—

wara li kkunsidra l-baġit ġenerali tal-Unjoni Ewropea għas-sena finanzjarja 2010 (1),

—

wara li kkunsidra l-kontijiet annwali tal-Unjoni Ewropea għas-sena finanzjarja 2010 (COM(2011) 473 – C7-0257/2011) (2),

—

wara li kkunsidra r-rapport dwar il-ġestjoni baġitarja u finanzjarja — it-Taqsima I — Il-Parlament Ewropew — Sena Finanzjarja 2010 (3),

—

wara li kkunsidra r-rapport annwali tal-Awditur Intern għas-sena finanzjarja 2010,

—

wara li kkunsidra r-Rapport Annwali tal-Qorti tal-Awdituri dwar l-implimentazzjoni tal-baġit għas-sena finanzjarja 2010, flimkien mar-risposti tal-istituzzjonijiet (4),

—

wara li kkunsidra d-dikjarazzjoni ta’ assigurazzjoni (5) dwar l-affidabilità tal-kontijiet, kif ukoll il-legalità u r-regolarità tal-operazzjonijiet li jaqgħu taħthom, ipprovduta mill-Qorti tal-Awdituri għas-sena finanzjarja 2010 skont l-Artikolu 287 tat-Trattat dwar il-Funzjonament tal-Unjoni Ewropea,

—

wara li kkunsidra l-Artikolu 314(10) u l-Artikolu 318 tat-Trattat dwar il-Funzjonament tal-Unjoni Ewropea, u l-Artikolu 106a tat-Trattat Euratom,

—

wara li kkunsidra r-Regolament tal-Kunsill (KE, Euratom) Nru 1605/2002 tal-25 ta’ Ġunju 2002 rigward ir-Regolament Finanzjarju applikabbli għall-baġit ġenerali tal-Komunitajiet Ewropej (6) (ir-Regolament Finanzjarju), u b'mod partikolari l-Artikoli 145, 146 u 147 tiegħu,

—

wara li kkunsidra l-Artikolu 13 tar-Regoli Interni dwar l-implimentazzjoni tal-baġit tal-Parlament Ewropew (7),

—

wara li kkunsidra l-Artikolu 147(1) tar-Regolament Finanzjarju, skont liema artikolu kull istituzzjoni tal-Unjoni għandha tieħu l-passi kollha xierqa biex taġixxi fuq il-kummenti li jakkumpanjaw id-deċiżjoni ta’ kwittanza tal-Parlament Ewopew,

—

wara li kkunsidra r-riżoluzzjoni tiegħu tal-10 ta’ Marzu 2009 dwar il-linji gwida għall-proċedura baġitarja 2010 — it-Taqsimiet I, II, IV, V, VI, VII, VIII u IX (8),

—

wara li kkunsidra r-riżoluzzjoni tiegħu tal-5 ta’ Mejju 2009 dwar l-estimi tad-dħul u tal-infiq tal-Parlament għas-sena finanzjarja 2010 (9),

—

wara li kkunsidra r-Regoli 77 u 80(3) u l-Anness VI tar-Regoli ta’ Proċedura tiegħu,

—

wara li kkunsidra r-rapport tal-Kumitat għall-Kontroll tal-Baġit (A7-0120/2012),

A.

billi l-verifika tal-Qorti tal-Awdituri ddikjarat li, fir-rigward tan-nefqa amministrattiva tal-2010, l-istituzzjonijiet kollha implimentaw b'mod sodisfaċenti s-sistemi ta’ sorveljanza u ta’ kontroll meħtieġa mir-Regolament Finanzjarju u 93 % tal-58 ħlas awditjat kienu ħielsa minn żbalji materjali,

B.

billi, fit-16 ta’ Ġunju 2011, is-Segretarju Ġenerali ċċertifika li għandu assigurazzjoni raġonevoli li l-baġit tal-Parlament Ewropew ġie implimentat b'konformità mal-prinċipji ta’ ġestjoni finanzjarja soda u li l-qafas ta’ kontroll li ġie applikat jagħti l-garanziji meħtieġa tal-legalità u r-regolarità tal-operazzjonijiet sottostanti;

C.

billi filwaqt li xi kwistjonijiet li tqajmu matul id-diskussjonijiet dwar il-kwittanza għall-2010 fil-Kumitat għall-Kontroll tal-Baġit marru lil hinn mill-kwistjonijiet speċifiċi għall-2010, u kienu inklużi f'mistoqsijiet ġenerali li saru mill-Kumitat, din ir-riżoluzzjoni tibqa' ffukata prinċipalment fuq l-implimentazzjoni tal-baġit u l-kwittanza għas-sena finanzjarja 2010, filwaqt li jirrikonoxxi li l-approċċi għall-kwistjonijiet baġitarji huma suġġetti għal diskussjoni usa' b'mod partikolari fil-grupp ta’ ħidma li qed jiġi stabbilit biex iqis l-ispejjeż u t-tfaddil possibbli tal-Parlament Ewropew, u f'konformità mal-linji gwida tal-baġit tal-2013 adottati fit-8 ta’ Frar 2012, li jfittex li jagħmel tfaddil fuq tul ta’ żmien twil sinifikanti, permezz ta’ evalwazzjoni indipendenti tal-baġit tal-Parlament Ewropew li jwassal għal proposti sa tmiem l-2012 segwit mill-implimentazzjoni mgħaġġla tagħhom;

1.

Jirrimarka li l-implimentazzjoni tal-baġit fl-2010 kienet problematika peress li dik kienet l-ewwel sena sħiħa ta’ operazzjonijiet wara l-elezzjonijiet Ewropej tal-2009, u seħħet fil-kuntest ta’ problemi finanzjarji kontinwi fl-Unjoni;

2.

Josserva li l-baġit tal-Parlament (approprjazzjonijiet finali li jammontaw għal EUR 1 616 760 399, meta mqabbla ma’ EUR 1 529 970 930 fl-2009) kien ftit inqas minn parti waħda minn ħamsa (19,99 %; 19,67 % fl-2009, għaldaqstant inqas mis-sehem ta’ 20 % tas-soltu) tal-Intestatura V (Nefqa amministrattiva) fil-baġit ġenerali tal-Unjoni Ewropea għall-2010;

3.

Jieħu nota tat-tweġiba tas-Segretarjat tal-Parlament, skont liema tweġiba l-ispejjeż annwali tas-sede tal-Parlament fi Strasburgu kienu jammontaw preċiżament għal EUR 51 500 000 fl-2010, li minnhom EUR 33 500 000 kienu spejjeż infrastrutturali u EUR 18 000 000 kienu spejjeż operattivi għat-12-il sessjoni parzjali ta’ kull xahar; josserva li dawn l-ammonti uffiċjali huma ħafna inqas mill-istimi mressqa qabel, li kienu jvarjaw minn EUR 169 000 000 għal EUR 203 000 000; jinnota, madankollu, li fl-istimi tal-2006, l-Amministrazzjoni kienet ikkalkulat li kieku kellu jkun hemm sede unika, l-iffrankar annwali jkun ta’ EUR 204 miljun, filwaqt li fl-2010 ċ-ċifra stmata kienet ta’ EUR 180 miljun, li hija ċifra aktar baxxa minħabba li sadanittant kienu nxtraw il-binjiet ta’ Strasburgu u kien sar titjib fit-teknoloġija tal-informazzjoni, u jfakkar li fl-istimi tiegħu għall-2013, il-Parlament Ewropew ivvota, b'429 vot favur u 184 vot kontra, li jkollu sede unika sabiex jiffranka l-ispejjeż;

4.

Jinnota li d-dħul fis-seħħ tat-Trattat ta’ Lisbona żied is-setgħat, l-attivitajiet u l-ammont ta’ xogħol leġislattiv tal-Parlament, b'mod li rrikjeda bidliet kbar fl-organizzazzjoni u fil-metodi ta’ ħidma tiegħu biex wieħed jibni fuq l-eċċellenza leġislattiva u jkompli t-tħejjijiet għat-tkabbir tal-Unjoni biex tinkludi l-Kroazja; jinnota wkoll li, biex wieħed jirreaġixxi għall-isfidi l-ġodda, ġew adottati miżuri biex tittejjeb il-kosteffikaċja permezz ta’ żieda fil-produttività, ridistribuzzjoni tal-persunal u metodi ta’ ħidma mtejba;

5.

Jinnota li kienet meħtieġa l-adozzjoni ta’ baġit emendatorju (Nru 1/2010 adottat fid-19 ta’ Mejju 2010) ta’ EUR 9 397 164 biex tiġi ffinanzjata n-nefqa addizzjonali li rriżultat direttament mid-dħul fis-seħħ tat-Trattat ta’ Lisbona; jinnota wkoll li dan il-baġit emendatorju saħħaħ, b'mod partikolari, żewġ partiti baġitarji (Il-Partita 1200“Remunerazzjoni u allowances” u l-Partita 4220/01 “L-assistenza parlamentari: assistenti lokali”) biex tissaħħaħ l-assistenza lill-Membri fit-twettiq tal-kompiti leġislattivi miżjuda tagħhom; madankollu jiddispjaċih li din iż-żieda ma tnaqqsitx b'mod sostanzjali permezz ta’ tfaddil iktar konsistenti;

6.

Jinnota li s-sena rat konsolidament u aktar modernizzazzjoni tal-amministrazzjoni, bi ffukar akbar fuq l-attivitajiet ewlenin, ir-ristrutturar tas-servizzi, użu aħjar ta’ teknoloġiji moderni u iktar kooperazzjoni interistituzzjonali;

7.

Jirrimarka li l-2010 kienet l-ewwel sena li fiha l-Istatut il-ġdid tal-Membri u l-Istatut tal-Assistenti (it-tnejn li huma fis-seħħ mill-14 ta’ Lulju 2009) ġew implimentati għalkollox bid-dħul fis-seħħ ta’ sett ta’ modifiki għall-Miżuri Implimentattivi taż-żewġ Statuti, proposti mill-Grupp Temporanju ta’ Valutazzjoni, u li dawn irrappreżentaw kompiti addizzjonali sinifikanti għall-amministrazzjoni tal-Parlament;

8.

Jinnota l-adozzjoni mill-Bureau, fl-24 ta’ Marzu 2010, ta’ Strateġija tal-ICT għal terminu medju ta’ żmien (u b'mod partikolari s-Sistema tal-Ġestjoni tal-Għarfien - KMS - li tagħmel parti minnha) u politika tal-bini għal terminu medju ta’ żmien, li t-tnejn li huma għandhom dimensjoni finanzjarja notevoli;

9.

Jinnota li, fl-2010, il-Parlament irċieva dħul li jammonta għal EUR 243 094 204 (EUR 141 250 059 fl-2009), li kien jinkludi EUR 110 298 523 fi dħul assenjat;

10.

Jinnota ċ-ċifri li fuq il-bażi tagħhom ingħalqu l-kontijiet tal-Parlament għas-sena finanzjarja 2010, jiġifieri:

11.

Jinnota li fl-2010, 96 % (93 % fl-2009) tal-approprjazzjonijiet finali ġew impenjati, b'rata ta’ kanċellazzjoni ta’ 4 % (6,7 % fl-2009), u li, bħal fis-snin preċedenti, intlaħaq livell għoli ħafna ta’ implimentazzjoni baġitarja;

12.

Jinnota madankollu r-riporti sinifikanti għall-2010 (EUR 190 365 823 (10)), konsegwenza, fil-biċċa l-kbira tagħhom, tan-natura partikolari tas-sena elettorali 2009, u jitlob li jkun hemm ippjanar aħjar tan-nefqa li jikkunsidra dan kollu fil-perjodu ta’ qabel elezzjonijiet Ewropej futuri;

13.

Jinnota li dan il-livell għoli globali ta’ implimentazzjoni huwa parzjalment dovut għal żewġ trasferimenti mmirati li saru qabel tmiem is-sena finanzjarja 2010 (EUR 9 240 000 għax-xiri ta’ Dar l-Ewropa f'Sofija u EUR 10 923 000 għal erba' proġetti kbar tal-IT); jilqa' l-fatt li, għat-tieni darba, ma saru l-ebda trasferimenti kollettivi bejn l-2010 u l-2011; iħeġġeġ lill-amministrazzjoni tiegħu, madankollu, biex fil-futur timmira għall-objettiv ta’ ppjanar u dixxiplina baġitarji aħjar u aktar ċari u jinnota li l-inklużjoni tal-bini, l-IT u kwalunkwe nefqa importanti oħra fil-baġit tipprovdi ċarezza finanzjarja totali; iqis li l-infiq il-kbir kollu għandu jkun previst totalment fil-baġit annwali u mhux jirriżulta mill-bżonn li jsir irkupru ta’ ammonti mhux użati;

14.

Jilqa' b'sodisfazzjon id-dikjarazzjoni tas-Segretarju Ġenerali tas-16 ta’ Ġunju 2011 fil-kapaċità tiegħu ta’ Uffiċjal Awtorizzanti Prinċipali b'delega, fir-rigward tar-rapporti tal-attivitajiet annwali tal-uffiċjali awtorizzanti għall-2010, li fiha ċċertifika li hu għandu assigurazzjoni raġonevoli li l-baġit tal-Parlament kien implimentat f'konformita' mal-prinċipji ta’ ġestjoni finanzjarja tajba u li l-qafas ta’ kontroll li ġie applikat jagħti l-garanziji meħtieġa tal-legalità u r-regolarità tal-operazzjonijiet sottostanti;

15.

Jinnota li s-servizzi ċentrali stabbilixxew, fuq il-bażi ta’ tagħrif provdut mid-dipartimenti awtorizzanti, ir-rapport annwali (11) lill-awtorità baġitarja dwar kuntratti mogħtija fl-2010 u jinnota wkoll it-tqassim li ġej tal-kuntratti kollha mogħtija fl-2009 u fl-2010:

(Rapport annwali dwar il-kuntratti mogħtija mill-Parlament Ewropew, 2010, p. 5)

16.

Jinnota t-tqassim tal-kuntratti mogħtija fl-2010 u fl-2009 skont it-tip ta’ proċedura użata kif ġej:

(Rapport annwali dwar il-kuntratti mogħtija mill-Parlament Ewropew, 2010, paġni 6-7)

17.

