11.5.2011   

MT

Il-Ġurnal Uffiċjali tal-Unjoni Ewropea

L 122/1

(1)

Il-Kummissjoni, bir-Regolament (KE) Nru 194/2009 (2) imponiet dazju kompensatorju provviżorju fuq l-importazzjonijiet tal-bijodiżil li joriġinaw mill-Istati Uniti tal-Amerika (“l-Istati Uniti”).

(2)

Skont ir-Regolament (KE) Nru 598/2009 (3) (“ir-Regolament definittiv”), il-Kunsill impona dazju kompensatorju definittiv ta’ bejn EUR 211,2 u EUR 237 kull tunnellata metrika fuq l-importazzjonijiet tal-bijodiżil, li kif definit fl-Artikolu 1(1) tar-Regolament (“il-prodott ikkonċernat”) joriġinaw fl-Istati Uniti (“il-miżuri eżistenti”). L-investigazzjoni li wasslet għall-adozzjoni tar-Regolament definittiv minn hawn ‘il quddiem hija msemmija bħala l-“investigazzjoni oriġinali.”

(3)

Ta' min jinnota ukoll li bir-Regolament (KE) Nru 599/2009 (4), il-Kunsill impona dazju antidumping definittiv ta’ bejn EUR 0 u EUR 198 kull tunnellata metrika fuq l-importazzjonijiet tal-prodott ikkonċernat.

(4)

Fit-30 ta’ Ġunju 2010, il-Kummissjoni rċeviet talba skont l-Artikolu 23(4) tar-Regolament bażiku biex tinvestiga l-possibbiltà ta’ evażjoni tal-miżuri kompensatorji imposti fuq l-importazzjonijiet tal-prodott ikkonċernat. It-talba tressqet mill-Bord Ewropew tal-Bijodiżil (“EBB” – European Biodiesel Board) f'isem il-produtturi tal-bijodiżil tal-Unjoni.

(5)

It-talba allegat li l-miżuri kompensatorji fuq l-importazzjonijiet tal-prodott ikkonċernat kienu qegħdin jiġu evitati permezz ta’ trasbord mill-Kanada u Singapor, u minn esportazzjonijiet tal-bijodiżil f'taħlita li fiha bil-piż 20 % jew inqas ta’ bijodiżil.

(6)

It-talba allegat li kien hemm bidla sinifikanti fix-xejra tal-kummerċ li tinvolvi l-esportazzjonijiet mill-Istati Uniti, mill-Kanada u minn Singapor wara li ġew imposti l-miżuri fuq il-prodott ikkonċernat, u li ma hemmx raġuni jew ġustifikazzjoni adegwata suffiċjenti ħlief l-impożizzjoni tad-dazju għal din il-bidla. Din il-bidla fix-xejra tal-kummerċ allegatament ġiet mit-trasbord tal-prodott ikkonċernat mill-Kanada u minn Singapor.

(7)

It-talba allegat ukoll li wara l-impożizzjoni tal-miżuri, l-esportazzjonijiet tal-bijodiżil f'taħlitiet li fihom 20 % jew inqas ta’ bijodiżil mill-Istati Uniti kienu bdew jaslu fl-Unjoni, fejn allegatament ħadu vantaġġ mil-limitu fil-kontenut tal-bijodiżil iffissat fid-deskrizzjoni tal-prodott ikkonċernat.

(8)

Barra minn hekk, it-talba allegat li l-effetti ta’ rimedju tal-miżuri kompensatorji eżistenti fuq il-prodott ikkonċernat kienu qegħdin jiġu mminati f'termini ta’ kwantità u ta’ prezz. Ġie allegat li ammonti sinifikanti ta’ importazzjonijiet tal-bijodiżil f'forma pura jew f'taħlita li fiha bil-piż iktar minn 20 % ta’ bijodiżil mill-Kanada u minn Singapor u tal-bijodiżil f'taħlitiet li fihom 20 % jew inqas ta’ bijodiżil, dehru li ħadu post l-importazzjonijiet tal-prodott ikkonċernat. Iktar minn hekk, teżisti biżżejjed evidenza li din iż-żieda fil-volum ta’ importazzjonijiet saret bi prezzijiet ferm taħt il-prezz li ma jikkawżax danni stabbilit fl-investigazzjoni li wasslet għall-miżuri eżistenti.

(9)

Fl-aħħar nett, it-talba allegat li l-prezzijiet tal-prodott ikkonċernat jibqgħu jiġu sussidjati kif stabbilit qabel.

(10)

Hekk kif iddeterminat, wara konsultazzjoni mal-Kumitat Konsultattiv, li hemm biżżejjed evidenza prima facie għall-bidu ta’ investigazzjoni skont l-Artikolu 23 tar-Regolament bażiku, il-Kummissjoni bdiet investigazzjoni bir-Regolament (KE) Nru 721/2010 (5) (“ir-Regolament tal-bidu”). Skont l-Artikolu 24(5) tar-Regolament bażiku, il-Kummissjoni, bir-Regolament tal-bidu, tat ukoll istruzzjonijiet lill-awtorijtajiet tad-dwana biex jirreġistraw l-importazzjonijiet ikkunsinnati mill-Kanada u minn Singapor, kif ukoll importazzjonijiet li joriġinaw fl-Istati Uniti ta’ bijodiżil f'taħlita li fiha bil-piż 20 % jew inqas ta’ esteri monoalkiliċi aċidi xaħmija u/jew nafta paraffinika miksuba minn sinteżi u/jew trattament idriku, li ma joriġinax mill-fossili.

(11)

Il-Kummissjoni bdiet ukoll investigazzjoni parallela bir-Regolament (KE) Nru 720/2010 (6) li tikkonċerna l-possibbiltà ta’ evażjoni ta’ miżuri antidumping fuq importazzjonijiet tal-bijodiżil li joriġinaw mill-Istati Uniti permezz ta’ importazzjonijiet ta’ bijodiżil ikkunsinnati mill-Kanada u minn Singapor u minn importazzjonijiet ta’ bijodiżil f'taħlita li fiha bil-piż 20 % jew inqas ta’ bijodiżil li joriġinaw mill-Istati Uniti.

(12)

Il-Kummissjoni għarrfet uffiċjalment lil awtoritajiet tal-Istati Uniti, tal-Kanada u ta’ Singapor. Ġew mibgħuta kwestjonarji lil produtturi/esportaturi magħrufa fl-Istati Uniti, fil-Kanada u Singapor. Il-partijiet interessati ngħataw l-opportunità li jressqu l-opinjonijiet tagħhom bil-miktub u li jitolbu smigħ fiż-żmien stipulat fir-Regolament ta’ bidu.

(13)

Il-kumpaniji li ġejjin wieġbu għad-domandi tal-kwestjonarju u sussegwentement twettqu żjarat ta’ verifika fl-istabbilimenti tagħhom:

(14)

Barra minn hekk, saru żjarat lill-awtoritajiet kompetenti rilevanti tal-Gvern tal-Kanada u tal-Gvern tas-Singapor.

(15)

Il-perijodu investigattiv kien bejn l-1 ta’ April 2009 sat-30 ta’ Ġunju 2010 (“il-PI”). Id-dejta ġiet miġbura mill-perijodu tal-2008 sal-aħħar tal-PI sabiex jiġi investigat il-bdil allegat fix-xejra tal-kummerċ.

(16)

Il-prodott ikkonċernat mill-possibbiltà ta’ evażjoni, jiġifieri l-prodott maħruġ fl-investigazzjoni oriġinali, huwa esteri monoalkiliċi aċidi xaħmija u/jew nafta paraffinika miksuba minn sinteżi u/jew trattament idriku, ta’ oriġini mhux mill-fossili, magħruf normalment bħala “bijodiżil”, sew jekk f'forma pura jew f'taħlita b'piż ta’ iktar minn 20 % ta’ esteri monoalkiliċi aċidi xaħmija u/jew nafta paraffinika miksuba minn sinteżi u/jew trattament idriku, ta’ oriġini mhux mill-fossili, li bħalissa jaqgħu fil-kodiċi NM ex 1516 20 98, ex 1518 00 91, ex 1518 00 99, ex 2710 19 41, 3824 90 91, ex 3824 90 97, u li joriġina mill-Istati Uniti.

(17)

Il-prodott li jifforma parti miċ-ċirkumvenzjoni għandu żewġ partijiet. L-ewwel nett, fir-rigward tal-allegazzjonijiet ta’ trasbord mill-Kanada u minn Singapor, huwa identiku għall-prodott maħruġ fl-investigazzjoni oriġinali, kif deskritt fil-premessa ta’ qabel. Fir-rigward il-konsenja direttament mill-Istati Uniti, il-prodott investigat huwa bijodiżil f'taħlita li fiha bil-piż 20 % jew inqas ta’ esteri monoalkiliċi aċidi xaħmija u/jew nafta paraffinika miksuba minn sinteżi u/jew trattament idriku, ta’ oriġini mhux mill-fossili, li joriġina mill-Istati Uniti.

(18)

Wara l-impożizzjoni tal-miżuri kompensatorji provviżorji f'Marzu 2009, l-importazzjonijiet tal-prodott ikkonċernat prattikament twaqqfu. It-tabella hawn taħt tagħti taqsira tas-sitwazzjoni:

Importazzjonijiet ta' bijodiżil u ċertu bijodiżil f'taħlitiet fl-Unjoni Ewropea

taħt il-kodiċi NM 3824 90 91 (f’tunnellati)

(19)

Id-dejta tal-Eurostat ta’ hawn fuq tkopri il-bijodiżil kollu li fih 96,5 % jew iktar ta’ esteri.

(20)

Kif imqabbel, l-Istati Uniti tirraporta esportazzjonijiet tal-bijodiżil u tal-bijodiżil f'taħlitiet taħt il-kodiċi HTS 3824 90 40 00 (taħlitiet ta’ sustanzi xaħmija, ta’ oriġini mill-annimali jew veġetali) kif ġej:

Esportazzjonijiet ta' bijodiżil u bijodiżil f'taħlitiet mill-istati uniti

taħt il-kodiċi HTS 3824 90 40 00 (f’tunnellati)

(21)

Meta imqabblin, iż-żewġ tabelli ta’ hawn fuq iwasslu għall-konklużjoni li t-358 291 tunnellata metrika esportati fl-Unjoni waqt il-PI huma taħlitiet ta’ bijodiżil b'kontenut ta’ 96,5 % u inqas.

(22)

Kien hemm livell għoli ta’ koperazzjoni mill-produtturi/esportaturi fil-Kanada. Żewġ produtturi li jirrappreżentaw madwar 90 % tal-produzzjoni tal-bijodiżil fil-Kanada bagħtu tweġiba għall-kwestjonarju u kkooperaw bis-sħiħ fl-investigazzjoni. Barra minn hekk, l-Assoċjazzjoni Kanadiża tal-Fjuwil Rinnovabbli u l-awtoritajiet rilevanti tal-Gvern tal-Kanada kkooperaw fl-investigazzjoni.

(23)

Skont l-Artikolu 23(3) tar-Regolament bażiku, il-valutazzjoni tal-eżistenza ta’ evażjoni għandha tkun magħmula billi jiġi analizzat suċċessivament jekk kienx hemm bidla fix-xejra tal-kummerċ bejn l-Istati Uniti, il-Kanada u l-Unjoni, jekk din il-bidla rriżultatx minn prattika, proċess jew ħidma li għaliha ma kienx hemm raġuni adegwata jew ġustifikazzjoni ekonomika suffiċjenti għajr l-impożizzjoni tad-dazju, jekk kienx hemm evidenza ta’ ħsara jew l-effetti ta’ rimedju tad-dazju kinux qed jiddgħajfu f'termini ta’ prezzijiet u/jew kwantitajiet tal-prodott simili, u li l-prodott simili importat baqax jibbenefika mis-sussidju.

(24)

Importazzjonijiet tal-bijodiżil fl-Istati Uniti naqsu minn 1 487 790 tunnellata metrika fl-2008 għal 381 227 tunnellata metrika fl-2009 u għal kważi żero waqt il-PI.

(25)

Min-naħa l-oħra, skont id-dejta tal-Eurostat, l-importazzjonijiet totali tal-bijodiżil mill-Kanada għall-Unjoni żdiedu b'mod sinifikanti bejn l-2008 u l-PI minn 1 725 tunnellata metrika fl-2008 għal 140 043 tunnellata metrika fl-2009 u 197 772 tunnellata metrika waqt il-PI.

(26)

Ma hemmx dazju applikabbli fuq il-bejgħ tal-bijodiżil bejn l-Istati Uniti u l-Kanada jew restrizzjonijiet ta’ xorta oħra fuq l-importazzjonijiet.

(27)

Skont statistika tal-Istati Uniti, l-esportazzjonijiet tal-bijodiżil mill-Istati Uniti għall-Kanada żdiedu minn 967 tunnellata metrika fl-2008 għal 128 233 tunnellata metrika fl-2009 u 161 841 tunnellata metrika waqt il-PI.

(28)

Tqabbil tal-istatistika tal-esportazzjonijiet ipprovduti mill-awtoritajiet tal-Istati Uniti mal-istatistika tal-importazzjonijiet ipprovduti fuq il-post mill-awtoritajiet tal-Kanada juru diskrepanzi sinifikanti fuq bażi ta’ xahar xahar. Skont l-istatistika tal-Kanada, l-importazzjonijiet tal-bijodiżil tal-Istati Uniti żdiedu minn 11 757 tunnellata metrika fl-2008 għal 18 673 tunnellata metrika fl-2009 u 174 574 tunnellata metrika waqt il-PI.

(29)

Skont l-awtoritajiet tal-Kanada, ma hemmx kodiċi speċifiku biex jiġi ddikjarat il-bijodiżil. Huma nnutaw li l-Kanada u l-Istati Uniti jiskambjaw id-dejta għall-użu tal-importazzjoni bħala d-dejta rispettiva tal-esportazzjoni. Fil-livell ta’ sitt numri, id-dejta tal-importazzjoni tal-Kanada u d-dejta tal-esportazzjoni tal-Istati Uniti għandhom jaqblu, kif fil-fatt kważi jagħmlu taħt HTS 382490. Madankollu, lil hinn mis-sitt numri għandhom sistemi ta’ klassifikazzjoni għalihom. Għandu jkun ukoll innutat li l-istatistika tal-Kanada tkopri biss l-importazzjonijiet li ġew awtorizzati mid-dwana fil-Kanada u mhux l-oġġetti mibgħuta bil-baħar.

(30)

F’konklużjoni, minkejja d-diskrepanzi bejn iż-żewġ sorsi tad-dejta, huwa ċar li l-esportazzjoni tal-bijodiżil mill-Istati Uniti għall-Kanada żdiedet mill-2008 sal-PI, b'mod partikolari wara l-impożizzjoni tal-miżuri kompensatorji. Is-suq tal-bijodiżil tal-Kanada bħalissa mhux kapaċi jassorbi dawn il-kwantitajiet ta’ bijodiżil. Produtturi tal-bijodiżil tal-Kanada ġenwini huma nfatti orjentati lejn l-esportazzjoni.

(31)

Iż-żewġ produtturi fil-Kanada li kkooperaw ma għamlu l-ebda xiri ta’ bijodiżil mill-Istati Uniti jew minn sorsi oħrajn waqt il-PI.

(32)

Il-produzzjoni tal-bijodiżil fil-Kanada hija industrija minuri. Xi sitt faċilitajiet tal-produzzjoni kienu f'posthom waqt il-PI, imma ż-żewġ faċilitajiet fil-Lvant tal-Kanada, li huma fil-fatt posseduti u amministrati miż-żewġ produtturi li kkooperaw, waħidhom iwieġbu għal madwar 90 % tal-produzzjoni totali.

(33)

Mill-volumi ta’ produzzjoni mibjugħa mill-produtturi li kkooperaw, il-bejgħ fejn il-konsumaturi aħħarin kienu żgur fl-Amerika ta’ Fuq, jiġifieri fl-Istati Uniti jew il-Kanada, ġie determinat. Il-kumplament tal-bejgħ ġie mibjugħ lil konsumaturi li jew innegozjaw l-oġġetti u/jew ħalltu l-oġġetti ma’ bijodiżil ieħor. Iż-żewġ kumpaniji ma kinux jafu jekk il-konsumaturi bigħux il-prodotti lill-Unjoni bħala bijodiżil tal-Kanada, jekk ħalltuhx, jew jekk il-bijodiżil ġiex mibjugħ lil konsumatur aħħari fl-Istati Uniti jew fil-Kanada.

(34)

Anki jekk f'każ estrem kien preżunt li l-bijodiżil tal-Kanada ġenwin spiċċa kollu fl-Unjoni, dan iwieġeb biss għal 20 % tal-importazzjonijiet totali fl-Unjoni mill-Kanada waqt il-PI.

(35)

Ir-rikonċiljazzjoni tal-istatistika mad-dejta miksuba mill-produtturi li kkooperaw uriet li l-produtturi tal-bijodiżil tal-Kanada ma setgħux ipproduċew il-volum esportat mill-Kanada għall-Unjoni. Għalhekk dan jissuġġerixxi b'mod qawwi li ż-żieda f'daqqa fl-importazzjoni mill-Kanada fl-Unjoni hija relatata mal-esportazzjonijiet tal-bijodiżil fl-Istati Uniti kkunsinnati mill-Kanada.

(36)

It-tnaqqis globali fl-esportazzjonijiet tal-Istati Uniti għall-Unjoni sa mill-2008 u ż-żieda parallela tal-esportazzjonijiet mill-Kanada għall-Unjoni u tal-esportazzjonijiet mill-Istati Uniti għall-Kanada wara l-impożizzjoni tal-miżuri oriġinali jistgħu għalhekk jitqiesu bħala bidla fix-xejra tal-kummerċ.

(37)

L-investigazzjoni ma ħarġet għad-dawl l-ebda raġuni adegwata jew ġustifikazzjoni ekonomika oħra għat-trasbord ħlief l-evitar tal-ħlas tad-dazju kompensatorju fis-seħħ fuq il-bijodiżil li joriġina mill-Istati Uniti.

(38)

Id-dejta tal-Eurostat intużat biex jiġi vvalutat jekk il-prodotti importati, f'termini ta’ kwantitajiet, dgħajfux l-effetti ta’ remedju tal-miżuri kompensatorji fis-seħħ fuq l-importazzjonijiet tal-bijodiżil mill-Istati Uniti. Il-kwantitajiet u l-prezzijiet tal-esportazzjonijiet mill-Kanada ġew imqabbla mal-livell ta’ eliminazzjoni tad-danni stabbilit fl-investigazzjoni oriġinali.

(39)

Kif imsemmi hawn fuq, l-importazzjonijiet mill-Kanada għall-Unjoni żdiedu minn 1 725 tunnellata metrika fl-2008 għal 197 772 tunnellata metrika waqt il-PI, bl-aħħar wieħed jirrappreżenta sehem ta’ importazzjonijiet ta’ 9,2 %. Iż-żieda fl-importazzjonijiet mill-Kanada, ma setgħetx tiġi kkunsidrata bħala insinifikanti meta jitqies id-daqs tas-suq tal-Unjoni kif determinat fl-investigazzjoni oriġinali. Meta wieħed iqis il-livell tal-prezzijiet mingħajr dannu stabbilit fl-investigazzjoni oriġinali, l-importazzjonijiet tal-Kanada għall-Unjoni waqt il-PI urew twaqqigħ fil-bejgħ ta’ 50 % fir-reġjun, filwaqt li l-prezz tal-bejgħ tal-produtturi tal-Unjoni twaqqa' b'madwar 40 %.

(40)

Għalhekk ġie konkluż li l-miżuri qegħdin jiġu mminati f'termini ta’ kwantitajiet u prezzijiet.

(41)

Fir-rigward tas-sussidjar għandu jiġi nnutat li t-taxxa ta’ kreditu tal-bijodiżil tal-Istati Uniti, l-iskema ewlenija ta’ sussidju misjuba fl-investigazzjoni oriġinali, reġgħet iddaħħlet retroattivament f'Diċembru 2010. Fuq din il-bażi ġie konkluż li l-prodott simili importat xorta bbenefika mis-sussidji waqt il-PI.

(42)

L-investigazzjoni kkonkludiet li t-taxxi kompensatorji definittivi imposti fuq l-importazzjonijiet tal-bijodiżil li joriġinaw mill-Istati Uniti ġew evitati permezz tat-trasbord mill-Kanada skont l-Artikolu 23 tar-Regolament bażiku.

(43)

Żewġ negozjanti misjuba Singapor ikkooperaw fl-investigazzjoni. Barra minn hekk, kien hemm kooperazzjoni mill-awtoritajiet rilevanti tal-Gvern tas-Singapor.

(44)

Il-kriterji tal-ivvalutar tal-eżistenza ta’ ċirkumvenzjoni ġew deskritti fil-premessa (23) hawn fuq.

(45)

Skont iċ-ċifri tal-Eurostat, l-esportazzjonijiet totali tal-bijodiżil minn Singapor għall-Unjoni żdiedu minn 179 tunnellata metrika fl-2008 għal 20 486 tunnellata metrika fl-2009 u għal 32 078 tunnellata metrika waqt il-PI. L-esportazzjonijiet mill-Istati Uniti għas-Singapor żdiedu ukoll fl-istess perijodu.

