazzjoni għandu jiżgura li l-AETS tkun infurmata f’waqtha b’kull azzjoni ta’ superviżjoni jew infurzar fil-konfront ta’ CCP li tapplika għar-rikonoxximent u kwalunkwe bidla tal-kundizzjonijiet li taħthom ingħatat l-awtorizzazzjoni lis-CCP rilevanti u dwar kwalunkwe aġġornament rilevanti tal-informazzjoni oriġinarjament ipprovduta mis-CCP taħt il-proċess ta’ rikonoxximent.

(9)

Ir-rekwiżiti tar-Regolament (UE) Nru 648/2012 dwar il-linji interni ta’ rapportar tar-riskji jesiġu speċifikazzjoni ulterjuri biex jimplimentaw qafas ta’ ġestjoni tar-riskji, li jinkludi l-istruttura, id-drittijiet u r-responsabbiltajiet tal-proċess intern tal-ġestjoni tar-riskji. L-arranġamenti ta’ governanza għandhom iqisu reġimi differenti dwar id-dritt soċjetarju fl-Unjoni, biex jiġi żgurat li s-CCPs joperaw f’qafas ġuridiku sod.

(10)

Biex jiġi żgurat li CCP timplimenta l-proċeduri xierqa biex tikkonforma ma’ dan ir-Regolament, ir-Regolament (UE) Nru 648/2012 u r-Regolament ta' Implimentazzjoni tal-Kummissjoni (UE) Nru 1249/2012 (3), għandhom ikunu speċifikati r-rwol u r-responsabbiltajiet ta’ funzjoni ta’ konformità ta’ CCP.

(11)

Jinħtieġ li jiġu ddefiniti b’mod ċar ir-responsabbiltajiet tal-bord u tal-maniġment superjuri kif ukoll li jiġu speċifikati r-rekwiżiti minimi għall-funzjonament tal-bord sabiex jiġi żgurat li l-istruttura organizzattiva tas-CCP tippermettilha li twettaq is-servizzi u l-attivitajiet tagħha b’mod kontinwu u ordnat. Jinħtieġ ukoll li jiġu stabbiliti linji tar-rapportar ċari u diretti biex jiżguraw ir-responsabbiltà.

(12)

Sabiex tiġi żgurata ġestjoni soda u prudenti ta’ CCP, huwa importanti li l-politika tar-remunerazzjoni tagħha tiskoraġġixxi t-teħid eċċessiv ta’ riskji. Biex il-politika tar-remunerazzjoni tipproduċi l-effetti mixtieqa, għandha tkun immonitorjata u riveduta b’mod adegwat mill-bord li għandu jistabbilixxi kumitat speċifiku sabiex jissorvelja b’mod xieraq l-issodisfar tal-politika tar-remunerazzjoni.

(13)

Biex jiġi żgurat li s-CCPs joperaw bil-livell meħtieġ ta’ riżorsi umani li jissodisfaw l-obbligi kollha tagħhom, ikunu responsabbli għall-prestazzjoni tal-attivitajiet tagħhom u li l-awtoritajiet kompetenti jkollhom il-punti ta’ kuntatt rilevanti fi ħdan is-CCPs li huma jissuperviżjonaw, is-CCPs għandu jkollhom mill-inqas uffiċjal kap tar-riskji, uffiċjal kap għall-konformità u uffiċjal kap tat-teknoloġija.

(14)

Is-CCPs għandhom jivvalutaw u jimmonitorjaw b’mod adegwat sa fejn il-membri tal-bord li jservu fuq il-bordijiet ta’ entitajiet differenti jkollhom kunflitti ta’ interess, kemm jekk ġewwa jew barra l-grupp tas-CCP. Il-membri tal-bord ma għandhomx jinżammu milli jservu fuq bordijiet differenti sakemm dan ma jagħtix lok għal kunflitti ta’ interess.

(15)

Sabiex ikollha funzjoni effettiva ta’ awditjar, CCP għandha tiddefinixxi r-responsabbiltajiet u l-linji tar-rapportar tal-awdituri interni tagħha, biex jiġi żgurat li jitressqu f’waqthom kwistjonijiet rilevanti quddiem il-bord tas-CCP u lill-awtoritajiet kompetenti. Meta jiġi stabbilit u jinżamm uffiċċju tal-awditjar intern, il-missjoni, l-indipendenza u l-oġġettività, l-ambitu u r-responsabbiltà, l-awtorità, ir-responsabbiltà u l-istandards ta’ operazzjoni tiegħu għandhom ikunu ddefiniti b’mod ċar.

(16)

Sabiex twettaq id-dmirijiet tagħha b’mod effettiv, l-awtorità kompetenti rilevanti għandha tingħata aċċess għall-informazzjoni kollha meħtieġa biex tiddetermina jekk is-CCP hijiex konformi mal-kundizzjonijiet ta’ awtorizzazzjoni. Din l-informazzjoni għandha tkun disponibbli mis-CCP mingħajr dewmien żejjed.

