ANNESS I

Proċedura għall-valutazzjoni tal-konformità mar-rekwiżiti sabiex jinkisbu awtorizzazzjonijiet tas-sikurezza li għandhom jinħarġu skont l-Artikolu 11(1)(a) u (b) tad-Direttiva 2004/49/KE

1.   Il-proċeduri li awtorità nazzjonali tas-sikurezza (awtorità nazzjonali tas-sikurezza) tistabbilixxi sabiex tirċievi u tivvaluta l-applikazzjonijiet u sabiex tagħti awtorizzazzjoni tas-sikurezza għandhom ikunu msejsa fuq il-prinċipji ta' qafas li ġejjin.

(a)   L-istabbiliment u l-eżami tal-proċess ta' valutazzjoni

L-awtoritajiet nazzjonali tas-sikurezza għandhom jiżviluppaw proċessi strutturati u verifikabbli li għandhom jitwettqu minn persuni li jkunu kompetenti b’mod xieraq. Huma għandhom jiskrutinaw l-applikazzjonijiet skont il-kriterji ta' valutazzjoni għas-sistemi ta' ġestjoni tas-sikurezza stabbiliti fl-Anness II. Huma għandhom jirreġistraw u jagħtu raġunijiet għad-deċiżjonijiet kollha. Il-proċess globali ta' valutazzjoni tal-awtorità nazzjonali tas-sikurezza għandu jiġi perjodikament eżaminat internament u għandu jittejjeb kontinwament sabiex ikunu żgurati l-effikaċja u l-effiċjenza kontinwati tiegħu.

(b)   Il-kwalità tal-proċess ta' valutazzjoni

L-awtoritajiet nazzjonali tas-sikurezza għandhom jimmonitorjaw il-kwalità tal-prestazzjoni tagħhom fi stadji ewlenin fl-ipproċessar tal-applikazzjonijiet għall-awtorizzazzjonijiet tas-sikurezza.

(c)   L-ambitu tal-valutazzjoni

Il-valutazzjoni għandha tkun fuq il-livell ta' sistema ta' ġestjoni u għandha tkun xprunata mill-proċessi. Fejn l-iskrutinju jiżvela nuqqasijiet, l-awtorità nazzjonali tas-sikurezza tista’ teżerċita diskrezzjoni u, jiddependi min-natura u mis-serjetà tan-nuqqas ta' konformità, għandha tiddeskrivi fil-qosor il-punti li jeħtieġ li jittejbu. Fl-aħħar nett, l-awtorità nazzjonali tas-sikurezza għandha teżerċita s-setgħa tagħha biex tiċħad applikazzjoni.

Il-valutazzjoni għandha tkun:

—	adattata għar-riskji, għan-natura u għall-firxa ta' operazzjonijiet tal-applikant;

—	ibbażata fuq ġudizzji tal-ħila globali tal-amministratur tal-infrastruttura li jopera b’mod sikur kif inhu deskritt fis-sistema ta' ġestjoni tas-sikurezza tiegħu.

(d)   Iż-żmien meta ssir il-valutazzjoni

L-awtoritajiet nazzjonali tas-sikurezza għandhom ilestu l-valutazzjoni fiż-żmien mitlub mill-Artikolu 12 tad-Direttiva 2004/49/KE filwaqt li jiżguraw irwieħhom li l-evidenza pprovduta mill-applikant tiġi eżaminata b’mod suffiċjenti. L-awtorità nazzjonali tas-sikurezza għandha tinforma lill-amministraturi tal-infrastruttura bil-kwistjonijiet li l-iktar li jqajmu tħassib kemm jista’ jkun kmieni mil-lat prattiku waqt il-fażi tal-valutazzjoni.

(e)   It-teħid tad-deċiżjonijiet waqt il-valutazzjoni

Deċiżjoni biex applikazzjoni għal awtorizzazzjoni tas-sikurezza tiġi aċċettata jew miċħuda għandha tkun ibbażata fuq l-evidenza pprovduta mill-applikant u fuq jekk intwerietx jew le konformità mar-rekwiżiti rilevanti.

2.   L-awtorità nazzjonali tas-sikurezza għandha tivvaluta jekk is-sommarju mehmuż tal-manwal tas-sistema ta' ġestjoni tas-sikurezza jippermettix ġudizzju inizjali dwar il-kwalità ta' u dwar kemm hija xierqa s-sistema ta' ġestjoni tas-sikurezza u għandha tiddeċieda f’liema oqsma hija meħtieġa iktar informazzjoni. L-awtorità nazzjonali tas-sikurezza tista’, bħala parti minn din it-talba għal iktar informazzjoni, tfittex kemm jista’ jkun informazzjoni dettaljata daqskemm tqis li huwa raġonevolment meħtieġ sabiex tgħin il-valutazzjoni tal-applikazzjoni tagħha.

3.   Meta tingħata awtorizzazzjoni tas-sikurezza, il-konformità tas-sistema ta' ġestjoni tas-sikurezza tal-applikant mal-kriterji tal-valutazzjoni għandha tkun iddokumentata b’relazzjoni għal kull kriterju ta' valutazzjoni.

4.   Meta jiġi identifikat punt dubjuż jew nuqqas ta' konformità possibbli, l-awtorità nazzjonali tas-sikurezza għandha tkun speċifika u għandha tgħin lill-applikant jifhem il-livell ta' dettall mistenni fir-risposta. Biex tagħmel dan, hija għandha:

a.	tirreferi akkuratament għall-kriterji rilevanti u għandha tiżgura ruħha li l-applikant fehem b’mod ċar l-oqsma tan-nuqqas ta' konformità identifikati;

b.	tidentifika l-parti rilevanti tar-regolamenti, tar-regoli u tal-istandards relatati;

c.	tiddikjara għaliex il-kriterju ta' valutazzjoni ma ġiex sodisfatt;

d.

tiftiehem dwar iktar impenji, informazzjoni u kwalunkwe evidenza ta' sostenn li għandhom ikunu pprovduti, kif inhu mitlub mil-livell ta' dettall tal-kriterju, u għandha tispeċifika kemm l-azzjoni mitluba mill-applikant sabiex jiġi rrettifikat in-nuqqas kif ukoll il-perjodu ta' żmien għall-konformità;

e.	tispeċifika l-oqsma li jistgħu jkunu suġġetti għal iktar skrutinju permezz ta' superviżjoni wara l-għoti tal-awtorizzazzjoni.

ANNESS II

Kriterji għall-valutazzjoni tal-konformità mar-rekwiżiti sabiex jinkisbu awtorizzazzjonijiet tas-sikurezza li għandhom jinħarġu skont l-Artikolu 11(1)(a) u (b) tad-Direttiva 2004/49/KE

A.   MIŻURI TA’ KONTROLL TAR-RISKJI GĦAR-RISKJI KOLLHA ASSOĊJATI MAL-ATTIVITÀ TAL-AMMINISTRATUR TAL-INFRASTRUTTURA (1)

A.1

Hemm proċeduri stabbiliti sabiex ikunu identifikati r-riskji assoċjati mal-operazzjonijiet ferrovjarji, inklużi dawk li jirriżultaw direttament minn attivitajiet ta’ xogħol, mid-disinn tal-impjieg jew mill-ammont ta’ xogħol u mill-attivitajiet ta’ organizzazzjonijiet/persuni oħrajn.

A.2

Hemm proċeduri stabbiliti sabiex ikunu żviluppati u stabbiliti miżuri ta’ kontroll tar-riskji.

A.3

Hemm proċeduri stabbiliti sabiex tkun immonitorjata l-effikaċja tal-arranġamenti għall-kontroll tar-riskji u sabiex ikunu implimentati bidliet, meta dan ikun mitlub.

A.4

Hemm proċeduri stabbiliti sabiex tkun rikonoxxuta l-ħtieġa li jkun hemm ħidma flimkien ma’ entitajiet oħrajn (bħall-impriżi ferrovjarji, il-manifattur, il-fornitur tal-manutenzjoni, l-entità responsabbli għall-manutenzjoni, il-gwardjan tal-vetturi ferrovjarji, il-fornitur tas-servizzi, u l-entità tal-akkwist), fejn ikun xieraq, rigward kwistjonijiet fejn għandhom interfaċi kondiviżi li huwa probabbli li jaffetwaw l-istabbiliment ta’ miżuri ta’ kontroll tar-riskji adegwati skont l-Artikolu 4(3) tad-Direttiva 2004/49/KE.

A.5

Hemm proċeduri għal dokumentazzjoni u għal komunikazzjoni miftiehma mal-entitajiet rilevanti, inklużi l-identifikazzjoni tar-rwoli u tar-responsabbiltajiet ta’ kull organizzazzjoni parteċipanti u l-ispeċifikazzjonijiet għall-iskambji ta’ informazzjoni.

A.6

Hemm proċeduri sabiex tkun immonitorjata l-effikaċja ta’ dawn l-arranġamenti u sabiex ikunu implimentati bidliet meta dan ikun mitlub.

B.   KONTROLL TAR-RISKJI RELATAT MAL-PROVVISTA TAL-MANUTENZJONI U TAL-MATERJAL (2)

B.1

Hemm proċeduri sabiex mid-dejta dwar is-sikurezza jkunu derivati rekwiżiti/standards/proċessi ta’ manutenzjoni.

B.2

Hemm proċeduri sabiex l-intervalli ta’ manutenzjoni jkunu adattati skont it-tip u l-firxa ta’ servizz imwettaq.

B.3

Hemm proċeduri sabiex ikun żgurat li r-responsabbiltà għall-manutenzjoni tkun iddefinita b’mod ċar ħalli jkunu identifikati l-kompetenzi mitluba għall-karigi tal-manutenzjoni u sabiex ikunu allokati l-livelli xierqa ta’ responsabbiltà.

B.4

Hemm proċeduri sabiex tinġabar informazzjoni dwar il-ħsarat u d-difetti li jirriżultaw mit-tħaddim ta’ kuljum u sabiex dawn ikunu rrapportati lil dawk responsabbli għall-manutenzjoni.

B.5

Hemm proċeduri sabiex ikunu identifikati u rrapportati r-riskji li jirriżultaw minn difetti u minn nuqqasijiet ta’ konformità jew minn ħsarat fil-kostruzzjoni matul iċ-ċiklu ta’ ħajja kollu lill-partijiet interessati.

B.6

Hemm proċeduri sabiex ikunu vverifikati u kkontrollati l-prestazzjoni u r-riżultati tal-manutenzjoni ħalli jkun żgurat li dawn ikunu konformi mal-istandards korporattivi.

C.   KONTROLL TAR-RISKJI RELATAT MAL-UŻU TAL-KUNTRATTURI U MAL-KONTROLL TAL-FORNITURI (3)

C.1

Hemm proċeduri sabiex tkun ivverifikata l-kompetenza tal-kuntratturi (inklużi s-subkuntratturi) u tal-fornituri.

C.2

Hemm proċeduri sabiex ikunu vverifikati u kkontrollati l-prestazzjoni tas-sikurezza u r-riżultati tas-servizzi u tal-prodotti kkuntrattati kollha pprovduti jew mill-kuntrattur jew mill-fornitur sabiex ikun żgurat li dawn ikunu konformi mar-rekwiżiti stabbiliti fil-kuntratt.

C.3

Ir-responsabbiltajiet u l-kompiti relatati ma’ kwistjonijiet dwar is-sikurezza ferrovjarja huma ddefiniti, magħrufa u allokati b’mod ċar bejn is-sħab kontraenti u fost il-partijiet interessati l-oħra kollha.

C.4

Hemm proċeduri sabiex tkun żgurata t-traċċabbiltà tad-dokumenti u tal-kuntratti relatati mas-sikurezza.

C.5

Hemm proċeduri sabiex ikun żgurat li l-kompiti tas-sikurezza, inkluż l-iskambju tal-informazzjoni relatata mas-sikurezza, jitwettqu mill-kuntratturi jew mill-fornitur skont ir-rekwiżiti rilevanti stabbiliti fil-kuntratt.

D.   RISKJI LI JIRRIŻULTAW MILL-ATTIVITAJIET TA’ PARTIJIET OĦRAJN ESTERNI GĦAS-SISTEMA FERROVJARJA (4)

D.1

Hemm proċeduri sabiex jiġu identifikati r-riskji potenzjali minn partijiet esterni għas-sistema ferrovjarja fejn dan ikun xieraq u raġonevoli.

D.2

Hemm proċeduri sabiex ikunu stabbiliti miżuri ta’ kontroll ħalli jitaffew ir-riskji identifikati taħt D1 sa fejn għandhom x’jaqsmu r-responsabbiltajiet tal-applikant.

D.3

Hemm proċeduri sabiex tkun immonitorjata l-effikaċja tal-miżuri identifikati taħt D2 u sabiex jiġu implementati bidliet fejn ikun xieraq.

E.   DOKUMENTAZZJONI TAS-SISTEMA TA’ ĠESTJONI TAS-SIKUREZZA

E.1

Hemm deskrizzjoni tal-attività li tiċċara t-tip, il-firxa u r-riskju tal-operazzjoni.

E.2

Hemm deskrizzjoni tal-istruttura tas-sistema ta’ ġestjoni tas-sikurezza, inkluża l-allokazzjoni tar-rwoli u tar-responsabbiltajiet.

E.3

Hemm deskrizzjoni tal-proċeduri tas-sistema ta’ ġestjoni tas-sikurezza, mitluba mill-Artikolu 9 u mill-Anness III tad-Direttiva 2004/49/KE, konsistenti mat-tip u mal-firxa ta’ servizzi operati.

E.4

Il-proċessi u l-kompiti kritiċi għas-sikurezza li jkunu rilevanti għat-tip ta’ attività/servizz huma elenkati u deskritti fil-qosor.

F.   DISTRIBUZZJONI TAR-RESPONSABBILTAJIET (5)

F.1

Hemm deskrizzjoni ta’ kif tkun żgurata l-koordinazzjoni tal-attivitajiet tas-sistema ta’ ġestjoni tas-sikurezza fl-organizzazzjoni kollha, fuq il-bażi ta’ għarfien ipprovat u tar-responsabbiltà ewlenija fuq il-livell maniġerjali.

F.2

Hemm proċeduri sabiex ikun żgurat li l-persunal b’responsabbiltajiet iddelegati fi ħdan l-organizzazzjoni jkollu l-awtorità, il-kompetenza u r-riżorsi xierqa sabiex jaqdi dmiru.

F.3

L-oqsma ta’ responsabbiltà relatati mas-sikurezza u d-distribuzzjoni tar-responsabbiltajiet lil funzjonijiet speċifiċi assoċjati magħhom, flimkien mal-interfaċi tagħhom, huma ddefiniti b’mod ċar.

F.4

Hemm proċedura sabiex ikun żgurat li l-kompiti tas-sikurezza huma ddefiniti b’mod ċar u huma ddelegati lil persunal b’kompetenza xierqa.

G.   IKUN ŻGURAT IL-KONTROLL MILL-MANIĠMENT FUQ LIVELLI DIFFERENTI (6)

G.1

Hemm deskrizzjoni ta’ kif jiġu allokati r-responsabbiltajiet għal kull proċess relatat mas-sikurezza fl-organizzazzjoni kollha.

G.2

Hemm proċedura għal monitoraġġ regolari tal-prestazzjoni tal-kompiti żgurata mill-katina tal-linja maniġerjali li trid tidħol fis-seħħ jekk il-kompiti mhux qed jitwettqu b’mod xieraq.

G.3

Hemm proċeduri sabiex ikun identifikat u ġestit l-impatt ta’ attivitajiet oħrajn ta’ ġestjoni fuq is-sistema ta’ ġestjoni tas-sikurezza.

G.4

Hemm proċeduri sabiex dawk li għandhom rwol fil-ġestjoni tas-sikurezza jinżammu responsabbli għall-prestazzjoni tagħhom.

G.5

Hemm proċeduri sabiex ikunu allokati riżorsi ħalli jiġu assenjati l-kompiti skont is-sistema ta’ ġestjoni tas-sikurezza.

H.   L-INVOLMENT TAL-PERSUNAL U TAR-RAPPREŻENTANTI TAGĦHOM FUQ IL-LIVELLI KOLLHA (7)

H.1

Hemm proċeduri stabbiliti sabiex ikun żgurat li l-persunal u r-rappreżentanti tal-persunal ikunu rrappreżentati u kkonsultatati b’mod adegwat fid-definizzjoni, fil-proposta, fl-eżami u fl-iżvilupp tal-aspetti tas-sikurezza tal-proċeduri operattivi li jistgħu jinvolvu lill-persunal.

H.2

L-involviment tal-persunal u l-arranġamenti għall-konsultazzjonijiet mal-persunal huma ddokumentati.

I.   IKUN ŻGURAT TITJIB KONTINWU (8)

Hemm proċeduri stabbiliti sabiex ikun żgurat, fejn dan ikun raġonevolment prattikabbli, it-titjib kontinwu tas-sistema ta’ ġestjoni tas-sikurezza; dawn għandhom jinkludu:

(a)	proċeduri għal reviżjonijiet perjodiċi tas-sistema ta’ ġestjoni tas-sikurezza, kif jinstab li jkun meħtieġ

(b)	proċeduri għad-deskrizzjoni ta’ arranġamenti sabiex tkun immonitorjata u analizzata d-dejta dwar is-sikurezza rilevanti

(c)	proċeduri għad-deskrizzjoni ta’ kif in-nuqqasijiet identifikati jiġu rrettifikati

(d)	proċeduri għad-deskrizzjoni tal-implimentazzjoni tar-regoli l-ġodda dwar il-ġestjoni tas-sikurezza bbażati fuq l-iżvilupp u fuq it-tagħlim miksub.

(e)	proċeduri għad-deskrizzjoni ta’ kif is-sejbiet tal-verifiki interni jintużaw sabiex jagħtu lok għal titjib fis-sistema ta’ ġestjoni tas-sikurezza.

J.   POLITIKA TAS-SIKUREZZA APPROVATA MILL-KAP EŻEKUTTIV TAL-ORGANIZZAZZJONI U KKOMUNIKATA LILL-PERSUNAL KOLLU (9)

Jeżisti dokument li jiddeskrivi l-politika tas-sikurezza tal-organizzazzjoni u huwa:

(a)	ikkomunikat u mqiegħed għad-dispożizzjoni tal-persunal kollu, eż. permezz tal-intranet tal-organizzazzjoni;

(b)	adattat għat-tip u għall-firxa ta’ servizz;

(c)	approvat mill-kap eżekuttiv tal-organizzazzjoni.

K.   MIRI KWALITATTIVI U KWANTITTATIVI tal-organizzazzjoni SABIEX TINŻAMM U TITTEJJEB IS-SIKUREZZA, U L-PJANIJIET U L-PROĊEDURI SABIEX JINTLAĦQU DAWN IL-MIRI (10)

K.1

Hemm proċeduri sabiex ikunu ddeterminati l-miri tas-sikurezza rilevanti f’konformità mal-qafas legali, u hemm dokument li jiddikjara x’inhuma dawn il-miri.

K.2

Hemm proċeduri sabiex ikunu ddeterminati l-miri tas-sikurezza rilevanti li huma konsistenti mat-tip u mal-firxa tal-operazzjonijiet ferrovjarji koperti u mar-riskji rilevanti.

K.3

Hemm proċeduri sabiex il-prestazzjoni globali tas-sikurezza, b’relazzjoni għall-miri korporattivi tas-sikurezza tagħha u għal dawk stabbiliti fuq il-livell tal-Istat Membru, tkun ivvalutata b’mod regolari.

K.4

Hemm proċeduri stabbiliti sabiex l-arranġamenti operattivi jiġu mmonitorjati u rriveduti b’mod regolari billi: (a) tinġabar id-dejta dwar is-sikurezza rilevanti sabiex ikunu derivati t-tendenzi fil-prestazzjoni tas-sikurezza u tkun ivvalutata l-konformità mal-miri; (b) tiġi interpretata d-dejta rilevanti u jiġu implimentati l-bidliet meħtieġa.

K.5

Hemm proċeduri stabbiliti mill-amministratur tal-infrastruttura sabiex jiġu żviluppati pjanijiet u proċeduri ħalli jintlaħqu l-miri tiegħu.

L.   PROĊEDURI SABIEX JINTLAĦQU L-ISTANDARDS TEKNIĊI U OPERATTIVI EŻISTENTI, ĠODDA U MIBDULA JEW KUNDIZZJONIJIET PRESKRITTIVI OĦRAJN (11)

L.1.

Għar-rekwiżiti relatati mas-sikurezza li jkunu rilevanti għat-tip u għall-firxa tal-operazzjonijiet, hemm proċeduri sabiex: (a) dawn ir-rekwiżiti jiġu identifikati u jiġu aġġornati l-proċeduri rilevanti ħalli jirriflettu l-bidliet li sarulhom (ġestjoni tal-kontroll tal-bidliet); (b) jiġu implimentati; (c) tiġi mmonitorjata l-konformità magħhom; (d) tittieħed azzjoni meta jkun identifikat nuqqas ta’ konformità.

L.2

Hemm proċeduri stabbiliti sabiex ikun żgurat li l-persunal, il-proċeduri, id-dokumenti speċifiċi, it-tagħmir u l-vetturi ferrovjarji t-tajbin jintużaw għall-iskop maħsub.

L.3

Is-sistema ta’ ġestjoni tas-sikurezza għandha proċeduri stabbiliti sabiex ikun żgurat li l-manutenzjoni titwettaq skont ir-rekwiżiti rilevanti.

M.   PROĊEDURI U METODI BIEX TITWETTAQ EVALWAZZJONI TAR-RISKJI U BIEX JIĠU IMPLIMENTATI MIŻURI TA’ KONTROLL TAR-RISKJI KULL DARBA LI BIDLA FIL-KUNDIZZJONIJIET OPERATTIVI JEW MATERJAL ĠDID TIMPONI RISKJI ĠODDA FUQ L-INRASTRUTTUTURA JEW FUQ IT-TĦADDIM (12)

M.1

Hemm proċeduri ta’ ġestjoni għal bidliet fit-tagħmir, fil-proċeduri, fl-organizzazzjoni, fil-persunal jew fl-interfaċi.

M.2

Hemm proċeduri ta’ valutazzjoni tar-riskji sabiex ikunu ġestiti l-bidliet u sabiex ikun applikat is-CSM dwar l-evalwazzjoni u l-valutazzjoni tar-riskji kif isemmi fl-Regolament tal-Kummissjoni (KE) Nru 352/2009 (13) meta mitlub.

M.3

Hemm proċeduri stabbiliti sabiex ir-riżultati tal-valutazzjoni tar-riskji jiġu alimentati fi proċessi oħrajn fi ħdan l-organizzazzjoni u sabiex ikunu viżibbli għall-persunal rilevanti.