(46)

Skont l-awtoritajiet rilevanti tal-Gvern ta’ Singapor, il-bijodiżil prodott lokalment huwa mibjugħ l-iktar ġewwa s-Singapor sabiex jipprovdi għad-domanda domestika. Madankollu, huma nnutaw tkabbir tal-industrija fis-Singapor bil-bini riċenti ta’ faċilitajiet ta’ produzzjoni ġodda.

(47)

L-esportazzjonijiet minn Singapor kienu tradizzjonalment baxxi. L-importazzjonijiet tal-bijodiżil għall-Unjoni ġew eżaminati mill-qrib fil-bażi tad-dejta tal-Artikolu 14(6) u ċċekkjati mill-awtoritajiet tad-dwana nazzjonali rilevanti. Jidher li l-importazzjonijiet li waslu kienu ftit iżda fi kwantitajiet kbar. L-analiżi uriet li l-maġġoranza ta’ dawn l-importazzjonijiet kienu ġenwinament ta’ oriġini minn Singapor. Madankollu, ma setax jingħata rendikont tal-importazzjonijiet kollha.

(48)

Meta mqabbla mal-konsum tal-Unjoni stabbilit fl-investigazzjoni oriġinali, il-volumi importati minn Singapor għall-Unjoni li ma setgħux jingħataw rendikont instabu li kienu baxxi ħafna. Barra minn hekk, is-sehem tagħhom mill-konsum tal-Unjoni huwa ta’ ftit importanza meta wieħed iqis l-istima tal-Bord Ewropew tal-Bijodiżil dwar iż-żieda konsiderevoli fil-konsum tal-Unjoni sa mill-investigazzjoni oriġinali.

(49)

Fid-dawl ta’ dan ta’ hawn fuq jista' jiġi konkluż li l-effetti ta’ rimedju tal-miżuri kompensatorji ma ddgħajfux f'termini ta’ kwantitajiet minn Singapor.

(50)

Fir-rigward tat-trasbord, huwa magħruf sew li s-Singapor huwa l-fulkru tal-ġarr bil-baħar fl-Asja, fejn vapuri reġjonali jaslu u jħottu l-oġġetti li wara jerġgħu jitgħabbew fuq vapuri li jsalpaw, fost oħrajn, lejn l-Ewropa. F'din l-investigazzjoni, wieħed min-negozjanti li kooperaw ittrasborda l-bijodiżil ta’ oriġini mill-Malasja jew mill-Indoneżja, minn Singapor, b'destinazzjoni finali fl-Unjoni. Waqt il-PI, dan in-negozjant waħdu esporta kwantità sinifikanti ta’ bijodiżil lejn l-Unjoni vija trasbord fis-Singapor, u d-dwana għaddew il-bijodiżil fl-Unjoni bħala ta’ oriġini mill-Malasja jew mill-Indoneżja. Il-verifika ma kixfitx indikazzjonijiet li jqiegħdu fid-dubju l-oriġini ddikjarata mill-Indoneżja u l-Malasja.

(51)

Fid-dawl ta’ dan, l-investigazzjoni li tikkonċerna l-possibbiltà ta’ evażjoni tal-miżuri kompensatorji permezz ta’ importazzjonijiet tal-bijodiżil ikkunsinnati minn Singapor, għandha tiġi mwaqqfa.

(52)

Ħames produtturi tal-bijodiżil jew bijodiżil f'taħlitiet fl-Istati Uniti kkooperaw fl-investigazzjoni. Tlieta minnhom ġew inklużi fil-kampjun tal-investigazzjoni oriġinali. Il-Gvern tal-Istati Uniti kkoopera billi pprovda statistika dwar l-esportazzjonijiet u l-interpretazzjoni tagħhom dwar din l-istatistika.

(53)

It-tlett produtturi li ġew inklużi fil-kampjun tal-investigazzjoni oriġinali waqfu jesportaw il-bijodiżil wara l-impożizzjoni tal-miżuri definittivi.

(54)

Waħda biss mill-ħames kumpaniji li kkooperaw, BP North America, li ma kkooperatx fl-investigazzjoni oriġinali, esportat bijodiżil f'taħlitiet li fihom bil-piż 20 % jew inqas ta’ bijodiżil (“taħlitiet ta’ B20 jew inferjuri”) lill-Unjoni waqt il-PI.

(55)

Il-Bord Nazzjonali tal-Bijodiżil (“NBB” – National Biodiesel Board), li jirrappreżenta l-industrija tal-bijodiżil fl-Istati Uniti, argumenta li prodott li skont huma kien espliċitament barra mill-ambitu tal-prodott tal-miżuri eżistenti, ma jistax ikun soġġett għall-miżuri kompensatorji mingħajr investigazzjoni de novo kontra s-sussidji. In-NBB argumenta li r-Regolament definittiv stabbilixxa f'termini espliċiti “il-prodott ikkonċernat” u “il-prodott simili” fil-livell tal-bijodiżil u tal-bijodiżil f'taħlitiet li jikkorrispondu għal iktar minn 20 %. Skont in-NBB, dan ma kienx limitu artifiċjali imma kien jikkorrispondi mar-realtà tas-suq li ħarġet waqt l-investigazzjoni oriġinali. Pereżempju instab li dan il-limitu ta’ 20 % kien xieraq biex jippermetti distinzjoni ċara bejn it-tipi varji ta’ taħlitiet li kienu disponibbli fis-suq tal-Istati Uniti.

(56)

Skont in-NBB u partijiet interessati oħra, investigazzjoni kontra ċ-ċirkumvenzjoni tista' biss testendi l-miżuri kompensatorji fuq prodott ikkonċernat għal prodott simili, jiġifieri prodott b'tibdil żgħir meta kkumparat mal-prodott ikkonċernat. Mill-ġdid, in-NBB argumenta li fir-Regolament definittiv, il-Kunsill stess stabbilixxa li l-bijodiżil f'taħlitiet b'volum ta’ bijodiżil ta’ 20 % jew iktar mhuwiex prodott simili. Għalhekk, skont in-NBB, fl-istruttura tad-dispożizzjonijiet tar-Regolament bażiku ma hemm l-ebda għazla oħra ħlief li tinbeda investigazzjoni ġdida sabiex tiddetermina jekk dawn it-taħlitiet għandhomx ikunu soġġetti għall-miżuri.

(57)

Bi tweġiba għal dawn l-argumenti, ta’ min jinnota qabel xejn li l-għan tad-dispożizzjonijiet kontra ċ-ċirkumvenzjoni fl-Artikolu 23 tar-Regolament bażiku huwa li jikkontrobattu attentati allegati biex jiġu evitati l-miżuri fis-seħħ. Jekk teżisti biżżejjed evidenza prima facie li turi li ċ-ċirkumvenzjoni qed isseħħ fit-tifsira tal-Artikolu 23(3) tar-Regolament bażiku, il-Kummissjoni tibda investigazzjoni sabiex tiddetermina jekk hux qed issir iċ-ċirkumvenzjoni. Skont l-Artikolu 23(3) tar-Regolament bażiku, il-valutazzjoni tal-eżistenza ta’ ċirkumvenzjoni għandha tiġi magħmula, pereżempju, billi jiġi analizzat suċċessivament jekk kienx hemm bidla fix-xejra tal-kummerċ bejn l-Istati Uniti u l-Unjoni, jekk din il-bidla tirriżultax minn prattika, proċess jew ħidma li għaliha ma kienx hemm raġuni adegwata jew ġustifikazzjoni ekonomika suffiċjenti għajr l-impożizzjoni tad-dazju, u jekk kienx hemm evidenza ta’ ħsara jew jekk l-effetti ta’ rimedju tad-dazju kienux qed jiddgħajfu f'termini ta’ prezzijiet u/jew kwantitajiet.

(58)

Għandu jiġi mfakkar li investigazzjoni kontra ċ-ċirkumvenzjoni mhix analiżi tal-ambitu tal-prodott ibbażata fuq l-Artikolu 19 tar-Regolament bażiku u ma tbiddilx id-definizzjoni tal-prodott ikkonċernat u l-prodott simili. Id-dispożizzjonijiet taħt Artikolu 23 tar-Regolament bażiku jipprovdu għall-bażi legali rilevanti għal investigazzjoni dwar jekk hemmx evażjoni fir-rigward tal-prodott soġġett għall-miżuri.

(59)

F’dan ir-rigward, it-talba li l-Kummissjoni rċeviet skont l-Artikolu 23(4) tar-Regolament, allegat li wara l-impożizzjoni tal-miżuri, l-esportazzjonijiet tal-bijodiżil f'taħlitiet li fihom 20 % jew inqas ta’ bijodiżil mill-Istati Uniti kienu bdew jaslu fl-Unjoni, fejn allegatament ħadu vantaġġ mil-limitu fil-kontenut tal-bijodiżil iffissat fid-deskrizzjoni tal-prodott ikkonċernat u l-prodott simili. L-investigazzjoni eżaminat jekk din il-prattika għandhiex tiġi kkunsidrata bħala evażjoni skont id-dispożizzjonijiet tal-Artikolu 23 tar-Regolament bażiku. Fl-aħħar nett, għandu jiġi nnutat li l-allegata evażjoni tal-prattiki għandha tiġi eżaminata biss taħt l-Artikolu 23 tar-Regolament bażiku.

(60)

Kif imsemmi fil-premessa (20), il-kodiċi HTS 3824 90 40 00 tal-Istati Uniti fih taħlitiet b'kontenut ta’ bijodiżil ta’ 96,5 % u inqas. Skont l-istatistika dwar l-esportazzjoni tal-Istati Uniti, waqt il-PI ġiet esportata il-kwantità totali ta’ 358 291 tunnellata metrika ta’ dan it-tip ta’ taħlita għall-Unjoni.

(61)

Waqt il-PI, BP Products North America (“BPNA”) esportat proporzjon sinifikanti tal-kwantità msemmija hawn fuq.

(62)

BPNA ma pparteċipatx fl-investigazzjoni oriġinali minħabba li bdiet l-attivitajiet tagħha tal-bijodiżil fil-bidu tal-2009, qabel it-tkabbir b'antiċipazzjoni ta’ suq tal-bijodiżil attiv fil-futur b'rispons għall-mandati tal-gvern kemm fl-Istati Uniti u kemm barra. BPNA bdiet tesporta lejn l-Unjoni f'Diċembru 2009. F'dan ir-rigward, huwa mfakkar li l-miżuri ġew imposti f'Lulju 2009.

(63)

Fl-Unjoni, BP bigħet bijodiżil ta’ orġini mill-Istati Uniti f'taħlita li fiha bil-piż 15 % jew iktar inferjuri ta’ bijodiżil (“B15”) fir-Renju Unit, fi Franza u fil-Pajjiżi l-Baxxi. Fil-każijiet kollha, il-prodott huwa imħallat aktar sabiex jirrispetta l-leġiżlazzjoni rilevanti fis-seħħ f'xi Stati Membri biex jippromwovi l-konsum ta’ bijodiżil fil-pompa għaliex bħalissa huwa kkunsidrat bħala sostenibbli għall-ambjent.

(64)

BPNA argumentat li t-taħlitiet ta’ inqas minn 15 % mhumiex prodott simili għall-prodott ikkonċernat. Il-karatteristiċi u r-realtajiet tas-suq huma differenti ħafna. Il-loġistika involuta (inklużi restrizzjonijiet fit-trasport ta’ merkanzija bil-baħar) fil-produzzjoni u importazzjoni ta’ taħlitiet baxxi hija differenti ħafna minn dik ta’ gradi ogħla Skont BPNA, meta wieħed iġorr taħlitiet ta’ inqas minn 15 %, dawn il-prodotti huma klassifikati bħala prodott tal-petroleum għat-trasport għal kuntrarju ta’ prodott kimiku li jrendi t-trasportazzjoni irħas. BPNA argumentat ukoll li hemm differenzi fl-prestazzjoni bejn il-bijodiżil f'taħlitiet ta’ grad għoli u dak baxx meta użat f'magni tad-diżil.

(65)

L-għan tal-investigazzjoni fir-rigward taċ-ċirkumvenzjoni huwa li jiġi stabbilit jekk il-bijodiżil f'taħlita li fiha bil-piż 20 % jew inqas ta’ bijodiżil evitax il-miżuri fis-seħħ. Jista jkun il-każ li taħlitiet baxxi jattiraw spejjeż irħas tat-trasportazzjoni. Madankollu, ta’ min jinnota li taħlitiet ta’ B20 u inferjuri huma effettivi biss f'kompożizzjoni differenti tat-taħlita, meta mqabblin mal-proċess ta’ produzzjoni ta’ bijodiżil f'taħlitiet ta’ iktar superjuri minn B20. Biex tbiddel il-kompożizzjoni tat-taħlita huwa proċess sempliċi. Huwa maħsub li taħlitiet ta’ B20 u inferjuri huma biss tibdila żgħira fil-prodott ikkonċernat, bl-unika differenza tkun il-proporzjon ta’ bijodiżil fit-taħlita. Ta' min jinnota li l-prodott ikkonċernat, kif ukoll taħlitiet ta’ B20 u inferjuri huma destinati finalment għall-istess użi fl-Unjoni. Barra minn hekk, il-bijodiżil f'taħlitiet ta’ B20 u inferjuri, kif ukoll bijodiżil f'taħlitiet ta’ iktar superjuri minn B20, għandhom l-istess karatterstiċi essenzjali.

(66)

Importazzjonijiet tal-prodott ikkonċernat mill-Istati Uniti naqsu minn 1 487 790 tunnellata metrika fl-2008 għal 381 227 tunnellata metrika fl-2009 u għal kważi żero waqt il-PI.

(67)

F’dan ir-rigward, ta’ min jinnota li għalkemm kien hemm taħlit obbligatorju ta’ pereżempju B5 fl-Unjoni waqt l-investigazzjoni oriġinali, l-esportazzjonijiet ta’ taħlitiet ta’ B20 u inferjuri mill-Istati Uniti għall-Unjoni bdew iseħħu biss wara l-impożizzjoni tal-miżuri definittivi. Waqt l-investigazzjoni oriġinali, il-biċċa l-kbira tal-esportazzjonijiet ta’ taħlitiet ta’ B99,9 ġew esportati għall-Unjoni skont id-dejta meħuda mill-kampjun tal-produtturi esportaturi li kkooperaw. Ir-raġuni għal dan kienet li żied is-sussidju fuq il-prodotti esportati (1$ taxxa ta’ kreditu tal-bijodiżil kull gallun).

(68)

Huwa għalhekk diffiċli biex tara x'tista' tkun il-ġustifikazzjoni ekonomika biex jibdew jiġu esportati taħlitiet ta’ B20 u inferjuri, ħlief l-evażjoni tal-miżuri kompensatorji fis-seħħ.

(69)

Il-proporzjon ta’ bijodiżil f'taħlita għadu jiġi ssussidjat u l-importatur qed jevita l-ħlas tad-dazju kompensatorju mistħoqq. F'dan ir-rigward, ta’ min jinnota li d-dazju kompensatorju fuq it-taħlitiet huwa applikabbli proporzjonalment għall-bijodiżil f'taħlita, jiġifieri fil-każ ta’ importazzjonijiet ta’ taħlitiet ta’ B15 id-dazju kompensatorju mhux imħallas ikun ta’ madwar EUR 35 kull tunnellata metrika.

(70)

Skont BPNA, il-ħolqien ta’ bijodiżil ta’ iktar inferjuri minn taħlitiet ta’ B15 ma sarx speċifikament biex jiġi evitat id-dazju. Il-kumpanija sostniet li hija ma ħaditx sehem fl-investigazzjoni oriġinali għax bdiet l-attivitajiet tagħha tal-bijodiżil fil-bidu tal-2009, b'antiċipazzjoni ta’ suq tal-bijodiżil attiv fil-futur b'rispons għall-mandati tal-gvern kemm fl-Istati Uniti u kemm barra. L-istruttura speċifika tal-kumpanija, l-attività tagħha bħala kumpanija tal-petroleum u l-preżenza loġistika tagħha fl-Istati Uniti, għamlu t-taħlit fl-Istati Uniti u l-esportazzjoni għall-Unjoni, deċiżjoni kummerċjali loġika. It-taħlita esportata kienet dejjem ta’ B15 u inferjuri, minħabba l-miżuri ta’ sigurtà inqas stretti: sa B15, skont ir-regolamenti marittimi, it-taħlita titqisx bħala prodott kimiku.

(71)

Ta' min jinnota li l-attività tal-kumpanija fir-rigward tal-esportazzjoni għall-Unjoni bdiet biss wara l-impożizzjoni tal-miżuri. Huwa kkunsidrat li ma hemmx raġuni adegwata jew ġustifikazzjoni ekonomika suffiċjenti għajr l-evitar tal-ħlas tad-dazju kompensatorju fis-seħħ fuq il-bijodiżil li joriġina mill-Istati Uniti.

(72)

Meta wieħed jqis il-livell tal-prezzijiet mingħajr dannu tal-investigazzjoni oriġinali, l-importazzjonijiet tal-Istati Uniti ta’ taħlitiet ta’ B20 u inferjuri għall-Unjoni waqt il-PI urew kemm twaqqigħ fil-prezz kif ukoll bejgħ taħt il-prezz. L-esportazzjonijiet ta’ taħlitiet ta’ B20 u inferjuri bdew isiru biss wara l-impożizzjoni tal-miżuri definittivi, u l-kwantitajiet involuti huma sinifikanti.

(73)

Għalhekk ġie konkluż li l-miżuri qegħdin jiġu mminati f'termini ta’ kwantitajiet u prezzijiet.

(74)

Fir-rigward tas-sussidjar ta’ min jinnota li t-taxxa ta’ kreditu tal-bijodiżil tal-Istati Uniti, l-iskema ewlenija ta’ sussidju misjuba fl-investigazzjoni oriġinali, reġgħet iddaħħlet retroattivament f'Diċembru 2010. Fuq din il-bażi ġie konkluż li l-prodott simili importat xorta bbenefika mis-sussidji waqt il-PI.

(75)

L-investigazzjoni kkonkludiet ukoll li d-dazju kompensatorju definittiv impost fuq l-importazzjonijiet ta’ bijodiżil li joriġinaw mill-Istati Uniti ġew evitati permezz ta’ importazzjonijiet għall-Unjoni ta’ bijodiżil f'taħlita li fiha bil-piż 20 % jew inqas ta’ bijodiżil.

(76)

Ġie konkluż li l-unika ġustifikazzjoni ekonomika għall-esportazzjoni ta’ taħlitiet ta’ B20 u inferjuri ġiet imqanqla mis-sussidju fl-Istati Uniti minn naħa, u l-evitar tal-ħlas ta’ dazju kompensatorju meta timporta fl-Unjoni min-naħa l-oħra.

(77)

BPNA talbet għal eżenzjoni mill-miżuri estiżi possibli. Madankollu, minħabba li l-investigazzjoni uriet biċ-ċar li l-importazzjonijiet ta’ taħlitiet ta’ B20 u inferjuri bdew isiru biss sabiex jiġu evitati l-miżuri fis-seħħ, din l-eżenzjoni ma setgħetx tingħata. Skont id-dispożizzjonijiet tal-Artikolu 23(6) tar-Regolament bażiku, eżenzjonijiet jistgħu jingħataw biss lil produtturi tal-prodott ikkonċernat li jistgħu juru li mhumiex relatati mal-ebda produttur soġġett għall-miżuri u li mhumiex involuti fi prattiki ta’ ċirkumvenzjoni. F'dawn l-investigazzjonijiet instab li BPNA hija nvoluta fi prattiki ta’ evażjoni billi bdiet tesporta taħlitiet ta’ B20 u inferjuri wara l-impożizzjoni tal-miżuri kompensatorji u antidumping mingħajr raġuni adegwata jew ġustifikazzjoni ekonomika suffiċjenti għajr l-impożizzjoni tal-miżuri. Barra minn hekk, hemm evidenza li l-effetti tal-miżuri qegħdin jiġu mminati f'termini ta’ prezzijiet u kwantitajiet, u li l-prodott importat għadu jiġi sussidjat.

(78)

Uħud mill-produtturi tal-bijodiżil li kkooperaw fl-investigazzjoni oriġinali talbu għal eżenzjonijiet minn xi miżuri estiżi minħabba ċirkumvenzjoni. Instab li dawn il-produtturi mill-Istati Uniti ma pproduċewx jew ma bigħux bijodiżil ta’ taħlitiet ta’ B20 u inferjuri. Skont l-Artikolu 23(6) tar-Regolament bażiku, it-talba għal eżenzjoni mill-produtturi biss tista' tiġi kkunsidrata waqt l-investigazzjoni kontra ċ-ċirkumvenzjoni. Madankollu, ta’ min jinnota li Artikolu 23 tar-Regolament bażiku fih dispożizzjonijiet ġodda.

(79)

Fid-dawl ta’ dan ta’ hawn fuq, ġie konkluż li d-dazju kompensatorju definittiv impost fuq l-importazzjonijiet tal-bijodiżil li joriġinaw fl-Istati Uniti ġie evitat permezz ta’ trasbord mill-Kanada skont l-Artikolu 23 tar-Regolament bażiku.

(80)

Skont l-ewwel sentenza tal-Artikolu 23(1) tar-Regolament bażiku, il-miżuri fis-seħħ fuq l-importazzjonijiet tal-prodott ikkonċernat li joriġinaw fl-Istati Uniti, għandhom għalhekk jiġu estiżi għall-importazzjonijiet tal-istess prodott ikkunsinnati mill-Kanada, kemm jekk iddikjarati li joriġinaw mill-Kanada u kemm jekk le.