(17)

Rekords miżmumin minn CCPs għandhom jiffaċilitaw għarfien dettaljat tal-iskopertura tal-kreditu tas-CCPs għal membri tal-ikklerjar u jippermettu monitoraġġ tar-riskju sistemiku implikat. Permezz tagħhom għandu jkun possibbli wkoll għall-awtoritajiet kompetenti, l-AETS u l-membri rilevanti tas-Sistema Ewropea tal-Banek Ċentrali (SEBĊ) li jibnu mill-ġdid b’mod adegwat il-proċess tal-ikklerjar, sabiex tiġi vvalutata l-konformità mar-rekwiżiti regolatorji inklużi r-rekwiżiti ta’ rapportar. Ladarba tkun irreġstrata, dik id-dejta hija utli wkoll għas-CCPs għall-issodisfar tar-rekwiżiti regolatorji u l-obbligi lejn il-membri tal-ikklerjar kif ukoll fit-tilwim.

(18)

Id-dejta rrappurtata mis-CCPs lir-repożitorji tat-tranżazzjonijiet għandha tiġi rreġistrata sabiex tagħti s-setgħa lill-awtoritajiet kompetenti biex jivverifikaw il-konformità tas-CCPs mal-obbligu tar-rapportar stabbilit fir-Regolament (UE) Nru 648/2012 u jaċċessaw faċilment l-informazzjoni f’każijiet fejn din ma tistax tinstab f’repożitorji tat-tranżazzjonijiet.

(19)

Ir-rekwiżiti għaż-żamma tar-rekords fir-rigward tat-tranżazzjonijiet għandhom jagħmlu użu mill-istess kunċetti użati fl-obbligu tar-rapportar stabbilit fl-Artikolu 9 tar-Regolament (UE) Nru 648/2012, sabiex jiżguraw rapportar xieraq mis-CCPs.

(20)

Biex tiġi żgurata l-kontinwità tal-operat fi żminijiet ta’ interruzzjoni, is-sit sekondarju tal-ipproċessar tas-CCP għandu jkun distanti biżżejjed u f’post ġeografikament distanti biżżejjed mis-sit primarju sabiex ma jkunx soġġett għal-istess diżastru li jista’ jikkawża l-indisponibbiltà tas-sit primarju. Għandhom jinħolqu xenarji biex jiġi analizzat l-impatt ta’ eventi ta’ kriżi fuq servizzi kritiċi, inklużi xenarji li jipprevedu l-indisponibbiltà ta’ sistemi ikkawżata minn diżastru naturali. Dawk l-analiżi għandhom ikunu riveduti perjodikament.

(21)

Is-CCPs huma sistemikament infrastrutturi tas-suq finanzjarju rilevanti u għandhom jirkupraw funzjonijiet kritiċi fi żmien sagħtejn, b’sistemi ta’ riżerva li idealment jibdew l-ipproċessar immedjatament wara inċident. Is-CCPs għandhom jiżguraw ukoll, bi probabbiltà għolja ħafna, li mhi se tintilef ebda dejta

(22)

Huwa importanti li l-inadempjenza ta’ membru tal-ikklerjar ma tikkawżax telf sinifikanti lil parteċipanti oħra fis-suq. Għaldaqstant, is-CCPs huma meħtieġa li jkopru permezz tal-marġini sottomess mill-parti inadempjenti, mill-inqas, proporzjon rilevanti tat-telf possibbli li CCP tista’ ssofri matul il-proċess ta’ likwidazzjoni. Ir-regoli għandhom jiddeterminaw il-persentaġġ minimu li l-marġni għandhom ikopru għal klassijiet differenti ta’ strumenti finanzjarji. Barra minn hekk, is-CCPs għandhom isegwu prinċipji biex ifasslu adegwatament il-livelli tal-marġini tagħhom għall-karatteristiċi ta’ kull strument finanzjarju jew portafoll ikklerjat minnhom.

(23)

Is-CCPs ma għandhomx inaqqsu l-marġini tagħhom għal livell li jipperikola s-sikurezza tagħhom bħala riżultat tal-eżistenza ta’ ambjent ferm kompetittiv. Għal din ir-raġuni, kalkoli tal-marġni għandhom isegwu rekwiżiti speċifiċi fil-komponenti bażiċi tagħhom. F’dan is-sens, il-marġni għandhom iqisu firxa sħiħa ta’ kundizzjonijiet tas-suq inklużi perjodi ta’ stress.

