(a)

il-karatteristiċi tal-vettura;

(b)

l-ismijiet u l-firxiet tal-prezzijiet ta' vetturi li jikkompetu direttament fis-sena ta' qabel id-data tal-applikazzjoni;

(c)

il-lista tal-prezzijiet tal-vetturi li se jkunu koperti bid-deroga fis-sena kalendarja ta' qabel id-data tal-applikazzjoni jew fis-sena li hija l-iktar viċin tad-data tal-applikazzjoni.

(a)

Reġistrazzjonijiet fl-Unjoni, jew stima msejsa fuq dejta verifikabbli jekk il-figuri uffiċjali ma jkunux disponibbli fiż-żmien tal-applikazzjoni, fis-sena kalendarja l-iktar viċin tal-2007;

(b)

Il-karatteristiċi tal-vettura għal kull tip ta' karozza;

(c)

Il-lista ta' karozzi miġbura flimkien skont il-klassi tal-vettura kif stabbilit fl-Anness V.

—

Il-klassijiet tal-massa jikkorrispondu ma' dan li ġej (imqarrba sal-eqreb numru sħiħ):

—

Il-klassijiet tal-qawwa għall-massa jikkorrispondu ma' dan li ġej (imqarrba sal-eqreb numru sħiħ):

(1)

Sa minn nofs l-2007, il-funzjonament tas-swieq tal-kreditu bl-ingrossa sofra tfixkil serju. Ir-riżultat kien tnaqqis qawwi fil-likwidità fis-settur bankarju u nuqqas ta’ rieda min-naħa tal-banek sabiex isellfu lil xulxin u lill-ekonomija inġenerali. Minħabba li t-tfixkil tas-swieq tal-kreditu intensifika ruħu matul dawn l-aħħar tmintax-il xahar, il-kriżi finanzjarja intensifikat ruħha u l-ekonomija globali daħlet f’reċessjoni serja.

(2)

Huwa diffiċli li timmaġina riżoluzzjoni tal-kriżi finanzjarja u rkupru fl-ekonomija globali mingħajr stabbiltà assigurata fis-settur bankarju u fis-sistema finanzjarja inġenerali. Ikun biss meta jseħħ dan li terġa’ tiġi stabbilita l-kunfidenza tal-investituri u l-banek jerġgħu lura għall-imġiba normali tagħhom fir-rigward tas-self. Għaldaqstant, l-Istati taż-ŻEE poġġew fis-seħħ miżuri biex jappoġġjaw l-istabbiltà tas-setturi bankarji tagħhom u jappoġġjaw is-self, partikolarment l-injezzjoni ta’ kapital ġdid bl-użu ta’ fondi pubbliċi u l-għoti ta’ garanziji tal-gvern għal self bankarju.

(3)

Riċentement, bosta Stati taż-ŻEE ħabbru l-intenzjoni tagħhom li jikkomplementaw il-miżuri ta’ appoġġ eżistenti tagħhom billi jipprovdu xi forma ta’ salvataġġ tal-assi bankarji indeboliti. Dawn it-tħabbiriet, b’mod parallel ma’ inizjattiva simili fl-Istati Uniti, qanqlu dibattitu usa’ fi ħdan iż-ŻEE fuq il-merti tas-salvataġġ tal-assi bħala miżura ta’ sostenn governattiv għall-banek. Fil-kuntest ta’ dak id-dibattitu, il-Komunikazzjoni mill-Kummissjoni Ewropea li tikkorrispondi ma’ dan il-Kapitolu tal-Linji Gwida dwar l-Għajnuna mill-Istat tal-Awtorità tas-Sorveljanza tal-EFTA tħejjiet mis-servizzi tal-Kummissjoni Ewropea, f’konsultazzjoni mal-Bank Ċentrali Ewropew (BĊE), u tibni fuq ir-rakkomandazzjonijiet maħruġa fil-5 ta’ Frar 2009 mill-Eurosystem (ara l-Anness 1).

(4)

Dan il-Kapitolu jiffoka fuq kwistjonijiet li għandhom jiġu indirizzati mill-Istati tal-EFTA meta jkunu qed jikkunsidraw, ifasslu u jimplimentaw miżuri ta’ salvataġġ tal-assi. Fuq il-livell ġenerali, dawn il-kwistjonijiet jinkludu l-motivazzjoni għas-salvataġġ tal-assi bħala miżura għall-ħarsien tal-istabbiltà finanzjarja u li ssostni s-self tal-banek; il-kunsiderazzjonijiet aktar fit-tul tal-vijabbiltà tas-settur bankarju u s-sostenibbiltà baġitarja li għandhom jitqiesu meta jiġu kkunsidrati miżuri ta’ salvataġġ tal-assi; u l-ħtieġa għal approċċ komuni u kkoordinat għas-salvataġġ tal-assi fi ħdan iż-ŻEE, partikolarment sabiex jiġu assigurati kundizzjonijiet komuni għal kulħadd. Fil-kuntest ta’ dan l-approċċ taż-ŻEE, dan il-Kapitolu joffri wkoll gwida aktar speċifika dwar l-applikazzjoni tar-regoli tal-għajnuna mill-Istat għas-salvataġġ tal-assi, b’enfasi fuq kwistjonijiet bħal (i) l-obbligi tat-trasparenza u l-iżvelar; (ii) it-tqassim tal-piż bejn l-Istat, l-azzjonisti u l-kredituri; (iii) l-allinjament tal-inċentivi għall-benefiċjarji mal-objettivi tal-politika pubblika; (iv) il-prinċipji għat-tfassil ta’ miżuri ta’ salvataġġ tal-assi f’termini ta’ eliġibbiltà, valutazzjoni u ġestjoni tal-assi indeboliti; u (v) ir-relazzjoni bejn is-salvataġġ tal-assi, miżuri oħra ta’ appoġġ tal-gvern u r-ristrutturar tal-banek.

(5)

L-għanijiet immedjati tal-pakketti tas-salvataġġ taż-ŻEE mħabbra f’Ottubru 2008 huma li jissalvagwardjaw l-istabbiltà finanzjarja u jsostnu l-provvista ta’ kreditu lill-ekonomija reali. Huwa kmieni wisq biex wieħed jiġbed konklużjonijiet definittivi dwar l-effikaċja tal-pakketti, iżda huwa ċar li dawn biegħdu r-riskju ta’ kollass finanzjarju u appoġġjaw il-funzjonament ta’ swieq interbankarji importanti. Min-naħa l-oħra, l-evoluzzjoni fis-self lill-ekonomija reali sa mit-tħabbir tal-pakketti ma kenitx favorevoli, b’xi statistika reċenti tissuġġerixxi tnaqqis qawwi fil-pass tat-tkabbir tal-kreditu (2). F’bosta Stati taż-ŻEE, issa huma komuni ħafna rapporti li qed jiġi miċħud l-aċċess għall-kreditu tal-banek lil xi impriżi u jidher li r-restrizzjoni tal-kreditu tmur lil hinn minn dak li huwa ġġustifikat minn kunsiderazzjonijiet ċikliċi.