(81)

Sabiex tiġi evitata l-evażjoni tad-dazju minn allegazzjonijiet mhux ivverifikati li l-prodott li nġarr bil-baħar mill-Kanada ġie magħmul minn kumpanija soġġetta għal dazju individwali fir-Regolament definittiv, il-miżura li għandha tiġi estiża għandha tkun dik stabbilita għall-“Kumpaniji l-oħra kollha” fl-Artikolu 1(2) tar-Regolament (KE) Nru 598/2009, dik ta’ dazju kompensatorju definittiv ta’ EUR 237 kull tunnellata metrika.

(82)

Id-dazju kompensatorju fuq it-taħlitiet għandu jkun applikabbli, proporzjonalment, fit-taħlita, bil-piż, tal-kontenut totali ta’ esteri monoalkiliċi aċidi xaħmija u nafta paraffinika miksuba minn sinteżi u/jew trattament idriku, ta’ oriġini mhux mill-fossili (il-kontenut tal-bijodiżil).

(83)

Skont l-Artikoli 23(4) u 24(5) tar-Regolament bażiku, li jistipulaw li kull miżura estiża għandha tapplika għall-importazzjonijiet li daħlu fl-Unjoni skont ir-reġistrazzjoni imposta mir-Regolament tal-bidu, għandhom jinġabru d-dazji fuq dawk l-importazzjonijiet irreġistrati kkunsinnati mill-Kanada.

(84)

Fid-dawl ta’ dan ta’ hawn fuq, ġie konkluż li d-dazju kompensatorju definittiv impost fuq l-importazzjonijiet ta’ bijodiżil li joriġinaw fl-Istati Uniti ġie evitat permezz ta’ importazzjonijiet għall-Unjoni ta’ taħlitiet ta’ B20 u inferjuri skont l-Artikolu 23 tar-Regolament bażiku.

(85)

Skont l-ewwel sentenza tal-Artikolu 23(1) tar-Regolament bażiku, il-miżuri fis-seħħ fuq l-importazzjonijiet tal-prodott ikkonċernat li joriġinaw mill-Istati Uniti għandhom għalhekk jiġu estiżi għall-importazzjonijiet ta’ taħlitiet ta’ B20 u inferjuri.

(86)

Il-miżuri li għandhom jiġu estiżi għandhom ikunu dawk stabbiliti fl-Artikolu 1(2) tar-Regolament (KE) Nru 598/2009.

(87)

Id-dazju kompensatorju fuq it-taħlitiet li ġie estiż għandu jkun applikabbli, proporzjonalment, fit-taħlita, bil-piż, tal-kontenut totali ta’ esteri monoalkiliċi aċidi xaħmija u nafta paraffinika miksuba minn sinteżi u/jew trattament idriku, ta’ oriġini mhux mill-fossili (il-kontenut tal-bijodiżil).

(88)

Skont l-Artikoli 23(4) u 24(5) tar-Regolament bażiku, li jistipulaw li kull miżura estiża għandha tapplika għall-importazzjonijiet li daħlu fl-Unjoni skont ir-reġistrazzjoni imposta mir-Regolament tal-bidu, għandhom jinġabru d-dazji fuq dawk l-importazzjonijiet ta’ taħlitiet ta’ B20 u inferjuri li joriġinaw fl-Istati Uniti.

(89)

Fid-dawl tas-sejbiet fir-rigward tas-Singapor, l-investigazzjoni dwar l-evażjoni possibbli tal-miżuri kompensatorji permezz ta’ importazzjonijiet tal-bijodiżil ikkunsinnati minn Singapor għandha tintemm u r-reġistrazzjoni tal-importazzjonijiet tal-bijodiżil ikkunsinnati minn Singapor introdotta mir-Regolament tal-bidu, għandha titwaqqaf.

(90)

Iż-żewġ kumpaniji li kkooperaw fil-Kanada billi wieġbu għall-kwestjonarju talbu eżenzjoni mill-miżuri estiżi possibbli skont l-Artikolu 23(6) tar-Regolament bażiku.

(91)

Instab li ż-żewġ produtturi tal-Kanada li kkooperaw ma kinux involuti fi prattiki ta’ evażjoni li huma soġġetti għal din l-investigazzjoni. Barra minn hekk, dawn il-produtturi setgħu juru li ma kinux relatati mal-ebda mill-produtturi/esportaturi ta’ bijodiżil tal-Istati Uniti. Għalhekk, it-talbiet tagħhom ta’ eżenzjoni jistgħu jiġu milqugħa.

(92)

'Huwa kkunsidrat li huma meħtieġa miżuri speċjali f'dan il-każ sabiex jiżguraw l-applikazzjoni korretta ta’ dawn l-eżenzjonijiet. Dawn il-miżuri speċjali jikkonsistu fil-preżentazzjoni lill-awtoritajiet tad-Dwana tal-Istati Membri ta’ fattura kummerċjali valida li għandha tkun konformi mal-ħtiġiet stipulati fl-Anness għal dan ir-Regolament. L-importazzjonijiet li ma jkunux akkumpanjati b'fattura tali għandhom jkunu soġġetti għad-dazju kompensatorju estiż.

(93)

Parti li kkooperat fl-Istati Uniti li wieġbet għall-kwestjonarju ukoll talbet eżenzjoni mill-miżuri estiżi possibli skont l-Artikolu 23(6) tar-Regolament bażiku.

(94)

Kif spjegat fil-premessa (75) hawn fuq, l-investigazzjoni uriet biċ-ċar li din il-parti kienet involuta fi prattiki ta’ evażjoni billi timporta taħlitiet ta’ B20 u inferjuri. Konsegwentement, din l-eżenzjoni ma tistax tingħata.

(95)

Madankollu, għandu jkun enfasizzat li jekk xi produttur(i) li jesporta(w) kkonċernat(i) ma jibqgħux jagħmlu użu mis-sussidju, dawn il-partijiet jistgħu jitolbu għal analiżi skont l-Artikolu 19 tar-Regolament bażiku.

(96)

Il-partijiet kollha nteressati ġew mgħarrfa bil-fatti essenzjali u l-kunsiderazzjonijiet li wasslu għall-konklużjonijiet imsemmija u ġew mistiedna jagħmlu l-kummenti. Kienu kkunsidrati l-kummenti orali u miktuba li tressqu,

European Commission

Directorate-General for Trade

Directorate H

Office: N-105 04/92

1049 Brussell

IL-BELĠJU

Fax: + 32 2295 505

11.5.2011   

MT

Il-Ġurnal Uffiċjali tal-Unjoni Ewropea

L 122/12

(1)

Il-Kummissjoni, permezz tar-Regolament (KE) Nru 193/2009 (2) imponiet dazju anti-dumping provviżorju fuq l-importazzjonijiet tal-bijodiżil, li joriġinaw mill-Istati Uniti tal-Amerika (l-Istati Uniti).

(2)

Skont ir-Regolament (KE) Nru 599/2009 (3) (“ir-Regolament definittiv”), il-Kunsill impona dazju anti-dumping definittiv ta’ bejn EUR 0 u EUR 198 għal kull tunnellata metrika fuq l-importazzjonijiet tal-bijodiżil, kif iddefinit fl-Artikolu 1(1) tar-Regolament imsemmi (“il-prodott ikkonċernat”) li joriġina fl-Istati Uniti (“il-miżuri eżistenti”). L-investigazzjoni li wasslet għall-adozzjoni tar-Regolament definittiv minn issa ‘l quddiem hija msejħa l-“investigazzjoni oriġinali”.

(3)

Ta’ min jinnota wkoll li bir-Regolament (KE) Nru 598/2009 (4), il-Kunsill impona dazju kumpensatorju definittiv ta’ bejn EUR 211,2 u EUR 237 kull tunnellata metrika fuq l-importazzjonijiet tal-prodott ikkonċernat.

(4)

Fit-30 ta’ Ġunju 2010, il-Kummissjoni rċeviet talba skont l-Artikolu 13(3) tar-Regolament bażiku biex tinvestiga l-allegata ċirkomvenzjoni tal-miżuri anti-dumping imposti fuq l-importazzjonijiet tal-prodott ikkonċernat. It-talba tressqet mill-Bord Ewropew tal-Bijodiżil (EBB – European Biodiesel Board) f’isem il-produtturi tal-Unjoni tal-bijodiżil.

(5)

It-talba allegat li l-miżuri ta’ anti-dumping fuq l-importazzjonijiet tal-prodott ikkonċernat kienu qegħdin jiġu ċċirkumventati permezz ta’ trasbord mill-Kanada u Singapor, u permezz ta’ esportazzjonijiet ta’ bijodiżil f’taħlita li fiha bil-piż 20 % jew inqas ta’ bijodiżil

(6)

It-talba allegat li kien hemm bidla sinifikanti fix-xejra tal-kummerċ li tinvolvi l-esportazzjonijiet mill-Istati Uniti, mill-Kanada u minn Singapor wara l-impożizzjoni ta’ miżuri fuq il-prodott ikkonċernat, u li ma hemmx raġuni jew ġustifikazzjoni adegwata biżżejjed ħlief l-impożizzjoni tad-dazju għal din il-bidla. Din il-bidla fix-xejra tal-kummerċ allegatament ġiet mit-trasbord tal-prodott ikkonċernat mill-Kanada u minn Singapor.

(7)

It-talba allegat ukoll li wara l-impożizzjoni tal-miżuri, l-esportazzjonijiet tal-bijodiżil f’taħlitiet li fihom 20 % jew inqas ta’ bijodiżil mill-Istati Uniti kienu bdew jaslu fl-Unjoni, fejn allegatament ħadu vantaġġ mil-limitu fil-kontenut tal-bijodiżil iffissat fid-deskrizzjoni tal-prodott ikkonċernat.

(8)

Barra minn hekk, it-talba allegat li l-effetti ta’ rimedju tal-miżuri anti-dumping eżistenti fuq il-prodott ikkonċernat kienu qegħdin jiddgħajfu kemm f’termini ta’ kwantità kif ukoll f’termini ta’ prezz. Ġie allegat li ammonti sinifikanti ta’ importazzjonijiet ta’ bijodiżil pur jew f’taħlita li fiha bil-piż iktar minn 20 % bijodiżil mill-Kanada u minn Singapor u ta’ bijodiżil f’taħlitiet li fihom 20 % jew inqas ta’ bijodiżil, dehru li ħadu post l-importazzjonijiet tal-prodott ikkonċernat. Barra minn hekk, kien hemm biżżejjed evidenza li din iż-żieda fil-volum tal-importazzjonijiet saret bi prezzijiet ferm taħt il-prezz li ma jikkawżax danni stabbilit fl-investigazzjoni li wasslet għall-miżuri eżistenti.

(9)

Fl-aħħar nett, it-talba allegat li l-prezzijiet tal-prodott investigat komplew ikunu ssussidjati kif kien stabbilit qabel.

(10)

Hekk kif iddeterminat, wara konsultazzjoni mal-Kumitat Konsultattiv, li hemm biżżejjed evidenza prima facie biex tinbeda investigazzjoni skont l-Artikolu 13 tar-Regolament bażiku, il-Kummissjoni bdiet investigazzjoni bir-Regolament (KE) Nru 720/2010 (5) (“ir-Regolament tal-bidu”). Skont l-Artikolu 14(5) tar-Regolament bażiku, il-Kummissjoni, bir-Regolament tal-bidu, tat ukoll istruzzjonijiet lill-awtoritajiet tad-dwana biex jirreġistraw l-importazzjonijiet ikkunsinnati mill-Kanada u minn Singapor, kif ukoll importazzjonijiet li joriġinaw mill-Istati Uniti ta’ bijodiżil f’taħlita li fiha bil-piż 20 % jew inqas ta’ esteri monoalkiliċi aċidi xaħmija u/jew nafta paraffinika miksuba minn produzzjoni artifiċjali ta’ taħlitiet u/jew trattament idriku li ma joriġinax mill-fossili.

(11)

Il-Kummissjoni bdiet ukoll investigazzjoni parallela bir-Regolament (KE) Nru 721/2010 (6) rigward il-possibbiltà li ġew evitati miżuri kumpensatorji fuq l-importazzjonijiet tal-bijodiżil li joriġinaw mill-Istati Uniti permezz ta’ importazzjonijiet tal-bijodiżil ikkunsinjati mill-Kanada u minn Singapor, u permezz ta’ importazzjonijiet tal-bijodiżil f’taħlita li fiha bil-piż 20 % jew inqas ta’ bijodiżil li joriġinaw mill-Istati Uniti.

(12)

Il-Kummissjoni informat uffiċjalment lill-awtoritajiet tal-Istati Uniti, tal-Kanada u ta’ Singapor. Ġew mibgħuta kwestjonarji lil produtturi/esportaturi magħrufa fl-Istati Uniti, il-Kanada u Singapor. Il-partijiet interessati ngħataw l-opportunità li jressqu l-opinjonijiet tagħhom bil-miktub u li jitolbu smigħ fiż-żmien stipulat fir-Regolament ta’ bidu.

(13)

Il-kumpaniji li ġejjin wieġbu għad-domandi tal-kwestjonarji u sussegwentement twettqu żjarat ta’ verifika fl-istabbilimenti tagħhom:

(14)

Barra minn hekk, saru żjarat lil awtoritajiet kompetenti tal-Gvern tal-Kanada u tal-Gvern ta’ Singapor.

(15)

Il-perijodu ta’ investigazzjoni kien bejn l-1 ta’ April 2009 u t-30 ta’ Ġunju 2010 (‘il-PI’). Id-dejta ġiet miġbura mill-perijodu tal-2008 sal-aħħar tal-PI sabiex jiġi investigat l-bdil allegat fid-drawwiet tal-kummerċ.

(16)

Il-prodott ikkonċernat miċ-ċirkomvenzjoni possibbli, jiġifieri l-prodott ikkonċernat fl-investigazzjoni oriġinali, huwa esteri monoalkiliċi aċidi xaħmija u/jew nafta paraffinika miksuba minn minn sinteżi u/jew permezz ta’ trattament idriku li mhux ta’ oriġini mill-fossili magħruf b’mod komuni bħala “bijodiżil”, f’forma pura jew f’taħlita li b’piż ta’ iktar minn 20 % ta’ esteri monoalkiliċi aċidi xaħmija u/jew nafta paraffinika miksuba minn produzzjoni artifiċjali ta’ taħlitiet u/jew trattament idriku li mhux ta’ oriġini mill-fossili, li bħalissa jaqgħu fil-kodiċi NM ex 1516 20 98, ex 1518 00 91, ex 1518 00 99, ex 2710 19 41, 3824 90 91, ex 3824 90 97, u li joriġina mill-Istati Uniti.

(17)

Il-prodott li jifforma parti mill-investigazzjoni dwar iċ-ċirkomvenzjoni jikkonsisti minn żewġ tipi. L-ewwel nett, fir-rigward tal-allegazzjonijiet tat-trasbord mill-Kanada u Singapor, huwa prodott identiku għall-prodott li kien suġġett tal-investigazzjoni oriġinali, kif deskritt fil-paragrafu preċedenti. Fir-rigward ta’ kunsinni direttament mill-Isati Uniti, il-prodott li qed jiġi investigat huwa bijodiżil f’taħlita li fiha bil-piż 20 % jew inqas ta’ esteri monoalkiliċi aċidi xaħmija u/jew ta’ nafta paraffinika miksuba minn sinteżi u/jew permezz ta’ trattament idriku, ta’ oriġini mhux mill-fossili li joriġinaw mill-Istati Uniti.

(18)

B’konsegwenza tal-impożizzjoni tal-miżuri provviżorji ta’ anti-dumping f’Marzu 2009, importazzjonijiet tal-prodott ikkonċernat prattikament waqqfu. It-tabella hawn taħt tagħti sommarju tas-sitwazzjoni:

Importazzjonijiet ta’ bijodiżil u ċerti taħlitiet tal-bijodiżil fl-Unjoni Ewropea

taħt il-kodiċi NM 3824 90 91 (f’tunnellati metriċi)

(19)

Id-dejta tal-Eurostat ta’ hawn fuq tkopri l-bijodiżil kollu li fih 96,5 % jew iktar ta’ esteri.

(20)

F’paragun, l-Istati Uniti jirrapurtaw esportazzjonijiet ta’ bijodiżil u taħlitiet ta’ bijodiżil kollha skont il-kodiċi HTS 3824 90 40 00 (taħlitiet ta’ sustanzi xaħmija, ta’ oriġini tal-annimali jew veġetali) kif ġej:

Esportazzjonijiet ta’ bijodiżil u taħlitiet ta’ bijodiżil mill-Istati Uniti

taħt il-kodiċi HTS 3824 90 40 00 (f’tunnellati metriċi)

(21)

Tqabbil taż-żewġ tabelli ta’ hawn fuq iwassal għall-konklużjoni li t-358 291 tunnellata metrika esportati lejn l-Unjoni waqt il-PI huma taħlitiet ta’ bijodiżil b’kontenut ta’ 96,5 % u inqas.

(22)

Kien hemm livell għoli ta’ kooperazzjoni mill-produtturi/esportaturi fil-Kanada. Żewġ produtturi li jirrappreżentaw madwar 90 % tal-produzzjoni tal-bijodiżil fil-Kanada bagħtu tweġiba għall-kwestjonarju u kkooperaw bis-sħiħ fl-investigazzjoni. Barra minn hekk, l-Assoċjazzjoni Kanadiża tal-Fjuwils Rinnovabbli u awtoritajiet rilevanti tal-Gvern tal-Kanada kkooperaw fl-investigazzjoni.

(23)

Skont l-Artikolu 13(1) tar-Regolament bażiku, il-valutazzjoni tal-eżistenza ta’ ċirkomvenzjoni għandha ssir billi jiġi analizzat b’mod suċċessiv jekk kienx hemm bidla fix-xejra tal-kummerċ bejn l-Istati Uniti, il-Kanada u l-Unjoni, jekk din il-bidla tirriżultax minn prattika, proċess jew ħidma li għaliha ma kienx hemm raġuni adegwata jew ġustifikazzjoni ekonomika suffiċjenti għajr l-impożizzjoni tad-dazju, jekk kienx hemm evidenza ta’ ħsara jew jekk l-effetti ta’ rimedju tad-dazju kinux qed jiddgħajfu f’termini ta’ prezzijiet u/jew kwantitajiet tal-prodott simili, u jekk kienx hemm evidenza ta’ dumping b’relazzjoni mal-valuri normali stabbiliti preċedentement għal prodott simili.

(24)

L-importazzjonijiet tal-bijodiżil fl-Istati Uniti naqsu minn 1 487 790 tunnellata metrika fl-2008 għal 381 227 tunnellata metrika fl-2009 u għal qrib iż-żero waqt il-PI.

(25)

Min-naħa l-oħra, skont id-dejta tal-Eurostat l-importazzjonijiet totali ta’ bijodiżil mill-Kanada għall-Unjoni żdiedu b’mod sinifikanti bejn l-2008 u l-PI minn 1 725 tunnellata metrika fl-2008 għal 140 043 tunnellata metrika fl-2009 u 197 772 tunnellata metrika waqt il-PI.

(26)

Ma hemmx dazju applikabbli fuq il-bejgħ tal-bijodiżil bejn l-Istati Uniti u l-Kanada jew restrizzjonijiet ta’ xorta oħra fuq l-importazzjonijiet.

(27)

Skont l-istatistika tal-Istati Uniti, l-esportazzjonijiet ta’ bijodiżil bejn l-Istati Uniti u l-Kanada żdiedu minn 967 tunnellata metrika fl-2008 għal 128 233 tunnellata metrika fl-2009 u 161 841 tunnellata metrika waqt il-PI.

(28)

Tqabbil tal-istatistika tal-esportazzjonijiet ipprovduti mill-Istati Uniti mal-istatistika tal-importazzjonijiet ipprovduta fuq il-post mill-awtoritajiet Kanadiżi turi diskrepanzi sinifikanti fuq bażi ta’ xahar b’xahar. Skont l-istatistika Kanadiża, l-esportazzjonijiet ta’ bijodiżil tal-Istati Uniti żdiedu minn 11 757 tunnellata metrika fl-2008 għal 18 673 tunnellata metrika fl-2009 u 174 574 tunnellata metrika waqt il-PI.

(29)

Skont l-awtoritajiet Kanadiżi, ma hemmx kodiċi speċifiku biex jiġi ddikjarat il-bijodiżil. Huma nnutaw li l-Kanada u l-Istati Uniti jiskambjaw id-dejta għall-użu tal-importazzjoni mad-dejta rispettiva tal-esportazzjoni. Minħabba f’dan, fil-livell tas-sitt ċifri, id-dejta Kanadiża tal-importazzjoni u d-dejta tal-esportazzjoni tal-Istati Uniti għandhom jaqblu, kif kważi jagħmlu taħt l-HTS 38.24.90. Madankollu, lil hinn mis-sitt ċifri għandhom sistemi ta’ klassifikazzjoni għalihom. Ta’ min jinnota wkoll li l-istatistika Kanadiża tkopri biss l-importazzjonijiet li ġew awtorizzati mid-dwana fil-Kanada u mhux il-prodotti mibgħuta bit-trasbord.