(24)

Għandhom jiġu stabbiliti regoli biex jispeċifikaw l-persentaġġ xieraq u l-orizzonti ta’ żmien għall-perjodu ta’ likwidazzjoni u għall-kalkolu tal-volatilità storika. Madankollu, sabiex jiġi żgurat li s-CCPs jimmaniġġjaw kif dovut ir-riskju affrontat minnhom, ikun tajjeb li ma jiġix speċifikat l-approċċ li s-CCP għandha tieħu biex jiġu kkalkolati r-rekwiżiti tal-marġni minn dawn il-parametri. Għall-istess raġunijiet, is-CCPs ma għandhomx jinżammu milli jibbażaw ruħhom fuq diversi approċċi metodoloġiċi affidabbli għall-iżvilupp ta’ proviżjonament ta’ marġni ta’ portafoll, dawn għandhom jitħallew jibbażaw ruħhom fuq metodi bbażati fuq korrelazzjonijiet bejn ir-riskji fil-prezz tal-istrument finanzjarju jew sett ta’ strumenti finanzjarji kklerjati minnhom, kif ukoll kwalunkwe metodu xieraq ibbażat fuq parametru statistiku ekwivalenti ta’ dipendenza.

(25)

Sabiex jiġi determinat il-perjodu ta’ żmien li matulu CCP hija esposta għal riskju tas-suq relatat mal-ġestjoni ta’ pożizzoni ta’ parti inadempjenti, is-CCP għandha tikkunsidra l-karatteristiċi rilevanti tal-istrumenti finanzjarji jew portafoll ikklerjati, bħalma huma l-livell tagħhom ta’ likwidità u d-daqs tal-pożizzjoni jew il-konċentrazzjoni tagħha. Is-CCPs għandhom jevalwaw b’mod prudenti il-ħin meħtieġ għal-likwidazzjoni totali ta’ pożizzjoni ta’ parti inadempjenti mill-aħħar ġbir tal-marġni, id-daqs tal-pożizzjoni u l-konċentrazzjoni tagħha.

(26)

Sabiex jiġi evitat li tkun ikkawżata jew iggravata l-instabbiltà finanzjarja, is-CCPs għandhom jadottaw, sa fejn l-aktar possibbli, metodoloġiji tal-marġni li jħarsu ‘l quddiem li jillimitaw il-probabbiltà ta’ bidliet proċikliċi fir-rekwiżiti tal-marġni, mingħajr ma tiġi mminata r-reżistenza tas-CCP.

(27)

Intervall ogħla ta’ kunfidenza għal derivattivi OTC huwa normalment iġġustifikat għaliex dawk il-prodotti jistgħu ibatu minn ipprezzar inqas affidabbli u sensieliet iqsar ta’ dejta storika li fuqhom jistgħu jiġu bbażati l-istimi tal-iskopertura. CCPs jistgħu jikklerjaw id-derivattivi OTC li ma jbatux minn dawn il-fenomeni u jkollhom l-istess karatteristiċi ta’ riskju bħal derivattivi mniżżla fir-reġistru u għandhom ikunu jistgħu jikklerjaw dawk il-prodotti konsistentement irrispettivament mill-metodu ta’ eżekuzzjoni.

(28)

Definizzjoni adegwata ta’ kundizzjonijiet tas-suq estremi iżda plawsibbli hija komponent ewlieni tal-ġestjoni tar-riskju ta’ CCP. Għall-fini li jinżamm aġġornat il-qafas ta’ ġestjoni tar-riskju tas-CCP, kundizzjonijiet tas-suq estremi iżda plawsibbli ma għandhomx jitqiesu bħala kunċett statiku, iżda pjuttost bħala kundizzjonijiet li jevolvu maż-żmien u jvarjaw bejn is-swieq. Xenarju wieħed tas-suq jista’ jkun estrem iżda plawsibbli għal CCP waħda filwaqt li ma jkollux importanza kbira għal oħra. CCP għandha tistabbilixxi qafas ta’ politika intern b’saħħtu għall-identifikazzjoni tas-swieq li tkun esposta għalihom u tapplika sett minimu komuni ta’ standards għad-definizzjoni ta’ kundizzjonijiet estremi iżda plawsibbli f’kull suq identifikat. Għandha tqis oġġettivament il-potenzjal għal pressjonijiet simultanji f’aktar minn suq wieħed.

(29)

Sabiex jiġi żgurat li huma stabbiliti arranġamenti ta’ governanza xierqa u b’saħħithom, il-qafas użat minn CCP biex tidentifika kundizzjonijiet tas-suq estremi iżda plawsibbli għandu jiġi diskuss mill-kumitat tar-riskju u jiġi approvat mill-bord. Għandu jiġi rivedut mill-inqas darba fis-sena, b’riżultati diskussi mill-kumitat tar-riskju li mbagħad jiġu kondiviżi mal-bord. Ir-reviżjoni għandha tiżgura li t-tibdiliet għall-iskala u l-konċentrazzjoni tal-iskoperturi tas-CCP kif ukoll l-iżviluppi fis-swieq li topera fihom huma riflessi fid-definizzjoni ta’ kundizzjonijiet tas-suq estremi iżda plawsibbli. Madankollu, dik ir-reviżjoni ma għandhiex tissostitwixxi l-ġudizzju kontinwu tas-CCP dwar l-adegwatezza tal-fond tal-inadempjenza fid-dawl tal-kundizzjonijiet dejjem jevolvu tas-suq.

