(1)

Fit-2 ta’ Ottubru 2008 l-Kummissjoni Ewropea awtorizzat l-għajnuna mill-Istat lil Hypo Real Estate Holding AG fil-forma ta’ garanzija tal-Istat ta’ EUR 35 biljun (irreġistrata taħt il-każ numru N 44/08) (3) temporanja, jiġifieri għal sitt xhur jew sas-sottomissjoni ta’ pjan ta’ ristrutturar kredibbli u sostanzjat għall-bank. Il-Ġermanja nnotifikat il-miżura fit-30 ta’ Settembru 2008.

(2)

Fl-1 ta’ April 2009, il-Ġermanja nnotifikat pjan ta’ ristrutturar għal Hypo Real Estate (“HRE”) (irreġistrat taħt il-każ numru N 196/09). Permezz ta’ ittra datata 17 ta’ April 2009 l-Ġermanja ssupplimentat in-notifika tal-pjan ta’ ristrutturar billi informat lill-Kummissjoni dwar injezzjoni ta’ kapital ta’ EUR 60 miljun u tiġdid tal-garanziji tal-Istat ta’ EUR 52 biljun li kienu ngħataw taħt l-iskema ta’ appoġġ tal-bank approvata. (4)

(3)

Permezz ta’ ittra datata 7 ta’ Mejju 2009, (5) il-Kummissjoni informat lill-Ġermanja li kienet bdiet il-proċedura stabbilita fl-Artikolu 108(2) tat-Trattat dwar il-Funzjonament tal-Unjoni Ewropea. Dik id-deċiżjoni (“deċiżjoni tal-ftuħ”) ġiet ippubblikata f’Il-Ġurnal Uffiċjali tal-Unjoni Ewropea, (6) fejn issejjaħ lill-partijiet interessati biex jissottomettu l-kummenti tagħhom.

(4)

Fit-3 ta’ Ġunju 2009 l-Ġermanja nnotifikat injezzjoni ta’ kapital li tammonta għal EUR 2,96 biljun, irreġistrata taħt il-każ numru N 333/09.

(5)

Fis-17 ta’ Awwissu 2009 l-Ġermanja informat lill-Kummissjoni (irreġistrata taħt il-każ numru C 15/09) li kellha l-intenzjoni li terġa’ ġġedded il-garanziji mogħtija preċedentement minn Sonderfonds Finanzmarktstabilisierung (“SoFFin”) li jammontaw għal EUR 52 biljun għal HRE (cf. premessa 2).

(6)

Fl-20 u l-21 ta’ Ottubru 2009, il-Ġermanja pprovdiet aġġornament ieħor tal-pjan ta’ ristrutturar, innotifikat lill-Kummissjoni dwar miżuri addizzjonali maħsuba għall-HRE (ħolqien ta’ istituzzjoni ta’ likwidazzjoni, għoti ta’ garanziji addizzjonali) u informat lill-Kummissjoni dwar tiġdid ulterjuri, jiġifieri t-tielet tiġdid, tal-garanziji eżistenti ta’ SoFFin ta’ EUR 52 biljun (irreġistrati taħt il-każ numru N 557/09).

(7)

Fis-26 ta’ Ottubru 2009 l-Ġermanja nnotifikat, taħt il-każ numru N 557/09, injezzjoni ta’ kapital ulterjuri li tammonta għal EUR 3,0 biljun, il-garanziji ta’ SoFFin li jammontaw għal total ta’ EUR 18 biljun għal HRE, kif ukoll garanzija ta’ SoFFin li tammonta għal EUR 2 biljun għall-istituzzjoni ta’ likwidazzjoni ta’ HRE. (7) Il-Kummissjoni ma approvatx il-garanzija ta’ SoFFin li tammonta għal EUR 2 biljun.

(8)

Fit-13 ta’ Novembru 2009, il-Kummissjoni estendiet il-proċedura ta’ investigazzjoni formali u approvat temporanjament injezzjonijiet ta’ kapital ta’ EUR 60 miljun, EUR 2,96 biljun u EUR 3 biljun (fil-każijiet: C 15/09, N 333/09 u N 557/09) sakemm il-Kummissjoni tieħu deċiżjoni finali dwar il-pjan ta’ ristrutturar. Dik id-deċiżjoni ġiet ippubblikata f’Il-Ġurnal Uffiċjali tal-Unjoni Ewropea, (8) fejn issejjaħ lill-partijiet interessati biex jissottomettu l-kummenti.

(9)

Fil-15, 16 u 17 ta’ Diċembru 2009 (irreġistrat taħt il-każ numru N 694/09) l-awtoritajiet Ġermaniżi kkumplimentaw in-notifika tas-26 ta’ Ottubru 2009 billi ssottomettew informazzjoni ulterjuri dwar il-garanziji ta’ SoFFin ta’ EUR 18-il biljun.

(10)

Fil-21 ta’ Diċembru 2009 l-Kummissjoni awtorizzat temporanjament il-garanziji ta’ SoFFin ta’ EUR 18-il biljun għal mhux aktar minn sena waħda (il-każ numru N 694/09). (9)

(11)

Fit-30 ta’ April 2010, il-Ġermanja nnotifikat injezzjoni ta’ kapital ta’ SoFFin ta’ EUR 1,85 biljun (il-każ numru N 161/10).

(12)

Fid-19 ta’ Mejju 2010 l-Kummissjoni awtorizzat temporanjament l-injezzjoni ta’ kapital ta’ EUR 1,85 biljun sakemm il-Kummissjoni tieħu deċiżjoni finali dwar il-pjan ta’ ristrutturar. (10)

(13)

Fit-2 ta’ Settembru 2010 l-Ġermanja nnotifikat garanzija ta’ likwidità ta’ SoFFin li tammonta għal EUR 20 biljun (il-każ numru N 380/10).

(14)

Fl-10 ta’ Settembru 2010 l-Ġermanja nnotifikat miżura dwar l-assi danneġġjati - jiġifieri l-intenzjoni li tittrasferixxi assi minn HRE għal FMS Wertmanagement AöR (11) (“FMS-WM”) – u injezzjoni ta’ kapital ta’ mhux aktar minn madwar EUR 2,13 biljun, kif ukoll garanzija addizzjonali, jiġifieri garanzija ta’ ħlas ta’ mhux aktar minn EUR 20 biljun (il-każ numru N 380/10).

(15)

Fl-24 ta’ Settembru 2010 l-Kummissjoni reġgħet estendit il-proċedura ta’ investigazzjoni formali u awtorizzat temporanjament il-miżura dwar l-assi danneġġjati, il-garanzija ta’ likwidità ta’ EUR 20 biljun u l-garanzija ta’ ħlas ta’ mhux aktar minn EUR 20 biljun. Dik id-deċiżjoni ġiet ippubblikata f’Il-Ġurnal Uffiċjali tal-Unjoni Ewropea, (12) fejn issejjaħ lill-partijiet interessati biex jissottomettu l-kummenti. Id-deċiżjoni tal-Kummissjoni tal-24 ta’ Settembru 2010 ma koprietx l-injezzjoni ta’ kapital ta’ mhux aktar minn EUR 2,13 biljun li ġiet innotifikata mill-Ġermanja fl-10 ta’ Settembru 2010; jiġifieri dik l-injezzjoni ta’ kapital ma kinitx approvata mill-Kummissjoni.

(16)

Fl-14 ta’ Ġunju 2011 il-Ġermanja ssottomettiet aġġornament finali tal-pjan ta’ ristrutturar. Fil-15 ta’ Ġunju 2011 il-Ġermanja ssottomettiet lista ta’ impenji relatati, li kienet issupplimentata fl-1 ta’ Lulju 2011.

(17)

Fl-14 ta’ Ġunju 2011, il-Ġermanja kkjarifikat li l-injezzjoni ta’ kapital li jmiss mhux ser tammonta għal EUR 2,13 biljun kif notifikat fl-10 ta’ Settembru 2010, iżda ser tammonta għal EUR 2,08 biljun u li l-ammont imnaqqas ikun disponibbli għal FMS-WM.

(18)

Maż-żmien seħħew ħafna laqgħat u konferenzi bit-telefown u aktar korrispondenza ġiet kondiviża bejn id-dipartimenti tal-Kummissjoni, il-Ġermanja u HRE.

(19)

Il-Kummissjoni rċeviet kummenti minn partijiet interessati, bagħtithom lill-Ġermanja u rċeviet l-osservazzjonijiet mill-Ġermanja permezz ta’ ittra datata l-24 ta’ Marzu 2010.

(20)

F’Ottubru 2003 HRE ġiet stabbilita bħala spin-off tal-partijiet tan-negozju ta’ finanzjament tal-proprjetà immobbli kummerċjali ta’ HVB Group. Fl-2007, HRE ħadet fil-pussess tagħha lil DEPFA Bank plc bbażata f’Dublin u estendiet in-negozju tagħha għall-finanzi tas-settur pubbliku u tal-infrastruttura. L-HRE Group (13) jikkonsisti fil-preżent minn Hypo Real Estate Holding AG (“HRE Holding”) u t-tliet sussidjarji tagħha PBB Deutsche Pfandbriefbank AG (“PBB”), DEPFA Bank plc u Hypo Real Estate Finance B.V. in Liquidation (“HRE Finance i.L.”). DEPFA Bank plc u PBB kull wieħed għandhom numru ta’ sussidjarji u parteċipazzjonijiet oħra. PBB huwa l-bank ewlieni mogħti isem ġdid tal-grupp u l-uniku wieħed mit-tliet sussidjarji ta’ HRE Holding li ser ikompli jiġġenera negozju ġdid. Is-setturi ta’ attività tiegħu huma l-finanzi tal-proprjetà immobbli u l-finanzi tal-investiment pubbliku (“FIP”). DEPFA Bank plc hija eżawrita u mhux ser tikkuntratta kwalunkwe negozju ġdid min-notifika ta’ din id-deċiżjoni tal-Kummissjoni. L-attivitajiet ewlenin tagħha kienu jinkludu l-aktar in-negozji ta’ self ta’ finanzi tas-settur pubbliku u l-kreditu tal-baġit u l-finanzjament ta’ proġetti ta’ infrastruttura (eż. toroq, pontijiet, mini u bini pubbliku). Bħal ma jissuġġerixxi isimha, HRE Finance i.L. hija kumpanija f’likwidazzjoni. (14)

(21)

FMS-WM, l-istituzzjoni ta’ likwidazzjoni għal HRE, ġiet stabbilita fl-2010. Din tiġġestixxi l-assi u d-derivattivi tal-HRE Group li ħadet fil-pussess tagħha peress li jew ma kinux strateġiċi jew inkella kien fihom riskju jew piż kapitali inaċċettabbli. FMS-WM maż-żmien ħadet fil-pussess tagħha parti konsiderevoli tal-assi ta’ HRE. FMS-WM ma għandhiex liċenzja bankarja.

(22)

HRE rrapportat telf ta’ EUR 5,5 biljun għas-sena finanzjarja 2008, telf ta’ EUR 2,2 biljun għall-2009 u telf ta’ EUR 0,9 biljun għall-2010.

(23)

Bl-injezzjoni ta’ kapital li jammonta għal madwar EUR 3,02 biljun (EUR 60 miljun f’Marzu 2009, EUR 2,96 biljun f’Ġunju 2009), il-Ġermanja saret 90 % sid ta’ HRE. Fil-ħarifa tal-2009 seħħet tneħħija (squeeze-out) ta’ azzjonisti minuri. Il-Ġermanja akkwistat il-bqija tal-ishma, fejn ħallset EUR 1,30 kull sehem, u saret 100 % sid ta’ HRE. Proċess ta’ ristrutturar ġie mibdi sussegwentement għal HRE.

(24)

Fl-aħħar ta’ Settembru 2008, HRE iffaċċjat nuqqas ta’ likwidità, li poġġa l-bank kważi f’falliment. HRE ma kinitx kapaċi tikseb finanzjament fuq perjodu qasir fis-swieq peress li l-kriżi tas-swieq finanzjarji wasslet għall-kollass ta’ uħud mis-swieq ta’ finanzjament. Wara li Lehman Brothers applikaw għal protezzjoni tal-kredituri, is-suq interbankarju b’mod partikolari kważi waqaf kompletament f’nofs Settembru 2008.