Jilqa' l-fatt li, mill-2010, id-Direttorati Ġenerali kollha jfornu, f'anness mar-rapporti annwali tal-attività tagħhom, informazzjoni dettaljata dwar il-kuntratti mogħtija fil-qafas tal-proċedura negozjata eċċezzjonali, u jindikaw ir-raġunijiet għala ntużat din il-proċedura, flimkien ma’ informazzjoni oħra meħtieġa fil-paragrafu 50 tar-riżoluzzjoni tal-5 ta’ Mejju 2010 (12) dwar il-kwittanza għall-implimentazzjoni tal-baġit ġenerali tal-Unjoni Ewropea għas-sena finanzjarja 2008, Taqsima I - Il-Parlament Ewropew;

18.

Jirrikonoxxi bħala ħaġa pożittiva l-inverżjoni tax-xejra fl-2010 (meta mqabbla mal-2009 u mas-snin preċedenti) fin-numru ta’ proċeduri negozjati eċċezzjonali fir-rigward tal-kuntratti kollha ta’ valur ogħla minn EUR 25 000 (13), kif muri fit-tqassim li ġej:

(Rapport annwali dwar il-kuntratti mogħtija mill-Parlament Ewropew, 2010, p. 11)

19.

Jistieden lid-Direttorati Ġenerali li għad għandhom ċifri kbar, partikolarment id-DĠ INLO, biex inaqqsu aktar l-għadd/proporzjon ta’ dawn il-proċeduri; iħeġġeġ lill-amministrazzjoni tkompli l-iskrutinju strett ta’ dawn il-proċeduri, partikolarment fir-rigward ta’ kunflitti ta’ interess possibbli, u jiġu applikati sanzjonijiet intensifikati u disważivi għal kwalunkwe irregolarità misjuba; jistieden lis-Segretarju Ġenerali jirrapporta kull sitt xhur dwar il-progress li jkun sar lill-Kumitat għall-Kontroll tal-Baġit;

20.

Jilqa' favorevolment il-ħolqien min-naħa tad-DĠ PRES ta’ taqsima għall-akkwist fi ħdan l-Unità għall-Programmazzjoni, il-Ġestjoni Baġitarja u l-Kuntratti, billi din se żżid it-trasparenza tal-akkwisti pubbliċi;

21.

Jilqa' l-fatt li l-awditjar tal-Qorti tal-Awdituri sab li l-ħlasijiet b'mod globali kienu ħielsa minn żbalji materjali u li l-Qorti tal-Awdituri ma sabet ebda dgħufijiet materjali meta vvalutat il-konformità tas-sistemi ta’ superviżjoni u kontroll mar-Regolament Finanzjarju;

22.

Jinnota l-konklużjoni tal-Qorti tal-Awdituri li l-proċeduri applikati fl-2010, li ma kinux jirrikjedu provi tal-ispejjeż effettivi tal-ivvjaġġar u li inkludew ħlasijiet fi flus kontanti lill-mexxejja tal-gruppi, ippreżentaw riskju ta’ ħlas żejjed u llimitaw il-possibilità li jiġu applikati kontrolli interni għal dawn il-ħlasijiet, u jieħu nota tal-adozzjoni tal-bidliet riċenti għal din is-sistema; jindika iżda li l-Membri għad għandhom il-possibilità li jagħżlu li jirrikjedu l-ħlas fi flus kontanti għall-gruppi ta’ viżitaturi; jistieden lis-Segretarju Ġenerali jitlob l-opinjoni tal-Qorti tal-Awdituri dwar ir-regoli emendati;

23.

Jinnota b'diżappunt li l-Qorti tal-Awdituri kkonludiet li, f'erba' mill-ħames każijiet awditjati, jiġifieri f'mhux inqas minn 80 %, id-dokumentazzjoni relatata mal-eżami tal-applikazzjonijiet, it-twettiq tal-intervisti u d-deċiżjonijiet li ttieħdu biex jingħażel il-persunal kuntrattwali ma kinux kompluti, mingħajr konsegwenzi negattivi fuq il-persunal involut u għalhekk mingħajr ma jkunu pprovduti inċentivi biex is-sitwazzjoni titjieb; jaqbel mar-rakkomandazzjoni tal-Qorti tal-Awdituri li minn issa 'l quddiem għandha tiġi żgurata dokumentazzjoni sħiħa għal skopijiet ta’ kontroll intern;

24.

Jiddispjaċih li l-Qorti tal-Awdituri sabet żbalji, inkonsistenzi u dgħufijiet oħra fil-proċeduri tal-akkwist tal-Parlament li awditjat; jindika l-miżuri riċenti li ttieħdu biex jittejbu dawn il-proċeduri u jinkoraġġixxi lill-amministrazzjoni tiegħu tagħmel aktar titjib f'dan il-qasam tal-ħidma; jilqa' l-iżvilupp tal-għodda tal-IT Webcontracts, stabbilita fl-2010, li tippermetti li jitwettaq ix-xogħol tal-kuntratti onlajn;

25.

Jistieden lill-Bureau jerġa' jeżamina l-mekkaniżmi ta’ kontroll kollha għall-akkwist pubbliku, bil-għan li jiggarantixxi l-aktar prezzijiet kompetittivi għas-servizzi u l-oġġetti li huma offruti;

26.

Jinnota l-konklużjoni tal-Qorti tal-Awdituri rigward ir-riport ta’ approprjazzjonijiet mhux użati mill-gruppi politiċi u l-qsim ta’ sena ta’ elezzjoni Ewropea f'żewġ nofsijiet għall-iskopijiet tal-kalkolu tar-riport permess; huwa tal-fehma li, biex tiġi evitata ripetizzjoni futura tad-diffikultajiet li kien hemm fil-bidu tal-2010, kwalunkwe sena elettorali futura għandha tittieħed kollha kemm hi għall-kalkolu tar-riport għall-gruppi politiċi li ma jieqfux jiffunzjonaw wara elezzjoni;

27.

Josserva li filwaqt li ġie indikat li l-mistoqsijiet bil-miktub imressqa miċ-ċittadini ġeneralment jirċievu tweġiba fi żmien ġimagħtejn, attwalment ma teżistix sistema li bis-saħħa tagħha l-mistoqsijiet tal-Membri lill-President jew lis-Segretarju Ġenerali jirċievu tweġiba fl-istess ammont ta’ żmien;

28.

Jinnota b'sodisfazzjon il-prontezza u l-portata tat-tweġibiet bil-miktub fir-rigward tar-riżoluzzjoni tal-kwittanza tal-2009 mogħtija lill-Kumitat għall-Kontroll tal-Baġit fis-6 ta’ Ottubru 2011 u l-kwalità tal-iskambju ta’ opinjonijiet bejn is-Segretarju Ġenerali u l-Kumitat għall-Kontroll tal-Baġit matul is-segwitu tal-eżerċizzju ta’ kwittanza 2009 fil-11 ta’ Ottubru 2011;

29.

Jilqa' d-diversi reazzjonijiet għal numru ta’ talbiet li saru fir-riżoluzzjoni hawn fuq imsemmija u jistenna b'ħerqa t-tlestija tas-segwitu tat-talbiet li ġejjin u li kienu espressi f'dik ir-riżoluzzjoni:

30.

Jitlob lis-Segretarju Ġenerali jirrapporta lill-kumitat kompetenti tal-Parlament, sa mhux aktar tard mill-31 ta’ Ottubru 2012, dwar l-azzjoni li ttieħdet jew li għandha tittieħed;

31.

Jilqa' l-fatt li ditta ta’ awdituri esterni ċċertifikat li s-Servizz ta’ Awditjar Intern huwa fl-ogħla livell ta’ konformità mal-Istandards Internazzjonali għall-Prattika Professjonali tal-Awditjar Intern;

32.

Jinnota li, fil-laqgħa tal-kumitat kompetenti li saret fl-24 ta’ Jannar 2012, l-Awditur Intern ippreżenta r-rapport annwali tiegħu ffirmat fil-15 ta’ Lulju 2011 u spjega li, fl-2010, wettaq il-ħidma ta’ awditjar li ġejja fuq l-amministrazzjoni tal-Parlament:

33.

Jinnota u jappoġġa l-fehmiet espressi mill-Awditur Intern rigward il-ħtieġa:

34.

Jirreferi għall-kummenti tiegħu, li jinsabu f'riżoluzzjonijiet preċedenti ta’ kwittanza, dwar ir-rapporti tal-awditjar intern; jirrikonoxxi li r-rapporti tal-awditjar intern iservu bħala għodod għal titjib fis-sistemi u fil-prestazzjoni, u jistgħu biss jiġu interpretati kif suppost meta l-bidliet u r-riżultati jkunu kompluti, abbażi tar-rakkomandazzjonijiet tagħhom; jirrimarka madankollu li r-rieżami li għadu għaddej tar-Regolament Finanzjarju jittratta l-kwistjoni tad-disponibilità ta’ dawn ir-rapporti fuq talba filwaqt li jikkonforma mas-sentenza tal-Qorti tal-Ġustizzja tal-Unjoni Ewropea rigward din il-kwistjoni;

35.

Josserva b'sodisfazzjon li d-Diretturi Ġenerali kollha kienu f'pożizzjoni li jagħtu dikjarazzjoni ta’ assigurazzjoni bla riserva dwar l-implimentazzjoni tal-baġit mis-servizzi tagħhom fl-2010; hu konxju li r-rapporti tal-attivitajiet huma għodda ta’ tmexxija interna li l-għan ewlieni tagħhom hu li jagħtu lis-Segretarju Ġenerali idea ġenerali ċara tal-ħidma tal-amministrazzjoni, u b'mod partikolari ta’ kwalunkwe nuqqasijiet;

36.

Jinnota b'sodisfazzjon li l-Maniġer tar-Riskji daħal fil-kariga tiegħu fl-1 ta’ Ġunju 2010 u jirrapporta direttament lis-Segretarju Ġenerali; jilqa' l-pubblikazzjoni tal-Manwal tal-Ġestjoni tar-Riskji fis-16 ta’ Diċembru 2011 u jtenni t-talba tiegħu li l-kumitat kompetenti tiegħu jirċievi r-rapport tal-attivitajiet annwali tal-Maniġer tar-Riskji tal-2010 u jinżamm infurmat dwar l-iżviluppi fl-implimentazzjoni tal-politika l-ġdida tal-Parlament dwar il-ġestjoni tar-riskji;

37.

Jitlob li l-kumitat kompetenti tiegħu jiġi infurmat qabel l-aħħar ta’ Settembru 2012 dwar l-approċċ u l-azzjoni meħuda biex jiġu identifikati u mmaniġġjati karigi sensittivi;

38.

Jinnota tnaqqis żgħir fil-baġit iddedikat għas-sigurtà minn EUR 45 980 000 għal EUR 45 590 000 bejn l-2009 u l-2010; jilqa' x-xejra kontinwa ta’ tnaqqis fl-infiq baġitarju fl-2011 (approprjazzjonijiet finali: EUR 42 830 000) meta mqabbla mal-2010 u l-adozzjoni mill-Bureau f'lulju 2011 tal-Kunċett tas-Sigurtà Globali li jipprovdi sigurtà aktar moderna u effiċjenti għall-Parlament;

39.

Itenni t-talba tiegħu lis-Segretarju Ġenerali biex jintroduċi l-obbligu għall-Membri li juru l-baġġ tagħhom biex jidħlu u joħorġu mill-binjiet tal-Parlament; jipproponi li l-baġġijiet tal-Membri wkoll ikunu sottoposti għal kontroll elettroniku;

40.

Jinsisti li t-tisħiħ tas-sigurtà tal-binjiet tal-Parlament u l-inħawi immedjati ta’ madwarhom iridu jingħataw l-ogħla prijorità; jitlob li bħala parti minn dan ix-xogħol is-sigurtà fil-parkeġġi tal-karozzi għandha tittejjeb, u li l-aċċess għall-partijiet tal-binjiet li fihom l-uffiċini tal-Membri fil-Parlament imissu jiġi kkontrollat;

41.

Jenfasizza li s-serq ġara f'uffiċċji tal-Membri waqt li kienu msakkrin, u dan juri li hemm livell baxx ta’ sigurtà tal-uffiċċji; jistieden lis-Segretarju Ġenerali jieħu miżuri urġenti biex itejjeb is-sitwazzjoni attwali;

42.

Jinsab imħasseb dwar il-livell baxx ta’ sigurtà fil-parkeġġi tal-Parlament; josserva li bosta karozzi saritilhom il-ħsara apposta fil-parkeġġ ta’ Brussell; jistieden lill-Bureau jieħu azzjonijiet xierqa biex itejjeb is-sitwazzjoni;

43.

Itenni t-talba tiegħu lis-Segretarju Ġenerali biex iressaq, sat-30 ta’ Ġunju 2012, proposti għal sistema ta’ ffirmar aktar effikaċi, sigura u reżistenti għall-frodi (inkluż eżami tal-ħinijiet tal-ftuħ għall-iffirmar) u b'mod partikolari għal sistema futura possibbli ta’ ffirmar elettroniku għall-Membri kemm għall-iffirmar tad-dokumenti (bħall-emendi) kif ukoll għar-reġistrazzjoni tal-preżenza tagħhom b'firma diġitali, minkejja li hu konxju li għandu jkun mistenni biss impatt minimu f'termini ta’ spejjeż jew iffrankar;

44.

Jinnota b'sodisfazzjon li wara d-deċiżjoni tal-Bureau tal-5 ta’ Lulju 2010 l-internalizzazzjoni tas-servizzi ta’ akkreditazzjoni issa qed tiġi finalizzata; jistenna li s-sistema l-ġdida ta’ akkreditazzjoni tipprovdi servizz aħjar u aktar effiċjenti; iqis li huwa neċessarju li jitkomplew it-titjib u l-modernizzazzjoni tas-sigurtà tal-Parlament u, għal dak il-għan, tiġi professjonalizzata b'mod adegwat, essenzjalment permezz ta’ proċeduri ta’ selezzjoni u ta’ reklutaġġ speċifiċi, kif ukoll permezz ta’ korsijiet neċessarji ta’ taħriġ professjonali intern, ulterjuri u ta’ aġġornament; jistenna bil-ħerqa u b'interess l-iżvilupp tal-kunċett globali l-ġdid tas-sigurtà, speċjalment id-divrenzjar bejn żoni differenti, ħaġa li se ġġib titjib sostanzjali, speċjalment għal dak li għandu x'jaqsam mal-problemi relatati mas-sigurtà tal-uffiċċji tal-Membri;

45.