(30)

Biex tkun żgurata ġestjoni effiċienti tar-riskju tal-likwidità tagħhom, is-CCPs għandhom ikunu meħtieġa li jistabbilixxu qafas għall-ġestjoni tar-riskju tal-likwidità. Dak il-qafas għandu jiddependi fuq in-natura tal-obbligi tagħha u jindirizza l-għodod li jkunu disponibbli għal CCP biex tivvaluta r-riskju tal-likwidità li qed taffronta, tiddetermina il-pressjonijiet tal-likwidità li jista’ jkun hemm u tiżgura l-adegwatezza tar-riżorsi likwidi tagħha.

(31)

Fil-valutazzjoni tal-adegwatezza tar-riżorsi likwidi tagħha, jeħtieġ li CCP tqis id-daqs u l-likwidità tar-riżorsi miżmuma minnha, kif ukoll il-konċentrazzjoni possibbli tar-riskju ta’ dawn l-assi. Huwa importanti li s-CCPs ikunu jistgħu jidentifikaw it-tipi ewlenin kollha ta’ konċentrazzjonijiet tar-riskju tal-likwidità fi ħdan ir-riżorsi tagħhom sabiex ir-riżorsi ta’ likwidità tas-CCP disponibbli minnufih meta jkunu meħtieġa. Is-CCPs għandhom iqisu wkoll riskji addizzjonali li ġejjin minn relazzjonijiet, interdipendenza u konċentrazzjonijiet multipli.

(32)

Billi l-likwidità għandha tkun faċilment disponibbli għal tranżazzjonijiet għall-jum konċernat jew saħansitra tranżazzjonijiet matul l-istess jum, CCP jistgħu jużaw flus fil-bank ċentrali, tal-ħruġ, flus f’banek kummerċjali ta’ sodezza kreditizja, linji impenjati ta’ kreditu, repos impenjati, kollateral kummerċjabbli ħafna miżmum f’kustodja u investimenti li huma disponibbli minnufih u konvertibbli fi flus b’arranġamenti ta’ finanzjament prestabbiliti u affidabbli ħafna, anki f’kundizzjonijiet tas-suq ta’ stress. Tali flus u kollateral għandhom jingħaddu biss bħala parti mir-riżorsi finanzjarji likwidi prestabbiliti taħt ċerti kundizzjonijiet.

(33)

Sabiex jiġi pprovdut l-inċentiv neċessarju lis-CCP biex tistabbilixxi rekwiżiti prudenti u sabiex iżżomm dak l-ammont sa livell adegwat filwaqt li jiġi evitat arbitraġġ regolatorju, huwa importanti li tiġi stabbilita metodoloġija komuni għall-kalkolu u ż-żamma ta’ ammont speċifiku tar-riżorsi proprji ddedikati li CCP għandha żżomm biex jintużaw fil-kaskata tal-inadempjenza. Huwa essenzjali li jinżammu separatament dawk ir-riżorsi li jkopru telf minħabba inadempjenza b’funzjoni distinta mir-rekwiżiti kapitali minimi tas-CCP li jkopru riskji differenti li CCP tista’ tkun skoperta għalihom.

(34)

Huwa importanti li s-CCPs japplikaw metodoloġija konsistenti għall-kalkolu tar-riżorsi proprji li għandhom jintużaw fil-kaskata tal-inadempjenza, sabiex jiżguraw kundizzjonijiet ekwivalenti bejn is-CCPs. Jekk is-CCPs jingħataw diskrezzjoni biex jimplimentaw metodoloġija li ma tkunx ċara biżżejjed din tista’ twassal għal riżultati differenti ħafna fost is-CCPs, u b’hekk ikun inċentivat l-arbitraġġ regolatorju. Huwa għalhekk essenzjali li l-metodoloġija ma tippermettix diskrezzjoni min-naħa tas-CCPs. Għal dan il-għan, ikun xieraq li jkun hemm sempliċi persentaġġ ibbażat fuq miżura identifikabbli b’mod ċar u metodoloġija ċara għall-iżgurar ta’ kalkolu konsistenti tar-riżorsi proprji tas-CCPs li għandhom jintużaw f’kaskata tal-inadempjenza.

(35)

Għandu jiġi stabbilit sett minimu ta’ kriterji li jiżguraw li kollateral aċċettabbli jkun likwidu ħafna u jista’ jiġi kkonvertit malajr fi flus u bl-inqas impatt fuq il-prezz. Dawk il-kriterji għandhom jirreferu għall-emittent tal-kollateral, sa fejn jista’ jiġi likwidat fis-suq u jekk il-valur tiegħu huwa korrelatat mal-affidabbiltà kreditizja tal-membru li jissottometti il-kollateral biex ikopri risjku possibbli ta’ korrelazzjoni mhux favorevoli. CCP jista’ jkollha l-alternattiva li tapplika kriterji addizzjonali fejn meħtieġ biex tikseb il-livell mixtieq ta’ robustezza.