(6)

Raġuni ewlenija identifikata għall-fluss mhux suffiċjenti tal-kreditu hija l-inċertezza dwar il-valur tal-assi indeboliti, u dwar fejn dawn fil-fatt jinsabu, li kienet sors ta’ problemi fis-settur bankarju sa mill-bidu tal-kriżi. Inċertezza dwar il-valutazzjonijiet tal-assi mhux biss kompliet iddgħajjef il-fiduċja fis-settur bankarju, iżda dgħajfet l-effett tal-miżuri ta’ appoġġ mill-gvern meħuda s’issa. Pereżempju, ir-rikapitalizzazzjoni tal-banek ipprovdiet protezzjoni kontra l-indeboliment tal-assi iżda ħafna mill-protezzjoni kapitali pprovduta ġiet assorbita mill-banek fi provvedimenti kontra indebolimenti futuri tal-assi. Il-banek diġà ħadu passi biex jindirizzaw il-problema tal-assi indeboliti. Huma rreġistraw tniżżil sostanzjali fil-valuri tal-assi (3), ħadu passi biex jillimitaw it-telf li fadal permezz tar-riklassifikazzjoni tal-assi fil-karti tal-bilanċ tagħhom u gradwalment warrbu kapital addizzjonali sabiex isaħħu l-pożizzjonijiet tas-solvenza tagħhom. Madankollu, il-problema ma ġietx solvuta sa grad suffiċjenti u l-gravità mhux mistennija tat-tnaqqis ekonomiku issa tissuġġerixxi deterjorament addizzjonali u aktar mifrux fil-kwalità tal-kreditu tal-assi tal-banek.

(7)

Is-salvataġġ tal-assi jindirizza direttament il-kwistjoni tal-inċertezza dwar il-kwalità tal-karti tal-bilanċ tal-banek u għalhekk jgħin biex terġa’ titqajjem il-kunfidenza fis-settur. Huwa jista’ jgħin ukoll biex jiġi evitat ir-riskju ta’ eżerċizzji ripetuti ta’ rikapitalizzazzjoni tal-banek hekk kif id-dimensjoni tal-indeboliment tal-assi tikber f’sitwazzjoni ta’ deterjorament fl-ekonomija reali. Fuq din il-bażi, bosta Stati taż-ŻEE qegħdin attivament jikkunsidraw is-salvataġġ għall-assi indeboliti tal-banek biex jikkumplimentaw miżuri oħra.

(8)

Il-miżuri ta’ salvataġġ tal-assi għandhom ikunu mfassla u implimentati fil-manjiera li tikseb bl-aktar mod effettiv l-għanijiet immedjati li tiġi mħarsal-istabbiltà finanzjarja u jiġi sostnut is-self mill-banek. Kwistjoni importanti li għandha tiġi indirizzata f’dan il-kuntest hija li tiġi żgurata parteċipazzjoni xierqa fil-miżuri ta’ salvataġġ tal-assi permezz tal-iffissar ta’ prezzijiet u kundizzjonijiet xierqa u permezz tal-parteċipazzjoni obbligatorja jekk meqjusa bħala meħtieġa. Madankollu, l-enfasi fit-tfassil u l-implimentazzjoni ta’ miżuri ta’ salvataġġ tal-assi m’għandhiex tkun limitata għal dawn l-għanijiet immedjati. Huwa essenzjali li jitqiesu wkoll kunsiderazzjonijiet aktar fit-tul.

(9)

Jekk miżuri ta’ salvataġġ tal-assi ma jitwettqux b’tali mod li jiġi delimitat il-periklu ta’ tfixkil serju tal-kompetizzjoni fost il-banek (kemm fl-Istati tal-EFTA u kif ukoll fuq bażi transkonfinali) f’konformità mal-Linji Gwida dwar l-Għajnuna mill-Istat tal-Awtorità tas-Sorveljanza tal-EFTA, inkluż fejn meħtieġ ir-ristrutturar tal-benefiċjarji, l-eżitu jkun li s-settur bankarju taż-ŻEE jkun strutturalment aktar dgħajjef b’implikazzjonijiet negattivi għall-potenzjal tal-produzzjoni fl-ekonomija inġenerali. Barra minn hekk, dan jista’ jwassal għal ħtieġa rikorrenti għal interventi governattivi fis-settur, li jimplika piż progressivament itqal fuq il-finanzi pubbliċi. Dawn ir-riskji huma serji minħabba l-iskala probabbli tal-iskopertura tal-Istat. Sabiex jiġi limitat ir-riskju ta’ ħsara fit-tul bħal din, l-interventi governattivi fis-settur bankarju għandhom ikunu mmirati kif xieraq u akkumpanjati minn salvagwardji tal-imġiba li jallineaw l-inċentivi tal-banek ma’ dawk tal-politika pubblika. Dawn il-miżuri għandhom jiffurmaw parti minn sforz ġenerali biex is-settur bankarju jerġa’ jsir vijabbli, fuq il-bażi tar-ristrutturazzjoni meħtieġa. Il-ħtieġa għar-ristrutturazzjoni fis-settur bankarju bħala kontroparti tal-appoġġ tal-gvern hija diskussa f’aktar dettall fil-kuntest tar-regoli dwar l-għajnuna mill-Istat aktar tard fit-Taqsimiet 5 u 6.

(10)

Meta jkunu qed jikkunsidraw it-tfassil u l-implimentazzjoni ta’ miżuri ta’ salvataġġ tal-assi, huwa wkoll essenzjali li l-Istati tal-EFTA jqisu l-kuntest tal-baġit. Stimi tat-tniżżil totali mistenni tal-assi jissuġġerixxu li l-ispejjeż baġitarji - attwali, kontinġenti jew it-tnejn - tas-salvataġġ tal-assi jistgħu jkunu sostanzjali - kemm f’termini assoluti u kif ukoll b’mod relattiv mal-PGD fl-Istati tal-EFTA. L-appoġġ tal-gvern permezz ta’ salvataġġ tal-assi (u miżuri oħra) m’għandux ikun fuq skala tant kbira li joħloq tħassib dwar is-sostenibbiltà tal-finanzi pubbliċi bħal dak dwar dejn eċċessiv jew problemi ta’ finanzjament. Kunsiderazzjonijiet bħal dawn huma partikolarment importanti fil-kuntest attwali ta’ tkabbir fl-iżbilanċi baġitarji, livelli ta’ dejn pubbliku li qed jogħlew u l-isfidi li qed jiġu ffaċċjati fil-ħruġ ta’ bonds sovrani.