Jinnota li sar ristrutturar kbir tad-DĠ PRES fl-2010; jilqa' ċ-ċentralizzazzjoni tal-funzjonijiet finanzjarji, tal-ippjanar u tal-ġestjoni tal-akkwisti u tas-sigurtà f'Direttorat għar-Riżorsi li nħoloq f'Marzu 2010;

46.

Ifakkar fl-importanza politika tad-delegazzjonijiet fil-ħidma tal-Parlament ġewwa u barra l-Unjoni; jinnota, madankollu, id-diskrepanza li tidher kbira fl-ispejjeż għal kull Membru u għal kull ġurnata (li jvarjaw minn EUR 1 400 għal EUR 5 300) f'delegazzjonijiet differenti, b'mod partikolari dawk barra l-Unjoni; jistieden lil-Bureau tiegħu, f'kollaborazzjoni mad-DĠ kollha kkonċernati, jiżviluppa prinċipji għal struttura ta’ spejjeż aktar ekonomika u uniformi għaż-żjarat tad-delegazzjonijiet, b'mod partikolari filwaqt li jitqiesu l-importanza politika u t-tul tagħhom, u l-proporzjon ottimali bejn Membri u persunal; jitlob li tiġi żviluppata sistema informatika għall-konsolidament tal-baġit li tforni infomazzjoni dettaljata dwar il-baġit għal kull delegazzjoni u tippermetti t-titjib tal-ġestjoni tal-infiq; jappella biex għall-missjonijiet futuri tad-delegazzjonijiet tiġi preżentata dikjarazzjoni dettaljata tal-kostijiet għall-parteċipanti kollha;

47.

Huwa mħasseb li, ħlief fir-rigward tal-ispejjeż tal-Osservatorju Leġislattiv, il-linja baġitarja 3242 (Nefqiet għall-pubblikazzjoni, it-tagħrif u l-parteċipazzjoni f'manifestazzjonijiet pubbliċi) mhijiex trasparenti biżżejjed; iqis li l-infiq fis-subpartita 3242/01 b'mod partikolari għandu jintwera punt punt biex tittejjeb it-trasparenza fi snin futuri ta’ kontabilità;

48.

Jinnota li l-impenji mdaħħla fil-Partita 3243“Iċ-Ċentru għall-Viżitaturi” żdiedu b'mod sinifikanti (+ 227 %) f'kuntrast mas-sottoeżekuzzjoni fl-2009 u ammontaw għal EUR 12 725 985; jindika l-problema kbira bis-sikurezza tas-soffitti li dewmet il-proġett fl-2010 u ġiegħlet lill-amministrazzjoni tikkanċella EUR 1 000 000 li mbagħad ġew riportati awtomatikament mill-2009 għall-2010; josserva li l-kostijiet totali stmati jammontaw għal EUR 20 530 000, ammont li jirrappreżenta żieda ta’ 15,3 % meta mqabbel mal-2007; jitlob li jiddaħħlu garanziji biex jiġi evitat li pjanijiet oħra li jimplikaw kostijiet ta’ bosta miljuni ta’ euro jirreġistraw żieda simili;

49.

Jilqa' l-ftuħ taċ-Ċentru għall-Viżitaturi fl-14 ta’ Ottubru 2011 (ippjanat oriġinarjament għall-elezzjonijiet Ewropej tal-2009); jikkundanna madankollu d-dewmien konsiderevoli u l-qbiż tal-istima tal-ispejjeż ta’ dan il-proġett; jitlob li jsir rieżami tal-attività taċ-Ċentru tal-Viżitaturi wara tnax-il xahar minn meta jkun sar beda jiffunzjona, bil-għan li tiġi valutata r-reazzjoni tal-pubbliku, il-punti b'saħħithom tiegħu u d-dgħufijiet tiegħu, kif ukoll il-proporzjon bejn il-kostijiet u l-benefiċċji tiegħu, biex jiġi garantit li jkun qiegħed jipprovdi valur għall-flus;

50.

Jinnota li fil-5 ta’ Lulju 2010, il-Bureau adotta l-Istrateġija aġġornata ta’ Komunikazzjoni tal-Parlament li inkludiet il-proġett tad-Dar tal-Istorja Ewropea u li, f'Settembru 2010, ġurija internazzjonali eżaminat il-proġett; jinnota wkoll li għal dan il-proġett ma sarx użu mill-Kapitolu baġitarju 106“Riżerva għal proġetti prijoritarji li qed jiġu żviluppati” peress li l-approprjazzjonijiet kollha f'dak il-kapitolu (EUR 5 000 000) kienu ġew trasferiti fl-Artikolu 210“L-informatika u t-telekomunikazzjonijiet”; jinsisti sabiex jiġu kkomunikati l-implikazzjonijiet finanzjarji kumplessivi tal-proġett, partikolarment fid-dawl tal-kumplikazzjonijiet ikkawżati mix-xmara Maalbeek li tgħaddi taħt is-sisien tal-bini; itenni l-istennija tiegħu li l-pjan tal-ispejjeż li jinsab fil-Pjan Kummerċjali għandu jkun hemm konformità sħiħa miegħu;

51.

Jiddispjaċih li d-deċiżjonijiet meħuda mill-Bureau u entitajiet oħra dwar id-Dar tal-Istorja Ewropea ma kinux ibbażati fuq il-kostijiet finali sħaħ “stmati” involuti fl-istabbiliment ta’ proġett kompletament operattiv; jagħti parir lill-Bureau u lill-Kwesturi biex ma japprovaw l-ebda proġett jew inizjattiva fil-futur li għalihom ma tkunx ippreżentata stima finanzjarja totali għall-kostijiet diretti jew indiretti;

52.

Jirrikonoxxi l-importanza tal-iskema tal-viżitaturi biex jiżdied l-għarfien dwar il-Parlament u l-ħidma leġislattiva tiegħu; jinnota t-tibdil reċenti li sar fis-sistema tal-ħlas tal-gruppi tal-viżitaturi applikata mill-2010 u jitlob li ssir valutazzjoni tas-sistema l-ġdida ta’ ħlasijiet u l-iskema ta’ rimborż li turi l-evoluzzjoni tal-ispejjeż u l-livell ta’ kemm il-ħlasijiet jirriflettu l-ispejjeż effettivi li kellhom il-gruppi; jissuġġerixxi lill-Qorti tal-Awdituri li ssegwi dan u jistenna b'ħerqa l-kummenti tal-Awditur Intern dwar l-implimentazzjoni tas-sistema l-ġdida;

53.

Iħeġġeġ lill-amministrazzjoni tal-Parlament tirrapporta lill-Parlament dwar l-esperjenza ġenerali tar-regoli emendati li jirregolaw il-kobor tal-gruppi uffiċjali tal-viżitaturi, u b'mod partikolari dwar l-effetti ta’ dawn ir-regoli fuq l-organizzazzjoni u l-użu tal-kapaċità;

54.

Jesprimi t-tħassib tiegħu — għal raġunijiet ovvji ta’ sigurtà u b'kunsiderazzjoni għall-immaġni tal-Parlament — dwar il-fatt li l-istituzzjoni tagħti somom kbar fi flus kontanti lill-mexxejja tal-gruppi ta’ viżitaturi;

55.

Jiddispjaċih dwar il-fatt li EuroparlTV ma jistax jitqies storja ta’ suċċess meta jitqies in-numru baxx ħafna ta’ utenti diretti individwali tiegħu (14) (esklużi l-ispettaturi permezz ta’ ftehimiet ta’ sħubija ma’ stazzjonijiet tat-TV reġjonali) minkejja l-finanzjament konsiderevoli li rċieva fl-2010, li ammonta għal madwar EUR 9 000 000 (partita 3246); jilqa' l-isforzi li saru biex dan il-baġit jitnaqqas b'14 % (għal EUR 8 000 000) fl-2011 u fis-snin ta’ wara; jirrikonoxxi b'dispjaċir, madankollu, li ma jistax ikun iġġustifikat sussidju ulterjuri u jistieden lis-Segretarju Ġenerali jippreżenta proposti lill-kumitat kompetenti tiegħu għall-għeluq tal-operazzjoni;

56.

Jinnota li l-ispejjeż relatati mal-Premju LUX fl-2010 kienu EUR 380 666,18; huwa mħasseb li l-ispejjeż żdiedu għall-avveniment fl-2011 għal EUR 573 722,08 (b'iktar minn 50 %) u jistenna b'ħerqa li jara inverżjoni qawwija ta’ din ix-xejra mill-2012 'il quddiem; jitlob speċifikament li l-attivitajiet li ġejjin jitnaqqsu għat-trażżin tal-ispejjeż:

57.

Jinnota n-nefqa fuq il-premji fil-perjodu 2009-2011:

58.

Jemmen li ż-żieda ta’ 89 % fin-nefqa fuq il-premji bejn l-2009 u l-2011 utilizzat fondi li setgħu jintużaw aħjar band'oħra; jitlob li n-nefqa futura fuq il-premjijiet tinġieb lura għal-livelli tal-2009;

59.

Jinnota li l-ispejjeż relatati mal-Premju għall-Ġurnaliżmu fl-2010 kienu EUR 118 059, żieda ta’ 18 % fuq iċ-ċifra tal-2009; huwa mħasseb li l-ispejjeż għall-avveniment fl-2011 żdiedu b'iktar minn kwart, u jitlob li titwettaq analiżi sħiħa tal-ispejjeż meta mqabbla mal-benefiċċji qabel ma jiġu żviluppati kwalunkwe inizjattivi f'dan il-qasam tar-relazzjonijiet mal-midja jew fi kwalunkwe qasam ieħor, issa li l-Premju twaqqaf;

60.

Ma jqisx li l-premjijiet huma attività prinċipali tal-Parlament u jitlob li ssir analiżi tal-ispejjeż meta mqabbla mal-benefiċċji qabel ma jiġu żviluppati inizjattivi għal xi premju ġdid, sabiex tiġi kkunsidrata s-sitwazzjoni finanzjarja u ekonomika fl-Istati Membri kollha, li qed tkompli sejra għall-agħar;

61.

Jinnota t-twaqqif ta’ Direttorat għar-Riżorsi fid-DĠ fl-2010 biex iwettaq, inter alia, il-koordinament ċentralizzat tal-akkwisti pubbliċi, biex b'hekk l-uffiċċji deċentralizzati ta’ informazzjoni jkunu jistgħu jiġu affettwati inqas bil-prattika taċ-ċaqliq ta’ persunal ewlieni minn karigi sensittivi;

62.

Jinnota li d-978 missjoni mit-32 uffiċċju ta’ informazzjoni tal-Parlament għal Brussell u Strasburgu swew b'kollox EUR 944 330,- li fisser medja ta’ EUR 701 — għal missjoni fi Brussell u EUR 1 064 — għal missjoni fi Strasburgu; jinnota li missjoni mil-Lussemburgu għal Brussell tiswa medja ta’ EUR 250, filwaqt li missjoni mil-Lussemburgu għal Strasburgu tiswa medja ta’ EUR 630; jitlob li fil-futur jiġi pprovdut ukoll bl-ispiża medja għal kull missjoni (paġna 68 tat-tweġbiet għall-kwestjonarju);

63.

Jinnota l-ftuħ f'April 2010 tal-Uffiċċju ta’ Kollegament tal-PE (EPLO) f'Washington u s-sistema ta’ missjonijiet ta’ sena għal erba' uffiċjali li bdiet tiġi applikata f'Ottubru 2010; josserva li, għalkemm il-ħolqien tal-Uffiċċju ta’ Washington ma involviex il-ħolqien ta’ karigi ġodda, inevitabbilment kien hemm spejjeż oħra; jixtieq li jkun infurmat dwar il-livell ta’ dawn l-ispejjeż għall-2011 u l-2012; jitlob li jiġi ppreżentat rieżami tal-istruttura, l-attivitajiet u l-ispejjeż tiegħu lill-Bureau b'kopji għall-kumitati kompetenti rilevanti;

64.

Jilqa' l-fatt li d-DĠ seta' jtejjeb il-prestazzjoni grazzi għall-esternalizzazzjoni ta’ ċerti funzjonijiet (bħall-ġestjoni tal-crèche) u ż-żieda fl-użu tal-IT fil-ġestjoni tal-fajls tal-persunal; jilqa' l-implimentazzjoni tal-applikazzjoni tal-IT Streamline;

65.

Jinnota l-impatt tad-deċiżjoni tal-Kunsill ta’ Diċembru 2009 li jagħti aġġustament annwali fis-salarji ta’ 1,85 % biss minflok it-3,7 % indikati u proposti mill-Kummissjoni, ħaġa li rriżultat f'impenji pendenti (ftit inqas minn EUR 6 000 000 jew 1,4 %) fil-Partita 1200“Remunerazzjoni u allowances”;

66.

Jinnota li l-pjan ta’ stabbiliment totali għall-Parlament kien stabbilit fil-livell ta’ 6 285 kariga: 5 348 (jew 85,1 %) għas-Segretarjat tal-Parlament u 937 (jew 14,9 %) għall-Gruppi Politiċi, li jirrappreżentaw żieda ta’ 3,35 % mill-2009 għall-2010 (+ 204 karigi) fl-1 ta’ Diċembru 2009,

67.

Jieħu nota tal-bidliet fl-istruttura tas-Segretarjat, li ġew adottati mill-Bureau fl-2009 u li daħlu fis-seħħ fil-bidu tal-2010, bi tħejjija għall-mandat parlamentari l-ġdid, b'mod partikolari bil-ħsieb li jissaħħu s-servizzi għall-Membri; josserva li dawn il-bidliet wasslu, b'mod partikolari, għar-ristrutturar tad-DĠ PRES, id-DĠ PERS u d-DĠ INLO, u involvew ukoll il-ħolqien ta’ direttorat għar-riżorsi f'DĠ PRES, DĠ IPOL, DĠ EXPO u DĠ COMM, jiġiferi l-erba' direttorati ġenerali b'mandat essenzjalment politiku;

68.