(30)

Fl-aħħar mill-aħħar, minkejja d-diskrepanzi bejn iż-żewġ sorsi tad-dejta, huwa ċar li l-esportazzjoni ta’ bijodiżil mill-Istati Uniti għall-Kanada żdiedet mill-2008 sal-PI, b’mod partikolari wara l-impożizzjoni tal-miżuri kumpensatorji Is-suq tal-bijodiżil Kanadiż bħalissa mhuwiex kapaċi jassorbi dawn il-kwantitajiet ta’ bijodiżil. Il-produtturi Kanadiżi tal-bijodiżil ġenwini fil-fatt huma orjentati lejn l-esportazzjoni.

(31)

Iż-żewġ produtturi fil-Kanada li kkooperaw ma għamlu l-ebda xiri ta’ bijodiżil mill-Istati Uniti jew minn sorsi oħrajn waqt il-PI.

(32)

Il-produzzjoni tal-bijodiżil fil-Kanada hija industrija minuri. Madwar sitt faċilitajiet tal-produzzjoni kienu jeżistu waqt il-PI, imma ż-żewġ facilitajiet fil-Lvant tal-Kanada, li huma amministrati miż-żewġ produtturi li kkooperaw u proprjetà tagħhom, weħidhom iwieġbu għal kważi 90 % tal-produzzjoni totali.

(33)

Mill-volumi ta’ produzzjoni mibjugħa mill-produtturi li kkooperaw, ġie ddeterminat il-bejgħ tal-klijenti finali li kienu żgur fl-Amerika ta’ Fuq, jiġifieri fl-Istati Uniti jew il-Kanada. Il-kumplament tal-bejgħ ġie mibjugħ lill-konsumaturi li nnegozjaw il-prodotti u/jew ħalltu l-prodotti ma’ bijodiżil ieħor. Iż-żewġ kumpaniji ma kinux jafu jekk il-konsumaturi bigħux il-prodotti lill-Unjoni bħala bijodiżil Kanadiż, jekk ħalltuhx, jew jekk il-bijodiżil ġiex mibjugħ lil klijenti aħħarin fl-Istati Uniti jew fil-Kanada.

(34)

Anki jekk f’każ estrem kien preżunt li l-bijodiżil tal-Kanada ġenwin spiċċa kollu fl-Unjoni, dan iwieġeb biss għal 20 % tal-importazzjonijiet totali fl-Unjoni mill-Kanada waqt il-PI.

(35)

Ir-rikonċiljazzjoni tal-istatistika mad-dejta miksuba mill-produtturi li kkooperaw uriet li l-produtturi tal-bijodiżil tal-Kanada ma setgħux ipproduċew il-volum esportat mill-Kanada għall-Unjoni. Għalhekk dan jissuġġerixxi b’mod qawwi li ż-żieda f’daqqa fl-importazzjoni mill-Kanada għas-suq tal-Unjoni hija relatata mal-esportazzjonijiet tal-bijodiżil fl-Istati Uniti kkunsinnati mill-Kanada.

(36)

It-tnaqqis globali fl-esportazzjonijiet tal-Istati Uniti għall-Unjoni sa mill-2008 u ż-żieda parallela tal-esportazzjonijiet mill-Kanada għall-Unjoni u tal-esportazzjonijiet mill-Istati Uniti għall-Kanada wara l-impożizzjoni tal-miżuri oriġinali jistgħu għalhekk jitqiesu bħala bidla fix-xejra tal-kummerċ.

(37)

L-investigazzjoni ma ħarġet għad-dawl l-ebda raġuni adegwata jew ġustifikazzjoni ekonomika oħra għat-trasbord ħlief l-evitar tal-ħlas tad-dazju anti-dumping fis-seħħ fuq il-bijodiżil li joriġina mill-Istati Uniti.

(38)

Id-dejta tal-Eurostat intużat biex jiġi vvalutat jekk il-prodotti importati, f’termini ta’ kwantitajiet, dgħajfux l-effetti ta’ remedju tal-miżuri tal-anti-dumping fis-seħħ fuq l-importazzjonijiet tal-bijodiżil mill-Istati Uniti. Il-kwantitajiet u l-prezzijiet tal-esportazzjonijiet mill-Kanada tqabblu mal-livell ta’ eliminazzjoni tad-danni stabbilit fl-investigazzjoni oriġinali.

(39)

Kif imsemmi hawn fuq, l-importazzjonijiet mill-Kanada għall-Unjoni żdiedu minn 1 725 tunnellata metrika fl-2008 għal 197 772 tunnellata metrika waqt il-PI, bl-aħħar wieħed jirrappreżenta sehem ta’ importazzjonijiet ta’ 9,2 % Iż-żieda fl-importazzjonijiet mill-Kanada, ma setgħetx titqies bħala insinifikanti meta jitqies id-daqs tas-suq tal-Unjoni kif determinat fl-investigazzjoni oriġinali. Meta wieħed jikkunsidra l-livell tal-prezzijiet mingħajr dannu stabbilit fl-investigazzjoni oriġinali, l-importazzjonijiet tal-Kanada għall-Unjoni waqt il-PI urew twaqqigħ fil-bejgħ ta’ 50 % fir-reġjun, filwaqt li l-prezz tal-bejgħ tal-produtturi tal-Unjoni twaqqa’ b’madwar 40 %.

(40)

Għalhekk ġie konkluż li l-miżuri qegħdin jiġu mminati f’termini ta’ kwantitajiet u prezzijiet.

(41)

Skont l-Artikolu 13(1) u (2) tar-Regolament bażiku, ġie eżaminat jekk kienx hemm evidenza ta’ dumping b’rabta mal-valur normali stabbilit fl-investigazzjoni oriġinali.

(42)

Fl-investigazzjoni oriġinali l-valur normali ġie stabbilit fuq il-bażi tal-prezzijiet tal-bejgħ domestiku fl-andament normali tal-kummerċ u mibni fuq il-kost tal-produzzjoni magħdud ma’ marġni ta’ profitt raġjonevoli fejn ma kienx hemm bejgħ domestiku jew fejn ma kienx fl-andament normali tal-kummerċ.

(43)

Il-prezzijiet ta’ esportazzjoni mill-Kanada ġew stabbiliti fuq il-bażi tal-prezz medju ta’ importazzjoni tal-bijodiżil waqt il-PI kif ġie rrapportat fl-Eurostat.

(44)

Biex jiġi żgurat tqabbil ġust bejn il-valur normali u l-prezz ta’ esportazzjoni, saret konċessjoni xierqa fil-forma ta’ aġġustamenti għad-differenzi li jaffettwaw il-prezzijiet u l-komparabbiltà tal-prezzijiet skont l-Artikolu 2(10) tar-Regolament bażiku. Skont dan, fin-nuqqas ta’ informazzjoni marbuta ma’ għadd ta’ oġġetti tal-ispejjeż, l-ispejjeż tat-trasport u tal-assigurazzjoni bbażata fuq l-ispejjeż medji osservati għat-tagħbija tal-bijodiżil mill-Istati Uniti għall-Unjoni waqt l-investigazzjoni oriġinali biss tnaqqsu mill-prezzijiet CIF tal-Eurostat sabiex jaslu bil-prezzijiet FOB mal-fruntiera Kanadiża.

(45)

Skont l-Artikoli 2(11) u 2(12) tar-Regolament bażiku, id-dumping ġie kkalkolat permezz ta’ tqabbil bejn il-medja bil-piż ppeżat tal-valur normali kif stabbilit fl-investigazzjoni oriġinali u l-prezzijiet medji peżati ta’ esportazzjonijiet matul il-PI, espress bħala perċentwali tal-prezz CIF fi dazju mhux imħallas tal-fruntiera tal-Komunità.

(46)

Dan it-tqabbil wera l-eżistenza ta’ dumping.

(47)

L-investigazzjoni kkonkludiet li d-dazju anti-dumping definittiv impost fuq l-importazzjonijiet ta’ bijodiżil li joriġina mill-Istati Uniti ġie evitat permezz ta’ trasbord mill-Kanada skont l-Artikolu 13 tar-Regolament bażiku.

(48)

Żewġ negozjanti f’Singapor ikkooperaw fl-investigazzjoni. Barra minn hekk, kien hemm kooperazzjoni mill-awtoritajiet rilevanti tal-Gvern tas-Singapor.

(49)

Il-kriterji tal-ivvalutar tal-eżistenza taċ-ċirkonvenzjoni ġew deskritti fil-premessa (23) hawn fuq.

(50)

Skont iċ-ċifri tal-Eurostat, l-esportazzjonijiet totali tal-bijodiżil mis-Singapor għall-Unjoni żdiedu minn 179 tunnellata metrika fl-2008 għal 20 486 tunnellata metrika fl-2009 u għal 32 078 tunnellata metrika waqt il-PI. L-esportazzjonijiet mill-Istati Uniti għas-Singapor żdiedu wkoll fl-istess perijodu.

(51)

Skont l-awtoritajiet rilevanti tal-Gvern tas-Singapor, il-bijodiżil prodott lokalment huwa l-biċċa l-kbira mibjugħ f’Singapor biex jipprovdi għad-domanda domestika. Madankollu, huma jinnutaw tkabbir tal-industrija fis-Singapor bil-bini riċenti ta’ faċilitajiet ġodda ta’ produzzjoni.

(52)

L-esportazzjonijiet minn Singapor kienu tradizzjonalment baxxi. L-importazzjonijiet tal-bijodiżil fl-Unjoni ġew eżaminati mill-qrib fil-bażi tad-dejta tal-Artikolu 14(6) u vverifikati mill-awtoritajiet tad-dwana nazzjonali rilevanti. Jidher li l-importazzjonijiet li waslu kienu ftit iżda fi kwantitajiet kbar. L-analiżi wriet li l-maġġoranza ta’ dawn l-importazzjonijiet kienu ġenwinament ta’ oriġini minn Singapor Madankollu, ma setax jingħata rendikont tal-importazzjonijiet kollha.

(53)

Meta mqabbla mal-konsum tal-Unjoni stabbilit fl-investigazzjoni oriġinali, il-volumi importati minn Singapor għall-Unjoni, li ma setgħux jingħataw rendikont, instabu li kienu baxxi ħafna. Barra minn hekk, is-sehem tagħhom mill-konsum tal-Unjoni huwa ta’ ftit importanza meta wieħed iqis l-istima tal-Bord Ewropew tal-Bijodiżil dwar iż-żieda konsiderevoli fil-konsum tal-Unjoni sa mill-investigazzjoni oriġinali.

(54)

Fid-dawl ta’ dan ta’ hawn fuq jista’ jiġi konkluż li l-effetti ta’ rimedju tal-miżuri kompensatorji ma ddgħajfux f’termini ta’ kwantitajiet ikkunsinnati minn Singapor.

(55)

Fir-rigward tat-trasbord, huwa magħruf sew li Singapor huwa l-fulkru tal-ġarr bil-baħar fl-Asja, fejn vapuri reġjonali jaslu u jħottu l-oġġetti li wara jerġgħu jitgħabbew fuq vapuri li jsalpaw, fost oħrajn, lejn l-Ewropa. F’din l-investigazzjoni, wieħed min-negozjanti li kooperaw ittrasborda minn Singapor il-bijodiżil ta’ oriġini mill-Malasja jew mill-Indoneżja, b’destinazzjoni finali fl-Unjoni. Waqt il-PI, dan in-negozjant waħdu esporta kwantità sinifikanti ta’ bijodiżil lejn l-Unjoni permezz ta’ trasbord fis-Singapor, u d-dwana għaddew il-bijodiżil fl-Unjoni bħala ta’ oriġini mill-Malasja jew mill-Indoneżja. Il-verifika ma wrietx indikazzjonijiet li jqiegħdu f’dubju d-dikjarazzjoni tal-oriġini mill-Indoneżja jew mill-Malasja.

(56)

Fid-dawl ta’ dan, l-investigazzjoni li tikkonċerna l-possibbiltà ta’ ċirkomvenzjoni tal-miżuri anti-dumping permezz ta’ importazzjonijiet tal-bijodiżil ikkunsinnati mis-Singapor, għandha titwaqqaf.

(57)

Ħames produtturi tal-bijodiżil jew bijodiżil f’taħlitiet fl-Istati Uniti kkooperaw fl-investigazzjoni. Tlieta minnhom ġew inklużi fil-kampjun tal-investigazzjoni oriġinali. Il-Gvern tal-Istati Uniti kkoopera billi pprovda statistika dwar l-esportazzjonijiet u l-interpretazzjoni tagħhom dwar din l-istatistika.

(58)

It-tlett produtturi li ġew inklużi fil-kampjun tal-investigazzjoni oriġinali waqfu jesportaw il-bijodiżil wara l-impożizzjoni tal-miżuri definittivi.

(59)

Waħda biss mill-ħames kumpaniji li kkooperaw, BP North America, li ma kinitx ikkooperat fl-investigazzjoni oriġinali, esportat bijodiżil f’taħlitiet li fihom bil-piż 20 % jew inqas ta’ bijodiżil (“B20 u inferjuri”) lill-Unjoni waqt il-PI.

(60)

Il-Bord Nazzjonali tal-Bijodiżil (“NBB” – National Biodiesel Board), li jirrappreżenta l-industrija tal-bijodiżil fl-Istati Uniti, argumenta li prodott li skont huma kien espliċitament barra mill-ambitu tal-prodott tal-miżuri eżistenti, ma jistax ikun soġġett għall-miżuri anti-dumping mingħajr investigazzjoni anti-dumping de novo. In-NBB argumenta li r-Regolament definittiv stabbilixxa f’termini espliċiti “il-prodott ikkonċernat” u “il-prodott simili” fil-livell tal-bijodiżil u tal-bijodiżil f’taħlitiet li jikkorrispondu għal iktar minn 20 %. Skont in-NBB, dan ma kienx limitu artifiċjali imma kien jikkorrispondi mar-realtà tas-suq li ħarġet waqt l-investigazzjoni oriġinali. Pereżempju, instab li dan il-limitu ta’ 20 % kien xieraq biex jippermetti distinzjoni ċara bejn it-tipi varji ta’ taħlitiet li kienu disponibbli fis-suq tal-Istati Uniti.

(61)

Skont in-NBB u partijiet interessati oħra, investigazzjoni kontra ċ-ċirkomvenzjoni tista’ biss testendi l-miżuri ta’ anti-dumping għall-prodott ikkonċernat għall-prodott simili li għandu biss modifiki żgħar meta mqabbel mal-prodott ikkonċernat. Mill-ġdid, in-NBB argumenta li fir-Regolament definittiv, il-Kunsill stess stabbilixxa li l-bijodiżil f’taħlitiet b’volum ta’ bijodiżil ta’ 20 % jew iktar mhuwiex prodott simili. Għalhekk skont in-NBB, fl-istruttura tad-dispożizzjoniijet tar-Regolament bażiku mhemm l-ebda għażla oħra ħlief li tinbeda investigazzjoni ġdida sabiex tiddetermina jekk dawn it-taħlitiet għandhomx ikunu suġġetti għal miżuri.

(62)

Bi tweġiba għal dawn l-argumenti, għandu qabel xejn jiġi nnutat li l-għan tad-dispożizzjonijiet kontra ċ-ċirkomvenzjoni fl-Artikolu 13 tar-Regolament bażiku huwa li jikkontrobattu attentati allegati biex jiġu evitati l-miżuri fis-seħħ. Jekk teżisti biżżejjed evidenza prima facie li turi li ċ-ċirkomvenzjoni qed issir skont it-tifsira tal-Artikolu 13(1) tar-Regolament bażiku, il-Kummissjoni għandha tibda investigazzjoni sabiex tiddetermina jekk hux qed isseħħ iċ-ċirkomvenzjoni. Skont l-Artikolu 13(1) tar-Regolament bażiku, il-valutazzjoni tal-eżistenza ta’ evażjoni għandha tiġi magħmula eż. billi jiġi analizzat suċċessivament jekk kienx hemm bidla fix-xejra tal-kummerċ bejn l-Istati Uniti u l-Unjoni, jekk din il-bidla tirriżultax minn prattika, proċess jew ħidma li għaliha ma kienx hemm raġuni adegwata jew ġustifikazzjoni ekonomika suffiċjenti għajr l-impożizzjoni tad-dazju, u jekk kienx hemm evidenza ta’ ħsara jew jekk l-effetti ta’ rimedju tad-dazju kinux qed jiddgħajfu f’termini ta’ prezzijiet u/jew kwantitajiet.

(63)

Għandu jiġi mfakkar li investigazzjoni kontra ċ-ċirkomvenzjoni mhix analiżi tal-ambitu tal-prodott ibbażata fuq l-Artikolu 11(3) tar-Regolament bażiku u ma tbiddilx id-definizzjoni tal-prodott ikkonċernat u l-prodott simili. Id-dispożizzjonijiet taħt l-Artikolu 13 tar-Regolament bażiku jipprovdu għall-bażi legali rilevanti għal investigazzjoni dwar jekk hemmx ċirkomvenzjoni fir-rigward tal-prodott soġġett għall-miżuri.

(64)

F’dan ir-rigward, it-talba li l-Kummissjoni rċeviet skont l-Artikolu 13(3) tar-Regolament bażiku, allegat li wara l-impożizzjoni tal-miżuri, l-esportazzjonijiet tal-bijodiżil f’taħlitiet li fihom 20 % jew inqas ta’ bijodiżil mill-Istati Uniti kienu bdew jaslu fl-Unjoni, fejn allegatament ħadu vantaġġ mil-limitu fil-kontenut tal-bijodiżil iffissat fid-deskrizzjoni tal-prodott ikkonċernat u l-prodott simili. L-investigazzjoni eżaminat jekk din il-prattika għandhiex titqies bħala evażjoni skont id-dispożizzjonijiet tal-Artikolu 13 tar-Regolament bażiku. Fl-aħħar nett, ta’ min jinnota li l-allegata ċirkomvenzjoni tal-prattiki tista’ tiġi eżaminata biss skont l-Artikolu 13 tar-Regolament bażiku.

(65)

Kif imsemmi fil-premessa (19) hawn fuq, il-kodiċi HTS 3824 90 40 00 tal-Istati Uniti fih ukoll taħlitiet b’kontenut ta’ bijodiżil ta’ 96,5 % u inqas. Skont l-istatistika tal-esportazzjoni tal-Istati Uniti ġiet esportata kwantità totali ta’ 358 291 tunnellata metrika lejn l-Unjoni waqt il-PI.

(66)

Waqt il-PI, il-BP Products North America (“BPNA”) esportat proporzjon sinifikanti tal-kwantità msemmija hawn fuq.

(67)

Il-BPNA ma pparteċipatx fl-investigazzjoni oriġinali minħabba li bdiet l-attivitajiet tagħha tal-bijodiżil biss fil-bidu tal-2009, qabel it-tkabbir fil-futur tas-suq tal-bijodiżil, bħala tweġiba għal mandati tal-gvern kemm fl-Istati Uniti u kemm barra. Il-BPNA bdiet tesporta lejn l-Unjoni f’Diċembru 2009 F’dan ir-rigward, huwa mfakkar li l-miżuri ġew imposti f’Lulju 2009.

(68)

Fl-Unjoni, il-BP biegħet il-bijodiżil f’taħlita li fiha bil-piż 15 % jew inqas ta’ bijodiżil B15 ta’ oriġini mill-Istati Uniti fir-Renju Unit, Franza u l-Pajjiżi l-Baxxi. Fil-każijiet kollha, il-prodott huwa imħallat aktar sabiex jirrispetta l-leġiżlazzjoni rilevanti fis-seħħ f’xi Stati Membri li tippromwovi l-konsum tal-bijofjuwils fil-pompa li bħalissa huma kkunsidrati ambjentalment sostenibbli.

(69)

Il-BPNA argumentat li taħlitiet ta’ inqas minn 15 % mhumiex l-istess prodott għall-prodott ikkonċernat. Il-karatteristiċi u r-realtajiet tas-suq huma differenti ħafna. Il-loġistika involuta (inklużi r-restrizzjonijiet tat-trasport marittimu) fil-produzzjoni u l-importazzjoni tat-taħlitiet iktar baxxi huma differenti ħafna minn dak tal-gradi ogħla. Skont il-BPNA, meta t-taħlitiet ta’ trasportazzjoni huma inqas minn 15 %, prodotti bħal dawn għandhom jiġu kklassifikati bħala prodott tal-petroleum għat-trasportazzjoni għal kuntarju ta’ prodott kimiku li jrendi t-trasportazzjoni inqas għalja. Il-BPNA argumentat ukoll li hemm differenzi fil-prestazzjoni bejn il-bijodiżil f’taħlitiet bi grad baxx u dak bi grad għoli meta jintuża f’magni tad-diżil.

