(1)

Fil-Kawża C-249/10 P (2), il-Qorti tal-Ġustizzja ddeċidiet li t-teknika tat-teħid tal-kampjuni prevista fl-Artikolu 17 tar-Regolament tal-Kunsill (KE) Nru 1225/2009 (3) ma tistax tiġi applikata bil-għan li jiġu ddeterminati talbiet għal trattament ta’ ekonomija tas-suq skont is-subparagrafu (c) tal-Artikolu 2(7) ta’ dak ir-Regolament.

(2)

Id-deċiżjoni tal-Qorti tal-Ġustizzja titlob li l-Kummissjoni teżamina l-applikazzjonijiet kollha għal trattament ta’ ekonomija tas-suq imressqa minn produtturi esportaturi li jkunu kkooperaw u li mhumiex parti mill-kampjun, irrispettivament minn jekk in-numru ta’ produtturi li kkooperaw huwiex kbir. Madankollu, din il-prattika timponi piż amministrattiv sproporzjonat fuq l-awtoritajiet investigattivi tal-Unjoni. Għaldaqstant huwa f’loku li jiġi emendat ir-Regolament (KE) Nru 1225/2009.

(3)

Barra minn hekk, l-użu tat-teknika tat-teħid tal-kampjuni prevista fl-Artikolu 17 tar-Regolament (KE) Nru 1225/2009 bil-għan li jiġu ddeterminati talbiet għal trattament ta’ ekonomija tas-suq skont is-subparagrafu (c) tal-Artikolu 2(7) ta’ dak ir-Regolament hija permessa skont ir-regoli tal-Organizzazzjoni Dinjija tal-Kummerċ. Pereżempju, il-Bord tal-Korp għas-Soluzzjoni tat-Tilwim tal-Organizzazzjoni Dinjija tal-Kummerċ fit-tilwima DS405 “l-Unjoni Ewropea — Il-miżuri antidumping fuq ċerti żraben miċ-Ċina” (4) (rapport adottat fit-22 ta’ Frar 2012) sab li ċ-Ċina ma kinitx stabbiliet li l-Unjoni aġixxiet b’mod inkonsistenti mal-Artikoli 2.4 u 6.10.2 tal-Ftehim tal-Antidumping, mal-paragrafu 15(a)(ii) tal-Protokoll tal-Adeżjoni taċ-Ċina, u mal-paragrafi 151(e) u (f) tar-Rapport tal-Grupp ta’ Ħidma dwar l-Adeżjoni taċ-Ċina, minħabba li naqset milli teżamina l-applikazzjonijiet għal trattament tal-ekonomija tas-suq tal-produtturi esportaturi Ċiniżi li kkooperaw li ma kinux parti mill-kampjun għall-investigazzjoni oriġinali.

(4)

Għalhekk, meta wieħed jikkunsidra dak l-isfond u għal raġunijiet marbuta maċ-ċertezza legali, huwa meqjus f’loku li tiġi introdotta dispożizzjoni li tiċċara li d-deċiżjoni li l-investigazzjoni tiġi limitata għal numru raġonevoli ta’ partijiet billi jintużaw kampjuni abbażi tal-Artikolu 17 tar-Regolament (KE) Nru 1225/2009 tapplika wkoll għall-partijiet suġġetti għall-eżami skont is-subparagrafi (b) u (c) tal-Artikolu 2(7) ta’ dak ir-Regolament. B’riżultat ta’ dan, huwa wkoll f’loku li jiġi ċċarat li ma għandhiex issir determinazzjoni skont is-subparagrafu (c) tal-Artikolu 2(7) ta’ dak ir-Regolament għal produtturi esportaturi li mhumiex parti mill-kampjun sakemm dawn il-produtturi ma jitolbux u ma jiksbux eżami individwali skont l-Artikolu 17(3) tiegħu.

(5)

Barra minn hekk, huwa xieraq li jkun iċċarat li d-dazju anti-dumping li jrid jiġi applikat għall-importazzjonijiet mill-esportaturi jew mill-produtturi li jkunu ppreżentaw id-dettalji tagħhom skont l-Artikolu 17 tar-Regolament (KE) Nru 1225/2009 imma li ma kinux ġew inklużi fl-eżami, ma għandux jaqbeż il-marġini medju differenzjat tad-dumping stabbilit għall-partijiet fil-kampjun, irrispettivament minn jekk il-valur normali stabbilit għal dawn il-partijiet kienx determinat abbażi tal-Artikolu 2(1) sa (6) jew is-subparagrafu (a) tal-Artikolu 2(7) ta’ dak ir-Regolament.

(6)

Fl-aħħar nett, il-perjodu ta’ żmien stipulat ta’ tliet xhur li fih trid tkun saret id-determinazzjoni skont is-subparagrafu (c) tal-Artikolu 2(7) tar-Regolament (KE) Nru 1225/2009, irriżulta wieħed mhux prattiku partikolarment fi proċedimenti fejn it-teħid tal-kampjuni jsir skont l-Artikolu 17 ta’ dak ir-Regolament. Għaldaqstant, huwa f’loku li dak il-perijodu stipulat jiġi estiż.

(7)

Fl-interessi taċ-ċertezza legali u l-prinċipju ta’ amministrazzjoni soda, huwa neċessarju li jkun stipulat li l-emendi għar-Regolament (KE) Nru 1225/2009 previsti f’dan ir-Regolament għandhom japplikaw kemm jista’ jkun malajr għall-investigazzjonijiet ġodda u pendenti kollha.

(8)

Ir-Regolament (KE) Nru 1225/2009 għandu għalhekk jiġi emendat kif meħtieġ,

(1)

L-Artikolu 2(7) huwa emendat kif ġej:

(2)

Fl-Artikolu 9(6), l-ewwel sentenza hija sostitwita b’dan li ġej:

“Meta l-Kummissjoni tkun illimitat l-eżami tagħha skont l-Artikolu 17, kwalunkwe dazju anti-dumping applikat għall-importazzjonijiet minn esportaturi jew produtturi li jkunu ressqu d-dettalji tagħhom skont l-Artikolu 17 imma li ma kinux ġew inklużi fl-eżami ma għandux jaqbeż il-marġini medju peżat ta’ dumping stabbilit fir-rigward tal-partijiet fil-kampjun, irrispettivament minn jekk il-valur normali għal dawn il-partijiet huwiex determinat abbażi tal-Artikolu 2(1) sa (6) jew is-subparagrafu tal-Artikolu 2(7).”.