N.   PROVVISTA TA’ PROGRAMMI U TA’ SISTEMI TA’ TAĦRIĠ GĦALL-PERSUNAL SABIEX IKUN ŻGURAT LI L-KOMPETENZA TAL-PERSUNAL TINŻAMM AĠĠORNATA U L-KOMPITI JITWETTQU SKONT DAN (14)

N.1

Hemm sistema ta’ ġestjoni tal-kompetenzi li tinkludi, mill-inqas: (a) identifikazzjoni tal-għarfien u tal-ħiliet mitluba għal kompiti relatati mas-sikurezza; (b) prinċipji ta’ selezzjoni (il-livell edukattiv bażiku, il-kapaċità mentali u s-saħħa fiżika mitluba); (c) taħriġ inizjali u ċertifikazzjoni tal-kompetenza u tal-ħiliet miksuba; (d) taħriġ kontinwu u aġġornament perjodiku tal-għarfien u tal-ħiliet eżistenti; (e) kontrolli perjodiċi tal-kompetenza fejn ikun xieraq; (f) miżuri speċjali f’każ ta’ aċċidenti/inċidenti jew ta’ assenzi twal mix-xogħol, kif mitlub/fejn ikun xieraq; (g) taħriġ speċifiku fis-sistema ta’ ġestjoni tas-sikurezza għall-persunal direttament involut fil-proċeduri li jiżguraw li s-sistema ta’ ġestjoni tas-sikurezza taħdem.

N.2

Hemm proċeduri fi ħdan is-sistema ta’ ġestjoni tal-kompetenzi li jipprovdu għal: (a) l-identifikazzjoni tal-karigi li jwettqu kompiti ta’ sikurezza; (b) l-identifikazzjoni tal-karigi li jinvolvu responsabbiltajiet għat-teħid ta’ deċiżjonijiet operattivi fi ħdan is-sistema ta’ ġestjoni tas-sikurezza; (c) persunal li jkollu l-għarfien, il-ħiliet u il-kapaċità (medika u psikoloġika) meħtieġa li jkunu adattati għall-kompiti tiegħu u li jiġu mġedda/aġġornati perjodikament; (d) l-allokazzjoni tal-persunal b’kompetenza adattata għall-kompiti rilevanti; (e) il-monitoraġġ ta’ kif jitwettqu l-kompiti u l-implimentazzjoni ta’ azzjonijiet korrettivi fejn dan ikun mitlub.

O.   ARRANĠAMENTI GĦALL-PROVVISTA TA’ INFORMAZZJONI SUFFIĊJENTI FI ĦDAN L-ORGANIZZAZZJONI U, FEJN IKUN XIERAQ, BEJN L-ORGANIZZAZZJONIJIET LI JOPERAW FUQ L-ISTESS INFRASTRUTTURA (15)

O.1

Hemm proċeduri sabiex ikun żgurat li: (a) il-persunal ikollu għarfien u fehim tas-sistema ta’ ġestjoni tas-sikurezza u l-informazzjoni tkun faċilment aċċessibbli; u (b) il-persunal tas-sikurezza rilevanti tingħatalu dokumentazzjoni xierqa dwar is-sistema ta’ ġestjoni tas-sikurezza.

O.2

Hemm proċeduri sabiex ikun żgurat li: (a) l-informazzjoni operattiva ewlenija tkun rilevanti u valida; (b) il-persunal ikun jaf bl-eżistenza tagħha qabel ma trid tiġi applikata; (c) hija disponibbli għall-persunal u, fejn mitlub, jingħatawlhom formalment kopji tagħha.

O.3

Hemm arranġamenti stabbiliti għall-kondiviżjoni tal-informazzjoni bejn l-amministratur tal-infrastruttura u impriżi ferrovjarji oħrajn.

P.   PROĊEDURI U FORMATI BIEX TKUN IDDOKUMENTATA L-INFORMAZZJONI DWAR IS-SIKUREZZA U L-ISPEĊIFIKAZZJONI TA’ PROĊEDURA GĦALL-KONTROLL TAL-KONFIGURAZZJONI TA’ INFORMAZZJONI VITALI DWAR IS-SIKUREZZA (16)

P.1

Hemm proċeduri sabiex ikun żgurat li l-informazzjoni kollha rilevanti dwar is-sikurezza tkun korretta, kompluta, konsistenti, tinftiehem faċilment, tiġi aġġornata b’mod xieraq u ddokumentata kif suppost.

P.2

Hemm proċeduri sabiex: (a) il-kontroll tal-bidliet jingħata format, jiġi ġġenerat, iddistribwit u ġestit lid-dokumentazzjoni rilevanti kollha dwar is-sikurezza; (b) id-dokumentazzjoni/l-informazzjoni kollha rilevanti tiġi riċevuta, miġbura u maħżuna fuq karta jew permezz ta’ sistemi oħrajn ta’ reġistrazzjoni.

P.3

Hemm proċedura għall-kontroll tal-konfigurazzjoni ta’ informazzjoni vitali dwar is-sikurezza.

Q.   PROĊEDURI SABIEX IKUN ŻGURAT LI L-AĊĊIDENTI, L-INĊIDENTI, IL-KWAŻI INĊIDENTI U OKKORRENZI PERIKOLUŻI OĦRAJN JIĠU RRAPPORTATI, INVESTIGATI U ANALIZZATI U LI JITTIEĦDU L-MIŻURI PREVENTIVI MEĦTIEĠA (17)

Q.1

Hemm proċeduri sabiex ikun żgurat li l-aċċidenti, l-inċidenti, il-kważi inċidenti u okkorrenzi perikolużi oħrajn: (a) jiġu rrapportati, irreġistrati, investigati u analizzati; (b) jiġu rrapportati, kif inhu mitlub mil-leġiżlazzjoni rilevanti, lill-entitajiet nazzjonali.

Q.2

Hemm proċeduri sabiex ikun żgurat li: (a) ir-rakkomandazzjonijiet mill-awtorità nazzjonali tas-sikurezza, mill-korp investigattiv nazzjonali, u mill-investigazzjonijiet tal-industrija/interni jiġu evalwati u implimentati jekk dan ikun xieraq jew obbligatorju; (d) ir-rapporti/l-informazzjoni rilevanti minn impriżi ferrovjarji, amministraturi tal-infrastruttura, entitajiet responsabbli għall-manutenzjoni u gwardjani tal-vetturi ferrovjarji oħrajn jiġu kkunsidrati u meqjusa.

Q.3

Hemm proċeduri sabiex l-informazzjoni rilevanti relatata mal-investigazzjoni u mal-kawżi tal-aċċidenti, tal-inċidenti, tal-kważi inċidenti u ta’ okkorrenzi perikolużi oħrajn tintuża ħalli tinkiseb tagħlima u, fejn ikun mitlub, ħalli jkunu adottati miżuri preventivi.

R.   PROVVISTA TA’ PJANIJIET GĦAL AZZJONI U TWISSIJIET U INFORMAZZJONI F’KAŻ TA’ EMERĠENZA, MIFTIEHMA MAL-AWTORITAJIET PUBBLIĊI XIERQA (18)

R.1

Dokument jidentifika t-tipi kollha ta’ emerġenza, inklużi l-operazzjonijiet iddegradati, u hemm proċeduri stabbiliti sabiex ikunu identifikati dawk ġodda.

R.2

Hemm proċeduri stabbiliti sabiex ikun żgurat li, għal kull tip ta’ emerġenza identifikata: (a) is-servizzi ta’ emerġenza jistgħu jiġu kkuntattjati fil-pront; (b) is-servizzi ta’ emerġenza jiġu pprovduti bl-informazzjoni kollha rilevanti kemm minn qabel, sabiex jippreparaw ir-reazzjoni ta’ emerġenza tagħhom, kif ukoll fil-ħin ta’ emerġenza.

R.3

Ir-rwoli u r-responsabbiltajiet tal-partijiet kollha huma identifikati u stabbiliti f’dokument.

R.4

Jeżistu pjanijiet għal azzjoni, twissijiet u informazzjoni u jinkludu: (a) proċeduri sabiex il-persunal kollu b’responsabbiltà għall-ġestjoni tal-emerġenzi jkun imwissi; (b) arranġamenti sabiex dawn ikunu kkomunikati lill-partijiet kollha, inklużi l-istruzzjonijiet ta’ emerġenza għall-passiġġieri; (c) arranġamenti sabiex il-persunal kompetenti jkun ikkuntattjat immedjatament ħalli jkun jista’ jieħu kwalunkwe deċiżjoni mitluba.

R.5

Hemm dokument li jiddeskrivi kif ġew allokati r-riżorsi u l-mezzi u kif ġew identifikati r-rekwiżiti tat-taħriġ.

R.6

Hemm proċeduri stabbiliti sabiex il-kundizzjonijiet operattivi normali jerġgħu jiġu stabbiliti mill-iktar fis possibbli.

R.7

Hemm proċeduri għall-ittestjar tal-pjanijiet ta’ emerġenza f’kooperazzjoni ma’ partijiet oħrajn sabiex il-persunal jiġi mħarreġ, jiġu ttestjati l-proċeduri, jiġu identifikati l-punti dgħajfa u jiġi vverifikat kif jiġu ġestititi sitwazzjonijiet ta’ emerġenza potenzjali.

R.8

Hemm proċeduri stabbiliti sabiex il-pjanijiet ta’ emerġenza jkunu kkoordinati mal-impriżi ferrovjarji li joperaw fuq l-infrastruttura tal-organizzazzjoni u kwalunkwe infrastruttura oħra li magħha jkun hemm interfaċa.

R.9

Hemm arranġamenti stabbiliti sabiex l-operazzjonijiet u t-traffiku ferrovjarju jitwaqqfu fil-pront, jekk ikun meħtieġ, u sabiex il-partijiet interessati kollha jkunu informati bl-azzjoni meħuda.

S.   DISPOŻIZZJONIJIET GĦAL VERIFIKI INTERNI RIKORRENTI TAS-SISTEMA TA’ ĠESTJONI TAS-SIKUREZZA (19)

S.1

Hemm sistema ta’ verifiki interni li hija indipendenti u imparzjali u li taġixxi b’mod trasparenti.

S.2

Hemm skeda ta’ verifiki interni ppjanati li tista’ tiġi rriveduta jiddependi mir-riżultati tal-verifiki preċedenti u mill-monitoraġġ tal-prestazzjoni.

S.3

Hemm proċeduri stabbiliti sabiex ikunu identifikati u magħżula awdituri li jkunu kompetenti b’mod xieraq.

S.4

Hemm proċeduri stabbiliti sabiex: (a) jiġu analizzati u evalwati r-riżultati tal-verifiki; (b) jiġu rrakkomandati miżuri ta’ segwitu; (c) tittieħed azzjoni ta’ segwitu għall-effikaċja tal-miżuri; (d) jiġu ddokumentati l-eżekuzzjoni tal-verifiki u r-riżultati tal-verifiki.

S.5

Hemm proċeduri sabiex ikun żgurat li l-livelli ta’ grad għoli tal-katina maniġerjali jkunu jafu bir-riżultati tal-verifiki u jieħdu r-responsabbiltà globali għall-implimentazzjoni tal-bidliet fis-sistema ta’ ġestjoni tas-sikurezza.

S.6

Hemm dokument li juri kif il-verifiki huma ppjanati b’relazzjoni għall-arranġamenti ta’ monitoraġġ ta’ rutina sabiex tkun żgurata konformità mal-proċeduri u mal-istandards interni.

T.   DISINN SIKUR TAL-INFRASTRUTTURA FERROVJARJA (20)

T.1

Hemm proċeduri sabiex ikun żgurat id-disinn sikur tal-infrastruttura matul iċ-ċiklu ta’ ħajja kollu tal-infrastruttura, li jkopri d-disinn u l-installazzjoni.

T.2

Hemm proċeduri li jikkunsidraw il-bidla teknika tal-infrastruttura u l-ġestjoni ta’ dik il-bidla.

T.3

Hemm proċeduri li juru li r-regoli rilevanti li jkopru d-disinn tal-infrastruttura u kwalunkwe metodu ta’ sikurezza nazzjonali ġew identifikati u li l-applikant jista’ jkun konformi magħhom.

U.   TĦADDIM SIKUR TAL-INFRASTRUTTURA (21)

U.1

Hemm proċeduri sabiex ikun żgurat li l-infrastruttura tiġi ġestita u operata b’mod sikur, billi jiġu kkunsidrati l-għadd, it-tip u l-firxa ta’ operaturi li jiġġestixxu servizzi fuq in-netwerk, inklużi l-interazzjonijiet kollha meħtieġa, jiddependi mill-kumplessità tal-operazzjoni.

U.2

Hemm proċeduri li juru kif tiġi ġestita s-sikurezza fuq il-fruntieri fiżiċi u/jew operattivi tal-infrastruttura.

U.3

Hemm proċeduri li juru kif jiġu ġestiti kooperazzjoni u koordinazzjoni effettivi, kemm f’sitwazzjonijiet normali kif ukoll f’sitwazzjonijiet ta’ emerġenza.

U.4

Hemm proċeduri li juru li r-regoli li jkopru t-tħaddim sikur u l-ġestjoni tal-interfaċi tal-infrastruttura/vetturi ġew identifikati u li l-applikant jista’ jkun konformi magħhom.

V.   PROVVISTA TA’ MANUTENZJONI U TA’ MATERJAL (22)

V.1

Hemm proċeduri sabiex ikun żgurat li l-manutenzjoni tal-infrastruttura titwettaq b’mod sikur, inklużi kontroll ċar tal-ġestjoni u verifika u spezzjoni ddokumentati.

V.2

Hemm proċeduri li jiżguraw li l-manutenzjoni tal-infrastruttura tissodisfa l-ħtiġijiet speċifiċi tan-netwerk.

V.3

Hemm proċeduri li juru li r-regoli li jkopru l-provvista tal-manutenzjoni u tal-materjal ġew identifikati u li l-applikant jista’ jkun konformi magħhom.

W.   MANUTENZJONI U TĦADDIM TAS-SISTEMA TA’ KONTROLL U TA’ SINJALAZZJONI TAT-TRAFFIKU (23)

W.1

Hemm proċeduri sabiex ikun żgurat li s-sistema ta’ kontroll u ta’ sinjalazzjoni tat-traffiku tiġi operata u tinżamm f’kundizzjoni tajba sabiex ikun żgurat it-tħaddim sikur tal-ferrovija.

W.2

Hemm proċeduri sabiex ikun hemm konformità ma’ standards tekniċi u operattivi eżistenti, ġodda u mibdula.

W.3

Hemm proċeduri li jistabbilixxu kif tiġi ġestita s-sikurezza fuq il-fruntieri fiżiċi u/jew operattivi tas-sistema ta’ kontroll u ta’ sinjalazzjoni tat-traffiku, inkluż kif tiġi ġestita l-kooperazzjoni, jekk dan ikun meħtieġ.

W.4

Hemm proċeduri li juru li r-regoli li jkopru t-tħaddim sikur u l-manutenzjoni tas-sistema ta’ kontroll u ta’ sinjalazzjoni tat-traffiku ġew identifikati u li l-applikant jista’ jkun konformi magħhom.

---

(1)  Artikolu 9(2) tad-Direttiva 2004/49/KE.

(2)  Artikolu 9(2) tad-Direttiva 2004/49/KE.

(3)  Artikolu 9(2) tad-Direttiva 2004/49/KE.

(4)  Artikolu 9(2) tad-Direttiva 2004/49/KE.

(5)  Punt 1 tal-Anness III għad-Direttiva 2004/49/KE.

(6)  Punt 1 tal-Anness III għad-Direttiva 2004/49/KE.

(7)  Punt 1 tal-Anness III għad-Direttiva 2004/49/KE.

(8)  Punt 1 tal-Anness III għad-Direttiva 2004/49/KE.

(9)  Punt 2(a) tal-Anness III għad-Direttiva 2004/49/KE.

(10)  Punt 2(b) tal-Anness III għad-Direttiva 2004/49/KE.

(11)  Punt 2(c) tal-Anness III għad-Direttiva 2004/49/KE.

(12)  Punt 2(d) tal-Anness III għad-Direttiva 2004/49/KE.

(13)   ĠU L 108, 29.4.2009, p. 4.

(14)  Punt 2(e) tal-Anness III għad-Direttiva 2004/49/KE.

(15)  Punt 2(f) tal-Anness III għad-Direttiva 2004/49/KE.

(16)  Punt 2(g) tal-Anness III għad-Direttiva 2004/49/KE.

(17)  Punt 2(h) tal-Anness III għad-Direttiva 2004/49/KE.

(18)  Punt 2(i) tal-Anness III għad-Direttiva 2004/49/KE.

(19)  Punt 2(j) tal-Anness III għad-Direttiva 2004/49/KE.

(20)  Artikolu 11(1)(b) tad-Direttiva 2004/49/KE.

(21)  Artikolu 11(1)(b) tad-Direttiva 2004/49/KE.

(22)  Artikolu 11(1)(b) tad-Direttiva 2004/49/KE.

(23)  Artikolu 11(1)(b) tad-Direttiva 2004/49/KE.

ANNESS III

Prinċipji ta’ qafas għal superviżjoni wara l-għoti ta’ awtorizzazzjoni

1.

L-approċċ tal-awtoritajiet nazzjonali tas-sikurezza għal superviżjoni tal-konformità skont l-Artikoli 4(1) u 16(2)(e) tad-Direttiva 2004/49/KE għandu jkun ibbażat fuq il-prinċipji li ġejjin. Dawn il-prinċipji japplikaw għall-qafas tal-attivitajiet ta’ superviżjoni kollu u għall-każijiet individwali fi ħdan dak il-qafas.

2.

L-awtoritajiet nazzjonali tas-sikurezza għandhom japplikaw il-prinċipju tal-proporzjonalità bejn l-infurzar u r-riskju. L-azzjoni meħuda minn awtorità nazzjonali tas-sikurezza sabiex tinkiseb konformità jew sabiex jintalab rendikont mingħand l-amministraturi tal-infrastruttura talli ma ssodisfawx l-obbligi legali tagħhom għandha tkun proporzjonata għal kwalunkwe riskju għas-sikurezza jew għas-serjetà potenzjali ta’ kwalunkwe nuqqas ta’ konformità, inkluża kwalunkwe ħsara effettiva jew potenzjali.

3.

L-awtoritajiet nazzjonali tas-sikurezza għandhom japplikaw il-prinċipju tal-konsistenza tal-approċċ sabiex jiżguraw irwieħhom li awtorità nazzjonali tas-sikurezza jkollha approċċ simili f’ċirkustanzi simili sabiex tilħaq għanijiet simili.

4.

L-attività ta’ superviżjoni tal-awtorità nazzjonali tas-sikurezza għandha tkun immirata primarjament lejn dawk l-attivitajiet li awtorità nazzjonali tas-sikurezza temmen li jagħtu lok għall-iktar riskji serji jew fejn il-perikli huma l-inqas ikkontrollati sew. Biex tagħmel dan, l-awtorità nazzjonali tas-sikurezza għandu jkollha l-metodi u s-setgħa sabiex tivvaluta l-prestazzjoni tas-sikurezza ta’ kuljum tal-amministratur tal-infrastruttura.

5.

L-awtoritajiet nazzjonali tas-sikurezza għandhom jiddeċiedu dwar il-prijoritajiet sabiex jużaw ir-riżorsi tagħhom b’mod effettiv imma d-deċiżjoni dwar kif l-aħjar li għandu jsir dan għandha tkun ta’ kull awtorità nazzjonali tas-sikurezza individwali. L-azzjoni għandha tkun iffokata fuq dawk li huma responsabbli għar-riskju u li qegħdin fl-aħjar pożizzjoni sabiex jikkontrollawh.

6.

L-awtoritajiet nazzjonali tas-sikurezza għandhom japplikaw il-prinċipju tat-trasparenza sabiex jgħinu lill-amministraturi tal-infrastruttura jifhmu dak li huwa mistenni minnhom (inkluż dak li għandhom jew m’għandhomx jagħmlu) u dak li għandhom jistennew mingħand l-awtorità nazzjonali tas-sikurezza.

7.

L-awtoritajiet nazzjonali tas-sikurezza għandhom ikunu responsabbli għad-deċiżjonijiet tagħhom skont l-Artikolu 17(3) tad-Direttiva 2004/49/KE. Għalhekk, l-awtoritajiet nazzjonali tas-sikurezza għandu jkollhom politiki u prinċipji li jistgħu jiġu vvalutati fuq il-bażi tagħhom. Barra minn hekk, l-awtoritajiet nazzjonali tas-sikurezza għandu jkollhom mekkaniżmu effettiv u faċilment aċċessibbli sabiex jittrattaw il-kummenti u jieħdu ħsieb l-ilmenti – proċedura tal-ilmenti.

8.

L-awtoritajiet nazzjonali tas-sikurezza għandhom jiżviluppaw arranġamenti ta’ kooperazzjoni bejniethom sabiex jikkondividu l-informazzjoni ma’ xulxin u sabiex jikkoordinaw ir-reazzjoni tagħhom għal ksur ta’ sikurezza. Barra minn hekk, l-awtoritajiet nazzjonali tas-sikurezza għandhom jiżviluppaw arranġamenti ta’ kooperazzjoni ma’ awtoritajiet kompetenti oħrajn sabiex jikkondividu l-informazzjoni u jiżviluppaw approċċi unifikati għal kwistjonijiet li jinfluwenzaw is-sikurezza ferrovjarja.

ANNESS

Prodotti agrikoli maħsuba għall-konsum mill-bniedem elenkati fl-Anness I għat-Trattat:

Klassi 1.2.   Prodotti tal-laħam (imsajjar, immellaħ, affumikat, eċċ.)

L-ITALJA

Pancetta Piacentina (DPO)

ANNESS

Prodotti agrikoli maħsuba għall-konsum mill-bniedem elenkati fl-Anness I għat-Trattat:

Klassifikazzjoni 1.6.   Frott, ħaxix u ċereali, friski jew ipproċessati

SPANJA

Melón de La Mancha (IĠP)

ANNESS

Nru	21/T&Q
Stat Membru	Franza
Stokk	COD/5B6A-C
Speċi	Merluzz (Gadus morhua)
Żona	Iż-żona VIa; u l-ilmijiet tal-UE u dawk internazzjonali taż-żona Vb fil-Lvant ta' 12° 00′ W
Data	18.6.2010

ANNESS

Nru	20/T&Q
Stat Membru	Franza
Stokk	USK/567EI.
Speċi	Tusk (Brosme brosme)
Żona	L-ilmijiet tal-UE u dawk internazzjonali taż-żoni V, VI u VII
Data	18.6.2010

ANNESS

il-valuri fissi tal-importazzjoni għad-determinazzjoni tal-prezz ta' dħul ta' ċertu frott u ħaxix

(EUR/100 kg)
Kodiċi NM	Kodiċi tal-pajjiż terz (1)	Valur fiss tal-importazzjoni
0702 00 00	AL	64,0
	MA	73,3
	TR	100,3
	ZZ	79,2
0707 00 05	EG	150,8
	TR	78,4
	ZZ	114,6
0709 90 70	MA	97,0
	TR	105,1
	ZZ	101,1
0805 10 20	AR	43,0
	BR	50,0
	CL	87,6
	MA	63,6
	PE	58,9
	SZ	46,6
	TR	48,9
	ZA	43,5
	ZW	48,4
	ZZ	54,5
0805 20 10	MA	71,4
	TR	57,6
	ZZ	64,5
0805 20 30 , 0805 20 50 , 0805 20 70 , 0805 20 90	IL	72,6
	TR	70,1
	ZZ	71,4
0805 50 10	TR	54,4
	ZZ	54,4
0808 10 80	AR	74,9
	AU	187,9
	CA	105,7
	CL	84,2
	CN	95,3
	MK	26,7
	NZ	98,3
	US	106,2
	ZA	121,6
	ZZ	100,1
0808 20 50	CN	65,0
	US	112,9
	ZA	141,4
	ZZ	106,4

---

(1)  In-nomenklatura tal-pajjiżi ffissata mir-Regolament tal-Kummissjoni (KE) Nru 1833/2006 (ĠU L 354, 14.12.2006, p. 19). Il-kodiċi “ ZZ ” jirrappreżenta “oriġini oħra”.