Jinnota li, fil-31 ta’ Diċembru 2010, maġġoranza tal-persunal fis-Segretarjat (58,4 %) u fil-grupp funzjonali tal-amministraturi (51,7 %) kienu nisa; jilqa' l-fatt li, fil-livell tal-maniġment superjuri u dak tan-nofs, fl-2010 il-proporzjon tad-diretturi ġenerali nisa żdied (għal 36,4 %, jiġifieri erba' minn 11) kif għamel dak tal-kapijiet tal-unitajiet (għal 26,2 %);

69.

Jindika d-diffikultajiet fir-reklutaġġ ta’ uffiċjali jew aġenti minn ċerti Stati Membri bħall-Ġermanja, ir-Renju Unit, l-Awstrija jew il-Pajjiżi l-Baxxi, li l-proporzjon tal-persunal tagħhom fis-Segretarjat tal-Parlament huwa konsiderevolment inqas mill-“piż demografiku” tal-pajjiż partikolari fl-Unjoni (15), u josserva n-numru relattivament għoli ta’ persunal li għandhom ċittadinanza Belġjana (13,6 %) jew Lussemburgiża (2,3 %) konsegwenza tal-postijiet ta’ ħidma tal-Parlament; jitlob lill-Bureau jeżamina l-proċeduri u l-kundizzjonijiet ta’ reklutaġġ biex jaċċerta x'parti jista' jkollhom biex joħolqu diffikultajiet fir-reklutaġġ tal-persunal;

70.

Jinnota li, fl-2010, kien hemm 33 200 missjoni (vjaġġi uffiċjali) li jirrappreżentaw total ta’ 98 629 jum ta’ missjoni, li l-parti l-kbira tagħhom kienu jinvolvu vjaġġar bejn it-tliet postijiet ta’ ħidma; itenni l-ħtieġa li jiġu evitati missjonijiet mhux meħtieġa bejn it-tliet postijiet ta’ ħidma u l-ispejjeż li jinvolvu b'ġustifikazzjonijiet aktar sistematiċi u dokumentati u monitoraġġ aħjar; jitlob li s-Segretarju Ġenerali jirrapporta, bħala parti mill-proċedura ta’ kwittanza, dwar l-iffrankar li jsir konsegwenza ta’ aktar razzjonalizzazzjoni u dwar inizjattivi ulterjuri li ttieħdu jew li qed jiġu mfassla, li jwasslu għal inqas missjonijiet; huwa tal-fehma barra minn hekk li ġeneralment m'għandha ssir l-ebda laqgħa tal-kumitati fi Strasburgu, bl-eċċezzjoni ta’ dawk il-kumitati li l-aġenda tagħhom hija marbuta direttament mar-rapporti jew id-diskussjonijiet inklużi fl-aġenda tas-sessjoni parzjali ta’ dik il-ġimgħa; iħeġġeġ lill-Qorti tal-Awdituri tanalizza ulterjorment il-proċedura eżistenti għall-missjonijiet u tipprovdi rakkomandazzjonijiet għat-titjib tal-effiċjenza tagħhom; jitlob lis-Segretarju Ġenerali jeżamina speċifikament il-karigi bbażati barra Brussell, partikolarment għal dawk il-membri tal-persunal li jmorru fuq diversi missjonijiet fi Brussell, biex ikun aċċertat jekk dawn jeħtiġilhomx jiġu trasferiti; jissuġġerixxi li l-ftehim mal-awtoritajiet Lussemburgiżi, li jistabbilixxi n-numru ta’ persunal tal-Parlament ibbażat fil-Lussemburgu mingħajr ma jikkunsidra l-ħtiġijiet li qed jiżviluppaw tal-Parlament, jista' jeħtieġlu reviżjoni;

71.

Jinnota b'sodisfazzjon li l-bidla għal din is-sistema l-ġdida ta’ impjieg kienet fil-parti l-kbira tagħha newtrali għall-baġit, b'madwar 15-il membru tal-persunal jamministraw l-impjieg ta’ madwar 1 400 assistent, u jistenna b'ħerqa li jirċievi kopja tar-rapport dwar l-implimentazzjoni ta’ dik is-sistema l-ġdida ta’ impjieg, l-ispejjeż indiretti u diretti tagħha, inklużi l-benefiċċji għall-qgħad imħallsin mill-Kummissjoni;

72.

Jinnota li l-konklużjonijiet tal-Qorti tal-Awdituri rigward in-nuqqasijiet fid-dokumentazzjoni u t-traċċabilità tal-ispejjeż għall-missjonijiet tal-assistenti b'karozzi privati għadu ma nstabx rimedju għalihom; iħeġġeġ lill-amministrazzjoni tal-Parlament issib soluzzjoni trasparenti u traċċabbli għal din il-kwistjoni, malajr kemm jista' jkun;

73.

Jinnota l-politika tal-proprjetà għal terminu medju u twil (l-istrateġija tal-bini) adottata mill-Bureau fl-24 ta’ Marzu 2010 u l-parametri ewlenin tagħha:

74.

Jinnota li l-Kunsill Ewropew, filwaqt li bir-raġun qed jitlob li jkun hemm awsterità min-naħa tal-Parlament, qed ikompli jiċħad lill-istess Parlament l-opportunità li jwettaq iffrankar kunsiderevoli li jkun jirriżulta kieku ma jibqgħux isiru laqgħat fi Strasburgu;

75.

Jinnota li l-ispejjeż tal-manutenzjoni, l-operazzjoni u t-tindif żdiedu għat-tliet postijiet ta’ ħidma minn total ta’ EUR 33 700 000 fl-2009 għal EUR 38 700 000 fl-2010, u t-tbassir juri aktar żidiet għas-snin 2011-2013 ħlief għal tnaqqis żgħir fl-ispejjeż fil-Lussemburgu fis-sena 2013; jinnota, barra minn hekk, li l-konsum tal-enerġija u tal-elettriku kellu żidiet inqas drammatiċi iżda konsistenti fl-istess perjodu ta’ żmien;

76.

Jinnota l-ħlasijiet ta’ kera li naqsu b'mod sinifikanti fl-2010 (EUR 5 700 000 meta mqabbla ma’ EUR 58 600 000 fl-2008 — l-ogħla somma f'dawn l-aħħar snin), jinnota l-fluttwazzjonijet inqas estremi fl-ispejjeż tal-kiri (EUR 25 300 000 fl-2010, mqabbla ma’ livell massimu ta’ EUR 31 200 000 fl-2006 u livell minimu ta’ EUR 19 900 000 fl-2007) u jinnota wkoll l-ammonti varjati minfuqa fuq il-bini minn livell massimu ta’ EUR 165 900 000 fl-2006, għal żero fl-2009 u EUR 20 200 000 fl-2010;

77.

Jinnota b'sodisfazzjon li, skont it-tweġibiet li waslu għall-kwestjonarju tal-kwittanza, l-estimi jindikaw li, jekk l-istituzzjoni kienet tikri l-bini kollu tagħha, kien ikollha tipprevedi, fil-baġit 2010 tagħha, spejjeż addizzjonali ta’ EUR 163 000 000, ekwivalenti għal 10 % tal-baġit totali tagħha; jappoġġa, għalhekk, din il-politika ta’ xiri minflok kiri, li kienet rakkomandata b'mod qawwi mill-Qorti tal-Awdituri għal bosta snin, l-iktar riċentament fir-Rapport Speċjali Nru 2/2007 tagħha dwar in-nefqa fuq il-bini;

78.

Jinnota li x-xogħlijiet biex jitneħħa l-asbestos mit-tliet binjiet fi Strasburgu fl-2010, li swew EUR 2 464 701, kienu fil-parti l-kbira tagħhom irrimborżati mill-Belt ta’ Strasburgu li kkontribwiet EUR 2 015 000;

79.

Jinnota li, fis-27 ta’ Jannar 2010, l-Istat tal-Belġju rrimborża s-somma ta’ EUR 85 987 000 lill-Parlament, meta ħa fuqu l-ispejjeż tal-art li hija s-sit tal-bini Willy Brandt u József Antall u dawk tal-iżvilupp tas-saqaf tal-istazzjon ferrovjarju Bruxelles-Lussemburgu; jirrimarka li dan l-ammont iddaħħal fil-kontijiet bħala “dħul assenjat” bi qbil mar-Regolament Finanzjarju u ntuża biex jiffinanzja l-proġetti tal-proprjetà;

80.

Jinnota x-xiri fl-2010 tal-Bini REMARD fi Brussell (EUR 11 000 000) u d-deċiżjoni li tinxtara Dar l-Ewropa f'Sofija (EUR 9 240 000); jiddispjaċih li, minħabba s-suq ristrett, l-ispejjeż tal-manutenzjoni, ir-rinnovazzjoni u x-xiri huma għolja bla bżonn, u huwa diffiċli li tinżamm il-kunfidenzjalità tan-negozjati; iqis li rekwiżit propost skont ir-Regolament Finanzjarju rivedut sabiex l-istituzzjonijiet jippubblikaw il-pjanijiet tal-bini tagħhom għal numru ta’ snin bil-quddiem jirriżulta fi spiża notevoli għall-istituzzjonijiet u għall-kontributuri tat-taxxa;

81.

Josserva li jekk ikun permess il-finanzjament dirett tal-bini fir-Regolament Finanzjarju rivedut, dan ikollu effett pożittiv peress li jippermetti lill-Parlament juża self mingħajr ma jitlob l-intervent ta’ partijiet terzi, u b'hekk inaqqas l-ispejjeż u jżid it-trasparenza fl-istess ħin; jirrimarka li dan diġà huwa l-każ fir-rigward tal-finanzjament tal-bini KAD fil-Lussemburgu, li għalih intlaħaq qbil dwar sħubija mal-Bank Ewropew tal-Investiment, li qed jipprovdi 50 % tal-fondi;

82.

Jitlob f'dan ir-rigward dikjarazzjoni finanzjarja dettaljata tal-ispejjeż li diġà kien hemm, u dawk ipproġettati għall-20 sena li jmiss, fir-rigward tal-bini KAD fil-Lussemburgu, u jinsisti li l-ispejjeż totali mistennija għall-kostruzzjoni, l-ispejjeż operattivi stmati u spejjeż oħra li jirriżultaw b'rabta mal-kostruzzjoni u l-operat ta’ dan il-bini, jiġu ppubblikati fid-dettall;

83.

Jilqa' l-assigurazzjoni min-naħa tas-Segretarju Ġenerali li m'għadx hemm uffiċċji assenjati għal-lobbyists jew fondazzjonijiet, iżda jinnota li sal-31 ta’ Diċembru 2011, il-fondazzjoni Pegasus u l-Kangaroo Group kellhom uffiċċji għad-dispożizzjoni tagħhom fil-bini tal-Parlament;

84.

Jiddispjaċih li organizzazzjonijiet akkreditati ta’ lobbying okkupaw spazju għall-uffiċċji fl-2010, u b'hekk inħoloq trattament preferenzjali għal dawk l-organizzazzjonijiet fir-rigward tar-riżorsi tal-kontribwenti tal-UE;

85.

Itenni t-talba tiegħu biex ikun hemm aktar għażliet diversi rigward il-fornituri tal-ikel fi ħdan il-bini tal-Parlament, billi ma jibqax ikun hemm monopolju ta’ fornitur tal-ikel wieħed meta l-kuntratti attwali jaslu fi tmiemhom;

86.

Jinnota li ġew tradotti total ta’ 1 721 191 paġna fl-2010 (1 033 176 minnhom — jew 60 % — internament) u jilqa' l-fatt li d-dokumenti kollha meħtieġa għall-votazzjonijiet kienu prodotti fil-ħin minn DĠ TRAD u 90 % tat-traduzzjonijiet b'mod globali rrispettaw l-iskadenzi stabbiliti, minkejja l-fatt li 65 % tat-talbiet għal traduzzjoni saru tard (jiġifieri ma rrispettawx l-għaxart ijiem ta’ xogħol previsti fil-Kodiċi ta’ Kondotta dwar il-Multilingwiżmu);

87.

Jinnota b'sodisfazzjon li DĠ TRAD miexi lejn aktar produttività u użu aktar effikaċi tal-baġit tiegħu, filwaqt li jiżgura li jinżamm il-multilingwiżmu; jenfasizza, f'dan il-kuntest, li l-produttività interna żdiedet minn 1 500 paġna fis-sena għal 1 800 paġna; jilqa' l-fatt li kieku jiġu ppubblikati iċ-ċifri ta’ produttività għal kull unità lingwistika;

88.

Jinnota madankollu, li wara żieda ta’ aktar minn 10 % fir-rata ta’ konformità mal-Kodiċi ta’ Kondotta dwar il-Multilingwaliżmu bejn l-2008 u l-2009 (l-ewwel sena ta’ implimentazzjoni tiegħu), ir-rata ta’ konformità naqset bejn l-2009 u l-2010 (16); jistieden lill-kumitati, id-delegazzjonijiet u l-gruppi politiċi jirrispettaw b'mod strett l-iskadenzi stabbiliti fil-Kodiċi ta’ Kondotta;

89.

Jilqa' s-servizz il-ġdid ta’ Interpretazzjoni ad personam (IAP) offrut minn DĠ INTE lill-Membri u stabbilit wara l-proġett pilota li nbeda fl-2010;

90.

Jinnota b'sodisfazzjon li kien hemm tnaqqis fil-ħin tal-ħlas tal-fatturi għal medja ta’ 21 ġurnata fl-2010;

91.

Jinnota li, fl-2010, l-ispiża tal-ivvjaġġar tal-Membri u tal-persunal ammontat għal madwar EUR 107 000 000 (17) (jew 6,6 % tal-approprjazzjonijiet finali kollha) u li issa hemm fis-seħħ tnaqqis ta’ 5 %; iqis li għandu jitqies il-potenzjal għal aktar tnaqqis permezz ta’ mili tal-ajru miġbura flimkien; jitlob li tiġi ppreżentata analiżi tal-Artikolu 300 permezz ta’ nota mehmuża mal-kontijiet tal-ispiża medja ta’ vjaġġar għall kull uffiċjal għas-sitt rotot: Brussell-Lussemburgu; Lussemburgu-Brussell; Lussemburgu-Strasburgu; Strasburgu-Lussemburgu; Brussell-Strasburgu; Strasburgu-Brussell;

92.