(11)

Aktar speċifikament, is-sitwazzjoni baġitarja tal-Istati tal-EFTA se tkun kunsiderazzjoni importanti fl-għażla tal-arranġament tal-ġestjoni għall-assi suġġetti għas-salvataġġ, jiġifieri xiri tal-assi, assigurazzjoni tal-assi, tibdil tal-assi jew taħlita ta’ dawn l-arranġamenti (4). Jista’ ma jkunx hemm differenzi sinifikanti fl-implikazzjonijiet għall-kredibbiltà baġitarja tal-approċċi differenti għas-salvataġġ tal-assi għaliex huwa probabbli li s-swieq finanzjarji jiskontaw it-telf potenzjali fuq bażi simili (5). Madankollu, approċċ li jirrikjedi x-xiri sħiħ ta’ assi indeboliti jkollu impatt aktar immedjat fuq il-proporzjonijiet baġitarji u l-finanzjament tal-gvern. Filwaqt li l-għażla ta’ arranġament ta’ ġestjoni tal-assi indeboliti hija r-responsabbiltà ta’ kull Stat tal-EFTA, jistgħu jitqiesu approċċi mħallta li permezz tagħhom assi ħżiena ikunu mifruda mill-karta tal-bilanċ tal-banek f’entità separata (jew ġewwa jew barra mill-banek) li tibbenefika b’xi mod minn garanzija tal-gvern. Dan l-approċċ huwa attraenti peress li jipprovdi ħafna mill-benefiċċji tal-approċċ tax-xiri tal-assi mill-perspettiva tal-għoti lura tal-kunfidenza fis-sistema bankarja, filwaqt li jillimita l-impatt baġitarju immedjat.

(12)

F’kuntest ta’ riżorsi baġitarji skarsi, jista’ jkun xieraq li l-miżuri ta’ salvataġġ tal-assi jiġu ffukati fuq numru limitat ta’ banek ta’ importanza sistemika. Għal xi Stati tal-EFTA, is-salvataġġ tal-assi għall-banek jista’ jiġi limitat ħafna, minħabba r-restrizzjonijiet baġitarji eżistenti tagħhom u/jew id-daqs tal-karti tal-bilanċ tal-banek tagħhom meta mqabbla mal-PGD.

(13)

Meta jkunu qed jitqiesu xi forom ta’ miżuri ta’ salvataġġ tal-assi, hemm bżonn li jiġu rrikonċiljati l-għanijiet immedjati ta’ stabbiltà finanzjarja u self bankarju mal-ħtieġa li jiġi evitat dannu fit-tul għas-settur bankarju fi ħdan iż-ŻEE, għas-suq taż-ŻEE u għall-ekonomija inġenerali. Dan jista’ jinkiseb bl-aktar mod effettiv permezz ta’ approċċ komuni u kkoordinat fi ħdan iż-ŻEE, bl-għanijiet ġenerali li ġejjin:

(14)

Il-koordinazzjoni bejn l-Istati taż-ŻEE tkun meħtieġa biss fuq il-livell ġenerali u tista’ tintlaħaq filwaqt li tinżamm biżżejjed flessibiltà sabiex jitfasslu miżuri għas-sitwazzjonijiet speċifiċi ta’ banek individwali. Fin-nuqqas ta’ koordinazzjoni ex ante suffiċjenti, ħafna minn dawn l-objettivi ser jiġu ssodisfati biss permezz ta’ obbligi ta’ kontrolli ex post addizzjonali għall-għajnuna mill-Istat. Għaldaqstant, linji gwida komuni dwar il-karatteristiċi bażiċi tal-miżuri ta’ salvataġġ jgħinu biex tiġi mminimizzata l-ħtieġa għal korrezzjonijiet u aġġustamenti b’riżultat ta’ evalwazzjoni skont ir-regoli tal-għajnuna mill-Istat. Dawn il-linji gwida huma pprovvduti fit-taqsimiet li ġejjin.

(15)

Huwa d-dmir normali tal-banek li jivvalutaw ir-riskju tal-assi li jakkwistaw u li jassiguraw li jistgħu jkopru kull telf assoċjat (6). Madankollu jista’ jiġi kkunsidrat is-salvataġġ tal-assi sabiex tiġi appoġġjata l-istabbiltà finanzjarja. Il-miżuri pubbliċi ta’ salvataġġ tal-assi huma għajnuna mill-Istat peress li huma jeħilsu lill-bank benefiċjarju mill-bżonn li jirreġistra telf jew jagħmel riżerva għal telf possibbli fuq l-assi indeboliti tiegħu (jew jikkumpensawh għal dawn) u/jew jeħilsu l-kapital regolatorju għal użi oħra. Dan ikun partikolarment il-każ fejn assi indeboliti jinxtraw jew jiġu assigurati fuq valur ogħla mill-prezz tas-suq, jew jekk il-prezz tal-garanzija ma jikkumpensax lill-Istat għar-responsabbiltà massima possibbli tiegħu taħt il-garanzija (7).

(16)

Kwalunkwe għajnuna għall-miżuri ta’ salvataġġ tal-assi għandha, madankollu, tikkonforma mal-prinċipji ġenerali tan-neċessità, il-proporzjonalità u l-minimizzazzjoni tat-tfixkil tal-kompetizzjoni. Assistenza bħal din timplika tfixkil serju tal-kompetizzjoni bejn il-banek li huma benefiċjarji u dawk li mhumiex benefiċjarji u fost banek benefiċjarji bi gradi differenti ta’ bżonn. Banek li mhumiex benefiċjarji u li huma fundamentalment sodi jistgħu jħossuhom obbligati li jikkunsidraw li jitolbu l-intervent tal-gvern sabiex jippriżervaw il-pożizzjoni kompetittiva tagħhom fis-suq. Tfixkil simili tal-kompetizzjoni jista’ jseħħ ukoll fost l-Istati taż-ŻEE, bir-riskju ta’ kompetizzjoni tas-sussidji bejn l-Istati taż-ŻEE (li jippruvaw isalvaw lill-banek tagħhom mingħajr ma jqisu l-effetti fuq il-banek fl-Istati l-oħra taż-ŻEE) u moviment lejn il-protezzjoniżmu finanzjarju u l-frammentazzjoni tas-suq intern. Il-parteċipazzjoni fl-iskema ta’ salvataġġ tal-assi għandha għalhekk tkun kondizzjonata fuq kriterji oġġettivi u definiti b’mod ċar, sabiex jiġi evitat li banek individwali jieħdu vantaġġ mhux ġustifikat.