(25)

Il-mudell tan-negozju ta’ DEPFA Bank plc, sussidjarja bi sjieda sħiħa ta’ HRE minn Ottubru 2007 li kienet tiddependi ħafna fuq il-finanzjament mis-suq interbankarju u sorsi oħra ta’ finanzjament skopert fuq perjodu qasir, wera li kien fraġli ħafna fid-dawl tal-kriżi ta’ likwidità, u l-problemi li rriżultaw heddew l-eżistenza proprja tagħha.

(26)

HRE kellha tkopri l-bżonnijiet ta’ likwidità fuq perjodu qasir ta’ DEFPA Bank plc. Madankollu, il-volum tal-linji ta’ kreditu li kien dovut fit-30 ta’ Settembru 2008 kien kbir wisq biex jiġi appoġġjat minn HRE. Barra minn hekk, it-tranżazzjonijiet u l-attivitajiet interni fi ħdan l-HRE Group, bħar-riċevibbli, il-garanziji u l-ittri ta’ konfort, fissru li ħafna mill-kumpaniji fl-HRE Group kienu fl-istess sitwazzjoni. Il-problemi ta’ likwidità għalhekk kienu theddida serja għall-eżistenza tal-HRE Group.

(27)

Id-diffikultajiet ta’ HRE kienu fost affarijiet oħra attribwibbli għal problema ta’ legat li toriġina mill-assi li ma wrewx redditu xieraq fuq l-investiment jekk il-profil ta’ riskju attwali tagħhom ingħata kunsiderazzjoni, u għall-fatt li HRE kienet il-prodott ta’ fużjoni ta’ ħafna istituti bankarji iżgħar li kienu qed jużaw sistemi tal-IT differenti, […] (*1)

(28)

B’mod ġenerali, l-Istat Ġermaniż ipprovda jew ser jipprovdi lil HRE b’injezzjonijiet ta’ kapital li jammontaw għal total ta’ madwar EUR 9,95 biljun (FMS-WM irċeviet jew ser tirċievi parti minn dak il-kapital) u garanziji ta’ EUR 145 biljun. HRE ibbenefikat ukoll minn miżura ta’ salvataġġ tal-assi b’element ta’ għajnuna ta’ madwar EUR 20 biljun.

(29)

Bħala parti mill-intenzjoni tal-Ġermanja li tikseb kontroll sħiħ fuq HRE billi takkwista l-ishma kollha tagħha f’numru ta’ passi, fit-30 ta’ Marzu 2009 SoFFin xtrat 20 miljun sehem ġdid ta’ HRE għall-valur nominali tagħhom ta’ EUR 3 kull sehem, li rriżulta f’injezzjoni ta’ kapital lil HRE ta’ EUR 60 miljun u ta lil SoFFIN sehem ta’ 8,65 % fl-ekwità. Dik l-injezzjoni ta’ kapital kienet approvata temporanjament mill-Kummissjoni fit-13 ta’ Novembru 2009.

(30)

Fit-2 ta’ Ġunju 2009, l-azzjonisti ta’ HRE approvaw injezzjoni ta’ kapital li tammonta għal EUR 2,96 biljun f’HRE permezz tal-ħruġ ta’ ishma ġodda sabiex jiġu akkwistati minn SoFFin. Bħala riżultat, SoFFin kellha 90 % tal-ishma ta’ HRE. Dawk l-ishma maħruġin ġodda ġew irreġistrati fir-reġistru kummerċjali fit-8 ta’ Ġunju 2009. Din l-injezzjoni ta’ kapital ġiet approvata temporanjament mill-Kummissjoni fit-13 ta’ Novembru 2009.

(31)

L-injezzjoni ta’ kapital notifikata fis-26 ta’ Ottubru 2009, li tammonta għal EUR 3,0 biljun bħala total, kienet strutturata kif ġej:

(32)

Il-kuntratti għal dik l-injezzjoni ta’ kapital ta’ EUR 3 biljun ġew iffirmati fis-16 ta’ Novembru 2009. L-injezzjoni ta’ kapital ġiet approvata temporanjament mill-Kummissjoni fit-13 ta’ Novembru 2009.

(33)

L-injezzjoni ta’ kapital li tammonta għal EUR 1,85 biljun, fir-riżervi mhux impenjati (“freie Rücklagen”) ta’ HRE, ġiet diviża f’żewġ segmenti:

(34)

L-injezzjoni ta’ kapital ta’ EUR 1,85 biljun hija parti minn ħtieġa ta’ kapital totali stabbilita fil-pjan ta’ ristrutturar għal HRE. EUR 1,4 biljun ta’ din l-injezzjoni ta’ kapital ġew injettati sabiex ikun hemm konformità mar-rekwiżiti ta’ kapital regolatorji u bħala riżerva kontra r-riskju. Il-kuntratt għal dik l-injezzjoni ta’ kapital ta’ EUR 1,4 biljun ġie iffirmat fl-20 ta’ Mejju 2010. Il-Ġermanja qed tistenna li l-parti l-oħra tal-EUR 1,85 biljun, jiġifieri EUR 450 miljun, tiġi injettata fit-tielet kwart tal-2011.

(35)

Fl-10 ta’ Settembru 2010 l-awtoritajiet Ġermaniżi nnottifikaw injezzjoni ta’ kapital ta’ mhux aktar minn EUR 2,13 biljun għal HRE. Fl-14 ta’ Ġunju 2011, il-Ġermanja kkjarifikat li l-injezzjoni ta’ kapital mhux ser tammonta għal EUR 2,13 biljun iżda għal EUR 2,08 biljun u li l-ammont kellu jiġi injettat f’FMS-WM. Skont il-Ġermanja, it-EUR 2,08 biljun ser jiġu injettati fit-tielet kwart tal-2011. SoFFin poġġa it-EUR 2,08 biljun, soġġett għall-qbil tal-Kummissjoni Ewropea, bħala pretensjoni ta’ kapital (“Einlageanspruch”) fir-riżerva kapitali (“Kapitalrücklage”) ta’ HRE Holding. HRE Holding ittrasferiet dik il-pretensjoni ta’ kapital lil FMS-WM mill-1 ta’ Ottubru 2010.

(36)

Fit-13 ta’ Novembru 2008 l-Ġermanja pprovdiet garanziji tal-Istat ta’ EUR 35 biljun sabiex tnaqqas il-ħtiġijiet ta’ rifinanzjament ta’ HRE. Il-garanziji ġew approvati temporanjament mill-Kummissjoni fit-2 ta’ Ottubru 2008.

(37)

Dawn il-garanziji ngħataw għal linja ta’ likwidità li tammonta għal EUR 20 biljun ipprovduta mill-Deutsche Bundesbank u għan-noti garantiti li jammontaw għal EUR 15 biljun meħudin minn konsorzju ta’ istituzzjonijiet finanzjarji Ġermaniżi.

(38)

HRE ħallset primjum ta’ garanzija lill-Istat għall-garanzija ta’ EUR 35 biljun li jikkonsisti minn primjum bażiku u primjum relatat mal-prestazzjoni. Il-primjum bażiku kkonsista minn 1 % fis-sena fuq l-hekk imsejjaħ “L-Ewwel Ammont ta’ Garanzija fuq it-Telf” u minn 0,5 % fis-sena tal-hekk imsejjaħ “It-Tieni Ammont ta’ Garanzija fuq it-Telf”. Il-primjum relatat mal-prestazzjoni kien jikkonsisti minn 1,25 % fis-sena fuq “L-Ewwel Ammont ta’ Garanzija fuq it-Telf” u minn 0,25 % fis-sena fuq “It-Tieni Ammont ta’ Garanzija fuq it-Telf”.

(39)

Bejn Novembru 2008 u Frar 2009 HRE rċeviet garanziji ta’ ammont totali ta’ EUR 52 biljun minn SoFFin abbażi tal-iskema ta’ salvataġġ bankarja Ġermaniża approvata. (16)

(40)

HRE ħallset tariffa ta’ garanzija ta’ 0,5 % għall-partijiet tal-garanzija użati attwalment biex ikopru l-bonds u tariffa ta’ impenn ta’ 0,1 % għall-partijiet mhux użati.

(41)

In-“noti garantiti” li skadew fit-23 ta’ Diċembru 2009 ġew sostitwiti minn garanzija ta’ SoFFin għal EUR 8 biljun. Il-Kummissjoni approvat temporanjament dik il-garanzija fil-21 ta’ Diċembru 2009.

(42)

HRE ħallset primjum ta’ garanzija lil SoFFin li jammonta għal 0,5 % fis-sena tas-somma garantita. Għall-partijiet tal-garanzija li ma ntużawx, kienet applikabbli tariffa ta’ impenn ta’ 0,1 % fis-sena.

(43)

Fil-21 ta’ Diċembru 2009 garanzija ta’ SoFFin ta’ EUR 10 biljun, li damet mhux aktar minn sena, kienet approvata temporanjament mill-Kummissjoni, sabiex jiġu żgurati l-ħtiġijiet ta’ likwidità ta’ HRE.

(44)

HRE ħallset primjum ta’ garanzija lil SoFFin li jammonta għal 0,5 % fis-sena tas-somma garantita. Għall-partijiet tal-garanzija li ma ntużawx, kienet applikabbli tariffa ta’ impenn ta’ 0,1 % fis-sena.

(45)

HRE kellha bżonn ta’ garanzija ta’ likwidità addizzjonali ta’ EUR 20 biljun minħabba żviluppi avversi fis-swieq tal-kapital u tar-rati tal-imgħax futuri, li affettwaw lil HRE sakemm l-assi ġew trasferiti lill-istituzzjoni ta’ likwidazzjoni FMS-WM. Il-garanzija ġiet approvata temporanjament mill-Kummissjoni fl-24 ta’ Settembru 2010.

(46)

HRE ħallset primjum ta’ garanzija ta’ 0,8 % fis-sena. Għall-parti tal-garanzija mhux użata kienet applikabbli tariffa ta’ impenn ta’ 0,1 % fis-sena.

(47)

Garanzija ta’ ħlas ta’ mhux aktar minn EUR 20 biljun kienet meħtieġa minħabba l-inċertezzi li baqgħu rigward il-proċeduri teknikament kumplikati marbuta mat-trasferiment tal-assi lill-istituzzjoni ta’ likwidazzjoni. Il-garanzija ġiet approvata temporanjament mill-Kummissjoni fl-24 ta’ Settembru 2010.

(48)

HRE ħallset primjum ta’ garanzija lil SoFFin ta’ 0,8 % fis-sena. Għall-parti mhux użata tal-garanzija kienet applikabbli tariffa ta’ impenn ta’ 0,1 % fis-sena.

(49)

Fl-10 ta’ Settembru 2010, il-Ġermanja nnotifikat ukoll it-trasferiment ta’ ammont konċettwali ta’ madwar EUR 210 biljun ta’ assi u EUR 280 biljun ta’ derivattivi lill-istituzzjoni ta’ likwidazzjoni FMS-WM. FMS-WM ġiet maħluqa permezz ta’ deċiżjoni tal-bord tat-8 ta’ Lulju 2010 skont il-Finanzmarktstabilisierungsfondsgesetz Ġermaniż [Att dwar il-Fond ta’ Stabbilizzazzjoni tas-Suq Finanzjarju] (§ 8a tal-FMStFG). Din tiġġestixxi assi u derivattivi tal-grupp HRE li ħadet fil-pussess tagħha peress li dawn jew ma kinux strateġiċi jew inkella kien fihom riskju jew piż kapitali mhux aċċettabbli. FMS-WM taġixxi indipendentement minn HRE u tibbenefika minn obbligu fuq il-parti ta’ SoFFin li tikkumpensa għat-telf (“Verlustausgleichspflicht“). Madankollu, FMS-WM ma għandhiex liċenzja bankarja. Bħala riżultat, ħafna mill-assi ta’ HRE setgħu jiġu trasferiti b’mod sintetiku biss; varjetà ta’ mekkaniżmi ta’ “trasferiment”, skont iċ-ċirkostanzi speċifiċi, ġiet imfassla sabiex jinkiseb effett ta’ ħelsien kapitali regolatorju għal PBB u l-grupp HRE.