Jinnota li l-approprjazzjonijiet finali għall-Aġenzija tal-Ivvjaġġar ammontaw għal EUR 1 438 000 fl-2010, b'rata ta’ impenn għolja (94 %); jinnota wkoll li din tikseb prezzijiet innegozjati mil-linji tal-ajru, li jfisser li hemm prezz medju għall-aħjar servizz; jenfasizza madankollu li dan ma jfissirx li għal ġurnata jew vjaġġ speċifiku ma jkunx possibbli li jinstabu prezzijiet aħjar billi ssir prenotazzjoni diretta mal-operaturi tal-ivvjaġġar; jitlob li jsir stħarriġ indipendenti li jwassal għal evalwazzjoni tal-prestazzjoni tal-Aġenzija tal-Ivvjaġġar, l-istruttura u l-operat tagħha; jistieden lill-kuntrattur tal-aġenzija tal-ivvjaġġar attwali jagħmel aktar sforzi biex jiżgura li l-aktar għażliet irħas jiġu dejjem proposti lill-membri u l-persunal; jistieden ulterjorment lid-direttorat responsabbli jissorvelja l-livelli ta’ servizz ipprovduti mill-Aġenzija tal-Ivvjaġġar;

93.

Jiddispjaċih li xi drabi l-Aġenzija tal-Ivvjaġġar ma toffrix l-aħjar prezz, meta mqabbla ma aġenziji tal-ivvjaġġar oħrajn, kemm fiżiċi kif ukoll onlajn; jitlob lid-DĠ Finanzi jiżviluppa mekkaniżmu adegwat ta’ kontroll li jiżgura l-aħjar proporzjon ta’ kwalità/prezz;

94.

Huwa tal-fehma li jeħtieġ li tinkiseb data komparabbli dwar il-prezz tat-titjiriet sabiex jiġi ddeterminat l-aħjar prezz għal kull titjira partikolari;

95.

Jemmen li l-Parlament għandu jieqaf jagħti kuntratti monopolistiċi kull fejn ikun possibbli u li l-fatt li jkun hemm aktar minn aġenzija tal-ivvjaġġar waħda għad-dispożizzjoni tal-Membri u l-persunal iwassal għal inqas spejjeż u servizz aħjar għalihom;

96.

Jilqa' l-fatt li, fl-aħħar tas-sena finanzjarja 2010, ma ntużatx il-proċedura tat-trasferiment kollettiv kif kien intalab mill-Kumitat għall-Kontroll tal-Baġit tiegħu tul dawn l-aħħar snin, u b'hekk ġie evitat li jkun hemm differenza sinifikanti bejn il-baġit kif ippjanat għas-sena u l-implimentazzjoni tiegħu, kif ġara fi snin preċedenti, u jemmen li l-istituzzjonijiet kollha tal-Unjoni jħaffu l-iskrutinju u l-kwittanza baġitarja għal snin futuri jekk jippjanaw l-infiq tal-bini b'mod trasparenti permezz tal-proċedura baġitarja;

97.

Jinnota li, għalkemm fl-2010 l-valur tal-assi tal-Fond Volontarju tal-Pensjonijiet żdied bi 13,3 % hekk kif is-swieq tal-investiment komplew jirkupraw mill-kriżi finanzjarja globali tal-2008, il-fond volontarju tal-pensjonijiet kellu defiċit ta’ EUR 178 960 000 fil-31 ta’ Diċembru 2010, ħaġa li tqajjem tħassib dwar l-inadempjenza possibbli tal-fond; ifakkar li l-Parlament qed jiżgura l-ħlas tad-drittijiet tal-pensjoni għall- ex Membri kollha u għal uħud minn dawk attwali ta’ dan il-fond volontarju tal-pensjoni, meta u jekk dan il-fond ma jkunx jista' jissodisfa l-obbligi tiegħu; jixtieq li jkun infurmat kif u minn liema linja baġitarja l-Parlament se jirrispetta l-obbligi tiegħu f'dik l-eventwalità;

98.

Jirrikonoxxi li żewġ terzi mill-ħlasijiet lejn il-fond saru direttament mill-Parlament pjuttost milli minn membri individwali; ifakkar lill-membri tal-fond li l-kontribuzzjonijiet tagħhom kienu volontarji, u jinsisti li l-Parlament m'għandux jagħmel kontribuzzjonijiet finanzjari ulterjuri biex jiġu onorati pagamenti jew jitnaqqas id-defiċit ta’ fond li seta' ma kienx strutturat b'mod sodisfaċenti mill-bidu;

99.

Jinnota, barra minn hekk, li l-obbligi li jirriżultaw mir-Regoli PEAM (Ħlas tal-Infiq u tal-Allowances lill-Membri) relatati mal-pensjonijiet tar-romol u l-pensjonijiet tal-invalidità (Anness II) jammontaw għal EUR 28 950 000); jindika li hemm somom, li ammontaw għal EUR 195 640 000, użati biex ikopru każijiet — li jinvolvu l-aktar lill-Membri Taljani u Franċiżi — fejn id-dispożizzjonijiet nazzjonali u dawk tal-Parlament Ewropew fil-qasam tal-pensjonijiet kienu differenti (Anness III), u somom mill-iskema tal-Istatut stabbilita riċentament ta’ EUR 152 210 000 (din iċ-ċifra tal-aħħar se tiżdied minn sena għall-oħra); jiġbed l-attenzjoni għall-fatt li m'hemmx fondi biex ikopru din in-nefqa;

100.

Jinnota d-deċiżjonijiet tal-Bureau tas-17 ta’ Ġunju 2009 u tat-18 ta’ Ottubru 2010 li jiġu estiżi ż-żoni ta’ aċċess għan-netwerk mingħajr fili (Wi-Fi) fil-Parlament biex ikunu koperti l-Kamra, il-kmamar tal-kumitati, l-uffiċċji tal-Membri u l-ispazji pubbliċi kemm fi Brussell kif ukoll fi Strasburgu (l-ewwel fażi tal-proġett: EUR 7 878 000); jitlob lid-DĠ ITEC jagħmilha possibbli li Membri individwali jitolbu li ma jirċevux dokumenti stampati fil-futur għal-laqgħat tal-kumitat fejn jintuża l-eCommittee; jemmen li dan jista' jaċċelera s-suċċess tal-proġett;

101.

Jilqa' t-tfassil grafiku mill-ġdid kontinwu tal-websajt tal-PE wara d-deċiżjoni tal-Bureau fit-22 ta’ Novembru 2010 dwar “L-istrateġija għall-preżenza futura tal-Parlament Ewropew onlajn — It-tfassil mill-ġdid tal-websajt tal-PE”; jitlob li jkun hemm titjib fl-appoġġ tal-websajt, b'mod partikolari billi jitwettqu testijiet regolari;

102.

Jilqa' s-sistema AT4AM, li ġiet introdotta fl-2010, li tagħmilha aktar faċli għall-Membri jemendaw it-testi leġislattivi u mhux leġislattivi proposti;

103.

Jinnota b'sodisfazzjon it-titjib fis-settur tal-IT mill-2010 'l quddiem li wassal għal: kapaċità akbar li jiġu ġestiti aspetti ewlenin internament, il-proċess ta’ internalizzazzjoni tal-attivitajiet, it-twaqqif tal-korpi ewlenin tal-governanza korporattiva (il-Kumitat għall-Istrateġija ta’ Innovazzjoni tal-ICT u l-Kumitat ta’ Tmexxija għall-Innovazzjoni tal-ICT), it-twaqqif tal-funzjoni tal-ippjanar tal-IT u tas-sistema ta’ rappurtar dwar l-istatus tal-proġetti ta’ żvilupp tal-IT u l-iżvilupp ta’ metodoloġija trasparenti ta’ ppjanar għal perjodu qasir; jilqa' l-użu estensiv tal-indikaturi tal-prestazzjoni minn dan id-DĠ; jesprimi l-ansjetà tiegħu dwar ir-riskju dejjem jikber tal-aċċess illegali għas-sistemi tal-ICT tal-Parlament u tal-manipolazzjoni tagħhom, u jikkunsidra, bħala kwistjoni tal-akbar urġenza, li trid titfassal strateġija effikaċi fuq perjodu twil għall-ħarsien tagħhom; jitlob lis-Segretarju Ġenerali jżommu infurmat dwar il-miżuri li ttieħdu għal dak il-għan;

104.

Jistenna rapport sħiħ dwar kif jiġu żviluppati l-proġetti għal Softwer Liberu tal-Parlament fir-rigward tal-użu u l-utenti fil-Parlament, l-interazzjoni maċ-ċittadini u l-attivitajiet ta’ akkwist; jissuġġerixxi investigazzjoni tal-obbligi tal-Parlament skont ir-Regola 103 fir-rigward ta’ Softwer Liberu u Standards Miftuħa;

105.

Jinkoraġġixxi lil DĠ ITEC jagħmel ħiltu biex jipprepara aħjar il-proċeduri ta’ akkwist, b'mod partikolari fil-każ ta’ kuntratti qafas, li ta’ spiss huma kumplessi, billi jistipula obbligi kuntrattwali fir-rigward tar-riżultati previsti fil-kuntratt u tal-eżiti, aktar milli sempliċi produzzjoni, u billi jiddefinixxi aħjar il-ħtiġijiet u l-objettivi tal-Parlament; jissuġġerixxi li, aktar milli juża klawsoli ta’ penali, il-Parlament għandu jitlob kumpens minn fornitur jew mingħand min jagħti s-servizz meta dawn jonqsu milli jissodisfaw l-obbligi tagħhom, jew inkella juża t-theddida ta’ telf ta’ xogħol futur, fil-każ ta’ kuntratti qafas;

106.

Jinnota li t-tagħmir il-ġdid għall-votazzjoni fl-Emiċikli sewa EUR 2 135 623 u ġie ffinanzjat kollu kemm hu mill-approprjazzjoni tal-2010; jinnota wkoll li l-ispiża tal-manutenzjoni u tal-assistenza teknika għat-tagħmir għall-votazzjonijiet kienet ta’ EUR 147 149 fl-2010;

107.

Jinnota li fl-2010 l-approprjazzjonijiet imdaħħla fil-partita baġitarja 4000 intużaw kif ġej:

108.

Jilqa' l-impenn tal-amministrazzjoni tal-Parlament, iċċitat fir-Rapport tal-Qorti tal-Awdituri, biex tibda tintuża s-sena finanzjarja sħiħa biex jiġu kkalkulati r-riporti mill-gruppi politiċi fl-aħħar tas-snin elettorali, aktar milli żewġ nofsijiet separati ta’ sena; jilqa' dak li jidher li hu titjib fit-tbassir finanzjarju indikat mill-fatt li l-ebda approprjazzjonijiet mhux użati ma ġew irritornati mill-gruppi politiċi għall-2010;

109.

Jinnota li fl-2010 l-approprjazzjonijiet imdaħħla fil-partiti baġitarji 4020 u 4030 intużaw kif ġej (18):

110.

Jinnota l-bidliet mill-2010 inkluż fiż-żjarat ta’ ġestjoni fejn isir il-kontroll tal-kampjuni fir-rigward tal-baġit, ir-reklutaġġ, is-sejħiet għal offerti u sistemi oħra;

111.

Jinnota l-pjan ta’ azzjoni dwar is-CO2 adottat mill-Bureau fl-2010; jilqa' t-tnaqqis sinifikanti fil-konsum tal-enerġija fis-sede ta’ Strasburgu tal-Parlament, li naqas b'74 % bejn l-2006 u l-2010; jiddispjaċih, madankollu, li l-marka tal-karbonju tas-sit fi Strasburgu, li tirrappreżenta l-konsum tal-enerġija għas-sena 2010, kienet ta’ 1 533 tunnellata ta’ CO2;

112.

Huwa tal-fehma li għandha titqies il-possibilità li fil-baġit tal-Parlament isir kemm titjib ambjentali u kemm iffrankar permezz ta’ metodi ta’ ħidma differenti li huma aktar favorevoli għall-ambjent u irħas iżda li ma jnaqqsux mill-valur tax-xogħol tal-Parlament, inkluż l-użu ta’ vidjokonferenzi;

113.

Jilqa' l-introduzzjoni f'Diċembru 2010 ta’ “sistema għall-ħlas ta’ partijiet terzi” għal biljetti staġjonali tal-NMBS/SNCB (19) fi Brussell, fejn il-Parlament jikkontribwixxi 50 % tal-ispiża ta’ biljetti staġjonali annwali individwali sottoskritti mill-membri tal-persunal tiegħu; jinkoraġġixxi lill-amministrazzjoni tiegħu tagħmel l-arranġamenti meħtieġa biex tirrimborża wkoll persunal li jeħtiġilhom jikkumbinaw trasport ferrovjarju ma’ dak urban; huwa tal-fehma li dan jista' jkompli jippromwovi l-użu tat-trasport pubbliku u jnaqqas il-marka tal-karbonju tal-Parlament;

114.

Jilqa' l-proġetti pilota fil-qasam tal-loġistika li saru fl-2010 (pereżempju x-xiri ta’ vetturi b'emissjonijiet baxxi - standard EURO5, l-organizzazzjoni ta’ taħriġ dwar sewqan ambjentalment responsabbli għas-sewwieqa u għall-persunal tal-ġarr, il-qsim tal-sniedaq għat-trasport tad-dokumenti tax-xogħol, biex b'hekk tnaqqsu b'madwar 33 % l-emissjonijiet tas-CO2 f'dak il-qasam) bħala parti mill-Pjan ta’ Azzjoni EMAS;

115.

Jilqa' l-adozzjoni mill-Bureau fl-10 ta’ Novembru 2010 tal-proposta mill-Grupp ta’ Ħidma dwar il-Bini, it-Trasport u Parlament Aħdar li tirrevedi r-regoli li jirregolaw l-użu tal-karozzi uffiċjali mill-Membri, reviżjoni li ppermettiet lill-Parlament jimmodernizza l-flotta tiegħu b'vetturi li jniġġsu inqas u jorganizza trasport fi gruppi b'“minibuses” VIP għall-ajruporti fi Brussell u Strasburgu;

116.