(36)

CCPs għandhom jaċċettaw biss kollateral likwidu ħafna b’riskju minimu ta’ kreditu u tas-suq. Sabiex jiġi żgurat li l-kollateral miżmum mis-CCPs jibqa’ likwidu ħafna f’kull ħin, jinħtieġ li s-CCPs jistabbilixxu politiki u proċeduri trasparenti u prevedibbli biex jivvalutaw u jimmonitorjaw kontinwament il-likwidità tal-assi aċċettati bħala kollateral adegwat, jimplimentaw metodoloġiji ta’ valwazzjoni. Għal dak il-għan, is-CCPs għandhom jimplimentaw ukoll il-limiti tal-konċentrazzjoni bil-għan li jżommu biżżejjed diversifikazzjoni tal-kollateral biex jiżguraw li jista’ jiġi likwidat fil-pront mingħajr riskju sinifikanti tas-suq li jaffettwaw il-valur tiegħu. Meta jkunu qed jistabbilixxu l-politiki tagħhom dwar il-kollateral eliġibbli u l-limiti tal-konċentrazzjoni dawn għandhom iqisu d-disponibbiltà globali ta’ tali kollateral fid-dawl ta’ effetti makroekonomiċi potenzjali tal-politiki tagħhom.

(37)

Sabiex jiġi evitat riskju ta’ korrelazzjoni mhux favorevoli, il-membri tal-ikklerjar għandhom ikunu permessi, b’mod ġenerali, li jużaw bħala kollateral it-titoli tagħhom stess jew titoli maħruġa minn entità mill-istess grupp tagħhom. Madankollu, CCP għandha tkun tista’ tippermetti membri tal-ikklerjar jissottomettu bonds koperti li huma protetti mill-insolvenza tal-emittent. Madankollu, il-kollateral sottostanti għandu jkun segregat b’mod xieraq mill-emittent u jissodisfa l-kriterji minimi għall-aċċettabbiltà tal-kollateral. Membru tal-ikklerjar ma għandux joħroġ strumenti finanzjarji għall-fini primara li jintużaw bħala kollateral minn membru tal-ikklerjar ieħor.

(38)

Sabiex tiġi żgurata s-sikurezza tas-CCPs, CCP għandha taċċetta, bħala kollateral, garanzija ta’ bank kummerċjali biss wara valutazzjoni bir-reqqa tal-emittent u tal-qafas legali, kuntrattwali u operazzjonali tal-garanzija. L-iskoperturi mhux garantiti tas-CCPs għal banek kummerċjali għandhom jiġu evitati. Għalhekk, garanziji tal-banek kummerċjali jistgħu jiġu aċċettati biss taħt kundizzjonijiet stretti. Dawk il-kundizzjonijiet huma ġeneralment issodisfati fi swieq kkaratterizzati minn konċentrazzjoni għolja ta’ banek kummerċjali li lesti li jipprovdu l-kreditu lil membri tal-ikklerjar mhux finanzjarji. Għal din ir-raġuni limitu ogħla tal-konċentrazzjoni għandu jkun permess f’dawn il-każijiet.

(39)

Biex tillimita r-riskju tas-suq tagħha, CCP għandha tkun meħtieġa li tivvaluta l-kollateral tagħha tal-anqas kuljum. Din għandha tapplika telf impost prudenti li jirrifletti t-tnaqqis potenzjali tal-valur tal-kollateral fuq l-intervall bejn l-aħħar rivalwazzjoni tagħha u ż-żmien sa meta kollateral jista’ raġonevolment jiġi preżunt li huwa likwidat f’kundizzjonijiet tas-suq ta’ stress. Il-livell tal-kollateral għandu jqis ukoll skoperturi potenzjali ta’ riskju ta’ korrelazzjoni mhux favorevoli.

(40)

L-implimentazzjoni ta’ telf impost għandha tippermetti lis-CCP li tevita aġġustamenti kbar u mhux mistennija għall-ammont ta’ kollateral meħtieġ, u b’hekk jiġu evitati effetti proċikliċi sa fejn ikun possibbli.

(41)

CCP ma għandhiex tikkonċentra kollateral fuq għadd limitat ta’ emittenti jew f’għadd limitat ta’ assi, sabiex jiġu evitati effetti negattivi fuq il-prezzijiet potenzjalment sinfikanti f’każ ta’ likwidazzjoni ta’ kollateral fuq perjodu qasir ta’ żmien. Pożizzjonijiet konċentrati ta’ kollateral ma għandhomx jitqiesu bħala likwidi ħafna għal din ir-raġuni.

(42)

Likwidità, riskju tal-kreditu u tas-suq għandhom ikunu kkunsidrati fil-livell tal-portafoll kif ukoll fil-livell ta’ strument finanzjarju individwali. Portafoll ikkonċentrat jista’ jkollu effett negattiv sinifikanti fuq il-likwidità tal-kollateral jew tal-istrumenti finanzjarji li fihom is-CCP tista’ tinvesti r-riżorsi finanzjarji tagħha, billi l-bejgħ ta’ pożizzjonijiet kbar f’kundizzjonijiet tas-suq ta’ stress x’aktarx ma jkunx fattibbli mingħajr t-tnaqqis fil-prezz tas-suq. Għall-istess raġuni, kollateral miżmum mis-CCP għandu jiġi mmonitorjat u vvalutat fuq bażi kontinwa biex ikun żgurat li jibqa’ likwidu.