(70)

L-għan ta’ investigazzjoni dwar iċ-ċirkomvenzjoni huwa li jiġi stabbilit jekk il-bijodiżil f’taħlita li fiha bil-piż 20 % u inqas ta’ bijodiżil evitax il-miżuri fis-seħħ. Jista’ jagħti l-każ li taħlitiet iktar baxxi jattiraw spejjeż orħos. Madankollu ta’ min jinnota li taħlita B20 u inferjuri hija effettivament biss kompożizzjoni differenti tat-taħlita, meta mqabbla mal-proċess ta’ produzzjoni ta’ bijodiżil f’taħlita superjuri għall-B20. It-tibdil tal-kompożizzjoni ta’ taħlita huwa proċess sempliċi. L-iżvilupp tal-B20 u ta’ taħlitiet iktar inferjuri huwa meqjus sempliċement bħala modifika żgħira tal-prodott ikkonċernat, bl-unika differenza tikkonsisti mill-proporzjon tal-bijodiżil fit-taħlita. Ta’ min jinnota wkoll li l-prodott ikkonċernat, kif ukoll it-taħlitiet B20 u inferjuri, huma fl-aħħar mill-aħħar ddestinati għall-istess użi fl-Unjoni. Barra minn hekk, il-bijodiżil f’taħlitiet B20 u inferjuri kif ukoll biodiżil f’taħlitiet superjuri għall-B20 għandhom l-istess karatteristiċi essenzjali.

(71)

Importazzjonijiet tal-prodott ikkonċernat mill-Istati Uniti naqsu minn 1 487 790 tunnellata metrika fl-2008 għal 381 227 tunnellata metrika fl-2009 u għal kważi żero waqt il-PI.

(72)

F’dan ir-rigward, ta’ min jinnota li għalkemm kien hemm taħlit obbligatorju ta’ pereżempju taħlitiet B5 fl-Unjoni waqt l-investigazzjoni oriġinali, l-esportazzjonijiet ta’ taħlitiet B20 jew inferjuri għal dan mill-Istati Uniti għall-Unjoni bdew iseħħu biss wara l-impożizzjoni tal-miżuri definittivi. Skont id-dejta miksuba mill-kampjun tal-produtturi esportaturi li kkooperaw, waqt l-investigazzjoni oriġinali, fil-biċċa l-kbira, ġew esportati għall-Unjoni esportazzjonijiet ta’ taħlitiet B99,9. Ir-raġuni għal dan kienet li ġie mmassimizzat is-sussidju fuq il-prodotti esportati (USD 1 taxxa ta’ kreditu ta’ bijodiżil kull gallun).

(73)

Huwa għalhekk diffiċli biex wieħed jara x’tista’ tkun il-ġustifikazzjoni ekonomika biex jibdew jiġu esportati taħlitiet B20 u inferjuri, ħlief l-evażjoni tal-miżuri anti-dumping fis-seħħ.

(74)

Il-proporzjon ta’ bijodiżil fit-taħlita għadu jiġi ssussidjat u l-importatur qed jevita l-ħlas dovut tad-dazju anti-dumping. F’dan ir-rigward, ta’ min jinnota li d-dazju anti-dumping fuq it-taħlitiet huwa applikabbli proporzjonalment għall-bijodiżil fit-taħlita, jiġifieri fil-każ ta’ importazzjonijiet ta’ taħlitiet B15 id-dazju anti-dumping mhux imħallas ikun ta’ madwar EUR 26 kull tunnellata metrika.

(75)

Skont il-BNPA, il-ħolqien ta’ bijodiżil ta’ taħlitiet inferjuri għall-B15 ma seħħx speċifikament biex jiġu evitati d-dazji. Il-kumpanija argumentat li ma pparteċipatx fl-investigazzjoni oriġinali minħabba li hija bdiet l-attivitajiet tagħha tal-bijodiżil fl-2009 b’antiċipazzjoni ta’ suq attivi tal-bijodiżil fil-futur b’rispons għall-mandat tal-gvernijiet kemm fl-Istati Uniti kif ukoll barra. L-istruttura speċifika tal-kumpanija, l-attività tagħha bħala kumpanija tal-petroleum u l-preżenza loġistika tagħha fl-Istati Uniti, għamlet it-taħlit fl-Istati Uniti u l-esportazzjoni għall-Unjoni deċiżjoni kummerċjali loġika. It-taħlita esportata dejjem kienet ta’ B15 jew inferjuri, minħabba miżuri ta’ sigurtà inqas stretti: sa B15 it-taħlita ma titqisx prodott kimiku skont ir-regolamenti marittimi.

(76)

Ġie innutat li l-attività ta’ din il-kumpanija tal-esportazzjonijiet għall-Unjoni bdiet biss wara l-impożizzjonijiet tal-miżuri. Qed jitqies li mhemm l-ebda raġuni adegwata jew ġustifikazzjoni ekonomika oħra ħlief l-evitar tad-dazju anti-dumping fis-seħħ tal-bijodiżil li joriġina fl-Istati Uniti.

(77)

Meta wieħed iqis il-livell tal-prezzijiet mingħajr dannu tal-investigazzjoni oriġinali, l-importazzjonijiet tal-Istati Uniti tat-taħlitiet B20 u inferjuri għall-Unjoni waqt il-PI urew kemm twaqqigħ fil-prezz kif ukoll bejgħ taħt il-prezz. L-importazzjonijiet ta’ taħlitiet B20 u inferjuri bdew isiru biss wara l-impożizzjoni tal-miżuri definittivi, u l-kwantitajiet involuti huma sinifikanti.

(78)

Għalhekk ġie konkluż li l-miżuri qegħdin jiġu mminati f’termini ta’ kwantitajiet u prezzijiet.

(79)

Skont l-Artikolu 13(1) u (2) tar-Regolament bażiku, ġie eżaminat jekk kienx hemm evidenza ta’ dumping b’rabta mal-valur normali stabbilit fl-investigazzjoni oriġinali. It-tqabbil tal-valur normali medju peżat u l-prezz medju peżat ta’ esportazzjoni wera l-eżistenza ta’ dumping.

(80)

L-investigazzjoni kkonkludiet ukoll li d-dazji anti-dumping definittivi imposti fuq l-importazzjonijiet ta’ bijodiżil li joriġinaw mill-Istati Uniti ġew evitati permezz ta’ importazzjonijiet fl-Unjoni ta’ bijodiżil f’taħlita li fiha bil-piż 20 % jew inqas ta’ bijodiżil.

(81)

Ġie konkluż li l-unika ġustifikazzjoni ekonomika għall-esportazzjoni ta’ taħlitiet B20 u inferjuri ġiet imqanqla mis-sussidju fl-Istati Uniti minn naħa, u l-evitar tal-ħlas ta’ dazju anti-dumping waqt l-importazzjoni fl-Unjoni min-naħa l-oħra.

(82)

Il-BPNA talbet għal eżenzjoni mill-miżuri estiżi possibbli. Madankollu, minħabba li l-investigazzjoni wriet biċ-ċar li l-importazzjonijiet ta’ taħlitiet B20 u inferjuri bdew isiru biss sabiex jiġu evitati l-miżuri fis-seħħ, din l-eżenzjoni ma setgħetx tingħata. Skont id-dispożizzjonijiet tal-Artikolu 13(4) tar-Regolament bażiku, eżenzjonijiet jistgħu jingħataw biss lil produtturi tal-prodott ikkonċernat li jistgħu juru li mhumiex relatati mal-ebda produttur soġġett għal miżuri u li jinstabu li mhumiex involuti fi prattiki ta’ ċirkomvenzjoni. F’dawn l-investigazzjonijiet instab li l-BPNA hija involuta fi prattiki ta’ ċirkomvenzjoni billi bdiet tesporta t-taħlitiet B20 u inferjuri wara l-impożizzjoni tal-miżuri kompensatorji u anti-dumping mingħajr raġuni adegwata jew ġustifikazzjoni ekonomika suffiċjenti għajr l-impożizzjoni tal-miżuri. Barra minn hekk, hemm evidenza li l-effetti tal-miżuri qegħdin jiġu mminati f’termini ta’ prezzijiet u kwantitajiet, u li jeżisti d-dumping f’relazzjoni mal-valuri normali stabbiliti qabel.

(83)

Xi produtturi tal-bijodiżil li kkoperaw fl-investigazzjonijiet oriġinali talbu eżenzjonijiet minn kwalunkwe miżuri estiżi minħabba ċ-ċirkomvenzjoni. Instab li dawn il-produtturi tal-Istati Uniti ma pproduċewx jew ma bigħux il-bijodiżil B20 u inferjuri. Skont l-Artikolu 13(4) tar-Regolament bażiku, waqt li tkun għaddejja investigazzjoni dwar l-antiċirkomvenzjoni jistgħu jitqiesu biss talbiet min-naħa tal-produtturi. Madankollu, ta’ min jinnota li l-Artikolu 13 tar-Regolament bażiku fih dispożizzjonijiet għal produtturi ġodda.

(84)

Minħabba dan ta’ hawn fuq, ġie konkluż li d-dazju definittiv anti-dumping impost fuq l-importazzjonijiet tal-bijodiżil li joriġina fl-Istati Uniti kien evitat permezz tat-trasbord mill-Kanada skont l-Artikolu 13 tar-Regolament bażiku.

(85)

Skont l-ewwel sentenza tal-Artikolu 13(1) tar-Regolament bażiku, il-miżuri fis-seħħ fuq l-importazzjoni tal-prodott ikkonċernat li joriġina mill-Istati Uniti għandhom għalhekk jiġu estiżi għall-importazzjonijiet tal-istess prodott ikkunsinnat mill-Kanada, kemm jekk ikun iddikjarat li joriġina mill-Kanada u kemm jekk le.

(86)

Sabiex tiġi evitata l-evażjoni tad-dazju permezz ta’ allegazzjonijiet li ma jistgħux jiġu vverifikati li l-prodott li ġie ttrasbordat mill-Kanada ġie prodott minn kumpanija soġġetta għal dazju individwali fir-Regolament definittiv, il-miżura li trid tiġi estiża għandha tkun dik stabbilita għall-“Kumpaniji l-oħra kollha” fl-Artikolu 1(2) tar-Regolament (KE) Nru 599/2009, li huwa dazju anti-dumping definittiv ta’ EUR 172,2 kull tunnellata metrika.

(87)

Id-dazju anti-dumping fuq it-taħlitiet għandu jkun applikabbli proporzjonalment fit-taħlita, skont il-piż, tal-kontenut totali tal-esteri monoalkiliċi ta’ aċidi xaħmija u nafta paraffinika minn sinteżi u/jew trattament idriku, ta’ oriġini mhux mill-fossili (kontenut ta’ bijodiżil).

(88)

Skont l-Artikoli 13(3) u 14(5) tar-Regolament bażiku, li jistipula li kull miżura estiża għandha tapplika għall-importazzjonijiet li daħlu fl-Unjoni skont ir-reġistrazzjoni imposta mir-Regolament tal-bidu, għandhom jinġabru d-dazji fuq dawk l-importazzjonijiet irreġistrati kkunsinnati mill-Kanada.

(89)

Minn dan ta’ hawn fuq, ġie konkluż li d-dazju anti-dumping definittiv impost fuq l-importazzjonijiet ta’ bijodiżil li joriġinaw fl-Istati Uniti ġie evitat permezz ta’ importazzjonijiet fl-Unjoni ta’ B20 u inferjuri skont l-Artikolu 13 tar-Regolament bażiku.

(90)

Skont l-ewwel sentenza tal-Artikolu 13(1) tar-Regolament bażiku, il-miżuri fis-seħħ fuq l-importazzjonijiet tal-prodott ikkonċernat li joriġinaw mill-Istati Uniti għandhom għalhekk jiġu estiżi għall-importazzjonijiet ta’ B20 u inferjuri.

(91)

Il-miżuri li jridu jiġu estiżi għandhom ikunu dawk stabbliti fl-Artikolu 1(2) tar-Regolament (KE) Nru 599/2009.

(92)

Id-dazju anti-dumping estiż fuq it-taħlitiet għandu jkun applikabbli proporzjonalment fit-taħlita, skont il-piż, tal-kontenut totali tal-esteri monoalkiliċi ta’ aċidi xaħmija u nafta paraffinika minn sinteżi u/jew trattament idriku, ta’ oriġini mhux mill-fossili (kontenut ta’ bijodiżil).

(93)

Skont l-Artikoli 13(3) u 14(5) tar-Regolament bażiku, li jistipula li kull miżura estiża għandha tapplika għall-importazzjonijiet li daħlu fl-Unjoni skont ir-reġistrazzjoni imposta mir-Regolament ta’ bidu, għandhom jinġabru d-dazji għal dawk l-importazzjonijiet irreġistrati ta’ B20 u inferjuri li joriġinaw fl-Istati Uniti.

(94)

Fid-dawl tas-sejbiet fir-rigward tal-Malasja, l-investigazzjoni dwar ċirkomvenzjoni possibbli tal-miżuri anti-dumping minn importazzjonijiet ta’ bijodiżil minn Singapor għandha tintemm u r-reġistrazzjoni tal-importazzjonijiet tal-bijodiżil minn Singapor introdotta mir-Regolament ta’ bidu għandha titwaqqaf.

(95)

Iż-żewġ kumpaniji li kkooperaw fil-Kanada billi wieġbu għall-kwestjonarju talbu eżenzjoni mill-miżuri estiżi possibbli skont l-Artikolu 13(4) tar-Regolament bażiku.

(96)

Instab li ż-żewġ produtturi tal-Kanada li kkooperaw ma kinux involuti fi prattiki ta’ ċirkomvenzjoni li huma s-soġġett ta’ din l-investigazzjoni. Barra minn hekk, dawn il-produtturi setgħu juru li ma kinux relatati mal-ebda mill-produtturi/esportaturi ta’ bijodiżil tal-Istati Uniti. Għalhekk, it-talbiet tagħhom ta’ eżenzjoni jistgħu jiġu milqugħa.

(97)

Huwa kkunsidrat li huma meħtieġa miżuri speċjali f’dan il-każ sabiex tiġi żgurata l-applikazzjoni korretta ta’ dawn l-eżenzjonijiet. Dawn il-miżuri speċjali jikkonsistu fil-preżentazzjoni lill-awtoritajiet tad-Dwana tal-Istati Membri ta’ fattura kummerċjali valida li għandha tkun konformi mar-rekwiżiti stipulati fl-Anness għal dan ir-Regolament. L-importazzjonijiet li ma jkunux akkumpanjati b’fattura tali għandhom ikunu suġġetti għad-dazju estiż anti-dumping.

(98)

Parti li kkooperat fl-Istati Uniti li wieġbet għall-kwestjonarju ukoll talbet għal eżenzjoni mill-miżuri estiżi possibbli skont l-Artikolu 13(4) tar-Regolament bażiku.

(99)

Kif spjegat fil-premessa (80) hawn fuq, l-investigazzjoni uriet biċ-ċar li din il-parti kienet involuta fi prattiki ta’ ċirkomvenzjoni billi importat taħlitiet B20 u inferjuri. Għalhekk, din l-eżenzjoni ma tistax tingħata.

(100)

Madankollu, għandu jiġi enfasizzat li, kemm-il darba l-produttur(i) esportatur(i) ikkonċernati ma għadhomx jipprattikaw id-dumping, partijiet bħal dawn jistgħu jitolbu għal reviżjoni skont l-Artikolu 11(3) tar-Regolament bażiku.

(101)

Il-partijiet kollha interessati ġew mgħarrfa bil-fatti essenzjali u l-kunsiderazzjonijiet li wasslu għall-konklużjonijiet imsemmija u ġew mistiedna jagħmlu l-kummenti. Ġew ikkunsidrati l-kummenti orali u miktuba li tressqu,

European Commission

Directorate-General for Trade

Directorate H

Office: N-105 4/92

1049 Brussels

BELGIUM

Fax: + 32 2 295 505

11.5.2011   

MT

Il-Ġurnal Uffiċjali tal-Unjoni Ewropea

L 122/22

(1)

Id-Direttiva 2004/49/KE timmira li ttejjeb l-aċċess għas-suq tas-servizzi tat-trasport bil-ferrovija billi tiddefinixxi prinċipji komuni għall-immaniġġjar, ir-regolamentazzjoni u s-supeviżjoni tas-sikurezza tal-linji tal-ferrovija. Id-Direttiva 2004/49/KE tipprovdi wkoll għal qafas li għandu jiġi implimentat biex jiżgura kundizzjonijiet ugwali għall-entitajiet kollha responsabbli mill-manutenzjoni tal-vaguni tal-merkanzija permezz tal-applikazzjoni tal-istess rekwiżiti taċ-ċertifikazzjoni madwar l-Unjoni.

(2)

L-għan tas-sistema ta’ ċertifikazzjoni huwa li tipprovdi qafas għall-armonizzazzjoni tar-rekwiżiti u l-metodi biex tiġi evalwata l-ħila tal-entitajiet responsabbli mill-manutenzjoni madwar l-Unjoni.

(3)

Bla ħsara għar-responsabbiltà tal-impriżi ferrovjarji u tal-maniġers tal-infrastruttura għall-ħidma mingħajr periklu tal-ferroviji, l-entità responsabbli mill-manutenzjoni għandha tiżgura li l-vaguni tal-merkanzija li tagħhom hija responsabbli mill-manutenzjoni jkunu fi stat sikur permezz ta’ sistema tal-manutenzjoni. Billi titqies il-varjetà wiesgħa ta’ metodi ta’ disinn u manutenzjoni, din is-sistema ta’ manutenzjoni għandha tkun sistema orjentata lejn il-proċess.

(4)

Il-maniġers tal-infrastruttura għandhom bżonn jużaw il-vaguni tal-merkanzija biex jittrasportaw il-materjali għall-bini jew għall-attivitajiet ta’ manutenzjoni tal-infrastruttura. Meta l-vaguni tal-merkanzija jintużaw għal dan l-għan, il-maniġers tal-infrastruttura jagħmlu dan fil-kapaċità ta’ impriża ferrovjarja. Il-valutazzjoni tal-kapaċità tal-maniġer tal-infrastruttura li juża l-vaguni tal-merkanzija għal dan l-għan għandha tkun parti mill-valutazzjoni tiegħu għal awtorizzazzjoni tas-sikurezza skont l-Artikolu 11 tad-Direttiva 2004/49/KE.

(5)

L-ispezzjonijiet u l-monitoraġġ li jsiru qabel it-tluq ta’ ferrovija jew fi triqthom ġeneralment jitwettqu minn persunal operattiv tal-impriżi ferrovjarji jew maniġers tal-infrastruttura, billi jsegwu l-proċess deskritt fis-sistema tal-immaniġġjar tas-sikurezza tagħhom skont l-Artikolu 4(3) tad-Direttiva 2004/49/KE.

(6)

L-impriżi ferrovjarji jew il-maniġers tal-infrastruttura għandhom jiżguraw, permezz tas-sistema tal-immaniġġjar tas-sikurezza tagħhom, il-kontroll tar-riskji kollha relatati mal-attività tagħhom, inkluż l-użu tal-kuntratturi. Għal dan l-għan, impriża ferrovjarja għandha tiddependi fuq arranġamenti kuntrattwali li jinvolvu entitajiet responsabbli mill-manutenzjoni tal-vaguni kollha li din topera. Dan jista’ jkun kuntratt bejn l-impriża ferrovjarja u l-entità responsabbli mill-manutenzjoni jew katina ta’ kuntratti li jinvolvu partijiet oħra, bħas-sid. Dawn il-kuntratti għandhom ikunu konsistenti mal-proċeduri stabbiliti minn impriża ferrovjarja jew maniġer tal-infrastruttura fis-sistema tal-immaniġġjar tas-sikurezza tagħha, inkluż l-iskambju tal-informazzjoni.

(7)

Skont id-Direttiva 2004/49/KE, ċertifikat ta’ entità responsabbli mill-manutenzjoni (ċertifikat ECM) huwa validu fl-Unjoni kollha. Iċ-ċertifikati maħruġa minn korpi f’pajjiżi terzi maħtura skont kriterji ekwivalenti u li jkunu jilħqu rekwiżiti ekwivalenti għal dawk stipulati f’dan ir-Regolament għandhom normalment jiġu aċċettati bħala ekwivalenti taċ-ċertifikati ECM maħruġa fl-Unjoni.

(8)

Il-valutazzjoni, minn korp taċ-ċertifikazzjoni, ta’ applikazzjoni għal ċertikat ECM hija valutazzjoni tal-ħila tal-applikant li jimmaniġġja l-attivitajiet tal-manutenzjoni u li jwettaq il-funzjonijiet operattivi tal-manutenzjoni waħdu jew permezz ta’ kuntratti ma’ korpi oħra, bħal workshops tal-manutenzjoni, responsabbli biex iwettqu dawn il-funzjonijiet jew partijiet minn dawn il-funzjonijiet.

(9)

Sistema ta’ akkreditament għandha tipprovdi għodda għall-immaniġġjar tar-riskji billi tiżgura li l-korpi akkreditati jkunu kompetenti biex iwettqu l-ħidma li dwarha impenjaw ruħhom. Barra minn hekk, l-akkreditament jitqies bħala l-mezz għall-iżgurar tar-rikonoxximent nazzjonali u internazzjonali taċ-ċertifikati ECM maħruġa minn korpi akkreditati.

(10)

Sabiex ikun hemm sistema li permezz tagħha l-korpi taċ-ċertifikazzjoni jkunu jistgħu jwettqu kontrolli fuq entitajiet iċċertifikati responsabbli mill-manutenzjoni madwar l-Unjoni, huwa importanti li l-korpi kollha li joħorġu ċ-ċertifikati lil xi entità responsabbli mill-manutenzjoni (il-“korpi taċ-ċertifikazzjoni”) jikkooperaw flimkien sabiex jarmonizzaw l-approċċi għaċ-ċertifikazzjoni. Se jiġu żviluppati u approvati rekwiżiti speċifiċi għall-akkreditament b’konformità mad-dispożizzjonijiet tar-Regolament (KE) Nru 765/2008 tal-Parlament Ewropew u tal-Kunsill (2).