ANNESS

Deċiżjonijiet dwar bejgħ

(EUR/tunnellata)
Stat Membru	Il-prezz minimu tal-bejgħ
	Qamħ komuni	Xgħir	Qamħirrun
	Kodiċi tan-NM 1001 90	Kodiċi tan-NM 1003 00	Kodiċi tan-NM 1005 90 00
Il-Belġju	X	X	X
Il-Bulgarija	X	X	X
Ir-Repubblika Ċeka	214	175,01	X
Id-Danimarka	X	191,01	X
Il-Ġermanja	X	185	X
L-Estonja	X	175	X
L-Irlanda	X	X	X
Il-Ġreċja	X	X	X
Spanja	X	X	X
Franza	X	—	X
L-Italja	X	X	X
Ċipru	X	X	X
Il-Latvja	X	X	X
Il-Litwanja	X	176,2	X
Il-Lussemburgu	X	X	X
L-Ungerija	X	174	X
Malta	X	X	X
Il-Pajjiżi l-Baxxi	X	X	X
L-Awstrija	X	184,65	X
Il-Polonja	X	X	X
Il-Portugall	X	X	X
Ir-Rumanija	X	X	X
Is-Slovenja	X	X	X
Is-Slovakkja	X	175,1	X
Il-Finlandja	194,57	174,5	X
L-Isvezja	X	—	X
Ir-Renju Unit	X	199,08	X
(—) L-ebda prezz minimu tal-bejgħ iffissat (l-offerti kollha ġew miċħuda) (°) L-ebda offerta (X) L-ebda ċereali ma huma disponibbli għall-bejgħ (#) Mhux applikabbli

ANNESS

I.A

Numru tal-kwota tariffarja	Koeffiċjent tal-allokazzjoni
09.4590	—
09.4599	—
09.4591	—
09.4592	—
09.4593	—
09.4594	—
09.4595	100  %
09.4596	100  %
“—”: Il-Kummissjoni ma rċeviet l-ebda applikazzjoni għal liċenzja.

I.F

Prodotti li joriġinaw mill-Iżvizzera

Numru tal-kwota tariffarja	Koeffiċjent tal-allokazzjoni
09.4155	50,00  %

I.H

Prodotti li joriġinaw min-Norveġja

Numru tal-kwota tariffarja	Koeffiċjent tal-allokazzjoni
09.4179	100  %

I.I

Prodotti li joriġinaw mill-Iżlanda

Numru tal-kwota tariffarja	Koeffiċjent tal-allokazzjoni
09.4205	100  %
09.4206	100  %

I.J

Prodotti li joriġinaw mir-Repubblika tal-Moldova

Numru tal-kwota tariffarja	Koeffiċjent tal-allokazzjoni
09.4210	—
“—”: Il-Kummissjoni ma rċeviet l-ebda applikazzjoni għal liċenzja.

ANNESS

L-annotazzjoni li ġejja għandha tiżdied fl-aħħar tat-tabella fl-Anness I tad-Direttiva 91/414/KEE:

---

(1)  Aktar dettalji dwar l-identità u l-ispeċifikazzjoni tas-sustanza attiva jinsabu fir-rapport ta' reviżjoni.

ANNESS

1.   Qafas Ġenerali

Din id-Deċiżjoni tibni fuq l-inizjattiva tal-CODUN biex tindirizza t-theddid mit-traffikar tas-SALW u prodotti bażiċi destabbilizzanti oħrajn bl-ajru. Fil-kuntest tal-inizjattiva tal-CODUN, din id-Deċiżjoni ssegwi mill-proġetti mwettqin mis-SitCen, il-Klabb ta’ Budapest u s-SIPRI. Din id-Deċiżjoni tipprovdi għal software, sistemi pilota ta’ implimentazzjoni, programmi ta’ taħriġ u sensibbilizzazzjoni, għal missjonijiet rilevanti tal-immaniġġar ta’ kriżijiet, kif ukoll awtoritajiet internazzjonali u nazzjonali, għal titjib fil-monitoraġġ, l-aġġornament u t-tixrid ta’ informazzjoni dwar atturi ssuspettati tat-trasport bl-ajru li joperaw fl-Afrika u minn reġjuni oħrajn. Fl-implimentazzjoni ta’ din id-Deċiżjoni, għandha tiġi żgurata koordinazzjoni tajba ma’ proġetti rilevanti oħrajn iffinanzjati fil-qafas tal-programmi Komunitarji u Deċiżjonijiet oħrajn tal-Kunsill sabiex jiżdied l-impatt tal-azzjoni tal-Unjoni fil-prevenzjoni tal-kummerċ illeċitu tas-SALW.

2.   Objettivi

Il-proġetti deskritti hawn taħt ser jindirizzaw tliet oqsma identifikati mill-CODUN u partijiet interessati oħrajn involuti fl-inizjattiva tal-UE fil-ġlieda kontra t-traffikar tas-SALW bl-ajru:

(a)	il-ħtieġa li tiġi żviluppata sistema sikura għall-forniment ta’ aġġornamenti dwar kumpanniji u inġenji tal-ajru li regolarment jerġgħu jirreġistraw l-assi u jallokaw in-negozji mill-ġdid fl-isforzi tagħhom biex jevitaw li jinkixfu;

(b)

il-forniment ta’ software u taħriġ dwar il-manniġġar tar-riskji li jippermettu li jkun hemm missjonijiet rilevanti tal-immaniġġar tar-riskji, u awtoritajiet internazzjonali u nazzjonali biex ikun hemm monitoraġġ u eżami aktar effettivi tan-numru dejjem jiżdied ta’ atturi fit-trasport bl-ajru ssuspettati b’involviment fit-traffikar tas-SALW jew fil-moviment ta’ flussi ta’ prodotti bażiċi destabbilizzanti oħrajn bl-ajru;

(c)

il-ħtieġa li jiġu pprovduti taħriġ u appoġġ tekniku sabiex jitqajjem għarfien dwar organizzazzjonijiet multilaterali, missjonijiet, korpi reġjonali u stati fl-Afrika u reġjuni oħrajn sabiex tissaħħaħ il-kapaċità tagħhom li jimmonitorjaw u jikxfu l-atturi involuti fit-traffikar tas-SALW jew fil-moviment ta’ prodotti bażiċi destabbilizzanti oħrajn bl-ajru.

3.   Deskrizzjoni tal-proġett

3.1.   Proġett 1: Il-ħolqien ta’ pakkett ta’ software u l-implimentazzjoni ta’ proġett pilota għall-monitoraġġ, l-aġġornament u t-tixrid ta’ informazzjoni dwar atturi fit-trasport bl-ajru ssuspettati fit-traffikar illeċitu tas-SALW

3.1.1.   Objettiv tal-proġett

Il-proġett għandu l-għan li jtejjeb l-għodod u t-tekniki, fid-disponibbiltà ta’ missjonijiet rilevanti għall-immaniġġar tal-kriżijiet, awtoritajiet internazzjonali u dawk nazzjonali ta’ pajjiżi terzi u Stati Membri, biex jeżaminaw u jimmiraw b’mod effettiv l-inġenji ssuspettati tat-trasport bl-ajru li x’aktarx li huma involuti f’kummerċ illeċitu ta’ SALW bl-ajru minn ġewwa Stati terzi, minnhom jew lejhom;

3.1.2.   Deskrizzjoni tal-proġett

Fil-qafas ta’ dan il-proġett ser jitwettqu l-attivitajiet li ġejjin:

(a)	l-iżvilupp ta’ pakkett ta’ software dwar l-immaniġġar tar-riskji tat-traffikar bl-ajru għal organizzazzjonijiet multilaterali, missjonijiet u pajjiżi terzi magħżulin;

(b)	l-iżvilupp ta’ sistema pilota sikura ta’ pakkett għall-immaniġġar tar-riskji u t-tixrid tal-informazzjoni;

(c)	l-ittestjar fil-post tal-pakkett ta’ software f’konsultazzjoni mar-RGħ u korpi rilevanti tal-Kunsill u l-Istati Membri;

(d)	l-ittestjar fil-post tas-sistema tal-pakkett dwar it-tixrid tal-informazzjoni f’konsultazzjoni mar-RGħ u korpi rilevanti tal-Kunsill;

(e)	l-iżvilupp ta’ manwal u materjal ta’ taħriġ li jakkumpanjah li jiffaċilitaw l-użu u l-adozzjoni tas-sistemi deskritti fil-punti (a) u (b) minn missjonijiet rilevanti tal-immaniġġar ta’ kriżijiet, awtoritajiet internazzjonali u nazzjonali ta’ pajjiżi terzi, u Stati Membri tal-Unjoni;

(f)	il-preżentazzjoni tas-software finali u l-manwal assoċjat u l-materjal ta’ taħriġ f’sezzjoni ta’ ħidma konkludenti fejn il-partijiet interessati rilevanti ser ikunu mistiedna jipparteċipaw (mhux aktar minn 80 persuna).

Il-proġett ser ikun implimentat matul perijodu ta’ żmien adatt li jqis il-ħtieġa ta’ konsultazzjoni u koordinazzjoni mad-diversi partijiet interessati, taħt il-kontroll tar- RGħ. Il-proġett ser jiġi implimentat f’sitt fażijiet.

Fażi Preparatorja

Is-SIPRI, f’konsultazzjoni mal-korpi rilevanti tal-Kunsill u taħt il-kontroll tar-RGħ, ser jiżviluppa pakkett ta’ software, għodod għall-immaniġġar tar-riskji, kif ukoll sistema ta’ informazzjoni u pakkett għat-tixrid ta’ data disaggregata, bl-użu ta’ għażliet rilevanti ta’ teknoloġija tal-informazzjoni (IT).

Fażi ta’ Input ta’ Data

Bl-użu ta’ informazzjoni minn sors miftuħ biss, il-proġett ser jikkontribwixxi data minn sorsi rilevanti biex jinbnew bażijiet ta’ data komprensivi, li huma kapaċi jipprovdu informazzjoni biżżejjed għall-appoġġ ta’ għodod preċiżi għall-kxif u l-profiling fl-immaniġġar tar-riskji.

Fażi ta’ Valutazzjoni

Is-SIPRI, f’konsultazzjoni ma’ korpi rilevanti tal-Kunsill u taħt il-kontroll tar-RGħ, ser iwettaq valutazzjoni ta’ diversi siti, reġjuni, organizzazzjonijiet u missjonijiet fejn il-pakkett pilota li juża data minn sors miftuħ jista’ jiġi ttestjat fil-post fl-aħjar kondizzjonijiet.

Fażi tal-Ittestjar fil-Post

Is-SIPRI, f’konsultazzjoni ma’ korpi rilevanti tal-Kunsill u taħt il-kontroll tar-RGħ, ser iwettaq fażi tal-ittestjar fil-post flimkien mas-sħab identifikati fil-fażi ta’ valutazzjoni.

Fażi ta’ evalwazzjoni u adattament

Wara l-ittestjar fil-post, is-SIPRI ser jevalwa u jadatta s-software biex jieħu kont tal-esperjenza u l-lezzjonijiet meħuda mill-fażi tal-ittestjar fil-post. Dan ser jirriżulta fi prodott finali li għandu jkun disponibbli bil-qbil tad-diversi partijiet interessati.

Fażi ta’ preżentazzjoni

Il-verżjoni finali tas-software u tal-materjal ta’ taħriġ ser tiġi ppreżentata f’avveniment iddedikat għall-partijiet interessati rilevanti (mhux aktar minn 80 persuna) li kienu involuti fl-iżvilupp tagħha u li ġew identifikati bħala utenti finali tas-software.

3.1.3.   Riżultati tal-proġett

Il-proġett ser:

(a)	isaħħaħ il-kapaċità ta’ missjonijiet rilevanti tal-immaniġġar ta’ kriżijiet, awtoritajiet internazzjonali u nazzjonali ta’ pajjiżi terzi, u l-Istati Membri, li jimmonitorjaw l-attivitajiet tal-atturi fit-trasport bl-ajru ssuspettati bi traffikar ta’ SALW bl-ajru;

(b)	jipprovdi l-għodod u s-sistemi pilota meħtieġa biex jiżdied in-numru ta’ interdizzjonijiet ta’ merkanzija fejn hemm suspett ta’ traffikar illeċitu ta’ SALW, traffikati bl-ajru minn organizzazzjonijiet multilaterali, missjonijiet u stati fl-Afrika u reġjuni oħrajn;

(c)	iżid il-kapaċità tal-Istati Membri li jikkondividu b’mod sikur informazzjoni dwar atturi fit-trasport bl-ajru permezz ta’ tekniki ta’ data disaggregata u mekkaniżmi oħrajn ta’ profiling.

3.1.4.   Benefiċjarji tal-proġett

Il-benefiċjarji tal-proġett ser ikunu l-persunal rilevanti minn missjonijiet tal-immaniġġar tal-kriżijiet u awtoritajiet nazzjonali u internazzjonali. L-għażla ta’ benefiċjarji speċifiċi li jittestjaw il-pakkett ta’ software pilota ser tqis varjazzjonijiet bħall-preżenza ta’ missjonijiet Ewropej jew multilaterali tal-immaniġġar ta’ kriżijiet fuq il-post, il-ħtieġa li jsir l-aħjar użu mir-riżorsi, id-disponibbilità ta’ assistenza fil-livell lokali, ir-rieda politika u l-kapaċità tal-awtoritajiet lokali u nazzjonali fil-ġlieda kontra l-kummerċ illeċitu ta’ SALW bl-ajru. Is-SIPRI ser jipproponi lista qasira ta’ benefiċjarji li imbagħad ser tkun approvata mir-RGħ f’konsultazzjoni mal-korpi kompetenti tal-Kunsill.

3.2.   Proġett 2: It-tisħiħ tal-għarfien ta’ prattiki ta’ monitoraġġ, kxif u maniġġar ta’ riskji kontra t-trasportaturi bl-ajru involuti fit-traffikar tas-SALW bl-ajru u flussi ta’ prodotti bażiċi destabbilizzanti oħrajn permezz ta’ pubblikazzjonijiet, taħriġ u sensibbilizzazzjoni.

3.2.1.   Objettiv tal-proġett

Il-proġett għandu l-għan li jżid l-għarfien u l-ħila esperta teknika tal-persunal rilevanti internazzjonali u nazzjonali dwar “prattika tajba” fl-oqsma tal-monitoraġġ, il-kxif u l-analiżi tal-immaniġġar tar-riskji kontra t-trasportaturi bl-ajru ssuspettati bi traffikar ta’ SALW bl-ajru.

3.2.2   Deskrizzjoni tal-proġett

Fil-qafas ta’ dan il-proġett ser jitwettqu l-attivitajiet li ġejjin:

(a)	l-iżvilupp u l-pubblikazzjoni ta’ manwal u materjal ta’ taħriġ li jakkumpanjah biex jitqassmu lil sa 250 individwi li jaħdmu għal organizzazzjonijiet multilaterali, missjonijiet jew stati;

(b)

permezz tal-organizzazzjoni ta’ mhux aktar minn tliet seminars reġjonali, it-taħriġ u s-sensibbilizzazzjoni ta’ bejn 80-100 membru tal-persunal li jaħdem għal dipartiment jew ċelloli speċifiċi fi ħdan missjonijiet tal-immaniġġar ta’ kriżijiet, u awtoritajiet internazzjonali jew nazzjonali ta’ pajjiżi terzi, b’effett multiplikatur previst permezz tal-forniment ta’ materjali “għat-taħriġ ta’ min iħarreġ”;

(c)	l-ipproċessar ta’ riżultati u evalwazzjonijiet mill-attivitajiet ta’ taħriġ u sensibbilizzazzjoni, u l-iżvilupp abbażi ta’ dan ta’ mudell ta’ “prattika tajba” għall-kondiviżjoni ta’ informazzjoni dwar dan is-suġġett fost persunal rilevanti internazzjonali u nazzjonali;

(d)	il-preżentazzjoni tar-riżultati tal-mudell ta’ “prattika tajba” f’sezzjoni ta’ ħidma konkludenti finali fejn il-partijiet interessati rilevanti (sa 80 persuna) ser ikunu mistiedna jipparteċipaw.

3.2.3.   Riżultati tal-proġett

Il-proġett ser:

(a)

iżid l-għarfien min-naħa tal-persunal li jservi f’organizzazzjonijiet multilaterali, missjonijiet u stati ta’ “prattika tajba” fl-oqsma tal-monitoraġġ, il-kxif u l-analiżi tal-immaniġġar tar-riskji kontra atturi fit-trasport bl-ajru ssuspettati bi traffikar ta’ SALW bl-ajru u flussi ta’ prodotti bażiċi destabbilizzanti oħrajn;

(b)	jikkontribwixxi għall-istandardizzazzjoni ta’ “prattika tajba” f’dan il-qasam permezz tal-pubblikazzjoni u t-tixrid ta’ manwal dwar tekniki ta’ monitoraġġ, kxif u analiżi tal-immaniġġar tar-riskji;

(c)	jiggwida l-istabbiliment ta’ “prattika tajba” ta’ koordinazzjoni ta’ informazzjoni permezz ta’ attivitajiet ta’ taħriġ u sensibbilizzazzjoni għal persunal li jaħdem f’dipartimenti jew ċelloli speċifiċi fi ħdan organizzazzjonijiet multilaterali, missjonijiet jew stati.

3.2.4.   Benefiċjarji tal-proġett

Il-benefiċjarji tal-proġett ser ikunu l-persunal rilevanti minn missjonijiet tal-immaniġġar tal-kriżijiet u awtoritajiet nazzjonali u internazzjonali. L-għażla ta’ benefiċjarji speċifiċi li jibbenefikaw mit-taħriġ ser issir abbażi ta’ lista qasira ta’ benefiċjarji proposti mis-SIPRI, li ser tkun approvata mir-RGħ f’konsultazzjoni mal-korpi kompetenti tal-Kunsill.

4.   Postijiet

Il-postijiet għall-proġett 3.1 l-ittestjar fil-post u s-sezzjoni ta’ ħidma konkludenti, kif ukoll l-attivitajiet ta’ taħriġ u sensibbilizzazzjoni u s-sezzjoni ta’ ħidma konkludenti tal-proġett 3.2, ser jiġu determinati bit-teħid f’konsiderazzjoni tax-xewqa li jsir l-aħjar użu mir-riżorsi, it-tnaqqis tal-marka tal-karbonju u l-assistenza disponibbli fil-livell lokali. Is-SIPRI ser jipproponi lista qasira ta’ postijiet rakkomandati li ser tiġi approvata mir-RGħ f’konsultazzjoni mal-korpi kompetenti tal-Kunsill.

5.   Tul ta’ żmien

It-tul ta’ żmien totali tal-proġetti hu stmat li jkun ta’ 24 xahar.

6.   Entità ta’ implementazzjoni

L-implimentazzjoni teknika ta’ din id-Deċiżjoni ser tkun fdata lis-SIPRI. Is-SIPRI ser jiżgura l-viżibbiltà tal-kontribut tal-UE u ser iwettaq il-kompitu tiegħu taħt ir-responsabbiltà tar-RGħ.

7.   Rappurtar

Is-SIPRI ser iħejji rapporti regolari ta’ kull xahrejn u wara li titlesta kull waħda mill-attivitajiet deskritti. Ir-rapporti għandhom ikunu ppreżentati lir-RGħ mhux aktar tard minn sitt ġimgħat wara li jitlestew l-attivitajiet rilevanti.

ANNESS

IL-KUNSILL EWROPEW TAR-RIĊERKA

Regoli għas-sottomissjoni ta’ proposti u għall-proċeduri relatati ta’ evalwazzjoni, selezzjoni u allokazzjoni rilevanti għall-Programm Speċifiku Ideat tas-Seba’ Programm Kwadru (2007-2013)

WERREJ

1.

Preambolu – Definizzjoni tat-termini

53

2.

Introduzzjoni

53

2.1.

Prinċipji

53

2.2.

Is-sottomissjoni tal-proposti

54

2.2.1.

Is-sejħiet għall-proposti

54

2.2.2.

Il-prereġistrazzjoni

54

2.2.3.

Is-sottomissjoni

54

2.2.4.

L-assistenza għas-sottomissjoni

55

2.2.5.

Ir-riċeviment

55

2.2.6.

Il-kontroll tal-eliġibbiltà

55

3.

L-evalwazzjoni tar-reviżjoni minn pari

56

3.1.1.

Ir-rwol tal-esperti indipendenti

56

3.1.2.

Il-ħatra tal-esperti

57

3.1.2.1.

L-esklużjoni tal-esperti indipendenti fuq it-talba ta’ applikant

57

3.1.3.

It-Termini tal-ħatra, il-Kodiċi ta’ kondotta u l-Kunflitt ta’ interess

57

3.1.4.

L-osservaturi indipendenti

58

3.1.5.

Il-kriterji tal-evalwazzjoni tar-reviżjoni minn pari

59

3.1.6.

L-organizzazzjoni tal-evalwazzjoni tar-reviżjoni minn pari

59

3.1.6.1.

L-evalwazzjoni tar-reviżjoni minn pari ta’ proġetti ta’ riċerka fil-fruntieri tal-għarfien

59

3.1.6.2.

Il-proċedura ta’ sottomissjoni f’żewġ stadji għal proġetti ta’ riċerka fil-fruntieri tal-għarfien

60

3.1.6.3.

L-evalwazzjoni tar-reviżjoni minn pari tal-azzjonijiet ta’ koordinazzjoni u ta’ appoġġ

61

3.1.7.

Ir-riżultati tal-evalwazzjoni tar-reviżjoni minn pari, is-selezzjoni u ċ-ċaħda tal-proposti

61

3.1.8.

Ir-reazzjonijiet

62

3.1.9.

Il-proċeduri ta’ assistenza u ta’ rimedju

62

3.1.10.

Ir-rappurtar u l-informazzjoni dwar il-proċess tal-evalwazzjoni tar-reviżjoni minn pari

63

4.

Id-deċiżjoni dwar l-allokazzjoni u l-preparazzjoni tal-ftehimiet ta’ għotja

63

5.

Annessi

64

5.1.