(43)

Swieq tad-derivattivi tal-enerġija juru rabta partikolarment b’saħħitha mas-swieq ta’ komoditajiet ta’ spot u f’dawn is-swieq ta’ derivattivi l-proporzjon ta’ membri tal-ikklerjar mhux finanzjarji huwa għoli. F’dawk is-swieq, għadd sinifikanti ta’ parteċipanti fis-suq huma wkoll produtturi tal-komodità sottostanti. Aċċess għal biżżejjed kollateral biex jappoġġa bis-sħiħ garanziji ta’ banek kummerċjali jista’ jesiġi żvestiment sostanzjali minn dawk il-membri tal-ikklerjar mhux finanzjarji tal-pożizzjonijiet attwali tagħhom jew jista’ jimpedihom milli jkomplu jikklerjaw il-pożizzjonijiet tagħhom bħala membru dirett tal-ikklerjar ta’ CCP. Dak il-proċess jista’ jikkawża interruzzjonijiet tas-suq fis-swieq tal-enerġija, f’termini ta’ likwidità u d-diversità ta’ parteċipanti fis-suq. Għalhekk, l-applikazzjoni tiegħu għandha tiġi posposta skont qafas ta’ żmien stabbilit sew.

(44)

Sabiex tiġi żgurata applikazzjoni konsistenti tal-qafas stabbilit fir-Regolament (UE) Nru 648/2012, is-setturi kollha għandhom jaffrontaw rekwiżiti simili fil-forma finali tar-regoli applikabbli għalihom. Kumpaniji tal-enerġija attwalment joperaw taħt qafas stabbilit sew li se jeħtieġ xi żmien biex jadatta għar-rekwiżiti ġodda stabbiliti biex jiġu evitati effetti ta’ ħsara għall-ekonomija reali. Għalhekk, ikun tajjeb li tiġi stabbilita data ta’ applikazzjoni għal tali tipi ta’ swieq li tippermetti tranżizzjoni xierqa mill-prattika attwali tas-suq mingħajr ma jiġu affettwati bla bżonn l-istruttura u l-likwidità tas-suq.

(45)

Il-politika ta’ investiment ta’ CCP għandha tagħti l-ogħla prijorità lill-prinċipji tal-ħarsien tal-kapital u l-massimizzazzjoni tal-likwidità. Il-politika ta’ investiment għandha tiżgura wkoll li ma jinħolqu ebda kunflitti ta’ interess mal-interessi kummerċjali tas-CCP.

(46)

Il-kriterji li għandhom jiġu ssodisfati mill-istrumenti finanzjarji biex jitqiesu bħala investimenti eliġibbli għas-CCP, għandhom iqisu l-Prinċipju 16 tal-Prinċipi CPSS-IOSCO sabiex tiġi żgurata l-konsistenza internazzjonali. B’mod partikolari, CCP għandha tkun meħtieġa li tapplika standards restrittivi dwar l-emittent tal-istrument finanzjarju, it-trasferibbiltà tal-istrument finanzjarju u l-kreditu, is-suq, il-volatilità u riskju tal-kambju tal-istrument finanzjarju. CCP għandha tiżgura li ma timminax miżuri meħuda biex jillimitaw l-iskopertura għar-riskju tal-investiment tagħha billi jkollha skoperturi eċċessivi għal kwalunkwe strument finanzjarju individwali, tip ta’ strument finanzjarju, emittent individwali, tip ta’ emittent jew kustodju individwali.

(47)

L-użu ta’ derivattivi minn CCP jesponiha għal riskji addizzjonali tal-kreditu u tas-suq u huwa għalhekk neċessarju li jiġi ddefinit sett restrittiv ta’ ċirkustanzi li fihom CCP tista’ tinvesti r-riżorsi finanzjarji tagħha f’derivattivi. Billi l-għan tas-CCP għandu jkun li jkun hemm pożizzjoni żero fir-rigward tar-riskji tas-suq, l-uniċi riskji li CCP ikollha tiħħeġġja huma dawk li jikkonċernaw il-kollateral aċċettat minnha jew ir-riskji li jirriżultaw mill-inadempjenza ta’ membru tal-ikklerjar. Ir-riskji li jikkonċernaw il-kollateral aċċettat minn CCP jistgħu jkunu mmaniġġjati biżżejjed permezz ta’ telf impost u mhuwiex meqjus bħala neċessarju li CCP tuża d-derivattivi f’dan ir-rigward. Id-derivattivi għandhom jintużaw biss minn CCP għall-ġestjoni tar-riskju tal-likwidità li jirriżulta għal skoperturi għal muniti differenti u għall-finijiet ta’ ħħeġġjar tal-portafoll ta’ membru tal-ikklerjar inadempjenti u fejn il-proċeduri tal-ġestjoni tal-inadempjenza tas-CCP jipprevedu tali użu biss.