Jistieden lill-Konferenza tal-Presidenti jipprogrammaw dibattitu dwar il-kwittanza tal-Parlament f'ħin differenti minn dak tad-dibattitu dwar ir-rapporti ta’ kwittanza oħrajn sabiex il-Membri jkollhom l-opportunità jiddedikawlha l-attenzjoni esklużiva li kwittanza tal-istituzzjoni proprja tagħhom jistħoqqilha;

117.

Jissuġġerixxi lill-Bureau li għandu jpoġġi fuq l-aġenda tiegħu diskussjoni dwar ir-riżoluzzjoni ta’ kwittanza wara l-adozzjoni tagħha mis-seduta plenarja.

—

wara li kkunsidra l-baġit ġenerali tal-Unjoni Ewropea għas-sena finanzjarja 2010 (1),

—

wara li kkunsidra l-kontijiet annwali definittivi tal-Komunitajiet Ewropej għas-sena finanzjarja 2010 (COM(2011) 473 — C7-0258/2011) (2),

—

wara li kkunsidra r-rapport annwali tal-Kunsill għall-awtorità ta’ kwittanza dwar l-awditjar intern imwettaq fis-sena 2010,

—

wara li kkunsidra r-rapport annwali tal-Qorti tal-Awdituri dwar l-implimentazzjoni tal-baġit għas-sena finanzjarja 2010, flimkien mat-tweġibiet tal-istituzzjonijiet li jkunu qed jiġu awditjati (3),

—

wara li kkunsidra d-dikjarazzjoni ta’ assigurazzjoni (4) dwar l-affidabilità tal-kontijiet, kif ukoll il-legalità u r-regolarità tat-tranżazzjonijiet li fuqhom hija bbażata, ipprovduta mill-Qorti tal-Awdituri għas-sena finanzjarja 2010 skont l-Artikolu 287 tat-Trattat dwar il-Funzjonament tal-Unjoni Ewropea,

—

wara li kkunsidra l-Artikolu 314(10) u l-Artikoli 317, 318 u 319 tat-Trattat dwar il-Funzjonament tal-Unjoni Ewropea,

—

wara li kkunsidra r-Regolament tal-Kunsill (KE, Euratom) Nru 1605/2002 tal-25 ta’ Ġunju 2002 dwar ir-Regolament Finanzjarju applikabbli għall-baġit ġenerali tal-Komunitajiet Ewropej (5), u b’mod partikulari l-Artikoli 50, 86, 145, 146 u 147 tiegħu,

—

wara li kkunsidra d-Deċiżjoni Nru 31/2008 tas-Segretarju Ġenerali tal-Kunsill/Rappreżentant Għoli għall-Politika Barranija u tas-Sigurtà Komuni dwar ir-rimborż tal-ispejjeż tal-ivvjaġġar tad-delegati tal-Membri tal-Kunsill (6),

—

wara li kkunsidra l-Ftehim Interistituzzjonali bejn il-Parlament Ewropew, il-Kunsill u l-Kummissjoni tas-17 ta’ Mejju 2006 dwar id-dixxiplina baġitarja u l-ġestjoni finanzjarja soda (7),

—

wara li kkunsidra r-Regola 77 u l-Anness VI tar-Regoli ta’ Proċedura tiegħu,

—

wara li kkunsidra r-rapport tal-Kumitat għall-Kontroll tal-Baġit (A7-0095/2012),

1.

Jiddiferixxi d-deċiżjoni tiegħu dwar l-għoti ta’ kwittanza lis-Segretarju Ġenerali tal-Kunsill dwar l-implimentazzjoni tal-baġit tal-Kunsill għas-sena finanzjarja 2010, skont is-setgħa tal-Parlament li juża ż-żewġ skadenzi tal-kalendarju tal-għoti ta’ kwittanza sabiex, f’dan il-każ, jilħaq ftehim eventwali mal-Presidenza fil-kariga;

2.

Jieħu nota tal-fatt li, fir-rapport annwali tagħha tal-2010, il-Qorti tal-Awdituri stmat li, abbażi tax-xogħol tal-awditjar tagħha, il-ħlasijiet tas-sena li ntemmet fil-31 ta’ Diċembru 2010 għan-nefqa amministrattiva u nefqiet oħra tal-istituzzjonijiet u tal-korpi kienu ħielsa, meta meqjusa flimkien, minn żbalji materjali; jenfasizza li r-rata ta’ żball l-aktar probabbli hija valutata, fis-settur “nefqa amministrattiva”, li b’mod ġenerali kienet 0,4 % (paragrafi 7.9 u 7.10);

3.

Jirrikonoxxi li rċieva għadd ta’ dokumenti għall-proċedura ta’ kwittanza 2010 (id-dikjarazzjonijiet finanzjarji finali tal-2010 li jinkludu l-kontijiet, rapport dwar l-attività finanzjarja u sommarju tal-awditjar intern għall-2010); għadu qed jistenna d-dokumenti meħtieġa kollha għal kwittanza (inkluż l-awditjar intern sħiħ tal-2010);

4.

Jawspika li l-Parlament jirċievi r-Rapport Annwali ta’ Attività sħiħ; jinsisti li r-Rapport Annwali ta’ Attività jipprovdi wkoll tabella eżawrjenti tat-total tar-riżorsi umani għad-dispożizzjoni tal-Kunsill, imqassma skont il-kategorija, il-grad, is-sess, il-parteċipazzjoni fit-taħriġ professjonali u ċ-ċittadinanza;

5.

Jenfasizza li fir-rapport annwali tagħha għall-2010, il-Qorti tal-Awdituri kkritikat il-finanzjament tal-proġett tal-bini “Residence Palace” minħabba xi antiċipi (paragrafu 7.19); jinnota li l-Qorti tal-Awdituri sabet li matul il-perjodu 2008-2010, is-somma totali tal-antiċipi mħallsa mill-Kunsill laħqet is-somma ta’ EUR 235 000 000; jinnota li t-total tħallas minn linji baġitarji mhux użati biżżejjed; jinnota li “mhux użati biżżejjed” huwa t-terminu politikament korrett għal “ibbaġitjar żejjed”; jenfasizza li fl-2010, il-Kunsill żied il-linja baġitarja “Akkwist ta’ proprjetà immobbli” b’EUR 40 000 000;

6.

Jinnota l-ispjegazzjoni tal-Kunsill dwar il-fatt li l-approprjazzjonijiet saru disponibbli permezz ta’ trasferimenti baġitarji awtorizzati mill-awtorità tal-baġit skont il-proċeduri previsti fl-Artikoli 22 u 24 tar-Regolament Finanzjarju;

7.

Jaqbel mal-Qorti tal-Awdituri li din il-proċedura tagħmel ħsara lill-prinċipju baġitarju tal-preċiżjoni, minkejja l-iffrankar miksub fil-ħlas tal-kera;

8.

Jinnota t-tweġiba tal-Kunsill li l-ammonti għal-linji baġitarji għall-ispejjeż tal-interpretazzjoni u tal-ivvjaġġar tad-delegazzjonijiet għandhom ikunu aktar konformi mal-konsum reali u jitlob li jsir ippjanar baġitarju aħjar sabiex jiġu evitati l-prattiki attwali fil-futur;

9.

Ifakkar lill-Qorti tal-Awdituri fit-talba tal-Parlament biex twettaq valutazzjoni fil-fond tas-sistemi superviżorji u ta’ kontroll fil-Kunsill, simili għall-valutazzjonijiet li wettqet fil-Qorti tal-Ġustizzja, l-Ombudsman Ewropew u l-Kontrollur Ewropew għall-Protezzjoni tad-Data waqt it-tħejjija tar-Rapport Annwali tal-Qorti tal-Awdituri għas-sena finanzjarja 2010;

10.

Jiddeplora d-diffikultajiet li nstabu fil-proċeduri ta’ kwittanza għas-snin finanzjarji 2007, 2008 u 2009, li kienu dovuti għan-nuqqas ta’ rieda tal-Kunsill li jieħu sehem fi djalogu miftuħ u formali mal-Kumitat għall-Kontroll tal-Baġit kif ukoll li jwieġeb il-mistoqsijiet tal-Kumitat; ifakkar li l-Parlament irrifjuta li jagħti l-kwittanza lis-Segretarju Ġenerali tal-Kunsill għall-implimentazzjoni tal-baġit tal-Kunsill għas-sena finanzjarja 2009 għar-raġunijiet li ġew speċifikati fir-riżoluzzjonijiet tiegħu tal-10 ta’ Mejju 2011 (8) u tal-25 ta’ Ottubru 2011 (9);

11.

Itenni l-fehma tiegħu li l-kontribwenti Ewropej għandhom kull dritt jistennew li l-baġit tal-Unjoni kollu kemm hu, inklużi l-fondi kollha ġestiti b’mod awtonomu mill-istituzzjonijiet u l-aġenziji indipendenti tagħha, għandu jkun soġġett għal skrutinju pubbliku sħiħ;

12.

Jiddeplora l-fatt li l-Kunsill jemmen li - unikament fost l-istituzzjonijiet tal-Unjoni Ewropea - mhuwiex responsabbli għall-użu tiegħu tal-fondi mqiegħda għad-dispożizzjoni tiegħu;

13.

Jinnota li d-difett fl-argument tal-Kunsill skont liema l-għoti tal-kwittanza lill-Kummissjoni għandu jkun interpretat bħala l-għoti tal-kwittanza lill-baġit tal-Unjoni kollu kemm hu, inklużi partijiet tal-baġit użati mill-Kunsill, jidher mill-adeżjoni inkonsistenti tiegħu għall-pożizzjoni li l-Kummissjoni m’għandux ikollha s-setgħa li tissorvelja u tiġġestixxi l-baġit tiegħu; jemmen li l-unika riżoluzzjoni loġika ta’ dan il-kunflitt hija li l-Kunsill jew jistieden lill-Kummissjoni tieħu l-kontroll tal-finanzi tiegħu, inkella li jieħu sehem bis-sħiħ fi proċedura ta’ kwittanza standard li neċessarjament trid issegwi mutatis mutandis il-proċeduri kollha mill-istituzzjonijiet kollha l-oħra tal-Unjoni Ewropea;

14.

Itenni l-fatt li l-Parlament għadu qed jistenna t-tweġiba tal-Kunsill dwar l-azzjonijiet u t-talba għal dokumenti msemmija fiż-żewġ riżoluzzjonijiet imsemmija hawn fuq; jistieden lis-Segretarju Ġenerali tal-Kunsill jipprovdi lill-kumitat responsabbli tal-Parlament għall-proċedura ta’ kwittanza tweġibiet bil-miktub komprensivi għall-mistoqsijiet li ġejjin:

15.

Jinnota r-risposta tal-Kummissjoni tal-25 ta’ Novembru 2011 għall-ittra tal-President tal-Kumitat għall-Kontroll tal-Baġit, fejn il-Kummissjoni ddikjarat bħala xieraq li l-Parlament ikompli bl-għoti, bil-posponiment jew bir-rifjut tal-kwittanza lill-istituzzjonijiet l-oħra bħalma kien qiegħed isir sa issa;

16.

Ifakkar li, fil-31 ta’ Jannar 2012, il-President tal-Kumitat għall-Kontroll tal-Baġit bagħat ittra lill-Presidenza attwali tal-Kunsill, fejn jenfasizza x-xewqa tiegħu li jistabbilixxi d-djalogu politiku u jikkomunika mistoqsijiet addizzjonali mill-Kumitat tal-Parlament rigward il-kwittanza tal-Kunsill; għaldaqstant, jittama li l-Kunsill jagħti lill-kumitat kompetenti għall-proċedura ta’ kwittanza tweġiba għall-kwestjonarju — mehmuż mal-ittra tal-President - qabel id-dibattitu fil-plenarja;

17.

Madankollu, jiddispjaċih li l-Kunsill irrifjuta jattendi kull laqgħa uffiċjali tal-Kumitat għall-Kontroll tal-Baġit b’rabta mal-kwittanza tiegħu;

18.

Jenfasizza d-dritt tal-Parlament, fuq rakkomandazzjoni tal-Kunsill, li jagħti kwittanza, skont il-proċedura prevista mit-Trattat dwar il-Funzjonament tal-Unjoni Ewropea, li għandha tiġi interpretata fid-dawl tal-kuntest u l-fini tagħha, li tikkonsisti fit-tressiq tal-implimentazzjoni tal-baġit kollu tal-Unjoni Ewropea għall-kontroll u l-iskrutinju parlamentari mingħajr eċċezzjoni, u li jagħti kwittanza b’mod awtonomu mhux biss fir-rigward tat-taqsima tal-baġit implimentata mill-Kummissjoni, iżda wkoll fir-rigward tat-taqsimiet tal-baġit implimentati mill-istituzzjonijiet l-oħra, kif imsemmi fl-Artikolu 1 tar-Regolament Finanzjarju;

19.

Jinnota li l-Kunsill għandu jkun trasparenti u responsabbli għalkollox fir-rigward taċ-ċittadini Ewropej għall-fondi fdati lilu bħala istituzzjoni tal-Unjoni jinsisti li dan ifisser li l-Kunsill irid jipparteċipa bis-sħiħ u b’bona fide fil-proċess annwali tal-kwittanza:

20.

Jemmen li l-kooperazzjoni interistituzzjonali bejn il-Parlament u l-Kunsill hija ta’ importanza fundamentali fis-superviżjoni tal-implimentazzjoni tal-baġit tal-Unjoni; f’dan ir-rigward, jitlob lill-Kunsill jipprovdi t-tweġibiet għall-kwestjonarju pendenti mressaq mill-Parlament;

21.

Jitlob lill-Kunsill jiddiskuti l-kwittanza annwali tal-baġit ġenerali tal-Unjoni waqt parti pubblika tal-laqgħa tal-Kunsill.