(50)

It-trasferiment ġie approvat temporanjament mill-Kummissjoni fl-24 ta’ Settembru 2010. Il-miżura ttrasferiet assi mhux strateġiċi u mhux produttivi bħal bonds tal-gvern jew self fuq proprjetà mhux produttiv (jew, kif deskritt fil-premessa 49, l-użu kapitali regolatorju tagħhom biss) fi strument garantit mill-gvern li jkun likwidat fuq numru ta’ snin. L-assi mhux strateġiċi trasferiti kienu jinkludu wkoll dawk li ma setgħux jintużaw bħala kollateral għall-bonds koperti.

(51)

Id-data ta’ trasferiment effettiva kienet it-30 ta’ Settembru 2010. Sa dak iż-żmien, minħabba l-amortizzazzjoni, il-portafoll magħżul għat-trasferiment kellu valur skont il-kotba ta’ EUR 173 biljun. Skont il-Komunikazzjoni mill-Kummissjoni dwar it-trattament ta’ assi danneġġjati fis-settur bankarju tal-Komunità (“Il-Komunikazzjoni dwar l-Assi Danneġġjati” jew “IAC”), (17) il-Kummissjoni appuntat esperti esterni biex jappoġġjawha fl-ivvalutar tal-portafoll, fid-determinazzjoni tal-element ta’ għajnuna u fil-valutazzjoni ta’ jekk u sa liema punt il-valur tat-trasferiment li sar kienx ‘il fuq mill-valur ekonomiku reali (REV) tal-portafoll. Kif stabbilit fil-IAC, il-Ġermanja kkummissjonat ukoll espert estern biex iwettaq valutazzjoni indipendenti.

(52)

Il-portafoll inkluda madwar EUR 30 biljun ta’ self fuq proprjetà immobbli kummerċjali, li huma diversifikati ġeografikament u komposti l-aktar minn finanzjament ta’ bini ta’ uffiċċini u ċentri kummerċjali. Dawn huma ta’ tul taż-żmien relattivament qasir (tliet snin) iżda ta’ kwalità tal-kreditu inferjuri.

(53)

Il-parti tal-proprjetà immobbli mhux kummerċjali tal-portafoll kienet komposta mill-finanzi jew bonds tas-settur pubbliku u self lil entitajiet jew utilitajiet pubbliċi. Il-maġġoranza ta’ dak in-negozju kien jikkonsisti minn bonds standard (“plain vanilla bonds”), iżda kien jinkludi wkoll EUR 31 biljun ta’ “strumenti tal-kreditu strutturati” u EUR 30 biljun ieħor ta’ self lis-settur pubbliku. Il-kwalità tal-assi f’din il-parti tal-portafoll kienet ferm aħjar minn dik tas-self fuq proprjetà immobbli kummerċjali. Madankollu, minħabba l-maturitajiet twal tagħhom u bit-twessigħ tal-firxa tal-kreditu tas-suq mill-akkwiżizzjoni, it-titoli soffrew minn skont sinifikanti f’termini tal-prezz tas-suq.

(54)

L-esperti tal-Kummissjoni sabu li, għall-kuntrarju ta’ ċertu każijiet oħra ta’ għajnuna mill-Istat, il-kategoriji kumplessi tas-self tal-proprjetà immobbli kummerċjali u tal-assi tal-kreditu strutturati (li jikkonsistu l-aktar minn titoli garantiti b’self lill-istudenti, titoli garantiti b’assi tas-settur pubbliku u l-EUR 5 biljun f’investiment fi trasferimenti bi tpartit totali) kienu b’mod ġenerali siguri. Dawn kienu qed jistennew biss telf limitat fuq dawk il-kategoriji, minkejja li ogħla mill-istimi tal-esperti tal-Ġermanja, l-aktar minħabba l-valutazzjoni tal-bonds fi flus fl-istrutturi Halcyon/Pegasus kif ukoll il-bażi negattiva u l-ispejjeż tal-finanzjament impliċiti fit-trasferimenti bi tpartit totali. Għall-kuntrarju, l-“plain vanilla” bonds ġew ittrasferiti f’livell ta’ tpartit tal-assi viċin il-parità, ferm ogħla mir-REV tagħhom. Barra minn hekk, dawn kienu jappartjenu għal swieq li ma kinux partikolarment danneġġjati, għalhekk ir-REV tagħhom għandu filfatt ikun viċin tal-valur tas-suq tagħhom. Bħala riżultat, l-esperti tal-Kummissjoni kkonkludew li r-REV ta’ dik il-parti tal-portafoll tkun ferm taħt il-valur li għalih HRE ttrasferithom lil FMS-WM.

(55)

Għall-portafoll tad-derivattivi, l-esperti tal-Kummissjoni fil-biċċa l-kbira qablu mas-sejbiet tal-esperti tal-Ġermanja. Barra minn hekk, dawn stmaw il-kontravalur tar-riskju tal-kreditu bħala ftit ogħla mil-livell misjub mill-esperti tal-Ġermanja u inkorporaw ċertu sejbiet mill-kampjun tagħhom kif ukoll imposta ġenerali għar-“riskju operattiv”, motivata b’suppożizzjonijiet prudenti dwar in-nuqqasijiet fl-effettività totali tal-ħeġġ.

(56)

It-tabella ta’ hawn taħt tipprovdi taqsira tas-sejbiet tal-esperti tal-Kummissjoni:

(57)

Bħala riżultat, l-ammont ta’ għajnuna li, b’konformità mal-IAC, mhuwiex a priori kompatibbli mas-suq intern (li huwa definit bħala d-differenza bejn ir-REV u l-valur ta’ trasferiment) huwa determinat mill-esperti bħala madwar EUR 16,2 biljun. L-ammont totali tal-għajnuna, jiġifieri d-differenza bejn il-valur ta’ trasferiment u l-valur tas-suq, huwa diffiċli li jiġi stabbilit minħabba n-nuqqas ta’ prezzijiet tas-suq faċilment disponibbli għall-parti tas-self tal-portafoll. Is-suppożizzjoni estrema li l-valur tas-suq tal-ktieb tas-self huwa żero kieku tagħti ammont totali tal-għajnuna ta’ EUR 90 biljun. Jekk nissoponu li s-self jinnegozja fl-istess mod bħall-bonds likwidi ta’ maturità u kwalità tal-kreditu simili, l-għajnuna totali tkun madwar EUR 20 biljun.

(58)

Fis-7 ta’ Mejju 2009, il-Kummissjoni fetħet investigazzjoni fil-fond fil-miżuri ta’ għajnuna mill-Istat għal HRE, l-aktar abbażi tad-dubji dwar il-vijabbiltà ta’ HRE, b’mod partikolari fid-dawl tal-istrateġija u l-ħtiġijiet ta’ rifinanzjament ta’ HRE. Il-pjan ta’ ristrutturar inizjali sottomess lill-Kummissjoni fl-1 ta’ April 2009 identifika biss fatturi esterni bħala raġunijiet għall-problemi finanzjarji ta’ HRE u mmira lejn tnaqqis tal-karta tal-bilanċ ta’ biss 25 %, li jfisser li l-volum ta’ rifinanzjament kien jibqa’ għoli. HRE ppjanat li tnaqqas il-karta tal-bilanċ tal-grupp billi tbiegħ l-assi fis-suq, minflok tittrasferihom lil istituzzjoni ta’ likwidazzjoni. Wieħed mill-oqsma ewlenin tan-negozju deskritt fil-pjan ta’ ristrutturar kien l-attivitajiet tal-finanzi tal-baġit li jiġġeneraw marġini baxxi, u l-pjan kien fih ftit wisq informazzjoni dwar kwistjonijiet li huma vitali għall-proċess ta’ ristrutturar bħall-modifikazzjoni u l-integrazzjoni tas-sistemi tal-IT. F’dak l-istadju, il-Kummissjoni kellha wkoll dubji li kien hemm biżżejjed miżuri biex jillimitaw id-distorsjonijiet tal-kompetizzjoni u biżżejjed miżuri għall-kondiviżjoni tal-piż.

(59)

L-investigazzjoni fil-fond ġiet estiża fit-13 ta’ Novembru 2009 minħabba:

(60)

Fl-24 ta’ Settembru 2010 l-investigazzjoni fil-fond ġiet estiża għal darb’ oħra peress li:

(61)

Fl-1 ta’ April 2009, il-Ġermanja nnotifikat l-ewwel abbozz tal-pjan ta’ ristrutturar għal HRE u, wara ħafna modifiki, issottomettiet l-aġġornament finali tal-pjan fl-14 ta’ Ġunju 2011. Sakemm mhux speċifikat mod ieħor, ir-referenzi kollha għall-pjan ta’ ristrutturar fil-bqija ta’ din id-Deċiżjoni huma għal din il-verżjoni finali tal-14 ta’ Ġunju 2011.

(62)

Skont il-pjan ta’ ristrutturar, HRE - wara li ġiet meħlusa mil-legat tagħha ta’ assi danneġġjati b’valur nominali ta’ EUR 210 biljun permezz tat-trasferiment tagħhom lill-istituzzjoni ta’ likwidazzjoni FMS-WM - ser tfassal mill-ġdid l-attivitajiet tan-negozju tagħha f’mod li l-bank ewlieni tagħha PBB jkun jista’ jwettaq l-attivitajiet tiegħu abbażi ta’ approċċ ta’ finanzjament stabbli u sistemi ta’ kontroll intern imtejba. L-attivitajiet tal-ġejjieni tagħha ser ikunu fuq skala ferm iżgħar minn dik ta’ qabel il-kriżi, irrispettivament minn jekk hux ser jitkejlu f’termini ta’ daqs tal-karta tal-bilanċ, volum ta’ negozju ġdid, forza tax-xogħol, netwerk ta’ fergħat jew ambitu ġeografiku.

(63)

Paragunat mas-sitwazzjoni ta’ qabel il-kriżi, id-daqs tal-karta tal-bilanċ strateġika ta’ PBB fl-aħħar tal-2011 - korrett għal entrati li huma f’modalità eżawrita jew li ġew trasferiti sintetikament lil FMS-WM – jammonta għal madwar 15 % tal-karta tal-bilanċ ta’ HRE. In-negozju ġdid fil-finanzi tal-proprjetà immobbli pereżempju ser jitnaqqas għal madwar 30 % tal-livell tiegħu ta’ qabel il-kriżi (in-negozju ġdid ta’ HRE fil-finanzi tal-proprjetà immobbli kummerċjali ammonta għal EUR 32,1 biljun fl-2007). Il-forza tax-xogħol ġiet imnaqqsa b’madwar 30 %, u l-membri tal-bord eżekuttiv kollha ta’ HRE li kienu maħtura qabel il-kriżi ġew sostitwiti. Aktar minn 30 parteċipant, terz minnhom minn barra l-Ewropa, diġà ġew divestiti jew likwidati, jew huma fil-proċess ta’ likwidazzjoni. Madwar 26 minn 32 fergħa ngħalqu. Barra minn hekk, proġett ta’ trasformazzjoni għall-grupp sħiħ u fuq ħafna snin imsejjaħ “Evoluzzjoni Ġdida” b’baġit ta’ madwar EUR 180 miljun ġie mniedi għat-titjib u l-integrazzjoni tas-sistemi tal-IT.

(64)

PBB ser ikompli żewġ linji tan-negozju strateġiċi, il-finanzi tal-proprjetà immobbli (REF – real estate finance) u l-finanzi tal-investiment pubbliku (FIP). Iż-żewġ linji tan-negozju jimmiraw lejn assi li huma eliġibbli għal bonds koperti Ġermaniżi, jew fil-forma ta’ bonds ipotekarji Ġermaniżi (“Hypothekenpfandbriefe”) jew inkella fil-forma ta’ bonds tas-settur pubbliku Ġermaniżi (“öffentliche Pfandbriefe”). L-attivitajiet l-oħra kollha, b’mod partikolari n-negozju tal-finanzi tal-baġit, il-finanzi tal-infrastruttura, is-swieq kapitali u l-attivitajiet ta’ ġestjoni tal-assi, ser jitwaqqfu.