(48)

Biex jiżguraw is-sikurezza tas-CCPs, huma għandhom jitħallew biss iżommu flus f’depożiti mhux garantiti fi proporzjonijiet minimi. Waqt li jkunu qed jiggarantixxu l-flus tagħhom, is-CCPs għandhom dejjem jiżguraw li dawn huma dejjem protetti adegwatament kontra r-riskju tal-likwidità.

(49)

Jeħtieġ li jiġu stabbiliti rekwiżiti rigorużi tal-ittestjar tal-istress u dak retrospettiv biex jiġi żgurat li l-mudelli tas-CCP, il-metodoloġiji tagħhom u l-qafas ta’ ġestjoni tar-riskju tal-likwidità jaħdmu kif suppost, filwaqt li jitqiesu r-riskji kollha li s-CCP tkun esposta għalihom, sabiex is-CCP, fi kwalunkwe ħin, ikollha riżorsi adegwati biex ikopru dawk ir-riskji.

(50)

Biex tiġi żgurata applikazzjoni konsistenti ta’ rekwiżiti għas-CCPs, jeħtieġ li jiġu stabbiliti dispożizzjonijiet dettaljati rigward it-tipi ta’ testijiet li għandhom jitwettqu, inkluż kemm l-ittestjar tal-istress kif ukoll dak retrospettiv. Sabiex tkun koperta il-firxa wiesgħa ta’ kuntratti ta’ titoli u derivattivi li jistgħu jiġu kklerjati fil-futur, jiġu riflessi differenzi fl-approċċi tal-ġestjoni tal-operat u tar-riskju, ikun possibbli li jiġu indirizzati żviluppi futuri u riskji ġodda u tkun possibbli biżżejjed flessibbiltà, jeħtieġ approċċ ibbażat fuq il-kriterji.

(51)

Fil-validazzjoni ta’ mudelli ta’ CCP, il-metodoloġiji tagħhom u l-qafas ta’ ġestjoni tar-riskju tal-likwidità, huwa importanti li tintuża parti indipendenti xierqa sabiex tkun tista’ tinstab u tiġi implimentata kwalunkwe miżura korrettiva meħtieġa qabel l-implimentazzjoni u jiġi evitat kwalunkwe kunflitt ta’ interess materjali. Il-parti indipendenti għandha tkun separata biżżejjed mill-parti tal-operat tas-CCP li tiżviluppa, timplimenta u se topera l-mudell jew il-politiki li qed ikunu riveduti u ma għandhiex iżżom kunflitt ta’ interess materjali. Dawk il-kundizzjonijiet jistgħu jiġu ssodisfati jew minn parti interna li għandha linji separati ta’ rapportar jew parti esterna.

(52)

Aspetti varji tar-riżorsi finanzjarji ta’ CCP, notevolment il-kopertura tal-marġni, il-fondi ta’ inadempjenza u riżorsi finanzjarji oħra, huma mfassla biex ikopru xenarji u għanijiet differenti. Għalhekk jeħtieġ li jiġu pprovduti rekwiżiti speċifiċi biex jiġu riflessi dawn l-għanijiet u biex tiġi żgurata applikazzjoni konsistenti fost is-CCPs. Fil-valutazzjoni tal-kopertura meħtieġa, is-CCP ma għandhiex tikkumpensa għal kwalunkwe skopertura bejn il-membri tal-ikklerjar inadempjenti, sabiex jiġu evitati l-impatti potenzjali li dawn l-iskoperturi jistgħu jkollhom.

(53)

It-tipi differenti ta’ strumenti finanzjarji li jistgħu jiġu kklerjati minn CCP huma soġġetti għal varjetà ta’ riskji speċifiċi. CCP għandha għalhekk tkun meħtieġa li tikkunsidra r-riskji rilevanti kollha għas-swieq li tipprovdilhom servizzi ta’ kklerjar fil-mudelli tagħha, il-metodoloġiji tagħhom u l-qafas ta’ ġestjoni tar-riskju tal-likwidità sabiex tiżgura li tkejjel b’mod adegwat l-iskopertura potenzjali tagħha fil-futur. Sabiex dawn ir-riskji jiġu ikkunsidrati kif suppost, rekwiżiti ta’ ttestjar tal-istress għandhom jinkludu riskji speċifiċi għall-istrumenti rilevanti għat-tipi differenti ta’ strumenti finanzjarji.

(54)

Sabiex CCP tiżgura li l-mudell tagħha għall-kalkolu tal-marġni inizjali jirrifletti adegwatament l-iskoperturi potenzjali tiegħu, minbarra l-ittestjar retrospettiv ta’ kuljum tal-kopertura tal-marġini tagħha li jħares lejn l-adegwatezza tal-marġni li għaliha qed isir appell għall-manutenzjoni, għandha tittestja wkoll b’mod retrospettiv parametri u suppożizzjonijiet ewlenin tal-mudell. Dan huwa essenzjali sabiex jiġi żgurat li l-mudelli tas-CCPs jikkalkulaw il-marġni inizjali b’mod preċiż.