—

wara li kkunsidra l-baġit ġenerali tal-Unjoni Ewropea għas-sena finanzjarja 2010 (1),

—

wara li kkunsidra l-kontijiet annwali tal-Unjoni Ewropea għas-sena finanzjarja 2010 (COM(2011) 473 – C7-0256/2011) (2),

—

wara li kkunsidra r-rapport tal-Kummissjoni dwar is-segwitu għall-kwittanza għas-sena finanzjarja 2009 (COM(2011) 736), u għad-dokumenti ta’ ħidma tal-persunal tal-Kummissjoni ppubblikati ma’ dak ir-rapport (SEC(2011) 1350 u SEC(2011) 1351),

—

wara li kkunsidra l-komunikazzjoni tal-Kummissjoni tal-1 ta’ Ġunju 2011 bl-isem “Sinteżi tal-kisbiet amministrattivi tal-Kummissjoni fl-2010” (COM(2011) 323),

—

wara li kkunsidra r-rapport annwali tal-Kummissjoni lill-awtorità ta’ kwittanza dwar l-awditjar intern imwettaq fl-2010 (COM(2011) 643), u d-dokument ta’ ħidma tal-persunal tal-Kummissjoni li ġie ppubblikat ma’ dak ir-rapport (SEC(2011) 1189),

—

wara li kkunsidra r-Rapport Annwali tal-Qorti tal-Awdituri dwar l-implimentazzjoni tal-baġit għas-sena finanzjarja 2010, flimkien mar-risposti tal-istituzzjonijiet (3) (ir-Rapport Annwali), u r-rapporti speċjali tal-Qorti tal-Awdituri,

—

wara li kkunsidra d-dikjarazzjoni ta’ assigurazzjoni (4) dwar l-affidabbiltà tal-kontijiet u l-legalità u r-regolarità tal-operazzjonijiet li jaqgħu taħthom provduta mill-Qorti tal-Awdituri għas-sena finanzjarja 2010 skont l-Artikolu 287 tat-Trattat dwar il-Funzjonament tal-Unjoni Ewropea,

—

wara li kkunsidra r-rakkomandazzjoni tal-Kunsill tal-21 ta’ Frar 2012 dwar il-kwittanza li għandha tingħata lill-Kummissjoni fir-rigward tal-implimentazzjoni tal-baġit ġenerali tal-Unjoni Ewropea għas-sena finanzjarja 2010 (06081/1/2012 — C7-0053/2012), u jinnota li r-Renju Unit, il-Pajjiżi l-Baxxi u l-Isvezja għall-ewwel darba rrifjutaw li jirrakkomandaw li tiġi approvata l-kwittanza,

—

wara li kkunsidra r-rakkomandazzjoni tal-Kunsill tal-21 ta’ Frar 2012 dwar il-kwittanza li għandha tingħata lill-aġenziji eżekuttivi fir-rigward tal-implimentazzjoni tal-baġit għas-sena finanzjarja 2010 (06084/2012 – C7-0052/2012), u jinnota li r-Renju Unit, il-Pajjiżi l-Baxxi u l-Isvezja għall-ewwel darba rrifjutaw li jirrakkomandaw li tiġi approvata l-kwittanza,

—

wara li kkunsidra l-Artikoli 317, 318 u 319 tat-Trattat dwar il-Funzjonament tal-Unjoni Ewropea (TFUE) u l-Artikolu 106a tat-Trattat Euratom,

—

wara li kkunsidra r-Regolament tal-Kunsill (KE, Euratom) Nru 1605/2002 tal-25 ta’ Ġunju 2002 rigward ir-Regolament Finanzjarju applikabbli għall-baġit ġenerali tal-Komunitajiet Ewropej (5), u b’mod partikolari l-Artikoli 55, 145, 146 u 147 tiegħu,

—

wara li kkunsidra r-Regolament tal-Kunsill (KE) Nru 58/2003 tad-19 ta’ Diċembru 2002 li jfassal l-istatut għall-aġenziji eżekuttivi li jridu jiġu fdati b’ċerti kompiti fit-tmexxija tal-programmi tal-Komunità (6), u b’mod partikolari l-Artikolu 14(2) u (3) tiegħu,

—

wara li kkunsidra l-Artikolu 76 u l-Anness VI tar-Regoli ta’ Proċedura tiegħu,

—

wara li kkunsidra r-rapport tal-Kumitat għall-Kontroll tal-Baġit u l-opinjonijiet tal-kumitati l-oħra kkonċernati (A7-0098/2012),

A.

billi l-Ewropa qed taffaċċja kriżi baġitarja u finanzjarja serja li tista’ twassal għal kriżi ta’ fiduċja fl-Unjoni u billi huwa importanti immens li l-Unjoni tagħti eżempju mill-aħjar fil-qasam tal-ġestjoni pubblika tajba, permezz tal-Kummissjoni, li timplimenta l-baġit tal-Unjoni; billi ġestjoni pubblika tajba hija neċessarja sabiex l-Unjoni żżomm il-klassifikazzjoni AAA tagħha, li hija importanti, b’mod partikolari biex iżżomm mal-impenn tagħha li tipprovdi EUR 60 000 000 000 f’garanziji għall-Mekkaniżmu Ewropew ta’ Stabbilizzazzjoni Finanzjarja,

B.

billi l-2010 kienet l-ewwel sena finanzjarja kompletament koperta mid-dispożizzjonijiet tat-Trattat ta’ Lisbona, bi proċeduri baġitarji ġodda u l-istabbiliment tas-Servizz Ewropew għall-Azzjoni Esterna (SEAE), kif ukoll il-Presidenza tal-Kunsill Ewropew apparti l-Presidenza b’rotazzjoni tal-Kunsill; billi kienet ukoll l-ewwel sena tal-istrateġija l-ġdida Ewropa 2020,

C.

billi l-governanza tajba timplika li l-għanijiet politiċi jiġu stabbiliti qabel ma jgħaddu strumenti legali biex jintlaħqu dawk l-għanijiet, u billi l-istrumenti legali eżistenti li ma jkunux għalkollox f’armonija mal-għanijiet politiċi għandhom jiġu mmodifikati,

D.

billi għandu jkun hemm arranġamenti adegwati għat-trasparenza, ir-rendikont pubbliku u l-awditjar pubbliku meta jkunu involuti fondi pubbliċi, billi għas-sbatax-il sena konsekuttiva l-Qorti tal-Awdituri ma kinitx f’pożizzjoni li tagħti dikjarazzjoni ta’ assigurazzjoni pożittiva rigward il-baġit tal-Unjoni,

E.

billi l-Artikolu 287(1), it-tieni subparagrafu, tat-TFUE jirrikjedi li l-Qorti tal-Awdituri tipprovdi lill-Parlament Ewropew u lill-Kunsill b’dikjarazzjoni ta’ assigurazzjoni li biha tiċċertifika l-affidabbiltà tal-kontijiet u l-legalità u r-regolarità tal-operazzjonijiet li jaqgħu taħthom u jipprovdi wkoll li din id-dikjarazzjoni tista’ tiġi kompletata b’valutazzjonijiet speċifiċi għal kull qasam maġġuri tal-attività tal-Unjoni,

F.

billi iktar minn 90 % tal-iżbalji kollha jinstabu barra l-Kummissjoni fil-livell tal-awtoritajiet tal-Istati Membri u fil-livell tal-benefiċjarji finali (Rapport Annwali, punt 1.22),

G.

billi fil-maġġoranza tal-każijiet fejn instabu żbalji fil-qasam tal-Koeżjoni, l-awtoritajiet tal-Istati Membri kellhom biżżejjed informazzjoni biex setgħu identifikaw u sewwew l-iżbalji qabel ma ċċertifikaw l-infiq lill-Kummissjoni (Rapport Annwali, punt 4.25),

H.

billi huwa neċessarju li ssir distinzjoni bejn l-awtoritajiet nazzjonali li stabbilixxew sistemi ta’ superviżjoni u kontroll li jiffunzjonaw sew u awtoritajiet nazzjonali li huma responsabbli għal sistemi li huma biss parzjalment effikaċi biex jiġu evitati piżijiet addizzjonali għall-Istati Membri kollha,

I.

billi n-nuqqas ta’ interess serju mill-Istati Membri fil-proċedura ta’ kwittanza jista’ jkun dovut għall-isforzi insuffiċjenti tal-Kummissjoni fl-identifikazzjoni b’mod pubbliku, mhux ekwivoku u sostanzjat ta’ liema Stati Membri, reġjuni u programmi mhux qed jagħtu riżultati tajbin fil-ġestjoni tal-fondi tal-Unjoni,

J.

billi dikjarazzjonijiet nazzjonali obbligatorji ta’ ġestjoni maħruġa u ffirmati fil-livell ministerjali u awditjati kif xieraq minn awditur indipendenti huma mezz neċessarju biex jiġi miġġieled in-nuqqas ta’ responsabbiltà ta’ xi awtoritajiet nazzjonali fir-rigward tal-użu u l-ġestjoni tal-flus tal-Unjoni,

K.

billi ż-żieda fl-użu tal-prefinanzjament mill-Kummissjoni għandha implikazzjonijiet għall-approċċ tal-awditjar tal-Qorti tal-Awdituri u billi l-Qorti tal-Awdituri tista’ tadatta l-metodoloġija tagħha għaċ-ċirkostanzi l-ġodda biex tiżgura l-utilità tal-informazzjoni li l-Qorti tal-Awdituri tagħti lill-awtorità ta’ kwittanza,

L.

billi l-Unjoni aktar minn qatt qabel teħtieġ korp ta’ awdituri verament estern, b’saħħtu, indipendenti u effiċjenti, li naturalment ifisser – u b’rispett għall-kontribwenti – li l-Membri tal-Qorti tal-Awdituri ma għandhom qatt ikunu maħtura fuq bażi politika iżda biss fuq bażi professjonali,

M.

billi l-użu ta’ strumenti finanzjarji innovattivi u kumplessi għandu jiġi kontrobilanċjat bi trasparenza sħiħa, inkluża l-pubblikazzjoni ta’ data komprensiva tal-benefiċjarji finali kollha, u regoli ċari dwar ir-rappurtar biex jiġi evitat kwalunkwe riskju għall-baġit u għar-reputazzjoni tal-Unjoni,

N.

billi l-Istati Membri għandhom jikkooperaw mal-Kummissjoni biex jiżguraw li l-approprjazzjonijiet jintużaw b’konformità mal-prinċipji ta’ amministrazzjoni finanzjarja tajba,

O.

billi l-Istati Membri, anke jekk l-istruttura tagħhom tkun federali, jerfgħu r-responsabbiltà fil-konfront tad-dinja esterna u tal-Unjoni,

P.

billi kemm il-kwistjonijiet tal-konformità kif ukoll dawk tal-prestazzjoni għandhom jiġu indirizzati aħjar biex tissaħħaħ il-leġittimità tal-Unjoni,

Q.

billi l-iżvilupp kontinwu tad-Dikjarazzjoni ta’ Assigurazzjoni tal-Qorti tal-Awdituri tul is-snin kienet strumentali fl-identifikazzjoni ta’ oqsma fejn il-ġestjoni mill-Istati Membri u mill-Kummissjoni jeħtieġ li tittejjeb,

R.

billi l-Qorti tal-Awdituri reġgħet ma kinitx f’pożizzjoni li tagħti Dikjarazzjoni ta’ Assigurazzjoni pożittiva fir-rigward tal-legalità u r-regolarità tal-ħlasijiet, ħaġa li ta’ min jikkundannaha;

1.

Jistieden lill-Kummissjoni tippreżenta lill-Parlament Pjan ta’ Azzjoni biex jintlaħqu l-azzjonijiet prijoritarji li ġejjin:

2.

Jinnota li l-kontijiet annwali tal-Unjoni għas-sena finanzjarja 2010 jippreżentaw b’mod ġust fl-aspetti materjali kollha l-pożizzjoni tal-Unjoni fil-31 ta’ Diċembru 2010, u r-riżultati tal-operazzjonijiet tagħha u l-flussi ta’ flus kontanti tagħha għas-sena li ngħalqet dakinhar;

3.

Jinnota l-enfasi mqiegħda fuq il-bidla fil-politika tal-kontabbiltà tal-Kummissjoni fir-rigward tal-istrumenti ta’ inġinerija finanzjarja (FEI), ħaġa li turi li r-riskji tad-dikjarazzjonijiet ħżiena materjali għadhom jeżistu, minkejja li l-kontijiet ingħataw opinjoni mhux modifikata mill-2007 ‘l hawn; jistieden lill-Kummissjoni terġa’ teżamina annwalment jekk it-trattament il-ġdid adottat jirriflettix b’mod ġust ir-realtà sottostanti;

4.

Jinnota b’sodisfazzjon li d-dħul li fuqu huma bbażati l-kontijiet għas-sena li ntemmet fil-31 ta’ Diċembru 2010, fl-aspetti materjali kollha huwa legali u regolari;

5.

Jinnota b’sodisfazzjon li l-impenji li fuqhom huma bbażati l-kontijiet għas-sena li ntemmet fil-31 ta’ Diċembru 2010, fl-aspetti materjali kollha huma legali u regolari;

6.

Jiddispjaċih ħafna li l-ħlasijiet għadhom affettwati b’mod materjali minn żbalji;

7.

Jifhem li l-bażi tal-opinjoni negattiva tal-Qorti tal-Awdituri hija l-osservazzjoni li s-sistemi ta’ superviżjoni u kontroll huma biss parzjalment effikaċi u – konsegwenza ta’ dan – il-ħlasijiet huma affettwati b’rata ta’ żbalji li hija stmata li x’aktarx hi 3,7 %;

8.

Ifakkar li l-aktar rata probabbli ta’ żbalji għall-ħlasijiet fis-sena finanzjarja 2009 kienet stmata li kienet 3,3 %;

9.

Huwa mħasseb dwar din iż-żieda peress li treġġa’ lura x-xejra pożittiva osservata f’dawn l-aħħar ftit snin; jistieden lill-Kummissjoni tikseb tendenzi li juru tnaqqis konsistenti fir-rata ta’ żbalji kif mitlub fir-rapporti ta’ kwittanza preċedenti;

10.

Jattribwixxi dan l-iżvilupp primarjament liż-żieda tar-rata ta’ żbalji l-aktar probabbli fil-qasam tal-Koeżjoni, l-Enerġija u t-Trasport, li kellu żieda sinifikanti għal 7,7 %;

11.