(65)

L-arranġamenti għaż-żewġ sussidjarji l-oħra ta’ HRE Holding huma dawn li ġejjin: DEPFA Bank plc għandha tiġi eżawrita mid-data ta’ notifika ta’ din id-Deċiżjoni u ma għandhiex tiġġenera kwalunkwe negozju ġdid. L-istess japplika għas-sussidjarji tagħha. HRE Finance hija fi stat ta’ likwidazzjoni u wkoll mhux qed twettaq negozju ġdid.

(66)

Il-Ġermanja tiddikjara li d-deċiżjoni fundamentali li ssegwi strateġija kummerċjali aktar konservattiva u li tiffoka fuq il-bonds koperti Ġermaniżi bħala s-sors ta’ rifinanzjament primarju tiżgura titjib kwalitattiv tal-attivitajiet ta’ self peress li dawn huma soġġetti għall-qafas legali tal-Pfandbriefgesetz Ġermaniż [L-Att dwar il-Pfandbrief], li għandu rekwiżiti speċifiċi rigward il-ġestjoni, il-monitoraġġ u l-kontroll tar-riskji, u jipprovdi għal miżuri protettivi bħal-limitazzjoni tal-proporzjon ta’ self għall-valur. Dik l-istrateġija ta’ finanzjament tnaqqas b’mod konsiderevoli d-dipendenza preċedenti ta’ HRE fuq is-suq monetarju interbankarju, li fil-ġejjieni jkun meħtieġ biss għall-perjodu ta’ warehousing li jippreċedi l-ħruġ tal-bonds koperti.

(67)

Il-Kummissjoni rċeviet kummenti minn partijiet interessati, kif mogħti fil-qosor hawn taħt:

(68)

Fl-24 ta’ Marzu 2010 l-Kummissjoni rċeviet kummenti mill-Ġermanja dwar il-kummenti mill-partijiet interessati:

(69)

Il-Ġermanja taċċetta li l-miżuri jikkostitwixxu għajnuna mill-Istat fis-sens tal-Artikolu 107(1) TFUE.

(70)

Sabiex jiġi żgurat li l-mudell tan-negozju stabbilit fil-pjan ta’ ristrutturar jitqiegħed fl-azzjoni, u sabiex jiġi żgurat li tinkiseb biżżejjed kondiviżjoni tal-piż u li d-distorsjonijiet tal-kompetizzjoni jkunu limitati għall-minimu neċessarju, fil-15 ta’ Ġunju 2011 il-Ġermanja ssottomettiet numru ta’ impenji (20), li jistgħu jiġu mqassra kif ġej:

(a)   Implimentazzjoni tal-pjan ta’ ristrutturar u tal-impenji: Il-Ġermanja ser tiżgura li l-pjan ta’ ristrutturar kif stabbilit fil-verżjoni finali tiegħu u l-impenji jiġu implimentati bis-sħiħ.

(b)   Tul taż-żmien tal-impenji: Fil-prinċipju l-impenji huma validi sal-aħħar tal-perjodu ta’ ristrutturar, jiġifieri sal-31 ta’ Diċembru 2015. Madankollu, l-impenji rigward DEPFA Bank plc u s-sussidjarji tiegħu fil-prinċipju ser jintemmu malli DEPFA Bank plc jiġi privatizzat mill-ġdid, jekk dan iseħħ qabel. F’każ bħal dan, il-Ġermanja tinnotifika lill-Kummissjoni bil-bejgħ bil-quddiem u ma tikkompletax il-bejgħ mingħajr l-approvazzjoni tal-Kummissjoni, kieku kellu jseħħ qabel il-31 ta’ Diċembru 2013. L-impenji rigward PBB ser jintemmu malli PBB jiġi privatizzat mill-ġdid, iżda fi kwalunkwe każ mhux qabel il-31 ta’ Diċembru 2013.

(c)   Linji tan-negozju: Il-Ġermanja ser tiżgura li PBB biss isegwi negozju ġdid u li jagħmel dan biss f’żewġ linji tan-negozju, il-finanzi tal-proprjetà immobbli u l-finanzi tal-investiment pubbliku. Il-linji tan-negozju l-oħra kollha huma mwaqqfa (il-portafoll tal-finanzi tal-baġit ser jibqa’ fuq il-karta tal-bilanċ ta’ PBB iżda f’modalità eżawrita) u l-entitajiet l-oħra kollha tal-HRE Group ser iwaqqfu l-attivitajiet tan-negozju tagħhom.

(d)   Riprivatizzazzjoni ta’ PBB: Il-Ġermanja ser tipprivatizza mill-ġdid lil PBB malajr kemm jista’ jkun, u mhux aktar tard mill-31 ta’ Diċembru 2015.

(e)   Restrizzjoni tat-tkabbir ta’ PBB: Il-Ġermanja ser tiżgura li r-rati ta’ tkabbir ta’ PBB jibqgħu fil-limiti definiti, imkejla f’termini ta’ daqs tal-karta tal-bilanċ kif ukoll ta’ volum ta’ negozju ġdid.

(f)   Istituzzjoni ta’ likwidazzjoni: Il-Ġermanja ser tiżgura li, wara t-30 ta’ Settembru 2013, PBB ma jibqax jipprovdi la s-servizzi ta’ ġestjoni tal-assi u lanqas is-servizzi ta’ rifinanzjament għall-istituzzjoni ta’ likwidazzjoni FMS-WM u li, mill-perspettiva organizzazzjonali, dawk is-servizzi jistgħu jittieħdu minn partijiet terzi.

(g)   Preżenza fis-suq: Il-Ġermanja ser tiżgura li PBB jikseb negozju ġdid biss fuq is-swieq ġeografiċi li ġejjin:

(h)   Remunerazzjoni għall-użu tal-istituzzjoni ta’ likwidazzjoni: Il-Ġermanja għandha tiżgura li HRE, fil-limiti tal-ħiliet tagħha, tħallas remunerazzjoni xierqa għall-użu tal-istituzzjoni ta’ likwidazzjoni FMS-WM. Speċifikament, il-Ġermanja ser tiżgura li l-Bundesanstalt für Finanzmarktstabilisierung (“FMSA”) jordna lil HRE tħallas ammont ta’ EUR 1,59 biljun lil FMS-WM jew direttament jew inkella permezz tas-sussidjarji tagħha. Dawk is-sussidjarji ta’ HRE li ttrasferew l-assi lill-istituzzjoni ta’ likwidazzjoni u li għandhom kwota ta’ kapital ewlieni li taqbeż il-15 % huma fil-prinċipju responsabbli għal dak il-pagament. PBB ser iżomm u jakkumula l-profitti sabiex iħallas lura l-parteċipazzjoni silenzjuża.

(i)   Restrizzjonijiet rigward il-pagamenti tal-kupuni u d-distribuzzjoni tal-profitti: Il-Ġermanja ser tiżgura li HRE u s-sussidjarji tagħha jieqfu, fil-limiti legali, mill-pagamenti ta’ kupuni u miżuri oħra ta’ distribuzzjoni tal-profitti.

(j)   Restrizzjonijiet rigward il-ħlas lura: Il-Ġermanja ser tiżgura li HRE u s-sussidjarji tagħha jieqfu milli jħallsu lura l-istrumenti finanzjarji eżistenti.

(k)   Projbizzjoni fuq l-akwiżizzjoni: Il-Ġermanja ser tiżgura li HRE u s-sussidjarji tagħha ma jakkwistawx negozji oħra matul il-perjodu ta’ ristrutturar.

(l)   Impenji relatati mat-teknoloġija tal-informatika ta’ HRE/PBB: Il-Ġermanja ser tiżgura li l-proġett stabbilit għat-titjib tas-sistemi tal-IT tal-bank jiġi implimentat bis-sħiħ.

(m)   Impenn relatat mar-RAROC: Il-Ġermanja ser tiżgura li n-negozju ġdid strateġiku ta’ PBB ma joħroġ ebda self ġdid li għandu redditu fuq il-kapital aġġustat għar-riskju (RAROC - risk-adjusted return on capital) ta’ anqas minn 10 % fuq bażi ta’ tranżazzjonijiet individwali.

(n)   Trustee tal-monitoraġġ: Il-Ġermanja ser tiżgura li l-pjan ta’ ristrutturar u l-impenji kollha jiġu implimentati korrettament u li l-implimentazzjoni tiġi monitorjata kostantament minn trustee tal-monitoraġġ suffiċjentement kwalifikat.

(71)

Il-miżuri differenti konċernati ġew mogħtija jew direttament mill-Ġermanja jew inkella minn SoFFin, entità stabbilità u kkontrollata mill-Gvern Ġermaniż, u b’hekk tinvolvi r-riżorsi tal-Istat. Il-miżuri jipprovdu vantaġġ selettiv lil HRE, li jippermettilha tikseb kapital u garanziji ġodda u tibbenefika minn miżuri ta’ ħelsien ta’ assi b’kundizzjonijiet aktar favorevoli minn dawk li normalment jinstabu fis-suq. HRE hija bank attiv internazzjonalment, li jikkompeti ma’ banek oħra fil-Ġermanja u pajjiżi oħra. Għalhekk, għall-istess raġunijiet deskritti diġà fid-deċiżjonijiet preċedenti tal-Kummissjoni dwar HRE, (22) il-miżuri jikkostitwixxu għajnuna mill-Istat fis-sens tal-Artikolu 107(1) TFUE.

(72)

Fl-HRE Group huwa biss PBB (u s-sussidjarji tiegħu) li qed isegwu attivitajiet ekonomiċi ġodda u huwa għalhekk attiv fis-swieq. Għaldaqstant PBB jista’ jitqies bħala l-entità li qed ikompli l-attivitajiet ta’ HRE ta’ qabel (minkejja li b’mod limitat, kif spjegat fil-premessa 63). L-entitajiet l-oħra kollha tal-HRE Group (jiġifieri DEPFA Bank plc u s-sussidjarji tagħha u HRE Finance i.L.) huma f’modalità eżawrita u l-attivitajiet tagħhom huma limitati għal dak li huwa neċessarju biex jippermetti eżawriment ordinarju, iżda ma jiġġenerawx negozju ġdid.

(73)

L-objettiv finali u l-effett tal-miżuri kollha ta’ għajnuna (irrispettivament minn jekk ingħatawx formalment lil HRE, HRE Holding, PBB jew DEPFA Bank plc) huwa li jippermettu lill-PBB jibqa’ attiv fis-swieq. Għalhekk hija l-eżistenza li għadha fis-seħħ ta’ PBB fis-swieq li qed tikkawża d-distorsjoni tal-kompetizzjoni. DEPFA Bank plc tista’ (bħal FMS-WM) titqies purament istituzzjoni ta’ likwidazzjoni għall-assi li għal raġunijiet differenti ma ġewx trasferiti lil FMS-WM (il-“bank tal-assi ħżiena”). Din għandha tirrealizza l-assi tagħha meta jimmaturaw jew billi tbiegħhom fis-suq, iżda mhux ser tikkuntratta negozju ġdid mid-data ta’ notifika ta’ din id-Deċiżjoni. (23)

(74)

Minħabba l-fatt li PBB huwa għalhekk il-kontinwazzjoni ekonomika ta’ HRE u, f’konformità mal-prattika ta’ teħid ta’ deċiżjonijiet tal-Kummissjoni, (24) PBB huwa meqjus il-benefiċjarju tal-għajnuna, il-valutazzjoni tal-kompatibbiltà tal-għajnuna li ssegwi għalhekk ser tikkonċentra fuq PBB.