(11)

Biex jiġi evalwat il-proċess taċ-ċertifikazzjoni stabbilit f’dan ir-Regolament huwa importanti li l-Aġenzija Ferrovjarja Ewropea (l-Aġenzija) tissorvelja l-iżvilupp tas-sistema taċ-ċertifikazzjoni. Sabiex tkun tista’ twettaq din il-funzjoni, l-Aġenzija teħtieġ tiġbor l-informazzjoni dwar in-natura tal-korpi taċ-ċertifikazzjoni attivi f’dan il-qasam u n-numru ta’ ċertifikati maħruġa lill-entitajiet responsabbli mill-manutenzjoni. Huwa importanti wkoll li l-Aġenzija tiffaċilita l-koordinazjoni bejn il-korpi taċ-ċertifikazzjoni.

(12)

Ir-Regolament tal-Kummissjoni (KE) Nru 653/2007 tat-13 ta' Ġunju 2007 dwar l-użu ta’ format komuni Ewropew għaċ-ċertifikati tas-sigurtà u d-dokumenti tal-applikazzjoni skont l-Artikolu 10 tad-Direttiva 2004/49/KE tal-Parlament Ewropew u tal-Kunsill u dwar il-validità taċ-ċertifikati tas-sigurtà li nħarġu skont id-Direttiva 2001/14/KE (3) jipprovdi l-format standard għaċ-ċertifikat tas-sigurtà. Dan il-format għandu jiġi aġġornat biex jinkludi aktar informazzjoni dwar l-entitajiet responsabbli mill-manutenzjoni. Ir-Regolament (KE) Nru 653/2007 għandu għalhekk jiġi emendat skont dan.

(13)

Sakemm tiġi applikata bi sħiħ is-sistema ta’ ċertifikazzjoni tal-entità responsabbli mill-manutenzjoni pprovduta għaliha f’dan ir-Regolament, il-validità tal-prattiki eżistenti biex jiġu ċċertifikati l-entitajiet responsabbli mill-manutenzjoni u l-workshops tal-manutenzjoni għandha tiġi rikonoxxuta matul perjodu ta’ tranżizzjoni sabiex jiġi żgurat il-forniment mingħajr interuzzjoni tas-servizzi tat-trasport tal-merkanzija bil-ferrovija, b’mod partikolari, dawk fuq livell internazzjonali. Matul dan il-perjodu l-awtoritajiet nazzjonali tas-sikurezza għandhom jagħtu attenzjoni partikolari lill-ekwivalenza u l-konsistenza tal-prattiki differenti ta’ ċertifikazzjoni.

(14)

Il-miżuri stipulati f’dan ir-Regolament huma skont l-opinjoni tal-Kumitat stabbilit skont l-Artikolu 27 tad-Direttiva 2004/49/KE,

(a)

“akkreditament” tfisser akkreditament kif definit fl-Artikolu 2(10) tar-Regolament (KE) Nru 765/2008;

(b)

“ċertifikat ECM” tfisser ċertifikat maħruġ lill-entità responsabbli mill-manutenzjoni skont l-Artikolu 14a(4) tad-Direttiva 2004/49/KE;

(c)

“korp taċ-ċertifikazzjoni” tfisser korp, indikat skont l-Artikolu 10, bħala responsabbli miċ-ċertifikazzjoni ta’ entitajiet responsabbli mill-manutenzjoni, abbażi tal-kriterji fl-Anness II;

(d)

“vagun tal-merkanzija” tfisser vettura mingħajr awtopropulsjoni maħsuba għat-trasport tal-merkanzija jew materjali oħra biex jintużaw f’attivitajiet bħal bini jew manutenzjoni tal-infrastruttura;

(e)

“workshop tal-manutenzjoni” tfisser entità mobbli jew fissa magħmula minn persunal, inklużi dawk responsabbi mill-immaniġġjar, għodda u faċilitajiet organizzati biex iwettqu manutenzjoni fuq il-vetturi, il-partijiet, il-komponenti jew assemblaġġi sekondarji tal-vetturi.

(f)

“rilaxx għas-servizz” tfisser il-garanzija mogħtija lill-maniġer tal-flotta ta’ manutenzjoni, mill-entità li qed tipprovdi l-manutenzjoni, li l-manutenzjoni ġiet ipprovduta skont l-ordnijiet ta’ manutenzjoni;

(g)

“ritorn għall-operazzjoni” tfisser il-garanzija, ibbażata fuq ir-rilaxx għas-servizz, mogħtija lill-utent, bħall-impriża ferrovjarja jew sid, mill-entità responsabbli mill-manutenzjoni li x-xogħlijiet ta’ manutenzjoni xierqa kollha tlestew u l-vagun, li preċedentement kien tneħħa mill-operazzjoni, huwa f’kundizzjoni li jintuża b’mod sikur, bil-possibbiltà li jkun suġġett għal restrizzjonijiet temporanji fuq l-użu.

(a)

il-funzjoni tal-immaniġġjar, li tissorvelja u tikkoordina l-funzjonijiet tal-manutenzjoni msemmija fil-punti minn (b) sa (d) u tiżgura l-istat sikur tal-vagun tal-merkanzija fis-sistema tal-linji tal-ferrovija;

(b)

il-funzjoni tal-iżvilupp tal-manutenzjoni, li hija responsabbli għall-immaniġġjar tad-dokumentazzjoni tal-manutenzjoni, inkluż l-immaniġġjar tal-konfigurazzjoni, ibbażat fuq id-disinn u d-dejta operattiva kif ukoll fuq il-prestazzjoni u r-ritorn fuq l-esperjenza;

(c)

il-funzjoni tal-immaniġġjar tal-manutenzjoni tal-flotta, li jimmaniġġja l-irtirar tal-vagun tal-merkanzija għall-manutenzjoni u r-ritorn tiegħu fis-servizz wara l-manutenzjoni; u

(d)

il-funzjoni tat-twettiq tal-manutenzjoni, li tagħmel il-manutenzjoni teknika meħtieġa fuq vagun tal-merkanzija jew partijiet minnu, inkluż id-dokumentazzjoni tar-ritorn tiegħu fis-servizz.

(a)

fejn il-manutenzjoni tal-vaguni tal-merkanzija ssir mill-applikant, l-applikant jew għandu jinkludi ċertifikat ECM validu bħala parti mill-applikazzjoni tiegħu, jekk disponibbli, jew il-kapaċità tiegħu bħala entità responsabbli mill-manutenzjoni għandha tiġi vvalutata bħala parti mill-applikazzjoni tiegħu għal ċertifikat tas-sikurezza jew awtorizzazzjoni tas-sikurezza;

(b)

fejn il-manutenzjoni tal-vaguni tal-merkanzija ssir minn partijiet minbarra l-applikant, l-applikant għandu jiżgura, permezz tas-sistema tal-immaniġġjar tas-sikurezza tiegħu, il-kontroll tar-riskji kollha relatati mal-attivitajiet tiegħu, inkluż l-użu ta’ tali vaguni, fejn, b’mod partikolari, għandhom japplikaw id-dispożizzjonijiet tal-Artikolu 5 ta’ dan ir-Regolament.

11.5.2011   

MT

Il-Ġurnal Uffiċjali tal-Unjoni Ewropea

L 122/47

(1)

Fit-13 ta’ Awwissu 2010, il-Kummissjoni Ewropea (il-“Kummissjoni”) ħabbret permezz ta’ avviż ippubblikat f’Il-Ġurnal Uffiċjali tal-Unjoni Ewropea  (2) (“Avviż ta’ bidu”), il-bidu ta’ proċediment antidumping li jikkonċerna l-importazzjonijiet fl-Unjoni ta’ ċerti alkoħols xaħmija u t-taħlitiet tagħhom (“il-prodott investigat”) li joriġinaw mill-Indja, l-Indoneżja, u l-Malasja (“il-pajjiżi ikkonċernati”).

(2)

Il-proċedimenti ta’ antidumping inbdew wara ilment mressaq fit-30 ta’ Ġunju 2010 minn żewġ produtturi tal-Unjoni, Cognis GmbH u Sasol Olefins & Surfactants GmbH (“il-kwerelanti”). Dawn iż-żewġ kumpaniji huma inkorporati taħt il-liġi Ġermaniża, b’imkejjen ta’ produzzjoni fil-Ġermanja, Franza u l-Italja. Dawn iż-żewġ kumpaniji jirrappreżentaw sehem ewlieni, f’dan il-każ aktar minn 25 % tal-produzzjoni totali tal-Unjoni tal-prodott investigat. L-ilment kien jinkludi evidenza prima facie ta’ dumping tal-prodott imsemmi li joriġina fil-pajjiżi kkonċernati u ta’ ħsara materjali li rriżultat minnu, u din l-evidenza tqieset li kienet biżżejjed biex tiġġustifika l-bidu ta’ proċediment.

(3)

Il-Kummissjoni għarrfet uffiċjalment lill-kwerelanti, produtturi oħra magħrufa fl-Unjoni, importaturi/kummerċjanti u utenti magħrufa li huma kkonċernati, produtturi esportaturi u rappreżentanti tal-pajjiżi esportaturi kkonċernati dwar il-bidu tal-proċedura. Il-partijiet interessati ngħataw l-opportunità li jressqu l-opinjonijiet tagħhom bil-miktub u li jitolbu seduta fil-limitu taż-żmien stipulat fl-Avviż ta’ bidu.

(4)

Il-partijiet interessati kollha, li talbu dan u wrew li kien hemm raġunijiet partikolari għaliex għandhom jinstemgħu, ingħataw seduta.

(5)

Minħabba l-għadd kbir ta’ importaturi identifikati mill-ilment, kien hemm ħsieb ta’ teħid ta’ kampjuni għall-importaturi fl-Avviż ta’ bidu skont l-Artikolu 17(1) tar-Regolament bażiku. Erba’ importaturi pprovdew l-informazzjoni meħtieġa u qablu li jkunu inklużi fil-kampjun sal-iskadenza fl-Avviz ta’ bidu. Minħabba dan l-għadd żgħir ta’ importaturi li għamlu kuntatt ġie deċiż li t-teħid ta’ kampjuni ma jiġix applikat.

(6)

Il-Kummissjoni bagħtet kwestjonarji lill-produtturi esportaturi, lill-produtturi tal-Unjoni u lill-utenti u lill-fornituri kollha magħrufin li huma kkonċernati kif ukoll lill-partijiet kollha li talbu hekk fi ħdan l-iskadenzi stabbiliti fl-Avviż ta’ bidu.

(7)

Waslu t-tweġibiet għall-kwestjonarju minn ħames produtturi tal-Unjoni, żewġ importaturi, 21 utent fl-Unjoni, żewġ produtturi esportaturi fl-Indja, żewġ produtturi esportaturi fl-Indoneżja u n-negozjanti marbuta magħhom, u tliet produtturi esportaturi fil-Malasja u n-negozjanti marbuta magħhom.

(8)

Il-Kummissjoni fittxet u vverifikat l-informazzjoni kollha li hija qieset meħtieġa għal determinazzjoni preliminari ta’ dumping, il-ħsara li rriżultat u l-interess tal-Unjoni. Saru żjarat ta’ verifika fl-istabbilimenti tal-kumpaniji li ġejjin:

(9)

L-investigazzjoni tad-dumping u l-ħsara kopriet il-perjodu mill-1 ta’ Lulju 2009 sat-30 ta’ Ġunju 2010 (“il-perjodu tal-investigazzjoni” jew il-“PI”). L-eżami tat-tendenzi rilevanti gћall-valutazzjoni tal-ħsara kopra l-perjodu mill-1 ta’ Jannar 2007 sa tmiem il-perjodu ta’ investigazzjoni (“il-perjodu meqjus”).

(10)

Il-prodott ikkonċernat huwa alkoħols xaħmija saturati b’katina ta’ atomi ta’ karbonju ta’ tul ta’ C8, C10, C12, C14, C16 jew C18 (l-iżomeri bil-friegħi mhux inklużi) li jinkludu alkoħols xaħmija saturati uniċi (li ssir referenza għalihom ukoll bħala “qatgħat uniċi”) u taħlitiet li b’mod predominanti jinkludu kombinazzjoni ta’ ktajjen ta’ atomi ta’ karbonju ta’ tulijiet ta’ C6-C8, C6-C10, C8-C10, C10-C12 (ġeneralment kategorizzati bħala C8-C10), taħlitiet li b’mod predominanti jinkludu kombinazzjoni ta’ ktajjen ta’ atomi ta’ karbonju ta’ tulijiet ta’ C12-C14, C12-C16, C12-C18, C14-C16 (ġeneralment kategorizzati bħala C12-C14), u taħlitiet li b’mod predominanti jinkludu kombinazzjoni ta’ ktajjen ta’ atomi ta’ karbonju ta’ tulijiet ta’ C16-C18, li joriġinaw fl-Indja, l-Indoneżja, u l-Malasja (“il-prodott ikkonċernat”), li bħalissa jaqaw taħt il-kodiċijiet NM ex 2905 16 85, 2905 17 00, ex 2905 19 00 u ex 3823 70 00.

(11)

Il-prodott investigat huwa prodott intermedju li jiġi prodott minn sorsi naturali (oleokimiċi) jew sintetiċi (petrokimiċi), bħax-xaħmijiet u ż-żjut naturali, żejt mhux raffinat, gass naturali, likwidi ta’ gass naturali u l-karbonju. Jintuża l-aktar bħala materjal ta’ bażi għall-produzzjoni ta’ sulfati ta’ alkoħols xaħmija, etossilati ta’ alkoħols xaħmija u sulfati tal-etere ta’ alkoħols xaħmija (l-hekk imsejħa aġenti tensioattivi). L-aġenti tensioattivi jintużaw fil-produzzjoni ta’ deterġenti u prodotti għat-tindif fid-dar u l-kura personali.

(12)

Il-prodott esportat lejn l-Unjoni mill-Indja, l-Indoneżja u l-Malasja, u l-prodott li jiġi prodott u mibjugħ domestikament f’dawn il-pajjiżi kif ukoll dak manifatturat u mibjugħ fl-Unjoni mill-produtturi tal-Unjoni nstabu li kellhom l-istess karatteristiċi bażiċi fiżiċi u tekniċi kif ukoll l-istess użi. Għalhekk huma b’mod provviżorju meqjusa li huma simili fis-sens tal-Artikolu 1(4) tar-Regolament bażiku.

(13)

Matul il-kors tal-investigazzjoni, ċerti partijiet stqarrew li wieħed mill-kwerelanti pproduċa, f’wieħed mis-siti ta’ produzzjoni tiegħu, prodott li jinkludi molekuli tal-iżomeri bil-friegħi, mhux kopert bid-definizzjoni tal-ambitu tal-prodott, u li għalhekk din il-produzzjoni ma għandhiex tiġi kkunsidrata bħala waħda li tista’ titqies bħala prodott simili. Provviżorjament qed jiġi ddeterminat li din it-talba hija ġġustifikata, u għalhekk id-dejta ta’ dan il-produttur ma ntużatx fl-analiżi tal-ħsara. Għandu jiġi nnutat li żewġ kumpaniji oħra, b’waħda minnhom li qed tikkopera fl-investigazzjoni, ġew esklużi mid-definizzjoni tal-industrija tal-Unjoni għall-istess raġuni.

(14)

Għall-fini tad-determinazzjoni tal-valur normali għal kull produttur esportatur l-ewwel ġie stabbilit jekk il-volum totali tal-bejgħ domestiku tal-prodott simili lill-klijenti indipendenti kienx rappreżentattiv meta mqabbel mal-volum tal-bejgħ totali ta’ esportazzjoni lejn l-Unjoni. Skont l-Artikolu 2(2) tar-Regolament bażiku, il-bejgħ domestiku hu kkunsidrat rappreżentattiv meta l-volum totali tal-bejgħ domestiku ikun mill-anqas 5 % tal-volum totali tal-bejgħ tal-prodott ikkonċernat lejn l-Unjoni. Instab li l-bejgħ globali minn kull produttur esportatur tal-prodott simili fuq is-suq domestiku kien rappreżentattiv.

(15)

Għal kull tip ta’ prodott mibjugħ mill-produttur esportatur fis-suq lokali tiegħu u misjub li huwa komparabbli direttament mat-tip ta’ prodott mibjugħ għall-esportazzjoni lejn l-Unjoni, ġie stabbilit jekk il-bejgħ lokali kienx rappreżentattiv biżżejjed għall-finijiet tal-Artikolu 2(2) tar-Regolament bażiku. Il-bejgħ domestiku ta’ tip ta’ prodott partikolari tqies rappreżentattiv biżżejjed meta l-volum totali ta’ dak it-tip ta’ prodott mibjugħ mill-produttur esportatur ikkonċernat fis-suq domestiku lil klijenti indipendenti matul il-PI rrappreżenta mill-inqas 5 % tal-volum totali ta’ bejgħ tat-tip ta’ prodott komparabbli esportat lill-Unjoni.

(16)

Sussegwentement ġie eżaminat jekk il-bejgħ domestiku ta’ dan it-tip ta’ prodott jistax jitqies bħala bejgħ li sar fl-andament normali tal-kummerċ skont l-Artikolu 2(4) tar-Regolament bażiku. Dan sar billi ġie stabbilit il-proporzjon ta’ bejgћ domestiku bi qligħ lill-konsumaturi indipendenti fis-suq domestiku għal kull tip tal-prodott ikkonċernat esportat matul il-PI.

(17)

Għal dawk it-tipi ta’ prodotti fejn aktar minn 80 % bħala volum ta’ bejgħ fis-suq domestiku tat-tip ta’ prodott kienu ogħla mill-kost u l-medja differenzjata tal-prezz ta’ bejgħ ta’ dak it-tip kienet daqs jew iktar mill-prezz ta’ unità ta’ produzzjoni, il-valur normali, skont it-tip ta’ prodott, ġie kkalkulat bħala l-medja differenzjata tal-prezzijiet domestiċi attwali tal-bejgħ kollu tat-tip ikkonċernat, irrispettivament minn jekk dak il-bejgħ sarx bi profitt jew le.

(18)

Meta l-ammont ta’ bejgħ bi qligħ ta’ tip ta’ prodott kien jirrappreżenta 80 % jew inqas tal-volum ta’ bejgħ totali ta’ dak it-tip, jew meta l-prezz medju differenzjat ta’ dak it-tip kien inqas mill-kost ta’ unità ta’ produzzjoni, il-valur normali kien ibbażat fuq il-prezz domestiku attwali, li ġie kkalkulat bħala prezz medju differenzjat tal-bejgħ domestiku bi qligħ biss ta’ dak it-tip magħmul matul il-PI.

(19)

Iż-żewġ produtturi esportaturi fl-Indja esportaw il-prodott ikkonċernat direttament lil klijenti indipendenti fl-Unjoni. Għalhekk, il-prezzijiet ta’ esportazzjoni ġew stabbiliti abbażi tal-prezzijiet effettivament imħallsa jew li jistgħu jitħallsu minn dawn il-klijenti indipendenti għall-prodott ikkonċernat, skont l-Artikolu 2(8) tar-Regolament bażiku.

(20)

Il-valur normali u l-prezz ta’ esportazzjoni tal-produtturi esportaturi tqabblu fuq bażi ex-fabbrika.

(21)

Biex jiġi żgurat tqabbil ġust bejn il-valur normali u l-prezz ta’ esportazzjoni, saret konċessjoni xierqa fil-forma ta’ aġġustamenti għad-differenzi li jaffettwaw il-prezzijiet u l-komparabilità tal-prezzijiet skont l-Artikolu 2(10) tar-Regolament bażiku. Abbażi ta’ dan, fejn applikabbli u fejn kien iġġustifikat, saru aġġustamenti għad-differenzi fit-taxxi indiretti, trasport, assigurazzjoni, immaniġġjar, spejjeż ta’ tagħbija u oħrajn anċillari, spejjeż ta’ ppakkjar, spejjeż ta’ kreditu u kummissjonijiet.

(22)

Iż-żewġ produtturi esportaturi stqarrew li l-bejgħ tagħhom li għamlu lil wieħed mill-kwerelanti fl-Unjoni matul il-PI għandu jiġi injorat fil-kalkolu tal-marġini ta’ dumping għaliex dan il-bejgħ sar fi kwantitajiet sinifikanti u bi prezzijiet negozjati sew. Iżda, m’hemmx raġuni legali għaliex dawn l-esportazzjonijiet tal-prodott ikkonċernat għandhom jiġu injorati fil-kalkolu ta’ dumping. It-talbiet taż-żewġ produtturi esportaturi għalhekk ġew miċħuda.