(17)

L-Awtorità tas-Sorveljanza tal-EFTA (minn hawn ‘il quddiem “l-Awtorità”) stabbiliet il-prinċipji li jirregolaw l-applikazzjoni tar-regoli dwar l-għajnuna mill-Istat u, b’mod partikolari, l-Artikolu 61(3)(b) tal-Ftehim taż-ŻEE għal kwalunkwe miżura ta’ appoġġ għall-banek fil-kuntest tal-kriżi finanzjarja globali fil-Linji Gwida tagħha dwar l-istituzzjonijiet finanzjarji (8). L-Awtorità sussegwentement ipprovdiet linji gwida dettaljati dwar l-implimentazzjoni prattika ta’ dawn il-prinċipji għar-rikapitalizzazzjoni f’Kapitolu ġdid tal-Linji Gwida dwar l-Għajnuna mill-Istat (9). Bl-istess mod, il-linji gwida li ġejjin, ibbażati fuq l-istess prinċipji, jidentifikaw il-karatteristiċi ewlenin tal-miżuri jew skemi ta’ salvataġġ tal-assi, li jiddeterminaw kemm l-effikaċja tagħhom u kif ukoll l-impatt tagħhom fuq il-kompetizzjoni. Dawn il-linji gwida japplikaw ugwalment għall-banek kollha li huma mogħtija salvataġġ tal-assi irrispettivament mis-sitwazzjoni individwali tagħhom iżda l-implikazzjonijiet prattiċi tal-applikazzjoni tagħhom jistgħu jvarjaw skont il-profil tar-riskju u l-vijabbiltà tal-benefiċjarju. Il-prinċipji ta’ dawn il-linji gwida japplikaw mutatis mutandis fejn żewġ Stati taż-ŻEE jew aktar jikkoordinaw miżuri sabiex jipprovdu salvataġġ tal-assi għal banek transkonfinali.

(18)

Il-linji gwida preżenti jimmiraw li jistabbilixxu prinċipji u kundizzjonijiet ikkoordinati sabiex, kemm jista’ jkun, tiġi żgurata l-effikaċja tal-miżuri ta’ salvataġġ tal-assi fis-suq taż-ŻEE, filwaqt li jittieħed kont tal-għan fuq tul ta’ żmien, li mmorru lura għal kundizzjonijiet normali tas-suq, filwaqt li jibqgħu flessibbli biżżejjed sabiex jaħsbu għall-karatteristiċi speċifiċi jew jipprovdu miżuri jew proċeduri addizzjonali fuq il-livell individwali jew nazzjonali għal raġunijiet ta’ stabbiltà finanzjarja. Miżuri effettivi ta’ salvataġġ tal-assi għandu jkollhom bħala konsegwenza t-tkomplija tas-self lill-ekonomija reali.

(19)

Kwalunkwe miżura ta’ salvataġġ tal-assi trid tkun ibbażata fuq l-identifikazzjoni ċara tal-kobor tal-problemi li l-bank ikollu fir-rigward tal-assi, is-solvenza intrinsika tiegħu qabel l-appoġġ u l-prospetti li jkollu sabiex jerġa’ lura għall-vijabbiltà, filwaqt li jitqiesu b’mod xieraq l-alternattivi kollha possibbli, sabiex jiġi ffaċilitat il-proċess ta’ ristrutturar meħtieġ, tiġi evitata distorsjoni tal-inċentivi tal-atturi kollha u tiġi evitata l-ħela ta’ riżorsi statali mingħajr ma jkun hemm kontribut sabiex jerġa’ jibda l-fluss normali ta’ kreditu għall-ekonomija reali.

(20)

Għalhekk, sabiex jiġi minimizzat ir-riskju ta’ ħtieġa rikorrenti għal interventi tal-Istat favur l-istess benefiċjarji, għandhom jiġu sodisfatti l-kriterji li ġejjin bħala prerekwiżit sabiex wieħed jibbenefika mis-salvataġġ tal-assi:

(21)

Bħala prinċipju ġenerali, il-banek għandhom iġorru t-telf assoċjat ma’ assi indeboliti sal-massimu possibbli. Dan jirrikjedi, l-ewwel nett, trasparenza sħiħa u żvelar ex ante, segwiti mill-valutazzjoni korretta tal-assi qabel l-intervent tal-gvern u remunerazzjoni korretta tal-Istat għall-miżura tas-salvataġġ tal-assi, tkun xi tkun il-forma tagħha, sabiex tiġi żgurata responsabbiltà u rfigħ tal-piż ekwivalenti mill-azzjonisti irrispettivament mill-mudell preċiż li jintgħażel. Dawn l-elementi flimkien għandhom iwasslu għal koerenza ġenerali dwar il-qsim tal-piżijiet fuq firxa ta’ diversi forom ta’ sostenn mill-Istat, fid-dawl tal-karatteristiċi distintivi speċifiċi ta’ tipi differenti ta’ assistenza (12).

(22)

Ladarba l-assi jkunu ġew evalwati sew u t-telf ikun ġie korrettament identifikat (13), u jekk dan iwassal għal sitwazzjoni ta’ insolvenza teknika mingħajr intervent mill-Istat, il-bank għandu jew jitqiegħed fl-amministrazzjoni jew jiġi stralċjat, skont il-liġi taż-ŻEE u nazzjonali. F’din is-sitwazzjoni, bil-għan li jiġu mħarsal-istabbiltà u l-kunfidenza finanzjarji, jistgħu jkunu xierqa protezzjoni jew garanziji għad-detenturi tal-bonds (14).

(23)

Meta għal raġunijiet ta’ stabbiltà finanzjarja jidher mhux rakkomandabbli li bank jitqiegħed fl-amministrazzjoni jew jiġi stralċjat b’mod ordnat (15), għajnuna fil-forma ta’ garanzija jew xiri ta’ assi, limitata għall-minimu strett, tista’ tingħata lill-banek sabiex ikunu jistgħu jkomplu joperaw għall-perjodu meħtieġ biex jitfassal pjan jew għar-ristrutturar jew għall-istralċ b’mod ordnat. F’każijiet bħal dawn, l-azzjonisti għandhom ikunu wkoll mistennija li jġorru t-telf għall-inqas sakemm jintlaħqu l-limiti regolatorji ta’ adegwatezza ta’ kapital. L-alternattivi tan-nazzjonalizzazzjoni jistgħu jiġu kkunsidrati wkoll.

(24)

Meta ma jkunx possibbli li jintlaħaq qsim sħiħ tal-piżijiet ex ante, il-bank għandu jintalab sabiex jikkontribwixxi għall-kopertura tat-telf jew tar-riskju fi stadju aktar tard, pereżempju fil-forma ta’ klawsoli ta’ restituzzjoni jew, fil-każ ta’ skema ta’ assigurazzjoni, minn klawsola ta’ “l-ewwel telf”, li għandu jitħallas mill-bank (tipikament b’minimu ta’ 10 %) u klawsola ta’ “qsim tat-telf residwu”, li permezz tagħha l-bank jipparteċipa f’perċentwal (tipikament minimu ta’ 10 %) ta’ kwalunkwe telf addizzjonali (16).

(25)

Bħala regola ġenerali, anqas ma tkun il-kontribuzzjoni inizjali, aktar tkun għolja l-ħtieġa għal kontribuzzjoni tal-azzjonisti fi stadju aktar tard, jew fil-forma ta’ konverżjoni tat-telf tal-Istat f’ishma tal-bank u/jew fil-forma ta’ aktar miżuri ta’ kumpens sabiex jiġi limitat it-tfixkil tal-kompetizzjoni meta tiġi vvalutata r-ristrutturazzjoni meħtieġa.