(75)

Fir-rigward tal-fehma espressa minn Heisse Kursawe Eversheds li t-tneħħija tikkostitwixxi għajnuna mill-Istat, il-Kummissjoni tinnota li, filwaqt li l-injezzjonijiet ta’ kapital f’HRE jikkostitwixxu għajnuna mill-Istat, it-tneħħija (squeeze-out) ta’ azzjonisti minuri (jiġifieri l-akkwiżizzjoni tal-ishma tagħhom kontra ħlas lil dawk l-azzjonisti) fiha nnifisha ma tinkludix elementi ta’ għajnuna mill-Istat peress li ma tipprovdix il-bank b’vantaġġ li jirriżulta mir-riżorsi tal-Istat. It-tneħħija (squeeze-out) involviet pagament mill-Istat lill-azzjonisti minuri, iżda dan ma kellux effett ekonomiku fuq HRE. Mill-perspettiva ta’ HRE l-istruttura ta’ sjieda tagħha biss inbidlet. Bħala riżultat, il-kwistjoni dwar jekk it-tneħħija tiksirx id-dispożizzjonijiet tat-Trattat dwar il-moviment ħieles tal-kapital ma teħtieġx tiġi valutata f’din id-Deċiżjoni.

(76)

Skont l-Artikolu 107(3)(b) TFUE, l-għajnuna tista’ titqies bħala kompatibbli mas-suq intern jekk tirrimedja taqlib serju fl-ekonomija ta’ Stat Membru. Peress li d-disaggregazzjoni ta’ bank sistematikament rilevanti tista’ taffettwa direttament is-swieq finanzjarji u taffettwa indirettament l-ekonomija sħiħa ta’ Stat Membru, il-Kummissjoni fil-preżent, fid-dawl tas-sitwazzjoni fraġili kontinwa fis-swieq finanzjarji, tibbaża l-valutazzjoni tagħha tal-miżuri ta’ għajnuna mill-Istat fis-settur bankarju skont il-liġi tal-għajnuna mill-Istat fuq dik id-dispożizzjoni.

(77)

Il-Kummissjoni ma għandha l-ebda raġuni biex tiddubita l-kwalifika mill-Ġermanja ta’ HRE bħala bank ta’ rilevanza sistematika, b’mod partikolari fid-dawl tal-pożizzjoni li kellha preċedentement fis-suq Pfandbrief Ġermaniż, id-daqs oriġinali tal-karta tal-bilanċ ta’ HRE u l-ammont ta’ derivattivi miżmuma preċedentement minn HRE.

(78)

Il-Kummissjoni tosserva li HRE rċeviet għajnuna ta’ salvataġġ li l-Kummissjoni sabet li hija kompatibbli mas-suq intern; madankollu, dik l-għajnuna issa għandha tiġi valutata sabiex jiġi determinat jekk tistax titqies bħala għajnuna għar-ristrutturar li hija kompatibbli mas-suq intern. Għalhekk il-Kummissjoni issa għandha tivvaluta l-kompatibbiltà ta’ dawk il-miżuri u l-miżuri ta’ ristrutturar ulterjuri kollha, jiġifieri l-garanziji ta’ EUR 52 biljun u l-injezzjoni ta’ kapital ta’ EUR 2,08 biljun, abbażi tal-Komunikazzjoni dwar l-Assi Danneġġjati u l-Komunikazzjoni dwar ir-Ristrutturar.

(79)

Kwalunkwe trasferiment ta’ assi lil istituzzjoni ta’ likwidazzjoni għandu jseħħ skont l-IAC. Barra minn hekk, il-Komunikazzjoni dwar ir-Ristrutturar tiddikjara f’mod ċar li r-remunerazzjoni xierqa ta’ kwalunkwe intervent tal-Istat ġeneralment hija waħda mil-limitazzjonijiet l-aktar xierqa tad-distorsjonijiet tal-kompetizzjoni, peress li tillimita l-ammont tal-għajnuna mill-Istat. Jista’ jkun meħtieġ ukoll limitu fuq l-espansjoni tal-bank f’ċerti oqsma tan-negozju jew ġeografiċi, pereżempju permezz ta’ rimedji orjentati lejn is-suq bħal rekwiżiti kapitali speċifiċi, fejn is-suq jiddgħajjef b’restrizzjonijiet diretti fuq l-espansjoni, jew għal-limitazzjoni tal-periklu morali.

(80)

Rigward l-eliġibbiltà tal-assi assenjati għat-trasferiment, il-paragrafu 34 tal-IAC jirrikonoxxi n-neċessità ta’ approċċ pragmatiku u flessibbli lejn l-għażla tat-tipi ta’ assi għall-miżuri dwar l-assi danneġġjati. Il-Kummissjoni applikat dik il-flessibbiltà f’każijiet oħra ta’ għajnuna mill-Istat u aċċettat it-trasferiment ta’ assi li, strettament, ma kinux f’diffikultà iżda ma kinux strateġiċi fid-dawl tal-bidla profonda fil-mudell tan-negozju tal-bank ikkonċernat.

(81)

Kif stabbilit fil-paragrafu 46 tal-IAC, sabiex tkun faċilitata l-attenzjoni tal-bank fuq ir-ritorn tal-vijabbiltà u jiġu evitati kunflitti ta’ interess possibbli, huwa neċessarju li tiġi żgurata separazzjoni ċara funzjonali u organizzazzjonali bejn il-bank benefiċjarju u l-assi danneġġjati tiegħu. Il-Kummissjoni tifhem li meta l-istituzzjoni ta’ likwidazzjoni ġiet maħluqa ma kienx possibbli, b’mod partikolari għal raġunijiet tekniċi, li taqta’ immedjatament ir-rabtiet bejn PBB u FMS-WM. Madankollu, dik is-sitwazzjoni trid tissolva malajr kemm jista’ jkun. Abbażi ta’ dan, il-Ġermanja impenjat ruħha li PBB jistabbilixxi l-indipendenza organizzazzjonali sħiħa tas-servizzi relatati u ma jibqax jipprovdihom lil FMS-WM wara t-30 ta’ Settembru 2013.

(82)

Rigward il-valutazzjoni u l-kondiviżjoni tal-piż, il-paragrafu 21 tal-IAC jinnota li r-remunerazzjoni korretta hija element tar-rekwiżit ta’ kondiviżjoni tal-piż. Il-Kummissjoni ser tiżgura, kif innotat fl-Anness IV għall-IAC, li kwalunkwe pprezzar tal-ħelsien tal-assi jinkludi r-remunerazzjoni għall-Istat li tikkunsidra adegwatament ir-riskji li t-telf fil-ġejjieni jaqbeż dak li huwa mbassar fid-determinazzjoni tar-REV. F’konformità mal-prattika ta’ teħid ta’ deċiżjonijiet tal-Kummissjoni dwar il-miżuri dwar il-ħelsien tal-assi, (25) il-valutazzjoni tar-remunerazzjoni neċessarja tal-effett tal-ħelsien tal-assi ser tkun ibbażata fuq trasferiment tar-REV, anki jekk dak huwa aktar baxx mill-valur ta’ trasferiment.

(83)

Il-paragrafu 41 tal-IAC jindika li l-valur ta’ trasferiment għandu jikkorrispondi għar-REV. Meta Stat Membru jikkunsidra li jkun neċessarju – b’mod partikolari sabiex jevita l-falliment tekniku – li juża valur ta’ trasferiment għall-assi li jaqbeż ir-REV tagħhom, dan jista’ jiġi aċċettat biss jekk ikun akkumpanjat minn ristrutturar wiesa’ u l-introduzzjoni ta’ kundizzjonijiet li jippermettu l-irkupru ta’ dik l-għajnuna addizzjonali fi stadju aktar tard, pereżempju permezz ta’ mekkaniżmu ta’ treġġigħ lura.

(84)

Abbażi ta’ dan, il-Kummissjoni tasal għall-konklużjoni li d-differenza bejn ir-REV u l-valur ta’ trasferiment, li għandha tiġi rkuprata fi stadju aktar tard u li ġiet stabbilita bl-appoġġ tal-esperti indipendenti tal-Kummissjoni, hija fil-livell ta’ EUR 16,2 biljun, u ssejjaħ għal ristrutturar partikolarment bir-reqqa u tnaqqis fin-numru tal-impjegati tal-bank. Ebda remunerazzjoni addizzjonali ma hi meħtieġa, skont il-paragrafu 21 tal-IAC, għaliex, wara tnaqqis tal-kapital a priori ta’ EUR 16,2 biljun, il-miżura ma tinvolvi l-ebda effett ta’ ħelsien ta’ kapital ulterjuri. (26)

(85)

Il-Kummissjoni tosserva li l-Ġermanja ma pprovditx espliċitament għall-irkupru ta’ dak l-ammont. Madankollu, din introduċiet klawżoli li jippermettu l-irkupru sa fejn dan ikun possibbli. Dawn jikkonsistu minn:

Barra minn hekk, ir-ristrutturar propost huwa estensiv ħafna u jinkludi tnaqqis fin-numru ta’ impjegati drammatiku ħafna tal-bank ewlieni “tal-assi tajbin”, għal madwar 15 % tad-daqs ta’ HRE fl-aħħar tal-2008. Flimkien mal-impenji fuq ir-restrizzjoni tat-tkabbir, il-limitazzjonijiet tal-firxa tal-prodott, il-governanza korporattiva u r-riprivatizzazzjoni permezz ta’ proċedura ta’ offerta pubblika, il-pakkett sħiħ ta’ ristrutturar jista’ jitqies biżżejjed estensiv fis-sens tal-IAC.

(86)

Il-Kummissjoni tosserva wkoll li d-dubji li qajmet dwar ir-rieda tal-Ġermanja u HRE u l-kapaċità li jipprovdu trasparenza u żvelar sħiħ ex ante tal-indebolimenti ġew allevjati permezz tal-għoti ta’ dejta estensiva minn tim iddedikat fil-bank. Barra minn hekk, parzjalment fuq talba tal-Kummissjoni, HRE kellha s-settijiet tad-dejta tagħha verifikati għall-konsistenza u l-kwalità, li ffaċilita l-valutazzjoni finali mill-esperti tal-Kummissjoni. Barra minn hekk, il-Ġermanja u l-PBB impenjaw ruħhom għal titjib estensiv tas-sistemi ta’ ġestjoni tar-riskju u ta’ rapportar sabiex jittaffa t-tħassib tal-Kummissjoni dwar in-nuqqasijiet potenzjali fis-sistemi ta’ informazzjoni dwar il-ġestjoni fil-ġejjieni.

(87)

Il-Komunikazzjoni dwar ir-Ristrutturar tistabbilixxi r-regoli dwar l-għajnuna mill-Istat applikabbli għar-ristrutturar tal-istituzzjonijiet finanzjarji fil-kriżi attwali. Skont il-Komunikazzjoni dwar ir-Ristrutturar, sabiex ikun kompatibbli mas-suq intern skont l-Artikolu 107(3)(b) TFUE, ir-ristrutturar tal-istituzzjoni finanzjarja fil-kuntest tal-kriżi finanzjarja attwali għandu jwassal għar-ritorn tal-vijabbiltà fit-tul tal-bank, jinkludi kontribuzzjoni proprja suffiċjenti mill-benefiċjarju (kondiviżjoni tal-piż) u jkun fih biżżejjed miżuri li jillimitaw id-distorsjoni tal-kompetizzjoni. (27)

(88)

L-ammont ta’ injezzjonijiet ta’ kapital diġà mogħtija, l-ammont tal-injezzjoni ta’ kapital xorta previst u l-ammont ta’ għajnuna mill-Istat li jirriżulta mit-trasferiment tal-assi flimkien jirrappreżentaw aktar minn 20 % tal-assi peżati tar-riskju ta’ qabel il-kriżi ta’ HRE.

(89)

F’konformità mal-Artikolu 2 tal-Komunikazzjoni dwar ir-Ristrutturar, il-Ġermanja ssottomettiet pjan ta’ ristrutturar komprensiv u dettaljat li jidentifika l-kawżi tad-diffikultajiet finanzjarji ffaċjati minn HRE u jipprovdi informazzjoni dettaljata dwar il-mudell tan-negozju.