(23)

Iż-żewġ produtturi esportaturi talbu aġġustament għall-konverżjoni tar-rata tal-kambju hekk kif argumentaw li kien hemm apprezzament sostnut fir-Rupee Indjan (INR) kontra l-Euro (EUR) sa minn Novembru tal-2009 li jkollu effett ta’ tfixkil fuq il-kalkoħols ta’ dumping. It-talba kienet marbuta mal-bejgħ li sar fl-EUR minn Jannar tal-2010 ‘il quddiem u kienet tikkonsisti f’talba li, għall-finijiet tal-konverżjoni tal-valur ta’ dak il-bejgħ f’INR, ir-rata tal-kambju għax-xahar li fih sar il-bejgħ tiġi sostitwita bir-rata tal-kambju ta’ xahrejn qabel L-Artikolu 2(10)(j) fil-fatt jipprovdi għal aġġustament għall-konverżjonijiet tar-rata tal-kambju f’ċertu ċirkostanzi. Madankollu, wieħed jinnota li l-apprezzament tar-INR seħħ biss matul it-tieni nofs tal-PI. Barra minn hekk, wieħed jinnota li ż-żewġ kumpaniji Indjani spiss għollew il-prezzijiet tagħhom lill-klijenti ewlenin tagħhom fl-Unjoni matul dak il-perjodu u segwew mudell pjuttost regolari, u li l-prezzijiet stabbiliti fl-Unjoni mill-kwerelanti kienu wkoll qed jiżdiedu b’mod sod matul it-tieni nofs tal-PI. Għalhekk m’hemmx evidenza ċara li l-apprezzament tar-INR ma kienx rifless fil-ħin fil-prezzijiet li kienu jitolbu l-produtturi esportaturi Indjani lill-klijenti tagħhom fl-UE jew li kellu effett penalizzanti bla bżonn fil-kalkoħols ta’ dumping. It-talbiet taż-żewġ kumpaniji għalhekk ġew miċħuda.

(24)

Skont l-Artikolu 2(11) u (12) tar-Regolament bażiku, il-marġinijiet ta’ dumping għall-produtturi esportaturi Indjani li kkooperaw ġew stabbiliti abbażi ta’ paragun bejn il-medja differenzjata tal-valur normali u l-medja differenzjata tal-prezz ta’ esportazzjoni.

(25)

Abbażi tal-informazzjoni disponibbli mill-kwerelant u l-produtturi esportaturi Indjani li kkoopera, u meqjusal-informazzjoni statistika disponibbli, ma hemmx aktar produtturi magħrufa tal-prodott ikkonċernat fl-India. Għalhekk, il-marġini ta’ dumping nazzjonali li kellu jiġi stabbilit għall-Indja ġie stabbilit fl-istess livell tal-ogħla marġini misjub għal produttur esportatur li kkoopera.

(26)

Fuq din il-bażi, il-marġnijiet ta’ dumping provviżorji espressi bћala perċentwali tal-prezz CIF fuq il-fruntiera tal-Unjoni, bid-dazju mhux imħallas, huma kif ġej:

(27)

Għall-fini tad-determinazzjoni tal-valur normali għal kull produttur esportatur l-ewwel ġie stabbilit jekk il-volum totali tal-bejgħ domestiku tal-prodott simili lill-klijenti indipendenti kienx rappreżentattiv meta mqabbel mal-volum tal-bejgħ totali ta’ esportazzjoni lejn l-Unjoni. Skont l-Artikolu 2(2) tar-Regolament bażiku, il-bejgħ domestiku hu kkunsidrat rappreżentattiv meta l-volum totali tal-bejgħ domestiku ikun mill-anqas 5 % tal-volum totali tal-bejgħ tal-prodott ikkonċernat lejn l-Unjoni. Instab li l-bejgħ globali minn kull produttur esportatur tal-prodott simili fuq is-suq domestiku kien rappreżentattiv.

(28)

Għal kull tip ta’ prodott mibjugħ mill-produttur esportatur fis-suq lokali tiegħu u misjub li huwa komparabbli direttament mat-tip ta’ prodott mibjugħ għall-esportazzjoni lejn l-Unjoni, ġie stabbilit jekk il-bejgħ lokali kienx rappreżentattiv biżżejjed għall-finijiet tal-Artikolu 2(2) tar-Regolament bażiku. Il-bejgħ domestiku ta’ tip ta’ prodott partikolari tqies rappreżentattiv biżżejjed meta l-volum totali ta’ dak it-tip ta’ prodott mibjugħ mill-produttur esportatur ikkonċernat fis-suq domestiku lil klijenti indipendenti matul il-PI rrappreżenta mill-inqas 5 % tal-volum totali ta’ bejgħ tat-tip ta’ prodott komparabbli esportat lill-Unjoni.

(29)

Sussegwentement ġie eżaminat jekk il-bejgħ domestiku ta’ dan it-tip ta’ prodott jistax jitqies bħala bejgħ li sar fl-andament normali tal-kummerċ skont l-Artikolu 2(4) tar-Regolament bażiku. Dan sar billi ġie stabbilit il-proporzjon ta’ bejgћ domestiku bi qligħ lill-konsumaturi indipendenti fis-suq domestiku għal kull tip tal-prodott ikkonċernat esportat matul il-PI.

(30)

Għal dawk it-tipi ta’ prodotti fejn aktar minn 80 % bħala volum ta’ bejgħ fis-suq domestiku tat-tip ta’ prodott kienu ogħla mill-kost u l-medja differenzjata tal-prezz ta’ bejgħ ta’ dak it-tip kienet daqs jew iktar mill-prezz ta’ unità ta’ produzzjoni, il-valur normali, skont it-tip ta’ prodott, ġie kkalkulat bħala l-medja differenzjata tal-prezzijiet domestiċi attwali tal-bejgħ kollu tat-tip ikkonċernat, irrispettivament minn jekk dak il-bejgħ sarx bi profitt jew le.

(31)

Meta l-ammont ta’ bejgħ bi qligħ ta’ tip ta’ prodott kien jirrappreżenta 80 % jew inqas tal-volum ta’ bejgħ totali ta’ dak it-tip, jew meta l-prezz medju differenzjat ta’ dak it-tip kien inqas mill-kost ta’ unità ta’ produzzjoni, il-valur normali kien ibbażat fuq il-prezz domestiku attwali, li ġie kkalkulat bħala prezz medju differenzjat tal-bejgħ domestiku bi qligħ biss ta’ dak it-tip magħmul matul il-PI.

(32)

Fejn ma kien hemm ebda bejgħ domestiku ta’ tip ta’ prodott partikolari minn produttur esportatur, il-valur normali ġie maħdum skont l-Artikolu 2(3) tar-Regolament bażiku.

(33)

Meta jinbena l-valur normali skont l-Artikolu 2(3) tar-Regolament bażiku, l-ammonti għall-ispejjeż ġenerali, amministrattivi u ta’ bejgħ u għall-profitti ġew imsejsa, skont l-Artikolu 2(6) l-ewwel subparagrafu introduttorju tar-Regolament bażiku, fuq id-dejta effettiva marbuta mal-produzzjoni u l-bejgħ, fl-andament normali tal-kummerċ, tal-prodott simili, mill-produttur esportatur.

(34)

Il-produtturi esportaturi għamlu bejgħ ta’ esportazzjoni lill-Unjoni jew direttament lill-klijenti indipendenti jew permezz tal-kumpaniji tan-negozju relatati li jinsabu f’Singapor u fl-Unjoni.

(35)

Fejn il-bejgħ ta’ esportazzjoni lejn l-Unjoni sar jew direttament lil klijenti indipendenti fl-Unjoni jew permezz ta’ kumpaniji kummerċjali relatati f’Singapor, il-prezzijiet ta’ esportazzjoni ġew stabbiliti fuq il-bażi tal-prezzijiet effettivament imħallsa jew li għandhom jitħallsu għall-prodott ikkonċernat skont l-Artikolu 2(8) tar-Regolament bażiku.

(36)

Fejn il-bejgħ ta’ esportazzjoni lejn l-Unjoni sar permezz ta’ kumpaniji kummerċjali relatati li jinsabu fl-Unjoni, il-prezzijiet ta’ esportazzjoni ġew stabbiliti fuq il-bażi tal-ewwel prezzijiet tal-bejgħ mill-ġdid ta’ dawn in-negozjanti relatati lil klijenti indipendenti fl-Unjoni, skont l-Artikolu 2(9) tar-Regolament bażiku.

(37)

Il-valur normali u l-prezz ta’ esportazzjoni tal-produtturi esportaturi tqabblu fuq bażi ex-fabbrika.

(38)

Biex jiġi żgurat tqabbil ġust bejn il-valur normali u l-prezz ta’ esportazzjoni, saret konċessjoni xierqa fil-forma ta’ aġġustamenti għad-differenzi li jaffettwaw il-prezzijiet u l-komparabilità tal-prezzijiet skont l-Artikolu 2(10) tar-Regolament bażiku. Abbażi ta’ dan, fejn applikabbli u fejn kien iġġustifikat, saru aġġustamenti għad-differenzi fit-taxxi indiretti, trasport, assigurazzjoni, immaniġġjar, spejjeż ta’ tagħbija u oħrajn anċillari, spejjeż ta’ ppakkjar, spejjeż ta’ kreditu u kummissjonijiet.

(39)

Waħda mill-kumpaniji talbet aġġustament għad-differenzi fil-karatteristiċi fiżiċi abbażi li hija tesporta l-prodott investigat kemm fil-forma likwida kif ukoll dik solida lill-UE filwaqt li fuq is-suq domestiku hija tbiegħu biss fil-forma solida u li l-prezzijiet tal-forma likwida huma aktar baxxi minn dawk tal-prodott investigat. Madankollu, il-kumpanija ma pprovdietx il-kwantifikazzjoni ta’ dan l-aġġustament. Paragun sempliċi tal-prezzijiet ta’ esportazzjoni tal-prodott investigat solidu u likwidu ma jistax jikkostitwixxi l-bażi għall-għoti ta’ aġġustament għad-differenzi fil-karatteristiċi fiżiċi. Barra minn hekk, is-sistema tal-kontabbiltà tal-kumpanija ma tippermettix is-segregazzjoni tajba tad-differenzi fl-ispejjeż bejn il-prodott solidu u dak likwidu. Għalhekk, ma kienx hemm mod affidabbli biex jiġi kkalkulat l-aġġustament potenzjali u t-talba kellha tiġi miċħuda.

(40)

Il-kwerelanti ppreżentaw it-talba li hemm distorsjoni fl-ispiża tal-enerġija fl-Indoneżja minħabba l-prezzijiet baxxi ħafna u sussidjati tal-enerġija. Madankollu, ma ppreżentaw l-ebda tagħrif sostanzjat dwar kif din id-distorsjoni fl-ispiża tal-enerġija użata għall-produzzjoni domestika u għall-esportazzjoni se taffettwa l-kalkoħols ta’ dumping. It-talba għalhekk ma ntlaqatx.

(41)

Skont l-Artikolu 2(11) u (12) tar-Regolament bażiku, il-marġinijiet ta’ dumping għall-produtturi esportaturi Indoneżjani li kkooperaw ġew stabbiliti abbażi ta’ paragun bejn il-medja differenzjata tal-valur normali u l-medja differenzjata tal-prezz ta’ esportazzjoni.

(42)

Abbażi tal-informazzjoni disponibbli mill-kwerelant u l-produtturi esportaturi Indoneżjani li kkooperaw, u meqjusal-informazzjoni statistika disponibbli, ma hemmx aktar produtturi magħrufa tal-prodott ikkonċernat fl-Indoneżja. Għalhekk, il-marġini ta’ dumping nazzjonali li kellu jiġi stabbilit għall-Indoneżja ġie stabbilit fl-istess livell tal-ogħla marġini misjub għal produttur esportatur li kkoopera.

(43)

Fuq din il-bażi, il-marġnijiet tad-dumping provviżorji, espressi bћala perċentwali tal-prezz CIF fuq il-fruntiera tal-Unjoni, bid-dazju mhux imħallas, huma:

(44)

Għall-fini tad-determinazzjoni tal-valur normali għal kull produttur esportatur l-ewwel ġie stabbilit jekk il-volum totali tal-bejgħ domestiku tal-prodott simili lill-klijenti indipendenti kienx rappreżentattiv meta mqabbel mal-volum tal-bejgħ totali ta’ esportazzjoni lejn l-Unjoni. Skont l-Artikolu 2(2) tar-Regolament bażiku, il-bejgħ domestiku hu kkunsidrat rappreżentattiv meta l-volum totali tal-bejgħ domestiku ikun mill-anqas 5 % tal-volum totali tal-bejgħ tal-prodott ikkonċernat lejn l-Unjoni. Għal tnejn mill-produtturi esportaturi li kkooperaw instab li l-bejgħ globali mill-produtturi esportaturi tal-prodott simili fuq is-suq domestiku kien rappreżentattiv. Fil-każ tal-produttur esportatur l-ieħor li kkopera ma nstab l-ebda bejgħ domestiku indipendenti fil-PI.

(45)

Għal kull tip ta’ prodott mibjugħ mill-produttur esportatur fis-suq lokali tiegħu u misjub li huwa komparabbli direttament mat-tip ta’ prodott mibjugħ għall-esportazzjoni lejn l-Unjoni, ġie stabbilit jekk il-bejgħ lokali kienx rappreżentattiv biżżejjed għall-finijiet tal-Artikolu 2(2) tar-Regolament bażiku. Il-bejgħ domestiku ta’ tip ta’ prodott partikolari tqies rappreżentattiv biżżejjed meta l-volum totali ta’ dak it-tip ta’ prodott mibjugħ mill-produttur esportatur ikkonċernat fis-suq domestiku lil klijenti indipendenti matul il-PI rrappreżenta mill-inqas 5 % tal-volum totali ta’ bejgħ tat-tip ta’ prodott komparabbli esportat lill-Unjoni.

(46)

Sussegwentement ġie eżaminat jekk il-bejgħ domestiku ta’ dan it-tip ta’ prodott jistax jitqies bħala bejgħ li sar fl-andament normali tal-kummerċ skont l-Artikolu 2(4) tar-Regolament bażiku. Dan sar billi ġie stabbilit il-proporzjon ta’ bejgћ domestiku bi qligħ lill-konsumaturi indipendenti fis-suq domestiku għal kull tip tal-prodott ikkonċernat esportat matul il-PI.

(47)

Għal dawk it-tipi ta’ prodotti fejn aktar minn 80 % bħala volum ta’ bejgħ fis-suq domestiku tat-tip ta’ prodott kienu ogħla mill-kost u l-medja differenzjata tal-prezz ta’ bejgħ ta’ dak it-tip kienet daqs jew iktar mill-prezz ta’ unità ta’ produzzjoni, il-valur normali, skont it-tip ta’ prodott, ġie kkalkulat bħala l-medja differenzjata tal-prezzijiet domestiċi attwali tal-bejgħ kollu tat-tip ikkonċernat, irrispettivament minn jekk dak il-bejgħ sarx bi profitt jew le.

(48)

Meta l-ammont ta’ bejgħ bi qligħ ta’ tip ta’ prodott kien jirrappreżenta 80 % jew inqas tal-volum ta’ bejgħ totali ta’ dak it-tip, jew meta l-prezz medju differenzjat ta’ dak it-tip kien inqas mill-kost ta’ unità ta’ produzzjoni, il-valur normali kien ibbażat fuq il-prezz domestiku attwali, li ġie kkalkulat bħala prezz medju differenzjat tal-bejgħ domestiku bi qligħ biss ta’ dak it-tip magħmul matul il-PI.

(49)

Fejn ma kien hemm ebda bejgħ domestiku ta’ tip ta’ prodott partikolari minn produttur esportatur, il-valur normali ġie maħdum skont l-Artikolu 2(3) tar-Regolament bażiku.

(50)

Meta jinbena l-valur normali skont l-Artikolu 2(3) tar-Regolament bażiku, l-ammonti għall-ispejjeż ġenerali, amministrattivi u ta’ bejgħ u għall-profitti ġew imsejsa, skont l-Artikolu 2(6) l-ewwel subparagrafu introduttorju tar-Regolament bażiku, fuq id-dejta effettiva marbuta mal-produzzjoni u l-bejgħ, fl-andament normali tal-kummerċ, tal-prodott simili, mill-produttur esportatur.

(51)

Fil-każ tal-produttur esportatur li ma kellux bejgħ domestiku fil-PI, l-ammonti tal-ispejjeż ta’ bejgħ, dawk ġenerali u amministrattivi u tal-profitti ġew bbażati, skont l-Artikolu 2(6)(a) tar-Regolament bażiku, fuq il-medja differenzjata tal-ammonti attwali ddeterminati għaż-żewġ produtturi esportaturi l-oħra soġġetti għall-investigazzjoni fir-rigward tal-produzzjoni u l-bejgħ tal-prodott simili fis-suq tal-Malasja.

(52)

Il-produtturi esportaturi għamlu bejgħ ta’ esportazzjoni lill-Unjoni jew direttament lill-klijenti indipendenti jew permezz tal-kumpaniji tan-negozju relatati li jinsabu fl-Unjoni.

(53)

Fejn il-bejgħ mill-esportazzjoni lill-Unjoni sar direttament lil klijenti indipendenti, il-prezzijiet tal-esportazzjoni ġew stabbiliti fuq il-bażi tal-prezzijiet li effettivament tħallsu jew jistgħu jitħallsu għall-prodott ikkonċernat skont l-Artikolu 2(8) tar-Regolament bażiku.

(54)

Fejn il-bejgħ ta’ esportazzjoni lejn l-Unjoni sar permezz ta’ kumpaniji relatati li jinsabu fl-Unjoni, il-prezzijiet ta’ esportazzjoni ġew stabbiliti fuq il-bażi tal-ewwel prezzijiet tal-bejgħ mill-ġdid ta’ dawn il-kumpaniji relatati lil klijenti indipendenti fl-Unjoni, skont l-Artikolu 2(9) tar-Regolament bażiku.

(55)

Il-valur normali u l-prezz ta’ esportazzjoni tal-produtturi esportaturi tqabblu fuq bażi ex-fabbrika.

(56)

Biex jiġi żgurat tqabbil ġust bejn il-valur normali u l-prezz ta’ esportazzjoni, saret konċessjoni xierqa fil-forma ta’ aġġustamenti għad-differenzi li jaffettwaw il-prezzijiet u l-komparabilità tal-prezzijiet skont l-Artikolu 2(10) tar-Regolament bażiku. Abbażi ta’ dan, saru aġġustamenti għall-ispejjeż ta’ trasport, assigurazzjoni, immaniġġjar, tagħbija u oħrajn anċillari, fl-ispejjeż ta’ imballaġġ u l-ispejjeż ta’ kreditu, fejn kien applikabbli u ġġustifikat.

(57)

Produttur esportatur Malasjan stqarr li l-kumpanija relatata tiegħu fl-Unjoni hija fil-fatt id-dipartiment ta’ esportazzjoni tal-manifattur. Fuq din il-bażi, il-kumpanija stqarret li jkun hemm tnaqqis eċċessiv biex jiġi stabbilit il-prezz ex-fabbrika li kieku jsiru l-aġġustamenti kollha għall-ispejjeż tal-bejgħ, ġenerali u amministrattivi u l-profitti, skont l-Artikolu 2(9) tar-Regolament bażiku. F’dan ir-rigward, instab li l-fatturi nħarġu mill-kumpanija relatata lill-klijenti fl-Unjoni u li l-ħlasijiet mill-klijenti fl-Unjoni nġabru mill-kumpanija relatata. Aktar minn hekk, għandu jiġi nnutat li l-bejgħ li sar mill-kumpanija relatata inkluda l-qligħ. Barra minn hekk, il-kontijiet finanzjarji tan-negozjant urew li hu sofra l-ispejjeż normali tal-bejgħ, dawk ġenerali u amministrattivi li seħħew bejn l-importazzjoni u l-bejgħ mill-ġdid. Għalhekk jidher li l-kumpanija relatata fil-fatt twettaq il-funzjonijiet tipiċi tal-importatur. Fuq din il-bażi, l-argument kien miċħud.

(58)

Il-kwerelanti ppreżentaw fir-rigward tal-Malasja l-istess talba li tikkonċerna l-ispejjeż tal-enerġija msemmija fil-premessa (39) għall-Indoneżja. Din it-talba wkoll ġiet miċħuda għall-istess raġunijiet.

(59)

Skont l-Artikolu 2(11) u (12) tar-Regolament bażiku, il-marġinijiet ta’ dumping għall-produtturi esportaturi Malasjani li kkooperaw ġew stabbiliti abbażi ta’ paragun bejn il-medja differenzjata tal-valur normali u l-medja differenzjata tal-prezz ta’ esportazzjoni.

(60)

Abbażi tal-informazzjoni disponibbli mill-kwerelant u l-produtturi esportaturi Malasjani li kkoopera, u meqjusal-informazzjoni statistika disponibbli, ma hemmx aktar produtturi magħrufa tal-prodott ikkonċernat fil-Malasja. Għalhekk, il-marġini ta’ dumping nazzjonali li kellu jiġi stabbilit għall-Malasja ġie stabbilit fl-istess livell tal-ogħla marġini misjub għal produttur esportatur li kkoopera.

(61)

Fuq din il-bażi, il-marġnijiet tad-dumping provviżorji, espressi bћala perċentwali tal-prezz CIF fuq il-fruntiera tal-Unjoni, bid-dazju mhux imħallas, huma:

(62)

Matul il-PI, il-prodott simili ġie mmanifatturat minn żewġ produtturi magħrufa u minn xi produtturi oħra żgħar ħafna fl-Unjoni. L-informazzjoni kollha disponibbli rigward il-produtturi tal-Unjoni, inkluża l-informazzjoni pprovduta fl-ilment u d-dejta miġbura mill-produtturi tal-Unjoni qabel u wara l-bidu tal-investigazzjoni, intużat sabiex tiġi stabbilita l-produzzjoni totali tal-Unjoni. Abbażi ta’ dan, il-produzzjoni totali tal-Unjoni ġiet stmata għal madwar 400 000 u 500 000 tunnellata waqt il-PI. Il-produtturi tal-Unjoni li huma responsabbli għall-produzzjoni totali tal-Unjoni jikkostitwixxu l-industrija tal-Unjoni fis-sens tat-tifsira tal-Artikolu 4(1) tar-Regolament bażiku.