(26)

Bħala karatteristika ġenerali, programmi ta’ salvataġġ tal-assi indeboliti għandu jkollhom perjodu limitat għar-reġistrazzjoni ta’ sitt xhur mit-tnedija tal-iskema mill-gvern. Dan jillimita l-inċentivi għall-banek sabiex idewmu l-iżvelar meħtieġ bit-tama ta’ livelli ogħla ta’ għajnuna f’data aktar tard, u jiffaċilita riżoluzzjoni rapida tal-problemi bankarji qabel it-tnaqqis ekonomiku jkompli jaggrava s-sitwazzjoni. Matul il-perjodu ta’ sitt xhur, il-banek ikunu jistgħu jippreżentaw gruppi ta’ assi eliġibbli li għandhom jiġu koperti mill-miżuri ta’ salvataġġ tal-assi, bil-possibbiltà ta’ rollover (17).

(27)

Jista’ jkun meħtieġ li jitfasslu mekkaniżmi xierqa sabiex jiġi żgurat li l-banek li jkunu l-aktar fil-bżonn ta’ salvataġġ tal-assi jipparteċipaw fil-miżura tal-gvern. Dawn il-mekkaniżmi jistgħu jinkludu l-parteċipazzjoni obbligatorja fil-programm, u għandhom jinkludu mill-inqas żvelar obbligatorju lill-awtoritajiet ta’ sorveljanza. L-obbligu għall-banek kollha sabiex jiżvelaw id-daqs tal-problemi tagħhom relatati mal-assi se jikkontribwixxi għall-identifikazzjoni ċara tal-ħtieġa u l-ambitu neċessarju ta’ skema ta’ salvataġġ tal-assi fuq il-livell tal-Istati tal-EFTA.

(28)

Meta l-parteċipazzjoni mhijiex obbligatorja, l-iskema tista’ tinkludi inċentivi xierqa (bħall-għoti ta’ warrants jew drittijiet lill-azzjonisti eżistenti sabiex dawn ikunu jistgħu jipparteċipaw f’attivitajiet futuri ta’ ġbir ta’ kapital privat b’termini preferenzjali) biex tiġi ffaċilitata l-aċċettazzjoni mill-banek mingħajr ma jitnaqqas xejn mill-prinċipji tat-trasparenza u l-iżvelar, il-valutazzjoni ġusta u l-qsim tal-piżijiet.

(29)

Il-parteċipazzjoni wara l-iskadenza tal-perjodu ta’ sitt xhur għar-reġistrazzjoni tkun possibbli biss f’ċirkostanzi eċċezzjonali u imprevedibbli li għalihom il-bank ma jkunx responsabbli (18), u soġġett għal kundizzjonijiet aktar stretti, bħal remunerazzjoni ogħla lill-Istat u/jew miżuri kompensatorji ogħla.

(30)

L-aċċess għas-salvataġġ tal-assi għandu dejjem ikun kondizzjonali fuq numru xieraq ta’ restrizzjonijiet fuq l-imġiba. B’mod partikolari, banek benefiċjarji għandhom ikunu suġġetti għal salvagwardji li jiżguraw li l-effetti kapitali tas-salvataġġ jintużaw sabiex jiġi pprovdut il-kreditu sabiex tiġi ssodisfata d-domanda b’mod xieraq skont kriterji kummerċjali u mingħajr diskriminazzjoni u mhux għall-iffinanzjar ta’ strateġija ta’ tkabbir (b’mod partikolari l-akkwist ta’ banek tajbin) għad-detriment tal-kompetituri.

(31)

Għandhom jiġu kkunsidrati wkoll restrizzjonijiet fuq il-politika tad-dividendi u limiti fuq ir-remunerazzjonijiet eżekuttivi. Il-forma speċifika tar-restrizzjonijiet fuq l-imġiba għandha tkun iddeterminata fuq il-bażi ta’ valutazzjoni tal-proporzjonalità li tqis id-diversi fatturi li jistgħu jimplikaw il-ħtieġa ta’ ristrutturar (ara t-taqsima 6).

(32)

Meta tkun qed tiġi ddeterminata l-firxa ta’ assi eliġibbli għas-salvataġġ, jinħtieġ li jinstab bilanċ bejn li jintlaħaq l-għan immedjat tal-istabbiltà finanzjarja u l-ħtieġa li jiġi żgurat ir-ritorn għall-funzjonament normali tas-suq fuq perjodu ta’ tul medju. Assi komunement imsejħa ‘assi tossiċi’ (eż. titoli Amerikani msejsa fuq ipoteki u koperturi u derivattivi assoċjati), li kienu l-bidu tal-kriżi finanzjarja u li fil-parti l-kbira m’għadhomx likwidi jew huma suġġetti għal tnaqqis qawwi tal-valur tagħhom, jidhru li jirrappreżentaw il-parti l-kbira tal-inċertezza u x-xettiċiżmu dwar il-vijabbiltà tal-banek. Li tiġi ristretta l-firxa tal-assi eliġibbli għal dawn l-assi jkun jillimita l-iskopertura tal-Istat għal telf possibbli u jikkontribwixxi għall-prevenzjoni tat-tfixkil tal-kompetizzjoni (19). Madankollu, b’miżura ta’ salvataġġ dejqa żżejjed, ikun hemm ir-riskju li ma jintlaħaqx għal kollox l-għan li terġa’ tissawwar il-kunfidenza fis-settur finanzjarju, fid-dawl tad-differenzi bejn il-problemi speċifiċi li jeżistu fi Stati u banek differenti taż-ŻEE u fid-dawl ta’ kemm il-problema tal-indeboliment issa xterdet għal assi oħra. Dan huwa argument favur approċċ pragmatiku li jinkludi elementi ta’ flessibbiltà, u li jiżgura li assi oħra jibbenefikaw ukoll mill-miżuri ta’ salvataġġ sa kemm hu xieraq u fejn hu debitament ġustifikat.

(33)

Approċċ komuni u kkoordinat fi ħdan iż-ŻEE għall-identifikazzjoni tal-assi eliġibbli għall-miżuri ta’ salvataġġ huwa meħtieġ sew sabiex jiġi evitat it-tfixkil tal-kompetizzjoni fost l-Istati taż-ŻEE u fi ħdan is-settur bankarju taż-ŻEE, u kif ukoll sabiex jiġu limitati l-inċentivi sabiex banek transkonfinali jwettqu arbitrage fost miżuri ta’ salvataġġ nazzjonali differenti. Sabiex tiġi żgurata l-konsistenza fl-identifikazzjoni ta’ assi eliġibbli fl-Istati taż-ŻEE, għandhom jiġu żviluppati kategoriji (‘gruppi’) ta’ assi li jirriflettu l-grad ta’ indeboliment eżistenti. Linji gwida aktar dettaljati dwar id-definizzjoni ta’ dawn il-kategoriji huma pprovduti fl-Anness 3. L-użu ta’ dawn il-kategoriji ta’ assi jista’ jiffaċilita l-paragun bejn il-banek u l-profili tar-riskju tagħhom madwar iż-ŻEE. L-Istati tal-EFTA mbagħad ikunu jeħtieġu li jiddeċiedu liema kategoriji ta’ assi jistgħu jkunu koperti u sa liema punt, bla ħsara għall-analiżi tal-Awtorità tal-grad ta’ indeboliment tal-assi magħżula.