(90)

Il-pjan ta’ ristrutturar u l-informazzjoni kumplimentari provduti mill-Ġermanja juru li d-diffikultajiet ta’ HRE kienu l-aktar attribwibbli:

(91)

Kif stabbilit hawn fuq, ir-ristrutturar u l-miżuri ppjanati, li huma relatati primarjament mal-finanzjament tal-bank u s-sistemi ta’ kontroll intern, huma maħsuba biex jiżguraw li l-problemi ta’ likwidità li poġġew lil-bank kważi fil-falliment ma jkunux jistgħu jiġu ripetuti. Il-pjan ta’ ristrutturar jindirizza t-tħassib ewlieni f’mod speċifiku ħafna billi jiffoka fuq kunċett ta’ finanzjament ibbażat fuq Pfandbrief aktar stabbli, billi jnaqqas b’mod konsiderevoli d-dipendenza preċedenti fuq is-suq monetarju interbankarju, billi jtejjeb u jintegra s-sistemi tal-IT tiegħu u billi jnaqqas l-ambitu ġeografiku, in-netwerk ta’ fergħat u d-daqs assolut tan-negozju. Il-waqfien ta’ attivitajiet oħra u t-trattament tagħhom bħala portafoll eżawrit fuq il-karta tal-bilanċ ta’ PBB huwa pass komplementari loġiku għal dak il-kunċett.

(92)

Bħala konsegwenza, iż-żewġ linji tan-negozju li jibqa’ ta’ PBB ser jimmiraw biss lejn assi li huma eliġibbli għall-bonds koperti Ġermaniżi, jew fil-forma ta’ bonds ipotekarji (“Hypothekenpfandbriefe”) jew ta’ bonds tas-settur pubbliku (“öffentliche Pfandbriefe”). L-argument li strateġija kummerċjali aktar konservattiva ta’ dak it-tip għandha twassal għal titjib kwalitattiv tal-attivitajiet tas-self huwa kredibbli, b’mod partikolari fid-dawl tar-rekwiżiti speċifiċi tal-Att dwar il-Pfandbrief Ġermaniż rigward il-ġestjoni, il-monitoraġġ u l-kontroll tar-riskji, u l-miżuri protettivi tiegħu bħal-limiti għall-proporzjon ta’ self għall-valur.

(93)

Fil-premessa 92 tad-Deċiżjoni ta’ estensjoni tal-24 ta’ Settembru 2010 (cf. premessa 15 ta’ din id-Deċiżjoni) il-Kummissjoni esprimiet dubji li l-bank seta’ jikseb marġini suffiċjenti bl-attivitajiet ta’ negozju tal-ġejjieni tiegħu, b’mod partikolari dawk fis-settur tal-finanzi pubbliċi, li huwa karatterizzat b’marġini baxxi. Uħud mill-attivitajiet tal-finanzi tas-settur pubbliku ta’ qabel ta’ HRE, jiġifieri l-attivitajiet FIP, għandhom jitkomplew. Madankollu l-attivitajiet FIP ser jinvolvu biss finanzjament għal prodotti marbuta ma’ investimenti minn klijenti tas-settur pubbliku. Għalhekk dawn jistgħu jiġu distinti mill-attivitajiet tal-finanzi tal-baġit, jiġifieri l-finanzjament mhux impenjat tal-awtoritajiet pubbliċi, li hu karatterizzat b’marġini partikolarment baxxi. Fil-mudell tan-negozju aġġustat l-attivitajiet tal-finanzi tal-baġit ta’ marġini baxx jiġu mwaqqfa (dawn huma ekwivalenti għal madwar 75 % tal-attivitajiet tal-finanzi tas-settur pubbliku ta’ qabel) u l-portafoll li jirriżulta jitpoġġa fil-modalità eżawrita fuq il-karta tal-bilanċ ta’ PBB, sabiex dak it-tħassib tal-Kummissjoni jittaffa. Barra minn hekk, l-impenn mill-Ġermanja li tiżgura li PBB fin-negozju ġdid strateġiku tiegħu ma jikkuntrattax self ġdid li għandu RAROC ta’ anqas minn 10 % fuq bażi ta’ tranżazzjoni unika jgħin jallevja dan it-tħassib.

(94)

Il-Kummissjoni tinnota wkoll li ż-żamma ta’ FIP bħala linja tan-negozju sekondarja ta’ PBB ser tnaqqas it-tħassib tal-atturi tas-suq u l-aġenziji tal-klassifikazzjoni dwar in-nuqqas ta’ diversifikazzjoni min-naħa tal-banek li jirrestrinġi l-attivitajiet tagħhom għal linja tan-negozju unika (magħrufin bħala “banek monolinji”) u għalhekk huma dipendenti wisq fuq qasam tan-negozju uniku. Li jkollu żewġ linji tan-negozju, b’ċikli tan-negozju potenzjalment differenti, għandu jippermetti lil PBB jiżgura dħul aktar stabbli u prevedibbli u jikseb il-viżibbiltà meħtieġa fost l-investituri istituzzjonali.

(95)

Il-kunċett ta’ ristrutturar ser jirriżulta fi struttura organizzazzjonali aktar ċara, peress li attivitajiet marġinali bħal attivitajiet tas-swieq kapitali u tal-ġestjoni tal-assi jitwaqqfu u n-netwerk tal-fergħat jitnaqqas b’mod konsiderevoli. Numru sostanzjali ta’ uffiċċji tal-bejgħ diġà għalqu; skont il-mudell tan-negozju aktar dettaljat u reġjonali, erbgħa minn dawk l-uffiċċji tal-bejgħ (Berlin, Ħamburg, iż-żona tar-Rhine/Ruhr u Stokkolma) ser jinfetħu mill-ġdid.

(96)

Il-pjan ta’ ristrutturar jiżgura li PBB ma jżidx b’mod mhux dovut il-preżenza tiegħu fis-swieq. Is-self il-ġdid jingħata limitu massimu għaż-żewġ linji tan-negozju. Fis-swieq ewlenin rispettivi tiegħu PBB jimmira lejn ishma tas-suq ta’ 1 % sa 2 % bl-attivitajiet FIP tiegħu u 2 % sa 6 % bl-attivitajiet REF tiegħu.

(97)

Il-Kummissjoni tinnota li l-bank beda jindirizza d-dgħufijiet tas-sistema tal-IT tiegħu, li fil-bidu kien pjuttost eteroġenju u serjament defiċjenti, b’mod partikolari fir-rigward tal-funzjonalità u l-applikazzjonijiet tal-ġestjoni tar-riskju. Fl-2009 HRE stabbiliet proġett għall-grupp kollu fuq ħafna snin imsejjaħ “Evoluzzjoni Ġdida” b’baġit ta’ madwar EUR 180 miljun għat-trasformazzjoni tax-xenarju tal-IT. Il-proġett ser ixerred titjib varjat tas-sistema f’sitt rilaxxi suċċessivi. L-ambitu tal-proġett ikopri fost affarijiet oħra titjib operattiv bħall-konsolidazzjoni tas-sistemi ta’ ġestjoni tal-kreditu, titjib relatat mal-ġestjoni tar-riskju tas-sistema tal-IT fir-rigward tar-riskji tal-kreditu, tas-suq u tal-likwidità, l-istandardizzazzjoni tas-sistemi tal-uffiċċju tan-negozjar, u titjib tal-akkuratezza, id-dettall u l-kwalità tal-informazzjoni u tad-dejta. L-informazzjoni pprovduta fuq il-kontenut u l-progress tal-proċess ta’ trasformazzjoni tal-IT tissuġġerixxi li l-problemi inizjali ġew indirizzati f’mod adegwat u jistgħu jissolvew sal-limitu meħtieġ matul il-perjodu ta’ ristrutturar ta’ PBB. Hija l-fehma tal-Kummissjoni li s-sistema tal-IT tal-ġejjieni tkun pjattaforma effiċjenti u funzjonali għall-ġestjoni tar-riskju f’waqtha u prudenti li tkun xierqa għall-proċessi tan-negozju. L-implimentazzjoni sħiħa tagħha hija għalhekk kruċjali.

(98)

Il-likwidità, is-solvenza u l-profitabbiltà ta’ PBB (28) jittieħdu bħala l-indikaturi ewlenin tal-vijabbiltà tal-bank, valutati kemm taħt xenarju bażi kif ukoll taħt xenarju ta’ stress. (29)

(99)

Skont il-pjan ta’ ristrutturar, PBB mhux ser jibqa’ jibbenefika mill-garanziji tal-Istat fuq ir-rifinanzjament tiegħu. PBB madankollu jibqa’ istituzzjoni finanzjata mill-operaturi mingħajr finanzjament ta’ franchise. Dik is-sitwazzjoni hija mitigata bl-istrateġija ta’ PBB li jnaqqas b’mod sinifikanti l-ammont ta’ finanzjament mhux garantit meħtieġ u minflok joħroġ bonds koperti, li huma meqjusin bħala sors ta’ finanzjament aktar stabbli.

(100)

Peress li n-nuqqas ta’ likwidità akut kien wieħed mill-kawżi ewlenin tal-problemi ta’ HRE li fl-aħħar wassal għall-ħtieġa għall-appoġġ tal-Istat, il-pjan ta’ ristrutturar jipprovdi għal riżerva ta’ flus u likwidità xierqa, b’kunsiderazzjoni ta’ kwalunkwe effetti li jistgħu jirriżultaw mir-rekwiżiti ta’ Basel III. Dik ir-riżerva hija l-aktar fil-bidu tal-perjodu ta’ ristrutturar u tiżdied gradwalment maż-żmien. Fix-xenarju bażi r-riżerva ta’ flus u likwidità tkun ta’ madwar [12–17] % tal-karta tal-bilanċ ta’ PBB sal-aħħar tal-2011 u tilħaq livell ta’ madwar [7–17] % sal-aħħar tal-2015. Fix-xenarju ta’ stress ir-riżerva ta’ flus u likwidità taqbeż [7–10] % tal-karta tal-bilanċ ta’ PBB sal-aħħar tal-2011, u tilħaq livell ta’ madwar [7–10] % sal-aħħar tal-2015. Fil-fehma tal-Kummissjoni, is-sitwazzjoni ta’ likwidità tidher li hija xierqa kemm fix-xenarju bażi kif ukoll fix-xenarju ta’ stress.

(101)

Bi proporzjon ta’ kapital tal-Livell 1 (ikkalkulat fuq l-approċċ ibbażat fuq il-klassifikazzjonijiet interni ta’ Basel II) projettat għal 12,9 % fl-aħħar tal-2011 fix-xenarju bażi jew 10,5 % fix-xenarju ta’ stress, PBB huwa biżżejjed kapitalizzat u għandu jissodisfa r-rekwiżiti kapitali minimi matul il-perjodu ta’ ristrutturar. Skont is-suppożizzjonijiet użati fil-pjan ta’ ristrutturar, il-proporzjon ta’ kapital tal-Livell 1 fl-aħħar tal-2015 ser ikun 12,4 % fix-xenarju bażi jew 11,3 % fix-xenarju ta’ stress. Madankollu, id-deklin fil-proporzjon ta’ kapital tal-Livell 1 fix-xenarju bażi huwa prinċipalment minħabba ż-żieda projettata fl-assi peżati għar-riskju li jirriżultaw mit-tkabbir ippjanat u mhux it-telf (fix-xenarju bażi, PBB juri riżultat pożittiv wara t-taxxa bejn l-2011 u l-2015; huwa biss fix-xenarju ta’ stress li PBB ma jilħaqx break-even wara t-taxxa fl-2011 u l-2012).