(55)

Analiżi rigoruża tas-sensittività tar-rekwiżiti tal-marġni tista’ tassumi importanza akbar meta s-swieq huma llikwidi jew volatili u għandha tintuża biex tiddetermina l-impatt ta’ diversi parametri importanti tal-mudell. Analiżi tas-sensittività hija għodda effettiva biex tesplora n-nuqqasijiet moħbija li ma jistgħux jiġu identifikati permezz ta’ ttestjar retrospettiv.

(56)

Nuqqas ta’ twettiq ta’ testijiet tal-istress u dawk retrospettivi jista’ jwassal sabiex ir-riżorsi finanzjarji u likwidi ta’ CCP ma jkunux adegwati biex ikopru r-riskji reali li tkun esposta għalihom. Testijiet xierqa se jippermettu wkoll li l-mudelli ta’ CCP, u l-metodoloġiji tagħhom u l-qafas ta’ ġestjoni tar-riskju tal-likwidità, jindirizzaw minnufih swieq li qed jinbidlu u riskji ġodda. Ir-riżultati tat-test għandhom għalhekk jintużaw minnufih mis-CCPs sabiex jirrivedu l-mudelli, il-metodoloġiji u l-qafas ta’ ġestjoni tar-riskju tal-likwidità tagħhom.

(57)

L-immudellar ta’ kondizzjonijiet estremi tas-suq jista’ jgħin CCP biex tiddetermina l-limiti tal-mudelli attwali tagħha, il-qafas ta’ ġestjoni tar-riskju tal-likwidità u r-riżorsi finanzjarji u likwidi. Madankollu, jesiġi li s-CCP teżerċita ġudizzju waqt l-immudellar tas-swieq u prodotti differenti. Ittestjar invertit tal-istress għandu jitqies bħala għodda utli ta’ ġestjoni, minkejja li mhijiex dik prinċipali, biex tiddetermina l-livell xieraq tar-riżorsi finanzjarji.

(58)

L-involviment tal-membri tal-ikklerjar, il-klijenti u partijiet interessati rilevanti oħrajn fl-ittestjar tal-proċeduri ta’ ġestjoni ta’ inadempjenza ta’ CCP, permezz ta’ eżerċizzji ta’ simulazzjoni, huwa essenzjali sabiex jiżgura li dawn ikollhom il-fehim u l-kapaċità operazzjonali sabiex jipparteċipaw b’suċċess f’sitwazzjoni ta’ ġestjoni ta’ inadempjenza. L-eżerċizzji ta’ simulazzjoni għandhom jirreplikaw xenarju standard biex juri r-rwoli u r-responsabbiltajiet tal-membri tal-ikklerjar, il-klijenti u partijiet interessati relevanti oħrajn. Barra minn hekk huwa importanti li CCP jkollha mekkaniżmi xierqa li permezz tagħhom tkun tista’ taċċerta jekk hijiex meħtieġa azzjoni korrettiva u li tidentifika kwalunkwe nuqqas ta’ ċarezza jew diskrezzjoni permessi fir-regoli u l-proċeduri. L-ittestjar ta’ proċeduri ta’ ġestjoni ta’ inadempjenza ta’ CCP huwa partikolarment importanti meta jiddependi fuq membri tal-ikklerjar mhux inadempjenti jew partijiet terzi biex jgħinu fil-proċess ta’ likwidazzjoni u meta l-proċeduri tal-inadempjenza qatt ma ġew ittestjati minn inadempjenza reali.

(59)

Dan ir-Regolament huwa bbażat fuq l-abbozz tal-istandards tekniċi regolatorji sottomessi mill-Awtorità Ewropea tat-Titoli u s-Swieq (AETS) lill-Kummissjoni.

(60)

L-AETS ikkonsultat, fejn rilevanti, lill-Awtorità Bankarja Ewropea (EBA), lill-Bord Ewropew dwar ir-Riskju Sistemiku u lill-membri tas-SEBĊ qabel ma ssottomettiet l-abbozz tal-istandards tekniċi li fuqhom huwa msejjes dan ir-Regolament. B’konformità mal-Artikolu 10 tar-Regolament (UE) Nru 1095/2010, tal-Parlament Ewropew u tal-Kunsill tal-24 ta’ Novembru 2010 li jistabbilixxi Awtorità Superviżorja Ewropea (Awtorità Ewropea tat-Titoli u s-Swieq) (4) l-AETS wettqet konsultazzjonijiet pubbliċi miftuħa dwar dan l-abbozz ta’ standards tekniċi regolatorji, analizzat il-kostijiet u l-benefiċċji potenzjali relatati u talbet l-opinjoni tal-Grupp tal-Partijiet Interessati tat-Titoli u s-Swieq stabbilit skont l-Artikolu 37 tar-Regolament (UE) Nru 1095/2010.