(34)

Ikun meħtieġ li jiġi żviluppat approċċ proporzjonat sabiex jippermetti lil Stat tal-EFTA li s-settur bankarju tiegħu huwa addizzjonalment affettwat minn fatturi oħra ta’ tali kobor li jipperikolaw l-istabbiltà finanzjarja (bħall-fqigħ tal-‘bżiezaq’ fis-swieq tal-propjetà immobbli tiegħu stess) sabiex jestendi l-eliġibbiltà għal kategoriji ta’ assi definiti sew li jikkorrispondu għal din it-theddida sistemika b’ġustifikazzjoni xierqa u mingħajr restrizzjonijiet kwantitattivi.

(35)

Tista’ wkoll tkun ikkunsidrata flessibbiltà ulterjuri billi tiġi prevista l-possibbiltà li l-banek jiġu meħlusa minn assi indeboliti barra mill-ambitu tal-eliġibbiltà stipulat hawn fuq u mingħajr il-ħtieġa ta’ ġustifikazzjoni speċifika għal massimu ta’ 10-20 % tal-assi totali ta’ bank partikolari koperti minn mekkaniżmu ta’ salvataġġ fid-dawl tad-diversità ta’ ċirkostanzi tal-Istati tal-EFTA u l-banek differenti. Madankollu, assi li bħalissa ma jistgħux jiġu kkunsidrati bħala indeboliti m’għandhomx ikunu koperti minn programmi ta’ salvataġġ. Is-salvataġġ tal-assi m’għandux jipprovdi assigurazzjoni bla limiti kontra l-konsegwenzi futuri ta’ reċessjoni.

(36)

Bħala prinċipju ġenerali, aktar ma jkunu wiesgħa l-kriterji tal-eliġibbiltà, u aktar ma jkun kbir il-proporzjon li l-assi kkonċernati jirrappreżentaw fil-portafoll tal-bank, aktar għandhom isiru bir-reqqa r-ristrutturar u r-rimedji sabiex jiġi evitat tfixkil bla bżonn tal-kompetizzjoni. Fi kwalunkwe każ, l-Awtorità ma tikkunsidrax assi bħala eliġibbli għall-miżuri ta’ salvataġġ fejn dawn ikunu daħlu fil-karta tal-bilanċ ta’ bank benefiċjarju wara data speċifika qabel it-tħabbir tal-programm ta’ salvataġġ (20). Li jsir mod ieħor jista’ jirriżulta f’arbitrage tal-assi u jwassal għal riskju morali inaċċettabbli billi jipprovdi inċentivi għall-banek sabiex jastjenu milli jivvalutaw kif xieraq ir-riskji fis-self futur u investimenti futuri oħra u b’hekk jirrepetu l-istess żbalji li wasslu għall-kriżi preżenti (21).

(37)

Approċċ korrett u konsistenti għall-valutazzjoni tal-assi, inklużi assi li huma aktar kumplessi u inqas likwidi, hija ta’ importanza kbira biex jiġi evitat tfixkil bla bżonn tal-kompetizzjoni u biex jiġu evitati kompetizzjonijiet tas-sussidji bejn l-Istati taż-ŻEE. Il-valutazzjoni għandha ssegwi metodoloġija ġenerali stabbilita fil-livell taż-ŻEE u għandha tiġi kkoordinata mill-qrib ex ante mill-Awtorità fl-Istati tal-EFTA sabiex tiġi assigurata l-effikaċja massima tal-miżura ta’ salvataġġ tal-assi u jitnaqqas ir-riskju ta’ distorsjonijiet u arbitrage ta’ ħsara, partikolarment għal banek transkonfinali. Jistgħu jkunu meħtieġa metodoloġiji alternattivi sabiex jitqiesu ċ-ċirkostanzi speċifiċi li jirrigwardaw, pereżempju, d-disponibbiltà fil-ħin tad-dejta relevanti, sakemm dawn jilħqu livelli ekwivalenti ta’ trasparenza. Fi kwalunkwe każ, banek eliġibbli għandhom jivvalutaw il-portafolli tagħhom kuljum u jwettqu żvelar regolari u frekwenti lill-awtoritajiet nazzjonali u lill-awtoritajiet ta’ sorveljanza tagħhom.

(38)

Fejn il-valutazzjoni tal-assi tidher partikolarment kumplessa, jistgħu jiġu kkunsidrati approċċi alternattivi bħall-ħolqien ta’ “bank tajjeb” fejn l-Istat jixtri l-assi t-tajbin minflok dawk indeboliti. Sjieda pubblika ta’ bank (inkluża n-nazzjonalizzazzjoni) tista’ tkun għażla alternattiva, bil-ħsieb li titwettaq il-valutazzjoni maż-żmien f’kuntest ta’ ristrutturar jew ta’ stralċ b’mod ordnat, u b’hekk tiġi eliminata kwalunkwe inċertezza dwar il-valur reali tal-assi kkonċernati (22).

(39)

Bħala l-ewwel stadju, l-assi għandhom jiġu vvalutati fuq il-bażi tal-valur kurrenti tagħhom fis-suq, kull meta dan ikun possibbli. B’mod ġenerali, kwalunkwe trasferiment ta’ assi koperti minn skema b’valutazzjoni akbar mill-prezz tas-suq ikun jikkostitwixxi għajnuna mill-Istat. Il-valur tas-suq attwali jista’, madankollu, ikun pjuttost ‘il bogħod mill-valur kontabbli ta’ dawk l-assi fiċ-ċirkostanzi kurrenti, jew ineżistenti fin-nuqqas ta’ suq (għal xi assi l-valur jista’ effettivament ikun żero).

(40)

Bħala t-tieni stadju, il-valur attribwit lil assi indeboliti fil-kuntest ta’ programm ta’ salvataġġ tal-assi (il-“valur tat-trasferiment”) inevitabbilment ikun ogħla mill-prezzijiet kurrenti tas-suq sabiex jinkiseb l-effett ta’ salvataġġ. Sabiex tiġi żgurata konsistenza fl-evalwazzjoni tal-kompatibbiltà tal-għajnuna, l-Awtorità tikkunsidra valur tat-trasferiment li jirrifletti l-valur ekonomiku sottostanti fit-tul (il-“valur ekonomiku reali”) tal-assi, fuq il-bażi tal-flussi tal-flus sottostanti u orizzonti ta’ żmien aktar wiesgħa, standard aċċettabbli li jindika l-kompatibbiltà tal-ammont ta’ għajnuna bħala l-minimu meħtieġ. Se jkollu jiġi kkunsidrat tnaqqis uniformi applikabbli għal ċerti kategoriji ta’ assi biex jiġi approssimat il-valur ekonomiku reali ta’ assi li huma tant kumplessi li jidher imprattikabbli tbassir affidabbli tal-iżviluppi fil-futur prevedibbli.