(102)

Il-profitabbiltà ta’ PBB hija mistennija li titjieb matul il-perjodu ta’ ristrutturar. Skont il-pjan ta’ ristrutturar, fix-xenarju bażi l-profitt nett ta’ PBB wara t-taxxi ser jammonta għal EUR [110–150] fl-2011 u għal EUR [280-320] miljun fl-2015. Fl-2011 dak ir-riżultat jikkorrispondi għal redditu fuq l-ekwità (wara t-taxxi) ta’ biss [3–6] %, iżda fl-aħħar tal-perjodu ta’ ristrutturar fl-2015 jikkorrispondi għal redditu fuq l-ekwità (wara t-taxxi) ta’ [8–11] %. Il-profitabbiltà ta’ mira fix-xenarju bażi tista’ b’hekk titqies sodisfaċenti għal bank li qed isegwi n-negozju ta’ mira fil-pjan ta’ ristrutturar, kemm mill-perspettiva tal-vijabbiltà kif ukoll fid-dawl tar-riprivatizzazzjoni ppjanata ta’ PBB. Skont il-Ġermanja, il-profitti netti ta’ PBB wara t-taxxa jiġu kumpensati bit-telf mis-snin preċedenti. Minħabba t-telf ta’ riport, dan ifisser li PBB għandu jirreġistra telf tal-karta tal-bilanċ (“Bilanzverluste”) sal-201[…] iżda mhux ser jagħmel dan fl-201[…], fil-kuntest tal-fidwa tal-parteċipazzjoni silenzjuża.

(103)

Tabella 1: Previżjoni ta’ profitt u telf ta’ PBB, Standards Internazzjonali għall-Irrappurtar Finanzjarju (IFRS) (xenarju bażi), skont il-pjan ta’ ristrutturar

(104)

Fil-valutazzjoni tal-muturi ewlenin tal-profitabbiltà ta’ PBB, jistgħu jiġu identifikati żewġ sorsi ta’ profitabbiltà: l-ewwel, id-dħul ta’ PBB li joriġina mill-attivitajiet kummerċjali tiegħu ser jiżdied u, it-tieni, l-ispejjeż operattivi ser jonqsu.

(105)

Rigward iż-żieda fid-dħul, il-pjan ta’ ristrutturar jassumi li l-marġini medju fuq is-self jista’ jitjieb, b’mod partikolari permezz tas-sottoskrizzjoni ta’ negozju profittabbli ġdid jew ieħor. Rigward il-linja tan-negozju REF, il-marġini netti kkalkulati għall-portafoli kurrenti huma supponuti li jitjiebu minn [80–100] bps (punti bażiċi) għal [105–120] bps fl-2011, [105–110] bps fl-2012 u [95-100] bps minn hemm ‘il quddiem. Il-linja tan-negozju FIB ser tiġġenera marġini nett ta’ [27-35] bps matul il-perjodu sħiħ ta’ ristrutturar, li huwa titjib konsiderevoli fuq il-marġini nett ta’ [6–12] bps ikkalkulat għall-portafoll eżistenti tal-attivitajiet tal-finanzi tas-settur pubbliku. (30) Dak it-titjib huwa l-aktar minħabba l-fatt li l-attivitajiet tal-finanzi tal-baġit, li huma karatterizzati b’marġini partikolarment baxxi, mhux ser jibqgħu jiġu segwiti.

(106)

Minħabba l-importanza li jiġu garantiti marġini biżżejjed għolja, l-impenn tal-Ġermanja li n-negozju ġdid strateġiku ta’ PBB ma jikkuntrattax self ġdid b’RAROC ta’ anqas minn 10 % fuq bażi ta’ tranżazzjonijiet individwali huwa xieraq u neċessarju.

(107)

Fl-2011 u l-2012, it-tariffi ġġenerati mis-servizzi ta’ ġestjoni tal-assi provduti għal FMS-WM (il-“bank tal-assi ħżiena” ta’ HRE) jirrappreżentaw sors importanti ta’ dħul għall-PBB. Kif stabbilit fl-IAC, sabiex tiġi faċilitata l-attenzjoni tal-bank fuq ir-ritorn tal-vijabbiltà u sabiex jiġu evitati kunflitti ta’ interess possibbli, huwa neċessarju li tiġi żgurata separazzjoni funzjonali u organizzazzjonali ċara bejn il-bank benefiċjarju u l-assi danneġġjati tiegħu. Il-Kummissjoni tifhem li meta l-istituzzjoni ta’ likwidazzjoni ġiet maħluqa ma kienx possibbli, b’mod partikolari għal raġunijiet tekniċi, li r-rabtiet bejn PBB u FMS-WM jinqatgħu immedjatament. Madankollu, dik is-sitwazzjoni teħtieġ tiġi solvuta malajr kemm jista’ jkun. Abbażi ta’ dan, il-Ġermanja impenjat ruħha li PBB jistabbilixxi indipendenza organizzazzjonali sħiħa tas-servizzi relatati u jibqax jipprovdi dawk is-servizzi lil FMS-WM wara t-30 ta’ Settembru 2013. L-istess japplika għar-rifinanzjament ta’ FMS-WM. Dak l-impenn jgħin ukoll biex jiżgura li fuq perjodu medju l-profitabbiltà ta’ PBB tinżamm fiha u ma tibqax ibbażata fuq dħul mit-tariffi relatati mat-trasferiment tal-assi danneġġjati.

(108)

Il-Kummissjoni tinnota li PBB għandu l-intenzjoni li jnaqqas l-ispejjeż operattivi tiegħu b’mod konsiderevoli. Matul il-perjodu ta’ ristrutturar, il-proporzjoni ta’ spejjeż għal dħul ser jitjieb b’mod sinifikanti minn [64–79] % fl-2011 għal [32–42] % fl-2015 fix-xenarju bażi.

(109)

PBB adotta ċertu miżuri ta’ ristrutturar deċiżivi li jaffettwaw il-bażi tal-ispejjeż tiegħu. Għalaq numru konsiderevoli ta’ uffiċċji tal-bejgħ u naqqas il-forza tax-xogħol tiegħu b’madwar 30 % (1 366 impjegat fl-aħħar tal-2010, paragunat ma’ 2 000 impjegat fl-aħħar tal-2007). (31) Filwaqt li dawk il-miżuri ser ikollhom impatt pożittiv fuq l-ispejjeż operattivi fuq perjodu medju u twil, il-proċess ta’ ristrutturar iġib spejjeż straordinarji fuq perjodu qasir, b’mod partikolari għall-ħlasijiet tas-sensji u tal-irtirar bikri, it-tariffi għall-avukati u l-konsulenti, eċċ. Fil-fehma tal-Kummissjoni, is-suppożizzjoni li l-ispejjeż operattivi ser jistabbilizzaw f’livell ferm aktar baxx malli l-proċess ta’ ristrutturar ikun ġie kompletat għalhekk tidher kredibbli.

(110)

Wara t-trasferiment tal-assi danneġġjati lil FMS-WM, li rriżulta fi tnaqqis sinifikanti tal-karta tal-bilanċ, ix-xenarju bażi juri li l-provvedimenti għat-telf mis-self ta’ PBB huma stabbli għall-perjodu ta’ ristrutturar.

(111)

Il-Kummissjoni tqis li l-profitabbiltà fil-mira ta’ PBB hija wkoll biżżejjed robusta kontra s-suppożizzjonijiet li saru fix-xenarju ta’ stress, peress li la l-vijabbiltà tal-bank u lanqas il-prospetti tar-riprivatizzazzjoni ta’ PBB ma huma f’riskju. Skont il-pjan ta’ ristrutturar, fix-xenarju ta’ stress PBB jirreġistra telf ta’ EUR [100–125] miljun fl-2011, iżda fl-aħħar tal-perjodu ta’ ristrutturar fl-2015 PBB huwa mistenni li juri profitti ta’ EUR [270-310] miljun. Ir-redditu fuq l-ekwità (wara t-taxxi) jkun negattiv fl-2011 (– [2,8–3,8] %) u fl-2012, iżda f’dak ix-xenajru r-redditu mistenni fuq l-ekwità fl-2015 jkun kważi [9–12] %.

(112)

Tabella 2: Previżjoni tal-profitt u t-telf ta’ PBB, Standards Internazzjonali għall-Irrappurtar Finanzjarju (IFRS) (xenarju ta’ stress), skont il-pjan ta’ ristrutturar

(113)

Fid-dawl tat-titjib għall-mudell tan-negozju, l-infrastruttura teknika u l-arranġament organizzazzjonali, u l-impatt tagħhom fuq is-sitwazzjoni ta’ PBB rigward il-likwidità, is-solvenza u l-profitabbiltà mistennija, il-Kummissjoni tqis li l-pjan ta’ ristrutturar jissodisfa r-rekwiżiti tal-Komunikazzjoni dwar ir-Ristruttur fir-rigward tar-ritorn tal-vijabbiltà fit-tul.

(114)

Il-Komunikazzjoni dwar ir-Ristrutturar tistipula li l-benefiċjarju għandu jagħmel kontribuzzjoni xierqa għall-ispejjeż tar-ristrutturar. Il-prinċipji huma stabbiliti kif ġej fit-Taqsima 3 tal-Komunikazzjoni dwar ir-Ristrutturar:

(115)

Id-dubji tal-Kummissjoni dwar jekk l-għajnuna hijiex limitata għall-minimu neċessarju għar-ritorn tal-vijabbiltà fit-tul ta’ PBB ġew allevjati. Bħala total il-Ġermanja investiet jew ser tinvesti kważi EUR 10 biljun f’HRE. Parti minn dawk l-injezzjonijiet ta’ kapital, jiġifieri EUR 2,08 biljun, ser jintużaw għar-rikapitalizzazzjoni tal-istituzzjoni ta’ likwidazzjoni FMS-WM, filwaqt li EUR 1,59 biljun oħra ser jiġu trasferiti lil FMS-WM matul ir-ristrutturar. Madwar 63 % tal-kapital ta’ kważi EUR 10 biljun jibqa’ fl-HRE Group.

(116)

PBB huwa l-uniku entità fl-HRE Group li ser iwettaq negozju ġdid fil-ġejjieni u għaldaqstant jipparteċipa b’mod attiv fil-kompetizzjoni. Fix-xenarju bażi l-proporzjonijiet tal-kapital tal-Livell 1 tiegħu (abbażi tal-metodu RBA ta’ Basel II) huma projettati li jkunu 12,9 % fl-aħħar tal-2011, u jonqsu ftit matul il-perjodu ta’ ristrutturar biex jilħqu 12,4 % sal-aħħar tal-2015. Il-pjan ta’ ristrutturar ma jqajjimx dubji li l-bank ser jilħaq ir-rekwiżiti kapitali minimi matul il-perjodu ta’ ristrutturar. Il-proporzjon tal-kapital tal-Livell 1 projettat huwa qawwi, iżda konformi mal-proporzjonijiet ta’ kapital tal-kompetituri. Bħala reazzjoni għall-kriżi finanzjarja, il-banek issa b’mod ġenerali huma mistennija li juru proporzjonijiet ta’ kapital ogħla minn ta’ qabel il-kriżi. Irid jiġi mfakkar ukoll li PBB, minħabba l-problemi tiegħu fil-kriżi, jeħtieġ bażi ta’ kapital soda sabiex jikkonvinċi lill-atturi tas-suq li huwa sieħeb tan-negozju affidabbli. Fil-fehma tal-Kummissjoni, l-ammont ta’ kapital ipprovdut u l-proporzjonijiet ta’ kapital li jirriżultaw għalhekk huma meqjusin adegwati u limitati għall-minimu neċessarju.

(117)

Barra minn hekk, HRE bbenefikat mill-provvista ta’ garanziji li jammontaw għal EUR 145 biljun bħala total, li minnhom EUR 124 biljun attwalment intużaw. Dawk il-garanziji kienu neċessarji sabiex jiġi permess l-operat kontinwu tal-bank meta kien qed jiffaċċja l-insolvenza, tal-anqas sakemm HRE kienet f’pożizzjoni li titrasferixxi l-assi danneġġjati tiegħu lil FMS-WM. Il-garanziji kollha li ntużaw mill-HRE Group, li jammontaw għal total ta’ EUR 124 biljun, ġew trasferiti lil FMS-WM b’effett mill-1 ta’ Ottubru 2010. L-operat ta’ PBB għalhekk ma għadux jiddependi fuq il-garanziji tal-Istat. Dak it-trasferiment għin jiġi żgurat li l-għajnuna fil-forma ta’ garanziji kienet limitata għall-perjodu minimu neċessarju.