Ifakkar li l-Kummissjoni qed tippromwovi żieda fl-użu ta’ FEIs fil-qafas finanzjarju multiannwali li jmiss (7) minkejja l-fatt li l-Kummissjoni stess tikkunsidra l-FEIs huma strumenti ta’ riskju għoli (8); jifhem li l-FEIs jikkumplementaw aktar milli jieħdu post il-finanzjamenti eżistenti u għandhom il-benefiċċju potenzjali li jistgħu jintużaw aktar minn darba;

12.

Huwa mħasseb ħafna dwar in-nuqqas ta’ informazzjoni dwar l-implimentazzjoni tal-FEIs attwali li jidher li jolqot l-oqsma tal-politika kollha (Rapport Annwali, punti 1.31 u 1.33);

13.

Jiddeplora n-nuqqas ta’ rekwiżiti ta’ rapportar formali u jagħraf l-isforzi tal-Kummissjoni biex tirċievi informazzjoni dwar l-użu attwali tal-FEIs mill-Istati Membri fil-kuntest tal-Fond Ewropew għall-Iżvilupp Reġjonali (FEŻR); jilqa’ r-rapport ta’ sinteżi tal-informazzjoni li nġabret mill-Kummissjoni dwar “Strumenti ta’ Inġinerija Finanzjarja Implimentati mill-Istati Membri b’Kontribuzzjonijiet tal-FEŻR — is-sitwazzjoni fil-31 ta’ Diċembri 2010” (Rapport ta’ Sinteżi dwar l-FEIs) ippreżentat lill-Kumitat għall-Kontroll tal-Baġit tal-Parlament; jinnota li nħolqu FEIs b’impenn totali ta’ madwar EUR 8 100 000 000 u rċevew ħlasijiet ta’ madwar EUR 5 200 000 000 mill-programmi operattivi 2007-2013 sal-aħħar tal-2010 (Rapport Annwali, punt 4.32);

14.

Jiddeplora l-fatt li l-Kummissjoni rċeviet informazzjoni biss dwar bejn wieħed u ieħor 75 % tal-kontribuzzjonijiet totali impenjati għall-FEIs għall-impriżi (9); jinsab imħasseb li l-informazzjoni li waslet mill-Istati Membri varjat f’termini ta’ kompletezza u preċiżjoni u li numru limitat ta’ Stati Membri jew reġjuni ma tawx reazzjonijiet jew ma lestewx il-mudelli tar-rappurtar tal-monitoraġġ; jifhem li dan jagħmilha impossibbli għall-Kummissjoni tkopri l-FEIs kollha sal-31 ta’ Diċembru 2010;

15.

Jenfasizza li:

huma elementi importanti u indispensabbli għall-evalwazzjoni tal-użu tal-FEIs u jiddispjaċih ħafna li din l-informazzjoni għadha mhijiex disponibbli għalkollox;

16.

Jinnota u jiddeplora l-osservazzjonijiet tal-Qorti tal-Awdituri prinċipalment fil-qasam tal-Koeżjoni bħad-dotazzjonijiet żejda lill-FEIs li tippermetti l-ħrib mir-regola n + 2 (Rapport Annwali, eżempju 4.4(a)), dewmien u implimentazzjoni bil-mod tal-FEIs (Rapport Annwali, eżempju 4.4(b)), rekwiżiti irregolari fil-qasam tal-istralċ (Rapport Annwali, eżempju 4.4(c)), kontribuzzjonijiet finanzjarji mħallsa permezz ta’ ħlas bil-quddiem hekk kif l-istruttura ġuridika tal-FEI tkun ġiet stabbilita (Rapport Annwali, punt 4.34) u problemi fit-twettiq ta’ awditjar adegwat tal-FEIs (Rapport Annwali, punti 4.35 u 4.36);

17.

Jemmen li dawk l-osservazzjonijiet ġejjin minn bażi ġuridika mhux kompleta għall-FEIs; huwa mħasseb li r-regoli applikabbli għall-FEIs ma jistabbilixxux inċentivi adegwati biex isir użu effikaċi tal-FEIs; huwa mħasseb ukoll li jħallu wisq lok għal flessibbiltà għall-Istati Membri; jilqa’ madankollu t-tijib riċenti fl-iżvilupp ta’ bażi legali għall-FEIs; jenfasizza l-lakuni l-iktar importanti li ġejjin tal-bażi ġuridika li dak iż-żmien kien Regolament tal-Kunsill (13):

18.

Jaqbel mal-opinjoni tal-Qorti tal-Awdituri li riżorsi mogħtija lura u dħul miksub mill-istrumenti finanzjarji ma għandhomx jiġu riallokati xi mkien ieħor qabel l-għeluq tal-programm operazzjonali, iżda għandhom jingħataw lura lill-istrumenti finanzjarji rilevanti (Qorti tal-Awdituri, Opinjoni Nru 7/2011 (14), paġna 11); jistenna li din ir-rakkomandazzjoni titqies serjament matul il-proċedura leġiżlattiva rigward il-proposta għal regolament tal-Parlament Ewropew u tal-Kunsill li jistabbilixxi dispożizzjonijiet komuni dwar l-istrumenti strutturali (COM(2011) 615 – 2011/0276(COD));

19.

Huwa sodisfatt li l-Artikoli 130 u 131 tal-proposta għal regolament tal-Parlament Ewropew u tal-Kunsill dwar ir-regoli finanzjarji applikabbli għall-baġit annwali tal-Unjoni (COM(2010) 815 - 2010/0395(COD)) se jagħmluha possibbli li jiġi stabbilit il-perjodu tal-istrumenti finanzjarji; jitlob lill-Kummissjoni għal sintesi tal-miżuri li jistgħu jevitaw ir-riskji għall-baġit tal-Unjoni li jiġu mill-FEIs;

20.

Jinnota li l-FEIs huma preżenti f’oqsma ta’ politika oħra, ukoll; jagħraf ir-riskju ta’ sovrappożizzjonijiet u implimentazzjoni inkonsistenti ta’ dawn l-istrumenti mingħajr koordinament adegwat; jistieden lill-Qorti tal-Awdituri, għalhekk, tagħmel awditjar tal-FEIs b’mod orizzontali fl-oqsma tal-politika kollha;

21.

Jistieden lill-Kummissjoni tikkunsidra bħala azzjoni prijoritarja l-monitoraġġ mill-qrib tal-użu tal-FEIs fost affarijiet oħra billi:

22.

Ifakkar li, skont l-Artikolu 317 tat-TFUE, il-Kummissjoni timplimenta l-baġit tal-Unjoni bħala responsabbiltà tagħha; jenfasizza li fejn il-Kummissjoni timplimenta l-baġit permezz ta’ ġestjoni kondiviża, il-kompiti ta’ implimentazzjoni għandhom ikunu delegati lill-Istati Membri, skont l-Artikolu 53b tar-Regolament Finanzjarju;

23.

Jenfasizza għal darb’oħra (15) li l-Kummissjoni għalhekk għandha r-responsabbiltà primarja fil-ġestjoni tal-fondi tal-Unjoni kkonċernati u li, konsegwentament, il-Kummissjoni għandha l-obbligu li tieħu miżuri li jimmiraw lejn l-iżgurar tal-legalità u tar-regolarità kif ukoll lejn ġestjoni finanzjarja tajba;

24.

Jenfasizza li mhuwiex possibbli għall-Kummissjoni li tittrasferixxi r-responsabbiltà finanzjarja tagħha lill-Istati Membri, anki f’każijiet fejn id-dgħufija maniġerjali jew l-irregolarità ġiet identifikata fil-livell ta’ Stat Membru;

25.

Jikkunsidra li l-użu sinifikanti tat-terminu “ġestjoni kondiviża” għandu jkun ibbażat fuq il-prinċipju fundamentali li l-Unjoni tiddelega ftit mis-setgħat tagħha lill-Istati Membri u li l-Istati Membri għandhom l-obbligu li jwettqu l-parti tagħhom tal-ħidma bi qbil mal-atti leġiżlattivi tal-Unjoni; jitlob l-implimentazzjoni sħiħa tal-Punt 44 tal-Ftehim Interistituzzjonali tas-17 ta’ Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-amministrazzjoni finanzjarja tajba (16); jemmen li s-sintesi annwali tal-awditjar u d-dikjarazzjonijiet disponibbli jridu jkunu pubbliċi sabiex jikkontribwixxu għat-titjib tal-immaniġġjar tal-baġit tal-Unjoni Ewropea;

26.

Jinnota li r-rabta soda bejn ir-responsabbiltà finali tal-Kummissjoni għall-implimentazzjoni tal-baġit u l-importanza tal-proċedura ta’ kwittanza; jenfasizza li r-responsabbiltà finali tal-Kummissjoni fir-rigward tal-implimentazzjoni tal-baġit tkopri wkoll in-nuqqasijiet tas-sistemi ta’ ġestjoni u kontroll tal-Istati Membri;

27.

Jenfasizza li r-responsabbiltà finanzjarja hi u se tibqa’ indiviżibbli u jfakkar fl-Artikolu 53b(4) tar-Regolament Finanzjarju, li jgħid li “sabiex ikun żgurat li l-fondi jkunu użati skont ir-regoli applikabbli, il-Kummissjoni għandha tapplika proċeduri ta’ approvazzjoni tal-kontijiet jew mekkaniżmi ta’ korrezzjoni finanzjarja li bihom tkun tista’ tassumi r-responsabbiltà finali għall-implimentazzjoni tal-baġit” (enfasi miżjuda);

28.

Jenfasizza l-importanza tal-pożizzjonijiet meħuda mill-maniġment tal-Kummissjoni f’dan il-kuntest; jinnota, madankollu, l-osservazzjonijiet ġenerali tal-Qorti tal-Awdituri dwar ir-Rapporti Annwali tal-Attività tal-Kummissjoni li ma kienx hemm gwida għall-kalkolu tar-rata ta’ żball residwu jew tar-riskju residwu; jinnota ukoll li dawn l-elementi saru aktar importanti għall-kwistjoni ta’ jekk hemmx bżonn ta’ riżerva (Rapport Annwali, punti 1.19 u 1.20); jinsab imħasseb li dan jirriżulta f’inkonsistenzi fl-applikazzjoni bejn id-Direttorati Ġenerali;

29.

Jinnota wkoll l-osservazzjonijiet tal-Qorti tal-Awdituri dwar ir-Rapporti Annwali tal-Attività individwali li ġejjin:

30.

Ifakkar lill-Kummissjoni li r-riżervi kollha huma inklużi bħala anness għar-Rapport ta’ Sinteżi tal-Kummissjoni u jenfasizza li bl-adozzjoni tar-Rapport ta’ Sinteżi l-Kummissjoni “tassumi r-responsabbiltà politika kollha tal-maniġment min-naħa tad-Diretturi Ġenerali u l-Kapijiet tas-Servizz tagħha, abbażi tal-assigurazzjonijiet u r-riżervi li dawn tal-aħħar għamlu fir-Rapport Annwali tal-Attività (RAA) tagħhom” (17);

31.

Jenfasizza li l-Kulleġġ u l-Kummissarji għalhekk jieħdu r-responsabbiltà finali għall-affidabbiltà u l-kompletezza tar-riżervi magħmula mid-Diretturi Ġenerali u l-Kapijiet tal-Unitajiet li jservu ta’ “Uffiċjali Awtorizzanti b’Delega” u jenfasizza li l-att ta’ delega bl-ebda mod ma jneħħi r-responsabbiltà finali mill-Kulleġġ u mill-Kummissarji;

32.

Jinnota l-osservazzjonijiet magħmula mill-Qorti tal-Awdituri fir-rigward tal-opinjoni ġenerali tal-Awditur Intern; jemmen li fl-assenza ta’ rieżami sostanzjali li jqis it-tħassib tal-Qorti tal-Awdituri, l-utilità tal-opinjoni ġenerali se tibqa’ limitata;

33.

Huwa mħasseb dwar l-osservazzjonijiet tal-Qorti tal-Awdituri fir-rigward tar-Rapporti Annwali tal-Attività u r-Rapport ta’ Sinteżi (Rapport Annwali, punti 1.17 - 1.25); jemmen li dawk l-osservazzjonijiet jeħtieġ li jiġu indirizzati mingħajr dewmien biex jiġi ssalvagwardjat il-valur ta’ dawk id-dokumenti bħala strumenti ta’ rendikont; jirrikonoxxi, madankollu, li l-kalkolu ta’ rata ta’ żball residwu hija biss waħda mill-metodi użati mill-Kummissjoni biex ikun stmat l-ammont fir-riskju; jitlob lill-Kummissjoni tipprovdi linji gwida konsistenti li għandhom jiġu implimentati mid-Direttorati Ġenerali kollha;

34.

Jinnota l-Green Paper tal-Kummissjoni dwar il-qafas tal-governanza korporattiva tal-UE (18) għas-settur privat; ikompli jinnota li l-Kummissjoni għamlet progress kbir fir-rigward ta’ governanza korporattiva adegwata fi ħdan il-Kummissjoni wara l-avvenimenti li wasslu għar-riżenja tal-Kummissjoni Santer fl-1999;

35.

Jinnota d-dikjarazzjoni tal-Kummissjoni dwar il-Governanza adottata fit-30 ta’ Mejju 2007, li tkopri l-funzjonament intern tal-Kummissjoni u tispjega l-mod li bih hi mmexxija u kkontrollata u l-mod li bih tirrelata mal-partijiet interessati tagħha; iħeġġeġ lill-Kummissjoni tkompli ttejjeb il-governanza korporattiva tagħha u tinforma lill-awtorità tal-kwittanza bl-azzjonijiet u l-miżuri meħuda billi:

36.

Jistieden lill-Kummissjoni biex tikkunsidra bħala azzjoni prijoritarja t-titjib u t-tisħiħ tal-katina tal-responsabbiltà, fost affarijiet oħra billi:

37.

Jiddispjaċih li minkejja mezzi baġitarji konsiderevoli previsti għall-iskejjel Ewropej, dawn tal-aħħar għadhom qed jonqsu milli jissodisfaw il-kompitu primarju tagħhom, li hu dak li jipprovdu postijiet biżżejjed fil-lingwi meħtieġa u fil-viċinanzi tal-postijiet tax-xogħol u tar-residenza tal-uffiċjali, iżda minflok estendew l-attivitajiet tagħhom biex jinkludu oqsma oħra ta’ edukazzjoni;