(41)

Konsegwentement, il-valur tat-trasferiment għal miżuri tax-xiri tal-assi jew tal-assigurazzjoni tal-assi (23) għandu jkun ibbażat fuq il-valur ekonomiku reali tagħhom. Barra minn hekk, għandha tiġi żgurata remunerazzjoni adegwata għall-Istat. Fejn l-Istati tal-EFTA jidhrilhom li hu meħtieġ - partikolarment sabiex tiġi evitata insolvenza teknika - li jintuża valur tat-trasferiment tal-assi li jeċċedi l-valur ekonomiku reali, l-element ta’ għajnuna fil-miżura huwa proporzjonalment akbar. Dan jista’ jiġi aċċettat biss jekk ikun akkumpanjat minn ristrutturar wiesa’ u l-introduzzjoni ta’ kundizzjonijiet li jippermettu l-irkupru ta’ din l-għajnuna addizzjonali fi stadju iktar tard, pereżempju permezz ta’ mekkaniżmi ta’ claw-back.

(42)

Il-proċess ta’ valutazzjoni kemm fir-rigward tal-valur tas-suq, u l-valur ekonomiku reali, u kif ukoll ir-remunerazzjoni tal-Istat, għandu jsegwi l-istess proċessi u prinċipji ta’ gwida elenkati fl-Anness 4.

(43)

Meta tkun qed tivvaluta l-metodi ta’ valutazzjoni mressqa mill-Istati tal-EFTA għall-miżuri tas-salvataġġ tal-assi, u l-implimentazzjoni tagħhom f’każijiet individwali, l-Awtorità tista’ tikkkonsulta esperti tal-valutazzjoni (24). L-Awtorità se tibni wkoll fuq il-ħiliet professjonali esperti tal-korpi eżistenti organizzati fuq il-livell tal-UE sabiex tiġi assigurata l-konsistenza tal-metodoloġija tal-valutazzjoni.

(44)

Huwa għall-Istati tal-EFTA sabiex jagħżlu l-aħjar mudell sabiex jeħilsu lill-banek mill-assi, mill-firxa ta’ għażliet stabbiliti fit-taqsima 4, fid-dawl tad-daqs tal-problema tal-assi indeboliti, tas-sitwazzjoni individwali tal-banek ikkonċernati u kunsiderazzjonijiet baġitarji. L-għan tal-kontroll tal-għajnuna mill-Istat huwa li jiġi żgurat li l-karatteristiċi tal-mudell magħżul huma mfassla sabiex jiżguraw trattament ugwali u jevitaw tfixkil bla bżonn tal-kompetizzjoni.

(45)

Filwaqt li l-arranġamenti speċifiċi tal-ipprezzar għal miżura ta’ għajnuna jistgħu jvarjaw, il-karatteristiċi distintivi tagħhom m’għandhomx ikollhom impatt apprezzabbli fuq it-tqassim adegwat tal-piż bejn l-Istat u l-banek benefiċjarji. Fuq il-bażi ta’ valutazzjoni korretta, il-mekkaniżmu ta’ finanzjament ġenerali ta’ kumpanija tal-ġestjoni tal-assi, assigurazzjoni jew soluzzjoni ibrida għandu jiżgura li l-bank ikollu jassumi l-istess proporzjon ta’ telf. Klawsoli ‘claw-back’ jistgħu jiġu kkunsidrati f’dan il-kuntest. B’mod ġenerali, l-iskemi kollha għandhom jiżguraw li l-banek benefiċjarji jġorru t-telf imġarrab fit-trasferiment ta’ assi (ara aktar fil-para. 50 u n-nota 11 ta’ qiegħ il-paġna).

(46)

Ikun xi jkun il-mudell, sabiex ikun eħfef għall-bank biex jiffoka fuq ir-restawr tal-vijabbiltà u biex ikunu evitati kunflitti ta’ interess possibbli, huwa meħtieġ li tiġi żgurata separazzjoni funzjonali u organizzattiva ċara bejn il-bank benefiċjarju u l-assi indeboliti tiegħu, partikolarment f’dak li jirrigwarda l-amministrazzjoni, il-persunal u l-klijentela tagħhom.

(47)

Gwida dettaljata dwar l-implikazzjonijiet ta’ dawn il-linji gwida dwar il-proċedura tal-għajnuna mill-Istat fir-rigward ta’ kemm in-notifika inizjali tal-għajnuna u kif ukoll il-valutazzjoni tal-pjanijiet ta’ ristrutturar, fejn neċessarju, hi pprovduta fl-Anness 5.

(48)

Il-prinċipji u l-kundizzjonijiet imsemmija aktar ‘il fuq jistabbilixxu l-qafas għat-tfassil ta’ miżuri ta’ salvataġġ tal-assi f’konformità mar-regoli dwar l-għajnuna mill-Istat. Ir-regoli dwar l-għajnuna mill-Istat għandhom il-mira, fil-kuntest preżenti, li jassiguraw l-appoġġ massimu li jinvolvi l-anqas distorsjoni għat-tneħħija ta’ riskji relatati ma’ kategorija separata tal-assi mill-banek benefiċjarji sabiex titħejja art solida għar-ritorn għall-vijabbiltà fit-tul mingħajr appoġġ mill-Istat. Filwaqt li t-trattament ta’ assi indeboliti skont il-prinċipji ta’ hawn fuq huwa pass neċessarju għal ritorn lejn il-vijabbiltà għall-banek, fih innifsu dan mhux biżżejjed biex jintlaħaq dak l-għan. Skont is-sitwazzjoni u l-karatteristiċi partikolari tagħhom, il-banek se jkollhom jieħdu miżuri xierqa fl-interess tagħhom stess sabiex jiġi evitat li jerġgħu jseħħu problemi simili u tiġi żgurata profitabbiltà sostenibbli.

(49)

Taħt ir-regoli dwar l-għajnuna mill-Istat u partikolarment dawk dwar l-għajnuna għas-salvataġġ u r-ristrutturar, dan is-salvataġġ tal-assi jammonta għal operazzjoni strutturali u jeħtieġ evalwazzjoni bir-reqqa ta’ tliet kundizzjonijiet: i) kontribuzzjoni adegwata tal-benefiċjarju għall-ispejjeż tal-programm tal-assi indeboliti; ii) azzjoni xierqa biex ikun garantit ir-ritorn għall-vijabbiltà; u iii) miżuri neċessarji sabiex jiġi rrimedjat it-tfixkil għall-kompetizzjoni.