(118)

Kif dikjarat fil-Komunikazzjoni dwar ir-Ristrutturar, il-banek benefiċjarji għandhom l-ewwel jużaw ir-riżorsi proprji biex jiffinanzjaw ir-ristrutturar tagħhom, li tipikament isir permezz tal-bejgħ ta’ assi. HRE ttrasferiet parti konsiderevoli tal-assi tagħha billi ttrasferit ammont kunċettwali ta’ madwar EUR 210 biljun ta’ assi kif ukoll EUR 280 biljun ta’ derivattivi lill-istituzzjoni ta’ likwidazzjoni FMS-WM, li b’hekk naqqset effettivament il-karta tal-bilanċ tagħha bin-nofs. Madankollu, dik it-tranżazzjoni ma ħolqot ebda bilanċ pożittiv li seta’ kkontribwixxa għall-finanzjament tal-ispejjeż ta’ ristrutturar. Minflok, it-trasferiment għandu jkun klassifikat bħala miżura ta’ għajnuna mill-Istat fiha nnifisha, peress li l-prezz li HRE rċeviet għall-assi qabeż ir-REV tal-assi b’madwar EUR 16,2 biljun. Madankollu, il-kumpanija biegħet u hija fil-proċess li tbiegħ ħafna parteċipazzjonijiet fil-kumpaniji (eż. Arsago ACM GmbH (Frankfurt), Arsago Holding AG (Svizzera), DEPFA First Albany Securities LLC (New York) u Collineo Asset Management GmbH).

(119)

HRE ħallset l-imgħax lil SoFFin fuq il-garanziji kollha mogħtija mill-Ġermanja, ir-rati tal-imgħax rispettivi li jvarjaw minn 0,5 % sa 0,8 % fis-sena. Għalhekk, f’konfirmità mal-Komunikazzjoni tal-Kummissjoni dwar l-applikazzjoni ta’ regoli dwar l-għajnuna mill-Istat għal miżuri meħuda fir-rigward ta’ istituzzjonijiet finanzjarji fil-kuntest tal-kriżi finanzjarja globali preżenti (33) (“Il-Komunikazzjoni bankarja”), irremunerat b’mod xieraq dik il-parti tal-għajnuna mill-Istat. B’kuntrast, sa issal-bank la rrenumera l-kapital li rċieva u lanqas il-ħelsien tal-kapital li rriżulta mill-miżura tal-ħelsien tal-assi, u mhuwiex kapaċi jiżgura mekkaniżmu xieraq ta’ treġġigħ lura għall-element ta’ għajnuna rċevut fil-forma ta’ valur ta’ trasferiment tal-assi li kien ogħla mir-REV tagħhom.

(120)

Fid-dawl tas-sitwazzjoni ekonomika ġenerali ta’ HRE, jista’ jiġi konkluż li l-bank sempliċement ma kienx f’pożizzjoni li jagħmel ebda kontribuzzjoni siewja ulterjuri proprja għall-ispejjeż ta’ ristrutturar. (34) Għalhekk, in-nuqqas ta’ kontribuzzjoni proprja jrid jiġi kumpensat minn miżuri strutturali partikolarment vasti fil-pjan ta’ ristrutturar, sabiex jiġi żgurat li l-bank u l-azzjonisti tiegħu jaqsmu f’mod adegwat il-piż tas-salvataġġ tal-bank. B’mod ġenerali, il-Kummissjoni tqis li l-ammont ta’ tnaqqis fin-numru tal-impjegati stabbilit fil-pjan ta’ ristrutturar f’termini tad-daqs organizzazzjonali, il-preżenza fis-suq, l-ambitu tal-attivitajiet u d-daqs tal-karta tal-bilanċ huwa, minħabba ċ-ċirkostanzi speċifiċi ta’ dan il-każ, sostitut adegwat għan-nuqqas ta’ kontribuzzjoni proprja xierqa.

(121)

Għandu jiġi mfakkar ukoll li l-bank ittieħed fi sjieda pubblika u li l-kumpens irċevut mill-azzjonisti preċedenti tiegħu kien ibbażat fuq il-valur tal-kumpanija mingħajr l-appoġġ mill-Istat. (35) Dak ir-riżultat huwa element pożittiv mill-perspettiva ta’ għajnuna mill-Istat u jfisser li l-azzjonisti preċedenti ġew ikkanċellati u b’hekk jistgħu jitqiesu bħala li kkontribwixxew b’mod suffiċjenti għall-ispejjeż tar-ristrutturar ta’ HRE.

(122)

Barra minn hekk, fir-rigward tad-detenturi ta’ obbligazzjonijiet subordinati ta’ HRE, il-Ġermanja pprovdiet impenn li HRE mhux ser tagħmel pagamenti diskrezzjonali fuq strumenti finanzjarji relatati mal-profitt lil partijiet terzi, li jiżgura li d-detenturi tal-kapital tal-Livell 2 jieħdu ftit jew xejn kumpens għall-investiment tagħhom u b’hekk jipparteċipaw fil-kondiviżjoni tal-piż fl-istess mod bħad-detenturi tal-kapital tal-Livell 1.

(123)

Il-Kummissjoni għalhekk tikkonkludi li l-azzjonisti ta’ HRE kkontribwew b’mod adegwat għall-ispejjeż ta’ ristrutturar u li bħala konsegwenza r-riskju ta’ periklu morali huwa indirizzat b’mod xieraq.

(124)

Rigward il-miżuri li jillimitaw id-distorsjoni tal-kompetizzjoni, il-Komunikazzjoni dwar ir-Ristrutturar tistabbilixxi li l-Kummissjoni trid tikkunsidra, fil-valutazzjoni tagħha tal-ammont ta’ għajnuna, il-livell ta’ kondiviżjoni tal-piż u l-pożizzjoni li l-istituzzjoni finanzjarja ser ikollha fis-suq wara r-ristrutturar. Abbażi ta’ dik l-analiżi, għandhom jiġu stabbiliti miżuri xierqa.

(125)

Id-distorsjonijiet tal-kompetizzjoni kkawżati minn HRE huma sinifikanti. B’mod ġenerali, l-Istat Ġermaniż ipprovda jew ser jipprovdi għal injezzjonijiet ta’ kapital ta’ HRE li jammontaw għal madwar EUR 9,95 biljun (FMS-WM irċeviet jew ser tirċievi parti minn dak il-kapital) u garanziji ta’ EUR 145 biljun. HRE bbenefikat ukoll minn miżura ta’ ħelsien tal-assi b’element ta’ għajnuna ta’ madwar EUR 20 biljun. Minħabba dak l-appoġġ konsiderevoli mill-Istat, għandu jitwettaq ristrutturar fil-fond ta’ HRE.

(126)

Is-suċċessur ta’ HRE, PBB, ser ikun iffinanzjat sew u meħlus mill-piż tas-self riskjuż li kien sar minn HRE fil-passat. Ammont kbir ta’ għajnuna kien neċessarju sabiex PBB jinżamm fin-negozju u jiġi faċilitat il-qsim. Madankollu, PBB ser ikun bank ferm iżgħar, u miżuri suffiċjenti li jillimitaw kwalunkwe distorsjoni tal-kompetizzjoni ġew stabbiliti mill-Ġermanja.

(127)

L-ewwel, PBB ser ikun entità ekonomika li hija pjuttost differenti mill-HRE ta’ qabel. Dan ittieħed fi sjieda pubblika u fil-preżent huwa soġġett għal ristrutturar fil-fond. Bħala riżultat, PBB huwa bank ferm iżgħar milli kienet HRE. Wara t-trasferiment ta’ serje ta’ assi lil FMS-WM, id-daqs tal-karta tal-bilanċ strateġika ta’ PBB – li ma tikkunsidrax dawk l-entrati tal-karta tal-bilanċ li huma f’modalità eżawrita jew li ġew trasferiti sintetikament lil FMS-WM – huwa ta’ madwar 15 % tal-karta tal-bilanċ ta’ HRE fl-aħħar tal-2008.

(128)

It-tieni, il-Ġermanja pprovdiet lill-Kummissjoni b’diversi impenji li għandhom l-għan li jillimitaw il-preżenza fis-suq ta’ PBB, li ġew deskritti f’aktar dettall fit-Taqsima V. PBB ser ifittex biss negozju ġdid f’żewġ linji tan-negozju, REF u FIP. Dawk iż-żewġ linji tan-negozju għandhom biss spazju limitat għal tkabbir matul il-perjodu ta’ ristrutturar peress li negozju ġdid, id-daqsijiet tal-karta tal-bilanċ u tal-portafolji għandhom kollha jibqgħu f’limiti definiti, li jirrestrinġu effettivament l-abbiltà ta’ PBB li tespandi fis-suq u b’hekk tikkawża distorsjoni tal-kompetizzjoni. Dawk il-limiti massimi fuq it-tkabbir ser jibqgħu fis-seħħ sa tal-anqas il-31 ta’ Diċembru 2013 u potenzjalment aktar jekk PBB ma jiġix riprivatizzat sa dak iż-żmien. L-entitajiet l-oħra kollha ta’ HRE Group għandhom iwaqqfu n-negozju u jeżawrixxu l-portafolji tagħhom, b’mod partikolari l-ġestjoni tal-finanzi tal-infrastruttura, tas-swieq kapitali u tal-assi, u l-attivitajiet relatati mal-finanzi tal-baġit.

(129)

It-tielet, sabiex jiġi sollevat it-tħassib tal-Kummissjoni li PBB jista’ jagħmel ħsara lill-kompetizzjoni u lill-kompetituri permezz ta’ strateġiji ta’ pprezzar aggressivi wisq, il-Ġermanja impenjat ruħha li n-negozju ġdid strateġiku ta’ PBB ma joħroġx self ġdid b’RAROC ta’ anqas minn 10 % fuq bażi ta’ tranżazzjonijiet individwali. Fil-fehma tal-Kummissjoni, dak l-impenn ser ikun miżura oħra effettiva kontra distorsjonijiet mhux dovuti tal-kompetizzjoni.

(130)

Ir-raba’, l-attivitajiet ta’ PBB ser ikunu limitati minn restrizzjonijiet komportamentali li jinkludu projbizzjoni ta’ akkwiżizzjoni u projbizzjoni fuq l-invokazzjoni ta’ appoġġ mill-Istat fir-reklamar tiegħu.

(131)

Fl-aħħar, il-Ġermanja impenjat ruħha wkoll li tirriprivatizza lil PBB malajr kemm jista’ jkun, jiġifieri mhux aktar tard mill-31 ta’ Diċembru 2015. Il-bejgħ ta’ PBB ser jippermetti lir-Repubblika Federali tal-Ġermanja tirkupra (parti minn) l-fondi investiti f’HRE. Barra minn hekk, il-Kummissjoni tinnota li r-riprivatizzazzjoni f’waqtha tista’ tiżgura li l-partijiet terzi jkollhom l-opportunità li jakkwistaw lil PBB.

(132)

Il-Ġermanja impenjat ruħha li l-implimentazzjoni tal-pjan ta’ ristrutturar ta’ HRE u l-implimentazzjoni tal-impenji jkunu monitorjati minn trustee tal-monitoraġġ, li jissottometti rapporti lill-Kummissjoni fuq bażi trimestrali.

(133)

Il-Kummissjoni tikkonkludi li l-miżuri analizzati hawn fuq jikkostitwixxu għajnuna mill-Istat skont l-Artikolu 107(1) TFUE.

(134)

Il-Kummissjoni tikkonkludi wkoll li l-għajnuna għar-ristrutturar hija kompatibbli mas-suq intern skont l-Artikolu 107(3)(b) TFUE soġġett għall-implimentazzjoni tal-pjan ta’ ristrutturar li ġie aġġornat fl-aħħar fl-14 ta’ Ġunju 2011 u soġġett għas-sodisfazzjoni tal-impenji stabbiliti fl-Anness għal din id-Deċiżjoni,