Anness A – Il-Proċeduri għas-Sottomissjoni tal-Proposti fuq il-karta

64

5.2.

Anness B – Il-Proċeduri tal-Analiżi tal-Etika

64

5.3.

Anness C – Ir-regoli għar-rimbors tal-provvediment għall-ivvjaġġar, tal-provvediment ta’ kuljum u tal-provvediment għall-akkomodazzjoni għall-Investigaturi Prinċipali mistiedna għal intervista

67

5.4.

Anness D – Il-Ġestjoni tas-Sigurtà – Azzjonijiet sensittivi tal-KER

69

1.   PREAMBOLU – DEFINIZZJONI TAT-TERMINI

Il-Kunsill Ewropew tar-Riċerka (KER) ġie stabbilit mill-Kummissjoni Ewropea (1) skont id-dispożizzjonijiet tal-Programm Speċifiku “Ideat” tas-Seba’ Programm Kwadru għall-attivitajiet ta’ riċerka, l-iżvilupp teknoloġiku u dimostrazzjoni (“Programm Speċifiku Ideat”) (2), bħala l-mezz għall-implimentazzjoni ta’ dak il-Programm Speċifiku.

Il-KER tikkonsisti f’Kunsill Xjentifiku, f’Segretarju Ġenerali u fi struttura ta’ implimentazzjoni apposta stabbilita mill-Kummissjoni Ewropea bħala l-Aġenzija Eżekuttiva tal-Kunsill Ewropew għar-Riċerka (3); huwa għandu jagħti rendikont ta’ għemilu lill-Kummissjoni u jopera f’kundizzjonijiet ta’ awtonomija u ta’ integrità, iggarantiti mill-Kummissjoni.

Għal finijiet ta’ ċarezza, għal dan id-dokument għandhom japplikaw id-definizzjoniijiet tat-termini li ġejjin:

It-terminu “ERCEA” għandu jirreferi għall-Aġenzija Eżekuttiva tal-Kunsill Ewropew għar-Riċerka.

It-terminu “FP7” għandu jirreferi għas-“Seba’ Programm Kwadru tal-Komunità Ewropea għar-riċerka, l-żvilupp teknoloġiku u l-attivitajiet ta’ dimostrazzjoni (2007-2013)”  (4).

It-terminu “Regoli għall-Parteċipazzjoni” għandu jirreferi għar-“regoli għall-parteċipazzjoni ta’ impriżi, ċentri tar-riċerka u universitajiet f’azzjonijiet taħt is-Seba’ Programm Kwadru u għad-disseminazzjoni tar-riżultati tar-riċerka (2007-2013)”  (5).

It-terminu “Regolament Finanzjarju” għandu jirreferi għar-Regolament tal-Kunsill (KE, Euratom) Nru 1605/2002 tal-25 ta’ Ġunju 2002 rigward ir-Regolament Finanzjarju applikabbli għall-baġit ġenerali tal-Komunitajiet Ewropej (6).

2.   INTRODUZZJONI

Il-fini ta’ dan id-dokument huwa li jistabbilixxi r-regoli li japplikaw għas-sottomissjoni, għall-evalwazzjoni tar-reviżjoni minn pari tal-proposti, u għall-allokazzjoni tal-għotjiet lill-proposti li jiksbu suċċess. Ir-regoli jiffissaw parametri fundamentali li huma mfassla sabiex jiżguraw li l-proċeduri li jwasslu għall-allokazzjoni tal-għotjiet ikunu rigorużi, ġusti, effettivi u xierqa. Dawn ġew iddefiniti f’assoċjazzjoni mal-Kunsill Xjentfiku tal-KER, b’dan tal-aħħar ikun responsabbli, fost l-oħrajn, biex ikunu stabbiliti l-programm ta’ ħidma Ideat, il-metodi u l-proċeduri tal-evalwazzjoni tar-reviżjoni minn pari li japplikaw għall-evalwazzjoni tar-reviżjoni minn pari tal-proposti taħt il-Programm Speċifiku Ideat u biex ikunu identifikati l-esperti indipendenti li jassistu f’evalwazzjoni tar-reviżjoni minn pari ta’ din ix-xorta. Huma jiġu adottati mill-Kummissjoni skont ir-Regoli għall-Parteċipazzjoni.

It-Taqsima 1 tiddeskrivi l-prinċipji ewlenin li japplikaw għall-proċess mis-sottomissjoni sal-allokazzjoni: eċċellenza, trasparenza, ġustizzja u imparzjalità, effiċjenza u veloċità, flimkien mal-kunsiderazzjonijiet etiċi.

It-Taqsima 2 tiddeskrivi l-proċeduri għas-sottomissjoni tal-proposti u l-mod li bih jiġu ġestiti sussegwentement, inkluża l-valutazzjoni tal-eliġibbiltà.

It-Taqsima 3 tiddeskrivi l-evalwazzjoni tar-reviżjoni minn pari, inkluż il-mod li bih l-esperti indipendenti jiġu selezzjonati u maħtura, it-trattament tal-kunflitti ta’ interess potenzjali u effettivi, u l-organizzazzjoni tal-evalwazzjoni tar-reviżjoni minn pari. Hija tiddeskrivi wkoll il-mod li bih għandhom jiġu ġestiti l-appelli u l-ilmenti kif ukoll ir-rappurtar tal-evalwazzjoni tar-reviżjoni minn pari u l-allokazzjoni tal-għotjiet.

It-Taqsima 4 tiddeskrivi l-preparazzjoni u l-allokazzjoni tal-għotjiet.

2.1.   Prinċipji

Il-proċess mis-sottomissjoni tal-proposti sal-allokazzjoni tal-għotjiet għandu jkun ibbażat fuq prinċipji stabbiliti sew:

—	Eċċellenza. Il-proġetti selezzjonati għall-finanzjament iridu juru livell għoli ta’ kwalità xjentifika u/jew teknika.

—

Trasparenza.Id-deċiżjonijiet dwar il-finanzjament u dwar l-allokazzjoni jridu jkunu bbażati fuq regoli u proċeduri li ġew deskritti b’mod ċar, u l-entitajiet legali applikanti kif ukoll l-investigaturi prinċipali għandhom jirċievu reazzjonijiet adegwati dwar l-eżitu tal-evalwazzjoni tar-reviżjoni minn pari tal-proposti tagħhom.

—

Ġustizzja u imparzjalità.Il-proposti kollha għandhom jiġu ttrattati b’mod konsistenti u bl-istess mod. Huma jridu jiġu evalwati b’mod imparzjali fuq il-merti tagħhom, irrispettivament mill-oriġini tagħhom jew mill-identità tal-entità tas-sottomissjoni, tal-investigatur prinċipali u jew ta’ kwalunkwe membru tat-tim.

—	Kunfidenzjalità. Il-proposti kollha u d-dejta, l-għarfien u d-dokumenti relatati kkomunikati lill-ERCEA jridu jiġu ttrattati b’mod kunfidenzjali.

—	Effiċjenza u veloċità. Il-preparazzjoni tal-evalwazzjoni tar-reviżjoni minn pari, għall-allokazzjoni u għall-għotjiet għandha tkun veloċi kemm jista’ jkun, għandha tkun proporzjonata għaż-żamma tal-kwalità tal-evalwazzjoni tar-reviżjoni minn pari, u għandha tirrispetta l-qafas legali.

—	Kunsiderazzjonijiet etiċi u ta’ sigurtà. Kwalunkwe proposta li tikser prinċipji etiċi fundamentali, jew li ma tkunx konformi mal-proċeduri rilevanti tas-sigurtà tista’ tiġi eskluża mill-proċess tal-evalwazzjoni tar-reviżjoni minn pari, tas-selezzjoni u tal-allokazzjoni fi kwalunkwe ħin.

2.2.   Is-sottomissjoni tal-proposti

2.2.1.   Is-sejħiet għall-proposti

Il-proposti għandhom jiġu sottomessi b’risposta għas-sejħiet għal proposti (“sejħiet”) (7). Il-kontenut u l-għażla taż-żmien meta jsiru s-sejħiet huma stabbiliti fil-programm ta’ ħidma Ideat u huma ppubblikati f’Il-Ġurnal Uffiċjali tal-Unjoni Ewropea (“test tas-sejħa”) fuq il-websajt(s) tal-Kummissjoni (8), kif ukoll fuq il-websajt tal-KER li għandu jipprovdi hyperlinks għall-websajt(s) tal-Kummissjoni.

Is-sejħiet għal proġetti ta’ riċerka fil-fruntieri tal-għarfien jistgħu jispeċifikaw baġit indikattiv għas-sejħa kollha jew jagħtu baġits indikattivi għal oqsma speċifiċi ta’ riċerka fil-qafas tas-sejħa li għandhom jiġu evalwati minn Bordijiet separati ta’ esperti indipendenti.

Sejħa għandha tispeċifika wkoll jekk għandhiex tiġi segwita sottomissjoni fi stadju wieħed jew fi tnejn u/jew proċedura ta’ evalwazzjoni tar-reviżjoni minn pari fi stadju wieħed jew fi tnejn. Fil-każ ta’ sottomissjoni f’żewġ stadji, dawk li l-proposti tagħhom kienu evalwati b’mod pożittiv fl-ewwel stadju biss għandhom jiġu mistiedna jissottomettu proposti kompluti fit-tieni stadju.

2.2.2.   Il-prereġistrazzjoni

Minħabba l-approċċ minn isfel għal fuq tal-Programm Speċifiku Ideat, il-KER jistenna għadd kbir ta’ proposti fl-oqsma kollha tar-riċerka. Sabiex il-KER ikun jista’ jipprovdi r-riżorsi u l-kompetenza mitluba għall-proċess tal-evalwazzjoni tar-reviżjoni minn pari tal-KER, sejħa tista’ tipprevedi prereġistrazzjoni.

Il-prereġistrazzjoni tista’ tinvolvi dikjarazzjoni tas-suġġett maħsub u l-għanijiet tar-riċerka previsti tal-proposta.

Fejn is-sejħiet jipprevedu prereġistrazzjoni, qabel l-iskadenza tal-prereġistrazzjoni, l-applikant potenzjali għandu jitlob il-login u l-password għas-sistema tal-IT tas-Servizz Elettroniku għas-Sottomissjoni tal-Proposti (bħalissal-EPSS, imsejħa s-“sistema ta’ sottomissjoni elettronika” fit-test), meħtieġa għas-sottomissjoni ta’ proposta. L-iskadenza/i għall-prereġistrazzjoni tista’/jistgħu tiġi/jiġu ffissata/i ftit ġimgħat qabel l-iskadenza/i tas-sejħiet għas-sottomissjoni tal-proposti. Il-prereġistrazzjoni u s-sottomissjoni huma żewġ fażijiet differenti. Jekk is-sejħa tipprevedi prereġistrazzjoni imma l-applikant ma jagħmilx prereġistrazzjoni, is-sottomissjoni ta’ proposta minn dak l-applikant ma għandhiex tiġi aċċettata mis-sistema ta’ sottomissjoni elettronika.

Fejn is-sejħiet ma jipprevedux prereġistrazzjoni, l-applikant potenzjali xorta għandu jirreġistra u jitlob password għall-EPSS sabiex ikun jista’ jissottometti l-proposta, qabel l-iskadenza tas-sejħa.

F’każijiet eċċezzjonali, l-applikant potenzjali jista’ jitlob permess mingħand l-ERCEA sabiex jagħmel sottomissjoni fuq il-karta kif inhu pprovdut mill-Anness A għal din id-Deċiżjoni.

2.2.3.   Is-sottomissjoni

Il-proposti, u fejn ikun xieraq il-prereġistrazzjonijiet, għandhom jiġu sottomessi elettronikament permezz tas-sistema ta’ sottomissjoni elettronika bbażata fuq l-Internet operata mill-Kummissjoni (bħalissal-EPSS).

Il-proposti għal azzjonijiet ta’ riċerka “innovattiva” – skont id-dispożizzjonijiet tal-programm ta’ ħidma Ideat – għandhom jinvolvu Investigatur Prinċipali (PI) – individwu speċifikat bir-responsabbiltà xjentifika għall-proġett. Il-proposti għandhom jiġu sottomessi mill-PI li jingħata s-setgħa mill-istituzzjoni ospitanti tal-proposta, li hija formalment l-entità legali applikanta u li lilha għandha tiġi allokata l-għotja (9). Matul il-proċess kollu tas-sottomissjoni u tal-evalwazzjoni tar-reviżjoni minn pari, il-PI għandu jkun il-mezz prinċipali għall-komunikazzjoni bejn l-ERCEA u l-entità legali applikanta.

Il-preparazzjoni u t-tlugħ tad-dejta kollha tal-proposta u l-qbil mal-kundizzjonijiet tal-użu tas-sistema ta’ sottomissjoni elettronika kif ukoll mat-termini tal-evalwazzjoni tar-reviżjoni minn pari jridu jsiru qabel it-tentattiv sabiex tiġi sottomessa proposta.

Is-sistema ta’ sottomissjoni elettronika għandha twettaq għadd ta’ kontrolli ta’ verifika bażiċi. Huwa biss wara li jitlestew dawn il-kontrolli li s-sistema ta’ sottomissjoni elettronika għandha tħalli lill-applikant jagħmel is-sottomissjoni tiegħu. Dawn il-kontrolli ma għandhomx jissostitwixxu l-kontrolli formali tal-eliġibbiltà deskritti fit-Taqsima 2.2.6 u ma jistgħux jiżguraw li l-kontenut ta’ dawn il-fajls jissodisfa r-rekwiżiti tas-sejħa. Jiġi kkunsidrat li s-sottomissjoni qed issir fil-mument li l-PI jagħti bidu għall-proċess finali tas-sottomissjoni, kif ġie indikat mis-sistema ta’ sottomissjoni elettronika, u mhux fi kwalunkwe punt qabel dan.

Il-proposti mibgħuta fuq mezz ta’ ħżin elettroniku li jista’ jitneħħa (eż. CD-ROM jew kwalunke apparat elettroniku simili), bl-e-Mail jew bil-faks ma għandhomx jiġu kkunsidrati bħala li ġew sottomessi, u ma għandhomx jiġu evalwati. F’każijiet eċċezzjonali, jekk PI ma jkollu l-ebda mod kif jikseb aċċess għas-sistema ta’ sottomissjoni elettronika, dan l-investigatur prinċipali jista’ jitlob permess mingħand l-ERCEA sabiex jagħmel sottomissjoni fuq il-karta. Il-proċeduri relatati ma’ talba ta’ din ix-xorta u mal-formalitajiet dwar sottomissjoni fuq il-karta huma stabbiliti fl-Anness A għal dawn ir-Regoli.

Proċedura għall-irtirar ta’ proposta hija inkluża fil-Gwida għall-Applikanti rilevanti. Proposta rtirata ma għandhiex tiġi sussegwentement ikkunsidrata għal evalwazzjoni tar-reviżjoni minn pari jew għal selezzjoni.

Jekk tiġi riċevuta iktar minn sottomissjoni waħda tal-istess proposta, għandha tiġi evalwata biss l-iktar verżjoni reċenti eliġibbli.

Il-proposti għandhom jinżammu f’kundizzjonijiet ta’ sigurtà f’kull ħin. Meta ma jkunux meħtieġa iktar, il-kopji kollha għajr dawk meħtieġa għal finijiet ta’ arkivjazzjoni u/jew ta’ verifika għandhom jinqerdu.

2.2.4.   L-assistenza għas-sottomissjoni

Il-Gwida għall-Applikanti tispjega fid-dettall kif il-PI, il-membri tat-tim jew l-entitajiet legali applikanti jistgħu jitolbu assistenza jew informazzjoni dwar kwalunkwe kwistjoni relatata ma’ sejħa. Għandhom jiġu pprovduti d-dettalji ta’ kuntatt għall-Punti ta’ Kuntatt Nazzjonali, kif ukoll tal-help desks tal-ERCEA u tal-KER. Għandu jiġi pprovdut help desk apposta għal kwistjonijiet relatati mas-sistema ta’ sottomissjoni elettronika.

2.2.5.   Ir-riċeviment

Id-data u l-ħin tar-riċeviment tal-aħħar verżjoni tal-proposti sottomessi għandhom jiġu rreġistrati. Wara l-iskadenza tas-sejħa, għandha tintbagħat irċevuta ta’ rikonoxximent għar-riċeviment b’email li jinkludi:

—	It-titolu tal-proposta u l-identifikatur uniku tal-proposta (in-numru tal-proposta);

—	L-identifikatur tas-sejħa li l-proposta kienet indirizzata lilha;

—	Id-data u l-ħin tar-riċeviment (li huwa ffissat skont il-ħin tal-iskadenza tas-sejħa, għal proposti sottomessi elettronikament).

Wara s-sottomissjoni, l-ERCEA għandha tagħmel kuntatt mal-PI u/jew mal-entità legali applikanta biss jekk dan ikun meħtieġ sabiex ikunu ċċarati kwistjonijiet bħall-eliġibbiltà jew sabiex tkun ivverifikata dejta amministrattiva jew legali inkluża fil-proposta (10). Madankollu fi proċedura f’żewġ stadji u għall-applikazzjonijiet miżmuma biss, il-PI li jingħata s-setgħa mill-entità legali applikanti jista’, f’kundizzjonijiet speċifikati fis-sejħa, jiġi mistieden jissottometti proposta oħra jew iktar informazzjoni dwar il-proposta oriġinali, u/jew li jattendi għal intervista.

2.2.6.   Il-kontroll tal-eliġibbiltà

Il-proposti jridu jissodisfaw il-kriterji kollha ta’ eliġibbiltà jekk se jinżammu għal evalwazzjoni tar-reviżjoni minn pari. Dawn il-kriterji għandhom jiġu applikati b’mod rigoruż. Fil-każ ta’ sottomissjoni ta’ proposta f’żewġ stadji, kull stadju għandu jkun suġġett għal kontroll tal-eliġibbiltà. Il-proposti kollha sottomessi taħt sejħa għandhom ikunu suġġetti għal kontroll skont il-kriterji tal-eliġibbiltà li ġejjin:

—	Ir-riċeviment tal-proposta qabel l-iskadenza (id-data u l-ħin stabbiliti fis-sejħa);

—	Il-kompletezza tal-proposta, jiġifieri l-preżenza tal-partijiet u tal-formoli kollha mitluba (11);

—	L-ambitu tas-sejħa: il-kontenut tal-proposta jrid ikun relatat mal-għanijiet, mas-suġġetti u mal-iskema ta’ finanzjament stabbiliti fis-sejħa, kif ġew iddefiniti fil-programm ta’ ħidma Ideat. Proposta għandha tiġi kkunsidrata ineliġibbli għal raġunijiet ta’ “ambitu” biss f’każijiet ċari (12);

—	Il-kriterji addizzjonali kollha tal-eliġibbiltà li japplikaw għas-sejħa li huma speċifikat fil-programm ta’ ħidma Ideat u fil-fiche tas-sejħa.

Jekk jibda jidher ċar qabel, matul jew wara l-fażi tal-evalwazzjoni tar-reviżjoni minn pari, li kriterju tal-eliġibbiltà wieħed jew iktar ma ġiex sodisfatt, il-proposta għandha tiġi ddikjarata ineliġibbli u għandha tiġi rtirata minn kwalunkwe eżami ulterjuri. Fejn ikun hemm dubju dwar l-eliġibbiltà ta’ proposta, l-evalwazzjoni tar-reviżjoni minn pari tista’ tipproċedi sakemm tittieħed deċiżjoni finali dwar l-eliġibbiltà. Il-fatt li proposta tiġi evalwata f’ċirkustanzi ta’ din ix-xorta ma għandux jikkostitwixxi prova tal-eliġibbiltà tagħha.

Jekk il-kwistjoni tal-eliġibbiltà ma tkunx ċara u jiġi kkunsidrat li jeħtieġ li ssir analiżi iktar komprensiva tal-każ, jista’ jitlaqqa’ kumitat ta’ analiżi tal-eliġibbiltà. Ir-rwol tal-kumitat huwa li jiżgura intepretazzjoni legali koerenti ta’ każijiet ta’ din ix-xorta u trattament ugwali tal-entitajiet legali applikanti u tal-PI involuti fil-proposta (13).

Dawk il-PI li jinsab li l-proposti tagħhom huma ineliġibbli għandhom jiġu informati bir-raġunijiet għal deċiżjoni ta’ din ix-xorta.

3.   L-EVALWAZZJONI TAR-REVIŻJONI MINN PARI

3.1.1.   Ir-rwol tal-esperti indipendenti

Il-proposti għandhom jiġu suġġetti għal analiżi minn esperti indipendenti (analizzaturi pari) sabiex ikun żgurat li dawk li jilħqu l-ogħla kwalità biss jiġu selezzjonati għal finanzjament. Espert indipendenti għandu jkun espert li j/tkun estern/a għall-KER u għall-Kummissjoni (14), qed j/taħdem f’kapaċità personali u, fit-twettiq ta’ ħidmietu/ha ma j/tirrappreżenta lill-ebda organizzazzjoni jew komunità xjentifika.

Għall-finijiet tal-evalwazzjoni tar-reviżjoni minn pari, għandha ssir distinzjoni bejn ħames tipi ta’ esperti indipendenti:

1.   Presidenti tal-Bordijiet tal-evalwazzjoni tar-reviżjoni minn pari tal-KER: jorganizzaw il-ħidma fil-Bord tagħhom, jippresjedu l-laqgħat tal-Bord u jattendu għal-laqgħa finali ta’ konsolidament. Huma jistgħu jwettqu wkoll evalwazzjoni individwali tal-proposti, ġeneralment mill-bogħod, bi preparazzjoni għal-laqgħat tal-bord.

2.   Membri tal-Bordijiet tal-evalwazzjoni tar-reviżjoni minn pari tal-KER: jassistu fil-preparazzjoni tal-laqgħat tal-Bord, jattendu għal dawk il-laqgħat u jistgħu anki jagħtu kontribut fl-evalwazzjoni individwali tal-proposti, ġeneralment mill-bogħod.

3.   Evalwaturi tal-Bord: esperti indipendenti li jintalbu jassistu fl-evalwazzjoni indipendenti tal-proposti. Ġeneralment, ma jipparteċipawx fil-laqgħat tal-Bord.

4.   Arbitri: esperti indipendenti li jwettqu valutazzjonijiet individwali tal-proposti, mill-bogħod biss, u ma jingħatawx kumpens għall-kompiti li jwettqu.

5.   Osservaturi indipendenti: esperti indipendenti li jintalbu jeżaminaw il-proċess tal-evalwazzjoni tar-reviżjoni minn pari mill-perspettiva ta’ kif jaħdem u jiġi eżegwit. Huma ma jwettqux valutazzjonijiet tal-proposti li qed jiġu evalwati u jistgħu jattendu għal kwalunkwe laqgħa fil-proċess tal-evalwazzjoni tar-reviżjoni minn pari.