(50)

L-ewwel kundizzjoni għandha normalment tinkiseb billi jitwettqu r-rekwiżiti stabbiliti fil-kapitoli preċedenti, partikolarment l-iżvelar, il-valutazzjoni, l-ipprezzar u l-qsim tal-piżijiet. Dan għandu jiżgura kontribuzzjoni mill-benefiċjarju ta’ mill-inqas it-telf kollu mġarrab fit-trasferiment ta’ assi lill-Istat. Fejn dan mhux materjalment possibbli, l-għajnuna tista’ xorta waħda tiġi awtorizzata, bħala eċċezzjoni, suġġetta għal rekwiżiti aktar stretti rigward iż-żewġ kundizzjonijiet l-oħra.

(51)

L-obbligi tar-ritorn għall-vijabbiltà u l-ħtieġa għal rimedji għat-tfixkil tal-kompetizzjoni għandhom jiġu determinati fuq bażi ta’ każ b’każ. Rigward it-tieni kundizzjoni, il-ħtieġa għar-ritorn għall-vijabbiltà fit-tul, għandu jiġi nnotat li s-salvataġġ tal-assi jista’ jikkontribwixxi għal dan il-għan. Ir-reviżjoni tal-vijabbiltà għandha tiċċertifika l-adegwatezza attwali u prospettiva tal-kapital tal-bank wara evalwazzjoni sħiħa u kunsiderazzjoni tal-fatturi possibbli tar-riskju (25).

(52)

L-evalwazzjoni tal-Awtorità tar-ristrutturar meħtieġ, wara l-awtorizzazzjoni inizjali tal-miżuri ta’ salvataġġ tal-assi, għandha tkun determinata fuq il-bażi tal-kriterji li ġejjin: il-kriterji mfissra fil-komunikazzjoni mill-Awtorità dwar ir-rikapitalizzazzjoni tal-banek, il-proporzjon tal-assi tal-bank suġġetti għal salvataġġ; il-prezz tat-trasferiment ta’ dawn l-assi meta mqabbel mal-prezz tas-suq; il-karatteristiċi speċifiċi tas-salvataġġ tal-assi indeboliti mogħti; id-daqs totali tal-iskopertura tal-istat imqabbla mal-assi ta’ bank bil-piż differenzjat skont ir-riskju; in-natura u l-oriġini tal-problemi tal-bank benefiċjarju; u s-saħħa tal-mudell tan-negozju u l-istrateġija tal-investiment tal-bank. Hija tqis ukoll kwalunkwe għoti addizzjonali ta’ garanzija mill-Istat jew rikapitalizzazzjoni mill-Istat, sabiex tibni l-istampa sħiħa tas-sitwazzjoni tal-bank benefiċjarju (26).

(53)

Il-vijabbiltà fit-tul titlob li l-bank ikun kapaċi jopera mingħajr ebda appoġġ mill-Istat, u dan jimplika pjanijiet ċari sabiex jitħallas lura kwalunkwe kapital riċevut mill-Istat u jiġu rrinunzjati l-garanziji mill-Istat. Skont ir-riżultat ta’ din l-evalwazzjoni, ir-ristrutturar ikollu jinkludi analiżi fil-fond tal-istrateġija u l-attività tal-bank, inkluż, pereżempju, enfasi fuq in-negozju ċentrali, riorjentament tal-mudelli tan-negozju, l-għeluq jew ċessjoni ta’ diviżjonijiet/sussidjarji, bidliet fil-ġestjoni tal-assi-obbligazzjonijiet u bidliet oħra.

(54)

Il-ħtieġa għal ristrutturar fil-fond tkun preżunta meta valutazzjoni xierqa tal-assi indeboliti skont il-prinċipji stipulati fit-taqsima 5.5 u l-Anness 4 tkun se twassal għal ekwità negattiva/insolvenza teknika mingħajr intervent mill-Istat. Talbiet ripetuti għall-għajnuna u t-tbegħid mill-prinċipji ġenerali stabbiliti normalment juru l-ħtieġa għal ristrutturar fil-fond bħal dan.

(55)

Ristrutturar fil-fond ikun meħtieġ ukoll meta l-bank ikun diġà rċieva għajnuna mill-Istat fi kwalunkwe forma li tikkontribwixxi jew għall-kopertura jew għall-evitar ta’ telf, jew b’kollox taqbeż 2 % tat-total tal-assi tal-bank bil-piż differenzjat skont ir-riskju, filwaqt li jitqiesu b’mod dovut il-karatteristiċi speċifiċi tas-sitwazzjoni ta’ kull benefiċjarju (27).

(56)

Iż-żmien li fih jittieħdu kwalunkwe miżuri meħtieġa sabiex tingħata lura l-vijabbiltà għandhom jieħdu kont tas-sitwazzjoni speċifika tal-bank ikkonċernat, kif ukoll tas-sitwazzjoni ġenerali fis-settur bankarju, mingħajr ma jiddewmu aktar milli huwa neċessarju l-aġġustamenti meħtieġa.

(57)

It-tielet, id-dimensjoni tal-miżuri kompensatorji neċessarji għandha tiġi eżaminata, fuq il-bażi tat-tfixkil tal-kompetizzjoni li tirriżulta mill-għajnuna. Dan jista’ jinvolvi tnaqqis jew bejgħ ta’ unitajiet ta’ negozju jew sussidjarji li huma profitabbli, jew impenji ta’ imġiba sabiex tiġi limitata l-espansjoni kummerċjali.

(58)

Il-ħtieġa għal miżuri ta’ kumpens tkun preżunta jekk il-bank benefiċjarju ma jwettaqx il-kundizzjonijiet stabbiliti fil-paragrafi preċedenti u partikolarment dawk tal-iżvelar, il-valutazzjoni, l-ipprezzar u l-qsim tal-piżijiet.

(59)

L-Awtorità tivvaluta l-ambitu tal-miżuri kompensatorji meħtieġa, skont l-evalwazzjoni tagħha tat-tfixkil tal-kompetizzjoni li jirriżulta mill-għajnuna, u speċjalment fuq il-bażi tal-fatturi li ġejjin: l-ammont totali tal-għajnuna, inkluż minn miżuri ta’ garanzija u rikapitalizzazzjoni; il-volum tal-assi indeboliti li jibbenefikaw mill-miżura; il-proporzjon ta’ telf li jirriżulta mill-assi; is-solidità ġenerali tal-bank; il-profil tar-riskju tal-assi soġġetti għal salvataġġ; il-kwalità tal-ġestjoni tar-riskju tal-bank; il-proporzjonijiet tal-livell tas-solvenza fl-assenza tal-għajnuna; il-pożizzjoni tas-suq tal-bank benefiċjarju u t-tfixkil tal-kompetizzjoni mill-attivitajiet tas-suq li jkomplu għaddejjin tal-bank; u l-impatt tal-għajnuna fuq l-istruttura tas-settur bankarju.

(60)

Dan il-Kapitolu tal-Linji Gwida dwar l-Għajnuna mill-Istat japplika mid-data tal-adozzjoni tiegħu, wara li ġie kkunsidrat il-kuntest ekonomiku finanzjarju u ekonomiku li jitlob azzjoni immedjata.