(63)

Xi partijiet interessati stqarrew li wieħed mill-kwerelanti m’għandux jiġi kkunsidrat bħala parti mill-industrija tal-Unjoni, għaliex din il-kumpanija importat il-prodott ikkonċernat matul il-PI. Madankollu ġie vverifikat li l-perċentwali tal-prodott importat minn din il-kumpanija mill-pajjiżi kkonċernati matul il-PI kienet relattivament baxxa, u għalhekk mhux sostanzjali f’paragun mal-produzzjoni tagħha tal-prodott simili. Barra minn hekk, dawn l-importazzjonijiet kienu l-aktar ta’ natura temporanja. Għalhekk jista’ jiġi kkonfermat li l-attività ewlenija ta’ din il-kumpanija hija l-produzzjoni u l-bejgħ tal-prodott investigat fl-UE u l-interess ewlieni tagħha huwa dak ta’ produttur tal-Unjoni. B’konsegwenza ta’ dan, qed jiġi ddeterminat provviżorjament li din it-talba mhiex iġġustifikata.

(64)

Il-konsum ġie stabbilit fuq il-bażi tal-bejgħ totali fis-suq tal-Unjoni tal-industrija tal-Unjoni, l-użu vinkolanti, u l-importazzjonijiet totali (meħuda mill- Eurostat). Billi d-dejta tal-Eurostat tinkludi wkoll xi prodotti li mhumiex il-prodott ikkonċernat, saru l-aġġustamenti xierqa. It-tagħrif qed jingħata fil-forma ta’ numri ta’ indiċi (2007 = 100) biex tiġi mħarsal-kunfidenzjalità.

(65)

Matul il-perjodu kkunsidrat, il-konsum tal-Unjoni żdied ftit bi 2 %. L-ewwel, mill-2007 sal-2008, il-konsum żdied bi 2,2 %, segwit bi tnaqqis mill-2008 sal-2009 ta’ 4,8 %. Mill-2009 sal-aħħar tal-PI, il-konsum irkupra b’4.6 %.

(66)

It-tnaqqis fir-ritmu ekonomiku kkontribwixxa għat-tnaqqis fil-konsum mill-2008, li matulu l-utenti tal-prodott ikkonċernat raw waqgħa fid-domanda għall-prodotti tagħhom. Fil-bidu tal-PI, is-sitwazzjoni tas-suq bdiet titjieb xi ftit, u rriżultat f’żieda fid-domanda għall-prodott ikkonċernat paragunata mal-ewwel nofs tal-2009.

(67)

Il-Kummissjoni qieset jekk l-effetti tal-importazzjonijiet li kienu soġġetti għal dumping mill-pajjiżi kkonċernati għandhomx jiġu vvalutati b’mod kumulattiv, abbażi tal-kriterji li ġew stabbiliti fl-Artikolu 3(4) tar-Regolament bażiku. Dan l-Artikolu jipprovdi li l-effetti tal-importazzjonijiet minn żewġ pajjiżi jew aktar li fl-istess ħin ikunu soġġetti għal investigazzjonijiet anti-dumping għandhom ikunu vvaluati b’mod kumulattiv biss jekk jiġi ddeterminat li (a) il-marġni tad-dumping stabbilit f’relazzjoni għall-importazzjonijiet minn kull pajjiż huwa aktar minn de minimis kif ġie ddefinit fl-Artikolu 9(3) tar-Regolament bażiku u li l-volum tal-importazzjonijiet ta’ kull pajjiż mhux negliġibbli, u (b) valutazzjoni kumulattiva tal-effetti tal-importazzjonijiet hija adattata fid-dawl tal-kundizzjonijiet tal-kompetizzjoni bejn il-prodotti importati u l-kundizzjonijiet tal-kompetizzjoni bejn il-prodotti importati u l-prodott simili Komunitarju.

(68)

Il-marġinijiet ta’ dumping stabbiliti fir-rigward tal-importazzjonijiet minn kull pajjiż ikkonċernat huma aktar minn de minimis kif iddefinit fl-Artikolu 9(3) tar-Regolament bażiku, jiġifieri 2 % tal-prezzijiet ta’ esportazzjoni, u l-volum ta’ importazzjonijiet minn kull pajjiż ikkonċernat huwa ‘l fuq mil-livell standard ta’ 1 % tas-sehem tas-suq stabbilit mill-Artikolu 5(7) tar-Regolament bażiku.

(69)

L-investigazzoni wriet ukoll li l-kundizzjonijiet tal-kompetizzjoni kienu simili kemm bejn l-importazzjonijiet li kienu oġġett ta’ dumping u kemm bejn l-importazzjonijiet li kienu oġġett ta’ dumping u l-prodott simili. Instab li l-prezzijiet medji tal-importazzjoni mill-pajjiżi kollha kkonċernati waqgħu matul il-perjodu kkunsidrat, u segwew l-istess tendenza. Barra minn hekk, il-prodott investigat importat mill-pajjiżi kkonċernati kien simili f’kull rispett, huwa interskambjabbli u huwa kummerċjalizzat fl-Unjoni permezz ta’ kanali ta’ bejgħ paragunabbli u f’kundizzjonijiet kummerċjali simili, biex b’hekk jikkompetu ma’ xulxin u mal-prodott investigat prodott fl-Unjoni.

(70)

Abbażi ta’ dan, qed jiġi konkluż b’mod provviżorju li l-kundizzjonijiet ta’ akkumulazzjoni huma kollha sodisfatti u li għaldaqstant l-effetti tal-importazzjonijiet li ġew soġġetti għal dumping li joriġinaw fil-pajjiżi kkonċernati għandhom jiġu vvalutati b’mod konġunt għall-iskop tal-analiżi tal-ħsara.

(71)

Il-volum ta’ importazzjonijiet mill-pajjiżi konċernati żdiet b’mod sinifikanti b’57 % matul il-perjodu kkunsidrat. L-akbar żieda seħħet bejn l-2007 u l-2008 meta l-importazzjonijiet żdiedu bi 58 %. L-importazzjonijiet imbagħad naqsu bi ftit fl-2009 biex reġgħu żdiedu għal-livell tal-2008 matul il-PI.

(72)

Il-prezzijiet medji tal-importazzjonijiet mill-pajjiżi kkonċernati varjaw bil-qawwi matul il-perjodu kkunsidrat, u rriflettew tnaqqis ġenerali ta’ 6 %. Matul il-perjodu kkunsidrat, il-prezzijiet medji tal-importazzjonijiet mill-pajjiżi kkonċernati dejjem kienu aktar baxxi minn dawk stabbiliti mill-bqija tad-dinja u mill-industrija tal-Unjoni, għalhekk wasslu għal żieda fis-sehem tas-suq tal-pajjiżi kkonċernati.

(73)

Is-sehem tas-suq tal-pajjiżi konċernati żdied b’mod sinifikanti b’54 % matul il-perjodu kkunsidrat. L-ikbar żieda seħħet bejn l-2007 u l-2008. Kien hemm tnaqqis żgħir fl-importazzjonijiet matul il-kriżi ekonomika, li naqqset is-sehem tas-suq tal-pajjiżi kkonċernati bi 2 % bejn l-2008 u l-2009, iżda mbagħad reġgħu rkupraw dan is-sehem tas-suq sal-aħħar tal-perjodu kkunsidrat.

(74)

Għall-iskop li jiġi analizzat it-twaqqigħ tal-prezz, il-prezzijiet medji differenzjati tal-bejgħ għal kull tip ta’ prodott tal-industrija tal-Unjoni lil klijenti mhux relatati fis-suq tal-Unjoni, aġġustati għal livell ex-fabbrika, tqabblu mal-prezzijiet medji differenzjati korrispondenti tal-importazzjonijiet mill-pajjiżi kkonċernati lill-ewwel klijent indipendenti fis-suq tal-Unjoni, stabbiliti fuq bażi CIF b’aġġustamenti xierqa għad-dazji doganali attwali u għall-ispejjeż ta’ wara l-importazzjoni. Dan it-tqabbil tal-prezzijiet sar għat-tranżazzjonijiet fl-istess livell ta’ kummerċ, aġġustati kif dovut fejn neċessarju, u wara tnaqqis tar-rifużjonijiet u l-iskontijiet. Ir-riżultati tat-tqabbil, meta espressi bħala perċentwali tal-prezzijiet tal-bejgħ tal-industrija tal-Unjoni matul il-perjodu ta’ investigazzjoni, urew marġini ta’ twaqqigħ ta’ prezzijiet sinifikanti (sa 16 %). Dawn il-marġinijiet ta’ twaqqigħ ta’ prezzijiet jindikaw pressjoni fuq il-prezz eżerċitata mill-importazzjonijiet mill-pajjiżi kkonċernati fuq is-suq tal-Unjoni.

(75)

Għal kull pajjiż ikkonċernat il-marġini ta’ twaqqigħ ta’ prezzijiet kienu kif ġej:

(76)

B’konformità mal-Artikolu 3(5) tar-Regolament bażiku, l-eżami tal-impatt tal-importazzjonijiet li huma oġġett ta’ dumping fuq l-industrija tal-Unjoni kien jinkludi evalwazzjoni tal-indikaturi ekonomiċi kollha għal evalwazzjoni tal-istat tal-industrija tal-Unjoni mill-2007 sal-aħħar tal-PI.

(77)

Mill-2007 sal-2009, il-produzzjoni tal-Unjoni naqset b’mod sinifikanti bi 23 % biex żdiedet bi ftit bejn l-2009 u tmiem il-PI, biex irriżultat fi tnaqqis ġenerali ta’ 17 % matul il-perjodu kkunsidrat. Għandu jiġi nnotat li għalkemm il-konsum tal-Unjoni naqas b’madwar 5 % bejn l-2008 u l-2009, il-produzzjoni tal-industrija tal-Unjoni waqgħet ferm iżjed, bi 15 %, u li naqset li tibbenefika mill-irkuprar fil-konsum tal-Unjoni li seħħ fil-PI.

(78)

Il-kapaċità tal-produzzjoni tal-industrija tal-Unjoni naqset b’madwar 2 % tul il-perjodu meqjus. Wara li żdiedet b’madwar 9 % fl-2008, il-kapaċità tnaqqset fis-snin ta’ wara, b’riżultat ta’ tnaqqis ġenerali ta’ 2 % matul il-perjodu meqjus.

(79)

Madankollu, f’konformità mat-tnaqqis fil-volumi tal-produzzjoni, l-użu tal-kapaċità disponibbli naqas bi 15 % matul il-perjodu meqjus. L-akbar tnaqqis seħħ fl-2009, matul il-kriżi ekonomika ġenerali, u kien hemm xi ftit ta’ titjib matul il-PI.

(80)

Iċ-ċifri dwar il-bejgħ fit-tabella ta’ hawn taħt huma marbuta mal-volum u l-valur tal-bejgħ lill-ewwel klijent mhux relatat fis-suq tal-Unjoni.

(81)

Il-volumi tal-bejgħ u s-sehem tas-suq naqsu bejn l-2007 u l-PI, bi 18 % u 12 % rispettivament. Fil-bidu tal-perjodu kkunsidrat, bejn l-2007 u l-2008, minkejja ż-żieda fil-konsum tal-Unjoni, il-volum tal-bejgħ tal-industrija tal-Unjoni naqas bi 15 % u tilef 12 % mis-sehem tas-suq. Fl-2009, il-konsum tal-Unjoni nxtorob, u rriżulta f’aktar telf fil-volum tal-bejgħ ta’ 6,5 % għall-industrija tal-Unjoni. Fil-PI, konformi mal-konsum miżjud tal-Unjoni, il-bejgħ tal-Unjoni żdied bi ftit. Is-sehem tas-suq madankollu, baqa’ stabbli mill-2008 sal-aħħar tal-PI.

(82)

Il-prezzijiet żdiedu b’mod sinifikanti bejn l-2007 u l-2008, b’ 20 %. Għandu jiġi nnotat li l-produtturi esportaturi ukoll għollew il-prezzijiet tagħhom matul dan il-perjodu, għalkemm b’ferm inqas mill-industrija tal-Unjoni.

(83)

Fl-2009 l-industrija tal-Unjoni kellha tnaqqas il-prezzijiet, sabiex twieġeb għall-pressjoni taż-żidiet fl-importazzjonijiet mill-pajjiżi kkonċernati. Fl-2008 l-importazzjonijiet minn dawn il-pajjiżi kienu kibru b’57 % u l-prezzijiet tagħhom kienu aktar baxxi b’mod sinifikanti minn dawk tal-industrija tal-Unjoni. Madankollu, l-industrija tal-Unjoni ma setgħetx tnaqqas il-prezzijiet tagħha għall-istess livell tal-produtturi esportaturi.

(84)

Matul il-PI, l-industrija tal-Unjoni żammet il-livell tal-prezzijiet tal-2009, bir-riżultat ta’ żieda ġenerali fil-prezzijiet matul il-perjodu kkunsidrat ta’ 7 %.

(85)

Il-livelli tal-ħażniet tal-industrija tal-Unjoni naqsu b’33 % fil-perjodu meqjus. B’mod partikolari bejn l-2008 u l-PI, il-livelli tal-ħażniet naqsu b’mod sinifikanti b’51 %.

(86)

Minħabba t-tnaqqis fl-attivitajiet tal-industrija tal-Unjoni, in-numru tal-impjegati tnaqqas sostanzjalment bi 13 % matul il-perjodu kkunsidrat. L-ispejjeż tax-xogħol għal kull impjegat żdiedu bi ftit, b’6 %, matul il-perjodu kkunsidrat. Din hija meqjusa bħala żieda naturali u hija inqas mir-rata tal-inflazzjoni matul il-perjodu kkunsidrat.

(87)

Il-kapaċità ta’ profitt tal-industrija tal-Unjoni ġiet stabbilita billi ġie espress il-qligħ nett qabel it-taxxa (f’dan il-każ telf) mill-bejgħ tal-prodott simili bħala perċentwali tal-fatturat ta’ dan il-bejgħ. Ġie stabbilit li l-kapaċità ta’ qligħ tal-industrija tal-Unjoni ilha negattiva sa mill-bidu tal-perjodu kkonċernat fl-2007 u matul il-perjodu kkunsidrat it-telf żdied b’mod sinifikanti. Wara tnaqqis fit-telf fl-2008, dan reġa’ żdied b’mod sinifikanti fl-2009, fiż-żmien tal-kriżi ekonomika ġenerali. L-irkuprar ekonomiku li nħass matul il-PI, madankollu, ippermetta lill-industrija tal-Unjoni li tnaqqas it-telf tagħha fir-rigward tal-fatturat, iżda xorta baqgħet “il bogħod milli terġa” lura għal-livelli pożittivi ta’ profitt.

(88)

It-tendenza li dehret fl-likwidità tal-flus, li hija l-abilità tal-industrija li tiffinanzja waħedha l-attivitajiet tagħha, tirrifletti ħafna t-tendenza fil-kapaċità ta’ profitt. Il-likwidità kienet negattiva fl-2007 u turi tnaqqis sostanzjali matul il-perjodu kkunsidrat. Jistgħu jsiru l-istess kummenti dwar id-dħul fuq l-investimenti li wera żvilupp negattiv simili f’konformità mar-riżultati negattivi miksuba mill-industrija tal-Unjoni matul il-perjodu kkunsidrat.

(89)

Wara dak li ntqal hawn fuq, il-kapaċità tal-industrija tal-Unjoni li tinvesti saret limitata minħabba li l-likwidità ddeterjorat b’mod sinifikanti matul il-perjodu meqjus. B’konsegwenza ta’ dan, l-investimenti niżlu b’madwar 35 % matul il-perjodu kkunsidrat.

(90)

Il-konsum tal-Unjoni baqa’ kemmxejn stabbli matul il-perjodu kkunsidrat. Il-volum tal-bejgħ u s-sehem tas-suq tal-industrija tal-Unjoni madankollu, naqsu matul dan il-perjodu bi 18 % u 12 % rispettivament.

(91)

Meta jitqiesu l-volum, is-sehem mis-suq u l-prezzijiet tal-importazzjonijiet oġġett ta’ dumping mill-pajjiżi kkonċernati, l-impatt tal-marġnijiet effettivi ta’ dumping fuq l-industrija tal-Unjoni ma jistax jitqies negliġibbli.

(92)

L-investigazzjoni wriet li ħafna mill-indikaturi tal-ħsara bħall-produzzjoni (– 17 %), l-użu tal-kapaċità (– 13 %), il-volum ta’ bejgħ (– 18 %), is-sehem tas-suq (– 12 %) u l-impjieg (– 14 %) iddeterjoraw matul il-perjodu kkunsidrat. Barra minn hekk, l-indikaturi tal-ħsara relatati mal-prestazzjoni finanzjarja tal-industrija tal-Unjoni bħal-likwidità u l-kapaċità ta’ profitt kienu affettwati serjament. Dan ifisser li l-abilità tal-industrija tal-Unjoni li tiġbor il-kapital kienet imxekkla, b’mod partikolari matul il-PI.

(93)

Fid-dawl ta’ dak li ntqal aktar ‘il fuq, ġie konkluż li l-industrija tal-Unjoni sofriet ħsara materjali fil-kuntest tal-Artikolu 3(5) tar-Regolament bażiku.

(94)

Skont l-Artikoli 3(6) u 3(7) tar-Regolament bażiku, ġie eżaminat jekk l-importazzjonijiet li kienu oġġetti ta’ dumping tal-prodott ikkonċernat li joriġinaw fil-pajjiżi kkonċernati kkawżawx ħsara lill-industrija tal-Unjoni sal-punt li tista’ tiġi kklassifikata bħala materjali. Il-fatturi magħrufa minbarra l-importazzjonijiet oġġett ta’ dumping, li fl-istess ħin jistgħu jkunu qegħdin jikkawżaw ħsara lill-industrija tal-Unjoni, ġew eżaminati ukoll sabiex jiġi żgurat li l-ħsara possibbli kkawżata minn dawn il-fatturi l-oħra ma tkunx ġiet attribwita lill-importazzjonijiet oġġett ta’ dumping.

(95)

L-investigazzjoni wriet li l-konsum tal-Unjoni baqa’ pjuttost stabbli matul il-perjodu kkunsidrat, filwaqt li l-importazzjonijiet li huma l-oġġett ta’ dumping mill-pajjiżi kkonċernati żdiedu fil-volum b’mod sinifikanti, jiġifieri b’57 %.

(96)

L-importazzjonijiet li huma l-oġġett ta’ dumping mill-pajjiżi kkonċernati eżerċitaw pressjoni fuq l-industrija tal-Unjoni, partikolarment fis-sena 2008, meta dawn l-importazzjonijiet kibru bi 58 %. F’din is-sena, il-prezzijiet mill-pajjiżi kkonċernati, kif meħuda mill-Eurostat, kienu ferm aktar baxxi minn dawk tal-industrija tal-Unjoni. Dan wassal għal telf fis-sehem tas-suq għall-industrija tal-Unjoni ta’ madwar 12 %, filwaqt li l-pajjiżi kkonċernati żiedu s-sehem tagħhom tas-suq b’54 %.

(97)

Sabiex twieġeb għal din il-pressjoni, l-industrija tal-Unjoni naqqset il-prezzijiet tagħha fl-2009. Għalkemm il-volum tal-importazzjonijiet mill-pajjiżi kkonċernati naqas (– 6.7 %), f’konformità mat-tnaqqis fir-ritmu ekonomiku u t-tnaqqis fis-suq tal-UE, il-prezz tal-importazzjoni naqas aktar mill-prezz tal-industrija tal-Unjoni, u dan impedixxa lill-industrija tal-Unjoni milli terġa’ tikseb is-sehem tagħha tas-suq li kienet tilfet.

(98)

Matul il-PI, l-industrija tal-Unjoni kellha tnaqqas aktar il-prezzijiet tagħha filwaqt li t-twaqqigħ tal-prezzijiet mill-pajjiżi kkonċernati, abbażi taċ-ċifri tal-esportazzjoni vverifikati, kien għadu 3 %. Il-bejgħ tal-industrija tal-Unjoni f’termini ta’ volum (+ 4.3 %) u valur (+ 3.9 %) irkupra ftit, imma, minkejja li d-differenza fil-prezz fir-rigward tal-prezz tal-importazzjoni tal-pajjiżi kkonċernati naqset, l-industrija tal-Unjoni ma setgħetx tibbenefika mill-irkupru fil-konsum, u s-sehem tagħha tas-suq baqa’ l-istess. Sadanittant, l-importazzjonijiet mill-pajjiżi kkonċernati raw żieda oħra fil-volum (6.6 %) u fis-sehem tas-suq (2 %) matul il-PI.

(99)

Il-fatturi l-oħra li ġew eżaminati fil-kuntest tal-kawżalità huma l-importazzjonijiet minn pajjiżi l-oħra, il-prestazzjoni tal-esportazzjoni tal-industrija tal-Unjoni u l-effett tal-kriżi ekonomika.