3.1.2.   Il-ħatra tal-esperti (15)

Il-Kunsill Xjentifiku tal-KER għandu r-responsabbiltà li jipproponi l-esperti indipendenti għall-evalwazzjoni tar-reviżjoni minn pari tal-proġetti ta’ riċerka fil-fruntieri tal-għarfien (16) skont l-Artikolu 17(2) tar-Regoli għall-Parteċipazzjoni, u biex jimmonitorja l-implimentazzjoni tal-azzjonijiet indiretti fit-tifsira tal-Artikolu 27(1) tar-Regoli għall-Parteċipazzjoni. Il-Kunsill Xjentifiku tal-KER jista’ jistrieħ fuq il-membri tiegħu u fuq l-informazzjoni pprovduta mill-membri tal-Bord jew mill-ERCEA sabiex jidentifika lill-esperti indipendenti. L-ERCEA għandha taħtarhom formalment fuq il-bażi ta’ din il-proposta (17).

L-esperti indipendenti għandu jkollhom il-ħiliet u l-għarfien xierqa għall-oqsma ta’ attività fejn jintalbu jassistu. Huma jrid ikollhom livell għoli ta’ esperjenza professjonali fis-settur pubbliku jew privat fir-riċerka xjentifika, fl-istudju tax-xjenza jew fil-ġestjoni xjentifika. Jistgħu jkunu rikjesti wkoll ħiliet oħrajn (eż. konsulenza esperta u edukazzjoni tax-xjenzati żgħażagħ; ġestjoni jew evalwazzjoni ta’ proġetti; trasferiment u innovazzjoni tat-teknoloġija; kooperazzjoni internazzjonali fix-xjenza u fit-teknoloġija). Għall-ħatra tal-esperti indipendenti li jittrattaw informazzjoni kklassifikata, għandha tintalab l-awtorizzazzjoni tas-sigurtà xierqa.

L-ERCEA għandha tagħmel ukoll użu mil-lista ta’ esperti li tirriżulta minn sejħiet għal applikazzjonijiet ippubblikati f’Il-Ġurnal Uffiċjali tal-Unjoni Ewropea, kif ukoll minn esperti oħrajn bil-kwalifiki meħtieġa, li jiġu identifikati, pereżempju, permezz ta’ konsultazzjoni mal-aġenziji nazzjonali ta’ finanzjament għar-riċerka u organizzazzjonijiet simili. L-esperti jistgħu jiġu minn pajjiżi oħrajn għajr l-Istati Membri jew il-pajjiżi assoċjati mal-FP7.

Meta jiġu assemblati l-gruppi ta’ esperti, l-ERCEA għandha tipprova tiżgura l-ogħla livell ta’ kompetenza xjentifika u teknika, fl-oqsma adattati għas-sejħa, filwaqt li tqis ukoll kriterji oħrajn, bħal:

—	Inklużjoni raġonevoli ta’ nisa u ta’ rġiel mill-UE kollha u mill-pajjiżi assoċjati kif ukoll minn pajjiżi terzi (18)

—	Rotazzjoni regolari ta’ esperti, konsistenti mal-ħtieġa għal kontinwità. Bħala medja, huwa mistenni li jinbidlu mill-inqas kwart tal-esperti li jintużaw f’kull qasam ta’ riċerka f’kull sena kalendarja.

L-esperti jrid ikollhom ukoll il-ħiliet lingwistiċi xierqa meħtieġa biex jiġu evalwati l-proposti.

L-ismijiet tal-esperti indipendenti assenjati lill-proposti individwali ma għandhomx isiru pubbliċi. Madankollu, il-lista tal-esperti indipendenti li jkunu assistew fl-evalwazzjoni tal-proposti riċevuti taħt sejħa relatata mal-Programm Speċifiku Ideat għandha tiġi ppubblikata kull sena fil-websajt(s) tal-Kummissjoni. Barra minn hekk, il-lista ta’ membri tal-Bord għandha tiġi ppubblikata fuq il-websajt tal-KER.

Kwalunkwe kuntatt dirett jew indirett dwar l-evalwazzjoni tar-reviżjoni minn pari ta’ sejħa bejn il-PI u/jew l-entità legali applikanti li jissottomettu proposta taħt l-istess sejħa u kwalunkwe espert indipendenti involut f’dik l-evalwazzjoni tar-reviżjoni minn pari għandu jkun strettament ipprojbit. Kwalunkwe kuntatt ta’ din ix-xorta jista’ jirriżulta fid-deċiżjoni tal-ERCEA li teskludi l-proposta kkonċernata mis-sejħa inkwistjoni.

3.1.2.1.   L-esklużjoni tal-esperti indipendenti fuq it-talba ta’ applikant

Il-Gwida għall-Applikanti rilevanti tista’ tippermetti li l-applikanti jagħmlu talba li persuna speċifika (19) ma tagħmilhiex ta’ reviżur pari fl-evalwazzjoni tal-proposta tagħhom. F’każijiet ta’ din ix-xorta, l-applikanti għandhom jintalbu jispeċifikaw ir-raġunijiet għat-talba tagħhom (20). F’ċirkustanzi ta’ din ix-xorta, jekk il-persuna identifikata tkun esperta indipendenti li qed tipparteċipa fl-evalwazzjoni tal-proposti għas-sejħa inkwistjoni, hija tista’ tiġi eskluża mill-evalwazzjoni tal-proposta kkonċernata, sakemm l-ERCEA tibqa’ fil-pożizzjoni li l-proposta tiġi evalwata.

3.1.3.   It-Termini tal-ħatra, il-Kodiċi ta’ kondotta u l-Kunflitt ta’ interess

Din it-taqsima tindirizza l-mod li bih l-esperti indipendenti għandhom jinħatru mill-ERCEA sabiex jassistu fl-evalwazzjoni tar-reviżjoni minn pari tal-proposti sottomessi skont il-Programm Speċifiku Ideat. L-istess proċedura tista’ tiġi applikata mutatis mutandis mill-ERCEA għall-ħatra tal-esperti għall-kompiti fit-tifsira tal-Artikolu 27(1) tar-Regoli għall-Parteċipazzjoni.

L-ERCEA għandha toħroġ ittra ta’ ħatra, li għandha tiġi ffirmata mill-espert indipendenti, ibbażata fuq il-mudelli approvati mill-Kummissjoni. L-ittra ta’ ħatra tistabbilixxi l-qafas tar-relazzjoni bejn espert indipendenti u l-ERCEA li fi ħdanu l-espert jista’ jintalab jipprovdi kompetenza sabiex jassisti lill-KER.

Din l-ittra ta’ ħatra għandha tippreżenta l-Kundizzjonijiet Ġenerali li japplikaw fir-rigward tal-esperti indipendenti, b’mod partikolari, għandha tistabbilixxi Kodiċi ta’ kondotta għall-esperti indipendenti fl-evalwazzjonijiet tal-analiżijiet minn pari, annessi mal-ittra ta’ ħatra, id-dispożizzjonijiet essenzjali dwar il-kunfidenzjalità u l-kunflitt ta’ interess, u għandha tispeċifika t-trattament tad-dejta personali.

Il-ħatra għandha tkun effettiva malli l-espert indipendenti u l-ERCEA jiffirmaw l-ittra ta’ ħatra.

Il-Presidenti tal-Bordijiet, il-Membri tal-Bordijiet, l-Evalwaturi tal-Bordijiet u l-Osservaturi Indipendenti li jiġu assenjati l-kompiti għandhom id-dritt għal kumpens finanzjarju. F’dak il-każ, l-ittra ta’ ħatra għandha tipprovdi l-kundizzjonijiet ġenerali għall-kumpens.

L-arbitri li jiġu assenjati l-kompiti ma għandhomx ikunu eliġibbli għal kumpens finanzjarju.

Fil-kuntest ta’ kull assenjazzjoni ta’ kompiti, l-esperti indipendenti kollha għandhom jintalbu jikkonfermaw li ma għandhom l-ebda kunflitt ta’ interess (li jiskwalifika jew potenzjali) għal kull proposta li jeżaminaw. Jekk espert indipendenti jidentifika kunflitt ta’ interess relatat ma’ proposta, il-kors ta’ azzjoni għandu jiddependi minn jekk ikunx kunflitt ta’ interess li jiskwalifika jew potenzjali.

Iċ-ċirkustanzi fejn jistgħu jeżistu kunflitti ta’ interess “li jiskwalifikaw” u “potenzjali” għandhom jiġu deskritti fil-Kodiċi ta’ Kondotta.

L-esperti indipendenti ma jistgħux jipparteċipaw fl-evalwazzjoni ta’ proposti għal sejħa fejn huma stess ikunu ssottomettew proposta.

Meta jeżisti kunflitt ta’ interess li jiskwalifika, espert indipendenti ma jridx jinfluwenza l-evalwazzjoni tar-reviżjoni minn pari tal-proposta kkonċernata. B’mod partikolari espert indipendenti allura la għandu jassisti fil-valutazzjoni individwali (ġeneralment mill-bogħod), la għandu jitkellem u lanqas għandu jivvota fi kwalunkwe diskussjoni tal-Bord relatata ma’ din il-proposta. F’każ ta’ din ix-xorta, l-espert indipendenti għandu jħalli l-kamra (jew il-forum elettroniku) meta l-Bord jiddiskuti l-każ individwali tal-proposta fejn jeżisti kunflitt ta’ din ix-xorta.

Meta jeżisti kunflitt ta’ interess potenzjali, l-ERCEA għandha tikkunsidra ċ-ċirkustanzi tal-każ u għandha tieħu deċiżjoni. Jista’ jiġi deċiż jekk l-espert indipendenti għandux jitħalla jieħu sehem fl-evalwazzjoni tar-reviżjoni minn pari tal-proposta kkonċernata (l-espert allura jrid jiffirma dikjarazzjoni li tgħid dan) jew li jiġi eskluż bl-istess mod kif sar għall-kunflitt li jiskwalifika.

Espert irid jiddikjara kwalunkwe kunflitt ta’ interess mhux magħruf qabel sessjoni ta’ evalwazzjoni tar-reviżjoni minn pari.

Jekk kunflitt li sa dak iż-żmien ma kienx issuspettat isir apparenti matul l-evalwazzjoni tar-reviżjoni minn pari, l-espert indipendenti jrid iħabbar dan il-fatt immedjatament lil uffiċjal responsabbli. Jekk finalment jinstab li l-kunflitt huwa wieħed li jiskwalifika, l-espert indipendenti jrid jastjeni minn evalwazzjoni tar-reviżjoni minn pari ulterjuri li tinvolvi l-proposta kkonċernata. Kwalunkwe kumment u punteġġ li saru qabel minn dak l-espert indipendenti għandhom jiġu injorati. Jekk ikun meħtieġ, l-espert indipendenti għandu jiġi sostitwit.

Jekk espert indipendenti xjentement jaħbi kunflitt ta’ interess li jiskwalifika jew potenzjali u dan jiġi skopert waqt sessjoni ta’ evalwazzjoni tar-reviżjoni minn pari, l-espert indipendenti għandu jkun eskluż immedjatament, u għandhom japplikaw is-sanzjonijiet previsti fl-ittra ta’ ħatra. Kwalunkwe riżultat tas-sessjonijiet ta’ evalwazzjoni tar-reviżjoni minn pari fejn ikun ipparteċipa dan l-espert indipendenti għandu jkun iddikjarat null, u l-proposta/i ikkonċernata/i għandha/hom tiġi/jiġu evalwata/i mill-ġdid.

B’analoġija mal-Artikolu 265a(3) tar-Regoli ta’ Implimentazzjoni għar-Regolament Finanzjarju (21), ksur tal-Kodiċi ta’ Kondotta jew kondotta ħażina serja oħra mill-espert indipendenti tista’ tiġi kkwalifikata bħala kondotta professjonali ħażina gravi u tista’ twassal għall-esklużjoni ta’ dan l-espert indipendenti mil-lista tal-esperti indipendenti li għandhom jinħatru mill-ERCEA. Wara esklużjoni ta’ din ix-xorta, l-espert indipendenti għandu jitneħħa mill-bażi tad-dejta u għandu jiġi pprojbit milli jirreġistra mill-ġdid sakemm iddum l-esklużjoni.

3.1.4.   L-osservaturi indipendenti

L-esperti indipendenti jistgħu jinħatru bħala osservaturi sabiex jeżaminaw il-proċess tal-evalwazzjoni tar-reviżjoni minn pari mill-perspettiva ta’ kif jaħdem u jiġi eżegwit. Il-kompetenza tal-osservaturi għandha tkopri s-sessjoni kollha tal-evalwazzjoni tar-reviżjoni minn pari, inkluża kwalunkwe valutazzjoni mill-bogħod. Fil-każ ta’ valutazzjoni mill-bogħod, l-osservaturi għandu jkollhom aċċess għall-komunikazzjonijiet kollha bejn l-ERCEA u l-analizzaturi pari u jistgħu jagħmlu kuntatt ma’ wħud mill-analizzaturi pari jew magħhom ilkoll sabiex jistħarrġu l-opinjonijiet tagħhom dwar kif tmexxiet l-evalwazzjoni tar-reviżjoni minn pari. L-osservaturi għandu jkollhom aċċess għal kwalunkwe laqgħa li tkun parti mis-sessjoni tal-evalwazzjoni tar-reviżjoni minn pari.

L-ERCEA għandha tikkonkludi ittra ta’ ħatra ma’ kull osservatur indipendenti. Il-mudell approvat mill-Kummissjoni għandu jintuża għall-ħatra tal-osservaturi indipendenti. Il-Kodiċi ta’ Kondotta speċifiku għall-osservaturi tal-proċess tal-evalwazzjoni tar-reviżjoni minn pari għandu jiġi pprovdut fil-mudell approvat mill-Kummissjoni.

L-ERCEA għandha tinforma lill-kumitat tal-Programm bl-għażla tal-esperti bħala osservaturi, u bit-termini ta’ referenza tagħhom.

Il-kompitu tal-osservaturi għandu jkun li jqisu l-operazzjoni tas-sessjonijiet tal-evalwazzjoni tar-reviżjoni minn pari mill-perspettiva ta’ kif jaħdmu u mhux minn dak tal-eżitu, sakemm l-eżitu tal-evalwazzjonijiet tal-analiżi minn pari ma jkunx riżultat dirett tal-aspetti operattivi. Għal din ir-raġuni, ma hemmx għalfejn li l-osservaturi jkollhom kompetenza fil-qasam tal-proposti li jkunu qed jiġu evalwati. Tabilħaqq, għandu jiġi kkunsidrat bħala vantaġġ li tkun evitata l-preżenza ta’ osservaturi b’għarfien wisq approfondit tal-qasam tax-xjenza u tat-teknoloġija (S & T) partikolari sabiex ikunu evitati kunflitti bejn l-opinjonijiet tagħhom dwar l-eżitu tal-evalwazzjonijiet tal-analiżi minn pari u l-funzjonament tas-sessjonijiet. Ikun xi jkun il-każ, huma ma għandhomx jesprimu fehmithom dwar il-proposti li qed jiġu eżaminati jew dwar l-opinjonijiet tal-esperti indipendenti rigward il-proposti.

Ir-rwol tal-osservaturi għandu jkun li jagħtu pariri indipendenti dwar kif tmexxew is-sessjonijiet tal-evalwazzjoni tar-reviżjoni minn pari, dwar il-modi li bihom il-proċeduri jistgħu jittejbu u dwar il-mod li bih l-esperti indipendenti japplikaw il-kriterji ta’ evalwazzjoni. L-osservaturi għandhom jivverifikaw li jkun hemm adeżjoni mal-proċeduri stabbiliti jew imsemmija f’dawn ir-regoli u għandhom jagħmlu rapport lill-maniġment tal-programm dwar il-modi li bihom jista’ jittejjeb il-proċess.

L-osservaturi għandhom jirrispettaw l-istess obbligi ta’ kunfidenzjalità tal-esperti indipendenti u għandhom jiffirmaw ittri ta’ ħatra li jinkludu ftehimiet ta’ kunfidenzjalità. Huma ma għadhomx jitħallew jiżvelaw dettalji tal-proposti, tal-esperti indipendenti assenjati sabiex jeżaminaw il-proposti u lanqas tad-diskussjonijiet fil-Bordijiet tal-evalwazzjoni tar-reviżjoni minn pari.

L-osservaturi għandhom jirraportaw is-sejbiet tagħhom lill-KER. L-osservaturi għandhom jiġu inkoraġġiti wkoll jidħlu f’diskussjonijiet informali mal-uffiċjali tal-ERCEA involuti fis-sessjonijiet tal-evalwazzjoni tar-reviżjoni minn pari u jagħmlu osservazzjonijiet dwar kwalunkwe titjib possibbli li jista’ jitqiegħed immedjatament fil-prattika.

L-ERCEA għandha tinforma lill-kumitat tal-programm bis-sejbiet tal-osservaturi u tista’ tagħmel pubblikament disponibbli sommarju tar-rapport tagħhom.

It-twettiq ta’ osservazzjoni tal-evalwazzjoni tar-reviżjoni minn pari għandha tkun suġġetta għall-valuri massimi indikati fl-assenjazzjoni speċifika tal-kompitu. Il-valuri massimi indikati fl-assenjazzjoni tal-kompitu jistgħu jiġu estiżi b’emenda bil-miktub.

3.1.5.   Il-kriterji tal-evalwazzjoni tar-reviżjoni minn pari

Il-kriterji tal-evalwazzjoni, inklużi kwalunkwe punteġġ tal-proposta u l-piżijiet u l-limiti assoċjati, huma stabbiliti fil-programm ta’ ħidma Ideat u huma bbażati fuq il-prinċipji stabbiliti fil-Programm Speċifiku Ideat u fir-Regoli għall-Parteċipazzjoni (22). Il-mod li bih għandhom jiġu applikati jista’ jiġi spjegat ulterjorment fil-Gwida għall-Applikanti (23).

Fir-rigward ta’ proposti bi kwistjonijiet etikament sensittivi (ara l-Anness B) jew li jeżiġu iktar skrutinju fejn għandhom x’jaqsmu kunsiderazzjonijiet ta’ sigurtà (ara l-Anness D) għandhom jiġu applikati proċeduri speċjali.

3.1.6.   L-organizzazzjoni tal-evalwazzjoni tar-reviżjoni minn pari

Il-Kunsill Xjentifiku tal-KER għandu jistabbilixxi l-metodoloġija tal-evalwazzjoni tar-reviżjoni minn pari, li tista’ tvarja fid-dettalji għas-sejħiet differenti, għandu jissorvelja l-proċess tal-evalwazzjoni tar-reviżjoni minn pari u għandu jistabbilixxi r-regoli tal-proċedura għall-Bordijiet tal-KER ippubblikati fuq il-websajt tal-KER (Gwida għall-Analizzatturi Pari tal-KER). Il-Kunsill Xjentifiku tal-KER jista’ wkoll jagħti delega lill-membri tiegħu sabiex ikunu preżenti waqt il-laqgħat tal-Bordijiet bħala osservaturi. Madankollu, il-membri tal-Kunsill Xjentifiku ma għandhomx jinfluwenzaw, fl-ebda ċirkustanza, l-eżitu tal-laqgħa tal-Bord li jattendu għaliha.

L-evalwazzjoni tar-reviżjoni minn pari għandha tiġi organizzata fuq il-bażi tal-prinċipji stabbiliti fit-Taqsima 2.1 iktar ‘il fuq, sabiex tkun żgurata valutazzjoni konsistenti, rigoruża u bbażata fuq il-kwalità tal-proposti skont il-kriterji stabbiliti fil-programm ta’ ħidma Ideat.

Fejn sejħa tispeċifika proċedura ta’ evalwazzjoni f’żewġ stadji, huma biss dawk il-proposti li jkunu għaddew l-ewwel stadju, fuq il-bażi tal-evalwazzjoni meta mqabbla ma’ sett limitat ta’ kriterji, li għandhom jimxu ‘l quddiem għal evalwazzjoni tar-reviżjoni minn pari ulterjuri (24).

3.1.6.1.   L-evalwazzjoni tar-reviżjoni minn pari ta’ proġetti ta’ riċerka fil-fruntieri tal-għarfien.

L-evalwazzjoni tar-reviżjoni minn pari għandha titwettaq permezz ta’ Bordijiet ta’ xjenzati u ta’ akkademiċi indipendenti. Il-bordijiet jistgħu jkunu assistiti minn evalwaturi tal-bord u minn arbitri speċjalisti, li għandhom iwettqu l-evalwazzjoni tar-reviżjoni minn pari b’mod sħiħ jew parzjali fi djarhom jew fil-postijiet tax-xogħol tagħhom (“evalwazzjoni mill-bogħod”). Il-bordijiet għandhom jiġu stabbiliti sabiex ikopru l-firxa tal-oqsma ta’ riċerka koperti mis-sejħa, b’kull Bord ikun responsabbli għal għadd partikolari ta’ oqsma ta’ riċerka.

Skont ir-regoli tal-proċedura għall-Bordijiet tal-KER imsemmija iktar ‘il fuq, il-Bordijiet għandhom joperaw taħt il-presidenza ta’ espert indipendenti anzjan.

Kwalunkwe evalwazzjoni tar-reviżjoni minn pari tista’ tiġi organizzata f’żewġ stadji sussegwenti. F’każ ta’ din ix-xorta, l-eżitu tal-ewwel stadju għandu jkun il-kontribut għat-tieni stadju. Is-sekwenza tal-avvenimenti fi stadju ġeneralment għandha tkun kif ġej:

L-allokazzjoni tal-proposti lill-Bordijiet: Kull proposta għandha tiġi allokata lil Bord fuq il-bażi tas-suġġett tal-proposta. L-allokazzjoni inizjali għandha tkun ibbażata fuq indikazzjoni pprovduta mill-applikant, fuq it-titolu u l-kontenut tal-proposta u/jew fuq informazzjoni, possibbilment fil-forma ta’ “kelmiet prinċipali (keywords)”, ipprovduti fil-proposta.

Il-valutazzjoni individwali: Il-proposti għandhom jiġu eżaminati skont il-kriterji rilevanti minn għall-inqas tliet (3) analizzaturi pari (25), ikkwalifikati fl-oqsma xjentifiċi u/jew teknoloġiċi relatati mal-proposta, li jippreparaw ir-rapporti individwali dwar il-valutazzjoni (IAR).

Il-valutazzjoni tal-Bord: Il-Bordijiet għandhom id-dmir li jeżaminaw b’mod konsistenti l-proposti li jaqgħu fil-qasam tal-kompetenza tagħhom (26) u li joperaw b’mod koerenti ma’ Bordijiet oħrajn, sabiex tkun żgurata konsistenza fit-trattament tal-proposti fil-Bordijiet kollha differenti u fl-oqsma xjentifiċi/teknoloġiċi kollha differenti miftuħa fis-sejħa.

Il-ġudizzju ta’ Bord dwar proposta (inklużi kwalunkwe punteġġ mogħti lill-proposta għal kriterji invidwali jew b’mod globali, u l-pożizzjoni tagħha fi kwalunkwe lista ta’ pożizzjonijiet fi klassifika) huwa bbażat fuq il-valutazzjonijiet individwali u d-diskussjoni fil-Bord, u l-Bord jasal għalih b’vot maġġoritarju. L-eżitu tal-fażi ta’ valutazzjoni tal-Bord hija lista tal-ordni tal-klassifika. Fl-aħħar stadju tal-evalwazzjoni tar-reviżjoni minn pari, il-Bord għandu jidentifika dawk il-proposti li jiġu rrakkomandati għall-finanzjament, skont il-baġit assoċjat mas-sejħa.

Intervisti: Fejn dan jiġi speċifikat fil-programm ta’ ħidma Ideat, il-valutazzjoni tal-Bord tista’ tinkludi intervisti mal-PI u/jew mal-entità legali applikanta. L-ispejjeż tal-ivvjaġġar u tal-għajxien li jsiru b’relazzjoni għall-intervisti jistgħu jiġi rrimborsti mill-ERCEA. Ir-regoli għar-rimbors applikabbli għall-persuni intervistati huma speċifikati fl-Anness Ċ. Kwalunkwe intervista għandha ssir minn għall-inqas tliet membri tal-Bord. L-intervisti jistgħu jsiru fil-post tal-laqgħa tal-Bord tal-evalwazzjoni tar-reviżjoni minn pari, jew bla ħsara għall-fattibbiltà teknika, b’mezzi elettroniċi (konnessjoni bil-vidjo, telekonferenza, jew mezz simili).

Il-Valutazzjoni trasversali ta’ Bordijiet differenti (Valutazzjoni minn Bordijiet differenti, minn sferi differenti, minn oqsma ta’ riċerka differenti, eċċ.): Il-valutazzjoni trasversali ta’ Bordijiet differenti għandha tistabbilixxi ordni finali u rrakkomandat tal-klassifika tal-proposti miżmuma għas-sejħa kollha (mill-oqsma kollha ta’ riċerka miftuħa fis-sejħa), permezz ta’ valutazzjoni bir-reqqa tal-kwalità tal-proposti fil-Bordijiet differenti kollha. Din il-valutazzjoni għandha titwettaq f’forum ikkostitwit mill-presidenti tal-Bordijiet jew mill-membri ddelegati tal-Bordijiet tagħhom. Il-valutazzjoni trasversali tal-Bordijiet differenti għandha tagħti attenzjoni partikolari lil proposti b’natura interdixxiplinari li jaqsmu l-konfini bejn il-Bordijiet differenti, proposti f’oqsma ġodda u emerġenti u proposti li jinvolvu “riskju kbir u gwadann kbir”.

Jekk il-programm ta’ ħidma Ideat jiffissa baġits indikattivi assoċjati ma’ kull Bord, sfera, qasam ta’ riċerka, eċċ. id-diskussjoni tista’ tikkunsidra biss dawk il-proposti li mhumiex inklużi fost l-numru ta’ proposti li qegħdin suffiċjentment ‘il fuq fil-klassifika sabiex jaqgħu fil-baġit indikattiv iffissat għal kull Bord, sfera, qasam ta’ riċerka, eċċ.

L-evalwazzjoni tar-reviżjoni minn pari għandha twassal għal Rapport ta’ Evalwazzjoni (ER) għal kull propsta, inklużi r-riżultati ta’ bord trasversali, fejn ikun xieraq, fejn tiġi ddikjarata r-rakkomandazzjoni finali tal-bord rigward il-proposta, flimkien mal-valutazzjonijiet individwali tal-esperti indipendenti, kif ukoll kwalunkwe rakkomandazzjoni li saret dwar l-ammont massimu ta’ finanzjament li għandu jiġi allokat.

3.1.6.2.   Il-proċedura ta’ sottomissjoni f’żewġ stadji għal proġetti ta’ riċerka fil-fruntieri tal-għarfien.

Is-sejħa għandha tispeċifika meta għandha tapplika proċedura ta’ sottomissjoni f’żewġ stadji. F’każijiet ta’ din ix-xorta, il-kriterji ta’ evalwazzjoni applikabbli għal kull stadju għandhom jiġu stabbiliti fil-programm ta’ ħidma Ideat. Il-metodoloġija eżatta għall-evalwazzjoni tar-reviżjoni minn pari fl-ewwel u fit-tieni stadju tista’ tvarja (pereżempju, fl-użu tal-evalwaturi tal-bord, tal-arbitri u/jew tal-intervisti tal-PI).

Il-PI l-ewwel iridu jissottomettu proposta ridotta jew fil-qosor. Din il-proposta tal-ewwel stadju għandha tiġi evalwata skont il-kriterji għal dan l-istadju stabbiliti fis-sejħa.

Wara l-evalwazzjoni tal-proposta tal-ewwel stadju, il-valutazzjoni tal-Bord tista’ tirriżulta, għall-proposti miżmuma, fl-istedina għal sottomissjoni tat-tieni stadju. Indipendentement minn kwalunkwe valutazzjoni trasversali oħra minn bordijiet differenti, f’dan l-istadju l-Bordijiet jingħataw is-setgħa, fil-qafas ta’ kompetenza tagħhom, sabiex jirrakkomandaw il-proposti li għandhom jipproċedu għat-tieni stadju.

L-applikanti li jiksbu suċċess wara l-ewwel stadju għandhom jiġu mistiedna jissottomettu proposta iktar dettaljata jew iktar kompluta kif ukoll informazzjoni aġġornata dwar il-proposta oriġinali qabel skadenza speċifika għat-tieni stadju. Sabiex ikun sostnut il-prinċipju ta’ trattament ugwali, il-Bord jista’ jirrakkomanda l-esklużjoni minn evalwazzjoni ulterjuri ta’ proposti sottomessi fit-tieni stadju li jiddevjaw b’mod sostanzjali mill-proposta korrispondenti tal-ewwel stadju.

Il-proċess tal-evalwazzjoni tar-reviżjoni minn pari għat-tieni stadju għandu jsegwi s-sekwenza deskritta fit-Taqsima 3.1.6.1.

3.1.6.3.   L-evalwazzjoni tar-reviżjoni minn pari tal-azzjonijiet ta’ koordinazzjoni u ta’ appoġġ

L-evalwazzjoni tar-reviżjoni minn pari ta’ azzjonijiet ta’ koordinazzjoni u ta’ appoġġ għandha ssegwi l-istess sekwenza bħal fit-Taqsima 3.1.6.1. Il-valutazzjoni tal-Bord tista’ tkun il-fażi finali qabel mal-ERCEA tapprova l-lista finali tal-ordni tal-klassifika.

L-unika eċċezzjoni għal din il-proċedura għandu jkun il-każ ta’ azzjonijiet ta’ koordinazzjoni u ta’ appoġġ koperti mill-Artikolu 14 tar-Regoli għall-Parteċipazzjoni, fejn l-esperti indipendenti għandhom jinħatru biss jekk l-ERCEA tikkunsidra li dan huwa xieraq.

Iktar dettalji dwar il-proċedura tal-evalwazzjoni tar-reviżjoni minn pari tal-azzjonijiet ta’ koordinazzjoni u ta’ appoġġ għandhom ikunu stabbiliti fil-programm ta’ ħidma Ideat, fis-sejħa u fil-Gwida għall-Applikanti relatata.

3.1.7.   Ir-riżultati tal-evalwazzjoni tar-reviżjoni minn pari, is-selezzjoni u ċ-ċaħda tal-proposti

Il-Kunsill Xjentifiku tal-KER għandu jikkonferma l-lista finali tal-ordni tal-klassifika tal-proposti rakkomandati għal finanzjament mill-evalwazzjoni tar-reviżjoni minn pari.

Fuq il-bażi tal-eżitu tal-evalwazzjoni tar-reviżjoni minn pari u tal-istabbiliment tal-lista finali tal-ordni tal-klassifika mill-Kunsill Xjentifiku tal-KER, l-ERCEA għandha tipprepara l-lista/i finali tal-proposti għal finanzjament possibbli.

Dan għandu jirriżulta fi:

—

Lista ta’ proposti li jkunu ta’ kwalità suffiċjentement għolja biex jinżammu għal finanzjament possibbli. Din il-lista għandha tiġi ppreżentata fl-ordni tal-klassifika rrakkomandata, fejn tiġi stabbilita l-prijorità għall-finanzjament fil-limiti tal-baġit disponibbli għas-sejħa (il-lista tal-proposti miżmuma). Jekk is-sejħa tistabbilixxi baġits indikattivi għal Bordijiet, sferi, oqsma ta’ riċerka, eċċ. partikolari, jistgħu jiġu ppreparati listi ta’ proposti miżmuma separati għal kull qasam ta’ din ix-xorta.

—

Jekk il-finanzjament totali rrakkomandat għall-proposti miżmuma wara l-evalwazzjoni tar-reviżjoni minn pari jeċċedi l-baġit disponibbli għas-sejħa, tista’/jistgħu tiġi/jiġu stabbilita/i lista ta’ proposti ta’ riżerva waħda għall-proposti (jew – fil-każ ta’ baġits indikattivi assoċjati ma’ Bordijiet, sferi, oqsma ta’ riċerka eċċ. separati – iktar minn waħda). L-għadd ta’ proposti miżmuma bħala riżerva għandu jiġi ddeterminat mill-ERCEA fid-dawl tal-kunsiderazzjonijiet baġitarji u, għandu jkun ibbażat fuq il-probabbiltà li proposti ta’ din ix-xorta jistgħu eventwalment jirċievu finanzjament minħabba eventwalitajiet bħall-irtirar ta’ proposti jew id-disponibbiltà ta’ baġit addizzjonali.

—

Lista ta’ proposti li ma għandhomx jinżammu għall-finanzjament. Din il-lista għandha tinkludi dawk il-proposti li nstab li kienu ineliġibbli (jew qabel, jew matul jew wara l-evalwazzjoni tar-reviżjoni minn pari), dawk il-proposti li kien ikkunsidrat li ma laħqux il-limitu mitlub ta’ kwalità, dawk il-proposti li, minħabba li jaqgħu taħt ċertu pożizzjoni fil-klassifika, ma jistgħux jiġu ffinanzjati għaliex il-baġit disponibbli mhuwiex suffiċjenti, u dawk il-proposti li fadal mil-lista tal-proposti ta’ riżerva, meta l-baġit għal sejħa partikolari jkun intuża kollu.

Il-valutazzjoni tal-kwalità u l-ordni tal-klassifika rrakkomandata għall-finanzjament tal-proposti fil-lista tal-proposti miżmuma, għandha tkun ibbażata fuq l-evalwazzjoni tar-reviżjoni minn pari tal-proposta skont il-kriterji kollha rilevanti. Madankollu, kull meta sejħa tispeċifika proċedura ta’ evalwazzjoni tar-reviżjoni minn pari f’żewġ stadji u b’hekk fejn proposta tiġi kkunsidrata bħala waħda li ma tilħaqx limitu ta’ kwalità ffissat għal kriterju partikolari ta’ evalwazzjoni fis-sejħa, il-proposta tista’ tiġi rrakkomandata għal ċaħda finali matul l-evalwazzjoni tar-reviżjoni minn pari, mingħajr ma jkun hemm għalfejn tiġi vvalutata ulterjorment skont kriterji applikabbli oħrajn.

Kwalunkwe proposta li tmur kontra l-prinċipji fundamentali tal-etika jew li ma tissodisafx il-kundizzjonijiet previsti fil-Programm Speċifku Ideat, fil-programm ta’ ħidma Ideat jew fis-sejħa ma għandhiex tiġi selezzjonata (27). Il-proposti jistgħu jiġu miċħuda anki għal raġunijiet etiċi jew ta’ sigurtà wara l-proċeduri fl-Anness B u D rispettivament.

Kwalunkwe PI jew entità legali applikanta potenzjali għal azzjoni indiretta taħt il-Programm Speċifiku Ideat li jkun wettaq irregolarità (28) fl-implimentazzjoni ta’ kwalunkwe azzjoni indiretta oħra taħt il-Programmi Kwadru jista’ jiġi eskluż mill-proċedura ta’ selezzjoni fi kwalunkwe ħin, filwaqt li jitqies kif xieraq il-prinċipju ta’ proporzjonalità.

3.1.8.   Ir-reazzjonijiet

Wara l-evalwazzjoni tar-reviżjoni minn pari, l-ERCEA għandha tipprovdi reazzjoni lill-PI u lill-entità legali applikanta. Il-komunikazzjoni u r-reazzjonijiet kollha mingħand l-ERCEA lill-PI u lill-entità legali applikanta għandhom isiru permezz tal-kont tal-webmail b’sigurtà tal-ERCEA. Il-Gwida għall-Applikanti għandha tindika d-data mistennija tar-reazzjonijiet.

(a)

Wara l-evalwazzjoni tar-reviżjoni minn pari tal-ewwel stadju f’evalwazzjoni tar-reviżjoni minn pari f’żewġ stadji:   Dawk li l-proposti tagħhom jinstab li huma ineliġibbli għandhom jiġu informati bir-raġunijiet għal deċiżjoni ta’ din ix-xorta. Il-proposti ineliġibbli ma għandhomx jiġu evalwati.   Dawk li l-proposti tagħhom ma jinżammux għall-istadju li jmiss għandhom jirċievu r-reazzjonijiet dwar l-evalwazzjoni tar-reviżjoni minn pari fil-forma ta’ ER.   Fl-aħħar nett, dawk li l-proposti tagħhom jinżammu għall-istadju li jmiss għandhom jirċievu notifika, u jistgħu jiġu mistiedna jattendu għal intervista.

(b)

Wara tal-evalwazzjoni tar-reviżjoni minn pari tal-ewwel stadju fi proċedura ta’ sottomissjoni f’żewġ stadji:   Dawk li l-proposti tagħhom jinstab li huma ineliġibbli għandhom jiġu informati bir-raġunijiet għal deċiżjoni ta’ din ix-xorta. Il-proposti ineliġibbli ma għandhomx jiġu evalwati.   Dawk li l-proposti tagħhom ma jinżammux għall-istadju li jmiss għandhom jirċievu r-reazzjonijiet dwar l-evalwazzjoni tar-reviżjoni minn pari fil-forma ta’ ER.   Fl-aħħar nett, dawk li l-proposti tagħhom jinżammu għall-istadju li jmiss għandhom jirċievu stedina biex jissottomettu proposta għat-tieni stadju, u jistgħu jiġu mistiedna jattendu għal intervista.

(ċ)

Wara t-tieni evalwazzjoni tar-reviżjoni minn pari fil-każijiet a) u b) iktar ‘il fuq, u wara l-unika evalwazzjoni tar-reviżjoni minn pari fil-każ ta’ sottomissjoni waħda u ta’ evalwazzjoni fi stadju wieħed:   Dawk li l-proposti tagħhom jinstab li huma ineliġibbli għandhom jiġu informati bir-raġunijiet għal deċiżjoni ta’ din ix-xorta. Il-proposti ineliġibbli ma għandhomx jiġu evalwati.   Kemm il-proposti ‘il fuq minn kif ukoll dawk taħt il-limitu tal-kwalità għandhom jirċievu reazzjonijiet dwar l-evalwazzjoni tar-reviżjoni minn pari fil-forma ta’ ER.   L-ER għandu jipprovdi l-eżitu tal-evalwazzjoni tar-reviżjoni minn pari u għandu jinkludi, kif inhu xieraq, kummenti u punteġġ globali u/jew għal kriterji individwali. Għall-proposti fil-lista tal-proposti miżmuma, fejn ikun xieraq, l-ER għandu jindika kwalunkwe rakkomandazzjoni li saret rigward l-ammont massimu ta’ finanzjament li għandu jiġi allokat, u kwalunkwe rakkomandazzjoni xierqa oħra dwar it-tmexxija tal-proġett, u/jew kwalunkwe suġġeriment għal titjib fil-metodoloġija u fil-programm ta’ ħidma.   Għal dawk il-proposti li ġew miċħuda wara li ma laħqux limitu tal-kwalità, il-kummenti inklużi fl-ER jistgħu jkunu kompluti biss għal dawk il-kriterji eżaminati sal-punt meta l-limitu ma ntlaħaqx.   Dawk li l-proposti tagħhom jiġu miċħuda minħabba kunsiderazzjonijiet etiċi u ta’ sigurtà għandhom jiġu informati bir-raġunijiet għal deċiżjoni ta’ din ix-xorta.

3.1.9.   Il-proċeduri ta’ assistenza u ta’ rimedju

L-ERCEA għandha tipprovdi informazzjoni dwar il-proċedura li trid tiġi segwita mill-PI u/jew mill-entitajiet legali applikanti sabiex tiġi indirizzata kwalunkwe kwistjoni ta’ jew talba għal rimedju (29) dwar ir-riżultati ta’ evalwazzjoni tar-reviżjoni minn pari partikolari b’relazzjoni għal kwalunkwe sejħa tal-KER.

Mill-inqas, kwalunkwe kwistjoni ta’ jew talba għal rimedju għandha tinkludi isem is-sejħa, in-numru tal-proposta (jekk ikun hemm), it-titolu tal-proposta u deskrizzjoni tal-problemi ffaċċjati.

Għal kwistjonijiet rigward il-kontroll tal-eliġibbiltà u/jew il-proċess tal-evalwazzjoni tar-reviżjoni minn pari ta’ proposta partikolari, għandha tiġi stabbilita proċedura ta’ rimedju sabiex isir rapport dwar kwalunkwe nuqqas fir-riżultati tal-kontroll tal-eliġibbiltà jew fil-mod li bih proposta tkun ġiet evalwata jew li huwa probabbli li pperikolat id-deċiżjoni dwar jekk il-proposta tiġix iffinanzjata jew le. Sabiex jeżamina l-każ inwistjoni jista’ jitlaqqa’ kumitat ta’ rimedju. Jekk il-kumitat jintalab jikkunsidra kwistjonijiet ta’ eliġibbiltà, huwa jista’ jitlob il-parir tal-kumitat tal-analiżi tal-eliġibbiltà (ara t-Taqsima 2.2.6). Il-kumitat għandu jalqqa’ flimkien persunal bil-kompetenza xjentifika/teknika u legali mitluba. Il-kumitat innifsu, madankollu, ma għandux jevalwa il-proposta. Jiddependi min-natura tal-ilment, il-kumitat jista’ janalizza s-CV tal-esperti indipendenti, il-kummenti individwali tagħhom u l-ER. Il-kumitat ma għandux jixħet dubji fuq il-ġudizzju xjentifiku tal-bordijiet ta’ esperti li jkollhom kwalifiki xierqa.

Fid-dawl tal-analiżi tiegħu, il-kumitat għandu jirrakkomanda kors ta’ azzjoni lill-ERCEA. Jekk il-kumitat jikkunsidra li hemm evidenza li ssostni l-ilment, huwa jista’ jissuġġerixxi evalwazzjoni mill-ġdid parzjali jew totali tal-proposta mill-esperti indipendenti.

Kwalunkwe talba għal rimedju trid issir fi żmien xahar mid-data tar-reazzjoni maħruġa fuq il-kont tal-webmail b’sigurtà tal-ERCEA, kif ġie deskritt fit-Taqsima 3.1.8. Proċedura dettaljata ta’ rimedju hija deskritta fil-Gwida għall-Applikanti. It-talbiet mhux eliġibbli ma għandhomx jiġu ġestiti mill-kumitat ta’ rimedju.

Il-lanjanti għandha tintbagħtilhom risposta fi żmien tliet ġimgħat wara l-iskadenza applikabbli għat-talbiet għal rimedju, imsemmija iktar ‘il fuq. Jekk f’dak l-istadju ma tkunx tista’ tingħata risposta definittiva, ir-risposta għandha tindika meta se tingħata riposta ta’ din ix-xorta.

3.1.10.   Ir-rappurtar u l-informazzjoni dwar il-proċess tal-evalwazzjoni tar-reviżjoni minn pari

Wara kull evalwazzjoni tar-reviżjoni minn pari, l-ERCEA għandha tipprepara rapport u dan għandu jitqiegħed għad-dispożizzjoni tal-Kunsill Xjentfiku tal-KER u tal-kumitat tal-programm Ideat. Ir-rapport għandu jagħti informazzjoni statistika dwar il-proposti riċevuti (pereżempju, in-numru, it-temi prijoritarji koperti, il-kategoriji tal-entitajiet legali applikanti u l-baġit mitlub), dwar il-proċedura ta’ evalwazzjoni u dwar l-esperti indipendenti.

Għal finijiet ta’ komunikazzjoni, l-ERCEA tista’ tippubblika, wara tmiem il-proċess tal-evalwazzjoni u fi kwalunkwe midja xierqa, informazzjoni ġenerali dwar l-eżitu tal-evalwazzjoni tar-reviżjoni minn pari. Barra minn hekk, l-ERCEA tista’ tippubblika informazzjoni dwar il-proposti evalwati li jkunu ‘l fuq mil-limitu tal-kwalità bħala riżultat tal-evalwazzjoni (jew wara t-tieni (2) stadju ta’ evalwazzjoni f’żewġ stadji) (30) u li l-kunsens individwali għall-pubblikazzjoni tad-dejta speċifika tagħha jingħata mill-applikanti (31).

Għal finijiet relatati mal-monitoraġġ, mal-istudju u mal-evalwazzjoni previsti mill-programmi ta’ ħidma Ideat, l-ERCEA jista’ jkollha l-ħtieġa li l-proposti sottomessi jiġu pproċessati minn partijiet terzi (32) f’konformità mar-rekwiżiti tar-Regolament (KE) Nru 45/2001 tal-Parlament Ewropew u tal-Kunsill. L-applikanti (33) għandhom jintalbu jagħtu l-kunsens individwali liberu tagħhom għall-ipproċessar tal-proposti. Il-kunsens individwali ma għandux jintalab fuq bażi obbligatorja u għandu jiġi pprovdut biss fuq bażi volontarja mill-applikanti. Ir-rifjut li jingħata l-kunsens individwali ma għandux jaffetwa l-proċess tal-evalwazzjoni.

4.   ID-DEĊIŻJONI DWAR L-ALLOKAZZJONI U L-PREPARAZZJONI TAL-FTEHIMIET TA’ GĦOTJA

L-għotjiet għandhom jiġu allokati lill-entitajiet legali applikanti mill-uffiċjal awtorizzanti responsabbli, fil-baġit disponibbli, fuq il-bażi tal-lista tal-ordni tal-klassifika finali kif ġiet ippreparata mill-ERCEA skont it-Taqsima 3.1.7, permezz ta’ ftehim formali ta’ għotja.

Il-ftehimiet ta’ għotja għandhom jiġu konklużi mal-entitajiet legali applikanti bla ħsara għall-proċeduri finanzjarji u legali interni (34) u għall-verifika tar-rekwiżiti msemmija f’din it-taqsima.

Waqt il-preparazzjoni tal-ftehim ta’ għotja, il-PI u l-entità legali applikanti jistgħu jintalbu jipprovdu iktar informazzjoni dwar il-proġett u dwar il-ġestjoni prevista tiegħu (35). F’każijiet fejn iktar minn parteċipant wieħed ikun assoċjat mal-proġett, il-PI jew l-entità legali applikanta jistgħu jintalbu jiksbu informazzjoni u assigurazzjonijiet ta’ din ix-xorta mingħand il-parteċipanti l-oħra.

Fuq il-bażi tar-riżultat tal-proċess tal-evalwazzjoni, biex jiġi konkluż ftehim ta’ għotja, għal uħud mill-proposti, jistgħu jintalbu kundizzjonijiet addizzjonali (36). Kundizzjonijiet ta’ din ix-xorta għandhom ikunu ddokumentati b’mod xieraq u għandhom jiġu kkomunikati lill-PI u lill-entità legali applikanta kkonċernata, flimkien mal-ER.

Ma jistgħux jiġu allokati għotjiet lil entitajiet legali applikanti li fi żmien il-proċedura tal-allokazzjoni tal-għotja, ikunu f’waħda mis-sitwazzjonijiet imsemmija fl-Artikoli 93(1) (falliment, eċċ.), 94 (dikjarazzjonijiet foloz, eċċ.) u 96(2)(a) (esklużi minn kuntratti u għotjiet iffinanzjati mill-baġit tal-Unjoni Ewropea) tar-Regolament Finanzjarju. Huma jridu jiċċertifikaw li mhumiex f’waħda mis-sitwazzjonijiet elenkati iktar ‘il fuq (37).

Jekk ikun meħtieġ, f’dan l-istadju, il-kwistjonijiet etiċi wkoll għandhom jiġu ċċarati iktar. Għal dan l-iskop, l-ERCEA għandha taħtar esperti indipendenti sabiex jipparteċipaw fil-proċess tal-analiżi tal-etika (ara l-Anness B).

Il-preparazzjoni tal-għotjiet ma għandha tinvolvi l-ebda negozjati ta’ natura xjentifika/teknika. Għotja għandha tiġi allokata sussegwentement lill-entità legali applikanta fuq il-bażi tal-proposta sottomessa u tal-finanzjament irrakkomandat wara l-evalwazzjoni tar-reviżjoni minn pari, u bla ħsara għall-ftehim tal-entità legali applikanta mal-PI.

Jekk jirriżulta li jkun impossibbli li jintlaħaq ftehim mal-PI u mal-entità legali applikanti jew jekk wieħed minnhom jew it-tnejn li huma ma ffirmaw l-ebda ftehim supplimentari mitlub qabel skadenza raġonevoli li tista’ tiġi imposta, il-preparazzjonijiet għall-għotjiet jistgħu jiġu mitmuma.

Il-preparazzjoni tal-ftehimiet ta’ għotja għall-proposti fil-lista tal-proposti ta’ riżerva tista’ tibda malli jidher ċar li sar disponibbli baġit suffiċjenti sabiex ikun iffinanzjat proġett wieħed jew iktar minnhom. Bla ħsara għad-disponibbiltà tal-baġit, il-preparazzjoni tal-għotjiet għandha tibda bil-proposta li qiegħda fl-ogħla pożizzjoni fil-klassifika u tkompli f’ordni mill-kbir għaż-żgħir skont il-klassifika finali.

5.   ANNESSI

5.1.   Anness A – Il-Proċeduri għas-Sottomissjoni tal-Proposti fuq il-karta

F’każijiet eċċezzjonali, jekk applikant assolutament ma jkollu l-ebda mezz biex jikseb aċċess għas-sistema ta’ sottomissjoni elettronika tal-proposti u jekk ikun impossibbli li jsiru arranġamenti biex jagħmel dan, l-applikant jista’ jitlob permess mingħand l-ERCEA sabiex j/tagħmel is-sottomissjoni fuq il-karta. Talba ta’ din ix-xorta, li li trid tispjega b’mod ċar iċ-ċirkustanzi tal-każ, trid tiġi riċevuta mill-ERCEA mhux iktar tard minn xahar qabel l-iskadenza tas-sejħa.

Talba għal permess sabiex is-sottomissjoni ssir fuq il-karta għandha tintbagħat f’dan l-indirizz:

Aġenzija Eżekuttiva tal-Kunsill Ewropew għar-Riċerka

Kap tad-“Dipartiment tal-Ġestjoni Xjentifika”

COV2

B-1049 Brussell

Il-Belġju

L-ERCEA għandha tirrispondi għal talba ta’ din ix-xorta fi żmien ħamest ijiem ta’ xogħol minn meta tirċeviha. Jekk tingħata d-deroga, l-ERCEA għandha tibgħat formoli tal-proposti għal sottomissjoni fuq il-karta lill-applikant ikkonċernat.

Jekk il-karatteristiċi ta’ sejħa partikolari jfissru li s-sottomissjonijiet bbażati fuq l-Internet ġeneralment ma jkunux adattati, l-ERCEA tista’ tiddeċiedi mill-bidu nett li taċċetta sottomissjonijiet fuq il-karta. F’każijiet ta’ din ix-xorta, il-possibbiltà għandha tiġi ddikjarata fis-sejħa għall-proposti, u l-formoli tal-proposti għal sottomissjoni fuq il-karta għandhom ikunu ġeneralment disponibbli.

Meta titħalla sottomissjoni fuq il-karta, jew b’deroga speċjali jew b’deroga ġenerali kif ġie deskritt iktar ‘il fuq, il-kunsinna tal-pakketti li jkun fihom il-proposti fuq il-karta tista’ ssir billi tintuża l-posta normali, is-servizz ta’ kurrier privat jew bl-idejn. Il-verżjonijiet tal-proposti sottomessi fuq mezz ta’ ħżin elettroniku li jista’ jitneħħa (eż. CD-ROM jew kwalunkwe apparat elettroniku simili), bl-e-Mail jew bil-faks għandhom jiġu esklużi. Il-proposti sottomessi fuq il-karta jridu jiġu sottomessi f’pakkett wieħed. Jekk l-applikanti jixtiequ jissottomettu bidliet fi proposta jew informazzjoni addizzjonali, huma jridu jindikaw b’mod ċar liema partijiet tal-proposta nbidlu u l-bidliet/il-partijiet żejda jridu jiġu sottomessi u riċevuti qabel ma tagħlaq is-sejħa. Kontenut addizzjonali jew emendat tal-proposta li jiġi riċevut wara li tagħlaq is-sejħa ma għandux jiġi ttrattat jew evalwat.

F’każ ta’ proposta li tintbagħat bil-posta jew b’kurrier, l-evidenza tad-data tad-dispaċċ għandha tkun ikkostitwita mit-timbru postali jew mid-data tal-irċevuta ta’ depożitu. Il-pakketti li jinkludu l-proposti jistgħu jinfetħu, mal-wasla, mill-ERCEA (38) sabiex id-dettalji amministrattivi jiġu rreġistrati fil-bażijiet tad-dejta u tkun tista’ tintbagħat irċevuta ta’ rikonoxximent li l-pakkett ikun wasal.

5.2.   Anness B - Il-Proċeduri tal-Analiżi tal-Etika

Introduzzjoni

Sabiex ikunu implimentati l-Artikolu 6 tal-FP7 u l-Artikolu 15 tar-Regoli għall-Parteċipazzjoni, il-proċedura ta’ evalwazzjoni għandha tinkludi identifikazzjoni inizjali tal-kwistjonijiet etiċi mqajma mill-proposti segwita minn eżami sistematiku tal-etika tal-proposti li jqajmu kwistjonijiet etiċi. Fejn ikun meħtieġ, analiżi tal-etika tal-proposti tista’ ssir wara l-eżami sistematiku tal-etika u qabel kwalunkwe deċiżjoni dwar selezzjoni mill-ERCEA skont ir-regoli ffissati. L-eżami sistematiku tal-etika u l-analiżi tal-etika (li f’dan l-Anness għandhom jissejħu flimkien bħala Proċedura tal-Analiżi tal-Etika) għandhom jitwettqu minn esperti indipendenti bil-ħiliet xierqa fl-etika.

L-għanijiet tal-Proċedura tal-Analiżi tal-Etika għandhom ikunu li jiġi żgurat li l-Unjoni Ewropea ma tappoġġjax riċerka li tmur kontra l-prinċipji etiċi fundamentali stabbiliti fir-regoli rilevanti tal-UE u li jkun eżaminat jekk ir-riċerka tkunx konformi mar-regoli relatati mal-etika tar-riċerka stabbiliti fid-Deċiżjonijiet dwar l-FP7 u l-Programm Speċifiku Ideat. L-opinjonijiet tal-Grupp Ewropew dwar l-Etika fix-Xjenza u t-Teknoloġiji l-Ġodda qed jitqiesu u se jiġu kkunsidrati.

Il-proposti

Fejn ikun xieraq u/jew mitlub mis-sejħa, il-proposti għandhom jinkludu taqsima dwar l-Etika li għandha:

—	Tiddeskrivi l-aspetti etiċi potenzjali tar-riċerka proposta rigward l-għanijiet, il-metodoloġija u l-implikazzjonijiet potenzjali tar-riżultati tagħha;

—	Tiġġustifika t-tfassil tal-proġett ta’ riċerka mil-lat etiku;

—	Tispjega kif ir-rekwiżiti etiċi stabbiliti fil-programm ta’ ħidma għandhom jiġu sodisfatti;

—	Tindika kif il-proposti jissodisfaw ir-rekwiżiti legali u etiċi nazzjonali tal-pajjiż fejn qed jiġi ppjanat li titwettaq ir-riċerka;

—	Tindika l-perjodu ta’ żmien biex issir applikazzjoni għal opinjoni u/jew għal approvazzjoni minn kwalunkwe awtorità rilevanti fuq il-livell nazzjonali (bħall-awtorità tal-protezzjoni tad-dejta, l-awtorità tal-provi kliniċi, eċċ.).

Għal dan il-għan, l-applikanti għandhom jimlew it-“Tabella tal-Kwistjonijiet Etiċi” inkluża fil-Gwida għall-Applikanti.

L-ERCEA tista’ tikuntattja lill-applikant fi kwalunkwe ħin matul il-proċess sabiex tikseb informazzjoni addizzjonali rilevanti għall-awtorizzazzjoni etika.

Il-modalitajiet proċedurali ġenerali

Il-proċeduri tal-eżami sistematiku tal-etika u l-organizzazzjoni tal-Bordijiet tal-Analiżi tal-Etika

Il-pre-eżami sistematiku intern tal-proposti

It-tim tal-Etika tal-ERCEA għandu jissuġġetta għal preeżami sistematiku lill-proposti kollha rakkomandati għal finanzjament sabiex jidentifika dawk il-proposti li ma jqajmu l-ebda kwistjoni etika u li jistgħu jiġu approvati għall-għotjiet mingħajr l-involviment ta’ esperti indipendenti. Il-proposti l-oħra kollha għandhom jiġu sottomessi għal iktar skrutinju etiku. Dan il-proċess huwa bbażat fuq it-“Tabella tal-Kwistjonijiet Etiċi” u l-proposti, kif ġew sottomessi mill-applikanti.

Is-sottomissjoni lil Bord tal-Eżami Sistematiku tal-Etika

Il-proposti kollha identifikati fuq il-livell tal-preeżami sistematiku bħala li jqajmu kwistjonijiet etiċi għandhom jiġu sottomessi lil Bord tal-Eżami Sistematiku tal-Etika magħmul minn esperti indipendenti bil-ħiliet xierqa fl-etika.

L-esperti tal-Bord għandhom jidentifikaw dawk il-proposti fejn il-kwistjonijiet etiċi ġew indirizzati b’mod sodisfaċenti, dawk li jistgħu jiġu approvati bil-kundizzjoni li tingħata informazzjoni dokumentarja sodisfaċenti u/jew approvazzjoni fuq il-livell nazzjonali, u dawk li jeżiġu iktar attenzjoni minabba l-importanza tal-kwistjonjiet etiċi mqajma u li jeħtieġ li jiġu sottomessi għal Analiżi tal-Etika (39).

Għal kull proposta li tiġi eżaminata b’mod sistematiku, l-esperti għandhom jippreparaw u jiffirmaw rapport dwar l-Eżami Sistematiku tal-Etika li jinkludi taqsima ta’ rekwiżiti. Dawn ir-rekwiżiti għandhom isiru obbligi kuntrattwali.

Is-sottomissjoni lil Bord tal-Analiżi tal-Etika

Il-proġetti li jqajmu kwistjonijiet etiċi importanti li ġew identifikati waqt l-Eżami Sistematiku tal-Etika għandhom jiġu sottomessi quddiem Bord tal-Analiżi tal-Etika. Kwistjonijiet bħal interventi ta’ riċerka fuq il-bnedmin (40), riċerka fuq embrijuni umani u fuq ċelloli staminali tal-embrijoni tal-bniedem kif ukoll riċerka fuq primati mhux umani għandhom jiġu awtomatikament sottomessi (41) għal analiżi tal-etika.

Il-Bord tal-Analiżi tal-Etika għandu jikkontrolla l-kwistjonijiet etiċi mqajma minn proposta u għandu jidentifika r-rekwiżiti etiċi li għandhom jiġu sodisfatti sabiex il-proposta tkun approvata mil-lat etiku. F’dan l-istadju, il-Bord tal-Analiżi tal-Etika jista’ jidentifika l-proposti li jqajmu kwistjonijiet etiċi serji li jistgħu jwasslu għall-esklużjoni tal-proġett mill-proċess tal-għotja.

Il-kompożizzjoni tal-Bordijiet tal-Eżami Sistematiku tal-Etika u tal-Analiżi tal-Etika

Il-Bordijiet tal-Etika għandhom ikunu magħmula minn esperti indipendenti minn firxa ta’ dixxiplini bħal-liġi, is-soċjoloġija, il-psikoloġija, il-filosofija u l-etika, il-mediċina, il-bijoloġija molekulari, il-kimika, il-fiżika, l-inġinerija u x-xjenzi veterinarji b’bilanċ raġonevoli ta’ membri li ġejjin minn ambitu xjentifiku u oħrajn li ġejjin minn ambitu mhux xjentifiku.

L-esperti bil-kwalifiki xierqa fl-etika għandhom jiġu selezzjonati u għandhom jinħatru mill-ERCEA minn fost dawk l-esperti li ġew identifikati u selezzjonati mill-Kummissjoni għall-FP7, jew minn fost dawk identifikati mill-Kunsill Xjentifiku. Il-bordijiet għandhom ikunu bbilanċjati mil-lat ġeografiku u dak tas-sessi u l-kompożizzjoni tagħhom għandha tiddependi wkoll min-natura tal-proposti li jkunu qed jiġu analizzati. Għall-finijiet tal-proċess tal-approvazzjoni tal-etika, għaldaqstant għall-esperti fl-etika għandhom jintużaw l-ittri ta’ ħatra mudell approvati mill-Kummissjoni fir-rigward tal-esperti indipendenti.

Ir-rappreżentanti tas-soċjetà ċivili jistgħu jiġu mistiedna għal-laqgħat tal-Bordijiet.

L-Analiżi tal-Etika

Ġeneralment, fl-ewwel fażi, l-esperti indipendenti għandhom janalizzaw il-proposti mill-bogħod. Imbagħad, fit-tieni fażi, il-proposti għandhom jiġu diskussi fil-Bord tal-Analiżi tal-Etika maħtur kif xieraq, sabiex tkun adottat deċiżjoni kunsenswali.

Il-Bord għandu jipproduċi rapport dwar l-Analiżi tal-Etika. Ir-rapport dwar l-Analiżi tal-Etika għandu jinkludi lista ta’ kwistjonijiet etiċi, rendikont tal-mod li bih il-kwistjoni ġew ġestiti mill-PI u mit-tim tiegħu kif ukoll ir-rekwiżiti u r-rakkomandazzjonijiet tal-Bord tal-Analiżi tal-Etika. Ir-rapport għandu jiġi ffirmat mill-esperti tal-Bord tal-Analiżi tal-Etika. F’każ li ma jkun jista’ jintlaħaq l-ebda kunsens, ir-rapport għandu jirrifletti l-opinjoni tal-maġġoranza tal-esperti tal-Bord tal-Analiżi tal-Etika.

Ir-rapporti dwar l-Eżami Sistematiku tal-Etika u dwar l-Analiżi tal-Etika

Il-PI u l-entità legali applikanti għandhom jiġu informati bl-eżitu tal-Proċedura tal-Analiżi tal-Etika permezz jew tar-rapport dwar l-Eżami Sistematiku tal-Etika jew tar-rapport dwar l-Analiżi tal-Etika mingħajr ma tiġi żvelata l-identità tal-esperti.

Fid-deċiżjoni biex ikun iffinanzjat proġett, għandhom jitqiesu r-riżultati tal-Proċedura tal-Analiżi tal-Etika. Dan jista’ jinvolvi bidliet fil-ftehim ta’ għotja u fl-annessi tiegħu, jew f’każijiet estremi, it-tmiem tal-preparazzjoni tal-ftehim ta’ għotja.

L-approvazzjonijiet nazzjonali u l-opinjonijiet tal-kumitat tal-etika kompetenti

L-ERCEA għandha taċċerta ruħha li l-applikanti jkunu rċevew approvazzjoni xierqa mingħand l-awtorità nazzjonali u/jew opinjonijiet favorevoli mingħand il-kumitat kompetenti tal-etika qabel ma jiġi ffirmat il-ftehim ta’ għotja. Fejn l-approvazzjoni tal-awtorità nazzjonali u/jew opinjoni favorevoli mingħand kumitat etiku lokali ma tinkisibx/jinkisbux qabel ma jibda l-ftehim ta’ għotja, il-ftehim ta’ għotja għandu jinkludi klawżola speċjali li teżiġi li l-awtorizzazzjoni jew l-opinjoni rilevanti għandha tinkiseb qabel ma tinbeda r-riċerka korrispondenti.

L-Azzjoni ta’ Segwitu għal u l-Verifika tal-Etika

Il-proposti li jgħaddu minn Eżami Sistematiku tal-Etika u/jew minn Analiżi tal-Etika jistgħu jiġu mmarkati mill-esperti bħala li jeħtieġu Azzjoni ta’ Segwitu għal/Verifika tal-Etika (EFA). EFA għandu jsir minn esperti speċjalizzati fi kwistjonijiet etiċi, mhux qabel id-data tal-ewwel perjodu ta’ rappurtar finanzjarju għall-proposta. L-għan tal-proċedura tal-EFA għandu jkun li tassisti lill-benefiċjarji tal-għotja sabiex jittrattaw il-kwistjonijiet etiċi li tqajmu b’ħidmiethom u jekk ikun meħtieġ jieħdu miżuri korrettivi.

F’każijiet estremi, il-proċess tal-EFA jista’ jirriżulta f’rakkomandazzjoni lill-ERCEA biex jinġieb fi tmiemu ftehim ta’ għotja. L-organizzazzjoni u l-implimentazzjoni tal-proċedura tal-EFA għandhom ikunu r-responsabbiltà tas-Settur tal-Analiżi tal-Etika tal-Kummissjoni (DĠ RTD).

Il-modalitajiet proċedurali speċifiċi għall-attivitajiet ta’ riċerka li jinvolvu ċ-ċelloli staminali tal-embrijoni tal-bniedem  (42)

Meta tevalwa u tisselezzjona l-proposti li jinvolvu l-użu taċ-ċelloli staminali tal-embrijoni tal-bniedem (hESC) u qabel ma tipprepara l-ftehimiet ta’ għotja relatati, l-ERCEA għandha tuża l-proċedura li ġejja:

Għandha tapplika l-proċedura ġenerali tal-analiżi xjentifika minn pari, kif ġiet deskritta fit-Taqsima 3 iktar ‘il fuq. Barra minn hekk, l-esperti indipendenti tal-analiżi xjentifika minn pari għandhom jivvalutaw jekk:

—	il-proġett iservix miri importanti ta’ riċerka sabiex ikun avvanzat l-għarfien xjentifiku fir-riċerka bażika fl-Ewropea jew sabiex jiżdied l-għarfien mediku għall-iżvilupp ta’ metodi dijanjostiċi, preventivi jew terapewtiċi li għandhom jiġu applikati fir-rigward tal-bnedmin;

—

l-użu tal-hESC huwa meħtieġ sabiex jintlaħqu l-għanijiet xjentifiċi stabbiliti fil-proposta. B’mod partikolari, l-applikanti jridu jiddokumentaw li l-alternattivi validati xierqa (b’mod partikolari, iċ-ċelluli staminali minn sorsi jew b’oriġini oħrajn) mhumiex adattati u/jew disponibbli sabiex jintlaħqu l-miri mistennija tal-proposta. Din id-dispożizzjoni tal-aħħar ma għandhiex tapplika għal riċerka li tipparaguna l-hESC ma ċelluli staminali tal-bniedem oħrajn.

Il-proċedura tal-Analiżi tal-Etika

Il-proposti ta’ riċerka rrakkomandati għal finanzjament li jinvolvu l-użu tal-hESC għandhom jiġu sottomessi lill-Kummissjoni (DĠ RTD) għall-Analiżi tal-Etika. Il-proċeduri applikabbli għall-Analiżi tal-Etika mill-Kummissjoni għal proposti taħt l-FP7 li jinvolvu l-użu tal-hESC għandhom jiġu deskritti fl-ittri ta’ ħatra mudell approvati mill-Kummissjoni.

L-approvazzjonijiet nazzjonali u l-opinjonijiet tal-kumitat tal-etika kompetenti

L-ERCEA għandha taċċerta ruħha li l-applikanti jkunu rċevew l-approvazzjoni xierqa mingħand l-awtoritajiet lokali jew nazzjonali qabel ma jiġi ffirmat il-ftehim ta’ għotja.

Fejn l-approvazzjoni tal-awtorità nazzjonali u/jew opinjoni favorevoli mingħand kumitat etiku lokali ma jistgħux jinkisbu qabel il-bidu previst tal-proġett, il-ftehim ta’ għotja jista’ jiġi konkluż bla ħsara għall-inklużjoni ta’ klawżola speċjali li teżiġi li l-awtorizzazzjoni jew l-opinjoni rilevanti għandha tinkiseb qabel ma jinbew l-attivitajiet ta’ riċerka korrispondenti.

Waqt il-preparazzjoni tal-ftehim ta’ għotja, għandhom jitqiesu r-riżultati tal-Analiżi tal-Etika. Dan jista’ jipprevedi bidliet fid-Deskrizzjoni tal-ħidma stabbilita fil-ftehim ta’ għotja, jew f’ċerti każijiet it-tmiem tal-preparazzjoni tal-ftehim ta’ għotja.

Għal proposti dwar l-hESC, wara li tkun twettqet l-Analiżi tal-Etika, u skont l-Artikolu 6.9 tad-Deċiżjoni tal-Kunsill 2006/972/KE (43), għall-approvazzjoni tal-finanzjament u għall-adozzjoni tal-azzjonijiet li jinvolvu l-użu tal-hESC għandha tapplika l-proċedura regolatorja stabbilita fl-Artikoli 5 u 7 tad-Deċiżjoni tal-Kunsill 1999/468/KE.

Barra minn hekk, l-ERCEA għandha tagħti inkoraġġiment sabiex il-PI jiżgura ruħu minn komunikazzjoni xierqa mar-reġistru Ewropew tal-hESC (http://www.hescreg.eu/), ħalli jkunu żgurati trasparenza fir-rigward tal-linji tal-hESC użati u tixrid wiesa’ tal-informazzjoni disponibbli dwar dawn il-linji.

5.3.   Anness C – Ir-regoli għar-rimbors tal-provvediment għall-ivvjaġġar, tal-provvediment ta’ kuljum u tal-provvediment għall-akkomodazzjoni għall-Investigaturi Prinċipali mistiedna għal intervista (44)

5.4.   Anness D – Il-Ġestjoni tas-Sigurtà – Azzjonijiet sensittivi tal-KER

(A)   Introduzzjoni

Għal riċerka relatata mas-sigurtà, minħabba n-natura sensittiva tas-suġġetti indirizzati u n-nuqqasijiet partikolari fil-kapaċità li jeħtieġ li jiġu indirizzati sabiex ikunu protetti ċ-ċittadini tal-Ewropa, għandhom japplikaw proċeduri speċjali. L-azzjonijiet tal-KER għandhom jiġu kklassifikati (46) jekk jiġi kkunsidrat li huma sensittivi.

Dawn il-proċeduri huma deskritti iktar ‘l isfel. Huma għandhom japplikaw għall-azzjonijiet tal-KER kif inhu xieraq meta jiġu indirizzati suġġetti sensittivi mil-lat tas-sigurtà.

(B)   L-identifikazzjoni ta’ Azzjonijiet tal-KER potenzjalment ikklassifikati

Azzjoni tal-KER sensittiva mil-lat tas-sigurtà hija azzjoni li jista’ jkun hemm il-ħtieġa li tiġġestixxi informazzjoni klassifikata.

Marka ta’ “kunsiderazzjonijiet ta’ sigurtà” għandha tkun assoċjata mal-proposta:

—	meta l-applikant jiddikjara li proposta tkun sensittiva;

—	jekk l-evalwaturi esperti jew l-ERCEA jiskopru jew jissusspettaw kwalunkwe waħda mill-kundizzjonijiet li ġejjin: — Informazzjoni kklassifikata tintuża jew tista’ tintuża bħala informazzjoni tal-isfond, — Qed jiġi ppjanat li wħud mill-informazzjoni tal-ewwel pjan tiġi kklassifikata.

Kull meta ma’ proposta tkun assoċjata marka ta’ “kunsiderazzjonijiet tas-sigurtà”, iċ-ċirkustanzi tal-ħidma ppjanata għandhom ikunu skrutinati ulterjorment skont il-proċedura deskritta fit-Taqsima C iktar ‘l isfel.

Il-proposti, jekk dan jintalab fil-Gwida għall-Applikanti rilevanti, iridu jidentifikaw – jekk dan ikun meħtieġ – l-isfond mitlub biex titwettaq l-azzjoni tal-KER u l-informazzjoni kklassifikata tal-ewwel pjan li għandha tiġi prodotta bl-azzjoni. Fil-każ ta’ proposta li tinvolvi informazzjoni kklassifikata (tal-isfond u/jew tal-ewwel pjan), “Ittra dwar l-Aspetti ta’ Sigurtà” (SAL) (47) u l-“Gwida għall-Klassifiakzzjoni ta’ Sigurtà” (SCG) (48) annessa tagħha jridu jkunu parti mill-proposta.

L-SCG għandha tkopri:

—	Il-livell tal-klassifikazzjoni tal-informazzjoni tal-isfond u dik tal-ewwel pjan;

—	Liema parteċipant għandu jkollu aċċess għal liema informazzjoni;

Barra minn hekk, għandhom jintalbu d-dokumenti li ġejjin:

—	Kopja tal-“Faċilità ta’ Approvazzjoni ta’ Sigurtà” (FSC) (jew it-talbiet għall-FSC). Il-validità tal-FSC għandha tiġi kkontrollata mid-Direttorat għas-Sigurtà tal-Kummissjoni permezz tal-mezz formali xieraq mal-“Awtoritajiet Nazzjonali tas-Sigurtà” (NSA) involuti;

—	L-awtorizzazzjoni formali bil-miktub mill-awtoritajiet rilevanti tas-sigurtà sabiex tintuża l-informazzjoni tal-isfond ikklassifikata.

Is-SAL u l-SCG, akkumpanjati mid-dokumenti ta’ sostenn, għandhom jiġu eżaminati wkoll fil-proċedura ta’ skrutinju deskritta iktar ‘l isfel.

(C)   L-iskrutinju ta’ Azzjonijiet tal-KER potenzjalment ikklassifikati

Wara l-evalwazzjoni xjentifika tal-proposti, dawn għandhom jingħataw pożizzjoni fil-klassifika skont ir-riżultati tal-evalwazzjoni. “Lista ta’ proposti miżmuma” li tinkludi l-proposti rrakkomandati għal finanzjament possibbli, jiġifieri li ma ġewx miċħuda, u li għalihom huwa disponibbli l-finanzjament, kif ukoll “lista/i ta’ proposti ta’ riżerva” għandhom jiġu stabbiliti mill-ERCEA.

Kwalunkwe azzjoni tal-KER fil-lista ta’ proposti miżmuma u fil-lista/i ta’ proposti ta’ riżerva, li jkollha l-marka ta’ “kunsiderazzjonijiet tas-sigurtà” għandha tgħaddi minn proċedura ta’ skrutinju. Din għandha titwettaq minn sottokumitat ad hoc: il-“Kumitat tal-Iskrutinju tas-Sigurtà”.

Dan il-“Kumitat tal-Iskrutinju tas-Sigurtà” għandu jkun magħmul mir-rappreżentanti tal-Istati Membri nnominati f’kollaborazzjoni mill-qrib mal-awtoritajiet nazzjonali tas-sigurtà kompetenti, appoġġjati, jekk ikun xieraq, mir-rappreżentanti tal-Kumitat/i tal-Programmi rilevanti, f’konfigurazzjoni li tirrappreżenta lill-pajjiżi tal-applikanti tal-proposti. Dan il-Kumitat għandu jkun ippresjedut minn rappreżentant tal-Kummissjoni.

Dan il-Kumitat għandu jivverifika jekk l-aspetti kollha tas-sigurtà humiex qed jitqiesu kif xieraq mill-applikanti. Il-proposti għandhom jiġu skrutinati minn membri tal-Kumitat mill-istess pajjiżi bħall-applikanti tal-proposti.

Dan il-proċess għandu jilħaq pożizzjoni komuni bejn ir-rappreżentanti nazzjonali kkonċernati li tirriżulta f’waħda mir-rakkomandazzjonijiet li ġejjin:

—	Il-klassifikazzjoni mhijiex meħtieġa: Il-proċeduri għall-preparazzjoni tal-ftehimiet ta’ għotja tal-KER jistgħu jinbdew (għalkemm jistgħu jinħarġu xi rakkomandazzjonijiet għall-preparazzjoni, jekk dan ikun rilevanti);

—

Il-klassifikazzjoni hija meħtieġa: rakkomandazzjonijiet speċifiċi għall-preparazzjoni tal-ftehim ta’ għotja tal-KER għandhom jingħataw fil-forma ta’ kundizzjonijiet li għandhom jiġu sodisfatti fil-ftehim ta’ għotja. L-azzjoni tal-KER għandha ssir Azzjoni Kklassifikata (49) u għandha tkun ikklassifikata mill-UE fuq il-livell tal-ogħla klassifikazzjoni tal-informazzjoni użata/prodotta mill-azzjoni tal-KER kif ġie indikat fis-SAL u fl-SCG annessa tagħha.

—

Il-proposta hija wisq sensittiva biex tiġi ffinanzjata għaliex l-applikanti ma għandhomx l-esperjenza, il-ħiliet jew il-permessi xierqa sabiex jiġġestixxu b’mod xieraq l-informazzjoni kklassifikata. F’dak il-każ, il-proposta tista’ tiġi miċħuda. Jekk dan isir, l-ERCEA għandha tispjega r-raġunijiet għaċ-ċaħda, ħlief fejn dawn ir-raġunijiet ikunu huma stess ikklassifikati.

Fuq il-bażi ta’ din il-pożizzjoni komuni, għandu jiġi ddeterminat il-livell tal-klassifikazzjoni. Għaldaqstant, l-ERCEA, flimien mal-NSA kollha rilevanti, imbagħad għandha tivverifika, waqt il-preparazzjoni u l-implimentazzjoni tal-ftehim ta’ għotja, li huma stabbiliti l-proċeduri u l-azzjonijiet meħtieġa kollha sabiex ikun iggarantit li l-informazzjoni kklassifikata tiġi ttrattata b’mod xieraq.

(D)   Il-Liċenzji tal-Esportazzjoni u tat-Trasferiment

Barra minn hekk, proposta tista’ tiġi kkunsidrata wkoll bħala sensittiva, indipendentement minn kwalunkwe klassifikazzjoni mil-lat tas-sigurtà, jekk qed tippjana li tiskambja materjal suġġett għal liċenzji tat-trasferiment jew tal-esportazzjoni.

F’dak il-kuntest, l-applikanti jridu jkunu konformi mal-liġijiet nazzjonali u mar-regolamentazzjoni tal-UE (50). Jekk biex tiwettaq l-ħidma ppjanata huma mitluba liċenzji tal-esportazzjoni (jew liċenzji intra-UE), l-applikanti jridu jiċċaraw ir-rekwiżit biex ikollhom liċenzji tal-esportazzjoni jew tat-trasferiment ta’ din ix-xorta u jridu jipprovdu kopja tal-liċenzji tal-esportazzjoni jew tat-trasferiment (jew tat-talbiet).

(E)   Il-kooperazzjoni internazzjonali

It-tħassib dwar is-sigurtà ma jistax jiġi invokat bħala raġuni biex jiġu miċħuda proposti għal azzjonijiet tal-KER mhux ikklassifikati li jinvolvu l-parteċipazzjoni ta’ entitajiet minn pajjiż terza (51). L-uniċi eċċezzjonijiet għal dan għandhom iseħħu jekk:

—	Is-suġġett ġie deskritt fil-programm ta’ ħidma bħala li mhuwiex miftuħ għall-kooperazzjoni internazzjonali: f’dak il-każ kwalunkwe proposta li tinkludi l-kooperazzjoni internazzjonali għandha tiġi ddikjarata ineliġibbli;

—	Ġiet introdotta l-marka ta’ “kunsiderazzjonijiet tas-sigurtà”, f’liema każ il-proposta għandha tiġi skrutinata skont il-proċedura deskritta iktar ‘il fuq.

---

(1)   ĠU L 57, 24.2.2007, p. 14.

(2)   ĠU L 400, 30.12.2006, p. 243.

(3)   ĠU L 9, 12.1.2008, p. 15.

(4)   ĠU L 412, 30.12.2006, p. 1.

(5)   ĠU L 391, 30.12.2006, p. 1.

(6)   ĠU L 248, 16.9.2002, p. 1.

(7)  Bl-eċċezzjoni possibbli tal-azzjonijiet ta’ koordinazzjoni u ta’ appoġġ imsemmija fl-Artikolu 14 tar-Regoli għall-Parteċipazzjoni.

(8)  http://cordis.europa.eu/home_en.html; http://ec.europa.eu/reserach/participants/portal; http://erc.europa.eu

(9)  B’mod eċċezzjonali, il-PI jista’ jagħmilha huwa stess tal-entità legali applikanta.

(10)  L-operatur tas-sottomissjoni elettronika jista’ jikkuntattja lill-proponent sabiex jiċċara jew isolvi problemi tekniċi relatati mas-sottomissjoni.

(11)  Il-kompletezza tal-informazzjoni inkluża fil-proposta għandha tiġi evalwata mill-esperti indipendenti. Il-kontrolli tal-eliġibbiltà jikkonċernaw biss il-preżenza tal-partijiet u tal-formoli xierqa tal-proposta u l-validità tad-dokumenti supplimentari mitluba.

(12)  Il-proposti, normalment, għandhom jiġu evalwati skont il-kriterji għall-iskema ta’ finanzjament li għaliha jiġu sottomessi. Madankollu, pereżempju f’każijiet fejn l-iskema ta’ finanzjament intgħażlet b’mod żbaljat, l-ERCEA tista’ tiddeċiedi li tevalwa proposta skont il-kriterji ta’ skema ta’ finanzjament differenti. Dan jista’ jsir biss jekk jidher ċar li l-proposta ma tikkorrispondix, jew ftit tikkorrispondi, għall-iskema ta’ finanzjament li ntgħażlet oriġinarjament, u fis-sejħa inkwistjoni tkun miftuħa skema ta’ finanzjament iktar adattata.

(13)  Dan il-kumitat għandu jkun magħmul mill-persunal tal-ERCEA u, fejn ikun meħtieġ, minn persunal ieħor tal-Kummissjoni li jkollu l-kompetenza mitluba fi kwistjonijiet legali u/jew f’sistemi ta’ informazzjoni. Huwa għandu jeżamina l-proposta u ċ-ċirkustanzi tas-sottomissjoni tagħha u għandu jipprovdi pariri speċjalistiċi sabiex tkun sostnuta d-deċiżjoni jekk il-proposta għandhiex tiġi miċħuda jew le minħabba raġunijiet ta’ eliġibbiltà. Il-kumitat jista’ jiddeċiedi li jikkuntattja lill-PI u lill-entità legali applikanta sabiex jiċċara kwistjoni partikolari.

(14)  Il-persunal mill-aġenziji speċjalizzati rilevanti tal-UE għandhom jiġu kkunsidrati bħala esperti esterni.

(15)  L-Artikolu 17(2) tar-Regoli għall-Parteċipazzjoni.

(16)  Is-selezzjoni mill-Kunsill Xjentifiku tista’ ma tkunx rekwiżit obbligatorju għall-ħatra ta’ analizzaturi pari tal-azzjonijiet ta’ koordinazzjoni u ta’ appoġġ.

(17)  Skont ir-Regoli għall-Parteċipazzjoni u/jew Deċiżjoni tal-Kummissjoni C(2008) 5694 tat-8 ta’ Ottubru 2008 d-delegazzjoni tas-setgħat lill-ERCEA.

(18)  L-Unjoni Ewropea tipprova ssegwi politika ta’ bilanċ bejn is-sessi u ta’ opportunitajiet indaqs fil-qasam tar-riċerka. Għal dak il-għan, id-Deċiżjoni tal-Kummissjoni 2000/407/KEE tad-19 ta’ Ġunju 2000 “dwar il-bilanċ bejn is-sessi fil-kumitati u l-gruppi tal-esperti stabbiliti minnha”. Fl-istess kuntest, l-Artikolu 17(2) tar-Regoli għall-Parteċipazzjon jipprovdi li “għandhom jittieħdu miżuri xierqa sabiex jiġi żgurat bilanċ raġonevoli bejn is-sessi meta jinħatru gruppi ta’ esperti indipendenti”.

(19)  Il-Gwida għall-Applikanti rilevanti tista’ tippermetti sa mhux iktar minn tliet persuni li jistgħu jiġu indikati mill-applikant.

(20)  Ir-raġunijiet jridu jkunu bbażati fuq motivi ċar bħal rivalità xjentifika diretta, ostilità professjonali jew sitwazzjoni simili li timpedixxi jew tqiegħed f’dubju l-oġġettività tal-evalwatur potenzjali.

(21)   ĠU L 357, 31.12.2002, p. 1.

(22)  L-Artikolu 15 tar-Regoli għall-Parteċipazzjoni.

(23)  Il-proposti normalment għandhom jiġu evalwati skont il-kriterji għall-iskema ta’ finanzjament li għaliha ġew sottomessi. Madankollu, pereżempju, f’każijiet fejn l-iskema ta’ finanzjament intgħażlet b’mod żbaljat, l-ERCEA tista’ tiddeċiedi li tevalwa proposta skont il-kriterji ta’ skema ta’ finanzjament differenti. Dan jista’ jsir biss jekk jidher ċar li l-proposta ma tikkorrispondix, jew ftit tikkorrispondi, għall-iskema ta’ finanzjament li ntgħażlet oriġinarjament, u fis-sejħa inkwistjoni tkun miftuħa skema ta’ finanzjament iktar adattata.

(24)  Skont l-Artikolu 16.1 tar-Regoli għall-Parteċipazzjoni.

(25)  Dan jista’ jinkludi l-membri tal-Bordijiet għajr il-Bord/ijiet li lilu/hom tiġi assenjata l-proposta jew l-arbitri.

(26)  Dan jinkludi proposti interdixxiplinari minn bordijiet differenti jew minn sferi differenti li jistgħu jiġu assenjati ħalli jiġu analizzati mill-membri ta’ iktar minn Bord wieħed jew minn arbitri addizzjonali.

(27)  L-Artikolu 15(2) tar-Regoli għall-Parteċipazzjoni.

(28)   “Irregolarità” fis-sens tar-Regolament tal-Kunsill (KE, Euratom) Nru 2988/95. (ĠU L 312, 23.12.1995, p. 1).

(29)  Il-proċedura ta’ rimedju ma għandhiex tissostitwi l-mezzi normali li japplikaw għall-azzjonijiet kollha tal-ERCEA u tal-Kummissjoni, bħal: is-Segretarjat Ġenerali tal-Kummissjoni għal ksur tal-kodiċi ta’ amministrazzjoni tajba (relazzjonijiet mal-pubbliku); l-Ombudsman Ewropew għal “amministrazzjoni ħażina”; il-Qorti tal-Ġustizzja tal-Unjoni Ewropea għal deċiżjoni li taffetwa persuna jew entità legali.

(30)  Fuq il-bażi tal-lista finali ppreparata mill-ERCEA skont it-Taqsima 3.1.7.

(31)  Din tista’ tinkludi l-ismijiet tal-PI u tal-entitajiet legali applikanti, it-titolu tal-proposta u l-akronomu.

(32)  Il-kuntratturi u/jew il-benefiċjarji tal-Azzjonijiet ta’ Koordinazzjoni u ta’ Appoġġ.

(33)  Il-PI u/jew l-istituzzjonijiet ospitanti.

(34)  Inkluż, fejn ikun xieraq, l-ikkompletar tal-proċedura għall-konsultazzjoni tal-kumitat tal-programm ipprovduta fil-Programm Speċifiku Ideat.

(35)  Skont l-Artikolu 16(4) tar-Regoli għall-Parteċipazzjoni, u r-regoli tal-Kummissjoni dwar il-verifika tal-eżistenza u tal-istatus ġuridiku tal-parteċipanti, kif ukoll tal-kapaċitajiet operattivi u finanzjarji tagħhom f’azzjonijiet indiretti appoġġjati permezz tal-forma ta’ għotja taħt l-FP7, C(2007) 2466.

(36)  Il-kundizzjonijiet addizzjonali jistgħu jirreferu għar-rekwiżiti tal-evalwazzjoni tal-etika.

(37)  L-Artikolu 114 tar-Regolament Finanzjarju.

(38)  Jew kwalunkwe kuntrattur li tħallas sabiex jipprovdi servizzi amministrattivi għal sessjonijiet ta’ evalwazzjoni.

(39)  L-oqsma li ġejjin jaqgħu taħt ir-responsabbiltà tad-DĠ RTD: iċ-ċelluli staminali embrijoniċi tal-bniedem, il-primati mhux umani, l-intervent uman u l-proposti li jaqgħu f’dawn il-kategoriji għandhom jiġu awtomatikament sottomessi lid-DĠ RTD għal Analiżi tal-Etika.

(40)  Bħall-provi kliniċi u r-riċerka li tinvolvi tekniki invażivi fuq persuni ħajjin (eż. it-teħid ta’ kampjuni ta’ tessuti).

(41)  Il-proposti li jaqgħu f’dawn il-kategoriji għandhom jiġu awtomatikament sottomessi lid-DĠ RTD għal Analiżi tal-Etika.

(42)  Filwaqt li titqies id-dikjarazzjoni tal-Kummissjoni tal-24 ta’ Lulju 2006 (ĠU L 412, 30.12.2006, p. 42).

(43)   ĠU L 400, 30.12.2006, p. 243.

(44)  L-ERCEA tista’ tistabbilixxi sistema ta’ sottomissjoni elettronika li għandha tkun applikabbli għall-formoli u għall-oriġinali fuq il-karta li għandhom jiġu sottomessi fil-qafas ta’ dawn ir-regoli għar-rimborsi.

(45)  Bħala regola ġenerali, il-persuni intervistati ma jistgħux jintalbu: jitilqu mill-punt tal-oriġini tagħhom jew mill-post fejn qed issir l-intervista qabel is-07.00 (stazzjon jew mezz ieħor ta’ trasport) jew it-08.00 (ajurport); jaslu fil-post fejn qed issir l-intervista wara d-21.00 (ajruport) jew l-22.00 (stazzjon jew mezz ieħor ta’ trasport); jaslu fil-punt tal-oriġini tagħhom wara l-23.00 (ajruport, stazzjon jew mezz ieħor ta’ trasport).

(46)  Kif ġie ddefinit fid-Deċiżjoni tal-Kummissjoni 2001/844/KEE, KEFA, Euratom tat-23 ta’ Novembru 2001 li temenda r-Regoli Interni tal-Proċedura (ĠU L 317, 3.12.2001, p. 1) rigward id-dispożizzjonijiet tas-sigurtà u l-emendi suċċessivi tagħha.

(47)  Ittra dwar l-Aspetti ta’ Sigurtà (SAL): “ sett ta’ kondizzjonijiet kuntrattwali speċjali, maħruġ mill-awtorità kuntrattwali, li jifforma parti integrali minn kuntratt klassifikat li jinvolvi l-aċċess għal jew il-produzzjoni ta’ informazzjoni klassifikata tal-UE, li jidentifika l-ħtiġiet ta’ sigurtà jew dawk l-elementi tal-kuntratt li jeħtieġu protezzjoni ta’ sigurtà ”, kif ġiet iddefinita fit-Taqsima 27 tad-Deċiżjoni 2001/844/KE, KEFA, Euratom.

(48)  Kif ġiet iddefinita fid-Deċiżjoni 2001/844/KE, KEFA, Euratom.

(49)  It-trattament tad-dejta kunfidenzjali għandu jiġi rregolat mil-leġiżlazzjoni Komunitarja rilevanti kollha, inklużi r-regoli interni tal-Istituzzjonijiet bħad-Deċiżjoni 2001/844/KE, kefa, Euratom li temenda r-Regoli Interni tal-Proċedura rigward id-dispożizzjonijiet tas-sigurtà.

(50)  Regolament tal-Kunsill (KE) Nru 428/2009 tal-5 ta’ Mejju 2009 li jistabbilixxi reġim Komunitarju għall-kontroll tal-esportazzjonijiet, it-trasferiment, is-senserija u t-transitu ta’ oġġetti b’użu doppju – (ĠU L 134, 29.5.2009, p. 1).

(51)   “Pajjiż terz” għandha tfisser kwalunkwe pajjiż li la huwa Stat Membru tal-UE u lanqas pajjiż assoċjat mal-FP7.